ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བླ་མ་བརྒྱུད་པའི་གསོལ་འདེབས་ཐུགས་དམ་གནད་བསྐུལ།
ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བླ་མ་བརྒྱུད་པའི་གསོལ་འདེབས་ཐུགས་དམ་གནད་བསྐུལ་ཞེས་བྱ་བ། ༀ་ཨཱཿཧཱུྃ། ཐོག་མའི་མགོན་པོ་ཆོས་སྐུ་ཀུན་ཏུ་བཟང་། །དྲུག་པའི་བདག་ཉིད་རྒྱལ་བ་རྡོ་རྗེ་འཆང་། །འདྲེན་པའི་གཙོ་བོ་ཐུགས་མཆོག་རྡོ་རྗེ་སེམས། །རྒྱལ་བ་དགོངས་པའི་བརྒྱད་པ་ལ་གསོལ་བ་འདེབས། །སྤྲུལ་པའི་སྐུ་མཆོག་རིག་འཛིན་དགའ་རབ་ཞབས། །རྒྱལ་བའི་སྲས་མཆོག་གུ་རུ་ཤྲཱི་སེང་། །རྡོ་རྗེའི་སྐུ་བརྙེས་འཆི་མེད་པདྨ་འབྱུང་། །གསང་སྔགས་སྣོད་ལྡན་མཁའ་འགྲོ་མཚོ་རྒྱལ་མ། །རིག་འཛིན་རིག་པའི་བརྒྱུད་པ་ལ་གསོལ་བ་འདེབས། །ཟབ་གཏེར་མངའ་བདག་ཀརྨ་གླིང་པ དང་། །ཐུགས་ཀྱི་སྲས་མཆོག་ཆོས་རྗེའི་མཚན་ཅན་ཞབས། །སྙིགས་དུས་འགྲོ་མགོན་སུརྱ་ཙནྡྲའི་ཞབས། །གང་ཟག་སྙན་ཁུང་བརྒྱུད་པ་ལ་གསོལ་བ་
འདེབས། །ཆོས་ཀྱི་བདག་པོ་རྒྱ་བཙུན་ནམ་མཁའི་མཚན། །རིམ་གཉིས་དོན་རྟོགས་བསོད་ནམས་འོད་ཟེར་དང་། །ཚོགས་གཉིས་མཐར་ཕྱིན་པུཎྱེ་ཤྲཱིའི་ཞབས། །དོན་གཉིས་ལྷུན་གྲུབ་བསོད་ནམས་ཆོས་སྐྱོང་བ། །དུས་གསུམ་འདྲེན་མཆོག་སྣ་ཚོགས་རང་སར་གྲོལ། །ཁམས་གསུམ་འགྲོ་མགོན་ཀུན་དགའ་གྲགས་པའི་དཔལ། །སྐུ་གསུམ་རིགས་འདུས་མདོ་སྔགས་བསྟན་འཛིན་རྗེ། །སྣང་བཞི་གོང་བགྲོད་ཕྲིན་ལས་ལྷུན་གྲུབ་རྩལ། །སྐུ་བཞིའི་དབང་ཕྱུག་འགྱུར་མེད་རྡོ་རྗེའི་སྡེ། །དབང་བཞིའི་དོན་སྟོན་ལོ་ཆེན་དྷརྨ་ཤྲཱི། །རྒྱལ་བའི་སྲས་པོ་རིན་ཆེན་རྣམ་པར་རྒྱལ། །སྤྲལ་པའི་སྐྱེས་མཆོག་པདྨ་བསྟན་འཛིན་དང་། །རིག་འཛིན་གདུང་འཚོབ་ཀརྨ་བི་ཛ་ཡ། །བདེ་སྟོང་ལྷན་སྐྱེས་ཕྲིན་ལས་ཆོས་ཀྱི་སྒྲོན། །བཀའ་བབ་བདུན་ལྡན་རྡོ་རྗེ་གཟི་བརྗིད་རྩལ། །ཆོས་ཉིད་མངོན་གཟིགས་
འགྱུར་མེད་ངེས་དོན་དབང་། །སྨིན་གྲོལ་ཀློང་མཛོད་བདུད་འཇོམས་འགྲོ་འདུལ་གླིང་། །རིགས་བརྒྱའི་ཁྱབ་བདག་རྩ་བའི་བླ་མ་དང་། །སྣང་སྟོང་དབྱེར་མེད་ཡི་དམ་ཞི་ཁྲོའི་ལྷ། །མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས། །རྩ་གསུམ་ལྷ་ཚོགས་རྣམས་ལ་གསོལ་བ་འདེབས། །གང་ལ་གང་འདུལ་བཀའ་བརྒྱུད་བླ་མ་རྣམས། །ཁྱེད་ཀྱི་བསྟན་པ་ཤིན་ཏུ་ཉམས་དམའ་ནས། །དུས་འདིར་སྐྱེས་པའི་རྣལ་འབྱོར་ཡིད་ཕམ་པས། །འགྲོ་ཀུན་འཁོར་བའི་འདམ་ནས་དྲང་དུ་གསོལ། །སྨྲེ་ངག་གདུང་བའི་ང་རོས་ཁྱོད་འབོད་ན། །སྔོན་གྱི་དམ་བཅའ་གཉན་པོ་ད་དགོངས་ལ། །མཁའ་དབྱིངས་ཀློང་ནས་མཚན་དཔེའི་ཞལ་བསྟན་འཚལ། །འགྲོ་ཀུན་འཁོར་བའི་འདམ་ནས་དྲང་དུ་གསོལ། །གྲག་སྟོང་ཚངས་པའི་གསུང་གི་སྒྲ་སྒྲོགས་ནས། །ཁྱེད་ཀྱི་ཐུགས་མཛོད་
གཏེར་གྱི་སྒོ་ཕྱེས་ལ། །མཁྱེན་རབ་ཐུགས་རྗེའི་འོད་ཟེར་རབ་བཀྱེས་ནས། །འགྲོ་ཀུན་འཁོར་བའི་འདམ་ནས་དྲང་དུ་གསོལ། །དུས་མཐའི་འགྲོ་རྣམས་མ་ལུས་ད་སྒྲོལ་ཅིག །རྣམ་དག་དབང་བཞིའི་ཆུ་བོ་ད་བསྐུར་ཅིག །ཉོན་མོངས་འཁྲུལ་པའི་རྒྱུ་བཞི་ད་ཁྲོལ་ཅིག །འགྲོ་ཀུན་འཁོར་བའི་འདམ་ནས་དྲང་དུ་གསོལ། །བདེ་གཤེགས་སྐུ་བཞིའི་འབྲས་བུ་ད་སྩོལ་ཅིག །མཐའ་ཡས་ཕ་མ་མཁའ་མཉམ་སེམས་ཅན་རྣམས། །མ་ལུས་འདྲེན་པའི་བླ་མར་བདག་གྱུར་ཅིག །འགྲོ་ཀུན་འཁོར་བའི་འདམ་ནས་དྲང་དུ་གསོལ། །ཞེས་པའང་རྒྱ་བཙུན་ཆེན་པོའི་གསུང་སོར་བཞག་ལ་གཏེར་ཆེན་འགྲོ་འདུལ་གླིང་པའི་གསན་ཡིག་ལྟར་གྱི་བརྒྱུད་རིམ་ཞལ་བསྐངས་ཏེ་ཞི་ཁྲོའི་གསོ་སྦྱོང་གི་ཆོ་གའི་ཆ་ལག་ཏུ་གཏེར་སློབ་བཛྲ་བུདྡྷས་བྲིས་པ་དགེ་ལེགས་སུ་གྱུར་ཅིག། །།