གསོལ་འདེབས་སྨོན་ལམ་རྣམ་དག་ལམ་བཟང་།
༄༅། །དམ་ཆོས་བདེ་ཆེན་ལམ་མཆོག་ལས༔ གསོལ་འདེབས་སྨོན་ལམ་རྣམ་དག་ལམ་བཟང་བཞུགས་སོ། །
ན་མོ་ཨ་མི་ཏ་བྷ་ཡེ། དགེ་སློང་རྒྱལ་སྲས་ཆོས་ཀྱི་འབྱུང་གནས་ཀྱི། །ཐུགས་བསྐྱེད་སྨོན་པའི་རང་གཟུགས་དུས་སྨིན་པ། །འོད་མཚན་སྟོང་འབར་འཆི་མེད་ཚེ་ཡི་ལྷ། །གྲགས་པ་མཐའ་ཡས་མགོན་པོ་འོད་དཔག་མེད། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །བདག་སོགས་ལས་ངན་སྤྱོད་པའི་འགྲོ་བ་ཀུན། །མྱུར་དུ་བདེ་ཆེན་ཞིང་དུ་དྲངས་དུ་གསོལ། །ཆོས་སྤངས་མཚམས་མེད་ལས་བྱས་མ་གཏོགས་པས། །ཁྱོད་མཚན་དྲན་ཞིང་གསོལ་བ་བཏབ་གྱུར་ན ། །བདེ་ཆེན་ཞིང་དུ་འདྲེན་ཞེས་ཞལ་བཞེས་པའི། །ཐུགས་དམ་དམ་བཅས་རི་མོ་འདོད་ལྷས་ཀྱང་། །གཞིག་པར་མི་ནུས་སངས་རྒྱས་བདེན་པའི་བཀའ། །དེ་ཕྱིར་སྡིག་ལྡན་བདག་སོགས་འགྲོ་བ་ཀུན། །ལས་ངན་འཁྲུལ་པའི་དབང་དུ་མི་གཏོང་བར། །མགོན་པོ་ཁྱེད་ཀྱི་འཁོར་དུ་སྐྱེ་བར་ཤོག །བདག་སོགས་སྙིགས་མ་ལྔ་བདོའི་མཐར་སྐྱེས་པའི། ཚེ་ཐུང་ནད་མང་ཆོས་སྒྲུབ་སྙིང་རུས་དབེན། །སྡོམ་གསུམ་ལྷོད་ཅིང་རིམ་གཉིས་ལེ་ལས་གཡེང་། །འདི་ལ་མགོན་པོ་ཁྱོད་ཀྱིས་མི་གཟིགས་ན། །གཞན་ན་སྐྱོབ་པ་སུ་ཡང་མ་མཆིས་པས། །མྱུར་དུ་ཐུགས་རྗེས་གཟིགས་ཤིག་འོད་དཔག་མེད། །ཆོས་སྒོར་མ་ཞུགས་འགྲོ་རྣམས་རང་རྒྱུད་ཀྱི། །ཉོན་མོངས་མཐུས་ནོན་ལམ་དུ་ཞུགས་པ་དག །ཐོས་བསམ་འབྲས་བཟང་ཆགས་སྡང་མེ་ཡིས་བསྲེགས། །སྡོམ་གསུམ་གཟུགས་བརྙན་རིས་གཅོད་ཐོ་བས་བཤིག །བསྐྱེད་རྫོགས་བསྒོམ་བཟླས་ཟང་ཟིང་དངོས་པོར་བརྗེ། །ཀྱེ་མ་འདི་ལ་ཐུགས་རྗེས་མི་གཟིགས་ན། །གཞན་དུ་ཐུགས་རྗེའི་འཇུག་ཡུལ་སུ་ཞིག་ཡིན། །ཆོས་དྲེད་ཆོས་ཀྱིས་འདུལ་དཀའ་བདག་སོགས་འགྲོར། །མྱུར་དུ་ཐུགས་རྗེས་གཟིགས་ཤིག་འོད་དཔག་མེད། །མདོར་ན་ལས་ངན་རླུང་གིས་རབ་བསྐྱོད་བདག །དད་དང་དག་སྣང་ཇེ་དམན་མི་དགེའི་ལས། །རིལ་གྱིས་མང་དུ་སྤེལ་བའི་རྒྱུ་འབྲས་ཀྱིས། །ངན་འགྲོར་འགྲོ་བར་ངེས་ཀྱང་མགོན་ཁྱོད་ཀྱི། །མཁྱེན་བརྩེ་ནུས་པའི་ལྕགས་ཀྱུ་ཞགས་པ་ཡིས། །མྱུར་དུ་བདེ་ཆེན་ཞིང་དུ་དྲངས་དུ་གསོལ། །བདག་ལ་ཁྱེད་ཞལ་མཇལ་བའི་དགེ་བའི་སྟོབས། །ཕྲ་བས་ནོངས་ཀྱང་ཁྱེད་ཀྱི་དམ་བཅས་མཐུས། །ལས་ངན་ལྡན་ལ་ལྷག་པར་ཐུགས་རྗེ་ཡི། །འཇུག་པར་མྱུར་སྟབས་དེ་ཡིས་མཇལ་གྱུར་པས། །བདག་དང་བདག་ལ་བཟང་ངན་འབྲེལ་ཐོགས་ཀུན། །བདེ་ཆེན་ཞིང་གི་དཔལ་ལ་ལོངས་སྤྱོད་ཤོག །སླར་ཡང་འགྲོ་ཁམས་རྒྱ་མཚོ་མ་སྟོང་བར། །སྣ་ཚོགས་གཟུགས་དང་སྣ་ཚོགས་སྒྲ་ཡིས་ནི། །གང་ལ་གང་འཚམས་ཐབས་ཀྱི་ཕན་བདེའི་འཕྲུལ། །མགོན་པོ་ཁྱེད་བཞིན་གཞན་དོན་ཡོངས་འགྲུབ་ཤོག །ཅེས་པ་འདི་ཡང་བདག་སྙོམ་ལས་པ་ཀུན་བཟང་གཞན་ཕན་ལ་མེ་འབྲུག་ཟླ་བ་གཉིས་པའི་ཚེས་བཅུ་གསུམ་ནུབ་མགོན་པོ་འོད་དཔག་མེད་སྐུ་མདོག་དུང་ལྟར་དཀར་པོར་བསྒྱུར་ནས་ཞལ་མཇལ་བ་རྨིས་པས་ནངས་པར་གསོལ་འདེབས་སྨོན་ལམ་འདི་ཐོལ་བྱུང་དུ་བྲིས་པའི་དགེ་བས་འགྲོ་རྣམས་སྣང་མཐའི་གོ་འཕང་ལ་རག་པའི་རྒྱུར་གྱུར་ཅིག །དགེའོ།། །།