བརྟག་པ་གཉིས་པ། བཅུ་གཅིག་པ་ལྷན་ཅིག་སྐྱེས་པའི་སྦྱོར་བའི་ལེའུ།
ལེའུ་འདི་ཡང་རྫོགས་རིམས་ཀྱི་ཡན་ལག་དུ་གྱུར་པའི་རིགས་ཀྱི་དབྱེ་བ་དང་། ལས་ཀྱི་ཕྱག་རྒྱ་རྟེན་པའི་ཐབས་གསུངས་པས་འདི་ལ་གསུམ་ལས། ཞུས་པའི་ཚིག་གིས་མཚམས་སྦྱར་བ་དང་། གཞུང་དང་། ལེའུ་ཡི་མཚན་ནོ། །དང་པོ་ནི་ཚིགས་སུ་བཅད་པ་ཅིག་སྟེ། དགྱེས་པའི་རྡོ་རྗེ་ལ་དབང་དང་རོལ་བས་མཆོད་དེ། ལུས་ཅན་རྣམས་ཀྱི་རིགས་ལྔ་ལ་སོགས་པའི་གཟུགས་ཀྱི་རྟགས་བདག་མེད་མས་ཞུས་པའོ། །གཞུང་ལ་གཉིས། རིགས་ཀྱི་རྟགས་དང་། ལྷན་ཅིག་སྐྱེས་པའོ། །དང་པོ་ལ་བཞི་ལས། ཉོན་ཅིག་པར་གདམས་པ་ནི། བྷ་གར་ཞེས་པའི་ཚིགས་བཅད་ཅིག་སྟེ། རྡོ་རྗེ་པད་མ་སྦྱོར་ཞིང་བདེ་བའི་འཁོར་ལོ་འདྲེན་པས་འདི་སྐད་གསུངས་ཏེ། ལུས་ཅན་རྣམས་ཀྱི་རིགས་ཀྱི་རྟགས་བཤད་ཀྱིས། ཤེས་རབ་ཕ་རོལ་ཕྱིན་མ་ཉོན་ཞེས་བཀའ་སྩལ་པའོ། །ཕྱག་མཚན་གྱི་རྟགས་ནི། བུད་མེད་ཞེས་པའི་ཚིགས་བཅད་གཉིས་ཏེ། འདི་ཡང་དྲང་དོན་དུ་ནི་བུད་མེད་དམ་སྐྱེས་པ་གང་གི་སྲིན་ལག་གི་རྩ་བའམ་དཔྲལ་བར་རྡོ་རྗེ་རྩེ་དགུ་པའི་རི་མོ་སྣང་བ་ནི་མི་བསྐྱོད་པའི་རིགས་སོ། །དེ་བཞིན་དུ་རྣམ་པར་སྣང་མཛད་ཀྱི་འཁོར་ལོ། འོད་དཔག་མེད་ཀྱི་པད་མ། རིན་ཆེན་འབྱུང་ལྡན་གྱི་རིན་པོ་ཆེ། ལས་ཀྱི་རིགས་ཀྱི་རལ་གྲིའོ། །ཁ་དོག་གི་རྟགས་ནི། རྣལ་འབྱོར་པ་གང་ཞེས་པའི་ཚིགས་སུ་བཅད་པ་གསུམ་སྟེ། འདི་རྣམས་ཁ་དོག་ནག་པོ་ལ་སོགས་པ་དྲུག་དང་སངས་རྒྱས་དྲུག་རིམ་པ་བཞིན་སྦྱར་བར་རིག་པར་བྱའོ། །རིགས་ངེས་པ་ནི། སྐྱེ་བོ་ཞེས་པའི་ཚིགས་བཅད་གཉིས་ཏེ། དེ་ལྟ་བུའི་རྟགས་ངེས་པ་དང་ལྡན་པ་རྣམས་ལ། རྣལ་འབྱོར་མཐར་ཕྱིན་པའི་ཡོན་ཏན་ཅན་གྱིས་ཀྱང་། ང་རྒྱལ་མི་བཅག་ཅིང་ཐོ་མི་བརྩམ་མོ། །དེ་ཅིའི་ཕྱིར་ཞེ་ན། ཀུན་རྫོབ་གཟུགས་སུ་གནས་པ་འདི་དག་ཀྱང་བདེ་བར་གཤེགས་པ་རྣམས་ཀྱི་རིགས་སུ་འགྱུར་བའི་ཕྱིར་རོ། །བུད་མེད་རྣམས་ཀྱི་མཚན་ཉིད་འདི་ཅི་ལྟ་བར་སྐྱེས་པ་ལ་ཡང་དེ་བཞིན་དུ་ཤེས་པར་བྱ་ཞིང་ཀུན་རྫོབ་ཐ་སྙད་དུ་དེ་དང་དེའི་རིགས་ཞེས་བྱ་བར་བརྗོད་པ་ཡིན་ནོ། །འདི་རྣམས་ཀྱི་ངེས་པའི་དོན་ནི། ནང་གི་ཡེ་ཤེས་ཀྱི་ཁམས་ལ་སོགས་པ་དྲུག་དང་མཉམ་པར་སྦྱོར་བའོ། །ལྷན་ཅིག་སྐྱེས་པ་བསྟན་པ་ལ་བཞི་ལས། ཉོན་ཅིག་པར་གདམས་པ་ནི། བྷ་གར་ཞེས་པའི་ཚིགས་བཅད་གཅིག་སྟེ། འདི་ཡང་དབང་དང་ལས་ཀྱི་ཕྱག་རྒྱ་བསྟེན་པའི་སྐབས་སུ་ཐ་མལ་གྱི་ཚུལ་སྤངས་ཏེ་རྟོགས་པའི་ཡེ་ཤེས་བསྐྱེད་པའི་ཕྱིར། བྷ་ག་དང་། ལིང་ག་སྦྱོར་བས་རྡོ་རྗེ་སྟོང་པའི་དགའ་བས་མཉེས་པར་མཛད་དེ། བདག་མེད་མ་ལ་སོགས་པའི་དོན་གོ་བར་མཛད་པའི་ཕྱིར། ལྷ་མོ་སྟེ་ལས་ཀྱི་ཕྱག་རྒྱ་མཆོད་པའི་ཐབས་བཀའ་སྩལ་ཏོ། །གང་དུ་བསྟེན་པའི་གནས་ནི། ཚལ་དང་ཞེས་པའི་ཚིགས་བཅད་ཅིག་སྟེ། ཚལ་ཆེན་པོ་དང་སྐྱེ་བོ་མེད་པའི་གནས་དབེན་པ་རྣམས་སུ་བསྟེན་པར་བྱ་སྟེ། རྣམ་པར་རྟོག་པ་དང་བྲལ་བའི་འབྲས་བུས་ཕྱག་རྒྱ་ཆེན་པོ་བློ་ལ་བྱས་ནས། རྣལ་འབྱོར་པ་དབང་གི་ཡེ་ཤེས་རིག་པ་རྟག་ཏུ་མཆོད་པར་བྱའོ། །ཇི་ལྟར་བསྟེན་པའི་ཚུལ་ནི། འོ་དང་ཞེས་པའི་ཚིགས་བཅད་གསུམ་སྟེ། འདི་དག་ནི་ལས་ཀྱི་ཕྱག་རྒྱའི་སྦྱོར་བ་སྟོན་པ་ལས། དེའི་རིམ་པ་འགྲེལ་ཆེན་ལས་གསུངས་པ་རྣལ་འབྱོར་པས་གལ་ཏེ་གྲོང་པའི་ཆོས་ལ་སོགས་པས་འདོད་པར་མི་བྱ་སྟེ། དེ་ནས་རྗེས་སུ་ཆགས་པ་དང་བཅས་པར་མི་འགྱུར་ཞིང་མངོན་པར་འདོད་པའི་དངོས་གྲུབ་ཀྱང་ཉམས་པར་འགྱུར་བའོ། །ཐོག་མར་ཅི་ལྟར་གསུངས་པ་ལས་སྔགས་པས་གཞན་པ་འདོད་པར་མི་བྱ་ཞེས་པའོ། །དེས་ན་འོ་དང་འཁྱུད་པ་དང་རེག་པ་ནི་དགའ་བའི་དོན་ནོ། །གཞིབ་པ་དང་བཏུང་བ་ནི་མཆོག་དགའོ། །རྟག་ཏུ་མྱོས་པའི་སྒྲས་ནི་ལྷན་ཅིག་སྐྱེས་དགའོ། །བྷོ་ལ་ལྡན་པ་ཞེས་པ་ནི། བདེ་བ་དང་ལྡན་པ་སྟེ་བཞི་པའི་སྐད་ཅིག་མའོ། །དེའི་ཕྱག་རྒྱ་རིགས་ལྔ་ཡོད་པ་ལས། དུང་ཅན་མ་ནི་ཁྱོགས་ལྟ་བུས་བསྟེན་པ་སྟེ། མདུན་དང་རྒྱབ་ཏུ་ན་རི་ཡིས། །རིམ་པས་ཀ་ཏི་མདོ་ལིར་བྱེད། །མོན་མདོ་སྟེང་དུ་ཡང་དག་གནས། །ན་རི་དྷོ་ལིར་རབ་ཏུ་གྲགས། །ཞེས་སོ། །ཞར་ལ་ནི་བརླ་ཞེས་བྱ་སྟེ། །གཡས་ཕབ་པའི་སྦྱོར་བ་ཡིས། །གཡས་ལ་གཡོན་པའི་ལག་པ་དང་། །སྦྱར་བྱ་སྟེང་གི་ཀ་ར་ན། །ཁ་ནི་མངོན་དུ་ཕྱོགས་ནས་གནས། ཞེས་སོ། །ཤིན་དུ་བཀལ་བ་ནི། དུང་ཅན་མ་དང་མཐུན་པ་སྟེ། ངང་པའི་གཤོག་པའི་རྣམ་པ་ཅན། །ཨུད་ཏ་ན་རུ་རབ་ཏུ་གྲགས། །ཞེས་སོ། །དེ་བཞིན་དུ་སྟེང་དང་འོག་ཏུ་ཞེས་པ། པད་མ་ཅན་དང་། གླང་པོ་ཅན་ཞེས་བྱ་བའི་བྱེད་པ་སྟེ། འདི་ལྟར་བསྟེན་པས་ཕྱག་རྒྱ་ཆེན་པོའི་དངོས་གྲུབ་ཀྱང་འཐོབ་པར་འགྱུར་ཏེ། སངས་རྒྱས་ཀུན་དང་མཉམ་པར་འགྱུར་པ་ནི། འཛག་པ་མེད་པའི་བྱང་ཆུབ་ཀྱི་སེམས་ཀྱི་རྡོ་རྗེ་གཙུག་གཏོར་གྱི་མཐར་སོན་པ་ལས་སངས་རྒྱས་སུ་འགྱུར་རོ། །རིམ་པ་འདི་ནི་འགྲེལ་ཆེན་ལས་གསུངས་པ་ཡིན་ནོ། །བྱང་ཆུབ་ཀྱི་སེམས་བསྒྲུབ་པའི་བཟའ་བ་ནི། དེ་ལ་ཞེས་པའི་ཚིགས་སུ་བཅད་པ་གཅིག་སྟེ། དེ་ཡང་བྱང་ཆུབ་ཀྱི་སེམས་ག་བུར་གྱེན་དུ་བརྟན་པ་ལ་ལྷན་ཅིག་སྐྱེས་པའི་དེ་ཁོ་ན་འགྲུབ་པའི་ཕྱིར། བྱང་ཆུབ་ཀྱི་སེམས་འཕེལ་བར་བྱེད་པའི་རྒྱུ་ཤ་རྣམ་པ་ལྔ་བཟའ་བ་དང་ཆང་ཡང་བཏུང་བར་བྱ་བ་ཡིན་ལ། ངེས་པའི་དོན་དུ་ནི་ཤེས་རབ་ཀྱི་སྟོབས་བཟའ་བ་དང་། བདེ་བ་ཆེན་པོའི་རོ་ཐུང་བར་བྱེད་པ་ཉིད་ཡིན་ནོ། །ལེའུ་ཡི་མཚན་ནི། ཀྱེའི་རྡོ་རྗེ་ལས་ལྷན་ཅིག་སྐྱེས་པའི་སྦྱོར་བ་བསྟན་པ་སྟེ་ལེའུ་བཅུ་ཅིག་པའོ།། །།