གནས་ལྔ་པ། ཕྲ་རྒྱས་བསྟན་པ།
སེམས་ལ་གནས་པའི་ཉེས་ཚོགས་མ་ལུས་དྲུངས་ནས་ཕྱུང་མཛད་ཅིང་། །ཡེ་ཤེས་རབ་ཏུ་གསལ་བའི་མཁྱེན་པ་མཁའ་དང་མཉམ་གྱུར་ནས། །སྙིང་རྗེས་མ་བཟོད་གཅིག་ཏུ་མ་རྒན་རྣམས་ལ་དགོངས་པ་ཅན། །དཔལ་ལྡན་ཀརྨ་བཀའ་བརྒྱུད་མཆོག་གིས་བདག་བློ་རྗེས་འཛིན་གྱུར། །སྔོན་རབ་མཁས་པའི་གཞུང་ལུགས་བཟང་པོ་ལ། །ཇི་བཞིན་འབྱེད་པའི་རྣམ་དཔྱོད་འཁྲུལ་མེད་པ། སྙིགས་མའི་སྐྱེ་བོའི་སྤྱོད་ཡུལ་མ་ཡིན་པས། །བདག་གིས་ལེགས་པར་བཤད་ལ་སྤྲོ་བ་ནི། །རྒྱ་ཆེན་སྐྱེས་ནས་བརྩོན་པ་མ་བརྟུལ་ཏེ། །བླ་མའི་ལས་འདིར་སྒྲུབ་པ་ནན་ཏན་བྱས། །དེ་ཡང་། ཆ༥ ལྔ་པ་ཕྲ་རྒྱས་བསྟན་པའི་གནས་ཀྱི་དོན་ལ། གནས་ཀྱི་གཞུང་དང་། གནས་ཀྱི་མཚན་ནོ། །དང་པོ་ལ། ཕྲ་རྒྱས་ཀྱི་རང་བཞིན། གང་གིས་སྤོང་བ། སྤངས་པའི་འབྲས་བུའོ། །དང་པོ་ལ། སྲིད་པའི་རྩ་བ་ཕྲ་རྒྱས་སུ་བསྟན་པ། དེ་གཏན་ལ་དབབ་པའོ། །དང་པོ་ནི། སྲིད་པའི་རྩ་བ་ཕྲ་རྒྱས། ལས་ལས་འཇིག་རྟེན་སྣ་ཚོགས་སྐྱེས། །ཞེས་བཤད་པའི་ལས་ཀྱི་རབ་ཏུ་དབྱེ་བ་ཆོས་ཅན། ཕྲ་རྒྱས་ཀྱི་དབང་གིས་བསགས་པས་དེར་འགྱུར་བ་ཡིན་ཏེ། དེས་རྣམ་པར་སྨིན་པ་ངེས་པར་གནས་ནས་རྣམ་སྨིན་ངེས་པར་འབྱིན་པའི་ཕྱིར་རོ། །མ་ངེས་པའི་ལས་དགེ་མི་དགེ་ཡན་གར་བ་ཆོས་ཅན། སྲིད་པ་སྟེ་སྐྱེ་བ་མངོན་པར་འགྲུབ་ནུས་པ་མ་ཡིན་ཏེ། ཕྲ་རྒྱས་སམ་ཉོན་མོངས་པ་དེ་དག་ནི་མེད་པའི་ཕྱིར། དཔེར་ན། དགྲ་བཅོམ་པ་ཡང་སྲིད་ཀྱི་ལས་མ་ངེས་པ་བསགས་པ་ཡོད་ཀྱང་། ཕྲ་རྒྱས་མེད་པས་སྲིད་པ་མངོན་པར་མི་འགྲུབ་པ་བཞིན་ནོ། །ནི་ཞེས་ངེས་བཟུང་སྨོས་པ་ཆོས་ཅན། ཕྲ་རྒྱས་ཀྱི་དབང་གིས་སྲིད་པར་སྐྱེ་བའི་ལས་བསགས་པ་ཡིན་ཏེ། ཕྲ་རྒྱས་མེད་ན་སྲིད་པ་མངོན་པར་(༡༤༥ན)
འགྲུབ་མི་ནུས་པའི་ཕྱིར། ཞེས་དགོངས་པའི་སླད་དུ་བཀོད་པའོ། །ཞེས་པ་ནི་རྒྱལ་པོའི་སྲས་ཀྱི་བཞེད་པའོ། །གཞན་དག་ནི་ལས་དེ་དག་ཀྱང་ཕྲ་རྒྱས་ཀྱི་དབང་གིས་བསགས་པར་འགྱུར་གྱི། ཞེས་པའི་དོན་ནི་སྔར་ལས་མ་བྱས་པ་གདོད་བྱེད་པའང་ཕྲ་རྒྱས་ཀྱི་དབང་གིས་ཡང་སྲིད་ཀྱི་ལས་མ་གྲུབ་པ་སྒྲུབ་པར་བྱེད་ལ། དགྲ་བཅོམ་ནི་ཡང་སྲིད་མངོན་པར་འགྲུབ་བྱེད་ཀྱི་ལས་སོག་པར་མི་བྱེད་དོ། །ཕྲ་རྒྱས་མེད་པར་ནི་སྲིད་པ་མངོན་པར་འགྲུབ་པར་མི་ནུས་པའི་དོན་ནི། ལས་བྱས་པ་གང་ཡིན་པ་དེ་དག་ཀྱང་ལས་འགྲུབ་པ་གསོས་འདེབས་བྱེད་ཀྱི་ཕྲ་རྒྱས་མེད་པར་སྲིད་པ་མངོན་པར་འགྲུབ་མི་ནུས་ཏེ། དགྲ་བཅོམ་དག་ལ་སོ་སོ་སྐྱེ་བོའི་སྐབས་ན་བྱས་པའི་དགེ་མི་དགེའི་ལས་ཡོད་ཀྱང་། ཕྲ་རྒྱས་མེད་པས་སྲིད་པ་མངོན་པར་མི་འགྲུབ་པ་ལྟ་བུའི་ཕྱིར་རོ། །ནི་སྒྲ་ནི་དོན་ཐ་དད་དུ་བརྗོད་པ་བསྡུས་པའི་ཕྱིར་ཡིན་ནོ་ཞེས་ཟེར་རོ། །ངག་དོན་བསྡུ་ན། བཤད་ཚུལ་འདི་གཉིས་ལ་ཚིག་སྔ་མའི་བཤད་ཚུལ་དང་པོས་ནི། ཕྲ་རྒྱས་ཀྱི་དབང་གིས་ལས་བསགས་པས་འཇིག་རྟེན་འགྲུབ་པར་བསྟན་ལ། བཤད་ཚུལ་གཉིས་པས་ནི་ལས་དེ་དག་ཀྱང་ཕྲ་རྒྱས་ཀྱི་དབང་གིས་བསགས་ནས་ཡང་སྲིད་འགྲུབ་པར་བསྟན་ཏོ། །ཚིག་ཕྱི་མ་ལ་བཤད་ཚུལ་དང་པོས་ནི། མ་ངེས་པའི་ལས་ཀྱི་ཕྲ་རྒྱས་མེད་པར་སྐྱེ་བ་མི་འགྲུབ་པར་བསྟན་ལ། བཤད་ཚུལ་གཉིས་པས་ནི་ལས་གསོས་འདེབས་བྱེད་ཀྱི་ཕྲ་རྒྱས་མེད་ན་མ་ངེས་པའི་ལས་ཀྱིས་སྲིད་པ་མི་འགྲུབ་པར་བསྟན་ཏོ། །སྐྱེ་བའམ་ལས་ཀྱི་སྲིད་པ་ཆོས་ཅན། ཕྲ་རྒྱས་རྣམས་དེའི་རྩ་བ་ཅན་ཡིན་ཏེ། ཕྲ་རྒྱས་རྣམས་དེ་སོགས་པ་དང་ཀུན་སློང་བའི་རྒྱུ་ཡིན་པའི་ཕྱིར། སློབ་དཔོན་གང་བ་སྤེལ་ནི། སྐྱེ་བའི་ཤིང་རྟ་ཆེན་པོ་བྱིས་པ་ཡིས། །ཞོན་ཅིང་ཉོན་མོངས་ལས་ཀྱི་འཕང་ལོ་ཅན། །འདིར་ནི་ཉོན་(༡༤༥བ)
མོངས་འཕང་ལོ་གཅིག་ཉམས་པས། །ལས་ཀྱི་འཕང་ལོ་གཅིག་པུས་འཁོར་མ་ཡིན། །ཅེས་ལས་ཀྱིས་ཡང་སྲིད་འཕེན་པར་བྱེད་པ་དང་། མངོན་པར་འགྲུབ་བྱེད་ཀྱི་རྩ་བ་ཕྲ་རྒྱས་ཡིན་ནོ། །ཞེས་སྲིད་པ་ནི་ཡང་སྲིད་ཉིད་ལ་འདོད་ཅིང་དེའི་རྩ་བ་ནི་ཕྲ་རྒྱས་ཡིན་ནོ་ཞེས་འཆད་ལ། རྒྱལ་པོའི་སྲས་ནི། སྲིད་པ་ནི་འདིར་ཡང་སྲིད་ཕྱི་མ་དང་དེའི་རྒྱུ་བ་ལས་ཀྱི་སྲིད་པ་གཉིས་ཀ་ཡིན་པར་འདོད་ལ། དེའི་རྩ་བ་ནི་ཕྲ་རྒྱས་ཡིན་ཏེ། ཉོན་མོངས་པ་འཇུག་པ་ན་བྱ་བ་བཅུ་བྱེད་པའི་ཕྱིར་རོ་ཞེས་འཆད་དོ། །དེ་ལ་བྱ་བ་བཅུ་ནི། རྩ་བ་ཐོབ་པ་ཡིན་པས་རྒྱུན་མི་བཅད་པ་བརྟན་པར་བྱེད་པའོ། །མདོ་སྡེ་པས་རྩ་བ་ས་བོན་ཡིན་པས་དེ་བརྟན་པར་བྱེད་པའོ། །ཉོན་མོངས་པའི་རྒྱུན་བརྒྱུད་པས་མངོན་འགྱུར་བརྟེན་པར་བྱེད་དོ། །ལུས་ཀྱི་བདག་ཉིད་སྐྱེ་བ་དང་མཐུན་པར་ཞིང་དུ་སྒྲུབ་པར་བྱེད། རང་རང་གི་ཉེ་བའི་ཉོན་མོངས་རྒྱུ་མཐུན་འདོད་ཆགས་ཀྱིས་ངོ་ཚ་མེད་པ་དང་རྒོད་པ་དང་སེར་སྣ་བསྐྱེད། ཞེ་སྡང་གིས་ཁྲོ་བ་དང་ཕྲག་དོག་བསྐྱེད་པའོ། །ཉོན་མོངས་ཡོད་ན་ལས་ཉིད་སྲིད་པ་ཡིན་པས་ལས་ཀྱི་སྲིད་པ་མངོན་པར་སྒྲུབ་པར་བྱེད་དོ། །རང་གི་ཚོགས་ཚུལ་མིན་ཡིད་བྱེད་ཀྱི་རྣམ་རྟོག་དེ་འཛིན་ཅིང་། དེ་མ་འོངས་པ་སྐྱེ་བ་དང་མཐུན་པར་གནས་པར་བྱེད་དོ། །དམིགས་པ་ལ་ཀུན་ཏུ་རྨོངས་པར་བྱེད་དེ། ཡང་དག་པར་ཇི་ལྟ་བ་བཞིན་དུ་མི་འཛིན་པའི་ཕྱིར་དང་། བློ་ཉམས་པར་བྱེད་པའི་ཕྱིར། རྣམ་ཤེས་རྒྱུན་དམིགས་པའམ་ཕྱི་མ་ཡང་སྲིད་དུ་འཁྲིད་པར་བྱེད་དོ། །དགེ་བའི་ཕྱོགས་ལས་ཉམས་པར་བྱེད་དོ། །ཉོན་མོངས་གང་ཞིག་ཁམས་གང་དུ་གཏོགས་པ་དེས་ནི་ཁམས་དེ་ལས་མི་འདའ་བར་བྱེད་ཅིང་། འཆིང་བའི་ཆེད་དུ་ཁྱབ་པར་བྱེད་ཅིང་མཆེད་པར་བྱེད་པའོ། །གཉིས་པ་དེ་གཏན་ལ་དབབ་པ་ལ། དབྱེ་བ།(༡༤༦ན)
སྐྱེ་ཚུལ། རྣམ་གྲངས་སོ། །དང་པོ་ལ། ངོ་བོའི་དབྱེ་བ། རྣམ་པའི་དབྱེ་བ། ཕྲ་རྒྱས་དང་བཅས་པའི་དབྱེ་བའོ། །དང་པོ་ལ། སྤྱིར་དབྱེ་བ་དང་། ལྟ་བ་དང་ང་རྒྱལ་བྱེ་བྲག་ཏུ་དབྱེ་བའོ། །དང་པོ་ལ། དྲུག་ཏུ་དབྱེ་བ། བདུན་དུ་དབྱེ་བ། བཅུར་དབྱེ་བ། དགུ་བཅུ་རྩ་བརྒྱད་དུ་དབྱེ་བའོ། །དང་པོ་ནི། དྲུག །འདོད་ཆགས་དེ་བཞིན་ཁོང་ཁྲོ་དང་། །ང་རྒྱལ་མ་རིག་ལྟ་བ་དང་། །ཐེ་ཚོམ་ཡིན་ཏེ། ཕྲ་རྒྱས་དེ་དག་ཀྱང་མདོར་བསྡུ་ན་དྲུག་སྟེ། འདོད་ཆགས་དང་། ཁོང་ཁྲོ་དང་། ང་རྒྱལ་དང་། མ་རིག་པ་དང་། ལྟ་བ་དང་། ཐེ་ཚོམ་ཡིན་ཏེ། དེ་བཞིན་ཞེས་པས་ནི། དམིགས་པ་གང་ལ་འདོད་ཆགས་ཡོད་པ་དེ་ལ་དེ་བཞིན་དུ་ཁོང་ཁྲོ་སོགས་གཞན་དག་ཀྱང་རྒྱས་པར་འགྱུར་བའི་ཕྱིར། རས་ཡུག་གཤེར་བ་ལ་རྡུལ་ཆགས་པ་ལྟ་བུའོ་ཞེས་འོག་ནས་འཆད་དོ། །གཉིས་པ་[བདུན་དུ་དབྱེ་བ་]ལ། དབྱེ་བ་དངོས་དང་། སྲིད་པའི་འདོད་ཆགས་ངོས་བཟུང་བའོ། །དང་པོ་ནི། དེ་དྲུག་ཀྱང་། །འདོད་ཆགས་དབྱེ་བས་བདུན་དུ་བཤད། །ཕྲ་རྒྱས་དེ་དྲུག་ཀྱང་འདོད་ཆགས་ལ་འདོད་པའི་འདོད་ཆགས་དང་སྲིད་པའི་འདོད་ཆགས་གཉིས་སུ་དབྱེ་བས་ཕྲ་རྒྱས་བདུན་བཤད་དེ། འདོད་པའི་འདོད་ཆགས་ཁོང་ཁྲོ། སྲིད་པའི་འདོད་ཆགས་ང་རྒྱལ། མ་རིག་པ། ལྟ་བ། ཐེ་ཚོམ་སྟེ་ཕྲ་རྒྱས་སོ། །ཅི་འདོད་པའི་འདོད་ཆགས་ཉིད་ཕྲ་རྒྱས་ཡིན་པས་གཞི་མཐུན་པའི་ཕྱིར། འདོད་པའི་འདོད་ཆགས་ཀྱི་ཕྲ་རྒྱས་ཡིན་ནམ། འོན་ཏེ་འདོད་པའི་འདོད་ཆགས་ཀྱི་ཕྲ་རྒྱས་ཡིན། ཐ་དད་པའི་ཕྱིར། འདོད་པའི་འདོད་ཆགས་ཀྱི་ཕྲ་རྒྱས་ཡིན་ཅེས་དོགས་པ་ལ། བྱེ་སྨྲས། ཕྲ་རྒྱས་ཀུན་དཀྲིས་ཡིན་ལ། གནས་མ་བུའི་སྡེ་པ་ལྟར་ན་ཐོབ་པ་དང་། མདོ་སྡེ་པའི་ལུགས་ཀྱི་ས་བོན་ཡིན་ནོ་ཞེས་འདོད་པ་ལ། ཕྱོགས་དང་པོ་ལྟར་རོ་ཞེ་ན། ཆོས་ཅན། འོ་ན་མདོ་ལས། འདི་ན་ལ་ལ་འདོད་པའི་འདོད་ཆགས་ཀྱིས་ཀུན་ནས་དཀྲིས་པའི་སེམས་ཀྱིས་ལན་མང་དུ་མི་གནས་ལ། འདོད་པའི་འདོད་ཆགས་ཀྱིས་ཀུན་ནས་དཀྲིས་པ་བྱུང་ནའང་ཕྱིས་ངེས་པར་འབྱུང་བ་ཡང་དག་པར་ཇི་ལྟ་བ་བཞིན་རབ་ཏུ་(༡༤༦བ)
ཤེས་ཤིང་། དེའི་འདོད་ཆགས་ཀྱིས་ཀུན་ནས་དཀྲིས་པ་དེ་མཐུས་ཡང་དག་པར་ཤིན་ཏུ་ཀུན་ནས་འཇོམས་ཤིང་ཕྲ་རྒྱས་དང་བཅས་པ་སྤོང་བར་བྱེད་དོ་ཞེས་གསུངས་པའི་མདོ་དང་འགལ་ཏེ། རང་ཉིད་རང་དང་བཅས་པ་མ་ཡིན་པའི་ཕྱིར། ལྷ་སྦྱིན་བུ་དང་བཅས་པ་ཞེས་བརྗོད་པ་ནི། ལྷ་སྦྱིན་ལས་གཞན་པ་བརྗོད་པ་ལྟ་བུའོ། །ཕྱོགས་གཉིས་པ་ལྟར་ཁས་ལེན་ན་ཆོས་ཅན། ཆོས་མངོན་པར་འདོད་ཆགས་ཀྱི་ཕྲ་རྒྱས་ནི་བདེ་བ་དང་། ཡིད་བདེ་བ་དང་། བཏང་སྙོམས་ཀྱི་དབང་པོ་གསུམ་དང་མཚུངས་ལྡན་དུ་མངོན་པར་བཤད་པ་དང་འགལ་བར་ཐལ། ཕྲ་རྒྱས་ནི་ཐོབ་པའི་མཚན་ཉིད་ཀྱི་མི་ལྡན་པའི་འདུ་བྱེད་ཡིན་པའི་ཕྱིར། དཔེར་ན། གཟུགས་ཀྱི་སྐྱེ་བ་གཟུགས་ཡིན་པ་བུད་པ་བཞིན་ནོ། །བྱེ་བྲག་ཏུ་སྨྲ་བ་ན་རེ། འདོད་པའི་འདོད་ཆགས་ཉིད་ཕྲ་རྒྱས་ཡིན་ཏེ། ཐེ་ཚོམ་ཉིད་ཕྲ་རྒྱས་ཡིན་པའི་བར་དུའང་དེ་དང་འདྲའོ། །ཞེས་ཟེར་རོ། །དེ་ལྟར་ནའང་བཅས་ཞེས་པའི་མདོ་ཚིག་དང་འགལ་བ་མ་ཡིན་ཏེ། འདོད་པའི་འདོད་ཆགས་ཕྲ་རྒྱས་དང་བཅས་པའི་དོན་ནི། དེ་ཉོན་མོངས་གཞན་སྐྱེ་བ་དང་མཐུན་པར་གནས་པའི་འདོད་ཆགས་ཀྱི་རྣམ་པ་དགུ་ཕྱི་མ་ཕྱི་མ་སྔ་མའི་རྗེས་སུ་འབྲེལ་བ་དང་བཅས་པའི་སྒྲ་དོན་ཡིན་པའི་ཕྱིར། ཡང་ན་མདོ་ལས་ཐོབ་པ་ལ་ཕྲ་རྒྱས་ཀྱི་སྒྲས་བསྟན་པ་ཆོས་ཅན། ཕྲ་རྒྱས་ཀྱི་རྒྱུའི་ཐོབ་པ་ལ་འབྲས་བུ་ཕྲ་རྒྱས་ཀུན་དཀྲིས་ཀྱིས་ཉེ་བར་བཏགས་པ་ཡིན་ཏེ། འབྲས་མིང་རྒྱུ་ལ་བཏགས་པའི་ཕྱིར། དཔེར་ན། མེ་སྡུག་བསྔལ་གྱི་ཚོར་བའི་རྒྱུ་ཡིན་པ་ལ་བསམས་ནས་མེ་སྡུག་བསྔལ་ལོ་ཞེས་བརྗོད་པ་བཞིན་ནོ། །ཆོས་མངོན་པ་ལས་ཕྲ་རྒྱས་ཞེས་པའི་སྒྲ་འབྱུང་བ་ནི་ཆོས་ཅན། ཉོན་མོངས་པའི་ཀུན་དཀྲིས་ཁོ་ན་ལ་མཚན་ཉིད་པར་འཇུག་པ་ཡིན་ཏེ། དམིགས་པ་དང་མཚུངས་པར་ལྡན་པའི་སྒོ་ནས་རྒྱས་(༡༤༧ན)
པར་འགྱུར་བའི་ཕྱིར། ནོག་ལྐོག་ཤལ་དང་ལྡན་པ་དེ་ལ་བ་ལང་གི་སྒྲ་དངོས་མིང་དུ་འཇུག་པ་ལྟ་བུའོ། །གང་བ་སྤེལ་གྱིས། མང་བཀུར་བ་དང་། རྣམ་པར་ཕྱེ་སྟེ་སྨྲ་བའི་སྡེ་པའམ། སློབ་དཔོན་རྒྱལ་པོའི་སྲས་ལྟར་ན། གནས་མ་བུ་བའི་སྡེ་པས་ཕྲ་རྒྱས་མཚུངས་ལྡན་ཡིན་པ་ལ་ཤེས་བྱེད་ཅི་ཡོད་ཅེས་བྱེ་སྨྲ་ལ་དྲིས་པས། བྱེ་སྨྲ་ན་རེ། ཕྲ་རྒྱས་རྣམས་ནི་ཆོས་ཅན། མཚུངས་ལྡན་མ་ཡིན་པ་མ་ཡིན་ཏེ། ཕྲ་རྒྱས་ཀྱིས་སེམས་ནི་ཉོན་མོངས་པ་ཅན་དུ་འགྱུར་བར་བྱེད་པའི་ཕྱིར་དང་། སྔོན་མེད་པའི་དགེ་བ་མི་སྐྱེ་བས་སྒྲིབ་པའི་ཕྱིར། སྐྱེས་ཀྱང་ཡོངས་སུ་ཉམས་པ་དགེ་བ་དང་འགལ་བའི་ཕྱིར། དེ་ལ་ཁོ་ན་རེ། ཁྱབ་པ་མེད་དེ། ལྡན་པ་མིན་པ་རྣམས་ཀྱིས་ཀྱང་སེམས་ཉོན་མོངས་པ་ཅན་དུ་འགྱུར་བ་དང་། སྔོན་མེད་པའི་དགེ་བ་མི་སྐྱེ་བ་དང་། སྐྱེས་པ་ལས་ཡོངས་སུ་ཉམས་པར་བྱེད་པ་དེ་འདྲར་འགྱུར་བའི་ཕྱིར་ཞེས་ཟེར་རོ། །བྱེ་སྨྲས། འོ་ན་མཚུངས་ལྡན་མིན་པས་ཉོན་མོངས་པ་སོགས་གསུམ་བྱེད་ན་ཆོས་ཅན། དགེ་བ་ནམ་ཡང་དམིགས་པར་མི་འགྱུར་བར་ཐལ། དགེ་བའི་དུས་ན་ཡང་ཐོབ་པ་རྟག་ཏུ་ཉེ་བར་གནས་པ་གང་ཞིགལྡན་པ་མིན་པའི་ཐོབ་པ་དེས་ཀྱང་སེམས་ཉོན་མོངས་ཅན་དུ་འགྱུར་བ་སོགས་གསུམ་པོ་དེ་བྱེད་པའི་ཕྱིར། འདོད་མི་ནུས་ཏེ། དགེ་བའི་དམིགས་པ་ཡོད་པའི་ཕྱིར། ཕྲ་རྒྱས་ནི་མཚུངས་ལྡན་མ་ཡིན་པ་མ་ཡིན་པས་ཡིན་པར་གྲུབ་བོ། །ཕྱོགས་སྔ་ཕྱིའི་རྩོད་པ་འདི་ལ་སློབ་དཔོན་གྱིས་གཟུ་བོར་དཔྱད་པ་ན། ཕྲ་རྒྱས་ལྡན་པ་ཡིན་པ་ལ་བྱེ་སྨྲ་རྣམས་ཀྱིས། སེམས་ནི་ཉོན་མོངས་བྱེད་ཕྱིར་སོགས་བཀོད་པ་འདི་གཏན་ཚིགས་སུ་མི་རུང་བ་སྟེ། ཕྲ་རྒྱས་མཚུངས་ལྡན་དུ་མི་འདོད་པའི་གནས་མ་བུ་པ་དེས་ཀྱང་སེམས་ཉོན་མོངས་ཅན་དུ་བྱེད་པ་སོགས་ཕྲ་རྒྱས་ཀྱིས་བྱས་པར་མི་འདོད་ཀྱི། ཉོན་མོངས་པའི་(༡༤༧བ)
ཀུན་དཀྲིས་ཁོ་ནས་བྱས་པར་འདོད་པའི་ཕྱིར། དེ་ལྟར་ན་དགེ་བ་མི་དམིགས་པར་ཡང་མི་ཐལ་ཏེ། ཀུན་དཀྲིས་ནི་རྟག་ཏུ་ཉེ་བ་མ་ཡིན་པའི་ཕྱིར། གཏན་ཚིགས་སུ་མི་རུང་བའི་ཚུལ་ཞིབ་ཏུ་བརྗོད་ན། ཐོབ་པ་ཆོས་ཅན། ཕྲ་རྒྱས་མ་ཡིན་པར་ཐལ། སེམས་ཉོན་མོངས་པ་སོགས་མི་བྱེད་པའི་ཕྱིར་ཞེས་སྦྱར་ན་གཏན་ཚིགས་མ་གྲུབ། འདོད་ཆགས་སོགས་ཆོས་ཅན། མཚུངས་ལྡན་ཡིན་པར་ཐལ། སེམས་ཉོན་མོངས་པར་བྱེད་པ་སོགས་ཀྱི་ཕྱིར། ཞེས་སྦྱར་ན་གྲུབ་ཟིན་བསྒྲུབ་པར་འགྱུར། ཉོན་མོངས་པ་ཅན་ཙམ་ཆོས་ཅན། མཚུངས་ལྡན་དུ་ཐལ། སེམས་ཉོན་མོངས་པར་བྱེད་པ་སོགས་ཀྱི་ཕྱིར་ཞེ་ན། མ་ངེས་ཏེ། ལྡན་པ་མ་ཡིན་པའི་མི་མཐུན་ཕྱོགས་ཐོབ་སོགས་ལའང་གཏན་ཚིགས་དེ་ཞུགས་པའི་ཕྱིར་རོ་ཞེས་རྟོགས་པར་བྱའོ། །མདོ་སྡེ་པས་འདོད་པའི་ཕྲ་རྒྱས་ཀྱི་ལུགས་དེ་ནི་ལེགས་པ་ཡིན་ནོ། །དེའི་ལུགས་ཇི་ལྟ་བུ་ཞེ་ན། འདོད་པའི་འདོད་ཆགས་ཀྱི་ཕྲ་རྒྱས་ནི། འདོད་པའི་འདོད་ཆགས་ཀྱི་ཕྲ་རྒྱས་ཡིན་ཅེས་པའི་ཕྱོགས་བཟུང་ནས་ཕྲ་རྒྱས་དང་བཅས་པ་སྤོང་བར་བྱེད་དོ་ཞེས་འཆད་ནའང་མདོ་དང་མི་འགལ་མོད་ཀྱི། འོན་ཀྱང་ཕྲ་རྒྱས་ལྡན་པ་མ་ཡིན་པར་དོགས་པ་ཡོད་པ་མི་ལྡོག་པས་འདི་ལྟར་ཤེས་པར་བྱ་སྟེ། ཕྲ་རྒྱས་ནི་མཚུངས་ལྡན་མངོན་གྱུར་པའང་མ་ཡིན་ལ། གནས་མ་བུའི་སྡེ་པའི་འདོད་པ་ལྟར་ཐོབ་པའི་རྫས་ལོག་པ་ལྡན་པ་མིན་པའང་མ་ཡིན་ཏེ། ནུས་པའི་ངོ་བོའི་ས་བོན་ཕྲ་རྒྱས་ནི་ཆགས་སོགས་ལས་རྫས་གཞན་མ་ཡིན་པའི་ཕྱིར། ཉོན་མོངས་པ་ཉལ་བ་ནི་ཆོས་ཅན། ཕྲ་རྒྱས་ཞེས་བྱ་སྟེ། མངོན་དུ་མ་གྱུར་པར་ས་བོན་གྱི་དངོས་པོ་རྗེས་སུ་འབྲེལ་བར་གནས་པ་དེའི་ཕྱིར། སད་པ་ནི་མངོན་གྱུར་ཡིན་ཏེ། རང་གི་འབྲས་བུ་སེམས་ཀུན་ནས་ཉོན་མོངས་པ་ལ་སོགས་པར་བྱེད་ནུས་པའི་ཕྱིར། ཡང་སྲད་པ་(༡༤༨ན)
ལ་ཀུན་དཀྲིས་ཞེས་ཀྱང་བྱ་སྟེ། སེམས་རང་དབང་མེད་པར་བྱེད་པའི་ཕྱིར། ས་བོན་གྱི་དངོས་པོ་དེ་ཅི་ཞེ་ན། ཉོན་མོངས་སྔར་བྱུང་གིས་བསྐྱེད་པའི་རྒྱུའི་ནུས་པ་མཐུ་ཅན་དེ་ཡིན་ཏེ། རྟེན་ལས་དེ་ཉིད་ལས་གཞན་དུ་བརྗོད་དུ་མེད་པའི་ཕྱིར། དཔེར་ན། གཟུགས་ཉམས་སུ་མྱོང་བའི་ཤེས་པ་ལས་དྲན་པ་བསྐྱེད་པའི་མཐུ་རྫས་གཞན་མ་ཡིན་པ་བཞིན་ནོ། །ཡང་ལ་ལའི་དོར་དྲན་པ་བསྐྱེད་པའི་རྒྱུ་ལྡན་མིན་གྱི་རྫས་གཞན་ཡིན་པར་འདོད་པ་ཡོད་པས་དཔེ་མ་གྲུབ་དོགས་ན། དེའི་དཔེ་གཞན་ཡང་ཡོད་དེ། སཱ་ལུ་ལྟ་བུ་རྒྱུ་སྔར་སོང་གི་འབྲས་བུ་ད་ལྟ་བ་ལས་འབྲས་བུ་ཕྱི་མ་འབྱུང་བའི་རྒྱུ་ནུས་ཀྱི་མཐུ་ནི་དེ་ལས་རྫས་གཞན་མིན་པ་ལྟ་བུའོ། །ཡང་གནས་མ་བུ་པའི་འདོད་པ་ལྟར་ན་ཆོས་ཅན། ཉམས་མྱོང་གི་ཤེས་པ་ལས་དྲན་པ་བསྐྱེད་པའི་ནུས་པ་གཞན་དུ་ཐལ། ཉོན་མོངས་པ་རྣམས་ཀྱི་ས་བོན་གྱི་ཕྲ་རྒྱས་རྣམས་ཉོན་མོངས་ལས་གཞན་པ་ལྡན་པ་མ་ཡིན་པར་རྟོགས་པའི་ཕྱིར་ཞེས་འཕེན་ནོ། །གལ་ཏེ་ཉོན་མོངས་པའི་ཕྲ་རྒྱས་ཞེས་བྱ་བར་འདོད་ན། འོ་ན་མདོ་ལས་ཉོན་མོངས་པ་ཉིད་ཕྲ་རྒྱས་སུ་གསུངས་ཏེ། དྲུག་ཚན་དྲུག་པའི་མདོ་ལས། འདིའི་འདོད་པའི་འདོད་ཆགས་དེ་བདེ་བའི་ཚོར་བ་ལས་རྒྱས་པར་འགྱུར་རོ་ཞེས་གསུངས་པས། འདོད་ཆགས་ཁོ་ན་ཕྲ་རྒྱས་ཡིན་ཏེ། བདེ་བའི་ཚོར་བའི་གནས་སྐབས་ན་འདོད་ཆགས་ཀུན་ཏུ་འབྱུང་བས་དེ་སྐད་དུ་གསུངས་ཀྱི། ས་བོན་ནི་མ་ཡིན་ནོ་སྙམ་དུ་བསམ་པའི་ཕྱིར། ཁྱེད་ཀྱི་ལུང་དོན་དེ་ཅི་ལྟ་བུར་འདོན་ཅེ་ན། མདོ་སྡེ་པས། ལུང་དེ་ཁོ་ན་ཉིད་ཀྱིས་ཆོས་ཅན། འདོད་ཆགས་རང་ཕྲ་རྒྱས་སུ་བསྟན་པ་མ་ཡིན་གྱི། འགྱུར་རོ་ཞེས་པས་འདོད་ཆགས་ཀྱི་ས་བོན་ཁོ་ན་ཕྲ་རྒྱས་ཡིན་པས། གནས་སྐབས་དེ་ན་འདོད་ཆགས་དེའི་ཕྲ་རྒྱས་སྐྱེ་བར་འགྱུར་བས་ས་བོན་སྐྱེ་བར་འགྱུར་བ་ཡིན་གྱི། སྐྱེས་པ་མ་ཡིན་པས་(༡༤༨བ)
དེར་ནི་ས་བོན་འབྱུང་འགྱུར་གྱི་གནས་སྐབས་བརྗོད་པ་ཡིན་པའི་ཕྱིར་རོ། །འོ་ན་ཕྲ་རྒྱས་དེ་ནི་རྒྱས་པར་འགྱུར་ན། མངོན་གྱུར་ཞིག་པའི་ཚེ་ན་རྒྱས་པར་འགྱུར་རོ། །ཡང་ན་རྒྱུ་འདོད་ཆགས་ལ་ཕྲ་རྒྱས་སུ་ཉེ་བར་བཏགས་པ་ཡིན་ཏེ། འདོད་ཆགས་ནི་འདོད་ཆགས་ཀྱི་ས་བོན་ཕྲ་རྒྱས་ཀྱི་རྒྱུ་ཡིན་པས། འདོད་ཆགས་བསྐྱེད་པའི་ནུས་པ་འདོད་ཆགས་ལས་སྐྱེས་པ་ལ་འདོད་ཆགས་ཀྱི་ཕྲ་རྒྱས་ཞེས་བཤད་པ་ཡིན་པའི་ཕྱིར། མདོ་སྡེ་པས་ནི། ནུས་པ་ཕྲ་རྒྱས་ཡིན། མངོན་གྱུར་ནི་ནུས་པ་དེའི་རྒྱུ་ཡིན་པས་ཕྲ་རྒྱས་སུ་བཏགས་ཟེར། བྱེ་སྨྲས་ནི། མངོན་གྱུར་ཕྲ་རྒྱས་ཡིན་ལ། ས་བོན་ནི་མངོན་གྱུར་ཕྲ་རྒྱས་དེའི་རྒྱུ་ཡིན་པས་ས་བོན་ལ་ཕྲ་རྒྱས་སུ་བཏགས་ཟེར་རོ། །གཉིས་པ་ནི། ཁམས་གཉིས་ལས་སྐྱེས་སྲིད་འདོད་ཆགས། །ཁ་ནི་ནང་དུ་བལྟས་ཕྱིར་དེར། །ཐར་པའི་འདུ་ཤེས་བཟློག་ཕྱིར་བཤད། །གཟུགས་ཁམས་གཟུགས་མེད་ཁམས་གཉིས་ལས་སྐྱེས་པའི་འདོད་ཆགས་ནི་སྲིད་པའི་འདོད་ཆགས་ཞེས་བཤད་དོ། །དེ་དག་ནི་གཞལ་མེད་ཁང་སོགས་ལ་ཆགས་པ་ཡོད། ཕལ་ཆེར་རོ་མྱོང་དང་མཚུངས་ལྡན་གྱི་བསམ་གཏན་ལ་གཙོ་བོར་འདོད་ཆགས་པ་ཡིན་ལ། དེའང་ཁ་ནི་ནང་དུ་བལྟས་པའི་ཕྱིར་ཆུ་ཀླུང་འོད་སྲུང་སོགས་ཁ་ཅིག་ཁམས་གཉིས་པོ་དེར་ཐར་པ་ཡིན་ནོ་སྙམ་པའི་འདུ་ཤེས་བཟློག་པའི་ཕྱིར་སྲིད་པའི་འདོད་ཆགས་ཞེས་བཤད་དོ་ཞེས་གྲགས་སོ། །སློབ་དཔོན་གྱི་ལུགས་ཀྱིས་ཡོ་བྱད་དང་ལོངས་སྤྱོད་གཅིགལུས་དང་སྲིད་པ་གཅིག་པ་ཡིན་ཙམ་ན། འདོད་ཁམས་པ་ནི་ལུས་དང་ལོངས་སྤྱོད་གཉིས་ཀ་ལ་ཞེན་པ་ཡིན་པས་འདོད་པའི་འདོད་ཆགས་ཡིན། ལུས་ཕུང་པོ་ལྔའམ་གཞིའི་མཚན་ཉིད་ཁོ་ན་སྲིད་པ་ཡིན་ལ། སེམས་ཅན་དེ་དག་ཀྱང་སྙོམས་འཇུག་གི་རྟེན་ལུས་དང་བཅས་པ་ཁོ་ན་ལ་རོ་མྱོང་བར་བྱེད་པས་སྲིད་པའི་འདོད་ཆགས་ཞེས་བྱ་སྟེ། འདོད་པའི་འདོད་ཆགས་དང་བྲལ་བས་འདོད་པའི་ཡོན་ཏན་གྱི་རོ་མྱོང་བ་མ་ཡིན་པས། འདོད་པའི་འདོད་ཆགས་(༡༤༩ན)
མ་ཡིན་པའི་ཕྱིར་རོ། །གསུམ་པ་བཅུར་དབྱེ་བ་ནི། ལྟ་བ་ལྔ་སྟེ་འཇིག་ཚོགས་དང་། །ལོག་དང་མཐར་འཛིན་ལྟ་བ་དང་། །ལྟ་བ་དང་ནི་ཚུལ་ཁྲིམས་དང་། །བརྟུལ་ཞུགས་མཆོག་ཏུ་འཛིན་དང་བཅུ། །ཡང་ཆོས་མངོན་པ་ལས་ཕྲ་རྒྱས་དྲུག་པོ་དེ་ལས་བཅུར་འཆད་དེ། ལྟ་བ་ལ་ལྔར་ཕྱེ་བས་ཏེ། འཇིག་ཚོགས་ལ་ལྟ་བ་དང་། མཐར་འཛིན་པར་ལྟ་བ་དང་། ལོག་པར་ལྟ་བ་དང་། ལྟ་བ་མཆོག་ཏུ་འཛིན་པ་དང་ནི། ཚུལ་ཁྲིམས་བརྟུལ་ཞུགས་མཆོག་ཏུ་འཛིན་པ་སྟེ། དེ་ལྟར་ལྟ་བ་ལྔ། ལྟ་མིན་ལྔ་སྟེ་བཅུའོ། །བཞི་པ་དགུ་བཅུ་རྩ་བརྒྱད་དུ་དབྱེ་བ་ལ། དངོས་དང་། ཞར་བྱུང་ངོ་། །དང་པོ་ལ། འདོད་པའི་སས་བསྡུས་སོ་དྲུག་བཤད་པ། ཁམས་གོང་གི་སས་བསྡུས་རེ་གཉིས་བཤད་པ། མཇུག་བསྡུ་བའོ། །དང་པོ་ལ། མཐོང་སྤང་སོ་གཉིས་དང་། སྒོམ་སྤང་བཞི་བཤད་པའོ། །དང་པོ་ནི། དེ་དག་བཅུ་དང་བདུན་བདུན་བརྒྱད། །ལྟ་བ་གསུམ་གཉིས་མ་གཏོགས་པ། །འདོད་ན་སྡུག་བསྔལ་ལ་སོགས་པ། །མཐོང་བས་རིམ་བཞིན་སྤོང་བར་བྱེད། །ཡང་ཆོས་མངོན་པ་ལས། ཕྲ་རྒྱས་བཅུ་པོ་དེ་དག་ལས་འདོད་པ་ན་སུམ་ཅུ་རྩ་དྲུག་དང་། གཟུགས་ན་སུམ་ཅུ་རྩ་གཅིག་དང་། གཟུགས་མེད་ན་སུམ་ཅུ་རྩ་གཅིག་སྟེ་དགུ་བཅུ་གོ་བརྒྱད་དོ། །དེ་དག་མདོར་བསྡུ་ན་ཁམས་གསུམ་པའི་མཐོང་སྤོང་སྒོམ་སྤོང་དག་ཡིན་ཏོ། །དེ་ལ་འདོད་ཁམས་ཀྱི་མཐོང་སྤོང་ནི་སོ་གཉིས་ཏེ། བཅུ་པོ་དེ་དག་ལས་བཅུ་པོ་ཐམས་ཅད་དང་། བདུན་དང་བདུན་དང་བརྒྱད་རྣམས་འདོད་པའི་ཁམས་ན་སྡུག་བསྔལ་དང་ལ་སོགས་པ་ཀུན་འབྱུང་དང་འགོག་པ་དང་ལམ་རྣམས་ལ་མཐོང་བའི་ལམ་གྱིས་རིམ་བཞིན་སྤོང་བར་བྱེད་དེ། ཀུན་འགོག་ལ་འཇིག་ལྟ་མཐར་ལྟ་ཚུལ་ཞུགས་མཆོག་འཛིན་ཏེ་ལྟ་བ་གསུམ་དང་། ལམ་ལ་དང་པོ་གཉིས་མ་གཏོགས་པའི་ཕྱིར་ཏེ། བདེན་པ་ལ་དངོས་སམ་བརྒྱུད་ནས་ལོག་པར་ཞུགས་པ་གཅིག་སྤང་བྱར་བྱེད་དགོས་པས་དེ་དག་ལ་ལོག་ཞུགས་མེད་པའི་ཕྱིར། ཀུན་འགོག་གཉིས་ལ་དེ་གསུམ་མ་གཏོགས་པ་ནི། འཇིགས་ཚོགས་ལ་ལྟ་བ་ནི་འབྲས་བུར་གྱུར་པ་ཉེ་བར་ལེན་པའི་ཕུང་པོ་ལྔ་ལ་དམིགས་པར་(༡༤༩བ)
བྱེད་པ་ཡིན་པས། སྡུག་བསྔལ་མཐོང་བས་སྤོང་བར་བྱེད་པ་ཁོ་ན་ཡིན་ནོ། །མཐར་འཛིན་པར་ལྟ་བ་ཡང་། ཕུང་པོ་ལྔ་པོ་དེ་དག་ཉིད་རྟག་ཆད་ཀྱི་མཐར་འཛིན་པའི་ཕྱིར་ཡིན་ལ། ཚུལ་ཁྲིམས་བརྟུལ་ཞུགས་མཆོག་འཛིན་ཀྱང་། ཕུང་པོ་དེ་ཉིད་ལ་འདག་གྲོལ་དུ་དམིགས་པས་འདིར་བསལ་ཞིང་། ལམ་ལའང་འཇིགམཐར་གཉིས་མ་གཏོགས་ཚུལ་འདྲ་ལ། ལམ་ལ་ཚུལ་ཁྲིམས་བརྟུལ་ཞུགས་མཆོག་འཛིན་གྱིས་འདགས་པར་ཡིད་ཆེས་པས་ལོག་པར་ཞུགས་པས་མ་བསལ་ལོ། །ཉོན་མོངས་པས་ཕྲ་རྒྱས་སོ་གཉིས་བདེན་པ་ལ་སྐུར་པ་འདེབས་པ་དེ་ནི་ཆོས་ཅན། བདེན་པ་རྣམས་མཐོང་བ་ཙམ་གྱིས་སྤོང་བར་འགྱུར་ཏེ། གོམས་པས་སྤོང་བ་མ་ཡིན་པའི་ཕྱིར། ཐག་པ་མཐོང་བས་སྦྲུལ་དུ་འཁྲུལ་བ་སྤོང་བ་བཞིན་ནོ། །དེ་ནི་ཞིབ་ཏུ་ཅུང་ཟད་བཤད་པར་བྱ་སྟེ། འདོད་ན། སྡུག་བསྔལ་མཐོང་སྤང་བཅུ་སྟེ། མཆོག་འཛིན་གཉིས་ཀྱང་ཀུན་འགྲོ་ཡིན་པས་དངོས་སུ་ལོག་ཞུགས་ཡིན་ལ། དེ་ཡང་སྡུག་བསྔལ་ཉེར་ལེན་ཕུང་པོ་ལྔ་ལ་འཇིག་ཚོགས་ཀྱིས་བདག་ཏུ་དངོས་སུ་ལོག་པར་ཞུགས། མཐར་འཛིན་གྱིས་ཉེར་ལེན་གྱི་ཕུང་པོ་ལ་བཏགས་པའི་བདག་དེ་ལ་རྟག་ཆད་དུ་ལོག་པར་ཞུགས། ལོག་ལྟས་སྡུག་བསྔལ་དེ་ལ་སྐུར་བ་འདེབས། ལྟ་བ་མཆོག་འཛིན་གྱིས་ལྟ་བའི་གནས་ཉེར་ལེན་ཕུང་པོ་དམན་པ་དེ་ལ་མཆོག་ཏུ་འཛིན། ཚུལ་ཁྲིམས་ལ་བརྟུལ་ཞུགས་མཆོག་འཛིན་གྱིས་དམན་པ་དེ་ལ་རྒྱུར་འཛིན། ཐེ་ཚོམ་གྱིས་དེ་ལ་བློ་འཚོམ་པས་སྡུག་བསྔལ་ལ་དངོས་སུ་ལོག་ཞུགས་དྲུག་གོ། །དྲུག་པོ་དེ་ཡུལ་དུ་བཞག་ནས་འདོད་ཆགས་ཀྱིས་དེ་ལ་ཞེ་ན། ཁོང་ཁྲོས་སྡང་། ང་རྒྱལ་གྱིས་ཁེངས་ཏེ་དེ་གསུམ་ལོག་པར་ཞུགས་པ་ལས་ལོག་ཞུགས་སོ། །མ་རིག་པ་ལ་འདྲེས་(༡༥༠ན)
པའི་མ་རིག་པ་ནི་དྲུག་དང་མཚུངས་ལྡན་དངོས་སུ་ལོག་ཞུགས། གསུམ་དང་མཚུངས་ལྡན་ལོག་པར་ཞུགས་པ་ལ་ལོག་ཞུགས་སོ། །མ་འདྲེས་པའི་མ་རིག་པ་ནི་སྡུག་བསྔལ་ལ་རྨོངས་པ་ཡིན་ཏེ། དེ་ནི་དངོས་སུ་ལོག་པར་ཞུགས་སོ། །ཀུན་འབྱུང་ལ་ལོག་ཞུགས་བདུན་ནི། ལོག་ལྟས་ཀུན་འབྱུང་ལ་སྐུར་བ་འདེབས། ལྟ་བ་མཆོག་འཛིན་གྱིས་དེ་བཟང་པོར་འཛིན། ཐེ་ཚོམ་གྱིས་དེ་ལ་བློ་འཚོམ་སྟེ་དེ་གསུམ་ཀུན་འབྱུང་ལ་དངོས་སུ་ལོག་པར་ཞུགས། དེ་གསུམ་ཡུལ་དུ་བཞག་ནས། འདོད་ཆགས་ཀྱིས་ཆགས་། ཞེ་སྡང་གིས་སྡང་། ང་རྒྱལ་གྱིས་ཁེངས་ཏེ་དེ་གསུམ་ནི་ཀུན་འབྱུང་གི་ལོག་ཞུགས་ཀྱི་ལོག་ཞུགས་སོ། །འདྲེས་པའི་མ་རིག་པས་ནི། ལོག་ལྟ། ལྟ་བ་མཆོག་འཛིན། ཐེ་ཚོམ་དང་མཚུངས་པ་དེ་དངོས་སུ་ཀུན་འབྱུང་ལ་ལོག་པར་ཞུགས། མ་འདྲེས་པའི་མ་རིག་པ་ནི་ཀུན་འབྱུང་ལ་རྨོངས་པ་ཡིན་ཏེ། ཀུན་འབྱུང་ལ་དངོས་སུ་ལོག་པར་ཞུགས་སོ། །འགོག་པའི་ལོག་ཞུགས་བདུན་ནི། ལོག་ལྟས་འགོག་པ་ལ་སྐུར་བ་འདེབས། ཐེ་ཚོམ་གྱིས་འགོག་པ་ལ་འཚོམ་སྟེ། དེ་གཉིས་འགོག་པ་ལ་དངོས་སུ་ལོག་པར་ཞུགས་སོ། །དེ་གཉིས་ཡུལ་དུ་བཞག་ནས་འདོད། ཁོང་། ང་རྒྱལ་གསུམ་གྱིས་ཆགས་སྡང་ཁེངས་ཏེ་ལོག་པར་ཞུགས་པ་ལ་ལོག་པར་ཞུགས། ལྟ་བ་མཆོག་འཛིན་ནི། གང་གིས་དངོས་ཀྱི་ལོག་ལྟ་དང་ཐེ་ཚོམ་གཉིས་ལ་མཆོག་ཏུ་འཛིན་པས་ལོག་པར་ཞུགས་པས་ལོག་ཞུགས་ཡིན་ཏེ། ཟག་བཅས་མ་དམིགས་པར་ཟག་མེད་འགོག་པ་རང་ལ་དམིགས་མི་ནུས་པའི་ཕྱིར། འདྲེས་པའི་མ་རིག་པས་ནི། ལོག་ལྟ་ཐེ་ཚོམ་གཉིས་དང་མཚུངས་ལྡན་དངོས་སུ་ལོག་པར་ཞུགས། འདོད། ཁོང་། ང་རྒྱལ། ལྟ་བ་མཆོག་འཛིན་བཞི་དང་མཚུངས་(༡༥༠བ)
ལྡན་ནི་ལོག་པར་ཞུགས་པ་ལ་ལོག་པར་ཞུགས། མ་འདྲེས་པའི་མ་རིག་པ་ནི། འགོག་པ་ལ་དངོས་སུ་རྨོངས་པས་དངོས་སུ་ལོག་པར་ཞུགས་སོ། །ལམ་གྱི་ལོག་ཞུགས་བརྒྱད་ནི། ལོག་ལྟས་ལམ་ལ་སྐུར་པ་འདེབས། ཐེ་ཚོམ་གྱིས་ལམ་ལ་འཚོམ་སྟེ། དེ་གཉིས་དངོས་སུའོ། །དེ་གཉིས་ཡུལ་དུ་བཞག་ནས་འདོད་ཆགས་ཀྱིས་ཆགས། ཁོང་ཁྲོས་སྡང་། ང་རྒྱལ་གྱིས་ཁེངས། ལྟ་བ་མཆོག་འཛིན་གྱིས་བཟང་པོར་འཛིན། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱིས་འདག་པར་འཛིན་པས་དེ་ལྔ་ལོག་པར་ཞུགས། འདྲེས་པའི་མ་རིག་པ་ནི་གཉིས་དང་མཚུངས་ལྡན་དངོས་སུའོ། །ལྔ་དང་མཚུངས་ལྡན་ལོག་ཞུགས་ལ་ལོག་ཞུགས་སོ། །མ་འདྲེས་པའི་མ་རིག་པ་ནི་ལམ་ལ་དངོས་སུ་རྨོངས་ཏེ་དངོས་སུ་ལོག་པར་ཞུགས་སོ། །གཉིས་པ་ནི། བཞི་ནི་བསྒོམ་པས་སྤང་བྱ་ཡིན། །འདོད་ཆགས་དང་ཁོང་ཁྲོ་དང་མ་རིག་པ་དང་ང་རྒྱལ་བཞི་ནི་ཟག་མེད་ཀྱི་ལམ་སྒོམ་པས་སྤང་བྱ་ཡིན་ཏེ། བདེན་པ་མཐོང་བ་ཕྱིས་བདེན་པ་གང་རུང་ལ་དམིགས་ཏེ་ལམ་ཟག་མེད་ཡང་ཡང་དུ་བསྐྱེད་ཅིང་གོམས་པར་བྱས་པས་སྤོང་བའི་ཕྱིར། འཇིག་མཐའི་ལྟ་བ་གཉིས་ནི། སྡུག་བསྔལ་གྱི་རྣམ་པ་གཅིག་ཁོ་ན་སྟེ། སྡུག་བསྔལ་ལ་བདག་དང་བདག་གིར་དང་། བདག་ཏུ་འདོད་པའི་སྡུག་བསྔལ་ལ་རྟག་ཆད་ཀྱི་མཐར་འཛིན་པའི་ཕྱིར། སྡུག་བསྔལ་ཁོ་ན་ལ་ལོག་པར་ཞུགས་པའི་ཕྱིར། ལོག་ལྟ་ནི། སྡུག་བསྔལ་སོགས་མཐོང་སྤང་རིས་བཞི་ཀ་ལ་ལོག་པར་ཞུགས་ཏེ། སྡུག་བསྔལ་སོགས་བདེན་པ་བཞིའི་མཚན་ཉིད་ལ་མེད་ཅེས་སྐུར་བ་འདེབས་པའི་ཕྱིར། ལྟ་བ་མཆོག་འཛིན་དང་ཐེ་ཚོམ་ཡང་བདེན་པ་བཞི་ཀ་ལ་ལོག་པར་ཞུགས་ཏེ། དམན་པ་ལ་མཆོག་ཏུ་བལྟ་བའི་ཕྱིར་དང་། བདེན་པ་ཐམས་ཅད་ལ་ཐེ་ཚོམ་ཟ་བའི་རྣམ་པ་ཅན་ཡིན་པའི་ཕྱིར། ཚུལ་ཁྲིམས་དང་བརྟུལ་(༡༥༡ན)
ཞུགས་མཆོག་འཛིན་སྡུག་བསྔལ་དང་ལམ་གཉིས་ལ་ལོག་ཞུགས་ཡིན་ཏེ། དབང་ཕྱུག་སོགས་རྒྱུ་མིན་ལ་རྒྱུར་འཛིན་ཅིང་རྟག་བདག་སོགས་ཕྱིན་ཅི་ལོག་ལ་འཇུག་པའི་ཕྱིར་དང་། ལམ་མ་ཡིན་ལ་ལམ་དུ་འཛིན་པའི་ཕྱིར་རོ། །འདོད་ཆགས་དང་། ཁོང་ཁྲོ་དང་། ང་རྒྱལ་དང་། མ་རིག་པ་རྣམས་ནི་སྤང་བྱའི་རིས་ལྔ་པ་ཡིན་ཏེ། བདེན་པ་བཞི་མཐོང་བས་སྤང་བྱ་དང་། སྒོམ་པས་སྤང་བྱ་ཡིན་པའི་ཕྱིར། འོ་ན་ཆགས་སོགས་བཞི་པོ་དེ་རིས་ལྔ་པ་ཅན་ཡིན་ན་སྡུག་བསྔལ་སོགས་མཐོང་སྤང་གི་ཆ་གང་། སྒོམ་སྤོང་གི་ཆ་གང་ཞེ་ཞེ་ན། སྡུག་བསྔལ་མཐོང་བས་སྤང་བར་བྱ་བ་དང་། ལམ་མཐོང་བས་སྤང་བར་བྱ་བའི་འཇིག་ལྟ་སོགས་ལ་དམིགས་པའི་ཆགས་སོགས་ཉོན་མོངས་པ་གང་དག་ཆོས་ཅན། དེ་དག་ནི་མཐོང་བས་སྤང་བར་བྱ་བ་ཡིན་ཏེ། བདེན་པ་བཞི་ལ་འཇིག་ལྟ་སོགས་ཀྱིས་དངོས་སུ་ལོག་པར་ཞུགས། དེ་ལ་ཆགས་སོགས་ཀྱིས་ལོག་ཞུགས་ལ་ལོག་པར་ཞུགས་པས་བདེན་པ་ལ་ལོག་པར་ཞུགས་པ་ཡིན་པའི་ཕྱིར་ཏེ། དམིགས་པ་ཡོངས་སུ་ཤེས་པ་དང་། དེ་ལ་དམིགས་པ་ཡོངས་སུ་ཟད་པ་དང་ཞེས་འབྱུང་བའི་ཕྱིར། འདི་ལ་དཀའ་བའི་གནས་འདི་འདྲ་ཞིག་ཡོད་དེ། མ་རིག་པའི་ཕྲ་རྒྱས་ནི། བདེན་པ་བཞི་ཆར་ལ་དངོས་སུ་དམིགས་པ་ཅན་ཡང་ཡིན་པས་བདེན་པ་གང་ཞིག་ལ་དངོས་སུ་དམིགས་པ་ཅན་ཡང་ཡིན་ལ། གང་ཞིག་མཐོང་བས་སྤང་བྱའི་འཇིག་སོགས་ཀྱི་ཉོན་མོངས་ལ་རྗེས་ནས་དམིགས་པ་ཅན་ཡང་ཡིན་པས། བདེན་པ་ལ་དམིགས་པ་དང་། དེ་ལ་བརྟེན་པའི་ཉོན་མོངས་ལ་དམིགས་པ་གཉིས་ཀ་བརྗོད་དགོས་སམ་ཞེ་ན། མི་དགོས་ཏེ། གང་ཞིག་མཐོང་བས་སྤང་བར་བྱ་བའི་དམིགས་པ་ཅན། ཅེས་ཉོན་མོངས་ལ་དམིགས་པ་ཅན་ཅེས་སྨོས་པ་ཉིད་ཀྱིས་བདེན་པ་ལ་དམིགས་པ་དང་། གཅིག་ཏུ་(༡༥༡བ)
བསྡུས་པའི་ཚུལ་གྱིས་བརྗོད་པ་གྲུབ་པའི་ཕྱིར་ཏེ། གང་ཞིག་གི་སྒྲས་དམིགས་པ་གཉིས་ཀ་བཟུང་བའི་ཕྱིར། ཡང་མ་རིག་པ་ཕྲ་རྒྱས་ཀུན་ཏུ་འགྲོ་བ་ཀུན་འབྱུང་མཐོང་བས་སྤང་བར་བྱ་བ་རིས་ལྔ་ཀ་ལ་དམིགས་པ་ཡིན་པ་ཆོས་ཅན། སྡུག་བསྔལ་དང་འགོག་པ་ལ་སོགས་པའི་བདེན་པ་མཐོང་བས་སྤང་བྱ་ཉིད་དུ་ཐལ། སྡུག་བསྔལ་དང་འགོག་པ་ལ་སོགས་པ་བདེན་པ་མཐོང་བས་སྤང་བར་བྱ་བ་ལ་སོགས་པ་ལའང་དེས་དམིགས་པའི་ཕྱིར་ཞེ་ན། ཁྱབ་པ་མེད་པས་ཉེས་པ་མེད་དེ། དེ་ནི་རིས་ལྔ་ཅར་ལ་དམིགས་པ་ཡིན་མོད་ཀྱི། རིས་དེ་རྣམས་ལས་ཀུན་འབྱུང་གི་ངོ་བོ་ལ་མ་རིག་པས་དམིགས་པར་བྱེད་པ་དེ་ནི་ཀུན་འབྱུང་མཐོང་བས་སྤང་བྱ་དང་། གཞན་ལའང་དེ་ལྟར་སྦྱར་བར་བྱ་ཞིང་། གཟུགས་སོགས་ལ་མ་རིག་པས་དམིགས་པར་བྱེད་པ་དེ་ནི་སྒོམ་པའི་ལམ་གྱི་སྤང་བར་བྱ་བ་ཡིན་པའི་ཕྱིར། ལྷག་མ་འདོད་ཆགས་ཁོང་ཁྲོ་ང་རྒྱལ་མ་རིག་པ་གང་དག་ཆོས་ཅན། བདེན་པ་ལ་ལོག་པར་མི་ཞུགས་པའི་འཇིག་ལྟ་སོགས་ལ་མི་དམིགས་པ་དེ་དག་ནི་སྒོམ་པས་སྤང་བྱ་དག་ཡིན་ཏེ། ཤེས་བྱ་གཟུགས་ལ་དམིགས་པའི་ཡུལ་ཅན་གྱི་ལོག་ཞུགས་ཡིན་པའི་ཕྱིར། དེ་དག་ནི་ལྟ་བ་བཅུ་གཉིས། ཐེ་ཚོམ་བཞི། འདོད་ཆགས་ལྔ། ཁོང་ཁྲོ་ལྔ། ང་རྒྱལ་ལྔ། མ་རིག་པ་ལྔ་སྟེ་ཕྲ་རྒྱས་སོ་དྲུག་པོ་དེ་ནི་འདོད་པ་ན་སྤྱོད་པ་ཡིན་ནོ། །གཉིས་པ་ཁམས་གོང་གི་སས་བསྡུས་རེ་གཉིས་བཤད་པ་ནི། ཁོང་ཁྲོ་མ་གཏོགས་དེ་དག་ཉིད། །གཟུགས་ཁམས་གཟུགས་མེད་དེ་དང་འདྲ། །རྒྱུད་ཞིག་ནས་ཀྱིས་བརླན་པ་དང་། རྟེན་དང་། རྒྱས་པའི་གཞི་ཚོར་བ་སྡུག་བསྔལ་གཟུགས་ཁམས་ན་མེད་པས་ཁོང་ཁྲོ་ལྔ་མ་གཏོགས་པ་ཕྲ་རྒྱས་སུམ་ཅུ་རྩ་གཅིག་པོ་དེ་དག་ཉིད་གཟུགས་ཁམས་ན་སྤྱོད་པ་ཡིན་ནོ། །གཟུགས་མེད་ཀྱང་གཟུགས་ཀྱི་ཁམས་དེ་དང་འདྲ་བར་ཕྲ་རྒྱས་སུམ་ཅུ་རྩ་གཅིག་གོ། །དེ་ལྟར་འདོན་པར་བྱ་སྟེ། དེ་དག་དགུ་དང་དྲུག་དྲུག་(༡༥༢ན)
བདུན། །ཁོང་ཁྲོ་ལྟ་བ་གསུམ་གཉིས་དག །མ་གཏོགས་གཟུགས་ན་སྡུག་བསྔལ་སོགས། །མཐོང་བས་རིམ་བཞིན་སྤོང་བར་བྱེད། །གསུམ་ནི་སྒོམ་པས་སྤང་བྱ་ཡིན། །ཅེས་ཁམས་གོང་གཉིས་ལ་སྦྱར་རོ། །གསུམ་པ་མཇུག་བསྡུ་བ་ནི། དེ་ལྟར་དགུ་བཅུ་བརྒྱད་དུ་འདོད། །དེ་ལྟར་ན་ཆོས་མངོན་པ་དག་ནི་ཕྲ་རྒྱས་དྲུག་པོ་དེ་དག་རྣམ་པ་བཅུར་དབྱེ་བ་བདག་དང་བདག་གི་རྟག་ཆད་སོགས་ཞེས་རྣམ་པའི་དབྱེ་བ་དང་། སྤང་བྱའི་རིས་ལྔའི་བྱེ་བྲག་གི་དང་། ཁམས་གསུམ་ན་སྤྱོད་པའི་དབྱེ་བས་འདོད་ཆགས་བྱེ་བྲག་དང་། ཁམས་ཀྱི་བཅོ་ལྔ། ཁོང་ཁྲོའི་བྱེ་བྲག་གི་དབྱེ་བས་ལྔ། ང་རྒྱལ་ཡང་བྱེ་བྲག་དང་ཁམས་ཀྱི་དབྱེ་བས་བཅོ་ལྔ། མ་རིག་པའང་དེ་ཁམས་བཅོ་ལྔ། དེས་ན་ཐེ་ཚོམ་བཅུ་གཉིས། ལྟ་བ་ནི་རྣམ་པ་བྱེ་བྲག་ཁམས་ཀྱི་དབྱེ་བས་སུམ་ཅུ་རྩ་དྲུག་སྟེ་དགུ་བཅུ་བརྒྱད་དུ་འདོད་དོ། །འདོད་ཆགས་ཁོང་ཁྲོ་ང་རྒྱལ་མ་རིག་པ་ཐེ་ཚོམ་ནི་ཐམས་ཅད་ལ་རྣམ་པའི་དབྱེ་བ་མེད་དེ། ཆགས་པ་དང་། རྩུབ་པ་དང་། ཁེངས་པ་དང་། མི་གསལ་བ་དང་། ཐེ་ཚོམ་ཟ་བའི་རྣམ་པར་གཅིག་པའི་ཕྱིར། ཁོང་ཁྲོ་ལ་ཁམས་ཀྱི་དབྱེ་བ་མེད་ལ། བྱེ་བྲག་གི་དབྱེ་བ་ཡོད་ཅིང་ལྟ་བ་གསུམ་ཆར་གྱི་དབྱེ་བ་ཡོད་དོ། །དེས་ན་བྱེ་སྨྲས། མཐོང་སྒོམ་གྱི་སྤང་བྱ་ལ་ཞིབ་ཏུ་བྱས་ན་ཁམས་དང་ས་དང་རྣམ་པའི་སྒོ་ནས་དབྱེ་ན། རགས་པར་ཉིས་བརྒྱ་དང་བདུན་ཅུ་ཐམ་པའི་ལུགས་དང་། ཞིབ་པར་ཉིས་བརྒྱ་ལྔ་བཅུ་ང་བཞིའི་ལུགས་སོ། །དང་པོ་ལྟར་ན། ལོག་ཞུགས་བཅུ་པོ་ས་དགུས་བསྒྱུར་བས་དགུ་བཅུ་ཐམ་པ། དེ་ཚེ་འབྲིང་ཆུང་གསུམ་གྱིས་བསྒྱུར་བས་ཉིས་བརྒྱ་དང་བདུན་ཅུ་ཐམ་པའོ། །གཉིས་པ་ལྟར་ན། བཤད་མ་ཐག་པའི་ཉིས་བརྒྱ་དང་བདུན་ཅུ་པོའི་སྟེང་ནས་འདོད་པའི་ཀུན་འབྱུང་ལ། འཇིག་ལྟ་མཐར་ལྟ། ཚུལ་ཁྲིམས་བརྟུལ་ཞུགས་མཆོག་འཛིན་ཏེ་གསུམ། འགོག་པ་(༡༥༢བ)
ལ་དེ་གསུམ་སྟེ་དྲུག །ལམ་བདེན་ལ་འཇིག་མཐའ་གཉིས་ཏེ་བརྒྱད་འཕྲི། ཁམས་གོང་ས་བརྒྱད་ནས་ཁོང་ཁྲོ་བརྒྱད་འཕྲི་བས་ཉིས་བརྒྱ་དང་ལྔ་བཅུ་ང་བཞིའོ། །རྣམ་པར་གཏན་ལ་དབབ་པའི་བསྡུ་བ་ལས་ནི། འདོད་པའི་སྡུག་བསྔལ་ལ་ནི་བཅུ་པོ་ཐམས་ཅད་ལོག་པར་འཇུག་གོ་བདེན་པ་ཕྱི་མ་གསུམ་ལ་ནི། ལྟ་བ་དང་པོ་གཉིས་མ་གཏོགས་པ་བརྒྱད་བརྒྱད་ལོག་པར་འཇུག་གོ། །ཁམས་གོང་མ་གཉིས་ཀྱི་བདེན་པ་ལ་ནི་ཁོང་ཁྲོ་མ་གཏོགས་སྔ་མ་བཞིན་དུ་དགུ་དང་བདུན་བདུན་ལོག་པར་འཇུག་གོ། །ཞེས་གསུངས་པས། མཐོང་སྤང་འདོད་པ་ན་སོ་བཞི། གོང་མ་གཉིས་ན་སུམ་ཅུ་སུམ་ཅུ་སྟེ། དྲིལ་བས་དགུ་བཅུ་གོ་བཞི། སྒོམ་སྤོང་ནི་འདི་དང་མཐུན་པར་བཤད་པས། ལུགས་འདི་ནི་མདོ་སྡེ་པའི་འདོད་པའོ་ཞེས་བྲང་ཏི་འཆད་ཀྱང་། ཕྱིས་ཀྱི་མཁས་པ་དག་དེ་ནས་བཤད་པ་དེ་མདོ་སྡེ་པའི་ལུགས་ཡིན་པ་ལ་སྒྲུབ་བྱེད་མེད་པས་གྱི་ནའོ་ཟེར་རོ། །ཆོས་མངོན་པ་གོང་མ་པ་དག་གིས་ནི་ཉོན་མོངས་པ་དེ་དག་ལས་ལྟ་བ་འོག་མ་གསུམ་དང་། ཐེ་ཚོམ་ནི་ཀུན་བརྟགས་པའོ། །ལྷག་མ་ནི་ལྷན་ཅིག་སྐྱེས་པ་དང་ཀུན་བརྟགས་པའོ། །ཞེས་འབྱུང་བས་འདོད་ཆགས་ལ་སོགས་པ་བཞི་དང་། ལྟ་བ་དང་པོ་གཉིས་ཏེ་དྲུག་ནི་ལྷན་སྐྱེས་སྒོམ་སྤོང་དང་། ཀུན་བརྟགས་མཐོང་སྤོང་ཡིན་པས་གཉིས་ཀ་དང་། ལྟ་བ་ཕྱི་མ་གསུམ་དང་། ཐེ་ཚོམ་ནི་ཀུན་བརྟགས་ཁོ་ན་ཡིན་པས་མཐོང་སྤོང་ཉིད་དུ་ངེས་སོ། །ལུགས་འདིར་ནི། འཕགས་པའི་རྒྱུད་ལ་ཡོད་པའི་འཇིག་ལྟ་ལྷན་སྐྱེས་དང་། དེ་དང་མཚུངས་ལྡན་གྱི་མ་རིག་པའང་རྟེན་འབྲེལ་གྱི་ཡན་ལག་ཏུ་འཇོག་པའི་མ་རིག་པའི་ཡན་ལག་ནི་མ་ཡིན་པར་ཁས་ལེན་དགོས་ཏེ། དེས་ཀུན་ནས་སློང་བའི་ཟག་བཅས་ཀྱི་ལས་ནི་འཁོར་བར་འཕེན་བྱེད་མ་ཡིན་པའི་ཕྱིར་ཏེ། བདེན་པ་མཐོང་ལ་འཕེན་པ་(༡༥༣ན)
མེད་པའི་ཕྱིར། འཇིག་ལྟ་ལྷན་སྐྱེས་དང་མཚུངས་ལྡན་གྱི་མ་རིག་པས་ཀུན་ནས་སློང་སྟེ་ཆགས་པས་མི་ཚངས་སྤྱོད་ཀྱི་ལས་བསགས་པས། རྒྱུ་མཚན་དེའི་ཕྱིར་ངན་སོང་དུ་སྐྱེ་བའི་འདུ་བྱེད་ཀྱི་རྟེན་འབྲེལ་གྱི་ཡན་ལག་ཏུ་མི་འགྱུར་རོ། །དེས་ན་རྟེན་འབྲེལ་གྱི་ཡན་ལག་དང་པོར་འགྱུར་རྒྱུའི་མ་རིག་པ་ནི་འཇིག་ལྟ་ཀུན་བརྟགས་དང་། མཚུངས་ལྡན་གྱི་མ་རིག་པ་ཁོ་ན་ལ་བྱ་བ་དང་། དེས་ཀུན་ནས་སློང་བའི་ཟག་བཅས་དགེ་མི་དགེའི་ལས་གང་ཞིག་འདུ་བྱེད་ཀྱི་རྟེན་འབྲེལ་གྱི་ཡན་ལག་ཏུ་འཇོག་པ་འདི་གྲུབ་བོ། །དེ་ལྟར་ན་འཕགས་པ་ལ་འཁོར་བར་སྐྱེ་བ་འཕེན་བྱེད་ཀྱི་ཉོན་མོངས་སུ་གྱུར་པའི་བདག་ལྟ་མེད་ཀྱང་། སྤྱིར་འཕགས་པ་ཡིན་ན་བདག་ལྟ་སྤངས་པས་མ་ཁྱབ་པ་ཞིག་སྐབས་འདིར་ཁས་ལེན་དགོས་པ་ཡིན་ནོ། །ཉོན་མོངས་པ་བཅུ་པོ་དེ་དག་ཀྱང་བདེན་པ་བཞི་ལ་ཁྱད་པར་མེད་པར་ལོག་པར་འཇུག་པའི་ཕྱིར་འདོད་པ་ན་མཐོང་སྤོང་བཞི་བཅུ་དང་། ཁམས་གོང་མ་གཉིས་ན་ཁོང་ཁྲོ་མེད་པས་སུམ་ཅུ་རྩ་དྲུག་དྲུག་སྟེ་བརྒྱ་དང་བཅུ་གཉིས། སྒོམ་སྤང་ནི་འདོད་པ་ན་དྲུག་དང་། ཁམས་གོང་མ་གཉིས་ལྔ་ལྔ་སྟེ་བཅུ་དྲུག་ཡིན་ལ། སྒོམ་སྤོང་དེ་དག་ཀྱང་ཁམས་དང་ས་དང་རྣམ་པའི་སྒོ་ནས་ཕྱེ་ན་བཞི་བརྒྱ་དང་བཅུ་བཞིར་འགྱུར་ཏེ། འཇིག་ལྟ། མཐར་ལྟ། འདོད་ཆགས། ཁོང་ཁྲོ། ང་རྒྱལ། མ་རིག་པ་སྟེ་ལོག་ཞུགས་དྲུགདེ་ཆེ་འབྲིང་ཆུང་ངུའི་ནང་ཚན་དང་བཅས་པ་དགུས་བསྒྱུར་བས་སུམ་བརྒྱ་དྲུག་ཅུ་རྣམས་བསྡོམས་པས་སྒོམ་སྤོང་གི་ལོག་ཞུགས་བཞི་བརྒྱ་དང་བཅུ་བཞིའོ། །འདིར་སྨྲས་པ། ཐར་པ་འདོད་པ་དག་གིས་འཁོར་བ་ན། །བཅིངས་བྱེད་འཁྲུལ་པ་མེད་པར་ངོས་ཟིན་ཚེ། །འཆིང་བ་རྣམས་ལ་གདོས་དང་རྒྱ་ལྟ་བུའི། །ཉེས་པར་མཐོང་ནས་འཆིང་བ་མི་སྤོང་ངམ། །དེ་ཕྱིར་བདག་གིས་(༡༥༣བ)
སྟོན་པས་གསུངས་པ་ཡི། །འཆིང་བ་དེ་དག་འདི་ན་བརྡ་སྤྲོད་བྱས། །གཉིས་པ་ཞར་བྱུང་ནི། སྲིད་རྩེ་ལས་སྐྱེས་བཟོད་པ་ཡིས། །གཞོམ་བྱ་མཐོང་བས་སྤང་བྱ་ཉིད། །ལྷག་སྐྱེས་མཐོང་དང་བསྒོམ་གཉིས་ཀྱིས། །བཟོད་པས་གཞོམ་མིན་བསྒོམ་ཁོ་ནས། །འོ་ན་མཐོང་སྤོང་ཡིན་ན་མཐོང་ལམ་གྱིས་སྤོང་བས་ཁྱབ་བམ་མ་ཁྱབ་ཞེ་ན། བྱེ་སྨྲས་ནི་མ་ཁྱབ་སྟེ། སྤང་བྱ་ལ་བཟོད་པས་དང་ཤེས་པས་གཞོམ་བྱ་གཉིས་སུ་ངེས་ལ། བཟོད་པའི་གཞོམ་བྱ་གང་ཞིག་སྲིད་རྩེ་ལས་སྐྱེས་པ་ནི་མཐོང་བས་སྤང་བྱ་ཉིད་དུ་ངེས་ལ། ས་ལྷག་མ་ལས་སྐྱེས་པ་ནི་མཐོང་ལམ་དང་སྒོམ་ལམ་གཉིས་ཀ་ཉིད་ཀྱིས་དང་། བཟོད་པས་གཞོམ་བྱ་མིན་པ་ཤེས་པས་སྤང་བྱ་ནི་སྒོམ་ལམ་ཁོ་ནས་སྤོང་བའི་ཕྱིར། དང་པོ་གྲུབ་སྟེ། སྲིད་རྩེ་ལ་འཇིག་རྟེན་པའི་སྤོང་ལམ་མེད་པའི་ཕྱིར། གཉིས་པ་གྲུབ་སྟེ། འཕགས་པས་མཐོང་ལམ་དང་། སོ་སྐྱེའི་སྒོམ་ལམ་གྱིས་སྤོང་བའི་ཕྱིར། གསུམ་པ་གྲུབ་སྟེ། སྒོམ་སྤོང་དུ་ངེས་པ་དེ་མཐོང་ལམ་གྱིས་སྤང་མི་སྲིད་པའི་ཕྱིར། སྒོམ་སྤོང་ཁོ་ནར་ངེས་པ་དེའང་འཕགས་པ་དང་སོ་སྐྱེ་གཉིས་ཀས་འཇིག་རྟེན་དང་འཇིག་རྟེན་ལས་འདས་པའི་ལམ་གྱིས་སྤོང་བ་ཡིན། མདོར་ན་ས་གོང་མ་གོང་མ་ཐོབ་པའི་དུས་སུ་ས་འོག་མ་འོག་མའི་སྒོམ་སྤོང་སྟེ་ཨ་ཅང་ཆེས་སྤོང་པར་མ་ཟད། མཐོང་སྤོང་ཡང་སྤོང་བར་འདོད་པ་འདི་ལ་ཆོས་མངོན་པ་འདི་ལྟར་འཆད་པ་ལས་གཞན་པའི་སློབ་དཔོན་ཐོགས་མེད་ན་རེ། ཕྱི་རོལ་པ་རྣམས་ཀྱིས་ཆོས་ཅན། མཐོང་བས་སྤང་བྱ་རྣམས་མི་སྤོང་བ་ཁོ་ན་ཡིན་ཏེ། སྒོམ་སྤང་ཁོ་ན་རྣམ་པར་གནོན་པར་བྱེད་ཀྱི། མཐོང་སྤོང་ནི་ས་ཐམས་ཅད་ན་འདས་ལམ་ཁོ་ནས་སྤོང་བར་བྱེད་དགོས་པའི་ཕྱིར། རྟགས་ལུང་གིས་གྲུབ་སྟེ། ལས་རྣམ་འབྱེད་ཆེན་པོའི་མདོ་ལས། འདོད་ཆགས་དང་བྲལ་བ་རྣམས་ལ་འདོད་པའི་ཁམས་ལ་དམིགས་པའི་ལྟ་བ་ཀུན་ཏུ་འབྱུང་བར་གསུངས་ཏེ། འདི་སྐད་དུ། ཀུན་དགའ་བོ་འདི་ན་སྲོག་གཅོད་པ་སྤོང་བ་ནས་(༡༥༤ན)
ལོག་པར་ལྟ་བ་སྤོང་བའི་བར་དུ་ཡིན་ལ། འདི་ལའང་མི་དགའ་ཞིང་སོ་སོར་མི་དགའ་ལ་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་དམྱལ་བ་དག་གི་ནང་དུ་སྐྱེ་བར་འགྱུར་རོ། །དེ་ཕྱི་རོལ་མུ་སྟེགས་པ་དགེ་སྦྱོང་ངམ་བྲམ་ཟེ་ཡང་རུང་། རྫུ་འཕྲུལ་དང་ལྡན་པ་ལྷའི་མིག་དང་ལྡན་པ་གཞན་གྱི་སེམས་ཤེས་པ་གང་ཞིག་གིས་མཐོང་ན་དེ་འདི་སྙམ་དུ་ལུས་ཀྱིས་ལེགས་པར་སྤྱད་པ་ཡང་མེད། ལུས་ཀྱིས་ལེགས་པར་སྤྱད་པའི་རྣམ་པར་སྨིན་པ་ཡང་མེད། ངག་དང་ཡིད་ཀྱིས་ལེགས་པར་སྤྱད་པ་ཡང་མེད། ངག་དང་ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་ཡང་མེད་དོ་སྙམ་དུ་སེམས་སོ་ཞེས་རྒྱས་པར་འགྱུར་བས་ལོག་ལྟ་འདི་ནི་འདོད་པའི་ཁམས་ལ་དམིགས་པ་ཅན་ཡིན་ཏེ། ལས་དེ་འདོད་པ་ན་སྤྱོད་པ་ཡིན་པའི་ཕྱིར་དང་། དམྱལ་བ་ཡང་དེ་ཁོ་ན་ན་སྲིད་པའི་ཕྱིར་རོ། །ཡིད་ཀྱི་ཉེས་པ་ཆེན་པོས་དམྱལ་བར་སྐྱེས་པ་ཡིན་པ་ལ་མུ་སྟེགས་ངན་པའི་མངོན་ཤེས་ཀྱིས་མ་མཐོང་ཡང་། ལུས་ངག་གི་ཉེས་པ་མ་སྤྱད་པའི་སྐྱེ་བ་ཕྱི་མར་ངན་སོང་དུ་སྐྱེས་པ་མངོན་ཤེས་ཀྱིས་མཐོང་བ་ཙམ་རྒྱུ་མཚན་དུ་བྱས་ནས་རྒྱུ་འབྲས་ལ་སྐུར་བ་འདེབས་པ་བྱུང་ངོ་། །དེས་ན་བསམ་གཏན་གྱི་སེམས་ཐོབ་པ་དེས་ཁམས་གོང་མའི་ཉོན་མོངས་ནི་འོག་མ་ལ་འདོད་ཆགས་དང་བྲལ་བས་མི་དམིགས། འདོད་པའི་ལེགས་སྤྱད་ཀྱི་རྒྱུ་འབྲས་ལ་ལོག་པར་ལྟ་བས། འདོད་པའི་སྣོད་ངན་སོང་སོགས་དམིགས་ཙམ་ན། འདོད་པའི་ཁམས་ཀྱི་མཐོང་སྤོང་ཀུན་བརྟགས་ཀྱི་དམིགས་པ་ལས་འོས་མེད་པས་དེས་མཐོང་སྤོང་ཀུན་བརྟགས་མ་སྤངས་བར་བཞེད་པ་ལ། འོ་ན་འདོད་ཆགས་དང་བྲལ་བ་དེ་ཀུན་གྱིས་གོང་མའི་སེམས་མི་ཐོབ་པར་ཐལ། འདོད་པའི་མཐོང་སྤོང་མ་སྤང་ན་དེས་གེགས་བྱེད་པའི་ཕྱིར། དཔེར་ན། (༡༥༤བ)
འདོད་པའི་མཐོང་སྤང་དགུ་པ་མ་སྤངས་ན་དེས་གེགས་བྱས་ནས་ཕྱིར་མི་འོང་ཐོབ་ཏུ་མི་སྟེར་བ་དང་འདྲའམ་སྙམ་ན། རྟགས་ཁྱབ་མ་གྲུབ་སྟེ། སྒོམ་སྤང་ནི་ངོ་བོ་ཉིད་ཀྱིས་གོང་མ་ཐོབ་པའི་གེགས་བྱེད་པ་ཡིན་ལ། མཐོང་སྤོང་ངོ་བོ་ཉིད་ཀྱིས་གོང་མ་ཐོབ་པ་ལ་གེགས་མི་བྱེད་པའི་ཕྱིར། འདོད་ཆགས་དང་བྲལ་བ་འདོད་ཁམས་ལ་དམིགས་པའི་ལྟ་བ་ཅན་སྔོན་མཐའ་ལས་རྟོགས་ཏེ་སྨྲ་བ་ལ། རྟག་པར་སྨྲ་བ་རྣམས་དང་། ལ་ལ་རྟག་ཅིང་ལ་ལ་མི་རྟག་པར་སྨྲ་བ་རྣམས་དང་། རྒྱུ་མེད་པ་ལས་ཀུན་ཏུ་འབྱུང་བར་སྨྲ་བ་བྱུང་བ་ཉིད་ཀྱིས་ཤེས་ཏེ། ཚངས་པ་དྲྭ་བའི་མདོ་ལས། འདི་ན་དགེ་སྦྱོང་དམ་བྲམ་ཟེ་དགོན་པ་ན་འདུག་ཀྱང་རུང་། ཤིང་དྲུང་ན་འདུག་ཀྱང་རུང་། ཁང་སྟོང་ན་འདུག་ཀྱང་རུང་། ཀུན་ཏུ་སྦྱངས་པའི་རྒྱུ་སོགས་ཀྱིས་མཉམ་པར་བཞག་པ་ལས་མང་བ་ན། བར་གྱི་བསྐལ་པ་ཉི་ཤུར་དྲན་པའི་ཏིང་ངེ་འཛིན་ཞི་བ་ལ་རེག་ཅིང་བདག་དང་འཇིག་རྟེན་འདི་ནི་རྟག་པའོ་སྙམ་དུ་སེམས་པར་བྱེད་དོ་ཞེས་པ་དེའང་འདོད་ཁམས་ལ་དམིགས་པའི་ལྟ་བ་ཀུན་ཏུ་འབྱུང་བ་ཡིན་ནོ། །ཡང་མདོ་དེར། ཚངས་པའི་གཞལ་ཡས་ཁང་མན་ཆད་ཞིག་པ་ལས། སེམས་ཅན་ཕལ་ཆེར། འོད་གསལ་གྱི་ནང་དུ་གཟུགས་བཟང་བ། ཡིད་ལས་བྱུང་བ། དབང་པོ་ཚང་བ། དམན་པ་མ་ཡིན་པ། ཡན་ལག་དང་ཉིད་ལག་ཐམས་ཅད་དང་ལྡན་པ་ཁ་དོག་བཟང་པོ་ལ་གནས་པ། རང་འོད་དང་ལྡན་ཅིང་མཁའ་ལ་འགྲོ་བ་དགའ་བ་ཟ་བ་ཚེ་རིང་བ་དེ་ཚེ་ཟད་ནས་སླར་ཚངས་ཆེན་དུ་སྐྱེས་པ་དེ་སྐྱོ་ནས་ཟླ་བོ་འདོད་པ་ལས། ཡང་འོད་གསལ་བའི་ལྷ་ཚེ་ཟད་པ་དེར་སྐྱེས་པ་ན། ཁོང་གཉིས་བསམ་པ་མཐུན་པར། ཚངས་ཆེན་གྱིས་ངས་འདི་བྱས་སྙམ་པ་དང་། དེའི་ཟླ་གཡོག་གིས་འདིས་བདག་བྱས་སྙམ་པའི་བློ་སྐྱེས་པར་གྱུར་པའི་འཁོར་གང་རུང་གཅིག་ཤི་ནས་འཛམ་གླིང་གི་མིར་སྐྱེས། རབ་ཏུ་བྱུང་། སེམས་མཉམ་པར་ཇི་ལྟ་བུས་སྔོན་(༡༥༥ན)
གྱི་གནས་རྗེས་སུ་དྲན་ནས་ཚངས་པ་མ་ཤི་བར་མཐོང་བས། ཚངས་ཆེན་ནི་རྟག་བརྟན་ཐེར་ཟུག་མི་འགྱུར་ལ། བདག་ཅག་ཚངས་པ་དེས་སྤྲུལ་པས་མི་རྟག་པར་ལ་སོགས་པར་སེམས་སོ། །ཞེས་གསུངས་པ་དེའང་། ལ་ལ་རྟག་ཅེས་ཚངས་ཆེན་ལ་དམིགས་པ་ནི་འདོད་པ་ལ་དམིགས་པ་མ་ཡིན་ཀྱང་། ཚངས་པས་སྤྲུལ་པ་འདོད་ཁམས་སུ་སྐྱེས་པ་ལ་ལ་མི་རྟག་ཅེས་མཐར་འཛིན་ལྟ་བས་འདོད་ཁམས་ལ་དམིགས་པ་ཡིན་ཏེ། བདག་འདོད་ཁམས་སུ་སྐྱེས་པ་མི་རྟག་པར་ཞེན་པའི་ཕྱིར། དེ་བཞིན་དུ་གཟུགས་ཁམས་ན་འདུ་ཤེས་མེད་པ་ཞེས་བྱ་བའི་ལྷ་ཡོད་དེ། སེམས་ཅན་དེ་དག་འདུ་ཤེས་བསྐྱེད་པས་གནས་དེ་དག་ནས་ཤི་བར་འགྱུར་རོ། །ཤི་འཕོས་ནས་མི་དང་སྐལ་པ་མཉམ་པར་འོངས་པ་ན། སྔོན་གྱི་ལུས་རྗེས་སུ་དྲན་ནས་འཇིག་རྟེན་འདི་རྒྱུ་མེད་པ་ལས་བྱུང་བ་ཡིན་ནོ་སྙམ་དུ་སེམས་སོ་ཞེས་གསུངས་པས་ཀྱང་། ལོག་ལྟས་འདོད་ཁམས་ལ་དམིགས་པ་ཡིན་ཏེ། བདག་དང་འཇིག་རྟེན་གྱི་རྒྱུ་སྔོན་བྱས་པའི་དགེ་བ་ཟག་བཅས་སམ་མི་དགེ་བ་མ་ཡིན་ནོ་སྙམ་དུ་ཡིད་ཀྱིས་རྒྱུ་ལ་སྐུར་པ་འདེབས་པའི་ཕྱིར་དང་། འདོད་ཁམས་ཀྱི་ལན་གྲངས་གཞན་ལ་མྱོང་འགྱུར་གྱི་ལས་ལ་སྐུར་པ་འདེབས་པའི་ཕྱིར། ཁ་ཅིག་ནི། དེ་དག་འདོད་པ་སྤྱོད་པའི་ལྟ་བ་མ་ཡིན་ཏེ། དེ་དག་ནི་ལོག་པའི་ཤེས་པ་ཡིན་པའི་ཕྱིར་ཞེས་ལན་འདེབས་པར་བྱེད་ཀྱང་མི་རིགས་ཏེ། དེ་དག་ནི་ལྟ་བའི་ངོ་བོ་ཡིན་པའི་ཕྱིར། དེས་ན་ཕྱི་རོལ་པའི་ཆགས་བྲལ་གྱི་འདོད་པའི་མཐོང་སྤང་གི་ལྟ་བ་མ་སྤངས་པར་བཞེད་དོ། །བྱེ་བྲག་ཏུ་སྨྲ་བས་ནི། ཕྱི་རོལ་པའི་ཆགས་བྲལ་ནི་སྲིད་རྩེའི་བར་དུ་འགྲོ་ན་ཆོས་ཅན། འདོད་པའི་(༡༥༥བ)
ཉོན་མོངས་ཡོད་ན་ནི་སྲིད་རྩེའི་བར་དུ་དེ་མི་རིགས་ཏེ། རྒྱུན་ཞུགས་བཞིན་འདོད་པའི་མཐོང་སྒོམ་གྱི་སྤང་བྱ་གང་རུང་ཞིག་གིས་ཀྱང་འདོད་པར་ཉིང་མཚམས་སྦྱོར་བའི་ཕྱིར་ལུང་དེ་དག་གི་དོན་ཆོས་ཅན། སྒོམ་ལམ་གྱིས་མཐོང་སྤང་མི་སྤང་བའི་དོན་མ་ཡིན་ཏེ། ལུང་དོན་དེར་དེ་ལྟ་བ་དེ་དག་བསྐྱེད་པ་དང་བསམ་གཏན་གྱི་དངོས་གཞི་ལས་ཉམས་པ་དུས་མཉམ་དུ་བསྟན་པ་ཡིན་པའི་ཕྱིར། དཔེར་ན། ལུང་དབྱེན་གྱི་གཞི་ལས་ལྷ་སྦྱིན་བསྙེན་བཀུར་གྱིས་ཟིལ་གྱིས་ནོན་ཏེ། དགེ་སློང་གི་དགེ་འདུན་འཁོར་དུ་བྱ་བའི་ཕྱིར། བཅོམ་ལྡན་འདས་ལ་ཐུགས་ལས་ཆུང་ངུར་བཞུགས་པར་གསོལ་ལོ་སྙམ་དུ་སྡིག་པའི་བསམ་པ་སྐྱེས་པ་དང་། རྫུ་འཕྲུལ་ལས་ཉམས་པ་དང་། དུས་མཉམ་དུ་བྱུང་བར་བཤད་པ་ལྟར་རོ། །འོ་ན་འདོད་པའི་སྒོམ་སྤོང་སྤང་བས། འདོད་པའི་མཐོང་སྤོང་སྤང་ན་སླར་འདོད་པའི་མཐོང་སྤོང་ཇི་ལྟར་སྐྱེ་སྙམ་ན། སྡེ་པས། ཉོན་མོངས་པའི་ས་བོན་ནི་ཐོབ་པ་ལ་འདོད་པ་ལྟར་ན་འཇིག་རྟེན་པའི་ལས་ལམ་གྱིས་ཀྱང་ཕྱིས་ཉོན་མོངས་པ་སྐྱེ་བ་དང་འདོད་པར་སྐྱེ་བ་ནི་འདས་པའི་ཉོན་མོངས་རྫས་སུ་ཡོད་པ་ལས་སྐྱེ་བར་འདོད་དོ། །གཉིས་པ་ལྟ་བ་དང་ང་རྒྱལ་བྱེ་བྲག་ཏུ་དབྱེ་བ་ལ། ལྟ་བའི་དབྱེ་བ་དང་། ང་རྒྱལ་གྱི་དབྱེ་བའོ། །དང་པོ་ལ། ལྟ་བ་ལྔ་པོ་སོ་སོའི་རང་བཞིན། ལྔ་པ་ཀུན་འབྱུང་མཐོང་སྤང་མ་ཡིན་པའི་རྒྱུ་མཚན། ཕྱིན་ཅི་ལོག་བཞིར་དབྱེ་བའོ། །དང་པོ་ནི། བདག་དང་བདག་གི་རྟག་ཆད་དང་། །མེད་དང་དམན་ལ་མཆོག་ལྟ་དང་། །རྒྱུ་མིན་ལམ་མིན་དེར་ལྟ་བ། །དེ་དག་ལྟ་བ་ལྔ་ཡིན་ནོ། །བདག་གམ་བདག་གིར་ལྟ་བའི་ཡུལ་ནི་འཇིག་ཚོགས་ལ་བལྟ་བའོ། །འཇིག་ཚོགས་སུ་གྱུར་པའི་ཉེར་ལེན་གྱི་ཕུང་ལྔ་དེ་ནི་ཆོས་ཅན། ཁྱོད་ལ་འཇིག་ཚོགས་ཞེས་པའི་སྒྲ་དོན་མཐུན་དུ་འཇུག་པར་རིགས་ཏེ། འཇིག་པ་དང་བསགས་པའི་ཕྱིར། དེ་ལ་ཆོས་ཅན། ཕུང་པོ་ཞེས་པའི་སྒྲའང་དོན་མཐུན་དུ་འཇུག་རིགས་ཏེ། མང་པོ་དང་ཕུང་པོ་ཡིན་པའི་ཕྱིར། ཉེར་ལེན་(༡༥༦ན)
གྱི་ཕུང་ལྔ་ལ་འཇིག་ཚོགས་ཀྱི་སྒྲ་སྦྱར་ནས་བརྗོད་པ་ཆོས་ཅན། བདག་ཏུ་འཛིན་པ་སེལ་བའི་སླད་དུ་ཡིན་ཏེ། ཕུང་པོ་ལྔ་ལ་བདག་ཏུ་འཛིན་པའི་སྔོན་དུ་ཕུང་པོ་ལ་རྟག་པ་དང་རིལ་པོར་འདུ་ཤེས་པ་འབྱུང་བས། འཇིག་ཚོགས་སུ་བརྗོད་ན་རྟག་རིལ་གྱི་འདུ་ཤེས་བཟློག་ནུས་པས་དེར་བརྗོད་པའི་ཕྱིར་སྙམ་པའོ། །སྤྱིར་ཟག་བཅས་ལ་དམིགས་པ་ཐམས་ཅད་འཇིག་ཚོགས་ལ་ལྟ་བ་ཡིན་མོད་ཀྱི། བྱེ་བྲག་ཕུང་ལྔ་ལ་འཇིག་ཚོགས་སུ་ལྟ་བ་ཞེས་སྒྲ་ལྷག་པར་སྦྱར་བ་ཆོས་ཅན། དངོས་པོ་ལ་བདག་ཡོད་པ་སེལ་བའི་སླད་དུ་ཡིན་ཏེ། བདག་ཏུ་འཛིན་པ་ནི་འཇིག་ཚོགས་ལ་བལྟས་ནས་དེ་ལ་བདག་ཏུ་རློམ་པ་ཙམ་དུ་ཟད་པའི་ཕྱིར། ཇི་སྐད་དུ། དགེ་སློང་དག་དགེ་སྦྱོང་ངམ་བྲམ་ཟེ་གང་ལ་ལ་བདག་གོ་སྙམ་དུ་ཡང་དག་པར་རྗེས་སུ་ལྟ་བ་ན། ཡང་དག་པར་རྗེས་སུ་ལྟ་བ་དེ་དག་ཐམས་ཅད་ནི་ཉེ་བར་ལེན་པའི་ཕུང་པོ་འདི་དག་ལ་ལྟ་བ་ཁོ་ནར་ཟད་དོ། །བདག་ཏུ་བཟུང་བ་དེ་ཉིད་ལ་ཆོས་ཅན། རྟག་པའམ་ཆད་པར་ལྟ་བ་ནི་མཐར་འཛིན་པའི་ལྟ་བ་སྟེ། རྟག་པ་དང་ཆད་པའི་མཐར་འཛིན་པའི་ཕྱིར། སྡུག་བསྔལ་ལ་སོགས་པའི་བདེན་པ་རྣམས་ཡོད་བཞིན་དུ་མེད་ཅེས་ལྟ་བ་ནི་ལོག་ལྟ་དང་འཇིག་ལྟ་སོགས་ལོག་པར་ཞུགས་པའི་ལྟ་བ་ཐམས་ཅད་ལོག་ལྟ་ཡིན་ཏེ། ལོག་པར་ངེས་པར་སེམས་ཤིང་རྟོག་པའི་ཕྱིར། འཇིག་ལྟ་སོགས་ཀྱང་ལོག་ལྟ་ཡིན་པ་ལས། མེད་ཅེས་ལྟ་བ་ཁོ་ན་ཆོས་ཅན། ལོག་ལྟར་འཇོག་རིགས་ཏེ། ཧ་ཅང་ལོག་ཚབ་ཆེས་པའི་ཕྱིར། དཔེར་ན། མར་ཐམས་ཅད་དྲི་ང་བ་ཡིན་ཀྱང་། ཁྱད་པར་དུ་དྲི་ང་བ་ཚ་བ་ཆེ་བ་ལ་དྲི་ང་བ་ཞེས་བརྗོད་པ་བཞིན། གྲུབ་སྟེ། དགེ་བའི་རྩ་བ་གཅོད་པ་ལ་འགལ་ཚབ་ཆེན་པོར་གྱུར་པའི་ཕྱིར། ཁྱབ་སྟེ། འདིས་ནི་སྡུག་བསྔལ་ལ་སོགས་པའི་བདེན་པ་ཡོད་བཞིན་དུ་མེད་དོ་སྙམ་དུ་སྐུར་བ་(༡༥༦བ)
འདེབས་པའི་ལྟ་བ་ཡིན་ལ། འཇིག་ལྟ་སོགས་གཞན་ནི་བདག་ལ་སོགས་པར་སྒྲོ་འདོགས་པའི་ལྟ་བ་ཡིན་པའི་ཕྱིར། ལྟ་བ་སོགས་ཟག་བཅས་ཐམས་ཅད་དམན་པ་སྟེ། འཕགས་པ་རྣམས་ཀྱིས་སྤངས་པའི་ཕྱིར། དེས་ན་ལྟ་བ་ལ་སོགས་པ་ཉེར་ལེན་གྱི་ཕུང་པོ་རྣམས་ལ་མཆོག་དང་། གཙོ་བོ་ཉིད་དུ་འཛིན་པར་ལྟ་བ་ནི་ལྟ་བ་མཆོག་འཛིན་དང་། དབང་ཕྱུག་ཆེན་པོའམ་སྐྱེ་རྒུའི་བདག་པོའམ་གཞན་ཡང་རུང་སྟེ། འཇིག་རྟེན་གྱི་རྒྱུ་མིན་པ་ལ་རྒྱུར་ལྟ་བ་དང་། མེ་དང་ཆུར་འཇུག་པ་དང་། ཟས་གཅོད་པ་དང་། འཇུག་ངོགས་དང་། གཡངས་སར་མཆོང་བ་དང་། གདུང་བ་དང་། སྐྲ་འབལ་བ་སོགས་མཐོ་རིས་ཀྱི་རྒྱུ་མིན་པ་ལ་རྒྱུར་ལྟ་བ་དང་། སངས་རྒྱས་པ་རྣམས་ཀྱི་ལྟར་ན་ཚུལ་ཁྲིམས་དང་བརྟུལ་ཞུགས་ཙམ་ཁོ་ནས་ནི་ཐར་པ་མི་ཐོབ་པས་དེ་ཙམ་དང་། གྲངས་ཅན་གྱི་རྣལ་འབྱོར་གྱིས་རང་བཞིན་དང་སྐྱེས་བུའི་ཁྱད་པར་ཤེས་པ་དང་། སོགས་པས་ཚིག་དོན་དྲུག་ཤེས་པ་སོགས་ཐར་པའི་ལམ་མིན་པ་ལ་ཐར་ལམ་དེར་ལྟ་བ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བ་སྟེ། ཚུལ་ཁྲིམས་དང་བརྟུལ་ཞུགས་མཆོག་འཛིན་ནི་གཟུགས་ཕུང་གིས་བསྡུས་ལ། སོགས་པའི་སྒྲས་ནི་མི་མངོན་པར་བྱས་ཏེ། ཕུང་པོ་གཞན་བཞིའང་བསྡུས་ནས་ཉེར་ལེན་གྱི་ཕུང་པོ་ལྔ་ལ་འདག་གྲོལ་དུ་ལྟ་བའོ། །གྲག་ཅེས་པས་མདོ་ལས་དེ་གཉིས་ཙམ་བཟུང་བས་སོགས་པའི་སྒྲ་མི་འཐད་པར་བསྟན་པ་ཡིན་ནོ། །དེ་དག་ནི་ལྟ་བ་ལྔ་ཡིན་ནོ། །གཉིས་པ་ནི། དབང་ཕྱུག་སོགས་རྒྱུར་མངོན་ཞེན་པ། །རྟག་བདག་ཕྱིན་ཅི་ལོག་པ་ཡིས། །རབ་ཏུ་འཇུག་པས་དེ་ཕྱིར་དེ། །སྡུག་བསྔལ་མཐོང་བས་སྤང་བྱ་ཉིད། །རྒྱུ་མིན་ལ་རྒྱུར་འཛིན་གྱི་ལྟ་བ་ཚུལ་ཁྲིམས་དང་བརྟུལ་ཞུགས་མཆོག་འཛིན་གྱི་ལྟ་བ་ཡིན་ན་ཆོས་ཅན། ཀུན་འབྱུང་མཐོང་སྤོང་དུ་ཐལ། རྒྱུ་ལ་ལོག་པར་ཞུགས་པའི་ཕྱིར་ཞེ་ན། དབང་ཕྱུག་སོགས་རྒྱུར་མངོན་པར་ཞེན་པ་དེ་ཆོས་ཅན། སྡུག་བསྔལ་མཐོང་བས་སྤང་བྱ་ཉིད་ཡིན་ཏེ། (༡༥༧ན)
རྟག་པ་དང་བདག་ཏུ་ཕྱིན་ཅི་ལོག་པ་ཡི་སྒོ་ནས་རབ་ཏུ་འཇུག་པ་དེ་སྡུག་བསྔལ་མཐོང་སྤོང་ཡིན་པ་གང་ཞིགརྩ་བ་དེ་ལས་བྱུང་བའི་དེ་རྒྱུར་འཛིན་པ་ཡང་སྡུག་བསྔལ་མཐོང་བས་སྤོང་བ་དེ་ཡི་ཕྱིར། འདི་ལ་སེམས་ཙམ་པས་བྱེ་སྨྲ་ལ་དྲིས་པ། མེ་ཆུར་འཇུག་པ་སོགས་མཐོ་རིས་སུ་སྐྱེ་བར་འགྱུར་བའམ། ཚུལ་ཁྲིམས་བརྟུལ་ཞུགས་མཆོག་འཛིན་གྱིས་འདག་པའི་རྒྱུར་མངོན་པར་ཞེན་ཅིང་ལྟ་བ་འདི་ནི། དབང་ཕྱུག་ལ་བདག་དང་རྟག་པར་འཛིན་པ་དེས་བྱས་པ་མ་ཡིན་ན། ཀུན་འབྱུང་མཐོང་བས་སྤང་བྱ་ཁོ་ནར་འགྱུར་གྱི། སྡུག་བསྔལ་མཐོང་སྤོང་དུ་ཅི་ལ་འགྱུར་ཞེས་དྲིས་པ་ལ། བྱེ་སྨྲས། དེ་ནི་སྡུག་བསྔལ་མཐོང་སྤོང་དུ་རིགས་ཏེ། བསྟན་བཅོས་ལས། གང་དག་སྐྱེས་བུ་གང་ཟག་གང་ཞིགབ་ལང་གི་ཚུལ་ཁྲིམས་དང་། རི་དྭགས་ཀྱི་ཚུལ་ཁྲིམས་དང་། བྱ་གག་གི་ཚུལ་ཁྲིམས་ཡང་དག་པར་བླངས་ཏེ་གནས་པ་དེ་ནི་དེས་དག་པར་འགྱུར། གྲོལ་བར་འགྱུར། ངེས་པར་འབྱུང་བར་འགྱུར། བདེ་བ་དང་སྡུག་བསྔལ་ལས་རྣམ་པར་འདའ་བར་འགྱུར་ཞིང་། བདེ་བ་དང་སྡུག་བསྔལ་ལས་རྣམ་པར་འདས་པ་ཡང་རྗེས་སུ་ཐོབ་པར་འགྱུར་རོ། །ཞེས་དེ་ལྟར་བལྟ་ཞིང་དེ་སྐད་དུ་སྨྲ་བ་ནི། རྒྱུ་མིན་ལ་རྒྱུར་མངོན་པར་ཡིད་ཆེས་པས། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་སྟེ། སྡུག་བསྔལ་མཐོང་བས་སྤང་བར་བྱ་བ་ཡིན་ཅེས་རྒྱས་པར་འབྱུང་བའི་ཕྱིར་རོ། །སློབ་དཔོན་གྱིས། ལུང་དེས་མཆོག་འཛིན་ཕྱི་མ་སྡུག་བསྔལ་མཐོང་སྤོང་དུ་ཅིའི་ཕྱིར་བསྟན་ཅེས་སླར་དྲིས་པ་ལ། བྱེ་སྨྲས། དེ་སྡུག་བསྔལ་མཐོང་སྤོང་ཡིན་ཏེ། དེ་མཐོ་རིས་སུ་འགྲོ་བའམ། འདག་པར་ལྟ་བས་སྡུག་བསྔལ་ལ་ལོག་པར་ཞུགས་པའི་ཕྱིར་རོ། །ཞེས་ཟེར་བ་ལ། སློབ་དཔོན་གྱིས། འོ་ན་ཟག་བཅས་ལ་དམིགས་པ་ཐམས་ཅད་ཆོས་ཅན། སྡུག་(༡༥༧བ)
བསྔལ་མཐོང་སྤོང་དུ་ཐལ། ཟག་པ་དང་བཅས་པ་ལ་དམིགས་པ་ཐམས་ཅད་སྡུག་བསྔལ་ལ་ལོག་པར་ཞུགས་པའི་ཕྱིར། འདོད་ན། ཧ་ཅང་ཐལ་བར་འགྱུར་ཏེ། ཀུན་འབྱུང་ལ་སོགས་པའི་མཐོང་བས་སྤང་བྱའང་མེད་པར་འགྱུར་བའི་ཕྱིར་རོ། །ཡང་སློབ་དཔོན་གྱིས། ཚུལ་ཁྲིམས་དང་བརྟུལ་ཞུགས་མཆོག་འཛིན་ཆོས་ཅན། ལམ་མཐོང་བས་སྤང་བྱ་མ་ཡིན་པར་ཐལ། མཆོག་འཛིན་དེ་རྒྱུ་མིན་ལ་རྒྱུར་ཡིད་ཆེས་པའི་སྡུག་བསྔལ་མཐོང་སྤོང་ཡིན་པའི་ཕྱིར་ཞེས་པ་ལ། བྱེ་སྨྲས། ཚུལ་ཁྲིམས་དང་བརྟུལ་ཞུགས་མཆོག་འཛིན་དེ་སྡུག་བསྔལ་ལ་ལོག་ཞུགས་ཡིན་པ་བཞིན་དུ་ལམ་ལའང་ལོག་ཞུགས་ཡིན་ཏེ། དེས་ལམ་མཐོང་བས་སྤང་བྱ་བརྒྱད་ལ་དམིགས་པར་བྱེད་པའི་ཕྱིར་རམ། ཡང་ན་ལམ་ལ་དངོས་སུ་ལོག་ཞུགས་མིན་ཀྱང་། ལོག་པར་ཞུགས་པ་ལ་ལོག་པར་ཞུགས་པས་ལམ་ལ་ལོག་ཞུགས་སུ་འཇོག་པའི་ཕྱིར་རོ། །ཞེས་པ་ལ། སློབ་དཔོན་གྱིས། འོ་ན་ལམ་མཐོང་སྤང་དུ་གྱུར་པའི་ཚུལ་ཁྲིམས་བརྟུལ་ཞུགས་མཆོག་འཛིན་དེ་ཆོས་ཅན། སྡུག་བསྔལ་མཐོང་སྤོང་དུ་ཐལ། ལམ་མཐོང་བས་སྤང་བྱའི་ལོག་ལྟ་སོགས་བརྒྱད་ནི་ཚུལ་ཁྲིམས་བརྟུལ་ཞུགས་མཆོག་འཛིན་གྱི་དམིགས་པ་ཡིན་ཅིང་། དེ་དག་ཀྱང་ཟག་བཅས་ཡིན་པས་སྡུག་བསྔལ་གྱི་བདེན་པས་བསྡུས་ལ། དེ་ཡང་དེ་ལ་ལོག་པར་རྟོག་པ་ཡིན་པས། སྡུག་བསྔལ་མཐོང་བས་སྤོང་བ་ཁོ་ནར་འགྱུར་བའི་ཕྱིར། ཡང་ཚུལ་ཁྲིམས་དང་བརྟུལ་ཞུགས་མཆོག་འཛིན་ཆོས་ཅན། ལོག་པར་ལྟ་བ་སོགས་ལོག་ཞུགས་ལ་ལོག་པར་ཞུགས་པའང་འགྲུབ་པ་མ་ཡིན་ཏེ། ལམ་མེད་པར་སྐུར་བ་འདེབས། ལམ་ཡོད་མེད་ཐེ་ཚོམ་ཟ་ན། ལམ་མེད་པར་སྐུར་བ་འདེབས་པ་དང་། ལམ་ལ་ཐེ་ཚོམ་ཟ་བ་དེས་འདག་པར་ཡིད་ཆེས་པར་ཅི་ལ་འགྱུར་བའི་ཕྱིར། འོན་ཏེ་ཁོ་ན་རེ། གྲངས་ཅན་(༡༥༨ན)
སོགས་ཀྱིས་བརྟགས་པའི་ཐར་ལམ་མཆོག་ཏུ་བཟུང་ནས་འདི་ནི་ཐར་ལམ་ཡིན་གྱི། སངས་རྒྱས་པའི་ལམ་ལ་ནི་ཐར་པ་མེད་དོ། །ཞེས་ལོག་ཞུགས་ལ་ལོག་པར་ཞུགས་པ་ཡིན་པར་སྨྲ་ན། ཅི་ལྟོ་ཞེ་ན། སློབ་དཔོན་གྱིས། ཁས་ལེན་དེ་ལྟར་ན་ཆོས་ཅན་ལོག་ལྟ་སོགས་ཀྱིས་འདག་པར་ཡིད་ཆེས་པས་ལམ་མཐོང་བས་སྤང་བར་བྱ་བ་ལ་དམིགས་པ་དེ་མ་ཡིན་པར་ཐལ། ཐར་ལམ་མིན་པ་ལ་ཐར་ལམ་དུ་ཞེན་པ་དེ་ཁོ་ནས་ཡིད་ཆེས་པ་ཡིན་གྱི། ལོག་ལྟ་དེས་ནི་འདག་པར་ཡིད་ཆེས་པ་མ་ཡིན་པའི་ཕྱིར། ཉེས་པ་གཞན་ཡང་ཡོད་དེ། ཀུན་འབྱུང་དང་འགོག་པ་མཐོང་བས་སྤང་བྱ་ལ་དམིགས་པའི་ལོག་ལྟས་འདག་པར་འགྱུར་བའི་ལོག་ཞུགས་ཀྱང་ཡོད་པར་ཐལ། ལམ་ལ་སྐུར་བ་བཏབ་ཅིང་ཐེ་ཚོམ་ཟ་བ་དེས་འདག་པར་ཡིད་ཆེས་པས་ལམ་ལ་ལོག་པར་ཞུགས་པ་ཡིན་པའི་ཕྱིར། དེ་ལྟར་ན། མཆོག་འཛིན་ཕྱི་མ་འདི་སྡུག་བསྔལ་མཐོང་སྤང་ཡིན་པའང་མི་སྲིད་ལ། ལམ་མཐོང་སྤོང་ཡིན་པའང་ཧ་ཅང་ཐལ་བ་སོགས་ཀྱི་ཉེས་པ་ཡོད་པ་དེའི་ཕྱིར། མཆོག་འཛིན་ཕྱི་མ་འདི་སྡུག་བསྔལ་དང་ལམ་མཐོང་བས་སྤང་བྱ་ཡིན་པ་འདི་བརྟག་བྱ་ཡིན་ནོ་ཞེས་སློབ་དཔོན་གྱིས་ཐེ་ཚོམ་སྐུར་བ་འདི་བྱས་ཀྱི། རང་ལུགས་ནི་མ་བསྟན་ཏོ། །གཞན་དག་སེམས་ཙམ་པའི་ལུགས་ལ་བལྟོས་ཏེ་ཐེ་ཚོམ་སྐུར་པ་དེ་ལྟར་བྱས་སོ་ཞེས་ཟེར་རོ། །སེམས་ཙམ་པ་ནི། སྡུག་བསྔལ་མཐོང་སྤང་ལྟ་བ་ལྔ། ལྟ་མིན་ལྔ་སྟེ་བདེན་པ་བཞི་ཀ་ལ་བཅུ་རེ། འཇིག་ལྟ་ཆད་ལྟ་ལྷན་སྐྱེས། ཆགས་སྡང་ང་རྒྱལ་ལ་མ་རིག་པ་སྟེ་སྒོམ་སྤང་དྲུག་དང་བཅས་པས་འདོད་པ་ན་བཞི་བཅུ་རྩ་དྲུག །ཁམས་གོང་གཉིས་ན་ཁོང་ཁྲོ་མ་གཏོགས་མཐོང་སྤང་སོ་དྲུག །སྒོམ་སྤང་ལྔ་སྟེ་བཞི་བཅུ་རྩ་གཅིག་རེ་ཀུན་དྲིལ་བས་བརྒྱ་དང་ཉེར་བརྒྱད་དུ་འདོད་དོ། །ཡང་ཟག་(༡༥༨བ)
བཅས་ལ་དམིགས་པ་ཐམས་ཅད་སྡུག་བསྔལ་ལ་ལོག་ཞུགས་ཡིན་པའི་ཕྱིར། ལོག་ཞུགས་ཐམས་ཅད་སྡུག་བསྔལ་གྱི་བདེན་པ་མཐོང་བས་སྤོང་བས་ཧ་ཅང་ཐལ་བར་འགྱུར་རོ་ཞེས་འཕངས་པ་དེ་ལ། བྱེ་སྨྲའི་ཕྱོགས་ནས་ཁ་ཅིག་གིས་ལན་འདེབས་པ་ན། དེ་ནི་ཧ་ཅང་ཐལ་བར་འགྱུར་བའི་ཁྱབ་པ་མེད་དེ། ཟག་བཅས་ལ་དམིགས་པ་རྣམས་སྡུག་བསྔལ་ལ་ལོག་པར་ཞུགས་པ་ཡིན་མོད་ཀྱི། འོན་ཀྱང་ཁ་ཅིག་ནི་སྡུག་བསྔལ་དང་། ཁ་ཅིག་ནི་ཀུན་འབྱུང་དང་། ཁ་ཅིག་ནི་འགོག་པ་དང་། ཁ་ཅིག་ནི་ལམ་གྱི་སྒོ་ནས་ལོག་པར་ཞུགས་ལ། དེ་དག་ཀྱང་སྡུག་བསྔལ་སོགས་བཞི་མཐོང་བས་སོ་སོར་ལོག་ཞུགས་དེ་སྤོང་བར་བྱེད་པའི་ཕྱིར། དེས་ན་མཆོག་འཛིན་ཕྱི་མ་ཡང་རྟག་བདག་ཏུ་འཛིན་པས་སྡུག་བསྔལ་གྱི་སྒོ་ནས་སྡུག་བསྔལ་ལ་ལོག་ཞུགས་ཡིན་པས་སྡུག་བསྔལ་མཐོང་བས་སྤང་བྱ་ཡིན་པ་དང་། ལམ་ལ་ལོག་ཞུགས་ཀྱིས་གྲངས་ཅན་སོགས་ཀྱིས་བརྟགས་པའི་ལམ་བཟུང་ནས། སངས་རྒྱས་པ་ལ་ཐར་ལམ་མེད་དོ་ཞེས་ལོག་ལྟ་དེ་ལ་མཆོག་འཛིན་ཕྱི་མས་མཆོག་ཏུ་བལྟ་བ་དེ་ལམ་ལ་ལོག་ཞུགས་ཡིན་པས་ལམ་མཐོང་བས་སྤང་བྱ་དང་། མཆོག་འཛིན་ཕྱི་མ་ནི་ཀུན་འབྱུང་དང་འགོག་པ་ལ་ལོག་ཞུགས་མེད་པས། མཆོག་འཛིན་ཕྱི་མ་འདི་ནི་སྡུག་བསྔལ་དང་ལམ་མཐོང་བས་སྤང་བྱ་ཁོ་ནའོ་ཞེས་ཀྱང་ལན་འདེབས་སོ། །ཡང་མཆོག་འཛིན་ཕྱི་མས་ཀུན་འགོག་ལ་ཅིས་ལོག་པར་མི་འཇུག་ཅེ་ན། སློབ་དཔོན་འདུས་བཟང་ན་རེ། མཆོག་འཛིན་ཕྱི་མ་ཆོས་ཅན། ཀུན་འགོག་མཐོང་བས་སྤང་བྱ་མ་ཡིན་ཏེ། དེའི་ལུགས་སུ་མི་འཐད་པའི་ཕྱིར་ཏེ། མཆོག་འཛིན་ཕྱི་མའི་ལུགས་ནི་རྒྱུ་མིན་ལ་རྒྱུ་དང་། ལམ་མིན་ལ་ལམ་དུ་མངོན་པར་ཞེན་པ་ཡིན་ན། ཀུན་འབྱུང་ལ་སྐུར་འདེབས་ཀྱི་ལོག་ལྟ་ལ་འདག་པར་(༡༥༩ན)
མངོན་པར་ཞེན་པས་ནི་རྒྱུ་མེད་པ་ལས་འདག་པའི་རྒྱུར་ཁས་ལེན་དགོས་པ་ལས་གང་ལའང་རྒྱུ་མེད་ན་འདག་པ་ལ་ཡང་རྒྱུ་ཡོད་པར་མི་རིགས་པའི་ཕྱིར། དེ་ལྟར་ན་རྒྱུ་ཀུན་འབྱུང་ལ་སྐུར་བ་བཏབ་པས་དེའི་རྗེས་སུ་འབྱུང་བའི་འབྲས་བུ་ཐ་དད་པ་མ་ཡིན་པའི་དབང་ཕྱུག་ལ་སོགས་པ་སྡུག་བསྔལ་གྱི་ཕུང་པོ་ཡང་མེད་དོ་ཞེས་སྐུར་བ་བཏབ་པར་འགྱུར་བའི་ཕྱིར་ན། ཉེར་ལེན་གྱི་ཕུང་པོ་ལ་འདག་གྲོལ་དུ་ཡིད་ཆེས་པའི་ལོག་ཞུགས་འཇུག་པའི་སྐབས་མི་ཕྱེད་པའི་ཕྱིར། འགོག་པ་ལ་སྐུར་བ་འདེབས་པའི་ལོག་པར་ལྟ་བ་ལ་འདག་པར་ཡིད་ཆེས་པ་ནི། འགོག་པའི་ཐབས་ལ་རྟོག་པའི་ལོག་ཞུགས་འཇུག་པ་མི་སྲིད་པའི་ཕྱིར་ཏེ། འགོག་པ་མེད་དོ་སྙམ་དུ་ལྟ་བའི་རྗེས་ལ། དེའི་ཐབས་ལ་རྟོག་པ་ནི་དོན་མེད་པར་འགྱུར་བའི་ཕྱིར། མཆོག་འཛིན་ཕྱི་མ་ནི། ཀུན་འགོག་མཐོང་བས་སྤང་བྱའི་ལུས་སུ་མི་འཐད་པ་འདི་གྲུབ་པའོ། །དེ་ལྟར་ན་མཆོག་འཛིན་ཕྱི་མ་ལམ་མཐོང་བས་སྤང་བར་བྱ་བ་མ་ཡིན་པར་ཐལ། ལམ་མ་དམིགས་ན་མེད་དོ་སྙམ་དུ་ལོག་པར་ལྟ་བའམ་ཐེ་ཚོམ་ཟ་ན་ཇི་ལྟར་དེས་འདག་པར་ཡིད་ཆེས་པར་ཡོངས་སུ་རྟོག་པ་མི་འཐད་པའི་ཕྱིར་ཞེ་ན། འཕགས་ལམ་ལ་སྐུར་བ་འདེབས་པའི་ལོག་ལྟ་ཡང་དག་པར་མངོན་པར་ཞེན་པ་ནི་འཐད་པ་ཁོ་ན་སྟེ། དེ་ལ་རིགས་པར་འཛིན་པའི་ཕྱིར་རོ། །འཕགས་ལམ་ལ་སྐུར་བ་འདེབས་པའི་ལོག་ལྟ་ལ་རིགས་པར་འཛིན་པའི་བློ་སྐྱེ་བར་འགྱུར་བ་ཡང་དེ་ལས་གཞན་པའི་ཐར་ལམ་ཞིག་ཡོད་པར་འཁྲུལ་པ་ཡིན་ཏེ། འཕགས་ལམ་མེད་དོ་བྱ་བ་དང་། དེ་ལ་ཐེ་ཚོམ་ཟ་བ་ནི་རིགས་པའོ་སྙམ་དུ་སེམས་ཤིང་རིགས་པའི་སྒོ་ནས་འདག་པའི་ཐབས་གཞན་ལེན་པར་བྱེད་པའི་ཕྱིར་རོ། །ཐར་པའི་ལམ་གཞན་ལ་རློམ་པ་ཉིད་ཀྱི་མཆོག་འཛིན་ཕྱི་མས་ལམ་(༡༥༩བ)
མཐོང་བས་སྤང་བར་བྱ་བ་དེའི་ཡུལ་ཡིན་ཏེ། རང་གི་རིས་པ་ཙམ་ལ་དམིགས་པའི་ཕྱིར། འོ་ན་མཆོག་འཛིན་ཕྱི་མས་འགོག་པ་མཐོང་བས་སྤང་བར་བྱ་བ་ལ་ཡང་ལོག་པར་འཇུག་པར་ཐལ། ཡང་དག་པའི་ཐར་པ་ལ་སྐུར་བ་འདེབས་པའི་ལོག་པར་ལྟ་བ་ལ་རིགས་པར་འཛིན་པར་འགྱུར་བ་ཐར་པའི་གནས་ཞིག་ཏུ་འཁྲུལ་པས་མཚུངས་པའི་ཕྱིར་ཞེ་ན། གལ་མཚུངས་ཏེ། རྟག་པ་དང་ཞི་བ་ཐར་པའི་གནས་སུ་འཛིན་པར་མཚུངས་ན། དེ་ལ་སྐུར་བ་འདེབས་པ་ལ་འདག་པར་མངོན་པར་ཡིད་ཆེས་པ་མི་འཐད་པའི་ཕྱིར་གྲུབ་སྟེ། གདོན་མི་ཟ་བར་ཐར་པ་ཡོད་དོ་ཞེས་སྙམ་ན། ཐར་པའི་ཐབས་འཚོལ་བར་བྱེད་པ་ལས་དེ་ལ་སྐུར་བ་འདེབས་མི་སྲིད་པའི་ཕྱིར། དཔེར་ན། ཆོས་འདི་པ་དག་མྱ་ངན་ལས་འདས་པའི་འགོག་པ་རྫས་སུ་འདོད་པ་དང་མི་འདོད་པ་གང་ཡང་ཡོད་མོད་ཀྱི། རྟག་པ་དང་ཞི་བའི་ཐར་པར་འཛིན་པས་དེ་ལ་སྐུར་བ་འདེབས་པ་ལ་རིགས་པར་འཛིན་པའི་སྐབས་མི་ཕྱེད་པ་བཞིན་ནོ། །དེས་ན་མཆོག་འཛིན་ཕྱི་མས་འགོགས་པ་ལ་སྐུར་བ་འདེབས་པ་ཉིད་ཀྱིས་འདག་པ་ཡིད་ཆེས་པ་མེད་དེ། འདག་པའི་ཐར་པ་ཁས་ལེན་པ་མེད་ལ། འཕགས་ལམ་ལ་ནི་ངོ་བོ་དང་རྣམ་པ་ཐ་དད་པའི་ལམ་མིན་ལ་ལམ་དུ་ཞེན་པའི་ཚུལ་ཁྲིམས་དང་བརྟུལ་ཞུགས་མཆོག་འཛིན་ཁས་བླངས་ནས་འདག་པར་ཡིད་ཆེས་པ་ཉིད་ཀྱིས་འཕགས་ལམ་ལ་ལོག་པར་ཞུགས་པ་ཡོད་པའི་ཕྱིར། དེས་ན་མཆོག་འཛིན་ཕྱི་མ་ལམ་མཐོང་བས་སྤང་བྱ་ཁོ་ན་ཡིན་པ་སྲིད་ཀྱི། འགོག་པ་མཐོང་བས་སྤང་བྱ་ནི་མིན་ནོ་ཞེས་ཟེར་རོ། །མཆོག་འཛིན་ཕྱི་མས་སྡུག་བསྔལ་ལ་ལོག་པར་ཞུགས་པ་ནི་རིགས་པ་དང་རིང་དུ་སོང་བ་མ་ཡིན་པ་དང་། བསམ་པ་བརྟན་པོ་མ་ཡིན་པ་དང་། འབད་པ་ཆུང་ངུས་གཞོམ་པར་བྱ་བ་ཡིན་ལ། མཆོག་འཛིན་ཕྱི་(༡༦༠ན)
མས་ལམ་ལ་ལོག་ཞུགས་ནི་དེ་ལས་བཟློག་པའོ། །མདོར་ན་ཧ་ཅང་ཐལ་བ་སོགས་ལ་འདུས་བཟང་གི་ངག་དོན་བསྡུ་ན་ཀུན་འབྱུང་ལ། མཆོག་འཛིན་ཕྱི་མས་ལོག་པར་ཞུགས་པ་མི་འཐད་དེ། རྒྱུ་ཀུན་འབྱུང་རྒྱུ་ལ་སྐུར་བ་བཏབ་ན་འདིས་འདག་གྲོལ་བྱ་བར་མི་འཛིན་པའི་ཕྱིར། འགོག་པ་ལ་མཆོག་འཛིན་ཕྱི་མས་ལོག་པར་མི་འཇུག་སྟེ། འགོག་པ་འབྲས་བུ་ལ་སྐུར་བ་བཏབ་ཙམ་ན་འབྲས་བུ་མེད་པའི་རྒྱུར་རྟོག་པ་ལ་དོན་མེད་པའི་ཕྱིར། འོ་ན་ལམ་ལ་ཡང་མཚུངས་ཏེ། ལམ་ཐམས་ཅད་ལ་སྐུར་བ་བཏབ་ཙམ་ན་ལམ་ལ་འདག་གྲོལ་དུ་འགྱུར་ཅི་ལ་འཛིན་པའི་ཕྱིར་རོ་ཞེས་སྙམ་ན། ལམ་ལ་རིགས་མང་ཙམ་ན་བུདྡྷའི་ལམ་ལ་སྐུར་བ་འདེབས་པ་དེ་ཉིད་ཀྱང་རང་གི་ལམ་ལ་འདག་གྲོལ་དུ་འཛིན་པ་ཡོད་ལ། འོ་ན་སངས་རྒྱས་པའི་འགོག་པ་ལ་སྐུར་བ་བཏབ་པས་དེའི་རྒྱུ་ལ་མི་རྟོག་ཀྱང་རང་གི་འགོག་པའི་རྒྱུར་རྟོག་གོ་སྙམ་ན། འགོག་པ་ལ་ཞི་བ་ཙམ་དུ་བྱེ་བྲག་མེད་པས་དེ་ལ་སྐུར་བ་བཏབ་པ་ནི། རང་གཞན་གྱི་འགོག་པ་གང་ཡང་ཁས་མི་ལེན་པས་མཆོག་འཛིན་ཕྱི་མ་དེས་འགོག་པ་དེ་ལ་ལོག་པར་ཞུགས་མི་རིགས་སོ། །རྟག་བདག་ཏུ་ཕྱིན་ཅི་ལོག་པར་མ་ཟད། ཕྱིན་ཅི་ལོག་ནི་བཞི་སྟེ། མི་རྟག །སྡུག་བསྔལ། མི་གཙང་། བདག་མེད་ལ། རྟག །བདེ། གཙང་། བདག་ཏུ་ཕྱིན་ཅི་ལོག་པའོ། །གསུམ་པ་ཕྱིན་ཅི་ལོག་བཞིར་དབྱེ་བ་ལ། དངོས་དང་། ཞར་བྱུང་གཉིས་ལས། དང་པོ་ནི། ལྟ་བ་གསུམ་ལས་ཕྱིན་ཅི་ལོག །བཞི་ཚན་ཕྱིན་ཅི་ལོག་ཕྱིར་དང་། །ངེས་རྟོག་ཕྱིར་དང་སྒྲོ་འདོགས་ཕྱིར། །བཞི་ཚན་འདི་ཡི་རང་བཞིན་མཐར་འཛིན་ལྟ་བ། ལྟ་བ་མཆོག་འཛིན། འཇིག་ལྟ་སྟེ། ལྟ་བ་དེ་གསུམ་གྱི་ཕྱོགས་ལས་དང་པོ་ལས་རྟག་པར་ཕྱིན་ཅི་ལོག་གཉིས་པ་ལས་བདེ་བ་དང་གཙང་བར་ཕྱིན་ཅི་ལོག་གསུམ་པ་ལས་བདག་ཏུ་ལྟ་བ་ཕྱིན་ཅི་ལོག་སྟེ། ཕྱིན་ཅི་ལོག་བཞི་ཚན་འདིའི་རང་བཞིན་ཡིན་ནོ། །(༡༦༠བ)
གཞན་དག་འཇིག་ཚོགས་ལ་བདག་དང་བདག་གིར་ལྟ་བ་ཐམས་ཅད་བདག་ཏུ་ཕྱིན་ཅི་ལོག་པ་ཡིན་ནོ་ཞེས་ཟེར་རོ། །བྱེ་སྨྲས་བདག་གིར་ལྟ་བ་ཕྱིན་ཅི་ལོག་མ་ཡིན་པར་སྨྲས་པ་ལ། ཕ་རོལ་པོས་དེའི་རྒྱུ་མཚན་དྲིས་པ་ལ། བྱེ་སྨྲས། དེ་ནི་ཕྱིན་ཅི་ལོག་མ་ཡིན་ཏེ། མདོ་ལས། བདག་མེད་པ་ལ་བདག་གོ་སྙམ་དུ་ཕྱིན་ཅི་ལོག་པ་ཞེས་འབྱུང་གི། བདག་གི་སྙམ་དུ་ཞེས་བྱ་བ་ནི་མི་འབྱུང་བའི་ཕྱིར་ཞེས་ཟེར་བ་ལ། སློབ་དཔོན་གྱིས། མདོ་ལས་དེ་སྐད་དུ་བསྟན་པ་ནི་ཡོད་མོད་ཀྱི། དེའང་བདག་ཏུ་ལྟ་བ་ལ་དོན་གཞན་དུ་གྱུར་པ་ནི་མ་ཡིན་ཏེ། བདག་ཁོ་ན་ཉེར་ལེན་གྱི་ཕུང་ལྔ་ལ་དབང་བྱེད་པར་ལྟ་བ་འབའ་ཞིག་ཏུ་མ་ཟད་བདག་གིར་ཡང་བལྟའོ་ཞེས་པའི་ཐ་ཚིག་ཏུ་བཤད་པའི་ཕྱིར། དེས་བདག་ཏུ་ལྟ་བ་འདི་ཉིད་ང་དང་ང་ཡིར་འཛིན་པའི་སྒོ་གཉིས་པ་ཅན་ཡིན་ཀྱང་རྫས་སུ་ནི་གཅིག་ཡིན་ཏེ། རྟག་པ་དང་གཅིག་པས་བདག་དང་། དེ་ཉིད་གཞན་ལ་དབང་བྱེད་པས་བདག་གིའོ་ཞེས་བརྗོད་པའི་ཕྱིར། དེ་ལྟར་མིན་ན་ཆོས་ཅན། བདག་གིས་ཞེས་བྱ་བ་གསུམ་པར་བསྟན་པ་དང་། བདག་གི་ཕྱིར་ཞེས་བཞི་པར་བསྟན་པ་ཡང་བདག་ལས་རྫས་ཐ་དད་དུ་ཡོད་པར་ཐལ། བདག་གི་ཞེས་དྲུག་པར་བསྟན་པ་དེ་བདག་ལས་རྫས་ཐ་དད་ཡིན་པའི་ཕྱིར། རིགས་པ་འདི་ནི་ལུང་དེ་བདག་གི་ལྟ་བ་བདག་ལྟ་ལས་རྫས་གཞན་མ་ཡིན་པར་བསྟན་པ་ཡིན་གྱི། བདག་གི་ལྟ་བ་བདག་ལྟ་མ་ཡིན་པར་བསྟན་པ་མ་ཡིན་ནོ། །ཉོན་མོངས་གཞན་ནི་ཕྱིན་ཅི་ལོག་པར་མ་བཞག་པར། འདི་གསུམ་ལ་ཕྱིན་ཅི་ལོག་ཏུ་བཞག་པ་ཆོས་ཅན། དེའི་རྒྱུ་གསུམ་ཚང་བ་ཡིན་ཏེ། དམིགས་པ་ལ་གཅིག་ཏུ་ཕྱིན་ཅི་ལོག་ཏུ་ངེས་པར་རྟོག་པའི་ཕྱིར་དང་སྒྲོ་འདོགས་པའི་ཕྱིར་རོ། །ཆད་པར་ལྟ་བས་ལོག་པར་ལྟ་བ་ནི་སྒྲོ་འདོགས་མ་ཡིན་ཅིང་། མཆོག་འཛིན་ཕྱི་མ་(༡༦༡ན)
རྐང་པ་ལ་ཤིང་སྒྲོག་འདོགས་པ་སོགས་ཀྱིས་འདག་པར་དམིགས་པ་ལ་ངེས་པར་རྟོག་པ་ཉིད་ཀྱིས་སྒྲོ་འདོགས་པའི་ཕྱིར། འཆལ་ཚུལ་སྤོང་བ་ཙམ་ནི་གཅིག་ཏུ་ཕྱིན་ཅི་ལོག་མ་ཡིན་ཏེ། དེ་འདག་རྒྱུར་མི་འགྱུར་བ་མ་ཡིན་པའི་ཕྱིར། དེ་མཆོག་འཛིན་གྱི་ཕྱིན་ཅི་ལོག་ཏུ་འགྲོ་བ་ནི་དེ་ཁོ་ནས་འདག་པར་འཛིན་པས་འགྲོ་བ་ཡིན་ནོ། །ཉོན་མོངས་གཞན་དག་ནི་ཕྱིན་ཅི་ལོག་མིན་ཏེ། ངེས་རྟོག་བྱེད་པ་མ་ཡིན་པའི་ཕྱིར། གཉིས་པ་ནི། སེམས་དང་འདུ་ཤེས་དེའི་དབང་གིས། །གལ་ཏེ་ངེས་པར་རྟོག་པར་མི་བྱེད་པས་ཕྱིན་ཅི་ལོག་མ་ཡིན་ན། མདོ་ལས། མི་རྟག་པ་ལ་རྟག་གོ་སྙམ་དུ་འདུ་ཤེས་དང་སེམས་ཕྱིན་ཅི་ལོག་ཏུ་གསུངས་པ་ཇི་ཞེ་ན། དེ་ལ་འཇོག་བྱེད་ཡོད་དེ། སེམས་དང་འདུ་ཤེས་ནི་ལྟ་བ་ཕྱིན་ཅི་ལོག་དེ་དང་མཚུངས་པར་ལྡན་པ་དེའི་དབང་གིས་ཕྱིན་ཅི་ལོག་ཏུ་བཤད་པའི་ཕྱིར། འོ་ན་ཚོར་སོགས་ཀྱང་མཚུངས་ལྡན་གྱི་དབང་གིས་ཕྱིན་ཅི་ལོག་ཏུ་ཅིས་མ་བཤད་ཅེ་ན། འཇིག་རྟེན་ན་འདུ་ཤེས་དང་སེམས་ཕྱིན་ཅི་ལོག་ཅེས་གྲགས་ཀྱི། ཚོར་བ་ཕྱིན་ཅི་ལོག་ཅེས་མ་གྲགས་པའི་ཕྱིར། ཡང་ན་སེམས་གཙོ་བོ་ཡིན་པས་སེམས་ཕྱིན་ཅི་ལོག་དང་། འདུ་ཤེས་ནི་ལྟ་བ་དང་འདྲ་བར་ཡུལ་ལ་རྟོག་ཅིང་འཇལ་བས་ཕྱིན་ཅི་ལོག་ཏུ་བཞག་ལ། རྒྱུ་མཚན་གཉིས་ཚོར་སོགས་ལ་མེད་པས་དེར་མ་བཞག་པའི་ཕྱིར། ཕྱིན་ཅི་ལོག་དེ་ཐམས་ཅད་རྒྱུན་དུ་ཞུགས་པས་སྤངས་པ་ཡིན་ཏེ། ལྟ་བ་དང་མཚུངས་ལྡན་དང་བཅས་པ་རྣམས་ནི་མཐོང་བས་སྤང་བྱ་ཡིན་པའི་ཕྱིར། སྡེ་པ་གཞན་དག་ན་རེ། མི་རྟག་པས་རྟག་གོ་སྙམ་དུ་འདུ་ཤེས་པ་དང་། སེམས་དང་། ལྟ་བ་ཕྱིན་ཅི་ལོག་གསུམ་ནས་དེ་བཞིན་དུ་བདག་མེད་པ་ལ་བདག་གོ་སྙམ་པའི་བར་གསུམ་གསུམ་སྟེ། ཕྱིན་ཅི་ལོག་ནི་བཅུ་གཉིས་ཡིན་ནོ། །(༡༦༡བ)
མི་རྟག་པ་ལ་རྟག་གོ་སྙམ་པའི་འདུ་ཤེས་སེམས་ལྟ་བ་ཕྱིན་ཅི་ལོག་གསུམ། བདག་མེད་པ་ལ་བདག་གོ་སྙམ་པ་གསུམ་སྟེ་དྲུགསྡུག་བསྔལ་ལ་བདེ་སྙམ་པའི་ལྟ་བ་ཕྱིན་ཅི་ལོག་དང་བདུན། མི་གཙང་བ་ལ་གཙང་ངོ་སྙམ་པའི་ལྟ་བ་ཕྱིན་ཅི་ལོག་པ་དང་བརྒྱད་དོ། །སྡུག་བསྔལ་ལ་བདེའོ་སྙམ་པའི་འདུ་ཤེས་དང་སེམས་ཕྱིན་ཅི་ལོག་གཉིས། མི་གཙང་བ་ལ་གཙང་ངོ་སྙམ་པའི་འདུ་ཤེས་དངསེམས་ཕྱིན་ཅི་ལོག་གཉིས་ཏེ་བཞི་ནི་བསྒོམ་པས་སྤང་བར་བྱ་བ་དག་ཡིན་ནོ། །དེ་ལྟར་མ་ཡིན་ན་ཆོས་ཅན། རྒྱུན་ཞུགས་དང་ཕྱིར་འོང་འཕགས་པ་འདོད་ཆགས་དང་མ་བྲལ་བར་འདོད་པ་ལ་འདོད་ཆགས་སྐྱེ་བར་མི་འགྱུར་བར་ཐལ། སྡུག་བསྔལ་དང་། མི་གཙང་བ་ལ་བདེ་གཙང་གི་འདུ་ཤེས་དང་སེམས་པ་རྣམས་ཕྱིན་ཅི་ལོག་མ་ཡིན་པའི་ཕྱིར། འདོད་མི་ནུས་ཏེ། གཟུགས་ཅན་སྙིང་པོ་འཕགས་པ་རྒྱུན་ཞུགས་ཡིན་ཀྱང་འདོད་ཆགས་སྐྱེས་པ་ལྟ་བུའོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ནི། འཕགས་པ་ལ་བདེ་བ་དང་། གཙང་བར་འདུ་ཤེས་པ་དང་སེམས་པ་ཕྱིན་ཅི་ལོག་ཏུ་འདོད་ན་ཆོས་ཅན། སེམས་ཅན་དུ་འདུ་ཤེས་པ་དང་། སེམས་ཅན་ནོ་སྙམ་པའི་སེམས་པའང་ཕྱིན་ཅི་ལོག་ཏུ་ཐལ། བུད་མེད་དང་བདག་ལ་ལོངས་སྤྱད་བྱ་སྤྱོད་བྱེད་དུ་འདུ་ཤེས་པ་མེད་པར་ནི་དེ་ལ་བདེ་བ་དང་གཙང་བའི་འདོད་པའི་འདོད་ཆགས་སྐྱེ་བར་མི་རིགས་པའི་ཕྱིར། དེ་ཡང་འདོད་ན་བདག་གོ་སྙམ་དུ་འདུ་ཤེས་དང་སེམས་པའི་ཕྱིན་ཅི་ལོག་དག་ཀྱང་སྒོམ་པས་སྤང་བར་བྱ་བ་ཡིན་པར་ཐལ། སེམས་ཅན་དུ་འདུ་ཤེས་པའང་བདག་ལྟའི་དབང་གིས་ཕྱིན་ཅི་ལོག་ཡིན་པ་གང་ཞིགདེ་འཕགས་པ་ལའང་ཡོད་པའི་ཕྱིར། མདོ་ལས་ཀྱང་འཕགས་པ་ཉན་ཐོས་ཐོས་པ་དང་ལྡན་པ་འདིས་ནི་སྡུག་བསྔལ་འཕགས་(༡༦༢ན)
པའི་བདེན་པ་ཡང་དག་པ་ཇི་ལྟ་བ་བཞིན་དུ་ཤེས་སོ་ཞེས་བྱ་བ་ནས། བདག་མེད་པའི་བར་དུ་མི་རྟག་པ་ལ་རྟག་གོ་སྙམ་དུ་ཕྱིན་ཅི་ལོག་པ་དང་། སེམས་ཕྱིན་ཅི་ལོག་པ་དང་། ལྟ་བ་ཕྱིན་ཅི་ལོག་གང་ཡིན་པ་དེ་སྤོང་བར་བྱེད་དོ་ཞེས་རྒྱས་པར་གསུངས་པས། ལྟ་བས་ཀུན་སློང་བའི་མཚུངས་ལྡན་གྱི་འདུ་ཤེས་དང་སེམས་པ་ཁོ་ན་ཕྱིན་ཅི་ལོག་ཡིན་གྱི། དེ་ལས་གཞན་སྒོམ་སྤོང་དང་མཚུངས་ལྡན་གྱི་བདེ་བར་འདུ་ཤེས་པ་དང་། སེམས་པ་དག་ནི་ལོག་ཤེས་ཡིན་གྱི། ཕྱིན་ཅི་ལོག་མ་ཡིན་ཏེ། འཁྲུལ་རྒྱུ་དེ་བྱུང་བའི་དུས་ཙམ་དུ་འབྱུང་བའི་འཁྲུལ་པ་ཙམ་པོ་ནི་ལོག་ཤེས་ཡིན་པ་གང་ཞིགདུས་དེ་ལས་ཐལ་ནས་མི་འབྱུང་བས་ཕྱིན་ཅི་ལོག་མ་ཡིན་པར་གྲུབ་པའི་ཕྱིར། མགལ་མེའི་འཁོར་ལོ་དང་རི་མོ་ལ་གནོད་སྦྱིན་འཁྲུལ་པ་དེའི་དུས་སུ་ཡིན་གྱི། ཕྱིས་མ་ཡིན་པ་བཞིན་ནོ་ཞེས་ཟེར་རོ། །མདོར་ན་འཕགས་པ་ནི། འདི་ལ་བདེ་བའམ། གཙང་བར་འཁྲུལ་པའམ། སེམས་ཅན་དུ་འཁྲུལ་པ་ཡང་རུང་། ཡུད་ཙམ་པར་ཟད་ཀྱི། ཕྱིན་ཅི་ལོག་ནི་མ་ཡིན་ཏེ། དེ་ལ་ངེས་པར་རྟོག་པ་མ་ཡིན་པའི་ཕྱིར། སངས་རྒྱས་ཀྱིས། དགེ་སློང་དག །འཕགས་པ་ཉན་ཐོས་ཐོས་པ་དང་ལྡན་པ་ལ་དྲན་པ་ལས་ཉམས་པ་ཅུང་ཟད་འབྱུང་མོད་ཀྱི། འོན་ཀྱང་མྱུར་བ་ཁོ་ནར་མི་སྣང་བ་དང་ཡོངས་སུ་ཟད་པ་དང་ཡོངས་སུ་གཏུགས་པར་འགྱུར་རོ། །ཞེས་གསུངས་སོ་ཞེས་བྱེ་སྨྲས་ཁུངས་སུ་འདྲེན་པར་བྱེད་དོ། །ལུགས་སྔ་མ་གཉིས་ལས་ཕྱོགས་གསུམ་པ་འཛིན་པའི་གཞན་དག་ན་རེ། འདུ་ཤེས་པ་དང་སེམས་འཁྲུལ་པ་དེ་ཕྱིན་ཅི་ལོག་ཡིན་ཏེ། འཕགས་པ་ངག་གི་དབང་ཕྱུག་གིས་གནས་བརྟན་ཀུན་དགའ་བོ་ལ། འདོད་པའི་ཆགས་པས་ཟིལ་གནོན་ཕྱིར། །བདག་གི་སེམས་ནི་(༡༦༢བ)
གདུང་བར་གྱུར། །གོའུ་ཏམ་ཁྱོད་ཀྱི་ཐུགས་བརྩེའི་ཕྱིར། །ཞི་བ་མཆོག་ནི་བཤད་དུ་གསོལ། །ཅེས་སྨྲས་པ་དང་། འཕགས་པ་ཀུན་དགའ་བོས་དེའི་ལན་དུ། འདུ་ཤེས་ཕྱིན་ཅི་ལོག་པ་ཡིས། །ཁྱོད་ཀྱི་སེམས་ནི་ཡོངས་སུ་གདུངས། །དེ་ཕྱིར་འདོད་ཆགས་ལྡན་པ་ཡི། །རྒྱུ་མཚན་སྡུག་པ་སྤོང་བར་གྱིས། །ཞེས་ཆགས་སོགས་དེ་ལའང་ཕྱིན་ཅི་ལོག་ཡོད་པ་ཉིད་དུ་ཡོངས་སུ་བསྟན་པའི་ཕྱིར། དེས་ན་སྡེ་པ་འདིས་ལྟ་བའི་ཕྱིན་ཅི་ལོག་བཞི་བདེན་པ་མཐོང་བས་སྤངས་ཀྱང་། སེམས་དང་འདུ་ཤེས་ཕྱིན་ཅི་ལོག་བཞི་བཞི་སྟེ་བརྒྱད་མཐོང་ལམ་གྱིས་མ་སྤངས་པར་འདོད་དེ། སྒོམ་ལམ་གྱིས་སྤང་བྱ་ཁོ་ནར་འདོད་པའི་ཕྱིར། ཞེས་ཟེར་རོ། །འོ་ན་བྱེ་སྨྲས་དྲངས་པའི་འཕགས་པ་ཉན་ཐོས་ཐོས་པ་དང་ལྡན་པ་ཞེས་པ་ནས་སྤོང་བར་བྱེད་དོ་ཞེས་རྒྱས་པར་འབྱུང་ཞེས་པའི་བར་གྱི་མདོ་དང་མི་འགལ་ཏེ། སྤོང་བར་བྱེད་དོ་ཟེར་གྱི། སྤངས་སོ་མི་ཟེར་བས་མཐོང་ལམ་ཙམ་གྱིས་མི་སྤངས་ལ། སྒོམ་ལམ་ཙམ་གྱིས་ཀྱང་མི་སྤོང་བའི་ཕྱིར་དང་། འདུ་ཤེས་དང་སེམས་ཕྱིན་ཅི་ལོག་བརྒྱད་པོ་དེ་དག་ཀྱང་སྡུག་བསྔལ་སོགས་འཕགས་པའི་བདེན་པ་རྣམས་ཇི་བཞིན་ཤེས་པས་སྤོང་བར་འགྱུར་གྱི། ཇི་བཞིན་ཤེས་པ་མེད་པར་མ་ཡིན་ནོ་ཞེས་སྤོང་ཐབས་ལེགས་པར་བརྗོད་པའི་ཕྱིར་ཞེས་ཟེར་རོ། །གཞན་ཡང་། འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་སྡུག་བསྔལ་ཀུན་འབྱུང་བའོ། འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པའོ། །ཞེས་བཤད་པ་འདི་ནི་མཐོང་ལམ་ཁོ་ནའི་དབང་དུ་མཛད་པ་མ་ཡིན་གྱི། སྒོམ་ལམ་ཟག་མེད་ཀྱང་ནི་བདེན་པ་ལ་དམིགས་པ་ཉིད་ཀྱི་ཕྱིར་རོ། །མདོར་ན། བྱེ་སྨྲས་ཕྱིན་ཅི་ལོག་བཅུ་གཉིས་(༡༦༣ན)
རིངས་པ་མཐོང་ལམ་སྐྱེས་པས་སྤངས་པར་འདོད། །སྡེ་པ་ཁ་ཅིག་བརྒྱད་སྤངས་བཞི་མ་སྤངས་པར་འདོད། སྡེ་པ་ཁ་ཅིག་ལྟ་བ་ཕྱིན་ཅི་ལོག་བཞི་སྤངས། འདུ་ཤེས་དང་སེམས་ཕྱིན་ཅི་ལོག་བརྒྱད་མཐོང་ལམ་སྐྱེས་ཙམ་ནས་མ་སྤངས་པར་འདོད། སློབ་དཔོན་ཐོགས་མེད་ནི། ཕྱིན་ཅི་ལོག་སྒོམ་སྤོང་གི་རིགས་ཀུན་མ་སྤངས་པར་འདོད་དོ། །གཉིས་པ་ང་རྒྱལ་གྱི་དབྱེ་བ་ལ། དབྱེ་བ་དངོས། དེ་གཉེན་པོ་གང་གིས་སྤོང་བ། མ་སྤངས་ཀྱང་འཕགས་རྒྱུད་ལ་མངོན་དུ་མི་འགྱུར་བའི་སྒོམ་སྤང་བཤད་པའོ། །དང་པོ་ནི། ང་རྒྱལ་བདུན་རྣམ་དགུ་གསུམ་པོ། །ལྟ་བར་མ་ཟད་ང་རྒྱལ་ལའང་དེ་འཇུག་པའི་རྣམ་པའི་བྱེ་བྲག་ལས་བདུན་དུ་དབྱེར་ཡོད་དེ། ཆུང་ངུ་བས་བདག་ཁྱད་པར་དུ་འཕགས་པའམ། མཉམ་པ་དང་མཉམ་མོ་སྙམ་དུ་སེམས་ཁེངས་པའི་ང་རྒྱལ་དང་། རིགས་སོགས་ཀྱི་སྒོ་ནས་མཉམ་པ་བས་བདག་མཆོག་ཡིན་ཅེས་ཁྱད་པར་དུ་འཕགས་སོ་སྙམ་པའི་སེམས་ཁེངས་པ་ནི་ལྷག་པའི་ང་རྒྱལ་དང་། ཁྱད་པར་དུ་འཕགས་པས་ཀྱང་བདག་ཁྱད་པར་དུ་འཕགས་སོ་སྙམ་པ་ནི། ང་རྒྱལ་ལས་ཀྱང་ང་རྒྱལ་དང་ཉེར་ལན་གྱི་ཕུང་ལྔ་ལ་བདག་གམ་བདག་གིར་གོམས་པ་ངའོ་སྙམ་པའི་ང་རྒྱལ་དང་། ཏིང་ངེ་འཛིན་ལ་བརྟེན་པའི་ཆོས་ཟག་བཅས་མངོན་ཤེས་དང་སྨོན་ནས་ཤེས་པ་ལ་སོགས་དང་། ཟག་མེད་ཀྱི་ཁྱད་པར་མཐོང་ལམ་གྱི་ལམ་མ་ཐོབ་པར་ཆ་འདྲ་ཙམ་ཡོད་པ་ལ། དེ་བདག་གིས་ཐོབ་བོ་སྙམ་པ་ནི་མངོན་པའི་ང་རྒྱལ་དང་། བཟོ་དང་ཚུལ་ཁྲིམས་སོགས་ཀྱི་སྒོ་ནས་ཆེས་ཁྱད་པར་དུ་འཕགས་པ་བས་བདག་ཅུང་ཟད་ཅིག་དམན་ནོ་སྙམ་པ་ནི་ཅུང་ཟད་སྙམ་པའི་ང་རྒྱལ་དང་། ཡོན་ཏན་མིན་པ་ཉེས་སྤྱོད་དང་ལྡན་པའམ། ཡོན་ཏན་དང་ལྡན་པ་མ་ཡིན་པ་བདག་ཡོན་ཏན་དང་ལྡན་ནོ་སྙམ་པ་ལོག་པའི་ང་(༡༦༣བ)
རྒྱལ་ལོ། །འདི་དང་མངོན་པའི་ང་རྒྱལ་གྱི་ཁྱད་པར་ནི་ཡོན་ཏན་དུ་ང་རྒྱལ་བའི་གཞི་ཡོད་མེད་ཀྱིའོ། །བྱེ་བྲག་མེད་པར་བདག་གཞན་ལ་བརྟེན་ནས་སེམས་ཀྱིས་རང་མཐོང་ཞིང་རང་གི་ཁེངས་པ་ལ་ང་རྒྱལ་ཞེས་བཤད་དོ། །བསྟན་བཅོས་ལས། ང་རྒྱལ་རྣམ་པ་དགུ་སྟེ། བདག་མཆོག་ཡིན་ནོ་སྙམ་པ་ང་རྒྱལ་གྱི་རྣམ་པ་དང་། བདག་དང་འདྲའོ་སྙམ་པ་དང་། བདག་དམན་ནོ་སྙམ་པ་དང་། བདག་པས་མཆོག་ཡོད་དོ་སྙམ་པ་དང་། བདག་དང་མཉམ་པ་ཡོད་དོ། །བདག་པས་དམན་པ་ཡོད་དོ། །བདག་པས་མཆོག་མེད་དོ། །བདག་དང་མཉམ་པ་མེད་དོ། །བདག་པས་དམན་པ་མེད་དོ་སྙམ་པའི་ང་རྒྱལ་གྱི་རྣམ་པ། ཞེས་བཤད་པའི་རྣམ་པ་དགུ་པོ་དེ་དག་ནི། ང་རྒྱལ་དང་། ལྷག་པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་གསུམ་པོ་འདི་ལས་འབྱུང་སྟེ། དེ་ལ་དང་པོ་གསུམ་ནི་ལྟ་བ་སྔར་སོང་བ་ལ་བརྟེན་པའི་ང་རྒྱལ་གསུམ་སྟེ། ལྷག་པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་རྣམས་སོ། །གཉིས་པའི་གསུམ་ནི། ཅུང་ཟད་སྙམ་པའི་ང་རྒྱལ་དང་། ང་རྒྱལ་དང་། ལྷག་པའི་ང་རྒྱལ་གྱི་རྣམ་པ་རྣམས་སོ། །གསུམ་པའི་གསུམ་པ་ནི། ལྟ་བ་ལ་བརྟེན་པའི་ང་རྒྱལ་དང་། ལྷག་པའི་ང་རྒྱལ་དང་། ཅུང་ཅད་སྙམ་པའི་ང་རྒྱལ་རྣམས་ཡིན་ནོ། །ཆེས་ཁྱད་པར་དུ་འཕགས་པ་བས་བདག་ཏུ་ཅུང་ཟད་ཅིག་གིས་དམན་ནོ་སྙམ་པ་ནི་ཁེངས་པའི་གནས་ཡིན་པའི་ཕྱིར། ཅུང་ཟད་སྙམ་པའི་ང་རྒྱལ་དུ་རིགས་པ་བདེན་ཀྱང་བདག་ལས་དམན་པ་མེད་དོ་སྙམ་དུ་ཡིད་ལ་ཁེངས་པའི་གནས་ཅི་ཡོད་སྙམ་ན། གང་ཞིག་མངོན་པར་འདོད་པའི་སེམས་ཅན་གྱི་ཚོགས་དམ་པའི་ནང་ན་བདག་ཉིད་དམན་ཀྱང་། ཐ་གི་བ་ང་ཡང་ཁྱད་ཅན་ཡིན་ནོ་སྙམ་དུ་སེམས་པ་དེ་ལྟ་བུ་ཁེངས་པའི་གནས་སུ་ཡོད་དོ། །གཞན་སྔར་བཤད་པའི་དགུ་(༡༦༤ན)
པོ་འདི་ཡེ་ཤེས་ལ་འཇུག་པ་ལས་བཤད་པའི་ལུགས་ཡིན་གྱི། རབ་ཏུ་བྱེད་པའི་རྐང་པ་ལས་ནི། བདག་མཆོག་ཡིན་ནོ་སྙམ་པའི་ང་རྒྱལ་གྱི་རྣམ་པ་ནི་ཆོས་ཅན། དམན་པ་ལ་བལྟོས་ནས་ང་རྒྱལ་དང་། མཉམ་པ་ལ་བལྟོས་ནས་ལྷག་པའི་ང་རྒྱལ་དང་། ཁྱད་པར་དུ་འཕགས་པ་ལ་བལྟོས་ནས་ང་རྒྱལ་ལས་ཀྱང་ང་རྒྱལ་ཡིན་ཏེ། རིམ་བཞིན་ཆུང་ངུ་བས་བདག་ཁྱད་པར་དུ་འཕགས་པ་དང་མཉམ་པ་དང་མཉམ་ཞེས་བསྟན་པའི་ཕྱིར་དང་། མཉམ་པ་བས་བདག་ཁྱད་པར་དུ་འཕགས་སོ་སྙམ་པ་ཞེས་བསྟན་པའི་ཕྱིར་དང་། ཁྱད་པར་དུ་འཕགས་པ་བས་ཀྱང་བདག་ཁྱད་པར་དུ་འཕགས་སོ་སྙམ་པའོ། །ཞེས་བསྟན་པའི་ཕྱིར་རོ། །གཉིས་པ་ནི། མཐོང་དང་བསྒོམ་པས་ཟད་བྱ་བ། །ང་རྒྱལ་བདུན་པོ་དེ་དག་ནི་མཐོང་བ་དང་སྒོམ་པ་དག་གིས་ཟད་པར་བྱ་བའོ། །འདིར་ཐམས་ཅད་སྨོས་པ་ནི། ཁ་ཅིག་ངའོ་སྙམ་པའི་ང་རྒྱལ་དང་། ལོག་པའི་ང་རྒྱལ་ནི་མཐོང་སྤོང་ཡིན་ལ། ལྷག་མ་རྣམས་མཐོང་སྒོམ་གྱི་སྤང་བྱའོ་ཞེས་འདོད་པ་དེ་མི་འཐད་པར་བསྟན་པའི་ཆེད་དུ་ང་རྒྱལ་ཐམས་ཅད་མཐོང་སྒོམ་གྱི་སྤང་བྱར་བསྟན་པའོ། །ཡང་གོང་དུ་ང་རྒྱལ་རིས་ལྔ་ཅར་དུ་བསྟན་པས་མཐོང་སྤོང་སྒོམ་སྤོང་དུ་གྲུབ་བཞིན་དུའང་འདིར་བསྣན་ཅིང་སྨོས་ཅི་དགོས་སྙམ་ན། ལྟ་བ་ཡིན་ཚད་རིས་ལྔ་ཅར་མིན་པ་བཞིན། ང་རྒྱལ་ཀྱང་རིས་ལྔ་ཆར་མིན་ནམ་སྙམ་པའི་ལོག་རྟོག་དགག་པའི་ཆེད་དུ་ཡིན་ཏེ། འཇིག་ཚོགས་དང་མཐར་འཛིན་རིས་ལྔ་ཀ་ཡིན། ཚུལ་ཁྲིམས་དང་བརྟུལ་ཞུགས་མཆོག་འཛིན་རིས་ལྔ་ཀ་མིན་པ་བཞིན། ང་རྒྱལ་བདུན་ཀའང་རིས་ལྔ་ཀ་མིན་ནམ་སྙམ་པའི་ལོག་རྟོག་དགག་པའི་སླད་དུ་འདིར་བསྣན་ནས་བཤད་པའོ། །གསུམ་པ་ནི། བསྒོམ་པས་སྤང་བར་བྱ་བ་ནི། །གསོད་སོགས་ཀུན་ནས་དཀྲིས་པའོ། །དེ་བཞིན་འཇིག་སྲེད་འཕགས་པ་ལ། །རྣམ་སོགས་ངའོ་སྙམ་མི་འབྱུང་། །ལྟ་བས་རྒྱས་པར་འགྱུར་ཕྱིར་རོ། །མི་དགེའི་འགྱོད་པའང་མ་ཡིན་ནོ། །ཅི་འཕགས་པ་རྣམས་སྒོམ་པས་སྤང་བྱ་མ་སྤངས་པ་གང་ཡིན་པ་ལ་ཀུན་ཏུ་སྤྱོད་པ་ཡོད་དམ་ཞེ་ན། དེ་ནི་(༡༦༤བ)
མཐའ་གཅིག་ཏུ་མ་ངེས་ཏེ། དགེ་བ་ཟག་བཅས་ལ་འདུན་པའི་འདོད་ཆགས་དང་བྲལ་ཀྱང་ཟག་བཅས་ཀྱི་དད་སོགས་དང་གཉིད་དང་སྡུག་བསྔལ་གྱི་དབང་པོ་དང་མིག་སོགས་ནི་སྤངས་ཀྱང་སྤྱོད་ལ། གསོད་སོགས་ཀྱི་ཀུན་དཀྲིས་ནི་མ་སྤངས་ཀྱང་མི་འབྱུང་བ་ལྟ་བུའི་ཕྱིར། སྤངས་ཀྱང་སྤངས་ཀུན་ཏུ་མི་འབྱུང་བ་ནི་མཐོང་ལམ་སྐྱེས་པ་ཙམ་གྱིས་མཐོང་སྤོང་དང་། སྤངས་ཀྱང་མ་སྤངས་ཀུན་ཏུ་ཡང་འབྱུང་བ་ནི་སོ་སྐྱེའི་དུས་ཀྱི་མཐོང་སྤོང་ལྟ་བུ་ཡོད་པའི་ཕྱིར། ཉོན་མོངས་པ་ཀུན་ནས་དཀྲིས་པ་གང་གི་ཆེད་དུ་བསམས་ཏེ་སྲོག་ཆགས་གསོད་པར་བྱེད་པ་ནས་སོགས་པས་མ་བྱིན་པར་ལེན་པ་དང་། འདོད་པས་ལོག་པར་
གཡེམ་པ ་དང་། རྫུན་དུ་སྨྲ་བ་དང་། ངོ་ཚ་མེད་སོགས་དེ་ནི་ཆོས་ཅན། སྒོམ་པས་སྤང་བར་བྱ་བ་ཡིན་ཏེ། སྒོམ་སྤོང་གི་ཆོས་གཟུགས་སོགས་ཁོ་ན་ལ་དམིགས་པའི་ཕྱིར། འཇིག་ཚོགས་ལ་ལྟ་བ་ལ་སོགས་པ་ནི་སྒོམ་པས་སྤང་བར་བྱ་བའི་ཆོས་ལ་དམིགས་པར་བྱེད་མོད་ཀྱི། སྒོམ་པས་སྤང་བར་བྱ་བ་འབའ་ཞིག་ལ་ནི་མ་ཡིན་པས། སྒོམ་པས་སྤང་བར་བྱ་བ་མ་ཡིན་པའི་ཕྱིར། དེ་བཞིན་དུ་འཇིག་པ་ཁམས་གསུམ་པའི་མི་རྟག་པ་དོན་དུ་གཉེར་བའི་སྲིད་པའང་སྒོམ་སྤོང་ཡིན་ནོ། །ཅི་དེ་ལ་དོན་དུ་གཉེར་བ་ཡོད་དམ་ཞེ་ན། མདོ་ལས། ཇི་སྐད་དུ། བདག་ཇི་ལྟར་གསོན་ཅིང་འདུག་ལ་སྡོད་ཅིང་འཚོ་བ་དེ་སྲིད་དུ་ནད་དང་བཅས། འབྲས་དང་བཅས། ཟུག་རྔུ་དང་བཅས་པ་རིམས་ནད་དང་ཡོངས་སུ་གདུང་བ་དང་བཅས་པ་སྟེ། འདི་ལྟར་བདག་ཆད་པར་གྱུར་ཅིང་ཞིག་པར་གྱུར་ལ་འབྱུང་བར་མི་འགྱུར་ཏེ། དེ་ཙམ་གྱིས་བདག་ཉིད་ཡང་དག་པར་ཀུན་ནས་ཆད་པ་ཡིན་ནོ་སྙམ་དུ་སེམས་སོ། །ཞེས་འབྱུང་བ་ལྟ་བུའོ། །དེ་བཞིན་ཞེས་པའི་སྒྲས་སྐྱེ་བའི་སྲིད་པའི་ཕྱོགས་བཟུང་ངོ་། །ཇི་ལྟ་བུ་ཞེ་ན། (༡༦༥ན)
བདག་གླང་པོ་ཆེའི་རྒྱལ་པོ་ས་སྲུངས་ཀྱི་བུར་གྱུར་ཀྱང་ཅི་མ་རུང་ཞེས་པ་དང་། ལྷ་མ་ཡིན་གྱི་དབང་པོ་དང་། བུད་མེད་རིན་པོ་ཆེ་དང་། ལུས་ངན་པོ་དང་། བྱང་སྒྲ་མི་སྙན་པ་སོགས་སུ་གྱུར་ན་ཅི་མ་རུང་སྙམ་པ་མི་འབྱུང་བ་བསྡུའོ། །ཕྱོགས་སྨོས་པས་དབང་པོའམ་འཁོར་ལོས་སྒྱུར་རྒྱལ་དུ་འགྱུར་ཡང་ཅི་མ་རུང་སྙམ་པ་དེ་ལྟ་བུ་འབྱུང་བའོ། །སྒོམ་སྤོང་ནི་ང་རྒྱལ་གྱི་རྣམ་པ་རྣམས་དང་། ངའོ་སྙམ་པའི་ང་རྒྱལ་ཀྱང་ཡོད་མོད་ཀྱི། འཕགས་པ་ལ་ང་རྒྱལ་གྱི་རྣམ་པ་དགུ་པོ་རྣམས་དང་། སྒོམ་སྤང་གི་ངའོ་སྙམ་པའི་ང་རྒྱལ་དང་སོགས་པས་འཇིག་སྲེད་ཀྱི་བར་མ་སྤངས་ཀྱང་མི་འབྱུང་སྟེ། ང་རྒྱལ་དེ་དག་འཇིག་ཚོགས་ལ་ལྟ་བ་སྔོན་དུ་འགྲོ་བས་རྒྱས་པར་འགྱུར་བ་ལས་རྒྱས་བྱེད་ལྟ་བ་མེད་པས་རྐེད་པ་བཅག་པས་ལྡང་བར་མི་ནུས་པའི་ཕྱིར་རོ། །ལོག་ལྟ་སྤངས་པའི་ཕྱིར་གསོད་སོགས་ཀྱི་ཀུན་དཀྲིས་ཡོད་ཀྱང་ལྡང་བར་ནུས་པ་མ་ཡིན་ལ། ཆད་ལྟ་དང་རྟག་ལྟ་སྤངས་པས་འཇིག་སྲེད་དང་སྐྱེ་བའི་སྲེད་པ་ཡང་ལྡང་བར་མི་ནུས་པའི་ཕྱིར་རོ། །འགྱོད་པ་མི་དགེ་བ་ཡང་སྒོམ་སྤོང་གི་ཆོས་ལུས་ངག་གིས་ངན་པར་བྱས་པ་ལ་དམིགས་པས་སྒོམ་སྤང་ཡིན་ཀྱང་། འཕགས་པ་ལ་དེ་འབྱུང་བ་མ་ཡིན་ཏེ། དེ་ཐེ་ཚོམ་གྱིས་ཀུན་ནས་སློང་བ་ཡིན་ལ། ཐེ་ཚོམ་མཐོང་བས་སྤང་བར་བྱ་བ་ཡིན་པའི་ཕྱིར་རོ། །གཉིས་པ་རྣམ་པའི་དབྱེ་བ་ལ། ཀུན་འགྲོ་ཡིན་མིན་གྱི་དབྱེ་བ། ཟག་མེད་ལ་དམིགས་པ་དང་མ་དམིགས་པའི་བྱེ་བྲག །དམིགས་པ་དང་མཚུངས་ལྡན་གྱིས་རྒྱས་འགྱུར། མི་དགེ་བ་དང་ལུང་མ་བསྟན་གྱི་དབྱེ་བ། དུས་གསུམ་ལ་ཕྲ་རྒྱས་གང་ལྡན་པའོ། །དང་པོ་ལ། ཁམས་སྐལ་བ་མཉམ་པ་དང་། མི་མཉམ་པ་དང་། དེ་གཉིས་ལས་གཞན་པའི་ཀུན་འགྲོ་བཤད་པའོ། །དང་པོ་ནི། སྡུག་བསྔལ་རྒྱུ་མཐོང་སྤང་བྱ་བ། །ལྟ་དང་དེ་བཞིན་ཐེ་ཚོམ་དང་། །གང་དེ་ལྷན་ཅིག་མ་འདྲེས་པའི། །མ་རིག་གང་ཡིན་ཀུན་ཏུ་འགྲོ། །ཕྲ་རྒྱས་གོ་བརྒྱད་པོ་དེ་ལས་སྡུག་བསྔལ་དང་དེའི་རྒྱུ་(༡༦༥བ)
ཀུན་འབྱུང་མཐོང་བས་སྤང་བར་བྱ་བའི་ལྟ་བ་རྣམས་དང་། དེ་བཞིན་དུ་ཐེ་ཚོམ་དང་གང་དེ་དག་དང་ལྷན་ཅིག་མཚུངས་ལྡན་གྱི་མ་རིག་པ་དང་། སྡུག་བསྔལ་དང་ཀུན་འབྱུང་མཐོང་བས་སྤང་བྱའི་མ་རིག་པ་ཕྲ་རྒྱས་གཞན་དང་མ་འདྲེས་པ་གང་ཡིན་པ་སྟེ། སྡུག་བསྔལ་མཐོང་སྤོང་གི་ལྟ་བ་ལྔ། ཀུན་འབྱུང་མཐོང་སྤོང་གི་ལོག་ལྟ་དང་། ལྟ་བ་མཆོག་འཛིན་གཉིས་ཏེ་ལྟ་བ་བདུན། སྡུག་བསྔལ་དང་ཀུན་འབྱུང་མཐོང་སྤོང་གི་ཐེ་ཚོམ་གཉིས་དང་། དེ་གཉིས་ཀྱི་མ་རིག་པ་གཉིས་ཏེ་ཕྲ་རྒྱས་བཅུ་གཅིག་པོ་དེ་ནི་ཟག་བཅས་ཀྱི་དངོས་པོ་རང་གི་ཁམས་མཐའ་དག་ལ་དམིགས་པས་བསགས་པ་ཉེ་བར་བསྟན་པའི་ཕྱིར་དང་། བློ་གཅིག་ཅིང་བྱ་བ་གཅིག་པས་སྟོབས་དང་ལྡན་པར་གྲུབ་པའི་ཕྱིར་སྐལ་བ་མཉམ་པའི་ཁམས་ཀུན་ཏུ་འགྲོ་བ་ཡིན་ནོ། །མ་རིག་པ་གཉིས་ནི་སྡུག་ཀུན་གྱི་མཐོང་བས་སྤང་བྱ་ཁོ་ན་སྟེ། ཕྱོགས་གཅིག་གི་སྒོ་ནས་ཡིན་གྱི། མཐའ་དག་གི་སྒོ་ནས་མ་ཡིན་པའི་ཕྱིར། མ་རིག་པའི་ཀུན་འགྲོ་ནི་མཚུངས་ལྡན་དང་། མ་འདྲེས་པ་ཁོ་ན་ཀུན་འགྲོ་ཡིན་གྱི། འདོད་ཆགས་སོགས་དང་མཚུངས་པར་ལྡན་པ་ནི་མ་ཡིན་ནོ། །དེས་ན་ཕྲ་རྒྱས་བཅུ་གཅིག་ནི་ཀུན་ཏུ་འགྲོ་བ་ཡིན་ཏེ། ཕྲ་རྒྱས་དགུ་ནི་མཐའ་དག་གི་སྒོ་ནས་ཡིན་ལ། གཉིས་ནི་ཕྱོགས་གཅིག་གི་སྒོ་ནས་ཡིན་པས་སོ། །མ་འདྲེས་པའི་དོན་ནི། འདྲེས་པ་ནི་འགྲོགས་པ་ཞེས་བྱ་ལ། འདྲེས་པ་མེད་པ་ནི་མ་འདྲེས་པ་སྟེ། ལོགས་ཤིག་ཏུ་གྱུར་པ་ཞེས་བྱ་བའི་ཐ་ཚིག་གི་དོན་ཏེ། དཔེར་ན། བཅོམ་ལྡན་འདས་མ་འདྲེས་ལ། དགེ་སློང་གི་དགེ་འདུན་མ་འདྲེས་ཞེས་པ་ལྟ་བུ། བཅོམ་ལྡན་འདས་ཀྱང་ལོགས་ཤིག་ལ་དགེ་སློང་གི་དགེ་འདུན་ཀྱང་ལོགས་ཤིག་ཏུ་ཡོད་པར་བརྗོད་ཅིང་གོ་བ་ལྟ་བུའོ། །སློབ་དཔོན་གྱིས་བྱེ་བྲག་སྨྲ་བ་ལ་བརྟགས་པ་ནི། ཅི་རང་གི་ཁམས་མཐའ་དག་ལ་རིམ་(༡༦༦ན)
གྱིས་སམ། གཅིག་ཅར་དམིགས་ཞེས་དྲིས་པ་ལ། བྱེ་བྲག་ཏུ་སྨྲ་བས། རིམ་གྱིས་དམིགས་པ་ཡིན་ན་ཆགས་སོགས་ཀྱང་རིམ་གྱིས་རང་གི་ཁམས་ལ་དམིགས་པས་ཀུན་འགྲོར་འགྱུར་ལ། དེས་ན་གཅིག་ཅར་རོ་ཞེ་ན། སློབ་དཔོན་གྱིས། འོ་ན་མཆོག་འཛིན་ཕྱི་མ་ཀུན་འགྲོ་མ་ཡིན་པར་ཐལ། སུ་ཞིག་འདོད་ཁམས་གནས་ཉི་ཤུ་མཐའ་དག་གིས་འདག་པར་ཡིད་ཆེས་པའམ་མཐའ་དག་རྒྱུ་མ་ཡིན་ལ་རྒྱུར་ཡིད་ཆེས་པར་འགྱུར་བ་མེད་པའི་ཕྱིར་རོ། །བྱེ་སྨྲས་ཉེས་པ་མེད་དེ། རྫས་མ་ལུས་པ་ལ་གཅིག་ཅར་དམིགས་པ་མེད་ཀྱང་། འདོད་པའི་སྤང་བྱ་རིས་ལྔ་པོ་ཐམས་ཅད་ལ་དམིགས་ཤིང་འདག་པར་འཛིན་པ་ལ་སོགས་ཀྱི་ཕྱིར་སྙམ་ན། སློབ་དཔོན་གྱིས། དེ་ལྟར་ནའང་ཡུལ་ཉེར་ལེན་གྱི་ཕུང་པོ་ལྔ་པོ་གང་ལ་བདག་ཏུ་ལྟ་བ་ཡོད་པ་དེ་ལ་བདག་ཏུ་སྲེད་པ་ཡོད་ཅིང་དེའང་འདོད་ཆགས་ཡིན་ལ། གང་ལ་མཆོག་དང་གྲོལ་བའི་རྒྱུར་ལྟ་བ་དེ་དོན་དུ་གཉེར་ཞིང་། དེ་ལས་ང་རྒྱལ་དུ་འགྱུར་བས་ན་འདོད་ཆགས་དང་ང་རྒྱལ་ཡང་ཀུན་འགྲོར་འགྱུར་ཏེ། ལྟ་བ་དེ་དག་ནི་སྐལ་བ་མཉམ་པའི་ཁམས་མཐའ་དག་ལ་དམིགས་ལ། ཉོན་མོངས་པ་གཉིས་པོ་དེ་དག་ཀྱང་ལྟ་བའི་ཡུལ་ལ་འཇུག་པའི་ཕྱིར་རོ། །བྱེ་སྨྲས། སློབ་དཔོན་ལ་ཅི་སྦྱོར་བ་དེ་ཁྱོད་རང་གིས་སྒྲུབ་པ་ཡིན་ནམ། ངེད་ལ་ཐལ་བྱ་འཕེན་པ་ཡིན། དང་པོ་ལྟར་ན། ཁྱོད་ལ་འདི་འདྲི་སྟེ། དེ་གཉིས་ཀུན་འགྲོ་ཡིན་པ་དེ་ལྟར་ན་རིས་ལྔ་ཅར་ལ་དམིགས་པའི་ཕྱིར། མཐོང་བའམ་སྒོམ་པ་ཅི་ཞིག་གི་སྤང་བྱ་ཡིན་ཅེ་ན། སློབ་དཔོན་གྱིས། མཐོང་སྤོང་ལྟ་བའི་དབང་གིས་ཞུགས་པ་དང་། སྒོམ་སྤོང་ཉོན་མོངས་པའི་དབང་གིས་ཞུགས་པའི་འདོད་ཆགས་དང་ང་རྒྱལ་ནི། རིམ་པ་ལྟར་མཐོང་སྤོང་དང་སྒོམ་སྤོང་ཡིན་པའམ། ཡང་ན་མཐོང་སྤོང་ཁོ་ན་དང་གཉིས་ཀ་འདྲེས་མ་ལ་(༡༦༦བ)
དམིགས་པའི་དེ་གཉིས་ནི་རིམ་པ་ལྟར་མཐོང་བ་དང་སྒོམ་པས་སྤོང་ངོ་། །ཞེས་བཞེད་དོ། །གཉིས་པ་ལྟར་ན། འདོད་ཆགས་དང་ང་རྒྱལ་ནི་ཀུན་འགྲོར་མི་ཐལ་ཏེ། དེ་དག་ནི་ཕྱོགས་གཅིག་ལ་དམིགས་པས་རང་གི་མཚན་ཉིད་པ་ཡིན་གྱི། ཉོན་མོངས་པ་སྤྱི་པ་ལ་དམིགས་པ་ནི་མ་ཡིན་པའི་ཕྱིར་དང་། ཀུན་འགྲོ་ནི་སྤང་བྱ་རིས་ལྔ་ཅར་ལ་གཅིག་ཅར་དུ་དམིགས་པའི་ཕྱིར། རྟགས་སྔ་མ་གྲུབ་སྟེ། འདོད་ཆགས་ནི་སྡུག་པ་ཁོ་ན་དང་། ང་རྒྱལ་ནི་ཕུན་སུམ་ཚོགས་པ་ཁོ་ན་ལ་དམིགས་པའི་ཕྱིར་རོ། །དེས་ན་འདོད་ཆགས་དང་ང་རྒྱལ་ནི་མཐོང་སྤོང་དང་སྒོམ་སྤོང་ལ་དམིགས་པ་ནི་རིམ་པ་ལྟར་མཐོང་སྤོང་དང་སྒོམ་སྤོང་ཡིན་ནོ་ཞེས་འདོད་དོ། །གཉིས་པ་ནི། དེ་དག་ལས་དགུ་གོང་དུ་དམིགས། །ལྟ་བ་གཉིས་པོ་མ་གཏོགས་སོ། །སྐལ་བ་མཉམ་པའི་ཁམས་ཀུན་འགྲོ་བཅུ་གཅིག་པོ་དེ་དག་ལས་འཇིག་ལྟ་མཐར་ལྟ་གཉིས་པོ་མ་གཏོགས་པ་ཕྲ་རྒྱས་གཞན་དགུ་ནི་ཁམས་དང་ས་གོང་དུ་དམིགས་པས་སྐལ་བ་མི་མཉམ་པའི་ཁམས་ཀུན་འགྲོ་ཡིན་ནོ། །འདོད་ཁམས་ན་གནས་པ་གཟུགས་སམ་གཟུགས་མེད་ཀྱང་རུང་། རེས་འགའ་ནི་སྐལ་བ་མི་མཉམ་པའི་ཁམས་གཅིག་ལ་དམིགས། རེས་འགའ་ནི་གཟུགས་དང་གཟུགས་མེད་པའི་ཁམས་གཉིས་ལ་དམིགས་ཏེ། བསྟན་བཅོས་ཁུངས་འདོད་པ་དང་ལྡན་པ་ཞེས་སོགས་འབྱུང་བའི་ཕྱིར། འདི་ལྟར་འདོད་པའི་ལོག་ལྟས་གཟུགས་དང་གཟུགས་མེད་ཀྱི་སྡུག་བསྔལ་ལ་སྐུར་བ་འདེབས། ལྟ་བ་མཆོག་འཛིན་གྱིས་མཆོག་ཏུ་འཛིན། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱིས་རྒྱུ་མ་ཡིན་པ་ལ་རྒྱུར་འཛིན། ཐེ་ཚོམ་གྱིས་སོམ་ཉི་ཟ། མ་རིག་པས་རྨོངས་ཏེ་ཀུན་འབྱུང་མཐོང་སྤོང་ལའང་ཅི་རིགས་པར་རིག་པར་བྱའོ། །འདི་ངེས་པ་སྟེ། འདོད་པ་དང་བསམ་གཏན་བཞི་པ་ན་སྐལ་པ་མི་མཉམ་པའི་ཁམས་ཀུན་འགྲོ་ཡོད། བསམ་གཏན་གསུམ་(༡༦༧ན)
ན་གཉིས་ཀ་ཡོད། སྲིད་རྩེ་མ་གཏོགས་པའི་ས་ལྷག་མ་རྣམས་ན་སྐལ་བ་མི་མཉམ་པའི་ས་ཀུན་འགྲོ་ཡོད། སྲིད་རྩེ་ན་གཉིས་ཀ་མེད་དེ། ཁམས་དང་ས་གཞན་མེད་པའི་ཕྱིར། འདོད་ཁམས་ན་གནས་པ་ཚངས་པ་ལ་སེམས་ཅན་དུ་ལྟ་བ་དང་། རྟག་ལྟ་སྐྱེད་པར་བྱེད་པས་སྐལ་བ་མི་མཉམ་པའི་ཁམས་ལ་དམིགས་པའི་འཇིག་ལྟ་དང་མཐར་ལྟ་ཅིས་མ་ཡིན་ཅེ་ན། ཚངས་པ་ལ་སེམས་ཅན་དུ་ལྟ་བ་འཇིག་ལྟ་མ་ཡིན་ཏེ། དེ་ལ་བདག་དང་བདག་གིར་མི་འཛིན་པའི་ཕྱིར་དང་། ཚངས་པ་ལ་རྟག་པར་འཛིན་ཀྱང་མཐར་ལྟ་མ་ཡིན་ཏེ། མཐར་ལྟའང་འཇིག་ལྟས་ཀུན་ནས་སློང་དགོས་པ་ལས་དེས་ཀུན་ནས་སློང་བར་བྱས་པ་ཅན་མ་ཡིན་པའི་ཕྱིར། འོ་ན་ཚངས་པ་ལ་སེམས་ཅན་དང་རྟག་པར་ལྟ་བ་ལྟ་བ་གང་ཞིག་ཡིན་ཅེ་ན། ཆོས་མངོན་པ་བ་ན་རེ། འདི་འཇིག་ལྟས་བཅུག་པའི་ལོག་ཤེས་ཡིན་གྱི་ལྟ་བ་མ་ཡིན་ཏེ། རང་ལུས་ལ་བདག་གོ་སྙམ་པ་འཇིག་ལྟ་དང་། དེས་སློང་བ་མཐར་ལྟ་ཡིན་པ་ལ་དེར་ཡང་འདི་མི་རུང་ལ། ལྟ་བ་གཞན་དུའང་མི་རུང་ཟེར་རོ། །ཅི་ཚངས་པ་ལ་དམིགས་ནས་སྐུར་བ་འདེབས་པའམ་མཆོག་ཏུ་འཛིན་པ་ལྟ་བ་ཡིན་པས། ཚངས་པ་ལ་རྟག་ཆད་དུ་འཛིན་པ་ཅི་སྟེ་ལྟ་བ་མ་ཡིན་ཅེས་དྲིས་པ་ལ། བྱེ་སྨྲས་དེའི་ལན་མ་ཐེབས་པར། ངེད་ཅག་གི་གྲུབ་མཐའ་ནི་ཚང་མར་བྱ་དགོས་སོ་ཞེས་པའི་ལན་འདེབས་པར་བྱེད་དོ། །གསུམ་པ་ནི། དེ་དག་དང་ནི་ལྷན་ཅིག་གང་། །འབྱུང་དེའང་ཀུན་འགྲོ་ཐོབ་མ་གཏོགས། །ཀུན་འགྲོ་དེ་དག་དང་ནི་ལྷན་ཅིག་འབྱུང་བ་གང་ཡིན་པའི་ཚོར་སོགས་དང་སྐྱེ་སོགས་དེའང་ཀུན་འགྲོ་ཡིན་ནོ། །འོན་ཀྱང་ཐོབ་པ་ནི་མ་གཏོགས་ཏེ། ཕྲ་རྒྱས་དང་ཐོབ་པ་ནི་འབྲས་བུ་མི་གཅིག་པའི་ཕྱིར་དང་། ཐོབ་པས་རྣམ་སྨིན་མི་འབྱིན་པ་དང་། རྒྱུ་མཐུན་ཀྱང་མི་གཅིག་པའི་ཕྱིར། འདིར་ཕྲ་རྒྱས་ཀུན་འགྲོ་ཡིན་ལ། རྒྱུའི་ཀུན་འགྲོ་མ་ཡིན་པ་ནི། ཕྲ་རྒྱས་(༡༦༧བ)
ཀུན་འགྲོ་མ་འོངས་པ་ནི་ཕྲ་རྒྱས་ཀུན་འགྲོ་ཡིན་ཏེ། ཀུན་ཏུ་འགྲོ་བའི་ངོ་བོ་ཉིད་ཡིན་པའི་ཕྱིར། ཀུན་ཏུ་འགྲོ་བའི་རྒྱུས་ཀུན་ཏུ་འགྲོ་བ་ནི་མ་ཡིན་ཏེ། མ་འོངས་པའི་གནས་སྐབས་སུ་ཀུན་ཏུ་འགྲོ་བའི་རྒྱུ་རྣམ་པར་མི་བཞག་པའི་ཕྱིར། ཕྲ་རྒྱས་ཀུན་འགྲོ་མིན་ལ། རྒྱུའི་ཀུན་འགྲོ་ཡིན་པ་ནི། ཀུན་འགྲོ་དང་ལྷན་ཅིག་འབྱུང་བའི་ཚོར་སོགས་འདས་པ་དང་། ད་ལྟར་བྱུང་བ་ཉིད་ཀྱིས་ཀུན་འགྲོའི་རྒྱུ་ཡིན་ལ། ཀུན་འགྲོའི་ཕྲ་རྒྱས་ནི་མ་ཡིན་ཏེ། ཕྲ་རྒྱས་ཀྱི་ངོ་བོ་ཉིད་མ་ཡིན་པའི་ཕྱིར་རོ། །གཉིས་ཀ་ཡིན་པ་ནི། འདས་པ་དང་ད་ལྟར་བྱུང་བའི་ཕྲ་རྒྱས་ཀུན་ཏུ་འགྲོ་བ་རྣམས་སོ། །གཉིས་ཀ་མ་ཡིན་པ་ནི། ཀུན་འགྲོ་དེ་དག་དང་ལྷན་ཅིག་འབྱུང་བའི་ཚོར་སོགས་མ་འོངས་པ་རྣམས་དང་ཐོབ་པ་ལ་སོགས་པའོ། །བདེན་པ་དང་པོ་གཉིས་ཀྱི་སྤང་བྱ་མ་རིག་པ་དྲུག་ཀ་ལ་ཀུན་འགྲོ་ཡིན་མིན་གཉིས་ཀ་དངོས་སུ་བསྟན་པས། ཤུགས་ལ་ཀུན་འགྲོ་རྣམས་ནི་བདེན་པ་དང་པོ་གཉིས་ཀྱི་མཚན་ཉིད་དང་འགལ་བར་ཞུགས་པ་དངོས་སུ་ལོག་ཞུགས་དང་། ཀུན་འགྲོ་མ་ཡིན་པ་རྣམས་དངོས་པོ་ལ་དམིགས་ཀྱང་མཚན་ཉིད་དང་མི་འགལ་བས་ལོག་ཞུགས་ལས་ལོག་ཞུགས་ཡིན་ནོ་ཞེས་བསྟན་པ་ཡིན་ནོ། །ཐེག་པ་ཆེན་པོ་བདག་ནི། བདེན་པ་ལ་དངོས་སུ་ལོག་ཞུགས་དང་། ལོག་པ་ལ་ལོག་ཞུགས་དང་། དབང་གི་ལོག་པར་ཞུགས་པ་གསུམ་ལས། ལྟ་བ་དང་པོ་གསུམ་དང་། མ་རིག་པ་དང་། ཐེ་ཚོམ་དང་ལྔ་ནི་བདེན་པ་ལ་དངོས་སུ་ལོག་ཞུགས་ཡིན་ཏེ། བདེན་པ་ཉིད་ལ་ཅི་རིགས་པར། ང་དང་ང་ཡིར་འཛིན་པ་དང་། རྟག་ཆད་དུ་སྒྲོ་འདོགས་པ་དང་། མེད་དོ་ཞེས་སྐུར་བ་འདེབས་པ་དང་། གནས་ལུགས་མི་ཤེས་པ་དང་། མཐའ་གཞན་དུ་དོགས་པའི་ཕྱིར། འདོད་ཆགས་དང་ང་རྒྱལ། ལྟ་བ་ཕྱི་མ་(༡༦༨ན)
གཉིས་ཏེ་བཞི་ནི་ལོག་པ་ལ་ལོག་ཞུགས་ཡིན་ཏེ། རིམ་བཞིན་ལྟ་བ་དང་པོ་གསུམ་ལ་སྲེད་པ་དང་། ལྟ་བ་དེས་ཁེངས་པ་དང་། ལྟ་བ་དེ་དག་ལ་མཆོག་ཏུ་འཛིན་པ་དང་། ལྟ་བ་དེ་དག་འདག་གྲོལ་གྱི་རྒྱུ་མ་ཡིན་པ་ལ་དེར་འཛིན་པའི་ཕྱིར། ཁོང་ཁྲོ་ནི་དབང་གི་ལོག་ཞུགས་ཡིན་ཏེ། རང་དང་ལྟ་བ་མི་མཐུན་པ་ལ་སེམས་འཁྲུགས་པའི་ཕྱིར། ཞེས་འདོད་དོ། །གཉིས་པ་ཟག་མེད་ལ་དམིགས་པ་དང་མ་དམིགས་པའི་བྱེ་བྲག་ལ། ཟག་མེད་ལ་དམིགས་པ་དང་། མ་དམིགས་པའོ། །དང་པོ་ལ། བསྟན། བཤད་གཉིས་ལས། དང་པོ་ནི། འགོག་དང་ལམ་མཐོང་སྤང་བྱ་བ། །ལོག་ལྟ་ཐེ་ཚོམ་དེ་དག་དང་། །ལྡན་དང་འབའ་ཞིག་མ་རིག་དང་། །དྲུག་ནི་ཟག་མེད་སྤྱོད་ཡུལ་ཅན། །འགོག་པ་དང་ལམ་མཐོང་བས་སྤང་བར་བྱ་བའི་ལོག་ལྟ་ཐེ་ཚོམ་དང་དེ་དག་དང་མཚུངས་ལྡན་གྱི་མ་རིག་པ་དང་མ་འདྲེས་པ་འབའ་ཞིག་པའི་མ་རིག་པ་སྟེ་དྲུག་ནི་ཟག་མེད་འགོག་ལམ་ཡུལ་དུ་བྱེད་པས་སྤྱོད་ཡུལ་ཅན་ཡིན་ཅིང་། དེ་གཉིས་ནི་ཡུལ་ཡིན་ནོ། །རྣམ་པ་ནི་སྐུར་བ་འདེབས་པ་དང་། རྩེ་གཉིས་སམ་གཞན་དུ་དོགས་པ་དང་། མི་གསལ་བའི་རྣམ་པར་འཇུག་པའོ། །འགོག་ལམ་གྱི་ལོག་ཞུགས་ཀྱི་ལོག་ཞུགས་དང་། སྡུག་ཀུན་གྱི་ལོག་ཞུགས་རྣམས་ནི་ཟག་བཅས་ལ་དམིགས་པ་ཡིན་ནོ། །དྲུག་ཁོ་ན་ཞེས་ངེས་པར་བཟུང་བ་ཡིན་ཏེ། འདོད་ཆགས་མིན་ཏེ་སྤང་བྱའི་ཕྱིར། །གནོད་མི་བྱེད་ཕྱིར་ཞེ་སྡང་མིན། །ཅེས་སོགས་འབྱུང་བའི་ཕྱིར་ཆགས་སོགས་ནི་ཟག་མེད་ལ་དམིགས་པར་རུང་བ་མ་ཡིན་ནོ། །གཉིས་པ་རྒྱས་བཤད་ནི། རང་གི་ས་པའི་འགོག་པ་དང་། །ལམ་ནི་ཕན་ཚུན་རྒྱུ་ཡིན་པས། །ས་དྲུག་ས་དགུའི་ལམ་ནི་དེའོ། །སྤྱོད་ཡུལ་ཅན་གྱི་ཡུལ་ཡིན་ནོ། །ལོག་ལྟ་སོགས་ཀྱིས་འགོག་པ་ལ་དམིགས་པའི་འགོག་པ་ནི། རང་གི་ས་པའི་ཉོན་མོངས་སོགས་འགོག་པ་ལ་འཇོག་དགོས་ཏེ། འདོད་པ་ནས་སྲིད་རྩེའི་བར་གྱིས་ལོག་ལྟ་སོགས་ཀྱང་ས་དེ་དང་དེས་བསྡུས་ལ། སྤང་བྱ་རང་ཉིད་དང་བྲལ་བའི་འགོག་པ་དེ་ལ་དམིགས་ནུས་ཀྱི། ས་གཞན་གྱི་སྤང་བྱ་ཟད་པའི་འགོག་པ་ལ་དམིགས་པར་མི་ནུས་(༡༦༨བ)
པའི་ཕྱིར་ཏེ། ལམ་འགོག་པས་མ་བསྡུས་ཤིང་། འགོག་པ་ལ་ཕན་ཚུན་སྐལ་མཉམ་རྒྱུ་འབྲས་ཀྱང་མེད་པའི་ཕྱིར། ལམ་ནི་འདི་དང་མི་མཚུངས་ཏེ། ཕན་ཚུན་སྐལ་མཉམ་གྱི་རྒྱུ་ཡིན་པའི་ཕྱིར་ཏེ། ཇི་སྐད་དུ། ས་དགུའི་ལམ་ནི་ཕན་ཚུན་དུ། །མཉམ་དང་ཁྱད་པར་ཅན་གྱི་ཡིན། །ཅེས་འབྱུང་བའི་ཕྱིར་ན། ལམ་ལ་དམིགས་པའི་ལོག་ལྟ་སོགས་གསུམ་གྱི་དམིགས་པ་ནི། བསམ་གཏན་བཞི་དང་། མི་ལྕོགས་མེད་པ་དང་། བསམ་གཏན་ཁྱད་པར་ཅན་དེས་དྲུག་ཡིན་ཏེ། ཆོས་ཤེས་ཕྱོགས་མཐུན་གྱི་ལམ་ཐམས་ཅད་དང་། གཟུགས་དང་གཟུགས་མེད་པའི་གཉེན་པོ་ཡང་ཡིན་པའི་ཕྱིར། གཟུགས་དང་གཟུགས་མེད་ཀྱིས་བརྒྱད་པོ་རྣམས་ཀྱི་ལོག་ལྟ་སོགས་ཀྱི་དམིགས་པ་ནི། མི་ལྕོགས་མེད་པ་ནས་ཅིའང་མེད་པའི་སྐྱེ་མཆེད་ཀྱི་བར་གྱིས་དགུའི་རྗེས་སུ་ཤེས་པའི་ཕྱོགས་དང་མི་མཐུན་པའི་ལམ་ཐམས་ཅད་དོ། །ནི་བདུན་པའི་དོན་ཏོ། །ཕྲ་རྒྱས་དེའི་སྤྱོད་ཡུལ་ཅན་གྱི་ཡུལ་ལམ་དམིགས་པ་ནི་འགོག་ལམ་དེ་གཉིས་ཡིན་ནོ། །འོ་ན་ལམ་ནི་ཕན་ཚུན་རྒྱུ་ཡིན་པས་ཞེས་པ་ཉིད་ཀྱིས། རྗེས་ཤེས་ཕྱོགས་མཐུན་གྱི་ལམ་ཡང་འདོད་པའི་ལོག་ལྟ་སོགས་ཀྱིས་དམིགས་པར་འགྱུར་ལ། ཆོས་ཤེས་ཕྱོགས་མཐུན་གྱི་ལམ་ཡང་གཟུགས་དང་གཟུགས་མེད་ཀྱི་ལོག་ལྟ་སོགས་ཀྱིས་དམིགས་པར་འགྱུར་ཏེ། ས་དྲུག་པའམ་དགུ་པ་ཡིན་པ་གང་རུང་ཞིག་ལ་སྐུར་བ་བཏབ་པའམ་ཐེ་ཚོམ་ཟ་བས་ཐམས་ཅད་ལ་སྐུར་བ་བཏབ་པའམ་སོམ་ཉི་ཟོས་པའི་ཕྱིར་ཞེ་ན། མ་གྲུབ་སྟེ། ཆོས་ཤེས་དང་། རྗེས་ཤེས་དག་ཀྱང་ཕན་ཚུན་རྒྱུ་ཡིན་མོད་ཀྱི། རྗེས་ཤེས་ནི་འདོད་ཁམས་ཀྱི་གཉེན་པོ་མ་ཡིན་པས། འདོད་པ་ན་སྤྱོད་པའི་ལོག་ལྟ་སོགས་ཀྱི་རྗེས་ཤེས་ཕྱོགས་མཐུན་གྱི་ལམ་ལ་དམིགས་པ་མ་ཡིན་པའི་ཕྱིར། འོ་ན་ཆོས་ཤེས་ཕྱོགས་མཐུན་གྱི་ལམ་ཡང་གཟུགས་དང་གཟུགས་མེད་ཀྱི་ལོག་(༡༦༩ན)
ལྟ་སོགས་ཀྱིས་དམིགས་པར་འགྱུར་ཏེ། ཆོས་ཤེས་གཟུགས་དང་གཟུགས་མེད་ཀྱི་གཉེན་པོ་ཡིན་པའི་ཕྱིར་ཏེ། གྲུབ་མཐའ་ལས། སྒོམ་པའི་ལམ་པ་འགོག་པ་དང་། །ལམ་ལ་ཆོས་ཤེས་གང་ཡིན་ཏེ། །ཁམས་གསུམ་གྱི་ནི་གཉེན་པོ་ཡིན། །ཅེས་འབྱུང་བའི་ཕྱིར་ཞེ་ན། རྟགས་ཀྱི་ཕྱོགས་གཅིག་ཆོས་ཅན་ལ་མ་གྲུབ་པས་མ་ངེས་པ་ཡིན་ཏེ། འགོག་པ་དང་ལམ་ལ་ཆོས་ཤེས་གོང་མའི་གཉེན་པོ་ཡིན་ཀྱང་སྡུག་བསྔལ་དང་ཀུན་འབྱུང་ལ་ཆོས་ཤེས་གཉིས་དང་པོ་ཡིན་ལ། སྡུག་བསྔལ་དང་ཀུན་འབྱུང་ཆོས་ཤེས་སྒོམ་ལམ་གྱིས་བསྡུས་པ་ཆོས་ཤེས་རྫོགས་པར་ཁམས་གོང་མའི་གཉེན་པོར་མེད་པའི་ཕྱིར་དང་། འགོག་ལམ་གྱི་ཆོས་ཤེས་དེ་ཡང་གཟུགས་དང་གཟུགས་མེད་མཐའ་དག་གི་གཉེན་པོ་མ་ཡིན་པའི་ཕྱིར་ཏེ། གཟུགས་དང་གཟུགས་མེད་ཀྱི་དང་པོ་མཐོང་བས་སྤང་བྱ་རྣམས་ཀྱི་གཉེན་པོ་མ་ཡིན་པའི་ཕྱིར། ཆོས་ཤེས་ནི་ཁམས་གོང་གི་ལོག་ལྟ་སོགས་ཀྱིས་དམིགས་པར་མ་གྲུབ་བོ། །འདིར་སྒོམ་པའི་ལམ་ལ་འགོག་པ་དང་ལམ་ལ་ཆོས་ཤེས་པ་དེ་གོང་མ་གཉིས་ཀྱི་ཡང་གཉེན་པོ་ཡིན་ན། གོང་འོག་ཀུན་གྱི་གཉེན་པོར་སོང་བས་རྒྱུན་དུ་ཞུགས་པ་གཅིག་ཅར་བ་ཐེག་ཆེན་པ་འདོད་པ་ལྟ་བུར་མི་འགྲོའམ་སྙམ་ན། འདིའི་ལུགས་ཀྱི་རྒྱུན་དུ་ཞུགས་པ་གཅིག་ཅར་བ་ལྟ་བུར་མི་འདོད་དེ། འདོད་ཁམས་ཀྱི་ཆེ་འབྲིང་དགུ་སྤངས་ནས། དེ་ནས་འགོག་པ་དང་ལམ་ལ་ཆོས་ཤེས་ཀྱིས་དང་པོའི་ཆེ་འབྲིང་དགུ་སྤོང་། དེ་ནས་གཉིས་པའི་ཆེ་འབྲིང་དགུ་སྤོང་། དེ་ཀ་ལྟར་སྲིད་རྩེ་མན་ཆད་སྤོང་ངོ་། །དེ་ལྟར་འདོད་པ་ལ་འདོད་ཆགས་དང་བྲལ་གྱི་རྟིང་ལ། གདོད་འགོག་པ་དང་ལམ་གྱི་ཆོས་ཤེས་དེ་ཁམས་གོང་མ་གཉིས་ཀྱི་གཉེན་པོར་འགྲོའི། འདོད་པ་ལ་འདོད་ཆགས་དང་མ་བྲལ་བར་ཁམས་གོང་མའི་སྒོམ་སྤོང་གི་གཉེན་པོར་མི་འགྲོ། (༡༦༩བ)
འོ་ན་ཁམས་གོང་མ་གཉིས་ཀྱི་སྒོམ་སྤོང་གི་གཉེན་པོར་འདོད་པའི་འགོག་པ་དང་ལམ་ཤེས་པར་འགྲོ་བ་རྒྱུ་མཚན་ཅིས་སྙམ་ན། སྒོམ་སྤོང་ལ་ལོག་ཞུགས་སོ་སོ་བ་མེད་ཙམ་ན་འདོད་པའི་འགོག་པ་དང་ལམ་སྒོམ་པས་གོང་མའི་སྒོམ་སྤོང་སྤངས། འདོད་པའི་འགོག་པ་དང་ལམ་ཤེས་པ་ཁམས་གོང་མ་གཉིས་ཀྱི་མཐོང་སྤོང་ནི་མི་སྤངས་ཏེ་ལོག་ཞུགས་སོ་སོ་ཡིན་ཙམ་ན། འདོད་པའི་འགོག་པ་དང་ལམ་ཤེས་པ་དང་། གོང་མའི་འགོག་པ་དང་ལམ་ལ་ལོག་ཞུགས་ཡོད་པ་མི་འགལ་བས་མི་སྤངས་ཏེ། དཔེར་ན། ཐག་པ་ལ་ཐག་པར་ཤེས་པས་ཐོ་ལ་མིར་འཛིན་པ་མི་སྤོང་བ་དང་འདྲའོ། །གཉིས་པ་ཟག་མེད་ལ་མི་དམིགས་པ་ནི། འདོད་ཆགས་མིན་ཏེ་སྤང་བྱའི་ཕྱིར། །གནོད་མི་བྱེད་ཕྱིར་ཞེ་སྡང་མིན། །ཞི་དང་དག་དང་མཆོག་གྱུར་ཕྱིར། །ང་རྒྱལ་མ་ཡིན་མཆོག་འཛིན་མིན། །འདོད་ཆགས་ནི་འགོག་ལམ་ལ་དམིགས་པ་མིན་ཏེ། ཡིན་ན་དེའི་ཡུལ་ནི་སྤང་བྱ་ཡིན་དགོས་པ་ལས་འགོག་ལམ་ནི་སྤང་བྱ་མ་ཡིན་པའི་ཕྱིར། དགེ་བའི་ཆོས་ལ་འདུན་པ་ནི་དང་པའམ་ཡང་དག་པའི་ལྟ་བ་ཡིན་པས་ཐོབ་པ་བཅད་པས་སྤང་བྱ་མ་ཡིན་པ་བཞིན་ནོ། །ཡང་ལོག་ལྟ་སྤང་བྱ་ཡིན་ཀྱང་ཟག་མེད་ལ་དམིགས་ཤིང་འདུག་པས་གཏན་ཚིགས་དེ་མ་ངེས་སྙམ་ན། མི་མཚུངས་ཏེ། ལོག་ལྟ་ནི་ཟག་མེད་འགོག་པ་དང་ལམ་ལ་སྐུར་བ་འདེབས་པ་ཡིན་ལ། འདོད་ཆགས་ཟག་མེད་དེ་གཉིས་འདོད་ན། དགེ་བའི་ཆོས་ལ་འདུན་པ་བཞིན་སྤང་བྱ་མ་ཡིན་པར་ཐལ་བ་ལས། སྤང་བྱ་ཡིན་པས་དེ་ལ་མི་དམིགས་པར་གྲུབ་པའི་ཕྱིར་རོ། །ཞེ་སྡང་གིས་ཀྱང་འགོག་ལམ་ལ་དམིགས་པ་མིན་ཏེ། ཞེ་སྡང་ནི་གནོད་པར་བྱས་པའམ། བྱེད་པའམ། བྱེད་པར་འགྱུར་བ་ལ་དམིགས་པ་ཡིན་ན། འགོག་ལམ་ནི་ཀུན་ནས་མནར་སེམས་ཀྱི་གཞི་དགུའི་མཚན་ཉིད་ལས་འདས་པས་སུ་ལའང་གནོད་པ་མི་བྱེད་པའི་ཕྱིར། ང་རྒྱལ་ནི་འགོག་ལམ་ལ་དམིགས་པ་མ་ཡིན་ཏེ། ཞི་བའི་ཕྱིར། ཁྱབ་པ་ཡོད་དེ། ང་རྒྱལ་ནི་སེམས་ཁེངས་པ་ལ་བརྗོད་པའི་ཕྱིར། མཆོག་(༡༧༠ན)
འཛིན་ཕྱི་མས་ནི། ལམ་བདེན་ལ་དམིགས་པ་མ་ཡིན་ཏེ། ཉོན་མོངས་པའི་དྲི་མ་སྤངས་པས་དག་པའི་རྒྱུ་ཡིན་པས་དེར་ངེས་པའི་ཕྱིར། ཁྱབ་པ་ཡོད་དེ། མཆོག་འཛིན་ཕྱི་མ་ནི་ཡང་དག་པའི་རྒྱུ་མིན་ལ་ཡང་དག་པའི་རྒྱུར་འཛིན་པའི་ཕྱིར། ལྟ་བ་མཆོག་འཛིན་གྱིས་འགོག་ལམ་ལ་དམིགས་པ་མིན་ཏེ། ཡང་དག་པའི་དོན་དུ་དག་པ་ཡིན་པས། ཆོས་ཐམས་ཅད་མཆོག་ཏུ་གྱུར་པ་ཡིན་པས་དེར་ངེས་པའི་ཕྱིར་ཁྱབ་སྟེ། དེ་ནི་དངོས་པོ་དམན་པ་ལ་མཆོག་ཏུ་འཛིན་པའི་ལྟ་བ་ཡིན་པའི་ཕྱིར། འདིར་མཁས་པ་འཇམ་སྒེག་ན་རེ། ཕྲ་རྒྱས་གོ་བརྒྱད་ལས། ཟག་མེད་ཁོ་ན་ལ་དམིགས་པ་བཅུ་གཉིས། ཟག་བཅས་ཁོ་ན་ལ་དམིགས་པ་བརྒྱད་ཅུ། ཟག་བཅས་ཟག་མེད་གཉིས་ག་ལ་དམིགས་པ་འགོག་ལམ་མཐོང་སྤོང་གི་མ་རིག་པ་དྲུག་ཡིན་ནོ་ཞེས་དངོས་སུ་བསྟན་པའི་ཤུགས་ལས་ཟག་མེད་ལ་དམིགས་པ་རྣམས་དངོས་སུ་ལོག་ཞུགས་དང་། འགོག་ལམ་མཐོང་སྤོང་གི་ཟག་བཅས་ལ་དམིགས་པ་རྣམས་དངོས་སུ་ལོག་ཞུགས་ལོག་ལྟ་སོགས་དེ་དག་ལ་དམིགས་པས་ལོག་པ་ལ་ལོག་ཞུགས་ཡིན་ནོ་ཞེས་ཤེས་པར་བྱའོ། །གོང་མ་པ་ལྟར་ན་འགོག་ལམ་མཐོང་སྤང་གི་ལོག་ལྟ་ལ་སོགས་པ་དྲུག་པོ་དེ་དག་གིས་ཀྱང་རྟོག་བཅས་ཡིད་ཀྱིས་བརྟགས་པའི་འགོག་ལམ་གྱི་མིང་ཙམ་ལ་དམིགས་པ་ཡིན་གྱི། དེ་དག་དངོས་སུ་ནི་མི་དམིགས་ཏེ། གལ་ཏེ་ཟག་མེད་ལ་དངོས་སུ་དམིགས་ན་དེ་དག་འཕགས་པའི་ཡེ་ཤེས་སུ་ཐལ་བར་འགྱུར་བའི་ཕྱིར། ཞེས་འདོད་དེ། རྣམ་པར་གཏན་ལ་དབབ་པ་བསྡུ་བ་ལས། མཐོང་སྤང་སྒོམ་སྤང་དེ་དག་གི་དམིགས་པ་ནི་བསྡུ་ན་ལྔ་སྟེ། ལོག་པར་རྣམ་པར་བརྟགས་པའི་དངོས་པོ་ལ་དམིགས་པ་དང་། ལྟ་བ་ལ་དམིགས་པ་དང་། ཚུལ་ཁྲིམས་བརྟུལ་ཞུགས་ལ་དམིགས་པ་དང་། (༡༧༠བ)
རང་གིས་རྣམ་པར་བརྟགས་པའི་མིང་ལ་དམིགས་པ་དང་། རང་གི་ངང་གིས་ཡེ་ཡོད་པའི་དངོས་པོ་ལ་དམིགས་པའོ། །དེ་ལ་དང་པོ་ནི། བདེན་པ་དང་པོ་གཉིས་ལ་དམིགས་པ་རྣམས་སོ། །གཉིས་པ་ནི། ཐེ་ཚོམ་མ་གཏོགས་པ་ལྟ་བ་མཆོག་འཛིན་དང་འདོད་ཆགས་ལ་སོགས་པ་མཐོང་སྤོང་རྣམས་སོ། །གསུམ་པ་ནི། ཚུལ་ཁྲིམས་དང་བརྟུལ་ཞུགས་མཆོག་འཛིན་ནོ། །བཞི་པ་ནི། འགོག་ལམ་ལ་དམིགས་པ་དང་ཁམས་མི་འདྲ་བ་ལ་དམིགས་པ་རྣམས་ཏེ། །ཉོན་མོངས་པ་ནི་ནམ་ཡང་འགོག་ལམ་ལ་དམིགས་པར་མ་གྱུར། དམིགས་པར་མི་བྱེད། དམིགས་པར་མི་འགྱུར་ལ། ཁམས་མི་འདྲ་བ་ལའང་མ་ཡིན་པའི་ཕྱིར། ལྔ་པ་ནི། སྒོམ་སྤོང་རྣམས་སོ། །དེས་ན་དང་པོ་བཞི་ནི་མཐོང་སྤོང་གི་དམིགས་པ་ཡིན་ལ། ལྔ་པ་ནི་སྒོམ་སྤོང་གི་དམིགས་པ་ཡིན་ནོ། །ཞེས་པ་དང་། ཀུན་ལས་བཏུས་ལས་ཀྱང་། འགོག་པ་དང་ལམ་ལ་དམིགས་པའི་ཉོན་མོངས་པ་གང་ཡིན་པ་དེ་ནི་དེ་དག་ལ་དམིགས་པ་མ་ཡིན་པར་བལྟ་སྟེ། དེའི་དམིགས་པ་ནི་དེས་ཡོངས་སུ་རྟོགས་པའོ། །ཞེས་འབྱུང་བའི་ཕྱིར་རོ། །འོན་ཀྱང་བྱེ་བྲག་ཏུ་སྨྲ་བ་རྣམས་ནི་ཟག་མེད་ལ་དམིགས་ཀྱང་འཕགས་པར་འགྱུར་བ་ནི་མ་ངེས་ཏེ། སྒྲ་རྟག་འཛིན་བཞིན་ནོ་ཞེས་ལན་འདེབས་པར་བྱེད་དོ་ཞེས་བཀོད་པར་བྱས་སོ། །གསུམ་པ་དམིགས་པ་དང་མཚུངས་ལྡན་གྱིས་རྒྱས་འགྱུར་ལ། དམིགས་པའི་སྒོ་ནས་རྒྱས་འགྱུར་དང་། མཚུངས་ལྡན་གྱི་སྒོ་ནས་རྒྱས་འགྱུར་རོ། །དང་པོ་ནི། ཕྲ་རྒྱས་ཀུན་ཏུ་འགྲོ་རྣམས་ནི། །དམིགས་པའི་སྒོ་ནས་རང་གི་ས། །ཐམས་ཅད་དུ་ནི་རྒྱས་པར་འགྱུར། །ཀུན་འགྲོ་མ་ཡིན་རང་རིས་སུ། །ཟག་མེད་གོང་མའི་ཡུལ་ཅན་མིན། །བདག་གིར་མ་བྱས་གཉེན་པོའི་ཕྱིར། །ཕྲ་རྒྱས་གོ་བརྒྱད་པོ་ལས། དུ་ནི་དམིགས་པའི་སྒོ་ནས་རྒྱས་པར་འགྱུར་ལ། དུ་ནི་མཚུངས་ལྡན་ཁོ་ནའི་སྒོ་ནས་རྒྱས་པར་འགྱུར་རོ་ཞེ་ན་ཞེས་དྲི་བ་བཀོད་པའོ། །དམིགས་པས་རྒྱས་འགྱུར་ལ་ཁོ་ན་མི་སྨོས་པ་ནི། དམིགས་པའི་སྒོ་ནས་རྒྱས་པར་འགྱུར་ལ། མཚུངས་ལྡན་གྱི་སྒོ་ནས་རྒྱས་པ་ཁྱབ་བྱེད་དུ་ཡོད་པ་གོ་བའི་ཆེད་དུའོ། །དེ་དག་ལས་(༡༧༡ན)
ཕྲ་རྒྱས་ཀུན་ཏུ་འགྲོ་བ་སྐལ་མཉམ་རྣམས་ནི་དམིགས་པའི་སྒོ་ནས་རང་གིས་པའི་རིས་ལྔ་པོ་ཐམས་ཅད་དུ་ནི་རྒྱས་པར་འགྱུར་ལ། ཀུན་འགྲོ་མ་ཡིན་པ་ཟག་བཅས་ལ་དམིགས་པ་རྣམས་ནི་རང་གི་སར་རང་རིས་སུ་རྒྱས་པར་འགྱུར་གྱི། གཞན་དུ་མ་ཡིན་ཏེ། སྤང་བྱ་རིས་ལྔ་པོ་རྣམས་རིས་ལྔ་པོ་ཁོ་ན་ལ་རྒྱས་པར་འགྱུར་བའི་ཕྱིར། སྤྱིར་བཏང་ནས་དམིགས་ཀྱིས་བསལ་བ་ནི། ཟག་མེད་ལ་དམིགས་པའི་ཕྲ་རྒྱས་རྣམས་དང་། ས་གོང་མ་ལ་དམིགས་པའི་ཡུལ་ཅན་ཕྲ་རྒྱས་རྣམས་ཀྱང་ཆོས་ཅན། དམིགས་པའི་སྒོ་ནས་རྒྱས་པར་འགྱུར་བ་མིན་ཏེ། དེ་དག་གི་དམིགས་པའི་ཡུལ་ནི་བདག་ཏུ་ལྟ་བ་དང་སྲེད་པ་དག་གིས་བདག་གིར་མ་བྱས་པའི་ཕྱིར། ཁྱབ་པ་ཡོད་དེ། དངོས་པོ་གང་བདག་ལྟ་དང་སྲེད་པས་བདག་གིར་བྱས་པ་དེ་ལ་ཕྲ་རྒྱས་གཞན་རྒྱས་པར་ནུས་པའི་ཕྱིར། སྣམ་བུ་གཤེར་བ་ལ་རྡུལ་ཆགས་པ་བཞིན་ནོ། །འདོད་པར་གནས་ལས་གོང་མ་དེ་གཉེར་བ་དེ་ནི་གཉེན་པོ་དགེ་བའི་ཆོས་ལ་འདུན་པ་ཡིན་པའི་ཕྱིར། སྲེད་པ་དང་ཕྲ་རྒྱས་མ་ཡིན་ནོ། །ཡང་མྱང་འདས་དང་ཟག་མེད་ཀྱི་ལམ་དང་། ས་གོང་མ་ཡང་ཆོས་ཅན། དེ་ལ་དམིགས་པའི་ཉོན་མོངས་ཀྱིས་དམིགས་པ་དེ་དག་ཏུ་གནས་མི་ཐོད་དེ། དེ་ལ་དམིགས་པའི་ཉོན་མོངས་དང་ས་འོག་མའི་གཉེན་པོ་ཡིན་པའི་ཕྱིར། རྡོ་བསྲེགས་པ་ལ་རྐང་མཐིལ་གྱི་གནས་མི་ཐོང་པ་བཞིན་ནོ། །གཞན་ན་རེ། ཕྲ་རྒྱས་ཀྱི་དོན་ནི་རྗེས་སུ་མཐུན་པའི་དོན་ཡིན་ན་འགོག་པ་ལ་སོགས་པ་དེ་དག་ནི་ལོག་ལྟ་ལ་སོགས་པ་དེ་རྣམས་ཀྱི་རྗེས་སུ་མཐུན་པ་མ་ཡིན་ཏེ། རླུང་ནད་ཅན་ལ་ཁ་ཟས་རྩུབ་བག་ཅན་རྒྱས་པར་མི་འགྱུར་ཞེས་བྱ་བ་ལུས་དང་མཐུན་པར་མི་འགྱུར་ཞེས་གོ་བ་བཞིན་ནོ་ཟེར་རོ། །ཡང་འདིར་འདི་ཤེས་དགོས་ཏེ། ཕྲ་རྒྱས་ཀུན་ཏུ་འགྲོ་བ་རྣམས་དམིགས་པའི་སྒོ་ནས་རང་གིས་རུ་རྒྱས་བྱ་བའི་(༡༧༡བ)
དམིགས་པས་ལས་གོང་མ་ལ་དམིགས་ཀྱང་མི་རྒྱས་བྱ་བ་ཡིན་ན། འོ་ན་ས་གོང་མ་ལ་དམིགས་པ་དེ་དམིགས་པའི་སྒོ་ནས་མི་རྒྱས་བྱ་བའི་དམིགས་བསལ་མི་དགོས། གོང་དུ་རང་ག་ིས་རུ་རྒྱས་བྱ་བ་རང་གིས་གོང་མ་ལ་དམིགས་པས་མི་རྒྱས་པ་གྲུབ་པས་སོ་སྙམ་ན། འོ་ན་ཟག་མེད་ལ་དམིགས་པ་དེ་ཡང་ཟག་མེད་རང་གི་རིས་མིན་ཙམ་ན། རང་རིས་ལ་རྒྱས་བྱ་བ་དེས་ཟག་མེད་ཀྱི་མི་རྒྱས་པར་གྲུབ་པས། ཟག་མེད་མིང་སྨོས་ཅི་དགོས་སྙམ་ན། ཟག་མེད་ལ་དམིགས་པ་དེ་དམིགས་པའི་སྒོ་ནས་རྒྱས་པར་མི་འགྱུར་བྱ་བ་ལ་སྨོས་ན། ཟག་མེད་ལ་གཏན་མི་དམིགས་པ་གཅིག་ཡིན་ནམ། དམིགས་ཀྱང་རྒྱས་པར་འགྱུར་བ་ཟག་བཅས་ཀྱིས་རྒྱས་པར་འགྱུར་རམ་སྙམ་པའི་ལོག་རྟོག་སྐྱེ་བ་ལ། ཟག་མེད་ལ་དམིགས་ཀྱང་མི་རྒྱས་ཞེས་བསྟན་པའི་ཆེད་ཡིན་སྙམ་ན། དེ་ཚོད་གཅིག་ཏུ་ས་གོང་མ་ལ་དམིགས་པས་རྒྱས་པ་མ་ཡིན་བྱ་བ་མ་བསྟན་ན། ས་གོང་མ་ལ་གཏན་མི་དམིགས་སམ། ས་གོང་མ་ལ་དམིགས་ཀྱང་རྒྱས་པ་ནི་རང་གི་ས་འོག་མས་རྒྱས་སམ་སྙམ་པའི་ལོག་རྟོག་དགག་པ་ལ། ས་གོང་མ་ལ་དམིགས་ཀྱང་དེའི་སྒོ་ནས་མི་རྒྱས་པར་བསྟན་པ་ལ་གོང་མའི་ཡུལ་ཅན་མིན་ཅེས་བསྟན་པ་ཡིན་ནོ། ། གཉིས་པ་ནི། གང་ཞིག་གང་དང་མཚུངས་ལྡན་པ། །དེ་ནི་དེར་མཚུངས་ལྡན་སྒོ་ནས། །ཕྲ་རྒྱས་གང་ཞིག་སེམས་སམ་ཚོར་སོགས་ཆོས་གང་དང་མཚུངས་པར་ལྡན་པ་དེ་ནི་དེར་མཚུངས་པར་ལྡན་པའི་སྒོ་ནས་རྒྱས་པར་འགྱུར་རོ། །ནི་ཞེས་པ་ནི་ཇི་སྲིད་མ་སྤངས་པ་དེ་སྲིད་དུ་ཞེས་བྱ་བའི་ཆེད་དུའོ། །སྤངས་པ་ནི་བདེ་བ་དང་ཆགས་པ་ལྟ་བུ་མཚུངས་ལྡན་གཉིས་འདས་པ་འདས་པའི་ས་ན་ཡོད། མ་འོངས་པ་མ་འོངས་པའི་ས་ན་ལྷན་ཅིག་ཡོད་ཀྱང་མི་རྒྱས་ཏེ། ཤྭཱ་རིའི་བུ་ལྟ་བུའོ། །ལྷན་ཅིག་ཏུ་གནས་པ་དེ་ལ་ངང་པས་ཆུ་ལ་འོ་མ་འཐུང་བ་བཞིན་དུ་འདོད་ཆགས་སྤངས་ནས་སེམས་ལས་པ་ལྟ་བུའམ། འདོད་ཆགས་(༡༧༢ན)
སྤངས་ནས་དེ་དང་མཚུངས་ལྡན་གྱི་བདེ་བ་ལུས་པ་ལྟ་བུ་མི་སྲིད་དོ། །མཚུངས་ལྡན་གྱི་སྒོ་ནས་རྒྱས་འགྱུར་ནི་ཆོས་ཅན། ཟག་མེད་ལ་དམིགས་པའང་མིན་ལ། སྐལ་བ་མི་མཉམ་པའི་ཁམས་ཀུན་འགྲོའང་མ་ཡིན་ལ། དམིགས་པའི་སྒོ་ནས་ཀྱང་མ་ཡིན་པར་བསམ་གཏན་གསུམ་དང་། གཟུགས་མེད་གསུམ་ན་ཡོད་པའི་སྐལ་བ་མི་མཉམ་པའི་སའི་ཀུན་འགྲོ་དེ་ཡིན་ཏེ། འདོད་ཁམས་དང་བསམ་གཏན་བཞི་པ་དང་སྲིད་རྩེ་ན་མེད་པའི་ཕྱིར་ཏེ། འདོད་པ་ན་སའི་དབྱེ་བ་མེད་ལ་བཞི་པ་དང་སྲིད་རྩེ་ནས་གཞན་མེད་པའི་ཕྱིར་རོ། །ཡང་འདུ་བྱེད་ཟག་པ་དང་བཅས་པ་ལ་དམིགས་པ་དང་མཚུངས་ལྡན་གྱི་ཕྲ་རྒྱས་ནི་ཡོན་ཏན་དང་མཚུངས་པས་ཉོན་མོངས་པའི་མཐུ་འཕེལ་བར་བྱེད་དེ། དཔེར་ན། དུག་དང་འདྲེས་པའི་ཆང་སྐྱོན་ཅན་ཡིན་ཀྱང་ཡོན་ཏན་དང་མཚུངས་པས་དུག་གི་ནུས་པ་འཕེལ་བར་བྱེད་པ་བཞིན་ནོ། །ཡང་ཟག་མེད་ལ་དམིགས་པའི་ཕྲ་རྒྱས་རྣམས་ཀྱང་ཉོན་མོངས་པའི་མཐུ་ཉམས་པར་བྱེད་དེ། དཔེར་ན། སྨན་དང་འདྲེས་པའི་དུག་ནུས་པ་ཉམས་པར་འགྱུར་བ་ལྟ་བུའོ། །བཞི་པ་མི་དགེ་བ་དང་ལུང་མ་བསྟན་གྱི་དབྱེ་བ་ལ། དངོས་དང་། རྩ་བའི་བྱེ་བྲག །དེ་ལས་འཕྲོས་པའོ། །དང་པོ་ནི། གོང་མ་ཐམས་ཅད་ལུང་མ་བསྟན། །འདོད་ན་འཇིག་ཚོགས་ལྟ་བ་དང་། །མཐར་འཛིན་ལྷན་ཅིག་མ་རིག་པ། །ལྷག་མ་རྣམས་འདིར་མི་དགེ་བའོ། །ཁམས་གོང་མ་གཉིས་ཀྱི་ཕྲ་རྒྱས་ཐམས་ཅད་ནི་ཏིང་ངེ་འཛིན་གྱིས་བཏུལ་བས་རྣམ་སྨིན་འགྲུབ་མི་ནུས་པས་ལུང་མ་བསྟན་ཁོ་ནའོ། །ཆོས་ཉོན་མོངས་ཅན་རྣམས་ཀྱི་རྣམ་སྨིན་ནི་སྡུག་བསྔལ་ཡིན་ན། སྡུག་བསྔལ་དེ་ཁམས་དེ་གཉིས་ན་མེད་དེ། དེའི་རྒྱུ་ཕ་རོལ་པོ་ལ་གནོད་པའི་རྒྱུ་ཁྲོ་བ་གནོད་སེམས་རྣམ་འཚེ་སོགས་མེད་པའི་ཕྱིར། ཡང་ན་འོད་ཀྱི་རང་བཞིན་ལ་བཅད་པ་དང་བཏུང་བའི་སྒོ་ནས་སྡུག་བསྔལ་བསྐྱེད་པ་མེད་པའི་ཕྱིར། འདོད་ཁམས་ན་འཇིག་ཚོགས་ལ་ལྟ་བ་དང་མཐར་འཛིན་ལྟ་བ་དང་དེ་དག་དང་(༡༧༢བ)
ལྷན་ཅིག་མཚུངས་ལྡན་གྱི་མ་རིག་པ་ནི་ལུང་མ་བསྟན་ཡིན་ཏེ། སྦྱིན་པ་དང་ཚུལ་ཁྲིམས་སོགས་དང་མི་འགལ་བའི་ཕྱིར་ཏེ། བདག་འཇིག་རྟེན་ཕ་རོལ་ཏུ་བདེ་བར་འགྱུར་བར་བྱ་ཞེས་སྦྱིན་པ་སྦྱིན་པར་བྱེད། ཚུལ་ཁྲིམས་སྲུང་བར་བྱེད་དོ། །ཆད་པར་ལྟ་བ་ཡང་ཐར་པའི་རྗེས་སུ་མཐུན་པ་ཡིན་པ་དེ་ཉིད་ཀྱི་ཕྱིར། བཅོམ་ལྡན་འདས་ཀྱིས། ཕྱི་རོལ་པའི་ལྟ་བར་གྱུར་པ་རྣམས་ཀྱི་ནང་ན་ནི། འདི་ལྟ་སྟེ། བདག་མེད་པར་གྱུར་ཅིག །བདག་གི་མེད་པར་གྱུར་ཅིག །བདག་གི་བར་མ་གྱུར་ཅིག་ཅེས་ལྟ་བ་འདི་མཆོག་ཡིན་ནོ། །ཞེས་གསུངས་སོ། །འདིའི་ཆང་བར་ལྟ་བའི་དོན་ནི། ཆད་པ་ཡང་ཕྱིས་མེད་པར་འཛིན་པ་ཡིན། ལམ་གྱིས་འགོག་པ་ཐོབ་པ་ཡང་། ཕྱིས་སྡུག་བསྔལ་མེད་པར་འཛིན་པ་ཡིན། ཆད་པར་ལྟ་བ་དང་། འགོག་པའི་རྒྱུར་ལམ་དུ་ལྟ་བ་ཡང་དག་པའི་ལྟ་བ་ལ་ཁྱད་ཅི་ཡོད་སྙམ་ན། ཆད་པར་འཛིན་པ་ནི། རྒྱུའི་སྟོབས་ཀྱིས་མ་འགགས་པར་རང་འགགས་སུ་འཛིན་པ་ཡིན། ཡང་དག་པའི་ལྟ་བ་ནི། ལམ་གྱི་སྟོབས་ཀྱིས་སྡུག་བསྔལ་འགག་པར་འཛིན་པས་ཁྱད་དེ་ཡིན་ནོ། །གཞན་ཡང་ལྟ་བ་འདི་གཉིས་ནི་རང་གི་ཕུང་པོ་ལ་ཀུན་ཏུ་རྨོངས་པའི་ཕྱིར་དང་། ཕ་རོལ་ལ་གནོད་པའི་རྣམ་པས་ཞུགས་པ་མ་ཡིན་པའི་ཕྱིར། ལུང་མ་བསྟན་དུ་གྲུབ་བོ། །བྱེ་བྲག་ཏུ་སྨྲ་བས་དེ་ལ་གནོད་པ་བརྗོད་ནས་སྔོན་གྱི་སློབ་དཔོན་ཁ་ཅིག་གི་ལུགས་སྟོན་པ་ནི། མཐོ་རིས་ལ་སྲེད་པ་དང་། ངའོ་སྙམ་པའི་ང་རྒྱལ་དག་ཀྱང་ཆོས་ཅན། ལུང་མ་བསྟན་དུ་ཐལ། རང་གི་ཕུང་པོ་ལ་རྨོངས་ཤིང་ཕ་རོལ་ལ་གནོད་པའི་རྣམ་པར་མ་ཞུགས་པའི་ཕྱིར། འདོད་མི་ནུས་པས། འོ་ན་ལུང་མ་བསྟན་ཅི་འདྲ་བ་ཡིན་ཞེ་ན། སྔོན་གྱི་སློབ་དཔོན་ཐོགས་མེད་ན་རེ། ལྷན་སྐྱེས་ཀྱི་འཇིག་ཚོགས་ལ་ལྟ་བ་རི་དྭགས་དང་བྱ་རྣམས་ལའང་ཡོད་པ་བབ་ཅོལ་དུ་སྒྲ་ཐོས་པས་སྐྲག་པའི་རྒྱུར་(༡༧༣ན)
འགྱུར་བ་ལྟ་བུ་གང་ཡིན་པ་དེ་ལུང་མ་བསྟན་ཡིན་ནོ། །གྲངས་ཅན་སོགས་བདག་སྨྲ་རྣམས་ཀྱིས་རྣམ་པར་བརྟགས་པ་རིགས་པའི་རྣམ་རྟོག་སྔོན་དུ་འགྲོ་བ་ནི་མི་དགེ་བའོ། །མཐར་འཛིན་ལྟ་བའང་དེ་བཞིན་ནོ། །ཞེས་ཟེར་རོ། །འདོད་པའི་ཕྲ་རྒྱས་ལྷག་མ་རྣམས་འདོད་ཁམས་འདིར་མི་དགེ་བའོ། །གཉིས་པ་རྩ་བའི་བྱེ་བྲག་ལ། མི་དགེ་བའི་རྩ་བ་དང་། ལུང་མ་བསྟན་གྱི་རྩ་བའོ། །དང་པོ་ནི། འདོད་ན་འདོད་ཆགས་ཁོང་ཁྲོ་དང་། །རྨོངས་རྣམས་མི་དགེའི་རྩ་བ་ཡིན། །འདོད་ཁམས་ན་འདོད་ཆགས་ཐམས་ཅད་དང་ཁོང་ཁྲོ་ཐམས་ཅད་དང་འཇིག་ལྟ་མཐར་ལྟ་དང་མཚུངས་ལྡན་མ་གཏོགས་པའི་རྨོངས་པ་མ་རིག་པ་རྣམས་མི་དགེ་བའི་རྩ་བ་སྟེ་མི་དགེ་བ་ཡང་ཡིན་ལ། མི་དགེ་བའི་རྩ་བའང་ཡིན་པ་དེ་ཁོ་ན་མི་དགེ་བའི་རྩ་བར་འདོད་དོ། །ཕྲ་རྒྱས་ལྷག་མ་ཐེ་ཚོམ་ང་རྒྱལ་རྣམས་ནི་མི་དགེ་བ་ཡིན་ཀྱང་མི་དགེ་བའི་རྩ་བ་མ་ཡིན་ཏེ། སློབ་དཔོན་གང་སྤེལ་ནི། ཉོན་མོངས་པ་གང་ཞིག་ཕྲ་རྒྱས་རྩ་བའི་ཉོན་མོངས་པ་ཡིན་པ་དང་། སྤང་བྱ་རིས་རྣམ་པ་ལྔའི་རང་བཞིན་ཡིན་པ་དང་། ལུས་ངག་གི་ལས་ཀུན་ནས་སློང་པ་དང་། རྣམ་ཤེས་ཚོགས་དྲུག་ཅར་དང་མཚུངས་པར་ལྡན་པ་དང་། དགེ་རྩ་གཅོད་པ་ལ་སྟོབས་དང་ལྡན་པའི་རྒྱུ་ཡིན་པས། ཕྲ་རྒྱས་རྣམ་པ་ལྔའི་རང་བཞིན། །ལུས་ངག་བྱ་བ་ཀུན་སློང་བྱེད། །རྣམ་ཤེས་ལྔར་བརྟེན་དཀར་པོའི་རྩ། །ཀུན་གཅོད་འདྲེན་པ་མི་དགེའི་རྩའོ། །ཞེས་འཆད་དོ། །གཉིས་པ་ལུང་མ་བསྟན་གྱི་རྩ་བ་ལ། ཁ་ཆེ་བའི་ལུགས་དང་། ཉི་འོག་པའི་ལུགས་སོ། །དང་པོ་ནི། ལུང་མ་བསྟན་པའི་རྩ་བ་གསུམ། །དེ་ནི་སྲེད་དང་མ་རིག་བློ། །རྣམ་གཉིས་མཐོར་འཇུག་ཕྱིར་དེ་ལས། །གཞན་མིན། ཕྲ་རྒྱས་གོ་བརྒྱད་པོ་དེ་ལས་ལུང་མ་བསྟན་པའི་རྩ་བ་གསུམ་སྟེ། དེ་ནི་ཁམས་གོང་མའི་སྲེད་པ་དང་མ་རིག་པ་དང་། བློ་ཤེས་རབ་ཐ་ན་རྣམ་སྨིན་སྐྱེས་ཀྱང་རུང་ཅུང་ཟད་དང་བཅས་པ་དང་། འདོད་པའི་མ་སྒྲིབ་ལུང་མ་བསྟན་བཞི་ཀའི་ཤེས་རབ་དང་། ཉོན་མོངས་ལུང་མ་བསྟན་གྱི་རྨོངས་ལྟ་དེ་ཐམས་ཅད་ལུང་མ་བསྟན་པའི་རྩ་བ་དག་ཡིན་ནོ་ཞེས་ཟེར་རོ། །ཤེས་རབ་དེ་(༡༧༣བ)
ཡང་གཟུགས་མེད་དུ་ཉོན་མོངས་ཐམས་ཅད་དང་། རྣམ་སྨིན་གྱི་སེམས་དང་མཚུངས་ལྡན་དང་། གཟུགས་ན་དེར་མ་ཟད་སྤྱོད་ལམ་པ་དང་སྤྲུལ་སེམས་དང་ཡང་མཚུངས་ལྡན་དང་། འདོད་པར་འཇིག་ལྟ་མཐར་ལྟ་དང་བཟོ་གནས་པ་དང་ཡང་མཚུངས་ལྡན་ནོ། །དེ་དག་ལས་གཞན་ཐེ་ཚོམ་ནི་རྣམ་གཉིས་ཉིད་དུ་འཇུག་པའི་ཕྱིར་རྩ་བར་འོས་པ་མིན་ཏེ་གཡོ་བའི་ཕྱིར། ང་རྒྱལ་ནི་ཁེངས་པའི་མཚན་ཉིད་ཀྱིས་མཐོན་པོར་འཇུག་པའི་ཕྱིར་རྩ་བ་མ་ཡིན་ཏེ། རྩ་བ་དང་ཆོས་མི་མཐུན་པའི་ཕྱིར། འཇིག་རྟེན་ན་རྩ་བ་རྣམས་བསྟན་པ་དང་འོག་ན་གནས་པ་དག་ཡིན་པར་མཐོང་ན་ཐེ་ཚོམ་དང་ང་རྒྱལ་ནི་རྩ་བ་དང་ཆོས་མི་མཐུན་པས་རྩ་བར་མི་འོས་སོ། །གཉིས་པ་ནི། བཞི་ཞེས་ཉི་འོག་པ། །དེ་དག་སྲེད་ལྟ་ང་རྒྱལ་རྨོངས། །བསམ་གཏན་པ་གསུམ་མ་རིག་ལས། །ཉི་འོག་པ་རྣམས་ནི་ལུང་མ་བསྟན་གྱི་རྩ་བ་བཞི་ཞེས་འདོད་དོ། །གོང་མ་གཉིས་ན་ཡོད་པའི་སྲེད་པ་དང་ལྟ་བ་གོང་མའི་དང་། འདོད་པའི་འཇིག་ལྟ་སོགས་གཉིས་དང་། ང་རྒྱལ་དང་རྨོངས་པ་མ་རིག་པ་ལུང་མ་བསྟན་དེ་དག་སྟེ། བསམ་གཏན་པ་ནི་གསུམ་སྟེ། སྲེད་པ་དང་། ལྟ་བ་དང་། ང་རྒྱལ་ཤས་ཆེ་བའི་བསམ་གཏན་པ་དག་ཡིན་ལ། དེ་དག་ཀྱང་མ་རིག་པའི་དབང་གིས་འགྱུར་རོ། །དེ་རྣམས་ཀྱང་རོ་མྱོང་དང་མཚུངས་ལྡན་གྱི་བསམ་གཏན་སྒོམ་པ་དང་། བསམ་གཏན་ལ་བརྟེན་ནས་རྟག་སོགས་ཀྱི་ལྟ་བ་བསྐྱེད་པ་དང་། བདག་ནི་བསམ་གཏན་བཞི་པ་ཐོབ་ཀྱི་གཞན་ནི་མ་ཡིན་སྙམ་དུ་རློམ་པའོ། །སྲེད་པ་ཤས་ཆེ་བའང་ཡིན་ལ་བསམ་གཏན་པའང་ཡིན་པས་སྲེད་པ་ཤས་ཆེ་བའི་བསམ་གཏན་པ་སྟེ་སྲེད་པ་ལྷག་པ་ཞེས་པའི་ཐ་ཚིག་གོ། །གསུམ་པ་འཕྲོས་དོན་ནི། མགོ་གཅིག་དང་ནི་རྣམ་ཕྱེ་དང་། །དྲི་དང་བཞག་པར་ལུང་བསྟན་པ། །འཆི་དང་སྐྱེ་དང་ཁྱད་པར་འཕགས། །བདག་གཞན་ལ་སོགས་ལྟ་བུ་ཡིན། །མདོ་ལས་ལུང་མ་བསྟན་དངོས་པོ་བཅུ་བཞི་གསུང་བ་ནི་དགེ་མི་དགེ་ལུང་མ་བསྟན་གྱི་ཟླས་དབྱེའི་ལུང་མ་བསྟན་ཡིན་ནམ་ཞེ་ན། མ་ཡིན་ཏེ། གང་ཞིག་བཞག་པར་བྱ་བ་ཉིད་ཀྱིས་ལུང་མ་བསྟན་ཅིང་མ་བཤད་པའི་དྲི་བ་དེ་ནི་ལུང་དུ་མ་བསྟན་པ་(༡༧༤ན)
ཡིན་ལ། དེའི་དངོས་པོའི་གཞི་ན་དེ་ཙམ་དུ་ཟད་པས་ལུང་དུ་མ་བསྟན་པ་ཞེས་བརྗོད་པར་བས་པའི་ཕྱིར། དེའང་སེམས་ཅན་ཐམས་ཅད་འཆི་འམ་ཞེས་འདྲི་ན་འཆི་ཞེས་མགོ་གཅིག་ཏུ་ལུང་བསྟན་པར་བྱ་བ་ལྟ་བུ་དང་ནི། སེམས་ཅན་ཤི་བ་ཐམས་ཅད་སྐྱེའམ་ཞེས་འདྲི་ན་ཉོན་མོངས་པ་རྣམས་སྐྱེ་བར་འགྱུར་གྱི། ཉོན་མོངས་མེད་པ་རྣམས་མ་ཡིན་ནོ་ཞེས་རྣམ་པར་བྱེ་སྟེ་ལུང་བསྟན་པར་བྱ་བ་ལྟ་བུ་དང་། མི་འདི་འགྲོ་བ་ཁྱད་པར་དུ་འཕགས་པའམ། དམན་པ་ཡིན་ཅེས་འདྲི་ན། གང་ལ་བལྟོས་ནས་འདྲི་ཞེས་དྲིས་ནས་ལུང་བསྟན་པར་བྱ་སྟེ། ལྷ་ལ་བལྟོས་ནས་ཟེར་ན་དམན་ལ། ངན་སོང་ལ་བལྟོས་ནས་ཟེར་ན་ཁྱད་པར་དུ་འཕགས་ཞེས་ལུང་བསྟན་པར་བྱ་བ་དང་། ཅི་ཕུང་པོ་རྣམས་ལས་བདག་གམ་སེམས་ཅན་གཞན་ནམ་གཞན་མ་ཡིན་ཅེས་སོགས་འདྲི་ན། བདག་གམ་སེམས་ཅན་གྱི་རྫས་མེད་པའི་ཕྱིར་དང་། ཁྱད་གཞི་བདག་མེད་པར་སྨྲས་ན་སྐྲག་པ་སྐྱེ་ལ། གང་རུང་གི་མཐའ་ལ་ལན་བཏབ་ན་བདག་ལྟར་འགྱུར་བས་བཞག་པར་བྱ་སྟེ། མོ་གཤམ་གྱི་བུ་སངས་སམ་དཀར་ཤམ་ཞེས་བྱ་བ་བཞིན་ནོ། །འོ་ན་ལན་ལ་ཞལ་རོག་ཏུ་བཞུགས་ནས། ལུང་བསྟན་པར་ཅི་ལྟ་རུང་ཞེ་ན། ལན་གདབ་པའི་འོས་མ་ཡིན་པས་ལུང་མ་བསྟན་ཏོ་ཞེས་ལུང་བསྟན་པ་ཞེས་སྒྲ་སྦྱོར་བས་ཉམས་པ་མེད་དོ། །ཡང་བཙུན་པ་ར་མ་ན་རེ། འཆི་བ་ཐམས་ཅད་སྐྱེ་བར་འགྱུར་རམ་བྱ་བ་དེ་ཕྱེ་སྟེ་ལུང་བསྟན་པ་མིན། མགོ་གཅིག་ཏུ་ལུང་བསྟན་པ་ཡིན་ཏེ། འཆི་བ་ཐམས་ཅད་སྐྱེ་བ་ལ་དགྲ་བཅོམ་པ་གྲོངས་པ་སྐྱེ་བས་ཁྱབ། དཔེར་ན། ཤིང་ཐམས་ཅད་ཡོད་པ་ལ་ཤ་བ་ཡོད་པས་ཁྱབ་པ་ལ། ཤ་པ་མེད་ན་ཤིང་ཐམས་ཅད་མེད་པ་ཡིན། དེ་དང་འདྲ་བར་དགྲ་བཅོམ་པ་གྲོངས་པ་མི་སྐྱེ་ཙམ་ན་འཆི་བ་ཐམས་ཅད་མི་སྐྱེ་བྱ་བར་ལུང་དེ་བསྟན་པ་ཡིན་སྙམ་ནས་དེ་སྐད་དུ་བརྗོད་ཅེས་ཟེར་རོ། །དེ་ལྟར་ལན་(༡༧༤བ)
གདབ་ཏུ་མི་རུང་སྟེ། བཏབ་ན་ལན་འདེབས་པ་པོས་ཏེ་དགྲ་བཅོམ་པ་ལ་བསམས་ཏེ། དེ་སྐད་ལན་བཏབ་ཀྱང་ཉན་པ་པོས། ཐམས་ཅད་སྐྱེ་བ་ལ་དགྲ་བཅོམ་པ་གྲོངས་པ་སྐྱེ་བས་ཁྱབ་པ་ལ་ཁྱབ་བྱེད་མེད་པས་ཐམས་ཅད་ཀྱི་བྱེ་བྲག་དགྲ་བཅོམ་ཙམ་མི་སྐྱེ་བར་མི་གོ་བས་རྒྱང་འཕན་པར་བཞིན་དུ་རངས་པ་མི་སྐྱེ་བར་མཐོང་ནས་འོང་བས་དེ་སྐད་དུ་ལན་གདབ་པ་མ་ཡིན་པའི་ཕྱིར། སློབ་དཔོན་གྱིས། འདི་ཕྱེ་སྟེ་ལན་གདབ་པ་བྱེ་སྨྲའི་དཔེར་བརྗོད་འདི་ཁོ་ན་ལྟར་རུང་ངོ་། །ཞེས་སོ། །ཡང་བཙུན་པ་ར་མ་ན་རེ། དྲི་སྟེ་ལུང་བསྟན་པ་དེ་ཡང་དྲི་མི་དགོས་པར་མཆོག་དམན་གཉིས་ཀར་མགོ་གཅིག་ཏུ་ལུང་བསྟན་པར་བྱ་བ་ཡིན་ཏེ། དཔེར་ན། རྣམ་པར་ཤེས་པ་ནི་ཕྱི་མའི་རྒྱུ་ཡང་ཡིན་ལ་སྔ་མའི་འབྲས་བུའང་ཡིན་པས། རྒྱུ་འབྲས་གཉིས་ཡིན་པ་བཞིན་དམན་མཆོག་གཉིས་ཀར་མགོ་གཅིག་ཏུ་ལུང་བསྟན་བྱར་གྲུབ་པའི་ཕྱིར་ཞེས་ཟེར་རོ། །དེ་མི་འཐད་དེ། ཁོ་བལྟོས་ས་གཅིག་ལ་བལྟོས་པའི་མཐའ་གཅིག་ཏུ་གང་ཡིན་འདྲི་བ་ལ། གཉིས་ཀར་ལན་བཏབ་ན་ཁོའི་འདོད་པ་མི་ཚིམ། ཁོའི་འདོད་པ་ཚིམ་པར་བྱ་བའི་ཆེད་དུ་དྲིས་ནས། དུད་འགྲོ་ལ་བལྟོས་པའི་བཟང་བ་ཁོ་ན་བྱ་བའམ། ལྷ་ལ་བལྟོས་པའི་ངན་པ་ཁོ་ན་བྱ་བར་ལུང་སྟོན་པ་དེའང་འགྲོ་བའི་དབང་དུ་བྱས་པ་ཡིན་ལ། གཞན་གྱི་དབང་དུ་བྱས་པའི་ལྷ་བས་མི་བཟང་བ་ཡོད་པའི་ཕྱིར། ཡང་བཞག་སྟེ་ལུང་བསྟན་དེ་ཡང་བཞག་ན་ལུང་བསྟན་པར་ཅི་ལ་འོང་། འོ་ན་དེ་ཡང་བདག་རང་མེད་པར་ཕུང་པོ་དང་གཅིག་དང་ཐ་དད་ཅིག་ཅི་ལ་འོང་ཞེས་དེ་སྐད་ལུང་བསྟན་སྙམ་ན། དེ་ཡང་མི་འཐད་དེ། དེ་ནི་ལུང་བསྟན་དུ་མི་རུང་བ་ཡིན། སངས་རྒྱས་ལ་ཕྱི་རོལ་པ་ན་རེ། བྱེའུ་འདི་ཤི་བ་ཡིན་ནམ་མ་ཤི་བ་ཡིན་ཟེར་བ་ལ། ཤི་བ་ཡིན་བྱས་ན་བྱིའུ་སྤུར་ནས་ཐམས་ཅད་མཁྱེན་པར་མི་འདུག་ཟེར་ནས་འོང་། མ་ཤི་བ་ཡིན་བྱས་ན་(༡༧༥ན)
གསོད། དེ་ལུང་བསྟན་དུ་མི་རུང་། དེ་དང་འདྲ་བར་གོང་མ་སྐད་དུ། བདག་རང་མེད་བྱས་ན་བཏགས་པའི་བདག་ཕུང་པོ་ལྔའི་རྒྱུན་ལ་སྐུར་བ་བཏབ་པས་ལས་རྒྱུ་འབྲས་ལ་སྐུར་བ་བཏབ་པར་འགྲོ། བདག་ཡོད་བྱས་ན་རྐྱ་བསྐྱོན་ནས་ཤིན་ཏུ་ཡང་བདག་འཛིན་སྐྱེ། དེས་ན་ལུང་བསྟན་དུ་མི་རུང་བས་ལུང་མི་བསྟན་ཅིང་། བཞག་ནས་ཟབ་དོན་རྟོགས་སུ་མི་རུང་བར་བསྟན་ཏོ། །འོ་ན་ལུང་མ་བསྟན་པ་དེ་ལུང་བསྟན་པར་འོང་ངོ་སྙམ་ན། འོང་སྟེ། ལན་གདབ་ཏུ་མི་རུང་བར་ལུང་བསྟན་པ་ཡིན་པའི་ཕྱིར། ཆོས་མངོན་པ་བ་ན་རེ། སངས་རྒྱས་དང་དེའི་ལེགས་པར་བཤད་པའི་ཆོས་དང་། ཉན་ཐོས་ཀྱི་དགེ་འདུན་ལེགས་པར་ཞུགས་པ་དང་། གཟུགས་ནས་རྣམ་ཤེས་ཀྱི་བར་མི་རྟག་པ་དང་། སྡུག་བསྔལ་གདགས་པ་ནས་ལམ་གདགས་པའི་བར་ནི། དོན་དང་ཡང་དག་པར་ལྡན་པའི་ཕྱིར་མགོ་གཅིག་ཏུ་ལུང་བསྟན་པར་བྱའོ། །རྣམ་པར་ཕྱེ་སྟེ་ལུང་བསྟན་པ་ནི། འགའ་ཞིག་ཆོས་དག་སྨྲོས་ཤིག་ཟེར་ན། དུས་གསུམ་གྱི་ཆོས་མང་པོ་ཡོད་ན་གང་སྨྲ་ཞེས་བརྗོད་པར་བྱའོ། །འདས་པ་སྨྲོས་ཤིག་ཟེར་ན། གཟུགས་ནས་རྣམ་མཁྱེན་གྱི་བར་མང་དུ་ཡོད་ན་གང་ཞེས་བརྗོད་དོ། །དགེ་བ་སྨྲོས་ཟེར་ན་སྲོག་གཅོད་སྤོང་བ་ནས་ཀྱལ་བ་སྤོང་བའི་བར་བདུན་ཡོད་ན་ཞེས་བརྗོད་པར་བྱའོ། །སྲོག་གཅོད་སྤོང་བ་སྨྲོས་ཟེར་ན། དེ་ལ་ཡང་མ་ཆགས་པ་དང་། སྡང་བ་མེད་པ་དང་། གཏི་མུག་མེད་པ་ལས་སྐྱེས་པ་གསུམ་ཡོད་པ་ལས། མ་ཆགས་པ་ལའང་རིག་བྱེད་དང་རིག་བྱེད་མིན་པ་གཉིས་ཡོད་ན་ཞེས་སོགས་ཁོངས་ནས། རིག་བྱེད་མིན་པ་ལ་ཡང་སྡོམ་པས་བསྡུས་པ་སོགས་གསུམ་ཡོད་ན། སྡོམ་པ་ལའང་སོ་སོར་ཐར་པ་དང་། བོ་དྷིའི་ཡོད་ན་སོ་ཐར་ལའང་དགེ་(༡༧༥བ)
སློང་ལ་སོགས་པ་བཞི་ཡོད་ན་ཞེས་རྣམ་པར་ཕྱེ་སྟེ་བརྗོད་པར་བྱའོ། །འདྲི་བ་པོ་གཡོན་ཅན་རྣམ་པར་ཐོ་འཚམས་པའི་བསམ་པ་ཅན་གྱི་འདྲི་བ་ལུང་བསྟན་པ་ལའང་རྣམ་པར་ཕྱེ་སྟེ་ལུང་བསྟན་པའི་དྲི་ཚིག་དེ་ཉིད་ཡིན་ནོ། །དེ་ལ་ནི་ཆོས་མང་པོ་ཞིག་ཡོད་ན་ཞེས་བརྗོད་པར་བྱའི། འདས་སོགས་རྣམ་པར་དབྱེ་བ་ནི་མི་བྱ་སྟེ། འདྲི་བ་པོས་འདྲི་མི་འདོད་པས་ཅང་མི་སྨྲ་བའམ། འདྲི་འདོད་གང་ཡིན་ལུང་སྟོན་དུ་གཞུག་པའི་ཆེད་ཡོད་པའི་ཕྱིར། དགོས་པ་དེ་ཡོད་པའི་ཐ་ཚིག་གོ་ཞེས་ཟེར་རོ། །བཙུན་པ་ར་མ་ན་རེ། གང་གི་ཚེ་གཡོ་ཅན་དང་གཡོ་མེད་པ་དེ་གཉིས་ཅུང་ཟད་ཀྱང་མི་འདྲིའི། ཆོས་བཤད་དུ་གསོལ་ཞེས་གསོལ་བ་འདེབས་པ་འབའ་ཞིག་ཏུ་ཟད་ལ། གཡོ་ཡོད་མེད་གཉིས་ལའང་ཆོས་གཟུགས་སོགས་ཀྱི་དབྱེ་བ་ཅུང་ཟད་ཀྱང་ལུང་མི་སྟོན་གྱི། གང་བཤད་པར་བྱ་ཞེས་འདྲི་བ་འབའ་ཞིག་ཏུ་ཟད་ན། དེ་ཇི་ལྟར་གཡོ་ཡོད་མེད་གཉིས་ཀྱི་དྲི་བ་ཇི་ལྟར་ཡིན། ཇི་ལྟར་ན། ཆོས་མངོན་པ་པའི་ལུང་སྟོན་པ་ཡིན་ཅེས་དོགས་པ་སྐྱེས་པ་ལ། སློབ་དཔོན་གྱིས་ར་མའི་བསམ་པ་བླངས་ནས་དོགས་པ་བཅད་པ་ནི། དབྱེ་བ་རྒྱས་པར་མི་ཤེས་ཀྱང་ལམ་སྨོས་ཤིག་ཅེས་ཟེར་ན་ལམ་གང་ཞིག་ཡིན་ཅེས་དེས་ལམ་མ་དྲིས་པ་མ་ཡིན་པ་བཞིན་དུ་ཆོས་བཤད་དུ་གསོལ་སྨྲ་བས་ཀྱང་། ཆོས་གང་ཞིག་ཡིན་ཅེས་ཆོས་མ་དྲིས་པ་མ་ཡིན་ལ། འདྲི་བ་དེ་ཉིད་ཀྱིས་ལན་བཏབ་པ་པོས་ལན་ལུང་དུ་བསྟན་པའི་ཕྱིར། ཇི་ལྟར་དྲིས་ནས་ལུང་དུ་བསྟན་པ་མ་ཡིན་ནམ་སྟེ་ཡིན་པར་གྲུབ་བོ། །ངག་དོན་དྲི་བ་བོ་ལ་ལན་བཏབ་པོས་ཆོས་མང་པོ་ཞིག་ཡོད་ན་གང་དག་སྨྲ་བར་བྱ་ཞེས་འདྲི་བ་ཉིད་ཀྱི་སྒོ་ནས་ལན་ལུང་དུ་བསྟན་འདོད་པའི་ཆེད་དུ་ཡིན་ཏེ། ཤེས་འདོད་ཀྱི་ཆོས་མང་བ་ཉིད་ལས་གང་ཡིན་ཅེས་ལུང་བསྟན་པར་བྱ་བའི་ཆེད་ཡིན་པའི་ཕྱིར། བཞག་པར་བྱ་བ་ནི་འཇིག་རྟེན་མཐའ་ཡོད་པའམ་མེད་པ་ཞིག་ཅེས་(༡༧༦ན)
སོགས་སོ། །དྲི་བ་ལུང་བསྟན་པ་རྣམས་ཀྱི་མཚན་ཉིད་ནི་མདོ་ཁོ་ན་ལས་བལྟ་སྟེ། དགེ་འདུན་ཕལ་ཆེན་སྡེ་རྣམས་མདོ་ལས། དགེ་སློང་དག་བཞི་པོ་འདི་དག་ནི་དྲི་བ་ལུང་བསྟན་པ་ཡིན་ཏེ། དགེ་སློང་དག་མགོ་གཅིག་ཏུ་ལུང་བསྟན་བྱའི་འདྲི་བའང་ཡོད་ལ། བཞག་བྱའི་བར་དུ་ཡོད། མགོ་གཅིག་ཏུ་ལུང་བསྟན་བྱ་ནི་འདུ་བྱེད་ཐམས་ཅད་མི་རྟག་གམ། ཞེས་འདྲི་བའོ། །རྣམ་པར་ཕྱེ་སྟེ་ལུང་བསྟན་པའི་བྲི་བ་ནི། ཆེད་དུ་བསམ་བྱའི་ལས་བྱས་ན་བདེ་སོགས་ཅི་ཞིག་སོ་སོར་ཡང་དག་པར་མྱོང་བར་འགྱུར་ཞེས་འདྲི་བ་ལ། དགེ་བ་ཟག་བཅས་ཀྱི་བདེ་བ་དང་། མི་དགེ་བས་སྡུག་བསྔལ་མྱོང་ཞེས་ཕྱེ་སྟེ་ལུང་བསྟན་པའི་འདྲི་བ་ཡིན་ནོ། །དགེ་སློང་དག་དྲིས་ནས་ལུང་བསྟན་བྱའི་འདྲི་བ་ནི། འདུ་ཤེས་སྐྱེས་བུའི་བདག་ཉིད་ཡིན་ནམ། འོན་ཏེ་འདུ་ཤེས་ཀྱང་གཞན་ཞིག་ལ་བདག་ཀྱང་གཞན་ཞིག་ཅེས་འདྲི་ན། ཚེ་དང་ལྡན་པ་ཁྱོད་བདག་གང་ཡིན་པར་ཡིད་ཆེས་ཞེས་འདྲི་བར་བྱའོ། །ཚེ་དང་ལྡན་པ་རགས་པ་གཟུགས་བདག་ཡིན་ནོ་ཟེར་ན། ལན་དུ་འདུ་ཤེས་ཀྱང་གཞན་ལ། བདག་ཀྱང་གཞན་ནོ་ཞེས་བརྗོད་པར་བྱའོ། །ཡང་བདག་དེ་གཟུགས་ཅན་མ་ཡིན་པ་ཡིན་ནོ་ཟེར་ན། འོ་ན་འདུ་ཤེས་དང་ཁྱོད་ཀྱིས་བརྟགས་པའི་བདག་དེ་གཅིག་ཏུ་འགྱུར་གྱི། འདུ་ཤེས་ཀྱི་བདག་ཉིད་ལས་སྐྱེས་བུ་གཞན་དུ་མ་དམིགས་པས་དྲིས་ནས་ལུང་བསྟན་བྱའི་འདྲི་བ་ཡིན་ནོ། །འདིར་དྲིས་ཏེ་ལུང་བསྟན་དང་གོང་གི་བཞག་པའི་ལུང་བསྟན་གཉིས་དོན་གཅིག་པ་ལ་གོང་དུ་བཞག་པའི་ལུང་བསྟན་དུ་འགྲོ་ལ། འདིར་དྲིས་ཏེ་ལུང་བསྟན་དུ་འགྲོ་བ་ཇི་ལྟར་ཡིན་སྙམ་ན། འདྲི་བ་པོའི་བསམ་པ་ལ་བལྟོས་ནས་ཐ་དད་དེ། འོ་ན་སྐྱེས་བུའི་བདག་དེ་རྟག་པ་དང་གཅིག་པུ་ལ་འདྲི་བ་པོའི་བློ་གཏད་ན་བཞག་སྟེ་ལུང་བསྟན་ཡིན། སྐྱེས་བུའི་བདག་(༡༧༦བ)
དེ་གཟུགས་ཅན་ནམ་གཟུགས་ཅན་མ་ཡིན་པ་ལ་འདྲི་བ་པོ་བློ་གཏད་ན་དྲིས་ཏེ་ལུང་བསྟན་པ་ཡིན་ནོ། །བཞག་པར་བྱ་བའི་འདྲི་བ་ནི་འཇིག་རྟེན་རྟག་གམ་མི་རྟགརྟག་ཀྱང་རྟག་ལ། མི་རྟག་ཀྱང་མི་རྟག་པ་ཞིག་གམ། རྟག་པ་ཡང་མ་ཡིན། མི་རྟག་པ་ཡང་མ་ཡིན་པ་ཞིག་གམ། མཐའ་ཡོད་པ་ཞིག་གམ། མཐའ་ཡོད་པ་མ་ཡིན་པ་ཞིག་གམ། མཐའ་ཡོད་པའང་མ་ཡིན་མེད་པའང་མ་ཡིན་པ་ཞིག་གམ། དེ་བཞིན་གཤེགས་པ་གྲོངས་ཕན་ཆད་ཡོད་པ་ཞིག་གམ། ལུས་དེ་ཉིད་སྲོག་གམ། སྲོག་ཀྱང་གཞན་ལ་ལུས་ཀྱང་གཞན་ཞེས་འདྲི་བ་སྟེ་འདི་ནི་དགེ་སློང་དག་བཞག་པར་བྱ་བའི་འདྲི་བ་ཡིན་ཅེས་འདོན་ཏོ། །ལྔ་པ་དུས་གསུམ་ལ་ཕྲ་རྒྱས་གང་ལྡན་པ་ལ། དངོས་པོ་གང་དང་ལྡན་པ། དུས་གསུམ་དཔྱད་པ། སྤངས་ཀྱང་ལྡན་པ། ཆོས་གང་སེམས་གང་གི་ཡུལ་ཡིན་པའོ། །དང་པོ་ལ། རང་གི་མཚན་ཉིད་པའི་ལྡན་ཚུལ་དང་། སྤྱིའི་མཚན་ཉིད་པའི་ལྡན་ཚུལ་ལོ། །དང་པོ་ལ། དུས་གཉིས་ཀྱི་ལྡན་ཚུལ་དང་། མ་འོངས་པའི་ལྡན་ཚུལ་ལོ། །དང་པོ་ནི། འདས་དང་ཉེར་གནས་འདོད་ཆགས་དང་། །ཁོང་ཁྲོ་ང་རྒྱལ་དག་གིས་ནི། །གང་ལ་དེ་སྐྱེས་མ་སྤངས་པའི། །དངོས་པོ་དེ་དང་ལྡན་པ་ཡིན། །གང་ཟག་གང་གིས་ཕྲ་རྒྱས་གང་ཞིག་དམིགས་པ་གང་ལ་རྒྱས་པར་འགྱུར་བ་དེ་ནི་ཕྲ་རྒྱས་དེས་དམིགས་པ་དེ་དང་ལྡན་པ་ཡིན་ནོ། །མཚུངས་ལྡན་གྱི་སྒོ་ནས་དམིགས་པ་དེ་ཡང་ལྡན་པར་བྱེད་དོ། །དེ་ཡང་འདས་པ་དང་ད་ལྟ་བའི་ལྡན་ཚུལ་བརྗོད་པར་བྱ་སྟེ། བསྡུ་ན། འདོད་ཆགས་དང་ཁོང་ཁྲོ་དང་ང་རྒྱལ་ནི། ཡུལ་སྡུག་པ་དང་མི་སྡུག་པ་སོ་སོ་ལ་དམིགས་ནས་སྐྱེ་བས་གཞི་དང་བཅས་པ་ཡིན་པའི་ཕྱིར། རང་གི་མཚན་ཉིད་པའི་ཉོན་མོངས་སོ། །ལྟ་བ་དང་ཐེ་ཚོམ་ཡིད་ཀྱི་ས་པ་ཁོ་ན་དང་། མ་རིག་པ་ལ་སྒོ་ལྔའི་འཁོར་དུ་སྐྱེས་པ་དང་ཡིད་ཀྱི་འཁོར་དུ་ཡོད་པ་གཉིས་ལས། ཡིད་ཀྱི་ས་པའི་མ་རིག་པ་ནི། སྤྱིར་བདེ་སྡུག་བཏང་སྙོམས་མྱོང་འགྱུར་ལ་དམིགས་ནས་སྐྱེ་བས་གཞི་སོ་སོར་མེད་པ་ཡིན་པའི་ཕྱིར་ཉོན་(༡༧༧ན)
མོངས་པ་སྤྱི་པའོ། །དེ་ལ་རེ་ཞིག་དེ་ལ་ཡུལ་གྱི་དངོས་པོ་གང་ལ་འདས་པ་དང་ད་ལྟ་ཉེ་བར་གནས་པའི་འདོད་ཆགས་དང་ཁོང་ཁྲོ་དང་ང་རྒྱལ་དག་གིས་ནི་ཡུལ་གང་ལ་དེ་རྣམས་སྐྱེས་ལ། མ་སྤངས་པའི་ཡུལ་གྱི་དངོས་པོ་དེ་དང་གང་ཟག་དེ་ལྡན་པ་ཡིན་ཏེ། དེ་དག་རང་གི་མཚན་ཉིད་པའི་ཉོན་མོངས་ཡིན་པའི་ཕྱིར། ཐག་པས་གླང་བུ་འགིང་ཕུར་ལ་བཏགས་པ་དང་འདྲའོ། །ཡུལ་ནི་འགིང་ཕུར་ལྟ་བུ། ཉོན་མོངས་ནི་བརྟོད་ཐག་ལྟ་བུ། བརྟོད་ཐག་མ་བཅད་བར་དུ་གླང་བུ་དེ་འགིང་ཕུར་དང་ལྡན། དེ་དང་འདྲ་བར་བརྟོད་ཐག་ཉོན་མོངས་མ་སྤངས་ཀྱི་བར་ཡུལ་དེ་དང་ལྡན་པ་ཡིན་ནོ། །དེའང་ཡིད་ཀྱི་འདས་པས་ཀྱང་ཡུལ་གསུམ་ག་དང་ལྡན། ཡིད་ཀྱི་ད་ལྟར་གྱིས་ཀྱང་དུས་གསུམ་ཀའི་ཡུལ་དང་ལྡན། སྒོ་ལྔའི་ཉོན་མོངས་ནི་འདས་པས་ཡུལ་འདས་པ་ཁོ་ན་དང་ལྡན། ད་ལྟར་གྱིས་ཡུལ་ད་ལྟར་བ་ཁོ་ན་དང་ལྡན་གྱི། གཞན་ལ་དམིགས་པས་དམིགས་ཀྱང་མི་ནུས་ན་ལྡན་པ་ལྟ་ག་ལ་སྲིད་དོ། །ངེས་པར་གང་ཟག་ཐམས་ཅད་ལ་དེ་གསུམ་ཐམས་ཅད་དུ་འབྱུང་བ་མ་ཡིན་ནོ། །གཉིས་པ་ནི། ཡིད་ཀྱི་དེ་དག་མ་འོངས་པས། །ཀུན་དང་གཞན་གྱི་རང་དུས་པ། །མི་སྐྱེ་རྣམས་ཀྱི་ཐམས་ཅད་དང་། །ཡིད་ཀྱི་ས་པའི་འདོད་ཆགས་དང་ཁོང་ཁྲོ་དང་ང་རྒྱལ་དེ་དག་མ་འོངས་པ་ཉིད་ཀྱིས་གང་ལ་མ་སྤངས་པའི་དུས་གསུམ་པའི་དངོས་པོ་ཀུན་དང་ལྡན་ཏེ། ཡིད་ཀྱི་ཡུལ་ནི་དུས་གསུམ་པ་ཡིན་པའི་ཕྱིར། གཞན་རྣམ་ཤེས་ཚོགས་ལྔའི་ཆགས་སྡང་མ་འོངས་པ་སྐྱེ་བའི་ཆོས་ཅན་རྣམས་ཀྱིས་རང་གི་དུས་པ་མ་འོངས་པའི་དམིགས་པ་ཁོ་ན་དང་ལྡན་ནོ། །ང་རྒྱལ་མ་སྨོས་པ་ནི། མཐོང་སྤོང་བྱ་ཉིད་ང་རྒྱལ་བཅས། །ཡིད་རྣམ་ཤེས་ཀྱི་ས་པ་ཡིན། །ཅེས་འབྱུང་བས་ང་རྒྱལ་རྣམས་ཡིད་ཀྱི་ཡིན་པའི་ཕྱིར་རོ། །མི་སྐྱེ་བའི་ཆོས་ཅན་གྱི་རྣམ་ཤེས་ཚོགས་ལྔ་རྣམས་ཀྱིས་ཆགས་སྡང་དག་ཉིད་ཀྱིས་དམིགས་བྱའི་དངོས་པོ་དུས་གསུམ་པ་ཐམས་ཅད་(༡༧༧བ)
དང་ལྡན་ནོ། །མི་སྐྱེ་བའི་ཆོས་ཅན་དེ་དག་ནི་མ་འོངས་པའི་དུས་ཁོ་ན་ན་རྣམ་པར་གནས་ལ་དེ་དག་གི་དམིགས་པ་དག་ནི་འཕོ་བར་འགྱུར་རོ། །ཉོན་མོངས་པ་དང་ལྡན་པ་མི་སྐྱེ་བའི་ཆོས་ཅན་རྣམས་ནི་ལྕམ་པ་བཞིན་དུ་ཡུལ་ལ་མངོན་པར་ཕྱོགས་པ་ཁོ་ནར་གནས་ཏེ། འདི་ལྟར་མི་སྐྱེ་བའི་ཆོས་ཅན་རྣམས་ནི་དམིགས་པ་ལ་དམིགས་ནས་སྐྱེ་བར་འགྱུར་བ་མ་ཡིན་པ་ཉིད་དོ། །དེའི་ཕྱིར་ཁ་ཅིག་གི་དམིགས་པ་ནི་འདས་པ་ཡིན་ནོ། །ཁ་ཅིག་ནི་ད་ལྟ་ཡིན། ཁ་ཅིག་ནི་མ་འོངས་པ་ཡིན། དེ་དག་ནི་དམིགས་པ་མི་སྐྱེ་བ་ཁོ་ནས་མི་སྐྱེ་བ་མ་ཡིན། འོ་ན་ཅི་ཞེ་ན། རྐྱེན་མ་ཚང་བའི་ཕྱིར་ཏེ། གྲུབ་པའི་མཐའ་ནི་དངོས་པོ་དེ་རྣམས་ད་ལྟར་དུ་མ་ཚོགས་པ་ཚོགས་པར་བྱེད་དེ་མ་འོངས་པ་ནས་ད་ལྟར་གྱི་སར་བསྐྱེད་ནས་ཚོགས་པར་བྱེད་པ་ན། ཚོགས་པའི་གནས་སྐབས་དེ་འབྲས་བུ། འབྲས་བུ་དེ་འདྲ་བ་བསྐྱེད་པའི་རྒྱུ་ལ་འབྲས་བུ་ཅན་ཡིན། རྫས་ཀྱི་འབྲས་བུ་ཅན་ནི་རྒྱུ་དེ་མིན་ཏེ། ཡེ་ནས་གྲུབ་པ་དེ་བསྐྱེད་དུ་མེད་དོ། །དེ་ལྟར་ན་ཚོགས་པའི་གནས་སྐབས་ཀྱི་འབྲས་བུ་ཅན་ཡིན་གྱི། རྫས་ཀྱི་འབྲས་བུ་ཅན་མ་ཡིན་ནོ། །མ་འོངས་པ་མི་སྐྱེ་བའི་ཆོས་ཅན་དེ་ནི། ཡུལ་གཅིག་ཏུ་མ་ཚང་བས་མི་སྐྱེ་བ་མིན། ཡུལ་ཚང་ཡང་དབང་སོགས་གཞན་མེད་པའི་རྐྱེན་མ་ཚང་བས་ཀྱང་བརྟགས་མིན་འགོག་པར་འགྲོ་ཙམ་ན། ཡུལ་ཡོད་པ་དེ་མ་འོངས་པ་ད་ལྟར་དུ་འཕོས། ད་ལྟར་འདས་པར་འཕོས་ཙམ་ན་ཡུལ་ཇི་ལྟ་བ་བཞིན་དུ་དམིགས་ཏེ་ལྕམ་པ་དང་འདྲའོ། །གཉིས་པ་ནི། ལྷག་མ་ཀུན་གྱིས་ཀུན་དང་ལྡན། །ལྷག་མ་ལྟ་བ་ཐེ་ཚོམ་མ་རིག་པ་དུས་གསུམ་པ་ཀུན་གྱིས་ཀྱང་ཇི་སྲིད་མ་སྤངས་བར་དུ་དམིགས་བྱ་དུས་གསུམ་པའི་དངོས་པོ་རིས་ལྔ་ཅར་ཀུན་དང་ལྡན་ཏེ་སོ་སོར་ངེས་པ་ལ་མི་དམིགས་པས་ཕུང་པོ་ལྔ་ཅར་ལ་དམིགས་པས་ཉོན་མོངས་པ་སྐྱེ་བ་ཡིན་པའི་ཕྱིར། གཉིས་པ་དུས་གསུམ་དཔྱད་པ་ལ། རང་ལུགས་(༡༧༨ན)
བཀོད་པ་དང་། རྩོད་པ་སྤང་བའོ། །དང་པོ་ལ། དུས་གསུམ་རྫས་སུ་གྲུབ་པར་དམ་བཅའ་བ། དེའི་སྒྲུབ་བྱེད་དགོད་པ། དེ་བྱེ་སྨྲའི་ལུགས་སུ་བསྟན་པའོ། །དང་པོ་ནི། དུས་རྣམས་ཀུན་ཏུ་ཡོད། གལ་ཏེ་འདས་མ་འོངས་རྫས་སུ་ཡོད་ན་ནི། འདུས་བྱས་རྟག་པར་འགྱུར་ཏེ། དུས་ཐམས་ཅད་དུ་ཡོད་པའི་ཕྱིར། མེད་ན་དུས་གཉིས་ཀྱི་དངོས་པོ་དེ་དག་དང་ཕྲ་རྒྱས་དེས་ལྡན་པ་དང་བྲལ་བར་ཇི་ལྟར་འགྱུར་ཞེ་ན། བྱེ་སྨྲ་རྣམས་ནི་འདུས་བྱས་ཀྱི་མཚན་ཉིད་སྐྱེ་བ་ལ་སོགས་པ་འདུ་བྱེད་རྣམས་དུས་སུ་འཕོ་བར་འཇུག་པ་དེའི་ཕྱིར། འདུས་བྱས་རྟག་པའི་མཚན་ཉིད་མིན་པར་དམ་བཅའ་བའོ། །དུས་ནི་དུས་རྣམས་ཀུན་ཏུ་ད་ལྟ་བཞིན་རང་གི་ངོ་བོས་ཡོད་པར་ནི་གསལ་བར་དམ་བཅའོ། །གཉིས་པ་སྒྲུབ་བྱེད་ལ། ལུང་གི་སྒྲུབ་བྱེད་དང་། རིགས་པའི་སྒྲུབ་བྱེད་དོ། །དང་པོ་ནི། གསུངས་ཕྱིར། །གཉིས་ཕྱིར། བཅོམ་ལྡན་འདས་ཀྱིས། དགེ་སློང་དག་གལ་ཏེ་འདས་པའི་གཟུགས་ཤིག་ཡོད་པར་མ་གྱུར་ན། འཕགས་པ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་མི་ལྟ་བར་ཡང་མི་འགྱུར་བ་ཞིག་ན། གང་གི་ཕྱིར་འདས་པའི་གཟུགས་ཡོད་པ་དེའི་ཕྱིར། འཕགས་པ་ཉན་ཐོས་ཐོས་པ་དང་ལྡན་པ་འདས་པའི་གཟུགས་ལ་མི་ལྟ་བ་ཡིན་ནོ། །གལ་ཏེ་མ་འོངས་པའི་གཟུགས་ཤིག་ཡོད་པར་མ་གྱུར་ན་འཕགས་པ་ཉན་ཐོས་ཐོས་པ་དང་ལྡན་པ་མ་འོངས་པའི་གཟུགས་ལ་མངོན་པར་དགའ་བ་མེད་པར་མི་འགྱུར་བ་ཞིག་ན། གང་གི་ཕྱིར་མ་འོངས་པའི་གཟུགས་ཡོད་པ་དེའི་ཕྱིར་འཕགས་པ་ཉན་ཐོས་ཐོས་པ་དང་ལྡན་པ་མ་འོངས་པའི་གཟུགས་ལ་མངོན་པར་དགའ་བ་མེད་པ་ཡིན་ནོ། །ཞེས་དེ་ལྟར་ཞལ་ནས་གསུངས་པའི་ཕྱིར་རོ། །དགེ་སློང་དག །གལ་ཏེ། ད་ལྟར་བྱུང་བའི་གཟུགས་ཤིག་ཡོད་པར་མ་གྱུར་ན། འཕགས་པ་ཉན་ཐོས་ཐོས་པ་དང་ལྡན་པ་ད་ལྟར་བྱུང་བའི་གཟུགས་ལ་ཡིད་འབྱུང་བར་བྱ་(༡༧༨བ)
བ་དང་འདོད་ཆགས་དང་བྲལ་བར་བྱ་བ་དང་འགོག་པར་བྱ་བའི་ཕྱིར། ཞུགས་པར་ཡང་མི་འགྱུར་བ་ཞིག་ན། འདི་ནི་མ་སྨོས་ཏེ་གཉིས་ཀ་ལས་གྲུབ་པའི་ཕྱིར་རོ། །འདི་ཞལ་ནས་མ་ཡིན་ཀྱང་མདོ་གཞན་ལས་ཡིན་ཏེ། རྣམ་པར་ཤེས་པ་ནི་གཉིས་ལ་བརྟེན་ནས་སྐྱེའོ། །གཉིས་གང་ཞེ་ན། མིག་དང་གཟུགས་རྣམས་ནས་ཡིད་དང་ཆོས་ཀྱི་བར་རོ། །འདས་མ་འོངས་མེད་ན་དེ་ལ་དམིགས་པའི་རྣམ་ཤེས་ནི་གཉིས་ལ་བརྟེན་པར་མི་འགྱུར་བ་ཞིག་ན་གཉིས་ལ་བརྟེན་ནས་སྐྱེ་བར་གསུངས་པའི་ཕྱིར། གཉིས་པ་ནི། ཡུལ་ཡོད་ཕྱིར་འབྲས་ཕྱིར། །འདས་མ་འོངས་རང་དུས་སུ་ཡོད་པ་ཡིན་ཏེ། ཡུལ་དམིགས་པ་ཡོད་ན་རྣམ་ཤེས་སྐྱེའི། མེད་ན་མི་སྐྱེ་བའི་ཕྱིར། གྲུབ་སྟེ། རྣམ་ཤེས་ཡུལ་ཡོད་པ་ལ་དམིགས་པ་ཁོ་ན་ཡིན་ན་དམིགས་པའི་ངོ་བོ་ཉིད་དུ་སྐྱེ་དགོས་ལ། དེ་ལྟར་མ་ཡིན་ན་དེར་མི་རིགས་པའི་ཕྱིར། རྗེས་འགྲོའི་དཔེ་མིག་ཤེས་བཞིན་ནོ། །གལ་ཏེ། འདས་པ་དང་མ་འོངས་པ་ད་ལྟར་གྲུབ་པ་མེད་ན། དེ་ལ་དམིགས་པའི་ཤེས་པ་ཆོས་ཅན། རྣམ་ཤེས་སུ་མི་འགྱུར་བར་ཐལ། དམིགས་པ་མེད་པའི་ཕྱིར་ཏེ། འདས་མ་འོངས་རང་དུས་དེར་མེད་པའི་ཕྱིར། དེ་ལྟར་གྲུབ་པས་ད་ལྟར་དུ་ཐལ་བ་ཡང་མི་འགྱུར་ཏེ། རང་གི་བྱ་བ་སྐྱེ་ལ་མ་འགགས་པ་མ་ཡིན་པའི་ཕྱིར། དེ་ལྟར་མ་ཡིན་ན་འདུས་མ་བྱས་ལ་ཡང་ཐལ་བར་འགྱུར་རོ། །ཡང་འདས་མ་འོངས་ཡོད་པ་ཁོ་ན་སྟེ། རྣམ་སྨིན་གྱིས་འབྲས་བུ་བསྐྱེད་པའི་ཕྱིར། ཁྱབ་པ་ཡོད་དེ། འདས་པ་མེད་ན་ཚེ་ཕྱི་མ་ལ་ལས་དགེ་མི་དགེའི་འབྲས་བུ་མི་འབྱུང་བར་ཐལ། ཚེ་ཕྱི་མའི་འབྲས་བུའི་ཚེ་རྣམ་སྨིན་གྱི་རྒྱུ་མེད་པའི་ཕྱིར། ཁྱབ་པ་ཡོད་དེ། འབྲས་བུ་རྒྱུའི་རྗེས་སུ་འགྲོ་བའི་ཕྱིར། ཡང་དགེ་བ་དང་མི་དགེ་བའི་ལས་འདས་པ་ནི་རང་གི་ངོ་བོར་ཡོད་པ་ཡིན་ཏེ། སྨིན་པའི་ཚེ་འབྲས་བུ་འབྱུང་པའི་ཕྱིར། ད་ལྟར་གྱིས་མ་འོངས་པ་དངོས་སུ་བསྐྱེད་(༡༧༩ན)
པ་བཞིན་ལན་གྲངས་གཞན་ལ་མྱོང་འགྱུར་གྱི་ལས་འདས་པས་ཀྱང་རྣམ་སྨིན་དངོས་སུ་བསྐྱེད་པར་འདོད་པས་འདས་པ་ཡོད་ལ། འདས་པ་མེད་ན་འདས་པས་རྣམ་སྨིན་དངོས་སུ་བསྐྱེད་པའང་མི་འཐད་དོ། །གསུམ་པ་དེ་བྱེ་སྨྲའི་ལུགས་སུ་བསྟན་པ་ལ། དངོས་དང་། གྲུབ་མཐའི་དབྱེ་བ། ལུགས་བཞི་པོ་གང་བཟང་བརྟག་པའོ། །དང་པོ་ནི། དེ་ཡོད་སྨྲ་བའི་ཕྱིར་ཐམས་ཅད། །ཡོད་པར་སྨྲ་བར་འདོད། ཐམས་ཅད་ཡོད་སྨྲ་ཡིན་ཕན་ཆད་ངེས་པར་འདི་ཁས་བླངས་དགོས་ཞེས་གྲག་སྟེ། དུས་གསུམ་པོ་དེ་ཐམས་ཅད་ཡོད་པར་སྨྲ་བའི་ཕྱིར་དེ་དག་ནི་ཐམས་ཅད་ཡོད་པར་སྨྲ་བར་འདོད་ཀྱི། ད་ལྟ་བ་དང་འབྲས་བུ་མ་བསྐྱེད་པའི་ལས་འདས་པ་ནི་ཡོད་ལ། མ་འོངས་པ་དང་འབྲས་བུ་བསྐྱེད་ཟིན་འདས་པ་ནི་མེད་ཅེས་སྨྲ་བ་ནི་རྣམ་པར་ཕྱེ་སྟེ་སྨྲ་བའོ། །གཉིས་པ་ནི། དེ་དག །རྣམ་བཞི་དངོས་དང་མཚན་ཉིད་དང་། །གནས་སྐབས་གཞན་གཞན་འགྱུར་ཞེས་བྱ། །ཐམས་ཅད་ཡོད་པར་སྨྲ་བ་དེ་དག་ཀྱང་ལུགས་རྣམ་པ་བཞི་སྟེ། བཙུན་པ་ཆོས་སྐྱོབ་ན་རེ། དུས་གསུམ་གྱི་དངོས་པོ་རྣམས་མ་འོངས་པ་ནས་ད་ལྟ་དང་། ད་ལྟ་ནས་འདས་པའི་དུས་སུ་འཇུག་པ་ན་དངོས་པོ་གཞན་དུ་འགྱུར་གྱི། རྫས་གཞན་དུ་འགྱུར་བ་མ་ཡིན་ཏེ། རང་བཞིན་འཁྲུལ་པ་མེད་པའི་ཕྱིར། དཔེར་ན། གསེར་སྣོད་བཅོམ་ནས་གཞན་དུ་བྱེད་པ་ན་དབྱིབས་གཞན་དུ་འགྱུར་གྱི། ཁ་དོག་གཞན་དུ་མི་འགྱུར་བ་དང་། འོ་མ་ཞོར་འགྱུར་ན་རོ་ནུས་སྨིན་པ་འདོར་གྱི། ཁ་དོག་མ་ཡིན་པ་བཞིན་མ་འོངས་པའི་དུས་ནས་ད་ལྟར་བྱུང་བའི་དུས་སུ་འོང་བ་ན། མ་འོངས་པའི་དངོས་པོ་འདོར་གྱི་རྫས་མི་འདོར་བ་དང་། ད་ལྟའི་དུས་ནས་འདས་དུས་སུ་འགྲོ་བ་ན་ད་ལྟ་བ་འདོར་གྱི། རྫས་མི་འདོར་བ་ཞེས་ཟེར་རོ་ཞེས་གྲག་གོ། །ལུགས་འདི་ལ་སྙིང་པོ་མ་མཐོང་སྟེ། རྫས་དང་དངོས་པོ་གཅིག་ཡིན་ན། རྫས་གཞན་དུ་མི་འགྱུར་བ་བཞིན་དངོས་པོ་གཞན་དུ་མི་འགྱུར་བའམ། ཡང་ན་དངོས་པོ་གཞན་དུ་འགྱུར་བ་བཞིན་(༡༧༩བ)
རྫས་ཀྱང་གཞན་དུ་འགྱུར་བར་རིགས། ཐ་དད་ན་རྫས་མི་འགྱུར་བ་ནམ་མཁའ་དང་འདྲ། དངོས་པོ་འགྱུར་བ་བུམ་པ་དང་འདྲ་ཙམ་ན། ཤེས་བྱ་ཐམས་ཅད་ལ་ཕྱེད་མར་གཤགས་ནས་ཁ་ཅིག་མི་རྟག་པར་འགྲོའོ། །བཙུན་པ་དབྱངས་སྒྲོག་ནི། མཚན་ཉིད་གཞན་དུ་འགྱུར་བ་ཡིན་ཏེ། དུས་གསུམ་གྱི་ཆོས་རྣམས་དུས་སུ་འཇུག་པ་ན། འདས་པ་ནི་འདས་པའི་མཚན་ཉིད་དང་ལྡན་ལ། མ་འོངས་པ་དང་ད་ལྟར་བྱུང་བའི་མཚན་ཉིད་ཅུང་ཟད་དང་མི་ལྡན་པ་མིན་ནོ། །མ་འོངས་པ་ནི་མ་འོངས་པའི་མཚན་ཉིད་དང་ལྡན་ལ། འདས་ད་ལྟ་དག་གི་མཚན་ཉིད་ཅུང་ཟད་ཅིག་མི་ལྡན་པ་མ་ཡིན་ནོ། །ད་ལྟར་བྱུང་བ་ནི་དེ་བྱུང་གི་མཚན་ཉིད་དང་ལྡན་ལ། འདས་མ་འོངས་གྱི་མཚན་ཉིད་ཅུང་ཟད་ཅིག་མི་ལྡན་པ་མ་ཡིན་ཏེ། དངོས་པོ་གཅིག་ཉིད་དུས་གསུམ་གྱི་མཚན་ཉིད་དང་ལྡན་པས་མཚན་ཉིད་ཐ་དད་པའི་སྒོ་ནས་དུས་གསུམ་དུ་བཞག་པའི་ཕྱིར་དང་། དེ་དག་ལ་དུས་གཞན་གྱི་མཚན་ཉིད་གཏན་མེད་པ་དང་། རྫས་ཐ་དད་པ་ནི་མ་ཡིན་པའི་ཕྱིར། དཔེར་ན། སྐྱེས་པ་བུད་མེད་གཅིག་ལ་ལྷག་པར་ཆགས་ཚོད་དུ་བུད་མེད་གཞན་ལ་མ་ཆགས་ཀྱང་འདོད་ཆགས་ཀྱི་ཐོབ་པ་ཁོ་ན་ཡོད་ཀྱི། ཀུན་ཏུ་འབྱུང་བ་མ་ཡིན་པས་བུད་མེད་གཞན་ལ་ཆགས་པ་དང་མ་བྲལ་བ་བཞིན་དུ་འདས་པ་འདས་པའི་མཚན་ཉིད་དང་ལྡན་ཚོད་དུ། ད་ལྟར་དང་མ་འོངས་པའི་མཚན་ཉིད་དང་མི་ལྡན། འོ་ན་ཡང་ད་ལྟར་དང་མ་འོངས་པའི་མཚན་ཉིད་ཅུང་ཟད་དང་ལྡན་པའོ། །བཙུན་པ་དབྱིག་བཤེས་ནི། གནས་སྐབས་གཞན་དུ་འགྱུར་བར་སྨྲ་སྟེ། ཆོས་དུས་རྣམས་སུ་འཇུག་པ་ན་བྱ་བ་མི་བྱེད་པའི་གནས་སྐབས་ན་མ་འོངས་པ་དང་། བྱེད་པ་ན་ད་ལྟ་བ་དང་། བྱས་ནས་འགག་པ་ནི་འདས་པ་སྟེ། གནས་སྐབས་དང་གནས་སྐབས་སུ་ཕྱིན་(༡༨༠ན)
ནས་གནས་སྐབས་གཞན་གྱི་སྒོ་ནས་གཞན་དང་གཞན་ཅེས་སྟོན་གྱི། རྫས་གཞན་གྱི་སྒོ་ནས་ནི་མ་ཡིན་ཏེ། དཔེར་ན། སའི་རིལ་བུ་གཅིགགཅིག་གི་ཤོད་མིག་ཏུ་བཞག་ན་གཅིག་ཅེས་བྱ། བརྒྱའི་ཤོད་མིག་ཏུ་བཞག་ན་བརྒྱ་ཞེས་བྱ། སྟོང་གི་ཤོ་མིག་ཏུ་བཞག་ན་སྟོང་ཞེས་བྱ་བ་བཞིན་ཅེས་ཟེར་རོ། །ཞེས་གྲག་གོ། །བཙུན་པ་སངས་རྒྱས་ལྷ་ན་རེ། གཞན་དང་གཞན་དུ་འགྱུར་པར་འདོད་དེ། ཆོས་དུས་རྣམས་སུ་འཇུག་པ་ན་སྔ་མ་འདས་པ་དང་ད་ལྟ་ལ་བལྟོས་ནས་མ་འོངས་པ་དང་། ད་ལྟ་བ་དང་མ་འོངས་པ་ལ་བལྟོས་ནས་སྔ་མ་འདས་པ་དང་། སྔ་མ་འདས་པ་དང་ཕྱི་མ་མ་འོངས་པ་ལ་བལྟོས་ནས་ད་ལྟ་བ་དང་། གཞན་དང་གཞན་ཅེས་བརྗོད་དེ། དཔེར་ན། བུད་མེད་ཅིག་ལ་མ་ཞེས་ཀྱང་བྱ། བུ་མོ་ཞེས་ཀྱང་བྱ་བ་བཞིན་ནོ་ཞེས་ཟེར་རོ་གྲག་སྟེ། དེ་ལྟར་བཞི་པོ་དེ་དག་ཐམས་ཅད་ནི་ཡོད་པར་སྨྲ་བ་དག་ཡིན་ནོ། །གསུམ་པ་ནི། གསུམ་པ་བཟང་སྟེ་བྱ་བ་ཡིས། །དུས་རྣམས་རྣམ་གཞག །ལུགས་དང་པོ་རྫས་རང་གི་མཚན་ཉིད་མི་འགྱུར་ལ། དངོས་པོ་གཞན་དུ་འགྱུར་ཞིང་། དངོས་པོ་རྣམས་ཀྱང་རྫས་ལས་དོན་གཞན་མ་ཡིན་པར་སྨྲ་བ་གྲངས་ཅན་གྱི་ཕྱོགས་སུ་བསླན་པར་བྱ་སྟེ། གནས་གསུམ་པར་བཀག་ཟིན་ཏོ། །ལུགས་གཉིས་པ་ལྟར་ན་ཡང་། འདས་པ་དེ་ཆོས་ཅན། མ་འོངས་པ་དང་ད་ལྟ་བར་འགྱུར་ཏེ། དེ་དག་གི་མཚན་ཉིད་དང་ལྡན་པའི་ཕྱིར། འདོད་ན་དུས་ཐམས་ཅད་འཆོལ་བར་འགྱུར་རོ། །བུད་མེད་གཅིག་ལ་ཆགས་པའི་དུས་སུ་བུད་མེད་གཞན་ལ་ཆགས་པའི་ཐོབ་པ་མ་ཆད་ཀྱང་ཆགས་པ་མངོན་གྱུར་དུ་མེད་པ་དང་། འདས་པ་ལ་མ་འོངས་པ་དང་ད་ལྟ་བའི་མཚན་ཉིད་ཡོད་པ་ག་ལ་མཚུངས། བཞི་པ་ལྟར་ན་ཡང་། འདས་པའི་དུས་གཅིག་ལ་དུས་གསུམ་དུ་འགྱུར་ཏེ། འདས་པའི་དུས་གཅིག་གི་སྔ་ཕྱི་འདས་མ་འོངས་དང་། དབུས་ཀྱི་སྐད་ཅིག་ལ་ད་ལྟར་བྱུང་(༡༨༠བ)
བའི་ཕྱིར། དཔེར་ན། ཁར་ཉིན་ཉིན་མོའི་འདས་པ་དེ་ཞེ་ཉིན་སྔ་མ་དང་། ཁར་སོང་ཕྱི་མ་ལ་བལྟོས་ནས་ད་ལྟ་བར་འཇོག་དགོས་པ་བཞིན་ནོ། །འདོད་ན། འདས་པ་ཆོས་ཅན། འདས་པ་མ་ཡིན་པར་ཐལ། མ་འོངས་པ་དང་ད་ལྟ་བ་ཡིན་པའི་ཕྱིར། ལུགས་དེ་ལས། གསུམ་པ་གནས་སྐབས་གཞན་འགྱུར་འདོད་པ་བཟང་སྟེ། དེའི་ལུགས་ཀྱི་མིག་སོགས་ཀྱི་བྱ་བ་ལྟ་བ་དང་། གཟུགས་སོགས་ཀྱི་བྱ་བ་རང་གི་དབང་པོའི་སྤྱོད་ཡུལ་དུ་གྱུར་པ་ཡིན་ལ། བྱ་བ་དེ་མི་བྱེད་པའི་ཚེ་མ་འོངས་པ་དང་། བྱེད་པའི་ཚེ་ད་ལྟའི་དུས། བྱས་ནས་འགགས་པའི་ཚེ་འདས་པ་ཞེས་བྱ་བ་ཡིས་དུས་རྣམས་རྣམ་པར་བཞག་པའི་ཕྱིར་ཞེས་གྲག་གོ། །གཉིས་པ་རྩོད་སྤང་ལ། རྩོད་པ་དང་། ལན་གཉིས་ལས། དང་པོ་ནི། གེགས་སུ་བྱེད། །དེ་ཡང་ཇི་ལྟར་གཞན་མ་ཡིན། །དུས་སུ་མི་རུང་དེ་བཞིན་དུ། །ཡོད་ན་ཅི་ཕྱིར་མ་སྐྱེས་ཞིག །འོ་ན་དུས་ཐམས་ཅད་རྫས་སུ་ཡོད་པར་གོ་གཅིག་ན། དུས་གསུམ་དུ་འཇོག་བྱེད་གང་ཡིན་དྲིས་པས། བཤད་མ་ཐག་པའི་བྱ་བ་མི་བྱེད་པ་དང་། བྱེད་པ་དང་། བྱས་ནས་འགག་པ་དེ་གསུམ་ལ་དེར་འཇོག་གོ་ཞེ་ན། འོ་ན་དེ་མཚུངས་ཀྱི་མིག་ཆོས་ཅན། ད་ལྟར་བྱུང་བ་མ་ཡིན་པར་ཐལ། མིག་གི་རྣམ་ཤེས་བསྐྱེད་པའི་བྱ་བ་མི་བྱེད་པའི་ཕྱིར། དེ་ལ་ཁོ་རྟགས་ཁྱབ་མ་གྲུབ་སྟེ། དེ་མཚུངས་ཀྱི་ལྟ་བའི་བྱ་བ་མི་བྱེད་ཀྱང་། མིག་དེ་ནི་རང་གི་རྒྱུ་མཐུན་པའི་འབྲས་བུ་འཛིན་ཅིང་འཕེན་པ་ཡིན་ལ། འབྲས་བུ་འབྱིན་པ་ཡང་ཡིན་ལ་མཇུག་ཐོགས་སུ་རྒྱུ་མཐུན་པའམ། སྐྱེས་བུ་བྱེད་པའི་འབྲས་བུ་འབྱིན་པའི་ཕྱིར། དེ་མཚུངས་ཀྱི་མིག་ད་ལྟ་བར་གྲུབ་བོ་ཞེས་ཟེར་རོ། །འོ་ན་སྐལ་མཉམ་དང་ཀུན་འགྲོ་རྣམ་སྨིན་གྱི་རྒྱུ་འདས་པ་རྣམས་ཀྱང་ཆོས་ཅན། ད་ལྟ་བར་ཐལ། འབྲས་བུ་འབྱིན་པའི་བྱ་བ་ཡོད་པའི་ཕྱིར་ཏེ། ད་ལྟར་གྱི་དང་འདས་པ་དག །གཅིག་ནི་འདས་པས་འབྱིན་པར་འགྱུར། །ཞེས་འབྱུང་བའི་ཕྱིར། ཡང་(༡༨༡ན)
འབྲས་བུ་འཛིན་འབྱིན་གྱི་བྱ་བ་གཉིས་ཀ་ཡོད་པ་དེ་ནི་ད་ལྟ་བ་ཡིན་ཀྱང་། དེ་དག་ལ་འབྲས་བུ་འབྱིན་པ་ཡོད་ཀྱང་འཛིན་པ་མེད་དོ་ཞེ་ན། འོ་ན་སྐལ་མཉམ་གྱི་རྒྱུ་སོགས་འདས་པ་ཆོས་ཅན། བྱ་བ་བྱེད་པ་ཅན་དུ་ཐལ། འབྲས་བུ་འབྱིན་འཛིན་གཉིས་ཀ་ཡོད་པ་ད་ལྟ་བའི་བྱ་བར་འདོད་པ་ལས། འབྲས་བུ་འཛིན་པའི་བྱ་བ་འགགས་པའི་ཆ་ནས་འདས་པ་དང་། འབྱིན་པའི་བྱ་བ་དང་ལྡན་པའི་ཆ་ནས་ད་ལྟ་བར་བཞག་པའི་ཕྱིར། འདོད་ན། འདས་པ་དེ་འདས་ད་ལྟ་བ་གཉིས་ཀར་ཐལ། འདས་པ་དེ་དག་འབྲས་བུ་འཛིན་པའི་མཚན་ཉིད་ཀྱི་བྱ་བ་ཞིག་པའི་ཆ་ནས་འདས་པའི་མཚན་ཉིད་དང་ལྡན་ལ། ད་ལྟར་གྱི་འབྲས་བུ་འབྱིན་པའི་ཆ་ནས་ད་ལྟར་གྱི་མཚན་ཉིད་དང་ལྡན་པའི་ཕྱིར། དེའང་འདོད་ན། མཚན་ཉིད་ཐམས་ཅད་འཆོལ་པར་འགྱུར་བས་གང་ལའང་ཡིད་རྟོན་པར་མི་བྱེད་དོ། །ཡང་དེ་དག་གི་བྱ་བ་བྱེད་པ་ལ་གེགས་སུ་ཞིག་གིས་བྱེད་དེ་མི་བྱེད་པར་ཐལ། དུས་གཉིས་ད་ལྟ་བ་བཞིན་རྫས་སུ་ཡོད་པའི་ཕྱིར། ཡང་ན་དུས་གཉིས་ད་ལྟ་བར་ཁོ་ན་བཞིན་ཆོས་དེའི་བདག་ཉིད་དུ་ཡོད་ན་རེས་འགའ་ནི་བྱ་བ་བྱེད་ལ། རེས་འགའ་ནི་བྱ་བ་མི་བྱེད་པའི་གེགས་སུས་བྱེད་ཅེས་དྲིས་པ་ལ། དེ་མ་ཐག་པ་ལ་སོགས་པའི་རྐྱེན་མ་ཚང་བས་བྱ་བ་བྱེད་པ་ལ་གེགས་བྱས་ཞེ་ན། རྐྱེན་རྣམས་མ་འཚོགས་པར་རྟག་ཏུ་ནི་མི་རུང་སྟེ། འདི་ལྟར་ཁྱེད་ནི་རྐྱེན་རྣམས་ཡོད་པ་ཉིད་དུ་ཁས་ལེན་ལ། ཡོད་པ་རྣམས་ནི་རྟག་ཏུ་ཞིག་པ་མ་ཡིན་པའི་ཕྱིར། ཡང་རང་གི་བྱ་བ་བྱས་ནས་འགགས་པ་དང་། དེ་བྱེད་པ་དང་། དེ་མ་སྐྱེས་པའི་གནས་སྐབས་ཞེས་པའི་བྱ་བ་དེའང་ཇི་ལྟར་བཏུབ་སྟེ་མི་བཏུབ་པར་ཐལ། བྱ་བ་དུས་རྟག་ཏུ་ཡོད་ཀྱང་དུས་གསུམ་དུ་འཇོག་པ་ལ་བྱ་བ་གཞན་ཞིག་དགོས་པའི་ཕྱིར། ཡང་དུས་གསུམ་དུ་འཇོག་བྱེད་(༡༨༡བ)
ཀྱི་བྱ་བ་དུས་གསུམ་ལས་ཐ་དད་པ་དེ་ཆོས་ཅན། འདུས་མ་བྱས་སུ་ཐལ། དེ་ཡོད་པ་ནི་གང་ཞིག་དུས་གསུམ་གང་ཡང་མ་ཡིན་པའི་ཕྱིར། འདོད་ན། བྱ་བ་མི་བྱེད་པས་མ་འོངས་པར་འཇོག་པ་མི་འཐད་པར་ཐལ། མ་འོངས་པར་འཇོག་བྱེད་ཀྱི་བྱ་བ་འདུས་མ་བྱས་ཡིན་པ་ནི་གང་ཞིག་དེ་ནི་རྟག་པར་ཡོད་ལ། དེ་ཡོད་ན་དེའང་ཡོད་པར་གྲུབ་པའི་ཕྱིར། གལ་ཏེ་དུས་ཀྱི་ཆོས་ལས་བྱ་བ་གཞན་ཡིན་ན་སྐྱོན་དེར་འགྱུར་ཡང་། བྱ་བ་དེ་ནི་དུས་ཀྱི་ཆོས་ལས་གཞན་མ་ཡིན་པས་སྐྱོན་དེར་མི་འགྱུར་ཞེ་ན། དེ་ལྟར་ན་བྱ་བས་དུས་གསུམ་པོ་རྣམས་སུ་རྣམ་པར་བཞག་པར་མི་རུང་སྟེ། དངོས་པོ་དང་བྱ་བ་གཅིག་ཡིན་ལ། འདས་མ་འོངས་ཀྱི་དངོས་པོའང་ད་ལྟར་ཡོད་པས་བྱ་བའང་ཡོད་པའི་ཕྱིར། མ་ཁྱབ་སྟེ། རང་གི་ངོ་བོ་དུས་བཞག་པའི་རྒྱུར་མི་འདོད་ཀྱི། ཆོས་གང་མ་སྐྱེས་པ་ནི་མ་འོངས་པ་དང་། སྐྱེས་ལ་མ་ཞིག་པ་ད་ལྟར་བྱུང་བ་དང་། ཞིག་པ་དེ་འདས་པ་ཡིན་པའི་ཕྱིར། དུས་ཀྱི་རྣམ་གཞག་འགྲུབ་བོ་སྙམ་ན། མ་སྐྱེས་པ་དང་ཞིག་པ་དེ་ཉིད་མ་གྲུབ་པས་བརྗོད་པར་བྱ་ན། འདས་མ་འོངས་ཀྱི་ཆོས་གཉིས་ཆོས་ཅན། ཅིའི་ཕྱིར་ཞིག་པ་དང་མ་སྐྱེས་པ་འགྲུབ་པར་མི་འགྱུར་བར་ཐལ། ད་ལྟར་གྱི་ཆོས་རྫས་སུ་ཡོད་པ་དེ་བཞིན་དུ་ད་ལྟ་རྫས་སུ་ཡོད་པའི་ཕྱིར་རོ། །ཡང་གཟུགས་སོགས་འདི་སྔོན་མ་འོངས་པའི་གནས་སྐབས་གང་ན་མེད་པས་མ་སྐྱེས་པ་འདི་སྔོན་ཅི་ཞིག་མ་བྱུང་བ་ཡིན་ཅེས་དྲིས་པ་ལ། སྔོན་བྱ་བ་མ་བྱུང་བས་མ་འོངས་པ་ད་ལྟར་མ་བྱུང་བ་ཡིན་ཅེ་ན། འོ་ན་དེའི་ཚེ་མ་འོངས་པའི་ཆོས་ཀྱང་མེད་པར་ཐལ། ཆོས་དང་བྱ་བ་གཞན་མ་ཡིན་པའི་ཕྱིར། ཡང་གང་ཞིག་མེད་པས་ཞིག་པ་ཞེས་པའང་ཕྱིས་འདས་པའི་གནས་སྐབས་ན་ཅི་ཞིག་མེད་ཅེས་དྲིས་པ་ལ། ཕྱིས་བྱ་བ་འགགས་པས་ད་ལྟ་བ་འདས་པར་སོང་བ་ཡིན་(༡༨༢ན)
ཅེ་ན། འོ་ན་འདས་པའི་ཆོས་ཀྱང་མེད་པར་ཐལ། འདས་པའི་ཆོས་དང་བྱ་བ་གཞན་མ་ཡིན་པས་བྱ་བ་མེད་པའི་ཕྱིར། ཡང་ཁྱོད་མ་བྱུང་བ་ལས་བྱུང་བ་དང་། བྱུང་ནས་མི་འབྱུང་བ་དང་། མ་བྱུང་བ་ལས་རེ་ཞིག་མི་འབྱུང་བར་མི་འདོད་དོ་ཞེ་ན། ད་ལྟ་དང་འདས་པ་དང་མ་འོངས་པ་ཡང་འགྲུབ་པར་མི་འགྱུར་ལ། དེ་ཁས་ལེན་ཅིང་འདོད་ན་དུས་གསུམ་རྣམ་པ་ཐམས་ཅད་དུ་མི་འགྱུར་རོ། །ཡང་དུས་གསུམ་རྟག་པར་མི་འགྱུར་ཏེ། འདུ་བྱེད་ཀྱི་མཚན་ཉིད་དང་ལྡན་པའི་ཕྱིར་ཞེས་བྱ་བ་འདི་ནི་རྟག་པ་ཡང་ཡིན། མི་རྟག་པ་ཡང་ཡིན་ཅེས་པ་འགལ་བ་ཁོ་ན་སྒྲིབ་བྱེད་ཀྱི་ཚིག་ཙམ་སྟེ། རྟག་ཏུ་ཡོད་ན་སྐྱེ་འཇིག་མི་རུང་བའི་ཕྱིར། ཡང་སྨྲས་པ། གཟུགས་ལ་སོགས་པའི་རང་བཞིན་ཡང་ནི་དུས་རྟག་ཏུ་ཡོད་ལ། གཟུགས་སོགས་ཀྱི་དངོས་པོ་ཡང་ནི་རྟག་མི་འདོད། དངོས་པོ་དེ་ལས་རང་བཞིན་གཞན་ཡིན་ནམ་ཞེ་ན། རང་བཞིན་ལས་ཀྱང་དངོས་པོ་མི་གཞན་ཅེས་འདོད་པ་ནི། རིགས་པ་མེད་པས་འདོད་རྒྱལ་དུ་ཟད་དེ་གསལ་བར་དབང་ཕྱུག་གི་ཐ་སྙད་ཡིན་པར་གསལ་བའི་ཕྱིར་རོ། །གསུངས་ཕྱིར་ཞེས་སྨྲས་པའི་དགོངས་པ་ལེན་ཚུལ་ལ། སློབ་དཔོན་ནི་ཁོ་བོ་ཅག་ཀྱང་འདས་པ་དང་མ་འོངས་པ་ཡོད་དོ་ཞེས་སྨྲ་སྟེ། སྔོན་བྱུང་བ་གང་ཡིན་པ་དེ་ནི་འདས་པ་ཡིན་ཅིང་། རང་གི་མཚན་ཉིད་དུ་མེད་ལ། རང་གི་མཚན་ཉིད་དུ་མེད་ཀྱང་རྐྱེན་ཡོད་ན་འབྱུང་བར་འགྱུར་བ་གང་ཡིན་པ་དེ་ནི་མ་འོངས་པ་ཡིན་ནོ་ཞེས་དེ་ལྟའི་དབང་དུ་བྱས་ན་ཡོད་ཅེས་བརྗོད་ཀྱི། རྫས་སུ་ཡོད་པ་ནི་མ་ཡིན་ནོ། །འདས་པ་ནི་སྔར་བྱུང་གི་ཚུལ་དང་མ་འོངས་པ་གདོད་འབྱུང་བའི་ཚུལ་དེ་ལྟ་བཞིན་དུ་ཡོད་དོ་ཞེས་དེ་སྐད་དུ་ཟེར། སྔར་བྱུང་དང་གདོད་འབྱུང་ལས་གཞན་དུ་(༡༨༢བ)
ན་ཇི་ལྟར་ཡོད། དེ་ཙམ་ལ་འདས་མ་འོངས་ཀྱི་བདག་ཉིད་དུ་ཡོད་མེད་དོ་ཞེས་བརྗོད་པ་ཙམ་མོ། །ཁྱེད་ལྟར་ན། འདས་པ་དང་མ་འོངས་པ་ཇི་ལྟར་ཉེ་བར་གནས་པ་དེ་འཇོག་མི་བཏུབ་པར་ཐལ། འདས་པ་དང་མ་འོངས་པའི་བདག་ཉིད་དུ་རྟག་པར་ཡོད་པའི་ཕྱིར། དེ་བས་ན་བཅོམ་ལྡན་འདས་ཀྱིས། རྒྱུ་འབྲས་ལ་སྐུརབ་འདེབས་པའི་ལྟ་བ་དགག་པའི་ཕྱིར། སྔོན་བྱུང་གི་རྒྱུ་བྱུང་བ་ཉིད་དང་ཕྱིས་འབྱུང་འགྱུར་གྱི་འབྲས་བུ་འབྱུང་འགྱུར་ཉིད་དུ་ཤེས་པའི་སླད་དུ་འདས་པ་ཡོད་དོ། །མ་འོངས་པ་ཡོད་དོ། །ཞེས་གསུངས་པར་ཟད་དོ། །འདས་མ་འོངས་སྒྲོ་སྐུར་བསལ་བའི་ཆེད་དུ་ཡོད་པར་གསུངས་ཀྱི། དངོས་པོ་ལ་འདས་མ་འོངས་རང་མཚན་མེད་ན་ཡོད་བྱ་བར་སྟོན་པ་ཇི་སྙམ་ན། ཡོད་ཅེས་བྱ་བའི་སྒྲ་ནི་ཆོས་ཅན། རྫས་སུ་ཡོད་ནས་དེར་ཡོད་ཅེས་བརྗོད་པ་མ་ཡིན་ཏེ། ཚིག་གི་ཕྲད་པ་ཡིན་པའི་ཕྱིར། དཔེར་ན། མར་མེ་སྔ་ན་མེད་པ་ཡོད་དོ། །ཕྱིས་མེད་པ་ཡོད་དོ་ཞེས་སྨྲ་བ་དང་། ཡང་དཔེར་ན། མར་མེ་དེ་ཤི་བ་ནི་ཡོད་མེད་ཀྱི། ཁོ་བོས་ནི་མ་བསད་དོ་ཞེས་འཛེར་བ་བཞིན་དུ་རྫས་སུ་ཡོད་པ་མིན་ཀྱང་། འདས་པ་དང་མ་འོངས་པ་ཡོད་དོ་ཞེས་གསུངས་པ་ནི་དེ་འདྲའོ། །དེ་ལྟར་མ་ཡིན་ན་འདས་མ་འོངས་འགྲུབ་པར་མི་འགྱུར་བ་ཁོ་ན་སྟེ། ད་ལྟ་བ་བཞིན་ཐམས་ཅད་ཀྱི་ཚེ་རང་གི་མཚན་ཉིད་ཀྱིས་ཡོད་པའི་ཕྱིར། ཡང་བྱེ་བྲག་ཏུ་སྨྲ་བའི་ལྟར་ན། འགགས་པའང་ཡོད་པ་མ་ཡིན་ནམ་ཞེ་ན། ཡོད་ཅེས་སྨྲ་བ་དེ་བདེན་མོད་ཀྱི། མར་མེའི་ངོ་བོ་ཉིད་འཛིན་པ་ཁོ་ནར་ཡོད་པ་ནི་མ་ཡིན་ནོ། །ཚིག་གི་ཕྲད་རང་ནི། དུས་གསུམ་པའི་ཡུལ་ཅན་ཡིན་ཏེ། བྱུང་བར་གྱུར་ཏོ། །འབྱུང་བར་འགྱུར་རོ་བྱ་བའི་དོན་ལའང་ཚིག་ཕྲད་གནས་པའི་ཕྱིར་རོ། །རྫོགས་བྱེད་ཀྱི་སློབ་མ་ཀུན་ཏུ་རྒྱུ་དབྱུག་ཐོགས་ཐོར་ཚུགས་ཅན་རྣམས་ཀྱིས། (༡༨༣ན)
འཕགས་པ་མོའུ་གལ་བུ་བསད་དོ་ཞེས་གླེང་བ་ལ། ཀུན་ཏུ་རྒྱུ་ཐོར་ཚུགས་ཅན་རྣམས་ཀྱིས། ཁར་སོང་བསད་པ་དེ་འདས་ནས་མེད་པ་ལ་བློ་རྩེ་གཏད་ནས། འདི་ལྟར་གསོད་བ་མེད་དོ་ཞེས་སྨྲས་པ་དེའི་དབང་དུ་མཛད་ནས། བཅོམ་ལྡན་འདས་ཀྱིས། ལས་འདས་པ་དང་། ཟད་པ་དང་། འགགས་པ་དང་། བྲལ་བ་དང་། རྣམ་པར་གྱུར་པ་གང་ཡིན་པ་དེ་ནི་ཡོད་དོ། །ཞེས་གང་གསུངས་པ་དེ་ཇི་ལྟ་བུ་ཞེ་ན། ཅི་ཀུན་ཏུ་རྒྱུ་དབྱུག་ཐོགས་དེ་དག་མཚམས་མེད་པའི་ལས་དེ་སྔོན་བྱུང་བ་ཉིད་དུ་ནི་འདོད་པར་གྱུར་མོད་ཀྱི། འོན་ཀྱང་ལས་འདས་པ་དེ་ནི་མེད་དོ་ཞེས་ལོག་པར་རྟོག་པ་ལ། མདོ་དེ་ལས་ནི། རྒྱུ་དེ་ལ་སྔོན་གྱི་ལས་དེས་ཀུན་ཏུ་དྲངས་ཤིང་བཞག་པའི་འབྲས་བུ་བསྐྱེད་པའི་མཐུ་ཡོད་པ་ལ་དགོངས་ཏེ་ལས་འདས་པ་ཡོད། ཅེས་གསུངས་སོ། །མདོའི་དགོངས་པ་དེ་ལྟར་མ་ཡིན་ན་ཆོས་ཅན། འདས་པ་འགྲུབ་པར་མི་འགྱུར་ཏེ། ལས་དེ་རང་གི་མཚན་ཉིད་དུ་ད་ལྟར་བྱུང་བ་ཉིད་དུ་ཡོད་ན། ད་ལྟ་ཁོ་ནར་འགྱུར་བའི་ཕྱིར། འདས་མ་འོངས་རྫས་སུ་མ་གྲུབ་པ་འདི་ལྟ་བུར་ཤེས་པར་བྱ་དགོས་ཏེ། དོན་དམ་པ་སྟོང་པ་ཉིད་ཀྱི་མདོ་ལས། མིག་ནི་སྐྱེ་བ་ན་ཡང་གང་ནས་ཀྱང་མི་འོང་ལ། འགགས་པ་ན་ཡང་གང་དུའང་སོག་པར་མི་འགྱུར། དེ་ལྟ་བས་ན་དགེ་སློང་མིག་ནི་འབྱུང་བ་ལས་འབྱུང་ཞིང་། བྱུང་ནས་ཀྱང་སླར་འཇིག་པར་འགྱུར་རོ། །ཞེས་གསུངས་ཏེ། འདས་པ་ཡོད་ན་འོང་ས་གཅིག་འདུག་པས་གང་ནས་ཀྱང་མི་འོང་ཞེས་བརྗོད་པར་མི་འོང་བ་ལ་བརྗོད་པས་འོང་ས་འདས་པ་མེད་དོ། །མ་འོངས་པ་ཡོད་ན་སོག་ས་འདུག་པས་གང་དུའང་སོག་པར་མི་འགྱུར་ཞེས་བརྗོད་པར་མི་འོང་བ་ལ་བརྗོད་པས་སོགས་མ་འོངས་པ་མེད་དོ། །གལ་ཏེ་མ་འོངས་པའི་མིག་རྫས་གྲུབ་(༡༨༣བ)
ཅིག་ཡོད་ན་ཆོས་ཅན། མ་བྱུང་བ་ལས་བྱུང་བ་ཞེས་གསུངས་པ་མི་འགྱུར་བར་ཐལ། ཡེ་བྱུང་དུ་འདུག་པའི་ཕྱིར། གལ་ཏེ་ཡེ་ཡོད་ཡིན་ཀྱང་ད་ལྟར་གྱི་དུས་སུ་མ་བྱུང་བས་འབྱུང་ངོ་ཞེས་བརྗོད་པ་ཡིན་ཅེ་ན། དུས་ཡེ་ཡོད་དུ་མི་རུང་སྟེ། ད་ལྟར་བྱུང་བའི་དུས་ནི་མིག་གི་དངོས་པོ་ལས་དོན་གཞན་མ་ཡིན་པའི་ཕྱིར། འོན་ཏེ་མིག་གི་བདག་ཉིད་དུ་སྔར་མ་བྱུང་བ་ལས་འབྱུང་ངོ་ཞེ་ན་ནི། སྔར་མེད་པ་བཞིན་དུ་མ་འོངས་པའི་མིག་མེད་དོ་ཞེས་བྱ་བ་འདི་གྲུབ་བོ། །ཡང་རྣམ་པར་ཤེས་པ་ནི་དབང་པོ་དང་ཡུལ་གཉིས་ལ་བརྟེན་ནས་སྐྱེ་པའི་ཕྱིར་ཞེས་སྨྲས་པ་ནི་ཡིད་ཀྱི་བདག་པོའི་རྐྱེན་བྱས་ནས་ཡིད་ཀྱི་རྣམ་ཤེས་བསྐྱེད་པ་ལྟར་ཆོས་རྣམས་ཀྱང་དེ་དང་འདྲའམ། འོན་ཏེ་ཆོས་རྣམས་དམིགས་པ་ཙམ་ཡིན། དང་པོ་ལྟར་ཆོས་རྣམས་ཡིད་ཀྱི་རྣམ་ཤེས་བསྐྱེད་པའི་རྐྱེན་ཡིན་ཅེ་ན། འོ་ན་རྒྱུ་ལས་འབྲས་བུ་སྔ་རོལ་དུ་འབྱུང་བར་ཐལ། མ་འོངས་པ་བསྐལ་པ་སྟོང་གི་ས་ན་ཡོད་པའི་འབྱུང་གྱུར་གྱི་ཡིད་ཀྱི་རྣམ་ཤེས་བསྐྱེད་པའི་ཕྱིར། གྲུབ་སྟེ། མ་འོངས་པའི་ཆོས་ཀྱིས་ད་ལྟ་བའི་རྣམ་ཤེས་བསྐྱེད་ན། མ་འོངས་པ་ཉེ་བས་བསྐྱེད་པ་ལས་འོས་མེད་དེ། རིགས་ན་རིང་བས་བསྐྱེད་པ་ལའང་གནོད་བྱེད་མེད་པའི་ཕྱིར། ཡང་ན་མི་འབྱུང་བ་གང་ཡིན་པ་དེ་ཆོས་ཅན། རྣམ་ཤེས་སྐྱེད་བྱེད་མ་ཡིན་པར་ཐལ། མ་འོངས་པ་མི་སྐྱེ་བའི་ཆོས་ཅན་ཡིན་པའི་ཕྱིར། མྱ་ངན་ལས་འདས་པའི་ཆོས་ཀྱང་ཆོས་ཅན། རྣམ་ཤེས་སྐྱེད་བྱེད་མ་ཡིན་ཏེ། འཁོར་བར་འཇུག་པའི་རྣམ་ཤེས་འགག་པར་བྱེད་ཀྱི། རྣམ་ཤེས་སྐྱེ་བ་དང་འགལ་བར་བྱེད་པའི་ཕྱིར། གཉིས་པ་ཆོས་རྣམས་དམིགས་པ་ཙམ་ཡིན་ནོ་ཞེ་ན། ཁོ་བོའང་འདས་མ་འོངས་ཀྱང་དམིགས་པ་ཡིན་པར་ནི་སྨྲའོ། །གལ་ཏེ་(༡༨༤ན)
འདས་མ་འོངས་རྫས་སུ་མེད་ན་ཇི་ལྟར་དམིགས་པ་ཡིན་ཅེ་ན། མེད་པ་ལ་མེད་པར་དམིགས་པ་དེ་ལྟར་ཡོད་དོ་ཞེས་སྨྲའོ། །མེད་པ་དེ་ཇི་ལྟར་དམིགས་ཞེ་ན། ད་ལྟར་གྱི་དུས་སུ་གཟུགས་སྔོན་བྱུང་བར་གྱུར་པ་དང་། མ་འོངས་པའང་ཕྱིས་འབྱུང་བར་འགྱུར་རོ་ཞེས་དམིགས་ཀྱི། འདས་པའི་གཟུགས་ཚོར་དྲན་པ་ན། འདས་པའི་གཟུགས་ཚོར་ད་ལྟ་ཡོད་དོ་ཞེས་བྱ་བ་ནི་སུ་ཡང་མི་བལྟའོ། །འོ་ན་ཅི་ཞེ་ན། གཟུགས་དེ་ཚོར་བ་དང་མིག་གི་རྣམ་ཤེས་ཀྱིས་མཐོང་བའི་སྟོབས་ཀྱིས་ཇི་ལྟར་མཐོང་བ་དང་མྱོང་བ་བཞིན་བྱུང་བར་གྱུར་ཏོ་ཞེས་བྱ་བར་བལྟའོ། །ཡང་ཅི་ད་ལྟར་གྱི་གཟུགས་ཉམས་སུ་མྱོང་བ་དེ་དང་འདྲ་བར་འདས་པའང་དྲན་ནོ། །མ་འོངས་པ་ཇི་ལྟར་ད་ལྟར་འགྱུར་བ་དེ་ལྟ་བུ་ནི་སངས་རྒྱས་ཀྱིས་མཁྱེན་ཏེ། ཡུལ་ཐམས་ཅད་ལ་ཡེ་ཤེས་ཐོགས་པ་མི་མདའ་བའི་ཕྱིར། ཞེས་བྱ་བ་འདི་ཡི་རྟགས་འདི་ནི་སློབ་དཔོན་གང་བ་སྤེལ་གྱིས་སྦྱར་བ་ཡིན་ལ། འདི་ལྟར་གྱི་ཚེ་མ་འོངས་པ་དངོས་པོའི་རྫས་སུ་མེད་པས་དེ་ཡུལ་དུ་བྱེད་པ་ན། མངོན་སུམ་དུ་མི་རུང་། རྗེས་སུ་དཔག་བས་ཤེས་པར་ནི་མི་རུང་སྟེ། ཡུལ་ལ་ཇི་ལྟ་བུ་བཞིན་རྟོག་བྲལ་མ་འཁྲུལ་བའི་མཁྱེན་བ་ཚད་མར་འཇོག་དགོས་ན། དེའི་ཡུལ་དེ་རང་སྤྱི་གཉིས་ལས་གང་རུང་དང་། འཇལ་བྱེད་ཀྱི་བློའང་མངོན་རྗེས་གང་རུང་དུ་མི་འཐད་པས་སངས་རྒྱས་ཀྱི་ཀུན་རྫོབ་མཁྱེན་པའི་ཡུལ་འདི་ནི་ཡོད་མེད་དང་། ཐ་སྙད་པའི་ཚད་མས་འགྲུབ་པ་མ་ཡིན་པར་ཐེག་དམན་གྱི་ལུགས་སུའང་གསལ་ན་གང་དག་ཐེག་པ་ཆེན་པོའི་གོ་འཕང་ལ་གནས་པར་ཁས་ལེན་ཅིང་། ཟླ་མེད་པའི་སྟོན་པ་ཆེན་པོ་འདིའི་ཡེ་ཤེས་ཀྱང་རང་ཅག་ཚུར་མཐོང་གི་བློས་བསམ་གྱིས་མི་ཁྱབ་པར་སྨྲ་བཞིན་དུ་སྟོན་པ་རིན་པོ་ཆེས་ཀུན་རྫོབ་ཐམས་ཅད་མཁྱེན་(༡༨༤བ)
པ་ན་ཀུན་རྫོབ་ཚད་མས་གྲུབ་པ་ཁོ་ན་ཞིག་མཁྱེན་དགོས་ཞེས་སྨྲ་བ་ནི་སུ་ཞིག་གིས་བཅོལ་བར་བྱས་པ་ཡིན། གལ་ཏེ་འདས་མ་འོངས་ཀྱི་དམིགས་པ་རྫས་སུ་ཡོད་ན་ཆོས་ཅན། ད་ལྟར་དུ་ཐལ་ཏེ། ད་ལྟ་བ་དེ་བཞིན་དུ་འདས་མ་འོངས་དེའང་ཡོད་པའི་ཕྱིར། འོན་ཏེ་ད་ལྟ་བ་དེ་བཞིན་དུ་འདས་མ་འོངས་མེད་དོ་ཞེ་ན། འདས་པའི་གཟུགས་ད་ལྟ་བའི་གཟུགས་སུ་མེད་པས་དམིགས་པར་མ་གྲུབ་སྟེ། དེ་ཉིད་དྲན་ཡུལ་དུ་ཤར་བའི་ཕྱིར་རོ། །གལ་ཏེ་ད་ལྟའི་གཟུགས་ནི་སྡོམ་པ་ཡིན་ལ། འདས་པའི་གཟུགས་ནི་སིལ་བུ་རྡུལ་ཕྲ་རབ་ཡིན་ནོ་ཞེ་ན། རིགས་པ་མིན་ཏེ། དྲན་པ་ན་གོང་བུར་དྲན་གྱི་སིལ་བུ་ལ་མི་དྲན་ཅིང་མི་འཛིན་པའི་ཕྱིར། མ་གྲུབ་སྟེ། ད་ལྟར་གྱི་གཟུགས་གོང་བུར་གྱུར་བ་དེ་འདས་མ་འོངས་ཀྱི་གནས་སྐབས་ན། རྡུལ་ཕྲ་རབ་ཏུ་གྱེས་པས་ད་ལྟ་བ་བཞིན་དུ་མི་འཛིན་པའི་ཕྱིར་ཞེ་ན། དེ་ལྟར་ན་རྡུལ་ཕྲ་རབ་ཆོས་ཅན། རྟག་པར་འགྱུར་ཏེ། རྡུལ་ཕྲ་རབ་ད་ལྟར་བསགས་པ་དང་། འདས་མ་འོངས་ཀྱི་དུས་ན་གྱེས་པ་ཙམ་དུ་འགྱུར་གྱི། ངོ་བོ་ལ་ཅུང་ཟད་ཀྱང་སྐྱེ་འགག་མེད་པའི་ཕྱིར། འདོད་ན། བྱེ་སྨྲ་ཁྱོད་ཀྱི་ཡ་མཚན་ཅན་འཚོ་བྱེད་བྱེ་བྲག་པའི་རྩོད་པ་ཁས་བླང་བར་འགྱུར་རོ། །གཞན་ཡང་མིག་ནི་སྐྱེ་བ་ནའང་གང་ནས་ཀྱང་མི་འོང་ཞེས་གསུངས་པའི་མདོ་ཆོས་ཅན། དེ་བོར་ཞིང་དེ་ལ་གནོད་པ་དང་འགལ་བ་བྱས་པ་ཡིན་ཏེ། འདས་པའི་དུས་ན་དེའི་རྡུལ་ཕྲ་རབ་རྣམས་སིལ་བུར་ཡོད་པ་ད་ལྟར་བསགས་པར་ཁས་བླངས་པའི་ཕྱིར། ཚོར་བ་སོགས་རྡུལ་ཕྲ་རབ་ཀྱིས་བསགས་པ་མིན་པ་འདས་མ་འོངས་རྣམས་ཆོས་ཅན། ཇི་ལྟར་ན་སིལ་བུར་རུང་བ་མ་ཡིན་ཏེ། ལུས་ཅན་མ་ཡིན་པས་ཡུལ་ན་མི་གནས་པའི་ཕྱིར། ཡང་ཚོར་སོགས་འདས་པ་དེ་དག་ཀྱང་ད་ལྟར་བྱུང་བའི་ངོ་བོ་ལྟར་ཉམས་སུ་མྱོང་ཞིང་དྲན་ན་འདས་(༡༨༥ན)
པའི་ཚོར་སོགས་དེ་དག་ཀྱང་ད་ལྟར་བཞིན་ཡོད་པའི་ཕྱིར་ཞེ་ན། ཚོར་སོགས་རྟག་པར་འགྱུར་རོ། །འོན་ཏེ་འདས་པའི་ཚོར་སོགས་ད་ལྟ་བའི་ཚོར་སོགས་ཀྱི་ངོ་བོར་མེད་ན་ནི་མེད་པའང་དམིགས་པ་ཡིན་ནོ། །ཞེས་གྲུབ་བོ། །བདུད་དགེ་སྦྱོང་གི་ཆ་བྱད་དུ་བྱས་པ་ཞིག་གིས། བདེན་པ་མཐོང་བའི་འཕགས་པ་ཞིག་ལ་ཕུང་པོ་དྲུག་ཡིན། སྐྱེ་མཆེད་བཅུ་གསུམ་ཡིན། ཁམས་བཅུ་དགུ་ཡིན་ཟེར་ནས་བསླུར་བྱུང་བས། བདེན་པ་མཐོང་བ་དེ་དེས་བསླུ་བར་མི་ནུས་པར་བཤད་གྲགས་ལ། བྱེ་སྨྲས། འོ་ན་སྐྱེ་མཆེད་བཅུ་གསུམ་པ་ཡང་དམིགས་པར་ཐལ། མེད་པ་ཡང་དམིགས་པ་ཡིན་པའི་ཕྱིར་ཞེས་པ་ལ། སློབ་དཔོན་གྱིས། མེད་པ་དམིགས་པ་ཡིན་ཀྱང་སྐྱེ་མཆེད་བཅུ་གསུམ་པ་དམིགས་པ་མིན་པས་ཅི་ལྟོ། མེད་པར་མིགས་པ་ནི་ཆོས་ཀྱི་སྐྱེ་མཆེད་ཀྱི་ནང་དུ་འདུ་ལ། འོ་ན་སྐྱེ་མཆེད་བཅུ་གསུམ་པ་མེད་དོ་སྙམ་པའི་རྣམ་པར་ཤེས་པ་འདིའི་དམིགས་པ་ཅི་ཞིག་ཡིན། བྱེ་བྲག་སྨྲ་བས། སྐྱེ་མཆེད་བཅུ་གསུམ་པ་བྱ་བའི་མིང་དེ་ཉིད་དམིགས་པ་ཡིན་ནོ་ཞེ་ན། འོ་ན་རྗོད་བྱེད་ཀྱི་མིང་དེ་མེད་པར་རྟོགས་པར་འགྱུར་གྱི། བརྗོད་བྱ་སྐྱེ་མཆེད་བཅུ་གསུམ་པ་མེད་པའི་མཚན་ཉིད་ལ་དམིགས་པ་ནི་མ་ཡིན་ནོ། །འོ་ན་མིང་ངམ་སྒྲའི་སྔ་ན་མེད་པ་ལ་དམིགས་པའང་ཅི་ཞིག་ཡིན། བྱེ་སྨྲས་དེའི་དམིགས་པ་ནི་སྒྲ་ཁོ་ནའོ་ཞེ་ན། སློབ་དཔོན་གྱིས། འོ་ན་སྒྲའི་སྔ་ན་མེད་པ་ལ་དམིགས་པ་དེ་ཆོས་ཅན། སྒྲ་མེད་དོན་དུ་གཉེར་བ་དེ་ལ་སྒྲ་དབྱུང་དགོས་པ་ཁོ་ནར་འགྱུར་ཏེ། དེ་ལ་དམིགས་པ་དེ་སྒྲ་ཁོ་ན་ལ་དམིགས་པ་ཡིན་གྱི། སྔ་ན་མེད་པ་ལ་དམིགས་པ་མ་ཡིན་པའི་ཕྱིར། དཔེར་ན། ཇི་བདག་ལ་གནོད་ཀྱི་སྒྲ་མ་འདོན་ཅིག་ཟེར་ནས་སྒྲ་མེད་དོན་དུ་གཉེར་བ་དེ་ལ་སླར་སྒྲ་བསྐྱེད་དགོས་ཏེ། སྒྲ་མེད་པར་གྱིས་ཤིག་བརྗོད་པ་དེ་ཀ་(༡༨༥བ)
སྒྲ་ཡིན་པའི་ཕྱིར་དེ་བཞིན་ནོ། །བྱེ་སྨྲས། གང་ཞིག་སྒྲ་སྔ་ན་མེད་པ་དོན་དུ་གཉེར་བ་དེ་ལ་སྒྲ་དབྱུང་དགོས་པ་ཁོ་ནར་མི་འགྱུར་ཏེ། སྒྲ་སྔ་ན་མེད་པ་དེ་མ་འོངས་པའི་གནས་སྐབས་ཡིན་པ་གང་ཞིགདེ་ལ་དམིགས་པ་ཡིན་པའི་ཕྱིར་ཞེ་ན། འོ་ན་ཇི་ལྟར་གང་ཞིག་སྔ་ན་མེད་པ་ལ་དམིགས་པ་དེ་ལ་མེད་པའི་བློར་མི་འགྱུར་བར་ཐལ། སྒྲ་སྔ་ན་མེད་པ་དེ་མ་འོངས་པའི་ས་ན་ཙེན་ནེ་ཡོད་ན་ཡོད་པ་ལ་དམིགས་པ་ཅན་ཡིན་པའི་ཕྱིར། བྱེ་སྨྲས། ཁྱབ་པ་མེད་དེ། ད་ལྟར་དུ་མེད་དོ་སྙམ་པ་དེ་ལྟ་བུར་དེ་ལ་དམིགས་པ་མེད་པའི་བློ་འབྱུང་བའི་ཕྱིར་ཞེ་ན། འོ་ན་ད་ལྟར་གྱི་དེ་ཁོ་ན་མེད་སྙམ་པ་དེ་ལྟ་བུར་དམིགས་པའི་བློ་འབྱུང་བར་མི་འགྱུར་བར་ཐལ། མ་འོངས་པ་གང་ཡིན་པ་དེ་ཉིད་ད་ལྟར་ཡིན་གྱི། དེ་ལས་གཞན་པ་ནི་མ་ཡིན་པའི་ཕྱིར་རོ། །ཡང་ན་མ་འོངས་པ་དེའི་བྱེ་བྲག་ད་ལྟའི་གནས་སྐབས་ན་མཉན་བྱ་གང་ཡིན་པ་མེད་པས་ད་ལྟ་མེད་པ་ཡིན་ཅེ་ན། ཁྱད་པར་དེ་སྔོན་མ་བྱུང་བ་ལས་ཕྱིས་འབྱུང་བར་གྲུབ་སྟེ། མ་འོངས་པའི་གནས་སྐབས་སུ་མ་བྱུང་བ་ལས་ད་ལྟ་བའི་གནས་སྐབས་སུ་བྱུང་བའི་ཕྱིར། དེ་ལྟ་བས་ན་རྣམ་པར་ཤེས་པའི་དམིགས་པ་ནི། ད་ལྟར་གྱི་གནས་སྐབས་ན་ཡོད་པ་དང་། འདས་མ་འོངས་ཀྱི་གནས་སྐབས་ན་ཡོད་མེད་གཉིས་ཀ་ཡིན་པས་ཡོད་མེད་གཉིས་ཀ་ཡིན་ནོ། །གལ་ཏེ་མེད་པ་རྣམ་ཤེས་ཀྱི་དམིགས་པ་ཡིན་ན། བྱང་སེམས་སྲིད་པ་ཐ་མ་པས། འདི་སྐད་དུ། འཇིག་རྟེན་ན་མེད་པ་གང་ཡིན་པ་དེ་བདག་གིས་ཤེས་སོ། །ཞེས་བྱ་བ་དེ་ནི་མི་སྲིད་དོ། །ཞེས་གསུངས་པས། མེད་པ་ལ་དམིགས་པའི་རྣམ་ཤེས་མེད་དོ་ཞེ་ན། སློབ་དཔོན་གྱིས། མདོའི་དགོངས་པ་ནི་མངོན་པའི་ང་རྒྱལ་ཅན་འགའ་ཞིག་གིས་ལྷའི་མིག་གི་སྣང་བ་མེད་བཞིན་དུ་མེད་པ་ལ་ཡོད་པར་མཐོང་ནས་ཡོད་པར་འཛིན་པ་དེ་དགག་(༡༨༦ན)
པའི་ཕྱིར། མེད་པ་ལ་ཡོད་པའི་ང་རྒྱལ་བྱེད་པའི་མེད་པ་དེ་ཡོང་པར་མི་མཐོང་། འོ་ན་བདག་གིས་ཡོད་པ་ལ་ཡོད་པ་ཁོ་ནར་མཐོང་བྱ་བ་དེ་ཙམ་ལ་དགོངས་སོ། །དེ་ལྟར་མ་ཡིན་པར་བློ་ཐམས་ཅད་ཀྱི་ཡུལ་ཡོད་པ་ཉིད་དུ་རྣམ་པར་བཞག་ན་ཆོས་ཅན། འཇིག་རྟེན་ན་མེད་པ་གང་ཡིན་པ་ཞེས་སོགས་རྒྱས་པར་འབྱུང་བ་གང་ཡིན་པ་དེ་ལྟ་བུར་རྟོག་པའམ་དཔྱོད་པ་དང་ཐེ་ཚོམ་དུ་ག་ལ་འགྱུར་ཏེ། བློ་རྣམས་ཀྱི་དམིགས་པ་ཡོད་མེད་གཉིས་ཀ་ཡིན་ན་འདི་སྲིད་ཀྱི་གཞན་དུ་ན་རུང་བ་མ་ཡིན་པའི་ཕྱིར། ཡང་ན་སེམས་ཅན་དེ་དག་ཀྱང་ཡོད་པ་ཁོ་ན་ཡོད་པར་མཐོང་གི། མེད་པ་ལ་མ་ཡིན་ན་གཞན་དག་ལས་བྱང་སེམས་ལ་ཁྱད་པར་ཅི་ཞིག་ཡོད། བློ་རྣམས་ཀྱི་དམིགས་པ་ཡོད་མེད་གཉིས་ཀ་ལ་བྱང་ཆུབ་སེམས་དཔས་དམིགས་པ་ཡིན་ན། སེམས་ཅན་གཞན་ལས་ཁྱད་པར་ཡོད་པ་འདི་གྲུབ་བོ། །འདི་ནི་ངེས་པར་བློ་མེད་པ་དམིགས་པ་དེ་ལྟ་བུ་ཡིན་པར་ཤེས་པར་བྱ་སྟེ། བཅོམ་ལྡན་འདས་ཀྱིས་གཞན་དུ་ང་ཡི་ཉན་ཐོས་ཀྱི་དགེ་སློང་ཚུར་ཤོག་ཅེས་བྱ་བ་ནས། དེ་ངས་ནང་གཏམ་ན་ནུབ་ཁྱད་པར་དུ་འགྲོ། ནུབ་གཏམ་ན་ནང་ཁྱད་པར་དུ་འགྲོ་སྟེ། ཡོད་པ་ལའང་ཡོད་པར་ཤེས་ལ། མེད་པ་ལའང་མེད་པར་ཤེས་སོ། །ཞེས་སོགས་གསུངས་ཏེ། དེ་ལྟ་བས་ན་འདས་མ་འོངས་ཀྱི་དམིགས་བྱེད་ཡོད་ན་ཆོས་ཅན། དམིགས་བྱ་འདས་མ་འོངས་ཡོད་པར་དམ་བཅའ། དམིགས་བྱེད་ཡིན་པའི་ཕྱིར། མིག་གི་རྣམ་ཤེས་བཞིན། ཅེས་བྱ་བའི་གཏན་ཚིགས་འདི་ནི་མ་དེས་པས་རུང་བ་མ་ཡིན་ཏེ། དམིགས་བྱེད་ཡིན་ཀྱང་དམིགས་བྱ་དེ་མེད་པར་དམིགས་བྱེད་ཡོད་པ་ལ་ཅི་ཡང་མི་ལྟོ་བའི་ཕྱིར། མདོ་སྡེ་པས་ནི། འབྲས་ཕྱིར་ཞེས་པའི་གཏན་ཚིགས་ཀྱིས་ཀྱང་མ་ཁྱབ་སྟེ། ལས་འདས་པ་ལས་འབྲས་བུ་འབྱུང་བར་མི་(༡༨༦བ)
འདོད་པའི་ཕྱིར་དང་། ལས་སྔོན་དུ་འགྲོ་བའི་སེམས་རྒྱུད་ཀྱི་ཁྱད་པར་ལས་འབྲས་བུ་འབྱུང་བར་འདོད་པའི་ཕྱིར། དཔེར་ན། ས་བོན་ལ་དངོས་སུ་འབྲས་བུ་མི་འབྱུང་། ས་བོན་གྱིས་བརྒྱུད་རྒྱུ་བྱས་ནས་ས་བོན་ལས་མྱུ་གུ་དང་། སྡོང་བུ་དང་། ཡལ་འདབ་དང་། མེ་ཏོག་དང་། དེ་ལས་འབྲས་བུ་འབྱུང་བ་བཞིན་ལས་ཀྱི་བག་ཆགས་བཞག་པ་དེ་ནུས་པ་སྟོབས་ཅན་དུ་གྱུར་བ་ལ་འབྲས་བུ་འབྱུང་བའོ། །རྒྱས་པར་བསྟན་བཅོས་ཀྱི་མཇུག་ན་བདག་དགག་པར་བརྗོད་པར་བྱའོ། །ཡང་གང་གི་འདས་མ་འོངས་རྫས་སུ་ཡོད་པ་དེའི་འབྲས་བུ་རྟག་ཏུ་ཡོད་པ་ཁོ་ནར་བརྗོད་ན། སླར་འབྲས་བུ་བསྐྱེད་པ་དེ་ལ་ལས་ཀྱི་ནུས་པ་ཅི་ཞིག་ཡོད་ཅེས་དྲིས་པ་ལ། བྱེ་བྲག་སྨྲ་བས། དེའི་ནུས་པ་ནི་ལས་དེ་བསྐྱེད་པར་ནུས་པའི་ནུས་པ་དེ་ལའོ་སྙམ་ན། འོ་ན་ན་སྔོན་མེད་པ་ལས་འབྱུང་བས་སྔོན་མེད་པ་ལས་འབྱུང་བར་གྲུབ་པ་ཡིན་ནོ། །ཡང་རྒྱུ་དང་སྐྱེ་བ་དང་འབྲས་བུ་མ་འོངས་པ་ཐམས་ཅད་ཡོད་པ་ཡིན་ན་ཆོས་ཅན། འབྲས་བུ་གང་ལ་རྒྱུ་གང་ཞིག་ནུས་ཏེ། རྒྱུ་ཐམས་ཅད་ཀྱི་དུས་ན་འབྲས་བུ་ཐམས་ཅད་ཀྱང་རྫས་སུ་ཡོད་པའི་ཕྱིར། དེ་ལྟར་ན། མུ་སྟེགས་ལོ་རྩི་བ་གསལ་བྱེད་པ་རྣམས་ཀྱི་རྩོད་པ། གང་ཡོད་པ་དེ་ནི་ཡོད་པ་ཁོ་ནའོ། །གང་མེད་པ་དེ་ནི་མེད་པ་ཁོ་ནའོ། །མེད་པ་ལ་ནི་སྐྱེ་བའང་མེད་དོ། །ཡོད་པ་ལ་ནི་འཇིག་པའང་མེད་དོ་ཞེས་བརྗོད་པ་ཡིན་ནོ། །བྱེ་བྲག་ཏུ་སྨྲ་བས། ད་ལྟར་དུ་བྱེད་ནུས་པ་ཡིན་ནོ་ཞེ་ན། སློབ་དཔོན་གྱིས་སྐྱེ་བ་འདི་ནི་ད་ལྟར་དུ་བྱེད་པ་མ་ཡིན་ཏེ། ཡོད་པའི་ཕྱིར། ད་ལྟར་དུ་བྱེད་པ་ཞེས་བྱ་བ་འདི་ཅི་ཡིན་དྲིས་པ་ལ། རྒྱུས་འབྲས་བུ་ཡུལ་གཞན་དུ་འདྲེན་པ་ཡིན་ཅེ་ན། འོ་ན་འབྲས་བུ་མི་རྟག་པར་ཐལ་བར་འགྱུར་ཏེ། ཡུལ་ནས་ཡུལ་གཞན་དུ་འདྲེན་པ་འབའ་ཞིག་ཏུ་(༡༨༧ན)
ཟད་ཀྱི། སྐྱེ་བ་ཅུང་ཟད་ཀྱང་མེད་པའི་ཕྱིར། ཡང་ཚོར་སོགས་གཟུགས་ཅན་མིན་པ་ཡུལ་གཞན་དུ་འདྲེན་པ་མི་འཐད་པར་ཐལ། ཡུལ་ཅན་མ་ཡིན་པ་ཉིད་ཀྱིས་ཡུལ་ན་མི་གནས་པའི་ཕྱིར། ཡུལ་གཞན་དུ་འདྲེན་པ་དེ་ཆོས་ཅན། སྔར་མེད་པ་མ་བྱུང་བ་ལས་འབྱུང་བ་གྲུབ་པར་ཐལ། ཡུལ་གཞན་དུ་མ་བྱུང་བ་ལས་བྱུང་བའི་ཕྱིར། གལ་ཏེ་རྒྱུས་འབྲས་བུ་རང་གི་ངོ་བོ་ཁྱད་པར་དུ་བྱེད་དེ། དེས་ན་འབྲས་བུའི་ཁྱད་པར་ཡིན་པའི་ཕྱིར་ཞེས་སྙམ་ན། འོ་ན་ནི་མ་བྱུང་བ་དང་མ་སྐྱེས་པ་ལས་བྱུང་བ་དང་སྐྱེ་བར་གྲུབ་སྟེ། ཁྱད་པར་མ་བྱུང་བ་ལས་བྱུང་བའི་ཕྱིར། རྒྱས་པར་བཤད་ནས་མཇུག་བསྡུ་བ་ནི། འདི་སྐད་དུ། གང་འདས་པ་དང་མ་འོངས་པ་རྫས་སུ་ཡོད་པར་སྨྲ་བའི་ཐམས་ཅད་ཡོད་པར་སྨྲ་བ་ནི་བསྟན་པ་ལ་ལེགས་པས་མིན་གྱི། མདོ་ལས་ཐམས་ཅད་ཡོད་དོ་ཞེས་བྱ་བ་ནི་བསྟན་པ་ལ་ལེགས་པ་ཡིན་ནོ། །མདོ་ལས་གསུངས་པ་དེ་ཇི་ལྟར་ལེགས་ཤེ་ན། ཐམས་ཅད་ཡོད་ཅེས་བྱ་བ་ནི། བྲམ་ཟེ་སྐྱེ་མཆེད་བཅུ་གཉིས་ཁོ་ནའོ་ཞེས་ཡོད་རྒྱུ་རངས་པ་དེར་བསྟན་ལ། ཡང་ན་འདས་པ་ནི་བྱུང་ཟིན་གྱི་ཚུལ་དུ་ཡོད། མ་འོངས་པ་ནི་འབྱུང་འགྱུར་གྱི་ཚུལ་དུ་ཡོད། ད་ལྟར་ནི་བྱུང་བའི་ཚུལ་གྱིས་ཡོད་ཅེས་བཤད་ཟིན་ཏོ། །བྱེ་སྨྲས། འདས་མ་འོངས་ཀྱི་ཉོན་མོངས་དེས་སམ། འདས་མ་འོངས་ཀྱི་དངོས་པོ་དང་ལྡན་པར་མི་འགྱུར་བར་ཐལ། འདས་མ་འོངས་དག་མེད་པའི་ཕྱིར་ཞེ་ན། མདོ་སྡེ་བས་འདས་པ་དེ་ལས་སྐྱེས་པ་དང་། མ་འོངས་པ་དེའི་རྒྱུ་ཡང་ཡིན་པའི་ཉོན་མོངས་པའི་ཕྲ་རྒྱས་ས་བོན་ཡོད་པས་འདས་མ་འོངས་ཀྱི་ཉོན་མོངས་དེས་ལྡན་ལ། འདས་མ་འོངས་པ་དམིགས་པའི་ཕྲ་རྒྱས་ཡོད་པས་འདས་མ་འོངས་ཀྱི་དངོས་པོ་དེ་དང་ལྡན་པ་ཡིན་ནོ། །གཉིས་པ་ལན་ནི། ཆོས་ཉིད་དག་ནི་ཟབ་པ་ཡིན། །བྱེ་སྨྲས། (༡༨༧བ)
འདས་མ་འོངས་ནི་ཡོད་པ་ཁོ་ནའོ། །གང་ཞིག་དྲང་བར་མི་ནུས་པ་དེ་ལ་ནི་འདི་ལྟར་ཆོས་རྣམས་ཀྱི་རང་བཞིན་ནམ་ངོ་བོ་ཆོས་ཉིད་དག་ནི་ཟབ་པ་ཡིན་ཏེ། དེ་གདོན་མི་ཟ་བར་རྟོག་གིས་སྒྲུབ་ནུས་པ་མ་ཡིན་པའི་ཕྱིར་ཞེས་ཟེར་རོ། །རྫས་གང་སྐྱེ་བ་དེ་འགགས་པའི་རྣམ་གྲངས་ཀྱང་ཡོད་དེ། གཟུགས་སྐྱེ་ལ་གཟུགས་འགགས་པ་ནི་རྫས་གཞན་མ་ཡིན་པའོ། །གཞན་སྐྱེ་ལ་གཞན་འགགས་པའི་རྣམ་གྲངས་ནི། སྐྱེ་ལ་མངོན་དུ་ཕྱོགས་པའི་ཕྱིར་གཞན་མ་འོངས་པ་སྐྱེ་ཞིང་། འགགས་པ་ལ་མངོན་དུ་ཕྱོགས་པའི་ཕྱིར། གཞན་ད་ལྟར་གྱི་འགགས་ལ། དུས་ཀྱང་སྐྱེ་སྟེ། སྐྱེ་བ་དུས་ཀྱིས་བསྡུས་པའི་ཕྱིར། མ་འོངས་པའི་སྐད་ཅིག་མའི་ཚོགས་ཀྱི་ངོ་བོ་དུ་མ་ཞིག་ལས་སྐད་ཅིག་མ་འགའ་ཞིག་སྐྱེ་བའི་ཕྱིར་དུས་ལས་ཀྱང་སྐྱེ་བར་གྲུབ་བོ། །མ་འོངས་པ་དཔག་ཏུ་མེད་པ་ཡོད་པ་ལ་དང་པོ་ལུགས་སུ་གཅིག་ཏུ་མི་འོང་། བྱུང་ན་ད་མན་ཆད་རྒྱུན་ཆད་ནས་འགྲོ་བས་རྒྱུན་མ་ཆད་པ་རེས་འཇོག་ཏུ་འོང་ངོ་། །གསུམ་པ་སྤངས་ཀྱང་ལྡན་པའམ་མ་བྲལ་བ་ལ། མཐོང་སྤང་དང་། སྒོམ་སྤང་ངོ་། །དང་པོ་ནི། སྡུག་བསྔལ་མཐོང་སྤང་བྱ་སྤངས་ཀྱང་། །ཀུན་འགྲོ་ལྷག་མ་རྣམས་ཀྱིས་ལྡན། །དངོས་པོ་གང་སྤངས་ན་དངོས་པོ་དེ་དང་བྲལ་བའམ། བྲལ་ན་དེས་དངོས་པོ་དེ་སྤངས་པ་ཡིན་ཅེ་ན། འདིར་སྤངས་པ་ནི་ཐོབ་པ་དང་བྲལ་བ་ཡིན་ལ། བྲལ་བ་ནི་དེ་ལ་དམིགས་པའི་ཉོན་མོངས་སྤངས་པའོ། །དེས་ན་གང་དང་བྲལ་ན་དེས་དངོས་པོ་དེ་སྤངས་པ་ནི་ཡིན་ནོ། །སྤངས་ལ་མ་བྲལ་བའང་ཡོད་དེ། སྡུག་བསྔལ་ཤེས་པ་ནི་སྐྱེས་ལ། ཀུན་འབྱུང་ཤེས་པ་ནི་མ་སྐྱེས་པའི་ཚེ་སྡུག་བསྔལ་མཐོང་བས་སྤང་བར་བྱ་བའི་རིས་སྤངས་པ་ཡིན་ནོ། །དེ་སྤངས་ཀྱང་དེ་ལ་དམིགས་པ་ཀུན་ཏུ་འགྲོ་བ་ལྷག་མ་ཀུན་འབྱུང་མཐོང་སྤོང་ཀུན་འགྲོ་རྣམས་(༡༨༨ན)
ཀྱིས་ལྡན་ནོ། །སྡུག་བསྔལ་ལ་རྗེས་སུ་ཤེས་པས་ཁམས་གོང་མ་གཉིས་ཀྱི་སྡུག་བསྔལ་མཐོང་སྤང་སྤངས་ཀྱང་། ཀུན་འབྱུང་རྗེས་ཤེས་ཀྱི་ཡེ་ཤེས་མ་སྐྱེས་བར་དུ་ཀུན་འབྱུང་གི་ཀུན་འགྲོའི་སྡུག་བསྔལ་ལ་དམིགས་ཙམ་ན་སྡུག་བསྔལ་མཐོང་སྤང་སྤངས་ཀྱང་མ་བྲལ་བ་འདིའི་རྒྱུ་མཚན་ཀུན་འབྱུང་གི་ཀུན་འགྲོས་བརྟོད་ཐག་བྱས་པའོ། །ནམ་བརྟོད་ཐག་དེ་བཅད་ཙམ་ན་སྤངས་པ་དང་བྲལ་བ་ཀུན་མཉམ་མོ། །འགོག་པ་མཐོང་སྤོང་ནི་སྤངས་པ་དང་བྲལ་བ་དུས་མཉམ་ཡིན་ལ། ལམ་ལ་ཀུན་འགྲོ་མེད་ཙམ་ན་ཀུན་འགྲོའི་དམིགས་པ་མེད་པས་ལམ་གྱི་སྤངས་པ་དང་བྲལ་བ་ཀུན་མཉམ་མོ། །གཉིས་པ་ནི། དང་པོའི་རྣམ་པ་སྤངས་ཀྱང་དེའི། །ཡུལ་ཅན་དྲི་མ་ལྷག་རྣམས་ཀྱིས། །སྒོམ་སྤང་གི་རིས་ལའང་རྣམ་པ་དགུ་ལས། དང་པོའི་རྣམ་པ་ཆེན་པོའི་ཆེན་པོ་སྤངས་པས་བྲལ་ཀྱང་དེའི་ཡུལ་ཅན་དེ་ལ་དམིགས་པའི་དྲི་མ་ཉོན་མོངས་ལྷག་མ་ཆེན་པོའི་འབྲིང་སོགས་མ་སྤངས་པ་རྣམས་ཀྱི་དམིགས་པས་ལྡན་པ་ཡིན་ནོ། །སྒོམ་སྤང་བརྒྱད་པ་མན་ཆོད་ཡེ་ཤེས་དགྲ་དོད་ཀྱིས་སྤངས་ཀྱང་། ཆུང་ངུའི་ཆུང་ངུ་ཡེ་ཤེས་མེད་པས་ཆུང་ངུའི་ཆུང་ངུ་ཡོད་ཙམ་ན། ཆུང་ངུའི་ཆུང་ངུ་བརྒྱད་པོ་མན་ཆད་ཚོ་ལ་དམིགས་ཙམ་ན་བརྒྱད་པ་ཡན་ཆད་ཚོ་དགུ་པ་བརྟོད་ཐག་ལྟ་བུ་སྟེ། བརྒྱད་པ་ཡན་ཆད་འགིང་ཕུར་ལྟ་བུ་དམིགས་པའི་དུས་སུ་བརྒྱད་པ་ཡན་ཆད་སྤངས་ཀྱང་མ་བྲལ་ལོ། །འདིར་ཡུལ་ཅན་དེ་དག་དང་ལྡན་ནོ་ཞེས་སྟོན་པ་ནི་མ་ཡིན་གྱི། འོན་ཀྱངཡུལ་ཅན་ལྡན་པས་ཡུལ་སྤང་བ་ཡང་ལྡན་ནོ་ཞེས་བྱ་བ་ནི་གྲུབ་པའི་མཐའོ། །སྨྲས་པ། བླ་ན་མེད་པའི་ཐེག་པ་ཆེན་པོ་ལ། །གྲུབ་པ་མཐར་ཕྱིན་ལམ་གྱི་འབྱོར་དགུའི་ཆེད། །ཡང་དག་ལྟ་བའི་སྣང་བ་སྦྱིན་པའི་ཕྱིར། །བདག་གི་བློ་གྲོས་རབ་ཏུ་གསལ་བ་ཡི། །འོད་ཟེར་མངོན་པར་བྱང་ཆུབ་རྒྱས་པ་འདི། །ཤེས་བྱའི་(༡༨༨བ)
ཁོངས་ན་རབ་ཏུ་ཅིས་མ་གར། །བཞི་པ་ཆོས་གང་སེམས་གང་གི་ཡུལ་ཡིན་པ་ལ། ཁམས་གསུམ་གྱི་ཆོས་ལྔ་ལ་སེམས་གང་གིས་དམིགས་པ་དང་། ཟག་མེད་ལ་སེམས་གང་གིས་དམིགས་པའོ། །དང་པོ་ལ། མཐོང་སྤང་དང་པོ་གཉིས་དང་སྒོམ་སྤང་ལ་སེམས་གང་གིས་དམིགས་པ་དང་། འགོག་ལམ་མཐོང་སྤང་ལ་སེམས་གང་གིས་དམིགས་པའོ། །དང་པོ་ལ། འདོད་པའི་སས་བསྡུས་ལ། གཟུགས་ཀྱི་སས་བསྡུས། གཟུགས་མེད་ཀྱི་སས་བསྡུས་ལ་སེམས་གང་གིས་དམིགས་པའོ། །དང་པོ་ནི། སྡུག་བསྔལ་རྒྱུ་མཐོང་གོམས་པ་ཡིས། །སྤང་བྱ་འདོད་ཁམས་ལས་སྐྱེས་པ། །རང་གི་གསུམ་དང་གཟུགས་གཏོགས་གཅིག །དྲི་མེད་རྣམ་ཤེས་སྤྱོད་ཡུལ་ལོ། །དམིགས་པ་གང་ལ་ཕྲ་རྒྱས་དུ་རྒྱས་ཚིག་རེ་ནས་བཤད་ན་བརྗོད་བྱ་མང་པོར་འགྱུར་བས། འབད་པ་ཆུང་ངུས་འདྲི་བའི་ཚེག་མང་པོ་གོ་བར་འགྱུར་བར་བསྡུས་ཏེ་འཆད་ན། ཆོས་ནི་བཅུ་དྲུག་སྟེ། ཁམས་གསུམ་དུ་སྤང་བྱ་རིས་ལྔ་ལྔ་སྟེ་ལྔ་གསུམ་བཅོ་ལྔ། ཟག་མེད་དེ་བཅུ་དྲུག་གོ། །སེམས་ཀྱང་བཅུ་དྲུག་སྟེ་དེ་དག་ཉིད་དོ། །དེའང་གཟུགས་མཐོང་སྤོང་མིན་ཙམ་ན། འདོད་ཁམས་ན་སྡུག་བསྔལ་མཐོང་སྤང་བཅུ་པོ་དེ་ཕུང་པོ་བཞི། ཀུན་འབྱུང་གི་བདུན། འགོག་པའི་བདུན། ལམ་གྱི་བརྒྱད་པོ་དེའང་ཕུང་པོ་བཞི་བཞིའོ། །སྒོམ་སྤོང་ནི་མཐོང་སྤོང་མ་གཏོགས་པའི་ཟག་བཅས་མཐའ་དག་ཡིན་ཏེ། ཕུང་པོ་ལྔའོ། །གཟུགས་ཁམས་ཀྱི། སྡུག་བསྔལ་དགུ། ཀུན་འགོག་དྲུག་དྲུགལམ་བདུན་ནི། གཟུགས་མ་གཏོགས་པའི་ཕུང་པོ་བཞི་བཞིའོ། །སྒོམ་སྤོང་ཕུང་པོ་ལྔའོ། །གཟུགས་མེད་ཀྱི་མཐོང་སྤོང་དང་སྒོམ་སྤོང་ཡང་དེ་དང་འདྲའོ། །དེ་ལ་ཆོས་གང་ཞིག་སེམས་གང་གིས་དམིགས་པ་ཡིན་པར་ཤེས་པར་བྱས་ནས་ཕྲ་རྒྱས་འདི་སྙེད་ཅིག་རྒྱས་པར་འགྱུར་རོ་ཞེས་བརྟག་པར་བྱའོ། །དེ་ལ་སྡུག་བསྔལ་མཐོང་སྤོང་ཀུན་འགྲོ་དང་ཀུན་འགྲོ་མ་ཡིན་པ་མཚུངས་ལྡན་དང་། དེའི་(༡༨༩ན)
རྒྱུ་ཀུན་འབྱུང་མཐོང་སྤང་ཀུན་འགྲོ་མཚུངས་ལྡན་དང་། ལམ་གོམས་པ་ཡིས་སྤང་བར་བྱ་བ་དགེ་བ་དང་། འདོད་ཁམས་ལས་སྐྱེས་པ་འཇིག་རྟེན་པའི་ལམ་གྱི་འདོད་པ་ན་སྤྱོད་པའི་ཆོས་ལ་དམིགས་པའི་གནས་སྐབས་ཀྱི་རང་གི་གསུམ་དང་། གཟུགས་སུ་གཏོགས་པའི་འདོད་ཁམས་ལ་ལྟ་བའི་སྐབས་ན་སྒོམ་སྤང་དང་པོའི་ཉེར་བསྡོགས་ཀྱི་བར་ཆད་མེད་པའི་ལམ་གཅིག་དང་། དྲི་མ་མེད་པ་ཆོས་ཤེས་ཕྱོགས་དང་མཐུན་པ་ལྔའི་སྤྱོད་ཡུལ་ལོ། །རྣམ་ཤེས་ཞེས་བྱ་བ་ནི་རང་གི་གསུམ་དང་གཟུགས་གཏོགས་གཅིག་དང་དྲི་མེད་ལྔ་ཅར་ལ་རྣམ་ཤེས་ཞེས་གསལ་བྱེད་དུ་སྦྱར་རོ། །འདིར་རང་སའི་སྡུག་ཀུན་མཐོང་སྤང་གིས་རང་སའི་དེ་གཉིས་ལ་དམིགས་པ་ནི་སྐལ་མཉམ་ཀུན་འགྲོའི་དབང་དུ་བྱས་པ་དག་ཡིན་ལ། རང་སའི་སྒོམ་སྤང་གིས་ཀྱང་དམིགས་པ་ནི། རང་སའི་དགེ་བ་ཟག་བཅས་ཀྱི་གསུམ་པོ་དེ་ཉིད་ལ་དམིགས་པའི་དབང་དུ་བྱས་པ་ཡིན་ཏེ། སྤང་བྱ་གསུམ་པོ་དེ་ལ་དམིགས་པའི་ཐོས་བསམ་དང་། འཇིག་རྟེན་པའི་ཡང་དག་པའི་ལྟ་བ་ལྟ་བུའོ། །གཟུགས་སུ་གཏོགས་པའི་སྒོམ་སྤང་གིས་འདོད་པའི་དེ་གསུམ་ལ་དམིགས་པའང་གཟུགས་ཀྱི་དགེ་བའི་དབང་དུ་བྱས་པ་ཡིན་ཏེ། ས་གོང་མའི་ཉོན་མོངས་ཀྱིས་འོག་མ་ལ་མི་དམིགས་པའི་ཕྱིར། གཟུགས་མེད་ཀྱི་དགེ་བས་ནི་འདོད་པ་ལ་མི་དམིགས་ཏེ་རིང་བ་བཞིས་རིང་བའི་ཕྱིར། འདོད་པ་ན་སྤྱོད་པ་འགོག་པ་དང་། ལམ་མཐོང་བས་སྤང་བར་བྱ་བའི་སེམས་དག་གིས་དམིགས་པ་ནི་མ་ཡིན་ཏེ། ཟག་མེད་ལ་དམིགས་པའི་དངོས་སུ་ལོག་པར་ཞུགས་པའི་སེམས་དག་ནི་འགོག་པ་དང་ལམ་ལ་དམིགས་པའི་ཕྱིར། ཟག་པ་དང་བཅས་པ་ལོག་ཞུགས་ཀྱི་ལོག་ཞུགས་ལ་དམིགས་པ་དག་ཀྱང་འགོག་པ་དང་ལམ་མཐོང་བས་སྤང་བར་བྱ་བ་ཙམ་ལ་དམིགས་(༡༨༩བ)
པའི་ཕྱིར་རོ། །གཉིས་པ་ནི། གཟུགས་ཁམས་ལས་སྐྱེས་རང་གི་དང་། །འོག་གསུམ་གོང་གཅིག་དྲི་མེད་ཀྱིའང་། །གཟུགས་ཁམས་ལ་སྐྱེས་པའི་ཆོས་རྣམ་པ་གསུམ་པོ་དེ་དག་ནི་སེམས་བརྒྱད་ཀྱིས་དམིགས་ཏེ། རང་གི་ཁམས་པའི་སེམས་གསུམ་པོ་དེ་དག་ཉིད་དང་། ཁམས་འོག་མའི་སྡུག་བསྔལ་དང་ཀུན་འབྱུང་མཐོང་བས་སྤང་བར་བྱ་བའི་སེམས་སྐལ་བ་མི་མཉམ་པའི་ཁམས་ཀུན་ཏུ་འགྲོ་བ་དང་མཚུངས་པར་ལྡན་པ་དང་། སྒོམ་པས་སྤང་བར་བྱ་བ་ཐོས་པ་ལས་བྱུང་བའམ་བསམ་པ་ལས་བྱུང་བ་གསུམ་པོ་དེ་དག་ཉིད་དང་། ཁམས་གོང་མའི་སྒོམ་སྤོང་ནམ་མཁའི་ཉེར་བསྡོགས་དག་གི་སེམས་གཅིག་གིས་དང་། དྲི་མེད་རྗེས་ཤེས་ཕྱོགས་མཐུན་གྱི་སེམས་ཀྱི་དམིགས་པ་ཡིན་ནོ། །གསུམ་པ་ནི། གཟུགས་མེད་ལས་སྐྱེས་ཁམས་གསུམ་གཏོགས། །གསུམ་དང་ཟག་མེད་སྤྱོད་ཡུལ་ལོ། །སྤང་བྱ་ཆོས་དེ་གསུམ་གཟུགས་མེད་ལས་སྐྱེས་པ་ནི་སེམས་བཅུའི་དམིགས་པ་སྟེ། ཁམས་གསུམ་དུ་གཏོགས་པའི་སེམས་དེ་ཚན་པ་གསུམ་སྟེ་སེམས་དགུ་དང་སེམས་ཟག་པ་མེད་པའི་སྤྱོད་ཡུལ་ལོ། །གཉིས་པ་འགོག་ལམ་མཐོང་སྤོང་ལ་སེམས་གང་གིས་དམིགས་པ་ནི། འགོག་དང་ལམ་མཐོང་སྤང་བྱ་ཀུན། །རང་གིས་གླགས་པའི་སྤྱོད་ཡུལ་ལོ། །འགོག་པ་དང་ལམ་མཐོང་བས་སྤང་བྱའི་ཆོས་ཁམས་གསུམ་པ་ཀུན་རང་གི་སེམས་འགོག་པ་དང་ལམ་མཐོང་སྤོང་རེ་རེས་གླགས་པའི་སྤྱོད་ཡུལ་ལོ། །དེའང་འགོག་པ་མཐོང་སྤོང་འདོད་ཁམས་པ་ནི་རྣམ་ཤེས་དྲུག་གི་དམིགས་པ་སྟེ་སྔར་བཤད་ལྔ་དང་རང་གི་སེམས་བཀླག་པའི་དམིགས་པའོ། །ལམ་མཐོང་སྤོང་ཡང་དེ་དང་འདྲའོ། །དེ་བཞིན་དུ་འགོག་པ་དང་ལམ་མཐོང་བས་སྤང་བྱ་དང་གཟུགས་དང་གཟུགས་མེད་དུ་གཏོགས་པའང་འགོག་ལམ་མཐོང་སྤོང་གི་སེམས་རི་གླགས་པའི་སྤྱོད་ཡུལ་ཡིན་པས་སེམས་དགུ་དང་བཅུ་གཅིག་གི་དམིགས་པའོ། །གཉིས་པ་ཟག་མེད་ལ་སེམས་གང་གིས་དམིགས་པ་ནི། ཟག་མེད་ཁམས་གསུམ་མཐའ་གསུམ་དང་། །ཟག་པ་མེད་པའི་སྤྱོད་ཡུལ་ལོ། །ཟག་མེད་ནི་ཁམས་གསུམ་ན་སྤང་བྱ་རིས་ལྔ་ལྔ་ཡོད་པའི་མཐའ་མ་གསུམ་གསུམ་གྱི་སྤྱོད་ཡུལ་(༡༩༠ན)
ཏེ། འགོག་ལམ་ལ་དངོས་སུ་ལོག་ཞུགས་དང་། སྒོམ་སྤང་དགེ་བ་ཡིན་པ་དང་། ཟག་པ་མེད་པའི་སེམས་ཀྱིའང་ཡིན་པས་བཅུའི་སྤྱོད་ཡུལ་ལོ། །དེའང་ཟག་མེད་སོ་སོར་བརྟག་འགོག་དང་ལམ་བདེན་ནི་ཁམས་གསུམ་གྱི་ལོག་ལྟ་ལ་སོགས་པ་ཟག་མེད་ལ་དམིགས་པ་རྣམས་དང་མཚུངས་ལྡན་དང་། སྒོམ་སྤང་དགེ་བ་ཟག་བཅས་ཀྱི་སེམས་དང་། ཟག་མེད་ཆོས་ཤེས་རྗེས་ཤེས་ཀྱི་དམིགས་པ་ཡིན་ལ། ནམ་མཁའ་དང་སོ་སོར་བརྟགས་མིན་གཉིས་ནི་སྒོམ་སྤང་གི་སེམས་ཉོན་མོངས་ཅན་མ་ཡིན་པ་ཁོ་ནའི་དམིགས་པ་ཡིན་ནོ། །སློབ་དཔོན་ཡོན་ཏན་བློ་གྲོས་དང་དབྱིག་བཤེས་ན་རེ། ནམ་མཁའ་དང་སོ་སོར་བརྟགས་མིན་གཉིས་སྒོམ་སྤང་ཉོན་མོངས་ཅན་དང་། དེ་མ་ཡིན་པ་གཉིས་ཀ་དམིགས་པ་ཡིན་ན་ཞེས་ཟེར་བ་ནི་མི་རིགས་ཏེ། དྲུག་ནི་ཟག་མེད་སྤྱོད་ཡུལ་ཅན། །ཅེས་བརྟགས་འགོག་དང་ལམ་བདེན་ཁོ་ན་ཉོན་མོངས་ཅན་གྱི་དམིགས་པར་བཤད་དོ། །ཡང་བཤད་མ་ཐག་པའི་དོན་དེ་ཉིད་ཚིགས་སུ་བཅད་པ་ཕྱེད་གཉིས་ཀྱིས་བསྡུ་བ་ནི། ཁམས་གསུམ་སྡུག་བསྔལ་རྒྱུ་མཐོང་དང་། །སྒོམ་པས་སྤང་བྱ་ཟག་པ་མེད། །རྣམ་ཤེས་ལྔ་བརྒྱད་བཅུ་དང་ནི། །རྣམ་ཤེས་བཅུ་ཡི་སྤྱོད་ཡུལ་ཏེ། །འགོག་དང་ལམ་མཐོང་སྤང་བྱ་ཀུན། །རང་གིས་གླགས་པའི་སྤྱོད་ཡུལ་ལོ། །ཞེས་པའི་དོན་ནི། སྡུག་བསྔལ་དང་ཀུན་འབྱུང་མཐོང་བ་དང་། སྒོམ་པས་སྤང་བར་བྱ་བ་འདོད་པ་ན་སྤྱོད་པ་དག་ནི་བརྒྱད་ཀྱི་ཡིན་ནོ། །གཟུགས་མེད་ན་སྤྱོད་པ་དག་ནི་བཅུའི་ཡིན་ནོ། །དྲི་མ་མེད་པ་དག་ཀྱང་བཅུའི་ཡིན་ནོ་ཞེས་གོང་དུ་བཤད་པ་དེ་འགོག་ལམ་གྱི་སྤང་བྱ་ཁམས་གསུམ་དུ་དམིགས་པ་རེ་རེའི་གྲངས་ཀྱིས་འཕར་པའི་སྒོ་ནས་དམིགས་པར་བྱེད་དོ། །དེས་མཚོན་ནས་སེམས་བཅུ་དྲུག་པོ་རེ་རེའི་ཡུལ་དུ་ཆོས་བཅུ་(༡༩༠བ)
དྲུག་ཏུ་འགྱུར་ཚུལ་རྣམ་པར་བཞག་ནས་ཕྲ་རྒྱས་ཇི་ལྟར་རྒྱས་ཞེས་རྟོགས་པའི་དགོས་པའི་སླད་དེ། ཕྱོགས་ཙམ་བསྟན་པར་བྱའོ་ཞེས་པ་འདི་ལ་ནི། བོད་སྔ་རབས་པ་དག་སྡོམ་དུ་བྱས་པ་ནི། ཁམས་གསུམ་བདེན་བཞི་མཐོང་སྤང་དང་། །སྒོམ་སྤང་སེམས་ཀྱི་ཡུལ་དུ་ནི། །རིམ་བཞིན་བཅོ་ལྔ་གཉིས་བཅུ་དྲུག །བཅུ་དང་གཉིས་དང་བཅུ་དྲུག་དང་། །ལྔ་དང་གཉིས་དང་བཅུ་གཅིག་འགྱུར། །ཟག་མེད་ཡུལ་དུ་བཅུ་དྲུག་འགྱུར། །ཞེས་འདོད་པའི་སྡུག་ཀུན་གྱི་སྤང་བྱའི་ཡུལ་དུ་བཅོ་ལྔ། འགོག་ལམ་གྱི་སྤང་བྱའི་ཡུལ་དུ་རང་གི་དེ་གཉིས་དང་། སྒོམ་སྤང་གི་ཡུལ་དུ་བཅུ་དྲུག་དང་། དེའི་རིགས་ཁམས་གོང་ལ་འགྲེ་བ་སྟེ། དེའི་དོན་ཚིག་ཉུང་ལ་རྟོགས་སླ་བར་བརྗོད་ན། ཁམས་གསུམ་སྡུག་ཀུན་མཐོང་སྤང་རྣམས། །རིམ་བཞིན་བཅོ་ལྔ་བཅུ་དང་ལྔར། །འགོག་ལམ་མཐོང་སྤང་གཉིས་གཉིས་སུ། །སྒོམ་སྤང་ཟག་མེད་ཀུན་ལ་དམིགས། །ཞེས་སོ། །དེ་ལྟར་ཡུལ་ཡུལ་ཅན་དེ་རྣམས་ལས་ཡུལ་གང་ལ་ཡུལ་ཅན་ཏེ་ཕྲ་རྒྱས་དུ་རྒྱས་པ་ལ། ཡུལ་དེ་ཆོས་གང་དུ་གཏོགས་པ་དང་། དེ་སེམས་དུའི་ཡུལ་དུ་འགྱུར་བ་དང་། ཡུལ་ཅན་གྱི་སེམས་དེ་ཕྲ་རྒྱས་ཡིན་མིན་དང་། ཕྲ་རྒྱས་ཡིན་པ་དེ་ཡུལ་དེ་ལ་རྒྱས་མི་རྒྱས་བཞིས་ཤེས་པར་བྱ་བ་ལ། གཟུགས་ཀྱི་ཕུང་པོ་ལ་མཚོན་ན། དེ་འདོད་གཟུགས་ཀྱི་སྒོམ་སྤོང་དང་ཟག་མེད་གསུམ་དུ་གཏོགས་ལ། འདོད་པའི་སྒོམ་སྤང་གི་གཟུགས་ལའང་རྒྱུད་ཀྱིས་བསྡུས་པའི་ཉོན་མོངས་ཅན་ཡིན་ན། འདོད་པ་རང་སའི་བདེན་པ་གཉིས་ཀྱི་ཀུན་འགྲོ་དང་། སྒོམ་སྤང་དང་། བསམ་གཏན་དང་པོའི་ཉེར་བསྡོགས་(༡༩༡ན)
དང་། སྒོམ་ལམ་ཟག་མེད་ལྔའི་ཡུལ་དུ་འགྱུར་ཞིང་། སེམས་ལྔའི་དང་པོ་གསུམ་ཕྲ་རྒྱས་དང་། ཕྱི་མ་གཉིས་སྒོམ་ལམ་ཟག་བཅས་ཟ་མེད་ཡིན་པས་ཕྲ་རྒྱས་མ་ཡིན་ལ། ཕྲ་རྒྱས་ཡིན་པ་བདེན་པ་དང་པོ་གཉིས་ཀྱི་ཀུན་འགྲོ་བཅུ་གཅིག་དང་སྒོམ་སྤང་བཞི་སྟེ་པྱ་བཅོ་ལྔ་རྒྱས་པར་འགྱུར་རོ། །རྒྱུད་ཀྱིས་བསྡུས་པའི་ཉོན་མོངས་ཅན་མ་ཡིན་པ་དང་། རྒྱུད་ཀྱིས་མ་བསྡུས་པའི་གཟུགས་ཐམས་ཅད་ལ་ནི་སྒོམ་སྤང་བཞི་པོ་ཁོ་ནར་རྒྱས་སོ་ཞེས་ཤེས་པར་བྱའོ། །ད་ནི་བདེ་བའི་དབང་པོ་ལ་དམིགས་པའི་རྣམ་ཤེས་ལ་ཕྲ་རྒྱས་དུ་ཞིག་རྒྱས་པར་འགྱུར་ཞེ་ན། བདེ་བའི་དབང་པོ་ནི་བདུན་ཏེ། འདོད་པ་ན་སྤྱོད་པ་སྒོ་ལྔའི་ས་པའི་བདེ་བའི་དབང་པོ་ལུས་ཚོར་སྒོམ་པས་སྤང་བར་བྱ་བ་སྟེ། དྲུག་པ་མིན་སྐྱེས་མིན་ཅེས་འབྱུང་བའི་ཕྱིར་དེ་དང་། གཟུགས་ན་སྤྱོད་པའི་བདེ་བ་ལ་བསམ་གཏན་དང་པོ་ན་རྣམ་ཤེས་ཚོགས་གསུམ་གྱི་བདེ་བ་སྒོམ་སྤང་དང་། གསུམ་པ་ན་ཡིད་ཀྱི་ས་པའི་སྡུག་བསྔལ་མཐོང་སྤང་ནས་སྒོམ་སྤང་གི་བར་ལྔ་པོ་དེ་དང་། བསམ་གཏན་གསུམ་པའི་ས་པ་ཁོ་ནའི་ཟག་པ་མེད་པ་གཅིག་དང་སྟེ་བདུན་ནོ། །དེ་ལ་འགོག་པ་མཐོང་བས་སྤང་བྱ་མ་གཏོགས་རྣམ་ཤེས་བཅུ་གཉིས་ཀྱིས་དམིགས་པ་ཡིན་ཏེ། འདོད་པ་ན་སྤྱོད་པ་སྡུག་ཀུན་ལམ་མཐོང་བས་སྤང་བྱ་དང་། སྒོམ་པས་སྤང་བྱ་བཞིས་དམིགས་ལ། དེའང་སྡུག་ཀུན་། །མཐོང་སྤང་གིས་དམིགས་པ་ཡིན་ཏེ། རང་ས་དང་གོང་སའི་བདེ་དབང་ལ་འཇིག་ཚོགས་དང་ལོག་པར་ལྟ་བ་སོགས་ཀྱིས་དམིགས་པའི་ཕྱིར་དང་། ལམ་མཐོང་སྤང་གིས་དམིགས་པ་ཡིན་ཏེ། ལོག་ལྟ་སོགས་དང་མཚུངས་ལྡན་གྱིས་དམིགས་པའི་ཕྱིར། སྒོམ་སྤང་གིས་དམིགས་པ་ཡིན་ཏེ། ཆགས་སོགས་(༡༩༡བ)
མཚུངས་ལྡན་གྱི་སྒོ་ནས་དམིགས་པའི་ཕྱིར། འགོག་ལམ་མཐོང་སྤོང་གིས་ནི་དམིགས་པ་མིན་ཏེ། ལོག་ལྟ་སོགས་ནི་འགོག་པ་ལ་དམིགས་ཀྱི་བདེ་བ་ལ་མི་དམིགས་པའི་ཕྱིར། ལྟ་བ་མཆོག་འཛིན་སོགས་ཀྱིའང་དམིགས་མ་ཡིན་ཏེ། རང་རིས་ལ་དམིགས་པས་རང་རིས་ལ་བདེ་བའི་དབང་པོ་མེད་པའི་ཕྱིར་རོ། །གཟུགས་ན་སྤྱོད་པ་ནི་རིས་ལྔ་ཅར་གྱིས་དམིགས་ལ། གཟུགས་མེད་པ་ན་སྤྱོད་པ་ལམ་མཐོང་སྤོང་ལོག་ལྟ་སོགས་དང་མཚུངས་ལྡན་དང་། སྒོམ་སྤོང་གི་སེམས་དགེ་བ་སྟེ་གཉིས་ཀྱིས་ཀྱང་དམིགས་ཤིང་། ཟག་པ་མེད་པའི་རྣམ་པར་ཤེས་པས་ཀྱང་དམིགས་པས། བདེ་བའི་དབང་པོ་ལ་དམིགས་པའི་རྣམ་པར་ཤེས་པ་ནི་བཅུ་གཉིས་སོ། །དེ་ལྟར་དམིགས་པ་ལས་ཕྲ་རྒྱས་རྒྱས་པར་འགྱུར་བ་དང་མི་འགྱུར་བ་ནི་ཅི་རིགས་པར་ཡོད་དེ། ཟག་མེད་ཀྱི་དམིགས་པས་ནི་ཕྲ་རྒྱས་རྒྱས་པར་མི་འགྱུར་ལ། ཁ་ཅིག་ཁོ་ན་ལས་ཁ་ཅིག་རྒྱས་པར་འགྱུར་བའི་ཕྱིར། །དེའང་ཕྲ་རྒྱས་འདོད་པ་ན་སྤྱོད་པ་རིས་བཞིས་དམིགས་པ་ན་ཇི་ལྟར་རྒྱས་ཞེ་ན། བདེ་བའི་དབང་པོ་ལ་དམིགས་པ་ལོག་ལྟ་དང་མཚུངས་ལྡན་ལ་ནི། སྡུག་བསྔལ་མཐོང་བས་སྤང་བྱའི་ཕྲ་རྒྱས་བཅུ་ཅར་ཡང་དམིགས་པ་དང་མཚུངས་ལྡན་གྱིས་རྒྱས་ལ། ཀུན་འབྱུང་མཐོང་སྤང་ཡང་དེ་དང་འདྲའོ། །ལམ་མཐོང་བས་སྤང་བྱ་སོགས་ཀྱང་དེ་ལ་དམིགས་པའི་རྣམ་པར་ཤེས་པ་དེ་ལ་རྒྱས་པར་འགྱུར་ཏེ། ལོག་ལྟ་སོགས་དང་མཚུངས་ལྡན་གྱི་སྒོ་ནས་རྒྱས་པའི་ཕྱིར་དང་། ལྟ་བ་མཆོག་འཛིན་སོགས་ཀྱང་དམིགས་པའི་སྒོ་ནས་རྒྱས་པར་འགྱུར་བའི་ཕྱིར། སྒོམ་སྤང་ཡང་རིས་དེ་ལ་རྒྱས་ཏེ། ཆགས་སོགས་བདེ་དབང་ལ་དམིགས་པའི་ཤེས་པ་དང་མཚུངས་ལྡན་གྱི་སྒོ་ནས་རྒྱས་པའི་ཕྱིར། འགོག་པ་མཐོང་སྤང་(༡༩༢ན)
གི་རིས་དེ་ལ་རྒྱས་པར་མི་འགྱུར་ཏེ། བདེ་བའི་དབང་པོ་ལ་དམིགས་པའི་རྣམ་ཤེས་མེད་པའི་ཕྱིར། གཟུགས་ན་སྤྱོད་པ་འདུས་བྱས་ལ་དམིགས་པ་ལྔ་པོ་རྣམས་རིས་བཞི་ལ་རྒྱས་པ་ནི་བཤད་མ་ཐག་འགྲེ་བས་གོ་སླའོ། །གཟུགས་མེད་ཀྱི་ལམ་མཐོང་སྤོང་དང་སྒོམ་སྤང་གི་རིས་གཉིས་ཀྱི་ལམ་གྱི་བདེ་བའི་དབང་པོ་ལ་དམིགས་པའི་རྣམ་ཤེས་ལ་ལོག་ལྟ་དང་མཚུངས་ལྡན་གྱི་སྒོ་ནས་རྒྱས་པ་དང་། ལྟ་བ་མཆོག་འཛིན་དམིགས་པའི་སྒོ་ནས་རྒྱས་པར་འགྱུར་བ་དང་། སྒོམ་པས་སྤང་བྱའི་སེམས་དགེ་བ་ལམ་གྱི་བདེ་བའི་དབང་པོ་ལ་དམིགས་པས་ཆགས་སོགས་ཀྱི་རིས་རྒྱས་པར་འགྱུར་རོ། །གཟུགས་མེད་ཀྱི་ཕྲ་རྒྱས་སྡུག་ཀུན་རྣམས་ཀྱང་ལམ་ལ་དམིགས་པའི་རྣམ་ཤེས་ལོག་ལྟ་སོགས་དང་མཚུངས་ལྡན་ལ་མཚུངས་ལྡན་གྱི་སྒོ་ནས་རྒྱས་པར་འགྱུར་བར་ཤེས་པར་བྱའོ། །ཡང་བདེ་བའི་དབང་པོ་ལ་དམིགས་པའི་རྣམ་ཤེས་བཅུ་གཉིས་པོ་དེ་ཉིད་དང་། ཕན་ཚུན་དམིགས་པའི་ཚུལ་གྱིས་བདེ་བའི་དབང་པོ་ལ་དམིགས་པའི་རྣམ་ཤེས་ལ་དམིགས་པ་དང་། གཟུགས་མེད་ན་སྤྱོད་པ་སྡུག་ཀུན་མཐོང་སྤང་གཉིས་ཀྱིས་ལམ་ལ་དམིགས་པའི་རྣམ་པར་ཤེས་པ་གཟུགས་མེད་ན་སྤྱོད་པ་ལ་མ་མཐོང་བས་སྤང་བྱ་ལོག་ལྟ་མཚུངས་ལྡན་དང་། གཟུགས་མེད་ན་སྤྱོད་པ་སྒོམ་པས་སྤང་བྱ་ལ་དམིགས་ཏེ། བཅུ་བཞི་པོ་འདི་ནི་བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་ཤེས་སོ། །བདེ་བའི་དབང་པོ་ལ་དམིགས་པ་ལ་དམིགས་པའི་རྣམ་ཤེས་དེ་ལ་ནི་སྡུག་ཀུན་མཐོང་བས་སྤང་བར་བྱ་བ་དག་ཀྱང་འཕར་ན་རྒྱས་པར་འགྱུར་ལ། འདོད་པ་ན་སྤྱོད་པའི་འགོག་པ་མཐོང་སྤང་མ་གཏོགས་རིས་བཞི་དང་། གཟུགས་མེད་ན་སྤྱོད་པ་རིས་བཞི་ལ་དམིགས་པ་དང་མཚུངས་ལྡན་གྱི་སྒོ་ནས་རྒྱས་ལ། གཟུགས་(༡༩༢བ)
ན་སྤྱོད་པ་འདུས་བྱས་ཀྱི་དམིགས་པ་རིས་ལྔ་ཅི་རིགས་པར་དམིགས་པའམ་མཚུངས་ལྡན་གྱི་སྒོ་ནས་རྒྱས་པར་འགྱུར་ཞིང་། ལམ་སྲོལ་འདིས་གཞན་ཡང་ཁོང་དུ་ཆུད་པར་བྱ་སྟེ། སྡུག་བསྔལ་གྱི་དབང་པོ་ལ་དམིགས་པའི་ཤེས་པ་ལ་ཕྲ་རྒྱས་དུ་རྒྱས་ཞེ་ན། སྡུག་བསྔལ་གྱི་དབང་པོ་ནི་འདོད་པ་ན་སྤྱོད་པ་ལུས་ཚོར་གཅིག་སྟེ་སྒོམ་པས་སྤང་བྱ་ཡིན་ནོ། །དེ་ལ་དམིགས་པ་རྣམ་ཤེས་ནི་འདོད་སྤྱོད་ཀྱི་སྡུག་བསྔལ་མཐོང་བས་སྤང་བྱ་ཀུན་འགྲོ་མཚུངས་ལྡན་དང་། སྒོམ་སྤོང་དང་། གཟུགས་ན་སྤྱོད་པའི་སྒོམ་སྤོང་དང་། ཟག་མེད་ཀྱི་དམིགས་པ་སྟེ་ལྔའོ། །དེ་ལ་སྒོམ་སྤང་གི་རིས་ནི་དེ་ཉིད་རྒྱས་ལ། སྡུག་ཀུན་མཐོང་སྤོང་གི་རིས་ནི་ཀུན་འགྲོ་མཚུངས་ལྡན་གྱི་སེམས་དང་། སྒོམ་སྤོང་གི་སེམས་ལ་ཅི་རིགས་པར་མཚུངས་ལྡན་ནམ་དམིགས་པའི་སྒོ་ནས་རྒྱ་པར་འགྱུར། སྡུག་བསྔལ་གྱི་དབང་པོ་ལ་དམིགས་པ་ལ་དམིགས་པའི་རྣམ་ཤེས་ལ་ཕྲ་རྒྱས་དུ་རྒྱས་ཞེ་ན། དེ་ལ་དམིགས་པ་ལ་དམིགས་པའི་ཤེས་པའང་ལྔ་པོ་དེ་ཉིད་དེ་ཕན་ཚུན་དུ་དམིགས་པའི་ཕྱིར་དང་། དེའི་སྟེང་དུ་འདོད་སྤྱོད་ཀྱི་ལམ་མཐོང་སྤོང་ཟག་མེད་ལ་དམིགས་པ་དང་། གཟུགས་སྤྱོད་ཀྱི་ཀུན་འགྲོ་མཚུངས་ལྡན་གྱིས་ཀྱང་དམིགས་ཏེ། གཟུགས་སྤྱོད་ཀྱི་སྒོམ་སྤོང་དགེ་སྡུག་བསྔལ་གྱི་དབང་པོ་ལ་དམིགས་པ་ལ་དམིགས་པར་བྱེད་པའི་ཕྱིར། གཟུགས་མེད་ན་ནམ་མཁའི་ཉེར་བསྡོགས་བསྡུས་པའི་རགས་སོགས་ཀྱི་རྣམ་པར་སྡུག་དབང་ལ་དམིགས་པ་དེ་མིགས་ཏེ། སྡུག་དབང་ལ་དམིགས་པ་ལ་དམིགས་པའི་རྣམ་ཤེས་བརྒྱད་དོ། །དེ་ལ་འདོད་སྤྱོད་ཀྱི་ཕྲ་རྒྱས་རིས་བཞི་སྟེ། སྡུག་ཀུན་ལ་མཐོང་བ་དང་། སྒོམ་པས་སྤང་བྱ་དང་། གཟུགས་སྤྱོད་གསུམ་སྟེ་སྡུག་ཀུན་མཐོང་བ་དང་། སྒོམ་སྤོང་དང་། གཟུགས་མེད་གཅིག་སྟེ་སྒོམ་སྤོང་(༡༩༣ན)
དང་ཀུན་འགྲོ་ལ་རྒྱས་པར་འགྱུར་རོ། །ཡིད་བདེ་ལ་དམིགས་པའི་རྣམ་ཤེས་ལ་ཕྲ་རྒྱས་དུ་རྒྱས་ཞེ་ན། དེ་ལ་དམིགས་པའི་རྣམ་ཤེས་ནི། འདོད་གཟུགས་ཀྱི་སྤང་བྱ་རིས་ལྔ་ཀར་གྱིས་དམིགས་པས་བཅུ་དང་། ཟག་མེད་གཅིག་དང་། གཟུགས་མེད་མེད་ཀྱི་ལམ་མཐོང་བ་དང་སྒོམ་པས་སྤང་བྱ་དང་། ཟག་མེད་དེ་བཅུ་གསུམ་གྱིས་དམིགས་པ་ཡིན་ནོ། །དེ་ལ་ཅི་རིགས་པ་ཕྲ་རྒྱས་འདོད་གཟུགས་ན་སྤྱོད་པ་འདུས་བྱས་ལ་དམིགས་པ་རིས་ལྔ་དང་། གཟུགས་མེད་ན་སྤྱོད་པ་རིས་གཉིས་དང་། ཀུན་འགྲོ་དག་ཀྱང་རྒྱས་པར་འགྱུར་རོ། །ཡིད་བདེའི་དབང་པོ་ལ་དམིགས་པའི་རྣམ་ཤེས་ལ་ཕྲ་རྒྱས་དུ་རྒྱས་ཞེ་ན། དེ་ལ་དམིགས་པ་ལ་དམིགས་པའི་ཤེས་པའང་བཅུ་གསུམ་པོ་དེ་ཉིད་དང་། གཟུགས་མེད་ན་སྤྱོད་པའི་སྡུག་ཀུན་མཐོང་སྤོང་གཉིས་ཏེ། བཅོ་ལྔས་དམིགས་པར་བྱེད་དོ། །དེ་ལ་གཟུགས་མེད་ཀྱི་སྡུག་ཀུན་མཐོང་བས་སྤང་བྱ་སླར་འཕང་དང་། འདོད་གཟུགས་ཀྱི་འདུས་བྱས་ལ་དམིགས་པ་དང་། འགོག་པ་མཐོང་སྤོང་མ་གཏོགས་གཟུགས་མེད་ན་སྤྱོད་པ་རིས་བཞིའང་རྒྱས་པར་འགྱུར་རོ། །སྨྲས་པ། སྙིང་སྟོབས་མཆོག་གི་ཕ་རོལ་སོན་པ་འགས། །རྒྱ་ཆེན་ལུང་ལས་ངེས་ཤེས་གཏིང་ཐོབ་སྟེ། །ཡང་དག་བློ་གྲོས་ཟབ་མོ་སྐྱེ་སྲིད་ཀྱི། །དེ་ལ་བསམས་ནས་ངས་འདིར་ལེགས་པར་བཤད། །ཟབ་དགུ་རྣ་བར་སྙན་པའི་དཔལ་མེད་ལ། །གྱི་ནའི་གྲགས་པས་ཚིམ་ལ་འདིས་ཅི་བྱ། །ཞེས་སོ། །གསུམ་པ་ཕྲ་རྒྱས་དང་བཅས་པའི་དབྱེ་བ་ནི། ཉོན་མོངས་ཕྲ་རྒྱས་བཅས་རྣམ་གཉིས། །ཉོན་མོངས་ཅན་མིན་རྒྱས་འགྱུར་གྱིས། །ཕྲ་རྒྱས་གང་དག་གིས་སེམས་རྒྱས་གང་དག་ཡིན་པའོ། །དགེ་བ་ཟག་བཅས་དང་མ་སྒྲིབ་ལུང་མ་བསྟན་རྣམས་ཕྲ་རྒྱས་དང་བཅས་པར་འཇོག་པ་ནི། དམིགས་པས་རྒྱས་འགྱུར་ཁོ་ན་དེར་འཇོག་པ་ཡིན་ཏེ། རང་སའི་ཉོན་མོངས་ཀྱིས་(༡༩༣བ)
དམིགས་ནས་མི་རྒྱས་པ་མི་སྲིད་པའི་ཕྱིར་དང་། རང་སའི་ཉོན་མོངས་དང་མཚུངས་པར་ལྡན་པ་མི་སྲིད་པའི་ཕྱིར། དེས་ན་ཟག་བཅས་ཡིན་པ་ལ། ཟག་པ་དམིགས་པ་དང་། མཚུངས་ལྡན་གང་རུང་གི་སྒོ་ནས་རྒྱས་འགྱུར་ཡིན་པས་མ་ཁྱབ་ཀྱང་། བཤད་ཐལ་ན། ཟག་པ་དམིགས་པ་དང་མཚུངས་ལྡན་གང་རུང་གིས་རྒྱས་པས་ཁྱབ་པ་ཁས་ལེན་པ་ནི་ཞི་ཏུ་མ་དཔྱད་པའོ། །ཡང་དམིགས་པ་སྤངས་མ་སྤངས་ལ་རྒྱས་མི་རྒྱས་སུ་འཇོག་པ་དེའི་དོན་ནི། གང་ལ་དམིགས་པའི་ཡུལ་དེ་སྤངས་མ་སྤངས་ལ་བྱ་བ་ཁོ་ནར་མ་ཟད་ཀྱི། དེ་ལ་དམིགས་པར་བྱེད་པའི་ཡུལ་ཅན་གྱི་ཤེས་པ་སྤངས་མ་སྤངས་ལས་ཀྱང་འཇོག་དགོས་པ་ཡིན་ཏེ། ཇི་སྐད་དུ། དེ་ལ་དམིགས་པ་ཡང་དག་པར། །ཟད་དང་དམིགས་པ་སྤངས་པས་སོ། །ཞེས་སོ། །ཡང་སེམས་དེ་དང་མཚུངས་ལྡན་སྤངས་པའི་ཕྲ་རྒྱས་གང་དག་ཡིན་པ་ནི། དཔེར་ན། ཤྭཱ་རིའི་བུ་ལྟ་བུས་སྤངས་པའི་འདས་མ་འོངས་ཀྱི་ས་ན་ཉོན་མོངས་དང་སེམས་ལྷན་ཅིག་འདུག་པ་ལྟ་བུའོ། །དེས་ན་སེམས་དེ་ཉོན་མོངས་ཅན་མིན་པས་ཕྲ་རྒྱས་རྒྱས་བས་ཁྱབ་ཀྱང་། སེམས་ཉོན་མོངས་ཅན་ཕྲ་རྒྱས་བཅས་པ་ལ་རྒྱས་དང་མི་རྒྱས་པ་རྣམ་པ་གཉིས་ཡོད་པའི་ཕྱིར་ཏེ། སོ་སྐྱེ་ལ་དམིགས་མཚུངས་གཉིས་ཀའི་སྒོ་ནས་རྒྱས་པར་འགྱུར་བ་ཡིན་ཏེ། ཕྲ་རྒྱས་དེའི་ཐོབ་པས་སེམས་རྒྱུད་བཟུང་ཞིང་། རྒྱུད་དེ་ལ་མ་འོངས་པའི་རྒྱུ་མཐུན་པའི་རྒྱུ་བཞག་པས་དེ་སྲིད་དུ་ཕྲ་རྒྱས་རྒྱས་པར་འགྱུར་བའི་ཕྱིར། འཕགས་པ་ལ་མཚུངས་ལྡན་སྤངས་ཀྱང་། དམིགས་པ་རྒྱས་པ་དང་བཅས་པ་ཡོད་དེ། སྡུག་བསྔལ་མཐོང་སྤོང་བྱ་སྤངས་ཀྱང་། །ཀུན་འགྲོ་ལྷག་མ་རྣམས་ཀྱིས་ལྡན། །དང་པོའི་རྣམ་པ་སྤངས་ཀྱང་དེའི། །ཡུལ་ཅན་དྲི་མ་ལྷག་རྣམས་ཀྱི། །ཞེས་བཤད་པའི་ཕྱིར་རོ། །གཉིས་པ་ནི། དགྲ་བཅོམ་ལ་འདས་པའི་སེམས་(༡༩༤ན)
དང་མ་འོངས་པ་མི་སྐྱེ་བའི་ཆོས་ཅན་གྱི་སེམས་ཉོན་མོངས་པ་དང་ལྷན་ཅིག་གནས་པ་ནི་མཚུངས་པར་ལྡན་པ་སྤངས་པ་ཡིན་ཏེ། དེའི་ཐོབ་པ་བཅད་པའི་ཕྱིར། དེས་ན་རྒྱས་པར་ཡང་མི་འགྱུར་ལ། གང་ཞིག་དེ་དང་ལྷན་ཅིག་རྒྱུ་བ་ཉིད་ཀྱིས་ལྷན་ཅིག་པའི་དངོས་པོ་ཡིན་པ་དེ་ནི་གཉེན་པོས་བསལ་བར་མི་ནུས་པས་སེམས་དེ་ཟག་པ་དང་བཅས་པ་ཁོ་ན་སྟེ། ངང་པས་ཆུ་ལ་འོ་མ་ལེན་པ་ལྟར་ཉོན་མོངས་པ་བཀོག་ནས་སེམས་འབའ་ཞིག་བཞག་ཏུ་མི་འདོད་དོ། །དགེ་བ་ཟག་བཅས་ལྟ་བུ་སེམས་ཉོན་མོངས་ཅན་མིན་པ་ལ་ནི་ཕྲ་རྒྱས་དང་བཅས་ཞེས་སྦྱར་དགོས་ཏེ། དབྲལ་མ་ནུས་པའི་ཕྱིར་དམིགས་པ་མ་སྤངས་པས་རྒྱས་པར་འགྱུར་གྱི། ཕྲ་རྒྱས་དང་བཅས་པའི་ཕྱིར། ཇི་སྐད་དུ། ཉོན་མོངས་པ་ནི་དམིགས་པ་ལས། །སྤང་བར་བྱ་བ་འདོད་པ་ཡིན། །ཅེས་འབྱུང་ངོ་། །ཉོན་མོངས་ཅན་མིན་པ་ལ་ཕྲ་རྒྱས་མེད་པ་ནི་རྒྱས་འགྱུར་མིན་ཏེ། དེ་ལ་དམིགས་པ་ཀུན་འགྲོ་རྣམས་སྔར་སྤངས་ཟིན་པའི་ཕྱིར་དང་། སྒོམ་པས་སྤང་བྱ་རྣམས་ཕྱིས་སྤོང་བའི་ཕྱིར་རོ། །གཉིས་པ་སྐྱེ་ཚུལ་ལ། སྐྱེ་བའི་རིམ་པ་དང་། སྐྱེ་བའི་རྒྱུའོ། །དང་པོ་ནི། རྨོངས་ལས་ཐེ་ཚོམ་དེ་ནས་ནི། །ལོག་ལྟ་དེ་ནས་འཇིག་ཚོགས་ལྟ། །དེ་ནས་མཐར་འཛིན་དེ་ནས་ནི། །ཚུལ་ཁྲིམས་མཆོག་འཛིན་དེ་ནས་ལྟ། །རང་གི་ལྟ་ལ་ང་རྒྱལ་ཆགས། །གཞན་ལ་ཞེ་སྡང་དེ་ལྟར་རིམ། །དང་པོ་ཁོ་ནར་མ་རིག་པ་དང་ལྡན་པ་ལས་བདེན་པ་རྣམས་ལ་ཀུན་ཏུ་རྨོངས་པར་འགྱུར་ཏེ། དེ་ལ་སྡུག་བསྔལ་ནས་ལམ་གྱི་བར་དུ་མི་འདོད་དོ། །རྨོངས་པར་གྱུར་པ་ལས་ཕྱོགས་གཉིས་ཐོས་ནས་སྡུག་བསྔལ་ཡིན་ནམ་མ་ཡིན་སྙམ་པ་དེ་ལྟ་བུ་ལ་སོགས་པའི་ཐེ་ཚོམ་སྐྱེ་བར་འགྱུར་རོ། །ཐེ་ཚོམ་སྐྱེས་པ་དེ་ནས་ནི་ལོག་པར་ཐོས་པ་དང་བསམ་པ་ལས་སྡུག་བསྔལ་མེད་ཅེས་སོགས་ལོག་པར་ངེས་པའི་ལོག་ལྟ་སྐྱེ་ལ། དེ་ནས་ནི་སྡུག་བསྔལ་ཕུང་པོ་བསལ་ནས་འཇིག་ཚོགས་ལ་ལྟ་བ་སྐྱེ་སྟེ། བདག་ཏུ་མངོན་པར་ཞེན་པའི་ཕྱིར། གྲག་གོ་ཞེས་པ་ནི་ལོག་ལྟ་ལས་འཇིག་ལྟ་འབྱུང་བའི་ངེས་པ་མེད་པར་(༡༩༤བ)
བསྟན་པའི་ཕྱིར་ཏེ། རེ་འགས་ལྟ་བ་མཆོག་འཛིན་ཀྱང་དེའི་མཇུག་ཐོགས་སུ་འབྱུང་བའི་ཕྱིར་ཞེས་གང་སྤེལ་གསུང་ངོ་། །དེ་ནས་འཇིག་ཚོགས་ལ་ལྟ་བ་ལས་མཐར་འཛིན་ལྟ་བ་འཇུག་སྟེ། བདག་རྟག་ཆད་ཀྱི་མཐར་འཛིན་པའི་ཕྱིར། དེ་ནས་ནི་ཚུལ་ཁྲིམས་དང་བརྟུལ་ཞུགས་མཆོག་འཛིན་འཇུག་སྟེ། གང་ལ་མཐར་འཛིན་པ་དེས་དག་པར་ཡིད་ཆེས་པའི་ཕྱིར། དེ་ནས་ཚུལ་ཁྲིམས་དང་བརྟུལ་ཞུགས་མཆོག་འཛིན་ལས་ལྟ་བ་མཆོག་འཛིན་འཇུག་སྟེ། གང་གིས་དག་པར་ཡིད་ཆེས་པ་དེ་ལ་མཆོག་ཏུ་འཛིན་པའི་ཕྱིར། དེ་ནས་ནི་རང་གི་ལྟ་བ་ལ་ཆགས་པའི་ཕྱིར་དང་། དེ་ནས་ང་རྒྱལ་སྐྱེ་སྟེ། དེས་ཁེངས་པར་འགྱུར་བའི་ཕྱིར། རང་གི་ལྟ་བ་ལ་ལྷག་པར་ཞེན་པ་དེའི་དགྲ་བོར་གྱུར་བ་གཞན་གྱི་ལྟ་བ་ལ་ཞེ་སྡང་འཇུག་གོ །གཞན་དག་ནི། གང་གིས་སངས་རྒྱས་པའི་ལྟ་བ་སྔར་བླངས་ནས་ཕྱིས་མུ་སྟེགས་པ་ལ་ལོག་ཆོས་ཐོས་ན་སངས་རྒྱས་པའི་ལྟ་བ་གཞན་ལ་ཞེ་སྡང་བར་འདོད་དེ། ཆགས་སོགས་མཐོང་བས་སྤང་བྱ་རྣམས་ཀྱི་དམིགས་པ་ནི་རང་གི་རྒྱུད་ལ་ཡོད་པའི་ལྟ་བ་ཡིན་པའི་ཕྱིར་ན། རང་རྒྱུད་ཀྱི་སྔར་གྱི་ལྟ་བ་ལ་སྡང་བར་གྲུབ་པའི་ཕྱིར། འདི་ནས་མཐོང་སྤོང་རང་གི་རྒྱུད་ལ་དམིགས་པར་བཤད་པ་དང་། གོང་འོག་ནས་གཞན་གྱི་རྒྱུད་ལ་དམིགས་པར་བཤད་པ་ནི་ཀུན་འགྲོ་ཡིན་ལ། རང་གི་རྒྱུད་ལ་བཤད་པ་ནི་ཀུན་འགྲོ་མ་ཡིན་པ་ཡིན་པའི་དབང་དུ་བྱས་པའོ། །དེ་ལྟར་བཤད་པ་འདི་ནི་ཕྲ་རྒྱས་བཅུ་པོ་དེ་དག་གི་སྐྱེ་བའི་རིམ་པ་ཡིན་ནོ། །གཉིས་པ་སྐྱེ་བའི་རྒྱུ་ནི། ཕྲ་རྒྱས་སྤངས་པ་མ་ཡིན་དང་། །ཡུལ་ནི་ཉེ་བར་གནས་པ་དང་། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །རིས་མཐུན་པ་ཕུན་སུམ་ཚོགས་པ་དང་། ཡུལ་དང་། བདེ་བ་དང་། ཆང་འཐུང་བ་དང་། སྒོམ་པའི་ཁྱད་པར་སོགས་རྒྱུ་དག་ཡིན་མོད་ཀྱི། སྐྱེ་བ་ན་གཙོ་བོའི་རྒྱུ་གསུམ་གྱིས་སྐྱེ་སྟེ། ཕྲ་རྒྱས་སྤངས་པ་མ་ཡིན་ཅེས་པས་ཕྲ་རྒྱས་ཀུན་འབྱུང་གི་(༡༩༥ན)
ཐོབ་པ་མ་བཅད་པས་མ་སྤངས་ཤིང་། སྡུག་བསྔལ་ཡོངས་སུ་མ་ཤེས་ཤིང་གཉེན་པོ་མ་སྐྱེས་པ་དང་། ཉོན་མོངས་པ་སྐྱེ་བ་དང་མཐུན་པའི་ཡུལ་ཉེ་བར་གནས་པ་དང་། ཡུལ་སྣང་བ་དེ་ལ་ཕྱིན་ཅི་ལོག་དེ་མ་ཐག་རྐྱེན་ཚུལ་བཞིན་མ་ཡིན་པ་ཡིད་ལ་བྱེད་པ་ལས་ཉོན་མོངས་པ་སྐྱེའོ། །འདི་གསུམ་ནི་རྒྱུ་དང་ཡུལ་དང་སྦྱོར་བའི་སྟོབས་སོ། །དེ་དག་ཀྱང་གཙོ་བོའི་རྒྱུ་ཚང་བར་བགྲང་བ་ཡིན་གྱི། ངེས་པར་ཚང་དགོས་པ་མ་ཡིན་ཏེ། ཡུལ་གྱི་སྟོབས་ཁོ་ན་ལས་དགྲ་བཅོམ་པ་ཉམས་པ་ལྟ་བུའི་ཕྱིར། ཞེས་གྲགས་པ་ལས་དགྲ་བཅོམ་པ་སྤངས་པ་ལས་ཉམས་པ་མེད་ཅེས་མདོ་སྡེ་པས་མ་རངས་པའི་ཚིག་གོ། །གསུམ་པ་ཕྲ་རྒྱས་ཀྱི་རྣམ་གྲངས་ལ། ངོ་བོ་དངོས་དང་། གང་ལ་མཚུངས་པར་ལྡན་པ་དང་། སྒྲིབ་པ་ལྔ་བསྟན་པའོ། །དང་པོ་ལ། མདོ་ལས་འབྱུང་བའི་དོན་དང་། བསྟན་བཅོས་ལས་འབྱུང་བ་བསྟན་པའོ། །དང་པོ་ལ། དངོས་དང་། ངེས་ཚིག་གོ། །དང་པོ་ལ། ཟག་པ་དང་། ཆུ་སྦྱོར་དང་། ཉེར་ལེན་ནོ། །དང་པོ་ལ། འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པ་ལོགས་ཤིག་ཏུ་བསྟན་པའི་རྒྱུ་མཚན་ནོ། །དང་པོ་ནི། འདོད་ན་གཏི་མུག་མ་གཏོགས་པའི། །ཉོན་མོངས་ཀུན་ནས་དཀྲིས་བཅས་ཟག །འདོད་ཁམས་ན་གཏི་མུག་ལྔ་མ་གཏོགས་པའི་ཉོན་མོངས་པ་ལྟ་བ་བཅུ་གཉིས་དང་། ཐེ་ཚོམ་བཞི་དང་། འདོད་ཆགས། ཁོངཁྲོ། ང་རྒྱལ་ལྔ་ལྔ་སྟེ་སུམ་ཅུ་རྩ་གཅིག་དང་། ཀུན་ནས་དཀྲིས་པ་འཆད་འགྱུར་ངོ་ཚ་མེད་སོགས་བཅུ་དང་བཅས་པ་བཞི་བཅུ་རྩ་གཅིག་ནི་འདོད་པའི་ཟག་པ་ཡིན་ནོ། །གཉིས་པ་སྲིད་པའི་ཟག་པ་ལ། མཚན་གཞི་ངོས་བཟུང་བ་དང་། གོང་མ་གཉིས་ཀ་དེར་ངེས་པའི་རྒྱུ་མཚན་ནོ། །དང་པོ་ནི། གཟུགས་དང་གཟུགས་ནི་མེད་པ་ན། །ཕྲ་རྒྱས་ཁོ་ན་སྲིད་པའི་ཟག །གཟུགས་དང་གཟུགས་ནི་མེད་པ་ན། མ་རིག་པ་རྣམས་མ་གཏོགས་གཟུགས་ནི་ལྟ་བ་བཅུ་གཉིས་དང་། ཐེ་ཚོམ་བཞི། འདོད་ཆགས་ལྔ། ང་རྒྱལ་ལྔ་(༡༩༥བ)
སྟེ་ཉི་ཤུ་རྩ་དྲུག་དང་གཟུགས་མེད་ན་སྤྱོད་པའང་ཉེར་དྲུག་སྟེ། ཕྲ་རྒྱས་ལྔ་བཅུ་རྩ་གཉིས་ཁོ་ན་སྲིད་པའི་ཟག་པའོ། །རྨུགས་རྒོད་རྒྱགས་པ་ཁམས་གསུམ་ན། ཞེས་ཀུན་དཀྲིས་རྨུགས་རྒོད་གཉིས་ཀྱང་ཡོད་པ་མ་ཡིན་ནམ། རབ་ཏུ་བྱེད་པ་ལས། སྲིད་པའི་ཟག་པ་གང་ཞེ་ན། མ་རིག་པ་རྣམས་མ་གཏོགས་པ་དེ་ལས་གཞན་གཟུགས་དང་གཟུགས་མེད་པ་དང་ལྡན་པའི་ཀུན་ཏུ་སྦྱོར་བ་དང་། འཆིང་བ་དང་། ཕྲ་རྒྱས་དང་། ཉེ་ཉོན་དང་། ཀུན་དཀྲིས་གང་དག་ཡིན་པའོ། །ཞེས་བཤད་ན། །འདིར་དེ་མ་སྨོས་ཞེ་ན། ཁ་ཆེ་བ་ན་རེ། འདི་གཉིས་ནི་འདོད་ཆགས་སོགས་དང་མཚུངས་པར་ལྡན་པའི་ཕྱིར་དང་། ཕྲག་དོག་སེར་སྣ་འགྱོད་ཁྲོ་འཆབ་པ་རྣམས་མ་རིག་པ་ཙམ་དང་མཚུངས་ལྡན་ཡིན་པའི་ཕྱིར། རང་དབང་ཅན་མིན་པ་ལྟ་བུ་ནི་མ་ཡིན་པས་མ་སྨོས་ཞེས་ཟེར་རོ། །དེ་ལྟར་ན། འདོད་པའི་ངོ་ཚ་ཁྲེལ་མེད་རྨུགས་རྒོད་རྣམས་ཀྱང་འདོད་ཟག་མ་ཡིན་པར་འགྱུར་ཏེ། ཆགས་སོགས་མཚུངས་པར་ལྡན་པ་རང་དབང་མ་ཡིན་པའི་ཕྱིར་རོ་ཞེ་ན། འདིར་རང་གི་འཇུག་པ་ཤས་ཆུང་བས་རང་དབང་ཅན་ལ་ཡིན་པར་འདོད་ཀྱི། ཆགས་སོགས་དང་མཚུངས་པར་ལྡན་པས་རང་དབང་ཅན་མ་ཡིན་པ་ནི་མ་ཡིན་ནོ་ཞེས་འདོད་དོ། །གཉིས་པ་ནི། དེ་ལུང་མ་བསྟན་ཁ་ནང་བལྟས། །མཉམ་གཞག་ས་པའི་ཕྱིར་གཅིག་བྱས། །ཁམས་གོང་གི་ཕྲ་རྒྱས་དེ་གཉིས་ཀའང་ལུང་དུ་མ་བསྟན་པ་དང་། ཡུལ་གཙོ་བོར་མི་བྱེད་པར་ཁ་ནང་དུ་བལྟས་ཏེ་འཇུག་པ་དང་། མཉམ་པར་བཞག་པའི་ས་པ་དག་ཡིན་པའི་ཕྱིར། ཆོས་མཐུན་པ་གསུམ་གྱིས་གཅིག་ཏུ་བྱས་ཏེ། རྒྱུ་གང་གིས་སྲིད་པའི་འདོད་ཞེས་བཤད་པ་དེ་ཉིད་ཀྱིས་སྲིད་པའི་ཟག་པ་ཞེས་བྱའོ། །གསུམ་པ་མ་རིག་པའི་ཟག་པ་ལོགས་སུ་འཇོག་པའི་རྒྱུ་མཚན་ནི། རྩ་བ་མ་རིག་ཡིན་པས་ན། །ལོགས་ཤིག་ཏུ་ནི་ཟག་པར་བསྟན། །མ་རིག་པ་ཁམས་གསུམ་པ་རྫས་བཅོ་ལྔ་ནི་མ་རིག་པའི་ཟག་(༡༩༦ན)
པ་ཞེས་གྲུབ་བོ། །འདོད་པའི་ཟག་པ་སོགས་དེ་དག་ཐམས་ཅད་དང་འཁོར་བའི་རྩ་བ་མ་རིག་པ་ཡིན་པས་ན་མ་རིག་པ་ཕྱེ་སྟེ་ལོགས་ཤིག་ཏུ་ནི་ཟག་པར་བསྟན་ཏེ། མདོ་ལས། འཇིག་རྟེན་འདི་དང་ཕ་རོལ་ན། །འདོད་དང་ཆགས་པས་བསླངས་པ་ཡི། །ངན་འགྲོ་གང་དག་ཅི་ཡོད་པ། །ཐམས་ཅད་མ་རིག་རྩ་བ་ཅན། །ཅེས་གསུངས་སོ། །གཉིས་པ་ཆུ་སྦྱོར་བཤད་པ་ནི། ཆུ་བོ་སྦྱོར་བའང་དེ་བཞིན་དུ། །ལྷ་རྣམས་གསལ་ཕྱིར་ལོགས་ཤིག་བསྟན། །ཟག་པར་མ་ཡིན་གྲོགས་མེད་རྣམས། །འཇོག་པའི་རྗེས་སུ་མི་མཐུན་ལོ། །ཆུ་བོ་བཞི་སྟེ་ལྟ་བ་རྣམས་མ་གཏོགས་པའི་འདོད་པའི་ཟག་པ་ཉིད་འདོད་པ་ཆུ་བོ་དང་། སྲིད་པའི་ཟག་པ་སྲིད་པའི་ཆུ་བོ་དང་། ལྟ་བའི་ཆུ་བོ་དང་། མ་རིག་པའི་ཆུ་བོའོ། །སྦྱོར་བའང་དེ་བཞིན་དུ་རིག་པར་བྱའོ། །ལྟ་བ་རྣམས་ནི་གསལ་བའི་ཕྱིར་ཆུ་བོ་དང་སྦྱོར་བ་དག་གི་ནར་དུ་ལོགས་ཤིག་ཏུ་བསྟན་ཏོ་ཞེས་གྲག་གོ། །གྲག་ཅེས་པས་གདུལ་བྱའི་སྐྱེ་བོའི་དབང་གིས་ལྟ་བའི་སྦྱོར་བ་ལོགས་ཤིག་ཏུ་བཤད་ཅེས་གཞན་ལུགས་སྟོན་པའོ། །ལྟ་བ་རྣམས་ཟག་པ་དག་ཏུ་ལོགས་ཤིག་ཏུ་བཞག་པ་མ་ཡིན་ཏེ། གྲོགས་མེད་པའི་ལྟ་རྐྱང་རྣམས་ཟག་པའི་ངེས་ཚིག་འཇོག་བྱེད་ཡིན་ན། འཇོག་པའི་རྗེས་སུ་མི་མཐུན་པའི་ཕྱིར། འདི་དག་གྲོགས་དང་བཅས་པ་ཁོ་ན་ཟག་པ་རྣམས་ཀྱི་ནང་དུ་ཟག་པ་དག་ཏུ་བཤད་དེ་བསྲེས་ཏེ་བཤད་པ་ཡིན་ནོ། །ཞེས་ཟེར་རོ་ཞེས་གྲག་གོ། །ལོའི་སྒྲ་ལྟ་བ་རྣམས་གཡོ་བ་དང་གསལ་བས་ཟག་པ་དག་ཏུ་ལོགས་སུ་མ་བཤད་ན། མ་རིག་པ་ཡང་བརྟན་པའི་ཕྱིར་དང་། མི་གསལ་བའི་ཕྱིར་དང་། ཆུ་སྦྱོར་དུ་ལོགས་སུ་བསྟན་པར་མི་བྱ་ཞེས་བསྟན་པའི་ཕྱིར་ཞེས་གང་སྤེལ་གསུང་ངོ་། །དེ་ལྟར་ན།་འདོད་པའི་ཆུ་བོ་རྫས་ཉི་ཤུ་རྩ་དགུ་སྟེ། འདོད་ཆགས་དང་། ཁོང་ཁྲོ་དང་། ང་རྒྱལ་བཅོ་ལྔ་དང་། ཐེ་ཚོམ་བཞི་དང་། ཀུན་དཀྲིས་བཅུའོ། །སྲིད་པའི་ཆུ་བོ་རྫས་ཉི་ཤུ་རྩ་བརྒྱད་དེ། ཁམས་གཉིས་(༡༩༦བ)
ཀྱི་འདོད་ཆགས་བཅུ། ང་རྒྱལ་བཅུ་སྟེ་ཉི་ཤུ། ཐེ་ཚོམ་བརྒྱད་དེ་ཉེར་བརྒྱད་དོ། །ཁམས་གསུམ་ན་ལྟ་བ་བཅུ་གཉིས་བཅུ་གཉིས་ཡོད་པས་ལྟ་བའི་རྫས་སུམ་ཅུ་རྩ་དྲུག་གོ། །མ་རིག་པའི་ཆུ་བོའི་རྫས་ནི་བཅོ་ལྔའོ། །སྦྱོར་བ་ཡང་ཆུ་བོ་བཞིན་དུ་འདོད་པའི་སྦྱོར་བ་རྫས་ཉི་ཤུ་རྩ་དགུ། སྲིད་པའི་སྦྱོར་བ་ཉི་ཤུ་རྩ་བརྒྱད། ལྟ་བའི་སྦྱོར་བ་རྫས་སུམ་ཅུ་རྩ་དྲུག་གོ། །མ་རིག་པའི་སྦྱོར་བ་རྫས་བཅོ་ལྔའོ་ཞེས་རིག་པར་བྱའོ། །གསུམ་པ་ཉེར་ལེན་བཤད་པ་ནི། ཇི་སྐད་བཤད་ཉིད་མ་རིག་བཅས། །ཉེར་ལེན་རྣམས་ཏེ་ལྟ་རྣམ་གཉིས། །ཕྱེ་བའི་ཕྱིར་རོ་མ་རིག་པ། །འཛིན་པར་བྱེད་པ་མིན་ཕྱིར་བསྲེས། །ཇི་སྐད་བཤད་པ་ཉིད་འདོད་པའི་སྦྱོར་བའི་རྫས་ཉི་ཤུ་རྩ་དགུ། མ་རིག་པ་ལྔ་དང་བཅས་པ་རྫས་སུམ་རྩ་བཞི་ཁོ་ནར་འདོད་པ་ཉེ་བར་ལེན་པ་རྣམས་ཏེ། འདོད་ཆགས་ཁོང་ཁྲོ་ང་རྒྱལ་མ་རིག་པ་ལྔ་བཞི་ཉི་ཤུ། ཐེ་ཚོམ་བཞི། ཀུན་དཀྲིས་བཅུའོ། །སྲིད་པའི་སྦྱོར་བ་མ་རིག་པ་དང་བཅས་པ་རྫས་སུམ་ཅུ་རྩ་བརྒྱད་ཁོ་ན་བདག་ཏུ་སྨྲ་བ་ཉེ་བར་ལེན་པ་སྟེ། འདོད་ཆགས་དང་ང་རྒྱལ་དང་མ་རིག་པ་ལྔ་དང་བཅས་པས་སུམ་ཅུ་དང་ཐེ་ཚོམ་བརྒྱད་དོ། །ལྟ་བ་ལ་ལྟ་བ་ཉེར་ལེན་དང་ཚུལ་ཁྲིམས་བརྟུལ་ཞུགས་ཉེར་ལེན་རྣམ་པ་གཉིས་སུ་ཕྱེ་བ་སྟེ་འབྱུང་བའི་ཕྱིར་རོ། །ཚུལ་ཁྲིམས་དང་བརྟུལ་ཞུགས་ཉེར་ལེན་ནི། སྡུག་བསྔལ་དང་ལམ་གྱི་གཉིས་རེ་ཁམས་རེ་ན་ཡོད་པས་རྫས་དྲུག་གོ། །ཅིའི་ཕྱིར་ལྟ་བ་རྣམས་ལས་དེ་ལོགས་སུ་ཕྱུང་ཞེ་ན། ལམ་གྱི་དགྲར་གྱུར་པའི་དོན་གྱིས་ཏེ། གྲངས་ཅན་པའི་རྣལ་འབྱོར་དང་རིགས་པ་ཅན་པའི་ཚིག་དོན་དྲུག་ཤེས་པ་ལ་སོགས་པས་ཐར་པར་ལྟ་བའི་ཕྱིར། ཡང་ཁྱིམ་པ་དང་རབ་བྱུང་་བའི་ཕྱོགས་གཉིས་ཀ་བསླུ་བའི་དོན་གྱིས་ཏེ། འདི་ཁྱིམ་པ་རྣམས་ཀྱང་ལམ་མིན་ལ་ལམ་དུ་འདུ་ཤེས་པས་ཟས་མི་ཟ་བ་དང་། མེ་ཆུར་འཇུག་པ་དང་། མི་སྨྲ་བ་དང་དཔའ་བོ་བྱེད་པ་ལ་སོགས་བསླུ་ལ། རབ་བྱུང་རྣམས་ཀྱང་ཡུལ་ཡིད་དུ་འོང་བ་སྤངས་པའི་ཚུལ་ཁྲིམས་དང་བརྟུལ་ཞུགས་(༡༩༧ན)
མཆོག་འཛིན་གྱིས་དག་པར་ཡིད་ཆེས་པས་བསླུ་བར་འགྱུར་བའི་ཕྱིར་རོ། །མ་རིག་པ་དང་བསྲེས་ནས་ཉེར་ལེན་དུ་བཤད་ཀྱི། ལོགས་སུ་ཅིས་མ་བཤད་ཅེ་ན། སྲིད་པ་འཛིན་པའི་དོན་གྱི་ཉེར་ལེན་ཡིན་ན་ཆོས་ཅན། འདྲེས་པའི་མ་རིག་པ་ནི་ཉོན་མོངས་གཞན་དང་འབྲེལ་བའི་སྟོབས་ཀྱིས་ལྟ་བ་ལས་གཞན་པའི་ཉོན་མོངས་པ་རྣམས་དང་བསྲེས་ནས་འདོད་པ་ཉེར་ལེན་དང་། བདག་ཏུ་སྨྲ་བ་ཉེར་ལེན་དུ་བཤད་དེ། མ་འདྲེས་པའི་མ་རིག་པ་འབའ་ཞིག་པས་ནི་མི་གསལ་བས་འཁོར་བར་འཛིན་པར་བྱེད་པ་མིན་པའི་ཕྱིར་རོ། །འདི་ནི་བྱེ་སྨྲའི་ལུགས་ཡིན་ལ། སློབ་དཔོན་རང་ལུགས་ནི། འདུན་པའི་འདོད་ཆགས་ཁོ་ན་ཉེར་ལེན་ཡིན་པས་མ་རིག་པ་ཉེར་ལེན་དུ་མ་བཤད་པ་ཡིན་གྱི། འཛིན་བྱེད་མ་ཡིན་པས་ལོགས་སུ་མ་བཤད་པ་མ་ཡིན། དེས་ན་སྦྱོར་བ་དང་ཉེར་ལེན་ནི་འདུན་པའི་འདོད་ཆགས་ཉིད་ཡིན་། ཉོན་མོངས་པ་གཞན་ནི་མ་ཡིན་ཏེ། སྦྱོར་བ་དང་ཉེར་ལེན་གྱི་དོན་དངོས་སུ་འཁོར་བར་སྦྱོར་བ་དང་ལེན་པ་ཡིན་ན། ཉོན་མོངས་པ་གཞན་གྱིས་ནི་དེ་ལྟར་མ་ཡིན་པ་དང་། འདོད་ཆགས་ཀྱིས་དངོས་སུ་འཁོར་བར་སྦྱོར་བ་དང་ཉེ་བར་ལེན་པའི་ཕྱིར། དེས་ན་འདོད་པའི་སྦྱོར་བ་དང་ཉེར་ལེན་ནི་འདོད་ཆགས་ཉིད་ཡིན་ལ། སྲིད་པ་ལ་ཆགས་པ་ཉིད་སྲིད་པའི་སྦྱོར་བ་དང་བདག་ཏུ་སྨྲ་བ་ཉེར་ལེན་ཡིན་ཏེ། མདོ་ལས། འདོད་པའི་སྦྱོར་བ་གང་ཞེ་ན། རྒྱས་པར་འདོད་པ་རྣམས་ལ། འདོད་པ་ལ་འདོད་ཆགས་པ་དང་། འདོད་པ་ལ་འདུན་པ་དང་། འདོད་པ་ལ་སྲེད་པ་དང་། འདོད་པ་ལ་དད་ཆེས་པ་དང་། འདོད་པ་ལ་འདོད་པས་ང་རྒྱལ་བ་དང་། འདོད་པ་ལ་ཞེན་པ་དང་། འདོད་པ་ལ་དགའ་བ་དང་། འཆུམས་པ་དང་། ལྷག་པར་ཆགས་པ་གང་ཡིན་པ་དེས་འདིའི་སེམས་ཡོངས་སུ་གཏུགས་ཏེ་གནས་པ་འདི་ནི་(༡༩༧བ)
འདོད་པའི་སྦྱོར་བའོ། །ཞེས་བྱ་བའི་བར་དང་། ལྟ་བའི་སྦྱོར་བའི་བར་དུའང་དེ་དང་འདྲ་བར་གསུངས་ལ། མདོ་གཞན་ལས། འདོད་ཆགས་ཀྱང་ཉེར་ལེན་ཡིན་པར་གསུངས་ཏེ། འདུན་པ་ལ་སོགས་པ་ལ་འདུན་པའི་འདོད་ཆགས་གང་ཡིན་པ་ནི་འདོད་པ་ཉེ་བར་ལེན་པ་ལ་སོགས་པའང་ཡིན་པར་ཤེས་སོ། །གཉིས་པ་ངེས་ཚིག་ལ། ཕྲ་རྒྱས་ཀྱི་ངེས་ཚིག་དང་། ཟག་པ་ལ་སོགས་པའི་ངེས་ཚིག་གོ། །དང་པོ་ནི། གང་ཕྱིར་དེ་དག་ཕྲ་བ་དང་། །རྗེས་འབྲེལ་རྣམ་གཉིས་རྒྱས་འགྱུར་དང་། །རྗེས་སུ་འབྲང་བས་དེ་ཡི་ཕྱིར། །ཕྲ་རྒྱས་དག་ཏུ་བཤད་པ་ཡིན། །ཉོན་མོངས་པ་དེ་དག་ཆོས་ཅན། ཕྲ་རྒྱས་དག་ཏུ་བཤད་པ་ཡིན་ཏེ། གང་གི་ཕྱིར་ན་རྒྱུ་བའམ་འཇུག་པ་ཕྲ་བ་སྟེ། གཟུགས་ཅན་མ་ཡིན་པ་རྣམས་ཤེས་དཀའ་པའི་ཕྱིར་དང་། རྗེས་སུ་འབྲེལ་བ་ནི་གནས་མ་བུའི་ཐོག་མེད་ཀྱིས་ཐོབ་པ་དང་། མདོ་སྡེ་པས་ས་བོན་དང་འབྲེལ་བས་རྒྱུན་མི་འཆད་པའི་ཕྱིར་དང་། དམིགས་མཚུངས་རྣམ་གཉིས་ཀྱིས་རྒྱས་པར་འགྱུར་བ་དང་། སྒྲིམ་པའི་སྦྱོར་བ་མེད་པར་བཟློག་བཞིན་དུའང་གང་ཟག་ལ་ཡང་ཡང་མངོན་དུ་གྱུར་པའམ་ཉིན་བཞི་པ་དང་། བྱི་བའི་དུག་བཞིན་རྗེས་སུ་འབྲང་བ་དེའི་ཕྱིར་རོ། །གཉིས་པ་ནི། དེ་དག་འཇོག་བྱེད་ཟག་བྱེད་དང་། །འཁྱེར་བར་བྱེད་དང་འབྱར་བྱེད་དང་། །ཉེ་བར་འཛིན་ཕྱིར་ཟག་ལ་སོགས། །དེ་དག་གི་ནི་ངེས་ཚིག་ཡིན། །ཡང་ཉོན་མོངས་པ་དེ་དག་གིས་མི་གཡོ་བའི་ཚུལ་གྱིས་འཁོར་བར་འཇོག་ཅིང་སྦྱོར་བ་བྱེད་པ་དང་། སྲིད་རྩེ་ནས་མནར་མེད་ཀྱི་བར་དུ་སྐྱེ་མཆེད་དྲུག་གི་རྨའི་སྒོ་ནས་ཟག་ཅིང་འབོ་བྱེད་པ་དང་། འགྲོ་བ་གཞན་དང་ཡུལ་གཞན་དུ་ཁྲིད་པར་བྱེད་ཅིང་ཁྱེར་བར་བྱེད་པ་དང་། དེ་དང་དེར་སྦྱོར་བར་བྱེད་ཅིང་འབྱར་བར་བྱེདཔ་དང་། སྲིད་པའམ་ལུས་འཛིན་པས་སམ། འདོད་པ་ལ་སོགས་པའི་རྣམ་ཤེས་ཉེ་བར་འཛིན་ཅིང་ལེན་པར་བྱེད་པའི་ཕྱིར་ཟག་པ་དང་ལ་སོགས་པས་ཆུ་བོ་དང་སྦྱོར་བ་ཉེར་ལེན་དེ་དག་གི་ངེས་ཚིག་ཡིན་ནོ། །དེ་ནི་བྱེ་སྨྲའི་ལུགས་ཡིན་ལ། སློབ་དཔོན་ནི། འདི་སྐད་དུ་བཤད་ན་ཆེས་ལེགས་པ་ཡིན་ཏེ། ཕྲ་རྒྱས་ཀྱིས་རྣམ་ཤེས་ཀྱི་རྒྱུད་ཡུལ་རྣམས་ལ་(༡༩༨ན)
འཛག་པར་བྱེད་ཅིང་འགྲོ་བར་བྱེད་པས་ཟག་པ་རྣམས་དང་། དགེ་བའི་ཆོས་ཀྱི་འབད་པ་ཆེན་པོས་སེམས་རྒྱུད་ཀྱི་གྲུ་བཟློག་ཕྱོགས་སུ་བཀྲི་ཞིང་ཡུལ་ལས་བཟློག་པ་ནི་འབད་རྩོལ་དྲག་པོ་དགོས་པ་དང་། ཉོན་མོངས་སྐྱེ་བ་ནི་གོམས་པའི་ཤུགས་ཀྱིས་འབད་མི་དགོས་པས་ངང་གིས་འབྱུང་བ་སྟེ། འབད་པས་བཟློག་ཕྱོགས་སུ་བཀྲི་བ་དེ་འབད་མེད་དུ་ཚེགས་ཆུང་ངུས་ཆུའི་འབབ་ཕྱོགས་སུ་ཁྱེར་བར་འགྱུར་བ་བཞིན་མདོའི་ཚིག་དང་མཐུན་པའི་ཕྱིར་རོ། །ཤུགས་ཆེན་པོ་དང་ལྡན་པའི་ཕྱིར་ཆུ་བོ་དང་ཆོས་མཐུན་པ་དག་སྟེ། འདོད་ཆགས་ལ་སོགས་པ་དེ་དག་གི་རྗེས་སུ་སེམས་སེམས་བྱུང་དང་ལྡན་པ་ཁྱེར་བར་འགྱུར་བའི་ཕྱིར། ཆེ་ཐང་མངོན་འགྱུར་དུ་མི་འབྱུང་བས་སྦྱོར་བ་དང་། ཆེ་ཐང་དུ་འབྱུང་བ་ནི་ཆུ་བོ་སྟེ། ཇི་ལྟར་སྦྱོར་བ་ཡིན་ཅེ་ན། སྡུག་བསྔལ་སྣ་ཚོགས་དང་སྦྱོར་བའི་ཕྱིར་རམ། རྒྱུད་ལ་ཡང་ཡང་དུ་རྗེས་སུ་འབྲེལ་ཞིང་སྦྱོར་བའི་སྒོ་ནས་སྦྱོར་བ་ནི་ཐམས་ཅད་ཀྱི་ཚེ་ཡིན་ལ། ཆུ་བོ་ནི་རེ་འགའ་བའོ། །འདུན་པ་གང་གིས་འདོད་པ་སོགས་ཉེ་བར་ལེན་པའི་ཕྱིར་ཉེར་ལེན་རྣམས་སོ། །གཉིས་པ་བསྟན་བཅོས་ལས་འབྱུང་བ་ལ། བསྟན། བཤད་གཉིས་ལས། དང་པོ་ནི། དེ་དག་ཀུན་ཏུ་སྦྱོར་སོགས་ཀྱི། །དབྱེ་བས་ཡང་རྣམ་ལྔར་བཤད་དོ། །ཉོན་མོངས་དེ་དག་ཀུན་ཏུ་སྦྱོར་སོགས་ཀྱི་འཆིང་བ་དང་། ཕྲ་རྒྱས་དང་། ཉེ་ཉོན་དང་། ཀུན་དཀྲིས་ཀྱི་དབྱེ་བས་ཡང་རྣམ་པ་ལྔར་བཤད་དོ། །ཕྲ་རྒྱས་མ་གཏོགས་པ་ངོ་ཚ་མེད་པ་སོགས་ཀུན་ནས་དཀྲིས་པ་གཞན་དག་ཀྱང་ཡོད་པ་མ་ཡིན་ནམ། ཇི་ལྟར་ཕྲ་རྒྱས་དག་ཀུན་ནས་དཀྲིས་པ་ཡིན་ཅེས་དེ་སྐད་དུ་བརྗོད་ཅེ་ན། དེ་ལ་མ་གཏོགས་པ་དག་ཡོད་པ་བདེན་མོདཀྱི། ཐ་དད་པ་མ་ཡིན་པ་དག་ཀྱང་ཡོད་པར་ནི་འདོད་དེ། འདི་ལྟར་ཉོན་མོངས་པ་ཡང་ཀུན་ནས་དཀྲིས་པ་ཡིན་ཏེ། མདོ་ལས། འདོད་པའི་འདོད་ཆགས་ཀྱིས་ཀུན་ནས་དཀྲིས་པ་སྡུག་བསྔལ་(༡༩༨བ)
གྱི་རྐྱེན་ཅེས་འབྱུང་བའི་ཕྱིར། ཞེས་འཆད་པར་འགྱུར་རོ། །དེ་ལྟར་ན་ཕྲ་རྒྱས་ལས་མ་གཏོགས་པའི་ཉེ་བའི་ཉོན་མོངས་དང་ཀུན་ནས་དཀྲིས་པ་དག་ཡོད་ཀྱང་། རང་ལ་ཡང་ཉེ་བའི་ཉོན་མོངས་དང་ཀུན་དཀྲིས་བཞག་བཏུབ་སྟེ། ཕྲ་རྒྱས་རང་ཡང་སེམས་ཉེ་བར་ཉོན་མོངས་པར་བྱེད་པས་ཉེ་བའི་ཉོན་མོངས་ཡིན་ཅིང་མངོན་གྱུར་དུ་སྐྱེས་པས་ཀུན་ནས་དཀྲིས་པ་ཡང་ཡིན་ནོ། །གཉིས་པ་རྒྱས་བཤད་ལ། ཀུན་སྦྱོར་དང་། འཆིང་བ་དང་། ཉེ་ཉོན། ཀུན་དཀྲིས་སོ། །དང་པོ་ལ། ཀུན་སྦྱོར་དགུར་བཤད་པ། ཐ་མའི་ཆ་མཐུན། གོང་མའི་ཆ་མཐུན་ནོ། །དང་པོ་ནི། རྫས་དང་མཆོག་འཛིན་འདྲ་བའི་ཕྱིར། །ལྟ་གཉིས་ཀུན་ཏུ་སྦྱོར་གཞན་ནོ། །གང་ཕྱིར་གཉིས་ཀའང་གཅིག་ཏུ་ནི། །མི་དགེ་རང་དབང་དེ་ཡི་ཕྱིར། །ཕྲག་དོག་སེར་སྣ་དེ་དག་ལས། །ལོགས་ཤིག་ཀུན་སྦྱོར་གཉིས་སུ་བཤད། །རྗེས་སུ་ཆགས་པ་དང་། ཁོང་ཁྲོ་བ་དང་། ང་རྒྱལ་དང་། མ་རིག་པ་དང་། ལྟ་བ་དང་། མཆོག་ཏུ་འཛིན་པ་དང་། ཐེ་ཚོམ་དང་། ཕྲག་དོག་དང་། སེར་སྣའི་ཀུན་ཏུ་སྦྱོར་བ་རྣམས་སོ། །ཡུལ་དང་སྐྱེ་བ་ལ་སྦྱོར་བར་བྱེད་པས་སམ། འདི་རྣམས་ཡོད་ན་སྡུག་བསྔལ་གྱི་ཁྱད་པར་དུ་མ་དང་ཀུན་ཏུ་སྦྱོར་བས་ན་ཀུན་ཏུ་སྦྱོར་བ་རྣམས་ཏེ། ཉོན་མོངས་པ་ཐམས་ཅད་ཀྱི་གཞིར་གྱུར་པའི་ཕྱིར། རྗེས་ཆགས་ཀྱི་ཀུན་སྦྱོར་ནི་ཁམས་གསུམ་པའི་འདོད་ཆགས་ཏེ། རྟེན་དང་དམིགས་པའི་སྒོ་ནས་དངོས་པོ་འཚོགས་ཆས་དང་བཅས་པ་དག་ལ་མངོན་པར་ཞེན་པའོ། །ཁོང་ཁྲོ་དང་ཕྲག་དོག་དང་སེར་སྣའི་ཀུན་སྦྱོར་རྣམས་ནི་འདོད་པ་ན་སྤྱོད་པའོ། །ང་རྒྱལ་མ་རིག་པ་ལྟ་བ་མཆོག་འཛིན་དང་ཐེ་ཚོམ་གྱི་ཀུན་སྦྱོར་དག་ནི་ཁམས་གསུམ་པའོ། །ལྟ་བའི་ཀུན་སྦྱོར་ནི། འཇིག་ལྟ། ལོག་ལྟ། མཐར་ལྟ་གསུམ་མོ། །མཆོག་ཏུ་འཛིན་པའི་ཀུན་སྦྱོར་ནི། ལྟ་བ་དང་ཚུལ་ཁྲིམས་བརྟུལ་ཞུགས་མཆོག་འཛིན་དག་གོ། །ལྟ་བ་ལྔ་ཀུན་སྦྱོར་གཉིས་ཡིན་པ་དེའི་ཕྱིར་ལྟ་བ་མཆོག་འཛིན་དང་མཚུངས་ལྡན་གྱི་ཆོས་ཚོར་སོགས་རྣམས་ལ་རྗེས་ཆགས་ཀྱི་ཀུན་ཏུ་སྦྱོར་བས་ལྡན་ཅིང་། འཇིག་ལྟ་ལ་སོགས་པའི་མཚན་ཉིད་ཀྱི་ཀུན་(༡༩༩ན)
སྦྱོར་གྱིས་ལྡན་པ་མ་ཡིན་ལ། དེ་ལ་ལྟ་བའི་ཕྲ་རྒྱས་རྒྱས་པར་འགྱུར་བ་ཡོད་དམ་ཞེ་ན། ཡོད་དེ། ཀུན་འབྱུང་ཤེས་པ་སྐྱེ་ལ་འགོག་པ་ཤེས་པ་མ་སྐྱེས་པའི་ཚེ་ལྟ་བའི་ཀུན་སྦྱོར་ཀུན་འགྲོ་སྤངས་ལ། འགོག་པ་མཐོང་སྤོང་ཡན་ཆད་དུ་མཆོག་འཛིན་གྱི་ལྟ་བ་གཉིས་མ་སྤངས་ན་དེ་དང་མཚུངས་ལྡན་གྱི་ཚོར་སོགས་ཡོད་པར་བསྟན་པའི་ཕྱིར་རོ། །འགོག་པ་དང་ལམ་མཐོང་བས་སྤང་བྱ་ལྟ་བ་མཆོག་ཏུ་འཛིན་པ་དང་ཚུལ་ཁྲིམས་བརྟུལ་ཞུགས་མཆོག་འཛིན་དང་མཚུངས་ལྡན་གྱི་ཆོས་ཚོར་སོགས་རྣམས་ཆོས་ཅན། དམིགས་པའི་སྒོ་ནས་དེ་དང་ལྡན་པ་ཡིན་ཏེ། དེ་དག་དང་ནི་རྗེས་ཆགས་ཀྱི་ཀུན་ཏུ་སྦྱོར་བས་དམིགས་ནས་ཆགས་པ་སྐྱེ་བའི་ཕྱིར། མཚུངས་ལྡན་གྱིས་ནི་མ་ཡིན་ཏེ། རྩ་ཉོན་རྣམས་ཕན་ཚུན་མཚུངས་ལྡན་མེད་པའི་ཕྱིར། ལྟ་བའི་ཀུན་ཏུ་སྦྱོར་བ་ནི་མི་ལྡན་ཏེ། སྡུག་ཀུན་མཐོང་སྤོང་གི་ཀུན་འགྲོ་ནི་ཀུན་འབྱུང་ཤེས་པ་སྐྱེས་པས་སྤངས་པའི་ཕྱིར་ལ། ལྟ་བའི་ཀུན་སྦྱོར་ཀུན་འགྲོ་མིན་པ་ལོག་ལྟ་དེ་འགོག་ལམ་ཟག་མེད་ལ་དམིགས་ཀྱི། མཆོག་འཛིན་དང་མཚུངས་ལྡན་གྱི་ཚོར་སོགས་ལ་དམིགས་པ་མ་ཡིན་པའི་ཕྱིར་དང་། ཀུན་འགྲོ་མིན་པའི་ལོག་ལྟ་དེ་མཆོག་འཛིན་དང་མཚུངས་ལྡན་གྱི་ཚོར་སོགས་ལ་མཚུངས་པར་ལྡན་པ་ཅན་ཡང་མ་ཡིན་ཏེ། ཚོགས་པ་ཐ་དད་པས་དམིགས་པ་ཐ་དད་པའི་ཕྱིར། མཚུངས་པར་ལྡན་པ་ཅན་ལྟ་བའི་ཀུན་ཏུ་སྦྱོར་བ་ནི་མེད་པར་གྲུབ་བོ། །མཆོག་འཛིན་དང་མཚུངས་ལྡན་གྱི་ཚོར་སོགས་དེ་དག་ལ་ཆོས་ཅན། དེ་དག་ལ་མཆོག་འཛིན་མཚུངས་ལྡན་གྱི་སྒོ་ནས་རྒྱས་པར་འབྱུང་སྟེ། རང་གི་ཚོགས་སུ་འབྱུང་བ་ཡིན་པའི་ཕྱིར། དེ་ལ་ལྟ་བའི་ཀུན་སྦྱོར་ནི་རྒྱས་པར་མི་འགྱུར་ཏེ། མཆོག་འཛིན་གྱི་ཀུན་སྦྱོར་ལ་ལྟ་བའི་ཀུན་སྦྱོར་ཞེས་མིང་དུ་མ་བཏགས་པའི་ཕྱིར། ལྟ་(༡༩༩བ)
བའི་ཕྲ་རྒྱས་ཞེས་སྨོས་པས་ནི་ལྟ་བ་ལྔ་ཆར་བསྡུ་ལ། ལྟ་བའི་ཀུན་སྦྱོར་ཞེས་པས་ནི། འཇིག་ལྟ་ལ་སོགས་གསུམ་བཟུང་གི། མཆོག་འཛིན་གྱི་ལྟ་བ་དག་བསྡུས་པ་མིན་པར་རྟོགས་པའི་ཆེད་ཀྱི་ཕྱིར་རོ། །དེ་ལ་དོགས་པ་བཅད་པ་ལ། ལྟ་བའི་ཀུན་སྦྱོར་ལ་གཉིས་སུ་བཤད་པའི་རྒྱུ་མཚན་དང་། ཕྲ་དོག་སེར་སྣ་ལོགས་སུ་ཀུན་སྦྱོར་དུ་བཤད་པའི་རྒྱུ་མཚན་ནོ། །དང་པོ་ནི། ཀུན་སྦྱོར་གྱི་ནང་དུ་ལྟ་བ་གསུམ་ནི་ལོགས་སུ་ལྟ་བའི་ཀུན་སྦྱོར་དུ་བཤད་ལ། གཉིས་ནི་ལོགས་སུ་ག་འཛིན་གྱི་ཀུན་སྦྱོར་དུ་བཤད་ཅེ་ན། མཆོག་འཛིན་ལྟ་བ་གཉིས་ཆོས་ཅན། ལྟ་བ་གསུམ་ལས་ལོགས་སུ་ཀུན་ཏུ་སྦྱོར་བ་གཞན་དུ་བྱས་ནས་བསྟན་ཏེ། ལྟ་བ་གསུམ་ཡང་རྫས་བཅོ་བརྒྱད་ཡིན་ལ། ལྟ་བ་དེ་གཉིས་ཀྱང་རྫས་བཅོ་བརྒྱད་དེར་གྲངས་མཉམ་པར་འདྲ་བའི་ཕྱིར་དང་། ལྟ་བ་གསུམ་མཆོག་ཏུ་བཟུང་བྱ་དང་འདི་གཉིས་ནི་མཆོག་ཏུ་འཛིན་བྱེད་དུ་འདྲ་བའི་ཕྱིར་ཏེ། གཟུང་འཛིན་ཐ་དད་པའི་ཕྱིར། རྫས་བཅོ་བརྒྱད་ཀྱང་འདོད་པར་སྡུག་བསྔལ་མཐོང་སྤང་གི་འཇིག་ལྟ་མཐར་གཉིས། སྡུག་བསྔལ་མཐོང་སྤང་ནས་ལམ་མཐོང་སྤང་གི་བར་གྱི་ལོག་ལྟ་བཞི་སྟེ་དྲུགགོང་མ་གཉིས་སུའང་དྲུག་དེ་སྟེ་བཅོ་བརྒྱད། ཡང་འདོད་ཁམས་ན་ལྟ་བ་མཆོག་འཛིན་སྡུག་བསྔལ་ནས་ལམ་མཐོང་སྤང་གི་བར་བཞི། ཚུལ་ཁྲིམས་དང་བརྟུལ་ཞུགས་ཀྱང་སྡུག་བསྔལ་ལ་མཐོང་སྤང་གཉིས་ཏེ་འདོད་ཁམས་ན་དྲུགཁམས་གཉིས་ནའང་དེ་དང་འདྲ་བ་བཅོ་བརྒྱད། གཉིས་པ་ནི། ཡང་ཀུན་དཀྲིས་བརྒྱད་ལས། ཕྲག་དོག་དང་སེར་སྣ་ཁོ་ན་ཀུན་སྦྱོར་དུ་སྟོན་པ་ལ་རྒྱུ་མཚན་ཅི་ཡོད་ཅེ་ན། གང་གི་ཕྱིར་དེ་གཉིས་ཀའང་གཅིག་ཏུ་མི་དགེ་བ་དང་། མ་རིག་པ་ཙམ་དང་མཚུངས་པར་ལྡན་པས་རང་(༢༠༠ན)
དབང་ཅན་ཡིན་པ་དེའི་ཕྱིར་ཕྲག་དོག་དང་། སེར་སྣ་ཁོ་ན་ཀུན་དཀྲིས་དྲུག་པོ་དེ་དག་ལས་ལོགས་ཤིག་ཀུན་སྦྱོར་གཉིས་སུ་བཤད་ཀྱི། གཞན་དྲུག་ནི་དེ་ལྟར་མ་ཡིན་ཏེ། ངོ་ཚ་ཁྲེལ་མེད་ཀྱང་གཅིག་ཏུ་མི་དགེ་བ་ཡིན་མོད་ཀྱི། ཆགས་སོགས་དང་མཚུངས་ལྡན་ཡིན་པས་རང་དབང་ཅན་མ་ཡིན་ལ། འགྱོད་པ་མ་རིག་པ་ཙམ་དང་མཚུངས་པས་རང་དབང་ཅན་ཡིན་ཀྱང་གཅིག་ཏུ་མི་དགེ་བ་མ་ཡིན་གྱི་དགེ་བའང་ཡིན་པའི་ཕྱིར། རྨུགས་རྒོད་དང་གཉིད་ནི་ཆགས་སོགས་དང་མཚུངས་པར་ལྡན་པས་རང་དབང་ཅན་ཡང་མ་ཡིན་ལ། གཅིག་ཏུ་མི་དགེ་བ་མ་ཡིན་ཏེ། དགེ་བ་དང་ལུང་མ་བསྟན་ཀྱང་ཡིན་ནོ། །ཞེས་བསྟན་བཅོས་རབ་ཏུ་བྱེད་པའི་རྗེས་འབྲངས་བྱེ་སྨྲ་ཁ་ཅིག་འདོད་དོ། །གཞན་ན་རེ། ཀུན་དཀྲིས་བརྒྱད་ཡིན་པ་དེའི་ལྟར་ན་འགྱུར་གྱི། བྱེ་སྨྲ་གང་གི་ལྟར་ན། ཀུན་དཀྲིས་བཅུར་འདོད་པ་དེའི་ལྟར་ན་ཁྲོ་བ་དང་འཆབ་པའང་མི་དགེ་བ་དང་རང་དབང་ཅན་ཡིན་པའི་ཕྱིར་ཀུན་སྦྱོར་དུ་འཆད་པར་ཐལ་བར་འགྱུར་རོ་ཞེས་ཟེར་རོ། །འདིའི་ལན་ལ། སློབ་དཔོན་འདུས་བཟང་ན་རེ། ཀུན་དཀྲིས་བཅུ་ཡོད་ཀྱང་ཕྲག་དོག་དང་སྣས་བདེ་འགྲོ་ལྷག་པར་འཆིང་བའི་ཕྱིར་ཏེ། ཤིན་ཏུ་རྣོ་བ་དང་། ཡང་ཡང་དུ་འབྱུང་བའི་ཕྱིར་དང་། དེ་གཉིས་ནི་རིམ་པ་བཞིན་དུ་དབང་ཆུང་བ་དང་ལོངས་སྤྱོད་ཆུང་བའི་རྒྱུ་ཡིན་པའི་ཕྱིར་ལོགས་ཤིག་ཏུ་བསྟན་ཏེ། འདོད་པ་ན་ཀུན་སྦྱོར་གཞན་མང་པོ་ཡོད་ཀྱང་། མདོ་ལས་ཀོའུ་ཤི་ཀ་ལྷ་དང་མི་རྣམས་ནི་ཕྲག་དོག་དང་སེར་སྣའི་ཀུན་ཏུ་སྦྱོར་བ་ཅན་ཡིན་ནོ་ཞེས་གསུངས་པའི་ཕྱིར། ཞེས་ཟེར་རོ། །སློབ་དཔོན་རྒྱལ་པོའི་སྲས་ནི། འདི་གཉིས་རིམ་པ་ལྟར། ཀུན་ཏུ་གདུང་བའི་སྡུག་བསྔལ་དང་། ཀུན་ཏུ་དགའ་བ་དང་ལྡན་པའི་ཉོན་མོངས་པ་ཐམས་ཅད་སྟོན་པའི་ཕྱིར་(༢༠༠བ)
དང་། ཁྱིམ་པ་དང་རབ་བྱུང་གི་ཕྱོགས་གཉིས་ཀ་ལ་ལོངས་སྤྱོད་དང་ཆོས་ལ་ཕྲག་དོག་དང་སེར་སྣ་འབྱུང་བས་ཉོན་མོངས་པར་བྱེད་པའི་ཕྱིར་དང་། ལྷ་དང་ལྷ་མ་ཡིན་གྱི་ཕྱོགས་གཉིས་ཀ་བདུད་རྩི་དང་བུད་མེད་ཀྱི་ཕྱིར་ཤིན་ཏུ་ཉོན་མོངས་པར་བྱེད་པའི་ཕྱིར་ལོགས་ཤིག་ཏུ་བཤད་དོ། །ཞེས་འཆད་དོ། །གཉིས་པ་ཐ་མའི་ཆ་མཐུན་ལ། དངོས་དང་། དོགས་པ་གཅོད་པའོ། །དང་པོ་ནི། ཐ་མའི་ཆ་དང་མཐུན་རྣམ་ལྔ། །གཉིས་ཀྱིས་འདོད་ལས་མི་འདའ་ལ། །གསུམ་པོ་ཡིས་ནི་ཕྱིར་ཟློག་བྱེད། །བཅོམ་ལྡན་འདས་ཀྱིས་མདོ་གཞན་དུ་ཐ་མའི་ཆ་མཐུན་གྱི་ཀུན་སྦྱོར་ལྔ་གསུངས་པ་ཁམས་གསུམ་གྱི་ཐ་མ་ནི་འདོད་ཁམས་ཏེ། གཅིག་ཏུ་མཉམ་པར་མ་བཞག་པའི་ཕྱིར་དང་། མི་དགེ་བའི་ཆོས་ཡོད་པའི་ཕྱིར་དང་། ངན་འགྲོ་ཡོད་པའི་ཕྱིར་དང་། སྡུག་བསྔལ་དང་ཡིད་མི་བདེ་བ་ཡོད་པའི་ཕྱིར་དང་། ཉོན་མོངས་པ་བར་མཚམས་མེད་པའི་ཕྱིར། ཐ་མ་སྟེ་དམན་པའི་ཆ་དང་ལྡན་པའི་ཕྱིར་ཐ་མའི་ཆ་འདོད་ཁམས་ཡིན་ལ། དེ་དང་རྗེས་སུ་མཐུན་པའི་ཀུན་སྦྱོར་རྣམ་པ་ལྔ་གསུངས་ཏེ། འཇིག་ལྟ་དང་ཚུལ་ཁྲིམས་བརྟུལ་ཞུགས་མཆོག་འཛིན་དང་ཐེ་ཚོམ་དང་འདོད་པ་ལ་འདུན་པ་དང་གནོད་སེམས་སོ། །འདོད་པ་ལ་འདུན་པ་དང་གནོད་སེམས་གཉིས་ཀྱིས་སྒོ་བ་བཞིན་འདོད་པའི་བཙོན་ར་ལས་མི་འདའ་བར་བྱེད་དེ། དེ་དག་མ་སྤངས་ན་ཕགས་པའི་ཆོས་ཐོབ་ཀྱང་འདོད་པ་ལས་མི་འདའ་བའི་ཕྱིར། འཇིག་ལྟ་སོགས་པ་གསུམ་པོ་ཡིས་ནི་སྒོ་བ་བག་མེད་བཙོན་ར་ནས་ཤོར་ཡང་སྒོ་བའི་རྗེས་སུ་འབྲང་བ་རྣམས་བཞིན་ཕྱིར་ཟློག་པར་བྱེད་དོ། །སེམས་ཙམ་པ་ན་རེ། འཇིག་ལྟ་སོགས་གསུམ་གྱིས་སེམས་ཅན་གྱི་ཐ་མ་སོ་སྐྱེ་ལས་མི་འདའ་ལ། འདོད་པ་ལ་འདུན་པ་དང་གནོད་སེམས་ཀྱིས་ཀྱང་ཁམས་ཀྱི་ཐ་མ་འདོད་ཁམས་ལས་མི་འདའ་བས། དེས་ན་འདི་དག་ཐ་མའི་ཆ་དང་མཐུན་པ་རྣམས་ཞེས་བྱའོ་ཞེས་ཟེར་རོ། །སེམས་ཅན་གྱི་(༢༠༡ན)
ཐ་མ་སོ་སོའི་སྐྱེ་བོ་དང་། ཁམས་ཀྱི་ཐ་མ་འདོད་ཁམས་ཡིན་པས་སེམས་ཅན་གྱི་ཐ་མ་ལས་འདས་པ་སོ་སོའི་སྐྱེ་བོ་ལས་འདས་ཀྱང་། ཁམས་ཀྱི་ཐ་མ་ལས་མ་འདས་པ་ཡོད་དེ། འདོད་ཁམས་སུ་སྐྱེས་པའི་འཕགས་པའོ། །ཁམས་ཀྱི་ཐ་མ་ལས་འདས། འདོད་ཁམས་ལས་གྲོལ་ཀྱང་སེམས་ཅན་གྱི་ཐ་མ་སོ་སོའི་སྐྱེ་བོ་ལས་མ་འདས་པ་ཡོད་དེ། གོང་མ་གཉིས་སུ་སྐྱེས་པའི་སོ་སོའི་སྐྱེ་བོའོ། །གཉིས་ཀ་ལས་འདས་པ་ཡོད་དེ། གོང་མ་གཉིས་སུ་སྐྱེས་པའི་འཕགས་པའོ། །གཉིས་ཀ་ལས་མ་འདས་པ་ཡོད་དེ། འདོད་ཁམས་སུ་སྐྱེས་པའི་སོ་སོའི་སྐྱེ་བོའོ། །འཕགས་པར་གྱུར་ཀྱང་འདོད་པ་ལ་འདུན་པ་དང་། གནོད་སེམས་ཀྱི་ཁམས་ཐ་མ་ལས་མི་འདའ། ཁམས་གོང་མ་གཉིས་སུ་གྱུར་ཀྱང་འཇིག་ཚུལ་ཐེ་ཚོམ་གསུམ་གྱི་སེམས་ཅན་གྱི་ཐ་མ་སོ་སོའི་སྐྱེ་བོ་ལས་མི་འདའོ། །སེམས་ཅན་ལ་གཉིས་ཏེ། འཕགས་པའི་སེམས་ཅན་དང་། སོ་སོའི་སྐྱེ་བོའི་སེམས་ཅན་ནོ། །གཉིས་པ་ནི། རྒྱུན་ཞུགས་ཀྱི་ཀུན་སྦྱོར་གསུམ་ཡོངས་སུ་གཏུགས་ཏེ་སྤངས་པའི་ཕྱིར། ལྟ་བ་ལྔ། ཐེ་ཚོམ་དང་ཉོན་མོངས་པ་དྲུག་སྤངས་པ་ཡིན་ན་མཐར། ལོགལྟ་བ་མཆོག་གསུམ་བོར་ལ་ཀུན་སྦྱོར་གསུམ་སྤངས་ཞེས་འཇིག་ལྟ་སོགས་གསུམ་གསུངས་ཏེ། འདིའི་ལན་ལ། བྱེ་སྨྲའི་ལན། མདོ་སྡེ་པའི་ལན་ནོ། །དང་པོ་ནི། བོར་བའི་ལྟ་བ་གསུམ་པོ་དེ་ཐམས་ཅད་གཏུགས་པར་ནི་བརྗོད་བྱ་ཡིན་མོད་ཀྱི། ཉོན་མོངས་པ་ནི་རྣམ་པ་གསུམ་སྟེ། འཇིག་ལྟ་དང་མཐར་ལྟ་སྡུག་བསྔལ་མཐོང་བ་ཙམ་གྱིས་སྤང་བྱ་རྣམ་པ་གཅིག་དང་། ཚུལ་ཁྲིམས་དང་བརྟུལ་ཞུགས་མཆོག་འཛིན། སྡུག་བསྔལ་དང་ལམ་གྱི་རྣམ་པ་གཉིས་དང་། རྣམ་པ་བཞི་པ་ནི་ཐེ་ཚོམ། ལོག་ལྟ། ལྟ་བ་མཆོག་འཛིན་ཏེ་དེ་དག་གི་སྒོ་ནི་ཀུན་སྦྱོར་འདི་གསུམ་(༢༠༡བ)
གྱིས་བསྡུས་པའི་ཕྱིར་དང་། མཐར་ལྟའི་རྩ་བ་འཇིག་ལྟ་དང་། མཆོག་འཛིན་གྱི་རྩ་བ་ཚུལ་ཁྲིམས་བརྟུལ་ཞུགས་མཆོག་འཛིན་དང་། ལོག་ལྟའི་རྩ་བ་ཐེ་ཚོམ་གྱིས་བསྡུས་པའི་ཕྱིར་ཀུན་སྦྱོར་གསུམ་བསྟན་ཏོ། །ཞེས་ཟེར་ཏེ། བདག་ཏུ་བཟུང་བ་དེ་ལ་རྟག་ཆད་ཀྱི་མཐར་འཛིན་པའི་ཕྱིར་དང་། གང་གིས་འདག་པར་ཡིད་ཆེས་པ་ལས་མཆོག་ཏུ་འཛིན་པའི་ཕྱིར་དང་། ཐེ་ཚོམ་ཟ་བ་ལོག་པར་མཉན་པ་དང་བསམས་པའི་སྒོ་ནས་ལོག་པར་ངེས་པ་སྐྱེ་བའི་ཕྱིར་རྩ་བ་ཅན་ཡང་བཤད་པ་ཡིན་པར་རིག་པར་བྱའོ། །གཉིས་པ་ནི། སྒོ་དང་རྩ་བ་བསྡུས་ཕྱིར་གསུམ། །འགྲོ་མི་འདོད་དང་ལམ་ནོར་དང་། །ལམ་ལ་ཐེ་ཚོམ་དེ་སྙེད་ཅིག །ཐར་པ་བགྲོད་ལ་གེགས་བྱེད་པ། །དེ་ཡི་ཕྱིར་ན་གསུམ་བསྟན་ཏོ། །གཞན་སློབ་དཔོན་གྱི་ལུགས་ནི་ཡུལ་གཞན་དུ་བགྲོད་པར་བྱ་བ་ལ་བར་ཆད་དུ་བྱེད་པ་གསུམ་སྟེ། འགྲོ་མི་འདོད་པ་དང་། ལམ་གཞན་ལ་བརྟེན་པས་ལམ་ནོར་བ་དང་། ལམ་ལ་ཐེ་ཚོམ་ཟ་བ་དེ་བཞིན་དུ་ཐར་པར་བགྲོད་པ་ལ་གསུམ་པོ་དེ་སྙེད་ཅིག་བགེགས་བར་ཆད་བྱེད་དེ། འཇིག་ལྟས་ནི་ཐར་པས་སྐྲག་པར་འགྱུར་བས་འགྲོ་མི་འདོད་པར་འགྱུར་བ་དང་། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱིས་ལམ་གཞན་ལ་བརྟེན་པས་ལམ་མ་ནོར་བར་འགྱུར་བ་དང་། ཐེ་ཚོམ་གྱིས་ལམ་ལ་ཐེ་ཚོམ་ཟ་བར་འགྱུར་ཏེ། བཅོམ་ལྡན་འདས་ཀྱིས། རྒྱུན་ཞུགས་ཀྱིས་ཐར་བར་བགྲོད་པའི་བར་ཆད་དེ་དག་སྤངས་པར་སྟོན་པ་ན་ཉོན་མོངས་གསུམ་ཁོ་ན་སྤངས་པར་བསྟན་ཏོ། །ཞེས་ཟེར་རོ། །གསུམ་པ་གོང་མའི་ཆ་མཐུན་ནི། གོང་མའི་ཆ་དང་མཐུན་ལྔ་ཉིད། །གཟུགས་དང་གཟུགས་མེད་ལས་སྐྱེས་པའི། །འདོད་ཆགས་གཉིས་རྒོད་ང་རྒྱལ་རྨོངས། །བཅོམ་ལྡན་འདས་ཀྱིས་ཀུན་སྦྱོར་ཐ་མའི་ཆ་དང་མཐུན་པ་ལྔ་བཤད་པ་བཞིན་ཀུན་སྦྱོར་གོང་མ་གཟུགས་དང་གཟུགས་མེད་པའི་ཆ་མཐུན་ལྔ་ཉིད་དེ། ཇི་ལྟར་ཞེ་ན། གཟུགས་དང་གཟུགས་མེད་ལས་སྐྱེས་པའི་འདོད་ཆགས་གཉིས་དང་། རྒོད་པ་དང་། ང་རྒྱལ་དང་། རྨོངས་པ་མ་རིག་པ་སྟེ། དེ་དག་མ་སྤངས་པར་ཁམས་གོང་(༢༠༢ན)
མ་ལས་མི་འདའ་བའི་ཕྱིར། གཉིས་པ་འཆིང་བ་ནི། ཚོར་བའི་དབང་གིས་འཆིང་བ་གསུམ། །ཚོར་བ་བདེ་སྡུག་བཏང་སྙོམས་གསུམ་གྱི་དབང་གིས་དེ་ལ་འདོད་ཆགས་ཞེ་སྡང་གཏི་མུག་གི་འཆིང་བ་གསུམ་རྒྱས་པར་འགྱུར་རོ། །བཏང་སྙོམས་ལ་ཆགས་སྡང་ཡང་རྒྱས་མོད་ཀྱི། གཏི་མུག་བཞིན་རྒྱས་པ་ནི་མ་ཡིན་ཏེ། གཏི་མུག་ནི་བཏང་སྙོམས་དང་མི་གསལ་བར་རྗེས་སུ་མཐུན་པའི་ཕྱིར་ཤིན་ཏུ་རྒྱས་པའོ། །ཡང་ན་རང་རྒྱུད་ལ་ཡོད་པའི་ཚོར་བ་གསུམ་མྱོང་བའི་མཐུས་དེ་ལྟར་ངེས་ཏེ། མཚུངས་ལྡན་གྱི་སྒོ་ནས་རྒྱས་པའོ། །གཞན་ནི་བདེ་བ་ལ་འདོད་ཆགས་དང་སྡུག་བསྔལ་ལ་ཞེ་སྡང་རྒྱས་པ་དེ་ལྟར་ངེས་པ་མ་ཡིན་ཏེ། དགྲའི་བདེ་བ་ལ་དམིགས་ནས་ཞེ་སྡང་དང་། དགྲའི་སྡུག་བསྔལ་ལ་དམིགས་ནས་འདོད་ཆགས་རྒྱས་པའི་ཕྱིར་རོ། །ཡང་ན་རང་རྒྱུད་ལ་ཡོད་པའི་བདེ་སྡུག་ལ་ཆགས་སྡང་དམིགས་པའམ། མཚུངས་ལྡན་གྱི་སྒོ་ནས་རྒྱས་པར་ངེས་པ་ཡིན་པ་བཞིན་དགྲའི་རྒྱུད་ཀྱི་བདེ་སྡུག་ལ་མ་ཡིན་ནོ་ཞེས་སོ། །གསུམ་པ་ཉེ་ཉོན་ནི། ཉོན་མོངས་ལས་གཞན་ཉོན་མོངས་ཅན། །སེམས་བྱུང་འདུ་བྱེད་ཕུང་ཞེས་པ། །གང་དེའང་ཉེ་བའི་ཉོན་མོངས་ཏེ། །དེ་དག་ཉོན་མོངས་ཞེས་མི་བྱ། །རྩ་བའི་ཉོན་མོངས་པ་དེ་དག་ནི་ཉེ་བའི་ཉོན་མོངས་པའང་ཡིན་ཏེ། སེམས་ཉེ་བར་ཉོན་མོངས་པ་ཅན་དུ་བྱེད་པའི་ཕྱིར། ཉོན་མོངས་པ་རྣམས་ལས་དོན་གཞན་པ་ཆོས་ཉོན་མོངས་ཅན་སེམས་བྱུང་འདུ་བྱེད་ཀྱི་ཕུང་པོ་ཞེས་པས་བསྡུས་པ་གང་ཡིན་དེའང་ཉོན་མོངས་པ་དང་ཉེ་བར་འདུག་པས་ཉེ་བའི་ཉོན་མོངས་པ་ཁོ་ན་སྟེ་དེ་དག་རྩ་ཉོན་དྲུག་གི་ཚོད་ཙམ་དུ་ནི་ཉོན་མོངས་ཞེས་མི་བྱ་སྟེ། གཞི་ཕྲན་ཚེགས་ལས། མི་དགའ་བ་དང་། གླལ་བྱེད་པ་དང་། སེམས་ཞུམ་པ་ཉིད་དང་། རྨྱ་བ་དང་། ཟས་ཀྱི་དྲོད་མི་ཟིན་པ་ཉིད་དང་། ཐ་དད་པ་ཉིད་ཀྱི་འདུ་ཤེས་དང་། ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རུ་གདུག་དང་། འཕྱ་སྨོད་དང་། གནམ་པ་ཉིད་དང་། མི་གནམ་པ་ཉིད་དང་། རང་བཞིན་དུ་མི་འདུག་པ་(༢༠༢བ)
ཉིད་དང་། འདོད་པའི་རྣམ་རྟོག་ཉིད་དང་། འཚེ་བའི་རྣམ་རྟོག་དང་། ཉེ་བའི་རྣམ་རྟོག་དང་། ཡུལ་གྱི་རྣམ་རྟོག་དང་། མི་འཆི་བའི་རྣམ་རྟོག་དང་། བརྙས་པ་དང་ལྡན་པའི་རྣམ་རྟོག་དང་། རིགས་སྙེམས་པ་དང་ལྡན་པའི་རྣམ་རྟོག་དང་། མྱ་ངན་དང་། སྡུག་བསྔལ་དང་། ཡིད་མི་བདེ་བ་དང་། འཁྲུགས་པ་ཞེས་བྱ་བ་དག་གོ། །ཉེར་བཞི་པོ་འདིའི་དོན་ནི་རིན་ཆེན་ཕྲེང་བ་དང་གཞི་བསྡུ་བ་ལས་ཤེས་པར་བྱའོ། །བཞི་པ་ཀུན་དཀྲིས་ལ། དངོས་ཀྱི་དོན་དང་། ཞར་ལ་དྲི་མ་བཤད་པ། དེ་དག་གི་ཁྱད་པར་བཤད་པའོ། །དང་པོ་ལ། ངོ་བོ་ངོས་བཟུང་བ་དང་། གང་གི་རྒྱུ་མཐུན་ཡིན་པའོ། །དང་པོ་ལ། རབ་ཏུ་བྱེད་པ་ལས་གསུངས་པ་དང་། བྱེ་སྨྲའི་འདོད་པ་གཉིས་སོ། །དང་པོ་ནི། ངོ་ཚ་མེད་དང་ཁྲེལ་མེད་དང་། །ཕྲག་དོག་སེར་སྣ་རྒོད་པ་དང་། །འགྱོད་དང་རྨུགས་དང་གཉིད་དང་ནི། །ཀུན་ནས་དཀྲིས་པ་རྣམ་པ་བརྒྱད། །འདིར་ཀུན་དཀྲིས་དང་ཉོན་མོངས་པའི་དྲི་མས་བསྡུས་པ་ཁོ་ན་བསྟན་པར་བྱ་སྟེ། རྩ་བའི་ཉོན་མོངས་ཀྱང་ཀུན་ནས་དཀྲིས་པ་ཡིན་ཏེ། མདོ་ལས། འདོད་པའི་འདོད་ཆགས་ཀྱིས་ཀུན་ནས་དཀྲིས་པ་སྡུག་བསྔལ་གྱི་རྐྱེན་ཅེས་འབྱུང་བའི་ཕྱིར། སྲིད་པའི་བཙོན་རར་ཀུན་ནས་དཀྲིས་པའམ། འདི་ཡོད་ན་སྤྱོད་པ་ངན་པ་དང་ལྡན་པས་ཀུན་དཀྲིས་སོ། །བསྟན་བཅོས་རབ་ཏུ་བྱེད་པ་ལས། ངོ་ཚ་མེད་དང་ཁྲེལ་མེད་དང་སྟེ་ཞེས་པ། མ་གུས་ངོ་ཚ་མེད་ཁྲེལ་མེད། །ཁ་ན་མ་ཐོ་འཇིགས་མི་ལྟ། །ཞེས་པས་དེ་ཉིད་བསྟན་ཟིན་ཏོ། །གཞན་གྱི་ཕུན་སུམ་ཚོགས་པ་ལ་མི་བཟོད་པ་སྔོན་དུ་འགྲོ་བ་ཅན་གྱི་སེམས་ཁོངས་ནས་འཁྲུག་ཅིང་། སེམས་ཀྱི་གདུང་བ་ཕྲག་དོག་དང་། སེར་སྣ་ནི་ཆོས་དང་ཟང་ཟིང་དང་། གསོ་པ་དང་། བཟོ་རིག་མཁས་པ་རབ་ཏུ་སྦྱིན་པ་དང་། འགལ་བ་ཅན་བདག་ལས་གཞན་དུ་མ་འགྲོ་ཞིག་སྙམ་པའི་རྣམ་པ་ཅན་སེམས་ཀྱིས་ཀུན་ཏུ་འཛིན་པ་དང་། གླུ་གར་དང་། སྒེག་པའི་ཆ་ལུགས་དང་། རྒྱན་གྱིས་སེམས་མ་ཞི་བ་རྒོད་པ་དང་། དེ་དང་ལྡན་པས་(༢༠༣ན)
ལམ་གོལ་བར་ཞུགས་པར་གྱུར་པའོ། །ངན་པར་བྱས་པའི་དངོས་པོ་ནི་འགྱོད་པ་དང་ལུས་དང་སེམས་ལས་སུ་མི་རུང་བ་རྨུགས་པ་དང་གཉིད་དང་ནི། ལུས་ཡང་དག་པར་འཛིན་མི་ནུས་པ་སེམས་མངོན་པར་སྡུད་པ་སྟེ། ཟུར་སྔ་མས་སྙོམས་འཇུག་གཅོད་ལ། དེས་ཉོན་མོངས་ཅན་ཁོ་ན་ཀུན་དཀྲིས་ཡིན་གྱི། དགེ་བ་དང་ལུང་མ་བསྟན་ནི་མ་ཡིན་ནོ། །འགྱོད་པའང་དེ་བཞིན་ནོ། །ཀུན་ནས་དཀྲིས་པ་རྣམ་པ་བརྒྱད་འབྱུང་ངོ་། །གཉིས་པ་ནི། ཁྲོ་དང་འཆབ་པའོ། བྱེ་སྨྲའི་ལུགས་ཀྱི་ཀུན་དཀྲིས་བཅུ་སྟེ། བརྒྱད་པོ་དེ་དག་དང་། ཀུན་ནས་མནར་སེམས་ཀྱི་སེམས། ཁྱད་པར་སེམས་ཅན་འདི་བསད་དམ། བཅིངས་སམ། བརླག་གམ། ཕོངས་པར་གྱུར་ན་ཅི་མ་རུང་སྙམ་པའི་གནོད་སེམས་དང་། སེམས་ཅན་ལ་བརྙས་པ་དང་། རྡེག་པ་དང་སྐྲག་པར་བྱེད་པ་དང་། བསྡིགས་པ་སོགས་རྣམ་པར་འཚེ་བ་མ་གཏོགས་སེམས་ཅན་དང་སེམས་ཅན་མིན་པར་ཀུན་ནས་མནར་སེམས་པ་ཁྲོ་བ་སྟེ། དགེ་སློང་བསླབ་པ་འདོད་པ་ལ་སེམས་འཁྲུགས་པ་དང་། ཚེར་མ་ལ་སོགས་ལ་འཁྲུགས་པ་ལྟ་བུའོ། །འཆབ་པ་ནི། ཁ་ན་མ་ཐོ་བ་སྨད་པར་བྱ་བ་ཚུལ་ཁྲིམས་དང་སྤྱོད་པ་དང་འཚོ་བ་རྒུད་པ་ཡིན་ལ། མཁྱུད་པ་ནི་དེ་སྦེད་པའི་རྒྱུ་སྟེ་སྡིག་པའི་ནང་དུ་བཞག་པའི་ཕྱིར་མི་མངོན་པར་བྱེད་པའོ། །གཉིས་པ་གང་གི་རྒྱུ་མཐུན་ཡིན་པ་ནི། འདོད་ཆགས་ཀྱིས། །ངོ་ཚ་མེད་རྒོད་སེར་སྣ་བསླང་། །འཆབ་པ་རྩོད་དོ་མ་རིག་ལས། །རྨུགས་དང་གཉིད་དང་ཁྲེལ་མེད་དོ། །ཐེ་ཚོམ་ལས་འགྱོད་ཁྲོ་བ་དང་། །ཕྲག་དོག་ཁོང་ཁྲོའི་རྒྱུ་ལས་བྱུང་། །ཀུན་དཀྲིས་དེ་རྣམས་ལས་ཉེ་ཉོན་ངོ་ཚ་མེད་རྒོད་སེར་སྣ་ནི་འདོད་ཆགས་ཀྱིས་སློང་བའི་རྒྱུ་མཐུན་པ་ཡིན་ནོ། །མཐོང་སྤང་གི་འདོད་ཆགས་དེའི་ནང་ནས་ཀྱང་སྡུག་བསྔལ་མཐོང་སྤང་གི་ངོ་ཚ་མེད་པར་བསླང་། སྒོམ་སྤང་འདོད་ཆགས་ཀྱིས་སྒོམ་སྤང་གི་ངོ་ཚ་མེད་པའི་བར་དུ་བསླང་། རྒོད་པའང་དེ་དང་འདྲ། སེར་སྣ་སྒོམ་སྤང་ཡིན་ཙམ་ན་སློང་བྱེད་ཀྱང་སྒོམ་སྤོང་གི་འདོད་ཆགས་ཁོ་ནས་(༢༠༣བ)
བསླང་བས་སྐལ་མཉམ་གྱི་རྒྱུ་མཐུན་ཡིན། འཆབ་པ་ནི། ཁ་ཅིག་སྲེད་པའི་རྒྱུ་མཐུན་ཡིན་ཅེ་ན། གཞན་དག་མ་རིག་པའི་རྒྱུ་མཐུན་པའོ་ཞེས་ཟེར་བས་རྩོད་དོ། །གཞན་དག་ན་རེ། དེ་དེ་གཉིས་ག་ཡིན་ཏེ། ཉེས་པ་མཐོལ་ན་རྒྱལ་པོ་སོགས་ཀྱི་བདག་གི་ཉེས་པ་ཤེས་པས་ང་ལ་རྙེད་བཀུར་ཆད་དེ་འགྲོ་སྙམ་པས་འཆབ་པ་སྲེད་པའི་རྒྱུ་མཐུན་པ་དང་། ཉེས་པ་དེ་ལ་རྣམ་སྨིན་ཡིད་དུ་མི་འོང་བ་འོང་བར་མ་ཤེས་པས་འཆབ་ན། འཆབ་པ་སྟེ་མ་རིག་པའི་རྒྱུ་མཐུན་ཡིན་ནོ་ཞེས་ཟེར་རོ། །རྨུགས་གཉིད་ཁྲེལ་མེད་གསུམ་མ་རིག་པ་ལས་བྱུང་བའི་རྒྱུ་མཐུན་པ་ཡིན་ནོ། །མཐོང་སྤོང་གི་མ་རིག་པ་ལས་མཐོང་སྤོང་གི་རྨུགས་པ་སློང་བ་སྐལ་མཉམ་གྱི་རྒྱུ་མཐུན་ཡིན། སྡུག་བསྔལ་མཐོང་སྤང་གི་མ་རིག་པས་སྡུག་བསྔལ་མཐོང་སྤང་གིས་རྨུགས་པ་བསླང་ན་ཤིན་ཏུ་སྐལ་མཉམ་གྱི་རྒྱུ་མཐུན་ཡིན། མཐོང་སྤོང་གི་མ་རིག་པ་ལས་སྒོམ་སྤང་གི་རྨུགས་པ་སློང་ན་ཀུན་འགྲོའི་རྒྱུ་མཐུན་ཡིན། ཁྲེལ་མེད་མ་རིག་པའི་རྒྱུ་མཐུན་དུ་ཅང་འོང་ངམ་སྙམ་ན། ཁྲེལ་མེད་པས་འཇིགས་པར་མི་ལྟ་བ་ཞེས་འབྱུང་བས་སོ། །འགྱོད་པ་ཉོན་མོངས་ཅན་ནི་ཐ་ཚོམ་ལས་བྱུང་བའི་རྒྱུ་མཐུན་པ་ཡིན་ནོ། །ཉེ་ཉོན་ཁྲོ་བ་དང་ཕྲག་དོག་ནི་རྩ་ཉོན་ཁོང་ཁྲོའི་རྒྱུ་ལས་བྱུང་བའོ། །ཐེ་ཚོམ་ནི་མཐོང་སྤང་ཁོ་ན་ཡིན། འགྱོད་པ་སྒོམ་སྤང་ཁོ་ན་ཡིན་ཙམ་ན་ཐེ་ཚོམ་གྱིས་འགྱོད་པ་སློང་ན་ཀུན་འགྲོའི་རྒྱུ་མཐུན་ཁོ་ན་ཡིན་ནོ། །ཉེ་བའི་ཉོན་མོངས་པ་བཅུ་པོ་རྩ་ཉོན་གྱི་རྒྱུ་མཐུན་པ་ཡིན་ནོ། །གཉིས་པ་ཞར་ལ་དྲི་མ་བཤད་པ་ལ། དྲི་མའི་དབྱེ་བ། སོ་སོའི་རྒྱུའོ། །དང་པོ་ནི། གཞན་ཡང་ཉོན་མོངས་དྲི་མ་དྲུག །སྒྱུ་དང་གཡོ་དང་རྒྱགས་པ་དང་། །དེ་བཞིན་འཚིག་དང་ཁོན་འཛིན་དང་། །རྣམ་འཚེ། གཞན་ཡང་ལུས་ལ་དྲི་མ་འབྱུང་བ་བཞིན་རྩ་བའི་ཉོན་མོངས་པ་ལས་བྱུང་བའི་དྲི་མ་ལྟ་བུ་དྲུག་ནི། གཞན་འདྲིད་པའི་བསམ་པ་ཅན་སྲང་སོགས་ལ་གཡོ་བྱེད་པའི་སྒྱུ་(༢༠༤ན)
དང་། གཡོ་ནི་རང་གཞན་གྱི་ནང་གི་བསམ་པ་མཁྱུད་པ་དང་མི་གསལ་བར་བྱེད་པའི་ཐབས་སུ་གནས་པའི་སེམས་གྱ་གྱུ་བ་སྟེ། དེས་ཡང་དག་པ་ཇི་ལྟ་བ་བཞིན་མི་འཆགས་ཀྱི་གཏམ་རླུང་ལ་བསྐུར་བ་སྟེ་གཞན་དུ་བསྒྱུར་བའམ་མི་གསལ་བར་བྱེད་པའོ། །རང་གི་ཆོས་ལ་ཆགས་པ་ཡི། །སེམས་ནི་ཡོངས་སུ་གཏུགས་པའོ། །ཞེས་སྔར་བཤད་ཀྱི། རྒྱགས་པ་དང་དེ་བཞིན་དུ་འཚིག་པ་ནི་ཁ་ན་མ་ཐོ་བ་དང་བཅས་པའི་དངོས་པོ་དམ་དུ་འཛིན་པ་སྟེ། གང་གིས་རིགས་པར་གཏམས་པ་མི་འཛིན་པ་དང་མཁོན་དུ་འཛིན་པ་ནི་ཀུན་ནས་མནར་སེམས་ཀྱི་དངོས་པོ་ལན་མང་དུ་བྱེད་པ་དང་། རྣམ་པར་འཚེ་བ་ནི་ཐེ་ཚོམ་པ་སྟེ། གང་གིས་མཚོན་ཆ་དང་ཚིག་རྩུབ་དག་གིས་ཕ་རོལ་པོ་རྣམ་པར་ཐོ་འཚམས་པར་བྱེད་པའོ། །གཉིས་པ་ནི། སྒྱུ་དང་རྒྱགས་པ་ནི། །འདོད་ཆགས་ལས་སྐྱེས་ཁོན་འཛིན་དང་། །རྣམ་འཚེ་ཁོང་ཁྲོ་ལས་སྐྱེས་སོ། །འཚིག་པ་ལྟ་བ་མཆོག་འཛིན་ལས། །གཡོ་ནི་ལྟ་བས་ཀུན་ནས་བསླང་། །དྲི་མ་དྲུག་པོ་དེ་ལས་སྒྱུ་དང་རྒྱགས་པ་ནི་འདོད་ཆགས་ལས་སྐྱེས་པ་ཡིན་ལ། མཁོན་འཛིན་དང་རྣམ་འཚེ་ནི་ཁོང་ཁྲོ་ལས་སྐྱེ་བས་སོ། །འཚིག་པ་ནི་ལྟ་བ་མཆོག་འཛིན་ལས་སྐྱེས་ཤིང་གྱ་གྱུ་ཅི་ཡིན་སྡིག་ཅན་ལྟ་ཞེས་འབྱུང་བས་དྲི་མ་གཡོ་ནི་ཉོན་མོངས་ལྟ་བས་ཀུན་ནས་སློང་བའོ། །ལྟ་བ་མཆོག་འཛིན་ཀྱང་དམན་པ་ལ་མཆོག་ཏུ་འཛིན་པ་ཡིན་ལ། འཚིག་པའང་སྡིག་པ་དམན་པ་ལ་ཞེན་པ་ཡིན་པས། ལྟ་བ་མཆོག་འཛིན་མཐོང་སྤོང་ལས་འཚིག་པ་བྱུང་བ་དེ་ཀུན་འགྲོའི་རྒྱུ་མཐུན་ཡིན་ཏེ། འཚིག་པ་སྒོམ་སྤང་ཡིན་ནོ། །གསུམ་པ་དེ་དག་གི་ཁྱད་པར་བཤད་པ་ལ། མཐོང་སྤང་དང་སྒོམ་སྤང་གི་ཁྱད་པར། མི་དགེ་བ་དང་ལུང་མ་བསྟན་གྱི་ཁྱད་པར། ཁམས་དང་སའི་ཁྱད་པར་རོ། །དང་པོ་ནི། དེ་ལས་ངོ་ཚ་མེད་པ་དང་། །ཁྲེལ་མེད་རྨུགས་གཉིས་རྒོད་རྣམས་གཉིས། །དེ་ལས་གཞན་ནི་བསྒོམ་སྤང་བྱ། །རང་དབང་དེ་བཞིན་དྲི་མ་རྣམས། །ཀུན་དཀྲིས་བཅུར་བཤད་པ། དེ་ལ་ངོ་ཚ་མེད་པ་དང་ཁྲེལ་མེད་པ་དང་རྨུགས་པ་དང་གཉིད་པ་དང་རྒོད་པ་སྟེ་ཆོས་ལྔ་པོ་མཐོང་སྤོང་དང་སྒོམ་སྤང་རྣམ་པ་གཉིས་ཏེ། མཐོང་སྒོམ་(༢༠༤བ)
གྱི་ཉོན་མོངས་པ་དང་མཚུངས་པར་ལྡན་པའི་ཕྱིར། ལྔ་པོ་དེ་ལས་གཞན་པའི་ཉེ་ཉོན་ཀུན་དཀྲིས་ཀྱིས་བསྡུས་པ་ཕྲག་དོག་དང་། སེར་སྣ་དང་། འགྱོད་པ་དང་། ཁྲོ་བ་དང་། འཆབ་པ་ནི་སྒོམ་པས་སྤང་བྱ་ཁོ་ན་དང་། རང་དབང་ཡང་ཡིན་ཏེ། ཉེ་ཉོན་ལྔ་པོ་དེ་དག་མ་རིག་པ་ཙམ་དང་མཚུངས་ལྡན་ཡིན་པའི་ཕྱིར། མ་རིག་པ་ཙམ་དང་མཚུངས་པས་རང་དབང་ཅན་ཡིན་པ་ལ་རིགས་པ་ཅི་ཡོད་ཅེ་ན། དེ་དག་འཇུག་པ་ལ་ནི་རང་ཉིད་གཙོ་བོ་ཡིན་གྱི། འདོད་ཆགས་སོགས་ཉོན་མོངས་གཞན་ལ་མི་བལྟོས་ལ། མ་རིག་པ་ཙམ་དང་མཚུངས་པར་ལྡན་ཀྱང་མ་རིག་པ་ནི་གླེན་པའི་ཕྱིར་འཇུག་བྱེད་མ་ཡིན་ནོ། །ཕྲག་དོག་སོགས་ཉེ་ཉོན་ལྔ་པོ་དེ་དག་སྒོམ་སྤང་རང་དབང་ཅན་ཡིན་པ་དེ་བཞིན་དུ་ཉོན་མོངས་དྲི་མ་དྲུག་པོ་རྣམས་ཀྱང་ཕྲག་དོག་སོགས་ལྔ་པོ་དེ་དང་འདྲ་བར་སྒོམ་སྤང་དང་རང་དབང་བའོ། །གཉིས་པ་ནི། འདོད་ན་མི་དགེ་གསུམ་རྣམ་གཉིས། །དེ་ཡན་ཆད་ནི་ལུང་མ་བསྟན། །རྨུགས་རྒོད་གཉིད་མ་གཏོགས་པ་ཉེ་ཉོན་ཀུན་དཀྲིས་བདུན་དང་སྒྱུ་ལ་སོགས་པ་དྲུག་ཇི་སྐད་བཤད་པ་ནི་འདོད་ཁམས་ན་མི་དགེ་བའོ། །དེ་ལས་ཀྱང་རྨུགས་པ་དང་རྒོད་པ་དང་གཉིད་གསུམ་པོ་ནི་མི་དགེ་བ་དང་ལུང་མ་བསྟན་རྣམ་པ་གཉིས་དག་གོ་། གཉིད་དགེ་བ་ཡོད་ཀྱང་ཀུན་དཀྲིས་ཀྱི་སྐབས་ཡིན་པས་མི་བཟུང་ངོ་། །འདོད་ཁམས་དེ་ཡན་ཆད་ཀྱི་ཉེ་ཉོན་ཇི་སྙེད་སྲིད་པ་རྣམས་ནི་ལུང་དུ་མ་བསྟན་པའོ། །གསུམ་པ་ནི། འདོད་དང་བསམ་གཏན་དང་པོ་ན། །གཡོ་སྒྱུ་ཚངས་པས་འདྲིད་ཕྱིར་རོ། །རྨུགས་རྒོད་རྒྱགས་པ་ཁམས་གསུམ་ན། །གཞན་དག་འདོད་ཁམས་ལས་སྐྱེས་པ། །དེའང་འདོད་པ་དང་བསམ་གཏན་དང་པོ་ན་གཡོ་སྒྱུ་གཉིས་ཡོད་དེ། ཚངས་པ་ཆེན་པོ་ནི་རང་གི་འཁོར་གྱིས་བརྙས་པའི་ངོ་ཚ་བས་བདག་ཉིད་མི་ཤེས་པ་སྦེད་པ་ནི་རང་ཉིད་ལོག་པར་ཀུན་ཏུ་སྟོན་པས་ལྔ་སྡེའི་རྟ་ཐུལ་འདྲིད་པར་ཞུགས་པའི་ཕྱིར། ཚུལ་ཁྲིམས་ཀྱི་ཕུང་པོའ་ིམདོ་ལས། འཕགས་པ་རྟ་ཐུལ་གྱིས། ཚངས་པ་ལ་འབྱུང་བ་ཆེན་པོ་བཞི་འདི་དག་མ་ལུས་པར་གང་དུ་འགག་པར་འགྱུར་དྲིས་པ་དང་། མ་(༢༠༥ན)
ཤེས་ནས་གཏམ་རླུང་ལ་བསྐུར་ཏེ། བདག་ནི་ཚངས་པའོ། །ཚངས་པ་ཆེན་པོའོ། །དབང་ཕྱུག་གོ། །བྱེད་པ་པོའོ། །སྤྲུལ་པ་པོའོ། །འབྱིན་པ་པོའོ། །འབྱིན་བྱེད་དོ། །དངོས་པོ་རྣམས་ཀྱི་ཕར་གྱུར་པ་ཡིན་ནོ། །ཞེས་སྨྲས་སོ། །དེའི་འོག་ཏུ་ཚངས་པ་དེས་ཚེ་དང་ལྡན་པ་རྟ་ཐུལ་གྱི་ལག་ནས་བཟུང་སྟེ་ཕྱོགས་གཅིག་ཏུ་འདུག་ནས་དེ་བཞིན་གཤེགས་པ་བཞུགས་བཞིན་དུ་བདག་ལ་འདྲི་བར་སེམསསམ་ཞེས་སྨྲས་སོ། །དེ་ནི་ཚངས་པའི་སྒྱུ་ཡིན་པར་སྣང་ངོ་། །གཡོ་ནི། དེ་ལས་འགྱོད་གཉིད་མི་དགེ་རྣམས། །བསམ་གཏན་དང་པོ་དག་ན་མེད། །ཅེས་པ་དེར་བཤད་ཟིན་མོད་ཀྱང་། ཞར་ལ་འོངས་པས་ཀྱང་སྨོས་སོ། །རྨུགས་རྒོད་རྒྱགས་པ་གསུམ་ནི་ཁམས་གསུམ་ན་ཡོད་པའོ། །བཅུ་དྲུག་ལས་དེ་གསུམ་དང་། གཡོ་སྒྱུ་གཉིས་ཏེ་ལྔ་བོར་བས་གཞན་ཉེ་ཉོན་བཅུ་གཅིག་པོ་དག་འདོད་ཁམས་སྐྱེས་པ་ཁོ་ནའོ། །གཉིས་པ་དེ་རྣམས་གང་དང་མཚུངས་ལྡན་ལ། སེམས་གང་དང་མཚུངས་ལྡན། ཚོར་བ་གང་དང་མཚུངས་ལྡན་ནོ། །དང་པོ་ནི། མཐོང་སྤང་བྱ་གཉིད་ང་རྒྱལ་བཅས། །ཡིད་ཀྱི་རྣམ་ཤེས་ས་པ་ཡིན། །ཉེ་བའི་ཉོན་མོངས་རང་དབང་ཡང་། །གཞན་ནི་རྣམ་ཤེས་དྲུག་རྟེན་ཅན། །མཐོང་བས་སྤང་བྱའི་ཉོན་མོངས་དང་ཉེ་བའི་ཉོན་མོངས་ཐམས་ཅད་དང་། གཉིད་དང་ང་རྒྱལ་ནི་མཐོང་སྒོམ་གྱི་སྤང་བྱ་རིས་ལྔ་ཅར་དང་། བཅས་པ་ཡིན་ཀྱང་ཐམས་ཅད་ཡིད་ཀྱི་རྣམ་ཤེས་ཀྱིས་་ས་པ་ཡིན་ནོ། །ཕྲག་དོག །སེར་སྣ། འགྱོད་པ། ཁྲོ་བ། འཆབ་པ་དྲི་མ་རྣམས་ཏེ། ཉེ་བའི་ཉོན་མོངས་རང་དབང་ཅན་དེ་ཡང་སྒོམ་སྤང་ཡིན་ཡང་ཡིད་ཤེས་ཀྱིས་ས་པ་ཁོ་ན་ཡིན་ནོ། །ཉོན་མོངས་དང་ཉེ་བའི་ཉོན་མོངས་གཞན་སྒོམ་སྤོང་འདོད་ཆགས་ཁོང་ཁྲོ་མ་རིག་པ་རྣམས་དང་དེ་དག་དང་མཚུངས་ལྡན་ཉེ་ཉོན་ངོ་ཚ་མེད་པ་ཁྲེལ་མེད་པ་རྨུགས་རྒོད་རྣམས་དང་། ཉོན་མོངས་པའི་ས་པ་མང་པོའི་ནང་དུ་བཤད་པའི་བག་མེད། ལེ་ལོ། །མ་དད་པ་དག་ཁོ་ན་ཡིན། རྨུགས་རྒོད་ནི་སྐབས་འདི་ཉིད་(༢༠༥བ)
དུ་སྔར་སྨོས་ཟིན། གཏི་མུག་ནི་ཉོན་མོངས་པ་ཞེས་སྨོས་པས་བསྡུས་ལ། དེ་རྣམས་ནི་རྣམ་ཤེས་དྲུག་གི་ས་པའམ་རྟེན་ཅན་ནོ། །གཉིས་པ་ཚོར་བ་གང་དང་མཚུངས་པར་ལྡན་པ་ལ། རྩ་ཉོན་གང་དང་ལྡན་པ། ཉེ་ཉོན་གང་དང་ལྡན་པའོ། །དང་པོ་ལ། འདོད་པའི་དང་། ཁམས་གོང་གིའོ། །དང་པོ་ནི། བདེ་བ་དག་དང་འདོད་ཆགས་སུ། །མཚུངས་ལྡན་ཞེ་སྡང་བཟློག་པའོ། །མ་རིག་པ་དག་ཐམས་ཅད་དང་། །མེད་ལྟ་ཡིད་བདེ་སྡུག་བསྔལ་དང་། །ཡིད་མི་བདེ་དང་ཐེ་ཚོམ་མོ། །གཞན་ཡིད་བདེ་དང་འདོད་ལས་སྐྱེས། །བཏང་སྙོམས་དད་ཀུན། ལུས་ཚོར་བདེ་བ་དང་ཡིད་ཀྱི་བདེ་བ་དག་དང་འདོད་ཆགས་སུ་མཚུངས་པར་ལྡན་ནོ། །ཞེ་སྡང་ནི་བཟློག་པ་སྡུག་བསྔལ་དང་ཡིད་མི་བདེ་དང་མཚུངས་པར་ལྡན་ཏེ། ཆགས་སྡང་ནི་དགའ་བ་དང་སྐྱོ་བའི་རྣམ་པར་འཇུག་པའི་ཕྱིར་དང་། རྣམ་ཤེས་དྲུག་གི་ས་པ་ཡིན་པའི་ཕྱིར། མ་རིག་པ་དག་ནི་ཉོན་མོངས་ཐམས་ཅད་དང་མཚུངས་པར་ལྡན་པའི་ཕྱིར་ཚོར་བའི་དབང་པོ་ལྔ་པོ་ཐམས་ཅད་དང་མཚུངས་ལྡན་ནོ། །མེད་པར་ལྟ་བའི་ལོག་ལྟ་ནི་སྡིག་པའི་ལས་ཅན་རྣམས་ཀྱི་ཡིད་བདེ་དང་མཚུངས་པར་ལྡན་ཏེ། རང་གིས་བྱས་པའི་སྡིག་པ་འབྲས་བུ་མེད་པར་མཐོང་བའི་ཕྱིར། བསོད་ནམས་ཀྱི་ལས་ཅན་རྣམས་ཀྱི་མེད་ལྟ་ནི་ཡིད་ཀྱི་སྡུག་བསྔལ་ཡིད་མི་བདེ་དང་མཚུངས་ལྡན་ཡིན་ཏེ། བསོད་ནམས་བྱེད་པའི་འབད་པ་དོན་མེད་པར་མཐོང་བའི་ཕྱིར། ཐེ་ཚོམ་ཟོས་པ་ངེས་པར་དོན་དུ་གཉེར་བ་ན་ཡིད་མི་བདེ་བར་འགྱུར་བས་ཡིད་མི་བདེ་བ་དང་མཚུངས་ལྡན་ཐེ་ཚོམ་མོ། །གཞན་ལྟ་བ་བཞི་པོ་འཇིག་ལྟ། མཐར་ལྟ། ལྟ་བ་མཆོག་འཛིན། ཚུལ་ཁྲིམས་དང་བརྟུལ་ཞུགས་མཆོག་འཛིན་དང་། ང་རྒྱལ་ནི་ཡིད་བདེ་དང་མཚུངས་ལྡན་ཏེ། དགའ་བའི་རྣམ་པར་འཇུག་པའི་ཕྱིར། ཆད་ལྟ་ཡིད་བདེ་དང་མཚུངས་ལྡན་ནི་དེ་མངོན་པར་འདོད་པའི་ཕྱིར། དེའང་ཆེ་ལོང་ཙམ་དུ་དཔྱད་པ་ཡིན་གྱི། ཞིབ་ཏུ་ན། ཕུན་སུམ་ཚོགས་པ་ལ་བདག་ཏུ་འཛིན་ན་ཡིད་བདེ། ནད་བཅས་འབྲས་བཅས་ལ་བདག་ཏུ་འཛིན་ན་ཡིད་མི་བདེ། ཕུན་ཚོགས་ལ་རྟག་པར་(༢༠༦ན)
འཛིན་ན་ཡིད་བདེ། ཆད་པར་འཛིན་ན་ཡིད་མི་བདེ། ནད་བཅས་འབྲས་བཅས་ལ་རྟག་པར་འཛིན་ན་ཡིད་མི་བདེ། ཁྱད་ཅན་བདེ་བ་ལ་མཆོག་ཏུ་འཛིན་ན་ཡིད་བདེ། དམན་པ་སྡུག་བསྔལ་ལ་འདག་གྲོལ་དུ་འཛིན་ན་ཡིད་མི་བདེ། ཁྱད་པར་ཅན་ལྟ་བ་ལ་ལ་འདག་གྲོལ་དུ་འཛིན་ན་ཡིད་བདེའོ། །དེ་ལྟར་མཚུངས་པར་ལྡན་པ་ནི་འདོད་པ་ལས་སྐྱེས་པའི་སོ་སོར་ངེས་པ་སྟེ། དེ་ལས་གཞན་ན་སྡུག་བསྔལ་དང་ཡིད་མི་བདེ་བ་མེད་པའི་ཕྱིར་དང་། ཁོང་ཁྲོ་མེད་པའི་ཕྱིར་རོ། །སྤྱིར་སྨྲས་པ། ཕྲ་རྒྱས་ཀུན་བཏང་སྙོམས་ཀྱི་དབང་པོ་དང་མཚུངས་པར་ལྡན་ཏེ། ཉོན་མོངས་རྣམས་ཀྱི་རྒྱུན་ཆད་པའི་དུས་ན་བཏང་སྙོམས་ཀུན་ཏུ་གནས་པའི་ཕྱིར་ཏེ། འཇིག་པའི་གནས་སྐབས་ན་ཞན་པའི་ཕྱིར། དགའ་བ་དང་སྐྱོ་བའི་རྣམ་པས་དེ་དང་མཚུངས་པར་མི་ལྡན་པས་འགྲེལ་པར་མ་རངས་པའི་དོན་དུ་གྲག་གོ་ཞེས་སྨོས་སོ། །བྱེ་སྨྲ་རྣམས་ནི་འགལ་བ་མེད་པའི་ཕྱིར། སྐྱེས་བུ་གཟུ་བོ་བཞིན་ཅེས་ཟེར་རོ། །གཉིས་པ་ནི། ས་གོང་མ། །ས་ཇི་བཞིན་དུ་རང་རང་དང་། །ས་གོང་མའི་ཕྲ་རྒྱས་རྣམས་ནི་ས་གོང་ན་དབང་པོ་ཇི་སྙེད་ཅིག་ཡོད་པ། ས་ཇི་ལྟ་བ་བཞིན་དུ་རང་རང་གི་དབང་པོ་རྣམས་དང་མཚུངས་པར་ལྡན་ཏེ། བསམ་གཏན་དང་པོ་ན་མིག་རྣ་ལུས་གསུམ་གྱི་བདེ་བ་དང་། རྣམ་ཤེས་ཚོགས་བཞིའི་བཏང་སྙོམས་དང་ཡིད་བདེ་དང་ཅི་རིགས་པར་མཚུངས་པར་ལྡན་ལ། གཉིས་པ་ཡན་ཆད་ན་ཡིད་ཀྱི་ས་པའི་ཡིད་བདེ་དང་། བདེ་བ་དང་། བཏང་སྙོམས་དང་ཅི་རིགས་པར་མཚུངས་པར་ལྡན་ཏེ། བསམ་གཏན་གཉིས་པ་ན་ཡིད་བདེ་དང་བཏང་སྙོམས་ཀྱི་དབང་པོ། གསུམ་པ་ན་བདེ་བ་དང་བཏང་སྙོམས་ཀྱི་དབང་པོ། བསམ་གཏན་བཞི་པ་དང་གཟུགས་མེད་ན་ནི་བཏང་སྙོམས་ཀྱི་དབང་པོ་ཡོད་དོ། །དེ་ལ་ཕྲ་རྒྱས་ཐམས་ཅད་ཀྱང་ཇི་ལྟར་འོས་འོས་སུ་ཚོར་བའི་དབང་པོ་དང་མཚུངས་(༢༠༦བ)
པར་ལྡན་པ་ཡིན་ཏེ། དེ་ནི་ཞི་གནས་ཀྱིས་རྒྱུད་བརླན་པའི་ཕྱིར་དགའ་བ་དང་སྐྱོ་བ་རྣམ་པར་བཞག་པ་ནི་མེད་དོ། །གཉིས་པ་ཉེ་ཉོན་གང་དང་ལྡན་པ་ནི། འགྱོད་དང་ཕྲག་དོག་ཁྲོ་བ་དང་། །རྣམ་འཚེ་ཁོན་དུ་འཛིན་པ་དང་། །འཚིག་པ་ཡིད་མི་བདེ་བ་དང་། །སེར་སྣ་དག་ནི་བཟློག་པ་ཡིན། །གཡོ་དང་སྒྱུ་དང་འཆབ་དང་གཉིས། །གཉིས་ཀ་དང་ལྡན་བདེ་དག་དང་། །རྒྱགས་པ་བཏང་སྙོམས་ཀུན་ཏུ་འགྲོ། །བཞི་པོ་གཞན་ནི་ལྔ་དག་དང་། །འགྱོད་དང་ཕྲག་དོག་ཁྲོ་བ་དང་། །རྣམ་འཚེ་མཁོན་དུ་འཛིན་པ་དང་། །འཚིག་པ་རྣམས་ནི་སྐྱོ་བའི་རྣམ་པར་འཇུག་ཅིང་ཡིད་ཀྱི་ས་པ་ཡིན་པའི་ཕྱིར། ཡིད་མི་བདེ་བ་དང་མཚུངས་ལྡན་ནོ། །སེར་སྣ་དག་ནི་བཟློག་པས་ཡིད་བདེ་དང་མཚུངས་ལྡན་ཡིན་ཏེ། ཆགས་པའི་རྒྱུ་ལས་བྱུང་བས་དགའ་བའི་རྣམ་པར་འཇུག་པའི་ཕྱིར། གཡོ་དང་སྒྱུ་དང་འཆབ་དང་གཉིད་རྣམས་ནི་རེས་འགའ་ཡིད་བདེ་དང་ཡིད་མི་བདེ་གཉིས་ཀ་དང་མཚུངས་པར་ལྡན་ཏེ། རེས་འགའ་ཡིད་བདེ་བའི་སྒོ་ནས་ཕ་རོལ་འདྲིད་པར་བྱེད་ལ། རེས་ཡིད་མི་བདེ་བས་བྱེད་དེ་གཉིད་ཀྱི་བར་དུའང་དེ་དང་འདྲའོ། །རྒྱགས་པ་ཡང་བསམ་གཏན་གསུམ་པ་ན་བདེ་བ་དང་དག་ཅེས་གཉིས་པ་མན་ཆད་ན་ཡིད་བདེ་དང་། བཞི་པ་ཡན་ཆད་ན་བཏང་སྙོམས་དང་མཚུངས་པར་ལྡན་ཏེ། བཏང་སྙོམས་ཉོན་མོངས་ཉེ་ཉོན་ཀུན་ཏུ་མཚུངས་པར་འགྲོ་བའི་ཕྱིར་ཏེ། དེ་ནི་མ་རིག་པ་བཞིན་གང་ལའང་འགལ་བ་མེད་པའི་ཕྱིར། ངོ་ཚ་མེད་རྨུགས་རྒོད་དེ་ཀུན་དཀྲིས་བཞི་པོ་གཞན་ནི་ཚོར་བའི་དབང་པོ་ལྔ་དག་དང་མཚུངས་པར་ལྡན་ཏེ། དང་པོ་གཉིས་མི་དགེ་བའི་ས་མང་པོ་བ་ཡིན་པའི་ཕྱིར་དང་། གཉིས་པ་ཉོན་མོངས་པའི་ས་མང་པོ་བ་ཡིན་པའི་ཕྱིར། གསུམ་པ་སྒྲིབ་པ་ལྔ་བསྟན་པ་ལ། ངོ་བོ་དང་། གྲངས་ངེས་སོ། །དང་པོ་ནི། འདོད་ན་སྒྲིབ་རྣམས། མདོ་ལས། འདོད་འདུན། གནོད་སེམས། རྨུགས་པ། གཉིད་རྒོད། འགྱོད་པ་དང་། ཐེ་ཚོམ་དང་སྒྲིབ་པ་ལྔ་གསུངས་པ་ལས། འདོད་འདུན་གནོད་སེམས་འགྱོད་གཉིད་བཞི་འདོད་ཁམས་པ་ཁོ་ནར་རྟོགས་སླ་བས་མི་འདྲིའི། རྨུགས་རྒོད་ཐེ་ཚོམ་གསུམ་པོ་དེ་ཁམས་གསུམ་ཆར་(༢༠༧ན)
ཡིན་ཙམ་ན་ཁམས་གསུམ་ཆར་གྱི་སྒྲིབ་པ་དེ་ཡིན་ནམ། འདོད་པའི་གསུམ་པོ་དེ་སྒྲིབ་པ་ཡིན་ཅེ་ན། མདོ་ལས། འདི་ནི་མི་དགེ་བའི་ཕུང་པོ་མ་འདྲེས་པ་ཡོངས་སུ་རྫོགས་པ་ཡིན་ཏེ། འདི་ལྟ་སྟེ། སྒྲིབ་པ་ལྔའོ་ཞེས་གཅིག་ཏུ་མི་དགེ་བར་གསུངས་པའི་ཕྱིར། འདོད་ན་བསམ་གཏན་དང་སྙོམས་འཇུག་གི་སྒྲིབ་པ་རྣམས་ཡོད་ལ། གཞན་ན་ནི་མེད་དོ། །གཉིས་པ་གྲངས་ངེས་ལ། བདུན་བཤད་པ་དང་མི་འགལ་བའི་རྒྱུ་མཚན་དང་། ལྔར་ངེས་པའི་རྒྱུ་མཚན་ནོ། དང་པོ་ནི། མི་མཐུན་དང་། །ཟས་དང་བྱ་བ་གཅིག་པའི་ཕྱིར། །གཉིས་གཅིག །ཅིའི་ཕྱིར་རྨུགས་གཉིད་གཉིས། རྒོད་འགྱོད་གཉིས་སེམས་བྱུང་ཐ་དད་ཡིན་བཞིན་དུ་སྒྲིབ་པ་རེ་རེར་བཤད་ཅེ་ན། རྨུགས་གཉིད་གཉིས་ཡོད་ཀྱང་སྒྲིབ་པ་གཅིག་ཏུ་བཤད་དེ། དེ་གཉིས་ཀྱི་མི་མཐུན་ཕྱོགས་གཉེན་པོ་གཅིག་པའི་ཕྱིར་དང་། ཟས་ཏེ་སྐྱེད་བྱེད་ཀྱི་རྒྱུ་གཅིག་པའི་ཕྱིར་དང་བྱ་བའང་གཅིག་པའི་ཕྱིར་རོ། །དེ་ལ་གཉིས་ཀའི་མི་མཐུན་པའི་ཕྱོགས་རང་སྤྱིའི་མཚན་ཉིད་དང་། སངས་རྒྱས་ཀྱི་ཡོན་ཏན་དྲན་པའི་སྣང་བའི་འདུ་ཤེས་ཏེ་གཉེན་པོ་དང་ཟས་མ་ཡིན་པ་ཞེས་ཀྱང་བྱའོ། །ཟས་ནི་ལྔ་སྟེ། ལུས་སེམས་ལས་སུ་མི་རུང་བའི་རྨྱ་བ་དང་། མི་དགའ་བ་དང་། བྱ་རྨྱངས་ཏེ་གླལ་བ་ལྡིང་བ་དང་། མ་འོས་པར་མང་དུ་ཟོས་པས་ལུས་ཤིག་ཤིག་པོར་གྱུར་པ་ཁ་ཟས་ཀྱི་དྲོད་མི་ཟིན་པ་དང་སེམས་ཞུམ་པ་ཉིད་དེ། དེ་དག་གིས་དེ་གཉིས་རྒྱས་པར་བྱེད་པའི་ཕྱིར་རོ། །གཉིས་པོ་ནི་དེའི་བྱ་བ་ནི་སེམས་ཞུམ་པར་བྱེད་པའོ། །དེ་བཞིན་དུ་རྒོད་འགྱོད་གཉིས་ཀྱང་སྒྲིབ་པ་གཅིག་ཏུ་བཞག་སྟེ། མི་མཐུན་ཕྱོགས་དང་ཟས་དང་བྱ་བ་གཅིག་པའི་ཕྱིར། དེ་ལ་འདི་གཉིས་ཀྱི་མི་མཐུན་ཕྱོགས་སམ་གཉེན་པོ་ནི་ཞི་གནས་ཡིན་ལ། ཟས་ནི་བཞི་སྟེ། ཉེ་དུའི་རྣམ་རྟོག་དང་། གོས་ཟས་ཚེགས་ཆུང་ངུ་རྙེད་སོགས་ཀྱི་ཡུལ་གྱི་རྣམ་རྟོག་དང་། (༢༠༧བ)
མི་འཆི་བའི་རྣམ་རྟོག་དང་། སྔོན་དག་བགད་པ་དང་། ལུས་ནོམས་པ་དང་། ཀུན་ཏུ་ནོམས་པས་གཙེས་པ་དང་། དགའ་མགུར་སྤྱོད་པ་རྣམས་རྗེས་སུ་དྲན་པའོ། །བྱ་བ་ནི་གཉིས་ཀས་སེམས་རྣམ་པར་མ་ཞི་བར་བྱེད་དོ། །འདོད་པ་ལ་འདུན་པའི་ཟས་སྡུག་པའི་མཚན་མ་དང་། ཟས་མ་ཡིན་པ་མི་སྡུག་པ་དང་། གནོད་སེམས་ཀྱི་ཟས་ཁོང་ཁྲོའི་མཚན་མ་དང་། ཐེ་ཚོམ་གྱི་ཟས་དུས་གསུམ་དང་། ཟས་མིན་པ་རྟེན་འབྲེལ་སོ་སོར་རྟོག་པའོ། །གཉིས་པ་ནི། ཕུང་པོ་གནོད་བྱེད་དང་། །ཐེ་ཚོམ་ཕྱིར་ན་ལྔ་ཉིད་དོ། །འདོད་པ་ལ་འདུན་པ་དང་། གནོད་སེམས་ཀྱིས་ཚུལ་ཁྲིམས་ཀྱི་ཕུང་པོ་ལ་གནོད་པར་བྱེད་དེ། རིམ་པ་བཞིན་འདོད་པ་དང་སྡིག་པ་ལས་དབེན་པ་རིང་དུ་བྱེད་པའི་ཕྱིར། རྨུགས་གཉིད་ཀྱིས་ཤེས་རབ་ཀྱི་ཕུང་པོ་ལ་གནོད་པར་བྱེད་དེ། དེས་ལྷག་མཐོང་རིང་དུ་བྱེད་པའི་ཕྱིར། རྒོད་འགྱོད་ཀྱིས་ཏིང་ངེ་འཛིན་གྱི་ཕུང་པོ་ལ་གནོད་པར་བྱེད་དེ། དེས་ཞི་གནས་རིང་དུ་བྱེད་པའི་ཕྱིར། ཏིང་ངེ་འཛིན་དང་ཤེས་རབ་མེད་ན་བདེན་པ་ལ་ཐེ་ཚོམ་ཟ་བར་འགྱུར་བའི་ཕྱིར་ན་ལྔ་ཉིད་དུ་བཤད་དོ། །གཞན་དག་ན་རེ། རྨུགས་གཉིད་ཤེས་རབ་དང་། རྒོད་འགྱོད་ཏིང་ངེ་འཛིན་གྱི་ཕུང་པོ་དང་འགལ་བར་རྟོག་པ་འདི་ལྟར་ན་ཆོས་ཅན། རྒོད་འགྱོད་ཀྱི་སྒྲིབ་པ་རྨུགས་གཉིད་ཀྱི་སྔར་སྨོས་རིགས་པར་ཐལ། ཚུལ་ཁྲིམས་དང་ཏིང་འཛིན་ཤེས་རབ་བསྟན་པའི་རིམ་པས་དེ་དག་གི་མི་མཐུན་ཕྱོགས་སུ་གྱུར་པའི་སྒྲིབ་པ་རྣམས་བསྟན་རིགས་པས་རིམ་པ་ལས་བརྒལ་བ་ལ་དགོས་པ་མེད་པའི་ཕྱིར། དེས་ན་གྲངས་ཀྱི་རིམ་པ་བཞིན་དུ་འདི་གཉིས་ཀྱིས་ཆོས་ཅན། ཏིང་ངེ་འཛིན་དང་ཤེས་རབ་ཀྱི་ཕུང་པོ་ལ་གནོད་པར་བྱེད་དེ། ཏིང་ངེ་འཛིན་ལ་བརྩོན་པ་ནི་རྨུགས་གཉིད་ཀྱིས་འཇིགས་ལ། ཆོས་རབ་ཏུ་འབྱེད་པ་ལ་བརྩོན་པ་རྒོད་འགྱོད་ཀྱིས་འཇིགས་པའི་ཕྱིར། ཇི་ལྟར་(༢༠༨ན)
འཇིགས་ན་ཏིང་འཛིན་ལ་རྒོད་འགྱོད་ཀྱིས་ཤིན་ཏུ་བར་ཆད་བྱེད་ཀྱང་དེ་ནི་ངོ་བོ་མི་འདྲ། འོ་ན་སེམས་ཞི་བ་ལ་རྨུགས་གཉིད་ཀྱིས་འཇིགས་བྱ་བ་དེ། སེམས་གནས་པའི་དུས་སུ་རྨུགས་གཉིད་བྱུང་ན། རྨུགས་གཉིད་ཏིང་འཛིན་དང་ངོ་བོ་འདྲ་ཙམ་ན། སྒོམ་ཆེན་ཁ་ཅིག་དེ་ཏིང་འཛིན་རང་ཡིན་ནམ་སྙམ་དུ་སེམས་པས་སྒྲིབ་པར་རྟོགས་པར་དཀའ་བ་དེ་རྟོགས་པར་བྱ་བའི་དོན་དུ་ཡིན། ཆོས་རྣམ་འབྱེད་ལ་ཤིན་ཏུ་ཡང་རྨུགས་གཉིད་སྒྲིབ་ཀྱང་། ཆོས་འབྱེད་པ་ལ་རྒོད་འགྱོད་ཀྱིས་འཇིགས་བྱ་བ་དེ་ཆོས་འབྱེད་པའི་དུས་སུ་རྒོད་འགྱོད་བྱུང་ཙམ་ན། ངོ་བོ་འདྲ་ཙམ་ན་རྒོད་འགྱོད་དེ་ཆོས་འབྱེད་པ་རང་ཡིན་སྙམ་དུ་སྒོམ་ཆེན་ཁ་ཅིག་སེམས་པས། རྒོད་འགྱོད་དེ་ཆོས་འབྱེད་པ་ལ་སྒྲིབ་པར་རྟོགས་དཀའ་བས་དེ་རྟོགས་པའི་ཆེད་དུ་བསྟན་པའོ་ཞེས་ཟེར་རོ། །གཞན་སྔོན་གྱི་སློབ་དཔོན་དག་ནི་གཞན་དུ་བརྗོད་དེ། བསོད་སྙོམས་ཀྱི་ཕྱིར་འབྱམས་ཤིང་རྒྱུ་བར་གྱུར་པས་གཟུགས་སྡུག་མི་སྡུག་གི་ཡུལ་ལ་བུད་མེད་ཀྱི་གཟུགས་སམ་སྒྲ་ཞེས་མཚན་མར་བཟུང་ན་དེ་སྔོན་དུ་འགྲོ་བས། ནང་དུ་ཡང་དག་འཇོག་པ་ན་འགྲེང་འདུག་འཆགས་པའི་ཚེ། འདོད་འདུན་དང་གནོད་སེམས་དག་དང་པོ་ཉིད་དུ་བར་ཆད་བྱེད། དེའི་འོག་ཏུ་ཏིང་འཛིན་དུ་ཞུགས་པས་ཞི་ལྷག་གི་རྒྱུ་མཚན་ཕྱིན་ཅི་ལོག་ཏུ་ཡིད་ལ་བྱེད་པ་རིགས་པ་མ་ཡིན་པར་ཞི་ལྷག་བསྟེན་པ་སྟེ། རྨུགས་གཉིད་ནི་ཞི་གནས་ལ་ཉེ་བའི་དངོས་པོ་ཉིད་དུ་གནས་པས་བར་ཆད་བྱེད། རྒོད་འགྱོད་ནི། མཉམ་གཞག་གི་ཤེས་རབ་ལ་བར་ཆད་བྱེད་དེ། རླུང་དམར་གྱིས་དཀྲུགས་པའི་ཆུ་ལ་གཟུགས་བརྙན་མི་སྣང་བ་བཞིན་རྒོད་འགྱོད་ཀྱིས་དཀྲུགས་པའི་སེམས་ལ་དེ་ཉིད་མཐོང་བ་མེད་པའི་ཕྱིར། ལངས་པའི་རྗེས་ཀྱི་ཆོས་ལ་ངེས་པར་རྟོགས་པའི་ཚེ་དེ་ཉིད་མཐོང་བའི་ཤེས་རབ་(༢༠༨བ)
ལའང་ཐེ་ཚོམ་བར་ཆད་བྱེད་དོ། །འདིར་སྨྲས་པ། །ལེགས་ལམ་བཟང་པོའི་དགའ་སྟོན་བདུད་རྩི་ཅན། །ཀུན་ནས་ཉིན་བྱེད་འོང་ལྟར་འབར་བ་དེས། །བདག་བློ་རྟག་ཏུ་བཏང་བར་མ་གྱུར་པས། །འཁྲུལ་མེད་གཏམ་གྱི་གྲུབ་པ་འདི་ན་ཡོད། །གཉིས་པ་གང་གིས་སྤོང་བ་ལ། ཇི་ལྟར་སྤང་ཚུལ། སྤོང་བྱེད་གཉེན་པོའི་དབྱེ་བ། གང་ལས་ཕྱེ་ནས་སྤོང་ཚུལ། སྤངས་པ་གང་གིས་ཐག་བསྲིང་བ། སྤངས་པའི་ཐོབ་པ་ཡང་དང་ཡང་དུ་བསྟན་པའོ། །དང་པོ་ལ། མཐོང་སྤང་དང་། སྒོམ་སྤང་སྤོང་ཚུལ་ལོ། །དང་པོ་ནི། དམིགས་པ་ཡོངས་སུ་ཤེས་པ་དང་། །དེ་ལ་དམིགས་པ་ཡང་དག་པར། །ཟད་དང་དམིགས་པ་སྤངས་པས་སོ། །ད་ནི་འདི་དཔྱད་པར་བྱ་སྟེ། སྡུག་ཀུན་གྱི་ཀུན་འགྲོ་ལོག་ལྟ་སོགས་ཀྱིས་ཁམས་གོང་གི་སྐལ་བ་མི་མཉམ་པ་ལ་དམིགས་པ་དེ་ཁམས་གོང་མ་གཉིས་ཀྱི་དམིགས་པ་རྗེས་སུ་ཤེས་པའི་ཡེ་ཤེས་ཀྱིས་ཡོངས་སུ་ཤེས་བྱ་ཡིན་ལ། དེའི་ཚེ་དེ་སྤོང་བར་མི་འགྱུར་ཏེ། སྔར་སྡུག་ཀུན་ལ་ཆོས་ཤེས་ཀྱི་ཡེ་ཤེས་ཀྱིས་སྤངས་ཟིན་པས་ད་སྤང་དུ་མེད་པའི་ཕྱིར། གང་གི་ཚེ། ཆོས་ཤེས་ཀྱི་ཡེ་ཤེས་ཀྱིས་སྡུག་ཀུན་གྱི་ཀུན་འགྲོ་སྐལ་བ་མི་མཉམ་པ་ལ་དམིགས་པ་དེ་སྤོང་བའི་ཚེ་ཁམས་གོང་མ་གཉིས་ཀྱི་དམིགས་པ་མི་ཤེས་ཏེ། ད་དུང་རྗེས་ཤེས་ཀྱི་ཡེ་ཤེས་མ་སྐྱེས་པའི་ཕྱིར། དེ་ལྟར་ཐེ་ལེ་བསྣོལ་དུ་སོད་ནས་དམིགས་ཡུལ་བདེན་བཞིའི་རང་བཞིན་ཤེས་པའི་ཚེ་དེ་རྣམས་མི་སྤངས་ཤིང་། དེ་རྣམས་སྤོང་བའི་ཚེ་ཡུལ་གྱི་རང་བཞིན་མི་ཤེས་ན། དེ་དག་ཇི་ལྟར་སྤོང་སྙམ་པ་དེ་ནི་སྐལ་བ་མི་མཉམ་པའི་ཀུན་འགྲོའི་དབང་དུ་བྱས་ཏེ་དྲི་བའོ། །འགོག་ལམ་གྱི་ལོག་ཞུགས་ལ་ལོག་ཞུགས་ཀྱི་དབང་དུ་བྱས་ཏེ་འདྲི་ན། འགོག་ལམ་གྱི་ལོག་ཞུགས་ཀྱི་ལོག་ཞུགས་ལ་དམིགས་པ་འགོག་ལམ་ལ་དངོས་སུ་ལོག་ཞུགས་ཀྱི་ལོག་ཞུགས་དང་། ཐེ་ཚོམ་མ་རིག་པ་ཡིན། དེ་གསུམ་དངོས་སུ་སྡུག་བསྔལ་དང་ཀུན་འབྱུང་ཡིན་ཙམ་ན་དམིགས་པ་དེ་སྡུག་ཀུན་ལ་(༢༠༩ན)
ཆོས་ཤེས་དང་རྗེས་ཤེས་ཀྱི་ཡེ་ཤེས་ཀྱིས་ཡོངས་སུ་ཤེས་ཙམ་ན་འགོག་ལམ་ལ་ལོག་ཞུགས་ཀྱི་ལོག་ཞུགས་མི་སྤོང་སྟེ། སྡུག་ཀུན་ལ་ལོག་ཞུགས་ཀྱི་མཐོང་སྤོང་ནི་མ་ཡིན། འགོག་ལམ་ལ་ལོག་ཞུགས་ཀྱི་མཐོང་སྤོང་ཡིན་པའི་ཕྱིར། འགོག་ལམ་ལ་ལོག་ཞུགས་ཀྱི་ལོག་ཞུགས་དེ་འགོག་ལམ་ལ་ཆོས་ཤེས་དང་རྗེས་ཤེས་ཀྱིས་སྤོང་བའི་ཚེ་འགོག་ལམ་ལ་ལོག་ཞུགས་ཀྱི་ལོག་ཞུགས་ལ་དམིགས་པ་ཀུན་དེས་མི་ཤེས་ཏེ། སྔར་ཤེས་ཟིན་ད་ལྟར་ཤེས་པར་བྱར་མེད་པའི་ཕྱིར། དེས་ན་ཐེ་ལེ་བསྣོལ་དུ་དམིགས་པ་ཡོངས་སུ་ཤེས་པའི་ཚེ་ནི་མི་སྤོང་། སྤོང་བའི་ཚེ་ན་ནི་དམིགས་པ་ཡོངས་སུ་མི་ཤེས་ན་དེ་དག་ཇི་ལྟར་སྤོང་ཞེས་འདྲི་བ་ན། ལན་དུ། ཉོན་མོངས་པ་རྣམས་ནི་ཆོས་ཅན། དམིགས་པ་ཡོངས་ཤེས་ཁོ་ནས་སྤོང་བར་བྱེད་པ་མ་ཡིན་ཏེ། དམིགས་པ་ཡོངས་ཤེས་དང་། དེ་ལ་དམིགས་པ་ཡང་དག་པར་ཟད་པ་དང་། དམིགས་པ་སྤོང་བ་དང་། གཉེན་པོ་སྐྱེས་པ་བཞི་ཡོད་པའི་ཕྱིར། རེ་ཞིག་མཐོང་སྤོང་སྤང་ཚུལ་ནི། དེ་ལ་དམིགས་པ་ཡོངས་སུ་ཤེས་པས་མཐོང་སྤོང་བརྒྱད་ཅུ་རྩ་བརྒྱད་ལས། སྡུག་བསྔལ་མཐོང་སྤོང་འདོད་པའི་རང་ས་ལ་དམིགས་པ་སྐལ་བ་མཉམ་པའི་ཁམས་ཀུན་འགྲོ་ལྟ་བ་དང་པོ་གཉིས། ཀུན་འགྲོ་མ་ཡིན་པ་འདོད་ཆགས་ཁོང་ཁྲོ་ང་རྒྱལ་གསུམ་དང་། ཀུན་འགྱུར་མཐོང་སྤོང་ཀུན་འགྲོ་མ་ཡིན་པ་འདོད་ཆགས་ལ་སོགས་པ་གསུམ་པོ་དེ་དག་ཉིད་དེ། དེ་ལྟར་བརྒྱད་དང་། ཁམས་གོང་མ་གཉིས་ན་ཁོང་ཁྲོ་མ་གཏོགས་པ་སྡུག་བསྔལ་མཐོང་སྤོང་དགུ་དགུ་དང་། ཀུན་འབྱུང་མཐོང་སྤོང་དྲུག་དྲུག་སྟེ་སུམ་ཅུ་དང་། ཁམས་གསུམ་གྱི་འགོག་ལམ་མཐོང་སྤོང་གི་མ་རིག་པ་དྲུག་(འདྲེས་པའི་མ་རིག་པ་ལ་དངོས་སུ་ལོག་ཞུགས་དང་། ལོག་ཞུགས་ཀྱི་ལོག་ཞུགས་འདྲེས་པའི་མ་རིག་པ་གཉིས། མཆན།)(༢༠༩བ)
མ་གཏོགས་པ་ཟག་མེད་ལ་དམིགས་པ་ལོག་ལྟ་དང་ཐེ་ཚོམ་བཞི་གསུམ་བཅུ་གཉིས་ཏེ་ལྔ་བཅུ་རྣམས་ནི་དམིགས་པ་བདེན་པ་བཞི་ལ་ལོག་པར་ཞུགས་པས་ན། མཐོང་ལམ་གྱི་བདེན་པ་བཞིའི་རང་མཚན་ཡོངས་སུ་ཤེས་པས་སྤངས་ཏེ། བདེན་པ་ལ་དངོས་སུ་ལོག་པར་ཞུགས་པ་གང་ཞིགརྣམ་པ་འགལ་བའི་ཡེ་ཤེས་སྐྱེས་པའི་ཕྱིར། ཐོར་ཤེས་ནས་མིར་འཛིན་བཟློག་པ་བཞིན་དེའང་བདེན་པ་ལ་དངོས་སུ་ལོག་ཞུགས་ནི་དམིགས་པའི་མཚན་ཉིད་ཡོངས་སུ་ཤེས་པས་སྤངས་ལ། ལོག་ཞུགས་ཀྱི་ལོག་ཞུགས་ནི་དམིགས་པའི་དངོས་པོ་ཤེས་པས་སྤོང་བ་ཡིན་ནོ། །ཉོན་མོངས་དེ་ལ་དམིགས་པར་བྱེད་པའི་ཉོན་མོངས་གཞན་ཡང་དག་པར་ཟད་པས་སྤོང་བ་དང་སྟེ། དེའང་དེ་དག་ལས་དགུ་གོང་དུ་དམིགས་ཞེས་པའི་འདོད་པའི་བདེན་པ་དང་པོ་གཉིས་ཀྱི་སྐལ་བ་མི་མཉམ་པའི་ཁམས་ཀུན་འགྲོ་དགུ་པོ་དེ་ནི། དེ་དག་ལ་དམིགས་པའི་ཡུལ་ཅན་འདོད་པའི་སྐལ་མཉམ་གྱི་ཁམས་ཀུན་འགྲོ་རྣམས་སྤངས་པས་སྤོང་སྟེ། སྐལ་བ་མི་མཉམ་པ་ལ་དམིགས་པ་ནི་སྐལ་མཉམ་གྱི་ཀུན་འགྲོ་ཡུལ་ཅན་སྤངས་ན། སྐལ་བ་མི་མཉམ་པའི་ཀུན་འགྲོའི་ཡུལ་དེའང་སྤང་བར་འགྱུར་བའི་ཕྱིར། ཡང་ན་སྐལ་མཉམ་དང་སྐལ་བ་མི་མཉམ་པའི་ཀུན་འགྲོ་ནི་ཕན་ཚུན་རྒྱུ་འབྲས་ཡིན་པས། རྒྱུ་མེད་ན་འབྲས་བུ་མི་སྲིད་པའི་ཕྱིར། རྐེད་པ་བཅག་ན་ལྡང་མི་ནུས་པ་བཞིན་ནོ། །གཟུགས་ཀྱིས་གཟུགས་མེད་ལ་དམིགས་པ་དགུ་ནི་དེ་གཉིས་བདེན་པ་གཅིག་ཅར་དུ་མཐོང་བས་དམིགས་པ་ཤེས་པས་སྤོང་པ་ཁོ་ནའོ། །ཉོན་མོངས་དེའི་དམིགས་པའི་ཡུལ་དུ་གྱུར་པའི་ཉོན་མོངས་སྤངས་པས་སྤོང་བ་ནི། ཁམས་གསུམ་གྱི་འགོག་ལམ་མཐོང་སྤོང་ཟག་བཅས་ལ་དམིགས་པ་ལོག་པ་ལ་ལོག་ཞུགས་འདོད་པ་ན་འགོག་པ་མཐོང་(༢༡༠ན)
སྤོང་། འདོད། ཁོང་། ང་རྒྱལ། ལྟ་བ་མཆོག་འཛིན་བཞི་དང་། ལམ་མཐོང་སྤོང་ལའང་སྔ་མ་བཞི་དང་། མཆོག་འཛིན་ཕྱི་མ་སྟེ་ལྔ་དང་དགུ། ཁམས་གོང་མ་གཉིས་ན་ཁོང་ཁྲོ་མ་གཏོགས་བདུན་བདུན་ཏེ་ཉེར་གསུམ་པོ་རྣམས་ནི་ཆོས་ཅན། དེ་དག་གི་དམིགས་ཡུལ་དངོས་སུ་ལོག་ཞུགས་འགོག་ལམ་མཐོང་སྤོང་ཟག་མེད་ལ་དམིགས་པ་ལོག་ལྟ་ལ་སོགས་པ་དེ་དག་སྤངས་པས་ཡུལ་ཅན་ལྟ་བ་མཆོག་འཛིན་སོགས་ཟག་བཅས་ལ་དམིགས་པ་ལོག་ཞུགས་ལ་ལོག་ཞུགས་དེ་དག་ཀྱང་སྤོང་བར་འགྱུར་ཏེ། འགོག་ལམ་ཆོས་བཟོད་ཆོས་ཤེས་རྗེས་བཟོད་རྗེས་ཤེས་ཀྱིས་ཡུལ་ཟག་མེད་ལ་དངོས་སུ་དམིགས་པ་ལོག་ལྟ་ལ་སོགས་པ་དེ་དག་ལོག་པར་ཞུགས་ཤིང་གཏོད་པར་ཤེས་པས་སྤངས་པ་ན། ཡུལ་མེད་པར་བྱས་པས་ཡུལ་ཅན་མི་སྲིད་པའི་ཕྱིར། རྟེན་མ་བྲལ་ན་འགྱེལ་བར་འགྱུར་བ་བཞིན་ནོ། །ཁམས་གསུམ་གྱི་མཐོང་སྤོང་གི་མ་རིག་པ་དྲུག་ནི་དངོས་སུ་ལོག་ཞུགས་ཟག་མེད་ལ་དམིགས་པ་དང་། ལོག་ཞུགས་ལ་ལོག་ཞུགས་ཟག་བཅས་ལ་དམིགས་པ་ནི་རིམ་པ་ལྟར་དམིགས་པ་ཡོངས་སུ་ཤེས་པ་དང་། དམིགས་ཡུལ་སྤངས་པས་སྤོང་བ་ཡིན་ནོ། །གཉིས་པ་ནི། གཉེན་པོ་སྐྱེས་པས་ཟད་པར་འགྱུར། །སྒོམ་སྤོང་རྣམས་ནི་བདེན་པ་རྣམས་སྔར་ཤེས་ཟིན་པས་དམིགས་པ་ཤེས་པས་ཀྱང་མ་ཡིན་ལ། དེ་ལ་དམིགས་པ་ཟད་པས་ཀྱང་མ་ཡིན་ཏེ། དེ་དག་སྐལ་བ་མི་མཉམ་པའི་ཁམས་ཀུན་འགྲོ་མ་ཡིན་པའི་ཕྱིར། དམིགས་པ་སྤངས་པས་ཀྱང་མ་ཡིན་ཏེ། སྔར་དམིགས་པ་སྤོང་བ་དང་། དེ་དག་ལ་དམིགས་པ་སྤོང་བ་ལས་ཕྱིས་འདོད་ཆགས་སོགས་སྤོང་བ་མ་ཡིན་པའི་ཕྱིར། འོན་ཀྱང་ཉོན་མོངས་པའི་རྣམ་པ་གང་གི་གཉེན་པོ་ལམ་གང་ཡིན་པ་སྐྱེས་པས་དེ་ཟད་ཅིང་སྤོང་བར་འགྱུར་རོ། །གཉེན་པོ་ནི་ཆེན་པོའི་ཆེན་པོས་ནི་ཆུང་(༢༡༠བ)
ངུའི་ཆུང་ངུ་ཞེས་བྱ་སྟེ། ས་དང་ས་ན་ཉེས་རྣམ་དགུ། །དེ་བཞིན་དུ་ནི་ཡོན་ཏན་རྣམས། །ཞེས་བྱ་བ་ནས་འཆད་པར་འགྱུར་རོ། །གཉིས་པ་སྤོང་བྱེད་གཉེན་པོའི་དབྱེ་བ་ནི། གཉེན་པོ་རྣམ་བཞི་སྤོང་བ་དང་། །གཞི་དང་སྲིད་ཉིད་རྣམ་པར་ནི། །སུན་འབྱིན་ཞེས་བྱ། གཉེན་པོ་དུ་ཡོད་ན། གཉེན་པོ་རྣམ་པ་བཞི་སྟེ། གང་གིས་ཉོན་མོངས་པའི་ཐོབ་པ་གཅོད་པ་བར་ཆད་མེད་པའི་ལམ་ནི་མི་མཐུན་པའི་དགྲའི་ཕྱོགས་སྤོང་བའི་གཉེན་པོ་སྟེ། སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པའོ། །བར་ཆད་མེད་ལམ་གྱིས་སྤངས་པའི་འབྲལ་ཐོབ་འདི་ཀུན་ཏུ་འཛིན་པས་བཞི་དང་། དེ་ཉིད་གཉེན་པོ་ཡིན་པས་གཞི་གཉེན་པོ་སྟེ་བར་ཆད་མེད་ལམ་དེ་ཡན་ཆད་ཀྱི་སྡུག་བསྔལ་ལ་ཆོས་ཤེས་སོགས་རྣམ་པར་གྲོལ་བའི་ལམ་གང་གིས་བར་ཆད་མེད་ལམ་གྱིས་སྤངས་པའི་བྲལ་ཐོབ་ཀུན་ཏུ་འཛིན་པའོ། །བར་ཆད་མེད་ལམ་དང་པོ་མ་གཏོགས་པའི་བར་ཆད་མེད་ལམ་དང་། ཁྱད་པར་གྱི་ལམ་ཡང་གཞི་གཉེན་པོ་ཡིན་ཏེ། དེའི་ཐོབ་པ་རྒྱུན་མི་འཆད་པའི་ཕྱིར་དང་། བར་ཆད་མེད་ལམ་གྱིས་སྤངས་པའི་ཐོབ་པ་དེ་ཀུན་ཏུ་འཛིན་པའི་ཕྱིར། ཉོན་མོངས་པའི་ཐོབ་པ་ཐག་བསྲིང་བའི་ངོ་བོ་ཉིད་ཀྱི་གཉེན་པོ་ནི་རྣམ་གྲོལ་གྱི་ལམ་སྡུག་བསྔལ་ལ་ཆོས་ཤེས་པ་མ་གཏོགས་པ་དེ་ཡན་ཆད་ཀྱི་ཁྱད་པར་གྱི་ལམ་གང་ཡིན་པ་སྟེ། ཉོན་མོངས་པའི་ཐོབ་པ་ཆད་པ་ཐག་སྲིང་བྱེད་ཡིན་པའི་ཕྱིར་རོ། །དེས་ན་རྣམ་གྲོལ་གྱི་ལམ་དང་པོ་སྡུག་བསྔལ་ཆོས་ཤེས་དེ་གཞི་གཉེན་པོ་ཁོ་ན་ཡིན་ནོ། །གཞན་ན་རེ། རྣམ་གྲོལ་གྱི་ལམ་དང་པོའང་ཡིན་ཏེ། དེས་ཀྱང་ཉོན་མོངས་པའི་ཐོབ་པ་དེ་ཐག་སྲིང་བར་བྱེད་དོ་ཞེས་ཟེར་རོ། །རྣམ་པར་ནི་སུན་འབྱིན་པའི་གཉེན་པོ་སྟེ། སྡུག་ཀུན་ལ་དམིགས་པའི་སྦྱོར་ལམ་ཡིན་རུང་། བར་ཆད་མེད་ལམ་ཡིན་རུང་། རྣམ་གྲོལ་གྱི་ལམ་ཡིན་རུང་། ཁྱད་པར་གྱི་ལམ་ཡིན་རུང་། ལམ་གང་གིས་ཁམས་དེ་ལ་སྐྱོན་དུ་མཐོང་ནས་(༢༡༡ན)
མི་རྟག་པ་ལ་སོགས་པའི་རྣམ་པར་སུན་འབྱིན་པར་བྱེད་པ་སྟེ། ལྡོག་པའི་སྒོ་ནས་བཞི་པ་ལ་གསུམ་པོ་དང་ངོ་བོ་གཅིག་པའང་སྲིད་པའི་ཕྱིར་རོ། །གཞན་ཡང་སློབ་དཔོན་གྱིས་བཞེད་པ་འདི་དག་གི་གོ་རིམ་ཐེམ་སྐས་ཀྱི་ཚུལ་ལྟར་སྐྱེ་པའི་རིམ་པ་དང་མཚན་ཉིད་མ་འཆོལ་བར་ཐུགས་ལ་བཞག་ནས་བཤད་དེ། རྣམ་པར་སུན་འབྱིན་པའི་གཉེན་པོ་ནི་སྡུག་ཀུན་ལ་དམིགས་པ་དྲོ་བ་སོགས་སྦྱོར་ལམ་དང་། སྤོང་བ་གཉེན་པོ་ནི་བར་ཆད་མེད་ལམ་བརྒྱད་ཅུ་རྩ་དགུ་(སྒོམ་སྤང་གྱ་གཅིག་དང་། བདེན་བཞི་ལ་དམིགས་པའི་ཁམས་གོང་འོག་གི་མཐོང་སྤོང་བརྒྱད་སྤོང་བའི་བར་ཆད་མེད་ལམ་མོ། །མཆན།)ཐམས་ཅད་དོ། །གཞི་གཉེན་པོ་ནི་རྣམ་གྲོལ་གྱི་ལམ་ཐམས་ཅད་དོ། །ཐག་སྲིང་བའི་ངོ་བོའི་གཉེན་པོ་དེ་གསུམ་ལས་གཞན་ཁྱད་པར་གྱི་ལམ་ཐམས་ཅད་དོ། །གསུམ་པ་གང་ལས་ཕྱེ་ནས་སྤོང་ཚུལ་ནི། དམིགས་པ་ལས། །ཉོན་མོངས་པ་ནི་སྤང་བྱར་འདོད། །ཉོན་མོངས་སློང་བ་ན་གང་ལས་སྤང་བར་བྱ་ཞེ་ན། སེམས་དང་མཚུངས་པར་ལྡན་པ་ལས་ཉོན་མོངས་དེ་གཅིག་པུ་བཀོག་ནས་ཚེར་མ་འདོན་པ་བཞིན་དུ་སེམས་གཅིག་པུ་རང་གི་འཚོགས་པ་ལས་བཞག་ནས་དབྱེ་བར་ནུས་པ་ནི་མ་ཡིན་པས། དམིགས་པའི་ཡུལ་སུན་ཕྱུང་བས་ཉོན་མོངས་པ་ནི་སྤང་བྱར་འདོད་དེ། དམིགས་པ་དེ་སྤངས་པ་ལས་དབྱེ་བར་ནུས་པས་དེ་ལ་དམིགས་ནས་མི་སྐྱེ་བའི་ཕྱིར་དང་། དཔེར་ན། དམིགས་པ་ཐག་པ་ལ་ཐག་པར་ཤེས་པས་སྦྲུལ་འཛིན་མི་འོང་བ་བཞིན། དེ་ལྟ་ནའང་ཐག་པ་ལ་སྦྲུལ་དུ་འཁྲུལ་པའི་གཞི་སྦྲུལ་དང་ལྷན་ཅིག་ཐག་པ་ཡོད་པའི་ཚེ་ཐག་པ་ལ་སྦྲུལ་འཛིན་མི་སྐྱེའང་ཐག་པ་དང་ལྷན་ཅིག་པའི་སྦྲུལ་མི་ལྡོག་པ་བཞིན་མཚུངས་ལྡན་ལས་ནི་མི་ནུས་ཏེ། དུས་མཉམ་དུ་སྐྱེས་ཟིན་པའི་ཕྱིར་རོ། །དེ་ལའང་བརྟག་པར་བྱ་བ་ཡོད་དེ། དེ་ཞིག་ཉོན་མོངས་པ་མ་འོངས་པ་(༢༡༡བ)
ནི་རྣམ་པར་ཕྱེ་ཟིན་པའང་དངོས་པོ་དེ་ལ་དམིགས་ནས་མི་སྐྱེའོ་ཞེས་པའི་གཏན་ཚིགས་དེས་དམིགས་པ་ལས་དབྱེ་ནུས་པར་གྲུབ་ཏུ་ཆུག་ནའང་། འདས་པའི་ཉོན་མོངས་ཀྱིས་ཡུལ་ལ་དམིགས་ཟིན་པ་དེ་གོ་ཡུལ་དེ་དང་དབྲལ་བར་མི་ནུས་པར་ཐལ། དམིགས་པར་བྱས་པའི་དངོས་པོ་དམིགས་པ་མ་ཡིན་པར་བྱར་མི་ནུས་པའི་ཕྱིར། ཞེས་དོགས་ན། བྱེ་སྨྲས། དུས་གསུམ་གྱི་ཡུལ་བདེན་བཞིའི་དམིགས་པ་ཇི་ལྟ་བ་བཞིན་དུ་ཡོངས་སུ་ཤེས་ཙམ་ན་འདས་པའི་ཉོན་མོངས་པའི་ཐོབ་པའང་བཅད་པས། འདས་པའི་ཉོན་མོངས་དམིགས་པ་ལས་དབྲལ་ནུས་པ་དེ་ཀ་ཡིན་མོད་ཅེ་ན། སློབ་དཔོན་དབྱིག་གཉེན་གྱིས། ལན་དེ་ཡང་ཁྱབ་པ་མ་ངེས་པ་ཡིན་ཏེ། ཉོན་མོངས་སྤོང་བ་ལ་དམིགས་པ་ཡོངས་ཤེས་སོགས་སྤོང་ཚུལ་བཞི་ཡོད་པ་ལས། དང་པོ་ལ་དེས་ཁྱབ་ཏུ་ཆུག་ཀྱང་། ཕྱི་མ་གསུམ་ལམ་ཁྱབ་པས། དེའི་ལན་བརྗོད་པར་བྱ་དགོས་སོ་ཞེས་པ་ལ། དེའི་ལན་སློབ་དཔོན་འདུས་བཟང་གིས་བཏབ་པ་ནི། ཕྲ་རྒྱས་ཀྱི་དམིགས་པ་ནི་རྣམ་པ་གཉིས་སུ་ཡོད་པ་ལས། སྐལ་མཉམ་ལ་དམིགས་པའི་ཀུན་འགྲོ་དང་། ཀུན་འགྲོ་མིན་པའི་ཉོན་མོངས་པའི་ཡུལ་དེ་རང་གི་རྒྱུད་ལ་ལྡན་པ་ཡིན་ནོ། །སྐལ་བ་མི་མཉམ་པ་ལ་དམིགས་པའི་ཀུན་འགྲོ་དང་། ཟག་མེད་ལ་དམིགས་པའི་ཉོན་མོངས་དེའི་ཡུལ་སྐལ་བ་མི་མཉམ་པ་དང་ཟག་མེད་རང་གི་རྒྱུད་ལ་མི་ལྡན་པ་ཡིན་པས། དམིགས་པ་གཉིས་ལ་དམིགས་པའི་ཐོབ་པ་ཉོན་མོངས་པ་མ་འོངས་པ་དང་འདས་པའི་རྒྱུ་དང་འབྲས་བུར་གྱུར་པ་གང་ཟག་ཉོན་མོངས་ཅན་མ་ཡིན་པའི་སེམས་རྒྱུད་ལ་ཡང་ཡང་རྒྱུན་མི་འཆད་པར་འབྱུང་ལ། དེས་ན་སྐལ་བ་མཉམ་པའི་ཉོན་མོངས་དང་འགོག་ལམ་ཟག་མེད་ལ་དམིགས་པའི་ཉོན་མོངས་ནི་དམིགས་པ་ཡོངས་སུ་ཤེས་པས་འདས་པའི་ཐོབ་པ་(༢༡༢ན)
གཅོད་པས་སྤངས་ལ། སྐལ་བ་མི་མཉམ་པ་ལ་དམིགས་པའི་ཉོན་མོངས་པ་དང་། འགོག་ལམ་ཟག་བཅས་ལ་དམིགས་པའི་ཉོན་མོངས་ནི་དམིགས་པ་ཡང་དག་པར་ཟད་པ་དང་། དམིགས་པ་སྤངས་པས་སྤོང་སྟེ། སྐལ་བ་མི་མཉམ་པ་ལ་དམིགས་པའི་ཉོན་མོངས་ནི་སྐལ་མཉམ་ལ་དམིགས་པ་དང་། མངོན་གྱུར་ཕན་ཚུན་རྒྱུ་འབྲས་ཡིན་པས་དེའི་ཐོབ་པའང་ཕན་ཚུན་རྒྱུ་འབྲས་ཡིན་ལ། རྒྱུ་ལོག་ན་འབྲས་བུ་མི་འབྱུང་བས་སྤོང་ཚུལ་ཕྱི་མ་རྣམས་ལའང་འདས་པའི་ཉོན་མོངས་དམིགས་པ་ནི་ཐོབ་པ་བཅད་པ་ཁོ་ནས་སྤོང་བར་འདོད་དོ། །སློབ་དཔོན་རྒྱལ་བའི་སྲས་ཀྱིས། འོ་ན་དེ་ལྟར་ན་སྐལ་བ་མི་མཉམ་པའི་དམིགས་ཡུལ་ཡོངས་སུ་མ་ཤེས་ན་སྐལ་མཉམ་ལ་དམིགས་པའི་ཉོན་མོངས་སྤོང་བར་མི་འགྱུར་ཏེ། ཕན་ཚུན་རྒྱུ་འབྲས་ཡིན་པས་རྒྱུ་མི་བཟློག་ན་འབྲས་བུའང་མི་བཟློག་པའི་ཕྱིར། རྟགས་ཁྱབ་ཁས་བླངས། མི་འདོད་ཀ་མེད། དེ་ལྟར་ན་གཉེན་པོ་སྐྱེས་པས་ཟད་འགྱུར་སོགས་སྤོང་ཚུལ་ཕྱི་མ་གསུམ་པོའང་དམིགས་པ་ཡོངས་ཤེས་ཀྱི་སྤོང་ཚུལ་ལས་ཟུར་དུ་བཞག་ཏུ་མེད་པ་དང་། དམིགས་པ་སྤངས་པས་ཉོན་མོངས་སྤོང་བའང་དམིགས་པ་ཡོངས་ཤེས་ལ་རྣམ་པར་བཞག་པ་ཙམ་དུ་ཟད་པའོ། །ཞེས་གསུངས་སོ། །སློབ་དཔོན་ཐོགས་མེད་ནི། མཚུངས་ལྡན་ལས་སྤོང་བར་འདོད་དེ། ཉོན་མོངས་དེ་སྤངས་ཙམ་ན་ཉོན་མོངས་དེ་སེམས་དང་མཚུངས་པར་ག་ལ་འོས་སུ་བཞེད་དེ་ཐེག་པ་ཆེན་པོའི་ལུགས་སོ། །ཅི་ཙམ་གྱིས་ན་ཉོན་མོངས་པ་སྤོང་བར་བརྗོད་ཅེ་ན། རང་རྒྱུད་ལ་ཡོད་པའི་ཉོན་མོངས་པ་ནི་ཐོབ་པ་ཆད་པ་དང་། བྲལ་ཐོབ་སྐྱེས་པའི་ཚུལ་གྱིས་སྤངས་ལ། གཞན་རྒྱུད་ལ་ཡོད་པའི་ཉོན་མོངས་དང་། རང་རྒྱུད་ལ་ཡོད་པའི་ཉོན་མོངས་ཅན་མིན་པ་དགེ་བ་ཟག་བཅས་དང་། མ་སྒྲིབ་ལུང་མ་བསྟན་(༢༡༢བ)
གཟུགས་ཅན་དང་གཟུགས་ཅན་མ་ཡིན་པའི་ཆོས་དེ་དག་ལ་དམིགས་པའི་ཡུལ་ཅན་རང་རྒྱུད་ལ་ཡོད་པའི་ཉོན་མོངས་པ་འདུན་པའི་འདོད་ཆགས་ལ་སོགས་པའི་ཐོབ་པ་ཆད་པས་གཞན་རྒྱུད་ལ་ཡོད་པའི་ཉོན་མོངས་སྤོང་བའི་ཐ་སྙད་དུ་བྱེད་དོ། །གཞན་རྒྱུད་ལ་ཡོད་པའི་ཉོན་མོངས་པ་སྤོང་བ་ནི་ཐོབ་པ་ཆད་པས་མ་ཡིན་ཏེ། རང་རྒྱུད་ལ་དེའི་ཐོབ་པ་མེད་པའི་ཕྱིར། །བཞི་པ་སྤངས་པ་གང་གིས་ཐག་བསྲིང་བ་ནི། མཚན་ཉིད་མི་མཐུན་མི་མཐུན་ཕྱོགས། །ཡུལ་རྣམ་ཆད་དང་དུས་ཀྱིས་ཏེ། །འབྱུང་དང་ཚུལ་ཁྲིམས་ཕྱོགས་དང་ནི། །དུས་གཉིས་རིང་བ་ཉིད་ལྟ་བུའོ། །ཐག་སྲིང་བའི་ངོ་བོ་རྣམ་པ་བཞི་ཡོད་དོ་ཞེས་གྲགས་ཏེ། མཚན་ཉིད་ཀྱིས་རིང་བ་ནི་འབྱུང་ཆེན་རྣམས་ལྷན་ཅིག་སྐྱེས་ཀྱང་མཚན་ཉིད་མི་མཐུན་པ་ཐ་དད་པས་རིང་བ་ཉིད་ལྟ་བུ་དང་། མི་མཐུན་པའི་ཕྱོགས་གཉེན་པོས་རིང་བ་འཆལ་ཚུལ་ལས་ཚུལ་ཁྲིམས་བཞིན་ནོ། །ཡུལ་རྣམ་པར་ཆད་པས་རིང་སྟེ་ཤར་ཕྱོགས་ཀྱི་རྒྱ་མཚོ་ལས་ནུབ་ཀྱི་རྒྱ་མཚོ་བཞིན་དང་། དུས་ཀྱིས་རིང་བ་ཆོས་མངོན་པ་ལས་དུས་གཉིས་ཀྱི་ཆོས་སུ་བཤད་པ་ལྟ་བུ་དང་ཉེ་བ་ད་ལྟ་བ་དང་འདུས་མ་བྱས་ཞེས་འབྱུང་ངོ་། །སློབ་དཔོན་གྱིས། རིང་བ་ཞེས་བྱ་བ་དེ་གང་ལས་རིང་བ་ཡིན་ཅེས་དྲིས་པ་ལ། བྱེ་སྨྲས། ད་ལྟ་བ་ལས་རིང་བའོ། །ཞེས་ཟེར་རོ། །སློབ་དཔོན་གྱིས། འདས་ནས་རིང་དུ་ལོན་པ་དང་། ཡུན་རིང་ཞིག་ནས་འོང་བ་ད་ལྟར་ལས་རིང་བར་རིགས་ལ། འདས་མ་ཐག་པ་དང་། སྐྱེ་བར་འགྱུར་བ་གང་ཡིན་པ་དེ་ཆོས་ཅན། ད་ལྟ་ལས་ཅི་ལྟར་ན་རིང་བ་མ་ཡིན་པར་ཐལ། ད་ལྟ་དང་ཉེ་བ་ཉིད་ཀྱི་ཕྱིར། དེ་ལ་ཁོ་མ་ཁྱབ་སྟེ། འདས་མ་ཐག་པ་དང་འོང་ལ་ཁད་པ་དེ་ནི་ད་ལྟར་ལས་དུས་ཐ་དད་པ་ཉིད་ཀྱིས་རིང་བ་ཡིན་གྱི། ཡུན་རིང་པོ་ཞིག་ནས་བྱུང་བ་དང་འབྱུང་བ་ཉིད་ཀྱིས་ནི་རིང་བར་འཇོག་པ་མ་ཡིན་པའི་ཕྱིར་ཞེ་ན། འོ་ན་འདས་མ་འོངས་ལས་ད་ལྟ་བ་ཡང་རིང་བར་ཐལ། འདས་མ་འོངས་ལས་ད་ལྟར་དུས་ཐ་དད་པའི་ཕྱིར། དཔེར་ན། འདས་པ་དང་མ་འོངས་པ་ཉིད་ཀྱིས་(༢༡༣ན)
འདས་པ་དང་མ་འོངས་པ་ལྟ་བུའོ། །ཡང་ཁོ་ད་ལྟ་ལས་འདས་མ་འོངས་རིང་བ་ཡིན་ཏེ། བྱེད་པ་ཞིག་པ་ནི་འདས་པ་ཡིན་ལ། བྱེད་པ་མ་ཐོབ་པ་ནི་མ་འོངས་པ་ཡིན་པས། དེའི་ཆ་ནས་འདས་མ་འོངས་དེ་རིང་བར་འཇོག་པའི་ཕྱིར་ཞེ་ན། འོ་ན་འདས་མ་འོངས་ཀྱི་ཉེ་རིང་དུས་ལ་མི་བལྟོས་པ་དེས་ན་ཆོས་ཅན། འདུས་མ་བྱས་དང་ད་ལྟ་བ་ཉེ་བ་ཉིད་དུ་མ་གྲུབ་བར་ཐལ། དེ་ལ་བྱེད་པ་མེད་པའི་ཕྱིར། འདོད་མི་ནུས་ཏེ། བསྟན་བཅོས་ལས། ཆོས་ཉེ་བ་གང་དག་ཅེ་ན། ད་ལྟར་བྱུང་བའི་ཆོས་དང་འདུས་མ་བྱས་སོ། །ཞེས་འབྱུང་བ་དེའང་ཁྱོད་ཀྱིས་ཁས་བླངས་པས་འཁོར་གསུམ། ཡང་ཁོ་མ་ཁྱབ་པས་འདུས་མ་བྱས་དང་ད་ལྟ་བ་གཉིས་ཉེ་བ་ཉིད་དུ་གྲུབ་སྟེ། འགོག་པ་གཉིས་ཀྱི་ཐོབ་བ་དེ་ཡུལ་ཐམས་ཅད་དུ་སྐྱེ་བའི་ཕྱིར་ཞེ་ན། འོ་ན་འདས་མ་འོངས་ཀྱང་ད་ལྟ་བ་དང་ཉེ་བ་ཉིད་དུ་ཐལ། དགེ་སོགས་ཀྱིས་འདས་མ་འོངས་ཀྱི་ཐོབ་པ་ཡུལ་ཐམས་ཅད་དུ་སྐྱེ་བའི་ཕྱིར། འདུས་མ་བྱས་ནི་ནམ་མཁའ་ཡང་ད་ལྟ་བ་དང་ཉེ་བར་མི་འཐད་པར་ཐལ། དེ་ལ་ནི་ཐོབ་པ་མེད་པའི་ཕྱིར། ཡང་ཁོ་འདས་མ་འོངས་ནི་ད་ལྟ་བ་ལས་རིང་བ་ཡིན་ཏེ། ད་ལྟ་བས་བར་དུ་ཆོད་པས་ཕན་ཚུན་དུ་རིང་བའི་ཕྱིར་ཞེ་ན། དེ་ལྟར་ན་ད་ལྟ་བ་ལ་བལྟོས་ནས་འདས་མ་འོངས་ཉེ་བ་ཡིན་པར་ཐལ། ད་ལྟ་བ་ནི་འདས་མ་འོངས་གཉིས་ཀ་དང་ཉེ་བའི་ཕྱིར། གྲུབ་སྟེ། ད་ལྟ་བ་དང་འདས་མ་འོངས་ཀྱི་བར་དུ་ཆོད་བྱེད་གཞན་མེད་པའི་ཕྱིར། དེར་མ་ཟད་འདུས་མ་བྱས་ཀྱང་འདས་མ་འོངས་དང་ཉེ་བ་ཉིད་དུ་ཐལ། ད་ལྟར་གྱིས་འདས་མ་འོངས་ཆོད་པ་ལྟར་གང་གིས་ཀྱང་བར་དུ་ཆོད་པ་མེད་པའི་ཕྱིར། ཡང་ད་ལྟ་བ་དེ་རིང་བ་དང་ཉེ་བ་གཉིས་ཀ་ཡིན་པར་ཐལ། འདས་པ་དེ་ད་ལྟར་གྱིས་བར་དུ་ཆོད་པས་མ་འོངས་པ་ལས་རིང་བ་ཡིན་ལ། ད་ལྟར་དང་བར་དུ་མ་ཆོད་པས་ཉེ་བའང་ཡིན་པའི་ཕྱིར། (༢༡༣བ)
མ་འོངས་པ་ལ་ཡང་དེ་བཞིན་དུ་སྦྱར་བར་བྱའོ། །སློབ་དཔོན་རང་ལུགས་ཀྱིས་རིང་བར་ཅིས་འཇོག་ཅེ་ན། མ་འོངས་པ་ནི་ཆོས་ཅན། རང་གི་མཚན་ཉིད་ལས་རིང་བ་ཡིན་ཏེ། མ་འོངས་པ་ནི་རང་གི་མཚན་ཉིད་མ་ཐོབ་ཅིང་ཉེ་བར་མི་གནས་པའི་ཕྱིར། འདས་པ་ནི་ཆོས་ཅན། རང་གི་མཚན་ཉིད་ལས་རིང་བ་ཡིན་ཏེ། ཆོས་རང་གི་མཚན་ཉིད་དེ་འདས་པས་ཞིག་པའམ། འདས་པ་དེ་ཆོས་རང་གི་མཚན་ཉིད་ལས་ཞིག་པས་རིང་བའི་ཕྱིར། ལྔ་པ་སྤངས་པའི་ཐོབ་པ་ཡང་དང་ཡང་དུ་བསྟན་པ་ནི། ལན་ཅིག་ཏུ་ཟད་དེ་དག་གི། །བྲལ་པའི་ཐོབ་པ་ཡང་དང་ཡང་། །གཉེན་པོ་སྐྱེས་དང་འབྲས་ཐོབ་དང་། །དབང་པོ་རྣམ་པར་འཕེལ་རྣམས་སུ། །ཅི་གཉེན་པོ་སྐྱེས་པས་ཟད་པར་འགྱུར་ཞེས་པས་ལམ་ཁྱད་པར་དུ་འགྲོ་བའི་ཕྱིར་ཉོན་མོངས་རྣམས་ཀྱིས་སྤངས་པའང་ཡང་ཡང་དུ་ཁྱད་པར་འགྱུར་རམ་ཞེ་ན། ལམ་གོང་ནས་གོང་དུ་ཁྱད་པར་དུ་འགྱུར་ཡང་སྤངས་པ་ཁྱད་པར་དུ་འགྱུར་བ་ནི་མེད་དེ། གཉེན་པོ་གང་གིས་སྤོང་བའི་ལམ་གང་ཡིན་པ་དེ་ཁོ་ནས་ཉོན་མོངས་པ་ཐམས་ཅད་ལན་གཅིག་ཏུ་ཟད་པར་བྱས་ནས་ཐོབ་པ་ཆད་པའི་ཕྱིར། དེ་བར་ན་མགོ་སྔར་བཅད་པ་ཕྱིས་བཅད་དུ་མེད་ལ། རལ་གྲི་ནི་ཕྱིས་ཀྱང་རྣོ་རུ་འགྲོར་རུང་བ་ལྟ་བུའོ། །དེ་དག་གི་བྲལ་བའི་ཐོབ་པ་དུས་དྲུག་ཏུ་ཡང་དང་ཡང་དུ་ཁྱད་པར་དུ་འགྱུར་རོ། །བྲལ་ཐོབ་དང་ལྷན་ཅིག་ཏུ་གཉེན་པོ་རྣམ་གྲོལ་གྱི་ལམ་སྐྱེས་པ་དང་དེའི་ཚེ་ཐོབ་པ་ཁྱད་པར་དུ་གྱུར་བ་ཡིན་ནོ། །བར་ཆད་མེད་པའི་ལམ་ལ་ནི་རེ་ཞིག་བྲལ་བའི་ཐོབ་པ་མེད་དེ། སྐྱེ་བ་ལ་མངོན་དུ་ཕྱོགས་པ་ཡིན་པའི་ཕྱིར། རྣམ་པར་གྲོལ་བའི་ལམ་ཡང་བར་ཆད་མེད་པའི་ལམ་གཉེན་པོ་དངོས་དང་ལྷན་ཅིག་འབྲས་བུ་གཅིག་པའི་ཕྱིར་དེ་གཉེན་པོར་ཡང་འཇོག་སྟེ། བྲལ་བའི་ཐོབ་པ་འདྲེན་པར་བྱེད་པ་དང་། རྟེན་དུ་གྱུར་པའི་ཕྱིར་གཉིས་ཀས་དེ་ཐོབ་བོ་ཞེས་བཤད་དོ། །དགེ་སྦྱོང་ཚུལ་གྱིས་འབྲས་བུ་བཞི་ཐོབ་པས་ཁྱད་པར་དུ་འགྱུར་བ་ཡིན། འབྲས་བུ་བརྒྱད་ཅུ་རྩ་དགུ་དང་སྐྱེས་བུ་བྱེད་འབྲས་སོགས་ལ་གོ་(༢༡༤ན)
པར་འགྱུར་བ་བསལ་ནས། འབྲས་བུ་ཐོབ་པའང་རྣམ་གྲོལ་ལམ་རྣམ་པར་བཞག་པ་ཁོ་ན་བཟུང་བར་བྱ་སྟེ། བྲལ་བའི་རྙེད་པ་ཉིད་དང་ལྡན་པའི་ཕྱིར་རོ། །དབང་པོ་རྣམ་པར་འཕེལ་བ་རྣམས་ཏེ་དབང་པོ་འཕོ་བ་ན་ཐོབ་པ་ཁྱད་པར་དུ་འགྱུར་རོ། །སློབ་དཔོན་འདུས་བཟང་ན་རེ། དབང་པོ་འཕོ་བ་ནི་འབྲས་བུ་ཐོབ་པ་སྨོས་པས་འགྲུབ་བོ། །ཟེར་རོ། །འབྲས་བུ་ཐོབ་པས་དབང་པོ་འཕེལ་བ་བདེན་ཀྱང་བྲལ་བ་རྙེད་འགྱུར་གྱི་འབྲས་བུ་ཐོབ་པ་ཁྱད་པར་དུ་བསྟན་དགོས་པས་འདིར་སྨོས་པ་ཡིན་ལ། དེ་ལྟར་མིན་ན་གཉེན་པོ་སྐྱེས་པ་ཁོ་ནས་དེ་གྲུབ་པའི་ཕྱིར་འབྲས་བུ་སྨོས་མི་དགོས་པར་ཡང་ཐལ་ལོ། །བྲལ་ཐོབ་དེའང་ཅི་རིགས་པར་ཁ་ཅིག་དུས་དྲུག་ནས་གཉིས་ཀྱི་བར་དུ་ཐོབ་བོ། །དུས་གཅིག་ཏུ་ཐོབ་བོ་ཞེས་ནི་མ་བཤད་དེ། དབང་རྣོན་གྱིས་སྲིད་རྩེའི་རྣམ་པ་དགུ་པའི་བྲལ་བ་དུས་གཅིག་ཁོ་ནར་ཐོབ་པ་ནི་སྲིད་ཀྱང་དེ་ནི་ཡང་ཐོབ་པ་མིན་པས་མི་བརྗོད་དོ། །དབང་པོ་རྟུལ་པོས་བྲལ་བ་དུས་དྲུག་ཏུ་ཐོབ་པ་ནི། ཁམས་གསུམ་བདེན་པ་སྔ་མ་གསུམ་དང་ལམ་མཐོང་སྤོང་འདོད་ཁམས་ཀྱི་ལོག་ཞུགས་ཐམས་ཅད་ལམ་ལ་ཆོས་ཤེས་པའི་གཉེན་པོ་སྐྱེས་ཙམ་ན་དུས་གཅིག་ཏུ་ཟད་པའི་དུས་དེར་སྤང་བྱ་དེ་བྲལ་བའི་ཐོབ་པའོ། །དེ་ནས་ལམ་ལ་རྗེས་སུ་ཤེས་པ་རྒྱུན་ཞུགས་ཀྱི་འབྲས་བུ་ཐོབ་ཙམ་ན། སྔར་གྱི་སྡུག་བསྔལ་ཆོས་ཤེས་སྤངས་པས་དེས་སྤངས་པའི་བྲལ་བའི་ཐོབ་པ་མེད་ཙམ་ན། མཐོང་སྤོང་རྒྱུད་ལ་ལྡན་ཏེ་མི་འོང་ངམ་སྙམ་ན། མི་འོང་སྟེ། བྲལ་བའི་ཐོབ་པ་དེ་ཡེ་ཤེས་བཅུ་དྲུག་པ་རྒྱུན་དུ་ཞུགས་པའི་འབྲས་བུ་འཛིན་པས་རྒྱུད་ལ་མི་ལྡན། དེ་ནས་འདོད་ཁམས་ཀྱི་ཉོན་མོངས་འབྲིང་གི་ཆུང་ངུ་སྤངས་པ་ལན་གཅིག་ཕྱིར་འོང་བའི་འབྲས་བུ་ཐོབ་ཙམ་ན། སྡུག་བསྔལ་ལ་ཆོས་ཤེས་པའི་གཉེན་པོ་དེ་སྤངས་པས་སྔར་གྱི་བྲལ་བའི་ཐོབ་པ་དེ་ཆད་ནས་སྡུག་བསྔལ་(༢༡༤བ)
མཐོང་སྤོང་རྒྱུད་ལ་ལྡན་པར་མི་འོང་ངམ་སྙམ་ན། མི་འོང་སྟེ། སྔར་གྱི་སྡུག་བསྔལ་མཐོང་སྤོང་བྲལ་བའི་ཐོབ་པ་དེ་ཕྱིར་འོང་གི་འབྲས་བུས་འཛིན། དེ་ནས་འདོད་ཁམས་ཀྱི་ཉོན་མོངས་ཆུང་ངུའི་ཆུང་ངུ་སྤངས་ནས་ཕྱིར་མི་འོང་བའི་འབྲས་བུ་ཐོབ་པ་ཙམ་ན། ཕྱིར་འོང་བའི་འབྲས་བུ་སྤངས་པས་སྔར་གྱི་བྲལ་བའི་ཐོབ་པ་མེད་པས། ཡང་སྡུག་བསྔལ་ལོག་ཞུགས་རྒྱུད་ལ་ལྡན་ཏེ་མི་འགྲོའམ་སྙམ་ན། མི་འགྲོ་སྟེ། ཕྱིར་མི་འོང་གི་འབྲས་བུས་བྲལ་བའི་ཐོབ་པ་བཟུང་བས་སྡུག་བསྔལ་ལོག་ཞུགས་རྒྱུད་ལ་མི་ལྡན། དེ་བཞིན་དགྲ་བཅོམ་གྱི་འབྲས་བུའི་ཐོབ་པ་ལ་ཡང་དེ་དང་འདྲ་ཞིང་། དེ་ནས་དབང་པོ་རྣོན་པོར་འཕོ་བ་ལ་ཡང་དེ་དང་འདྲ་བས་དུས་དྲུག་ཏུ་ཐོབ་བོ། །འདིའང་སྲིད་པའི་དབང་དུ་བྱས་ཀྱི། དབང་རྟུལ་གདོན་མི་ཟ་བར་འཕོ་བ་ནི་མ་ཡིན་ནོ། །དབང་པོ་རྟུལ་པོ་ཉིད་ཀྱིས་ཁམས་གོང་མ་གཉིས་ཀྱི་ལམ་མཐོང་སྤོང་གི་བྲལ་བ་ནི་ལམ་ལ་རྗེས་ཤེས་གཉེན་པོ་དེ་དང་། རྒྱུན་དུ་ཞུགས་པའི་འབྲས་བུ་དུས་གཅིག་ཡིན་པས་དེ་གཉིས་གཅིག་ཏུ་བྱས་པས་དེ་དང་གཅིགཕྱིར་འོང་འབྲས་བུ་དང་གཉིས། ཕྱིར་མི་འོང་འབྲས་བུ་དང་གསུམ། དགྲ་བཅོམ་དང་བཞི། དབང་པོ་འཕོ་བ་དང་ལྔར་ཐོབ་བོ། །དེ་གཉིས་ཀྱི་སྒོམ་སྤོང་འདོད་པ་ན་སྤྱོད་པའི་ཆེན་པོའི་ཆེན་པོ་ནས་འབྲིང་པོའི་འབྲིང་པོ་བར་ཏེ་ལྔ་པོ་དེའི་བྲལ་བ་ཡང་ལྔ་པོའི་གཉེན་པོ་སྐྱེས་པ་དང་གཅིགཕྱིར་འོང་འབྲས་བུ་དང་གཉིས། ཕྱིར་མི་འོང་འབྲས་བུ་དང་གསུམ། དགྲ་བཅོམ་འབྲས་བུ་དང་བཞི། དབང་པོ་འཕོས་པ་དང་ལྔ་པོ་དེས་བྲལ་བ་ཐོབ་བོ། །འབྲིང་གི་ཆུང་ངུའི་སྤངས་པའི་བྲལ་བ་ཐོབ་པ་ནི། འབྲིང་གི་ཆུང་ངུའི་གཉེན་པོ་སྐྱེས་པ་དང་ཕྱིར་འོང་གི་འབྲས་བུ་གཉིས་དུས་གཅིག་པས་དེ་གཉིས་གཅིག་ཏུ་བྱས་པ་དང་གཅིགཕྱིར་མི་འོང་འབྲས་བུ་(༢༡༥ན)
དང་གཉིས། དགྲ་བཅོམ་འབྲས་བུ་དང་གསུམ། དབང་པོ་འཕོ་བའི་དུས་དང་བཞིར་ཐོབ་བོ། །དེ་ཉིད་ཀྱིས་འདོད་པའི་སྒོམ་སྤོང་བདུན་པ་དང་བརྒྱད་པ་ཆུང་ངུའི་ཆེན་པོ་ཆུང་ངུའི་འབྲིང་སྤངས་པ་བྲལ་བའི་ཐོབ་པ་དེ། དེའི་གཉེན་པོ་སྐྱེས་པའི་དུས་དང་གཅིགཕྱིར་མི་འོང་གི་འབྲས་བུའི་དུས་དང་གཉིས། དགྲ་བཅོམ་གྱི་འབྲས་བུའི་དུས་དང་གསུམ། དབང་པོ་འཕོ་བའི་དུས་དང་བཞིས་ཐོབ་བོ། །དེ་ཉིད་ཀྱིས་ཆུང་ངུའི་ཆུང་ངུ་བྲལ་བ་ཐོབ་པ་ནི་གཉེན་པོ་སྐྱེས་པ་དང་། ཕྱིར་མི་འོང་འབྲས་བུ་དུས་གཅིག་པས་དེ་གཉིས་གང་རུང་གཅིགདགྲ་བཅོམ་འབྲས་བུ་དང་གཉིས། དབང་པོ་འཕོ་བའི་དུས་དང་གསུམ་ན་ཐོབ་བོ། །དེ་བཞིན་ཉིད་དགྲ་བཅོམ་པ་ཉིད་ཀྱི་འབྲས་བུ་ཐོབ་པར་བྱེད་པ་དེ་ཁམས་གོང་མ་གཉིས་ཀྱི་སྒོམ་སྤོང་ཆེན་པོའི་ཆེན་པོ་ནས་སྲིད་རྩེའི་ཆུང་ངུའི་ཆུང་ངུ་མ་གཏོགས་པ་ཐམས་ཅད་ཀྱི་བྲལ་བ་ཡང་དེ་རྣམས་ཀྱི་གཉེན་པོ་སྐྱེས་པའི་དུས་དང་གཅིགདགྲ་བཅོམ་ཉིད་ཀྱི་འབྲས་བུའི་དུས་དང་གཉིས། དབང་པོ་འཕོ་བའི་དུས་དང་གསུམ་དུ་ཐོབ་བོ། །གཟུགས་མེད་ན་སྤྱོད་པའི་ཆུང་ངུའི་ཆུང་ངུ་གཉེན་པོ་སྐྱེས་པ་དང་། དགྲ་བཅོམ་པའི་འབྲས་བུ་ཐོབ་པ་དུས་གཅིག་པའི་ཕྱིར་གང་རུང་གཅིག་དང་། དབང་པོ་འཕོ་བའི་དུས་གཉིས་སུ་ཐོབ་པ་ཡིན་ནོ། །སྨོས་པ་རྣམས་ནི་དབང་པོ་རྟུལ་པོའི་དབང་དུ་བྱས་ཀྱི། རྣོན་པོ་ནི་དབང་པོ་འཕོ་བ་གཅིག་པུ་བོར་ནས་ཉོན་མོངས་པ་ཁ་ཅིག་དུས་ལྔར་ཐོབ་པ་ནས་གཉིས་ཀྱི་བར་དུ་ཐོབ་བོ། །ཐོབ་པ་དུས་གཅིག་པ་མི་འབྱུང་བ་ནི་སྲིད་རྩེའི་རྣམ་པ་དགུ་དང་བྲལ་བ་ན། གཉེན་པོ་རྣམ་གྲོལ་ལམ་སྐྱེས་པའི་ཐོབ་པ་དང་། དགྲ་བཅོམ་གྱི་འབྲས་བུ་ཐོབ་པའི་ཐོབ་པ་གཉིས་ཡ་བྲལ་དུ་མི་འབྱུང་བའི་དོན་གྱིས་སོ། །བྲལ་བ་དེ་ཉིད་གནས་སྐབས་དེ་དང་དེ་དག་ཏུ་ཡོངས་སུ་ཤེས་པ་(༢༡༥བ)
ཞེས་པའི་མིང་ཐོབ་སྟེ། དེའང་ཡོངས་ཤེས་གཉིས་ཏེ། ཡེ་ཤེས་ཀྱི་ཡོངས་ཤེས་ཟག་མེད་རྣམ་གྲོལ་གྱི་ལམ་དང་། སྤངས་པ་ཡོངས་ཤེས་སོ་སོར་བརྟགས་འགོག་གོ། སྤངས་པ་ཉིད་ལ་སྤངས་པ་ཡོངས་ཤེས་ཞེས་བརྗོད་དེ། འབྲས་བུ་སྤངས་པ་ལ་རྒྱུ་ཡེ་ཤེས་ཀྱི་མིང་གིས་བཏགས་པའི་ཕྱིར། གང་དུ་བཏགས་ན། མདོ་ལས་བསྟན་ཏེ། ཡོངས་སུ་ཤེས་པའི་ཆོས་རྣམས་གང་ཞེ་ན། ཉེར་ལེན་གྱི་ཕུང་པོ་ལྔའོ། །ཡོངས་སུ་ཤེས་པ་གང་ཞེ་ན། འདུན་པའི་འདོད་ཆགས་སྤངས་པ་དང་། འདུན་པའི་འདོད་ཆགས་ལས་ཡང་དག་པར་འདས་པ་སྟེ། འདི་ནི་ཡོངས་སུ་ཤེས་པའོ། །ཞེས་བོས་ནས་དགེ་སློང་རྣམས་ལ་བཀའ་སྩལ་པའོ། །དེའང་དཔེར་ན། རེག་པའི་སྐྱེ་མཆེད་དྲུག་ལ་འདི་སྔོན་གྱི་ལས་ཡིན་བྱ་བ་དང་འདྲའོ། །གསུམ་པ་སྤངས་པའི་འབྲས་བུ་ལ། འབྲས་བུའི་དབྱེ་བ། གང་གི་འབྲས་བུ་གང་ཡིན་པ། གྲངས་ངེས། གང་ཟག་གང་ལ་ལྡན་པའི་ཚུལ། གཏོང་ཐོབ་བོ། །དང་པོ་ནི། ཡོངས་སུ་ཤེས་དགུ་འདོད་པ་ན། །དང་པོ་རྣམ་གཉིས་ཟད་ལ་གཅིག །གཉིས་ཟད་པ་ནི་དེ་གཉིས་སོ། །དེ་བཞིན་གོང་མའི་དེ་གསུམ་ཉིད། །ཡོངས་སུ་ཤེས་པ་གཞན་གསུམ་སྟེ། །ཐ་མའི་ཆ་དང་མཐུན་གཟུགས་དང་། །ཟག་པ་ཀུན་ཟད། སླངས་པ་ཐམས་ཅད་ཡོངས་ཤེས་གཅིག་མ་ཡིན་གྱི། སྤངས་པའི་ཡོངས་སུ་ཤེས་པ་དགུའོ། །རེ་ཞིག་འདོད་པའི་ཁམས་ན་དང་པོ་སྡུག་བསྔལ་དང་ཀུན་འབྱུང་མཐོང་བས་སྤང་བྱའི་རྣམ་པ་གཉིས་ཟད་པ་ལ་ཡོངས་སུ་ཤེས་པ་གཅིག་ཡིན་ནོ། །འདི་གཉིས་ལ་ཀུན་འགྲོ་ཡོད་ཙམ་ན། སྡུག་བསྔལ་མཐོང་སྤོང་སྤངས་ཀྱང་ཀུན་འབྱུང་མཐོང་སྤོང་མ་སྤངས་ཙམ་ན་ཀུན་འབྱུང་མཐོང་སྤང་གི་ཀུན་འགྲོས་སྡུག་བསྔལ་མཐོང་སྤོང་ལ་དམིགས་ཙམ་ན། སྡུག་བསྔལ་མཐོང་སྤོང་ཀུན་འགྲོའི་ཐག་པ་དེས་ལྡན་པས། སྡུག་བསྔལ་མཐོང་སྤོང་གཅིག་བུ་སྤངས་པ་དེ་ཡོངས་སུ་ཤེས་པ་གཅིག་ཏུ་བཞག་ཏུ་མ་འདོད། འོ་ན་ཀུན་འབྱུང་མཐོང་སྤང་སྤངས་ཙམ་ན་གཉིས་ཀ་སྤངས་པས་ཡོངས་ཤེས་གཅིག་ཏུ་བསྡོམས་ནས་བཞག་གོ། །(༢༡༦ན)
འདོད་ཁམས་ཁོ་ན་ན་འགོག་པ་མཐོང་སྤོང་དང་ལམ་མཐོང་སྤོང་གཉིས་ཟད་པ་ནི་ཡོངས་སུ་ཤེས་པ་དེ་གཉིས་པོ་སྟེ་རེ་རེའོ། །འགོག་པ་མཐོང་སྤང་དང་ལམ་མཐོང་སྤང་ལ་ཀུན་འགྲོ་མེད་ཙམ་ན་སྤངས་པ་སོ་སོར་བཞག་ཏུ་འདོད་པས་ཡོངས་ཤེས་ལོགས་སུ་བཞག་གོ། །འདོད་པ་ན་མཐོང་སྤང་སྤངས་པའི་ཡོངས་ཤེས་གསུམ་ཡིན་པ་དེ་བཞིན་གོང་མ་གཟུགས་དང་གཟུགས་མེད་ཀྱི་མཐོང་སྤང་སྤངས་པ་དེ་གསུམ་ཉིད་དེ། སྡུག་ཀུན་མཐོང་སྤང་སྤངས་པ་ནི་གཅིག་དང་། འགོག་པ་མཐོང་སྤང་སྤངས་པ་གཉིས་པ་དང་། ལམ་མཐོང་སྤང་སྤངས་པ་གསུམ་པའོ། །དེ་ལྟར་ཁམས་གསུམ་པའི་མཐོང་སྤང་རྣམས་སྤངས་པ་ནི་ཡོངས་ཤེས་དྲུག་ཡིན་ནོ། །སྒོམ་པའི་ལམ་ལ་ཡོངས་སུ་ཤེས་པ་གཞན་ཡང་གསུམ་སྟེ། ཐ་མའི་ཆ་དང་མཐུན་པ་སྤངས་པ་ཡོངས་སུ་ཤེས་པ་གཅིག་སྟེ། འདོད་ཁམས་ཀྱི་ཟག་པ་ཟད་པའི་ཕྱིར་དེའི་མིང་ཡང་དེ་ཉིད་དོ། །གཟུགས་ཀྱི་ཟག་པ་སྤངས་པ་ཡང་གཟུགས་ཀྱི་ཀུན་སྦྱོར་གྱི་གཙོ་བོ་འདོད་ཆགས་ཟད་པའི་ཡོངས་སུ་ཤེས་པ་གཅིག་ཡིན་ནོ། །ཟག་པ་ཀུན་ཟད་པའང་གཅིག་ཡིན་ཏེ། ཀུན་སྦྱོར་ཐམས་ཅད་ཡོངས་སུ་གཏུགས་པའི་ཡོངས་སུ་ཤེས་པའོ། །ཅིའི་ཕྱིར་གོང་མ་གཉིས་ཀྱི་སྒོམ་སྤང་སྤངས་པའི་ཡོངས་སུ་ཤེས་པ་ནི་ཐ་དད་དུ་བསྟན་ལ་མཐོང་སྤང་མ་ཡིན་ཅེ་ན། ས་དང་ས་ན་སྒོམ་སྤང་དགུ་པ་ཡིན་པ་རྣམས་ཀྱི་གཉེན་པོ་བར་ཆད་མེད་པ་དང་། རྣམ་གྲོལ་གྱི་ལམ་དགུ་ཟག་བཅས་ཟག་མེད་མི་འདྲ་བའི་ཕྱིར། མཐོང་སྤང་གི་གཉེན་པོ་འདྲ་སྟེ། གཟུགས་ཀྱི་གཉེན་པོ་རྗེས་སུ་ཤེས་པའི་བཟོད་པ་སོགས་གཟུགས་མེད་རྣམས་ཀྱིའང་གཉེན་པོ་ཡིན་པས་ཐ་མི་དད་པའི་ཕྱིར། དེ་ལྟར་ན་ཡོངས་ཤེས་དགུའོ། །གཉིས་པ་གང་གི་འབྲས་བུ་གང་ཡིན་པ་ལ། ཤེས་བཟོད་དང་། ས་དང་།(༢༡༦བ)
ལམ་གང་གི་འབྲས་བུ་གང་ཡིན་པའོ། །དང་པོ་ནི། དྲུག་བཟོད་འབྲས། །ལྷག་མ་རྣམས་ནི་ཤེས་པའི་ཡིན། །དེ་རྣམས་ལས་སྔ་མ་མཐོང་སྤང་སྤངས་པའི་ཡོངས་ཤེས་དྲུག་བཟོད་པའི་འབྲས་བུ་ཡིན་ལ། ལྷག་མ་ཐ་མའི་ཆ་མཐུན་སྤངས་པ་ལ་སོགས་པའི་ཡོངས་སུ་ཤེས་པ་རྣམས་ནི་ཤེས་པའི་འབྲས་བུ་སྟེ་སྒོམ་ལམ་གྱི་འབྲས་བུ་ཡིན་ལ། སྒོམ་ལམ་ལ་ཤེས་པས་ཁྱབ་ཀྱི་བཟོད་པ་མེད་པའི་ཕྱིར། གལ་ཏེ་ཡོངས་ཤེས་ནི་བཟོད་པའི་འབྲས་བུ་མིན་ཏེ། དེ་ནི་ཟག་མེད་ཀྱི་མཁྱེན་པའི་འབྲས་བུ་ཡིན་པ་ལ། དྲི་མེད་བཟོད་རྣམས་ཤེས་པ་མིན། །ཅེས་པས་བཟོད་པ་ནི་ཤེས་པ་མ་ཡིན་པའི་ཕྱིར་ཞེ་ན། ཡོངས་ཤེས་བཟོད་པའི་འཁོར་ཤེས་པའི་འབྲས་བུ་ཡིན་ཀྱང་ཤེས་བཟོད་གཉིས་འབྲས་བུ་གཅིག་པས་ཤེས་པའི་འབྲས་བུ་བཟོད་པའི་འབྲས་བུར་བསྟན་པ་ཡིན་ཏེ། དཔེར་ན། རྒྱལ་པོའི་འཁོར་གྱིས་བྱས་པ་ལ་རྒྱལ་པོས་བྱས་སོ་ཞེས་བརྗོད་པ་བཞིན་ནོ་ཞེས་རྒྱལ་པོའི་སྲས་ཀྱིས་སོ། །སློབ་དཔོན་གང་སྤེལ་ནི། བཟོད་དང་ཤེས་པ་གོ་རིམ་བཞིན། །ཅེས་པའི་སྐབས་ནས་འབྱུང་བ་དང་འགལ་བས། སྤང་བྱ་ཤེས་པ་གཙོ་བོ་དང་བཟོད་པ་འཁོར་ཡིན་པས་དངོས་སུ་གཙོ་བོ་ཤེས་པའི་འབྲས་བུ་ཡིན་ཀྱང་། འཁོར་རྒྱལ་པོར་བཏགས་པ་ལྟར་འཁོར་བཟོད་པའི་འབྲས་བུར་བཏགས་པ་ཡིན་ནོ། །གཉིས་པ་ནི། མི་ལྕོགས་མེད་འབྲས་ཐམས་ཅད་དོ། །བསམ་གཏན་རྣམས་ཀྱི་ལྔའམ་བརྒྱད། །ཉེ་བར་བསྡོགས་པའི་གཅིག་ཡིན་ཏེ། །གཟུགས་མེད་དངོས་གཞི་གསུམ་གྱི་ཡང་། །བསམ་གཏན་དང་པོའི་ཉེར་བསྡོགས་མི་ལྕོགས་པ་མེད་པ་ནི་སྤང་བྱ་ཐམས་ཅད་ཀྱི་གཉེན་པོར་འགྱུར་བ་སྲིད་པས་དེའི་འབྲས་བུ་ནི་ཡོངས་ཤེས་དགུ་པོ་ཐམས་ཅད་དེ། ཟག་མེད་མི་ལྕོགས་མེད་པ་ཡིས། །ཐམས་ཅད་ལས་ནི་འདོད་ཆགས་བྲལ། །ཅེས་འབྱུང་བས་སོ། །བྱེ་སྨྲའི་ལུགས་ཀྱིས་བསམ་གཏན་དངོས་གཞི་རྣམས་ཀྱི་འབྲས་བུ་ཡོངས་ཤེས་གོང་མ་གཉིས་ཀྱིས་མཐོང་སྤང་སྤངས་པའི་ཡོངས་ཤེས་གསུམ། སྒོམ་སྤང་སྤངས་པའི་ཡོངས་ཤེས་གཉིས་ཏེ་ལྔ་ཡིན་པའམ། འདོད་པའི་ཉོན་མོངས་(༢༡༧ན)
སྤངས་པ་ནི་བསམ་གཏན་གྱི་དངོས་གཞིའི་འབྲས་བུ་མིན་ཏེ། དངོས་གཞིས་ས་གོང་མ་དག་གི་ཉོན་མོངས་ཀྱང་སྤོང་སྲིད་ལ། འདོད་པའི་གཉེན་པོ་མ་ཡིན་གྱི་འདོད་པའི་ཉོན་མོངས་སྤངས་པ་མི་ལྕོགས་མེད་པའི་འབྲས་བུ་ཡིན་པའི་ཕྱིར། བཙུན་པ་དབྱངས་སྒྲོག་གི་ལུགས་ཀྱི་ནི་བརྒྱད་དེ། འདོད་པའི་ཆགས་བྲལ་གྱི་གང་ཟག་གིས་འདོད་པའི་མཐོང་སྤོང་སྤངས་པའི་ཡོངས་ཤེས་གསུམ་འཕགས་ལམ་གྱིའང་འབྲས་བུ་སྟེ། བསམ་གཏན་གྱི་དངོས་གཞི་ལ་བརྟེན་ནས་ངེས་པར་འཇུག་པ་ན། མཐོང་སྤོང་སྔོན་འཇིག་རྟེན་པའི་ལམ་གྱིས་སྤངས་པ་རྣམས་ཀྱི་བྲལ་ཐོབ་ཟག་མེད་རྙེད་པའི་ཕྱིར། མཐོང་ལམ་གྱི་ནུས་པ་ཡོད་པས་འབྲས་བུར་འདོད་དོ། །འདོད་པ་ལས་ཆགས་པ་མ་བྲལ་བས་ཐ་མའི་ཆ་མཐུན་སྤངས་པའི་ཡེ་ཤེས་ཐོབ་པ་ནི་ཉེར་བསྡོགས་མི་ལྕོགས་མེད་པའི་འབྲས་བུ་ཁོ་ན་ལས་ཡིན་གྱི་དངོས་གཞིས་ནི་མ་ཡིན་ཏེ། དེ་མ་ཐོབ་པའི་ཕྱིར། འདོད་ཆགས་དང་བྲལ་བ་སྔོན་དུ་འགྲོ་བས་བསམ་གཏན་ལ་བརྟེན་ནས་ངེས་པ་ལ་འཇུག་པ་དེས་ཀྱང་སོ་སྐྱེའི་གནས་སྐབས་ན་འཇིག་རྟེན་པའི་ལམ་གྱིས་འདོད་པ་ན་སྤྱོད་པའི་ཉོན་མོངས་ཐམས་ཅད་སྤངས་པས། དེ་བསམ་གཏན་གྱི་དངོས་གཞིའི་འབྲས་བུ་མ་ཡིན་ནོ། །སེམས་ཀྱི་སྐད་ཅིག་བཅུ་དྲུག་ལ་དེའི་ཐ་མའི་ཆ་དང་མཐུན་པ་སྤངས་པའི་ཡོངས་སུ་ཤེས་པ་བསམ་གཏན་གྱི་དངོས་གཞི་ལ་བརྟན་པའང་རྣམ་པར་བཞག་མོད་ཀྱི། དེའི་འབྲས་བུར་ནི་མི་འཇོག་སྟེ། བཅུ་དྲུག་པའི་ལམ་ལ་རྗེས་སུ་ཤེས་པའི་དུས་ན་ལམ་མཐོང་སྤོང་སྤངས་པའི་ཡོངས་ཤེས་ཁོག་ཏུ་ཐ་མའི་ཆ་མཐུན་སྤོང་བར་སོང་བས་ཐ་མའི་ཆ་མཐུན་སྤངས་པ་ལོགས་སུ་འདོན་དུ་མེད་པའི་ཕྱིར། འོ་ན་གནས་སྐབས་དེ་ན་ཐ་མའི་ཆ་དང་མཐུན་པ་སྤངས་པ་འཇིག་རྟེན་པའི་ལམ་གྱིས་ཐོབ་པའི་བྲལ་བའི་ཐོབ་པ་ཟག་(༢༡༧བ)
པ་མེད་པའང་ཐོབ་པས་དེ་སྤངས་པའི་ཡོངས་ཤེས་སུ་བཞག་སྟེ། དེའི་ཚེ་ནི་མཐོང་བས་སྤང་བར་བྱ་བ་སྔ་མ་སྤངས་པས། སྔར་མཐོང་བའི་ལམ་གྱིས་སྤང་བར་བྱ་བ་སླངས་པ་གང་ཡིན་པ་དང་། སྔར་ཐ་མའི་ཆ་དང་མཐུན་པ་སྤངས་པ་བསྡོམས་ནས་ཐ་མའི་ཆ་དང་མཐུན་པའི་ཡོངས་ཤེས་གཅིག་ཏུ་རྣམ་པར་བཞག་སྟེ། ཁམས་ལས་འདོད་ཆགས་བྲལ་བ་དང་། །འབྲས་བུ་ཐོབ་ཕྱིར་དེ་དག་སྡོམ། །ཞེས་ཐམས་ཅད་བསྡོམས་ནས་དེར་འཇོག་དགོས་པའི་ཕྱིར། དེས་ན་ཐ་མའི་ཆ་མཐུན་སྤངས་པའི་ཡོངས་ཤེས་ནི་མི་ལྕོགས་མེད་པའི་འབྲས་བུ་ཁོ་ནར་བཞག་གི། དངོས་གཞིའི་འབྲས་བུ་ནི་མ་ཡིན་ཏེ། འདི་ལ་ནི་བྱེ་སྨྲ་དང་བཙུན་པ་དབྱངས་སྒྲོག་མཐུན་ནོ། །བསམ་གཏན་རྣམས་ཀྱི་ལྔའམ་བརྒྱད། །ཅེས་བཤད་པ་བཞིན་བསམ་གཏན་ཁྱད་པར་ཅན་གྱི་འབྲས་བུའང་ལྔའམ་བརྒྱད་དེ། དེ་ལ་བརྟེན་པའི་ཟག་མེད་ཀྱི་ཉོན་མོངས་པ་སྤོང་བར་འགྱུར་བའི་ཕྱིར་དངོས་སུ་མ་སྨོས་ཀྱང་འགྲུབ་བོ། །ཁྱད་པར་འཕགས་པ་ནི་བསམ་གཏན་དང་པོ་ན་རྟོགས་པ་དང་བྲལ་བས་སོ། །གཟུགས་མེད་ཀྱིའང་ནམ་མཁའི་ཉེ་བར་བསྡོགས་པའི་འབྲས་བུ་ཡོངས་ཤེས་གཟུགས་ཀྱི་འདོད་ཆགས་ཟད་པ་གཅིག་ཡིན་ནོ། །དེ་འཇིག་རྟེན་པ་ཡིན་ཀྱང་འཕགས་པ་ཁོ་ན་ལ་འབྲས་བུ་ཡོངས་ཤེས་སུ་བཞག་སྟེ། བྲལ་བའི་ཐོབ་པ་ཟག་མེད་སྲིད་པའི་ཕྱིར་རོ། །གཟུགས་མེད་ཀྱི་དངོས་གཞི་ཟག་མེད་གསུམ་གྱིའང་འབྲས་བུ་ཀུན་སྦྱོར་ཐམས་ཅད་ཡོངས་སུ་གཏུགས་པའི་ཡོངས་ཤེས་གཅིག་ཁོ་ནའོ། །གསུམ་པ་ནི། ཐམས་ཅད་འཕགས་པའི་ལམ་གྱི་ཡིན། །འཇིག་རྟེན་པའི་གཉིས་རྗེས་ཀྱི་ཡང་། །ཆོས་ཤེས་པའི་ནི་གསུམ་ཡིན་ནོ། །དེའི་ཕྱོགས་མཐུན་གྱི་དྲུག་དང་ལྔ། །ཡོངས་ཤེས་དགུ་པོ་ཐམས་ཅད་འཕགས་པའི་ལམ་གྱི་འབྲས་བུ་ཡིན་ཏེ། མཐོང་སྒོམ་གྱི་ལམ་ཆོས་ཤེས་རྗེས་ཤེས་ཀྱིས་ཕྱེ་བའི་འབྲས་བུ་ཡིན་པའི་ཕྱིར། འཇིག་རྟེན་པའི་ལམ་གྱི་འབྲས་བུ་ནི་ཐ་མའི་ཆ་མཐུན་དང་། གཟུགས་ཀྱི་འདོད་ཆགས་(༢༡༨ན)
ཟད་པའི་ཡོངས་ཤེས་གཉིས་སོ། །སྒོམ་ལམ་གྱིས་བསྡུས་པའི་རྗེས་ཤེས་ཀྱིའང་གཟུགས་ཀྱི་འདོད་ཆགས་ཟད་པ་དང་། ཀུན་སྦྱོར་ཡོངས་སུ་གཏུགས་པའི་ཡོངས་ཤེས་གཉིས་སོ། །སྒོམ་ལམ་གྱིས་བསྡུས་པའི་ཆོས་ཤེས་པའི་ཐ་མའི་ཆ་མཐུན་སོགས་སྤངས་པའི་ཡོངས་ཤེས་གསུམ་ཡིན་ཏེ། ཁམས་གསུམ་པའི་སྒོམ་སྤང་གི་གཉེན་པོ་ཡིན་པའི་ཕྱིར། ཆོས་ཤེས་དེའི་ཕྱོགས་མཐུན་གྱི་ཡོངས་ཤེས་དྲུག་དང་། རྗེས་ཤེས་དེའི་ཕྱོགས་མཐུན་གྱི་ཡོངས་ཤེས་ལྔ་སྟེ། རིམ་པ་བཞིན་དང་པོ་ཆོས་བཟོད་དང་ཆོས་ཤེས་རྣམས་ཀྱི་འབྲས་བུ་འདོད་པའི་མཐོང་སྤོང་སྤངས་པ་གསུམ་དང་། ཆོས་ཤེས་སྒོམ་ལམ་ལ་སྡུག་ཀུན་ཤེས་པས་བསྡུས་པ་རྣམས་ཀྱི་ཐ་མའི་ཆ་མཐུན་སྤངས་པ་གཅིག་དང་། འགོག་ལམ་ཆོས་ཤེས་པས་བསྡུས་པ་རྣམས་ཀྱིས་ཁམས་གསུམ་ཀའི་གཉེན་པོ་བྱེད་པས། ཐ་མའི་ཆ་མཐུན་སྤངས་པའི་ཡོངས་ཤེས་གཅིགའགོག་པ་དང་ལམ་ཤེས་པས་བསྡུས་པའི་ཐ་མའི་ཆ་མཐུན་སྤངས། གཟུགས་ཀྱི་འདོད་ཆགས་ཟད་པའི་ཀུན་སྦྱོར་ཐམས་ཅད་གཏུགས་ཏེ་དྲུག་གོ། །གཉིས་པ་ཡང་རྗེས་བཟོད་དང་རྗེས་ཤེས་རྣམས་ཀྱི་འབྲས་བུ་གོང་མའི་མཐོང་སྤོང་སྤངས་པའི་གསུམ་དང་། ཡོངས་ཤེས་ཐ་མ་གཉིས་སོ། །གསུམ་པ་གྲངས་ངེས་ལ། ཁ་ཅིག་ཡོངས་ཤེས་དགུར་ཅི་ལ་ངེས། སྡུག་བསྔལ་མཐོང་སྤོང་སྤངས་པ་ནས་སྲིད་རྩེའི་སྒོམ་སྤོང་ཆུང་ངུའི་ཆུང་ངུ་བར་དུ་སྤངས་པ་རེ་རེ་ལ་ཡོངས་ཤེས་རེ་འཇོག་མི་དགོས་སམ་ཞེ་ན། ལན་ལ། མཐོང་སྤོང་སྤངས་པ་དྲུག་གི་གྲངས་ངེས། སྒོམ་སྤོང་སྤངས་པ་གསུམ་གྱི་གྲངས་ངེས་སོ། །དང་པོ་ནི། བྲལ་བའི་ཐོབ་པ་ཟག་མེད་དང་། །སྲིད་རྩེ་ཉམས་པར་བྱས་པ་དང་། །རྒྱུ་གཉིས་ཀུན་ཏུ་བཅོམ་པའི་ཕྱིར། །ཡོངས་ཤེས། རེ་ཞིག་བཟོད་པའི་འབྲས་བུ་བྲལ་བ་ནི་རྒྱུ་གསུམ་གྱིས་ཁྱད་པར་དུ་འཕགས་པའི་ཆ་ནས་ཡོངས་ཤེས་སུ་འཇོག་སྟེ། བྲལ་བའི་ཐོབ་པ་ཟག་(༢༡༨བ)
མེད་རྙེད་པའི་ཕྱིར་དང་། སྲིད་རྩེའི་ཕྱོགས་ཉམས་ཤིང་སྤོང་བའི་ཕྱིར་དང་། རྒྱུ་སྡུག་བསྔལ་དང་ཀུན་འབྱུང་མཐོང་སྤོང་གི་ཀུན་འགྲོ་གཉིས་ཀུན་ཏུ་སྤངས་ཤིང་བཅོམ་པའི་ཕྱིར། གྲུབ་སྟེ། སོ་སྐྱེ་ལ་རྒྱུ་གཉིས་བཅོམ་པ་མེད་ཅིང་། བྲལ་ཐོབ་ཟག་མེད་རྙེད་པ་མེད་པ་དང་། སྲིད་རྩེ་ཉམས་བྱེད་འཇིག་རྟེན་པའི་ལམ་མེད་པས་འདི་ཡི་སྤངས་པ་ཡོངས་ཤེས་ཞེས་པའི་མིང་མི་ཐོབ་བོ། །འཕགས་པའང་བཟོད་པའི་འབྲས་བུ་སྤངས་པ་དེ་ལ་ཇི་སྲིད་སྡུག་བསྔལ་རྗེས་བཟོད་ལ་གནས་པ་དེ་སྲིད་དུ་འདོད་ཁམས་ཀྱི་སྡུག་བསྔལ་མཐོང་སྤོང་སྤངས་པའི་བྲལ་ཐོབ་ཟག་མེད་ཡོད་ཀྱང་། མཐོང་སྤོང་དུ་གྱུར་པའི་སྲིད་རྩེའི་ཉོན་མོངས་ཉམས་པར་བྱེད་པ་ནི་མ་ཡིན་ནོ། །སྡུག་བསྔལ་རྗེས་ཤེས་ལ་བྲལ་ཐོབ་ཟག་མེད་དང་། སྲིད་རྩེ་ཉམས་པ་ཡོད་ཀྱང་རྒྱུ་གཉིས་ཀུན་ཏུ་བཅོམ་པ་མ་ཡིན་ཏེ། རྒྱུ་ཀུན་འབྱུང་མཐོང་སྤོང་ཀུན་འགྲོ་མ་སྤངས་པའི་ཕྱིར། ཞིབ་ཏུ་བརྗོད་ན། སྡུག་བསྔལ་ཆོས་བཟོད་ཀྱི་དུས་ན་བྲལ་ཐོབ་ཟག་མེད་མེད་དེ། འགག་འགྱུར་གྱི་ལམ་གྱིས་སྒྲིབ་པ་སྤོང་བས་སོ། །རྒྱུ་གཉིས་ཀུན་ཏུ་བཅོམ་པས་སྡུག་ཀུན་གྱི་མཐོང་སྤོང་སྤངས་པ་ཨ་ཅང་ཡང་ཆེས་མོད། སྲིད་རྩེའི་མཐོང་སྤོང་སྤངས་པ་མེད་པས་ཡོངས་ཤེས་སུ་མི་བཞགསྡུག་བསྔལ་ལ་ཆོས་ཤེས་པའི་དུས་ན་བྲལ་ཐོབ་ཟག་མེད་ཡོད་ཀྱང་ཕྱི་མ་གཉིས་མེད་པས་ཡོངས་ཤེས་སུ་མི་འཇོགསྡུག་བསྔལ་རྗེས་བཟོད་ཀྱི་དུས་འདོད་པའི་སྡུག་བསྔལ་མཐོང་སྤོང་གི་བྲལ་ཐོབ་ཟག་མེད་ཡོད་ཀྱང་འགག་པར་འགྱུར་བའི་ལམ་གྱིས་སྒྲིབ་པ་སྤོང་བས་སྲིད་རྩེ་ཉམས་པར་བྱས་པ་མེད། ཀུན་འབྱུང་མཐོང་སྤོང་སྤངས་པ་མེད་པས་རྒྱུ་གཉིས་ཀུན་ཏུ་བཅོམ་པ་མེད་པས་ཡོངས་ཤེས་སུ་མི་བཞགསྡུག་བསྔལ་རྗེས་ཤེས་ཀྱི་དུས་ན་དང་པོ་གཉིས་ཡོད་(༢༡༩ན)
ཀྱང་ཀུན་འབྱུང་མཐོང་སྤོང་མ་སྤངས་པས་རྒྱུ་གཉིས་ཀུན་ཏུ་བཅོམ་པ་མེད་པས་ཡོངས་ཤེས་སུ་མ་བཞགཀུན་འབྱུང་ཆོས་བཟོད་ཀྱི་དུས་ན་སྡུག་བསྔལ་མཐོང་སྤོང་སྤངས་པ་འགག་པར་འགྱུར་བས་སྤངས་ཙམ་ན་བྲལ་ཐོབ་ཟག་མེད་ཡོད་ཀྱང་། རྒྱུ་གཉིས་ཀུན་ཏུ་བཅོམ་པའང་མེད། སྲིད་རྩེ་ཉམས་པའང་མེད་པས་ཡོངས་ཤེས་སུ་མ་བཞག་གོ། །ཆོས་ཤེས་དང་རྗེས་ཤེས་གཞན་ཀུན་འབྱུང་ལ་ཆོས་ཤེས་ནས་བཟུང་སྟེ་ཟད་ཤེས་ཀྱི་བར་དེ་དག་ལ་རྒྱུ་གསུམ་པོ་ཐམས་ཅད་ཡོད་པས་གནས་སྐབས་དེ་དག་ཏུ་སྤོང་བ་ལ་ཡོངས་ཤེས་ཀྱི་མིང་ཐོབ་བོ། །གཉིས་པ་ནི། ཁམས་ལས་འདས་པ་ལས། །སྒོམ་ལམ་གྱིས་ཤེས་པའི་འབྲས་བུ་སྤངས་པ་ནི་རྒྱུ་གསུམ་པོ་དེ་དང་ཁམས་མཐའ་དག་ལས་འདོད་ཆགས་དང་བྲལ་བའི་ཕྱིར་ཡང་དག་པར་འདས་པ་ལས་ཡོངས་ཤེས་ཀྱི་མིང་ཐོབ་བོ། །ཡང་རྒྱུ་སྔ་མ་གསུམ་དང་ཁམས་ལས་འདས་པ་སྟེ་བཞིའི་ཐོག་ཏུ་དམིགས་བྱ་དམིགས་བྱེད་ཀྱི་ཉོན་མོངས་པའི་སྐད་ཅིག་གཉིས། ཀུན་ཏུ་སྦྱོར་བ་དང་བྲལ་བ་ཞེས་པ་ཆོས་མངོན་དུ་བ་རྣམས་ཀྱི་རྒྱུ་ལྔ་པ་ཞིག་སྨྲས་པ་དེ་སྤང་བྱ་རིས་ལྔའི་རྣམ་པ་གང་ཞིག་སྤངས་ལ། སྤངས་པའི་རྣམ་པ་དེ་ལ་དམིགས་པའི་མཐོང་སྒོམ་གྱི་ཉོན་མོངས་དང་བྲལ་བར་གྱུར་ན་ཡོངས་ཤེས་སུ་འཇོག་གོ་ཞེས་བྱ་བ་ནི་འདི་ལྟར་འཆད་དགོས་ཏེ། གཉིས་ཀུན་ཏུ་སྦྱོར་བ་དང་བྲལ་བ་དེའི་རྒྱུ་སྡུག་ཀུན་མཐོང་སྤོང་གི་ཀུན་འགྲོའི་རྒྱུ་གཉིས་ཡང་དག་པར་བཅོམ་པ་དང་། ཁམས་ལས་ཡང་དག་པར་འདས་པ་ལས་གཞན་མ་ཡིན་པ་བརྗོད་དེ། འདི་ལྟར་ཡུལ་སྡུག་བསྔལ་མཐོང་བས་སྤང་བར་བྱ་བ་དག་སྤངས་ཀྱང་ཇི་སྲིད་དུ་དེ་ལ་དམིགས་པའི་ཡུལ་ཅན་ཀུན་འབྱུང་མཐོང་བས་སྤང་བར་བྱ་བའི་ཀུན་ཏུ་འགྲོ་བའི་རྒྱུ་སྤངས་པར་མ་གྱུར་པ་དེ་སྲིད་དུ་རྒྱུ་གཉིས་ཀ་(༢༡༩བ)
ཡང་དག་པར་བཅོམ་པ་མེད་ལ། སྒོམ་པས་སྤང་བར་བྱ་བ་དག་ཀྱང་ཡུལ་རྣམ་པ་བརྒྱད་ཀྱི་བར་སྤངས་ཀྱང་ཇི་སྲིད་དུ་ཡུལ་ཅན་རྣམ་པ་དགུ་པ་མ་སྤངས་པ་དེ་སྲིད་དུ་ཁམས་ལས་ཡང་དག་པར་འདའ་བ་མེད་པའི་ཕྱིར། ངག་དོན་ཡུལ་དང་ཡུལ་ཅན་གཉིས་ཀུན་སྦྱོར་བ་དང་བྲལ་བ་དེ་ཆོས་ཅན། རྒྱུ་གཉིས་ཀུན་ཏུ་བཅོམ་པ་དང་། ཁམས་ལས་འདས་པ་ལས་ལོག་པ་མེད་དེ། སྡུག་བསྔལ་མཐོང་སྤོང་ཡུལ། ཀུན་འབྱུང་མཐོང་སྤོང་ཡུལ་ཅན་ཡིན་ཙམ་ན། སྡུག་ཀུན་མཐོང་སྤོང་སྤངས་པའི་རྒྱུ་གཉིས་ཀུན་ཏུ་བཅོམ་པར་འདུས་ལ། བརྒྱད་པ་ཡུལ། དགུ་པ་ཡུལ་ཅན་ཡིན་ཙམ་ན་དགུ་པ་སྤངས་པས་ཁམས་ལས་ཡང་དག་པར་འདས་པ་དེར་འདུ་བའི་ཕྱིར། བཞི་པ་གང་ཟག་གང་ལ་ལྡན་པ་ནི། གཅིག་མིན་མཐོང་ལ་གནས་པ་ནི། །ལྔ་ཡི་བར་དང་ཡང་དག་ལྡན། །བསྒོམ་ལ་གནས་པ་དྲུག་གམ་ནི། །གཅིག་གམ་ཡང་ན་གཉིས་དང་ངོ་། །ཁམས་ལས་འདོད་ཆགས་བྲལ་བ་དང་། །འབྲས་བུ་ཐོབ་ཕྱིར་དེ་དག་བསྡོམས། །སོ་སྐྱེ་ནི་ཡོངས་ཤེས་གཅིག་དང་ཡང་ལྡན་པ་མིན་ཏེ། བྲལ་ཐོབ་ཟག་མེད་མེད་པའི་ཕྱིར། འཕགས་པ་མཐོང་ལམ་པ་ཇི་སྲིད་ཀུན་འབྱུང་ལ་ཆོས་ཤེས་པའི་བཟོད་པ་ལ་གནས་པའི་བར་དུ་མི་ལྡན་ཏེ་རྒྱུ་གཉིས་མ་སྤངས་པའི་ཕྱིར། གཞན་མཐོང་ལམ་ལ་གནས་པ་ཀུན་འབྱུང་ཆོས་བཟོད་ཀྱི་སྒྲས་ནི། སྡུག་བསྔལ་ལ་ཆོས་ཤེས་པ་དང་། རྗེས་སུ་ཤེས་པའི་བཟོད་ཤེས་དང་། ཀུན་འབྱུང་ཆོས་ཤེས་ཀྱི་བཟོད་པ་དང་ཡང་མི་ལྡན་ཏེ། རྒྱུ་མཚན་སྔ་མ་ཉིད་ཀྱི་ཕྱིར། ཀུན་འབྱུང་ལ་ཆོས་ཤེས་པ་དང་ཀུན་འབྱུང་ལ་རྗེས་ཤེས་ཀྱི་བཟོད་པ་ལ་གནས་པ་ཡང་གཅིག་དང་ལྡན་ནོ། །ཀུན་འབྱུང་ལ་རྗེས་སུ་ཤེས་པ་ནི་འདོད་པའི་སྡུག་ཀུན་མཐོང་སྤང་སྤངས་པའི་ཡོངས་ཤེས་དང་། གོང་མའི་སྡུག་ཀུན་མཐོང་སྤོང་སྤངས་པའི་ཡོངས་ཤེས་གཉིས་དང་ལྡན་ནོ། །འགོག་པ་ལ་ཆོས་ཤེས་པ་ནི་གསུམ་དང་ལྡན་ལ། འགོག་པ་ལ་རྗེས་སུ་ཤེས་པ་ནི་བཞི་དང་ལྡན་ལ། ལམ་ལ་ཆོས་ཤེས་པ་ནི། ལྔའི་བར་དུ་ཡང་(༢༢༠ན)
དག་ལྡན་གྱི། མཐོང་ལམ་ལ་གནས་པ་ནི་དྲུག་དང་མི་ལྡན་ནོ། །སྐད་ཅིག་བཅུ་དྲུག་པ་སྒོམ་ལམ་ཡིན་པའི་ཕྱིར། སྒོམ་ལམ་ལ་གནས་པ་ནི་ལམ་ལ་རྗེས་ཤེས་སུ་གནས་པ་ཇི་སྲིད་འདོད་པ་ལས་ཆགས་བྲལ་མ་ཐོབ་པ་རྣམ་པ་བརྒྱད་པའི་བར་སྤངས་པའམ་ཆགས་བྲལ་དེ་ལས་ཡོངས་སུ་ཉམས་པ་ནི་ཡོངས་ཤེས་དྲུག་དང་ལྡན་ནོ། །འདི་ལ་ལམ་རྗེས་ཤེས་ཐོབ་པ་ན་ཡོངས་ཤེས་དྲུག་དང་ལྡན་པར་མི་འགྱུར་ཏེ། འབྲས་བུ་བཞི་རྣམ་བཞག་པ་ཡི། །རྒྱུ་ལྔ་དག་ནི་སྲིད་ཕྱིར་རོ། །འབྲས་ལ་སྔོན་ལམ་བཏང་བ་དང་། །གཞན་ཐོབ་པ་དང་ཟད་སྡོམ་དང་། །ཤེས་པ་བརྒྱད་ཚན་ཐོབ་པ་དང་། །རྣམ་པ་བཅུ་དྲུག་ཐོབ་པའོ། །ཞེས་སྤངས་པ་སྡོམ་པར་བཤད་པའི་ཕྱིར་ཞེ་ན། སྤངས་པ་སྡོམ་པ་ཡིན་གྱི་ཡོངས་ཤེས་སྡོམ་པ་མ་ཡིན་པས་འགལ་བ་མེད་དོ། །མཐོང་ལམ་གྱི་སྔོན་འཇིག་རྟེན་པའི་ལམ་གྱིས་ཆགས་བྲལ་ཐོབ་པ་ལམ་ལ་རྗེས་ཤེས་སྐྱེས་པའང་ཐ་མའི་ཆ་མཐུན་སྤངས་པའི་ཡོངས་ཤེས་གཅིག་པུ་དང་ལྡན་ལ། བདེན་པ་མངོན་པར་རྟོགས་པའི་ཕྱིས་མཐར་གྱིས་ཆགས་བྲལ་ཐོབ་པའང་དེ་ཁོ་ན་དང་ལྡན་ཏེ། སྤངས་པ་སྡོམ་པའི་ཕྱིར་རོ། །དགྲ་བཅོམ་ཐོབ་པའང་ཀུན་སྦྱོར་ཐམས་ཅད་གཏུགས་པའི་ཡོངས་ཤེས་གཅིག་པུ་དང་ལྡན་ཏེ། དེའི་ཚེ་ཡོངས་ཤེས་སྡོམ་པའི་ཕྱིར། དགྲ་བཅོམ་དེ་གཟུགས་ཀྱི་ཀུན་དཀྲིས་ཀྱིས་ཉམས་ནའང་ཐ་མའི་ཆ་མཐུན་སྤངས་པ་གཅིག་དང་ལྡན། འདོད་པའི་ཉོན་མོངས་ཀྱིས་ཉམས་ན་དྲུག་དང་ལྡན་ལའམ་སྟེ་ཡང་ན་ཕྱིར་མི་འོང་གཟུགས་ཀྱི་ཆགས་བྲལ་ཐོབ་པ་ནི་ཐ་མའི་ཆ་མཐུན་སྤངས་པ་དང་། གཟུགས་ཀྱི་འདོད་ཆགས་ཟད་པའི་ཡོངས་ཤེས་གཉིས་དང་ལྡན་ལ། ཁམས་ལས་འདོད་ཆགས་དང་བྲལ་ཀྱང་མི་སྡོམ་པ་ནི་སྔོན་མེད་ཀྱི་འབྲས་བུ་ཐོབ་པ་(༢༢༠བ)
མེད་པའི་ཕྱིར། གཟུགས་མེད་ཀྱི་ཀུན་དཀྲིས་ཀྱིས་དགྲ་བཅོམ་ལས་ཉམས་པ་ཡང་དེ་གཉིས་ལྡན་ཏེ། དེ་ལས་ཉམས་ན་ཕྱིར་ཤེས་པ་འོག་མ་གཉིས་ཐོབ་པའི་ཕྱིར། འདོད་པ་ཙམ་ལས་འདོད་ཆགས་དང་བྲལ་བའི་ཕྱིར་མི་འོང་དང་། དགྲ་བཅོམ་དག་གི་ཡོངས་ཤེས་གཅིག་ཁོ་ནར་བཞག་གི། རྒྱུན་ཞུགས་བཞིན་དུ་མ་ཡིན་ཅེ་ན། འདི་ལྟར་གཅིག་ཏུ་འཇོག་པ་ནི་ཁམས་ལས་འདོད་ཆགས་དང་བྲལ་བ་དང་འབྲས་བུ་འཐོབ་པ་དང་། རྒྱུ་དེ་གཉིས་ཀའང་ཕྱིར་མི་འོང་དང་དགྲ་བཅོམ་གྱི་གནས་སྐབས་ན་སྲིད་པ་དེའི་ཕྱིར་གནས་སྐབས་དེ་དག་ན་སྤངས་པ་ཐམས་ཅད་བསྡོམས་ཏེ། ཐ་མའི་ཆ་མཐུན་སྤངས་པའི་ཡོངས་ཤེས་སམ། ཀུན་སྦྱོར་ཐམས་ཅད་གཏུགས་པའི་ཡོངས་སུ་ཤེས་པ་གཅིག་བྱའོ། །ལྔ་པ་གཏོང་ཐོབ་ནི། ལ་ལ་གཅིག་གཉིས་ལྔ་དང་དྲུག །གཏོང་སྟེ་འཐོབ་པ་ལྔ་མིན་ནོ། །དགྲ་བཅོམ་ལས་ཉམས་ནས་ཀུན་སྦྱོར་ཐམས་ཅད་གཏུགས་པའི་ཡོངས་ཤེས་གཅིག་པུ་གཏོང་ལ། གཟུགས་ལས་འདོད་ཆགས་དང་མ་བྲལ་བའི་ཕྱིར་མི་འོང་འདོད་པའི་ཆགས་བྲལ་ལས་ཉམས་ནའང་བདུན་པ་གཅིག་གཏོང་ངོ་། །ཕྱིར་མི་འོང་གཟུགས་ཀྱི་ཆགས་བྲལ་ཞིག་འདོད་པའི་ཆགས་བྲལ་ལས་ཉམས་ན་བདུན་པ་དང་བརྒྱད་པ་གཉིས་གཏོང་ངོ་། །ཆགས་བྲལ་སྔོན་འགྲོ་ལམ་རྗེས་ཤེས་ལ་གནས་པ་ནི་སེམས་ཀྱི་སྐད་ཅིག་བཅུ་དྲུག་པ་ལ་གནས་ཏེ་ཡོངས་སུ་ཤེས་པ་བདུན་པ་ཐོབ་པ་ན་སྔ་མ་སྐད་ཅིག་བཅོ་ལྔ་ལ་ཐོབ་པ་ལྔ་གཏོང་ངོ་། །ཆགས་བྲལ་སྔོན་འགྲོ་མ་ཡིན་པ་མཐར་གྱིས་པ་འདོད་པ་ལས་འདོད་ཆགས་དང་བྲལ་བར་བྱེད་པ་ནི་ཁམས་གསུམ་གྱི་མཐོང་སྤང་སྤངས་པའི་ཡོངས་ཤེས་དྲུག་གཏོང་ངོ་། །དེ་བཞིན་དུ་ཐོབ་པ་ལ་ཡང་ལ་ལས་ནི་གཅིག་ཐོབ་སྟེ། མཐོང་ལམ་ལ་གནས་པས་ཡོངས་ཤེས་སྔོན་མེད་ཐོབ་པའོ། །སྒོམ་ལམ་ལ་ཆགས་བྲལ་སྔོན་འགྲོས་མཐོང་ལམ་གྱི་ཐ་མར་ཐ་མའི་ཆ་མཐུན་སྤངས་(༢༢༡ན)
པའི་ཡོངས་ཤེས་གཅིག་ཐོབ་བོ། །མཐར་གྱིས་པས་ཀྱང་འདོད་པ་ལས་ཆགས་བྲལ་གྱི་རྣམ་གྲོལ་ལམ་དགུ་པ་ལ་གཅིག་ཉིད་ཐོབ་བོ། །དགྲ་བཅོམ་གྱིས་ཀྱང་དགུ་པ་གཅིག་ཐོབ་བོ། །གཟུགས་མེད་ལ་འདོད་ཆགས་དང་བྲལ་བ་དེ་འབའ་ཞིག་ལས་ཡོངས་སུ་ཉམས་པས་ཀྱང་བདུན་པ་དང་བརྒྱད་པ་གཉིས་ཐོབ་ལ། གཟུགས་ཀྱི་ཆགས་བྲལ་ལས་ཉམས་ན་བདུན་པ་ཁོ་ན་ཐོབ་པས་འབའ་ཞིག་ཅེས་སྨོས་སོ། །ཕྱིར་མི་འོང་མཐར་གྱིས་པ་འབྲས་བུ་ལས་ཉམས་པ་ཁམས་གསུམ་གྱི་མཐོང་སྤང་སྤངས་པའི་ཡོངས་ཤེས་དྲུག་ཐོབ་ཀྱི། ཆགས་བྲལ་སྔོན་འགྲོ་ལས་ཉམས་པ་མེད་དེ། དེའི་ཆགས་བྲལ་ལམ་གཉིས་ཀྱིས་ཐོབ་པའི་ཕྱིར། དེ་ཉམས་པ་སྲིད་ན་ལྔ་ཐོབ་པར་འགྱུར་ཏེ། ཆགས་བྲལ་སྔོན་འགྲོའི་ཕྱིར་མི་འོང་བཅུ་དྲུག་པའི་ཚེ་ལྔ་བཏང་བ་དེ་ལས་ཉམས་པ་སྲིད་ན་ལྔ་ཐོབ་པ་སྲིད་པའི་ཕྱིར། དེ་ནི་བརྟག་མཐའ་བཟུང་བ་ཡིན་པས། ལྔ་ཐོབ་པ་ཡོད་པ་མིན་ཏེ། དེའི་ཆགས་བྲལ་ལམ་གཉིས་ཀྱིས་ཐོབ་པས་ཉམས་པ་མི་སྲིད་པའི་ཕྱིར་རོ། །གཉིས་པ་གནས་ཀྱི་མཚན་བསྟན་པ་ནི། ཆོས་མངོན་པ་མཛོད་ཀྱི་ཚིག་ལེའུར་བྱས་པ་ལས། ཕྲ་རྒྱས་བསྟན་པ་ཞེས་བྱ་བ་སྟེ་གནས་ལྔ་པའོ། །འདིར་སྨྲས་པ། གང་ཞིག་ཀུན་ནས་འཆིང་བྱེད་ཉོན་མོངས་ཀྱི། །རྣམ་དབྱེ་ངོ་བོ་བྱེད་ལས་སོ་སོ་བ། །ཇི་བཞིན་ཤེས་ནས་ལེགས་པར་སྤངས་འདོད་ལ། །ང་ཡི་ལེགས་པར་བཤད་པ་འདིར་ཡོད་ཀྱི། །ཐར་འདོན་དམ་པའི་གོ་སར་རབ་དགའ་བའི། །བདེ་བར་ངལ་བསོ་བྱེད་པ་འགའ་ཡོད་ན། །བློ་གྲོས་སྟོབས་ཤུགས་མཆོག་ཏུ་བསྐྱེད་པ་ནས། །ཤེས་བྱ་རྒྱ་ཆེན་ཡུལ་འདིར་གཅིག་ཏུ་དཔྱོད། །བདག་གིས་ངོ་མོ་གངས་དཀར་གྱི། །རི་ཡི་སུལ་དུ་བྱང་ཆུབ་སེམས། །རིས་མེད་སྒོམ་པའི་སྐབས་འགའ་(༢༢༡བ)
འགར། །བསྟན་བཅོས་གསལ་བར་བྱས་པ་འདིའི། །དགེ་ལས་འབྲས་བུ་གང་བྱུང་བ། །ཀརྨ་བཀའ་བརྒྱུད་རྒྱས་པ་དང་། །ཀརྨ་ཕྲིན་ལས་དགོངས་འགྲུབ་ཅིང་། །ཀརྨ་པ་ཡི་དགོངས་རྫོགས་གྱུར། །ཅེས་སྨྲས་སོ། །