ཆོས་མ་སྨིན་གྲོལ་གྱི་ངོར།
རང་རིག་དོན་སྟོན་བླ་མར་འདུད། །འོད་གསལ་རང་མདངས་སྐྱོང་བ་ན། །གེགས་དང་གོལ་ས་ཐམས་ཅད་ཀྱི། །རྩ་བ་ཡིད་དཔྱོད་འཛིན་པ་ཡིན། །དུས་གསུམ་རྟོག་པསམ་བསླད་པར། །རང་བབ་སྟོང་གསལ་ཕྱོགས་མེད་ངང་། །མ་ཡེངས་རང་ཚུགས་མ་ཤོར་ཙམ། །དགག་སྒྲུབ་བྲལ་བར་ཆམ་གྱིས་ཞོག །དེ་ལ་གོལ་ཤོར་འཛོལ་ས་མེད། །རྣམ་རྟོག་ཇི་འགྱུ་དགག་མི་དགོས། །གཞི་རྩ་ངོ་བོ་རིག་པའི་གཤིས། །རྗེན་པ་ངོས་བཟུང་ངང་དེར་སྐྱོང་། །ཆུ་ལ་རི་མོ་བྲིས་པ་བཞིན། །ཤར་གྲོལ་རང་གྲོལ་ཉིད་དུ་འགྲོ། །ལྟ་བ་མཐའ་དང་བྲལ་བ་ལ། ། སྒོམ་པ་བསལ་བཞག་དེར་འཛིན་ཁྲོལ། །སྤྱོད་པ་ཚོགས་དྲུག་ལྷུག་པར་ཞོག །འབྲས་བུ་སྐུ་གསུམ་རང་ངོར་རྫོགས། །ལྟ་སྒོམ་སྤྱོད་འབྲས་བཞི་པོ་
ཡང་། །སོ་སོ་མ་ཡིན་ཐ་མི་དད། །རིག་པའི་ངོ་བོ་ངོ་ཤེས་ཤིང་། །སྒོ་ལྔའི་དབང་ཡུལ་གསལ་བ་ལ། །ཡིད་དཔྱོད་གཟུང་འཛིན་མ་ཞུགས་པ། གཉུག་མའི་དྲན་པ་མ་ཡེངས་ཙམ། །དེ་ལ་མཉམ་བཞག་ཅེས་སུ་འདོགས། །ཆེད་དུ་སྒོམ་པ་མ་ཡིན་ཅིང་། །བཏང་སྙོམས་ཐ་མལ་མ་ཤོར་བར། སྤྲུལ་བསྒྱུར་བསྐྱེད་རྫོགས་ལ་སོགས་པ། །དེ་ཡི་རང་ཞལ་བྱེད་པ་ལ། །རྗེས་ཐོབ་ཉིད་དུ་བཞག་ན་ཡང་། །རྗེ་བཙུན་མི་ལའི་ཞལ་ན་རེ། །འགྲོ་འཆགས་ཉལ་འདུག་སེམས་ལ་བལྟ། །ཐུན་མཚམས་མེད་པའི་དགེ་སྦྱོར་ཡིན། །ཞེས་དང་དམ་པ་རྒྱ་གར་གྱིས། །གཅིག་པུ་ལྐོག་ཏུ་ཉལ་ཙ་ན། རིག་པ་རྗེན་པར་བཞག་པ་ཡིན། །མང་པོའི་ཚོགས་སུ་གནས་ཙ་ན། །གང་ཤར་གྱི་ངོ་བོ་ལྟ་བ་ཡིན། །ཞེས་གསུངས་དེ་ལས་མེད་པར་གོ། །སྙིང་རྗེ་
བྱང་སེམས་མོས་གུས་དང་། །བྲལ་བའི་མཐོ་སྐད་ཅི་ཆེ་ཡང་། །ཉན་ཐོས་འགོག་པ་གཟུགས་མེད་ཁམས། །ཡང་ན་དུད་འགྲོའི་རུ་འགྱུར། །སྟོང་ཉིད་མཁའ་ལྟར་རྟོགས་ན་ཡང་། །ལས་འབྲས་སྤངས་བླང་མ་ནོར་གཅེས། །རང་སེམས་ཆོས་སྐུ་མཐོང་ན་ཡང་། །བླ་མར་དད་དང་མོས་གུས་བྱ། །བདག་གཞན་གཉིས་མེད་དོན་རྟོགས་ཀྱང་། །འགྲོ་བའི་དོན་དུ་བྱང་སེམས་བསྐྱེད། །ལྟ་སྤྱོད་འབྲེལ་བ་རྒྱལ་བའི་ལམ། །འདི་མིན་གཞན་གྱི་སངས་མི་རྒྱ། །འདི་བྲིས་དགེ་བ་གང་ཐོབ་དེས། །མཁའ་མཉམ་འགྲོ་ཁམས་རྒྱ་མཚོ་ཀུན། །ཟུང་འཇུག་ཀུན་བཟང་གྲོལ་ནས། །འཁོར་བ་དོང་སྤྲུགས་དཔལ་དུ་ཤོག །ཅེས་པའང་ཆོས་མ་སྨིན་གྲོལ་ནས་ནན་བསྐུལ་ངོར་རྒྱལ་ཁམས་ཉུལ་བའི་བྱ་སྤྲང་ཁྲོ་རྒྱལ་པས་སོ།།
ཤོག་སྟོང་།