བརྟག་པ་གཉིས་པ། གཉིས་པ་དངོས་གྲུབ་གཏན་ལ་དབབ་པའི་ལེའུ།
ལེའུ་གཉིས་པ་དངོས་གྲུབ་གཏན་ལ་དབབ་པ་འདི་ཡང་། བརྟག་པ་དང་པོར་གསུངས་པའི་བསྐྱེད་པ་དང་རྫོགས་པའི་རིམ་པ་ཉམས་སུ་ལེན་པར་བྱེད་པའི་ཁྲིགས་དང་། དངོས་གྲུབ་ཀྱི་ངེས་པ་གཏན་ལ་དབབ་པ་སྟོན་ཏེ། འདི་ལ་གསུམ། ཞུས་པ་དང་། གཞུང་དོན་དང་། ལེའུ་ཡི་མཚན་ནོ། །དང་པོ་ནི་རྡོ་རྗེ་སྙིང་པོས་གསོལ་བ་ཞེས་པའི་ཚིགས་བཅད་གཅིག་སྟེ། དེ་ཡང་བཅོམ་ལྡན་འདས་ལ་རྡོ་རྗེ་སྙིང་པོས་གསོལ་བ། ནམ་མཁའ་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སྐྱེ་བ་མེད་པ་སྤྲོས་པ་དང་བྲལ་བ་ལ་རྒྱ་མཚོ་ཆེན་པོའི་ནང་ན་སྐུ་བ་ཡང་བ་དེ་ཤར་གྱི་རླུང་གིས་ནུབ་དུ་དེད། ནུབ་ཀྱི་རླུང་གིས་ཤར་དུ་དེད་དེ་གཏིང་མི་ཚུགས་པ་ལྟར། རང་འདོད་ལྷའི་ཧེ་རུ་ཀའམ། བདག་མེད་མའི་བསྐྱེད་པའི་རིམ་པ་རྣམ་པར་རྟོག་པ་གློ་བུར་བའི་གཏིང་མི་ཚུགས་པར་བསྒོམས་པས། སེམས་ཅན་གྱིས་ཕྱག་རྒྱ་ཆེན་པོའི་དངོས་གྲུབ་ཅི་ལྟར་འགྲུབ་པར་འགྱུར་ཞེས་སོ། །གཞུང་ལ་བཞི། བསྐྱེད་པའི་རིམ་པ་ཅི་ལྟར་བསྒོམ་པ་དང་། དེ་བརྟན་པར་བྱེད་པའི་སྤྱོད་པ་དང་། དངོས་གྲུབ་ཀྱི་མཚན་ཉིད་དང་། རིམ་པ་གཉིས་ཀྱི་རྣམ་བཞག་གོ །དང་པོ་ལ་གཉིས་ཏེ། མདོར་བསྟན་དང་། རྒྱས་བཤད་དོ། །དང་པོ་ནི། བཅོམ་ལྡན་འདས་ཞེས་པའི་ཚིག་རྐང་ལྔ་སྟེ། བསྐྱེད་པའི་རིམ་པ་བསྒོམ་དགོས་པར་སྟོན་པ། དེ་ཡང་ཚོགས་བསགས་པའི་གང་ཟག་སྨིན་པར་བྱེད་པའི་དབང་ཐོབ་ནས་ལམ་གྱི་རིམ་པ་མངོན་དུ་བྱེད་པར་འདོད་པས་ཐོག་མར་བདག་མེད་མའི་རྣལ་འབྱོར་དང་ལྡན་པའམ་ཡང་ན་ཧེ་རུ་ཀ་བཞི་ལས་གང་རུང་གི་བསྐྱེད་རིམས་བསྒོམ་པ་ལ་བརྩོན་པར་བྱ་སྟེ། དེ་ལས་གཞན་པའི་སེམས་ཀྱིས་སྐད་ཅིག་ཀྱང་ཕྱག་རྒྱ་ཆེན་པོའི་དངོས་གྲུབ་འདོད་པས་གཞན་དུ་གནས་པར་མི་བྱའོ། །རྒྱས་པར་བཤད་པ་ལ་གཉིས། ལས་དང་པོ་པའི་བྱ་བ་དང་། བརྟན་པ་ཐོབ་ནས་ཉམས་སུ་བླང་པའི་ཚུལ་ལོ། །དང་པོ་ལ་གསུམ་ལས། ཉམས་སུ་བླང་པའི་གནས་ནི། དང་པོ་ཞེས་པའི་ཚིག་རྐང་ལྔ་སྟེ། དེ་ཡང་ལས་དང་པོ་པས་གོམས་པར་བྱེད་པའི་དུས་ཀྱི་གནས་ནི་གང་དུ་བསྔགས་པ་སྟེ་ཤེས་པའི་གནས་སུ་བསྒོམ། དེ་རང་གང་ཞེ་ན། སེམས་རྩེ་གཅིག་ཏུ་མ་ཡེངས་པར་མཉམ་གཞག་འགྲུབ་པར་འགྱུར་པའི་གནས་ནི་བཟང་པོ་ངེས་པར་བརྟག་སྟེ། རང་གི་ཁྱིམ་ལ་སོགས་པར་མཚན་མོའི་དུས་སུ་བསྒོམ་པའོ། །དེས་ནི་སེམས་བདེ་བས་ཏིང་ངེ་འཛིན་གསལ་བར་འགྱུར་རོ། །མཚན་མོ་དུར་ཁྲོད་ལ་སོགས་པར་མི་བསྒོམ་པ་ནི་ལས་དང་པོ་པ་ལ་ལུས་སྲོག་གི་བར་ཆད་དུ་གྱུར་དུ་དོགས་པའི་ཕྱིར་རོ། །བརྟན་པ་ཐོབ་ནས་དུར་ཁྲོད་རིའི་བྱ་སྐྱིབས་ལ་སོགས་པར་བསྒོམ་མོ། །བསམ་པ་ནི། བདག་ཉིད་གྲུབ་པའི་སེམས་ཀྱིས་ནི་ཅེས་པ་ནམ་མཁའ་དང་མཉམ་པའི་སེམས་ཅན་གྱི་དོན་དུ་ཕྱག་རྒྱ་ཆེན་པོ་གྲུབ་པར་འདོད་པའི་སེམས་ཀྱིས་བསྒོམ་མོ། །ལྷའི་རྣལ་འབྱོར་ནི། ཚིག་གཉིས་ཏེ། བདག་མེད་མའི་རྣལ་འབྱོར་སྐྱེ་བ་མེད་པར་རྟོགས་པའི་ཤེས་རབ་ཅན་གྱིས་བསྒོམ་པའམ། ཡང་ན་དཔལ་ཧེ་རུ་ཀའི་གཟུགས་སུ་བསྒོམ་པའོ། །དེ་ལྟར་ལས་དང་པོ་པའི་སྤྱོད་པ་བསྟན་ནས་བརྟན་པ་ཐོབ་ནས། ཉམས་སུ་བླང་ཚུལ་ལ་གཉིས་ལས། ཐམས་ཅད་དེ་ཉིད་དང་བསྲེ་བ་ནི། རྐང་བ་བཀྲུ་དང་ཞེས་པའི་ཚིག་རྐང་དགུ་སྟེ། དེ་ལྟར་མཉམ་པར་བཞག་པ་ཅུང་ཟད་བརྟན་ནས་རྗེས་ཐོབ་དུ་རྐང་པ་བཀྲུ་བ་དང་། ཟས་ཟ་བ་དང་། འཐོར་འཐུང་དང་སོ་རྩི་ཟ་ཙན་དན་གྱི་བྱུག་པས་ལག་པ་ཉེད་པ་དང་། སྨད་གཡོགས་བཅིང་པ་དང་། འབྱུང་བ་དང་། སྨྲ་བ་དང་། འགྲོ་བ་དང་། འདུག་པ་དང་ཁྲོ་བ་དང་རྒོད་པ་ལ་སོགས་པ་དུས་ཐམས་ཅད་དུ་བཅོམ་ལྡན་འདས་སྒྱུ་མ་ལྟ་བུ་བསྟེན་པ་དང་། བདག་མེད་མའི་ཤེས་རབ་རྟོགས་པའི་བརཏལ་ཤུགས་ཅན་ཉིད་ཀྱིས་རྣལ་འབྱོར་མའམ་ཧེ་རུ་ཀ་རྣམ་པར་བསྒོམ་མོ། །དེ་ལས་གཞན་གྱིས་མི་འགྲུབ་པར་བསྟན་པ་ནི་ཚིགས་བཅད་གཅིག་སྟེ། དེ་ལྟར་མཉམ་རྗེས་མེད་པ་ལས་གཞན་གྱི་ཚུལ་གྱིས་སྐད་ཅིག་ཀྱང་གནས་པར་མི་བྱ་སྟེ། འདུག་པའི་སེམས་རྣམ་པར་འཕྲོ་བ་དང་མ་རིག་པའི་དབང་གིས། དངོས་གྲུབ་འདོད་པ་དང་བཅས་པས་ཕྱག་རྒྱ་ཆེན་པོའི་དངོས་གྲུབ་ཀྱི་ཕྱིར། མཁས་པ་རྣམས་ཀྱིས་རྣམ་པར་གཡེང་བའི་འབད་པས་གནས་པར་མི་བྱའོ། །དེ་ལྟར་བསྐྱེད་པའི་རིམ་པ་གསུངས་ནས། དེ་བརྟན་པར་བྱེད་པ་ཡི་སྤྱོད་པ་ལ་གསུམ། སྤྱོད་པའི་སྔོན་དུ་འགྲོ་བ་དང་། ཧེ་རུ་ཀའི་སྤྱོད་པ་དང་། བདག་མེད་མའི་སྤྱོད་པའོ། །དང་པོ་ལ་ལྔ་ལས། བཤད་པར་དམ་བཅའ་བ་ནི། བསམ་གཏན་ཉོན་མོངས་འཇིག་བྱེད་པ། རྡོ་རྗེ་སྙིང་པོ་ང་ཡིས་བཤད་ཅེས་པ་བསྐྱེད་རྫོགས་ཀྱི་བསམ་གཏན་གྱིས་ཉོན་མོངས་པ་ཐམས་ཅད་འཇོམས་པར་བྱེད་པ་བསྟན་གྱིས་ཉོན་ཅིག་པའོ། །དུས་དང་ཐབས་ཀྱི་ངོ་བོ་ནི། བརྩེ་བས་ཞེས་པའི་ཚིག་རྐང་དྲུག་སྟེ། བསམ་གཏན་ཉོན་མོངས་འཇིག་བྱེད་དེ་ཡང་གཞན་ནས་བསྐྱེད་པའི་རིམ་པ་དེ་ཉིད་ཀྱི་དབང་དུ་མཛད་ནས་ཟླ་བ་ཕྱེད་ལ་སོགས་པར་བསྒོམ་ཏེ་གཞུག་པར་གསུངས་ཀྱང་། འདིར་ནི་ངེས་པའི་དོན་དུ། བསྐྱེད་རིམས་ལ་བརྟན་པ་ཐོབ་པའི་རྣལ་འབྱོར་པས་བླ་མའི་མན་ངག་ལ་བརྟེན་ཏེ། ཕྱག་རྒྱ་བཞིའི་རྫོགས་པའི་རིམ་པ་བསྒོམ་པར་བྱའོ། །འགྲེལ་ཆེན་ལས། བསམ་གཏན་དོན་ནི་ཅི་ཞིག་བརྗོད། །སྡུག་བསྔལ་ཐམས་ཅད་བསྲེག་པ་དང་། །ཉོན་མོངས་ཐམས་ཅད་འཇོམས་པ་ཉིད། །ཤེས་རབ་ལྷན་ཅིག་བསམ་གཏན་ནི། །སྲིད་པ་དུམ་བུར་བྱེད་པའི་མཆོག །ཞེས་པས་བརྩེ་བས་ཕྱག་རྒྱ་ཆེན་པོའི་དངོས་གྲུབ་ཀྱི་དོན་དུ་ཟླ་བ་ཕྱེད་ལ་སོགས་པར་ཡོངས་སུ་བརྟག་སྟེ། རྣམ་པར་རྟོག་པའི་བསམ་པ་ཐམས་ཅད་ཡོངས་སུ་སྤངས་ནས་སོ་སོར་སྣང་བ་བསྡུས་སྟེ་ལྷའི་གཟུགས་སུ་སེམས་པས་ཉི་མ་གཅིག་ཏུ་མ་ཆད་པར་བསྒོམས་པས། དུ་བ་ལ་སོགས་པའི་རྟགས་ཡོངས་སུ་བརྟག་པར་བྱ་སྟེ། སྲོག་རྩོལ་ལ་སོགས་པའི་སྦྱོར་བས་ཟླ་བ་ཕྱེད་ཙམ་གྱིས་ངེས་པར་སྒྱུ་མ་ལྟ་བུ་མངོན་དུ་འགྱུར་ཏེ། ཀུན་མཁྱེན་ཧེ་རུ་ཀ་དེ་ནི། དངོས་གྲུབ་ཉེར་གནས་བཟློག་པ་མེད། །ཕྱི་ནས་སྒྱུ་མའི་རྣམ་པ་མཚུངས། །རྨི་ལམ་རྣམ་པར་སྐད་ཅིག་འགྱུར། །ཞེས་པ་ལ་སོགས་པ་གསུངས་སོ། །མཆོག་ཏུ་གྱུར་པའི་ངེས་པ་ནི། རང་གཞན་ཞེས་པའི་ཚིགས་བཅད་གཅིག་སྟེ། དེ་ཡང་རང་གཞན་གྱི་དོན་རབ་ཏུ་བསྒྲུབ་པའི་ཕྱིར། འཁོར་བར་ཐབས་ཁྱད་པར་དུ་འཕགས་པ་གཞན་ཡོད་པ་མ་ཡིན་ནོ། །རིག་མ་ནི་ལས་དང་ཆོས་དང་དམ་ཚིག་གི་ཕྱག་རྒྱ་དང་ལྷན་ཅིག་ཏུ་གོམས་པར་བྱས་པས་འཕྲལ་དུ་མྱུར་བར་དྲོད་ལ་སོགས་པའི་རྟགས་མངོན་དུ་བྱེད་པ་ཉིད་ཡིན་ནོ། །དྲོད་ཀྱི་རྟགས་ནི། འཇིགས་སྨྱོ་ཞེས་པའི་ཚིགས་བཅད་གཉིས་ཏེ། དེ་ལྟར་བསྒོམས་པ་ལས་དྲོད་ཀྱི་རྟགས་ཆུང་དུ་ནི། རང་ཉིད་ངན་འགྲོ་ལ་འཇིགས་པ་དང་། སྨྱོ་བ་སྟེ་རྒྱུད་འཁྲུལ་པ་དང་། དེ་བཞིན་དུ་འཁོར་བའི་སྡུག་བསྔལ་དང་མྱ་ངན་གྱི་གདུང་པས་ཡིད་ལ་འཚེ་བ་མེད་པ་འདི་ནི་དང་པོའོ། །གཉིས་པ་ནི། འདོད་ཆགས་དང་ཞེ་སྡང་གཏི་མུག་ཆེན་པོས་བསྒྲུབ་པ་པོ་ཉིད་ཀྱི་རྒྱུད་ཉོན་མོངས་པར་མི་ནུས་པའོ། །དྲོད་ཆེན་པོའི་རྟགས་ནི་ལྟ་སྟངས་ལ་སོགས་པ་ཕན་པ་དང་གནོད་པའི་འབྲས་བུ་འབྱིན་ནུས་པ་འབྱུང་བ་དེ་ལྟར་ངེས་པར་ཤེས་ནས་ཅི་ལྟར་ཉམས་སུ་ལེན་པ་དེ་སྐད་ཅིག་ཀྱང་རྣལ་འབྱོར་པ་རྣམས་ཅ་ཅོ་མི་གནས་པར་བསྒོམ་པར་བྱ་བས་རྟོགས་པར་འགྱུར་རོ། །ཕན་ཡོན་ནི་གཉིས་ལས། སྒྲིབ་པ་ཤས་ཆེ་བས་ཀྱང་འགྲུབ་པ་ནི། མཚམས་མེད་ཞེས་པའི་ཚིག་རྐང་དྲུག་སྟེ་གོང་དུ་གསུངས་པའི་དངོས་གྲུབ་དེ་འབད་པ་དང་ལྡན་པས་བསྒོམས་ན་དམན་པས་ཀྱང་འགྲུབ་པར་འགྱུར་ཏེ། ཕ་དང་མ་དང་དགྲ་བཅོམ་པ་གསོད་པ་དང་། དགེ་འདུན་གྱི་དབྱེན་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་ལྔ་བྱེད་པ་དང་། སྲོག་ཆགས་གསོད་ལ་དགའ་བ་ཤན་པ་ལྟ་བུ་དང་། གཞན་ཡང་སྐྱེ་བ་དམན་པ་མ་ནིང་དང་བུད་མེད་དང་རྒྱུད་རྨོངས་པ་དང་མ་རུངས་བ་ལས་ངན་པ་བྱེད་པ་དང་། གཟུགས་ངན་པ་དང་ཡན་ལག་མ་ཚང་པ་ལ་སོགས་པས་ཀྱང་བསྐྱེད་རྫོགས་ཀྱི་རྣལ་འབྱོར་བསམས་པས་བྱང་ཆུབ་ཀྱི་རྟགས་དེ་རྣམས་འགྲུབ་པར་འགྱུར་རོ། །འདིས་ནི་རྡོ་རྗེའི་ཐེག་པའི་ཐབས་ཀྱི་ཆེ་བ་བསྟན་ཏོ། །འོ་ན་རང་བཞིན་བཟང་པོས་མི་འགྲུབ་བམ་ཞེ་ན། སྦྱངས་པ་ཅན་གྱིས་མྱུར་དུ་འགྲུབ་པར་བསྟན་པ། དགེ་བ་བཅུ་ཞེས་པའི་ཚིགས་བཅད་བཞི་སྟེ་ལུས་དང་ངག་དང་ཡིད་ཀྱི་དགེ་བ་བཅུ་ལ་གོམས་པ་དང་། བླ་མ་ལ་གུས་ཤིང་དབང་པོ་དུལ་བ་ང་རྒྱལ་དང་ཁྲོ་བ་ལས་རྒྱུད་རྣམ་པར་གྲོལ་བ་དེས་ནི་རེ་ཤིག་ངེས་པར་ཕྱག་རྒྱ་ཆེན་པོའི་དངོས་གྲུབ་འགྲུབ་པར་འགྱུར་རོ། །འདི་དག་གི་ངེས་པའི་དོན་ནི། འཁོར་བར་སྐྱེ་བར་བྱེད་པ་ཡི། །མ་རིག་པ་ལ་མ་ཞེས་བརྗོད། །དགའ་བའི་འདོད་ཆགས་ཕ་ཞེས་བརྗོད། །ཕུང་པོའི་ཚོགས་པ་དགེ་འདུན་ཏེ། །དགྲ་བཅོམ་ཆོས་སུ་རྟོག་པ་བསང་། །དེ་བཞིན་གཤེགས་སུ་གང་རྟོག་པ། །འདི་དག་རྣམ་པར་བཅོམ་པས་ན། །མཚམས་མེད་ལྔ་ནི་བྱེད་པ་ཡིན་ཞེས་པ་ལ་སོགས་པ་གསུངས་པས། འདི་ལྟ་བུའི་དོན་དང་ལྡན་པར་སྦྱང་པས་རྡོ་རྗེའི་ཐེག་པ་འགྲུབ་པར་འགྱུར་གྱིས། ངན་པར་སྤྱོད་པ་དག་གིས་མཚན་ཙམ་ལ་ཡང་དད་པར་དཀའ་ན་རྡོ་རྗེའི་ཐེག་པ་དང་ཕྲད་པ་ལྟ་སྨོས་ཀྱང་ཅི་དགོས། དེ་ལྟར་ཡང་ནམ་མཁའ་དང་མཉམ་པའི་རྒྱུད་ཀུན་ཏུ་སྤྱོད་པ་ལས། བྱིས་པའི་ཤེས་པའི་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་པ། །དེ་ཀུན་གྱིས་ཀྱང་སངས་རྒྱས་ཀྱི། །སྤྱོད་ཡུལ་གསང་ཆ་མི་ཤེས་སོ། །ཞེས་གསུངས་སོ། །དེ་ལྟར་སྤྱོད་པའི་སྔོན་འགྲོ་བཤད་ནས། ཧེ་རུ་ཀའི་སྤྱོད་པ་ལ་གཉིས། གསང་སྤྱོད་དང་བརཏལ་ཤུགས་ཀྱི་སྤྱོད་པའོ། །དང་པོ་ནི་རྟག་ཏུ་ཞེས་པའི་ཚིག་རྐང་གསུམ་སྟེ། དེ་ཡང་ཟླ་བ་ཕྱེད་ལ་སོགས་པ་ཁོ་ན་མ་ཡིན་གྱིས་རྟག་ཏུ་གོམས་པའི་རྣལ་འབྱོར་གྱིས་མཉམ་པར་བཞག་པས་ཕྱག་རྒྱ་ཆེན་པོའི་དངོས་གྲུབ་འཐོབ་པའི་དོན་དུ་ཐོག་མར་ཟླ་བ་གཅིག་ཏུ་གསང་ལ་སྤྱོད་པ་སྤྱད་པར་བྱའོ། །དེས་ནི་རྣམ་པར་རྟོག་པ་ལས་སུ་རུང་བར་འགྱུར་རོ། །བརཏལ་ཤུགས་ཀྱི་སྤྱོད་པ་ལ་བཞི་ལས། སྤྱོད་པའི་གྲོགས་ལུང་སྟོན་པ་ནི་ཅི་སྲིད་ཅེས་པའི་ཚིགས་བཅད་གཉིས་ཏེ། དེ་ཡང་བརཏལ་ཤུགས་ཀྱི་སྤྱོད་པ་སྔར་ལེའུ་དྲུག་པར་གསུངས་པ་ལྟ་བུ་ཡི་བརཏལ་ཤུགས་ཀྱིས་མྱུར་དུ་འགྲུབ་པར་འདོད་ན་གྲོགས་འདི་ལྟ་བུ་དགོས་ཀྱིས་གཞན་དུ་ནི་མ་ཡིན་ནོ། །དེ་ཡང་གསང་སྤྱོད་ནི་ཟླ་བ་གཅིག་ཁོ་ནར་ནི་ངེས་པ་མ་ཡིན་ཏེ། ཅི་སྲིད་མཆོག་གི་ཕྱག་རྒྱ་མ་རྙེད་ཀྱི་བར་གསང་སྟེ་སྤྱོད་པའོ། །གནང་བ་ཅི་ལྟར་རྙེད་པར་འགྱུར་ན། སྔགས་པ་དེ་ལ་རྣལ་འབྱོར་མ་རྣམས་ཀྱིས་ལུང་སྟོན་པར་འགྱུར་ཏེ། ཕྱག་རྒྱ་ཆེ་གེ་མོ་ཞེས་བྱ་བ་ཁྱེར་ལ་བརཏལ་ཤུགས་ཀྱི་སྤྱོད་པས་སེམས་ཅན་གྱི་དོན་གྱིས་ཅིག ཀྱེའི་རྡོ་རྗེ་འཛིན་པ་ཞེས་སྨྲ་བར་འགྱུར་ཏེ། དེ་ཡང་བུམ་པའི་དབང་གི་དུས་སུ་རྡོ་རྗེ་འཛིན་པར་དབང་བསྐུར་བ་ཐོབ་པས་སོ། །རྙེད་པ་དེ་ཡང་ཡོན་ཏན་གྱི་མིག་ཡངས་མ། གཟུགས་དང་ལང་ཚོ་ཡིས་རྣམ་པར་བརྒྱན་མ། སི་ལ་དང་ག་བུར་ཡང་དག་པར་ལྡན་པ་སྟེ་རིགས་སུམ་ཅུ་སོ་དྲུག་གི་རྣལ་འབྱོར་མར་ངེས་པའོ། །དེ་ཅི་ལྟར་སྤྱད་པ་ནི་བྱང་ཆུབ་སེམས་ཞེས་པའི་ཚིག་རྐང་དགུ་སྟེ། ཐོག་མར་དགེ་བ་བཅུ་ལས་བརྩམས་ནས་དེའི་ཆོས་རབ་ཏུ་དབྱེ་བ་ནི། སྡོམ་པ་དང་ལྡན་པ་ཀུན་རྫོབ་པ་དང་དོན་དམ་པའི་བྱང་ཆུབ་ཀྱི་སེམས་ཀྱི་རྣམ་པར་སྦྱངས་པས། ཡི་དམ་གྱི་ལྷའི་གཟུགས་ཀྱི་སེམས་དང་། བསམ་གཏན་གྱི་དམ་ཚིག་གི་སེམས་ཀྱང་གཅིག་པ་ཉིད་དུ་ཟླ་བ་གཅིག་གིས་སྐལ་པ་དང་ལྡན་པར་འགྱུར་བ་འདི་ལ་ཐེ་ཚོམ་མེད་དོ། །དེ་ལྟར་མཆོག་གི་དངོས་གྲུབ་ཐོབ་པའི་བུད་མེད་གང་ཡིན་པ་དེ་ནི་རྣམ་པར་རྟོག་པ་ཐམས་ཅད་ཡང་དག་པར་སྤངས་པ་ཡིན་པས་དེ་ལྟ་བུ་དང་ལྷན་ཅིག་ཏུ་སྤྱད་པར་བྱ་ཡིས། གཞན་གྱིས་ནི་འགྲུབ་པ་མ་ཡིན་ནོ། །ཡང་ན་ནུས་པས་དགུག་པ་ནི། ཡང་ན་ཞེས་པའི་ཚིག་རྐང་ལྔ་སྟེ། དེ་ལ་སྔ་མ་ལྟར་ལུས་སྟོན་པ་མ་བྱུང་ན་ཅི་ལྟར་བྱ་ཞེ་ན་ཡང་ན་བདག་གི་ནུས་པ་ཡིས་ལྷ་མ་ཡིན་དང་མི་རྣམས་དང་གནོད་སྦྱིན་དང་མིའམ་ཅི་ལས་ཀྱང་དེ་དག་གི་བུ་མོ་རྒྱུད་ལས་གསུངས་པའི་དགུག་པའི་སྦྱོར་བས་ཕྱག་རྒྱ་བཀུག་ལ་སྐལ་པ་དང་ལྡན་མི་ལྡན་རབ་ཏུ་བརྟག་སྟེ། ལྡན་པ་དེ་ཡང་ཁྱེར་ལ་སྤྱོད་པ་སྤྱད་པར་བྱའོ། །དེའི་དགོས་པ་ནི། བདག་གི་ཞེས་པའི་ཚིག་རྐང་ལྔ་སྟེ། དེ་ཡང་བདག་གི་དལ་བ་ཁོ་ན་མངོན་དུ་བྱེད་པའི་ཕྱིར་ལེའུ་དྲུག་པར་གང་བཤད་པའི་ཧེ་རུ་ཀ་འཇིགས་པའི་གཟུགས་ཅན་གྱི་སྤྱོད་པ་བདག་གི་ལོངས་སྤྱོད་ཀྱི་ཕྱིར་མ་གསུངས་སོ། །འོ་ན་གང་གི་ཕྱིར་ཞེ་ན་རང་ཡིད་སྡུག་གི་ཡུལ་ལ་བརྟན་མི་གཡོ་བ་རང་གི་སེམས་ཀྱིས་སོ་སོར་བརྟག་སྟེ་གཅིག་ཏུ་བྱ་བའི་ཕྱིར་རོ། །དེ་ལྟར་ཡང་གདོང་དུ་བབ་པ་འདི་ལྟར་སྣང་བ་ཀུན། །སེམས་ཀྱི་རྩ་བ་སྟོང་པ་ཉིད་དང་ལྷན་ཅིག་བྱོས། །ཞེས་ས་ར་ཧ་པས་གསུངས་སོ། །བདག་མེད་མའི་སྤྱོད་པ་ལ་གཉིས་ལས། ཞུས་པ་ནི། ཚིགས་སུ་བཅད་པ་གཅིག་སྟེ་རྡོ་རྗེ་སྙིང་པོས་བཅོམ་ལྡན་འདས་ལ་གསོལ་བ། དེ་ལྟར་བརཏལ་ཤུགས་ཀྱི་སྤྱོད་པ་ལ་གྲོགས་ཕྱག་རྒྱ་དགོས་ན་ཡུམ་བདག་མེད་མའི་རྣལ་འབྱོར་དང་ལྡན་པས་ཕྱག་རྒྱ་ཡང་བདག་མེད་མ་ཉིད་ཀྱི་རྣམ་པར་ཅི་ལྟར་བརྗོད་དེ། ཐབས་ཤེས་རབ་གཉིས་མེད་པའི་ཕྱག་རྒྱ་དང་། རང་ཡང་ཤེས་རབ་བདག་མེད་མར་བསྒོམས་པའི་ཕྱག་རྒྱ་གཉིས་དག་གིས། ལས་ཀྱི་ཕྱག་རྒྱ་ལ་བརྟེན་པའི་དངོས་གྲུབ་ཅི་ལྟར་འགྲུབ་པར་འགྱུར་ཏེ་མི་འགྱུར་རོ། །དེའི་ལན་ནི། བཅོམ་ལྡན་འདས་ཀྱིས་བཀའ་བསྩལ་པ་ཞེས་པའི་ཚིགས་སུ་བཅད་པ་གསུམ་སྟེ། དེ་ཡང་བདག་མེད་མའི་རྣལ་འབྱོར་གྱི་གཟུགས་ཀྱིས་སྤྱོད་པ་བྱ་བ་ནི་མ་ཡིན་གྱིས། བུད་མེད་ཀྱི་གཟུགས་སྤངས་ནས་བཅོམ་ལྡན་འདས་ཀྱི་གཟུགས་སུ་བྱ་སྟེ། ཅི་ལྟར་བསྒྱུར་ན་ནུ་མ་སྤངས་པ་བྷོ་ལར་འབྱུང་ཞིང་། ཀཀྐོ་ལ་ནི་ལྟེ་བའི་དབུས་སུ་གནས་ལ། འགྲམ་གཉིས་ནི་དྲིལ་བུ་དང་ཟེའུ་འབྲུ་བྷོ་ལ་ཅན་དུ་འགྱུར་ཏེ། ལུས་ཀྱི་དག་པ་གཞན་རྣམས་ནི་ཧེ་རུ་ཀའི་གཟུགས་ཉིད་ཡིན་པས་ཏིང་ངེ་འཛིན་གྱིས་འབད་པ་མེད་པར་སྐྱེས་བུར་བསྒྱུར་ཞིང་དེ་ལྟར་གསལ་བར་ནུས་པའི་ཕྱིར་རྣལ་འབྱོར་ཅན་གྱིས་ཕྱག་རྒྱའི་དངོས་གྲུབ་འགྲུབ་པར་འགྱུར་རོ། །དེ་ལྟར་བརྟན་པར་བྱེད་པའི་སྤྱོད་པ་བཤད་ནས། དེའི་དངོས་གྲུབ་ཀྱིས་མཚན་ཉིད་ལ་གཉིས་ལས། མདོར་བསྟན་ནི། ཆགས་དང་ཞེས་པའི་ཚིག་རྐང་གཉིས་ཏེ། དེ་ལྟར་སྤྱོད་པ་གོམས་པ་ལས་ཆགས་པ་སྟེ་སྐྱེ་བ་དང་འཇིག་པ་འཆི་བ་བདག་གིས་ཀྱང་ཐབས་དང་ཤེས་རབ་ཀྱི་རང་བཞིན་རྟོགས་པ་དེ་ལ་གནོད་པར་མི་འགྱུར་རོ། །དེའི་རྒྱས་པར་བཤད་པ་ནི། གང་ཕྱིར་ཞེས་པའི་ཚིགས་བཅད་དྲུག་སྟེ། དེ་ཡང་གནོད་པ་མེད་པ་གང་གི་ཕྱིར་ཞེ་ན། ཐབས་སྐྱེ་བ་ནི་འབྱུང་བ་ཉིད་ཡིན་ལ། འཇིག་པ་ནི་ཤེས་རབ་ཀྱི་ཆ་སྲིད་པ་མཐར་བྱེད་པ་རྟོགས་པའི་རྣལ་འབྱོར་ཅན་མྱ་ངན་ལས་འདས་པའི་དབྱིངས་སུ་འཇུག་པའི་ཕྱིར་དེ་ནི་འཆི་བ་ལ་རབ་ཏུ་འཇིགས་པ་ཡོད་པ་མ་ཡིན་ལ། གཞན་གྱི་དོན་དུ་སྒྱུ་མ་ལྷར་སྐྱེ་བ་དེ་ཉིད་ལའང་ཆགས་པ་མེད་པར་འགྱུར་རོ། །མ་རྟོགས་པ་ལ་ལ་དག་འཇིགས་པ་སྟེ་འཆི་བས་འཇིགས་པར་འགྱུར་ཡང་འཇིག་པ་ཉིད་དངོས་པོ་མེད་པའི་ཕྱིར། འཕེལ་བ་དང་ཟད་པར་འགྱུར་བ་མེད་པས་སྐྱེ་འཆི་ནི་རྣམ་པ་རྟོག་པ་ཙམ་མོ། །འདི་ལྟར་རྟོགས་པར་གྱུར་པའི་རྣལ་འབྱོར་ཅན་ནི་སྤྱོད་པ་མཐར་ཕྱིན་པར་བྱ་བའི་ཕྱིར་ཤིན་དུ་སྤྲོས་པ་མེད་པའི་རྣལ་འབྱོར་ལ་འཇུག་པར་བྱའོ། །རིམ་པ་གཉིས་ཀྱི་རྣམ་གཞག་ལ་གསུམ། བསྒོམ་བྱ་རིམ་གཉིས་ངེས་པར་བྱ་བ་དང་། དབྱེར་མེད་དུ་བསྒོམ་པའི་འཐད་པ་དང་། དེས་གྲོལ་བའི་རྒྱུ་མཚན་ནོ། །དང་པོ་ལ་བཞི་ལས་བསྒོམ་པའི་གོ་རིམ་ནི། བསྐྱེད་པའི་ཞེས་པ་ཚིགས་བཅད་གཅིག་སྟེ། དེ་ལྟར་བརཏལ་ཤུགས་ཀྱི་སྤྱད་པ་སྤྱོད་པ་དེའི་རྗེས་སུ་དུར་ཁྲོད་ལ་སོགས་པ་གནས་དབེན་པར་ཞེན་པའི་དངོས་པོ་ཐམས་ཅད་བཏང་སྟེ། རྣལ་འབྱོར་པས་ལས་དང་པོ་པ་བཞིན་བསྐྱེད་པའི་རིམ་པ་ཡན་ལག་དྲུག་ལྡན་གྱི་རྣལ་འབྱོར་ལ་སྐྱེས་བུ་བརཏལ་ཤུགས་ཅན་གྱིས་སྤྲོས་ཏེ་བསྒོམ་པར་བྱའོ། །དེ་ལྟར་སྤྲོས་པ་དེ་ཡང་རྨི་ལམ་དང་འདྲ་བ་སེམས་ཀྱི་སྒྲོ་བཏགས་པར་རིག་པར་བྱས་ནས་སྤྲོས་པ་དེ་དག་སྤྲོས་པ་མེད་པའི་ཕྱག་རྒྱ་ཆེན་པོས་རྒྱས་གདབ་པར་བྱའོ། །དེ་ལྟར་བསྒོམས་ནས་དེ་བརྟན་པར་བྱེད་པ་ལ། བླ་མ་གོང་མ་རྣམས་ཀྱི་བཞེད་པས་དངོས་གྲུབ་མྱུར་བའི་དོན་དུ་ལྟ་ལ་དྲག་ཤུལ་སྦྱང་བའི་ཆོ་ག་བྱས་པས་མྱུར་དུ་འགྲུབ་བོ་ཞེས་བཞེད་དོ། །འདིར་ནི་དེ་ལྟར་བསྒོམས་པ་ལ་བརྟེན་ནས་ཟུང་འཇུག་གི་ལམ་མངོན་དུ་བྱེད་པའོ། །ཟུང་དུ་འཇུག་པ་བསྟན་པ་ནི། ཅི་ལྟར་ཞེས་པའི་ཚིགས་བཅད་གཅིག་སྟེ། ཅི་ལྟར་སྒྱུ་མའི་རྟ་གླང་དང་རྨི་ལམ་གྱི་ཡུལ་དང་། བར་མ་དོའི་སྲིད་པའི་གཟུགས་ལྟར་སྣང་ཡང་བདེན་པ་མེད་པའི་རང་བཞིན་དུ་རྣལ་འབྱོར་ཅན་གྱི་རྟག་ཏུ་གོམས་པའི་སྦྱོར་བ་ལས། དཀྱིལ་འཁོར་གྱི་འཁོར་ལོ་ཉིད་ཀྱང་དེ་བཞིན་དུ་གནས་པར་འདོད་དེ། འདིར་ནི་ངེས་པའི་དོན་དུ་དུ་བ་ལ་སོགས་པ་རྟགས་ཀྱི་རིམ་པ་ཟད་ནས་སྒྱུ་མ་ལྟ་བུའི་དཀྱིལ་འཁོར་རྣལ་འབྱོར་ཅན་གྱིས་མཐོང་སྟེ་ཐམས་ཅད་དེ་ཁོ་ན་དང་དབྱེར་མེད་པར་མངོན་དུ་གྱུར་པ་ཡང་དག་པའི་ལམ་དུ་སྤྱན་རས་གཟིགས་ཀྱིས་གསུངས་སོ། །དེ་གང་ལས་བྱུང་བའི་དབང་ནི། ཕྱག་རྒྱ་ཞེས་པའི་ཚིགས་བཅད་གཅིག་སྟེ། དེ་ལྟར་རྟོགས་པར་བྱེད་པའི་གཞི་ནི་དབང་གསུམ་པ་ལས་སྐྱེས་བའི་ལྷན་ཅིག་སྐྱེས་པའམ། ཡང་ན་བཞི་པ་ཕྱག་རྒྱ་ཆེན་པོའི་དབང་བསྐུར་བའི་སྐབས་སུ་ཅི་ལྟར་ཤེས་ཤིང་མྱོང་བའི་ཞི་བ་ཆེན་པོ་དེ་མཚོན་པ་ལ་བརྟེན་པས་འདིར་རྟོགས་པ་ནི་དེའི་བྱིན་བརླབས་ཡིན་གྱིས། གཞན་ལས་ལྷན་ཅིག་སྐྱེས་པའི་དཀྱིལ་འཁོར་སྒྱུ་མ་ལྷར་སྐྱེས་པ་ནི་མེད་དོ། །ཡེ་ཤེས་དེ་ཐམས་ཅད་ཀྱི་བདག་ཉིད་དུ་བསྟན་པ་ནི། བདེ་བ་ནག་ཅེས་པའི་ཚིགས་བཅད་གཉིས་ཏེ། འདི་ཡང་བསྐྱེད་པའི་རིམ་པའི་དབང་དུ་ནི། དེ་བཞིན་གཤེགས་པ་རིགས་ལྔ་ཧེ་རུ་ཀ་དང་དྲུག་ཁ་དོག་གིས་མཚོན་ཏེ། བདེ་བ་ཆེན་པོའི་རྣམ་པ་ལས་ཤར་བར་བརྗོད་ལ་དོན་དམ་པར་ནི་ནང་དུ་བདེ་བ་ཆེན་པོ་བརྟན་པས་ནག་པོ་དང་སེར་པོ་དང་དམར་པོ་དང་དཀར་པོ་ལྗང་ཁུ་སྔོན་པོ་སྟེ་ཁ་དོག་དྲུག་དུ་སྣང་བ་དང་། རྒྱུ་བ་དང་མི་རྒྱུ་བ་དང་། ཐབས་དང་ཤེས་རབ་དང་ཀུན་ཏུ་རུ་དང་། དངོས་པོ་དང་དངོས་པོ་མེད་པ་ཐམས་ཅད་རྡོ་རྗེ་སེམས་དཔའ་བདེ་བ་ཆེན་པོའི་རང་བཞིན་སྟོང་པ་དང་སྙིང་རྗེ་རོ་ཅིག་པའི་རྣམ་པ་མངོན་དུ་འགྱུར་བར་བརྗོད་དོ། །དབྱེར་མེད་དུ་བསྒོམ་པའི་འཐད་པ་ལ་གཉིས་ཏེ། ཞུས་ལན་གྱིས་རང་གི་ངོ་བོ་རྟེན་དང་རྟེན་པ་ཡིན་པ་དང་། ཐོབ་བྱའི་འབྲས་བུའོ། །དང་པོ་རྡོ་རྗེ་སྙིང་པོས་གསོལ་པ། ཞེས་པའི་ཚིགས་སུ་བཅད་པ་གསུམ་སྟེ། བཅོམ་ལྡན་འདས་ལ་རྡོ་རྗེ་སྙིང་པོས་གསོལ་པ། བཅོམ་ལྡན་འདས་ཀྱིས་ཐམས་ཅད་བདེ་བ་དང་སྟོང་པའི་རང་བཞིན་དབྱེར་མེད་པའི་རྟོགས་པའི་རིག་པའི་རྣལ་འབྱོར་འདི་ནི་སྤྲོས་པ་དང་བྲལ་བ། གནས་སྐབས་སུ་ཡང་ཕྱག་རྒྱ་ལས་སྐྱེས་པའི་བདེ་བ་ལ་སྟོང་པའི་རྒྱས་གདབ་པའི་བདེ་བ་ཆེན་པོར་བརྗོད་ན། དོན་རྫོགས་པ་དེ་ལ་བསྒོམ་པར་བྱ་རྒྱུ་མེད་པའི་ཕྱིར་བསྐྱེད་པའི་རིམ་པ་བསྒོམས་ནས་ཅི་ཞིག་འཚལ་ཞེས་ཞུས་སོ། །ལན་ནི། བཅོམ་ལྡན་འདས་ཀྱིས་བཀའ་བསྩལ་པ། ཨེ་མ་ནི་ངོ་མཚར་བའོ། །གཞན་གྱི་དོན་ལ་བརྩོན་པའི་བྱང་ཆུབ་སེམས་དཔའ་ཆེན་པོ་ཞེས་རྡོ་རྗེ་སྙིང་པོ་ལ་བོས་ནས། དེ་ལྟར་བརྗོད་པ་དེ་རྫོགས་རིམས་ལ་དད་པའི་ཤུགས་ཀྱིས་ཐབས་བསྐྱེད་རིམས་ཀྱི་ཆ་ལས་ཉམས་པ་སྟེ། འདི་ལྟར་ཐབས་དང་ཤེས་རབ་མེད་ན་མི་འགྲུབ་པས་གཞིའི་སྐབས་སུ་ལུས་ཀྱི་དངོས་པོ་མེད་ན་དེའི་རྟེན། སེམས་མེད་ལ་དེ་མེད་ན་བདེ་བ་མེད་པར་འགྱུར་རོ། །ལམ་གྱི་སྐབས་སུ་བསྐྱེད་རིམས་ལ་རྟེན་པ་ལུས་མེད་ན་དེ་སྤྲོས་བྲལ་དུ་རྫོགས་པའི་བདེ་བ་ཆེན་པོ་ཡང་མེད་པས། དེའི་ཕྱིར་ལུས་ཀྱི་དངོས་པོ་མེད་པའི་བདེ་བ་གང་ལས་བྱུང་སྟེ། ཁྱབ་བྱ་དང་ཁྱབ་བྱེད་ཀྱི་ཚུལ་གྱིས། ཁྱབ་བྱེད་བདེ་བས་ཁྱབ་བྱ་འགྲོ་བ་ཐམས་ཅད་ལ་ཁྱབ་པ་ཉིད་དེ། དཔེར་ན་ཤིང་གི་སྤྱིས་ཤུག་པ་ལ་སོགས་པའི་བྱེ་བྲག་ཐམས་ཅད་ལ་ཁྱབ་པ་བཞིན་ནོ། །ཡང་བཟློག་པའི་ཚུལ་དུ་ཡང་གསུམ་པ། མེ་ཏོག་ཐམས་ཅད་ལ་དྲི་ཡིས་ཁྱབ་ཀྱང་། ཅི་ལྟར་མེ་ཏོག་པད་མོ་ལ་གནས་པའི་དྲི་མེ་ཏོག་པད་མོའི་དངོས་པོ་དེ་མེད་ན་དྲི་འདི་ནི་པད་མོའི་དྲིའོ་ཞེས་ཤེས་པར་མི་འགྱུར་བ་དེ་བཞིན་དུ། ལྷའི་གཟུགས་ལ་སོགས་པའི་དངོས་པོ་མེད་པས་དེ་རྣམ་པར་དག་པའི་བདེ་བ་ཆེན་པོ་ཉིད་ཀྱང་དམིགས་པར་མི་འགྱུར་པའི་ཕྱིར་ཀུན་རྫོབ་དང་དོན་དམ་པའི་རང་བཞིན་དབྱེར་མེད་པར་རིག་པར་བྱ་སྟེ་ཀུན་སྤྱོད་ལས། རྒྱུད་འདི་ཡིས་ནི་རྣལ་འབྱོར་པ། །བདེན་པ་གཉིས་ལ་ཡང་དག་བརྟེན། །ཞེས་གསུངས་སོ། །གཉིས་པ་ཐོབ་བྱའི་འབྲས་བུ་ལ་ལྔ་ལས། མདོར་བསྟན་པ་ནི། དངོས་དང་ཞེས་པའི་ཚིགས་བཅད་གཅིག་སྟེ། དེ་ལྟ་བུའི་བདེ་བ་ཆེན་པོ་དེ་ལྟ་བུ་འདི་ནི་དེ་བཞིན་གཤེགས་པའི་སྙིང་པོ་སྟེ་སེམས་དྲི་མ་མེད་པ་ཉིད་དོ། །དེ་ནི་དངོས་པོ་སྟེ་ཆོས་ཀྱི་སྐུའི་རང་བཞིན་ནོ། །དངོས་པོ་དེ་མ་ཡིན་པ་ནི་བེམ་པོ་ལ་སོགས་པ་མ་ཡིན་པའོ། །དངོས་པོའི་དོན་དམ་རྟོགས་པར་གྱུར་པ་དེའི་ཕྱིར་སངས་རྒྱས་ཀྱང་དེའོ། །གང་ཞིག་ལེ་ལོས་བསྣུན་པ་ནི་ཡང་དག་པའི་བརྩོན་འགྲུས་མེད་པའམ། ཡང་ན་དབང་པོ་གཉིས་ཀྱི་བདེ་བ་ལ་ཞེན་པའི་རྨོངས་པ་གང་གིས་དེའི་དོན་མི་ཤེས་སོ་ཞེས་འགྲེལ་ཆེན་ལས་སོ། །དེའི་རྟེན་རྣམ་པར་དག་པ་ནི་རྡོ་རྗེ་བཙུན་མོ་ཞེས་པའི་ཚིགས་བཅད་གཅིག་སྟེ། དེ་བཞིན་གཤེགས་པའི་སྙིང་པོ་དེ་རྟོགས་པར་བྱ་བའི་ཕྱིར་རྡོ་རྗེ་སྟོང་པ་བཙུན་མོའི་སྒྲས་ལེགས་པར་སྦྱངས་པའི་ཕྱག་རྒྱ་བཞི་ཡི་བྷ་ག་ནི་ཨེའི་རྣམ་པའི་ཆ་བྱད་གཟུགས་སྟེ་གླེང་གཞིའི་སྐབས་སུ་བཤད་པ་ལྟ་བུ་སྟོང་པ་ཆེན་པོ་ཡི་གེ་ལྔའོ། །སངས་རྒྱས་རིན་ཆེན་ཟ་མ་ཏོག་ནི་ཕུང་པོ་ཁམས་དང་སྐྱེ་མཆེད་ཀྱི་སངས་རྒྱས་ཐམས་ཅད་དེ་ལས་བྱུང་བའི་ཕྱིར། དེ་རྟོགས་པ་ལས་བདེ་བ་ཅན་དུ་རྟག་ཏུ་བཞུགས་པར་འགྱུར་ཏེ་རྣམ་པར་དག་པའི་དབྱིངས་ཉིད་དུ་ཆུད་པའི་ཕྱིར་རོ། །དེས་ན་ཉམས་སུ་ལེན་པ་ནི་དེའི་ཕྱག་རྒྱ་བཞི་ལས་རྟོགས་པར་བྱའོ། །རྟེན་པ་དོན་དམ་པའི་ཆོས་ཀྱི་སྐུའི་བདག་ཉིད་ནི། འཆད་པ་པོ་ང་ཞེས་པའི་ཚིགས་བཅད་གཉིས་ཏེ། དེ་ལྟར་བདེ་བ་ཅན་དུ་བཞུགས་པའི་ལྷན་ཅིག་སྐྱེས་པ་དེ་ཉིད་འཆད་པ་པོ་ང་སྟེ་སྟོན་པ་རྡོ་རྗེ་འཆང་དང་དོན་དམ་པའི་ཆོས་ཀྱང་ངའོ། །རང་ལས་ཤར་བའི་འཁོར་གྱི་ཚོགས་དང་ལྡན་པ་ཉན་པར་བྱེད་པའང་ངའོ། །འཇིག་རྟེན་ལ་ལམ་སྟོན་པ་དང་འབྲས་བུའི་བསྒྲུབ་བྱ་ཡང་ངའོ། །མ་རྟོགས་པའི་དུས་ན་འཇིག་རྟེན་དང་། རྟོགས་ན་འཇིག་རྟེན་ལས་འདས་པའང་ང་ཡིན་ནོ། །ད་དེ་རང་གང་ཞེ་ན་ལྷན་ཅིག་སྐྱེས་པའི་དགའ་བའི་རང་བཞིན་བདེ་སྟོང་དབྱེར་མེད་པའོ། །དེ་ཉིད་རྟོགས་པར་བྱ་བའི་དོན་དུ། མཆོག་དགའི་མ་མཐའ། དགའ་བྲལ་གྱི་དང་པོར་མཚོན་པའི་རྟོག་བྲལ་མ་འཁྲུལ་པ་སྐྱེས་པ་དེ་ལྟ་བུ་མཐར་ཕྱིན་པར་གྱུར་ན་མུན་པ་ལ་མར་མེ་བཏེག་པ་ལྟར་འགྱུར་བའི་ཕྱིར་ཚུལ་དེ་བཞིན་དུ་དཔེ་དོན་གྱི་ཡེ་ཤེས་ཁྱབ་བྱ་དང་ཁྱབ་བྱེད་ལ་ཡང་ཡིད་ཆེས་པར་གྱིས་ཅིག་ཅེས་སོ། །རྟེན་པ་ཀུན་རྫོབ་གཟུགས་སྐུ་བསྟན་པ་ནི། བཙུན་མོ་ཞེས་པའི་ཚིག་རྐང་དྲུག་སྟེ། བདེ་བ་ཆེན་པོ་རྟོགས་པའི་རྟེན་དབང་གི་སྐབས་སུ་བཙུན་མོ་སྔགས་སྐྱེས་མ་ལ་སོགས་པའི་བྷ་གའམ་རང་གི་ལུས་ལ་རྩ་གསུམ་འདུས་པའི་མདོའི་བྷ་ག་བདེ་བ་ཆེན་པོའི་འཁོར་ལོར་གནས་པའི་བྱང་ཆུབ་ཀྱི་སེམས་རྣམ་པར་དག་པ་ལས་གཟུགས་ཀྱི་སྐུའི་སྟོན་པ་སུམ་ཅུ་རྩ་གཉིས་ཀྱི་མཚན་དང་ལྡན་པ་གཙོ་བོ་དཔེ་བྱད་བརྒྱད་ཅུས་སྤྲས་པའི་རྣམ་པར་འགྱུར་བ་དེ་གཞིའི་སྐབས་སུ་རྟེན་ཁུ་བ་ཞེས་བྱ་བའི་རྣམ་པར་གནས་སོ། །ཀུནྡ་ལྟ་བུ་དེ་མེད་པ་ན་དོན་དམ་བདེ་བའི་གཟུགས་ཅན་ཀྱང་མེད་པར་འགྱུར་བས་གཅིག་ཁོ་ན་ལ་ལྷན་སྐྱེས་སྐྱེ་བའི་ནུས་པ་མེད་པའི་ཕྱིར་ཕན་ཚུན་ལྟོས་པ་དང་བཅས་པ་ཡིན་ནོ། །འཇུག་བསྡུ་བ་ནི། ཚིག་རྐང་གསུམ་སྟེ། སྔར་གསུངས་པའི་བསྐྱེད་རིམས་སམ། བྱང་ཆུབ་སེམས་ཀྱི་ལྷའི་རྣལ་འབྱོར་ལས་སྐྱེས་པའི་བདེ་བ་ཡིན་པ་དེའི་ཕྱིར་དེ་སངས་རྒྱས་དངོས་པོ་ཡང་མ་ཡིན་ཏེ་བདེ་བ་ཆེན་པོའི་རྣམ་པ་ཡིན་པས་སོ། །དེ་ཉིད་དངོས་པོ་མེད་པའི་ཚུལ་ཡང་མ་ཡིན་ཏེ་རྣལ་འབྱོར་ཅན་གྱིས་རྟོགས་པར་བྱ་བ་ཡིན་པའི་ཕྱིར་རོ། །དེ་སྐད་དུ་ཡང་རྣམ་པ་འདི་རྟོགས་པར་བྱ་བའི་ཕྱིར་ཐབས་གཞན་ཡོད་པར་མ་གཟིགས་པས་ཀུན་རྫོབ་ཀྱི་གཟུགས་འདི་ཉིད་བསྔགས་པ་མཛད་དོ། །ཞེས་རྡོ་རྗེ་སྙིང་པོས་གསུངས་སོ། །དེས་གྲོལ་བའི་རྒྱུ་མཚན་ལ་གསུམ། དག་པ་གསུམ་གྱི་རང་བཞིན་དང་། ཐབས་ཁྱད་པར་ཅན་དང་། རིགས་དང་རིགས་བདག་གི་དབྱེ་བའོ། །དང་པོ་ནི། ཞལ་ཕྱག་ཞེས་པའི་ཚིག་རྐང་བཅུ་སྟེ། དེ་ལྟར་ཀུན་རྫོབ་དང་དོན་དམ་པའི་རང་བཞིན་བསྐྱེད་རྫོགས་དེ་ཡང་དབྱེར་མི་ཕྱེད་པའི་དོན་ནི་བསྐྱེད་རིམས་ཞལ་ཕྱག་རྣམ་པའི་གཟུགས་ཅན་ཕུང་པོ་ལ་སོགས་པ་སྦྱོང་བར་བྱེད་ལ་མཆོག་ཏུ་བདེ་བ་ཆེན་པོ་ནི་གཟུགས་སུ་གྲུབ་པ་མེད་པས་ན། ཅི་ལྟར་བུམ་པ་དང་བུམ་པའི་ནམ་མཁའ་བཞིན་སྣང་བ་དེའི་ཕྱིར་འགྲོ་བ་ཀུན་གྱི་ལྷན་ཅིག་སྐྱེས་པའང་དེ་བཞིན་ནོ། །ཚུལ་དེ་ལ་ནི་རང་བཞིན་གྱི་ལྷན་ཅིག་སྐྱེས་པ་ཞེས་ཀྱང་བརྗོད་དེ་རྣམ་པར་དག་པ་འདི་ཡང་ལྷ་ལ་སོགས་པའི་རྣམ་པ་སྣང་བའི་སེམས་ཀྱིས་བརྟགས་ན་དེའི་རང་བཞིན་སྟོང་པ་མྱ་ངན་ལས་འདས་པ་ཉིད་ཡིན་ནོ། །འོ་ན་ལྷའི་རྣམ་པའི་གཟུགས་ཀྱི་བཞིན་ལག་དང་ཁ་དོག་ལ་སོགས་པར་གནས་པ་ནི་བསྒོམས་པས་ཅི་ཞིག་བྱ། རྣམ་པ་སྐྱེས་པ་ཙམ་ཉིད་ཀྱིས་དོན་དམ་པ་ཡང་རྣམ་པར་གནས་ཏེ། བུམ་པ་གྲུབ་པས་དེའི་ནམ་མཁའ་གྲུབ་པ་བཞིན་དུ། ལུས་དང་ལྷ་གྲུབ་པའི་ཚེ་ལྷན་ཅིག་སྐྱེས་པ་གྲུབ་པས་ཐབས་ཀྱི་རྩོལ་བ་དོན་མེད་པར་འགྱུར་རོ་ཞེ་ན། འོན་ཀྱང་བག་ཆགས་ཕལ་པ་སྦྱོང་བར་བྱེད་པའི་དོན་དུ་དེ་དང་དེའི་གཉེན་པོའི་ཆ་བསྟན་པར་བརྗོད་པའོ། །ཐབས་ཁྱད་པར་ཅན་བསྟན་པ་ལ་གཉིས་ལས། དང་པོ་དཔེ་བཞིས་ཐབས་དངོས་བསྟན་པ་ནི། ཚིགས་སུ་བཅད་པ། དྲུག་སྟེ། དེ་ཡང་བག་ཆགས་ཕལ་པ་ལ་སྦྱོང་བར་བྱེད་པ་ལ། ཐབས་ཀྱི་ཡན་ལག་ནི་བསམ་གྱིས་མི་ཁྱབ་མོད་ཀྱིས་མདོར་བསྡུས་ཏེ་གསུངས་པ། དཔེར་ན་བོང་ང་ལ་སོགས་པ་དུག་གི་དུམ་བུ་གང་ཟབ་པ་ཉིད་ཀྱིས་སྐྱེ་བོ་ཐམས་ཅད་འཆི་བར་འགྱུར་བ་ལ། དུག་གི་དེ་ཉིད་ཤེས་པ་དེས། དངུལ་ཆུ་ལ་སོགས་པའི་དུག་གིས་སྔར་གྱི་དུག་རབ་ཏུ་འབིགས་པར་བྱེད་ལ་སྨན་དུ་འགྱུར་བ་བཞིན། རྣམ་པར་རྟོག་པའི་དུག་ཀྱང་གཉེན་པོ་ཐབས་མཁས་པའི་རྟོགས་པས་འབིགས་པར་འགྱུར་རོ། །དེའི་དོན་འོད་སྲུངས་ཀྱིས་ཞུས་པ་ལས་ཀྱང་། འོད་སྲུངས་འདི་ལྟ་སྟེ། ཡེ་ཤེས་དང་ཐབས་མཁས་པས་ཟིན་པའི་ཉོན་མོངས་པའི་དུག་གིས་འཁོར་བར་འཆིང་མི་ནུས་སོ་ཞེས་གསུངས་སོ། །དཔེ་གཉིས་པ་ནི། ཅི་ལྟར་སྐྱ་རྦབ་ཀྱི་རླུང་གིས་ཟིན་པ་དེ་ལ་གྲང་རླུང་གི་རྒྱུ་མོན་སྲན་གྲེའུ་ཡི་ཟ་བ་བྱིན་པས་ཕན་པར་འགྱུར་ཏེ་འདི་ནི་བཟློག་པའི་སྨན་དུ་རྣམ་པར་བརྟགས་པས་དེ་ལྟར་རླུང་གིས་རླུང་ལ་བསྣུན་པར་བྱེད་པ་དང་། རྣམ་པར་རྟོག་པ་ལ་རྣམ་པར་རྟོགས་པས་སུན་འབྱིན་པ་དང་། སྲིད་པ་ལ་སྲིད་པ་ཉིད་ཀྱིས་རྣམ་པར་དག་པར་བྱེད་སྟེ་འདི་ནི་ཐབས་མཆོག་ཏུ་གྱུར་པ་ཡིན་ནོ། །དཔེ་གསུམ་པ་ནི། ཅི་ལྟར་རྣམ་བར་ཆུའི་ཐིགས་པ་ཞུགས་པས་ན་བ་ལ་ཆུ་གཞན་གྱིས་ནི་དགུག་པར་བྱ་བ་དེ་བཞིན་དུ། ཕུང་པོ་ལ་སོགས་པའི་དངོས་པོའི་རྣམ་རྟོག་ཀྱང་དེ་ཉིད་ལྷའི་རྣམ་པར་ངེས་པ་ཡིས་སྦྱངས་བྱའོ། །དཔེ་བཞི་པ་ནི། ཅི་ལྟར་མེ་ཡིས་ཚིགས་པ་ཡིན་ན་མྱུར་དུ་ཞི་བར་འདོད་པས་སླར་ཡང་མེ་ཡིས་གདུང་པར་བྱས་ན་མྱུར་དུ་ཞི་བ་དེ་བཞིན་དུ། འདོད་ཆགས་ཀྱི་མེ་ཡིས་རྒྱུད་ཚིག་པར་གྱུར་པ་ལ་དེ་བས་ཆེས་སྟོབས་ལྡན་དུ་གྱུར་པའི་འདོད་ཆགས་ཀྱི་མེ་ཡིས་གདུང་པར་བྱས་ན་དེ་ཉིད་རྣམ་པར་རྟོག་པ་སུན་ཕྱུང་སྟེ་ཞི་བར་འགྱུར་རོ། །མདོར་ན་སྐྱེ་བོ་རྣམས་ཀྱི་མི་བཟད་པའི་ལས་གང་གིས་འཆིང་བར་འགྱུར་བ་དེ་ལ་ཐབས་དང་བཅས་ན་དེ་ཉིད་ཀྱིས་སྲིད་པའི་འཆིང་བ་ལས་གྲོལ་བར་འགྱུར་ཏེ། ཆགས་པས་འཇིག་རྟེན་ཐམས་ཅད་འཆིང་བར་འགྱུར་བ་ཡིན་ཡང་སེམས་ཅན་རྣམས་འཁོར་བ་ལས་སྒྲོལ་བར་འདོད་པའི་འདོད་ཆགས་ཉིད་ཀྱིས་རྣམ་པར་གྲོལ་བའི་སངས་རྒྱས་ཀྱང་ཐོབ་པར་འགྱུར་རོ། །གཞན་ཡང་འཕགས་པ་བུད་མེད་འགྱུར་བའི་མདོ་ལས། གདུག་པའི་སྦྲུལ་གྱིས་ཟིན་པ་ཡི། །དུག་ནི་དུག་གིས་ཞི་བགྱིད་ལྟར། །དེ་བཞིན་འདིས་ནི་བདག་ཅག་གི །འདོད་ཆགས་དུག་ནི་དུག་གིས་བཅོམ། །ཞེས་གསུངས་སོ། །དེ་ཉིད་ཐེག་པ་འོག་མས་མི་ཤེས་པ་ནི་ཚིག་གཉིས་ཏེ། འདི་ལྟ་བུའི་ཐེག་པ་ཆེན་པོའི་བཟློག་པའི་བསྒོམ་པ་འདི་ཉིད་ནི་སངས་རྒྱས་པའི་མུ་སྟེགས་ཅན་ཉན་ཐོས་ལ་སོགས་པ་ཡིས་ཀྱང་མི་ཤེས་ན་གཞན་གྱིས་ཤེས་པ་ལྟ་སྨོས་ཀྱང་ཅི་དགོས། རིགས་དང་རིགས་བདག་གི་དབྱེ་བ་ལ་ཡང་གསུམ་ལས། མདོར་བསྟན་པ་ནི། འབྱུང་བ་ཞེས་པའི་ཚིགས་བཅད་ཅིག་སྟེ། དེ་ལྟར་སྦྱོང་བྱེད་ཐབས་ཀྱི་རིམ་པ་ལ་སྦྱང་གཞི་རྣམ་པར་དབྱེ་བ་ཤེས་དགོས་པས། ཐོག་མར་ལུས་མངོན་པར་འགྲུབ་པའི་དུས་སུ་འབྱུང་བ་ལྔའི་རང་བཞིན་ལས་ཀུན་ཏུ་རུའི་གནས་སྐབས་ལྔ་རུ་གྱུར་ཏེ་དགའ་བ་ཆེན་པོ་ཅིག་ཉིད་ལས་གནས་སྐབས་ཀྱི་དབྱེ་བས་ལྔ་རུ་འགྲོ་བར་འགྱུར་རོ། །དེ་ཉིད་རྒྱས་པར་བཤད་པ། བྷོ་ལ་ཞེས་པའི་ཚིགས་སུ་བཅད་པ་ཕྱེད་དང་དྲུག་སྟེ། དེ་ཡང་གཞིའི་སྐབས་སུ་ཐབས་དང་ཤེས་རབ་ཀྱི་བྷོ་ལ་ཀ་ཀོ་ལ་སྦྱོར་བ་ལས། ཐོག་མར་རེག་པ་སྲ་བའི་བག་ཆགས་ནི་སྲ་བ་སའི་ཁམས་ཡིན་ལ་དེ་ཉིད་གཏི་མུག་དག་པ་ཆོས་ཀྱི་དབྱིངས་ཀྱི་ཡེ་ཤེས་ཡིན་པའི་ཕྱིར་གཏི་མུག་རྣམ་པར་དག་པ་རྣམ་པར་སྣང་མཛད་དུ་བརྗོད་དོ། །གང་གི་ཕྱིར་བྱང་ཆུབ་ཀྱི་སེམས་གཤེར་བ་ནི་ཆུའི་ཁམས་སུ་བརྗོད་ལ། ཆུ་ཞེ་སྡང་དག་པ་མི་བསྐྱོད་པ་མེ་ལོང་ལྟ་བུའོ། །གཉིས་ཀྱིས་བསྐྱོད་པའི་སྦྱོར་བ་ལས་སྐྱེས་པའི་དྲོད་ནི་མེ་འདོད་ཆགས་དག་པ་འོད་དཔག་ཏུ་མེད་པ་སྟེ་སོ་སོར་རྟོག་པའི་ཡེ་ཤེས་སོ། །ཀ་ཀོ་ལར་རླུང་སེམས་རྒྱུ་བ་གཡོ་བ་རླུང་གི་ཁམས་ཕྲག་དོག་དག་པ་དོན་ཡོད་གྲུབ་པ་ཡིན་པས་བྱ་བ་གྲུབ་པའོ། །བདེ་བའི་འདོད་ཆགས་རྣམ་པར་དག་པ་ཁྲག་གི་རང་བཞིན་གྱི་དགའ་བ་ནམ་མཁའི་མཚན་ཉིད་སེར་སྣ་དག་པ་རིན་ཆེན་འབྱུང་ལྡན་དང་མཉམ་པ་ཉིད་ཀྱི་རང་བཞིན་ཏེ། དེ་ལྟར་སེམས་དང་བྱང་ཆུབ་ཀྱི་སེམས་ཆེན་པོ་གཅིག་ལས་གནས་སྐབས་ལྔའི་གཟུགས་ཀྱིས་རྣམ་པར་མཚོན་པས་ལུས་གནས་པ་ན་ཡང་དེ་ལྟར་གནས་ལ། འཆི་བ་ཡང་སྐུ་ལྔའི་བདག་ཉིད་ཅན་དུ་འཆི་བས་སྦྱོང་པར་བྱེད་པ་ལྷའི་ཁམས་ཀྱང་དེ་ལྟར་བསྟན་ལ་འབྲས་བུ་ཡང་གནས་སྐབས་དེ་ཉིད་ཀྱི་དག་པ་ཡིན་ནོ། །རིགས་ཀྱི་དབྱེ་བ་ནི། རིགས་ནི་ཞེས་པའི་ཚིགས་སུ་བཅད་པ་ཕྱེད་དང་བཞི་སྟེ། དེ་ལྟར་རྩ་བའི་རིགས་ལྔ་པོ་དེ་ཉིད་ལས་རིགས་ཀྱི་དབྱེ་བ་སྟོང་ཕྲག་དུ་མ་སྐྱེས་པ་ཉིད་དེ། དེའི་ཕྱིར་འདི་དག་རང་བཞིན་གཅིག་པ་ཉིད་དོ། །གཅིག་པ་དེ་ནི་བདེ་བ་ཆེན་པོ་ཞེས་བྱ་བ་མཆོག་དུ་ཕན་པར་བྱེད་པའི་བདག་ཉིད་ཡིན་མོད་ཀྱི། འདིར་སྒྲིབ་པ་དང་འབྲེལ་བའི་ཆ་ནས་འདོད་ཆགས་ལ་སོགས་པའི་སེམས་ལྔ་ཡིས་དབྱེ་བས་ནི་ལྔ་རུ་འགྲོ་བར་འགྱུར་རོ། །དེ་ལས་གང་གཱའི་ཀླུང་གི་བྱེ་མ་སྙེད་དུ་ཡང་འགྱུར་མོད་ཀྱི། འདིར་རེ་ཤིག་དབྱེ་བ་མཛད་པ། སེམས་ཀྱི་རྒྱལ་པོ་རིགས་ཅིག་ལས་བྱུང་བའི་དེ་བཞིན་གཤེགས་པའི་རིགས་ལྔའོ། །རིགས་དུ་མ་ནི་ཉི་ཤུ་རྩ་ལྔའོ། །དེ་རྣམས་ཀྱི་རིགས་ལས་རིགས་རྣམས་བརྒྱ་ནི་དྲི་མ་མེད་པ་ལས། རྩ་བའི་རིགས་ལྔའི་རེ་རེ་ལ་ལྔ་ལྔར་ཕྱེ་བས་ཉི་ཤུ་རྩ་ལྔའོ། །བདེ་བ་ཆེན་པོ་དང་དྲུག་དྲུག་ཏུ་ཕྱེ་བས་སུམ་ཅུ་སོ་དྲུག་གོ་གོང་མ་ལ་ཐབས་དང་ཤེས་རབ་ཀྱི་དབྱེ་བས་ལྔ་བཅུའོ། །དེ་ལས་ལུས་དང་བསམ་པའི་དབང་གིས་རིགས་བརྒྱའོ་ཞེས་གསུངས་སོ། །དེ་ལྟར་བརྒྱ་ལས་འབུམ་དང་བྱེ་བ་དང་གྲངས་མེད་པར་ཡང་འགྱུར་ཏེ་ཐམས་ཅད་ཀྱང་མཆོག་ཏུ་དགའ་བའི་རིགས་ལས་བྱུང་བའོ། །ལེའུ་ཡི་མཚན་ནི། ཀྱེའི་རྡོ་རྗེ་མཁའ་འགྲོ་མ་དྲ་བའི་སྡོམ་པ་ལས་བསྐྱེད་རྫོགས་ཀྱི་དངོས་གྲུབ་གཏན་ལ་དབབ་པའི་ལེའུ་སྟེ་རིམ་པར་ཕྱེ་བའི་གཉིས་པའོ།། །།