སྣང་བ་མཐུན་རྐྱེན་དུ་ཤར་བའི་ཡོན་ཏན།

དེ་ནས་བདུན་པ་སྣང་བ་མཐུན་རྐྱེན་དུ་ཤར་བའི་ཡོན་ཏན་ནི། ལམ་མི་བདེ་བ་ཆུ་སྒྲ་ཆེ་བ། མཐུན་འཇུག་དཀའ་བའི་གནས་བྲག་གསེབ་ཅིག་ཏུ་བྱོན་སོང་བ་དང་། འདི་མི་བདེ་བར་འདུག་ཞུས་པས། འདི་ཤིན་ཏུ་བདེ་བཙན་དྲོ་སྐྱིད་ཕུག་ཉི་མ་རྫོང་བྱ་བ་ཡིན་གསུང་ནས་གནས་ལ་བསྟོད་པའི་མགུར་འདི་གསུངས་སོ། །ཨེ་མ་རི་ཁྲོད་ནགས་ཀྱི་གསེབ། །བྲག་དཀར་སྐྱིད་ཕུག་ཉི་མ་རྫོང་། །བཙན་ལ་བག་ཡངས་ཤེས་པ་བདེ། །ཉམས་རྒྱུད་ལ་སྐྱེ་བའི་དབེན་ས་འདིར། །རིག་པ་དྭངས་ཤིང་ཤེས་པ་བདེ། །རྒྱུ་འགྲུལ་མེད་པས་སྣང་བ་བདེ། །མེ་ཤིང་འཛོམས་པས་ངང་གི་བདེ། །ཁ་སྐད་མི་ཚོར་ཆགས་སྡང་ཟད། །རི་བྲག་དཔའ་བོ་མཁའ་འགྲོ་འདྲ། །རྒྱབ་རི་ལྷ་ཡི་ཕོ་བྲང་འདྲ། །མདུན་རི་མ་ཡི་པང་དང་འདྲ། །གཡས་རི་རྒྱལ་མཚན་འཕྱར་བ་འདྲ། །གཡོན་རི་པད་མ་བྱེ་བ་འདྲ། །ཤིང་ལོ་མཆོད་པའི་ལྷ་མོ་འདྲ། །ཤིང་ཐོག་རྩི་བཅུད་འབྲས་བུ་འདྲ། །ཆུ་དང་ཆུ་ཕྲན་ཁྲུས་བུམ་འདྲ། སྟག་དང་གཅན་གཟན་སྒོ་ཁྱི་འདྲ། བྱ་དང་རི་དྭགས་ནོར་ཕྱུགས་འདྲ། །སྤྲ་དང་སྤྲེའུ་ཁྱིམ་མཚེས་འདྲ། །ན་བུན་འཇའ་ཚོན་རྨ་གཡང་འདྲ། །སྦྲང་ཆར་ཟིམ་བུ་མཆོད་སྤྲིན་འདྲ། སྤངས་དང་མེ་ཏོག་མཎྜྻལ་འདྲ། འདི་ལྟ་བུ་ཡི་དབེན་གནས་འདིར། །ལྷ་ཡི་ཡོག་ཤིང་བླ་མས་བྱིན། །མཁའ་འགྲོ་མཉེས་ཤིང་ཡི་དམ་འཁོར། །ཆོས་རང་དབང་མེད་པར་ཤུགས་ལས་འབྱུང་། །སྡིག་རང་དབང་མེད་པར་ངང་གིས་འདག །སླད་ནས་བྱང་ཆུབ་སྒྲུབ་པ་རྣམས། །གནས་འདི་འདྲ་བསྟེན་ཅིང་ཡེངས་མེད་སྒོམ། །བུ་འདིར་བཞུགས་རས་པ་བུ་སློབ་རྣམས། ཉམས་དགའ་བར་ཨེ་འདུག་ལྟོས་དང་གསལ། །ཞེས་གསུངས་པས་སྣང་བ་དགའ་ལྷག་ལྷག་པའི་ཉམས་བཟང་པོ་སློབ་མ་རྣམས་ལ་སྐྱེས་སོ། །དེ་ནས་བསྒོམ་ཞིང་ཡོད་པ་ལ་ཡོན་བདག་གཤེན་རྡོར་མོས་འགོས་བྱས་པའི་བན་སྐྱེས་མང་པོ་ཞིག་བརྒྱགས་དུམ་པ་རེ་ཁུར་ནས་མཇལ་དུ་བྱུང་སྟེ་ཁོང་རྣམས་ན་རེ། བླ་མ་ལགས། དགོན་པ་ཐག་རིང་ཞིང་མཐུན་རྐྱེན་ཡང་དཀོན་པས་སྙེན་ནམ་གྱི་རི་ཕུག་ལ་བཞུགས་ནས་ཉེ་གནས་རེ་ཡང་འཇོག་པ་དང་། རས་པ་དཔོན་སློབ་འཚོ་བས་མ་བཀྲེས་པ་མཛད་པར་ཞུ་ཞུས་པས་ཡང་མགུར་འདི་གསུངས་སོ། །བླ་མ་མི་བསྐྱོད་ཀྱི་ངོ་བོ་རྡོ་རྗེ་འཆང་། སྤྲང་པོས་རི་ཁྲོད་ཟིན་པར་ཐུགས་རྗེས་བཟུང་། །འདིར་བཞུགས་ཀྱི་ཡོན་བདག་དད་པ་ཅན། །ཐག་རིང་པོ་ནས་ཡང་ཡང་བྱོན་པ་ལ། །གདབ་ལེན་གླུ་ཡིས་འཇལ་བ་དེ། །ཁྲམ་གཏམ་གྱི་མགོ་གཡོགས་མ་ལགས་ཏེ། །ཉམས་སྣང་བ་མཐུན་པའི་སྐྱིད་སྐྱིད་ཡིན། །ཚིག་སྙན་པའི་མན་ངག་བཤད་པ་དེ། །བཅོས་མའི་ཁ་རྒན་མ་ཡིན་ཏེ། །སེམས་ལ་ཨེ་ཕན་སྙིང་གཏམ་ཡིན། །གནས་ཆུ་ཤིང་འཛོམས་པའི་དགོན་པ་དེར། །འཁོར་ཉེ་གནས་ཟེར་བ་རྫུན་དུ་གདའ། །ཟ་རོགས་ངན་པ་དགོས་རྒྱུ་ཆུང་། །ཉེ་གནས་ཤེས་རབ་རལ་ཁས་བྱེད། །གཅིག་པུར་རི་ལ་སྡོད་པ་ལ། །ནོར་ཟང་ཟིང་ཟེར་བ་རྫུན་དུ་གདའ། །དགྲ་བོའི་གཡབ་མོ་དགོས་རྒྱུ་ཆུང་། ཆོག་ཤེས་ཀྱི་ཕྱུག་ལ་ཟད་པ་མེད། །ལྷུན་གྲུབ་གཏུམ་མོ་སྦར་ཙ་ན། །གོས་སློག་ཟེར་བ་རྫུན་དུ་གདའ། །ཁྲེས་ལོག་ཁུར་པོས་དགོས་རྒྱུ་ཆུང་། །བདེ་སྟོང་རང་འོད་ཤིན་ཏུ་དྲོ། རིན་ཆེན་སེམས་ཀྱི་གཏེར་རྙེད་ཙ། །ལས་སོ་ནམ་ཟེར་བ་རྫུན་དུ་གདའ། བྲལ་བྲེལ་གཡེང་བས་དགོས་རྒྱུ་ཆུང་། །ཉམས་གསལ་སྟོང་རིག་པ་ཟད་རྒྱུ་མེད། །རང་རིག་འོད་གསལ་རྟོགས་ཙམ་ན། །ཁ་བརྡ་སྐམ་པོ་རྫུན་དུ་གདའ། །ཁས་ལེན་གྲུབ་མཐའ་དགོས་རྒྱུ་ཆུང་། །སྟོང་ཉིད་ཆོ་འཕྲུལ་རང་དབང་ཆེ། །རང་བྱུང་ཆོས་ཉིད་ཤར་ཙམ་ན། །དམིགས་བཅས་བསྒོམ་པ་རྫུན་དུ་གདའ། །སྡུག་བཙིར་སེམས་འཛིན་དགོས་རྒྱུ་ཆུང་། །གསལ་སྟོང་རྟེན་འབྲེལ་རང་དབང་ཆེ། །རྩོལ་མེད་ཤུགས་འབྱུང་ཤར་ཙམ་ན། །བཅོས་མའི་ཚུལ་འཆོས་རྫུན་དུ་གདའ། ལྷག་པའི་སྤྱོད་པ་དགོས་རྒྱུ་ཆུང་། །རང་བྱུང་རང་གྲོལ་རང་དབང་ཆེ། །སྐྱེས་མེད་སྤྲོས་བྲལ་གོ་ཙམ་ན། །སྒྲ་ཚད་སྒྲོགས་གླེང་རྫུན་དུ་གདའ། །ཐ་སྙད་བསླབ་པ་དགོས་རྒྱུ་ཆུང་། །འགག་མེད་རང་རྩལ་རང་དབང་ཆེ། །གང་ཤར་ཆོས་ཉིད་དཀྱིལ་འཁོར་ལ། །འཁོར་འདས་བཟང་ངན་རྫུན་དུ་གདའ། །བློས་བྱས་འབྲས་བུ་དགོས་རྒྱུ་ཆུང་། དབེན་པའི་རང་གྲུབ་རང་དབང་ཆེ། །མོས་གུས་སེམས་ལ་ཐོབ་ཙམ་ན། །ངོ་སྲུང་ཞབས་ཏོག་རྫུན་དུ་གདའ། །ངས་བྱས་འབུལ་བ་དགོས་རྒྱུ་ཆུང་། །སེམས་མཐུན་སྣང་བ་རང་དབང་ཆེ། །ལམ་ནོར་ས་མེད་པའི་རྣལ་འབྱོར་ལ། །སྐྱིད་ཇ་ཆང་གཉིས་ཀྱི་ཐབ་ཁ་མེད། །ཟས་ཤ་ཐུད་གཉིས་ཀྱི་མགྲོན་ཟས་མེད། །ཁྱེད་ཡོན་བདག་གཉིས་པོའི་ནོར་ཟས་མེད། །མ་ཇོ་མོ་དགའ་བའི་སྐྱེ་གཟུགས་མེད། །འཁོར་སློབ་མ་དགའ་བའི་གཡེང་བ་མེད། །མི་ཐམས་ཅད་དགའ་བའི་ཕོ་རྒོད་མེད། སྤྲང་བློ་ཕུག་བཅུག་པའི་རྣལ་འབྱོར་ལ། །གཅིག་ཀྱང་མེད་པས་ཕུན་སུམ་ཚོགས། །གླུ་བདེ་སྐྱིད་སྤྲོས་དགའ་ལེན་པ་དེ། །ཉམས་སྣང་བ་སྐྱོ་ཤས་ཆེ་བའི་དོན། །ཁྱེད་འདིར་བཞུགས་ཡོན་བདག་བུ་སློབ་རྣམས། །ཉམས་སྐྱིད་པའི་སྨོན་ལམ་མང་པོ་ཐོབ། །ཅེས་གསུངས་པས་ཡོན་བདག་རྣམས་དད་སྟེ། སྲོག་གཅོད་པ་སྤངས་པར་ཁས་བླངས་ཞིང་། ཁོང་རྣམས་དགེ་བསྙེན་བྱས་ཏེ་མ་ཎིའི་ལུང་ཞུས་ཤིང་། ཁ་མ་ཎི་དང་མ་བྲལ། ལག་འཕྲེང་བ་དང་མ་བྲལ་བར་བྱུང་ངོ་། །དེར་ཁོང་རྣམས་ན་རེ། བླ་མ་གཅིག་པུ་རང་ལ་མཉེས་པར་འདུག །ངེད་གྲོང་པའི་ལས་དར་བྱ་བ་ཐེབ་རེ་ཨེ་དྲན་ལགས་ཞུས་པས། དེ་ཆེན་པོ་མི་དྲན། དྲན་ན་གང་ཟུག་གསུང་ནས་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །སྤྲང་རི་ཁྲོད་ཟིན་པར་བྱིན་གྱིས་རློབས། །ངས་གནས་མི་མེད་གཅིག་པུར་བསྒོམ་བསྒོམ་ནས། །གྲོང་པའི་གཡེང་བ་བརྗེད་ནས་ཐལ། ངས་ན་མེད་སྡུག་སྒུར་བྱས་བྱས་ནས། །སྐྱིད་འདོད་ཀྱི་དགའ་བ་བརྗེད་ནས་ཐལ། །དུག་པོ་རས་གོས་གོན་གོན་ནས། འཕྱོར་རང་མཐོང་ངང་གིས་བརྗེད་ནས་ཐལ། །སྤྲང་བེར་གྱི་མགོ་བོ་བཟུང་བཟུང་ནས། །རིས་ལུག་གི་སྐྱོང་བྲན་བརྗེད་ནས་ཐལ། །ངས་མེ་ལྕགས་རྣོན་པོ་བཟུང་བཟུང་ནས། །ཁྱིམ་མཚེས་ངང་གིས་བརྗེད་ནས་ཐལ། །གཉོམ་ཆུང་འདུག་ཚུལ་མཁས་མཁས་ནས། །མི་ཆེན་གྱི་ངོ་སྲུང་བརྗེད་ནས་ཐལ། །ཚེ་ཕྱི་མའི་བདེ་སྐྱིད་བསམ་བསམ་ནས། །ཚེ་འདི་ཡི་བདེ་སྐྱིད་བརྗེད་ནས་ཐལ། །ནམ་འཆིའི་སྣང་བ་འཕྲོས་འཕྲོས་ནས། །ཞག་དང་ཟ་མ་བརྗེད་ནས་ཐལ། །ཨེ་འཆི་ལ་སྙིང་རུས་བྱས་བྱས་ནས། །ལོ་དང་ཟླ་བ་བརྗེད་ནས་ཐལ། །འཆི་དུས་ཅི་འོང་བསམ་བསམ་ནས། །ཚེ་འདིར་ཅི་འོང་བརྗེད་ནས་ཐལ། །ལར་ཚེ་འདིའི་བྱ་བཞག་རླུང་ལ་འཕྱར། །དུས་གཏན་དུ་སྐྱིད་པ་ཞེ་ལ་བཞག །འཆི་བ་མྱུར་དུ་ནམ་འོང་བསམ། འཆི་བ་བཙན་ཐབས་སུ་འགྲོ་བ་ཨེ་འགྲུབ་བསམ། །ཁྱེད་འདིར་བཞུགས་ཀྱི་ཡོན་བདག་བུ་སློབ་རྣམས། །འཆི་བ་འདི་བཞིན་སོམ་ལ་ལྷ་ཆོས་མཛོད། །ཚེ་ལ་སྡོད་ལོང་མེད་པས་མྱུར་དུ་སྒྲུབས། །ཅེས་གསུངས་པས། ཡོན་བདག་དེ་རྣམས་སྐྱོ་ཤས་ཆེན་པོ་སྐྱེས་ཏེ་ཆོས་དང་དགེ་བ་ལ་རང་གཞན་བསྐུལ་ནུས་པའི་དད་པ་ཅན་བྱུང་ནས་བྲིན་དང་སྙེ་ནམ་དུ་རྗེ་བཙུན་གྱི་སྙན་པ་བརྗོད་ནས། ཡུལ་མི་ཚོ་ཡང་དགེ་བ་ལ་བརྩོན་ཞིང་། རྗེ་བཙུན་གྱི་མཛད་སྤྱོད་ལ་ཉན་པས་མི་ཐམས་ཅད་སྣང་བ་དགའ་བའི་བདེ་སྐྱིད་དཔག་ཏུ་མེད་པ་ལ་འཇུག་ནུས་པ་འབྱུང་ངོ་། །དེ་ཐམས་ཅད་སྐྱིད་ཕུག་ཉི་མ་རྫོང་གི་སྐོར་རོ།། །།

ན་མོ་གུ་རུ། རྗེ་བཙུན་ཆེན་པོ་བྲག་སྐྱ་རྡོ་རྗེ་རྫོང་ན་བཞུགས་པའི་དུས་སུ་རི་བོང་ཞིག་གིས་ཝ་ཞིག་བཞོན་ནས། ཙི་སྤྱང་གིས་མདའ་གཞུ་ཐོགས། རི་ཤོ་ཁོག་མའི་ཕུབ་ཁུར་ནས རྗེ་བཙུན་གྱི་མདུན་དུ་ཕར་རྒྱུག་ཚུར་རྒྱུག་བྱེད་པ་དེ་གཟིགས་ནས་མགུར་འདི་གསུངས་སོ། །ང་ཕ་ལ་བུ་སྐྱེས་གྱད་ཀྱི་རིགས། །སྡར་ཝ་དོམ་ཕྱོང་ངེ་འབྲོས་མ་མྱོང་། །ང་ཕ་མྱེས་ཀྱི་ཚ་བོ་སྟག་སླག་ཅན། །སྡང་དགྲ་ལ་སྟ་ཟུར་ཤོར་མ་མྱོང་། །ང་གཅན་གཟན་རྒྱལ་པོ་སེང་གེའི་རིགས། །མཐོ་གངས་དཀར་མིན་པ་སྡོད་མ་མྱོང་། །ལྕགས་ཀྱི་གར་བུ་རྡོས་མི་ཤིགས། །ལྕགས་ཀྱི་གར་བུ་རྡོས་ཆོག་ན། །ལྕགས་ཞུན་ཐར་བྱས་པ་དོན་རེ་ཆུང་། །སེང་གེ་དཀར་མོ་ཉམས་མི་ང་། །སེང་གེ་དཀར་མོ་ཉམས་ང་ན། །སེང་རྩལ་གསུམ་རྫོགས་པ་དོན་རེ་ཆུང་། །བྱ་རྒྱལ་རྒོད་པོ་གཡང་མི་ཟ། །བྱ་རྒྱལ་རྒོད་པོ་གཡང་ཟ་ན། །རྒོད་གཤོག་དྲུག་རྒྱས་པ་དོན་རེ་ཆུང་། །ང་མི་ལ་རས་པ་འདྲེས་མི་འཇིགས། །མི་ལ་རས་པ་འདྲེས་འཇིགས་ན། །སེམས་སྟོང་ཉིད་བསྒོམ་པ་དོན་རེ་ཆུང་། །ཝ་ད་རུང་རྒྱུག་དང་མཚར་ཡང་ཆེ། །ཝ་མོའི་རྟ་ཕོ་བང་ཡང་མགྱོགས། །རི་བོང་གི་མི་ཕོ་རྩལ་རེ་ཆེ། །ཙི་སྤྱང་གི་མདའ་གཞུ་ཁ་རེ་ཚ། །རི་ཤྭའི་ཕུབ་ཆུང་གོ་རེ་བཙན། །ཨ་ན་རེ་མཚར་ལ་དགོད་རེ་བྲོ། །ཞེས་གསུངས་པས་ཝ་མོའི་རྟ་ཁ་ཡར་བསྒྱུར་ནས་མི་རྒྱུག་ཁྱོད་མི་སྐྲག་པར་འདུག་ཟེར་ཏེ་ཡར་ནས་སོང་ངོ་། །དེ་ནས་བདེ་བའི་མགུར་གསུངས་པ། འདུ་འཛི་མེད་པའི་དབེན་གནས་བདེ། ན་ཚ་མེད་པའི་སྒྱུ་ལུས་བདེ། །རྣམ་རྟོག་འཇམས་པའི་ཁ་ཟས་བདེ། །སེམས་ལ་འོད་གསལ་ཤར་བས་བདེ། །ཞེན་ཆགས་མེད་པའི་འགྲོ་འདུག་བདེ། །རླུང་གི་འགྲོ་འོང་མེད་ན་བདེ། །བདེ་ཆེན་ལུས་ལ་རྒྱས་ན་བདེ། །ལྟ་བ་གཉིས་མེད་རྟོགས་ན་བདེ། །ཞེས་གསུངས། ཕྱག་ནི་གཉིས་མེད་ཡེ་ཤེས་ཏེ། །རྒྱ་ནི་འཁོར་བའི་སྐྱོན་མ་གོས། །ཆེན་པོ་ཟུང་དུ་འཇུག་པ་སྟེ། དེ་རྟོགས་ཕྱག་རྒྱ་ཆེན་པོ་ཡིན། །ཞེས་གསུངས་སོ། །དེ་ཐམས་ཅད་བྲག་སྐྱ་རྡོ་རྗེ་རྫོང་གི་སྐོར་རོ།། །།དེ་ནས་རྗེ་བཙུན་གྱིས་བུ་སློབ་རྣམས་ལ། གནས་གཅིག་ཏུ་རང་ལོ་བར་གནས་འབྱམས་པས། རྣལ་འབྱོར་པའི་རྒྱུ་བ་དང་། བརྩོན་འགྲུས་ཀྱང་འབྱམས་འགྲོ་བ་དང་ལིང་པའི་བྲག་ལ་བསྒོམ་དུ་འགྲོ་གསུངས་པ་ལ། སློབ་མ་རྣམས་ངེད་ཚོ་ཡང་འགྲོ་ཞུས་པས། མི་མང་པོ་སོང་བས་མི་དགའ། ང་ལ་ཁམས་འདུས་ཐེབས་གསུམ་འོང་བ་ལ། ཁམས་འདུས་དང་པོ་ལ་ཕྱི་ཆུ་བཟང་དང་། བྲག་དམར་མཆོང་གླིང་དུ་འོང་བས། ད་ཡང་རི་ཁྲོད་གཉེན་པོ་ཞིག་ཏུ་འདུས་འོང་ནས་མི་དགའ་གསུངས་ནས། སློབ་མ་རྣམས་ལིང་བའི་ལུང་པ་ཞིག་ཏུ་བསྒོམ་བཅུག་ནས། ཁོང་རང་ལིང་བའི་བྲག་གསེབ་ཏུ་བསྒོམ་ཞིང་བཞུགས་པ་ལ། ནུབ་ཅིག་ཡིད་ལ་མེད་པར་ནམ་སྲོད་ཡོལ་ཙམ་ལ་བྲག་གི་སེར་ག་ནས་བཤུད་པ་ཅིག་ཙེ་རེ་རེ་བྱུང་བས། རྗེ་བཙུན་གྱིས་གཟིགས་ཙ། བྲག་གིས་ལོགས་ལ་འོད་དམར་པོ་ཁྱུག་ཁྱུག་བྱུང་བས། ལེགས་པར་གཟིགས་པ་ལ་འོད་དེའི་སྣ་ལ་མི་དམར་པོ་གཅིག་གླ་བ་ལ་ཞོན་ནས་བུད་མེད་གཅིག་གིས་སྣ་ཁྲིད་དེ་རྗེ་བཙུན་གྱི་གཡོན་སྐོར་དུ་ཀོ་རོ་རོ། ཐམས་ཅད་མགྱོགས་པར་ཤོག་ཟེར་ཞིང་མང་པོ་ཡོད་པའི་བརྡའ་བྱེད་ཅིང་འདུག་པ་ལ། རྗེ་བཙུན་གྱིས་འདི་བྲག་སྲིན་མོའི་ཆོ་འཕྲུལ་རེད་དགོངས་ནས་མགུར་འདི་གསུངས་སོ། །མི་ང་བར་ཆོད་ཐོ་འཚམས་པ། །མི་སྡུག་སྤྲུལ་པའི་གཟུགས་བརྙན་ཅན། །ཁྱོད་ལིང་བ་བྲག་གི་བྲག་སྲིན་མོ། །ལས་ངན་འདྲེ་མོ་མ་ཡིན་ནམ། །གླུ་སྙན་པའི་འགྱུར་ཁུག་ངས་མི་ཤེས། །ངག་བདེན་པའི་ཚིག་འདིར་ཁྱོད་ཀྱང་ཉོན། །ཡ་ཀི་དགུང་སྔོན་གྱི་དཀྱིལ་ཤེད་ན། །ཉི་ཟླ་ཟུང་གཅིག་གཡང་ཆགས་པ། །དེ་ངོ་མཚར་ལྷ་ཡི་གཞལ་ཡས་ཁང་། །འོད་ཟེར་སྐྱེ་འགྲོའི་དཔལ་དུ་ཤར། ལས་སུ་གླིང་བཞིའི་མུན་པ་སེལ། །གཟའ་ཁྱབ་འཇུག་དགྲ་རུ་མ་ལྡང་ཞིག །ཁྱབ་འཇུག་འདྲེ་རུ་མ་གནོད་ཅིག །ཤར་རྩེ་མཐོ་ཤེལ་གྱི་གངས་རི་ལ། །སེང་ལྕམ་དཀར་མོའི་གཡང་ཆགས་པ། །དེ་བྱོལ་སོང་ཀུན་གྱི་རྒྱལ་པོ་ཡིན། །ཆེ་རྟགས་སུ་གོད་ཀྱི་ཤ་མི་ཟ། །ཁོང་གངས་དཀར་གྱི་ཟུར་ཁ་འགྲིམ་པ་ལ། །བུ་ཡུག་དགྲ་རུ་མ་ལྡང་ཞིག །བུ་ཡུག་འདྲེ་རུ་མ་གནོད་ཅིག །ལྷོ་ནགས་མའི་གསེབ་ཀྱི་ལྡིང་ཁང་ན། །རྒྱ་སྟག་ཁྲ་བོའི་གཡང་ཆགས་པ། དེ་གཅན་གཟན་རྣམས་ཀྱི་གྱད་པ་ཡིན། དཔའ་རྟགས་སུ་རང་གི་སྲོག་མི་འཕང་། །ཁོང་དོགས་མོའི་ས་འཕྲང་འགྲིམ་པ་ལ། །ཁྱོད་ས་མདའ་དགྲ་རུ་མ་ལྡང་ཞིག །ས་མདའ་འདྲེ་རུ་མ་གནོད་ཅིག །ནུབ་མ་སང་གཡུ་མཚོ་མེར་བ་ལ། །འགྱུར་མོ་ཉ་ཡི་གཡང་ཆགས་པ། །དེ་འབྱུང་བ་ཆུ་ཡི་གར་མཁན་ཡིན། །ཡ་མཚན་གསེར་མིག་འཁྱིལ་བ་ཡོད། །ཁོང་འདོད་ཡོན་ཟས་ཀྱི་འབྲངས་པ་ལ། །ལྕགས་ཀྱུ་དགྲ་རུ་མ་ལྡང་ཞིག །ལྕགས་ཀྱུ་འདྲེ་རུ་ལ་གནོད་ཅིག །བྱང་ལིང་བའི་བྲག་དམར་བསམ་ཡས་ན། །བྱ་རྒྱལ་རྒོད་པོའི་གཡང་ཆགས་པ། །དེ་འདབ་ཆགས་བྱ་ཡི་དྲང་སྲོང་ཡིན། །ཁོང་ངོ་མཚར་གཞན་གྱི་སྲོག་མི་གཅོད། །ཁོང་རི་གསུམ་རྩེ་ལ་གཟན་འཚོལ་བ། །ཁྱོད་མགུལ་རྙི་དགྲ་རུ་མ་ལྡང་ཞིག །མགུལ་རྙི་འདྲེ་རུ་མ་གནོད་ཅིག །བྲག་རྒོད་ཚང་ཅན་གྱི་ལིང་བ་འདིར། །ང་མི་ལ་རས་པའི་གཡང་ཆགས་པ། །རྒྱུ་བྱང་ཆུབ་མཆོག་ཏུ་སེམས་བསྐྱེད་ནས། །ཚེ་གཅིག་ལུས་གཅིག་འདི་ཉིད་ལ། །རྩེ་གཅིག་སངས་རྒྱས་བསྒྲུབ་པ་ལ། །ཁྱོད་བྲག་སྲིན་མོ་དགྲ་རུ་མ་ལྡང་ཞིག །བྲག་སྲིན་མོ་འདྲེ་རུ་མ་གནོད་ཅིག །གླུ་ངོ་མཚར་དཔེ་ལྔ་དོན་དང་དྲུག །ཚིག་སྙན་དངགས་མདོ་ལུང་གསེར་ཐག་ཅན། །དོན་མཇལ་བར་གདའམ་བྲག་སྲིན་མོ། །ལས་བསགས་ཤིང་ལྗི་བ་སྡིག་པ་ཡིན། །ཁྱོད་སྡིག་ལ་ནན་ཏན་མ་ཆེ་བར། །ངན་སེམས་གདུབ་རྩུབ་ཞི་བར་མཛོད། །ཁྱོད་མ་གནོད་མ་གནོད་འདྲེ་མོ་ངན། མི་ང་ལ་མ་གནོད་ཕར་ལོག་ཅིག །ཅེས་གསུངས་པས། མི་དེས་རྗེ་བཙུན་ལ་གྲུ་ཙོག་ཅིག་བརྒྱབ་ནས་གར་སོང་ཡང་ཆ་མེད། བུད་མེད་དེ་ཁྱི་མོ་དམར་མོ་ཞིག་ཏུ་སྤྲུལ་ནས་རྗེ་བཙུན་གྱི་ཞབས་གཡས་པའི་མཐེའུ་ཆུང་ལ་འཇུས་ནས་བྱུང་བ་ལ། རྗེ་བཙུན་གྱིས་བྲག་སྲིན་མོ་ཁྱོད་སྙིང་རེ་རྗེ་ཨང་གསུངས་ནས། མགུར་ཚིགས་བཞི་མ་འདི་གསུངས་སོ། །ཨ་ཙ་མ་འབྱུང་པོ་སྙིང་རེ་རྗེ། །ལས་རེ་ངན་གདུབ་རྩུབ་ཀྱི་བསམ་པ་ལ། །ཞེ་རེ་འགྱོད་སྡིག་པའི་རྣམ་སྨིན་ལ། །བསམ་ཞིང་སྙིང་རླུང་འཁྲུགས་པའི་རྒྱུ། །ང་སྟོང་ཉིད་འབྱོངས་པའི་རྣལ་འབྱོར་ལ། །འདྲེ་ཁྱོད་ཀྱིས་གནོད་པ་མི་སྲིད་དེ། སེམས་ཅན་ལ་གནོད་པས་སྡིག་པ་ཆེ། །ལར་ཐམས་ཅད་སེམས་སུ་མ་ཤེས་ན། རྣམ་རྟོག་འདྲེ་ལ་ཟད་པ་མེད། །སེམས་འདི་སྟོང་པར་མ་ཤེས་ན། །འདྲེ་ལོག་ནས་ཡོད་སྙམ་འཁྲུལ་པ་ཡིན། །གདོན་གནོད་སྦྱིན་ཕ་མར་མ་ཤེས་ན། །རྒྱུད་ངན་པའི་འདྲེ་ལ་ཟད་མཐའ་མེད། །སེམས་སྟོང་ཉིད་བྱང་ཆུབ་ཏུ་མ་གྲོལ་ན། །འདྲེ་བརྡུང་ཞིང་བརྡུང་ཞིང་ཇེ་མང་འགྲོ། །འདྲེ་ཁྱོད་བས་སྣང་སྲིད་དགྲར་ལངས་ཀྱང་། །འཇིགས་སྣང་གི་ཁུ་འཁྲིགས་དབྱིངས་སུ་ཡལ། །རྫུན་སྣང་གི་ཟོལ་ཟོག་རླུང་ལ་ཤོར། །ང་བྱང་ཆུབ་སེམས་ཀྱི་རྫོང་ནང་ན། །ཐུགས་རྗེའི་འོད་ཟེར་ཕྱོགས་བཅུར་འཕྲོ། །བདག་གཞན་དོན་རྣམས་རྩོལ་མེད་འགྲུབ། །འདྲེ་བྱང་སེམས་བསྐྱེད་ཅིག་ལེགས་པར་སྦྱངས། །སྐལ་པ་བཟང་པོའི་ཆོས་ཤིག་མཛོད། །ཚེ་འདི་བདེ་ཕྱི་མ་ཤིན་ཏུ་སྐྱིད། དུས་རྒྱུན་དུ་བདེ་བས་གོ་བར་གྱིས། །ཞེས་གསུངས་པས། ཞབས་ལ་བཟུང་བ་དེ་ནི་མ་བཏང་བར་གཟུགས་མེད་པའི་སྐད་ལྷང་ལྷང་བ་ཞིག་བར་སྣང་ནས་འདི་སྐད་ལེན་བཏབ། འདྲེ་མོས་ཡི་དྭགས་ཀྱི་ཚིག་དབྱངས་རྟ་ལ་བསྐྱོན་པ་འདི་སྐད་དོ། །ཨེ་མ་སྐལ་ལྡན་རིགས་ཀྱི་བུ། །གཅིག་པུར་སྡོད་པའི་སྙིང་སྟོབས་ཅན། །རི་ཁྲོད་འགྲིམ་པའི་རྣལ་འབྱོར་པ། །དཀའ་བ་སྤྱད་པའི་ངོ་མཚར་ཅན། །མི་ཁྱོད་ཀྱི་གླུ་དབྱངས་རྒྱལ་པོའི་བཀའ། །རྒྱལ་པོའི་བཀའ་དེ་གསེར་ལས་ལྗི། །གསེར་ལས་རག་ཤོག་མཚུངས་སུ་ཆེ། །མཚང་དེ་ལས་སླར་ལོག་མ་ཤེས་ན། །ཁྱོད་སྔོན་ཆད་བཟླས་པ་རྫུན་དུ་ཟད། །དེ་ཡན་ཆད་རྒྱལ་པོའི་ཁྲིམས་ཀྱི་གླུ། །ད་དཔེ་ལ་དྲངས་པའི་ཚིགས་ལན་འཚལ། །ཐུགས་མ་ཡེངས་དར་ཅིག་གསན་པར་ཞུ། །ཡ་ཀི་དགུང་སྔོན་གྱི་དཀྱིལ་ཤེད་ན། །འོད་གསལ་ཉི་ཟླའི་གཡང་ཆགས་པ། །གླིང་བཞིའི་མུན་པ་སེལ་ལོ་སྐད། །ཁོང་སྣང་གསལ་བྱ་ར་མི་གཏོང་ཞིང་། །དཀྱིལ་འཁོར་འོད་ཀྱིས་མ་བསླུས་ན། །གཟའ་ཁྱབ་མཇུག་དགྲ་རུ་ཅི་ལ་ལྡང་། །ཁྱབ་མཇུག་འདྲེ་རུ་ཅི་ལ་གནོད། །ཤར་གངས་དཀར་ཤེལ་གྱི་ཟུར་ཤེད་ན། །སེང་ལྕམ་དཀར་མོ་གཡང་ཆགས་པ། །འབྲོང་བྱོལ་སོང་ཁྲིམས་ལ་གནོད་དོ་སྐད། །ཁོང་ཁྲོ་གཏུམ་ང་རྒྱལ་མི་ཆེ་ཞིང་། །གཡུ་རལ་སྔོན་མོས་མ་བསླུས་ན། །བུ་ཡུག་དགྲ་རུ་ཅི་ལ་ལྡང་། །བུ་ཡུག་འདྲེ་རུ་ཅི་ལ་གནོད། །ལྷོ་ནགས་མ་གསེབ་ཀྱི་ལྡིང་ཁང་ན། །སྟག་གུ་རི་བཀྲའི་གཡང་ཆགས་པ། །སྤྱིར་སྡེར་ཆགས་ཟིལ་གྱིས་གནོན་ནོ་སྐད། །ཁོང་ཡང་རྩལ་དྲེགས་པས་མི་བརློམ་ཞིང་། །རི་མོ་འཛུམ་གྱིས་མ་བསླུས་ན། །ས་མདའ་དགྲ་རུ་ཅི་ལ་ལྡང་། །ས་མདའ་འདྲེ་རུ་ཅི་ལ་གནོད། །ནུབ་མ་སང་གཡུ་མཚོ་མེར་བ་ལ། །འགྱུར་མོ་ལྟོ་དཀར་གཡང་ཆགས་པ། །ལྷ་དྲང་སྲོང་གཟིགས་མོ་ཆེའོ་སྐད། །ཁོང་ཁ་ཟས་དོན་དུ་མི་གཉེར་ཞིང་། །སྒྱུ་མའི་ལུས་ཀྱིས་མ་བསླུས་ན། །ལྕགས་ཀྱུ་དགྲ་རུ་ཅི་ལ་ལྡང་། །ལྕགས་ཀྱུ་འདྲེ་རུ་ཅི་ལ་གནོད། །བྱང་ལིང་པའི་བྲག་དམར་བསམ་ཡས་ན། །བྱ་རྒྱལ་རྒོད་པོའི་གཡང་ཆགས་པ། །འདབ་ཆགས་ཟིལ་གྱིས་གནོན་ཏོ་སྐད། །ཁོང་ཤ་ཁྲག་གཟན་དུ་མི་ཟ་ཞིང་། །གཤོག་དྲུག་ལྡེམ་གྱིས་མ་བསླུས་ན། མགུལ་རྙི་དགྲ་རུ་ཅི་ལ་ལྡང་། །མགུལ་རྙི་དགྲ་རུ་ཅི་ལ་གནོད། །བྲག་རྒོད་ཚང་ཅན་གྱི་ལིང་པ་ན། །ཁྱོད་མི་ལ་རས་པའི་གཡང་ཆགས་པ། །འགྲོ་དྲུག་ལམ་སྣ་འདྲེན་ནོ་སྐད། །ཁྱོད་རྣམ་རྟོག་གི་ཉེར་ལེན་མི་མང་ན། །རང་སྣང་བག་ཆགས་མི་འཁྲུལ་ཞིང་། །རང་སེམས་དགྲ་རུ་མ་ལྡང་ན། །བྲག་སྲིན་མོ་དགྲ་རུ་ཅི་ལ་ལྡང་། །ང་བྲག་སྲིན་མོ་འདྲེ་རུ་ཅི་ལ་གནོད། །བར་ཆད་བདུད་འདི་སེམས་ལས་བྱུང་། །སེམས་ཀྱི་དེ་ཉིད་མ་ཤེས་ན། །ཁྱོད་སོང་ཞིག་བྱས་ཀྱང་ང་མི་འགྲོ། །རང་སེམས་སྟོང་པར་མ་རྟོགས་ན། །འདྲེ་ང་ཡི་མི་ཚད་གཞན་ཡང་མང་། །རང་སེམས་རང་གིས་ངོ་ཤེས་ན། །མི་མཐུན་རྐྱེན་རྣམས་གྲོགས་སུ་འགྱུར། །ང་བྲག་སྲིན་མོ་ཡང་འབངས་སུ་མཆི། ལར་ཁྱོད་ཀྱི་སེམས་ལ་ཁུ་འཁྲིགས་ཡོད། །ད་རུང་ཁུ་འཁྲིགས་བདེན་རྫུན་ལྟོས། །ད་རུང་འཁོར་བའི་རྫུན་ཕུག་གཏིབ། །ད་རུང་སེམས་ཉིད་གཏན་ལ་ཕོབ། །ད་རུང་འཁྲུལ་པའི་ཕུ་ཐག་ཆོད། །ཅེས་ནམ་མཁའ་ནས་བྲག་སྲིན་མོས་དེ་སྐད་བརྗོད་པ་དང་། རྗེ་བཙུན་ཆེན་པོའི་མོ་ཡི་ཚིག་དེ་ལ་བདེན་པའི་ངེས་ཤེས་དྲག་པོ་སྐྱེས་ཏེ། དེའི་ལན་དུ་མགུར་འདི་གསུངས་སོ། །ཁྱོད་བདེན་ནོ་བདེན་ནོ་འདྲེ་མོ་བདེན། ཚིག་དེ་ལས་བདེན་པ་ཡོད་རེ་ཀན། །ངས་སྔོན་ཆད་རྒྱལ་ཁམས་འགྲིམ་འགྲིམ་ནས། །གླུ་དེ་བས་སྙན་པ་ཚོར་མ་མྱོངས། །མཁས་བཙུན་བརྒྱ་ཡིས་ཞལ་ཕྱེས་ཀྱང་། །དོན་དེ་བས་ཟབ་པ་ཡོད་རེ་ཤི། །ཕ་བླ་མའི་བཀའ་དྲིན་དངོས་སུ་ཤར། །འདྲེ་ཁྱོད་ཀྱི་ཁ་ནས་ལེགས་བཤད་བྱུང་། །ལེགས་བཤད་གསེར་གྱི་ཐུར་མ་དེ། །མི་བདག་གི་རྣམ་ཤེས་སྙིང་ལ་བརྒྱབ། །ནད་དངོས་པོར་འཛིན་པའི་སྙིང་རླུང་བཏོན། །མ་རིག་འཁྲུལ་པའི་མུན་པ་བསལ། བློ་པདྨ་དཀར་པོ་ཁ་ཕྱེས་བས། །རང་རིག་གསལ་བའི་སྒྲོན་མེ་སྦར། །དྲན་པའི་ཡེ་ཤེས་ཏུར་རེ་སད། །དྲན་པ་སད་དང་མ་སད་པ། །དགུང་སྔོན་གྱི་དབྱིངས་སུ་ཡར་བལྟས་པས། །ཆོས་ཉིད་སྟོང་པ་ཏུར་རེ་དྲན། །ད་དངོས་པོའི་ཆོས་ལ་ཉམས་ང་མེད། །ཉི་ཟླ་གཉིས་ལ་ཡར་བལྟས་པས། །སེམས་ཉིད་འོད་གསལ་ཏུར་རེ་དྲན། །ད་བྱིང་རྒོད་གཉིས་ལ་ཉམས་ང་མེད། །རི་བོའི་རྩེ་ལ་ཕར་བལྟས་པས། །འགྱུར་མེད་ཏིང་འཛིན་བརྟན་པོར་ཚུགས། ད་འཕོ་འགྱུར་གཉིས་ལ་ཉམས་ང་མེད། །ཆུ་བོའི་གཞུང་ལ་ཕར་བལྟས་པས། །ཉམས་མྱོང་ཡེ་ཤེས་རྒྱུན་ཆད་མེད། །ད་གློ་བུར་གྱི་རྣམ་རྟོག་ལ་ཉམས་ང་མེད། །འཇའ་ཚོན་རི་མོ་ཕར་བལྟས་པས། །གསལ་སྟོང་ཟུང་འཇུག་དབྱིངས་སུ་འདྲེས། །ད་རྟག་ཆད་གཉིས་ལ་ཉམས་ང་མེད། །མེ་ལོང་གཟུགས་བརྙན་མཐོང་ཙ་ན། །འཛིན་མེད་རང་ཤར་ཏུ་རེ་དྲན། །ད་གཟུང་འཛིན་གཉིས་ལ་ཉམས་ང་མེད། །རང་རིག་སེམས་ལ་ཚུར་བལྟས་ཙ། བུམ་ནང་མར་མེ་ཏ་ལེར་གསལ། །ད་གཏི་མུག་རྨོངས་ལ་ཉམས་ང་མེད། །འདྲེ་ཁྱོད་ཀྱི་ཁ་ནས་ཚིག་ཐོན་པས། །མི་ཁོ་བོའི་ཡིད་ལ་གསལ་ཏེ་ཤར། །ད་བར་ཆད་བགེགས་ལ་ཉམས་ང་མེད། །འདྲེ་མོའི་གླུ་དབྱངས་ཆོས་ཀྱི་སྒྲ། ཐོས་པས་ཁོ་བོ་སྤྲོ་བ་སྐྱེས། །ད་འདྲེ་དང་བདུད་ལ་ཉམས་ང་མེད། །ཨ་མཚར་པོ་གཏམ་སྙན་དབྱིངས་ནས་ཐོས། །བསམ་ཞིང་ཁོ་བོ་ངོ་མཚར་སྐྱེས། །ད་ཐེ་ཚོམ་གཉིས་ལ་ཉམས་ང་མེད། །ཁྱོད་ལེགས་བཤད་འདི་འདྲ་ཤེས་ཤེས་ནས། །སེམས་ཀྱི་དེ་ཉིད་གོ་གོ་ནས། །ལུས་ངན་འདྲེ་མོར་སྐྱེས་པ་ཅིའི་ལེན་ཨང་། །ལུས་ངག་སྡུག་བསྔལ་བསྒྲུབ་བསྒྲུབ་ནས། །ལས་ངན་གནོད་ཅིང་འཚེ་བར་བྱེད། །དེ་རྒྱུ་འབྲས་ཁྱད་དུ་བསད་པས་ལེན། །ད་ནི་འཁོར་བའི་ཉེས་དམིགས་སྒོམས། །སྡིག་མི་དགེ་བཅུ་པོ་གཏན་སྤོངས་ལ། །ཆོས་དགེ་བ་བཅུ་པོ་དང་དུ་ལོངས། །ང་སེང་གེ་ལྟ་བུར་ཉམས་ང་མེད། །འགྱུར་བ་མེད་པའི་རྣལ་འབྱོར་ལ། །འདྲེ་ཁྱོད་ཀྱི་དོ་ནུབ་ཐོ་འཚམས་པས། །གདོན་གནོད་སྦྱིན་ཤ་ཟ་སྤུན་ལྔ་དང་། །མིག་བསྒྱུར་སྤྲུལ་པའི་ལྷ་འདྲེ་རྣམས། །རྒྱ་པོ་བྱམས་པའི་སྟོབས་བཞིན་དུ། །སྨོན་ལམ་འབྲེལ་བས་མཚམས་སྦྱར་ནས། །བྱང་ཆུབ་སེམས་དང་ལྡན་གྱུར་ཏེ། །དུས་ཕྱི་མར་ང་ཡི་གདུལ་བྱར་ཤོག །ཅེས་གསུངས་པས། བྲག་སྲིན་མོ་དེས་ཞབས་ལ་འཇུས་པ་དེ་བཏང་ནས་རླུང་དམར་འཚུབ་མ་གཅིག་ཏུ་བྱས་ཏེ། །ཡང་ཚུར་ཇེ་ཉེ་ཇེ་ཉེ་ལ་བཏང་ཡང་སྙན་པའི་གླུ་དབྱངས་ཞུ་བའི་དོན་འགའ་ཞིག་འདི་སྐད་ཅེས་ཟེར་རོ། །ཀྱེ་མ་སྐལ་ལྡན་རྣལ་འབྱོར་པ། །བསོད་ནམས་བསགས་པས་དམ་ཆོས་སྤྱོད། །ངོ་མཚར་གཅིག་པུར་རི་ལ་བཞུགས། །ཐུགས་རྗེས་སྤྱན་རྒྱང་འགྲོ་ལ་གཟིགས། །ང་པདྨ་ཐོད་ཕྲེང་བརྒྱུད་པ་འཛིན། །དམ་ཆོས་ཚིག་གི་འཕྲེང་བ་ཉན། །ཚིག་ཐོས་པ་ཡོད་ཀྱང་ཞེ་ལ་མེད། །ད་ལྟ་རྣལ་འབྱོར་ཚོགས་ཁང་འགྲིམ། །ལས་འཕྲོ་ཅན་རྣམས་དགེ་ལ་བཀོད། །སྐལ་བ་ཅན་རྣམས་དོན་དང་སྤྲད། སེམས་བཟང་སྣང་བ་དཀར་ལགས་ཀྱང་། །ལུས་ངན་མ་སོས་ལྟོགས་ཚོར་ཆེ། །ལས་སུ་འཛམ་གླིང་གྲོང་ཁྱེར་ཉུལ། །ཟས་སུ་ཤ་དང་ཁྲག་ལ་དགའ། །མི་ཙམ་པོ་ཕལ་པའི་སེམས་ལ་འཇུག །སྨན་འཕྱོར་མོ་ཀུན་ལ་བསླུ་ཆུ་བླུད། །ཕོ་འཕྱོར་པོ་ཀུན་ལ་མཚལ་རིས་བཏབ། །མིག་གིས་ཀུན་ལ་ལྟད་མོ་བལྟ། །སེམས་ཀྱིས་རྒྱལ་ཁམས་ཞེ་ལ་གནོན། །ལུས་ཀྱིས་ཀུན་ལ་ཡེངས་རྒྱག་བྱས། །གནས་ནི་ལིང་བའི་བྲག་ལ་གནས། །དེ་ཚོ་ང་ཡི་སྤྱོད་འགྲོས་ཡིན། །ཁྱེད་ཀྱི་དྲུང་དུ་ཞུ་བ་ལགས། །ལན་གཅིག་གླུ་རུ་བླངས་པ་ཡིན། །འོ་སྐོལ་མཇལ་བའི་སྤྲོ་དགའ་ཡིན། །ད་ལྟ་མཚར་བའི་ཞུ་དོན་ཡིན། །རྗེ་བཙུན་བཞུགས་པའི་ཞབས་ཏོག་ཡིན། །ང་རང་དད་པའི་གསལ་ཚིག་ཡིན། །གླུ་དྲང་གཏམ་ཕུལ་བས་མཉེས་པར་ཤོག །ཅེས་ཟེར་བས། རྗེ་བཙུན་གྱིས་དམན་མོའི་རིགས་འདི་རྣམས་ཁ་མཁས་ཀྱང་ལག་ལེན་ལ་རེ་བ་མེད་པས། ད་རུང་དྲི་བ་ཞིག་བྱེད་དགོས་དགོང་ནས་མོའི་གླུ་ལན་དུ་མགུར་བཞེངས་པ་འདི་གསུངས་སོ། །འོ་ན་ཉོན་ཅིག་དམན་མོ་ཁྱོད། །སློབ་དཔོན་བཟང་སྟེ་སློབ་མ་ངན། །ལྷ་ཆོས་ཐོས་བསམ་མང་བྱས་ཀྱང་། །དོན་མ་གོ་ཚིག་གི་འཕྲེང་བ་བཟུང་། །ཁས་ཡག་ཡག་གཏམ་ཡང་ལག་ལེན་མེད། །ཁྲམ་གཏམ་ཁ་ཡི་སྟོང་བཤད་དེ། །རང་རྒྱུད་དྲི་མ་འདག་མི་སྲིད། །ཁྱོད་སྔོན་གྱི་བག་ཆགས་ངན་པ་དང་། །འཕྲལ་དུ་ལས་ངན་བསགས་བསགས་པས། །སྡོམ་པ་དམ་ཚིག་ཁས་བླངས་ཉམས། །དེ་ཡི་སྟོབས་ཀྱིས་དམན་མོར་སྐྱེས། །ལུས་སྡུག་བསྔལ་ཤ་ཟའི་གྲོང་ཁྱེར་རྒྱུ། །ངག་མི་བདེན་ངོ་ལྐོག་རྫུན་རྫུན་མང་། །སེམས་མི་དགེ་འགྲོ་བའི་སྲོག་ལ་གནོད། །ལུས་ངན་པའི་གཟུགས་སུ་སྐྱེས་པ་དེ། །ལས་རྒྱུ་འབྲས་ཁྱད་བསོད་ཆེས་པས་ལན། །ད་འཁོར་བའི་ཉེས་དམིགས་བསམ་ཤེས་ན། །ལས་མི་དགེ་བྱས་ཚད་བཤགས་པ་གྱིས། །དགེ་བ་བསྒྲུབ་པར་ཁ་ཡས་ལོངས། །ང་སེང་གེ་ལྟ་བུར་ཉམས་ང་མེད། །གླང་ཆེན་ལྟ་བུར་ཉམས་ང་མེད། སྨྱོན་པ་ལྟ་བུར་གཟའ་གཏད་མེད། །ང་ཡིས་ཁྱོད་ལ་བདེན་ཚིག་བརྗོད། ཁྱོད་ཀྱིས་ད་རུང་དྲང་གཏམ་སྨྲོས། །མི་ང་ལ་བར་ཆད་ཐོ་འཚམས་པས། །འདྲེ་ཁྱོད་ཀྱི་གཏན་གྱི་སོ་ནམ་རེད། །སྔོན་གནོད་སྦྱིན་ཤ་ཟ་སྤུན་ལྔ་དང་། །རྒྱལ་པོ་བྱམས་པའི་སྟོབས་བཞིན་དུ། །ཆོས་སྨོན་ལམ་འབྲེལ་བའི་སྟོབས་བཞག་ནས། །མ་འོངས་དུས་ན་རྗེས་སུ་འཛིན། །དེ་རྟོག་དཔྱོད་མཛོད་ཅིག་དམན་མོ་འཕྲུལ། །ཞེས་གསུངས་པས། བྲག་སྲིན་མོས་དྲང་པོར་གཏམ་བཤད་པའི་དོན་གྱི་གླུ་འདི་ཕུལ་ལོ། །དུས་གསུམ་སངས་རྒྱས་ཀུན་གྱི་གཙོ། །རྡོ་རྗེ་འཆང་ལ་དྲང་སྲོང་ལུས། །ངོ་མཚར་བསྟན་པའི་བདག་པོ་མཛད། །ཡ་མཚན་བྱང་ཆུབ་ཐུགས་བསྐྱེད་བཟང་། །ངེད་དམན་མོ་མིང་སྲིང་བསོད་ནམས་ཆེ། །ཁྱེད་ཀྱིས་གསུང་ཐོས་གོ་བ་སྐྱེས། །ང་དང་པོར་སློབ་དཔོན་གཉན་གྱིས་བཀས། །དམ་པའི་ལྷ་ཆོས་ཐོས་བསམ་བྱས། །བར་དུ་ལས་འཕྲོ་ངན་ལ་ཞུགས། །ཉོན་མོངས་གདུབ་རྩུབ་བསྲན་བཟོད་མེད། །ཐ་མར་ཆོས་འཁོར་དམན་མོར་སྐྱེས། །འགྲོ་བ་སེམས་ཅན་ཐམས་ཅད་ལ། །ཕན་ཡང་བཏགས་ཏེ་གནོད་ཡང་བསྐྱལ། །དུས་ན་ནིང་སོང་བའི་སྔོན་རོལ་ཏུ། །ལིང་པའི་བྲག་ལ་སྒོམ་ཆེན་ཁྱེད། །བྱོན་ནས་གཅིག་པུར་སྒྲུབ་པ་མཛད། །ང་ཡང་རེས་དགའ་རེས་མ་དགའ། །དགའ་བའི་ཕྱིར་ན་དོ་ནུབ་མཇལ། །མ་དགའི་ཕྱིར་ན་ཞབས་ལ་འཇུས། །དེ་གནོང་བའི་ཕྱིར་ན་རྗེ་ལ་བཤགས། །དུས་ད་ལྟ་དམན་མོའི་གདུག་རྩུབ་ཡང་། །ཆོས་སྙིང་ནས་བྱེད་ལ་སྡོང་གྲོགས་བྱེད། །མ་འོངས་དུས་ན་བདག་གཞན་རྣམས། །སྐུ་བདེ་ཆེན་འབྱོན་པའི་བསལ་གྲིབ་ཀྱིས། །དུག་ལྔ་ཉིན་མཚན་གདུང་བ་ལ། །ལས་ངན་འདྲེ་མོ་བསྐྱབ་ཏུ་གསོལ། ཁྱོད་ཀྱི་བཀའ་ལ་བརྟེན་ནས་སུ། །འདི་ནས་བཟུང་སྟེ་བྱང་ཆུབ་བར། །གདུག་པའི་བསམ་པ་ཀུན་ཞི་སྟེ། །རྣལ་འབྱོར་སྐྱོང་བའི་སྲུང་མ་བྱེད། །སྒྲུབ་པ་བྱེད་པའི་སྡོང་གྲོགས་བྱེད། །སྒོམ་ཆེན་ཀུན་གྱི་འབངས་མོ་བྱེད། །ཆོས་མཛད་ཀུན་གྱི་ཁ་འཛིན་བྱེད། །དམ་ཚིག་ཅན་གྱི་ལས་གྲོགས་བྱེད། །བསྟན་པ་བསྲུང་ཤིང་ཞབས་ཏོག་བྱེད། །ཅེས་སྨོན་ལམ་བཟང་པོ་བརྗོད་ཅིང་། སྒྲུབ་པ་བྱེད་པ་ཐམས་ཅད་ཀྱི་མགོན་བྱེད་ཅིང་གནོད་པ་མི་སྐྱེལ་བར་དམ་བཅས་ཤིང་དད་པར་གྱུར་ཏེ། ཡང་རྗེ་བཙུན་གྱིས་བྲག་སྲིན་མོ་རྗེས་སུ་འཛིན་པའི་མགུར་འདི་གསུངས་སོ། །ང་འཁོར་བ་སྤངས་པའི་བན་དེ་ཡིན། །བླ་མ་དམ་པའི་སྲས་བུ་ཡིན། །གདམ་ངག་རིན་ཆེན་གཏེར་མཛོད་ཡིན། དམ་ཆོས་སྙིང་ནས་སྒྲུབ་པ་ཡིན། །སྟོང་ཉིད་རྟོགས་པའི་རྣལ་འབྱོར་ཡིན། །སེམས་ཅན་རྣམས་ཀྱི་མ་རྒན་ཡིན། །སྙིང་སྟོབས་ཅན་གྱི་དཀའ་ཐུབ་ཡིན། །ཤཱཀྱ་ཐུབ་པའི་སྲོལ་འཛིན་ཡིན། །བྱང་ཆུབ་སེམས་ཀྱི་བདག་ཉིད་ཡིན། །བྱམས་པ་སྔོན་ནས་བསྒོམ་པ་ཡིན། །སྙིང་རྗེས་གདུག་པ་འདུལ་བ་ཡིན། །ལིང་པའི་བྲག་ལ་བྱོན་པ་ཡིན། །ཡེངས་བ་མེད་པར་བསྒོམས་པ་ཡིན། །ཁྱོད་དགའ་བར་སེམས་སམ་དམན་མོ་འཁྲུལ། །དགའ་བར་མ་ཚོར་ཁྱེད་ཅག་ངན། །འདྲེ་ཁྱོད་བས་ཆེ་བ་ངར་འཛིན་ཡིན། །འདྲེ་ཁྱོད་བས་མང་བ་འདུ་བྱེད་ཡིན། འདྲེ་ཁྱོད་བས་མང་བ་བསམ་ངན་ཡིན། །འདྲེ་ཁྱོད་བས་རྒོད་པ་རྣམ་རྟོག་ཡིན། །རྣམ་རྟོག་ངོ་བོ་ཆོས་ཉིད་ཡིན། །འདྲེ་ལང་ཤོར་བག་ཆགས་ངན་པ་ཡིན། །འདྲེ་འདྲེ་རུ་བཟུང་ན་སྡང་དགྲ་ཡིན། །འདྲེ་སྟོང་པར་ཤེས་ན་སོད་པ་ཡིན། །འདྲེ་ཆོས་ཉིད་དུ་གྲོལ་ན་རང་གྲོལ་ཡིན། །འདྲེ་ཕ་མར་ཤེས་ན་ཟིན་པ་ཡིན། སེམས་བྱང་ཆུབ་ཏུ་རྟོགས་ན་འདྲེ་མིང་མེད། །དེ་ཡིན་ལུགས་ཤེས་པས་ཐམས་ཅད་གྲོལ། །འདྲེ་དམན་མོའི་ཞུ་ཚིག་བརྡ་རུ་བསྟན། །མི་ཁོ་བོའི་གདུལ་བྱར་དམ་ལ་བཏགས། །དེ་དབབ་ཁྱེད་ཅག་ཚིག་བཞིན་ཉོན། །བདག་ཅག་རྡོ་རྗེ་འཛིན་པའི་བཀའ་མ་བཅག །གདམས་ངག་གཉན་པོའི་གསུང་མ་བཀྲལ། །ཐུགས་རྗེ་ཆེན་པོ་སུན་མ་ཕྱུང་། །ལུས་ངག་བསམ་པའི་བར་མ་གཅོད། །གལ་ཏེ་བབ་བཅོལ་སྤྱད་གྱུར་ན། །རྡོ་རྗེ་དམྱལ་བར་འགྲོ་བར་ངེས། །དོ་གལ་ཆེ་བས་ལེན་གསུམ་གདབ། །དེ་གོ་བར་གྱིས་ལ་ལག་ལེན་མཛོད། །འོ་སྐོལ་སྨོན་ལམ་བཟང་པོས་འཕྲད། །མ་འོངས་ཚེ་ན་བདེ་ཆེན་ཞིང་། །རབ་འབྱམས་བསམ་གྱིས་མི་ཁྱབ་པར། །ཁྱོད་བྱང་ཆུབ་སེམས་དང་ལྡན་པར་གྱིས། །བྱང་ཆུབ་སེམས་དང་ཁྱོད་ལྡན་ན། །གདུལ་བྱ་འཁོར་གྱི་དང་པོར་སྐྱེ། །རྡོ་རྗེ་སེམས་དཔའི་བུད་མེད་བྱ། །ཞེས་གསུངས་ཏེ་དམ་ལ་བཏགས་པས། བྲག་སྲིན་མོས་ཀྱང་བདེན་པར་སྨྲ་ཞིང་སྨོན་ལམ་བཏབ། བླ་མས་ཀྱང་བཀའ་བསྐྱོན་ཞིང་ཆོས་བཤད་པས་བྲག་སྲིན་མོ་ཡང་དད་པར་གྱུར་ཏོ། །ཕྱག་དང་སྐོར་བ་བྱེད་ཅིང་ཡོད་པ་ལ། བླ་མ་ཐང་ཆད་པའི་སྣ ང་བ་འདྲ་བ་ཞིག་བྱུང་བ་ལ། གཉིད་ཡིན་ནམ་མ་ཡིན་པའི་སྣང་བ་ཞིག་བྱུང་བ་ཐུན་ཆུང་བ་གཅིག་ལ་སོང་ཙ། ནམ་ཡང་ལངས་ནས་བྱུང་། དེ་ནས་ཉི་མ་རྩེ་ཤར་ལ་བྲག་སྲིན་མོ་ནི་སྔར་གྱི་འདྲེ་གཟུགས་མེད་པར་ལྷ་མོ་ཡིད་དུ་འོང་བ་དཔོན་གཡོག་ལྔ་བྱས་ནས། འབྲས་དང་། ལ་ཕུད་དང་། ས་ལུ་དང་། གོར་བ། བུ་རམ། སྦྲང་། ཤིང་མངར། རྒུན་འབྲུམ། ཁམ་བུ་ལ་སོགས་པའི་དཀར་གསུམ་མངར་གསུམ་གྱི་ཟས་སྣ་བརྒྱ་རྩ་བརྒྱད་བཤམས་ནས། བར་སྣང་གི་དབྱིངས་ན་སྨན་བཙུན་ལྔ་པོ་དེ་མགྲིན་ཅིག་ཏུ་བསྡེབས་ནས། ཆོས་ངེས་པའི་དོན་ཞུ་བའི་མཆོད་དབྱངས་འདི་ཕུལ་ལོ། །ཨེ་མ་ཡ་རབ་མཛངས་ཀྱི་བུ། །བསོད་ནམས་བསགས་པའི་སྐལ་པ་ཅན། །བླ་མ་བཟང་པོས་བྱིན་བརླབས་ཅན། །སྒྲུབ་པ་བྱེད་པའི་སྙིང་རུས་ཅན། གཅིག་པུར་སྡོད་པའི་སྙིང་སྟོབས་ཅན། །ཟབ་མོ་གནད་ཀྱི་སྒྲུབ་པར་བརྩོན། །འདྲེ་བར་ཆོད་ཡོད་པར་མི་སྲིད་ཀྱང་། །ནང་རྩ་རླུང་རྟགས་ཀྱི་རྟེན་འབྲེལ་ལ། །སྒྱུ་མ་གར་གྱི་དོན་སྟོན་པ། །ངེད་ཅག་ཁྱེད་ཀྱི་སེམས་དང་བསྡོང་། །སྔོན་ཆད་ཤ་ཟ་སྤུན་སྔ་ལ། །དེང་སང་སྨན་མོ་སྤུན་ལྔ་བསྟན། །མ་འོངས་ཚེ་རིང་སྤུན་ལྔ་ལ། །སྨོན་ལམ་འབྲེལ་བའི་མངོན་ཤེས་ཤར། །སྔོན་ཆད་གྲུ་ཐོབ་མང་མཇལ་ཡང་། །བཀའ་དྲིན་བྱིན་རླབས་རྗེ་ལས་ཐོབ། ད་སྨན་བཙུན་ལྔ་ཡིས་ཞུ་འཕུལ་བ། །ཆོས་དྲང་དོན་ཐེག་ཆུང་མགོ་བསྐོར་འདི། །ལས་ཉོན་མོངས་ཐུལ་བར་དཀའ་བར་གདའ། །ཁ་བཤད་སྟོང་པའི་འཁྱོར་མགྲོན་དེས། །རྐྱེན་སྡུག་བསྔལ་བྱུང་ན་འབྲོས་པར་ངེས། །མི་ཆོས་དྲེད་དུ་སོང་བའི་སློབ་དཔོན་དེ། །རང་འདོད་པ་མ་གྲུབ་ཁྲོ་བར་འདུག །རྗེ་དུས་གསུམ་སངས་རྒྱས་སྤྲུལ་པའི་སྐུ། །ངེས་པ་དོན་གྱི་དོན་རྟོགས་པ། །ཐུགས་ལས་འཁྲུངས་པའི་ཟབ་མོའི་དོན། །གནད་ལ་དྲིལ་བའི་མན་ངག་དབྱངས། །ངེས་དོན་མཐར་ཐུག་སྐྱེལ་སོ་དེ། །བདག་ཅག་མིང་སྲིང་བྱམས་པའི་སྤུན། །འཁོར་དང་སློབ་མར་མཆིས་པ་ལ། །རྡོ་རྗེའི་གསང་ཚིག་དམ་པའི་དོན། །ཡེ་ཤེས་ཆེན་པོའི་འོད་གསལ་བ། །མཆོག་གི་དོན་གསལ་གནང་དུ་གསོལ། །ངེས་དོན་ཟབ་མོ་གསང་བའི་རྒྱ། །ཐོས་པས་ངན་སོང་ལྟུང་མི་སྲིད། །བསྒོམ་པས་འཁོར་བར་འཁྱམས་མི་སྲིད། །སྦ་སྲི་མེད་པར་གནང་བར་ཞུ། །ཞེས་ཞུས་པས། རྗེ་བཙུན་གྱིས། ད་རུང་ཁྱེད་ཚོས་ངེས་དོན་བསྒོམ་མི་ནུས། གལ་ཏེ་ནུས་ན་དམ་བཅའ་དྲག་པོ་དགོས་གསུངས་པས། འགྱུར་བ་མེད་པའི་སྲོག་སྙིང་ཐམས་ཅད་ཕུལ་ནས། ད་ཕྱིན་ཆད་ཆོས་མཛད་ཐམས་ཅད་ལ་སྡོང་གྲོགས་བྱེད་པར་དམ་བཅས་པས། རྗེ་བཙུན་གྱིས་ངེས་པའི་དོན་གྱི་ཉམས་དབྱངས་ཐེམ་པ་ཉི་ཤུ་རྩ་བརྒྱད་དུ་གྱུར་པ་འདི་མགུར་དུ་གསུངས་སོ། །རྗེ་སྦས་པའི་སངས་རྒྱས་མི་གཟུགས་ཅན། །མཚན་བརྗོད་པར་དཀའ་བའི་ལོ་ཙྭ་བ། །ཕ་སྐུ་དྲིན་ཅན་གྱི་ཞབས་ལ་འདུད། །ང་རིག་བྱེད་གླུ་མཁན་མ་ཡིན་ཏེ། །འདྲེ་ཁྱོད་ཀྱིས་གླུ་ལོངས་གླུ་ལོངས་ཟེར། །ད་རེས་གནས་ལུགས་དབྱངས་ཤིག་ལེན། །འབྲུག་དང་གློག་དང་ལྷོ་སྤྲིན་གསུམ། །བྱུང་ཡང་ནམ་མཁའ་རང་ལས་བྱུང་། །ཐིམ་ཡང་ནམ་མཁའ་རང་ལ་ཐིམ། །འཇའ་དང་ན་བུན་ཁུ་རླངས་གསུམ། །བྱུང་ཡང་བར་སྣང་རང་ལས་བྱུང་། །ཐིམ་ཡང་བར་སྣང་རང་ལ་ཐིམ། །རྩི་བཅུད་ལོ་ཏོག་འབྲས་བུ་གསུམ། །བྱུང་ཡང་ས་གཞི་རང་ལས་བྱུང་། །ཐིམ་ཡང་ས་གཞི་རང་ལ་ཐིམ། །ནགས་ཚལ་དང་མེ་ཏོག་ལོ་འདབ་གསུམ། །བྱུང་ཡང་རི་བོ་རང་ལས་བྱུང་། །ཐིམ་ཡང་རི་བོ་རང་ལ་ཐིམ། །ཆུ་རླངས་ཆུ་ལྦུ་ཆུ་རླབས་གསུམ། །བྱུང་ཡང་ཆུ་བོ་རང་ལས་བྱུང་། །ཐིམ་ཡང་ཆུ་བོ་རང་ལ་ཐིམ། བག་ཆགས་འཛིན་ཆགས་ཞེན་ཆགས་སུམ། །བྱུང་ཡང་ཀུན་གཞི་རང་ལས་བྱུང་། །ཐིམ་ཡང་ཀུན་གཞི་རང་ལ་ཐིམ། རང་རིག་རང་གསལ་རང་གྲོལ་གསུམ། །བྱུང་ཡང་སེམས་ཉིད་རང་ལས་བྱུང་། །ཐིམ་ཡང་སེམས་ཉིད་རང་ལ་ཐིམ། །སྐྱེ་མེད་འགག་མེད་བརྗོད་མེད་གསུམ། །བྱུང་ཡང་ཆོས་ཉིད་རང་ལས་བྱུང་། །ཐིམ་ཡང་ཆོས་ཉིད་རང་ལ་ཐིམ། །འདྲེར་སྣང་འདྲེར་འཛིན་འདྲེར་རྟོག་གསུམ། བྱུང་ཡང་རྣལ་འབྱོར་རང་ལས་བྱུང་། །ཐིམ་ཡང་རྣལ་འབྱོར་རང་ལ་ཐིམ། ལར་བགེགས་རྣམས་སེམས་ཀྱི་འཁྲུལ་པ་སྟེ། །རང་སྣང་སྟོང་པར་མ་རྟོགས་ན། །འདྲེ་རང་རྒྱུད་དུ་འཛིན་ན་སྒོམ་ཆེན་འཁུལ། །ལར་འཁྲུལ་པའི་རྩ་བ་སེམས་ལས་བྱུང་། སེམས་ཉིད་ངོ་བོ་རྟོགས་པ་ལ། །འོད་གསལ་འགྲོ་འོང་མེད་པར་མཐོང་། །ཕྱི་ཡུལ་དུ་སྣང་བ་འཁྲུལ་པའི་སེམས། །སྣང་བའི་མཚན་ཉིད་རྟོགས་པ་ལ། །སྣང་སྟོང་སྐྱེ་བ་མེད་པར་རྟོགས། །ལར་སྒོམ་པ་ཉིད་ཀྱང་རྟོགས་པ་ལ། །མི་བསྒོམ་པ་ཡང་རྟོགས་པ་སྟེ། །བསྒོམ་དང་མི་བསྒོམ་གཉིས་སུ་མེད། །གཉིས་འཛིན་གྱིས་ལྟ་བ་འཁྲུལ་པའི་གཞི། །མཐར་ཐུག་དོན་ལ་ལྟ་རྒྱུ་མེད། །འདི་ཀུན་སེམས་ཀྱི་མཚན་ཉིད་སྟེ། །རང་སེམས་ལ་ཡང་མཚན་ཉིད་མེད། །ནམ་མཁའི་མཚན་ཉིད་དཔེར་བཞག་ན། །ནམ་མཁའ་ལ་ཡང་མཚན་ཉིད་མེད། །མཚན་ཉིད་མེད་པ་བསྒོམ་བསྒོམ་ནས། ཆོས་ཉིད་གཏན་ལ་འབེབས་པར་བྱེད། །ཆོས་ཉིད་ལ་ཡང་མཚན་ཉིད་མེད། །མཐར་ཐུག་དོན་ལ་དགག་བསྒྲུབས་མེད། །ཡང་དག་དོན་ལ་བསམ་རྒྱུ་མེད། །བསམ་རྒྱུ་མེད་པར་བསྒོམ་ཤེས་ན། །ཉོན་མོངས་དྲི་ཟད་བདར་ཟད་ཡིན། །བསམ་བློ་མང་པོ་སྐྱེས་ཕྱིན་ཆད། །ཇི་ལྟར་བསྒོམ་ཡང་གྲོལ་མི་འགྱུར། །བསམ་མེད་རྟོག་པ་ཟད་པ་ན། །སྡིག་པ་ལས་ངན་ཟད་པ་ཡིན། །ལས་ངན་རྟོག་པ་མ་སྐྱེས་པར། །སྐྱེ་མེད་ངང་དུ་སྒོམ་ཟུག་ན། །འཁོར་བ་རྫུན་གྱི་ཟོལ་རིས་ཡལ། ལར་ལྟ་རྒྱུ་མེད་པའི་དོན་ལ་ལྟོས། །ཡེངས་བ་མེད་པའི་ངང་དུ་བསྒོམ། སྤྱོད་པ་གང་བྱུང་ངེས་མེད་སྤྱོད། །འབྲས་བུ་རེ་དོགས་ཐ་སྙད་སྤངས། །འདྲེ་ཁྱོད་ཀྱི་དམ་ཆོས་དེ་ལ་མཛོད། །ངས་སྟོང་འབྱམས་གླུ་རེ་ལེན་མི་ཁོམ། ཁྱོད་འདྲི་རྒྱུ་མ་མང་ཁ་རོག་སྡོད། །ཁྱོད་ལོངས་ཤིག་ཟེར་བས་བླངས་པ་ཡིན། །ད་ལྟ་ཁོ་བོའི་སྨྱོ་ཚིག་ཡིན། །ད་ཁྱོད་ནི་ཁ་རོག་སྡོད་ཟུག་ན། །ཟས་སུ་བདེ་ཆེན་ཟན་ལ་ཟོ། །སྐོམ་དུ་ཟག་མེད་བདུད་རྩི་འཐུང་། །ལས་སུ་རྣལ་འབྱོར་སྡོང་གྲོགས་མཛོད། །ཅེས་གསུངས་པས། བྲག་སྲིན་མོ་ལ་སོགས་པ་དད་པར་གྱུར་པས་ཕྱག་དང་བསྐོར་བ་མང་དུ་བྱས་ནས་འཇའ་ཡལ་བ་བཞིན་དུ་སོང་ངོ་། །དེ་ཕྱིན་ཆད་ལ་བྲག་དགོན་པ་དེ་ལ་སུ་བསྡད་བསྡད་ལ། གནོད་པ་མེད་ཅིང་སྡོང་གྲོགས་བྱེད་དོ། །གུང་ཐང་ལིང་པའི་བྲག་དེ་ལ་མི་ལ་རས་པ་དང་བྲག་སྲིན་མོ་གཉིས་ཀྱི་ཞུ་བ་ཞུས་ལེན་ལིང་བའི་སྐོར་ཏེ་སྐོར་ཆེ་བའོ།། །།