ཡིག་དྲུག་བསྐུལ་མ་འཕགས་པའི་ཞམ་ངོམ།
༄༅། །ཡིག་དྲུག་བསྐུལ་མ་འཕགས་པའི་ཞམ་ངོམ་བཞུགས། །
ན་མོ། མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་འཕགས་མཆོག་ཐུགས་རྗེ་ཆེན་པོའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་སྐབས་སུ་མཆིའོ། །བདག་སོགས་སེམས་ཅན་ཐམས་ཅད་ཐར་པ་དང་ཐམས་ཅད་མཁྱེན་པའི་གོ་འཕང་ལ་འགོད་པའི་ཆེད་དུ་མ་ཎིའི་འཛབ་དབྱངས་སྒྲོགས་པར་ཞུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ། སྡུག་བསྔལ་མེད་པའི་བདེ་བ་དམ་པ་དང་མི་འབྲལ། ཉེ་རིང་ཆགས་སྡང་དང་བྲལ་བའི་བཏང་སྙོམས་ཆེན་པོ་ལ་གནས་པའི་ཆེད་དུ་མ་ཎིའི་འཛབ་དབྱངས་སྒྲོགས་པར་ཞུ། གཞན་ཡང་རྒྱལ་ཁམས་ཀུན་ཏུ་དུས་ཀྱི་འཁྲུག་པ་ཞི་བ། ནད་ཀྱི་འཚེ་བ་བྲལ་བ། མཚོན་གྱི་བསྐལ་པ་དབེན་པ། མི་ནད་དང་ཕྱུགས་ནད་རྒྱུན་ཆད་ཅིང་རྫོགས་ལྡན་གྱི་བསྐལ་པ་ལ་ལོངས་སྤྱོད་པའི་ཆེད་དུ་མ་ཎིའི་འཛབ་དབྱངས༴ ཁྱད་པར་དུའང་མཆོག་གསུམ་རིན་པོ་ཆེ་བསྟན་པ་གོང་ནས་གོང་དུ་འཕེལ་ཞིང་བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཚེ་རིང་ཞིང་སྐུ་ཁམས་བཟང་བ་དང་མཛད་པ་ཕྲིན་ལས་གོང་འཕེལ་དུ་འགྱུར་བཞིན་བསྟན་འགྲོར་ཕན་བདེ་རྒྱ་ཆེན་སྦྱོར་བའི་ཆེད་དུ་འགྲོ་བ་རིགས་དྲུག་གི་གནས་རིས་ཀྱི་སྡུག་བསྔལ་རྒྱུ་འབྲས་བཅས་ཡོངས་སུ་དག་ནས་ཕྱི་སྣོད་ཐུགས་རྗེ་ཆེན་པོའི་གཞལ་ཡས་ཁང་དང་ནང་བཅུད་ཀྱི་འགྲོ་རྣམས་ཐུགས་རྗེ་ཆེན་པོའི་གསང་གསུམ་སྒྲ་གྲག་ཐམས་ཅད་ཐུགས་རྗེ་ཆེན་པོའི་གསུང་མཆོག་ཡི་གེ་དྲུག་མའི་རང་སྒྲ་དྲན་རྟོག་ཐམས་ཅད་ཐུགས་རྗེ་ཆེན་པོའི་ཐུགས་ཀློང་དང་དབྱེར་མེད་དུ་བསྒྱུར་བའི་ཆེད་དུ་མ་ཎིའི་འཛབ་དབྱངས་སྒྲོགས་པར་ཞུ། ༈ བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །དཔལ་ལྡན་བླ་མ་རྣམས་ལ་གསོལ་བ་འདེབས། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་ལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་ལྡན། །བླ་མའི་སྐུ་ལ་གསོལ༴ བླ་མའི་གསུང་ནི་ཚངས་པའི་དབྱངས། །བདག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་འཇིགས་བྱེད་པ། །བླ་མའི་གསུང་ལ༴ བླ་མའི་ཐུགས་ནི་ནམ་མཁའ་འདྲ། །བདེ་གསལ་མི་རྟོག་ངང་ཚུལ་ཅན། །རྣམ་ཐར་གསུམ་ལ་ལེགས་གནས་པ། །བླ་མའི་ཐུགས་ལ༴ བཅོམ་ལྡན་ཐུགས་རྗེ་ཆེན་པོ༴ སོགས། སྤྱན་རས་གསོལ༴ ཕྱག སྟོང་འཁོར་ལོས་སྒྱུར་བའི་སོགས། བཙུན་པ་སྤྱན་རས༴ ཕྱོགས་བཅུ་དུས་གསུམ་རྒྱལ་བ་རྒྱ་མཚོ་ཡི། །ཐུགས་རྗེའི་སྤྱི་གཟུགས་འགྲོ་བའི་སྐྱབས་གནས་མཆོག །ནམ་མཁའ་ཇི་སྲིད་འགྲོ་དོན་མི་ལྷོད་པ། །འཕགས་མཆོག་སྤྱན་རས་གཟིགས་ལ༴ འགྲོ་དྲུག་འཁོར་བའི་སྡུག་བསྔལ་སྨག་རུམ་དུ། །འཕགས་མཆོག་ཁྱེད་ཀྱི་ཐུགས་བསྐྱེད་འོད་བརྒྱའི་ཟེར། །སྤྲོས་པའི་མོད་ལ་བདེ་སྐྱིད་ཆུ་སྐྱེས་ཚལ། །རྒྱས་པར་མཛོད་དང་འཕགས་མཆོག་སྤྱན་རས་གཟིགས། །མདོར་ན་ཁམས་གསུམ་འཁོར་བའི་སྡུག་བསྔལ་སྤྲིན། །ལྷག་མེད་ཆོས་ཀྱི་དབྱིངས་སུ་དེངས་བའི་མཁར། །མངོན་མཐོ་ངེས་ལེགས་ཟླ་ཉིའི་དལ་བཀྲམ་བཞིན། །རྫོགས་ལྡན་མངོན་རྟོགས་སྟོན་དང་སྤྱན༴ ཕྱི་སྣོད་བདེ་ཆེན་ཞིང་དུ་འགྱུར་བ་དང་། །ནང་བཅུད་བདེ་ཆེན་ཞིང་གི་ལྷ་ཚོགས་ལ། །གྱུར་ནས་འགྲོ་ཁམས་སྡུག་བསྔལ་ཡོངས་བྲལ་ནས། །གཏན་བདེ་འགྱུར་མེད་ཆོས་སྐུ་ཐོབ་ཕྱིར་བསྔོ། །ཕྱི་སྣོད་བཀྲ་ཤིས་རྟག་བརྟན་འཕོ་འཕྱུག་བྲལ། །ནང་བཅུད་བཀྲ་ཤིས་སྐྱེ་དགུ་བདེ་ཞིང་སྐྱིད། །ལུགས་ཟུང་བཀྲ་ཤིས་ཆོས་དང་འབྱོར་བ་རྒྱས། །མཐར་ཐུག་བཀྲ་ཤིས་སྐུ་གསུམ་མངོན་གྱུར་ཤོག །ཅེས་པ་འདི་ཡང་རང་སློབ་ཀློང་གསལ་གྱིས་བསྐུལ་ངོར་ཐུགས་རྗེ་ཆེན་པོའི་རྣམ་འབྱོར་པ་ཀུན་བཟང་གཞན་ཕན་གྱིས་བྲིས་པ་ཡོངས་སུ་དགེ་བར་གྱུར་ཅིག །