བདེ་བ་ཅན་གྱི་ཕྱི་སྒྲུབ་ཐར་པའི་ཐེམ་སྐས།
༄༅། དམ་ཆོས་བདེ་ཆེན་ལམ་མཆོག་ལས༔ བདེ་བ་ཅན་གྱི་ཕྱི་སྒྲུབ་ཐར་པའི་ཐེམ་སྐས་བཞུགས༔ ༔
ན་མོ་ཨ་མི་ཏཱ་བྷ་ཡེ༔ འོད་སྣང་དཔག་ཏུ་མེད་པ་ལ༔ སྣང་བ་མཐའ་ཡས་ཞེས་གྲགས་པའི༔ འོད་མཚན་སྟོང་འབར་རྒྱལ་བ་དེར༔ འདུ་འབྲལ་མེད་པར་ཕྱག་འཚལ་ལོ༔ གང་ལ་བརྟེན་ནས་ཐར་པའི་ལམ༔ མཆོག་གི་ཐེམ་སྐས་དོན་གཉེར་གྱི༔ ལས་སྐལ་ལྡན་པ་རྣམས་ཀྱི་ཆེད༔ ཕྱི་སྒྲུབ་ཐར་པའི་ཐེམ་སྐས་འགོད༔ དེ་ལ་སྦྱོར་དངོས་རྗེས་གསུམ་ལས་དང་པོ་གཙང་ཞིང་ཡིད་འོང་བའི༔ གནས་སུ་བདེ་ཆེན་ཞིང་རྣམས་ཀྱི༔ རྟེན་དང་བརྟེན་པའི་མངོན་རྟོགས་དགྲམ༔ དེ་མདུན་བྱ་རྒྱུད་ལ་འོས་པའི༔ གཡོ་སྒྱུས་མ་བསླད་མཆོད་པའི་རྫས༔ དངོས་འབྱོར་ཤིན་ཏུ་གལ་ཆེའི་ཕྱིར༔ སེར་སྣའི་སྐྱོན་སྤངས་རྒྱ་ཆེན་བསྟར༔ ཆོ་ག་དོན་གཉེར་གང་དང་སུ༔ གཙང་སྦྲའི་བརྟུལ་ཞུགས་སྔོན་འགྲོ་བས༔ མཐའ་ཡས་སྲིད་པའི་འགྲོ་བ་ཀུན༔ ཐར་ལམ་མཆོག་ལ་འགོད་འདོད་ཀྱི༔ ཀུན་སློང་བཟང་པོས་ཆོ་གར་འཇུག༔ གཉིས་པ་རྣམ་གྲངས་བཅུ་དགུ་སྟེ༔ དང་པོ་བདེ་ཆེན་ཞིང་ཁམས་ཀྱི༔ རྟེན་དང་བརྟེན་པར་བཅས་པ་ཀུན༔ མདུན་མཁར་སྒྱུ་མའི་འདུ་བྱེད་བཞིན༔ མངོན་སུམ་བཞུགས་པའི་སྤྱན་སྔ་རུ༔ མཐའ་ཡས་འགྲོ་ཀུན་སྐྱབས་ཞུ་བསམ༔ དང་པོ་སྐྱབས་སུ་འགྲོ་བ་ནི༔ ན་མོ་སྡུག་བསྔལ་རྒྱུ་འབྲས་ཡོངས་སྤངས་པའི༔ བདེ་ཆེན་རྒྱལ་བའི་དཀྱིལ་འཁོར་ལ༔ བྱང་ཆུབ་སྙིང་པོ་མ་ཐོབ་པར༔ སྒོ་གསུམ་གསུམ་པའི་སྐྱབས་སུ་མཆི༔ ལན་གསུམ། གཉིས་པ་སེམས་བསྐྱེད་པ་ནི༔ མཁའ་མཉམ་རིགས་དྲུག་འགྲོ་བའི་ཁམས༔ ཕ་མར་མ་གྱུར་སྲིད་མིན་པས༔ ཚད་མེད་རྣམ་བཞི་ལྡན་པའི་བློས༔ བདེ་ཆེན་ས་ལ་འགོད་པར་བྱ༔ ལན་གསུམ༔ གསུམ་པ་ཡན་ལག་བདུན་པ་ནི༔ བདག་ལུས་དཔག་མེད་ཡོངས་སྤྲུལ་ཏེ༔ སྣང་མཐའི་དལ་དུ་ཕྱག་འཚལ་ལོ༔ གཡོ་སྒྱུས་མ་བསླད་མཆོད་པའི་ཚོགས༔ འགྲོ་ཀུན་ཚོགས་གཉིས་རྫོགས་ཕྱིར་འབུལ༔ ཐོག་མཐའ་མེད་པའི་བག་ཆགས་སྡིག༔ གནོང་འགྱོད་སེམས་ཀྱིས་མཐོལ་ལོ་བཤགས༔ སྲིད་ཞིའི་དགེ་ཚོགས་ཇི་སྙེད་ལ༔ སྙིང་ནས་དགའ་བས་རྗེས་ཡི་རང་༔ གདུལ་བྱའི་ཁམས་དབང་བསམ་པ་བཞིན༔ ཐེག་གསུམ་ཆོས་འཁོར་བསྐོར་བར་བསྐུལ༔ འཁོར་བའི་རྒྱ་མཚོ་མ་སྟོང་བར༔ མྱ་ངན་མི་འདའ་བཞུགས་སུ་གསོལ༔ འདིས་མཚོན་དུས་གསུམ་དགེ་བའི་ལས༔ འགྲོ་ཀུན་བདེ་ཆེན་ཐོབ་ཕྱིར་བསྔོ༔ བཞི་བ་ཕྱི་རོལ་གཉུག་གནས་དང་༔ འཕྲལ་རྒྱུར་བརྔན་དང་འཁོན་སྦྱོང་བ༔ སོ་སོར་གཏོར་མ་ སྦྱངས་སྤེལ་བསྒྱུར༔ ཧྲཱི༔ ཀུན་འབྱུང་མ་རིག་ས་བོན་གྱིས༔ ཡོངས་བསྐྱེད་སྡུག་བསྔལ་བདེན་པའི་གཟུགས༔ ལམ་བདེན་མ་མཐོང་འབྱུང་པོའི་རིགས༔ མཆོད་དང་སྦྱིན་པའི་གཏོར་མ་འདི༔ ལོངས་ལ་དཀར་ཕྱོགས་སྐྱོང་རྣམས་ཀྱིས༔ རྣམ་དཀར་ལས་ཀྱི་སྟོངས་གྲོགས་མཛོད༔ ནག་ཕྱོགས་འཚེ་བའི་བློ་སྤོངས་ལ༔ ལྕང་ལོ་ཅན་གྱི་གནས་མཆོག་ཏུ༔ འབྱུང་པོའི་ཚོགས་ལ་ཕྱག་རྡོར་གྱིས༔ ཆོས་འཁོར་བསྐོར་བའི་གམ་དུ་སོང་༔ དེ་རུ་བྱང་སེམས་མཆོག་བསྐྱེད་ལ༔ བསྟན་འགྲོར་ཕན་བདེའི་ལས་བྱོས་ཤིག༔ གལ་ཏེ་བསྒོ་བར་མི་ཉན་ན༔ རྒྱལ་བ་འོད་མཚན་སྟོང་འབར་ཡང་༔ ཁྲོ་སྡང་ལ་ཁྲོས་ཁྲོ་བོའི་རྗེ༔ ཐུགས་སྤྲུལ་ཧྱ་གྷྲྀ་ཝའི་སྐུ༔ དམར་ནག་དུས་མཐའི་མེ་དཔུང་བཞིན༔ ཀུན་ནས་ཀུན་ཏུ་རབ་འབར་ནས༔ བགེགས་ཚོགས་གཞོམ་པར་གདོན་མི་ཟ༔ ༀ་ཧྱ་གྷྲྀ་ཝ་གནོད་བྱེད་གདོན་བགེགས་སརྦ་ཨུ་ཙ་ཏ་ཡ་ཕཊ༔ དང་ཧཱུཾ་བཞིའི་སྔགས་ཀྱིས་བཀའ་ལ་མི་ཉན་པ་རྣམས་ཕྱིར་བསྐྲད་པར་བསམ་ལ༔ ལྔ་པ་སྲུང་འཁོར་བསྒོམ་པ་ནི༔ ཧྲཱི༔ མ་རིག་གཉིས་འཛིན་ཆོ་འཕྲུལ་གྱིས༔ བསྐྲུན་པའི་མིང་བཞིའི་རྟེན་ཅན་བགེགས༔ གཞོམ་བྲལ་རྡོ་རྗེའི་མུ་ཁྱུད་ཀྱི༔ མཚམས་ལས་འདའ་བར་མ་བྱེད་ཅིག༔ ༀ་ཧྱ་གྷྲྀ་ཝ་བཛྲ་རཀྵ་རཀྵ༔ དྲུག་པ་ཐོག་མེད་དུས་དག་ནས༔ ང་རུ་བཟུང་བའི་བག་ཆགས་ལུས༔ ཆོས་ཀྱི་བདག་མེད་ལ་སྦྱོར་ཕྱིར༔ ཕྱག་ན་པདྨའི་ཕྱག་རྒྱར་བསྐྱེད༔ སྭ་བྷ་ཝ་ཡིས་སྟོང་པར་སྦྱངས༔ ཀུན་རྫོབ་མཚན་བཅས་ཆོས་རྣམས་ཀུན༔ སྣང་ལ་རང་བཞིན་བྲལ་བའི་ངང་༔ ཞིང་ཁམས་རྣམ་དག་པོ་ཏ་ལ༔ མཚན་ཉིད་དཔལ་ཡོན་ཀུན་རྫོགས་དབུས༔ པད་དཀར་ཟླ་བའི་གདན་སྟེང་དུ༔ རང་སེམས་ཧྲཱི༔ དཀར་འཕྲོ་འདུ་ལས༔ རང་ལུས་འཕགས་མཆོག་པད་དཀར་འཆང་༔ དུང་མདོག་ཞལ་གཅིག་ཕྱག་གཉིས་པ༔ བྱམས་བརྩེས་སྤྱན་ཟུར་འགྲོ་ལ་གཟིགས༔ ཕྱག་གཡས་མཆོག་སྦྱིན་ཕྱག་རྒྱ་ཡིས༔ རབ་མཛེས་པད་དཀར་ཡུ་བ་འཛིན༔ གཡོན་ཕྱག་བརྐྱངས་ཏེ་གདན་ཁར་གནོན༔ ཞབས་གཉིས་བརྐྱང་བསྐུམ་གར་གྱིས་རོལ༔ རྒྱན་ཆ་བཅུ་གསུམ་ཞི་ཚུལ་དགུ༔ རབ་རྫོགས་དབུ་སྐྲའི་ཐོར་ཚུགས་རྩེར༔ ནོར་བུས་སྤྲས་ཤིང་གཟི་འོད་འབར༔ མཚན་དཔེའི་དཔལ་ཡོན་ཡོངས་སུ་རྫོགས༔ འོད་ལྔའི་འཇའ་ཚོན་ཀློང་དཀྱིལ་ན༔ ཆོས་ཀྱི་སྐུ་དང་དབྱེར་མེད་བཞུགས༔ ༀ་མ་ཎི་པདྨེ་ཧཱུཾ༔ ཞེས་པས་རང་ལུས་ལྷ་སྐུར་སྦྱངས༔ བདུན་པ་མཆོད་རྫས་བརླབ་པ་ནི༔ བདག་གི་ཐུགས་ཀའི་འོད་ཟེར་གྱིས། མཆོད་པའི་རྫས་ཀུན་དངོས་འཛིན་དང་༔ དངོས་མེད་ལས་འདས་སྟོང་པར་སྦྱངས༔ སྟོང་པའི་ངང་ལས་ཉེར་སྤྱོད་ཀྱི༔ མཆོད་པ་སྣ་བརྒྱད་རྒྱལ་སྲིད་བདུན༔ བཀྲ་ཤིས་རྫས་རྟགས་བརྒྱད་ཟུང་སོགས༔ ལྷ་མིའི་ལོངས་སྤྱོད་ཡོ་བྱད་ཚོགས༔ ཀུན་ཏུ་བཟང་པོའི་མཆོད་སྤྲིན་བཞིན༔ བསམ་གྱིས་མི་ཁྱབ་རྫས་སུ་གྱུར༔ སྥ་ར་ཎ་ཁཾ༔ ༀ་བཛྲ་ཨརྒྷཾ་སོགས་ནས། མཆོད་པའི་སྤྲིན་ཞེས་བྱ་བའི་གཟུངས་ ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ་བཛྲ་སཱ་ར་པྲ་མར་དྷ་ན་ཡ། ཏ་ཐཱ་ག་ཏ་ཡ། ཨར་ཧ་ཏེ་སམྱག་སཾ་བུདྷ་ཡ། ཏཏྱ་ཐཱ་ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིཏྱ་བཛྲེ་མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མན་ཏྲོ་བ་སཾ་ཀྲ་མ་ཎ་བཛྲ་སརྦ་ཀརྨཱ་ཨ་བ་རཏྣ་བི་ཤྭ་དྷ་ན་བཛྲེ་སྭཱ་ཧཱ༔ བརྒྱད་པ་ཚོགས་ཞིང་བསྒྲུབ་པ་ནི༔ ༀ་མ་ཧཱ་ཤཱུ་ནྱེ་ཏ་ཛྙཱ་ཎ་བཛྲ་སྭཱ་བྷ་ཝ་ཨཏྨ་ཀ྅ཧཾ། སྣང་སྲིད་འཁོར་འདས་ཆོས་རྣམས་ཀུན༔ ཡོད་པར་འཛིན་པའི་རྟག་ལྟ་དང་༔ མེད་པར་འཛིན་པའི་ཆད་ལྟ་ཡི༔ ཕྱོགས་སུ་མ་ལྷུང་དེ་བཞིན་ཉིད༔ འགག་མེད་རྩལ་དུ་སྣང་བའི་གཟུགས༔ བདེ་ཆེན་པདྨོ་བཀོད་ཀྱི་ཞིང་༔ ལག་མཐིལ་ལྟར་མཉམ་ས་གཞི་ནི༔ ཆུ་ཞེང་སྲིད་དུ་མི་མངོན་པའི༔ ཐ་གྲུ་ཀུན་ནས་ཡངས་པ་ལ༔ རིན་ཆེན་སྣ་ཚོགས་གཅལ་དུ་བཀྲམ༔ ནག་པོའི་རི་དང་ལྷུན་པོ་དང་༔ ཆུ་གཏེར་འཁོར་ཡུག་དམན་པ་ཕལ༔ ཡོངས་སུ་སྤངས་པས་ཉམས་དགའ་ཞིང་༔ ལོ་ལེགས་བདེ་འབྱོར་ལྟ་ན་སྡུག༔ ལྷ་མི་གཉིས་ལས་ལྷ་མིན་དང་༔ ངན་སོང་མི་ཁོམ་གནས་ལས་འདས༔ རིན་ཆེན་ལས་གྲུབ་ཤིང་ལྗོན་པ༔ རྩ་བ་ཡལ་འདབ་ལོ་འབྲས་དང་༔ མེ་ཏོག་ལ་སོགས་དེ་བཞིན་གྱིས༔ ཡོངས་མཛེས་དཔག་ཚད་སྟོང་དང་ནི༔ དྲུག་བརྒྱའི་དཔངས་ལྡན་སུ་ཝརྞའི༔ དྲ་བས་ལེགས་སྤུད་བསེར་བུ་ཡིས༔ བསྐྱོད་ལས་སྙན་དང་མཐུན་པ་སོགས༔ ཡིད་དུ་འོང་བའི་སྒྲ་དབྱངས་སྒྲོགས༔ དྲི་བཟང་སྤྲོ་བའི་མེ་ཏོག་གིས༔ མི་འགྲེང་བདུན་གྱི་དཔངས་མཉམ་པར༔ ཡོངས་ཞེས་མནན་ན་ནེམ་འགྱུར་ཞིང་༔ བཏེགས་ན་མཐོ་བའི་ལྟད་མོ་ངོམ༔ གཞན་ཡང་ཨུཏྤལ་པདྨ་དང་༔ ཀུ་མུ་ཏ་དང་པད་དཀར་ཚལ༔ ཡིད་དུ་འོང་ཞིང་མཛེས་པར་སྤྲས༔ འདམ་རྫབ་བྲལ་བའི་ས་སྙིང་གི༔ བྱེ་མར་བསྟི་བ་སྤྲུལ་པའི་བྱ༔ བཞད་དང་ཁྲུང་ཁྲུང་ངུར་བ་དང་༔ ཀ་རན་ད་དང་ནེ་ཙོ་དང་༔ རི་སྐེགས་ཀུ་ལན་ད་དང་ནི༔ ཀ་ལ་པིང་ག་རྨ་བྱ་སོགས༔ སྙན་འཇེབས་མགྲིན་པའི་རྒྱུད་མངས་འཁྲོལ༔ ཡན་ལག་བརྒྱད་ལྡན་སྤོས་ཆུའི་ཀླུང་༔ ཅ་ཅོའི་སྒྲ་སྤངས་རྣ་བར་བདེ༔ ཡིད་ལ་འབབ་ཅིང་རབ་ཏུ་སྙན༔ མི་རྟག་ཞི་དང་བདག་མེད་དང་༔ ཚད་མེད་རྣམ་བཞི་མཆོག་གསུམ་དང་༔ ས་དང་ཕར་ཕྱིན་སྟོབས་བཅུ་དང་༔ མི་འཇིགས་རྣམ་བཞི་མ་འདྲེས་ཆོས༔ རྣམ་ཐར་སྒོ་གསུམ་མངོན་ཤེས་ལྔ༔ འོད་ཟེར་ཆེན་པོའི་དབང་བསྐུར་སོགས༔ ཆུ་ཀླུང་སྒྲ་ལས་འབྱུང་འགྱུར་བས༔ རབ་ཏུ་དགའ་ཞིང་སྡུག་བསྔལ་བྲལ༔ མདོར་ན་དགྲ་བཅོམ་འགོག་པ་ལ༔ སྙོམས་པར་ཞུགས་ལྟའི་བདེ་ལྡན་པས༔ བདེ་བ་ཅན་གྱི་ཞིང་ཞེས་བྱ༔ གོས་རྒྱན་སྐྱེད་མོའི་ཚལ་དང་ནི༔ མཁའ་ལས་འབྱུང་བའི་གཞལ་མེད་ཁང་༔ རོལ་མོའི་བྱེ་བྲག་ཇི་སྙེད་དང་༔ སྣ་ཚོགས་མཆོད་རྫས་འདོད་ཡོན་རིགས༔ གཞན་འཕྲུལ་དབང་བྱེད་གནས་དང་མཚུངས༔ དྭངས་མའི་ཟས་ཀྱིས་ཚིམ་འགྱུར་ཞིང་༔ གཟའ་དང་རྒྱུ་སྐར་ཉིན་མཚན་ཆ༔ ཁྱིམ་གྱི་བདག་འཛིན་སོགས་ཀྱང དབེན༔ དུས་དང་དུས་སུ་སྤོས་ཆུའི་ཆར༔ འབབ་ཅིང་ལྷ་ཡི་མེ་ཏོག་དང་༔ རིན་ཆེན་གདུགས་དང་རྒྱལ་མཚན་དང་༔ བ་དན་བླ་བྲེ་རྔ་ཡབ་སོགས༔ ནམ་མཁར་འཛིན་པའི་སྒྱུ་འཕྲུལ་དང་༔ ལྷ་མོ་རྣམས་ཀྱིས་རོལ་མོ་དང་༔ ཆབས་གཅིག་གླུ་དབྱངས་གར་ལ་བརྩོན༔ མདོར་ན་སངས་རྒྱས་བཅོམ་ལྡན་འདས༔ གང་གའི་གླུང་གི་བྱེ་མ་ཡི༔ གྲངས་ཀྱི་ཕ་རོལ་སོན་པས་ཀྱང་༔ བདེ་ཆེན་ཞིང་གི་དཔལ་ཡོན་ཚོགས༔ བསྐལ་པར་བརྗོད་ཀྱང་ཟད་མི་ཤེས༔ དེ་ལྟའི་ཁྱད་འཕགས་ཞིང་མཆོག་གི༔ ནམ་མཁར་དཔག་ཚད་བརྒྱ་སྟོང་གི༔ གཞལ་མེད་ཁང་བཟང་མཆོག་གི་དབུས༔ རིན་ཆེན་སྣ་བདུན་ལས་གྲུབ་ཁྲི༔ རྨ་བྱས་བཏེགས་ཤིང་རབ་ཏུ་མཐོ༔ དེ་དབུས་བཾ་ལས་པདྨ་ནི༔ དམར་པོ་འདབ་སྟོང་བརྡལ་བའི་སྟེང་༔ རཾ་ལས་ཉི་མའི་གདན་སྟེང་དུ༔ རང་སེམས་ཡི་གེ་ཧྲཱི༔དམར་པོར༔ འོད་འཕྲོས་འཕགས་མཆོད་འགྲོ་སྒྲིབ་སྦྱངས༔ ཚུར་འདུས་ཡོངས་སུ་གྱུར་པ་ལས༔ སངས་རྒྱས་བགྲང་ལས་འདས་རྣམས་ཀྱིས༔ མཚན་དང་བསྟོད་བསྔགས་བརྗོད་པའི་ཡུལ༔ བཅོམ་ལྡན་རྒྱལ་བ་འོད་དཔག་མེད༔ པདྨ་རཱ་གའི་ལྷུན་པོ་ལ༔ ཉིན་བྱེད་བྱེ་བས་རབ་འཁྱུད་པའི༔ འོད་དང་གཟི་བརྗིད་མཆོག་ཏུ་འབར༔ ཞབས་གཉིས་རྡོ་རྗེའི་སྐྱིལ་ཀྲུང་གིས༔ བཞུགས་པའི་སྟེང་དུ་ཕྱག་གཉིས་ཀ༔ མཉམ་བཞག་ལྷུང་བཟེད་བཏེགས་པའོ༔ དམར་སེར་དར་གྱི་ཤམ་ཐབས་དང་༔ སྔོུན་པོའི་བླ་གོས་དམར་པོ་ཡི༔ སྣམ་སྦྱར་མནབས་པས་རབ་ཏུ་མཛེས༔ དབུ་ཡི་གཙུག་ཏོར་ལྟར་མི་མངོན༔ དེ་སོགས་མཚན་དཔེའི་དཔལ་ཡོན་རྫོགས༔ གཡས་སུ་འཕགས་མཆོག་སྤྱན་རས་གཟིགས༔ དུང་མདོག་ཕྱག་གཡོན་པད་དཀར་གྱི༔ ཡུ་བ་ཐུགས་ཀར་འཛིན་ཅིང་བཏེགས༔ གཡོན་དུ་སེམས་དཔའ་མཐུ་ཆེན་ཐོབ༔ སྔོུན་པོ་ཕྱག་གཡོན་ཆུ་སྐྱེས་སྟེང་༔ རྡོ་རྗེ་བཏེགས་པའི་ཚུལ་གྱིས་བསྣམས༔ སོ་སོའི་གཡས་གཉིས་སྐྱབས་སྦྱིན་མཛད༔ མདུན་ནས་བརྩམས་པའི་གཡས་བསྐོར་གྱིས༔ སྨན་བླ་བཅོམ་ལྡན་ཤཱཀྱ་ཐུབ༔ མཚན་ལེགས་རིན་ཆེན་ཟླ་བ་དང་༔ གསེར་བཟང་མྱ་ངན་མེད་མཆོག་དཔལ༔ ཆོས་བསྒྲགས་ཆོས་ཀྱི་བློ་གྲོས་སོགས༔ བསྐལ་བཟང་འདྲེན་པ་སྟོང་རྩ་བཅས༔ གསེར་མདོག་མཚན་དཔེའི་དཔལ་ཡོན་རྫོགས༔ ཐམས་ཅད་པད་ཟླའི་གདན་ལ་བཞུགས༔ མདུན་དུ་འཇམ་དབྱངས་སྒྲིབ་སེལ་དང་༔ ནམ་མཁའི་སྙིང་པོ་ས་ཡི་སྙིང་༔ བྱམས་པ་ཀུན་ཏུ་བཟང་པོ་སོགས༔ སེམས་དཔའ་སེམས་མ་སྤྲིན་ལྟར་གཏིབས༔ མཐའ་སྐོར་རྒྱལ་བའི་ཞིང་འདི་དང་༔ ཞིང་ཁམས་གཞན་ནས་ཞིང་མཆོག་དེར༔ སྐྱེ་བའི་རྒྱུ་བསགས་ཐམས་ཅད་ལས༔ ཞིང་དེར་མི་སྐྱེ་དོགས་པ་ཡིས༔ པདྨའི་མངལ་ཁང་སྐྱེད་ཚལ་དང་༔ གཞལ་མེད་ཁང་དུ་འདུ་ཤེས་ཤིང་༔ ལོ་གྲངས་ལྔ་བརྒྱར་དེར་གནས་ནས༔ སངས་རྒྱས་གསུང་ཐོས་ཞལ་མི་མཇལ༔ ཉན་ཐོས་འགོག་པའང་དེ་བཞིན་ནོ༔ དེ་ལས་ཁྱད་འཕགས་ཞིང་མཆོག་དེར༔ འདུན་ཞིང་སོམ་ཉི་བྲལ་བའི་རིགས༔ གང་ཞིག་དང་བའི་སེམས་སྐྱེས་ཙམ༔ པདྨ་ཁ་ཕྱེས་དབུས་ཉིད་དུ༔ སྐྱིལ་མོ་ཀྲུང་བཅས་རྫུས་སྐྱེས་ཀྱི༔ བྱང་སེམས་ཚུལ་འཛིན་བསམ་ཡས་ཚོགས༔ ཉན་རང་དང་ནི་ལྷ་མི་ཡི༔ རྣམ་པ་ཅན་རྣམས་བར་སྣང་ལ༔ ཆགས་ཐོགས་མེད་པར་འགྲོ་བ་དང་༔ མཚན་བཟང་སུམ་ཅུ་རྩ་གཉིས་ལྡན༔ ལུས་ཀྱི་ཆ་བྱད་ཡོངས་རྫོགས་ཤིང་༔ བསམ་གཏན་དང་ནི་མངོན་ཤེས་དང་༔ ཤེས་རབ་ཀྱི་ནི་རབ་དབྱེར་མཁས༔ དབང་པོ་རྣོ་ཞིང་མ་བསྡམས་མིན༔ ཀུན་ཤེས་ཞུམ་བྲལ་དབང་པོ་བརྟན༔ བཟོད་ཐོབ་རྒྱལ་མཐོང་ཆོས་ཉན་རྟག༔ ལོག་པར་མི་ལྟུང་ཡོན་ཏན་འབྱོར༔ དེ་ལྟར་གསལ་བའི་གཙོ་འཁོར་གྱི༔ གནས་གསུམ་ༀ་ཨཱཿཧཱུཾ་གིས་མཚན༔ དེ་ལས་འཕྲོས་པའི་འོད་ཟེར་གྱིས༔ དམིགས་བྲལ་རང་བཞིན་གནས་མཆོག་དང་༔ བདེ་བ་ཅན་གྱི་ཞིང་ཁམས་ནས༔ འོད་མཚན་སྟོང་འབར་རྒྱལ་བ་ལ༔ འདྲེན་པ་སྟོང་རྩ་བདེ་གཤེགས་བདུན༔ ཉེ་བའི་སྲས་བརྒྱད་ལ་སོགས་པའི༔ བདེ་ཆེན་དཀྱིལ་འཁོར་ལྷ་ཚོགས་ཀུན༔ མདུན་གྱི་ནམ་མཁར་སྦྱན་དྲངས་གྱུར༔ དགུ་པ་ལྷ་ཚོགས་སྤྱན་འདྲེན་ནི༔ གང་ཞིག་རྒྱལ་བ་ཡིད་བྱེད་པ༔ དེ་ཡི་མདུན་ན་དེ་བཞུགས་ཏེ༔ དབང་བསྐུར་བྱིན་གྱིས་བརླབས་གསུངས་ཕྱིར༔ དད་འདུན་མོས་པའི་བློ་བསྐྱེད་ལ༔ ཨེ་མ་ཧོ༔ ཡོངས་ཀྱི་འགྲོ་བའི་སྐྱབས་གྱུར་བཅོམ་ལྡན་འདས༔ མ་ལུས་རྒྱལ་བའི་མཁྱེན་བརྩེའི་མངའ་བདག་མཆོག༔ འོད་མཚན་སྟོང་འབར་འཆི་མེད་ཚེ་ཡི་ལྷ༔ དེང་འདིར་བསོད་ནམས་ཞིང་དུ་སྤྱན་འདྲེན་གཤེགས༔ མགོན་ཁྱོད་འཇིག་རྟེན་དབང་ཕྱུག་རྒྱལ་པོའི་དྲུང་༔ བྱང་ཆུབ་མཆོག་ཏུ་སེམས་བསྐྱེད་དམ་བཅས་བཞིན༔ དེང་དུས་འགྲོ་བའི་སྡུག་བསྔལ་གཟིགས་མཛོད་ལ༔ ཆགས་ཐོགས་མེད་པའི་སྒྱུ་འཕྲུལ་མངོན་པར་མཛོད༔ ཀྱཻ་མ༔ དད་མོས་ལྡན་པའི་གདུལ་བྱའི་འགྲོ་བ་ལ༔ ཐུགས་རྗེའི་འཇུག་པ་དུས་ལས་ཡོལ་མིན་པའི༔ གསུང་གསང་རྡོ་རྗེའི་རི་མོའི་ཐ་ཚིག་དོན༔ དུས་ལ་བབ་པོ་གནས་འདིར་འབྱོན་པར་མཛོད༔ གང་ཞིག་དྲན་པའི་མོད་ལ་འགྲོ་ཀུན་གྱི༔ སྡུག་བསྔལ་རྒྱུ་དང་འབྲས་བུ་སྟོང་འགྱུར་བས༔ སྨོན་ལམ་ཆེན་པོ་བརྒྱད་བཏབ་འབྲས་སྨིན་པ༔ བདེར་གཤེགས་མཆེད་བརྒྱད་སྤྱན་འདྲེན་གཤེགས་སུ་གསོལ༔ བཟང་པོའི་བསྐལ་བའི་མཆོག་དམན་འགྲོ་བ་ཀུན༔ ཐར་དང་རྣམ་མཁྱེན་མཆོག་གི་གོ་འཕང་ལ༔ འགོད་པར་ཞལ་བཞེས་འདྲེན་པ་སྟོང་རྩ་གཉིས༔ དེང་འདིར་ཚོགས་བསགས་ཞིང་དུ་སྤྱན་འདྲེན་གཤེགས༔ ཇི་སྲིད་ནམ་མཁའ་གཟུགས་སུ་མ་གྱུར་བར༔ དེ་སྲིད་འགྲོ་བའི་དོན་ལ་གཡེལ་མེད་ཞེས༔ ཐུགས་བསྐྱེད་དམ་བཅའི་ཁུར་གྱིས་མ་ངལ་བའི༔ རྒྱལ་སྲས་སེམས་དཔའི་ཚོགས་ཀུན་གནས་འདིར་གཤེགས༔ གཞན་ཡང་རབ་འབྱམས་རྒྱལ་བའི་ཞིང་ཁམས་ན༔ བཞུགས་པའི་རྒྱལ་དང་དེ་སྲས་ཉན་རང་ཚོགས༔ སྤྲུལ་དང་ཡང་སྤྲུལ་ཉིང་སྤྲུལ་སུམ་སྤྲུལ་སོགས༔ འགྲོ་ཀུན་བདེ་ལ་སྦྱོར་ཕྱིར་གནས་འདིར་སྤྱོན༔ ཁྱེད་རྣམས་མཁྱེན་བརྩེ་སྟོབས་ནུས་དཔལ་ལྡན་ཞིང་༔ ཆགས་ཐོགས་མེད་པའི་ཡེ་ཤེས་མངའ་བའི་ཕྱིར༔ བཤམས་པའི་གནས་འདིར་སྤྲིན་གྱི་ལྕུག་མའི་ཚུལ༔ སྐུད་ཅིག་ཙམ་གྱིས་སྤྱན་འདྲེན་གཤེགས་སུ་གསོལ༔ ༀ་ཨཱཿཧཱུཾ་བྷུདྡྷ་བོ་དྷི་ས་ཏྭ་ས་པཱ་རི་ཝ་ར་བཛྲ་ས་མཱ་ཛ༔ ཛཿཧཱུཾ་བཾ་ཧོཿ བཅུ་པ་བཞུགས་སུ་གསོལ་བ་ནི༔ ཧྲཱི༔ གཙོ་དང་འཁོར་བཅས་པདྨ་རིགས་ཀྱི་ལྷ༔ རང་རང་སོ་སོར་འོས་པའི་གདན་ཁྲི་ལ༔ འགྲོ་ལ་ཕན་དང་བདེ་བའི་ཆོས་སྟོན་ཕྱིར༔ སྲིད་ཞུའི་རྟེན་མཆོག་དཔལ་དུ་བཞུགས་སུ་གསོལ༔ ས་མ་ཡ་ཏིཥྛ་ནྟུ༔ བཅུ་གཅིག་པ་ཕྱག་འཚལ་བ་ནི༔ ཧྲཱི༔ བདག་དང་ལྷ་ལ་གཉིས་སུ་འཛིན་པའི་སེམས༔ དབྱིངས་སུ་གཅིག་ཀྱང་དུ་མར་རྟོག་པའི་བློ༔ བདེ་ཆེན་ཀློང་དུ་རོ་གཅིག་མ་གྱུར་བར༔ ས་ལམ་སྒྲིབ་ཚོགས་སྦྱོང་ཕྱིར་ཕྱག་འཚལ་ལོ༔ ན་མོ་པཱུ་རུ་ཤ་ཡ་ཧོ༔ བཅུ་གཉིས་པ་མཆོད་པ་འབུལ་བ་ནི༔ དེ་བཞིན་གཤེགས་པ་རྣམས་དང་དམ་པའི་ཆོས༔ དཀོན་མཆོག་དྲི་མ་མེད་དང་སངས་རྒྱས་སྲས༔ ཡོན་ཏན་རྒྱ་མཚོ་རྣམས་ལ་ལེགས་པར་མཆོད༔ མེ་ཏོག་འབྲས་བུ་ཇི་སྙེད་ཡོད་པ་དང་༔ སྨན་གྱི་རྣམ་པ་གང་ཞིག་ཡོད་པ་དང་༔ འཇིག་རྟེན་རིན་ཆེན་ཇི་སྙེད་ཡོད་པ་དང་༔ ཆུ་གཙང་ཡིད་དུ་འོང་བ་ཇི་སྙེད་དང་༔ རིན་ཆེན་རི་བོ་དང་ནི་དེ་བཞིན་དུ༔ ནགས་ཚལ་ས་ཕྱོགས་དབེན་ཞིང་ཉམས་དགའ་དང་༔ ལྗོན་ཤིང་མེ་ཏོག་རྒྱན་སྤྲས་སྤུད་པ་དང་༔ ཤིང་གང་འབྲས་བཟང་ཡལ་ག་དུད་པ་དང་༔ ལྷ་སོགས་འཇིག་རྟེན་ན་ཡང་དྲི་ངད་ལྡན༔ སྤོས་དང་དཔག་བསམ་ཤིང་དང་རིན་ཆེན་ཤིང་༔ མ་རྨོས་འཁྲུངས་པའི་ལོ་ཏོག་རྣམས་པ་དང་༔ གཞན་ཡང་མཆོད་པར་འོས་པའི་རྒྱན་རྣམས་ནི༔ མཚོ་དང་རྫིང་བུ་པདྨས་བརྒྱན་པ་དག༔ ངང་པ་ཤིན་ཏུ་སྐད་སྙན་ཡིད་འོང་ལྡན༔ ནམ་མཁའ་རབ་འབྱམས་ཁམས་ཀྱི་མཐས་གཏུགས་པ༔ ཡོངས་སུ་བཟུང་བ་མེད་པ་དེ་དག་ཀུན༔ བློ་ཡིས་བླངས་ནས་ཐུབ་པ་སྐྱེས་ཀྱི་མཆོག༔ སྲས་དང་བཅས་པ་རྣམས་ལ་བདག་འབུལ་ན༔ ཡོན་གནས་དམ་པ་ཐུགས་རྗེ་ཆེ་རྣམས་ཀྱིས༔ བདག་ལ་བརྩེར་དགོངས་བདག་གི་འདི་དག་བཞེས༔ རྒྱལ་དང་དེ་སྲས་རྣམས་ལ་བདག་གིས་ནི༔ བདག་གི་ལུས་ཀུན་གཏན་དུ་འབུལ་བར་བགྱི༔ སེམས་དཔའ་མཆོག་རྣམས་བདག་ནི་ཡོངས་བཞེས་ཤིག༔ གུས་པས་ཁྱེད་ཀྱི་འབངས་སུ་མཆི་བར་བགྱི༔ བདག་ནི་ཁྱེད་ཀྱིས་ཡོངས་སུ་བཟུང་བ་ན༔ སྲིད་ལ་མི་འཇིགས་སེམས་ཅན་ཕན་པར་བགྱིད༔ སྔོུན་གྱི་སྡིག་ལས་ཡང་དག་འདའ་བགྱིད་ཅིང་༔ སྡིག་པ་གཞན་ཡང་སླན་ཆད་མི་བགྱིད་དོ༔ ཁྲུས་ཀྱི་ཁང་པ་ཤིན་ཏུ་དྲི་ཞིམ་པ༔ ཤེལ་གྱི་ས་གཞི་གསལ་ཞིང་འཚེར་བ་བསྟར༔ རིན་ཆེན་འབར་བའི་ཀ་བ་ཡིད་འོང་ལྡན༔ མུ་ཏིག་འོད་ཆགས་བླ་རེ་བྲེས་པ་དེར༔ དེ་བཞིན་གཤེགས་པ་རྣམས་དང་དེ་སྲས་ལ༔ རིན་ཆེན་བུམ་པ་མང་པོ་སྤོས་ཀྱི་ཆུ༔ ཡིད་འོང་ལེགས་པར་བཀང་པ་གླུ་དང་ནི༔ རོལ་མོ་བཅས་པ་དུ་མས་སྐུ་ཁྲུས་གསོལ༔ དེ་དག་སྐུ་ལ་མཚུངས་པ་མེད་པའི་གོས༔ གཙང་ལ་དྲི་རབ་བགོས་པའི་སྐུ་ཕྱིའོ༔ དེ་ནས་དེ་ལ་ཁ་དོག་ལེགས་བསྒྱུར་བའི༔ ན་བཟའ་ཤིན་ཏུ་དྲི་ཞིམ་དམ་པ་འབུལ༔ གོས་བཟང་སྲབ་ལ་འཇམ་པ་སྣ་ཚོགས་དང༔ རྒྱན་མཆོག་བརྒྱ་ཕྲག་དེ་དང་དེ་དག་གིས༔ འཕགས་པ་ཀུན་ཏུ་བཟང་དང་འཇམ་དབྱངས་དང་༔ འཇིག་རྟེན་དབང་ཕྱུག་སོགས་ལ་བརྒྱན་པར་བགྱི༔ སྟོང་གསུམ་ཀུན་ཏུ་དྲི་ངད་ལྡང་བ་ཡི༔ དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ༔ གསེར་སྦྱངས་བཙོ་མ་བྱི་དོར་བྱས་པ་ལྟར༔ འོད་ཆགས་འབར་བ་དེ་དག་བྱུག་པར་བགྱི༔ ཐུབ་དབང་མཆོད་གནས་མཆོག་ལ་ཡིད་འོང་བའི༔ མེ་ཏོག་མནྡ་ར་དང་པདྨ་དང་༔ ཨུཏྤལ་ལ་སོགས་དྲི་ཞིམ་ཐམས་ཅད་དང་༔ ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད༔ སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི༔ བདུག་པའི་སྤྲིན་ཚོགས་རྣམས་ཀྱང་དེ་ལ་འབུལ༔ ཞལ་ཟས་བཟའ་བཏུང་སྣ་ཚོགས་བཅས་པ་ཡི༔ ལྷ་བཤོས་རྣམས་ཀྱང་དེ་ལ་དབུལ་བར་བགྱི༔ གསེར་གྱི་པདྨ་ཚར་དུ་དངར་བ་ཡི༔ རིན་ཆེན་སྒྲོན་མེ་རྣམས་ཀྱང་དབུལ་བར་བགྱི༔ ས་གཞི་བསྟར་བ་སྤོས་ཀྱིས་བྱུགས་པ་དེར༔ མེ་ཏོག་ཡིད་འོང་སིལ་མ་དགྲམ་པར་བྱ༔ གཞལ་མེད་ཕོ་བྲང་བསྟོད་དབྱངས་ཡིད་འོང་ལྡན༔ མུ་ཏིག་རིན་ཆེན་རྒྱན་འཕྱང་མཛེས་འབར་བ༔ དཔག་ཡས་ནམ་མཁའི་རྒྱན་གྱུར་དེ་དག་ཀྱང་༔ ཐུགས་རྗེའི་རང་བཞིན་ཅན་ལ་དབུལ་བར་བགྱི༔ རིན་ཆེན་གདུགས་མཛེས་གསེར་གྱི་ཡུ་བ་ཅན༔ ཁོར་ཡུག་རྒྱན་གྱི་རྣམས་པ་ཡིད་འོང་ལྡན༔ དབྱིབས་ལེགས་ལྟ་ན་སྡུག་པ་སྒྲེང་བ་ཡང་༔ རྟག་ཏུ་ཐུབ་དབང་རྣམས་ལ་དབུལ་བར་བགྱི༔ དེ་ལས་གཞན་ཡང་མཆོད་པའི་ཚོགས༔ རོལ་མོ་དབྱངས་སྙན་ཡིད་འོང་ལྡན༔ སེམས་ཅན་སྡུག་བསྔལ་སེལ་བྱེད་པའི༔ སྤྲིན་རྣམས་སོ་སོར་གནས་གྱུར་ཅིག༔ དམ་ཆོས་དཀོན་མཆོག་ཐམས་ཅད་དང་༔ མཆོད་རྟེན་རྣམས་དང་སྐུ་གཟུགས་ལ༔ རིན་ཆེན་མེ་ཏོག་ལ་སོགས་ཆར༔ རྒྱུན་མི་འཆད་པར་འབབ་བར་ཤོག༔ ཡོན་ཏན་རྒྱ་མཚོ་རྣམས་ལ་བདག༔ བསྟོད་དབྱངས་ཡན་ལག་རྒྱ་མཚོས་མཆོད༔ བསྟོད་དབྱངས་སྙན་སྤྲིན་དེ་དག་ལ༔ ངེས་པར་ཀུན་ཏུ་འབྱུང་གྱུར་ཅིག༔ བཅུ་གསུམ་པ་བསྟོད་པ་ནི༔ ཧཱུཾ། གཞི་དབྱིངས་ཀ་དག་སྤྲོས་དང་བྲལ་གྱུར་ཀྱང་༔ གཞི་སྣང་འཁོར་འདས་ལྷུན་གྱིས་གྲུབ་པའི་གདངས༔ གཞི་རྩལ་གང་ལ་གང་འདུལ་རོལ་བའི་སྐུ༔ གདོད་ནས་སངས་རྒྱས་འཆི་མེད་མགོན་པོར་བསྟོད༔ གང་ཁྱོད་འཇིག་རྟེན་དབང་ཕྱུག་རྒྱལ་པོའི་དྲུང་༔ དགེ་སློང་རྒྱལ་སྲས་ཆོས་ཀྱི་འབྱུང་གནས་ཞེས༔ དཔག་མེད་སྨོན་ལམ་ཐུགས་བསྐྱེད་མཐུས་གྲུབ་པའི༔ སངས་རྒྱས་བསོད་ནམས་ཕུན་ཚོགས་ཕྱག་འཚལ་བསྟོད༔ འདྲེན་པ་སྟོང་གི་མཁྱེན་བརྩེ་ནུས་པའི་སྟོབས༔ མགོན་པོ་ཁྱེད་ཀྱི་གསང་གསུམ་དཀྱིལ་འཁོར་དུ༔ སྣ་ཚོགས་ཆུ་ཕྲན་རྒྱ་མཚོར་རོ་གཅིག་བཞིན༔ དབྱེར་མེད་མཉམ་ཉིད་ངང་དུ་ཕྱག་འཚལ་བསྟོད༔ གྲངས་མེད་གོང་ནས་ཐུགས་བསྐྱེད་སྨོན་ལམ་འབྲས༔ ཤར་ཕྱོགས་བཻ་ཌཱུཪྱ་སྣང་ཞིང་ཁམས་ཀྱི༔ ཕྱོགས་མཚམས་བརྒྱད་ཀྱི་སྟོན་པ་བདེར་གཤེགས་བརྒྱད༔ གཙོ་འཁོར་སྤྲུལ་པར་བཅས་ལ་ཕྱག་འཚལ་བསྟོད༔ རྨད་བྱུང་བཟང་བོའི་བསྐལ་བའི་འདྲེན་པ་སྟོང་༔ འགྲོ་དོན་གཡེལ་བ་མེད་པའི་བྱང་སེམས་སྡེ༔ རྒྱལ་བསྟན་འཛིན་མཛད་ཉན་རང་དགྲ་བཅོམ་ཚོགས༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ བཅུ་བཞི་བ་བཟླས་པ་བྱ་བ་ནི༔ མདུན་བསྐྱེད་ཐུགས་ཀར་པད་ཟླའི་སྟེང་༔ ཧྲཱིཿ དམར་ཏིལ་གྱི་མར་མེ་བཞིན༔ སྔུགས་ཀྱི་ཕྲེང་བས་བསྐོར་བ་ལས༔ འོད་འཕྲོས་རབ་འབྱམས་ཞིང་ཁམས་ཀྱི༔ རྒྱལ་བ་སྲས་བཅས་ཡོངས་མཆོད་ཅིང་༔ བྱིན་རླབས་དངོས་གྲུབ་ཚུར་འདུས་བསམ༔ སླར་ཡང་བྱམས་དང་སྙིང་རྗེ་ཡི༔ འོད་ཟེར་རིགས་དྲུག་གནས་སུ་འཕྲོས༔ སོ་སོའི་སྡུག་བསྔལ་རྒྱུ་དང་འབྲས༔ ཡོངས་བསལ་རྒྱལ་བའི་གོ་འཕང་ལ༔ བཀོད་པའི་བདེ་ཆེན་དཔལ་ཐོབ་གྱུར༔ བར་བསམ་ ༀ་ཨཱཿ ཧཱུཾ། ༀ་ཨ་མི་ཏ་བྷ་ཧྲཱིཿཞེས་པ་བརྒྱ་སྟོང་ཁྲི་འབུམ་སོགས༔ མ་ཡེངས་ངང་ནས་བཟླ་བ་གཅེས༔ ཡེངས་བཞིན་བཟླས་ལ་འབྲས་མི་འབྱིན༔ མཚམས་སུ་གཟུངས་རིང་འདི་ཉིད་ཀྱང་༔ དལ་བུས་དག་པར་བཟླ་བར་བྱ༔ ཏཪྱ་ཐཱ༔ ཨ་མི་ཏེ༔ ཨ་མི་ཏོད་བྷ་ཝེ༔ ཨ་མི་ཏ་སཾ་བྷ་ཝེ༔ ཨ་མི་ཏ་བི་གྲན་ཏེ༔ ཨ་མི་ཏ་ག་ག་ན༔ ཀིར་ཏི་ཀ་རེ་སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ ༔ དེ་བཞིན་གང་ནུས་བཟླས་པའི་མཐར༔ ཡན་ལག་བདུན་པ་བཟང་སྤྱོད་ལྟར༔ ཚིག་དོན་མ་འཆོལ་བཏང་བར་བྱ༔ སྐུབས་འདིར་མདུན་གྱི་རྟེན་བརྟེན་པ༔ བདེ་ཆེན་ཞིང་དང་དབྱེར་མེད་པའི༔ དད་མོས་བརྟན་པའི་ཀུན་སློང་གིས༔ ཕྱག་འཚལ་ཆོ་གར་འདི་བཞིན་འཇུག༔ ཨེ་མ་ཧོ༔ དུས་གསུམ་ཕྱོགས་བཅུའི་ཞིང་ན་བཞུགས་པ་ཡི༔ རྒྱལ་རྣམས་ཐུགས་བསྐྱེད་སྨོན་ལམ་ཡོངས་བསྡམས་པ༔ བཅོམ་ལྡན་འོད་མཚན་སྟོང་འབར་རྒྱལ་བ་ལ༔ བདག་གི་སྒོ་གསུམ་གུས་པས་ཕྱག་འཚལ་ལོ༔ མགོན་པོ་ཁྱེད་ཀྱི་ཐུགས་བསྐྱེད་སྨོན་ལམ་སྟོབས༔ སྡིག་ལྡན་འགྲོ་ལ་ལྷག་པར་འཇུག་པ་ཡིས༔ ཞལ་བཞེས་ཐུགས་བསྐྱེད་གཡར་དམ་གོ་ཆའི་འཕྲུལ༔ ནམ་ཡང་ལྷོད་པ་མེད་དེར་ཕྱག་འཚལ་ལོ༔ འདྲེན་མཆོག་རྒྱལ་བ་སྟོང་གི་ཞིང་ཁམས་ཀྱི༔ དཔལ་དང་ཡོན་ཏན་མ་ལུས་ལྷུན་རྫོགས་ཤིང་༔ སྡུག་བསྔལ་མིང་མེད་བདེ་སྐྱིད་དཔལ་འབྱོར་ལྡན༔ བདེ་ཆེན་རྒྱལ་པོའི་ཞིང་དེར་ཕྱག་འཚལ་ལོ༔ དེར་བཞུགས་བཅོམ་ལྡན་རྒྱལ་བ་འོད་དཔག་མེད༔ མཁྱེན་བརྩེ་ནུས་པ་དཔག་མེད་འཁོར་དཔག་མེད༔ སྐུ་ཚེ་དཔག་མེད་ཕྲིན་ལས་དཔག་ཏུ་མེད༔ དཔལ་ཡོན་དཔག་མེད་ལྡན་དེར་ཕྱག་འཚལ་ལོ༔ སྙིགས་དུས་འགྲོ་ཀུན་སྐྱོབ་པའི་མཐུ་ནུས་སྟོབས༔ རྒྱལ་བ་གཞན་ལས་འཕགས་པའི་བདེ་གཤེགས་བརྒྱད༔ བསྐལ་བཟང་སངས་རྒྱས་སྟོང་རྩ་རིགས་གསུམ་མགོན༔ སྤྲུལ་འཁོར་བཀའ་སྡོད་བཅས་ལ་ཕྱག་འཚལ་ལོ༔ བསྐལ་མང་གོང་ནས་ཞི་བ་མཆོག་བརྙེས་ཀྱང་༔ བསྟན་འགྲོར་ཕན་བདེའི་བདུད་རྩི་སྤེལ་སླད་དུ༔ སྣ་ཚོགས་འཕྲུལ་གྱིས་མངོན་རྟོགས་གསལ་མཛད་པ༔ རྒྱལ་སྲས་འཕགས་པའི་ཚོགས་ལ་ཕྱག་འཚལ་ལོ༔ གཞན་ཡང་རབ་འབྱམས་རྒྱལ་བའི་ཞིང་ཁམས་ན༔ བཞུགས་པའི་རྒྱལ་དང་དེ་སྲས་ཉན་རང་དང་༔ དགྲ་བཅོམ་ལ་སོགས་རྒྱལ་བསྟན་འཛིན་རྣམས་ལ༔ སྒོ་གསུམ་གུས་པས་རྟག་ཏུ་ཕྱག་འཚལ་ལོ༔ རབ་འབྱམས་རྒྱ་མཚོའི་ཞིང་ཁམས་ཇི་སྙེད་ན༔ མཆོད་ཡོན་ཞབས་བསིལ་མེ་ཏོག་བདུག་པའི་སྤྲིན༔ སྣང་གསལ་དྲི་ཆབ་ཞལ་ཟས་རོལ་མོའི་སྒྲ༔ གཟུགས་སྒྲ་དྲི་རོ་རེག་བྱ་ཆོས་ལ་སོགས༔ བཀྲ་ཤིས་རྫས་རྟགས་བརྒྱད་དང་རྒྱལ་སྲིད་བདུན༔ སྣ་ཚོགས་མཆོད་པའི་བྱེ་བྲག་བསམ་ཡས་ཀུན༔ འཆི་མེད་མགོན་པོའི་དཀྱིལ་འཁོར་ལྷ་ལ་འབུལ༔ བཞེས་ནས་འགྲོ་ཀུན་ཚོགས་རྫོགས་སྒྲིབ་སྦྱངས་ཤིང་༔ རྣམ་གྲོལ་བྱང་ཆེན་ཐོབ་པའི་རྒྱུར་གྱུར་ཅིག༔ མཁྱེན་ལྡན་རྒྱལ་བ་སྲས་འཁོར་བཅས་པ་ཡི༔ སྤྱན་སྔར་བདག་གིས་མི་འཚལ་ལས་བགྱིས་པ༔ སྲོག་གཅོད་མ་བྱིན་བླངས་དང་འདོད་ལོག་སྤྱོད༔ ལུས་ཀྱི་མི་དགེའི་ལས་ཀུན་མཐོལ་ལོ་བཤགས༔ རྫུན་དང་ཕྲ་མ་ཚིག་རྩུབ་ངག་འཁྱལ་སོགས༔ ངག་གི་མི་དགེའི་ལས་ཀུན་མཐོལ་ལོ་བཤགས༔ བརྣབས་སེམས་གནོད་སེམས་ལོག་པར་ལྟ་བ་སོགས༔ ཡིད་ཀྱིས་ནོངས་པའི་ལས་བགྱིས་མཐོལ་ལོ་བཤགས༔ གཞན་ཡང་སོ་ཐར་བྱང་སེམས་སྔགས་སྡོམ་གྱི༔ བསླབ་གནས་བླང་དོར་གོ་ལྡོག་འཆོལ་བའི་ལས༔ བགྱིས་སོ་ཅོག་ཀུན་སྙིང་ནས་བཤགས་བགྱིད་ན༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ བྱོན་བཞུགས་འབྱོན་འགྱུར་རྒྱལ་དང་དེ་སྲས་ཀྱི༔ བསམ་ཡས་སྐུ་གསུང་ཐུགས་ཡོན་འཕྲིན་ལས་འཕྲུལ༔ མཆོག་དམན་གདུལ་བྱར་མངོན་སུམ་སྣང་མཛད་ནས༔ གདུལ་ཐབས་དཔག་མེད་བསྟན་དེར་རྗེས་ཡི་རང་༔ ཞིང་ཁམས་འདི་སོགས་རབ་འབྱམས་ཞིང་ཁམས་ན༔ བཞུགས་པའི་རྒྱལ་དང་དེ་སྲས་འཕགས་པ་གསུམ༔ གང་གི་རྗེས་འཇུག་བསྟན་འགྲོར་སྨན་པའི་ཚོགས༔ མྱ་ངན་མི་འདའ་སྲིད་མཐའི་བར་དུ་བཞུགས༔ འདིས་མཚོན་ཟག་བཅས་ཟག་མེད་དགེ་བའི་རྒྱུན༔ འཁོར་གསུམ་དམིགས་པའི་དྲི་མས་མ་གོས་བཞིན༔ མཐའ་མེད་འགྲོ་བས་བསོད་ནམས་དཔལ་གྱུར་ཏེ༔ བདེ་ཆེན་ཞིང་ཁམས་ཐོབ་པའི་རྒྱུ་རུ་བསྔོ༔ བཅུ་དྲུག་པ་སྨོན་ལམ་ནི༔ ཨེ་མ་ཧོ༔ མཐའ་ཡས་རྒྱལ་བའི་ཞིང་ཁམས་རྒྱ་མཚོ་ཡི༔ དཔལ་དང་ཡོན་ཏན་མ་ལུས་ཡོངས་བསྡམས་པ༔ བདེ་སྐྱིད་དཔག་མེད་ཞིང་མཆོག་བླ་ན་མེད༔ སྡུག་བསྔལ་རྒྱུ་འབྲས་ཀུན་སྤངས་བདེ་ཆེན་ཞིང་༔ དགེ་སློང་རྒྱལ་སྲས་ཆོས་ཀྱི་འབྱུང་གནས་ཀྱི༔ ཐུགས་བསྐྱེད་སྨོན་པའི་རང་གཟུགས་མངོན་གྱུར་གནས༔ ཞིང་དེར་བདག་སོགས་འགྲོ་ཀུན་སྐྱེ་བར་ཤོག༔ དེར་བཞུགས་བཅོམ་ལྡན་རྒྱལ་བ་འོད་དཔག་མེད༔ སྤྱན་རས་གཟིགས་དང་མཐུ་ཆེན་ཐོབ་ལ་སོགས༔ སངས་རྒྱས་བྱང་སེམས་དཔག་མེད་འཁོར་གྱིས་བསྐོར༔ གང་གི་ཐུགས་བསྐྱེད་སྨོན་ལམ་མཐུ་བྱིན་དང་༔ བདག་སོགས་དད་མོས་གསོལ་བཏབ་འཕེན་པ་ཡིས༔ ཚེ་འདིའི་ལུས་སེམས་སོ་སོར་བྲལ་བའི་དུས༔ སྐྱེ་སྲིད་གཞན་གྱི་དབང་དུ་མི་འགྱུར་བར༔ འོད་དཔག་མེད་ཀྱི་ཞབས་དྲུང་པདྨོ་རུ༔ རྫུས་ཏེ་སྐྱེ་བའི་དཔལ་ཡོན་ཐོབ་པར་ཤོག༔ དེར་ཡང་ཞི་བ་ཕྱོགས་གཅིག་མི་གཉེར་ཞིང་༔ དམིགས་མཐའ་བྲལ་བའི་སེམས་ཅན་ཐམས་ཅད་ལ༔ རང་རང་སྐད་དང་སྤྱོད་ཚུལ་སྣ་ཚོགས་ཀྱིས༔ ཕན་དང་བདེ་བའི་རྒྱུ་འབྲས་ཆོས་སྟོན་པའི༔ མཁྱེན་བརྩེ་ནུས་པའི་དབང་ཕྱུག་མཆོག་ཐོབ་ཤོག༔ བཅུ་བདུན་པ་བཟོད་གསོལ་ནི༔ ཧོ༔ བདག་སོགས་ལས་དང་སྐལ་དམན་པས༔ ལྟ་སྒོམ་སྤྱོད་པ་ཉམས་པ་དང་༔ གཙང་སྦྲ་ཆུང་ཞིང་མཆོད་པ་དམན༔ ཉེས་ཚོགས་ཅི་བགྱིས་བཤགས་པར་བགྱི༔ ༀ་པདྨ་ས་ཏྭ་ས་མ་ཡ༔ མ་ནུ་པཱ་ལ་ཡ༔ སོགས། བཅོ་བརྒྱད་པ་བདག་མདུན་བསྡུ་རིམ་ནི༔ ཧྲཱིཿ མདུན་བསྐྱོད་བརྟེན་དང་བརྟེན་པར་བཅས༔ མཐའ་ནས་རིམ་བཞིན་གཙོ་ལ་ཐིམ༔ གཙོ་བོ་འཇའ་ཚོན་ཡལ་བ་བཞིན༔ བདེ་ཆེན་སྤྲོས་བྲལ་ཀློང་དུ་གཤེགས༔ བདག་བསྐྱེད་ཆུ་ཟླའི་འདུ་བྱེད་འཕྲུལཿ ནམ་མཁའི་ཟླ་བར་རོ་གཅིག་ལྟར༔ རང་བཞིན་ཆོས་དབྱིངས་ངང་དུ་བཞག༔ སླར་ཡང་འཕགས་པའི་སྐུ་རུ་གསལ༔ བཅུ་དགུ་པ་བཀྲ་ཤིས་བརྗོད་པ་ནི༔ ཧྲཱིཿ སྤྲོས་བྲལ་མཁའ་ལ་འོད་མཚན་སྟོང་འབར་གཟིས༔ སྐུལ་བཟང་པདྨོའི་ཚལ་ཀུན་ཡོངས་ཕྱེས་ཤིང་༔ ཕན་བདེའི་དྲི་བཟང་ཕྱོགས་ཀུན་ཁྱབ་གྱུར་པའི༔ བཀྲ་ཤིས་བདེ་སྐྱིད་ཉི་མ་རྟག་གསལ་ཤོག༔ དམ་ཆོས་བདེ་ཆེན་ལམ་མཆོག་ལས༔ ཕྱི་སྒྲུབ་ཐར་པའི་ཐེམ་སྐས་འདི༔ འོད་མཚན་སྟོང་འབར་རྒྱལ་བ་ཡིས༔ འཇིགས་མེད་འཕྲིན་ལས་འོད་ཟེར་ལ༔ ལྕགས་ཕོ་ཁྱི་ལོར་རྟེན་འབྲེལ་གྱི༔ སྒོ་འཕར་དང་པོ་ཕྱེས་མདོ་ཀྱང་༔ རེ་ཞིག་བཏང་སྙོམས་ལ་བཞག་པ༔ ས་སྐྱོང་རྣལ་འབྱོར་དབང་མོ་ཡིས༔ རིན་ཆེན་གཉིས་པའི་མཎྜལ་ལ༔ བཀྲ་ཤིས་རྟགས་བཀྲའི་དངུལ་ཚོམ་དང་༔ སྣ་ལྔའི་དར་བཅས་ཕུལ་ནས་སུ༔ ཁྱོད་ལ་དག་སྣང་ཞིག་ཡོད་སྐད༔ དེ་ལྟར་ངེས་ན་བཏང་སྙོམས་སུ༔ མི་བཞག་ཅིས་ཀྱང་འབེབ་དགོས་ཞེས༔ ཆུ་ཕོ་ནོར་སྐྱོང་རྒྱལ་པོའི་ལོར༔ བརྡའ་འགྲོལ་རྟེན་འབྱུང་དབང་བཙན་པ༔ དངོས་དང་འཇིགས་མེད་བློ་གསལ་བས༔ རྟེན་འབྲེལ་བཟང་པོའི་མཚམས་སྦྱོར་གྱི༔ བདག་པོར་གྱུར་པའི་ལྡེ་མིག་གིས༔ ཁོ་བོའི་ཀུན་གཞིའི་སྒོ་ལྕགས་རྒྱ༔ ཕྱེ་བའི་སྒྲ་ཚིག་ཡིག་ལམ་དུ༔ གསལ་བྱེད་ཀུན་བཟང་འཆི་མེད་ཀྱིས༔ བགྱིས་འདིའི་དགེ་བས་འགྲོ་བ་ཀུན༔ སྣང་མཐའི་གོ་འཕང་མཆོག་ཐོབ་ཤོག༔ དགེའོ་བཀྲ་ཤིསཿ