བརྟག་པ་གཉིས་པ། དགུ་པ་སྔགས་བཏུ་བའི་ལེའུ།

ལེའུ་འདི་ཡང་བསྐྱེད་རྫོགས་ཀྱི་ཡན་ལག་ཁ་སྦྱོར་དབྱེ་བ་དང་། རྣམ་པར་དག་པ་དང་། གསང་སྔགས་དག་པར་བྱེད་པའི་ཕྱིར་སྔགས་བཏུ་བ་རྣམས་གསུང་སྟེ། འདི་ལ་གཉིས་ལས། གཞུང་དང་། ལེའུ་ཡི་མཚན་ནོ། །དང་པོ་ལ་གསུམ་སྟེ། ཁ་སྦྱོར་དབྱེ་བ་དང་། རྣམ་དག་དང་། སྔགས་བཏུ་བའོ། །དང་པོ་ལ་གཉིས་ལས། བཤད་པར་དམ་བཅའ་བ་ནི། ཚིགས་སུ་བཅད་པ་ཅིག་སྟེ། དེ་ལྟར་གདུལ་དཀའ་འདུལ་བ་གསུངས་པ་དེ་མ་ཐག་པ་ནས། ཁ་སྦྱོར་དབྱེ་བ་ནི། ཕྱི་རོལ་དུ་ལུས་སེམས་ཀྱི་ཁ་སྦྱོར་དབྱེ་བའམ། ནང་དུ་སེམས་དང་། ཉོན་མོངས་ཀྱི་ཁ་སྦྱོར་དབྱེ་བའི་མཚན་ཉིད་བཤད་པར་བྱ་སྟེ། གང་ལ་ལས་འདི་རྣམ་པར་ཤེས་པ་ཙམ་གྱིས་ཕྱག་རྒྱ་ཆེན་པོའི་དངོས་གྲུབ་ཀྱི་རྒྱུར་འགྱུར་བའོ། །བཤད་པ་དངོས་ལ་ལྔ་ལས། ཏིང་ངེ་འཛིན་གྱི་ཁ་སྦྱོར་དབྱེ་བ་ནི། བསྒྲུབ་བྱའི་ཞེས་པའི་ཚིག་རྐང་དྲུག་སྟེ། དེ་ཡང་བསྒྲུབ་བྱའི་ལྟེ་བའི་རྩ་བ་ཁ་ཕྱེ་ལ་སྙིང་ནུ་མ་གཡོན་ཕྱོགས་སུ་བརྟེན་པ་ཁ་ཐུར་དུ་བལྟས་པ་བསམ་ལ་བརཏལ་ཤུགས་ཅན་གྱིས་དེའི་སྙིང་ཕྱུང་བར་བསམས་ནས་ས་ལ་བརྡབས་པས་ཡེ་ཤེས་སེམས་དཔའི་ངོ་བོ་ཕྱུང་སྟེ་ལྷ་ཉེ་བར་བསྒྲག་པར་བྱ། དེ་ཡང་ཧེ་རུ་ཀ་མཉམ་ཡན་ལག་དྲུག་ལྡན་དུ་བསྒོམས་པའི་རྣལ་འབྱོར་གྱི་ནང་གི་མ་རུངས་པའི་སེམས་ནི་མྱུར་དུ་བསད་པར་འདོད་པའི་བསམ་པས་འདི་ཉིད་བསྒོམས་པ་ཙམ་གྱིས་སངས་རྒྱས་རྣམས་ཀྱང་ངེས་པར་འཇིག་ན་གཞན་ལྟ་སྨོས་ཀྱང་ཅི་དགོས་སོ། །བསྒྲལ་བའི་ཡུལ་ནི། བསྟན་ལ་ཞེས་པའི་ཚིགས་ཏེ། དེ་ཡང་བསྟན་ལ་གནོད་པ་བྱེད་པ་དང་བླ་མ་དང་སངས་རྒྱས་འཇིག་པ་ནི་མཚམས་མེད་པའི་ལས་བྱེད་པ་རྣམས་ལ་བྱའོ། །སྒྲོལ་བར་བྱེད་པའི་ཚུལ་ནི། བླ་མ་ཐུབ་པ་ལ་ཞུས་ནས་ཞེས་པའི་ཚིག་གཉིས་ཏེ། འདི་ནི་ཉེས་པ་བསྒྲགས་པ་སྟེ། དེ་ཡང་ངན་པར་སྤྱོད་པ་དེ་ཚུལ་བཞིན་མ་ཡིན་པ་བྱེད་པ་ལ། མདུན་གྱི་ནམ་མཁར་བླ་མ་དང་སངས་རྒྱས་ཐམས་ཅད་བཞུགས་པར་བསྒོམས་ནས། གང་ཟག་འདིས་ཚུལ་བཞིན་མ་ཡིན་པ་བྱེད་པ་འདི་བསྒྲལ་བར་ཞུ་འཚལ་ཞེས་བསྒྲགས་པས་གནང་བ་བྱིན་པར་བསམ་སྟེ་འདི་དག་ནི་སྙིང་རྗེ་གཙོ་བོར་གྱུར་པའི་བསད་པ་བྱ་བ་ཡིན་ནོ། །བསད་པའི་ཆོ་ག་དངོས་ནི། ཅི་ལྟར་ཞེས་པའི་ཚིགས་བཅད་གཉིས་ཏེ། བསྒྲུབ་བྱ་ཕྱུགས་ལྟ་བུའི་རང་བཞིན་གྱི་གཟུགས་དེ་ཉིད་ཁྲག་དུ་སྐྱུག་ཅིང་ལུས་འདར་བ་སྐྲ་གྲོལ་བ་ཁ་ཐུར་དུ་བལྟས་པའི་རྣམ་པ་ཅན་དུ་བསྒོམ་ནས། དེའི་འོག་སྒོ་ནས་མེ་ཁབ་ལྟ་བུའི་གཟུགས་ཅན་འཇུག་པར་བསམ་སྟེ། སྙིང་ཁར་རྂ་ལས་མེ་འབར་བས་ཕུང་པོ་ཐམས་ཅད་བསྲེག་པར་བྱེད་པར་བསྒོམས་ན་སྐད་ཅིག་གིས་གསོད་པར་བྱེད་དོ། །བསམས་པ་ཙམ་གྱིས་འགྲུབ་པར་བསྟན་པ་ནི། རྒྱུད་འདི་ཞེས་པའི་ཚིགས་བཅད་ཅིག་ནི། དེ་ལྟར་བསྟན་པའི་ལས་དེ་ནི་མྱུར་དུ་འགྲུབ་པར་འགྱུར་ཏེ་རྒྱུད་འདི་ལ་ནི་སྦྱིན་བསྲེག་དང་འཁྲུལ་འཁོར་ལ་ལ་སོགས་པ་མེད་དོ། །དེ་བཞིན་དུ་ཕྱག་རྒྱ་བཅིང་བ་དང་། ལས་ཀྱི་བྱ་བ་གཞན་ཡང་བྱ་བ་ཡོད་པ་མ་ཡིན་ཏེ། ཀླགས་པ་ཙམ་མམ་བསམ་གཏན་ཙམ་གྱིས་འགྲུབ་པར་འགྱུར་རོ། །དེ་ལྟར་བསྟན་པ་རྣམས་ཀྱི་ལས་རིམ་འདི་དག་ཀྱང་། ཉེས་པ་བསྒྲག་པ་དང་། བསྲུང་བ་གཞོམ་པ་དང་། དགུག་པ་དང་། ཁ་སྦྱོར་དབྱེ་བ་དང་། གནས་སུ་འཕང་པས་ལོགས་པར་བྱ་བ་ཡིན་ནོ། །རྣམ་པར་དག་པ་ལ་གཉིས་ལས། བཤད་པར་དམ་བཅའ་དང་། བཤད་པ་དངོས་སོ། །དང་པོ་ནི་རྟོག་མེད་ཞེས་པའི་ཚིག་བཅད་ཅིག་སྟེ། འདི་ཡང་བསྐྱེད་རིམས་ལ་རྫོགས་པའི་རིམ་པས་རྒྱས་བཏབ་ན་མཆོག་གི་དངོས་གྲུབ་ཀྱི་རྒྱུར་འགྲོ་བར་སྟོན་ཏེ། རྟོག་མེད་ནི་རྫོགས་རིམས་མི་རྟོག་པས་ཟིན་ན་ཕྱག་རྒྱ་ཆེན་པོའི་དངོས་གྲུབ་སྦྱིན་པའོ། །ཐ་མལ་པའི་སྲིད་པ་སྦྱོང་ན། དེ་ཁོ་ནའི་རྟོགས་པས་ཟིན་ན་ཐ་མལ་གྱི་རྟོག་པ་གཅོད་པས་ན་སྦྱོང་བ་ཉམས་དགའ་བ་ནི་ལྷན་ཅིག་སྐྱེས་པའི་ཡེ་ཤེས་ཀྱི་སྣང་བ་ལས་ཤར་བས་སོ། །གསང་བ་ནི་རྒྱུད་སྡེ་འོག་མ་པའམ། ཡང་ན་རྟོགས་པར་དཀའ་བས་སོ། །ཉོན་ཅིག་ལྷ་མོ་ཅེས་པ་བདག་མེད་མ་ལ་བོས་པའོ། །བཤད་པ་དངོས་ལ་གསུམ་སྟེ། ཐབས་ཀྱི་ཟིན་པ་དང་མ་ཟིན་པའི་ཁྱད་པར་ནི། རིན་ཆེན་ཞེས་པའི་ཚིགས་བཅད་གཉིས་ཏེ། རིན་ཆེན་ནི་ཀྱེའི་རྡོ་རྗེའི་དཀྱིལ་འཁོར་ཉིད་དུ་ཕུན་སུམ་ཚོགས་པ་ཐམས་ཅད་བྱུང་བས་སམ། ཡང་ན་དེ་ཁོ་ནའི་རྟོགས་པས་ཟིན་ན་འདོད་པ་ཐམས་ཅད་འབྱུང་བས་སོ། །གཟི་བརྗིད་འབར་བ་ནི་གཞན་ཟིལ་གྱིས་གནོན་པས་སོ། །ལྟོས་ཅེས་པ་དེ་ལྟ་བུའི་བསྐྱེད་རིམས་དེ་ལའོ། །མ་ཕུག་པ་ཅེས་པ་སེམས་ལྷན་ཅིག་སྐྱེས་པའི་རྟོགས་པས་མ་ཟིན་པས་ནི་ཕྱག་རྒྱ་ཆེན་པོའི་སྦྱོར་བ་དང་བྲལ་བར་འགྱུར། ཕུག་པ་ནི་ཟིན་པས་དགང་བ་སྦྱིན་པར་འགྱུར་རོ། །དེའི་ཚེ་འདོད་པའི་ཡོན་ཏན་སྤང་ངམ་ཞེ་ན་འཁོར་བ་ཉེར་ལེན་གྱི་ཕུང་པོའི་འདོད་པའི་ཡོན་ཏན་ལྔ་དང་ལྡན་པའི་རིན་པོ་ཆེ་ནི་དེ་ཁོ་ནའི་རྟོགས་པས་ཟིན་ན་ཡོན་ཏན་ཐམས་ཅད་འབྱུང་བའོ། །མ་དག་པས་ནི་དེ་ཁོ་ནའི་རྟོགས་པས་མ་ཟིན་ན་དུག་དུ་འགྲོ་སྟེ། འཁོར་བའི་ཉེས་པ་བསྐྱེད་པར་བྱེད་ལ་དག་པས་ནི་བདུད་རྩི་ལྟ་བུར་འགྱུར་རོ། །རྣམ་དག་མདོར་བསྟན་པ་ནི། འཁོར་བའི་ཞེས་པའི་ཚིགས་བཅད་ཅིག་སྟེ། དེ་ཡང་འཁོར་བའི་རང་བཞིན་རྣམ་པར་དག་པ་དཔལ་ཧེ་རུ་ཀའི་རང་བཞིན་གྱིས་འགྲོ་བ་རྣམས་སྒྲོལ་བའི་དོན་དུ་གཙོ་བོ་བཅོམ་ལྡན་འདས་ཀྱི་རྣམ་པ་གང་གི་གཟུགས་ཀྱིས་གྱུར་པ་བཤད་པར་བྱ་ཅེས་པའོ། །རྒྱས་པར་བཤད་པ་ནི། སྙིང་རྗེའི་སྤྱན་ཞེས་པའི་ཚིགས་བཅད་ཕྱེད་དང་བཞི་སྟེ། དེ་ཡང་ཐུན་མཚམས་སུ་རྣམ་པར་དག་པ་དྲན་པར་བྱེད་པ་ལ་དཔལ་ཧེ་རུ་ཀའི་དག་པ་ནི་སྙིང་རྗེས་འགྲོ་བའི་དོན་མཛད་པ་ལ་ཆགས་པས་སྤྱན་དམར་པོ། བྱམས་པའི་ཐུགས་མི་འགྱུར་བས་སྐུ་མདོག་གནག་པའོ། །བསྡུ་བ་བཞི་དང་། རྣམ་པར་ཐར་པ་བརྒྱད་དང་། སྟོང་པ་ཉིད་བཅུ་དྲུག་ནི་སྔར་ལེའུ་དགུ་པར་བསྟན་པ་ལྟ་བུའོ། །གུག་སྐྱེད་ནི་རུས་པའི་རྒྱན་སངས་རྒྱས་ལྔ་དག་པ། གདུག་པ་ཅན་འདུལ་བའི་ཕྱིར་ཁྲོ་བོ། དེ་བཞིན་དུ་ཤ་ནི་པུ་ཀ་སི། ཁྲག་ནི་རི་ཁྲོད་མ་གདོལ་པ་མོ་ཁུ་བ། གཡུང་མོ་རྐང་དང་ཚིལ་བུ། ལྤགས་པ་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ལ་སོགས་པ་བདུན། རུས་པ་ནི་སྡུག་བསྔལ་ལ་སོགས་པའི་བདེན་པ་བཞི་རྣམ་པར་དག་པ་སྟེ། མདོར་ན་གཞི་ལམ་འབྲས་བུའི་བདག་ཉིད་ཐམས་ཅད་དཔལ་ཧེ་རུ་ཀ་ལ་ཚང་ངོ་། །ཁ་སྦྱོར་དབྱེ་བ་ལ་སོགས་པ་འདི་རྣམས་ཀྱི་ངེས་པའི་དོན་ཡང་འགྲེལ་ཆེན་ལས། ལྟེ་བའི་དབུས་སུ་པད་མ་ཆེ། །སྐུད་པ་བཅུ་དྲུག་ཡང་དག་ལྡན། །ཡི་གེ་ཉིད་ནི་མཉམ་པར་སྦྱོར། །ཁ་སྦྱོར་བྱེད་པ་བླ་ན་མེད། །དེ་དབུས་སྟོང་ཉིད་དམ་པ་ནི། །སྤྲོ་དང་བསྡུ་བ་བྱེད་པ་ཅན། །དེ་འདིར་དེ་ཁོ་ཉིད་དུ་འགྱུར། །རང་བྱུང་ཐམས་ཅད་ཁྱབ་པ་པོ། །ཞེས་བྱ་བའི་རིམ་པ་འདིས་ནི་ཧེ་རུ་ཀ་དང་། ནང་གི་ཁ་སྦྱོར་དབྱེ་བའི་བདག་ཉིད་ནི་ཨ་ཧྂ་ལས་བྱུང་བའི་བྱང་ཆུབ་ཀྱི་སེམས་བཅུ་དྲུག་ཚན་པ་གཉིས་ཀྱི་བདག་ཉིད་དོན་དམ་པའི་བདེ་བ་ལ་རབ་ཏུ་ཞུགས་པས་རྣམ་པར་རྟོག་པ་གསོད་པར་འགྱུར་རོ། །སྔགས་བཏུ་བ་ལ་གསུམ། ཞུས་པ་དང་། ལན་མདོར་བསྟན་དང་། བཏུ་བ་དངོས་སོ། །སྔགས་འདི་དག་གི་དོན་ནི་སྔར་ལེའུ་གཉིས་པར་བཤད་པ་ཅི་ལྟ་བ་བཞིན་དུ་ཡིན་ལ། འདིར་བཏུ་བ་བསྟན་པའི་དགོས་པ་ནི་དེ་ཉིད་དག་པར་བྱ་བའི་ཆེད་དུའོ། །དང་པོ་ནི། བདག་མེད་མས་གསོལ་བ་ཞེས་པའི་ཚིག་རྐང་ལྔས་སྔར་སྔགས་གསུངས་པའི་བཏུ་བ་ཅི་ལྟར་ལགས། གང་གི་སྔགས་ཀྱིས་སྐྱེ་བོ་རྣམས་ཀྱི་ཞི་རྒྱས་ལ་སོགས་པའི་དངོས་གྲུབ་འགྲུབ་པར་འགྱུར་པའི་སྔགས་བདེ་བ་ཆེན་པོས་བཤད་དུ་གསོལ་ཞེས་པའོ། །ལན་མདོར་བསྟན་ནི། བཅོམ་ལྡན་འདས་རྡོ་རྗེ་འཆང་ཆེན་པོ་རྡོ་རྗེ་སྙིང་པོ་དབྱེར་མེད་པའི་གཟི་བརྗིད་ཆེན་པོས་ཅི་ལྟར་སྔགས་བཏུ་བའི་དོན་ཞུས་པ་ངས་བཤད་ཀྱིས་ལྷ་མོ་ཤེས་རབ་ཆེན་མོ་ཉོན་ཅིག་ཅེས་བཀའ་སྩལ་པའོ། །བཏུ་བ་དངོས་ནི། དང་པོར་ཞེས་པ་ནས་འབྱུང་པོ་ཐམས་ཅད་ཀྱི་གཏོར་མའི་སྔགས་སོ་ཞེས་པའི་བར་གྱིས་ལས་ཚོགས་ཀྱི་སྔགས་དང་། ཧེ་རུ་ཀ་བཞིའི་སྙིང་པོ་དང་། གྲོང་ཁྱེར་དཀྲུག་པ་དང་། ས་སྦྱང་བ་དང་། བཟའ་བཏུང་བྱིན་གྱིས་བརླབ་པ་དང་། གཏོར་མའི་སྔགས་རྣམས་རིམ་པ་བཞིན་དུ་ཡིན་ཏེ། དེ་ཡང་ཐོག་མར་རྣམ་པར་སྣང་མཛད་ཀྱི་ས་བོན་ནི་ཨོཾ་ཡིན་པས་དང་པོར་སྦྱིན་པའོ། །དེ་ནས་དྲོ་བའི་ཡི་གེ་བཞི་པ་ཧ་བཞག་པའོ། །དེ་ལ་པུ་ཀ་སི་བྱིན་པ་ནི་སུ་དང་སྦྱར་བས་ཧུ་རུ་འགྱུར་བའོ། །སྟོང་པས་མནན་པ་ནི་སྟེང་དུ་ཐིག་ལེ་བྱིན་པའོ། །མདོག་དཀར་ནི་དེའི་སྟེང་དུ་ན་ད། བྱིན་པའོ། །མཐར་སྭཱ་ཧཱ། སྦྱར་བ་ནི་རེངས་པར་བྱེད་པའི་སྔགས་ཡིན་ཏེ། འདིས་ནི་བཟླས་པ་འབུམ་གྱིས་ནི། །འགྲོ་བ་རྟག་ཏུ་རེངས་པར་བྱེད། །ཅེས་སོ། །དབང་དུ་བྱ་བའི་སྔགས་བཏུ་བ་ནི། ཨོཾ་ཨྂ་སྭཱ་ཧཱ། ཞེས་བྱའོ། །དེ་ལའང་དང་པོར་རྣམ་པར་སྣང་མཛད་བཞག་ཅེས་པ་ནི་རྣམ་པར་སྣང་མཛད་ཀྱི་ས་བོན་ཨོཾ་མོ། ས་མཁའ་སྤྱོད་མ་དེ་ནས་ཅེས་པ་མཁའ་སྤྱོད་མའི་ས་བོན་ཨྂ་ངོ་། །མཐར་སྭཱ་ཧཱ་སྦྱར་བ་ནི་དབང་དུ་བྱ་བའི་སྔགས་ཏེ་སངས་རྒྱས་ཀྱང་ནི་དབང་དུ་བྱེད་ཅེས་སོ། །ཨོཾ་ཁྂ་སྭཱ་ཧཱ། སྐྲོད་པར་བྱེད་པའོ། །ཨོཾ་ཛིཾ་སྭཱ་ཧཱ་སྡང་བར་བྱེད་པའོ། །ཨོཾ་བུམ་སྭཱ་ཧཱ། མངོན་སྤྱོད་དོ། །ཨོཾ་ཧཱུྃ་སྭཱ་ཧཱ། འགུགས་པར་བྱེད་པའོ། །ཨོཾ་གྷུ་སྭཱ་ཧཱ། གསོད་པར་བྱེད་པའི་འོ། །དེ་བཞིན་དུ་སྡེ་ཚན་གྱི་ཡི་གེ་རྣམས་ལ་ནང་ཚན་གྱི་ཡི་གེ་གང་ཡིན་པ་དང་། དྲོ་བའི་ཡི་གེ་དང་། མཐར་གནས་ཀྱི་ཡི་གེ་ལས་ལུས་བཏུའོ། །དེ་ཡང་ཨུས་མ་ནི་ཤ་ཡ་ས་ཧ་གྷོ་ཁ་སྟེ་དྲོ་བའི་ཡི་གེའོ། །མཐར་གནས་ནི་ཨ་དྷ་ཥྛ་ཡ་ར་ལ་ཝའོ། །ཡན་ལག་ནི་བརྟག་པ་འོག་མའི་ལེའུ་བཞི་པའི་ལྷ་མོ་བཅོ་ལྔའི་ས་བོན་ལས་བཏུའོ། །སྔགས་ཀྱི་ངོ་བོ་ནི། བརྟག་པ་དང་པོའི་སྔགས་ཀྱི་ལེའུ་བླངས་ལ་འདི་ཡི་བཏུ་བ་དང་སྦྱར་ནས་སྔར་བཞིན་དུ་བཏུས་པས་རྟོགས་སླ་སྟེ་བཤད་པ་བྱས་ནའང་ཡང་དུ་བཟློས་པར་འདུག་པས་ཚུལ་དེ་ལྟར་ཤོད་ཅིག་ལེའུ་ཡི་མཚན་ནི། ཀྱེའི་རྡོ་རྗེ་ལས་སྔགས་བཏུ་བ་བསྟན་པའི་ལེའུ་སྟེ་དགུ་པའོ།། །།