བྱ་བྲལ་རྡོ་བ་བླ་མས་ལུང་བསྟན་ལྕགས་ཁྱིའི་ལོར་གསུངས་པ།
༄༅། །བྱ་བྲལ་རྡོ་བ་བླ་མས་ལུང་བསྟན་ལྕགས་ཁྱིའི་ལོར་གསུངས་པ་བཞུགས། །
ན་མོ་གུ་རུ་པདྨ་ཀ་ར་ཡེ། མཁྱེན་གཉིས་ཀྱི་མེ་ཞལ་ལམ་ཡངས་དབྱིངས། །བྱམས་བརྩེ་ཡི་སྤྲིན་ཕུང་བླ་མེད་འཁྲིགས། །ཐུགས་རྗེའི་དཔལ་འོད་ཟེར་སྟོང་འབར་བ། །མི་ཁོ་བོའི་སྙིང་དབུས་རྟག་པར་བཞུགས། །འབྱུང་འགྱུར་གྱི་རྟེན་འབྲེལ་སྒོ་འཕར་ཕྱེས། །ལེགས་ཉེས་ཀུན་སྐྱུ་རུ་རཱ་ལག་མཐིལ་ལྟར། །ཡུལ་འདིའི་སྟོད་སྦས་པའི་ཚུལ་གང་དེ། །རྗེ་མི་ལའི་ཟློས་གར་སྙིང་སྟོབས་ཅན། །སྔུར་མེད་ཀྱི་གནས་སུ་རྟེན་གསུམ་བཞེངས། །བར་དེ་རུ་གཞན་གྱི་དགེ་བཤེས་ཚུལ། །གཏེར་འདོན་ཞིང་རྡོ་ལ་ཕྱག་རྗེས་འཇོག །དེ་དང་གང་འབྲེལ་ཉེར་དགུའི་ཟླ། །སྨད་ལྷ་མིན་ལྷར་བརྫུའི་ལྷ་མ་དང་། །འདས་ལོག་ཚུལ་མང་འཛོམ་ན་རྡོ་ཡུལ་འགྲིབ། །ལར་རང་དཔོན་མངའ་རིས་རང་དགྲར་ལངས། །ཡུལ་གནོད་སྦྱིན་སྐྱོང་བའི་ས་ཆ་རུ། །མགོན་པད་འབྱུང་དང་དབྱེར་མེད་གདོང་ལྔའི་མཚན། །ཁོང་མུ་དྲ་ལ་སྤྱོད་ཅིང་བསྟན་འགྲོ་གསོ། །གནས་འཛམ་ཐང་དུ་ལུགས་ཟུང་ཁྲ་བོར་འགྱུར། །སྐྱབས་མགོན་ཞིག་དམག་དཔོན་མཛད་པའི་སྐབས། །རོང་ལྷམ་ནག་ཅན་གྱི་ཁྱུ་ུ ཚོགས་ནས། །བྱང་རྨ་སྟོད་འབྲོག་སྡེ་བརྒྱ་ཕྲག་བཅུའི། །དུས་ཆགས་དེ་རེ་ཞིག་བླ་རུ་འཕགས། །མཐར་མ་ཧཱ་ར་ཛའི་གལ་དུ་འཐོག། །ཡུལ་དེ་ན་ཕྲུ་མ་སྣ་ཚོགས་རྩོད། །མི་ཕལ་ཆེར་རང་བྱས་རང་ལ་འཕོ། །རྫ་སྡེ་ཆགས་མངའ་རིས་རང་འཐོར་བྱེད། །ཟླ་སྡེ་ཀུན་བྱ་སྤུ་རླུང་ཁྱེར་ཟླ། །གསེར་སྟོད་ལ་དམག་གི་བསྟན་པ་དར། །རེ་ཞིག་ནས་ཕྱོགས་ཀུན་དགྲ་རུ་ལངས། །ཡུལ་སྨར་ཤོད་མགོ་མང་དབང་གཞུའི་དཔེ། །དགོས་བླུན་པོ་གོ་ས་མཐོ་བ་ཞིག །ཉིང་མཚམས་སུ་སྦྱར་ནས་འགོང་པོར་སྐྱེས། །རྒྱ་འདྲེ་དང་ཡུལ་འདྲེའི་སྣ་འདྲེན་བྱེད། །རྗེ་རྣལ་འབྱོར་ཧཱུཾ་ནག་མེ་འབར་གྱི། །སྤྲུལ་བས་འདུལ་ཞིང་མགོ་ལོག་བདེ། །མགོན་ཧེ་རུ་ཀ་པའི་ཕྲིན་ལས་བཞིས། །ཡུལ་ཀ་ན་ཀ་ཡི་འ བྱུང་པོ་འདུལ། །ལྷོ་ཧོར་བྲག་ཛ་ཡའི་དབྱར་རྔ་ལྡིར། །གོ་ས་བྱེད་ལ་དབུས་ཀྱི་གསེར་འཕྲུ་བྱེད། །ཤར་པད་འབྱུང་གི་སྒྱུ་འཕྲུལ་དགེ་བཤེས་ཀྱི། །འཁོར་དམར་སེར་ཀུན་དའི་ཚལ་ཆེན་རྒྱས། །ལྷོ་ལྕགས་ལ་སྙིང་རྗེའི་མྱུ་གུ་འཁྲུངས། །རིས་མེད་ཀྱི་སྤྱོད་པས་བསྟན་འགྲོ་འཚོ། །ནུབ་མཚོ་རྒྱལ་སྤྲུལ་པ་གཏེར་ལ་དབང་། །ཆོས་མ་ཧཱ་ཡ་ན་བླ་རུ་སྤེལ། །བྱང་ས་སྙིང་ཞྭ་ལ་བྱུ་རུའི་ཏོག ། གཡུ་སྔོན་པོའི་མཚོ་ལ་ལྕགས་ཀྱིས་འཚེ། །མེ་ལྷ་ལ་ཙི་ནའི་ཕྲུ་མ་འཁྲུགས། །བ་ཡུ་ནས་མཐའ་དམག་ཤྭ་འུད་ལྷུད། །སྲིན་པོ་ལ་བདེ་སྡུག་སྤེལ་མ་འོང་། །སྟེང་ཕྱོགས་ལ་སྙིགས་མའི་ལྟ་ངན་ཤར། །བོད་ཡུལ་དབུས་དམག་གི་ཆུ་རྒྱུན་འབེབས། །ལྷོ་བདུད་སྡེ་ཁག་གསུམ་རང་འཁྲུགས་འོང་། །ཧོར་སྡེ་བཞི་སེང་ཁོག་འབུ་ཞུགས་འདྲ། །ཡུལ་གསེར་སྟོད་སྙིང་པོའི་བསྟན་པ་དར། །སྡེ་སྨད་པ་འཁྲུགས་རྩོད་རུ་མ་ཕྱེད། །ཨེ་མ་ཧོ་པདྨ་འབྱུང་གནས་རྗེ། །དུས་སྙིགས་མ་སྐྱབས་གནས་ཁྱེད་ལས་མེད། །མ་འགྲོ་དྲུག་སེམས་ཅན་སྙིང་རེ་རྗེ། །ཁྱད་པར་དུ་དུས་ཀྱི་མར་གཤམ་འདིར། །བདེ་བ་དང་དགེ་བ་དཔལ་འབྱོར་ཀུན། །ཁོ་ནམ་ལངས་ཀྱི་སྐར་མའི་ཟླ་རུ་འགྲོ། །ནད་རིམས་དང་བགེགས་རིགས་སྣ་ཚོགས་དར། །མི་ཚེ་ནི་འགྲིབ་པའིི་སྔ་ལྟས་ལ། །བགྲང་བྱའང་སུམ་ཅུ་བཞི་ཅུ་ཙམ། །འདུ་བ་ཀུན་ངོས་མི་ཟིན་པ་དར། །དམ་པའི་ཆོས་རྒྱབ་དོར་ཚེ་འདི་གཉེར། །བན་དེ་རྣམས་སྡིག་ལ་ངོ་མཚར་བྱེད། །མི་ཕལ་བ་རྣམས་ཆོས་ལ་སྐྱོ་ཤས་བསྐྱེད། །བུད་མེད་ཀུན་འདྲེ་སྲིན་གྲལ་དུ་སྙེག །སྐྱེས་པ་ཕལ་མཁའ་རྒྱུའི་ཡི་དྭགས་སྐྱེས། །ལྷ་འདྲེའི་ཚུལ་གཏམ་གྱི་ལེགས་ཉེས་བཤད། །མི་ལ་ལས་གཤིན་པོའི་རྣམ་ཐར་བགྲང་། །ཆོས་སྒོམ་སྒྲུབ་ལ་བརྩོན་རྣམས་འདྲེ་ལྟར་འཛིན། །རང་ཆོས་མེད་ཀྱང་བསྟན་འགྲོ་སྤེལ་ལ་རློམ། །ཕ་བླ་མའི་དམ་ཚིག་ལྐོག་ཏུ་སྦ། །རང་མཐོང་གི་སྤྱོད་པས་གཟུ་ལུམ་བརྩོན། །ཕམ་དང་དཔོན་པོ་དྲིན་ཅན་རྣམས། །དགྲ་ལྟར་དུ་ངོམ་ལ་གང་རྒོད་བྱེད། །ཕྱོགས་མཐའ་དག་གི་དམག་འཁྲུགས་ཡང་ཡང་འོང་། །མི་ཕལ་ཆེར་གྲི་རུ་འཆི་བའི་དུས། །ལྷ་ཨོ་རྒྱན་མ་གཏོགས་རེ་ས་མེད། །ཁོང་དམ་པ་ལ་ལའི་སྒྲུབ་གནས་ལ། །ཕ་པད་འབྱུང་གི་བྱིན་རླབས་སྤྲིན་ལྟར་འདུ། །གང་དེ་ལ་ཕྱག་དང་སྐོར་བར་འབོངས། །ཁོ་བོ་ཀུན་བཟང་གཞན་ཕན་ལ། །རྗེ་མཁྱེན་བརྩེའི་ཉི་གཞོན་ཡེ་ནས་གསལ། །རིས་མེད་ཀྱི་བྱིན་རླབས་སྤྲིན་ཕུང་འཁྲིགས། །ཕྱོགས་མེད་ཀྱི་འགྲོ་ཕན་ཆར་ལྟར་འབེབས། །སྐལ་ལྡན་རྣམས་དད་དམ་མྱུ་གུ་འཁྲུངས། །ལས་ཅན་དག་གདམས་པའི་འབྲས་བུ་སྨིན། །རྗེས་འཇུག་རྣམས་བླ་མ་སྒྲུབ་པ་ལས། །ཚོགས་བསགས་ནི་དེ་ལས་གཞན་མི་དགོས། །འགྱུར་མེད་མཁའ་ལ་སྐྱེ་མེད་ཨ་ཡིག་ཤར། ནམ་གྲུ་དེ་ལ་རི་ལ་ཟླ་བའི་མདོག །སྔུ་འགྱུར་ཀ་ཡི་གནས་ལ་འཕེལ་འགྲིབ་འོང་། །དཔལ་གྱི་དམར་པོའི་གླིང་དུ་བཀའ་རྒྱུད་འཛིན། །རྒྱ་ཚད་དཔག་མེད་ཀྱི་རྡོ་ལེབ་དེ། །བརྒྱ་བྱིན་མི་སོགས་བླ་རུ་ཁུར། །ཡིད་བཞིན་རཏྣ་དེ་འབྲུག་གིས་ཁྱེར། །ཡོངས་སུ་གྲགས་ཀྱང་དམན་སར་ལྟུང་། །དམར་སེར་རལ་མང་ཕག་ཏུ་ཡིབ། །དགེ་འཕེལ་རི་ལ་དོན་གཉིས་འགྲུབ། །ཁྲོ་བོ་ལ་ཕྲུ་མ་སྣ་ཚོགས་པ། །བྱང་རྨ་ལུང དུ་འདུ་ལ་ལྟད་མོ་ལྟོས། །བྱང་རོང་གི་གང་གའི་སྨན་ལྗོངས་ལ། །ཉེས་མེད་ཀྱི་སྤྲིན་གྱི་རྡོ་ཆར་འབེབས། །སྐྱབས་མགོན་རྗེ་ཙི་ནའི་གལ་དུ་བཟུང་། །འཛམ་གླིང་གི་ལེགས་ཉེས་རྟེན་འབྲེལ་ཀུན། །འགོག་མེད་ཀྱི་རྡོ་ལ་རི་མོའི་གཟུགས། །དུས་ད་ལྟ་མངོན་ཀྱང་དེ་མིན་པའི། །ཞིབ་སྨྲ་བའི་དུས་ལ་མ་བབ་པོ། །༈ རྡོ་བླས་འབྱུང འགྱུར་གྱི་ལུང་བསྟན་སྤེལ་བའོ།། །། ༈ གླུང་ལོའི་ལུང་བསྟན་བཞུགས། །༈ ན་མོ་གུ་རུ་དྷེ་ཝ་ཌཱཀྐི་ནི་སརྦ་སིདྡྷི་མེ་པྲ་ཡཙྪ་ཡེ། ཞིང་རབ་འབྱམས་ཀྱི་རྒྱལ་བ་སྲས་བཅས་ཀྱི། །སྤྱིའི་གཟུགས་གྱུར་རྗེ་བཙུན་པདྨ་སྐྱེས། །གང་མངལ་སྐྱེས་ཚུལ་བཟུང་འཇིགས་མེད་གླིང་། །དེའི་བདེན་པས་དེང་འདིར་དགེ་ལེགས་སྩོལ། །བདག་རྡོ་བླ་ཀུན་བཟང་གཞན་ཕན་ཞེས། །ལོ་བདུན་ཅུ་བརྒྱད་ཅུར་ཉེ་བ་ཡི། །འཆི་མ་ནུས་མི་རྒན་གང་དེ་ཡི། །སེམས་ཀུན་གཞི་མེ་ལོང་དྲི་བྲལ་ངོགས། དུས་འབྱུང་འགྱུར་བཟང་ངན་ལེགས་ཉེས་ཀྱི། ལྟས་རྟེན་འབྲེལ་གཟུགས་སུ་སྣང་བའི་ཆོས། འདིར་མངོན་སུམ་ངོམ་ལ་ལྟད་མོ་ལྟོས། དུས་རྒྱལ་པོ་མེ་གླང་ཤར་ཙམ་ན། ཡོངས་རྐང་གཉིས་མི་དང་ཁྱད་པར་དུ། བོད་ཆེ་ཆུང་ཀུན་ལ་མི་དགེའི་ལྟས། དམག་འཁྲུག་དང་ལོ་ཉེས་མི་ཕྱུགས་ནད། དུ་མ་རུ་འབྱུང་ཞིང་བཟློག་པར་དཀའ། བྱེ་བྲག་ཏུ་ས་ཆ་དང་ཡུལ་ཁོལ་བུ། མ་སྟོང་བར་སེང་གེའི་དེ་ཁོག་པ་ཡི། སྲིན་བུའི་ཚོགས་ལངས་ནས་རང་གི་གཟུགས། རྡུལ་ཕྲན་དུ་མ་སོང་དེ་སྲིད་དུ། འཚེ་བ་བཞིན་འཚུབ་འདི་དུས་ངན་སྟོབས། དེ་ལས་ཀྱང་དམིགས་བསལ་མངོན་རྟོགས་ནི། རུ་བཞི་ནི་བོད་ཡུལ་ས་ཆ་རུ། གནམ་ས་བར་གྱི་ཐེའུ་རང་གི སྒྱུ་འཕྲུལ་གྱི་རང་གཟུགས་བན་འགོང་གི ཁོག་ཞུགས་ནས་སེར་འཁྲུག་སློང་བ་དང་། དེའི་རྐྱེན་གྱིས་ལྷ་འདྲེ་མི་གསུམ་འཁྲུགས། ཉོ་དྲ་ཡི་གྲུབ་མཐའ་ཕལ་མོ་ཆེ། འཚུབ་མ་བཞིན་འཁྱིལ་ཞིང་བྱེད་ལ་རིངས། ས་ངོར་ཟུང་ཕྱི་ཟླུམ་ནང་སྟོང་སྙམ། ཀར་འབྲུག་སོགས་རང་སའི་བྱིན་རླབས་ཀྱི། དཔག་བསམ་གྱི་ལྗོན་པ་སྲུང་ལ་བརྩོན། ཞི་གཅོད་སོགས་གདུལ་བྱ་ཁོལ་བུ་སྨིན། བཀྲ་ཤིས་ཀྱི་ལྷུན་པོ་ལྷུམས་སུ་ཚུད། གྲྭ་ས་བཞི་རྔ་མོང་མགོ་བཞི་རུ། བོད་ཁམས་ཀྱི་མཆོད་སྡོང་མས་ནས་སློང་། དེའི་རྐྱེན་གྱིས་སྐྱོན་ཡོན་སྣ་བཞི་ངོམ ། དྭགས་ཀོང་སོགས་རང་ཡུལ་ཕལ་མོ་ཆེ། ཐལ་ཕུང་བཞིན་འཚུབ་མས་གཏོར་ཞིང་འདུ། བྱང་འབྲོག་ཕལ་མི་ཕྱུགས་ཉམས་རྒུད་ཀྱིས། ཆུ་ཕྲན་འགའ་ཐན་པས་གདུང་བཞིན་འགྱུར། སྡེ་དགེ་ཡང་ཕྱོགས་མཚམས་ཟ་བྱེད་སྡེས། ཟ་རློམ་ཡང་རང་གྲིབ་དགྲ་གཤེད་དུ། མ་གྱུར་ན་གྲགས་ངན་རྗེས་མི་སོན། འོན་ཀྱང་ནི་བླ་འོག་གོས་དང་། ཞྭ་ལྷྭམ་སོགས་རང་ས་བསྲུང་ཐབས་གཅེས། ད་ནས་ནི་བགྲང་བྱ་ཡོལ་ཚུན་ཚོད། འཇིག་རྟེན་འདིར་གྲགས་པའི་རྒྱལ་བློན་སོགས། ཉེ་དུ་དང་མཛའ་བཤེས་དགྲ་ཟླའི་ཚོགས། བྱ་འུག་གཉིས་ལྟ་སྣང་མཛའ་སྡེབ་ཅིང་། ཡོན་མཆོད་འགའ་ཀུན་བརྟགས་དེས་བསླད་དང་། དཔོན་སྡེ་ཕལ་རྨི་ལམ་སྒྱུ་མར་མཚུངས། ཟླ་རྒྱུད་ཀྱི་ཆོས་སྡེ་མི་སྡེ་ཀུན། ཤིང་རང་བདུད་རང་གིས་མ་བྱས་ན། གཞན་ཅི་ཙམ་གནོད་ཀྱང་རེས་འགའ་ཙམ། ཡིན་ཕྱིར་ན་ཡུལ་སྡེ་མཆོག་དམན་ཀུན། ཕྱི་རོལ་ཚོགས་ཕམ་ནུས་སྟོབས་ལྡན་འགྱུར། དེ་ལས་ཀྱང་སྔོན་ནས་ཁོ་བོ་ཡིས། ས་སྐྱོང་གི་རྒྱལ་པོར་ཡང་ཡང་དུ། ནང་མི་འགའ་ཕྱིར་བྲོས་པར་གྱུར་ན། དེའི་རྐྱེན་གྱིས་ཅིར་འགྱུར་ཆ་མེད་པས། ཅིས་ཀྱང་ནི་རང་ས་སྲུང་དགོས་པའི། ཡར་ཞུ་ཡང་ཁ་ཤས་ཕུལ་མོད་ཀྱང་། དབྱིངས་བཞུགས་དོན་ཤོལ་པས་འདི་འདྲ་བྱུང་། འོན་ཀྱང་ནི་ད་ུདུང་རང་གཞན་གྱི། ཕྱོགས་གཉིས་དང་ཕྱོགས་གསུམ་ལ་སོགས་ནས། ངེས་མེ་ཐེ་ཚོམ་གར་བསྒྱུར་ཞིང་། རྫུན་གཟུགས་ཀྱི་མིག་མང་བརྒྱ་སྟོང་ཙེ། ཤར་ཕྱོགས་ནས་རྒྱ་གྲོག་དམར་ནག་འཐབ། ལྷོ་ཕྱོགས་ནས་གཅན་གཟན་གཡུལ་ཆེན་ཤོམ། ནུབ་ཕྱོགས་ནས་ཤྭ་འོད་མཁའ་མཉམ་འཕྱུར། བྱང་ཕྱོགས་ནས་རྔ་བོང་ཁྱུ་སྡེབ་འུར། སྟེང་ཕྱོགས་ནས་ཚེར་མའི་བླ་བྲེ་བྲེས། འོག་ཕྱོགས་ནས་སྲོག་ཆགས་མང་པོའི་འཚེ། མ་ཁང་གཉིས་རང་ཕུང་འཇིག་ལ་བརྩོན། ཏྲི་བོ་ཧོར་ཅོག་རྒྱུའི་གདོན་གྱིས་དམན། བྲག་འགོ་རུ་འབྱུང་བྱས་གད་མོ་རྒོད། དེའི་རྐྱེན་གྱི་ལྷ་འདྲེ་མི་གསུམ་འཁྲུགས། འཇམ་རྫུ་ཡི་རྫུན་རླབས་ཆེན་པོ་ཡི། གཟུགས་བརྙན་གྱི་སྨུག་པས་ཡུལ་ཁམས་འཐིབ། རྒྱལ་རོང་གི་རྒྱལ་ཁག་ཆེན་པོ་བཞི། །ཡིད་དད་གུས་གྱི་ཆུ་གཏེར་རྒྱས་པའི་ཀློང་། ཉམས་ལྷན་སྐྱེས་ཀྱི་མྱུ་གུ་རབ་གཡོའི་རྩེར། སེམས་གསལ་སྟོང་གི་པད་དཀར་འཛུམ་པའི་སྦུབས། རྗེ་བླ་མ་རྔ་ཡབ་གླིང་པ་བཞུགས། གཤིས་སྐྱེ་བ་མེད་པའི་ཆོ་འཕྲུལ་གར། ཡུམ་ལྷན་སྐྱེས་ཌཱ་ཀིའི་གཟུགས་ཅན་དེ། དུས་འབྱུང་དང་བྱུང་བ་ལུང་བསྟན་ཐོས། ༀ་དུང་དུང་ཤ་མོ་ཏེ་ཏི་པ་ལ་མུ་པ་ཏེ་དཱ་དྷ་ཐིམ། དེའི་བརྡའ་དོན་ནི། ཡུལ་དགེ་བ་གངས་གྱི་རི་བོའི་ཁོད། མགོན་སངས་རྒྱས་བསྟན་པའི་ཉེ་འོད་བརྡལ། འོད་བྱང་གི་མཐའ་ལ་ཐུག་ཉེའི་ཚེ། དུས་ངན་པའི་ཁུགས་པ་བཅུ་པ་ལས། གསེར་རི་བསྒལ་བའི་ཀླུ་ཤར་ཚེ། དབུས་གསེར་གྱི་ཁྲི་ལ་ཡ་ཡོ་འབྱུང་། དགྲ་ལྕགས་ཁྱི་ཟུག་ཚེ་དུ་རུ་ཀས། དུས་པ་ཁུགས་དགུ་པ་མངོན་དུ་བྱེད། ཡུལ་མདོ་ཁམས་ཀྱི་རྒྱལ་མཚན་འཇམ་དབྱངས་ཀྱིས། གནས་རི་བོ་རྩེ་ལྔར་འཛུག་ས་སྙམབྱེད། ཤར་དུག་ཤིང་ཚལ་ནས་ཕག་བྱ་ལ། མེ་ལྷ་རྒྱ་གར་རྨ་བྱས་གྲོགས་བཅོལ་ཏེ། རྒྱབ་བསྟེན་དེ་ཡིད་སྲུབ་ལྟ་ཡིས་སོ། སྤྲེའུ་དམར་པོ་ཞོན་ནས་བོད་དུ་རྒྱུ། དང་པོ་དེ་ཆུ་ཤིང་རུལ་བར་མཚུངས། བར་བ་དེ་བསླུ་བྱེད་གྲོགས་སུ་བརྫུ། ཐ་མ་དེ་ངོ་མི་ཤེས་པས་ཕུང་། ལ་ལ་ནི་ཉི་བོད་ཀྱི་མི་རུ་བརྫུ། ཁ་ཅིག་མོན་དང་ཙི་ནའི་ཆ་ལུགས་ཅན། མགོ་རུལ་བ་སྣ་ཡིས་མ་ཚོར་རོ། འདུན་གྲོས་བྱེད་ཚེ་ཕྱི་བའི་དུས་གཅིག་འོང་། སྡེ་བཞི་དགེ་བཅུའི་ཁྲོ་ཡི་ཕོ་བྲང་ལ། གནམ་ལྕགས་ཀྱི་ཐོག་མདའ་ལན་གསུམ་འབེབས། མཐའ་རུ་ནི་དབང་པོའི་གཞུ་བཞིན་འགྲོ། བདུད་སྡེ་ཁ་གསུམ་ཡ་མ་ཟུང་དུ་འགྲོ། རེ་ཞིག་ན་དུམ་བུ་སིལ་མར་འགྲོ། ཧོར་སྡེ་བ་རང་གཤེད་རང་ལ་འབེབས། ཡུལ་དབུས་གཙང་བསྟན་པའི་སྟོབས་འབྱོར་དེ། བཀྲག་ཚེ་བ་ཕྱི་ནི་དབང་གཞུར་མཚུངས། ནང་ན་སྙིང་པོ་མེད་པ་ཆུ་ཤིང་སྡོང་། མགོན་ཀརྨ་ཡི་ཞྭ་སེར་དམར་པོར་འགྱུར། བྱང་རྨ་རྒྱུད་བདེ་ཡང་རེ་ཞིང་ཡིན། ཡུལ་ཀ་ན་ཀ་ཡི་རཱ་ཛ་སེ། རྒྱལ་བསྟན་སྤེལ་བའི་སྦྱིན་བདག་བྱེད་སྲིད་ཀྱང་། དུག་ཚལ་ནག་པོའི་ནང་ན་སྟག་གིས་ཁྱེར། ལྟེ་སྡེ་དགེའི་གཡུ་གཙེ་ངང་ངུར་ལས། ཐན་སྐྱེས་དུག་ཤིང་ཚལ་གྱི་སྲིན་བྱ་ཡིས། ཀླ་ཀློའི་སྲམ་གྱི་ཤ་ཁྲག་ཟོས་པའི་ཁྲག །རྟོག་རྟེག་ཉོག་ཅིང་ཡུལ་ཀུན་ཁྲུ་མས་འགེང་། ཁ་རླངས་ཀྱིས་ས་བཅུད་ཉམས་ནས་འགྲེ། དབུས་ཞྭ་སེར་ཏོག་ལ་རྒྱ་སྐྱེགས་བྱུག དེ་ཡིས་ཀུན་གྱི་དད་པ་ལོག་སོགས་འབྱུང་། འབྲི་ཡི་ཁ་ཆུ་ཆད་ཚེ་དེ་མཚུངས་པའི། འགྲོ་བ་ཀུན་གྱི་བདེ་རྒྱུན་རེ་ཞིག་ཆད། ཆོས་སྔ་འགྱུར་བསྟན་པའི་ཉི་འོད་དེ། ཡུལ་སྦས་པའི་གནས་སུ་འགྲོ་བ་ལ། རྡོ་སྟོད་དུ་སྙིང་པོའི་བསྟན་པ་དར། ཀཿཡི་གནས་ལ་སེར་བ་ལན་གསུམ་འབེབས། ཆོས་གསང་ཆེན་བསྟན་པ་འཕེལ་འགྲིབ་མང་། བཀའ་བརྒྱུད་གཟུགས་བརྙན་ཙམ་དེ་ཆེར་གསལ་ནས། ཉི་མའི་ཉེར་དང་འགྲན་ཀྱང་རེ་ཞིག་ནས། ལྷ་བཻ་རོའི་གཟིགས་རྩ་གསུམ་གྱི་བྱིན་རླབས་སྤྲིན་ལྟར་འདུཿ དེར་ཕྱག་མཆོད་དང་བསྐོར་བར་འཕད་རྣམ་འཚེངས། ཡང་པད་འབྱུང་གི་བྱིན་རླབས་དགེ་བཤེས་ཚུལ། དམར་སེར་གྱི་འཁོར་གཉིས་ཀུན་དེའི་ཚལ། རྒྱས་འགྱུར་ཞིང་བསྟན་དང་འགྲོ་བ་ཡི། ཕན་བདེ་སྤེལ་ལ་ཆས་པ་བཞིན། སྐྱེ་མེད་ཀྱི་ཀུན་གསལ་མཁའ་དབྱིངས་སུ། འགག་མེད་ཀྱི་དབྱངས་ཡིག་དང་པོ་དཀར། ཟུང་འཚོགས་པས་དགོན་སྡེ་བཅའ་ཡང་སྲིད། དེར་མིག་སྨན་ཡང་ཟླ་བའི་མདོག་ཏུ་འགྱུར། ཡུལ་དེ་རུ་ས་སྲིན་དང་ཐེའུ་རང་གི། ཆོ་འཕྲུལ་གྱིས་པྲེ་ཏ་སརྦ་ཏ། སོགས་དར་བ་ཡང་རྒྱལ་དབང་པད་མ་ཡི། སྤྲུལ་པ་ཞིག་གིས་རིམ་གྱིས་འདུ། ས་སྲིན་སྔོན་ཐུལ་ཡང་ཐེའུ་རང་གིས། ལྷ་མི་ཡི་བར་དུ་དབྱེན་སྦྱོར་བ། འདུལ་བའི་ཐུགས་བསྐྱེད་ལྷོ་གྱུར་ན། བསྟན་འགྲོ་ལ་གནོད་པས་དེ་ལ་གཟབ། འཛི་མདའ་ནས་གཟུང་སྟེ་དབང་བར་དུ། བླ་མ་དང་སེར་གཟུགས་མང་པོ་ཞིག ཤི་ཚེ་རྒྱལ་འགོང་དམ་སྲི་དང་། མཁའ་རྒྱུའི་ཡི་དྭགས་སུ་སྐྱེས་པ་དང་། ཁྱད་པར་དུ་གོ་ས་མཐོན་པོ་ཡི། དཀོར་སྡུད་མཁན་ཕྱི་རུ་འགྲོ་མགོན་ཚུལ། ནང་གནག་པའི་བླ་མ་བླུན་པོ་ཞིག ཤི་ཚེ་རྒྱལ་འགོང་དུ་སྐྱེས་ནས་སུ། རྒྱ་འདྲེ་དང་ཡུལ་འདྲེའི་སྣ་འདྲེན་བྱེད། ཡུལ་དེ་རུ་ནད་མུག་མཚོན་གསུམ་དང་། བྱེ་བྲག་ཏུ་ངོས་མི་ཟིན་པའི་ནད། མང་འབྱུང་ཞིང་མི་རྣམས་ཕལ་ཆེར་འཆི། རྗེ་སྔགས་འཆང་ཧཱུྃ་ནག་མེ་འབར་མཚན། གང་དེ་ཡི་སྤྲུལ་པ་ལྕགས་ལ་ནི། སྙིང་རྗེའི་མྱུ་གུ་འཁྲུངས་པ་ལྟའི། བརྟུལ་བཞུགས་ཞི་དྲག་འདྲེས་པ་ཡི། རྣལ་འབྱོར་ཧེ་རུ་ཀ་པའི་དེ་ཚུལ། མགོན་པད་འབྱུང་གིས་བྱིན་གྱིས་བརླབས་པ་སྟེ། མཚོ་རྒྱལ་གྱི་བྱིན་ཐོབ་རིག་མ་དང་། ཟབ་གཏེར་ལ་སྤྱོད་པའི་སྐལ་བ་ཅན། དེ་ཉིད་ཀྱིས་འདུལ་བའི་དུས་བབ་བཞིན། དཔལ་པད་འབྱུང་གི་བྱིན་རླབས་ལ་བརྟེན་ནས། ལྷ་ཡིད་དམ་རྡོ་རྗེ་ཕུར་པ་དང་། དབང་དྲག་པདྨ་ལ་བརྟེན་པ་ཡི། སྙིང་རྗེ་ཁྲོས་པའི་ངང་ཚུལ་ཅན༔ རིམ་བཞིན་དུ་འདུལ་བས་མགོ་ལོག་བདེ། གང་དེ་ཡིས་བསྟན་པའི་ཡང་སྙིང་ནི། ཆོས་ཐེག་པའི་མཆོག་ཀྱང་བླ་ན་སྤེལ། ཡང་དེ་དང་མཚུངས་པར་ཡུལ་ཕྱོགས་ནི། ཀ་ན་ཀ་ཡི་འབྱུང་པོ་རྣམས། མགོན་ཧེ་རུ་ཀ་ཡིས་ཕྲིན་ལས་བཞིས། འདུལ་བར་ངེས་པའང་། གདོན་མི་ཟ། གནས་འཛམ་ཐང་དུ་ལུགས་ཟུང་དཀར་ནག་གཉིས། འདྲེས་པས་ཁྲ་བོ་རུ་འགྱུར་བ་དང་། སྐྱབས་མགོན་ཞིག་དམག་དཔོན་ཚུལ་བཟུང་སྐབས། བསྟན་པའང་རི་མོའི་ཟླ་རུ་འགྲོ། རོང་ལྷྭམ་ནག་ཅན་གྱི་ཁྱུ་ཚོགས་ནས། བྱང་རྨ་སྟོད་དུ་འབྲོག་སྡེ་བརྒྱ་ཕྲག་བཅུའི་དུས་ཆགས་དེ་རེ་ཞིག་བླ་རུ་འཕགས། དབང་ཨ་དད་ཀྱི་མགོ་བོ་གནོན་ལ་ལྟོས། དེའི་རྐྱེན་གྱིས་ཡུལ་གཞན་ཀུན་ཀྱང་འདུད། མཐའ་མ་ནི་ར་ཛའི་གལ་དུ་འཐོག། ཡུལ་དེ་ན་ཕྲུ་མ་སྣ་ཚོགས་ཀྱི། རྩོད་པ་ཡང་མང་དུ་འབྱུང་བར་འགྱུར། མཐར་བར་ཆད་ཀྱི་དབང་དུ་མ་གྱུར་ན། ཟླ་བྲལ་གྱི་གྲགས་པ་སྲིད་ན་གསལ། ལྷ་དབང་ཕྱུག་ཆེན་པོའི་སྤྲུལ་པ་དེ། དབང་ཕྱུག་གི་གཏེར་ཁར་དབང་བ་ཡི། གཏེར་སྟོན་ཞིག་དང་འཕྲད་གྱུར་ནས། རྟེན་འབྲེལ་གྱི་ལེགས་ཚོགས་མ་འཆུག་ན། བར་ཆད་ཀྱི་གཡུལ་ལས་རྒྱལ་འགྱུར་ཞིང་། ཚེ་ཆོས་དང་རིགས་རྒྱུད་བསོད་ནམས་འཕེལ། དབུས་གཙང་དང་རྒྱ་སོག་འབྲེལ་བའི་ལམ། འཛུགས་ནུས་ཤིང་བསྟན་དང་འགྲོ་ལ་སྨན། དམར་སེར་གྱི་བསྟན་དང་དེ་འཛིན་སྡེ། ཕན་པ་དང་བདེ་བའི་དགའ་སྟོན་རྒྱས། ཁོང་ལྷ་དཔལ་འབྱོར་ཕུན་ཚོགས་ལ། ཕྲག་དོག་པའི་ལྷ་མིན་ཕལ་ཆེར་བཞིན། མི་ཕལ་མོ་ཆེའི་རང་བྱས་ལས་ངན་དེ། རང་ལ་འོང་བས་མནར་བར་འགྱུར། རྫ་སྡེ་ཀུན་རང་སྡེ་རང་བརླག་གི། བྱ་བ་ལ་བརྩོན་ཞིང་བྱ་ཚང་ལ། རྡོ་བརྒྱབ་བཞིན་དལ་མེད་བྱ་བས་བྲེལ། ཡོས་རྔོད་ལྟར་གྱུར་ཚེ་དགའ་སྐྱོ་འགྲན། ཟླ་སྡེ་ཀུན་རང་ཚུགས་མི་ཐུབ་པ། དཔེ་བྱ་སྤུ་རླུང་ཁྱེར་ཇི་བཞིན་ཏུཿ ཕལ་ཆེར་ཞིག་ཡུལ་གཞན་བ་སྙེགས་པ་དང་། རང་ས་ན་གནས་པ་འགའ་ཞིག་ཀྱང་། ཐགས་སྣལ་མ་བྲེགས་པའི་ཟླ་རུ་འགྲོ། དེར་བླུན་པོ་ཆོས་པར་རྫུ་བ་ཞིག ཀུན་གྱིས་བླ་མར་བཀུར་བ་ཡིས། ཆོས་ཆོས་མིན་གསེར་དང་ར་གན་བརྗེ། དེའི་བླུན་གྱིས་བསྟན་པའང་གཟུགས་བརྙན་འགྱུར། བླུན་པོ་རྣམས་མགོ་འཁོར་མཁས་རྣམས་མིན། གསེར་སྟོད་ལ་དམག་འཁྲུག་དར་བ་ནས། རེ་ཞིག་ནས་ཕྱོགས་ཀུན་དགྲ་རུ་ལངས། སྡེ་སྨད་པ་འཁྲུག་རྩོད་རུ་མ་བྱེད། དེའི་རྐྱེན་གྱིས་བདེ་སྡུག་རེས་མོས་ཞིན། བར་དེ་རུ་བདུད་སྲིན་བཙན་གསུམ་གྱིས། ཕམ་རྒྱལ་མིག་མང་རྩེ་བ་བཞིན། ཡང་སྟོད་དུ་སྙིང་པོའི་བསྟན་པ་དར། བདེ་སྐྱིད་ཀྱང་སྤྲིན་བར་ཉི་ཞུར་བཞིན། ཡུལ་སྨད་ཤོད་མགོ་མང་དབང་གཞུའི་དཔེ། རང་སྲིད་ཀྱིས་མི་ངོམས་གཞན་སྡེ་རློམ། རང་ནོར་གྱིས་མི་ངོམས་གཞན་བཙོམ་པས། མཐར་རང་ཉིད་ཕུང་བའི་རྒྱུར་འགྱུར་སྲིད། ལྷོ་ཕྱོགས་ནས་ཡི་དྭགས་མཁའ་རྒྱུའི་སྡེ། ཟ་འདྲེ་དང་ཤི་གཤེད་མང་པོ་ཞིག མི་ཡི་གཟུགས་བརྫུས་པ་བླ་མའི་ཚུལ། གྲོགས་རྒྱལ་འགོང་དམ་སྲིས་བྱས་པ་དག །ཡུལ་དེ་རུ་འོངས་པ་དེའི་རྐྱེན་གྱིས། མི་ནད་དང་ནོར་ནད་རིགས་མང་པོ། འབྱུང་འགྱུར་ན་ཡུལ་ཕྱོགས་དེ་ཉིད་དང་། ཡུལ་གཞན་ཕྱོགས་ཀྱང་མང་པོ་ཞིག་ལ་གནོད། ཡང་ས་སྐྱ་པ་ཕྱི་སྣུམ་ནང་སྐམ་འགྱུར། རྙིང་མའང་བསྟན་འཛིན་སྐྱེས་བུ་དབེན། ཀརྨ་པ་རང་ཉིད་རང་ཆེ་འབྱིན། ཇོ་ནང་པ་གཞན་གྱི་ཁོངས་སུ་ཐིམ། དགེ་ལུགས་པ་སྟོབས་དང་འབྱོར་བ་རྒྱས། ཀཿཐོག་གི་བསྟན་པ་བག་ལ་ཞ། དཔལ་ཡུལ་པ་གཞན་ལ་གཟུགས་བརྙན་འགྲན། དཔལ་སྤུངས་པ་རང་ཚུགས་འཛིན་ཞིང་འགྱིང་། རྫོགས་ཆེན་པའི་བསྟན་པ་གཏེར་གྱི་རྫས། ཞེ་ཆེན་ཡང་རེ་ཞིག་ནས་རྒུད་པར་འགྱུར། རྡོར་བྲག་དང་སྨིན་གླིང་ཅུང་ཟད་བརྟན། ཆོས་སྔ་འགྱུར་གྱི་ཆུ་མགོ་ཀཿཐོག་ཏུ། བར་སྐབས་སུ་འཕེལ་འགྲིབ་མང་དུ་འབྱུང་། ལས་ཅན་གྱི་སྐྱེས་བུ་མང་དུ་འབྱུང་། བདུད་སྤྲུལ་ཀྱང་བཟང་རྫུ་མང་ཞིག་འོང་། དེའི་རྐྱེན་གྱིས་སྙིང་པོའི་བསྟན་པ་ལ། འཕེལ་འགྲིབ་ཀྱང་འགའ་ཙམ་འབྱུང་འགྱུར་ཞིང་། བཛྲ་དང་དྷརྨའི་མཚན་ཅན་གྱི། དམ་པ་ཟུང་ལུང་རྟོགས་ཀྱི་བསྟན་པ་སྤེལ། དཔལ་གླིང་དུ་སྔར་དང་མི་འདྲ་བའི། །ཆོས་ཤིག་ཀྱང་དར་ཞིང་དེ་ལ་གཡེངས། དེའི་རྐྱེན་གྱིས་བསྟན་པའང་བཀྲག་ཉ་ཆེ། དཔེ་བར་སྣང་ཁམས་ན་དབང་གཞུ་བཞིན། །དཔལ་སྤུང་སུ་ལུགས་ཟུང་འདྲེས་མའི་རྒྱུན། བརྟན་འགྱུར་ཡང་དཔོན་སློབ་དམ་ཚིག་འཆལ། དེའི་རྐྱེན་གྱིས་བསྟན་སེལ་ཡ་མ་ཟུང་། དཔེ་བྱ་འུག་གཉིས་ཀྱི་ཟླ་རུ་འགྲོ། སྡེ་བཞི་དང་དགེ་བཅུའི་མཚན་འཆང་བ། ཆོས་སྲིད་ཟུང་ཆོས་སྐྱོང་བཟང་པོའི་མཐུས། །མི་མཐུན་གཡུལ་ལས་རྒྱལ་ན་ཡང་། །ས་སྐྱོང་གི་བླ་མ་འབྲུག་གིས་འཁྱེར། །འོན་ཀྱང་ནི་ཆོས་དང་སྲིད་གཉིས་པོ་དེ། དཔེ་རྡོ་ལ་བརྐོས་པའི་རི་མོ་བཞིན། བརྟན་ཆགས་དེར་ཕྱོགས་ཀུན་ཟིལ་གནོན་པ། ཆོས་སྐྱོང་གི་མཐུ་རུ་གོར་མ་ཆག། རུ་དམ་དུ་སྔར་འདྲེས་མི་མིན་ཞིག ས་སྟེང་འོག་ཏུ་བྱིང་བ། ས་སྟེང་དུ་ཐོན། དེའི་རྐྱེན་གྱིས་བསྟན་སྲིད་ས་འོག་ཏུ། གཏེར་རྫས་བཞིནབྱིང་བར་འགྱུར་ཡང་སྲིད། ཞེ་ཆེན་གྱི་དར་གདུགས་བཀྲག་མདངས་ཅན། ཆར་དྲག་པོས་གདུང་ཚེ་ཧྲུལ་པོར་འགྱུར། དུས་རེ་ཞིག་དར་ཡང་རྒུད་པ་ཡིས། མི་འགའ་ཞིག་སྐྱོ་བའི་རྒྱུ་རུ་འགྱུར། དབུ་རྒྱ་ཚད་དཔག་མེད་གླིང་དྷོ་སེམས། ཨ་མོ་ཡི་ཀ་དེ་དབང་པོའི་སྟན། ལྷ་བརྒྱ་བྱིན་དང་མི་རྣམས་སྟེང་དུ་འཁུར། བླ་འོག་འདི་གོ་ས་ནོར་ཆེའི་སྐྱོན། བོད་ཆོས་རྒྱལ་སྤྱན་རས་གཟིགས་དབང་གི། སྤྲུལ་པ་འགྲོ་བའི་མཆོད་སྟོང་དེ། ཡང་བསྟན་འགྲོའི་དཔལ་དུ་གྱུར་མོད་ཀྱང་། ལོག་སྨོོན་ཅན་ཨུ་དུམ་བཙན་པོ་ཡི། སྐྱེ་བ་དེ་ཡིས་གཡོ་ཐབས་ཀྱིས། སྦྱོར་ངན་གྱི་སྟ་རེས་བཤིག་གྱུར་ན། འཛམ་གླིང་གི་ཉི་མ་ནུབ་རིར་ཕྱོགས། མཐར་དེ་ཡི་གཉེན་པོ་སྙིང་སྟོབས་ཅན། སྐྱེས་བུ་དམ་པ་འགའ་ཞིག་གིས། རྐྱེན་བྱས་ཏེ་མ་ཧཱ་ར་ཛ་ཡི། ཆད་པ་དྲག་པོས་དེ་མནར་འགྱུར། ཡོངས་སུ་གྲགས་ཀྱང་དམའ་རུ་ལྟུང་། དམར་སེར་གྱི་རལ་མང་ཕག་ཏུ་ཡིན་པས་བདོ་ཆོས་སྲིད་སྐྱོང་བ་བར་ཆད་ཀྱིས། དབང་མ་གྱུར་རྟེན་འབྲེལ་གེགས་མེད་དུ། འགྲིག་གྱུར་ན་སླར་ཡང་སྔ་འགྱུར་གྱི། བསྟན་པ་དང་དེ་འཛིན་སྐྱོང་བ་དང་། ཁྱད་པར་དུ་རྒྱལ་དབང་པདྨ་ཡི། སྤྲུལ་པ་ཐུགས་གཏེར་བདག་པོ་དང་། འཕྲད་གྱུར་ན་བོད་ཁམས་ཡོངས་ལ་སྨན། འོན་ཀྱང་ནི་བདུད་སྡེའི་བར་ཆད་ཀྱིས། ལེགས་ཚོགས་ཀྱི་རྟེན་འབྲེལ་འགྲིགས་པའང་དཀའ། འོན་ཀྱང་ནི་ཨོ་རྒྱན་ཆེན་པོ་དང་། རྗེ་རིན་པོ་ཆེ་དབྱེར་མེད་མོས་པ་ཡིས། དམར་སེར་གྱི་སྡེ་གཉིས་རིས་མེད་དུ། བསྐྱངས་ནས་ཕྱོགས་ཞེན་མི་མཛད་པ། རྒྱལ་དབང་མཆོག་ལྔ་བའི་དུས་བཞིན་དུ། མཛད་གྱུར་ན་ཆོས་སྲིད་ཀྱང་དེ་རྗེས་བསྙེག །ཤར་རྒྱ་ནག་གི་ཡུལ་དུ་སེམས་དཔའ་ཆེ། གསེར་གྱི་ཞྭ་བྱི་རུའི་ཏོག་མཛེས་པས། ཡོངས་འགྲོ་བའི་བདེ་སྐྱིད་རྒྱས་པ་དང་། རིས་མེད་ཀྱི་བསྟན་ལ་ཕན་བདེ་སྤེལ། ཆོས་སྔ་འགྱུར་ཡིད་བཞིན་དབང་གི་རྒྱལ། བཤད་ཀྱི་རྒྱལ་མཚན་རྩེར་བཀོད་ན། ཆོས་དང་སྲིད་ཀྱི་ལེགས་ཚོགས་ཀུན། ཕྱོགས་ལས་རྣམ་རྒྱལ་གྱི་དགེ་མཚན་མངོན། རྒྱལ་ཁམས་ཀུན་དམར་སེར་གྱི་དགེ་འདུན་སྡེ། བསླད་མེད་པ་གསེར་ཟངས་དམར་སེར་གྱི། ཁམས་ལྟ་བུ་ཟུང་འབྲེལ་དར་གྱུར་ན། བསྟན་པ་དང་འགྲོ་བའི་བདེ་སྐྱིད་རྒྱས། མི་བླུན་པོ་ཕྲག་དོག་ཅན་རྣམས་ཀྱིས། ཙན་དན་ས་མཆོག་ཀྱང་སོལ་བར་བྱེད། ང་རྒྱལ་དང་གྱ་ཚོམ་སྤྱོད་པའི་སྐྱོན། སྐྱབས་མགོན་ཞིག་ཙི་ནའི་གལ་དུ་འཐོག། རང་སྡེའི་ཁྱུར་བདུད་རིགས་འགའ་ཞིག་ཀྱང་། ཡོད་པ་ཡི་སྐྱེན་བྱས་འཁྲུག་རྩོད་དར། གཞན་ཕྱོགས་བྱང་རོང་གི་རྡོ་ཆར་ནི། བཀྲ་ཤིས་སྨན་ལྗོངས་སུ་ཡང་ཡང་འབེབས། དེའི་རྐྱེན་གྱིས་དགེ་འདུན་གྱི་སྡེ་ངང་ཁྱུ་ནི། ཚོགས་རྣམས་ཀྱང་སྐྲག་སྟེ་བག་མི་ཕེབས། དེར་པད་འབྱུང་གི་བྱིན་རླབས་ལ་བརྟེན་ནས། བཤད་སྒྲུབ་ཀྱི་བསྟན་ལ་བར་ཆད་མེད། རྒྱ་རོང་གི་རྒྱལ་ཁམས་ཕལ་མོ་ཆེ། དར་རྒུད་ཀྱི་མངོན་རྟོགས་ངོམ་ན་ཡང་། མགོན་པད་འབྱུང་དང་བཻ་རོའི་སྤྲུལ་པ་ཡིས། འདུལ་བའི་དུས་བབ་ན་རེ་ཞིག་བདེ། གཡུ་སྔོན་པོའི་མཚོ་ལ་མིག་སྨན་དང་། ལྕགས་ཀྱིས་འཚེ་བ་ཡང་ཡང་རྩོམ། །མེ་ལྷ་ལ་ཙི་ནའི་ཕྲུ་མ་ཡི། །འཁྲུག་རྩོད་ཀྱང་ཡོས་རྔོད་ལྟ་བུ་འབྱུང་། བ་ཡུ་ནས་མཐའ་དམག་ཤྭ་འུད་ལྷུད། མི་རྣམས་ཀུན་གཡོ་ཞིང་འཁྲུགས་རྩོད་འབྱུང་། སྲིན་པོ་ལ་བདེ་སྡུག་སྤེལ་མ་འོང་། དགའ་སྐྱོ་ཟུག་འགྲན་བཞིན་བག་མི་ཕེབས། ཁྲོ་མོ་ལ་ཕྲུ་མ་སྣ་ཚོགས་པ། བྱང་རྨ་ལུང་དུ་འདུ་ལ་ལྟད་མོ་ལྟོས། སྟེང་ཕྱོགས་ནས་སྙིགས་མའི་ལྟས་ངན་ཤར། བོད་ཡུལ་དབུས་དམག་གི་ཆུ་རྒྱུན་འབེབས། དེའི་རྐྱེན་གྱིས་མི་བདེའི་རྐྱེན་མང་འཁྲུགས། །ལྷོ་བདུད་སྡེ་ཁག་གསུམ་རང་འཁྲུགས་འོང་། གཞན་ཕྱོགས་ཀྱི་རྒྱལ་པོ་ཟིལ་གྱིས་གནོན། ཧོར་སྡེ་བཞི་སེང་ཁོག་འབུ་ཞུགས་འདྲ། མ་ཁང་ཡང་རང་ཕུང་རང་བརླག་འགྲན། ཅི་ཞིག་ནས་ཆད་པ་ངལ་གསོ་བཞིན། བྲེ་བ་ཡང་ལུགས་ཟུང་རང་ཚུགས་དང་། གཞན་ཕྱོགས་ལ་བརྟེན་པས་རེ་ཞིག་འཚོ། བྲག་མགོ་རུ་ལུགས་ཟུང་དུམ་བུར་འགྲོ། མཐར་གཞན་གྱི་གྲོགས་སུ་འགྲོ་ཡང་སྲིད། །བེ་རི་བའི་རང་ཚུགས་མི་འཆར་བར། །བཟུང་ན་ནི་གཞན་གྱིས་གླགས་མི་རྙེད། གླིུང་ཚང་ཡང་རང་སྲིད་སྐྱོང་བཞིན་དུ། གཞན་ཕྱོགས་ཀྱི་རྒྱལ་པོའི་ཞབས་སུ་འགྲོ། ལྷོ་ཧོར་བྲག་ཛ་ཡི་དབྱར་རྔ་ལྡིར། མཛེས་བྱེད་ལ་དབུས་ཀྱི་གསེར་འཕྲུ་བྱེད། དུས་ལྔ་བརྒྱ་ཐ་མའི་མར་གཤམ་འདིར། བདེ་བ་དང་དགེ་བ་དཔལ་འབྱོར་ཀུན། ཁོ་ནམ་ལངས་སྐར་མ་བཞིན་དུ་འགྲོ། སྡིག་སྡུག་དང་ནད་རིམས་གདོན་བགེགས་རྣ་མོ་ཡི་སྐར་ཚོགས་ཇི་བཞིན་འཚུབས། ཚེ་ཐུང་ནད་མང་རྐྱེན་ངན་གྱིས། མི་ཚེ་ཡང་འགྲིབ་ཅིང་བགྲང་བྱ་ནི། སུམ་ཅུ་དང་བཞི་བཅུར་ཉེ་བ་ཙམ། ནད་འདུ་བ་ངོས་མི་ཟིན་པ་ཡང་། སྣ་ཚོགས་ཞིག་འབྱུང་ཞིང་སུམ་ཆ་སྟོང་། ས་གཡོ་དེང་རི་ཉིལ་ཤྭ་འུད་དང་། དམག་འཁྲུག་དང་མཚོན་ཆའི་བསྐལ་པ་དར། དམ་པའི་ཆོས་ཡིད་ལ་མི་དྲན་ཞིང་། ཚེ་འདི་ཡི་འདུན་མ་ཁོ་ནར་རེམ། སེར་མོ་རྣམས་སྡིག་པའི་ལས་ཀྱིས་འཚོ། མི་ནག་ཕལ་སྐྱོ་ཤེས་ངེས་འབྱུང་སྐྱེ། བུད་མེད་ཕལ་འདྲེ་སྲིན་གྲལ་དུ་བསྙེག །སྐྱེས་པ་ཕལ་མཁའ་རྒྱུའི་འདྲེ་རུ་སྐྱེས། ལྷ་འདྲེའི་ཚུལ་ལེགས་ཉེས་གཏམ་ཡང་འཆད། ལྷ་པ་དང་ཤི་ལོག་མང་ཞིག་དང་། མི་ལ་ལས་གཤིན་པོའི་ལོ་རྒྱུས་གླེང་། ཆོས་འཆད་ཉན་དང་སྒོམ་སྒྲུབ་ལ་བརྩོན་པ་རྣམས། འདྲེ་ལྟར་དུ་འཛིན་ཞིང་ཀུན་གྱིས་བརྙས། ཆོས་ཅི་ཡང་མི་ཤེས་བླུན་པོ་རྣམས། བླ་མའི་ཚུལ་བཟུང་ཞིང་བསྟན་པ་དང་། འགྲོ་བའི་དོན་བྱེད་རློམ་གཡོ་སྒྱུ་དང་། ཚུལ་འཆོས་ཀྱིས་རང་གཞན་མགོ་བསྐོར་ཞིང་། ལོག་འཚོ་ལྔར་སྤྱོད་ལ་ཀུན་ཀྱང་དད། ཁོང་བླ་མ་ཕལ་ཟ་འདྲེས་རྒྱུད་བརླམས་པས། རང་མཐོ་དང་ང་རྒྱལ་གྱིས་མངོན་ཤེས་འཆད། ལོག་འཚོ་ཡི་དཀོར་རྫས་མང་བསགས་ཏེ། ཡར་མཆོད་དག་མར་སྦྱིན་བྱེད་མི་ནུས། རྟ་དྲེལ་དང་ཆོས་གོས་ཀྱིས་གཟི་བརྗིད་རྒྱས། དད་གཤིན་གྱི་རྫས་ལ་ཤི་སྦར་འཐམས། དེའི་སྐྱོན་གྱིས་ཤི་ནས་རྒྱལ་འགོང་དུ་སྐྱེས། བསྟ་འགྲོ་ལ་དངོས་སམ་བརྒྱུད་ནས་གནོད། ཕ་བླ་མ་གསང་ཞིང་དམ་ཚིག་སྡོམ། རྩྭ་ལྟར་དུ་འདོར་ཞིང་རང་ཆེ་འབྱིན། རང་མཐོ་དང་ང་རྒྱལ་སྤྱོ་ངན་གྱིས། རང་གཟན་ཡི་མགོ་བོ་སྐོར་བར་བྱེད། དེའི་རྐྱེན་གྱིས་སེར་གཟུགས་ཕལ་མོ་ཆེ། རྒྱལ་འགོང་དང་དམ་སྲིར་སྐྱེས་ནས་སུ། །རྒྱ་འདྲེ་དང་ཡུལ་འདྲེའི་སྣ་འདྲེན་བྱེད། དམག་འཁྲུག་དང་ནད་རིམས་སྣ་ཚོགས་དར། བླ་མ་དང་དཔོན་པོ་ཕ་མ་སོགས། དྲིན་ཅན་གྱི་དྲིན་ལན་ཁྱད་བསད་ནས། དགྲ་ལྟར་དུ་མཐོང་ཞིང་ཆོས་སྤང་དང་། སྡིག་པ་ཡི་ལས་ལ་གང་རྒོད་བྱེད། ཕྱོགས་མཐའ་དག་ནས་དམག་འཁྲུགས་ཡང་ཡང་འོང་། ཁོང་མི་རྣམས་ཕལ་ཆེར་གྲི་རུ་འཆི། འདི་འདྲ་ཡི་དུས་ལ་བབ་པའི་ཚེ། མགོན་པད་འབྱུང་ལས་རེ་ས་གཞན་ན་མེད། ཨེ་མ་ཧོ། རྒྱལ་བ་ཀུན་འདུས་དངོས། མགོན་སངས་རྒྱས་གཉིས་པ་པད་མ་འབྱུང་། དུས་སྙིགས་མ་ལ་སྐྱབས་གནས་ཁྱེད་ལས་མེད། མ་འགྲོ་དྲུག་གི་སེམས་ཅན་སྤྱི་དང་ནི། ཁྱད་པར་དུ་སྙིགས་མའི་འགྲོ་བ་རྣམས། སྡུག་བསྔལ་གྱིས་གདུང་འདི་སྙིང་རེ་རྗེ། ཕ་ཁྱེད་ཀྱི་ཐུགས་རྗེ་ནུས་མཐུ་ཡིས། དུས་སྙིགས་མའི་འགྲོ་རྣམས་སྐྱབས་སུ་གསོལ། མི་ཁོ་བོ་ཀུན་བཟང་གཞན་ཕན་ཞེས། ཆོས་བྱང་ཆུབ་སེམས་གཉིས་ཀྱི་པ་ཕོགས་ཐོབ། རིས་མེད་ཀྱི་བྱིན་ལབས་སྤྲིན་བཞིན་འགྲིགས། ཕ་མཁྱེན་བརྩེ་མི་ཡི་ཉི་མར་འོད་ཟེར་འབར། ཕྱོགས་མེད་ཀྱི་འགྲོ་ལ་ཕན་བདེའི་ཆར། དུས་རྒྱུན་ཆད་མེད་པར་འབེབ་པ་ཡིས། སྐུལ་ལྡན་རྣམས་དད་དམ་གྱི་མྱུ་གུ་འཁྲུངས། ལས་ཅན་ནྲམས་བྱང་ཆུབ་ཀྱི་འབྲས་བུ་སྨིན། རྗེས་འཇུག་རྣམས་སྨིན་གྲོལ་གདམས་ངག་གིས། རྒྱུད་སྨན་ཞིང་གྲོལ་ཕྱིར་བླ་མ་ཡི། སྒྲུབ་པ་ལས་ཚོགས་བསགས་སྒྲིབ་སྦྱོང་དང་། བསྐྱེད་རྫོགས་ཀྱི་རྣམ་གྲངས་མང་མི་དགོས། ལམ་བསྐྱེད་རྫོགས་གཉིས་དང་རྫོགས་པ་ཆེ། སྙན་བརྒྱུད་ཀྱི་གདམས་ངག་བསྒོམ་ནུས་ན། ཚེ་འདི་འམ་བར་དོ་སྐྱེ་བ་གཞན། གང་རུང་དུ་གྲོལ་བར་གདོན་མི་ཟ། ད་དུང་ཡང་འབྱུང་འགྱུར་ལེགས་ཉེས་གཟུགས། མང་ཞིག་དང་ཁྱད་པར་གང་ཟག་འགའི། བཟང་ངན་གྱི་དབྱེ་བ་མང་པོ་ཞིག །ཡིད་ངོ་རུ་ཤར་ཡང་དེ་ཙམ་མོ། ལུང་བསྟན་འགའི་བརྡའ་གྲོལ་ཡང་ཡིག་འདི། དུས་རེ་ཞིག་གི་བར་དུ་གསང་བའི་རྒྱ། མཐར་མངོན་གྱུར་ཚེ་བླང་དོར་མ་ནོར་ན། འཕྲལ་ཞུགས་ཀུན་ཕན་བདེའི་རྒྱུར་གྱུར་སྲིད། ཚིག་དེ་སྐད་བྱ་བྲལ་རྡོ་བླ་ཡིས། ཤར་མ་རུ་བྲིས་བཞིན་སྤེལ་བ་འདིས། བླང་དོར་གྱི་གནས་ཀུན་ཡོངས་གསལ་ནས། བསྟན་འགྲོ་ལ་སྨན་པའི་རྒྱུར་གྱུར་ཅིག །སརྦ་མངྒ་ལཾ།