བརྟག་པ་གཉིས་པ། དྲུག་པ་བྲིས་སྐུའི་ཆོ་གའི་ལེའུ།
ལེའུ་འདི་ནས་སྤྱོད་པའི་རྣལ་འབྱོར་གྱི་དུས་སུ་དགོས་པའི་རུས་པའི་རྒྱན་འཛིན་པའི་དོན་དང་བསྐྱེད་རིམས་ཀྱི་ཡན་ལག་དུ་དགོས་པའི་བྲིས་སྐུ་འཆད་དོ། །འདི་ལ་གསུམ། ཕྱག་རྒྱའི་དག་པ་དང་། བྲིས་སྐུ་དང་། ལེའུ་ཡི་མཚན་ནོ། །དང་པོ་ལ་གཉིས་ལས། མདོར་བསྟན་པ་ནི། ལྷ་མོ་ལ་ནི་ཞེས་པའི། ཚིགས་བཅད་གཉིས་ཏེ། འདི་ཡང་ཁོང་སྡོམ་གསུམ་ལས་ལམ། རྫོགས་རིམས་ཀྱི་ཡན་ལག་གོ །འདི་ཡང་ལྷན་ཅིག་སྐྱེས་པའི་ཡེ་ཤེས་ཀྱི་བདེ་བའི་དོན་ཏེ། ལྷ་མོ་དང་མཉམ་པར་འཁྱུད་ཅིང་། རྡོ་རྗེ་ཐོད་པའི་བདེ་སྟོང་མཉམ་པར་སྦྱར་ནས། ནུ་མ་ལ་སོགས་པ་བདེ་བ་ཆེན་པོའི་གནས་རྣམས་བསྐུལ་བར་མཛད་པ་སྟེ། འདི་ཡི་ངེས་པའི་དོན་ནི། ཆགས་པ་དང་བཅས་པའི་ལྷན་ཅིག་སྐྱེས་པའི་སྦྱོར་བའི་དོན་མཚོན་པར་མཛད་པའོ། །དེ་ལྟར་རོལ་པ་མཛད་ནས་ཕྱག་རྒྱ་ལྔ་རབ་ཏུ་ཕྱེ་སྟེ་གསུངས་སོ། །རྒྱས་པར་བཤད་པ་ནི། བླ་མ་སློབ་དཔོན་ཞེས་པའི་ཚིགས་སུ་བཅད་པ་ཕྱེད་དང་གསུམ་སྟེ། དེ་ལྟར་རུས་པའི་རྒྱན་ལྔ་འཛིན་པའི་དོན་ཡང་། བླ་མ་དང་རང་འདོད་པའི་ལྷ་ལ་ཕྱག་འཚལ་བའི་དོན་དུ་སྤྱི་བོར་འཁོར་ལོ་འཛིན་པའོ། །རྡོ་རྗེ་འཛིན་པ་ལ་གཞན་གྱིས་སྨོད་ཚིག་མི་ཉན་པའི་ཕྱིར། རྣ་བ་ལ་རྣ་ཆའོ། །སྔགས་ཀྱི་བཟླས་པ་འཛིན་པ་ནི། མགུལ་བརྒྱན་ནོ། །གདུ་གུ་ནི་སྲོག་ཆགས་གསོད་པ་སྤངས་པའི་ཚུལ་ཁྲིམས་སོ། །ཕྱག་རྒྱ་བསྟེན་པ་ནི་སྐེ་རགས་ཏེ་འདི་རྣམས་ནི་མི་བསྐྱོད་པ་ལ་སོགས་པའི་སངས་རྒྱས་ལྔ་རྣམ་པར་དག་པས་རྟག་ཏུ་ལུས་ལ་ཕྱག་རྒྱ་འདི་དག་གིས་གདབ་པའོ། །འདི་ཡི་ངེས་དོན་ནི་འགྲེལ་ཆེན་ལས། སྤྱི་བོ་ལ་སོགས་པའི་གནས་རྣམས་སུ་རླུང་རྣམ་པ་ལྔ་བཅིངས་པས་བྱང་ཆུབ་ཀྱི་སེམས་འགོག་པར་བྱེད་པའོ། །བྲིས་སྐུ་ལ་གཉིས་ཏེ། ཞུས་པ་དང་། ལན་ནོ། །དང་པོ་ནི་དེ་ནས་ཞེས་པའི་ཚིག་རྐང་དགུ་སྟེ། འདི་ནི་བསྐྱེད་པའི་རིམ་པའི་ཡན་ལག་ཏུ་རྟེན་བྲིས་སྐུའི་ཆོ་ག་གསུངས་ཏེ། ཕྱག་རྒྱའི་དོན་གསུངས་པ་དེ་ནས་རབ་ཏུ་བཞད་པ་ནི་དགྱེས་པའི་དོན་ནོ། །ཚེམས་ཀྱིས་མ་མཆུ་བཙིར་བ་ནི་བདེ་བས་མཆོད་དེ། ཀྱེའི་རྡོ་རྗེ་ལྷན་ཅིག་སྐྱེས་པའི་གཟུགས་ཅན་ལ་ལྷ་མོ་བདག་མེད་མས་ཞུས་པ། གཙོ་བོ་ཞེས་བོས་ནས་ཆོ་ག་གང་དང་བྱ་བ་གང་གིས་དགྱེས་པའི་རྡོ་རྗེ་བྲིས་སྐུའི་ཆོ་ག་བྱེད་བཅོམ་ལྡན་འདས་ཀྱིས་གསུང་དུ་གསོལ་ཞེས་པའོ། །ལན་ལ་གསུམ་ལས། བྲི་བའི་ཐབས་ནི། བཅོམ་ལྡན་འདས་ཞེས་པའི་ཚིག་རྐང་བཅུ་སྟེ། བཅོམ་ལྡན་འདས་ཀྱིས་བཀའ་སྩལ་པ། འདིར་རི་མོ་བྲི་བར་བྱེད་པའི་བྲི་མཁན་དབང་བསྐུར་བ་ཐོབ་ཅིང་དམ་ཚིག་ཅན་དང་། བསྒྲུབ་པ་པོ་ཡང་དམ་ཚིག་ཅན་གྱིས་བྲིས་སྐུ་འཇིགས་པ་བྲི་བ་ཉིད་དོ། །བྲི་བའི་ཚོན་རྐོང་ནི་སྐྱེས་པའི་ཐོད་པ་མཚོན་ཁ་དོག་ལྔ་དང་། རོ་ཡི་སྐྲའི་པིར་གྱིས་བྲིས་སྐུ་བླ་ན་མེད་པའི་མཛེས་པ་བྲི་བར་བྱའོ། །བྲིས་གཞི་ཡི་སྐུད་པ་འཁལ་བ་དང་རས་ཡུག་འཐག་པ་ཡང་དམ་ཚིག་དང་ལྡན་པས་བྱས་ན་དངོས་གྲུབ་མྱུར་དུ་འགྲུབ་པར་འགྱུར་རོ། །བྱིན་བརླབས་ཀྱི་རིམ་པ་ནི། དམ་ཚིག་ཞེས་པའི་ཚིག་རྐང་དགུ་སྟེ། དེ་ལྟར་དམ་ཚིག་དང་ལྡན་པའི་རྣལ་འབྱོར་ཅན་གྱིས་བྱིན་གྱིས་བརླབ་པའི་རིམ་པ་ཡང་། ཟླ་བ་ཡར་གྱི་ངོའམ་ཟླ་བ་མར་གྱི་ངོའི་བཅུ་བཞི་པ་ལ་གནས་དབེན་པར་ཉི་མ་ཕྱེད་ནས་མ་རུངས་པ་ནི་བདུད་འདུལ་བའི་སེམས་ཀྱིས་ལུས་ལ་རུས་པའི་རྒྱན་དང་། རྣམ་པར་རྟོག་པ་སྤངས་ཏེ་དམ་ཚིག་གི་བཏུང་བ་ཉུང་ཟད་ཙམ་དང་བཅས་པས་འབགས་པ་དང་མ་དག་པའི་ཉེས་པ་ཐམས་ཅད་བསལ་ཏེ་དམ་ཚིག་གི་དགའ་སྟོན་བྱའོ། །བྱིན་གྱིས་བརླབ་པའི་གྲོགས་ནི། བཞིན་བཟང་ཞེས་པའི་ཚིགས་བཅད་གཅིག་སྟེ། བཞིན་བཟང་ཞིང་སྙིང་རྗེ་དང་ལྡན་པའི་སྐལ་བ་བཟང་མོའི་གྲོགས་ཀྱིས་ཀྱང་བཅོམ་ལྡན་འདས་ལ་མེ་ཏོག་ལ་སོགས་པས་མཆོད་པར་བྱའོ། །འདི་རྣམས་ཀྱི་ངེས་པའི་དོན་ཡང་། ཆོས་ཀྱི་འབྱུང་གནས་བྲིས་སྐུ་མཆོག བྱང་ཆུབ་སེམས་ནི་ལྷ་རྣམས་ཉིད། །བདེ་བ་ཆེན་པོའི་གཟུགས་ཀྱིས་དེ། །རྣལ་འབྱོར་རིག་པས་རྟག་དུ་མཆོད། །ཞེས་ནཱ་རོ་པས་གསུངས་སོ། །ལེའུ་ཡི་མཚན་ནི་ཀྱེའི་རྡོ་རྗེ་ལས་བྲིས་སྐུ་གསལ་བར་བསྟན་པ་སྟེ་རིམ་པར་ཕྱེ་བའི་དྲུག་པའོ།། །།