ཐོལ་བྱུང་གི་གཏམ་ཐོགས་མེད་དུ་སྨྲས་པ།
ཨོཾ་སྭ་སྟི། རབ་འབྱམས་རྒྱལ་ཀུན་གྱི་མཁྱེན་བརྩེའི་ནུས་པའི་བདག །དུས་གསུམ་ཀུན་མཁྱེན་གྱི་སློབ་དཔོན་པད་འབྱུང་དང་། །དབྱེར་མེད་མཁྱེན་བརྩེ་ཡི་འོད་ཟེར་སྟོང་འབར་གཟིས། །སྙིགས་དུས་སྐྱེ་དགུ་ཡི་སྨག་རུམ་ཡོངས་གསལ་མཛོད། །ལེགས་པར་གསོན་མཛོད་དང་བསོད་ནམས་ནོར་བུ་ཀྱེ། །དུས་ངན་མེ་གླང་ལ་ཤར་བ་ཙམ་ཉིད་ནས། །སྙིགས་མའི་མངོན་རྟོགས་ཀྱི་ངན་ལྟས་ཤར་བ་ཡིན། །ད་སྟེ་བགྲང་བྱ་གྲངས་མང་ཞིག་མ་འདས་པར། །སྟོད་སྨད་བར་གསུམ་སོགས་དམག་འཁྲུག་མུ་གེ་དང་། །ལོ་ཉེས་སད་སེར་སོགས་མང་ཞིག་འབྱུང་ལྟས་དང་། །ཁྱད་པར་མདོ་སྨད་འདིར་དཀར་ནག་ཁྲ་བོའི་གཟུགས། །མངོན་ཞིངསྣ་ཚོགས་ཀྱི་སྤྱོད་པའི་མིག་མང་རྩེ། །ཤར་ཕྱོགས་ཁྲི་ལྡན་གྱི་རཱ་ཛས་ལྕེ་གཉིས་སྐྱོང་། །ལྷོ་ཕྱོགས་གཅན་གཟན་གྱི་ཁྱུ་སྡེབ་ཀུ་ཅོ་འདོན། །ནུབ་ཕྱོགས་ཆོས་མདོག་གིས་གྲུབ་མཐའི་སྒྲ་རྣམས་སྒྲོགས། །བྱང་ཕྱོགས་རི་འགལ་གྱི་བྱ་སྤྲེལ་མང་ཞིག་འཐབས། །ངང་ཁྱུའི་སྡེ་ཚོགས་ལ་རྒྱ་ཁྲའི་འུར་ཞོགས་སློང་། །པད་རག་གཙུག་རྒྱན་ལ་ཚ་ཟེར་འོད་མདངས་འབར། །དུང་མདོག་ཞྭ་མོའི་རྩེར་ཁུ་བྱུག་གསུང་སྙན་སྒྲོགས། །དཀར་མདོག་ས་བོན་ལ་དམར་པོའི་འབྲས་བུ་སྨིན། །དབུས་གཙང་རི་བཞི་ལ་སྣ་ཚོགས་གཟུགས་བརྙན་ངོམ། ། མདོ་ཁམས་སྒང་དྲུག་ལ་མིག་མང་ཆོ་ལོ་འགྱེད། །རྒྱལ་རོང་རྒྱལ་ཁག་རྣམས་དགྲ་ཟུན་ཡོས་ལྟར་རྔོ། །རྒྱ་སོག་བོད་གསུམ་པོ་ཐག་བྲན་ཇི་བཞིན་བྲེལ། །ཡུལ་ཕྱོགས་ཕལ་མོ་ཆེ་བྱ་ཁྱུ་སྡེབ་བཞིན་འུར། །ཡུལ་འབྲོག་ངེས་མེད་ཀུན་བག་མི་ཕེབས་བཞིན་འདྲོག །ཅི་བྱ་གཏོལ་མེད་ཀྱི་བསམ་སྤྱོད་ཐགས་བྲེགས་བཞིན། །དེ་འདྲེའི་དུས་ངན་གྱི་མངོན་རྟོགས་ངོམ་གྱུར་ཡང་། །སྙིགས་དུས་སྐྱོབས་ངེས་ཀྱི་ལྷ་མཆོག་པད་འབྱུང་ལ། །ཁ་ཞེ་མེད་པ་ཡིས་གསོལ་བ་ཐོབ་དང་ནི། །ངེས་པར་ཕན་བདེ་ཡི་མངོན་རྟོགས་མཐོང་ཞེས་སྨྲ། །མཆོག་གསུམ་རྩ་གསུམ་གྱི་བདེན་པའི་བྱིན་རླབས་དང་། །བདག་གི་ལྷག་བསམ་གྱི་མཐུ་སྟོབས་ནུས་པ་ཡིས། །འགྲོ་རྣམས་དགའ་བདེ་ཡི་དཔལ་ལ་ལོངས་སྤྱོད་ཤོག །ཅེས་འདི་ཡང་རྒྱལ་རོང་པ་བསོད་ནམས་ནོར་བུའི་ངོར་རྡོ་བླ་འཇིགས་མེད་ཕྲིན་ལས་འོད་ཟེར་གྱིས་ཐོལ་བྱུང་གི་གཏམ་ཐོགས་མེད་དུ་སྨྲས་པའི་དགེ་བའི་འགྲོ་རྣམས་རྫོགས་ལྡན་གྱི་དཔལ་ལ་ལོངས་སྤྱོད་པའི་སྐལ་པ་དང་ལྡན་པར་གྱུར་ཅིག། །།དགེའོ།། །།