འོད་གསལ་སྙིང་གི་ཐིག་ལེ་ལས། དབང་དྲག་རྡོ་རྗེ་གྲོ་ལོད་ཀྱི་སྨད་ལས་སྤུ་གྲི་འབར་བ་གློག་གི་འཕྲུལ་འཁོར།
འོད་གསལ་སྙིང་གི་ཐིག་ལེ་ལས། དབང་དྲག་རྡོ་རྗེ་གྲོ་ལོད་ཀྱི་སྨད་ལས་སྤུ་གྲི་འབར་བ་གློག་གི་འཕྲུལ་འཁོར་ཞེས་བྱ་བ་བཞུགས་སོ།
བླ་མ་དང་དཔལ་པདྨ་དྲག་པོ་ལ་ཕྱག་འཚལ་ལོ། །དཔལ་ཁྲག་འཐུང་པདྨ་དྲག་པོ་རྡོ་རྗེ་གྲོ་ལོད་མཐིང་ནག་གི་རྩ་བའི་བསྙེན་ཐེམས་པའི་རྣལ་འབྱོར་པས་དམར་ཆེན་གཏོར་བཟློག་གི་ལས་སྦྱོར་བརྩམས་པ་ལ་གསུམ། སྦྱོར་བ། དངོས་གཞི། རྗེས་ཀྱི་བྱ་བའོ། །དང་པོ་ནི། གཟའ་སྐར་རྩུབ་ཅིང་དྲག་ལས་ལ་བསྔགས་པའི་དུས་སུ་ཕུགས་ལོགས་སུ་རྟེན་དང་བདག་བསྐྱེད་ཀྱི་མཆོད་གཏོར་བཤམས་པའི་མདུན་དུ་ལས་དཀྱིལ་གྱི་གཞིར་
དུག་ཁྲག་གིས་ཆག་ཆག་བཏབ་པར་ཆོས་འབྱུང་ནག་པོ་ལྕགས་འཁོར་རྩིབས་བཞི་རྡོ་ར་མེ་རིས་མཚན་པ་ཅན་འབྲི་བའམ། མ་འབྱོར་ན་འབྲུ་ནག་གི་ཚོམ་བུ་ལྷ་གྲངས་བཀོད་པའི་དབུས་སུ་མཉྫིའི་ཁར་ལྕགས་སྣོད་དུ་འབྲུ་ནག་ཕྱེ་མ་ཁྲག་ཆང་གིས་སྦྲུས་པ་ལ་གཏོར་མ་ཟུར་གསུམ་ཐོག་གཟུགས་སྲིན་ཞལ་ཕྱུངས་པ་ལ། འཁོར་དམར་གཏོར་ཟུར་གསུམ་དགུ་དང་བཞིས་བསྐོར་བ་ལ་མེ་རི་སོགས་དྲག་རྒྱན་རྔམ་བརྗིད་ཅན་གྱི་རྩེར་སྐུ་རྟེན་དང་ཁྱུང་ཙཀ་དར་ནག་
གི་འཕུར་ལྡིང་རྡོ་རྗེ་རྭ་གདེངས་པ་དང་། ཐོད་སྐམ་གྱི་ཏོག་གིས་སྨྲས་པ། མཚེ་ཡུངས་རྩང་གསུམ་ཤ་དུམ་རྒྱུ་རློན་རྣམས་ཀྱིས་བརྒྱན་པ་བཀོད་མཐར་ཁྲག་གི་ཨརྒྷཾ་སོགས་དྲག་པོའི་མཆོད་པས་གཡས་སུ་བསྐོར། མདུན་ངོས་སུ་བྲུབ་ཁུང་ལིངྒ་ཐུན་རྫས་བསྒྲལ་ཆས་སོགས་མཁོ་བའི་ཡོ་བྱད་ཐམས་ཅད་ཚོགས་པར་བྱའོ། །གཉིས་པ་དངོས་གཞི་ལ་གཉིས། བསྐྱེད་བཟླས་ཀྱི་རྫོང་བཅའ་བ། ལས་སྦྱོར་གྱི་དཔུང་བསྡུ་བའོ། །དང་པོ་ནི། བརྒྱུད་འདེབས་ནས་བརྩམ་སྔོན་འགྲོ་རྣམས་དང་། དངོས་གཞི་བདག་མདུན་ཅིག་ཅར་དུ་གསལ་བཏབ་ལ་བསྙེན་སྒྲུབ་ལས་སྦྱོར་གྱི་བཟླས་པ་ཅི་འགྲུབ་མཐར། སྲུང་འཁོར་གྱི་དམིགས་པ་ནི། བདག་ཉིད་རྡོ་རྗེ་གྲོ་ལོད་ཀྱི༔ ཐུགས་མཆོག་འོད་ཀྱི་དྲྭ་བའི་ཀློང་༔ པདྨ་ཉི་ཟླའི་གདན་སྟེངས་སུ༔ ཕ་ལམ་ལས་གྲུབ་རྡོ་རྗེ་སེར༔ རྩེ་ལྔའི་ལྟེ་བར་ཉི་གདན་དབུས༔ ༸ཧཱུྃ་ཡིག་མཐིང་ཀའི་ཀླད་སྐོར་ནང་༔ བླ་མ་ཁོག་པར་བསྲུང་བྱ་དང་༔ ཞབས་ཀྱུ་
ཡུལ་མཁར་རྟ་ཕྱུགས་ལ༔ མཐའ་སྐོར་སྔགས་ཕྲེང་འཁོར་བ་ཡི༔ འོད་ཀྱིས་རྒྱལ་བ་སྲས་བཅས་མཆོད༔ བྱིན་རླབས་དངོས་གྲུབ་གསེར་བཙོ་མའི༔ འོད་ཀྱི་རྣམ་པར་འདུས་པ་ཡང་༔ ཕྲ་རབ་རྡོ་རྗེའི་རྡུལ་གྱུར་ནས༔ དམིགས་བྱའི་ལུས་ངག་ཡིད་གསུམ་དང་༔ ཕྱི་རོལ་རྡོ་རྗེའི་ར་གུར་ལས༔ འདྲེས་པས་ཅིས་ཀྱང་མི་ཤིགས་གྱུར༔ འདྲེས་པས་ཅིས་ཀྱང་མི་ཤིགས་གྱུར༔ རྩ་སྔགསཤམ་དུ༔ མ་མ་བཛྲ་ཀཱ་ཝཱ་ཙི་རཀྵ་རཀྵ་ཧཱུྃ༔ ཞེས་བཏགས་པ་ཅི་ནུས་སུ་བཟླ། །་དམིགས་ནི། སྐུ་དང་ཕྱག་མཚན་ཐམས་ཅད་ལས། །གནམ་ལྕགས་རྡོ་རྗེའི་ཚ་ཚ་དང་། །ལྕགས་སྡིག་ནག་པོ་སེར་ཆེན་བཞིན། །འབེབས་པ་སྟོང་ཁམས་ཐམས་ཅད་ཁེངས། །ཕ་རོལ་བྱད་ཕུར་དམག་ཚོགས་དང་། །སྡེ་བརྒྱད་ལོག་འདྲེན་ཐལ་བར་བརླག །འཁོར་འདས་བྱང་ཆུབ་སེམས་ཀྱི་
ཀློང་། །གཉིས་སྣང་དགྲ་འདྲེ་དབྱིངས་སུ་ཡལ། །ཞེས་རྩ་སྔགས་དང་གཟིར་སྔགས་སྦྲེལ་བའི་ཤམ་དུ། གནོད་བྱེད་དམ་སྲི་རྒྱལ་གདོན་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་མཱ་ར་ཡ་བྷོ་བྷྱོཿ་ཟློག་ཟློག་ཅེས་ཅི་འགྲུབ་དང་། ཨོཾ་བཛྲ་ཤྲཱི་གྲོ་བོ་ལོད་ཧཱུྃ་ཧཱུྃ་ཧཱུྃ༔ བདུད་པྲ་མཱ་ར་ཡ་རྦད་ནན༔ ཁ་ལ་ཛམ་རྦད་ནནཿ༔ ར་ཙ་དུ་ལིང་ཤག་རྦད་ནན༔ ཤིག་ཤིག་དུམ་དུམ་རྦད་ནན༔ ཚལ་པ་ཚལ་པ་རྦད་ནན༔ ཁྲོ་ཁྲོ་བྩོ་རྦད་ནན༔ རྨུགས་རྨུགས་རྦད་ནན༔ ཏིར་ཏིར་རྦད་ནན༔ ཚལ་ཚལ་རྦད་ནན༔ ཞེས་པའང་ཅུང་ཟད་བཟླས་ཏེ་ཐུན་རྫས་ལ་ཧས་བཏབ་སྟེ་ངར་འདོགས། མཐར། ན་རོ༔ དཀོན་མཆོག༔ གསུམ་གྱི་བདེན་པ་དང་༔ རྩ་གསུམ་ལྷ་ཡི་བྱིན་རླབས་དང་༔ ཆོས་སྐྱོང་སྲུང་མའི་མཐུ་རྩལ་དང་༔ རིག་སྔགས་དམོད་པའི་མཚོན་ཆའི་མཐུས༔
།བདག་ཅག་དཔོན་སློབ་འཁོར་བཅས་ཀྱི༔ དགྲ་འདྲེ་ཆག་ཆེ་ཉམ་ང་དང་། །བྱད་ཕུར་རྦོད་གཏོང་སྲི་ཀེགས་སོགས། །མཐུན་གནོད་བྱེད་མ་ལུས་པ། །མེད་པར་གྱུར་ཅིག་ཞི་གྱུར་ཅིག །རབ་ཏུ་ཞི་ཞིང་སྟོང་གྱུར་ཅིག །བྷྱོཿ་བྷྱོཿ་ཟློག་ཟློག་མཱ་ར་ཡ༔ བྱ། དེ་ནས་བཀའ་སྲུང་མ་མགོན་ལྕམ་དྲལ། གཟའ། ཚེ་རིང་མ་བཅས་སྙིང་ཐིག་གཉན་པོའི་ཆོས་སྲུང་རྣམས་ཀྱི་གཏོར་ཆོག་རྒྱས་བསྡུས་ཅི་རིགས་བཏང་། ཚོགས་བྱིན་རླབས་ནས་ལྷག་མའི་མཐར་ཐུག་བར་བཏང་རྗེས་སྨད་ལས་ལ་འཇུག་པ་ཉིད་སྔ་འགྱུར་བའི་རིག་འཛིན་གོང་མ་ཁ་ཅིག་གི་བཞེད་པ་བཞིན་འདིར་ཡང་ཕྱག་ལེན་ལ་མཛད་དོ། གཉིས་པ་ལས་སྦྱོར་ལ་གཉིས། གདབ་པའི་ འབེན 
་གཟུག་པ། ཟློག་པའི་གཡུལ་གཤོམ་པའོ། །དང་པོ་ལ། ཐོག་མར་དཔུང་བསྡུ་བའི་ཕྱིར་ཐུགས་དམ་བསྐུལ་བ་ནི། སྣོད་བཅུད་དཀྱིལ་འཁོར་དུ་བསྐྱེད་པ་
ཐམས་ཅད་སྔོན་གྱི་ཐུགས་དམ་ལས་བཞེངས་ཏེ་རྔམ་པའི་ཧཱྃ་སྒྲ་དིར་གྱིས་མངོན་སྤྱོད་དྲག་པོའི་ལས་ལ་ཆས་པར་བསམ་ལ། ཧཱུྃ་བྷྱོཿ བདེ་ཆེན་ཆོས་དབྱིངས་སྒྱུ་འཕྲུལ་དྲྭ་བའི་སྐུ༔ འོད་དཔག་མེད་མགོན་སྟོན་པ་གངས་ཆེན་མཚོ༔ རིགས་ལྔའི་རྒྱལ་བ་སྲས་དང་བཅས་པའི་ཚོགས༔ དགོངས་པ་གཅིག་བསྡུས་དབང་ཆེན་ཁྲོས་པ་དགོངས༔ ལོག་སྤྱོད་གདུག་པས་ཁེངས་པའི་རཱུ་ཏྲ་དེས༔ སྦྱོར་བ་རྩུབ་མོས་འཇིག་རྟེན་ཉམ་ཐག་ཚེ༔ ཁྲོ་ལ་ཁྲོས་པ་རོལ་པའི་ཕྲིན་ལས་ཀྱིས༔ དཀྱིལ་འཁོར་ཐམས་ཅད་བདག་ལ་བསྡུ་མཛད་དེ༔ སྟོང་ཉིད་སྙིང་རྗེ་ཁྲོས་པའི་ང་རྒྱལ་གྱིས༔ འཛིན་རྟོག་ལོག་པའི་བདག་པོ་འདུལ་བ་བཞིན༔ ཐུགས་དམ་བསྐུལ་བ་དྲག་པོའི་སྔགས་ལ་དགོངས༔ ༀ་རུ་ལུ་རུ་ལུ་ཧཱུྃ༔ བྱང་ཆུབ་སེམས་ཀྱི་གཟི་བརྗིད་ལྡན་བྱས་
ནས༔ འཕྲོ་འདུའི་འོད་ཀྱིས་འཁོར་བ་རུ་བཟློག་ཅིང་༔ རྡོ་རྗེ་སློབ་དཔོན་ཐོད་ཕྲེང་རིགས་ལྔའི་ཚོགས༔ དུས་གསུམ་སངས་རྒྱས་ཐམས་ཅད་ར་མདའ་གཉེར༔ སྤྲུལ་པ་བསམ་མི་ཁྱབ་ཅིག་བསྒྱུར་ལ་རྔམ༔ ཁམས་གསུམ་དྲེགས་པའི་ཚོགས་ལ་སྐྱས་ལིངས་ཐོབ༔ ཨོཾ་རུ་ལུ་རུ་ལུ་ཧཱུྃ ཆོས་སྐུ་ཞི་བའི་ངང་ལས་མ་གཡོས་ཀྱང་༔ སྤྲུལ་སྐུ་རིགས་ཀྱི་སྤྲུལ་པ་བརྗོད་མི་ལངས༔ དབང་དྲག་རོལ་པའི་དུར་ཁྲོད་ཆེན་པོ་ནས༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཨོཾ་རུ་ལུ་རུ་ལུ་ཧཱུྃཧཱུྃཿ ཞེས་དང་། དོ་གལ་ཆེ་ན་གསང་ཆེན་སྔ་འགྱུར་བའི་བསྟན་སྲུང་གཉན་པོ་སྔགས་བདག་དྲེགས་པའི་ཚོགས་རྣམས་སྒོས་སུ་བསྐུལ་བ་ནི། ཀྱི། བདག་ནི་རིག་འཛིན་རྣལ་འབྱོར་སྒྲུབ་པ་པོ། །དམ་ལ་གནས་ཤིང་རྩ་གསུམ་ལྷ་ལ་ཕྲེང་།
དགོངས་སུ་གསོལ་ལོ་རྒྱུད་གསུམ་དྲེགས་པའི་ཚོགས། །ཐུགས་དམ་མ་གཡེལ་བཅོལ་བའི་ལས་འདི་སྒྲུབས། །སྔགས་འཆང་དམ་ལྡན་གང་དུ་གནས་པ་དེར། །ལུང་དང་རྟོགས་པའི་སངས་རྒྱས་བསྟན་པ་གནས། །རྒྱལ་བསྟན་རིན་ཆེན་གང་དུ་གནས་པ་དེར། །བསྟན་སྲུང་དམ་ཅན་དྲེགས་པའི་ཚོགས་ཀྱང་གནས། །རིག་འཛིན་བླ་མའི་བཀའ་རྒྱུད་འཛིན་པ་པོས། །བསྙེན་སྒྲུབ་ཕྲིན་ལས་གཞུང་བཞིན་བསྲངས་ནས་ཀྱང་། །བ་ལིཾ་བདུད་རྩིའི་མཆོད་པ་བཤམས་ལགས་ན། །དམ་ཅན་རྒྱ་མཚོ་སྤྲིན་ཕུང་བཞིན་དུ་འདུས། །བུ་ཆུང་ཕ་ལ་རེ་བ་ཇི་བཞིན་དུ། །བདག་ཅག་ཁྱེད་ལ་མི་རེ་སུ་ལ་རེ། །རྒྱལ་མཚན་དམ་པར་ཁྱེད་རྣམས་ཅིའི་མི་འཕྱར། །ཐུགས་རྗེས་གཟིགས་ཤིག་སྔགས་བདག་དྲེགས་པའི་ཚོགས། །བརྒྱུད་གསུམ་བླ་མའི་ཐ་
ཚིག་དགོངས་སམ་ཅི། །རྣལ་འབྱོར་གདུང་བའི་བསྐུལ་དབྱངས་གསན་ནམ་ཅི། །རྒྱལ་བསྟན་སྨ་འབེབས་བྱེད་པ་གཟིགས་སམ་ཅི། །ཁྱེད་ཀྱི་གཡར་དམ་གཉན་པོ་བདག་གིས་བསྐུལ། །སྔོན་ཚེ་རྒྱལ་དབང་པདྨ་ཐོད་ཕྲེང་སོགས། །རིག་འཛིན་བླ་མ་འདུས་པའི་དཀྱིལ་འཁོར་དུ། །སྔགས་བདག་དྲེགས་པའི་ཚོགས་རྣམས་སྤྲིན་ལྟར་འདུས། །མ་འོངས་རྩོད་ལྡན་སྙིགས་མའི་དུས་ཀྱི་ཚེ། །ཡང་གསང་སྙིང་པོ་ཐུགས་ཀྱི་བསྟན་པ་ལ། །སྙིང་སྟོབས་ལྡན་པ་སྙིང་པོའི་བསྟན་འཛིན་ཚོགས། །བརྟུལ་ཞུགས་དྲག་པོའི་རྩལ་གྱིས་འབྱུང་བའི་ཚེ། །སྔགས་བདག་དྲེགས་པའི་དཔུང་ཚོགས་དེར་ཆས་ནས། །མི་བཟོད་དམོད་པ་དྲག་པོའི་གནམ་ལྕགས་ཐོག །འཇིགས་པའི་མི་དབལ་རྔམ་པའི་ང་རོ་ཡིས། །བསྟན་པའི་ཆེ་བ་སྨད་པའི་
དམ་ཉམས་ཀྱི། །དཔའ་བཀོང་སྙིང་འབྱིན་སྡེ་རིགས་བརླགས་ནས་སུ། །བསྟན་མཇུག་སྔགས་ཀྱིས་གསོ་བར་དམ་བཅས་བཞིན། །དམ་རྫས་བདུད་རྩི་འབར་བ་འདི་བཞེས་ལ། །སྔགས་འཆང་བདེན་ཚིག་རྫུན་དུ་མ་གཏོང་ཀྱེ། །དྲེགས་པའི་གཟི་བྱིན་དབྱིངས་སུ་མ་སྦེད་པར། །ཇི་ལྟར་རེ་ཞིང་བཅོལ་བའི་ལས་འདི་ལ། །རྟགས་དང་མཚན་མ་མྱུར་དུ་སྟོན་པ་དང་། །མ་ཐོགས་མ་འགྱང་ད་ལྟ་ཉིད་དག་ཏུ། །ལས་ཀྱི་འབྲས་བུ་མཆིས་པར་མཛད་དུ་གསོལ། །ཧཱུྃཿ། རབ་འབྱམས་ཞི་ཁྲོའི་ཁྱབ་བདག་སྒྲུབ་སྡེ་བརྒྱད། །བཀའ་སྲུང་དྲེགས་ཆེན་གཉན་པོའི་ཚོགས་དང་བཅས། །ལྷ་གྲལ་མི་བརྩི་བརྙས་སེམས་འཆང་བ་ཡི། །སྡིག་ཅན་དགྲ་བོ་ད་ལྟ་ཁུག་ལ་ཤོག །རྒྱལ་བ་རྒྱ་མཚོའི་ཐུགས་བཅུད་ནང་རྒྱུད་གསུམ། །མཁས་གྲུབ་རིག་འཛིན་བརྒྱུད་པའི་
བཀའ་ལུང་བཅས། །ཆོས་གྲལ་མི་བརྩི་སུན་འབྱིན་བྱེད་པ་ཡི། །སྡིག་ཅན་དགྲ་བོ་ད་ལྟ་ཁུག་ལ་ཤོག །ཐུགས་རྗེའི་བདག་ཉིད་རྒྱལ་དབང་པདྨ་དང་། །དེ་ཡི་ཟབ་མོ་གཏེར་གྱི་ཆོས་རྣམས་ལ། །བཀའ་དྲིན་མི་བརྩི་བྱས་པ་ལོག་བཟོ་བའི། །སྡིག་ཅན་དགྲ་བོ་ད་ལྟ་ཁུག་ལ་་ཤོག །ཚོགས་ཀྱི་རྒྱལ་པོ་གསང་སྔགས་འདུས་པའི་སྡེ། །རྒྱལ་དབང་པདྨའི་རིང་ལུགས་འཛིན་པ་རྣམས། །མཆོད་གྲལ་མི་བརྩི་གཤེ་སྐུར་བྱེད་པ་ཡི། །སྡིག་ཅན་དགྲ་བོ་ད་ལྟ་ཁུག་ལ་ཤོག །གངས་ཅན་འདི་ན་བསྟན་སྒོར་ཞུགས་རྣམས་ལ། །ཆོས་དང་གང་ཟག་བཀའ་དྲིན་ཆེ་བ་ནི། །སྔ་འགྱུར བ་སྟེ་དེ་དག་ཁྱད་གསོད་པའི། །སྡིག་ཅན་དགྲ་བོ་ད་ལྟ་ཁུག་ལ་ཤོག །སྔ་འགྱུར་དབང་ཆོས་མན་ངག་སྒོར་ཞུགས་ནས། །ངན་སྨྲས་ལོག་ལྟའི་ཁོང་
སྐྲན་འཆང་བ་རྣམས། །ཁྱད་པར་དུ་ཡང་བསྒྲལ་བའི་ཞིང་ཡིན་པས། །མ་ཐོགས་ད་ལྟ་ཉིད་དུ་ཁུག་ལ་ཤོག །མདོར་ན་གསང་ཆེན་སྔ་འགྱུར་བསྟན་པ་ལ། །བསམ་པ་ངན་དང་སྦྱོར་བ་རྩུབ་པ་དང་། །མངའ་ཐང་དཔལ་ལ་ཇི་གནོད་བྱེད་པ་རྣམས། །མ་ཤོར་ད་ལྟ་ཉིད་དུ་ཁུག་ལ་ཤོག །ཕྱོགས་ཞེན་བསམ་པ་གདུག་པས་བསྟན་སྲུང་ཚོགས། །ཐུགས་དམ་གནད་ནས་བསྐལ་བ་མ་ལགས་ཏེ། །སྡིག་ཅན་འདི་ལ་ཉེས་པ་འདི་ཡོད་པས། །ལེགས་ཉེས་༝ སྟངས་འཛིན་རྣམས་ཀྱིས་འགུགས་པར་འོས། །བསྟན་ལ་གནོད་ཀྱང་ཁྱེད་ཀྱིས་མི་སྒྲོལ་ན། །འཇིག་རྟེན་བསྒྲལ་བའི་ཞིང་ནི་གང་དུ་མཆིས། །ཕུད་ཀྱི་ངོ་བསྲུང་ཉེས་ཆུང་གསོད་བྱེད་པ། །དེ་འདྲས་བསྟན་པ་བསྲུང་བར་འགྱུར་རམ་ཅི། །རྣལ་འབྱོར་བདག་དང་བསྟན་སྲུང་རྒྱལ་པོ་རྣམས། །བསྟན་དང་
བསྟན་འཛིན་གཙིགས་སུ་བཟུང་བ་ཡི། །འདའ་དཀའ་རྡོ་རྗེའི་དམ་ཚིག་གཅིག་ལགས་ན། །བསྐུལ་བའི་ལས་འདི་ཡལ་བར་མ་འདོར་ཅིག །གལ་ཏེ་ཡང་དག་བསྟན་དང་རང་བཟོའི་ཆོས། །ཐེག་ཆེན་བསྟན་པ་འཛིན་དང་ལོག་སྨོན་ཅན། །འདྲ་ཞིང་མཉམ་པར་དབྱེ་བསལ་མི་འབྱེད་ན། །ཁྱེད་ལ་བསྟན་སྲུང་མཚན་གྱིས་ཅི་ཞིག་བགྱི། །སྔགས་བདག་དྲེགས་པ་མེད་དང་ཁྱད་མ་མཆིས། །རྒྱུ་འབྲས་བདེན་པ་འཆོལ་དང་ཁྱད་པར་མེད། །སྲིད་གསུམ་དཔལ་འབྱོར་ཉམས་པར་གྱུར་ཀྱང་སླའི། །བསྟན་པའི་གནད་རྣམས་ཉམས་པར་མི་རུང་ཡང་། །བསྟན་ལ་འཚེ་བའི་མི་དང་མི་མིན་གྱིས། །བསྟན་པའི་མངའ་ཐང་བཅོམ་པ་མ་གཟིགས་སམ། །འབར་བའི་སྤྱན་གྱིས་ཁམས་གསུམ་ས་ལེར་གཟིགས། །དམ་ཚིག་སྙིང་ལ་
བརྣག་པའི་ཤུགས་ཀྱིས་ནི། །སྲིད་གསུམ་ཁྱབ་རྒྱུག་ས་གསུམ་བརླག་ནུས་པའི། །དམ་ཅན་དྲེགས་པ་བསྐུལ་ལོ་ས་མ་ཡ། །རྟེན་འབྲེལ་ཆོས་ཉིད་བདེན་པ་མི་བསླུ་ཞིང་། །བསྟན་སྲུང་དྲེགས་པ་དམ་ཚིག་མཐུ་ལྡན་ན། །བརྒྱུད་གསུམ་བླ་མའི་རྒྱུད་འཛིན་རྣལ་འབྱོར་གྱིས། །བསྐུལ་བའི་ལས་ལ་བཏང་སྙོམས་ཇི་ལྟར་མཛད། །ནམ་མཁའ་སྟོང་པ་འདི་ལ་ཚད་མ་འཛུགས། །ལས་ཀྱི་རྣམ་པར་སྨིན་ལ་ཁུང་མ་ཕྱུངས། །སྣ་ཚོགས་གཞན་གྱི་རྐྱེན་ལ་བསྙད་མ་གདགས། །ཕྱི་མའི་སྐྱེ་བར་དུས་འདེབས་མ་མཛད་པར། །གནག་པའི་དགྲ་བགེགས་ད་ལྟ་ཉིད་དུ་ཁུག །བཤམས་པའི་གཏོར་མ་འདི་དང་གཉིས་མེད་སྟིམས། །ཁ་ཁ་ཁཱ་ཧི་དགྲ་བོ་མཱ་ར་ཡ། །རྣམ་པར་ཤེས་པ་ཆོས་ཀྱི་དབྱིངས་སུ་སྤོར། །བསྟན་སྲུང་དྲེགས་པ་རབ་ཏུ་དགྱེས་མཛོད་ལ། །
སྤྱི་སྒོས་རཱ་ཏྲའི་མིང་ཡང་མེད་པར་གྱིས། །ཐེག་མཆོག་སྙིང་པོའི་བསྟན་པ་རིན་པོ་ཆེའི། །གནད་རྣམས་ཉམས་པར་བྱེད་པའི་བཟང་བརྫུ་ཅན། །གང་དུ་བྱུང་ཡང་དེ་ཡང་མོད་ཉིད་ལ། །སྙིང་ཁྲག་ས་ལ་གཏོར་ཞིང་བརླག་པར་གྱིས། །གཞན་ཡང་བསྟན་ལ་གནོད་པའི་དགྲ་དང་བགེགས། །གང་ན་འདུག་པ་མཁྱེན་པའི་སྤྱན་གྱིས་ལྟོས། །ཞི་རྒྱས་དབང་གིས་གདུལ་བར་འོས་པ་རྣམས། །ཕྲིན་ལས་ཆེན་པོས་དེ་ལྟར་འདུལ་བར་མཛོད། །གལ་ཏེ་ཞི་བས་འདུལ་དུ་མི་འཚལ་ན། །སྡིག་ཅན་དེ་དག་སྡེ་དང་ཕྱོགས་སུ་བཅས། །རྗེས་མེད་བརླག་ཅིང་དེ་ཡང་སྟོབས་དང་དཔུང་། །ནམ་ཡང་ལྡང་མེད་གནོན་པའི་ཕྲིན་ལས་མཛོད། །ཆོས་སུན་འབྱིན་པའི་ལྕེ་ལ་རལ་གྲིས་ཐོབ། །བརྣག་པ་ངན་པའི་སྙིང་ལ་དུག་མདའ་རྒྱོབ། །སྦྱོར་བ་
ངན་པའི་ཡན་ལག་ཞགས་པས་ཆིངས། །རྗེས་བཞག་ངན་པའི་ལས་མཐའ་ཤུལ་མེད་སྡུས། །སྟོབས་ནུས་རླུང་རྟ་ཁ་ཕུང་རྗེས་མེད་ཐོངས། །འཁོར་གཡོག་སྡེ་དཔུང་མིང་མེད་རང་བརླག་མཛོད། །བརྒྱུད་འཛིན་རྗེས་བརྗོད་མཐའ་ཡས་ཤུལ་མེད་གྱིས། །བརྣག་པའི་ལས་འདི་ཇི་བཞིན་མཐར་དབྱུང་ནས། །བསྟན་པའི་སྙིང་པོ་མཆོག་དང་དེ་འཛིན་སྡེ། །ཕྱོགས་ལས་རྣམ་པར་རྒྱལ་བའི་འཆི་མེད་རྔ། །ས་གསུམ་ཁྱབ་པར་བསྒྲགས་པའི་དགེ་ལེགས་ཀྱིས། །འཇིག་རྟེན་ཕན་བདེ་ཆེན་པོས་ཁྱབ་པར་མཛོད། །ཅེས་དྲག་ཏུ་བསྐུལ། གསེར་སྐྱེམས་འབུལ་བ་ནི། རཾ་ཡཾ་ཁཾ འདོད་ཡོན་ཟག་པ་མེད་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿས་བརླབས། ཧཱུྃཿ དཀོན་མཆོག་རིན་ཆེན་གསུམ་དང་རྩ་བ་གསུམ༔ ཁྱད་པར་དབང་དྲག་གྲོ་ལོད་
ལྷ་ཚོགས་རྣམས༔ གསེར་སྐྱེམས་བདུད་རྩིའི་མཆོད་པ་འདི་བཞེས་ལ༔ རྣལ་འབྱོར་བདག་གི་མཐུ་དང་དཔུང་བསྐྱེད་ཅིག༔ ཕོ་རྒྱུད་མོ་རྒྱུད་མ་ནིང་དྲེགས་པའི་སྡེ༔ མ་མོ་མཁའ་འགྲོ་ཞིང་སྐྱོང་གནས་ཉུལ་ཀུན༔ གསེར་སྐྱེམས་བདུད་རྩིའི་མཆོད་པ་འདི་བཞེས་ལ༔ འབྱོར་བདག་གི་མཐུ་དང་དཔུང་བསྐྱེད་ཅིག༔ ལོ་ཟླ་ཞག་དུས་སྤར་སྨེ་ཚེས་ཀྱི་བདག༔ ཡུལ་ལྷ་གཞི་བདག་མཐུ་རྩལ་ལྡན་པ་ཀུན༔ གསེར་སྐྱེམས་བདུད་རྩིའི་མཆོད་པ་འདི་བཞེས་ལ༔ རྣལ་འབྱོར་བདག་གི་མཐུ་དང་དཔུང་བསྐྱེད་ཅིག༔ གཟུ་དཔང་གསོལ་བ་ནི། ༸ཧཱུྃ་བྷྱོ༔ མ་ཉེས་མ་ལན་འཕགས་པའི་ཚོགས༔ བདེ་གཤེགས་རྣམས་ཀྱིས་གཟུ་དཔང་མཛོད༔ ཞལ་ལྕེ་ལྷ་འདྲེ་ཡོངས་ཀྱིས་ཆོདཿ༔ དགོངས་ཤིག་དུས་གསུམ་བདེ་གཤེགས་དང་༔
སྲས་བཅས་དཀོན་མཆོག་གསུམ་པོ་དགོངས༔ བསྟན་པ་བཤིག་པའི་དམ་ཉམས་ལ༔ སྲུང་སྐྱོབ་མགོན་གྲོགས་མ་མཛད་ཅིག༔ བདག་ཅག་མི་ནོར འཁོར་བཅས་ལ༔ སྡང་བའི་སེམས་དང་རྩུབ་པའི་སེམས༔ གདུག་པའི་སེམས་དང་མི་མཐུན་སེམས༔ གནོད་པའི་སྦྱོར་བ་གཤོམ་པ་དང་༔ 
འབེན ་བཅའ་སྔགས་དང་འཁྲུལ་འཁོར་བསྐོར༔ ཕྲ་མེན་ངན་སྔགས་རྦད་པ་ཡི༔ བན་དགྲ་གླང་སྙིང་བསམ་ངན་དང་༔ མི་དང་མི་མིན་ཐམས་ཅད་ཀྱི༔ སྟོབས་དང་ནུས་པ་ཐམས་ཅད་ཤིགས༔ མཐུ་དང་རྫུ་འཕྲུལ་ཐམས་ཅད་འཕྲོག༔ ཤ་ཟོ་ཁྲག་འཐུང་ཁྲམ་ལ་ཐོབ༔ སྨྱོ་འབོག་སྨྱོས་དང་བརྒྱལ་དུ་ཆུག༔ རང་མཚོན་ནུས་པ་རང་གཤེད་ཕོབ༔ དྲང་སྲོང་དམོད་པའི་བཀའ་ཆད་ཐོངས༔ ཞེས་དང་། ལྷ་སྲུང་གཉན་པོར་མ་ཉེས་པའི་ཡུས་གསོལ་
ཞིང་ར་མདར་སྦྲན་པ་ནི། ཧཱུྃཿ ཐོག་མེད་དུས་ནས་རྫོགས་སངས་རྒྱས་པའི་མགོན། །རིག་འཛིན་བླ་མ་དཀོན་མཆོག་ཡི་དམ་ལྷ། །ཌཱ་ཀི་དམ་ཅན་ཆོས་སྲུང་དབྱིངས་ནས་གསོན། །བདེན་རྫུན་དྲང་པོའི་དབང་པོ་ཁྱེད་ཀྱིས་མཛོད། །ཆུང་ནས་ལྷག་བསམ་རབ་དཀར་བསམ་པ་འདི། །ཡང་དག་དལ་འབྱོར་སྙིང་པོ་རྙེད་དཀའ་དང་། །མི་རྟག་སྐྱོ་ཤས་འཁོར་བའི་སྡུག་བསྔལ་དྲན། །ཆོས་བཞིན་སྤྱོད་དུས་བཤོལ་འདེབས་དགྲ་ཡིས་གཙེས། །སྐྱོབ་པའི་སྲུང་མ་མེད་དམ་རམ་ཟླར་ལོག །བྱམས་གདུང་མཛའ་བཤེས་གཉེན་འདུན་རྒྱབ་ཏུ་བསྐྱུར། །ཡང་དག་དམའ་མོའི་ས་བཟུང་དམ་ཆོས་བསྒྲུབས། །སྐྱབས་མཆོག་བླ་མ་གཙུག་ཏུ་བསྒོམ་དུས་སུ། །དགྲ་བོ་ལྷ་སྲིན་བདུད་ཀྱི་གཉའ་ནོན་བྱུང་། །སྐྱོབ་པའི་སྲུང་མ་མེད་དམ་
རམ་ཟླར་ལོག །སོ་ཐར་རྫིང་ཞུགས་ཐོས་བསམ་རྒྱ་མཚོའི་གླིང་། །ཡོངས་ཀྱི་དེད་དཔོན་མཚན་ལྡན་བླ་མ་བསྟེན། །སྒོམ་བྱུང་རིན་ཆེན་ལེན་དུ་ཕྱིན་པ་ལ། དགྲ་བོ་མི་མཐུན་རླུང་གི་འཚུབས་མ་བྱུང་། །སྐྱོབ་པའི་སྲུང་མ་མེད་དམ་རམ་ཟླར་ལོག །བློ་གྲོས་འདབ་དཀར་དབང་བཞིའི་ཟེའུ་འབྲུས་མཛེས། །བསྐྱེད་རྫོགས་སྡོམ་གསུམ་དྲི་བཟང་རབ་གྱེས་འདུ། །ཐར་གླིང་ལྷ་ཡི་ཕོ་བྲང་འགྲིམ་པའི་དུས། །དགྲ་བོ་སྐྱིན་ཐང་གློག་གི་འཁོར་ལོ་བསྐོར། །སྐྱོབ་པའི་སྲུང་མ་མེད་དམ་རམ་ཟླར་ལོག༔ ་ཆོས་དབྱིངས་དྭངས་མའི་འོད་ཀློང་དུ། །བདེ་སྟོང་ཡེ་ཤེས་པདྨོ་འཛུམ་པའི་གློང་། །སྣང་བཞི་ཆོས་ཟད་གཞི་ལ་སྨིན་པའི་དུས། །ལོག་ལྟོས་ཐེག་མཆོག་ཁྱད་གསོད་དགྲ་བོ་བྱུང་། །སྐྱོབ་པའི་སྲུང་མ་མེད་དམ་རམ་ཟླར་
ལོག །ཚེ་འདིའི་བྱ་བཞག་འཁྲུལ་པའི་སྤྲིན་ཀུན་དེངས། །རྣམ་མཁྱེན་ཡེ་ཤེས་ཉི་མའི་ཟེར་སྟོང་གིས། །འདབ་དཀར་གླིང་བཞིའི་གདུལ་བྱ་སྐྱོང་བ་ལ། །ཕྲག་དོག་སྐྱིན་ཐང་དགྲ་བོའི་སྤྲིན་ནག་འཁྲུགས། །སྐྱོབ་པའི་སྲུང་མ་མེད་དམ་རམ་ཟླར་ལོག །བོས་ན་སྲ་བའི་བྲག་ཀྱང་ལན་འབྱིན་ན། །དུས་གསུམ་མངོན་ཤེས་བདག་པོ་སྙན་མ་སྲ། །བདག་ལ་དགོངས་པའི་དུས་དེ་དེ་རིང་ལ། །སྐྱབས་ཀུན་ཆོས་ཀྱི་དབྱིངས་ནས་བརྩེ་བས་གཟིགས། །སྐྱོབ་པའི་སྲུང་མ་མེད་དམ་རམ་ཟླར་ལོག །དལ་འབྱོར་ཀླུ་དབང་གཙུག་གི་ཡིད་བཞིན་མཆོག །འདོད་དགུའི་རེ་བ་སྐོང་བའི་སེམས་ཉིད་འདི། །མི་མེད་ནགས་མཐའི་ལྗོངས་སུ་སྐྱོང་བ་ལ། །དགྲ་བོ་སྟོབས་འབྱོར་སྲོག་དབུགས་འཕྲོག་ཏུ་བྱུང་། །སྐྱོབ་པའི་སྲུང་མ་མེད་དམ་
རམ་ཟླར་ལོག །བདག་ནི་བདེན་རྫུན་ཚིག་གསུམ་ཤོད་དབང་མེད། །ཀུན་མཁྱེན་ཡེ་ཤེས་སྤྱན་ལྡན་ཁྱེད་ལྟ་བུར། །མི་བདེན་རྫུན་གྱིས་དབུ་བསྐོར་སུ་ལ་ཞུ། །དྲང་པོའི་དཀར་རྒྱུ་འདི་ལ་ལེགས་གསོན་ལ། །སྐྱོབ་པའི་སྲུང་མ་མེད་དམ་རམ་ཟླར་ལོག །སྔོན་བྱོན་རྒྱལ་བའི་ཐུགས་རྗེའི་ཟེར་མ་ཕོག༔ ལེགས་བཤད་དཀར་པོའི་ཆོས་ཀྱིས་འདི་མ་ཐུལ། །མ་ཉེས་བདེན་པའི་ཁོང་ཡུས་ཁྱད་དུ་བསད། །ཁས་ཉེན་སྒྲུབ་པ་པོ་ཡི་རྒྱབ་བརྟེན་མཛོད། །སྐྱོབ་པའི་སྲུང་མ་མེད་དམ་རམ་ཟླར་ལོག །དཀའ་ཐུབ་སྒྲུབ་པའི་དམ་རྫས་དགྲ་ཡིས་ཁྱེར། །ཆོས་སྲུང་ཌཱ་ཀིའི་རྟེན་རྫས་གར་སོང་ཅི། །དགེ་སྡིག་བླང་དོར མ་ལུས་ཁྱད་དུ་བསད། །ནག་པོའི་རྣམ་སྨིན་འབྲས་བུ་སླེབས་དུས་མེད། །སྐྱོབ་པའི་སྲུང་མ་མེད་དམ་རམ་ཟླར་ལོག །མཧཱ་གུ་རུ་སྲིན་པོའི་ཁ་གནོན་
གཤེགས། །པཎ་ཆེན་བི་མ་འཇའ་ལུས་དབྱིངས་སུ་གཟིམས། ཀུན་མཁྱེན་ཡབ་སྲས་མི་སྣང་མཁའ་སྤྱོད་གཤེགས། རྩོལ་མེད་ཨ་ཏིའི་བསྟན་པ་སུ་ཡིས་འཛིན། །སྐྱོབ་པའི་སྲུང་མ་མེད་དམ་རམ་ཟླར་ལོག །འོད་གསལ་འཇའ་ལུས་བསྟན་འདི་ཉམས་དམའ་ཞིང་། །ལོག་སྤྱོད་སྡིག་པའི་བཤེས་ཀྱི་མངའ་ཐང་རྒྱས། །དུས་ངན་མཐའ་དམག་བདུད་ཀྱི་མུན་ཆེན་འཐིབས། །དད་ལྡན་སྐྱོ་ཤས་ཅན་རྣམས་སུ་ལ་རེ། །སྐྱོབ་པའི་སྲུང་མ་མེད་དམ་རམ་ཟླར་ལོག །ཆོས་ལྡན་སྐྱེས་བུ་སྐྱོང་བའི་སྒྲུབ་རྫས་དང་། །ཐོས་བསམ་ཆོས་སྤྱོད་གཞི་མ་ཟབ་མོའི་དཔེ། །ཕངས་ཀྱང་རང་དབང་མེད་པར་དགྲ་བོས་ཁྱེར། །བདག་ལ་འབོད་སའི་མགོན་ནི་ཁྱོད་ལས་མེད། །སྐྱོབ་པའི་སྲུང་མ་མེད་དམ་རམ་ཟླར་ལོག །ཆོས་མཛད་སྐྱེས་བུ་
སྐྱོང་བར་ཞལ་བཞེས་པའི། །ཆོས་སྲུང་བསྟན་དགྲ་མི་འདུལ་གང་དུ་བཞུགས། །རྦད་ན་གསོས་པའི་ཁྱིས་ཀྱང་དགྲ་འདུལ་ན། །བདག་ཉིད་འབོད་པའི་དུས་སུ་སྙན་མ་སྲ། །སྐྱོབ་པའི་སྲུང་མ་མེད་དམ་རམ་ཟླར་ལོག །ལས་ངན་མི་དགེ་བཅུ་ཡི་སྲོལ་རྣམས་བཏོད། །ལུགས་བཟང་དགེ་བ་བཅུ་ལ་སྤྱད་དབང་མེད། །ཐུབ་བསྟན་པདྨའི་འདབ་བརྒྱ་ཟུམ་དུ་ཉེ། །མ་ཉེས་ཁས་ཉེན་བདག་ཉིད་སུ་ལ་རེ། །སྐྱོབ་པའི་སྲུང་མ་མེད་དམ་རམ་ཟླར་ལོག ། རིག་འཛིན་པདྨའི་སྒྲུབ་བརྒྱུད་ཁྱད་དུ་བསད། །ཕོག་འགྱེལ་ནག་པོའི་མཐུ་ལ་བུ་ལོན་བསྙགས། །བཤད་སྒྲུབ་ཉིད་བྱེད་པདྨ་སད་ལ་བསྐུར། །སྔགས་གཞོན་མི་རྟག་སྐྱོ་བའི་དུས་ཚོད་འདིར། །སྐྱོབ་པའི་སྲུང་མ་མེད་དམ་རམ་ཟླར་ལོག །རྣམ་མཁྱེན་མངོན་ཤེས་མངའ་བས་འདིར་གཟིགས་དང་། །
ཀུན་མཁྱེན་དགེ་བའི་བཤེས་ཀྱི་མེ་ཏོག་ཡལ། །བརྩེ་ཆེན་ཆོས་ཀྱི་གླང་པོ་མལ་དུ་གཟིམས། །སྐལ་བཟང་རྗེས་སུ་འཇུག་རྣམས་སྐྱོ་བ་འཕེལ། །སྐྱོབ་པའི་སྲུང་མ་མེད་དམ་རམ་ཟླར་ལོག །བྷྱོཿ། ད་ནི་ཁྱོད་ཀྱི་མཐུ་རྩལ་མ་ཕྱུངས་ན། །དེ་ནས་སྲུང་མ་བརྟེན་པས་ཅི་ཞིག་ཊྛཾབྱ། །སྔོན་གྱི་ལས་ངན་འབྲས་བུའི་དུས་བསྒུག་ན། །མྱུར་བའི་མཐུ་རྩལ་དཔུང་དེ་གང་དུ་ཡལ། །ད་ལྟ་དགྲ་བོ་ཆམས་ལ་དབབ་པའི་དུས། །རྔམ་བྱེད་ལས་ཀྱི་བཤན་པས་བར་སྣང་ཁེངས། །ནད་མཚོན་དུག་གི་ཐོག་ཆར་མ་ཕབ་ན། །དེང་ནས་ཐུབ་བསྟན་འདི་ལ་ཤུལ་མི་མངོན། །བཀའ་གསང་བླང་དོར་མ་ལུས་རྫུན་པར་འགྱུར། །རི་རབ་ཁྲག་གི་རྒྱ་མཚོ་ཉི་ཟླ་དང་། །གླིང་བཞི་ནད་ཀྱི་དཔུང་ཚོགས་མུན་སྤྲིན་ཆར། །ལྟས་ངན་བརྒྱད་ཅུ་རྩ་བཞི་
ལ་སོགས་པ། །བཀའ་སྲུང་སྡེ་བརྒྱད་སྟོང་གིས་ཁྲམ་ཁ་ཕོབ། །དགྲ་བོའི་བླ་སྲོག་རྣམ་ཤེས་དབང་མེད་ཆོམས། །ཕྱིན་ཆད་ཕ་ཚེ་བུ་བརྒྱུད་མེད་པར་མཛོད། །ཁ་རྗེ་རིགས་རྒྱུད་སྙན་གྲགས་ཡལ་དུ་ཆུག །ཡུལ་མཁར་སྒྱུ་མའི་གྲོང་ཁྱེར་གྲམ་ལྟར་རྡོལ། །སྐྱོབ་བྱེད་འགོ་བའི་སྲུང་མ་ཡར་ལ་་གཤེགས། །ཕན་བྱེད་རིགས་ཀྱི་ལྷ་དགུ་སྤྲིན་ལྟར་ཡལ། །རེ་བའི་གནས་ཡུལ་ཐུགས་རྗེའི་ཞགས་པ་བསྡུས། །རྒྱལ་བའི་བསྟན་ཀུན་འཇོམས་པའི་ཞིང་བཅུ་འདིའི། །ཕྱི་ཡི་དབང་པོ་རྣམ་ལྔ་མཆོད་པར་བཞེས། །ནང་གི་དོན་སྙིང་སྣ་ལྔ་མཆོད་པར་བཞེས། །གསང་བའི་བླ་ཚེ་སྲོག་དབུགས་མཆོད་བཞེས། །དཀོན་མཆོག་བླ་མའི་དབུ་འཕང་ཡར་ལ་བསྟོད། །ཨ་ཏི་གླང་ཆེན་གཟིམས་པ་མལ་ནས་སློངས། །རྨད་བྱུང་སྒྲུབ་རྒྱུད་པདྨོའི་འདབ་
བརྒྱ་ཕྱེས། །ཆོས་དབྱིངས་ཉམས་དང་རྟོགས་པའི་གདུགས་དཀར་སྒྲེངས། །ཆོས་ཟད་ལྟ་བའི་རྒྱ་མཚོ་མེར་དུ་ཆུག༔ རྣམ་ཀུན་ཐར་གླིང་རྒྱལ་བའི་ཞིང་དུ་སྒྲོལ། །རྟག་ཏུ་སྲུང་མ་རྒྱ་མཚོ་དགྱེས་པའི་ཕྱིར། །གུས་པས་བདག་གི་གཙུག་ཏུ་ཁྱོད་མཆོད་དོ། །ཧོམ་དང་དམིགས་བྱ་བསྐྱེད་པ་ནི། ཨེ་རཾ་ཕཊ་རཾ་ཛྭ་ལ་ཛ༔ ཨེ མཱ་ར་བསད་པའི་ད་ལ་ནི༔ ཕྱི་ནི་གྲུ་བཞི་གདེངས་པ་ལ༔ ནང་ནི་ཟླ་གམ་འབར་བ་ཡི༔ ལྟེ་བ་ཨེ་རྫོང་དམར་ནག་འབར༔ དུག་གསུམ་རང་མཚན་བཙོན་ཁང་དུ༔ དཀོན་མཆོག་སློབ་དཔོན་སྐུ་དགྲ་དང་༔ རྣལ་འབྱོར་བདག་ལ་སྒོས་ཀྱི་དགྲ༔ དམ་ལོག་དམ་ཚིག་ལྡན་པའི་དགྲ༔ འདུ་བར་འོང་དང་སེམས་ཅན་ཚེ༔ རང་རྒྱུད་དམན་པ་ཞིང་བཅུའི་དགྲ༔ བདག་ལ་དོ་བསྡོ་ཕོད་བཙུགས་ཤིང་༔
བསམ་ངན་ཕྲ་མེན་ལས་སྦྱོར་རྩོམཿ༔ བན་དགྲ་གླང་སྙིང་བྱད་མ་རྣམས༔ ཕུང་ཁམས་སྐྱེ་མཆེད་ཚང་བའི་གཟུགས༔ མི་སྡུག་ཉམ་ཐག་གཟས་པོ་གསལ༔ ཞེས་དམིགས་ལ། ཉེས་པ་བསྒྲག་པ་ནི། ཧཱུྃ། རྒྱལ་བའི་བསྟན་པ་ཡོངས་དང་བྱེ་བྲག་ཏུ། །རང་བཞིན་འོད་གསལ་སྙིང་པོ་ཁྱད་དུ་བསད། དགེ་བའི་དཔུང་བཅོམ་མི་དགེ་བཅུ་ཡི་ཞིང་། །ཐར་པའི་ལམ་སྟོན་ཡོངས་ཀྱི་སྐ་དགྲ་དངོས། །མིང་རུས་ཡི་གེར་བྲིས་པའི་དམ་ཉམས་འདི། །སྙིང་རྗེ་རབ་ཏུ་ཁྲོས་པའི་ཞེ་སྡང་གིས། །མི་བཟད་མཚོན་ཆས་གཏུབས་ལ་རྔམ་ཟས་མཛོད། །སྙིང་ཁྲག་རྒྱ་མཚོར་ཁོལ་བའི་རྦ་ཀློང་བཞེས། །བདེན་རྫུན་ཚིག་གིས་སྨྲ་ས་འདི་ལ་མེད། །མགོ་ཡི་གཉའ་གནོན་རྐང་གི་ཚེར་མ་བྱས། །ཤ་ལྟར་བྲོས་ཀྱང་ཁྱི་ལྟར་བདས་ནས་བྱུང་། །བྱ་ལྟར་ཡིབ་ཀྱང་ཁྲ་ལྟར་
འཚོལ་དུ་བྱུང་། །ཉེས་མེད་བདག་ལ་བདེ་བའི་སྐབས་མ་བྱིན། །སྐྱོབས་པའི་དཀོན་མཆོག་བརྟེན་པའི་སྲུང་མ་ཡང་། འདི་ཡིས་ཁྱད་དུ་བསད་ནས་ལོ་ཟླ་མང་། །ང་ཡི་བདེན་ཡུས་སྣང་སྲིད་མིག་སྔར་བསྒྲགས། །མགོན་མེད་བདག་ལ་ཐུགས་རྗེ་ད་གཟིགས་ཤིག༔ བཅུ་ཀུན་ཚང་བསྟན་པའི་དགྲ་བོ་ལ། །སྟོད་ནས་ཚ་བ་སྨད་ནས་གྲང་བ་དང་། །བར་ནས་བཞི་བརྒྱ་རྩ་བཞིའི་ནད་རིགས་ཀུན། །ཚེ་ཟད་དགྲ་བོའི་སྙིང་གི་དཀྱིལ་དུ་སློངས། །འདི་ནས་ཞག་བདུན་ལྷག་པའི་དུས་བཏབ་ན། །བརྟེན་པའི་བཀའ་སྲུང་རྣམས་ལ་དགོས་པ་མེད། །ལྟས་ངན་བརྒྱད་ཅུ་རྩ་བཞི་ལ་སོགས་པ། །མི་མཐུན་རྟགས་ཀྱི་མཚན་མ་ད་ལྟ་ཐོངས། །མི་སྡོད་འཆི་བའི་རྟགས་ཀྱི་དུས་གཏུགས་ཤིག །བདེན་སྟོབས་བརྗོད་ཅིང་བཀུག་པ་ནི། ན་མོ།
སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། ཁྲག་འཐུང་ཆེ་མཆོག་དབང་དྲག་རྡོ་རྗེ་གྲོ་ལོད་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང་། བཀའ་སྲུང་ཕོ་ཉ་ལས་མཁན་རྣམས་ཀྱི་བཀའ་བདེན་པ་དང་། གཞན་ཡང་གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་གྱི་བདེན་པའི་སྟོབས་ཀྱིས་བདག་ཅག་རྣལ་འབྱོར་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས། བར་ཆད་ཀྱི་རྐྱེན། ཁྱད་པར་དུ་དམ་འགོང་རྒྱལ་གདོན་བྱད་མ་རྦོད་གཏོང་ལྷ་སྲུང་དང་བཅས་པ་རྣམས། མགོན་བྱེད་ཀྱི་ལྷ། ཚེ་དང་དབང་ཐང་། བསོད་ནམས་དང་དུས་
ཀྱི་དབང་དུ་མ་གཏོང་བར་ད་ལྟ་ཉིད་དུ་གཟུགས་ལིངྒ་འདི་ལ་ཁུག་ཅིག༔ རྩ་སྔགས་མཐར། ནྲྀ་ཏྲི་ཧུར་ཐུམ་ཛ༔ ཛཿཧཱུྃ་བྃ་ཧོ༔ ཞེས་དགུག་གཞུག་དྲག་པོ་ལན་གསུམ་དང་། ཧཱུྃཿ་ཛ༔ སྟོབས་བཅུ་མངའ་བ་རྡོ་རྗེ་གྲོ་བོ་ལོདཿ༔ དབང་ཆེན་གར་གྱི་དབང་ཕྱུག་སྲས་དང་འཁོར༔ རྒྱས་ཆོས་དང་འཕགས་པའི་ཚོགས་ཆེན་པོ༔ མཆོག་གསུམ་བདེན་པ་དམོད་པའི་བྱིན་རླབས་དང་༔ སྙིང་པོ་སྔགས་དང་ཏིང་འཛིན་བདེན་པའི་མཐུསཿ༔ གང་ལ་བྱ་བའི་དམ་ཉམས་སྡིག་ཅན་རྣམས༔ ལྕགས་ཀྱུས་ཟུངས་ལ་ཞགས་པས་སྐེ་ནས་ཆིངས༔ ཡན་ལག་སྡོམས་ལ་དྲིལ་བུས་མྱོས་བྱས་ནས༔ དམིགས་རྟེན་མཚན་མའི་རྫས་ལ་གཉིས་མེད།ཁུག༔ རྩ་སྔགས་མཐར། ཛཿཧཱུྃ་བཾ་ཧོ༔ ནྲྀ་ཏྲི་ཨོཾ་ཀུ་ཤ་ཛཿཛ༔ བླ་ཤ་རེ་མ་ཏི་འགྲིམ་འགྲིམ༔ ཤ་མ་
རུ་ཏི་ཐུལ་ཐུལ༔ མྱོག་མྱོག༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོག་ལིང་ཤག་ལིང་ཐུམ་ཙ་མུནྜི་ཛཿཧཱུྃ་བཾ་ཧོ༔ ཞེས་འགུགས་འཆིང་སྡོམ་མྱོས་ཀྱི་ལས་བྱ་ཞིང་། ཕྱག་རྒྱ་བཞི། བྱ་འུག་གི་དོང་རུ། དུག་ཁྲག་འབྲས་བུ། ཡུངས་ཀར་བྱད་ཐག་སྨྱོ་ཁྲག་རྣམས་བརྡེག་ལ། ཕོ་ཉ་འགྱེད་པ་ནི། བྷྱོ༔ ལས་བྱེད་ཕྲ་མེན་ཕྲ་མ་མཁན༔ གང་ལ་བྱ་བའི་སྐྱོབ་པའི་ལྷ༔ མི་དང་ལྷ་གཉིས་དབྱེན་གྱིས་དབྱེས༔ མཁོན་ཆུག་རང་གཤེད་རང་ལ་ཕོབ༔ རྩ་སྔགས་དང་། རཱུ་ཏྲ་ཧབ་ལེ་ཧུབ་ལེ་ཤག་ཕྱེས༔ རཱུ་ཏྲ་མ་ནི་མཱ་མ་ས་ཤག་ཕྱེས༔ མ་མ་ཏྲག་རཀྴ་ཤག་ཕྱེས༔ དྷེ་ཝ་ནི་མཱ་ར་ཡ་ཤག་ཕྱེས༔ དྷེ་ཝ་ཙིཏྟ་ཤག་ཕྱེས༔ ཝ་ཤག་ཤག་ཕྱེས༔ བྷ་རི་ཤག་ཕྱེས༔ ཙིཏྟ་ཤག་ཕྱེས༔ ན་སུ་ཡེ་ཤག་ཕྱེས༔ ནཱ་ག་ཕུས་པ་ཤག་ཕྱེས༔ ཀ་ཁ་ག་གྷ་ང་ལཾ༔ དགྲ་བོ་སྐྱོབ་
བྱེད་ལྷ་བཅུ་དང་ཤག་ཕྱེས༔ དམ་ཉམས་པའི་དགྲ་བོ་འདི་ཆོས་ཀྱི་སྲུང་མ་དང་ཤག་ཕྱེས༔ སྐྱོབ་བྱེད་ཀྱི་ལྷ་བཅུ་དགྲ་བོའི་བདུད་དང་གཤེད་དུ་ཕོབ་ཅིག༔ ཅེས་བརྗོད། གནད་ལ་དབབ་པ་ནི། ཐུན་རྫས་སྣ་ཚོགས་ཀྱིས་བྲབ་ཅིང་། ཧཱུྃཿ དཔལ་ཆེན་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་ན༔ སྟོབས་ཆེན་ཁྲོ་བོའི་ཐུགས་ཁྲོས་ནས༔ རྡོ་རྗེ་མེ་ཡི་སེར་བ་དང་༔ དྲག་པོ་སྔགས་ཀྱི་སྒྲ་ཆེན་པོས༔ བརླག་པར་་འགྱུར་བར་གདོན་མི་ཟ༔ དགྲ་བགེགས་སྲོག་རྩ་ལེན་པར་བྱེདཿ༔ ཛ༔ དམ་ཚིག་ཆེན་པོའི་དུས་ལ་བབ༔ མཐུ་རྩལ་འདོན་པའི་དུས་ལ་བབ༔ དངོས་གྲུབ་བར་ཆད་རྩོམ་པ་དང་༔ བདག་ལ་སྡང་བའི་དགྲ་བོ་འདི༔ གཏོགས་ཤིག་སྲོག་དང་ཕྲོལ་ལ་ཤོག༔ གློ་སྙིང་དམར་པོ་ཕྱུངས་ལ་ཤོག༔
མ་གཡེལ་མ་གཡེལ་ལས་མཛོད་ཅིག༔ དུས་ལ་བབ་བོ་ས་མ་ཡ༔ དྲང་སྲོང་དམོད་པས་བསྡིགས་པ་ནི། ཨོཾ་ལོཀྟྲི་པཱ་ལ་ནན༔ ས་ག་པཱ་ཤ་ནན༔ ནཱ་ག༔ དུ་དུ་ནན༔ མ་མཾ་མ་ཙ༔ ཙིར་ཙ་ར་ཙིར་ཙ་ར༔ བཾ་རུ་ལུ་བཾ་རུ་ལུ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར༔ ཙི་དུ་སོད་ཙི་དུ་སོད༔ ཤིག་ལྷུར་གཏུབས༔ ཧ་ལ་པ་ཏི་ནན༔ འཁོར་བ་ཐུལ༔ གནོད་བྱེད་འབྱུང་པོའི་ཀཱ་ཝཱ་ཙི་བརླག་བརླག༔ ཅེས་དང་། དམ་ཉམས་པའི་དགྲ་བོ་འདི་ཡི་སྲིད་པ་སྤྱི་ནས་བཤིག་ཅིག༔ སྲིད་གསུམ་རྨང་ནས་སྒྱེལ་ཅིག༔ འཁོར་བ་གཏིང་ནས་ཕྱུངས་ཤིག༔ བསྐལ་པའི་མེས་སྲེགས་ཤིག༔ བཀའ་ཡི་དམོད་པས་སྡིགས་ཤིག༔ བཀའ་ཡི་ཆད་པས་ཆོད་ཅིག༔ གནམ་ལྕགས་རལ་གྲིས་སྤྱི་གཙུག་ནས་རྒྱོབ་ཅིག༔ མགོ་བོ་ཚལ་པ་བརྒྱ་རུ་ཐོངས་
ཤིག༔ སྙིང་དུམ་བུ་སྟོང་དུ་ཐོངས་ཤིག༔ ལུས་དུམ་བུ་སྟོང་དུ་གཏུབས་ཤིག༔ རྡོ་རྗེའི་སེར་བ་ཆེན་པོ་ཕོབ་ཅིག༔ དགྲ་བོ་མི་ནོར་འཁོར་དང་བཅས་པ་ཕུང་དུ་ཆུག་ཅིག་ཡ༔ ཧོ༔ དཔལ་ཆེན་པོ་རྡོ་རྗེ་གྲོ་བོ་ལོད་ཀྱི་ལྷ་ཚོགས་ལས་བྱེད་བཀའ་ཡི་ཕོ་ཉ་རྣམས་ཀྱིས་སྡིག་ཅན་འདིའི་བླ་དང་རྫུ་འཕྲུལ་འཕྲོག་ཅིག༔ ཁོང་ནས་སྙིང་ཕྱུངས་ཤིག༔ ཁ་ནས་ཁྲག་སྐྱུག་ཅིག༔ གནམ་གྱི་འཇུ་ཐག་ཆོད་ཅིག༔ ས་ཡི་རྟེན་དུ་ཕུར་ཕུད་ཅིག༔ བར་གྱི་དམུ་ཐག་ཆོད་ཅིག༔ ལྟག་ནས་བདུད་གཡོས་ཤིག༔ མདུན་ནས་འོད་འཕྲོག་ཅིག༔ ཉེ་འབྲེལ་མི་ནོར་དང་འཕྲོག་ཅིག༔ གོང་གི་ཕུ་བོ་དང་ཕྲོལ་ཅིག༔ འོག་གི་ནུ་བོ་དང་ཕྲོལ་ཅིག༔ མཆན་གྱི་བུ་དང་ཕྲོལ་ཅིག༔ གློ་བུར་དང་ཡེ་འདྲོགས་ཐོངས་ཤིག༔ མི་ནད་དང་
ཕྱུགས་ནད་ཐོངས་ཤིག༔ ཀླད་ཁྲག་དང་སྙིང་ཁྲག་དཀྲུགས་ཤིག༔ མདའ་གྲི་དང་མདུང་གྲིར་སོད་ཅིག༔ དམེ་གྲི་ཆུ་གྲི་རྦབ་གྲིར་སོད་ཅིག༔ འགགས་གྲི་དང་ལྕེབས་གྲིར་སོད་ཅིག༔ ལོ་ནད་ཟླ་གཅོང་གིས་སོད་ཅིག༔ མཛེ་ནད་རིམས་ནད་ཀྱིས་སོད་ཅིག༔ རང་སྲོག་རང་གིས་ཆོད་ཅིག༔ ཡ་ཐོད་ཉི་མ་འདེ་རུ་ཆུག་ཅིག༔ མ་ཐོད་ས་རྡོ་འགམ་དུ་ཆུག་ཅིག༔ ཕུང་གསུམ་གཡབ་མོ་ཐོབ་ཅིག༔ དྲེགས་པའི་འདྲེ་དམག་ཐོངས་ཤིག༔ བདུན་རྒྱུད་རྩད་ནས་གཅོད་པའི་ཕྲིན་ལས་མཛོད་ཅིག༔ བསྒྲལ་བ་ནི། ཕུར་བུ་རྡོ་རྗེ་ཐལ་མོའི་བར་དུ་བཟུང་ལ། ཧཱུྃཿ ལག་གཉིས་རིགས་ལྔ་ཡབ་ཡུམ་གྱི༔ སྦྱོར་མཚམས་འོད་ཀྱིས་བདེ་གཤེགས་བསྐུལ༔ སྐུ་གསུང་ཐུགས་ཀྱི་བྱིན་རླབས་འདུས༔ ཁམས་གསུམ་དུས་གཅིག་སྒྲོལ་བ་ཡི༔ མཐུ་རྩལ་བྱིན་
དབང་ཡོངས་སུ་རྫོགས༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ ཞེས་བྱིན་གྱིས་བརླབས་ཤིང་བདག་ཕུར འབེན ་གསུམ་གསལ་བ་སུམ་ལྡན་གྱི་ངང་ནས་གདབ་པ་དངོས་ནི། བདག་ཉིད་དབང་དྲག་ཧེ་རུ་ཀཿ༔ ཕུར་པ་སྲས་མཆོག་ཀཱི་ལ་ཡ༔ རཱུ་པ་དགྲ་བགེགས་དངོས་སུ་གསལ༔ ལྟ་བ་སྟོང་ཉིད་རྫོང་བཟུང་སྟེ༔ སྒོམ་པ་རྩེ་གཅིག་འཕྲང་ལ་བཤར༔ སྤྱོད་པ་སྙིང་རྗེ་ཁྲོས་པའི་སྲོག༔ ཚེ་ཁྲུས་གནད་ཀྱི་དགོངས་པ་ཡིས༔ སྙིང་གར་བཏབ་པས་ཁ་སྦྱོར་དབྱེ༔ ཞེས་པའི་དགོངས་པ་དང་ལྡན་པས་ཕུར་བུ་ཐོགས་ལ། ཧཱུྃ བདག་ཉིད་དཔལ་ཆེན་ཧེ་རུ་ཀཿ༔ ཕུར་པ་སྲས་མཆོག་ཀཱི་ལ་ཡ༔ ཁམས་གསུམ་སྒྲོལ་བའི་མཐུ་ལྡན་པ༔ དགྲ་བགེགས་སྙིང་གི་དཀྱིལ་དུ་བཏབ༔ ཚེ་བསོད་དྭངས་བཅུད་རང་ལ་ཐིམ༔
གནས་ངན་དྲི་མ་ཁྲུས་ཀྱིས་སྦྱངས༔ རྣམ་ཤེས་རྒྱལ་བའི་སྲས་སུ་བསྐྱེད༔ གཟུགས་ཕུང་ཐལ་བའི་རྡུལ་དུ་རློག༔ རྩ་སྔགས་མཐར། ཨོཾ་བཛྲ་རཀྴ་རཱ ཙའི་ཙིཏྟ་ཟུངས༔ ཁ་རཀ་སྨེ་ཤ་རཀྴ་རཱ་ཙའི་ཙིཏྟ་རྦད༔ འཁུ་ན་དུམ་བུ་རཱ་ཙའི་ཙིཏྟ་ཤིགས༔ འདའ་ན་རཀྴ་རཱ་ཙའི་ཙིཏྟ་ཕྱུངས༔ སྡོག་ན་རཀྴ་ཙའི་ཙིཏྟ་རྦདཿ༔ ཏྲིའུ་གཏུབ་གཏུབ་རྦད་རྦད༔ ཙིཏྟ་ཧུ་ལུ་ཧུ་ལུ་རྦད༔ ཙིཏྟ་རཀྴ་གཏུབས་གཏུབས༔ ཏྲིའུ་དུ་ཏྲིའུ་དུ༔ བཛྲ་སརྦ་དུཥྚི་ཏྲིག་ནན༔ ཧུར་ཐུ་ཛཿམཱ་ར་ཡ་རྦད༔ ཅེས་ཚེ་ཁྲུས་གནས་ལུང་གི་དགོངས་པས་བརྟེན་པ་དབྱིངས་སུ་བསྒྲལ། སྒྲོལ་གྲིས་རྟེན་གཞི་བསྒྲལ་བ་ནི། ཧཱུྃ པདྨ་དྲག་པོའི་ལྷ་ཚོགས་ཀྱིས༔ རྣོ་ངར་ཡེ་ཤེས་རལ་གྲི་ཡིས༔ མ་རིག་སྒོ་ངའི་སྦུབ་དྲལ་ནས༔ དགྲ་བགེགས་གཟུགས་ཕུང་རྡུལ་དུ་རློག༔ སརྦ་ཤ་ཏྲཾ་བིགྲཱན་ཚིནྡྷ་ཚིནྡྷ་
མཱ་ར་ཡ་ཧཱུྃ་ཕཊ༔ ཅེས་རྐང་པ་གཡོན་ནས་བརྩམ་སྟེ་དུམ་བུར་གཏུབ། གཏུན་དུ་བརྡུང་བ་ནི། ཧཱུྃ རྡོ་རྗེ་འབར་བའི་གཏུན་ཁུང་དུཿ༔ རྡོ་རྗེ་ཕ་ལམ་ཐོ་བས་བརྡུངས༔ ལྷ་ཡང་རུང་སྟེ་བགེགས་ཀྱང་སྒྲོལ༔ དམ་ཉམས་དགྲ་བོའི་ཚེ་སྲོག་ཆོདཿ༔ ཁ་ཐཾ་ཁ་ཐཾ ཞལ་དུ་སྟོབ་པ་ནི། ལིང་རོ་བདུད་རྩིར་སྦར་བ་ཧོམ་གཟར་གྱིས་གཏོར་མར་སྟོབ་ཅིང་། ཧཱུྃ དབང་ཆེན་རོལ་པའི་དུར་ཁྲོད་ཆེན་པོ་ནས༔ དཔལ་ཆེན་རྟ་མགྲིན་རྡོ་རྗེ་གྲོ་བོ་ལོད༔ དང་སྤྲུལ་པའི་ལྷ་ཚོགས་འཁོར་དང་བཅས༔ གནམ་ས་གདངས་པ་ཙམ་གྱི་ཞལ་ཕྱེས་ཤིག༔ གངས་རི་འབར་བ་ཙམ་གྱི་མཆེ་བ་གཙིགས༔ ཉི་ཟླ་འབར་བ་ཙམ་གྱི་སྤྱན་མིག་ལྡོག༔ གློག་དམར་འཁྱུག་པ་ཙམ་གྱི་ལྗགས་སྐྱོངས་ཤིག༔ བསྟབ་བོ་གདུག་ཅན་བསྒྲལ་བའི་ཤ་ཁྲག་རུས༔ བཞེས་
ཤིག་བཞེས་ཤིག་ལྷག་མེད་རོལ་མཛོད་ཅིག༔ མ་ཧཱ་མཱཾ་ས་ལ་ཁཱ་ཧི མ་ཧཱ་རཀྟ་ལ་ཁཱ་ཧི མ་ཧཱ་ཀེ་ནི་རི་ཏི་ལ་ཁཱ་ཧི མ་ཧཱ་གོ་རོ་ཙ་ན་ལ་ཁཱ་ཏི༔ མ་ཧཱ་ཙིཏྟ་ལ་ཁཱ་ཏི༔ མ་ཧཱ་བ་སུ་ཏ་ལ་ཁཱ་ཏི༔ མ་ཧཱ་ཞིང་ཆེན་ལ་ཁཱ་ཏི༔ གཉིས་པ་བཟློག་པའི་གཡུལ་གཤོམ་པ་ནི། ལིང་རོ་ཁྲག་སྐྱེམས་དང་སྦྱར་ཏེ་གཏོར་ཆེན་དུ་འབུལ་ཞིང་། ཧཱུྃ་བྷྱོ༔ འོག་མིན་གསང་ཆེན་རོལ་པའི་ཞིང་ཁམས་ནས༔ རིགས་བརྒྱའི་ཁྱབ་བདག་རྡོ་རྗེ་ཐོད་ཕྲེང་རྩལ༔ མཚན་མཆོག་བརྒྱད་དང་རྣམ་འཕྲུལ་དཔག་ཏུ་མེད༔ ཞི་དང་ཁྲོ་བོའི་རྣམ་འགྱུར་བསམ་མི་ཁྱབ༔ ལྷག་པའི་ལྷ་མཆོག་རྡོ་རྗེ་གྲོ་བོ་ལོད༔ མ་དད་སེམས་ཅན་ཆེན་པོ་བསྒྲལ་བྱས་ནས༔ ཡེ་ཤེས་བདུད་རྩིར་བསྒྱུར་ཞིང་སྟོབ་ལགས་ན༔ དུས་གསུམ་བདེ་གཤེགས་རྒྱལ་བའི་ཐུགས་དམ་བསྐང་༔ མཱཾ་ས་ཀེང་རུས་ཤ་ཁྲག་
གཏོར་མ་འབུལ༔ དུག་གསུམ་གཏམས་པའི་མཆོད་པས་ཐུགས་དམ་བསྐང་༔ རྨད་དུ་བྱུང་བའི་གཏོར་མས་ཐུགས་དམ་བསྐང་༔ རཀྟ་ཆགས་པ་དམར་གྱིས་ཐུགས་དམ་བསྐང་༔ གཟུགས་དང་གཟུགས་མེད་ཚོགས་ཀྱིས་ཐུགས་དམ་བསྐང་༔ དམ་རྫས་བདུད་རྩི་ཕུད་ཐུགས་དམ་བསྐང་༔ བྱ་ནག་ལུག་ནག་མདངས་ཀྱིས་ཐུགས་དམ་བསྐང་༔ ཐུགས་དམ་བསྐངས་པས་ཐམས་ཅད་ཟློག་སྒྱར་གསོལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ མ་རིག་གཟུང་འཛིན་འཁྲུལ་པའི་སེམས་ཀྱི་རླབས༔ དུག་ལྔ་རང་རྒྱུད་སྨིན་པའི་དགྲ་དང་བགེགས༔ འཇིགས་པ་ཆེན་པོ་བརྒྱད་དང་བཅུ་དྲུག་རྣམས༔ བཟློག་བསྒྱུར་དྲག་པོ་སྔགས་ཀྱི་གཡུལ་ངོ་བཤམས༔ རྒྱབ་རྟེན་དཔུང་དུ་དཀོན་མཆོག་གསུམ་པོ་
བཞེངས༔ དྲང་སྲོང་དམོད་པའི་སྔགས་ཀྱིས་མཚོན་ཆ་གདེངས༔ མ་རུངས་ཞིང་བཅུ་ཚང་བའི་སྡིག་པ་ཅན༔ བསམ་སྦྱོར་ངན་པའི་ཚོགས་ལ་ལིངས་སུ་འདེབས༔ གང་ལ་བྱ་བ་ཐལ་བའི་རྡུལ་དུ་རློག༔ གང་ལ་བྱ་བ་ཐལ་བའི་རྡུལ་དུ་རློག༔ ཉེས་མེད་རྣལ་འབྱོར་བྱང་ཆུབ་བསྒྲུབ་པ་ལ༔ གདུག་པ་ཧོམ་ལ་སྦྱིན་སྲེག་བཏབ་པ་འབྱུང་བའི་དགྲ་གཤེད་ས་ལ་གཤོར་དུ་མནན༔ ཆུ་ལ་གཏད་དང་རླུང་ལ་ཟོར་དུ་བསྐུར༔ སྔགས་ཀྱི་གཤེད་བསྐོར་དབྱེ་བསྐྲད་རིག་སྔགས་སྦྱོར༔ གླང་སྙིང་བྱད་མ་ཀླ་ཀློ་གདུག་པའི་དཔུང་༔ བཟློག་བསྒྱར་དྲག་པོའི་ཕྲིན་ལས་དུས་ལ་བབ༔ སླར་ཡང་རང་གཤེད་རང་གི་བདུད་དུ་ཕོབཿ༔ དུས་མཐའ་བསྟུངས་ཤིང་བརླག་པའི་ཕྲིན་ལས་མཛོད༔ ཨོཾ་བཛྲ་ཤྲཱི་གྲོ་བོ་ལོད་སརྦ་སིདྡྷི་ཧཱུྃ༔ ཨོཾ་ལོཀྟྲི་པཱ་ལ་ནན༔ ས་ག་པཱ་ཤ་ནན༔ ནཱ་ག་དུ་དུ་
ནན༔ མ་མཾ་མ་མེ༔ ཙིར་ཙ་ར་ཙིར་ཙ་ར༔ བཾ་རུ་ལུ་བཾ་རུ་ལུ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར༔ ཙི་དུ་སོད་ཙི་དུ་སོད༔ ཤིག་ལྷུར་གཏུབས༔ ཧ་ལ་པ་ཏི་ནན༔ འཁོར་བ་ཐུལ༔ གནོད་བྱེད་འབྱུང་པོའི་ཀཱ་ཝཱ་ཙི་བརླག་བརླག༔ ཏྲིག་ནན་མྱག་ཐཾ་ཧ་ན་ད་ཧ་པ་ཙ་མུག་མུག་ཐིབ་ཐིབ་ཧེད་ཧེད་བྷྱོཿ་ཟློག་ཕཊ༔ ཧཱུྃ་བྷྱོ༔ ཐུགས་ཀར་ཟླ་གམ་གསང་བའི་དཀྱིལ་འཁོར་ནས༔ གར་གྱི་དབང་ཕྱུག་རྟ་མཆོག་ཧེ་རུ་ཀ༔ པདྨ་གཟི་ལྡན་རྒྱལ་བ་བསྐྱེད་པའི་ཡུམ༔སྲས་དང་སྤྲུལ་པ་བསམ་མི་ཁྱབ་པའི་ཚོགས༔ མ་དད་སེམས་ཅན་ཆེན་པོ་བསྒྲལ་བྱས་ནས༔ ཡེ་ཤེས་བདུད་རྩིར་བསྒྱུར་ཞིང་སྟོབ་ལགས་ན༔ དུས་གསུམ་བདེ་གཤེགས་རྒྱལ་བའི་ཐུགས་དམ་བསྐང་༔ མཱཾ་ས་ཀེང་རུས་ཤ་ཁྲག་གཏོར་
མ་འབུལ༔ དུག་གསུམ་གཏམས་པའི་མཆོད་པས་ཐུགས་དམ་བསྐང་༔ རྨད་དུ་བྱུང་བའི་གཏོར་མས་ཐུགས་དམ་བསྐང་༔ གྱིས་ཐུགས་དམ་བསྐང་༔ གཟུགས་དང་གཟུགས་མེད་ཚོགས་ཀྱིས་ཐུགས་དམ་བསྐང་༔ དམ་རྫས་བདུད་རྩི་ཕུད་ཀྱིས་ཐུགས་དམ་བསྐང་༔ བྱ་ནག་ལུག་ནག་མདངས་ཀྱིས་ཐུགས་དམ་བསྐང་༔ ཐུགས་དམ་བསྐངས་པས་ཐམས་ཅད་ཟློག་སྒྱར་གསོལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ མ་རིག་གཟུང་འཛིན་འཁྲུལ་པའི་སེམས་ཀྱི་རླབས༔ དུག་ལྔ་རང་རྒྱུད་སྨིན་པའི་དགྲ་དང་བགེགས༔ འཇིགས་པ་ཆེན་པོ་བརྒྱད་དང་བཅུ་དྲུག་རྣམས༔ བཟློག་བསྒྱུར་དྲག་པོ་སྔགས་ཀྱི་གཡུལ་ངོ་བཤམས༔ རྒྱབ་བརྟེན་དཔུང་དུ་དཀོན་མཆོག་གསུམ་པོ་བཞེངས༔ དྲང་སྲོང་དམོད་པའི་
སྔགས་ཀྱིས་མཚོན་ཆ་གདེངས༔ མ་རུངས་ཞིང་བཅུ་ཚང་བའི་སྡིག་པ་ཅནཿ བསམ་སྦྱོར་ངན་པའི་ཚོགས་ལ་ལིངས་སུ་འདེབས༔ གང་ལ་བྱ་བ་ཐལ་བའི་རྡུལ་དུ་རློག༔ ཉེས་མེད་རྣལ་འབྱོར་བྱང་ཆུབ་བསྒྲུབ་པ་ལ༔ གདུག་པ་ཧོམ་ལ་སྦྱིན་སྲེག་བཏབ་པ་དང་༔ འབྱུང་བའི་དགྲ་གཤེད་ས་ལ་གཤོར་དུ་མནནཿ༔ ཆུ་ལ་གཏད་དང་རླུང་ལ་ཟོར་དུ་བསྐུརཿ༔ སྔགས་ཀྱི་གཤེད་བསྐོར་དབྱེ་བསྐྲད་རིག་སྔགས་སྦྱོར༔ གླང་སྙིང་བྱད་མ་ཀླ་ཀློ་གདུག་པའི་དཔུང་༔ བཟློག་བསྒྱུར་དྲག་པོའི་ཕྲིན་ལས་དུས་ལ་བབཿ༔ སླར་ཡང་རང་གཤེད་རང་གི་བདུད་དུ་ཕོབཿ༔ མཐའ་བསྟུངས་ཤིང་བརླག་པའི་ཕྲིན་ལས་མཛོད༔ ཨོཾ་བཛྲ་ཤྲཱི་གྲོ་བོ་ལོད་སརྦ་སིདྡྷི་ཧཱུྃ༔ ཨོཾ་ལོཀྟྲི་པཱ་ལ་ནན༔ ས་ག་པཱ་ཤ་ནན༔ ནཱ་ག་དུ་དུ་ནན༔
མ་མཾ་མ་མིི ཙིར་ཙ་ར་ཙིར་ཙ་ར༔ བཾ་རུ་ལུ་བཾ་རུ་ལུ་རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར༔ ཙི་དུ་སོད་ཙི་དུ་སོདཿ༔ ཤིག་ལྷར་གཏུབས༔ ཧ་ལ་པ་ཏི་ནནཿ༔ འཁོར་བ་ཐུལ༔ གནོད་བྱེད་འབྱུང་པོའི་ཀཱ་ཝཱ་ཙི་བརླག་བརླག༔ ཏྲིག་ནནམྱག་ཐཾ་ཧ་ན་ད་ཧ་པ་ཙ་མུག་མུག་ཐིབ་ཐིབ ཧེད་ཧེད་བྷྱོཿ་ཟློག་ཕཊ༔ ཧཱུྃ་བྷྱོ༔ ཆོས་དབྱིངས་ཡེ་ཤེས་རྣམ་སྣང་གངས་ཆེན་མཚོ༔ རྡོ་རྗེ་སློབ་དཔོན་བུདྡྷ་ཐོད་ཕྲེང་རྩལ༔ མེ་ལོང་ཡེ་ཤེས་རྡོ་རྗེ་ཐོད་ཕྲེང་རྩལ༔ མཉམ་ཉིད་ཡེ་ཤེས་རཏྣ་ཐོད་ཕྲེང་རྩལ༔ སོར་རྟོག་ཡེ་ཤེས་པདྨ་ཐོད་ཕྲེང་རྩལ༔ བྱ་གྲུབ་ཡེ་ཤེས་ཀརྨ་ཐོད་ཕྲེང་རྩལ༔ རིགས་བཞིའི་གིང་ཆེན་མཁའ་འགྲོའི་འཁོར་དང་བཅས༔ ཕྲིན་ལས་བཞི་སྒྲུབ་དབང་ཕྱུག་སྒོམའི་ཚོགས༔ མ་དད་སེམས་ཅན་ཆེན་པོ་བསྒྲལ་བྱས་ནས༔
ཡེ་ཤེས་བདུད་རྩིར་བསྒྱུར་ཞིང་སྟོབ་ལགས་ན༔ དུས་གསུམ་བདེ་གཤེགས་རྒྱལ་བའི་ཐུགས་དམ་བསྐང་༔ མཱཾ་ས་ཀེང་རུས་ཤ་ཁྲག་གཏོར་མ་འབུལ༔ དུག་གསུམ་གཏམས་པའི་མཆོད་པས་ཐུགས་དམ་བསྐང་༔ རྨད་དུ་བྱུང་བའི་གཏོར་མས་ཐུགས་དམ་བསྐང་༔ རཀྟ་ཆགས་པ་དམར་གྱིས་ཐུགས་དམ་བསྐང་༔ གཟུགས་དང་གཟུགས་མེད་ཚོགས་ཀྱིས་ཐུགས་དམ་བསྐང་༔ དམ་རྫས་བདུད་རྩི་ཕུད་ཀྱིས་ཐུགས་དམ་བསྐང་༔ བྱ་ནག་ལུག་ནག་མདངས་ཀྱིས་ཐུགས་དམ་བསྐང་༔ ཐུགས་དམ་བསྐངས་པས་ཐམས་ཅད་ཟློག་སྒྱུར་གསོལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ མ་རིག་གཟུང་འཛིན་འཁྲུལ་པའི་སེམས་ཀྱི་རླབས༔ དུག་ལྔ་རང་རྒྱུད་སྨིན་པའི་དགྲ་དང་བགེགས༔ འཇིགས་པ་
ཆེན་པོ་བརྒྱད་དང་བཅུ་དྲུག་རྣམསཿ༔ བཟློག་བསྒྱུར་དྲག་པོ་སྔགས་ཀྱི་གཡུལ་ངོ་བཤམས༔ རྒྱབ་བརྟེན་དཔུང་དུ་དཀོན་མཆོག་གསུམ་པོ་བཞེངས༔ དྲང་སྲོང་དམོད་པའི་སྔགས་ཀྱིས་མཚོན་ཆ་གདེངས༔ མ་རུངས་ཞིང་བཅུ་ཚང་བའི་སྡིག་པ་ཅན༔ བསམ་སྦྱོར་ངན་པའི་ཚོགས་ལ་ལིངས་སུ་འདེབས༔ གང་ལ་བྱ་བ་ཐལ་བའི་རྡུལ་དུ་རློག༔ ཉེས་མེད་རྣལ་འབྱོར་བྱང་ཆུབ་བསྒྲུབ་པ་ལ༔ གདུག་པ་ཧོམ་ལ་སྦྱིན་སྲེག་བཏབ་པ་དང་༔ འབྱུང་བའི་དགྲ་གཤེད་ས་ལ་གཤོར་དུ་མནན༔ ཆུ་ལ་གཏད་དང་རླུང་ལ་ཟོར་དུ་བསྐུར༔ྋ སྔགས་ཀྱི་གཤེད་བསྐོར་དབྱེ་བསྐྲད་རིག་སྔགས་སྦྱོར༔ གླང་སྙིང་བྱད་མ་ཀླ་ཀློ་གདུག་པའི་དཔུང་༔ བཟློག་བསྒྱུར་དྲག་པོའི་ཕྲིན་ལས་དུས་ལ་བབ༔ སླར་ལ་རང་གཤེད་རང་གི་བདུད་དུ་ཕོབ༔ དུས་མཐའ་བསྟུངས་ཤིང་
བརླག་པའི་ཕྲིན་ལས་མཛོད༔ ཨོཾ་བཛྲ་ཤྲཱི་གྲོ་བོ་ལོད་སརྦ་སིདྡྷི་ཧཱུྃ༔ ཨོཾ་ལོཀྵི་པཱ་ལ་ནནཿ༔ ས་ག་པཱ་ཤ་ནན༔ ནཱ་ག་དུ་དུ་ནན༔ མ་མཾ་མ་ཙ༔ ཙིར་ཙ་ར་ཙིར་ཙ་ར༔ བཾ་རུ་ལུ་བཾ་རུ་ལུ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར ཙི་དུ་སོད་ཙི་དུ་སོད༔ ཤིག་ལྷུར་གཏུབས༔ ཧ་ལ་པ་ཏི་ནན༔ འཁོར་བ་ཐུལ༔ གནོད་བྱེད་འབྱུང་པོའི་ཀཱ་ཝཱ་ཙི་བརླག་བརླག༔ ཏྲིག་ནན་མྱག་ཐཾ་ཧ་ན་ད་ཧ་པ་ཙ་མུག་མུག་ཐིབ་ཐིབ་ཧེད་ཧེད་བྷྱོཿ་ཟློག་ཕཊ༔ ཅེས་དང་སྤྲོ་ན་སྐབས་འདིར་ཁྱུང་ཟློག་དང་རྩང་ཟློག་སོགས་ཀྱང་རིགས་མཐུན་ནས་བླང་བའམ་མེད་ཀྱང་ཆད་སྐྱོན་དུ་མི་འགྱུར། ཡང་ཟློག་པའི་མདེ་ཁ་དམིགས་བསལ་སྦྱར་བར་སྤྲོ་ན། ལིང་རོ་གཏོར་ཆུང་ཁྲག་སྐྱེམས་བཅས་འབུལ་ཞིང་། ཐུགས་ལས་ལོཀྟྲི་པཱ་ལ་ཆེ འབུམ་ཕྲག་དམོད་པའི་དྲང་སྲོང་ཚོགས༔
དཔལ་མགོན་བདུན་ཅུའི་ཚོགས་དང་བཅས༔ གློག་ལྟར་འཁྱུག་ཅིང་ཐོག་ལྟར་ཕོབ༔ གདུག་ཅན་ཞིང་བཅུ་ཚང་བ་ཡི༔ བྱད་མ་བརླང་པོར་སྤྱོད་པ་ཡིས༔ སླར་ཡང་ཟློག་པའི་ལས་སྦྱོར་གྱིས༔ རྣལ་འབྱོར་བདག་ཅག་འཁོར་བཅས་ལ༔ ལུས་ཀྱི་ན་ཚ་བྱུང་བ་རྣམས༔ བྱད་མ་མཁན་གྱི་སྟེང་དུ་བྷྱོཿ སེམས་ཀྱི་རྣམ་གཡེང་སྡུག་བསྔལ་ཀུན༔ བྱད་མ་མཁན་གྱི་སྟེང་དུ་ཟློག༔ འཇིགས་པ་བརྒྱད་དང་བཅུ་དྲུག་ཀུན༔ བྱད་མ་མཁན་གྱི་སྟེང་དུ་བྷྱོཿ སྡེ་བརྒྱད་གདུག་པའི་ཆོ་འཕྲུལ་དཔུང་༔ བྱད་མ་མཁན་གྱི་སྟེང་དུ་ཟློག༔ ལྷ་སྲུང་བདུད་དུ་བབ་པ་རྣམས༔ བྱད་མ་མཁན་གྱི་སྟེང་དུ་ཕོབ༔ ཆག་ཆེ་ཉམ་ང་ཐན་ལྟས་ངན༔ བྱད་མ་མཁན་གྱི་སྟེང་དུ་ཟློག༔ མོ་པྲ་རྨི་ལམ་དངོས་ཉམས་འཚུབས༔ བན་བོན་སྔགས་པའི་མཐུ་གཏད་ཀུན༔
བྱད་མ་མཁན་གྱི་སྟེང་དུ་བྷྱོཿ༔ ཧོམ་དང་སྡེབ་གཤོར་པར་བུ་བསྐོར༔ བྱད་མ་མཁན་གྱི་སྟེང་དུ་བྷྱོཿ སྣོད་བཅུད་རྒུད་ཅིང་འཁྲུགས་པའི་ཚོགས༔ བྱད་མ་མཁན་གྱི་སྟེང་དུ་བྷྱོཿ༔ མདོར་ན་འགལ་རྐྱེན་མི་མཐུན་ཀུན༔ བྱད་མ་མཁན་གྱི་སྟེང་དུ་བྷྱོཿ༔ དགྲ་བགེགས་བྱད་མ འཁོར་བཅས་རྣམས༔ བློ་ཟློག་དམོད་པའི་གད་མོས་ཐོབ༔ རྡོ་རྗེ་ལྷུན་པོའི་ཕྱག་རྒྱས་ནོན༔ རིག་སྔགས་རྒྱ་མཚོའི་རྦ་ལ་གཡེངས༔ དྲག་ཤུལ་སྟོབས་རྫོགས་མེ་ཡིས་སྲེགས༔ མི་བཟད་དྲག་སྔགས་རླུང་གིས་གཏོར༔ སྡང་བའི་དགྲ་དང་གནོད་པའི་བགེགས༔ བསམ་ངན་སྦྱོར་རྩུབ་བྱད་མ་རྣམས༔ གཏོར་མ་འདི་དང་མཉམ་དུ་བཞེས༔ དྲག་ཤུལ་ཕྲིན་ལས་ཡོངས་རྫོགས་མཛོད༔ རྩ་སྔགས་དང་ལོཀྟྲིའི་སྔགས་བརྗོད་མཐར་དམོད་ཚིག་ཐལ་རྡེབ་བདེན་
སྟོབས་བརྗོད་པ་བཅས་བྱ། ཐུན་གཏོར་གཏོང་བ་ནི། དམར་གཏོར་ལ་ན་མོ་རྩ་བརྒྱུད་བླ་མ་སོགས་ཀྱིས་དམིགས་བྱ་འགུགས་བསྟིམ་བྱས་ཏེ། རཾ་ཡཾ་ཁཾ་གིས་སྦྱང་། ཨོཾ་ཨཱཿཧཱུྃ གིས་བྱིན་བརླབས་ནས། དམ་ཉམས་དགྲ་བགེགས་བསྒྲལ་བ་ལ་དམ་ཉམས་དགྲ་བགེགས་བསྒྲལ་བ་ལས་བྱུང་བའི་གཏོར་མ་ངོ་བོ་རང་བཞིན་རྣམ་པར་དག་ཅིང་རྨད་དུ་བྱུང་བ་ལས་རྣམ་པ་དགྲ་བོའི་ཤ་ཁྲག་གི་རང་བཞིན་ཡི་དམ་ཞི་ཁྲོའི་ཚོགས་དང་སྲུང་མ་དམ་ཅན་རྒྱ་མཚོའི་དགྱེས་སྐོང་དམ་པར་གྱུར། ཨེ་ཨ་རལླི་ཧྲཧྲི་ཧྲི་ཛཿཛ༔ ཞེས་དང་། ཨོཾ་བཛྲ་ཤྲཱི་གྲོ་བོ་ལོད་ས་པ་རི་ཝཱ་ར་སརྦ་བིགྷན་ཤ་ཏྲཾ་མཧཱ་མཾ་ས་རཀྟ་ཀཻ་ནི་རི་ཏི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི ཞེས་ལན་གསུམ་མམ་བདུན་གྱིས་ཕུལ་མཐར་གཏོར་མའི་ལྷག་མ་དུག་མཚོན་རྡོ་རྗེའི་ཆར་དུ་མོས་ནས། བྷྱོ༔ དོ་ནུབ་དྲག་པོ་སྔགས་ཀྱིས་བྱིན་བརླབས་པ༔ དྲང་སྲོང་དམོད་པའི་དམར་གྱི་གཏོར་མ་འདི༔ གང་ལ་བྱ་བའི་
གཞི་བཅུའི་སྟེང་དུ་འཕེན༔ ཟློག་སྒྱུར་དྲག་པོའི་ཕྲིན་ལས་དུས་ལ་བབ༔ རྩ་སྔགས་དང་ལོཀྟྲིའི་སྔགས་ཤམ་དུ། ཟོར་མཱ་ར་ཡ་ཟར་ཡ ཨེ་ས་བྷྱོཿ་ཟློག་རྦད་ཡ༔ ཞེས་དམོད་ཚིག་ཐལ་རྡེབ་དང་བཅས་གནོད་པའི་ཕྱོགས་སུ་འཕང་བས་དམིགས་བྱ་གནས་ལུས་ལོངས་སྤྱོད་དང་བཅས་པ་རྗེས་མེད་དུ་བརླག་པར་བསམ། ཞག་གྲངས་བྱེད་ན་ཆོས་སྐྱོང་གཏོར་འབུལ་དང་ལས་བྱང་གི་བསྐུལ་ཆད་བརྟན་སོགས་རྗེས་ཆོག་རྣམས་ཕྲིན་ལས་ཀྱི་གཞུང་བཞིན་བྱའོ། གསུམ་པ་རྗེས་མཐའ་སྡུད་རིམ་པ་ལ། སྲུང་བའི་མཐའ་སྡུད་མནན་པ་དང་། བསད་པའི་མཐའ་སྡུད་སྲེག་པ་ནི་དཀྱུས་སུ་མ་བྱུང་ནའང་དགོས་གལ་བྱུང་ན་རྗེ་ཛྙཱ་ནའི་ཡང་གསང་གྲོ་ལོད་སོགས་རིགས་མཐུན་གྱི་མན་ངག་གཞན་ལས་སྦྱར་རུང་བ་ཉིད་དོ། །འདིར་ཉིན་ཐ་མའི་ཚེ་འཕང་བ་ཟོར་གྱི་ལས་ལ་བཞི། ཟོར་བསྒྲུབ་པ། ཟོར་ལམ་ཕྱེ་བ། གཏོར་ཟོར་འཕེན་པ། རྗེས་བསྡུ་བའོ། །དང་པོ་ཟོར་བསྒྲུབ་པ་ནི།
ཟློག་པ་ཚར་བའི་རྗེས་སུ། གཏོར་མའི་ལྷ་ཚོགས་ལ་མཆོད་བསྟོད་བཟོད་གསོལ་བྱས་ཏེ། ཧཱུྃ་ཕཊ་ཛ༔ ཞེས་པ་དང་། སྤྲུལ་གཞི་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཞུགས། སྤྲུལ་པ་དམ་ཚིག་གི་འཁོར་ལོ་འོད་དུ་ཞུ་ནས་རང་ལ་ཐིམ་པར་བསམ། སླར་ཡང་གཏོར་ཆེན་ཟོར་རྫས་དང་བཅས་པ་སྐད་ཅིག་གིས་ཁྲག་འཐུང་རྡོ་རྗེ་གྲོ་ལོད་སྤྲུལ་འཁོར་གིང་ཆེན་སྒོ་སྐྱོང་བཀའ་སྲུང་སྡེ་བརྒྱད་དྲེགས་པའི་དཔུང་ཚོགས་བསམ་གྱིས་མི་ཁྱབ་པ་དང་བཅས་པ་ཐམས་ཅད་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ་ནད་མཚོན་དུག་གི་ཆར་འབེབས་པས་བར་ཆད་རྐྱེན་ངན་ཐམས་ཅད་ཟློག་ཅིང་དགྲ་བགེགས་སྒྲོལ་བའི་ལས་ལ་རྔམ་པར་གྱུར། ཞེས་རྩ་སྔགས་དང་གཟིར་སྔགས་མང་དུ་བཟླས་ལ་ཟོར་ཐུན་རྫས་ཀྱི་ནུས་སྟོབས་བསྐྱེད། ཐུན་གཏོར་གོང་བཞིན་འབུལ་ཞིང་། ཧཱུྃ༔ དགྲ་བགེགས་
གདུག་པ་བདུད་ཀྱི་ཚོགས༔ སྡེ་དཔུང་འཁོར་དང་བཅས་པ་ཡི༔ ཤ་ཁྲག་བདུད་རྩིའི་རྒྱ་མཚོ་འདི༔ ཁྲོ་རྒྱལ་འབར་བའི་ཚོགས་ལ་འབུལ༔ ལས་དང་བག་ཆགས་དག་པ་དང་༔ རང་གཤེད་བསམ་སྦྱོར་ངན་པ་རྣམས༔ ཁོ་རང་ལ་ནི་ཟློག་པ་དང་༔ རང་མཚོན་རང་ལ་ཟུག་པ་དང་༔ རང་ཤ་རང་གིས་ཟ་བར་མཛོདཿ༔ རང་སྡེ་རང་གིས་ཕྱེ་མར་ཐོངས༔ རྡུལ་ཆ་ཙམ་ཡང་མེད་པར་མཛོདཿ༔ ༸ཧཱྃ གཏུམ་ཆེན་འབར་བའི་ཁྲོ་བོའི་རྗེ༔ ཁྲག་འཐུང་རྡོ་རྗེ་གྲོ་བོ་ལོད༔ དབང་ཆེན་པདྨ་རྟ་མགྲིན་རྒྱལ༔ སྤྲུལ་འཁོར་བཀའ་ཉན་ལས་བྱེད་བཅས༔ྋའཇིགས་ཚུལ་དགྲ་བགེགས་གནད་ནས་འགུགས་པ་དང་༔ བདག་སྲུངས་རྐྱེན་ངན་བར་ཆད་ཟློག༔ ཨོཾ་བཛྲ་ཀྲོ་ཏ་རཀྵ་རཀྵ་ཧཱུྃ་ཕཊ༔
ཅེས་ཕྲིན་ལས་བཅོལ། གཉིས་པ་ཟོར་ལམ་བསལ་བ་ནི། ཡང་ཐོག་སོགས་བླ་གབ་མེད་པའི་སར་ཕྱིན་ལ་གསེར་སྐྱེམས་འཐོར་ཞིང་། ཧཱུྃ༔ དབང་པོ་རྡོ་རྗེ་ཅན་ལ་སོགསཿ༔ ཕྱོགས་སྐྱོང་ཆེན་པོ་བཅུ་རྣམས་དང་༔ རྒྱལ་ཆེན་བཞི་སོགས་གདོན་གྱི་བདག༔ རང་རང་འཁོར་དང་བཅས་པ་དང་༔ གནམ་སའི་སྒྲ་ཅན་སའི་ལྷ་མོ༔ དུས་མཚན་ཐུན་ཕྱེད་རཱ་ཧུ་ལ༔ བིཥྛི་དུས་ལ་དབང་བའི་ལྷ རྟག་ཆགས་ཡུལ་ལྷ་གཉན་པོ་རྣམས༔ གསེར་སྐྱེམས་བརྔན་སྦྱིན་འདི་བཞེས་ལ༔ སྒོ་ཕྱེ་འཕྲང་སོལ་ཟོར་ལམ་ཕྱེས༔ སེམས་མེད་འབྱུང་བ་ཆེན་པོ་བཞིའི༔ ཀློང་དུ་དགྲ་བགེགས་དམིགས་བྱས་ནས༔ ཟོར་སྣ་དགྲ་ལ་གཏོད་བྱེད་ན༔ སེམས་ལྡན་ཀོ་ལོང་མི་འཚལ་ཏེ༔ དབུ་ཆུམས་ཞབས་སྡུས་སྐུ་གཟུར་ལ༔ རང་བཞིན་མེད་པའི་དབྱིངས་ལ་བཞུགས༔ དཀར་ཕྱོགས་
སྲུང་མས་གྲོགས་དན་མཛོདཿ སྲིད་པ་ཧོ་ཡི་ཕྱག་རྒྱའི་རྒྱབ་ཡིག་སྒྲོགས། དེ་ནས་ལས་བྱང་གི་བསྐུལ་བ་དང་། ཆོས་སྐྱོང་མ་མགོན་ལྕམ་དྲལ་གྱི་བསྐུལ་དང་། གཟའི་བསྐུལ་བྱང་། ངན་ནེ་མའི་བསྐུལ་རྣམས་ཀྱང་དགོས་གལ་དང་བསྟུན་སྙིང་ཐིག་གི་གཞུང་བཞིན་བྱ། ཆད་མདོ་ཡང་ལས་བྱང་བཞིན་གྱེར་རོ། །གསུམ་པ་གཏོར་ཟོར་འཕེན་པ་ནི། ཕྱར་དར་སོགས་ཀྱིས་སྣ་དྲངས་ཏེ་གཏོར་ཟོར་སོགས་ཁྱེར་ལ་གང་དུ་འཕང་བའི་གནས་གཟའ་རྒོད་རྒྱུ་བའི་ཕྱོགས་སུ་ཟློག་སྔགས་བཟླ་ཞིང་ཕྱིན་ནས། གསེར་སྐྱེམས་ཀྱི་མཆོད་པ་སྔོན་དུ་འགྲོ་བས། བདེན་སྟོབས་བཅས་འགུག་གཞུག་གིས་དགྲ་བགེགས་བཀུག་སྟེ་དམིགས་པའི་ འབེན ་བྱས་ལ། གཏོར་ཆེན་གྱི་ལྷ་དམ་ཚིག་པ་རྣམས་རང་ལ་ཐིམ་པས་གཟི་བྱིན་ནུས་སྟོབས་མཆོག་ཏུ་འབར། གཏོར་མ་ཁྲོ་བོའི་དམག་ཚོགས་དང་ཟོར་རྫས་ནད་མཚོན་སྨྱོ་དུག་གི་ཆར་ཆེན་པོ་དགྲ་བགེགས་ཀྱི་སྟེང་དུ་གློག་
འཁྱུག་པ་ལྟར་སོང་ནས་གནས་ལུས་ལོངས་སྤྱོད་དང་བཅས་པ་རྗེས་ཤུལ་ལྷག་མེད་དུ་བཅོམ་པར་བསམ་ལ། གཏོར་ཆེན་ཐོགས་ཏེ། ཧཱུྃ་ཧཱུྃ༔ ཞི་བ་ཆེན་པོའི་དབྱིངས་ལས་མ་གཡོས་ཀྱང་༔ བདུད་འདུལ་ཡེ་ཤེས་དབང་དྲག་གྲོ་བོ་ལོད༔ དཔལ་གྱི་བཀའ་སྡོད་མཐུ་རྩལ་ག་རུ་ཊ༔ གཙོ་འཁོར་སྤྲལ་པ་བྲན་དང་ཕོ་ཉའི་ཚོགས༔ དེ་རིང་དྲག་པོ་ཟོར་གྱི་ལས་ལ་བཞེངས༔ མི་བཟད་འབར་བ་ཆེན་པོའི་གཟི་བྱིན་སྐྱེད༔ ཟོར་རྫས་ནད་མཚོན་དུག་གི་ཆར་ཆེན་་ པོས༔ རྣལ་འབྱོར་བདག་ཅག་འཁོར་དང་བཅས་པ་ཡི༔ བྱང་ཆུབ་བསྒྲུབ་ལ་བར་དུ་གཅོད་པ་ཡི༔ ནད་གདོན་འགལ་རྐྱེན་ཆག་ཆེ་ཉམ་ང་ཀུན༔ སངས་རྒྱས་བསྟན་པ་བཤིག་པའི་སྤྱི་དགྲ་དང་༔ རྣལ་འབྱོར་ཐད་དུ་ལངས་པའི་སྒོས་ཀྱི་དགྲ༔ གནས་སྐབས་མཐར་ཐུག་གནོད་ཅིང་འཚེ་བའི་
བགེགས༔ བདུད་བཞིའི་དམག་ཚོགས་ཕྱི་ནང་ཉེར་འཚེའི་རྐྱེན༔ བདུད་བཞི་དཔུང་དང་བཅས་པའི་སྟེང་དུ་ཟློག༔ བྱེད་དགྲ་བོ་བྱད་མ་རྩད་ནས་ཆོདཿ༔ གནོད་བྱེད་བགེགས་དཔུང་ཐལ་བའི་རྡུལ་དུ་རློག༔ གནོད་བྱེད་བགེགས་དཔུང་ཐལ་བའི་རྡུལ་དུ་རློག༔ མི་ལྡོག་ཡེ་ཤེས་ཕྱག་རྒྱའི་གཟེར་ཆེན་ཐོབ༔ མངོན་སྤྱོད་དྲག་པོའི་ཕྲིན་ལས་ཡོངས་རྫོགས་མཛོདཿ༔ ཅེས་དང་། གོང་གི་ཐུན་གཏོར་གྱི་ཚིག་བྷྱོ༔ དོ་ནུབ་དྲག་པོ་སོགས་དང་ལོཀྟྲིའི་སྔགས་ཤམ་བཅས་བཟླ། ཚམ་རྔམ་བཅས་གཏོར་རྩེ་དགྲ་ཕྱོགས་སུ་བསྟན་ལ་འཕངས། ཐལ་མོ་དང་དུལ་མོ་བརྡབ། དགོངས་པའི་གདིང་བསྐྱེད། ལྟ་སྟངས་ཀྱིས་གཟིར་བ་སོགས་བྱ། སྤྲོ་ན་འདིར་དམོད་ངན་དུག་གི་མེ་ཏོག་སྒྲོག་ཅིང་བཤུགས་པ་དང་རྐང་གླིང་དྲག་ཏུ་འབུད་ལ་མེ་ཧོམ་སྦར་རོ། །དེ་ནས་ཟོར་རྗེས་གཅོད་པ་ནི། ཡེ་ཤེས་ཀྱི་བྱ་ཁྱུང་འཇིགས་སུ་རུང་བ་ཞིག་གིས་མཚམས་བཅད་པར་བསམ་ལ། ཧཱུྃ་
ཁྲོཾ་བཛྲ་ག་རུ་ཊ་བྷྱོ་བཟློག༔ ཅེས་བརྗོད་ལ་སློབ་དཔོན་གྱིས་རྟིང་མནན་ཏེ་ཚུར་ལོག རྡོ་རྗེའི་གུར་དུ་བདག་གཞན་བསྲུང་བྱ་ཐམས་ཅད་ཚུད་པར་བསམ་ལ་ལས་བྱང་བཞིན་སྲུང་འཁོར་གསལ་གདབ་བོ། །བཞི་པ་རྗེས་བསྡུ་བ་ནི། སྒྲུབ་ཁང་གི་སྒོ་དྲུང་དུ་གཏོར་གཞོང་བཤལ་བའི་ཕུད་ཀྱིས་བརྟན་མའི་གཏོར་མ་བྲན་ལ་བྱིན་གྱིས་བརླབས་ཏེ་ལས་བྱང་བཞིན་འབུལ། གཏོར གཞོང་ཁ་སྦུབས་ལ་བྲོ་ར་བསྐོར་ཏེ། ཨེ་གྲུ་གསུམ་པར་དགྲ་བགེགས་དམ་སྲི་ཐམས་ཅད་བཀུག་པར་བསམ་ཞིང་དགུག་གཞུག་དང་བྲོ་བརྡུང་བྱས་ནས་ནང་དུ་ལོག་སྟེ་ཚེ་འགུགས་བྱ། སྔར་བཏེགས་པའི་ནམ་མཁར་བཞུགས་པའི་ལྷ་རྣམས་ལ་མཆོད་ཅིང་བསྟོད་དེ་དངོས་གྲུབ་བླངས་ནས་རང་ལ་བསྟིམ། ལྷག་ཆད་བསྐང་། དཀྱིལ་འཁོར་བསྡུ། སྨོན་ལམ་ཤིས་བརྗོད་ཀྱིས་མཐའ་བརྒྱན་པར་བྱའོ། །དེ་ལྟར་དབང་དྲག་རྡོ་རྗེ་གྲོ་ལོད་ཀྱི་སྨད་ལས་སྤུ་གྲི་འབར་བ་གློག་གི་འཕྲུལ་འཁོར་ཞེས་བྱ་བ་འདི་ནི། ཨ་བྷི་ཙརྱའི་ཀརྨ་ལ་མངོན་པར་སྤྲོ་བ་མདོ་ཁམས་གོ་འཇོ་བླ་མ་ཕུན་
ཚོགས་བཀྲ་ཤིས་ཀྱིས་ནན་ཏན་ཆེན་པོས་བསྐུལ་བའི་ངོ་དང་། རྗེ་བླ་མའི་དག་སྣང་གྲོ་ལོད་འདི་ལ་ཐུགས་སྲས་ཀྱི་ཐུ་བོ་མཆོག་སྤྲུལ་དཔལ་ཆེན་འདུས་པ་རྩལ་གྱིས་ལྗགས་བསྒྲིགས་སྨད་ལས་རྒྱས་པ་ཞིག་ཁམས་སུ་བཞུགས་ན་ཡང་དུས་ཀྱི་རྩུབ་འགྱུར་མི་བཟད་པའི་འཚུབས་ཀློང་དུ་བག་ལ་ཞ་ནས་ཕྱོགས་འདིར་དཔེ་རྒྱུན་མ་འཕེལ་བར་བརྟེན། དུས་བབ་ཀྱི་ཟབ་ཆོས་ནུབ་པར་ཕངས་དྲག་ནས་དག་སྣང་གཞུང་ཉིད་རྩ་བར་བཟུང་། ཁ་བསྐང་དུ་འོས་པ་འགའ་ཞིག་བཀའ་གཏེར་གྲུབ་པའི་མན་ངག་རིགས་མཐུན་ཚད་མ་ཤ་སྟག་གུང་བསྡེབས་ཏེ་ལག་ཏུ་བླངས་བདེ་བར། ཤར་རྒྱལ་བ་ཀཿཐོག་པའི་བཀའ་འབངས་སུ་གྱུར་པ་གཏེར་སློབ་ཁྲོ་རྒྱལ་རྡོ་རྗེས་བླ་མ་དང་ལྷག་པའི་ལྷ་ལ་གནང་བ་ཞུས་ཏེ། བག་མེད་ཀྱི་ལོ་ནག་པ་ཟླ་བའི་དམར་ཕྱོགས་ཀྱི་།ས་པ་དང་པོ་གཟའ་ཆེན་མིག་དམར་དར་བའི་ཉིན་གནས་མཆོག་རྡོ་རྗེ་བཀོད་པའི་གླིང་དུ་གྲུབ་པར་བགྱིས་པའི་ཡི་གེ་པ་ནི་སྔགས་བན་ཆོས་དབྱིངས་དཔལ་མཆོག་གིས་བགྱིས་པ་སྟེ། འདིས་
ཀྱང་སྙིགས་དུས་དམ་སྲི་རྒྱལ་འགོང་བར་ཆད་བདུད་དཔུང་ཐམས་ཅད་ཚར་བཅད་ནས་གསང་ཆེན་སྔ་འགྱུར་བསྟན་པའི་སྙིང་པོ་མི་ནུབ་ཕྱོགས་བཅུར་རྒྱས་ཤིང་ཡུན་དུ་གནས་པའི་རྒྱུར་གྱུར་ཅིག༔ སརྦ་མངྒ་ལཾ།།
ན་མོ། དཀོན་མཆོག་གསུམ་དང་ཡི་དམ་ལྷ། །རྡོ་རྗེ་གྲོ་ལོད་བདེན་སྟོབས་ཀྱིས། །གནོད་བྱེད་དགྲ་དུར་ཕུང་སྲིའི་རིགས། །ལིངྒ་འདི་ལ་མྱུར་དུ་ཁུག །ཅེས་གྲངས་མང་གསོག །བྱ་བྲལ་བུདྡྷས་སོ།། །།
ཤོག་སྟོང་།