སྙིང་ཐིག་རིམ་གཉིས་སྐོར་གྱི་གླེགས་བམ་རིན་པོ་ཆེའི་དཀར་ཆག་སྤར་བྱང་སྨོན་ཚིག་ཉུང་འདུས་ཚིག་ལ་མི་རྟོན་དོན་ལ་རྟོན་པ།
སྙིང་ཐིག་རིམ་གཉིས་སྐོར་གྱི་གླེགས་བམ་རིན་པོ་ཆེའི་དཀར་ཆག་སྤར་བྱང་སྨོན་ཚིག་ཉུང་འདུས་ཚིག་ལ་མི་རྟོན་དོན་ལ་རྟོན་པ་ཞེས་བྱ་བ་བཞུགས་སོ། །
ཨོཾ་སྭ་སྟི། གདོད་མའི་མགོན་པོ་རྡོར་འཆང་རྡོ་རྗེ་སེམས། །དགའ་རབ་འཇམ་དཔལ་ཤྲཱི་སེང་བི་མ་ལ། །པད་འབྱུང་མཚོ་རྒྱལ་ཀློང་ཆེན་རབ་འབྱམས་ཞབས། །ཀུན་གྱི་ཞལ་སྐྱིན་ངག་གི་དབང་པོར་འདུད། །ཐེག་དགུའི་རྩེ་རྒྱལ་རྫོགས་ཆེན་རྒྱུད་འབུམ་ཕྲག །དྲུག་ཅུ་རྩ་བཞིའི་ཡང་ཞུན་བཅུ་བདུན་དང། །སྙིང་ཐིག་མ་གཉིས་ཡང་ཐིག་རྣམ་པ་
གསུམ། །མཛོད་ཆེན་བདུན་དང་ཤིང་རྟ་སྐོར་གསུམ་གྱི། །གནད་ལས་གནད་བསྡུས་ཡང་ཟབ་བཅུད་ཕྱུངས་པ། །ཀུན་མཁྱེན་གཉིས་པ་གཡོ་རུ་རྫོགས་ཆེན་པའི། །དགོངས་གཏེར་ཀློང་ཆེན་སྙིང་ཐིག་ཅེས་གྲགས་པའི། །བླ་སྒྲབ་ཡང་གསང་ཐིག་ལེའི་རྒྱ་ཅན་གཞུང། །རྩ་བ་དང་ནི་མ་ཚང་ཁ་སྐོང་སྐོར། །ཆོ་གའི་ཡན་ལག་ཉེར་མཁོ་འདུས་གསལ་
བཅས། །དེ་དག་རྒྱབ་རྟེན་ཀུན་མཁྱེན་རྒྱལ་བ་ཡི། །རྟོགས་པའི་འདྲ་འབག་ཆོས་དབྱིངས་མཛོད་ཀྱིས་བརྒྱན། །པོ་ཏི་དཀར་ཆུང་ཁྱེར་བདེ་ཡིད་འོང་ཞིང། །ཡིག་གཟུགས་ལེགས་ལ་ཞུ་གཏུགས་དག་ཐེར་ལྡན། །ཆོས་སྐུའི་རིང་བསྲེལ་སངས་རྒྱས་ལག་འཆང་འདི། །སྐལ་བཟང་གདུལ་བྱར་མི་ཟད ཆོས་སྦྱིན་སླད། །འཇར་མན་རིགས་སྐྱེས་འོད་གསལ་རྡོ་རྗེ་ཞེས། །རྗོགས་ཆེན་ཆོས་ལ་དད་མོས་ལྷག་བསམ་ཅན། །གང་དེས་གཏོང་ཕོད་དོན་གཉེར་ཚུ་ཆེར་བསྐྱེད་དེ། །དེང་དུས་ཅན་གྱི་འཕྲུལ་ཐབས་ལམ་ནས་དྲངས། །ཚེ་གཅིག་གྲོལ་འདོད་སྒྲུབ་བརྩོན་ཕོ་མོ་ལ། །གླེགས་བམ་འདི་ཉིད་ཡིད་བཞིན་ནོར་བུ་བརྒྱའི། །དོ་ཟླ་མེད་པའི་འཕྲད་ཆོག་དབང་གི་རྒྱལ། །གཙུག་གི་རྒྱན་དུ་མི་འབྲལ་རྟག་བརྟེན་རིགས། །ཆོས་ཚུལ་འདི་ཡང་དགོངས་བརྡ་སྙན་
ཁུངས་བརྒྱུད། །མ་དང་ཌཱ་ཀིའི་ཞལ་རླངས་ངད་མ་ཡལ། །ཐ་སྙད་རྟོག་གེའི་ལམ་གྱི་ཆར་མི་ཉེ། །སུ་འཕྲད་སྦྱངས་པ་སྔོན་སོང་ལས་ཅན་ཡིན། །བསྐལ་མང་མཐའ་བསྒུག་འབྲས་བུ་ཕྱི་དུས་རེ། །དྲང་དོན་འབད་རྩོལ་ཞེན་ཚེ་ཡུན་རེ་རིང། །འབད་མེད་ལོ་ཟླས་གྲོལ་བའི་ངེས་དོན་སྙིང། །འདི་ལྟའི་ངེས་འབྱེད་ཤེས་དེ་མཁས་པའི་རབ། །དེང་དུས་མི་རྣམས་འདུ་འཛི་གཡེང་ལ་དགའ། །ཕྱི་མ་མི་བསམ་གལ་ཆུང་ཆོས་ལ་བྱེད། །ནོར་དང་ཁེ་གྲགས་གཡོ་སྒྱུར་མགོ་བོ་འཁོར། །ཨ་རེ་འདི་འདྲ་མཐོང་ཚེ་སྐྱོ་བ་སྐྱེ། །འདིར་འབད་དགེ་བས་ཡིད་ཅན་ཁམས་གསུམ་འགྲོ་།རྨད་བྱུང་རྡོ་རྗེ་སྙིང་པོའི་གསེེང་ལམ་ནས། །ཕྱམ་གཅིག་ཀ་དག་ཀུན་བཟང་དགོངས་ཀློང་སྦུབས། །འབད་མེད་སངས་རྒྱས་འཁོར་བ་དོང་
སྤགས་ཤོག །ཅེས་པའང་ཡུལ་གྱིས་བསྐལ་པའི་ནུབ་ཕྱོགས་འཇར་མན་ནས་ལྷགས་པའི། རྫོགས་ཆེན་ལམ་ལ་མི་འཕྲོག་པའི་དད་མོས་ཅན་འོད་གསལ་རྡོ་རྗེས་ཟབ་གསང་གདམས་པའི་གླེགས་བམ་རབ་ཏུ་མང་པོ་སྤར་བསྐྲུན་གྲུབ་སྟེ། །སྤར་བྱང་ཉུང་བསྡུས་ཞིག་འབྲི་བའི་ཆེད་དུ་ལྷ་རྫས་རབ་དཀར་དྲི་བྲལ་དང། སྤར་ཕུད་གླེགས་བམ་སྒྲིལ་ཚས་དང་ལྡན་པ་བརྒྱ་ཕྲག་བཅས་བསྐུལ་བ་དོན་ཡོད་པར་བྱ་བའི་ཕྱིར་སྙིང་ཐིག་ལ་མོས་པས་སྤྱོད་པའི་དགེ་བསྙེན་རིག་པ་འཛིན་པ་སངས་རྒྱས་རྡོ་རྗེ་ཞེས་འབོད་པའི་སྙོམས་ལས་པ་དེས་རབ་ཚེས་དཔལ་གདོང་ལོ་ནག་ཟླའི་དཀར་ཕྱོགས་ཀྱི་རྒྱལ་བ་གསུམ་པ་ལ་དཔལ་ཧེ་རུ་ཀ་རོལ་པ། བལ་ཡུལ་ཡང་ལེ་ཤོད་ཀྱི་སྒྲུབ་གནས་ཆེན་པོར་བྲིས་པ་འདིས་ཀྱང་བླ་མེད་མཆོག་གི་བསྟན་པ་རིན་པོ་ཆེ་འཛམ་བུ་གླིང་གི་ཁྱོན་ཡོངས་ལ་དར་ཞིང་རྒྱས་པའི་རྒྱུར་གྱུར་ཅིག །སརྦ་དཱ་ཀལྱ་ཎཾ་བྷ་བ་ཏུ།།