སྐྱབས་འགྲོ་སྨོན་ལམ་འདོད་གསོལ་དང་བཅས་བདུད་རྩིའི་ཟེར་མ།
༄༅། །སྐྱབས་འགྲོ་སྨོན་ལམ་འདོད་གསོལ་དང་བཅས་བདུད་རྩིའི་ཟེར་མ་བཞུགས། ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་སྲས་དང་བཅས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདག་ཉིད་ཆེན་པོ་རིགས་དང་དཀྱིལ་འཁོར་ཀུན་གྱི་མངའ་བདག་བླ་མའི་རྣམ་རོལ་སྔོན་གྱི་དུས་ན་ངོ་བོ་ཀ་དག་ཀུན་ཏུ་བཟང་པོ་དང་། །རང་བཞིན་ལྷུན་གྲུབ་བཅོམ་ལྡན་འདས་རྒྱལ་བ་རིགས་ལྔ་དེ་ཉིད་གཅིག་དྲིལ་རིགས་དྲུག་པ་རྡོ་རྗེ་འཆང་ཆེན་པོ། །དེ་ཉིད་ཀྱི་སྒྱུ་འཕྲུལ་ཟློས་པའི་གར་བསྒྱུར་དཔལ་ལྡན་རྡོ་རྗེ་སེམས་དཔའ་གསང་བའི་བདག་པོ་རྡོ་རྗེ་ཆོས། །དེ་ཉིད་མིའི་རྫུ་ལ་ཞུགས་པ་སྤྲུལ་པའི་སྐུ་མཆོག་དགའ་རབ་རྡོ་རྗེ་དང་དུས་གསུམ་ཀུན་མཁྱེན་པདྨ་འབྱུང་གནས། འཇའ་ལུས་རྡོ་རྗེའི་སྐུ་བརྙེས་བི་མ་ལ་མི་དྲ། དེ་ཉིད་བདེ་གཤེགས་སྙིང་པོའི་རང་བཞིན་མཁའ་ཟླ་གཅིག་པོའི་ཆོ་འཕྲུལ་གྱི་འཇིག་རྟེན་གྱི་ཁམས་ཀྱི་ཆུ་སྣོད་ཆེ་ཆུང་ཇི་སྙེད་དུ་འཆར་ནུས་པའི་སྟོབས་མཐུས་རྩལ་རྫོགས་བཞིན། ཀུན་བྱེད་རྒྱལ་པོའི་རང་རྩལ་ལས་འཕགས་པ་རིགས་གསུམ་མགོན་པོའི་སྒྱུ་འཕྲུལ་མེས་དབོན་རྣམ་གསུམ་དང་། །དེ་ལས་ཡང་ཡབ་རྗེ་བླ་མའི་སྤྲུལ་གཞི་ཆོས་སྐྱོང་བའི་རྒྱལ་པོ་ཚངས་པ་ལྷའི་མེ་ཏོག་གི་རིགས་ཀྱི་མྱུ་གུ་རྩེ་མོའི་གྲངས་ལྡན་ལས་ལྷ་སྲས་མུ་རུམ་བཙན་པོ་དེ་ཉིད་ཟློས་པའི་གར་བསྒྱུར། །ཨོ་རྒྱན་ཆེན་པོའི་ཕྲིན་ལས་ཕྱོགས་བརྒྱར་སྤེལ་བའི་མངའ་བདག་གཏེར་ཆེན་སངས་རྒྱས་གླིང་པ་ནས་གང་ལ་གང་འདུལ་གྱི་སྐྱེ་སྤྲུལ་མང་དུ་བྱུང་མཐར་ཡུལ་མཐའ་འཁོབ་ཀྱི་གདུལ་བྱར་རབ་འབྱམས་ཕྲིན་ལས་ཀྱི་འཇུག་པ་དཔག་མེད་ཀྱི་སྒོ་ནས་ཐར་བ་དང་ཐམས་ཅད་མཁྱེན་པའི་ལམ་རིམ་གྱིས་སམ་ཅིག་ཅར་དུ་མངོན་པར་སྟོན་ནུས་པ་རྒྱལ་བ་རྡོ་རྗེ་འཆང་ཆེན་པོ་དང་དབྱེར་མ་མཆིས་པ་གང་གི་མཚན་ཤིན་ཏུ་བརྗོད་པར་དཀའ་ཡང་བདག་སོགས་རྣམས་ཀྱི་མོས་གུས་དང་གདུང་ཤུགས་དྲག་པོའི་སྒོ་ནས་དོན་གྱི་སླད་དུ་མཚན་ནས་སྨོས་ན་ཆོས་སྒོར་དང་པོའི་ཞུགས་པའི་མཚན་བསོད་ནམས་བསྟན་འཛིན། མིང་དོན་དང་མཐུན་པའི་མཚན་ཀུན་བཟང་གཞན་ཕན། །ཡབ་རྗེ་ཆོས་ཀྱི་རྒྱལ་པོའི་ལུང་བསྟན་དང་མཐུན་པའི་མཚན་འཇིགས་མེད་ཕྲིན་ལས་འོད་ཟེར་དཔལ་འབར། རྒྱལ་བའི་ཕྲིན་ལས་ལ་རང་དབང་བསྒྱུར་བའི་མཚན་ཀརྨ་དབང་དྲག་གམ། བྱང་ཆུབ་རྡོ་རྗེ་ལ་སོགས་པའི་མཚན་གྱི་རྣམ་གྲངས་དུ་མ་ལ་རང་དབང་བསྒྱུར་བའི་ཟབ་གསང་རྡོ་རྗེ་ཐེག་པའི་བསྟན་པའི་མངའ་བདག་སྟོན་པའི་ཞལ་སྐྱིན་བཀའ་དྲིན་གསུམ་ལྡན་བླ་མ་རིན་པོ་ཆེ་དེ་ཉིད་ཀྱི་ཞབས་ཀྱི་པདྨོ་དྲི་མ་དང་བྲལ་བར་དུས་དང་རྣམ་པ་ཀུན་ཏུ་རྣམ་གསུམ་དད་པའི་སྒོ་ནས་ཕྱག་འཚལ་ཞིང་། སྐྱབས་སུ་མཆིའོ། སྐྱེ་བ་དང་ཚེ་རབས་ཀྱི་ཕྲེང་བ་ཀུན་ཏུ་ཐུགས་བརྩེ་བ་ཆེན་པོས་རྗེས་སུ་བཟུང་བཞིན་ཆོས་ཆོས་སུ་འགྲོ་བ། ཆོས་ལམ་དུ་ལོངས་པ། །ལམ་འཁྲུལ་པ་སེལ་བ། འཁྲུལ་རྟོག་ཡེ་ཤེས་སུ་འཆར་བ། མ་རྟོགས་ལོག་རྟོག་ཕྱོགས་རྟོགས་ཀྱི་དབང་དུ་སྐད་ཅིག་ཙམ་ཡང་མི་འགྲོ་བར་ས་ལམ་གྱི་ཡོན་ཏན་ཐམས་ཅད་མྱུར་དུ་རྫོགས་ནས། །ཞི་བ་ཕྱོགས་གཅིག་མ་ཡིན་པར་སྟོང་ཉིད་སྙིང་རྗེ་བདེ་སྡོང་ཟུང་འཇུག་ཅེས་མཐའ་བརྒྱད་དང་བྲལ་བའི་དབུ་མ། སྣང་སྲིད་འཁོར་འདས་ཕྱག་རྒྱས་ཐེབས་པ་ཕྱག་ཆེན། ཆོས་རྣམས་ངོ་བོ་སྟོང་པ། རང་བཞིན་གསལ་བ༑ ཐུགས་རྗེ་ཀུན་ཁྱབ་གསུམ་དུ་རྫོགས་པ་རྫོགས་པ་ཆེན་པོའི་ཆོས་རྣམས་མཐར་ཕྱིན་ནས་ནམ་མཁའ་ཇི་སྲིད་དུ་སེམས་ཅན་ཐམས་ཅད་ཀྱི་དོན་ཐོགས་པ་མེད་པར་འབྱུང་བར་གྱུར་ཅིག །སྐྱབས་འགྲོ་སྨོན་ལམ་འདི་འདྲ་བ། །དགོས་ཞེས་མི་བུ་རུས་དྲུག་གི། །ནང་ཚན་ཨ་ལྕགས་འབྲུར་མཆེད་པའི། །མགོ་ལོག་མཆོག་ལྡན་གྱིས་བསྐུལ་བཞིན། །རྡོ་བླ་རྣལ་འབྱོར་པ་དེ་ཡིས། །སྐུལ་བ་པོ་སོགས་རྗེས་འཇུག་གི། །དད་པའི་ཆུ་བོ་རྒྱས་ཕྱིར་དུ། །སྤེལ་བཞིན་ཐུགས་མཆོག་རྡོ་རྗེ་ཡིས། །བྲིས་འདིའི་ དགེ་བས་བསྟན་དང་འགྲོར། །ཕན་བདེ་རྒྱ་ཆེན་འབྱུང་བར་ཤོག །དགེའོ། །དགེའོ།། །།