བླ་མ་རྡོ་རྗེ་གཟི་བརྗིད་རྩལ་ལ་ཕྱག་འཚལ།
བླ་མ་རྡོ་རྗེ་གཟི་བརྗིད་རྩལ་ལ་ཕྱག་འཚལ་ཞིང་སྐྱབས་སུ་མཆིའོ། །ད་ལོ་རྒྱལ་གྱི་ཟླ་བ་ལ། །སྦས་ཡུལ་བཀྲ་ཤིས་ལྡིང་གནས་སུ། །སློབ་དཔོན་རྡོ་གྲུབ་སྤྲུལ་སྐུའི་དྲུང་། །རིན་ཆེན་གཏེར་མཛོད་ཞུ་ཕྱིར་དུ། །རང་ལྟོས་གྲྭ་གཞོན་འགའ་ཞིག་ནི། །ཆེད་དུ་རྫོང་བརྡ་བྱ་བ་ལ། །བསླབ་བྱ་ཚིག་གསུམ་ཡོད་ཀྱི་ཉོན། །འདི་བསམ་དེ་བསམ་མེད་པ་ཡི། །མི་རྗེས་ཁྱི་རྒྱུག་མི་བྱེད་པར། །རང་གཞན་འཁོར་བའི་རྒྱ་མཚོ་ལས། །བྲལ་ཕྱིར་བྱང་ཆུབ་མཆོག་སེམས་བསྐྱེད། །ཨུ་དུམ་ཝཱ་རའི་མེ་ཏོག་ལྟར། །དཀོན་པའི་མི་ལུས་རྟེན་བཟང་དང་། །ཨོ་རྒྱན་ཟབ་ཆོས་རིན་གཏེར་དབང་། །དེ་སྟོན་མཚན་ལྡན་བླ་མ་བཅས། །ཤིན་ཏུ་རྙེད་པར་དཀའ་བ་རྣམས། །ད་རེས་སྔོན་བསགས་བསོད་ནམས་མཐུས། །ཕུན་སུམ་
ཚོགས་པ་འདི་འདྲ་ནི། །དུས་བརྒྱའི་ཟ་མ་ལན་གཅིག་ཡིན། །དགའ་ཞིང་སྤྲོ་བ་རྒྱ་ཆེར་མཛོད། །དམ་ཆོས་སྙིང་པོ་གསང་སྔགས་ཀྱི། །ཐོག་མའི་འཇུག་སྒོ་དབང་ཡིན་ཅིང་། །དབང་གི་རྩ་བ་དམ་ཚིག་ཡིན། །དམ་ཚིག་མ་ཉམས་དངོས་གྲུབ་འགྲུབ། །ཉམས་ན་རྡོ་རྗེ་དམྱལ་བར་ལྟུང་། །ཁེ་ཉེན་ཕུང་འཚེང་གཉིས་ཀ་ཆེ། །དེ་འདྲའི་སྨིན་གྲོལ་ཞུ་བའི་ཚེ། །བླ་སློབ་རྟེན་འབྲེལ་མ་ལོག་གཅེས། །དབང་དང་ཆོས་གྲལ་འདུག་པའི་ཚེ། །རྣ་བ་ཚྭ དབང་ཚིག་སྒྲ་ལ་གཏོད། །དེ་ཡི་དོན་ལ་སེམས་ཀྱིས་བསམ། །ཤབ་ཤུབ་ཁ་བརྡ་མིག་བརྡ་སྤངས། །བླ་མ་རྡོ་རྗེ་སློབ་དཔོན་ལ། །ཐེ་ཚོམ་ལོག་ལྟ་སྤངས་བ་དང་། །དག་སྣང་མོས་གུས་སྙིང་ནས་བསྐྱེད། །མཆེད་ལྕམ་རྡོ་རྗེ་སྤུན་གྲོགས་ལ། །སྐྱོན་རྟོག་འཁོན་འགྲས་མི་བྱ་བར། །བརྩེ་གདུང་
བྱམས་པས་འགྲོགས་མཁས་བྱ། །གལ་ཏེ་གཞན་གྱི་སྐྱོན་མཐོང་ན། །རང་སྐྱོན་ཡིན་ཕྱིར་ངོས་ཟིན་དགོས། །མདོར་ན དྲན་ཤེས་བག་ཡོད་བརྟེན། །སྒོ་གསུམ་ཞི་དུལ་ལྷོད་ཆགས་ངང་། །མཐོ་དམན་ཐམས་ཅད་གོང་དུ་བཀུར། །ང་རྒྱལ་ཕྲག་དོག་དགྲ་ཆེན་བཏུལ། རྟག་པར་དམན་ས་བཟུང་བ་གནད། མཆོང་རྒྱུག་ཧ་བགད་ཀུ་ཅོ་སྤངས། །རྩེད་མོ་ང་རྒྱལ་ཚིག་རྩུབ་སོགས། །སྨྲ་བའི་ཉེས་པ་ཀུན་སྤངས་ནས། ཁ་རོག་བསྡད་ན་གནོད་མི་འབྱུང་། །ཁེ་དང་རྒྱལ་ཁ་གཞན་ལ་བྱིན། །བཟོད་པ་བསྒོམ་པ་དཀའ་ཐུབ་མཆོག །ཕམ་ཁ་ཁུར་བ་དགེ་སྦྱོང་ཆོས། ཆོས་ཐུན་རེ་བཞིན་སེམས་བསྐྱེད་དང་། །བསྔོ་སྨོན་མ་ཆག་དོན་ཆེན་ལྡན། དེ་ལྟར་བགྱིས་ན་དབང་གི་དོན། །ལུས་ངག་ཡིད་དང་ཆ་མཉམ་
བཅས། །རྡོ་རྗེ་བཞི་ཡི་བྱིན་རླབས་འཇུག །སྐུ་བཞིའི་གོ་འཕང་ཐོབ་རུང་འགྱུར། །བསྐྱེད་རྫོགས་བཟླས་སྒོམ་བྱེད་ལ་དབང་། །ཚོགས་རྫོགས་སྒྲིབ་སྦྱོང་གཉིས་ཀ་ཡང་། །དབང་ལུང་ཞོར་ལ་འབྱུང་བ་སོགས། །དབང་གི་ཕན་ཡོན་བསམ་མི་ཁྱབ། །འདི་རུ་སྨྲོས་ཀྱིས་མ་ལྡང་ངོ་། །དབང་བསྐུར་ཞུས་ཐོབ་བྱ་བ་དེ། །རབ་ན་དབང་དོན་ཡེ་ཤེས་རྟོགས། །འབྲིང་དུ་བདེ་གསལ་མི་རྟོག་སྐྱེ། །ཐ་མའང་དབང་བཞིའི་ངེས་ཤེས་རྙེད། །དེ་ལས་ལྡོག་སྟེ་དབང་དོན་གྱི། །ཡེ་ཤེས་སྐྱེ་བ་ཕར་ཞོག་གི། །དབང་བཞིའི་གོ་ཡུལ་ཙམ་མ་ཆགས། །བུམ་ཆུ་མྱང་དང་ཙ་ཀ་ལི། །མགོ་བོར་བཞག་ཙམ་གྱིས་ཞེ་ཚིམས། །དེ་འདྲ་དོན་དབང་ཐོབ་པ་ཡི། །གོ་ཆོད་ནམ་ཡང་བྱར་མི་རུང་། །ད་ལྟ་བསྟན་པའི་དམར་ཐག་དུས། །འདི་འདྲའི་རྣམ་བཞག་བྱེད་
མཁན་དཀོན། །དེ་ཕྱིར་བུ་ཁྱེད་རྣམས་ཀྱིས་ཀྱང་། །ཡང་དག་ལྟར་སྣང་དབྱེ་བསལ་ལ། །གཟབ་ནས་ཐོས་བསམ་ངེས་ཤེས་བསྐྱེད། །ལྷག་པར་སྙིགས་མའི་དུས་སྐྱེས་པའི། །གང་ཟག་གཏེར་ཆོས་ཀྱིས་གྲོལ་བས། །དལ་འབྱོར་སྙིང་པོ་འདི་ཡིས་ལོངས། །བྱིན་རླབས་ཆེ་ཞིང་བརྒྱུད་ཐག་ཉེ། །ལྷད་མ་ཞུགས་ཤིང་ལག་ལེན་བདེ། །ངས་ནི་བཀའ་གཏེར་རྒྱུད་སྡེ་དང་། །སྒྲུབ་སྡེ་མང་པོར་ཐོས་བསམ་བགྱིས། རིན་ཆེན་གཏེར་གྱི་མཛོད་ཆེན་འདི། །རྙིང་མ་སྤྱི་ཡི་ཕ་ཆོས་ཡིན། །ཕ་ནོར་བུ་ཡིས་སྤྱོད་ཤེས་ན། །སྐལ་བ་བཟང་པོའི་མཆོག་ཏུ་གོ །དེ་སྐད་སྔགས་༔བན་རྒན་པོ་ངས། །གྲྭ་པ་རྣམས་ལ་གདམས་པའི་དགེས། །གསང་སྔགས་བླ་མེད་བསྟན་པ་འདི། །འཛམ་གྲིང་ཡོངས་ལ་དར་རྒྱས་ཤོག །ཅེས་
པའང་རང་གི་གྲྭ་པ་རྣམས་དབང་ལུང་ཞུ་བར་ཆེད་དུ་རྫོང་བའི་ཚེ་ཁ་ཏའི་ཚུལ་དུ་སངས་རྒྱས་རྡོ་རྗེས་ཤི་ལུ་གྷུ་རིའི་བདེ་གཤེགས་མྱང་འདས་མཆོད་རྟེན་དྲུང་ནས་བྲིས་ཏེ་སྤྲིངས་པ་བྷ་བ་ཏུ།།