བླ་མའི་རྣལ་འབྱོར་སྐུ་གསུམ་རིག་འདུས།
བླ་མའི་རྣལ་འབྱོར་སྐུ་གསུམ་རིག་འདུས་ཞེས་བྱ་བ་བཞུགས་སོ། །
ན་མོ་གུ་རུ་བྷྱ། དེ་ཡང་རང་ལ་གསང་སྔགས་ཀྱི་སྨིན་གྲོལ་སྟོན་པའི་བླ་མ་དེ་ཉིད་སྐྱབས་གནས་དཀྱིལ་འཁོར་རྒྱ་མཚོའི་མངའ་བདག་བཀའ་དྲིན་སངས་རྒྱས་ལས་ཀྱང་ཆེ་བར་ཤེས་ནས། ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་བསྐྱེད་དེ་གསོལ་འདེབས་བླ་མ་སྒྲུབ་པ་ནི་ལེགས་པའི་ཡོན་ཏན་དང་དངོས་གྲུབ་ཐམས་ཅད་ཀྱི་གཞིའམ་རྩ་བ་ཡིན་པས་དེའི་ཚུལ་ལ་འཇུག་པར་འདོད་ན། དང་པོར་སྐྱབས་སུ་འགྲོ་བ་ནི། ན་མོ། བདག་སོགས་དེང་
ནས་བྱང་ཆུབ་སྙིང་པོའི་བར། །དཀོན་མཆོག་རྩ་གསུམ་སྐུ་གསུམ་ཡོངས་འདུས་དཔལ། །འཁོར་ལོའི་དབང་ཕྱུག་རྗེ་བཙུན་བླ་མ་ལ། །སྐྱབས་སུ་མཆིའོ་ཐུགས་རྗེས་བཟུང་དུ་གསོལ། །གཉིས་པ་སེམས་བསྐྱེད་པ་ནི། བདག་གིས་འགྲོ་དྲུག་སེམས་ཅན་ཀུན་བསྒྲལ་ནས། །བདེ་ཆེན་སངས་རྒྱས་ས་ལ་འགོད་བྱའི་ཕྱིར། །ཟབ་མོའི་རྣལ་འབྱོར་མཆོག་གི་ལམ་ཞུགས་ཏེ། །རང་གནས་
སྐུ་གསུམ་ཐོབ་པར་སེམས་བསྐྱེད་དོ། །གསུམ་པ་ཚོགས་རྟེན་གསལ་གདབ་པ་ནི། ཨ། །རང་སྣང་བདེ་ཆེན་དག་པའི་ཞིང་ཁམས་སུ། །བདག་ཉིད་ཐུགས་རྗེ་ཆེན་པོའི་སྐུར་སེམས་ཉིད་ངལ་གསོ། མཆན། གསལ་བའི། །སྤྱི་བོར་ཡེ་ཤེས་འོད་ལྔ་འཁྲིགས་པའི་ཀློང་། །རྨ་བྱའི་ཁྲི་སྟེང་པདྨ་ཟླ་གདན་ལ། །རྩ་བའི་བླ་མ་སངས་རྒྱས་མཚན་འཆང་བ། །རྣམ་འགྱུར་བདེ་གཤེགས་སྣང་བ་མཐའ་ཡས་སྐུ། །དམར་གསལ་མཚན་དཔེའི་འོད་ཟེར་འབུམ་ཕྲག་འཕྲོ། །ཆོས་གོས་གསུམ་གསོལ་ཕྱག་གཉིས་མཉམ་གཞག་གིས། །རིན་ཆེན་ལྷུང་བཟེད་བདུད་རྩིའི་བཀང་བ་བསྣམས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །གཡས་སུ་སེམས་དཔའ་སྤྱན་རས་གཟིགས་དབང་དང་། །གཡོན་དུ་སེམས་དཔའ་མཐུ་ཆེན་ཐོབ་པ་གཉིས། །བཞེངས་པའི་སྟབས་ཅན་པདྨའི་ཡུ་བ་བཟུང་། །ཞི་འཛུམ
ལོངས་སྤྱོད་རྒྱན་གྱིས་རྣམ་པར་སྤྲས། །མདུན་ན་པདྨ་འབྱུང་གནས་དཀར་དམར་མདངས། །ཕྱག་གཉིས་རྡོ་རྗེ་ཐོད་འཛིན་སྐྱིལ་ཀྲུང་བཞུགས། །ཐེག་གསུམ་ཆས་རྫོགས་པད་ཞྭ་རྒོད་ལྡེམ་མཛས། །མཆན་ཁུང་གཡོན་ན་ཡུམ་གྱི་ཁ་ཊཱཾ་འཆང་། །རྒྱབ་ཏུ་བྱང་སེམས་དགྲ་བཅོམ་འཕགས་པའི་ཚོགས། །སྐུ་མདོག་ཕྱག་མཚན་རྒྱན་དང་ཆ་ལུགས་ནི། །ཆགས་བྲལ་ཆགས་ཅན་མ་ངེས་ཅིར་ཡང་འཆར། །མཐའ་བསྐོར་རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་དམ་ཅན་རྒྱ་མཚོ་སྤྲིན་ལྟར་གཏིབས། །སྣང་སྟོང་ལྷུན་གྲུབ་དབྱེར་མེད་ཆེན་པོར་གསལ། །ཀུན་གྱི་གནས་གསུམ་འབྲུ་གསུམ་མཚན་པ་ལས། །འོད་འཕྲོས་ཡེ་ཤེས་པ་རྣམས་སྤྱན་དྲངས་གྱར། །བཞི་པ་སྤྱན་འདྲེན་པ་ནི། ཧཱུྃཿ། ནུབ་ཕྱོགས་བདེ་བ་ཅན་གྱི་ཞིང་ཁམས་ནས། །ཆོས་
སྐུ་སྣང་བ་མཐའ་ཡས་གཤེགས་སུ་གསལ། །ལྷོ་ཕྱོགས་རི་བོ་གྲུ་འཛིན་ཞིང་ཁམས་ནས། །ལོངས་སྐུ་ཐུགས་རྗེ་ཆེན་པོ་གཤེགས་སུ་གསོལ། །རྔ་ཡབ་པདྨ་འོད་ཀྱི་ཕོ་བྲང་ནས། །སྤྲུལ་སྐུ་པདྨ་འབྱུང་གནས་གཤེགས་སུ་གསོལ། །ཐུགས་རྗེ་གང་འདུལ་སྤྲུལ་པའི་ཞིང་ཁམས་ནས། །བྱང་སེམས་དགྲ་བཅོམ་འཕགས་པ གཤེགས་སུ་གསོལ། །ཆོས་དབྱིངས་འོག་མིན་གནས་ཡུལ་དུར་ཁྲོད་ནས། །རབ་འབྱམས་རྩ་གསུམ་ལྷ་ཚོགས་གཤེགས་སུ་གསོལ། །བཀའ་དང་དམ་ཚིག་གཉན་པོའི་གཞལ་ཡས་ནས། །སྔགས་བདག་ བརྒྱུད་གསུམ 
་དྲེགས་ཚོགས་གཤེགས་སུ་གསོལ། །འཇའ་ཚོན་ཡེ་ཤེས་འོད་ལྔ་ཀྱི་ལི་ལི། །རིག་འཛིན་སྐུ་དང་ཐིག་ལེ་ཤིགས་སེ་ཤིག །སྤྱི་གཙུག་པདྨ་ཟླ་བའི་གདན་སྟེང་དུ། །བསྐྱེད་པའི་ཚོགས་ཞིང་དམ་ཚིག་པ་རྣམས་དང་། །དབྱེར་མེད་མཉམ་པ་ཉིད་དུ་བཞུགས་སུ་
གསོལ། །ལྔ་པ་ཚོགས་བསགས་ཡན་ལག་བདུན་པ་ནི། །གདོད་ནས་བྱང་ཆུབ་རྡོ་རྗེ་སྙིང་པོའི་གདུང་། །དཀོན་མཆོག་གསུམ་དངོས་དམ་ཆོས་རིན་ཆེན་མཛོད། །དུས་གསུམ་རྒྱལ་བའི་ཕྲིན་ལས་གཅིག་བསྡུས་པ། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །བདག་ལུས་ལོངས་སྤྱོད་དུས་གསུམ་དགེ་བའི་ཚོགས། །རབ་འབྱམས་སྐུ་གསུམ་ཞིང་གི་མཆོད་པའི་སྤྲིན། །མཁའ་མཉམ་འགྲོ་བའི་ཚོགས་ཆེན་རབ་རྫོགས་ཕྱིར། །བློ་ཡིས་བླངས་ནས་ཁྱབ་བདག་བླ་མར་འབུལ། །ཐོག་མེད་དུས་ནས་སྲིད་པར་འཁོར་བ་ནས། །དུག་གསུམ་དབང་གིས་སྒོ་གསུམ་མི་དགེའི་ལས། །བཅས་དང་རང་བཞིན་སྡིག་ལྟུང་དྲི་མ་ཀུན། །བླ་མ་རྒྱལ་བ་སྲས་བཅས་སྤྱན་སྔར་བཤགས། །འཕགས་བཞི་སོ་སོ་སྐྱེ་བོ་མ་ལུས་པའི། །རང་གཞན་དོན་དུ་ཟག་བཅས་ཟག་མེད་ཀྱི། །དགེ་བའི་རྩ་བ་
བགྱིས་དང་བགྱིད་གྱུར་པ། །རབ་ཏུ་དགའ་བས་རྗེས་སུ་ཡི་རང་ངོ་། །མ་རིག་སྲིད་པའི་ཆུ་བོར་བྱིང་བ་ཡི། །འགྲོ་བའི་ཁམས་དབང་བསམ་པ་ཇི་བཞིན་དུ། །རྒྱུ་འབྲས་ཟབ་ཅིང་རྒྱ་ཆེའི་ཆོས་འཁོར་ལོ། །འཁོར་བ་མ་སྟོངས་བར་དུ་བསྐོར་བར་བསྐུལ། །རྒྱལ་དང་དེ་སྲས་བྱང་སེམས་རིག་པ་འཛིན། །འགྲོ་བའི་བླ་མ་མཆོག་མཛད་དེ་དག་ལ། །སྲིད་པར་སེམས་ཅན་གཅིག་ཀྱང་མི་གནས་པ། །དེ་སྲིད་མྱ་ངན་མི་འདའ་བཞུགས་པར་གསོལ། །འདིས་མཚོན་དུས་གསུམ་བསགས་ཡོད་དགེ་བ་ཀུན། །མཁའ་མཉམ་འགྲོ་ཀུན་སངས་རྒྱས་འཐོབ་བྱའི་ཕྱིར། །འཁོར་གསུམ་དམིགས་མཐའ་བྲལ་བའི་དབྱིངས་སུ་བསྔོ། །ཟུང་འཇུག་སྐུ་དང་ཡེ་ཤེས་མངོན་གྱུར་ཤོག །དྲུག་པ་ཕུར་ཚུགས་སུ་གསོལ་བ་གདབ་པ་ནི། །ཀྱེ་ཀྱེ། བླ་མ་འོད་དཔག་མེད། །བདག་སོགས་འཁོར་བའི་སེམས་ཅན་རྣམས། །དུས་ངན་མཐར་སྐྱེས་
ལས་ཉོན་རགས། །བཟོད་མེད་སྡུག་བསྔལ་དྲག་པོས་མནར། །རེ་ལྟོས་སྐྱབས་བྲལ་མགོན་མེད་ལ། །ཐུགས་རྗེས་ཟུངས་ཤིག་འོད་དཔག་མེད། །ལམ་སྣ་དྲོངས་ཤིག་སྤྱན་རས་གཟིགས། །བྱིན་གྱིས་རློབས་ཤིག་གུ་རུ་རྗེ། །འཕགས་པའི་ཚོགས་ཀྱིས་བསྐྱབ་ཏུ་གསོལ། །མོས་གུས་ཁོ་ནའི་ཉེ་རྒྱུ་ལས། །ཐབས་གཞན་འབད་ཀྱང་གྲོལ་མིན་ཞེས། །བླ་མའི་དྲིན་གྱིས་གང་གསུངས་པ། །སྙིང་གི་དཀྱིལ་དུ་རྟག་བཀོད་ནས། །ཁ་ཙམ་ཚིག་ཙམ་མ་ཡིན་པར། །རྩེ་གཅིག་གདུང་བས་གསོལ་བ་འདེབས། །མི་མཐུན་བགེགས་དང་བར་ཆད་སོལ། །དབང་བྱིན་དགོངས་བརྒྱུད་བདག་ལ་འཕོས། །ཐུགས་ཡིད་གཅིག་འདྲེས་ད་ལྟ་ཉིད། །རྟོགས་གྲོལ་ཆེན་པོར་བྱིན་གྱིས་རློབས། ཨོཾ་ཨཱཿབཛྲ་གུ་རུ་དྷརྨ་ཀཱ་ཡ།སམྦྷོ་ཀཱ་ཡ། ནིརྨ་ཀཱ་ཡ་སརྦ་སིདྡྷི་ཧཱུྃ་ཨཱ༔ ཞེས་བཟླས་མཐར་དབང་བཞི་བླང་བ་ནི། །
མོས་གུས་མཐུ་ཡིས་བླ་མའི་རྒྱུད་བསྐུལ་ཏེ། །རྒྱལ་ཀུན་རྡོ་རྗེ་གསུམ་གྱི་སྙིང་པོ་ལས། །འོད་ཟེར་དཀར་དམར་མཐིང་གསུམ་རིམ་གཅིག་ཆར། །བྱུང་བ་རང་གི༔ གནས་གསུམ་ཐིམ་པ་ཡིས། །སྒོ་གསུམ་ཤེས་སྒྲིབ་བག་ཆགས་བཅས་པར་སྦྱངས། །དབང་བཞི་ཐོབ་ཅིང་ཐུགས་ཡིད་དབྱེར་མེད་འདྲེས། །ལྷན་སྐྱེས་བདེ་ཆེན་སྐུ་བཞིའི་རང་ཞལ་བལྟ། །ཨ་ཨཱ༔ ཞེས་བླ་མའི་དགོངས་ཀློང་དང་དབྱེར་མེད་དུ་བསྲེས་པའི་ངང་ལ་མཐའ་བྲལ་དུ་གློད་དེ།།དེ་ཡང་ངང་ལ་གནས་པ། །དྲན་གཞི་ཟད་པ། འབད་རྩོལ་མེད་པ། རེ་དོགས་གྲོལ་བ།ཡང་དོག་མེད་པ། རིག་ལ་མི་འཛིན་པ།མ་ཡེངས་པ་ལ་རྟོག་པས་མ་བསླད་པའི་རང་བཞིན་དུ་མཉམ་པར་བཞག །དེ་ལས་ལྡང་བ་ན།དགེ་བ་འདི་ཡིས་མྱུར་དུ་བདག །སྐུ་གསུམ་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །དེང་ནས་བདག་སོགས་སྐྱེ་བ་ཐམས་ཅད་དུ། །མི་ཁོམ་བརྒྱད་
སྤངས་དལ་འབྱོར་ཡོན་ཏན་ཐོབ། །མཐའ་ཡས་འགྲོ་ལ་ཕན་ཕྱིར་ཐེག་པ་མཆོག །དེར་ཞུགས་ནས་ནི་དག་རྫོགས་སྨིན་པར ཚེ་ཡི་འདུ་བྱེད་སྟོངས་པར་གྱུར་མ་ཐག །བདེ་བ་ཅན་དང་རི་བོ་པོ་ཊ་ལ། །ཟངས་མདོག་དཔལ་རིའི་ཞིང་དུ་བརྫུས་སྐྱེས་ཏེ། །འོད་དཔག་མེད་དང་སྤྱན་གཟིགས་པད་འབྱུང་རྗེས། །བཤེས་གཉེན་མཆོག་མཛད་སྨིན་གྲོལ་ལུང་བསྟན་ཅིང་། །ཕ་རོལ་ཕྱིན་བཅུ་རབ་རྫོགས་བདེ་གཤེགས་ཁོལ། །སྒྲིབ་བྲལ་འབྲས་བུའི་སྦུབས་སུ་གྲོལ་བར་ཤོག །ཅེས་དང་བདེ་སྨོན་རྒྱས་བསྡུས་ཟངས་མདོག་དཔལ་རིའི་སྨོན་ལམ་སོགས་ཀྱིས་མཐའ་བརྒྱན་ཏེ་སྤྱོད་ལམ་ཐམས་ཅད་བླ་མའི་རྣལ་འབྱོར་གྱི་ལམ་ཁྱེར་དང་མ་བྲལ་ན་བྱང་ཆུབ་ཕྱོགས་ཀྱི་ཆོས་རྣམས་རྐྱེན་གཞན་ལ་རག་མ་ལུས་པར་མྱུར་བ་ཉིད་དུ་འབྱུང་བ་ཡིན་པས་ཉམས་སུ་བླང་བར་བྱའོ། །ཞེས་པའང་སྔོན་ཆད་རང་ཉིད་ཀུལླུའི་རི་ཁྲོད་ཕུན་ཚོགས་དགའ་ཚལ་དུ་འདུག་
སྐབས་གུ་རུ་བརྟུལ་ཞུགས་གླིང་པ་དཔོན་སློབ་རྣམས་ཀྱིས་རིན་པོ་ཆེ་སྣ་ལྔའི་མཎྜལ་དང་བཅས་དངོས་སུ་བསྐུལ་བ་དང་། ཉེ་ཆར་ཡི་གེའི་ལམ་ནས་ནན་ཏན་གྱིས་བསྐུལ་བའི་ངོ་མལྡོག་པར་དུས་ཞབས་ཀྱི་བྱ་སྤྲང་སྙོམས་ལས་པ་སངས་རྒྱས་རྡོ་རྗེས་རབ་ཚེས་ལྕགས་གླང་ཟླ་༣ཚེས་༡༠ལ་ལྷོ་མོན་གྱི་མཚམས་རི་ལྗོངས་སྨན་ཤིང་མེ་ཏོག་རྒྱས་པའི་ཚལ་དུ་སྦྱར་བའོ།། །།