གསོལ་འདེབས་དང་འབྲེལ་བའི་ཞལ་གདམས་ཐོལ་བྱུང་མ།
གསོལ་འདེབས་དང་འབྲེལ་བའི་ཞལ་གདམས་ཐོལ་བྱུང་མ་བཞུགས་སོ། །
ཨ་ཧོ། །ངོ་བོ་གདོད་མའི་སངས་རྒྱས། །རང་བཞིན་མ་འགགས་ལོངས་སྐུ། །ཟུང་འཇུག་ཐུགས་རྗེའི་རང་མདངས། །སྐུ་གསུམ་བླ་མ་མཁྱེན་ནོ། །དགུ་ལྡན་སྐུ་བཞིའི་བདག་ཉིད། །ལུང་ཟིན་སངས་རྒྱས་རྡོ་རྗེ། །བྱིན་བརྒྱུད་དགོངས་ཀློང་ཡོངས་གྲུབ། །དབྱིངས་ནས་བརྩེ་ཆེན་རོལ་པས། །མོས་པའི་བུ་ལ་གཟིགས་ཤིག །དགོངས་བརྡ་
སྙན་བརྒྱུད་བྱིན་དབང་། །ད་ལྟ་ཉིད་དུ་བསྩལ་ནས། །ཉིད་དང་དབྱེར་མེད་མཛོད་ཅིག །གསོལ་བ་ང་ཡིས་འདེབས་ན། །ཐུགས་རྗེ་ཁྱེད་ཀྱིས་གཟིགས་ལ། །ཉམས་ཀྱི་ཤུན་པ་བྲལ་བའི། །རིག་སྟོང་ཆོས་སྐའི་ཕ་ཕོགས། ལྟ་སྒོམ་སྤྱོད་འབྲས་ལས་འདས། །རང་བྱུང་གདོད་མའི་གཤིས་ལུགས། །བློ་བྲལ་ཡེ་ཡིན་ངང་དུ། །མ་བཅོས་སོ་མའི་
རྟོགས་ཚད། །ངོ་ཤེས་ལ་ཟླའི་གདེང་ལྡན། །གཅེར་མཐོང་རང་གྲོལ་བོགས་ཆེན། །ད་ལྟ་སྟན་ཐོག་འདི་རུ། །བདག་ལ་ཐོན་པར་མཛོད་ཅིག༔ འོད་གསལ་རྫོགས་ཆེན་མྱུར་ལམ། །མོས་གུས་ཉེ་རྒྱུས་མཐུ་ལས། །ཚེ་གཅིག་རྟོགས་གྲོལ་མངོན་གྱུར། །ས་ལམ་གཞིར་རྫོགས་འབྲས་བུ། །ཕྱི དུས་མི་རེ་ཨ་ཧོ། །སྔོན་བསགས་བསོད་ནམས་ལས་སད། །སྨིན་གྲོལ་བདུད་རྩི་འཐུངས་པས། །མ་རིག་ལས་ཉོན་འཁྲུལ་བག །སྐྱེ་མེད་ཆོས་སྐུར་སངས་ཏེ། །རྩོལ་བྲལ་སྙིང་རྗེས་འགྲོ་ཁམས། །དོང་ནས་སྤྲུགས་པའི་ཁྱད་ཆོས། །ཕ་གཅིག་བླ་མའི་དྲིན་ལས། །བུ་རུལ་བདག་ལ་ཐོབ་སྟེ། །བརྒྱ་ཤེས་གཅིག་རྡུག་མི་རེ། །གཅིག་ཤེས་ཀུན་གྲོལ་ངང་ནས། །མི་ཚེ་ཧྲིལ་པོ་སྐྱེལ་གཏོང་། །ནོར་གོལ་ཤོར་བའི་བརྐུང་འཕྲང་།
དཔལ་ལྡན་བླ་མས་སྐྱོབས་མཛོད། །མོས་གུས་གསོལ་འདེབས་མ་གཏོགས། །དགེ་གཞན་བྱར་མེད་བྱ་བཏང་། །ད་ནི་ཨེ་འོང་མི་འོང་། །རང་ལག་ཡོད་པ་ལོས་ཤེས། །འདི་ལྟར་ཕྱི་ནང་སྣོད་བཅུད། །རང་གཞན་ཀུན་གྱི་ཐོག་ཏུ། །མི་ཐུབ་སྙིགས་ལྔའི་བདུད་མདས། །ཕོག་པའི་ཚུལ་འདིར་དགོངས་ནས། །ཉམ་ཆུང་བྱ་བཏང་བརྟུལ་ཞུགས། །དབེན་ཁྲོད་ངེས་མེད་རྣམས་སུ། །གྲོགས་མེད་གཅིག་པུས་བསྐྱངས་ཏེ། །ཉིན་མཚན་ཆུ་བོའི་རྒྱུན་བཞིན། དྲན་སྣང་ཡེ་ཤེས་འཁོར་ལོར། །མཉམ་རྗེས་མཉམ་ཉིད་རྡོ་རུས། །རྐྱེན་ཐོག་རོ་སྙོམས་ནུས་པར། །མཁྱེན་ནོ་བླ་མ་མཁྱེན་ནོ། །ཁ་ཏ་སྐམ་པོའི་འུད་ཀྱིས། །སྐྱེ་འཆི་བར་དོའི་འགག་ལ། །བསླུ་བའི་ཉེན་ཅིག་འདུག་པས། །དྲན་པའི་སོ་
ཚུགས་རེམ་མཛོད། །ཅེས་བླ་མ་རྒྱང་འབོད་ཀྱི་གསོལ་འདེབས་ཞལ་གདམས་ཀྱི་དོད་འདི་སྔགས་ཕྲུག་འཇིགས་མེད་བློ་བདེ་ནས་གསེར་དངུལ་གྱི་མཎྜལ་དང་བཅས་བསྐུལ་ལྕག་སྔ་ཕྱི་ཡང་ཡང་བྱུང་བ་དོན་མེད་དུ་མ་སོང་ཕྱིར་དཀོར་རྒན་བུདྡྷ་བཛྲས་རང་གནས་གཡུ་འབྲུག་སྒང་མཚམས་ཁང་ནས་སྨྲས་པ་བུ་མོ་སྭ་ར་སྭ་སྟིས་ཡི་གེར་བྲིས་པ་མངྒ་ལཾ།།