བླ་བརྒྱུད་ཁྱད་པར་བ་རྣམས་ཀྱི་གསོལ་འདེབས་སྙན་བརྒྱུད་བྱིན་རླབས་འབེབས་པའི་སྤྲིན་མཛོད།

༄༅། །བླ་བརྒྱུད་ཁྱད་པར་བ་རྣམས་ཀྱི་གསོལ་འདེབས་སྙན་བརྒྱུད་བྱིན་རླབས་འབེབས་པའི་སྤྲིན་མཛོད་ཅེས་བྱ་བ་བཞུགས། ༈ ན་མོ་གུ་རུ། སྐུ་གསུམ་ལྷུན་གྲུབ་བདེ་ཆེན་ལྷན་སྐྱེས་ཀྱི་ཕོ་བྲང་། །ཟག་མེད་འཇའ་གུར་འཁྲིགས་པའི་འོད་ཕུང་གི་ཀློང་ན། །དུས་གསུམ་སངས་རྒྱས་གཉིས་པ་མཚོ་སྐྱེས་རྗེ་དྲན་བྱུང་། །བློ་སྣ་ཆོས་ལ་འགྱུར་བར་བྱིན་གྱིས་རང་རློབས་ཤིག །ཀུན་ཁྱབ་ཆོས་དབྱིངས་ཡེ་ཤེས་བུམ་སྐུ་ཡི་ཀློང་ན། །རྫོགས་ཆེན་ནམ་མཁའི་རྣལ་འབྱོར་ཀློང་ཆེན་གྱི་རབ་འབྱམས། །དོན་གྱིས་ཐམས་ཅད་མཁྱེན་པ་སྙིང་ཁོང་ནས་དྲན༴ མི་རྟག་འཆི་བ་དྲན་པར་བྱིན༴ རྣམ་སྣང་ཐུགས་རྗེ་ཡེ་ཤེས་སྒྱུ་འཕྲུལ་གྱི་རོལ་གར། །ལོ་ཆེན་བཻ་རོའི་རྣམ་འཕྲུལ་པྲ་ཛྙཱ་ཡི་མཚན་ཅན། །འོད་གསལ་སྣ་ཚོགས་རང་གྲོལ་སྙིང་དབུས༴ དགོས་མེད་རྒྱུད་ལ་སྐྱེ་བར༴ ལུང་རྟོགས་ཕྱུར་བུར་སྤུང་པའི་ས་འཛིན་གྱི་ངོས་སུ། །འཇིགས་མེད་མི་ཡི་སེང་གེ་ལྷ་བཙུན་གྱི་ཆོས་རྗེ། །བརྟུལ་ཞུགས་གྲུབ་བརྙེས་ཡོངས་ཀྱི་གཙུག་རྒྱན་དེ་དྲན༴ ཚེ་དང་སྒྲུབ་པ་མཉམ་པར་བྱིན༴ མཚོ་རྒྱལ་ཟློས་གར་རིག་འཛིན་ཀུན་བཟང་གི་པདྨ། །ལྷན་བརྩེའི་རྣམ་འཕྲུལ་མཉམ་མེད་ཧཱུཾ་ནག་གི་འགྲོ་འདུལ། །ཀུན་འདུས་གཅིག་ཆོག་རྒྱལ་པོ་ཐེག་གླིང་རྗེ་དྲན༴ དོན་གཉིས་མཐའ་རུ་ཕྱིན་པར༴ མཁྱེ༵ན་པའི་ཡེ་ཤེས་འཇམ་དཔལ་རྣོན་པོ་དང་མཚུངས་ཤིང་། །བྱམས་བརྩེ༵འི་རང་བཞིན་ཕྱག་ན་པདྨ་ཡི་ངང་ཚུལ། །མཐུ་སྟོབས་འོ༵ད་ཟེ༵ར་ཕྱག་ན་རྡོ་རྗེ་དང་དབྱེར་མེད། །རྒྱལ་ཀུན་ངོ་བོ་འཇིགས་མེད་གླིང་པ་དེ༴ ཀ་དག་ལྷུན་གྲུབ་རྟོགས་པར་བྱིན༴ ཆོས་བརྒྱད་ཁྲིམས་ཀྱི་རཱ་ཛ་སྟོབས་རྩལ་སོགས་དམན་པས། །ཆོས་མིན་སྤྱོད་པའི་འཁོར་འབངས་ཡང་དཀོན་པའི་རྣལ་འབྱོར། །ཆོས་དང་ཆོས་མིན་ཤེས་བཞིན་གཞན་དོན་ལ་བརྩོན་པའི། །འཇིགས་མེད་ཕྲིན་ལས་འོད་ཟེར་དེ་དད་ངོར་སྣང་བྱུང་། །དམ་ཚིག་ཉམས་མེད་བསྲུང་བར་བྱིན་གྱིས་རང་རློབས་ཤིག ༧ །ཡང་ན། འོད་གསལ་འགྲོ་འོང་ལས་འདས་སྤྲོས་བྲལ་གྱི་ཞིང་ན། །ལྷུན་གྲུབ་དོན་གྱི་བླ་མ་མཁྱེན་བརྩེ་ཡི་འོད་ཟེར། །ཁམས་གསུམ་འགྲོ་བའི་མགོན་པོ་སྙིང་ཁོང་ནས་དྲན་བྱུང་། །ཐུགས་རྒྱུད་དགོངས་པའི་ཡེ་ཤེས་བདག་ཉིད་ལ་འཕོས་ཤིག །གར་བཞུགས་བདེ་བ་ཆེན་པོའི་འོག་མིན་གྱི་ཞིང་ན། །སྙན་བརྒྱུད་དོན་གྱི་བཀའ་བབ་དྲིན་ཅན་གྱི་བླ་མ། །རིག་འཛིན་བྱང་ཆུབ་རྡོ་རྗེ་ཡབ་སྲས་ཟུང་དྲན་བྱུང་། །སྨིན་གྲོལ་བདུད་རྩིའི་ཆུ་རྒྱུན་སྤྲང་ཆུང་ལ་སྩོལ་ཤོག །ཨ་ཧོ། སྐྱེ་འགག་གནས་གསུམ་བྲལ་བ་གདོད་མ་ཡི་གཤིས་ལུགས། །རྩེ༷་གཅིག༷་རང་ངོ་ཤེས་པ་སྦྱོར་ལམ་གྱི་རྣལ་འབྱོར། །ཡིད་དཔྱོད་ལྐོག་ཏུ་མ་གྱུར་མངོན་སུམ་གྱི་རིག་མདངས། །འབད་མེད་ལྷུག་པར་སྟོན་ཅིག་དྲིན་ཆེན་གྱི་བླ་མ། །བྱ་རྩོལ་བློ་ཡི་མདུད་པ་རང་གྲོལ་དུ་སོང་ནས། །སྤྲོས༷་བྲལ༷་བདེ་བ་ཆེན་པོ་མཐོང་ལམ་གྱི་རྣལ་འབྱོར། །ཐིག་ལེ་ཆེན་པོའི་ཀློང་དུ་གོང་འཕེལ་གྱི་རིག་མདངས། །མཐོང་ནས་ལོངས་སྐུའི་སྒྲོ་འདོགས་ད་ལྟ་རང་ཆོད་ཤོག །སྣང་སེམས་གཉིས་སུ་མ་གྲུབ་ཆོས་སྐུ་ཡི་ཀློང་ན། །རོ་གཅིག་འཁོར་འདས་རང་གྲོལ་སྒོམ་ལམ་གྱི་རྣལ་འབྱོར། །ལྔ་ལྡན་ཚོམ་བུའི་ཀློང་དུ་ཚད་ཕེབས་ཀྱི་རིག་མདངས། །མཐོང་ནས་ཕྱིར་མི་ལྡོག་པའི་དངོས་གྲུབ་དེ་སྩོལ་ཤོག །རིག་པ་བག་ཆགས་གཡའ་ཡིས་གདོད་མ་ནས་མ་གོས། །སྒོམ་མེད་སྐུ་གསུམ་རང་ཆས་དག་པ་ཡི་གཉིས་ལྡན། །ཡེ་གྲོལ་འདུས་མ་བྱས་པ་ཆོས་ཟད་ཀྱི་ཀློང་དུ། །འཕོ་ཆེན་འཇའ་ལུས་རྡོ་རྗེའི་སྐུ་མཆོག་དེ་འགྲུབ་ཤོག །ཆོས་ཉིད་ཟད་སར་འཁྱོལ་བའི་གསོལ་འདེབས་ཀྱི་གླུ་ཆུང་། །དཔའ་བོ་ཌཀྐི་འདུ་བའི་ཡར་ཚེས་ཀྱི་ཐུན་ལ། །སྐྱིད་པོའི་མལ་དུ་བྱ་བཏང་རྣལ་འབྱོར་ངས་བླངས་པས། །རྩ་གསུམ་དམ་ཅན་དགྱེས་པའི་མཆོད་དབྱངས་སུ་འབུལ་ལོ།། །།