གསུམ་པ་བདེ་དྲོད་ངོ་འཕྲོད་པའི་ཡོན་ཏན།

གསུམ་པ་བདེ་དྲོད་ངོ་འཕྲོད་པའི་ཡོན་ཏན་ནི། སྲིང་མོ་ན་རེ། ཁྱོད་ཉིན་མོ་གླུ་ལེན་མཚན་མོ་ཉལ་བས། སེམས་ཡང་ཡེངས་ལ་སོང་ནས་ཨེའུ་ཟུག་ཟེར་བས་མོ་བདེན་དགོངས་ནས། ལུས་ངག་ཡིད་གསུམ་གནད་རྣམ་པ་གསུམ་གྱིས་གཅུན་ཏེ། སྲིང་མོས་བྱིན་པའི་སྣམ་བུ་ཡང་བཟོ་ཐབས་དང་བཟོ་ལོང་མ་བྱུང་བས། ཙོག་པུ་ལུས་ཀྱི་གནད། རྒྱ་མདུད་ངག་གི་གནད། སྦྲུལ་མདུད་སེམས་ཀྱི་གནད་དེ་གསུམ་ལ་དྲིལ་ནས། ཤི་མ་ཤི་མེད། འགྱེལ་མ་འགྱེལ་མེད་པར་བསྒོམས་པས་ཞག་བཅོ་བརྒྱད་ནས་བདེ་དྲོད་རང་འབར་ལ་སོང་སྟེ། སྲིང་མོས་བྱིན་པའི་སྣམ་བུ་ཡང་འབུ་མུག་མས་ཟོས་ནས་དམ་མེ་དུམ་མེ་སོང་བ་ལ། ཡང་ཉིན་གཅིག་སྤྲང་མོ་སླེབ་བྱུང་བས་ཁྱེད་ཀྱི་སྣམ་བུ་ཨེ་བཟོས་ཞུས་པས། སྣམ་བུ་བཟོ་བ་མ་བྱུང་ནས་འབུས་ཟོས་གསུངས་པས་ཁྱེད་ཀྱི་སྣམ་བུ་ཆུད་ཟོས་བྱས་ནས། ད་གཅེར་བུ་ངོ་མི་ཚ་བ་ཨེ་ལགས་ཞུས་པས་མགུར་འདི་གསུངས་སོ། །རྗེ་བླ་མ་རྣམས་ལ་གསོལ་བ་འདེབས། །སྤྲང་པོས་རི་ཁྲོད་ཐུབ་པར་བྱིན་གྱིས་རློབས། །ངོ་མི་ཚ་བ་ལ་ངོ་ཚ་བྱེད། །ངོ་ཚའི་བུ་ཕོ་པང་དུ་པང་། །ངོ་ཚའི་བུ་ཕོ་རིན་གྱིས་ཉོས། །ངོ་ཚའི་ལས་ལ་ཐོད་པ་བརྒས། །འདི་ནི་རང་བྱུང་གི་ཕོ་རྟགས་ཡིན། །ཕོ་མོར་མིང་བཏགས་ཚུན་ཆད་ནས། །འདི་ཉིད་ཡོད་པ་སུས་ཀྱང་ཤེས། ཁྲེལ་ངོ་ཚ་གཉིས་ལ་ཁྱེད་མི་འཛེམ། །ངན་སྤྱོད་གཡོ་སྒྱུ་རྐུ་བ་དང་། །སྤྱོད་ངན་ཞེ་ངན་ལོག་ལྟ་དང་། །ངོ་ཤེས་ཉེ་བ་བཅོམ་པ་རྣམས། །ཁྲེལ་ངོ་ཚ་ཡིན་ཏེ་འཛེམ་མི་མེད། །རྡོ་རྗེ་ཟབ་མོའི་གསང་སྤྱོད་དང་། །མན་ངག་ཟབ་མོའི་སྒོམ་ཆེན་ཀུན། །མི་ཚེ་ཆོས་ལ་སྐྱེལ་བ་ལ། །ངོ་ཚས་འཇིགས་པ་སྐད་ཅིག་མེད། །ཁྱེད་པེ་ཏ་རེ་སྡུག་སེམས་མ་ཆུང་། ཡིད་ཆད་མ་སྔ་སྤྲང་དུ་སོང་། །ཞེས་གསུངས། དེ་ནས་བྲག་དམར་སྤོ་མཐོ་རུ་བྱོན། ཟྭ་ཚོད་འབའ་ཞིག་ལ་དཀའ་ཐུབ་མཛད་པས་ཉམས་ཆུང་བར་སོང་། མཚམས་འདིར་མ་དཔེ་ལས་ལྡེབ་བཅུ་གཅིག་ཚང་མི་འདུག །དཔེ་གཞན་གསུམ་ཙམ་ལ་འཚོལ་བསྡུ་བྱས་ཀྱང་འདི་ལས་ལྷག་པ་མི་འདུག་པས་གསབ་ཐབས་བྲལ། རྗེས་སུ་མ་དཔེ་གཞན་བཙལ་རྙེད་ཐུབ་ན་དེར་བསབ་གནང་ཡོད་པ་མཁྱེན། སར་གྲོལ། །དམ་ཚིག་གི་ཐག་ཆོད་བདེ་མོར་གདའ། །ལར་ཡང་སེམས་མ་བཅོས་པ་འདི་བདེ་མོར་གདའ། །འབྲས་བུ་རེ་མེད་ཀྱི་ངང་ལས་དོགས་མེད་འཕྱོ། །རེ་དོགས་ཀྱི་མཚན་མ་རང་སར་གྲོལ། །འབྲས་བུའི་ཐག་ཆོད་བདེ་མོར་གདའ། །ལར་ཡང་སེམས་མ་བཅོས་པ་འདི་བདེ་མོར་གདའ། །གསུངས་པས་མང་དུ་བྱུང་ངོ་། །འབུང་ནས་བསྒོམ་བསྒོམ་པ་ལ་ཟྭ་རང་གིས་ཡང་མ་འགྱང་པར་བསྒོམ་ཤེད་ཇེ་ཆུང་ལ་སོང་ནས་དབང་པོ་སྙོམས་པོ་ལས་མ་བྱུང་བ་ལ། ཉིན་ཅིག་ཁྱི་ར་བ་འགས་ཤ་བ་བསད་པའི་ཤ་ཁུར་ནས་བྲག་རྩེ་ནས་བྱུང་བས་རྟོགས་འདོད་བྱས་ཏེ། སྐད་མང་པོ་བཏང་ནས་རྗེ་བཙུན་གྱིས་གཟིགས་ཙ། ཁྱོད་མི་ལ་ཐོས་པ་དགའ་ཨེ་ཡིན་ཟེར་བས། ཡིན་གསུངས་པས། ཁྱོད་བྲག་འདི་ལ་བསྡད་པ་ལ་བྲག་འདི་ལ་ཡོན་ཏན་ཅི་ཡོད་ཟེར་བའི་ལན་དུ་མགུར་འདི་གསུངས་སོ། །རྗེ་བླ་མའི་བྱིན་རླབས་བྲག་ལ་ཞུགས། །བྲག་འདི་ཡི་ཡོན་ཏན་མ་ཤེས་ན། །སྤོས་རི་སྤོ་མཐོན་ནམ་མཁའ་རྫོང་། །ནམ་མཁའ་རྫོང་གི་ཕོ་བྲང་ན། །སྟེང་ན་ལྷོ་སྤྲིན་སྨུག་པོ་འཐིབས། །འོག་ན་གཙང་ཆབ་སྔོན་མོ་འབབ། །རྒྱབ་ཏུ་བྲག་དམར་ནམ་མཁའི་དབྱིངས། །མདུན་ན་སྤང་ཐང་མེ་ཏོག་བཀྲ། །ཟུར་ན་གཅན་གཟན་ངར་སྒྲ་བསྒྲོགས། །ལོག་ན་བྱ་རྒྱལ་རྒོད་པོ་ལྡིང་། །དུས་སུ་སྦྲང་ཆར་ཟིམ་བུ་འབབས། །རྒྱུན་དུ་བུང་བས་རྒྱང་གླུ་ལེན། །ཤ་རྐྱང་མ་བུས་རྩེ་བྲོ་བརྡུངས། །ལྕོ་ག་མ་བུས་འགྱུར་སྐད་སྒྲོགས། ལྷ་བྱ་གོང་མོས་གསུང་སྙན་སྒྲོགས། །རྫ་ཆབ་སིལ་མས་སྙན་པ་བརྗོད། །དུས་ཀྱི་སྐད་རིགས་ཉམས་ཀྱི་གྲོགས། །གནས་འདི་ཡི་ཡོན་ཏན་བསམ་མི་ཁྱབ། །ཉམས་དགའ་བས་གླུ་རུ་བླངས་པ་ཡིན། གདམས་ངག་ཁ་རུ་བཏོན་པ་ཡིན། །ཁྱོད་ཁྱི་ར་བ་ལ་བཤད་པ་ཡིན། །ལས་སྡིག་པ་མ་མཛད་དགེ་བ་མཛོད། །ཅེས་གསུངས་པས། ཁྱི་ར་བ་རྣམས་གྱིས་ངོ་མཚར་ཆེ་ཟེར་ནས་ཤ་བའི་ཤ་དང་ཕྱེ་ཡི་ལྷག་མ་དུམ་པ་ཅིག་འདུག་པ་རྣམས་ཕུལ་བ་ལ་ཤ་ཚོད་མཛད་དེ་གསོལ་བས། སྐུ་ལུས་འབུལ་ཤིག་གེ་བཏང་ནས་སྒོམ་ཤེད་ཆེར་སོང་། ཁམས་དང་ལུས་བདེ། སེམས་གསལ་དུ་སོང་བས་དགེ་སྦྱོར་བཟང་པོ་བྱུང་། ཡང་ཞག་གཅིག་གཉིས་ནས་ཁྱི་ར་བ་རྒན་པ་ཅིག་གིས་རྩམ་པ་ཞིག་ཁྱེར་ནས་ཡོང་བས། ད་ཞག་སྐུ་ཁམས་བདེ འམ་ཞུས་པས། ལེགས་པོར་བདེ་གསུངས་ནས་མགུར་འདི་གསུངས་སོ། །བྲག་དཀར་སྤོ་མཐོ་ཕོ་བྲང་ན། །མི་ལ་རས་པའི་བསྒོམ་ལུགས་བདེ། །འཛིན་ཆགས་མེད་པའི་འགྲོ་ལུགས་བདེ། །ན་ཚ་མེད་པའི་སྒྱུ་ལུས་བདེ། །ཉལ་པ་མེད་པའི་འདུག་ལུགས་བདེ། །ལྟོགས་པ་མེད་པའི་ཏིང་འཛིན་བདེ། །གྲང་བ་མེད་པའི་གཏུམ་མོ་བདེ། ཞུམ་པ་མེད་པའི་བརཏལ་ཞུགས་བདེ། །རྩོལ་བ་མེད་པའི་ས་བོན་བདེ། །ཡེངས་པ་མེད་པའི་དབེན་གནས་བདེ། །དེ་ཚོ་ལུས་ཀྱི་འཁྱེར་སོ་ཡིན། ཐབས་ཤེས་གཉིས་ཀྱིས་ཐེག་པ་བདེ། །བསྐྱེད་རྫོགས་ཟུང་འཇུག་ཉམས་ལེན་བདེ། །རླུང་འགྲོ་འོང་མེད་པའི་སེམས་ཉིད་བདེ། །ལབ་རོགས་མེད་པའི་སྨྲ་བཅད་བདེ། །དེ་ཚོ་ངག་གི་འཁྱེར་སོ་ཡིན། །ངོས་བཟུང་མེད་པའི་ལྟ་བ་བདེ། །རྒྱུན་ཆད་མེད་པའི་སྒོམ་པ་བདེ། ཉམས་ང་མེད་པའི་སྤྱོད་པ་བདེ། །རེ་དོགས་མེད་པའི་འབྲས་བུ་བདེ། །དེ་ཚོ་སེམས་ཀྱི་འཁྱེར་སོ་ཡིན། །འགྱུར་མེད་རྟོག་མེད་འོད་གསལ་བདེ། །བདེ་ཆེན་རྣམ་དག་དབྱིངས་སུ་བདེ། །འགགས་མེད་འཆར་སྒོའི་ཀློང་དུ་བདེ། །ཤིན་ཏུ་བདེ་བའི་དབྱངས་ཆུང་འདི། ཉམས་མྱོང་གླུ་རུ་བླངས་པ་ཡིན། །གདམས་ངག་ཁ་ནས་ཤོར་བ་ཡིན། །ལྟ་སྤྱོད་ཟུང་དུ་བསྡེབས་པ་ཡིན། །སླད་ནས་བྱང་ཆུབ་བསྒྲུབ་འདོད་རྣམས། །དོན་ཉམས་སུ་ལེན་ན་དེ་ལྟར་མཛོད། །ཅེས་གསུངས་པས། ཡོན་བདག་དེ་དགའ་ནས་ཕྱག་མང་དུ་འཚལ་ནས་ཁྱིམ་དུ་སོང་སྟེ། ཞག་གཅིག་གཉིས་ནས། ཡོན་བདག་རོགས་འགའ་དང་བཅས་ཏེ་འགྲོགས་ནས་རྩམ་པ་དུམ་པ་རེ་ཁྱེར་ནས་ཡོང་སྟེ། བླ་མ་ལགས། ཁར་ཉིན་གྱི་མགུར་མ་དེ་ལེགས་པོ་རང་ཞིག་བྱུང་སྟེ་ངེད་ཤེས་རབ་ཆུང་བ་དང་མ་ཟིན། ཚིག་ཉུང་ལ་དོན་གསལ་བ་ཞིག་གསུང་དང་ཟེར་བས་ཡང་མགུར་འདི་གསུངས་སོ། །རྗེ་བླ་མའི་བྱིན་བརླབས་བྲག་ལ་ཞུགས། །སྤྲང་བྲག་ལ་གནས་པར་བྱིན་གྱིས་རློབས། །དད་དང་མཁས་དང་བཙུན་དང་གསུམ། །འདི་གསུམ་སེམས་ཀྱི་སྲོག་ཤིང་ཡིན། །བཙུགས་ན་བརྟན་ལ་འཇུས་ན་བདེ། །སྲོག་ཤིང་མཛད་ན་དེ་ལ་མཛོད། །ཆག་མེད་ཞེན་མེད་རྨོངས་མེད་གསུམ། །འདི་གསུམ་སེམས་ཀྱིས་གོ་ཆ་ཡིན། །གྱོན་ན་ཡང་ལ་མཚོན་ཁར་སྲ། །གོ་ཆ་མཛད་ན་དེ་ལ་མཛོད། །བསྒོམ་དང་བརྩོན་དང་བསྲན་ཚུགས་གསུམ། །འདི་གསུམ་སེམས་ཀྱི་རྟ་ཕོ་ཡིན། །རྒྱུགས་ན་མགྱོགས་ལ་བྲོས་ན་ཐར། །རྟ་ཕོ་མཛད་ན་དེ་ལ་མཛོད། །རང་རིག་རང་གསལ་རང་བདེ་གསུམ། །འདི་གསུམ་སེམས་ཀྱི་འབྲས་བུ་ལགས། །བཏབ་ལ་སྨིན་ལ་ཟ་ན་བཅུད། །འབྲས་བུ་མཛད་ན་དེ་ལ་མཛོད། །སེམས་དོན་རྣམ་པ་བཅུ་གཉིས་འདི། །རྣལ་འབྱོར་བློ་ལ་ཤར་ནས་བླངས། །ཁྱོད་ཡོན་བདག་དད་པའི་གདབ་ལེན་མཛོད། །ཅེས་གསུངས་པས། ཡོན་བདག་དེ་དད་པ་ཅན་གཤེན་རྡོར་མོ་བྱ་བ་ཡིན་པས། ད་རུང་མདོར་བསྡུས་པ་ཚིག་གཅིག་ལ་དྲིལ་བ་ཅིག་གསུང་དང་ཟེར་ལ་ཡང་མགུར་འདི་གསུངས་སོ། །བླ་མའི་བྱིན་བརླབས་སེམས་ལ་ཞུགས། སེམས་སྟོང་ཉིད་རྟོགས་པར་བྱིན་གྱི་རློབས། །ཡོན་བདག་དད་པའི་ཕྱག་རྟེན་ལ། །ལྷ་ཡི་དམ་མཉེས་པའི་གླུ་ཞིག་ལེན། །སྣང་དང་སྟོང་དང་དབྱེར་མེད་གསུམ། །འདི་གསུམ་ལྟ་བའི་མདོར་བསྡུས་ཡིན། །གསལ་དང་མི་རྟོག་མ་ཡེངས་གསུམ། །འདི་གསུམ་སྒོམ་པའི་མདོར་བསྡུས་ཡིན། མ་ཆགས་མ་ཞེན་མ་འཁྲུལ་གསུམ། །འདི་གསུམ་སྤྱོད་པའི་མདོར་བསྡུས་ཡིན། །རེ་མེད་དོགས་མེད་མཐར་སྐྱོལ་གསུམ། །འདི་གསུམ་འབྲས་བུའི་མདོར་བསྡུས་ཡིན། །ངོས་མེད་ལྐོག་མེད་ཟོལ་མེད་གསུམ། །འདི་གསུམ་དམ་ཚིག་མདོར་བསྡུས་ཡིན། །ཞེས་གསུངས་པས། ཡོན་བདག་རྣམས་མཉེས་ཏེ་ཁྱིམ་དུ་སོང་ངོ་། །ལར་སྙེ་ནམ་གྱིས་མི་སྡེ་རྣམས་དད་པ་ཆེ་ཡང་མཁོས་ཆུང་བས་ཞབས་ཏོག་ཆེན་པོ་ཙམ་མ་བྱུང་བས་དཀོར་གྱི་དགེ་སྦྱོར་མ་འཕྲོག །ཟླ་བ་ལྔ་དྲུག་ནས་ལྟོགས་དྲིར་རླུང་ལ་མ་བསྐུར་ཞེས་གསུངས་སོ། །དེ་ཐམས་ཅད་སྤོ་རི་སྤོ་མཐོན་གྱིས་སྐོར་རོ།། །།

དེ་ནས་སྤོ་རི་སྤོ་མཐོན་ན་ལོ་དྲུག་སོང་བ་དང་། བྲག་དམར་མཆོང་གླིང་ཁྱུང་གི་རྫོང་ན་ལོ་བཅུ་གཉིས། ཟླ་བ་བཅུ་གཉིས། ཟ་མ་བཅུ་གཉིས། བཅུ་གཉིས་ཆ་བཞིའི་དམ་བཅའ་བྱས་པའི་འོག་ཏུ་ཤི་བ་ཅིག་ཨེ་ནུས་བསམ་ནས་བསྒྲུབ་པ་ལ། ཡུལ་གྱི་མི་སྡེས་ཀྱང་གར་ཡོད་མ་ཚོར་བར་བསྒོམ་པས། ཨེ་འཆི་ཨེ་འཆི་བསམ་པ་ལ་འཆི་རྒྱུ་མ་བྱུང་ཞིང་དབང་པོ་ངན་པོར་བྱུང་བས། ངས་འཇིག་རྟེན་གྱིས་བྱ་བ་བཏང་ཐལ་ཟིན། ད་རུང་མ་ཤི་ཡང་ཆོས་རང་བྱེད་བསམ་པ་སྐྱེས་ཏེ། ཟྭ་ཞིག་བཙོས་ནས་གསོལ་དགོངས་ནས། ཤིང་ཞིག་འཐུ་བ་ལ་སོང་སྟེ་ཤིང་ཧྲལ་ཧྲུལ་དུམ་པ་ཅིག་རྙེད་པ་རྡོ་ལེབ་ཅིག་གི་སྟེང་དུ་བཞག་ནས་བསྙེལ་བ་གསོས་ནས་ཡོད་པ་ལྷག་པ་ཞིག་འོང་བས་གཏོར་སོང་བ་ལ། ཐམས་ཅད་མི་རྟག་པ་འདི་རང་ཡིན་ཨང་། བདག་ལ་ཡང་མི་རྟག་པ་ནམ་ཡོང་ཨང་དགོངས་ཤིང་ཡོད་པ་ལ་ད་རུང་ཤིང་ཞིག་འཐུ་དགོས་དགོངས་ནས་ཤིང་སྐམ་པོ་ཆེ་བ་གཅིག་བཅག་རིང་ལ་ཤིང་ཆག་པ་དང་མཉམ་དུ་འགྱེལ་བའི་ངང་ལ་དབང་པོ་མ་བྱུང་སྟེ། དགོང་མོ་ཉི་མ་ཟེར་བ་ལྷག་པ་སེར་བུ་བཤི་རིང་བ་བྱུང་ནས་མནལ་སད་པ་འདྲ་བ་ཅིག་ལ་དབང་པོ་རྙེད་དེ། སྐྱོ་བའི་སྙིང་རླུང་དྲག་པོ་ཅིག་ལངས་ཟིན་པས། ཉི་མ་ཤར་ཕྱོགས་སུ་གཟིགས་པས། བླ་མའི་སྐུ་མཁར་ཡོད་པའི་ཕྱོགས་སུ། སྤྲིན་དཀར་པོ་གཅིག་ལིང་ངེ་འདུག་པ་དང་། དེ་རུ་བླ་མ་དྲན་པའི་མགུར་སྤྲིན་དཀར་ལྡིང་བ་འདི་གསུངས་སོ། །རྗེ་བླ་མ་དེ་ལ་ཕྱག་འཚལ་གསོལ་བ་འདེབས། །སྤྲང་པོའི་སྙིང་རླུང་སང་བར་བྱིན་གྱིས་རློབས། །ཉི་མ་ཤར་ན་སྤྲིན་དཀར་ལང་མ་ལིང་། །སྤྲིན་དཀར་པོ་ལྡིང་བའི་འོག་རོལ་ན། །ལྷོ་གྲོ་བོ་ལུང་གིས་དགོན་པ་ན། །བྲག་སེང་ཆེན་བསྣོལ་བའི་གདན་སྟེང་ན། །ལྷོ་བྲག་གི་མར་པ་ལོ་ཙྭ་དེ། །དུས་ད་ལྟ་བཞུགས་ན་དགའ་བ་ལ། །ད་ལྟ་བཞུགས་ན་སྐྱིད་པ་ལ། །ས་སྐོར་ཐག་རིང་ཡང་མཇལ་སྙིང་འདོད། །ལམ་བགྲོད་པར་དཀའ་ཡང་མཇལ་སྙིང་འདོད། །ལར་ཡང་བླ་མ་དྲན་པ་བྱུང་། །བསམ་ཞིང་རྗེ་བཙུན་དྲན་པ་བྱུང་། །ཡུམ་སངས་རྒྱས་བསྐྱེད་བྱེད་བདག་མེད་མ། །དུས་ད་ལྟ་བཞུགས་ན་དགའ་བ་ལ། །ད་ལྟ་བཞུགས་ན་སྐྱིད་པ་ལ། །མ་ལ་ཕྱག་རྟེན་མེད་ཀྱང་མཇལ་སྙིང་འདོད། །འབུལ་རྒྱུ་མེད་ཀྱང་མཇལ་སྙིང་འདོད། །ལར་ཡང་བླ་མ་དྲན་པ་བྱུང་། །བསམ་ཞིང་རྗེ་བཙུན་དྲན་པར་བྱུང་། །དབང་ཟབ་མོ་བརྡ་ཡི་དབང་བཞི་དེ། །དུས་ད་ལྟ་མཛད་ན་དགའ་བ་ལ། །ད་ལྟ་མཛད་ན་སྐྱིད་པ་ལ། །ང་ཡོ་བྱད་ཆུང་ཡང་འབུལ་སྙིང་འདོད། །འཚོ་བ་དཀོན་ཡང་ཞུ་སྙིང་འདོད། །ལར་ཡང་བླ་མ་དྲན་པ་བྱུང་། །བསམ་ཞིང་རྗེ་བཙུན་དྲན་པར་བྱུང་། རྒྱུད་ཟབ་མོ་དགྱེས་པ་རྡོ་རྗེ་དེ། །དུས་ད་ལྟ་གསུང་ན་དགའ་བ་ལ། །ད་ལྟ་གསུང་ན་སྐྱིད་པ་ལ། །ང་ཤེས་རབ་ཆུང་ཡང་ཉན་སྙིང་འདོད། བློ་རྩེ་རཏལ་ཡང་ཉན་སྙིང་འདོད། །ལར་ཡང་བླ་མ་དྲན་པ་བྱུང་། །བསམ་ཞིང་རྗེ་བཙུན་དྲན་པར་བྱུང་། །ཁྲིད་ཟབ་མོ་ན་རོའི་ཆོས་དྲུག་དེ། དུས་ད་ལྟ་གསུང་ན་དགའ་བ་ལ། །ད་ལྟ་གསུངས་ན་སྐྱིད་པ་ལ། །ང་སྒོམ་བསྲན་ཆུང་ཡང་བསྒོམ་སྙིང་འདོད། །འབྱུང་བཞི་རྒུད་ཀྱང་སྒོམ་སྙིང་འདོད། །ལར་ཡང་བླ་མ་དྲན་པར་བྱུང་། བསམ་ཞིང་རྗེ་བཙུན་དྲན་པར་བྱུང་། །ཕ་བླ་མས་བསྡུས་པའི་མཆེད་གྲོགས་དེ། །དུས་ད་ལྟ་ཚོགས་ན་དགའ་བ་ལ། དུས་ད་ལྟ་ཚོགས་ན་སྐྱིད་པ་ལ། །བདག་གདུང་སེམས་ཆུང་ཡང་མཇལ་སྙིང་འདོད། །བགྲོ་གླེང་གོ་བསྡུར་བྱེད་སྙིང་འདོད། །ལར་ཡང་བླ་མ་དྲན་པར་བྱུང་། བསམ་ཞིང་རྗེ་བཙུན་དྲན་པར་བྱུང་། །བླ་མ་མཉེས་པའི་སྐུ་མཁར་དེ། །དུས་ད་ལྟ་བརྩིགས་ན་དགའ་བ་ལ། །ད་ལྟ་བརྩིགས་ན་སྐྱིད་པ་ལ། །ན་སོ་རྒས་ཀྱང་བརྩིགས་སྙིང་འདོད། །སྒྱུ་ལུས་ངན་ཡང་བརྩིགས་སྙིང་འདོད། །ལར་ཡང་བླ་མ་དྲན་པར་བྱུང་། །བསམ་ཞིང་རྗེ་བཙུན་དྲན་པར་བྱུང་། །དྲིན་ཆེན་ཨ་མ་ཡབ་ཡུམ་དེ། །དུས་ད་ལྟ་ཡོད་ན་དགའ་བ་ལ། །ད་ལྟ་ཡོད་ན་སྐྱིད་པ་ལ། །ཕ་མའི་དྲིན་ལན་མཇལ་སྙིང་འདོད། །ཞབས་ཏོག་ཅི་ནུས་བྱེད་སྙིང་འདོད། །ལར་ཡང་བླ་མ་དྲན་པར་བྱུང་། བསམ་ཞིང་རྗེ་བཙུན་དྲན་པར་བྱུང་། །རྡོ་རྗེ་འཆང་ཆེན་བྱིན་རླབས་ཅན། །སྤྲང་པོའི་སྐྱོ་བ་སངས་པར་བྱིན་གྱིས་རློབས། །ཞེས་གསུངས་པས། སྤྲིན་དེ་ཇེ་ཆེ་ཇེ་ཆེ་ལ་སོང་ནས་ཁོང་གིས་དབུ་ཐོག་ཏུ་སྣམ་བུ་བརྐྱང་བ་བཞིན་དུ་འོང་ནས་སྤྲིན་དེའི་རྩེ་མོ་ལ། བླ་མ་མར་པ་དེ་ཉིད་སེང་གེ་དཀར་མོ་སྲབ་མེད་ཅིག་ལ་ཆིབ་ནས་འདུག་པ་གཟིགས་པས། མི་ལ་རས་པ་ཁྱོད་དེ་རིང་འོ་དོད་ཆེན་པོ་བྱེད་པ་ཅི་བྱུང་། བླ་མ་ལ་དད་པ་སྐྱེས་སམ། རྐྱེན་ངན་རྟོགས་པ་ཡུལ་ཕྱིར་འབྲང་ངམ། ནང་བསྒྲུབ་པའི་ཁང་པར་སྐྱིད་འདོད་ཀྱི་བར་ཆད་ཞུགས་སམ། བློ་འགོང་པོ་རེ་དོགས་བཅེར་བས་ཁོང་དུ་སྤུན་ནམ་ཅི་བྱུང་། ང་དང་ཁྱེད་གཉིས་འདུ་འབྲལ་མེད་པ་ཡིན་གསུང་པའི་སྒྲ་ཐོས་པས་དགའ་དྲག་ནས་འདི་བཟླས་མ་རྙེད་པ་ལ། དཔེ་དང་བྲལ་བའི་རྟོགས་པ་ཤར། བརྗོད་དུ་མེད་པའི་ཉམས་སྐྱེས་ནས། གསོལ་འདེབས་མོས་གུས་ཀྱི་མགུར་འདི་གསུངས་སོ། །རྗེ་བླ་མའི་ཞལ་མཐོང་གསུང་ཐོས་པས། །སྤྲང་པོའི་སྙིང་རླུང་ཉམས་ལ་ཤར། །ཐུགས་རྗེས་ཡིད་ལ་བསམ་པ་ཡི། །རྟོགས་པ་མོས་གུས་གཏིང་ནས་སྐྱེས། །བཀའ་དྲིན་བྱིན་བརླབས་དངོས་ཞུགས་པས། །ཆོས་མིན་གྱི་སྣང་བ་ཁྲེགས་སེ་ཆད། །མི་མེད་ལུང་སྟོང་གི་འོ་དོད་འདི། །བླ་མའི་སྙན་ལ་གཟན་ལགས་ཀྱང་། །སྤྲང་འདི་མིན་གྱི་སྣང་བ་ཚིམ་མི་ནུས། །སྙིང་རུས་སྡུག་བསྲན་གྱི་སྒྲུབ་པ་འདི། །ཕ་བླ་མ་མཉེས་པའི་ཞབས་ཏོག་ལགས། །ན་མེད་གཅིག་པུའི་རི་ཁྲོད་འདི། །མཁའ་འགྲོ་མཉེས་པའི་ཞབས་ཏོག་ཡིན། །ཤིར་ཆུག་ལྟོགས་བསྒུར་གྱི་སྡུག་བསྲན་འདི། །མགོན་མེད་སེམས་ཅན་གྱི་སྦྱིན་པ་ཡིན། །གྲོགས་མེད་གཅིག་པུའི་སྙིང་རུས་འདི། །ལས་རྣམ་སྨིན་སྦྱོང་བའི་བྱབ་ཤིང་ཡིན། །ཟད་མེད་ཟྭ་ཡི་ཆོས་བརྒྱགས་འདི། །ཉམས་རྟོགས་པ་སྐྱེ་བའི་མཐུན་རྐྱེན་ཡིན། །ཕ་བླ་མའི་དྲིན་ལེན་བསྒྲུབ་པས་འཇལ། །དྲིན་ཐུགས་ལ་ཐོགས་ཤིག་གུ་རུ་རྗེ། །སྤྲང་རི་ཁྲོད་ནོན་པར་བྱིན་གྱིས་རློབས། །ཞེས་གསུངས་པས། སྣང་བ་བདེ་ཏིང་ངེ་ཤིང་དུམ་པ་ཅིག་ཁྱེར་ནས་ཡར་སོང་ཙ། ཕུག་པ་ན་ལྕགས་ཀྱི་ཨ་ཙ་ར་གཟུགས་མཐེ་བོང་ཙམ་མིག་ཕོར་པ་ཙམ་ཡོད་པ་བདུན་གྱིས་ལ་ལས་མེ་འབུད། ལ་ལས་ཆུ་ལེན། ལ་ལས་རྩམ་པ་བཏག་སྟངས་དང་། ལས་སྣ་ཚོགས་པའི་ཆོ་འཕྲུལ་སྟོན་ཅིང་འདུག་པས་དངངས། གཟིགས་མ་གཟིགས་ལ་ཡ་ང་བ་ཅིག་བྱུང་བས། ལྷ་བསྒོམ་ནས་དྲག་སྔགས་བཟླས་པས་ཀྱང་ལྟ་སྟངས་རོལ་པ་ཆེར་བྱས། བྱམས་སྙིང་རྗེ་བསྒོམ་པས་ཞི་མ་ནུས་པས་འདི་རྣམས་ཡུལ་འདིའི་གཞི་བདག་ཨེ་མ་ཡིན་ང་གནས་འདི་ན་ལོ་ཟླ་བ་འདི་ཙམ་བསྡད་པ་ལ། གཏོར་མ་དང་བསྟོད་པ་གཅིག་ཀྱང་མ་བྱས་དགོངས་ནས་གནས་ལ་བསྟོད་པའི་མགུར་འདི་གསུངས་སོ། །ཨེ་མ་རི་ཁྲོད་དབེན་པའི་གནས། ཕ་རྒྱལ་བས་བྱང་ཆུབ་བསྒྲུབ་པའི་ས། །མི་རང་ཉིད་གཅིག་པུར་གནས་པའི་ཡུལ། །གནས་བྲག་དམར་མཆོང་གླིང་ཁྱུང་གི་རྫོང་། །སྟེང་ན་ལྷོ་སྤྲིན་སྨུག་པོ་འཆིབ། །དེ་ལ་རྒོད་པོ་ལང་མ་ལིང་། །མདའ་ལ་གཙང་ཆབ་མེ་རེ་རེ། །དེ་ལ་ཉ་སྲམ་གྱ་མ་གྱུ། །རྒྱབ་ཏུ་རི་རྒྱལ་རྩེ་མཐོ་བ། །དེ་ལ་རྩི་ཤིང་སྣ་ཚོགས་རྒྱས། །མདུན་དུ་འབྲས་ཕུང་རང་ལ་འཁོར། །དེ་ལ་མེ་ཏོག་ཆུ་མིག་རྒྱས། །རྩ་ན་ན་སྤང་ཆོ་ལོ་རིས། །དེ་ལ་ཤ་རྐྱང་མ་བུ་རྩེ། །ཤིང་ལོ་མེ་ཏོག་པད་མ་རིས། །དེ་ལ་འཇོལ་མང་གསུང་སྙན་བསྒྲོགས། །རྫ་དང་གཡའ་མ་གངས་རི་མང་། །དེ་ལ་གོང་མོས་སྐད་སྙན་འགྱུར། །འབྲོག་དང་ལུང་པའི་ཕུ་མདའ་དམ། དེ་ལ་བར་ཆོད་མི་རྗེས་ཆད། །ང་དང་གནས་བཟང་བྱང་ཆུབ་མཐུན། །དེ་ལྟ་བུ་ཡི་དབེན་གནས་འདིར། ང་མི་ལ་རས་པའི་ཉམས་མྱོང་སྐྱོང་། །ཉམས་མྱོང་རྩ་བ་བྱང་ཆུབ་སེམས། །འདྲེ་འདིར་ཚོགས་བར་ཆོད་མི་མ་ཡིན། །བྱམས་སྙིང་རྗེའི་བདུད་རྩི་འཐུང་ལ་དེངས། །ཞེས་གསུངས་པས། ཆོ་འཕྲུལ་གཏོང་བའི་ཨ་ཙ་ར་གསུམ་དེངས་ནས་སོང་། བཞི་པོ་དེ་ད་དུང་འགྲོར་མ་ཉན་པས། བཞི་པོ་དེ་འདྲེ་ཡི་ཆོ་འཕྲུལ་བར་ཆད་ཡིན་པར་དགོངས་ནས། ལྟ་བ་གདེངས་དང་ལྡན་པའི་མགུར་འདི་གསུངས་སོ། །ཡང་ཕོ་ང་དང་ང་རང་མི་ཟེར་ཏེ། །ང་རང་སེང་ཆེན་དཀར་མོའི་བུ། །སེང་མ་ཡི་མངལ་ནས་གཡུ་རལ་རྒྱས། །ཕྲུ་མ་གངས་དཀར་སྟོངས་སུ་བཀྲལ། །སེང་འཕྲུག་གི་དུས་ན་ཚང་སྒོ་འགྲིམས། །སེང་ཕྲན་གྱི་ལོ་ལ་ཁྱུ་སྣ་དྲངས། །སེང་ཆེན་གྱི་ལོ་ལ་གངས་སྟོད་བསྐོར། །ཁ་བ་བུ་ཡུག་འཚུབས་ཀྱང་ཉམས་མི་ང་། །ཕོ་ང་དང་ང་རང་མི་ཟེར་ཏེ། །ང་རང་འདབ་ཆགས་ཁྱུང་གི་བུ། །ཁྱུང་སྒོ་ངའི་ནང་ནས་གཤོག་སྒྲོ་རྒྱས། །ཁྱུང་ཕྲུག་གི་ལོ་ལ་ཚང་སྒོ་འགྲིམས། །ཁྱུང་ཕྲན་གྱི་ལོ་ལ་ཁྱུང་སྣ་དྲངས། །ཁྱུང་ཆེན་གྱི་ལོ་ལ་ནམ་འཕངས་བསྐྱོད། །ཁོང་གཡང་ས་ཆེ་ཡང་ཉམས་མི་ང་། །ཕོ་ང་དང་ང་རང་མི་ཟེར་ཏེ། །ང་དང་ཉ་ཆེན་ཡོར་མོའི་བུ། །མ་ཡི་མངལ་ནས་གསེར་མིག་འཁྱིལ། །ཉ་ཆུང་ལོ་ལ་མཚོ་མཐའ་འགྲིམས། །ཉ་ཕྲན་གྱི་ལོ་ལ་ཁྱུ་སྣ་དྲངས། །ཉ་ཆེན་གྱི་ལོ་ལ་མཚོ་སྟོད་བཟུང་། །མཚོ་རྦ་རླབས་འཁྲུགས་ཀྱང་ཉམས་མི་ང་། །ཕོ་ང་དང་ང་རང་མི་ཟེར་ཏེ། །ང་རང་ནཱ་རོ་མེ་ཏྲིའི་བུ། ཆུང་དད་སྐྱེས་པའི་ལོ་ལ་ཆོས་སྒོར་ཞུགས། །ཆོས་སྒོར་ཞུགས་ནས་ཆོས་ཁྲིད་ཞུས། །བསྒོམ་ཁྲིད་བསྐྱངས་ནས་རི་ཁྲོད་འགྲིམས། རི་ཁྲོད་འགྲིམས་པས་ཉམས་རྟོགས་རྒྱས། །ཁྱོད་བར་ཆད་ཀྱི་གདོན་ལ་ཉམས་ང་མེད། །འདྲེ་ངན་གྱི་བར་ཆོད་ཚུགས་མི་སྲིད། །འདྲེ་དེ་རིང་བྱོན་པ་ངོ་མཚར་ཆེ། །སང་ཉིན་ཅིས་ཀྱང་འབྱོན་པར་ཞུ། །སྐབས་སུ་གླེང་ལང་ཡང་ཡང་བྱེད། །ཅེས་གསུངས་པས་ཨ་ཙ་ར་གསུམ་འཇའ་ཡལ་བ་བཞིན་དུ་སོང་། གཅིག་ནི་ལྟ་སྟངས་རོལ་པའི་གར་ཆེན་བཏང་བས། འདི་དེ་མ་རུངས་པའི་མཐུ་བོ་ཆེ་ཅིག་རེད་དགོངས་ནས་ཡང་རྟོགས་ཚད་ལྟ་བའི་མགུར་འདི་གསུངས་སོ། །ལྕགས་ཀྱི་ཕ་བོང་རྡོས་མི་ཤིགས། །ལྕགས་ཀྱི་ཕ་བོང་རྡོས་ཤིག་ན། །ལྕགས་ཞུན་ཐར་བྱས་པ་དོན་གོ་ཆུང་། །སེ་གེ་གངས་ལ་སྤར་མི་འཁྱགས། །སེ་གེ་གངས་ལ་འགྱིང་བ་སྦར་འཁྱགས་ན། །སེང་རྩལ་གསུམ་རྫོགས་པ་དོན་གོ་ཆུང་། །བྱ་མཁའ་ལ་འཕུར་བ་ལྷུང་མི་སྲིད། །བྱ་མཁའ་ལ་འཕུར་བ་ལྷུང་སྲིད་ན། །བྱ་གཤོག་དྲུག་རྒྱས་པ་དོན་གོ་ཆུང་། །ཉ་ཆབ་ལ་གནས་པ་འཚུབ་མི་སྲིད། །ཉ་ཆབ་ལ་གནས་པ་འཚུབ་སྲིད་ན། །ཉ་གསེར་མིག་འཁྱིལ་པ་དོན་གོ་ཆུང་། །ང་ནཱ་རོ་མཻ་ཏྲིའི་བུ་བརྒྱུད་འདི། སེམས་སྟོང་ཉིད་རྟོགས་པ་འདྲེས་མི་འཇིག །སེམས་སྟོང་ཉིད་རྟོགས་པ་འདྲེས་འཇིག་ན། མཐོ་བྲག་ལ་བསྒོམས་པའི་དོན་གོ་ཆུང་། །ཁྱོད་འདྲའི་འདྲེ་ལ་ཉམས་ང་མེད། །ཁྱོད་འདྲའི་འདྲེ་ལ་ཉམ་ང་ན། སེམས་སྙིང་རྗེ་ཤར་བ་དོན་གོ་ཆུང་། །འདྲེ་ད་རུང་བཞུགས་ན་ཐུག་ལ་བཏགས། །ཁྱོད་རོགས་པ་ཡོད་ན་སྐེད་ལ་ཤོག །ངེ་རང་གསུང་གླེང་ཁོ་ཐག་ཆོད། །ཨ་ཙ་མ་འབྱུང་པོ་སྙིང་རེ་རྗེ། །རྗེ་མི་བསྐྱོད་ངོ་བོ་རྡོ་རྗེ་འཆང་། །སྤྲང་སྙིང་རྗེ་འབྱོངས་པར་བྱིན་གྱིས་རློབས། །ཞེས་གསུངས་པས། བྱམས་སྙིང་རྗེ་ལུས་ལ་ལྟོས་པ་མེད་པར་ཁ་ན་ཕར་བཙངས་པས་ཟ་རྒྱུ་མ་བྱུང་བར་འཇའ་ཡལ་བ་བཞིན་དེངས་ནས་སོང་ངོ་། །དེ་ཐམས་ཅད་བྲག་དམར་མཆོང་གླིང་གིས་སྐོར་རོ།། །།

དེ་ནས་དམ་བཅའ་རྫོགས་པ་དང་། བྲིན་དང་སྙེ་ནམ་གྱི་སོ་མཚམས་ལ་ཕྱི་གངས་ཀྱི་ར་བ་དེར་རྗེ་བཙུན་བྱོན་ནས་བསྒོམ་བཞིན་ཡོད་པའི་སྟོན་ཟླ་ར་བའི་ཚེས་བཅུ་བཞིའི་ནུབ་མོ་ལ། ལ་ཕྱི་ཆུ་བཟང་གིས་ལྷ་འདྲེ་ཐམས་ཅད་དམག་བྱས་ནས་འོང་པས། ཆོ་འཕྲུལ་ཡ་མ་ཟུང་རིགས་མི་འདྲ་བ་མང་པོ་བསྟན་པས་དེའི་དུས་སུ་རྗེ་བཙུན་གྱིས་མི་མ་ཡིན་དེ་རྣམས་ལ་མགུར་འདི་གསུངས་སོ། །བླ་མའི་བཀའ་དྲིན་སྙིང་ལ་ཞུགས། །ནང་དངོས་པོར་འཛིན་པའི་སྙིང་རླུང་བསལ། །བློ་པད་མ་དཀར་པོ་འདབ་བཞི་རྒྱས། །བློ་འཁྲུལ་སྣང་མི་འཁྲུག་ཤེས་པ་ལ། །གདོན་གནོད་སྦྱིན་ཕོ་མོའི་ཆོ་འཕྲུལ་འདི། །ཨ་ཙ་མ་ཡི་དྭགས་སྙིང་རེ་རྗེ། །སྔོན་ལས་ངན་བསགས་པའི་འབྲས་བུ་དེ། །ད་ལྟ་ལུས་ངན་རྣམ་སྨིན་སྤྱོད། །ཡིད་མཁའ་ལ་རྒྱུ་བའི་ཀུན་སློང་ངན། །སྦྱོར་ངན་ཉོན་མོངས་ཀྱི་གདུབ་རྩུབ་ཀྱིས། །གསོད་གཅོད་བརྡེགས་བཙོག་བྱེད་དོ་ཞེས། །མི་ང་ལ་ཁྱེད་རྣམས་མི་གནོད་དོ། །ཁྱོད་ལས་ངན་བསགས་པས་ད་གཟོད་སྡུག །ང་སྟོང་ཉིད་རྟོགས་པའི་རྣལ་འབྱོར་པ། བློ་ཡ་ང་མེད་པ་ལྟ་བའི་གདེང་། །དཔའ་བོ་སེང་གེའི་སྤྱོད་འགྲོས་ཀྱིས། །ལུས་ནི་ལྷ་ཡི་རྫོང་ལ་ཞེན། །ངག་ནི་སྔགས་ཀྱི་རྫོང་ལ་ཞེན། །སེམས་ནི་འོད་གསལ་རྫོང་ལ་ཞེན། །ཚོགས་དྲུག་རང་རང་ངོ་བོས་སྟོང་། །འོད་ལུས་རྡོ་རྗེའི་རྣལ་འབྱོར་ལ། །ཁྱོད་ཡི་དྭགས་ཐོ་འཚམ་ཅི་ལ་ཕན། །སྤྱིར་དགེ་སྡིག་འབྲས་བུ་བདེན་ནུས་ཆེ། །རྒྱུ་མཐུན་འབྲས་བུ་བསགས་བསགས་ནས། །ངན་སོང་འགྲོ་བ་ཡི་རེ་མུག །ཨ་ཙ་མ་ཡི་དྭགས་ཉོན་རེ་མོངས། །དོན་གནས་ལུགས་མ་རྟོགས་སྙིང་རེ་རྗེ། མདོག་ངན་མི་རྒན་རས་པ་འདི། །རག་རིག་བྱེད་གླུ་ཡིས་ཆོས་བཤད་པས། །ནང་བཅུད་ཀྱིས་བསྡུས་པའི་སེམས་ཅན་རྣམས། །གཉེན་ཕ་མར་མ་གྱུར་གང་ཡང་མེད། དེ་དྲིན་ཆེན་ཡིན་པས་སྡུག་པར་འཕང་། །ཁྱོད་ཡི་དྭགས་གནོད་སེམས་སླར་ལོགས་ནས། །ལས་རྒྱུ་འབྲས་བསམ་ན་ཅི་མ་ལགས། །ཆོས་དགེ་བཅུ་སྤྱད་ན་ཅི་བདེ་འཐོབ། །ཚིག་ལེགས་པར་བཟུང་ལ་རྟོག་དཔྱོད་ཐོང་། དོན་གོ་བར་མཛོད་ལ་ཉམས་སུ་ལོངས། །ཞེས་གསུངས་པས། དེར་ཚོགས་པའི་ཡུལ་བཙན་བྲག་སྲིན་མོ་རྣམས་ན་རེ། འདིར་ཚོགས་པ་རྣམས་ལས་ངན་གོམ་དྲག་པས། སྡིག་པས་གནོད་པར་ཤེས། དགེ་བས་ཕན་པར་གོ་ཡང་། ལས་ངན་ཤུགས་ཀྱི་སྤྱོད་པ་ལ་དགའ་བ་ཅིག་བྱུང་བས་རང་དབང་མ་བྱུང་། བླ་མའི་མགུར་དེ་འདྲ་ཡིན་ན། དགེ་བ་ལ་སྤྲོ་སྤྲོ་འདུག་ཅིང་། ཤིན་ཏུ་སྙན་པས་ཕན་པར་བྱུང་བས་ད་རུང་མགུར་ཞིག་བཞེངས་པར་ཞུ་ཟེར་བས། ཡང་ཆོས་བཤད་འདི་མགུར་དུ་གསུངས་སོ། །རྗེ་བླ་མའི་བཀའ་དྲིན་སེམས་ལ་ཞུགས། །སེམས་བསམ་པ་ལོག་པ་སྐྱེ་མ་མྱོང་། །དོན་བདེན་པའི་ཚིག་དང་མ་འབྲེལ་ན། །གླུ་གྲེ་འགྱུར་སྙན་པ་པི་ཝང་ཡིན། །ཆོས་མཐུན་དཔེ་ཡིས་མི་མཚོན་ན། ཚིག་སྡེབ་སྦྱོར་མཁས་ཀྱང་ཐ་སྙད་ཡིན། །ཆོས་ལག་ལེན་རྒྱུད་ལ་མི་འགེལ་ན། །ངས་ཤེས་སོ་ཟེར་ཡང་མགོ་སྐོར་ཡིན། །དོན་སྙན་བརྒྱུད་ཀྱི་གདམས་ངག་མི་བསྒོམ་ན། །གནས་རི་ཁྲོད་བཟུང་ཡང་རང་སྡུག་ཡིན། །ཕན་ངེས་པའི་དམ་ཆོས་མི་བྱེད་ན། །འཕྲལ་སོ་ནམ་རེམས་ཀྱང་སྡུག་ལས་ཡིན། །ལས་རྒྱུ་འབྲས་ཞིབ་ཏུ་མ་བརྩིས་ན། །ཚིག་ཁ་ལྟ་ཆེ་ཡང་སྨྱོན་པ་ཡིན། ཆོས་བཤད་པ་ཡིད་ལ་མི་འཇོག་ན། །བཤད་ལོ་བྱས་ཀྱང་ཆུད་ཟོས་ཡིན། །ངས་མི་དགེ་སྤང་ན་ངང་གིས་འགྲིབ། །ལས་དགེ་བ་བསྒྲུབ་ན་ངང་གིས་འགྲུབ། །འགག་གཅིག་ལ་དྲིལ་བ་ཉམས་སུ་ལོངས། །ཚིག་མང་པོ་བཤད་པས་ཕན་པ་ཆུང་། །དོན་དེ་བཞིན་ཉམས་སུ་ལེན་གལ་ཏེ་ཆེ། །ཞེས་གསུངས་པས། བླ་མ་ལགས། དོན་འདི་ཡིན་ཞིབ་ཏུ་མ་བཤད་ན་མ་གོ་ལགས། ཁྱེད་ཀྱིས་ད་རུང་མགུར་ཅིག་གསུངས་དང་དེ་རྣམས་ཀྱི་ཆོ་འཕྲུལ་ཡང་ཞི་བར་བྱེད་ཟེར་བས། བླ་མས་ཆོ་འཕྲུལ་མ་ཞི་བ་རྣལ་འབྱོར་པའི་གྲོགས་སུ་བཟང་ཞིང་རྒྱན་དུ་ཆེ་གསུངས་ནས་མགུར་འདི་གསུངས་སོ། །ང་རང་སེམས་རང་དབང་ཐོབ་པའི་རྣལ་འབྱོར་པས། །རྒྱན་དུ་ཆེ་བའི་གླུ་ཞིག་ལེན། ཁྱོད་འདིར་ཚོགས་ཀྱི་གནོད་སྦྱིན་ཕོ་མོ་རྣམས། །ཡིད་མ་ཡེངས་རྣ་བའི་དབང་པོ་གཏོད། །དབུས་རི་བོ་མཆོག་རབ་མཆོད་རྟེན་ལ། །ལྷོ་བཻཌུརྻ་ཡི་འོད་གསལ་བ། །འཛམ་གླིང་ནམ་མཁའི་རྒྱན་དུ་ཆེ། །རི་གཉའ་ཤིང་འཛིན་གྱི་གོང་རོལ་ན། །ཉི་ཟླ་ཟུང་ཅིག་འོད་གསལ་བ། །གླིང་བཞི་ཡངས་པའི་རྒྱན་དུ་ཆེ། །ཀླུ་བྱང་ཆུབ་སེམས་དཔའི་རྫུ་འཕྲུལ་གྱིས། །ནམ་མཁའི་མཐོང་ནས་ཆར་ཕབས་པས། །དོག་མོ་ས་ཡི་རྒྱན་དུ་ཆེ། །ཕྱི་རྒྱ་མཚོ་ཆེན་པོའི་རླངས་པ་ལ། །བར་སྣང་ཡངས་ལ་ལྷོ་སྤྲིན་བྱུང་། །ལྷོ་སྤྲིན་བར་སྣང་གི་རྒྱན་དུ་ཆེ། །འབྱུང་བ་དྲོད་གཤེར་གྱི་ཏིང་འཛིན་གྱིས། །ཤར་སྤངས་རིའི་ལོགས་ལ་འཇའ་མཚོན་བཀྲ། །འཇའ་ཚོན་སྤང་རིའི་རྒྱན་དུ་ཆེ། ནུབ་མ་གྲོས་མཚོ་ལ་ཆུ་འབབ་པ། །ལྷོ་འཛམ་བུའི་གླིང་གི་རྩི་ཤིང་རྒྱས། །སྐྱེ་འགྲོ་ཡོངས་ཀྱི་རྒྱན་དུ་ཆེ། །ང་རྣལ་འབྱོར་རི་ཁྲོད་འགྲིམ་པ་ལ། སེམས་སྟོང་ཉིད་བསྒོམས་པའི་ནུས་མཐུ་ཡིས། །འདྲེ་གནོད་སྦྱིན་ཕོ་མོའི་ཆོ་འཕྲུལ་བྱུང་། ཆོ་འཕྲུལ་རྣལ་འབྱོར་རྒྱན་དུ་ཆེ། །ཁྱེད་ལེགས་པར་ཉོན་དང་མི་མ་ཡིན། །མི་ང་ངོ་ཁྱོད་ཀྱིས་མ་ཤེས་ན། །ང་རྣལ་འབྱོར་མི་ལ་རས་པ་ཡིན། །ང་བྱང་སེམས་ཀྱི་མེ་ཏོག་གཏིང་ནས་འཁྲུངས། །གླུ་སྙན་པའི་དབྱངས་ཀྱི་བརྡ་སྦྱར་ནས། །ངག་བདེན་པའི་ཚིག་གིས་ཆོས་བཤད་པ། །ཕན་པའི་སེམས་ཀྱི་གྲོས་ཤིག་འདེབས། །ཁྱེད་བྱང་ཆུབ་མཆོག་ཏུ་སེམས་བསྐྱེད་ནས། །འགྲོ་བ་གཞན་དོན་མ་བྱུང་ཡང་། །མི་དགེ་བཅུ་པོ་སྤངས་བྱས་ནས། །རང་ཞི་བདེའི་ཐར་པ་ཅིས་མི་ཐོབ། །མི་ངས་ཟེར་ཉན་ན་དོན་ཆེན་འགྲུབ། །འཕྲལ་དམ་ཆོས་བྱ་ན་ཡུན་དུ་བདེ། །ཞེས་གསུངས་པས། དེར་འཚོགས་པའི་ལྷ་འདྲེ་རྣམས་དད་པ་སྐྱེས་ཏེ་ཕྱག་དང་བསྐོར་བ་མང་དུ་བྱས་ནས་རང་རང་གི་གནས་སུ་དེང་ནས་སོང་བ་ལ། ད་རུང་འབའ་རོ་ཆེན་པོ་གཅིག་ལ་བལ་པོ་འགས་བསྐོར་ནས་ད་རུང་འགྲོ་མ་ཉན་ནས་རི་བསྙིལ་བ་དང་། ཐོག་འབེབས་པ་སོགས་བྱེད་པར་བྱུང་བས། ཡང་རྗེ་བཙུན་གྱིས་རྟོགས་ཚད་ལྟ་བའི་མགུར་འདི་གསུངས་སོ། །ཁྱོད་ད་རུང་ཉོན་དང་མི་མ་ཡིན། །མཁའ་ལ་རྒྱུ་བའི་ཐོགས་པ་མེད། །བསམ་ངན་བག་ཆགས་རྒྱུད་ལ་འཇག །ཉོན་མོངས་ཀྱི་འཚེ་བས་གཞན་ལ་རྔམ། །གཞན་སྡུག་གི་སྡིག་པས་རང་ཉིད་མནར། །རྒྱུ་འབྲས་ཀྱི་བདེན་པ་སྟོར་བ་མེད། །རྣམ་སྨིན་གྱི་ནུས་པས་ས་ནས་སླེབ། །ཁྱོད་རང་གི་ཁྱོད་རང་མནར་སྡང་བྱེད། །ཨ་ཙ་མ་ཡི་དྭགས་ཀྱིས་འཁྲུལ་པ་ལ། ཡི་རེ་མུག་ལས་ངན་གྱིས་ནུས་པ་ལ། །འདི་འདྲ་རང་བསམ་ན་སྙིང་རླུང་ལྡང་། །ཁྱོད་སྔོན་ཡང་ལས་ངན་བསགས་བསགས་པས། །ད་རུང་ལས་ངན་གསོག་སྙིང་འདོད། །གསོད་གཅོད་ཀྱིས་སྡིགས་པས་ཟིན་པ་ཡིན། །ཟས་སུ་ཤ་དང་ཁྲག་ལ་དགའ། །ལས་སུ་འགྲོ་བའི་སྲོག་གཅོད་པ། །འགྲོ་དྲུག་གི་ནང་ནས་ཡི་དྭགས་ལུས། །བདེ་སྡུག་སྤྱད་པས་ངན་འགྲོར་ལྟུང་། །ཨ་རེ་འཕང་ལྷ་ཆོས་ལ་སྣང་བ་བསྒྱུར། །དགོས་རེ་མེད་བདེ་བ་མྱུར་དུ་ཐོབ། །ཅེས་གསུངས་པས་མི་མ་ཡིན་དེ་རྣམས་ན་རེ། ཁྱོད་ངེད་ཚོ་ལ་ཆོས་བཤད་མཁས་པ་ལ་ཚད་མི་གདའ། ཁྱོད་རང་ལ་ལྟ་བ་རྟོགས་པའི་གདིང་ཅི་ཙམ་ཡོད་ཟེར་བས། དེའི་ལེན་དུ་མགུར་འདི་གསུངས་སོ། །དོན་དམ་རྟོགས་པའི་རྣལ་འབྱོར་པ། །གཞི་སྐྱེ་མེད་ངང་ལ་གདེང་བཅས་ནས། །ལམ་འགག་མེད་ཀྱི་རྩལ་དེ་རིམ་གྱིས་རྫོགས། །ཐབས་སྙིང་རྗེ་ཆེན་པོའི་བརྡའ་སྦྱར་ནས། །དོན་ཆོས་ཉིད་ངང་ནས་གླུ་ཞིག་ལེན། །ཁྱོད་ལས་ཉོན་གྱིས་སྒྲིབ་གཡོག་འཐུགས་པོ་ཡིས། །ངེས་དོན་གྱི་གནས་ལུགས་མི་གོ་སྟེ། །དྲང་དོན་གྱི་ཆོས་ཤིག་ད་རུང་བཤད། །སྔོན་ཐམས་ཅད་མཁྱེན་པ་སངས་རྒྱས་ཀྱིས། །བཀའ་དྲི་མ་མེད་པའི་མདོ་རྒྱུད་ལས། །དེ་འགྲོ་བ་ཡོངས་ཀྱི་སྙིང་གཅིག་པུས། །དོན་མི་བསླུ་ངེས་པའི་བདེན་ཚིག་ཡིན། །རྗེ་བྱམས་པའི་གསུངས་ལ་ཁྱོད་ཀྱང་ཉོན། །ང་ཉམས་ལ་སྦྱངས་པའི་རྣལ་འབྱོར་དེ། །ཕྱི་འཁྲུལ་སྣང་གི་བགེགས་ལ་ཕར་བལྟས་པས། །སྐྱེ་མེད་ཀྱི་ཆོ་འཕྲུལ་ཡིན་པར་གོ །ནང་རིག་པའི་སེམས་ལ་ཚུར་བལྟས་པས། །གཞི་རྩ་བྲལ་གྱི་སེམས་ཉིད་ཡེ་ནས་སྟོང་། །ང་བླ་མ་རྒྱུད་པའི་བྱིན་བརླབ་དང་། །རང་གཅིག་པུར་བསྒོམ་པའི་ཡོན་ཏན་གྱིས། །རྗེ་ནཱ་རོ་ཆེན་པོའི་བརྒྱུད་པ་འཛིན། །དོན་མ་ནོར་རྒྱལ་བའི་དགོངས་པ་བསྒོམ། །ཐབས་ཟབ་མོ་སྔགས་ཀྱི་རྒྱུད་སྡེ་རྣམས། །བླ་མའི་གདམ་ངག་གནད་བཀྲོལ་ནས། །ལམ་བསྐྱེད་རྫོགས་བརྟན་པོར་བསྒོམ་བསྒོམ་པས། །ནང་རྩ་གནས་རྟེན་འབྲེལ་ཤེས་པ་ཡིན། ཕྱི་འཁྲུལ་སྣང་གི་བགེགས་ལ་ང་མི་འཇིགས། །ངེད་བྲམ་ཟེ་ཆེན་པོའི་བརྒྱུད་པ་ལ། །རྗེ་ནམ་མཁའ་ལྟ་བུའི་རྣལ་འབྱོར་མང་། །ཡིད་དབུ་མའི་དོན་ལ་སྦྱང་སྦྱང་ནས། །འཁྲུལ་སྣང་གི་དྲན་པ་དབྱིངས་སུ་ཡལ། །གདོན་བྱ་གདོན་བྱེད་ངས་མ་མཐོང་། །ཆོས་སྡེ་སྣོད་ཀྱི་གསུང་རབ་ཞལ་ཕྱེ་ཡང་། །དོན་འདི་ལས་མེད་པ་བློ་ཐག་ཆོད། །ཅེས་གསུངས་པས་ཁོང་རྣམས་དད་པར་གྱུར་ཏེ། ཕྱག་དང་སྐོར་བ་མང་དུ་བྱས་ནས། ངེད་རྣམས་ཀྱི་འཚོ་བ་བཤོས་གཙང་རེ་འདྲེན་ཟེར་ནས་སོང་བ་དང་། ནམ་ལངས་ནས་སོང་ངོ་། །ཉི་མ་ཤར་བ་དང་རི་རྩེར་ཕར་བྱོན་ནས་བྲག་ཁ་ཞིག་ཏུ་དུམ་པ་གཅིག་གཟིམས་ནས་བཞུགས་ཙ། འདང་གི་དེ་རྣམས་ངོ་ཤེས་ལྷག་གེ་ཚན་པ་སུམ་ཅུ་པ་གཅིག་བྱས་ནས་འབྲས་དང་། ཉ་དང་ལ་ཕུད་དང་། བུར་ཤིང་དང་། གོ་ལ་དང་། ཚོད་མའི་བྱེ་བྲག་མང་པོ་དང་ཆང་ལ་སོགས་པའི་བཟའ་བཏུང་མང་ལ་ཞིམ་པ་དྲངས་སྙམ་བྱེད། ཁོང་རྣམས་ཀྱང་དགའ་དགའ་སྤྲོ་སྤྲོ་མང་དུ་བྱས་ནས་ན་ར་ར། ནུ་རུ་རུ་དེང་ནས་སོང་སྙམ་པ་བྱེད་པ་ལ། རྗེ་བཙུན་ཡང་ཁམས་དྭངས་སིང་ངེར་སོང་ནས། ཟླ་བ་གཅིག་གཉིས་ལ་དང་ཁ་མེར་ཆི་ལེ་འཚོ་བའི་སྣང་བ་བྱུང་ངོ་། །དེ་ཐམས་ཅད་ལ་ཕྱི་ཆུ་བཟང་གིས་སྐོར་རོ།། །།

དེ་ནས་རྗེ་བཙུན་གྱིས་ཐུགས་དགོངས་ལ། ཟྭ་རང་འཐུང་བས་འབུ་མང་པོ་མཆི་བར་འདུག་དགོངས་ནས། སྙེ་ནམ་དུ་བསོད་སྙོམས་ལ་བྱོན་པ་ལ། ཡོན་བདག་གཤེན་རྡོར་མོ་དང་། སྟོན་པ་ཤག་འགུ་ལ་སོགས་པ་རྣམས་དང་སྟོན་མོ་བྱེད་པ་ཅིག་ཏུ་མཇལ་བས། རྗེ་བཙུན་ལ་ཆོས་གཏམ་དང་། གླའོ་བྱེད་པར་ཞུ་ཞུས་པས་མགུར་འདི་གསུངས་སོ། །རྗེ་བླ་མའི་བྱིན་བརླབ་སེམས་ལ་ཞུགས། སེམས་ཡང་ཡེངས་ལ་ཤོར་བས་སྡུག་བསྔལ་ཆེ། །ངས་བྱམས་དང་སྙིང་རྗེ་བསྒོམ་བསྒོམ་ནས། །བདག་གཞན་འཛིན་པ་བརྗེད་དེ་ཐལ། །བླ་མ་སྤྱི་བོར་བསྒོམ་བསྒོམ་ནས། །མི་ཆོས་ཀྱི་འདུན་མ་བརྗེད་དེ་ཐལ། །ཡི་དམ་འབྲལ་མེད་དུ་བསྒོམ་བསྒོམ་ནས། །ཐ་མལ་གྱི་རྟོག་པ་བརྗེད་དེ་ཐལ། །སྙན་བརྒྱུད་ཀྱི་གདན་ངག་བསྒོམ་བསྒོམ་ནས། །རེ་དོགས་ཀྱི་བསྒོམ་པ་བརྗེད་དེ་ཐལ། །ཚེ་འདི་ཕྱི་མཉམ་དུ་བསྒོམ་བསྒོམ་ནས། །སྐྱེ་འཆིའི་འཇིགས་པ་བརྗེད་པ་ཐལ། །གཅིག་པུར་ཉམས་ལེན་བསྐྱངས་བསྐྱངས་ནས། །ཁེ་དྲག་གི་ངོ་སྲུང་བརྗེད་ནས་ཐལ། །རང་རྒྱུད་ལ་ཉམས་ལེན་སྦྱར་སྦྱར་ནས། །ཆོས་གཏམ་དང་ཁ་འཛིན་བརྗེད་ནས་ཐལ། །སྐྱེ་འགག་གནས་མེད་དུ་བསྒོམ་བསྒོམ་ནས། །ཁས་ལེན་གྱི་ལྟ་བ་བརྗེད་ནས་ཐལ། །སྣང་བ་ཆོས་སྐུར་སེམས་སེམས་ནས། །དམིགས་བཅས་གྱི་བསྒོམ་པ་བརྗེད་ནས་ཐལ། །མ་བཅོས་ལྷུག་པར་བཞག་བཞག་ནས། །ཚུལ་ཆོས་ཀྱིས་སྤྱོད་པ་བརྗེད་ནས་ཐལ། །ལུས་ངག་གི་དམན་ས་བཟུང་བཟུང་ནས། །མི་ཆེན་གྱི་རེ་བ་བརྗེད་ནས་ཐལ། །སྒྱུ་ལུས་དགོན་པ་བྱས་བྱས་ནས། །བདེ་འབྱམས་གྱི་དགོན་པ་བརྗེད་ནས་ཐལ། །ཞེས་གསུངས་པས། ཡོན་བདག་རྣམས་ན་རེ། ཁྱེད་ལ་དེ་ལྟ་བུ་ཡོད་པ་དེ་ངེད་ཚོས་མི་གོ་བས། གོ་སླ་བའི་ཆོས་ཤིག་ཞུ་ཞུས་པས་ཡང་མགུར་འདི་གསུངས་སོ། །རྗེ་བླ་མའི་བྱིན་བརླབས་ལུས་ལ་ཞུགས། །ལུས་སྙིང་རུས་བསྒོམ་པས་དོན་ཆེན་འགྲུབ། །ཁྱེད་གསོན་དང་ཡོན་བདག་དད་པ་ཅན། །དམ་ཆོས་ཐང་མལ་བདལ་བ་ལ། །སྡིག་བབ་ཅོལ་སྤྱོད་པ་ཤིན་ཏུ་གླེན། །དཀའ་ལས་སྣ་ཚོགས་ཡོད་པའི་ལུས་པོ་འདི། །མི་ཚེ་ཡང་ཡེངས་དུ་སྐྱེལ་བ་ཤིན་ཏུ་གླེན། །གྲོང་ཁྱེར་གྱང་ར་ཞིག་པོའི་དུར་ཁྲོད་དུ། །དུས་རྟག་ཏུ་སྡོད་སེམས་བྱས་པ་ཤིན་ཏུ་གླེན། །བཟའ་མི་ཚོང་དུས་ལྟ་བུའི་མགྲོན་པོ་ལ། །ངན་ཤག་འཐབ་མོ་བྱེད་པ་ཤིན་ཏུ་གླེན། །ཚིག་སྒྲ་སྙན་སྒྱུ་མའི་རང་བཞིན་ལ། ཞེ་རན་གལ་དུ་འཛིན་པ་ཤིན་ཏུ་གླེན། །དགྲ་སྡང་མེ་ཏོག་བཞིན་དུ་ཡལ་ནས་འགྲོ། །གླེན་པས་རང་སྲོག་སྐྱེལ་བ་ཤིན་ཏུ་གླེན། །གཉེན་ཚན་སླུ་བྲིད་བརྫུན་གྱི་ཟོལ་ཁང་ལ། ཤི་བ་མྱང་ངན་བྱེད་པ་ཤུན་ཏུ་གླེན། །ནོར་ཟས་ཟིལ་པ་ལྟ་བུའི་གཡར་པོ་ལ། །སེར་སྣའི་མདུད་པ་བཅིངས་པ་ཤིན་ཏུ་གླེན། །ཕུང་པོ་མི་གཙང་རྫས་ཀྱིས་རྐྱལ་པ་ལ། །བཟང་འདོད་བྱི་དོར་བྱེད་པ་ཤིན་ཏུ་གླེན། །གདམས་ངག་དམ་ཆོས་བདུད་རྩིའི་ཟས་མཆོག་འདི། ཟས་ནོར་ཕྱིར་དུ་འཚོང་བ་ཤིན་ཏུ་གླེན། །གླེན་པ་མང་དུ་འཚོགས་པ་ལ། །སྤྱང་ན་ལྷ་ཆོས་རང་མགོ་ཐོན། །ཅེས་གསུངས་པས་དེར་འཚོགས་པའི་ཡོན་བདག་ཕོ་མོ་རྣམས་ན་རེ། ད་དེ་རྗེ་བཙུན་ངེད་རྣམས་ཀྱིས་བླ་མཆོད་བྱེད་དགོས། ཁྱེད་རི་ཁྲོད་ཁོ་ནར་བཞུགས་པས་ངེད་ཚོ་གར་ཡོད་མི་ཤེས་ནས་ངེད་རྣམས་ལ་མི་ཕན་པར་འདུག་ཞུས་པས་མགུར་འདི་གསུངས་སོ། །རྗེ་བླ་མའི་བྱིན་བརླབས་ངག་ལ་ཞུགས། །ངག་སྨྲ་བཅད་བྱང་སེམས་ཆོས་ཀྱི་སྒྲ། །རྗེ་བླ་མའི་དད་པ་སེམས་ལ་ཡོད། །འཕྲལ་མཉམ་དུ་འགྲོགས་ན་སྣང་བ་སྤུན། །མིག་འདྲིས་ཆེ་ན་གཤིས་ཀྱི་བརྙས། །འགྲོགས་ཡུན་རིང་ན་རེ་འཁོངས་མང་། །གཤིས་ངན་འཐབ་མོ་དམ་ཚིག་དཀྲུག །གྲོགས་ངན་གྱིས་དགེ་སྦྱོར་བཟང་པོ་སྤུར། །གཙོ་འདུན་གྱི་ཁ་བཟུང་ལས་ངན་གསོག །ཡིན་མིན་གྱི་གཏོགས་དགྲ་ཡི་འཁོར། །ཕྱོགས་ཆ་ཡི་གཡོ་སྒྱུ་སྡིག་པོ་ཆེ། །དད་ཟས་ཁས་ལེན་བསམ་ངན་འཁྲུག །གཤིན་ཟས་ཀྱི་རོ་དོམ་ཁྱག་མཐའ་མེད། །ཁྱོད་མི་ནག་གི་བླ་མཆོད་ཤིན་ཏུ་ལོད། །འགྲོགས་ཤིང་བརྙས་ན་ཡི་མུག་ལྡངས། །ཚང་མང་གི་དཔོན་པོ་འཆི་ཀ་སྡུག །དེ་བས་རི་ཁྲོད་རྣལ་འབྱོར་པ། །གྲོང་ཡུལ་དུ་ལུས་ན་གྱོང་རེ་ཆེ། །ང་ལ་ཕྱིའི་གངས་ལ་བསྒོམ་དུ་འགྲོ། ཁྱེད་དད་པ་ཡོད་པས་ཚོགས་གསོག་མཛོད། །འདིར་འཚོགས་ཀྱིས་ཡོན་བདག་ཕོ་མོ་རྣམས། །བླ་མཆོད་བྱེད་ཟེར་བག་ཆགས་བཟང་། །སྨོན་ལམ་གྱིས་འབྲེལ་པས་ཡང་ཡང་མཇལ། །ཞེས་གསུངས་ཏེ་ཡོན་བདག་གཤེན་རྡོར་མོ་བཟའ་ཚོ་དང་སྟོན་པ་ཤཀ་གུས་དབུ་མཛད་པའི་བན་སྐྱེ་མང་པོས་ཅི་ཙམ་བཤོལ་ཡང་མ་ཤོལ་བར་ཁོང་རྣམས་ཀྱིས་ཕྱེ་བྲེ་དོ། འབྲས་བྲེ་གང་། ཤ་གཟུགས་ཕྱེད་གཉིས། མར་གཤག་གཅིག་དང་དེ་རྣམས་ཕུལ་ནས། རྗེ་བཙུན་ལ་ཕྱིའི་གངས་ལ་བྱོན་སོང་ངོ་། །དེ་ཐམས་ཅད་གཤེན་རྡོར་མོའི་སྐོར་རོ། །དེ་ནས་བཞི་པ་ཟས་གོས་ཀྱི་འདུན་པ་དང་བྲལ་བའི་ཡོན་ཏན་ནི། གཤེན་རྡོར་མོ་ལ་སོགས་པ་བན་སྐྱེ་དྲུག་གིས་བསྐྱལ་ནས་ཁོང་རྣམས་ཀྱིས་ཀྱང་རྗེ་བཙུན་གྱི་དགུན་བརྒྱགས་ཁྱེར་ནས། ལོ་གསར་གྱིས་ཚེས་གཅིག་ལ་འོང་བའི་ཆད་བྱས་པ་ལ། ཁོང་རྣམས་སང་འགྲོ་གནངས་འགྲོ་ཟེར་བ་ལ་ཁ་བ་ཉིན་མཚན་བཅོ་བརྒྱད་བབས་པས། ཟླ་བ་དྲུག་གི་བར་དུ་སྙེ་ནམ་དང་ལ་ཕྱིའི་བར་དུ་འགྲུལ་པ་ཆད། ཡོན་བདག་རྣམས་ཀྱི་རྗེ་བཙུན་གྲོང་བར་ཐག་བཅད་ནས་ཆོ་ག་དང་བདུན་ཚིགས་མཆོད་པ་ཚོགས་འཁོར་ལ་སོགས་པ་བྱས་སོ། །དེ་ནས་ཕྱིས་དབྱུག་གུ་ཟླ་བར་སོང་བ་དང་། ཁོང་རྣམས་གྲོས་བྱས་ནས་རྗེ་བཙུན་གྱི་གདུང་ཨེ་རྙེད་ལ་བན་སྐྱེ་དྲུག་གིས་ད་རུང་ཁ་བ་ཙག་ཙིག་ཡོད་པ་གཤག་ནས་སོང་བས། གངས་ལ་མ་ཐོན་བར་ལ་ཕྱིར་ལོག་དགོས་པར་འདུག་བྱས་ཤིང་ཡོད་ཙ། ཕ་བོང་ཞིག་གི་སྟེང་དུ་གསའ་ཆེན་པོ་གཅིག་བྱུང་བས། །གསའ་འདིས་གདུང་ཟོས་ཟིན་བྱས་ནས་འབུག་ན་གངས་གཤག་ཙ། གསའ་རྗེས་ཀྱང་མི་རྗེས་སུ་སོང་འདུག་པས། མི་མ་ཡིན་གྱིས་ཆོ་འཕྲུལ་རེད་བྱས་ནས་ཕྱིར་ལ་ལྡོག་རྩིས་བྱས་ཙ། རྗེ་བཙུན་ནི་དབེན་གནས་བདུད་འདུལ་ཕུག་མོ་ཆེ་བྱ་བ་ནས། དབྱངས་ཤིག་ལྷང་ལྷང་གྲགས་པས། ཁོང་རྣམས་དགའ་དྲག་པས་མགྱོགས་པར་སོང་ཙ། རྗེ་བཙུན་གྱི་འཚོ་བ་གསོལ་མ་དགོས་པར་དེ་གངས་ཀྱི་རྩམ་པ་ལ་ཟན་ཐུལ་བྱས། མར་གྱི་ཟན་མར་བྱས། འབྲས་ཚོད་ལ་ཤ་བཏབ་ནས་མེ་ཞིག་བུས་ནས་བཞུགས་པ་ལ། ཁོང་རྣམས་ཀྱི་ལ་ལས་ཕྱག་ནས་འཐེན་འཐེན་བྱས། ལ་ལ་རྗེ་བཙུན་ལགས་ཟེར། ལ་ལ་ངུ་ཞིང་དགའ་ཆེས་ཀྱི་ངུ་བྲོ་བྱེད། ལས་ལས་ཕྱག་མང་པོ་འཚལ་ལོ། །དེར་རྗེ་བཙུན་གྱིས་ཁྱེད་ཚོ་འོང་བའི་སྔོན་ལ་ང་འོང་ལེ་ཨེ་མཐོང་གསུངས་པས། ད་ཅི་གསའ་ཅིག་འོང་བ་མིན་པ་མ་མཐོང་ཞུས་པས། དེ་ང་ཡིན་ཕྱི་སྣང་བའི་སྤྲུལ་བསྒྱུར་བསྟན་པ་ཙམ་ཡིན་གྱི་གསུངས། ད་ཅི་དབྱངས་ཤིག་ལྷང་ལྷང་གྲགས་པ་དེ་ད་རུང་གསུང་དང་ཞུས་པས། ཁོང་ཚོ་ལ་དེའི་དུས་སྦྲུལ་གཉིས་རྐེད་པ་ལ་འཁྱུད་པ་དང་། སྦལ་པ་ར་ཙམ་ཞིག་གིས་ཕོ་འཁྱུད་དུ་བསྡམ་པ་ལ་སོགས་པ་མང་པོ་བྱུང་བས་དང་པོ་རེ་སྐྲག་སྟེ། ཉམས་སུ་ཤེས་པ་བདེ་ཕྱམ་ཕྱམ་སོང་སྐད་དོ། །དེ་ནས་ཉམས་རྟོགས་པའི་འཁྲུངས་ལུགས་འདི་མགུར་དུ་གསུངས་སོ། །རྗེ་བླ་མའི་ཞབས་ལ་སྤྱི་བོས་བཏུད། བྱིན་བརླབ་དངོས་གྲུབ་མཁའ་འགྲོས་བྱིན། །དམ་ཚིག་གི་བདུན་ཚིགས་ཕན་པ་ཆེ། །དད་པའི་མཆོད་པས་དབང་པོ་གསོས། །བུ་སློབ་ཀྱིས་ཚོགས་གསོག་བཟང་ནས་བྱུང་། །ལྟ་བའི་སེམས་ལ་སྟོང་ཉིད་ཤར། །བལྟ་རྒྱུའི་དངོས་པོ་རྡུལ་ཙམ་མེད། །བལྟ་བྱ་དང་ལྟ་བྱེད་གཏོར་ནས་སོང་། །ལྟ་བའི་རྟོགས་ཚུལ་བཟང་ནས་བྱུང་། །བསྒོམས་པའི་ཉམས་ལ་འཆར་སྒོ་མང་། བསྒོམ་རྒྱུའི་ཐུན་འཚམས་བཟུང་རྒྱུ་མེད། བསྒོམ་བྱ་སྒོམ་བྱེད་སྟོར་ནས་སོང་། །བསྒོམས་པའི་སྙིང་རུས་བཟང་ནས་བྱུང་། །སྤྱོད་པའི་རྒྱུ་འབྲས་སྟོང་ཉིད་ཀྱི་ངང་། །རྟེན་འབྲེལ་གྱི་བརྡ་ལ་འཚམས་པ་མེད། །སྤྱོད་བྱ་སྤྱོད་བྱེད་ཀྱང་གཏོར་ནས་བྱུང་། །སྤྱོད་པའི་ཚུལ་ཁྲིམས་ཀྱང་བཟང་ནས་བྱུང་། །དམ་ཚིག་གི་ཁོང་ཟེར་ཡང་དམ་ནས་བྱུང་། །ངོས་ལྐོག་གི་ཆོས་བརྒྱད་བསྒྲིབ་པ་མེད། །བསྲུང་བྱ་དང་སྲུང་བྱེད་ཀྱང་སྟོར་ནས་སོང་། །བླ་མ་མཉེས་ཚུལ་ཡང་བཟང་ནས་བྱུང་། །འབྲས་བུའི་བྱང་སེམས་ལུས་ངག་རྒྱས། །ཕྱོགས་ཆའི་རྟོག་སྒྲིབ་དབྱིངས་སུ་ཡལ། །བསྒྲུབ་རྒྱུ་དང་སྒྲུབ་བྱེད་ཀྱང་སྟོར་ནས་སོང་། །བདག་གཞན་གྱི་དོན་ཆེན་ཡང་བཟང་ནས་བྱུང་། །མི་རྒན་གྱི་གླུ་རྒན་གང་ལ་ལེན། །སྐྱིད་དགའི་ཉམས་དབྱངས་བྲག་ལ་ཕོག །བསྒྲུབ་པའི་སྐུ་འཚམས་ཁ་བས་བསྡམ། །འཚོ་བའི་ཞབས་རྟོགས་ལྷ་འདྲེས་བྱས། །རྫ་བྲག་གི་འབབ་ཆུ་བཏུང་བའི་མཚོ། །སུས་བསྒྲུབ་མེད་པར་དཔལ་ལས་གྲུབ། །ལས་བྱེད་མི་མེད་པར་སོ་ནམས་ཚར། །འཕྲལ་གསོག་འཇོག་མེད་པར་བང་མཛོད་ཁེངས། །ལས་ངན་པ་ཟད་ནས་རྒྱལ་ས་ཟིན། །བུ་སློབ་མ་ཡོན་བདག་འཁོར་བཅས་རྣམས། །དད་པས་ཞག་ཏོག་བྱས་པ་ལ། །དྲིན་ལེན་ཆོས་ཀྱི་འཇལ་བ་ཡིན། །ཐུགས་དགྱེས་པར་མཛོད་ལ་བསོད་ནམས་ཆེ། །ཞེས་པས། ཡོན་བདག་རྣམས་དགའ་སྟེ། རྗེ་བཙུན་ལགས་སྔར་བས་ཀྱང་སྐུ་མདང་ཆེར་སོང་ཟིན་པས། འཚོ་བ་ལྷ་འདྲེས་ཇི་ལྟར་སྦྱར། ངེད་ཚོའི་མཆོད་པ་བདུན་ཚིགས་ཀྱི་ཇི་ལྟར་ཕན་ཞུས་པས་ཕལ་ཆེར་ཏིང་ངེ་འཛིན་རང་ལ་སོང་། རེ་འགའ་ཕྱེ་ཐུར་མགོ་ཙམ་རེ་ཡང་འགམ། རེས་འགའ་རྒྱ་གར་ནས་མཁའ་འགྲོ་མས་ཚོགས་དུམ་པ་རེ་ཡང་བསྐྱལ། རྟ་ཟླ་བའི་ཉ་སྐོར་ནས་བཟུང་སྟེ་ཁྱེད་ཚོས་བཟའ་བ་བྱིན་པའི་སྣང་བ་ཞིག་ལ་བརྟེན་ནས་དང་ཁ་མེར་ཆི་ལེ་བྱུང་བས་ལྟོགས་པའི་སྣང་བ་མེད་པ་ཤས་ཆེ་གསུང་ནས། དཔོན་སློབ་ཚེས་གྲངས་བརྩིས་པས་བདུན་ཚིག་དང་གཉིས་འགྲིག་ནས་བྱུང་བས། གཤིན་པོ་ལ་དགེ་བ་བྱས་པས་ཕན་ཆེ་བར་འདུག་གསུངས། དེ་ནས་ད་ཡུལ་དུ་འབྱོན་པར་ཞུ་ཞུས་པས། ང་འདི་རང་སྐྱིད། ཁྱེད་རང་ཚོ་སོང་གསུང་པས་ད་རེས་མ་བྱོན་ན་ངེད་ཚོ་བསད་པ་དང་འདྲ་ཞུས་པས། དེར་ཡུལ་དུ་དཔོན་སློབ་རྣམས་བྱོན་པས། རྗེ་བཙུན་མ་གྲོང་ཟིན་ཟེར་བའི་གཡེར་ཆེན་པོ་བྱུང་ནས་མི་མང་པོ་མཇལ་དུ་འོང་བས། མ་གྲོངས་པ་སྲིད་ཟིན་ཟེར་ཞིང་ཕྱག་འཚལ་བ་དང་། སྐོར་བ་ལ་སོགས་བྱས་ཤིང་བསྙུན་དྲི་མང་པོ་བྱས་པས། མི་རྣམས་ད་ལན་མིན་པ་དད་དུ་མ་ཉན། ལྷ་འདྲེ་རྣམས་སྔ་མོ་ནས་དད། མི་བས་ལྷ་འདྲེ་དད་ཡང་བ་དང་ཕྱི་གཞུང་རིང་བ་ལ་ག་པར་གདའ་གསུངས་པས་ཁོང་དེར་ཚོགས་པ་རྣམས་དད་པའི་གདབ་ལེན། ཁ་བའི་བབས་ཚུལ་གངས་མགུར་རིང་མོ་བྱ་བ་འདི་གསུངས་སོ། །དཔལ་དེ་རིང་བཀྲ་ཤིས་ཀྱི་ཁྲི་གདུགས་ལ། །ཕྱོགས་ཀྱི་ཡོན་བདག་ཕོ་མོ་རྣམས། །འོ་སྐོལ་མ་ཤི་འཕྲད་པས་གློ་བ་དགའ། །ང་མི་རྒན་གླུ་ཡི་དཀོར་མཛོད་ཡིན། །སྙུང་དྲི་རྨེད་ཀྱི་ལེན་དུ་གླུ་གཅིག་ལེན། །སྙན་ལྷན་ནེ་གསོན་ལ་ཐུགས་གཏད་འཚལ། །ཡང་སྟག་གི་ལོ་ཡི་ལོ་མཇུག་དང་། །ཡོས་བུའི་ལོ་ཡི་ལོ་འགོ་ལ། །ཝ་རྒྱལ་ཟླ་བའི་ཉ་དྲུག་ལ། །ང་འཁོར་བའི་ཆོས་ལ་ཡིད་འབྱུང་ནས། འབྲོག་ལ་ཕྱི་གངས་ཀྱི་ར་བ་དེར། །མི་ངས་ཀྱང་དབེན་པ་བསྙགས་ནས་ཕྱིན། །ཁོང་གནམ་ས་གཉིས་པོ་གྲོས་བྱས་ནས། །སྐྱི་སེར་རླུང་གི་བང་ཆེན་བཏང་། འབྱུང་བ་ཆུ་ཀླུང་གཡོས་གཡོས་ནས། །ལྷོ་སྤྲིན་སྨུག་པོ་འདུན་མར་བསྡུས། །ཉི་ཟླ་ཟུང་གཅིག་བཙོན་དུ་བཟུང་། །རྒྱུ་སྐར་ཉེར་བརྒྱད་སྟར་ལ་བརྒྱུས། །ཁྲིམས་ཀྱིས་གཟའ་བརྒྱད་ལྕགས་སུ་བཅུག །དགུ་ཚིགས་སྐྱ་མོ་བརྟོད་ལ་མནན། །སྐར་ཆེན་ཡོངས་ལ་སྦུད་ཀྱིས་བཏབ། །སྦུད་ཀྱི་མདངས་གཡོགས་ཐ་མ་ལ། །ཁ་བ་ཉིན་དགུ་མཚན་དགུ་བབས། །ཆ་ལ་ཉིན་མཚན་བཅོ་བརྒྱད་བབས། །ཆེ་བ་ཆེ་སྟེ་བལ་འདབ་ཙམ། །འདབ་ཆགས་བྱ་ལྟར་ལྡིང་ཞིང་བབས། ཆུང་བ་ཆུང་སྟེ་འཕང་ལོ་ཙམ། །བུང་བ་ལྟ་བུར་འཁོར་ཞིང་བབས། །ཡང་ཆུང་སྲ་མ་འབྲིང་པོ་ཙོམ། །ཁུ་འཕང་བཞིན་དུ་འདྲིལ་ཞིང་འབབས། །ལར་ཁ་བ་ཆེ་ཆུང་ཚད་ལས་འདས། །མཐོ་གངས་དཀར་རྩེ་མོ་དགུང་དང་མཉམ། །དམའ་རྩི་ཤིང་ནག་མཚལ་རྒྱ་ཞོས་མནན། །མཚོ་རྦ་རླབས་ཅན་ལ་དར་ཆགས་བཏབ། །རི་ནག་པོ་རྣམས་ལ་སྐུ་དཀར་གསོལ། །གཙང་ཆབ་སྔོན་མོ་སྦུབས་སུ་རུབ། ས་མཐོ་དམན་མེད་པར་ཐང་དུ་མཉམ། །བབས་དེ་ལྟར་ཆེ་བའི་ངང་ཉིད་ནས། །སྤྱིར་དབུ་ནག་མི་ལ་བཟང་བཙོན་བྱུང་། །རྐང་བཞི་ཕྱུགས་ལ་མུ་གེ་བྱུང་། །སྒོས་རི་དྭགས་དམན་མའི་འཚོ་བ་བཅད། །སྟེང་འདབ་ཆགས་རྣམས་ལ་རྒྱགས་ཆད་བྱུང་། །འོག་བྲ་བ་བྱི་བ་གཏེར་དུ་སྦས། །གཅན་གཟན་རྣམས་ལ་ཁ་ཆིངས་བྱུང་། །དེ་འདྲའི་སྐྱི་འདངས་ཀྱི་བསྐལ་པ་ལ། །ང་མི་ལ་རས་པའི་སྒོས་སྐལ་དུ། །སྟེང་ནས་བབས་པའི་ཁ་བ་དང་། །ལོ་གསར་སྒང་གི་ལྷགས་པ་གཉིས། །རྣལ་འབྱོར་རས་པའི་རས་གོས་གསུམ། །གངས་དཀར་གྱི་སྟོངས་སུ་འཁྲུགས་པ་ཤོར། །ཁ་ བ་མ་རྒྱལ་ཆུ་རུ་བཞུ། །རླུང་འར ་འུར་ཆེ་ཡང་རང་ཞིར་ཐལ། །རས་གོས་མེ་ལྟར་འབར་ཞིང་གདའ། །དཔལ་ལ་དོར་གྱི་འཁྲུག་པ་རྒྱལ་རྒྱལ་འདྲ། །གྱད་དཔེ་བཞག་གི་ཤི་སྲོག་དེ་རུ་བསྣོལ། །མཚོན་རྩེ་རྒྱལ་གྱི་རལ་ཁ་དེ་རུ་སྤྲད། །སྤྱིར་སྒོམ་ཆེན་རྣམས་ལ་ཚད་རྡོ་བོར། །སྒོས་གཏུམ་མོ་རས་ཀྱི་ཆེ་བ་བཏོན། །ནད་འདུ་བ་རྣམ་བཞི་སྲང་ལ་འཇལ། །ཕྱི་ནང་འཁྲུལ་མེད་གཏན་མཉམ་བགྱིས། རླུང་ཚ་གྲང་གཉིས་ཀ་བཅུད་ལ་བོར། ཕྱིས་ཅི་ཟེར་ཉན་པར་ཁ་ཡིས་བླངས། །སྐྱི་འདངས་ཁ་བའི་གདོན་སྲིན་མནན། །ཕྱིས་གཡོ་འགུལ་མེད་པར་གཅིག་ལ་ཕབ། །སྲིད་པའི་དམག་དཔུང་ལས་ངན་ལ། །དུས་ད་རེས་ཀྱིས་འཁྲུག་པ་རྣལ་འབྱོར་རྒྱལ། །ཕ་མྱེས་ཀྱི་ཚ་བོ་སྟག་སླག་ཅན། །སྡར་ཝ་སླག་གྱོན་ནས་འབྲོས་མ་མྱོང་། །ཕ་ལ་བུ་སྐྱེས་གྱད་ཀྱི་རིགས། །སྡང་དགྲ་ལ་སྟ་ཟུར་འཆོར་མ་མྱོང་། །ང་གཅན་གཟན་རྒྱལ་པོ་སེ་གེའི་རིགས། །གནས་གངས་ཁྲོད་མིན་པར་སྡོད་མ་མྱོང་། །ཤོར་ལར་ཡང་བྲེ་མོ་བགྱིས་པ་ལགས། །ང་མི་རྒན་གྱི་ཁ་ལ་གཏད་ཡོད་ན། །གྲུ་ཐོབ་འགའ་རེ་འབྱོན་ཏེ་མཆིས། །མི་ལ་རྣལ་འབྱོར་རས་པ་ང་། །རྒྱལ་ཁམས་ཡོངས་ལ་གྲགས་ཏེ་མཆི། །ཁྱེད་བུ་སློབ་རྣམས་ཀྱང་དད་དེ་མཆི། །ཤོ་གམ་ཕྱི་ནས་ཟློ་སྟེ་མཆི། །སྒྲུབ་བརྒྱུད་བསྟན་པ་དར་ཏེ་མཆི། །ང་རྣལ་འབྱོར་སྐུ་ཁམས་བཟང་ནས་བྱུང་། །ཁྱོད་ཡོན་བདག་སྐུ་ཁམས་བདེ་ལགས་སམ། །ཞེས་སྙེ་ནམ་རྩར་མའི་བུ་སློབ་རྣམས་ལ་གསུངས་སོ། །དེ་ནས་ཡོན་བདག་རྣམས་ཀྱིས་གྲོང་ཡུལ་འབྱོན་པའི་ཞུ་བ་བྱ་པས། ང་ལ་ཕྱིའི་གངས་ལ་བསྒོམ་བསྒོམ་པས། གྲོང་ཡུལ་དུ་བབས་པས་དབང་པོ་འགྲིབ། གསུངས་པས་རིའི་མགུལ་ཅིག་ཏུ་བཅུག་ནས། ཡོན་བདག་གཤེན་རྡོར་མོས་འགོ་བྱས་པ་རྣམས་ཀྱིས་རྗེ་བཙུན་མ་གྲོངས་པའི་ཕྱེ་མར་ལ་ཆང་དང་སྟོན་མོའི་ཚོགས་འཁོར་མང་དུ་བྱས་པའི་ཚོགས་གྲལ་དུ། རྗེ་བཙུན་ལགས་ཐུགས་ལ་འཁྲུངས་པའི་ཉམས་དབྱངས་ཤིག་གསུང་བར་ཞུ་ཞུས་པས་མགུར་འདི་གསུངས་སོ། །རྗེ་བླ་མའི་བྱིན་བརླབས་སེམས་ལ་ཞུགས། །གནས་མི་མེད་འགྲིམས་པས་རྟོགས་པ་ཤར། །གནས་དོ་ནུབ་བཀྲ་ཤིས་ཀྱི་བཞུགས་གནས་འདིར། །ཁྱེད་སྟོན་པ་ཤཱཀ་གུས་དབུ་མཛད་པའི། །གདན་གང་འཛོམ་པའི་བུ་སློབ་རྣམས། །སྨོན་ལམ་དག་པས་མཚམས་སྦྱར་ནས། །ཡོན་བདག་རྡོར་མོ་བཟའ་ཚོ་དང་། དམ་ཚིག་ཆོས་ཀྱིས་འབྲེལ་པ་ཡིས། །ཁྱེད་བུ་སློབ་རྣམས་ཀྱིས་ཞུ་ཕུལ་བས། །བྱོན་སྐྱེམས་ཆོས་ཤིག་གནང་འཚལ་སྐད། །དོན་དེ་ལ་མཚན་ཉིད་འདི་སྐད་ལོ། །ངས་འཁོར་བའི་ཆོས་ལ་ཡིད་བྱུང་བས། །སྐྱོ་ནས་ལ་ཕྱིའི་གངས་ལ་ཕྱིན། །དབེན་གནས་དཔལ་གྱི་བདུད་འདུལ་ཕུག །ཟླ་དྲུག་བསྒོམ་པའི་ཉམས་ལ་ཤར། གནད་ཀྱི་མདོ་དྲུག་འདི་ལྟར་གདའ། །ཕྱི་ཡི་ཡུལ་དྲུག་དཔེར་བཞག་ནས། །ནང་གི་སྐྱོན་དྲུག་གཏན་ལ་འབེབས། །མི་ཐར་འཆིང་བ་སྒྲོག་དྲུག་ལ། །ཐབས་ཀྱིས་གྲོལ་བའི་ལམ་དྲུག་མཐོང་། །ཀློང་དྲུག་གདིངས་སུ་གྱུར་པ་ལ། །ཉམས་ལ་བདེ་བ་རྣམ་དྲུག་ཤར། །གླུ་དེ་རྗེས་བསྐྱར་ནས་མ་བླངས་ནས། །དོན་དེ་ལ་ཐུགས་སུ་མི་འབྱོན་པས། །ཚིག་བརྡའ་ཡིས་བཀྲོལ་བས་སྐད་ཅིག་ཉོན། །ཐོགས་རྡུགས་ཡོད་ན་ནམ་མཁའ་མིན། །གྲངས་ཀྱིས་ལོང་ན་སྐར་ཕྲན་མིན། །གཡོ་འགུལ་ཡོད་ན་རི་བོ་མིན། །འཕྲི་བསྣན་ཡོད་ན་རྒྱ་མཚོ་མིན། །ཟམ་པས་སླེབ་ན་ཆུ་བོ་མིན། །བཟུང་དུ་ཡོད་ན་འཇའ་ཚོན་མིན། །དེ་ནི་ཕྱི་ཡི་དཔེ་དྲུག་ཡིན། །གཟའ་གཏད་ཡོད་ན་ལྟ་བ་མིན། །བྱིང་རྒོད་ཡོད་ན་བསྒོམ་པ་མིན། །བླང་དོར་ཡོད་ན་སྤྱོད་པ་མིན། །རྣམ་རྟོག་ཡོད་ན་རྣལ་འབྱོར་མིན། འཆར་ནུབ་ཡོད་ན་ཡེ་ཤེས་མིན། །སྐྱེ་འཆི་ཡོད་ན་སངས་རྒྱས་མིན། །དེ་ནི་རྣལ་འབྱོར་སྐྱོན་དྲུག་ཡིན། །ཞེ་སྡང་ཆེ་ན་དམྱལ་བའི་སྒྲོགས། །སེར་སྣ་ཆེ་ན་ཡི་དྭགས་སྒྲོགས། །གཏི་མུག་ཆེ་ན་བྱོལ་སོང་སྒྲོགས། །འདོད་ཆགས་ཆེ་ན་མི་ཡི་སྒྲོགས། །ཕྲག་དོག་ཆེ་ན་ལྷ་མིན་སྒྲོགས། །ང་རྒྱལ་ཆེ་ན་ལྷ་ཡི་སྒྲོག །དེ་མི་ཐར་འཆིང་བའི་སྒྲོགས་དྲུག་ལགས། །དད་པ་ཆེ་ན་ཐར་པའི་ལམ། །མཁས་བཙུན་བསྟན་ན་ཐར་པའི་ལམ། །དམ་ཚིག་གཙང་བ་ཐར་པའི་ལམ། །རི་ཁྲོད་འགྲིམ་ན་ཐར་པའི་ལམ། །གཅིག་པུར་སྡོད་ན་ཐར་པའི་ལམ། །སྒྲུབ་པ་བྱེད་ན་ཐར་པའི་ལམ། །དེ་ཐབས་ཀྱིས་གྲོལ་བའི་ལམ་དྲུག་ཡིན། །ལྷན་ཅིག་སྐྱེས་པ་གཉུག་མའི་ཀློང་། །ཕྱི་ནང་མེད་པ་རིག་པའི་ཀློང་། །གསལ་འགྲིབ་མེད་པ་ཡེ་ཤེས་ཀློང་། །བདལ་བ་མེད་པ་ཆོས་ཀྱིས་ཀློང་། །འཕོ་འགྱུར་མེད་པ་ཐིག་ལེའི་ཀློང་། །རྒྱུན་ཆད་མེད་པ་ཉམས་ཀྱི་ཀློང་། །དེ་རྣམས་གདིངས་ཆེན་ཀློང་དྲུག་ལགས། །ལུས་ལ་གཏུམ་མོ་འབར་བས་བདེ། །རླུང་རོ་རྐྱང་དྷུ་ཏིར་འདུས་པས་བདེ། །སྟོད་བྱང་ཆུབ་སེམས་ཀྱི་རྒྱུན་བབ་བདེ། །སྨད་དྭངས་མའི་ཐིག་ལེས་ཁྱབ་པས་བདེ། །བར་དཀར་དམར་ཐུག་འཕྲད་བསྲེ་བས་བདེ། །ལུས་ཟག་མེད་བདེ་བས་ཚིམ་པ་བདེ། །དེ་རྣལ་འབྱོར་ཉམས་ཀྱི་བདེ་དྲུག་ལགས། །ད་གནད་ཀྱི་མདོ་དྲུག་ཉམས་ཀྱི་དབྱངས། །ཟླ་དྲུག་བསྒོམ་པའི་ཉམས་དབྱངས་འདི། །ཁྱེད་བུ་སློབ་འཛོམ་པའི་དགའ་སྟོན་མཛོད། །ལར་མི་དགའ་བ་རྣམས་ཚོགས་པ་ད་རེས་ཙམ། །ཆང་བདུད་རྩི་འཐུང་བ་ལ་ཉེ་བཟང་། །ང་མི་རྒན་གླུ་རྒན་ལེན་པ་ཡི། །ཁྱེད་བུ་སློབ་རྣམས་ཀྱི་ངོ་མ་ཆོག །ཐུགས་དགྱེས་པར་བཀྲ་ཤིས་ཆོས་ལ་འབུངས། །ལམ་དགྱེས་པའི་སྨོན་ལམ་འགྲུབ་པར་ཤོག །ཅེས་གསུངས་པས། དེར་ཚོགས་པའི་ཡོན་བདག་བུ་སློབ་རྣམས་དད་པར་གྱུར་ཅིང་། འབུལ་བ་མང་པོ་བྱེད་ཟེར་བ་མ་བཞེས་ཏེ་སྙེ་ནམ་གྱི་རི་ལ་བྱོན་ནས་བཞུགས་སོ། །དེ་ཐམས་ཅད་གངས་མགུར་གྱི་སྐོར་རོ།། །།