ནུས་པ་ཆེ་བའི་ཡོན་ཏན།

དེ་ནས་བཅུ་བཞི་པ་ཆེ་བའི་ཡོན་ཏན་ནི། བྲིང་གི་ཕུག་པ་ཅིག་ན་སྒོམ་ཆེན་སུ་བསྡད་གཤེགས་ནས་འགྲོ་ཆེ་ཟེར

་ནས་མི་སུ་འགྲོ་མི་ཕོད་པ་ཅིག་ཏུ། རས་ཆུང་པ་དཔོན་སློབ་གཉིས་བྱོན་ནས་བླ་མ་ཟད་པར་ཆུའི་ཏིང་ངེ་འཛིན་ལ་བཞུགས་ཙ་ནམ་སྲོད་ལ་བུད་མེད་ཆེན་མོ་ཅིག་བྱུང་ནས་ང་ཡི་འདི་ན་སུ་ཡོད་ཟེར་བ་ལ། བླ་མས་སྙིང་རྗེ་བསྒོམ་ཙ། སྨེ་བ་ཅན་འདྲ་བ་གཡོ་ཆེ་བ་ཞིག་ཟེར་ནས་ལོག་སོང་ངོ་། །དེ་ནས་ནམ་ཕྱེད་ན་ཡང་བུད་མེད་ཅིག་འོང་ནས་བླ་མའི་གཟིམས་མལ་ཆུ་དེའི་ནང་དུ་རྡེའུ་ཞིག་འཕང་ནས་སོང་ཞུས་པས། འོ་ན་ཁྱོད་ཀྱིས་ཐོན་གསུངས་ནས་ཆུའི་ཏིང་ངེ་འཛིན་ལ་བཞུགས་པས། རས་ཆུང་པས་རྡེའུ་བཏོན་ནས་ཕན་པར་འདུག་གོ །དེའི་ཕྱི་ནུབ་མོ་དེ་ལ་རྒྱལ་པོ་གཉིས་ཀྱི་སྣ་དྲངས་ཏེ་འདྲེའི་དམག་མང་པོ་བྱུང་ནས། འདིར་སུ་ཡོད་ན་ཁྱོད་རང་གི་ཡུལ་དུ་མགྱོགས་པར་སོང་ཞིག །མི་འགྲོ་ན་འདྲེ་དམག་གིས་ཁྱོད་ལ་བ་ཐོབ་པ་འདྲ་བ་ཅིག་བྱེད་ཟེར་བས། བླ་མས་དེའི་ལན་དུ་མགུར་འདི་གསུངས་སོ། །རྗེ་འགྲོ་བའི་མགོན་ལ་གསོལ་བ་འདེབས། བསམ་ངན་ཞི་བར་བྱིན་གྱིས་རློབས། །འོ་ན་རྒྱལ་ངན་སྙིང་རེ་རྗེ། །འདྲེ་མོའི་དམག་ཚོགས་ཉོན་རེ་མོངས། །ཁྱོད་བསམ་ངན་གདུག་རྩུབ་གོམས་གོམས་ནས། །སེམས་ཅན་ཡོངས་ལ་འཆི་བ་བྱེད། །ཤ་དང་ཁྲག་ལ་ཟོས་ཟོས་ནས། སྲོག་གཅོད་དབུགས་ལེན་ཤིན་ཏུ་བྲོད། །ལུས་ངན་འདྲེ་མོར་སྐྱེས་སྐྱེས་ནས། །ལས་ངན་སྤྱད་སྤྱད་དམྱལ་བར་སྐྱེ། །ད་ཐར་པའི་ས་བོན་མི་དྲན་པས། །ཐར་ཐབས་མེད་པས་སྙིང་རེ་རྗེ། །ང་སྟོང་ཉིད་སྙིང་རྗེའི་གདན་ལ་བཞུགས། །ཁྱོད་སོང་ཅིག་བྱས་པས་ཆས་ཐབས་མེད། །རྫུ་འཕྲུལ་ལུས་ཀྱི་བཀོད་པ་ལ། །ཁྱོད་འཁྱེར་རྒྱུ་རྙེད་ན་དགའ་བ་ཡིན། །བྱང་ཆུབ་སེམས་ཀྱི་བདག་ཉིད་ལ། །འདྲེ་མང་པོའི་འཚོགས་ན་ང་ཡང་དགའ། །ཞེས་གསུངས་པས། ལ་ལ་ན་རེ་སོང་ཟེར། གཅིག་ན་རེ་མི་འགྲོ་ན་འདྲེ་མོ་འདི་ལ་གནས་ཤིག་བྱིན་ཟེར། དེའི་ནང་ནས་ཞེ་ནག་པ་འགས་གདུག་རྩུབ་བྱས་ནས་ད་མི་འགྲོ་བར་འདུག་ཟེར་ནས། ཐོག་དང་སེར་བ་འབབ་ལ་ཁད་བྱུང་བས་བླ་མས་མགུར་འདི་གསུངས་སོ། །ཁྱོད་ལེགས་པར་ཉོན་དང་རྒྱལ་པོ་གཉིས། །འདྲེ་མོ་ཞེ་ནག་གདུག་རྩུབ་ཅན། །འབྱུང་པོ་ཡི་དྭགས་ཐམས་ཅད་ལ། རང་གིས་རང་བྱས་རང་ལ་སྨིན། །གདུག་སེམས་སྐྱེས་ཤིང་སྡུག་བསྔལ་སྐྱེད། །བསམ་ངན་སྐྱེས་ཤིང་བསོད་ནམས་འཛད། །ཟ་འདོད་ལང་ཞིང་ཟ་རྒྱུ་དཀོན། ལྟོགས་པ་ཆེ་བས་རང་སྐལ་འཆད། འགྲོ་འདུག་མང་བས་གནས་མལ་འཆོར། །བྱེད་རྒྱུ་མང་བས་ཚར་དུས་མེད། །ལས་ངན་བསགས་ཞིང་དོན་མི་འགྲུབ། །ཁ་སོ་ཆེ་བའི་དགྲ་མི་ཐུབ། །ཁྱོད་ཡིད་ངན་འདྲེ་མོ་ཆོ་འཕྲུལ་ལ། །ང་རྣལ་འབྱོར་ཤིན་ཏུ་དགོད་སྙིང་འདོད། །ཆོ་འཕྲུལ་རྫུན་ཀྱི་ཧྲ་ཧྲི་ལ། །ང་རྣལ་འབྱོར་ཤིན་ཏུ་རྒྱུ་མཚན་ཞིབ། །ཁྱོད་གནས་མལ་འདོད་ན་སྟབས་ཀྱིས་སྤྲད། །གསུང་གླེང་ཡོད་ན་མོས་ཀྱི་བྱེད། །གནས་འདིར་སྒོམ་ཆེན་མང་པོ་བོར། །ང་དེ་ཡི་ཙ་རར་བྱེད་དུ་འོང་། །གནས་འདི་བདག་ཁྱེད་ཚོ་ཡིན་པ་ལ། །ངས་མ་རྙེད་པ་དེ་ཁྱེད་ཚོ་ཡིན། །འདྲེ་འདིར་འཚོགས་གཅིག་ཀྱང་མ་འགྲོ་བར། །གཞན་འདྲེ་སྲིན་ཡོད་ཚད་བོས་ལ་ཤོག །ཅེས་གསུངས་པས། རྒྱལ་པོ་གཅིག་ན་རེ། འདི་ལ་སྟོང་ཉིད་ཀྱི་གོ་ཆ་ཡོད་པའི་བློ་གདིང་ཅན་ཅིག་འདུག །དངོས་པོ་ལ་དངོས་པོའི་མཚོན་གྱིས་ཐུབ་པ་ཡིན། སྟོང་ཉིད་ལ་དངོས་པོའི་མཚོན་གྱིས་ཕན་གནོད་མེད་པས། ད་དུམ་བྱ་དགོས་ཟེར། འདྲེ་དམག་བྱིང་གིས་འདིར་འོང་རྒྱུ་གཅིག་ལ་རེ་ཙ་ཟེར་ནས། ཐམས་ཅད་ཀྱིས་ཕྱག་དང་བསྐོར་བ་བྱས་པས། བླ་མས་ད་རུང་འདི་རྣམས་ལ་ངེས་ཤེས་མེད་དགོངས་ནས་མགུར་འདི་གསུངས་སོ། །ཁྱོད་ལེགས་པར་ཉོན་དང་འདྲེ་མོ་ངན། །ཁྱོད་ལས་ངན་འདྲེ་ཡི་དམག་དཔུང་དེ། །ལས་ངན་བསགས་པའི་སྡིག་པ་ཡིན། །ང་སྣང་སྲིད་ཆོས་སྐུར་ཤར་བ་ལ། །འདྲེ་ཡི་དམག་ཚོགས་རྒྱན་དུ་བཟང་། །ད་ལེགས་པར་ཉོན་དང་རྒྱལ་པོ་འདྲེ། །ཁྱོད་སྐྱབས་དཀོན་མཆོག་གསུམ་ལ་གནས་པ་ན། །གནས་བཟང་པོ་འཆུག་མེད་རྙེད་པ་ཡིན། །ཤ་ཁྲག་ཟས་སུ་མ་ཟོས་ན། །མཐོ་རིས་ཐར་ལམ་ཐོབ་པ་ཡིན། །འགྲོ་ལ་འཚེ་བ་སྤངས་པ་ན། །བྱང་ཆུབ་ལམ་སྣ་མྱུར་དུ་ཟིན། །མི་དགེ་བཅུ་པོ་སྤངས་པ་ན། །རྒྱལ་བས་རྗེས་སུ་འཛིན་པ་ཡིན། །དགེ་བ་བཅུ་པོ་སྒྲུབ་ནུས་ན། །བླ་མའི་གདམས་ངག་གོ་བ་ཡིན། །གདུག་སེམས་འཁྲུག་པ་ཞི་ནུས་ན། རིག་འཛིན་གྲལ་དུ་ཕྱིན་པ་ཡིན། །དམ་བཅའ་སྡོམ་པ་བྱེད་ནུས་ན། །འོ་སྐོལ་འདུན་མ་འཆམ་པ་ཡིན། །སྡོམ་པ་དམ་ཚིག་ལེན་ནུས་ན། །ངས་ཀྱང་དམ་ལ་འབེབས་པ་ཡིན། །ཞེས་གསུངས་པས། ཁོང་རྣམས་དད་ནས་སྐྱབས་འགྲོ་དང་སེམས་བསྐྱེད་ཞུས་ནས་དམ་བཅའ་མི་རེས་རེ་རེ་ཕུལ། ལ་ལས་ཉ་སྡོམ་སྲུང་ཟེར། ལ་ལས་བླ་མའི་འཁོར་དུ་གཏོགས་པའི་ཞབས་ཏོག་བྱེད་ཟེར། སྲོག་འབུལ་མི་ཡང་མང་པོ་བྱུང་སྟེ། དེ་ཕྱིན་དགོན་པ་དེར་སུ་བསྡད་ལ་གནོད་པ་མི་བྱེད་པའི་དམ་བཅའ་དྲག་པོ་བྱས། དེ་ཕྱིན་ནས་དགོན་པ་དེར་བཀྲ་ཤིས་པ་བྲིང་གི་ལ་སོ་ལྷ་མོ་ཕུག་ཏུ་བཏགས་སོ། །དེ་ནས་སྙེ་ནམ་དུ་བྱོན་པ་ལ་ཡོན་བདག་དང་གྲྭ་པ་རྣམས་ཀྱིས་འདྲེ་ཨེ་ཐུབ་ལགས། །ཞེས་ཞུས་པའི་ལེན་དུ་མགུར་འདི་གསུངས་སོ། །བྲིང་གི་ལ་སོ་དགོན་པ་དེར། །སྒྱུ་མ་ལུས་ཀྱི་སྐྱིལ་ཀྲུང་བཅས། །གཉིས་སུ་མེད་པར་མཉམ་པར་བཞག །སྐྱེ་བ་མེད་པའི་དམིགས་པ་ལ། །ཡེང་བ་མེད་པར་བློ་བཞག་ནས། །བདུད་མོའི་གནོད་སེམས་བྱང་ཆུབ་བསྒྱུར། མ་རུང་སེམས་ཕྲལ་སློབ་མ་བྱས། །ད་ནི་སུ་འགྲོ་ཉམ་ང་མེད། །གང་སྡོད་ཐུགས་དམ་ཡར་ལ་འཕེལ། །གནས་ནི་བཀྲ་ཤིས་ལྷ་མོ་ཕུག །གནས་པོ་དགེ་བསྙེན་བླ་མ་སྐྱབས། །ངེད་རང་ཚོ་དང་གྲོགས་མཆེད་ཡིན། དེ་བཞིན་དགོངས་ལ་སུ་འགྲོ་སོང་། །ཚེ་རིང་ནད་མེད་དངོས་གྲུབ་འཐོབ། །ཅེས་གསུངས་སོ། །དེ་ཐམས་ཅད་བྲིང་གི་ལ་སོའི་སྐོར་རོ།། །།དུས་དེར་ལོ་སྟོང་དགོན་པར་རྗེ་བཙུན་གྱི་གྲྭ་པ་རྣམས་ནད་དྲག་པོས་ན་བ་ལ། རྗེ་བཙུན་དེར་བྱོན་ཏེ། ཞབས་སྐྱིལ་ཀྲུང་མཛད་ནས་ཡང་དག་པའི་དོན་ལ་མཉམ་པར་བཞག་པས། ནད་པ་ཐམས་ཅད་ཞག་གསུམ་ནས་ལེགས་པར་སོས། དེའི་དུས་སུ་གསུངས་པ། བྲིན་གྱི་ལོང་སྟོང་དགོན་པ་རུ། །སྒྱུ་མ་ལུས་ཀྱི་སྐྱིལ་ཀྲུང་བཅས། །གཉིས་སུ་མེད་པའི་མཉམ་བཞག་བྱས། །སྐྱེ་བ་མེད་པའི་དམིགས་པ་ལ། །ཡེང་བ་མེད་པར་བློ་བཞག་ནས། །མ་རུང་སེམས་ཕྲལ་སློབ་མར་བྱས། །ཞི་ཁྲོ་གཉིས་ཀྱི་དགུག་གཞུག་ལ། བྱམས་དང་སྙིང་རྗེས་བློ་བཞག་པས། །མ་རུངས་སྟོང་ཕྲག་བརྒྱད་ཅུ་ཡི། །གདོན་བསལ་ནས་ནད་པ་ཡོ་ནས་བསླངས། །ཐ་མ་ལུས་ཀྱི་ནད་པ་ལ། །ཡི་དམ་ལྷ་ཡི་སྨན་སྦྱོར་གྱིས། གཟུང་འཛིན་གཉིས་ཀྱི་ནད་རྣམས་གསལ། གཉིས་སུ་མེད་པའི་སྨན་སྦྱོར་གྱིས། །བཞི་བརྒྱ་རྩ་བཞིའི་ནད་རྣམས་བསལ། །ཕྱག་རྒྱ་ཆེན་པོའི་རོ་སྙོམས་བྱས། །བསལ་ན་ནད་ཀྱང་སོས་སོས་འདྲ། །ཞེས་གསུངས་སོ། །དེར་རྗེ་བཙུན་ལ་ཡུལ་ཞིང་དགོན་པ་དང་། རི་ཁྲོད་དང་། ཡུལ་ཞིང་ལ་སོགས་པ་འབུལ་བ་མང་པོ་བྱུང་ཡང་དེ་འདྲ་དགོས་པ་མེད། འདི་འདྲ་ཁོ་ན་དགའ་ཟེར་ནས་རྣ་བ་བཙིར་བ་ཅིག་བྱུང་དགོས། ལར་སོ་སོའི་སྐྱེ་བོ་ཡིན་པའི་ས་ལ་གནས་འདི་ཚོ་བས་གསར་འགྲོགས་ལ་དགའ་བ། ཕྱི་ཐག་ཐུང་བ། འགྲས་རྐྱེན་པ་མེད་གསུངས་ནས། མཆོང་གླིང་བྲག་ལ་བྱོན་པས། དེ་སྟོན་པ་བྷོ་དྷི་རཱ་ཛ་ཞེས་བྱ་བ་ཁོང་རང་གིས་སློབ་མ་སྟོན་སྒོམ་བཟང་པོ་སྔར་ཁོང་རང་གིང་པ་བྲག་ལ་ཡོད་དུས་བྱོན་པ། ཚད་མ་དང་། བསླབ་བཏུས་དང་། རྒྱུད་བླ་མ་ལ་སོགས་པ་བྱམས་པའི་ཆོས་ལྔ་ལ་ཤིན་ཏུ་མཁས་པ་ཡུལ་ལྕིམ་ལུང་པ་གཅིག་དང་། འཁོར་གྱི་གཙོ་བོ་སྟོན་པ་ཆོས་རྡོར་གཉིས་ཀྱིས་ངོ་ཆེན་བྱ་ནས་མངའ་རིས་པའི་རྒྱུ་སྟོན་བྱ་བ། ཕར་ཚད་ལ་སོགས་པ་སློབ་དཔོན་བཅུ་གཅིག་དང་མང་ཡུལ་དང་ལ་སྟོད་གཉིས་ཀ་ནས་འབངས་མང་དུ་ཡོད་པའི་བཙད་པོ་ཁུ་མཚན་གཉིས། ལྷ་བཙུན་མངོན་པ་དང་། འདུལ་བ་ཤེས་པའི་དཔོན་གཡོག་བདུན་རྣམས་བྱུང་སྟེ། རས་དང་ཟངས་དང་མཛོ་དང་། དྲེལ་ལ་སོགས་པ་ཕྱག་རྟེན་དུ་ཕུལ་ནས། ཆོས་བཤད་པ་སྒོམ་པ་གཉིས་གལ་ཆེ། སྔར་ངེད་ཚོའི་ཆོས་དེ་ལམ་དུ་སོང་ངམ་སོགས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་པོའི་དོན་གང་ལགས་ངེས་དོན་གང་ལགས་ཞུས་པས། རྗེ་བཙུན་གྱིས་མ་བཞེས་པར་ལེན་དུ་གླུ་ཞིག་བྱའོ་གསུངས་ནས། རྗེ་བླ་མ་རྣམས་ལ་ཕྱག་འཚལ་ལོ། །ཁྱེད་སྟོན་སྒོམ་གཉིས་ཀྱིས་ཞུ་སྣ་མཛད། །ཆེ་ལུང་གསུམ་གྱི་ཆེ་དགུ་བྱུང་། །གདམས་ངག་ལམ་དུ་འཇིག་པར་ཞུ། ཞུ་ཆེན་དང་ཞུ་མཁན་གཉིས་ཀ་བཟུང་། །ང་གུང་ཐང་མི་ལ་མཐུ་ཆེན། །སངས་རྒྱས་མར་པའི་གཅེས་མིང་ལགས། །ངེས་ཚིག་གཡེམ་རྒྱུག་ཐོས་བློ་མ་ཡིན་པར། །རང་འདོད་དང་ཟུར་ཟ་མ་ཡིན་པའི། །གཏིང་ནས་སྙིང་ལ་བབ་པའི་ཚིག །གོ་བས་སླ་ཞིང་དོན་ལ་བདེན། །རིག་པས་བརྟགས་ན་འཐད་དུ་འགྲོ། །ང་མི་རྒན་གྱི་ཁ་བཤད་ལེགས་པར་ཉོན། །རང་གི་ཉམས་སུ་མ་བླངས་ན། །མཁའ་ལ་རྒྱུ་བའི་ཡིད་དྭགས་ཡལ། །རྒྱུད་སྡེའི་མཁྱེན་རྒྱ་ཁོང་གི་ཤེས། གང་འབྲེལ་རིག་པ་ཁོང་ཡང་མཁས། །སྒྲ་ཚད་ཐ་སྙད་ཁོང་ཡང་དག །མངོན་ཤེས་རྫུ་འཕྲུལ་ཁོང་ལ་མངའ། །འབྱོར་པ་ལོངས་སྤྱོད་ཁོང་ཡང་བཟང་། །བློ་གྲོས་རིག་པ་ཁོང་རྣོ་སྟེ། །ཆོས་རང་གིས་ཉམས་སུ་མ་བླངས་ནས། །རྒྱུ་འབྲས་ཕྲ་ལ་མ་འཛེམ་ལ། །ཆེར་རློམ་འཇིག་རྟེན་བློས་མ་ཐེང་། །རང་འདོད་རྣམ་རྟོག་མ་ཟད་པས། །ངེས་པའི་དོན་ལ་རྟོགས་དུས་མེད། །འཁོར་བའི་ཆུ་ལས་ཐར་དུས་མེད། །སྡུག་བསྔལ་གྱི་མྱུ་གུ་སྐེམ་དུས་མེད། །ཤེས་བྱ་མཁས་དང་མངོན་ཤེས་མྱུར། །འགལ་འབྲེལ་རྣམ་རྟོག་རག་པ་དེས། །རང་རྒྱུད་བསྲེག་པའི་མེ་ཤིང་ཡིན། སླར་ལ་རང་སྐྱོན་རང་ལ་འཁོར། །དམ་ཆོས་ཉམས་སུ་བླང་རྒྱུ་ཡིན། །དེ་བས་ཉམས་སུ་བླངས་ཀྱང་འཚལ། །འཆི་སོས་སྨན་གྱི་བདུད་རྩི་ཡིན། །ནད་པ་རང་གིས་མ་མྱོང་ན། །བདུད་རྩི་ཡོད་པས་ཅི་ལ་ཕན། །ནད་ལས་མྱུར་དུ་ཐར་འདོད་ན། །ལྷ་འཆི་སོས་སྨན་དེ་ཟ་ཡང་འཚལ། །སྨན་མཆོག་དེ་ལ་ལོངས་སྤྱོད་འཚལ། །འཆི་མེད་ལྷ་ཡི་བདུད་རྩི་དེ། །ལྷ་མིན་ལྷ་ལག་ཏུ་མང་ཡོད་དེ། །རང་གིས་མྱོང་བར་མ་ནུས་པས། །ལྷ་མིན་ཕལ་ཆེར་དུས་མིན་འཆི། འཆི་མེད་བདུད་རྩིས་ཅི་ལ་ཕན། །དུས་མིན་འཆི་ལས་ཐར་འདོད་ན། །འཆི་མེད་རྒྱལ་པོ་འཐུང་ཡང་འཚལ། །བདུད་རྩི་རང་གིས་སྤྱད་ཀྱང་འཚལ། །རོ་བརྒྱ་ལྡན་པའི་ཟས་མཆོག་དེ། །གཤིན་རྗེའི་མཛོད་ན་མང་ཡོད་དེ། རང་གིས་ཟ་བར་མ་ནུས་པས། །གཤིན་རྗེ་ཕལ་ཆེར་བཀྲེས་ནས་འཆི། །ཁ་ཟས་མཆོག་དེས་ཅི་ལ་ཕན། །བཀྲེས་པའི་ནད་ལས་ཐར་འདོད་ན། ཁ་ཟས་རང་གི་ཟ་ཡང་འཚལ། །རོ་བརྒྱ་རང་གི་མྱོང་ཡང་འཚལ། །ལར་དང་ངས་ནི་མི་ཤེས་ཨང་། །བཤད་རལ་མཁན་པོ་ཡིན་ཀྱང་མིན། །མིན་ཀྱང་ད་རེས་ཞུ་མཁན་བཟང་། །ཕར་ཕྱིན་དྲུག་ལ་ཆོས་ཀུན་འདུས། །སྦྱིན་པ་རྒྱལ་པོའི་ཆོས་ལུགས་ཡིན། །བདོག་པ་ཅི་ཡོད་སྦྱིན་པས་ན། མཐོང་ཆོས་ལྷ་མི་རྒྱལ་སྲིད་འཐོབ། །དེ་ཆོས་མཛད་རྣམས་ཀྱི་གཡེང་བའི་རྒྱུ། ཚུལ་ཁྲིམས་ཐར་པའི་ཕྱི་སྐས་ཡིན། །སངས་རྒྱས་བསྟན་པར་ཞུགས་པ་ཡིན། །སྐྱེས་བུ་ཀུན་ལ་མེད་ཐབས་མེད། བསྟན་པ་ཟུངས་ཤིག་འདིར་འདུས་རྣམས། །བཟོད་པ་དྲང་སྲོང་ཁྱད་ཆོས་ཡིན། །དྲང་སྲོང་ཤཱཀྱའི་རྗེས་འབྲངས་ནས། །ཀུན་གྱིས་གྱོན་པས་དཀའ་བའི་གོས། །བཟོད་པའི་གཡང་ལུགས་ལེགས་པར་གྱོན། །བརྩོན་འགྲུས་ཐར་པའི་ཉེ་ལམ་ཡིན། །དམ་ཆོས་སྤྱི་ལ་དགོས་པའི་ལམ། །ལམ་དེ་དང་བྲལ་ན་རེ་ཐག་ཆད། །ལམ་དེ་ཡི་གཞུང་ལ་ཞུགས་ལ་རྒྱུག །ཆོས་བཞི་དེ་ཀུན་བསོད་ནམས་ཚོགས། །རྣལ་འབྱོར་ཀུན་ལ་མེད་ཐབས་མེད། །ད་ནི་ཡེ་ཤེས་ཕྱོགས་ཀྱི་ཆོས། །བསམ་གཏན་ཚོགས་གཉིས་ས་མཚམས་ཡིན། །ས་མཚམས་རྟག་ཏུ་སྡོད་དགོས་པས། །གཡེང་བ་བྱུང་བ་བསྲུང་བའི་ཐབས། །ཚོགས་གཉིས་ཀུན་ལ་སྦྱར་ཡང་འཚལ། །ཤེས་རབ་ངེས་པའི་དོན་གྱི་ཆོས། །སངས་རྒྱས་ཀུན་གྱི་མཛོད་གཅིག་པུ། །སྤྱད་པས་མི་འཛད་རྒྱུན་ལ་རྒྱུག །འཇིག་རྟེན་སེམས་ཅན་མ་ལུས་ལ། །གྱ་ནོམ་དབུལ་བ་འདོར་བའི་ནོར། །མི་ཁོམ་མཐའ་དག་སྤངས་ནས་ནི། །དལ་བའི་མཆོག་དེ་སྦྱིན་པར་མཛད། །ཡེ་ཤེས་ཚོགས་དེ་རིན་ཆེན་ཡིན། །རིམ་གྱིས་ཁྱད་པར་འཕགས་སུ་སོང་། །ཁྱེད་རྣམས་ཀུན་གྱི་མགྲོན་དེ་མཛོད། །ཐུགས་དགྱེས་པས་དགོངས་ལ་ཉམས་སུ་ལོངས། །ཞེས་གསུངས་པས་ཐམས་ཅད་དད་ནས་གདམས་ངག་ཞུས་པས་ཉམས་རྟོགས་ཁྱད་པར་དུ་འཕགས་པ་འཁྲུངས་པ་ལགས་སོ། །བྲིང་གི་ལོ་སྟོང་དགོན་པའི་སྐོར་རོ།། །།དེ་ནས་རྗེ་བཙུན་གུང་ཐང་གྲོང་མོ་ཆེ་ཡི་སྲང་སྒོ་གཅིག་ན་ཕར་ལ་བྱོན་ཙ་བུད་མེད་རྫོང་མང་པོ་བཏགས་པ་གཅིག་ཆུ་ཁུར་ནས་བྱུང་བ་ལ། ཡོན་བདག་མོ་སོང་པོ་ཅིག་སློང་། དེ་མེད་ན་ཆུ་ཞིག་སློང་གསུངས་པས། མོ་ན་རེ། ཁྱོད་རྣལ་འབྱོར་པ་གཅེས་རྒན་ཅིག་འདུག །ཆུ་དགོས་ན་ཆུ་ཁར་སོང་། ཁྱོད་ང་ལ་བསྙད་ཚོལ་ནས་གཡུ་འབྲག་འདོད་ཟིན་ཏེ། ངས་བུ་དང་སྐུད་པོ་རྣམས་བཀོད་ན་ཁྱོད་བསད་འདོད་ཟེར་བས། འདི་དང་འབྲེལ་པ་མེད་པར་འདུག་དགོངས་ནས་གྲོང་སྨད་ཅིག་ཏུ་ཕར་སོང་བས། རྒན་མོ་ཞིག་འདུག་པ་ལ་རྒན་མོ་ང་ལ་སིང་པོ་ཅིག་སློང་། དེ་མེད་ན་ཆུ་ཞིག་སློང་གསུངས་པས་ནང་དུ་འབྱོན་པར་ཞུ་ཟེར་ནས། ར་བ་ཞིག་ཏུ་བཞུགས་བཅུག་ནས་ཆང་མང་པོ་དྲངས་ཏེ་རྒན་མོ་ན་རེ། རྣལ་འབྱོར་པ་ཁྱེད་འདྲ་བ་མཐོང་ཙ་ང་གླུ་དང་བྲོ་འཁྲབ་སྙིང་འདོད་སྟེ། བུ་དང་ཚ་བོ་ཀུན་གྱི་ཨ་མ་སྨྱོས་འདུག་ཟེར་ནས་འོང་ཟེར་བའི་ལན་དུ་རྗེ་བཙུན་གྱིས་ཁྱོད་རྒན་མོ་སྨྱོ་ལུགས་ཇི་ལྟར་སྨྱོ། ང་རྣལ་འབྱོར་པ་སྨྱོ་ལུགས་གསུངས་ནས་མགུར་འདི་གསུངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །སྒོས་བཀའ་དྲིན་ཅན་གྱིས་བྱིན་གྱིས་རློབས། །མི་མཐུན་རྐྱེན་ངན་བར་ཆད་སོལ། །མཐུན་པའི་ལམ་སྣ་ཆོས་ལ་དྲོངས། །ང་ཕ་སྨྱོ་བུ་སྨྱོ་མེས་པོ་སྨྱོ། །ཡང་མེས་ཏེ་ལོ་བཟང་པོ་སྨྱོ། །མེས་པོ་ནཱ་རོ་པཎ་ཆེན་སྨྱོ། །ཕ་རྒན་མར་པ་ལོ་ཙཱ་སྨྱོ། །ང་རང་མི་ལ་རས་པ་སྨྱོ། །སྨྱོ་བའི་སྨྱོ་ལུགས་བཤད་ཙམ་ན། །ཡང་མེ་ཏེ་ལོ་བཟང་པོ་དེ། །ཕྱག་རྒྱ་ཆེན་པོའི་གདོན་གྱིས་སྨྱོ། །མེས་པོ་ནཱ་རོ་པཎ་ཆེ་དེ། །རིག་པ་བརཏལ་ཞུགས་གདོན་གྱིས་སྨྱོ། །ཕ་རྒན་མར་པ་ལོ་ཙཱ་དེ། །རྒྱུད་སྡེ་བཞི་ཡི་གདོན་གྱིས་སྨྱོ། །ང་རང་མི་ལ་རས་པ་འདི། །རྩ་རླུང་གཉིས་ཀྱི་གདོན་གྱིས་སྨྱོ། །ཕྱོགས་རིས་མེད་པའི་ལྟ་བ་སྨྱོ། །དམིགས་མེད་རང་གསལ་སྒོམ་པ་སྨྱོ། །འཛིན་མེད་རང་གྲོལ་སྤྱོད་པ་སྨྱོ། །ཟོལ་ཟོག་མེད་པའི་དམ་ཚིག་སྨྱོ། །སྨྱོ་བས་མི་ཚད་འདྲེ་ཡང་གདོན། །ཕོ་གདོན་བླ་མའི་གདམས་ངག་གདོན། །མོ་གདོན་མཁའ་འགྲོའི་བྱིན་རླབས་གདོན། །བློ་བདེ་འཁོང་པོ་ཕུག་ཞུགས་གདོན། །དེ་ལྟར་སྨྱོ་བའི་རྣལ་འབྱོར་ལ། །དུས་གཏན་དུ་བདེ་སྐྱིད་རྒྱུན་ཆད་མེད། །ཅེས་གསུངས་པས་མོ་ན་རེ། ངེད་ཡུལ་འདི་ན་འདྲེ་རེད་ཟེར་རྡུང་བཏགས་བྱེད་ལུགས་ཡོད་པས། མ་ཕོད་པ་ཡིན་ཟེར་བའི་ལན་དུ་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །རྟོགས་པའི་རྒྱལ་པོ་སྙིང་ལ་ཞུགས། །ཉམས་རྩལ་འདྲེ་མོས་ཡང་ཉུལ་བྱས། །འདྲེ་གདོན་བས་མི་ཚད་ན་ཡང་ན། །ཕྱག་རྒྱ་ཆེན་པོས་རྒྱབ་ནས་གཟེར། །རྫོགས་པ་ཆེན་པོས་མདུན་ནས་གཟེར། །ལུས་ལ་གཏུམ་མོ་མེ་ལྟར་འབར། །ཁ་ནས་གདམས་ངག་ཁྲག་ལྟར་སྐྱུགས། །ཆོས་ཉིད་བདེན་པས་བྱང་ཁོག་རྒྱས། །ན་བས་མ་ཚད་འཆི་ཡང་འཆི། ལྟ་བའི་ཀློང་དུ་ཕྱོགས་རིས་འཆི། །སྒོམ་པའི་ཀློང་དུ་བྱིང་རྒོད་འཆི། །སྤྱོད་པའི་ཀློང་དུ་ཚུལ་འཆོས་འཆི། །དམ་ཚིག་ཀློང་དུ་ཟོལ་ཟོག་འཆི། །འབྲས་བུའི་ཀློང་དུ་རེ་དོགས་འཆི། །སྐུ་གསུམ་ངང་དུ་རྣལ་འབྱོར་འཆི། །རྣལ་འབྱོར་ཤི་བའི་ནང་པ་དེར། །སྣམ་བུ་རྐྱང་པ་མ་ལགས་པའི། །ཕྱི་སྣང་བ་ཁྲ་བོར་རེ་ཐུམ་ཐོང་། །རྩྭ་དྲེས་མའི་ཐག་པ་མ་ལགས་པའི། །རྩྭ་ཨ་ཝ་དྷུ་ཏིའི་ཐག་པས་སྒྲོག །སྣབ་བཤལ་བུ་ཚ་མ་ལགས་པའི། །རིག་པའི་ཁྱེའུ་ཆུང་མར་ལོང་ལ། ང་རྣལ་འབྱོར་ཤི་བའི་རོ་འདི་ཁུར། །ས་ལམ་སྐྱ་མོ་མ་ལགས་པའི། །བྱང་ཆུབ་ཆེན་པོའི་ལམ་ལ་དྲོངས། །ས་མཁན་མཁའ་འགྲོ་སྡེ་བཞིས་མཛོད། །རོ་སྣ་བཀའ་བརྒྱུད་བླ་མས་དྲོངས། །གངས་རི་སྤང་རི་མ་ལགས་པའི། དཔལ་ཀུན་ཏུ་བཟང་པོའི་ས་ལ་སྐྱེལ། །ཝ་དང་སྤྱང་ཀི་མ་ལགས་པའི། །ཐབས་ཤེས་གཉིས་ཀྱི་ཝ་སྤྱང་རོལ། །རྡོ་རྗེ་འཆང་གི་དུར་དུ་སྦོས། །ཞེས་གསུངས་པས། མོ་ན་རེ། ཁྱེད་དེ་འདྲ་སྨྱོ་བའི་རྣལ་འབྱོར་པ་རེད་པས་ཞལ་མཐོང་བ་ནས་སྣང་བ་འགྱུར་ཞིང་དགའ། ད་རུང་སེམས་ལ་ཕན་པའི་སྐྱབས་འགྲོ་ཚིག་གསུམ་ཐུགས་ལ་ཐོགས་ཞེས་ཞུས་པས་ཡང་གདམས་ངག་འདི་མགུར་དུ་གསུངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །སངས་རྒྱས་ཆོས་དང་དགེ་འདུན་གསུམ། །འདི་གསུམ་ཕྱི་ཡི་སྐྱབས་འགྲོ་ཡིན། །མི་ངེད་ཀྱང་ཁོང་ལ་བསྐྱབས་པས་འཚིང་། །ཁྱེད་ཀྱང་ཁོང་ལ་སྐྱབས་ན་འཚིང་། །བླ་མ་ཡི་དམ་མཁའ་འགྲོ་གསུམ། །འདི་གསུམ་ནང་གི་སྐྱབས་འགྲོ་ཡིན། །མི་ངེད་ཀྱང་ཁོང་ལ་བསྐྱབས་པས་འཚིང་། །ཁྱེད་ཀྱང་ཁོང་ལ་སྐྱབས་པས་འཚིང་། །རྩ་དང་རླུང་དང་ཐིག་ལེ་གསུམ། །འདི་གསུམ་གསང་བའི་སྐྱབས་འགྲོ་ཡིན། །མི་ཀྱང་ཁོང་ལ་བསྐྱབས་པས་འཚིང་། །ཁྱེད་ཀྱང་ཁོང་ལ་བསྐྱབས་ན་བཟང་། །སྣང་དང་སྟོང་དང་དབྱེར་མེད་གསུམ། །འདི་གསུམ་དེ་ཁོ་ན་ཉིད་ཀྱི་སྐྱབས་འགྲོ་ཡིན། །མི་ངེད་ཀྱང་ཁོང་ལ་བསྐྱབས་པས་འཚིང་། །ཁྱེད་ཀྱང་ཁོང་ལ་སྐྱབས་ན་བཟང་། །ཁྱོད་སྒྱུ་མ་ལུས་ཀྱི་ཁང་རུལ། །ཞག་དང་ཟ་མའི་ཆར་པ་བབས། ལོ་དང་ཟླ་བའི་ཐིགས་པ་བྱུང་། །སྒྱུ་ལུས་ཁང་རྒན་འཇིག་ལས་ཆེ། །འཆི་བྲོ་ཐིགས་ཚག་འཕྱིས་པ་ཙམ། །དཔེ་ནི་ཉི་མའི་རྒས་གྲིབ་བཞིན། །ཕར་ཕར་བྲོས་ཀྱང་ཚུར་ཚུར་འདེད། བྲོས་པས་ཐར་པ་ངས་མ་མཐོང་། །ཆོས་པ་འཆི་བ་མཐོང་ཙ་ན། །དགེ་སྦྱོར་བསྐུལ་བའི་སློབ་དཔོན་ཡིན། །སྡིག་ཅན་འཆི་བ་མཐོང་ཙ་ན། །སྡིག་སྡུག་བསྐུལ་བའི་སློབ་དཔོན་ཡིན། དེ་ལ་འགྱོད་པ་ཅི་གདའ་ལྟ་ཡང་ལྟ། །ཕྱུག་པོ་འཆི་བ་མཐོང་ཙ་ན། །ནོར་སྒྱུ་མར་སྟོན་པའི་སློབ་དཔོན་ཡིན། །དེ་ལ་གཏོང་ཕོད་ཅི་འདུག་ལྟ་ཡང་ལྟ། །རྒས་པ་འཆི་བ་མཐོང་ཙ་ན། །དེ་མི་རྟག་སྟོན་པའི་སློབ་དཔོན་ཡིན། །དེ་ལ་སྐྱོ་ཤས་ཅི་འདུག་ལྟ་ཡང་ལྟ། །གཞོན་པ་འཆི་བ་མཐོང་ཙ་ན། །ཆོས་ལོང་མེད་སྟོན་པའི་སློབ་དཔོན་ཡིན། །དེ་ལ་བརྩོན་འགྲུས་ཅི་འདུག་ལྟ་ཡང་ལྟ། །བདེ་སྐྱིད་ཕ་མའི་གན་ན་ཡོད། །དྭ་ཕྲུག་སྡུག་ལ་ཅི་ཆ་ཡོད། །སོ་ནམ་འབྲས་བུ་མང་དུ་སྨིན། །ལས་མི་ནུས་པ་ལ་ཅི་ཆ་ཡོད། །དྲོ་འཇམ་ལུ་གུའི་ལྤགས་ལ་ཡོད། །གྱོན་མ་མྱོང་བ་ལ་ཅི་ཆ་ཡོད། །མགྱོགས་པ་གྱི་ལིང་རྟ་ལ་ཡོད། །ཞོན་མ་མྱོང་པ་ལ་ཅི་ཅ་ཡོད། །ཆོས་བྱེད་མི་ཚེ་སྐྱིད་ལ་སྐྱེལ། །ཆོས་མ་ནུས་པ་ལ་ཅི་ཆ་ཡོད། །ལྟོ་ཁ་ནས་ཕྲི་ལ་སྦྱིན་པར་ཐོང་། །གཉིད་ཁ་ནས་ཕྲི་ལ་དགེ་སྦྱོར་མཛོད། །འཆི་བ་སྙིང་ནས་སོམ་ལ་ལྷ་ཆོས་གྱིས། །ཞེས་གསུངས་པས་རྒན་མོ་དད་པ་སྐྱེས་ནས་དགའ་བའི་གླུ་མང་པོ་ཡང་བྱས། སྐྱིད་སྐྱིད་ཀྱི་གར་མང་པོ་ཡང་བྱས། བླ་མས་སྐྱབས་འགྲོ་དང་སེམས་བསྐྱེད་གནང་བས་རང་ཡང་ཆོས་ལ་གནས་ཤིང་། བུ་ཚ་བོ་ཡང་དགེ་བ་ལ་བསྒྱུར་ནུས་པ་ཅིག་བྱུང་ངོ་། ། ༈ རྗེ་བཙུན་མི་ལ་རས་པ་དཔོན་སློབ་ཡུལ་ཡ་མཚན་ཅན་གྱི་དིང་མ་བྲིན་གྱི་ཤར་ཕྱོགས་སུ་ལྡོམ་བུ་ལ་བྱོན་པའི་དུས་སུ། ཡུལ་པས་བསྙེན་བཀུར་སྤུངས་པའི་དུས་སུ་རྒན་མོ་ཐ་ག་མ་ཅིག་བསོད་སྙོམས་ཀྱིས་མནར་བས་སྙིང་རྗེ་བར་དགོངས་ནས། ཨ་ཕྱི་རས་པ་འདི་ཚོ་ལ་བསོད་སྙོམས་ཤིག་ཞུ་གསུངས་པས། རྒན་མོ་ང་ལ་སྟེར་རྒྱུ་མེད་ཟེར་ནས་བྲོས་པའི་ཚེ། མོ་ཡི་ཐུ་བ་ནས་བཟུང་ནས་མགུར་འདི་གསུངས་སོ། །རྗེ་བླ་མ་རྣམས་ལ་ཕྱག་འཚལ་ལོ། །ཡར་མཐོ་རིས་ཐར་པའི་ལམ་སྣ་དང་གཅིག །མར་ངན་སོང་གསུམ་གྱི་སྡུག་བསྔལ་དང་གཉིས། །བར་གར་འགྲོ་རང་དབང་མི་ཆེ་དང་གསུམ། །འདི་གསུམ་འཛོམ་པའི་དུས་ཚོད་དེར། །ཨ་ཕྱི་ཆོས་དང་འཁོན་པའི་སྙིང་མེད་མ་དེ་མིན་ནམ། །མ་རྒན་ལྟ་རྟོག་དེ་རང་གི་སེམས་ལ་གྱིས་དང་། །ནང་ནུབ་སྔ་ཕྱིའི་སྡུག་ཟེར་དང་གཅིག །བུ་ལོན་འཁོར་མེད་ཀྱི་གཡོ་གཏམ་དང་གཉིས། །མགུ་བ་མེད་པའི་གསོས་བཏང་གསུམ། འདི་གསུམ་འཛོམ་པའི་དུས་ཚོད་འདིར། །ཨ་ཕྱི་སྤྱང་ལ་དོན་ཆུང་གི་སྙིང་མེད་མ་དེ་ཡིན་ནམ། །མ་རྒན་ལྟ་རྟོག་རང་གི་སེམས་ལ་གྱིས། །ཐོབ་ཚད་རྐུ་བའི་རྐུན་མ་དང་གཅིག །མ་མཐོང་འཕྲོག་པའི་ཇག་པ་དང་གཉིས། ཤི་རྨས་བྱེད་པའི་འཁྲུག་པ་དང་གསུམ། །འདི་གསུམ་འཛོམ་པའི་དུས་ཚོད་དེར། །ཨ་ཕྱི་གོ་ཁ་སློང་བའི་སྙིང་མེད་མ་དེ་མིན་ནམ། །མ་རྒན་ལྟ་རྟོག་རང་གི་སེམས་ལ་གྱིས་དང་། །རང་གཞན་སྐྱེས་པའི་མལ་ས་དང་གཅིག །ཕན་ཞིང་རལ་པོའི་དུག་ཧྲུལ་དང་གཉིས། །མ་བཀྲུས་ལྟ་ཕོར་སྲེ་མོ་དང་གསུམ། །འདི་གསུམ་འཛོམ་པའི་དུས་ཚོད་དེར། །ཨ་ཕྱི་ཟ་ཐང་གི་རྒུད་པའི་སྙིང་མེད་མ་དེ་མིན་ནམ། །མ་རྒན་ལྟ་རྟོག་དེ་རང་གི་སེམས་ལ་གྱིས་དང་། །ཕྱི་པགས་པ་བསྡུས་པའི་གཉེར་མ་དང་གཅིག །ནང་ཤ་ཁྲག་སྐམ་པའི་རུས་པ་གཉིས། །བར་དབང་པོ་འོན་ལོང་གི་ཐོ་ཡོལ་དང་གསུམ། །འདི་གསུམ་འཛོམ་པའི་དུས་ཚོད་དེར། །ཨ་ཕྱི་འབྱུང་བཞི་རྒུད་པའི་སྙིང་མེད་མ་དེ་མིན་ནམ། །མ་རྒན་ལྟ་རྟོག་དེ་རང་གི་སེམས་ལ་གྱིས་དང་། །ཡར་མཐོ་རིས་རིན་ཆེན་གསེར་བས་དཀོན། །མར་ངན་སོང་གསུམ་གཟུང་ཤ་བས་ཀྱང་འབྲིམ། །བར་དབང་པོ་གར་འགྲོ་ཆ་མེད་དང་གསུམ། །འདི་གསུམ་འཛོམ་པའི་དུས་ཚོད་འདིར། །ཨ་ཕྱི་ངན་སོང་གསུམ་འགྲོ་བའི་སྙིང་མེད་མ་དེ་མིན་ནམ། །མ་རྒན་ལྟ་རྟོག་དེ་རང་གི་སེམས་ལ་གྱིས་དང་། །ཞེས་གསུངས་ནས་བཞུད་དེ། རྒན་མོས་ཕྱག་འཚལ་ཐུགས་རྗེས་འཛིན་པར་ཞུ་ཞུས་པས། ཐུགས་ལ་བརྟགས་ཏེ་མ་རང་གི་ཞིང་ཐེམ་བཙོངས་ནས་བསྒོམས་པས་སྒོམ་མ་བཟང་མོ་བྱུང་སྐད་དོ། །ཡང་རྗེ་བཙུན་དང་རས་ཆུང་པ་དཔོན་སློབ་གཉིས། རྒྱ་ལྕགས་རི་གོང་བྱ་བ་ཆུ་ཆེན་པོ་འབབས་པའི་འགྲམ་ན་ཕྱིར་བྱོན་པ་ལས། ཕ་རི་ན་བུ་མོ་གཉིས་ཕྱིར་ཐལ་ནས་ཁྲུས་བྱས་མེ་ལོང་ལ་བལྟ་ཞིང་འདུག་པས། བུ་མོ་ཆུང་བ་དེ་ན་རེ། རྣལ་འབྱོར་པ་ཕ་རི་གཉིས་འདྲ་བས་རྒྱལ་ཁམས་འགྲིམ་ནས་ཅི་འདོད་པ་ཡིན་ཟེར་བ་ལ། ཆེ་བ་དེ་ན་རེ། ངེད་རང་གཉིས་འདྲ་བ་ལ་ཕ་ཕྱུག་གི་བུ་མོ་གཟུགས་ལེགས་པ་གོས་ནོར་འཛོམ་པ་རེ་འདོད་ནས་འགྲོ་བ་ཨེ་མ་ཡིན་ཟེར་བས། ཆུང་བ་དེ་ན་རེ། དེ་ཨེ་ཡིན་ཚེ་ཕྱི་མ་སངས་རྒྱས་འདོད་ནས་འགྲོ་བ་ཨེ་མ་ཡིན་ཟེར་སྐད། དེ་ནས་ཆུ་དེའི་ཟམ་སྔས་སུ་འཕྲད་པ་དང་། རྗེ་བཙུན་གྱིས་རས་ཆུང་པ་ལ་བུ་མོ་གཉིས་ཀྱི་ཐུ་བ་ལ་འགྱུས་ཤིག་གསུངས་ནས་མགུར་འདི་གསུངས་སོ། །མི་ཀུན་གྱིས་མི་ལུས་མི་ལུས་ཟེར། །མི་ལུས་རྩྭ་ཁའི་ཟིལ་པ་འདྲ། །སྔ་དྲོ་ཆགས་ཀྱང་ཕྱི་དྲོ་འཇིག །ཆགས་འཇིག་མཐོང་བས་བློ་བ་བདེ། །ཆགས་འཇིག་མེད་པའི་སེམས་ལ་ལྟོས། ཡང་ལྟོས་ཡང་ལྟོས་སེམས་ལ་ལྟོས། །ལྟ་རྟོག་རང་གི་སེམས་ལ་གྱིས། །བསམ་མནོ་རང་གི་སེམས་ལ་ཐོང་། །མི་ཀུན་གྱིས་མི་ཚེ་མི་ཚེ་ཟེར། །མི་ཚེ་བྲག་ལ་ཆུ་འབབ་འདྲ། །ཚེ་དལ་ཅིག་འགྱིང་ལོང་མི་གདའ་ན། །ཚེ་འགྱིང་ལོང་མེད་པའི་སེམས་ལ་ལྟོས། །ཡང་ལྟོས་ཡང་ལྟོས་སེམས་ལ་ལྟོས། །ལྟ་རྟོག་རང་གི་སེམས་ལ་གྱིས། །བསམ་མནོ་རང་གི་སེམས་ལ་ཐོང་། མི་ཀུན་གྱིས་ནོར་རྫས་ནོར་རྫས་ཟེར། །ནོར་རྫས་སྦྲང་མས་རྩི་གསོག་འདྲ། །ནོར་བདག་པོས་བསགས་པ་གཞན་གྱིས་སྤྱད། བདག་གསོག་གཞན་གྱིས་སྤྱད་པས་བློ་མ་བདེ། །ཡང་ལྟོས་ཡང་ལྟོས་སེམས་ལ་ལྟོས། །ལྟ་རྟོག་རང་གི་སེམས་ལ་གྱིས། །བསམ་མནོ་རང་གི་སེམས་ལ་ཐོང་། །ཁྱོད་གཞོན་ནུ་ཀུན་གྱི་སྙིང་ལམ་ན། །ན་བ་འོང་སྙམ་མི་གདའ་སྟེ། ནད་ཐོག་བབ་ཚུལ་དུ་འོང་ཉན་གདའ། །རྒས་པ་འོང་སྙམ་མི་གདའ་སྟེ། །རྒས་སྒོ་ཉལ་ཐབས་སུ་འོང་ཉན་གདའ། །འཆི་བ་འོང་སྙམ་མི་གདའ་སྟེ། །འཆི་བ་གློ་བུར་དུ་འོང་ཉན་གདའ། །ང་ན་དང་རྒས་དང་འཆི་དང་གསུམ། ཉི་མ་ཐལ་ཀའི་གྲིབ་སོ་བཞིན། །ཕར་ཕར་བྲོས་ཀྱང་ཚུར་ཚུར་འདོད། །བྲོས་ཀྱང་ཐར་བ་ངས་མ་མཐོང་། །སང་ཉིན་འཆི་བའི་དུས་བྱུང་ཚེ། །དཔའ་བོས་རལ་ཁ་སྤྲད་དུ་མེད། གླང་སྙིང་ཅན་ལ་ཅི་ཆ་ཡོད། །ཕྱུག་པོའི་ནོར་གྱིས་བསླུས་པ་མེད། །སྡུག་སོགས་མཁན་ལ་ཅི་ཆ་ཡོད། །མཛངས་པས་ཟས་ཀྱིས་བསླུས་ས་མེད། །སེར་སྣ་ཅན་ལ་ཅི་ཆ་ཡོད། །སྐྱེ་ཡག་བཞིན་གྱིས་བསླུ་ས་མེད། །ང་ཆུ་ཁྲུས་མཁན་ལ་ཅི་ཆ་ཡོད། །བྱིས་པས་གཅེས་སྐད་བྱེད་ས་མེད། །སྡུག་ཡུལ་མཁན་ལ་ཅི་ཆ་ཡོད། །དམ་ཚིག་ས་མདོའི་མཁར་ཁང་འདྲ། །གང་བསྲུང་བསྲུང་ཚོ་དེ་རྒྱལ་ནས་གདའ། །ཞེས་གསུངས་པས། བུ་མོ་ཆུང་བ་དེའི་ནོར་གཡུ་ཀུན་རྗེ་བཙུན་ལ་ཕུལ་ནས་ཆོས་བྱེད་པར་ཁས་བླངས་པས། །རྗེ་བཙུན་གྱིས་གཏུམ་མོའི་ཁྲིད་གནང་ནས་བསྒོམས་པས། ལོ་སར་སྒང་ལ་རས་རྐྱང་གིས་ཆོག་པའི་རས་མ་ངོ་མཚར་ཅན་ཅིག་བྱུང་སྐད་དོ། །ཡང་དུས་དེར་བནྡེ་མཁས་བཙུན་ལྡན་པ་ཡིན་ཟེར་བ་དཔོན་སློབ་གསུམ་པ་ཅིག་བྱུང་ནས་མར་རིལ་གཅིག་ཕྱག་རྟེན་བྱས་ཏེ། རྗེ་བཙུན་ལགས་ཉམས་ལེན་སླ་བ་དོན་ལྟ་བ་ལ་ཁམས་ཆེ་བའི་གདམས་ངག་ཅིག་ཞུ་ཞུས་པས། །གསོན་དང་དགེ་བཤེས་ཆོས་མཛད་ཀུན། །མེད་ཐབས་མེད་པའི་གཏམ་ཞིག་འཆད། །དད་དང་མཁས་དང་བཙུན་དང་གསུམ། །འདི་གསུམ་སེམས་ཀྱི་སྲོག་ཤིང་ལ། །བཙུགས་ན་བརྟན་ལ་འགྱུ་ན་བདེ། སྲོག་ཤིང་མཛད་ན་དེ་ལ་མཛོད། །ཆགས་མེད་རྨོངས་མེད་སྡང་མེད་གསུམ། །འདི་གསུམ་སེམས་ཀྱི་གོ་ཆ་ལགས། །གྱོན་ལ་ཡང་ལ་མཚོན་ཁར་སྲ། །གོ་ཆ་མཛད་ན་དེ་ལ་མཛོད། །སྒོམ་དང་བརྩོན་དང་བསྲན་ཚུགས་གསུམ། །འདི་གསུམ་སེམས་ཀྱི་རྟ་ཕོ་ལགས། །བྲོས་ན་ཐར་ལ་བདས་ན་ཟིན། །རྟ་ཕོ་མཛད་ན་དེ་ལ་མཛོད། །རང་རིག་རང་གསལ་རྟོག་མེད་གསུམ། །འདི་གསུམ་སེམས་གྱི་འབྲས་བུ་ལགས། བཏབ་ན་སྨན་ལ་བཟའ་ན་དུག །འབྲས་བུ་མཛད་ན་དེ་ལ་མཛོད། །སེམས་དོན་བཅུ་གཉིས་བྱ་བ་ཡིན། །ང་ཤེས་རབ་མཚོན་ཆེན་ཁོང་ནས་འཕྱེ། །ལར་ཆོས་མཛད་རྣམས་ལ་འདི་རྣམས་གཅེས། །འདི་རྣམས་འཛོམས་པ་བརྒྱ་ལ་འགའ། །དེ་ཕྱིར་ཡོན་ཏན་ཐོབ་པ་དཀའ། །ཞེས་སེམས་དོན་བཅུ་གཉིས་བྱ་བ་དེ་གསུངས་པས་སྟོན་པ་དད་ནས་གདམས་ངག་ཞུས་ཏེ་བསྒོམས་པས་ཉམས་རྟོགས་ཁྱད་པར་ཅན་རྒྱུད་ལ་འཁྲུངས་པ་ལགས་སོ། །དེ་ཐམས་ཅད་ཨ་ཕྱི་སྣང་མ་ལ་སོགས་པའི་སྐོར་རོ། །དེ་ནས་ཡང་རྗེ་བཙུན་དང་སེ་བན་རས་པ་དཔོན་སློབ་བསོད་སྙོམས་ལ་ལྕིམ་ལུ་ང་ཆུ་མཐའ་མཁར་བུ་ལ་བྱོན་པའི་དུས་སུ། ངན་རྫོང་བྱང་ཆུབ་འབར་ཞིང་རྨོ་ཞིང་འདུག་པ་ལ་ཡོན་བདག་ཁྱོད་ཕྱུག་པོ་ཞིག་ཡིན་ཟེར་བས། རྣལ་འབྱོར་པ་ངེད་གཉིས་ལ་དེ་རིང་ཉིན་སྐོར་གྱི་འཚོ་བ་ཞིག་སློང་དགོས་གསུངས་པས། ཁོ་ན་རེ། བཞེས་པ་དྲང་བས་ཆོག །ཉིད་རྣལ་འབྱོར་པ་བཟང་པོ་ཡིན་ན་སྣང་བ་དཔེར་རྒྱུ་འདྲེན་ཤེས་པ་ཡིན་པས། ང་ཡི་ཞིང་རྨོ་བ་འདི་བསྟུན་པའི་མགུར་ཅིག་གསུངས་བར་ཞུ་ཞུས་པས་མགུར་འདི་གསུངས་སོ། །རྗེ་སྒྲ་བསྒྱུར་རྒྱལ་པོ་རིན་པོ་ཆེ། །སྒོམ་གསུམ་གུས་པས་ཕྱག་འཚལ་ལོ། །འོ་ན་ཡོན་བདག་ཁེ་གྲགས་ཅན། །ཁྱོད་ངན་རྫོང་ཕྱུག་པོ་ཚུར་ཉོན་དང་། །ཡང་དཔྱིད་ཀ་སོས་ཀའི་ཟླ་བ་ལ། །བོད་མི་རེས་ཞིང་རེ་རྨོ་ཙམ་ན། །རྣལ་འབྱོར་ངས་ཀྱང་ཞིང་ཅིག་རྨོ། །ཉོན་མོངས་ཐལ་བའི་ཞིང་ས་ལ། །གཉིས་མེད་གླང་པོ་དོར་སྡེབ་ནས། །ཤེས་རབ་ལྡན་པའི་ཐོང་གཤོལ་བཏགས། །དམ་ཚིག་ལྡན་པས་སྣ་ཁྲིད་དེ། །ཡེང་བ་མེད་པར་ཐོང་བཙུགས་ནས། །བརྩོན་འགྲུས་མྱུར་བའི་ལྕག་གིས་བྲབ། །ཐ་བ་སྲ་ཡང་ཕེད་དེ་མཆི། །བྱང་ཆུབ་མྱུ་གུ་འཁྲུངས་ཏེ་མཆི། །འབྲས་བུ་མྱུར་དུ་སྨིན་ཏེ་མཆི། །ཁྱེད་འཇིག་རྟེན་འདི་ཡི་སོ་ནམ་མཁན། །ང་སྐྱེ་བ་གཏན་གྱི་སོ་ནམ་མཁན། །སྟོན་ཐོག་སུ་མང་ལྟ་ཡང་ལྟ། །ནམ་ཕུག་སུ་སྐྱིད་ལྟ་ཡང་ལྟ། །དེ་སྣང་བ་དཔེ་རུ་དྲངས་པ་ཡིན། །སོ་ནམ་དབྱངས་སུ་བླངས་པ་ཡིན། ཐུགས་དགྱེས་པར་མཛོད་ཅིག་ཁེ་གྲགས་ཅན། །ཁྱེད་རང་དོན་ལགས་སོ་ཚོགས་གསོག་མཛོད། །ཅེས་ཞིང་ས་དང་བསྟུན་པའི་མགུར་འདི་གསུངས་པས། ཡོན་བདག་ན་རེ། །འོ་ན་རྣལ་འབྱོར་པ་ཁྱེད་རང་གི་ཕྱག་ན་བསྣམས་པའི་སྦ་ལྕག་དེའི་བརྡ་དོན་ཅི་ལགས། དེ་ལ་དགོས་པ་ཅི་འདུག་ཞུས་པས་ཡང་རྗེ་བཙུན་གྱིས་མགུར་འདི་གསུངས་སོ། །འོ་ན་ཡོན་བདག་དྲི་རྟོག་མཁན། ཁྱོད་སྦྱིན་ཤུགས་ཅན་དེ་ཚུར་ཉོན་དང་། །མི་ང་ངོ་ཁྱོད་ཀྱིས་ཤེས་མ་ཤེས། །ཁོ་བོ་མི་ལ་རས་པ་ཡིན། །དཀའ་བ་སྤྱད་པའི་གང་ཟག་ཡིན། །སྙིང་རུས་བྱས་པའི་སྒོམ་ཆེན་ཡིན། །ཕྱོགས་འཛིན་སྤངས་པའི་རྣལ་འབྱོར་ཡིན། །འཁྲུལ་རྟོག་མེད་པའི་རས་པ་ཡིན། །ང་ཡི་ལག་ན་བཟུང་བའི་སྦ་དཀར་འདི། །དང་པོ་རྒྱ་བྲག་ལོགས་ལ་སྐྱེས། །བར་དུ་རྒྱ་ཟོར་འགུག་མོས་བརྔས། །ཐ་མ་ཤ་བྲེང་མཉེན་ལ་དྲངས། །འོང་ནི་ལྷོ་ཁའི་མོན་ནས་འོང་། །བཀལ་ནི་ཐེག་ཆེན་མཛོ་ལ་བཀལ། །འགྲིམ་ནི་ཚོང་འདུས་རྣམས་སུས་འགྲིམས། །ཕུལ་ནི་དད་པ་ཅན་གྱིས་ཕུལ། །ད་ལྟ་ང་ཡི་བེར་མ་ལྕག །འདི་དོན་ཁྱོད་ཀྱི་གོ་མ་གོ །འདི་དོན་ཁྱེད་ཀྱིས་མ་གོ་ན། །འདི་དོན་བཤད་ཀྱིས་ལེགས་པར་ཉོན། སྦ་མ་ཐོག་རྩ་བ་བཅད་པ་དེ། །འཁོར་བའི་གཞི་རྩ་གཅོད་པའི་རྟགས། །སྦ་ཡ་ཐོག་རྩེ་མོ་བཅད་པ་དེ། །ཐེ་ཚོམ་གོལ་ས་བཅད་པའི་རྟགས། །ང་ཁྲུ་དོ་ཚད་དུ་བོར་བ་དེ། །ཆོས་པའི་ཚད་རྡོ་བོར་བའི་རྟགས། །སྦ་རྒྱུ་བཟང་ཞིང་མཉན་པ་དེ། །གཞི་སེམས་བསྐྱེད་ཡེ་ནས་བཟང་བའི་རྟགས། །སྦ་རྩི་འཇམ་ཁ་དོག་ལེགས་པ་དེ། །སེམས་གཉུག་མའི་དོན་ལ་སྦྱངས་པའི་རྟགས། །སྦ་དྲང་ལ་ལྡེམ་པར་འདུག་པ་དེ། །དོན་མ་ནོར་ཉམས་སུ་ལེན་པའི་རྟགས། །སྦ་ལ་ལུང་སུལ་འདུག་པ་དེ། །བྱང་ཆུབ་ལམ་དུ་འཁྲིད་པའི་རྟགས། །སྦ་དུམ་བུ་བཞི་རུ་འདུག་པ་དེ། །ཚད་མེད་བཞི་དང་ལྡན་པའི་རྟགས། །སྦ་ཚིགས་པ་གསུམ་འདུག་པ་དེ། །གཞི་ལ་སྐུ་གསུམ་ཚང་བའི་རྟགས། སྦ་ཁ་དོག་བསྒྱུར་དུ་མེད་པ་དེ། །ཆོས་ཉིད་འགྱུར་བ་མེད་པའི་རྟགས། །སྦ་སྣུམ་ལ་འདྲིལ་བ་འདུག་པ་དེ། །ཆོས་ཉིད་སྤྲོས་དང་བྲལ་བའི་རྟགས། །སྦ་ཡེ་ནས་དཀར་ཞིང་འཚེར་བ་དེ། །ཆོས་སྐུ་དྲི་མ་མེད་པའི་རྟགས། །སྦ་ལ་སྦུ་གུ་འདུག་པ་དེ། །ཆོས་རྣམས་ཐམས་ཅད་སྟོང་པའི་རྟགས། །སྦ་ལ་སྨེ་བ་འདུག་པ་དེ། །ཆོས་ཐིག་ལེ་ཉག་ཅིག་གོ་བའི་རྟགས། །ནག་པོ་རྩག་རྩིག་འདུག་པ་དེ། །བོད་ཀྱི་རྣལ་འབྱོར་རས་པ་ལ། །རྣམ་རྟོག་ཕྲ་མོ་ཡོད་པའི་རྟགས། །སྦ་ཆོ་རིགས་ཡེ་ནས་བཙུན་པ་དེ། །ཆོས་ཚུལ་བཞིན་ཉམས་སུ་ལེན་པའི་རྟགས། །སྦ་གཙང་ཞིང་ཡིད་དུ་འོང་བ་དེ། །འགྲོ་བ་དད་ཅིང་འདུན་པའི་རྟགས། །སྦ་ཞབས་ལྕགས་ཀྱིས་བཀོར་བ་དེ། །རྣལ་འབྱོར་རི་ཁྲོད་འགྲིམ་པའི་རྟགས། །ཆང་ཟུང་ཟངས་ཀྱིས་དྲིལ་བ་དེ། །ཌཱ་ཀི་དབང་དུ་འདུ་བའི་རྟགས། །སྦ་ལ་ལྕགས་འཛེར་བཏབ་པ་དེ། །རྣལ་འབྱོར་སྙིང་རུས་ཆེ་བའི་རྟགས། །ར་གན་གསེར་ལོང་བཏགས་པ་དེ། །ནང་གི་ཡོན་ཏན་རྒྱས་པའི་རྟགས། །དེ་ལ་ཤ་བྲིང་བཏགས་པ་དེ། །རྣལ་འབྱོར་ཤེས་པ་མཉེན་པའི་རྟགས། །ལྕག་འབྲས་གཉིས་སུ་སྒྲིལ་བ་དེ། །ཟུང་འཇུག་ལམ་དུ་ཁྱེར་བའི་རྟགས། །རུས་པའི་ཨ་ལོང་བཏགས་པ་དེ། །རྣལ་འབྱོར་རྒྱལ་ཁམས་འགྲིམ་པའི་རྟགས། །མེ་ཆ་ཁུག་མ་བཏགས་པ་དེ། །ཅིར་སྣང་གྲོགས་སུ་ཤར་བའི་རྟགས། །དུང་ལོང་ཡ་ཀོ་བཏགས་པ་དེ། །ཆོས་ཀྱི་འཁོར་ལོ་བསྐོར་བའི་རྟགས། །གཅན་གཟན་རས་མོ་བཏགས་པ་དེ། །ཉམ་ང་བག་ཚ་མེད་པའི་རྟགས། །མེ་ལོང་སྤུ་གྲི་བཏགས་པ་དེ། །རྟོགས་ཚད་ནང་ནས་ཤར་བ་དང་། །ཉོན་མོངས་ཟུག་རྔུ་གཅོད་པའི་རྟགས། །ཤེལ་སྒོང་ཉག་གཅིག་བཏགས་པ་དེ། །བག་ཆགས་དྲི་མ་སྤངས་པའི་རྟགས། །བ་སོའི་ཕྲེང་བ་བཏགས་པ་དེ། །བླ་མ་ཡིད་ལ་འཕྲེང་བའི་རྟགས། །དྲིལ་བུ་གཡེར་ཁ་བཏགས་པ་དེ། །སྙན་པ་ཕྱོགས་བཅུར་སྒྲོགས་པའི་རྟགས། །སྣམ་རས་དཀར་དམར་བཏགས་པ་དེ། །བུ་སློབ་མང་པོ་འཁོར་བའི་རྟགས། ལྕག་འབྲས་མ་བུ་འཛོམ་པ་དེ། །སྐུ་གསུམ་མ་དང་མཇལ་བའི། རྟགས། །རྣལ་འབྱོར་ལག་ན་མཛེས་པ་དེ། །མི་ནག་ཐབས་ཀྱིས་འདུལ་བའི་རྟགས། །དེ་དོན་གང་ལགས་འདྲི་བ་ཡང་། མོས་གུས་བག་ཆགས་ཡོད་པའི་རྟགས། །ཁྱོད་དང་ང་གཉིས་འཕྲད་པ་ཡང་། །སྔོན་ཆད་སྨོན་ལམ་བཏབ་པའི་རྟགས། །སྦ་ལྕག་དཀར་པོ་རྟགས་ཀྱི་གླུ། །བརྡ་གོ་བར་འདུག་གམ་ལྷ་མི་ཀུན། །དོན་ཆོས་སུ་གདའོ་དད་གུས་ཅན། །ཁྱོད་ཡུན་དུ་སྐྱིད་ཀྱི་ལྷ་ཆོས་མཛོད། །ཅེས་སྦ་ལྕག་དཀར་པོ་ཆོས་དང་བསྟུན་པའི་མགུར་དེ་གསུངས་པས་ཡོན་བདག་ཁོ་ལྷག་པར་དད་པ་སྐྱེས་ཏེ་བདག་མ་ཤིའི་བར་དུ་མཆོད་གནས་ལ་གདན་ཕབ་ནས་བཞུགས་པར་ཞུ་འཚལ་ཞུས་པས། ཞག་བདུན་ལས་བཞུགས་པར་མ་བཞེད་དེ། །བཞུད་ཀར་རྗེ་བཙུན་ཅིས་ཀྱང་གཤེགས་ན་ཁྱེད་རང་གི་ཐུགས་ཉམས་སུ་འཁྲུངས་པའི་སྒོམ་ཉམས་ཚིག་གསུམ་གནང་བར་ཞུ་ཞུས་པས། ཕ་བླ་མ་རྣམས་ལ་ཕྱག་འཚལ་ལོ། །ཨེ་མ་ཡོན་བདག་དད་པ་ཅན། །ཁྱོད་ཕྱུག་པོ་མདོ་མེད་ཚུར་ཉོན་དང་། །ཆོས་ཁ་ལ་སླ་སྟེ་དོན་ལ་དཀའ། །ཁྱེད་ཅག་ཕྱི་ལྟར་འཇིག་རྟེན་པ། །ཡོད་དུ་རེ་ལ་ནམ་བླ་འདས། །ལར་ནི་དམ་ཆོས་བགྱིས་ན་ལེགས། །གཡའ་ཡི་ཆུ་མིག་བསིལ་གསུམ་པོ། །ནད་མཁྲིས་པ་སེལ་བར་ཆ་མཆིས་ཏེ། །ལྷ་བྱ་གོང་མོ་མ་ལགས་པའི། །རི་དྭགས་དམན་ལ་བཏུང་དབང་མེད། །གནམ་ལྕགས་ཐོག་གི་རལ་གྲི་དེ། །གཡུལ་ངོ་ཟློག་པར་ཆ་མཆིས་ཏེ། །གླང་ཆེན་ས་སྲུང་མ་ལགས་པའི། གླང་ཕྲན་གཞན་ལ་བཏགས་དབང་མེད། །འཆི་མེད་ལྷ་ཡི་བདུད་རྩི་དེ། །བཅུད་ལེན་གྲུབ་པར་ཆ་མཆིས་ཏེ། །སློབ་དཔོན་ཀླུ་སྒྲུབ་མ་ལགས་པའི། །ཕལ་པ་གཞན་ལ་སྤྱོད་དབང་མེད། །རྒྱ་མཚོའི་གཏིང་གི་རིན་པོ་ཆེ། དགོས་འདོད་འབྱུང་བར་ཆ་མཆིས་ཏེ། །ཀླུ་དགའ་བོ་འཇོག་པོ་མ་ལགས་པའི། །འཛམ་གླིང་མི་ལ་སྤྱོད་དབང་མེད། །དགའ་ལྡན་ལྷ་ཡི་ཕོ་བྲང་དེ། །གཟིགས་མོ་ཆེ་བར་ཆ་མཆིས་ཏེ། སློབ་དཔོན་ཐོགས་མེད་མ་ལགས་པའི། །གང་ཟག་གཞན་གྱིས་མཐོང་དབང་མེད། །བཟང་དྲུག་སྨན་གྱི་ནུས་པ་དེ། །ནད་ཚ་གྲང་འཇོམས་པར་ཆ་མཆིས་ཀྱང་། །ཤིང་ཙན་དན་སྡོང་པོ་མ་ལགས་པའི། །ཤིང་ཕལ་པ་རྣམས་ལ་ཡོངས་མི་སྨིན། །ལས་རྒྱུ་འབྲས་དཀར་པོའི་དགེ་བ་བཅུས། །མཐོ་རིས་འཐོབ་པར་ཆ་མཆིས་ཏེ། །མི་དད་པ་ཅན་ཅིག་མ་ལགས་པའི། །སྡིག་པོ་ཆེ་ལ་སྤྱད་དབང་མེད། །བཀའ་བརྒྱུད་ལུང་དང་མན་ངག་གསུམ། །བྱང་ཆུབ་ཐོབ་པར་ཆ་མཆིས་ཏེ། མི་ལས་འཕྲོ་ཅན་ཅིག་མ་ལགས་པའི། །སྐལ་མེད་རྣམས་ལ་སྤྱད་དབང་མེད། །སྙན་བརྒྱུད་གདམས་ངག་རིན་པོ་ཆེ། །མངོན་སངས་རྒྱས་པར་ཆ་མཆིས་ཏེ། །མི་སྙིང་རུས་ཅན་ཅིག་མ་ལགས་པའི། །གཡེང་བ་ཅན་ལ་བསྒོམ་དབང་མེད། བཟའ་བཏུང་ཟས་ཀྱི་ཚོགས་འཁོར་དེ། །བཀྲེས་སྐོམ་སེལ་བར་ཆ་མཆིས་ཏེ། །ཁྱོད་སྐྱོར་མོ་འདྲེན་ནེ་མ་ལགས་པའི། །སེར་སྣ་ཅན་ལ་སྤྱོད་དབང་མེད། །ཟང་ཟིང་ནོར་གྱི་གཏོང་ཕོད་དེ། །རང་བརྒྱགས་ཡིན་པར་ཆ་མཆིས་ཏེ། །ཁྱོད་ངན་རྫོང་ཕྱུག་པོ་མ་ལགས་པའི། །ནོར་ཡོད་དགུ་ཅིག་གི་གཏོང་མི་ཕོད། །ང་གུང་ཐང་གི་རྣལ་འབྱོར་མི་ལ་དང་། ཉེ་གནས་སེ་བན་རས་པ་གཉིས། །ཁྱོད་ལྕིམ་ལུང་གི་ངན་རྫོང་ཕྱུག་པོ་གསུམ། །ཞག་བདུན་བར་དུ་མལ་ས་གཅིག །དེ་སྨོན་ལམ་འབྲེལ་བ་བཞག་པ་ཡིན། །ད་ནི་མི་སྡོད་འཁྱམ་དུ་འགྲོ། །ཁྱོད་ཡོན་བདག་བཟའ་བྲན་འཁོར་བཅས་རྣམས། །ཚེ་རིང་ནད་མེད་སྨོན་ལམ་འཚལ། །ཞེས་གཡའ་ཡི་ཆུ་མིག་བསིལ་གསུམ་མ་བྱ་བ་དེ་གསུངས་ནས་ཡོན་བདག་ཁྱོད་ཀྱིས་ང་ལ་ཟས་བྱིན། ངས་ཁྱོད་ལ་ཆོས་བཤད། ཉལ་བའི་གནས་བྱས་པ་དང་གསུམ་པོ་དེ་གལ་ཆེ་བ་ཡིན། ལར་མོས་པའི་སེམས་ཀྱི་ས་བོན་བྱ་བ་དུས་རྟག་ཏུ་དད་པ་བྱས་ཚེ་ཕྱི་མར་ལྷན་ཅིག་སྐྱེ་བའི་རྒྱུ་ཡིན། སྨོན་ལམ་གྱི་འབྲེལ་པ་བཞག་པ་ཆོས་མང་པོ་བཤད་མི་དགོས། ཡུན་རིང་པོར་འགྲོགས་མི་དགོས། དམིགས་པ་ཡུལ་གྱི་རྐྱེན་དང་མོས་པ་སེམས་ཀྱི་ས་བོན་འཛོམ་ན་དལ་ཅིག་བསྣོན་ཡང་སྨོན་ལམ་གྱི་སྟོབས་འཇོམས་ནས་འོང་བ་ཡིན་པས། སེམས་འཕྲོད་ཅིང་འདུན་པ་གལ་ཆེ། དུས་དེང་སང་བསོད་ནམས་མ་བསགས་པས། ནང་དུ་ཡོན་ཏན་མང་པོ་ཡོད་པ་མི་མཐོང་། ཕྱི་ཡི་སྐྱོན་བག་རེ་ཡོད་པ་དེ་མཐོང་བ་ཡིན། མོས་པ་བྱེད་པ་ལ་ང་དང་ཐག་ཉེ་རིང་མེད། ཐག་ཉེ་རིང་ཧ་ཅང་མཛད་ཆེས་ན། མཇུག་ཏུ་འཁོན་ཤུགས་ཅན་འགྲོ་བ་ཡིན། ཁྱོད་ཀྱི་ཆོས་བྱེད་པ་མི་འོང་། བག་ཀྱི་སློབ་དགོས་ངས་ཀྱང་ཁྱེད་ལ་སྨོན་ལམ་གདབ། ཁྱེད་ཀྱང་ང་ལ་གསོལ་བ་ཐོབ། མོས་གུས་བསྐྱེད། དུས་ད་ལྟའི་སྤྱོད་ལམ་འདི་ལས་མ་འགྱུར་ན། ཚེ་ཕྱི་མ་ཡང་སྐྱེ་གནས་ཁྱད་པར་ཅན་དང་། ལོངས་སྤྱོད་ཕུན་སུམ་ཚོགས་པ་ལ་གདོན་མི་ཟ། ཆོས་བྱེད་པ་ལ་རྒྱལ་ཁམས་མང་པོ་འགྲིམ་མི་དགོས། སླར་ཡང་ངན་སྤྱོད་མང་པོ་མཐོང་ཙ་ན་ཤེས་པ་སྒྲིན་དུ་འགྲོ་བ་ཡིན། ཁྱོད་མི་ཆོས་པའི་ཆོས་དེ་རང་ཡུལ་ན་བཟང་བ་ཡིན། ཚོགས་ཞོར་ལ་བསགས། སེམས་བསྐྱེད་ཀྱིས་ཟིན་ན་སྤྲང་པོ་ལ་ཡོན་མྱུར་དུ་བྱིན་པ་གཅིག་པུས་ཆོག །ཆོས་རང་འདི་ཡིན་བྱ་བ་བཟང་པོ་ཅིག་ལོག་ན་མེད། ངེད་ཅག་གི་ལད་མོ་ཁྱོད་ཀྱིས་མི་འོང་། སེང་གེ་མཆོང་ས་ན་ཝ་མཆོངས་པས་རྐེད་པ་འཆག །ཆོས་པ་ཕལ་ཆེར་གྱིས་མི་འོང་བར་གདའ། དེ་བས་ཁྱེད་རང་ཁྱིམ་པས་ག་གི །དེ་ལས་མ་འགྱུར་གསུངས་ནས་བཞུད་དོ། །ཡོན་བདག་འཁོར་དང་བཅས་པས་རི་སྣའི་ཉག་གཅིག་ཏུ་སྐྱེས་ཐུང་བྱས་ཏེ། ཁྱེད་རི་ཁྲོད་ཕྱོགས་མེད་དུ་བཞུད་པར་འདུག་པས། ད་ཨེ་མཇལ་ཡང་མི་ཤེས་ངེས་རྣམས་ལ་གདམས་ངག་སྨོན་ལམ་དང་བཅས་པ་ཞིག་གནང་བར་ཞུ་ཞུས་པས་མགུར་འདི་གསུངས་སོ། །ཕ་བླ་མ་རྣམས་ལ་ཕྱག་འཚལ་ལོ། །བཀའ་དྲིན་ཅན་གྱིས་བསྐྱབ་ཏུ་གསོལ། །མཐོ་ལ་ཡངས་པའི་དགུང་སྔོན་དང་གཅིག །དེ་ལ་འཁོར་བའི་ཁྲི་གདུགས་དང་གཉིས། །གནས་སྐབས་ཀྱི་འབྲེལ་བ་ཡང་ཡུད་ཙམ། །ཉི་ཟླ་གླིང་བཞི་བསྐོར་དུ་འགྲོ། །དགུང་སྔོན་སྐུ་ཁམས་ཅི་བདེར་བཞུགས། །ང་ཉི་ཟླ་གཟའ་ཡིས་མ་ཟིན་ཅིང་། །དགུང་སྔོན་སྤྲིན་གྱིས་མ་སྒྲིབ་ན། །ཡང་ཡང་མཇལ་བའི་སྨོན་ལམ་འཚལ། །ཕ་རི་ལོགས་ཀྱི་སྤང་རྒྱན་དང་གཅིག །དེ་ལ་འཁོར་བའི་བུང་བ་དང་གཉིས། གནས་སྐབས་ཀྱི་འབྲེལ་བ་ཡང་ཡུད་ཙམ། །ང་བུང་བ་རྩི་བཅུད་ལེན་དུ་འགྲོ། །མེ་ཏོག་སྐུ་ཁམས་ཅི་བདེར་བཞུགས། །ང་བུང་བ་སེར་བས་མ་བརྡུང་ཞིང་། །མེ་ཏོག་སད་ཀྱིས་མ་ཁྱེར་བར། །ཡང་ཡང་མཇལ་བའི་སྨོན་མ་འཚལ། །ཕུ་གསུམ་བྲག་རི་གཟར་པོ་དང་། །དེ་ལ་འཁོར་བའི་བྱ་རྒྱལ་གཉིས། །གནས་སྐབས་འབྲེལ་པ་ཡང་ཡུད་ཙམ། །ང་བྱ་རྒྱལ་ནམ་འཕང་བསྐྱོད་དུ་འགྲོ། །བྲག་རི་སྐུ་ཁམས་ཅི་བདེར་བཞུགས། །བྱ་རྒྱལ་རྙི་ཡིས་མ་ཟིན་ཅིང་། བྲག་རི་ཐོག་གིས་མ་བཤིག་པར། །ཡང་ཡང་མཇལ་བའི་སྨོན་ལམ་འཚལ། །རྒྱུན་དུ་འབབ་པའི་གཙང་ཆབ་དང་གཅིག །དེ་ལ་འཕྱོ་བའི་ཉ་མོ་དང་གཉིས། །གནས་སྐབས་ཀྱི་འབྲེལ་པ་ཡང་ཡུད་ཙམ། །ཉ་མོ་ཆུ་མཐའ་བསྐོར་དུ་འགྲོ། །གཙང་ཆབ་སྐུ་ཁམས་ཅི་བདེར་བཞུགས། གཙང་ཆབ་ཐན་པས་མ་བསྐམ་ཞིང་། །ཉ་མོ་དོལ་གྱིས་མ་ཟིན་པར། །ཡང་ཡང་མཇལ་བའི་སྨོན་ལམ་འཚལ། །འདིར་བཞུགས་ཡོན་བདག་ཕོ་མོ་དང་གཅིག །ང་རྒྱལ་ཁམས་མི་ལ་རས་པ་གཉིས། །གནས་སྐབས་ཀྱི་འབྲེལ་བ་ཡང་ཡུད་ཙམ། །རྣལ་འབྱོར་ཁྱི་ཡིས་མ་ཕུག་ཅིང་། ཡོན་བདག་གུམ་ཆད་མ་བྱུང་བར། །ཡང་ཡང་མཇལ་བའི་སྨོན་ལམ་འཚལ། །ཞེས་པའི་མགུར་སྨོན་ལམ་ཞལ་གདམས་དང་བཅས་པ་དེ་གསུངས། དེ་ནས་རྗེ་བཙུན་བཞུད་ཁར་ངན་རྫོང་ཕྱུག་པོ་ལ་ག་ལ་ལང་བཅུ་དྲུག་མ་འདི་གསུངས་སོ། །ངོ་སྲུང་ཐག་པ་མ་བཅད་ན། མི་སེམས་བཟུང་བས་ག་ལ་ལང་། །ཞེན་མེད་ལྡོམ་བུ་མ་བྱས་ན། །བསྙེན་བཀུར་སྒྲུབ་པས་ག་ལ་ལང་། །ཆོག་ཤེས་འཕྲལ་ཕྱིད་མ་བྱས་ན། །ཟས་ནོར་གསོག་པས་ག་ལ་ལང་། བརྗོད་མེད་དོན་ཅིག་མ་རྟོགས་ན། །ཐ་སྙད་བརྗོད་པས་ག་ལ་ལང་། །དཔེ་མེད་དོན་ཅིག་མ་རྟོགས་ན། །ཡིག་ནག་བྲིས་པས་ག་ལ་ལང་། །རྐྱེན་ངན་གྲོགས་སུ་མ་ཤར་ན། །སྡུག་བསྔལ་སྤངས་པས་ག་ལ་ལང་། །དུག་ལྔ་ལམ་དུ་མ་སློང་ན། །གཉེན་པོ་བརྟེན་པས་ག་ལ་ལང་། །རྣམ་རྟོག་ཆོས་སྐུར་མ་ཤེས་ན། །དྲན་སྣང་བཀག་པས་ག་ལ་ལང་། །ལས་བྱ་བསམ་རྒྱབ་ཏུ་མ་བསྐྱུར་ན། །དགོས་འདོད་སྒྲུབ་པས་ག་ལ་ལང་། །བྱར་མེད་ཞེན་ཐག་མ་བཅད་ན། །སེམས་བྱ་བློ་སྒྲུབ་པས་ག་ལ་ལང་། །ད་ལྟ་རྦད་ཆོད་མ་བྱས་ན། །ལས་འཕྲོ་བསྒུགས་པས་ག་ལ་ལང་། །རང་ཉིད་དམ་ཆོས་མ་སྒྲུབ་ན། །གཞན་གྱིས་སྒྲུབ་པས་ག་ལ་ལང་། །ད་ལྟ་བཙན་གྲོལ་མ་བྱས་ན། ཤུགས་གྲོལ་རེ་བས་ག་ལ་ལང་། །ད་ལྟ་སེམས་རྩལ་མ་སྦྱངས་ན། །ཤུགས་འབྱུང་རེ་བས་ག་ལ་ལང་། །ད་ལྟ་ཐོག་ཆོད་མ་བྱས་ན། །བྱང་སེམས་བྱས་པས་ག་ལ་ལང་། །ད་ལྟ་བརྡར་ཤ་མ་ཆོད་ན། །ཕྱིས་ཆོད་དུ་རེ་བས་ག་ལ་ལང་། །ཞེས་གསུངས་སོ། །ཡང་གསུངས་པ། །འདུ་བ་རྣམ་བཞི་འདྲེས་པ་ཡི། །ལུས་ལ་ན་ཚ་མེད་ན་བདེ། །གཏུམ་མོ་མེ་ལྟར་འབར་བ་ཡི། །འཁྱག་པའི་བསམ་པ་མེད་དེ་བདེ། །སེམས་ལ་འོད་གསལ་ཤར་བ་ཡིས། །སྐྱེ་མེད་ངོ་བོ་མཐོང་སྟེ་བདེ། །ཁམས་ཀྱི་ཟས་དང་མ་བྲལ་ཡང་། །དད་པ་ཅན་གྱིས་བཏེགས་ཏེ་བདེ། །དཔོན་མེད་གཡོག་མེད་ངང་གིས་བདེ། །འདི་ཞེས་བྱ་བའི་ཧང་སྤྱོད་བདེ། །འདི་ལས་བདེ་བ་ལོག་ན་མེད། །ཅེས་བདེ་བ་དྲུག་གི་མགུར་གསུངས་སོ། །དེ་ཐམས་ཅད་སྦ་མགུར་སྐོར་གྱི་རོ།། །།དེ་ནས་རྗེ་བཙུན་ཆེན་པོ་དཔོན་སློབ་གཉིས་རྩིབས་རི་ལ་བྱོན་ཏེ། སྒྲུབ་པ་མཛད་པའི་དུས་སུ་རྗེ་བཙུན་ཆེན་པོའི་ཐུགས་དགོངས་ལ། ངས་སྒྲུབ་པ་བྱས་པའི་གནས་མང་དུ་ཡོད་ཀྱང་འདིའི་རྟོགས་པ་ཙམ་ཡེ་མ་བྱུང་བས་འདི་ལ་བསྟོད་པ་ཅིག་བྱེད་དགོས་གསུངས་ནས། རྗེ་བླའི་ཞབས་ལ་ཕྱག་འཚལ་ལོ། །གནས་བྱིན་རླབས་ཅན་གྱི་རྩིབས་རི་ན། །སྔོན་དགྲ་བཅོམ་ལྔ་བརྒྱའི་བཞུགས་ས་ཡོད། །ད་ལྟ་མི་ལ་རས་པའི་སྒོམ་གཡས་ཡོད། །གནས་བྱིན་རླབས་ཅན་གྱི་རྩིབས་རི་ན། །གནས་ཆུ་ཐག་རིང་སྟེ་ལམ་ཐག་ཉེ། །ཤིང་ཕུང་དཀོན་ཡང་གདམས་ངག་མོད། །གནས་བྱིན་རླབས་ཅན་གྱི་རྩིབས་རི་ན། །འཚོ་བ་དཀོན་ཏེ་བསམ་གཏན་འཕེལ། །ཡི་དམ་འཁོར་ལོ་བདེ་མཆོག་བཞུགས། །དེ་མཆོག་གི་དངོས་གྲུབ་སྟེར་བའི་ལྷ། །གནས་བྱིན་རླབས་ཅན་གྱི་རྩིབས་རི་ན། །ཆོས་སྐྱོང་མ་མགོན་ལྕམ་དྲལ་བཞུགས། །དེ་བར་ཆད་སེལ་བའི་ཆོས་སྐྱོང་ཡིན། །དུས་ངན་གྱི་གནས་དགོན་ཆགས་སྡང་རྒྱུ། །ང་མི་ལ་སྒོམ་ཆེན་བསྒོམ་དུ་འགྲོ། །གནས་རྫོང་དྲུག་ལ་བསྒོམ་དུ་འགྲོ། །ཞེས་གསུངས་སོ།། །།