སྨན་བཙུན་ཚེ་རིང་མཆེད་ལྔའི་གཏོར་འབུལ།
༄༅། །སྨན་བཙུན་ཚེ་རིང་མཆེད་ལྔའི་གཏོར་འབུལ་བཞུགས། །རཾ་ཡཾ་ཁཾ། །གཏོར་མ་ཟག་མ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། །ༀ་ཨཱཿཧཱུྃ། ལན་གསུམ། ཧཱུྃ། སྔོན་ཚེ་སློབ་དཔོན་པདྨའི་བཀའ། །བར་དུ་བཞད་པ་རྡོ་རྗེའི་ལུང་། །ཐ་མ་འཇིགས་མེད་གླིང་པའི་ཚིག །བཀའ་དང་དམ་ཚིག་དྲན་མཛོད་ལ། །ཚེ་རིང་མཆེད་ལྔ་འཁོར་དང་བཅས། །འདིར་གཤེགས་ཕྱི་ནང་གསང་གསུམ་གྱི། །མཆོད་རྫས་སྒྲུབ་རྫས་བསྐང་རྫས་སོགས། །མཐུན་རྫས་ལོངས་སྤྱོད་འདི་བཞེས་ལ། །ཐུགས་དམ་གཉན་པོ་བསྐངས་ནས་ཀྱང་། །རབ་འབྱམས་ཕྲིན་ལས་ཡོངས་གྲུབ་ཅིང་། །མཆོག་ཐུན་དངོས་གྲུབ་ཀུན་ཐོབ་ནས། །བསྟན་འགྲོར་ཕན་པའི་དཔལ་ཐོབ་ཤོག །ཅེས་ཚེ་རིང་མཆེད་ལྔའི་གཏོར་འབུལ་འདི་ཉིད་དད་ལྡན་འཇིགས་མེད་འོད་གསལ་གྱི་ངོར། །རྡོ་བླས་སྤེལ་བའི་ཡི་གེ་པ་ནི་འཇིགས་མེད་བསོད་ནམས་མཆོག་ལྡན་གྱིས་བགྱིས་པས་རྗེས་འཇུག་རྣམས་ཀྱིས་ལས་བཞིའི་ཕྲིན་ལས་འགྲུབ་པའི་རྒྱུར་གྱུར་ཅིག །དགེའོ། མངྒ་ལམ།