མཆོག་གསུམ་རྩ་གསུམ་་་་
༄༅། །མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་རྗེ་བཙུན་བླ་མ་རིན་པོ་ཆེ་ལ་ཕྱག་འཚལ་ལོ། །དེ་ཡང་རྣལ་འབྱོར་པ་རང་ངམ་བསྲུང་བྱར་གྱུར་པ་གང་ཡང་ཅུང་སྟེ་ཕྱོགས་མཚམས་གང་དུ་འགྲོ་བའི་རྒྱབ་བརྟེན་དུ་ལམ་ལྷ་བྱད་སྤྲོ་ན་བསང་རྫས་རྣམས་ཁ་གསོས་ལ། རཾ་ཡཾ་ཁཾ་གིས་མི་གཙང་བའི་སྐྱོན་རྣམས་བསྲེག་ཏེ་བཀྲུས་ལ། ༀ་ཨཱཿཧཱུཾ། གིས་སྦྱངས་སྤེལ་བསྒྱུར་གསུམ་བྱས་ནས་བསང་གཞུང་གི་འདོད་ཡོལ་ཕྲིན་བཅོལ་གྱི་སྐྱབས་སུ་བབ་ཚེ་རྒྱུ་འབྲས་བསླུད་མེད་ལ་ཡིད་ཆེས་ཀྱི་དད་པ་བསྐྱེད་བཞིན་འདི་སྐད་དོ། ཀྱཻ་དོན་དམ་རང་བཞིན་སྤྲོལ་ཡང་། །ཀུན་རྫོབ་སྣང་ཉིད་ཆོས་རྣམས་ཀུན། །རྟེན་ཅིང་འབྲེལ་འབྱུང་ལ་བརྟེན་ཕྱིར། །དེང་འདིར་ལམ་ལྷའི་ཆོ་ག་འཇུག །བྷྲུཾ་ལས་རིན་པོ་ཆེ་ཡི་སྣོད། །རྣམ་དག་དྲི་བྲལ་དཔལ་ཡོན་གྱིས། །ལེགས་སྤུད་ཕུན་ཚོགས་དལ་དབུས་སུ། །མེ་ལྷའིངོ་བོ་མེ་ཀློང་དུ། །རྨུག་པ་དངས་བྱེད་དྲི་བཟང་ཤིང་། །ཕྱི་མར་ཟས་སྣ་དང་སྦོར་ཏེ། །དགོས་པོ་འཛིན་པ་ལྷག་མེད་དུ། །གོས་དཀར་ལྷ་མོའི་དབྱིངས་ཆེན་པོར། །བསྲེགས་ཚེ་སྲིད་ཞིའི་མགྲོན་རིགས་ཀུན། །ཚིམ་ཞིང་མཉེས་སན་བདག་སོགས་ཀྱི། །རེ་འདོད་ཡོངས་སུ་བསྐོང་བར་གྱུར། ༀ་ན་མཿ སརྦ་ཏ་ཐཱ་ག་ཏོ་བྷྱོ༴ ཀྱཻ་རུ་དང་འཀུའི་ཚོགས་ཆནེ་གཉིས། །རྫོགས་ཕྱིར་དམ་པ་གསུམ་གྱི་སེམས། །བསྐྱ་བཞིན་སྣང་སྲིད་འདོད་དགུའི་རྗེས། །བསྲེག་པའི་དུད་སྤྲིན་རྒྱལ་ཆེན་པོ། །འདོད་ལྔའི་ལོང་སྤྱོད་འཛད་མེད་གཏེར་བསྔོ་ཟིང་འབུལ་བའི་ཚོགས་བསག་ཞིང་། །ཕོ་རྒྱུད་དུས་གསུམ་རྒྱལ་བ་སྲས། །སྐང་བཟང་འདྲེན་པ་སྟོང་རྩ་གཉིས། །ཁྱད་པར་འདྲེན་མཆོག་ཤཱཀྱའི་དོག །ཕྱག་འཚལ་སྐྱབས་མཆིས་གསོལ་བ་འདེབས། །བསང་མཆོད་དམ་པ་འདི་ཤེས་ལ། །ཁ་འཛིན་སྟོངས་གྲོགས་མགོན་སྐྱབས་མཛད། །རྒྱལ་ཀུན་སྤྱི་གཟུགས་པདྨ་སྐྱེས། །ཡུམ་ཆེན་ཡེ་ཤེས་འཚོ་རྒྱལ་མ། །ཐུགས་རྗེ་ཆེན་པོས་སྤྱན་རས་གཟིགས། །རིག་གསུམ་མེདསྤྲུལ་མེས་དབོན་གསུམ། །རྗེ་འབངས་ཉེར་ལྔ་མར་པ་རྗེ། །མི་ལ་སྙི་སྒོམ་བརྒྱུད་འཛིན་བཅས། །ས་ཟུར་གནུབས་གཉགས་སོགས་ཀྱི། །བརྒྱུད་འདིན་རྩ་ལག་དངས་པ། །སྔ་འགྱུར་ཕྱི་འགྱུར་བསྟན་འཛིན་སྡེར། །ཕྱག་འཚལ༴ བསང་༴ ཁ་འཛིན༴ བླ་མ་ཡིད་དམ་མཁའ་འགྲོ་དང་། །བཀྲུང་མཆོད་སྐྱོང་གཏེར་སྲུང་དང་། །དཀར་ཕྱོགས་ཡུལ་ལྷ་ཟོ་དོར་རིགས། །ཕ་ལྷ་མ་ལྷ་ཞིང་ལྷ་སོགས། །འགོ་བའི་ལྷ་ལྔ་གཙོ་དང་འཁོར། །སློབ་དཔོན་བརྒྱུད་ཛག་ཕ་མས་བརྒྱུད། །ཚེ་རབས་ལས་ཀྱིས་འགོ་བའི་ལྷ། །ལུས་ཇི་སྙེད་ཚོགས་རྣམས་ལ། ྅྅྅ །བྱང་སེམས་ཉེ་བའི་སྲས་བརྒྱད་དང་། །སྒྲོལ་མ་དཀར་ལྗང་རིག་བྱེད་མ། །གྲྭ་ལྔའི་ལྷ་མོ་ཁྲོ་གཉེར་ཅན། །གསང་སྔགས་རིག་སྔགས་གཟུངས་སྔགས་ཀྱི། །ལྷ་དང་ལྷ་མོའི་ཚོགས་རྣམས་ལ། ྅྅྅ ལོག་ལྷན་ཚོགས་བདག་ཕྱག་བཞི་དྲུག །མགོན་ཆེན་སྡེ་ལྔ་མ་ནིང་སོགས། །གཟའ་མཆོག་དམ་ཅན་མགར་དམར་ནག །ཕོ་རྒྱུད་མགོན་པོའི་ཚོགས་རྣམས་དང་། །ཨེ་ཀ་ཛ་ཌི་རོ་མ་ཏི། །དུང་སྐྱོང་མ་སོགས་ལྷ་མོའི་ཚོགས༑ །ཚེ་རིང་མཆོད་ལྔ་གཡུ་སྒྲོན་མ། །རྡོ་རྗེ་གཤོག་རྒོད་དམག་ཟོར་མ། །བརྡན་མ་བཅུ་གཉིས་ལ་སོགས་པའི། །ཡེ་ཤེས་ལས་དང་འཇིག་རྟེན་གྱི། །སྲུང་མ་མོ་རྒྱུད་ཐམས་ཅད་ལ། ྅྅྅ །སློབ་དཔོན་པདྨ་འབྱུང་གནས་ཀྱི། །བཀའ་སྡོད་བྷོ་ཌའི་ཡུལ་ལྷའི་གཙོ། །ཏི་སོ་ཐང་ལྷ་ཤམ་པོ་དང་། །རྒམ་པོ་དཔལ་རི་འོ་ཏེ་གང་། །སྤོམ་ར་རྫ་རྒྱལ་འབྲི་རྒྱལསོགས། །དུང་ཀོང་ཉང་གསུམ་ཏུ་བཞི་བདེ། །མདོ་ཁམས་སྒོང་དྲུག་ལ་གནས་རིགས། །འཛམ་གླིང་སྐྱོང་བ་སྤྱི་དང་ནི། །བྱེ་བྲག་གངས་ཅན་བོད་ཀྱི་ཡུལ། །སྐྱོང་བྱེད་ས་བདག་ཡུལ་བདག་དང་༑ །གཞི་བདག་གནས་བདག་ཐམས་ཅད་ལ། །བསག་མཆོད་འབུལ་ལོ་འགལ་རྐྱེན་བཟློག །མཐུན་རྐྱེན་བསམ་དོན་ལྷུན་གྲུབ་མཛོད༑ །བྱེ་བྲག་གསེར་སྟོང་འབྲོང་རི་ཡི། །གཙོ་འཁོར་སྤྲུལ་པ་ཡང་སྤྲུལ་གཙོས། །ས་ཕྱོགས་ཡུལ་རི་འདི་དག་ལ། །གནས་པའི་ས་བདག་གཞི་བདག་རིགས། །གཞན་ཡང་རྟོ་མཛི་སྨྲར་གསུམ་གྱི། །ཆར་གཏོགས་པ་བདག་གཞི་བདག་ཚོགས། །དེ་ལས་གཞན་ཡང་ས་གསུམ་གྱི། །ལྷ་ཀླུ་འབྱུང་པོ་ཟོ་དོར་རྣམས། །བསང་༴ མཐུན༴ དཔལ་མགོན་བདུན་ཅུ་རྩ་ལྔ་དང་། །ཕྱི་ནང་གསང་བ་ཡང་གསུང་གི། ལྷ་སྲིན་སྡེ་བརྒྱད་དྲེགས་པ་ཅན། །རྒྱལ་ཆེན་སྡེ་བཞི་གཙོ་འཁོར་བཅས། །རིགས་དྲུག་འགྲོ་བ་མ་ལུས་ཀུན། །བདེ་གཤེགས་སྙིང་པོ་གཅིག་ཡིན་ཕྱིར། ྅྅ །མཆོག་གསུམ་རྩ་གསུམ་བཀྲུང་དང་། །དམ་ཅན་ནོར་ལྷ་རྒྱ་མཚོའ་ཚོགས། །ཡུལ་ལྷ་གཞི་བདག་དཀར་ཕྱོགས་སྐྱོང་། །མདོར་ན་མཆོད་འོས་མགྲོན་རིགས་ལ། །བསངས་དང་མཅོད་པ་དངོས་འབྱོར་དག་། ཡིད་སྤྲུལ་དཔག་མེད་འདིས་ཤེས་ལ། །བདག་དང་བསྲུང་བྱའི་རིགས་རྣམས་ཀུན། །ཐག་རིང་ཤུལ་མ་བགྲོད་པའི་ཚེ། །སྔོན་པས་སུས་ལ་རྒྱབ་ནས་སྐྱོར། །ཁ་འཛིན་སྟོངས་གྲོགས་གཡེལ་མེད་དང་། །ཉིན་རྫི་མཚན་མོར་མེལ་ཚེ་མཛོད། །ཁ་ཡི་ཟས་འདོད་ཟས་དང་སྤྲོད། །ལག་པའི་ནོར་འདོད་ནོར༴ །ཡིད་ཀྱི་ཆོས་འདོད༴ །བློ་ཡགས་ལམ་ཡགས་ཅིང་བསམ་འགྲུབ། །གཞི་སྐྱིད་མགྲོན་དགེ་བདེ་ལེགས་འབྱོར། །ཕུན་སུམ་ཚོགས་པའི་ལམ་ལྷ་མཛོད། །འཇིགས་བརྒྱད་ཞི་བའི་ལམ་ལྷ༴ །ཚེ་བསོད་རྒྱས་པའི༴ །མོས་བཞི་དབང་འདུས༴ །དགྲ་འགེགས་ཚར་གཅོད༴ །དགྲ་ཕམ་བདག་རྒྱལ༴ །ལུས་ལ་ནད་མེད༴ །སེམས་ལ་འགྱོད་མེད༴ །བཟང་དང་འཕྲད་པའི༴ །ངན་དང་འཛོལ་བའི༴ འགལ་སྤོང་མཐུན་འགྲུབ༴ །བསམ་དོན་འགྲུབ་པའི༴ །ཕར་འགྲོའི་རུས་སུ་བསྐྱལ་མ་དང་། ཆུར་འོང་དུས་སུ་བསུམ་སོགས། །ལམ་ལྷ་མཛོད་ལ་དངོས་གྲུབ་རྩོལ། །རབ་འབྱམས་ཕྲིན་ལས་ཀུན་འགྲུབ་ཅིང་། །འཕྲལ་ཕུག་རྡག་བདེའི་བཀྲ་ཤིས་ཤོག །མིག་གིས་ལྟས་བཟང་ལྟད་མོ་མཐོང་། །རྣ་བས་བདེ་སྐྱིད་དཔལ་ཡོན་ཐོས། །སྣ་ཡིས་རི་བཟང་དད་ལྡན་ཐོབ། །ལྕེ་ཡིས་བདེའི་དགུའི་རོ་ཞིམ་སྤྱོད། །ལུས་ཀྱིས་དགའ་བདེའི་རེག་བྱར་སྤྱོད། །སེམས་ཀྱིས་བདེ་སྐྱིད་ཕུན་ཚོགས་དང་། །རྒྱུན་མི་འཆད་པར་ལོངས་སྤྱོད་ཤོག །རྗེས་ཆོག་བསང་གཞུང་སྤྱི་ལྟར་བྱའོ། །ཅེས་པ་འདི་ཡང་རྣལ་འབྱོར་པ་སཱ་རས་བསྐུར་ངོར། ༧ རྡོ་བླས་བྲིས་པ་ཡོངས་སུ་དགེ་བར་གྱུར་ཅིག །དགེའོ། དགེའོ། དགེའོ། བཀྲ་ཤིས་སར་གྱུར་ཅིག །སརྦ་མངྒ་ལམ།