སྐྱབས་དྲན་མཆོག་གཏེར་ཆེན་བླ་མ་རྗེར།
ན་མོ་གུ་རུ་བྷྱ། སྐྱབས་དྲན་མཆོག་གཏེར་ཆེན་བླ་མ་རྗེར། །སྤྲང་སྐྱོ་གདུང་དྲག་པོས་གསོལ་བ་འདེབས། །གནས་མི་མངོན་ཟངས་མདོག་དཔལ་རི་ནས། །དབྱིངས་ཟག་བྲལ་མཁྱེན་པའི་སྤྱན་གྱིས་གཟིགས། །དུས་ད་ནི་སྣོད་བཅུད་གར་བལྟས་ཀྱང། །ཡོངས་སྙིགས་མ་ལྔ་ཡི་རང་མཚང་ངོམས། །ས་གང་དུ་བསྡད་ཀྱང་བདེ་སྐྱིད་ཟད། །ཆོས་ཚུལ་བཞིན་བྱེད་པ་སྲིད་པ་ཙམ། །ལས་བྱ་བ་རང་འདོད་གཡོ་ཁྲམ་གྱིས། །གཞན་བསླུ་བའི་བསམ་སྤྱོད་ཁོ་ན་ལས། །ལས་རྒྱུ་འབྲས་བརྩི་བ་ལྟ་ཞོག་གི། །ཚེ་ཕྱི་མ་དྲན་པའི་མི་རེ་དཀོན། །ལར་བསམ་ཞིང་སྙིང་རླུང་དབང་མེད་ལངས། །ཕ་དྲིན་ཅན་བླ་མ་དཔལ་རིར་གཤེགས། །བུ་ལས་ངན་འཁོར་ནག་གྲོང་དུ་ལུས། །ཡིད་འཆི་ལ་སྨོན་ཀྱང་འཆི་མ་ནུས།
གསོན་བསྡད་རྒྱུར་འདི་སྣང་སྐྱོ་ཆད་དེ། །སྡུག་རེ་དོགས་ལྐོག་ཟས་ཨ་ཙ་མ། །མིང་སྐམ་པོའི་བླ་ཆུང་གོ་ས་འདིས། །དགྲ་འཆི་བདག་སླེབས་ཉིན་མི་བསླུའམ། །གྲོང་ཡུལ་དང་འདུ་འཛིར་བྱོལ་ཁུལ་གྱིས། །རི་དབེན་པའི་ནགས་ཁྲོད་བརྟེན་མདོག་འདི། །རྒྱུད་ཞེན་ཆགས་ངན་གོམས་བག་ཆགས་ཀྱིས། །རྟག་འཛིན་དང་ཕྱི་ཚིས་གྲབ་ཤོམ་འདིང་། །ལས་ཟིན་མེད་མང་པོས་ལུས་སེམས་བྲེལ། །མི་དགོས་རྒུ་དགོས་ལ་རྫོགས་དུས་མེད། །ཐུན་གཙང་མ་གཅིག་ཀྱང་ཆོད་དུས་དབེན། །ཁོང་འཇིག་རྟེན་ཞོ་ཤས་འཚོ་བ་ཡི། །རྐང་ལེབ་ལ་མངགས་གཞུག་ཁུར་ལྗིད་བཀལ། །གྱེན་ཐུར་དང་གཡང་ས་འཕྲང་རྩུབ་ལ། །ཁུར་མི་ཐེག་སྒྱིད་པ་འདར་སིག་སིག །ངག་ཧུ་ཁྱུ་དང་ཤུགས་རིང་བརྩེགས་མར་འདོན། །སྙིང་ཁ་རུ་འཐོན་འདྲའི་སྡུག་བསྔལ་
དང་། །ལུས་རྔུལ་ནག་གི་ཐིགས་པ་ཤ་ར་ར། །འདི་དཔོན་ཆེན་གྱིས་ཁྲལ་དུ་འདེད་པ་དང་། །སྒོ་ཀུན་ནས་མཚུངས་པ་མ་ལགས་སམ། །ལར་སྙིང་རྗེ་མེད་པའི་ཆོས་གཟུགས་ཀྱང་། །ཁྲམ་པ་ཡིས་རི་སྟོང་མྱུལ་བ་འདྲ། །གནས་རི་ཁྲོད་འཛིན་པའི་དོན་སྒོ་ནི། །དོན་བྱ་བ་ཉུང་ཞིང་དགེ་འཕེལ་དགོས། །མར་འཁོར་བའི་གནས་ན་ཇི་ཙམ་དུ། །ལུས་དཀའ་ཐུབ་གདུང་བས་ཚར་བཅད་ཀྱང་། །དུས་མཐའ་མེད་འཁོར་བའི་རྒྱུ་ལས་མེད། །བར་དགོན་སྡེ་གྲྭ་སའི་སྤྱི་རྒྱུག་ལམ། །མངོན་ལྐོག་དང་ཚུལ་འཆོས་འགྲན་སེམས་རྩོད། །ཀློག་ཕེར་ཙམ་ནས་གྲོང་ཆོག་ལ་མི་ཚེ་སྐྱེལ། །ཐོས་བསམ་དང་ཆོས་སྤྱོད་བསྐྱེད་རྫོགས་དོན། །སྙིང་པོ་དང་བྲལ་བའི་གཟུགས་བརྙན་ལ། །བདག་ཞེ་ནས་མགུ་བ་ཅང་མ་བྱུང་། །སྟེང་རི་
ཁྲོད་བཟུང་བ་ལེགས་མོད་ཀྱང་། །ནང་ཉོན་མོངས་འདུལ་སྦྱོངས་མི་ལྡན་ན། །བྱ་བྱིའུ་རི་དྭགས་གཅན་གཟན་མཚུངས། །མཚམས་ཁང་དུ་རྟེན་གསུམ་མཆོད་ཆའི་རིགས། །ཁྲ་ཁྲ་དང་ཤིག་ཤིག་སྟོང་བསགས་ཀྱང་། །བདག་འཛིན་དང་ངོམ་ཁྱེར་ཆོས་བརྒྱད་ཀྱི། །རྟོད་ཕུར་ལས་གཞན་དུ་ཨེ་འགྲོ་སོམས། །གཅིག་མཁོ་གཉིས་དགོས་ངང་འཆི་བདག་སླེབས། །ནོར་ཀུན་ལས་མཆོག་གྱུར་ཆོག་ཤེས་ལ། །བདག་སྤྲོད་མཁན་མེད་པ་མཚར་ཆེའོ། །གནས་དབེན་པ་བརྟེན་པའི་སྒོམ་ཕྲུག་ཚོ། །གཞི་ངེས་འབྱུང་སྐྱོ་ཤས་འཆི་ཆོས་དྲན། །མ་འགྲོ་ཀུན་དོན་དུ་བྱང་སེམས་བསྐྱེད། །དུས་རྟག་ཏུ་ཁ་འདོན་བཟླས་བརྗོད་དང་། །ལམ་བསྐྱེད་རྫོགས་ཟུང་འཇུག་ཉམས་ལེན་ལ། །ཁྲིགས་ཐུན་བཞི་ལས་བཞི་མ་ཆག་པ། །ན་དགའ་དང་འཆི་སྐྱིད་ལ་
ཚད་བཙུགས་འཚལ། །འདི་ཁ་ཏ་ཁ་ཆེམས་གཅིག་ཆོག་ཡིན། །དུས་ད་ནི་གང་དང་ཅི་སྨོན་ཡང། །སེམས་སྐྱོ་བ་སྐྱེ་བའི་རང་བཞིན་ལས། །གཞན་ཅི་ཡང་མེད་འདི་ཀྱེ་མ་ཧུད། །རྗེ་བླ་མ་ཞིང་ཁམས་གཞན་དུ་གཤེགས། །ཕྱོགས་ཐམས་ཅད་མྱ་ངན་མུན་པས་ཁྱབ། ཡུལ་སྣོད་བཅུད་སྡིག་པའི་ཡོ་ལང་འཁྲུགས། །ཆོས་བྱེད་ལོ་རྣམས་འདི་སྣང་བསླུ་བྲིད་ལ། །མགོ་འཁོར་ནས་དོན་ཆེན་ཡལ་བར་བོར། །ཕྱོགས་ཀུན་ནས་དམན་འཁྲུག་སྐད་ངན་སྦིར། །རྗེ་རྒྱལ་བསྟན་ནམ་ལང་རྒྱུ་སྐར་འདྲ། །མི་རྒན་འཁོགས་བདག་ཀྱང་ལོ་ནས་གཏུགས། །ལུས་འབྱུང་བཞི་གོག་པོ་འདི་སྐྱར་ན་སྙམ། །ཕ་རྗེ་བཙུན་གུ་རུའི་ཞབས་དྲུང་ལས། །སེམས་འདུན་པ་གཏད་ས་གཞན་དུ་མེད། །དུས་དེ་ཚེ་དཔའ་བོ་མཁའ་འགྲོ་མས།
མདུན་བསུས་ནས་ཞིང་དེར་དྲོང་དུ་གསོལ། །གནས་དེ་རུ་ཕ་བུ་ལྷན་འཛོམ་སྟེ། །ཆོས་སྨིན་གྲོལ་ཐབས་མཁས་ལ་བརྟེན་ནས། །ཕྱིར་མི་ལྡོག་བདེ་ཆེན་མཆོག་ཐོབ་ཤོག །ཅེས་པའང་བྱ་བྲལ་སངས་རྡོར་རྒན་བུས་ཡུལ་དུས་གང་ཟག་གི་གནས་ཚུལ་ལ་སྐྱོ་ཤས་ཀྱིས་ཁམས་འདུས་དྲག་པོ་བྱུང་བའི་རྐྱེན་གྱིས་སྦས་ཡུལ་ཡོལ་མོའི་ཡང་ཁྲོད་ཀུན་བཟང་ཆོས་གླིང་ཅོག་སྒར་དུ་ཡིད་ལ་གང་དྲན་བྱུང་རྒྱལ་དུ་སྨྲས་པའོ།།