རྩ་གསུམ་ཀུན་འདུས་རྣལ་འབྱོར་བྱིན་རླབས་ནོར་བུ།
༄༅། རྩ་གསུམ་ཀུན་འདུས་རྣལ་འབྱོར་བྱིན་རླབས་ནོར་བུ་ཞེས་བྱ་བ་བཞུགས།
ན་མོ་གུ་རུ། རྩ་གསུམ་ཀུན་འདུས་རྣལ་འབྱོར་ནི། སྦྱོར་བ་སེམས་བསྐྱེད་དམ་པ་ཡིས། ཟིན་བཞིན་སྐྱབས་འགྲོ་སེམས་བསྐྱེད་ནི། ན་མོཿ །བྱིན་རླབས་རྩ་བ་བླ་མ་དང་། །དངོས་གྲུབ་རྩ་བ་ཡི་དམ་ལྷ། །བདེ་བསྐྱེད་གནས་གསུམ་མཁའ་འགྲོ་དང་། །བར་ཆད་སེལ་མཛད་ཆོས་སྐྱོང་ལ། །སྐྱབས་སུ་མཆིའོ་འགྲོ་བ་ཀུན། །སངས་རྒྱས་ཐོབ་ཕྱིར་སེམས་མཆོག་བསྐྱེད། ལན་གསུམ་དེ་ནས་ཡན་ལག་བདུན། ཚིག་རྗེས་དོན་མཐུན་འདི་བཞིན་བརྗོད། །རྩ་གསུམ་ཆོས་སྐྱོང་དམ་ཅན་ལ། །ཕྱག་འཚལ་མཆོད་འབུལ་སྡིག་པ་བཤགས། །དགེ་ལ་ཡི་རང་ཆོས་སྟོན་བསྐུལ། །རྒྱལ་རྣམས་མྱ་ངན་མི་འདའ་བཞུགས། །རྣམ་དཀར་དགེ་ཚོགས་འགྲོ་ལ་བསྔོ། དངོས་གཞི་རང་དོན་དམིགས་པ་ཡིས། མ་བསླད་རྩ་གསུམ་རྣལ་འབྱོར་བསྒོམ། ཨེ་མ་ཧོ། །གནས་རང་སྣང་རྣམ་དག་འོག་མིན་ན། །དབྱིངས་ཡེ་ཤེས་དབྱེར་མེད་འཇའ་གུར་དབུས། །གདན་ཐབས་ཤེས་མཚོན་བྱེད་ཟླ་ཉི་དང་། །ཡོངས་དྲི་མ་ཀུན་བྱང་པདྨའི་གདན། །གསུམ་བརྩེགས་པའི་སྟེང་དུ་རྒྱལ་ཀུན་གྱི། །སྐུ་གསུང་ཐུགས་ཡོན་ཏན་ཕྲིན་ལས་རྣམས། །དོན་གཅིག་བསྡུས་རྣམ་འདྲེན་དམ་པའི་མགོན། །དབང་ཁྲིད་དང་ལུང་དང་རྗེས་གནང་དང་། །ཆོས་བྱིན་རླབས་ཐོབ་པའི་བླ་མ་རྣམས། །ཡོངས་གཅིག་བསྡུས་བླ་མ་རིན་པོ་ཆེ། །ཕ་དྲིན་ཅན་ཀུན་བཟང་གཞན་ཕན་པ། །སྐུའི་རྣམ་འགྱུར་ཨོ་རྒྱན་རྡོ་རྗེ་འཆང་། །ལོ་བཅུ་དྲུག་ལོན་པའི་ན་ཚོད་ཅན། །བཀྲག་ལང་ཚོ་རབ་རྒྱས་གཟི་འོད་འབར། །ཞལ་གཅིག་ལ་ཕྱག་ཞབས་ཟུང་རེས་མཛེས། །ཕྱག་གཡས་ན་གསེར་རྡོར་རྩེ་ལྔ་བསྣམས། །གཡོན་བདུད་རྩིས་བཀང་བའི་བྷནྡྷ་ཐོགས། །སྐུར་གསང་ཕོད་དཀར་པོ་དེའི་སྟེང་དུ། །ཆོས་ཐེག་ཆེན་དཔལ་རྫོགས་བེར་འདུང་དང་། །དེའི་སྟེང་དུ་ཆོས་གོས་དམར་པོ་མནབས། །དེ་ཐེག་གསུམ་རྫོགས་པའི་བརྡ་དང་རྟགས། །ཞབས་རྒྱལ་པོ་རོལ་པའི་སྟབས་སུ་བཞུགས། །དེའི་གཙུག་ཏུ་ཆོས་སྐུ་སྣང་མཐའ་ཡས། །མགྲིན་པ་རུ་ལོངས་སྐུ་སྤྱན་རས་གཟིགས། །སྙིང་དབུས་སུ་སྤྲུལ་སྐུ་པདྨ་འབྱུང་། །ལྟེ་བ་རུ་མཁའ་འགྲོ་སྡེ་ལྔ་དང་། །གསང་གནས་སུ་ཆོས་སྐྱོང་དམ་ཅན་སྡེ། །མཐའ་སྐོར་དུ་རྒྱ་བོད་གྲུབ་ཆེན་ཚོགས། །རྒྱ་མཚོ་ལ་གཟའ་སྐར་ཤར་བ་བཞིན། །བདག་ཉིད་ལ་བྱམས་བརྩེའི་ཐུགས་ཀྱིས་ནི། གཟིགས་བཞིན་དུ་བྱིན་ནུས་གཡོ་བར་གྱུར། །ཞེས་བསམ་ལ་གནས་ལྔའི་ལྷ་ལྔ་ཡི། །ཐུགས་དབུས་སུ་ཧྲཱིཿཨཱཿཧཱུཾ་དང་ནི། །མ་དང་ནི་བྷྱོ་ཡིས་མཚན་པར་བསམ། །དེ་དག་ལས་འོད་ཟེར་འཇའ་ཚོན་ལྟར། །འཕྲོས་གྱུར་ནས་རྩ་གསུམ་ལྷ་རྣམས་ཀུན། །སྤྱན་དྲངས་ནས་སོ་སོར་ཐིམ་ཙམ་གྱིས། །དམ་ཚིག་དང་ཡེ་ཤེས་དབྱེར་མེད་པར། །མཁྱེན་བརྩེ་དང་ནུས་སྟོབས་ཕུན་ཚོགས་གྱུར། ཞེས་བསམ་ལ་གསོལ་འདེབས་སྔགས་འདི་བཟླ། ༀ་ཨཱཿབཛྲ་གུ་རུ་དྷེ་ཝ་ཊཱཀྐི་ནི་ཧ་རི་ནི་ས་ར་ཙ་ཧྲཱི་ཡ་དྷ་རྨ་པཱ་ལ་ལོ་ཀ་པཱ་ལ་སརྦ་སིདྡྷི་ཕ་ལ་ཧཱུཾཿ སྔུགས་དེ་མང་དུ་བརྗོད་མཐར་དབང་བླང་བ། །བླ་མ་རྩ་གསུམ་ཆོས་སྐྱོང་དམ་ཅན་གྱི། །གནས་ལྔའི་ཡིག་འབྲུ་སོ་སོར་འོད་དང་ཟེར། །དཀར་དམར་མཐིང་སེར་ལྗང་གུའི་ཚོགས་བྱུང་ནས། །རང་གི་གནས་ལྔར་ཐིམ་པས་རྩ་གསུམ་ལྷའི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །དབང་དང་དངོས་གྲུབ་བྱིན་རླབས་ནུས་པའི་སྟོབས། །ཐམས་ཅད་རང་ལ་ཐོབ་པའི་མོས་གུས་བསྐྱེད། །དེ་རྗེས་རྩ་གསུམ་ལྷ་ཚོགས་འོད་ཞུ་ནས། །རང་ལ་ཐིམ་པས་དུ་མ་རོ་གཅིག་གྱུར། ཞེས་པས་དམིགས་མེད་ངང་ནས་བསྔོ་སྨོན་བྱ། དེ་ལྟར་རྩ་གསུམ་ལྷ་ཡི་རྣལ་འབྱོར་འདི། དད་དམ་ལྡན་པ་ཕྲིན་ལས་མིང་འཛིན་གྱིས། བསྐུལ་ངོར་ཀུན་བཟང་གཞན་ལ་ཕན་དེ་ཡིས། སྤེལ་བས་འགྲོ་རྣམས་སངས་རྒྱས་ས་ཐོབ་ཤོག །དགེའོ། དགེའོ། དགེའོ། །