རྟོགས་པ་ལམ་དུ་ཤར་བའི་ཡོན་ཏན།

དེ་ནས་དྲུག་པ་རྟོགས་པ་ལམ་དུ་ཤར་བའི་ཡོན་ཏན་ནི། སྙེན་ནམ་དུ་བསོད་ནམས་ཆེན་པོ་སྐྱེས་པས་གང་སྣང་རྟོགས་པར་འཁྱེར་མ་ཤེས་ན་རེ་མེད་གསུངས་ནས། མིས་མི་རྙེད་པའི་འཚོ་བ་དཀོན་པ། སྡོད་སྙིང་མི་འདོད་པའི་ཤིང་ཕུག་ཅིག་ཏུ་བཞུགས་པས། རས་ཆུང་པས། འདི་འདྲ་ན་མི་ཟུག་པར་འདུག །ཆུ་ཡང་ལེན་དཀའ་བར་འདུག་པས་མཐུན་རྐྱེན་དུམ་པ་ཡོད་པ། གང་ལ་ཡང་མི་འགལ་བའི་ས་ཞིག་ཏུ་བྱོན་ནས་བཞུགས་དགོས་ཞུས་པས། རས་ཆུང་པ། ཁབ་རྩེ་གཉིས་ཀྱི་བཟོ་མི་འོང་། །སེམས་རྩེ་གཉིས་ཀྱིས་དོན་མི་འགྲུབ། །ཚེ་འདིར་ཨེ་སྐྱིད་ལ་ཆོས་པའི་མིང་མེད། །ཅེས་གསུངས་ནས་མགུར་འདི་གསུངས་སོ། །རྗེ་བླ་མའི་རྣམ་ཐར་སེམས་ལ་གཅགས། །གསུང་ཞལ་དའི་བདུད་རྩི་བརྗེད་ཐབས་མེད། །ཆོས་ལོང་ཡོད་ལ་བཞག་ན་སྐལ་བ་ཆད། །ཆོས་རང་རྒྱུད་ལ་བསྲེས་ལ་འབུངས་ལ་བསྒོམ། །ཚེ་འདི་ལ་ཆགས་ན་ཕྱི་མ་སྡུག །འཕྲལ་སྐྱིད་འདོད་ལ་དགའ་ན་བར་ཆད་ཆེ། །ཆོས་ལོང་ཡོད་བསམ་ན་གླན་པ་ཡིན། །རང་འཆི་བས་འཇིག་ན་འབུངས་ལ་བསྒོམ། །ལས་སྡིག་པ་སྤྱོད་ན་ངན་འགྲོར་ལྟུང་། །སེམས་གཡོ་ཟོལ་འདུག་ན་རང་ཉིད་བརླག །རང་བསམ་ངན་སྐྱེས་ན་བསོད་ནམས་འཛད། །ལས་རྣམ་སྨིན་སྦྱོང་ན་འབུངས་ལ་བསྒོམ། །གོས་བཟང་པོ་གྱོན་འདོད་སྣང་བ་འཁྲུལ། །ཟས་ཞིམ་པོ་ཟ་འདོད་སྡིག་སྤྱོད་རེམ། །གཏམ་སྙན་པོ་འོང་འདོད་ལྷ་ཁ་གདུག །བློ་ཆོས་བརྒྱད་སྤོང་ལ་འབུངས་ལ་བསྒོམ། །ནོར་ཕྱུག་པོ་འོང་འདོད་དགྲ་དང་འཕྲད། །འཁོར་མང་པོའི་བསྐོར་འདོད་བློ་འགྱོད་ཆེ། །ཚོགས་མང་མང་བསགས་འདོད་ལོག་ལྟ་ཆེ། །བློ་ཆོས་དང་བསྟུན་ལ་འབུངས་ལ་བསྒོམ། །སྒོམ་ནུས་ན་རྟོགས་པ་སེམས་ལ་འཆར། བསྒོམ་མ་ནུས་ཁ་བཤད་ཁྲམ་པའི་ཤག །ཡུན་རིང་པོར་བསྡོད་ལོང་མ་མཆིས་པས། །ཡེངས་མེད་དུ་བསྒོམ་དང་གར་ཡང་སྤྲོ། །རོག་མེད་དུ་སྡོད་དང་ཅིས་ཡང་དྲག །སྒོམ་གསལ་སྟོང་གི་བསམ་གཏན་རིན་པོ་ཆེ། །བུ་རས་ཆུང་གི་སྙིང་ལ་གནས་པར་ཤོག །ཅེས་གསུངས་པས། རས་ཆུང་པ་ཡང་སྣང་བ་འགྱུར་ནས་བསྒོམ་པས་ཉམས་རྟོགས་བཟང་པོ་སྐྱེས་ནས་སེམས་དྭངས་སྙིག་ཕྱེས་པའི་རྒྱུ་འབྲས་རང་ས་ནས་ཤར་ནས། རས་ཆུང་པས་རྟོགས་དཔྱོད་སྒྱུ་མའི་ཉམས་དབྱངས་འདི་ཕུལ་ལོ། །ཕ་བླ་མའི་བཀའ་དྲིན་ལྷ་ཆོས་བྱེད། སེམས་འཕྲེང་བའི་དྲིན་ཆེན་ཕ་མ་བསྐྱུར། །སྤངས་དཀའ་བའི་ཕ་ཡུལ་རྒྱབ་ཏུ་སྤངས། གྲོགས་ཉེ་དུའི་གདུངས་སེམས་ད་རུང་འདུག །འཕྲལ་ཟས་ནོར་གོས་གསུམ་གསོག་འཇོག་བཤོལ། །སེར་སྣ་སྡུག་སོགས་མཐུན་རྐྱེན་མེད། །དཀའ་ཐུབ་མཐུན་རྐྱེན་བཅུད་ལེན་གྱི་བྲག་ལ་བསྒོམ། །སེམས་གསོག་འཇོག་གི་སྣང་བ་ད་རུང་འདུག །མཇལ་ནི་གྲུབ་ཐོབ་དངོས་དང་མཇལ། །ཐོབ་ནི་སྙན་བརྒྱུད་ཀྱི་གདམས་ངག་ཐོབ། །བསྒོམ་ནི་ཡེང་མེད་ཀྱི་བརྩོན་འགྲུས་བྱེད། །མཇལ་འདོད་དང་ཞུ་འདོད་ད་རུང་འདུག །བྱེད་ནི་ཕ་ཡི་ཞབས་ཏོག་བྱེད། །སྒྲུབ་ནི་ཚེ་གཅིག་སངས་རྒྱས་བསྒྲུབ། །བཞུགས་ནི་རི་ཁྲོད་གྱིས་གནས་སུ་བཞུགས། །བྱ་ལོ་དང་བྱེད་ལོ་ད་རུང་འདུག །རྗེ་མི་སྐྱོད་ཀྱི་ངོ་བོ་རྡོ་རྗེ་འཆང་། །བུ་ཡི་སྣང་བ་འགྱུར་བར་བྱིན་གྱིས་རློབས། །ཞེས་ཞུས་པས། བླ་མའི་ཞལ་ནས། ཁྱོད་རི་ཁྲོད་ཀྱི་གནས་སུ་བག་ཆགས་ཀྱི་སྣང་བ་སྤུན། མི་དྲན་དགུ་དྲན་གྱི་དྲང་བ་ཅིག་འོང་བ་ལ་ཚེགས་མེད། མི་ཤེས་དགུ་ཤེས་ཀྱི་ཆེན་པོ་ཞིག་འདོད་ན། མགོ་གཡོགས་ཀྱི་ཟོག་པོ་ཞིག་འོང་བ་ལ་ཚེགས་མེད། །ཅེས་གསུངས་ནས་རས་ཆུང་པའི་སེམས་རྟོག་སེལ་བའི་མགུར་འདི་གསུངས་སོ། །རྗེ་བླ་མའི་བྱིན་བརླབ་རི་ལ་ཞུགས། །གནས་རི་ཁྲོད་ཟིན་པར་བྱིན་གྱིས་རློབས། །ཁྱོད་སྐལ་བ་ཅན་གྱི་རས་ཆུང་པ། སེམས་དབང་པོ་བསྒྲིམ་ལ་གླུ་འདི་ཉོན། །དབེན་གནས་རི་ཁྲོད་འགྲིམ་དུས་ན། །ཉེ་བའི་ཁ་ཆེས་མ་དྲན་ཞིག །དྲན་ན་དགྲ་སྡང་གསོན་ལང་བྱེད། །བླ་མའི་དྲུང་དུ་བསྒོམ་དུས་ན། ཚོགས་གསོག་ཁ་ལེན་མ་དྲན་ཞིག །དྲན་ན་སྤྱོད་ངན་དམག་དཔུང་འཁྲུགས། །འབྱུང་པོའི་གཏོར་མ་གཏོང་དུས་ན། །གཏོར་རིལ་གྱི་གསོག་འཇོག་མ་དྲན་ཞིག །དྲན་ན་རང་ཉིད་འབྱུང་པོར་འགྲོ། །ཡེང་མེད་ཀྱི་བསམ་གཏན་བསྒོམ་དུས་ན། །གྲོགས་པོ་ལ་མཇལ་འཕྲད་མ་དྲན་ཞིག །དྲན་ན་མཆེད་གྲོགས་ཀྱི་དགེ་སྦྱོར་སྤུར། །དཀའ་ཐུབ་ཀྱི་སྙིང་རུས་བྱེད་དུས་སུ། །ཤ་ཆང་གི་ཞིམ་ལྟོ་མ་དྲན་ཞིག །དྲན་ན་ཡི་དྭགས་ཀྱི་གནས་སུ་སྐྱེ། །སྙན་བརྒྱུད་ཀྱི་ཐབས་ལམ་བསྒོམ་དུས་སུ། །ཤེས་འདོད་ཀྱི་སློབ་གཉེར་མ་དྲན་ཞིག །དྲན་ན་ལོག་པའི་ལམ་དུ་འཇུག །མོན་གྱི་ཤིང་རིར་སྡོད་དུས་སུ། །འགྲོ་འདོད་ཀྱི་བྱ་ར་མ་དྲན་ཞིག །དྲན་ན་ཡིད་ངན་འཕྲལ་ལ་ལྡང་། །བུ་སྙིང་རུས་ལྷ་ཆོས་མགོ་བོ་ཐོན། །སྡུག་ཁུར་གྱི་འཁོར་བའི་སྡུག་བསྔལ་སྤོང་། །སྨོན་ལམ་དང་འབྲེལ་པའི་བུ་སློབ་ལ། །ཕ་ཡི་རྟོགས་པ་སྐྱེ་བར་ཤོག །སྣང་སྲིད་ཆོས་སྐུར་རྟོགས་པ་འདི། །བུ་ཡི་ཉམས་ལ་རྫོགས་པར་ཤོག །ཅེས་གསུངས་པ་དང་རས་ཆུང་པའི་ཐུགས་ལེགས་པར་འགྱུར་ནས་རི་ལ་ཟུག་པ་དང་། བསྒོམ་ལ་འཕེལ་སྐྱེད་ཆེན་པོ་བྱུང་ནས་བླ་མ་དང་དུས་རྟག་ཏུ་མི་འབྲལ་ཨང་བསམ་པའི་ངེས་ཤེས་དྲག་པོ་སྐྱེས་ནས། ཐུགས་དམ་འཕེལ་བ་དང་། འཁོར་བ་ལ་ཞེན་པ་ལོག་སྟེ། ཡང་ཉམས་རྟོགས་གོང་དུ་འཕེལ་བའི་དོན་དུ་མགུར་འདི་གསུངས་སོ། །ཁམས་གསུམ་འཁོར་བའི་རྒྱ་མཚོ་ནས། །ལུས་ཤ་ཁྲག་གི་ཕུང་པོ་སྡིག་པོ་ཆེ། །གཟུགས་ཤ་ཁྲག་ལུས་ལ་ཆགས་ཆགས་ནས། །སྐྱེ་ཤིའི་རྩ་གདར་ཆོད་དུས་མེད། །སེམས་གཞི་རྩ་ཆོད་ཅིག་རས་ཆུང་པ། །མ་རིག་འཁྲུལ་པའི་གྲོང་ཁྱེར་ན། །གཏི་མུག་གི་རྣམ་རྟོག་སྡིག་པོ་ཆེ། །དོན་མེད་ཉེ་རིང་བྱེད་བྱེད་ནས། །སེམས་བཏང་སྙོམས་ངང་ལ་གནས་དུས་མེད། །སེམས་ཆག་སྡང་སྐྱུར་ཅིག་རས་ཆུང་པ། །མཐོ་མི་མངོན་ནམ་མཁའི་དབྱིངས་ཤེད་ན། །རྗེ་དུས་གསུམ་སངས་རྒྱས་ཞལ་བཞུགས་མཁན། །ཆོས་དྲང་དོན་བསླུ་བྲིད་གསུང་གསུང་ནས། །ད་ངེས་པའི་དོན་ལ་རྟོགས་དུས་མེད། །སེམས་སྤྲོས་པ་ཆོད་ཅིག་རས་ཆུང་པ། །ལུང་རིག་གཉིས་ཀྱི་བར་དོ་ན། གཟུང་འཛིན་ང་བདག་གི་སྡིག་པོ་ཆེ། །གློ་བུར་གྱི་རྐྱེན་ཁ་འགྲིམ་འགྲིམ་ནས། །སེམས་གནས་ལུག་ངང་ལ་གནས་དུས་མེད། སེམས་ཀློད་ལ་ཞོག་ཅིག་རས་ཆུང་པ། །སྐྱེ་འཆི་གཉིས་ཀྱི་བར་དོ་ན། །བར་དོའི་རྣམ་ཤེས་སྡིག་པོ་ཆེ། །ལུས་མེད་ལུས་དང་འགྲོགས་འགྲོགས་ནས། །སེམས་ཆོས་ཉིད་ཀྱི་མ་དང་མཇལ་དུས་མེད། །སེམས་བཙན་ས་བཟུང་ཞིག་རས་ཆུང་པ། །ཆོས་ལྟ་བ་དང་བསྒོམ་པ་སྤྱོད་པ་གསུམ། །ཚེ་འདི་དང་ཕྱི་མ་བར་དོ་གསུམ། །གཅིག་ཏུ་དྲིལ་ལ་ཉམས་སུ་ལོངས། །ཞེས་དང་། ཡང་ཉམས་ལེན་འདི་གསུངས་སོ། །འཆི་བདག་གཤིན་རྗེའི་ཕོ་ཉ་ལ། དུས་ལ་ངེས་པ་མི་གདའ་ན། །གློ་བུར་དུ་ཤི་ན་ཡིད་རེ་མུག །ད་ལྟ་རང་ནས་འཆི་ཆེས་གྱིས། །ཟང་ཟིང་སྒྱུ་མའི་ནོར་རྫས་ཀྱང་། །གཞན་གྱི་སྤྱོད་ན་ཉོན་མོངས་སྐྱེ། །ཤུལ་དུ་ལུས་ན་མི་ཡིས་འཕྱ། །ཞེན་ཆགས་མེད་པའི་སྦྱིན་པ་ཐོང་། ཐ་སྙད་ཚིག་གི་དམ་ཆོས་ཀྱང་། །སློབ་པར་དཀའ་ལ་ཕན་ཡོན་ཆུང་། །ཤེས་ནས་ང་རྒྱལ་འདོད་པ་སྐྱེས། །བླ་མའི་གསུང་བཞིན་ཉམས་སུ་ལོངས། །གྲོང་ཡུལ་ཡོན་བདག་ངོ་སྲུང་ཡང་། །མགུ་བ་ཉུང་ལ་འཁང་བ་མང་། །བསླབ་ཉེས་ལགས་སུ་མ་བཏང་ཞིག །བྱ་བ་ཐོང་ལ་རི་ཁྲོད་བཟུང་། །རྟག་ཏུ་དགོས་པའི་ལྟོ་གོས་ཀྱང་། །བཟང་པོར་བྱས་ཀྱང་ཚིམ་པ་མེད། ངན་པར་བྱས་ཀྱང་དེ་ཀ་ཙམ། །རྩོལ་སྒྲུབ་སྐྱུར་ལ་སྡུག་བསྲན་བསྐྱེད། སེམས་སྐྱོ་བ་སྐྱེས་པའི་དབྱངས་ཆུང་འདི། །སེམས་ལ་ཞོག་ཅིག་རས་ཆུང་པ། །ཞེས་གསུངས་པས། ཉམས་དང་རྟོགས་པ་གོང་དུ་འཕེལ་བ་བྱུང་ངོ་། །དེ་ཐམས་ཅད་མོན་གྱི་ཤིང་རིའི་སྐོར་རོ།། །།དེ་ནས་དཔོན་སློབ་གཉིས་སིང་གྷ་ལ་ཡི་ནགས་ཀ་ཏི་ཤེལ་ཕུག་ནམ་མཁའ་རྫོང་བྱ་བ་ན་བསྒོམ་ཞིང་ཡོད་པ་ལ། ཡོན་བདག་གཤེན་རྡོར་མོས་འགོས་བྱས་སྙེ་ནམ་པའི་མི་བརྒྱད་ཀྱིས་བརྒྱགས་དུམ་པ་རེ་ཁུར་ནས་མ་རྙེད་ཙམ་བྱུང་བས། རྗེ་བཙུན་ལགས། འདིར་མཐུན་རྐྱེན་མི་འཛོམས་པ། བློ་སྡུག་པའི་རི་འདིར་མི་བཞུགས་པར་བོད་ལ་འབྱོན་པར་ཞུ་ཞུས་པས། གནས་འདི་སྡུག་ཟེར་དུ་མི་རུང་འདིར་སྐྱིད་གསུངས་ནས་གནས་ལ་བསྟོད་པའི་མགུར་འདི་གསུངས་སོ། །རྗེ་བླ་མའི་བྱིན་རླབས་གནས་ལ་ཞུགས། །མོན་གྱི་ཤིང་རི་བདེ་བའི་མཁར། སྤང་རི་མེ་ཏོག་བཀྲ་བའི་ཡུལ། །ལྗོན་ཤིང་གར་སྟབས་བྱེད་པའི་གསེབ། །སྤྲ་སྤྲེའུ་རྩེད་མོ་རྩེད་པའི་ས། བྱ་སྐད་སྣ་ཚོགས་སྒྲོགས་པའི་གནས། །འབུང་བ་ལང་ལིང་འཕུར་བའི་ས། ཉིན་མཚན་མེད་པར་འཇའ་རིས་འཁྱུག །དབྱར་དགུན་མེད་པར་སྦྲང་ཆར་འབབས། །སྟོན་དཔྱིད་མེད་པར་ན་བུན་འཁྲིགས། །དེ་ལྟ་བུ་ཡི་དབེན་གནས་ན། །ང་མི་ལ་རས་པ་རྣལ་འབྱོར་པ། །སེམས་སྟོང་ཉིད་བསྒོམ་པའི་འོད་གསལ་བདེ། །འཆར་སྒོ་མང་ན་ཤིན་ཏུ་བདེ། མཐོན་དམན་ཆེ་ན་དེ་བས་བདེ། །ལུས་ངན་སློང་བའི་སྐྱེ་གཟུགས་བདེ། །སྣ་ཚོགས་འཁྲུགས་ན་ཤིན་ཏུ་བདེ། །འཇིགས་སྣང་ཆེ་ན་དེ་བས་བདེ། །ཉོན་མོངས་ཤི་འཆིའི་ཤི་འབྲས་བདེ། །གདུག་རྩུབ་ཆེ་ན་ཤིན་ཏུ་བདེ། །ན་ཚ་མང་ན་དེ་བས་བདེ། །སྡུག་བསྔལ་བདེ་བར་གྱུར་བས་བདེ། ཉམས་ཤུགས་ལས་འཁྲུལ་འཁོར་ཤིན་ཏུ་བདེ། །མཆོངས་རྒྱུག་གར་སྟབས་དེ་བས་བདེ། །ངག་བྱུང་རྒྱལ་གླུ་ཡི་དཀོར་མཛོད་བདེ། །ཚིག་སྙན་པའི་དལ་དབྱངས་ཤིན་ཏུ་བདེ། །སྒྲ་སྣ་ཚོགས་བསྒྱུར་ན་དེ་བས་བདེ། །སེམས་ངར་དྲང་གི་སྤྲོས་པ་དབྱིངས་སུ་བདེ། རང་ཤུགས་ཀྱི་རང་ཤར་ཤིན་ཏུ་བདེ། །སྣ་ཚོགས་སུ་ཤར་ན་དེ་བས་བདེ། །ཉམས་བདེ་ཞིང་སྐྱིད་པའི་རྣལ་འབྱོར་ལ། །བུ་དད་ཅན་མཇལ་བའི་བྱོན་སྐྱེམས་མཛོད། །ཅེས་གསུངས་པས་ཡོན་བདག་རྣམས་ན་རེ། ཁྱོད་ལ་ཉམས་བཟང་པོ་ཡོད་པ་ཐུགས་ལ་བཏགས། ཉམས་བཟང་པོ་ཡོད་པ་ངེད་ཚོས་ཤེས་ཏེ་གནས་འདི་ལ་ལམ་བཟང་པོ་མི་འདུག་པས། འོ་བརྒྱལ་དོགས་པ་ལགས་ཞུས་པས་གནས་འདི་ཤིན་ཏུ་བདེ། ཁྱེད་ཚོས་མ་བརྟགས་པ་ཡིན་གསུངས་ནས་ཡང་མགུར་འདི་གསུངས་སོ། །གནས་རི་ཁྲོད་ཤིང་རིའི་དབེན་གནས་འདིར། །འོག་ན་སྤྲ་བའི་འབོལ་ཆུང་བདེ། །འགྲོ་འདུག་མེད་པས་ཡང་ཡང་བདེ། །ལུས་ལ་བལ་པོའི་ཤིང་བལ་བདེ། རྩོལ་བསྒྲུབ་མེད་པས་ཡང་ཡང་བདེ། །ནང་དུ་གཏུམ་མོ་འབར་བས་བདེ། གྲང་དྲོ་མེད་པའི་ཡང་ཡང་བདེ། །ངག་ལ་སྨྲ་བ་བཅད་པས་བདེ། །ལབ་རོགས་མེད་པས་ཡང་ཡང་བདེ། །དབུགས་ལ་འགྲོ་འོང་མེད་པས་བདེ། རྒྱུ་བ་ཁེགས་པས་ཡང་ཡང་བདེ། སེམས་ལ་དོགས་པ་མེད་པས་བདེ། །བྱིང་རྒོད་མེད་པས་ཡང་ཡང་བདེ། །ཏིང་འཛིན་འོད་གསལ་ཤར་བས་བདེ། །གསལ་འགྲིབ་མེད་ན་ཡང་ཡང་བདེ། །ནོར་ལ་འཛིན་ཆགས་མེད་པས་བདེ། །ཞེན་པ་མེད་ན་ཡང་ཡང་བདེ། །ཟས་ལ་སེར་སྣ་མེད་པས་བདེ། སྲེད་པ་མེད་ན་ཡང་ཡང་བདེ། །གཉེན་ལ་འབྲེལ་པ་མེད་པས་བདེ། །ཞེ་གདུང་མེད་ན་ཡང་ཡང་བདེ། དགྲ་ལ་ཞེ་སྡང་མེད་པས་བདེ། །ཀུན་དང་མཐུན་ན་ཡང་ཡང་བདེ། གཉིས་སུ་མེད་པའི་ལྟ་བ་བདེ། །ངོས་བཟུང་མེད་ན་ཡང་ཡང་བདེ། །རྒྱུན་ཆད་མེད་པའི་སྒོམ་པ་བདེ། །མཉམ་རྗེས་མེད་ན་ཡང་ཡང་བདེ། ཚུལ་འཆོས་མེད་པའི་སྤྱོད་པ་བདེ། སྤང་བླངས་མེད་ན་ཡང་ཡང་བདེ། །ཐེག་པ་ཆེ་ཆུང་མེད་པས་བདེ། །དོན་གཅིག་ཏུ་རྟོགས་ན་དེ་བས་བདེ། །སེམས་ལ་ཇི་ལྟར་བྱས་ཀྱང་བདེ། །རྩོལ་སྒྲུབ་མེད་ན་ཡང་ཡང་བདེ། །རྣལ་འབྱོར་རས་པའི་བདེ་བ་འདིས། །སེམས་ཅན་ཐམས་ཅད་བདེ་བར་ཤོག །ཅེས་གསུངས་པས་ཡོན་བདག་རྣམས་ན་རེ། ཁྱེད་དེ་བཞིན་བདེ་བ་འདིས་གར་སོང་ཡང་བདེ། གར་བཞུགས་ལ་ཁྱད་མེད་པས་ངེད་ཀྱི་ཡུལ་དུའང་འབྱོན་ཡང་ཨེ་མ་བདེ་བས་འབྱོན་བར་ཞུ་ཞུས་པས། རྗེ་བཙུན་གྱིས་མགུར་འདི་གསུངས་སོ། །རྗེ་བླ་མའི་བཀའ་དྲིན་ཆོས་ཀྱི་འཇལ། །ཆོས་བྱིན་བརླབས་དབང་བསྐུར་རང་རྒྱུད་སྨིན། །རྒྱུད་ཟབ་མོ་མན་ངག་གླུ་རུ་ལེན། །ཁྱེད་འདིར་བཞུགས་སྙན་གྱི་དབང་པོ་གཏོད། །གངས་དཀར་གྱི་སེང་ལྕམ་དཀར་མོ་དེ། །སེང་གངས་དཀར་ཀློང་དུ་འདུག་སྟངས་འགྱིང་། །སེང་སྲོག་ཆགས་འཇིགས་པ་མ་མཆིས་ཏེ། །གངས་སྟོད་འཛིན་པ་ཡ་ཚུལ་ཡིན། བྲག་དཀར་གྱི་ཐང་དཀར་རྒོད་པོ་དེ། །གཤོག་དྲུག་ནམ་མཁའི་དབྱིངས་སུ་བརྐྱངས། །རྒོད་གཡང་ལ་ལྷུང་དོགས་མ་ཡིན་ཏེ། །ནམ་འཕང་བསྐྱོད་པ་ཡ་ཚུལ་ཡིན། །མ་ཀི་ཆུ་བོའི་རྒྱ་མཚོ་ན། །ཉ་སྲམ་མ་བུས་ཡང་རྩལ་སྦྱངས། །ཉ་འཚུབ་ཀྱིས་དོགས་པ་མ་ལགས་ཏེ། །གྱ་གྱུར་འཁྱུགས་པ་ཡ་ཚུལ་ཡིན། །མོན་གྱི་ཤིང་རིའི་ལོ་མ་ལ། །སྤྲ་སྤྲེའུ་རྩེད་མོ་རྩེ་བ་དེ། །སྤྲེལ་འགྱེལ་གྱི་དོགས་པ་མ་ཡིན་ཏེ། །རྩེ་སྣང་མང་བ་རང་གཤིས་ཡིན། །ཤིང་གསེབ་ནགས་ཀྱི་ས་འཕྲང་ན། །རྒྱ་སྟག་ཁྲ་བོས་ཡང་རྩལ་སྦྱོང་། །སྟག་འཇིགས་ཀྱིས་དོགས་པ་མ་ཡིན་ཏེ། རྩལ་གསུམ་རྫོགས་པ་རང་གཤིས་ཡིན། །ནག་གསེབ་ཀ་ཏིའི་རྫོང་གསེབ་ཏུ། །རྣལ་འབྱོར་རས་པས་སྟོང་ཉིད་བསྒོམ། །བསྒོམ་ཤོར་གྱིས་དོགས་པ་མ་ལགས་ཏེ། །སྒོམ་ཡུན་དུ་བསྲིང་བ་ཡ་ཚུལ་ཡིན། །ཆོས་ཉིད་དབྱིངས་ཀྱི་དཀྱིལ་འཁོར་ན། །ཡེངས་པ་མེད་པར་ལྟ་བ་དེ། །དོན་ནོར་གྱིས་དོགས་པ་མ་ཡིན་ཏེ། །གནད་རང་ས་འཛིན་པ་ཡ་ཚུལ་ཡིན། །ནང་ཆོ་འཕྲུལ་ཏིང་འཛིན་རྟེན་འབྲེལ་ལ། །གེགས་དང་གོལ་ས་འཁྲུགས་པ་དེ། །ཆོས་སྐྱོན་ཆེན་ཡིན་པ་མ་ལགས་ཏེ། །རྟགས་མྱུར་དུ་སྟོན་པའི་ཁ་པོ་ཡིན། །རང་ཤར་སྤྱོད་པའི་རང་འགྲོས་ལ། །མཐོ་དམན་རྣམ་འགྱུར་མང་བ་དེ། །བློ་གཉིས་སྣང་གི་རྟོག་པ་མ་ལགས་ཏེ། །བརྡ་སྣ་ཚོགས་སྣང་བ་རྟེན་འབྲེལ་ཡིན། །ལས་རྒྱུ་འབྲས་འབྲས་བུ་སྨིན་པ་ལ། །དགེ་སྡིག་གི་རང་གཟུགས་མཐོང་བ་དེ། །སྒོམ་གོལ་སར་སོང་བ་མ་ལགས་ཏེ། །རིག་སོ་སོར་གསལ་བའི་བདེན་ཚིག་ཡིན། །སྒོམ་རང་ཚུགས་ཐུབ་པའི་སྒོམ་ཆེན་དེས། །འཇིག་རྟེན་ལ་སྲེད་པ་ཆུང་བ་དེ། གཏམ་ཟེར་ལོའི་སྙན་གྲགས་མ་ཡིན་ཏེ། །འཕྲལ་ཞེན་པ་ལོག་པ་དམ་ཚིག་ཡིན། །ཆོས་ཟབ་མོ་བསྒོམས་པའི་རྣལ་འབྱོར་ལ། །རི་དང་བྲག་ལ་སྐྱེ་བ་དེ། །ཟོབ་དང་ཐོ་ཅོ་མ་ལགས་ཏེ། རྩེ་གཅིག་ཏུ་བསྒོམ་པ་རང་འདོད་ཡིན། །རས་པའི་གླུ་དབྱངས་མང་པོ་དེ། །ཡེངས་འདོད་ཀྱི་ཁ་ཁྲམ་མ་ཡིན་ཏེ། །སྤྲོ་དགའི་ཡོན་བདག་དད་པ་ཅན། །ཕན་པའི་སྙིང་གཏམ་སེམས་ལ་བཟུང་། །ཞེས་གསུངས་པས་དེར་འོང་བའི་ཡོན་བདག་དད་པ་ཅན་རྣམས་ཤིན་ཏུ་དད་པས་ཕྱག་དང་བསྐོར་བ་མང་དུ་བྱས་ཏེ་ཡུལ་དུ་སོང་ངོ་། །དེ་ཐམས་ཅད་སིང་གྷ་ལ་ཡི་ནགས་གསེབ་ཀྱི་སྐོར་རོ།། །།དེ་ནས་ཡང་ཡུལ་ནས་ཁྲིད་ཞུ་བའི་བན་དྷེ་ལྔ་ཙམ་ཞིག་བྱུང་བས། སྙན་བརྒྱུད་ཀྱི་ཁྲིད་ཞུས་ནས་བསྒོམ་པས་ཆོས་ལ་སྙིང་རུས་དང་། འདོད་པ་ཆུང་ཞིང་རས་ཐུབ་པར་བྱུང་བས་དེ་རྣམས་ལ་ཞལ་ཏ་བདུད་རྩིའི་ཉམས་དབྱངས་འདི་མགུར་དུ་གསུངས་སོ། །རྗེ་བཙུན་བླ་མ་ཆོས་ཀྱི་སྐུ། །འགག་མེད་ཐར་པའི་ལམ་སྟོན་པ། །མཛད་པའི་ཐུགས་རྗེ་འགྲོ་བའི་བདག །རྩེ་གཅིག་སེམས་ལ་གནས་པར་བྱིན་གྱིས་རློབས། །སྙན་བརྒྱུད་ཟབ་མོ་སྒོམ་པ་སྐལ་པ་བཟང་། །ཁྱེད་གཞོན་ནུ་རབ་ཏུ་བྱུང་དུས་སུ། །རང་རྩིས་རང་འདོད་མ་ཆེ་ཞིག །ཆེས་ན་དགེ་སྡིག་སྣ་ཚོགས་སྤྱོད། །སྤྱད་ན་ངན་འགྲོར་ལྟུང་བར་འགྱུར། བླ་མའི་ཞབས་ཏོག་བྱེད་དུས་སུ། །ངས་བྱས་དང་ཁོང་ཡུས་མ་ཆེ་ཞིག །ཆེས་ན་དཔོན་སློབ་རེ་ཆོད་འཛོལ། །འཛོལ་ན་བསམ་པའི་དོན་མི་འགྲུབ། །སྡོམ་པ་དམ་ཚིག་བསྲུང་དུས་སུ། །མི་ནག་གི་གྲོང་དུ་མ་ཉལ་ཞིག །ཉལ་ན་མིག་སློང་ངན་པ་སྐྱེ། །སྐྱེས་ན་དམ་ཚིག་གིས་སྡོམ་པ་འཆོར། །ཐོས་པ་སློབ་གཉེར་བྱེད་དུས་སུ། །ཐ་སྙད་ང་རྒྱལ་མ་ཆེ་ཞིག །ཆེས་ན་དུག་ལྔའི་མེ་རོ་ལྡང་། །ལྡང་ན་དགེ་སྦྱོར་གྱི་བསམ་པ་འཁྲུག །མཆེད་གྲོགས་དང་ལྷན་དུ་བསྒོམ་དུས་སུ། །བྱ་རྒྱུ་དང་བྱེད་རྒྱུ་མ་མང་ཞིག །མང་ན་ཟབ་མོའི་དགེ་སྦྱོར་སྤུར། །སྤུར་ན་ཆོས་ཀྱི་སྐལ་པ་ཆད། །ཐབས་ལམ་སྙན་བརྒྱུད་བསྒོམ་དུས་སུ། བྱིན་རླབས་འདྲེ་བརྡུང་མ་དྲན་ཞིག །་དྲན་ན་རང་རྒྱུད་འདྲེ་རུ་ལྡང་། །ལྡང་ན་གྲོང་པའི་ཆོས་སྤྱོད་རེམ། །ཉམས་དང་རྟོགས་པ་ཤར་དུས་སུ། །མངོན་ཤེས་དང་རང་ཚོད་མ་ལབ་ཅིག །ལབ་ན་གསང་བའི་བརྡའ་སྐད་འཆོར། །ཤོར་ན་ཉམས་རྟོགས་ཀྱི་ཡོན་ཏན་འགྲིབ། །སྐྱོན་དུ་ཤེས་པས་སྤངས་བར་མཛོད། །སྡིག་སྤྱོད་ཀྱི་ཁྲམ་ཟས་མ་ཟ་བར། །གཤིན་པོའི་ཁུ་རུ་མ་ཁུར་བར། །ངོ་སྲུང་གི་འདུན་པ་མ་སྒྲིགས་པར། །ཉམས་ཆུང་ཆོས་འགོ་བྲག་ལས་ཐོན། །ཞེས་གསུངས་པས། ཡང་རས་པ་རྣམས་ཀྱིས་གསེར་དུམ་པ་རེ་འདུག་པ་ཕུལ་ནས། ལྟ་སྒོམ་སྤྱོད་པའི་གནད་འགག་གི་ཆོས་རེ་ཞུ་ཞུས་པས། གསེར་ཁྱེད་རང་ཚོའི་སྒྲུབ་པའི་བརྒྱགས་གྱིས་གསུངས་ནས་མགུར་འདི་གསུངས་སོ། །རྗེ་བླ་མའི་ལྟ་སྒོམ་སྤྱོད་པའི་འགྲོས། །རང་གྲུབ་ཏུ་གནས་པར་བྱིན་གྱིས་རློབས། །ལྟ་བ་འདི་ལ་གཟེར་གསུམ་གདའ། །སྒོམ་པ་འདི་ལ་གཟེར་གསུམ་གདའ། །སྤྱོད་པ་འདི་ལ་གཟེར་གསུམ་གདའ། འབྲས་བུ་འདི་ལ་གཟེར་གསུམ་གདའ། །ལྟ་བའི་གཟེར་གསུམ་བཤད་ཙ་ན། །སྣང་སྲིད་སེམས་སུ་འདུས་ཏེ་གདའ། སེམས་ཉིད་གསལ་པའི་ངང་དུ་གདའ། །དེ་ལ་ངོས་བཟུང་མེད་པར་གདའ། །བསྒོམ་པའི་གཟེར་གསུམ་བཤད་ཙ་ན། །རྣམ་རྟོག་ཆོས་སྐུར་གྲོལ་བར་གདའ། །རིག་གསལ་བདེ་བའི་ངང་དུ་གདའ། །མ་བཅོས་མཉམ་པར་བཞག་པར་གདའ། །སྤྱོད་པའི་གཟེར་གསུམ་བཤད་ཙ་ན། །དགེ་བཅུ་སྤྱོད་པའི་ཤུགས་ལས་འཆར། སྡིག་བཅུ་རང་བཞིན་གནས་སུ་འདག །གཉེན་པོ་གསལ་སྟོང་བཅོས་སུ་མེད། །འབྲས་བུའི་གཟེར་གསུམ་བཤད་ཙ་ན། །མྱང་འདས་གནས་སུ་སྒྲུབ་རྒྱུ་མེད། །འཁོར་བ་གཞན་དུ་སྤངས་པ་མེད། །རང་སེམས་སངས་རྒྱས་སུ་བློ་ཐག་ཆོད། །གཟེར་གསུམ་ནང་ནས་གཟེར་ཅིག་འདེབས། །གཟེར་ནི་ཆོས་ཉིད་སྟོང་པའི་གཟེར། །འདེབས་མཁན་བླ་མ་དམ་པས་རིམ་གྱིས་མཛད། །མང་དུ་སྤྱོད་ན་ཐེབས་མི་འགྱུར། །ལྷན་ཅིག་རྟོགས་ན་ཐེབ་པ་ཡིན། སྤྱིར་ཆོས་མཛད་རྣམས་ཀྱི་སྤྱི་ནོར་ཡིན། །རྣལ་འབྱོར་བློ་ལ་ཤར་ནས་བླངས། །ཁྱེད་བུ་སློབ་རྣམས་ཀྱི་ཐུགས་དམ་མཛོད། །ཅེས་གསུངས་པས། རས་པ་རྣམས་ཀྱིས་ཞུས་པས་དེ་ལྟ་བུའི་ཆོས་དེ་ལ་བླ་མ་རང་བསྒོམ་པས་ཨེ་ཆོག་ཞུས་པ་ལ་ཡང་མགུར་འདི་གསུངས་སོ། །གྲུ་ཐོབ་བླ་མ་རྗེ་བཙུན་དེ། །མུན་པ་སེལ་བའི་ལམ་མཁན་ཡིན། །སྐྱོ་ངལ་མེད་པའི་དད་པ་འདི། །བདེ་འགྲོར་འཁྲིད་པའི་ལམ་མཁན་ཡིན། །དབང་པོ་ལྔ་ཡི་རྟོགས་པ་དེ། ཐུག་འཕྲད་བསྒོམ་པའི་ལམ་མཁན་ཡིན། །བླ་མ་དང་གདམས་ངག་སློབ་མ་གསུམ། །སྙིང་རུས་དང་སྡུག་བསྲན་དད་པ་གསུམ། །ཤེས་རབ་དང་སྙིང་རྗེ་མི་གཞི་གསུམ། །འདི་གསུམ་རྒྱུན་གྱི་ལམ་མཁན་ཡིན། །འདུ་འཛི་མེད་པའི་དབེན་པ་འདི། །བསམ་གཏན་སྐྱོང་བའི་ལམ་མཁན་ཡིན། །བཀའ་རྒྱུད་བླ་མའི་ཞལ་གདམས་དེ། སྐུ་གསུམ་སྟོན་པའི་ལམ་མཁན་ཡིན། །སྐྱབས་ཡུལ་དཀོན་མཆོག་གསུམ་པོ་འདི། །ནོར་བ་མེད་པའི་ལམ་མཁན་ཡིན། །ལམ་མཁན་དྲུག་གིས་སྣ་དྲངས་ནས། །སྣང་མེད་བདེ་ཆེན་ལམ་དུ་འགྲོ། །སྤྲོས་མེད་མི་རྟོག་ངང་ལ་སྡོད། །རང་ཤེས་རང་གྲོལ་གྱི་རང་ཡུལ་སྐྱིད། ངེས་ཤེས་དོན་ཤེས་ཀྱི་རང་ཚུགས་ཟིན། །རྒྱལ་ཁམས་མི་མེད་ཀྱི་ལུང་སྟོང་དུ། །རྣལ་འབྱོར་གྱི་སྐྱིད་གླུ་འབྲུག་བཞིན་སྒྲོགས། །སྙན་པའི་ཆར་པ་ཕྱོགས་བཅུར་འབབས། །སྙིང་རྗེའི་མེ་ཏོག་ལོ་འདབ་རྒྱས། །བྱང་སེམས་གྱི་འབྲས་བུ་དག་པར་སྨིན། །བྱང་ཆུབ་ཀྱི་འཕྲིན་ལས་ཐམས་ཅད་རྒྱས། །ཞེས་གསུངས་སོ། །ཡང་བླ་མ་རྣམས་ལ་ཕྱག་འཚལ་ལོ། །ངས་སྐྱེ་བ་མེད་པའི་གདིངས་ཤིག་རྙེད། །སྔ་ཕྱི་གཉིས་ཀྱི་འཛིན་པ་དག །རིགས་དྲུག་གི་སྣང་བ་རྫུན་དུ་ཐལ། །སྐྱེ་ཤི་གཉིས་ཀྱི་སྒྲོ་འདོགས་ཆོད། །གཉིས་སུ་མེད་པའི་གདིངས་ཤིག་རྙེད། །ལུས་སེམས་གཉིས་ཀྱི་འཛིན་པ་དག །ཚོགས་དྲུག་གི་སྣང་བ་རྫུན་དུ་ཐལ། །དངོས་པོར་འཛིན་པའི་སྒྲོ་འདོགས་ཆོད། །མཉམ་པ་གཉིས་ཀྱི་གདིངས་ཤིག་རྙེད། །བདེ་སྡུག་གཉིས་སུ་འཛིན་པ་དག །ཚོར་བའི་ཉམས་མྱོང་རྫུན་དུ་ཐལ། །སྤང་བླང་གཉིས་ཀྱི་སྒྲོ་འདོགས་ཆོད། །དབྱེ་རུ་མེད་པའི་གདིངས་ཤིག་རྙེད། །འཁོར་འདས་གཉིས་ཀྱི་འཛིན་པ་དག །ས་ལམ་སྦྱངས་པ་རྫུན་དུ་ཐལ། །ཞེས་གསུངས་པས། རས་པ་རྣམས་ན་རེ། གནས་དང་བླ་མ་འཛོམས་པའི་སློབ་མ་ངེད་ཚོ་སྐྱིད་པར་བྱུང་བས། དབེན་གནས་འདི་འཚོ་བས་དབེན་པའི་གནས་དགོན་པ་འགའ་ཞིག་བརྩིགས་དགོས་ཞུས་པས། བླ་མའི་ཞལ་ནས། དགོན་པ་བརྩིགས་མི་དགོས། ང་ཡི་བྲག་ཕུག་འདི་རང་སྐྱིད། འདི་དཔའ་གྲོ་སྟག་ཚང་གིས་ཕུག་པ་བྱ་བ་ཡིན་གསུངས་ནས་མགུར་འདི་གསུངས་སོ། །རྗེ་བླ་མའི་ཞབས་དྲུང་སྡོད་པའི་ཚེ། ཐུགས་རྗེའི་བཀའ་དྲིན་བྱིན་བརླབ་མཁར། །ད་འཇིགས་ཀྱིས་དོགས་སྙམ་བདག་ལ་མེད། །ངས་གྲང་གིས་དོགས་ནས་གོས་ཤིག་བཙལ། །གོས་དེ་ནི་གཏུམ་མོ་ལྷུན་གྲུབ་གོས། །ད་གྲང་གིས་དོགས་སྙམ་བདག་ལ་མེད། ངས་དབུལ་གྱི་དོགས་ནས་ནོར་ཞིག་བཙལ། །ནོར་དེ་ནི་འཕགས་པའི་ནོར་མཆོག་བདུན། །ད་དབུལ་གྱིས་དོགས་སྙམ་བདག་ལ་མེད། །ངས་ལྟོགས་ཀྱིས་དོགས་ནས་ཟས་ཤིག་བཙལ། །ཟས་དེ་ནི་ཆོས་ཉིད་ཏིང་འཛིན་ཟས། །ད་ལྟོགས་ཀྱིས་དོགས་སྙམ་བདག་ལ་མེད། །ངས་སྐོམ་གྱི་དོགས་ནས་ཧུབ་ཅིག་བཙལ། །སྐོམ་དེ་ན་དྲན་ཤེས་བདུད་རྩི་ཆང་། །ད་སྐོམ་གྱི་དོགས་སྙམ་བདག་ལ་མེད། །ངས་སྐྱོ་ཡི་དོགས་ནས་གྲོགས་ཤིག་བཙལ། གྲོགས་དེ་ནི་བདེ་སྟོང་སྒྱུ་མའི་གྲོགས། །ད་སྐྱོ་ཡི་དོགས་སྙམ་བདག་ལ་མེད། །ངས་ནོར་ཡི་དོགས་ནས་ལམ་ཞིག་བཙལ། །ལམ་དེ་ནི་ཟུང་འཇུག་ཡངས་པའི་ལམ། །ད་ནོར་གྱིས་དོགས་སྙམ་བདག་ལ་མེད། །སྒོས་འདོད་དགུ་ཚང་བའི་རྣལ་འབྱོར་པ། །གནས་གང་དུ་བསྡད་ཀྱང་སྐྱིད་པར་འདུག །སྟག་ཚང་དཔལ་གྲོ་སེང་གེའི་ཕུག །སྟག་མོའི་ངར་སྐད་སྐྱི་ཤ་ཚ། །དེས་དབང་མེད་དུ་སྐུ་མཚམས་བསྡམས་སུ་བཅུག །སྟག་ཕྲུག་གི་ཙི་ཚོས་སྙིང་རྗེ་སྐྱེས། །དེས་དབང་མེད་བྱང་ཆུབ་བསྒྲུབ་ཏུ་བཅུག །སྤྲེའུ་ཡི་སྐྱལ་སྒྲས་ཞེ་བ་གཅུ། །དེས་དབང་མེད་དུ་སྐྱོ་ཤས་སྐྱེ་རུ་བཅུག །སྤྲེལ་ཕྲུག་གི་མྱ་སྒྲས་རྒོད་སྙིང་འདོད། །དེས་དབང་མེད་དུ་སེམས་བསྐྱེད་བསྒོམ་དུ་བཅུག །ཁུ་བྱུག་གི་ངག་སྙན་ཡིད་རྩ་གཡོ། །དེས་དབང་མེད་དུ་མཆི་མ་འཆོར་དུ་བཅུག །ལྕོ་གའི་འགྱུར་སྐད་རྣ་བར་སྙན། དེས་དབང་མེད་དུ་སྣང་བ་སྐྱིད་དུ་བྱུང་། བྱ་རིགས་ཀྱི་སྐད་རིགས་སྣ་ཚོགས་ཀྱི། །རྣལ་འབྱོར་གྱི་འདུག་རོགས་སེམས་ལ་ཕན། །གནས་འདི་འདྲར་བསྡད་ན་ངང་གིས་སྐྱིད། །རོགས་གཅིག་ཀྱང་མེད་ན་དེ་བས་སྐྱིད། །རྣལ་འབྱོར་སྐྱིད་པའི་ཉམས་དབྱངས་འདིས། །འགྲོ་བའི་སྡུག་བསྔལ་སེལ་བར་ཤོག །ཅེས་གསུངས་པས། དེར་འོང་པའི་རས་པ་རྣམས་ཀྱང་སྐྱོ་ཤས་བཟང་པོ་སྐྱེས་ནས་དགེ་སྦྱོར་ལ་བརྩོན་ཏིང་ངེར་སོང་ནས་དཔོན་སློབ་རྣམས་ཐུགས་དམ་འཕེལ་བར་བྱུང་ངོ་། །དེ་ཐམས་ཅད་དཔལ་གྲོ་སྟག་ཚང་གི་སྐོར་རོ།། །།