པད་མའི་ཞལ་གདམས་གྲོལ་ཐིག་མཐོང་བ་རང་གྲོལ་ལས། བརྒྱུད་པའི་གསོལ་འདེབས་བྱིན་རླབས་སྤྲིན་དཔུང་།
༄༅། །པད་མའི་ཞལ་གདམས་གྲོལ་ཐིག་མཐོང་བ་རང་གྲོལ་ལས། བརྒྱུད་པའི་གསོལ་འདེབས་བྱིན་རླབས་སྤྲིན་དཔུང་བཞུགས།
ཨེ་མ་ཧོ། །ཀ་དག་སྤྲོས་བྲལ་ཆོས་སྐུའི་ཕོ་བྲང་ན། །ནང་གསལ་སྐུ་གསུམ་ཀུན་བཟང་ཡབ་ཡུམ་སོགས། །ཆོས་སྐུའི་སྟོན་འཁོར་དཔག་ཏུ་མེད་པ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །རང་བཞིན་ལྷུན་གྲུབ་འགག་མེད་གདངས་ཆེན་ལས། །ཡོངས་ཤར་ལོངས་སྤྱོད་རྫོགས་སྐུ་སྟངས་དཔྱལ་ལྷ། །སྟོན་འཁོར་བསམ་གྱིས་མི་ཁྱབ་བགྲང་ཡས་ལ། གསོལ་བ༴ །རང་བཞིན་སྤྲུལ་སྐུའི་ཞིང་དང་དེར་མཆེད་པའི། །གང་འདུལ་ཞིང་ཁམས་རབ་འབྱམས་རྒྱ་མཚོ་ན། །བཞུགས་པའི་རྒྱལ་བ་རྒྱ་མཚོ་སྟོན་འཁོར་ལ། གསོལ་བ༴ །རིགས་བརྒྱ་རིགས་ལྔ་རིགས་གསུམ་སྤྱི་དྲིལ་གཟུགས། །དྲུག་པ་རྡོ་རྗེ་འཆང་ཆེན་རྡོ་རྗེ་སེམས། །དབྱེར་མེད་ལྷའི་བུ་དགའ་རབ་རྡོ་རྗེ་ལ། གསོལ་བ༴ སྐུ་གསུམ་སྟོན་པ་གང་ལ་གང་འདུལ་སྐུར། །སྒྱུ་འཕྲུལ་གར་བསྒྱུར་རྫོགས་པ་ཆེན་པོ་ཡི། །སྟོན་པ་བཅུ་གཉིས་འཁོར་དང་ཡང་འཁོར་ལ། གསོལ་བ༴ འཇམ་དབྱངས་ཕྱག་ན་པདྨ་རྡོ་རྗེ་འཛིན། །ཨུ་པ་རཱ་ཛ་འབྱོར་བའི་དབང་པོ་སོགས། །རོ་ལངས་བདེ་བ་རྡོ་རྗེ་བཞད་རྩལ་ལ། གསོལ་བ༴ རིགས་ཅན་དྲ་མ་ལྔ་དང་རྒྱལ་པོ་ཛཿ ཀུ་ཀུ་རཱ་ཛ་ཨིནྟྲ་བོ་དྷི་སོགས། །སྒེག་རྡོར་བུདྡྷ་གུ་ཧྱ་བི་མ་ལ། གསོལ་བ༴ རིམ་དགུའི་ཐེག་པའི་མངའ་བདག་ཨུ་རྒྱན་རྗེ། །རྒྱལ་ཡུམ་མཚོ་རྒྱལ་ལོ་ཆེན་བཻ་རོའི་ཞབས། །པྲཛྙཱ་རསྨི་རྒྱལ་སྲས་རྣམ་གཉིས་ལ། གསོལ་བ༴ ཆོས་དབྱིངས་རང་གྲོལ་ཆེ་མཆོག་འདུས་པ་རྩལ། །འགྱུར་མེད་རྡོ་རྗེ་ཀུན་བཟང་པདྨ་དབང་། །གྲུབ་པའི་དབང་ཕྱུག་གུ་རུ་འོད་ཟེར་ལ། གསོལ་བ༴ བརྒྱུད་པ་དགུ་ལྡན་ཀློ་ཆེན་རབ་འབྱམས་དང་། །དབྱེར་མེད་མཁྱེན་བརྩེའི་འོད་ཟེར་འཇིགས་མེད་གླིང་། །སྨིན་གྲོལ་བཅུད་འཛིན་ཀུན་བཟང་གཞན་ཕན་ལ། གསོལ་བ༴ །ཀུན་ཏུ་བཟང་པོ་ཐོད་ཕྲེང་ཡབ་ཡུམ་དང་། །རྩ་གསུམ་འདུས་པ་རབ་འབྱམས་དཀྱིལ་འཁོར་ལྷ། །གནས་གསུམ་མཁའ་འགྲོ་བཀའ་སྲུང་དམ་ཅན་ལ། གསོལ་བ༴ ཕྱིར་ལྟར་སྒྲོ་འདོགས་ཀུན་གཅོད་བླ་མ་ལ། །བསྟེན་ནས་བརྗོད་བྱ་བསླབ་པ་རྣམ་གསུམ་དང་། །རྗོད་བྱེད་མདོ་རྒྱུད་ཚིག་ལ་གོམས་བྱས་ནས། །བུམ་དབང་ཐོབ་བྱས་བསྐྱེད་རིམ་སྒོམ་ལ་དབང་། །ལྟ་བ་ཀུན་བརྟགས་གཞན་དབང་ཡོངས་གྲུབ་དང་། །གྲུབ་མཐའ་འཁོར་འདས་དབྱེར་མེད་དོན་རྟོགས་ནས། །འདའ་ཀ་འོད་ཀྱི་གོང་བུ་སྒྲ་ཡིས་འཕོ། །འབྲས་བུ་མཁའ་ཁྱབ་སྤྲུལ་པའི་སྐུ་འགྲུབ་ཤོག །ནང་ལྟར་རང་བྱུང་ཡེ་ཤེས་སྟོན་ནུས་པའི། །བླ་མས་གསང་དབང་ཟབ་མོ་ལ་བརྟེན་ནས། །ངག་གི་སྒྲིབ་སྦྱོང་བདག་བྱིན་བརླབ་པའི་ལམ། །ཕྱི་ནང་གསང་བའི་གཏུམ་མོ་སྒོམ་པ་དང་། །ལྟ་བ་རང་བྱུང་ཡེ་ཤེས་མངོན་གྱུར་ཅིང་། །གྲུབ་མཐའ་མ་འདྲེས་ཡོངས་རྫོགས་འདའ་ཀ་མར། །དཔེ་ཡི་འོད་གསལ་བོགས་འདོན་ལམ་བགྲོད་པའི། །ཆ་ལག་རྣམ་པ་གསུམ་ལ་བརྟེན་བྱས་པས། །འབྲས་བུ་མཁའ་ཁྱབ་རྡོ་རྗེའི་གསུང་འགྲུབ་ཤོག །གསང་བ་ལྷན་སྐྱེས་ཡེ་ཤེས་དོན་སྟོན་པའི། །བླ་མས་ཤེས་རབ་ཡེ་ཤེས་དབང་བསྐུར་ལ། །བརྟེན་ནས་ཡིད་ཀྱི་དྲི་མ་དག་བྱས་ཤིང་། །གཞན་ལུས་མུ་ཏྲ་བརྟེན་ལ་དབང་བྱས་ནས། །ལྟ་བ་ལྷན་ཅིག་སྐྱེས་པའི་ཡེ་ཤེས་དང་། །གྲུབ་མཐའ་བདེ་སྟོང་ཟུང་འཇུག་འདའ་ཀ་མར། །དོན་གྱི་རྡོར་སེམས་འབྲས་བུ་མཁའ་ཁྱབ་ཀྱི། །འགྱུར་མེད་ཐུགས་ཀྱི་རྡོ་རྗེ་འགྲུབ་པར་ཤོག །མཐར་ཐུག་དབང་བཞིའི་དེ་ཉིད་དོན་སྟོན་པའི། །བླ་མས་ཚིག་དབང་བསྐུར་ནས་སྒོ་གསུམ་གྱི། །དྲི་མ་ཀུན་སྦྱངས་གནས་ལུགས་ཕྱག་ཆེན་དང་། །ཐོད་རྒལ་སྟོང་པ་རིག་པའི་སྙིང་པོ་ཅན། །ཉམས་སུ་ལེན་པར་དབང་བྱས་ལྟ་བ་ཡང་། །ཤིན་ཏུ་རྣམ་པར་དག་པའི་ཡེ་ཤེས་དང་། །གྲུབ་མཐའ་བསམ་གྱིས་མི་ཁྱབ་ཟུང་འཇུག་ལ། །འདའ་ཀར་གསང་ཆེན་མ་ཧཱ་མུ་ཏྲའི་ལཾ། །འབྲས་བུ་མཁའ་ཁྱབ་ངོ་བོ་ཉིད་ཀྱི་སྐུ། །མཆོག་ཏུ་མི་འགྱུར་སྟོང་གཟུགས་ཕྱག་རྒྱ་ཆེ། །ཡེ་ཤེས་རླུང་དང་རིག་པར་གྲུབ་པའི་སྐུ། །མཚན་དཔེས་སྤྲས་པ་རང་སྣང་བཞིན་ལེགས་ཅན། །ཁ་སྦྱོར་ཡན་ལག་བདུན་ལྡན་གདོད་མ་ནས། །ལྷུན་གྱིས་གྲུབ་པའི་བདེ་ཆེན་ལྷན་སྐྱེས་ཀྱི། ཡེ་ཤེས་སྐུ་མཆོག་མངོན་དུ་འགྱུར་བར་ཤོག །མདོར་ན་བརྟན་པ་སྣོད་ཀྱི་འཇིག་རྟེན་ཁམས། །བདེ་ཆེན་པདྨ་བཀོད་དུ་འཆར་བ་དང་། །ནང་བཅུད་འཇིག་རྟེན་བདུན་གྱི་གནས་རིགས་ཀུན། །རྩ་གསུམ་ཞི་ཁྲོའི་དལ་དུ་ལྷུན་རྫོགས་ཤིང་། །སྒྲ་གྲགས་གསུང་དང་དྲན་རྟོག་ཐུགས་རྡོ་རྗེར། །སྨིན་ནས་སྲིད་ཁམས་འགྲོ་རྣམས་ཕྱམ་གཅིག་ཏུ། །རིག་འཛིན་པདྨའི་གསང་གསུམ་རྡོ་རྗེའི་སྐུར། །མངོན་འཚང་རྒྱས་ནས་མ་གྱུར་འགྲོ་བའི་ཁམས། །མ་ཟད་དེ་སྲིད་འགྲོ་དོན་མཐའ་ཡས་ཤོག །ཅེས་པདྨའི་ཞལ་གདམས་གྲོལ་ཐིག་མཐོང་བ་རང་གྲོལ་གྱི་བརྒྱུད་པའི་གསོལ་འདེབས་བྱིན་རླབས་སྤྲིན་དཔུང་འདི་ཉིད་ལོ་ཆེན་བཻ་རོའི་ཐུགས་ཀྱི་འོད་ཟེར་གཏེར་ཆེན་པྲཛྙཱ་ར སྨིའི་བསྟན་འཛིན་དུ་རློམ་པ་འཇིགས་མེད་ཕྲིན་ལས་འོད་ཟེར་དཔལ་འབར་དུ་འབོད་པས་སྤེལ་བའི་ཡི་གེ་པ་ནི་རང་སློབ་བློ་གྲོས་བཟང་པོས་བགྱིས་པའི་དགེ་བས་བསྟན་འགྲོ་ཡོངས་ལ་སྨན་པའི་རྒྱུར་གྱུར་ཅིག་གུ། དགེའོ། དགེའོ། དགེའོ། །