དྲིན་ལན་བསབ་པའི་ཡོན་ཏན།
དེ་ནས་བཅུ་པ་དྲིན་ལན་བསབ་པའི་ཡོན་ཏན་ནི། སྤོ་རི་སྤོ་མཐོ་ནམ་མཁའ་རྫོང་དུ་བཞུགས་པའི་དུས་སུ་སྙེ་ནམ་ན་བོན་པོ་ཞིག་ཡོད་པ་དེ་ཡི་རྗེ་བཙུན་འདི་འདོད་པ་ལ་བློ་ལོག་པ་ཞིག་འདུག་ཟེར་ནས། ཁོང་རང་གི་སློབ་མས་མ་ཚོར་བར་བསྙེན་བཀུར་དུམ་པ་རེ་ཡང་བྱས། གདམས་ངག་རྣམས་ཀྱང་ལྐོག་ཏུ་ཞུས་པའི་བོན་པོ་དེ་ནད་ཀྱིས་ཟིན་པས་ཤི་བར་ཉེ་བ་ན་ཁོའི་བླ་མ་རྣམས་ཀྱིས་ཁ་ཆེམས་འཇོག་དགོས་ཟེར་བས། བོན་པོ་ན་རེ། ང་ཡི་ཁ་ལ་ཉན་པའི་ལབ་གཏོང་མཁན་ཡོད་ན་ང་ལ་ལབ་རྒྱུ་ཡོད་ཟེར་བས། ཅི་ཡོད་ན་བསམ་པས་ཐམས་ཅད་ཀྱི་མནའ་བྱས་པས། དེ་ན་ང་ཡི་བུ་མོ་ཡང་བོས་ཟེར་བས་བུ་མོ་བོས་པས། ཨ་མས་ཅི་བྱེད་ཟེར་བས། བུ་མོ་དཔང་པོར་བཞག་ནས་ཁ་ཆེམས་སུ་བཞག་སྟེ། ད་འོ་སྐོལ་བོན་པོ་ཟེར་ལེ་འདི་ནོར་ནས་འདུག །འདི་གཞི་འཆུག་སྟེ་ཧ་རེ་ལོང་། ལམ་ནོར་ཏེ་མི་དགེ་བ་ལ་མི་འཛེམ། འབྲས་བུ་ནོར་ཏེ་འཇིག་རྟེན་པའི་ཆེན་པོ་ཞིག་ལས་མི་སྐྱེ། སྐྱབས་ལོག་སྟེ་མི་མ་ཡིན་ལ་གསོལ་བ་འདེབས། སེམས་བསྐྱེད་ཉེས་ཏེ་ལགས་རྟགས་ཁུར་ཞིང་བུ་སྨད་གསོ་བ་ཞིག་ལ་མ་བྱུང་བར་འདུག །ད་ང་ཡི་ནོར་སྐལ་དེ་རྗེ་བཙུན་དཔོན་སློབ་ལ་ཕུལ་ལ། བདུན་ཚིག་གཅིག་ཞུ། དེ་མ་བྱས་ན་ང་ཁྱེད་ཚོས་བསད་པ་དང་འདྲ་ཟེར་བས། ཁོས་ཟེར་བ་བཞིན་བྱས་པ་ན། བདུན་ཚིག་གི་ནུབ་མོ་མཚན་བྱང་ཞིག་བྱས་པ་ལ། རྗེ་བཙུན་གྱིས་བོན་པོའི་རྣམ་ཤེས་མངོན་དུ་བཀུག་ནས་སྔར་ཅི་ཡོད་པ་བཞིན་དབང་པོ་སྐྱེ་མཆེད་དང་སང་ངེ་བྱས་ཏེ། རྗེ་བཙུན་དཔོན་སློབ་ཀྱིས་མཚན་བྱང་དེ་ལ་ལམ་བསྟན་སྒྲིབ་སྦྱོང་གི་ཚུལ་དུ་མགུར་འདི་གསུངས་སོ། །རྗེ་བཀའ་བརྒྱུད་ཀྱི་བྱིན་བརླབས་རྒྱབ་དཔུང་བཟང་། །རིགས་བརྒྱུད་མཁའ་འགྲོའི་དངོས་གྲུབ་ཐོབ། །ཆོས་བརྒྱུད་མ་ནོར་བུ་སློབ་རྣམས། །ལས་ངན་རྣམ་སྨིན་སྦྱོང་པ་ལ། །རང་རྒྱུད་ལ་སྡོམ་པ་ཡོད་པ་དགོས། །ཡོན་བདག་གི་བླ་མཆོད་བྱེད་པ་ལ། །སྙིང་རྗེ་དང་བྱམས་སེམས་རྒྱས་པ་དགོས། །མང་པོའི་ཚོགས་དཔོན་བྱེད་པ་ལ། །ཡོན་ཏན་དང་རྟོགས་པ་ལྡན་པ་དགོས། །གྲུབ་ཐོབ་ཀྱི་བླ་མ་བརྟེན་པ་ལ། །དག་སྣང་སྙིང་རུས་ཆེ་བ་དགོས། །གཤིན་པོའི་ཟ་མ་ཟ་བ་ལ། །མཐོང་ལམ་གྱི་ཡོན་ཏན་སྐྱེ་བ་དགོས། །ཚེ་འདས་ཀྱི་རྣམ་ཤེས་འདྲེན་པ་ལ། །མངོན་ཤེས་དང་གྲུབ་རྟགས་ཐོན་པ་དགོས། །དད་ལོག་གི་སྣང་བ་བསྒྱུར་བ་ལ། །རྫུ་འཕྲུལ་གྱི་སྤྲུལ་པ་ནུས་པ་དགོས། །དེ་རིང་བདུན་ཚིག་ཀྱི་དཀྱིལ་འཁོར་ལ། །མངོན་ཤེས་ལམ་སྣ་ཟིན་པ་དགོས། །བོན་པོའི་ཡོན་བདག་བུ་སློབ་རྣམས། །སེམས་ལ་ཐེ་ཚོམ་མ་བྱེད་ཅིག །ཅེས་གསུངས་པས། འཇའ་འོད་ཀྱི་གུར་ཕུབ། མེ་ཏོག་གི་ཆར་བབས། མཚན་བྱང་ནི་འོད་ཀོར་ཀོར་དུ་ནམ་མཁའ་ལ་ཀྱི་ལི་ལི་སོང་བས། དེ་རྣམས་བོན་པོའི་བུ་སློབ་རྣམས་ཀྱིས་མཐོང་བ་ལ། ནམ་མཁའ་ནས་སྒྲ་ཞིག་བྱུང་སྟེ་རྗེ་བཙུན་ང་ལ་སྐུ་དྲིན་ཆེ། ཁྱེད་མིན་ན་ང་ལ་ཐར་པའི་སྐབས་མི་འདུག་ཟེར་བ་ཐམས་ཅད་ཀྱི་ཚོར་བས་དེ་རིང་དེ་ཀ་ཡིན། ངོ་མཚར་རང་ཆེ་ཟེར་བས་དེའི་ལན་དུ་མགུར་འདི་གསུངས་སོ། །རྗེ་ངོ་མཚར་བླ་མའི་བྱིན་བརླབས་ཞུགས། །ངོ་མཚར་མར་པའི་ཞབས་ལ་གསོལ་བ་འདེབས། །བཀའ་དྲིན་མོས་གུས་ཀྱི་འཁོར་བར་ཐུགས་རྗེས་ཟུངས། །ང་དང་པོ་རྗེ་དང་མཇལ་བ་དེ། །ངོ་མཚར་ཡོངས་ཀྱིས་ཆེ་ཤོས་ཡིན། །གདམས་ངག་སྙན་བརྒྱུད་ཐོབ་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །འཇིག་རྟེན་བྱ་བ་བཏང་བ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །རི་ཁྲོད་དབེན་པར་ཟུག་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །ནང་ནས་ཉམས་རྟོགས་སྐྱེས་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །གཅིག་པུར་སྡུག་བསྲན་བྱས་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །ཆོས་བརྒྱད་འདུན་མ་མེད་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །བླ་མ་མཉེས་པར་འགྲུབ་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །བོན་པོས་ཁ་ཆེམས་འཇོག་པ་དེ། །ངོ་མཚར་ཡོངས་ཀྱི་ཆེ་ཤོས་ཡིན། །བུ་སློབ་ཁ་ལ་ཉན་པ་དེ། །ངོ་མཚར་ཡོངས་ཀྱིས་ཆེ་ཤོས་ཡིན། །མཚན་བྱང་འཇའ་ཚོན་གུར་ཕུབ་དེ། ། ངོ་མཚར་ཡོངས་ཀྱིས་ཆེ་ཤོས་ཡིན། །འདིར་ཚོགས་དད་པ་སྐྱེས་པ་དེ། །ངོ་མཚར་ཡོངས་ཀྱིས་ཆེ་ཤོས་ཡིན། །ཞེས་གསུངས་པས། སྲིང་མོ་པེ་ཏ་མ་དེར་ཡོད་པས་མཆི་མ་ཁྲལ་ལེ་བྱུང་ནས། ཁྱེད་ཀྱིས་མི་གཞན་ལ་འདི་འདྲའི་ནུས་པ་སྟོན་རྒྱུ་འདུག །རང་རེ་གཉིས་ཀྱི་ཕ་མའི་ཤི་ལུགས་ཟེར་ཞིང་ངུས་པས། བླ་མའི་ཞལ་ནས་ངུ་མི་དགོས་ངས་ཕ་མ་གཉིས་དྲངས་ཚར་གསུངས་པས། དེ་ཇི་ལྟར་ང་ལ་བཤད་པར་ཞུ་ཟེར་བའི་ལན་དུ་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །ཕ་མའི་དྲིན་ལེན་འཁོར་བར་ཐུགས་རྗེས་ཟུངས། །ངས་ཨ་མ་ལུས་ཀྱི་སྒྲོམ་བུ་ལ། །ཕ་མས་དྲིན་གྱི་རྒྱལ་པོ་ལ། །སྒྱུ་མའི་ལུས་ཤིག་འདོར་དུས་ན། །རྣམ་ཤེས་རང་གི་སེམས་ལ་བསྲེ། །སེམས་ཉིད་རྒྱལ་བའི་ཐུགས་ལ་བསྟིམས། །ཐུགས་རྗེས་འཇའ་འོད་ཞིང་ཁམས་ཤར། །ལུས་སྟོང་ལྷའི་སྐུ་ལ་བསྟིམས། །ལྷ་རང་བྱུང་གྲུབ་པ་ངོ་མཚར་ཆེ། །ངག་གྲགས་སྟོང་བརྗོད་མེད་སྔགས་སུ་འདྲེས། །སྔགས་རང་སྒྲ་སྣང་བ་ངོ་མཚར་ཆེ། །སེམས་འཁྱམས་པོ་ཏིང་ངེ་འཛིན་གྱིས་བཀུག །གསལ་སྟོང་རིག་པ་རང་ངོ་ཤེས། །སེམས་རང་ས་ཟིན་པས་འཁྲུལ་པ་མེད། །འཕོ་འགྱུར་མེད་པས་ངོ་མཚར་ཆེ། །མི་བདག་གི་སྒྲུབ་པ་བྱེད་པའི་རིང་། །བྱམས་དང་སྙིང་རྗེའི་དྲག་སྔགས་དེས། །ཉིན་མེད་མཚན་མེད་སྡིག་སྒྲིབ་སྦྱངས། །རིགས་དྲུག་འཁོར་བའི་སྐྱེ་སྒོ་གཅོད། །གཙང་ཞིང་དག་པའི་ཞིང་ཁམས་སུ། །བདེ་ཞིང་དག་པའི་ཚོགས་ལ་བསྒྲིགས། །དགའ་ཞིང་མཉེས་པའི་ལོངས་སྤྱོད་འཕེལ། །བདེ་བ་ཅན་གྱི་ཞིང་ཁམས་སུ། །དཔའ་བོ་དཔའ་མོའི་འཁོར་གྱིས་བསྐོར། །ཁྱོད་སེམས་ཆུང་མི་དགོས་པེ་ཏ་མ། །ཞེས་གསུངས་ཏེ་མོ་ཡང་མདངས་སལ་ཏེ་བྱུང་ནས། ལགས་དེ་ནི་མཚར་ཟིན། ཁྱེད་ཀྱི་དཀྱིལ་འཁོར་དང་མཚན་བྱང་དང་། ཚ་ཚ་ལ་སོགས་པ་ཨེ་མཛད་ཟེར་བའི་ལན་དུ་མགུར་འདི་གསུངས་སོ། །འགྲོ་བའི་མགོན་ལ་གསོལ་བ་འདེབས། །ཕ་མའི་དྲིན་ལེན་འཁོར་བར་བྱིན་གྱིས་རློབས། །སེམས་ཅན་ཐམས་ཅད་དྲངས་པ་ཐུགས་རྗེས་ཟུངས། །ངས་བདེན་གཉིས་དབྱེར་མེད་དཀྱིལ་འཁོར་དུ། །རང་རིག་གསལ་བའི་ལྷ་ཚོགས་བཀོད། །རྒྱུད་ལུང་མན་ངག་བུམ་པ་ལ། །ཕ་རོལ་ཕྱིན་དྲུག་ཁྲུས་ཆབ་བླུགས། །སེར་སྣ་དུག་ལྔའི་སྒྲིབ་པ་སྦྱངས། །བཀའ་བརྒྱུད་བླ་མའི་བདུད་རྩི་ཡིས། །ལུས་ངག་སེམས་ལ་དབང་བཅུ་བསྐུར། །རྟོགས་པ་ལམ་གྱི་རིམ་པ་དེས། །དབྱེར་མེད་བདེ་བ་ཆེན་པོར་བསྟན། །སྐུ་གསུམ་དབྱེར་མེད་ཚ་ཚ་བཏབ། །ཟག་པ་མེད་པའི་བདུན་ཚིགས་བསྐྱངས། །རྗེས་ཤེས་ཟབ་མོའི་དུས་དྲན་ལ། །གཉེན་པོ་བཟང་པོའི་མཆོད་པ་འབུལ། །ཕྱག་རྒྱ་ཆེན་པོའི་བསྔོ་བ་ལ། །རང་བཞིན་རྣམ་དག་སྨོན་ལམ་འདེབས། །བདག་དང་ཕ་མ་སེམས་ཅན་གྱིས། །བསམ་པ་ཐམས་ཅད་གཅིག་ཏུ་བསྒྲུབས། །བླ་མའི་བཀའ་དྲིན་དྲན་པ་ལ། །ཕ་མའི་དྲིན་ལེན་འཁོར་བ་ཡིན། །ཡང་གསུངས་པ། ལུས་ཀྱི་ཤིང་དེར་སྤྲེའུའི་སེམས། །འདྲེས་མེད་བཤེས་མེད་རྒྱལ་ཁམས་སུ། །གཅིག་པུ་གཉིས་མེད་འཁྱམས་གྱུར་པས། །སྒྱུ་མ་ལུས་ཀྱི་ཧོམ་ཁུང་དུ། །འགྲོ་དྲུག་ས་བོན་བུད་ཤིང་དེར། །སྐྱེ་བ་མེད་པའི་བྱང་བུ་བཙུགས། །རོ་ནི་གསལ་སྟོང་དག་དུ་སྦྱངས། །བདུན་ཚིགས་སྣང་སྟོང་གཉིས་སུ་བྱས། །ཚ་ཚ་སྐྱེ་བ་མེད་པར་བཏབ། །ཟས་ནི་བདེ་བ་ཆེན་པོ་གཏད། །ལམ་ནི་གཉིས་སུ་མེད་པར་བསྟན། །བསྔོ་བ་ཕྱག་རྒྱ་ཆེན་པོའི་བྱས། །སྨོན་ལམ་བྱང་ཆུབ་སེམས་སུ་བཏབ། །ཕ་མའི་དྲིན་ལེན་འཁོར་ཏེ་མཆི། །ཞེས་གསུངས་པས་མོ་ཤིན་ཏུ་དགའ་སྟེ། ཨ་ལ་ལ་ཚད་མི་འདུག །ད་ང་ཡང་འདྲེན་པར་ཞུ་ཟེར་ཞིང་རྩོལ་མེད་ཀྱི་ཕྱག་མང་པོ་འཚལ་བའི་ངག་ཏུ་བརྒྱལ་ནས་སོང་སྟེ། དྲན་པ་རྙེད་པ་དང་། སྔར་དང་མི་འདྲ་བའི་ཆོས་སྣ་ཆེན་པོ་ཞིག་བྱུང་བ་ལ། རྗེ་བཙུན་གྱིས་ཁྱོད་ཀྱི་ཆོས་བྱེད་ན་བསྒོམ་ཨེ་ནུས་གསུངས་པས། སྒོམ་ཆེན་འདི་ཙམ་ཡོད་པས་བསྒོམ་ནུས་ན། ངས་བསྒོམ་མི་ནུས་པ་ཅི་ཡིན་ཟེར་ནས་ངེས་ཤེས་དང་དད་པ་མོས་པ་རང་དབང་མེད་པར་སྐྱེས་པས། རྗེ་བཙུན་གྱིས་མོའི་སེམས་ལ་ཨེ་ཕན་གྱིས་མགུར་འདི་གསུངས་སོ། །རྗེ་ལྷོ་བྲག་མར་པའི་ཞབས་ལ་འདུད། །གཉེན་ལ་གདུང་སེམས་ཞི་བར་བྱིན་གྱིས་རློབས། །ཆོས་དང་སེམས་རྒྱུད་འདྲེས་པར་ཐུགས་རྗེས་ཟུངས། །གསོན་དང་སྲིང་མོ་པེ་ཏ་མ། །ཁྱོད་གཞོན་དུས་སྙིང་རུས་མ་བྱས་ན། །རྒས་ཙ་བྱེད་བསམ་ཅི་ལ་ཕན། །བླ་མ་རྗེ་བཙུན་མ་བསྟེན་པའི། གྲོགས་བཟང་བླ་མས་ཅི་ལ་ཕན། །གདམས་ངག་སྙན་བརྒྱུད་མི་བསྒོམ་པའི། །ཁ་བཤད་སྐམ་པོའི་ཅི་ལ་ཕན། །རང་སེམས་ངོ་མ་ཤེས་པ་ཡི། །མང་པོ་བསླབ་པས་ཅི་ལ་ཕན། །སྐྱེ་མེད་རང་ས་མ་ཟིན་པའི། ཁ་ཏ་སྒམ་པོས་སྡིག་པ་བསགས། །ཉམས་མྱོང་ནང་ནས་མ་ཤར་བའི། །ཚུལ་འཆོས་མཁན་ཅིག་འདོད་པ་མང་། རྟེན་འབྲེལ་ལྟད་མོ་མ་མཐོང་བའི། །ཐོ་ཅོ་མཁན་ཅིག་རང་རྩིས་ཆེ། །བྱང་སེམས་སྙིང་རྗེ་མ་སྐྱེས་པའི། །ངོ་ལྐོག་མཁན་ཅིག་གཙང་གཙང་མང་། །སངས་རྒྱས་ཨེ་འཐོབ་མི་ཤེས་པའི། །ཆོས་པ་ཟེར་ཞིང་ནོར་ལ་ནག །སེམས་ཅན་ཡོངས་ལ་མི་ཕན་པའི། །ཕ་མར་བྱམས་ཤིང་འཁོར་བའི་རྒྱུ། །ཆོས་དང་མཐུན་པར་མི་སྒྲུབས་ན། །ཉེ་བ་ཡིན་ཡང་སྡང་བའི་དགྲ། །རོགས་ལ་གནོད་པར་བྱེད་པའི་མི། །མཛེས་མཛེས་འདྲ་ཡང་བདུད་ཀྱི་རིགས། །འཕྲལ་སྒོམ་ཆེན་ཟེར་ཡང་སྒོམ་སྡུག་ཡིན། །ཅི་ཕན་ཅི་བསམ་མི་བསྒྲུབ་པའི། །འགྲོགས་བཟང་པོ་བྱས་ཀྱང་ཞེ་འགྱོད་མང་། །ང་མ་ཕྱིད་སྡུག་བསྔལ་གྱིས་ཡི་མུག་དེས། །ཁྱོད་སྲིང་མོའི་སྡིག་སྒྲིབ་དག་དག་འདྲ། །ཞེས་གསུངས་པས་སེམས་ལ་ཕན་ཏེ་སྣང་སྐྱིད་ཏིང་ངེ་སོང་ནས། རྗེ་བཙུན་གྱིས་གདམས་ངག་གནང་ནས་བསྒོམ་དུ་བཅུག་པས་རང་བྱུང་གི་སྒོམ་བཟང་པོ་སྐྱེས་ཏེ། བླ་མ་མཉེས་ནས་འདིས་ང་སྡུག་པའི་སེམས་གསལ་ཏེ་རང་གིས་མོའི་སྡིག་པ་ཟད་ཟིན་གསུངས་ནས་མགུར་འདི་གསུངས་སོ། །ད་རུང་ཉོན་དང་པེ་ཏ་མ། །ཆོས་ལ་སྣང་བ་མ་ལོག་ཙ། །སྡུག་བསྔལ་ཟད་རྒྱུ་འོང་བ་ཡིན། །མི་ལ་ངན་པ་མ་བརྗོད་ཙ། །རང་ལ་ལྷ་བཞིན་མཐོང་བ་ཡིན། །གཞན་ལ་བསམ་པ་མི་ངན་ན། །རང་གི་བསོད་ནམས་འཕེལ་བ་ཡིན། །ཚེ་འདི་ལ་ཞེན་པ་མ་ཆེ་ན། ཕྱི་མ་བདེ་ཞིང་སྐྱིད་པ་ཡིན། །རང་མཐོང་ང་རྒྱལ་མ་བསྐྱེད་དང་། །གཟུགས་བཟང་ཡིད་འོང་འཐོབ་པ་ཡིན། །སེམས་ཉིད་རང་གཤིས་སྐྱོང་བ་ན། །སངས་རྒྱས་མྱུར་དུ་འཐོབ་པ་ཡིན། །མཚམས་དང་སྨྲ་བཅད་དམ་པ་ན། མཁའ་འགྲོའི་བྱིན་རླབས་འཁོར་བ་ཡིན། །ལུས་ལ་སྐྱིད་འདོད་མེད་པ་ན། །རྣམ་སྨིན་སྒྲིབ་པ་བྱང་བ་ཡིན། །སྒོམ་ཡུན་ཤི་དང་སྙོམས་ནུས་ན། །ཡང་རྒྱལ་དགུང་དང་མཉམ་པ་ཡིན། །སེམས་ལ་ནོངས་འཁྲིས་མི་གདའ་ན། དཔའ་བོ་དཔའ་མོའི་བསུ་བ་ཡིན། །བྱེད་སྤྱོད་ཆོས་དང་བསྟུན་ཤེས་ན། །ཆོས་སྐྱོང་དཔའ་བོའི་བསྲུང་བ་ཡིན། །བླ་མ་རྗེ་ལ་གསོལ་བཏབ་ན། །བྱིན་རླབས་དངོས་གྲུབ་འབྱུང་བ་ཡིན། ཁྱོད་ཤེས་པར་གྱིས་ལ་ཉམས་སུ་ལོངས། །དུས་ཀུན་ཏུ་བདེ་སྐྱིད་དཔལ་ལ་སྤྱོད། །ཅེས་གསུངས་ཏེ་ལས་རྒྱུ་འབྲས་ཀྱི་ཆོས་མང་དུ་གསུངས་པས། པེ་ཏ་མ་ངེས་ཤེས་སྐྱེས་ནས་ཆོས་མ་ནུས་པ་གང་གིས་ཀྱང་སྐྱིད་འཐོབ་པ་མ་རེད་ཟེར་བའི་རྟོགས་ལྡན་མ་བཟང་མོ་ཞིག་བྱུང་ངོ་། །དེ་ཐམས་ཅད་ཕ་མའི་དྲིན་ལེན་བསབ་པའི་སྐོར་རོ། །