བརྟག་པ་གཉིས་པ། དང་པོ་རབ་གནས་ཀྱི་ལེའུ།
དཔལ་ལྡན་མཁའ་དང་ཡེ་ཤེས་དྲུག་པའི་ཁམས། །སྲོག་དང་སྒྲ་གཅན་ཐིག་ལེའི་རང་བཞིན་ཅན། །བདག་འཛིན་འཇོམས་བྱེད་བདག་མེད་མར་གྲགས་པ། །རྒྱལ་བ་ཀུན་གྱི་ཡུམ་དེ་ཕྱག་འཚལ་ནས། །སྒྱུ་མ་ལྟ་སོགས་དཔེ་ཡིས་ཕྱག་རྒྱ་ཆེ། །ཟབ་མོ་དབུ་མའི་རང་བཞིན་ཉེར་སྟོན་པ། །མ་ཚང་རྒྱས་བཤད་ངེས་པར་བྱེད་པའི་དོན། །གསལ་བྱེད་བརྟག་པ་གཉིས་པ་རབ་བཤད་བྱ། །བཅོམ་ལྡན་འདས་རྡོ་རྗེ་འཆང་ཆེན་པོས་རྒྱུད་ཀྱི་རྒྱལ་པོ་འདི་ཉིད་ཀྱི། ལེའུ་དང་པོར་གཞི་ལམ་འབྲས་བུ་གསུམ་གསུངས་པའི་དོན་བརྟག་པ་དང་པོས་རྒྱས་པར་བཤད་ནས། དེ་ཉིད་ཀྱི་མ་ཚང་བ་བསྐོང་ཞིང་ཐེ་ཚོམ་བསལ་ནས་ངེས་པ་སྟེར་བ་དང་། དངོས་གྲུབ་གཏན་ལ་དབབ་པའི་ཕྱིར་བརྟག་པ་གཉིས་པ་འདིས་ཤིན་ཏུ་རྒྱས་པར་བཤད་པ་ལས། འདི་ཉིད་ཀྱི་བརྗོད་བྱ་རྗོད་བྱེད་དང་། འབྲེལ་བ་དང་དགོས་པ་དང་། དགོས་པའི་ཡང་དགོས་པ་རྣམས་ནི་སྔ་མའི་རྗེས་སུ་འབྲངས་ཏེ་ཁོང་དུ་ཆུད་པར་བྱའོ། །འདི་ལ་ལེའུ་བཅུ་གཉིས་ལས། དང་པོ་རབ་གནས་ཀྱི་ལེའུ་འདི་ཡང་། གཞི་ཤེས་བྱེད་ཀྱི་ཐབས་དབང་བསྐུར་བ་དང་། བསྐྱེད་རིམས་ཀྱི་ཡན་ལག་དུ་རྟེན་རབ་ཏུ་གནས་པ་དང་། སྦྱིན་བསྲེག་དང་། ས་སྦྱང་པ་དང་། ཕྱི་ཡི་མཆོད་པ་དང་། རྡོ་རྗེ་སློབ་དཔོན་གྱི་མཚན་ཉིད་གསུངས་ཏེ། འདི་ལ་གསུམ། ཞུས་པ་དང་། ལན་དང་། ལེའུ་ཡི་མཚན་ནོ། །དང་པོ་ནི་རྡོ་རྗེ་སྙིང་པོས་གསོལ་བ་ལ་སོགས་པའི་ཚིགས་སུ་བཅད་པ་ཅིག་སྟེ། རྣལ་འབྱོར་གྱི་དབང་ཕྱུག་བྱེ་བ་ཕྲག་བརྒྱད་ཅུའི་གཙོ་བོར་གྱུར་པ་རྡོ་རྗེ་སྙིང་པོས་གསོལ་པ། བཅོམ་ལྡན་འདས་ཞེས་བོས་ནས་རྡོ་རྗེ་སྙིང་པོ་བདག་ལ་དུས་གསུམ་གྱི་སངས་རྒྱས་ཐམས་ཅད་ཀྱི་བྱིན་གྱི་བརླབས་གཅིག་ཏུ་སྡུད་པའི་བྱེད་ཐབས། རབ་ཏུ་གནས་པ་མཚན་ཉིད་དང་ལྡན་པ། ཐམས་ཅད་དུ་དགེ་སར་བྱེད་པའི་བཟང་པོ་ཉིད་ཀྱི་ཆོ་གའི་རིམ་པ་ཅི་ལྟ་བ་བཞིན་དུ་བཤད་དུ་གསོལ་ཞེས་ཞུས་སོ། །ལན་ལ་ལྔ། རབ་གནས་དང་། སློབ་དཔོན་གྱི་མཚན་ཉིད་དང་། མཆོད་པ་དང་སྦྱིན་བསྲེག་དང་། ས་སླང་པའོ། །དང་པོ་ལ་གཉིས་ལས། སྔོན་དུ་འགྲོ་བ་ནི། བཅོམ་ལྡན་འདས་ཞེས་པའི་ཚིག་རྐང་ལྔ་སྟེ། ཐོག་མར་ཞུས་པའི་ལན་བཅོམ་ལྡན་འདས་ཀྱིས་བཀའ་བསྩལ་པ། དེ་ཡང་རབ་དུ་གནས་པ། བསྡུས་པ་ནི་ཏིང་ངེ་འཛིན་གྱི་རིམ་པ་ཙམ་མམ། ཡང་ན་རྡོ་རྗེ་སློབ་དཔོན་ནུས་པ་ཐོབ་པས་ཉི་མ་ཅིག་གི་ཆོ་ག་བྱས་པ་ཡང་རུང་ངོ་། །འདིར་ནི་ཆོ་ག་རྒྱས་པའི་དབང་དུ་བྱས་སྟེ་སྔོན་དུ་གྲངས་དང་མཚན་པའི་བསྙེན་པ་བྱས་ནས། རབ་དུ་གནས་པའི་གནས་དེར་སྔར་སའི་ཆོ་ག་ལ་སོགས་པ་བྱས་པ་མ་ཡིན་ན། ལེའུ་བཅུ་པ་ལས་གསུངས་པ་ལྟ་བུའི་སའི་ཆོ་ག་དང་། བསྲུང་པའི་བར་དུ་བྱས་ནས་ལྷ་སྟ་གོན་དུ་གནས་པ་ཡང་དབང་གི་སྐབས་བཞིན་དུ་བྱའོ། །བུམ་པ་སྟ་གོན་ནི། དབང་བསྐུར་བའི་དོན་དུ་བྱུང་བ་དཀྱིལ་འཁོར་གྱི་ལྷའི་བུམ་པ་ནི་མཚུངས་ལ། དྲི་མ་ཁྲུས་ཀྱི་བུམ་པ་ནི་བྱིན་གྱིས་བརླབ་པ་ཙམ་བྱའོ། །སྦྱིན་བསྲེག་སྟ་གོན་དུ་གནས་པ་ཡང་འོག་ནས་ཅི་སྐད་གསུངས་པའི་རྒྱས་པ་ལ་སོགས་པའི་སྦྱིན་བསྲེག་བྱས་ནས། སློབ་མ་འཇུག་པ་ཡོད་ན་སློབ་མ་སྟ་གོན་ཡང་བྱ། དེ་ལྟར་ནུབ་གཉིས་པའི་བྱ་བ་སྔོན་དུ་རྫོགས་ནས། ནུབ་གསུམ་པ་ལ་བབ་པ་ན། དཀྱིལ་འཁོར་དམ་པ་བཞེངས་པ་ཅེས་པས་ཐིག་བཏབ་སྟེ་ལེགས་པར་བྲིས་ནས་གནས་ཉེ་བར་བརྒྱན་ཏེ་དཀྱིལ་འཁོར་བསྒྲུབ་པ་དང་། རྡོ་རྗེ་སློབ་དཔོན་བདག་འཇུག་ཀྱང་བྱས་ནས་རབ་ཏུ་གནས་པའི་རྟེན་སྟ་གོན་བྱ་བ་ནི། སྔ་བར་ཅེས་པ་སྲོད་ལ་སོགས་པའི་དུས་སུ་སྐུ་གཟུགས་སྦྱང་པ་ནི། དཀྱིལ་འཁོར་གྱི་ལྷོ་ཕྱོགས་སུ་ཁྲུས་ཀྱི་སྟེགས་བུ་པད་མ་འདབ་བརྒྱད་དང་བཅས་པ་བརྩིགས་པའམ་བྲིས་པ་ཡང་རུང་སྟེ། དེར་རྟེན་བཞུགས་སོ་གསོལ་ནས། རྟེན་སྦྱང་པ་དང་བཀྲུ་ཞིང་ཕྱི་བ་བྱ་སྟེ། བའི་ལྔ་དང་འདག་ཆལ་ལྔ། དྲི་ལྔ་རྣམ་པའི་ཁྱད་པར་གྱིས། །སྐུ་གཟུགས་ལ་ནི་བྱུག་པར་བྱ། །ཞེས་གུར་ལས་གསུངས་པ་བཞིན་དུ། དངོས་སམ་མེ་ལོང་གི་གཟུགས་བརྙན་ལ་བྱ་སྟེ། དེའི་འོག་ཏུ་སྟ་གོན་ལ་སོགས་བྱས་ནས་ནི་ཅེས་པ། རྟེན་དེ་ཉིད་བཅོམ་ལྡན་འདས་དགྱེས་པའི་རྡོ་རྗེ་མངོན་པར་རྟོགས་པ་བཞིན་དུ་བསྐྱེད་པའམ། ཡང་ན་ལྷ་སོ་སོའི་བསྐྱེད་ཆོག་ཀྱང་རུང་སྟེ་ལེགས་པར་བསྐྱེད་པ་ལ། སྐུ་གསུང་ཐུགས་བྱིན་གྱིས་བརླབ་པ་ཙམ་བྱ་སྟེ། བཅོམ་ལྡན་རྡོ་རྗེ་ཆེ་ན། མཆོག་ལ་སོགས་པའི་ཚིགས་སུ་བཅད་པས་གསོལ་བ་གདབ་ཅིང་རྟེན་དགབ་པར་བྱའོ། །གཉིས་པ་དངོས་གཞི་ནི། ནམ་མཁར་བཞུགས་པའི་སངས་རྒྱས་ཀུན། །སྐུ་གཟུགས་སྙིང་ཀར་རབ་ཏུ་གཞུག །ཞེས་པས། དངོས་གཞིའི་དུས་སུ་སྔ་མ་ལྟ་བུའི་བསྐྱེད་པའི་རིམ་པ་གསལ་བཏབ་སྟེ་དབང་བསྐུར་བ་ཅི་ལྟ་བ་བཞིན་དུ་ཡེ་ཤེས་ཀྱི་འཁོར་ལོ་འགུག་ཅིང་གཞུག་པ་དང་། དཀྱིལ་འཁོར་གྱི་ལྷའི་བུམ་པས་དབང་བསྐུར་སྟེ་རིག་པའི་དབང་ལྔ། བརཏལ་ཤུགས་ཀྱི་དབང་དང་དྲུག་ཙམ་བསྐུར་རོ། །སློབ་མ་འཇུག་པ་ཡོད་ན་ནི། སྔོན་དུ་ལྷ་ལ་དབང་བསྐུར་བར་བྱ་སྟེ། དེའི་འོག་དུ་མི་ལ་དབང་བསྐུར་བར་བྱའོ། །དེ་ནས་ཉི་མ་ཤར་བ་དང་། མེ་ཏོག་ཕུལ་ཞིང་སྤྱན་ཕྱེ་སྟེ་མངལ་འབུལ་བ་གཞན་ཡང་བྱས་ནས་བརྟན་པར་བཞུགས་སུ་གསོལ་ཞིང་ཡོན་བདག་བསྒོ་བ་དང་ཤིས་པ་བརྗོད་པ་དང་དགའ་སྟོན་དང་བསྔོ་བའི་བར་དུ་བྱའོ། །འདི་ནི་རབ་དུ་གནས་པའི་ཆོ་གའོ། །འདི་ཡི་ངེས་པའི་དོན་ནི། འགྲེལ་ཆེན་ལས། གང་ཞིག་སེམས་ནི་མཚོན་པ་ཅན། །སྐུ་གཟུགས་ལྷ་ཞེས་ཡང་དག་བཤད། །ཞེས་པ་དང་། རྣམ་པར་མི་རྟོག་ངོ་བོ་རུ། །སེམས་ནི་གང་ཞིག་རབ་ཞུགས་པ། རབ་ཏུ་གནས་ཤིང་ལྷ་རྣམས་མཆོད། །དེ་ལས་རང་བྱིན་བརླབ་པར་འགྱུར། །ཞེས་གསུངས་པས། ཕྱག་རྒྱ་བཞི་ལ་དམིགས་པའི་མན་ངག་གིས་ལྷན་ཅིག་སྐྱེས་པ་མངོན་དུ་བྱེད་པ་འདི་ནི་རབ་དུ་གནས་པར་བརྗོད་དོ། །སློབ་དཔོན་གྱི་མཚན་ཉིད་ནི། རང་འདོད་ཞེས་པའི་ཚིག་རྐང་གཉིས་ཏེ། རང་འདོད་པའི་ལྷ་ཧེ་རུ་ཀ་ལ་སོགས་པའི་བསྐྱེད་པའི་རིམ་པ་ལ་མཉམ་པར་འཇོག་ནུས་པའི་རྣལ་འབྱོར་པ། རྫོགས་རིམས་ཀྱི་དོན་རབ་ཏུ་མཐོང་བ། གསང་སྔགས་ཀྱི་ཕ་རོལ་དུ་སོན་པ་མཁས་པའི་བདག་ཉིད་ཅན་འདིས་ནི་རབ་ཏུ་གནས་པ་ལ་སོགས་པ་ཡང་བྱ་རུང་བ་ཡིན་ནོ། །མཆོད་པ་ནི། ཨོཾ་ཞེས་པ་ནས་གོང་མ་བཞིན་ཞེས་པའི་བར་གྱིས་བསྟན་ཏེ། ཨོཾ་ནི་མགོ་འདྲེན་པའམ་སྐུ། བཛྭ་པུཥྤེ་ནི་རྡོ་རྗེ་མེ་ཏོག །ཨ་ཧཱུྃ་ནི་གསུང་དང་ཐུགས་སྭཱཧཱ་ནི་གཞི་ཚུགས་གཅིག་པ་ཡིན་ཟེར་རོ། །དྷུ་པེ་ནི་བདུག་སྤོས། དཱི་པཾ་མར་མེ། གྷན་དྷེ། དྲི་ཆབ། ནིཝེ་ཏེ་ལྷ་བཤོས་སོ། །མཆོད་པ་དེ་ཅི་ལྟར་བྱེད་ན། སྣ་ཚོགས་ཧཱུྃ་ནི་རྫོགས་པ་དང་། ཅེས་པ་ཧཱུྃ་ཞེས་བརྗོད་ཅིང་ཀུ་ཤའི་ཆུས་བསང་རྡོ་རྗེ་ལག་ཏུ་བཟུང་སྟེ་ཧཱུྃ་ཧཱུྃ་ཞེས་བརྗོད་ཅིང་བདེ་སྟོང་དུ་བྱིན་གྱིས་བརླབ་བོ། །དེ་ནས་མེ་ཏོག་ལ་སོགས་པ་འབུལ་ལོ། །རིམ་པ་ཅི་ལྟར་འབུལ་ན། གོང་མ་ནི་སྔ་མ་སྟེ་བྱ་བའི་རྒྱུད་ཀྱི་ཆོ་གའི་རིམ་པ་ལྟར་མཆོད་ཡོན་དང་ཞབས་བསིལ་ལ་སོགས་པ་རིམ་པ་བཞིན་ཕུལ་ཏེ། དེ་ནས་མཆོད་པ་གཞན་རྣམས་འབུལ་ལོ། །སྦྱིན་བསྲེག་ལ་ལྔ་ལས། ཐབ་ཁུང་བསྲེག་རྫས་མེ་ལྷ་སྤྱན་འདྲེན་པ། གཤེགས་སུ་གསོལ་བ། མཆོད་ཡོན་ནོ། །དང་པོ་ལ་གསུམ་ལས། དབྱིབས་ནི། ཞི་བ་ཞེས་པའི་ཚིགས་བཅད་གཅིག་སྟེ། སྟ་གོན་དང་ལས་ཚོགས་ལ་སོགས་པས་བསྒྲུབ་པའི་དུས་སུ་སྦྱིན་བསྲེག་གི་ཐབ་ནི་ཞི་བ་ལ་བཟླུམ་པོ། རྒྱས་པ་ལ་གྲུ་བཞི། གསང་བ་ལ་གྲུ་གསུམ། འདི་ཉིད་ལ་ལྷག་མ་གྲུབ་པ་ནི། དབང་དང་འགུག་པ་ལ་ཟླ་གམ་མོ། །ཚད་ནི། ཚིག་རྐང་དྲུག་སྟེ། རྒྱར་ཁྲུ་གང་དང་ནི་ཟབས་སུ་ཁྲུ་ཕྱེད་ཉིད་ཞི་བའི་སྟེང་དང་འོག་ཏུ་ཡིན་ནོ། །ཁྲུ་དོ་དང་ཁྲུ་གང་གི་རྒྱས་པའི་སྟེང་འོག་དུ་བརྗོད་དོ། །སོར་ཉི་ཤུ་དང་དེའི་ཕྱེད་ནི་གསང་བའི་སྟེང་འོག་དུ་སྟེ་དབང་དང་འགུག་པ་ཡང་དེ་དང་མཚུངས་སོ། །ཁ་དོག་ནི་ཚིག་རྐང་དྲུག་སྟེ། ཞི་བ་ལ་ནི་ཁ་དོག་དཀར་པོར་བྱའོ། །དེ་བཞིན་དུ་རྒྱས་པ་ལ་སེར་པོ། གསང་བ་ལ་ནག་པོ། དབང་ལ་དམར་པོ། དབང་ཅི་ལྟ་བཞིན་དུ་འགུག་པ་དང་གསང་བ་བཞིན་དུ་སྡང་པ་ལ་ཡང་བྱའོ། །གཉིས་པ་བསྲེག་རྫས་ནི། ཞི་ལ་ཏིལ་ཞེས་པའི་ཚིགས་བཅད་གཅིག་སྟེ། སྔོན་དུ་སྦྱིན་བསྲེག་གི་ཐབ་གསུངས་པ་བཞིན་དུ་བྱ་སྟེ་སོ་སོ་ལ་ཤིས་པའི་ཤིང་བརྩིགས་ནས་མར་ལ་སོགས་པའི་ཐུན་མོང་གི་བསྲེག་རྫས་གུར་ལས་གསུངས་པ་རྣམས་དང་། བྱེ་བྲག་དུ་མེད་དུ་མི་རུང་པའི་ཞི་བ་ལ་ཏིལ། རྒྱས་པ་ལ་ཞོ། གསང་བ་དང་སྡང་པ་དང་རེངས་པར་བྱེད་པ་ལ་ཚེར་མ། དབང་དང་འགུག་པ་ལ། ཨུཏྤ་ལ་རྣམས་ལེགས་པར་བཤམས་ནས། བདག་ཉིད་ལྷའི་རྣལ་འབྱོར་དང་ལྡན་པས་ཐབ་བསངས་ཏེ་མེ་སྤར་ནས་མེ་ལྷ་དམ་ཚིག་པ་བསྐྱེད་པ་བྱའོ། །མེ་ལྷ་སྤྱན་དྲངས་ནི། ཨོཾ་ཨག་ནེ་ཞེས་པའི་ཚིགས་བཅད་གཅིག་སྟེ། སྔགས་ཀྱི་དོན་ཡང་ཨག་ནེ་ཡེ་མ་ཧཱ་ཏེ་ཛ་ནི། གཟི་བརྗིད་ཆེན་པོ་མེའི་ལྷ་ཞེས་པའོ། །སརྦ་ཀརྨ་པྲ་ས་ཏཱ་ཀ་ནི་ལས་རྣམས་ཐམས་ཅད་སོ་སོར་བསྒྲུབས་ཞེས་སོ། །ཀ་རུ་ནྱ་ཀྲི་ཏ་སརྦ་ཨརྟ་ནི་སྙིང་རྗེའི་དབང་གིས་དོན་རྣམས་གསོལ་ཞེས་སོ། །ཨ་སྨྂ་ནི་ས་ན་ཧི་ཏོ་བྷ་བ་ནི། ཤར་ལྷོའི་མཚམས་སུ་ཐང་གཅིག་བཞུགས་ཞེས་པའོ། །དེ་ལྟར་མེ་ལྷ་བཀུག་སྟེ་མཆོད་ནས། དེའི་འོག་ཏུ་ཡི་དམ་གྱི་ལྷ་བསྐྱེད་ནས་སྦྱིན་བསྲེག་བྱ་སྟེ་འདོད་དོན་ལ་གསོལ་བ་གདབ་པའི་བར་དུ་བྱས་ནས་གཤེགས་སུ་གསོལ་ལོ། །སླར་མེ་ལྷ་ལ་དྲིན་ལན་གྱི་སྦྱིན་བསྲེག་བྱས་ནས་གཤེགས་སུ་གསོལ་བ་ནི། ས་དྷཱ་ནི་ཝ་ཞེས་པའི་ཚིགས་བཅད་གཅིག་སྟེ། བསྒྱུར་ན། བདག་གི་དོན་དང་གཞན་གྱི་དོན། །བསྒྲུབས་ཀྱིས་བཞུད་ཅིག་བྱིན་ཟ་ཁྱོད། །སླར་ཡང་དུས་ལ་བབ་པ་ན། །བདག་གི་དངོས་གྲུབ་ཐམས་ཅད་བསྒྲུབས། །ཞེས་པ་མ་དགའ་བའི་སྔགས་སོ། །མཆོད་ཡོན་གྱི་སྔགས་ནི། ཨོཾ་ཛ་ཧཱུྃ་བྂ་ཧོ་ཁ་རྂ་མཆོད་ཡོན་གྱི་སྔགས་སོ། །ཨོཾ་ནི་རི་ཏི་ཧཱུྃ་ཁྂ་ཞབས་བསིལ་ལོ། །འདི་དག་ཀྱང་ཤྲི་ཧེ་རུ་ཀ་ས་པ་རི་ཝ་ར་ཞེས་པ་དང་སྤེལ་ལོ། །ཨོཾ་དྷྂ་དྷྂ་ནི་ནེ་པེ་ཏེ་དང་གདམ་ཀ་ཡིན་ནོ་ཞེས་ཟེར་རོ། །ས་སྦྱང་བ་ནི། ས་བསླང་པའི་སྐབས་སུ་སའི་ལྷ་མོ་ལ་མཆོད་བསྟོད་སྔོན་དུ་བཏང་ནས་གསོལ་བ་གདབ་པ་ནི། མ་མ་རིན་ཆེན་སྣ་ཚོགས་འཛིན་ཞེས་པའི་ཚིགས་བཅད་འདིས་བྱའོ། །འདི་རྣམས་ཀྱི་ངེས་པའི་དོན་ནི། རྩ་རླུང་བྱང་ཆུབ་ཀྱི་སེམས་ཀྱི་མན་ངག་གིས་གཏུམ་མོའི་སྦྱིན་བསྲེག་ལ་བརྟེན་ནས། ཕུང་པོ་དང་ཁམས་དང་སྐྱེ་མཆེད་ཀྱི་བག་ཆགས་ཐམས་ཅད་བསྲེག་པར་བྱེད་པའི་རིམ་པ་རྒྱས་པར་ཁ་སྦྱོར་ལས། མགོ་བོའི་ཐོད་པ་ཉིད་ཀྱང་ནི། །སྦྱིན་བསྲེག་སྣོད་དུ་ཉེ་བར་བརྗོད། །རོ་མ་བླུག་གཟར་བཤད་པ་སྟེ། །སྙིང་ཁའི་ཆོས་འཁོར་བརྐྱང་པ་ནི། །དགང་གཟར་བདག་ཉིད་རྣམ་པར་བསྟན། །ལྟེ་བའི་དཀྱིལ་འཁོར་ཉིད་ཀྱང་ཐབ། །ཞེས་པ་ལ་སོགས་གསུངས་སོ། །ལེའུ་ཡི་མཚན་ནི། ཀྱེའི་རྡོ་རྗེ་མཁའ་འགྲོ་མ་དང་གཉིས་སུ་མེད་པའི་དྲ་བའི་སྡོམ་པ་བསྟན་པ་གཉིས་པའི་བར་དུ་གནས་པ་ལ་སོགས་པ་བསྟན་པའི་ལེའུ་སྟེ་དང་པོའོ།། །།