ཞིང་རབ་འབྱམས་ཀྱི་་་་་་་
༄༅། །ན་མོ་གུ་རུ་དྷེ་ཝཌ་ཀྐི་ནི་སརྦ་སིདྡྷི་མེ་པྲ་ཡ་ཙ་ཡེ། །ཞིང་རབ་འབྱམས་ཀྱི་རྒྱལ་བ་སྲས་བཅས་ཀྱི། སྤྱི་གཟུགས་གྱུར་རྗེ་བཙུན་པདྨ་སྐྱེས། །གང་མངལ་སྐྱེས་ཚུལ་རིག༵་འཛི༵ན་འཇི༵གས་མེ༵ད་གླིང༵་། །དེའི་བདེན་པས་དེངས་འདིར་བདེ་ལེགས་སྩོལ། །བདག་རྡོ་བླ་ཀུ༵ན་བཟ༵ང་གཞ༵ན་ཕན༵་ཞེས། །ལོ་བདུན་ཅུ་བརྒྱད་ཅུར་ཉེ་ན་ཡང་། །འཆི་མ་ནུས་མི་རྒན་གང་དེ་ཡི། །སེམས་ཀུན་གཞིའི་མེ་ལོང་དྲི་བྲལ་ངོགས། །དུས་འབྱུང་འགྱུར་བཟང་ངན་ལེགས་ཉེས་ཀྱི། །ལྟས་རྟེན་འབྲེལ་གཟུགས་སུ་སྣང་བའི་ཆོས། །འདིར་མངོན་སུམ་དུ་ངོམ་ལ་ལྟད་མོ་ལྟོས། །དུས་རྒྱལ་པོ་མེ་གླང་ཤར་ཙམ་ནས། །ཡོངས་རྐང་གཉིས་མི་དང་ཁྱད་པར་དུ། །བོད་ཆེ་ཆུང་ཀུན་ལ་མི་དགེའི་ལྟས། །དམག་འཁྲུག་དང་ལོ་ཉེས་མི་ཕྱུགས་ནད། །དུ་མ་རུ་འབྱུང་ཞིང་བཟློག་པར་དཀའ། །བྱེ་བྲག་ཏུ་ས་ཆ་ཡུལ་ཁོལ་བུར། །མ་སྟོང་བར་སེང་གེའི་ཁོག་པ་ཡི། །སྲིན་བུའི་ཚོགས་ལངས་ནས་རང་གི་གཟུགས། །རྡུལ་ཕྲན་དུ་མ་སོང་དེ་སྲིད་དུ། །འཚོ་བ་བཞིན་འཚུབས་འདི་དུས་ང ན་སྟོབས། །དེ་ལས་ལ་དམིགས་བསལ་མངོན་རྟོགས་ཀྱི། །རུ་བཞི་ཡི་བོད་ཡུལ་ས་ཆ་རུ། །གནམ་ས་དང་བར་གྱི་ཐེའུ་རང་གི། །སྒྱུ་འཕྲུལ་ཀྱི་རང་གཟུགས་བན་བོན་འགའི། །ཁོང་ཞུགས་ནས་སེར་འཁྲུགས་སློང་བ་དང་། །དེའི་རྐྱེན་ཀྱི་ལྷ་འདྲེ་མི་གསུམ་འཚུབས། །ལྷོ་རྔ་ཡི་གྲུབ་མཐའ་ཕལ་མོ་ཆེ། །འཚུབ་མ་བཞིན་འཁྱིལ་ཞིང་བྱེར་ལ་རིངས། །ས་དངུལ་ཁྱེད་ཕྱི་སྣུམ་ནང་སྟོང་སྐམ། །བཀའ་འབྲུག་སོགས་རང་སའི་བྱིན་རླབས་ཀྱི། །དཔག་བསམ་ཀྱི་ལྗོན་པ་བསྲུངས་ལ་བརྩོན། །ཞི་གཙོད་སོགས་གདུལ་བྱ་ཁོལ་བུར་སྨིན། །བཀྲ་ཤིས་ཀྱི་ལྷུན་པོ་ལྷུམས་སུ་ཚུད། །གྲྭ་ས་བཞིར་རྔ་བོང་མྱོ་བཞིར་རྒྱུ། །བོད་ཁམས་ཀྱི་མཆོད་སྡོང་མས་ནས་སློང་། །དེའི་རྐྱེན་གྱིས་སྐྱོན་ཡོན་སྣ་བཞི་ངོམ། །དག་སྐོང་སོགས་རོང་ཡུལ་ཕལ་མོ་ཆེ། །ཐལ་ཕུང་བཞིན་འཚུབ་མ་གཏོར་བཞིན་འདུ། །བྱང་འབྲོག་ཕལ་མི་ཕྱུགས་ཉམས་རྒུད་ཀྱི། །ཆུ་ཕྲན་འགའ་ཐན་པ་གདུང་བཞིན་འགྱུར། །སྡེ་དགེ་ཡང་ཕྱོགས་འཚམས་ཟ་བྱེད་སྡེས། །ཟ་རློམ་ཡང་རང་གྲིབ་དགྲ་གཤེད་དུ། །མ་གྱུར་བར་གྲགས་ངན་རྗེ་མི་དཔོན། །འོན་ཀྱང་ནི་བླ་འོག་གོ་ས་དང་། །ཞྭ་ལྷྭམ་སོགས་རང་ས་བསྲུང་ཐབས་གཅེས། །ད་འདི་ནས་བགྲང་བྱ་ཡོས་ཕན་ཚུན། །འཇིག་རྟེན་འདིར་གྲགས་པའི་རྒྱལ་བློན་སོགས། །ཉེ་དུ་དང་མཛའ་བཤེས་དགྲ་ཟླའི་ཚོགས། །བྱ་འུག་གཉིས་ལྟར་སྣང་མཛའ་སྡེབ་ཅིང་། །ཡོན་མཆོད་འགའ་ཀུན་བརྟགས་དཔེ་ཟླ་དང་། །དཔོན་སྡེ་ཕར་རྨི་ལམ་སྒྱུ་མར་མཚུངས། །ཟླ་རྒྱུད་ཀྱི་ཆོས་སྡེ་མི་སྡེ་ཀུན། །ཤིང་རང་བདུད་རང་གིས་མ་བྱས་ན། །གཞན་ཅི་ཙམ་གནོད་ཀྱང་རེ་འགའ་ཙམ། །ཡིན་ཕྱིར་ན་ཡུལ་སྡེ་མཆོག་དམན་ཀུན། །མཛུ་གུ་ལྔ་སོ་སོར་མ་བྲལ་ན། །ཁུ་ཚུར་གྱི་སྒྲོམ་བུ་བཙིང་མཛོད་དང་། ཕ་རོལ་ཚང་ཕམ་ནུས་སྟོབས་ལྡན་འགྱུར། །དེ་ལས་ཀྱང་སྔོན་ནས་ཁོ་བ་ཡིས། །ས་སྐྱོང་གི་རྒྱལ་པོར་ཡང་ཡང་དུ། །ནང་མི་འགའ་ཕྱི་བྲོས་མང་གྱུར་ན། །དེའི་རྐྱེན་ཀྱིར་ཅིར་འགྱུར་ཆ་མེད་པས། །ཅེས་ཀྱང་ནི་རང་ས་བསྲུང་དགོས་པའི། །ཡར་ཞུ་ཡང་ཁ་ཤས་ཕུལ་མོད་ཀྱང་། །དབྱིངས་འཇུག་དོན་ཤོར་བས་འདི་འདྲ་འཁྲུལ། །འོན་ཀྱང་ད་དུང་རང་གཞན་གྱི། །ཕྱོགས་གཉིས་དང་ཕྱོགས་གསུམ་ལ་སོགས་པའི། །ངེས་མེད་ཀྱི་ཐེ་ཚོམ་གར་བསྒྱུར་ཞིང་། །རྫུན་གཟུགས་ཀྱི་མིག་མང་བརྒྱ་སྟོང་རྩེ། །ཤར་ཕྱོགས་ནས་རྒྱ་གྲོག་དམར་ནག་འཐབ། །ལྷོ་ཕྱོགས་ནས་གཅན་གཟན་གཡུལ་ཚེན་ཤོམ། །ནུབ་ཕྱོགས་ནས་ཤ་འུད་མཁའ་མཉམ་འགྱུར། །བྱང་ཕྱོགས་ནས་རྔ་བོང་ཁྱུ་སྡེབ་འུར། །སྟེང་ཕྱོགས་ནས་ཚར་མའི་བླ་བྲེ་གཡོ། །འོག་ཕྱོགས་ནས་སྲོག་ཆགས་མང་པོས་འཚེ། །མ་ཁང་གཉིས་རང་ཕུང་འཇིགས་ལ་བརྩོན། །བྲེ་བོ་ཧོར་ཅོག་རིའི་གདོན་གྱིས་མནར། །བྲག་འགོ་ནས་འབྱུང་བཞིའི་གད་མོ་དགོད། །དེའི་རྐྱེན་ཀྱིས་ལྷ་འདྲེ་མི་གསུམ་འཁྲུགས། །འཇམ་བརྫུ་མི་རྫུན་རླབས་ཆེན་པོ་ཡི། །གཟུགས་བརྙན་གྱི་སྨུག་པ་ཡུལ་འགར་འཐིབ། །རྒྱ་རོང་རྒྱལ་ཁག་ཆེན་པོ་བཞི། །རང་གཞན་གྱི་ཕུང་ལས་ལྟད་མོ་ངོམ། །ས་སྙིང་གི་མིང་འཛིན་ཡུལ་འདི་གར། །ཕུང་བྱེད་ཀྱི་ཁུར་བོ་བཅུ་གཉིས་འཕོས། །ལ་ལ་ཞིག་དགྲ་ཟླ་བསྙེག་པས་བྲེལ། །འགའ་ཞིག་ས་གཏིང་འཛུལ་ལ་རིངས། །ཕལ་མོ་ཚེས་བདུད་སྲིན་སྐྱབས་སུ་འཚོལ། །དེ་དག་ཀྱང་ལས་ངན་བྱས་པའི་འབྲས། །ཡིན་ཕྱིར་ན་དགེ་སྒྲུབ་སྡིག་སྤང་གལ། །ད་ལོ་ནས་བཟུང་སྟེ་ལོ་དྲུག་ཚུན། །ལྷ་མིན་དང་སུམ་ཅུ་རྩ་གསུམ་གཉིས། །རེ་འགའ་ཙམ་འཁྲུག་ཅིང་འཐབ་ངེས་ན། མི་རྣམས་ཀྱི་དགེ་སྡིག་ཆེ་ཆུང་གི། །སྟོབས་འབྲེལ་གྱི་ལྷ་ལ་ཕམ་རྒྱལ་གཟུགས། །འབྱུང་ངེས་ཤིང་ལྷ་རྣམས་ཕམ་གྱུར་ན། །མི་རྣམས་ལེ་བདེ་སྡུག་སྣ་ཚོགས་འབྱུང་། །དོན་དེ་ཕྱིར་ཀུན་གྱི་འགལ་སྤོང་ལ། །མཐུན་སྒྲུབ་ཀྱི་རིམ་གྲོར་བརྩོན་པ་སྐྱེད། །ཁྱད་པར་དུ་པདྨ༵་བཀའ༵་ཐ༵ང་དང་། །ལེ༵འུ་བདུ༵ན་དང་བས༵མ་ལྷུན༵་གང་རུང་སྒྲུབས། །སློབ༵་དཔོ༵ན་གྱི་སྐུ༵་གསུང་ཐུགས་ཀྱི༵་རྟེན༵། །ཅི་མང་དུ་བཞེངས་ན་ཕན་དང་བདེའི། །མངོན་རྟོགས་གཟུགས་མཐོང་ལ་ཐེ་ཚོམ་མེད། །དེ་ཕྱིར་ན་དེ་དོན་གསལ་བཞིན་དུ། །ཅི་ནུས་དང་སྒྲུབ་པར་བརྩོན་མཛོད་དང་། །འཕྲལ་ཕུགས་སུ་བདེ་ཞིང་སྐྱིད་པར་ངེས། །མཆོག་གསུམ་དང་རྩ་གསུམ་བདེན་སྟོབས་དང་། །ཁོ་བོ་ཡི་ལྷག་བསམ་རྣམ་དག་མཐུས། །རྒྱལ་ཁམས་ཀྱི་མི་བདེའི་སྨག་རུམ་དུ། །བདེ་སྐྱིད་ཀྱི་འོད་སྟོང་འཆར་བར་ཤོག །དགེའོ། བཀྲི་ཤིས་སོ།། །།