ཞི་ཁྲོ་དགོངས་པ་རང་གྲོལ་སྔགས་གསོའི་ཆོ་གའི་སྒོ་ནས་གཞན་ལ་དབང་བསྐུར་ཚུལ་གྱི་མཚམས་སྦྱོར་ཉུང་གསལ་ཁྱེར་བདེར་བཀོད་པ་གྲུབ་པ་མཆོག་གི་ཞལ་ལུང་།
ཞི་ཁྲོ་དགོངས་པ་རང་གྲོལ་སྔགས་གསོའི་ཆོ་གའི་སྒོ་ནས་གཞན་ལ་དབང་བསྐུར་ཚུལ་གྱི་མཚམས་སྦྱོར་ཉུང་གསལ་ཁྱེར་བདེར་བཀོད་པ་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ། །
ཞི་ཁྲོ་ཡོངས་རྫོགས་ལྷ་ལ་ཕྱག་འཚལ་ལོ། དེ་ལ་འདིར་ཞི་ཁྲོའི་སྔགས་གསོ་ཀུན་བཟང་དགོངས་རྒྱན་དང་འབྲེལ་བར་གཞན་ལ་དབང་བསྐུར་ན། སྦྱོར་བ་ཡོ་བྱད་ཀྱི་བཅས་གཤོམ་དང་། དངོས་གཞི་བདག་མདུན་མཆོད་བསྟོད་ཛཔ་ཀྱི་མཐར་ཐུག་པའི་བར་སྔགས་གསོའི་ཆོ་གའི་གཞུང་བཞིན་སོང་ནས་རིག་པའི་མེ་ཏོག་དོར་ཏེ་སློབ་མ་འཇུག་པར་གནང་བར་ནོད། དེ་ནས་སློབ་མ་ལ་ཁྲུས་དང་བགེགས་བསྐྲད། བསྲུང་འཁོར་བསྒོམ་པ།
མེ་ཏོག་བཀྱེ་བ་བཅས་བྱས་ལ། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་ཐོབ་པར་བྱ། དེའི་ཆེད་དུ་ཞི་ཁྲོའི་དབང་བསྐུར་ཟབ་མོ་གསན་ནས་དོན་ཉམས་སུ་བླངས་ཏེ་སེམས་ཅན་ཐམས་ཅད་དཔལ་ཀུན་བཟང་གདོད་མའི་མགོན་པོའི་གོ་འཕང་མཆོག་ལ་འགོད་
པར་བྱའོ་སྙམ་དུ་སེམས་བསྐྱེད་པ་གསལ་བཏབ་སྟེ་གསན་པར་ཞུ། དེ་ཡང་སྟོན་པ་ཐབས་མཁས་ལ་ཐུགས་རྗེ་ཚད་མེད་པ་མངའ་བ་དེ་ཉིད་ཀྱིས་གདུལ་བྱའི་བསམ་པ་དང་། དབང་པོ་དང་། སྐལ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་བསྟན་པ་ཐམས་ཅད་ཀྱང་བསྡུ་ན་ཐེག་པ་རིམ་དགུར་འདུས་ཤིང་། དེ་ལ་ཡང་ཐེག་པ་ཆེན་པོ་ཕ་རོལ་ཏུ་ཕྱིན་པ་བདེན་གཉིས་ལ་བཟང་ངན་བླང་དོར་དུ་བལྟ་བ་ལས། འདིས་ཀུན་རྫོབ་ཏུའང་ཆོས་རྣམས་ལ་མི་གཉིས་པའི་བསམ་སྤྱོད་དང་ལྡན་པས། འབྲས་བུའི་ངོ་བོ་སྣང་སྟོང་ཟུང་འཇུག་གི་ཆོས་སྐུར་རྟོགས་པར་བྱས་ལ་ཏིང་ངེ་འཛིན་གྱིས་གོམས་པར་བྱེད་པའི་ཕྱིར་འབྲས་བུ་ལམ་བྱེད་ཀྱི་ཁྱད་པར་དུ་འཕགས་པ་གསང་སྔགས་རྡོ་རྗེ་ཐེག་པ་ཡིན། དེ་ལྟར་ཡང་སློབ་དཔོན་སངས་རྒྱས་གསང་
བས། ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དང་། །ཀུན་རྫོབ་ཏུ་འང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས་སོ། །དེ་ལ་ཡང་སྔགས་གསར་རྙིང་གཉིས་ལས། འདིར་ཆེ་བ་དྲུག་ལྡན་གྱིས་ཁྱད་པར་དུ་འཕགས་པ་གསང་སྔགས་རྙིང་མ་ཡིན། དེ་ལའང་ཕྱི་ཐུབ་པ་རྒྱུད་ཀྱི་ཐེག་པ་དང་། ནང་པ་ཐབས་ཀྱི་རྒྱུད་ཀྱི་ཐེག་པ་གཉིས་ལས་ཕྱི་མ། དེ་ལའང་རྒྱུད་སྡེ་དང་སྒྲུབ་སྡེ་གཉིས་ཀྱི། འདིར་ལྷའི་ངོ་བོ་གསང་ཆེན་དམ་པ་རིགས་བརྒྱ་དང་བརྒྱུད་པའི་བབས་སོའི་དབང་གིས་དེ་གཉིས་ཀའི་རྩ་བར་གྱུར་པ་ཡིན། སྤྱིར་སྔ་འགྱུར་བ་ལ་བཀའ་གཏེར་དག་སྣང་གི་བབས་སོ་གསུམ་དུ་བཞུགས་པ་ལས། འདི་ནི་བཀའ་མ་ལས་ཀྱང་བཀའ་བབ་ལུང་བསྟན། སྨོན་ལམ་དབང་བསྐུར།
མཁའ་འགྲོ་གཏད་རྒྱ་སྟེ་ཁྱད་པར་གྱི་བརྒྱུད་པ་གསུམ་དང་ལྡན་ཅིང་། གཙོ་བོ་བརྒྱུད་ཐག་ཉེ་ཞིང་གཏེར་ཡིག་གི་དཔེ་དཔང་མངའ་བས་ཁུངས་བཙུན་པ་དང་། གང་ལ་གང་འདུལ་གྱི་དུས་དང་འཚམས་པར་མངོན་དུ་སྣང་བའི་ཕྱིར་ཟབ་ལམ་ནམ་ཡང་མི་ནུབ་པས་ཁྱད་པར་དུ་འཕགས་པ་གཏེར་གྱི་ཕྱོགས་སུ་གཏོགས་པ་ཡིན། དེ་ལའང་འཁྲུལ་མེད་གླིང་པ་ལྔའི་ནང་གསེས་གཏེར་ཆེན་ཀརྨ་གླིང་པ་ཞེས་རྩོད་པ་དང་བྲལ་བ་ཡོངས་སུ་གྲགས་པ་དེ་ཉིད་ཀྱི་གཏེར་ཁ་ལས་བྱོན་པ་སྟེ། འོ་སྐོལ་དུས་སྙིགས་མར་སྐྱེས་པའི་གང་ཟག་ལས་ངན་གྱི་བྱ་བས་གཡེངས་ནས་ཚུལ་བཞིན་ཉམས་སུ་ལེན་མ་ནུས་ན་ཡང་། ལན་གཅིག་རྣ་བར་ཐོས་པ་ཙམ་གྱིས་བར་དོའི་འཁྲུལ་སྣང་འཇིགས་སྐྲག་སྡུག་བསྔལ་ཐམས་ཅད་ལས་གྲོལ་ནུས་པའི་ཆོས་ཟབ་མོ་བར་དོའི་ཐོས་གྲོལ་ཆེན་མོའི་དབང་བསྐུར་བ་
ཡིན། དེ་ཡང་སྔོན་བྲམ་ཟེ་དུང་གི་ཕྲེང་བ་ཅན་ཞེས་བྱ་བའི་སློབ་དཔོན་མཁས་པ་ཞིག་ལ། སློབ་བུ་ལས་ངན་ཕྲག་དོག་ཅན་གྱིས་རང་གི་སློབ་དཔོན་ལ་ཆད་པ་དུ་མ་བཅད་ནས་བཀྲོངས། དེའི་རྣམ་སྨིན་གྱིས་སློབ་བུ་དེ་ཉིད་སེམས་ཅན་ལུས་སྲུལ་པོ་ཅན་ཞེས་བྱ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་བ་ཞིག་ཏུ་སྐྱེས་པ་དེ་ཐར་པའི་ཐབས་བཅོམ་ལྡན་འདས་དཔལ་ཀུན་ཏུ་བཟང་པོས་ཞི་ཁྲོ་ན་རག་དོང་སྤྲགས་ཀྱི་རྒྱུད་གསུངས་ཤིང་། སེམས་ཅན་དེའི་རྣ་བར་ཞི་ཁྲོའི་མཚན་དང་སྔགས་བསྒྲགས་ཤིང་དབང་བསྐུར་ན་ཐར་བར་གསུངས་ནས། བྱང་ཆུབ་སེམས་དཔའ་ཕྱག་ན་རྡོ་རྗེས་དེ་བཞིན་མཛད་པ་ལ་བརྟེན་ནས་སེམས་ཅན་ལུས་སྲུལ་པོ་དམྱལ་བ་ལས་ཐར་ཏེ་ལྷའི་གནས་སུ་རིག་འཛིན་མིའི་ཐོད་པ་ཅན་ཞེས་བྱ་བར་སྐྱེས་སོ། །དེ་ནས་ཆོས་འདི་ཆོས་སྐུ་ཀུན་ཏུ་
བཟང་པོས་དྲུག་པ་རྡོ་རྗེ་འཆང་ལ། དེས་སྟོན་པ་རྡོ་རྗེ་སེམས་དཔའ་ལ་དགོངས་པས་བྱིན་གྱིས་བརླབས་པས་རྒྱལ་བ་དགོངས་པའི་བརྒྱུད་པ་ཞེས་བྱའོ། །དེས་རྒྱ་གར་གྱི་རིག་འཛིན་དགའ་རབ་རྡོ་རྗེ། དེས་རྒྱ་ནག་གི་རིག་འཛིན་ཤྲཱི་སེང་ཧ། ས་ཨོ་རྒྱན་གྱི་རིག་འཛིན་པདྨ་འབྱུང་གནས་ལ་བརྡ་ཡི་སྒོ་ནས་བསྟན པས་རིག་འཛིན་བརྡ་ཡི་བརྒྱུད་པ་ཞེས་བྱའོ། །དེ་ནས་ཨོ་རྒྱན་རིན་པོ་ཆེ་བོད་དུ་བྱོན་ནས་ལོ་ཙཱ་ཀླུ་ཡི་རྒྱལ་མཚན་ལ་སོགས་རྗེ་འབངས་རྣམས་ལ་ཆོས་ཀྱི་སྙན་བརྒྱུད་དུ་གནང་། དེའི་ཚེ་སྡིག་བློན་ཤནྟི་ཞེས་བྱ་བས་མཁའ་འགྲོ་ཡེ་ཤེས་མཚོ་རྒྱལ་ཆོས་བྲོས་བྱོན་ནས་གནས་ལ་མ་སོང་བ་ལ་ཆད་པ་མང་དུ་བཅད་པའི་རྣམ་སྨིན་གྱིས་བློན་པོ་དམྱལ་བ་མནར་མེད་དུ་སྐྱེས་པ་དེ་འདྲེན་པའི་ཕྱིར་མཚོ་རྒྱལ་ཉིད་དམྱལ་གནས་སུ་བྱོན་པས་ཇི་ལྟར་བྱས་ཀྱང་འདྲེན་མ་ཐུབ་ནས།
འདི་ཇི་ལྟར་བྱས་ན་ཐར་པའི་ཐབས་ཡོད་ཅེས་གཤིན་རྗེ་ལས་མཁན་རྣམས་ལ་དྲིས་པས་ཞི་ཁྲོའི་དཀྱིལ་འཁོར་ཞལ་ཕྱེས་ན་ཐར། གཞན་ཐར་པའི་ཐབས་གང་ཡང་མ་མཆིས་ཟེར་བ་ལ། མཚོ་རྒྱལ་གྱིས་ཞི་ཁྲོའི་དཀྱིལ་འཁོར་ཞལ་ཕྱེས་པ་ཙམ་གྱིས་ལྕགས་སྲེག་གི་ཁང་པ་ཡང་ཞིག༔ ལྕགས་སྲེག་གི་ས་གཞི་ཡང་བསིལ་བར་གྱུར་ནས་བདུད་བློན་ཤནྟིས་གཙོས་པའི་དམྱལ་བའི་སེམས་ཅན་འབུམ་ཕྲག་ལྔ་དྲངས་སོ། །དེ་ནས་ཆོས་འདི་ཤིན་ཏུ་ཟབ་པས་ནུབ་ཀྱིས་དོགས་ནས་ཞི་ཁྲོ་བཀའ་མ་ཡང་དར་བར་མཛད། ཨོ་རྒྱན་ཡབ་ཡུམ་གྱིས་བཀའ་བགྲོས་ནས་མ་འོངས་པའི་དོན་དུ་གཏེར་ཁ་མང་དུ་སྦས་པ་ལས་འདི་ནི་མངའ་བདག་ཡབ་སྲས་དང་ལོ་ཙཱ་བ་ཅོག་རོ་ཀླུའི་རྒྱལ་མཚན་སོགས་ཀྱིས་གསེར་གཡུའི་མཎྜལ་ཕུལ་ནས། ཁྱེད་ཀྱི་ཐུགས་རྗེའི་བཀའ་དྲིན་
ལས་སྔོན་ཆད་ཐེག་པ་ཕྱི་ནང་གི་ཆོས་ཀྱི་སྒྲོན་མེ་དཔག་ཏུ་མེད་པ་ཐུགས་ལ་བཏགས་མོད་ཀྱང་ད་དུང་ཡང་བདག་ཅག་རྗེ་འབངས་རྣམས་དང་མ་འོངས་སྙིགས་དུས་འགྲོ་བ་རྣམས་ཀྱི་དོན་དུ་ཐེག་པ་ཕྱི་ནང་གི་ཆོས་ཐམས་ཅད་ཀྱི་འགག་དོན་གཅིག་ཏུ་དྲིལ་ནས་ཚེ་གཅིག་ལ་སངས་རྒྱས་པའི་ཆོས་ཡུན་རིང་པོར་དཀའ་སྤྱད་སྙིང་རུས་ཀྱི་འབད་རྩོལ་ལ་མ་ལྟོས་པར་ཐོས་པ་ཙམ་གྱིས་གྲོལ་བའི་ཆོས་ཟབ་ཅིང་ཉུང་ལ་དོན་འདུས་པ་ཞིག་བཀའ་བསྩལ་དུ་གསོལ། ཤུགས་དྲག་པོས་གསོལ་བ་བཏབ་པས། སློབ་དཔོན་ཆེན་པོས། ཀྱེ་མ་མངའ་བདག་རྒྱལ་པོ་ཡབ་སྲས་རྗེ་འབངས་རྣམས་ཀྱི་ཐུགས་བཞེད་ལྟར། དཔལ་ཀུན་ཏུ་བཟང་པོའི་དགོངས་པ་མངོན་དུ་ཕྱུང་བ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་གནད་འགག་གཅིག་ཏུ་དྲིལ་ནས་ཐོས་པ་ཙམ་གྱིས་ངན་
སོང་གི་སྐྱེ་སྒོ་གཅོད་པ། གོ་བ་ཙམ་གྱིས་བདེ་ཆེན་གྱི་ས་ལ་གཤེགས་པ། དོན་ཡིད་ལ་བྱེད་པ་རྣམས་ནི་ལྷུན་གྱིས་གྲུབ་པའི་རིག་འཛིན་ཕྱིར་མི་ལྡོག་པའི་ས་ལ་གཤེགས་པར་བྱེད་པ། གང་འབྲེལ་ཐམས་ཅད་དོན་ཆེན་པོ་དང་ལྡན་པའི་ཆོས་དེ་ལྟ་བུ་ཞིག་བདག་ལ་ཡོད་ཀྱང་གདུལ་བྱ་བློ་ཆུང་ཐེག་དམན་གྱི་རིགས་སྐལ་མེད་ལོག་ལྟ་ཐེ་ཚོམ་ཅན་གྱི་བློར་མི་ཤོང་ནས་སླར་སྐུར་པ་འདེབས་པས་ངན་སོང་དུ་འཕེན་པས་ན་ཁྱེད་རྣམས་ཀྱིས་རླུང་ཕྱོགས་ཙམ་ཡང་གཞན་ལ་མ་བསྒྲག་ཅིག །མ་འོངས་སྙིགས་དུས་ཀྱི་དོན་དུ་གཏེར་ལ་སྦ་བར་བྱའོ་ཞེས་གསུངས་ནས་ཆོས་ཐམས་ཅད་ཀྱི་མདོ་འགག་གཅིག་ཏུ་དྲིལ་ནས་ཟབ་ཆོས་ཞི་ཁྲོ་དགོངས་པ་རང་གྲོལ་ཞེས་བྱ་བར་མཚན་གསོལ་ཏེ་ལོ་ཙཱ་བ་ཀླུའི་རྒྱལ་མཚན་གྱི་སྐལ་བར་གནང་། མ་འོངས་སྙིགས་དུས་ཀྱི་འགྲོ་བ་བསོད་
ནམས་དམན་པ་རྣམས་ལ་དགོངས་ཏེ་དྭགས་ལྷ་སྒམ་པོའི་རི་ལྷ་བྲན་གར་བྱེད་པ་འདྲ་བའི་གནས་སུ་གཏེར་དུ་སྦས་པ། ཕྱིས་དུས་ལ་བབས་པའི་ཚེ་ལོ་ཙཱ་ཉིད་ཀྱི་སྐྱེས་མཐའ་གཏེར་སྟོན་གྲུབ་ཐོབ་ཆེན་པོ་ཀརྨ་གླིང་པས་སྤྱན་དྲངས་ཏེ་བཀའ་རྒྱ་དམ་པས་སྐུའི་སྲས་ཉི་ཟླ་ཆོས་རྗེ་ཁོ་ན་ལ་བཀའ་ཕལ་ཆེར་ཚང་བ་དང་། ལུང་ཟིན་གྱི་སློབ་མ་མཆོག་གྱུར་གྲུབ་ཐོབ་དངོས་གྲུབ་རྒྱ་མཚོ་ལ་དབང་བཞི་ཡོངས་རྫོགས་གནང་ནས་བརྒྱུད་པ་གསུམ་གྱི་བར་དུ་གཅིག་བརྒྱུད་ལས་མི་སྤེལ་བའི་བཀའ་རྒྱ་བཏབ་སྟེ་མི་རབས་གསུམ་དུ་གཅིག་བརྒྱུད་དུ་མཛད། དེ་ནས་ཨོ་རྒྱན་ཆེན་པོས་ལུང་བསྟན་པ་ལྟར་བརྒྱུད་པ་གསུམ་པ་བཀའ་བབས་རྒྱ་ར་བ་ནམ་མཁའ་ཆོས་ཀྱི་རྒྱ་མཚོ་ནས་རྒྱ་གྲོལ་ཏེ་རིམ་པར་སྤེལ་བ་ལས་བརྒྱུད་པའི་བཀའ་སྲོལ་མང་དུ་གྱེས་ཏེ་བོད་ཁམས་ཕལ་ཆེར་ཟབ་ཆོས་འདིའི་ཕྲིན་ལས་
ཀྱིས་ཁྱབ་པར་གྱུར་པ་ཡིན་ལ། དེང་སང་ཟུར་མང་ལུགས། ཀཿཐོག་ལུགས། གནས་མདོ་ལུགས་ཏེ་བརྒྱུད་ཚུལ་དང་ཕྱག་ལེན་མི་འདྲ་བ་གསུམ་བྱུང་བ་རྣམས་འདིར་གཅིག་ཏུ་འདུ་བ་ཙམ་དུ་མ་ཟད་བཀའ་མའི་ཞི་ཁྲོ་དོང་སྤྲགས་ཀྱང་འདིར་བཀའ་གཏེར་ཆུ་བོ་གཅིག་འདྲེས་སུ་དོན་གྱི་སོང་བ་ཡིན་པས། ན་རག་དོང་སྤྲུགས་མཚམས་མེད་ལྔ་སྦྱོང་གི་རྣལ་འབྱོར་སྤྱི་ཁྲུས་ཟབ་མོ་འདི་ཉིད་ཨོ་རྒྱན་ཆེན་པོའི་རྡོ་རྗེའི་གསུང་ལས། ཐོས་གྲོལ་འདི་ནི་བསྒོམ་མི་དགོས་པར་སངས་རྒྱས་པའི་ཆོས༔ ཐོས་པ་ཙམ་གྱིས་གྲོལ་བ་ཐོབ་པའི་ཆོས༔ མཚམས་མེད་པ་ལྔ་བསགས་པའི་མིའི་རྣ་ལམ་དུ་ཐོས་ན་ཡང་ངེས་པར་གྲོལ་བར་འགྱུར་རོ༔ འཆི་ཁར་འཚང་རྒྱ་བའི་མན་ངག་དུས་གསུམ་གྱི་སངས་རྒྱས་ཀྱིས་བཙལ་ཡང་འདི་ལས་ལྷག་པའི་ཆོས་
རྙེད་པར་མི་འགྱུར༔ ཞེས་གསུངས། དེ་ལྟར་ཟབ་ཆོས་ཁྱད་པར་དུ་འཕགས་པ་འདིའི་སྨིན་གྲོལ་གྱི་རིམ་པ་གཉིས་ལས། འདིར་སྨིན་བྱེད་ཀྱི་དབང་བསྐུར་བའི་སྐབས་ཡིན། དེ་ལའང་རྒྱས་པ་འཕྲད་ཚད་རང་གྲོལ། འབྲིང་པོ་འགྲོ་དྲུག་རང་གྲོལ། བསྡུས་པ་གཏོར་དབང་རེག་པ་དོན་ལྡན་དང་གསུམ སློབ་དཔོན་ཆེན་པོའི་མན་ངག་ཞལ་གདམས་ལས་ཇི་ལྟར་བསྟན་པ་བཞིན་ལམ་ལ་ཞུགས་པའི་རྣལ་འབྱོར་པ་རྣམས་ཀྱི་དམ་ཚིག་ཉམས་ཆག་ཐམས་ཅད་སྦྱོང་ཞིང་དབང་བཞིའི་ཡེ་ཤེས་ཀྱི་རྒྱུན་འཕོ་བར་བྱེད་པ་སྔགས་ཀྱི་གསོ་སྦྱོང་གི་ཆོ་ག་དང་འབྲེལ་བར་འདིར་དབང་བསྐུར་འབྲིང་པོ་མཐའ་རྟེན་གཏོར་དབང་དང་བཅས་པ་བསྒྲུབ་པར་བགྱི་བ་ལ། སློབ་དཔོན་དང་སློབ་མའི་བྱ་བ་གཉིས་ལས། བདག་ཉིད་ཀྱིས་བགྱིས་བར་འོས་པ་རྣམས་
ལེགས་པར་གྲུབ་པ་ལགས། ཁྱེད་རང་སློབ་མ་རྣམས་ཀྱི་བྱ་བའི་རིམ་པ་ལ་ལྔ་སྟེ། བཤགས་པའི་གཞི་དགོད་པ། མཎྜལ་ཕུལ་ཞིང་གསོལ་བ་གདབ་པ། ལྟུང་བ་བཤགས་པ། སྡོམ་པ་གཟུང་བ། དམ་ལ་བཞག་པའོ། །དང་པོ་བཤགས་པའི་གཞི་འགོད་པ་ལ། རང་རེ་གནས་པའི་གནས་ཁང་འདི་ཡང་ཐ་མལ་གྱི་གནས་ཁང་མ་ཡིན་པར་འོག་མིན་ཆོས་ཀྱི་དབྱིངས་ཀྱི་ཕོ་བྲང་དངོས་ཡིན་སྙམ་པ་དང་། སློབ་དཔོན་ཀྱང་ཐ་མལ་གྱི་ལུས་ཅན་མ་ཡིན་པར་ཁྱབ་བདག་གདོད་མའི་མགོན་པོ་དངོས་ཡིན་སྙམ་དུ་མོས་གུས་བསྐྱེད་ལ་ཉམས་ཆག་སྦྱོང་ཞིང་དབང་ལེན་པའི་ཡུལ་དུ་དམིགས་ྋནས་ཐོག་མར་བརྗོད་མེད་དོན་བཤགས་ལྷན་ཅིག་ཏུ་གསུང་བར་ཞུ། ཞེས་བརྡ་སྦྱར་ལ། ༀ། ཡེ་ཤེས་སྐུ་མཆོག་སོགས་ནས། རབ་གནོང་བཟོད་པར་
གསོལ། བར་དང་། གཉིས་པ་སྦྱོར་བ་སྔོན་འགྲོའི་ཆོས་རྣམས་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཎྜལ་འབུལ་དུ་གཞུག༔ གསོལ་བ་གདབ་པ་འདིའི་རྗེས་ཟློས་མཛོད། ཀྱེ་མ་བླ་མ་སོགས་ནས། དུས་འདིར་བསྐུར༔ དུས་འདིར་བསྐུར༔ བར་ལན་གསུམ། གསུམ་པ་ལྟུང་བ་བཤགས་པ་ནི། སྡོམ་པ་གསུམ་དང་འགལ་བའི་ཉེས་ལྟུང་རྣམས་ལ་གནོང་ཞིང་འགྱོད་གདུང་དྲག་པོས་བཤགས་ཚིག་འདི་ལྷན་ཅིག་ཏུ་གསུང་བར་ཞུ། དུས་གསུམ་སངས་རྒྱས་སོགས་ནས། ཚངས་པར་སྩལ་དུ་གསོལ། བར་དང་། བཞི་པ་སྡོམ་པ་བཟུང་བ་འདིའི་རྗེས་ཟློས་མཛོད། ཨེ་མ། ཕྱོགས་བཅུའི་སོགས་སྤྱི་དང་ཁྱད་པར་གྱི་སྐྱབས་འགྲོ། སོ་ཐར། བྱང་སེམས། སྔགས་སྡོམ་བླང་བ་རྣམས་ལན་གསུམ་རེ་རྗེས་ཟློས་བྱར་གཞུག །ལྔ་པ་དམ་ལ་བཞག་པ་འདི་ལ་གསན་པས་ཁྱབ་སྟེ། ཧཱུྃཿ འདི་ནི་དམ་
ཚིག་སོགས་སྐུ་གསུང་ཐུགས་ཀྱི་དམ་བཞག་བྱའོ། །ད་ནི་གཉིས་པ་དངོས་གཞི་ལ་གསུམ་སྟེ། ཉམས་ཆག་སྦྱོང་བ་ཁྲུས་ཀྱི་ལུང་དང་། ཡོན་ཏན་སྤེལ་བ་བཤགས་སྐོང་ཚོགས་མཆོད། ཡེ་ཤེས་གསོ་བ་དབང་གི་ཆོ་གའོ། །དང་པོ་རིགས་དྲུག་གནས་སྦྱོང་གི་རིམ་པ་ལ་དམིགས་པ་འདི་བཞིན་དུ་མཛོད་ཅིག །སློབ་བུས་སོགས་དམྱལ་བ་ནས་མིའི་བར་དང་། གཉིས་པ་སྒོ་གསུམ་གྱི་སྒྲིབ་སྦྱོང་ལ་གསུམ་ལས། དང་པོ་ལུས་སྒྲིབ་སྦྱོང་ང ༔ཡང་བཤགས་པ་དང་ཁྲུས་དབང་གཉིས་ལས། དང་པོ་ལུས་ཀྱི་སྒོ་ནས་ཕྱག་གིས་བཤགས་པ་ནི། རང་རང་རྣམས་ཀྱི་སོགས་ནས། སངས་སངས་དག་པར་མོས་ལ་ཕྱག་འཚལ་གྱི་རིམ་པ་ལྷན་ཅིག་ཏུ་གསུང་བཞིན་རྐྱང་ཕྱག་འཚོལ་ཅིག །བླ་མ་མཉམ་མེད་སོགས་ནས་དམ་ཅན་རྒྱ་མཚོའི་ཚོགས་ལ་ཕྱག་འཚལ་
ལོ། བར་དང་། སློབ་དཔོན་གྱིས། ཨ་ལ་ལ་ཧོཿསོགས། དབུགས་དབྱུང་དང་ཁྲུས་དབང་སོང་ནས། ད་ནི་གཉིས་པ་ངག་སྒྲིབ་སྦྱོང་བ་ལ་གཉིས་ཡོད་པ་ལས། དང་པོ་ངག་གསང་སྔགས་བཟླས་པའི་སྒོ་ནས་བཤགས་པ་འདི་ཚིག་ཕྱིར་སེམས་གཞོལ་བས་ལྷན་ཅིག་ཏུ་གསུང་བར་ཞུ། སྤྱི་གཙུག་པད་ཟླའི་སོགས་ནས་མྱུར་དུ་དྲང་དུ་གསོལ། བར། སློབ་དཔོན་གྱིས། བླ་མ་རྡོ་རྗེ་སེམས་དཔའི་སོགས་ནས། ཐིམ་པར་མོས་ཤིག༔ ཅེས་དང་། ཁྲུས་དབང་བཅས་སོང་ནས། ད་གསུམ་པ་ཡིད་སྒྲིབ་སྦྱོང་བ་ལའང་གཉིས་ཀྱི། དང་པོ་ཡིད་བསྒྲིབ་བྱ་སྒྲིབ་བྱེད་ལས་འདས་པ་མ་བཅོས་གཉུག་མའི་ཀ་དག་གི་ངང་དུ་མཉམ་པར་བཞག་བཞིན་པས་ལྟ་བའི་ཀློང་བཤགས་འདི་ལྟར་ལྷན་ཅིག་ཏུ་གསུང་བར་ཞུ། ཨོཾ༔ཆོས་ཀྱི་དབྱིངས་ཉིད་སོགས་ནས། མཐོལ་ལོ་བཤགས༔ བར་དང་། ཁྲུས་
དབང་བཅས་བྱའོ། །ད་ནི་རྩ་བའི་གཉིས་པ་ཡོན་ཏན་སྤེལ་བ་བཤགས་སྐོང་ཚོགས་མཆོད་ཀྱི་རིམ་པ་རྣམས་དཔོན་སློབ་ལྷན་དུ་གསུང་བར་ཞུ་ཞེས་བརྡ་སྦྱར་ལ། ༀ། དང་པོ་བདག་དང་སོགས་ཐེག་པ་ལམ་ཞུགས་ཀྱི་བཤགས་པ། དག་གྱུར་གྱི་སྐོང་བ། ཚོགས་རྫས་ལ་བགེགས་བསྐྲད་པ། བྱིན་རླབས། ཨོཾ། ཚོགས་ཞིང་སྤྱན་འདྲེན། ཕྱི་ནང་གི་ཚོགས་མཆོད། བར་བཤགས་བསྒྲལ་སྟོབ་རྣམས་མཐར་ཆགས་སུ་བཏང་ངོ་། །ད་ནི་གསུམ་པ་ཡེ་ཤེས་གསོ་བ་དབང་གི་ཆོ་ག་ལ། དཀྱིལ་འཁོར་དུ་འཇུག་པ་དང་། ཞུགས་ནས་དབང་བསྐུར་བ་གཉིས་ལས། དང་པོ་ལ་ལྔ་སྟེ། གསོལ་བ་གདབ་པ། བྱིན་དབབ་པ། མེ་ཏོག་དོར་བ། མིག་དབྱེ་བ། མཐོང་བ་བསྟན་པའོ། །དང་པོ། དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་
མཎྜལ་འབུལ་དུ་གནུག །མཚམས་སྦྱོར་དང་བཅས་མིག་དར་དང་མེ་ཏོག་གཏད། གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་མགོན་པོ་སོགས་ལན་གསུམ། གཉིས་པ་ཡེ་ཤེས་དབབ་པ་ལ་དམིགས་པ་འདི་བཞིན་མཛོད། སློབ་མ་སེང་གེས་སོགས་ནས། བརྟན་པར་བྱ་ཞིང་རྗེས་ཟློས་དང་བཅས་མེ་ཏོག་དོར་གཞུག །མིག་དབྱེ་དང་མཐོང་བ་བསྟན་པ་རྣམས་དལ་ལ་ལྷོད་ཆགས་པ་བྱའོ། །ད་ནི་གཉིས་པ་དབང་བསྐུར་བ་ལ་ཡང་། བུམ་དབང་། གསང་དབང་། ཤེར་དབང་། ཚིག་ྋ དབང་། བྱིན་རླབས་གཏོར་དབང་དང་ལྔ་ཡོད་པ་ལས། དང་པོ་བུམ་པའི་དབང་ལ་ཐོག་མར་བུམ་དབང་གི་ལམ་བསྐྱེད་རིམ་དབྱིབས་ཀྱི་རྣལ་འབྱོར་དང་འགལ་བའི་དམ་ཚིག་ཉམས་ཆག་ཐམས་ཅད་བཤགས་ཤིང་སྐོང་བའི་ཆོ་ག་འདི་ལྷན་ཅིག་ཏུ་གསུང་བར་ཞུ། ཨོཾ། བདག་ལུས་གཞལ་ཡས་སོགས་དང་།
གཏོར་མའི་སྐོང་བ་བཅས་བྱ། ད་བུམ་དབང་དངོས་ལ། ཕྱི་ཕན་པའི་དབང་དང་། ནང་ནུས་པའི་དབང་གཉིས་ལས། དང་པོའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་ཧོ༔ བླ་མ་རྡོ་རྗེ་སོགས་ལན་གསུམ། ཞེས་གསོལ་བ་བཏབ་པས་གདན་གསུམ་ཚང་བའི་སོགས་ནས་རིག་པའི་དབང་ལྔ་ཀ་རྫོགས་མཐར། དེ་དག་གིས་མ་རིག་པ་ལྔ་སྦྱངས་ནས་རིག་པའི་ཡེ་ཤེས་ལྔ་ཐོབ་བྱེད་ཡིན་ལ། དེ་བརྟན་པར་བྱ་བའི་སླད་དུ་སླར་ཡང་རྣམ་རྒྱལ་བུམ་པའི་དབང་བསྐུར་བ་ནི། ཧཱུྃཿ བུམ་པ་འདི་ནི་སོགས་ནས། རྗེས་འབྲེལ་ཕྱག་མཚན་ལྔ་གཏད་པ་བཅས་བྱ། ད་ནི་གཉིས་པ་ནང་ནུས་པ་འཇུག་པ་ལྷ་སྐུ་ཕྱག་རྒྱའི་དབང་བསྐུར་ཞུ་བའི་སླད་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་ཧོ༔ བླ་མ་སོགས་ལན་གསུམ། ཁྱེད་རང་རྣམས་
སེང་གེས་བཏེགས་པའི་སོགས་སྤྲོས་བཅས་ལྷ་དབང་ཡོངས་རྫོགས་དབང་ཕྱུག་ཉེར་བརྒྱད་ཀྱི་མཐར་ཐུག་བར་བསྐུར། སྲོག་ལ་དབང་ཐོབ་པར་གྱུར་ཅིག །བར་དང་། འདི་ལྟར་སྣང་བའི་སོགས་ངོ་སྤྲོད་ཅིང་རྟོགས་པ་བསྐྱེད། གཉིས་པ་གསང་བའི་དབང་ལ། ཐོག་མར་གསང་དབང་གི་ལམ་རང་བྱིན་གྱིས་བརླབས་པ་རྩ་རླུང་གི་རྣལ་འབྱོར་དང་འགལ་བའི་དམ་ཚིག་ཉམས་ཆག་ཐམས་ཅད་བཤགས་ཤིང་སྐོང་བའི་ཆོ་ག་འདི་ལྷན་ཅིག་ཏུ་གསུང་བར་ཞུ། ཨཱ༔ ལུས་གནས་ཡི་གེ་སོགས་དང་། རཀྟའི་སྐོང་བ། གསང་དབང་དངོས་དང་རྗེས་འབྲེལ་བཟླས་ལུང་སྐབས། བོ་དྷི་ཙིཏྟ་དང་ཡིག་བརྒྱ་ལན་གསུམ་རེ་རྗེས་ཟློས་བྱར་གཞུག་ཅིང་རྟོགས་པ་བསྐྱེད། གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ལ་ཐོག་མར་ཤེར་དབང་དང་འབྲེལ་བའི་ལམ་རྗེས་ཆགས་ཐིག་ལེའི་རྣལ་འབྱོར་དང་འགལ་བའི་དམ་ཚིག་
ཉམས་ཆག་ཐམས་ཅད་བཤགས་ཤིང་སྐོང་བའི་ཆོ་ག་འདི་ལྷན་ཅིག་ཏུ་གསུང་བར་ཞུ། ཧཱུྃཿ ལུས་ཁམས་བདུད་རྩི་སོགས་དང་། བདུད་རྩི་སྨན་གྱི་སྐོང་བ། ཤེར་དབང་དངོས་དང་། རྟོགས་པ་བསྐྱེད་པའི་བར་བྱའོ། །བཞི་པ་ཚིག་དབང་རིན་པོ་ཆེ་བསྐུར་བ་ལ་ཐོག་མར་ཚིག་དབང་དང་འབྲེལ་བའི་ལམ་དེ་བཞིན་ཉིད་ཀྱི་རྣལ་འབྱོར་ལས་འདས་པའི་དམ་ཚིག་ཉམས་ཆག་ཐམས་ཅད་བཤགས་ཤིང་སྐོང་བའི་ཆོ་ག་འདི་ལྷན་ཅིག་ཏུ་གསུང་བར་ཞུ། ཐབས་དང་ཤེས་རབ་སོགས་དང་། མར་མེའི་སྐོང་བ། ཚིག་དབང་དངོས་དང་རྟོགས་པ་བསྐྱེད་པ་བཅས་སོང་ནས། ད་ལྔ་པ་བྱིན་རླབས་གཏོར་མའི་དབང་བསྐུར་བ་ལ་ཐོག་མར་རྡོ་རྗེ་ཐེག་པའི་དམ་ཚིག་གི་གནད་ཐམས་ཅད་བསྡུས་ཏེ་བཤགས་ཤིང་ཆོས་ཉིད་དོན་དེ་རྟོགས་པའི་སྐོང་བ་འདི་དག་ལྷན་ཅིག་ཏུ་གསུང་བར་ཞུ། དུས་
གསུམ་བདེ་གཤེགས་སོགས་དང་། ཆོས་ཉིད་དོན་སྐོང་། གཏོར་དབང་དངོས། མཐའ་རྟེན་བཀྲ་ཤིས་རྫས་རྟགས་རྒྱལ་སྲིད་སྣ་བདུན་བཅས་སྤྱི་འགྲེས་ཟུར་གསལ་ལྟར་སོང་ནས། སྤྱི་དོན་གསུམ་པ་རྗེས་བརྟན་ཅིང་མཐའ་རྒྱས་པར་བྱེད་པ་ལ་གསུམ་སྟེ། དམ་ཚིག་ཁས་བླང་བ། དགའ་སྟོན་བྱ་བ། སྨོན་ལམ་གདབ་པ་རྣམས་ལས། དང་པོ་གསང་སྔགས་རྡོ་རྗེ་ཐེག་པའི་དབང་གི་སྲོག་རྩ་སྤྱི་དང་ཁྱད་པར་གྱི་སྡོམ་པས་དམ་ཚིག་མཐའ་དག་ཚུལ་བཞིན་བཟུང་བར་བགྱིའོ་སྙམ་པས་དམ་བཅའ་ཉེར་བརྒྱད་པ་འདི་ལྷན་ཅིག་ཏུ་གསུང་བར་ཞུ། ༀ། རྣལ་འབྱོར་དབང་པོ་སོགས་ནས། བསྩལ་དུ་གསོལ། བར་དང་། སླར་ཡང་བསྡུས་ཏེ་ཁས་བླངས་པ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ་གྱིས་དམ་ཚིག་ཁས་བླངས་དང་ལུས་ལོངས་སྤྱོད་འབུལ་ཞིང་། དེ་ལྟར་དབང་བསྐུར་ལེགས་
པར་ཐོབ་པའི་གཏང་རག་ཏུ་མཎྜལ་ཕུལ་མཛོད། ཅེས་མནྜལ་འབུལ། གཉིས་པ་དགའ་སྟོན་ཚོགས་ལ་རོལ་བ་ནི། ཧོ༔ ཚོགས་ཀྱི་མཆོད་པ་རྒྱན་དུ་རོལ། ཨ་ལ་ལ་ཧོཿཞེས་བརྡ་དང་བརྡས་འབུལ་ལེན་གྱིས་དཔོན་སློབ་ཐམས་ཅད་ཚོགས་ཀྱི་འཁོར་ལོའི་དགའ་སྟོན་ཚིམ་པ་དྲུག་ལྡན་དུ་རོལ། ཚོགས་གླུ་ལེན་པར་སྤྲོ་ན་ཅང་ཏེའུ་སོགས་ཀྱི་སྒྲ་དང་བཅས་ལེན། གསུམ་པ་གསང་སྔགས་ཟབ་མོའི་ལམ་འདིར་བརྟེན་ནས་བྱས་བསགས་ཀྱིས་དགེ་ཚོགས་ཆུད་མི་ཟ་ཞིང་འདོད་པའི་དངོས་གྲུབ་དོན་གཉིས་ཀྱི་འབྲས་བུ་མྱུར་དུ་འགྲུབ་ཕྱིར་བརྡ་དོན་རྟགས་ཀྱི་རྟེན་འབྲེལ་དགོས་པ་ཁྱད་འཕགས་སྣང་གསལ་མར་མེའི་སྨོན་ལམ་འདི་ཉིད་འདུན་པ་རྩེ་གཅིག་པས་གསུང་བར་ཞུ། ཧཱུྃཿ བླ་མེད་གསང་བ་སོགས་ནས། འགྲུབ་པར་ཤོག །བར་དང་། གཞན་ཡང་སྤྲོ་ན་སྨོན་ལམ་ཇི་ལྟར་རིགས་པ་བྱས་ལ་སློབ་
མ་རྣམས་རང་གནས་སུ་གཏང་། སློབ་དཔོན་གྱིས་ཆོ་གའི་རྗེས་རིམ་རྣམས་དཀྱུས་སུ་བསྟན་པ་བཞིན་མཐར་དབྱུང་བས་གྲུབ་བོ། །ཞེས་པ་འདི་ཡང་སྦས་ཡུལ་ཀརྨ་རོང་དུ་གྲུབ་རིགས་ཀྱི་མྱུ་གུར་འཁྲུངས་ཤིང་ལམ་འདིར་མོས་པའི་སྔགས་ཀྱི་རྣལ་འབྱོར་པ་པདྨ་ཚེ་མཆོག་རྡོ་རྗེས་དོན་གཉེར་ཆེན་པོས་བསྐུལ་བའི་ངོར། རྒྱལ་ཁམས་པ་སངས་རྒྱས་རྡོ་རྗེས་སྒྲུབ་སྡེ་ཀུན་གྲོལ་འོད་གསལ་བསམ་གཏན་ཁང་བུར་བྲིས་པ་འདིས་ཀྱང་ལམ་ཞུགས་རྣམས་ཀྱི་རྒྱུད་སྨིན་ཅིང་གྲོལ་བའི་རྒྱུར་གྱུར་ཅིག རྩེའི་སླར་ཡང་མཚམས་སྦྱོར་ཚིག་སྣ་ཅུང་ཟད་བསྲིངས་ཤིང་ཞུས་དག་པར་བགྱིས་པ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།