གཏུམ་མོའི་མེ་དབང་བདེ་དྲོད་རབ་འབར།
༄༅། །གཏུམ་མོའི་མེ་དབང་བདེ་དྲོད་རབ་འབར་བཞུགས། །
ན་མོ་བཛྲ་དྷཱ་ར་ཡེ། དབང་བཞིའི་མངའ་བདག་མཁྱེན་བརྩེ་འོད། །རབ་འབར་ཟེར་བརྒྱའི་གཟི་འོད་ཀྱིས། །སྒོ་གསུམ་བག་ཆགས་ཐུན་གསུམ་སྨག ། མཐར་བྱེད་གཏུམ་མོ་འོད་བརྒྱར་འདུད། །དེ་ལ་ཡང་གཏུམ་མོའི་མེ་དབང་བསྐུར་བར་སྤྲོ་ན་རྩ་དབང་རྒྱལ་ཐབས་སྤྱི་བླུགས་ཀྱི་བུམ་དབང་དང་གསང་དབང་གྲུབ་རྗེས་སློབ་མ་རླུང་ཆས་ཀྱིས་སྤུད་ལ་རྣམ་སྣང་གི་ཆོས་བདུན་དང་ལྡན་པའི་ངང་ནས་སེམས་གཞན་དུ་མི་ཡེངས་པར་སྡོད་ཅེས་བརྡའ་སྤྲད་ལ་དམིགས་པ་འདི་བཞིན་དུ་ཕོག །ༀ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཏྨ་ཀོ྅ཧཾཿ ཆོས་ཐམས་ཅད་རང་བཞིན་གྱི་འོད་གསལ་བའི་སྟོང་པ་ཉིད་དུ་གྱུར། སྟོང་པའི་ངང་ལས་འཁོར་བའི་འདམ་དྲིས་མ་གོས་པའི་པདྨ་དང་། །མ་རིག་པའི་མུན་པ་སེལ་བའི་ཉི་གདན་དང་། །འཁོར་བའི་ཚ་དབལ་བསལ་ཕྱིར་ཟླ་གདན་དང་སུམ་བརྩེགས་ཀྱི་སྟེང་དུ་ཁྱེད་རང་རྣམས་སྐད་ཅིག་གིས་ཐབས་མཆོག་ཧེ་རུ་ཀ་ཐམས་ཅད་འདུས་པའི་ངོ་བོ་ གསང་བའི་བདག་པོ་རྡོ་རྗེ་ཆོས། །སྐུ་མདོག་སྔོ་སྐྱ་ཞལ་གཅིག་ཕྱག་གཉིས་རྡོར ་དྲིལ་བསྣོལ་སྟབས་སུ་འཛིན་པས་ཡུམ་ལ་འཁྱུད་ཅིང་སྤྱན་གསུམ་མཆེ་བ་ཅུང་ཟད་གཙིགས་པ་ཞི་མ་ཁྲོའི་རྣམ་འགྱུར་ཅན་ཞབས་གཉིས་གཡས་བརྐྱངས་གཡོན་བསྐུམ་པའི་ཚུལ་གྱིས་དོར་སྟབས་སུ་བཞུགས་པ། ཡུམ་ཡེ་ཤེས་ཀྱི་མཁའ་འགྲོ་མ་རྡོ་རྗེ་རྣལ་འབྱོར་མ་དམར་མོ་གཡས་གྲི་གུག་དང་གཡོན་ཐོད་ཁྲག་འཛིན་པས་ཡབ་ཀྱི་མགུལ་ནས་འཁྱུད་ཅིང་གཉིས་སུ་མེད་པར་སྦྱོར་བས་ལུས་དབུས་སུ་རྩ་དབུ་མ་ཆུ་ཤིང་གི་སྡོང་པོ་ལྟར་དྲང་བ། །ཏིལ་གྱི་མར་མེ་ལྟར་གསལ་བ། །རྒྱ་སྐྱེགས་ཀྱི་ཁུ་བ་ལྟར་དྭངས་བ། །མཐིང་ཤུན་ལྟར་སྔོ་བ་སྟེ་མཚན་ཉིད་བཞི་དང་ལྡན་པ་ཆོས་ཀྱི་སྐུ། །གཡས་སུ་རོ་མ་དཀར་མོ་ལོངས་སྐུ་དང་། །གཡོན་དུ་རྐྱང་མ་དམར་མོ་སྤྲུལ་སྐུའི་མཚོན་བྱེད་ཡིན་ལ། ཡར་སྣེ་གསུམ་ཚངས་བུག་དང་སྣ་བུག་གཉིས་སུ་ཟུག་པ། མར་སྣེ་གཉིས་ལྟེ་འོག་གཉེར་པོ་ཆེས་ཐད་ནས་དབུ་མ་དང་ནང་གཅིག་ཏུ་གྱུར་པ། དེ་ཡང་དབུ་མར་སྦ་ལྕག་འབྲིང་པོ་ཙམ་དང་། །རོ་རྐྱང་གཉིས་དེ་ལ་ཆེས་ཕྲ་བ་གསུམ་ག་མདོག་དྭངས་བ་མདངས་གསལ་བ། །ཕྱི་གསལ་ནང་གསལ་འོད་ཀྱི་སྦུ་གུ་ལྟ་བུར་གྱུར་པ་ལ་དམིགས་པ་གཏད་དེ་མ་ཡེངས་པར་བཞག །དེའི་ངང་ནས་རླུང་རོ་དགུ་སྤྲུགས་ཀྱི་འཕྲུལ་འཁོར་བྱས་ལ་གཡས་གཡོན་དབུས་གསུམ་ནས་རླུང་རོ་དགུ་བུས་པས་ཉོན་མོངས་པ་དུག་གསུམ་གྱིས་ཀུན་ནས་བསླངས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་སངས་ཀྱིས་དག་པར་བསམས་ལ་ཅུང་ཟད་མཉམ་པར་བཞག །དེ་ནས་རྩ་དབུ་མའི་ཡར་སྣེ་ཚངས་པའི་བུ་གར་ཟུག་པའི་དཀྱིལ་དྲང་པོར་ཆོས་སྐུ་ཀུན་བཟང་ཡབ་ཡུམ་གཙུག་ཏོར་གྱི་ཚུལ་དང་། དེའི་འོག་ཏུ་ལོངས་སྐུ་རྡོ་རྗེ་སེམས་དཔའ། དེ་ནས་རིམ་བཞིན་སྤྲུལ་སྐུ་དགའ་རབ་རྡོ་རྗེ་རིག་འཛིན་ཤྲཱི་སིངྷ། སློབ་དཔོན་འཇམ་དཔལ་བཤེས་གཉེན། ཡེ་ཤེས་མདོ། དྲི་མེད་བཤེས་གཉེན། སློབ་དཔོན་པདྨ་འབྱུང་གནས་ལ་གཡས་སུ་ཆོས་རྒྱལ་ཁྲི་སྲོང་ལྡེའུ་བཙན། གཡོན་དུ་བཻ་རོ་ཙ་ན། མདུན་དུ་ཡེ་ཤེས་མཚོ་རྒྱལ། དེའི་འོག་ཀློང་ཆེན་རྡོ་རྗེ་གཟི་བརྗིད། རིག་འཛིན་འཇིགས་མེད་གླིང་པ། འཇིགས་མེད་ཕྲིན་ལས་འོད་ཟེར་རྣམས་ཐོ་བརྩེགས་སུ་གསལ་བའི་སྐུ་ལས་འོད་ཟེར་དཔག་ཏུ་མེད་པ་ཕྱོགས་བཅུའི་ཞིང་རབ་འབྱམས་རྣམས་སུ་འཕྲོས་པས་རྒྱལ་བ་སྲས་དང་བཅས་པ་རྣམས་ཀྱི་ཐུགས་རྒྱུད་བསྐུལ་བས་ཡིད་བཞིན་གྱི་ནོར་བུ་རིན་པོ་ཆེ་ལ་གསོལ་བ་བཏབ་པ་བཞིན་ལས་ཆེན་བཞི་དང་གྲུབ་ཆེན་བརྒྱད་ལ་སོགས་པ་ཐུན་མོང་གི་དངོས་གྲུབ་དང་སྐུ་ལྔ་སོགས་བདེ་སྟོང་ཟུང་འཇུག་མཆོག་གི་གཏུམ་མོའི་དངོས་གྲུབ་སོགས་མཆོག་ཐུན་མོང་གཉིས་ཀྱི་དངོས་གྲུབ་མ་ལུས་ཤིང་ལུས་པ་མེད་པར་མེ་དཔུང་ཆེན་པོ་ལ་ཞུན་མར་བླུགས་པ་བཞིན་གཉིས་སུ་མེད་ཅིང་གཉིས་སུ་བྱར་མེད་པར་གྱུར་པས་ལུས་ལ་བདེ་དྲོད་འབར་བ་དང་ངག་ལ་ནུས་པ་འབར་བ་དང་སེམས་ལ་རྟོགས་པ་འབར་བ་སྟེ་འབར་བ་གསུམ་གྱི་དངོས་གྲུབ་མངོན་སུམ་དུ་ཐོབ་པར་བྱུང་སྙམ་པའི་མོས་གུས་ཚད་མེད་པ་སྐྱེད་ཅིག ཅེས་བརྡའ་སྦྱར་ལ། རྡོར་དྲིལ་དང་བཅས་ཏེ། ཨེ་མ་ཧོ། དག་པ་རབ་འབྱམས་དབུ་མའི་གྲོང་ཁྱེར་ནཿ སེམས་ཀྱི་རྡོ་རྗེ་ཆོས་སྐུའི་ངོ་བོ་ཉིདཿ ཕུང་པོ་ཁམས་དང་སྐྱེ་མཆེད་གདན་གསུམ་ལྷའིཿ རྣམ་རོལ་རྩ་བརྒྱུད་བླ་མར་གསོལ་བ་འདེབསཿ རླུང་སེམས་དབྱེར་མེད་ཞུ་བདེའི་ཙཎྜ་ལིཿ འཁོར་ལོ་ལྔ་ཡི་དཔའ་བོ་མཁའ་འགྲོའི་གྲོང་ཿ ཚོགས་ཀྱི་འཁོར་ལོས་འདུ་བས་མཉེས་བྱས་ནསཿ དབང་དང་དགའ་བཞིའི་ཡེ་ཤེས་རོས་གང་ཤོགཿ ཁྱད་པར་མཆོག་གི་གཏུམ་མོས་འཁོར་ལོ་བཞིའིཿ རླུང་སེམས་ལས་རུང་དྷུ་ཏའི་རྩ་མདུད་རྣམསཿ ཚོགས་དང་སྦྱོར་མཐོང་སྒོམ་པའི་ལམ་དུ་གྲོལཿ ས་བཅུའི་རྒྱུན་མཐའ་གཙུག་ཏོར་རྩེར་སྨིན་ཤོགཿ ཉོན་མོངས་རླུང་སེམས་འཁོར་བའི་རང་བཞིན་ནིཿ རྣམ་གྲོལ་ཞི་བ་ཡེ་ཤེས་རླུང་མཆོག་གིཿ རང་དབང་གྱུར་ལས་རྩ་ཁམས་ཡི་གེའི་སྤྲིནཿ འཁོར་ལོ་ཚོགས་ཆེན་ས་ལ་ལྷུན་རྫོགས་ཤོགཿ ཅེས་བརྗོད་མཐར་སློབ་མ་རྣམས་མཉམ་བཞག་གི་ངང་ནས་རླུང་བུམ་པ་ཅན་བཟུང་ཚེ་སྣང་སྲིད་འཁོར་འདས་ཀྱི་དྭངས་བཅུད་ཐམས་ཅད་རླུང་ཁ་དོག་སྔོན་པོའི་རྣམ་པར་གྱུར་ཏེ། རོ་རྐྱང་གཉིས་སུ་བརྒྱུད་ནས་དབུ་མའི་ནང་དུ་ཐིམ་པས་རྒྱལ་བ་རྣམས་ཀྱི་གསང་བ་གསུམ་གྱི་བྱིན་རླབས་ནུས་པ་ཐམས་ཅད་དང་འབྱུང་ལྔའི་ཁམས་ཀྱི་དྭངས་བཅུད་ནུས་པའི་ཡོན་ཏན་ལྷ་ཀླུ་མིའི་དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱི་བདེན་ཚིག་ནུས་པ་དང་བཅས་པ་མེ་འབར་བ་ལ་བུད་ཤིང་བསྣན་པ་བཞིན་ཀུན་ནས་ཀུན་ཏུ་འབར་བས་བདེ་དྲོད་གཉིས་མེད་ཀྱི་དངོས་གྲུབ་འཕྲལ་དུ་ཐོབ་པར་ བསམ་མོ། དེ་ནས་བླ་མ་རྣམས་འོད་ཀྱི་རང་བཞིན་དུ་གྱུར་ནས་དབུ་མའི་ཡར་སྣེེ་ཧཾ་ཡིག་དཀར་པོ་མགོ་ཐུར་བསྟན་དང་རྩ་གསུམ་འདུས་པའི་མར་སྣེར་ཨ་ཤད་དམར་པོ་སྐྱེར་ཚེར་སྐེད་པ་ནས་བཅད་པ་ལྟ་བུའི་བཅད་ཁ་སྟེང་དུ་བསྟན་པ་ལྟ་བུའི་དཀྱིལ་ནས་ཤེས་རབ་ཡེ་ཤེས་ཀྱི་མེ་རྒྱ་ཁབ་ལྟར་འབར་བ་དེ་ཡང་ངོ་བོ་ཐིག་གེ་རྣམ་པ་མེ་རེག་བྱ་ཚ་བ་ཉམས་བདེ་བ་སྟེ་མཚན་ཉིད་བཞི་ལྡན་དུ་གསལ་ལ། ཡང་སློབ་མ་རྣམས་ཀྱིས་རླུང་བུམ་པ་ཅན་འཛིན་པ་དང་སྦྲགས་ལ་སྲིད་དང་ཞི་བའི་དཔལ་དང་ཡོན་ཏན་མ་ལུས་པ་ཐམས་ཅད་ནམ་མཁའ་ཁ་དོག་སྔོན་པོའི་རང་བཞིན་དང་འདྲེས་ཏེ་སྣ་བུག་གཉིས་སུ་ཞུགས། རོ་རྐྱང་གཉིས་ནས་བརྒྱུད། མྱུར་བའི་ཤུགས་དང་བཅས་ཏེ་ཨ་ཤད་ལ་ཕོག་པས་མེ་དམར་འུར་གྱིས་འབར་བ་དབུ་མའི་ལམ་ནས་ཡར་སོང་སྟེ་ཧཾ་ཡིག་ལ་རེག་ལ་ཁད་དུ་གྱུར་བ་དང་ཧཾ་ལས་བདུད་རྩིའི་རྒྱུན་ཞུན་མར་གྱི་གོང་བུ་ཞུ་བ་བཞིན་རྒྱུན་མ་ཆད་དུ་བབས་པས་བྱང་སེམས་དཀར་དམར་གཉིས་གཅིག་ཏུ་འདྲེས་པས་སྤྱི་བོ་བདེ་ཆེན་འཁོར་ལོའི་རྩ་འདབ་སུམ་ཅུ་སོ་གཉིས་པོ་ཡོངས་སུ་གང་། །དེ་ན་བཞུགས་པའི་སངས་རྒྱས་རྣམ་པར་སྣང་མཛད་ཡབ་ཡུམ་སྲས་འཁོར་དང་བཅས་པ་རྣམས་དང་བུདྡྷ་རིགས་ཀྱི་དཔའ་བོ་རྣལ་འབྱོར་མའི་ཚོགས་རྣམས་བདེ་སྟོང་བདུད་རྩིའི་མཆོད་པས་མཉེས་ཤིང་ཚིམས་ནས་ཚོགས་གཉིས་རྫོགས་སྒྲིབ་གཉིས་དག་བུམ་པའི་དབང་མཆོག་ཐོབ་ཅིང་། དགའ་བའི་ཡེ་ཤེས་རྒྱུད་ལ་སྐྱེ་བའི་མོས་པ་གྱིས་ཤིག །བརྡའ་སྦྱར་ལ། ཨེ་མ་ཧོ། དག་པ་རབ་འབྱམས་ཞེས་གསོལ་འདེབས་ཚང་མ་བཏང་མཐར་རླུང་བུམ་ཆེན་བཟུང་དུ་བཅུག་པ་བུམ་དབང་ཐོབ་པའི་དག་བྱ་དག་བྱེད་དག་འབྲས་རྣམས་ལ་ངེས་ཤེས་ན་འདྲོངས་པར་བྱའོ། ཡང་བདུད་རྩི་བྱང་སེམས་དཀར་དམར་གྱི་རང་བཞིན་དེ་ཉིད་མགྲིན་པའི་རྩ་འཁོར་གྱི་གནས་སུ་སླེབས་ཤིང་རྩ་འདབ་བཅུ་དྲུག་ན་བཞུགས་པའི་སངས་རྒྱས་སྣང་བ་མཐའ་ཡས་ཡབ་ཡུམ་སྲས་འཁོར་དང་བཅས་པ་རྣམས་དང་པདྨ་རིགས་ཀྱི་དཔའ་བོ་རྣལ་འབྱོར་མའི་ཚོགས་རྣམས་བདེ་སྟོང་བདུད་རྩིའི་མཆོད་པས་མཉེས་ཤིང་ཚིམས་ནས་ཚོགས་གཉིས་རྫོགས་སྒྲིབ་གཉིས་དག །གསང་བའི་དབང་མཆོག་ཐོབ་ཅིང་། མཆོག་དགའི་ཡེ་ཤེས་རྒྱུད་ལ་སྐྱེ་བའི་མོས་པ་གྱིས་ཤིག །ཨེ་མ་ཧོ་དག་པ་རབ་འབྱམས་ཚང་བར་བཏང་མཐར་རླུང་བུམ་པ་ཅན་གཟུང་དུ་བཅུག་པས་གསང་དབང་ཐོབ་པའི་དག་བྱ་དག་བྱེད་དག་འབྲས་རྣམས་ལ་ངེས་ཤེས་འདྲོངས་པར་བྱའོ། ཡང་བདུད་རྩི་བྱང་སེམས་དཀར་དམར་གྱི་རང་བཞིན་དེ་ཉིད་སྙིང་ཁའི་རྩ་འཁོར་གྱི་གནས་སུ་སླེབས་ཤིང་རྩ་འདབ་བརྒྱད་ན་བཞུགས་པའི་སངས་རྒྱས་མི་བསྐྱོད་པ་ཡབ་ཡུམ་སྲས་འཁོར་དང་བཅས་པ་རྣམས་དང་རྡོ་རྗེ་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་རྣམས་བདེ་སྟོང་བདུད་རྩིའི་མཆོད་པས་མཉེས་ཤིང་ཚིམས་ནས་ཚོགས་གཉིས་རྫོགས་སྒྲིབ་གཉིས་དག །ཤེས་རབ་ཡེ་ཤེས་ཀྱི་དབང་ཐོབ་ཅིང་། ཁྱད་པར་གྱི་དགའ་བ་རྒྱུད་ལ་སྐྱེ་བའི་མོས་པ་གྱིས་ཤིག །ཨེ་མ་ཧོ་དག་པ་རབ་འབྱམས་ཚང་བར་བརྗོད་མཐར་རླུང་བུམ་པ་ཅན་བཟུང་དུ་བཅུག་པས་ཤེས་རབ་ཡེ་ཤེས་ཀྱི་དབང་ཐོབ་པའི་དག་བྱ་དག་བྱེད་དག་འབྲས་རྣམས་ལ་ངེས་ཤེས་འདྲོངས་པར་བྱའོ། ཡང་བདུད་རྩི་བྱང་སེམས་དཀར་དམར་གྱི་རང་བཞིན་དེ་ཉིད་ལྟེ་བའི་རྩ་འཁོར་གྱི་དབུས་སུ་སླེབས། །དེར་རྩ་འདབ་དྲུག་ཅུ་རྩ་བཞི་ན་བཞུགས་པའི་སངས་རྒྱས་རིན་ཆེན་འབྱུང་ལྡན་ཡབ་ཡུམ་སྲས་འཁོར་དང་བཅས་པ་རྣམས་དང་རིན་ཆེན་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་རྣམས་བདེ་སྟོང་བདུད་རྩིའི་མཆོད་པས་མཉེས་ཤིང་ཚིམས་ནས་ཚོགས་གཉིས་རྫོགས་སྒྲིབ་གཉིས་དག །ཚིག་དབང་རིན་པོ་ཆེ་ཐོབ་ཅིང་། །ལྷན་སྐྱེས་ཀྱི་དགའ་བ་རྒྱུད་ལ་སྐྱེ་བའི་མོས་པ་གྱིས་ཤིག །ཨེ་མ་ཧོ། དག་པ་རབ་འབྱམས་ཚང་བར་བཏང་མཐར་རླུང་བུམ་པ་ཅན་བཟུང་དུ་བཅུག་པས་ཚིག་དབང་རིན་པོ་ཆེ་ཐོབ་པའི་དག་བྱ་དག་བྱེད་དག་འབྲས་རྣམས་ལ་ངེས་ཤེས་འདྲོངས་པར་བྱའོ། ཡང་བདུད་རྩི་དཀར་དམར་གྱི་རང་བཞིན་དེ་ཉིད་རྩ་གསུམ་གསང་གནས་དང་འབྲེལ་ཏེ་རྡོ་རྗེ་ནོར་བུའི་རྩ་བར་རྩ་འཁོར་ཉི་ཤུ་རྩ་བརྒྱད་གྱེས་པའི་དབུས་སུ་སླེབས། དེ་ན་བཞུགས་པའི་སངས་རྒྱས་དོན་ཡོད་གྲུབ་པ་ཡབ་ཡུམ་སྲས་འཁོར་དང་བཅས་པ་རྣམས་དང་ལས་ཀྱི་རིགས་ཀྱི་དཔའ་བོ་དང་རྣལ་འབྱོར་མའི་ཚོགས་རྣམས་བདེ་སྟོང་བདུད་རྩིའི་མཆོད་པས་མཉེས་ཤིང་ཚིམས་ནས་ཚོགས་གཉིས་རྫོགས་སྒྲིབ་གཉིས་དག །དབང་བཞི་ངོ་བོ་གཅིག་པ་ཐོབ་ཅིང་དགའ་བྲལ་གྱི་དགའ་བ་རྒྱུད་ལ་སྐྱེ་བའི་མོས་པ་གྱིས་ཤིག །ཨེ་མ་ཧོ། དག་པ་རབ་འབྱམས་ཚང་བར་བཏང་མཐར་རླུང་བུམ་ཆེན་བཟུང་དུ་བཅུག་པས་སྐུ་ལྔ་ཡེ་ཤེས་ལྔ་ཡི་དབང་ཐོབ་པའི་དག་བྱ་དག་བྱེད་དག་འབྲས་རྣམས་ལ་ངེས་ཤེས་འདྲོངས་པར་བྱའོ། སླར་བདུད་རྩི་བྱང་སེམས་དཀར་དམར་གྱི་རང་བཞིན་དེ་ཉིད་ཡར་ལྡོག་སྟེ་ཁམས་དཀར་ཆ་ཧཾ་ཡིག་ལ་ཐིམ། དམར་ཆ་ཨ་ཤད་ལ་ཐིམ་པས་བདེ་སྟོང་ཟུང་འཇུག་གི་ཡེ་ཤེས་མངོན་དུ་བྱས་པའི་མོས་པ་གྱིས་ཤིག །ཅེས་བརྗོད། དེ་ལྟར་གཏུམ་མོའི་མེ་དབང་བདེ་དྲོད་རབ་འབར་འདི་རྣལ་འབྱོར་པ་འཇིགས་མེད་རལ་གྲི་དང་ཀུན་མཁྱེན་གཉིས་ཀྱིས་བསྐུལ་ངོར་འཇིགས་མེད་ཕྲིན་ལས་འོད་ཟེར་གྱིས་བྲིས་པའི་དགེ་བས་རྗེས་འཇུག་རྣམས་འབར་བ་གསུམ་གྱི་དངོས་གྲུབ་ལོངས་སྤྱོད་ནས་བདེ་སྟོང་ཟུང་འཇུག་གི་རྟོགས་པ་རྒྱུད་ལ་སྐྱེ་བའི་རྒྱུར་གྱུར་ཅིག །