དམ་ཆོས་བདེ་ཆེན་ལམ་མཆོག་ལས༔ དཀར་གསུར་གཏོང་ཐབས་མཆོད་སྦྱིན་གཏེར་མཛོད།

༄༅། །དམ་ཆོས་བདེ་ཆེན་ལམ་མཆོག་ལས༔ དཀར་གསུར་གཏོང་ཐབས་མཆོད་སྦྱིན་གཏེར་མཛོད་བཞུགས༔

ན་མོ་གུ་རུ་ཨ་མི་ཏ་བྷ་ཡེ། འདིར་དཀར་གསུར་གཏོང་ཐབས་ལ་མཐོང་བརྒྱུད་བཞིན་གསུར་མཆོད་བསྟར་ལ༔ ཚད་མེད་རྣམ་པ་བཞིའི་བློ་དང་ལྡན་པའི་ངང་ནས། ན་མོ་བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། ཞིང་ཁམས་རྒྱ་མཚོའི་མགྲོན་རིགས་མཆོག་དམན་ཐམས་ཅད་བྱོན་ནས་མདུན་གྱི་ནམ་མཁར་བཞུགས་པར་གྱུར། །ༀ་ཨཱཿཧཱུྃ་ ལན་བདུན་བརྗོད། དུ་བ་འདི་འདོད་ཡོན་གྱི་ལྷ་མོ་གཟུགས་རྡོ་རྗེ་མ་མཛེས་ཤིང་ལྟ་ན་སྡུག་པ་དབྱངས་སྙན་པ་དྲི་ཞིམ་པ་རེག་བྱ་འཇམ་པ་ཕྱག་གཉིས་ན་ལྷའི་བདུད་རྩི་རོ་བརྒྱ་དང་ལྡན་པའི་བུམ་པ་བསྣམས་པའི་ནང་ནས་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་སྤྲོ་ཞིང་སྣོད་བཅུད་ཀྱི་ཉེས་གྲིབ་དང་དམུ་གབ་དག་པར་བྱེད་པའི་དབུ་གཙུག་ན་སངས་རྒྱས་རིན་ཆེན་མངས་ཕྱག་གཡས་མཆོག་སྦྱིན་གྱི་རྒྱས་དབུལ་བ་སེལ་ཞིང་འདོད་ཡོན་གྱི་ལོངས་སྤྱོད་ཟད་མི་ཤེས་པའི་གཏེར་དུ་གྱུར། ན་མཿ སརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཁེ་བྷྱཿ སོགས་ལན་གསུམ་བརྗོད། ཨེ་མ་ཧོཿ རང་བྱུང་ལྷུན་གྲུབ་རིན་པོ་ཆེ་ཡི་སྣོད། །ཟླ་དཀར་མདངས་འཛིན་ཞི་བའི་ཐབ་ཀྱི་དལ། །མཚན་ཉིད་ཕུན་ཚོགས་དབུས་སུ་མེ་ཡི་ལྷ། །དབྱིངས་རིག་དབྱེར་མེད་ངོ་བོ་རབ་འབར་ཀློང་། །འཇིག་རྟེན་སྲིད་ཞིའི་འདོད་དགུའི་ལོངས་སྤྱོད་རྫས། །དངོས་པོར་འཛིན་པ་བསྲེགས་པའི་དྭངས་མའི་བཅུད། །ཟག་མེད་ཡེ་ཤེས་བདུད་རྩིར་བྱིན་བརླབས་ནས། །མཆོད་སྦྱིན་མགྲོན་རྣམས་མཉེས་པའི་ལས་ལ་འཇུག །བྷྲུཾ་སྲིད་ཞིའི་དཔལ་ཡོན་ཕུན་ཚོགས་གསུར་མཆོད་འདི། །མཆོག་གསུམ་རྒྱལ་བ་རྒྱ་མཚོ་སྲས་དང་བཅས། །ཉན་ཐོས་རང་རྒྱལ་ལྷ་དང་མི་ལ་སོགས། །སྟོན་པའི་རྣམ་བཞིའི་འཁོར་ཚོགས་རྒྱ་མཚོར་འབུལ། །ཁྱད་པར་དྲུག་ལྡན་བླ་མ་དམ་པ་དང་། །ཡི་དམ་རྒྱུད་སྡེ་བཞི་དང་ཐེག་རིམ་དགུའི། །ལྷ་ཚོགས་ཞི་ཆགས་ཁྲོ་སོགས་ཡབ་ཡུམ་སྲས། །ཀུན་ལ་གསུར་མཆོད་འདོད་དགུའི་ལོངས་སྤྱོད་འབུལ། །ཡུལ་ཆེན་ཉེར་བཞི་གནས་ཆེན་སུམ་ཅུ་གཉིས། །དུར་ཁྲོད་ཆེན་པོ་བརྒྱད་ན་ལེགས་བཞུགས་པའི། །དཔའ་བོ་དཔའ་མོ་མཁའ་འགྲོ་མཁའ་འགྲོ་མ། །ཆོས་སྲུང་དམ་ཅན་རྒྱ་མཚོའི་ཚོགས་རྣམས་ལ། །འདོད་ཡོན་ལྔ་ལྡན་གསུར་མཆོད་རྒྱ་མཚོ་འདི། །འབུལ་ལོ་དགྱེས་ཤིང་ཚིམ་པར་བཞེས་སུ་གསོལ། །མ་མགོན་ལྕམ་དྲལ་ཚེ་རིང་མཆེད་ལྔ་དང་། །ཕྱི་ནང་གསང་བ་མཆོག་དང་སྤྲུལ་པ་དང་། །སྣང་སྲིད་སྡེ་བརྒྱད་དཔལ་མགོན་བདུན་ཅུར་བཅས། །འདོད་ཡོན་ལྔ་ལྡན་གསུར་མཆོད་འདི་འབུལ་བཞེས། །གཞན་ཡང་འབྱུང་ལྔ་སྤར་སྨེ་དུས་ཚོད་ལྷ། །ཕྱོགས་མཚམས་སྟེང་འོག་ཉི་མ་ཟླ་བའི་ལྷ། །འགོ་བའི་ལྷ་ལྔ་རྟ་ནོར་ལུག་གི་ལྷ། །ཁང་ལྷ་ཞིང་ལྷ་ཡུལ་འབྲོག་གནས་ཀྱི་ལྷ། །བྱེས་ལྷ་ལམ་ལྷ་ཚོང་མགྲོན་དམག་ཇག་ལྷ། །མ་ལུས་འཁོར་བཅས་གསུར་མཆོད་འདི་བཞེས་ཤིག །གཞན་ཡང་གཉུག་གནས་འཕྲལ་རྒྱུའི་རིགས་རྣམས་དང་། །བགེགས་རིགས་ལན་ཆགས་ཤ་འཁོན་མ་འཁོར་ཚིམ། །གཤིན་པར་བརྫུ་ཞིང་གསོན་པོར་འཇུག་པའི་ཚོགས། །གསུར་མཆོད་འདོད་ཡོན་ལྔ་ལྡན་འདི་བཞེས་ཤིག །ཁྱད་པར་སྔོན་འདས་གཤིན་པོ་ཕལ་མོ་ཆེ། །བར་དོར་འཁྱམས་ཤིང་བསྐལ་པར་གནས་པའི་རིགས། །དེ་ལས་དེང་གི་དུས་དང་སླད་ཀྱི་ཆའི། །ཚེ་ཟད་ལས་ཀྱིས་ཤི་དང་དུས་མིན་ཤི། །གཤིན་གྱི་གྲལ་བསྙེགས་སེར་སྐྱ་བུད་མེད་རིགས། །བྱིས་པ་ལ་སོགས་དྲི་དང་གསུར་ལ་སྲེད། །བྱེ་བྲག་ཚེ་འདས་ཆྒཻའི་གཙོར་བྱས་པའི། །བར་དོའི་འགྲོ་རྣམས་གསུར་མཆོད་འདི་བཞེས་ཤིག །གཞན་ཡང་དྲན་ངོར་མ་ཤར་མིང་མ་སྨོས། །ཁས་ཞན་དབང་ཆུང་གཟུགས་ངན་གཟི་བརྗིད་བྲལ། །ཅེར་རེ་བལྟ་དང་གྲོག་གེར་རབ་ཉན་ཞིང་། །དུང་ངེ་བཟའ་བཏུང་ཡིད་ལ་བྱེད་པའི་རིགས། །བཟའ་བ་མེར་བསྲེགས་བཏུང་བས་བྲན་པ་འདི། །སྣོམས་ཤིག་བཞེས་ཤིག་སྤྱོད་ཅིག་ཚིམ་པར་རོལ། །དེ་ལྟར་འཁོར་གསུམ་མི་དམིགས་མཆོད་སྦྱིན་མཐུས། །རྒྱལ་བ་རྒྱ་མཚོ་མཆོད་པས་མཉེས་གྱུར་ཅིག །དམ་ཅན་རྒྱ་མཚོའི་ཐུགས་དམ་སྐོང་གྱུར་ཅིག །རིགས་དྲུག་སོ་སོའི་འདོད་པ་ཚིམ་གྱུར་ཅིག །ཤ་འཁོན་ལན་ཆགས་བུ་ལོན་འཁོར་གྱུར་ཅིག །མཆོད་ཡུལ་ཀུན་མཉེས་མཆོག་ཐུན་དངོས་གྲུབ་སྩོལ། །སྦྱིན་ཡུལ་ཡོངས་ཚིམས་བསམ་དགུའི་འདོད་དོན་སྒྲུབས། །འཇིག་རྟེན་ཁམས་བདེ་བདེ་སྐྱིད་ཕུན་ཚོགས་བརྟན། །ཚེ་འདིར་རྫོགས་ལྡན་དཔལ་ལ་ལོངས་སྤྱོད་ཅིང་། །མཐར་ཐུག་བདེ་ཆེན་ཞིང་ལ་སྤྱོད་པར་ཤོག །ཅེས་དང་གཞན་ཡང་། ཁམས་གསུམ་དག་པའི་ཞིང་། །སྲིད་གསུམ་ཐུགས་རྗེའི་མགྲོན། །མ་ལུས་ཁྱབ་པའི་ཟས། །ཆོས་ཉིད་ནུས་པའི་མཐུས། །འདོད་ཡོན་མི་ཟད་པའི་གཏེར་ལ་ལོངས་སྤྱོད་པར་གྱུར་ཅིག །མ་ཎི་ཅི་ནུས་འདོན་ལ། མ་འབྱོར་པ་དང་༴ བཟོད་པར་གསོལ་ནས་ཡིག་བརྒྱ་བརྗོད། ཁྱེད་ཀྱིས་སེམས་ཅན་དོན་ཀུན་མཛད། སོགས། མགྲོན་རྣམས་སོ་སོ་རང་རང་གནས་སུ་གཤེགས་པར་གྱུར། ཞེས་བསམ་ལ། བསྔོ་སྨོན་ཅི་འགྲུབ་བྱའོ། ཞེས་པ་འདིའང་༧ཡབ་རྗེ་སྤྲུལ་པའི་སྐུ་རིན་པོ་ཆེའི་དགོངས་བཞེད་བཞིན་༧རྡོ་བླས་སྨྲས་པའི་དགེ་བས་མགོན་མེད་གཤིན་པོའི་ཚོགས་རྣམས་ལ་ཕན་པའི་རྒྱུར་གྱུར་ཅིག་གུ། དགེའོ། །དགེའོ། །དགེའོ། །བཀྲ་ཤིས།། །།