དགའ་ལྡན་ཤར་རྩེ་ཛེ་སྨད་སྤྲུལ་སྐུ་བློ་བཟང་དཔལ་ལྡན་གྱི་སྨྲ་ངན་དུག་གི་ས་བོན་གཞོམ་པའི་འབེལ་གཏམ།
དགའ་ལྡན་ཤར་རྩེ་ཛེ་སྨད་སྤྲུལ་སྐུ་བློ་བཟང་དཔལ་ལྡན་གྱི་སྨྲ་ངན་དུག་གི་ས་བོན་གཞོམ་པའི་འབེལ་གཏམ། ལུངརིགས་རྡོ་རྗེའི་མེ་ཆར་ཞེས་བྱ་བ་བཞུགས་སོ། །
བླ་མ་རྒྱལ་བ་སྲས་དང་སློབ་མར་བཅས་པ་རྣམས་ལ་ཕྱག་འཚལ་ལོ། །མ་དག་འཆལ་གཏམ་ལ་བརྟེན་ནས་ངན་འགྲོའི་གཡང་སར་ཕྱོགས་པ་རྣམས་ཐུགས་རྗེས་བཟུང་དུ་གསོལ། རྒྱལ་ཀུན་སྤྱི་གཟུགས་སྣང་སྲིད་བྲན་དུ་བཀོལ། །ཞིང་ཁམས་རྒྱ་མཚོར་བསྟན་གཉིས་སྒྲོན་མེ་སྦར། །གངས་ཅན་གཙུག་ནོར་གཅིག་པུ་མཚོ་སྐྱེས་རྗེ། ཐུགས་སྲས་རྗེ་འབངས་ལོ་པཎ་ཚོགས་བཅས་རྒྱལ། །མགོན་དེའི་སྒྱུ་འཕྲུལ་རང་གཞན་ལྟ་གྲུབ་གནད། །མ་འདྲེས་འབྱེད་ལ་གཟུངས་སྤོབས་གཏེར་གྲོལ་
བས། །འཇིགས་བྲལ་སེང་གེའི་ང་རོས་ལོག་སྨྲའི་ཁྱུ། །ཕམ་མཛད་ཀུན་མཁྱེན་རོང་ཀློང་ཕྱག་གི་ཡུལ། བསིལ་རིའི་ལྗོངས་སུ་ཐུབ་བསྟན་བཤད་སྒྲུབ་ཀྱི། །ཤིང་རྟས་འདྲེན་པའི་ཐུགས་བསྐྱེད་མཐུ་མངའ་བ། །དུས་གསུམ་རིས་མེད་བཤེས་གཉེན་བྱོན་པ་ཡི། །བཀའ་དྲིན་གཞལ་དུ་མ་མཆིས་བསམ་གྱིན་དད། །དེང་དུས་མོས་དགེ་བསོད་དམན་རྟོག་གེའི་ཡིད། །ང་རྒྱལ་ཁེངས་དྲེགས་ཕྱོགས་ལྷུང་གདོན་གྱིས་བརླམས། །ཕུང་འགོང་སྐྱབས་བཟུང་ཆོས་སྤོང་ལས་ལ་འཇུག །སེར་
གཟུགས་ཡང་བརྙན་མཐོང་བས་མཆི་མ་དཀུ། །ལོག་སྨྲའི་འདོད་གཏམ་དཔྱད་དེ་མ་དགག་ན། །བསྟན་པའི་ནང་དབྱེན་ཚབས་ཆེན་འགྱུར་གྱིས་དོགས། ལུང་རིགས་འཐད་ལྡན་ལ་བརྟེན་བྱི་དོར་འདི། །རྡོ་རྗེའི་མཆེད་ཀྱིས་བསྐུལ་མའང་བྱུང་ནས་བརྩམས། །མཐོང་མ་ཐག་ཏུ་ཁྲོས་འཁྲུགས་མི་བཟད་མེ། །སྦར་ལ་མ་རིངས་དོན་ལ་རྟོག་དཔྱོད་ཆུགས། །བླང་འོས་བྱིས་པའི་ངག་ལ་མཐའ་མི་ཁེགས། །རིས་མེད་མཁྱེན་སྤྱན་ལྡན་རྣམས་གཟིགས་མོར་མཛོད། །དེ་ལ་འདིར་རྒྱལ་བའི་བསྟན་པ་ཐམས་ཅད་འགལ་མེད་དུ་རྟོགས་པའི་ཤེས་རབ་དང་། གཟུ་བོར་གནས་པའི་བློ་གྲོས་མི་ལྡན་ཞིང་། ཕྱོགས་རེའི་ཐོས་པ་ཉི་ཚེ་བས་རྒྱུད་ཁེངས་ཏེ། ཡང་དག་པའི་ཆོས་ཟབ་མོ་དང་། བསྟན་འཛིན་སྐྱེས་ཆེན་ཚད་མར་གྱུར་པ་མང་པོ་ལ་སྒྲོ་སྐུར་བཏབ་སྟེ་རང་དང་གཞན་དག་དམྱལ་བར་འགྲོ་
བའི་རྒྱུ་འབད་པས་བསྒྲུབ་པའི་ཤེས་རློམ་མངོན་པའི་ང་རྒྱལ་ཅན། དགའ་ལྡན་ཤར་རྩེ་ཛེ་སྨད་སྤྲུལ་སྐུ་བློ་བཟང་དཔལ་ལྡན་གྱིས་སྔོན་ཆད་རབ་ཚེས་ལྕགས་ཁྱི་ལོར་རྒྱལ་ཆེན་ཤུགས་ལྡན་གྱི་བྱུང་བ་བརྗོད་པ་ཕ་རྒོད་བླ་མའི་ཞལ་གྱི་བདུད་རྩི་ཞེས་པ་ཤོག་ལྡེབ་སུམ་ཅུ་སོ་བརྒྱད་ཡོད་པའི་དེབ་ཅིག་བཟོས་ནས་སྐྱབས་བཅོལ་བོད་མིའི་གཞིས་སྒར་དང་། སློབ་གྲྭ་ཁག་སོ་སོར་ཁྱབ་སྤེལ་བྱས་ཏེ་རིང་པོར་མ་ལོན་པར་དགག་ལན་བྱུང་བ་ནི། ས་པཎ་གྱིས། ཕ་རོལ་གནད་དུ་འབེབས་པའི་ཚིག །དགྲ་བོ་ལ་ཡང་སྨྲ་མི་བྱ། །བྲག་ཆ་བཞིན་དུ་རང་ཉིད་ལ། །དེ་མ་ཐག་ཏུ་ལེ་ལན་འབྱུང་། །ཞེས་གསུངས་པ་ལྟར་ངོར་རྗེ་བཙུན་ཨེ་ཝཾ་པའི་རིང་ལུགས་འཛིན་པ་ཏྲེ་ཧོར་གདོང་ཐོག་སྤྲུལ་སྐུ་ངག་དབང་ཐེག་མཆོག་བསྟན་པའི་རྒྱལ་མཚན་གྱིས་དགག་ལན་མ་བཅོས་
དངོས་འབྲེལ་བརྗོད་པ་དུས་ཀྱི་སྦྲང་ཆར་ཞེས་པ་ཤོག་ལྡེབ་བརྒྱད་ཅུར་ལོངས་པ་འདི་ཆེད་གཏད་བརྩམས་ཏེ། ད་བར་དཔར་ཐེངས་སྔ་ཕྱི་བར་གསུམ་བརྒྱབས་ནས་ཕྱི་ནང་མི་རིགས་ཡོངས་ཀྱི་མདུན་སར་ཁྱབ་གདལ་དུ་བཀྲམས་པའི་ནང་ཛེ་སྨད་སྤྲུལ་སྐུར་འགལ་བའི་ཁུར་ཆེན་བཅོ་བརྒྱད་བསྐུར་ཏེ་ད་བར་ལན་མེད་མི་སྨྲའི་བརྟུལ་ཞུགས་ལ་ཡང་དག་པར་བཀོད་པའི་ཚུལ་འདི། དེང་སང་སྐྱེ་བོའི་ཇ་གྲལ་ཡན་ཆད་དུ་ཀུན་གྱིས་གླེང་མོ་བྱེད་རྟེན་ཞིག་ཏུ་གྱུར་པ། དེ་ལྟ་ནའང་ཛེ་སྨད་ཀྱི་དཔེ་དེབ་དེའི་ཐོག་མཐའ་བར་གསུམ་གྱི་དོན་ལ་ཞིབ་ཏུ་གཞིགས་ན། ཆེན་པོ་འགའི་ཐུགས་ལ་གདོན་གསོལ་དུ་འཇུག་པ་དང་། ཞྭ་སེར་རིང་ལུགས་འཛིན་པའི་བསྟན་འཛིན་དགེ་འདུན་ཡོན་བདག་དང་བཅས་པས་ཕུང་འགོང་སྐྱབས་སུ་བསྟེན་ནས་སྐྱབས་སྡོམ་འཇིག་པའི་རྒྱུ་བྱེད་པ་དང་། རྙིང་མ་བའི་བསྟན་
པ་དེ་འཛིན་དང་བཅས་པ་ཤཱཀྱ་ཐུབ་པའི་མདོ་སྔགས་ཀྱི་བསྟན་པ་ལས་ཕྱི་རོལ་དུ་འཕུལ་ཏེ་ལོག་ལྟ་དང་ཆོས་སྤོང་གི་ལས་མི་བཟད་པ་ལ་རང་གཞན་ཚང་མ་སྦྱར་བ་དང་། དེ་ཙམ་དུ་མ་ཟད་ད་ལྟ་དང་མ་འོངས་པའི་གང་ཟག་རྣམས་ཕྱོགས་རིས་ཆགས་སྡང་། དབྱེན་སྦྱོར་འཐབ་བཀྲོལ་ཕུང་དཀྲུགས་རྩོད་པ་འགྱེད་པའི་བསྐུལ་བསླང་བྱེད་པ་སོགས་ལ་ཆེད་དུ་དམིགས་པའི་ཀུན་སློང་ངན་གཡོ་སྡང་ཞེན་དུག་གི་ས་བོན་ལྟ་བུ་ལ་གཞི་བྱས་པའི་རྗོད་བྱེད་ཕལ་ཆེར། མི་ནག་སྐྱེ་བོ་ཆོས་ཀྱི་གནད་མི་ཤེས་པའི་བླུན་པོ་དུ་མས་བབ་ཅོལ་སྤྱི་བརྟོལ་དུ་སྨྲས་པའི་ལོག་ལྟ་སྐུར་འདེབས་ཀྱི་ངག་སྒྲོས་ཁུངས་མ་དག་པ་འབའ་ཞིག་ཕྱོགས་གཅིག་ཏུ་བསྒྲིགས་པ་མ་གཏོགས། ནང་བསྟན་ལ་སྨན་པ་དང་། འགྲོ་བའི་ཁམས་ལ་འདི་དང་ཕྱི་མར་ཕན་པ་དང་བདེ་བའི་སྒོར་
འགྱུར་བའི་བསྟན་བཅོས་བཟང་པོའི་མཚན་ཉིད་སྣ་གཅིག་ཀྱང་མ་མཆིས་པས་འདི་དགག་པ་ལ་བཞི་སྟེ། དགག་ལན་འབྲི་དགོས་པའི་རྒྱུ་མཚན་བརྗོད་པ། གླེང་གཞི་ཤུགས་ལྡན་གྱི་ཡུལ་སུན་དབྱུང་བ། ཕྱོགས་སྔའི་འཆལ་གཏམ་གྱི་ཚིག་དོན་ནོར་བའི་སྐྱོན་མཚང་རེ་རེ་ནས་སྨོས་པ། ཉེས་སྡིག་ཚབས་ཆེན་སྤོང་བའི་གཞེན་བསྐུལ་གྱིས་མཇུག་བསྡུ་བའོ། །
དགག་ལན་འབྲི་དགོས་པའི་རྒྱུ་མཚན་བརྗོད་པ།
དང་པོ་དགོས་དོན་ཅུང་ཟད་འཆད་ན། སྤྱིར་བླུན་རྟུལ་ཆོས་མེད་སྤྲང་རྒན་བདག་ལྟ་བུ་སྐྱེ་བས་ཐོབ་པ་དང་ཚེ་འདི་ཉིད་ཀྱི་དབང་དུ་བྱས་ན་ཡང་ཐོས་བསམ་སྒོམ་པའི་ཤེས་རབ་གསུམ་གྱི་འདྲེན་བྱེད་མ་རིག་པའི་ལིང་ཏོག་གིས་བསྒྲིབས་བཞིན་ཆོས་གཏམ་ཤོད་པའི་གྲལ་དུ་འཚང་བ་ལས་ཁ་རོག་བསྡད་པ་བསྟན་པ་དང་རང་ལ་གནོད་པ་ཆུང་བར་ཤེས་ན་ཡང་། ལེགས་པར་བསམ་ན་འདི་ལྟར། ཐོས་པས་རྒྱུད་དུལ་ཞིང་། གྲུབ་
མཐའ་ཕྱོགས་མེད་ལ་དག་སྣང་གིས་ཁྱབ་པའི་གང་ཟག་བསགས་པ་ཅན་གཟུ་བོར་གནས་པ་རྣམས་ནི། འདི་འདྲའི་འཁྱོག་གཏམ་གྱི་བསླུ་བྲིད་མཐོང་ན། དེ་སྙིང་རྗེའི་ཡུལ་དུ་བལྟས་ཏེ་དེ་ལས་ལྡོག་པར་བསྐུལ་བ་ལས། དེ་ལ་ངོ་མཚར་དང་བདེན་པར་ག་ལ་འཛིན། དེ་ལྟར་མིན་པར་དགེ་བའི་བཤེས་གཉེན་ཡང་དག་གིས་མ་ཟིན་ཅིང་། བླུན་པོ་གྲགས་རྗེས་སུ་འབྲང་བ། བློ་གཟུ་བོར་མི་གནས་པ། ཆོས་རྒྱུས་ཆུང་བ། བློ་གྲོས་བདུད་སྡེས་བཅོམ་པ་ཁ་ཅིག་རི་དྭགས་སྨིག་རྒྱུའི་ཆུ་ལ་སྲེད་པ་ལྟར། དགེ་ལུགས་པའི་མིང་ཐོགས་ཚད་ལྟ་གྲུབ་སྤྱོད་པ་ལ་ནོར་འཁྲུལ་དྲི་མས་མ་གོས་པ་ཤ་སྟག་ཡིན་ཁྱབ་མཉམ་དང་། རྙིང་མ་བའི་ཆོས་དང་གང་ཟག་གཉིས་ཀ་དག་པ་དང་མ་དག་པའི་ཁྱད་ཙམ་ཡང་མ་ཕྱེས་པར། རྙིང་མ་ཟེར་ཚད་མ་དག་པ་དང་ལོག་པའི་
ཕྱོགས་སུ་རང་ཡང་འཛིན། གཞན་ལའང་དེ་ལྟར་འདོམས་པ་ནི་ནོར་ཚབས་ཆེ་བ་ཡིན་པ་འདི་ཀུན་གྱིས་ཤེས་དགོས་པར་སྣང་། ཕྱོགས་ལྷུང་གི་གཏམ་འཆལ་ཆོས་དང་རྒྱབ་འགལ་ཐ་ཆད་འདི་འདྲ་བ་ལ་མགོ་བོ་མགལ་མེ་ལྟར་འཁོར་ནས། ལོག་ལྟ་དང་ཆོས་སྤོང་གི་ལས་ངན་དམྱལ་བའི་རྒྱུ་འབད་པས་སྒྲུབ་པའི་སྐྱེ་བོ་མང་པོ་ཞིག །བོད་ལྗོངས་སུ་སྔོན་ཆད་ཀྱང་བྱུང་བ་དང་། ད་ལྟའང་ཡོད་མུས་ལ། མ་འོངས་པ་ན་ཡང་དེ་འདྲ་འོང་ཉེན་ཆེ་ཞིང་། དེ་དག་སྐྱབས་གནས་ལོག་པ་དང་། རྒྱུད་ལོག་ལྟས་བསླད་ནས། རང་ཅག་ནང་པ་སངས་རྒྱས་པ་རྣམས་ཀྱི་བསྟན་པ་སྤྱི་ཡི་འཇུག་སྒོ་གསུམ་ལ་སྐྱབས་སུ་འགྲོ་བའི་དགག་སྒྲུབ་ཀྱི་བསླབ་བྱ་དང་དངོས་སུ་འགལ་བའི་ཁར། ཆོས་ལུགས་ཁག་ཕན་ཚུན་གཅིག་གིས་གཅིག་ལ་བྱ་རོག་དང་འུག་པའི་བརྟུལ་ཞུགས་འཛིན་པ་དང་། དེ་
ལ་བརྟེན་ནས་འཇིག་རྟེན་སྐྱེ་བོ་ཕལ་པ་རྣམས་ཀྱང་། རྒྱུ་མཚན་ཅི་ཡང་མི་ཤེས་ན་ཡང་། བླ་སྤྲུལ་དང་དགེ་བཤེས་ག་གེ་མོས་འདི དང་འདི་འདྲ་གསུངས་པ་རེད་ཟེར་ནས། ཕྱོགས་འཛིན་ཅན་གྱི་རྗེས་སུ་གཡོམ་རྒྱུག་བྱེད་ཅིང་རྨོངས་ཞེན་ཁ་འཛིན་སུ་བས་ཀྱང་ཐུ་བ་མང་པོ་ད་ལྟ་མངོན་སུམ་མཐོང་ཆོས་སུ་གྱུར་པ་འདི་དག་གི་རྩ་བ་དགེ་རྙིང་སུ་ལ་ཐུག་བསམ་མནོ་ལེགས་པར་བཏང་ན་གོ་ལས་ཆེ། དེས་ན་ལས་ངན་ཚབས་ཆེན་གསོག་པ་པོ་རང་ ི ཉིད་ཕུང་ལ་སྦྱོར་བ་དང་། དེ་འདྲའི་ཁ་ལ་ཉན་པའི་མི་བསོད་དམན་མང་པོ་ངན་འགྲོར་འཁྲིད་པར་མ་ཟད། དེ་འདྲ་བྱེད་པའི་ཡུལ་ཕྱོགས་སུའང་། མཐོང་ཆོས་སུ་སྣོད་བཅུད་ལ་སད་སེར་རླུང་འཚུབས། ནད་ཡམས་མུ་གེ་གོད་ཁ་ནང་འཁྲུགས་ཁ་མཆུ། འཐབ་རྩོད། འབྱུང་བཞིའི་གནོད་པ། དམག་འཁྲུག་ཐན་
ལྟས་ངན་དགུ་སྡུག་བཅུ་རྐྱེན་བགེགས་བར་ཆད་ཐམས་ཅད་མི་འདོད་བཞིན་དུ་འབྱུང་བ་ཆོས་ཉིད་ཡིན་པས། རང་རེ་སྟོན་པ་གཅིག་གི་རྗེས་འཇུག་རྣམ་གྲོལ་དོན་དུ་གཉེར་བའི་ཆོས་ཀྱི་མཆེད་རྣམས་བཀའ་མདོ་རྒྱུད་ནས་གསུངས་ཚད་ཀྱི་ཆོས་རྣམས་ལ་ཉམས་ལེན་ལག་ལེན་དུ་མ་ཐེབས་ཀྱང་ཆོས་སྤོང་གི་ལས་ངན་མ་བསགས་ཙམ་རེ་སྙིགས་དུས་ཀྱི་སྐབས་འདིར་ཤིན་ཏུ་ནས་ཀྱང་གལ་ཆེ་བ་ཡིན་ཏེ། རྒྱལ་བས་ལུང་ཟིན་འཇམ་མགོན་བློ་གྲོས་མཐའ་ཡས་ཀྱིས། ཕྱོགས་འཛིན་དམ་པའི་ཆེ་རྒུ་ཕལ་མོ་ཆེ། །རྒྱལ་བའི་བཀའ་དང་འཇིག་རྟེན་ཕྱི་མ་ལ། །ཡིད་མི་ཆེས་པས་རང་དང་རང་ཉིད་ལ། །འབྲེལ་པ་ཟབ་ཚད་ངན་འགྲོའི་ཕྱོགས་སུ་འཕུལ། །ཁྱིམ་པ་རྣམས་ལ་བསྟན་པའི་གཉེར་མེད་ཀྱང་། །བསོད་ནམས་ཟད་པས་ཕྱོགས་རིས་ཁ་འཛིན་བྱེད། །རིམ་གྱིས་ཚབས་ཆེ་སྡེ་འཁྲུགས་
ཕུང་ལ་སྦྱོར། །དེ་འདྲའི་ཕྱོགས་དེར་ཕྱི་མ་ལྟ་ཅི་སྨྲོས། །མཐོང་ཆོས་ལའང་བཀྲ་མི་ཤིས་ཀུན་འབྱུང་། །དེས་ན་རང་འདྲའི་ཉམས་ཆུང་གང་ཟག་རྣམས། །ཆོས་ནས་བཤད་ཚོད་ཉམས་ལེན་ཐེབས་དཀའ་ཡང་། །ཆོས་སྤངས་ལས་མ་བསགས་པ་ཙམ་བྱུང་ན། །སྙིགས་མའི་སྐྱེ་བོ་རྣམས་ལ་དེ་གལ་ཆེ། །ཞེས་དང་། ཡང་། ཁོང་ཆེན་པོ་ལ་ལ་ཕྱོགས་རིས་ཆེ། །རྗེས་འཇུག་ལ་ཆོས་སྤོང་གི་ཕ་ཕོགས་གནང་། །མཐོང་ཐོས་ཀྱི་སྣང་བ་དགྲ་རུ་བསླངས། །ཞེས་གསུངས་པ་འདི་གདམས་ངག་མཚང་རྒོལ་དུ་འདུག །ཕན་བདེ་འབྱུང་བའི་གནས་གཅིག་པུ། རྒྱལ་བའི་ལུང་རྟོགས་ཀྱི་བསྟན་༈པ་རིན་པོ་ཆེའི་ལྷག་ཞབས་ཅུང་ཟད་ཅིག་མཆིས་པ་འདི་མྱུར་དུ་འཇིག་པའི་རྒྱུ་ཡང་། དགེ་འདུན་གྱི་སྡེ་རྣམས་ཕྱོགས་ཕན་ཚུན་ཆགས་སྡང་དང་། གྲུབ་མཐའ་
ང་བཟང་ཁོ་བཟང་རྩོད་པ་ལས། ཆོས་དང་མཐུན་པའི་གང་ཟག་ཚུལ་ལྡན་ཉིན་སྐར་ལྟར་གྱུར་པའི་དབང་གིས། དམ་པའི་ཆོས་ཀྱི་གཟི་བྱིན་ཉམས་པས་ཐུགས་ཕྱུངས་ཏེ་སངས་རྒྱས་མཐོང་བའི་ཆོས་སྐྱོང་སྲུང་མ་རྣམས་དག་པའི་ཞིང་དང་རི་རབ་ལ་ཞལ་གཟིགས། འདོད་ཁམས་ན་དབང་ཆེ་བ་བདུད་དགའ་རབ་དབང་ཕྱུག་སྡེ་རིས་དང་བཅས་པ། དེ་དག་གི་ཆར་གཏོགས་ནག་པོའི་རྩ་ལག་འདྲེ་རྒོད་འབྱུང་པོ་གློ་བུར་དུ་ལྷགས་པ་མང་པོ་ཁ་དར་ཞིང་། ཆེ་རྒུ་དུ་མའི་སྙིང་ལ་བདུད་སྡེའི་ཕྲུ་མ་བཏབ་ནས། མཛད་སྤྱོད་ལོག་ལམ་དུ་བསྒྱུར་བ་དང་ཆབས་ཅིག །འཇིག་རྟེན་གྱི་ཁམས་སུ་གོང་དུ་བཤད་པ་ལྟར་བཀྲ་མི་ཤིས་པའི་བྱུར་དང་ལྟས་ངན་ཐམས་ཅད་ཆར་དུས་ཀྱི་ཆུ་བོ་བཞིན་རྒྱས་པ་འདི་ལྟ་བུ་བྱུང་བར་གདོན་མི་ཟ་སྟེ། དེ་ཡང་མདོ་སྡེ་གདམས་ངག་འབོགས་པའི་རྒྱལ་པོ་ཞེས་
བྱ་བའི་ལེའུ་ཉེར་གསུམ་པ་ལས། འཇིག་པའི་རྒྱུ་ནི་འདི་ལྟ་སྟེ། །དགེ་འདུན་དབྱེན་དང་སྡེ་འཁྲུགས་དང་། །གྲུབ་མཐའ་འཁྲུགས་དང་ལྷ་སྲིན་འཁྲུགས། །དེས་ནི་བསྟན་པ་འཇིག་པར་འགྱུར། །ཞེས་བསྟན་པ་འཇིག་པའི་རྒྱུ་རྐྱེན་གསལ་བར་སྟོན་པ་རང་ཉིད་ཀྱིས་ལུང་བསྟན་པ་ལྟར། ཨོ་རྒྱན་དུས་གསུམ་མཁྱེན་པས་ཀྱང་ཕྱི་རབས་ཀྱི་བོད་འབངས་རྣམས་ལ་ཞལ་ཆེམས་སུ་བསྩལ་བ། རཏྣ་གླིང་པའི་གཏེར་བྱོན་གུ་རུའི་རྣམ་ཐར་ཞལ་- ཆེམས་གསེར་ཕྲེང་ལས། བོད་ཀྱི་མདོ་སྔགས་བསྟན་འཛིན་རྣམས༔ གཅིག་གིས་གཅིག་ལ་མ་སྨོད་པར༔ རང་རང་ཆོས་ལུགས་གཞུང་བཞིན་སྤྱོད༔ རང་དོན་སྒྲུབས་ལ་གཞན་དོན་འབད༔ ཀུན་གྱིས་བསྟན་པ་གྲུ་བཞིར་ཁུར༔ ཞེས་གསུངས་སོ། །སྤྱིར་གསར་རྙིང་སུ་ཡིན་ཀྱང་འདྲ། ཐོས་བསམ་ཕྱོགས་
རེར་མ་སོང་བར། ཐུགས་གཟུ་བོར་གནས་པ་ཞིག་ཡིན་ཕྱིན་ཐམས་ཅད་དགོངས་པའི་ཞེ་ཕུགས་གཏད་ཕྱོགས་གཅིག་མཐུན་ལས་སོ་སོ་བ་མེད་པར། རང་ལུགས་གཙོ་བོར་མཛད་ཅིང་། གཞན་ཐམས་ཅད་ལ་དག་སྣང་སྦྱངས་པ་ཁོ་ན་མ་གཏོགས། དེང་སང་གི་མཁས་རློམ་ཕྱོགས་ལྷུང་ཕྲག་དོག་གི་གདོན་ཆེན་སྙིང་ལ་ཉལ་བ་ཁ་ཅིག་ལྟར། རང་ལུགས་ཉམས་ལེན་རྒྱབ་ཏུ་བོར་ཏེ། གཞན་ལ་གཤེ་སྨོད་ཅི་ཐུབ་གང་ཐུབ་ལྷུར་བླངས་ནས་ཆོས་སྤོང་གི་ལས་ལ་གད་མཆོང་གཡང་མཆོང་བྱེད་མཁན་དེ་འདྲ་མིན་པ་ཤིན་ཏུ་གསལ་ཏེ། དགེ་ལུགས་པའི་བསྟན་འཛིན་རྒྱུ་སྐར་ལྟ་བུའི་ནང་ན་ཉི་ཟླ་ལྟར་མངོན་པར་འཕགས་པའི་ཚད་མའི་སྐྱེས་བུ་དམ་པ་པཎ་ཆེན་བློ་བཟང་ཆོས་རྒྱན་གྱིས། བོད་གངས་ཅན་གྱི་བསྟན་འཛིན་མཐའ་དག་ལ། །སེམས་ཁོངས་ནས་དག་པའི་སྣང་བ་སྦྱངས། །རྒྱུད་
ཆོས་སྤོང་ལོག་ལྟས་མ་སྦགས་ཙམ། །འདི་བསྟན་པ་འགལ་མེད་རྟོགས་པའི་དྲིན། །ཞེས་དང་། ཡང་། མདོར་ན་ཁོ་བོ་རང་གི ཡོན་ཏན་དུ་བྱས་པ་ལའང་། གྲུབ་མཐའ་གང་ལའང་ཆགས་སྡང་གི་ཀུན་ནས་བསླངས་པའི་ཕྱོགས་འཛིན་གཏན་ནས་མེད་པའི་མཐུས། བདག་ལ་མངོན་པར་དགྱེས་པའི་ཆོས་ཀྱི་བདུད་རྩི་ཡང་དག་པར་བཞེས་པ། གྲུབ་མཐའ་སྣ་ཚོགས་པའི་བསྟན་འཛིན་གྱི་སྐྱེས་བུ་ཆེ་ཕྲ་དུ་མས་ནི་བོད་དབུས་གཙང་གི་ཕྱོགས་མཚམས་ཀུན་ཏུ་ཁྱབ། ཅེས་པའི་གསུངས་འདི་གཅིག་པུས་ཀྱང་རྗེ་ཙོང་ཁ་པའི་བསྟན་བཅོས་བྱང་ཆུབ་ལམ་རིམ་ཆེན་མོའི་ཆེ་བ་བཞི་བཤད་པ་དེ་དཔེ་ཐོག་ཏུ་མ་ལུས་པར་ཐུགས་རྒྱུད་དང་འདྲེས་པར་མཛད་པའི་རྣམ་ཐར་ངོ་མཚར་ཅན་འདི་འདྲ་ལ་ཐུགས་རྩེ་གཏོད་མཁན་གྱི་དགེ་ལྡན་པ་དེང་སང་སུ་མཆིས་གཟིགས།
དེ་བཞིན་དུ་རིས་མེད་ཀྱི་མཁས་གྲུབ་ཆེན་པོ་ཀོང་སྤྲུལ་ཡོན་ཏན་རྒྱ་མཚོས། ཐུབ་བསྟན་རིས་སུ་མ་ཆད་པའི་བསྟན་དང་བསྟན་འཛིན་ཐམས་ཅད་ལ་དད་པའི པདྨོ་ཕྱོགས་མེད་དུ་གྲོལ། ཆོས་རྒྱུས་ཀྱང་ཇེ་དྲག་ཏུ་སོང་། ཆོས་སྤོང་ལས་ཚབས་པོ་ཆེ་མ་བསགས་པ་འདི་རྗེ་བླ་མ་རིན་པོ་ཆེ་འདི་ཉིད་ཀྱི་བཀའ་དྲིན་ལས་བྱུང་བ་ཡིན་ནོ། །ཞེས་གསུངས་པ་དང་། ཕྱི་དུས་ཀྱི་མཁས་པའི་དབང་པོ་འཇམ་པའི་དབྱངས་དངོས་མི་ཕམ་ཕྱོགས་ལས་རྣམ་རྒྱལ་གྱིས། ཨེ་མ་བོད་ཡུལ་ཆོས་ལུགས་རྣམ་པ་བཞི། །དོན་གྱི་ཁུངས་གཅིག་མོས་སྣང་སོ་སོར་ཤར། །སུ་ལ་ཞུགས་ཀྱང་ཚུལ་བཞིན་ཉམས་བླངས་ན། །མཁས་དང་གྲུབ་པའི་ཡོན་ཏན་འབྱུང་བའི་ཕྱིར། །ཕ་གཅིག་མ་གཅིག་བུ་ཚ་ཇི་བཞིན་དུ། །ཕན་ཚུན་ཐུགས་མཐུན་མོས་གུས་དག་སྣང་སྒོམས། །རང་ལུགས་གཙོར་བཟུང་གཞན་ལ་གཤེ་བ་
སྤོངས། །དེ་ལྟར་མཛད་ན་བསྟན་ཞབས་འདིར་ཡང་ལེགས། །ཞེས་གསུངས་པ་ཐུགས་མད། དེ་བས་ན་ད་ལྟའི་སྐྱེ་བོ་རྣམས། བདེན་པ་དང་། དྲང་གཏམ། ཕན་པའི་ཚིག་སྨྲས་ན་ནི། ཕྱིན་ཅི་ལོག་ཏུ་གོ་ཞིང་། ཐེ་ཚོམ་དང་ལོག་པར་ལྟ་བ་འཕེལ་བའི་རྐྱེན་དུ་གྱུར་པ། ཧམ་རྫུན་དང་། གཡོ་སྒྱུ་གྱ་གྱུའི་ངག །དངོས་དང་བརྒྱུད་ནས་ཕན་པ་མེད་ཅིང་གནོད་པའི་རང་བཞིན་ཅན་སྨྲ་བ་ལ་ནི་ཁྭ་ཏ་མི་གཙང་བ་ལ་དགའ་བ་བཞིན་ཐེ་མི་ཚོམ་པར་་འཇུག་པ་འདི་ལྟ་བུའི་སྐབས་སུ་སྨྲ་བ་མང་ན་དགྲ་སོགས་སྡང་བ་ལས་གཞན་མ་མཆིས་ཀྱང་། བུ་སྟོན་གྱིས། མང་དུ་སྨྲས་ན་དགྲ་སོགས་སྡང་། །མ་སྨྲས་ལག་ལེན་འཆོལ་བར་སྤྱོད། །ཅེས་དང་། རྗེ་ཙོང་ཁ་པས། ཡིན་ཚུལ་བཤད་ན་མཁས་འདོད་ཅན་དུ་མཐོང་། །ལོག་པར་བསྟན་ན་ལྟ་ངན་ཕྱི་ཕྱིར་འཕེལ། །
མི་སྨྲའི་བརྟུལ་ཞུགས་བཟུང་ན་དོན་མི་འགྲུབ། །ཅེས་གསུངས་པའི་རྒྱུ་མཚན་ལ་བསམ་ནས། རིས་མེད་དགེ་བའི་བཤེགས་གཉེན་སྔོན་བྱོན་དམ་པའི་སྐྱེས་ཆེན་ཚད་ལྡན་རྣམས་ཀྱི་དགོངས་སྤྱོད་རྨད་དུ་བྱུང་བ་དང་ཆེས་ཡོངས་སུ་འགལ་བའི་སྨྲ་བ་ངན་པ་ཐོས་པ་ཙམ་གྱིས་རྣ་བ་དགབ་འོས་པ་མ་རབས་ངོ་ཚ་དང་བྲལ་བའི་ལོརྒྱུས་ཀྱི་སྐྱོན་མཚང་རྣམས་ཐེར་འདོན་མ་བྱས་ན། ངན་པ་ཁ་རྒྱལ་དུ་གྱུར་ཏེ། བློ་དམན་སེར་སྐྱ་མང་པོ་མ་དག་པའི་ཟེར་སྒྲོས་ངན་པའི་རྗེས་སུ་རི་བོང་གི་ཅལ་ལྟར་རྒྱུག་ནས། འབྲས་བུ་དམྱལ་བ་ཡིད་དུ་མི་འོང་བའི་གནས་སུ་འཕྱན་པ་དེ་རྣམས་ལོག་ལྟ་དང་ཆོས་སྤོང་གི་ལས་ཚབས་པོ་ཆེ་བསགས་པའི་སྡིག་རྒྱུན་ལས་ལྡོག་སྟེ། ཆོས་སྣང་བའི་སྒོ་དད་པ་དག་སྣང་གིས་གཞི་བཟུང་སྟེ། ཐུབ་པའི་རྗེས་འཇུག་ཐམས་ཅད་ཕན་ཚུན་འཁོན་འཛིན་ཕྲག་དོག་རིང་དུ་
སྤངས་ནས། ཕ་མ་གཅིག་ལས་ཆད་པའི་བུ་ཚ་བཞིན་དུ་ཐུགས་མཐུན་དམ་གཙང་གི་སྒོ་ནས་བསྟན་པ་ཐམས་ཅད་ཚ་གྲང་བཞིན དུ་འགལ་བར་མི་བལྟ་བར། གཞུང་ལུགས་གདམས་པར་འཁྱེར་ཤེས་པའི་སྒོ་ནས་བསྟན་པའི་ལྷག་ཞབས་མར་མེ་འཆི་ཁ་མའི་འོད་ཙམ་གནས་པ་འདི་མྱུར་དུ་ནུབ་པར་མི་འགྱུར་བའི་མཐུ་བྱིན་གྱིས་འཇིག་རྟེན་གྱི་ཁམས་སུ་བདེ་ལེགས་ཕུན་སུམ་ཚོགས་པ་འབྱུང་བའི་ཆེད་དུ་ཡང་དག་པར་དམིགས་ནས། ཡིན་མིན་བདེན་རྫུན་ཤན་འབྱེད་ཀྱི་འབེལ་གཏམ་ཅུང་ཟད། ལུང་རིགས་ཚད་མའི་རྒྱབ་སྐྱོར་དང་བཅས་ཏེ་འབྲི་བའི་དགོས་པ་དང་རྒྱུ་མཚན་དེ་ལྟར་ལགས་སོ། །
གླེང་གཞི་ཤུགས་ལྡན་གྱི་ཞེན་ཡུལ་སུན་དབྱུང་བ།
གྲགས་རྒྱན་གློ་བུར་དོལ་རྒྱལ་དུ་གསར་སྐྱེས་ཇི་ལྟར་བྱུང་བའི་སྐྱེ་བརྒྱུད་བཤད་པ།
གཉིས་པ་གླེང་གཞི་ཤུགས་ལྡན་གྱི་ཞེན་ཡུལ་སུན་དབྱུང་བ་ལ་གསུམ་སྟེ། གྲགས་རྒྱན་གློ་བུར་དོལ་རྒྱལ་དུ་གསར་སྐྱེས་ཇི་ལྟར་བྱུང་བའི་སྐྱེ་བརྒྱུད་བཤད་པ།
དེ་ཉིད་རིག་འཛིན་ནུས་ལྡན་རྣམས་ཀྱིས་བསྒྲལ་འདྲེན་ཇི་ལྟར་མཛད་ཚུལ་བཤད་པ། ཕུང་འགོང་སྐྱབས་གནས་སུ་བཟུང་བ་རྣམས་བཀའ་གདམས་རིང་ལུགས་གཙང་མ་ལས་ཉམས་ཚུལ་བཤད་པའོ། །དང་པོ་ནི། དགའ་ལྡན་ཁྲི་ཐོག་བཅོ་ལྔ་པ་འབྲས་སྤུངས་བློ་གསལ་གླིང་གི་པཎ་ཆེན་བསོད་ནམས་གྲགས་པ། དེའི་ཡང་སྲིད་བསོད་ནམས་ཡེ་ཤེས་དབང་པོ། དེའི་ཡང་སྲིད་ངག་དབང་བསོད་ནམས་དགེ་ལེགས་ཏེ། དེ་རྣམས་གྲགས་རྒྱན་གྱི་སྐུ་ཕྲེང་དུ་འདྲེན་པ་བ་ཡང་གོང་མ་མཁས་གྲགས་ཅན་བྱུང་བ་དེ་དག་གི་ཞབས་འདྲེན་དུ་འགྲོ་བ་ལས་བསྟོད་ཡུལ་གྱི་ཆེ་ཡོན་དུ་མི་འགྲོ་བས་འོས་འཐད་མ་མཐོང་། འདིར་སྐབས་བབ་འབྲས་སྤུངས་གཟིམས་ཁང་གོང་སྤྲུལ་སྐུ་གྲགས་པ་རྒྱལ་མཚན་གྱི་ལོ་རྒྱུས་ཅུང་ཟད་འཆད་ན། ཁོང་ནི་རབ་བྱུང་བཅུ་པའི་ས་མོ་ལུག་སྤྱི་ལོ་ཆིག་སྟོང་
དྲུག་བརྒྱ་ཉི་ཤུ་ཐམ་པ་ལ་སྟོད་ལུང་གད་ཁ་སར་སྐུ་འཁྲུངས་པ་དེ་ཉིད་ཀྱིས་ཐོག་མར་པཎ་ཆེན་བློ་བཟང་ཆོས་རྒྱན་བསྟེན། དེ་རྗེས་གོང་ས་ལྔ་པ་ཆེན་པོའི་དྲུང་ནས། རྒྱ་སོག་དཔོན་རིགས་མང་པོ་དང་ལྷན་དུ། རྡོར་ཕྲེང་དང་ཀྲྀ་ཡ་སྦྲགས་མའི་དཀྱིལ་འཁོར་ཞེ་ལྔའི་དབང་དང་། ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་གྱི་ལུང་སོགས་གསན་པ་ཡིན་འདུག་ཀྱང་། མི་རིང་བར་བླ་སློབ་བར་དམ་སེལ་ངན་པ་ཞིག་བྱུང་ཡོད་པ་གདོན་མི་ཟ་སྟེ། ཅིའི་ཕྱིར་ཞེ་ན། ཁྲི་བྱང་རིན་པོ་ཆེས་མཛད་པའི་ཤུགས་ལྡན་རྟོགས་བརྗོད་དམ་ཅན་རྒྱ་མཚོ་དགྱེས་པའི་རོལ་མོ་ལས། རྒྱལ་དབང་ལྔ་པ་ཆེན་པོ་དང་། གྲགས་རྒྱན་རང་ཉིད་བཅས་ཉི་ཟླ་ལྟ་བུའི་སྐྱེས་ཆེན་རྣམ་གཉིས་གློ་བུར་རྐྱེན་དབང་སྟབས་ཀྱིས་རེ་ཞིག་ཞལ་འཛོམ་གྱི་གོ་སྐབས་རིང་བར་གྱུར་ཞེས་
གསུངས་པ་དང་། དེ་སྐབས་གོང་ས་ལྔ་པ་ཆེན་པོའི་བཀའ་ལུང་སྤྱི་བོས་ནོད་པའི་སྡེ་སྲིད་བསོད་ནམས་ཆོས་འཕེལ་ལམ། བསོད་ནམས་རབ་བརྟན་ཞེས་ཀྱང་གྲགས་པ་སོགས་དགའ་ལྡན་ཕོ་བྲང་གི་ཆབ་སྲིད་ལ་དབང་བ་རྣམས་གྲགས་རྒྱན་ལ་ཁོང་ཁྲོ་མི་བཟོད་པ་འབར་ནས་སྐུ་བཀྲོངས་པའི་འཕྲོས་གཏམ་བྱུང་ལུགས་ལ་དཔགས་ན་གོང་ས་མཆོག་གི་ཐུགས་དང་འགལ་བ་ཤིན་ཏུ་གསལ། དེར་མ་ཟད་སྐབས་དེར་གོང་ས་ལྔ་པ་རང་ལའང་དམ་གྲིབ་ཕོག་པའི་ཚུལ་གསུང་རྣམ་དུ་ཀུ་ལ་ཀ་པའི་ནང་དུ། ཚེས་བཅོ་ལྔ་ལ་གཟའ་འཛིན་འདུག་པ་དང་བསྟུན། མ་ཤའི་ལས་སྦྱོར་བྱེད་རྩིས་ཀྱིས་ཚེས་བཅུ་གཅིག་ནས་བསྙེན་མཚམས་ཤིན་ཏུ་དམ་པར་བཅད་དེ་འཇམ་དཀར་གྱི་བཟླས་བརྗོད་བཙུགས་པ་ཚ་རྟིང་ཁར་རང་དབང་དང་བྲལ་བའི་གཉིད་ཀྱིས་ནོན་པར། རེ་ཞིག་ཐུན་བཞག་
སྟེ་ཁམས་གསེང་བའི་ཐབས་འདྲ་བྱས། ཇའི་སང་སྡེ་པར་ཕྱི་དྲོ་ད་ལྟའི་འདི་འདྲ་མིན་ཙམ་བྱུང་ན་མ་གཏོགས་དགེ་སྦྱོར་ཚད་ལྡན མི་ཡོང་བ་སྣང་ཞེས་གླེང་བརྗོད་ཀྱང་བཏང་། དེ་ཡང་སྤྲུལ་པའི་སྐུ་གཉན་ཚད་ཀྱིས་བསྙུང་བར། གླིང་སྟོད་ཆོས་རྗེ་དང་། བྱང་ངོས་ནས་ཀྱིས་འཕྲོད་བསྟེན་མཛད་པས་གཞི་མེད་དུ་དྭངས་པས་སོག་ཡུལ་དུ་ཙན་ཐོན་གྱི་ཉེ་ལེན་ལ་སྡེ་པའི་སྐུ་གཞོགས་ནས་སྡེ་པ་ནོར་བུ་བཏང་བས་བཀའ་ལུང་བསྒྱུར་སྐབས་སྐྱོན་མེད་་དེ་ག་ཡོད་འདུག་ཀྱང་། ཚ་རྟིང་ཁར་གློ་བུར་བསྙུན་པས་ཚོགས་ཆེན་དུ་མང་ཇ་དང་། གནས་ཆུང་ལྕོག་ཏུ་སྐུ་ཕེབས་ཚ་གྲུལ་ཞིང་སྡེ་པར་འཕྲོས་ཕུལ་བར་༜བརྟེན་ལྷ་ས་ནས་ཉིན་མཚམས་ལ་ཕེབས་པས་ཁ་སང་རྗེས་གནང་ངེད་རང་གིས་བཤོལ་བས་འཚེར་བ་བྱུང་། ད་ལམ་ཅིས་ཀྱང་འགྲོ་དགོས་ཞེས་ཇའི་སང་སྡེ་
པ་བརྒྱུད་དེ་གསུངས་པ་མཚམས་ལ་ཧར་འདོན་བྱས་ཏེ་གཟིམས་ཁང་གོང་དུ་ཕྱིན། མགོན་པོའི་རྗེས་གནང་བར་ཆད་ཀུན་སེལ་ཕུལ་ཀྱང་འབྱུང་པོ་ཞིག་གིས་བརླམས་པས་ཐུགས་མི་ཟིན་འདུག་པས་ཕན་ཐོགས་མེད་པས་ཚེས་བཅུ་གསུམ་གྱི་ཚ་རྟིང་ཁར་ཞིང་བརྗེས་སྣང་། ཞེས་གསུངས་པ་འདི་ལ་ཚད་མར་འཛིན དགོས། དེས་ན་ད་ལྟ་དགེ་ལྡན་པ་ཀུན། སྡེ་པ་བསོད་ནམས་ཆོས་འཕེལ་དང་། ནང་སོ་ནོར་བུ་སྐ་མཆེད་ངན་མཐུན་གྱིས་མགྲིན་པར་དར་བརྫངས་རྒྱབ་སྟེ་བཀྲོངས་ཚུལ་དང་། ཤུགས་ལྡན་བསྟོད་པར། ལོག་སྨོན་ཀུན་ཚོགས་དར་གྱིས་མགུལ་བཅིངས་ཚེ། ཞེས་རྐེ་བསྡམས་ཏེ་བཀྲོངས་ཚུལ་མི་འདྲ་བ་གཉིས་བྱུང་བ་ལ་གོང་དུ་ཀུན་མཁྱེན་རྒྱལ་དབང་ལྔ་པའི་གསུངས་དེས་ལོ་རྒྱུས་མཐུན་མིན་གཉིས་ཀ་བཞར་ཚར་བ་འདི་ལ་ཡིད་རྟོན་དགོས། དོན་དུ་གྲགས་རྒྱན་
དགུང་ལོ་སོ་བརྒྱད་པ་མེ་སྤྲེལ་ཟླ་བ་ལྔ་པའི་ཚེས་བཅུ་གསུམ་ཉིན་འདས་གྲོངས་སུ་གྱུར་ཏེ། སྐུ་གདུང་འབྲས་སྤུངས་སྔགས་པའི་ཆོས་རང་ཞུགས་ལ་ཕུལ་བ་ན་མེས་མ་ཚིག་པ་དངུལ་གདུང་ནང་དུ་རིལ་པོ་བཅུག་སྟེ། གཟིམས་ཁང་གོང་རང་དུ་བཞག་པར་སྐུ་གདུང་ཞབས་ཕྱི་བ་རྣམས་ཀྱང་སྡོད་མི་བཟོད་པའི་ཚེགས་སྒྲ་དང་སྡིག་སྒྲ། མཆོད་རྟེན་ནང་ནས་སྐད་ངན་དང་ཙིར་སྒྲ་རྒྱབ་པ་སོགས་བྱུང་བ་ན། གནས་ཆུང་ཆོས་སྐྱོང་བཀའ་ལུང་ ི་བཞིན་དངུལ་གདུང་ལྷུ་ཕྲལ་ནས། སྐུ་གདུང་ཤིང་སྒམ་ནང་བཅུག་སྟེ་ཡར་ཆབ་གཙང་པོར་སྐྱུར་བ་རིམ་གྱིས་ཁྱེར་བ་ལྷོ་ཁ་དོལ་གྱི་མདར་ཆགས་པ་དེང་བཅུ་བཞི་༔ སྐབས་དོལ་ཆུ་མིག་དཀར་མོར་ཡོད་པས་དོལ་རྒྱལ་ཞེས་མིང་དེ་ནས་ཐོགས། གྲགས་རྒྱན་གཤེགས་ཁར་བླ་མ་དང་དམ་ཚིག་ཉམས་པས་མ་ཚད་སྨོན་ལམ་
ལོག་པ་ཞིག་བཏབ་ཡོད་པར་ངེས་ཏེ། མི་དབང་པཎྜི་ཏ་སངས་རྒྱས་རྒྱ་མཚོས་མཛད་པའི་བདུད་རྩི་སྙིང་པོ་ཡན་ལག་བརྒྱད་པ་མན་ངག་ཡོན་ཏན་རྒྱུད་ཀྱི་ལྷན ཐབས་ལེའུ་བརྒྱ་དང་བཅུ་གཉིས་པ་ལས། ལུགས་མཐུན་དམ་ལ་གནས་པའི་རྒྱལ་པོ་དང་། །དེ་མིན་དམ་སྲི་འབྱུང་པོའི་རིགས་ལ་སོགས། །ཞེས་པའི་ཐད་ཀྱི་འགྲེལ་པ་ན་ལུགས་མཐུན་རྒྱལ་པོ་སྐུ་ལྔ་སོགས་ཡིན། དེ་མིན་དོལ་ཆུ་མིག་དཀར་མོར་གནས་པ་སོགས། བླ་མའི་རིགས་སྨོན་ལམ་ལོག་པ་དང་བཙུན་པ་⇨ སྡོམ་ཉམས་འདྲེར་སྐྱེས་པ་ཞེས་ཤིན་ཏུ་གསལ་བར་གསུངས་པའི་ཕྱིར་རོ། །གྲགས་རྒྱན་གཤེགས་ཁ་ནས་བཟུང་ལྔ་པ་ཆེན་པོའི་གཟིགས་སྣང་དུ་ཆོ་འཕྲུལ་གྱི་རྣམ་པ་བྱུང་ཚུལ་རྣམས་ལྔ་པ་ཆེན་པོའི་རང་རྣམ་དུ་ཀུ་ལའི་ནང་དུ་འདི་ལྟར། ཚེས་བདུན་ནས་དཔལ་ལྡན་རེ་མ་ཏིའི་མདོས་བསྐང་བཙུགས་པའི་རྡོ་རྗེ་སློབ་
དཔོན་དུ་ཕྱིན། ཆོས་སྐྱོང་ཆེན་པོའང་ཁོག་ཏུ་ཞུགས་ཏེ་ཕེབས། གསོལ་ཇ་ཁང་གི་ནང་དུ་གདོན་གྱི་འཚུབ་ཅིག་འདུག་གསུངས། མཚམས་ཀྱི་སྐབས་ཚེས་བཅུ་བདུན་ནས་བཟུང་ཉམས་སྣང་གི་འཁྲུལ་ངོར་ཆ་དཀར་ཆོས་མཛད་དང་ལྷན་དུ་སྤྲེའུ་བྱིས་པ་ལོ་བརྒྱད་པ་ཙམ་དོམ་ལྤགས་ལྟ་བུའི་ཁ་དོག་ནག་ཅིང་མིག་དམར་སེར་དུ་འཁྱིལ་བ་ཞིག་རེས་རྗེས་སུ་འབྲངས། སྐབས་འགར་མཇིང་པར་ཞོན་ནས་འོང་བ་ཞིག་བྱུང་བ་དང་མཐུན་པ་འདྲ། ཞེས་དང་། ཆོས་སྐྱོང་ཆེན་པོས་སྤྲུལ་པའི་སྐུའི་པུར་བཞུ་དུས་ཉེ་འཁོར་དུ་བསྡད་པ་མི་འགབ་པས་པོ་ཏཱ་ལར་སོང་གསུངས་པ་བཞིན་ཉེར་གཉིས་ལ་འོང་། ཞག་བདུན་གྱི་བར་འཕགས་པ་མཆེད་ཀྱི་དྲུང་དུ་མཆོད་པ་སྨོན་ལམ་བཟླས་བརྗོད་སོགས་དགེ་སྦྱོར་ལ་བརྩོན་པར་བྱས། ལས་སྒྲིབ་དག་པའི་ལྟས་བཟང་པོ་འདྲ་
འོང་དུ་རེ་ཡང་ནུབ་གཅིག་རྨི་ལམ་དུ་བཙུན་པ་ཞིག་གིས་ཟན་ཧྲིལ་མོ་སྦོམ་ཕྲ་མཛུབ་མོ་ཙམ་མཁྱིད་གང་གི་ཚད་རྩ་རྩེའི་རྣམ་པ་ཡོད་ཁུལ་ཞིག་མདུན་དུ་བཞག་སྟེ་འདི་སྡེ་བ་སྐྱིད་རུ་བ་ཡིན་ཟེར་བའི་མུས་ལ་ཟན་དེ་སྲོག་ཆགས་ལྟར་འགྲོ་བ་དང་། ཡང་རྫོང་གི་རྟ་ལམ་དུ་དམག་གིས་འཚངས་པས་ཇའི་སང་སྡེ་པ་དང་ལྷན་ཅིག་ཆར་འབབ་པའི་མུན་ཁྲོད་ལ་མཆིལ་ལྷམ་ཡང་མ་གྱོན་པར་ལྟག་སྒོ་ནས་ཐོན་ཏེ་བྲོས་འགྲོ་བ་སོགས་ངན་པ་འབའ་ཞིག་བྱུང་། ཞེས་དང་། དབྱར་ཐོག་འདིར་འགོང་པོའི་འཚུབ་སྔར་དང་མི་འདྲ་བའི་ཆེ་བ་འདུག་པར་ཟླ་བ་དགུ་པའི་ཚེས་དགུ་ནས་བདུན་གཅིག་གི་བར་ཡང་ཟབ་རྡོ་རྗེ་གྲོ་ལོད་བསྒྲུབས་པས་ཚ་ངར་གྱི་དབལ་གཅོག་པ་ལ་ཕན་པར་བྱུང་། ཞེས་དང་། ས་ཁྱི་ཟླ་བ་གསུམ་པའི་ཚེས་གཅིག་གི་སྲོད་འཁོར་ལ་ཉ་ཤུར་སྐྱ་རིལ་གྱིས་ཇའི་སང་སྡེ་པ་བརྒྱུད་
དེ་སྡེ་པ་བསྙུང་ལུགས་འདི་བཞིན་བྱུང་ཟེར་བར་ཟ་ཡིག་དང་། བྱིན་རླབས་རྟེན་སོགས་བསྐུར། ནམ་འོག་ལ་ཡོང་རྩིས་ཀྱིས་རྟ་བསུ་བ་ཐོངས་བྱས་ཀྱང་ནམ་སངས་ལས་མ་འབྱོར། ཚེས་གཉིས་ཀྱི་ཞོགས་པ་ལྷ་སར་ཕྱིན། སྐུ་གྲིབ་བསྙུན་གཞི་བབས་ཤིན་ཏུ་ལྕི་བ་འདུག་པས་བཅོས་ཀ་ཎྜཱ འགྲོ་མདོག་མ་ཁ་ཡང་། ཟ་ཡིག །དུག་དབྱུངས། སྨན་བཅོས་ཐབས་སྣ་ཚོགས་བྱས་རུང་། ཚེས་གསུམ་གྱི་ཉིན་ཕྱེད་ལ་ཞལ་མ་བཞུགས་པར་འཕོ་བ་་བཏབ། བྱང་མི་མང་བའི་སྒྲ་དང་བཅས་དེ་ཙམ་གྱི་གནད་དུ་འགྲོ་མདོག་ཁ་བ་ཞིག་མ་བྱུང་། ཞེས་དང་། ཆོས་སྐྱོང་ཆེན་པོས་སྡེ་པར་འདྲེ་སྣ་ཟུག་པས་གཟིམས་༔ ཁང་གོང་གི་མཆོད་རྟེན་རྣམས་གཞན་དུ་སྤོ་དགོས་ཚུལ་ལོ་སྔ་མ་སྟོད་ལུང་ཆུ་ཚན་ལ་བྱོན་སྐབས་དགེ་བསྐོས་གཉིས་བརྒྱུད་དེ་ལབ་པ་ཡིན་ཡང་དངུལ་གདུང་
ཚོ་ཕྲལ་ནས་འཇོག་པ་ཙམ་ལས་མ་སྤོས་པའི་སྐྱོན་གྱིས་ནད་གཞི་ཚུག་པ་ཡིན། ད་ལྟ་འཚུབ་ཆེར་སོང་བས་གཟིམས་ཁང་གོང་སྤོ་དགོས་གསུངས་པར་རྒྱལ་བརྫོངས་ལྟ་བུས་གོ་ཆོད་པས་ཁང་པ་བཤིག་མ་དགོས་པ་ཡོང་མི་ཡོང་གི་གླེང་གཞི་མང་དུ་བྱུང་རུང་བདེན་མི་བདེན་ཇི་ལྟར་ཡང་མཆོད་རྟེན་བརྒྱད་པོ་མ་ཕྲལ་བའི་སྐབས་མཆོད་རྟེན་ནང་ནས་སྐད་དང་། ཙིར་སྒྲ་བརྒྱབ་ཟེར་བས་མཚོན་པའི་རྣམ་རྟོག་འདྲེ་ལངས་ཀྱིས་ཁ་ཚོན་མ་ཆོད་པས་སྐྱ་ཆས་ཚོ་སྟོད་ལུང་མདའ་དང་། ཤིང་ཆ་རྣམས་ཤར་ཆུ་སྦུག་ཏུ་བསྐྱལ། གཟིམས་ཁང་བཤིག་ཤུལ་དུ་གྲྭ་ཚང་གིས་ཁྲོ་རོལ་སླང་གང་མ་ཞིག་དང་། གྲྭ་ཚང་གསུམ་ནས་བསྡུས་པའི་དགེ་འདུན་བརྒྱ་སྐོར་གྱིས་གསུང་རབ་བསྒྲགས་ཞེས་གསུངས་ཤིང་། གཞན་ཡང་ལྔ་པ་ཆེན་པོའི་མནལ་ལམ་དུ། གདུགས་ངུར་སྨྲིག་མདོག་ཀ་བཞིའི་ཚད་
ཙམ་པ་འཁོར་བ་ཞིག་ཡང་ཡང་བྱུང་ཞིང་དེ་བྱུང་རེས་ཀྱི་ཕྱི་ནང་ཅི་རིགས་སུ་འཚུབ་རེ་འོང་བ་དང་། རིན་ཆེན་སྒང་པ་དབང་རྒྱལ་རྡོ་རྗེར་རྟ་མགྲིན་གྱི་རྗེས་གནང་སྩལ་སྐབས་རླུང་སོགས་རྐྱེན་ཡེ་མེད་པར་གཏོར་གསོལ་ཅོག་སྟེང་ནས་ལྷུང་པ་དང་། གསོལ་ཚིགས་གནང་སྐབས་གསོལ་ཚིགས་ཀྱང་དོན་མེད་དུ་མགོ་འཇུག་ལྡོག་པ། སྐབས་ཤིག་རྩེ་ཕོ་བྲང་པོ་ཏཱ་ལ་ཡང་ཡོམ་ཡོམ་དུ་འདར་བ་སོགས་ཆོ་འཕྲུལ་ཡང་ཡང་བསྟན་པ་དང་། རྣམ་རྒྱལ་གྲྭ་ཚང་གི་དགེ་འདུན་མང་པོ་སྟེང་གྲིབ་ཀྱིས་འདས་གྲོངས་བྱུང་བ་དང་། གྲྭ་ཚང་གི་མཚམས་ཁག་པ་རྣམས་ཡོད་སར་དགོང་མོ་མར་མེའི་འོད་ལ་༉ གཟུགས་མི་མཐོང་བའི་ལག་པ་ཆེན་པོས་མར་མེ་བསྒྲིབ་པ་དང་གསོད་པ། ཆབ་གསང་འགྲོ་མཁན་དང་། གྲྭ་གཟུགས་བོང་བུའི་མགོ་ཅན་ཟླ་གམ་གྱོན་པར་
ཐུག་པ། སྐས་འགོའི་སྐས་རུ་མི་ནག་རྒྱ་ལུ་ཆས་སུ་འཁྲུལ་ནས་གཡང་ལ་བསྐྱར་གྲབ་བྱས་པ། འགའ་ཞིག་ལ་ཞུགས་ཏེ་ནད་པ་ཡིན་ཁུལ་གྱི་རྩ་སྟོན་པ་སོགས་མང་པོ་བྱུང་། ནད་པ་དེ་རིགས་ལ་ཨེམ་ཆི་དར་མོ་སྨན་རམ་པ་རང་འཕྲོད་ཅིང་། ཁོང་མཚན་རྒྱུའི་འབྱུང་པོ་དང་གྲོགས་མཆེད་ལྟ་བུ་ཡིན་ཚོད འདུག །སྐབས་ཤིག་ཁོང་གིས་གྲྭ་པ་ནད་པ་ཞིག་གི་རྩར་བྱོན་པས་རྒྱལ་ཆེན་གྱིས་གནོད་པར་ཤེས་ཏེ། ཁྱོད་ཀྱི་ན་ཚ་དེ་འདི་ཁ་རང་དུ་འདུག་ཅེས་སྙིང་ཁར་ ོ ཕྱག་མཛུབ་བཙུགས་པས། ཁ་རོག་བཞུགས། མིས་ཤེས་ཡོང་ཞེས་ཤུབ་བུར་བརྗོད་པ། དེར་སྨན་པ་དར་མོ་བས་འཇམ་འགྲོས་ཀྱིས་གསེད་བཀྲོལ་གནང་ནས་དྲག་པ་དང་། གྲགས་རྒྱན་ཞལ་བཞུགས་སྐབས་གསོལ་སྨན་འབུལ་མིའི་སྨན་པ་འབྲས་ཉང་པོ་ཁམས་ཚན་གྱི་ཨེམ་ཆིར་ཞིག་ཡོད་པ་དེར། གྲགས་རྒྱན་
གཤེགས་རྗེས་ནུབ་གཅིག་ཉམས་དང་རྨི་ལམ་འདྲེས་མ་ལྟ་བུ་ཤིན་ཏུ་གསལ་བར་གྲགས་རྒྱན་གྱི་གསོལ་དཔོན་བྱུང་སྟེ། བླ་མ་སྐུ་ཁམས་ཅུང་མི་བདེ་བ་ཡོད་པས། ཁྱེད་གདན་འདྲེན་པར་གཏོང་གནང་མཛད་བྱུང་ཟེར། དེར་ངེད་ལ་རྟ་མེད་ཇི་ལྟར་བྱེད་བྱས་པར། རྟ་ཁྲིད་ཡོད་ཟེར་བ་ལྟར་སྨན་པས་སྨན་སོགས་ཁྱེར་ཏེ་སོང་བ་ན་འབྲས་སྤུངས་ལྕགས་རིའི་ཕྱིའི་རྡོ་བཅལ་དུ་རྟ་དཀར་པོ་སྒ་ཆས་རང་འགྲིགས་ཤིག་འདུག་པར་ཞོན་ནས་ཨ་ཙ་ར་གཉིས་ཀྱིས་ཁྲིད་དེ་རྐྱང་ཐང་སྒང་དུ་སླེབས་པ་ན། དེར་རྒྱལ་བ་ཐམས་ཅད་མཁྱེན་པ་ཕྱོགས་ཕེབས་སྐབས་ཀྱི་བཞུགས་སྒར་ལྟ་བུའི་སྒར་ཆེན་ཞིག་གི་དབུས་ཀྱི་དབུ་གུར་དུ་ཁྲི་ཆེན་པོ་ཞིག་གི་སྟེང་ན་གྲགས་རྒྱན་སྔར་ཞལ་བཞུགས་སྐབས་ལྟར་མངོན་སུམ་དུ་བཞུགས་འདུག་པ་མཇལ་སྐབས་གྲགས་རྒྱན་ནས། ངོས་
ལུས་ཀྱི་རྒྱབ་སྐེད་པའི་སྨད་འདི་ཚོར་ཤུ་ཐོར་ལྟ་བུ་ཅུང་ཟད་ཐོན་ཏེ་མི་བདེ་བ་ཡོད་ཅེས་ཨེམ་ཆིར་ཕྱག་རྩ་བསྟན་པ་དང་། གསོལ་སྨན་འབུལ་བཞེས། སྨན་ཡོན་གནང་བ་རྣམས་སྨན་སྒྲོར་བླུགས་ཏེ་ཚུར་ལོག་ཡོང་བ་སོགས་མངོན་སུམ་པ་ལྟར་བྱུང་། སང་གཉིད་སད་སྐབས། བླ་མ་ནི་སྐུ་འདས་ཟིན་ཀྱང་། མདང་ནུབ་ཀྱི་མངོན་སུམ་པ་ལྟར་བྱུང་བ་ཇི་ཡིན་སྙམ་དོགས་ཏེ་སྨན་སྒྲོ་ཁ་ཕྱེས་ཏེ་བལྟས་པས་སྨན་ཡོན་གནང་བ་རྣམས་དངོས་སུ་ཡོད་པ་བྱུང་བ་དང་ཞེས་སོ། །ཡང་ལྷ་སའི་ཕྱོགས་སུ་ནད་ཡམས་མཆེད་ཅིང་མི་མང་པོ་ཤི་བ་དང་། རྣམ་རྒྱལ་གྲྭ་ཚང་གི་དགེ་འདུན་མང་པོ་འདས་གྲོངས་སོང་བ་སོགས་ཡུལ་ཁམས་ལ་མི་ཤིས་པའི་མཚན་མ་ངན་པ་སྣ་ཚོགས་མུ་མཐུད་གཏོང་བཞིན་རྣམ་སྨིན་སྲིད་པའི་བར་དོ་ཡིད་ཀྱི་ལུས་ཅན་དེ། མེ་བྱ། ས་ཁྱི། ས་ཕག །ལྕགས་བྱི། ལྕགས་
གླང་སྟེ་ལོ་ལྔའི་རིང་འཁྲུལ་སྣང་འཁོར་བའི་བག་ཆགས་དང་འགྲོགས་བཞིན་དུ་དབུས་གཡོར་ཕྱོགས་སུ་འཁྱམས་འཁྱམས་གཙང་ཕྱོགས་ཀྱི་ཆོས་སྡེ་བཀྲ་ཤིས་ལྷུན་པོར་པཎ་ཆེན་ཐམས་ཅད་མཁྱེན་པ་བློ་བཟང་ཆོས་རྒྱན་ཞབས་དྲུང་དུ་སྐྱབས་འཚོལ་འགྲོ་བར་བརྩམས་ཚེ་ཎྜཱདགོན་པའི་གླིང་བསྐོར་གྱི་ལམ་དུ་རྣམ་སྲས་རྟ་བདག་བརྒྱད་ཀྱིས་བཀག་ནས་ནང་དུ་མ་བཏང་ཅེས་པའི་ལོ་རྒྱུས་འདི་ལྟར་ན་དོལ་རྒྱལ་གསོན་པོའི་སྐབས་ནས་པཎ་ཆེན་ཐམས་ཅད་མཁྱེན་པའི་ཐུགས་རྗེའི་ལྕགས་ཀྱུ་རྣོན་པོའི་ཡུལ་དུ་གྱུར་པའི་དད་དམ་གྱི་ཨ་ལོང་སྲ་བརྟན་ཅིག་མེད་པ་ཡང་མཐོང་ཐུབ། དེ་ནས་རིམ་གྱིས་སོང་སོང་བ་ལས་དཔལ་ས་སྐྱར་སླེབས་པའི་ཚེ། བདག་ཆེན་བསོད་ནམས་རིན་ཆེན་དགུང་གྲངས་བཅུ་བདུན་དུ་ཕེབས་པ་ལྕགས་མོ་གླང་ལོར་ས་སྐྱའི་
དབུ་རྩེ་རྙིང་མར་གསུང་ངག་རིན་པོ་ཆེ་ལམ་འབྲས་ཚོགས་བཤད་འདུས་པ་སུམ་བརྒྱ་ལྷག་ཙམ་ལ་གནང་བའི་སར་མཚན་མོ་རྡོ་ཆར་འབེབས་པ་དང་། མང་པོ་ལ་གནོད་འཚེ་དང་ཆོ་འཕྲུལ་སྣ་ཚོགས་བསྟན་པའི་སྐབས། བདག་ཆེན་གྱི་མནལ་ལམ་དུ་ས་སྐྱའི་ཕུན་ཚོགས་གླིང་བརྩེ་ཆེན་ལྷ་ཁང་འགག་ན་བན་གཟུགས་ཤིག་གཟིགས་ནས་མི་མཁྱེན་པ་ལྟར་མཛད་ནས་ཁྱོད་སུ་ཡིན་གསུངས་པ་ལ། ང་དགེ་ལྡན་པའི་དམ་སྲི་ཁོ་ཡིན་ཞེས་སྦ་གསང་མེད་པར་རང་གི་ཡིན་ལུགས་དྲང་པོར་ཞུས་ནས། ཁྱེད་ཀྱིས་ང་ལ་ཟས་སྐལ་ཞིག་སྩོལ་ཞེས་གསོལ་བས། ཁའུ་སྐྱེད་ལྷས་སུ་རྒྱལ་མཁར་བརྩིགས་ནས་འདྲེ་ཁྱོད་རེ་ཞིག་དེར་སྡོད་ཅེས་བླ་ཡིད་ཆགས་པའི་རྟེན་དུ་བྱིན་པ་དང་། དེ་བཞིན་སྲས་ས་ཆེན་ཀུན་བློས་ཀྱང་ས་སྐྱའི་བྱང་ངོས་དགོན་པའི་ཕྱི་རོལ་དུ་རྨུག་ཆུང་མགོན་ཁང་བཟོས་ནས་
དེར་དོལ་རྒྱལ་ཆགས་རྟེན་བྱས་པ་འདི་དག་ལོ་རྒྱུས་ཡོངས་གྲགས་ལྟར་བཀོད་པ་ཡིན་ནོ། །
དེ་ཉིད་རིག་འཛིན་ནུས་ལྡན་རྣམས་ཀྱིས་བསྒྲལ་འདྲེན་ཇི་ལྟར་མཛད་ཚུལ་བཤད་པ།
གཉིས་པ་དེ་ཉིད་རིག་འཛིན་ནུས་ལྡན་རྣམས་ཀྱིས་བསྒྲལ་འདྲེན་ཇི་ལྟར་མཛད་པའི་ཚུལ་བརྗོད་པ་ནི། གོང་དུ་བཤད་པ་བཞིན་གྲགས་རྒྱན་ལས་རྐྱེན་ངན་པའི་དབང་གིས་རྒྱལ་འགོང་གདུག་པ་ཅན་དུ་སྐྱེས་ནས་ཀྱང་། སྔ་མའི་བག་ཆགས་ངན་པའི་འཕྲོ་སད་ནས། རུ་ཏྲ་ཐར་བ་ནག་པོའི་བརྟུལ་ཞུགས་བཟུང་སྟེ་རང་གི་རྩ་བའི་བླ་མ་རྒྱལ་མཆོག་ཐམས་ཅད་མཁྱེན་པ་ལྔ་པ་ཆེན་པོའི་སྐུ་དགྲ་དང་། དམ་ལྡན་རྣལ་འབྱོར་མང་པོའི་སྒོས་དགྲ། དགེ་འདུན་གྱི་སྡེ་དང་སྐྱེ་འགྲོ་ཉེས་མེད་རྣམས་ལ་གནོད་ཅིང་འཚེ་བར་བྱེད་༉ པ་སོགས་བསྒྲལ་བའི་ཞིང་བཅུ་ཚང་བའི་ལས་ངན་གྱི་ནུས་པ་སྟོབས་སུ་གྱུར་པ་དང་། དུས་དེར་རྣམ་རྒྱལ་གྲྭ་ཚང་ཡོངས་ནས་ཀྱང་། རྒྱལ་བའི་དབང་པོར་
ཡང་ཡང་གསོལ་བ་བཏབ་པའི་རྒྱུ་རྐྱེན་རྟེན་ཅིང་འབྲེལ་འབྱུང་འཚོགས་པ་ན། རྒྱལ་དབང་ཉིད་དང་ལྷོ་རྒྱུད་རིག་འཛིན་རྣམ་གཉིས་བཅས་བགྲོ་བ་མཛད་དེ། སྲི་དོལ་རྒྱལ་མ་བཏུལ་ན་བོད་ཁམས་བསྟན་འགྲོའི་བདེ་སྐྱིད་ལ་ཤིན་ཏུ་གནོད་ཅིང་། དེའང་ཞི་བས་འདུལ་དུ་མི་འཚལ་ཏེ། རྒྱུད་ལས། ཤིན་ཏུ་ཁྲོ་ཞིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཁྲོ་བོ་དེ་བཞིན་གཤེགས་ཀུན་མཛད། །ཅེས་གསུངས་པ་ལྟར། མངོན་སྤྱོད་དྲག་པོའི་རོལ་པས་ཚར་གཅོད་པ་ལ་གཅིག་ཏུ་ཕྱོགས་ཏེ། དམ་སྲི་དོལ་རྒྱལ་བླ་མ་ས་སྐྱ་པ་ཆེན་པོས་དམ་བཞག་མཛད་ནས་བགྲང་བྱ་བཅུ་གཉིས་འདས་པ་ཆུ་མོ་གླང་གི་ལོར་རྩེ་པོ་ཏཱ་ལའི་གྲྭ་ཚང་དུ་རྡོ་རྗེ་གྲོ་ལོད་ཀྱི་རྡོ་རྗེ་སློབ་དཔོན་དགའ་གདོང་སྔགས་རམ་པ་དོན་གྲུབ་རྒྱ་མཚོ་དང་། ཡང་གསང་ཀརྨ་དྲག་པོའི་རྡོ་རྗེ་སློབ་དཔོན་རྒྱལ་མཆོག་ཉིད་
དང་། གནང་བྱུང་སྔགས་འཆང་བློ་བཟང་མཁྱེན་བརྩེས་གནང་བའི་དགེ་འདུན་གྲངས་བཅད་ཀྱི་སྒྲུབ་ཁག་གཉིས། རྡོ་རྗེ་བྲག་རིག་འཛིན་སྤྲུལ་སྐུ་པདྨ་ཕྲིན་ལས། སྨིན་གྲོལ་གླིང་རིག་འཛིན་གཏེར་བདག་གླིང་པ། ཆོས་རྗེ་འུག་བྱ་ལུང་པ། ཀ་ཚལ་ཟུར་པ་མངའ་རིས་སྔགས་འཆང་དཀོན་མཆོག་ལྷུན་གྲུབ། འཕྱོང་རྒྱས་དཔལ་རི་སྤྲུལ་སྐུ་རྣམས་ཀྱིས། བླ་མ་དྲག་པོ། གཤིན་རྗེ་ཚེ་བདག །ཕུར་པ། ལོཀྟྲི་སོགས་སྒྲུབ་ཁག་བདུན་གྱིས་པོ་སྦ་ཏཱ་ལའི་བདེ་ཡངས་ཤར་དུ་སྦྱིན་སྲེག་གནང་ཞིང་། ལས་སྦྱོར་གནང་རྒྱུའི་སྔ་དྲོ་དེར་ལྕགས་པོ་རིར་དགེ་སློང་བྱང་ཆུབ་སེམས་དཔའ་ཟེར་བའི་མིག་མཐོང་མཁན་ཞིག་ཡོད་འདུག་པ་དེའི་མཐོང་སྣང་དུ། ཞོགས་པ་སྔ་མོར་པོ་ཏཱ་ལའི་ཕྱོགས་ནས་ཁྲོ་ཆུང་མང་པོ་ཉི་ཟེར་གྱི་རྡུལ་ཕྲན་ལྟ་བུ་འཕྲོས་ནས་འབྲས་སྤུངས་
ཕྱོགས་ལ་སོང་ཞིང་། ཚ་རྟིང་མ་སྔ་ཕྱོགས་ཙམ་ལ་དོལ་རྒྱལ་དཔོན་གཡོག་པོ་ཏཱ་ལའི་ཕྱོགས་སུ་འགྲོ་བ་མཐོང་འདུག །དུས་དེར་དོལ་རྒྱལ་ཇི་ལྟར་བསྒྲལ་སྟོབ་མཛད་པ་ཡིན་ཞེ་ན་འདི་ལྟ་སྟེ། གཏེར་ཆེན་ཆོས་ཀྱི་རྒྱལ་པོའི་ནང་གི་རྟོགས་པ་བརྗོད་པ་ཡོན་ཏན་མཐའ་ཡས་རྣམ་པར་བཀོད་པའི་རོལ་མོ་ཞེས་བྱ་བ་ལས། སླར་ཡང་ཟླ་བ་བཞི་པའི་འགོར། གོང་ནས་སྤྱན་འདྲེན་འབྱོར་བ་བཞིན་རྡོ་རྗེ་བྲག་བརྒྱུད་ཕོ་བྲང་རྩེར་ཕེབས། དེར་རྒྱལ་མཆོག་དམ་པ་ཅུང་ཟད་བསྙུན་པའི་སྐུ་རིམ་དུ། གྲྭ་ཚང་ཆེན་མོའི་གྲྭ་པ་བསྙེན་སོང་རྣམས་ཀྱིས། འབྱུང་པོ་མཐར་བྱེད་ཀྱི་ཆོ་ག་མཛད་པའི་སློབ་དཔོན་དུ་ཞབས་བསྐྱོད་ཅིང་། དེའི་སང་ཉིན་ཕོ་བྲང་རྩེར། བརྒྱགས་བརྔན་དང་རྗེས་འབྲེལ་དུ་ཨོ་རྒྱན་སྣང་སྲིད་ཟིལ་གནོན་གྱི་སྐུའི་ཕྱི་བྱད་དུ་ཞུགས་ཏེ། ལྷ་སྲིན་རྣམས་ལ་བཀའ་བསྒོ་དམ་བསྒྲག་མཛད་
པའི་ཚེ། སྡེ་བརྒྱད་དྲེགས་པ་མ་ལུས་པ་རང་རང་གི་དཔུང་དང་བཅས་འདུས་ནས་གུས་པས་བཀའ་ནོད་ཅིང་ལས་སྒྲུབ་པར་དམ་བཅས་པའི་རྣམ་འགྱུར་གསལ་བ་གཟིགས་པ་དང་། ཡང་གོང་མའི་ལུང་གིས་བསྐུལ་ཏེ། སྟོང་ཉིད་རང་གདངས་སྙིང་རྗེ་ཆེན་པོའི་རྩལ་སྣང་། བླ་མ་དྲག་པོ་གཏུམ་དྲག་འབར་བའི་སྐུར་བཞེངས་ནས་ཧོམ་མེའི་ལས་སྦྱོར་མཛད་པས། ལས་བྱེད་ཀྱི་ཕོ་ཉ་རྣམས་ཀྱིས་མཚན་རྒྱུའི་འབྱུང་པོ་མི་བསྲུན་པའི་རྐེ་ཞགས་པས་བཅིངས་ཏེ། དབང་མེད་དུ་འཁྲིད་ནས་བསྒྲལ་བཅོམ་ཞལ་དུ་སྟོབ་པ་མངོན་སུམ་དུ་གཟིགས་ཤིང་། དེ་དུས་སྨྲེ་སྔགས་འོ་དོད་ཀྱི་སྒྲ་དང་བསྲེགས་པའི་དྲི་མི་སྡུག་པ་སོགས་དེར་འཁོད་ཀུན་གྱིས་ཚོར་བ་བྱུང་། གཞན་ཡང་དྲག་པོའི་ཟོར་ལས་བྱད་གདོན་འགྲོལ་བ་སོགས་སྐུ་རིམ་མཛད་པ་རྣམས་ལ་མཚན་ལྟས་
ལེགས་པ་བྱུང་བ་ལྟར་གོང་གི་སྐུའང་གཞི་མེད་དུ་དྭངས། ཞེས་གསུངས། དེ་ལྟར་དུས་སྐབས་དེར་སྐུ་དངོས་སུ་བཞུགས་པའི་འཕགས་ཆེན་དམ་པའི་ས་ལ་བཞུགས་ཤིང་གནས་ལྔ་རིག་པའི་མ་ཧཱ་པཎྜི་ཏ་དྷརྨ་ཤྲཱིས་གསལ་པོར་བཀོད་པའི་ལོ་རྒྱུས་ཁུངས་ཡང་དག་དང་ལྡན་པའི་སྒྲུབ་བྱེད་བདེན་དཔང་ཡོད་བཞིན། ཁུངས་མེད་ལོ་རྒྱུས་སྨྲ་བའི་གང་ཟག་གི་རྗེས་འབྲངས་ཁ་ཅིག་རྫུན་རྒྱབ་རྫུན་གྱིས་བྱེད་པའི། གོང་ས་མཆོག་དང་། རིག་འཛིན་པད་ཕྲིན་སོགས་ཀྱིས་དོལ་རྒྱལ་དགང་གཟར་ཁར་བཀུགས་པ་གསང་ཕུའི་སྲུང་མ་བསེ་ཁྲབ་པའི་རྫུ་འཕྲུལ་གྱིས་ཐུགས་ཡེངས་ནས་ཤོར་ཟེར་བ་ནི་འཕགས་ཆེན་ཁྱད་པར་ཅན་དེ་རྣམས་ལ་སྐུར་འདེབས་ཀྱི་ལས་ཚབས་པོ་ཆེར་འགྱུར་ཏེ། དོལ་རྒྱལ་གཏེར་ཆེན་རིན་པོ་ཆེས་གནས་སྤར་མཛད་ཟིན་པའི་རྟིང་ལ་བླ་མ་གཞན་དག་ལ་དོལ་རྒྱལ་
དགུག་རྒྱུ་དང་ཤོར་རྒྱུ་ཞིག་ག་ལ་ཡོད། དེ་ལྟར་སྨྲ་བ་ནི་དཔེར་ན་མོ་གཤམ་བུ་བཀུགས་ནས་བཀྱིག་ཚེ་ཐག་པ་བཙན་གྱིས་བཅད ནས་བྲོས་ཤོར་ཟེར་བ་དང་ཅིས་མི་མཚུངས། དུས་དེར་གཏེར་ཆེན་འགྱུར་མེད་རྡོ་རྗེའི་ཆེ་བ་འདོན་བྱེད་དང་འདུལ་སྐལ་དུ་བབས་ཏེ་ཁོང་ཉིད་ཀྱིས་བསྒྲལ་བའི་ཚུལ་ཙམ་བསྟན་པ་མ་གཏོགས། བླ་སྤྲུལ་སྐྱེས་ཆེན་གཞན་རྣམས་ཀྱང་རྟོགས་པས་བདག་བསྒྲལ། ཐུགས་རྗེས་གཞན་སྒྲོལ་བའི་མཐུ་ནུས་མངའ་བ་ཤ་སྟག་ཡིན་སྟབས་དེ་དག་གིས་འདུལ་མ་ཐུབ་པ་ལྟ་བུར་ནམ་ཡང་བསམ་པར་མི་བྱའོ། །གོང་ས་ལྔ་པ་ཆེན་པོའི་རང་རྣམ་དང་། རྡོ་རྗེ་བྲག་རིག་འཛིན་པདྨ་ཕྲིན་ལས་༜སོགས་ཀྱི་རྣམ་ཐར་ཡི་གེ་ན་ཟུར་ཙམ་ཡང་བཤད་པའི་དོལ་རྒྱལ་ཤོར་ཟེར་བའི་ངག་རྒྱུན་དེ་མ་དག་རྫུན་དང་གཡོ་ཁྲམ་གྱི་སྐད་ཆ་ཡིན་པའི་མཚང་གསལ་པོ་
བརྡོལ་བ་འདི་ལ་རང་གཞན་བློ་དང་ལྡན་པ་ཀུན་གྱིས་དཔྱོད་དང་ཤེས་པར་འགྱུར་རོ། །འདི་ལ་དོགས་སེལ་ཅུང་ཟད་བརྗོད་པར་བྱ་སྟེ། གོང་དུ་བཤད་པ་ལྟར ཤུགས་ལྡན་ངེས་པར་དུ་གནས་སྤར་ཟིན་ན། དུས་དེ་ནས་བཟུང་སྟེ་ད་ཐུག་བར། རྒྱལ་ཆེན་ཞེས་བསྟེན་མཆོད་བྱས་ན་མགོན་སྐྱོབ་སྡོང་གྲོགས་བྱེད་པ་དང་། འགའ་རེ་ལ་དངོས་གཟུགས་སྟོན་པ་དང་། མིའི་ཁོག་ཏུ་ཞུགས་ནས་ལུང་སྟོན་པ་སོགས་ཡོད་ཕྱིར་ཇི་ལྟར་འགོག་ཅེ་ན། དེ་རྣམས་ནི་མཐོང་སྣང་སྒྲོ་བཏགས་ཀྱི་ལྷ་འདྲེ་ཞེས་བྱ་བ། གྲགས་རྒྱན་རང་ཉིད་འཆི་ཁར་སྲོག་དབུགས་ལེན་པ་པོ་ནག་ཕྱོགས་བདུད་རིགས་དྲི་ཟ་ཀུན་ཏུ་ཁྱབ་དང་། གནོད་སྦྱིན་རྟོགས་འདོད་དང་། འབྱུང་པོ་བ་ར་ཧི་ལ་སོགས་གསོན་བདུད་གཤིན་ལྕགས་རྣམས་གྲགས་རྒྱན་དུ་བརྫུས་པ་ཡིན་ཏེ། མཁས་གྲུབ་ཆེན་པོ་ཀརྨ་ཆགས་མེད་ཀྱིས། གཞན་
ཡང་དྲི་ཟ་ཀུན་ཏུ་ཁྱབ་བྱེད་དང་། །གནོད་སྦྱིན་རྟོགས་འདོད་འབྱུང་པོ་བ་ར་ཧི། །དེ་སོགས་ནག་ཕྱོགས་བདུད་རིགས་མང་པོ་ཡིས། །འཆི་ཁར་དབུགས་ལེན་ཕུང་པོ་བདག་ཏུ་འཛིན། །ཚེ་འདས་གཟུགས་བཟུང་གསོན་པོ་རྣམས་ལ་གནོད། །ཚེ་འདས་ལ་བསྔོས་ཟས་སྐོམ་བར་ནས་འཇོམས། །ཚེ་འདས་ཡིན་པར་བརྫུས་ནས་ཆ་འཕྲིན་བསྐུར། །དེ་འདྲ་དཔག་ཏུ་མེད་པ་ཡོད་པའི་ཚུལ། །ཚེ་འཕོ་ཇི་ལྟར་འགྱུར་བའི་མདོ་ལས་གསུངས། །དེ་དག་རྣམས་དང་ཕྱེ་བར་མ་བྱས་ན། །གསོན་པོ་རྣམས་ལ་གནོད་པས་གསོན་བདུད་ཟེར། །གཤིན་པོ་ཡར་འགྲོ་མི་བཅུག་བཅགས་པའི་ཕྱིར། །དེ་ལ་གསོན་༈ བདུད་གཤིན་ལྕགས་ཞེས་བྱའོ། །ཞེས་གསུངས་པ་ལྟར་དང་། གཞན་དུ་དོལ་རྒྱལ་གྱིས་ལོ་མང་རིང་སྡེ་པ་སོགས་གཞན་གྱི་སྲོག་དབུགས་འཕྲོགས་ནས་
འཁོར་དུ་བསྡུས་པའི་གསར་སྐྱེས་ཡི་དྭགས་མཁའ་ལ་རྒྱུ་བའི་གདོན་བགེགས་འབྱུང་པོའི་སྡེ་ཚན་དུ་གཏོགས་པ་རྣམས་ཡིན་པ་ལས་ཤུགས་ལྡན་དངོས་མིན་པ་ལོ་རྒྱུས་ཁུངས་ལྡན་གྱི་ཐོག་ནས་ར་འཕྲོད་དེ། དེ་ཡང་གཏེར་ཆེན་རིན་པོ་ཆེའི་ཞབས་དྲུང་དུ་ཡུན་རིང་བསྟེན་པའི་རྡོ་རྗེ་འཛིན་པ་ཆེན་པོ་དགེ་སློང་བློ་གསལ་རྒྱ་མཚོའི་རྣམ་པར་ཐར་པ་ལས་འཕྲོས་པའི་བྱུང་བ་བརྗོད་པ་གདུང་བའི་མུན་སེལ་ཞེས་པ། སླེ་ལུང་བཞད་པའི་རྡོ་རྗེ་བློ་གསལ་རྒྱ་མཚོའི་གསུང་སྒྲོས་འཐོར་བུ་རྣམས་མ་བཅོས་ལྷུག་པར་ཡི་གེར་འགོད་གནང་མཛད་པ་དེ་ཉིད་ལས། གཏེར་སྟོན་རིན་པོ་ཆེའི་བཀའ་ལས། དོལ་རྒྱལ་ཟེར་བ་འདི་གཟིམས་ཁང་གོང་གི་སྤྲུལ་སྐུ་རང་མིན་པ་འདྲ། ཡར་སྟོད་དུ་སྐྱེས་པའི་ཀརྨ་པའི་གྲྭ་པ་དམ་ལོག་གཞུང་རང་ལ་ཆེད་དུ་བསམ་ནས་སྨོན་ལམ་ལོག་པར་བཏབ་པ་ཞིག་ཡིན་པ་འདྲ།
ཞེས་དང་། ཡང་། ཤ་འུག་གཏེར་བྱོན་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ལུང་བྱང་ལས། འཕུང་བྱེད་འགོང་པོ་སྐྱབས་སུ་བསྟེན༔ ཞེས། དུས་ཕྱིས་དོལ་རྒྱལ་ལ་སྐྱབས་གནས་ཀྱི་མཐར་ཐུག་ཡིན་པའི་གནད་མ་རྟོགས་ཀྱང་། འཕྲལ་སྒང་ཞེད་དྲགས་ནས་བསྟན་སྲུང གི་གཙོ་བོར་བསྟེན་མཁན་མང་པོ་བྱུང་བ་དེ་ལ་དགོངས་པར་སྣང་ཞིང་། འགོང་པོའི་རྣམ་པར་བསྟན་པར་སོང་གཤིས་བསྟེན་ན་ཡང་ཕན་ཐོགས་མི་ཡོང་བའི་སྟེང་དུ་གནོད་རིགས་ཡིན་འདུག །ཅེས་དང་། ཡང་། ཆེད་གཏད་གདུག་རྩུབ་ཆེ་བའི་སྒོ་ནས་དགའ་ལྡན་ཕོ་བྲང་གི་ཆོས་སྲིད་ལ་གནོད་པ་བྱེད་མཁན་གྱི་རྣམ་པར་བསྟན་པ་ཡིན། ཞེས་དང་། ཡང་། ཀུན་མཁྱེན་ཆེན་པོ་དེ་ལྟ་བུས་བསྒྲལ་མི་ཐུབ་པ་ཡང་མི་སྲིད། བསྒྲལ་ཕྱིན་ཆད་རྣམ་ཤེས་དང་པོའི་སངས་རྒྱས་
ཀྱི་ཞིང་དུ་འཕང་བ་མ་གཏོགས། རང་གར་སྐྱེ་བོ་གཅིག་གིས་གཅིག་བསད་པ་ལྟ་བུ་བྱས་ནས་སྔ་མའི་སྲོག་དང་ཕྲལ་ཡང་། སླར་སྨོན་ལམ་བཏབ་ནས་གནོད་པ་བྱེད་མཁན་དུ་སྐྱེ་བ་ལེན་པ་དེ་འདྲ་ཅི་ལ་སྲིད་དེ་ཡང་དག་པའི་གནད་འགག་མ་རྟོགས་པའི་ལབ་ལབ་འབའ་ཞིག་གོ །ཞེས་དེ་དུས་ཀྱི་མཁས་གྲུབ་འགྲན་ཟླ་དང་བྲལ་བ་རྩོད་མེད་ཡོངས་གྲགས་དེ་དག་གིས་གསུངས་པའི་ལོ་རྒྱུས་འཁྲུལ་པའི་དྲི་མ་དང་བྲལ་བས་ཁ་ཚོན་ཡང་ནས་ཡང་དུ་བཅད་པ་འདིས་ཐེ་ཚོམ་གྱི་དཔྱངས་ཐག་ལ་རོ་འཇུ་བྱེད་དགོས་དོན་མ་མཆིས་ནའང་། ད་དུང་འདི་ལ་སྔོན་བྱུང་ལོ་རྒྱུས་བཤད་པའི་སྒོ་ནས་ངོ་སྤྲོད་གསལ་པོར་བགྱིད་ན། སྔོན་ཆད་བསམ་ཡས་སུ་མཁན་སློབ་ཆོས་གསུམ་དང་ལོ་པཎ་མང་པོ་ཞལ་བཞུགས་པའི་སྐབས་སུ་བློན་པོ་རྟ་ར་ཀླུ་གོང་ཤི་བ་ལ། དབུ་རྩེར་མཁན་སློབ་ལོ་པཎ་རྣམས་
ཀྱིས་ཞི་བ་རྡོར་དབྱིངས་རྣམ་སྣང་མངོན་བྱང་སོགས་གསང་སྔགས་ཕྱི་ནང་གི་དཀྱིལ་འཁོར་མང་པོ་ཞལ་ཕྱེས་ཏེ་རིགས་དྲུག་གནས་འདྲེན་སོགས་སྒྲིབ་སྦྱོང་གི་ཆོ་ག་མཛད་པ་ལ་རྒྱལ་པོ་ཐུགས་མཉེས། ཨཱརྱ་པ་ལོའི་གླིང་དུ་བོན་པོ་རྣམས་འཚོགས་ནས་གཡག་ལུག་ཤ་བ་སོགས་དངོས་སུ་བཤམས་པའི་བོན་གྱི་ཆོ་ག་བྱེད་པའི་སར་རྒྱལ་པོ་ཕེབས་ཚེ། རྟ་ར་ཀླུ་གོང་བང་སོའི་ནང་ནས་གསོན་པོར་ལངས་བྱུང་ནས་ཟས་ཟ་ཞིང་གཉེན་བཤེས་ ོ རྣམས་དང་གཏམ་སྨྲ་བར་བྱེད་པ་སོགས་བྱུང་བས། རྒྱལ་པོ་ཤིན་ཏུ་ཡ་མཚན་སྐྱེས་ནས། གུ་རུ་པདྨའི་དྲུང་དུ་ལོ་རྒྱུས་རྣམས་ཞུས་པ་ལ། གུ་རུའི་ཞལ་ནས། བཙད་པོ་ལེགས་པར་གསོན་ཅིག གཤིན་པོ་རྟ་ར་ཀླུ་གོང་ནི་ད་ལྟ་བྱོལ་སོང་གི་གནས་སུ་སྐྱེས་ཡོད། བོན་པོས་བཀུགས་པ་དེ་ནི་རྟ་ར་ཀླུ་གོང་གི་དབུགས་
ལེན་མཁན་སྒོ་རྒོད་གདོང་བཙན་བྱ་བ་དེ་ཡིན། གལ་ཏེ་ཡིད་མ་ཆེས་ན། སྔར་དབུ་རྩེའི་བར་ཁང་དུ་རྒྱལ་པོ་རྗེ་འབངས་རྣམས་ལ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་པདྨ་འབྱུང་གནས་ང་ཡིས་དབང་བསྐུར་ནས་རང་རང་སོ་སོ་ལ་གསང་བའི་མཚན་རེ་བཏགས་སྐབས། བློན་པོ་ཀླུ་གོང་ཁོ་པ་ཡང་དབང་གྲལ་དུ་ཡོད། པདྨ་ང་ཡི་ཤེལ་ཕྲེང་བརྒྱ་རྩ་འདི་ལྷ་སྲས་བཙན་པོའི་ཕྱག་ཏུ་བསྣམས་ནས་ཨཱརྱ་པ་ལོར་ཀླུ་གོང་གི་རྐེར་བསྐོན་ལ། པདྨས་བཏགས་པའི་གསང་་མཚན་དྲིས་ཤིག་དང་གསལ་བར་འགྱུར་རོ་ཞེས་བཀའ་སྩལ་པ་བཞིན་རྒྱལ་པོ་བོན་པོའི་མདུན་དུ་ཕེབས་ནས། བློན་པོ་ཀླུ་གོང་ལ་ཕྱག་ཕྲེང་བསྐོན་ནས་གསང་མཚན་ཇི་ཡིན་དྲིས་ཚེ། གཤིན་པོ་ན་རེ་སྔར་དབུ་རྩེའི་བར་ཁང་དུ་སློབ་དཔོན་ཆེན་པོས་རྡོ་རྗེ་དབྱིངས་ཀྱི་དབང་བསྐུར་མཛད་ཚེ། ངེད་རྣམས་རྒྱ་མཚོའི་ཕ་
མཐར་བསྐྲད་ནས་དབང་གྲལ་དུ་མེད་པས། གསང་མཚན་བཤད་རྒྱུ་ག་ནས་ཡོང་ཟེར། རྗེ་རྒྱལ་པོས། འོ་ན་ང་ཡི་བློན་པོ་གར སོང་ཞེས་དྲིས་པས། དེ་ན་རེ། ང་ནི་གཤིན་བོན་རྩ་རུ་འོངས་པ། དཔེར་ན་ཤན་པས་ལུག་ཤ་ཟ་བ་ལས་སེམས་ཅན་རྣམ་ཤེས་གར་སོང་ཤོད་རྒྱུ་མེད་པ་བཞིན། ཁྱེད་ཀྱི་བློན་པོའི་དབུགས་ཕྲོགས་པ་ལས། ཀླུ་གོང་གར་སོང་ང་ལ་བཤད་རྒྱུ་མེད། འདིར་ཀླུ་གོང་གི་དགེ་རྩར་བསྔོས་པའི་ཟས་སྐལ་འཕྲོག་པ་ལ་ ི འོངས་པ་བདག་ནི། བྱང་གི་སྒྲོ་རྒོད་གདོང་བཙན་བྱ་བ་དེ་ཡིན་ནོ་ཞེས་ཟེར་མ་ཐག །ཕུང་པོ་རུལ་དྲི་ང་བ་མནམ་པ་ཞིག་ཏུ་གྱུར་སོང་བས། རྒྱལ་པོ་ཐུགས་༉ ཆེས་ནས་གུ་རུའི་དྲུང་དུ་ཕེབས་ཏེ། རྒྱལ་བའི་སྲས་ཀྱི་བཀའ་བཞིན་བདེན་པ་བྱུང་ངོ་ཞེས་གསོལ་ཏོ། །དེ་ལ། ལོ་པཎ་ཐམས་ཅད་མགྲིན་དང་དབྱངས་
གཅིག་ཏུ། ཤཱཀྱ་སེང་གེ་བོད་དུ་མ་ཕེབས་ན༔ བོན་ལུགས་འདི་ཡིས་སེམས་ཅན་འཁོར་བར་འཁྲིད༔ གཤེད་འདྲེ་བོས་ནས་གཤིན་པོ་ཡིན་ཟེར་སྨྲ ཁྲི་སྲོང་ལྡེའུ་བཙན་ཆོས་ལ་ཡིད་ཆེས་ཤིང༔ བོན་ལ་ཐེ་ཚོམ་སྐྱེས་ནས་བསྡུར་དགོས་དགོངས༔ ཞེས་པའི་ལོ་རྒྱུས་འདི་ནི་ལྷོ་གཏེར་ཆེན་པོ་རིག་འཛིན་པདྨ་གླིང་པའི་གཏེར་བྱོན་ཨོ་རྒྱན་སྐྱེས་རབས་ཆོས་འབྱུང་མུན་སེལ་སྒྲོན་མེ་ལས་རྡོ་རྗེའི་ཚིག་གིས་བསྟན་པའི་དོན་ཡིན་པས་མི་ནག་པའི་ངག་རྒྱུན་རྫུན་གཤོབ་དང་མཚུངས་པའི་གནས་མེད་པ་ཡང་ཤེས་པར་བྱ་བ་གལ་ཆེའོ། །
ཕུང་འགོང་སྐྱབས་གནས་སུ་བཟུང་བ་རྣམས་བཀའ་གདམས་རིང་ལུགས་གཙང་མ་ལས་ཉམས་ཚུལ་བཤད་པ།
གསུམ་པ་ཕུང་འགོང་སྐྱབས་གནས་སུ་བཟུང་བ་རྣམས་བཀའ་གདམས་རིང་ལུགས་གཙང་མ་ལས་ཉམས་པའི་ཚུལ་བཤད་པ་ནི། སྤྱིར་ན་བོད་གངས་ཅན་གྱི་ལྗོངས་སུ་ད་ལྟ་ཡོངས་གྲགས་ཆོས་ལུགས་ཁག་རྣམ་པ་བཞི་ཡོད་པའི་ནང་གསེས། རི་བོ་
དགེ་ལུགས་པ་ནི་ཇོ་བོ་བཀའ་གདམས་པ་ལ་གསར་རྙིང་གཉིས་དབྱེ་བའི་གསར་མ་དེ་ལ་ངོས་འཛིན་པ་ལས་མེད་ཅིང་། དེ་དག་གི་དགོངས་པའི་ཞེ་ཕུག་ནི་མདོ་སྔགས་ཀྱི་ལམ་ཐམས་ཅད་སྐྱེས་བུ་གསུམ་གྱི་ལམ་དུ་བསྡུ་བར་མཛད་པའི་གཞུང་ཇོ་བོ་རྗེའི་ལམ་སྒྲོན་ལ་ཁུངས་སུ་བྱས་པའི་བྱང་ཆུབ་ལམ་གྱི་རིམ་པ་ཆེ་ཆུང་རྣམས་ཡིན། དེ་ལ་རྗེ་བླ་མ་ཙོང་ཁ་པ་ཆེན་པོས་ཆེ་བ་བཞི་ལྡན་གྱི་ཁོག་ཏུ་བཀྲལ་ནའང་། དེའི་རྗེས་འཇུག་རྟོག་གེར་བརྟེན་པ་ཁ་ཅིག་ནི་དེང་སང་གོ་བ་ལྡོག་ཕྱོགས་སུ་ལེན་པར་སྣང་བ་ནི་རྗེ་བདག་ཉིད་ཆེན་པོའི་བསྟན་པ་ཤིན་ཏུ་སྙིགས་མར་གྱུར་པའི་དབང་གིས་བྱུང་བར་གོར་མ་ཆག །དེ་ཡང་ཇོ་འབྲོམ་ཡབ་སྲས་དང་བཀའ་གདམས་སྐུ་མཆེད་རྣམས་ནི་བཀའ་གདམས་ལྷ་བཞི་ཙམ་ལ་བསྟེན་པ་མ་གཏོགས་ཆོས་སྐྱོང་གྲགས་ཆེ་བ་སྐུ་ལྔ་དང་།
དམ་ཅན་རྡོ་རྗེ་ལེགས་པ་སོགས་བོད་ཀྱི་འཇིག་རྟེན་པའི་ལྷ་སྲུང་གང་ལའང་བསྟེན་རིགས་སུ་མི་འདུག་སྟེ། བཀའ་གདམས་གླེགས་བམ་ཞལ་གཟིགས་ཀྱི་ཚོམ་ལས། རྒྱལ་བུ་འབྲོམ་གྱིས། དབང་གི་རྒྱལ་པེ་ང་ལ་གསོན། །གང་དག་རྒྱུན་དུ་མཆོད་བྱས་ནས། །འཆི་ཁར་དབུགས་ནི་ལེན་པ་མཐོང་། །དེ་འདྲའི་ལྷ་ངན་འདྲེ་བས་རྩོག །མཆོད་འཕྲོ་ཉིད་ནས་བརྡུང་བར་རིགས། །དེ་བས་ཕྱི་མ་ངན་འགྲོར་འདྲེན། །མཆོད་བསྟོད་ནོངས་པ་གཅིག་གིས་འཇོམས། །རྡོར་ལེགས་པེ་དཀར་ལ་སོགས་པ། །དོན་མེད་འགོང་པོས་དགོས་པ་མེད། །ཅེས་སྐྱོན་ཡོན་རྒྱུ་མཚན་དང་བཅས་པ་གསལ་བར་གསུངས་པ་བཞིན་དུ། ཕྱིས་བྱུང་དགེ་ལྡན་པའི་སྐྱེས་ཆེན་གྲགས་ཆེ་བ་པཎ་ཆེན་བློ་བཟང་ཆོས་རྒྱན་སྐུ་ཕྲེང་རིམ་བྱོན་རྣམས་དང་། ཕུར་ལྕོགས་ངག་དབང་བྱམས་པ། ཞོགས་དོན་ཡོད་མཁས་
གྲུབ། ཡོངས་འཛིན་ཡེ་ཤེས་རྒྱལ་མཚན། རྒྱལ་བ་བསྐལ་བཟང་རྒྱ་མཚོ་སྐུ་ཕྲེང་ན་རིམ་རྣམས་དང་། རྭ་སྒྲེང་ཁྲི་ཆེན་ངག དབང་མཆོག་ལྡན། འབྲས་སྤུངས་འཇམ་དབྱངས་བཞད་པ། ལྕང་སྐྱ་རོལ་པའི་རྡོ་རྗེ། སྒོ་མང་བླ་མ་བློ་བཟང་དམ་ཆོས། སེ་ར་བ་སྒོམ་སྡེ་ནམ་མཁའ་རྒྱལ་མཚན། ཁྲི་ཆེན་བསྟན་པ་རབ་རྒྱས་སོགས། དགེ་ལྡན་པའི་བསྟན་འཛིན་བཟང་ལ་མང་བ་དེ་རྣམས་ནི་སྐྱེས་བུ་གསུམ་གྱི་ཆོས་སྐྱོང་བའི་སྲུང་མ། དམ་ཅན་ ི ཆོས་རྒྱལ། རྒྱལ་ཆེན་རྣམ་ཐོས་སྲས། མགོན་པོ་ཕྱག་དྲུག་པ་གསུམ་གྱི་གཙོས་རྒྱལ་བའི་བསྟན་པ་རིས་སུ་མ་ཆད་པ་སྲུང་ཞིང་ཡེ་ཤེས་ཀྱི་སྤྱན་མངའ་བ་རྣམས་བསྟེན་པར་མཛད་པ་ལས། འཁུ་ལྡོག་གདུག་རྩུབ་ཕྲག་དོག་ཅན་གྱི་འབྱུང་པོ་གསར་སྐྱེས་ཉི་ཚེ་བ་ཕན་ལས་གནོད་པ་མང་བ་སྟེར་མཁན་རིགས་མཆོད་
ཅིང་སྒྲུབ་པའི་ལོ་རྒྱུས་མི་འདུག་ཅིང་དེ་རྣམས་ཀྱི་གསུང་འབུམ་ན་བསྟན་སྲུང་དབང་པོ་རྣམས་ཀྱི་མཚན་སྨྲོས་གྲས་སུའང་ཤུགས་ལྡན་མ་འཁོད་པ་དང་། ལྷག་པར་དགེ་ལྡན་པའི་གདན་ས་ཆེ་ཤོས་སེར་འབྲས་དགའ་གསུམ། བཀྲ་ཤིས་ལྷུན་པོ། མངའ་རིས་གྲྭ་ཚང་། དྭགས་པོ་བཤད་སྒྲུབ་གླིང་། རྒྱལ་མེ་ཏོག་ཐང་། རྒྱུད་གྲྭ་སྟོད་སྨད། བྱང་རྭ་སྒྲེང་གི་གདན་ས་རྣམས་སུ་རྒྱལ་པོ་ཤུགས་ལྡན་གྱི་མགོན་ཁང་གཏན་འཇགས་བཞེངས་པ་མེད་ཅིང་གྲྭ་ཚང་དེ་དག་གིས་སྤྱི་ཁྱབ་ཏུ་བསྟེན་པར་མི་མཛད་པ་ལ་དཔགས་ན། དེང་སང་དགེ་ལྡན་པ་ཕལ་མོ་ཆེས་ཤུགས་ལྡན་སྲུང་མའི་གཙོ་བོར་འཛིན་པ་འདི་ནི་བཀའ་གདམས་གསར་རྙིང་གཉིས་ཀའི་རིང་ལུགས་གཙང་མ་དང་ཡོངས་སུ་འགལ་བར་མཐོང་། དེ་འདྲ་ལ་དགོངས་ནས་སྒམ་པོ་པ་ཨོ་རྒྱན་འགྲོ་འདུལ་གླིང་པའི་མ་འོངས་ལུང་བསྟན་ལས།
གསར་སྐྱེས་རྒྱལ་འགོང་དགྲ་ལྷའི་ཚུལ་དུ་མཆོདཿ༔ ཅེས་བོད་ཁམས་དུས་འགྱུར་ཁུག་པའི་རྟགས་སུ་གསུངས་པ་དང་ཡང་འགྲིགས་ཤིང་། དགའ་ལྡན་བསྟན་པའི་གསལ་བྱེད་ཆེན་པོ་ལྕང་སྐྱ་རོལ་པའི་རྡོ་རྗེའི་རྣམ་ཐར་དགེ་ལྡན་བསྟན་པའི་མཛེས་རྒྱན་ལས། རྨ་ཆེན་གྱི་ལྷ་ཐོའི་ཐད་དུ་ཕེབས་ནས། རྗེ་བླ་མ་ཡབ་སྲས་ཀྱིས་འཇིག་རྟེན་པའི་ལྷ་སྲུང་བསྟེན་པར་མི་མཛད་པས། ཞེས་དང་། ཡང་། སྔ་མ་དགའ་ལྡན་ཁྲི་པ་འགའ་ཞིག་གིས་དོལ་རྒྱལ་བསྟེན་པས་བཀྲ་མི་ཤིས་པ་བྱུང་བར་ཁྲི་ཆེན་རྡོ་རྗེ་འཆང་གིས་ཁོ་ཡི་ལྷ་རྟེན་བཤིག་ཅིང་དགོད་པ་ནས་བསྐྲད་པའི་ལོ་རྒྱུས་སོགས་ཞིབ་ཏུ་གསུངས་ཞེས་དང་། པཎ་ཆེན་སྐུ་ཕྲེང་ལྔ་པ་བསྟན་པའི་དབང་ཕྱུག་གི་རྣམ་ཐར་ལས། ཆུ་བྱ་ཟླ་བ་དྲུག་པའི་ཚེས་དྲུག་ཉིན་གཅུང་སྐུ་ཞབས་དང་སྐུ་བཅར་གསོལ་དཔོན་
བཅས་པར་བཀའ་ཕེབས་སུ། བདེ་ཆེན་ཕོ་བྲང་གི་རྩེའི་ཡང་ཐོག་གི་གཟིམས་ཆུང་དུ་དེང་སང་དོལ་རྒྱལ་གྱི་ཆོ་འཕྲུལ་སྣ་ཚོགས་ཤིག་སྟོན་ཀྱིན་འདུག་པས། ཚེས་དགུ་ཉིན་གཟིམས་ཆུང་བཤིག་རལ་དང་བཅས་བསྡུ་དགོས་ཕེབས་ཞེས་གསུངས་པ་དང་། རྒྱལ་ཆེན་ཤུགས་ལྡན་གྱི་སྐུ་ཐང་བཀྲས་ལྷུན་གཟིམས་ཆུང་གི་ཐེམ་པའི་འོག་ཏུ་མནན་པར་མཛད་པའི་ལོ་རྒྱུས་ཀྱང་མཆིས་པ་འདི་དག་ལ་དགོས་པ་ཆེན་པོ་དང་ལྡན་ཞིང་། དོན་དུ་རྒྱལ་སྲས་ཐོགས་མེད་བཟང་པོས། རང་ཡང་འཁོར་བའི་བཙོན་རར་བཅིངས་པ་ཡི། །འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། དེ་ཕྱིར་གང་ལ་བསྐྱབ་ན་མི་བསླུ་བའི། །དཀོན་མཆོག་སྐྱབས་འགྲོ་རྒྱལ་སྲས་ལག་ལེན་ཡིན། །ཞེས་གསུངས་པས་མཆོད་ཡུལ་ལོག་པ་སྡུག་འདྲེ་ལ་མཆོད་བསྟོད་བྱེད་པར་དགའ་བ་རྣམས་རང་ཉིད་ཕུང་ལ་སྦྱོར་བའི་སྔ་ལྟས་
ཡིན་ཏེ། ཇི་སྐད་དུ། མཆོད་པ་དམ་པ་ལ་བྱ་ཡི། །དམན་པ་མཆོད་ན་ཉེས་པའི་གཞི། །འོ་མ་སྐྱེས་བུའི་བདུད་རྩི་སྟེ། །སྦྲུལ་ལ་བྱིན་ན་དུག་འཕེལ་ལོ། །ཞེས་གསུངས་པ་ལྟར་ལགས་ན། མིག་ལྡན་གཡང་སར་མཆོང་པ་ཇི་ལྟར་རིགས། ལྷག་པར་ཡང་ནང་པའི་ཁྱུར་ཚུད་ཅིང་སྡོམ་པ་མཐའ་དག་གི་རྟེན་གཞི་ཁྱིམ་པ་དགེ་བསྙེན་ཡན་ཆད་ཀྱིས་སྐྱབས་སུ་འགྲོ་བའི་དགག་པའི་བསླབ་བྱ་གསུམ་ནི། མདོ་སྡེ་མྱང་འདས་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ནི་ལྷ་གཞན་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་པ་མིན། །ཞེས་གསུངས་པས་སངས་རྒྱས་ལ་
སྐྱབས་སུ་སོང་བས་རང་ཉིད་འཁོར་བ་ན་འཁོར་བ་འཇིག་རྟེན་པའི་ལྷ་ཆེན་པོ་དང་། ཁྱབ་འཇུག་ལ་སོགས་པར་ཡང་སྐྱབས་སུ་མི་འཛིན་ན། མཁའ་ལ་རྒྱུ་བའི་ཡི་དྭགས་ཀྱི་སྡེ་ཚན་དོལ་རྒྱལ་ལྟ་བུ་སྨྲོས་ཅི་དགོས། དེ་ཡང་མཁའ་ལ་རྒྱུ་བའི་ཡི་དྭགས་ནི། ལུས་སྲུལ་པོ་དང་། རོ་ལངས་དང་། སྨྱོ་བྱེད་དང་། རྗེད་བྱེད་དང་། གནོད་སྦྱིན་དང་། ཤ་ཟ་དང་། གྲིབ་གནོན་དང་། སྐེམ་བྱེད་དང་། ནམ་གྲུ་དང་། བྱད་གདོན་དང་། སྲིན་པོ་དང་། བཙན་དང་། རྒྱལ་པོ་ལ་སོགས་འབྱུང་པོའི་རིགས་ཅན་མཐའ་དག་སྟེ། འདི་དག་ལས་ཀྱི་རྫུ་འཕྲུལ་དང་ལྡན་ཞིང་ཁ་ཅིག་སྔོན་གྱི་དགེ་བ་ཕྲ་མོས་ལོངས་སྤྱོད་དང་ལྡན་ཡང་། བརྟན་ཅིང་དུས་ཚིགས་ལོག་པ་དང་། ཡུལ་ཡིད་དུ་མི་འོང་བ་དང་། འཚེ་བ་དང་། ཉམ་ང་བ་དང་། བཀྲེས་སྐོམ་དང་། ཚེ་དང་མདངས་འཕྲོག་པ་ལ་
བརྩོན་ཞིང་ཕ་རོལ་འབའ་ཞིག་ལ་གནོད་པ་བསྒྲུབ་པས་སླད་ཀྱི་སྡུག་བསྔལ་འདུ་བྱེད་པ་དང་། རྫུ་འཕྲུལ་གྱིས་སོང་ཡང་ལམ་འཕྲང་དུ་བསྲུང་བར་སྣང་བ་དང་། ཆད་པས་འཚེ་བ་དང་། གང་དུ་སྙིང་ཉེ་ནས་ཕྱིན་པ་དེ་དག་ལ་རང་ཉིད་སྔོན་འཆི་ཀའི་གནད་འཆད་པའི་ཚོར་བ་འཕོ་བས་རིག་སྔགས་དང་ཐུན་གྱི་རང་ཡང་གནད་འཆད་པའི་སྡུག་བསྔལ་གྱི་ཚོར་བ་དེས་རྟག་པར་གདུང་བས་དེ་ནད་པ་གཞན་ལ་སྤོ་བའི་བསམ་སྦྱོར་ངན་པ་དང་། གཞན་ཡང་ཁྱི་དང་བྱ་ལ་སོགས་པ་ཡང་ཡོད་པར་བཤད་པས་སྡུག་བསྔལ་དང་ལྡན་པ་དེ་ལ་གཤིན་རྗེའི་འཇིག་རྟེན་དུ་སོང་བ་ཞེས་བྱ་བས་བློ་གྲོས་ཅན་རྣམས་༔ སྐྱབས་འགྲོའི་བསླབ་པ་ལས་ཉམས་པའི་ཕུང་འགོང་ལ་བློ་ཕུག་གཏོད་པ་ནི་བཀའ་གདམས་པའི་རིང་ལུགས་ལས་ཉམས་ཤིང་ནོར་བུ་དང་མཆིང་བུ་ནོར་བའི་
ལམ་ངན་དེ་འདྲ་རྒྱང་རིང་དུ་དོར་ནས་ཆོས་རྒྱུད་གཙང་སིང་ངེ་བ་རེ་ཅི་ནས་གལ་ཆེ་བ་ལགས་སོ། །
ཕྱོགས་སྔའི་འཆལ་གཏམ་གྱི་ཚིག་དོན་ནོར་བའི་སྐྱོན་མཚང་རེ་རེ་ནས་སྨོས་པ།
ད་ནི་རྩ་བའི་གསུམ་པ་ཕྱོགས་སྔའི་འཆལ་གཏམ་གྱི་ཚིག་དོན་ནོར་བའི་སྐྱོན་མཚང་རེ་རེ་ནས་སྨྲོས་པ་ལ། ཕྱོགས་སྔའི་དཔེ་ངན་གྱི་ཚིག་སྣ་ལྷུ་ཚང་དཀྱུས་སུ་མ་བཀོད་ན། འབེན་མ་མཐོང་བའི་མདའ་འཕེན་ལྟར། ལན་ཐེབས་དང་མ་ཐེབས་ཀུན་གྱིས་རྟོགས་པར་མི་འགྱུར་བ་དེས་ན། འདིར་ཡིག་ཚོགས་ལ་མ་འཛེམ་པར་ཛེ་སྨད་ཀྱི་ཀླན་ཀའི་དེབ་ཚང་བར་འགོད་པའི་ཞར་ལ། ཐད་ཀ་ཐད་ཀའི་ཚིག་དོན་གྱི་སྐྱོན་མཚང་རྣམས་འཐད་ལྡན་གྱི་རིགས་པས་དགག་པར་བགྱི་བ་ལ་ཐོག་མར་ཁོ་པའི་དཔེ་དེབ་དེའི་མིང་ལ་འདི་ལྟར། ༼མཐུ་དང་སྟོབས་ཀྱིས་ཆེ་བའི་བསྟན་སྲུང་ཆེན་པོ་རྡོ་རྗེ་ཤུགས་ལྡན་རྩལ་གྱི་བྱུང་བ་བརྗོད་པ་ཕ་རྒོད་བླ་མའི་ཞལ་གྱི་བདུད་རྩིའི་ཆུ་ཁུར་བརྩེགས་ཤིང་འཇིགས་རུང་
གློག་ཞགས་འགྱུ་བའི་སྤྲིན་ནག་འཁྲུགས་པའི་ང་རོ་ཞེས་བྱ་བ་བཞུགས་སོ༽ཞེས་པ་ལ། ཐོག་མར་བསྟན་བཅོས་ཀྱི་མིང་སྨྲོས་པ་ནས་འགལ་འདུའི་འགོ་འཛུགས་པ་ནི་མི་མཁས་པའི་ནང་ཆ་སྟོན་པ་སྟེ། ཁྱོད་ཀྱི་བྱུང་བ་བརྗོད་པ་འདི་ལ་ཕ་བླ་མའི་ཞལ་གྱི་བདུད་རྩི་ཞེས་བརྗོད་རིན་ཆོག་པའི་ཎྞཱརང་གཞན་གྱི་རྒྱུད་འདུལ་བ་ལ་ཕན་པའི་ཆོས་ཀྱི་བདུད་རྩི་མདོ་སྔགས་ཀྱི་ཉམས་ལེན་གཅིག་ཀྱང་མི་འདུག་པས་དོན་དང་འགལ། རྗོད་བྱེད་བརྡ་ལ་མ་བྱང་ནས། ཆུ་ཁུར་དང་། སྤྲིན་ནག་ཅེས་དོན་གཅིག་ལ་ཚིག་གཉིས་ཟློས་པ་བྱུང་བས་ཚིག་ལ་འགལ་བ་བྱུང་བ་སྟེ་ཚིག་དོན་གཉིས་ཀའི་ཆ་ནས་འགལ་ལོ། ཡང་མཆོད་བརྗོད་དང་དམ་བཅའི་ཚིག ༼བླ་མ་དང་དུས་དགྲའི་དབང་པོ་དབྱེར་མ་མཆིས་པའི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ།
མཉམ་རྗེས་མི་ཕྱེད་རིག་པའི་སྣང་བ་ཆེ། །ཡེ་ཤེས་འཁོར་ལོར་འཕྲུལ་པའི་ཚིག་གི་བདག །བསྔགས་ཕྱིར་གསེར་གྱི་འཕྲིན་ཡིག་འདི་བཀླགས་ན། །ངག་ཡིད་རིག་པའི་གཏེར་གྱི་འདོད་འཇོར་མཛོད། །བློ་གཏེར་རིག་པའི་ཡེ་ཤེས་ཐིག་ལེ་དྷི་ཡིག་དམར་སེར་སྣང་བྱེད་ཉི་མར་བཞུ་བའི་ཁམས། །གཙུག་ཏོར་རྩེ་ཡང་གསེར་བཟང་མདོག་ཏུ་ཅོད་པན་ཟོལ་གྱིས་མཐོ་བར་གྲགས་པའི་འཛུམ་ཟེར་གྱིས། །འཁྲུལ་སེལ་ལེགས་བཤད་དབྱར་སྐྱེས་གདངས་སུ་སྨྲ་ངན་གཞིལ་བ་དག་གཙང་ཚངས་པའི་སྲིད་ཀྱི་སྲོལ། །འབྱེད་ལ་རིང་ནས་རྒྱལ་ཀུན་མདུན་སར་ཟབ་ཡངས་ཐུགས་ནི་བརྟན་པོར་བཟུང་བའི་དཔལ་དེ་བསྔགས། །ཀུན་རྨོངས་མུན་པའི་བློ་ཡི་ཁམས་ཀྱང་བཟང་པོའི་ལམ་དུ་ཡུད་ཀྱིས་བསྲེལ་བའི་ཡེ་ཤེས་མཆོག་གི་སྣང་བ་ཆེ། །རིག་པའི་རྣོ་མྱུར་བསྟན་ཡོད་སྒྱ་མའི་སྣང་བརྙན་
འཛིན་ལ་ཟུང་འཇུག་ནོར་བུའི་ཕྲེང་བར་བསྟར་བའི་དཔལ་གྱི་མཆོག །ཆོས་འདུལ་གཏེར་གྱི་བཅས་པའི་རྒྱ་ལས་གཡོ་བ་མེད་ཀྱང་ཁ་སྦྱོར་ཡང་དག་བདེ་སྟོང་མཆོག་གི་བསམ་འཕེལ་ནོར། །སྙིང་པོར་སྙེམས་པའི་མཚོ་སྐྱེས་རྡོ་རྗེ་བྱང་ཆུབ་བར་དུ་སྙིང་ལ་རྩེན་པའི་རྩེ་དགའི་གར་གྱིས་སྒྱུ སྐྱོང་གྱུར་ཅིག །གདུག་ཅན་སྙིང་དང་བདུད་སྡེའི་སྲོག་ལ་མཚོན་ཆར་རྩུབ་པའི་འཇིགས་རུང་དྲག་པོའི་མེ་དཔུང་ཀློང་། །ཡོངས་དག་ཡེ་ཤེས་བདུད་རྩིས་འཚོ་བའི་དབྱིངས་རིག་མི་ཕྱེད་མཁའ་ཁམས་རྡོ་རྗེ་གཟུགས་ཆེ་བས། །འཆལ་སྤྱོད་ར་རིའི་དྲི་མས་ནོག་པའི་དམ་པའི་ཟླ་བའང་ཕམ་དུ་བགྱིད་ལ་ཤུགས་འཆང་ཞིང་། །སྐྱེ་རྒུའི་སྲོག་གི་གཤེད་དུ་ཁྲོས་པའི་སྒྲ་གཅན་འདི་ཀོ་དགེ་ལྡན་བསྟན་པའི་དགྲ་ལྷར་བསྔགས། །སྐྱེས་བུའི་མཆོག་ཅིག་སྡང་བའི་དགྲ་ལ་དྲག་
པོར་ཁྲོས་པའི་ངོ་མཚར་གཏམ་སྙན་གཙང་རྒོད་བླ་མའི་གསུང་གི་མཛོད། །དམ་ཅན་རྒྱ་མཚོ་དགྱེས་པ་བསྐྱེད་པའི་རོལ་མོའི་སྒྲས་ཀྱང་གསལ་བར་མ་གྱུར་ཡ་མཚན་བྱུང་བ་གླེང་བའི་དུང་། །མ་ཉམས་གཙང་མའི་ཆོས་ཀྱི་སྲོག་ལ་འཆལ་སྤྱོད་རིམ་གྱི་འཚེ་བ་གཞིལ་སླད་རྣམ་དཔྱོད་དབུགས་ཀྱིས་ཉེར་བསྐུལ་ན། གྲོགས་དག་འདི་ན་གཟུ་བོའི་བློ་གྲོས་འདབ་སྟོང་ཕྱེས་ལ་བག་ཡོད་ཁྲིམས་ཀྱིས་བསྟན་སྲུང་དགྱེས་པ་བསྐྱེད་པར་རིགས། ༽ ཞེས་བཀོད་པའི་སྐྱོན་བརྗོད་པ། རིག་པའི་སྣང་བ་ཞེས་པ་དང་། རིག་པའི་ཡེ་ཤེས། དབྱིངས་རིག་ཅེས་པ་རྣམས་ནི་རྫོགས་ཆེན་གྱི་ཆོས་སྐད་ཡིན་ཕྱིར། ཁྱེད་ཀྱང་དགའ་ལྡན་བསྟན་ལ་ཪྙིང་ཆོས་ཀྱི་བསྲེ་བསླད་འཇུག་མཁན་དུ་ཅིས་མ་སོང་། ཡང་སྣང་བྱེད་ཉི་མར་བཞུ་བའི་ཁམས་ཞེས་པ་སྣང་བྱེད་དང་ཉི་མ་གཉིས་ཟློས་སྐྱོན། ཡང་ཡུད་ཀྱིས་
བསྲེལ་ཞེས་པ་འཆང་བ་ལ་འཇུག་ཀྱང་ཁྱོད་ཀྱིས་བསྒྱུར་བའི་དོན་དུ་གོ་བ་བླངས་པ་འཁྲུལ། ཡང་རིག་པའི་རྣོ་མྱུར་བསྟན་ཡོད་ཅེས་རིག་པ་བསྟན་ཡོད་ཐོགས་བཅས་ཀྱི་གཟུགས་སུ་བཀོད་པ་གཞུང་ལུགས་སྨྲ་བའི་མདུན་སར་ངོ་ཚ་བའི་ཚིག་ཏུ་སྣང་་། ཡང་མཚོ་སྐྱེས་རྡོ་རྗེ་བྱང་ཆུབ་བར་དུ་སྙིང་ལ་རྩེན་ཞེས་ཀླད་དུ་ཨོ་རྒྱན་པདྨ་མཆོད་བརྗོད་ཀྱི་ཡུལ་དུ་བྱེད་པ་དང་། དཀྱུས་སུ་དེའི་གསུང་རྙིང་མ་བའི་ཆོས་རྣམས་སངས་རྒྱས་བསྟན་པ་ལས་ལོགས་སུ་བཀར་བ་གཉིས་དངོས་འགལ་དུ་སོང་བའི་སྐྱོན་ཇི་ལྟར་སེལ། ཡང་འཆལ་སྤྱོད་ར་རིའི་དྲི་མས་ནོག་པའི་དམ་པའི་ཟླ་བའང་ཕམ་དུ་བགྱིད་ལ་ཤུགས་འཆང་ཞིང་། ཞེས་པ་དམ་པའི་སྐྱེས་བུ་ཡིན་པར་ཁས་བླངས་ཏེ། དེ་ཉིད་ཆོས་སྐྱོང་གི་མཐུ་རྩལ་གྱིས་ཕམ་པར་བྱ་བའི་ཡུལ་དང་། འཆལ་སྤྱོད་ཀྱི་དྲི་
མས་ནོག་པར་བཤད་པ་ཡང་རྒོད་བྲོ་བའི་ཚིག་ཏུ་བས། ཡང་སྐྱེས་བུའི་མཆོག་ཅིག་སྡང་བའང་དགྲ་ལ་དྲག་པོར་ཁྲོས་པའི་ངོ་མཚར་གཏམ་སྙན་ཞེས་པ་འདི་ཡང་མི་འཐད་དེ། སྐྱེས་བུའི་མཆོག་དེ་ཐེག་ཆེན་བྱང་ཆུབ་སེམས་དཔའ་ལ་བཞག་ན་དགྲ་སྡང་བ་ལ་སླར་བུ་བཞིན་བལྟས་ཏེ་བྱམས་དང་སྙིང་རྗེའི་རྟེན་དུ་བྱེད་པ་ལས་ཁྲོ་བ་ག་ལ་རིགས། དམན་ལམ་པ་ཡིན་ཀྱང་གཤེ་བ་ལ་སླར་མི་གཤེ་ཁྲོ་བ་ལ་སླར་མི་ཁྲོ་བ་སོགས་དགེ་སྦྱོང་གི་ཆོས་བཞི་ལྷུར་ལེན་དགོས་པ་ལ་ཁྱེད་ལ ཀྱིས་དེ་ལས་ལྡོག་སྟེ་དགྲ་ལ་སྡང་བ་ཉིད་ངོ་མཚར་དུ་བརྩི་ན། ཆགས་སྡང་ནི་ཉོན་མོངས་རགས་པ་ཡིན་ཅིང་དེ་རྒྱུད་ལྡན་གྱི་གང་ཟག་སྐྱེ་བོ་ཕལ་པའི་དགྲ འདུལ་གཉེན་སྐྱོང་ལས་འཕགས་ཆོས་མི་འགྲུབ་བོ། །ཡང་ཛེ་སྨད་ན་རེ། ༼དེ་ལ་འདིར་རྒྱལ་བ་ཀུན་གྱི་ཡེ་ཤེས་ཀྱི་རོལ་པ་སྣང་སྲིད་དྲེགས་པ་ཡོངས་ཀྱི་རྗེ་
བོར་ཤར་བའི་འཇམ་དཔལ་དྲག་པོ། ཞྭ་སེར་ཅོད་པཎ་འཆང་བའི་སྲོལ་འཛིན་བུ་བཞིན་སྐྱོང་བའི་བྱ་ར་མཁན། ལྟ་གྲུབ་འཆལ་བར་སྤྱོད་པ་དང་ཞིང་བཅུའི་དགྲ་ལ་དྲག་པོའི་ཆད་པ་ཐོག་ལྟར་འབེབས་པ། ཕྱོགས་བཅུར་རྒྱུ་བའི་གདུག་ཅན་ཚར་གཅོད་པས་ཁྲག་འཐུང་ཁྲོ་བོ་ཀུན་གྱི་གཙོ་བོ། དམར་ནག་མེ་ལྕེ་ཕྲེང་བའི་ཀློང་ན་ནད་དང་དུག་གི་འཚུབ་མ་དུས་མཐའི་རླུང་ནག་ལྟར་གཡོ་ཞིང་དུག་གསུམ་གཅོང་ནད་གསོ་བའི་སྨན་པ། དམ་ལྡན་རྣལ་འབྱོར་སྐྱོང་བའི་དགྲ་ལྷ། རིག་འཛིན་སྟོང་གི་སྲོག་ཤིང་། བདུད་འདུལ་བཤན་པ་ཡོངས་ཀྱི་དམག་དཔོན། ལྷ་མཆོག་སྤྲུལ་པའི་ཆོས་སྐྱོང་རྒྱལ་ཆེན་རྡོ་རྗེ་༈ ཤུགས་ལྡན་རྩལ་གྱི་གསང་བ་གསུམ་གྱི་རྣམ་པར་ཐར་པ་མཐའ་དག་པའི་ཚུལ་རྒྱས་པ་ནི་ཟུང་འཇུག་གྲུབ་པའི་དཔའ་བོ་༧ཕ་བཀའ་དྲིན་མཚུངས་མེད་སྐྱབས་
རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོ་དོན་གྱི་སླད་དུ་མཚན་ནས་སྨྲོས་ཏེ་རྗེ་བཙུན་བློ་བཟང་ཡེ་ཤེས་བསྟན་འཛིན་རྒྱ་མཚོ་དཔལ་བཟང་པོས་བརྩམས་པར་མཛད་པའི། དགེ་ལྡན་བསྟན་པ་བསྲུང་བའི་ལྷ་མཆོག་སྤྲུལ་པའི་ཆོས་རྒྱལ་ཆེན་པོ་རྡོ་རྗེ་ཤུགས་ལྡན་རྩལ་གྱི་གསང་གསུམ་རྨད་དུ་བྱུང་བའི་རྟོགས་པ་བརྗོད་པའི་གཏམ་དུ་བྱ་བ་དམ་ཅན་རྒྱ་མཚོ་དགྱེས་པའི་རོལ་མོ་ཞེས་བྱ་བ་ལས་ཤེས་པར་བྱ་ཞིང་། འདིར་དེ་ཉིད་དུ་མ་གསལ་བའི་རིགས་ཁ་སྐོང་བའི་སྲི་ཞུའི་ཚུལ་གྱིས་བརྗོད་པར་བྱ་སྟེ༽ཞེས་མངོན་པའི་ང་རྒྱལ་གྱིས་ཡ་ང་བག་ཚ་མེད་པར་བཀོད་པ་ལ་ལན་བརྗོད་པར་བྱ་སྟེ། དེབ་འདིའི་གླེང་གཞི་ན་ཕ་རྒོད་བླ་མ་མི་སློབ་ཟུང་འཇུག་གྲུབ་པར་བཤད་འདུག་པ་རང་གི་མོས་རྟེན་དུ་རུང་བ་ལས། སྤྱིར་བཏང་དེང་སང་སྐྱེ་བོ་ཀུན་གྱི་རྣ་བར་ཤོང་བའི་སྐད་ཆ་མ་ཡིན་པས་འདི་ལ་མདོ་
རྒྱུད་ལམ་དང་འབྲས་བུའི་དགོངས་པ་དང་སྦྱར་ནས་དྲི་བ་བྱུང་ན་ཁྱོད་ཀྱི་སྨྲ་བྱེད་ཐུང་ངུར་ཇི་ལྟར་མི་འགྱུར། དེས་ན་ཟུང་འཇུག་ནོར་བུའི་ཕྲེང་བར་དོ་ལེ་བརྒྱུས་པའི་ཨུ་ཚུགས་བསྐྱར་ནས་རན་ཚོད་ཙམ་སྨྲ་ན་མི་མཛེས་སམ། ཡང་འདིར་ལུང་དྲངས་པའི་ཕ་རྒོད་བླ་མས་མཛད་པའི་ཤུགས་ལྡན་རྟོགས་བརྗོད་དམ་ཅན་རྒྱ་མཚོ་དགྱེས་པའི་རོལ་མོ་ཞེས་པ་འདི་མིང་དོན་མི་མཚུངས་ཏེ། ཤུགས་ལྡན་ཉིད་ལ་གཞུང་བསྟེན་སྲུང་མ་དམར་ནག་གཉིས་ཀྱིས་གཙོས་པའི་གསར་རྙིང་གི་ཆོས་སྐྱོང་དམ་ཅན་རྒྱ་མཚོ་སུ་ཡང་ཐུགས་མཉེས་པའི་ལོ་རྒྱུས་འདྲེན་རྒྱུ་མེད་པའི་ཕྱིར། ཁ་འགེང་ཡུར་མ་དག་པ་ལ། ཁ་སྐོང་བྱེད་ཀྱང་འདི་ལྟར་ཞེ་སྡང་འཁྲུལ་པའི་རང་གཟུགས་ཕོ་གདོན་རྒྱལ་པོའི་སྡེ་ཚན་དམ་སྲི་ཤུགས་ལྡན་ཉིད། ཡེ་ཤེས་ལྷ་མཆོག་འཇམ་དཔལ་ཞི་དྲག་དང་། ཁྲོ་
བོའི་རྒྱལ་པོ་ཀུན་གྱི་སྤྱི་རྗེར་བྱས་ཤིང་སྣང་སྲིད་དྲེགས་པའི་གཙོ་མཆོག་ཏུ་བཞག་པ་དེ་ལྟར་ན། འཇིག་རྟེན་འདས་མ་འདས་དང་མགྲོན་བཞིའི་གོ་རིམ་དང་ས་མཚམས་ཐམས་ཅད་གོ་ལོག་ཏུ་སོང་སྟེ། དཀོན་མཆོག་སྲི་ཞུ་དང་མགོན་པོ་ཡོན་ཏན་གྱི་མགྲོན་གཉིས། རིགས་དྲུག་སྙིང་རྗེ་དང་། བགེགས་རིགས་ལན ཆགས་ཀྱི་འཁོར་དུ་བསྡུ་དགོས་པའི་རྣམ་བཞག་གོ་ལྡོག་ལྷམ་དཔེ་ཞྭ་བཀབ་ཀྱི་བཤད་པ་ངོ་ཚ་མེད་པ་འདི་གཅིག་པུས་ཀྱང་ཕ་རྒོད་བླ་མ་དང་། ཆོས་སྐྱོང་ཤུགས་ལྡན་བཅས་པར་སྲི་ཞུ་ལྟ་ཞོག་བསྟོད་མི་མཁས་པའི་སྨད་པ་དང་ཞབས་ནས་དྲངས་པ་ལ་ལྟོས། ཡང་ཛེ་སྨད་ན་རེ། ༼དེ་ཡང་རྡོ་རྗེ་ཤུགས་ལྡན་རྩལ་གྱི་བསྟོད་པ་དཔག་མེད་བསྐལ་སྔོན་མར། དགའ་ལྡན་བསྟན་ལ་བསྲེ་བསླད་འཇུག་བྱེད་པའི། །བདག་ཉིད་ཆེ་དང་ཕལ་དང་དཔོན་ཆེན་སོགས། །ཐལ་བའི་
རྡུལ་བཞིན་རློག་པར་མཛད་པ་ཡི། ཞྭ་སེར་བསྟན་པའི་དགྲ་ལྷ་ཁྱོད་ལ་བསྟོད། །ཅེས་པའི་ཐད་ཀྱི་བསྟོད་འགྲེལ་དམ་ཅན་རྒྱ་མཚོ་དགྱེས་པའི་རོལ་མོ་ལས། གཞན་ཡང་བོད་རྗེ་སྲིད་སྐྱོང་གི་ཁྲི་ལ་དབང་བསྒྱུར་བའི་བླ་ཆེན་དང་། རྨད་བྱུང་སྐྱེས་རབས་ཀྱི་ཕྲེང་བ་ཚར་དུ་དངར་བའི་བླ་སྤྲུལ་ཆེ་ཆུང་། ལུང་དང་རྟོགས་པའི་ཡོན་ཏན་གྱིས་ཕྱུག་པའི་དམ་པའི་སྐྱེས་བུ། ཆེན་པོའི་ལུང་དང་ལས་ཀས་མངོན་པར་མཐོ་བའི་དཔོན་ཆེན། རིགས་རུས་མངའ་ཐང་སྟོབས་འབྱོར་གྱིས་དྲེགས་པའི་སྡེ་དཔོན་མི་དྲག་སོགས་རང་ཉིད་འཇམ་མགོན་ཙོང་ཁ་པའི་བསྟན་པའི་རྗེས་འཇུག་བསྙོན་མེད་ཡིན་བཞིན་དུ། རྗེ་བླ་མའི་བསྟན་པ་རིན་པོ་ཆེ་མདོ་སྔགས་ཀྱི་ལྟ་སྒོམ་སྤྱོད་གསུམ་གང་གི་ཆ་ནས་ཀྱང་གཞན་ལ་འགྲམ་ཆུ་ལྡང་མི་དགོས་པར་ཡོད་པ་འདི་ཉིད་ཀྱིས་ཆོག་མི་ཤེས་
པར་ལྟ་གྲུབ་གཞན་གྱི་བསྲེ་བསླད་འཆལ་འཆོལ་སྣ་ཚོགས་བྱེད་པའི་སྐྱ་སེར་མཆོག་དམན་དུ་མ་ཞིག་ལ་རྒྱལ་པོའི་ཆད་པ་དང་། གྱོད་དང་ཁ་མཆུ། དུས་མིན་འཆི་རྐྱེན་སོགས་མི་འདོད་སྣ་དགུ་ཐོག་ཏུ་འབེབས་པའི་དྲག་པོའི་ཆད་ལས་ཅི་རིགས་པའི་རྟགས་མཚན་རྣོ་མྱུར་མངོན་སུམ་དུ་བསྟན་ཏེ། ཞྭ་སེར་བསྟན་པའི་དབུ་འཕང་དགུང་ལ་རེག་པར་མཛད་པའི་དགྲ་ལྷ་ཆེན་པོར་གྱུར་པའི་ཚུལ་ལ་བསྟོད་པའོ། །འདི་དག་གི་ལོ་རྒྱུས་ངོ་མཚར་བའི་གཏམ་དུ་གླེང་བར་འོས་པ་མང་པོ་ཞིག་མཆིས་ནའང་། ཡིག་ཚོགས་ཀྱི་ངལ་བར་འཇིགས་པ་མ་ཟད། དུས་སྐབས་འདི་འདྲར། ལྷ་ཁང་ནང་གི་འུར་རྡོའི་དཔེ་ལྟར་དགོས་པ་ལས་དགག་བྱ་ཆེ་བར་གྱུར་དོགས་ཀྱིས་ཡི་གེར་འགོད་པའི་ངལ་བ་མ་བྱས་སོ། །ཞེས་གསུངས་ཏེ་ཡོངས་གྲགས་སུ་འགོད་པར་མ་མཛད་པའི་ལོ་རྒྱུས་ངོ་མཚར་
ཅན་རྣམས། སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོ་ཉིད་ཀྱི་ཐུགས་བརྩེ་བ་ཆེན་པོས་བདག་ལ་ཞོར་འཕྲོས་ཀྱི་ཚུལ་དུ་ཇི་ལྟར་སྩལ་བ་རྣམས་བརྗེད་པར་ཕངས་ནས་ཕྱོགས་གཅིག་ཏུ་བསྡུས་པ་ཉིད་རྩ་བར་བཟུང་། ཕྱོགས་གཞན་ནས་ཀྱང་ཁུངས་ལྡན་འགའ་ཞིག་རྙེད་པ་རྣམས་ཀྱིསཟུར་བརྒྱན་ཏེ་བསྟོད་འགྲེལ་རྟོགས་བརྗོད་དམ་ཅན་རྒྱ་མཚོ་དགྱེས་པའི་རོལ་མོའི་ཁ་སྐོང་གི་ཚུལ་དུ་ངོ་མཚར་བའི་གཏམ་རྣམས་འབྲི་བའི་བྱ་བ་ལ་ཞུགས་སོ། །༽ཞེས་བཀོད་པ་འདི་ཤིན་ཏུ་མི་འཐད་དེ། དྭགས་པོ་བློ་བཟང་མཁས་གྲུབ་དང་། ཕ་བོང་ཁ་པ་བདེ་ཆེན་སྙིང་པོ་གཉིས་ཀྱིས་ཆེད་དུ་བཅོས་པའི་ཤུགས་ལྡན་བསྟོད་པའི་ནང་གི་ཤྭ་ལོ་ཀ་གཅིག་ཁོལ་བཏོན་བྱས་པའི་རྩ་འགྲེལ་གཉིས་འདིར་ཁྱེད་ཀྱི་བསྟན་བཅོས་ངན་པ་འདིའི་ལུས་རྣམ་པར་བཞག་པའི་རྩ་བ་ཕྱོགས་
རིས་དང་ལོག་ལྟའི་འུད་གཏམ་རྣམས་འཕྲོ་གཞི་བྱས་ཕྱིར། མགོ་མཇུག་བར་གསུམ་གྱི་བརྗོད་བྱའི་དོན་ཐམས་ཅད། ཇི་སྐད་དུ། རྩ་བ་སྨན་དུ་མཆིས་ན་མྱུ་གུའང་སྨན། །རྩ་བ་དུག་ཡིན་མྱུ་གུ་སྨྲོས་ཅི་དགོས། །ཞེས་གསུངས་པ་ལྟར་ཕྱོགས་ལྷུང་སྡང་ཞུགས་ཀྱིས་བྱས་པ་ཡིན་པར་སུས་ཀྱང་རྟོགས་པར་སླ། འདི་ལྟ་བུའི་ལོ་རྒྱུས་ལ་ངོ་མཚར་ཆེ་ཆེ་ལྟར་བྱེད་པ་དང་། དེ་ཡང་ཁྲི་བྱང་གིས་ཡོངས་གྲགས་སུ་བཀོད་མ་བྲ་བར། ཛེ་སྨད་སྤྲུལ་སྐུ་གཅིག་པོ་ལ་སྙན་བརྒྱུད་དུ་ཚེ གདམས་པའི་དོན་རྣམས་བརྗེད་པར་ཧ་ཅང་ཕངས་དྲགས་ནས་ཕྱོགས་བསྒྲིགས་བྱས་ཚུལ་སྐད་པ་ནི། ཁྱེད་ལ་ངོ་མཚར་བའི་ལོ་རྒྱུས་དང་བླ་མའི་གདམས་ངག་གི་མུ་གེ་བྱུང་བ་ཁག་མེད། ཕན་ལས་གནོད་པ་མང་བའི་ལོ་རྒྱུས་འདི་འདྲ་བརྗེད་ཤོར་ན་བསྟན་པ་ལ་དེ་རང་གནོད་པ་ཆུང་བས་ཐུགས་ཕངས་མ་དགོས་
ཤིང་། བླ་མས་བརྩེ་བ་ཆེན་པོས་བསྩལ་བའི་གདམས་ངག་དེ། ད་རེས་ཀྱི་འདི་དང་འདི་འདྲའི་རང་བཞིན་ལས་མེད་ན་ནི་ཅོལ་ཆུང་དུ་སོང་བས་དགེ་ལྡན་བསྟན་པའི་ག་དར་དུ་མི་འགྲོ་བར་རང་ཉིད་སྨ་འབེབས་སུ་སོང་སྟེ། ལྕང་སྐྱ་རིན་པོ་ཆེས། རང་གཞན་ལྟ་སྒོམ་གྲུབ་མཐའི་ཁྱད་པར་རྣམས། །ལྟ་ཅི་ཐ་སྙད་ཙམ་ལའང་རྨོངས་ན་ཡང་། །གཞན་ལུགས་འབད་པས་སྨོད་ཅིང་སྡང་སེམས་བསྐྱེད། །ཅོལ་ཆུང་གཡོམ་རྒྱུག་མཁན་ལ་ཐུགས་རྗེས་གཟིགས། །ཞེས་གསུངས་སོ། །ཡང་མཁས་པའི་ཉམས་ཡིན་ཁུལ་གྱིས་བར་སྐབས་ཚིགས་བཅད་འདི་ལྟར། ༼མཆོག་གི་རིག་པ་འདོད་རྒུར་སྦྱིན་༔ པའི་གཏེར། །ཕ་རྒོད་བླ་མའི་གསུང་གསང་ནོར་བུའི་མཛོད། །ཀུན་རྨོངས་ཕོངས་སེལ་གཉེན་དུ་བསྟེན་རིགས་ཀྱི། །བརྗེད་ངེས་རྐུན་པོར་འཆོར་ན་བདག་
གིས་ནོངས། །ཚུལ་འཆོས་རྣམ་བཀྲའི་འཇའ་ཟེར་རྟག་འཕྲོ་ཡང་། །དུག་གསུམ་ནག་པོ་བརྩེགས་པས་ལུས་བརྟས་པའི། །རྣམ་རིག་མདོངས་མཐའ་རྒྱས པའི་ཟློས་གར་དང་། །ལྷན་ཅིག་མྱོས་པའི་གྲེ་འགྱུར་བདག་གིས་བསྒྱུར། །ཞེས་ཀྱང་སྨྲའི་༽ ཞེས་བྲིས་པའི་ཤྭ་ལོ་ཀ་རྗེས་མའི་དོན་རང་བློ་རང་ལ་ལྐོག་ཏུ་མ་གྱུར་བའི་རང་ཉིད་ཀྱི་ཕྱི་ནང་གསང་བའིརང་བཞིན་མ་བཅོས་ལྷག་པར་བརྗོད་འདུག་པས་འདི་ལ་དཔྱད་པ་མ་བྱས། བསྟོད་འགྲེལ་གྱི་དགག་པ་དངོས་ནི་འོག་ཏུ་འཆད་པར་འགྱུར་རོ། །ཡང་ཛེ་སྨད་ན་རེ། ༼དེ་ལ་འདིར་བདེ་ལྡན་ཞིང་གི་མགོན་པོ་རྒྱལ་བ་འོད་སྣང་མཐའ་ཡས་པའི་སྒྱུ་འཕྲུལ་གྱི་རོལ་པ། ཀུན་གཟིགས་པཎ་ཆེན་བློ་བཟང་དཔལ་ལྡན་ཆོས་ཀྱི་གྲགས་པ་བསྟན་པའི་དབང་ཕྱུག་མཆོག་ཉིད་ཆེས་སྐུ་ན་ཕྲ་མོའི་དུས་ནས་རིག་པའི་གནས་ཡོངས་རྫོགས་ལ
མཁྱེན་རབ་ཀྱི་ཀློང་བརྡོལ་ཏེ་མཁས་དང་གྲུབ་པའི་ཕ་རོལ་དུ་སོན་པའི་སྐྱེས་ཆེན་དམ་པ་ཆེས་ཁྱད་དུ་འཕགས། བསྟན་འགྲོའི་དོན་རྒྱ་ཆེར་མཛད་ནུས་པ་ཞིག་བྱོན་མོད་དེ། འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་དཔྱད་གསུམ་གྱིས་ལེགས་པར་གཏན་ལ་དབབ་པས་ཚང་ལ་མ་བའི་ལམ་ཡོངས་སུ་རྫོགས་པའི་བཞེད་སྲོལ་རི་བོ་དགེ་ལྡན་པ་རང་གི་ལྟ་གྲུབ་གཙང་མའི་ཉམས་བཞེས་གཙོ་བོར་མ་གནང་བར། གསང་སྔགས་རྙིང་མའི་ཆོས་སྐོར་བཀའ་གཏེར་གྱི་རིགས་ལ་གསན་བསམ་མང་དུ་མཛད་སྣང་ཚུལ་པཎ་ཆེན་དེ་ཉིད་ཀྱི་རྣམ་ཐར་དང་། རྒྱལ་ཆེན་བསྟོད་འགྲེལ་དུ་གསལ་བར་༈ གསུངས་པ་ལྟར་གྱི་མཛད་པ་ལ་བརྟེན་ནས་ཆོས་སྐྱོང་བའི་རྒྱལ་པོ་ཆེན་པོ་རྡོ་རྗེ་ཤུགས་ལྡན་རྩལ་དེ་ཉིད་ཀྱིས་དེ་ལྟར་མི་གནང་བའི་བསྐུལ་མ་ཡང་ཡང་མཛད་
པར་ཡང་། ཐུགས་སྣང་མི་གཤིན་པའི་ཚུལ་གྱིས་ཆོས་སྐྱོང་ཆེན་པོ་འདིར་དམིགས་ཏེ། དྲག་པོའི་སྲེག་སྦྱོར་གྱི་ལས་མཐའ་བརྩམ་པར་མཛད་ཅིང་། སྐབས་དེར་གྲྭ་པ་ཞིག་གིས་ཆོས་སྐྱོང་ཤུགས་ལྡན་གྱི་སྐུ་ཐང་ཞིག་འབུལ་བ་བྱུང་བས། ཆོས་སྐྱོང་ཉིད་བསྲེག་བྱར་དངོས་སུ་ཁུག་པའི་རྟགས་རྟེན་ལེགས་ཚུལ་གྱིས་ཞལ་ཐང་དེ་ཉིད་སྦྱིན་སྲེག་གི་ཐབ་ཏུ་བསྲེག་རྫས་དང་ལྷན་ཅིག་བསྲེག་པར་མཛད་པས། དེ་ཉིད་མར་ཁུའི་སྣུམ་གྱིས་ཚོས་པ་ལྟ་བུར་གྱུར་པ་ཙམ་ལས། དོན་ཚ དུ་མེས་མ་ཚིག་པར་བརྟེན་སྲེག་ཐབ་ནས་བཞེས་ཏེ་རྫས་ངན་དུ་མས་སྦགས་པར་མཛད་དེ། བཀྲས་ལྷུན་གཟིམ་ཆུང་གི་སྒོ་ཐེམ་འོག་ཏུ་མནན་པ་སོགས་དྲག་སྦྱོར་གནང་བའི་མཐུ་ལས་པཎ་ཆེན་རིན་པོ་ཆེ་དེ་ཉིད་དགུང་གྲངས་སུམ་ཅུ་པར་ཕེབས་པ་རབ་བྱུང་བཅོ་ལྔ་པའི་ཆུ་ལུག་ལོར་བསྙུན་བཞེས་ཀྱིས་དགོངས་པ་ཞི་
དབྱིངས་སུ་གཤེགས་ཁར་གྲྭ་པ་རྒྱ་བོ་གཟབ་མཆོར་ཅན་འཇིགས་སུ་རུང་བ་ཞིག་གཟིམ་ཆུང་དུ་འོངས་ནས་ཆོ་འཕྲུལ་དུ་མ་བསྟན་པ་བྱུང་ཞིང་། དེ་ལྟར་པཎ་ཆེན་རིན་པོ་ཆེ་བསྟན་པའི་དབང་ཕྱུག་གི་མཛད་བྱུས་ལམ་ལྷོངས་མ་བྱུང་བ་མ་ཟད། སྐུ་ཕྲེང་རྗེས་མ་པཎ་ཆེན་བློ་བཟང་ཐུབ་བསྟན་ཆོས་ཀྱི་ཉི་མ་དགེ་ལེགས་རྣམ་རྒྱལ་དཔལ་བཟང་པོ་མཆོག་ཀྱང་རྙིང་ཆོས་དང་གཏེར་ཆོས་སུ་གྲགས་པ་རྣམས་ལ་གསན་བསམ་གང་ཡང་མ་མཛད་མོད། སྐུ་ཕྲེང་སྔོན་མའི་དུས་སུ་ལྷ་མི་གཉིས་ཐུགས་འཁོན་བྱུང་བའི་རྗེས་འབྲེལ་ལྟ་བུར་འཕྲལ་རྐྱེན་བླ་གཞུང་གཉིས་ཀྱི་ཞབས་འབྲིང་ཡིད་སྲུབས་སྙིང་ཞུགས་ལ་ལ་དག་གི་བྱེད་པ་ལ་བརྟེན་ནས་གཞུང་བླ་གཉིས་ཀྱི་དབར་ཐུགས་སྣང་མི་མཐུན་པའི་རྐྱེན་ངན་ཆེས་ཆེར་བྱུང་སྟབས། རྒྱ་སོག་གི་ཡུལ་གྲུར་གསང་སྟབས་ཀྱི་
ཚུལ་དུ་ཆིབས་བསྒྱུར་མཛད་དགོས་པ་བྱུང་ཞིང་། སླར་དབུས་གཙང་ཁུལ་དུ་ཕྱིར་ཕེབས་མཛད་བཞེད་ཀྱང་ཕྱི་ནང་གི་འཕྲལ་རྐྱེན་སྣ་ཚོགས་ཀྱིས་བཞེད་པ་དོན་ཐོག་ཏུ་མ་ཁེལ་བའི་མུར་དགུང་གྲངས་ལྔ་བཅུ་ང་ལྔར་ཕེབས་པའི་མེ་གླང་ལོར་བར་ཁམས་སྐྱེ་རྒུ་མདོར་གཟུགས་སྐུ་དབྱིངས་སུ་བསྡུས། དེའི་སྔོན་མེ་བྱི་ལོར་རྗེ་ཕ་བོང་ཁ་པ་བདེ་ཆེན་སྙིང་པོ་སྐྱེ་རྒུ་མདོར་པཎ་ཆེན་ཆོས་ཀྱི་ཉི་མ་རིན་པོ་ཆེའི་སྤྱན་སྔར་ཆེད་དུ་མཇལ་བཅར་ཕེབས་སྐབས་པཎ་ཆེན་རིན་པོ་ཆེས་རྗེ་ཕ་བོང་ཁ་པར་བཀའ་མངགས་སུ། གང་ཉིད་འདུལ་འཛིན་བློ་གྲོས་སྦས་པའི་སྐུའི་སྐྱེ་བ་ཡིན་སྟབས། དེའི་རྟེན་འབྲེལ་གྱིས་བཀྲ་ཤིས་ལྷུན་པོ་བ་ཁྱེད་ལ་དགའ་གུས་རང་ཤུགས་ཀྱིས་འབྱུང་བས། ཁྱེད་ཉིད་བཀྲས་ལྷུན་དུ་ངེས་པར་ཕེབས་ཏེ་གསུང་ཆོས་རྒྱ་ཆེར་སྩལ་དགོས་པ་དང་། དེ་སྐབས་པཎ་ཆེན་གོང་མས་
མནན་པ་མཛད་པའི་ཆོས་སྐྱོང་གི་ཞལ་ཐང་དེ་ཡང་ཕྱིར་འདོན་གནང་དགོས་སོགས་ཀྱི་བཀའ་མངགས་སྩལ་ཞིང་། དེ་དོན་ལྟར་རྗེ་ཕ་བོང་ཁ་པས་ཀྱང་རྗེས་སུ་རབ་བྱུང་བཅུ་དྲུག་པའི་ལྕགས་འབྲུག་ལོར་བཀྲ་ཤིས་ལྷུན་པོ་དཔལ་གྱི་སྡེ་ཆེན་པོར་ཆིབས་བསྒྱར་གྱིས་སྐྱ་སེར་མཆོག་དམན་བགྲང་བ་ལས་འདས་པར་བྱང་ཆུབ་ལམ་གྱི་རིམ་པས་མཚོན་པའི་གསུང་ཆོས་རྒྱ་ཆེར་སྩལ་བ་དང་། རྫས་ངན་གྱིས་སྦགས་པའི་ཆོས་སྐྱོང་གི་ཐང་སྐུ་དེ་ཡང་ཕྱིར་དབྱུང་བར་མཛད་ཅིང་། དེ་ནས་བཀྲས་ལྷུན་མགོན་ཁང་དུ་འདོད་གསོལ་དང་སྦྲགས་ཤུགས་ལྡན་གྱི་བསྐང་གསོ་དང་། འཕྲིན་བཅོལ་བཏང་དུ་གཞུག་༉ པ་དང་། ཆོས་སྐྱོང་ཤུགས་ལྡན་གྱི་སྐུ་གསུང་ཐུགས་ཀྱི་རྟེན་བཞེངས་པ་སོགས་མཛད་དེ་བླ་བྲང་རྒྱལ་མཚན་མཐོན་པོ་དང་། ཆོས་སྐྱོང་དབར་ལྷ་མི་ཕན་ཚུན་
འདུམ་སྒྲིག་ལྟ་བུའི་དམ་བཞག་ཅིག་ཀྱང་བཀའ་རྩོམ་མཛད་ཡོད་པར་འདུག །དེ་རྗེས་སླར་ཡང་ཀུན་གཟིགས་པཎ་ཆེན་རིན་པོ་ཆེ་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་པོ་མཆོག་འདི་ཉིད་ཀྱང་ས་སྟག་ལོར་ཨ་མདོ་མཚོ་སྔོན་ཁོངས་ཞང་ཧོ་རྫོང་གི་སྤོ་མདོའི་དཔོན་ཚང་དུ་སྐུ་བལྟམས་ཤིང་དམ་པའི་རང་རྟགས་གསལ་བར་འཆར་བའི་མཛད་པ་སྣ་ཚོགས་པ་ཞིག་ཨ་མདོའི་ཁུལ་དུ་བྱུང་འདུག་ཀྱང་། དབུས་གཙང་དུ་ཕེབས་ཏེ་པཎ་ཆེན་གོང་མའི་ཁྲི་ལ་མངའ་གསོལ་མཛད་རྒྱུར་འཕྲལ་རྐྱེན་སྣ་ཚོགས་ཀྱིས་ཡུན་འགྱངས་བྱུང་ཞིང་པཎ་ཆེན་རིན་པོ་ཆེ་མཆོག་འདི་ཉིད་ཀྱིས་ཐོག་མར་བཀྲས་ལྷུན་དུ་ཕེབས་འཕྲལ་རྒྱལ་ཆེན་རྡོ་རྗེ་ཤུགས་ལྡན་རིགས་ལྔའི་བསྐང་གསོ་ལས་བཞི་ལྷུན་གྱིས་གྲུབ་པའི་སྒྲ་དབྱངས་ཞེས་པ་པཎ་ཆེན་མཆོག་ཉིད་ནས་རྩོམ་པའི་ཐུགས་འདུན་
ཡོད་པ་དང་། གཞན་གྱིས་བསྐུལ་བ་དུས་མཚུངས་པར་གསར་དུ་བཀའ་རྩོམ་མཛད་པ་སོགས་ལྷ་མི་ཕན་ཚུན་ཐུགས་མཐུན་གྱི་ངང་དུ་ཡོད་ཀྱང་། རྗེས་སུ་པཎ་ཆེན་ཡོངས་འཛིན་དཀའ་ཆེན་ཨང་ཉི་མ་ལགས་ཞུ་བ་དེས་ཕོ་བྲང་རྒྱལ་མཚན་མཐོན་པོའི་གཟིམས་ཆུང་ཉི་འོད་བདེ་ཆེན་ཀུན་སྒྱུ་འཁྱིལ་དུ་རྒྱལ་ཆེན་གྱི་སྐུ་ཞིག་ཡོད་འདུག་པར་གཟིམས་ཆུང་དཀོན་གཉེར་ལ་གདུག་འདྲེའི་སྐ་འདི་ཕྱིར་ཐོན་དགོས་ལུགས་གསུངས་པར་དཀོན་གཉེར་ནས་ད་ལྟའི་ཀུན་གཟིགས་རིན་པོ་ཆེར་དགོངས་སྐོར་ཞུས་པར། ཕྱིར་མ་བཏོན་པར་ཡོངས་འཛིན་གྱིས་མི་གཟིགས་པའི་ཁུག་ཅིག་ཏུ་འཇོག་ཅེས་བཀའ་གནང་། དཀའ་ཆེན་དེ་ཉིད་རྒྱལ་ཆེན་ལ་མི་མཉེས་པ་ཞིག་ཡིན་སྟབས་ཁོང་ནས་ངེད་ཚོ་བཀའ་གདམས་རིང་ལུགས་གཙང་མར་སྐྱོང་མཁན་ཡིན་པས་ལྷ་མང་པོ་བསྟེན་
ན་ཕུང་ཡོང་ཞེས་ཡང་ཡང་ནན་ཏན་བཀག་ཆ་བྱས་ཏེ། བཀྲས་ལྷུན་བདེ་ཆེན་ཕོ་བྲང་དུ་ཡོད་པའི་མགོན་ཁང་དུ་རྒྱལ་ཆེན་གྱི་བསྐང་གསོ་བཏང་མི་ཆོག་པ་དང་། བཀྲས་ལྷུན་རྩེ་མགོན་ཁང་པའི་གྲས་རྒྱལ་ཆེན་སྐུ་རྟེན་པ་ཀརྨ་ཟེར་བ་རྗེ་ཕ་བོང་ཁས་རྩ་སྒོ་དབྱེ་བར་མཛད་པ་དེར་ཡང་ད་ཕྱིན་ཆོས་སྐྱོང་ཕེབས་མི་ཆོག ཅེས་སྐུ་ཕེབས་བཀག་སྡོམ་ཐོག །ལོ་བསྟར་བོད་ཟླ་དང་པོའི་ཚེས་གསུམ་ལ་སྐུ་གསོལ་རྒྱས་པ་མཛད་སྲོལ་ཡོད་པ་དེ་ཡང་མཚམས་འཇོག་མཛད་དུ་བཅུག་ཅིང་།མཚམས་འཇོག་བྱས་པའི་ཐོག་མའི་ཉིན་མོ་དེ་རང་ལ་གཞིས་རྩེའི་ས་སྲུང་དམག་མི་དང་བཀྲས་ལྷུན་བླ་བྲང་གི་ཞབས་ཁོངས་ལག་དོ་བ་ཨ་མདོ་རྣམས་འཁྲུགས་འཛིང་ཆེན་པོ་བྱུང་བ་སོགས་མི་ཤིས་པའི་རྟགས་མཚན་བྱུང་བ་མ་ཟད་ཨང་ཉི་མ་ལགས་རང་ཉིད་པཎ་ཆེན་ཆིབས་བསྒྱར་གྱི་ཆིབས་རགས་ཆེན་མོ་
ཚར་གཉིས་ཙམ་ལ་རྟས་བསྐྱར་བ་དང་། བདེ་ཆེན་ཕོ་བྲང་དུ་ཕོ་བྲང་གསར་བཞེངས་རྗེས་སྒོ་དབྱེའི་མཛད་སྒོའི་སྐབས་བཀྲས་ལྷུན་རྒྱབ་རིའི་རྩེའི་ཆོས་བདག་ནི་སེར་བའི་དར་ལྕོག་གི་སྲོག་ཤིང་ཆག་ལྷུང་། བདེ་ཆེན་ཕོ་བྲང་ལ་ཐོག་འཁྱུག་རྒྱབ་པ་སོགས་བྱུང་བར་བརྟེན། རྒྱལ་ཆེན་བསྐང་གསོ་སྔར་རྒྱུན་བཞིན་གཏོང་སྲོལ་འཛུགས་གནང་མཛད་དགོས་བྱུང་ཞིང་། དེ་རྗེས་ཤིང་རྟ་ལོར་རྒྱ་དམར་གྱིས་རྒྱ་ནག་ཏུ་རྒྱལ་ཡོངས་ཚོགས་འདུའི་འཐུས་མིར་གདན་ཞུས་ལྟར་པཎ་ཆེན་རིན་པོ་ཆེ་ཕེབས་པར། གཙང་ནས་ཕེབས་ཐོན་ཟིན་ཕྲལ་གཙང་ཁུལ་རྒྱལ་རྩེའི་ཕུ་ཉིང་རོ་ཞེས་པའི་ས་གནས་ནས་ཤྭ་འོད་ཀྱི་ཆུ་ཆེན་སྔ་ནས་མ་གྲགས་པ་ཞིག་ཐོན་ཏེ། པཎ་ཆེན་རིན་པོ་ཆེ་སྐུ་ཕྲེང་ན་རིམ་གྱི་བཞུགས་གནས་གཙོ་བོ་ཀུན་སྐྱོབ་གླིང་རྟེན་བརྟེན་པར་བཅས་པ་འབྱུང་བ་
ཆུའི་ཀློང་དུ་རྨེག་མེད་དུ་བསྟིམ་ཞིང་། ཆུ་བརྡོལ་དེ་ཉིད་ས་ཐག་རིང་པོ་ནས་ཡོངས་སྐབས་མེ་ལྕེ་གཡོ་བ་ལྟར་དམར་ལྷང་ངེ་ཡོང་བར་འདུག་ཅེས་གྲགས་ཤིང་། པཎ་ཆེན་ཡོངས་འཛིན་ཨང་ཉི་མ་ལགས་ཀྱང་རྒྱ་ནག་ནས་ཕྱིར་ཕེབས་མ་ཐུབ་པར་ཉི་མའི་བུའི་མཆེ་བའི་ཕྲག་ཏུ་གཤེགས་པ་སོགས་ཚེས་གཅིག་ནས་འཕྱུགས་ན་གནམ་གང་བར་གྱི་དཔེ་ལྟར། པཎ་ཆེན་བསྟན་པའི་དབང་ཕྱུག་རིན་པོ་ཆེའི་སྐུ་དུས་ལྟ་གྲུབ་གཙང་བར་མ་མཛད་པའི་དབང་གིས་ཉམས་ཉེས་ཀྱི་་རྒྱུན་ལམ་གསུམ་འབབ་པའི་ཀླུང་ལྟར་མི་ཆད་པར་གྱུར་བ་ཡིན་ནོ། ༽ ཞེས་ངོ་ཚ་ཁྲེལ་འཛེམ་མེད་པར་བཀོད་འདུག་པ་འདི་ནི་རྙིང་མ་བ་ཙམ་དུ་མ་ཟད་རི་བོ་དགེ་ལྡན་པ་གཟུར་གནས་ཀུན་གྱིས་ཀྱང་ངེས་པར་དགག་དགོས་པའི་གནད་ཆེས་ཆེ་བར་མཐོང་སྟེ། འདི་ལྟར་རྒྱལ་བ་འོད་མཐའ་ཡས་ཀྱི་སྒྱ་འཕྲུལ་གཙང་
པཎ་ཆེན་ཐམས་ཅད་མཁྱེན་པ་ཆེན་པོ་སྐུ་ཕྲེང་ན་རིམ་གསུམ་གྱིས་གཙོས་པའི་དབུས་གཙང་ཁམས་གསུམ་གྱི་རི་བོ་དགེ་ལྡན་པའི་བསྟན་པའི་སྒྲོན་མེ་མཚུངས་ཟླ་མ་མཆིས་པ་རྩོད་བྲལ་སྤྲལ་པའི་སྐྱེས་མཆོག་ཆེན་པོ་འཕགས་པའི་ས་ལ་བཞུགས་པའི་བྱང་ཆུབ་སེམས་དཔའ་བསམ་བཞིན་བསྟན་འགྲོའི་དཔུང་གཉེན་དུ་བྱོན་པ། སྔོན་ནས་ད་ལྟའི་བར་དུ་གྲུབ་མཐའ་རིས་སུ་མ་ཆད་པའི་སྐྱེ་འགྲོ་དྲག་ཞན་སེར་སྐྱ་ཡོངས་ཀྱིས། འདི་ཕྱིའི་སྐྱབས་གནས་དམ་པར་སྤྱི་བོའི་རྒྱན་དུ་བསྒོམ་ཞིང་སྒོ་གསུམ་གུས་པ་ཆེན་པོས་ཅི་མཛད་ལེགས་པར་མཐོང་བའི་དག་སྣང་མོས་གདུང་བླ་ན་མེད་པ་བསྐྱེད་ནས་གསོལ་འདེབས་རྒྱང་འབོད་ལྷང་ལྷང་བྱེད་ཡུལ་གྱི་ཞིང་མཆོག་ཁྱད་པར་ཅན་དེ་སྙེད་ཅིག་ལ། ཁྱོད་ཅག་གིས་མཁྲིས་ནད་ཅན་གྱིས་དུང་ལ་སེར་པོ་མཐོང་བ་
ལྟར་རང་རྒྱུད་ལོག་ལྟ་ཕྲག་དོག་དྲག་པོས་བསླད་ནས། རྗེས་ཟློས་ཙམ་ཡང་བྱེད་མི་རུང་བའི་གཤེ་སྐུར། སྒྲོ་འདོགས། སྨ་འབེབས། མཚང་འབྲུ། ངན་སྨྲ་སྐྱོན་བརྗོད་སྣ་ཚོགས་འདི་ལྟར་བྲིས་ནས་གངས་ཅན་པ་རྣམས་ཀྱི་མདུན་དུ་ཁྱབ་བསྒྲགས་བྱས་པ་ནི་སྙིང་ལ་བདུད་དང་དམ་སྲི་ཞུགས་པ་ལས་གཞན་མ་ཡིན་ཏེ། དེ་ཡང་ཤུགས་ལྡན་དམ་ཉམས་ཡིན་པར་རིག་པས་ཇི་ལྟར་གྲུབ་ཅེ་ན། གྲགས་རྒྱན་རང་ཉིད་ཀྱི་ཐུན་མོང་མིན་པའི་རིགས་བདག་བླ་མ་པཎ་ཆེན་བློ་བཟང་་ཆོས་རྒྱན་ཡིན་པ་པཎ་ཆེན་རང་རྣམ་དུ་གསལ་ནའང་དེའི་སྐུ་ཕྲེང་ལྔ་པ་དང་། དྲུག་པ། བདུན་པ་རྣམས་ཀྱི་སྐུ་ཚེ་ལ་བར་ཆད་བྱས་པ་དང་། མཛད་པ་ཕྲིན་ལས་ལ་གེགས་ཆེན་པོ་བྱས་པ་དེས། རྣལ་འབྱོར་བླ་མེད་ཀྱི་རྩ་ལྟུང་དང་པོ་རྡོ་རྗེ་སློབ་དཔོན་བརྙས་པར་གྱུར་པས། དགེ་ལྡན་པའི་དམ་སྲི་གདུག་པ་ཅན་མིང་
དོན་མཚུངས་ཤིང་། ཞི་བས་འདུལ་མི་ནུས་པར་མཁྱེན་ནས་རྒྱལ་དབང་ལྔ་པ་ཆེན་པོ་དང་། པཎ་ཆེན་ལྔ་པ་གཉིས་ཀས། མངོན་སྤྱོད་བསྲེག་མནན་གྱི་ལས་སྦྱོར་མཛད་ཚུལ་ཁྱོད་རང་གིས་ཀྱང་གསལ་བཤད་བྱས་འདུག་པ་དེ་ལྟར་དང་། པཎ་ཆེན་རིན་པོ་ཆེར་མཁས་དང་གྲུབ་པའི་ཕ་རོལ་ཏུ་སོན་པ་ཞེས་བྲིས་འདུག་པ་བརྡ་ཐ་སྙད་ལ་མ་བྱང་པའི་ཚིག་སྟེ། ཅིའི་ཕྱིར་ཞེ་ན། མཁས་གྲུབ་ཀྱི་ཡང་ཕ་རོལ་ཤེད་ཕྱིན་དགོས་རྒྱུ་ཡིན་ན་ནི། མི་མཁས་པ་དང་མ་གྲུབ་པའི་ས་ལས་ཅི་ཞིག་ཡོད། པཎ་ཆེན་བསྟན་པའི་དབང་ཕྱུག་གིས་རྙིང་ཆོས་གསན་བཞེས་གནང་བ་ཡོངས་གྲགས་དང་། པཎ་ཆེན་༔ ཆོས་ཀྱི་ཉི་མས་རྙིང་ཆོས་ལ་གསན་བསམ་གང་ཡང་མ་མཛད་ཅེས་པ་མི་བདེན་ཏེ། པཎ་ཆེན་དེ་ཉིད་ཀྱིས་ཆོས་རྗེ་མི་ཕམ་འཇམ་དཔལ་དགྱེས་པས་མཛད་པའི་
གེ་སར་རྡོ་རྗེ་ཚེ་རྒྱལ་སྐོར་ལ་ཉམས་བཞེས་མཛད་ཚུལ་པཎ་ཆེན་སྐ་བཅར་བ་བཀྲས་མཐོང་བའི་ངག་ལམ་ནས་ཁོ་བོས་གསལ་པོ་ཐོས་པ་འདིས་ཁྱོད་ཀྱི་རྫུན་རྐུབ་ཅིས་མ་བུད། འདི་ལ་དཔགས་ན། པཎ་ཆེན་རིན་པོ་ཆེས་ཕ་བོང་ཁ་པར་བཀའ་མངགས་གནང་བ། བཀྲས་ལྷུན་དུ་ཕེབས་དགོས་རྒྱུ་དང་། གཟིམས་ཆུང་ཐེམ་འོག་ནས་མནན་པ་འདོན་དགོས་ཚུལ་སོགས་བཤད་པ་རྣམས་ཀྱང་རྫུན་གཏམ་དུ་ལོས་ཤེས། ད་ལྟའི་པཎ་ཆེན་གྱི་ཡོངས་འཛིན་དམ་པ་བཀའ་ཆེན་ཨང་ཉི་མས་ངེད་ཚོ་བཀའ་གདམས་རིང་ལུགས་གཙང་མར་སྐྱོང་མཁན་ཡིན་པས་ལྷ་མང་པོ་བསྟེན་ན་ཕུང་ཡོང་ཞེས་དགེ་ལུགས་གཙང་མ་སྐྱོང་བཞིན་པ་དེ་འདྲ་ལ་ཡང་ཤུགས་ལྡན་ཁྲོས་ཏེ་སྲོག་དབུགས་འཕྲོག་པ་ཡིན་ཚུལ་བཤད་པ་དེ་ལྟར་ན་བཀའ་གདམས་བསྟན་པའི་དགྲ་བགེགས་དངོས་གནས་ཤུགས་ལྡན་
ཡིན་པར་རིགས་པ་ཚད་མས་གྲུབ་བོ། རྒྱལ་རྩེའི་ཕུ་ནས་ཆུ་སྨྱོན་བརྡོལ་ཏེ་པཎ་ཆེན་རིན་པོ་ཆེའི་བཞུགས་གནས་ཀུན་སྐྱོབ་གླིང་གིས་གཙོས་པའི་ཡུལ་གྲོང་དང་ཁང་ཞིང་སྒོ་ཕྱུགས་སྲོག་ཆགས་བགྲང་ལས་འདས་པ་ལ་གནོད་སྐྱོན་ཚབས་ཆེན་བྱུང་བ་ཡང་ཤུགས་ལྡན་གྱི་འཁུ་ལྡོག་ཁོ་ནས་བྱུང་བར་བལྟ་བ་དེ་ལྟར་ན་བོད་ཁམས་སྐྱེ་འགྲོའི་བདེ་སྐྱིད་བཅོམ་མཁན་བྱེད་གཏེ་དངོས་ཤུགས་ལྡན་ཡིན་པར་དངོས་སུ་སྨྲས་པ་དེས་འདིར་ཤུགས་ལྡན་ལ་བསྟོད་བསྔགས་བྱས་ཚད་རྐང་རྗེས་ལག་བསུབ་ཏུ་སོང་བས་མ་ཚད། ཇི་སྐད་དུ། ཀཉྩིའི་ཡུལ་གྱི་རྒྱལ་ཕྲན་འགའ། །ཕ་བསད་པ་ལ་རྒྱལ་རྔ་བརྡུངས། །ཞེས་པའི་དཔེར་སོང་ངོ་། །པཎ་ཆེན་བསྟན་པའི་དབང་ཕྱུག་གིས་གདུག་འདྲེ་ལྷར་མ་བསྟེན་པ་དང་། ཆོས་ལ་ཕྱོགས་རིས་མ་གནང་བར་རྙིང་མ་བའི་ཆོས་
བཀའ་གཏེར་སྐོར་ལ་གསན་བཞེས་ཡང་དག་པ་མཛད་པ་ལ་ངོ་མཚར་དུ་བརྩི་བ་ལྟ་ཅི། ཚེས་གཅིག་ནས་འཕྱུགས་པའི་དཔེ་དང་སྦྱར་ནས་ལྟ་གྲུབ་མི་གཙང་བ་དང་། དེ་ནས་བཟུང་སྟེ་ཡང་སྲིད་སྤྲུལ་སྐུ་ཐམས་ཅད་ལ་ཉམས་ཉེས་ཆུ་རྒྱུན་བཞིན་བྱུང་བར་བཤད་པ་འདི་ནི་ཁྱེད་ཅག་ཕ་བོང་ཁ་པའི་སློབ་མ་ཡང་སློབ་ཉུང་ཤས་ཤིག་མ་གཏོགས་རང་གཞན་ཆོས་སྤྱན་ལྡན་པ་ཀུན་གྱིས་ཐུ་ལེས་འདེབས་པར་སོམ་ཉི་དང་བྲལ་ལོ། །ཡང་ཛེ་སྨད་ན་རེ། ༼ཏྲེ་ཧོར་གཟིགས་རྒྱབ་སྐུ་གོང་མ་བློ་བཟང་དཔལ་ལྡན་ཆོས་ཀྱི་དབང་ཕྱུག་ཅེས་ལུང་དང་རྟོགས་པའི་ཡོན་ཏན་གྱིས་ཕྱུག་པའི་སྐྱེས་མཆོག་དེ་ཉིད་སྐུ་ན་ཕྲ་མོའི་དུས་སུ་ཆོས་སྐྱོང་རྡོ་རྗེ་ཤུགས་ལྡན་འདི་ཉིད་ཤིན་ཏུ་འགོ་བ་དང་། སྲུང་མའི་གཙོ་བོ་ལྟ་བུར་མཛད་ཅིང་། གཟིགས་རྒྱབ་རིན་པོ་ཆེ་ཉིད་ཆོས་སྡེ་ཆེན་པོ་བཀྲ་ཤིས་ལྷུན་པོར་གཞུང་
ལུགས་རབ་འབྱམས་ལ་སྦྱང་བ་མཛད་པས་མཁས་པའི་དབང་ཕྱུག་ཆེན་པོར་གྱུར་ནས་དཀའ་ཆེན་མཚན་རྟགས་གྲུབ་རྗེས་ཁམས་སུ་ཕེབས་ཁར། བཞད་དངུལ་ཆུ་རིན་པོ་ཆེ་བློ་བཟང་ཆོས་འཕེལ་ལམ་དབྱངས་ཅན་གྲུབ་པའི་རྡོ་རྗེའི་ཞབས་དྲུང་དུ་ཐོན་ཕྱག་གི་མཇལ་ཁར་ཕེབས་སྐབས། དངུལ་ཆུ་རིན་པོ་ཆེས་མཇལ་དར་དང་ཕྱག་མདུད་ཅིག་གནང་ཕྱག་གཉིས་གཟིགས་རྒྱབ་རིན་པོ་ཆེའི་དབུ་ཐོག་ཏུ་བཞག་སྟེ་ཐུགས་བརྩེ་བ་ཆེན་པོས་ཞལ་ནས། དགེ་ལྡན་བསྟན་པ་མ་སྐྱོང་ན། །ཤུགས་ལྡན་མཐུ་རྩལ་ཤིན་ཏུ་ཆེ། །ཞེས་གསུངས་པའི་བསླབ་བྱའང་མཛད། དེ་ནས་གཟིགས་རྒྱབ་རིན་པོ་ཆེ་ཉིད་ཁམས་ཕྱོགས་སུ་ཕེབས་ཏེ་བསྟན་པ་དང་འགྲོ་བའི་དོན་རྒྱ་ཆེན་པོ་མཛད། སླར་དབུས་གཙང་ཕྱོགས་སུ་ཕེབས་ཏེ་བཀྲ་ཤིས་ལྷུན་པོར་པཎ་ཆེན་ཐམས་ཅད་མཁྱེན་
གཟིགས་ཆེན་པོ་བློ་བཟང་ཐུབ་བསྟན་ཆོས་ཀྱི་ཉི་མ་དགེ་ལེགས་རྣམ་རྒྱལ་དཔལ་བཟང་པོ་དང་མཇལ་སྐབས། པཎ་ཆེན་རིན་པོ་ཆེ་ཐུགས་ཤིན་ཏུ་དགྱེས་མཉེས་བྱུང་ནས་གཟིགས་རྒྱབ་ཚང་སྐུ་མདུན་དུ་ཡང་ཡང་ཕེབས་དགོས་ཞེས་དང་། པཎ་ཆེན་རིན་པོ་ཆེ་ནས་ཉིན་གཅིག་གཟིགས་རྒྱབ་ཚང་ལ་ངེད་གཉིས་འབྲལ་མེད་དུ་འཕྲད་པ་ཞིག་དགོས། དེའི་སླད་དུ་ཁྱེད་ཀྱིས་ཀུན་སྐྱོབ་གླིང་གི་མཁན་པོ་གནང་དགོས་ཞེས་བཀའ་ཕེབས་པ་ལྟར། ཀུན་སྐྱོབ་གླིང་དུ་མཁན་པོ་༤ མཛད་དེ་པཎ་ཆེན་སྐུ་གོང་མ་དང་འབྲལ་མེད་ལྟ་བུར་བཞུགས། དེ་སྐབས་པཎ་ཆེན་སྐུ་གོང་མ་བསྟན་པའི་དབང་ཕྱུག་གི་ཕྱག་བཞེས་རྙིང་ཆོས་སྐོར་གྱི་ཕྱག་དཔེ་དང་། མཆོད་ཆས། བཞུགས་གདན་སོགས་སྐུའི་ཉེར་སྤྱད་རྣམས་གཟིགས་རྒྱབ་རིན་པོ་ཆེར་གསོལ་རས་སྩལ་ནས་འདིའི་བདག་པོ་ཁྱེད་ཀྱིས་གྱིས་
ཤིག་ཅེས་གསུངས་པ་བཞིན་གཟིགས་རྒྱབ་རིན་པོ་ཆེས་ཀྱང་བཀའ་བཞིན་བསྒྲུབས་པ་དང་། དེའི་སྟབས་ཀྱིས་རྙིང་མའི་ཆོས་སྐོར་ཅི་རིགས་ཤིག་གསན་བཞེས་དང་ལག་ལེན་མཛད་དགོས་པ་བྱུང་། དེ་རྗེས་བོད་དུ་ཁྱུང་སྤྲུལ་ཞེས་པ་རྙིང་མའི་བླ་མ་སྔགས་འཆང་ཞིག་གཟིགས་རྒྱབ རིན་པོ་ཆེའི་སྐུ་མདུན་དུ་ཡང་ཡང་བཅར་ཏེ། དེས་ཁྱེད་ཀྱིས་རྙིང་མའི་ཆོས་སྐོར་གནང་ན། རྒྱལ་མཆོག་ལྔ་པ་ཆེན་པོའི་མཛད་པ་དང་ཁྱད་མེད་ལྟ་བུ་འབྱུང་བས་ཤིན་ཏུ་ལེགས་པ་དང་། དེའི་ཐོག་རྙིང་མའི་རིན་ཆེན་གཏེར་མཛོད་ཆ་ཚང་ཞིག་ཀྱང་གསན་བཞེས་མཛད་ན། རྙིང་མའི་ཆོས་སྐོར་ཡོངས་རྫོགས་ཀྱི་བདག་པོར་འགྱུར་བས་ངེས་པར་གསན་ན་ལེགས་ཚུལ་ཞུས་ཤིང་། མ་ཟད་དམ་པ་ཉིད་ཀྱི་དག་སྣང་སེང་གདོང་མའི་ཆོས་སྐོར་དེ་ཡང་རིན་ཆེན་གཏེར་མཛོད་
ཀྱི་མཇུག་ཏུ་སྦྱར་ན་ལེགས་པོ་ཡོང་བ་འདུག་ཅེས་པ་སོགས་སྙན་བསྐུལ་ཡང་ཡང་ཞུས་པ་ལ་བརྟེན་ནས། གཟིགས་རྒྱབ་རིན་པོ་ཆེས་ཁྱུང་སྤྲུལ་གྱི་མདུན་ནས་རིན་ཆེན་གཏེར་མཛོད་ཆ་ཚང་གསན་རྒྱུའི་ཐུགས་ཐག་བཅད། འདི་དག་གི་དུས་སྐབས་སྔ་ཕྱི་མང་པོར་རྒྱལ་ཆེན་རྡོ་རྗེ་ཤུགས་ལྡན་སྐུ་ཕེབས་ཀྱིས་རྙིང་ཆོས་གསན་བསམ་མཛད་རྒྱུ་མེད་པ་དང་། གལ་ཏེ་འདི་འདྲ་གནང་ན་སྐུ་ཚེ་མཛད་པ་དང་བཅས་པར་བར་ཆད་འོང་བས་མི་ལེགས་པའི་ཚུལ་སོགས་ཀྱི་བཀའ་ལུང་ཤུགས་ཆེ་མང་ཙམ་མཛད་ཀྱང་མ་གསན་པ་དང་། བར་སྐབས་ཤིག་ཏུ་སྤ་རི་ཐོག་བཙན་ཡིན་ཟེར་བའི་ལྷ་ཞིག་ཐོག་ཕེབས་བྱུང་སྟེ། ང་གདུག་འདྲེ་རྒད་པོ་བསམ་ཡས་ཕྱོགས་སུ་ཤ་ཁྲལ་ཞིག་འབུལ་དགོས་པ་ལགས་ན། སྐུ་ཉིད་ནས་བདག་ལ་ཤ་ཞིག་གསོལ་རས་གནང་དགོས། ཞེས་ཞུས་པར་གཟིགས་རྒྱབ་
རིན་པོ་ཆེས་སྐུ་རྩེད་ལྟ་བུར་གཞན་ནི་མེད་ང་རང་དགོས་ན་སྤྲད་ཆོག་གསུངས་པར། ཐོག་བཙན་དེས་སྐུ་ཉིད་ང་ལ་རང་ལྟ་མི་དགོས་ཏེ་རྒྱལ་ཆེན་རྡོ་རྗེ་ཤུགས་ལྡན་ལ་དགོས་གསུང་གིན་འདུག་གོ །ཞེས་ཞུས་ཀྱང་སྣང་མེད་ལྟ་བུར་མཛད་དེ་མ་གསན། སྐབས་ཤིག་རྒྱལ་ཆེན་རྡོ་རྗེ་ཤུགས་ལྡན་སྐུ་ཕེབས་ནས་ཐུགས་ཤིན་ཏུ་ཁྲོས་པའི་ཚུལ་གྱིས། ངས་གཤིན་རྗེའི་སྦར་མོ་འདི་འདེབས་མི་ཡོང་། གལ་ཏེ་བཏབ་ན་ཀློད་ཤེས་མི་ཡོང་། ཞེས་གསུངས་པ་སོགས་ཞི་དྲག་སྣ་ཚོགས་ཀྱིས་དགེ་ལྡན་ལྟ་གྲུབ་གཙང་མར་འཛིན་དགོས་པའི་བསྐུལ་མ་ཡང་ཡང་ཞུས་ཀྱང་གཟིགས་རྒྱབ་རིན་པོ་ཆེས་གསན་དགོངས་ཡེ་མ་མཛད་པར། ཁོང་སྐྱེས་བུ་དམ་པ་འདི་དང་འདི་འདྲ་བ་སྐྱེ་བ་སྔ་ཕྱིར་སྐུ་ཚེ་ལ་བར་ཆད་གཏོང་མུས་ཡིན་ཡང་། ང་ནི་བླ་མའི་བཀའ་མ་འཁྲོལ་
བས་ཐབས་མེད་ཅེས་གསུངས་ནས། མ་གསན་པར་རིན་ཆེན་གཏེར་མཛོད་གསན་རྩིས་མཛད་དེ་ལྷ་སའི་ཉེ་སྐོར་ཤར་ཕྱོགས་ནོར་རྒྱས་ནང་པའམ་གྲོང་གསར་གཞིས་ཀའི་སྤྲོ་ ཁང་གཡར ་པོ་ཞུས་ཏེ་ཁྱུང་སྤྲུལ་མདུན་ནས་ཐོག་མར་རྙིང་ཆོས་ཀྱི་བཀའ་ལུང་གཞན་མང་ཙམ་ཞིག་གསན། དེ་ནས་ཆོས་སྐྱོང་རྒྱལ་ཆེན་ཤུགས་ལྡན་གྱི་ཆོ་འཕྲུལ་ཆེར་བྱུང་བ་དང་། ྋཁྱུང་སྤྲུལ་གྱིས་ངེད་བླ་སློབ་གཉིས་ཀ་སྐུ་མཚམས་ཤིན་ཏུ་དམ་པར་མཛད་དེ་བཞུགས་དགོས་ཚུལ་ཞུས་ཏེ་བཅད་རྒྱར་བཞུགས། དེ་སྐབས་ལྷ་སར་སྲིད་བློན་བཤད་སྒྲ་བ་དཔལ་འབྱོར་རྡོ་རྗེ་གློ་བུར་སྐུ་བསྙུན་ཏེ་གཟིགས་རྒྱབ་རིན་པོ་ཆེ་ཚེ་དབང་གང་བར་ཕེབས་དགོས་ཞེས་སྙན་གསན་ནན་ཞུ་བྱུང་བར་བརྟེན་བཅད་རྒྱ་ལས་ཧར་འདོན་མ་མཛད་མཐུ་མེད་ཀྱིས་ཕེབས་དགོས་པ་བྱུང་། སྲིད་བློན་ལ་ཚེ་དབང་གནང་ཟིན་
རྗེས་བསྟན་རྒྱས་གླིང་གི་ལྡེ་འཆང་བློ་མཁས་ལགས་ཀྱི་གཟིམ་ཤག་ཏུ་ཕེབས་ནས་སྐུ་ཆས་གང་ཡོད་ཕྱག་མཛོད་ལ་རྩིས་སྤྲོད་ལེགས་པར་མཛད། ཁྱེད་ཀྱིས་ཞབས་ཕྱི་ལེགས་པར་བགྱིས་བྱུང་བས་ཐུགས་རྗེ་ཆེ། ད་ནས་ཁྱེད་རང་ཡང་སེམས་མ་ཕམ། ངས་ཀྱང་བརྗེད་མི་ཡོང་ཞེས་གསུངས་ཏེ་སེམས་གསོ་ཡང་ཡང་མཛད། དེ་ནས་གྲོང་སར་གཞིས་ཀའི་སྤྲོ་ཁང་དུ་ཕྱིར་ཕེབས་འཕྲལ་གློ་བུར་དུ་སྐུའི་བསྙུན་གཞི་ཤིན་ཏུ་ལྕི་བ་ཞིག་བྱུང་སྟེ་ཞག་གཅིག་སོང་བའི་ཐོ་རངས་ཁར་ཞིང་ཁམས་གཞན་དུ་གཤེགས། དེ་ཉིན་ཉི་མ་སྔ་ཕྱི་ཚ་རྟིང་ཙམ་ལ་བླ་བྲང་གི་མ་བྱན་གྲྭ་བཙུན་ཞིག་ལ། རྒྱལ་ཆེན་ཤུགས་༉ ལྡན་ཁོག་ཏུ་ཞུགས་ཏེ་བྱུང་བ་དང་། ཁྱུང་སྤྲུལ་གྱིས་དབུ་ལ་ཨོཾ་རྒྱན་པཎ་ཞྭ་བཞེས་ཕྱག་ཏུ་རྡོ་རྗེ་རྩེ་དགུ་པ་ཞིག་ཐོགས་ཏེ། ཞལ་ནས་ཧཱུྃ་ཧཱུྃ་ཞེས་སྡིགས་མཛུབ་
དང་བཅས་ཏེ་བྱུང་སྐབས་ཆོས་སྐྱོང་རྒྱལ་ཆེན་ཤུགས་ལྡན་ཁོག་ཞུགས་དེའི་ཞལ་ནས་ཧཱ་ཧཱ་ཞེས་གད་མོ་དང་བཅས་ཕྱག་ཐལ་མོ་བརྡབ་སྟེ་སྐུ་སངས། དེ་མ་ཐག་ཏུ་ཁྱུང་སྤྲུལ་གྱི་ཆིབས་རྟ་ལེགས་ཤོས་ཤིག་གི་གྲོད་པ་ཆེར་སྦོས། རྒྱལ་གཟེར་བཏབ་སྟེ་ཤི་བ་ཞིག་བྱུང་། གཟིགས་རྒྱབ་རིན་པོ་ཆེ་འདིས་རྙིང་ཆོས་གསན་བཞེས་མ་གནང་བར་ལྟ་སྤྱོད་རྣམ་པར་དག་པ་གསེར་སྦྱང་བཙོ་མའི་ཅོད་པན་འཆང་བའི་རིང་ལུགས་ཉིད་ཀྱིས་ཆོག་པར་འཛིན་ན་སྐུ་ཚེ་མཛད་འཕྲིན་མཚུངས་ཟླ་བྲལ་བ་ཞིག་ཡོང་རྒྱུ་ཡིན་འདྲ་ཡང་བར་ཆད་ཀྱི་དབང་གིས་དེ་ལྟར་མ་བྱུང་བ་ཡིན་འདུག གཟིགས་རྒྱབ་རིན་པོ་ཆེའི་སྐོར་འདི་རྒྱུད་སྨད་ཏྲེ་ཧོར་སྔགས་རམ་པ་བློ་བཟང་རྒྱ་མཚོ་ཞེས་པ་གཟིགས་རྒྱབ་རིན་པོ་ཆེ་སྐུ་གོང་མ་ཞི་བར་མ་གཤེགས་ཀྱི་བར། རིན་པོ་ཆེའི་ཞབས་ཕྱི་དང་ཁྱད་མེད་ལྟ་བུར་སྐུ་དྲུང་
དུ་ཡུན་རིང་བཅར་བསྡད་བྱས་ཤིང་། རྗེས་སོར་གཡག་སྡེ་འཁྱམས་དགོན་པའི་བླ་མར་བཞུགས་པ་ཁོང་གི་ངག་ལམ་ནས་ཞིབ་མ་ཟད་དེ་ཉིད་ཀྱི་སྐུ་ཕྲེང་རྗེས་པར་ཐོས་པ་ཡིན་པས་ཁུངས་བཙུན་པའི་གནས་ཡིན་ཞེས་༧སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་གི་ཞལ་ལས་ཐོས་ཤིང་། མ་གཟིགས་རྒྱབ་རིན་པོ་ཆེ་ད་ལྟ་འཚོ་ཞིང་གཞེས་པ་འདི་ཉིད་ལའང་ཞལ་རས་ཀྱི་ཕྱེད་ཙམ་ནག་ནོག་གི་སྐྱོན་གྱིས་ཁེབས་པ་སོགས་ཆོས་སྐྱོང་གཉན་པོ་འདི་ཉིད་ཀྱི་ཐུགས་དང་འགལ་བའི་བརྟུལ་ཞུགས་བཟུང་བ་ནི་མཚར་དུ་ཆེའོ། །༽ཞེས་ཟེར་བ་ཡང་ཕྱོགས་ཞེན་ཆགས་སྡང་གི་གཏམ་སྟེ། གཟིགས་རྒྱབ་རིན་པོ་ཆེ་མཁས་གྲུབ་ཡོངས་གྲགས་དེ་ལྟ་བུ་ལ་སྒྲོ་སྐུར་ངན་པ་ཞུ་རྒྱུས་ཕོངས་ནས་ཁྱུང་སྤྲུལ་པདྨ་དབང་ཆེན་མདུན་ནས་རྙིང་ཆོས་སྐོར་མ་ཞུས་ན་ཚེ་དང་འགྲོ་དོན་
མཐར་ཕྱིན་པ་ཡོང་རྒྱུ་ལ། རིན་ཆེན་གཏེར་མཛོད་གསན་རྒྱུ་ཐུགས་བཅད་པ་དེས་བར་ཆད་དུ་གྱུར་ནས་ལྷ་སར་གློ་བུར་དུ་སྐུ་གཤེགས་ཟེར་བ་ཁྱོད་ཀྱི་མངོན་པར་ཤེས་པས་བཤད་པ་ཡིན་ན་མ་གཏོགས་འདི་ལ་བདེན་པའི་རྒྱུ་མཚན་ཏིལ་འབྲུ་ཙམ་མ་མཆིས། ཤུགས་ལྡན་ཙམ་ནུས་མཐུ་ཆེ་ན་ཁྱུང་སྤྲུལ་གྱིས་རྡོ་རྗེས་བསྡིགས་ཚེ་སྐུ་ཡལ་མ་ཐང་ཞིང་། གནོད་པ་ཆིབས་ཀྱི་གྲོད་ཁོག་སྦོས་པ་ལས་དྲག་ཙམ་བྱེད་རིགས་པ་ལ་དེ་ལྟར་མ་བྱུང་འདུག་པས་ལོ་རྒྱུས་རིང་པོ་བྲིས་པ་་ཡང་ཆོས་སྐྱོང་ནུས་མཐུ་ཞན་པ་དང་ཁྱུང་སྤྲལ་གྱི་ཆེ་བ་འདོན་བྱེད་དུ་མི་གདའ་འམ། ད་ལྟའི་གཟིགས་རྒྱབ་རིན་པོ་ཆེའི་ཞལ་རས་ལ་ཤ་མཚན་ཡོད་པ་ཆོས་སྐྱོང་གི་བཀའ་ཆད་ཡིན་པར་འགོད་འོས་ཚེ་གཟིགས་རྒྱབ་རིན་པོ་ཆེའི་སྐུ་ལ་མི་མཛེས་པའི་ཆ་ཅི་ཡོད་ཐམས་ཅད་རྒྱལ་ཆེན་གྱི་བཀའ་ཆད་ཡིན་པར་སྨྲོས་དང་
རུང་བར་འགྱུར་རོ། །ཛེ་སྨད་ན་རེ། ༼སེར་བྱེས་རྩེད་ཉ་སྤྲུལ་སྐུ་གོང་མ་དེས་ཀྱང་འཁྲུལ་བྲལ་ཚང་ལ་མ་ནོར་བ་བློ་བཟང་རྒྱལ་བའི་ཆོས་ཚུལ་ཡལ་བར་དོར་ཏེ་ཁྱུང་སྤྲུལ་སོགས་བསྟེན་ཅིང་ཟབ་ཟབ་མོ་དང་རྫིག་རྫིག་མོར་མིང་བཏགས་པའི་ལྟར་སྣང་གི་ལམ་དག་ལ་དབུ་འཁོར་ཏེ་ལྟ་༜གྲུབ་འཆལ་བར་སྤྱོད་པའི་མཛད་པ་ལ་བརྟེན་ནས་ཆོས་སྐྱོང་ཆེན་པོ་འདི་ཉིད་ཀྱི་ཐུགས་དང་འགལ་བའི་ཆོ་འཕྲུལ་དུ་མ་བསྟན་ཅིང་། རྩེད་ཉ་རིན་པོ་ཆེ་དེ་ཉིད་ཀྱིས་རྙིང་ཆོས་ལ་གསན་བསམ་གནང་བའི་རྗེས་ཙམ་ཞིག་ལ་ལྷ་སར་གཟིམ་ཤག་བཤད་སྒྲའི་ཉེ་འགྲམ་ར་ག་སྨད་ཅེས་པར་རྗེ་ཡབ་སྲས་གསུམ་གྱི་གསུང་འབུམ་བཀླག་ལུང་གནང་སྐབས། ཤངས་ཁྲག་མང་དུ་བཤར་ནས་ཆོད་དཀའ་བ་ཡང་ཡང་བྱུང་བ་དང་། གསུང་འབུམ་གྱི་ཡིག་འབྲུ་རྣམས་ཀྱང་ཁྲག་གིས་
བྲིས་པ་ལྟར་དམར་རྐྱང་དུ་གཟིགས་པ་བྱུང་ཞེས་རྩེད་ཉ་རིན་པོ་ཆེ་ཉིད་ཀྱིས་རྗེ་ཕ་བོང་ཁར་གསུང་འཕྲོས་སུ་གསུང་འདུག །སྐབས་ཤིག་ལྷ་ལྡན་ནས་བྱང་དུ་ཕེབས་ཏེ་བྱང་ཁུལ་བསྙུན་ཟུག་དྲག་པོ་བྱུང་སྟབས། ཆོས་སྐྱོང་ལ་ཞུ་བཤགས་འབུལ་བའི་ཆེད་དུ་བྱང་ནས་བང་མི་ཆེད་མངགས་གཏོང་གནང་མཛད་དེ་དགའ་ལྡན་ཁྲི་ཆེན་དགུ་བཅུ་པ་ཏྲེ་ཧོར་བྱམས་པ་ཆོས་གྲགས་རིན་པོ་ཆེ་དང་། སྐྱབས་རྗེ་ཕ་བོང་ཁ་པ་བདེ་ཆེན་སྙིང་པོ་རྣམ་གཉིས་ནས་ཆོས་སྐྱོང་ཤུགས་ལྡན་= ལ་ངོ་ཆེན་དང་སྦྲགས་ཞུ་བཤགས་འབུལ་གནང་མཛད་རོགས་ཞེས་གསུངས་འདུག་པར་རྗེ་ཕ་བོང་ཁ་པས་འདིའི་སྐོར་ངོས་མི་འགབ་ཅིང་། ཆོས་སྐྱོང་ཉིད་ཀྱིས་འཇམ་མགོན་ཙོང་ཁ་པ་ཆེན་པོའི་དྲུང་དུ་དགའ་ལྡན་ཐུན་མོང་མ་ཡིན་པའི་བསྟན་སྲུང་མཛད་རྒྱུའི་ཐུགས་བསྐྱེད་ཅིང་དམ་བཅའ་བཞེས་པ་དང་། རྗེ་ཙོང་
ཁ་པ་ཆེན་པོའི་རྒྱལ་ཚབ་དགའ་ལྡན་ཁྲི་ཆེན་རིན་པོ་ཆེ་ཡིན་པས་ད་རེས་ངོ་ཆེན་མཛད་རྒྱུའི་སྐོར་ཁྲི་ཆེན་རིན་པོ་ཆེར་ཞུས་ན་ལེགས་ཚུལ་གསུངས་པ་ལྟར། དགའ་ལྡན་ཁྲི་ཆེན་རིན་པོ་ཆེར་ཞུས་པར་ཞལ་བཞེས་མཛད་དེ་ལྷ་སར་སྤྲོ་བདེ་ཁང་གསར་དུ་ཕེབས། ཆོས་སྐྱོང་སྐུ་གསོལ་ཐོག་རྩེད་ཉ་རིན་པོ་ཆེའི་སྐོར་ཞུ་བཤགས་ཕུལ་བར། ངེད་ཀྱི་བློན་པོར་ཞུས་ཞེས་གསུངས་པ་ལྟར། སྨོན་སྐྱིད་ཁང་གསར་དུ་བཀའི་བློན་པོ་བཙན་རྒོད་ཁ་ཆེ་དམར་པོ་གསོལ་ཁ་ཞུས་ཏེ་ཞུ་བཤགས་འབུལ་གནང་མཛད་པ་ན། བཙན་རྒོད་ཀྱིས་དྲག་རྩུབ་ཀྱི་རྣམ་འགྱུར་མང་དུ་བསྟན་པས། ཁྲི་ཆེན་རིན་པོ་ཆེ་ཉིད་ཀྱང་ཐུགས་ཞེད་སྣང་བྱུང་བའི་ཚུལ་མཛད་ཅིང་། བཙན་གྱི་བཀའ་ལུང་དུ། དམ་པ་ཁོང་བྱེད་སྤྱོད་མང་དང་གཅིག །འདྲེ་ང་གདུག་རྩུབ་ཆེ་དང་གཉིས། ཅི་འགྱུར་མི་
ཤེས་གསུངས་ཏེ་དེ་འཕྲལ་སྐུ་ཡལ། འདིའི་སྐོར་ཁྲི་ཆེན་རིན་པོ་དེ་ཉིད་ཀྱིས་ཕྱིས་ཁྲི་ཐོག་གོ་བཞི་པར་ཕེབས་པ་སེར་བྱེས་གཙང་པ་ལྷུན་གྲུབ་བརྩོན་འགྲུས་རིན་པོ་ཆེ་རྒྱུད་པར་དགེ་བཤེས་དཀྱུས་མར་བཞུགས་སྐབས་གསུང་བྱུང་ཞེས་ཁྲི་ཆེན་གོ་བཞི་པས་གསུངས་པ་དང་། རྩེད་ཉ་བྱང་དུ་ཕེབས་སྐབས་དེར་གང་ནས་འོང་ཆ་མེད་པའི་འདོགས་ཁྱི་ལྟ་བུའི་ཁྱི་འཁྱམས་དམར་པོ་ཁ་ནག་པོ་ཡོད་པ་ཞིག་ཕྱི་བཞིན་འབྲངས་ནས་འོངས་ཏེ། རྭ་སྒྲེང་གི་རྩེད་ཉ་རི་ཁྲོད་དུ་གཟིག་- མང་དུ་ཡོད་པས་ཀྱང་། ཁྱི་དེ་ལ་གནོད་འཚེ་གང་ཡང་བྱེད་མི་ནུས་པ་དང་། དེ་ནས་རྩེད་ཉ་གར་ཕེབས་ཀྱི་རྗེས་སུ་བསྙེགས་ཏེ་ཡོང་བ་ཞིག་བྱུང་། རྩེད་ཉ་རིན་པོ་ཆེ་བྱང་དུ་ཆོས་འཁོར་སྒང་ཞེས་པའི་གྲོང་སྡེར་ཕེབས་སྐབས་ངེད་ཀྱི་རྗེས་སུ་རྒྱལ་འཁྱམས་ཤིག་སླེབས་ཡོད་པར་འདུག་ཅེས་གསུངས་ཏེ། རྟ་མགྲིན་
ཡང་གསང་གི་སྒོ་ནས་དྲག་པོའི་གཏོར་མ་ཟོར་དུ་འཕེན་པ་ཡང་ཡང་མཛད་པ་སོགས་ཀྱིས་ཀྱང་གང་ཡང་མ་ཕན་པར་རིང་མིན་ཞི་ཉ་སྤྲུལ་སྐུ་ཁོ་བོ་བར་གཤེགས། རྩེད་ཉ་སྐུ་གཤེགས་པའི་རྗེས་སུ་སྔར་གྱི་ཁྱི་དེ་ཡང་གར་སོང་མེད་པར་བརླག་འདུག་ཅིང་། མ་ཟད་དེའི་སྐུ་ཕྲེང་རྗེས་མ་རྩེད་ཉ དང་ན་ཚོད་མཉམ་པ་འདི་ཉིད་ཀྱང་སེར་བྱེས་གྲྭ་ཚང་དུ་གཞུང་ལུགས་ལ་སྦྱངས་པ་མཛད་སྐབས་རིག་ལམ་རྣོ་མྱུར་ལེགས་རབ་ཡོད་པ་ཡང་། རྭ་སྒྲེང་དང་། མཁར་རྡོ་ཉམས་ཉེས་པའི་སྐབས་དེར་གཞུང་ལ་ངོ་རྒོལ་མེ་འཕེན་བྱེད་པའི་བྱེད་གཏེའི་གྲས་སུ་ཚུད་དེ། གཞུང་དམག་གིས་འཛིན་བཟུང་དང་། ཁོང་དང་མཉམ་བསྐྱོད་སེར་སྨད་གྲྭ་པ་གྲོང་སྟོད་པ་ཞེས་པ་ཞིག་གཞུང་དམག་གིས་བསད་པའི་མགོ་ལག་སྐེ་ལ་བསྐོན་ཏེ་དམའ་འབེབས་ཀྱིས་ལྷ་སའི་ཁྲོམ་གཞུང་བརྒྱུད་རྩེ་
ཞོལ་དུ་འཁྲིད་དེ་རྐང་པར་ལྕགས་སྒྲོག་དང་བཅས་བཙོན་འཇུག་བྱས་ཤིང་། བཙོན་ཁང་དུ་བསླབ་སྐྱོན་བྱུང་བ་སོགས་མི་ཤིས་པའི་མཚན་མ་མང་དུ་བྱུང་བ་མངོན་སུམ་མཐོང་ཆོས་སུ་གྱུར་ཏོ། །༽ ཞེས་ཟེར་བ་ཡང་ཆགས་སྡང་གི་གཏམ་སྟེ། དེ་ཡང་རྩེད་ཉ་སྤྲུལ་སྐུ་གོང་མས་ཆོས་ལ་ཕྱོགས་རིས་སྤངས་ཏེ་ཁྱུང་སྤྲལ་ལས་རྙིང་མའི་ཆོས་སྐོར་ཞུས་པ་དེ་ཟབ་མོ་མིན་པ་དང་། ལམ་ལྟར་སྣང་ལ་དབུ་འཁོར་བ་དང་། མ་ཟད་ལྟ་གྲུབ་འཆལ་བར་གྱུར་ཞེས་ཟེར་བ་དེ་ལྟ་ན་ནི། རྒྱལ་བའི་དབང་པོ་ཐམས་ཅད་མཁྱེན་པ། དགེ་འདུན་རྒྱ་མཚོ་དང་། རྗེ་བསོད་ནམས་རྒྱ་མཚོ། ཡོན་ཏན་རྒྱ་མཚོ། བློ་བཟང་རྒྱ་མཚོ། ཐུབ་བསྟན་རྒྱ་མཚོ་སོགས་སྔོན་བྱོན་དགེ་ལུགས་པའི་བསྟན་འཛིན་ཚད་ལྡན་དེ་དག་ལམ་ངན་ལ་ཞུགས་པའི་ལྟ་གྲུབ་འཆལ་པོར་རིགས་པས་གྲུབ་སྟེ། དེ་དག་གིས་རྙིང་ཆོས་
གསན་བསམ་སྒོམ་གསུམ་མཛད་པའི་ཕྱིར་རོ། །རྩེད་ཉ་རིན་པོ་ཆེས་ལྷ་ལྡན་དུ་རྗེ་ཡབ་སྲས་གསུམ་གྱི་བཀའ་འབུམ་ལྗགས་ལུང་གནང་སྐབས། ཤུགས་ལྡན་གྱིས་ཡང་ནས་ཡང་དུ་བར་ཆད་བརྩམས་འདུག་པ་འདིས་ཞྭ་སེར་རིང་ལུགས་སྐྱོང་བའི་ཆོས་སྲུང་དུ་ཇི་ལྟར་རུང་། ཡང་ཁོང་གིས་ཤུགས་ལྡན་ལ་ངོ་ཆེན་དང་སྦྲགས་ཞུ་བཤགས་ནན་དུ་ཕུལ་ཡང་དང་ལེན་མ་བྱས་པར་བྱང་ཆོས་འཁོར་སྒང་དུ་བཀྲོངས་པར་བཤད་པ་ནི། སྡོམ་པ་ཉི་ཤུ་པ་ལས། ཚིག་གིས་བཤགས་ཀྱང་མི་ཉན་པར། །ཁྲོ་བས་གཞན་ལ་འཚོག་པ་དང་། །ཞེས་གསུངས་པ་ལྟར་བྱང་སེམས་ཀྱི་རྩ་ལྟུང་ཕོག་པར་མ་ཟད། འདྲེ་ངན་གདུག་རྩུབ་དང་ཀོ་ལོང་ཅན་དུ་མཚོན་ནུས། རྩེད་ཉ་སྐུ་ཕྲེང་རྗེས་མ་དེས་དགའ་ལྡན་བསྟན་ལ་ཐན་སྐྱེལ་བསླབ་པ་ཁྱད་གསོད་ཀྱིས་དམག་ཇག་གི་བྱ་བ་
གཞུང་ལ་ངོ་རྒོལ་འཐབ་འཛིང་བྱས་རྐྱེན་གྱིས་ཁྲི་མུན་དུ་ཚུད་པ་བསྙོན་མེད་ལ། ད་དུང་ཤུགས་ལྡན་གྱི་བཀའ་ཆད་ཡིན་ཚུལ་བཤད་པ་ནི་རྒྱུ་འབྲས་ཁྱད་གསོད་ངོ་ཚ་དང་བྲལ་བའི་ཚིག་གོ། །ཡང་ཛེ་སྨད་ན་རེ། ༼བར་ཁམས་བསྟན་པའི་སྣང་བྱེད་ཆེན་པོ་ཆབ་མདོ་འཕགས་པ་ལྷ་ཧོ་ཐོག་ཐུ་བློ་བཟང་ཐུབ་བསྟན་མི་ཕམ་ཚུལ་ཁྲིམས་རྒྱལ་མཚན་གྱིས་ཀྱང་དགེ་ལྡན་ལྟ་གྲུབ་གཙང་མར་སྐྱོང་འོས་པ་མ་བསྐྱངས་པར་ལྟ་སྤྱོད་ཆལ་ཆོལ་སྣ་ཚོགས་ཤིག་མཛད་པས་མཐར་བསླབ་སྐྱོན་བྱུང་ཞིང་། དེར་བརྟེན་༸རྒྱལ་དབང་ཐུབ་བསྟན་རྒྱ་མཚོའི་བཀའ་ཉེས་ཕོག་སྟེ་ཆབ་ཁོངས་སྡེ་དགོན་གྱི་ཆོས་སྲིད་དབང་ལུང་བསྒྱུར་་དུ་མེད་པར་ཐུགས་ལས་ཆུང་ངུར་བཞུགས་དགོངས་སོགས་མཛད་པ་ལམ་དུ་མི་འགྲོ་བ་དང་། རྗེས་སོར་ཆབ་མདོའི་སིས་ཐོག་ཐང་ཞེས་པར་འཕགས་ཆེན་རིམ་པའི་སྤྲོ་
ཁང་ཡོད་པ་དེར་ཆུ་འགྲོའི་ཡུར་བ་ཞིག་གི་ནང་རྐང་སྒ་རིལ་ལམ་རྐང་འཁོར་ཆག་རོ་ཞིག་བོར་ཡོད་མ་གཟིགས་པར་ཆབ་གསང་གནང་སྐབས་ཞབས་འདྲེད་ཤོར་ཏེ་ལྷུང་བར་འཁོར་ལོའི་ཆག་དུམ་ཞིག་འདོམས་ཀྱི་རྩ་བར་ཟུག་ཅིང་རྨ་སྐྱོན་ཆེ་བྱུང་ལ་སྨན་དཔྱད་ཇི་ལྟར་མཛད་ཀྱང་མ་ཕན་པར་དྲི་ཆུ་ཡང་ཆུ་ལམ་ནས་མིན་པར་རྨ་ཁུང་ནས་ཐོན་པ་སོགས་བསྙུན་གཞི་བབས་ལྕི་ཡུན་རིང་མཐར་སྐུ་གཤེགས་པའི་རྐྱེན་ངན་འདི་དག་ཀྱང་རྡོ་རྗེ་ཤུགས་ལྡན་འདི་ཉིད་ཀྱི་ཐུགས་དང་འགལ་བའི་ཆོ་འཕྲུལ་ཁོ་ནར་ངེས་ཏེ། རྗེ་ཕ་བོང་ཁ་པ་བདེ་ཆེན་སྙིང་པོ་མཆོག་མདོ་ཁམས་ཕྱོགས་སུ་ཆིབས་བསྒྱུར་མཛད་དེ་ཆབ་༔ མདོར་ཕེབས་སྐབས། འཕགས་ཆེན་རིན་པོ་ཆེའི་སྤྲོ་ཁང་ཐང་དཀར་སྟེང་དུ་བཞུགས་ཞག་མཛད་པའི་ནུབ་ཅིག་རྗེ་ཕ་བོང་ཁ་པའི་གཟིམ་ལམ་དུ། ཡོལ་བ་
ཞིག་གི་ཚུར་ངོས་སུ་སྲུང་མ་དྲག་རྩུབ་ཤིན་ཏུ་ཆེ་བ་གཉིས་དང་། ཡོལ་བའི་ཕར་ངོས་སུ་འཕགས་ཆེན་རིན་པོ་ཆེ་འདི་ཉིད་ཤིན་ཏུ་ཉམ་ཐག་པའི་ཚུལ་དུ་བཞུགས་པ་ཞིག་གི་གཟིམ་ལམ་བྱུང་བ། དམ་པ་འདིས་ལྟ་གྲུབ་མི་གཙང་བའི་བསྲེ་བསླད་ཅན་དུ་མཛད་པས། མཛད་པའི་ཐ་མ་མི་ཤིས་པ་འདི་འདྲ་འབྱུང་བའི་རྟགས་མཚན་ཡིན་འདུག་ཅེས་རྗེ་ཕ་བོང་ཁས་དྲུང་ཡིག་འདན་མ་བློ་བཟང་རྡོ་རྗེ་ལགས་སོགས་ལ་བཀའ་གནང་འདུག་པ་དང་། གོང་གསལ་གཤེགས་རྐྱེན་བསྙུན་གཞིའི་སྐོར་གྱི་གནས་ཚུལ་རྣམས་ཆབ་མདོའི་མངའ་ཁོངས་ཁྱུང་པོ་རྨེ་རུ་སྐྱིད་མཁར་དགོན་གྱི་གྲྭ་རིགས་བཙན་ཕོ་དགེ་སློང་མཁྱེན་རབ་བྱམས་པ་ཞེས་པ་འཕགས་ཆེན་རིན་པོ་ཆོའི་སྐུ་བཅར་ཞབས་ཞུའི་གྲས་ཤིག་གི་ངག་ལམ་ཐོས་པ་ཁུངས་ལྡན་ཡིན་ཞེས་ཆབ་མདོའི་རྒྱ་ར་རིན་པོ་ཆེས་༧སྐྱབས་རྗེ་བཀའ་
དྲིན་བླ་མེད་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོར་ཞུ་གནང་མཛད་འདུག་པ་ལྟར་རོ། །༽ ཞེས་ཟེར་བ་མ་བརྟག་ཧམ་རྫུན་ཟང་མ་སྟེ། དེ་ཡང་འཕགས་པ་ལྷ་སྐུ་ཕྲེང་གོང་མ་རྣམས་ཀྱི་རིང་ནས་རྙིང་མའི་ཆོས་གསན་བཞེས་གནང་སྲོལ་ཡོད་བཞིན་པ་ལ་ཁྱོད་ཀྱིས་དགེ་ལྡན་གཙང་མ་↑སྐྱོང་འོས་པ་མ་བསྐྱངས་ཞེས་ཟེར་བ་ཅི་ལ་འཐད། ཆབ་མདོ་འཕགས་པ་ལྷའི་སྐུ་ཕྲེང་གོང་མ་འཇིག་རྟེན་དབང་ཕྱུག་རྒྱལ་བ་རྒྱ་མཚོ་དང་། ཞི་བ་བཟང་པོ། ཐུགས་སྲས་ངག་དབང་མཆོག་གི་སྤྲུལ་སྐུ་རྣམསཀྱིས་སྨིན་གླིང་གཏེར་ཆེན་གཅུང་ལོ་ཆེན་དྷརྨ་ཤྲཱི་བར་ཁམས་ཆབ་མདོ་དགོན་དུ་གདན་འདྲེན་ཞུས་པའི་དྲུང་ནས་གཏེར་གསར། ཐུགས་ཆེན་བདེ་གཤེགས་ཀུན་འདུས་དང་། ཚེ་དཔག་མེད་ཡང་སྙིང་ཀུན་འདུས། རྡོར་སེམས། གུར་དྲག །གཤིན་རྗེ་དྲེགས་
འཇོམས་རྣམས་དང་། གཏེར་རྙིང་སྐོར་ཆོས་དབང་བླ་མ་གསང་འདུས། ཉང་གི་དྲག་དམར་ཆེ་བ། ཕྱག་རྡོར་དྲེགས་འདུལ་གྱི་དབང་ཆེ་ཆུང་། ཕྱག་རྡོར་གསང་སྒྲུབ་ཁང་བརྩེགས། རྟ་མགྲིན་གསང་སྒྲུབ། ལོཀྟྲི། ནཱ་ག་རཀྴ། ན་རཀ་དོང་སྤྲུགས་ཞི་ཁྲོ་ཁྲོམ་སྤྲུགས་ལུགས་ཀྱི་དབང་དང་། རྗེས་གནང་ལ་སོགས་རྡོ་རྗེ་ཐེག་པ་སྔ་འགྱུར་བཀའ་གཏེར་རྒྱ་མཚོའི་སྨིན་གྲོལ་གྱི་རྒྱུན་བཟང་ཡང་དག་པར་བཞེས་པ་སྨིན་གླིང་ལོ་ཆེན་དྷརྨ་ཤྲཱིའི་གསུང་རྣམ་དུ་གསལ་ན་ཡང་མཐོང་རྒྱ་ཆུང་ལ་ང་རྒྱལ་ཆེ་བ་ཁྱོད་ཀྱིས་ལོ་རྒྱུས་ཁུངས་མ་ཆོད་བཞིན་དུ་སྨྲ་དགོས་པའི་ཁྲལ་སུ་ཡིས་བཀལ། འཕགས་པ་ལྷས་དེ་དུས་ཕ་བོང་ཁ་པ་ཕྱོགས་རིས་ཅན་དུ་གཟིགས་ནས་གུས་བཏུད་མ་ཞུས་པའི་ཉེར་ལེན་གྱིས་མཚན་ལམ་ངན་ལྟས་བྱུང་ཚུལ་གླེང་ཡོད་ཤས་ཆེ། དོན་དུ་འཕགས་པ་ལྷ་གོང་མ་དེ་
ནི་མངོན་ཤེས་དང་རྫུ་འཕྲུལ་ཐོགས་མེད་མངའ་བ་ཆོས་ལུགས་གྲུབ་མཐའི་ཕྱོགས་རིས་ཡེ་མི་མཛད་ཅིང་། མཐར་ཞིང་བརྗེ་སྐབས་ཀྱང་གདུང་ལས་རིང་བསྲེལ་མང་པོ་བྱོན་པ་སོགས་ངོ་མཚར་བའི་རྟགས་ཁྱད་པར་ཅན་བྱུང་ནས་སྐྱེ་རྒུ་རྣམས་དད་པ་ལ་བཀོད་པ་འདི་བདེན་པའི་དཔང་པོར་འཕགས་པ་ལྷའི་ཞབས་ཕྱི་རྒྱུས་ཅན་མང་པོ་ད་ལྟ་ཡང་ཡོད་པ་རྣམས་ལ་དྲིས་ཤིག་དང་གསལ་བར་འགྱུར་གྱི། རྫུན་རྒྱབ་རྒྱ་ར་སྤྲུལ་སྐུ་ཕྱོགས་རིས་དང་འཆལ་སྤྱོད་ཆགས་སྡང་ཅན་གྱི་འཁྱོག་གཏམ་ལ་ཚད་མར་ནམ་ཡང་མི་བྱེད། དེ་ལྟར་འཕགས་ཆེན་དམ་པར་སྐུར་ཞུས་བྱེད་མཁན་རྒྱ་ར་སྤྲུལ་སྐུ་དང་ལོ་རྒྱུས་ཞུ་ཡུལ་བཅས་བླ་སློབ་གཉིས་ཀས་རྙིང་ཆོས་སྤོང་བ་དང་ཤུགས་ལྡན་ལ་འདི་ཕྱིའི་བློ་གཏད་ཞུ་མཉམ་མཛད་ཀྱང་། མཐར་ཁོང་གཉིས་ཀྱི་སྐུ་ཚེ་འདི་ལ་མི་ཤིས་པའི་
མཚན་མ་ཅི་བྱུང་རང་གཞན་ཀུན་གྱིས་ཤེས་གསལ་ལྟར་རོ། །ཛེ་སྨད་ན་རེ།༼ནག་ཆུ་སྒྲུབ་ཁང་སྤྲུལ་སྐུ་སྐུ་ཕྲེང་དྲུག་པ་ཐུབ་བསྟན་སྐལ་བཟང་བསྟན་འཛིན་གྱིས་ཀྱང་། གང་གི་སྐྱེ་བར་འཛིན་པའི་རྗེ་སྒྲུབ་ཁང་པ་དགེ་ལེགས་རྒྱ་མཚོ་སོགས་སྐུ་ཕྲེང་གོང་མ་རྣམས་ཀྱི་རྣམ་ཐར་གཙང་མ་བདག་གིར་མ་བཞེས་པར་རྙིང་ཆོས་གེ་སར་དང་ཕུར་པ་སོགས་ཀྱི་སྐོར་ཞུས་ཏེ་བསྙེན་པ་དང་ལས་སྦྱོར་སྣ་ཚོགས་མཛད་པ་སོགས་དགེ་ལྡན་ལྟ་གྲུབ་བསྲེ་བསླད་ཅན་དུ་སྤྱོད་པས། ཆེན་རྡོ་རྗེ་ཤུགས་ལྡན་གྱི་ཐུགས་དང་འགལ་བའི་དབང་གིས་བསྙུན་གཞི་ཚབས་པོ་ཆེ་ཞིག་བྱུང་སྟེ་ཉིན་ཤས་རིང་ཤངས་ཁྲག་ཀྱང་ཆད་མེད་མང་དུ་ཐོན་འདུག་རྒྱལ་པའི་ཁར་ཉིད་ཀྱི་གཟིགས་སྣང་དུ་གཟིམ་ཆུང་ནང་དུ་མི་འདྲ་མིན་མང་པོ་ཞིག་ཡོང་གི་འདུག་ཅིང་། ལྷག་པར་གྲྭ་པ་མང་པོ་བཀག་ཀྱང་མ་ཁེགས་པར་ནང་དུ་
ཤོར་ཏེ་འོངས་པ་དེ་སྐབས་མི་བདེ་བ་ཆེན་པོ་ཡོང་གི་འདུག་ཅེས་གསུངས་ཤིང་། མཐར་དགུང་གྲངས་སུམ་ཅུ་སོ་བདུན་ལོར་བྱང་ཁུལ་ཨ་མདོ་སྟོད་དུ་རྙིང་མའི་ཡི་དམ་ཕུར་པ་རྡོ་རྗེ་གཞོན་ནུའི་སྒྲུབ་པ་མཛད་བཞིན་པའི་མུར་ཞིང་བརྗེ་བ་སྣང་ངོ་། །༽ ཞེས་ཟེར་བ་ལ་དཔྱད་ན། ནག་ཆུ་སྒྲུབ་ཁང་སྤྲུལ་སྐུས་དགེ་ལྡན་ལྟ་གྲུབ་བསྲེ་བསླད་ཅན་བྱས་པས་ཕུང་བར་བརྩིས་འདུག་པ་ལ་བློ་གཟུ་བོར་གནས་པ་ཞིག་གིས་བལྟས་ན། འདྲེ་ངན་ལྷར་བསྟེན་ཅིང་ཆོས་སྤོང་དམ་ཉམས་བསགས་པ་དེས་དགེ་ལྡན་བསྟན་པ་ལ་བསྲེ་བསླད་ཅན་དུ་མ་གྱུར་ན། ཁོང་གིས་ཡི་དམ་ལྷ་མཆོག་རྡོ་རྗེ་ཕུར་པའི་ཆོས་སྐོར་ཞུས་ཏེ་མཐར་དགོངས་པ་མ་རྫོགས་ཀྱི་བར་དུ་ཆོས་ལ་སྤོང་ལེན་དང་ལོག་ལྟ་མ་མཛད་པར་བསྙེན་སྒྲབ་ལ་ཚུལ་བཞིན་འབུངས་པ་དེ་འདྲས། བསྲེ་བསླད་ངན་
པར་གྱུར་ཏོ་སྙམ་པ་དེ་ནི་ཁྱོད་ཀྱིས་ཐོས་པ་བྱས་ཚད་ཕྱོགས་རེ་བ་གཡག་ཞར་གྱིས་རྩྭ་ཉུལ་བ་ལྟར་སོང་བ་ལས་གཞན་མ་ཡིན་ནོ། །ཛེ་སྨད་ན་རེ། ༼ད་ནི་བོད་རྗེ་སྲིད་སྐྱོང་གི་ཁྲི་ལ་དབང་བསྒྱར་བའི་རྒྱལ་ཚབ་རྭ་སྒྲེང་རིན་པོ་ཆེར། ཆོས་སྐྱོང་ཆེན་པོ་རྡོ་རྗེ་ཤུགས་ལྡན་གྱི་ཆོ་འཕྲུལ་ལ་བརྟེན་ནས་རྒྱལ་པོའི་ཆད་པ་འབབ་པའི་ཚུལ་བརྗོད་པར་བྱ་སྟེ། དེི་ཡང་རྭ་སྒྲེང་རིན་པོ་ཆེ་སྐུ་ཕྲེང་བཞི་པ་ངག་དབང་ཡེ་ཤེས་བསྟན་པའི་རྒྱལ་མཚན་དཔལ་བཟང་པོ་དེ་ཉིད་སྐུམྱ་ངན་ལས་འདའ་ཁར། ད་ཕྱིན་རྭ་སྒྲེང་རིན་པོ་ཆེའི་ཡང་སྲིད་རྩད་དཔྱོད་མི་དགོས་ཞེས་རྒྱལ་དབང་ཐུབ་བསྟན་རྒྱ་མཚོར་སྙན་འབུལ་དང་སྦྲགས། རྭ་སྒྲེང་བླ་བྲང་གི་འཛིན་དབང་ཡོངས་རྫོགས་གཞུང་ས་མཆོག་ལ་རྩ་འབུལ་གནང་སྟེ་ཞིང་བརྗེས། འོན་ཀྱང་རྒྱལ་དབང་མཆོག་ནས་འཛིན་དབང་རྣམས་བླ་བྲང་ལ་ཕྱིར་སྩལ་གྱིས།
བླ་མཆོད་དང་འབྲེལ་བའི་འབུམ་ཚོགས་སོགས་རིམ་གྲོ་གཏོས་ཆེ་བ་འབད་སྒྲུབ་ཐོག་ཡང་སྲིད་མཆོག་སྤྲུལ་རྩད་དཔྱོད་ཀྱིས་ན་ཕྲ་མོའི་དུས་སུ་སྲ་མཁྲེགས་ཀྱི་རྡོ་བ་འདམ་བུ་ལྟར་བརྫིས་པའི་ཞབས་རྗེས་བཞག་པ་ཕྱིས་རྭ་སྒྲེང་དགོན་པའི་རྟེན་གྲལ་དུ་ཡོད་པ་ཁོ་བོས་ཀྱང་མཇལ་མྱོང་བ་གདན་ཞུ་ངེས་པར་བྱ་དགོས་ཀྱི་བཀའ་ཁྱབ་ཇི་སྩལ་ལྟར། རྭ་སྒྲེང་རིན་པོ་ཆེའི་ཡང་སྲིད་དྭགས་པོའི་ཁུར་དུ་ཁྱིམ་ཚང་དབུལ་པོ་ཞིག་ཏུ་སྐུ་བལྟམས་ཏེ། སྐུ་དང་། ཉིན་གཅིག་ཡུམ་མེད་པའི་ཤུལ་དུ་ཐུག་རྫའི་ནང་ནས་ཐུག་པ་ཕྱིར་ལུད་པ་གླགས་མ་རྙེད་པའི་ཟོལ་གྱིས་ཞབས་སྒྲོག་གིས་ཐུག་རྫའི་ཁ་རྒྱ་རྐྱལ་སྣོད་ཀྱི་ཁ་སུལ་ལྟར་བཅིང་བ་དང་། ཡང་སྲིད་རྩད་དཔྱོད་པ་འབྱོར་རྒྱུའི་ཉིན། དེ་རིང་རང་རེར་འགྲུལ་པ་གསར་པ་ཞིག་འབྱོར་ཡོང་ཞེས་མ་འོངས་མངོན་མཁྱེན་
གྱིས་ཕ་བོང་སྲ་བའི་སྟེང་དུ་རྟ་འདོགས་པའི་ཕུར་པ་འདེབས་གནང་མཛད་པ་སོགས། ཡང་སྲིད་འཁྲུལ་བྲལ་ངེས་པ་སྟེར་བའི་ལྟས་ངོ་མཚར་བ་དུ་མ་དང་བཅས།༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་པ་ཐུབ་བསྟན་རྒྱ་མཚོའི་བཀའ་ལུང་གིས། རྭ་སྒྲེང་རིན་པོ་ཆེ་སྐུ་ཕྲེང་ལྔ་པ་ཐུབ་བསྟན་འཇམ་དཔལ་ཡེ་ཤེས་རྒྱལ་མཚན་ཞེས་མཚན་གསོལ་དང་བཅས་རྭ་སྒྲེང་གོང་མའི་ཁྲི་ལ་མངའ་གསོལ་ཞིང་། ཆོས་སྡེ་ཆེན་པོ་སེ་ར་ཐེག་ཆེན་གླིང་བྱེས་པ་མཁས་སྙན་གྲྭ་ཚང་དུ་གསན་བསམ་མཛད་དེ། ལྷ་ལྡན་སྨོན་ལམ་ཆེན་མོའི་གྲྭ་སྐོར་མཚན་བཞེས་དམ་བཅའ་འཇོག་གནང་མཛད་པ་སོགས་སློབ་གཉེར་གྲུབ་རྗེས། ཆུ་སྤྲེལ་ལོར་རྒྱལ་དབང་ཐུབ་བསྟན་རྒྱ་མཚོ་རྭ་སྒྲེང་གནས་གཟིགས་སུ་ཆེད་གཏད་ཞབས་འཁོད་ཀྱིས། རྭ་སྒྲེང་རིན་པོ་ཆེར་ནང་དོན་སྲིད་དབང་འཛིན་ཕྱོགས་
སྐོར་སོགས་བཀའ་མངགས་གནང་ཡོད་ཚོད་མ་ཟད། ཕྱི་ལྟར་ཡང་རྭ་སྒྲེང་རིན་པོ་ཆེར་མཉེས་ཚོར་ཤིན་ཏུ་ཆེ་བ་མཛད་དེ། ཆུ་བྱ་ལོར་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་དགོངས་པ་ཞི་དབྱིངས་སུ་གཤེགས། དེ་རྗེས་ཟླ་བ་གཉིས་ཙམ་གྱི་རིང་སྲིད་བཀའ་ལྷན་རྒྱས་ནས་ཆབ་སྲིད་འགན་བཞེས་མཛད་ཀྱང་། དེའི་རྗེས་བོད་ལྗོངས་སྤྱི་ཚོགས་ཀྱི་ཚོགས་འདུ་ཆེན་མོའི་སར། ཆབ་སྲིད་ཀྱི་དབུ་འཛིན་སུ་འོས་བཀའ་བགྲོས་མང་དུ་གནང་བའི་མཐར། རྒྱལ་ཚབ་བླ་མ་སྐོ་བཞག་གནང་རྒྱུ་གཏན་འཁེལ་གྱིས། རྭ་སྒྲེང་རིན་པོ་ཆེ་མཆོག་དང་། དགའ་ལྡན་ཁྲི་པ་ལས་ཐོག་ཡེ་ཤེས་དབང་ལྡན་ནམ་ཡོངས་གྲགས་སུ་འབྲས་སྤུངས་བློ་གླིང་མི་ཉག་ཨ་མིང་ཞུ་བ། ཡོངས་འཛིན་ཕུར་ལྕོག་བྱམས་མགོན་སྤྲུལ་སྐུ་རིན་པོ་ཆེ་བཅས་རྣམ་པ་གསུམ་འོས་འདེམས་
ཐོག །རྩེ་འཕགས་པ་ལོ་ཀི་ཤྭ་རའི་མདུན་དུ་དགའ་ལྡན་ཁྲི་ཟུར་ཏྲེ་ཧོར་བྱམས་པ་ཆོས་གྲགས་རིན་པོ་ཆེ་གདན་ཞུས་ཀྱིས་ཟན་བརྟག་བསྒྲིལ་གནང་མཛད་པར། ཟན་བསྒྲིལ་དུ་རྭ་སྒྲེང་མཆོག་སྤྲུལ་རིན་པོ་ཆེའི་མཚན་ཐོན་པ་ལྟར་ཐུགས་གཏན་འཁེལ་ཏེ། རབ་བྱུང་བཅུ་དྲུག་པའི་ཤིང་ཁྱི་ཟླ་བ་དང་པོའི་ཚེས་བཅུ་ཉིན་རྒྱལ་ཚབ་སྲིད་སྐྱོང་གི་ཁྲིར་ཕེབས་ཏེ་གཞུང་དགའ་ལྡན་ཕོ་བྲང་པ་ཆེན་པོའི་ཆོས་སྲིད་གཉིས་ལྡན་གྱི་ཆབ་སྲིད་ཚུལ་བཞིན་བསྐྱངས་པའི་ཐུགས་འགན་བཞེས་ཤིང་། ལྷག་པར་རྒྱལ་མཆོག་ཐུབ་བསྟན་རྒྱ་མཚོའི་གདུང་རིན་པོ་ཆེ་ནང་གཟུངས་སུ་བཞུགས་པའི་གསེར་གྱི་མཆོད་སྡོང་ཆེན་པོ་དགེ་ལེགས་འདོད་འཇོ་རྟེན་དང་བརྟེན་པར་བཅས་པ་གསར་བཞེངས་མཛད་པ་དང་། རྒྱལ་བའི་ཡང་སྲིད་རིན་པོ་ཆེ་རྩད་དཔྱོད་སླད་ལྷ་མོའི་བླ་མཚོར་གཟིགས་ཞིབ་ཏུ་རྭ་སྒྲེང་རིན་པོ་ཆེ་ཉིད་
ཕེབས་ནས་སྐབས་བབས་སྐལ་བ་ཡོད་མེད་རྩེ་འཕགས་པ་རིན་པོ་ཆེའི་དྲུང་ཟན་བསྒྲིལ་མཛད་པར་སྐལ་བ་ཡོད་ཅེས་ཐོན་པ་ལྟར། ལྷ་མོའི་མཚོ་གཟིགས་སུ་ཕེབས་པས་མཚོ་མཇལ་གསལ་གཟིགས་བྱུང་བ་ལྟར། རང་ཅག་ཁ་བ་རི་བའི་མེ་ཏོག་གང་ལ་ཕོག་པའི་ལྷ་སྐལ་སྤྱི་ནོར་གོང་ས་༧ སྐྱབས་མགོན་ཆེན་པོའི་ཡང་སྲིད་འཁྲུལ་བྲལ་རྩད་དཔྱོད་གདན་ཞུས་ཀྱིས། གསེར་གྱི་ཁྲི་འཕང་མཐོན་པོར་མངའ་གསོལ་བར་མཛད་པ་སོགས་མཛད་རླབས་རྒྱ་ཆེ་རྨད་དུ་བྱུང་ཞིང་། ས་ཡོས་ལོ་སྟོད་དུ་སྲིད་བློན་གླང་མདུན་པ་ཀུན་དགའ་དབང་ཕྱུག་དང་དགོངས་གཞི་མ་མཉམ་པར་བརྟེན་དགོངས་ཞུ་མཛད་ཉེར། བོད་ལྗོངས་སྤྱི་ཚོགས་ནས་ཆབ་སྲིད་ཀྱི་ཐུགས་འགན་ཡོངས་རྫོགས་ཕུལ་ཏེ་རྒྱལ་ཚབ་སྲིད་སྐྱོང་རང་འཇགས་གནང་རྒྱུའི་གསོལ་འདེབས་ཞུས་ཤིང་། ས་
ཡོས་ཟླ་བ་བཅུ་པའི་ཚེས་བཞི་ཉིན་ལྷ་ལྡན་ར་ས་འཕྲུལ་སྣང་གི་གཙུག་ལག་ཁང་དུ། ཇོ་བོ་རིན་པོ་ཆེའི་མདུན་དུ་༸གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོའི་དབུ་སྐྱེས་ཀྱི་ལན་བུ་འབྲེག་ཅིང་། བསླབ་གཞི་ལྔ་ནོད་པའི་དགེ་བསྙེན་གྱི་སྡོམ་པ་སྩལ། ཡང་སྐྱར་ས་ཡོས་ཟླ་བ་བཅུ་གཉིས་པའི་ནང་རྒྱལ་ཚབ་རྭ་སྒྲེང་རིན་པོ་ཆེ་ཉིད་ནས་ཆབ་སྲིད་འཛིན་སྐྱོང་གློ་བུར་དགོངས་ཞུ་གནང་བར། བཀའ་ཤག་དང་སྤྱི་ཚོགས་ཧྲག་བསྡུས་ནས་༸༧གོང་ས་མཆོག་ད་ལྟ་སྐུ་ན་ཕྲ་ཡང་རིམ་པར་རིང་མིན་སོན་རྒྱུར་བརྟེན་བར་འདིར་སྲིད་སྐྱོང་གཞན་དག་གསར་བསྐོ་མ་དགོས་པར་སྔར་བཞིན་རང་འཇགས་གནང་དགོས་ནན་ཞུས་བྱས་ཀྱང་། ཞལ་བཞེས་གཏན་ནས་མ་གནང་བར། ཐ་མའི་བཀའ་སློབ་ཏུ་སྲིད་སྐྱོང་གསར་པ་ཡོངས་འཛིན་སྟག་བྲག་རིན་པོ་ཆེར་ཞུས་ན་ལེགས་ཚུལ་དང་བཅས་སྲིད་
སྐྱོང་མཛད་ཁུར་ལོ་བདུན་གནང་སྟེ་ཟླ་བ་བཅུ་གཉིས་པའི་ཚེས་བཅུ་ཉིན་ཁྲི་ལས་བཤོལ། སྐབས་དེ་དག་ཏུ་རྭ་སྒྲེང་རིན་པོ་ཆེ་ཉིད ཀྱི་སྒོས་ཀྱི་གདན་སའི་དབང་དུ་བྱས་ན་བཀའ་གདམས་བསྟན་པའི་ཆུ་འགོ་འབྲོམ་སྟོན་རྒྱལ་བའི་འབྱུང་གནས་ཀྱི་གདན་ས་ཡིན་པས། བཀའ་གདམས་གཙང་མའི་རྣམ་ཐར་བདག་གིར་བཞེས་དགོས་པར་མ་ཟད། རྭ་སྒྲེང་སྐུ་ཕྲེང་དང་པོ་དགའ་ལྡན་ཁྲི་ཆེན་ངག་དབང་མཆོག་ལྡན་དེ་ཉིད་ཀྱིས་རྒྱལ་དབང་བསྐལ་བཟང་རྒྱ་མཚོའི་ཡོངས་འཛིན་མཛད་པ་ནས་བཟུང་སྐུ་ཕྲེང་རིམ་བྱོན་གྱིས། དགེ་ལྡན་ལྟ་གྲུབ་གཙང་མའི་ཉམས་བཞེས་མཛད་པའི་རྗེས་སུ་སློབ་པར་མཛད་འོས་པ་ལྟར། ཞྭ་སེར་ཅོད་པན་འཆང་བའི་ལུགས་བཟང་འཛིན་པའི་དམ་པ་ཚད་ལྡན་མང་པོས་ཀྱང་མཉམ་མེད་རི་བོ་དགེ་ལྡན་པའི་རིང་ལུགས་རྨ་མེད་པར་འཛིན་
སྐྱོང་སྤེལ་གསུམ་མཛད་དགོས་པའི་སྙན་བསྐུལ་ཞུས་ཤིང་། དེ་མཚུངས་རྗེ་ཕ་བོང་ཁ་པ་བདེ་ཆེན་སྙིང་པོས་ཀྱང་འབུལ་གནང་མཛད་པའི་སྙན་བསྐུལ་ཞིག་ཏུའང་། བཀའ་མངགས་རིན་པོ་ཆེ་སྤྱི་ནོད་བཞིན། རྒྱུན་གྱི་ཉམས་བཞེས་གཟིགས་དཔེ་ཐུགས་ཞིབ་བསྐྱང་རྒྱུའི་བསྙེལ་བྱང་བཀོད་པར། སྤྱིར་འཇམ་མགོན་ཙོང་ཁ་པ་ཆེན་པོའི་བསྟན་པ་ལ་ཐོས་བསམ་སྒོམ་གསུམ་གྱིས་འཇུག་ལུགས་གསང་འདུས་མན་ངག་ཡིག་ཆུང་ཉེར་གཅིག་ནང་གི་དང་པོར་དཀར་ཆག་ཐོའི་ཡིག་ཆུང་ཞེས་པ་ཡོད་པ་ལྟར་འཇུག་དགོས་པར་གསུངས་ཤིང་། ཐོག་མར་རྣམ་ཐར་སྐོར་གཟིགས་རྟོག་མཛད་ན་གོ་བ་སྐྱེ་སླ་བ་དང་། དམ་པ་གོང་མ་རྣམས་ཀྱི་མཛད་པའི་ཁྱད་པར་ཐུགས་སུ་ཆུད་པ་བཅས་གནད་ཆེ་བས། དེས་ན་རྣམ་ཐར་སྐོར་ལ་རྗེའི་རྣམ་ཐར་ཆེན་མོ། ཚེ་གླིང་ཡོངས་འཛིན་པཎྜི་ཏའི་གསུང་
འབུམ་གྲས་ལམ་རིམ་བླ་མ་བརྒྱུད་པའི་རྣམ་ཐར་པོད་གཉིས། ཞེས་སོགས་དང་། མཇུག་ཏུ། དགེ་ལྡན་མཁས་གྲུབ་གོང་མ་ཆེས་མཐའ་ཡས་པས་གསུང་རབ་ཀྱང་གཅིག་ལས་གཅིག་གསལ་ཞིང་། ཟབ་ལ་རྒྱ་ཆེ་བ་འཁྱེར་བདེ་བ་སོགས་མཐའ་ཡས་པར་བཞུགས། ཞེས་སོགས་དགེ་ལྡན་བཀའ་བརྒྱུད་གོང་མ་ཟུང་འཇུག་ནོར་བུའི་ཕྲེང་བ་རིམ་པར་བྱོན་པ་རྣམས་ཀྱི་རྣམ་ཐར་གཙང་མ་བདག་གིར་བཞེས་དགོས་པའི་སྙན་བསྐུལ་ཡང་ཡང་ཞུ་གནང་མཛད་ཀྱང་། གསན་དགོངས་ཡེ་ནས་མ་མཛད་པར་ཆབ་མདོ་བ་མཚན་ཉིད་སྤྲུལ་སྐུ་ཞེས་གྲུབ་མཐའ་ཡབ་རྗེ་འཇམ་དཔལ་སྙིང་པོའི་རིང་ལུགས་ལས་གཞན་དུ་གྱུར་པ་ཞིག་ཡོད་པ་དེ་ཉིད་དབང་ལུང་མན་ངག་ནོད་པའི་གཙོ་བོའི་བླ་མ་ལྟ་བུར་མཛད་དེ། དུས་རྒྱུན་དུ་བསྟེན་བཏུགས་ཀྱིས། གཏེར་བཏོན་
ཆོས་རྗེ་གླིང་པའི་གཏེར་ཆོས་སོགས་རྙིང་མའི་ཆོས་སྐོར་མཐའ་ཀླས་པ་ཞིག་གསན་བཞེས་མཛད་པ་དང་། ༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོའི་ཞབས་བརྟན་གསོལ་འདེབས་ཀྱང་། མཚན་ཉིད་སྤྲུལ་སྐུར་རྩོམ་ཟིན་འདེབས་སུ་བཅུག་པས་དེར་རྙིང་མའི་ཆོས་ཀྱི་བརྡ་སྐད་མང་དུ་བྱུང་བ་དང་། གཞན་ཞིང་སྒྲུབ་སྤྲུལ་སྐུ་ཞེས་པ་དང་། གཏེར་བཏོན་དུ་གྲགས་པ་དུ་མར་བསྟེན་ཅིང་། སྡེ་དགེ་མཁན་པོ་ངག་བློའི་སློབ་མ་སངས་རྒྱས་རྡོ་རྗེ་ཟེར་བ་དེའི་མདུན་ནས་རྫོགས་ཆེན་གྱི་ཁྲིད་གསན་པ་སོགས་མདོར་ན་དམ་པ་གོང་མའི་བཞེད་གཞུང་རང་སྲོལ་མ་ཉམས་པར་སྐྱོང་བ་ལས་ཕྱིར་བཟློག་པར་མཛད་པས། དགེ་ལྡན་ཐུན་མོང་མ་ཡིན་པའི་བསྟན་སྲུང་དགྲ་ལྷའི་རྒྱལ་པོ་ཆོས་སྐྱོང་རྡོ་རྗེ་ཤུགས་ལྡན་འདི་ཉིད་ཀྱི་ཐུགས་དང་འགལ་བའི་ཉེས་པ་མི་ཟད་པའི་དབང་གིས་མཐར་མཛད་
བྱུས་ལམ་དུ་མ་ལྷོང་པར་རང་ཉིད་ལྟོས་པར་བཅས་པ་ཕུང་ཚབས་ཆེ་བའི་ཡ་ཡུད་འདི་བྱུང་བ་ཡིན་ལ། དེ་ཡང་རྭ་སྒྲེང་རིན་པོ་ཆེ་མཆོག་ཉིད་ནས་འདུ་ཁང་གི་ལྡེབ་རིས་སུ། ཡི་དམ་ཕུར་པ་དཔལ་ཆེན་རྡོ་རྗེ་གཞོན་ནུའི་ལྷ་ཚོགས་ཀྱི་སྣང་བརྙན་བཞེངས་སུ་བཅུག་པ་མ་ཟད། རྭ་སྒྲེང་རིན་པོ་ཆེ་མཆོག་ཉིད་ཡི་དམ་ཕུར་པའི་བསྙེན་མཚམས་བཅད་རྒྱ་ཞིག་མཛད་འདུག་པ་དང་། སྐབས་དེའི་གཟིམ་ལམ་དུ་གྲྭ་པ་ཞིག་གིས་སྡེར་མའི་ནང་སྙིང་དམར་པོ་ཞིག་བླུགས་ཏེ་ཕུལ་བའི་གཟིམ་ལྟས་བྱུང་འདུག་པར། རྭ་སྒྲེང་རིན་པོ་ཆེ་ཉིད་ནས་ཆོས་སྐྱོང་བྲན་དུ་འཁོལ་བ་ལྟ་བུའི་རྟེན་འབྲེལ་དུ་བརྩིས་ཏེ། ཨར་ལས་དོ་དམ་པ་ཤན་ཁ་བར་བཀའ་གནང་འདུག་ཅིང་། དེ་སྐབས་ཤན་ཁ་བས་གཟིམ་ལྟས་ལེགས་པོ་རང་ཨེ་ཡིན་སྙམ་པ་འདུག་ཅེས་ཞུས་པ་ཡིན་ཞེས་ཤན་ཁ་བས་
སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོར་ཞུས་འདུག་པ་དང་། མ་ཟད་ཕྱིས་རྭ་སྒྲེང་བླ་བྲང་ལྟོས་བཅས་ཉམས་ཉེས་པའི་སྐབས། མཁར་རྡོ་བླ་བྲང་མཁར་དབང་ཡོངས་རྫོགས་གཞུང་བཞེས་གནང་སྟབས། སྲིད་སྐྱོང་སྟག་བྲག་རིན་པོ་ཆེས་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་མཆོག་དང་། མཚན་ཞབས་རྒྱ་མཚོ་གླིང་སྤྲུལ་སྐུ་རྣམ་གཉིས་ལ། མཁར་རྡོའི་ཕྱག་དཔེའི་གྲས་སུ་མཁར་རྡོ་རིག་འཛིན་ཆོས་ཀྱི་རྡོ་རྗེའི་མ་འོངས་ལུང་བསྟན་གྱི་ཕྱག་དཔེ་ཡོད་པ་འཚོལ་དགོས་ཞེས་བཀའ་གནང་བ་ལྟར། རྣམ་པ་གཉིས་ཀྱིས་འཚོལ་ཞིབ་མཛད་སྐབས། མཁར་རྡོ་གོང་མའི་ལུང་བསྟན་དེ་དག་དང་ལྷན་དུ་ཡོད་པའི་ཤོག་ལྷེ་ཁག་གི་གྲས་སུ། མཁར་རྡོ་སྤྲུལ་སྐུས་རྭ་སྒྲེང་རིན་པོ་ཆེའི་སྐུ་ཕྱྭ་མཛད་འཕྲིན་དང་བཅས་པའི་སྐོར་ཇི་འགྱུར་བླ་མ་གཞན་ཞིག་ལ་པྲ་འབེབས་ཞུས་པའི་ཡི་གེ་ཞིག་
འདུག་པར། པྲ་ལུང་རྣམས་ཇི་བཞིན་ད་ལྟ་ཐུགས་ངེས་མི་སྣང་ཡང་། པྲ་རྟགས་སུ་སྣ་ཚོགས་རྡོ་རྗེ་ལྟེ་བ་མེད་པ་ཞིག་དང་། དེའི་རྒྱབ་ཏུ་གྲྭ་པ་བསེ་ཐེབས་གྱོན་པ་ཞིག་ལངས་ནས་བསྡད་ཡོད་བྱུང་ཚུལ་འཁོད་འདུག་ཅེས་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོས་ཁོ་བོར་གསུངས་པ། སྭཱ་ཚོགས་རྡོ་རྗེ་ནི་སྐ་ཚེ་དང་མཛད་པ་ཕྲིན་ལས་ཀྱི་རྟགས་ཏེ། དེར་ལྟེ་བ་མེད་པ་འགལ་རྐྱེན་བར་ཆད་ཆེ་བའི་མཚན་མ་དང་། གྲྭ་པ་བསེ་ཐེབས་གྱོན་པ་དེ་ཉིད་ཆོས་སྐྱོང་ཆེན་པོ་རྡོ་རྗེ་ཤུགས་ལྡན་གྱི་རྣམ་འཕྲུལ་ཡིན་ངེས་ཀྱི་པྲ་རྟགས་མ་འོངས་གསལ་སྟོན་ཐུབ་པ་བྱུང་འདུག་པ་བཞིན། མཐར་མེ་ཕག་ལོར་རྭ་སྒྲེང་རིན་༔པོ་ཆེ་དང་། སྲིད་སྐྱོང་སྟག་བྲག་རིན་པོ་ཆེ་རྣམ་གཉིས་ཐུགས་བཞེད་མ་སྙོམས་པར། རྭ་སྒྲེང་རིན་པོ་ཆེའི་ཕྱོགས་ནས་སྲིད་སྐྱོང་སྟག་བྲག་རིན་པོ་ཆེའི་སྐུ་
སྲོག་ལ་བསྡོ་བའི་མཛད་ཉེས་ཀྱི་རྣམ་པ་ཐོན་པར་བརྟེན། གཞུང་གི་མཐོ་རིམ་ལས་བྱེད་འགའ་ཞིག་གོ་བསྡུར་ཐོག་གསང་རྒྱའི་ངང་ནས་བཀའ་བློན་ཟུར་ཁང་པ་དབང་ཆེན་དགེ་ལེགས་དང་། བཀའ་བློན་ལྷ་ཀླུ་བ་འགྱུར་མེད་ཚེ་དབང་རྡོ་རྗེ་གཉིས་དཔུང་དམག་དང་བཅས། རྭ་སྒྲེང་རིན་པོ་ཆེ་གདན་ཞུ་བཏང་བ་ལྟར། ཁོང་རྣམས་ཟླ་བ་གཉིས་ཚེས་བཅུ་གསུམ་དགོང་མོར་མཚན་བགྲོད་ཀྱིས་རྭ་སྒྲེང་དུ་བསྐྱོད་དེ། དེ་ནས་རྭ་སྒྲེང་རིན་པོ་ཆེ་ཚུར་ལམ་འཕན་པོ་སྒོ་ལ་བརྒྱུད་གདན་ཞུས་བྱས་ཤིང་སྐབས་དེར་རྩེད་ཉ་སྤྲུལ་སྐུས་འགོ་འཁྲིད་ཀྱིས་སེར་བྱེས་གྲྭ་ཚང་གི་གྲྭ་གཞོན་རྡོབ་རྡོབ་རྣམས་ནས་རྭ་སྒྲེང་རིན་པོ་ཆེའི་རྒྱབ་ལངས་ཀྱིས་བྱེས་མཁན་པོ་ལས་ཐོག་པ་སོག་པོ་བློ་བཟང་བསྟན་དར་སྟག་བྲག་རིན་པོ་ཆེའི་ཕྱོགས་ཉེའི་བབས་ཀྱིས་ངོ་གཡོག་བཞི་ཉེས་བརྡུངས་ཀྱིས་བསད་ཅིང་། གཞུང་
ལའང་ངོ་རྒོལ་གྱི་མེ་འཕེན་སོགས་བྱེད་པ་དང་། གཞུང་ནས་ཀྱང་ཚེས་བཅུ་བཞིའི་ཉིན་རྭ་སྒྲེང་བླ་བྲང་དང་། མཁར་རྡོ་བླ་བྲང་སོགས་ཀྱི་མི་རྒྱུ་རྣམས་དོ་དམ་གནང་། རྒྱལ་ཚབ་ཟུར་པ་རྭ་སྒྲེང་རིན་པོ་ཆེ་རྩེ་ཕོ་བྲང་གི་ཤར་བརྒྱུད་ཤར་ཆེན་ལྕོག་ཏུ་གཤམ་གསལ་བསྲུང་བྱ་བའི་འགོ་དམག རྣམས་ལས། དེ་མིན་ཞབས་འབྲིང་གཅིག་ཀྱང་མེད་པའི་སྐུ་རྐྱང་ཁོ་ནར་དོ་དམ་གྱིས་ཁོངས་སུ་བཞུགས་དགོས་པ་བྱུང་། རྭ་སྒྲེང་རིན་པོ་ཆེའི་རྒྱུན་དུ་ཐུགས་འདྲིས་ཆེ་བ་མཁར་རྡོ་སྤྲུལ་སྐུ་སྐལ་བཟང་ཐུབ་བསྟན་སྙན་གྲགས་དང་། རྭ་སྒྲེང་རིན་པོ་ཆེའི་སྐུ་མཆེད་རྭ་སྒྲེང་ཛ་སག་གཉིས་ཀྱང་འཛིན་བཟུང་དང་། བཞི་སྡེ་སྨྱུང་གནས་བླ་མ་བློ་བཟང་ཡེ་ཤེས་རྣམ་རྒྱལ་ཁོང་གི་སྐུ་ཕྲེང་གོང་མ་ཚོའི་རྣམ་ཐར་བཟུང་སྟེ་ལྟ་གྲུབ་གཙང་མ་ཞིག་སྐྱོང་རྒྱུ་བབས་འབྲེལ་ཆེ་ཡང་། རྭ་སྒྲེང་རིན་
པོ་ཆེའི་གསུང་དབང་ལྟ་བུས་རྙིང་ཆོས་ཀྱི་བསྲེ་བསླད་གནང་བར་བརྟེན་ཆོས་སྐྱོང་འདི་ཉིད་མ་དགྱེས་པའི་རྣམ་པས། བསོད་ནམས་ཟད་ཁར་བསམ་ངན་སྐྱེ་བའི་དཔེ་ལྟར། སྟག་བྲག་རིན་པོ་ཆེའི་སྐུ་ལ་བསྡོ་བའི་བྱ་ངན་གྲས་སུ་སོན་པར་བརྟེན་འཛིན་བཟུང་བྱ་སྐབས། རང་གིས་རང་ལ་མེ་མདའ་བརྒྱབ་སྟེ་འདས་གྲོངས་སོང་བ་དང་། ཚོགས་འདུ་ནས་ཞིབ་དཔྱོད་སླད་རྒྱལ་ཟུར་རྭ་སྒྲེང་རིན་པོ་ཆེ་ཚོགས་འདུར་གདན་ཞུས་ཀྱིས། གདན་ཐོབ་སྒྲོན་ཏེ་མཛད་ཉེས་ཅི་བྱུང་བཀའ་འདྲི་ཞུས་པར། ཐོག་མར་མཁར་རྡོ་སྤྲུལ་སྐུའི་ངག་ལམ་ནས་ནག་ཉེས་མཐིལ་བརྡོལ་གྱིས། མཐར་རྭ་སྒྲེང་རིན་པོ་ཆེས་ཀྱང་སྲིད་སྐྱོང་སྟག་བྲག་རིན་པོ་ཆེའི་མཛད་པར་ཡི་རང་མིན་གྱི་སྒོ་ནས་ལས་དོན་ནོར་འཁྲུལ་འགའ་ཞིག་བྱུང་སོང་ཡང་། བླ་སློབ་ཆོས་ཀྱི་དམ་ཚིག་གི་འབྲེལ་བར་བརྟེན། ང་རང་སྲིད་
སྐྱོང་སྟག་བྲག་རིན་པོ་ཆེའི་སྐུ་མདུན་དུ་ངོ་བཅར་གྱིས་དགོངས་སེལ་ཕྱག་འཚལ་ཞུ་བཤགས་དང་། ཕྱིན་ཆད་འགྱོད་སྡོམ་དམ་བཅའ་མཛད་རྒྱུ་གན་རྒྱ་ཁག་འབྲེལ་ཕུལ་ཆོག་པ་ཞེས་ནག་ཉེས་ཞལ་བཞེས་ཀྱིས་ཞུ་ནན་ཇི་མཛད་ལྟར། ཚོགས་འདུ་ནས་ཀྱང་དེ་དོན་ཡོང་བའི་རྒྱབ་གཉེར་བཅས་བཀའ་ཤག་བརྒྱུད་སྙན་ཞུ་གནང་ཡང་དོན་སྨིན་མ་སོན་པའི་མུར། སེར་བྱེས་གྲྭ་མང་ནས་ཀྱང་ཟིང་ཆ་ཇེ་ཆེར་སོང་གཤིས། གཞུང་དམག་ནས་ཀྱང་ཆོས་སྡེ་ཆེན་པོར་ཁ་གཏད་དེ་མེ་འཕེན་ཉིན་བསྟུད་བྱས་པ་དང་། རྭ་སྒྲེང་གདན་སར་དམག་སྤྱི་སྐལ་བཟང་ཚུལ་ཁྲིམས་དང་། བྱང་སྤྱི་ཞྭ་སྒབ་པ་འགོ་དམག་ཆེད་བཏང་གིས་རྭ་སྒྲེང་དགོན་གྱི་སྐུ་གསུང་ཐུགས་རྟེན་གྱིས་མཚོན་པའི་སྣོད་བཅུད་ཀུན་ལ་ཉམས་ཉེས་མི་བཟད་པ་བཏང་བ་སོགས། འཚེ་སྤོང་ཞི་བའི་རྒྱལ་
བསྟན་རིན་པོ་ཆེ་ཉམས་སྨད་ཅིང་འཇིག་པའི་སྙིགས་མའི་མངོན་རྟགས་དུས་ཤར་བ་བྱུང་། འདིའི་མཛད་ཉེས་སྐོར་མཁར་རྡོ་སྤྲུལ་སྐུ་དང་། སྨྱུང་གནས་བླ་མ། རྭ་སྒྲེང་ཛ་སག་སོགས་ཀྱིས་རྭ་སྒྲེང་རིན་པོ་ཆེར་མཛད་དཀའི་སྙན་བསྐུལ་མང་པོ་རིམ་ཞུས་ལ། རྭ་སྒྲེང་རིན་པོ་ཆེ་ཉིད་ནས་ཐོག་མར་དགག་བྱ་གང་ཐུབ་མཛད་ཀྱང་། གོང་སྨོས་རྣམས་ནས་ཞུ་ནན་ཆེས་གཤིས་མཐར་ཁོང་ཚོའི་འདོད་ཐོག་ཏུ་ཆོག་འཐུས་སྩལ་བ་ཕྱག་བྲིས་ངོ་མ་ཁག་ནས་ར་འཕྲོད་གསལ་པོ་བྱུང་ཡོད་འདུག །རྭ་སྒྲེང་རིན་པོ་ཆེའི་ཞུ་ཐག་ཆོད་དེ་ཤར་ཆེན་ལྕོག་ཏུ་བསྲུང་བྱ་བ་སྣང་རྩེ་ཤག་གི་མི་དཔོན་ལུང་ཤར་བ་ཨོ་རྒྱན་རྣམ་གྲོལ་དང་། གྲ་ཕྱི་དམག་སྒར་གྱི་རུ་བཞི་པའི་རུ་དཔོན་སྐལ་བཟང་དགྲ་འདུལ། རྩེ་དྲུང་བལ་པོ་ཟེར་བ་དང་དམག་མི་གང་འཚམས་བཅས་ཡོད་པའི་དོ་དམ་འོག་བཞུགས་མུར་ཟླ་བ་གསུམ་
པའི་ཚེས་བཅུ་བདུན་གྱི་མཚན་མོ་ཆུ་ཚོད་གཉིས་ཙམ་ལ་སྐྲ་སྲོག་མི་བཟད་པའི་རྐྱེན་ངན་ཇི་བྱུང་ཕྱི་མི་སུས་ཀྱང་ཆ་མ་རྟོགས་པར་དོན་སྙིང་གློ་བུར་དེ་ནུབ་སྐུ་མྱ་ངན་ལས་འདས་པ་དང་། ༽ ཞེས་ཟེར་བ་ལ་ལན་བརྗོད་པར་བྱ་སྟེ། རྭ་སྒྲེང་སྲིད་སྐྱོང་ཧོ་ཐོག་ཐུ་རིན་པོ་ཆེར་ཐོག་མར་སྤྲུལ་སྐུ་ཚད་མ་ཡང་དག་པ་ཡིན་པའི་སྒྲུབ་བྱེད་རིང་པོ་དེ་ཙམ་ཞིག་བྲིས་ཏེ་བསྟོད་བསྔགས་བགྱིས་པ་དང་། མཐར་ལྷ་མི་གཉིས་ཀས་བསྒྲལ་འོས་སུ་བཀོད་པ་ཁ་གཅིག་ལྕེ་གཉིས་འདི་གང་ཞིག་བདེན་པར་འཛིན། མ་ཟད་ཁྱོད་རྐང་པས་ས་མ་ཟིན་པར་སྤྱི་བོས་གནམ་བརྟོལ་བའི་གཏམ་རྭ་སྒྲེང་རིན་པོ་ཆེས་ཤིང་ཁྱི་ནས། ས་ཡོས་བར་ལོ་དྲུག་ལས་མ་སོང་བ་ལ། སྲིད་སྐྱོང་མཛད་ཁུར་ལོ་བདུན་གནང་སྟེ་ཁྲི་ལས་བཤོལ་ཞེས་སྔ་ཚིག་དང་ཕྱི་ཚིག་རྒྱབ་འགལ་དུ་སོང་བ་ལ་ཤེས་
ལྡན་ཡོངས་ཀྱིས་གཟིགས་ཤིག་དང་ལོ་རྒྱུས་ཕལ་ཆེ་བ་དེ་ལྟར་མ་དག་རྫུན་ཧམ་ཡིན་པར་གསལ་པོར་རྟོགས་ཐུབ། རྭ་སྒྲེང་སྐུ་གོང་མ་དེས་ཀྱང་རྙིང་ཆོས་གསན་བཞེས་མཛད་པ་ཁོང་གི་ཐུགས་དམ་ཕྱག་དཔེ་རྭ་སྒྲེང་བླ་བྲང་དུ་བཞུགས་པའི་ནང་རྙིང་མའི་ཆོས་ཚན་མང་པོ་འདུག་པ་ཁོ་བོས་ཀྱང་མཇལ་མྱོང་། མ་ཟད་གཏེར་ཆེན་མཆོག་གྱུར་གླིང་པའི་ཆོས་བདག་ཏུ་ལུང་གིས་ཟིན་པ་ཡིན་འདུག་ཀྱང་རྟེན་འབྲེལ་གཞན་དབང་དུ་སོང་གདའ། སྲིད་སྐྱོང་རིན་པོ་ཆེ་དེ་ཉིད་ཀྱང་བར་ཆད་ཀྱི་དབང་དུ་མ་སོང་ན་བོད་ཁམས་ཙམ་དུ་མ་ཟད་འཛམ་གླིང་གི་འགྲོ་བ་ཀུན་ལ་ཕན་བདེའི་བྱེད་པོར་ལུང་གིས་བསྔགས་ཏེ། གཡོན་རུ་གཏེར་སྟོན་འཆི་མེད་རྡོ་རྗེའི་དག་སྣང་ལུང་བསྟན་ལས། རྭ་སྒྲེང་པདྨའི་རྣམ་འཕྲུལ་ནི༔ བདུད་རྣམས་འདུལ་བའི་དཔའ་བོ་ཆེ༔ འཛམ་གླིང་འགྲོ་བ་སུམ་གཉིས་
ལ༔ ཕྱིར་མི་ལྡོག་པའི་དབུགས་ཆེན་འབྱིན༔ ཞེས་དང་། རྡོ་གྲུབ་ཀུན་བཟང་གཞན་ཕན་གྱིས། བྱང་རྭ་སྒྲེང་གི་ནིརྨ་ཀ་དེ་ཡིས། །བོད་ཆོས་སྲིད་སྐྱོང་བར་བར་ཆད་ཀྱི། །དབང་མ་གྱུར་རྟེན་འབྲེལ་གེགས་མེད་དུ། །འགྲིགས་གྱུར་ན་བོད་ཁམས་ཡོངས་ལ་ཕན། །དེ་འོན་ཀྱང་བདུད་སྡེའི་བར་ཆད་མང་། །ཞེས་དང་། མགོན་ཀུན་མཁྱེན་ལྔ་པའི་དུས་བཞིན་དུ། །ཞྭ་དམར་སེར་གྱི་བསྟན་པ་རིས་མེད་པར། །བསྐྱངས་གྱུར་ན་བསྟན་འགྲོ་ཡོངས་ལ་སྨན། །ཞེས་གསུངས་པ་བཞིན། སྔོན་སྨོན་ཐུགས་བསྐྱེད་དུས་སུ་སྨིན་ཏེ་བསྟན་པ་རིས་སུ་མ་ཆད་པ་ལ་དག་སྣང་བཟང་པོས་ཁྱབ་པར་མཛད་༉ དེ། དགེ་བའི་བཤེས་གཉེན་མཁས་ཤིང་གྲུབ་པའི་དབང་པོ་ཆབ་མདོ་མཚན་ཉིད་སྤྲུལ་སྐུ་འཇམ་དཔལ་ནོར་བུ་རིན་པོ་ཆེ་ལས་རྙིང་མའི་གཏེར་ཆོས་མང་པོའི་
སྨིན་གྲོལ་རྒྱབ་བརྟེན་དང་བཅས་པ་གསན་བཞེས་དང་རྭ་སྒྲེང་གཏེར་སྟོན་སངས་རྒྱས་དབང་འདུས་ཀྱི་ཆོས་སྐོར་པར་དུ་བཞེངས་པ་སོགས་ཞབས་ཏོག་རྒྱ་ཆེར་བཀའ་དྲིན་བསྐྱངས། ཐ་ན་ཉམ་ཆུང་བདག་ལྟ་བུ་ལའང་བོང་བ་གསེར་གཟིགས་ཀྱིས་བླ་མའི་གོ་སར་བཀུར་ཏེ་རྫོགས་ཆེན་སྙིང་ཐིག་གི་སྙན་བརྒྱུད་མན་ངག་སྐོར་མཆོད་སྤྲིན་དུ་ཕུལ་བ་དགྱེས་བརྩེས་བཞེས་པ་བཅས་ཀྱི་ཤུགས་ལྡན་ཐུགས་འཁོན་བྱུང་ནས་རྭ་སྒྲེང་རིན་པོ་ཆེ་ལྟོས་པར་བཅས་པ་ཉམས་ཉེས་སུ་གྱུར་པར་བཤད་པ་འདི་དང་། འོག་ཏུ་དེ་མ་ཐག་སྟག་བྲག་རིན་པོ་ཆེའི་སྐུ་སྲོག་ལ་བསྡོ་བའི་མཛད་ཉེས་ར་འཕྲོད་གསལ་པོ་བྱུང་ནས་བཀྲོངས་པའི་ལོ་རྒྱུས་ཁ་མི་འཆམ་པ་ཆམ་པ་སྨྱོན་པའི་བླ་བརྡོལ་ལྟར་སྨྲས་པའི་སྲིད་དོན་དང་འབྲེལ་བའི་ལོ་རྒྱུས་ཕྲ་ཞིབ་བཀོད་ལུགས་འདི་ལ་དཔགས་ན་དེ་སྐབས་གྲོས་ངན་ཤོམས་མཁན་
གྱི་ཁོངས་གཏོགས་ཞིག་གི་སྐད་ཆ་ཡིན་པ་ཡང་གསལ་པོར་རྟོགས། རྒྱལ་མཆོག་སྐུ་ཕྲེང་བཅུ་བཞི་པའི་ཞབས་བརྟན་གསོལ་འདེབས། མཚན་སྤྲུལ་རིན་པོ་ཆེར་རྩོམ་ཟིན་འདེབས་བཅུགས་པའི་དཔང་པོ་སུ་མཆིས། གལ་ཏེ་དེ་ལྟར་ཡིན་ཀྱང་རུང་སྟེ། ཞབས་བརྟན་གྱི་ཚིག་དོན་ཕུན་སུམ་ཚོགས་པ་དང་དེར་རྙིང་མའི་ཆོས་སྐད་འདྲེས་པ་ལ་འགལ་བའི་སྐྱོན་སྤུ་རྩེ་ཙམ་མ་མཆིས་ཏེ། ཞབས་བརྟན་གྱི་བདེན་འབྲས་རྒྱལ་བ་རིན་པོ་ཆེ་དེང་སང་བར་འཚོ་གཞེས་བརྟན་བཞིན་པ་དང་། ཞབས་བརྟན་གསོལ་འདེབས་དེ་ཡང་གནག་རྫི་ཡན་ཆད་ཀྱི་བློ་ལ་བྱང་ནས་འུར་འདོན་བྱེད་པ་འདི་ལྟར་ལ་ཁྱོད་ཕྲག་དོག་དང་ལོག་ལྟའི་མེ་ལྕེ་སྙིང་ལ་འབར་ཞིང་། ངན་སྨྲའི་ཚིག་གི་དུ་བ་ཇི་ཙམ་འཐུལ་ཀྱང་ཉི་ཤར་སྦས་མོས་ག་ལ་ཁེབས། ཡང་བདག་ཅག་གི་མཚུངས་མེད་
རྗེ་བཙུན་བླ་མ་རིན་པོ་ཆེའི་མཚན་སྨྲོས་སྐབས་སུ། ཁྱེད་ཀྱིས་སྡེ་དགེ་མཁན་པོ་ངག་བློ་ཞེས་བྲིས་པ་མགོ་མ་ཚོས་པའི་ཆ་མེད་རྒྱུས་གཏམ་སྟེ། བདག་གི་བླ་མ་སྡེ་དགེ་བ་མ་ཡིན་ཏེ་ཝ་ཤུལ་ཁྲོམ་ཐར་རྟ་ཁོག་མ་ཞེས་པའི་འབྲོག་སྡེ་ཏྲེ་ཧོར་ཁང་སར་དཔོན་གྱི་མངའ་འབངས་སུ་གཏོགས་ཤིང་། མཚན་ལའང་འབྲོག་པའི་༜ཡུལ་སྐད་གཅེས་མིང་དུ་ངག་དགའ་འམ། ཡང་ན། ཡུལ་དུས་དེར་གཏེར་སྟོན་ངག་དབང་བསྟན་འཛིན་ཞེས་པའི་བླ་མ་སྐུ་བསྒྲེས་ཤིག་བཞུགས་པ་ལ་བདག་གི་བླ་མ་ཁོང་གི་ཞལ་སློབ་ཏུ་གྱུར་པ་དང་། སྐུ་ན་གཞོན་སྟབས་ངག་ཆུང་ཞེས་མཚན་དེ་ལྟར་ཐོགས་པ་ལས། ངག་བློ་ཟེར་བ་ལ་ཡང་མ་གྲགས་པས་ཉི་མའི་མདུན་སར་མེ་ཁྱེར་གྱི་སྒྲོན་མེ་བཀྱགས་ན་དེ་འདྲ་ལས་ཅི་ཡོང་། རྭ་སྒྲེང་རིན་པོ་ཆེས་ཕུར་པའི་ལྷ་ཚོགས་ཀྱི་བཞེངས་པ་དང་། མཚམས་དང་སྒྲུབ་པ་
མཛད་པས་ཆུས་ཉེར་བྱུང་བར་བཤད་པ་དེ་ནི་བདུད་ཀྱི་གསང་ཚིག་དངོས་ཏེ། ཅིའི་ཕྱིར་ན། གསང་ཆེན་སྔ་འགྱུར་བ་ལ་རྒྱུད་སྡེ་དང་སྒྲུབ་སྡེ་གཉིས་སུ་ཕྱེ་བའི་ཕྱི་མ་ལ་སྒྲུབ་སྡེ་ཆེན་པོ་བརྒྱད་ཀྱི་ནང་གསེས་ཕྲིན་ལས་ཀྱི་ལྷ་མཆོག་དཔལ་ཆེན་རྡོ་རྗེ་ཕུར་པ་ལ་རྒྱུད་དང་སྒྲུབ་ཐབས་ལས་ཁ་ཚར་དང་བཅས་པ། བཀའ་གཏེར་དག་སྣང་གི་བབས་སོ་རྒྱ་མཚོའི་ཀློང་ཆེན་པོ་ལྟར་ཟབ་ཅིང་རྒྱ་ཆེ་བ་བཞུགས་པ་དང་། ལྷ་མཆོག་འདིའི་སྒོ་ནས་དངོས་གྲུབ་བརྙེས་པའི་རིག་འཛིན་ས་རྙིང་གཉིས་ཀར་ད་ལྟའི་བར་ཟམ་མ་ཆད་པར་བྱོན་པའི། ཆོས་རྒྱུས་དང་རྣམ་ཐར་ལོ་རྒྱུས་དེ་དག །ཐོས་ཆུང་ཁྲོན་པའི་སྦལ་པ་ཁྱོད་ལ་མེད་པའི་ནང་ཆ་སྟོན་པར་ཟད་དེ། འཕགས་བོད་གཉིས་ཀར་རླུང་ལྟར་དུ་གྲགས་པ་བརྟན་པས་ད་གཟོད་རྒྱུད་རྣམ་དག་ཏུ་སྒྲུབ་པའི་ངལ་བ་བརྟེན་མི་དགོ
ཏེ། མཁས་པ་ཆེན་པོ་ཤཱཀྱ་མཆོག་ལྡན་གྱིས། མདོར་ན་ཡང་ཕུར་སོགས་རྒྱ་དཔེ་ཅན་ལོ་ཙཱ་བ་དོན་མཐུན་གྱིས་བསྒྱུར་བ་ལས་མཁས་པ་ལ་མཐུན་པར་གྲགས་པ་རྣམས་ནི་སྤྱིར་རྒྱ་གར་མ་དང་། རྒྱུད་རྣམ་དག་ཏུ་གྲུབ་ཟིན་པས་ན་སླར་སྒྲུབ་མི་དགོས་ཞེས་གསུངས་པ་འདི་ཁོ་ནས་ཀྱང་ལོག་རྟོག་ངན་པ་རྡུལ་དུ་བརླག་ནུས། རྨོངས་པ་ཁྱེད་ཅག་བསོད་ནམས་ཟད་རྟགས་ལྷ་ལ་ཡི་ཆད་བྱེད་པ་་ཨ་ཙམ། དེ་ལྟར་ལྷ་དང་བླ་མ། ཆོས་དང་སྒྲབ་པ་པོ་བཅས་པར་ཉོན་མོངས་དུག་ལྔའི་དབང་གིས་སྨོད་པ་ནི། སྨད་པའི་ལྕི་བ་བཞིའི་ཁ་ན་མ་ཐོ་བ་ལ་བག་མེད་དུ་ཞུགས་པ་སྟེ། དེ་ཡང་། གཏི་མུག་གྀ་དབང་གིས་སྟོན་པའི་སྐུ་ལ་སྨད་པ། ང་རྒྱལ་གྱི་དབང་གིས་མཁས་པའི་ཡོན་ཏན་ལ་སྨད་པ། ཕྲག་དོག་གི་དབང་གིས་བདེན་པའི་ཚིག་ལ་སྨད་པ། ཕྱོགས་རིས་ཀྱི་དབང་གིས་ཆོས་ལ་དགག་
སྒྲུབ་བགྱིས་པ་སྟེ། དེ་བཞི་ཀའི་ཉེས་པ་འབྱུང་བའི་སྟེང་དུ། ལོག་པ་བརྒྱད་ཀྱི་ཉེས་སྡིག་ཀྱང་ཅིག་ཅར་དུ་འབྱུང་སྟེ། དེ་ཡང་། དགེ་བ་ལ་སྨད་པ། སྡིག་པ་ལ་བསྟོད་པ། དགེ་བ་ཅན་དཀྲུགས་པ། དད་པ་ཅན་གྱི་ཚོགས་བཅག་པ། བླ་མ་ཡི་དམ་དང་། མཆེད་ལྕམ་སྤངས་པ། དཀྱིལ་འཁོར་གཉེན་པོ་འབྲལ་བ་རྣམས་ཁྱོད་ཀྱིས་བྱས་ཤིང་བསགས་པའི་ཕྱིར་རོ། །སྲིད་སྐྱོང་རྭ་སྒྲེང་རིན་པོ་ཆེ་དེ་ཉིད་བོད་ཁམས་ཡོངས་ལ་བཀའ་དྲིན་ཆེ་ཚུལ་ཅུང་ཟད་གླེང་ན་། སྐུ་ཕྲེང་བཅུ་གསུམ་པ་ཆེན་པོའི་རྒྱལ་ཚབ་ཏུ་མངའ་གསོལ་བའི་དགོངས་གཞི་དང་མཐུན་པར་སྲིད་སྐྱོང་གི་ཁྲི་འཛིན་གནང་རིང་གོང་ས་སྐུ་ཕྲེང་བཅུ་གསུམ་པ་ཆེན་པོ་དགོངས་པ་རྫོགས་རྗེས་གསེར་གདུང་རིན་པོ་ཆེ་བཞེངས་པ་དང་། སྐུ་ཕྲེང་བཅུ་བཞི་པའི་ཡང་སྲིད་འཁྲུལ་བྲལ་ངོས་འཛིན་གནང་
ནས་གྲུ་འཛིན་ཕོ་བྲང་དུ་གསེར་ཁྲིར་མངའ་གསོལ་མཛད་པ་དང་། གཙུག་ཕུད་བཞེས་ཏེ་དགེ་བསྙེན་གྱི་སྡོམ་པ་གནང་བ་དང་། རྭ་སྒྲེང་། དགའ་ལྡན། ཡེར་པ། བསམ་ཡས། གྲྭ་ཕྱི་སྨིན་གྲོལ་གླིང་གི་མཆོད་རྟེན་མཐོང་གྲོལ་ཆེན་མོ་སོགས། གཙུག་ལག་ཁང་དང་གནས་རྟེན་ཁྱད་པར་ཅན་མང་པོ་ཉམས་གོག་ཏུ་སོང་བ་རྣམས་རྟེན་དང་བརྟེན་པར་བཅས་པ་ཉམས་གསོ་བླ་མེད་མཛད་པ་ཚང་མའི་ཐུགས་ལ་མངའ་བ་དེ་ལྟ་ན་ཡང་། སྐུ་ཕྲེང་བཅུ་བཞི་པའི་ཐོག་མའི་ཡོངས་འཛིན་མཛད་རྗེས་དང་བཀའ་དྲིན་ཆེ་བ་དེ་ལྟ་བུ་ལ་བོད་ཁམས་བསྟན་གཤེད་སྨོན་ལོག་དམ་སྲི་བདུད་རིགས་མིའི་གཟུགས་སུ་སྤྲུལ་པའི་སེར་སྐྱ་ཁ་དྲག་དབང་པོ་ཆེ་འགའ་ཞིག་གིས་གྲོས་ངན་གཤོམ་ནས། དྲིན་ལན་ལོག་པར་འཇལ། ལས་འབྲས་ཁྱད་དུ་བསད། དམ་ཚིག་ཆུ་ལ་གཡུགས་ནས་བྱང་ཆུབ་སེམས་
དཔའི་སྐུ་སྲོག་བཀྲོངས་པའི་མཚམས་མེད་ཀྱི་ལས་ངན་བསགས་པ་དང་། བཀའ་གདམས་བསྟན་པའི་ཆུ་འགོ་རྭ་སྒྲེང་རྒྱལ་བའི དགེ་གནས་དང་ཆོས་སྡེ་ཆེན་པོ་སེ་ར་ཐེག་ཆེན་གླིང་བཅས་པར་ཀླ་ཀློའི་བརྟུལ་ཞུགས་ལག་ལེན་དངོས་སུ་བསྟར་ཏེ། སྐུ་གསུང་ཐུགས་རྟེན་བྱིན་ཅན་དཔག་ཏུ་མེད་པ་བཤིག་གཏོར་བཅོམ་ཁྱེར་ཉེ་བའི་མཚམས་མེད་བྱས་པ་དང་། བླ་སྤྲུལ་དགེ་འདུན་གྲངས་མེད་པ་མཚོན་གྱིས་བཀུམས་པའི་ལས་ངན་འདི་འདྲ་བས་དགེ་ལྡན་བསྟན་ལ་མ་གནོད་པར་ཚང་ལ་མ་ནོར་བའི་ལམ་ཟབ་མོ་རྙིང་མའི་ཆོས་དང་བླ་མ་ལ་ཕྱོགས་རིས་སྤངས་པའི་དད་པ་དག་སྣང་གིས་གསན་སྦྱངས་གནང་བས་གནོད་པའི་སྒྲུབ་བྱེད་ཀྱི་ལུང་རིགས་ཡོད་ན་སྟོན་ཅིག །ད་དུང་ངན་བྱས་ངོ་སོར་ཁྱེར་ཏེ་དགེ་ལྡན་པའི་སྲུང་མ་ཤུགས་ལྡན་གྱི་བཀའ་ཆད་ཡིན་ཞེས་འཛེམ་
བག་ཙམ་ཡང་མེད་པར་མཁྱེན་ལྡན་ཡོངས་ཀྱི་སྙན་ཁུངས་སུ་དྲིལ་བསྒྲགས་བྱས་པ་མ་ཡིན་ནམ། འོ་ན་ཤུགས་ལྡན་ཐུགས་དང་འགལ་བའི་དབང་གིས་མ་ཡིན་ན། རྒྱུ་གང་གིས་ལན་ཞེ་ན། སྤྱིར་བོད་ཁམས་ལ་ཆག་སྒོ་ཆེན་པོ་བདོ་བ་དང་། སྒོས་སུ་གོང་དུ་སྨྲོས་པ་ལྟར་མི་དང་མི་མིན་དམ་སྲིའི་འཚུབས་ལས་བྱུང་བ་དང་། ཡང་སྒོས་ཤཱཀྱའི་རྗེས་འཇུག་དགེ་འདུན་གྱི་སྡེ་རྣམས་བསླབ་གསུམ་ཡལ་བར་བོར་ནས། ཚོང་དང་བུན་སྐྱེད། གྱོད་དང་ཁ་མཆུ། ཆོམ་རྐུན་དང་དམག་ཇག་ལ་སོགས། བསྟན་པ་ནང་ནས་བཤིག་པའི་ཁྱིམ་པ་སུན་འབྱིན་གྱི་བྱ་བ་མི་རུང་སྣ་དགུ་སྤྱད་པའི་ལ་ཡོག་འཁོར་བས། བོད་ཁམས་སུ་དུས་ངན་གྱི་ཁུག་སོ་སྔ་བསྣུར་གྱི་རྐྱེན་དུ་གྱུར་ཏེ། སྐྱེ་འགྲོ་དྲག་ཞན་མེད་པར་སྡུག་བསྔལ་གྱི་འདམ་དུ་ཚུད་པའི་སྔ་ལྟས་སུ་ཨོ་རྒྱན་དུས་གསུམ་མཁྱེན་པས་ལན་
གཅིག་མ་ཡིན་པར་གསུངས་ཏེ། གཏེར་ལུང་ལས། ཆེ་རྒུའི་སྙིང་ལ་སྡུག་འདྲེ་དངོས་ཞུགས་པས༔ མཐུན་རྐྱེན་བས་ཀྱང འགལ་རྐྱེན་སྒྲུབ་པ་མང་༔ མི་དང་མི་མིན་དམ་སྲིའི་ཆོ་འཕྲུལ་གྱིས༔ ང་སྤྲུལ་སྐྱེས་བུར་ལོག་ལྟའི་འབར་ཤ་ལྡིར༔ ཆེ་སྟེ་ཚེ་སྲོག་ཆུང་སྟེ་ཕྲིན་ལས་ལ༔ གློ་བུར་ཧུར་ཐུམ་ཅི་མི་འདོད་པ་གཏོང་༔ ཞེས་དང་། སྙིགས་མའི་དུས་སུ་ཆོས་དང་གང་ཟག་འགལ༔ མི་རུང་སྣ་དགུ་སྤྱོད་པའི་སྐབས་ཤར་ཚེ༔ དམ་སྲི་འགོང་པོའི་ཚ་ངར་རླུང་ལྟར་འཚུབས༔ ཞེས་གསུངས་པའི་ཐོག་ཏུ་བབས་པ་ལ་ཆ་འཇོག་བྱས་ན་ལེགས་ཀྱི། ངན་ཁག་ཐམས་ཅད་ཤུགས་ལྡན་ལ་དཀྲིས་ན་༴ ཐུགས་དམ་དགྱེས་པ་བསྐྱེད་པའི་ཐབས་སུ་མི་འགྱུར་རོ། །ཛེ་སྨད་ན་རེ། ༼དེ་མཚུངས་མཁར་རྡོ་སྤྲུལ་སྐུ་སྐལ་བཟང་ཐུབ་བསྟན་སྙན་གྲགས་ཉིད་ནས་ཀྱང་
ཐོག་མར་རྗེ་ཕ་བོང་ཁའི་ཞབས་དྲུང་དུ་བསྙེགས་ཏེ་རབ་རྒྱལ་མེ་གླང་ལོར་སྒྲོལ་མ་ཙིཏྟ་མ་ཎིའི་བསྐྱེད་རྫོགས་ཀྱི་ཁྲིད་ཡིག་རྩོམ་པའི་བསྐུལ་མ་སོགས་མཛད་ཀྱང་། ཇི་ལྟར་བསྐུལ་མ་མཛད་པ་དང་རྗེས་སུ་མཐུན་པའི་ཉམས་བཞེས་མ་གནང་བར་ལྟ་གྲུབ་བསྲེ་བསླད་ཅན་དུ་མཛད་པ་ཡིན་ཏེ། དེ་ཡང་རྗེ་ཕ་བོང་ཁ་པ་བདེ་ཆེན་སྙིང་པོས་བསྐྱེད་རྫོགས་ཁྲིད་ཡིག་ཙིཏྟ་མ་ཎིའི་དོ་ཤལ་ཞེས་པ་གསར་རྩོམ་མཛད་དེ་བསླབ་བྱ་མཛད་པ་ནི་དེ་ཉིད་ལས། དེ་ནས་ཆོས་ཀྱི་ལུགས་འཚོལ་བ་ནི་འདི་སྣང་གི་ལྟོ་གོས་གཏམ་གསུམ་གྱི་བདེ་སྐྱིད་འཚོལ་བ་ཙམ་དང་མི་འདྲ་བར། སྐྱེ་བ་གཏན་གྱི་འདུན་མ་གང་ལས་ལེན་པའི་སྙིང་པོ་འཚོལ་བ་དང་། ཐར་པ་དང་ཐམས་ཅད་མཁྱེན་པའི་གོ་འཕང་མཆོག་ལ་གང་ནས་བགྲོད་པའི་ལམ་འཚོལ་བ་ཡིན་པས་ས་འདིར་ཆོས་མིན་ཆོས་སུ་སྒྲོགས་པ་དང་། ལྟར་སྣང་
ཉེས་བཤད་ཀྱི་ལམ་གོལ་དང་། ཕྱོགས་རིས་དང་ཉི་ཚེ་བའི་ལམ་ཙམ་ལ་སྟོང་སྐད་འབྲུག་ལྟར་སྒྲོགས་པ་སོགས་ཆེས་མང་བས་ཆོས་ཀྱི་ཁ་ཕོ་ཙམ་ལ་འཁྲུལ་ནས་འཇུག་པ་དང་། ཕྱོགས་ལྷུང་རུས་ཞེན་གྱི་ཕྱོགས་འཛིན་དང་། གཞན་གྱི་ཟེར་རྗེས་གཡམ་རྒྱུག་ཙམ་དུ་མ་སོང་བར་གཟུ་བོའི་བློས་གང་ནི་ཡང་དག་གི་ལམ། གང་ནི་ལྟར་སྣང་དང་གོལ་བའི་ལམ། གང་ནི་ཕྱོགས་རེ་བའི་ལམ། གང་ནི་ཡོངས་སུ་རྫོགས་པའི་ལམ། གང་ནི་རྒྱལ་བ་དགྱེས་པའི་ལམ། གང་ནི་མཁས་པས་སྨད་པའི་ལམ་སྙམ་དུ་ཤེས་རབ་ཀྱི་མིག་བགྲད་ནས་ལེགས་པར་བརྟག་སྟེ། ལམ་མ་ནོར་བ་འཚོལ་བ་ལ་འཇུག་པར་མ་བྱས་ན་ནི་མི་ཚེ་ཧྲིལ་པོར་ཆོས་བྱས་པར་རློམ་ཡང་མུ་སྟེགས་ཀྱི་དཀའ་ཐུབ་ལྟར་ངན་སོང་གི་སྒྲུབ་ཐབས་སུ་སོང་བ་ཆེས་མང་བའི་གནས་འདི་ལ་ཤིན་ཏུ་
གཟབ་པར་བྱའོ། །ཞེས་ཁོ་བོས་བཟོད་གླགས་མེད་པའི་ཤ་ཚ་བརྩེ་སེམས་དྲག་པོས་ཆེད་དུ་གདམས་པ་ལགས་སོ། །ཞེས་གསུངས་འདུག་པ་ལྟར། ལམ་ཚང་ལ་མ་ནོར་བ་རྒྱལ་བ་དགྱེས་པའི་བཞེད་གཞུང་ཞིག་མཛད་པར་རིགས་ཀྱང་དེ་ལྟར་མ་གནང་བར། ལྷ་བཙུན་རིན་པོ་ཆེའི་དྲུང་ནས་གེ་སར་སེང་ཆེན་གྱི་ཆོས་སྐོར་སོགས་གསན་པ་དང་། རྭ་སྒྲེང་རིན་པོ་ཆེ་དང་ལྷན་དུ་མཚན་ཉིད་སྤྲུལ་སྐུ་སོགས་ཀྱི་དྲུང་ནས་ཀྱང་རྙིང་མའི་ཆོས་སྐོར་མང་དུ་གསན་ཞིང་ཉམས་བཞེས་མཛད་པ་དང་། ཉིད་ནས་ཀྱང་རྒྱུན་དུ་ཐུགས་དམ་བརྟག་པ་ཚུན་ཆད་གེ་སར་སྐྱེས་བུ་དོན་གྲུབ་ཀྱི་མདའ་མོར་གྲགས་པ་ལྷ་མདའ་དང་འདྲེ་མདའ་འཕར་ལྡང་ལ་དཔྱད་པའི་མོ་ཕྱྭ་འདེབས་པ་སོགས་དགེ་ལྡན་ལྟ་གྲུབ་འཆལ་བར་སྤྱོད་པའི་དབང་གིས་རྭ་སྒྲེང་རིན་པོ་ཆེ་དང་ལྷན་དུ། སྲིད་སྐྱོང་སྟག་བྲག་རིན་པོ་ཆེ་
ལྟོས་བཅས་ལ་བསྡོ་བའི་ནག་ཉེས་བྱས་པའི་དངོས་ར་འཕྲོད་དེ། སྔོན་རབས་སྐུ་ཕྲེང་དུ་མའི་དུས་ནས་གཏན་འཇག་བྲང་མཁར་དབང་གཞུང་བཞེས་དང་། སྐུ་གཟུགས་ལ་ཁྲིམས་ཉེས་ལྕག་གིས་བྲབས་པ་སོགས་དུཿཁ་མི་བཟད་པས་མནར་བཞིན་དུ་མེ་ཕག་ལོ་ནས་བཟུང་ལྕགས་སྟག་བར་ལོ་ངོ་བཞི་ཙམ་གྱི་རིང་། ནོར་གླིང་སྐུ་སྲུང་དམག་སྒར་གྱི་དོ་དམ་འོག །དཀར་ཁུང་མེད་པའི་བཙོན་ཁང་འདོམས་གང་གྲུ་བཞིའི་ནང་ཞབས་ལ་གདུང་ལྕགས་དང་བཅས་བཞུགས་དགོས་བྱུང་བ་དང་། མཐར་༧གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོས་ལུགས་གཉིས་ཆབ་སྲིད་ཀྱི་ཐུགས་འགན་བཞེས་ཏེ་བོད་རྒྱལ་ཁབ་ཀྱི་བཙོན་པ་ཡོངས་རྫོགས་ལྷོད་བཀྲོལ་གནང་བའི་སྐབས། བཙོན་ཁང་ནས་ཐར་ཏེ་བྱང་ཁུལ་དུ་ཅི་བདེར་བཞུགས་ཆོག་པ་བྱུང་
ཡང་རིང་མིན་དགོངས་པ་གཞན་དུ་གཤེགས་ཤིང་། དགོངས་པ་རྫོགས་ཉེའི་སྐབས་སྔོན་གཟིམ་ཁང་གོང་གི་སྤྲུལ་སྐུ་གྲགས་པ་རྒྱལ་མཚན་རྡོ་རྗེ་ཤུགས་ལྡན་རྩལ་གྱི་སྐུར་བཞེངས་པ་དང་། སླེ་ལུང་བཞད་པའི་རྡོ་རྗེ་བསྟན་སྲུང་དྲག་ཤུལ་དབང་པོའི་སྐུར་བཞེངས་པ་ལྟ་བུ་ཞི་བར་གཤེགས་འཕྲལ་གདུག་ཅན་མ་རུངས་པ་ཚར་གཅོད་པའི་དྲག་པོའི་སྐུར་བཞེངས་རྒྱུའི་ཐུགས་འདོད་ལྟ་བུས་དགོངས་པ་མ་རྫོགས་གོང་ནས་བཙན་རྒོད་དོན་ཡོད་རྡོ་རྗེ་ཞེས་པའི་སྲུང་མའི་བསྐང་གསོ་གསར་བརྩམས་མཛད་ཅིང་སྲུང་མའི་འདྲ་སྐུ་བཞེངས་སུ་བཅུག་པ་དང་། མཐར་དགོངས་པ་རྫོགས་སྐབས་ཀྱང་སྤྱན་བགྲད་ཅིང་། ལྗགས་འདྲིལ་བ་དང་། ཕྱག་སྡིག་མཛུབ་དང་བཅས་ཏེ་སྐུ་གཤེགས་པ་སོགས་མཛད་འདུག་ཀྱང་། སྐུ་གཤེགས་པའི་རྗེས་སུ་དྲག་པོར་བཞེངས་པའི་རྟགས་མཚན་གསལ་བ་འདི་བྱུང་
གི་ལྟས་མངོན་མཚན་གང་ཡང་མ་བྱུང་བ་སོགས་མཛད་པ་འཕྲིན་ལས་ལམ་དུ་མ་སོང་བ་ནི། ཆོས་སྐྱོང་རྡོ་རྗེ་ཤུགས་ལྡན་འདི་ཉིད་ཀྱི་ཆོ་འཕྲུལ་ཁོ་ནར་ངེས་སོ། །བཙན་རྒོད་དོན་ཡོད་རྡོ་རྗེ་དང་། སྐུ་འདས་སྐབས་ཀྱི་གནས་ཚུལ་རྣམས་མཁར་རྡོའི་གྲོགས་པོ་ནག་ཆུ་བསམ་བསྟན་སྤྲུལ། །སྐུའི་ངག་ལམ་ལས་ཐོས་པ་ཡིན་ཞེས་སྐྱབས་རྗེ་བཀའ་དྲིན་ཟླ་མེད་ཁྲི་བྱང་རྡོ་རྗེ་འཆང་ཆེན་པོས་བཀའ་སྩལ་བ་ལགས་སོ། །༽ ཞེས་ཟེར་བ་ལ་བརྗོད་པར་བྱ་སྟེ། དེ་ལ་མཁར་རྡོ་རིན་པོ་ཆེ་སྐུ་ཕྲེང་གོང་མའི་གོང་མ་རིག་འཛིན་ཆོས་ཀྱི་རྡོ་རྗེ་དེ་ཉིད་ལ་ཟབ་གཏེར་གྱི་བཀའ་བབས་གསང་ཡེ་དང་འཇམ་དཔལ་གཤིན་རྗེ་ཚེ་བདག་གི་ལས་མཐའ་གནུབས་ལུགས་གནམ་ལྕགས་ཨུར་མོའི་ལས་སྦྱོར་སོགས་ལ་རང་བྱན་ཚུད་པའི་རིག་སྔགས་འཆང་ཉམས་རྟོགས་
དང་མཐུ་ནུས་གཞན་འགྲན་བྲལ་བ་དེ་འདྲའི་སྤྲུལ་བརྒྱུད་ཡིན་པ་ལ་དགེ་ལྡན་རིང་ལུགས་གཙང་མ་ལས་གཞན་མཛད་མི་ཆོག་པ་ལྟ་བུའི་གཏམ་དེ་ཅི་ལ་འཐད། མ་ཟད་ཁོང་ལ་ཕ་བོང་ཁ་པས་བསླབ་བྱ་མཛད་པའི་ནང་དུ། ས་འདིར་ཆོས་མིན་ཆོས་སུ་སྒྲོགས་པ་དང་། ལྟར་སྣང་ཉེས་བཤད་ཀྱི་ལམ་གོལ་དང་། ཕྱོགས་རིས་དང་ཉི་ཚེ་བའི་ལམ་ཙམ་ལ་སྟོང་སྐད་འབྲུག་ལྟར་སྒྲོགས་པ་སོགས་ཆེས་མང་བས་ཞེས་ནོར་འཁྲུལ་དང་། སྐྱོན་ཐམས་ཅད་རྙིང་མ་བའི་ཆོས་ལ་དམིགས་ནས་དེ་སྤོངས་ཤིག་པའི་བསྐུལ་མ་མཛད་པ་ནི། མགོ་རུལ་བ་སྣས་མ་ཚོར་བའི་ཕྱོགས་ལྷུང་སྡང་ཞུགས་ཀྱི་ཚིག་གིས་སྐྱེ་བོ་འདྲིད་པ་དང་། ལོག་པའི་ལམ་དུ་ཁྲིད་མཁན་གྱི་གང་ཟག་ཏུ་ངེས་པས། མཚམས་མེད་ལྔ་ལས་ཀྱང་ཐུ་བའི་ལམ་ངན་སྟོན་པའི་གང་ཟག་ཕ་བོང་ཁ་པ་ལྟ་བུ་ནི་ཐོས་པ་དང་། འཕྲད་ཅིང་
འགྲོགས་པ་ཙམ་ཡང་བྱ་བར་སྟོན་པ་ཐུགས་རྗེ་ཅན་གྱིས་མ་གནང་སྟེ། འདི་ལྟར་ཡུམ་རྒྱས་པ་ལས། མཚམས་མེད་པ་ལྔས་ནི། ཆོས་སྤོང་བར་འགྱུར་བ་འདི་ཡི་གཟུགས་བརྙན་ཙམ་དུ་ཡང་མི་སྤྱོད་དོ། །ཤཱ་རིའི་བུ། ཆོས་སྤོང་བའི་བསམ་པས་འདི་སྐད་དུ། འདི་ལ་ཁྱོད་དང་བདག་ཅག་གིས་བསླབས་པར་མི་བྱ་སྟེ། འདི་ནི་ཆོས་མ་ཡིན་ནོ། །འདུལ་བ་མ་ཡིན་ནོ། །འདི་ནི་སྟོན་པའི་བསྟན་པ་མ་ཡིན་ནོ། །འདི་ནི་དེ་བཞིན་གཤེགས་པས་གསུངས་པ་མ་ཡིན་ནོ། །ཞེས་ཟེར་ཞིང་། དེ་བདག་ཉིད་ཀྱང་སྤོང་ལ། གཞན་ལའང་མོས་པ་མེད་པར་བྱེད་ཅིང་། བདག་གཞན་གྱི་བསམ་པ་ཉམས་པར་བྱེད་པ། བདག་གཞན་ཆུད་གསན་པར་དགའ་བ། བདག་ཉིད་ཀྱང་ཕྱིར་སྤོང་བར་འདོད་ལ། གཞན་ཡང་སྤོང་དུ་འཇུག་པ། ཆོས་འཇིག་པའི་ལས་བསགས་
པ་དེའི་གཟུགས་བརྙན་དུ་ཡང་འགྱུར་རེ་ཀན། ཤཱ་རིའི་བུ། ངས་ནི་གང་ཟག་དེ་ལྟ་བུ་ཐོས་པར་ཡང་བྱ་བར་མ་གནང་ན། འཕྲད་པ་དང་། འགྲོགས་པ་ལྟ་སྨོས་ཀྱང་ཅི་དགོས། ཞེས་གསུངས་པ་མ་ལགས་སམ། རྙིང་བསྟན་ཆོས་མ་ཡིན་ན་བོད་དུ་འགྱུར་བའི་བཀའ་འཁོར་ལོ་གསུམ་གྱི་མདོ་དང་བསྟན་བཅོས་རྣམས་ནི་ཉུང་ཟད་ཙམ་མ་གཏོགས་ཚང་མ་སྔ་འགྱུར་བའི་ལོ་པཎ་རྣམས་ཀྱིས་བསྒྱུར་བ་ཡིན་སྟབས་དེ་དག་ཆོས་མིན་དུ་སྨྲ་བའི་སྤོབས་པ་ཡོད་ན་སྨྲོས་ཤིག ལམ་ལྟར་སྣང་མ་ཡིན་ཏེ། །སྐྱེས་བུ་གསུམ་དང་རིགས་ཅན་གསུམ་གྱི་གདུལ་བྱ་འདུལ་བའི་ཐབས་རྨད་དུ་བྱུང་བ་རིམ་དགུའི་ཐེག་པའི་གཞི་ལམ་འབྲས གསུམ་གྱི་གནད་མ་ཚང་བ་མེད་པ་བསྟན་པའི་ཕྱིར་རོ། །ཉེས་བཤད་མ་ཡིན་ཏེ། སྔ་འགྱུར་བའི་པཎ་གྲུབ་རྒྱ་མཚོ་ལྟ་བུ་དང་། ཁྱད་པར་ཀུན་མཁྱེན་རོང་ཀློང་
རྣམ་གཉིས་མི་ཕམ་ཕྱོགས་ལས་རྣམ་རྒྱལ་སོགས་སྔ་ཕྱིར་བྱོན་པའི་ལོ་པཎ་རྣམས་ཀྱིས་མདོ་སྔགས་ཀྱི་ལེགས་བཤད་ཐང་མལ་བརྡལ་བ་འདི་མ་མཐོང་བ་ཅེ་རེ་ལོང་དུ་སོང་བ་མ་ཡིན་ནམ། ལམ་གོལ་བ་ཇི་ལྟར་ཡིན་ཏེ། གཞི་བདེན་གཉིས། ལམ་ཚོགས་གཉིས། འབྲས་བུ་སྐུ་གཉིས་བཅས་ཟུང་འཇུག་གི་ལམ་བཟང་འདི་ཡང་གོལ་བ་ཡིན་ན། ཁྱོད་ལ་མ་གོལ་བའི་ལམ་གཞན་ཞིག་སྟོན་རྒྱུ་ཡོད་དགོས། ཕྱོགས་རེ་བའི་ལམ་ཡང་མ་ཡིན་ཏེ། ཐུན་མོང་དང་ཐུན་མིན། དྲང་དོན་དང་ངེས་དོན། ཟབ་པ་དང་རྒྱ་ཆེ་བ། མདོ་དང་སྔགས། ལྟ་སྒོམ་སྤྱོད་གསུམ་དང་། ས་ལམ་གྱི་རྣམ་བཞག་ཐམས་ཅད་༈ ཚང་ལ་མ་ནོར་བ་བསྟན་པ་རྙིང་མ་ལས་ལྷག་པ་ཞིག་ཕ་བོང་ཁ་པ་ལ་མེད་པའི་ཕྱིར་རོ། །མཁས་པས་སྨད་པའི་ལམ་ཡང་མ་ཡིན་ཏེ། དཔལ་ཨ་ཏི་ཤ ས་
སྐྱ་པཎྜི་ཏ། མཁས་པ་བུ་སྟོན། རྗེ་ཙོང་ཁ་པ་སོགས་རྒྱ་བོད་ཀྱི་མཁས་པ་ཡོངས་སུ་གྲགས་པ་དེ་རྣམས་ཀྱིས་བསྟོད་བསྔགས་མཛད་པ་ལས་སྨད་པའི་ལོ་རྒྱུས་མེད་པའི་ཕྱིར་རོ། །ཉི་ཚེ་བའི་ལམ་ལ་སྟོང་སྐད་ཀྱི་ཁ་ཕོ་འབྲུག་ལྟར་སྒྲོགས་པའང་མ་ཡིན་ཏེ། ཆོས་ཀྱི་ཕྱོགས་ནས་མདོ་སྔགས་བཀའ་གཏེར་དག་སྣང་། སྙན་བརྒྱུད་མན་ངག་གི་མཛོད་གསར་མ་ལ་གྲགས་པ་རྣམས་ཀྱི་ལམ་གནད་ཚང་བའི་ཁར་གཞན་ལ་མེད་པའི་ཁྱད་ཆོས་བསམ་གྱིས་མི་ཁྱབ་པ་དང་ལྡན་པའི་ཕྱིར་དང་། གང་ཟག་གི་ཕྱོགས་ནས་ཟབ་མོ་ནང་རྒྱུད་སྡེ་གསུམ་གྱི་ལམ་ནས་མཆོག་གི་དངོས་གྲུབ་བརྙེས་པ་མཆིམས་ཕུའི་རྗེ་འབངས་ཉེར་ལྔ། ཡེར་པའི་གྲུབ་ཐོབ་བརྒྱད་ཅུ། ཆུ་བོ་རིའི་རྟོགས་ལྡན་བརྒྱ་རྩ་སོགས་དང་སོ་ཟུར་གནུབས་གསུམ། གཏེར་སྟོན་བརྒྱ་རྩ། གཏེར་ཕྲན་སྟོང་རྩ་སོགས་རླུང་སེམས་ལ་
རང་དབང་ཐོབ་པ་གྲངས་མེད་པ་དང་། ཟག་མེད་འཇའ་ལུས་གྲུབ་པ། གདུང་དང་རིང་བསྲེལ་སོགས་རྒྱུད་ནས་བཤད་ཚོད་དང་མཐུན་པའི་རྟགས་མངོན་དུ་གྱུར་པ་གྲངས་མེད་པ་བྱོན་པའི་རྣམ་ཐར་ལོ་རྒྱུས་ཆོས་འབྱུང་དཔང་པོ་ཡོད་པ་འདི་བཞིན་ལགས་ན། རྙིང་མ་བས་ཆོས་ཀྱི་ཁ་ཕོ་འབྲུག་སྟོང་གི་སྐད་ལྟར་སྒྲོགས་ན་ཡང་བསྔགས་འོས་བསྔགས་བསྟོད་དོན་ལ་གནས་པ་ཡིན་པ་ལས། སྡུག་འདྲེའི་བསྟོད་པ་ཙམ་ལ་སྤྲིན་ནག་འཁྲུགས་པའི་ང་རོ་ཟེར་བ་དང་མཚུངས་པའི་གནས་མེད་དོ། །རྒྱལ་བ་དགྱེས་པའི་ལམ་ཕྱོགས་རིས་ཆགས་སྡང་གི་ངག་ཡིན་ནམ། རྙིང་མ་བའི་ཟབ་ལམ་རྣམས་ཡིན། ཀོང་དུ་དྲངས་མ་ཐག་པའི་ཡུམ་རྒྱས་པའི་ལུང་དེ་ལ་དྲིས་དང་གསལ། རྙིང་ཆོས་མི་ཚེ་ཧྲིལ་པོར་བྱས་ཀྱང་ངན་འགྲོའི་རྒྱུ་ལས་མེད་ཟེར་བ་འདི་བདུད་ཀྱི་
གསང་ཚིག་སྟེ། རྙིང་ཆོས་ཟབ་མོ་རྫོགས་པ་ཆེན་པོ་བསྒོམས་ན་ཚེ་གང་པོ་ལྟ་ཅི་ལོ་ཟླ་ཙམ་གྱིས་ཀྱང་འཁོར་བར་མི་ལྡོག་པའི་རྟགས་ཚད་མངོན་དུ་འབྱུང་བ་དང་། ཚེ་ལུས་གཅིག་ལ་ལུས་རྡུལ་ཕྲན་དུ་དེངས། སེམས་ཆོས་སྐར་གྲོལ་ཏེ་སྐྲ་སེན་ཙམ་སྙིགས་མའི་ལྷག་མ་རུ་བཞག་པ་རྒྱ་བོད་གཉིས་ཀར་ཤིན་ཏུ་མང་པོ་བྱུང་ཡོད་པ་ཕ་བོང་ཁ་པས་མ་མཐོང་མ་ཐོས་པ་བདེན། མུ་སྟེགས་པ་དཀའ་ཐུབ་བརྟེན་པས་ངན་འགྲོར་འཕངས་པ་གཞུང་གང་ནས་བཤད་པའི་ཁུངས་སྟོན་དགོས། མཁར་རྡོ་རིན་པོ་ཆེས་དང་པོ་ཕ་བོང་ཁ་པ་བསྟེན་ཀྱང་ལོག་ལམ་གྱི་བསླབ་བྱ་དེ་འདྲ་ཤེས་རབ་ཀྱི་སྤྱན་བགྲད་ནས་གཟིགས་པས་ཡང་དག་པ་མ་ཡིན་པར་ཤེས་ནས་བཏང་སྙོམས་སུ་བཞག་སྟེ། གཟོད་མཚན་ཉིད་རིན་པོ་ཆེའི་དྲུང་ནས་རྙིང་ཆོས་གསན་པར་མཛད་པ་ཁྱེད་ཅག་ཁོང་ཁྲོ་མེ་ལྟར་འབར་ཏེ་གཤེ་
སྐུར་ཞུས་པ་ཆགས་སྡང་གི་ངག་ཡིན་པ་ལས་ཤ་ཚའི་གཏམ་ག་ལ་ཡིན། མཁར་རྡོ་རིན་པོ་ཆེས་རྒྱུན་གྱི་ཐུགས་དམ་བརྟག་པ་གེ སར་མདའ་མོ་ལ་བརྟེན་པར་མཛད་པ་དེས་དགེ་ལྡན་ལྟ་གྲུབ་འཆལ་བར་བསམ་པ་དེ་ནི་ཧ་ཅང་རྐུབ་བཙུམ་གུ་དོག་གི་གཏམ་མོ། །གོང་དུ་ཕ་བོང་ཁ་པས་རྙིང་ཆོས་ལ་སྐྱོན་བརྗོད་ཇི་སྙེད་ཅིག་བྱས་ཚད་ཚང་མ་ཁོ་རང་གི་ལོག་པའི་བསླབ་བྱ་རྣམས་དང་ཤུགས་ལྡན་གྱི་རྟོགས་བརྗོད་དུ་བསྙད་པའི་དེབ་མ་བུ་གཉིས་སོགས་ཀྱི་བརྗོད་དོན་གྱི་ཐོག་ཏུ་སོང་བ་འདི་ལྟ་སྟེ། ལྷ་སྐལ་ཆད་པས་སྐྱབས་གནས་ཡི་དྭགས་ལ་འཚོལ་བ་ནང་པའི་ཆོས་ལུགས་མིན་པ་དང་། སྡུག་འདྲེ་ལ་ཆེ་བའི་ཡོན་ཏན་བརྗོད་པ་དམ་ཆོས་ཡང་དག་མིན་པས་ལྟར་སྣང་དང་། བརྗོད་བྱ་ཐར་པ་ཐོབ་པའི་ལམ་དང་རྗེས་སུ་མ་འབྲེལ་བས་ཉེས་བཤད་དང་། དམ་པ་ལ་སྐུར་
པ་བཏབ་པ་ཐེག་ཆེན་གྱི་ལམ་ལས་གོལ་བ་དང་། རང་གི་མ་གཏོགས་གཞན་ལུགས་ཐམས་ཅད་འབད་པས་འགོག་པ་ཕྱོགས་རིས་དང་། བརྒྱུད་པའི་ཁུངས་འདེད་ས་རྡུགས་པ་དང་ཕ་བོང་ཁ་པའི་བརྒྱུད་འཛིན་ཁ་ཡར་ལས་དགེ་ལྡན་པ་བྱིང་ཁས་མི་ལེན་པས་ཉི་ཚེ་བ་དང་། ཤུགས་ལྡན་གསོལ་མཆོད་ཙམ་གྱིས་དགེ་ལུགས་པའི་ལམ་གྱི་ཁོག་མི་ཁྲོལ་བས་ཕྱོགས་རེ་བ་དང་། མདོ་སྔགས་ཀྱི་ལམ་གནད་མི་སྟོན་པའི་ཁར་བསྟན་པ་དཀྲུགས་པའི་ཆགས་སྡང་གི་ཀླན་ཀ་ངན་པ་ལ་རྒྱལ་བ་སྲས་བཅས་མི་དགྱེས་པ་དང་། སྔོན་ནས་ད་ལྟའི་བར་ཕ་བོང་ཁ་པ་དང་ཤུགས་ལྡན་ལ་ཕྱོགས་ལྷུང་ཅན་གྱི་སློབ་མ་ཡང་སློབ་ཁ་ཅིག་ལས་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་དང་། གཟུར་གནས་ཀྱི་གང་ཟག་ཆོས་སྤྱན་ཡངས་པ་རྣམས་ཀྱིས་ཁྲེལ་བགད་ཀྱི་གནས་སུ་བྱེད་པ་འདིས་
མཁས་པས་སྨད་པའི་ལམ་དང་། དེ་ལྟ་བུའི་སྐྱོན་དང་ལྡན་པ་ལ་མི་བསམ་པར་ད་དུང་སྟོང་སྐད་ཀྱི་ཁ་ཕོ་དམ་ཅན་རྒྱ་མཚོ་དགྱེས་པའི་རོལ་མོ་དང་། ཕ་རྒོད་བླ་མའི་ཞལ་གྱི་བདུད་རྩི་སོགས། འབྲུག་ལྟར་སྒྲོགས་པ་ལ་འཁྲུལ་ནས་གཡམ་རྒྱུག་བྱེད་མཁན་མཐོ་དམན་བར་གསུམ་ཆེས་མང་པོ་ཞིག་གིས་ད་གཟོད་གནད་དོན་ཇི་བཞིན་ཁོང་དུ་ཆུད་ནས་ཕྱིར་ནུར་འགྲོས་བྱེད་ལུགས་ལ་བརྟག་ན། བཀའ་གདམས་གསུང་སྒྲོས་སུ། རྗེས་བཟང་ན་ཆོས་ཡིན། རྗེས་ངན་ན་ཆོས་མིན་ཞེས་ཆོས་དང་ཆོས་མིན་གྱི་གནམ་ཐིག་གིས་བཅད་པ་ལ་ལྟོས། མཁར་རྡོ་སྤྲུལ་སྐུ་རིན་པོ་ཆེ་བཙོན་རར་ཚུད་པ་དང་ལྕག་གིས་གཞུས་པ་སོགས་ངན་བྱས་ངོ་སོར་ཁྱེར་ཡང་དོན་དུ་བོད་ཁམས་སྐྱེ་འགྲོའི་བདེ་སྐྱིད་བཅོམ་པའི་དམ་ཉམས་སྨོན་ལམ་ལོག་པར་བཏབ་པའི་འབྲས་བུ་དུས་
སུ་སྨིན་པ་རྣམས་ཀྱི་བསམ་སྦྱོར་ངན་པས་བསྟན་སེལ་ཕུང་དཀྲུགས་བསླངས་པ་ཡིན་པ་ལས། རྙིང་མ་བྱས་པས་མ་ལན་པ་བོད་ཁམས་ཡོངས་ཀྱིས་ཤེས། ཁོང་བཙན་གྱི་སྐུར་བཞེངས་པར་བཞེད་ཀྱང་སྐུ་གཤེགས་པའི་རྗེས་སུ་དེའི་རྟགས་མཚན་ཅི་ཡང་མ་བྱུང་བ་དེ་ནི་རྙིང་མའི་མཁའ་འགྲོ་སྙིང་ཐིག་ལ་ཐུགས་དམ ཉམས་ལེན་གནད་དུ་བསྣུན་པ་ལས་བར་དོའི་གདམས་པར་རང་བྱན་ཚུད་ནསའཆི་བ་འོད་གསལ་ཆོས་ཀྱི་སྐུར་སངས་རྒྱས་པའམ། བར་དོར་ལོངས་སྐུར་བཞེངས་པའམ། རྣམ་གྲོལ་དབུགས་ཆེན་འབྱིན་པའི་ཞིང་ཁམས་ལྔ། མཁའ་སྤྱོད་རིག་པ་འཛིན་པའི་གྲོང་ཁྱེར་ཟངས་མདོག་དཔལ་གྱི་རི་བོར་བརྫུས་ཏེ་སྐྱེས་པ་ལས། གྲགས་རྒྱན་ལྟ་བུར་འབྱུང་པོ་གདུག་པའི་ལུས་སུ་མ་འཁྲུལ་ཞིང་བསྟན་འགྲོར་གནོད་པའི་སྨོན་ལམ་ལོག་པ་མ་བཏབ་པའི་རྟགས་ངོ་མཚར་ཅན་
ནོ། །ཛེ་སྨད་ན་རེ། ༼ཀུན་བདེ་གླིང་རྟ་ཚག་རྗེ་དྲུང་ཐོང་ཤན་ཧུ་ཐོག་ཐུ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱལ་མཚན མཆོག་ཀྱང་ལྷ་བླ་དུ་མའི་ལུང་གིས་རྟ་ཚག་གོང་མའི་ཁྲི་ལ་མངའ་གསོལ་ཞིང་། ཆོས་སྡེ་ཆེན་པོ་དཔལ་ལྡན་འབྲས་སྤུངས་སྒོ་མང་གྲྭ་ཚང་དུ་གཞུང་ལུགས རབ་འབྱམས་ལ་གསན་བསམ་མཛད་དེ། ལྷ་ལྡན་སྨོན་ལམ་ཆེན་མོའི་གྲྭ་སྐོར་མཚན་བཞེས་མཛད་པ་དང་། ལྷག་པར་འཇམ་མགོན་ཙོང་ཁ་པ་ཆེན་པོའི་སྙན་བརྒྱུད་ཀྱི་གསང་བའི་མཛོད་འཛིན་བ་སོ་ཆོས་ཀྱི་རྒྱལ་མཚན་གྱི་སྐྱེ་སྤྲུལ་དུ་གྲགས་པས་དགེ་ལྡན་ལྟ་གྲུབ་གཙང་མའི་རིང་ལུགས་རྨ་མེད་པར་འཛིན་སྐྱོང་སྤེལ་གསུམ་མཛད་པར་འོས་པ་ཞིག་ཡིན་ཡང་ལྷ་བཙུན་རིན་པོ་ཆེ་སོགས་ཀྱི་དྲུང་ནས། གཏེར་ཆོས་སུ་གྲགས་པ་དང་། ཆོས་སྤྱོད་བཅུའི་དབང་ཞེས་པ་སོགས་
སོག་ཡུལ་ནས་བརྒྱུད་པའི་དབང་ལུང་ཨ་ཕའི་ཉམས་སྣང་དང་། ཨ་མའི་རྨི་ལམ་དུ་ཤར་ཟེར་བ་ལྟ་བུའི་ཆོས་སྐོར་འཆལ་འཆོལ་སྣ་ཚོགས་དང་། ལྷག་་གེ་སར་སྐྱེས་མཆོག་ནོར་བུ་དགྲ་འདུལ་གྱི་དབང་ལུང་མན་ངག་གི་སྐོར་གསན་ཅིང་གེ་སར་གྱི་བསྙེན་སྒྲུབ་ལ་བརྩོན་པར་མཛད་པ་སོགས་འཁྲུལ་བྲལ་ཚང་ལ་མ་ནོར་བ་རི་བོ་དགེ་ལྡན་པའི་བསྟན་པའི་སྲོལ་བཟང་པོ་རིང་དུ་དོར་བས། ཞྭ་སེར་བསྟན་པ་བསྲུང་བའི་ཆོས་སྐྱོང་དགྲ་ལྷའི་རྒྱལ་པོ་རྡོ་རྗེ་ཤུགས་ལྡན་གྱི་ཐུགས་དང་འགལ་བའི་ཉེས་པའི་ཆད་པས་ནོན་ཏེ། སྐུའི་བྱང་ཁོག་ལ་གཟེར་གྱིས་བཏབ་པའི་བསྙུན་མནར་མི་བཟད་པ་བྱུང་བར། ལྷ་བླ་དུ་མར་བརྟགས་པ་ཞུ་བར་མཛད་པ་ན། ཆོས་སྐྱོང་ཤུགས་ལྡན་གྱི་འཕྲུལ་དུ་མཁྱེན་ཏེ་སྤང་ལུང་རི་ཁྲོད་ནས་ཆོས་སྐྱོང་གི་སྐུ་རྟེན་པ་ཆེད་འབོད་ཀྱིས་སྐུ་གསོལ་ཐོག །ལྷ་བཙུན་
རིན་པོ་ཆེར་ངོ་ཆེན་མཛད་གནང་ཞུས་ཏེ་བཤགས་པ་མཛད་པར། ཆོས་སྐྱོང་ཆེན་པོས་ཐུགས་མ་དགྱེས་པའི་རྣམ་པ་དང་བཅས་ལྷ་བཙུན་རིན་པོ་ཆེར་ཡང་། དམ་པ་ཉིད་ནས་ཀྱང་ལྟ་གྲུབ་སེལ་མེད་ལེགས་པོ་ཚུལ་ལྡན་ཞིག་མ་གནང་ན་མི་ལེགས་ཚུལ་ཞུས་པར་བརྟེན། ལྷ་བཙུན་རིན་པོ་ཆེ་ཡང་ཐུགས་འཇིགས་སྣང་ལྟ་བུས། ད་ངས་ཆོས་སྐྱོང་ལ་ངོ་ཆེན་ཞུ་རྒྱུ་འདི་ཡོང་བ་མི་འདུག་ཅེས་དེ་ཕྱིན་ངོ་ཆེན་མ་མཛད་པར་བརྟེན། དེ་རྗེས་རྟག་ཚག་རིན་པོ་ཆེས་སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོར་ངོ་ཆེན་མཛད་པར་ཞུས་ཏེ་ཉིན་གཅིག་སླར་ཡང་། སྤང་ལུང་སྐུ་རྟེན་ཆེད་འབོད་ཐོག་སྐྱབས་རྗེ་རྡོ་རྗེ་འཆང་གདན་ཞུར་ཀུན་བདེ་གླིང་ཛ་སག་འོད་ཟེར་རྒྱལ་མཚན་ཕེབས་ཊོལ་བཅས་ལྷ་ལྡན་གཟིམ་ཤག་ཏུ་གདན་ཞུ་བཅར་བ་གུས་པ་བདག་གིས་ཀྱང་མངོན་དུ་
འགྱུར། དེ་ནས་ཀུན་བདེ་གླིང་གི་ནུབ་ངོས་སྤྲོ་ཁང་གསར་པའི་ནང་རྟ་ཚག་རིན་པོ་ཆེ་བསྐྲུན་བཞིན་ཡོད་པ་དེར། ཆོས་སྐྱོང་ཆེན་པོ་སྐུ་གསོལ་དང་འབྲེལ་སྐྱབས་རྗེ་ཁྲི་བྱང་རྡོ་རྗེ་འཆང་གིས་ངོ་ཆེན་ཞུ་འབུལ་མཛད་པར། ཤུགས་ལྡན་གྱི་བཀའ་ལུང་མང་ཙམ་ཞིག་དང་། དེ་རྗེས་བཙན་རྒོད་གཡུ་དམར་རྒྱལ་ཆེན་གྱིས་ཤུགས་ལྡན་གྱི་ལུང་དོན་གསལ་བར་མཛད་པ་ན། ངེད་དྲེགས་པ་རྣམས་ཀྱིས་འཇམ་མགོན་བླ་མའི་བསྟན་པ་བསྲུང་རྒྱུའི་ཁས་བླངས་དམ་བཅའ་བྱས་པར་བརྟེན་འདི་ཐད་ཧ་ཅང་བྱེད་དཀའ་ཆེ་བའི་རང་བཞིན་དང་། འོན་ཀྱང་ད་རེས་དགེ་ལྡན་པའི་བསྟན་པ་འཛིན་པའི་སྐྱེས་བུ་དམ་པ་ཆེན་པོ་སྐུ་བགྲེས་ཤིག་གིས་ངོ་ཆེན་གནང་བར། ངེད་ཚོས་གང་ཐུབ་ཞུ་རྒྱུ་ཡང་གཙོ་བོ་རྟ་ཚག་རིན་པོ་ཆེ་སྐུ་ཉིད་ཀྱི་མཛད་སྤྱོད་ཁོ་ནར་རག་ལུས་པ་ཡིན་སྟབས། ད་ཕྱིན་ཇི་ལྟར་
གནང་རྒྱུ་ཡིན་ནམ་ཞེས་དྲི་བ་ཞུས་པར། རྟ་ཚག་རིན་པོ་ཆེས་སྤྱན་ཆབ་དྲག་ཏུ་བསིལ་ཞིང་ད་ཕྱིན་སྔར་འགྱོད་ཕྱིས་སྡོམ་ངེས་པར མཛད་དེ། རྙིང་ཆོས་ཉམས་བཞེས་སོགས་ཅམ་འཇོག་གནང་རྒྱུའི་ཞལ་བཞེས་མཛད་པ་དང་། དེ་ནས་ཐུགས་ཀའི་ཐད་བཙན་རྒོད་ཀྱིས་ཕུད་ཇའི་ཁ་ཕྲུ་འདེབས་པ་སོགས་བྱས་ཏེ། དེ་རྗེས་སྐུ་ཁམས་ཅུང་ཟད་དྭངས་བསྐྱེད་བྱུང་ཞིང་། འོན་ཀྱང་རྗེས་སོར་དམ་བཅའི་དོན་ཇི་བཞིན་མ་བྱུང་བའི་མཐུ་ལས་བསྙུན་གཞི་དྲག་བསྐྱེད་མ་བྱུང་བར། རྒྱ་གར་དུ་སྨན་བཅོས་དང་། གནས་གཟིགས་ཆབས་ཅིག་ཕེབས་བཞེད་ཀྱིས། གོང་ས་སྐྱབས་མགོན་ཆེན་པོ་སྟོན་འཁོར་རྒྱ་གར་དུ་གནས་བརྟན་པའི་ལུགས་ཀྱི་སྟོན་པ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་འཁོར་བའི་དུས་དྲན་ཆོས་ཀྱི་ཚོགས་འདུ་ཆེན་མོའི་མཛད་སྒོར་ཕེབ་
ས་པ་དང་དུས་མཚུངས་པར་ཕག་རི་བརྒྱུད་རྒྱ་གར་དུ་ཕེབས་ཤིང་། ལྷ་ས་ནས་སྐབས་དེར་ལྷན་དུ་ཕྱག་ཕྱིར་གསོལ་སྨན་འབུལ་མཁན་ལྷ་ལྡན་ལྕགས་པོ་རིའི་སྨན་པ་གྲྭ་ཚང་གི་དགེ་རྒན་ངག་དབང་ཡེ་ཤེས་ལགས་ཀྱང་ཡོད་འདུག་པ་དང་། རྟ་ཚག་རིན་པོ་ཆེ་སྟོན་འཁོར་ཕག་རིར་ཕེབས་སྐབས་མཚན་མོ་ཞིག་རྟ་ཚག་རིན་པོ་ཆེར་བཟོད་པར་དཀའ་བའི་བསྙུན་མནར་ཚབས་པོ་ཆེ་བྱུང་བ་དང་ཆབས་ཅིག་ཆོས་སྐྱོང་རྡོ་རྗེ་ཤུགས་ལྡན་དངོས་སུ་སྐུའི་ཁོག་ཏུ་ཞུགས་ཉམས་ལྟ་བུར། ཞབས་གྲས་གཉིས་གསུམ་གྱིས་སྐུ་ལ་འཇུས་ཀྱང་གླགས་མི་རྙེད་པའི་ལུས་ཤུགས་ཆེ་ཞིང་། མགུལ་འགག་པའི་སོར་སྒྲ་དང་བཅས་བཀའ་ལུང་རྒྱག་ལ་ཉེ་བ་ཞིག་བྱུང་སྟེ། སྐབས་དེར་ངག་དབང་ཡེ་ཤེས་ཀྱི་གཙོས་ཞབས་ཕྱི་རྣམས་ནས་བཟོད་གསོལ་ནན་ཞུས་བགྱིད་དགོས་བྱུང་བ་དང་། མཐར་དེ་གར་དྭངས་
ཙམ་བྱུང་ཡང་། རྒྱ་གར་དུ་ཕེབས་རྗེས་ཀ་ལི་ཀ་ཏའི་སྨན་ཁང་ཆེ་ཤོས་ཤིག་ཏུ་གདན་ཞུས་ཀྱིས་གསོལ་སྨན་འབུལ་བཞེས་མཛད ཀྱང་མ་ཕན་པར་སྐུ་ཚེའི་འདུ་བྱེད་སྟོངས་པར་གྱུར་ཏོ། །གོང་གསལ་ཕག་རིར་ཕེབས་སྐབས་ཀྱི་གནས་ཚུལ་འདི་རྣམས་སྨད་དགེ་ངག་དབང་ཡེ་ཤེས་ཀྱིས་༣ སྐྱབས་རྗེ་ཁྲི་བྱང་རྡོ་རྗེ་འཆང་ལ་ཞུས་འདུག་ཅིང་། ཆོས་སྐྱོང་དེ་ལ་གཏན་གཏན་མ་བྱས་ན་བལྟ་ཉན་མི་འདུག །ཅེས་དང་། ཅ་ཟིང་པོ་ཞེ་དྲག་འདུག །སྐབས་དེར་རྦད་དེ་དངོས་སུ་ཞུགས་བྱུང་ངོ་། །ཞེས་འཇིགས་སྣང་དང་བཅས་ཞུས་འདུག་པས་ཁུངས་བཙུན་པའི་གནས་སོ། །༽ཞེས་ཟེར་བ་ལ་བརྗོད་པར་༉བྱ་སྟེ། རྟ་ཚག་རིན་པོ་ཆེ་སྐུ་ཕྲེང་གོང་མའི་དུས་ནས་དཔལ་འབར་གཏེར་སྟོན་བདུད་འདུལ་དྲག་སྔགས་གླིང་པ་སོགས་བླ་མར་བསྟེན་ནས་རྙིང་མའི་ཆོས་
སྐོར་མང་པོ་གསན་བཞེས་མཛད་པ་མ་ཟད་ཁོང་གི་གདན་ས་མདོ་ཁམས་ཚ་བ་དཔའ་ཤོད་དགོན་དུ་གཏེར་གསར་གྱི་སྒྲུབ་ཆེན་ཕྱག་བཞེས་འཆམ་སོགས་ལོ་བསྟར་ཆག་མེད་རྒྱ་དམར་གྱིས་མ་བརླག་བར་དུ་བཙུགས་ཡོད་པ་དང་། ལྷ་ལྡན་ཀུན་བདེ་གླིང་རང་དུའང་རྙིང་མའི་ཕྱག་དཔེ་དཀྱིལ་ཐང་སྐུ་ཙཀ་སོགས་དབང་དང་སྒྲུབ་ཆེན་ལ་མཁོ་བའི་རྟེན་དང་མཆོད་ཆས་ཤིན་ཏུ་སྤུས་གཙང་མང་པོ་བཞུགས་པ་ཁོ་བོས་ཀྱང་མཇལ་མྱོང་བ་དེ་འདྲ་ཡིན་བཞིན་ཞྭ་སེར་ལུགས་ཁོ་ན་འཛིན་སྐྱོང་སྤེལ་གསུམ་མཛད་རིགས་ཀྱང་མ་བྱུང་ཟེར་བའི་སྐྱོན་འཛུགས་འོས་མེད་དེ་འདྲ་བྱེད་པ་ཅི་ལ་འཐད། ལྷག་པར་གེ་སར་ནོར་བུ་དགྲ་འདུལ་ལ་ཁྱེད་ཅག་སྙིང་གས་པ་ཙམ་དུ་སྡང་ཞུགས་བྱེད་མོད། དེ་ནི་ཕྱོགས་ལྷུང་གི་རྙོག་མས་ལེགས་ཉེས་ཀྱི་གཟུགས་ལ་ལྟ་བའི་གོ་སྐབས་མ་བྱུང་བའི་སྐྱོན་ཏེ། གླིང་
རྗེ་གེ་སེར་ནི། དོལ་རྒྱལ་ལྟ་བུར་མི་ཤི་བཙན་སྐྱེས་དང་ག་ལ་མཚུངས་ཏེ། རབ་བྱུང་གཉིས་པའི་ས་ཕོ་སྟག་ལ་མདོ་ཁམས་གླིང་ཡུལ་དུ་སྐུ་འཁྲུངས་ཤིང་། སྤྲུལ་པའི་གང་ཟག་བསད་པ་གསོ་ནུས་པའི་མཐུ་རྩལ་དང་རྫུ་འཕྲུལ་འཛམ་གླིང་ན་འགྲན་ཟླ་དང་བྲལ་བ་ཞིག་སྟེ། དེ་ཡང་འཕགས་མཆོག་རིགས་གསུམ་སེམས་དཔའ་དང་། པདྨ་འབྱུང་གནས་ཀྱི་ངོ་བོ་ལ། རྣམ་པ་ཙམ་དུ་དགྲ་བླ་ཝེར་མའི་ཚུལ་བསྟན་ནས། ནག་ཕྱོགས་མཐའ་བཞིའི་ཧོར་བདུད་མ་རུངས་པ་རྣམས། དཔའ་མཛངས་རྟུལ་ཕོད་དྲག་ཤུལ་ཕྲིན་ལས་ཐབས་མཁས་ཐུགས་རྗེ་རྨད་དུ་བྱུང་བའི་སྒོ་ནས་ཆོམ་ལ་ཕབ་སྟེ། སངས་རྒྱས་ཀྱི་བསྟན་པ་སྤྱི་དང་མཁན་སློབ་ཆོས་རྒྱལ་མེས་དབོན་རྣམ་གསུམ་གྱི་རིང་ལུགས་དྲི་མ་མེད་པ་ཕྲིན་ལས་རྣམ་བཞིས་སྐྱོང་བ་དང་། འབྱུང་འགྱུར་
ཀླ་ཀློའི་ཁ་གནོན་རིགས་ལྡན་ལྕགས་འཁོར་ཅན་གྱི་སྐར་བཞེངས་པ་ཡིན་ཏེ། ཆོས་རྗེ་མི་ཕམ་སྨྲ་བའི་ཉི་མས། །ངོ་བོ་དཔལ་ལྡན་འཇམ་པའི་རྡོ་རྗེ་ཉིད། །རྣམ་པ་སྣང་སྲིད་དགྲ་བླའི་རྒྱལ་པོའི་ཚུལ། །སྔོན་ཚེ་རིག་འཛིན་པདྨ་འབྱུང་གནས་ཏེ། །ད་ལྟ་སེང་ཆེན་ནོར་བུ་དགྲ་འདུལ་རྩལ། །མ་འོངས་རིགས་ལྡན་དྲག་པོ་འཁོར་ལོ་ཅན། །ཞེས་གསུངས་པ་ལྟར་རོ། །སོག་པོ་ནས་བྱུང་བའི་ཆོས་སྤྱོད་བཅུའི་དབང་ཡོད་པ་མ་མཐོང་། གལ་ཏེ་ཡོད་དུ་ཆུག་ཀྱང་འགལ་བ་གང་ཡང་མེད་དེ། ངེད་སྔ་འགྱུར་རྙིང་མ་བའི་རྒྱུད་དང་སྒྲུབ་སྡེའི་དབང་གི་ཆོ་ག་རྒྱས་པ་རྣམས་སུ། འཇིག་རྟེན་ལྷ་མིའི་ཐེག་པ་ནས། རྣམ་གྲོལ་ཐེག་པ་རིམ་པ་དགུ་ཡི་བར་གྱི་དབང་བསྐུར་གྱི་ཆོ་ག་གསལ་བར་བཞུགས་པས། ཆོས་སྤྱོད་བཅུ་དེར་དོན་གྱིས་འདུས་པ་མ་ཤེས་སམ། སོག་ཡུལ་ནས་བརྒྱུད་པས་ཅི་སྟོ། གང་
ཟག་ལ་མི་རྟོན་ཆོས་ལ་རྟོན་དགོས་པའི་ཕྱིར་རོ། །ཉམས་དང་རྨི་ལམ་ལ་བྱུང་བའི་ཆོས་ཚད་མ་མིན་པར་འདོད་བཞིན་དུ། ཁྱེད་ཅག་གི་ཤུགས་ལྡན་སྲོག་གཏད་ཀྱི་ཁུངས་གཏུགས་ས་སྟག་ཕུ་པདྨ་རྡོ་རྗེའི་རྨི་ལམ་ཡིན་པར་ཕ་བོང་ཁ་པས་བཤད་འདུག་པ་དེས་ན། འདིར་ཁྱེད་ཀྱིས་ཨ་ཕའི་ཉམས་སྣང་དང་། ཨ་མའི་རྨི་ལམ་ཞེས་པའི་བསྟིང་ཚིག་དེ་ཁྱོད་རང་ལ་འཁོར་བས། མེ་ཕར་བུས་ཨ་ར་ཚུར་ཚིག་པའི་དཔེར་སོང་ངོ་། །རྟ་ཚག་རིན་པོ་ཆེས་ཤུགས་ལྡན་ལ་ངོ་ཆེན་པ་དང་སྦྲགས་ཞུ་བཤགས་ཕུལ་ཡང་མ་བླངས་པ་ནི་གོང་དུ་སྨོས་པ་ལྟར་རྒྱལ་ངན་དེ་བྱང་སེམས་ཀྱི་བསླབ་པ་ལས་ཉམས་པས་༔ བྱང་ཆུབ་སེམས་དཔའ་མ་ཡིན་པ་དང་། — བརྩེ་མེད་ཞེ་ནག་གཞུང་ངན་མ་རབས་བསྟེན་དཀའ་བ་ཕན་ལས་གནོད་པ་མང་བ་སྟེར་མཁན་ཡིན་པའི་ར་འཕྲོད་
གསལ་པོ་བྱུང་བའོ། །དེ་ལྟར་སྐྱེས་ཆེན་ཁྱད་པར་ཅན་དེ་རྣམས་ལ་སྐུ་ངལ་དང་བར་ཆད་བྱུང་ཚུལ་བསྟན་པ་དེ་ཐམས་ཅད་ཤུགས་ལྡན་གྱི་ཆོ་འཕྲུལ་དང་བཀའ ཆད་ཡིན་པར་གདངས་སྐད་མཐོན་པོས་གླེང་བ་དེ་ཡང་ཁྱེད་ཅག་འབྱུང་པོ་སྐྱབས་འཛིན་པ་ཁ་ཅིག་གི་རྣམ་པར་རྟོག་པ་ལགས་པས་བྲག་ཆའི་སྒྲ་ལ་སུ་ཞིག་བདེན་པར་འཛིན། ཁོ་བོ་ཅག་དེ་ལྟར་མི་འདོད་དེ། སྟོན་པའི་ཞབས་ལ་སེང་ལྡེང་ཚེར་མ་ཟུག་པ་དང་། མོ་འགལ་བུ་མུ་སྟེགས་ཀུན་ཏུ་རྒྱུས་བཀྲོངས་པ་དང་། འཕགས་མཆོག་ཀླུ་སྒྲུབ་དབུ་རྒྱལ་བུས་བཅད་པ་སོགས་ལས་བདག་གིར་མཛད་པའམ། སྔར་བཤད་པ་བཞིན་བོད་ཁམས་སྤྱིའི་བསོད་ནམས་ཀྱིས་མ་འཆུན་པར་བདུད་དགེ་སྦྱོང་དང་མི་ཆེན་ཁ་དྲག་དཔོན་བློན་གྱི་ཚུལ་དུ་བརྫུས་ནས། དམ་པའི་སྐྱེས་བུ་རྣམས་ཀྱི་དགོངས་སྤྱོད་ལ་ཚོད་བཟུང་མཉམ་འགྲོགས་ཕྲག་
དོག་ལོག་ལྟས་བར་གཅོད་བརྩམས་པའམ།ཤཱཀྱའི་བསྟན་པ་ཉམས་པའི་སྔ་ལྟས་སུའང་བཤད་དེ། མ་ཅིག་ལབ་སྒྲོན་ལུང་བསྟན་ལས། དགེ་སློང་ཐུབ་བསྟན་ངེས་པར་བསྲུང་བ་ནི། །རྣམ་པར་དག་པ་གཅིག་ཙམ་ཡོད་གྱུར་ཀྱང་། །དེ་ཡི་དགེ་དང་ལྷག་བསམ་རྣམ་དག་ལ། །བདུད་རྣམས་བར་ཆད་བྱེད་པར་དབང་ཆེ་བས། །དགེ་སྦྱོང་བསྟན་སྲུང་དེ་དག་ནི། །ཚེ་ཐུང་ལོངས་སྤྱོད་ཆུང་ལ་ནད་རྐྱེན་མང་། །ཤིན་ཏུ་ཉམ་ཐག་རབ་ཏུ་མནར་བར་འགྱུར། །དེ་འདྲའི་དུས་ཤིག་འབྱུང་བར་གྱུར་པའི་ཚེ། །ཤཱཀྱའི་བསྟན་པ་ཉམས་པའི་སྔ་ལྟས་ཡིན། །ཞེས་གསུངས་པ་ལྟར་རོ། །ཡང་ཛེ་སྨད་ན་རེ། ༼བདག་ཅག་གི་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་འཆང་ཕ་བོང་ཁ་པ་བདེ་ཆེན་སྙིང་པོ་མཆོག་ཀྱང་། སྐུ་ཚེའི་སྟོད་དུ་བྲག་རི་རིན་པོ་ཆེ་སྐུ་གོང་མའི་
གོང་མ་ཕྲིན་ལས་པདྨ་ཀུན་བཟང་ཆོས་རྒྱལ་དཔལ་བཟང་པོ་ཞེས་ལྷ་འབྲུམ་གྱི་བསྙུན་གཞིས་སྐུ་གཤེགས་པ་དེ་དང་། ཀོང་པོ་ལྕགས་གྲོང་གྲུབ་ཆེན་འོད་གསལ་ཐེག་མཆོག་རྡོ་རྗེ། གུང་སྤྲུལ་རིན་པོ་ཆེ་མཁྱེན་རབ་དཔལ་ལྡན་བསྟན་པའི་ཉི་མ། མི་ཉག་རི་ཁུད་རིན་པོ་ཆེ་བློ་བཟང་ཆོས་གྲགས་རྒྱ་མཚོ་སོགས་ཀྱི་དྲུང་ནས་རྟ་མགྲིན་ཡང་གསང་གི་སྐོར་དང་། རྒྱལ་མཆོག་ལྔ་པའི་དག་སྣང་གསང་བ་རྒྱ་ཅན། ལྷག་པར་གུང་སྤྲུལ་རིན་པོ་ཆེའི་དྲུང་ནས་སྨིན་གླིང་གཏེར་ཆེན་གྱིས་མཛད་པའི་སྒྲུབ་ཐབས་འདོད་འཇོའི་བུམ་བཟང་གི་རྗེས་གནང་སོགས་གསན་ཅིང་། ཕྱིས་དེའི་ཁ་གསབ་ལྟ་བུའི་རྗེས་གནང་སྐོར་མང་པོ་ཞིག་གསན སྐབས་གཏོར་མ་སྟོད་ཟུར་གསུམ་མེ་རི་འབར་བ་སྨད་ཁྲོ་ཞལ་ཅན་བཞེངས་པ་སོགས། སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་སྐུ་ན་ཕྲ་བའི་དུས་གཏོར་མ་ཡིད་
དུ་འོང་བ་འདུག་པ་མཆོད་གཡོག་ལས་བསླངས་ཏེ་རྩེད་མོ་བྱེད་པ་དྲན་གསུངས། མི་ཉག་རི་ཁུད་རིན་པོ་ཆེ་འདི་ན་བཟའ་སྤུ་ཕྲུག་དམར་པོའི་ཕྱུ་པའི་སྟེང་རས་སྔོན་གྱི་ཁ་གོས་མནབས། ཕྱག་ཕྲེང་ཐོད་ཕྲེང་ཞིག་བསྣམས། ཤངས་ཐག་གི་རྭ་ཅོ་ཆེན་པོ་ཞིག་སྐུ་འབག་ཏུ་བཅུག །སྐུ་གཟུགས་ཆེ་ལ་ཨག་ཚོམ་ཅུང་ཟད་ཡོད་པ་སྐུ་ཆེ་ཉམས་གང་ཡང་མེད་པར། ཞབས་ཕྱི་ཁང་སོགས་གང་བྱུང་དུ་བཞུགས་ནས་ཚང་མར་འཕྲོས་གཏམ་གྱི་བཀའ་མོལ་གནང་བཞིན་དུ་བཞུགས་མཁན་ཞིག་ཡོད་འདུག །དེ་ལྟར་རྗེ་ཕ་བོང་ཁས་རྙིང་ཆོས་སྐོར་གྱི་དབང་ལུང་མན་ངག་གི་སྐོར་མང་དུ་གསན་ཅིང་རྟ་༉ མགྲིན་ཡང་གསང་གི་བསྙེན་པ་ཁ་སྐོང་དང་བཅས་པ་གནང་བ་སོགས་ཉམས་བཞེས་མཛད་པའི་དུས་སྐབས་དེ་དག་གི་གཟིམ་ལམ་དུ་གྲྭ་པ་རྒྱ་བོ་དང་། སྐབས་
འགར་གཟབ་མཆོར་ཅན་གྱི་གྲྭ་པ་སོགས་འདྲ་མིན་མང་པོས་མི་དགའ་བའི་རྣམ་འགྱུར་བསྟན་པའི་གཟིམ་ལམ་ཡང་ཡང་བྱུང་བ་དང་། དུས་སྐབས་དེ་དག་ཏུ་རྗེ་ཕ་བོང་ཁ་པ་ཆེན་པོ་ཆུ་བཟང་རི་ཁྲོད་དུ་ཁྲི་བྱང་བླ་བྲང་གི་གཟིམ་ཤག་ངོ་མའི་ནུབ་ངོས་སྤོ་ཁང་དུ་གཏན་བཞུགས་ལྟ་བུར་མཛད་མུས་ཀྱི་ནུབ་གཅིག་གཟིམ་ཆུང་དུ་སྐུ་གཟིམ་སྐབས། ཤར་གྱི་བཞུགས་གདན་སྟེང་སྐུ་གཟིམ་གནང་བ། སང་ཉིན་གཟིམ་ལས་སད་སྐབས་ནུབ་ངོས་ཀྱི་བཞུགས་གདན་སྟེང་དུ་སྤོས་འདུག་པ་དང་། ལྷག་པར་གུང་སྤྲུལ་རིན་པོ་ཆེའི་དྲུང་ནས་སྒྲུབ་ཐབས་འདོད་འཇོའི་བུམ་བཟང་གསན་སྐབས། གུང་སྤྲུལ་རིན་པོ་ཆེ་སྤྲོ་ཁང་དུ་བཞུགས་ཤིང་། རྗེ་ཕ་བོང་ཁ་ཉིད་ཁྲི་བྱང་བླ་བྲང་གི་གཟིམ་ཤག་ངོ་མའི་སྒོ་མཆོར་སྟེང་གི་རབ་གསལ་དུ་སྤོ་བཞུགས་མཛད་པའི་སྐབས་དགོང་དྲོ་སྐུ་གཟིམ་ཟིན་ཀྱང་། གཟིམ་
མ་ཁུག་པར་ཡོད་པའི་དུས་ཤིག་ཏུ་མཚན་ཕྱེད་ཙམ་ལ་ཆུ་བཟང་གི་རི་གཤམ་ལྷོ་ཕྱོགས་ཐག་རིང་སེ་ར་སྤྱི་སོའི་ཐད་ཙམ་ནས་སྐད་འབོད་ཕྲ་སྦོམ་གཉིས་དང་། དེའི་ནང་ནས་གཙོ་ཆེར་བུད་མེད་ལྟ་བུའི་སྐད་འབོད་མཐོན་པོར་སྒྲོག་པ་ཞིག་བྱུང་བར་རྗེ་ཕ་བོང་ཁའི་ཐུགས་སྣང་དུ་སྤྲོ་ཁང་ནང་ས་སྐྱའི་བདག་ཆེན་རིན་པོ་ཆེ་བཞུགས་ཡོད་དགོངས་པ་ལྟ་བུའི་འདི་གར་བདག་ཆེན་རིན་པོ་ཆེ་བཞུགས་སྟབས་ས་སྐྱའི་འབལ་མོ་ཡིན་རྒྱུ་རེད་དགོངས་པ་བྱུང་ཞིང་། བུད་མེད་ཀྱི་སྐད་འབོད་དེས་གམ་པ་ལ་མོའི་རྩ་ནས་ཤ་སྐལ་ཞིག་ལངས་སོང་ངོ་། །ཞེས་ཟེར་བ་གསན་པས། གམ་པ་ལ་རྩར་གྲོང་ཁྱིམ་གཞན་མེད་གམ་པ་བར་ཚིགས་ཟེར་བའི་གྲོང་པ་དེར་ཡིན་རྒྱུ་རེད། གྲོང་པ་དེ་ནས་མི་ཞིག་ཤི་ཡོད་པ་འདྲ་གང་དྲག་སྙིང་རྗེ་སྙམ་དུ་དགོངས་པ་བྱུང་བ་དང་། དེ་ནས་སྐད་
འབོད་དེ་གཉིས་རེ་མོས་ཀྱིས་ཐག་ཇེ་ཉེར་སོང་སྟེ། ཆུ་བཟང་རི་གཤམ་ནས་ཡར་འོང་བ་རི་ཁྲོད་གཟིམ་ཤག་རྒྱལ་སྒོའི་འགག་ཏུ་སླེབས་པ་དང་། སྐད་འབོད་མེད་གཟིམ་ཤག་མདུན་གྱི་རྡོ་གཅལ་ནས་ལྕགས་ཐག་འདྲུད་བཞིན་དུ་ཡོང་བའི་སིལ་སྒྲ་གསན་ཞིང་། དེ་ནས་སྒོ་མཆོར་གྱི་རྡོ་སྐས་བརྒྱུད་རྗེ་ཉིད་བཞུགས་པའི་གཟིམ་ཆུང་གི་ཞབས་ཕྱི་ཁང་དུ་འབྱོར་ཏེ། བཞུགས་སའི་སྒོའི་ཡ་ཐེམ་དང་། སྒོ་ཡོལ་དབར་ནས་ལག་པ་དམར་པོ་དམར་ཧོང་ངེ་བ་མེའི་རང་བཞིན་ལྟ་ ི བུ་སྡེར་མོ་ཅན་བསྟན་པས། རྗེ་ཕ་བོང་ཁ་པ་ཉིད་ཀྱིས་ཆོས་སྐྱོང་རྡོ་རྗེ་ཤུགས་ལྡན་གྱི་འཕྲུལ་དུ་དགོངས་ཏེ་མཐོལ་བཤགས་མཛད་ཅིང་། དུས་ཡུན་གང་མཚམས་ཤིག་ནས་ལག་པ་དེ་མར་བསྐུམས་ཏེ་ཕྱིར་སོང་བ་དེ་ཉིད་སྔར་ཚུར་ཡོང་བ་ཇི་ལྟ་བར་རྒྱལ་སྒོའི་འགག་ནས་སྐད་འབོད་དང་བཅས་ཕྱིར་ལོག་སོང་བ་
བྱུང་། སྐབས་དེར་ཞབས་ཕྱི་ཁང་དུ་སེར་སྨད་རྒྱལ་རོང་པ་དགེ་བཤེས་ཚངས་དབྱངས་ཟེར་བ་གསོལ་ཚིགས་བཟོ་མཁས་པ་ཞིག ཉལ་ནས་བསྡད་ཡོད་པར་སྐྱོན་བྱུང་མེད་དམ་དགོངས་ཏེ། སྨད་གཡོག་མནབས་ནས་སྐུ་བཞེངས་ཀྱིས་གཟིགས་པར་ཕེབས་པ་ན། ཁོང་པ་གཉིད་ཁུག་ནས་༈ བསྡད་ཡོད་འདུག་པའི་ཆོ་འཕྲུལ་ངོ་མཚར་ཅན་བྱུང་། དེ་རྗེའི་ཆུ་བྱི་ལོའི་རྒྱ་དམག་བྱུང་བའི་མཇུག་ཙམ་དུ་བོད་གཞུང་གིས་བསྟན་སྲིད་ཞབས་རིམ་དུ་རྒྱལ་ང བའི་བཀའ་འགྱུར་རིན་པོ་ཆེའི་བཀླགས་ལུང་འཆད་ཉན་ཚུགས་རྒྱུར། དགའ་ལྡན་དུ་རྒྱུད་སྟོང་གྲྭ་ཁང་ནང་དགའ་ལྡན་ཤར་རྩེ་དགེ་བཤེས་ཉག་རེ་བློ་གྲོས་ཆོས་འཕེལ་དང་། བྲག་ཡེར་པར་དགའ་ལྡན་ཅོ་ནེའི་ཤར་པ་སྤྲུལ་སྐུ། ལྷ་ལྡན་དུརྨེ་རུའི་འདུ་ཁང་ནང་རྗེ་ཕ་བོང་ཁ་པ་ཉིད་ཀྱིས་བཀའ་འགྱུར་བཀླགས་ལུང་
སྩལ་དགོས་༸རྒྱལ་བའི་ཕྱག་རྟགས་དགོངས་དོན་ལྟར་གནང་བའི་མཇུག་ཙམ་ཞིག་ལ། དུག་གཡའ་ལྟ་བུའི་བསྙུན་གཞི་ཚབས་པོ་ཆེ་བྱུང་སྟེ་ཞིང་བརྗེ་ལ་ཁད་པ་ལྟ་བུའི་མཐར་སྐུ་ཤ་ཡོངས་རྗོགས་སྔོན་པོར་སོང་བའང་དེ་སྐབས་ནས་བྱུང་བ་དང་། གཞན་ཡང་བཞི་སྡེ་ཏཱ་བླ་མ་དགེ་སློང་བྱམས་པ་འཇིགས་མེད་རྣམ་གྲོལ་ལ་ཆོས་སྐྱོང་རྡོ་རྗེ་ཤུགས་ལྡན་དང་། འཁོར་དགེ་སློང་ཞིག་བཅས་ཤིན་ཏུ་གསང་བའི་སྒོ་ནས་སྐབས་རེ་ཙམ་ཁོག་ཞུགས་བྱེད་བཞིན་པ་དེ་དག་གིས་རྗེ་ཕ་བོང་ཁ་པར་དགེ་ལྡན་ལྟ་གྲུབ་གཙང་མ་བསྲེ་བསླད་དང་བྲལ་བར་འཛིན་སྐྱོང་སྤེལ་གསུམ་དགོས་པའི་སྙན་བསྐུལ་ཡང་ཡང་ཞུ་བ་སོགས་ལ་བརྟེན། མཐར་རྙིང་ཆོས་སྐོར་གསན་བསམ་མཚམས་བཅད་དང་། གསན་པ་རྣམས་ཀྱང་གཞན་ལ་མི་སྤེལ་བའི་གཡར་དམ་བཞེས་ཏེ་དགེ་ལྡན་རིང་ལུགས་གཙང་མའི་རྣམ་
ཐར་བདག་གིར་བཞེས་པ་ལ་བརྟེན་ནས། སྐུ་ཚེའི་སྨད་ལ་རྒྱལ་བསྟན་འཛིན་སྐྱོང་སྤེལ་བའི་རླབས་ཆེན་འཕྲིན་ལས་ཀྱི་རོལ་པ་རྒྱ་ཧོར་བོད་གསུམ་གྱི་ཁྱོན་ལ་ཁྱབ་བརྡལ་དུ་གྱུར་པ་འདི་བྱུང་བ་ཡིན་ནོ། །༽ ཞེས་རྙིང་མ་ལ་སྨོད་པའི་བསམ་པས་རང་གི་བླ་མ་ལ་བསྟོད་མི་མཁས་སྨད་པར སོང་བའི་འཁྱོག་ཚིག་བཀོད་པ་འདི་ལ་དངོས་པོའི་གནས་ཚུལ་དང་མཐུན་པའི་གདབ་ལན་ངོ་བསྟོད་དང་ཟོལ་ཚིག་སྤངས་ཏེ་བརྗོད་པར་བྱ་བ་ལ། ཕ་བོང་ཁ་པ་ཁོང་གོང་ས་ལྔ་པའི་དབུ་བླ་འཁོན་སྟོན་དཔལ་འབྱོར་ལྷུན་གྲུབ་ཀྱི་སྐྱེ་སྲིད་དུ་ཁས་འཆེ་ན་དེ་ནི་མཁའ་འགྲོ་ཡེ་ཤེས་མཚོ་རྒྱལ་དང་། ལོ་ཙཱ་བ་ཆེན་པོ་སྐ་བ་དཔལ་བརྩེགས། གསང་བདག་སྒྲོ་ཕུག་པ་སོགས་ཀྱི་སྐུ་སྐྱེ་ཡིན་པར་ལྔ་པ་ཆེན་པོའི་གསུང་འབུམ་དུ་གཏེར་ལུང་དང་བཅས་པ་གསལ་བས་རྙིང་མའི་བསྟན་
ལ་སྡང་ཞུགས་དེ་ཙམ་མཛད་ག་ལ་རིགས། སྤྱིར་བཏང་གང་ཟག་གི་ཚོད་གང་ཟག་གིས་བཟུང་དུ་རུང་བར་མ་གསུང་མོད། འོན་ཀྱང་ཆུ་སྐྱར་ལས་ཆུ་དང་དུ་བའི་རྟགས་ལས་མེར་ཤེས་པ་ལྟར་སོ་སྐྱེ་མཐུན་སྣང་དབང་བཙན་པར་བྱས་ཏེ་མངོན་སུམ་དང་རྗེས་དཔག་ལ་བརྟེན་ནས་ཅུང་ཟད་དཔྱད་པར་བྱ་བ་ལ། ཁོང་སྐུ་ཚེའི་སྟོད་ལ་རྙིང་མའི་བླ་སྤྲུལ་མང་པོའི་ཞབས་ལ་གཏུགས་ནས་གཏེར་ཆོས་དང་གསང་བ་དག་སྣང་རྒྱ་ཅན་ཉེར་ལྔ་སྒྲུབ་ཐབས་འདོད་འཇོའི་བུམ་བཟང་སོགས་ཆེས་མང་པོའི་དབང་ལུང་ཁྲིད་གསུམ་གསན་པ་ཙམ་དུ་མ་ཟད་བསྙེན་སྒྲུབ་ཀྱང་མཛད་ཟིན་རྗེས། ཆོས་ཟབ་ན་བདུད་ཟབ་ཅེས་པ་ལྟར། ཉིང་འཁྲུལ་ཟ་ཟི་དང་། འཚུབས་ལྷོངས་བག་ཙམ་བྱུང་བ་ལ་ལམ་ཁྱེར་དང་རོ་སྙོམས་མཛད་དགོས་རྒྱུ་ལ་དེ་མ་བྱུང་བར། ལྟ་བ་དང་བློ་སྦྱོང་དཔེ་ཐོག་ཏུ་ལུས་ནས་འཁྲུལ་
སྣང་ལ་བདེན་འཛིན་རང་རྒྱུད་པར་ཤོར་བས་ནོངས་འདུག་སྟེ། རྗེ་མི་ལས། སྤྱིར་ཐེག་པའི་མཐར་ཐུག་གསང་སྔགས་ཀྱི། །རྣལ་འབྱོར་བླ་མེད་རྒྱུད་ནས་ཀྱང་། །ཁམས་འདུས་རྩ་ཡི་རྟེན་འབྲེལ་གྱིས། །ཕྱི་རོལ་འདྲེ་གཟུགས་མཐོང་བར་གསུངས། །དེ་རང་སྣང་རྫུན་དུ་མ་ཤེས་ཤིང་། །བདེན་ནོ་སྙམ་ན་ཤིན་ཏུ་འཁྲུལ། །ཞེས་གསུངས་པ་ལྟར་བར་ཆད་རྐྱེན་དབང་དུ་ཤོར་ཏེ། བསོད་ནམས་ཟད་ཁར་ལྷ་ལ་ཡི་ཆད་སྐྱེས་པའི་དཔེ་བཞིན་གྱུར་ནས། སྐུ་ཚེའི་སྨད་ལ་རྙིང་མའི་ཆོས་དང་བླ་མ་ཡི་དམ་ལྷ་དང་བཅས་པ་རྩྭ་ལྟར་དོར་བ་འདི་ལྟ་བུ་ནི་རྣམ་ཐར་བཟང་པོ་མ་ལགས་ཏེ། ཅིའི་ཕྱིར་ཞེ་ན། ཁེ་ཉེན་ཆེ་བའི་རྡོ་རྗེ་ཐེག་པའི་སྐུ་གསུང་ཐུགས་ཀྱི་དམ་ཚིག་ཉམས་པའི་དབང་གིས་རྡོ་རྗེ་དམྱལ་བའི་རྒྱུ་ཆེན་པོ་བསགས་པ་སྟེ། འབྲུག་སྨྱོན་ཀུན་ལེགས་ཀྱིས། རྡོ་རྗེ་
ཐེག་པ་ལ་ཞུགས་མ་ཞུགས་དབང་གི་ཁྱད་བྱས་པ་ཡིན། དབང་གི་དམ་ཚིག་གསུམ་པོ་དེ་ཐུབ་ན། རྡོ་རྗེའཆང་ཟེར་བའི་ཐམས་ཅད་ཀྱི་གྲལ་མགོར་སྔོ་རེང་ངེ་བསྡད་ཆོག་པ་ཡོང་སྟེ། དམ་ཚིག་གསུམ་པོ་དེ་མ་ཐུབ་ན་རྡོ་རྗེའི་དམྱལ་བ་ཟེར་བའི་ལྟོགས་འགོང་ཅན་སུ་ཞུགས་དགུའི་རྟིང་ལ་སྡོད་དགོས་པ་དེ་ཡོང་བས། ཐུགས་བསམ་གཏོང་དགོས་པར་འདུག་གོ །ཞེས་གསུངས་པ་འདི་ལས་འགྲོ་ས་གཞན་ཅི་ཡོད། དཔེར་ན་དབང་ཕྱུག་མི་ལ་རས་པ་སྨན་ལུང་ཆུ་བར་ན་ ོ བཞུགས་དུས། གདོན་ཆེན་བཅོ་བརྒྱད་ཀྱིས་གཙོ་བྱས་པའི་སྣང་སྲིད་ཀྱི་ལྷ་འདྲེ་རྣམས་འཚོགས་ནས། ཉི་ཟླ་ཆ་ལང་རྡེབ། རྒྱ་མཚོ་ཧུབ་ཀྱིས་འཐུང་། གཟུགས་མེད་ལག་པ་རྐྱོང་པ་སོགས་ཆོ་འཕྲུལ་སྣ་ཚོགས་བསྟན་པ་ལ། རྗེ་བཙུན་གྱིས་ལྟ་བས་ཟིལ་གྱིས་མནན་ནས། རྐྱེན་ངན་དངོས་གྲུབ་དང་ལྟས་ངན་
གཡང་དུ་ལོན། བར་ཆད་ལམ་དུ་ལྷོངས། རྣམ་རྟོག་ཆོས་སྐུར་འཆར། སྐྱོན་ཡོན་ཏན་དུ་གྲོལ་ཏེ་ཐུན་མོང་ལམ་གྱི་མཐུན་རྐྱེན ཐམས་ཅད་ངང་གིས་འབྱུང་བ་དང་ཕྱོགས་ཙམ་མཐུན་པ་ཞིག་བྱུང་ན་ཁོང་ལ་གྲགས་པ་ངན་པས་ས་སྟེང་ཁྱབ་པ་འདི་ཡོང་མ་ཐང་ནའང་། དེ་ལྟར་མ་ཡིན་པར་ཁོང་གིས་གདོད་ནས་དག་པའི་ཡེ་ཤེས་ཀྱི་ལྷ་དང་། འཇིག་རྟེན་གློ་བུར་དུ་ལྷགས་པའི་གདུག་འདྲེ་གཉིས་གསེར་དང་ར་གན་འདམ་ཁ་ནོར་འདུག་པ་དེ་ལས་ནམ་གཞག་གཏན་གྱི་འདུན་མ་འཕྱུག་ཚབས་ཆེ་བ་གཞན་ཅི་ཞིག་ཡོད། དེས་ན་དམ་ཚིག་ཉམས་པའི་བཀའ་ཆད་ཀྱིས་སྐུ་ཚེ་དེ་ལ་ཡང་ཁོང་པཎ་ཆེན་བློ་བཟང་ཆོས་རྒྱན་གྱིས་མཛད་པའི་བླ་མཆོད་ཆོ་ག་སོགས་དགའ་ལྡན་བསྟན་ལ་བསྲེ་བསླད་དབྲི་སྣོན་གཟུ་ལུམ་རས་ཆོད་བྱས་པ་སོགས་ཀྱི་རྐྱེན་པས། རྒྱལ་དབང་
ཐུབ་བསྟན་རྒྱ་མཚོས་བཀའ་ཉེས་ཕོག་སྟེ་གཞན་ལ་ཆོས་འཆད་དབང་མེད་པར་བཟོས་ཤིང་། ལྷ་སར་བཀའ་འགྱུར་བཀླགས་ལུང་གནང་སྐབས་བསྙུན་གཞི་དྲག་པོ་ཐེབས་ནས་སྐུ་ལུས་ཀྱང་ནག་པོར་གྱུར་དུས་ཐུགས་ལ་གདོན་ཆེན་པོ་དེ་ཞུགས་པ་ཡིན་ཞེས་མི་རྒན་རབས་མང་པོས་གླེང་བ་འདི་བདེན་པའི་ཚོད་དུ་གདའ། རྒྱལ་བ་རིན་པོ་ཆེ་ཞིང་བརྗེས་རྗེས་ཕ་བོང་ཁ་པ་བར་ཁམས་ཆབ་མདོ་དང་། ཤོ་རྟ་ལྷོ་གསུམ། དབུས་དགའ་ལྡན། གཙང་བཀྲ་ཤིས་ལྷུན་པོ། ལྷོ་ཁ་མངའ་རིས་དྭགས་པོ་གྲྭ་ཚང་སོགས་སུ་ཕེབས་ནས་ལམ་རིམ་སོགས་བཀའ་ཆོས་གང་དུ་གསུངས་པའི་ཡུལ་དེ་རྣམས་སུ་ཆོས་ལུགས་གྲུབ་མཐའི་ཆགས་སྡང་གི་སྐད་ཆ་ངན་པ་སྔར་མ་གྲགས་པ་དར་བའི་འགོ་ཚུགས་པ་དང་། རྐྱེན་དེས་དཀར་ཕྱོགས་ལ་དགའ་བའི་ལྷ་སྲུང་འཁྲུགས་པར་གྱུར་ནས་ཡུལ་དེ་རྣམས་
སུ། འབྲུམ་པ། དམར་བཤལ། འགོ་བའི་ནད་རིམས་སོགས་ཀྱིས་དགེ་འདུན་མང་པོ་འདས་གྲོང་དུ་གྱུར་པ་དང་། སད་སེར་བཙའ་འབུ་ལོ་ཉེས་སོགས་སྣོད་བཅུད་ལ་མི་ཤིས་པའི་མཚན་ལྟས་ངན་པ་མང་པོ་བྱུང་བ་ནི་རང་ཅག་རྣམས་ལ་མངོན་སུམ་ཚད་མ་ཡིན་པས་སུ་ཞིག་གིས་*བསྙོན་དུ་ཡོད། དེ་བཞིན་དུ་བཀྲ་ཤིས་ལྷུན་པོར་ཕེབས་སྐབས་པཎ་ཆེན་སྐུ་གོང་མས་དམ་སྲི་དོལ་རྒྱལ་ཐེམ་འོག་ཏུ་མནན་ཡོད་པ་དེ་ཕ་བོང་ཁ་པས་ས་སྟེང་དུ་ཕྱུངས་པ་དང་། ཞལ་སློབ་དགེ་འདུན་ཚོ་གཅིག་མངགས་ནས། ཤངས་གུང་ཐང་རི་ཁྲོད་ཀྱི་ལྷ་ཁང་རྟེན་གཙོ་གུ་རུའི་བརྙན་བྱིན་ཅན་ཞིག་ཡོད་པ་དེ་བཤིག་ནས་ཆུ་ལ་གཡུགས་པར་བརྟེན། རྭ་སྒྲེང་རིན་པོ་ཆེ་སྲིད་སྐྱོང་ཁྲི་ཐོག་སྐབས་ཁ་མཆུ་གཞུང་གཏུགས་ཀྱིས། རི་ཁྲོད་གནས་འཛིན་བླ་མ་གུང་ཐང་རིན་པོ་ཆེ་ཞེས་
ཁམས་ཚ་བའི་ཕྱོགས་ནས་ཡིན་པ་དགུང་ལོ་བརྒྱ་ལོན་པར་གྲགས་པ་ཁོང་ལྷ་སའི་སྤོམ་མདའི་གཟིམས་ཤག་ཏུ་བཞུགས་འདུག་པ་དང་ཁོ་བོ་ཁམས་ནས་དང་ཐོག་ལྷ་སར་སླེབས་པ་དུས་མཚུངས་པས་གནས་ཚང་གཅིག་པར་སོང་སྟབས་དོན་གནད་དེའི་སྐོར་ལ་འཕྲོས་ཞིབ་ཀྱང་བྱ་མྱོང་། དེ་ལྟར་རྙིང་ཆོས་ཞུས་ཟིན་ཐམས་ཅད་རང་གིས་སྤངས་པ་དང་། གཞན་ལའང་མི་སྤེལ་བའི་དམ་བཅའ་བཞེས་པ་དེ་དགེ་ལྡན་རྣམ་ཐར་གཙང་མ་བྱས་པ་ཡིན་ན་དེ་ལས་སླ་བ་ཅི་ཡོད། ཀོང་པོ་ལྕགས་གྲོང་གྲུབ་ཆེན་འོད་གསལ་ཐེག་མཆོག་རྡོ་རྗེ་ཞེས་བཀོད་པ་ནོར་བ་སྟེ། བླ་མ་དེའི་མཚན་དངོས་ལྕང་གྲོང་གྲུབ་ཆེན་འོད་གསལ་ཐོགས་མེད་ཅེས་ཞུ་བ་ཡིན་སྟབས། ཁྱོད་ཀྱིས་སྨྲ་བ་འདི་ནི་སྔོན་དགེ་བཤེས་ཤིག་ལ་དམྱལ་ཁམས་བཅོ་བརྒྱད་ཀྱི་མིང་དྲིས་པ་ལ། དགེ་བཤེས་ཀྱིས་མ་དྲན་ནས་ཚ་
དམྱལ་བརྒྱད། གྲང་དམྱལ་བརྒྱད། ཀརྨ་པ་ཞྭ་དམར་ནག་གཉིས་དང་བཅོ་བརྒྱད་རེད་ཅེས་བགྲངས་པའི་དཔེར་སོང་སྟེ། དུས་དེར་རྒྱལ་དབང་ཀརྨ་པ་བཅུ་བཞི་པ་ཐེག་མཆོག་རྡོ་རྗེའི་མཚན་རྣ་བར་འཇགས་པ་ཁ་ནས་བྱུང་རྒྱལ་དུ་སྨྲས་པ་ཡིན་ལས་ཆེ། རི་ཁུད་རིན་པོ་ཆེ་དེ་ཉིད་ས་ངོར་གྱི་ཆོས་རྒྱུད་ཡིན་པས་རྙིང་ཆོས་འཛིན་སྤེལ་མཛད་མིན་ཐེ་ཚོམ་གྱི་གཞི་དང་། ཁོང་གི་ན་བཟའ་སྐུ་ཆས་དང་བྱད་དབྱིབས་སོགས་རྒྱས་བཤད་དེ་རིགས་སྣག་ཤོག་གྲོན་པའི་རྒྱུ་ལས་དགོས་དོན་མ་མཆིས། འདོད་འཇོའི་བུམ་བཟང་གི་དབང་ལ་ཁྱོད་ཀྱིས་རྗེས་གནང་གསན་ཞེས་བཀོད་པ་ནི། སྔགས་ཕྱོགས་ལ་ཐོས་༜བསམ་གྱི་གོམ་པ་འདོར་མ་མྱོང་བའི་སྐྱོན་ཡིན་ཀྱང་། ད་དུང་ཅ་ཅོ་སྨྲ་བ་མཚར། སྐུ་ཚེའི་སྨད་ལ་ཕྲིན་ལས་རྒྱ་བོད་ཧོར་གསུམ་དུ་ཁྱབ་ཟེར་བ་འདི་ཅི་ལྟར་
བདེན་ཏེ། ཁོང་གི་སྐུ་ཚེ་ལ་ཆ་བཞག་ན་མཐར་མ་ཕྱིན་པར་དྭགས་པོ་ནས་ཡར་ལུང་ཁྲ་འབྲུག་ཏུ་བྱང་ཆུབ་ལམ་རིམ་ཆོས་འཁོར་ཆེད་འཛུགས་དོན་དུ་ཕེབས་པའི་ལམ་ཁ་དྭགས་པོ་པོད་དྲངས་ལ་ཡི་རྩ་བར་ཁྱིམ་ཚང་ཞིག་གི་ནང་དུ་གསོལ་བ་བཞེས་འཕྲོ་ལ་གློ་བུར་གཟའ་གདོང་ཐུག་གིས་ལྟ་ལོང་ཉན་ལོང་མ་བྱུང་བར་དེ་ག་རང་སྐུ་གཤེགས་པ་དང་། དེའི་ཡང་སྲིད་དེ་ཡང་བྷག་སར་སློབ་གཉེར་བྱེད་འཕྲོ་ལ་བསྙུན་གཞི་དྲག་པོ་ཞིག་གིས་ཐེབས་ཏེ། རྡོར་གླིང་མངའ་ཁུལ་ཁར་ཤང་སྨན་ཁང་ཞིག་ཏུ་གདན་ཞུས་ཀྱིས་སྨན་དཔྱད་སྐུ་རིམ་ཇི་ཙམ་བསྒྲབས་ཀྱང་ཕན་སྐྱེད་མ་བྱུང་བར་གཞོན་ནུའི་དུས་སུ་འདས་གྲོངས་སུ་གྱུར། མཛད་ཕྲིན་ལ་ཆ་བཞག་ན་སྔོན་ཆད་བོད་དུ་རྒྱལ་བའི་བསྟན་པ་རིན་པོ་ཆེ་སྤེལ་བ་ལ་སྒྲུབ་རྒྱུད་ཤིང་རྟ་ཆེན་པོ་བརྒྱད་བྱོན་ནས་བྷོ་ཊའི་ལྗོངས་ཀུན་དཀར་
འབྱམས་ཡུག་གཅིག་ཏུ་བཏང་བ་དེ་ལྟར་ཡང་། ཕྱིས་ནས་ཕ་བོང་ཁ་པས་བསྟན་སེལ་ཕྱོགས་རིས་ཀྱི་ཤིང་རྟ་དགུ་པ་འདི་ཡི་སྲོལ་གསར་དུ་ཕྱེས་ནས་རྒྱ་ཧོར་བོད་གསུམ་ལ་ཆོས་སྤོང་ལོག་ལྟ་ངན་པའི་ཕྱོགས། འཛིན་སྐྱོང་སྤེལ་གསུམ་དར་ཁྱབ་ཏུ་གྱུར་པ་འདི་འདྲ་ལས་གཞན་རྒྱལ་བསྟན་རིས་མེད་ཕྱོགས་ལྷུང་གི་དྲི་མས་མ་སྦགས་པ་ཞིག་འཛིན་སྐྱོང་སྤེལ་གསུམ་མཛད་མེད་པ་གཟུ་བོར་གནས་པའི་བློ་གྲོས་ཅན་རྣམས་ཀྱིས་མཁྱེན་པར་འགྱུར་རོ། །འདི་ནི་ཁྱེད་ཅག་གིས་པཎ་ཆེན་ཐམས་ཅད་མཁྱེན་པར་དཔེ་བཀོད་པའི་ཚེས་གཅིག་ནས་འཕྱུགས་ན་གནམ་གང་བར་དུ་འཕྱུགས་ཟེར་བ་དེ་ཕ་བོང་ཁ་པ་སྐུ་གོང་༜འོག་ལ་བྱུང་ཞིང་། སྐབས་འགག་ལ་ཐུག་དུས་དགེ་ལྡན་ཐུན་མོང་མ་ཡིན་པའི་བསྟན་སྲུང་མཐུ་དང་གཉིས་ཀས་ཆེ་བའི་དགྲ་ལྷ་རྫིག་རྫིག་པོ་ཁ་ཕོ་འབྲུག་སྐད་
ཙམ་སྒྲོགས་པ་དེས་ཀྱང་བསྐྱབ་མ་ནུས་པར་དགའ་ལྡན་བསྟན་པའི་དབུ་འཕང་དམའ་བ་འདི་བྱུང་བ་ཨི་ཤེས། གོང་དུ་སྨོས་པ་དེ་དག་ནི་མདོ་ཙམ་སྟེ་མཐའ་དག་བཤད་ན་ཡི་གེ་ཉུང་ངུས་མཚོན་པར་མི་ནུས་ཤིང་སྤྲོས་པས་ཆོག་གོ །ཡང་ཛེ་སྨད་ན་རེ། ༼བདག་ཅག་གི་དཔལ་ལྡན་བླ་མ་དམ་པ་བཀའ་དྲིན་མཚུངས་མེད་བྲག་རི་རྡོ་རྗེ་འཆང་བློ་བཟང་ལུང་རིགས་རྒྱ་མཚོ་དབང་རྒྱལ་དཔལ་བཟང་པོས་ཀྱང་ལྷ་བཙུན་རིན་པོ་ཆེའི་དྲུང་ནས། རྒྱལ་མཆོག་ལྔ་པའི་དག་སྣང་གསང་བ་རྒྱ་ཅན་སོགས་གསང་སྔགས་སྔ་འགྱུར་གྱི་སྡེར་གཏོགས་འགའ་རེ་གསན་ཞིང་སྐབས་དེར་བྲག་རི་རི་ཁྲོད་དུ་ཕེབས་སྐབས་ཕེབས་ལམ་དུ་ཆིབས་པས་བསྐྱར་བ་དང་། དེ་རྗེས་རྟ་མགྲིན་ཡང་གསང་གི་བསྙེན་པ་གནང་རྗེས་ཡང་གསང་དབང་ཆེན་ཞིག་གནང་ཉེར་གུས་སློབ་བདག་ལ་སོགས་པ་སློབ་མ་
མང་པོ་ཞིག་ལ་ཡང་གསང་བེའུ་བུམ་ཁལ་ཁ་དམ་ཚིག་རྡོ་རྗེས་བསྒྲིགས་པ་བཅས་ཀྱི་བཀླགས་ལུང་སྩལ་ཞིང་། འོན་ཀྱང་རྡོ་རྗེ་ཤུགས་ལྡན་མ་མཉེས་པའི་རྣམ་པས། སྲོད་འཁོར་ཙམ་ཞིག་ལ་བྲག་རི་རི་ཁྲོད་ཀྱི་གཟིམ་ཆུང་གི་ཉེ་འགྲམ་ཞིག་ཏུ་དེ་ཕོ་ལྟ་བུའི་བྱ་གཟུགས་ཆེ་བ་སྔར་མཐོང་མ་མྱོང་བ་ཞིག་བབས་པ་སོགས་མཚན་མ་འགའ་ཞིག་བྱུང་བར། བྲག་རི་རིན་པོ་ཆེ་སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོའི་སྐུ་ཉེ་ཚ་བོར་སོང་སྟབས། ཁྲི་བྱང་རིན་པོ་ཆེ་ནས་བྲག་རི་རིན་པོ་ཆེ་མཆོག་ལ་ངེད་གཉིས་ཀྱི་བླ་མ་རྡོ་རྗེ་འཆང་དགོངས་པ་ཞི་བར་གཤེགས་ཟིན་པས་བཀའ་སྐྱོན་ཕེབས་དོགས་མ་དགོས་ཀྱང་། སྲུང་མ་རྡོ་རྗེ་ཤུགས་ལྡན་བཞུགས་ཡོད་སྟབས། རྙིང་ཆོས་གསན་བསམ་ཟིན་པ་རྣམས་འཆད་སྤེལ་མ་མཛད་ན་ལེགས་ཚུལ་བཀའ་གནང་
བར་བརྟེན་རྟ་མགྲིན་ཡང་གསང་གི་བཀའ་དབང་དེའང་ཆེས་ཤིན་ཏུ་གསང་བའི་སྒོ་ནས་སྦྱིན་བདག་སོགས་འགའ་ཞིག་ཙམ་ལས་གཞན་ལ་མ་གནང་སྟབས། གུས་སློབ་བདག་གིས་ཀྱང་ནོད་པའི་སྐལ་བར་མ་གྱུར་ཞིང་། དེ་ནས་བཟུང་རྙིང་མའི་ཆོས་སྐོར་གཞན་རྣམས་ཀྱང་སྤེལ་བར་མ་མཛད་པ་ཡིན་ནོ། །༽ཞེས་བཀོད་པ་ལ་དཔྱད་པར་བྱ་སྟེ། བྲག་རི་རིན་པོ་ཆེ་སྐུ་ཕྲེང་གོང་མའི་གོང་མ་པདྨ་ཀུན་བཟང་ཞུ་བ་ཕ་བོང་ཁ་པ་ལ་རྙིང་སྩལ་བ་པོ་དེའི་རིང་ནས་རྙིང་མ་ཡིན་པར་བཤད་བཞིན། དེའི་སྤྲུལ་བརྒྱུད་ཀྱིས་རྙིང་ཆོས་གནང་བ་ལ་བཀག་འགོག་འབད་ནས་བྱེད་པ་ཡང་འོས་ཤིང་འཐད་པ་མ་ཡིན། བྲག་རི་རིན་པོ་ཆེས་ལྷ་བཙུན་རིན་པོ་ཆེ་བླ་མར་བསྟེན་ཏེ་རྙིང་ཆོས་ཀྱི་དབང་ལུང་འགའ་ཞུས་པ་དང་། རྟ་མགྲིན་ཡང་གསང་གི་བསྙེན་པ་ཡང་བསྐྱེལ་ཟིན་མཚམས། དངོས་གྲུབ་ཐོབ་ཁར་
བར་ཆད་དུ་གྱུར་པ། ཆིབས་ལས་ལྷུང་བ་དང་། རི་ཁྲོད་དུ་རི་བྱ་བབས་པ་ཙམ་གྱི་རྣམ་རྟོག་གི་རྐྱེན་ཆུང་ངུ་དེ་ཙམ་ཡང་ལམ་དུ་ཁྱེར་མ་ནུས་པའི་ཁར། བདུད་བཤེས་གཉེན་དུ་བརྫུས་པའི་བསླུ་བྲིད་ཀྱི་ངག་ལ་མཉན་ནས། བྱིན་རླབས་དང་དངོས་གྲུབ་ཀྱི་རྩ་བ་བླ་མ་དང་ཡི་དམ། དེ་སྒྲུབ་པའི་ཐབས་རྙིང་མའི་ཆོས་དང་དམ་ཚིག་བཅས་པ་རྩྭ་ལྟར་དོར་བའི་ལོ་རྒྱུས་བཀོད་པ་འདི་རང་གི་བླ་མའི་སྐྱོན་མཛུབ་མོས་བྲུས་པར་ཟད་དོ། ད་ལྟའི་ཁྲི་བྱང་རིན་པོ་ཆེས་རང་གི་ཚ་བོ་ཡིན་པ་བྲག་རི་སྤྲུལ་སྐུར་ཆོས་སྤོང་བར་བསྐུལ་བས་མ་ཚད་བླ་མ་དང་གསང་སྔགས་ཀྱི་དམ་ཚིག་ལས་འགལ་བ་དེ་ཉེས་པ་ཆུང་3བར་བརྩིས་ཏེ། དེ་བས་ཤུགས་ལྡན་དང་འགལ་བ་བྱུང་ན་ཉེས་ཚབས་ཆེས་ཆེ་བ་ལྟར་བཀོད་ནས་འཇིགས་སྣང་བསྐུལ་བ་དང་བཅས་གསང་ཆེན་ཟབ་མོའི་
སྨིན་གྲོལ་ཕྲིན་ལས་ཀྱི་སྒོ་བཀག་པ་འདི་ནི་བསྟན་པ་ཐམས་ཅད་འགལ་མེད་དུ་མ་རྟོགས་པ་དང་། ཐོས་པ་ཕྱོགས་རེར་གྱུར་པ་མ་ཟད་ཐེག་ཆེན་བྱང་ཆུབ་སེམས་དཔའི་སྤྱོད་པ་དང་ཡོངས་སུ་འགལ་བར་མཐོང་ངོ་། །ཛེ་སྨད་ཁྱོད་རང་གིས་ཀྱང་བྲག་རི་སྤྲུལ་སྐུའི་དྲུང་ནས་རྙིང་ཆོས་རྟ་མགྲིན་ཡང་གསང་གི་བེའུ་བུམ་ཞུས་འདུག་པ་དེ་ཁྱོད་ཀྱིས་ད་ལྟ་སྤངས་སམ་མ་སྤངས། སྤངས་ན་ནི་ཆོས་སྤོང་ལས་ངན་དམྱལ་བའི་རྒྱུ་བསྒྲུབས་ཚར། མ་སྤངས་ན་ནི་དགའ་ལྡན་རིང་ལུགས་གཙང་མ་ལ་ལྟ་གྲུབ་ཆལ་ཆོལ་རྙིང་ཆོས་ཀྱི་བསྲེ་བསླད་བྱེད་པར་སོང་བས། རྒྱལ་ཆེན་གྱིས་ཁྱོད་ལ་དགའ་ལྡན་པའི་བླ་མ་ཞིང་གཤེགས་གོང་དུ་སྨྲོས་པ་རྣམས་དང་འདྲ་བར་བཀའ་ཆད་དྲག་པོ་ཐོག་ལྟར་འབེབས་པར་ཅིས་མི་འགྱུར། དེས་ན་ཁྱེད་ཅག་ཕ་བོང་ཁ་པ་བརྒྱུད་པ་དང་བཅས་པ་ཚང་མ་ཆོས་དང་དམ་
ཚིག་ལྷ་དང་བླ་མར་བཅས་པ་འུར་རྡོར་འཕངས་པ་ཤ་སྟག་མ་ཡིན་ན་གང་ཡིན། དེ་འདྲའི་གནོང་ཡོད་པ་བཀབ་ནས་ད་དུང་དཀར་རྙིང་སོགས་ཀྱི་ཆོས་དང་བླ་མ་ལ་དཔྱས་གདགས་པ་ནི། ཇི་སྐད་དུ། རང་སྐྱོན་རི་བོ་ཙམ་ཡང་ཁོང་དུ་སྦེད། །གཞན་སྐྱོན་ཏིལ་འབྲུ་ཙམ་ཡང་འབད་༈པས་སྒྲོགས། །ཞེས་གསུངས་པ་འདི་ཁོ་ནའོ། །དེ་ལྟར་གངས་ཅན་བསྟན་པའི་ཕྱི་མོ་སྔ་འགྱུར་བསྟན་པའི་སྙིང་པོ་ཟབ་གསང་རྫོགས་པ་ཆེན་པོའི་ཆོས་དང་། དེ་འཛིན་མཁས་ཤིང་གྲུབ་པ་བརྙེས་པའི་སྐྱེས་བུ་དམ་པ་རྣམས་དང་། ཡེ་ཤེས་ལྷ་དང་བསྟན་སྲུང་དམ་ཅན་བཅས་པར་སྙིང་ནས་ལོག་པར་བལྟས་ཏེ་རང་གིས་སྤངས་པ་དང་། རང་ལ་ལྟོས་པ་སོགས་གཞན་དག་ཀྱང་སྤོང་དུ་འཇུག་ཅིང་མོས་པ་ལྡོག་པའི་ཐབས་དངོས་དང་བརྒྱུད་ནས་སངས་རྒྱས་བསྟན་ལ་དབྱེན་སྦྱོར་
ཕུང་དཀྲུགས་ཐན་སྐྱེལ་ངན་པ་བྱེད་པ་དེ་དག་ནི་བསྟན་པ་ནང་ནས་བཤིག་པའི་སྨོན་ལམ་ལོག་པའི་དགེ་སྦྱོང་མངོན་པའི་ང་རྒྱལ་ཅན་དེ་འདྲ་དེང་སང་འབྱུང་བ་དང་དེ་དག་ཕྱོགས་རིས་ཀྱི་ལས་དེས་ངན་སོང་དུ་ལྷུང་བར་གསུངས་ཏེ། འཕགས་པ་ཟླ་བ་དྲི་མ་མེད་པའི་མདོ་ལས། མ་འོངས་པའི་དུས་ན་དགེ་སློང་མངོན་༜པའི་ང་རྒྱལ་ཅན་ཆོས་ལྟར་བཅོས་པ་དུ་མ་འབྱུང་སྟེ། དེའི་ཚེ་རང་གིས་བསླད་པའི་ཆོས་དག་འདྲེས་མར་བྱས་ཏེ་འདི་ནི་དམ་པའོ་ཞེས་སྟོན་ཅིང་། ཆོས་སྨྲ་བ་ ྚ གཞན་ལ་འདུད་པར་མི་བྱེད། ཡོངས་སུ་འདྲི་བར་མི་བྱེད། ཀུན་ནས་མནར་སེམས་པས་སྨོད་པར་བྱེད་དོ། །མི་གཏི་མུག་ཅན་དེ་དག་ནི་དེའི་རྒྱུས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་རྣམས་སུ་སྐྱེ་བར་འགྱུར་རོ། །ཞེས་གསུངས་པ་ལྟར་ང་རྒྱལ་དང་གཏི་མུག་གིས་བྱང་ཆུབ་སེམས་དཔའ་ལ་སྐུར་
འདེབས་སྨོད་པར་བྱེད་པ་དང་ཆོས་ལ་སྡང་ཞིང་བརྙས་པར་བྱེད་པ་ནི། མཚམས་མེད་པ་ལྔ་ལས་ལྕི་བ་དང་། ངུ་འབོད་ལ་སོགས་ངན་འགྲོར་ལྟུང་ཞིང་ཐར་པའི་དུས་མེད་པར་གསུངས་ཏེ། འཕགས་པ་དད་པའི་སྟོབས་བསྐྱེད་པ་ལ་འཇུག་པ་ལས། གང་ལ་ལ་ཞིག་གིས་བྱང་ཆུབ་སེམས་དཔའ་ལ་རྐྱེན་གང་ཡང་རུང་བས་ཁྱད་དུ་གསད་དེ་སྨྱོས་ན། དེའི་སྡིག་པའི་ལས་ཀྱིས་སེམས་ཅན་དམྱལ་བ་ངུ་འབོད་ཆེན་པོར་སྐྱེ་སྟེ། ལུས་དཔག་ཚད་ལྔ་བརྒྱ་པ་ལས་མགོ་བོ་ལྔ་བརྒྱ་ཡོད་དེ། མགོ་བོ་རེ་ལ་ལྕེ་བརྒྱ་བརྒྱ་ལྕེ་རེ་ལ་ཡང་ལྕགས་ཀྱི་ཐོང་གཤོལ་འབར་བ་ལྔ་བརྒྱ་ལྔ་བརྒྱས་རྨོའོ། །ཞེས་དང་། གང་བྱང་ཆུབ་སེམས་དཔའ་ལ་སྐུར་པ་འདེབས་པ་ནི། སངས་རྒྱས་ཀྱི་རིགས་གཅོད་པར་ཞུགས་པ་ཡིན་ན། གང་བྱང་ཆུབ་སེམས་དཔའ་ལ་སྐུར་པ་
འདེབས་པ་དེས་དམ་པའི་ཆོས་སྤངས་པ་ཡིན་ནོ། །ཞེས་དང་། གང་ལ་ལ་ཞིག་གིས་འཛམ་བུའི་གླིང་གི་སེམས་ཅན་ཐམས་ཅད་ཀྱི་སྲོག་བཅད་དེ། བདོག་པ་ཐམས་ཅད་འཕྲོགས་པ་ལས། གང་གཞན་ཞིག་གིས་བྱང་ཆུབ་སེམས་དཔའ་ཅི་འདྲ་ཡང་རུང་བ་ལ་སྨད་པ་འདི་ནི་སྡིག་པ་དེ་བས་སྡིག་པ་གྲངས་མེད་པ བསྐྱེད་དོ། །ཞེས་གསུངས་པས་ན། བྱང་ཆུབ་སེམས་དཔའ་ལ་ཡང་སྐུར་བ་བཏབ་པའི་ལས་མ་གཏོགས་པ། ལས་གཞན་གང་གིས་ཀྱང་བྱང་ཆུབ་སེམས་དཔའ་ངན་འགྲོར་ལྟུང་མི་ནུས་པར་རབ་ཏུ་ཞི་བ་རྣམ་ངེས་ཆོ་འཕྲུལ་གྱི་མདོ་ལས་གསུངས་ཤིང་། སྡུད་པ་ལས་ཀྱང་། ལུང་བསྟན་མ་ཐོབ་བྱང་ཆུབ་སེམས་དཔའ་གང་ཞིག་གིས། །ལུང་བསྟན་ཐོབ་ལ་སེམས་ཁྲོས་རྩོད་པ་རྩོམ་བྱེད་ན། །ཐ་བ་སྐྱོན་ལྡན་སེམས་ཀྱི་སྐད་ཅིག་ཇི་སྙེད་པ། །དེ་སྙེད་བསྐལ་བར་གཞི་ནས་
གོ་ཆ་བགོ་དགོས་སོ། །ཞེས་གསུངས་པ་དང་། མགོན་པོ་བྱམས་པས། འཕགས་ལ་སྐུར་དང་དེས་གསུང་ཆོས་ལ་བརྙས་པ་གང་། །དེ་ཀུན་རྨོངས་པའི་མངོན་ཞེན་བརྟས་བྱས་ཉོན་མོངས་ཡིན། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། །ཞེས་དང་། ཀུན་མཁྱེན་ཀློང་ཆེན་པས། ལོག་རྟོག་ཅན་གྱི་སྐྱེ་བོ་འགའ། །ཆོས་དང་འཕགས་ལ་སྐུར་འདེབས་པའི། །མཚམས་མེད་ལས་ལྕིའི་ཆོས་སྤོང་བའི། །རྗེས་སུ་ཤེས་ལྡན་ཁ་ཅིག་ཀྱང་། ། ཞུགས་ནས་མི་ཟད་སྡིག་པའི་ལས། །བྱེད་པས་ཕྱེ་ལེབ་མེར་མཆོངས་མཚུངས། །ཞེས་གསུངས་ཤིང་། རྒྱུད་བླ་མ་ལས། གང་ཞིག་གང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་གང་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་
བསམ་པས་མྱུར་དུ་དེ་ལས་ཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་གསུངས་སོ། །སྙིགས་མ་ལྔ་བདོའི་དུས་སུ་བདུད་ཁ་ཕྱུར་ནས། ཆོས་ཁྲིམས་ཉམས་པའི་རྟགས་ཆོས་འཆད་སྟོན་པའི་གཟུགས་བརྙན་འདི་འདྲ་འབྱུང་བར་ལུང་བསྟན་པའི་ཐོག་ཏུ་བབས་པ་སྟེ། མ་ཅིག་རྣམ་བཤད་ཆེན་མོ་ལས་ཀྱང་འདི་ལྟར། སངས་རྒྱས་བསྟན་པའི་ཕྱི་དྲོ་མར་བབ་དུས་ཐུག་པས། །ལོག་རྟོག་བདུད་རྣམས་ཁ་ཕྱུར་རྩོད་པ་རྒྱས་པ་འབྱུང་། །དེ་དུས་རྒྱལ་ཁྲིམས་ཆོས་ཁྲིམས་འཆུགས་པ་དང་། །སྙིགས་མ་ལྔ་པོ་བདོ་བའི་དུས་ཡིན་པས། །ཆོས་ཁྲིམས་འཆུགས་རྟགས་ཆོས་འཆད་སྟོན་པ་འདི་འདྲ་འབྱུང་། ། གྲུབ་མཐའ་སྨྲ་སྐད་སྟོན་པ་འགའ་ཞིག་འབྱུང་བ་ཡིས། །ཡིག་ནག་ཀློག་པའི་ཚིག་སྐམ་མང་འགྲེལ་ཡང་། །ཐེག་ཆེན་ལྟ་བའི་ཁྱད་པར་མ་ཤེས་
པས། །བདག་འཛིན་འགོང་པོ་མ་ཐུལ་འཕེལ་གྱུར་པའི། །ཚེ་འདིར་ཞེན་པས་སྙན་གྲགས་འདོད་པའི་ཕྱིར། །འཁོར་མང་བསྡུས་ནས་ཉན་བཤད་བྱེད་མོད་ཀྱང་། །འདོད་པ་ཁོང་དུ་བཅུག་པའི་ཁེངས་སེམས་རབ་ཏུ་རྒྱས། །རང་བས་མཁས་པའི་བདེན་པའི་ཚིག་མདའ་དེ། །རང་གི་སྙིང་ལ་ཟུག་པའི་མཚང་ཆེ་ཁོང་ཁྲོ་འབར། །ཨཁས་པའི་བདེན་ཚིག་བདེན་པར་མཐོང་ན་ཡང་། །རང་མཚང་ཡིན་ཕྱིར་བདེན་པའི་ཚིག་ལ་སྨོད་བྱེད་ཅིང་། །གྲུབ་མཐའ་ལོག་པར་བཟུང་ནས་ཉོན་མོངས་འཕེལ་བར་བྱེད། །རང་བས་ལྷག་པའི་བསོད་ནམས་བསགས་པ་གཞན། །ལྷུན་གྱིས་གྲུབ་པའི་འཁོར་མང་ལོངས་༈ སྤྱོད་འདུ་བ་ཡང་། །ལྷ་མིན་ལྷ་ཡི་དཔལ་ལ་རྩོད་འདྲ་ཡི། །ཕྲག་དོག་དབང་གིས་གཞི་མེད་གྲོས་ངན་བསམ་ཡས་འདིང་། །སངས་རྒྱས་བསྟན་ལ་ཕྱོགས་
རིས་བགོ་བཤའ་རྒྱག །དམ་པའི་ཆོས་ལ་བདག་འཛིན་ཐེའུ་བཏགས། །བདེ་གཤེགས་སྐུ་ལ་ཕྱོགས་རིས་བླང་དོར་བྱེད། །ནང་པའི་གྲུབ་མཐའ་བཟློག་ནས་རྩོད་གཞི་བཟུང་། །དགེ་སློང་འདུལ་བ་འཛིན་པས་དམག་དཔོན་བྱེད། །དགེ་ཚུལ་གོ་མཚོན་ཐོགས་ནས་འཐབ་ལ་བརྩོན། །གྲུབ་མཐའ་རྩོད་པའི་ཆོས་སྐད་ཆེན་པོ་འདོན། །འཁྲུག་རྩོད་གོང་མའི་ཞབས་ཏོག་བྱས་པར་འདོད། །ཕྱོགས་ཆ་སྡུག་ཞེན་དམ་ཚིག་བསྲུང་སྐད་སྨྲ། །ཚིག་སྐམ་གྲངས་མང་འགྲེལ་པར་གྱུར་པ་ན། །བསྟན་པ་འཛིན་དང་བསྟན་པའི་སྲོག་ཤིང་ཡིན་ཟེར་ནས། །རྣམ་པར་འབྱེད་པའི་ཚིག་ལ་རབ་ཏུ་དགའ་གྱུར་པའི། །ཐོས་པ་མང་པོ་བྱས་པའི་ཁེངས་སེམས་ཀྱིས། །ནང་གི་བྱང་ཆུབ་སེམས་དང་རིང་དུ་སོང་བ་ཡིས། །དད་དང་མོས་གུས་ཞི་དུལ་གསུམ་དང་བྲལ་ནས་ནི། །ཕྲག་དོག་འགྲན་སེམས་
བདག་སྐྱེད་དབང་དུ་གྱུར་པས་ན། །བསྟན་པ་གཅིག་པའི་མཁན་སློབ་གྲོགས་མཆེད་དང་། །ཁྱད་པར་བུད་མེད་ཟབ་ལམ་མཐུན་པ་རྡོ་རྗེའི་སྤུན་རྣམས་དང་། །གང་ཞིག་གང་གི་སློབ་མར་གྱུར་པ་རྣམས། །མི་མཐུན་རྩོད་དང་དགེ་འདུན་ནང་དམེ་བྱེད། །བསྟན་པའི་ནང་འགལ་དགོན་སྡེ་ཆོལ་བུར་འགྲོ། །བསྟན་པ་ཉམས་པའི་མི་ནག་སྲིད་དུ་བཀོལ། །དམ་ཚིག་ཉམས་པའི་མནའ་ཡི་འབྲེལ་པ་བཞག །གཏམ་མཐའ་ཟས་དང་ནོར་གྱིས་བསྒྲིབ་པ་དང་། །མི་སྡེ་ཡུལ་ཁམས་ཀུན་གྱི་དཀྲུགས་ཤིང་བྱེད། །ཐམས་ཅད་མི་དགེ་འཁྲུགས་པའི་ལས་ལ་སྦྱོར། །དེ་འདྲའི་སྟོན་པ་འགའ་ཞིག་འབྱུང་བ་ཡི། །ཁ་ནས་གསུང་རབ་དྲི་མེད་སིལ་སིལ་སྨྲ། །སེམས་ལ་འདོད་སྲེད་མེ་དཔུང་རབ་ཏུ་འབར། །ལུས་ལ་འདུལ་བའི་ཆས་རྟགས་འཛིན། །རེས་འགའ་མི་ནག་
དམག་དཔོན་བྱེད། །རེས་འགའ་བཙུན་པའི་དམག་དཔོན་བྱེད། །རེས་འགའ་དཔོན་སྐྱའི་དཔུང་རོགས་བྱེད། །རེས་འགའ་བཤད་ཉན་སློབ་དཔོན་བྱེད། རེས་འགའ་དགོན་སྡེའི་ཚོགས་དཔོན་བྱེད། །རེས་འགའ་ཚེ་འདས་འདྲེན་སྟོན་བྱེད། །རེས་འགའ་ནད་པའི་སྔས་སྲུང་བྱེད། །རེས་འགའ་ཞལ་ལྕེའི་བཅད་གྲས་བྱེད། །རེས་འགའ་གྲོང་ཆོག་མུ་སྣེ་དེད། །རེས་འགའ་རྨོ་བཀོལ་ལས་དཔོན་བྱེད། །རེས་འགའ་ཚོང་དཔོན་ཟང་ཟིང་གཉེར། །རེས་འགའ་རྐུ་སློང་དཔོན་པོ་བྱེད། །རེས་འགའ་ཟོག་ཆོས་གསོག་འཇོག་བྱེད། །རེས་འགའ་ལུང་བགྲང་སྒྲུབ་པ་བྱེད་ལ་བརྩོན། །རེས་འགའ་བླ་མེད་སྔགས་ཀྱི་ཐེག་པ་ཆེ། །མི་ནག་ཕོ་མོར་ཟས་དང་ནོར་ལ་འཚོང་། །རྙེད་པ་འདོད་ཕྱིར་ཟས་ནོར་བྱིན་ལ་དགའ། །སྔགས་འདོན་གཏོར་མའི་ལས་ལ་ཅུང་ཟད་བརྩོན། །མཐུ་ཆེན་དགྲ་བོ་
གསོད་པར་བསྙད་པ་དང་། །འདྲེ་གདོན་ཐུལ་སྙམ་དྲེགས་པས་རབ་ཏུ་ཁེངས། །དེ་འདྲའི་སྟོན་པ་འགའ་ཞིག་འབྱུང་བའི་དུས། ཆོས་ཁྲིམས་ཉམས་རྟགས་ཡིན་ནོ་རིགས་ལྡན་ཀུན། །ཅེས་གསུངས་པ་སོགས་མདོ་དང་དགོངས་འགྲེལ་གྲུབ་པའི་ལུང་ཚད་མའི་གནོད་བྱེད་ཀྱི་མེ་ཆར་དགེ་སྦྱོང་ཆོས་ལྟར་བཅོས་པ་ཁྱེད་ཅག་གི་མགོ་ལ་བབས་པས་མ་ཚད། རིགས་པས་ཀྱང་གྲུབ་སྟེ། འབྱུང་པོ་འདྲེ་གདོན་ལ་སྐྱབས་གནས་ཀྱི་མཆོག་ཏུ་འཛིན་ཅིང་། གསུང་རབ་ལ་ནང་འགལ་མེ་ཆུ་ལྟར་བཟུང་ནས། ཆོས་དང་གང་ཟག་ཁྱད་པར་ཅན་རྣམས་ལ་སྙིང་ནས་སྨོད་པའི་ནག་པོའི་ཆོས་བཞི་ལ་བག་མེད་དུ་སྤྱོད་པའི་༔ དབང་གིས་མཐར་ངན་འགྲོར་ལྟུང་བ་ཨ་ཅང་ཆེ། གནས་སྐབས་སུ་ཡང་དེ་དག་གང་དུ་བསྡད་པ་དང་ཆོས་ར་འཛུག་པ་སོགས་བྱེད་པའི་ཡུལ་ཕྱོགས་དེར་
རྗེས་ནས་ཆོས་ལུགས་བཟང་ཞན་དང་ཕྱོགས་རིས་ཆགས་སྡང་གི་འུད་གཏམ་སྣ་ཚོགས་ཤིག་ལྷགས་ནས་སྐྱེ་བོ་ཕལ་མོ་ཆེ་བློ་འཁོས་སུ་མི་ཕེབས་པ་མངོན་སུམ་ཡོང་གི་འདུག་པ་འདི་དགེ་བའི་བཤེས་གཉེན་ཡང་དག་པ་མ་ཡིན་པའི་རྟགས་སུ་ངེས་ཏེ། རྗེ་བཙུན་ཀུན་དགའ་སྙིང་པོས། སྐྱེས་བུ་དམ་པ་ཞིག་ཡིན་ན་གང་དུ་བྱོན་པའི་ཤུལ་དེར་དད་པ་དང་སྙིང་རྗེ་ཆེ་བ། ཕྱོགས་རིས་དང་ཆགས་སྡང་ཆུང་བ། སྐྱེ་བོ་རྣམས་རྒྱུད་འཇམ་ཤིགས་སེ་འགྲོ་བ་ཞིག་དགོས་པ་ཡིན།བློ ཕྱོགས་རིས་ཁ་འཛིན་ཆགས་སྡང་ཇེ་འཕེལ་དུ་སོང་། དེ་ལ་བརྟེན་ནས་ཁ་མཆུ་གླེང་བརྗོད་འཐབ་རྩོད་སོགས་རྒྱུད་རྩུབ་ཟིང་དུ་སོང་ན་མི་དགེ་བའི་བཤེས་གཉེན་ཡིན་པའི་རྟགས་ཡིན་ཞེས་གསུངས་པ་འདི་ཐུགས་བདེན། དེས་ན་ཕྱོགས་རེའི་བློ་ཅན་རྣམས་ངའི་ལུགས་འདི་ཁོ་ན་ཡང་དག་པ་ཡིན་གྱི། གཞན་ནི་
གཏི་མུག་གོ་ཞེས་སྨྲ་བ་ནི་མུན་སྤྲུལ་ཏེ། ཉྭ་སེར་རང་ལུགས་ཀྱི་ཕྱག་ལེན་དང་གཞུང་ལུགས་རེ་ཟུང་ཙམ་མ་གཏོགས། དཀར་རྙིང་ས་གསུམ་གྱི་ལུགས་ལ་དག་སྣང་དང་གཟིགས་རྒྱ་ཤིན་ཏུ་ཆུང་བས་ཆོས་རྒྱུས་ཆུང་བ་དང་། གཟུ་བོར་མི་གནས་ཤིང་ཆོས་སྤྱན་དང་མི་ལྡན་ཀྱང་དབང་ཡོད་ཁ་དྲག་ལྟ་བུས་ཆོས་ལུགས་ལ་ཡག་གཙོག་དང་། བརྒྱུད་པ་བཟང་ངན་གྱི་སྐད་ཆ་མང་ཞིང་གཞན་ལུགས་ལྟ་ཞོག །དགེ་ལུགས་པ་རང་ཕྱོགས་ལའང་ནང་ཕན་ཚུན་རྒྱུ་མཚན་མེད་པའི་དོགས་འཛེམ་བྱེད་པ་འདི་དག་དགེ་ལྡན་པའི་བསྟན་འཛིན་ཚད་ལྡན་དུ་ཆ་འཇོག་དཀའ་སྟེ། བསྟན་པ་དཀྲུགས་པའི་བདུད་ཀྱི་ལས་སུ་ཆེ་བས་སོ། །དེ་སྐད་དུ་འཇམ་མགོན་བློ་གྲོས་མཐའ་ཡས་ཀྱིས། ཇི་ལྟར་རང་འདོད་དབང་གྱུར་མི་ཡི་བདག །ས་གཞི་སྐྱོང་ལ་ནུས་ཐོབ་མིན་པ་
ལྟར། །ཕྱོགས་རེའི་བློ་ཅན་ཐུབ་བསྟན་ལྟ་ཅི་སྨྲོས། །རང་ལུགས་འཛིན་ལའང་ཚད་མའི་སྐྱེས་བུ་མིན། །དམ་པ་རྣམས་ནི་མཐར་ཐུག་དགོངས་གཞི་གཅིག ང་རྒྱལ་ཅན་གྱིས་རང་འདོད་དུ་མར་བཀྱོག །ཐུབ་བསྟན་འགལ་མེད་སྒྲུབ་ན་མཁས་མོད་ཀྱི། །བསྟན་པ་དཀྲུགས་པའི་བསྟན་འཛིན་སུ་ཡི་འཕྲུལ། །ཞེ་གསུངས། དམ་པའི་ཆོས་ལ་ཕྱོགས་རིས་ཕྲག་དོག་ཅན་དམ་སྲིས་རྒྱུད་བསྐུལ་ཏེ། བསྟན་པ་ནང་ནས་བཤིག་པའི་བདུད་ཀྱི་གསང་ཚིག་ཕན་མེད་གནོད་པའི་ལ རང་བཞིན་ཁ་ནས་ཞར་དང་ཞོར་ལ་ཐོན་པའི། རྫུན་པོ་ཆེ་ལ་གཏན་ཚིགས་མང་ཟེར་བའི་དཔེ་ལྟར། ཆོས་དང་སྲིད་ཕན་ཚུན་སྲ་བསྲེ་དང་འབྲེལ་པའི་གཏམ་ཉོབ་ཚིག་རོ་རྫུན་རྒྱབ་རྫུན་གྱིས་བྱས་པ་དོན་མེད་ཕྱོགས་ལྷུང་གི་འཆལ་གཏམ་མ་དག་པ་འདི་འདྲ་ཡུལ་དུས་གནས་སྐབས་ངན་པ་འདི་འདྲར་འགྲོ་བརྩིས་ནས་
ངོས་ལྐོག་གཉིས་ཀར་ཁྱབ་སྤེལ་བྱས་པའི་དེབ་སེར་པོ་འདི། གཟས་པའི་ཁར་མ་ཕོག་པར་མ་གཟས་པའི་སྣར་ཕོག་སྟེ་ཞེ་ལ་བརྣག་པའི་དོན་འགྲུབ་པ་ལྟ་ཞོག །ད་ཙམ་ན་བོད་དབུ་དམངས་ཚང་མས་ཐག་པ་ནག་པོ་དུག་སྦྲུལ་དུ་འཁྲུལ་པའི་མཚང་ཕུག་ནས་རིག་སྟེ་བསམ་སྦྱོར་ངན་པའི་འབྲས་བུ་རང་ཐོག་ཏུ་འཁོར་ནས་བརྒྱ་ཁ་མང་གིས་གླེང་། སྟོང་མིག་མང་གིས་བལྟ་ཞིང་འདུག་པ། འདི་འདྲའི་རྙོག་མ་གཏིང་སློང་བྱེད་པོ་རྙིང་མ་བ་རེད་དམ་ཁྱེད་ཅག་དགེ་ལྡན་པར་ཁས་འཆེ་བའི་ཕྱོགས་ལྷུང་ཅན་རྣམས་རེད་ལེགས་པར་སོམས་ཤིག །ཁོ་བོས་སྲང་མདོའི་གཏམ་ཙམ་ལ་ཡིད་མ་རྟོན་པར་མངོན་སུམ་དང་ལྐོག་གྱུར་ལ་མི་བསླུ་བའི་ལུང་རིགས་ཚད་མས་དགག་བཞག་ཅུང་ཟད་བགྱིས་པ་འདིས་ཕྲག་དོག་ཅན་ལེགས་སྐར་དང་ལྷས་སྦྱིན་གྱི་བརྟུལ་
ཞུགས་འཛིན་པ་ཉུང་ཟད་ཅིག་འདུལ་མི་ནུས་ཀྱང་། དྲང་པོའི་བློ་ཅན་རྣམས་ཀྱི་ལོག་རྟོག་ཞི་བའི་སྨན་ཡོན་དུ་འགྱུར་བར་ཤེས་ནས་འབད་པས་བྲིས་པ་སྟེ། རྫ་དཔལ་སྤྲལ་རིན་པོ་ཆེས། དེ་སོགས་རང་བཟོའི་ཆོས་སྐད་ཀྱིས། །མྱོང་པའི་རྟོག་གེ་འཆལ་པ་དག །རྒྱལ་བའི་བཀའ་ཡང་ལྷམ་ནང་གི། །རྩྭ་ལྟར་འདོར་ན གཞན་གྱིས་ཅི། །གྲུབ་པའི་ཉམས་མྱོང་ལག་རྗེས་དང་། །མཁས་པའི་ལུང་རིགས་རྣམ་དག་གིས། །ཕྲག་དོག་ཅན་གདུལ་མི་ནུས་ཏེ། །ཐུབ་པ་མཆོག་དང་ལྷས་སྦྱིན་བཞིན། །ཞེས་གསུངས་པ་ལྟར་རོ། །ཡང་ཛེ་སྨད་ཀྱིས་དམ་པའི་བླ་སྤྲུལ་དང་མི་དྲག་རྣམས་ལ་སེང་གེའི་གསོབ་བསྟན་ནས་བྱིས་པ་རྣམས་ལ་ཞེད་སྣང་བསྐུལ་བའི་བར་སྐབས་ཀྱི་ཚིགས་བཅད་འདི་ལྟར། ༼འདིར་སྨྲས་པ། བདུད་རྩིའི་ཟེགས་མ་ཕྱོགས་སུ་འགྲིམ་པས་སྙིང་ལ་དགའ་བའི་མཆོག་ཐོབ་
ཅིང་། །རེ་བའི་མིག་འབུར་གྱེན་དུ་འདེགས་པ་ཐར་འདོད་སྐྱེ་རྒུའི་ཕན་བདེའི་དཔལ། །དུས་སུ་སྒྲུབ་བྱེད་དགེ་ལྡན་རང་སྲོལ་ཆུ་ཁུར་འཛིན་པའི་སྤྲིན་གྱི་ཕྲེང་། །ལང་ལོང་གཡོ་བའི་གར་གྱི་རོལ་པས་གདུང་སེལ་མངོན་དགའི་བསིལ་བ་འབེབས། །ཞི་བའི་གྲིབ་བསིལ་སྣུམ་པོར་འཁོར་ཞིང་ལུང་རྟོགས་ནོར་བུའི་གདེངས་ཀས་བརྗིད་པར་སྙེམས་མོད་ཀྱི། །ལྟ་སྤྱོད་འཆལ་བའི་རོ་འཛིན་ཟུང་གིས་ནག་པོ་བརྩེགས་པའི་རྡུལ་མང་གཡོ་བའི་གྱ་གྱུ་ཅན། །དམ་པའི་ཚོགས་ཀྱང་ཡོན་པོར་མི་གཏོང་བཤོག་རླབས་རལ་གྲིའི་འཕྲུལ་འཁོར་གདེངས་པའི་འཕྲིན་ལས་ཀྱིས། །ཙིཏྟའི་དྭངས་མ་བཟང་བའི་ཕུད་དུ་༜ གཡོས་སུ་སྦྱར་བའི་གཏམ་གྱི་སརྒ་ཉེར་བསྡུས་ནས། །ཚིག་ཏུ་སྙན་པའི་གྲགས་པ་ཡིད་འོང་མུ་ཏིག་དོ་ཤལ་ཕྱོགས་ཀྱི་དགའ་མའི་རྒྱན་མཛེས་ཤིང་། །དབང་
དང་སྟོབས་འབྱོར་རིགས་ཀྱིས་ཆེ་བའི་སྤོབས་པ་མངོན་མཐོ་རྐང་གཉིས་རྗེ་བོར་གྱུར་རྣམས་ཀྱང་། །ལྟར་སྣང་ཟབ་མོའི་མིང་གིས་འབྲིད་དེ་དགེ་ལྡན་བསྟན་ལ་དྭང་བ་ལྷོད་པའི་ཧཱུཾ་སྒྲ་ཅན། །གང་ཞིག་གང་གི་འཕྲིན་ལས་འོད་སྟོང་སྣང་བའི་མཚོན་གྱིས་ཐལ་བར་གཞོམ་པའི་གཏམ་འདི་སྤྲོ། །ངོ་མཚར་བྱུང་བ་གླེང་བའི་ཕྱིར། །ཀུན་གྱི་ཡི་ག་འཇོ་བའི་དཔྱིད། །ཅི་སླད་ཕང་འགྲོ་མི་བསྒྲར་ཏེ། །མཚོ་བྱུང་སྙིང་ལ་རོལ་པས་སོ། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །༽ ཞེས་བཀོད་པ་ལ་དཔྱད་ན། ཚིག་གི་སྐྱོན་ཆུ་ཁུར་འཛིན་པའི་སྤྲིན་ཞེས་འཛིན་བྱ་འཛིན་བྱེད་གཉིས་ཀ་དོན་ཐ་དད་མ་དམིགས་ཕྱིར་ཟློས་སྐྱོན་ཡིན། ཧཱུཾ་སྒྲ་ཅན་ཞེས་འུག་པ་ལ་སྦྱར་བ་མི་འཐད་དེ། རྒྱུད་ལས། འཇིགས་པའི་ཧཱུཾ་སྒྲ་ངེས་སྒྲོགས་ཤིང་། །ཞེས་ཁྲོ་བོའི་རྒྱལ་པོ་སྤྱིའི་མཚན་ལ་འཇུག་པ་དེ་ཐན་བྱ་
ལ་སྦྱར་བ་བླུན་རྟགས་སོ། །དོན་ལའང་སྐྱོན་མཆིས་ཏེ། དམ་པའི་སྐྱེས་བུ་ཡིན་པ་དང་། ལྟ་སྤྱོད་འཆལ་པོ་ཡིན་པ་ཇི་ལྟར་མི་ཡང་མི་དྲག་འགའ་ཞིག་ཆོས་ཟབ་མོ་ཕྱག་རྫོགས་ཀྱི་ཆེ་བ་ཐོས་ནས་དེར་ཞུགས་པ་བསླུ་བྲིད་དབང་དུ་སོང་བ་དང་། དེས་དགའ་ལྡན་བསྟན་ལ་དང་བ་ལྷོད་པར་གྱུར་ནས་ཤུགས་ལྡན་གྱིས་རྡུལ་དུ་བརླག་པའི་འོས་སུ་བཀོད་པ་བཅས་དངོས་འགལ་ཤ་སྟག་བྲིས་པའི་འཁྱོག་ཚིག་ངན་པ་དེ་ལྟ་བུ་ལ། བྱི་ལས་མ་རང་གི་རྟུག་པ་གསེར་དུ་མཐོང་བ་བཞིན། ངོ་མཚར་ཆེ་བའི་བར་སྐབས་ཀྱི་ཚིག་ཀུན་གྱི་ཞེ་ལ་འབབ་པ་འདི་ནི་དབྱངས་ཅན་མ་ངག་ལ་རོལ་པའི་མཐུ་ལས་ཡིན་པར་བཤད་པ་ཡང་དངོས་པོའི་རང་མདོག་དང་ཆེས་མི་མཐུན་པའི་གཏམ་ངོ་ཚ་དང་ཡོངས་སུ་བྲལ་བའོ། །སླར་ཡང་གཞུང་དགའ་ལྡན་ཕོ་བྲང་གི་རྗེ་
དཔོན་མང་པོ་ཞིག་ལ་སྨད་པར་འདོད་ནས་ཛེ་སྨད་ན་རེ། ༼ད་ནི་ལུང་དང་ལས་ཀས་མངོན་པར་མཐོ་བའི་སྡེ་དཔོན་མི་དྲག་རྣམས་ལ་དྲག་པོའི་ཆད་ལས་ཐོག ཏུ་བབས་པའི་ཚུལ་དག་བརྗོད་པར་བྱ་བ་ལ། དེ་ཡང་ཐོག་མར་ཟུར་ཁང་པ་བཀའ་དྲུང་ཆེ་བ་རིམ་བཞི་པདྨ་དབང་ཆེན་ཞེས་པ་ལྟ་གྲུབ་མི་གཙང་བའི་འཆལ་སྤྱོད་ཀྱིས་རྐྱེན་འདས་སུ་གྱུར་པའི་ཚུལ་གླེང་བར་བྱ་སྟེ། དེ་ཡང་སྤྱིར་གཟིམ་ཤག་ཟུར་ཁང་པ་འདིའི་རིགས་བརྒྱུད་ནི། རྒྱལ་མཆོག་བདུན་པ་སྐལ་བཟང་རྒྱ་ ི་མཚོའི་སྐུ་དུས་སུ། སྔོན་མངའ་བདག་འོད་སྲུང་ནས་མཆེད་པའི་མངའ་རིས་གུ་གེ་རྒྱལ་པོའི་གདུང་བརྒྱུད་སོར་མོ་དྲ་བས་འབྲེལ་བ་ཞིག་ཡུལ་དབུས་ལྷ་ལྡན དུ་སླེབས་པར། ས་ཁང་ཕ་གཞིས་བདག་རྐྱེན་སྩལ་བར་མིང་ཟུར་ཁང་དུ་གྲགས་ཤིང་། ཟུར་ཁང་ཞེས་པའི་མིང་ཐོགས་དོན་ནི། ཆོས་རྒྱལ་གྱི་གདུང་ལས་
ཟུར་དུ་མཆེད་པའི་གཟིམ་ཁང་ལ་ཟེར་བ་ཡིན་ཞེས་གླེང་བར་འདུག་ཀྱང་། གཟིམ་ཤག་དེ་ཉིད་གཙུག་ལག་ཁང་གི་ཟུར་འགྲམ་དུ་ཡོད་པའི་སྟབས་ཀྱིས་མིང་དེ་ལྟར་ཐོགས་སམ་སྙམ་པ་དང་། གང་ལྟར་དེའི་རིགས་བརྒྱུད་ལས་གཞུང་ཞབས་སེར་མོ་བ་ཞིག་ལ་ལས་འགན་འགྲུབ་མིན་གྱི་བཀའ་ཉེས་ཕོག་པ་རྐྱེན་ངན་གྲོགས་སུ་ཤར་ཏེ་ཆོས་ཕྱོགས་ཉམས་བཞེས་མཐར་ཕྱིན་མཛད་པར་ཨོ་རྒྱན་ཟུར་རྗེ་གླིང་པ་ཞེས་གྲགས་པ་བྱུང་ཞིང་། དེ་ག་ནས་རིམ་པར་བརྒྱུད་དེ་སྐབས་ཤིག་ཟུར་ཁང་ཐའི་ཇི་ཚེ་བརྟན་རྡོ་རྗེའི་རིགས་བརྒྱུད་དུ་བུ་གཉིས་བྱུང་བའི་གཞོན་པ་རྡོ་རྗེ་རྒྱལ་པོ་ཞེས་འཆལ་འཆོལ་སྨྱོ་སྤྱོད་ལྟ་བུའི་བརྟན་ཞུགས་བཟུང་བ་ཞིག་ཡོད་པ་ཟུར་དུ་ཐོན་ཏེ་བགོ་སྐལ་དུ་ཟུར་ཁང་ནས་བདེ་ཆེན་ཁ་རོབ་ཤན་ཁའི་གཞིས་ཀ་སྤྲད་ཅིང་། དེའི་བུ་ལ་ཆོས་སྐྱོང་ཤུགས་ལྡན་
ཁོག་ཕེབས་ཀྱིས་ཁ་རོབ་ཤན་ཁའི་ཆོས་རྗེ་ཞེས་གྲགས་པ་དང་། དེའི་བུ་མཁན་ཆུང་བྱམས་པ་ཆོས་དབང་གི་སྤུན་གཞོན་པ་ཤོད་དྲུང་རྣམ་དཔོན་རྡོ་རྗེ་དགྲ་འདུལ་གྱི་བུ་ལ་དུས་ཕྱིས་ཀྱང་ཤུགས་ལྡན་ཁོག་ཞུགས་བབས་མུས་སུ་ཡོད་པ་དང་། བུ་རྒན་པ་ཟུར་ཁང་རང་དུ་རིགས་བརྒྱུད་འཛིན་མཁན་གྱི་དམིགས་ཡུལ་དུ་སྡོད་རྩིས་ཡོད་ཀྱང་། དེ་ཉིད་སྤྱི་ཁྱབ་མཁན་པོ་དཔལ་ལྡན་དོན་གྲུབ་ཀྱིས་གཟིམ་ཤག་བཤད་སྒྲའི་མག་པར་བཙན་ཤེད་ཀྱིས་བཏང་སྟེ་བཤད་སྒྲའི་རྩིས་དཔོན་དུ་གྲགས་པ་དེ་བྱུང་ལ། སྐབས་དེར་ཟུར་ཁང་རང་དུ་སྔོན་གྱི་རིགས་བརྒྱུད་ཐད་མོ་བརྒྱུད་ཙམ་ལས་མེད་སྟབས། རྒྱལ་རྩེ་ལྕང་ལོ་པའི་རིགས་བརྒྱུད་དབང་ཆེན་ནོར་བུ་ཞེས་པ་མག་པར་བླངས་ཏེ། དེའི་བུ་བསོད་ནམས་དབང་ཆེན་དང་། དེའི་བུ་པདྨ་དབང་ཆེན་ཡིན་ལ། འདི་ཉིད་རྒྱ་བོད་ཀྱི་སྐད་དང་
ཡིག་རྩིས་སོགས་ལ་རྣམ་དཔྱོད་ཤེས་རབ་ཀྱི་རྩལ་ཆེ་ཞིང་། སྙན་སུམ་སོགས་ཐ་སྙད་རིག་པའི་གནས་ལ་མཚོན་ནའང་ཤིན་ཏུ་མཁས་པ་དཔེར་ན་སུམ་རྟགས་ཀྱི་ཟླ་སྡུད་ཀྱི་དཔེར་བརྗོད་གཅིག་བརྩམས་འདུག་པར། ཀ་མ་ལ་དག་དགོད་པའི་སྐྱེད་ཚལ་ན། །ཁ་མིན་འདབ་མས་གླུ་ལེན་རྐང་དྲུག་གོ། །ག་ལ་བ་དེར་སྡིག་པའི་དྲི་འཐུལ་བ། །ང་དང་ང་འདྲའི་རིགས་རྣམས་ཡིད་དྲང་ངོ་། །ཅ་ཅོ་མ་ལགས་དཔལ་དང་ཡོན་ཏན་གྱི། །ཆ་ཤས་ཡོངས་རྫོགས་བླ་མར་བློ་གཏད་དོ། །ཇ་ཆང་ཐར་ལམ་མིན་ཞེས་གླིང་བཞི་ན། །ཉ་རྒྱས་ཟླ་བས་སྤྱོད་པ་འདི་ཡིན་ནོ། །ཞེས་སོགས་བྲིས་འདུག་པར་བརྟག་༜ནའང་ཤེས་ཡོན་གྱི་འདབ་སྟོང་བཀྲ་བར་ཡང་དག་པའི་འབྲས་བུའི་གཏན་ཚིགས་ཀྱིས་དཔོགས་ནུས་པར་སྣང་ཞིང་། དེ་ལྟར་ཆོས་སྲིད་ལུགས་གཉིས་ཀྱི་
ཤེས་རྒྱ་ཆེ་བས་ལྔ་རིག་སྨྲ་བའི་དབང་ཕྱུག་དགེ་བཤེས་ཤེས་རབ་རྒྱ་མཚོ་འཇམ་དཔལ་དགྱེས་པའི་བློ་གྲོས་རིན་པོ་ཆེས་ཀྱང་། ཁྱིམ་པ་པཎྜི་ཏ་ཞེས་བསྔགས་བརྗོད་མཛད་ཅིང་། དེ་ཉིད་རང་ལོ་བཅུ་བཞི་པར་གཞུང་གནས་ནས་༧རྒྱལ་བའི་ཕེབས་བྱམས་འགོ་པ་དང་། དེ་རྗེས་བཀའ་ཤག་ལས་ཁུངས་ཀྱི་དྲུང་ཡིག་ཏུ་བསྐོ་བཞག་མཛད་པར་བྱས་རྗེས་གཟེངས་ཐོན་བྱུང་བར་བརྟེན་༧ རྒྱལ་དབང་ཐམས་ཅད་མཁྱེན་གཟིགས་སྐུ་ཕྲེང་བཅུ་གསུམ་པ་ཆེན་པོས་ཀྱང་འདི་ཉིད་གནས་ ི སྤར་མཛད་དེ་བཀའ་དྲུང་ཆེ་བ་རིམ་བཞི་ཞེས་པའི་གོ་གནས་ཀྱི་མིང་གི་ཐོག །དབང་ཚད་བཀའ་བློན་རྣམས་དང་འདྲ་མཉམ་སྩལ་བས་འཇིག་རྟེན་སྲིད་ལུགས་ལའང་ཕུན་སུམ་ཚོགས་ཤིང་། འོན་ཀྱང་རང་གི་སྔར་སྲོལ་ཕ་མེས་ཀྱི་ལུགས་བཟུང་ལྟར་ཆོས་སྐྱོང་རྡོ་རྗེ་ཤུགས་ལྡན་ལ་བརྟེན་ཅིང་དགེ་ལྡན་ལྟ་གྲུབ་གཙང་
མར་སྐྱོང་བ་ཞིག་མ་བྱུང་བར་འདུག་ཅིང་། དེ་ཡང་། གོང་བརྗོད་ཟུར་ཁང་པའི་མི་བརྒྱུད་ངོ་མ་རྡོ་རྗེ་རྒྱལ་པོ་ཟུར་མཆེད་ཀྱིས་ཁ་རོབ་ཤན་ཁར་གནས་འཁོད་བྱས་ཤིང་། འདིའི་རིགས་བརྒྱུད་ཁོངས་ནས་མི་ངོ་རེར་ཆོས་སྐྱོང་ཤུགས་ལྡན་དང་། ཆོས་སྐྱོང་བསེ་ཁྲབ། བཀའ་སྲུང་ཁ་ཆེ་དམར་པོ་བཅས་ཁོག་ཞུགས་བྱ་མུས་ལ་བརྟེན་ལྷ་ལྡན་ཟུར་ཁང་ཟིམ་ཤག་ཏུའང་གལ་ཆེ་ནམ་ཡིན་ལ་གསོལ་ཁ་དང་། ལྷག་པར་ལོ་གསོལ་ལྟ་བུར་ལོ་རེ་བཞིན་འཆར་ཅན་བོད་ཟླ་དང་པོ་ཆོ་འཕྲུལ་ཟླ་བའི་ཚེས་བརྒྱད་ཉིན་ཁ་རོབ་ཤན་ཁའི་སྐུ་རྟེན་ཆེད་འབོད་ཀྱིས། ཚེས་བརྒྱད་ལྷ་གསོལ་ཞེས་ལྷ་ལྡན་ཟུར་ཁང་དུ་རྒྱལ་༔ ཆེན་ཤུགས་ལྡན་སྐུ་གསོལ་ཞུ་དགོས་ལ། སྐབས་དེར་ཟུར་ཁང་པའི་མི་བརྒྱུད་གྲས་ནས་མི་ཚང་གཞན་གྱི་ཁྱིམ་ཐབ་ཏུ་བསྐྱོད་པ་སོགས་ཉེ་སྐོར་དུ་གཉེན་ཉེ་ཇི་
ཡོད་ཚང་འཛོམས་ཀྱིས་གཟབ་མཆོར་དང་བཅས་ལྷ་གསོལ་ཞུ་བ་དང་། དེ་རྗེས་ཐུགས་སྤྲོ་བཏང་བ་སོགས་བྱ་སྲོལ་མ་ནུབ་པ་ཡོད་པ་ལྟར། རི་བོ་དགེ་ལྡན་པའི་བསྟན་པ་དང་། བསྟན་སྲུང་ལ་བསྟེན་མཆོད་སྲི་ཞུའི་སྒོ་ནས་གཅེས་སྤྲས་འཛིན་སྐྱོང་བྱ་བར་འོས་པ་དེ་ལྟར་ཡང་། པདྨ་དབང་ཆེན་ཉིད་ཀྱི་ཕ་མེས་དུས ལྟ་གྲུབ་འཆལ་བར་སྤྱོད་དེ་རྙིང་མའི་རིང་ལུགས་ལ་མོས་པ་ལྷུར་ལེན་པའི་དབང་གིས་སྐྱེད་བྱེད་ཞབས་པད་བསོད་ནམས་དབང་ཆེན་ཡང་ཉག་རོང་གཏེར སྟོན་བསོད་རྒྱལ་སོགས་ལ་བསྟེན་གཏུགས་བགྱིས་པས་བགྲང་བྱ་སུམ་ཅུ་སོ་བདུན་པར་ཁྲག་རླུང་སྟོད་འཚང་ལྟ་བུས་གློ་བུར་འདས་གྲོང་སོང་བ་དང་། དེ་རྗེས་ལྷ་སར་ཆུ་བྱི་རྒྱ་དམག་གི་དམག་འཁྲུགས་ཀྱི་རྗེས་ཟུར་ཁང་པའི་ཁང་པ་གསར་པ་ཨར་རྒྱག་སྐབས། ཐོག་མར་ཆོས་སྐྱོང་གི་ལུང་དུ། གསེང་གཡབ་
ཐོག་རྗེ་ཡབ་སྲས་གསུམ་གྱི་སྐུ་བརྙན་བཞེངས་དགོས་གསུངས་ཀྱང་། སྐབས་དེར་ཟུར་ཁང་ཞབས་པད་བསོད་ནམས་དབང་ཆེན འདས་ཏེ་རིགས་མྱུག་རྣམས་འཚར་ལོངས་མ་ཐུབ་པའི་དབར་ཟུར་ཁང་ནང་གི་ལས་དོན་གྱི་དབང་འཛིན་བྱ་མཁན་རྗེ་བཙུན་མ་སྐལ་བཟང་ཆོས་སྒྲོན་ཞེས་པ་རྙིང་ཆོས་ལ་མོས་པ་ཞིག་ཡོད་པ་དེས་ཕར་འགྱངས་ནར་ལུས་སུ་བཞག་པ། རྗེ་སོར་བསྐྱར་དུ་ཆོས་སྐྱོང་ལ་གསེང་གཡབ་ཐོག་གི་སྐུ་འདྲ་བཞེངས་རྒྱུ་བཀའ་འདྲི་ཞུས་པར། གུ་རུ་སྣང་སྲིད་ཟིལ་གནོན་བཞེངས་ཞེས་པ་དང་། དེ་སྐབས་མགོན་ཁང་གསར་རྒྱག་ནང་དུ་ཡོད་པའི་ཆོས་སྐྱོང་གི་སྐུ་ཆས་བསྒྲིགས་༴བཤམས་བྱས་པ་རྣམས་མཚན་གཅིག་ལ་མར་ས་སྟེང་དུ་གཡུགས་ནས་ཡོད་པ་དང་། དེ་ཕྱིན་ཆོས་སྐྱོང་གི་བཀའ་ལུང་དུ་ཟུར་ཁང་པའི་སྤྱིའི་རིམ་གྲོར་ཡང་།
གུ་རུའི་ཚོགས་བསྐོང་སོགས་རྙིང་མའི་ཆོ་གའི་སྐོར་གྱི་རིམ་གྲོ་འབའ་ཞིག་བསྟན་པ་བྱུང་ཞིང་། དགེ་ལྡན་བསྟན་པ་གཙང་མར་སྐྱོང་བའི་ཆོས་སྐྱོང་ཞིག་གིས་དེ་ལྟར་ལུང་བསྟན་མཛད་པ་ཐུགས་ལ་མ་བབས་པའི་མཚན་མར་མངོན་ཞེས་པའི་གཏམ་གླེང་ཡང་བྱུང་འདུག །པདྨ་དབང་ཆེན་ཉིད་ན་ཚོད་གཞོན་ནུའི་དུས་ནས་གྲྭ་ནང་རྒྱས་གླིང་ཚོགས་པའི་བླ་མ་དཔའ་བོ་རིན་པོ་ཆེ་ཞུ་བའི་རྙིང་མའི་བླ་མ་ཞིག་གི་དྲུང་ནས། རྙིང་མའི་དབང་བཀའ་མང་དུ་ཞུས་ཤིང་སྐབས་དེར་པདྨའི་རིགས་ཀྱི་ལྷ་ལ་མེ་ཏོག་ཕོག་པའི་མིང་པདྨ་དབང་ཆེན་དུ་བཏགས་པ་དང་། དེ་རྗེས་རྙིང་མའི་བླ་མ་སྣ་ཚོགས་དང་། གཙོ་བོ་རྫོགས་ཆེན་བླ་མ་བསྟན་འཛིན་གྲགས་པའི་དྲུང་ནས་རྫོགས་ཆེན་སྐོར་མང་དུ་ཉན་པ་དང་། ཀུན་མཁྱེན་ཀློང་ཆེན་པའི་གསུང་ཡོན་ཏན་མཛོད་ཤིང་དཔར་གསར་བརྐོས་བྱས་ཤིང་།
སྐབས་དེའི་དཔར་བྱང་སྨོན་ཚིག་དགེ་བཤེས་ཤེས་རབ་རིན་པོ་ཆེར་ཞུས་པར། དགེ་བཤེས་རིན་པོ་ཆེས་སྨོན་ཚིག་དང་ལྷན་དུ་ཕྱག་བྲིས་སུ། རྣམ་དཔྱོད་མཆིས་ན་གསེར་དང་ནི། །བོང་བ་ནམ་ཡང་མི་སྙོམ་ཞུ། །ཞེས་ལྟ་གྲུབ་རྣམ་པར་དག་དང་མི་དག་གསེར་བོང་མི་མཉམ་པར་བཟུང་དགོས་པའི་སློབ་སྟོན་གནང་ཞིང་། དགེ་བཤེས་ཤེས་རབ་རྒྱ་མཚོ་རིན་པོ་ཆེས་རྫོགས་ཆེན་བླ་མ་བསྟན་འཛིན་གྲགས་པས་བརྩམས་པའི་གཞུང་རྣམས་ལ་ ྨ་དགག་པ་མཛད་པར་བཞེད་དེ། བསྟན་འཛིན་གྲགས་པས་མཛད་པའི་སྨོན་ལམ་བདུད་སྡེ་ཚར་གཅོད་ལ་དགག་པ་གནང་བར། བདུད་བཞི་ཐུལ་བ་སྟོབས་བཅུའི་རྩལ། །བདུད་དཔུང་ཕམ་བྱེད་དམ་པའི་ཆོས། །བདུད་ཀྱིས་མི་ཕྱེད་དགེ་འདུན་ལ། །བདུད་ལས་རྒྱལ་ཕྱིར་གུས་ཕྱག་འཚལ། །བདུད་ཀྱིས་ཕྱེ་བའི་
མགྲིན་པ་ནས། །བདུད་ཀྱི་སྨྲ་བ་ལྷུར་ལེན་གང་། །བདུད་ཀྱི་སྡེ་ཞེས་ཆེས་མཚར་མོད། །བདུད་སྡེ་རང་ཉིད་རིགས་པས་གྲུབ། །ཅེས་སོགས་དང་། ཡང་བསྟན་གྲགས་ཀྱིས་བརྩམས་པའི་གང་བློ་མའི་འགྲེལ་པ་བཀྲ་ཤིས་གསེར་གྱི་ཉ་མོ་ཞེས་པར། དགེ་བཤེས་ཤེས་རབ་རྒྱ་མཚོ་རིན་པོ་ཆེས་འགྲེལ་པ་དེར་འཇམ་པོར་བརྟག་པ་ཞེས་དོགས་གནས་མདོར་བསྡུས་པ་རྣམས་གསལ་བའི་སྟོང་ཐུན་གྱི་ཚུལ་དུ་འགོད་པའི་དགག་པ་མཛད་པ་རྣམས་ཀྱང་པདྨ་དབང་ཆེན་གྱིས་དེ་ལྟར་དགག་པ་མི་མཛད་པར་ནན་ཏན་ཞུས་ཏེ་བཀག་པས་དགག་མཛད་པའི་བསྟན་བཅོས་གཉིས་ཀ་རྩོམ་འཕྲོར་ལུས་ནས་ཡོད་ཅིང་། དེ་རྗེས་དགེ་བཤེས་ཤེས་རབ་རིན་པོ་ཆེས་པདྨ་དབང་ཆེན་ཉིད་ལ་གནང་བའི་བསླབ་བྱའི་བཀའ་ཡིག་ཅིག་ཏུའང་། ལ་ལ་རིགས་བྲལ་རྡོ་རྗེའི་སྙིང་ཁམས་བརྟས། །ལ་ལ་
རང་ཉམས་བརྡ་དང་ཁ་ཕོ་སྒྲོག །ཕལ་ཆེར་སོས་ཀའི་འཇའ་དང་ཆུ་ཤིང་སྤུན། །ཀྱེ་མ་བསམ་ཞིང་བསམ་ཞིང་ཡིད་རེ་མུག །བློ་བཟང་མཁྱེན་པའི་དྲུང་ན་གཞན་གྱི་གཞུང་། །མ་བརྟགས་ཟབ་ཟབ་རྫིག་རྫིག་འདྲ་ན་ཡང་། །ཕྲ་བར་གཞིག་ཚེ་བྲང་འགྲོའི་མདུད་པ་ལྟར། །འཇིག་པར་འགྱུར་བའི་ཚུལ་འདིས་གུས་པ་ལྷོད། །བླ་མ་འཇིགས་མེད་རྡོ་རྗེའི་མདུན་རོལ་ན། །སློབ་མ་ལྷ་དགའ་རྡོ་རྗེའི་ཁྱུ་ཚོགས་འཁྲིགས། །འཆད་ཉན་བྱིས་པའི་བྱེ་མའི་ཁང་བུ་བརྩིགས། །བདེན་སྣང་སྤྲོ་ཡང་ནམ་ཞིག་ངུ་བའི་རྒྱུ། །དེས་ཀྱང་བློ་བཟང་རྒྱལ་བ་ཡབ་སྲས་དྲན། །ལྟ་སྤྱོད་རྣམ་དག་པདྨའི་ལྗོན་པ་དྲན། །ལེགས་༔བཤད་ཟླ་མེད་རྒྱལ་བའི་ཚངས་དབྱངས་དྲན། །གསུང་སྐྱེས་མཁས་མང་ནམ་མཁའི་སྐར་ཚོགས་དྲན། །ཞེས་དང་། དགེ་བཤེས་རིན་པོ་ཆེ་ཉིད་ཀྱི་གསུང་རྗེ་
ཙོང་ཁ་པའི་བསྟོད་པ་དད་པའི་དྲི་བསུང་འཐུལ་བའི་སྤོས་ཀྱི་རྫིང་བུ་ཞེས་པ་བསྐུར་བར་མཛད་དེ། བསྟོད་པ་འདི་ཡིས་ལྷ་སྲས་ཁྱོད་ཀྱི་ཐུགས། །དགྱེས་པ་བསྐྱེད་སྙམ་རེ་བ་བདག་ལ་མེད། །འོན་ཀྱང་བཀའ་ནན་དམར་བས་ཕུལ་བ་ལགས། །དོག་པའི་དགོངས་ཁྲོས་མི་མཛད་བཀའ་དྲིན་ཞུ། །འགྲོ་ཀུན་ཁམས་དབང་མོས་པ་སྣ་ཚོགས་པས། །རང་བློར་འཐད་པའི་ཕྱོགས་ལ་བརྟེན་ན་མཛེས། །དོན་མེད་ཆགས་སྡང་བླུན་པོའི་རང་མཚང་ཡིན། །ཁྱེད་ཀྱང་དེ་བཞིན་- དགོངས་ནས་མཛད་འཚལ་ལོ། །ཞེས་བློ་བཟང་ཆོས་ཀྱི་རྒྱལ་པོའི་བསྟན་པའི་ཁྱད་ཆོས་དང་། དེར་འཇུག་པར་བསྐུལ་བ་ཆགས་སྡང་མིན་ཚུལ་སོགས་དོན་གྱིས་ཡང་དག་པའི་བསླབ་བྱ་མཛད་ཀྱང་། འཇུག་ལྡོག་ཚུལ་བཞིན་མ་བྱུང་བའི་དབང་གིས་བཟློག་ཏུ་མེད་པའི་ནད་ཀྱིས་ཟིན་ཏེ། ཐོག་མར་ཆོས་སྐྱོང་ཤུགས་
ལྡན་གྱི་བཀའ་ལུང་དུ་རྗེ་ཡབ་སྲས་ཀྱི་སྐུ་བཞེངས་རྒྱུ་དང་། དྲུག་ཅུ་མ་རྒྱ་ཆེ་འབུལ་རྒྱུའི་ཐོག་བླང་དོར་གྱི་གནས་ལ་ཚུལ་མཐུན་བྱ་དགོས་ཞེས་གསུངས་ཀྱང་ལུང་དོན་དང་མཐུན་པ་ཇི་བཞིན་མ་བྱུང་བར་བརྟེན། མཐར་ལུས་ལ་རྨ་ཐོན་ཏེ་རྡོལ་བའི་ནད་མནར་མི་བཟད་པ་བྱུང་སྟེ། ༧གོང་ས་མཆོག་གི་བླ་སྨན་པ་ཆུང་བ་ཤེལ་ཆོས་བྱ་སྦུག་པ་དམ་ཆོས་དཔལ་ལྡན་ཟེར་བ་བསྟེན་གཏུགས་སྐབས། རྨ་བརྡོལ་བ་དེར་སྨན་ནག་པོ་ཞིག་བྱུག་པ་ན་བཟོད་པར་དཀའ་བའི་ཟུག་རྔུ་ཡོང་བ་དང་། རྨ་གཅིག་བསྐམས་འཕྲལ་གཞན་ཞིག་ནས་རྨ་ཐོན་ཏེ། ནད་མནར་ཡུན་རིང་ལོ་གཅིག་ཙམ་བྱས་པ་དང་། འདི་ལ་སྲས་ཤིག་འཁྲུངས་པ་དེ་ཡང་རྨ་ཐོན་པའི་ན་ཚ་དེ་འདྲ་བ་ཞིག་གིས་འདས་གྲོངས་སོང་ཞིང་། པད་དབང་ཉིད་ནད་མནར་སྐབས་བླ་མ་སོགས་ངོ་ཆེན་བཙལ་ནས།
གཟིམ་ཤག་ཏུ་ཆོས་སྐྱོང་ཤུགས་ལྡན་སྐུ་གསོལ་ཞུས་ཏེ་ལུང་ཞུ་དང་བཟོད་གསོལ་མང་དུ་བྱས་ཀྱང་། མཐའ་མར་ཆོས་སྐྱོང་ཤུགས་ལྡན་གྱི་བཀའ་ལུང་དུ། དགེ་ལྡན་ལྟ་གྲུབ་གཙང་མར་མི་སྤྱོད་པའི་ཤེས་ཡོན་ཅན་འདི་རིགས། གཞུང་སའི་ལས་ཁུངས་མཐོ་ཤོས་བཀའ་ཤག་ཏུ་གནས་འཁོད་ཀྱིས་ཡུན་རིང་འཚོ་ན། རི་བོ་དགེ་ལྡན་པའི་བསྟན་པ་དང་། བསྟན་པ་མཆོད་སྦྱིན་གྱི་མངའ་བདག་གཞུང་དགའ་ལྡན་ཕོ་བྲང་པའི་ཆབ་སྲིད་ལ་གནོད་རིགས་སུ་གདའ་བས་བྱ་ཐབས་མ་མཆིས་ཞེས་སོགས་ཀྱི་ལུང་ཕབ་འདུག་པ་དང་། སྐབས་དེར་གཡོག་པོ་ཚོས་བན་གཟུགས་ཅན་ཞིག་དངོས་སུ་གཟིམ་ཆུང་དུ་སོང་བ་ལྟ་བུར་མཐོང་བ་སོགས་འཚུབ་ལྟས་དུ་མ་དང་བཅས། རང་ལོ་ཉི་ཤུ་རྩ་གཉིས་པ་མེ་འབྲུག་ལོར་ཐབས་དང་། སྨན་དང་། རིམ་གྲོ་གང་གིས་ཀྱང་བཟློག་ཏུ་མ་ནུས་པར་ཆོས་
སྐྱོང་རྡོ་རྗེ་ཤུགས་ལྡན་གྱི་བཀའི་ཆད་པ་ཐོག་ཏུ་བབས་ཏེ། འཇིག་རྟེན་འདིའི་སྣང་བ་བསྡུས་ཏེ་ཕྱི་མའི་བཤུལ་ལམ་དུ་ཆས་དགོས་བྱུང་བར་སྣང་ངོ་། །གོང་གསལ་ཟུར་ཁང་པའི་བརྒྱུད་པ་དང་། པདྨ་དབང་ཆེན་གྱི་སྐོར་རྣམས་པདྨ་དབང་ཆེན་གྱི་གཅུང་པོ་རྗེས་ཤོར་ཀུན་བཟང་རྩེའི་གོ་མག ཕེབས་པ་ཁེ་སྨད་བསོད་ནམས་དབང་འདུས་ངོ་མའི་ཞལ་ལས་དངོས་སུ་ཐོས་པ་ལགས་སོ། །༽ཞེས་ཟེར་བ་ལ་བརྗོད་པར་བྱ་སྟེ། ཁྱེད་ཕ་སྤད་འདུལ་འཛིན་དགེ་སྦྱོང་དུ་ཁས་འཆེ་ནས་སྟོན་པས་མ་གནང་བའི་བཅས་དང་རང་བཞིན་གྱི་ཁ་ན་མ་ཐོ་བའི་ལས་བདག་བསྟོད་གཞན་སྨོད་ཁོ་ན་དམིགས་ཡུལ་དུ་བཟུང་སྟེ། དམག་དང་ཆོམ་རྐུན་ཁྱིམ་གྱི་འཚོ་འཛིན་སོགས་ངག་འཁྱལ་ཆགས་སྡང་དགྲ་འདུལ་གཉེན་སྐྱོང་གི་གཏམ་ཉོབ་མཁས་དང་དམ་པས་སྨད་འོས་རྐྱང་པ་ལ།
ཆོས་སྐྱོང་གི་རྟོགས་བརྗོད་དུ་མིང་བཏགས་པ་འདི་ནི་ཆོས་མ་ཡིན། འདུལ་བ་མ་ཡིན་པས་ཉི་མ་འཕུལ་ཐབས་དང་། སྣག་ཤོག་གྲོན་པ་ལས་དགོས་དོན་ཆེར་མ་མཆིས། ཞིབ་ཏུ་བརྟག་ན་ཟུར་ཁང་པའི་མི་རབས་མི་བརྒྱུད་ཀྱི་རྒྱས་བཤད་དང་། ལྷ་སའི་སྐུ་དྲག་ཁག་གི་བུ་མག་པར་བཏང་བ་དང་། བུ་མོ་བག་མར་བསུས་ཚུལ་མང་པོ་དང་། སྲིད་དོན་ཁྲིམས་ལུགས་དང་འབྲེལ་བའི་བྱིས་པ་འབྲིད་ཐབས་ཀྱི་གཡོ་རྫུན་མ་དག་པའི་ཕྲེང་བ་འདི་ཕྱོགས་རིས་འུར་གཏམ་དོན་མེད་ཡིན་པ་ཀུན་གྱིས་ཤེས་ཕྱིར་ལན་འདེབས་ཀྱི་ངལ་བ་བསྟེན་མ་དགོས་ན་ཡང་། ཡིན་ལུགས་མིན་ལུགས་མ་བཤད་ན་ལྐུགས་པའི་བརྟུལ་ཞུགས་སུ་འགྲོ་བས་གཞུར་བརྟག་ཅུང་ཟད་བགྱིད་ན། དེ་ཡང་ཟུར་ཁང་པའི་ཡབ་ཞབས་པད་བསོད་ནམས་དབང་ཆེན་དང་། སྲས་བཀའ་དྲུང་ཆེ་བ་པདྨ་དབང་ཆེན་ཏེ་ཡབ་
སྲས་གཉིས་ཀ་སྔོན་སྨོན་ལས་འཕྲོ་བཟང་པོས་མཚམས་སྦྱར་ཏེ། ཐུབ་བསྟན་སྙིང་པོ་གསང་ཆེན་སྔ་འགྱུར་གྱི་བསྟན་པ་རིན་པོ་ཆེ་ལ་མི་འཕྲོག་པའི་དད་མོས་དྲག་པོས་ཡབ་ཀྱིས་ཉག་རོང་གཏེར་ཆེན་ལས་རབ་གླིང་པ་དང་། སྲས་ཀྱིས་མཁས་དང་གྲུབ་པའི་དབང་ཕྱུག་ཆེན་པོ་རྒྱལ་རོང་བསྟན་འཛིན་གྲགས་པའམ་དཔལ་གྱི་སེང་གེ་རིན་པོ་ཆེ་སོགས་བཤེས་གཉེན་མཚན་ཉིད་དང་ལྡན་པ་དུ་མ་ལས་ཟབ་དགུའི་སྨིན་གྲོལ་གདམས་པའི་བདུད་རྩི་ཚུལ་བཞིན་ནོས་ནས་ཐུགས་ཉམས་སུ་ལེགས་པར་བཞེས་གནང་བ་དེ་ལ་དོན་མེད་ཕྲག་དོག་མི་བཟོད་པ་ལངས་ཏེ་གཤེ་སྐུར་འདེབས་པ་ནི་ཆོས་དང་རང་རྒྱུད་འཛོལ་བའི་ནང་ཆ་སྟོན་པར་མ་ཟད། ཟུར་ཁང་པ་མངའ་རིས་གུ་གེ་རྒྱལ་པོའི་གདུང་ཡིན་ན་དེའི་བརྒྱུད་པ་དང་། ཨོ་རྒྱན་ཟུར་རྗེ་གླིང་པ། རྡོ་རྗེ་རྒྱལ་པོ་
སོགས་ཕ་མེས་རྣམས་རྙིང་མ་བའི་ཆོས་བརྒྱུད་གཙང་མ་ཡིན་པར་ཁས་བླངས་བཞིན། རིམ་བཞི་པདྨ་དབང་ཆེན་ལྟ་གྲུབ་མི་གཙང་བའི་རྐྱེན་གྱིས་འདས་ཞེས་གླེང་བ་མ་བརྟག་བརྡོལ་ཐབས་ཀྱི་གཏམ་འདི་འདྲ་ལ་སུ་ཞིག་གིས་ཆ་འཇོག་བྱེད། ཆོས་སྐྱོང་གིས་ཟུར་ཁང་པའི་ཕ་མེས་ཀྱི་དུས་ནས་སྐྱབས་སུ་བསྟེན་པའི་གུ་རུའི་སྐུ་བཞེངས་རྒྱུ་དང་དེའི་ཚོགས་བསྐང་གཏོང་དགོས་བཀའ་ལུང་ཕེབས་པ་བསྙོན་མེད་ལ་ཁྱེད་ཅག་ཕྲག་དོག་དང་ལོག་ལྟའི་མེ་ལྕེས་རྒྱུད་ཚིག་ནས་ལུང་བསྟན་ལོག་པར་བསྒྲུབས་པ་ངོ་ཚ་དང་བྲལ་བའི་གཏམ་དུ་བས། གཡོ་རུ་རྫོགས་ཆེན་པ་རང་བྱུང་རྡོ་རྗེའམ་ཀུན་མཁྱེན་རིག་འཛིན་ཆེན་པོ་འཇིགས་མེད་གླིང་པས་མཛད་པའི་བསྟན་བཅོས་ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལ། ཁྱོད་ཀྱིས་ཀུན་མཁྱེན་ཀློང་ཆེན་པའི་གསུང་ཞེས་ཕྱོགས་ཙམ་ཡང་མ་
གོ་བའི་ཧམ་རྫུན་འདི་ཡང་། རྙིང་མའི་དཔེ་ཆ་རྣམས་གཙོག་པར་བཟུང་ནས་མིག་ལམ་དུ་མཐོང་སར་མ་བཞག་པར་ཚ་ཁང་དུ་བསྐྱལ་བའམ་ཆུ་ལ་བོར་ཚར་བ་དེས་རྙིང་མའི་ཆོས་དང་བླ་མའི་ཆ་རྒྱུས་མེད་པ་ཐུགས་ཁག་མེད། དེ་ལྟར་ཡོན་ཏན་མཛོད་ཀྱི་རྩ་བ་དང་འགྲེལ་པ་ཤིང་རྟ་རྣམ་གཉིས་ཀྱི་པར་ཤིང་རྙིང་པ་ཟུར་མཛོད་ཚེ་རིང་དོན་གྲུབ་ཀྱིས་བསྐྲུན་པའི་པར་བྱང་གྲུབ་དབང་དྷརྨ་སེངྒེས་མཛད་པ་ཅན་དེ་ལྷ་ལྡན་དུ་སྡེ་གཟར་སྐབས་འཐོར་བརླག་ཆུད་ཟོས་སུ་སོང་བ་རྣམས་རྗེས་ནས་མེ་འབྲུག་ལོར་ཟུར་ཁང་སྲས་པདྨ་དབང་ཆེན་གྱིས་ཆད་པ་རྣམས་གསར་བརྐོ་བྱེད་བཅུག་སྐབས་ཀྱི་པར་བྱང་སྨོན་ཚིག་བཀའ་དྲུང་ཆེ་བ་པདྨ་དབང་ཆེན་རང་ཉིད་ཀྱིས་བརྩམས་ནས་བསྟན་བཅོས་ཀྱི་གཤམ་དུ་སྦྱར་འདུག་པ་ལས། ཁྱེད་ཀྱིས་ཟེར་བ་ལྟར་དགེ་བཤེས་ཤེས་
རབ་ཀྱིས་མཛད་པའི་པར་བྱང་བརྐོས་མི་འདུག་པས་ཁྱོད་ཀྱི་གཏམ་དེ་ཡང་བདེན་བྲལ་དུ་ཐལ་ལོ། །ལར་བླ་མ་བསྟན་འཛིན་གྲགས་པ་རིན་པོ་ཆེ་ནི། རྫོགས་ཆེན་དཔལ་དགེ་སྤྲུལ་སྐུ་འཇིགས་མེད་ཆོས་ཀྱི་དབང་པོ་དང་། མདོ་མཁྱེན་བརྩེ་ཡེ་ཤེས་རྡོ་རྗེ་རྣམ་གཉིས་ཀྱིས་གཙོས་བཤེས་གཉེན་མཁས་གྲུབ་ཚད་ལྡན་མང་པོ་མཉེས་པ་གསུམ་གྱི་སྒོ་ནས་བསྟེན་ཏེ་དབུ་ཚད་འདུལ་མངོན་རྣམས་དང་ཕར་ཕྱིན་སོགས་བྱམས་ཆོས་སྡེ་ལྔ་སྤྱོད་འཇུག་བཅས་དང་ལྷག་པར་མན་ངག་སྙིང་ཐིག་གོང་འོག་ལ་གསན་བསམ་ཙམ་གྱིས་ཆོག་ཤེས་མ་མཛད་པར་འཇིག་རྟེན་ཚེ་འདི་བློས་བཏང་ནས་དབེན་གནས་རྣམས་སུ་བྱ་བྲལ་སྒོ་གཅིག་པའི་བརྟུལ་ཞུགས་ཀྱིས་སྒོམ་སྒྲུབ་ཉམས་ལེན་ཁོ་ནས་ཚེ་དང་སྒྲུབ་པ་མཉམ་པའི་སུམ་ལྡན་རྡོ་རྗེ་འཛིན་པ་ཆེན་པོ་དེ་ཉིད་ཀྱིས་མཛད་པའི་རྒྱ་གཞུང་གི་འགྲེལ་པ་དཔྱད་
གསུམ་དག་པ་ལ། ཨ་མདོ་དགེ་བཤེས་ཤེས་རབ་ཟེར་བ་ཚེ་སྟོད་རྟོག་གེ་བའི་ཚིག་སྐམ་ཕྱོགས་རེ་བ་ཉི་ཚེ་ཙམ་ལ་སྦྱངས་ཁུལ་གྱིས་མངོན་པའི་ང་རྒྱལ་གཟེངས་མཐོ་བ་ཙམ་ལས། དབེན་པར་ཞག་གཅིག་མ་བསྡད་ཅིང་ཆོས་རྣལ་མའི་ཉམས་ལེན་ཐུན་གཅིག་ཀྱང་བྱེད་མ་མྱོང་བ་དེ་འདྲས་ཆོས་ལ་དགག་པ་དང་། གང་ཟག་བདུད་ཀྱི་ཕྱོགས་སུ་འཕུལ་བའི་བརྒལ་བརྟག་ལྟར་སྣང་བ་དེ་ནི་ཁ་ཕྱིར་ལྟས་ཀྱི་ཐོས་པས་རང་རྒྱུད་མ་ཐུལ་བའི་མཚང་ཆེན་ ི་དུ་ཟད་དེ། དེའང་སྔོན་རྗེ་བཙུན་མི་ལ་གཉའ་ནང་སྟོན་མོ་ཞིག་གི་སར་ཕེབས་པ་ལ། དར་བློས་ཕྲག་དོག་གིས་རྗེ་བཙུན་ལ་ཚིག་རྩོད་ངན་སྨྲས་མང་པོ་ཞུས་ང་། མཐར་ལོག་ལྟའི་ངང་དུ་ཤི་བས་གདོན་ཆེན་པོ་འཇིགས་སུ་རུང་བ་ཞིག་ཏུ་སྐྱེས་པའི་ལོ་རྒྱུས་མགུར་འབུམ་དུ་གསལ་བ་དེ་དང་ཆོས་མཚུངས་ཏེ། དགེ་
བཤེས་ཤེས་རབ་ཐོག་མར་དབུས་ཕྱོགས་གྲྭ་ས་ནས་མཁས་མིང་ཙམ་ཐོགས་ཏེ། ལྷ་ལྡན་དུ་བཀའ་འགྱུར་རིན་པོ་ཆེའི་པར་གསར་བརྐོ་སྐབས་ཞུས་དག་པའི་གྲས་སུ་ཚུད་ཀྱང་། རྒྱལ་བའི་བཀའ་ལ་གཟུ་ལུམ་རས་ཆོད་རང་བཟོ་སྣ་ཚོགས་བྱས་ཤིང་། ཕྱོགས་རིས་ཆགས་སྡང་གིས་བསྟན་པ་དཀྲུགས་པའི་ལ་ཡོག རྒྱབ་སྟེ། བྱ་བ་ལམ་ལྷོང་མ་བྱུང་བར་རྒྱལ་དབང་ཐུབ་བསྟན་རྒྱ་མཚོའི་བཀའ་འགལ་དམ་ལོག་ཉེས་ཆད་ཕོག་སྟེ། ལྕག་གིས་བྲབ་པ་དང་བཙོན་ཁང་དུ་བཅུག་ཀྱང་ཟེར། གང་ལྟར་ཡང་བོད་ནས་ཕྱིར་བསྐྲད་བཏང་བ་ཡིན། དེ་རྗེས་སླར་ཡང་བོད་དུ་སླེབས་པའི་རེ་བ་ཆེན་པོ་བྱས་ཏེ་མདོ་སྨད་ནས་བྱང་ནག་ཆུ་ཁ་བར་དཀའ་བ་ཁྱད་དུ་བསད་ནས་འོང་མཚམས་སྲིད་སྐྱོང་སྟག་བྲག་རིན་པོ་ཆེའི་བཀས་འོང་དུ་བཅུག་པར་མི་འདོད་བཞིན་དུ་རང་ཡུལ་དུ་ལོག་དགོས་བྱུང་བ་
དང་། ཚེ་མཇུག་རྒས་ཁར་བསྟན་གཤེད་རྒྱ་དམར་འགོ་ཁྲིད་བདུད་རྒན་མའོ་ཙེ་ཏུང་ལ་བསྟོད་བསྔགས་དང་ཆོས་ལ་སྨོད་པའི་རྩོམ་སྒྲིག་བྱེད་པའི་བྲན་གཡོག་ཏུ་བཀོལ་ཏེ་རང་དབང་སྐད་ཅིག་ཀྱང་མེད་པའི་དུཿཁ་ལོ་མང་མྱོང་མཐར། འགྱོད་གདུང་དྲག་པོའི་མེ་ལྕེ་སྙིང་ལ་འབར་ཞིང་ཆོས་སྤོང་ལས་ངན་གྱི་ཁུར་པོས་ནོན་བཞིན་ཆོས་མེད་ཀླ་ཀློའི་དཔུང་གིས་བསྐོར་བའི་དབུས་སུ་ཆོས་ཀྱི་སྒྲ་ཙམ་མ་ཐོས་པའི་ངང་དུ་ཚེའི་དུས་བྱས་འདུག་པ་ལས། རི་བོ་དགེ་ལྡན་པའི་བསྟན་པ་ལ་སྨན་པའི་བྱས་རྗེས་ཅི་བཞག་ཡོད། ཁོ་པས་ཟུར་ཁང་སྲས་ལ་བསླབ་བྱ་བྱས་དོན་སྙིང་པོ། དགེ་ལུགས་པའི་ལྟ་བ་རྙིང་མའི་ལྟ་བ་བོང་བ་ལྟ་བུ་ཡིན་པ་ནོར་མི་ཉན་ཞེས་བཤད་པ་འདི་ནི་ཕྱོགས་རིས་ཀྱི་གཏམ་ཧ་ཅང་ཐལ་ཆེ་བ་སྟེ། འདི་ལྟར། མཚན་ཉིད་ཐེག་
པའི་ལྟ་བ་མཐོ་ཤོས་དབུ་མ་དང་དེའི་ནང་ནས་ཐལ་འགྱུར་བ་ཡིན་པར་བཞག་དགོས་མོད། དེ་ནི་རྒྱལ་མཆོག་བསྐལ་བཟང་རྒྱ་མཚོ་ཚུན་ཆད་ཀྱི་དགེ་ལྡན་པ་རྣམས་ཐལ་འགྱུར་ལྟ་བ་ཚིག་ཏུ་བརྗོད་ཤེས་པ་ཙམ་ལས་དོན་རྟོགས་པ་མེད་ཅེས་ཀློང་རྡོལ་བཀའ་འབུམ་དུ་གསལ་པོར་བྲིས་པ་འདིས། ད་ལྟ་ནི་གསེར་བོང་བས་མ་ཚད་ཐལ་བར་འགྱུར་ཟིན་སྣང་། ངེད་ཅག་སྔ་འགྱུར་བའི་ལྟ་གྲུབ་ནི་རྒྱལ་བས་ལུང་བསྟན་པའི་ཀླུ་སྒྲུབ་དང་ཐོགས་མེད། སློབ་དཔོན་སངས་རྒྱས་གཉིས་པ་སོགས། རྒྱ་གར་གྱི་རིག་འཛིན་བརྒྱད། དགའ་རབ། ཤྲཱི་སེང་། བི་མ་ལ་རྣམས་དང་། བོད་ཀྱི་བཻ་རོ་སོགས་སློབ་དཔོན་ཆེན་པོས་བདེ་གཤེགས་འདུས་པའི་དཀྱིལ་འཁོར་དུ་སྨིན་པར་མཛད་པའི་རྗེ་འབངས་ཉེར་ལྔ་དང་། རྡོ་རྗེ་ཐེག་པའི་བསྟན་པའི་བཀའ་བབ། སྟོད་ན་སྔགས་པའི་རྒྱལ་པོ་སོ་ཟུར་
གནུབས་གསུམ། སྨད་ན་དམ་གཙང་བྱམས་གསུམ་སློབ་ཚོགས་དང་བཅས་པ། འབྲས་བུ་ཕྱི་དུས་དང་བར་དོར་མི་རེ་བར་ཟུང འཇུག་གདོད་མའི་མགོན་པོའི་གོ་འཕང་སྐུ་ཚེ་དེ་ཉིད་ལ་མངོན་དུ་མཛད་པ་ཤ་སྟག་བྱུང་བ་རྣམས་དང་། ཨོ་རྒྱན་དུས་གསུམ་མཁྱེན་པས་སྙིགས་དུས་ཀྱི་གདུལ་བྱ་ལ་དགོངས་ནས། ཕྱོགས་བཞི་དབུས་ལྔའི་གཏེར་ཁ་ཆེན་པོ་རྣམས་ཀྱིས་གཙོར་བྱས་པའི་མིང་ཅན་བྱེ་བ། མིང་མེད་གྲངས་འདས་སྦས་པ་རྣམས། རྗེ་འབངས་ལས་ཅན་རྣམས་ཀྱི་སྐྱེ་སྤྲུལ། མཆོག་གི་སྤྲུལ་སྐུ་རྣམ་གསུམ། འཁྲུལ་མེད་གླིང་པ་བཅུ་གཅིག དྲི་མེད་སྡེ་ལྔ། ནུས་ལྡན་ཉེར་གཅིག་སོགས་༜ གཏེར་ཆེན་བརྒྱ་རྩ། གཏེར་ཕྲན་སྟོང་རྩར་གྲགས་པ་དེ་ཐམས་ཅད། ཐེག་པ་རིམ་དགུའི་རྩེ་རྒྱལ་ཨ་ཏི་རྫོགས་པ་ཆེན་པོ་གསང་བ་རྨད་དུ་བྱུང་བའི་ལྟ་བ་ཡང་
དག་པ་ཇི་ལྟ་བ་བཞིན་དུ་རྟོགས་པ་དེས་གྲུབ་ཐོབ་ཏུ་རྣམ་པར་བཞག་པ་མ་གཏོགས། སྤྱོད་པ་དང་རྫུ་འཕྲུལ་རྐྱང་པ་ཙམ་གྱིས་དེ་ལྟར་བཞག་པར་མི་འདོད་དོ། །རྗེས་ཐོབ་ཇི་སྙེད་མཁྱེན་པའི་ཡེ་ཤེས་ཀྱིས། རང་གཞན་གྱི་གྲུབ་མཐའ་རྒྱ་མཚོ་མ་འདྲེས་སོ་སོར་འབྱེད་པ་ལ་གཞན་དྲིང་མི་འཇོག་པའི་གཟུངས་སྤོབས་ཀྱི་གཏེར་བརྒྱད་གྲོལ་བས། རྒྱན་དྲུག་མཆོག་གཉིས་ཀྱི་གཞུང་དང་དབྱེར་མ་མཆིས་པའི་ཚིག་དོན་བཟང་པོ་འདོམས་པ་པོ། རོང་ཟོམ་པཎྜི་ཏ། རོག་བན་ཤེས་རབ་འོད། ཀུན་མཁྱེན་ཡབ་སྲས། མངའ་རིས་པཎྜི་ཏ། ཀཿཐོག་པ་ཤཱཀྱ་རྡོ་རྗེ། འབྲས་ལྗོངས་རྫོགས་ཆེན་པ་སོགས་ནས་ད་ལྟའི་བར་བྱོན་པའི་རྒྱལ་དབང་པདྨའི་སློབ་བརྒྱུད་ཀྱི་གྲངས་དང་དེ་དག་གི་མདོ་སྔགས་རིག་གནས་དང་བཅས་པའི་ཆོས་ཀྱི་རྣམ་གྲངས་ཙམ་དགེ་ལུགས་པ་ལ་བྱུང་མེད་པ་མཁས་རློམ་
རྡོ་བའི་ཤེས་རབ་ཀྱིས་མ་མཐོང་མ་ཐོས་ནས་བོང་བར་བྱས་ཀྱང་། དོན་དུ་དུས་གསུམ་རྒྱལ་བའི་གཤེགས་ཤུལ་མཐར་ཐུག བགྲོད་པ་གཅིག་པའི་ལམ་མཆོག་གསེར་སྦྱངས་བཙོ་མ་ལྟ་བུ་ཡིན་པར་གྲགས་ཤིང་གྲུབ་པ་འདི་ལ་འཁུ་ཞིང་གཤུང་བ་ཁོ་རང་གི་ལས་སོ། །རྡོ་བའི་ཤེས་རབ་ཀྱི་ཕྱོགས་ཞེན་ཆགས་སྡང་གི་ཚིགས་བཅད་ཀྱི་དོན་ལ་དཔྱད་ན། བློ་བཟང་གྲགས་པ་གཅིག་པུ་མ་གཏོགས་ལྟ་སྤྱོད་རྣམ་དག་དང་། གཞུང་ལུགས་སྐྱོན་མེད་རྩོམ་མཁན། སློབ་མ་མཁས་པ་མང་པོ་བྱུང་བ་བཅས་དེ་ལྟ་བུའི་རྣམ་ཐར་མངའ་བའི་བླ་མ་གཞན་བོད་ཁམས་སུ་གཏན་ནས་མ་བྱུང་ཚུལ་ངོ་ཚ་ཁྲེལ་འཛེམ་ལ་མ་པར་སྨྲས་པ་དེ་མཁས་པའི་མདུན་སར་ཁྲེལ་བགད་ཀྱི་རྒྱུ་ལས་མ་མཆིས་ཏེ། འབྲུག་པ་ཀུན་ལེགས་ཀྱིས། རང་སའི་བླ་མ་བསྟོད་པར་འོས་ན་
ཡང་། །མ་བྱས་བྱས་ཀྱི་རྣམ་ཐར་མང་པོ་འདི། །བླུན་པོ་དད་ཀྱང་མཁས་རྣམས་ཁྲེལ་བའི་རྒྱུ། །ཀུན་ལེགས་རང་བཞིན་བརྗོད་པ་རྣམ་ཐར་ཡིན། །ཞེས་གསུངས་པ་འདི་ཐུགས་མད། རྗེ་རིན་པོ་ཆེའི་གྲུབ་མཐའི་བཞེད་ཚུལ་ལ་ཡང་ས་སྐྱ་བ་སོགས་གཞན་གྱི་མཁས་པ་མང་པོས་ཧཱྃ་རུབ་ཕཊ་རུབ་རྒྱབ་སྟེ་རྩོད་རྒོལ་བྱས་པ་ལས་སྐྱོན་མེད་ཡང་དག་ཏུ་ཁས་བླངས་པ་རྐྱང་བྱུང་མི་འདུག རྗེ་རང་གི་སློབ་མའི་ནང་ནས་ཀྱང་རྗེའི་མདོ་སྔགས་ཀྱི་བཞེད་སྲོལ་ལ་དང་བ་མི་སྟོན་མཁན་མང་རབ་ཅིག་བྱུང་བ་འདི་བདེན་པ་ཡིན། རྗེ་རིན་པོ་ཆེ་དང་མཁས་གྲུབ་རྗེ་གཉིས་ཀའི་ཞལ་སློབ་ཡིན་པ་པཎ་ཆེན་བྱམས་པ་གླིང་པས་ཀྱང་། དྲི་བ་ལྷག་བསམ་རབ་དཀར་འདི་རྗེའི་གསུང་མིན་ཅིང་དོན་ལ་འགལ་བ་ཡོད་ཚུལ་གསུངས་པ་དང་། མཁས་པ་ཆེན་པོ་སྟག་ཚང་ལོ་ཙཱ་བ་ཤེས་རབ་རིན་ཆེན་གྱིས་ཀྱང་།
གང་དག་དཔལ་ལྡན་ཟླ་བའི་རྗེས་འབྲང་ནས། །མ་དག་འཁྲུལ་བའི་སྣང་བ་ཚད་གྲུབ་ཏུ། །རིག་པ་དུ་མས་དཔྱད་ནས་ཁས་ལེན་པ། །འདི་ལ་འགལ་བའི་ཁུར་ཆེན་འདི་ལྟར་ཡོད། །ཅེས་ཐ་སྙད་ཚད་གྲུབ་ལ་སྐྱོན་གྱི་རྩ་བར་བཟུང་ནས་འགལ་བའི་ཁུར་ཆེན་བཅོ་བརྒྱད་བཀལ་བ་དང་། པཎ་ཆེན་གསེར་མདོག་ཅན་པས། རྗེའི་གསུང་དང་མུ་སྟེགས་པའི་གཞུང་ཁྱད་མེད་པར་བསྒྲུབས་ཏེ། གང་ལ་བདག་ཏུ་འཛིན་པས་དམིགས་གཏད་པའི། ། བདག་དེ་བཅིངས་གྲོལ་ཀུན་གྱི་བྱེད་པོར་སྨྲ། །མུ་སྟེགས་གཞུང་དང་ཁྱད་པར་མ་རྙེད་པའི། །ཆོས་ལུགས་འདི་དག་དོགས་པའི་གནས་སུ་མཐོང་། །ཞེས་༣ སོགས་གསུངས་ཏེ་རྗེའི་དབུ་མ་རྩ་བ་ཤེས་རབ་དང་། འཇུག་པའི་ཊཱིཀ་ཆེན་སོགས་བཀག་ཡོད། དེ་བཞིན་དུ་ཀུན་མཁྱེན་གོ་རམ་པ་བསོད་ནམས་སེང་གེས་
ཀྱང་འཇུག་འགྲེལ་ལྟ་བ་ངན་སེལ་དུ་རྗེའི་འཇུག་ཊཱིཀ་ལ་འཛུགས་པར་མ་ཟད། རྗེ་བླ་མ་ལ། དྲུང་བློ་བ་འདི་ལ་དེང་སང་གི་བཙུན་ཆུང་སློབ་གཉེར་བ་བློ་གསར་པ་ཞིག་གི་ཤེས་རབ་ཀྱང་མི་འདུག་ཅེས་བསྟིང་ཚིག་ཀྱང་མཛད་དོ། །གཞན་ཡང་ས་བཟང་ལོ་ཙཱ་བ་ངག་གི་དབང་པོ་དང་། གོང་དུ་སྨྲོས་པ་ལྟར། བྱམས་གླིང་པཎ་ཆེན་བསོད་ནམས་རྣམ་རྒྱལ། ངོར་ཆེན་ཀུན་དགའ་བཟང་པོ་སོགས་མཁས་པ་ལོ་པཎ་མང་པོས་ཀྱང་རྗེའི་སྔགས་ཕྱོགས་ཀྱི་ཡིག་ཆ་ལ་དངོས་སུ་དགག་པ་རྒྱབ་འདུག་ན། དེང་སང་དགེ་ལྡན་པའི་ཁྲོད་དུ་སྨྲ་བའི་དབང་ཕྱུག་མཁས་པ་མིང་དོན་མཚུངས་པ་མཆིས་ཚེ། རྗེའི་གྲུབ་མཐའ་བཟུང་ནས་གོང་གི་ཕས་རྒོལ་དེ་རྣམས་ལ་ངོ་སོ་ཐོན་པའི་རྩོད་ལན་རྩོམ་རན་པ་ལས་ཀྱང་ཕྱི་ཐལ་དུ་མཐོང་སྟེ། ཐུའུ་བཀྭན་པ་དྷརྨ་བཛྲ་གྱིས་རང་གི་བླ་མ་སུམྦྷ་མཁན་པོ་ཡེ་ཤེས་
དཔལ་འབྱོར་གྱི་གསུང་ལ་དགག་པ་བསྐྱོན་པ་ཀེ་ཏ་ཀའི་བྱི་དོར་ལས། གྲུབ་མཐའ་ནི་རང་རང་ལྟ་བའི་སྒོ་ནས་འཇོག་དགོས་པ་ཡིན་གྱི། ཆོ་ག་ཐན་ཐུན་དང་ལུས་ངག་གི་རྣམ་པར་རིག་བྱེད་ཀྱིས་འཇོག་པ་མ་ཡིན་པས། དེ་འདྲ་ལ་དེ་ཙམ་གྱི་དོག་གནང་མི་དགོས་པ་འདྲ། འདི་ལྟ་བུ་རྩད་གཅོད་པ་ལས། གོ་ཤཱཀ་སྟག་གསུམ་སོགས་རྟོག་གེ་ལ་སྦྱངས་པའི་རྒོལ་ངན་གྱི་རྩོད་པ་རྣམས་ལུང་རིག་གིས་སུན་མ་ཕྱུང་ན་ངེས་པར་བསྟན་པ་ལ་གནོད་ ི་པས་སྔ་མ་ཡང་རང་ཕྱོགས་མཁས་གྲུབ་མང་པོས་རྩོད་ལན་མཛད་མོད། ད་དུང་གོ་རམ་པས་རྗེ་བླ་མའི་རྣམ་བཞག་རིག་པའི་རྣམ་བཤད་བཀག་པ་སོགས་༜རྩོད་པ་འགའ་ཞིག་ལ་སུས་ཀྱང་ལན་བཏབ་པ་མ་མཐོང་བས་གྲུབ་མཐའི་རྩོད་པ་ལ་དགྱེས་པའི་རིག་པའི་དབང་ཕྱུག་འགའ་ཞིག་ད་ལྟ་མཆིས་ན་རྒོལ་ངན་འདི་
དག་ཚར་བཅད་ན་ལེགས་པར་འགྱུར་སྙམ་དུ་སེམས་སོ། །ཞེས་གསུངས་པ་མཐོང་ཐོས་བྱུང་ཡོད་ལས་ཆེ། དགེ་བཤེས་ཤེས་རབ་ཀྱིས་དཔྱད་གསུམ་དག པའི་མན་ངག་གི་བསྟན་བཅོས་ཡོན་ཏན་མཛོད་ལྟ་བུ་ལ་བརྟན་མི་བཟོད་པའི་སྐྱོན་ཅན་དུ་བརྩིས་པ་དང་། བསྟན་འཛིན་གྲགས་པ་བདུད་ཡིན་པར་རིག་པས་གྲུབ་ཚུལ་སོགས་མ་བརྟག་པའི་གཏམ་གྱ་ཚོམ་དུ་སྨྲ་བ་ནི་བདུད་ཀྱི་ཆོ་འཕྲུལ་དུ་བཤད་དེ། འབྲུག་པ་ཀུན་ལེགས་ཀྱིས། རང་ཉིད་ཆོས་པར་རློམ་ནས་གཞན་དག་གི །སྐྱོན་མཚང་གཏིང་ནས་འདྲུ་བའི་རྟོག་དཔྱོད་ཅན། །བདག་ལ་མངོན་ཤེས་མེད་པར་གཞན་རྒྱུན་འཇལ། །དཔྱད་གཞི་འདི་ཡང་བདུད་ཀྱི་ཆོ་འཕྲུལ་ཡིན། །ཞེས་གསུངས་པ་ལྟར་ཆོས་དང་གང་ཟག་གི་ཚད་འཛིན་འདི་ཤིན་ཏུ་དཀའ། རང་ཐེ་ཚོམ་མི་ཟ་བའི་ཆོས་ཤིག་ལ་བློ་གཏད། གཞན་ལ་སྒྲོ་སྐུར་དང་
ཟུར་ཟ་སུན་ཅི་འབྱིན་མི་བྱ་བར་བཏང་སྙོམས་སུ་བཞག་ན་ལེགས་ཏེ། མགོན་པོ་བྱམས་པས། ཡིད་ཀྱི་ཉེས་པ་རང་བཞིན་གདུག་པ་སྟེ། །མི་རིགས་པ་ནི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨྲོས་ཅི་དགོས། །དེ་བས་བཏང་སྙོམས་བཞག་ལེགས་ཉེས་པ་མེད། །ཅེས་གསུངས་པས་ཆོས་ལ་སྨོད་པའི་རྩ་ལྟུང་དྲུག་པ་ལ་བག་ཡོད་པ་བྱས་ན་མི་ལེགས་སམ། བློ་བཟང་ཆོས་ཀྱི་རྒྱལ་པོའི་བསྟན་པའི་ཁྱད་ཆོས་དང་། དེར་འཇུག་ར་བསྐུལ་བ་ཆགས་སྡང་མིན་ཚུལ་སོགས་དོན་གྱིས་ཡང་དག་པའི་བསླབ་བྱ་མཛད། ཅེས་པའང་སྔ་ཚིག་དང་ཕྱི་ཚིག་འགལ་ཏེ་གོང་དུ་རྗེ་ཙོང་ཁ་པའི་ལྟ་གྲུབ་ཀྱི་ཁྱད་ཆོས་གང་ཡང་བཤད་པ་མི་གསལ་བ་དང་། ཆགས་སྡང་ཡིན་པ་ཚིག་གི་བབས་ལས་ཤེས་པས་སོ། །རྙིང་མ་བའི་ཆོས་འཆད་ཉན་བྱེད་པ་བྱེ་
མའི་ཁང་བུ་འདྲ་བ་དང་མཐར་ངུ་བའི་རྒྱུ་ཞེས་ཟེར་བ་ནི་ལོག་རྟོག་སྟེ། རྒྱལ་བའི་ལུང་གི་བསྟན་པ་འཆད་ཉན་གྱིས་འཛིན་པ་དང་། རྟོགས་པའི་བསྟན་པ་སྒྲབ་པ་ཉམས་ལེན་གྱི་སྒོ་ནས་འཛིན་དགོས་པའི་ཚུལ། སྟོན་པའི་དམ་ཆོས་རྣམ་གཉིས་པོ། །ལུང་དང་རྟོགས་པའི་བདག་ཉིད་ཅན། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ནའོ། །ཞེས་གསུངས་པ་ལྟར་འཕགས་བོད་བསྟན་པ་སྤྱིའི་འཇུག་ཚུལ་མ་ནོར་བ་ཕྱག་ལེན་དུ་བཏབ་པ་བྱིས་པའི་བྱེ་རྩེད་དང་འདྲ་ན། དགེ་བཤེས་ཤེས་རབ་ཀྱིས་ཉན་པ་པོ་ལ་ཆོས་སྤོང་ཆགས་སྡང་གི་བསླབ་སྟོན་བྱེད་པའི་འཆད་ཉན་དེ་འདྲ་བདུད་ཀྱི་འཆད་ཉན་དངོས་ཡིན། ལུང་གི་ཆོས་འཆད་ཉན་བྱས་པའི་ཕན་ཡོན་དང་བསྔགས་པ་ལ་བསམ་ན་དགའ་སྤྲོ་སྐྱེས་ནས་དགོད་བྲོ་བ་ལས་ངུ་བའི་དོན་ཅི་ཞིག་ཡོད། དེ་ནི་ཁོ་རང་གི་འབྱུང་འགྱུར་ལས་
ངན་གྱི་འབྲས་བུ་ངུ་འབོད་ལ་སོགས་པ་དམྱལ་བའི་སྡུག་བསྔལ་ཐོག་ཏུ་བབ་པ་ལ་བསམ་ན་ངེས་པར་ངུ་དགོས་པའི་ཚོད་དུ་སྣང་ངོ་། །བོད་ཀྱི་ཁྲིམས་ཁང་མཐོ་ཤོས་བཀའ་ཤག་ཏུ་རྙིང་མ་བྱེད་མཁན་ཤེས་རྒྱ་ཅན་གྱི་རིགས་བཞག་ན། དགེ་ལྡན་པའི་བསྟན་པ་དང་། གཞུང་དགའ་ལྡན་ཕོ་བྲང་གི་ཆབ་སྲིད་ལ་གནོད་པས་ཡུན་རིང་འཚོ་འཇུག་ཐབས་མེད་ཚུལ་ཆོས་སྐྱོང་བཀའ་ལུང་ལ་ཕག་གཡར་བ་འདི་འདྲ་ནི་བོད་རྒྱལ་ཁབ་ཀྱི་ཆབ་སྲིད་བསྐྱང་སྟངས་ལ་དངོས་སུ་ཐེ་བྱུས་བྱས་པས་མ་ཚད་རྙིང་མ་བ་རྩ་མེད་བཟོས་ནས། དགེ་ལུགས་པ་ཁེར་གཙང་གིས་བོད་ཁམས་ཀྱི་ཆོས་སྲིད་གཉིས་ཀ་འཛིན་རྒྱུ་དམིགས་ཡུལ་དུ་དུས་རིང་མོ་ནས་སྙིང་ལ་བཅངས་པར་ད་གཟོད་གསལ་ཤེས་བྱུང་། ཁྱེད་ཅག་གི་ཞེ་ལ་བརྣག་རྒྱུ་དེ་ནི། རྙིང་ཆོས་སུས་བྱས་མི་གྲལ་དང་ལྷ་
གྲལ་ནས་རྒྱང་འབུད་བཏང་སྟེ། རྒྱལ་བ་བསྐལ་བཟང་རྒྱ་མཚོའི་དུས་སུ་བྱུང་བ་རེད་ཅེས་རྗེ་སྐུ་ཞིག་ལས་ཁུངས་ཆེ་ཁག་རྣམས་སུ་སྒྲིག་བཤོམ་དང་འབྲེལ། དགེ་ལྡན་ལྟ་གྲུབ་གཙང་མ་བསྐྱང་མཁན་ཤ་སྟག་སེར་རིས་སེ་འཚོགས་ནས་བཀོད་ཁྱབ་གཏོང་རྒྱུ་དེ་ག་ལགས་མོད། དེ་འདྲ་དངོས་སུ་འོང་བར་བྱེད་པའི་ཐོབ་དབང་དང་ནུས་པ་ཁྱོད་ལ་རྒྱུ་ཚོགས་མ་ཚང་བས། ནམ་ཡང་འགྲུབ་མི་སྲིད་པའི་རང་འདོད་ཀྱི་རེ་བ་སྟོང་ཟད་དུ་འགྲོ་བ་མཁྱེན་ལས་ཆེ། ལར་དུས་རབས་དང་བསྟུན་པའི་གཏམ་བཤད་ན་འཕར་འབུབ་ཆུང་བ་ལགས་པས་སླན་ཆད་དམངས་གཙོའི་མདུན་སར་འདི་རིགས་ནམ་ཡང་མི་སྨྲ་བར་ཁ་རོག་བཞུགས་མཛོད། དེ་ལྟར་ཁེ་སྨད་བསོད་ནམས་དབང་འདུས་ཀྱི་ཞལ་རྒྱུན་རྣམས་བཀོད་གྲུབ་ནས། སླར་ཡང་ལྷ་ཀླུའི་གུང་སྨ་དབབ་པའི་ཕྱིར་ཛེ་སྨད་ན་རེ། གཟིམ་
ཤག་ལྷ་ཀླུའི་དགའ་ཚལ་བ་དེ་རྒྱལ་བ་འཇམ་དཔལ་རྒྱ་མཚོའི་ཡབ་གཞིས་ལ་བརྟེན། མི་རབས་སྔ་མ་རྣམས་སུ་དགེ་ལྡན་རིང་ལུགས་ལ་མོས་ཤིང་ལྟ་གྲུབ་གཙང་མ་འཛིན་པ་དེ་ལྟར་ཡང་། ལྷ་ཀླུའི་གུང་འཇིགས་མེད་རྣམ་རྒྱལ་ཞེས་པས་ཀུན་བཟང་རྩེའི་མཁན་དྲུང་བསྟན་འཛིན་དབང་པོ་སོགས་དང་ལྷན་དུ། སྡེ་དགེ་བ་ཡིན་པ་རྙིང་མའི་བླ་མ་བཀྲས་ཚེ་ལགས་ཟེར་བ་སྡོམ་གཙང་མིན་ཡང་གྲྭ་ཆས་ལེགས་པོ་གྱོན་པ་ཞིག་ཡོད་པ་དེའི་མདུན་ནས། ཐོག་མར་སྙན་སུམ་སོགས་རིག་གནས་སྐོར་ཁྲིད་ཅིང་། དེ་རྗེས་རིམ་པས་རྙིང་མའི་ཆོས་སྒོར་ཞུགས་ཤིང་། ཉམས་ལེན་ཡང་ཅི་ནུས་བྱས་པ་དང་། ལྷ་ཀླུའི་གུང་ཉིད་ཀྱིས་བླ་མར་བསྟེན་པའི་རྟོགས་ལྡན་རལ་ལྕོག་ཅན་ཞིག་ཡོད་པ། ལྷ་ཀླུ་དང་ཐག་ཉེའི་སྤ་རི་ཁུག་གི་རི་ཁྲོད་དུ་བཞག་སྟེ་སྲི་ཞུ་རིམ་གྲོ་བྱས་
ཤིང་དེའི་མདུན་ནས་གུང་འཇིགས་རྣམ་ཉིད་དང་། གུང་གི་ཨ་མ་བཅས་གཉིས་ཀས་རྙིང་ཆོས་སྐོར་མང་དུ་ཞུས་ཤིང་། སྐབས་ཤིག་ལྷ་ཀླུའི་གཟི་མ་དཔོན བྱེ་བ་འཆི་མེད་ཅེས་པ་རྒན་གྲས་ཤིག་གིས་རྟོགས་ལྡན་རལ་ལྕོག་ཅན་གྱིས་གུང་གི་མ་ཡུམ་ལ་ལོག་པར་གཡེམ་ཞིང་རྫུ་བག་གི་གྱོན་གོས་ཧྲུལ་པོར་སོང་བའི་སྐྱོན་མཚང་དམར་རྗེན་དུ་མཐོང་ནས་རི་ཁྲོད་དུ་བསྐྱོད་དེ་བླ་མ་དེ་ཉིད་དབྱུག་པས་ཆེར་བརྡུངས་ཤིང་། མགོ་བོའི་རལ་པ་ཡང་མང་དུ་བཀོག་པ་སོགས་ལ་བརྟེན། ལྷ་ཀླུའི་གུང་ཉིད་སྤ་རིའི་རི་ཁྲོད་དུ་ཆེད་བསྐྱོད་ཀྱིས་དགོངས་སེལ་བཟོད་གསོལ་ཞུ་དགོས་པ་སོགས་བྱུང་ལ། ལྷ་ཀླུའི་གུང་དེ་ཉིད་ཀྱི་མདུན་མར་བཤད་སྒྲའི་སྲས་མོ་གཡང་འཛོམས་ཚེ་རིང་བསུས་ཤིང་། ལྷ་ལྕམ་འདི་ཉིད་དགེ་ལྡན་པའི་བསྟན་པ་ལ་མོས་ཤིང་། ལྷ་སྲུང་ཡང་རྒྱལ་ཆེན་རྡོ་རྗེ་ཤུགས་ལྡན་
ཉིད་ལ་བསྟེན་པ་སོགས་ཁྱོ་ཤུག་གཉིས་ལྟ་གྲུབ་མི་མཐུན་པར་གནས་མུས་ཀྱི་མཐར། གུང་དེ་ཉིད་ལོ་ན་ཆེར་མ་ལོན་པའི་དུས ནས་ལུས་ལ་ཤིག་ནད་བྱུང་སྟེ་ནད་མནར་མི་བཟད་པའི་སྒོ་ནས་ཆོས་སྐྱོང་གི་ཆོ་འཕྲུལ་དུ་མ་བསྟན་པ་མངོན་སུམ་མྱོང་བཞིན་པར་འཇིག་རྟེན་ཕྱི་མའི་བཤུལ་་་རིང་བགྲོད་དཀའི་ལམ་དུ་འཕྱན་པར་གྱུར་ཅིང་། དེ་ནས་ལྷ་ཀླུར་རྒྱལ་བའི་དཔོན་བརྒྱུད་ཀྱི་མི་ངོའི་རིགས་བརྒྱུད་ཀྱང་ཆད་པར་གྱུར་པ་ཡིན། སྐབས་དེར་གྲུབ་པའི་དབང་ཕྱུག་ཆེན་པོ་དགའ་ལྡན་གསེར་སྐོང་རྡོ་རྗེ་འཆང་ངག་དབང་ཚུལ་ཁྲིམས་དོན་ལྡན་དཔལ་བཟང་པོས་ལྷ་ཆེན་ཁྲོས་འདུག་པས་དེའི་མཐུ་ཡིན་་༜ཞེས་གསལ་བར་ལུང་བསྟན་པའང་བྱུང་འདུག་ཅིང་། འདིའི་སྐབས་ཀྱི་ལྟས་དང་ཆོ་འཕྲུལ་བྱུང་ཚུལ་མང་པོ་ཞིག་ལྷ་ལྕམ་གཡང་འཛོམས་ཚེ་རིང་ལ་གསུང་
རྒྱུ་འདུག་པ། ད་ལྟ་བརྗེད་ངས་ཀྱི་དབང་དུ་སོང་ཞེས་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོའི་ཞལ་ལས་ཐོས་ཤིང་སླར་ཁུངས་ལྡན་རྙེད་པ་བྱུང་ཚེ་འདིར་བསྣན་པར་རིགས། གོང་སྨྲོས་ལྷ་ཀླུའི་ལྷ་ལྕམ་གྱི་སྐུ་ཟླ་གུང་འཇིགས་མེད་རྣམ་རྒྱལ་དང་། སྲས་གུང་ཕུན་ཚོགས་རབ་རྒྱས་གཉིས་ཀ་རིམ་པར་འདས་གྲོང་སོང་རྗེས་ལྷ་ཀླུར་ལྷ་ལྕམ་ཙམ་ལས་མེད་སྟབས་ཞབས་གྲས་སྤྱི་ནས་གཞུང་ལ་སྙན་འབུལ་ཞུས་པ་ལྟར། མཐར་སྐུ་ཕྲེང་བཅུ་གསུམ་པ་ཆེན་པོས་ལྷ་ཀླུའི་འཚོ་འཛིན་དུ་རྩིས་དཔོན་ལུང་ཤར་པ་བསྐོ་བཞག་དང་། ལུང་ཤར་གྱི་བུ་འགྱུར་མེད་ཚེ་དབང་རྡོ་རྗེ་ཞེས་སམ་ལྷ་ཀླུའི་ཞབས་པད་དུ་གྲགས་པ་དེང་སང་ཡོད་མུས་དེ་ཉིད་ལྷ་ཀླུའི་བུ་ཚབ་ཏུ་ཉར་དགོས་བཀའ་སྩལ་བ་ལྟར། རྩིས་དཔོན་ལུང་ཤར་བ་རྙིང་བླ་སྣ་ཚོགས་ཀྱི་མདུན་ནས་རྙིང་མའི་ཆོས་སྐོར་གྱི་དབང་ལུང་མང་
ཐོས་ཀྱིས་ལྟ་གྲུབ་གཙང་མར་མི་འཛིན་ཞིང་། གེ་སར་སེང་ཆེན་རྒྱལ་པོ་ལྷག་ལྷའི་གཙོ་བོར་བསྟེན་པ་དེ་ཉིད་ལྷ་ཀླུའི་འཚོ་འཛིན་དུ་འབྱོར་བ་ནས་བཟུང་། ལྷ་ཀླུའི་ལྷ་ལྕམ་གཡང་འཛོམས་ཚེ་རིང་གོང་བརྗོད་ལྟར་དགེ་ལྡན་གྱི་ལྟ་གྲུབ་གཙང་ཞིང་། ཆོས་སྐྱོང་ཡང་རྡོ་རྗེ་ཤུགས་ལྡན་ཉིད་ལ་བསྟེན་མཆོད་བྱས་ཏེ་མགོན་ཁང་གི་སྐུ་རྟེན་གྱི་གྲས་སུ་རྒྱལ་ཆེན་ཤུགས་ལྡན་གྱི་སྐུ་ཡོད་པ་དེ་ཡང་། ལྷ་ཀླུའི་གཟིམ་ཤག་ཏུ་བཞག་དབང་མེད་དབེན་གནས་ ི བཀྲ་ཤིས་ཆོས་གླིང་དུ་སྤོ་དགོས་བྱུང་བ་དང་། འཆར་ཅན་ཟླ་གསོལ་ཡང་བཀྲ་ཤིས་ཆོས་གླིང་དུ་ཡར་འབུལ་རྒྱུ་བསྐུར་བ་ལས། གཟིམ་ཤག་ཏུ་གཏོང་༜དབང་མེད་པ་སོགས་རྩིས་དཔོན་ལུང་ཤར་རྙིང་ཆོས་ལ་དམ་འཛིན་ཆེ་བས། རྗེས་སུ་རྒྱུན་རིང་ནད་མནར་བྱུང་ཞིང་། སྐབས་དེར་རྩེ་ཞོལ་དུ་ཡོད་པའི་ལུང་
ཤར་གྱི་ཁང་པའི་ཐོག་ཁར་བྱ་རྒོད་བབས་པས་རྣམ་རྟོག་ཟོས་ཏེ། རྒྱལ་དབང་ཐུབ་བསྟན་རྒྱ་མཚོར་ཐུགས་དམ་བརྟག་ཞུ་ཕུལ་བའི་བཀའ་ལན་ཕྱིར་ཕེབས་སུ། རྗེ་དགེ་འདུན་གྲུབ་པས། དྲིན་ཇི་བཞིན་ཁུར་བར་མ་ནུས་ཀྱང་། །སེམས་ཆགས་སྡང་དབང་དུ་མ་སོང་བར། །མགོན་ཁྱོད་ཀྱི་བསྟན་པ་འཛིན་པ་ལ། །དུས ནམ་ཡང་བརྩོན་པ་བགྱིད་པར་སྨོན། །ཞེས་ཐུགས་དམ་བཅས་པ་ལྟར། གཞུང་དགའ་ལྡན་ཕོ་བྲང་པ་འདི་རིས་མེད་བསྟན་པ་སྤྱི་དང་། ལྷག་པར་རྒྱལ་མཆོག་བསྐལ་བཟང་རྒྱ་མཚོས་བཀའ་ཤག་ཏུ་རྗེ་ཙོང་ཁ་པ་ཆེན་པོའི་སྣང་བརྙན་བཞེངས་པ་སོགས་རི་བོ་དགེ་ལྡན་པའི་ལྟ་གྲུབ་རྨ་མེད་པར་སྟོབས་ཀྱིས་འཛིན་པའི་སྦྱིན་བདག་ཡིན་པ་དང་། གཞུང་ཞབས་སེར་སྐྱ་ཡོངས་ནས་བླང་དོར་འཛོལ་མེད་དགོས་རྒྱུ་དེ་ལྟར་ལ། ད་ལམ་རྡོ་རྗེ་འཇིགས་བྱེད་ཀྱི་ཞབས་གཡོན་གྱི་
གནོན་བྱ་དང་པོ་ཁང་ཐོག་ཏུ་བབས་པ་མི་ཤེས་པའི་མཚན་མར་རྟེན། བླ་མཆོད་དང་འབྲེལ་བའི་ཚོགས་མཆོད་ཅི་འགྲུབ་དང་། དྲུག་ཅུ་མ་ཆེས་མང་བ་ཞིག་གནད་སྨིན་འབད་སྒྲབ་དགོས་པ་སོགས་སྩལ་འདུག་ཅིང་། ཐུགས་དམ་བཀའ་ལན་འདི་རྒྱལ་མཆོག་ཐུབ་བསྟན་རྒྱ་མཚོ་དགོངས་ཁྲི་བྱང་རིན་པོ་ཆེ། མཚན་ཞབས་སེར་སྨད་པ་ཞི་བར་མནལ་བའི་མཇུག་དེར། རྒྱལ་ཚབ་རྭ་སྒྲེང་རིན་པོ་ཆེ་ནས་སྐྱབས་རྗེ་གླིང་སྤྲལ་རྡོ་རྗེ་འཆང་དང་། རྒྱལ་དབང་ཆོས་རྗེའི་སྤྲུལ་སྐུ་བཅས་ལ་རྒྱལ་བའི་མཛད་རྣམ་ཕྱོགས་སྒྲིག་གི་ས་བོན་ཡིག་ཆ་འཚོལ་ཞིབ་གནང་དགོས་བཀའ་ཕེབས་བཞིན་ཕོ་བྲང་ཡས་མས་ཀྱི་གཟིམ་ཆུང་ཁག་ཏུ་འཚོལ་གནང་མཛད་སྐབས་སུ་ནོར་གླིང་སྐལ་བཟང་ཕོ་བྲང་གི་སྟེང་ཐོག་གཟིམ་ཆུང་ཕྱག་དཔེ་ཁང་དུ། མཆོག་དམན་སྐྱ་སེར་དུ་མར་
ཐུགས་དམ་བཀའ་ལན་གནད་ཆེ་རིམ་སྩལ་ཁག་ཕྱོགས་སྡེབ་ཀྱི་དེབ་འགའ་ཤས་མཆིས་པའི་ནང་སྐྱབས་རྗེ་ཁྲི་བྱང་རྡོ་རྗེ་འཆང་གིས་དངོས་སུ་གཟིགས་འདུག་པས་ཡིད་ཆེས་པའི་གནས་དང་། དེ་ནས་གང་ལྟར་ཡུན་རིང་མ་ལོན་པར་༧ རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་དགོངས་པ་ཞི་དབྱིངས་སུ་གཤེགས། དེ་རྗེས་རྩིས་དཔོན་ལུང་ཤར་ཉིད་ནས་རྩེ་ཤོད་གཞུང་ཞབས་རྒྱ་ཆེའི་ཤོག་ཁག་ཅིག་གི་སྣེ་ཁྲིད་ཀྱིས་བཀའ་བློན་ཁྲི་སྨོན་པར་སྐྱོན་འཛུགས་དང་འབྲེལ་ཆབ་སྲིད་སྐོར་ལ་བསྒྱུར་བཅོས་གང་འཚམས་ཤིག་གནང་དགོས་ཞེས་རྒྱལ་སྲིད་བཀའ་ཤག་བཅས་པའི་མཚན་འཁོད་སྙན་ཞུ་ཕུལ་བ་སོགས་གཞུང་གི་སྲིད་དབང་བསྒྱར་ཕྱོགས་ཀྱི་བསམ་ཚུལ་མི་མཐུན་པའི་རྐྱེན་ངན་དང་། འགའ་ཞིག་གི་བརྗོད་སྲོལ་དུ་ལུང་ཤར་བས། དེ་སྔ་བོད་ཀྱི་བསྟན་སྲིད་བསྲུང་དམག་གི་ཕོགས་
དམིགས་སུ་བོད་སྤྱི་ཚོགས་ཀྱི་འཆར་དོན་ལྟར། བཀའ་བློན་དང་། མདའ་དཔོན་གྱི་ཐབ་རྟེན་གཞིས་ཁག་མཚོན་གཞུང་གཞིས་ཁག་དང་། སྒེར་པ་ངོ་དོད་སྒྲུབ་མི། ཞབས་ཞུ་དང་ངོ་དོད་གང་ཡང་མེད་རིགས་ལྕགས་སྟག་ཞིབ་གཞུང་ཆེན་མོར་མ་གསལ་བ། བྱས་རྗེས་གཟིགས་བཟོས་ཀྱི་ས་རྟེན་མི་བརྒྱུད་དང་། ལོ་དུས་རྫོགས་པ། ནང་སྦྱོར་ས་རིགས་བཅས་ལ་གཞུང་འབབ་བབས་མཚུངས་འགེལ་རྒྱུ་གཏན་འཁེལ་བའི་ལས་དོན་སྒྲུབ་ཿ མཁན་མཁན་དྲུང་བློ་བཟང་བསྟན་སྐྱོང་དང་། རྩིས་དཔོན་ལུང་ཤར་གཉིས་ཡིན་ཅིང་། ལས་དོན་ཚགས་ཚུད་བྱུང་ཡོད་ཀྱང་ལས་དོན་བསྒྲུབ་སྐབས་ཕྱོགས་ལྷུང་སྐྱོན་ཆ་ཆེ་ཙམ་གྱུར་ཡོད་ཚོད་སྟབས། མཁན་དྲུང་བློ་བཟང་བསྟན་སྐྱོང་སྔོན་འདས་ཟིན་རྗེས། ལས་སྦྲེལ་རྩིས་དཔོན་ལུང་ཤར་པ་ཤུལ་ལུས་ལ་འབབ་
འཁྲིའི་ས་བདག་རྣམས་ཀྱིས་འཁོན་བཟུང་སྙིང་ནད་བྱས་ཚུལ་ཟེར་མོད། གང་ལྟར་རྩིས་དཔོན་ལུང་ཤར་ལྟོས་པར་བཅས་པ་འཛིན་བཟུང་དོ་དམ་ཐོག་ལུང་ཤར་ཉིད་ཀྱི་མིག་འབྲས་གཉིས་བཏོན་པ་དང་། མིག་འབྲས་བཏོན་ཤུལ་དུ་སྣུམ་འཁོལ་མ་བླུགས་པ་སོགས་བཟོད་པར་དཀའ་བའི་དུཿཁ་མི་བཟད་པས་ནོན་ཞིང་། རྩེ་ཞོལ་དུ་བཙོན་འཇུག་བྱས་ཏེ་ལོ་ཤས་རིང་ཡ་ང་བའི་འཇིགས་པ་དུ་མམྱོང་བཞིན་དུ་ཚེ་འཕོས་པར་གྱུར་ཏོ། །༽ ཞེས་པ་ལ་བརྗོད་པ། རྒྱལ་བའི་ཡབ་ཚང་ཡིན་ཚད་སོ་སོའི་ཕ་མེས་རིང་ནས་བྱས་པའི་ཆོས་ལུགས་དོར་ནས་དགེ་ལུགས་ལྟ་གྲུབ་རྐྱང་པ་འཛིན་དགོས་པས་མ་ཁྱབ་སྟེ། དཔེར་ན་རྒྱལ་མཆོག་བདུན་པའི་ཡབ་གཞིས་བསམ་འགྲུབ་ཕོ་བྲང་པ་ད་ལྟའི་བར་དགེ་ལུགས་རྐྱང་པ་མི་མཛད་པ་བཞིན་ནོ། །ལྷ་ཀླུའི་གུང་གི་བླ་མ་བཀྲ་ཚེ་རྙིང་མ་བར་
འཛིན་པའང་ནོར་བ་སྟེ། བླ་མ་བཀྲ་ཤིས་ཚེ་རིང་ནི་འཇམ་མགོན་ཀོང་སྤྲུལ་རིན་པོ་ཆེ་དང་། མཁན་ཆེན་བཀྲ་ཤིས་འོད་ཟེར་སོགས་ཀྱི་ཞལ་སློབ་ཀཾ་ཚང་བཀའ་བརྒྱུད་ཀྱི་ཆོས་སྡེ་ཆེན་པོ་ཤར་དཔལ་སྤུངས་ཐུབ་བསྟན་ཆོས་འཁོར་གླིང་གི་མཁས་བཙུན་བཟང་གསུམ་འཛོམ་པའི་དགེ་སློང་དགེ་བའི་བཤེས་གཉེན་ཆེན་པོ་ཡོངས་གྲགས་ཤིག་ཡིན་པ་ལ། ཁྱོད་ཀྱིས་སྡོམ་གཙང་མིན་ཞེས་ཕས་ཕམ་གྱི་སྐུར་ཞུས་ངན་པ་བྱས་པ་དེས་རབ་བྱུང་དང་བསྙེན་རྫོགས་ཀྱི་བླངས་འདས་དང་དགེ་འདུན་ལྷག་མའི་ལྟུང་བ་ཆེན་པོའི་གཡང་སར་ཤེས་བཞིན་དུ་ལྕེབས་པ་དང་། བྱང་ཆུབ་སེམས་དཔའི་སྡོམ་པའི་འགལ་ཟླ་༉དམ་པར་སྐུར་འདེབས་ཀྱི་ནག་ཆོས་ལ་སྤྱད་པ་ཡིན་ཅིང་། རང་ཉིད་དགེ་སྦྱོང་དུ་ཁས་འཆེ་ནས། ཆོས་ལུགས་གཞན་གྱི་བསྟན་འཛིན་རྣམས་ལ་ཕྲག་དོག་
གིས་དགྲ་བོར་འཛིན་པ་འདི་ཡང་དམ་པ་རྣམས་ཐུགས་དབྱུང་བའི་ལས་ངན་བསགས་པ་ལོས་ཡིན། དེ་ཡང་ཐམས་ཅད་མཁྱེན་པ་དགེ་འདུན་གྲུབ་པ་དཔལ་བཟང་པོས། ལར་ད་ལྟ་གངས་རིའི་ཁྲོད་འདི་ན། །རང་བསྟན་པ་འཛིན་པར་ཁས་ལེན་ཅིང་། །གཞན་བསྟན་འཛིན་དགྲ་བོའི་དྭངས་མར་འཛིན། །ཚུལ་འདི་ལ་སྐྱོ་བ་གཏིང་ནས་སྐྱེས། །ཞེས་གསུངས་པས་སོ། །ཡང་གུང་གི་ཡུམ་ལ་བླ་མ་རལ་ལྕོག་ཅན་མིང་སྨྲ་རྒྱུ་མེད་པ་ཞིག་འདོད་ལོག་སྤྱད་ཟེར་བ་ཡང་གོང་གི་བླ་མ་བཀྲ་ཚེའི་ལོ་རྒྱུས་དང་མཚུངས་པར་ཤུགས་ལས་རྟོགས་སླ། དེར་མ་ཟད་གུང་རང་གིས་བླ་མ་ལ་བཤགས་པ་དང་བཟོད་གསོལ་ཕུལ་ལུགས་ཀྱིས་གུང་གི་ཞབས་ཕྱི་བས་ནོར་འཁྲུལ་ཤོར་བ་ཡིན་པར་ཆེས་གསལ། སྤྱིར་སྔགས་པས་ཐབས་ལམ་བརྟུལ་ཞུགས་ཀྱི་སྤྱོད་པ་རིག་མ་བརྟེན་པ་ཙམ་ལ་སྐྱོན་མཚང་
དམར་རྗེན་དུ་མཐོང་ཞེས་གཞན་ལ་སྨ་འབེབས་དྲག་པོ་དེ་ཙམ་དུ་བྱེད་རིགས་ན། ལྟ་སྤྱོད་གཙང་མ་ཞེས་ཁ་ལ་བུ་རམ་མུར་མུར་བྱེད་མཁན་གྱི་ཞྭ་སེར་རིང་ལུགས་པ། གནས་བརྟན་འདུལ་བ་འཛིན་པར་རློམ་ནས་གཞན་ལ་སོ་ཐར་རབ་བྱུང་དང་བསྙེན་རྫོགས་ཀྱི་སྡོམ་པ་སྦྱིན་པའི་མཁན་པོ་དང་ལས་སློབ་བྱེད་པས་མཚོན་འདུལ་བ་གཞི་གསུམ་གྱི་ཆོ་ག་ལ་ལག་ལེན་བྱེད་ཅིང་། ངུར་སྨྲིག་ཐར་པའི་རྒྱལ་མཚན་རིན་ཐང་ཅན་སྐུ་ལ་མནབས་ནའང་། ལྐོག་ཏུ་བཙུན་མ་དང་གཞན་བདག་པོ་ཅན་གྱི་བུད་མེད་ལ་བྱི་རྐུན་བྱེད་པའི་དགེ་སློང་ངོས་ལྐོག་ཅན་དང་བརྫུ་བག་ཅན་དངོས་བདེན་ཡིན་པའི་གྲགས་པ་བོད་ཕྱི་ནང་ཀུན་དུ་རླུང་ལྟར་ཁྱབ་ཚར་བ་སྦར་མོས་བཀབ་ནས། ད་དུང་སྔགས་པ་ལ་མོ་ཁ་རྒྱག་པ་མཚར་ཆེ། དེ་ལྟར་མ་འོངས་པ་ན་འབྱུང་བར་ཨོ་རྒྱན་བསྟན་
གཉིས་གླིང་པའི་ལུང་བསྟན་དུས་གསུམ་ཀུན་གསལ་ལས། རྩ་བཞིའི་སྡོམ་པ་རང་གིས་མི་བསྲུང་བའི༔ དགེ་སློང་སྡོམ་པ་གཞན་ལ་འབོག་པ་འོང་༔ ཞེས་གསུངས་པའི་ཐོག་ཏུ་བབས་པར་མངོན། རང་ཕྱོགས་འཆལ་སྤྱོད་བྱེད་པ་ལ། གྲུབ་པའི་དབང་ཕྱུག་དང་རྡོ་རྗེ་འཆང་ཞེས་བསྔགས་པ་བྱེད་ཅིང་། གཞན་ཕྱོགས་དགེ་སློང་ཚད་ལྡན་ལའང་སྡོམ་གཙང་མིན་ཟེར་བ་དང་། སྔགས་སྤྱོད་ལ་ལོག་གཡེམ་དུ་མིང་འདོགས་བྱེད་པ་འདི་དག་ཨ་ཕའི་ཁ་ཕོར་གཙང་ཞེན་དང་ཧམ་བསྙོན་འདིང་བ་ཅིས་མ་ཡིན། ལྷ་ལྕམ་གཡང་འཛོམ་ཚེ་རིང་དགེ་ལྡན་ལྟ་གྲུབ་གཙང་མ་དང་ཤུགས་ལྡན་སྲུང་མར་བསྟེན་པ་ཡིན་སྟབས་ཁྱོད་ཅག་གི་འདོད་པ་ལྟར་བྱས་ན་ཁ་དྲོ་བཀྲ་ཤིས་པ་ཞིག་ཡོང་དགོས་རྒྱུ་ལ་དེ་ལྟར་མ་བྱུང་བར། ན་སོ་གཞོན་དུས་ནས་ཡུགས་སར་ལུས། རང་དབང་མི་ལ་ཤོར་
ནས་སྡུག་སྐད་དང་། ཡུས་ཆེ་ཁྲི་བྱང་རིན་པོ་ཆེར་འདོན་དགོས་པ་དེ་ཡང་ཆོས་སྐྱོང་གི་ཕྲིན་ལས་བསྒྲུབས་པའི་རྟགས་མཚན་རེད་དམ། སྐབས་འདིར་ཁྲི་བྱང་རིན་པོ་ཆེས་ཐུགས་བརྗེད་ཁུར་བ། སླར་ཁུངས་ལྡན་རྙེད་ན་འཛུད་དགོས་རྒྱུ་དེ་ཡང་དུས་ད་ཙམ་ན་རྙེད་ཡོད་ལས་ཆེ་བས་ཅིས ཀྱང་བར་འདིར་གཞུག་རོགས་གནང་ཞུ། ལྷ་ཀླུའི་ཞབས་པད་རྡོ་རྗེ་ཚེ་དབང་ཡང་དགེ་ལྡན་གཙང་མ་དང་། སྲུང་མ་ཤུགས་ལྡན་ལ་གཙོ་བོར་བྱེད་མཁན་ཞིག་ཡིན་ཀྱང་མཐར་ཐོག་ཏུ་བབས་པ་ནི་ཁ་མ་དྲོ། བཀྲ་མ་ཤིས། དོན་མ་གྲུབ་པ་བྱུང་བ་ཚང་མས་མཁྱེན་གསལ་ལྟར་མ་ལགས་སམ། རྒྱལ་བ་ཐུབ་བསྟན་རྒྱ་མཚོའི་ཐུགས་དམ་བཀའ་ལན་ཕེབས་དོན་རེད་ཟེར་བ་དེ་ཡང་བདེན་རྫུན་དོགས་གཞི་ཆེ་སྟེ། དེའི་ནང་གི་ཚིག་དོན་དགའ་ལྡན་ཕོ་བྲང་པ་འདི་རི་བོ་དགེ་ལྡན་
པའི་ལྟ་གྲུབ་རྨ་མེད་འཛིན་དགོས་པ། གཞུང་ཞབས་སེར་སྐྱ་ཚང་མས་བླང་དོར་འཛོལ་མེད་དགོས་ཚུལ་གྱི་ཕྱོགས་རིས་འབུར་དོད་ཀྱི་གསུང་དེ་འདྲ་རྒྱལ་དབང་ཐུབ་བསྟན་རྒྱ་མཚོའི་བཞེད་དགོངས་དང་མི་མཐུན་ཅིང་། ལྟས་ངན་བྱུང་བའི་ཟློག་རིམ་དུ། བླ་མ་མཆོད་པའི་ཚོགས་མཆོད་དགོས་གསུངས་པའང་འབྲེལ་མ་ཆགས་ཙམ་འདུག ཁྲི་བྱང་རིན་པོ་ཆེ་ནས་རྒྱལ་བའི་བཞུགས་གནས་ཕོ་བྲང་ཡས་མས་ཀྱི་ཡིག་ཆ་འཚོལ་ཞིབ་མཛད་སྐབས་གོང་དུ་རྭ་སྒྲེང་དང་མཁར་རྡོ་སོགས་དང་འདིར་ལུང་ཤར་སྐོར་བཅས་པར་བཟང་པོའི་ལུང་བསྟན་དང་བཀའ་ཡིག་གཅིག་ཀྱང་མ་གཟིགས་པར། ངན་པའི་ལུང་བསྟན་དང་། ཕྱོགས་སུ་ལྷུང་བའི་ཡིག་སྣ་ཁག་རྙེད་ནས་དོ་སྣང་ཆེན་པོ་གནང་ཚུལ་བཀོད་པ་འདི་འདྲ་མཁྱེན་རྒྱ་ཅན་གྱིས་གཟིགས་ན་ཡ་མཚན་སྐྱེ་བའི་གནས་སུ་མཐོང་།
ལུང་ཤར་གྱི་གཞུང་སྲིད་ལས་དོན་སྐོར་མང་པོ་བཤད་པ་དོན་མེད་ངག་འཁྱལ་དུ་འདུག་པས་བྲག་ཆའི་སྒྲ་ལ་གདབ་ལན་མ་བགྱིས། ལྷ་ཀླུའི་གུང་འཇིགས་མེད་རྣམ་རྒྱལ་མཐར་ཤིག་ནད་ཀྱིས་གྲོངས་ཞེས་པ་ལ་བརྟག་ན་བོད་ཀྱི་སྐུ་དྲག་ཟས་གོས་མཐུན་རྐྱེན་སྟོབས་འབྱོར་འཁོར་གཡོག་ཕུན་སུམ་ཚོགས་པ་དེ་ལྟ་བུ་ལ། སྤྲང་པོ་གོས་བརྗེ་རྒྱུ་མེད་པ་ལ་འབྱུང་ཉེའི་ཤིག་ནད་རྒྱབ་པ་འདི་མི་སྲིད་པའི་གཏམ་དུ་སྣང་བས་སུའི་རྣ་བར་འགྲོ། རྩིས་དཔོན་ལུང་ཤར་བ་མིག་འབྲས་བཏོན་པ་དང་བཙོན་ཁང་དུ་ལོ་ཤས་བསྡད་དགོས་བྱུང་བ་དེ་ནི་སྔོན་གྱི་ལས་དང་འཕྲལ་གྱི་སྤྱོད་པ་མ་གཟོ་བའི་རྐྱེན་ལས་བྱུང་བ་ཡིན་པ་ལས། ཁྱེད་ཅག་གིས་ཟེར་བ་ལྟར་རྙིང་ཆོས་ལ་ཞུགས་པ་དང་། དེའི་ལེ་ལན་གྱིས་རྒྱལ་ཆེན་ཤུགས་ལྡན་ཐུགས་མ་དགྱེས་ནས་ཆོ་འཕྲུལ་
བསྟན་པ་དང་ཆད་པ་བཅད་པ་བཅས་ཡིན་པར་ནམ་ཡང་མི་ལྟ་སྟེ། མདོ་ལས། ལུས་ཅན་དག་གི་ལས་རྣམས་ནི། བསྐལ་པ་བརྒྱར་ཡང་ཆུད་མི་ཟ། ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་དང་། རིན་ཆེན་ཕྲེང་བ་ལས། དགེ་བ་ལས་ནི་མཐོ་རིས་དང་། །དེ་བཞིན་བདེ་འགྲོ་ཐམས་ཅད་དོ། །མི་དགེ་བ་ལས་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་དོ། །ཞེས་དང་། ལུང་ཤར་བས་ཚོད་ལས་ཐལ་བའི་ཕྱག་ལས་རྒྱལ་ཁྲིམས་ལ་བཅོས་བསྒྱུར་དང་ཁྲལ་འགེལ་སྟངས་སོགས་ཉེས་ནས་རང་ཉིད་ལ་ཆད་པ་ཕོག་པ་སྟེ། ལེགས་བཤད་ལས། གཟུ་ལུམ་དག་གི་སྤྱོད་པ་ཡིས། །སྐྱོ་བམྱུར་དུ་རྒུད་པར་འགྱུར། །སྤྱི་བརྟོལ་ཅན་གྱི་གླང་རྒོད་ཀྱི། །གཅད་བྱ་མྱུར་དུ་མི་གཅོད་དམ། །ཞེས་གསུངས་པ་ལྟར་རོ། །དེ་ལྟར་ལྷམ་ལྕམ་
གཡང་འཛོམ་ཚེ་རིང་གི་ཞལ་གྱི་བདུད་རྩི་རྣམས་བཤད་གྲུབ་ནས་སླར་ཡང་། བཀའ་བློན་ཁྲི་སྨོན་པར་འཛུག་པར་འདོད་ནས་འདི་ས་ལྟར་བཀའ་བློན་ཁྲི་སྨོན་པ་ནོར་བུ་དབང་རྒྱལ་ཡང་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོའི་དུས་སུ་གཞུང་གི་ལས་འཛིན་ཐེག་པ་རིམ་འཛེགས་ཀྱིས རྩིས་དཔོན། དེ་ཐོག་ཏུ་ཐའི་ཇིའི་གོ་མིང་། དེ་ཐོག་ཏུ་ཐའི་ཇིའི་གོ་མིང་། དེ་ནས་ཆུ་བྱི་རྒྱ་དམག་མཐར་བསྐྲོད་སྐབས་བོད་དམག་ཡོངས་ཀྱི་སྤྱི་ཁྱབ་ཏུ་བསྐོ་སྩལ་སོགས་ལ་བྱས་རྗེས་གཟེངས་ཐོན་བྱུང་ཞིང་། དེ་རྗེས་མདོ་སྨད་སྤྱི་ཁྱབ་བཀའ་བློན་བྱམས་པ་བསྟན་སྐྱོང་འདས་ཚབ་མདོ་སྨད་སྤྱི་ཁྱབ་བཀའ་བློན་བཅས་སུ་རིམ་པར་བསྐོ་སྩལ་༜དང་འབྲེལ་ཆབ་སྲིད་ཀྱི་བྱ་བཞག་སྐོར་ལ་རྨད་དུ་བྱུང་བའི་མཁྱེན་རྒྱ་ཆེ་བ་དང་༧གོང་ས་སྐྱབས་མགོན་ཆེན་པོ་ཐུབ་བསྟན་རྒྱ་མཚོས་ཀྱང་རྗེས་བརྩེའི་ལྕགས་
ཀྱུས་འཛིན་པ་དེ་ལྟར་ཡིན་ཡང་། རྙིང་ཆོས་ལ་མོས་ཤིང་རྙིང་བླ་དུ་མའི་དྲུང་ནས་དབང་ལུང་ཁྲིད་གསུམ་མང་དུ་ཉན་ཏེ་ཉམས་ལེན་གྱི་མཐིལ་ལྟ་བུར་བཟུང་བར་བརྟེན་དགེ་ལྡན་བསྟན་པ་བསྲུང་བའི་དགྲ་ལྷ་རྡོ་རྗེ་ཤུགས་ལྡན་སྩལ་གྱི་ཐུགས་དང་འགལ་བར་གྱུར་པའི་དབང་གིས་མཐར། ཤེས་པ་རང་བཞིན་དུ་མི་གནས་པར་སྨྱོས་ཏེ་བཀའ་བློན་མིང་ཁུར་ཡོད་ཐོག །གཟིམ་ཤག་ནས་ཕྱིར་ཐོན་གྱིས་ལྷ་སའི་འོང་སྟོད་ཞིང་ཁའི་ཁྲོམ་གསེབ་ཏུ་བསྐྱོད་དེ། སྦུབ་ཆལ་སོགས་ཚོང་ཆས་སུ་བཞག་པའི་རོལ་མོ་ཡོད་རྒུ་བླངས་ནས་དཀྲོལ་བ་དང་། སྐབས་འགར་སྨད་དུ་ཤམ་ཐབས་དཀར་པོ་ཞིག་གྱོན་ཏེ། ཁྲོམ་གསེབ་ཏུ་བསྐྱོད་པ་དང་། ཉིན་གཅིག་སྨད་དུ་ཤམ་ཐབས་དཀར་པོ་ཞིག་དང་། དེའི་སྟོད་དུ་གཟན་དམར་པོ་ཞིག་གྱོན་ནས་རྒྱལ་ཚབ་རྭ་སྒྲེང་རིན་པོ་ཆེ་བཞི་སྡེར་བཞུགས་པའི་སྐ་མདུན་
དུ་བཅར་བར། རྒྱལ་ཚབ་རིན་པོ་ཆེས་སྐུ་རྩེད་ཀྱིས་དེ་རིང་ས་དབང་ཆེན་མོ་གཏེར་བཏོན་གྱི་ཆས་བཞེས་འདུག་ན། གཏེར་བཏོན་སུ་ཞུ་བ་དེ་ཡིན་ནམ། ཞེས་བཀའ་འདྲི་གནང་བར། ཁོང་རང་ལ་བུ་མང་པོ་ཡོད་སྟབས། ང་གཏེར་བཏོན་མི་གཏེར་གླིང་བ་ཟེར་བ་དེ་ཡིན། ཞེས་ཞུས་པ་སོགས་ལེགས་ཉེས་གསེར་དང་བོང་བ་མཉམ་ཉིད་དུ་རྟོགས་ཤིང་། སྨྱོ་སྤྱོད་རང་བྱུང་རང་གྲོལ་གྱི་ཉམས་རྟོགས་ཐང་མར་བརྡལ་བས་གང་བྱུང་ལམ་དུ་འཁྱེར་བའི་བརྟུལ་ཞུགས་ཞེ་ཁྲེལ་བའི་གནས་དག་བཟུང་བ་སྣང་ལ། སྐབས་དེར་སྐུ་ངོ་ཤུད་ཁུད་པ་ཁོང་གི་ལྕམ་ཁྲི་སྨོན་གྱི་སྲས་མོར་བརྟེན་བསྙུན་མནར་སྐབས་ཞབས་ཞུར་ཡོད་པ་དེས། སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་མཆོག་ལ་མི་ཆེན་པོའི་སྐུ་དྲག་སྨྱོ་བ་ལས་སྡུག་པ་མི་འདུག །བརྡུངས་ཀྱང་ཅུང་མི་
འགྲིགས། ཞུས་ཀྱང་མི་གསན་པར་འདུག །གཞན་ཞིག་ཡིན་ན་བསྡམས་བཀྱིགས་བརྡུང་བཏགས་སོགས་བྱས་ཆོག་པ་ལ། ཞེས་ཞུས་ཤིང་། ཁྲི་སྨོན་བསྙུན་མནར་སྐབས་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་བཀའ་བསྒོ་གནང་བར་གདན་འདྲེན་ཡང་ཞུས་འདུག །ཁྲི་སྨོན་ཉིད་ཀྱི་སྐུ་ཟླ་ཕྱི་མ་སྡེ་དགེ་ཐའི་ཇིའི་ལྕམ་ཞེས་པ་ཞིག་ཡོད་པ་དེས། ཁྲི་སྨོན་པའི་ཕ་མེས་ཀྱི་རྒྱུ་ནོར་ཅི་ཡོད་གང་བྱུང་གཏོར་སྐྱོན་བཏང་བས། སྲས་རྣམས་ཀྱང་གཟིམ་ཤག་ཏུ་བསྡད་བློ་མེད་པར་ཕྱྀ རང་སྐལ་བླངས་ནས་ཟུར་ཐོན་གྱིས་ཁྲི་སྨོན་ལྟེ་བར་རྒྱུ་ནོར་གྱིས་ཕོངས་པས་ཕྱོགས་ཀུན་ནས་བུ་ལོན་མང་དུ་བླངས་ཤིང་། ལས་དོན་གང་ཅིར་ལམ་ལྷོང་མ་བྱུང་བ་གཙང་ཁུལ་གྱི་ནུབ་གླིང་ཞེས་པའི་ཕ་གཞིས་ཀྱང་ཀུན་བདེ་གླིང་བླ་བྲང་དུ་གཏའ་མར་བཞག་སྟེ། བུ་ལོན་བླངས་དགོས་བྱུང་བ་སོགས་རྒུད་པའི་མཐའ་
ཅན་དུ་གྱུར་ཏེ་ཕྱི་མའི་ལྔ་ལམ་དུ་འཕོས་པར་གྱུར་ཏོ། །ད་དུང་བསྙད་པར་བྱ་བའི་ལོ་རྒྱུས་འགའ་ཞིག་མཆིས་ཀྱང་རེ་ཞིག་དེ་ཙམ།༽ཞེས་པ་ལ་བརྗོད་པ། བཀའ་བློན་ཁྲི་སྨོན་པ་ཁོང་རྙིང་བསྟན་ལ་གཅིག་ཏུ་མོས་པ་ཐུགས་ལ་འཁྲུངས་ཏེ་རྙིང་མའི་བླ་མ་མང་པོའི་དྲུང་ནས་དབང་ལུང་ཁྲིད་གསུམ་གསན་པ་དང་ཐུགས་དམ་ཉམས་བཞེས་ཀྱི་མཐིལ་གནང་བའི་རྒྱུ་དེས། ཤུགས་ལྡན་གྱི་ཐུགས་དང་འགལ་བར་གྱུར་པ་དེ་ལྟར་ན་ཤུགས་ལྡན་དེ་ཉིད་རྒྱལ་བའི་བསྟན་སྲུང་མ་ཡིན་པར་བསྟན་དགྲ་དངོས་གནས་ཡིན་པའི་ར་འཕྲོད་གསལ་པོ་བྱུང་བ་མ་ལགས་སམ། ལར་ཁྲི་སྨོན་པ་སྨྱོས་ཟེར་བ་འདི་འཁོན་༜ འཛིན་ཕྱོགས་རིས་ཀྱི་རྫུན་ཧམ་ཡིན་པ་མ་གཏོགས་དངོས་པོའི་གནས་ཚུལ་དང་མཐུན་པའི་བདེན་པའི་དག་དཔང་གང་ཡང་མི་འདུག་སྟེ། ཁྱོད་ཅག་ཁྲི་སྨོན་པ་
སྨྱོན་པ་ཡིན་པའི་སྒྲུབ་བྱེད་ཀྱི་རྟགས་བཀོད་རྒྱུ་འདི་ལྟར། ཤམ་ཐབས་དང་གཟན་བཞེས་པ་དང་། ཁྲོམ་དུ་བཤམས་པའི་སྦུབ་ཆལ་དཀྲོལ་བ། རྒྱལ་ཚབ་རྭ་སྒྲེང་རིན་པོ་ཆེའི་སྐུ་མདུན་དུ་ཐུགས་འདྲིས་ཆེ་གཤིས་ནང་ལུགས་སྐུ་རྩེད་ཀྱི་ཞལ་འཕྲོས་མཛད་པ་ཙམ་ལས་གཞན་ཅི་ཡང་མེད་པ་འདིས། དམ་བཅའ་དེ་བྱེ་མའི་ཆངས་བུ་བཞིན་རང་ཞིག་ཏུ་སོང་གདའ་འོ། །ཁྲི་བྱང་རིན་པོ་ཆེ་དང་ཤུད་ཁུད་ལྕམ་ལྷན་རྒྱས་ནས་ཞབས་པད་ཁྲི་སྨོན་པ་སྨོས་པར་གཟིགས་པ་ལས་ལྩ གཞན་ལ་དེ་འདྲའི་ལོ་རྒྱུས་མི་འདུག་པར་མ་ཟད། མཐར་མེ་གླང་ལོ་མགོར་དགུང་ན་མཐོ་ཕེབས་ལ་བརྟེན་ལས་ཞབས་ཆབས་ཅིག་དགོངས་པ་ཞུས་པ་ལས། སྨྱོ་ནས་ཞུས་པའི་ལོ་རྒྱུས་དབེན། དེ་ལ་གཞུང་ནས་ལེགས་སྐྱེས་སྩལ་བ་དང་བཅས་བཀའ་བློན་ཟུར་བཞུགས་གནང་བ་ཡིན་འདུག །འདི་མི་བདེན་བསམ་ན་
ཁྲི་སྨོན་པ་རང་གི་ཚ་བོ་ཡིན་པ་ཞྭ་སྒབ་པ་དབང་ཕྱུག་བདེ་ལྡན་གྱིས་བསྒྲིགས་པའི་རྒྱལ་རབས་ལ་ལྟོས་དང་གསལ། ཡང་ལྟ་བ་མཉམ་པ་ཉིད་དང་། སྤྱོད་པ་རང་གྲོལ་གྱི་ཉམས་རྟོགས་ཐང་མལ་བརྡལ་བས་ཞེས་བསྔགས་བརྗོད་བྱས་པ་དང་། དེ་མ་ཐག་བརྟུལ་ཞུགས་ཞེ་ཁྲེལ་བའི་གནས་བཟུང་ཞེས་སྨོད་པའི་ཚིག་ཁ་གཅིག་ལྕེ་གཉིས་ཀྱིས་དངོས་འགལ་འདི་དག་ལ་ལྟོས་དང་ཁྱོད་རང་ཤེས་པ་རང་བཞིན་དུ་མི་གནས་པའི་ཞད་ཅིག་འདུག །སྤྱིར་ཡང་ཞབས་པད་ཁྲི་སྨོན་པ་ལྟ་བུ་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོའི་ཐུགས་དགོངས་དང་མཐུན་པའི་གཞུང་ས་དགའ་ལྡན་ཕོ་བྲང་པ་ཆེན་པོའི་སྲིད་དོན་༜ཞབས་འདེགས་སྒྲུབ་ཕྱོགས་སྐོར་མཁྱེན་རླབས་དང་ལྡན་པས་སྔ་ཕྱི་བར་གསུམ་བྱས་རྗེས་གཟེངས་ཐོན་པ་བྱུང་བའི་སྤ་དར་ནུབ་གླིང་གཞིས་ཁ་སྩལ་བ་བཅས།
དེ་འདྲའི་དཔའ་བོ་ཞིག་ལ་ཤུགས་ལྡན་གྱིས་ཆད་པས་བཅད་འོས་ན་སྔར་བརྗོད་པ་ལྟར་རྒྱལ་ཆེན་ཤུགས་ལྡན་དེ་ཉིད་གཞུང་ས་དགའ་ལྡན་ཕོ་བྲང་པའི་ཆོས་སྲིད་ལ་གནོད་པའི་འདྲེར་ཆེ་བའི་རྟགས་མཚན་ཡང་དག་པ་མ་ཡིན་ནམ། ཁྲི་སྨོན་པ་ལོངས་སྤྱོད་སྔར་ཡོད་བསགས་མཐར་འཛད་པའི་ཆོས་ཉིད་ལས་མ་འདས་ཤིང་། རྗེས་སོར་དབུལ་པོར་གྱུར་པ་ནི་རང་གི་སྔོན་བསགས་སེར་སྣའི་དབང་གིས་ཡིན་པ་འབྲས་བུའི་རྟགས་ཀྱིས་རྒྱུ་དཔགས་ནུས་པ་ལས། ཁྱེད་ཅག་གི་ཁྱབ་ཆུང་གུ་དོག་གི་འདོད་གཏམ་ལྟར་བོད་ཆུང་ངུ་ལྷ་སའི་གྲོང་ཁྱེར་ཙམ་ལ་གནས་པའི་སྐུ་དྲག་གོ་གནས་ཅན་ཉུང་ཤས་ཅིག་ལ་སྐྱིད་སྡུག་ལེགས་ཉེས་འབྱོར་རྒུད་ཚེ་རིང་ཐུང་ལ་སོགས་བཟང་ངན་ཅི་བྱུང་ཐམས་ཅད། རྒྱལ་ཆེན་ཤུགས་ལྡན་ཐུགས་དགའ་བ་དང་མ་དགའ་བ་ཁོ་ན་ལས་བྱུང་བར་བཤད་པ་
དེ་ཚོ་ཞིབ་ཏུ་བརྟགས་ན་མུ་སྟེགས་དངོས་པོར་སྨྲ་བའི་གྲུབ་མཐའ་དབང་ཕྱུག་རྒྱུར་སྨྲ་བ་དང་ཁྱད་པར་འགའ་ཡང་མ་མཆིས་པས། སངས་རྒྱས་ཐུབ་པ་མཆོག་གི་བསྟན་པའི་ཁྱད་ཆོས་རྒྱུ་འབྲས་བསླུ་བ་མེད་པའི་གནས་དང་འཛམ་གླིང་ལས་ཀྱི་ས་པ་ཞེས་པའི་དོན་ལས་འགོང་ནུས་པ་སྙིང་ཁམས་ཆེ། ད་དུང་བསྙད་པར་བྱ་རྒྱུ་ཡོད་ཟེར་བ་དེ་གོང་དུ་བཤད་པ་ཚོ་དང་ཆོ་འདྲ་ལས་མེད་ན་ནི་རང་གི་ནང་ཆ་སྟོན་པ་ཙམ་དུ་ཟད། དེ་མིན་ཆོས་མཐུན་བཟང་པོ་ཀུན་ལ་སྨན་ཡོན་དུ་གྱུར་པ་དེ་འདྲ་བདོག་ན་ནི་ངེས་པར་གསུང་དུ་གསོལ། ད་ནི་དེབ་སེར་པོ་དེའི་མཇུག་གི་དོན་ཚིགས་བཅད་རིང་པོ་འདི་ལྟར། སྨྲས་པ། མདོ་རྒྱུད་བཞིན་དུ་ཆོས་འདུལ་ལམ་གྱིས་དུལ་བར་སྤྱོད་ཅིང་གསང་ཆེན་ཐེག་པས་སྙིང་ལ་བདུད་རྩིའི་མཆོག་དངར་བའི། །འཁྲུལ་བྲལ་གསེར་
སྦྱངས་དོ་ཀེར་གཡོ་བའི་གྲུབ་མཐའི་རང་སྲོལ་བསམ་འཕེལ་ནོར་ནི་སྙིང་ལ་ཉེ་བའི་དཔལ་འཛིན་ན། །གང་གི་ཕྲིན་ལས་ཆར་དུ་བསྙིལ་ཡང་བག་མེད་འཆོལ་བའི་ཙིཏྟའི་གཤེད་དུ་རྡོ་རྗེའི་ཐོག་གི་མཚོན་འབེབས་པའི། །མཐུ་ལྡན་གཙོ་བོ་རྡོ་རྗེའི་ཤུགས་ལྡན་མཛའ་བའི་གྲོགས་སུ་ཉེ་བར་བསྙེན་ལ་རྒུད་པའི་སྣང་བ་དབྱིངས་སུ་ཡལ། །སྙིང་གི་ཟེ་འབྲུའི་དཔལ་དུ་ཆེ་བའི་ཕ་གཅིག་བླ་མའི་མཁྱེན་ཟབ་ཆུ་གཏེར་འཕྱུར་བའི་རླབས། །ཆོས་དབྱིངས་མཁའ་ལ་སྒྱ་མ་ཇི་བཞིན་ཕུང་པོར་བྱས་པའི་རྟོགས་བརྗོད་ནམ་མཁའི་གཉིས་འཐུང་ནི། །འཇིགས་དང་དཔའ་བའི་དྲག་ཤུལ་གློག་གི་གྱ་གྱུའི་དོ་ཤལ་རིང་དུ་འཕྱང་བའི་ལྟོ་བ་ནས། །ངོ་མཚར་ཚིག་ཕྲེང་སྣ་ཚོགས་གདངས་སུ་རྣམ་པར་འཕྲུལ་པའི་སྒྲ་བརྒྱའི་དབྱངས་དག་འདི་ན་སྒྲོག །འདི་ལས་ཐོབ་པའི་ལེགས་བྱས་ཆ་ནི་ར་རིས་བྲལ་བའི་
ཡོངས་རྫོགས་ཟླ་བཞིན་འབུམ་ཕྲག་སྣང་བ་རབ་དཀར་བས། འཁྲུལ་བྲལ་ཡང་དག་ཚད་མའི་ལམ་དུ་ལུང་རིགས་གསེར་གྱི་བྱེ་མ་འདྲེན་པ་དག་གཙང་གངྒཱའི་རྒྱུན་བཟང་གིས། རྨོངས་དང་ཡིད་གཉིས་ལོག་པའི་དྲི་མ་དྲུང་ནས་འབྱིན་སླད་བདུད་རྩིའི་ཁམས་སུ་རིང་ནས་འབབ་པ་ཚངས་པའི་ཀླུང་། །བློ་བཟང་སྙན་བརྒྱུད་མཆོག་གི་རྒྱུན་འདིས་ཕྱོགས་ཀྱི་མུ་ལ་གདུང་བ་གཞིལ་བའི་ཤིས་པ་རྒྱ་མཚོས་ཁྱབ་གྱུར་ཅིག །༽ཞེས་པ་ལ་བརྗོད་པ། འདིའི་རྐང་པ་བཞི་པའི་དོན་ཤུགས་ལྡན་མཛའ་གྲོགས་སུ་བསྟེན་ན་རྒུད་པ་མེད་ཟེར་བ་མི་འཐད་དེ། ཤུགས་ལྡན་མཛའ་བའི་གྲོགས་སུ་མ་ཟད་འདྲེན་པའི་༜སྐྱབས་ཀྱི་མཆོག་ཏུ་བསྟེན་མཁན་རྣམས་ལའང་རྒུད་པ་སོགས་མི་འདོད་སྣ་དགུ་ཐོག་ཏུ་བྱུང་བ་གོང་དུ་བཤད་པ་ལྟར་ལགས་པས་མངོན་སུམ་ཚད་མས་གནོད་
དོ། །རྐང་པ་ལྔ་པའི་དོན་ཕ་བླ་མའི་མཁྱེན་པའི་རླབས་འཕྱུར་བ་གོང་དུ་དགག་ཟིན་པའི་མ་དག་ཁུངས་མེད་གཏམ་ཉོབ་དེ་རྣམས་ལ་བསྔགས་འོས་སུ་ཇི་ལྟར་རུང་། རྐང་པ་དྲུག་པའི་དོན་རྟོགས་བརྗོད་ཀྱི་དཔེ་མཁའ་ལ་སྒྲ་མའི་ཕུང་པོ་བཀོད་པ་བདེན་པ་མེད་རང་གིས་ཀྱང་ཁས་བླངས་པ་མ་ཡིན་ནམ། རྐང་པ་བདུན་པ་ཡི་དྭགས་མཁའ་རྒྱུའི་འབྱུང་གདོན་ལ་ཤུགས་ལྡན་དུ། བདེན་ཞེན་གྱིས་བླུན་པོ་རྣམས་ལ་འཇིགས་སྣང་སྐྱེད་པ་མཁྱེན་ལྡན་གྱིས་ཁྲེལ་བའི་གནས་སོ། །རྐང་པ་བརྒྱད་པ་ངོ་མི་མཚར་བའི་དོན་ལ་ངོ་མཚར་དུ་འཛིན་པ་བླུན་པོའི་རང་རྟགས་སུ་བཤད། རྐང་པ་དགུ་པ་ཆགས་སྡང་རང་གའི་གཏམ་འདི་བརྗོད་པ་ལ་ལེགས་བྱས་བསོད་ནམས་ཐོབ་པར་འདོད་པ་ལས་འབྲས་ལ་རྨོངས་པ་སྟེ། འཕགས་པ་ཀླུས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་
ནི་མི་དགེ་བའོ། །ཞེས་གསུངས་པས་མི་དགེ་བ་བསྔོ་རྒྱུར་བྱ་བ་སངས་རྒྱས་པ་ལ་མ་གྲགས། རྐང་པ་བཅུ་པ་ནོར་འཁྲུལ་ཅན་མ་དག་པའི་འཆལ་གཏམ་འདི་འདྲ་འཁྲུལ་བྲལ་ཡང་དག་ཚད་མའི་ལམ་དུ་བཟུང་བ་མ་བརྟགས་ཉམས་དགའ་ཙམ་དུ་ཟད། རྐང་པ་བཅུ་གཅིག་པ་བསྟན་བཅོས་ལོག་སྨྲ་ངན་པ་འདིས་རང་གཞན་གྱི་རྨོངས་པ་དང་ཐེ་ཚོམ་ལོག་རྟོག་བཅས་ཀྱི་དྲི་མ་སེལ་བ་ལྟ་ཅི། དུག་ལ་བདུད་རྩིར་ཞེན་ནས་ཐར་བའི་སྲོག་རྩ་གཅོད་པའི་སྒྱུ་ཐབས་ཙམ་མོ། །རྐང་པ་ཐ་མ་དེབ་འདིའི་ཐོག་མཐའ་བར་གསུམ་དུ་རྗེ་བདག་ཉིད་ཆེན་པོའི་སྙན་བརྒྱུད་ཀྱི་བརྗོད་བྱ་རྗོད་བྱེད་ཀྱི་ཤས་ཙམ་ཡང་མེད་པ་ལ། ཁྱོད་ཀྱིས་བློ་བཟང་སྙན་བརྒྱུད་མཆོག་འདིས་ཞེས་ངེས་བཟུང་དང་བཅས་ཏེ་བཀོད་པ་འདི། དུས་དང་གནས་སྐབས་ངན་པ་འདི་འདྲར་ལྟར་སྣང་བརྡོལ་ཐབས་
ཀྱི་སྐད་ཆ་ལ་བློ་མིག་མ་ཞར་བ་རྣམས་ཀྱིས་སྙིང་པོ་མེད་པ་སྨྲིག་རྒྱུའི་ཆུ་ལ་འགྲམ་ཆུ་ནམ་ཡང་ལྡང་མི་སྲིད་དེ། འཇམ་མགོན་གུ་ཎས། དུས་དང་སྐལ་བ་བཤད་བྱའི་དོན་དང་གསུམ། །མཚུངས་པར་བབས་པས་བརྡོལ་ཐབས་འབྱུང་མོད་ཀྱི། །བློ་ལྡན་ངེས་དོན་བདུད་རྩིའི་ཟས་ཅན་རྣམས། །ལྟར་སྣང་སྨྲིག་རྒྱུའི་ཆུ་ལ་སྲེད་མི་སྲིད། །ཅེས་གསུངས་པ་ལྟར་རོ། །དེ་ནས་དེབ་ཀྱི་མཛད་བྱང་འདི་ལྟར། ཅེས་མཐུ་དང་སྟོབས་ཀྱིས་ཆེ་བའི་བསྟན་སྲུང་ཆེན་པོ་རྡོ་རྗེ་ཤུགས་ལྡན་རྩལ་གྱི་བྱུང་བ་བརྗོད་པ་ཕ་རྒོད་བླ་མའི་ཞལ་གྱི་བདུད་རྩིའི་ཆུ་ཁུར་བརྩེགས་ཤིང་འཇིགས་རུང་གློག་ཞག་འགྱུ་བའི་སྤྲིན་ནག་འཁྲུགས་པའི་ང་རོ་ཞེས་བྱ་བ་འདི་ནི། རྡོ་རྗེ་ཤུགས་ལྡན་རྩལ་གྱི་གསང་གསུམ་རྨད་དུ་བྱུང་བའི་རྟོགས་པ་བརྗོད་པའི་གཏམ་དུ་བྱ་བ་དམ་ཅན་རྒྱ་མཚོ་དགྱེས་པའི་རོལ་མོའི་ནང་དུ་
གསལ་བར་མ་གསུངས་པའི་ལོ་རྒྱུས་ངོ་མཚར་ཅན་རྣམས་ཕ་བླ་མ་བཀའ་དྲིན་མཚུངས་མེད་སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོས་ཞོར་འཕྲོས་ཀྱི་ཚུལ་དུ་སྔ་ཕྱིར་བཀའ་སྩལ་བ་རྣམས་བརྗེད་དུ་ཕངས་པས་ཟིན་ཐོར་བཀོད་པ་རྩ་བར་བཟུང་། ཁུངས་ལྡན་གཞན་ནས་རྙེད་དང་། མངོན་སུམ་མཐོང་ཆོས་སུ་གྱུར་པ་རྣམས་ཀྱིས་ཟུར་བརྒྱན་ཏེ། ཆོས་སྐྱོང་ཆེན་པོ་འདི་ཉིད་ཀྱིས་ཁོ་བོ་ཅག་ཆེས་ན་ཚོད་ཕྲ་མོའི་དུས་སུའང་ཛེ་སྨད་བློ་བཟང་འཕྲིན་ལས་རྣམ་རྒྱལ་གྱི་སྐྱེ་བར་བཏགས་པའི་ཐ་སྙད་ཀྱི་མེ་ཏོག་འཐོར་བ་དང་། རྣོ་ངར་འབར་བའི་གྲི་རིང་ཞིག་ཡི་གེ་དབུ་ཅན་ཞྭ་ཡིག་གི་རྣམ་པར་བཀུག་སྟེ་དམ་ཚིག་གི་རྟེན་དུ་སྦྱིན་པའི་ལེགས་ཚོགས་ཀྱི་སྒོ་འཕར་དབྱེ་བ་ནས་བཟུང་། ལུས་ཀྱི་གྲིབ་མ་གཉིས་པའི་རང་བཞིན་དུ་རྟག་ཏུ་འགྲོགས་ཏེ་རྣམ་བཞིའི་འཕྲིན་
ལས་ཀྱིས་བསྐྱངས་པའི་མཚན་མ་སྣ་ཚོགས་པ་ཉམས་སུ་མྱོང་བ་ལ་བརྟེན་ནས་འདི་ཉིད་འབྲི་བ་ལ་འདུན་པའི་སྤྲོ་བ་ཆེན་པོས་ཡིད་དབང་མེད་དུ་བསྐུལ་ཏེ་རིགས་བརྒྱའི་ཁྱབ་བདག་འཁོར་ལོའི་མགོན་པོ་སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོའི་དྲུང་ནས། འདི་ཉིད་ཀྱི་ཉེ་བརྒྱུད་ཐུན་མོང་མ་ཡིན་པའི་སྲོག་དབང་ཟབ་མོ་ནོད་ཅིང་། ལས་བསྙེན་ཚུལ་བཞིན་དུ་བགྱིས་པ་དང་། ཁྲིད་ལུང་མན་ངག་གནད་ཟབ་མོ་རྣམས་རྫོགས་པར་ཐོབ་པའི་དམ་ལྡན་རྣལ་འབྱོར་སྤྱོད་པ། རི་བོ་དགའ་ལྡན་པའི་བསྟན་པ་ལ་ཤེས་ནས་མོས་པ་ཐོབ་པའི་ཤཱཀྱའི་དགེ་སྦྱོང་དགའ་ལྡན་ཤར་རྩེ་ཛེ་སྨད་སྤྲུལ་མིང་པ་བློ་བཟང་དཔལ་ལྡན་བསྟན་འཛིན་ཡར་རྒྱས་སུ་འབོད་པའི་སྙོམས་ལས་པས། རབ་རྒྱལ་ཐུན་མོང་ཞེས་པ་ལྕགས་ཕོ་ཁྱི་ལོའི་གྲོ་བཞིན་ཟླ་བའི་དམར་ཕྱོགས་རྫོགས་པ་གསུམ་པའི་ཉིན་འཕགས་
ཡུལ་མ་དྷི་པར་ངྷི་ཤའི་ཁོངས། པ་ཆ་མ་རི་ཞེས་མ་ཧཱ་དེ་ཝཿས་སྒྱུ་འཕྲུལ་གྱི་བཀོད་པ་དུ་མ་བསྟན་པའི་གནས་སུ་གྲགས་པའི་སར་རང་ཤག་གར་འདུག་སྐྱིད་པའི་གྲོང་ཁྱེར་དུ་ཟླ་བསྐང་བགྱིས་པའི་ཚེ་མཇུག་གྲུབ་པར་སྦྱར་བ་འདིས་རི་བོ་དགེ་ལྡན་པའི་བསྟན་པ་ཕྱོགས་ཀུན་དུ་དར་ཞིང་རྒྱས་པར་གྱུར་ཅིག་གུ། ཅེས་པ་ལ་བརྗོད་པ། ཛེ་སྨད་པས་ཡང་བསྐྱར་ཕ་རྒོད་བླ་མའི་ཞལ་གྱི་བདུད་རྩི་སྩལ་བ་བརྗེད་དུ་ཕངས་པས་རྩ་བར་བཟུང་ཟེར་བ་འདི་ལ་བསམ་ན་རྟོགས་བརྗོད་དམ་ཅན་རྒྱ་མཚོ་དགྱེས་པའི་རོལ་མོ་ཞེས་པ་ལའང་འགལ་དང་མ་འབྲེལ་དོན་ལ་མི་གནས་པ་མང་པོ་མཆིས་ནའང་འདིར་ཡི་གེས་འཇིགས་ནས་མ་བྲིས། ཤུགས་ལྡན་རྟོགས་བརྗོད་མ་བུ་གཉིས་ཀའི་ནང་དུ་ཤུགས་ལྡན་གྱི་འཁོར་བཙན་རྒོད་གཡུ་དམར་རྒྱལ་ཆེན་དང་། ཁ་ཆེ་དམར་
པོ་ཟེར་བ་གཉིས་ཀྱི་སྐྱེ་རྒྱུད་ལབ་རྒྱུ་མ་རྙེད་འདུག་པ་འདིས་དམ་ཅན་རྒྱ་མཚོ་ལྟ་ཞོག་ཤུགས་ལྡན་ཁོ་རང་གི་གཙོ་འཁོར་ཡང་མ་ཚང་བས་དེ་དག་དགྱེས་པའི་རོལ་མོ་ཡང་ཕྱོགས་རེ་ཉི་ཚེ་བ་ཙམ་དུ་གྱུར་ལ། ཁུངས་ལྡན་གཞན་ནས་རྙེད་པ་དང་ཟེར་ཡང་། གོང་དུ་ཁུངས་སོ་སོའི་སྐབས་སུ་ཐད་ཀར་དགག་བཞག་བགྱིས་གྲུབ་ཅིང་། མངོན་སུམ་མཐོང་ཆོས་སུ་གྱུར་པས་ཟུར་བརྒྱན་ཟེར་བ། རབ་རིབ་ཅན་གྱིས་སྐྲ་ཤད་ལྟར་མ་དག་པར་མཐོང་བ་ཡིན་ཚོད་འདུག་པས་ཡིད་རྟོན་དཀའ། རྩོམ་པ་པོ་རང་ཉིད་ཐོག་མར་ཤུགས་ལྡན་གྱིས་སྤྲུལ་སྐུར་མཚན་བཏགས་པ་དེ་ནི་བོད་ཀྱི་སྐྱེ་སྤྲུལ་གཞན་ལྟར་ལྷ་བླས་ལུང་བསྟན་པ་དང་། རྟེན་མཆོག་དྲུང་དུ་བརྟག་སྒྲིལ་འཕང་པའམ། ཡང་ན་རང་གི་སྔོན་གནས་སྐྱེ་བ་དྲན་ཏེ་ངོས་འཛིན་གནང་སྲོལ་གྱི་ལུགས་ལས་ལྡོག་སྟེ་ཟ་འདྲེ་ཕུང་སྲི་ཁོག་བརླམས་
ཀྱིས་ངོས་བཟུང་བྱས་ཚུལ་ལ་གཞིག་ན་གང་གི་སྤྲུལ་པ་ཡིན་འཕྱང་མོ་ཉུག་ཏུ་གྱུར། གྲི་རིང་བཀུག་ནས་བྱིན་པ་དེ་ལེགས་ཉེསགང་གི་སྒོ་འབྱེད་ཀྱི་རྟེན་འབྲེལ་ཡིན་ཆ་མི་ཐོག དེ་ནས་བཟུང་སྟེ་རྒྱལ་འགོང་ལུས་གྲིབ་ལྟར་འགྲོགས་ནས་ལས་བཞིའི་ཕྲིན་ལས་སྒྲུབ་པའི་མཚན་མ་མཐོང་ཚར་རྗེས་གཟོད་འདིའི་སྲོག་གཏད་ཞུས་པ་ལ་དགོས་པ་ལྷག་པོ་ཅི་ཡོད། ལར་མ་མཐོང་མཐོང་ཚུལ་གྱི་མི་ཆོས་བླ་མའི་རྫུན་གྱིས་རབ་བྱུང་གི་སྡོམ་པ་འཇིག་པའི་རྐྱེན་བྱས་པ་མ་འཚལ་ལམ། ཡང་ན་མི་མ་ཡིན་རྟག་ཏུ་མཐོང་བ་བདེན་ན་ལུས་མ་བོར་བར་ལྷ་འདྲེ་མ་རུང་བའི་འཁོར་དུ་སྐྱེས་ནས་སྤྱོད་ལམ་གཅིག་ཏུ་གྱུར་པ་ལས་འོས་ཅི་ཡོད། ཉེ་བརྒྱུད་ཐུན་མིན་གྱི་དབང་ཞུས་པ་ལ་ཞིབ་པར་དཔྱད་ན། རིང་བརྒྱུད་དང་ཉེ་བརྒྱུད་གཉིས་ཀ་བཞག་ཏུ་མེད་དེ། དང་པོ་རྒྱལ་བ་
རྡོ་རྗེ་འཆང་། སྟོན་པ་ཤཱཀྱའི་རྒྱལ་པོ། སློབ་དཔོན་མཚོ་སྐྱེས་རྡོ་རྗེ། དཔལ་ཨ་ཏི་ཤ། རྗེ་ཙོང་ཁ་པ་ཡབ་སྲས་སོགས་ནས་བརྒྱུད་པའི་ཤུགས་ལྡན་དང་སྒྲུབ་ཐབས་ཡིག་ཆ་བཅས་རི་རྭ་བཞིན་ཡིན། གཉིས་པ་ཉེ་བརྒྱུད་ཀྱང་མེད་དེ། ཕྱི་དུས་ཕ་བོང་ཁ་པས་མཛད་པའི་སྲོག་གཏད་དེའི་ཁུངས་གཏུགས་ས་ནི་སྟག་ཕུ་པདྨ་བཛྲ་གྱི་རྨི་ལམ་དུ་དགའ་ལྡན་གནས་སུ་འདུལ་འཛིན་གྲགས་པ་རྒྱལ་མཚན་བཞུགས་པ་རྨིས་གསུངས་པ་ལས་དབང་དང་གདམས་པའི་འཕྲོས་སྦྲང་སྐད་ཙམ་ཡང་མི་སྣང་བས་ཕ་བོང་ཁ་པ་དང་ཁྲི་བྱང་རིན་པོ་ཆེ་དཔོན་སློབ་ཤུགས་ལྡན་སྐུ་དངོས་ཡིན་པའི་དབང་དུ་བཏང་ནས་ཉེ་བརྒྱུད་ཐོབ་པའི་མིང་འདོགས་མཛད་ན་ལས་གཞན་ཉེ་བརྒྱུད་མི་འགྲུབ་བོ། །འདི་ལ་བསྙེན་པ་བསྐྱལ་བ་ཡང་བཀའ་གདམས་རིང་ལུགས་གཙང་མའི་ལྟ་གྲུབ་མ་ལགས་ཏེ། ཇོ་བོ་བཀའ་
གདམས་པ་རྣམས་ཆོས་ཚུགས་གཏམ་ལ་མ་སྐུར། ལོངས་སྤྱོད་ལོག་འཚོས་མ་བསྒྲུབ། བསྙེན་པ་འདྲེ་ལ་མི་བསྐྱལ། ནོར་ཕྱིར་ཆོས་མི་གཏོང་། ཆོས་ཀྱིས་གཏམ་མི་ཉོ། ཞེས་གསུངས་པ་མ་ཡིན་ནམ། དམ་ལྡན་རྣལ་འབྱོར་དུ་ཁས་འཆེ་བ་མི་རིགས་ཏེ་གོང་དུ་བཤད་པ་ལྟར་སྡོམ་པ་གསུམ་གྱི་བཅས་མཚམས་ལས་འགལ་བའི་ཉེས་ལྟུང་གི་ཁུར་ཆེན་གྱིས་ནོན་ནས་བཤགས་པ་དང་། ལསམྱོང་ནས་ཟད་པ་མེད་བཞིན་ད་དུང་དམ་ལྡན་ཞེས་བདག་ལ་བསྟོད་པ་ནི་མངོན་པའི་ང་རྒྱལ་ཙམ་མོ། །དགའ་ལྡན་པའི་བསྟན་པ་ལ་ཤེས་ནས་མོས་པ་ཐོབ་པར་ཁྱོད་མ་ཟེར་ཅིག ཅིས་ཤེ་ན། རྗེ་ཙོང་ཁ་པས་རྙིང་༉ མ་བཀག་པ་མེད་ཅིང་རྫོགས་ཆེན་ཆོས་རྣམ་དག་ཏུ་བཞེས། དེའི་གསུང་སྐྱེས་མཁས་གྲུབ་རྗེས་རྙིང་མ་སྒྲུབ་བྱེད་ཀྱི་བསྟན་བཅོས་ཀྱང་ཡོད་ན། ཁྱོད་དེ་དག་
ལས་ཀྱང་རྣམ་དཔྱོད་ཆེ་བའི་དབང་རྣོན་ཆོས་རྗེས་སུ་འབྲང་བ་ཞིག་དེང་སང་ཕྱོགས་འདིར་བྱོན་ནས། སྔོན་གྱི་རྗེ་དགེ་འདུན་གྲུབ་པ། པཎ་ཆེན་བློ་བཟང་ཆོས་རྒྱན། གོང་ས་ལྔ་པ་ཆེན་པོ་སོགས་དབང་རྟུལ་དད་པའི་རྗེས་འབྲང་དུ་སྒྲབས་ཤིག་དང་། གཟོད་ཤེས་ནས་མོས་པ་ཐོབ་པའི་གྲངས་སུ་ཚུད་སྲིད། ཤཱཀྱའི་དགེ་སྦྱོང་དུ་འཛེམ་བག་ཙམ་ཡང་མེད་པར་སྨྲས་པ་འདི་ལ་བརྟག་ན། ངེས་འབྱུང་གིས་བསྐུལ་ཏེ་རབ་ཏུ་བྱུང་ཞིང་ལྟུང་བ་སྡེ་ལྔའི་བཅས་མཚམས་ལས་མ་འགལ་བ་འདྲ་མཆིས་ན་ནི་ངོ་མཚར་ཆེ་མོད། དེ་མིན་ནང་དུ་ཆགས་སྡང་དང་ཆོས་བརྒྱད་ཀྱི་ཀུན་སློང་གཞིག་ཏུ་མེད་པ་འཆང་ཞིང་གཞན་སྨོད་ཀྱི་ཚིག་ཟུར་རྣོན་པོ་ཚེར་མ་ལྟར་འཛུག་ཅིང་ཕྱི་ཡི་གཟུགས་བརྙན་ཚུལ་འཆོས་དང་གཡོ་སྒྱ་བསླུ་བྲིད་ངོམས་པ་ཅན་ལ་ཡ་མཚན་མི་སྐྱེ་སྟེ། པཎ་ཆེན་བློ་བཟང་ཆོས་རྒྱན་
གྱིས། ཆགས་སྡང་བརླང་པོའི་ཐུགས་རྒྱུད་ཞོ་འཐུང་བུའི། །རུས་པར་འགྲན་ཀྱང་གསུང་འཇམ་ཞི་དུལ་ཅན། །ངུར་སྨྲིག་གིས་མཛེས་ཚེར་མ་དར་གཏུམས་བཞིན། །འཕྱོན་མའི་རྣམ་ཐར་ཚུལ་ལ་བདག་མི་དགའ། ཞེས་དང་ཀུན་མཁྱེན་འཇིགས་མེད་གླིང་པས། ངེས་འབྱུང་བྲལ་བའི་དྲང་སྲོང་རྒྱལ་མཚན་ནི། །མཚམས་ཀྱི་སྤྲིན་པས་རྔོན་པ་ལ་བགོས་བཞིན། །ཁྲིམས་ཀྱི་གཟུགས་བརྙན་ལྟང་བྱེད་ཆེན་པོའི་གཡང་། །ཐར་པ་འདོད་པའི་སེམས་ཀྱིས་ཉེ་བར་སྲུངས། །ཞེས་གསུངས། ལར་ཡང་དགེ་སྦྱོང་དུ་ཁས་འཆེ་བས་འགངས་ཆེ་ན་སྔོན་དགེ་སློང་ལྷ་ཆེན་པོའི་ལོ་རྒྱུས་ཀྱིས་ཤེས་པར་འགྱུར། དེབ་རྩོམ་ཡུལ་ལ་མ་དྷེ་པར་ངྷི་ཤ་ཞེས་པ་མ་དག་སྟེ། ཡུལ་ཕྱོགས་དེའི་མིང་ལ་རྒྱ་གར་སྐད་དུ་མ་ངྷ་པར་དེ་ཤ་ཞེས་བྱ་བ་དེ་ཉིད་བོད་སྐད་དུ་བསྒྱུར་
ན། དབུས་ཕྱོགས་མངའ་སྡེ་ལ་འཇུག་པ་དང་། གྲོང་སྡེའི་མིང་དུ་པ་ཆ་མ་རི་ཞེས་པའང་འབྲེལ་མེད་ཀྱིས་སྒྲ་ཚིག་སྤྱི་བརྟོལ་དུ་སྣང་། དེབ་སེར་པོ་དེ་བརྩམས་པའི་མཇུག་བསྡུ་བའི་ཚེས་གྲངས་ཟླ་བ་ཟད་པའི་གནམ་སྟོང་ཉིན་ཟླ་གསོལ་དང་ཆབས་ཅིག་རྫོགས་པར་བྱས་པའང་། ཀུན་རྫོབ་བདེན་པ་གཙུག་ལག་རྩིས་ཀྱི་ལྡན་འབྲས་བཟང་ངན་ཙམ་ཡང་ལྟ་མ་ཤེས་པར་ད་དུང་བསྟན་བཅོས་རྩོམ་པ་དགོད་བྲོ། དེ་ཡང་རྩིས་ཀྱི་འབྲས་བཤད་ལས། སྟོང་ཆེན་ལ་ནི་ལག་སྟོང་ཚེས་ཉི་སྟེ། །དགྲས་བཅོམ་ཁ་མཆུ་ཁ་སྨྲས་འབྱུང་བར་འགྱུར། །ཞེས་དང་། གནམ་གང་ལ་གཏོ་མི་བྱ། ལྷ་འདྲེས་ཡས་མི་ལེན་ཞེས་བཤད་པའི་ཉིན་འདིར་གདུག་འདྲེའི་ཟླ་བསྐང་བཏང་བ་དེ་ཡང་། གཏོར་ཟན་ཆུད་ཟོས་པ་ལས་མ་མཆིས་སྙམ་མོ། །དེབ་སེར་པོ་དེའི་ནང་དུ་ཡི་གེ་མ་དག་པ་མང་པོ་འདུག་པ་
རྣམས་སོར་བཞག་བྱས་ཡོད་པ་ལས་བཟོ་བཅོས་རིགས་གང་ཡང་བྱས་མེད་པས་མ་ཕྱི་པར་མ་དང་ཞུ་དག་ཕེར་བ་ཡོད་དོ། །
ཉེས་སྡིག་ཚབས་ཆེན་སྤོང་བའི་གཞེན་བསྐུལ་གྱིས་མཇུག་བསྡུ་བ།
ད་ནི་རྩ་བའི་བཞི་པ་ཉེས་སྡིག་ཚབས་ཆེན་སྤོང་བའི་གཞེན་བསྐུལ་གྱིས་མཇུག་བསྡུ་བ་ནི། དེ་ཡང་གོང་དུ་སྨྲོས་པ་བཞིན་རང་ཉིད་སྔོན་གྱི་བསགས་རྒྱབ་ཆུང་བས་ཚེ་འདིར་མ་ཚོར་བཞིན་དུ་ངན་འགྲོར་ཁྲིད་པའི་ལོག་པའི་བཤེས་གཉེན་དང་འཕྲད་པའི་རྐྱེན་གྱིས། སྔོན་ཆད་ཆོས་རྒྱལ་མེས་དབོན་རྣམ་གསུམ་དང་། མཁན་སློབ་ལོ་པཎ་སངས་རྒྱས་དངོས་བྱོན་ལྟ་བུ་དེ་རྣམས་ཀྱི་བཀའ་དྲིན་ལ་བརྟེན་བོད་ཡུལ་མུན་གླིང་མཐའ་འཁོབ་ཁ་བ་ཅན་གྱི་ལྗོངས་སུ། རྒྱལ་བས་གདུལ་བྱའི་༔ཁམས་དང་དབང་པོ་བསམ་པའི་ཁྱད་པར་དང་རྗེས་སུ་མཐུན་པར་གསུངས་པའི་ཆོས་ཀྱི་ལུགས་སྲོལ་རྨད་དུ་བྱུང་བའི་བཤད་སྒྲུབ་ཀྱི་ཤིང་རྟ་བརྒྱུད་ཚུལ་ཐ་
དད་པ་ལྟ་བུར་བྱུང་བ་ཀུན་ཀྱང་ཟབ་ཅིང་རྒྱ་ཆེ་བ་གཞི་ལམ་འབྲས་གསུམ་དང་། ལྟ་སྒོམ་སྤྱོད་གསུམ་སྟོན་པའི་བརྗོད་བྱ་བསླབ་པ་གསུམ་དང་རྗོད་བྱེད་སྡེ་སྣོད་གསུམ་དང་འབྲེལ་བའི་མདོ་སྔགས་ཀྱི་བསྟན་པ་རིན་པོ་ཆེ་གསར་རྙིང་གི་མཁས་གྲུབ་ཚད་ལྡན་ཐམས་ཅད་ཕན་ཚུན་རྩོད་པ་མེད་ཅིང་མཐར་ཐུག་དགོངས་པ་གཅིག་ཏུ་གཞོལ་ཞིང་འབབ་པར་བཞེད་པ་ལ། ཁྱེད་ཅག་ཕྱོགས་ལྷུང་ཕྲག་དོག་གི་ཀུན་དཀྲིས་ཆེན་པོས་བསྟན་པ་དཀྲུགས་ཤིང་སྡེ་འཁྲུགས་བསླངས་པའི་ལས་ངན་ཚབས་ཆེན་ཇི་སྙེད་ཅིག་སྔོན་ཆད་བསགས་ཟིན་མོད། གདུལ་དུ་རུང་བ་སྐྱེས་བུའི་མཚན་ཉིད་ཡིན་པས། གནོང་ཞིང་འགྱོད་གདུང་དྲག་པོས་མཐོལ་བཤགས་བྱ་བ་དང་། སླན་ཆད་མཚམས་མེད་ལྔ་ལས་ཀྱང་ཐུ་བའི་ཆོས་སྤོང་དང་། སྐུར་འདེབས་ཀྱི་ལས་ནམ་ཡང་མི་བྱ་བའི་སྡོམ་སེམས་དམ་བཅའ་བརྟན་
པོར་བཟུང་ན་རང་དྲིན་རང་ལ་ཆེ་ཞིང་ཉེས་སྡིག་བྱང་ནས། རང་ཉིད་ཀྱང་དམ་པའི་གྲལ་དུ་ཚུད་པར་འགྱུར་བའི་ཚུལ། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ཡང་། །ཕྱིས་ནས་བག་དང་ལྡན་པར་གྱུར་པ་དེ། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་པ་ལྟར་ལགས། དེ་ལྟར་མ་ཡིན་པར་ཁ་ཅིག་རྙིང་བསྟན་ནུབ་ཏུ་རེ་བས་ལྐོག་ཏུ་འབར་བ་དང་། དངོས་སུའང་འདི་དང་འདི་ལྟ་བུའི་འཆལ་གཏམ་སྣ་ཚོགས་ཁྱབ་སྤེལ་ཇི་ཙམ་བྱས་ཀྱང་། བསྲེགས་བཅད་བརྡར་གསུམ་གྱིས་བརྟགས་ཟིན་པའི་གསེར་སྦྱང་བཙོམ་༜ ལྟ་བུའི་སྔ་འགྱུར་བཀའ་གཏེར་དག་སྣང་གི་བསྟན་པ་རིན་པོ་ཆེ་འདི་ནི་བསྣུབ་རྒྱུ་ལྟ་ཞོག །གང་ལ་གང་འདུལ་གྱི་འགྲོ་བའི་དོན་རྒྱལ་བ་བྱམས་པའི་བསྟན་པ་
མ་ཤར་གྱི་བར་དུ་གནས་པ་དང་། ད་ལྟའི་བསྟན་མཇུག་གཏེར་གྱིས་སྐྱོང་བར་བསླུ་མེད་རྡོ་རྗེའི་ལུང་གིས་གསལ་བ་ལ་བྱིས་པ་ཆུང་ངུ་ནུ་ཞོས་འགྲངས་ནས་མ་ལ་གཤེ་བ་ལྟར། བོད་དུ་སྔོན་ཆད་ཆོས་ལ་ཕྱོགས་རིས་དང་ཕྲག་དོག་ཅན་གྱི་གང་ཟག་སྔ་རབས་པ་ལྷ་བླ་མ་ཁུ་དབོན་དང་། འགོས་ལྷས་བཙས། དཔལ་འཛིན། ཆག་ལོ་རྣམས་དང་། དུས་ཕྱིས་མདོ་སྨད་བྱང་རྒྱུད་ཕྱོགས་ཀྱི་དགེ་ལྡན་པ། ཐུའུ་བཀྭན་ཆོས་ཉི། སུམ་བྷ་མཁན་པོ་ཡེ་ཤེས་དཔལ་འབྱོར། ཝ་མང་དགེ་བཤེས་སོགས་ཀྱིས་ཀྱང་ཆགས་སྡང་ཆོས་སུ་སྨྲ་བའི་ཡིག་སྣ་ཐར་ཐོར་རེ་བྲི་སྤེལ་བྱས་པ་མཐོང་ཡང་། དགག་དགོས་སྙིང་པོ་མེད་པར་འཁུམས། དེ་རྣམས་ཀྱི་རྩོད་བཟློག་གི་བསྟན་བཅོས་མཛད་པོ་ཀུན་མཁྱེན་རོང་ཀློང་གཉིས་དང་། རྒྱང་རོ་བྱང་ཆུབ་འབུམ། མཁས་མཆོག་སོག་བཟློག་པ། སྨིན་གཏེར་
མཆེད། གཡོ་རུ་རྫོགས་ཆེན་པ། ཀཿཐོག་མ་ཧཱ་པཎྜི་ཏ། འཇམ་དབྱངས་མི་ཕམ། ཟེ་ཆེན་རྒྱལ་ཚབ་སོགས་ཀྱིས་གནས་གསུམ་གཞལ་བའི་གཏན་ཚིགས་ལུང་རིགས་དྲི་མ་མེད་པས་དགག་སྒྲུབ་དང་བྱི་དོར་མཛད་ཚར་བས་ད་ནི་སྙིང་ལས་ཆུང་ངུར་ཉལ་བས་ཆོག་པ་ཨ་ལ་ལ། ཁྱེད་ཅག་ཕྱོགས་རིས་ཀྱི་མིག་ཅན་ཁོ་བོ་ལ་འདི་ལྟར། ཁྱོད་ཀྱང་དགེ་ལྡན་པའི་ཆོས་དང་བླ་མ་ལ་ཁ་བཏང་བ་འདིས་དམྱལ་བའི་རྒྱུ་བསགས་པ་ཅིའི་ཕྱིར་མ་ཡིན་ཞེ་ན། བདེན་ཏེ་ཁོ་བོས་འདིར་དགེ་ལུགས་པའི་ཆོས་དང་བླ་མ་ཚད་ལྡན་སུ་ལ་ཡང་ཁ་བཏང་བ་མེད། ཛེ་སྨད་ཀྱིས་ཕ་བོང་ཁ་པ་དང་ཁྲི་བྱང་གཉིས་ཀྱི་ཞལ་ལུང་ཡིན་ཞེས་ཤུགས་ལྡན་རྟོགས་བརྗོད་དུ་མིང་བཏགས་པ་དེའི་བརྗོད་དོན་ནི། རྙིང་མ་བའི་ཆོས་བྱས་ན་ཐར་པ་ཐོབ་ཟེར་རྒྱུའི་ཚབ་ལ་རྙིང་ཆོས་བྱས་ཚད་ཚེ་འདི་ལ་ཚེ་
ཐུང་ནད་མང་ལོངས་སྤྱོད་དབུལ་པོར་འགྱུར་ཞིང་ཚེ་ཕྱི་མར་དམྱལ་བ་མནར་མེད་དུ་སྐྱེ་བར་འགྱུར་ཞེས་བཀོད་འདུག་པས་དེ་ནི་དགེ་ལྡན་པའི་ལྟ་གྲུབ་རྣམ་དག་ལྟ་ཅི། ཆོས་མ་ཡིན། འདུལ་བ་མ་ཡིན། སྟོན་པའི་བསྟན་པ་མ་ཡིན་པ་ཙམ་དུ་མ་ཟད། དེ་ལྟར་སྨྲ་བ་པོ་དེ་ཡང་ཆགས་སྡང་ཆོས་སུ་བཅོས་ནས་སྐྱེ་བོ་རྣམས་ལོག་དུ་འཁྲིད་མཁན་ལས་མ་འདས་པ་དེས། དེ་དག་ལ་མཉན་པ་ཡིན་ན། འདི་ཕྱིར་ཕུང་ཚབས་ཆེ་བ་དེ་ཟློག་པའི་ཆེད་དུ་སྔོན་བྱོན་རིས་མེད་ཀྱི་མཁས་གྲུབ་དམ་པ་ཚད་ཐུབ་ཀྱི་གསུང་དང་མདོ་སྔགས་ཀྱི་ལུང་གིས་རྒྱབ་སྐྱོར་ནས་དགག་བཞག་གི་འབེལ་གཏམ་ཅུང་ཟད་ཅིག་གོ་བདེ་གྲོང་ཚིག་གི་ལམ་ནས་དྲངས་ཏེ་སྨྲས་པ་འདི་དགེ་བར་འགྱུར་རམ་སྡིག་པར་འགྲོ་ཆོས་ལུགས་ཁག་བཞིའི་ཆོས་སྤྱན་ཡངས་པ་རྣམས་ཀྱིས་ལེགས་པར་གཟིགས་མཛོད། ཡང་
ཤུགས་ལྡན་ཆོ་ག་བཏང་བ་དེ་རི་བོ་དགེ་ལྡན་པའི་ལྟ་གྲུབ་གཙང་མའི་རིང་ལུགས་ཡིན་ཚུལ་བཤད་པ་འདི་ལ་ཁོ་བོས་དཔྱད་ན་དེ་ནི་མགོ་བོ་རུལ་བ་སྣས་མ་ཚོར་བར་གདའ་སྟེ། ཅིས་ཤེ་ན། ཤུགས་ལྡན་གསོལ་ཁ་ཐོག་མར་མཛད་པ་པོ་ནི་བླ་མ་ས་སྐྱ་པ་རྙིང་མའི་ཡང་ཕུར་ལ་ཐུགས་དམ གཙོ་བོར་གནང་མཁན་དེ་ཡིན། དེང་སང་དར་བའི་སྲོག་གཏད་སྐོར་འདི་ནི་སྟག་ཕུ་པདྨ་རྡོ་རྗེ་ཞེས་རྙིང་མའི་ལྟ་སྤྱོད་གཉིས་ཀ་དང་འདྲ་མ་འདྲེས་གནང་མཁན་དེའི་མནལ་ལམ་ཙམ་ཞིག་ལ་ཁུངས་ཕྱུངས་འདུག་གཤིས་ཆུ་འགོ་ནས་རྙོག་ཚར་བ་མ་ཤེས་པར། དགེ་ལྡན་གཙང་མའི་རང་ལུགས་ཡིན་ཞེས་ཁ་ཕོ་འབྲུག་ལྟར་སྒྲོགས་པ་འདི་ཡང་མ་བརྟག་གྱ་ཚོམ་དུ་འཇུག་པའི་སྐྱོན་ཆེ་སྙམ། ལར་རྟོགས་བརྗོད་འདིའི་ཐོག་མཐའ་བར་གསུམ་ཀུན་ཏུ་དགེ་ལྡན་པའི་མཁས་གྲུབ་
ཡོངས་གྲགས་ཚད་ལྡན་གྱི་གསུང་ཤྭ་ལོ་ཀ་གཅིག་ཀྱང་མ་དྲངས་པར་ཕྱོགས་རེ་བའི་རང་འདོད་ཀྱི་གཏམ་རྫུན་རྒྱབ་རྫུན་གྱིས་བྱས་ཚུལ་འདི་ལ་ལྟོས་དང་། དྲང་བདེན་ཡིན་དང་འཁྱོག་རྫུན་ཡིན་ཆེས་གསལ། གཞན་གནད་དོན་མ་རྟོགས་པའི་སྐྱེ་བོའི་ཁ་ནས་ཐོན་ཚད་སྨྲས་པ་ལ་ཆ་ཅི་ཡོད། སྔོན་ཆད་བོད་དུ་ཡང་ཆོས་པའི་གཟུགས་བརྙན་དུ་འཆོས་པ་རྣམས་ཀྱིས་ཆོས་ལུགས་ཕན་ཚུན་ཆགས་སྡང་བསྟན་སེལ་སྡེ་འཁྲུགས་མང་དུ་བསླངས་པའི་རྐྱེན་གྱིས། མཐར་མི་དབུས་སུ་རྡིབ། དབུས་མི་མཐའ་ལ་འཁྱར། བསྟན་པ་རྨང་ནས་འཇིག་པ་འདི་འབྱུང་བ་དང་། ད་དུང་ཡང་སྔར་དང་འདྲ་བའི་ཆོས་ལ་བརྟེན་པའི་ཆོས་མིན་གྱི་ལས་ངན་ཚབས་ཆེན་བསགས་དྲགས་ན་སངས་རྒྱས་ཀྱི་བསྟན་པ་ཇེ་དར་ཇེ་བཟང་དུ་མི་འགྲོ་བའི་ཁར་དམ་པའི་ཆོས་ཀྱི་ཆེ་བ་དང་བྱིན་རླབས་གཟི་བརྗིད་
མངའ་ཐང་ཐམས་ཅད་ཟླ་བ་མར་གྱི་ངོ་བཞིན་ཉམས་རྒུད་དུ་འགྲོ་རྒྱུ་ཉག་གཅིག་ལ་བརྟེན། ཨོ་རྒྱན་ཆེན་པོས་མ་འོངས་པ་ན་བསྟན་བཅོས་ཕལ་གྱིས་དུག་ལྔ་སྤེལ་བ་དང་མཐའ་དམག་འབོད་རྐྱེན་བྱེད་པའི་ལུང་བསྟན་ཞལ་གསལ་མང་དུ་གསུངས་པས་སྔོན་ཆད་ཀྱང་བསླུས་པ་མེད་ཅིང་འབྱུང་འགྱུར་དུའང་བསླུ་བར་མི་འགྱུར་བའི་ཚུལ་ལ་དགོངས་ནས། རང་རྒྱལ་བར་འདོད། གཞན་ཕམ་པར་འདོད་པའི་གཡོ་སྒྱུའི་རྩོད་པ་ཚིག་རྩུབ་ཀྱིས་གཞན་རྒྱུད་བསྲེག་པ་ནི་དམྱལ་བའི་རྒྱུ་ལས་མེད་ཚུལ། ཀུན་མཁྱེན་བུས། རང་ཉིད་རྒྱལ་འདོད་ཕ་རོལ་དམའ་དབབ་འདོད། །གཡོ་སྒྱུའི་རྩོད་པ་ཚིག་རྩུབ་ངན་སེམས་ཅན། །ངག་ཀྱལ་སྣ་ཚོགས་སྨྲ་ཞིང་གཞན་རྒྱུད་བསྲེག །ད་ལྟའི་རྩོད་པ་འདི་ཡང་དམྱལ་བའི་རྒྱུ། །ཞེས་གསུངས་པའྀ་དོན་ལས་གཞན་མ་
མཆིས་པས་དོན་མེད་ཕྱོགས་རིས་ཀྱི་སྦིར་གཏམ་རིགས་ངོས་ལྐོག་གཉིས་ཀར་ཆོས་ལུགས་ཁག་བཞི་ཀས་དུས་ནམ་དུ་ཡང་མི་མཛད་པའི་གཞེན་བསྐུལ་ཀུ་སཱ་ལི་བདག་གིས་ཞེ་ཐག་པ་ནས་འདེབས་པ་ལགས། ད་ནི་དོན་གྱི་སྙིང་པོ། རང་རེ་གངས་ཅན་པ་རྣམས་ཤཱཀྱའི་བསྟན་པའི་གནས་ལ་དོན་མཐུན་དུ་ཞུགས་པ་ཡིན་ཅིང་། ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པ་མཚུངས་པར་མ་ཟད། སྤྱོད་པ་ཡོད་སྨ་དང་། ལྟ་བ་མདོ་སྔགས་གཉིས་ཀ་སྤྲོས་བྲལ་དུ་ཁས་འཆེ་བ་ཤ་སྟག་ཡིན་པས་ཤིན་ཏུ་མཁས་གྲུབ་ཀྱི་དབང་པོ་ཐམས་ཅད་ལྟ་བའི་གནད་ལ་མི་མཐུན་པ་མེད་པར་བཞེད་པས་དོན་དུ་ལྟ་གྲུབ་མཚུངས་པའི་ཕྱིར་ཆེས་ཉེ་བ་དང་། རྒྱལ་བསྟན་ནུབ་ལ་ཁད་ཀྱི་དུས་སྐབས་ངན་པ་འདི་ལ། ཆོས་བྱེད་ཕན་ཚུན་སྐྱོན་མཚང་བརྗོད་རེས་བྱ་བ་འདི་རང་གཞན་བླ་སློབ་ཚང་མའི་ཞབས་
འདྲེན་ཆེ་བས། ཚང་མའི་ཉམསམྱོང་གི་ཐོག་ནས་གཅིག་ལ་གཅིག་སྡང་མིག་མི་ལྟ་བར་ཕ་མ་བུ་ཚ་འཕྲད་པའི་འདུ་ཤེས་ལྟར་དགའ་འཛུམ་མུལ་ལེ་བའི་ངང་ནས་རང་རང་སོ་སོའི་ཆོས་ཀྱི་རྒྱལ་ཐབས་དར་རྒྱས་ཡུན་གནས་ཀྱི་ཐབས་ཚུལ་ལ་སྒོ་ཀུན་ནས་འབད་པའི་རེ་འདུན་དང་སྨོན་ལམ་སྙིང་ནས་ཞུ་བ་སྟེ། དེ་སྐད་དུ་འཇམ་དཔལ་དབྱངས་དངོས་མི་ཕམ་འཇམ་དབྱངས་རྒྱ་མཚོས། སྟོན་པ་གཅིག་གི་རྗེས་ཞུགས་ནས། །བསྟན་པ་གཅིག་ལ་སློབ་པ་ཀུན། །ཞེན་ལྟའི་སྡང་མིག་སྤངས་བྱས་ནས། །དགའ་བའི་འཛུམ་གྱིས་འགྲོགས་གྱུར་ཅིག །བསྟན་ལས་ཕྱི་རོལ་གྱུར་པའི་ཆ། །རང་གཞན་སུ་ལ་སྣང་ཡང་སྤོངས། །བསྟན་པའི་དོན་དང་མཐུན་པའི་ཆ། །རང་གཞན་སུ་ལ་ཡོད་ཀྱང་སྒྲུབས། །དེ་མཐུས་གངས་རིའི་ཁྲོད་འདི་རུ། །སྒྲུབ་བརྒྱུད་རྒྱལ་
ཐབས་ཆེན་པོ་བཞི། །ཆོས་ཀྱི་འབྱོར་པས་མཛེས་འབར་ཞིང་། །ཕྱོགས་ལས་རྣམ་པར་རྒྱལ་གྱུར་ཅིག །ཅེས་གསུངས་པ་བཞིན་ནོ། །སྨྲས་པ། སྔོན་གྱི་དོལ་རྒྱལ་འོག་མིན་མཁའ་ལ་སྤར། །དེང་སང་གསར་སྐྱེས་འབྱུང་པོ་དེར་འཁྲུལ་བསྟེན། །འདི་ལས་འཕྲོས་པའི་སྦིར་གཏམ་སྣ་ཚོགས་ཀྱིས། །སྐྱེ་བ་མང་པོ་མགོ་འཐོམ་ལངས་ལ་ལྟོས། །སྔོན་ཆད་འདི་ལ་དགག་བཞག་རྩོད་སྤོང་གི །ཚད་ཐུབ་ཡི་གེ་ཕྱོགས་བསྒྲིགས་བྱས་པ་དཀོན། །འོན་ཀྱང་འདྲེ་ཉལ་ཕཊ་ཀྱིས་དཀྲོག་པ་ལྟར། །ཛེ་སྨད་དེབ་ངན་མཐོང་ནས་ངས་འདི་བརྩམས། །ཡིན་ལ་ཡིན་དང་མིན་ལ་མིན་བཤད་ཀྱི། །མ་མཐོང་མ་ཐོས་འོལ་ཚོད་ཧམ་རྫུན་གྱིས། ། གཞན་བསླུའི་བསམ་སྦྱོར་ངན་གཡོ་མ་ཡིན་པར། །རང་གཞན་ཀུན་གྱི་ལོག་རྟོག་བཟློག་ཕྱིར་བགྱིས། །ལྟ་གྲུབ་གནད་མེད་མི་ནག་སྐྱེ་བོ་ཡི། །ཆགས་སྡང་
ངག་འཁྱལ་འབའ་སམ་བསྡུས་པ་ལ། །ཕ་རྒོད་བླ་མའི་གདམས་བཅུད་དུ་འཁྲུལ་བ། །འདི་འདྲའི་ལན་འདེབས་མཁས་ལས་བླུན་པོ་མཛེས། །རྩོད་དུས་ཤཱཀྱའི་རྗེས་འཇུག་ནང་ཕན་ཚུན། །ཆོས་ལུགས་ལ་བསྙད་དབྱེན་སྦྱོར་ཕུང་དཀྲུགས་འདི། །བདུད་ཀྱི་ལས་སུ་རྒྱལ་དང་དེ་སྲས་ཀུན། །ལན་གཅིག་མིན་པར་གསུངས་སོ་གསུང་བར་འགྱུར། །ཉམས་ཆུང་རང་གར་སྡོད་པའི་རྣའི་བུ་གར། །ཕྱོགས་ལྷུང་ཕྲག་དོག་གཏམ་གྱི་ཚེར་མ་ཡི། །རེག་པ་རྩུབ་མོས་གཙེས་ལ་ལན་བཏབ་པ། །དྲང་བདེན་ལ་དགའི་སྙན་དབང་སིམ་ཀྱང་སྲིད། །ཡང་དག་ལྟར་སྣང་ཆུ་དང་འོ་མའི་ཁྱད། །འབྱེད་པའི་རྣམ་དཔྱོད་འདབ་ཆགས་ངང་མོའི་མཆུ། །མི་ལྡན་འཁྱོག་ཚིག་ཁྭ་ཏའི་ཐན་སྐད་ཀྱང་། །སྨོད་ངན་རང་མགོར་འདྲེན་པའི་བརྫུ་བག་ཙམ། །རང་རང་ལྟ་གྲུབ་གཙང་
ན་དེས་ཆོག་གི །གཞན་ལུགས་ཐམས་ཅད་སུན་འབྱིན་ཕས་རྒོལ་དེར་། །ལུང་རིགས་རྡོ་རྗེའི་མེ་ཆར་མ་དབབ་ན། །དམ་ཉམས་སྐྲག་ལང་ཡན་པར་ཤོར་གྱིས་དོགས། །ཆོས་ལུགས་རྣམ་བཞི་ཆོས་ཀྱི་རང་ལྡོག་ནས། །རྣམ་པར་དག་མཉམ་གྲུབ་ཟིན་གྲུབ་ཅི་དགོས། །གང་ཟག་སྣོད་ཀྱི་བྱེ་བྲག་དག་མ་དག །ཀུན་ལ་ཡོད་མཉམ་སུ་ཡིས་སུ་ལ་སྨོད། །འཆལ་སྤྱོད་བྱེད་ཕྱིར་རྙིང་མ་ཆོས་ལོག་ཏུ། །ཁྱེད་ཅག་འདོད་ན་དགེ་ལྡན་ཁྲོད་ན་ཡང་། །འཆལ་སྤྱོད་བྱེད་མཁན་དེ་བས་ཀྱང་མང་ཕྱིར། །དགེ་ལུགས་ཕྱོགས་གཅིག་གཙང་འདོད་ཡོངས་རེ་འཁྲུལ། །ཞྭ་སེར་རིང་ལུགས་ཚུལ་མཐུན་མཛད་ཀུན་ལ། །དད་པའི་སྣང་བ་རྒྱ་ཆེར་སྤྲོ་མོད་ཀྱང་། །མཐོང་ཚད་སྡང་དགྲར་བལྟ་བའི་ལོག་ལྟའི་སྡེ། །དེ་དག་གཏམ་འདིས་ལན་བརྒྱར་ཟིལ་གྱིས་གནོན། །གངས་ཅན་ཐར་འདོད་ཡོངས་ལ་
དྲིན་ཆེ་བ། །སྔ་འགྱུར་བསྟན་དང་བརྒྱུད་འཛིན་ཚོགས་ཡིན་ཀྱང་། །བྱས་པ་མི་གཟོ་དྲིན་ལ་མི་བརྩི་བའི། །ངོ་ཚ་ཁྲེལ་མེད་པོ་རྣམས་སུ་ཡིས་སྐྱོབ། །སྐྱབས་གནས་ལོག་པ་དམ་འགོང་ལ་བཅོལ་ཕྱིར། །བསྟན་པ་སྤྱི་ཡི་འཇུག་སྒོ་སྐྱབས་འགྲོ་ནས། །བསྟན་པའི་སྙིང་པོ་རྒྱུད་སྡེ་རྒྱ་མཚོའི་བར། །སྡོམ་གསུམ་བསླབ་གསུམ་དམ་ཚིག་དྲི་མར་བྱས། །སྔོན་གྱི་མཁས་་གྲུབ་རིས་མེད་ཚོགས་རྣམས་ཀྱི། །མཛད་པའི་རྣམ་ཐར་དེབ་ཐེར་དཔང་་བཞག་སྟེ། །སྐྱེ་བོའི་མུ་ཅོར་རྫུན་གཏམ་ཕུག་གཏིབས་ཚེ། །ཕས་རྒོལ་སྙིང་རྩ་འཕར་པ་དངོས་པོའི་གཤིས། །མཁས་པས་མཁས་པ་བསྟོད་ན་གཉིས་ཀ་མཛེས། །བླུན་པོས་མཁས་ལ་བསྟོད་པར་ག་ལ་འགྱུར། །བླུན་པོས་བློན་པོར་བསྟོད་པ་གཉིས་ཀ་ཉམས། །བསྟོད་སྨད་རན་པར་སྨྲ་བ་འོས་ཤིང་འཚམས།
བདག་ནི་སྐུ་སྐྱེ་དགེ་བཤེས་མཁས་མ་ལགས། །བགྲང་བྱའི་ཁུར་ལྕི་རང་གཞན་བཟང་ངན་ཡུལ། །མང་མཐོང་ལོ་རྒྱུས་བརྗོད་པས་མ་ཕོངས་ཙམ། །འོན་ཀྱང་ཁྱི་རྒན་ཀུ་ཅོ་འདོན་བསམ་མེད། །ཕྱོགས་རིས་ཆགས་སྡང་ཆོས་སྤོང་དགག་བྱ་དང་། །ཕྱོགས་མེད་དག་སྣང་མཐུན་འགྲོགས་བསྒྲུབ་བྱ་ཉིད། །དེ་ཕྱིར་དགག་དགོས་གོ་དོན་ལེགས་རྟོགས་ན། །འདི་ཉིད་ཕན་པའི་གདམས་ངག་བྱས་ཀྱང་རུང་། །མཁས་པའི་ཚོགས་རྣམས་དུས་ཀྱིས་ནུབ་གྱུར་ཏེ། །ཤེས་རློམ་ང་རྒྱལ་མགོ་འཕང་དགུང་དུ་བསྟོད། །ཞེ་སྡང་ཚིག་རྩུབ་ཚེར་མའི་མཚོན་རྩེ་གཟེངས། །ཁྲིམས་མེད་སེར་གཟུགས་རྟོག་གེས་ས་སྟེང་གང་། །པད་འབྱུང་རྒྱལ་བའི་བསྟན་པ་ཁྱད་གསོད་པའི། །ལོག་རྟོག་མུ་སྟེགས་བག་ཆགས་འཐས་པ་ཅན། །འབྱུང་འགྱུར་ལུང་དོན་བདེན་པ་མངོན་གྱུར་ཀྱང་། །མ་རིག་སྐྱེ་བོ་
རྣམས་ཀྱིས་ཅང་མ་མཐོང་། །དགེ་ལྡན་ཆོས་བཟང་རྙིང་ཆོས་ངན་པར་བརྩི། །དགེ་ལུགས་པ་གཙང་རྙིང་མ་མི་གཙང་ཞེས། ཆོས་དང་གང་ཟག་བཟང་ངན་སྟངས་གཅོད་འདི། །ཤཱཀྱ་ཐུབ་པའི་རིང་ལུགས་མ་ཡིན་ནོ། །རྙིང་དགེ་གཉིས་པོ་གཅིག་གིས་གཅིག་ཤོས་ལ། །དག་སྣང་རྒྱབ་སྐྱུར་སྐྱོན་འཛུགས་རེས་བསྐོར་ན། །མི་ཚེ་ལའང་རྫོགས་མཐའ་མེད་པའི་ཕྱིར། །ད་ནི་ཕུང་པོ་གསུམ་པ་མི་དྲག་གམ། །ཆེ་བ་དྲུག་ལྡན་གསང་ཆེན་སྔ་འགྱུར་བའི། །བཀའ་གཏེར་དྲི་མེད་ཆོས་ལ་གཤེ་བྱེད་ཅིང་། །ངན་སྨྲ་གླེང་མོ་མངོན་ལྐོག་འཛེམ་མེད་ལ། །ལན་མེད་ལྐུགས་པའི་བརྟུལ་ཞུགས་ཅིའི་ཕྱིར་འཛིན། །བཀའ་རྙིང་ས་གསུམ་ཕུ་ནུ་བཞིན་དུ་མཐུན། །སྨིན་གྲོལ་ཆོས་དང་དམ་ཚིག་སྲོག་གིས་འབྲེལ། །ཕྲ་མ་སྔ་བཙན་དགེ་ལུགས་རྐང་འདྲེན་འགས། །
བསྟན་པའི་དཀྲུགས་ཤིང་ཕུང་ཁྲོལ་བྱས་མིན་ནམ། །ཕྱོགས་ལྷུང་སྡང་ཞུགས་སྡིག་པ་ཕལ་ལས་ཐུ། །དེ་ཟློག་དོན་བརྩོན་རྣམ་དཀར་དགེ་བར་གསུངས། འདི་ལས་ཐོབ་པའི་བསོད་ནམས་གང་མཆིས་པ། །འགྲོ་ཀུན་ཆོས་མིག་རྡུལ་བྲལ་ཐོབ་ཕྱིར་བསྔོ། །རྒྱལ་བསྟན་ཉི་འོད་ལྷག་ཞབས་ཅུང་ཟད་འདི། །ལོག་རྟོག་སྤྲིན་ནག་འཁྲུགས་པ་ལས་གྲོལ་ཏེ། །བསྟན་འཛིན་བུང་བའི་ཚོགས་ཀུན་དགའ་བའི་དཔྱིད། །ལུང་རྟོགས་འདབ་མ་ཕྱོགས་བརྒྱར་བཞད་གྱུར་ཅིག །འདྲེན་མཆོག་ཤཱཀྱའི་བསྟན་པ་དར་བ་དང་། །བསྟན་འཛིན་ཞབས་བརྟན་བཤད་སྒྲུབ་ཆོས་སྤྱོད་འཕེལ། །འགྲོ་ཀུན་ཐེག་པ་མཆོག་གི་ལམ་ཞུགས་ཏེ། །བླ་མེད་རྫོགས་པའི་བྱང་ཆུབ་མྱུར་ཐོབ་ཤོག །ཅེས་པ་འདི་ཡང་དགའ་ལྡན་ཤར་རྩེ་པ་ཛེ་སྨད་སྤྲུལ་སྐུས་འགྲེམས་སྤེལ་བྱས་པའི་དེབ་ཆུང་ཕ་རྒོད་བླ་མའི་ཞལ་གྱི་
བདུད་རྩི་ཞེས་པ་ལ་ཏྲེ་ཧོར་གདོང་ཐོག་སྤྲུལ་སྐུ་བསྟན་རྒྱན་པས་དེ་ལ་དགག་ལན་དུས་ཀྱི་སྦྲང་ཆར་ཞེས་པ་ཞིག་གནང་བའི་ནང་དུ་བལྟས་པས། ད་དུང་དོན་གནད་ཁ་ཤས་ལ་དགག་དགོས་པར་འདུག་ཀྱང་། འཚེམ་ལུས་སུ་གྱུར་པ་མཐོང་ནས་རྩོད་ཟློག་འདི་ལྟ་བུ་ཞིག་འབྲི་འདུན་ཡོད་ཐོ་ཉེ་ཆར་རྡོ་རྗེའི་མཆེད་དམ་པ་མདོ་ཁམས་གོ་འཇོ་རྩེད་རོང་བླ་མ་ཕུན་ཚོགས་བཀྲ་ཤིས་དང་། རང་དང་སྐྱེས་ཡུལ་གཅིག་པ་ཉག་ཨ་ཛི་རོང་གི་དགེ་བཙུན་དམ་པ་ཐུབ་བསྟན་ཆོས་འབྱུང་གཉིས་ནས་ཀྱང་ལྷ་རྫས་ཨ་ཤེ་དང་ཧིན་སྒོར་མི་ཟད་རྒྱན་འཁོར་གྱི་གྲངས་༢༥བཅས་ནན་ཏན་ཆེན་པོས་བསྐུལ་ལྕག་བྱུང་བ་ལ་བརྟེན་ནས་ཤར་རྒྱལ་བ་ཀཿཐོག་པའི་བཀའ་འབངས་ཐ་ཤལ་ཀུ་སཱ་ལི་སངས་རྒྱས་རྡོ་རྗེ་ཞེས་འབོད་པའི་སྙོམས་ལས་པས། རབ་བྱུང་བཅུ་དྲུག་པའི་ས་ཁམས་བྷ་ལ་
ཧའི་ལོ། མགོ་ཟླའི་དམར་ཕྱོགས་ཀྱི་རྒྱལ་བ་གཉིས་པ། ཉི་མ་མེ་བཞིའི་འགྲུབ་སྦྱོར་བཟང་པོ་ལ། རྒྱ་གར་ཤར་ཕྱོགས་ཟ་ཧོར་གྱི་རྒྱལ་ཁམས་བྷང་ག་ལའི་ཡུལ་ཤི་ལི་གུ་རི་ཞེས་པའི་གྲོང་བརྡལ་གྱི་བྱང་ཕྱོགས་སཱ་ལའི་ཤིང་དང་འཁྲི་ཤིང་གི་ར་བས་ཀུན་ནས་བསྐོར་ཞིང་ཆུ་བོ་ལྔ་ལྡན་ཞེས་པ་དལ་གྱིས་དབང་ཕྱོགས་ནས་འབབས་པའི་ཉེ་འགྲམ་བདེ་བར་གཤེགས་པའི་སྐུ་འབུམ་མཐོང་གྲོལ་ཆེན་མོའི་དྲུང་གི་རང་ཤག་ཏུ་ལེགས་པར་གྲུབ་པར་བགྱིས་པ་འདི་གང་གིས་མཐོང་བ་རྣམས་བློ་ཐེ་ཚོམ་དང་ལོག་རྟོག་གི་མུན་པ་སངས་ཏེ་དངོས་བྱུང་ཡིན་ལུགས་དྲང་པོའི་དོན་ལ་ངེས་ཤེས་བདེ་བླག་ཏུ་སྟེར་བའི་རྒྱུར་གྱུར་ཅིག རྒྱལ་ཆེན་མིང་གི་གཟིག་ལྤགས་གྱོན་པ་ཡི། །ཞེ་སྡང་འཁྲུལ་འདྲེ་གནོད་པའི་མགྲིན་བཟང་དེས། བསྟན་འགྲོའི་ཕན་བདེའི་ལོ་ཏོག་ཟོས་པའི་མཐར། །ལུང་རིགས་ཉག་
ཕྲན་སྦྱོར་བས་བསད་ལ་ལྟོས། །ཞེས་ཀྱང་སྨྲས་སོ།། །།