སྡེ་བརྒྱད་དྲེགས་བསྐུལ་གླང་སྨྱོན་སྣ་རྩེར་བཀོད་པའི་མཚོན་འཁོར།
༄༅། །སྡེ་བརྒྱད་དྲེགས་བསྐུལ་གླང་སྨྱོན་སྣ་རྩེར་བཀོད་པའི་མཚོན་འཁོར་བཞུགས། ཧཱུཾ་ཧཱུཾ་ཧཱུཾ། ང་ནི་དཔལ་ཆེན་དྲག་པོ་ཐོད་ཕྲེང་རྩལ། །ཆེ་བཙན་དྲེགས་པ་ཡོངས་ཀྱི་སྲོག་སྙིང་བདག །གཡོ་མེད་དེ་བཞིན་ཉིད་ཀྱི་ཏིང་འཛིན་ལས། །ཀུན་སྣང་སྙིང་རྗེ་ཆེན་པོའི་འོད་སྟོང་འབར། །རབ་འབྱམས་ཕྲིན་ལས་འཇུག་པ་དཔག་མེད་ཀྱིས། །མཐའ་ཡས་འགྲོ་ལ་གང་འདུལ་ཆོས་སྟོན་ཕྱིར། །རྣམ་དཀར་ལས་སྤང་གནག་ཅིང་རྩུབ་པའི་དགྲ། །འཕྲལ་ཕུགས་མིང་དགེ་སྤེལ་བའི་གདུག་པ་ཅན། །ཆོས་སྲིད་ཁྲིམས་ཀྱི་ཡལ་གམ་བསྣུབས་པ་སྤྱི། །ཁྱད་པར་གཟུགས་དང་མིང་རུས་འབེན་དུ་བཅས། །བསྒྲལ་བྱར་འོས་པའི་དམིགས་ཡུལ་འདི་ཉིད་ལ། །སྡེ་བརྒྱད་དྲེགས་པ་ཡོངས་ཀྱི་བཀའ་ཆད་ཕོབ། །བསྐུལ་ལོ་བསྐུལ་ལོ་དྲེགས་པ་སྡེ་བརྒྱད་བསྐུལ། །ཁྱེད་ཅག་དོན་ལ་མྱ་ངན་འདས་མོད་ཀྱང་། །གདུལ་དཀའ་འདུལ་ཕྱིར་དྲེགས་པའི་ཚུལ་བཟུང་བཞིན། །དུས་ལ་བབ་པོ་དགྲ་སྲོག་མྱུར་དུ་ཆོད། །བསྐུལ་ལོ་ཕྱི་ཡི་ལྷ་སྲིན་སྡེ་བརྒྱད་བསྐུལ། །དགྲ་བོའི་ཕྱི་ཡུལ་བདོག་རྒུ་སྟོབས་འབྱོར་ཆོམས། །བསྐུལ་ལོ་ནང་གི་ལྷ་སྲིན་སྡེ་བརྒྱད་བསྐུལ། །དགྲ་བོའི་བུ་དང་ཆུང་མ་ལུས་རྟེན་གཞོམ། །བསྐུལ་ལོ་གསང་བའི་ལྷ་སྲིན་སྡེ་བརྒྱད་བསྐུལ། །དགྲ་བོའི་སྐྱོབ་བྱེད་ལྷ་ཕྲོལ་བདུད་དང་སྤྲོད། །བསྐུལ་ལོ་མཆོག་གི་ལྷ་སྲིན་སྡེ་བརྒྱད་བསྐུལ། །དགྲ་བོའི་ལུས་སེམས་གཉིས་ཕྲོལ་བདེ་སྐྱིད་གཏོར། །བསྐུལ་ལོ་སྤྲུལ་པའི་ལྷ་སྲིན་སྡེ་བརྒྱད་བསྐུལ། །དགྲ་བོའི་དཔའ་རྩལ་སྙན་གྲགས་མིང་མེད་མཛོད། །བསྐུལ་ལོ་སྣང་ཞིང་སྲིད་པའི་སྡེ་བརྒྱད་བསྐུལ། །དགྲ་བོའི་མི་ནོར་འཁོར་བཅས་རྡུལ་དུ་རློགས། །ཤ་ཁྲག་དམར་གྱི་གཏོར་མ་འདི་བཞེས་ལ། །དམ་ཉམས་གནོད་བྱེད་དགྲ་བོ་གདུག་པ་ཅན། །ལོ་ཟླ་ཞག་ཏུ་མ་འགྱང་མྱུར་བསྒྲལ་ནས། །སངས་རྒྱས་བསྟན་པ་དར་བའི་ཕྲིན་ལས་མཛོད། །སྡེ་བརྒྱད་དྲེགས་བསྐུལ་གླང་སྨྱོན་སྣ་རྩེར་བཀོད་པའི་མཚོན་འཁོར་ཞེས་བྱ་བ་འདི་ཡང་རིག་སྔགས་འཆང་བ་ལག་ན་རྡོ་རྗེས་སོ།། །།