བརྟག་པ་གཉིས་པ། བཅུ་པ་བཟླས་པའི་ལེའུ།
ལེའུ་འདི་ནས་འབྲས་བུ་ལས་ཚོགས་པ་བར་བྱེད་པ་ལ་སོ་སོའི་བཟླས་པའི་ཡུལ་ཕྲེང་བ་དང་བཟའ་བ་གསུངས་ཏེ། འདི་ལ་གསུམ། བཤད་པར་དམ་བཅའ་དང་། གཞུང་དངོས་དང་། ལེའུ་ཡི་མཚན་ནོ། །དང་པོ་ནི་ཚིགས་བཅད་ཅིག་སྟེ། སྔགས་བཏུ་བ་གསུངས་པ་དེ་ནས་ཆོས་ཐམས་ཅད་ལྷན་ཅིག་སྐྱེས་པའི་ཡེ་ཤེས་སུ་སྡོམ་པ་ཅིག་པའི་རྡོ་རྗེ་སེམས་དཔའ། བདེ་སྟོང་དབྱེར་མི་ཕྱེད་པའི་བརྡར་བདག་མེད་མ་དང་མཉམ་པར་སྦྱོར་བ་མཛད་ནས་བཟླས་པའི་ཡུལ་ཕྲེང་བ་རབ་ཏུ་ཕྱེ་བའོ། །གཞུང་ལ་གཉིས་ལས། ཕྲེང་བ་ནི། ཤེལ་གྱིས་ཞེས་པའི་ཚིགས་བཅད་གཉིས་ཏེ། ཤེལ་གྱི་ཕྲེང་བ་ནི་རེངས་པའི་ལས་ལ་ཤིས་སོ། །དེ་བཞིན་དུ་དབང་དང་། མངོན་སྤྱོད་དང་། སྡང་བ་དང་། སྐྲོད་པ་དང་། འགུག་པ་དང་། ཆར་དབབ་པ་དང་གསང་བ་རྣམས། ཙན་དན་ལ་སོགས་པའི་ཕྲེང་བ་སོ་སོ་ལ་བསྔགས་པ་ཡིན་ལ། ངེས་པའི་དོན་དུ་ནི། འདི་དག་ཀྱང་ནང་གི་རྩ་རླུང་གི་སྦྱོར་བ་ཉིད་དུ་གསུངས་ཏེ། པད་མར་རྡོ་རྗེ་རབ་བཞུགས་པ། །སྐུད་པ་ཁ་སྦྱར་དབུས་ཉིད་དུ། །ཐམས་ཅད་དེ་ཉིད་བསྒོམས་པ་ཡི། །ཕྲེང་བ་རབ་ཏུ་གནས་པར་བྱ། །སྔགས་ཀྱི་དེ་ཉིད་གསལ་བ་ནི། ཡེ་ཤེས་ལྔ་ཡི་ངོ་བོ་ཉིད། །རྟོག་གེ་པ་ཡིས་མི་ཤེས་ཤིང་། རྣལ་འབྱོར་པ་ཡི་སྤྱོད་ཡུལ་ཡིན། ཞེས་འགྲེལ་ཆེན་ལས་གསུངས་པ་བཞིན་དུ་རྟོགས་པར་བྱའོ། །གཉིས་པ་བཟའ་བ་ལ་ཡང་གཉིས་ལས། སོ་སོའི་བཟའ་བ་ནི། རེངས་པར་ཞེས་པའི་ཚིག་རྐང་དྲུག་སྟེ། ལས་གང་བསྒྲུབ་པའི་དུས་སུ་བཟའ་བ་གང་ཤིས་ན། རེངས་པའི་ལས་བསྒྲུབ་པའི་དུས་སུ་འོ་མའི་བཏུང་བ་ཤིས་སོ། །དབང་ལ་རང་གི་འདུན་པ་ནི་གང་འདོད་པའམ། ཡང་ན་བདུན་པ་སྟེ། ཟས་ཟོས་པ་བད་ཀན། དེ་ཁྲག །དེ་ཤ། དེ་ཚིལ། དེ་རུས་པ། དེ་རྐང་སྟེ། ཐིག་ལེར་འགྲོ་བས་དཀར་ཆའོ། །ད་པ་ལ་སི་ལ་ནི་དམར་ཆ། དགུག་པ་ལ་བཞི་མཉམ་ནི་དྲི་ཆེན། སྡང་བ་ལ་ས་ལུས་བསྐྱེད་པ་ནི་ཤ་ཆེན། བསྐྲད་པ་ལ་གླ་བ་ནི་དྲི་ཆུར་བརྗོད་དོ། །ཐུན་མོང་གི་བཟའ་བ་ནི། ཡང་ན་ཞེས་པའི་ཚིག་རྐང་གསུམ་སྟེ། མཐའི་ཤ་ནི་ཨ་ཤ་སྟེ་རྟ་ཤ། དང་པོའི་ཤ་ནི་ཤོ་ན་ཁྱི་ཤ། ན་དང་པོ་ན་ར་མི་ཤ། ག་དང་པོ་ག་བྷི་བ་གླང་གི་ཤ། ཧ་དང་པོ་ཧ་ཏི་གླང་པོ་ཆེའི་ཤ་སྟེ་ཤ་ལྔའོ། །འདི་རྣམས་ཀྱི་ངེས་པའི་དོན་ཡང་སྔར་བཤད་དོ། །ལེའུ་ཡི་མཚན་ནི། ཀྱེའི་རྡོ་རྗེ་ལས་བཟླས་པའི་ཡུལ་དང་བཟའ་བ་བསྟན་པ་སྟེ་བཅུ་པའོ།། །།