ཞི་ཁྲོའི་སྔགས་གསོའི་ཆོ་གའི་ཡན་ལག་ཚེ་འདས་རྗེས་འཛིན་རིགས་དྲུག་དོང་སྤྲུགས།
ཞི་ཁྲོའི་སྔགས་གསོའི་ཆོ་གའི་ཡན་ལག་ཚེ་འདས་རྗེས་འཛིན་རིགས་དྲུག་དོང་སྤྲུགས་ཞེས་བྱ་བ་བཞུགས་སོ།
བླ་མ་དང་གཉིས་སུ་མེད་པའི་བཅོམ་ལྡན་འདས་རྒྱལ་བ་ཞི་ཁྲོའི་ལྷ་ཚོགས་ལ་ཕྱག་འཚལ་ལོ། ཐམས་ཅད་ཀྱི་རྒྱལ་པོ་དགོངས་པ་རང་གྲོལ་གྱི་སྒོ་ནས་ཚེ་འདས་ལ་ཕན་གདགས་ཚུལ་ལ་རྟོགས་པ་མཆོག་དང་ལྡན་ཞིང་སྙིང་རྗེ་ཆེན་པོའི་རྩི་དང་ལྡན་པའི་སློབ་དཔོན་གྱིས། སྦྱོར་བ་ཞི་ཁྲོའི་དཀྱིལ་འཁོར་དབང་རྫས་བཅས་གཞུང་བཞིན་བཤམས་པའི་ལྷོ་སྒོར་རིགས་དྲུག་གི་དལ་དུ་མིང་བྱང་ནྀ་རྟེན་བཅས་དགོད། གཞན་
ཡང་སྦྱོང་ཆས། ཏིལ་དང་མེ་ཆུ། བྲབ་རྫས། ལན་ཆགས་བདག་པོ་སྤྱི་ལ་བགེགས་གཏོར་གཅིག །ཐུབ་དྲུག་སྤྱི་ལ་ལྷ་བཤོས་གཅིག༔ ཟས་བསྔོ་སོགས་འོག་ཏུ་དགོས་པའི་ཡོ་བྱད་ཚང་བར་འདུ་བྱ། ཆོ་ག་སྔགས་གསོའི་དཀྱུས་བཞིན་ལྷག་མའི་མཐར་ཐུག་བར་བཏང་། འདིར་སྤྲོ་ན་ལས་བུམ་དུ་རྡོར་སེམས་བསྐྱེད་བཟླས་འོད་ཞུ་བཅས་བྱ་ཞིང་། མ་བྱས་ཀྱང་ཆད་སྐྱོན་མེད། གཤིན་དོན་གནས་ལུང་གི་ཆོ་ག་དངོས་ལ། རྟེན་བསྐྱེད་རྣམ་ཤེས་དགུག་ཅིང་
བསྟིམ། བགེགས་དང་སྡིག་སྦྱོང་རིགས་དྲུག་འདྲེན། །དབང་བསྐུར་ཟས་གཏད་སྨོན་ལམ་གདབ། །ནད་སྒྲིབ་སྦྱོང་དང་ལམ་བསྟན་ཅིང་། །གནས་སྤར་རྟེན་སྦྱང་སཱཙྪ་གདབ། །ཅེས་བཅུ་གཉིས་ལས། དང་པོ་ནི། རྟེན་ལས་སྔགས་ཀྱིས་བསང་། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ་གིས་སྦྱངས། སྟོང་པའི་ངང་ལས་པད་དཀར་ཟླ་བའི་སྟེང་། །ནྲྀཿལས་ཚེ་འདས་ཕུང་ཁམས་སྐྱེ་མཆེད་ཀུན། །གསོན་གྱི་རྣམ་པས་ཐལ་སྦྱར་མེ་ཏོག་བཅས། །བླ་མ་ལྷ་ལ་གུས་པས་འཁོད་པར་གྱུར། །གཉིས་པ་རྣམ་ཤེས་དགུག་པ་ནི། ཧཱུྃ༔ བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཧཱྃ་ལས་འོད་འཕྲོས་ཚེ་འདས་རྣམ་ཤེས་དེ༔ རིགས་དྲུག་གང་ན་ཡོད་པའི་ས་དེ་ནས༔ བདག་གི་འོད་ཀྱིས་རེག་མ་ཐག་ཏུ་ནི༔ རྣམ་ཤེས་ནྲ་དེ་ཨ་དཀར་གཅིག་ཏུ་གྱུར༔ མདུན་དུ་བཀུག་ནས་མཚན་བྱང་རྟེན་ལ་ཐིམ༔ ལྕགས་ཀྱུའི་ཕྱག་རྒྱ་བཅས། ན་
མོ། བྱིན་རླབས་ཀྱི་རྩ་བ་བླ་མ་རྣམས་ཀྱི་བདེན་པ་དང་། བསླུ་བ་མེད་པ་དཀོན་མཆོག་གསུམ་གྱི་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་རྣམས་ཀྱི་བདེན་པ་དང་། དོན་དམ་རང་བཞིན་གྱི་རྣམ་པར་དག་པའི་བདེན་པ་དང་། ཀུན་རྫོབ་རྟེན་འབྲེལ་བསླུ་བ་མེད་པའི་བདེན་པ་དང་། བཅོམ་ལྡན་འདས་བདེར་གཤེགས་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པའི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས་རང་བཞིན་སྐྱེ་གནས་ཀྱི་བར་དོ་ནས་ཆོས་ཉིད་དང་སྲིད་པའི་བར་དོར་བརྒྱུད་ཁ་འཁྱལ་བའི་ཚེ་འདས་ཆེ་གེ་མོའི་རྣམ་པར་ཤེས་པ་འགྲོ་བ་རིགས་དྲུག༔ སྐྱེ་གནས་རྣམ་པ་བཞི། སྲིད་པ་བར་མ་དོ་གང་དུ་གནས་ཀྱང་སྐད་ཅིག་ཡུད་ཙམ་ལ་འདིར་མཆིས་པར་གྱུར་ཅིག༔ ནྲྀ་ཡཾ་ཛཿབཛྲ་ཨངྐུ་ཤ་ཛ༔ ཞེས་པས་
རྣམ་ཤེས་དང་། ཨ་ནྲྀ་སུ་ཏྲི་པྲེ་དུ་མ་མ་ཨངྐུ་ཤ་ཛ༔ ཞེས་པས་རིགས་དྲུག་གི་བག་ཆགས་དགུག༔ ཛཿཧཱུྃ་བཾ་ཧོཿས་རྣམ་ཤེས་རྟེན་ལ་བསྟིམ། ཏིཥྛ་བཛྲ་ས་མ་ཡ་ལྷན། ཞེས་པས་རྟེན་དང་དབྱེར་མེད་དུ་བག་ཕེབ་སྟེ་འཁོད་པར་བསམ་མོ། །གསུམ་པ་ནི་བགེགས་གཏོར། རཾ་ཡཾ་ཁཾ་གིས་བསང་སྦྱང་། ཨོཾ་་ཨཱཿཧཱྃ་ཧོཿས་བརླབ། གཏོར་མ་གསུམ་རྟེན་ལ་བསྐོར་ཞིང་ཨོཾ་སརྦ་བིགྷན་ན་མཿསརྦ་ཏ་ཐཱ་ག་ཏེ་བྷྱོཿབི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྤ་ཏེ་སྥ་ར་ཎ་ཧི་མཾ་ག་ག་ན་ཁཾ་གྲྀཧྥེ་ཨི་དཾ་བ་ལིཾ་ཏ་ཡེ་སྭཱ་ཧཱ། ཞེས་ལན་གསུམ། ཏིང་ལོ་དང་ཆངས་བུས་བསྐོར་ཞིང་། ཨོཾ་སུམྦྷ་ནི་སུམྦྷ་ནི་ཧཱུྃ། གྲྀ་ཧྞ་གྲྀ་ཧྞ་ཧཱུྃ། གྲྀ་ཧྞ་པ་ཡ། གྲྀ་ཧྞ་པ་ཡ་ཧཱུྃ། ཨཱ་ན་ཡ་ཧོ༔ བྷ་ག་ཝཱན་བིདྱ་རཱ་ཛ་ཡ་ཧཱུྃ་ཕཊ། ཅེས་ལན་གསུམ་དང་། ང་ཉིད་ལྷ་ཡི་ང་རྒྱལ་གྱིས༔ འོད་དང་འོད་ཟེར་ཕྱོགས་བཅུར་འཕྲོས༔ སྟེང་འོག་ཕྱོགས་མཚམས་ཐམས་ཅད་ཀུན༔ རང་རིག་སྟོང་གསལ་རིག་
པའི་མདངས༔ ཀུན་བཟང་རིགས་ལྔ་རྡོ་རྗེ་སེམས༔ རབ་འཇིགས་ཁྲག་འཐུང་སྤྲུལ་པའི་ཚོགས༔ སྣང་ལ་རང་བཞིན་མེད་པ་ཡིས༔ རབ་ཏུ་གང་ནས་འོད་འཕྲོས་པས༔ ཚེ་འདས་འདི་ལ་གནོད་བྱེད་ཅིང་༔ སྲོག་གཅོད་མདངས་འཕྲོག་གཤིན་ལྕགས་བགེགས། ཉོན་མོངས་མ་རིག་རྒྱུ་ལས་བྱུང་༔ རྒྱུ་དྲུག་འཁོར་བའི་ལམ་དགག་ཕྱིར༔ འདི་རུ་མ་འདུག་གཞན་དུ་དེངས༔ ཧཱྃ་ཧཱྃ་ཨུ་ཙཎྚ་ཡ་ཕཊ༔ བདེན་སྟོབས་བརྗོད་པ་སྔོན་དུ་འགྲོ་བས། ཚེ་ལས་འདས་པ་གསོན་གྱི་དུས་སུ་ཚེ་གནས་པ་དང་གཤིན་གྱི་དུས་སུ་ཟ་འདྲེ་ཤི་གཤེད་བྱེད་ཅིང་སྡིག་པ་སྦྱོང་བ་ལ་བར་དུ་གཅོད་པའི་བགེགས་ཐམས་ཅད་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་
རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། དྲག་སྔགས་དང་བཅས་གཏོར་མ་ཕྱི་རོལ་དུ་དོར། མཚོན་ཆ་ལྔ་ཡི་གུར་དུ་གྱུར་ནས་གཤེད་དང་བགེགས་ཀྱིས་བསྐལ་པར་མི་མཐོང་བར་གྱུར། ཨོཾ་བཛྲ་རཏྣ་པདྨ་ཀརྨ་ཙཀྲ་ཛྭ་ལ་རཾ་ཧཱྃ་ཕཊ་ཀྱིས་སྲུང་འཁོར་བསྒོམ། བཞི་པ་ལ་གསུམ་སྟེ། སྡིག་པ་དང་འཁོར་བའི་ས་བོན བག་ཆགས་ཐམས་ཅད་ཡེ་ཤེས་ཀྱི་མེ་དང་ཆུས་སྦྱང་བ། ཆོས་ཉིད་ཀྱི་རླུང་གིས་གཏོར་བ། བྱང་ཆུབ་སེམས་ཀྱི་ཆུས་བཀྲུ་བའོ། །དང་པོ་ནི། མཚན་བྱང་མདུན་དུ་གཡས་སུ་མེ། གཡོན་དུ་ཆུ། མདུན་དུ་ཏིལ་བཅས་བཤམས་ལ། ཚེ་འདས་ཀྱི་རྐང་མཐིལ་དུ་དམྱལ་བའི་ས་བོན་དུཿདུད་ཁ། གསང་གནས་སུ་ཡི་དྭགས་ཀྱི་ས་བོན་པྲེ་དམར་པོ། ལྟེ་བར་དུད་འགྲོའི་ས་བོན་ཏྲི་ལྗང་གུ། སྙིང་གར་མིའི་ས་བོན་ནྀ་སྔོ་སྐྱ། མགྲིན་པར་ལྷ་མིན་གྱི་ས་བོན་སུཾ་སེར་པོ། སྤྱི་བོར་ལྷའི་ས་བོན་ཨ་དཀར་པོ་རྣམས་བག་ཆགས་
དང་བཅས་པ་མདུན་གྱི་ཏིལ་ལ་ཐིམ་པར་གྱུར། ཏིལ་བཟུང་ལ་གཡས་གཡོན་དུ་བསྐོར་ཞིང་། ཧཱུྃ༔ བཅོམ་ལྡན་ཐུགས་མཆོག་རྡོ་རྗེ་སེམས་དཔའ་ཡི༔ ཐུགས་སྲོག་ཧཱྃ་ལས་ཡེ་ཤེས་རྣམ་ལྔའི་མེས༔ རིགས་དྲུག་འཁོར་བའི་ས་བོན་བག་ཆགས་དང་༔ ཉོན་མོངས་རྟོག་ཚོགས་སྡིག་སྒྲིབ ཐམས་ཅད་བསྲེགས༔ ཨོཾ་སརྦ་པཱ་པཾ་ད་ཧ་ན་དུ་པྲ་ཏྲི་ནྲྀ་སུཾ་ཨ་སརྦ་བྷ་སྨིཾ་ཀུ་རུ་ཡེ་སྭཱ་ཧཱ༔ ཞེས་བརྗོད་ལ་མེ་དང་ཆུར་དོར། གཉིས་པ་ནི། ཡིག་བརྒྱའི་མཐར། ༀ་དུ་ད་ཧ་ད་ཧ་སརྦ་ན་རཀ་ག་ཏེ་ཧེ་ཏུཾ་ཧཱུྃ་ཕཊཿ༔ ཨོཾ་པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཨོཾ་ཏྲི་མ་ཐ་མ་ཐ་སརྦ་ཏཱིརྱ་ཀ་ག་ཏེ་ཧེ་ཏུཾ་ཧཱུྃ་ཕཊཿ༔ ༀ་ནྲྀ་ཙྪིནྡྲ་ཙྪིནྡྲ་སརྦ་ཨ་ཝ་ར་ཎ་ནི་ཧཱུྃ་ཕཊཿ༔ ཨོཾ་སུཾ་སརྦ་དུ་ལ་སརྦ་ཀརྨ་པྲ་བེ་ཤ་ཡ་ཧཱུྃ་ཕཊ༔ ཨོཾ་ཨ་སརྦ་ཏ་ཐཱ་ག་ཏ་བྷི་ད་ན་ཁངྒ་ཙྪིནྡྷ་ཙྪིནྡྷ་ཧཱུྃ་ཕཊ༔ ཅེས་བཟླ་ཞིང་བྱེ་མ་དང་ཡུངས་
དཀར་གྱིས་བྲབ། གསུམ་པ་ནི། ལས་བུམ་དུ་རྣམ་རྒྱལ་བུམ་པའི་ཆུ་ཅུང་ཟད་བསྲེས་ཏེ། མེ་ལོང་དུ་དཀྱིལ་འཁོར་ལྷའི་སྣང་བརྙན་འཆར་བར་ཁྲུས་གསོལ་ཞིང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། རྒྱལ་བའི་སྐུ་གསུང་ཐུགས་མཆོག་ལ། །ཉོན་མོངས་དྲི་མ་མི་མངའ་ཡང་། །ཚེ་འདས་སྒོ་གསུམ་སྒྲིབ་སྦྱང་ཕྱིར། །གཙང་མ་ཆབ་ཀྱིས་སྐུ་ཁྲུས གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་ཁྲུས་གསོལ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །ཨོཾ་ཧཱུྃ་ཏྲཾ་ཧྲཱིཿཨཱ༔ ཀཱ་ཡ་བི་ཤོ་དྷ་ནི་སྭཱ་ཧཱ། ཞེས་སྐུ་ཕྱི། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་
བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཞེས་ན་བཟའ་དང་རྒྱན་དབུལ། ཁྲུས་ཆུ་སླར་ཡང་བུམ་པར་བླུགས་ཏེ་དམིགས་རྟེན་བཀྲུ་ཞིང་། ཧཱུྃཿ༔ འདི་ནི་ཕ་རོལ་ཕྱིན་དྲུག་ཆུ༔ ཉོན་དྲུག་དྲི་མ་སྦྱོང་མཛད་པ༔ ཕར་ཕྱིན་དྲུག་ལ་ལེགས་འགོད་ཆུ༔ ཕྱིན་དྲུག་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ཚེ་ལས་འདས་པའི་སྡིག་པ་དང་སྒྲིབ་པ་ཤཱིནྟཾ་ཀུ་རུ་སྭཱ་ཧཱ༔ འདི་ནི་ཐབས་ཀྱི་རང་བཞིན་ཆུ༔ ཐབས་ཀྱི་དྲི་མ་སྦྱོང་མཛད་པ༔ ཐབས་ཆེན་ཉིད་ལ་ལེགས་འགོད་ཆུ༔ ཐབས་ཀྱི་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ཚེ་ལས་འདས་པའི་སྡིག་པ་དང་སྒྲིབ་པ་ཤཱིནྟཾ་ཀུ་རུ་སྭཱ་ཧཱ༔ འདི་ནི་སྟོབས་ཀྱི་རང་བཞིན་ཆུ༔ སྟོབས་ཀྱི་དྲི་མ་སྦྱོང་
མཛད་པ༔ སྟོབས་ཆེན་ཉིད་ལ་ལེགས་འགོད་ཆུ༔ སྟོབས་ཀྱི་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ཚེ་ལས་འདས་པའི་སྡིག་པ་དང་སྒྲིབ་པ་ཤཱིནྟཾ་ཀུ་རུ་སྭཱ་ཧཱ༔ འདི་ནི་སྨོན་ལམ་རང་བཞིན་ཆུ༔ སྨོན་ལམ་དྲི་མ་སྦྱོང་མཛད་པ༔ སྨོན་ལམ་ཉིད་ལ་ལེགས་འགོད་ཆུ༔ སྨོན་ལམ་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ཚེ་ལས་འདས་པའི་སྡིག་པ་དང་སྒྲིབ་པ་ཤཱིནྟཾ་ཀུ་རུ་སྭཱ་ཧཱ༔ འདི་ནི་ཡེ་ཤེས་རང་བཞིན་ཆུ༔ ཡེ་ཤེས་དྲི་མ་སྦྱོང་མཛད་པ༔ ཡེ་ཤེས་ཉིད་ལ་ལེགས་འགོད་ཆུ༔ ཡེ་ཤེས་ཆུ་ཡིས་དག་གྱུར་ཅིག༔ ཁྲུས་ལེགས་མཛད་ལ་ཕྱག་འཚལ་ལོ༔ ཡིག་བརྒྱའི་མཐར། ཚེ་ལས་འདས་པའི་སྡིག་པ་དང་སྒྲིབ་པ་ཤཱིནྟཾ་ཀུ་རུ་སྭཱ་ཧཱ༔ བཀྲུས་ནས། ཞར་ལ་དུག་སྦྱོང་ནི། ཀུ་ཤས་རྟེན་ལ་བྱབ་ཅིང་། འདོད་
ཆགས་ཞེ་སྡང་གཏི་མུག་གསུམ༔ འདི་དག་འཇིག་རྟེན་དུག་གསུམ་སྟེ༔ བདེ་གཤེགས་རིགས་ལྔ་དུག་མི་མངའ༔ སངས་རྒྱས་བདེན་པས་དུག་བཅོམ་མོ༔ བདེན་པ་གང་གིས་སངས་རྒྱས་རྣམས༔ འཇིག་རྟེན་ཀུན་ཏུ་བླ་ན་མེད༔ བདེན་པའི་ཚིག་ནི་འདི་དག་གིས༔ ཁྱོད་ཀྱི་ཉོན་མོངས་དུག་རྣམས་ནི༔ རང་བཞིན་མེད་པར་དག་གྱུར་ཅིག༔ འབྱུང་བ་བཞིས་རྟེན་ལ་བསྐོར་ཞིང་། ས་ཆུ་མེ་རླུང་འབྱུང་བ་བཞི༔ དུག་གི་ཕ་དང་མ་ཡིན་ཏེ༔ བདེན་པའི་བདེན་ཚིག་འདི་བརྗོད་པས༔ དུག་རྣམས་འབྱུང་བཞིའི་ནང་དུ་སོང་༔ གང་བའི་སྣོད་དུ་དུག་སོང་ལ༔ ཁྱོད་ཀྱི་དུག་ནི་དུག་མེད་ཤོག༔ དཀོན་མཆོག་གསུམ་གྱི་བདེན་པ་དང་༔ ཏིང་འཛིན་སྔགས་ཀྱི་བྱིན་རླབས་ཀྱིས༔ ཚེ་འདས་ལུས་བརྗེས་བུ་ཁྱོད་ཀྱི༔ དུག་རྣམས་གཏན་ནས་དག་གྱུར་ཅིག༔
ཡིག་བརྒྱ་དང་མི་འཁྲུགས་པའི་གཟུངས་སོགས་བརྗོད་ལ་ཁྲུས་བྱའོ། །ལྔ་པ་ནི། གསོལ་གདབ་ཆོས་བཤད་སྐྱབས་སུ་གསོལ། །དབང་བསྐུར་བྱ་ཞིང་ལན་ཆགས་སྦྱངས། །བསྲེགས་དང་བཀྲུ་ཞིང་གནས་ནས་དྲང་། །ཞེས་བརྒྱད་ལས། དང་པོ་ནི། ཚེ་འདས་ཉིད་ཀྱིས་གསོལ་བ་གདབ་པར་བསམ་ལ། ཀྱེ་མ་མགོན་པོ་ཐུགས་རྗེ་ཅན༔ རིགས་དྲུག་གནས་སུ་ལྟུང་བ་ཡི སྐྱབས་བྲལ་མགོན་མེད་སེམས་ཅན་ལ༔ ཐུགས་རྗེའི་ལྕགས་ཀྱུས་བཟུང་དུ་གསོལཿ༔ གཉིས་པ་ནི། སློབ་དཔོན་གྱིས། འོ་སྔོན་ཚེ་མོའུ་འགལ་གྱི་མ་རིག་དྲུག་ཏུ་རིམ་པར་སྐྱེས་པ་དང་། རྒྱལ་བུ་དགེ་མཐོང་ན་རག་ཏུ་སྐྱེས་པ་དང་། བྲམ་ཟེ་དུང་གི་ཕྲེང་བའི་སློབ་བུ་ལས་ངན་གྱི་དབང་གིས་སེམས་ཅན་ལུས་སྲུལ་པོ་ཞེས་བྱ་བ་རིགས་དྲུག་གི་སྡུག་བསྔལ་དྲག་པོ་དུས་གཅིག་ལ་མྱོང་བ་རྣམས་ཀྱང་ཐབས་དང་རྟེན་འབྲེལ་ཟབ་མོའི་ཆོ་ག་ལ་བརྟེན་ནས་མཐོ་རིས་དང་ཐར་པའི་གནས་
སུ་དྲངས་པ་ལྟར་ཚེ་ལས་འདས་པ་ཁྱོད་རིགས་དྲུག་གི་གནས་ནས་འདྲེན་པའི་ཆོ་ག་བྱེད་པ་ཡིན་པས་དད་གུས་དང་སྤོ་བ་རྒྱ་ཆེན་པོ་བསྐྱེད་ཅིག །ཅེས་བཤད་ལ། ཨེ་མ༔ ཚེ་འཕོས་ལུས་བརྗེས་བར་དོའི་ཡིད་ལུས་ཁྱོད༔ སྔོན་ཆད་མ་རིག་རྨོངས་པའི་ལས་དབང་གིསཿ༔ དུག་གསུམ་གྱིས་བཅིངས་ངན་སོང་གསུམ་དུ་མནར༔ དེང་ནས་བརྩམས་ཏེ་རྒྱལ་བའི་ཐུགས་རྗེ་ཡི༔ ཕོ་ཉས་བཟུང་སྟེ་རིགས་དྲུག་གནས་ནས་དྲང་༔ དོན་འབྲས་འདོད་ཕྱིར་དད་པའི་ཤུགས་བསྐྱེད་ལ༔ འདྲེན་པ་ཐུབ་ཆེན་དྲུག་ལ་གསོལ་བ་ཐོབ༔ ཅེས་གདམས་ལ། གསུམ་པ་ནི། ཚེ་འདས་ཀྱིས། ཀྱེ་མ༔ བདག་འདྲའི་སེམས་ཅན་ལས་ངན་པ༔ དུག་ལྔ་དྲག་པོའི་ལས་དབང་གིས༔ རིགས་དྲུག་འཁོར་བའི་གནས་སུ་སྐྱེས༔ ཚ་གྲང་བཀྲེས་སྐོམ་བཀོལ་སྤྱོད་དང་༔ འཐབ་རྩོད་འཕོ་
ལྟུང་བྲེལ་ཕོངས་སོགས༔ སྡུག་བསྔལ་དཔག་མེད་བརྗོད་ལས་འདས༔ སྡུག་བསྔལ་འདི་ལས་བདག་སྒྲོལ་མཛོད༔ བརྩེ་བ་ཆེན་པོས་བཟུང་དུ་གསོལ༔ ཅེས་གསོལ་ལ། སློབ་དཔོན་གྱིས། ཀྱེ་མ་ཚེ་འདས་ལུས་བརྗེས་རིགས་ཀྱི་བུ༔ ཉོན་མོངས་དུག་ལྔས་ཀུན་ནས་བསླངས་ནས་སུ༔ ལས་ངན་མི་དགེ་བཅུ་ཡི་རྣམ་སྨིན་གྱིས༔ འགྲོ་དྲུག་འཁོར་བའི་གནས་སུ་སྐྱེ་སྲིད་ཀྱི༔ དེ་ན་མགོན་དང་སྐྱབས་སུ་གྱུར་པ་ནི༔ འགྲོ་དྲུག་དོན་མཛད་སྤྲུལ་སྐུ་ཐུབ་དྲུག་བཞུགས༔ དེ་ལ་སྐྱབས་སུ་འགྲོ་བའི་ཚིག་འདི་སྨྲོས༔ དུག་ལྔ་གཟུང་འཛིན་ཀུན་སྤངས་བདེ་བར་གཤེགས༔ ཕྱིན་དྲུག་ཆོས་ཐོབ་ཉོན་མོངས་རྣམ་པར་དག༔ རིགས་དྲུག་ཐུབ་པ་རང་རྟགས་ཕྱག་རྒྱ་ཅན༔ ཚ་གྲང་བཀྲེས་སྐོམ་གླེན་ལྐུགས་འཐབ་རྩོད་དང་༔ འཕོ་ལྟུང་བྲེལ་ཕོངས་སྡུག་བསྔལ་སྦྱང་དུ་གསོལ༔ བཅོམ་ལྡན་ཐུབ་
ཆེན་དྲུག་ལ་སྐྱབས་སུ་མཆི༔ བྱམས་མགོན་ཐུགས་རྗེ་ཅན་ལ་སྐྱབས་སུ་མཆི༔ མགོན་པོ་མཆོག་གྱུར་ཁྱེད་ལ་སྐྱབས་སུ་མཆི༔ འཁོར་བའི་སྡུག་བསྔལ་འདི་ལས་སྐྱོབས་མཛོད་ཅིག༔ ཚེ་འདས་དོན་དུ་ཞལ་ཟས་འདི་བཞེས་ལ༔ རིགས་དྲུག་འཁོར་བའི་གནས་ནས་དྲང་དུ་གསོལ༔ ཞལ་ཟས་བཏེགས་ལ། ཧཱུྃཿ༔ བཅོམ་ལྡན་ཐུབ་ཆེན་དྲུག་པོ་ལ༔ དྲི་མེད་དག་པའི་ཞལ་ཟས་དང་༔ འདོད་ཡོན་རྒྱན་གྱི་མཆོད་གཏོར་འབུལ༔ འགྲོ་དྲུག་སྡུག་བསྔལ་སྦྱང་དུ་གསོལ༔ཨོཾ་བཛྲ་ནཻ་ཝི་ཏྱཱ་ཨཱཿཧཱུྃ༔ ཞེས་དབུལ། བཞི་པ་ལ་གཉིས། ཐོག་མར་ཕྱག་མཚན་གྱི་དབང་བསྐུར་བ་ནི། ཐུབ་དྲུག་སོ་སོའི་ཕྱག་མཚན་ཐོགས་ལ། ཚ་གྲང་སྐྱོབ་བྱེད་མེ་ཆུ་བསིལ་དྲོད་ལྡན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ དམྱལ་བ་ཚ་གྲང་སྡུག་བསྔལ་ལས་གྲོལ་ནས༔ ན་ར་ཀ་ཡི་སྡུག་
བསྔལ་བྲལ་བར་ཤོག༔ དུཿ༔ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུྃ་ཕཊཿ༔ ཨཱ༔ རིན་ཆེན་སྒྲོམ་གྱི་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ པྲེ་ཏ་ཀ་ཡི་སྡུག་བསྔལ་བྲལ་བར་ཤོག༔ པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊཿ༔ ༀ༔ ཤེས་རབ་རིག་པའི་པུསྟི་འདི༔ དུས་གསུམ་སངས་རྒྱས་ཞི་ཁྲོའི་གསུང་༔ ཚེ་འདས་ཁྱོད་ལ་དབང་བསྐུར་བས༔ ཏཱིརྱ་ཀ་ཡི་སྡུག་བསྔལ་བྲལ་བར་ཤོག༔ ཏྲི་མ་ཐ་མ་ཐ་སརྦ་ཏཱིརྱ་ཀ་ག་ཏེ་ཧེ་ཏུ་ཧཱུྃ་ཕཊ༔ ཧཱ༔ ཤེས་རབ་དོན་མཚོན་རལ་གྲི་དང་༔ བདུད་ཀྱི་མཚོན་སྲུང་གོ་ཆ་འདི༔ དུས་གསུམ་རྒྱལ་བའི་སྦྱོར་སྒྲོལ་ཏེ༔ ཞི་ཁྲོ་རྒྱལ་བའི་ཕྱག་མཚན་འདིས༔ ཚེ་འདས་ཁྱོད་ལ་དབང་བསྐུར་བས༔ ཧེ་ས་ཀ་ཡི་སྡུག་བསྔལ་བྲལ་བར་ཤོག༔ སུ་སརྦ་དུ་ལ་སརྦ་ཀརྨ་པྲ་བེ་ཤ་ཡ་ཧཱུྃ་ཕཊཿ༔ སྭཱ༔
ལོངས་སྤྱོད་བདུད་ཀྱི་གཡེང་འཇོམས་པའི༔ པི་ཝཾ་སྙན་པའི་དོན་བྱེད་འདིས༔ ཚེ་འདས་ཁྱོད་ལ་དབང་བསྐུར་བས༔ གཅིག་གིས་ལས་རྫོགས་ཤོག༔ ཨ་སརྦ་ཏ་ཐཱ་ག་ཏ་བིདྱཱ་ཁངྒ་ཙྪིནྡྷ་ཙྪིནྡྷ་ཧཱུྃ་ཕཊཿ༔ ཧཱུྃ༔ རིན་ཆེན་པར་བུ་ལྷུང་བཟེད་ན༔ རྒྱལ་བ་ཞི་ཁྲོའི་ལྷ་ཚོགས་བཞུ༔ གསེག་ཤང་དྲང་སྲོང་སྒྲ་སྒྲོག་འདི༔ ཐུགས་རྟག་ཞི་ཁྲོ་ལྷ་ཡི་རྟགས༔ ཚེ་འདས་ཁྱོད་ལ་དབང་བསྐུར་བས༔ ཨ་བྷཱ་དྷཱ་ཏིའི་དབང་ཐོབ་ཤོག༔ ཨོཾ་ཙྪིནྡྲ་ཙྪིནྡྷ་སརྦ་ཨ་བ་ར་ཎ་ནི་ཧཱུྃ་ཕཊཿ༔ གཉིས་པ་བུམ་དབང་བསྐུར་བ་ནི། ཧཱུྃཿ༔ ལྔ་ཚན་ལྔ་ཡི་བུམ་པ་འདིར༔ བདེ་གཤེགས་སྐུ་གསུང་ཐུགས་ཡོན་ཏན༔ ཕྲིན་ལས་༧་རིགས་ལྔའི་ལྷ་ཚོགས་བཞུགས༔ ཚེ་འདས་ཁྱོད་ལ་དབང་བསྐུར་བས༔ རིགས་དྲུག་སྐྱེ་སྒོ་བཅད་ནས་ནི༔ ཞིང་ཁམས་ལྔ་ལ་དབང་བསྒྱུར་ཤོག༔ ཧཱུྃ་
བཛྲ་ཨ་བྷི་ཥིཉྩ་ཨཱ༔ ཨོཾ་བུདྡྷ་ཨ་བྷི་ཥིཉྩ་ཨཱ༔ སྭཱ་རཏྣ་ཨ་བྷི་ཥིཉྩ་ཨཱཿ་མཱཾ་པདྨ་ཨ་བྷི་ཥིཉྩ་ཨཱ༔ ཧཱ་ཀརྨ་ཨ་བྷི་ཥིཉྩ་ཨཱ༔ ལྔ་པ་ནི། ལན་ཆགས་གཏོར་མ་ཨ་ཀཱ་རོས་བྱིན་གྱིས་བརླབས། ཧཱུྃཿ༔ གཏོར་མ་འདོད་ཡོན་ལྔ་དང་ལྡན་པ་འདི༔ ཚེ་འདས་བུ་ལོན་ལན་ཆགས་སྙེགས་པ་ཡི༔ གསོན་བདུད་གཤིན་ལྕགས་ལན་ཆགས་ཁྱོད་ལ་སྦྱིན༔ གཏོར་མ་འདི་ཡིས་མགུ་ཞིང་ཚིམས་གྱིས་ལ༔ ཚེ་འདས་འདི་ལ་ཐར་པའི་གེགས་མ་བྱེད༔ ཅེས་བསྔོ། དྲུག་པ་ནི། བྱེ་མ་ཐོགས་ལ། འདོད་ཆགས་ཞེ་སྡང་གཏི་མུག་དང་༔ ང་རྒྱལ་ལོག་ལྟ་ཐེ་ཚོམ་སྟེ༔ འདི་དག་འཇིག་རྟེན་དུག་ཡིན་ཏེ༔ བཅོམ་ལྡན་རིགས་ལྔ་དུག་མི་མངའ༔ སངས་རྒྱས་བདེན་པས་དུག་བཅོམ་མོ༔ ཚེ་ལས་འདས་པ་འདི་ཉིད་ཀྱི༔ ཉོན་མོངས་དྲི་མ་དག་གྱུར་ཅིག༔ ཡིག་བརྒྱ་དང་སྒྲིབ་སྦྱོང་གི་སྔགས་སོགས་སྦྲེལ་བ་བརྗོད་ཅིང་བྱེ་མས་བྲབ་པས་ཡེ་ཤེས་
ཀྱི་མེས་རིགས་དྲུག་གི་ས་བོན་བག་ཆགས་དང་བཅས་པ་བསྲེགས་པར་བསམ། བདུན་པ་ནི། ཁྲུས་བུམ་ཐོགས་ལ། འདི་ནི་ཕྱིན་དྲུག་རང་བཞིན་ཆུ༔ ཉོན་མོངས་ཁོང་ཁྲོ་སེར་སྣ་རྨོངས༔ ཕྲག་དོག་ང་རྒྱལ་ཐེ་ཚོམ་གྱི༔ དྲི་མ་རྣམ་དྲུག་སྦྱོང་མཛད་པ༔ བྱམས་སྦྱིན་ཡེ་ཤེས་ཚུལ་ཁྲིམས་དང་༔ ཏིང་འཛིན་སྤྲོ་དགའི་ཆུས་བཀྲུས་པས༔ ཉོན་དྲུག་དྲི་མ་དག་གྱུར་ཅིག༔ ཅེས་དང་ཡིག་བརྒྱ་བརྗོད་ཅིང་བཀྲུས་པས་བྱང་ཆུབ་སེམས་ཀྱི་ཆུ་རྒྱུན་གྱིས་ཉོན་མོངས་པའི་ཐལ་བའང་སྦྱངས་པར་བསམ༔ བརྒྱད་པ་ནི། ས་འདི་བཅད་པ་མན་ཆད་ནི༔ རིགས་དྲུག་འཁོར་བའི་གནས་ཡིན་པས༔ བོར་རོ་སྤོང་ངོ་རིགས་ཀྱི་བུ༔ ཡུལ་དང་ཁང་ཁྱིམ་ནོར་རྫས་ཀུན༔ སྒྱུ་མའི་རྟ་གླང་ཇི་བཞིན་དུ༔ མི་རྟག་འབྲལ་བའི་ཆོས་ཅན་ཡིན༔ ཁྱོད་ཀྱི་མིང་ནས་འབོད་བྱེད་ཅིང་༔ ཕ་མ་ཉེ་དྲུང་ང་ཡིན་
ཞེས༔ སྨྲེ་ངག་འོ་དོད་འབོད་པ་ཀུན༔ཐར་ལམ་བར་ཆད་གེགས་ཡིན་པས༔ དེ་ལ་མ་ཉན་རིགས་ཀྱི་བུ༔ ཆགས་པར་མ་བྱེད་རིགས་ཀྱི་བུ༔ ས་འདི་བཅད་པ་ཡན་ཆད་ནི༔ ཐར་པ་བདེ་བའི་གནས་ཡིན་པས༔ འདོང་ངོ་གཤེགས་སོ་རིགས་ཀྱི་བུ༔ ཕྱིར་མི་ལྡོག་པའི་ས་ཐོབ་ཤོག༔ ཅེས་བརྗོད་ཅིང་རིགས་དྲུག་གི་གནས་ནས་དྲངས། རྡོ་རྗེས་ཕྱི་ལམ་བཅད་ལ་སློབ་དཔོན་གྱི་མདུན་དུ་དབང་སྟེགས་ལ་བཀོད། དྲུག་པ་དབང་བསྐུར་ནི། མཎྜལ་ནས་བརྩམས་ཏེ་གཏང་རག་གི་བར་ལོ་ཆེན་ཞི་ཁྲོའི་བདག་འཇུག་བཞིན་ལ། ཚིག་གི་མཚམས་སྦྱོར་རྒྱས་བསྡུས་ཅི་རིགས་པས་བརྡ་སྤྲད། འོན་ཀྱང་སྦྱོར་བ་སྡིག་སྒྲིབ་སྦྱོང་བའི་དབང་ནི་གནས་འདྲེན་གྱི་སྐབས་སུ་སོང་ཟིན་པས་འདིར་མི་དགོས། སྤྲོ་ན་མཇུག་ཏུ་ལུས་ལོངས་སྤྱོད་འབུལ་བ་དང་དགེ་བ་བསྔོ་བ་བྱའོ། །གལ་ཏེ་སྤྲོས་པ་བསྡུ་བའི་དབང་དུ་བྱས་ན། ཚེ་འདས་ཀྱིས་བརྗོད་པར་བསམ་ལ། ས་གཞི་སྤོས་ཆུས་བྱུགས་ཤིང་སོགས་མཎྜལ་
དབུལ། ཐལ་མོ་སྦྱར་ཏེ། ཨེ་མ་མགོན་པོ་ཐུགས་རྗེ་ཅན༔ བདག་འདྲའི་སེམས་ཅན་འཁོར་བར་འཁྱམས༔ ལོག་པའི་ལམ་དུ་ཞུགས་ལགས་པས༔ བདེ་ཆེན་ཐར་པའི་ལམ་སྟོན་འཚལ༔ དཀྱིལ་འཁོར་ཆེན་པོར་གཞུག་ཏུ་གསོལ༔ ཞེས་གསོལ་བ་སློབ་དཔོན་གྱིས། ཨེ་མ་ཚེ་འདས་བུ་ཁྱོད་ལེགས་པར་ཉོན༔ འཁོར་བའི་གནས་ནས་ཐར་པའི་གྲོང་འཇུག་ན༔ ཚེ་འདིའི་འབྲས་བུ་དོན་དུ་གཉེར་མི་བྱ༔ འཇིག་རྟེན་ཚེ་འདི་དོན་དུ་གཉེར་བ་ན༔ ཕ་རོལ་ཐར་པའི་འབྲས་བུ་ཐོབ་མི་འགྱུར༔ འཇིག་རྟེན་ཕ་རོལ་གཞན་དོན་གཉེར་བ་ན༔ འབད་པ་མེད་པར་འདི་འབྲས་རང་དོན་འགྲུབ༔ དེ་ཕྱིར་ཕ་རོལ་གཞན་དོན་གཉེར་བར་གྱིས༔ སླར་ཡང་ཉན་པར་བསྐུལ་བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི༔ ཤིན་ཏུ་བསམ་པ་བཟང་དང་ལྡན་པས་ཉོན༔ བརྗེད་
ངས་བློ་ལ་རྡོར་སེམས་ལ་སོགས་པའི༔ དུས་གསུམ་རྒྱལ་བ་རྣམས་ཀྱིས་བྱིན་མི་རློབས༔ སྤྲོ་བ་བསྐྱེད་པ་ནི། བུ་ཁྱོད་ཤིན་ཏུ་སྐལ་པ་བཟང་༔ གང་གིས་སྒྱ་འཕྲུལ་ཞི་ཁྲོ་ཡིས༔ དཀྱིལ་འཁོར་ལྷ་ལ་ཕྱག་འཚལ་ན༔ ཉམས་ཆག་མ་ལུས་ཀུན་བྱང་སྟེ༔ མཚམས་མེད་ལྔ་ཡི་སྡིག་ཀྱང་བྱང་༔ ན་རཀ་གནས་ཀྱང་དོང་སྤྲུགས་ཏེ༔ རིག་འཛིན་རྒྱལ་བའི་ཞིང་དུ་དྲང་༔ སྒྱུ་འཕྲུལ་ཞི་ཁྲོའི་ལྷ་ཚོགས་ལ༔ གང་ཞིག་གུས་པས་ཕྱག་འཚལ་ན༔ ཉམས་ཆག་ཀུན་ཀྱང་བྱང་བར་འགྱུར༔ དམ་ཚིག་བསྐངས་ནས་དངོས་གྲུབ་ཐོབ༔ དེ་ཕྱིར་སྤྲོ་བའི་སེམས་ཀྱིས་ཉོན༔ ཞེས་བསྐུལ་ལ། ཉེ་དྲུང་སོགས་ཡོད་ན་ཕྱག་འཚལ་དུ་བཅུག་ལ། སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབས་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་
ལོ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེན་རོལ་པ་ཡི། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་གུས་པས་ཕྱག་འཚལ་ལོ། །བླ་མ་རྒྱལ་བ་སྲས་བཅས་ཀྱིས། །བདག་དང་མཐའ་ཡས་སེམས་ཅན་ཀུན། །འཁོར་བ་ངན་སོང་འཇིགས་ལས་སྐྱོབས། །བྱང་ཆུབ་གནས་སུ་དབུགས་དབྱུང་གསོལ། །ཞེས་བརྗོད། སྡོམ་པ་བཟུང་བ་ནི། ཕྱོགས་བཅུའི་སངས་རྒྱས་བྱང་སེམས་རྣམས༔ ཚེ་འདས་བདག༔ ལ་དགོངས་སུ་གསོལཿ༔ དཀོན་མཆོག་རྩ་གསུམ་དཀྱིལ་འཁོར་ལྷར༔ བདག་ནི་གུས་པས་སྐྱབས་སུ་མཆི༔ སོ་སོ་ཐར་པའི་སྡོམ་པ་དང་༔ སྨོན་དང་
འཇུག་པའི་བྱང་ཆུབ་སེམས༔ རྩ་བ་ཡན་ལག་དམ་ཚིག་ཀུན༔ མ་ལུས་བདག་གིས་ཡོངས་སུ་བཟུང་༔ ཞེས་བླངས། དེ་ནས་བྱང་བུར་མིག་དར་བཀབ་ཅིང་མེ་ཏོག་མདུན་དུ་བཞག་ལ། ཨོཾ་ཙཀྵུ་བྷནྡྷ་ཝ་ར་མ་ཎ་ཡེ་སྭཱ་ཧཱ༔ ཨཁཾ་བིར་ཧཱུྃ་ཞེས་བརྗོད། ཡེ་ཤེས་དབབ་པ་ནི། ཨོཾ་བཛྲ་ཤྲཱི་ཧེ་རུ་ཀ་ཨུཙྪ་ཊ་ཡ་ཕཊཿ༔ ཅེས་བགེགས་བསྐྲད་ལ། ཚེ་ལས་འདས་པ་སྐད་ཅིག་གིས་དཔལ་རྡོ་རྗེ་སེམས་དཔར་གསལ་བའི་སྙིང་གར་ཞི་བའི་ལྷ་ཚོགས་བཞི་བཅུ་རྩ་གཉིས། དུང་ཁང་དུ་འབར་བ་ཁྲག་འཐུང་ལྔ་བཅུ་རྩ་བརྒྱད། མགྲིན་པར་རིག་འཛིན་དཔའ་བོ་ཡབ་ཡུམ་བཅུ་སོགས་གདན་གསུམ་ཡོངས་རྫོགས་དམ་པ་རིགས་བརྒྱའི་རང་བཞིན་ཏིལ་གྱི་གོང་བུ་ཁ་ཕྱེ་བ་བཞིན་དུ་གསལ་བའི་གནས་གསུམ་གྱི་ཡི་གེ་ལས་འོད་ཟེར་འཕྲོས་པས། རང་བཞིན་ཆོས་ཀྱི་དབྱིངས་ནས་ཡེ་ཤེས་ཀྱི་འཁོར་ལོ་ཁ་ཆར་བུ་ཡུག་འཚུབས་
པ་ལྟར་བྱོན་ནས་དབྱེར་མེད་དུ་ཐིམ་པར་གྱུར། ༀ་ཨཱཿ་ཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱ༔ ༀ་རུ་ལུ་རུ་ལུ་ཧཱུྃ་བྷྱོཿ་ཧཱུྃ༔ བཛྲ་ཨཱ་བེ་ཤ་ཡ་ཨཱ་བེ་ཤ་ཡ་ཨ་ཨཱཿ༔ ཛཿཧཱྃ་བཾ་ཧོ༔ ཞེས་དབབ། ཏིཥྛ་བཛྲས་བརྟན་པར་བྱ། དཀྱིལ་འཁོར་དུ་འཇུག་པ་ནི་མཚན་བྱང་དཀྱིལ་འཁོར་ཕྱོགས་བཞིའི་སྒོར་ཁྱེར་ལ། དཀྱིལ་འཁོར་ཆེན་པོའི་ཕྱོགས་བཞིའི་སྒོ ཞེ་སྡང་ང་རྒྱལ་འདོད་ཆགས་དང་༔ ཕྲག་དོག་སྒྲིབ་པས་བཅད་ལགས་ན༔ སྙིང་རྗེ་བྱམས་དགའ་བཏང་སྙོམས་ཀྱི༔ རྟ་གདོང་ཕག་སེང་སྦྲལ་གདོང་བཞི༔ སྒོ་བ་རྣམ་རྒྱལ་གཤིན་རྗེ་གཤེད༔ རྟ་མགྲིན་རྒྱལ་པོ་བདུད་རྩི་འཁྱིལ༔ སྒོ་མ་ལྕགས་ཀྱུ་ཞགས་པ་དང་༔ ལྕགས་སྒྲོག་དྲིལ་བུ་མ་བཞི་ཡིས༔ ཐབས་ཤེས་རང་རང་ཕྱག་རྒྱ་ཡིས༔ ཡེ་ཤེས་བཞི་ཡི་སྒོ་ཕྱེས་ལ༔ ཚེ་འདས་དད་པས་འཇུག་པར་བགྱི༔ ཀུན་བཟང་
ཞི་ཁྲོའི་ལྷ་ཚོགས་ལ༔ ཚེ་འདས་གུས་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་བེ་ཤ་ཡ་ཕཊ༔ ཨོཾ་བཛྲ་པུཥྤ་པྲ་ཏཱིཙྪ་ཧོ༔ ཞེས་བརྗོད་ལ་མེ་ཏོག་དོར། ༀ་ཛྙཱ་ན་ཙཀྵུ་པྲ་བེ་ཤ་ཡ་ཕཊཿ༔ ཅེས་མིག་དར་བསལ། དེ་ནས་དབང་གི་དངོས་གཞིའི་སླད་དུ། ཕྱི་རིན་པོ་ཆེའི་བུམ་པ་ལ་ནང་གཞལ་ཡས་ཁང་གི་རྣམ་པར་གནས་པའི་དབུས་སུ་སྒྱུ་འཕྲུལ་ཞི་ཁྲོའི་ལྷ་ཚོགས་རྣམས་སྐད་ཅིག་གིས་གསལ་བའི་རྟེན་དང་བརྟེན་པར་བཅས་པ་སྤྱི་བོར་བཞག་ཅིང་དབང་བསྐུར་བའི་ཚེ མོས་པ་མཛོད་ཅེས་བརྡ་སྦྱར་ལ། ཧཱུྃཿ བུམ་པ་འདི་ནི་གཞལ་ཡས་ཁང་༔ ནང་ན་ཞི་ཁྲོའི་ལྷ་ཚོགས་བཞུགས༔ ཕྱི་ནང་གསང་བའི་དཀྱིལ་འཁོར་ནས༔ སྐུ་གསུང་ཐུགས་ཀྱི་དབང་མཆོག་རྣམས༔ སློབ་བུ་ཁྱོད་ལ་ཕབ་པ་ཡིས༔ ཕུང་ཁམས་ལྷ་དང་ལྷ་མོར་གྱུར༔ བསྐྱེད་རིམ་ལྷ་དབང་ཐོབ་པར་ཤོག༔ ཨོཾ་ཨཱ༔
ཧཱུྃ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུྃ༔ ཨོཾ་ཨཱཿཧཱུྃ་ཧྲཱིཿསྭཱ་ཧཱ༔ ལྷ་དབང་སྒོས་སུ་སྤྲོ་ན། ཞི་བའི་སྐུ་ཙཀ་རྣམས་ཐོགས་ལ། ཧཱུྃཿ ཚེ་འདས་ལུས་བརྗེས་རིགས་ཀྱི་བུ་ཁྱོད་ལ། །སངས་རྒྱས་བཞི་བཅུ་རྩ་གཉིས་དབང་བསྐུར་བས། །རྟོག་ཚོགས་བཞི་བཅུ་རྩ་གཉིས་གནས་དག་ནས། །བཞི་བཅུ་རྩ་གཉིས་རྒྱལ་བའི་དབང་ཐོབ་ཤོག །ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱ༔ དྷརྨཱ་ཀཱ་ཡ། སམྦྷོ་ཀཱ་ཡ། ནིརྨཱ་ཀཱ་ཡ། ཨ་བྷིཥིཉྩ་ཧཱུྃཿ། ཁྲོ་བོའི་སྐུ་ཙཀ་རྣམས་ཐོགས་ལ། ཧཱུྃཿ། ཚེ་འདས་ལུས་བརྗེས་རིགས་ཀྱི་བུ་ཁྱོད་ལ། །ཁྲག་འཐུང་ལྔ་བཅུ་རྩ་བརྒྱད་དབང་བསྐུར་བས། །ཉོན་མོངས་རྟོག་ཚོགས་མ་སྤངས་རང་གྲོལ་ནས། །ལྔ་བཅུ་རྩ་བརྒྱད་ཁྲོ་བོའི་དབང་ཐོབ་ཤོག །ཨོཾ་མ་ཧཱ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོཿ་ཧཱུྃ། ཨ་བྷི་ཥིཉྩ་ཧཱུྃཿ། ངོ་སྤྲོད་ནི། དེ་ལྟར་རྒྱལ་བ་ཞི་ཁྲོའི་ལྷ་ཚོགས་རྣམས། །གཞན་ན་
མེད་དེ་རང་རིག་བྱང་ཆུབ་སེམས། །ད་ལྟའི་ཤེས་རིག་མ་འགག་ས་ལེ་བ། །ཀུན་བཟང་གདོད་མའི་མགོན་པོ་དེ་ག་འོ། །ཅིར་ཡང་མ་གྲུབ་སྟོང་དབྱིངས་ཀུན བཟང་མོ། །དེ་ཉིད་རྟོགས་ན་སྐད་ཅིག་རྫོགས་འཚང་རྒྱ། །དེ་ཕྱིར་མ་ཡེངས་རང་ངོ་རང་གིས་ལྟོས། །གཞན་ཡང་ཕུང་ལྔ་མ་འགག་རིགས་ལྔ་སྟེ། །འབྱུང ལྔར་སྣང་བ་ཡུམ་ལྔའི་རང་བཞིན་ཡིན། །ཚོགས་བརྒྱད་མ་འགག་གསལ་བ་སེམས་དཔའ་བརྒྱད། །ཡུལ་བརྒྱད་རང་སར་དག་པ་སེམས་མ་བརྒྱད། །དུག་ལྔ་སེར་སྣ་གནས་དག་ཐུབ་པ་དྲུག །རྟག་ཆད་མུ་བཞི་གནས་དག་སྒོ་བ་བཞི། །སྐྱེ་གནས་བཞི་བདག་སྒོ་མ་བཞི་ཡིན་ཏེ། །བཞི་བཅུ་རྩ་གཉིས་རང་སྣང་དབ པའི་ལྷ། །གུད་ན་མི་དམིགས་རང་བྱུང་རིག་པའི་མདངས། །ཤེས་པར་གྱིས་ཤིག་ཚེ་འདས་རིགས་ཀྱི་བུ། །ཁྲག་འཐུང་འབར་བ་ལྔ་བཅུ་རྩ་བརྒྱད་ཀྱང་། །
ལོགས་ན་མེད་དེ་ཉོན་མོངས་རྟོག་ཚོགས་རྣམས། །རང་སར་དག་ནས་རང་བཞིན་མེད་ཤེས་ནས། །ཁྲག་འཐུང་ལྷ་ཚོགས་སྐུ་རུ་གསལ་བ་སྟེ། །རང་བྱུང་རིག་པའི་རྩལ་དུ་ཤེས་པར་གྱིས། །སྐྱེ་གནས་བར་དོར་ཞི་ཁྲོའི་ལྷ་དེ་རྣམས། །ཙིཏྟ་དུང་ཁང་ལུས་ཀྱི་སྦུབས་སུ་གནས། །ལུས་སེམས་བྲལ་དུས་རང་མདངས་ཕྱིར་འཆར་ཏེ། །ཆོས་ཉིད་བར་དོར་སྒྲ་འོད་ཟེར་དང་བཅས། །ནམ་མཁའ་བར་སྣང་གང་བར་མངོན་སུམ་སྣང་། །འདི་དུས སྒྲ་འོད་ཟེར་ལ་མ་འཇིགས་པར། །རང་སྣང་རང་ངོ་ཤེས་པ་ལོངས་སྐུར་གྲོལ། །དེ་ཕྱིར་དངངས་སྐྲག་འཇིགས་སྣང་སྤོང་བྱོས་ལ། །གང་ཤར་རང་སྣང་རིག་པ་ངོ་ཤེས་བྱ། །དོན་ཆེན་འགག་ལ་ཐུག་པའི་དུས་ཚོད་འདིར། །རང་སྣང་ཞི་ཁྲོའི་ཚོགས་ལ་མ་འཇིགས་ཤིག །དེ་ལྟར་མ་ཤེས་རང་སྣང་གཞན་བཟུང་ན། །
དངངས་སྐྲག་འཇིགས་ནས་སྲིད་པ་བར་དོར་འཁྱམས། །འདི་དུས་འདུན་པ་རྩེ་གཅིག་གལ་ཆེ་བས། །བླ་མ་དཀོན་མཆོག་ཡི་དམ་ལྷ་ཚོགས་དང་། །མི་ཡུལ་དབང་ཐོབ་ཆོས་འབྲེལ་གང་ཆེ་དང་། །དགེ་བའི་བྱ་བ་ཡིད་ལ་དྲན་པར་བྱོས། །ཀུན་ལ་དག་སྣང་མོས་གུས་གལ་ཆེ་ཞིང་། །མངལ་སྒོ་དགག་དང་རུ་ལོག་དྲན་པར་བྱ། །དག་པའི་ཞིང་ཁམས་ཡིད་ཀྱི་འདུན་པས་ཟུངས། །ཆགས་སྡང་སྤོངས་ལ་བླ་མ་ཡབ་ཡུམ་སྒོམས། །བུ་ཁྱོད་འཁོར་བ་འདི་ལ་མ་ཆགས་པར། ི །བདེ་ཆེན་དག་པའི་ཞིང་དུ་འགྲོ་བར་གྱིས། །ཞེས་ངོ་སྤྲོད་བྱ། སྤྲོན་འདིར་གཏོར་དབང་རེག་པ་དོན་ལྡན་བསྐུར། གང་ལྟར་ཡང་། མཐའ་རྟེན་གྱིས་མངའ་གསོལ་བ་ནི། སྣ་བདུན་དང་རྟགས་བརྒྱད་རིམ་པར་གཏད་ལ། ཧོ༔ ཚེ་འདས་རིགས་ཀྱི་བུ་ཁྱོད་ལ། །རྒྱལ་སྲིད་སྣ་བདུན་དབང་བསྐུར་བས། །བདེ་ལེགས་ཕུན་སུམ་ཚོགས་པ་དང་། །
འཕགས་པའི་ནོར་བདུན་ཕྱུག་ནས་ཀྱང་། །གཞན་དོན་དཔག་མེད་འགྲུབ་པར་ཤོག །ཨོཾ་དྲ་བྱ་རཏྣ་ཨ་བྷི་ཥིཉྩ་ཧཱུྃ། ཧོ༔ ཚེ་འདས་རིགས་ཀྱི་བུ་ཁྱོད་ལ། །བཀྲ་ཤིས་རྟགས་བརྒྱད་དབང་བསྐུར་བས། །རྒྱལ་བུ་རྒྱལ་སར་ཐོན་ནས་ཀྱང་། །རྒྱལ་འབངས་མངའ་འོག་ཚུད་པ་ལྟར། བུམ་དབང་ཡོངས་སུ་རྫོགས་ཐོབ་ནས། །གཞན་དོན་དཔག་མེད་དབང་ཐོབ་ཤོག །ཨཥྚ་མངྒ་ལཾ་ཨ་བྷི་ཥིཉྩ་མཱཾ། གཞན་ཡང་ཤིས་པ་བརྗོད་པས་མངའ་གསོལ་བར་བྱའོ། །བདུན་པ་ནི། ཚེ་འདས་ལྷར་གྱུར་པ་ལ་འདོད་ཡོན་རྣམས། །རཾ་ཡཾ་ཁཾ་གིས་བསང་སྦྱངས། སྟོང་པའི་ངང་ལས་ལྷ་རྫས་ལས་དང་ཏིང་ངེ་འཛིན་ལས་གྲུབ་པའི་འདོད་ཡོན་གྱི་༴་དངོས་པོ་ཟད་མི་ཤེས་པ་ནམ་མཁའ་གང་བར་གྱུར། ༀ་ཨཱཿཧཱུྃ་ལན་གསུམ་དང་ནམ་མཁའ་མཛོད་ཀྱིས་སྔགས་རྒྱས་བརླབས། ཧཱུྃཿ ཚེ་འདས་ལུས་བརྗེས་རིགས་ཀྱི་བུ་
ཁྱོད་ཀྱང་༔ བྱམས་གདུང་ཡིད་ལ་གཅགས་པའི་གཉེན་འདུན་དང་༔ སྨོན་ལམ་ལས་འབྲེལ་མཐུན་པའི་གྲོགས་འདི་རྣམས༔ ཡུན་དུ་འགྲོགས་པའི་སྐལ་དང་དབང་མེད་པས༔ བརྩེ་བའི་སེམས་ཀྱིས་ལོངས་སྤྱོད་སྣ་ཚོགས་བསགས༔ ཐུགས་རྗེ་ཐབས་དང་ལྡན་པའི་སློབ་དཔོན་གྱིས༔ ལོངས་སྤྱོད་གཏེར་ཆེན འཕྲུལ་གྱི་གཞོང་པ་རུ༔ རོ་བརྒྱ་བཅུད་དང་ལྡན་པའི་བཟའ་བ་དང་༔ ཉོན་མོངས་གདུང་བ་སེལ་བའི་བཏུང་བ་བཤམས༔ ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས༔ ཚེ་འདས་རིགས་ཀྱི་བུ་ལ་བསྔོས་པ་ཡིས༔ བཀྲེས་སྐོམ་སྡུག་བསྔལ་མ་ལུས་ཞི་ནས་ནི༔ ཡུན་གྱི་ཟས་དང་སྐོམ་དུ་འབྱུང་བར་ཤོག༔ འདོད་ཡོན་ལོངས་སྤྱོད་འདི་ལྟར་དཔག་མེད་ཀྱང་༔ གཟུགས་སྒྲ་དྲི་རོ་རེག་བྱ་ལ་སོགས་རྫས༔ དངོས་སུ་འབྱོར་བཤམས་ཡིད་ཀྱིས་ལེགས་སྤྲལ་ནས༔
ཏིང་འཛིན་སྔགས་དང་ཕྱག་རྒྱས་བྱིན་བརླབས་ཏེ༔ ཚེ་འདས་རིགས་ཀྱི་བུ་ལ་བསྔོས་པ་ཡིས༔ འདོད་ཡོན་ལོངས་སྤྱོད་དཔལ་དུ་སྤྱོད་པར་ཤོག༔ ཅེས་བརྗོད་ལ་ཉེ་དུ་སོགས་ཀྱིས་དྲི་གསུར་བཏང་ལ་བསྔོ་ཞིང་། ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱྃ། ལན་གསུམ། མཆོད་སྦྱིན་གྱི་གསུར་བསྔོ་འདོད་པའི་ཡོན་ཏན་ལྔ་དང་ལྡན་པ་འདི་ཉིད། འཇིག་རྟེན་འདི་ནས་འཇིག་རྟེན་ཕ་རོལ་དུ་ཚེ་ལས་འདས་པ་ལ་སྦྱིན་ནོ། །བསྔོའོ། །མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་བྲོ་བ། ལུས་ཀྱི་ཡུལ་དུ་རེག་བྱ་འཇམ་པ། ཡིད་ཀྱི་ཡུལ་དུ་བདེ་
བ་མཆོག་གིས་ཚིམས་ནས། བར་དོ་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པ་མྱུར་དུ་ཐོབ་པའི་སྐལ་བ་དང་ལྡན་པར་གྱུར་ཅིག༔ ཅེས་བསྔོ། བརྒྱད་པ་ནི། འདི་ནས་ཤར་ལྷོ་ནུབ་བྱང་དང་༔ དབུས་ཀྱི་ཕྱོགས་ཀྱི་འཇིག་རྟེན་ན༔ བདེ་གཤེགས་རིགས་ལྔའི་ཞིང་ཁམས་ཡོད༔ ཐམས་ཅད་འབྱུང་ལྔའི་རང་བཞིན་ཏེ༔ འབྱུང་ལྔར་ཤི་ཞེས་བྱ་བ་མེད༔ སེམས་ཅན་སྲོག་ནི་འབྱུང་ཆེན་ཏེ༔ འབྱུང་བའི་སྙིང་པོ་མི་འགྱུར་བའི༔ ཡི་གེ་ལྔ་རུ་རྣམ་པར་དག༔ དེ་ལ་བརྟེན་ནས་བུ་ཁྱོད་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ནས༔ ཞིང་མཆོག་ལྔར་ནི་སྐྱེས་གྱུར་ཏེ༔ ཡུམ་ཆེན་ལྔ་དང་གཉིས་མེད་ཤོག༔ ཅེས་བརྗོད་པས་སངས་རྒྱས་ཀྱི་ཞིང་ཡོངས་སུ་སྦྱོང་བའི་མཐུ་དང་ལྡན་པར་བསམ༔ དགུ་པ་ནི། སེམས་དཔའ་ལྔ་ཡི་སྐུ་གཟུགས་མེ་ལོང་ལ་ཤར་བ་བསྟན་ཅིང་། ཀྱེ་མ༔ མུན་པ་ལྟ་བུའི་འཇིག་རྟེན་
ཁམས་སུ་འཁྱམས༔ སྡུག་བསྔལ་ཉམ་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེ་ཅན་གྱིས་སྐྱོབ་པར་ཤོག༔ མེ་ལོང་མཉམ་ཉིད་སོར་རྟོགས་བྱ་བ་གྲུབ༔ ཆོས་དབྱིངས་ཡེ་ཤེས་ངང་ལས་སྐུར་སྤྲུལ་པ༔ རྒྱལ་སྲས་ས་སྙིང་ནམ་སྙིང་སྤྱན་རས་གཟིགས༔ ཕྱག་རྡོར་སྒྲིབ་པ་རྣམ་སེལ་ཐུགས་རྗེ་ཡིས༔ ཚེ་འདས་མིག་དང་རྣ་བ་སྣ་དང་ལྕེ ལུས་ཀྱི་དབང་པོ་ལྔ་ཡི་ནད་བསལ་ནས༔ གཟུགས་སྒྲ་དྲི་རོ་རེག་བྱ་མྱོང་བར་ཤོག༔ སྔོན་ཚེ་གོང་ནས་བསྙེན་པའི་ལྷ༔ ཡི་དམ་ལྷ་མཆོག་འཁོར་བའི་སྐྱབས༔ རྒྱལ་སྲས་བྱང་ཆུབ་སེམས་དཔའ་ལྔ༔ ལྷ་མཆོག་རྣམས་ལ་སྐྱབས་སུ་མཆི༔ ཐུགས་རྗེས་ཚེ་འདས་བྱིན་གྱིས་རློབས༔ ཞེས་བརྗོད་པས་སེམས་ཅན་རྣམས་ཡོངས་སུ་སྨིན་པའི་མཐུ་དང་ལྡན་པར་བསམ། བཅུ་པ་ལ་ལམ་བསྟན་པ་དང་། གནས་སྤར་བ་གཉིས་ལས།
དང་པོ་ནི་སྣང་གསལ་གྱི་འོད་ཀྱིས་མཚོན་པར་བྱས་ལ། ཧཱུྃཿ༔ རང་བཞིན་ཤུགས་ཀྱིས་དྲངས་པའི་དྲན་པས་ཉོན༔ འཁོར་བའི་རྦ་རླབས་མུན་ལྟར་འཁྱམས་པ་ལ༔ ཐུགས་རྗེའི་ཤུགས་ཀྱིས་སྒྲོན་མེ་འདི་བསྟན་པས༔ ཡེ་ཤེས་འོད་ལ་རྟག་ཏུ་འདེ་བར་ཤོག༔ ཐར་པའི་ཞིང་དུ་འགྲོ་བ་ལ༔ མུན་པ་འཐིབས་དང་མ་རིག་རྨོངས༔ མི་ཤེས་འཁྲུལ་དང་ལམ་སྟོར་ན༔ ཡེ་ཤེས་སྒྲོན་མེས་གསལ་གྱུར་ཅིག༔ ཡེ་ཤེས་སྣང་བ་ཆེན་པོ་སྟེ༔ སྔགས་འཆང་རྒྱལ་པོས་སྒྲོན་མེ་སྦྱིན༔ འདི་ལ་བརྟེན་ནས་བུ་ཁྱོད་ཀྱང་༔ འོག་མིན་ཆོས་དབྱིངས་ཞིང་ཁམས་སུ༔ ཡེ་ཤེས་ལྷ་དང་འཕྲད་པར་ཤོག༔ ཅེས་དང་། འདི་ནས་ཤར་ལྷོ་ནུབ་བྱང་དབུས༔ མངོན་དགའ་དཔལ་ལྡན་པདྨ་བརྩེགས༔ ལས་གྲུབ་སྟུག་པོ་བཀོད་པའི་ཞིང་༔ བཅོམ་ལྡན་རྒྱལ་བ་རིགས་ལྔ་བཞུགས༔ གང་ཞིག་དེ་ཡི་མཚན་འཛིན་པ༔
ཞིང་མཆོག་དེར་ནི་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ རྫོགས་པའི་སངས་རྒྱས་རིགས་ལྔ་ལ༔ ཚེ་ལས་འདས་པ་འདི་ཉིད་ཀྱི༔ ཕུང་པོ་ལྔ་པོ་ཡོན་དུ་འབུལ༔ ཡོན་འདི་བཞེས་ལ་ལམ་འདི་སྟོན༔ སེམས་འདི་བྱང་ཆུབ་གནས་སུ་དྲོངས༔ གཉིས་པ་གནས་སྤར་བ་ནི། ཐབས་ཤེས་ཟུང་འབྲེལ་མདའ་གཞུའི་འཕྲུལ་འཁོར་གྱིས་མཚོན་ཏེ། ཧཱུྃཿ ཐབས་ཀྱི་གཞུ་ལ་ཤེས་རབ་མདའ་བཀང་སྟེ༔ ཡེ་ཤེས་ཐུགས་རྗེའི་ཤུགས་ཀྱི་རྒྱུད་དང་ལྡན༔ བླ་ན་མེད་པའི་གནས་མཆོག་དམ་པ་རུ༔ ཚེ་འདས་མདའ་འཕང་བཞིན་དུ་སྐྱེ་བར་ཤོག༔ ཅེས་དང་། ཞིང་ཁམས་འདི་ནས་དབུས་ཀྱི་ཕྱོགས་རོལ་ན༔ འོག་མིན་ཆོས་དབྱིངས་ཕོ་བྲང་ཞེས་བྱ་ཡོད༔ དེ་ན་སངས་རྒྱས་ཀུན་གྱི་སྤྱི་མེས་ནི༔ ཐོག་མའི་སངས་རྒྱས་ཀུན་ཏུ་བཟང་པོ་བཞུགས༔ དུས་གསུམ་སངས་རྒྱས་
ཐམས་ཅད་བསྐྱེད་པའི་ཡུམ༔ ཆོས་ཉིད་ཀུན་ཏུ་བཟང་མོ་ཞེས་བྱ་ཡོད༔ རྒྱལ་བའི་གཙོ་མཆོག་རྡོ་རྗེ་སེམས་དཔའ་བཞུགས༔ ཡུམ་ཆེན་ནམ་མཁའི་དབྱིངས་ཕྱུག་ཅེས་བྱ་བཞུགས༔ རིགས་བཞི་ཡབ་ཡུམ་གཙོ་འཁོར་གྲངས་མེད་ཡོད༔ སྤྲུལ་པའི་སངས་རྒྱས་གྲངས་ལས་འདས་པ་ཡོད༔ ཡ་མཚན་བཀོད་པ་བསམ་གྱིས་མི་ཁྱབ་ཡོད༔ དེ་ཕྱིར་མིང་ནི་སྟུག་པོ་བཀོད་པའི་ཞིང་༔ ཞིང་མཆོག་གཙང་མའི་གནས་རབ་དམ་པ་དེར༔ ཚེ་འདས་ལུས་བརྗེས་རིགས་ཀྱི་བུ་ཁྱོད་ཀྱང་༔ རྫོགས་པའི་སངས་རྒྱས་དེ་ཡི་སྲས་མཆོག་ཏུ༔ རྩལ་ཆེན་མདའ་འཕངས་བཞིན་དུ་སྐྱེ་བར་ཤོག༔ ཕཊ༔ ཚེ་ལས་འདས་པའི་རྣམ་པར་ཤེས་པ་ཧཱུྃ་མཐིང་ག་གཅིག་ཏུ་གྱུར་ཏེ༔ རྩལ་པོ་ཆེས་མདའ་འཕངས་པ་བཞིན་དུ་རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་ཐིམ་པས༔ རྒྱལ་བའི་སྲས་སུ་
གྱུར་ཏེ་སངས་རྒྱས་པར་གྱུར༔ སླར་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ཐོགས་པ་མེད་པར་བྱེད་ནུས་པར་གྱུར་ཅིག༔ ཅེས་འོག་མིན་སྟུག་པོ་བཀོད་པར་གནས་སྤར། བཅུ་གཅིག་པ་ནི། མདུན་དུ་མར་མེ་བཞག་ལ། ཨོཾ་བཛྲ་སཏྭ་ཧཱུྃཿ ཞེས་བརྗོད་པས། མར་མེའི་དབུས་སུ་མེ་ལྷ་རྡོ་རྗེ་སེམས། །གསལ་བའི་འོད་ཀྱིས་ཡེ་ཤེས་སྤྱན་དྲངས་ཐིམ། །ཐུགས་རྗེའི་འོད་འཕྲོས་ཚེ་ལས་འདས་པ་ཡི། །ཉོན་མོངས་སྡིག་སྒྲིབ་ཐམས་ཅད་བསྲེག་པར་གྱུར། །ཅེས་བསམས་ལ། ཧཱུྃཿ ཚེ་འདས་རིགས་ཀྱི་བུ་ཁྱོད་ཀྱི༔ ཉོན་མོངས་ལྔ་ཡི་ཐབ་ཁུང་དུ༔ ཕུང་པོ་ལྔ་ཡི་བུད་ཤིང་ལ༔ ཡེ་ཤེས་ལྔ་ཡི་མེ་སྦར་པས༔ ཉོན་མོངས་རྒྱ་མཚོ་སྐེམ་པར་ཤོག༔ བདག་ཏུ་འཛིན་པའི་ཕུང་པོ་ལ༔ སྟོང་པ་ཉིད་ཀྱི་མེ་སྦར་བས༔ གནས་ལུགས་ཇི་བཞིན་རྟོགས་པར་ཤོག༔
དུག་གསུམ་འདུས་པའི་ཕུང་པོ་ལ༔ སྐུ་གསུང་ཐུགས་ཀྱི་མེ་སྦར་བས༔ སྐུ་གསུམ་ལྷུན་གྱིས་གྲུབ་པར་ཤོག༔ དུག་ལྔ་འདུས་པའི་ཕུང་པོ་ལ༔ རྒྱལ་བ་རིགས་ལྔའི་མེ་སྦར་བས༔ ཡེ་ཤེས་ལྔ་དང་ལྡན་པར་ཤོག༔ འབྱུང་བཞི་འདུས་པའི་ཕུང་པོ་ལ༔ ཡུམ་ཆེན་བཞི་ཡི་མེ་སྦར་བས༔ ཚད་མེད་བཞི་དང་ལྡན་༜ ནས་ཀྱང་༔ ཕྲིན་ལས་རྣམ་བཞི་ལྷན་གྲུབ་ནས༔ འཁོར་བའི་རྒྱ་མཚོ་སྐེམ་པར་ཤོག༔ ཅེས་དང་། ཡི་གེ་བརྒྱ་པ་དང་མི་འཁྲུགས་པའི་གཟུངས་སོགས་བཟླཞིང་། ཨགྣ་ཡེ་ཛྭ་ལ་རཾ་ཞེས་བསྲེགས། བཅུ་གཉིས་པ་ནི། ཐལ་བ་བུམ་ཆུས་སྦྱངས་ཤིང་བྱེ་མས་བྲབ། ས་གཙང་མ་དང་སྦྱར་ནས་སཱཙྪ་གདབ། རབ་གནས་རྒྱས་བསྡུས་ཇི་ལྟར་རིགས་པ་བྱ་ཞིང་། དབེན་གནས་སམ་ཆུ་ཀླུང་ཆེན་པོར་སྤྱན་འདྲེན་པར་བྱ། ཚེ་འདས་ཀྱི་དོན་དུ་བཟང་པོ་སྤྱོད་པ་ལ་སོགས་སྨོན་ལམ་གདབ་ཅིང་། ཤི་རྒབ་བཅད་ཕྱིར་ཤིས་བརྗོད་རྒྱ་ཆེར་བྱ། བསྐུལ་དང་ཆད་མདོ་སོགས་ཆོ་
གའི་རྗེས་རིམ་རྣམས་གཞུང་བཞིན་བྱའོ། །ཞེས་པའང་ཟབ་མོའི་ལམ་འདི་ལ་མོས་ཤིང་དོན་གཉེར་དང་ལྡན་པ་སྦས་ཡུལ་ཀརྨ་རོང་གི་རྣལ་འབྱོར་པ་པདྨ་ཚེ་མཆོག་རྡོ་རྗེས་ཞི་ཁྲོ་དགོངས་པ་རང་གྲོལ་གྱི་སྔགས་གསོའི་ཆ་རྐྱེན་དུ་གཤིན་ཆོག་རྒྱས་བསྡུས་འཚམས་པ་འདི་ལྟ་བུ་ཞིག་དགོས་ཞེས་ནན་ཏན་ཆེན་པོས་བསྐུལ་བའི་གཡར་ཁྲལ་དུ། དུས་མཐའི་སྔགས་བན་སྙོམས་ལས་པ་ཁྲོ་རྒྱལ་རྡོ་རྗེའམ་མིང་གཞན་སངས་རྒྱས་རྡོ་རྗེར་འབོད་པས། ཨོ་རྒྱན་མཁན་པོའི་རྡོ་རྗེའི་གསུང་གནས་འདྲེན་འགྲོ་དྲུག་རང་གྲོལ་གྱི་དགོངས་པ་ལྟར་ལ་ངག་འདོན་ཚིག་ཚོགས་ཀྱི་སྤྲོས་པ་ཇི་རིགས་སུ་བསྡུས་ནས་ཁྲིགས་སུ་བསྡེབས་པ་འདིས་ཀྱང་གཤིན་པོ་སྐྱབས་མེད་མགོན་བྲལ་མང་པོ་འཁྲུལ་སྣང་བར་དོ་དྲུག་གི་འཇིགས་སྐྲག་སྡུག་བསྔལ་གྱི་མཚོ་ཆེན་ལས་ཡོངས་སུ་བསྒྲལ་ཏེ་བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་པའི་སྐལ་བ་དང་ལྡན་པའི་རྒྱུར་གྱུར་ཅིག །སརྦ་མངྒ་ལཾ།
ཤོག་སྟོང་།