སྤྱོད་པ་ཆེ་བའི་ཡོན་ཏན།

དེ་ནས་བཅུ་གཅིག་པ་སྤྱོད་པ་ཆེ་བའི་ཡོན་ཏན་ནི། ཉིན་རེ་ཡང་སྤྲུལ་པའི་གཟུགས་མང་དུ་མཛད་དེ། སྤྱིལ་པོའི་ནང་དུ་བསྒོམ་ཞིང་བཞུགས་པ་དང་། ཐག་རིང་པོའི་སྒོམ་ཆེན་རྣམས་ལ་ཆོས་གསུངས་པ་དང་། ལྷ་ཡི་ཡུལ་དུ་ལྷས་གདན་དྲངས་ནས་ཆོས་གསུངས་པ་དང་། ལྷ་འདྲེ་དང་མི་མ་ཡིན་ལ་ཆོས་གསུངས་པ། སྨན་དང་ཡུལ་ལྷ་རྣམས་ལ་མགུར་བྱེད་པ་དང་། བྲིན་དུ་ནགས་ལ་མེ་ཤོར་བ་གསོད་པ་དང་། སྙེ་ནམ་དུ་ཟམ་པ་ཆུ་ལ་ཤོར་བ་འདོན་པ་དང་། དུད་འགྲོའི་གནས་སུ་ཆོས་གསུང་པ་ལ་བྱོན་པས་གོ་ནུས་པ་རེ་རེ་ཙམ་མིན་པ་མ་བྱུང་། ཡི་དྭགས་ཀྱི་ཡུལ་དུ་ཆོས་གསུངས་པ་ལ་བྱོན་པས་ཆོས་མི་གོ་བར་སེར་སྣས་གདུང་ཞིང་བཤུད་པ་བྱེད་ཅིང་བྱུང་བ་ལ་ཆོས་སྦྱིན་མཛད། དམྱལ་བའི་གནས་སུ་བྱོན་པ་ལ་ཆོས་ཀྱི་སྣང་བ་ཡིད་ལ་མེད་པ་ཐུགས་ལ་འདུག་པས་ཐུགས་ཆད། ཨ་པ་སྡིག་པའི་ནུས་པས་དེ་འདྲ་བ་ཅིག་འགྲུབ་ཟིན་དགོངས་ནས་སྤྱན་ཆབ་མང་པོ་ཤོར། ཆོས་གྲལ་གཅིག་ཏུ་རས་པ་རྣམས་དང་ཡོན་བདག་རྣམས་ཁ་མ་འཆམ་སྟེ། དེ་ལ་དྲིན་ཆེ་ངེད་ལ་དྲིན་ཆེ་ཟེར་བ་མང་པོ་བྱུང་སྟེ། རས་ཆུང་པས་ཞུས་པ། ཉིན་གཅིག་ཚེས་གྲངས་དུས་ཚོད་ཐམས་ཅད་གཅིག་པ་ལ་སྤྲུལ་པ་འདི་ཚན་མཛད་པ་ཅི་ལགས་ཞུས་པས། ཁྱེད་རྣམས་སེམས་ཆུང་བ་ཡིན། ང་མ་སོང་བ་དང་མ་བྱས་པ་མེད་གསུངས་ཤིང་རེས་བཤུམ། རེས་བཞད། རེས་ཐེ་ཚོམ་མི་མཛད། རེས་སྤྱན་ཧྲིག་ཧྲིག་མཛད་ཅིང་བཞུགས་ཙ། ལྷ་ཡི་བུ་དང་བུ་མོ་མང་པོས་བཀའ་དྲིན་ཆེ་ཟེར་བའི་མེ་ཏོག་གཏོར་བ་མཐོང་། ཡུལ་ལྷ་མང་པོས་གཟུགས་མེད་པའི་སྒྲ་སྐད་ཀྱིས་བཀའ་དྲིན་ཆེ་ཟེར་བ་དང་། ཁར་སང་གི་མགུར་དེ་འདྲ་གསུངས་དང་ཟེར་བའི་སྒྲ་སྐད་ཡང་ཐོས་པས། རས་པ་རྣམས་ཀྱིས་རྒྱུ་རྐྱེན་ཅི་ལགས་ཞེས་ཡང་དང་ཡང་དུ་ཞུས་པའི་ལེན་དུ་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །བླ་མའི་བྱིན་རླབས་ལུས་ལ་ཞུགས། །ལུས་སྒྱུ་ལུས་གྲུབ་པ་སྤྲུལ་པའི་སྐུ། །བླ་མའི་བྱིན་རླབས་ངག་ལ་ཞུགས། །ངག་གླུ་དབྱངས་ལེན་པས་གདམས་ངག་སྟོན། །བླ་མའི་བྱིན་རླབས་སེམས་ལ་ཞུགས། །སེམས་རྟོགས་པ་ཐོབ་པས་སངས་རྒྱས་གྲུབ། །ང་མེས་མི་འཚིག་ཅིང་ཆུས་མི་འཁྱེར། །སྤྱོད་པ་གླང་ཆེན་འགྲོས་གྱི་གར། །དག་པའི་འགྲོ་བ་ཐམས་ཅད་ལ། །ཐ་དད་ཀྱི་སྣང་བ་སོ་སོ་ཡིས། ང་ཡི་སྐུ་མཐོང་གསུང་ཐོས་ཤིང་། །བསོད་ནམས་བསགས་པས་སྐུ་མཐོང་གྲོལ། །མ་དག་འགྲོ་བ་ལས་ངན་གྱིས། །ང་ཡི་ལུས་ཀྱང་མ་མཐོང་ཞིང་། །སྡིག་པས་སྡུག་བསྔལ་སྤྱོད་པ་ལ། །སངས་རྒྱས་མཐུ་ཡིས་མ་ཕན་པ། །དེ་ཡི་ཡི་མུག་ངུ་བྲོ་སྐྱེ། ཁྱེད་རྣམས་ཆོས་ལ་འབུངས་ཤིག་ཨང་། །ངས་ནི་བཤད་ཚུལ་ཐུབ་པ་མེད། །ཨ་ཙ་མ་སྡིག་ཅན་སྙིང་རེ་རྗེ། །ལོག་སྤྱོད་མཁན་རྣམས་ཐར་མཐའ་མི་གདའ་ན། །སྡུག་བསྔལ་མཐོང་བས་སྙིང་རླུང་ལངས། ངེད་རང་ཚོ་སྒོམ་ཡུན་སྲིང་ཅིག་ཨང་། །ཚེ་འདི་ཅི་བྱེད་མི་བསམ་པར། །ཕྱི་མ་ཅི་འོང་བསམ་པ་གྱིས། །ཞེས་གསུངས་པས། རས་ཆུང་པ་དང་། རས་པ་རྣམས་ཀྱིས་དེའི་རྒྱུ་རྐྱེན་ཅི་ལགས་ཞུས་པས། སྤྲུལ་པའི་རྣམ་པས་འགྲོ་བ་ཐམས་ཅད་གཟིགས་ལས་ཆེ་བས། སྡུག་བསྔལ་གང་ཆེ། བདེ་སྡུག་གཉིས་ལས་ཇི་ལྟ་བུའི་བསྒྱུར་བར་གདའ་ལགས། རིགས་དྲུག་གི་སེམས་ཅན་ལ་ཚད་ཟིན་པར་ཨེ་འདུག་ཞུས་པས། བླ་མས་རིགས་དྲུག་གི་ཚད་ཟིན་གསུང་འབྱོན་དུ་མ་ཉན་པས། རས་ཆུང་པས་མི་གསུང་བར་འདུག་བསམ་པས། ངེད་རྣམས་སྐལ་བ་བཟང་བའི་བླ་མ་དང་འབྲེལ་པས་ཐུགས་རྗེས་གཟིགས། །ཞེས་ཞུས་པས། འོ་ན་མཎྜྻལ་ཕུལ་ཅིག་གསུངས་པས་མཎྜྻལ་མང་དུ་ཕུལ། ཕྱག་རྩོལ་མེད་མང་དུ་འཚལ་བས། ད་སྡོད་ལ་ང་ཡི་མགུར་ལ་ཉོན་གསུངས་ནས་དང་པོར་ལྷ་ཡི་རྒྱུ་འབྲས་མགུར་དུ་གསུངས་པ་ནི། བཀའ་དྲིན་བླ་མ་རྗེ་ལ་གསོལ་བ་འདེབས། །བྱིན་རླབས་ཅན་ཡོངས་ལ་ཁྱབ་པར་ཤོག །འཇིག་རྟེན་ལྷ་ཡི་བདེ་བ་ཡང་། །གཡེར་ནི་ལྷ་ཞེས་ཆེ་ཞིང་འདུག །སྐད་ནི་གཡུ་འབྲུག་བཞིན་དུ་ཆེར་གྲགས་ཀྱང་། །དེ་ལ་སྙིང་པོ་མི་འདུག་སྟེ། །བཟང་ངན་ཡིད་ལ་མི་དྲན་ཅིང་། །འདུ་ཤེས་རྨུགས་པས་ཚོར་བ་མེད། །དེང་སང་དབང་པོ་བརྒྱལ་བ་བཞིན། །བསྐལ་མང་ཡང་བགྲང་བརྩིས་ཀྱང་། །སྐད་ཅིག་ཙམ་ཞིག་མ་གཏོགས་པ། །དེ་ལ་སྙིང་པོ་ཡེ་མ་མཆིས། །ལྷུང་དུས་བསམ་ངན་སྐྱེས་ནས་ལྷུང་། །དེ་ཡི་རྒྱུ་རྐྱེན་གནས་ལུགས་ནི། །སྟོང་ལྟ་ཁ་ལྟ་སྒམ་པོ་བྱུང་། །གཟུགས་ཁམས་གནས་རིས་བཅུ་དྲུག་ཀྱང་། །གཙང་མ་རིས་ལྔ་རང་སོ་སྟེ། །འོག་མ་བཅུ་གཉིས་ལྷུང་བ་ཡང་། །རྒྱུ་འབྲས་བསོད་ནམས་མ་ཟད་བར། །དེ་ཡི་བདེ་བ་སྤྱོད་བྱེད་ཅིང་། །ཉོན་མོངས་ཚོར་བ་མྱོང་བ་བཞིན། །ལོ་གྲངས་བསྐལ་གྲངས་མང་བརྩིས་ཀྱང་། །བདེ་བ་འཁྲིག་ཞེན་ཡུན་མི་ཚོར། །ཡིད་མེད་བསམ་ངན་སྐྱེས་ཤིང་ལྷུང་། །ལྷུང་བའི་རྟགས་དང་རང་སྒྲ་ཡིས། །ལྷུང་ཁར་སེམས་ལ་སྡུག་བསྔལ་ཆེ། །ཆོས་ལ་བདེན་པ་མེད་བསམ་པས། །ཐར་མེད་གནས་སུ་སྡུག་བསྔལ་སྤྱོད། །དེ་འདྲ་མཐོང་ཙ་སྙིང་རླུང་ལང་། །རྒྱལ་ཆེན་རིགས་བཞིའི་ལྷ་རྣམས་ཀྱང་། །སུམ་ཅུ་རྩ་གསུམ་དང་པོ་སྟེ། །འོག་མ་ཐམས་ཅད་གོང་བཞིན་ལྟུང་། །དེ་ཡི་རྒྱུ་རྐྱེན་རྣམ་སྨིན་ཡང་། །ཕྱོགས་ཆ་ཅན་གྱི་དགེ་བ་དང་། །ཞེན་འཛིན་ཅན་གྱི་སྒོམ་ཆེན་དང་། །ཆོས་བརྒྱད་བསྒྲིགས་པའི་ཆོས་སྤྱོད་རྣམས། །ཁས་ཡག་ཡག་སྨྲས་ཀྱང་སེམས་མ་དག །ས་བོན་བཞི་ཡི་བག་ཆགས་ལུས་པ་དེས། །ཡུན་དུ་སོང་ཙ་བསམ་ངན་སྐྱེ། །བསམ་ངན་སྐྱེས་པས་བསོད་ནམས་འཛད། །བསོད་ནམས་ཟད་པས་མྱུར་དུ་ལྷུང་། །ལྟུང་བྱེད་ལྷ་ཡི་སྡུག་བསྔལ་ཡང་། །ཞིབ་ཏུ་བཤད་ན་སྣང་བ་འཁྲུགས། །དེ་གོ་བར་མཛོད་ལ་སྒོམ་ཡུན་སྲིང་། །ཞེས་གསུངས་པས། རས་ཆུང་པ་ཡང་སྣང་བ་སྐྱོ་ཕྱེད་དེ་སོང་ནས། བླ་མ་ལགས་ལྷ་མ་ཡིན་གྱི་སྡུག་བསྔལ་ཇི་ལྟ་བུ་འདུག་ཞུས་པས་ཡང་མགུར་འདི་གསུངས་སོ། །བླ་མ་མཁའ་འགྲོའི་ཚོགས་ལ་གསོལ་བ་འདེབས། །བྱང་སེམས་རྒྱུད་ལ་སྐྱེ་བར་བྱིན་གྱི་རློབས། །ལྷ་མིན་སྡུག་བསྔལ་མི་ཆེ་རྒྱུ། །སྡིག་སེམས་འཁྲུགས་པས་རང་གཞན་བརླག །སེམས་ཉིད་འཁྲུགས་པས་རང་མགོ་འཁོར། །ཚོར་བ་ངན་པས་འདུ་ཤེས་རག །གང་སྣང་དགྲ་རུ་ལེན་པ་ལ། བདེ་བ་སྐད་ཅིག་ཡོད་ཐབས་མེད། །ལས་ངན་རང་སྲོག་མི་འཕངས་པར། གཞན་ལ་ཕན་སེམས་སྐྱེ་བ་དཀའ། །རྩོད་པ་ལས་ཀྱི་འཁྲུགས་པ་ལ། །ད་རུང་ཁ་ལ་མི་ཉན་འདྲ། །དེ་ཡི་རྒྱུ་རྐྱེན་བཤད་ན་ཡང་། །རང་བདེ་གཞན་སྡུག་འདོད་པ་དང་། གཉེན་ལ་བྱམས་ཤིང་དགྲ་ལ་སྡང་། །ཡིན་པ་མིན་ཏེ་བྱ་ཐབས་མེད། །ཁྱོད་འདིར་ཚོགས་སྒོམ་ཡུན་ཤི་དང་སྙོམས། །ཞེས་གསུངས་པས། ཡང་ཞུས་པ། བླ་མ་ལགས། ལས་རྒྱུ་འབྲས་ཕྲའུ་རེ་ལ་དེ་ལྟར་སོང་ན་ངེད་རང་མི་ཚེ་ཡང་ཐར་བར་དཀའ། ཚིག་རེ་ཡི་གོང་འོག་དང་ལེགས་ཉེས་དུམ་པ་རེ་མི་འོང་མི་སྲིད་འདུས་པས། ཇི་ལྟར་བྱེད་ཞུས་པས་ཡང་མགུར་འདི་གསུངས་སོ། །རྗེ་སྦས་པའི་སངས་རྒྱས་མི་ཡི་གཟུགས། །ལྷོ་བྲག་མར་པའི་ཞབས་ལ་འདུད། །འོ་སྐོལ་འགྲོ་བ་མི་ཡི་ལུས། །དགེ་སྡིག་གང་སྤྱད་ནུས་པ་ཆེ། །དེ་ཁམས་དྲུག་ཚང་བའི་ངང་ནུས་ཡིན། །ཁྱེད་མཁས་པར་ཤེས་ཟེར་རས་ཆུང་པ། །འགག་དང་གནད་མིག་མི་ཤེས་པ། །མང་པོ་ཤེས་ཟེར་འཆལ་པ་ཡིན། །སེམས་ཀྱི་རྩ་བ་མ་རྟོགས་ན། །ལོ་མང་བསྒོམས་ཟེར་རྫུན་མ་ཡིན། །ཞིང་དང་བསམ་པ་མ་འབྲེལ་ན། །རྒྱུ་མང་པོ་བཏང་ཡང་ཆུད་ཟོས་ཡིན། །ཕྱོགས་མེད་ཀུན་ལ་མ་ཕན་ན། །འགྲོགས་གང་བཟང་མཆོད་པ་ཁ་ལེན་ཡིན། །གང་ལ་གང་འགྲོས་མི་ཤེས་པས། །གླན་པས་དྲང་གཏམ་སྨྲ་བ་ལྟུང་གཞི་ཡིན། །གང་ལ་གང་ཕན་ཤེས་པ་ན། །མཁས་པས་རྫུན་དུ་སྨྲ་བ་དགེ་བ་ཡིན། །ང་ལ་རྒྱུ་མེད་ཟེར་བ་ན། །རྨོངས་པ་རྨོངས་གཏམ་ཡང་ལ་གནོད། །དགེ་བ་སེམས་ལ་ཤར་བ་ན། །ས་རྡོ་རྩི་ཤིང་དགེ་བའི་རྒྱུ། །ལང་བསམ་ཤེས་པ་ལ་མི་བས་ལོད་པ་མེད། །ཟ་འདོད་པ་ཁྱི་བས་ལྟོགས་པ་མེད། །ཁྲེལ་མེད་པ་ལ་དཔོན་བས་འཇིགས་པ་མེད། །ཕྱུག་པོ་ཐམས་ཅད་ཡོད་སྡུག་ཡིན། །དབུལ་པོ་ཚོལ་བས་དབུལ་སྡུག་ཡིན། །ཡོད་མེད་གཉིས་ཀ་སྡུག་བསྔལ་ཡིན། །བུ་ཆོས་ཤིག་ནུས་ན་སྐྱིད་དང་མཇལ་འོང་། །དེ་གོ་བར་མཛོད་ལ་ཡུན་དུ་བསྒོམ། །ཞེས་གསུངས་པས། ཡང་རས་ཆུང་པས། མི་ཡི་རྒྱུ་མཚན་ཡང་གསུང་རེ་རེའི་གོ་ཞིང་འདུག །མར་ངན་སོང་གི་གནས་འདི་རྣམས་རྒྱུ་རྐྱེན་ཅི་ལགས་ཞུས་པས། ཡང་མགུར་འདི་གསུངས་སོ། །སྐྱབས་བླ་མ་རྣམས་ལ་གསོལ་བ་འདེབས། །ངན་འགྲོ་ཡི་འཇིགས་པ་སེལ་བར་བྱིན་གྱིས་རློབས། །ཤ་ཁྲག་ཟས་སུ་ཟ་བྱེད་ཅིང་། །གསོད་གཅོད་ལས་སུ་སོང་བ་རྣམས། །ཚ་དམྱལ་བརྒྱད་དུ་བསྲེགས་པར་འདུག །དེ་ཡང་དགེ་བ་མ་བརྗེད་ན། །ཐར་པའི་དུས་ནི་བསྟན་པར་འདུག །ཟས་སུ་མ་ཟས་ཟ་བྱེད་ཅིང་། །རང་སེམས་ལྷག་མར་འཛིན་སེམས་པ། བཅོམ་ཞིང་ཕྲོག་ཕྲོག་བརྒྱབ་པ་རྣམས། །གྲང་དམྱལ་བརྒྱད་དུ་སྐྱེ་བར་འདུག །ཆོས་ལ་ལོག་ལྟ་མ་སྐྱེས་ན། །ཐར་པའི་གནས་སྐབས་བཤད་པ་ཡིན། །བཀའ་ལ་ལོག་པ་འགལ་བྱེད་ཅིང་། །སྐུར་པ་ངན་པ་འདེབས་པ་དང་། །ཞལ་ལྕེ་ལོག་ཁྲིམས་གཅོད་པ་ན། །རོ་མྱགས་འདམ་དང་མེ་འོབ་དང་། །རལ་གྲི་ལོ་མས་གཅོད་པར་འདུག །ཁས་བླངས་ཚུལ་ཁྲིམས་ཉམས་པ་རྣམས། །དམ་ཚིག་ཆད་པ་ཕོག་པས་ན། །ཤལ་མ་རི་དང་མེ་འོབས་ནང་། །ནགས་རི་ཅན་དང་ཆུ་ཚན་དོང་། །བསྲེགས་ཤིང་སྡུག་བསྔལ་སྤྱད་པར་འདུག །དཀོན་མཆོག་ཡིད་ལ་དྲན་སྲིད་ན། །ནམ་དྲན་དུས་ན་ཐར་དུས་བསྟན། །ལས་ངན་ཡང་ཡང་སྤྱད་སྤྱད་པས། །སྡིག་སེམས་ལོག་པའི་ལས་དབང་གིས། །རང་ཉིད་བདེ་བ་འདོད་པའི་ཕྱིར། །ཕ་མ་སློབ་དཔོན་གསོད་བྱེད་ཅིང་། །དཀོན་མཆོག་དཀོར་ནོར་འཕྲོག་པ་དང་། །སྐུར་པ་ལོག་པའི་ཚིག་ལྕེ་སྨྲ། །ཆོས་ལ་བདེན་པ་མེད་ཟེར་བས། །མནར་མེད་དམྱལ་བར་སྲེག་པར་བྱེད། །འདི་ལ་ཐར་པ་མེད་པར་གསུངས། །བུ་བསམ་ཞིང་སྙིང་རླུང་ལྡང་བར་ཡོད། །བློ་ཆོས་ལ་གཏད་ལ་འབུངས་ལ་སྒོམས། །ཞེས་གསུངས་པས་རས་ཆུང་པ་དང་དེར་བཞུགས་པ་རྣམས་བ་སྤུ་ཚ་ཟིང་ངེ་སོང་སྟེ་བླ་མ་ལགས། དེ་འདྲ་གསུངས་པས་འདི་ཙམ་འཇིགས་ཤིང་འདུག་པ་ན། དེར་སྐྱེས་པའི་སེམས་ཅན་རྣམས་ཅི་ཙམ་ལགས་ཞུས་པས་ཡང་མགུར་འདི་གསུངས་སོ། །རྗེ་བླ་མ་རྣམས་ལ་ཕྱ་འཚལ་ལོ། །ངན་འགྲོ་འཇིགས་པ་སེལ་བར་ཐུགས་རྗེས་ཟུངས། །དམྱལ་བར་རང་སྲོག་གཅོད་སྤྲོ་བས། །འཇིགས་ཤིང་བྲོས་པས་ཐར་ཐབས་མེད། །ཡི་དྭགས་སྣང་བ་དགྲར་ལངས་པས། །གང་ལ་འབྲོས་ཤིང་གང་ལ་སྐྱབས། །དུད་འགྲོ་གཅིག་ལ་གཅིག་ཟ་བས། །སུ་ཡི་ལེ་ལེན་སུ་ལ་འདེད། །ཁྱད་པར་ཡི་དྭགས་སྡུག་བསྔལ་དེ། །བསམ་ངན་སེར་སྣ་ཅན་གྱི་ལེན། །ཡོད་དུས་དགེ་བ་མི་ཤེས་ཤིང་། །འཇུངས་པས་རང་གིས་ཟ་མི་ཕོད། །མི་ལ་སྟེར་བ་མི་སྲིད་ཅིང་། །ཡང་ཡང་ལྟ་ཞིང་གསོག་པ་ཡི། །བྱི་བ་བཞིན་དུ་ཆོག་ཞེས་མེད། །རང་གི་སྡུག་གསོག་གཞན་གྱིས་སྤྱོད། །འཆི་དུས་སེར་སྣའི་སྣང་བ་བཞིན། །བར་དོ་ཡི་དྭགས་སྣང་བ་སྐྱེ། སྣང་ལོག་ལས་ཀྱི་བཀྲེས་སྐོམ་སྤྱོད། གལ་ཏེ་བདེ་སྤྱོད་མཐོང་སྲིད་ན། །དེ་ལ་སེར་སྣ་སྡུག་སེམས་སྐྱེ། །དེ་ཡི་ལས་ཀྱི་ཡང་ཡང་ལྟུང་། །དེ་སྙིང་རུས་བྱས་པའི་སྒོམ་ཆེན་གྱིས། །ཡི་དྭགས་གླུ་རུ་བླངས་པ་ཡིན། འདིར་བཞུགས་རས་པ་བུ་སློབ་རྣམས། །གཏམ་གོ་བར་བྱུང་ན་སྒོམ་ཡུན་སྲིང་། །ཞེས་གསུངས་པས། རས་ཆུང་པས་ཞུས་པ། མགུར་མ་དེ་རྣམས་ཕན་པ་རང་གཅིག་བྱུང་། ད་རུང་དུད་འགྲོ་འདི་རྣམས་རྒྱུ་མཚན་གང་གིས་འཁྲུལ་པ་ལགས། །ཞེས་ཞུས་པས་ཡང་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །ངན་འགྲོའི་འཇིགས་པ་སེལ་བར་ཐུགས་རྗེས་ཟུངས། །དུད་འགྲོ་མི་ཤེས་གཏི་མུག་པས། །བླུན་པོ་བོང་ཅི་དུད་འགྲོ་ལས། །མ་རིག་ལས་ངན་ནུས་པ་ཡི། །ཆོས་ལ་བདེན་པར་མ་རྟོགས་ཤིང་། །དགེ་སྡིག་བཟང་ངན་མ་ཕྱེད་པར། །ཕྱམ་ཕྱམ་ལས་ལ་མི་ཚེ་ཟད། །བརྟགས་དང་རྟོག་དཔྱོད་མི་ཤེས་ཤིང་། །ཧ་རེ་ལོང་བཞིན་བླུན་སྤྱོད་མང་། །དགེ་བ་སྡིག་པ་མི་ཤེས་པས། །སྨྱོན་པ་བཞིན་དུ་ཕུང་ཉེས་སྤྱོད། །དབུགས་དབྱུང་དབང་པོ་མ་སྐྱེས་པས། །དེ་ལ་བཟང་པོ་ཡིན་ཞེས་འཁྲུལ། །ལར་མི་ཤེས་སྡིག་པ་གཅོད་གཅོད་རྣམས། །གཅན་གཟན་དུད་འགྲོར་སྐྱེ་བར་མཆི། །བཟང་ངན་མེད་པའི་བླུན་པོ་རྣམས། །ཚོགས་ཕལ་པའི་དུད་འགྲོར་སྐྱེ་བར་མཆི། །བསམ་པ་རྨོངས་པའི་སྐྱེ་བོ་རྣམས། །ཕྲའུ་དུད་འགྲོར་སྐྱེ་སྟེ་མཆི། །ལར་དུད་འགྲོའི་རྣམ་སྨིན་ལས་རྣམས་ལ། །བཤད་པས་ལོང་ཐབས་མི་གདའ་བས། །མགོ་བོ་ཁུག་ལ་རང་སེམས་རྩལ་སྦྱངས་གྱིས། །ཞེས་གསུངས་པས་དེར་ཚོགས་པའི་བུ་སློབ་རྣམས་ན་རེ། བླ་མས་ཆོས་ཅི་གསུངས་ལ། མགུར་དང་གླུ་རང་མཛད་པ་ཅི་ལགས་ཞུས་པས། བླ་མའི་ཞལ་ནས། ང་རི་ཁྲོད་ན་ལྷ་འདྲེ་དང་འགྲོགས་ཡུན་རིང་། གླུ་ལ་ཁོང་ཅག་ལྷ་འདྲེ་ཡང་དགའ། ང་རང་ཡང་གླུ་ལེན་སྙིང་འདོད། །ཅེས་གསུངས་པས། གླུ་རང་ལེན་སྙིང་འདོད་པ་དེ་ཅི་ལགས། གསུང་བར་ཞུ་ཞུས་པས། ཡང་མགུར་འདི་གསུངས་སོ། །རྗེ་བླ་མའི་བཀའ་དྲིན་ཡང་ཡང་དྲན། །དག་སྣང་གླུ་ཡི་དྲིན་ལན་མཇལ། སྤང་སེར་པོ་རི་ཡི་ལོགས་ཤིག་ན། །ཤ་རྒྱས་པའི་རི་དྭགས་གླུ་དབྱངས་ལེན། །དབྱར་མེ་ཏོག་སེར་པོའི་ཟེའུ་འབྲུ་ལ། །རྩི་རྒྱས་པའི་བུང་བས་གླུ་དབྱངས་ལེན། །དགུང་སྔོན་པོ་འབྱུང་བ་འཐག་པ་ལ། །དྲོད་ཤར་བས་གཡུ་འབྲུག་གླུ་དབྱངས་ལེན། །རི་གཡའ་སྤང་དག་པའི་གཡུ་ལོ་ལ། །ཁམས་རྒྱས་པས་ན་ཆུང་གླུ་དབྱངས་ལེན། །གྲོང་ཁྱེར་ཕྱུག་པའི་སྒོ་འགྲམ་ན། །ཟ་འདོད་པ་འཁྱམས་པས་གླུ་དབྱངས་ལེན། །མི་ཤི་བ་རོ་ཡི་སྔས་ཁ་ན། ནོར་འདོད་པ་བན་བོན་གླུ་དབྱངས་ལེན། །རི་ན་བུན་ཅན་གྱི་རི་ཁྲོད་ན། །ཉམས་ཤར་བས་རྣལ་འབྱོར་གླུ་དབྱངས་ལེན། །གླུ་ཁོང་ནས་སྐྱོ་བས་དབྱངས་སུ་བླངས། །ཉམས་རིག་པ་དངས་པས་སེམས་ཉིད་བདེ། །ཆོས་སྙིང་ནས་གནག་པས་ཅི་བསམ་འགྲུབ། བློ་གང་བྱུང་ལྡན་པས་སྐྱིད་པར་བྱུང་། །ཞེས་གསུངས་པས། དེར་བཞུགས་པའི་རས་པ་རྣམས་ལ་ངེས་ཤེས་དང་། སྐྱོ་ཤས་དང་། ཞེན་ལོག་དང་། སྙིང་རུས་དང་། སྡུག་བསྲན་དང་། དད་པ་དང་། སྙིང་རྗེ་དང་། བརྩོན་འགྲུས་ལ་སོགས་པ་བརྩོན་པ་དང་ངོ་མཚར་བའི་རྟོགས་པ་རྣམས་རྒྱུད་ལ་སྐྱེས་སོ། །དེ་གསུངས་པ་དེ་ཐམས་ཅད་སྒྱུ་འཕྲུལ་རིག་པའི་སྐོར་རོ།། །།དེ་ནས་ཡང་ཉིན་གཅིག་བླ་མའི་གཟིམ་ཁང་ན་འོད་ཞིག་ཀྱི་ལི་ལི་འདུག །ཡང་ཉིན་གཅིག་མར་མེ་ཞིག་འབར་ཞིང་འདུག །ཡང་ཉིན་གཅིག་ཡོན་ཆབ་ཞིག་ལྟེམ་མེར་འདུག་ཡང་ཉིན་གཅིག་ཚ་ཚ་ཞིག་ཅོག་གེར་འདུག །ཡང་ཉིན་གཅིག་སྤོས་རེངས་ཤིག་ལྡེམ་མེ་འདུག །ཡང་ཉིན་གཅིག་རླུང་ཞིག་ཀྱི་ལི་ལི་འདུག །དེ་ལ་སོགས་པ་སྤྲུལ་པ་རྣམ་མཐོང་བས། རས་ཆུང་པས་ཞུས་པ། བླ་མ་ལགས་འདི་ལྟ་བུ་རྣམས་ཅི་ལགས་ཞུས་པས་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །ལུས་སྤྲུལ་བསྒྱུར་མང་བར་ཐུགས་རྗེས་ཟུངས། །བུ་ཉོན་ཅིག་རས་ཆུང་བཞིན་ལེགས་པོ། །ང་འབྱུང་བ་ས་ལ་དབང་ཐོབ་ཙ། །ས་ཡང་ང་ཡི་རང་བཞིན་ཡིན། །འབྱུང་བ་ཆུ་ལ་དབང་ཐོབ་ཙ། །ཆུ་ཡང་ང་ཡི་རང་བཞིན་ཡིན། །འབྱུང་བ་མེ་ལ་དབང་ཐོབ་ཙ། །མེ་ཡང་ང་ཡི་རང་བཞིན་ཡིན། །འབྱུང་བ་རླུང་ལ་དབང་ཐོབ་ཙ། །རླུང་ཡང་ང་ཡི་རང་བཞིན་ཡིན། །ནམ་མཁའ་སྟོང་ཉིད་འབྱོངས་ཙམ་ན། །སྣང་སྲིད་ང་དང་དབྱེར་མེད་འདྲེས། །ལུས་སེམས་སྣང་བ་དབང་ཐོབ་ཙ། །ཅི་ལ་སྤྲུལ་ཡང་འགྲུབ་པར་འདུག །རྫུ་འཕྲུལ་ལུས་ཀྱི་བཀོད་པ་ལ། །ཁྱོད་མོས་པ་སྐྱེས་ན་གསོལ་བ་ཐོབ། །རྗེ་གྲུབ་ཐོབ་རྣམས་ཀྱི་བྱིན་རླབས་འཇུག །ཅེས་གསུངས་ཏེ་དེའི་དུས་སུ་ཟད་པར་གྱི་ཏིང་ངེ་འཛིན་རྣམས་བརྟན་པར་འདུག་གོ །དེའི་དུས་སུ་ལྕམ་མེ་བྱ་བའི་ཡོན་བདག་མོ་གཅིག་གིས་ཚོགས་འཁོར་དྲངས་ནས་བླ་མ་ལགས། ཁྱེད་ཀྱི་སློབ་མ་ལ་གྲུབ་པ་ཐོབ་པ་ཨེ་ཡོད་ཞུས་པས། བླ་མའི་ཞལ་ནས་མི་རྣམས་ཀྱི་ང་ལ་འཁོས་མེད་བསམ་སྟེ་མཁའ་འགྲོ། ལུང་བསྟན་འདི་སྐད་ཅེས་གསུངས་ནས་མགུར་འདི་གསུངས་སོ། །བླ་མ་མཁའ་འགྲོའི་ཚོགས་ལ་གསོལ་བ་འདེབས། །འགྲོ་དོན་ལྷུན་གྱིས་གྲུབ་པར་བྱིན་གྱིས་རློབས། །མཁའ་འགྲོའི་ལུང་བསྟན་སྤྲུལ་པའི་སྐུ། །དྭགས་པོ་ཉི་མ་འགྲོ་ལ་འཆར། །རས་ཆུང་ཟླ་བ་སྤྲུལ་པའི་སྐུ། །སྒོམ་སྟག་ཇོ་དར་ཞི་བ་འོད། འབྲི་སྒོམ་ལ་སོགས་ཉི་ཤུ་ལྔ། །འགོས་བྱས་དེ་རྣམས་མཁའ་འགྲོས་གསུངས། །གྲུབ་ཐོབ་ལྔ་དང་རྟོགས་ལྡན་བརྒྱད། །རབ་བྱུང་ཉམས་ཤར་བརྒྱ་རྩ་བརྒྱད། ཆོས་མཐུན་སློབ་མ་སྟོང་རྩ་འོང་། །ཆོས་འབྲེལ་ཐོབ་པ་ཁྲི་འབུམ་སྟེ། །ལག་ལེན་སྐྱོང་བ་རེ་རེར་འདུ། །ཁྱོད་དྲི་རྟོག་བྱེད་པ་བག་ཆགས་བཟང་། །ཞེས་གསུངས་པས་ཨ་ལ་ལ་མང་པོ་འོང་བར་འདུག་ཟེར་ཞིང་ཕྱག་མང་པོ་འཚལ་བ་ལ་སྣང་བ་འགྱུར་ཏེ་ཆོས་དང་མཐུན་པའི་སློབ་མ་ཅིག་ཏུ་གྱུར་ཏེ་ཆོས་ཚོགས་གྲལ་དེ་ནས་ཕྱོགས་རིས་ཀྱི་རི་ཁྲོད་དུ་འགྲོ་ཟེར་བའི་བུ་སློབ་འགའ་བྱུང་བ་ལ་མགུར་འདི་གསུངས་སོ། །ལྷོ་བྲག་མར་པའི་ཞབས་ལ་གསོལ་བ་འདེབས། །མོས་གུས་འབྲལ་བ་མེད་པ་བྱིན་གྱིས་རློབས། ཁྱོད་རི་ཁྲོད་འཛིན་པའི་སྒོམ་ཆེན་རྣམས། །ཉིན་མཚན་མེད་པར་ཉལ་བ་ལ། །གདིངས་དང་ལྡན་པའི་གདམས་ངག་དགོས། །གདམས་ངག་མེད་པའི་རི་ཁྲོད་དེ། །རྣལ་འབྱོར་གྲོང་པའི་གསེབ་ཏུ་འཆོར། །ཤེས་རབ་མེད་པའི་སྒོམ་ཆེན་དེ། །བླུན་པོ་རྫུན་གྱི་མགོ་སྐོར་བས། །རྣལ་འབྱོར་བ་གླང་གསེབ་ཏུ་འཆོར། །ལྟ་བ་མེད་པའི་སྒོམ་ཆེན་དེ། ཁ་ལྟ་སྐམ་པོའི་ཆོས་བཤད་པས། །རྣལ་འབྱོར་ཤན་པའི་ལག་ཏུ་འཆོར། །སྒོམ་པ་མེད་པའི་ཕོ་ཚོད་ཀྱིས། །རྫུན་རྫུན་སྨྲ་རྒྱུ་མང་བ་དེ། །རྣལ་འབྱོར་རྫུན་མའི་གསེབ་ཏུ་འཆོར། །རང་གྲོལ་ནང་ནས་མ་སྐྱེས་པའི། །ཐོ་ཅོ་བརཏལ་ཞུགས་སྤྱོད་པ་དེ། །རྣལ་འབྱོར་སྨྱོན་པའི་གསེབ་ཏུ་འཆོར། །ལྷ་གྲོགས་ལ་དམ་ཚིག་སྲུང་བ་ལ། །ངོ་ལྐོག་མེད་པའི་ཚིག་སྤྱོད་དགོས། །དེ་ཡི་གདམས་ངག་མེད་པ་ན། །རྣལ་འབྱོར་འབྱུང་པོའི་གསེབ་ཏུ་འཆོར། །གཙང་བཙོག་མེད་པའི་སྤྱོད་པ་དགོས། །ཉམ་ང་མེད་པའི་གདིངས་ཤིང་དགོས། །དེ་ཡི་གདམས་ངག་མེད་པ་ན། །རྣལ་འབྱོར་ཁྱི་ཕག་གསེབ་ཏུ་འཆོར། །རོ་སྙོམས་ལྡོམ་བུ་བྱེད་པ་ལ། །འགྲོ་ཉལ་ཁྱད་མེད་སྒོམ་ཞིག་དགོས། །དེ་ཡི་གདམས་ངག་མེད་པ་ན། །རྣལ་འབྱོར་སྤྲང་པོའི་གསེབ་ཏུ་འཆོར། །བླ་མ་དམ་པ་བསྟེན་པ་ལ། །ཅི་གསུངས་སྒྲུབ་པའི་དམ་བཅའ་དགོས། །དེ་ཡི་གདམས་ངག་མེད་པ་ན། །ཇི་ལྟར་འབུངས་ཡང་ཟོལ་ཟོག་ཡིན། །ཞེས་གསུངས་སོ། །ཡང་ལྕམ་ལྷན་སྐྱེས་པའི་སྒྲོན་མེས་ཞུས་པ་ལ། ཡང་གསུངས་པ། བལྟ་རུ་མེད་དེ་མཐོང་བའི་མཆོག །དེ་ནི་སེམས་ཀྱི་འོད་གསལ་ལགས། །བཙལ་དུ་མེད་ཏེ་རྙེད་པའི་མཆོག །དེ་ནི་རིན་ཆེན་སེམས་གཏེར་ལགས། །ཟ་རྒྱུ་མེད་དེ་འགྲངས་པའི་མཆོག །དེ་ནི་མི་རྟོག་རྣམ་གྲོལ་ཟས། །བཏུང་དུ་མེད་དེ་ངོམས་བའི་མཆོག །བྱང་ཆུབ་སེམས་ལ་བཏུང་དུ་མེད། །རང་རིག་སེམས་ཀྱི་ཡེ་ཤེས་ལ། །ངག་ཏུ་བརྗོད་པའི་ལམ་མ་མཆིས། ཉན་ཐོས་བྱིས་པའི་ཡུལ་མིན་ཏེ། །རྟོག་གེ་པ་ཡི་དེ་མི་ཤེས། །བསྐུར་ཐོབ་མེད་པའི་དོན་རྟོགས་ནས། །དབང་གི་མཆོག་ནི་དེ་ལ་བྱ། །མཐོ་དམན་མེད་པའི་དོན་རྟོགས་ནས། །ས་ཡི་མཆོག་ནི་དེ་ལ་བྱ། །བགྲོད་དུ་མེད་པའི་དོན་རྟོགས་ན། །ལམ་གྱི་མཆོག་ནི་དེ་ལ་བྱ། །སྐྱེ་ཤི་མེད་པའི་དོན་རྟོགས་ན། །སྒྱུ་མའི་མཆོག་ནི་དེ་ལ་བྱ། །འདུ་འབྲལ་མེད་པའི་དོན་རྟོགས་ན། །ཚིག་གི་མཆོག་ནི་དེ་ལ་བྱ། །གཞལ་དུ་མེད་པའི་དོན་རྟོགས་ན། །ཚད་མའི་མཆོག་ནི་དེ་ལ་བྱ། །ཆེ་ཆུང་མེད་པའི་དོན་རྟོགས་ན། ཐབས་ཀྱི་མཆོག་ནི་དེ་ལ་བྱ། །བཟང་ངན་མེད་པའི་དོན་རྟོགས་ན། ཐེག་པའི་མཆོག་ནི་དེ་ལ་བྱ། །གཉིས་སུ་མེད་པའི་དོན་རྟོགས་ན། །ལྟ་བའི་མཆོག་ཀྱང་དེ་ལ་བྱ། །རྩོལ་སྒྲུབ་མེད་པའི་དོན་རྟོགས་ན། །སྒོམ་པའི་མཆོག་ཀྱང་དེ་ལ་བྱ། །དེ་ཉིད་དོན་ལས་མ་གཡོས་ན། །འབྲས་བུའི་མཆོག་ཀྱང་དེ་ལ་བྱ། །དེ་ལྟའི་དོན་དང་མི་ལྡན་པར། །ལྟ་བར་སྙེམས་པའི་སྟོན་པ་དང་། །ཚིག་ཁོག་མཁས་པའི་གྲྭ་པ་དང་། །སྤང་ལེན་བྱེད་པའི་སྒོམ་ཆེན་ཀུན། །གྲོལ་དུ་རེ་སྟེ་འཆིང་བར་མཆི། །གཉིས་འཛིན་གྱི་ཐག་པས་འཆིང་བར་མཆི། །ཐར་དུ་རེ་སྟེ་འཆིང་བར་མཆི། གཟུང་འཛིན་ལྕགས་ཀྱུས་བཟུང་སྟེ་མཆི། །ཐོན་དུ་རེ་སྟེ་བྱིང་དུ་མཆི། །ཁམས་གསུམ་འཁོར་བར་བྱིང་སྟེ་མཆི། །ཞེས་གསུངས་སོ། །ཡང་གསུངས་པ། གཉིས་སུ་མེད་པ་ལྟ་བའི་དོན། །ཡེང་བ་མེད་པ་སྒོམ་པའི་དོན། །ཟུང་དུ་འཇུག་པ་སྤྱོད་པའི་དོན། །དེ་གཉིས་དབྱེར་མེད་འབྲས་བུའི་དོན། །དམ་པའི་བརྒྱུད་པས་ཟིན་པ་དང་། །འཁྲུལ་པ་དབྱིངས་སུ་དག་པ་དང་། །བྱ་བ་གནས་སུ་ཐེགས་པ་དང་། །འདི་གསུམ་ལྡན་ན་རྣལ་འབྱོར་ཡིན། །ཕྱག་རྒྱ་ཆེན་པོ་བསྒོམ་པ་ལ། །མཚན་མའི་སེམས་འཛིན་དགོས་རྒྱུ་མེད། །སྤྲོས་བྲལ་ནང་ནས་ཤར་བ་ལ། །སྒྲ་དང་ཚད་མ་དགོས་རྒྱུ་མེད། །འདི་གསུམ་ལྡན་པ་རྣལ་འབྱོར་ཡིན། །ཞེས་གསུངས་སོ། །ཡང་གསུངས་པ། བུ་དང་ཆུང་མ་ངོ་སྲུང་གསུམ། །དེ་གསུམ་རྣལ་འབྱོར་གྱི་འཆིང་བ་ཡིན། །རྫས་དང་ལོངས་སྤྱོད་ཁེ་གྲགས་གསུམ། །དེ་གསུམ་རྣལ་འབྱོར་གྱི་ཆད་པ་ཡིན། །གཉེན་དང་ཡོན་བདག་སློབ་མ་གསུམ། །དེ་གསུམ་རྣལ་འབྱོར་གྱི་བཤོལ་འདེབས་ཡིན། །ཆང་དང་ངལ་དུབ་གཉིད་དང་གསུམ། །འདི་གསུམ་རྣལ་འབྱོར་གྱི་ཆོམ་པོ་ཡིན། །གཏམ་དང་གད་མོ་ལྟད་མོ་གསུམ། །དེ་གསུམ་རྣལ་འབྱོར་གྱི་གཡེང་བ་ཡིན། །བླ་མ་གདམས་ངག་དད་པ་གསུམ། །དེ་གསུམ་རྣལ་འབྱོར་གྱི་གཞི་མ་ཡིན། །དབེན་གནས་གྲོགས་མཆོག་འཚོ་བ་གསུམ། །འདི་གསུམ་རྣལ་འབྱོར་གྱི་ལམ་རྟགས་ཡིན། །མ་ཡེངས་མི་རྟོག་བདེ་བ་གསུམ། །འདི་གསུམ་རྣལ་འབྱོར་གྱི་གཏན་གྲོགས་ཡིན། །ལྷུག་པ་ཤུགས་འབྱུང་རང་ལུགས་གསུམ། འདི་གསུམ་རྣལ་འབྱོར་གྱི་འཁྱེར་ལུགས་ཡིན། །ཆགས་མེད་སྡང་མེད་རྨོངས་མེད་གསུམ། །འདི་གསུམ་རྣལ་འབྱོར་གྱི་ལམ་རྟགས་ཡིན། །ཞེས་གསུངས་སོ། །ཡང་གསུང་པ། རྣལ་འབྱོར་རབ་གཅིག་ཡོད་པ་དེ། །དགོན་པ་གངས་དཀར་རྩེ་ལ་བརྩེགས། །འཚོ་བ་སྣང་སྲིད་ལྷ་འདྲེས་འདྲེན། །སྐྱོ་རོགས་དཀོན་མཆོག་གསུམ་གྱིས་བྱེད། །གཏོར་མ་སེང་ལྕམ་དཀར་མོས་ཟ། །ནམ་ཚོད་བྱ་རྒྱལ་རྒོད་པོས་འཛིན། །དེ་འདྲའི་རྣལ་འབྱོར་སྐྱིད་སྐྱིད་འདྲ། དེ་འདྲའི་རྣལ་འབྱོར་བྲོད་ཀྱང་བྲོད། །རྣལ་འབྱོར་འབྲིང་ཅིག་ཡོད་པ་དེ། །དགོན་པ་རི་བོའི་མགུལ་དུ་བརྩེགས། འཚོ་བ་ཡོན་བདག་ཕོ་མོའི་སྦྱོར། །སྐྱོ་རོག་མ་དང་མཁའ་འགྲོའི་བྱེད། །གཏོར་མ་ཝ་དང་སྤྱང་ཀིས་ཟས། །ནམ་ཚོད་ལྷ་བྱ་གོང་མོ་འཛིན། །དེ་འདྲའི་རྣལ་འབྱོར་དེ་བྲོད་ཀྱང་བྲོད། །རྣལ་འབྱོར་ཐ་མ་ཅིག་ཡོད་པ་དེ། །དགོན་པ་གྲོང་ཁྱེར་གྱི་དབུས་སུ་བརྩེགས། །འཚོ་བ་ཟོལ་ཟོག་གཉིས་ལ་བྱེད། །སྐྱོ་རོགས་དེ་ཨ་ཞེ་གོ་མས་བྱེད། །གཏོར་མ་དེ་ཁྱི་དང་རྨང་རྩེས་ཟ། །ནམ་ཚོད་དེ་བུ་ཆུང་ངུ་བས་བཟུང་། །དེ་འདྲའི་རྣལ་འབྱོར་ཡི་རེ་མུག །ཡི་རེ་མུག་ལ་སྙིང་རེ་རྗེ། །ཞེས་གསུངས་སོ། །ཡང་གསུངས་པ། ཉིན་མཚན་མེད་པར་ཉལ་བ་ལ། །གདིངས་བཞི་ལྡན་པའི་གདམས་ངག་འཚལ། །དེ་ཡི་གདམས་ངག་མེད་པ་ན། །རྣལ་འབྱོར་ཁྱི་ཕག་གསེབ་ཏུ་འཆོར། །འགྲོ་ཉལ་འདུག་སྒོམ་གདམས་ངག་འཚལ། །དེ་ཡི་གདམས་ངག་མེད་པ་ན། །རྣལ་འབྱོར་སྤྲང་པོའི་གསེབ་ཏུ་འཆོར། །ཆ་ལ་བླ་མའི་གདམས་ངག་འཚལ། །ཞེས་གསུངས་སོ། །དེ་ཐམས་ཅད་ལྕམ་མེའི་སྐོར་རོ།། །།