འོད་གསལ་སྙིང་གི་ཐིག་ལེ་ལས། དབང་དྲག་རྡོ་རྗེ་གྲོ་ལོད་མཐིང་ནག་རྡོ་རྗེ་ཁྲོ་ཕུར་གྱི་ཕྲིན་བཀླགས་ཆོག་ཏུ་བཀོད་པ་བདུད་དཔུང་ཚར་གཅོད།
འོད་གསལ་སྙིང་གི་ཐིག་ལེ་ལས། དབང་དྲག་རྡོ་རྗེ་གྲོ་ལོད་མཐིང་ནག་རྡོ་རྗེ་ཁྲོ་ཕུར་གྱི་ཕྲིན་བཀླགས་ཆོག་ཏུ་བཀོད་པ་བདུད་དཔུང་ཚར་གཅོད་ཅེས་བྱ་བ་བཞུགས་སོ། །
བླ་མ་དང་དབང་དྲག་རྡོ་རྗེ་གྲོ་ལོད་ལ་ཕྱག་འཚལ་ལོ། མཉམ་ཉིད་ཆོས་སྐུའི་ཀློང་ནས་སྙིང་རྗེའི་གར། །གདུལ་དཀའ་དམ་འགོང་གཤེད་དུ་རབ་ཁྲོས་པ། །ཆེ་མཆོག་རྡོ་རྗེ་གྲོ་ལོད་ལ་བཏུད་དེ། །ཕྲིན་ལས་བདུད་དཔུང་ཚར་གཅོད་བསྡེབ་ལ་སྤྲོ། །དེང་སང་སྙིགས་མ་ལས་ཀྱང་ཆེས་སྙིགས་མའི་དུས་སུ་མི་ཐུབ་པ་ལྔ་བདོ་ཞིང་སྡོམ་པ་དམ་ཚིག་ཉམས་པའི་དབང་གིས། ནག་ཕྱོགས་བདུད་རིགས་དམ་སྲི་རྣམས་ཁ་དར་ནས་ཆོས་བྱེད་ཕོ་མོ་
རྣམས་ཀྱི་ཚེ་དང་ཆོས་ལ་བར་ཆད་ཤིན་ཏུ་སྡང་བའི་སྐབས་འདིར། གཅིག་ཆོག་གི་གཉེན་པོ་སྟོབས་ཀྱི་ལྷ་མཆོག་འཆོལ་བའི་ཁྲོ་རྒྱལ་གྲོ་ལོད་མཐིང་ནག་རྡོ་རྗེ་ཁྲོ་ཕུར་གྱི་ཕྲིན་ལས་ཟབ་འདྲིལ་ལ་འཇུག་པར་འདོད་པས། སྦྱོར་བ་གནས་ཁང་གི་ཕུགས་ལོགས་སུ་སྐུ་གསུང་ཐུགས་ཀྱི་རྟེན་གང་འཛོམ་བཀྲམ་པའི་མདུན་དུ་སྟེགས་གཙང་མར་པད་སྣོད་དུ་ཟན་ལ་གདན་འཁོར་ལོ་རྩིབས་བཞི་ཉི་ཟླའི་སྟེང་དུ་དཔལ་གཏོར་བརྗིད་ལྡན་པད་འདབ་བཞི་པའི་མཐར་ཐེབས་
ཀྱུ་གང་མང་གིས་བསྐོར་བ་རྒྱན་སྤྲོས་ཅན། སྐུ་ཙག་དང་དར་གདུགས་མཐིང་ནག་ཕུབ་པའི་གཡས་གཡོན་དུ་སྨན་རཀ། མདུན་དུ་ཞི་དྲག་གི་ཉེར་སྤྱོད་སོགས་དགོས་པའི་ཡོ་བྱད་རྣམས་ཚོགས་པར་བྱས་ནས། ཆོ་ག་དངོས་ལ། སྔོན་འགྲོ་དངོས་གཞི། རྗེས་ཀྱི་རིམ་པའོ། །དང་པོ་སྔོན་འགྲོའི་ཐོག་མར། བརྒྱུད་པའི་གསོལ་འདེབས་ནི། ཆོས་སྐུ་འོད་མཚན་སྟོང་འབར་རིགས་ཀྱི་བདག །ལོངས་སྤྱོད་ཡོངས་རྫོགས་ཐུགས་རྗེ་སྤྱན་རས་གཟིགས། །སྤྲུལ་སྐུ་པདྨ་རྒྱལ་ལ་གསོལ་བ་འདེབས། །བདུད་དཔུང་མ་ལུས་འཇོམས་པར་བྱིན་གྱིས་རློབས། །འཇམ་དབྱངས་མངའ་བདག་ཚངས་པ་ལྷའི་མེ་ཏོགྋ །གསང་བའི་བདག་མོ་བདེ་ཆེན་མཚོ་རྒྱལ་མ། །འདྲེན་མཆོག་པདྨ་ལས་འབྲེལ་ལ་གསོལ་བ་འདེབས། །བདུད་དཔུང་མ་ལུས་འཇོམས་པར་བྱིན་གྱིས་རློབས། །ཟབ་གསང་གདམས་པའི་བཀའ་བབས་བུདྡྷའི་
མཚན། །ལས་སྨོན་སྐལ་ལྡན་ལུང་ཟིན་ཆོས་ཀྱི་བདག །རིག་འཛིན་རྩ་བརྒྱུད་བླ་མར་གསོལ་བ་འདེབས། །བདུད་དཔུང་མ་ལུས་འཇོམས་པར་བྱིན་གྱིས་རློབས། །ཡི་དམ་དཀྱིལ་འཁོར་གཙོ་མཆོག་གྲོ་བོ་ལོད། །དབང་ཆེན་རྟ་མགྲིན་རིགས་ལྔའི་ཐོད་ཕྲེང་རྩལ། །ལས་མཛད་གིང་ཆེན་སྡེ་བཞི་ལ་གསོལ་བ་འདེབས། །བདུད་དཔུང་མ་ལུས་འཇོམས་པར་བྱིན་གྱིས་རློབས། །དཔའ་བོ་མཁའ་འགྲོ་སྒོ་སྐྱོང་རྒྱལ་ཆེན་བཞི། །ཡེ་ཤེས་ལས་གྲུབ་དམ་ཅན་གཏེར་སྲུང་སོགས། །དཀྱིལ་འཁོར་ལྷ་ཚོགས་རྣམས་ལ་གསོལ་བ་འདེབས། །བདུད་དཔུང་མ་ལུས་འཇོམས་པར་བྱིན་གྱིས་རློབས། །རྩ་གསུམ་ཀུན་འདུས་དབང་དྲག་ཞི་ཁྲོའི་ལྷར། །རྩེ་གཅིག་གདུང་བ་དྲག་པོས་གསོལ་བཏབ་མཐུས། །སྨིན་གྲོལ་བསྙེན་
སྒྲབ་ཕྲིན་ལས་མཐར་ཕྱིན་ནས། །ཟུང་འཇུག་པདྨ་ཧེ་རུ་ཀ་འགྲུབ་ཤོག །སྐྱབས་སུ་འགྲོ་བ་ནི། རང་གི་སྙིང་གའི་ཧཱྃ་ལས་འོད་ཟེར་འཕྲོས་པས་བླ་མ་རིག་འཛིན་དབང་དྲག་རྡོ་རྗེ་གྲོ་ལོད་ཀྱི་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛ༔ ས་སད་པར་མོས་ལ། ཧཱྃ་ཧྲཱི༔ ཆོས་སྐུའི་སྟོན་པ་སངས་རྒྱས་འོད་དཔག་མེད༔ ལྔ་ལྡན་ལོངས་སྐུའི་ཁྱབ་བདག་སྤྱན་རས་གཟིགས༔ ཐུགས་རྗེ་སྤྲུལ་སྐུའི་མངའ་བདག་པདྨ་འབྱུང་༔ སྐུ་གསུམ་རིག་འཛིན་བླ་མ་གྲོ་བོ་ལོདཿ༔ དཀྱིལ་འཁོར་ལྷ་ཚོགས་རྣམས་ལ་སྐྱབས་སུ་མཆི༔ བར་ཆད་བདུད་སྡེའི་གཡུལ་ལས་བསྐྱབ་ཏུ་གསོལ༔ ལན་གསུམ། སེམས་བསྐྱེད་པ་ནི། མ་དད་གདུལ་བར་བྱ་བའི་ཚུལ་བསྟུན་ཏེ༔ སྲིད་གསུམ་མ་ལུས་དབང་དུ་སྡུད་པ་དང་༔ ངན་སོང་གནས་སྦྱོང་མ་རིག་མུན་ཁང་གཏིབས༔
ཐམས་ཅད་གཞིག་ཅིང་གཡུལ་དུ་འབྲུབ་པ་དང་༔ དུས་གསུམ་རྒྱལ་བའི་སྐུ་ཡང་བསྐྱེད་པའི་ཕྱིར༔ བླ་མེད་བྱང་ཆུབ་གནས་སུ་འགོད་པར་བྱའོ༔ ལན་གསུམ། རྒྱུན་བཤགས་ནི། ཧོ༔ རྡོ་རྗེ་སློབ་དཔོན་སངས་རྒྱས་དཔལ༔ དུས་གསུམ་བཞུགས་ལ་ཕྱག་འཚལ་ལོ༔ མཆོག་གསུམ་བསྟེན་པའི་ཞིང་གྱུར་ལཿ༔ གཉིས་མེད་ཡིད་ཀྱིས་སྐྱབས་སུ་མཆི༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ དག་པའི་མཆོད་པ་བཞེས་སུ་གསོལ༔ དངོས་གྲུབ་ཆུ་བོ་གཅོད་པའི་གེགསཿ༔ ཉེས་བྱས་མ་ལུས་བཤགས་པར་བགྱི༔ ཕྱོགས་བཅུ་འཁོར་གསུམ་དག་པའི་ཆོས༔ མ་ཆགས་སྤྱོད་ལ་རྗེས་ཡི་རང་༔ དག་པའི་མཐའ་བཞི་དྲི་མ་མེད༔ རྫོགས་པའི་བྱང་ཆུབ་སེམས་བསྐྱེད་དོ༔ བདེ་གཤེགས་དབང་ཕྱུག་སེམས་ཅན་
ལ༔ དགོས་པ་གསུམ་ཕྱིར་ལུས་འབུལ་ལོ༔ ཚེ་རབས་བགྲངས་པའི་ལས་རྣམས་ཀུན༔ བསྡུས་ཏེ་བྱང་ཆུབ་ཆེན་པོར་བསྔོ༔ ལན་གསུམ། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཛ་ཧཱུྃ་བཾ་ཧོ༔ ཚོགས་ཞིང་རྣམས་རང་ལ་ཐིམ་པར་གྱུར། ཕྱི་རོལ་པ་ལ་གཏོར་མ་སྦྱིན་པ་དང་། བགེགས་ལ་བཀའ་བསྒོ་བ་ནི། རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བ་གཟི་བརྗིད་བསྐལ་པའི་མེ་ལྟར་འབར་བར་གྱུར། ཅེས་གཉུག་མའི་ལྷར་ལྡང་ནས། གྲལ་གཤམ་དུ་དཀར་གཏོར་དང་བགེགས་གཏོར་བཤམས་ལ། ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿཀྱིས་བསང་། སྭ་བྷ་ཝས་སྦྱང་། སྟོང་པའི་ངང་ལས་བྷཾ་ལས་རིན་པོ་ཆེའི་སྣོད་
ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ། ཧ་ཧོ་ཧྲཱི༔ ས་བྱིན་གྱིས་བརླབ། བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛ༔ ས་སྤྱན་དྲངས། སྠ་ན་པ་ཏི་ཀྵེ་ཊ་པཱ་ལཉྩ་ན་མཿསརྦ་ཏ་ཐཱ་ག་ཏ་སོགས་ལན་གསུམ་གྱིས་བསྔོས་ལ། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་
ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། སརྦ་བྷ་ཏ་ཨ་ཀརྵ་ཡ་ཛ༔ ས་བགེགས་བཀུག །ཨོཾ་སརྦ་བིགྷན་ན་མ༔ སརྦ་སོགས་ནམ་མཁའ་མཛོད་སྔགས་ལན་གསུམ་གྱིས་བསྔོས་ལ། ཧཱུྃ་ཧྲཱི༔ འཁྲུལ་པ་གཟུང་འཛིན་རྟོག་ངན་རྒྱུ༔ རྐྱེན་ནི་ཆགས་སྡང་ལ་སོགས་པ༔ ལྟ་བ་ལོག་པ་ཉོན་མོངས་ལྔ ལས་ཀྱི་འབྲས་བུ་སྨིན་པ་ཡི༔ བགེགས་རིགས་འབྱུང་པོར་གཏོགས་པ་རྣམས༔ མཆོད་སྦྱིན་གཏོར་མ་ཆེན་པོ་འདི༔ མང་པོར་ཏིང་ངེ་འཛིན་གྱིས་བསྐྱེད༔ སོ་སོར་ཐོབ་པ་སྔགས་ཀྱིས་བྱས༔ ཕྱག་རྒྱས་ཕམ་རྒྱལ་འཐབ་རྩོད་མེད༔ ཚིག་བཤད་བདེན་
པས་བཀྲོལ་ཏེ་བསྔོ༔ སྔགས་འཆང་བདག་གི་བཀའ་མ་བཅག༔ གུམ་གུམ་ཆུམ་ཆུམ་དམ་ལ་འདུས༔ ཧཱུྃ ཤིན་ཏུ་ཁྲོ་ཞིང་གཏུམ་པ་ལ༔ ཞི་བས་ཕན་པར་མི་འགྱུར་ཏེ༔ ཁྲོ་བོར་དེ་བཞིན་གཤེགས་ཀུན་མཛད༔ ཁྲོ་བོའི་ཚུལ་ཅན་ཁྲོས་པས་ཀྱང་༔ འཇིག་རྟེན་གསུམ་པོ་སྲེག་བྱེད་ནཿ༔ སངས་རྒྱས་ཐམས་ཅད་ཁྲོས་པ་ཡིས༔ ཁམས་གསུམ་མ་ལུས་དབང་སྡུད་ནཿ༔ མ་དད་སེམས་ཅན་སྨོས་ཅི་དགོས༔ སརྦ་བིགྷན་མཱ་ར་ཡ་ཕཊཿ༔ ཅེས་དྲག་སྔགས་ཡུངས་ཐུན་རོལ་མོ་ཚམ་རྔམ་དང་བཅས་པས་བགེགས་བསྐྲད། སྲུང་འཁོར་བསྒོམ་པ་ནི། ཧཱུྃ ཕྱི་སྣོད་གཞལ་ཡས་ནང་བཅུད་ལྷ༔ྋ ཐབས་ཤེས་ཉི་ཟླའི་ག་འུ་དང་༔ ཕྱི་རོལ་མཚོན་ཆ་མེ་རིའི་གུར༔ སྲུང་བའི་ཚོགས་ཁང་ལྷུན་གྱིས་གྲུབ༔ ཨོཾ་བཛྲ་རཀྵ་རཀྵ་
རྡོ་རྗེའི་དམ་བཅའ་བཟུང་བ་ནི། ཧོ༔ མ་རིག་རླབས་ཀྱིས་སེམས་ཉིད་རང་ཞལ་བསྒྲིབས༔ ཡེ་ནས་དབྱེར་མེད་རྟོག་པས་སོ་སོར་བཟུང་༔ བྱུང་འདུ་འབྲལ་མེད་པའི་རྡོ་རྗེ་སེམས༔ སྐུ་གསུང་ཐུགས་སུ་བསྒྲུབ་པར་དམ་བཅའ་འོ༔ ཨོཾ་ཨཱཿཧཱུྃ་ས་མ་ཡ་ཧོ༔ བྱིན་དབབ་པ་ནི། སྤོས་དང་རོལ་མོས་གཟི་བྱིན་བསྐྱེད་ལ། ཧཱུྃ དཔལ་ཆེན་རྡོ་རྗེ་གྲོ་བོ་ལོད༔ སྟག་ཚང་སེང་གེ་བསམ་འགྲུབ་ཏུ༔ གདུག་པའི་དམ་སྲི་བཏུལ་བ་བཞིན༔ ཁྱེད་ཀྱི་ཐུགས་དམ་དུས་ལ་བབ༔ སྒྲུབ་མཆོག་རྣལ་འབྱོར་བདག་ཅག་གིས༔ དུར་ཁྲོད་རྫས་ལ་རྟེན་བཅས་ཏེ གདུང་བ་དྲག་པོས་རྒྱུད་བསྐུལ་ན༔ ཐུགས་རྗེ་ཆེན་པོས་འདིར་དགོངས་ཤིག༔ ཕྱི་ནང་གསང་བའི་བར་ཆད་སོལ༔ དབང་བསྐུར་བྱིན་ཕོབ་དངོས་གྲུབ་སྩོལ༔ ཨོཾ་རུ་ལུ་རུ་ལུ་ཧཱུྃ་བྷྱོཿ་ཧཱུྃ་ས་མ་ཡ་ཨ་
ཝེ་ཤ་ཡ་བིཾ་ཕེ་ཧྲཱིཿ་ཧྲཱིཿ་སརྦ་སརྦ་སིདྡྷི་ཧཱུྃ མཆོད་རྫས་བྱིན་བརླབ་ནི། ཧཱུྃ དབྱིངས་ནས་ཡི་གེ་འབྲུ་གསུམ་ཆར་དུ་བབཿ༔ མཆོད་རྫས་ཉེས་སྐྱོན་མ་དག་བསྲེགས་གཏོར་བཀྲུས༔ བྷཾ་ལས་རིན་ཆེན་ཨ་ལས་བྷནྡྷའི་ནང་༔ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུར༔ ཨོཾ་བཛྲ་ཨནྱཱཾ་པཱཏྱཾ་པུཥྤ་དྷུ་པེ་དཱི་པཾ་གྷནྡྷ་རཱུ་པ་ཤབྡ་གྷདྡྷེ་རཱ་ས་སྤརྻ་སརྦ་པཱུཙ་ཨཱཿཧཱུྃ ཞེས་དང་། ཨོཾ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཥུ༔ ཨོཾ་མ་ཧཱ་བ་ལིཾ་ཏ་ཧཱུྃ་ཨོཾ་མ་ཧཱ་རཀྟ་ཧཱུྃ་ཧྲཱིཿཥྛཿཞེས་ནང་མཆོད་ཀྱི་སྔགས་རྣམས་ལན་གསུམ་གསུམ་བརྗོད་དོ། །གཉིས་པ་དངོས་གཞི་ལ་དམ་ཚིག་གི་དཀྱིལ་འཁོར་བསྐྱེད་པ་ནི། ཧཱྃཿ རྣམ་པར་མི་རྟོག་ཡེ་ནས་སྐྱེ་མེད་ཅིང་༔ གཟུང་འཛིན་རྟོག་མེད་མཐའ་གཉིས་མ་ཆགས་དབྱིངས༔ ཡེ་ནས་མཉམ་ཉིད་རང་བཞིན་ཇི་བཞིན་ང་
མཚན་མའི་རྟོག་བྲལ་སྨྲ་བསམ་བརྗོད་ལས་འདས༔ ཤུ་ནྱ་ཏཱ་ཛྙཱ་ན་་ཨཏྨ་ཀོ྅་ཧཾ༔ མ་ལྟར་བྱམས་པ་ཀུན་ལ་ཁྱབ་པའི་སྐུ༔ མཁའ་ལྟར་དག་པ་ཆོ་འཕྲུལ་འབྱུང་བའི་རྒྱུ༔ ཀུན་ལ་སྙོམས་པའི་ཡེ་ཤེས་གསལ་བ་དང་༔ ཡོན་ཏན་རིན་ཆེན་འབྱུང་བའི་དབང་ལྡན་ཡུམ༔ དྷརྨ་དྷཱ་ཏུ་ཧཱུྃ༔ ཡི་གེ་ཧཱུྃ་ནི་སེམས་ཀྱི་རང་བཞིན་ཏེ ཆགས་པའི་སྐྱོན་བྲལ་པདྨ་རཱ་གའི་མདོག༔ སངས་རྒྱས་ཆེ་བའི་ཁྱད་པར་བསྟན་པའི་ཕྱིར༔ རྒྱ་མཚོའི་རླབས་ལྟར་ཁྲོ་བོའི་སྤྲལ་པ་འབྱུང་༔ ཧཱུྃ་ཧཱུྃ་ཧཱུྃ༔ ཧཱུྃ་ལས་ཞེ་སྡང་འབར་བའི་ནམ་མཁའ་ལ༔ ཕྲག་དོག་གཡོ་བའི་འཚུབ་མ་རྒྱ་གྲམ་ལྡན༔ ཆགས་པ་རཀྟའི་རྦ་ཀློང་འཁྱིལ་ཞིང་གཏམས༔ གཏི་མུག་མུན་པའི་ཀེང་རུས་ས་གཞི་བརྡལ༔ ང་རྒྱལ་ཆེན་པོའི་རི་རབ་མེ་རི་འབར༔ དབང་ཆེན་འབྱུང་བ་ཡུམ་ལྔའི་
མཁའ་ལ་ཤར༔ རྡོ་རྗེ་མེ་དཔུང་དུར་ཁྲོད་ཁོར་ཡུག་དབུས༔ བྷཾ་ལས་དབང་དྲག་རོལ་པའི་གཞལ་ཡས་ཁང་༔ ཕྱི་ནི་རིན་ཆེན་ནང་ནི་ཐོད་པའི་མཁར༔ ཁྲག་ཞག་འདམ་འཐས་གནམ་ལྕགས་གཟེར་མས་གཏམས༔ ཡིད་བཞིན་འབྱོར་ལྡན་རྒྱལ་བ་རྒྱ་མཚོའི་ཞིང་༔ སྣ་ཚོགས་ཡོན་ཏན་གསང་བའི་མཛོད་ཀྱི་གཏེར༔ ཁྲོ་བོའི་འབྱུང་གནས་དཔལ་ཆེན་རྔམ་པའི་ཡུལ༔ ཐུག་ཆོམ་འུར་སྒྲ་ཁམས་གསུམ་ཡོངས་སུ་ལྡིར༔ ་ཡོངས་མ་ཆད་ཚད་མེད་དཔག་ལས་འདས༔ ཚངས་པ་ཕོ་མོ་བསྣོལ་བའི་གདུང་ཁྱམས་ལ༔ ཏི་ར་ཕོ་མོ་བསྣོལ་བའི་གྲལ་མ་བཏབ༔ ཕྱོགས་ང་གཡང་གཞི་ཤ་ཆེན་ཐོག་ས་བཀྲམ༔ ཉ་ཆེན་འཕན་དང་སྦྲུལ་ནག་ཟ་ར་ཚགས༔ ཆུ་སྲིན་རུས་སྦལ་ཞིང་ཆེན་སྨུག་པོའི་སྒོ༔ གཟའ་བརྒྱད་རྒྱུ་
སྐར་ཚོགས་ཀྱིས་ཁ་བད་བཅས༔ ཉི་མ་ཟླ་བ་སྣང་བའི་སྐར་ཁུང་བརྒྱན༔ ཞིང་ཆེན་རྒྱལ་མཚན་ཞིང་ཆུང་བ་དན་ཕྱར༔ སྔོན་ཆད་འདས་པའི་རྒྱལ་སྲས་རྣམས་ཀྱི་དབྱིངས༔ ད་ལྟ་བཞུགས་པ་ཁྲོ་རྒྱལ་རོལ་པའི་གནས༔ སླད་ནས་འབྱོན་པའི་རྒྱལ་སྲས་གཤེགས་པའི་ཤུལ༔ དུས་གསུམ་སངས་རྒྱས་བཞུགས་པའི་ཕོ་བྲང་དབུས༔ ཐོད་རུས་བར་ཁྱམས་གྲུ་ཆད་དཔགས་པ་ལ༔ གནམ་ལྕགས་རྡོ་རྗེ་འབར་བའི་གཟེར་མགོས་གཏམས༔ འཁོར་ལོ་རྩིབས་བཞི་ལྟེ་བར་ཆོས་འབྱུང་དབུས༔ སྣ་ཚོགས་པདྨ་ཟླ་བ་ཉི་མའི་དབུས༔ བདུད་དང་དམ་སྲི་བྱི་ཆིངས་བསྣོལ་བའི་སྟེང་༔ དམུ་སྟག་མི་ཟན་ཤིན་ཏུ་རྔམ་པའི་ཚུལ༔ ཞེ་སྡང་རྒྱས་པའི་མཆེ་བ་སྡེར་མོ་གཟེངས༔ འདོད་ཆགས་འཁྲུགས་པའི་མིག་རྩ་ཁྲག་ཏུ་ཁོལ༔ ང་རྒྱལ་ཁེངས་པ་ཧཱུྃ་གི་ང་
རོ་སྒྲོགས༔ དབང་གི་ཕྲིན་ལས་མགྱོགས་པའི་མཐུ་དང་ལྡན༔ ཤེས་རབ་རྩལ་གྱིས་ཡེ་ཤེས་ཕ་རོལ་ཕྱིན༔ རིག་པའི་རླབས་ཀྱིས་ས་གསུམ་ཅིག་ཆར་གནོནཿ༔ མཁའ་ལྡིང་རྒྱལ་པོ་གཟན་ལ་བབ་པའི་ཚུལ༔ རང་རིག་གསལ་བ་རྒྱུ་ཡི་ཡི་གེ་ཉིད༔ གདན་ལ་བབ་ཅིང་བྱང་ཆུབ་སེམས་སྤྲིན་ལས༔ སྤྲུལ་པ་བསམ་མི་ཁྱབ་ཅིང་ཡོངས་གྱུར་པས༔ ཐིག་ལེ་དམར་པོ་འབར་ཞིང་འཕྲོ་བར་གྱུར༔ སྟོང་པའི་དབྱིངས་ལས་ཐུགས་རྗེ་གླུས་བསྐུལ་ཏེ༔ ཨེ་མཾ་སེམས་ཅན་སངས་རྒྱས་ཚོགས་ཅན་རྣམས༔ མ་དད་འཁྲུལ་པའི་ལོག་རྟོག་སེམས་ཅན་རྣམས༔ སྔོན་གྱི་ལས་ཉོན་ས་བོན་རྩུབ་མོས་འཕངས༔ འབྲས་བུ་ཉོན་མོངས་ལྔ་རུ་སྨིན་པ་རྣམས༔ གདུལ་བྱ་འདུལ་ཕྱིར་ཁྲོ་བོ་འཆོལ་བར་བཞེངས༔ བསྐུལ་བ་གསན་ནས་
སྐུ་གསུང་ཐུགས་རྗེ་གཡོས༔ སྲིད་གསུམ་ཟླ་མེད་པདྨ་ཐོད་ཕྲེང་རྩལ༔ འཆི་མེད་རྡོ་རྗེ་ཕྱག་རྒྱ་ཆེན་པོ་བརྙེས༔ དབང་དྲག་ཁྲོས་པ་རྡོ་རྗེ་གྲོ་བོ་ལོདཿ༔ སྐུ་མདོག་མཐིང་ནག་སྟོང་ཟིལ་ཆགས་པའི་མདངས༔ བཻཌཱུར་སྔོན་པོ་ཉི་མ་བྱེ་བས་བརྒྱན༔ ཞལ་གཅིག་ཕྱག་གཉིས་ཞབས་གཉིས་སག་ལྷམ་གསོལ༔ འདོར་སྟབས་སྟག་མོའི་མགོ་དང་འཕོངས་སྟེང་བརྫིས༔ སྒེག་དཔའ་འཇིགས་རུང་དགོད་གཤེ་དྲག་ཤུལ་འབར༔ སྒེག་དཔའ་འཇིགས་རུང་དགོད་གཤེ་དྲག་ཤུལ་འབར༔ སྙིང་རྗེ་རྔམ་དང་ཞི་བ་གར་དགུ་རྫོགས༔ དམར་སྨུག་བེར་ཕྱམ་ཆོས་གོས་གསུམ་གྱིས་སྤྲས༔ ཁ་དོག་མེ་འབར་བྱུ་རུའི་འོད་འཁྱིལ་བས༔ ས་གསུམ་ཟིལ་གནོན་སྲིད་གསུམ་གཞོབ་ཏུ་བསྲེག༔ རལ་པ་ཁམ་ནག་རྡོ་རྗེའི་ཚོམ་བུར་འཁྱིལ༔ མེ་རླུང་འཁྲུགས་པས་ཞེ་སྡང་གདུག་པའི་ཚོགས༔ ཁྲོ་བོ་དབང་སྡུད་འཇིགས་པའི་ཧཱུྃཿ་སྒྲ་
རྔམ༔ སྤྱན་མིག་མེ་འབར་སྟོང་གསུམ་ཉི་ཟླ་འཁྲུགས༔ སྨིན་མ་གློག་འགྱུ་དུག་གསུམ་རྩད་ནས་གཅོདཿ༔ སྙན་ཆ་དུང་ལོང་རྡོ་རྗེའི་ཁོངས་གསེང་ནས༔ འབྲུག་གི་སྒྲ་སྒྲོགས་རྡོ་རྗེའི་ཐོག་ཆར་འབེབས༔ ཤངས་ཀྱི་ཀློང་ནས་མཚོན་ཆའི་བུ་ཡུག་འཚུབས༔ རྒྱུད་ལྔ་སྒྲོལ་བའི་ཧོམ་ཞལ་ཨམ་གཙིགས་བསྡམས༔ མཆེ་བ་རབ་གཙིགས་ལྗགས་ལས་འོད་ཟེར་འཕྲོ༔ ཨག་ཚོམ་སྨ་ར་གདུག་པའི་མེ་དཔུང་འབར༔ ལོག༔ འདྲེན་བདུད་དང་མུ་སྟེགས་ཐལ་བར་བརླག༔ ཕྱག་གཡས་གསེར་གྱི་རྡོ་རྗེ་རྩེ་ལྔ་འཕྱར༔ རྭ་ལས་སྐྱེས་པའི་གནམ་ལྕགས་རལ་གྲི་འབར༔ རྡོ་རྗེའི་ཚྭ་ཚྭས་བན་དགྲ་གླང་སྙིང་འགེམས༔ ཕྱག་གཡོན་སྐུ་གསུམ་ལྷུན་གྲུབ་ལྕགས་ཕུར་འདྲིལ༔ ཞེ་སྡང་ལས་སྐྱེས་རྒྱལ་འགོང་དམ་སྲི་རྣམས༔ དཔའ་
བཀོང་ཟིལ་གནོན་མྱ་ངན་སྐྱེད་པར་བྱེད༔ ལྕགས་སྡིག་ནག་པོ་སེར་ཆེན་བཞིན་དུ་འབེབས༔ ཐུགས་ཀར་རིན་ཆེན་ཟླ་གམ་དམར་པོའི་དབུས༔ དཔལ་ཆེན་རྟ་མཆོག་པདྨ་ཧེ་རུ་ཀཿ༔ དམར་གསལ་འཁྲུགས་པ་དུས་མཐའི་མེ་བཞིན་འབར༔ དབུ་ལྔ་བཅུ་དྲུག་ཕྱག་ལ་ཞབས་བརྒྱད་བསྒྲདཿ༔ རྗེའི་ཁྱུང་གཤོག་བྱ་ཁྱུང་ཉི་ཟླས་མཚན༔ དུར་ཁྲོད་དཔལ་གྱི་ཆས་རྣམས་སྐུ་ལ་རྫོགས༔ ཤར་ལྷོ་ནུབ་བྱང་ཕྱོགས་བཞིར་གཟིགས་པའི་དབུ༔ ཞལ་ཀུན་ཀྱང་ལས་བཞིའི་རྟ་མགོ་འཚེར༔ དྲི་ཟ་གཤིན་རྗེ་ཀླུ་ཡི་དབང་པོ་དང་༔ གནོད་སྦྱིན་བདུད་ཀྱི་ཚོགས་ལམྱ་ངན་སྐྱེད༔ གཡས་བརྒྱད་རྡོ་རྗེ་ཊཱཾ་དྲིལ་བུ་དང་༔ ལྕགས་ཀྱུ་སྤྲུལ་ཞགས་འཁོར་ལོ་རལ་གྲི་ཞགས༔ གཡོན་བརྒྱད་ཐོད་ཁྲག་པདྨ་རུ་དྲའི་སྙིང་༔ རྡོ་རྗེའི་དབྱུག་པ་རྒྱ་གྲམ་བེ་ཅོན་
མེ༔ ཏྲི་ཤུ་ལ་དང་ཡེ་ཤེས་ཁྱུང་ཁྲ་འགྱེདཿ༔ ཡུམ་ཆེན་པདྨ་གཟི་ལྡན་བཻཌྰུར་མདོག༔ ཕྱག་གཉིས་ནོར་བུ་རིན་ཆེན་ཟ་མ་བསྣམས་ཤིང་ཡབ་ཡུམ་བདེ་བ་ཆེན་པོར་སྦྱོར༔ གཙོ་བོའི་སྤྱི་གཙུག་པདྨ་ཉི་ཟླའི་སྟེང་༔ རྡོ་རྗེ་སློབ་དཔོན་བུདྡྷ་ཐོད་ཕྲེང་རྩལ༔ དམར་སྨུག་བརྗིད་པ་ཞི་ཁྲོའི་ཉམས་ཀྱིས་སྒེག༔ སྔགས་ཀྱི་བེར་ཆེན་མཐིང་ནག་སྐུ་ལ་གསོལ༔ དབུ་སྐྲ་ཐོར་ཚུགས་དར་མཐིང་ཅོད་པན་འཕུར༔ ཚོགས་དར་དང་རིན་པོ་ཆེ་ཡིས་བརྒྱན༔ གཡས་པ་ཌཱ་རུ་གཡོན་པས་འཁོར་ལོ་འཛིན༔ མི་གཡོ་མཉམ་པ་རྡོ་རྗེའི་སྐྱིལ་ཀྲུང་བཞུགས༔ ཕྱོགས་བཞིའི་རྩིབས་སྟེང་པདྨ་ཉི་ཟླའི་དབུས༔ རྡོ་རྗེ་རིན་ཆེན་པདྨ་ཐོད་ཕྲེང་རྩལ༔ ཀརྨ་ཐོད་ཕྲེང་དཀར་སེར་དམར་ལྗང་མདོག༔ རྡོ་རྗེ་རིན་ཆེན་པདྨའི་
མཆོད་སྡོང་དང་༔ ཕྲིན་ལས་ལྷུན་གྲུབ་སྣ་ཚོགས་རྒྱ་གྲམ་གཡོན༔ ཀུན་ཀྱང་གཡས་པས་ཐོད་པའི་ཌཱ་རུ་འཁྲོལ༔ རྒྱན་དང་ཆ་ལུགས་གཙོ་བོའི་ཚུལ་དང་མཚུངས༔ གྲུ་ཆད་བཞི་ལ་པདྨ་བམ་གྱི་སྟེང་༔ རིགས་བཞིའི་གིང་ཆེན་དཀར་སེར་དམར་ལྗང་མདོག༔ གཡས་པས་རང་རྟགས་གཡོན་པས་བྷནྡྲ་ཐོགས༔ གསང་བའི་ཡུམ་བཞི་གྲི་གུག་ཐོད་པ་འཛིན༔ ཀུན་ཀྱང་གཅེར་བུ་རིན་ཆེན་རུས་པས་བརྒྱན༔ ཞབས་གཉིས་བཞེངས་སྟབས་གར་གྱི་རོལ་པས་འགྱིངས༔ ཁྱམས་གནས་གསུམ་དཔའ་བོ་མཁའ་འགྲོ་མ༔ འབུམ་ཕྲག་ཡངས་པའི་ཚོགས་རྣམས་མ་ལུས་པ༔ སྐུ་མདོག་ཕྱག་མཚན་མ་ངེས་ཅིར་ཡང་འཆར༔ ཕོ་བྲང་སྒོ་བཞིར་ལྕགས་ཀྱུ་ཞགས་པ་དང་༔ རྡོ་རྗེ་ལྕགས་སྒྲོག་རྡོ་རྗེ་དྲིལ་བུ་མ༔ ཕྲིན་ལས་བཞི་སྒྲུབ་རྒྱལ་ཆེན་ཕོ་
ཉར་འགྱེད༔ སྣང་སྟོང་མ་འགགས་འཇའ་ཚོན་ཤར་བ་བཞིན༔ གདོད་ནས་ལྷུན་གྲུབ་དཀྱིལ་འཁོར་ཆེན་པོར་ཤར༔ མི་འགྱུར་མི་ཤིགས་འོད་གསལ་སྙིང་པོའི་ངང་༔ ཉོན་མོངས་རང་གྲོལ་ཡེ་ཤེས་ལྔ་དང་ལྡན༔ ཕུང་ཁམས་སྐྱེ་མཆེད་གདོད་ནས་རྣམ་དག་པའི༔ གསུང་ཐུགས་ཀྱི་རྡོ་རྗེའི་དཀྱིལ་འཁོར་རྫོགས༔ ཨོཾ་ཧཱུྃ་ཏྲཾ་ཧྲཱིཿ་ཨཱ༔ ཨ་བྷི་ཥིཉྩ་ཧཱུྃ ཨོཾ་ཨཱཿཧཱུྃ ཡེ་ཤེས་པ་སྤྱན་དྲངས་པ་ནི། སྤོས་རོལ་གདུང་དབྱངས་ཀྱིས་བསྐུལ་ཏེ། ཧཱུྃ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཕྱིར༔ བྱིན་གྱིས་བརླབ་ཕྱིར་གཤེགས་སུ་
གསོལ༔ ཧཱུྃ སྔོན་གྱི་བསྐལ་པའི་དང་པོ་ལ༔ གླིང་གི་མིང་ནི་འཛམ་བུའི་གླིང་༔ གནས་ཀྱི་མཆོག་གྱུར་ཨོ་རྒྱན་གནས༔ ཡུལ་གྱི་མིང་ནི་ལི་ཡི་ཡུལ༔ རང་བྱུང་མཆོད་རྟེན་འཇིག་རྟེན་བརྩེགས༔ སློབ་དཔོན་རྡོ་རྗེ་གྲོ་བོ་ལོད༔ དྲེགས་པ་ཚར་གཅོད་དངོས་གྲུབ་བརྙེས༔ འཁོར་དུ་ཀརྨ་མཁའ་འགྲོས་བསྐོར༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ བཛྲགུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ བཞུགས་སུ་གསོལ་བ་ནི། ཧཱུྃ བདེ་ཆེན་ཆོས་སྐུ་བརྡལ་བའི་ཞིང་ཁམས་སུ༔ ཡེ་ཤེས་ལྔ་ལྡན་རིགས་ལྔའི་ཕོ་བྲང་
དབུས༔ གདུལ་ཐབས་སྒྱུ་མར་རོལ་པའི་གདན་ཁྲི་ལ༔ ཡེ་ནས་གཉིས་མེད་ལྷུན་གྲུབ་ཆེན་པོར་བཞུགས༔ དབྱིངས་དག་པ་དབང་གི་དཀྱིལ་འཁོར་འདིར༔ ཡེ་ཤེས་ཁྱད་པར་འཕགས་པའི་གཞལ་ཡས་སུ༔ དཔལ་ཆེན་རྡོ་རྗེ་གྲོ་ལོད་ལྷ་ཚོགས་རྣམས༔ གཉིས་སུ་མེད་པའི་ཚུལ་གྱིས་བཞུགས་སུ་གསོལ༔ ས་མ་ཡ་ཛཿ༔ ས་མ་ཡ་སྟཱཾ༔ པྲ་ཝེ་ཤ་ཡ་ཕཊ༔ ཨཱ་ཝེ་ཤ་ཡ་ཨཱ༔ ཕྱག་འཚལ་བ་ནི། ཧཱུྃཿ འདོད་ཆགས་དག་པས་ཤེས་རབ་ཕ་རོལ་ཕྱིན༔ མ་འགག་རོལ་པའི་ཕྱག་རྒྱ་ཅིར་ཡང་སྣང་༔ བདེ་གཤེགས་ཡབ་ཡུམ་སྐུ་ལ་ཕྱག་འཚལ་ལོ༔ ཉོན་མོངས་རྟོག་པའི་དྲྭ་བ་ཀུན་བཅོམ་ནས༔ ཡེ་ཤེས་དགུ་ཡི་དོན་དང་རབ་ལྡན་པ༔ དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ལོ༔ ཨ་ཏི་པཱུ་
ཧོ༔ པྲ་ཏཱིཙྪ་ཧོ༔ ཤྲཱི་ན་མ༔ མཆོད་པ་འབུལ་བ་ལ། ལྷ་རྫས་ཕྱི་མཆོད་ནི། ཧཱུྃཿ ཀུན་བཟང་མཆོད་པའི་སྤྲིན་ཕུང་ཆེན་པོར་ཤར༔ ཕྱོགས་བཅུའི་སངས་རྒྱས་ཞིང་ཁམས་རྒྱས་པར་འགེངས༔ སྐུ་གསུང་ཐུགས་ཀྱི་དགྱེས་པ་བསྐྱེད་པའི་ཕྱིར༔ མེ་ཏོག་བདུག་སྤོས་མར་མེ་དྲི་ཆབ་མ༔ མཆོད་ཆེན་དབང་གི་ཚུལ་དུ་འབུལ་ལགས་ན༔ དམ་ཚིག་དགྱེས་པ་མཆོག་ལ་རོལ་མཛོད་ཅིག༔ ན་མཿསརྦ་ཏ་ཐཱ་ག་ཏ་བྷྱོཿ་བི་ཤྭ་མུ་ཁེ་བྷྱཿསརྦ་ཏཏ་ཁཾ་ཨུཏྤ་ཏེ་སྤ་ར་ཚ་ཎ་ཧི་མཾ་ག་ག་ན་ཁཾ་སྭཱ་ཧཱ༔ པུཥྤ་དྷུ་པེ་ཨཱ་ལོ་ཀེ་གནྡྷ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ཁཾ་སྭཱ་ཧཱ རང་བྱུང་ནང་མཆོད་ནི། ཧཱུྃཿ འདོད་ཡོན་རང་འཕྲུལ་རྡོ་རྗེའི་དམ་ཚིག་སྟེ༔ གཟུགས་སྒྲ་དྲི་རོ་རེག་བྱ་ཆོས་ཀྱི་ཁམས༔ རྡོ་རྗེའི་ལྷ་མོ་གསང་བའི་མཆོད་པ་རྣམས༔ དཀྱིལ་འཁོར་ལྷ་ཚོགས་མ་ལུས་པ་
རྣམས་བཞེས༔ རཱུ་པ་ཤབྡ་གཏྗེ་རཱ་ས་སྤངྒེ་དྷརྨ་པཱུ་ཛ་ཧོ༔ གཉིས་མེད་གསང་མཆོད་ནི། ཧོ༔ དགྱེས་ཉམས་མཆོག་གི་མཆོད་པ་ཆེན་པོ་འདི༔ འདོད་པའི་ཡོན་ཏན་ལྷ་མོར་བྱིན་བརླབས་ཤིང་༔ པདྨ་རཀྟ་པཉྩཨ་མྲྀ་ཏ༔ དམ་ཚིག་བཞིན་དུ་ཅི་བདེར་བཞེས་སུ་གསོལ༔ ཧ་ཧེ་པྲ་ཝེ་ཤ་ཡཀྴ་རཀྴ་ས་མ་ཡ་ཨ་ར་ལླི་ཁཱ་ཏི༔ ཞེས་པ་ཙམ་མམ། རྒྱས་པར་སྤྲོན་གཞུང་གི་དངོས་བསྟན་ཚོགས་མཆོད་སྐབས་འབྱུང་བའི་མཆོད་ཕྲེང་འཁྲུགས་བསྡེབས་ཀྱིས་འདིར་བླངས་པ་སྟེ། དེ་ཡང་ཕྱི་སྒེག་བཞི་ནི། སྤོས་ཀྱི་སྤྲིན་ལྡིང་བདུག་པ་མོ༔ རྒྱལ་བའི་དཀྱིལ་འཁོར་བདུག་པས་འགེངས༔ བྱམས་པ་ཐབས་དང་ཤེས་བཛྲ་དྷུ་པེའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་དྷུ་པེ་དྷུ ཨུཏྤལ་མཐིང་ག་མེ་ཏོག་འཐོར༔ ཟླ་གམ་རིན་ཆེན་འཕྲོ་འདུ་གསལ༔
སྙིང་རྗེ་ཐབས་དང་ཤེས་རབ་ལས༔ བཛྲ་པུཥྤའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་པུཥྤ་པུ དབང་གི་ཕྱག་ན་སྒྲོན་མེ་བསྣམས༔ ཆོས་ཀྱི་རྒྱལ་མཚན་འབར་བ་འཛིན༔ དགའ་བ་ཐབས་དང་ཤེས་རབ་ལས༔ བཛྲ་ཨཱ་ལོ་ཀེའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱི༔ ཙནྡན་བདུད་རྩིའི་ཆར་འབེབས་མ༔ དཀྱིལ་འཁོར་གསལ་བའི་ཐིག་ལེ་འབེབས༔ བཏང་སྙོམས་ཐབས་དང་ཤེས་རབ་ལས༔ བཛྲ་གདྡྷེའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་གཉཱེ་གན༔ ཕྱི་ཡི་མཆོད་པ་དམ་པ་འདི༔ ཚད་མེད་བཞི་དང་མཉམ་པར་སྦྱོར༔ ཨ་ལ་ལ་སྟེ་བཞེས་སུ་གསོལ༔ ནང་སྒེག་བཞི་ནི། ཧོ༔ དུང་མདོག་སྒེག་མོ་རྡོ་རྗེའི་སྤྱན༔ སེམས་དཔའ་སྔོན་པོའི་ཡེ་ཤེས་འབེབས༔ མེ་ལོང་ལྟ་བུའི་ཡེ་ཤེས་ལས༔ བཛྲ་ལཱ་སྱའི་མཆོད་པར་
རོལ༔ ཨོཾ་ཤྲཱི་བཛྲ་རཱ་ག་ལཱ་སྱ་ཧཱུྃ ཡིད་བཞིན་རིན་ཆེན་འོད་འབར་མ༔ འཇམ་དཔལ་རྣོན་པོའི་དངོས་གྲུབ་འཛིན༔ མཉམ་པ་ཉིད་ཀྱི་ཡེ་ཤེས་ལས༔ བཛྲ་མཱ་ལེའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་མཱ་ལེ་ཏྲཾ༔ པདྨ་དབྱངས་མཁན་རྨ་བྱའི་མགྲིན༔ སྤྱན་རས་གཟིགས་ཀྱི་དངོས་གྲུབ་འཛིནནཿ༔ སོ་སོར་རྟོགས་པའི་ཡེ་ཤེས་ལས༔ བཛྲ་གཱིརྟིའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་གཱིརྟི་ཧྲཱི༔ གར་མཁན་འགྱིང་འབག་གཟི་ལྡན་མ༔ ལས་ཀྱི་འཁོར་ལོ་རྣམ་པར་འཇོམས༔ བྱ་བ་ནན་ཏན་ཡེ་ཤེས་ལས༔ བཛྲ་ནཱིརྟིའི་མཆོད་པར་རོལ༔ ཨོཾ་ཤྲཱི་བཛྲ་རཱ་ག་ནཱིརྟི་ཨཱ༔ ནང་གི་མཆོད་པ་དམ་པ་ནི༔ ཡེ་ཤེས་བཞི་དང་མཉམ་པར་སྦྱོར༔ ཨ་ལ་ལ་སྟེ་བཞེས་སུ་གསོལ༔ འདོད་ཡོན་གྱི་ལྷ་མོ་ལྔ་ནི། གཟུགས་
སུ་སྣང་བ་ཐམས་ཅད་ཀུན༔ སྣང་སྟོང་ངོ་བོ་ཉིད་ཀྱི་གཞི༔ ཆོས་དབྱིངས་དག་པ་ཡེ་ཤེས་ཏེ༔ རྡོ་རྗེ་ལྷ་མོ་གཟུགས་མཛེས་མ༔ འདོད་ཡོན་ཕྱག་ན་བསྣམས་ནས་ནི༔ རྐང་པས་གར་བྱེད་ལག་སྟབས་བསྒྱུར༔ སྙན་པའི་གླུ་དབྱངས་བླངས་ནས་ནི༔ དཀྱིལ་འཁོར་ལྷ་ལ་མཆོད་པ་འབུལ༔ ཨོཾ་ཤྲཱི་བཛྲ་རཱ་ག་རཱུ་པ་ཙ༔ ཐམས་ཅད་མ་ལུས་སྒྲ་རྣམས་ནི༔ གྲག་སྟོང་ངོ་བོ་ཉིད་ཀྱི་གཞི༔ མེ་ལོང་ལྟ་བུའི་ཡེ་ཤེས་ཏེ༔ རྡོ་རྗེ་ལྷ་མོ་འཇམ་པའི་སྒྲ༔✖ འདོད་ཡོན་ཕྱག་ན་བསྣམས་ནས་ནི༔ རྐང་པས་གར་བྱེད་ལག་སྟབས་བསྒྱུར༔ སྙན་པའི་གླུ་དབྱངས་བླངས་ནས་ནི༔ དཀྱིལ་འཁོར་ལྷ་ལ་མཆོད་པ འབུལ༔ ཨོཾ་ཤྲཱི་བཛྲ་རཱ་ག་ཤབྡ་ཧཱུྃ བདེ་བས་ཚིམ་བྱེད་བསོད་ནམས་མཆོག༔ ཚིམས་སྟོང་ངོ་བོ་ཉིད་ཀྱི་གཞི༔ མཉམ་པ་ཉིད་ཀྱི་ཡེ་ཤེས་ཏེ༔
རྡོ་རྗེ་ལྷ་མོ་དྲི་མཆོག་མ༔ འདོད་ཡོན་ཕྱག་ན་བསྣམས་ནས་སུ༔ རྐང་པས་གར་བྱེད་ལག་སྟབས་བསྒྱུར༔ སྙན་པའི་གླུ་དབྱངས་བླངས་ནས་ནི དཀྱིལ་འཁོར་ལྷ་ལ་མཆོད་པ་འབུལ༔ ཨོཾ་ཤྲཱི་བཛྲ་རཱ་ག་གཉཱེ་ཏཱཾ བདེ་བའི་རོ་ཡིས་ཚིམས་བྱེད་མ༔ རོ་སྟོང་ངོ་བོ་ཉིད་ཀྱི་གཞི༔ སོ་སོར་རྟོགས་པའི་ཡེ་ཤེས་ཏེ༔ རྡོ་རྗེ་ལྷ་མོ་བདེ་བ་མོ༔ འདོད་ཡོན་ཕྱག་ན་བསྣམས་ནས་སུ༔ རྐང་པས་གར་བྱེད་ལག་སྟབས་བསྒྱུར༔ སྙན་པའི་གླུ་དབྱངས་བླངས་ནས་ནི༔ དཀྱིལ་འཁོར་ལྷ་ལ་མཆོད་པ་འབུལ༔ ཨོཾ་ཤྲཱི་བཛྲ་རཱ་ག་རཱ་ས་ཧྲཱི༔ དཀྱིལ་འཁོར་བསམ་ཡས་ལྷུན་གྱིས་གྲུབ༔ བདེ་མཆོག་དཀྱིལ་འཁོར་ཡངས་བྱེད་མ༔ བྱ་བ་གྲུབ་པའི་ཡེ་ཤེས་ཏེ༔ རྡོ་རྗེ་ལྷ་མོ་རེག་བྱ་མ༔ འདོད་ཡོན་ཕྱག་ན་བསྣམ་ནས་
རྐང་པས་གར་བྱེད་ལག་སྟབས་བསྒྱུར༔ སྙན་པའི་གླུ་དབྱངས་བླངས་ནས་ནི༔ དཀྱིལ་འཁོར་ལྷ་ལ་མཆོད་པ་འབུལ༔ ཨོཾ་ཤྲཱི་བཛྲ་རཱ་ག་སྤརྴ་ཨཱ༔ ཁྱད་པར་དུར་ཁྲོད་དྲག་པོའི་མཆོད་པ་ནི། ཧཱུྃཿ དུར་ཁྲོད་དྲག་པོའི་གཞལ་མེད་ཁང་ཆེན་པོ༔ རྡོ་རྗེ་འཛིན་ཀྱང་འཇིགས་པའི་ཕོ་བྲང་དུཿ༔ དགྲ་བགེགས་བསྒྲལ་བའི་ཁྲག་གི་མཆོད་ཡོན་དང་༔ དབང་པོའི་མེ་ཏོག་ཚིལ་གསུར་བདུག་པའི་སྤྲིན༔ ཞུན་ཆེན་མར་མེ་མཁྲིས་པའི་དྲི་ཆབ་རྫིང་༔ རུས་ཞལ་ཟས་རྐང་གླིང་ཐོད་རྔའི་སྒྲ༔ བྱང་སེམས་དཀར་དམར་བདུད་རྩི་རཀྟའི་མཚོ༔ ཕུང་པོ་མ་ཚང་མེད་པའི་གཏོར་མ་ཆེ༔ དམ་རྫས་རྒྱ་ཆེན་པོས༔ བླ་མ་དྲག་པོ་འཁོར་བཅས་ཐུགས་དམ་བསྐང་༔ དགྱེས་པར་བཞེས་ལ་དྲག་པོའི་ཕྲིན་ལས་མཛོད༔ ཨོྃ་བཛྲ་ཨརྒྷཾ་པུཥྤེ་
སོགས་ཤབྡ་བོ་དྷི་ཙིཏྟ་མ་ཧཱ་རཀྟ་མཱཾ་ས་བ་ལིཾ་ཏ་པཱུ་ཛ་ཧོ༔ ཞེས་དང་། ཆོས་སྐུ་སྣང་བ་མཐའ་ཡས་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ལོངས་སྐུ་ཐུགས་རྗེ་ཆེན་པོའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྤྲུལ་སྐུ་པདྨ་འབྱུང་གནས་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། མཁའ་འགྲོ་ཡེ་ཤེས་མཚོ་རྒྱལ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། མངའ་བདག་ཆོས་རྒྱལ་ཡབ་སྲས་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རིག་འཛིན་པདྨ་ལས་འབྲེལ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ལས་ཅན་ཆོས་བདག་སྐྱེས་བུའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། དྲིན་ཅན་རྩ་བརྒྱུད་བླ་མའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། གུ་རུ་ཐོད་ཕྲེང་སྡེ་ལྔའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡི་དམ་རྡོ་རྗེ་གྲོ་ལོད་ཞལ་དུ་སརྦ་པཉྩ་ཨ་མྲྀ་ཏ་
ཁ་རཾ་ཁཱ་ཧི། དབང་ཆེན་རྟ་མགྲིན་ཡབ་ཡུམ་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ལས་མཛད་གིང་ཆེན་སྡེ་བཞིའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། དཔའ་བོ་ཌཱ་ཀི་སྒོ་སྐྱོང་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། དམ་ཅན་ཆོས་སྲུང་རྒྱ་མཚོའི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། མཆོད་པར་འོས་པ་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཀཱ་ཡ་ཝཱ་ཀ་ཙིཏྟ་སིདྡྷི་ཨོཾ་ཨཱཿཧཱུྃ ཞེས་བདུད་རྩི་མྱང་། བསྟོད་པ་བྱ་བ་ནི། ཧཱུྃ མ་བཅོས་སྤྲོས་བྲལ་བླ་མ་ཆོས་ཀྱི་སྐུ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ པད་སྡོང་ལས་འཁྲུངས་བླ་མ་སྤྲུལ་པའི་སྐུ༔ སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད༔ སྐུ་ནི་མི་འགྱུར་ཀུན་ཏུ་བཟང་པོའི་སྐུ༔ གསུང་ནི་མི་འགགས་མཉམ་ཉིད་རིག་པའི་གསུང་༔ ཐུགས་ནི་མི་གཡོ་སྨྲ་བསམ་བརྗོད་ལས་འདས༔
གསུང་ཐུགས་ལྡན་པདྨ་རྒྱལ་ལ་བསྟོད༔ འགྲོ་བའི་དོན་དུ་རང་བྱུང་འོད་དཔག་མེད༔ བཀྲ་ཤིས་ཡོན་ཏན་དུ་མས་བརྒྱན་པའི་སྐུ༔ འཇིག་རྟེན་མངའ་བསྒྱར་པདྨ་རྒྱལ་པོའི་སྲས༔ རྡོ་རྗེ་གྲོ་ལོད་རྩལ་ལ་ཕྱག་འཚལ་བསྟོད༔ དབང་དྲག་མེ་ལྟར་འབར་བའི་དཀྱིལ་འཁོར་ནས༔ ཁྲོ་བོའི་རྒྱལ་པོ་ཟ་བྱེད་ཧཱུྃཿ་སྒྲ་ཅན༔ རྟ་སྐད་རྔམ་པ་དངོས་གྲུབ་གཏེར་གྱི་མཛོདཿ༔ དབང་མཆོག་འབར་བའི་སྐུ་ལ་ཕྱག་འཚལ་བསྟོད༔ ཞི་བའི་ལས་མཛད་རྡོ་རྗེ་ཐོད་ཕྲེང་རྩལཿ༔ རྒྱས་པའི་ལས་མཛད་རཏྣ་ཐོད་ཕྲེང་རྩལ༔ དབང་གི་ལས་མཛད་པདྨ་ཐོད་ཕྲེང་རྩལ༔ དྲག་པོའི་ལས་མཛད་ཀརྨ་ཐོད་ཕྲེང་རྩལ༔ ཐམས་ཅད་ལྷུན་གྲུབ་བུདྡྷ་ཐོད་ཕྲེང་རྩལ༔ ཕྲིན་ལས་རྫོགས་པའི་རྗེ་ལ་ཕྱག་འཚལ་བསྟོད༔ སྣ་ཚོགས་གར་སྦྱར་ཐོགས་མེད་
ཕྲིན་ལས་བདག༔ རིགས་བཞིའི་གིང་ཆེན་མཁའ་འགྲོའི་ཚོགས་ལ་བསྟོད༔ ཚོགས་ཆེན་འདུས་པའི་དཀྱིལ་འཁོར་སྒོ་སྐྱོང་ཞིང་༔ ཚད་མེད་བཞི་ལྡན་ཕྲིན་ལས་རྣམ་བཞི་སྒྲུབ༔ གདུག་པའི་འཁོར་བ་ལིངས་ལ་འདེབས་མཁས་པ༔ གདུག་པའི་འཁོར་བ་ལིངས་ལ་འདེབས་མཁས་པ༔ དཔལ་གྱི་བཀའ་ཉན་སྐྱོང་མ་བཞི་ལ་བསྟོདཿ༔ བདག་ཅག་སེམས་ཅན་ལས་ཀྱིས་མནར་ཞིང་གཟིར༔ མ་རིག་དབང་གིས་སྨིན་སོ་རྒྱུད་ལྔར་འཁྱམསཿ༔ ལོག་རྟོག་ངན་པའི་དབང་གྱུར་འགལ་འཁྲུལ་རྣམས༔ ཡེ་ཤེས་གཟིགས་མངའ་འཕགས་པའི་ཚོགས་ལ་བཤགས༔ ཨོཾ་བཛྲ་སཏྭ་ས་མ་ཡ་སོགས་ཚང་བར་བརྗོད། བཟླས་པ་ལ་བསྙེན་སྒྲུབ་ལས་གསུམ་ལས། ཡེ་ཤེས་སེམས་དཔར་བསྙེན་པ་ནི། རང་ཉིད་དབང་དྲག་གྲོ་ལོད་སྐུར་གསལ་བའི༔ །ཐུགས་ཀར་ཡེ་ཤེས་སེམས་དཔའ་རྟ་མགྲིན་དམར༔ དེ་ཡི་ཐུགས་ཀར་རིན་
ཆེན་ཟུར་བརྒྱད་དབུས༔ གསེར་གྱི་རྡོ་རྗེ་རྩེ་ལྔའི་ལྟེ་བ་ལ༔ པདྨ་ཉི་མ་ཟླ་བའི་དཀྱིལ་འཁོར་དབུས༔ རང་བྱུང་རིག་པ་ཧཱུྃཿ་ཡིག་དམར་པོའི་མཐརཿ༔ རྩ་བའི་རིག་སྔགས་བྱུ་རུའི་ཕྲེང་བ་བཞིན༔ བསྐོར་ཞིང་འཁོར་བས་ཐ་མལ་སྣང་ཞེན་སྦྱངས༔ སྣོད་བཅུད་དཀྱིལ་འཁོར་གསུམ་གྱི་ངོ་བོར་རྫོགས༔ ཞེས་པའི་ཏིང་ངེ་འཛིན་ལ་ཡིད་རྩེ་གཅིག་པས། ཨོཾ་པདྨ་ཏ་ཀྲི་ཏ་ཧྱ་གྲྀ་ཝ་ཧཱུྃ༔ ཞེས་འབུམ་ཕྲག་བཅུ་བཟླ། དམ་ཚིག་སེམས་དཔར་སྒྲུབ་པ་ནི། སླར་ཡང་ཐུགས་སྲོག་སྒྲུབ་སྔགས་ཀྱིས་བསྐོར་བའི༔ འོད་ཟེར་ལྕགས་ཀྱི་ཚྭ་ཚྭ་གཏམས་པའམ༔ མགལ་མེ་དམར་པོ་ཀླད་ལ་བསྐོར་བ་བཞིནཿ༔ འཁོར་ཞིང་སྣང་བས་བདེ་གཤེགས་ཞིང་ཁམས་འགེངས༔ སྒྲ་དང་འོད་ཀྱིས་རྒྱུད་བསྐུལ་མཆོད་སྤྲིན་སྤྲོས༔ སླར་ཡང་ངན་སོང་གནས་སྦྱངས་རྒྱུད་ལྔ་
བསྒྲལ༔ ཀུན་ཀྱང་དཔལ་ཆེན་ཁྲོ་བོའི་ཞིང་དུ་བསྒྱུར༔ གཟུང་འཛིན་རྟོག་བྲལ་བྱང་ཆུབ་སེམས་ཀྱི་ངང་༔ གདན་གསུམ་ཡོངས་རྫོགས་ཆོས་སྐུའི་རོལ་པར་བལྟ༔ ཞེས་ཡེ་ཤེས་སེམས་དཔའ་སྟངས་དཔྱལ་དང་། བདག་མདུན་བར་དུ་འཁོར་བའི་དོ་ལིའི་དམིགས་པ་གཙོབོར་བཟུང་ལ། ཨོཾ་བཛྲ་ཤྲཱི་གྲོ་བོ་ལོད་སརྦ་སིདྡྷི་ཧཱུྃ་ཞེས་འབུམ་ཕྲག་བཅུ་གསུམ་བཟླ། ལས་སྦྱོར་ནི། བདག་ཉིད་པདྨ་དྲག་པོའི་ཐུགས་ཀ་ནས། །འོད་ཟེར་མེ་ཕུང་ལྕགས་སྡིགས་ཚྭ་ཚྭ་འཕྲོས། །སྡེ་བརྒྱད་དམ་སྲི་བར་ཆད་བདུད་སྡེའི་ཚོགས། །ཐལ་བར་བརླག་ཅིང་ཀ་དག་ཆོས་སྐུར་བསྒྲལ། །ཚུར་འདུས་བདག་ཐིམ་ཆེ་བཙན་འགྲན་བྲལ་གྱུར། ཨོཾ་བཛྲ་ཙཎྜ་སརྦ་དུབྫན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཅེས་དྲེགས་པའི་གཟིར་སྔགས་སྒྲུབ་པའི་བཅུ་ཆ་ཙམ་བཟླ། གཞན་ཡང་དགོས་པ་ཁྱད་པར་ཅན་གྱི་ཚེ་སྲུང་བཟློག་བསད་པའི་
འཁྲུལ་འཁོར་ཀྱང་སྦྱར་རོ། །གསུམ་པ་རྗེས་ཀྱི་རིམ་པ་ལ། ཚོགས་ཀྱི་མཆོད་པ་ནི། དམ་རྫས་རྣམས་ཆུ་ནང་ཆང་གསུམ་གྱིས་བྲན་ལ། ཨོཾ་སརྦ་དྲ་བྱཾ་ཤྭ་དྷ་ཡ་ཧཱུྃ་ཕཊ༔ ཀྱིས་བསང་། རཾ་ཡཾ་ཁཾགིས་སྦྱང་། ཧཱུྃ བཀྲ་ཤིས་མཚན་ལྡན་རྡོ་རྗེའི་ཀ་པཱ་ལར༔ དམ་རྫས་བདུད་རྩི་ལྔ་དང་ཤ་ཆེན་ལྔ༔ ཕྱི་ནང་གསང་བ་སྒྲུབ་པའི་དམ་ཚིག་རྫས༔ གཞན་ཡང་འདོད་ཡོན་ཕུན་སུམ་ཚོགས་པ་རྣམས༔ རྣམ་དག་བྱང་ཆུབ་ཡི་གེ་གསུམ་གྱིས་སྦྱོར གསུང་ཐུགས་ཀྱྀ་དངོས་གྲུབ་བསྡུས་པའི་དབྱིག༔ ཟག་མེད་ཀུན་བཟང་སྤྲིན་གྱི་རོལ་པར་བསྒྱུར༔ ༀ་ཨཱཿཧཱུྃ ལན་གསུམ། ཚོགས་ཞིང་སྤྱན་འདྲེན་པ་ནི། ཨོཾཿ བདེ་བར་གཤེགས་སོ་བཅོམ་ལྡན་འདས༔ བསོད་ནམས་ཞིང་དུ་དེང་བདག་གྱུར༔བྱིན་གྱིས་བརླབ་ཕྱིར་གཤེགས་སུ་གསོལ༔ ཡིད་
བཞིན་མཆོད་པ་དམ་པ་བཞེས་སུ་གསོལ༔ ཤྲཱི་བཛྲ་ཨོཾ་ཀུ་ཤ་ཛ༔ བཛྲ་པཱ་ཤ་ཧཱུྃ བཛྲ་སྤོཊ་བ༔ བཛྲ་གྷཎྜེ་ཧོ༔ མདུན་རྟེན་དང་དབྱེར་མེད་དུ་བཞུགས་པར་བསམ་ལ། ཨོཾ་ཤྲཱི་རཱ་ག་དྷུ་པེ་བྷྱ༔ པུཥྤཔུ ཨཱ་ལོ་ཀེ་ཧྲཱི༔ གནྠེ་གན༔ ཨོཾ་ཤྲཱི་བཛྲ་རཱ་ག་ལཱ་སྱེ་ཧཱུྃ མཱ་ལྱེ་ཏྲཾ གཱིརྟི་ཧྲཱི༔ ནཱིརྟི་ཨཱ༔ ཞེས་པ་རྣམས་ཀྱིས་སྤྱིར་མཆོད། ཚོགས་ཕུད་རིམ་པ་གསུམ་དུ་སྤྲོས་ལ། མཆོད་པ་ནི། ཧཱུྃ ཐབས་དང་ཤེས་རབ་ལྡན་གྱུར་ཅིང་༔ བྱང་ཆུབ་སེམས་དང་མ་ཆགས་པའི༔ གཉིས་སུ་མེད་པར་ཐིམ་གྱུར་ནས༔ ཚོགས་ཆེན་གཉིས་ཀྱང་རྫོགས་པར་ལྡན༔ ཚོགས་རྗེ་ཚོགས་བདག་དཔལ་དང་ལྡན༔ ཚོགས་ཀྱི་སློབ་དཔོན་གཤེགས་སུ་གསོལ༔ གཟུགས་དང་སྒྲ་དང་དྲི་དང་རོ༔ རེག་བྱ་ཆོས་ལ་སོགས་པ་ཡི༔ འདོད་ཡོན་ལྔ་ཡི་མཆོད་པ་འདི༔
བདེ་བར་གཤེགས་ལ་འབུལ་ལགས་ན༔ དགྱེས་པའི་དོན་ལ་བཞེས་སུ་གསོལ༔ མཉམ་ཉིད་བདེ་བའི་མཆོད་པ་ནི༔ ཆོས་ཀྱི་དབྱིངས་སུ་རོ་གཅིག་པས༔ ཕྱི་ནང་གསང་བའི་མཆོད་པ་ཡིས༔ ལྷ་རྣམས་མཉེས་ཤིང་དངོས་གྲུབ་འབེབས༔ མ་ཧཱ་ག་ཎ་ཙཀྲ་པྲཱ་ཛ་ཁཱ་ཧི༔ བཤགས་པ་ནི། ཧོ༔ དབང་ཆེན་རྡོ་རྗེ་གྲོ་ལོད་དགོངས་སུ་གསོལཿ༔ མ་རིག་རྨོངས་པས་ལྗོངས་པའི་སྐྱེ་འགྲོ་དང་༔ རྣལ་འབྱོར་དམ་ལ་གནས་པའི་སྒྲུབ་པ་པོ༔ ཐོག་མ་མེད་པའི་དུས་ནས་ད་བར་འཁོར༔ གཟུང་འཛིན་ཆགས་པའི་དབང་གིས་བསགས་པ་ཡི༔ རྒྱུད་དྲུག་བག་ཆགས་ཇི་སྙེད་མ་་ལུས་དང་༔ རྩ་བ་ཡན་ལག་དམ་ཚིག་ཉམས་པ་རྣམས༔ རང་གནོང་འགྱོད་པའི་སེམས་ཀྱིས་མཐོལ་ལོ་བཤགས༔ དག་ཚངས་མཆོག་གི་དངོས་
གྲུབ་སྩལ་དུ་གསོལ༔ ཡིག་བརྒྱ་བརྗོད། ཚོགས་ཐ་མ་ལ་རྟེན་བྱས་ཏེ་བསྒྲལ་བ་ལ་ཧོམ་བསྐྱེད་ནི། ཨེ་ལས་གནམ་ལྕགས་འབར་བའི་ཁང་སྒྲོམ་ནང་། །ནྲ་དང་ཏྲི་ལས་གནོད་བྱེད་དགྲ་བགེགས་རྣམས། །ཡན་ལག་ལྕགས་སྒྲོག་གིས་བཅིངས་ཉམ་ཐག་པ། །མངོན་སུམ་ལྟ་བུར་གསལ་བ་ཉིད་དུ་གྱུར། །འགུགས་གཞུག་ནི། ན་མོ། རྩ་བརྒྱུད་བླ་མ་ཡི་དམ་ལྷ་ཚོགས་དང་། །ཁྱད་པར་དབང་དྲག་པདྨ་དྲག་པོ་ཧེ་རུ་ཀའི། །ཏིང་འཛིན་སྔགས་དང་ཕྱག་རྒྱའི་ནུས་མཐུ་ཎྜ ཡིས། །དགྲ་བགེགས་ཐམས་ཅད་ཁུག་ཅིག་གཟུགས་ལ་ཕོབ། །ནྲྀ་ཏྲི་རཱུ་ཏྲ་ཨངྐུ་ཤ་ཛ༔ ཛཿཧཱུྃ་བཾ་ཧོ༔ ཕུར་པ་གདབ་ཅིང་སྒྲོལ་གྲིས་གཏུབ་ལ། ཧཱུྃ ང་ནི་རིག་པ་དཔལ་ཆེན་ཧེ་རུ་ཀཿ༔ འཁོར་འདས་རོ་གཅིག་ལྟ་བའི་ཕུར་བུ་ཡིས༔ མ་རིག་གཉིས་འཛིན་བདུད་དང་དགྲ་བགེགས་རྣམས༔ སྙིང་རྗེས་
བསྒྲལ་ཞིང་གཏུབ་བོ་ཀཱི་ལ་ཡ༔ ཀ་དག་མངོན་རྫོགས་སངས་རྒྱས་ཕྱིར་མ་ལྡོག༔ ༀ་དྷརྨ་དྷཱ་ཏུ་ཀཱི་ལ་ཡ་རུ་ཏྲ་མཱ་ར་ཡ་དུན་མྱོག་ཐཾ་རྦདཿ༔ ཅེས་ཚེ་ཁྲུས་ཀྱི་དགོངས་པ་དང་ལྡན་པས། བསྒྲལ་བའི་ཤཁྲག་བདུད་རྩིར་སྦར་ལ་བསྟབ་པ་ནི། ཧཱུྃ༔ བླ་མ་ཡི་དམ་མཁའ་འགྲོ་ཞལ་ཕྱེས་ཤིག༔ ཁམས་གསུམ་ཡོངས་སྒྲོལ་དགྲ་བགེགས་ཞལ་དུ་བསྟབ༔ རྔམས་བྱེད་ཧོམ་ཁུང་ཡངས་པའི་མགུལ་དུ་བསྟིམ༔ འཁོར་འདས་མཉམ་ཉིད་ངང་དུ་མཆོད་པར་བཞེས༔ གུ་རུ་དྷེ་ཝ་ཌཱ་ཀི་ནཱི༔ དགྲ་བགེགས་ཀྱི་ཤ་ཁྲག་རུས་པ་ལ་ཁ་ཁ་ཁཱ་ཧི་ཁཱ་ཧི༔ བྷིནྡྷ་ཡ་བྷིནྡྷ་ཡ་ཧཱུྃ་ཕཊཿ༔ འདིར་རྒྱལ་བ་སྤྱི་སྐོང་སོགས་སྦྱར་ན་ལེགས། ཚོགས་ལ་རོལ་བ་ནི། བརྡའི་འབུལ་ལེན་བཅས་ནང་གི་རྣལ་འབྱོར་དང་ལྡན་པས་ལོངས་སྤྱོད། ལྷག་མ་གཏོང་བ་ནི། ྋ ཨོཾ་ཨཱཿཧཱུྃ ལན་གསུམ།
ལྷག་གཏོར་བདུད་རྩིའི་རྒྱ་མཚོ་འདོད་ཡོན་གྱི་ཕུང་པོ་ཟད་མི་ཤེས་པའི་གཏེར་དུ་གྱུར། ཞེས་བྱིན་བརླབས་ལ། ༀ་ཨཱ་རལླི་ཤྲཱི་ཤྲཱི་ཛ༔ ཞེས་ལྷག་སྡུད་ཀྱི་ཕོ་ཉ་རྣམས་སྤྱན་དྲངས་ཏེ། ཧཱུྃ༔ དང་པོ་ཕུད་ཀྱིས་མི་མཆོད་རྒྱུ༔ བླ་མ་ཡི་དམ་ཕུད་ཀྱི་བདག༔ བར་དུ་ཚོགས་ཀྱིས་མི་མཆོད་རྒྱུ༔ མ་དང་མཁའ་འགྲོ་ཚོགས་ལ་དགྱེས༔ ཐ་མ་ལྷག་མས་མི་མཆོད་རྒྱུ༔ བྲན་དང་བཀའ་ཉན་ལྷག་ལ་དགྱེས༔ དབང་ཕྱུག་མ་སྲིང་མཁའ་འགྲོ་མ༔ འབར་མ་གིང་ལང་ཕོ་ཉའི་ཚོགས༔ འབུམ་ཕྲག་ཡངས་པའི་སྡེ་བརྒྱད་རྣམས༔ འདིར་གཤེགས་ལྷག་མའི་གཏོར་མ་བཞེས༔ སྔོན་ཚེ་དཔལ་གྱི་བཀའ་ལུང་བཞིན༔ བཅོལ་བའི་ཕྲིན་ལས་གྲུབ་པར་མཛོད༔ ཨོཾ་ཨུཙྪིཥྚ་བཛྲ་ཨ་ཏི་ཏྲ་ས་མ་ཡ་ཁཱ་ཧི་ཁཱ་ཧི་ཧཱུྃ་ཧྲཱིཿབྷྱོཿ་བྷྱོ༔ ཞེས་ཕྱི་རོལ་དུ་འབུལ་ལ། ཐུགས་དམ་བསྐུལ་
བ་ནི། ཧཱུྃ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་༔ འཇིག་རྟེན་འཇིག་རྟེན་འདས་པའི་དུར་ཁྲོད་ནས༔ དཀོན་མཆོག་རྩ་བ་གསུམ་དང་ཆོས་སྐྱོང་ཚོགསཿ༔ སྡེ་བརྒྱད་དྲེགས་པའི་དམག་དཔུང་དབྱིངས་ནས་བཞེངས༔ ད་དུས་བསྐལ་པ་སྙིགས་མའི་ཡང་མཐའ་འདིར༔ བསྟན་པ་གཉན་ལ་སྡང་བའི་དགྲ་དར་ན༔ ལེ་ལོ་བཏང་སྙོམས་གཡེལ་བར་མ་མཛད་པར༔ བསྟན་དང་བསྟན་འཛིན་བདག་གི་གྲོགས་ལ་དགོངས༔ ཆོས་ཀྱི་དབྱིངས་ནས་སྒྱུ་འཕྲུལ་དྲྭ་བའི་སྤྲིན༔ རིག་འཛིན་ཁྲག་འཐུང་ལྷ་ཚོགས་སྐུར་སྟོན་པ༔ རྣལ་འབྱོར་མོས་པའི་གདུང་ཤུགས་བཟོད་དཀའ་བས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཆད་མདོ་བསྒྲག་པ་ནི། གཏོར་མ་ལ་སྨན་རཀ་བྲན་ཅིང་འབྲུ་གསུམ་གྱིས་བརླབ་ལ། ཧཱུྃ་
བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་གསང་བ་མཆོག་གི་དཀྱིལ་འཁོར་ནས༔ དཔལ་ཆེན་རྟ་མགྲིན་རྡོ་རྗེ་གྲོ་བོ་ལོདཿ༔ འཐུང་རིགས་ལྔའི་ཚོགས་ཀྱིས་གར་བསྒྱུར་ཞིང་༔ མ་རུངས་དྲེགས་པའི་སྡེ་དཔོན་འདུལ་བའི་ཚེ༔ དམ་ལ་བཏགས་པའི་དབང་ཕྱུག་མཁའ་འགྲོ་གིང་༔ མ་སྲིང་འབར་མ་ཕོ་ཉ་ལས་མཁན་རྣམས༔ དམ་རྫས་དམར་གྱིས་བརྒྱན་པའི་གཏོར་མ་ལོངས༔ བདག་གིས་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ་བྷྱོ༔ རྒྱ་གར་ཡུལ་གྱི་དུར་ཁྲོད་གནས་ཆེན་བརྒྱད༔ བཀའ་བབ་རིག་འཛིན་སོ་སོའི་ཐུགས་མཛོད་བརྟོལ༔ དཔལ་ཆེན་སྒྲུབ་པ བཀའ་བརྒྱད་སྐུར་བཞེངས་ཚེ༔ དམ་ལ་བཏགས་པའི་ཞིང་སྐྱོང་མཁའ་འགྲོའི་ཚོགས༔ དམ་རྫས་དམར་གྱིས་བརྒྱན་པའི་གཏོར་མ་ལོངས༔
བདག་གིས་བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ་བྷྱོ༔ ཚ་ཤོད་མང་ཡུལ་དཔལ་མོའི་སྒྲབ་པའི་མཚོར༔ ཆེན་རྟ་མཆོག་རོལ་པའི་སྐུར་བསྟན་ནས༔ དམ་ལ་བཏགས་པའི་དགེ་བསྙེན་ཉེར་གཅིག་དང་༔ བོད་སྐྱོང་བརྟན་མ་ཆེན་མོ་བཅུ་གཉིས་དང་༔ དགེ་བསྙེན་བྱང་བཙན་འབྲོག་མོ་གཉན་ཆེན་སོགས༔ དམ་རྫས་དམར་གྱིས་བརྒྱན་པའི་གཏོར་མ་ལོངས༔ བདག་གིས་བཅོལ་བའི་ཕྲིན་ལས་འགྲུབ་པར་སིལ་མ་ལ་དང་འུ་ཡུག་མལ་གྲོ་ཀླུངས༔ ཧས་པོ་རི་དང་ཤམ་པོ་མཁའ་རི་དང་༔ ཏི་སེའི་གངས་དང་མཆིམས་ཕུ་ཤེལ་བྲག་དང་༔ མཁར་ཆུ་བསམ་ཡས་ཁྲ་འབྲུག་ལ་སོགས་དང་༔ ཁྱད་པར་སྟག་ཚང་སེང་གེ་བསམ་འགྲུབ་ཏུ༔ དཔལ་ཆེན་རྡོ་རྗེ་གྲོ་ལོད་སྐུར་བསྟན་ཏེ༔
བོད་ཡུལ་མཐའ་དབུས་གཏེར་གྱིས་གཏམས་བྱས་ནས༔ དམ་ལ་བཏགས་པའི་གཟའ་ཀླུ་རྒྱལ་གསུམ་དང་༔ གངས་ཅན་དྲེགས་པའི་སྡེ་བརྒྱད་ཚོགས་དམ་རྫས་དམར་གྱིས་བརྒྱན་པའི་གཏོར་མ་ལོངས༔ བདག་གིས་བཅོལ་བའི་ཕྲིན་ལས་འགྲུབ་པར་མཛོད༔ ཕན་བདེ་རྒྱལ་བའི་བསྟན་པ་སྲུང་བ་དང་༔ ༔མཐའ་དམག་ཟློག་ལ་ནད་གདོན་གནོད་པ་སྲུངས༔ ཆོས་རྒྱལ་རྗེ་ཡི་བརྒྱུད་པ་བུ་བཞིན་སྐྱོངས༔ སད་སེར་མུ་གེ་བྱད་ཕུར་རྦོད་༤ གཏོང་ཟློག༔ བཀའ་དང་དམ་ལ་མ་འདའ་ཕྲིན་ལས་མཛོད༔ ས་མ་ཡ་དམ་ལས་མ་འདའ་ཞིག༔ རཀྵ་སི་ཧཱུྃ༔ སྐབས་འགའ་ཞིག་ཏུ་ཆད་མདོའི་གཏོར མ་དེ་ཉིད་མཚོན་ཆའི་ཕུང་པོར་བསྒྱུར་ལ་ཟོར་དུ་འཕང་བ་ནི། བྷྱོ༔ དོ་ནུབ་དྲག་པོ་སྔགས་ཀྱིས་བྱིན་བརླབས་པ༔ དྲང་སྲོང་དམོད་པའི་དམར་གྱི་གཏོར་མ་འདི༔
གང་ལ་བྱ་བའི་ཞིང་བཅུའི་སྟེང་དུ་འཕེན༔ ཟློག་སྒྱུར་དྲག་པོའི་ཕྲིན་ལས་དུས་ལ་བབ༔ ཟློག་སྒྱུར་དྲག་པོའི་ཕྲིན་ལས་དུས་ལ་བབ༔ སྔགས་རྒོད་ལོཀྟྲིའི་ཤམ་དུ། མཱ་ར་ཡ་ཟོར་ཡ༔ ཨེ་ས་བྷོ་ཟློག་རྦད་ཡ༔ ཞེས་དགྲ་ཕྱོགས་སུ་འཕང་། བཤལ་ཆུ་གཏོར་མར་སྦྲེང་ཞིང་བརྟན་མ་བསྐྱང་བ་ནི། ༀ་ཨཱཿཧཱུྃ་གིས་བརླབས་ནས། བརྟན་མ་སྐྱོང་མཛད་མ་དང་སྲིང་༔ དཔལ་གནས་མ་དང་ཡང་དག་ཤེས༔ ཁྱུང་བཙུན་ཀོང་ལྷ་གཡུ་བུན་མཿ༔ མེ་ཏོག་ཟླ་འོད་བྱང་རྒྱལ་མ༔ གསེར་ཐང་ཀུན་བཟང་ཤཱིནྟིཾ་དཔལ༔ ཀླུ་མོ་གཟི་འབར་ལ་སོགས་པའི༔ བརྟན་མ་བཅུ་གཉིས་གཏོར་མ་ལོངས༔ མི་མཐུན་གནོད་པའི་ཕྱོགས་རྣམས་ཟློགཿ༔ ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཁཱ་ཧི༔ མ་མ་ཧྲཱིཿམ་མ་ཧྲཱིཿཁཱ་ཧི་ཁཱ་ཧི༔ རྟ་བྲོ་བརྡུང་བ་ནི། ཧཱུྃཿ ཨེ་ཡི་དཀྱིལ་འཁོར་ཆེན་པོ་འདིརཿ༔ རྒྱུད་དྲུག་
གནས་པའི་སེམས་ཅན་གྱི༔ འཁོར་ལོའི་ལམ་ལྔ་དགག་པའི་ཕྱིར༔ ཡིག་འབྲུ་འཁྲིགས་པའི་བྲོ་བརྡུངས་པས༔ རྒྱུད་དྲུག་འབྲོས་ཁུངས་གཅོད་པའི་རྒྱ༔ དུག་གསུམ་རྡུལ་ཕྲན་བཞིན་དུ་བཤིག༔ ཕུང་པོ་ཁམས་དང་སྐྱེ་མཆེད་ཚོགས༔ རྡོ་རྗེ་དབྱིངས་ཀྱི་དཀྱིལ་འཁོར་དུ༔ སྐུ་གསུང་ཐུགས་སུ་བདག་སྦྱོར་བས༔ ཕྱག་རྒྱ་ཆེན་པོར་བདག་གྱུར་ཅིག༔ ཧ་ཧ་རུ་ལུ་ཧ་ཧ་རུ་ལུ་ཧཱུྃ་ཕཊ༔ དངོས་གྲུབ་བླང་བ་ནི། གཏོར་མ་ལྷར་གསལ་བ་ལ་མཆོད་ཅིང་བསྟོད་ནས། ཧཱུྂ ཚད་མེད་རྨད་བྱུང་ཐུགས་རྗེའི་གཏོར་མ་འདི༔ གོས་འདོད་ཀུན་འབྱུང་ནོར་བུ་རིན་པོ་ཆེ༔ དབང་གི་རྒྱལ་པོ་དངོས་གྲུབ་སྒྲུབ་པའི་མི་ཟད་སྐུ་གསུང་ཐུགས་ཀྱི་དངོས་གྲུབ་སྩོལཿ༔ རྩ་སྔགས་མཐར། ༀ་ཨཱཿཧཱུྃ་སརྦ་སིདྡྷི་ཕ་ལ་ཧཱུྃ ཞེས་སྒྲུབ་རྫས་གནས་གསུམ་དུ་གཏུག་ཅིང་མྱང་
ངོ་། །བཟོད་པར་གསོལ་བ་ནི། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱིས་པ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཡི་གེ་བརྒྱ་པ་མང་དུ་བརྗོད། དཀྱིལ་འཁོར་བསྡུ་བ་ནི། མདུན་དཀྱིལ་དང་འབྲེལ་ན་དེའི་ཡེ་ཤེས་པ་རྣམས། །འདིར་ནི་རྟེན་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་བསྩལ་དུ་གསོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། བརྟན་བཞུགས་བྱ་བའམ། མེད་ན་ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུ ཞེས་པས་གཤེགས་གསོལ་བྱ། ཏིང་ངེ་འཛིན་གྱི་
དཀྱིལ་འཁོར། ཧཱུྃ ངོ་མཚར་སྤྲུལ་པའི་འཁོར་ལོ་མ་ལུས་པ༔ མ་སྐྱེས་སེམས་ཀྱི་དཀྱིལ་འཁོར་ཆེན་པོར་ཐིམ༔ ཆོས་རྣམས་རྩ་བ་བྱང་ཆུབ་སེམས་ཀྱི་ངང་༔ ཡེ་ཤེས་ལྔ་རྫོགས་སྟོང་ཉིད་དམ་པའི་མཛོདཿ༔ ཨ་ཨ་ཨཱ༔ ཞེས་མཉམ་པར་བཞག་པས་རྟག་མཐའ་བསལ། སླར་ཡང་ཁམས་གསུམ་འགྲོ་བའི་དོན་མཛད་པ༔ འགྲོ་དྲུག་མུན་སེལ་དབང་ཆེན་གྲོ་བོ་ལོད༔ སྒེག་པའི་ཉམས་ཀྱིས་སྒེག་པའི་གར་མཛོད་ཅིག༔ ཅེས་ང་རྒྱལ་བཟུང་བས་ཆད་མཐའ་བསལ། བསྔོ་སྨོན་ནི། ཧོ༔ ལྷ་མཆོག་བསྙེན་ཅིང་བསྒྲུབ་པའི་དགེ་བ་འདིས༔ སེམས་ལ་ཉམས་ཀྱི་སྣང་བ་ནང་དུ་འཆར༔ ལུས་ལ་གར་གྱི་སྣང་བ་ཕྱི་རུ་ཤར༔ ངག་ལ་བདེན་པ་སྔགས་ཀྱི་སྣང་བ་འཆར༔ ཡུལ་སྣང་ཞེན་པ་རྒྱལ་བའི་ཐུགས་སུ་ཤར༔ སྐུ་གསུམ་རྨི་ལམ་སྒྱུ་འདྲའི་དོན་རྟོགས་ཤོག༔
བཀྲ་ཤིས་བརྗོད་པ་ནི། མེ་ཏོག་གི་ཆར་དབབ་ལ། འཆི་མེད་ཟླ་གམ་དམར་པོ་དབང་གི་དཀྱིལ༔ སྐྱེ་ཤི་གཉིས་མེད་མགོན་པོ་ཚེ་མཐའ་ཡས༔ ཐུགས་རྗེ་སྒྱུ་མའི་རོལ་པ་རྟ་མཆོག་དཔལ༔ སྤྲུལ་པའི་ཁྲོ་བོ་འཆོལ་པ་གྲོ་བོ་ལོད༔ སྐུ་གསུང་ཐུགས་ཀྱི་གསང་བ་བསམ་མི་ཁྱབ༔ ཅིར་ཡང་སྟོན་ཅིང་ཅིར་ཡང་སྣང་བ་ཡི༔ གཅིག་ཏུ་མ་ངེས་ཡོན་ཏན་ཕྲིན་ལས་རྣམས༔ ཅིས་ཀྱང་མ་བསྒྲིབས་ཁམས་གསུམ་རྣམ་པར་རྒྱལ༔ བདེན་པ་དེས་ཀྱང་འདིར་ནི་བདེ་ལེགས་སྩོལ༔ སྟོང་གསུམ་འཇིག་རྟེན་མི་མཇེད་སྤྲལ་པའི་ཞིང་༔ སྤྲུལ་པའི་གར་བསྒྱུར་སྟོན་པས་བསམ་མི་ཁྱབ༔ བསྟན་གཉིས་ཉི་ཟླ་ཟུང་གཅིག་འཁོར་ཞིང་སྣང་༔ བདེན་པ་དེས་ཀྱང་འདིར་ནི་བདེ་ལེགས་སྩོལཿ༔ ཁྱད་པར་བསིལ་ལྡན་ར་བ་དཀར་པོར་བསྒྱུར༔
མཐོང་ཐོས་དྲན་རེག་བྱང་ཆུབ་ལམ་ལ་བཀོད༔ མཐའ་དབུས་མེད་པ་རིན་ཆེན་གཏེར་གྱིས་གཏམསཿ བདེན་པ་དེས་ཀྱང་འདིར་ནི་བདེ་ལེགས་སྩོལ༔ འགྲོ་བ་གདུལ་བྱ་སོ་སོའི་སྣང་ངོ་རུ༔ ཁྱོད་ཀྱི་ཕྲིན་ལས་སྤྲུལ་སྐུ་འཇའ་ལྟར་ཤར༔ འཁོར་བ་དོང་སྤྲུགས་མཛད་པའི་ངོ་མཚར་འབར༔ དེས་ཀྱང་འདིར་ནི་བདེ་ལེགས་སྩོལ༔ ཅེས་དང་། གཞན་ཡང་ཤིས་བརྗོད་ཇི་ལྟར་རིགས་པ་སྤེལ་བས་དགེ་ལེགས་སུ་བྱའོ། །འཕོ་ཆེན་རྡོ་རྗེའི་སྐུ་བརྙེས་བི་མ་ལའི། །རྣམ་འཕྲུལ་རྩོད་མེད་ཡོངས་གྲགས་རིག་འཛིན་རྗེ། །པདྨ་ལས་འབྲེལ་དག་སྣང་ཆོས་སྒོ་ཕྱེས། །རྩ་གཞུང་གབ་སྦས་གཅུས་དཀྲུགས་རྡོ་རྗེའི་ཚིག །ཕལ་གྱིས་རྟོགས་དཀའ་རོ་འཛིན་མདུད་རྒྱར་ཚུད། །ལག་ལེན་ནོར་འཁྲུལ་མ་དག་རྒྱུན་འབྱམས་དོགས། །གུ་རུའི་ཐུགས་བསྐྱེད་བསླུ་མེད་བདེན་མཐུ་ལས། །རྩ་བའི་གཞུང་དང་གྲུབ་པའི་མན་ངག་ལ། །བརྟེན་ནས་རྣམ་གསལ་
འཇུག་བདེའི་ཆོ་གའི་ཁྲིགས། །གསར་དུ་བསྡེབས་གང་སྤྱི་བརྟོལ་མ་ལགས་ཏེ། །བླ་མ་ལྷ་ཡིས་གནང་བ་ཐོབ་ནས་བྱས། །དངོས་གྲུབ་བསྒྲུབ་ལ་བསླུ་བའི་ལྕགས་ཀྱུ་མེད། །ནོངས་ན་འཆགས་སོ་དགེ་བས་སྲིད་གསུམ་འགྲོ། །དབང་དྲག་པདྨའི་དགོངས་ཀློང་བྱང་ཆུབ་ནས། །ཟབ་ལམ་ཕྲིན་ལས་མི་ནུབ་དར་སྨིན་རྒྱས། །དགེ་ལེགས་བཀྲ་ཤིས་སྲིད་ཞིའི་སླར་འབར་ཤོག །དེ་ལྟར་དབང་དྲག་གྲོ་ལོད་མཐིང་ནག་རྡོ་རྗེ་ཁྲོ་ཕུར་གྱི་ཕྲིན་ལས་བཀླགས་ཆོག་ཏུ་བཀོད་པ་བདུད་དཔུང་ཚར་གཅོད་ཅེས་བྱ་བ་འདི་ནི། རྣམ་པར་དགེ་བའི་བློ་གྲོས་ཅན་མདོ་ཁམས་གོ་འཇོ་བླ་མ་ཕུན་ཚོགས་བཀྲ་ཤིས་ཀྱིས་དོན་གཉེར་ཆེན་པོས་བསྐུལ་བ་ལས། དུས་བབ་ཀྱི་ཟབ་ལམ་འདི་ཉིད་སྲིད་པའི་མཐར་ཡང་མི་ནུབ་ཅིང་ལམ་ཞུགས་རྣམས་ལ་བར་ཆད་བདུད་ཀྱི་གཡུལ་ལས་རྣམ་པར་རྒྱལ་བའི་ཆ་རྐྱེན་དུ་ཡང་དག་པར་དམིགས་ནས། ཤར་རྒྱལ་བ་ཀཿཐོག་པའི་བཀའ་འབངས་ཐ་ཤལ་བ་སངས་རྒྱས་རྡོ་རྗེས་ཆུ་མོ་གླང་ལོ་ཆོ་འཕྲུལ་ཟླ་བའི་
དཀར་ཕྱོགས་ཀྱི་རྫོགས་པ་གཉིས་པའི་དུས་ཚེས་དགེ་བ་ལ། འཕགས་ཡུལ་ཤར་ཕྱོགས་བྷང་ག་ལའི་ཡུལ་གྱི་བྱེ་བྲག་རྡོ་རྗེ་བཀོད་པའི་གླིང་གི་སྒྲུབ་སྡེ་ཀུན་གྲོལ་འོད་གསལ་རྩེའི་བསྟི་གནས་སུ་ལེགས་པར་སྦྱར་བའི་ཡི་གེ་པ་ནི་སྔགས་བན་ཆོས་དབྱིངས་དཔལ་མཆོག་གིས་བགྱིས་པ་དགེ་ལེགས་སུ་གྱུར་ཅིག༔ སརྦ་མངྒ་ལཾ།། ༈ འདིའི་བརྒྱུད་པ་ནི། ཆོས་སྐུ་འོད་སྣང་་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། ཆོས་རྒྱལ་ཁྲི་སྲོང་ལྡེའུ་བཙན། མཁའ་འགྲོ་ཡེ་ཤེས་མཚོ་རྒྱལ། ཆོས་རྗེ་པདྨ་ལས་འབྲེལ་རྩལ། དེས་ཁོ་བོ་བྱ་བྲལ་སངས་རྒྱས་རྡོ་རྗེ་ལའོ།། །།