ཀ་གདུང་རྒྱན་སྤྲོས་སྤངས་པའི་བྲག་ཕུག
ཨོཾ་ན་མོ་རྗེ། ཀ་གདུང་རྒྱན་སྤྲོས་སྤངས་པའི་བྲག་ཕུག་ཏུ། །ཁ་ཟས་རྒྱབ་གོས་ངན་ངོན་ཙམ་བརྟེན་ནས། །ག་ལེར་རང་བྱུང་རིག་པ་སྐྱོང་ཐུབ་ན། །ང་བདག་ཉོན་ཤེས་འཁྲུལ་པས་བརྫི་བར་དཀའ། །ཅ་ཅོ་འཁྲུལ་པའི་གཏམ་ལ་ཟད་མཐའ་མེད། །ཆ་ལུགས་མི་གཙོ་ཅི་བདེ་གང་དགའ་གྱིས། །ཇ་ཆང་འདོད་ཡོན་བརྟེན་བཞིན་སླར་ལ་སྲེད། །ཉ་མོ་ལྕགས་ཀྱུས་བཟུང་བའི་ངང་ཚུལ་སོམས། །ཏ་ཐཱ་ག་ཏའི་ཆོས་མཆོག་དང་འཕྲད་ཚེ། །ཐ་མལ་དལ་འབྱོར་སྟོང་ལོག་མ་བྱེད་པར། །ད་ལྟ་ཉིད་ནས་འོད་གསལ་རྫོགས་ཆེན་སྒོམས། །ན་དགའ་འཆི་སྐྱིད་བྲང་འོག་ཨེ་ཆུག་ལྟོས། །པཱ་པཾ་སྡིག་ལྟུང་ཞར་དང་ཞོར་ལ་གསོག །ཕ་མའི་དོན་དུའང་མི་དགེ་སྡིག་ལ་འཛེམས། །བ་ལ་ཧ་ཡིས་ཚོང་པ་བསྒྲལ་བ་བཞིན། མ་
རྣམས་འཁོར་བའི་ཕ་རོལ་སྒྲོལ་སེམས་བསྐྱེད། །ཙྭ་རི་པད་བཀོད་དེང་སང་ཀླ་ཀློས་བཟུང་། །ཚ་གྲང་སྙོམས་པའི་རི་ཁྲོད་དབེན་པ་ན། །ཛ་ཧུའི་རྒྱུན་བཞིན་མ་བཅོས་ཅོག་བཞག་རྒྱུན། །ཝ་ལེར་སྐྱོང་ལས་མྱུར་ལམ་གཞན་ཡོད་མིན། །ཞྭ་མོའི་ཏོག་ལྟར་མཚན་ལྡན་བླ་མ་བཀུར། །ཟ་རེ་ཟི་རེ་ཆོས་བརྒྱད་བློ་མ་མང་། །འ་ཅག་བློ་ཕུགས་འཆི་ཆོས་གཤའ་མར་གཏོད། །ཡ་མཚན་གོང་མའི་རྣམ་ཐར་རྗེས་ཤུལ་སྙོགས། །རྭ་ལྟར་གྱོང་པོའི་རང་རྒྱུད་མ་ཐུལ་ན། །ལ་ལུང་འཕྲང་བརྒལ་དཀའ་ལས་སྡུག་གྱོང་རེད། །ཤ་ཆང་ཤྭ་སྦག་ཚོང་བུན་དུག་བཞིན་སྤོངས། །ས་བཅུ་དབང་ཕྱུག་རྣམས་ཀྱིས་དེ་དག་བཀག །ཧ་ལ་དུག་ལྔའི་མེ་འབར་ཀུ་སཱ་ལི། །ཨ་བསེ་སངས་རྒྱས་རྡོ་རྗེས་གྲོགས་རྣམས་ལ། །ཕན་པའི་སེམས་ཀྱིས་སྙིང་གཏམ་ཡི་གེར་
བྲིས། །མ་བརྗེད་རྒྱུད་ལ་སྦྱོར་དང་དོན་ཆེའོ། །ཞེས་པའང་ཡོལ་ཕུ་བྱེ་མ་ཐང་དུ་ཆར་སྐྱོབ་ཙམ་ལ་བརྟེན་ནས་དཀའ་ཐུབ་ལ་གནས་སྐབས་སུ་སྦྱར་བ་དགེ་བར་གྱུར་ཅིག། །།
ཤོག་སྟོང་།