ཉོན་དང་འདོད་ལྡན་བུ་མོ་ལགས།

ཨོཾ་སྭ་སྟི། །ཉོན་དང་འདོད་ལྡན་བུ་མོ་ལགས། །དེང་སང་བསྟན་ཞབས་མཐར་སྐྱེས་པའི། །མི་རྣམས་སྙིང་ལ་བདུད མདས་ཕོག །ཕན་པའི་ཚིག་ཀྱང་ལོག་པར་གོ། །ཕྱི་མ་མི་བསམ་འཁོར་བ་ལ། །བདེན་ཞེན་འཁྲུལ་པའི་འཁོར་ལོར་འཕྱན། །ཆོས་ལ་བསྙད་ནས་འཇིག་རྟེན་སྒྲུབ། །ཁ་དང་ལག་ལེན་དོན་འཛོལ་ནས། །དམྱལ་བ་མཐའ་མེད་རྒྱུ་བསགས་པ། །དེ་འདྲ་ས་རྡུལ་གྲངས་ལས་མང་། །སྙིང་ནས་བཤའ་མའི་ཆོས་བསྒྲུབ་ན། །ལོང་མེད་བློ་སྣ་འུབ་ཀྱིས་བསྟུང་། །ངེས་འབྱུང་ལས་འབྲས་དཔང་བཞག་སྟེ། །བླ་མ་རང་སེམས་ལྷ་གསུམ་གྱིས། མ་ཁྲེལ་བ་ཞིག་ཤིན་ཏུ་གཅེས། །དེ་ཡང་དམ་ཆོས་ཀུན་ཟབ་ཀྱང་། །རང་སེམས་ཆོས་དང་མ་མཐུན་ན། །འཁོར་བའི་གཅོང་ནད་མི་སེལ་བས།

བློ་སྣ་ནང་དུ་བཀུག་འཚལ་ལོ། །ལམ་མཁན་བཤེས་གཉེན་མགོན་ལ་བསྟེན། །རང་སྐྱོན་ང་རྒྱལ་མཚང་ནས་བྲུས། །འབྲིང་མཆོག་དམན་གསུམ་གོང་དུ་བཀུར། །ཆོག་ཤེས་ནོར་དང་ཟས་ལ་བྱ། །རྟག་ཏུ་དབེན་ཁྲོད་བས་མཐར་འདུག །ཁ་ལག་སྤྱོད་གསུམ་ཉུང་དུ་ཆུག །བསོད་ནམས་ཚོགས་གཉིས་གསོག་ལ་འབུངས། །ཆོས་བརྒྱད་ཆགས་སྡང་དགྲ་བྱུང་ན། །དྲན་དང་ཤེས་བཞིན་བག་ཡོད་བྱ། །རྩ་བ་རང་རྒྱུད་འདུལ་སྦྱོང་ལས། །གཞན་གྱུར་དགེ་བའི་གཟུགས་བརྙན་ཡིན། །ཆོས་ནས་ཇི་སྐད་བསྟན་པའི་དོན། །བླ་མ་དམ་པས་བཀྲོལ་ཏེ་བཤད། །གདམས་དོན་ཉམས་སུ་ལེན་པ་ལས། །སྣོད་ལྡན་ཞེས་སུ་གྲགས་མིན་ནམ། །ཉན་ལོ་ཐོས་ལོས་འཚང་མི་རྒྱ། །ཐ་མལ་སྐྱེ་བོའི་གཤིས་དེ་ལས། །འགྱུར་ལྡོག་བློ་སྐྱེད་མ་འཁྲུངས་

པར། །རང་མཐོང་རི་བོ་ཙམ་བསྒོམ་ཀྱང་། །རྐྱེན་ངན་ལམ་དུ་མི་ལྷོངས་ཤིང་། །དྲེད་པོ་དམ་པས་ཁྲེལ་བའི་གནས། །སྙིགས་དུས་ཆོས་གཟུགས་དེ་དག་གི། །རྗེས་སུ་གཡང་ལ་མ་ལྕེབས་ཨང་། །དལ་འབྱོར་རྟེན་དང་བསྟན་པ་གནས། །མོས་ཐོབ་དགེ་བའི་བཤེས་ཀྱིས་ཟིན། །དེ་ཀུན་དཀོན་པའི་ཆོས་ལགས་པའི། །ཚུལ་འདི་ཡང་ཡང་བསམ་ནས་སུ། །གཏན་གྱི་འདུན་པ་རྫོགས་བྱང་གི། །གོ་འཕང་ཚེ་འདིར བསྒྲུབ་ལ་གཏོད། །དེ་ལ་མཁོ་བའི་རིམ་པ་རྣམས། །ཕྲ་ཞིབ་བླ་མའི་ཞལ་ལ་ཐུག༔ ༼ཐྲི༽། །ཞེས་པའང་ཚུལ་ཁྲིམས་བཟང་མོའི་ངོར་བྱ་སྤྲང་བུདྡྷས།།

ཤོག་སྟོང་།