བརྟག་པ་གཉིས་པ། བརྒྱད་པ་གདུལ་དཀའ་འདུལ་བའི་ལེའུ།
ལེའུ་འདི་ཡང་བསྐྱེད་རྫོགས་ཀྱི་ཡན་ལག་ཕྱག་རྒྱ་པད་མ་ཅན་གྱི་མཚན་ཉིད་དང་། ཐུན་མཚམས་ཀྱི་སྨོན་ལམ་གདབ་པ་དང་། ཐེག་པའི་རིམ་འཇུག་གསུངས་པ་ལ་གསུམ་སྟེ། ཞུ་བའི་ཚིག་གིས་མཚམས་སྦྱོར་དང་། གཞུང་དངོས་དང་། ལེའུ་མཚན་ནོ། །དང་པོ་ནི། དེ་ནས་ཞེས་པའི་ཚིགས་བཅད་ཅིག་སྟེ། བཟའ་བ་བཤད་པ་དེ་ནས་རྣལ་འབྱོར་མ་བདག་མེད་མས་ཞུས་པ། ཀུན་རྫོབ་རྣམ་པའི་གཟུགས་སྔགས་སྐྱེས་མ་ལ་སོགས་པ་ལ་བརྟེན་ནས། དེ་ལས་བྱུང་བའི་བདེ་བ་དེས་སྣང་བ་ཐམས་ཅད་ལ་རྒྱས་འདེབས་པས་ན་ཕྱག་རྒྱ་ཆེན་པོ་དེའི་རྒྱུ་རུ་ཇི་ལྟར་འགྱུར། དོན་སྟོང་ཉིད་ལ་སྙིང་རྗེའི་བདེ་བ་སྦྱིན་པའི་རྟགས་སུ། བདག་མེད་མ་ལ་བདེ་བ་སྦྱིན་པའི་ཧེ་རུ་ཀས་བཤད་དུ་གསོལ་ཅེས་པའོ། །གཞུང་ལ་གསུམ་ལས་པད་མ་ཅན་གྱི་མཚན་ཉིད། སྨོན་ལམ། གདུལ་དཀའ་འདུལ་བའི་རིམ་པའོ། །དང་པོ་ནི་བཅོམ་ལྡན་འདས་ཞེས་པའི་ཚིགས་སུ་བཅད་པ་ཕྱེད་དང་ལྔ་སྟེ། ལས་ཀྱི་ཕྱག་རྒྱ་ལ་བརྟེན་པའི་རྫོགས་རིམས་ཀྱི་སྐབས་སུ་ཕྱག་རྒྱ་རིགས་ལྔ་གསུངས་པ་རྣམས་ཀྱི་གཙོ་བོར་གྱུར་པ་པད་མ་ཅན་གྱི་མཚན་ཉིད། བཅོམ་ལྡན་འདས་ཀྱིས་བཀའ་སྩལ་པ། ཕྱག་རྒྱ་འདི་ནི་ཤིན་དུ་རིང་བ་དང་ཐུང་བ་མ་ཡིན་པ། གནག་པ་དང་དཀར་བ་མ་ཡིན་པ་སྔོ་བསངས། མིག་པད་མའི་འདབ་མའི་རྣམ་པ་ཅན། དེའི་དབུགས་དང་རྡུལ་ཡང་རི་དྭགས་ཀྱི་ལྟེ་བའི་དྲི་ཅན། པད་མ་དང་དབང་པོའི་མཆོག་ལས་ཀྱང་པད་མ་ཨུཏྤ་ལ་དང་ཨ་ཀ་རུའི་དྲི་དང་མཚུངས་པའི་བྱང་ཆུབ་ཀྱི་སེམས་འབྱུང་བའི་བཅུད་ཀྱིས་ལེན་གྱི་རྫས་ཆེན་པོར་འགྱུར་རོ། །འདི་ནི་སྤྱོད་ལམ་དལ་ཞིང་སྐྱོན་གྱིས་མི་གཡོ་བ་སྙན་པར་སྨྲ་ཞིང་ཡིད་དུ་འོང་བ། སྐྲ་བཟངས་དཔྲལ་བའི་དབུས་ན་རི་མོ་གསུམ་པ་འདི་ནི་པད་མ་ཅན་དུ་བརྗོད་དེ་ལྷན་ཅིག་སྐྱེས་པའི་གཟུགས་ཅན་མ་འདི་རྙེད་ན་ནི། ཕྱག་རྒྱ་ཆེན་པོའི་དངོས་གྲུབ་ཀྱི་རྒྱུར་འགྱུར་ཏེ་འགྲེལ་ཆེན་ལས། ལྷ་མོ་འདི་ཉིད་ཅིག་པུ་ཉིད། མཐའ་ཡས་ཡོན་ཏན་སྟེར་བའོ། །དེ་ནི་བྷ་ག་བཟང་མོར་ཤེས། །སྒྲུབ་པ་པོ་ཡིས་མཆོག་སྟེར་རབ། །ཞེས་གསུངས་སོ། །འདི་ལས་གཞན་པ་རྣམས་ནི། ཡ་མི་ནི་དང་སྐྲག་བྱེད་མ། །ནགས་ཚལ་མ་དང་དེ་བཞིན་འཇིགས། གཟུགས་ཀུན་སྤྱོད་མ་མཛེས་མ་དག །བྷ་སུ་མཁའ་འགྲོ་མ་རྣམས་བདུན། །ཞེས་བྱ་བ་ལ་སོགས་པ་བདེ་མཆོག་བསྡུས་པ་ལས་གསུངས་པ་བཞིན་དུ། འདི་དག་ནི་ཕྱག་རྒྱ་ཆེན་པོའི་དངོས་གྲུབ་བསྒྲུབ་པར་བྱེད་པ་རྣམས་ཡིན་ནོ། །སྨོན་ལམ་གདབ་པ་ལ་གཉིས་ལས། ཞུས་པ་ནི། དེ་ནས་རྣལ་འབྱོར་མ་བདག་མེད་མས་གསོལ་བ། བཅོམ་ལྡན་འདས་སྨོན་ལམ་ཇི་ལྟར་གདབ་པར་བགྱི་ཞེས་སོ། །ལན་ནི། བཅོམ་ལྡན་འདས་ཀྱིས་བཀའ་སྩལ་པ་ནས་ཚིགས་བཅད་གཉིས་ཏེ། འདིའི་དོན་ཡང་། རིགས་བཟང་པོར་སྐྱེ་བར་ཤོག་ཅིག དེ་བཞིན་དུ་དམ་ཚིག་ཅན་དང་། བསྙོན་ཅིང་བརྩད་དུ་མེད་པའི་ཀྱེའི་རྡོ་རྗེའི་གདམ་ངག་གི་བཀའ་མ་ཉམས་པའི་བླ་མ་དང་ཕྲད་པ་དང་། བླ་མ་དེ་ལ་གུས་པ་དང་། བླ་མ་དང་རང་གཉིས་ཀ་ཡང་སྙིང་རྗེ་དང་ལྡན་པར་ཤོག་ཅིག་ཅེས་པའོ། །སྐྱེ་ཞིང་སྐྱེ་བ་ནི་སྐྱེ་བ་ཐམས་ཅད་དུ། ལག་པས་རྡོ་རྗེ་ནི་བྱང་ཆུབ་ཀྱི་སེམས་ཀྱི་བརྡའ། དྲིལ་བུ་ནི་ཤེས་རབ་ཀྱི་ཕ་རོལ་དུ་ཕྱིན་པའི་བརྡའ། ཟབ་མོའི་ཆོས་ནི་ཀྱེའི་རྡོ་རྗེའི་རྒྱུད་དེ་ཀློག་པ་དང་ཉན་པ་དང་བཤད་པར་ཤོག་ཅིག་ཅེས་པའོ། །དོན་དམ་པའི་བཙུན་མོ་ནི་སྟོང་ཉིད་དོ། །ཁུ་བ་ནི་སྟོང་པ་ཉིད་རྟོགས་པའོ། །བཟའ་བ་ནི་ལོངས་སྤྱོད་པར་ཤོག་ཅིག་ཅེས་པའོ། །ཀུན་རྫོབ་ཀྱི་བཙུན་མོ་ནི་སྔགས་སྐྱེས་མ་ལ་སོགས་པའོ། །ཁུ་བ་ནི་ཐིག་ལེ་དཀར་དམར་མཉམ་ཟས་ཅན་ནི་རླུང་སྟོབས་ཀྱིས་ལེན་པར་ཤོག་ཅེས་པའོ། །རང་ལུས་ཐབས་ལྡན་ཀྱི་བཙུན་མོ་ནི་འཁོར་ལོ་བཞིའི་རྩ་སུམ་ཅུ་རྩ་གཉིས་སམ་ཨ་ཝཾ་དྷུ་ཏིའོ། །ཁུ་བ་ནི་དེ་ལས་འཛགས་པ་ཉམས་སུ་མྱོང་བའི་བདེ་བའོ། །མཉམ་ཟས་ཅན་ནི་དེ་ལོངས་སྤྱོད་པར་ཤོག་ཅིག་ཅེས་པའོ། །གདུལ་དཀའ་འདུལ་བའི་རིམ་པ་ལ་གསུམ་ལས། ཞུས་པ་ནི། དེ་ནས་ཞེས་པའི་ཚིགས་བཅད་ཅིག་སྟེ། དེ་ལྟར་སྨོན་ལམ་བསྟན་པ་ལ་ལྷ་མོ་དགྱེས་ནས་ཚིག་འདི་ཉིད་ཡང་ཞུས་པའོ། །གང་ཞུས་ན། སྐལ་པ་མེད་པའི་སེམས་ཅན་རྣམས་འདུལ་བར་དཀའ་བས་ཐབས་གང་གི་རིམ་པས་འདུལ་བ་ལགས་ཞེས་སོ། །ཐེག་པའི་རིམ་པ་རྒྱས་བཤད་ནི། བཅོམ་ལྡན་འདས་ཞེས་པའི་ཚིགས་རྐང་དགུ་སྟེ། ལན། བཅོམ་ལྡན་འདས་ཀྱིས་བཀའ་སྩལ་བ། དང་པོར་འཁོར་བ་ལས་བློ་ཟློག་ཅིང་མྱ་ངན་ལས་འདས་པ་ལ་འདུན་པར་བྱས་ནས་ཡན་ལག་བརྒྱད་དང་ལྡན་པའི་གསོ་སྦྱོང་སྦྱིན་པར་བྱའོ། །དེའི་རྗེས་སུ་བསླབ་པའི་གནས་བཅུ་དང་ལྡན་པའི་དགེ་ཚུལ་ལམ། ཡང་ན་དགེ་བསྙེན་ནས་དགེ་སློང་གི་བར་སྦྱིན་པར་བྱའོ། །དེ་ནས་ལྟ་བ་བསྟན་པ་ནི་བྱེ་བྲག་དུ་སྨྲ་བ་དང་མདོ་སྡེ་པའི་གཟུང་བ་རྡུལ་ཕྲན་དང་འཛིན་པ་སྐད་ཅིག་ཆ་བཅས་ཆ་མེད་ལ་སོགས་པ་བསྟན་ནས། དེའི་འོག་ཏུ་རྣལ་འབྱོར་སྤྱོད་པ་ནི་སེམས་ཙམ་སྟེ་ཆོས་ཐམས་ཅད་སེམས་ཙམ་ལ་སོགས་པ་བསྟན་པར་བྱའོ། །དེའི་རྗེས་སུ་དབུ་མ་ནི་སྤྲོས་པའི་མཐའ་བརྒྱད་དང་བྲལ་བས་ན། དེ་ནས་བྱ་སྤྱོད་རྣལ་འབྱོར་གྱི་སྔགས་ཀྱི་རིམ་པ་ཀུན་ཤེས་པར་བྱས་ནས། ཐམས་ཅད་ཀྱི་རྗེས་སུ་ཀྱེའི་རྡོ་རྗེ་སྟོང་པ་དང་སྙིང་རྗེ་ཟུང་དུ་འཇུག་པའི་ཐབས་འདི་ཉིད་བསྟན་པར་བྱའོ། །འདི་དག་ནི་རྒྱས་པར་ཆིངས་ཀྱི་ཐད་ཀར་བཤད་དོ། །གུས་པས་བསླབ་པའི་ཕན་ཡོན་ནི། སློབ་མས་ཞེས་པའི་ཚིག་རྐང་གཉིས་ཏེ། དེ་ལྟ་བུའི་རིམ་པ་སློབ་མས་གུས་པས་བསླབ་པ་ལས་ཕྱག་རྒྱ་ཆེན་པོའི་དངོས་གྲུབ་འགྲུབ་པར་འགྱུར་བ་ལ་ཐེ་ཚོམ་མེད་དོ། །ལེའུ་ཡི་མཚན་ནི། ཀྱེའི་རྡོ་རྗེ་ལས་གདུལ་དཀའ་འདུལ་བའི་ལེའུ་སྟེ་བརྒྱད་པའོ།། །།