སྐུ་ལྔའི་གསོལ་མཆོད།

༄༅། །སྐུ་ལྔའི་གསོལ་མཆོད་བཞུགས། ཧཱུྃ། སྤྲོས་བྲལ་ཆོས་ཀྱི་སྐུ་ལས་ལོངས་སྐུའི་མདངས། །རིགས་ལྔ་གངས་ཆེན་མཚོ་ཡི་རྒྱུ་འཕྲུལ་གར། །ལེགས་བསྒྱུར་བཅོམ་ལྡན་པདྨ་དབང་ཆེན་གྱི། །ཡང་སྤྲུལ་དྲེགས་པའི་གཙོ་བོ་བེ་ཧ་ར། །སྐུ་གསུང་ཐུགས་ཡོན་ཕྲིན་ལས་རྒྱལ་པོ་ལྔ། །ཡབ་ཡུམ་སྲས་འཁོར་མངག་གཞུག་བྲན་གཡོག་བཅས། །དངོས་བཤམས་ཡིད་སྤྲུལ་མཆོད་ཚོགས་འདི་བཞེས་ལ། །བདག་དང་བསྲུང་བྱའི་མི་མཐུན་ཕྱོགས་ཀུན་ཞི། །ཚེ་བསོད་དཔལ་འབྱོར་སྟོབས་རྒྱས་གང་འདོད་ཕུལ། །དབང་སྡུས་དགྲ་བགེགས་བརླག་སོགས་རབ་འབྱམས་ལས། །ཡོང་འགྲུབ་བསྟན་འགྲོར་ཕན་བདེ་རྒྱ་ཆེན་པོ། །སྦྱོར་ནུས་མཐུ་སྟོབས་ནུས་པ་ཕུན་ཚོགས་མཛོད། །ཅེས་པའང་རྡོ་རྗེ་འཛིན་པ་མཐུ་སྟོབས་རྡོ་རྗེའི་ངོར་ལུན་བཟང་གཞན་ཕན་པས་བགྱིས་པའོ།།