བླ་མའི་རྣལ་འབྱོར་བྱིན་རླབས་འདོད་དགུའི་དཔལ་སྟེར།
བླ་མའི་རྣལ་འབྱོར་བྱིན་རླབས་འདོད་དགུའི་དཔལ་སྟེར་ཞེས་བྱ་བ་བཞུགས་སོ།
ན་མོ་གུ་རུ་ཡེ། གང་ཞིག་དངོས་གྲུབ་མཆོག་འདོད་པས། །བཅོས་མིན་དད་དང་མོས་གུས་ཀྱིས། །ཨོཾ། རིག་སྟོང་དབྱེར་མེད་བླ་མ་ལ། །ཐ་དད་བྲལ་བར་སྐྱབས་སུ་མཆི། །འཁོར་འདས་མཉམ་ཉིད་རྫོགས་པའི་ཀློང་། །ངང་བཞག་གཉུག་མའི་ཡེ་སེམས་བསྐྱེད། །ཅེས་པས་སྐྱབས་འགྲོ་སེམས་བསྐྱེད་ནས། །ཨཱ༔ ཆོས་ཉིད་མངོན་སུམ་ནམ་མཁའ་ལ། །ཉམས་སྣང་གོང་འཕེལ་
འཇའ་ཟེར་ཀློང་། །ཚད་ཕེབས་རྡོ་རྗེའི་བླ་མ་ནི། །ཆོས་ཟད་གདོད་མའི་སངས་རྒྱས་དངོས། །འཇམ་དཔལ་གྲུབ་པའི་ནོར་བུའི་ཞབས། །གྲུབ་པ་མཆོག་གི་བརྟུལ་ཞུགས་འཆང་། །དཀར་གསལ་ཞལ་གཅིག་འཛུམ་མཛེས་སྒེག །ཕྱག་གཉིས་རལ་གྲི་བནྡྷ་བསྣམས། །པད་ཉིར་རོལ་པའི་སྟབས་ཀྱིས་བཞུགས། །ཐོད་སྐམ་རྩེ་བྲན་རུས་པའི་རྒྱན། །དཔའ་བོ་སྟག་
གི་ཤམ་ཐབས་གསོལ། །སྤྱི་བོར་རྣམ་དག་འོད་ལྔའི་ཀློང་། །རིགས་བདག་ཨ་ཙཱརྱ་ཡ་མ། །ཐེག་གསུམ་ཆས་རྫོགས་རང་འོད་ཡུམ། །འཁྲིལ་སྦྱོར་རྗེས་ཆགས་ཉམས་བརྒྱ་འབར། །སྣང་སྲིད་ཟིལ་གནོན་ཆེན་པོར་བཞུགས། །གསང་གསུམ་རྡོ་རྗེ་སྙིང་པོ་ལས། །འོད་འཕྲོས་ཡེ་ཤེས་འཁོར་ལོ་བསྐུལ། །དམ་ཚིག་ཕྱག་རྒྱར་དབྱེར་མེད་བསྟིམ། །མ་འདྲེས་ཡོངས་སུ་རྫོགས་པར་གྱུར། །དེ་ལྟར་སྣང་སྟོང་སྒྱུ་མའི་སྐུར། །གསལ་བཏབ་ཡན་ལག་བདུན་པ་ནི། མ་བཙལ་རྫོགས་ལྡན་བླ་མ་ལ། །རང་གྲོལ་ལྟ་བའི་ཕྱག་འཚལ་ལོ། །ཚོགས་དྲུག་འཛིན་དག་མཆོད་པ་འབུལ། །མ་རིག་སྦུབས་སུ་ཆུད་པ་བཤགས། །འཁོར་འདས་མཉམ་བརྡལ་རྗེས་ཡི་རང་། །བྱ་རྩོལ་བྲལ་བའི་ཆོས་འཁོར་བསྐོར། །གཞོན་ནུ་བུམ་སྐུར་བཞུགས་གསོལ་འདེབས། །དགེ་ཚོགས་ཀ་དག་དབྱིངས་སུ་བསྔོ། །དེ་
ནས་གསོལ་འདེབས་རྒྱུད་བསྐུལ་བ། མོས་གུས་མཆི་མ་འཁྲུགས་པའི་ངང་། རིག་སྟོང་འཇམ་དཔལ་ཁྲོས་པ་གཤིན་རྗེའི་གཤེད། །དབྱེར་མེད་སྐུ་ཡི་མཆོག་སྟེ་གསུང་དབང་ཕྱུག །དཔལ་ལྡན་ཀུན་བཟང་བླ་མར་གསོལ་བ་འདེབས། །དོན་བརྒྱུད་དགོངས་པ་འཕོ་བར་བྱིན་གྱིས་རློབས། །ཞེས་པ་ཕུར་ཚུགས་གསོལ་བ་བཏབ། །དངོས་གྲུབ་བསྐུལ་ཕྱིར་མཚན་སྔགས་ནི། །ཨོཾཨཱཿགུ་རུ་མཉྫུ་ཤྲཱི་མ་ཎི་སིདྡྷི་ཧཱུྃ་ཧཱུྃ། ཞེས་པ་བརྒྱ་སྟོང་ཁྲི་འབུམ་སོགས། །ཟླས་མཐར་དབང་བླངས་དམིགས་གནད་བཅས། ཧཱུྃཿ། བླ་མ་རྗེ་བཙུན་ཧེ་རུ་ཀའི། །ཡི་གེ་གསུམ་ལས་འོད་ཟེར་འཕྲོས། །རང་གི་སྒོ་གསུམ་ལ་ཐིམ་པས། །རྡོ་རྗེ་གསུམ་གྱི་དབང་བྱིན་ཐོབ། །བླ་མ་འོད་ཞུ་སྙིང་དབུས་ཐིམ། །བློ་འདས་ཆོས་སྐུར་ལ་བཟླའོ། །དེ་ལྟར་མཉམ་པར་བཞག་པའི་རྗེས། །སྣང་སྲིད་བླ་མའི་རོལ་པར་བལྟ། །བསྔོ་སྨོན་ཤིས་བརྗོད་སྤྱི་ལྟར་བྱ། །
ཁམས་དུབ་མོས་གུས་དད་པས་གསོ། །ཞེས་པའང་མཚན་དགོན་བྱང་འདྲེན་པ་ཆེ་མཆོག་གིས་གསུང་བསྐུལ་ངོར། རྒྱལ་ཁམས་ཀྱི་ཀུ་སཱ་ལི་སྨྱོན་པ་སངས་རྒྱས་རྡོ་རྗེས་བྲིས་པ་དགེ།