སྨན་བླ་བདེར་གཤེགས་མཆེད་བརྒྱད་ཀྱི་གསོལ་འདེབས།
༄༅། །སྨན་བླ་བདེར་གཤེགས་མཆེད་བརྒྱད་ཀྱི་གསོལ་འདེབས་བཞུགས་སོ། །ན་མོ་བྷཻ་ཥ་ཛྱེ་མ་ཧཱ་ར་ཛ་ཡེ། །བསོད་ནམས་ཡོན་ཏན་རྒྱ་མཚོའི་གཏེར་མངའ་ཞིང་། །བསམ་གྱིས་མི་ཁྱབ་ཐུགས་རྗེའི་བྱིན་རླབས་ཀྱིས། །འགྲོ་བའི་སྡུག་བསྔལ་གདུང་བ་ཞི་མཛད་པ། །བཅོམ་ལྡན་སྨན་གྱི་བླ་མར་གསོལ་བ་འདེབས། །མགོན་ཁྱོད་སློབ་པ་ལམ་ལ་གནས་པའི་ཚེ། །འགྲོ་བའི་དུག་གསུམ་ལས་གྱུར་ནད་དང་གདོན། །ཡོངས་སུ་ཞི་ནས་བདེ་བར་དབུགས་དབྱུང་ཞེས། །དམ་བཅའ་མཐར་ཕྱིན་མཆོག་ལ༴ ད་ལྟ་མི་མཇེད་ཞིང་འདིའི་ཤར་ཕྱོགས་ཀྱི། །སྟེང་གི་ནམ་མཁར་བདེ་བ་ཅན་ལྟ་བུ། །དཔལ་དང་ཡོན་ཏན་ཕུན་ཚོགས་ཞིང་ཁམས་ན། །བཞུགས་པའི་བདེར་གཤེགས་བརྒྱད་ལ༴ སྙིགས་དུས་ཚེ་ལོ་བརྒྱ་པའི་སྡུག་བསྔལ་སྨག །རྒྱལ་བ་གཞན་གྱིས་བསལ་བར་མ་ནུས་པ། །སེལ་མཛད་བཻ་ཌཱུཪྱ་ཡི་འོད་ཟེར་ཅན། །བཅོམ་ལྡན་སྨན་པའི་རྒྱལ་པོར་གསོལ༴ བསྐལ་བཟང་འདྲེན་པ་སྟོང་དང་རྩ་གཉིས་ཀྱི། །མཁྱེན་བརྩེ་ནུས་པའི་དཔལ་ཡོན་ཡོངས་བསྡོམས་མགོན། །འགྲོ་དྲུག་འཁོར་བའི་སྡུག་བསྔལ་གཞོམ་མཛད་གཉེན། །སྨན་བླ་གཙོ་འཁོར་རྣམས་ལ༴ མཚན་ལེགས་རིན་ཟླ་གསེར་བཟང་མྱ་ངན་མེད། །ཆོས་བསྒྲགས་རྒྱ་མཚོ་ཆོས་བློ་ཤཱཀྱ་ཐུབ། །ཡུམ་ཆེན་ཤེར་ཕྱིན་རིགས་གསུམ་མགོན་པོ་སོགས། །རྒྱལ་བ་སྲས་བཅས་རྣམས༴ སློབ་དཔོན་ཆེན་པོ་བོ་དྷི་ས་ཏྭ་དང་། །ཆོས་རྒྱལ་ཁྲི་སྲོང་ལྡེའུ་བཙན་ནས་བཟུང་སྟེ། །སྨན་བླའི་མདོ་སྡེ་ཉམས་སུ་བླངས་པ་ཡི། །རྩ་བརྒྱུད་བླ་མ་རྣམས་ལ༴ གཞན་ཡང་ཐོག་མཐའ་བར་གསུམ་དགེ་བའི་ཆོས། །སྨན་བླའི་མདོ་འདི་བསྲུང་ཞིང་སྤེལ་བ་དང་། །འཆད་ཉན་བྱེད་ལ་གྲོགས་བགྱིད་དམ་བཅས་པའི། །བཀའ་སྲུང་ཆོས་སྐྱོང་རྣམས་ལ༴ དེ་ལྟར་གསོལ་བ་བཏབ་པའི་མཐུ་ནུས་ཀྱིས། །ཚེ་འདིར་གནོད་པའི་ནད་གདོན་བར་ཆད་རྐྱེན། །དུས་མིན་འཆི་བ་བཅོ་བརྒྱད་ལ་སོགས་པའི། །མི་མཐུན་ཕྱོགས་རྣམས་ཞི་བར་བྱིན་གྱིས་རློབས། །ཁྱད་པར་དུག་ལྔ་དུག་གསུམ་ལས་གྱུར་པའི། །ཕོ་གདོན་མོ་གདོན་ཀླུ་གདོན་བགེགས་ཀྱི་རིགས། །བཞི་བརྒྱ་རྩ་བཞིའི་ནད་གདོན་རྐྱེན་ངན་སོགས། །འགལ་རྐྱེན་མ་ལུས་ཞི་བར༴ བཅོམ་ལྡན་སྨན་བླ་བདེར་གཤེགས་མཆེད་བརྒྱད་སོགས། །རྟེན་དང་བརྟེན་པར་བཅས་པ་མ་ལུས་པ། །བསྒོམ་བསྒྲུབ་མཆོད་ཅིང་བསྟོད་པའི་བྱིན་རླབས་ཀྱིས། །རྒྱལ་བའི་གསང་གསུམ་བྱིན་ནུས་དངོས་གྲུབ་སྩོལ། །གཟུང་བ་བརྟན་པ་སྣོད་ཀྱི་འཇིག་རྟེན་ཁམས། །བཅོམ་ལྡན་སྨན་བླའི་ཞིང་དུ་འགྱུར་བ་དང་། །འཛིན་པ་བདག་དང་ཆོས་སུ་བག་ཆགས་སྐྱོན། །སྨན་བླའི་གསང་བ་གསུམ་དུ་གྲོལ་བར་ཤོག །མདོར་ན་འཁོར་འདས་གཉིས་སུ་འཛིན་པའི་སེམས། །བཅོམ་ལྡན་སྨན་བླའི་ཐུགས་རྗེའི་འོད་ཟེར་གྱིས། །འཁྲུལ་བའི་རྟོག་ཚོགས་སྤྲིན་དེངས་མཁའ་དབྱིངས་སུ། །ཀ་དག་ལྷུན་གྲུབ་འོད་བརྒྱའི་ཞལ་མཐོང་ཤོག །དེར་ཡང་རབ་འབྱམས་འཕྲིན་ལས་འཇུག་པ་ནི། །མཐའ་ཡས་འགྲོ་ལ་མཐའ་ཡས་ཆོས་སྟོན་ཞིང་། །མཐའ་ཡས་ཞིང་ཁམས་རྒྱ་མཚོ་དཔལ་ཡོན་ཀུན། །ཡོངས་ཚང་སྨན་བླའི་གོ་སར་དབུགས་དབྱུང་ཤོག །ཅེས་སྨན་བླའི་གསོལ་འདེབས་བཻ་ཌཱུཪྱའི་ཕྲེང་བ་འདི་ཉིད་སྐལ་བ་བཟང་པོའི་མངོན་རྟོགས་ཀྱིས་སྤུད་པ་བླ་མ་མ་ཏི་བྷ་དྲ་མ་ཎིས་བསྐུལ་ངོར། ༧ རྡོ་བླས་སྨྲས་པ་ཡོངས་སུ་དགེ་བར་གྱུར་ཅིག །དགེའོ།། །།