གནས་དྲུག་པ། ལམ་དང་གང་ཟག་བསྟན་པ།
རྒྱལ་བསྟན་ཡོངས་སུ་རྫོགས་པའི་མངའ་བདག་མཆོག །མཉམ་མེད་དྭགས་པོ་བཀའ་བརྒྱུད་ཅེས་གྲགས་པ། །གང་དེའི་རིང་ལུགས་གསལ་བར་བྱ་བའི་ཕྱིར། །ཐུབ་དབང་ཉི་མ་རྣམས་ལ་ཕྱག་འཚལ་ནས། །རྒྱ་ཆེན་ཚོས་མངོན་མཛོད་ཀྱི་ལེགས་བཤད་ལ། །བཀླག་པ་ཉིད་ཀྱིས་ཆོས་ཟབ་དོན་དམ་ནི། །རྟོགས་པར་འགྱུར་བ་ཕལ་ཆེར་བཤད་ཟིན་གྱི། །ལྷག་མའི་དོན་ཀྱང་དེ་བཞིན་དགྲོལ་བར་བྱ། །དེ་ལ། ཆ༦ དྲུག་པ་ལམ་དང་གང་ཟག་བསྟན་པའི་གནས་ཀྱི་དོན་ལ་གཉིས་ལས། དང་པོ་གནས་ཀྱི་གཞུང་བཤད་པ་ལ། ལམ་བཤད་པ། གང་ཟག་བཤད་པ། ལམ་བྱེ་བྲག་ཏུ་བཤད་པའོ། །དང་པོ་ལ། མཚམས་སྦྱར་བ། ལམ་གྱི་ངོ་བོ། ལམ་གྱི་དམིགས་པ། ལམ་སྐྱེ་བའི་ཚུལ་ལོ། །དང་པོ་ནི། བདེན་པ་མཐོང་དང་བསྒོམས་པ་ལས། །ཉོན་མོངས་སྤངས་པ་ཞེས་བཤད་པ། །གནས་ལྔ་པར་སྤངས་པ་ནི་ཡོངས་ཤེས་ཞེས་པའི་མིང་ཐོབ་བོ། །ཞེས་བཤད་པའི་སྤངས་པ་དེའང་བདེན་པ་རྣམས་མཐོང་བ་མཐོང་ལམ་དང་། བདེན་པ་སྒོམ་པ་སྒོམ་པའི་ལམ་ལས་ཉོན་མོངས་ཕྲ་རྒྱས་རྣམས་སྤངས་པར་གོང་དུ་བཤད་པ་ལས་དེའི་སྤོང་བའི་ལམ་འདིར་བཤད་པ་ཡིན་ནོ། །གཉིས་པ་ནི། བསྒོམ་པའི་ལམ་ནི་རྣམ་གཉིས་ཏེ། །མཐོང་བ་ཞེས་བྱ་ཟག་པ་མེད། །ལམ་དེ་དག་ཟག་མེད་དམ་ཟག་བཅས་ཡིན་ཅེ་ན། སྒོམ་པའི་ལམ་ནི་ཟག་བཅས་འཇིག་རྟེན་པ་དང་། ཟག་མེད་འཇིག་རྟེན་ལས་འདས་པ་རྣམ་པ་གཉིས་ཏེ། མཐོང་བའི་ལམ་ཞེས་བྱ་བ་ནི་འཇིག་རྟེན་ལས་འདས་པ་ཟག་མེད་ཁོ་ན་སྟེ། སྲིད་རྩེ་དང་བཅས་པའི་ཁམས་གསུམ་པོའི་གཉེན་པོ་ཡིན་པའི་ཕྱིར་དང་། ཁམས་གསུམ་གྱི་མཐོང་སྤོང་གི་རྣམ་པ་དགུ་གཅིག་ཅར་སྤོང་བའི་ཕྱིར། (༢༢༢ན)
འཇིག་རྟེན་པ་ལ་ནི་ཁམས་གསུམ་པ་ཀུན་སྤོང་བ་དང་རྣམ་པ་དགུ་གཅིག་ཅར་དུ་སྤོང་བ་དེ་འདྲའི་མཐུ་མེད་དོ། །སྒོམ་སྤོང་གི་ཉོན་མོངས་ནི་གཞི་དང་བཅས་པ་བརྟན་པའི་ཕྱིར་འཇིག་རྟེན་ལས་འདས་པས་ཀྱང་གཅིག་ཅར་མི་སྤོང་ངོ་། །གསུམ་པ་ལམ་གྱི་དམིགས་པ་ལ། བདེན་བཞི་བཤད་པ་དང་། བདེན་གཉིས་བཤད་པའོ། །དང་པོ་ལ། ངོ་བོ་དང་། གོ་རིམ་དང་། དེ་ལས་འཕྲོས་པའི་དོན་ཏོ། །དང་པོ་ནི། བདེན་པ་དག་ནི་བཞིར་བཤད་དོ། །བདེན་པ་མཐོང་ཞེས་པའི་བདེན་པ་དག་ནི་ཟག་བཅས་ཟག་པ་མེད་ཆོས་བསྟན་པར་ལམ་བདེན་རང་མིང་གིས་བཤད་ལ། སོ་སོར་བརྟགས་པས་འགོག་པ་གང་ཞེས་འགོག་བདེན་དུ་བཤད་ཅིང་། སྡུག་ཀུན་འབྱུང་དང་འཇིག་རྟེན་དང་། །ཞེས་པར་སྡུག་ཀུན་གྱི་བདེན་པ་སྟེ་བཞིར་བཤད་དོ། །གཉིས་པ་ནི། སྡུག་བསྔལ་ཀུན་འབྱུང་དེ་བཞིན་དུ། །འགོག་དང་ལམ་སྟེ་དེ་ལྟར་ན། །དེ་དག་ཇི་ལྟར་མངོན་རྟོགས་རིམ། །འདི་དག་གི་རིམ་པ་ནི་དེ་ཉིད་མ་ཡིན་གྱི། སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱི་བདེན་པ་སྟེ་དེ་དག་གི་རིམ་པ་ནི་འདི་ཡིན་ནོ། །དེ་བཞིན་ཅེས་པའི་སྒྲ་ནི། རང་གི་ངོ་བོ་ནི་སྔར་ཟག་བཅས་འབྲས་བུའི་ཆ་དང་། རྒྱུའི་ཆ་དང་བྲལ་བའོ། །ཞེས་དང་། ཟག་མེད་འདུས་བྱས་ཀྱི་ཆོས་རྣམས་ཞེས་ཇི་སྐད་བཤད་པ་དེ་ཁོ་ན་བཞིན་ནོ་ཞེས་རབ་ཏུ་བསྟན་པར་བྱ་བའི་ཕྱིར་རོ། །རིམ་པ་དེ་ནི་བདེན་པ་དེ་དག་སྔར་ཇི་ལྟར་མངོན་པར་རྟོགས་པའི་རིམ་པ་བཞིན་བསྟན་ཏོ། །མངོན་རྟོགས་ཀྱི་རིམ་པ་བཞིན་བསྟན་པར་བཞེད་པ་མིན་ན། ཀུན་འབྱུང་སྡུག་བསྔལ། ལམ་འགོག་པ་ཞེས་རྒྱུ་སྔར་བསྟན་པ་ལ་འབྲས་བུ་ཕྱིས་བསྟན་པར་འགྱུར་རོ། །དྲན་པ་ཉེར་གཞག་བཞི་དང་། བསམ་གཏན་ལ་སོགས་ཁ་ཅིག་ནི་རགས་རིམ་ནས་དམིགས་པ་སྟེ། རྒྱུ་བ་རགས་པའམ། ཕྲ་བའི་སྒོ་ནས་སམ། སྔ་མ་དང་ཕྱི་མ་རྒྱུ་འབྲས་སུ་འགྱུར་བའི་སྒོ་ནས་སྐྱེ་བའི་རིམ་པ་དང་མཐུན་པར་བསྟན་ཏོ། །(༢༢༢བ)
སོགས་པས་རྣམ་ཐར་དང་ཟིལ་གནོན་དང་ཟད་པར་ཀྱང་དེ་བཞིན་ནོ། །ཁ་ཅིག་ནི་རྟོགས་པར་སླ་བ་དང་མཐུན་པའམ། ཡང་ན་རྣམ་གཞག་གམ་བཤད་པ་དང་མཐུན་པར་བསྟན་པ་ནི་ཡང་དག་སྤོང་བ་རྣམས་ལྟ་བུ་སྟེ། དཀར་ནག་གཉིས་ལས་ནག་ཕྱོགས་དང་། མ་སྐྱེས་པ་དང་སྐྱེས་པ་གཉིས་ལས་སྐྱེས་པ་རྟོགས་པར་སླ་སྟེ། མ་སྐྱེས་པ་ནི་དཀའ་བས་སྐྱེས་པའི་སྟོབས་ཀྱིས་རྟོགས་པའི་ཕྱིར། དོན་ལ་ནི་སྔར་མ་སྐྱེས་པ་མི་བསྐྱེད་པ་འོང་། ཕྱིས་སྐྱེས་པ་འཇོམས་པ་འོང་ཡང་སྲིད། ཡང་ན་སྔར་སྐྱེས་པ་འཇོམས། ཕྱིས་མ་སྐྱེས་པ་མི་བསྐྱེད་པ་ཡང་འོང་བ་སྲིད་དོ། །བདེན་པ་རྣམས་ནི་མངོན་རྟོགས་དང་མཐུན་པར་བསྟན་ལ། དེ་ལྟར་མངོན་པར་རྟོགས་པའི་རྒྱུ་མཚན་ནི། གང་ལ་ཆགས་པ་སྡུག་བསྔལ་ཉེར་ལེན་གྱི་ཕུང་པོ་དང་། གང་གིས་གནོད་པ་སྡུག་བསྔལ་དང་། སྡུག་བསྔལ་གང་ལས་ཐར་པ་དོན་དུ་གཉེར་བའི་སྡུག་བསྔལ་དེ་ལ་དང་པོ་སྦྱོར་བའི་ལམ་ངེས་འབྱེད་ཆ་མཐུན་གྱི་སྐབས་སུ་ཡོངས་སུ་རྟོགས་པས་ངེས་པར་འབྱེད་ལ། ཕྱིས་འདིའི་རྒྱུ་གང་ཞེས་ཀུན་བདེན་རྟོག་གོ། །དེ་ནས་འདིའི་འགོག་པ་གང་ཞེས་འགོག་བདེན་རྟོག་གོ། །དེ་ནས་འདིའི་ལམ་གང་ཞེས་ལམ་བདེན་རྟོག་སྟེ། ནད་མཐོང་ནས་དེའི་རྒྱུ་དང་། དེ་ཟད་པ་དང་། དེ་ཟད་བྱེད་ཀྱི་སྨན་འཚོལ་བ་བཞིན་བདེན་པའི་དཔེ་ནི། མདོ་ལས། སྨན་པ་འཚོ་བྱེད་གཞོན་ནུས་གསོས་ཀྱི་དབང་དུ་མཛད་ནས། ཡན་ལག་བཞི་དང་ལྡན་པའི་སྨན་པ་ཟུག་རྔུ་འབྱིན་པ་ནི་རྒྱལ་པོའི་འོས་ཡིན་ཅིང་། རྒྱལ་པོའི་སྤུ་ལ་འབབ་པ་ཡིན། རྒྱལ་པོའི་ཡན་ལག་ཉིད་ཀྱི་གྲངས་སུ་འགྲོའོ། །བཞི་པོ་གང་དག་ཅེ་ན། ནད་ལ་མཁས་པ་ཡིན། ནད་ཀྱི་གཞི་ལ་མཁས་པ་ཡིན། ནད་སྤོང་བ་ལ་མཁས་པ་ཡིན། ནད་སྤངས་ནས་ཕྱིར་མི་སྐྱེ་བ་ལ་མཁས་པ་ཡིན། དེ་བཞིན་(༢༢༣ན)
དུ་ཡན་ལག་བཞི་དང་ལྡན་པའི་སངས་རྒྱས་ཀྱང་ཟུག་རྔུ་འབྱིན་པ་བླ་ན་མེད་པ་ཞེས་བྱའོ། །དགེ་སློང་དག་འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །ཞེས་ཡང་དག་པར་ཇི་ལྟ་བ་བཞིན་དུ་མཁྱེན་ཏོ། །ཞེས་སོ། །སྔར་ཤུགས་ཀྱིས་འཕངས་པའི་སྦྱོར་ལམ་གྱི་སྐབས་ན་བདེན་པ་ལ་རྟོགས་པ་དེ་བཞིན་ཕྱིས་བདེན་པ་མངོན་པར་རྟོགས་སྐབས་ནའང་དེ་ལ་དེ་ལྟར་རྟོགས་པ་ནི། དཀྱུས་བསྟན་པའི་རྟ་ཐག་ཐོགས་མེད་པར་རྒྱུག་པ་བཞིན་ནམ། ཁ་ཅིག་ནི་ཐག་ཐོགས་མེད་པར་དཀྱུས་སྙོལ་བ་བཞིན་ནོ། །མངོན་རྟོགས་ཀྱི་དོན་ནི་མངོན་སུམ་དུ་མ་ནོར་བར་རྟོགས་པའོ། །བདེན་པ་མངོན་རྟོགས་འདི་ཟག་མེད་ཁོ་ན་ཡིན་གྱི། ཟག་བཅས་མིན་པ་ཅི་ཞེ་ན། དེ་ནི་ཟག་མེད་ཡང་དག་པ་དེ་ཁོ་ན་ཉིད་ཡིན་ཏེ། མྱང་འདས་ལ་མངོན་དུ་ཕྱོགས་པའི་ཡེ་ཤེས་ཁྱད་པར་ཅན་ཡིན་པའི་ཕྱིར། དེའང་ཉེར་ལེན་གྱི་ཕུང་པོ་འབྲས་གྱུར་རྣམས་ནི་སྡུག་བདེན་ནོ། །རྒྱུར་གྱུར་རྣམས་ནི་ཀུན་བདེན་ཡིན་ཏེ། འདི་ལས་ཀུན་འབྱུང་བའི་ཕྱིར། ཀུན་སྡུག་གཉིས་ནི་རྒྱུ་འབྲས་སུ་གྱུར་པས་མིང་གི་སྒོ་ནས་བྱེ་བྲག་ཡོད་ཀྱི། རྫས་སུ་ནི་མ་ཡིན་ནོ། །འགོག་ལམ་ནི་མིང་དུ་མ་ཟད་རྫས་སུའང་བྱེ་བྲག་ཡོད་དོ། །མདོ་ལས། འཕགས་བདེན་རྣམས་ཞེས་འབྱུང་བའི་དོན་ཅི་ཞེ་ན། འདི་དག་ནི་འཕགས་པ་རྣམས་ལ་བདེན་པའི་ཕྱིར། མདོ་སྡེ་ཁོ་ན་ལས་འཕགས་པའི་བདེན་པ་རྣམས། ཞེས་བཤད་དོ། །ཅི་འདི་དག་གཞན་རྣམས་ལ་རྫུན་ནམ་ཞེ་ན། བདེན་པ་རང་གི་ངོ་བོ་ནི་ཐམས་ཅད་ལ་བདེན་ཏེ། གཞན་དག་ལའང་སྡུག་བསྔལ་ནི་སྡུག་བསྔལ་ལ་སོགས་པ་ཁོ་ན་ཡིན་(༢༢༣བ)
པ་ལས་ཕྱིན་ཅི་མ་ལོག་པའི་ཕྱིར། དེ་ལྟར་ནའང་འཕགས་པ་རྣམས་ཀྱིས་ནི་བདེན་པ་རྣམས་ལ་འཕགས་པ་རྣམས་ཀྱིས་བདེན་པ་ཞེས་བྱ་སྟེ། བདེན་པ་བཞི་ལ་རྣམ་པ་བཅུ་དྲུག་སོགས་ཇི་ལྟ་བ་དེ་ཁོ་ནར་གཟིགས་པའི་ཕྱིར། འཕགས་མིན་གྱི་བདེན་པ་རྣམས་ལ་འཕགས་པ་རྣམས་ཀྱི་བདེན་པ་ཞེས་མི་བྱ་སྟེ། སྡུག་བསྔལ་ལ་བདེ་བ་སོགས་ཕྱིན་ཅི་ལོག་ཏུ་མཐོང་བའི་ཕྱིར། ཚིགས་སུ་བཅད་པ་ལས། འཕགས་པས་བདེ་བར་གང་གསུངས་པ། །དེ་ནི་གཞན་གྱི་སྡུག་བསྔལ་རིག །ཅེས་པའི་དོན་འགོག་བདེན་ནི་ཡང་སྲིད་མེད་པའི་ཕྱིར་གཡང་ས་བཞིན་དུ་བྱིས་པ་རྣམས་འཇིགས་པར་བྱེད་པ་ཡིན་ལ། དེ་བཞིན་གཞན་གྱིས་བདེ་བར་གང་སྨྲས་པ། དེ་ནི་འཕགས་པའི་སྡུག་བསྔལ་རིགཅེས་འཕགས་པས་ཉེར་ལེན་གྱི་ཕུང་པོ་ལྔ་སྡུག་བསྔལ་དུ་མཐོང་བའོ། །གཞན་ན་རེ། བདེན་པ་དང་པོ་གཉིས་ནི་འཕགས་པའི་བདེན་པ་སྟེ། ཕྱིན་ཅི་མ་ལོག་པར་གཟིགས་པའི་ཕྱིར། ཕྱི་མ་གཉིས་ནི་འཕགས་པའང་ཡིན། འཕགས་པ་རྣམས་ཀྱི་བདེན་པའང་ཡིན་ཏེ། དགེ་བ་དང་ཟག་པ་མེད་པའི་ཕྱིར་དང་། ཕྱིན་ཅི་མ་ལོག་པར་གཟིགས་པའི་ཕྱིར་ཞེས་ཟེར་རོ། །ཁ་ཅིག་དེ་ལ་མགོ་བསྒྲེ་སྟེ། སྡུག་ཀུན་ནི་སོ་སོའི་སྐྱེ་བོའང་ཡིན། སོ་སོའི་སྐྱེ་བོའི་བདེན་པའང་ཡིན་པས། སྡུག་ཀུན་ནི་སོ་སོའི་སྐྱེ་བོའི་བདེན་པ། འགོག་པ་དང་ལམ་ནི་སོ་སོའི་སྐྱེ་བོ་ལ་བདེན་པས་སོ་སོའི་སྐྱེ་བའི་བདེན་པའོ་སྙམ་ན། དེ་མི་རིགས་ཏེ། སྡུག་ཀུན་སོ་སོའི་སྐྱེ་བོ་ཡིན་ཀྱང་སོ་སོའི་སྐྱེ་བོ་ལ་མི་བདེན་ཏེ། སྡུག་བསྔལ་སྡུག་བསྔལ་དུ་བདེན་པར་མ་མཐོང་། ཀུན་འབྱུང་ལ་ཀུན་འབྱུང་དུ་བདེན་པར་སོ་སོའི་སྐྱེ་བོས་མ་མཐོང་། གཞི་མཐུན་གྱི་ཡ་གཅིག་མེད། འགོག་པ་དང་ལམ་སོ་སོའི་སྐྱེ་བོའི་འགོག་པ་དང་(༢༢༤ན)
ལམ་དུ་བདེན་པར་མ་མཐོང་བས་འགོག་པ་དང་ལམ་སོ་སོའི་སྐྱེ་བོ་ལ་བདེན་པ་ཞེས་མི་བྱའོ། །གསུམ་པ་དེ་ལས་འཕྲོས་པའི་དོན་ནི། ཡིད་འོང་ཡིད་དུ་མི་འོང་དང་། །དེ་ལས་གཞན་ཟག་བཅས་རྣམས་ཉིད། །སྡུག་བསྔལ་ཉིད་གསུམ་ལྡན་པའི་ཕྱིར། །ཅི་རིགས་མ་ལུས་སྡུག་བསྔལ་ལོ། །སྡུག་བསྔལ་གྱི་མཚན་གཞི་ཚོར་བའི་ཕྱོགས་གཅིག་སྡུག་བསྔལ་ཡིན་ཙམ་ན་མཚན་ཉིད་ཟག་བཅས་ཏེ་ཧ་ཅང་ཁྱབ་ཆེས་ཏེ། བདེ་བ་དང་བཏང་སྙོམས་ལའང་དེར་འགྱུར་བའི་ཕྱིར་ཞེ་ན། མཚན་ཉིད་ཟག་བཅས་ལ་ཁྱབ་ཆེས་པའི་ཉེས་པ་མེད་དེ། དེའི་མཚན་གཞི་སྡུག་བསྔལ་གཅིག་པུར་མ་ཟད་གསུམ་ག་ཡིན་པའི་ཕྱིར། མཚན་གཞི་གསུམ་གར་གྲུབ་པ་ན་ཆོས་ཅན། མཚན་ཉིད་སྡུག་བསྔལ་ཙམ་གྱིས་ཁྱབ་སྟེ། བདེ་བ་ལ་འགྱུར་བའི་སྡུག་བསྔལ་དང་འདུ་བྱེད་ཀྱི་སྡུག་བསྔལ་གཉིས་ཡོད། སྡུག་བསྔལ་ལ་སྡུག་བསྔལ་གྱི་སྡུག་བསྔལ་དང་འདུ་བྱེད་ཀྱི་སྡུག་བསྔལ་གཉིས་ཡོད། བཏང་སྙོམས་ལ་འདུ་བྱེད་ཀྱི་སྡུག་བསྔལ་ཀྱང་ཡོད་པའི་ཕྱིར། དེས་ན་སྡུག་བསྔལ་ནི་གསུམ་སྟེ། ཡིད་དུ་འོང་བ་རྣམས་འགྱུར་བའི་སྡུག་བསྔལ་གྱི་སྡུག་བསྔལ་དང་། ཡིད་དུ་མི་འོང་བ་རྣམས་སྡུག་བསྔལ་གྱི་སྡུག་བསྔལ་དང་། དེ་གཉིས་ལས་གཞན་ཟག་བཅས་རྣམས་ནི་འདུ་བྱེད་ཀྱི་སྡུག་བསྔལ་གྱི་སྡུག་བསྔལ་བ་ཉིད་དེ། འདུས་བྱས་ཟག་བཅས་རྣམས་སྡུག་བསྔལ་ཉིད་གསུམ་དང་ལྡན་པའི་ཕྱིར། སྡུག་བསྔལ་གསུམ་པོ་དེ་དག་གིས་ཅི་རིགས་པར་ཟག་བཅས་མ་ལུས་པ་སྡུག་བསྔལ་ལོ། །ཡིད་དུ་འོང་བ་ལ་སོགས་པ་གསུམ་ནི་ཚོར་བ་གསུམ་གྱི་གོ་རིམ་དང་མཐུན་པར་འབྱུང་བ་ཡིན་ཏེ། ཚོར་བ་བདེ་བ་དེའི་དབང་གིས་དབང་པོ་དོན་རེག་པ་དེ་དང་མཚུངས་ལྡན་འདུ་བྱེད་རྣམས་ཀྱང་ཡིད་དུ་འོང་བ་རྣམས་ཀྱི་མིང་ཐོབ་པར་འགྱུར་བའི་ཕྱིར་ཏེ། བདེ་བ་ལ་སོགས་ཀྱི་འཚོགས་པ་ཡིན་པའི་ཕྱིར། ཟག་བཅས་ཀྱི་བདེ་བའི་ཚོར་བ་ནི་མི་རྟག་པ་ཉིད་ཀྱིས་འགྱུར་བའི་སྡུག་བསྔལ་ཏེ། བདེ་བའི་ཚོར་བ་ནི་སྐྱེ་བ་ན་བདེ། གནས་པ་ནའང་བདེ། འགྱུར་བ་ན་སྡུག་བསྔལ་ལོ། །ཞེས་སོ། །སྡུག་བསྔལ་ནི་གནོད་པ་རང་གི་ངོ་བོ་ཉིད་ཁོ་ནས་སྡུག་བསྔལ་བ་ཉིད་ནི། མདོ་(༢༢༤བ)
ལས། སྡུག་བསྔལ་གྱི་ཚོར་བ་ནི་སྐྱེ་བ་ན་ཡང་སྡུག་བསྔལ་ལ། གནས་པ་ན་ཡང་སྡུག་བསྔལ་ལོ། །ཞེས་གསུངས་སོ། །ཤུགས་ཀྱིས་འདི་འགྱུར་བའི་བདེ་བ་མ་ཡིན་ནམ། ཡིན་ན་མཚན་ཉིད་འཆོལ་བར་འགྱུར་རོ་ཞེ་ན། འདི་ནི་སུན་དབྱུང་བའི་ཆ་ནས་འདིར་བསྟན་པར་ཟད་དེ། ངོ་བོ་གང་གི་རྣམ་པར་སུན་འབྱིན་པ་དེ་ཉིད་ལ་བལྟོས་ནས་སྡུག་བསྔལ་བ་ཁོ་ན་ཡིན་པའི་ཕྱིར། དཔེར་ན། བདེ་ཚོར་སྐྱེ་བ་དང་། གནས་པ་ན་བདེ་བ་ཡིན་དུ་ཟིན་ཀྱང་། རྣམ་པར་སུན་དབྱུང་བྱའི་ཆ་ནས་སྡུག་བསྔལ་ཡིན་པ་བཞིན། འདིའང་རྣམ་པར་སུན་འབྱིན་པ་ཉིད་ཀྱི་ཆ་ནས་སྡུག་བསྔལ་དུ་འཇོག་པ་ནི་དེ་དང་འདྲའོ། །དེ་ལྟར་ན། བདེ་བ་སུན་དབྱུང་བྱ་ཡིན་པ་བཞིན་དུ་སྡུག་བསྔལ་ཀྱང་སུན་དབྱུང་བྱ་ཡིན་ཙམ་ན། སྐྱེ་བ་དང་གནས་པས་སྡུག་བསྔལ་གྱི་སུན་དབྱུང་བར་བྱ་ཡི། འགྱུར་ནས་བདེ་བར་འགྲོ་བས་སུན་དབྱུང་བྱ་ནི་མ་ཡིན་ཏེ། ཡིན་ན་མྱང་འདས་དང་མཐུན་པར་བྱ་བ་ཡིན་པའི་ཕྱིར་ཏེ། སྡུག་བསྔལ་འགྱུར་ནས་བདེ་བར་འགྲོ་བའི་ཕྱིར། འདོད་ན་མྱང་འདས་དང་མཐུན་པར་བྱ་བ་མ་ཡིན་ཏེ། འདི་ནི་རང་གི་ངོ་བོ་ཁོ་ནས་སྡུག་བསྔལ་ཡིན་པའི་ཕྱིར། བཏང་སྙོམས་ཀྱི་ཚོར་བ་ནི་འདུ་བྱེད་དམ་སྐྱེ་བ་ཁོ་ནས་སྡུག་བསྔལ་བ་ཉིད་དེ། རྐྱེན་གྱིས་མངོན་པར་འདུ་བྱེད་པའི་ཕྱིར། གང་མི་རྟག་པ་དེ་ནི་སྡུག་བསྔལ་ཡིན་ནོ། །ཞེས་སོ། །ཚོར་བ་དེ་གསུམ་མྱོང་བར་འགྱུར་བའི་འདུ་བྱེད་རྣམས་ཀྱང་ཚོར་བ་དང་འདྲ་བར་འགྱུར་བ་དང་། སྡུག་བསྔལ་གྱི་དང་སྐྱེས་ཙམ་གྱིས་རིམ་པ་བཞིན་སྡུག་བསྔལ་གསུམ་དུ་བརྗོད་པར་བྱའོ། །གཞན་ན་རེ། སྡུག་བསྔལ་ཉིད་སྡུག་བསྔལ་ཡིན་པས་སྡུག་བསྔལ་གྱི་སྡུག་བསྔལ་ཡིན་ལ། འདུ་བྱེད་ཉིད་སྡུག་བསྔལ་ཡང་ཡིན། འདུ་བྱེད་ཀྱང་ཡིན་པའི་བར་དུ་དེ་དང་འདྲ་བར་གཞི་མཐུན་དུ་སྦྱར་བ་སྟེ། ཨུཏྤལ་ཡི་སྔོན་པོ་ལྟ་(༢༢༥ན)
བུ་ཞེས་ཟེར་རོ། །རྐྱེན་ལས་སྐྱེ་བས་འདུ་བྱེད་ཀྱི་སྡུག་བསྔལ་ཡིན་ན་བདེ་སྡུག་གཉིས་ཀྱང་རྐྱེན་ལས་སྐྱེ་བས་འདུ་བྱེད་ཀྱི་སྡུག་བསྔལ་དུ་ཐལ་ལོ་སྙམ་ན། འདོད་དོ། །འོ་ན་བདེ་སྡུག་གཉིས་ལ་འདུ་བྱེད་ཀྱི་སྡུག་བསྔལ་མི་ཟེར་བར་འགྱུར་བ་དང་། སྡུག་བསྔལ་གྱི་སྡུག་བསྔལ་ཟེར་བ་ཅིས་སྙམ་ན། དེ་གཉིས་སྒོས་མིང་ཡིན་ལ་དེ་གཉིས་ལ་འདུ་བྱེད་ཀྱི་སྡུག་བསྔལ་ཞེས་པའི་སྤྱི་མིང་ཡང་བཤད་དོ། །ཡིད་འོང་སོགས་ཟག་བཅས་འདུ་བྱེད་ཐམས་ཅད་ནི་འདུ་བྱེད་ཀྱི་སྡུག་བསྔལ་ཉིད་ཀྱིས་སྡུག་བསྔལ་བ་སྟེ། དེ་ནི་ཁྱབ་པ་ཡིན་པའི་ཕྱིར། དེ་ཐམས་ཅད་སྡུག་བསྔལ་ཡིན་ན་ཀུན་གྱིས་ཅིས་མི་མཐོང་ཞེ་ན། གཞན་གྱིས་མ་ཡིན་ཏེ། འཕགས་པ་རྣམས་ཁོ་ནས་གཟིགས་པའི་ཕྱིར། སྨྲས་པ། ལག་མཐིལ་སྤུ་ཉག་གཅིག་འདུག་པ། །མི་རྣམས་ཀྱིས་ནི་མི་རྟོགས་ལ། །དེ་ཉིད་མིག་ཏུ་སོང་བ་ནི། །མི་བདེ་བ་དང་གནོད་བསྐྱེད་ལྟར། །བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་འདྲ་བ་ནི། །དེ་ཡིས་ཤིན་ཏུ་ཡིད་ཀྱང་འབྱུང་། །འཕགས་པ་རྣམས་སྲིད་རྩེ་དག་ལའང་སྡུག་བསྔལ་གྱི་བློ་འཇུག་པ་ལྟར་བྱིས་པ་རྣམས་མནར་མེད་ཀྱི་ཕུང་པོ་རྣམས་ལའང་དེ་ལྟར་སྡུག་བསྔལ་གྱི་བློ་མི་འཇུག་གོ། །འོ་ན་འདུ་བྱེད་ཀྱི་སྡུག་བསྔལ་ཉིད་ཀྱིས་འདུ་བྱེད་ཐམས་ཅད་སྡུག་བསྔལ་ཡིན་ན་ལམ་ཡང་ཆོས་ཅན། འདུ་བྱེད་ཀྱི་སྡུག་བསྔལ་ཉིད་དུ་ཐལ་བར་འགྱུར་ཏེ། རྐྱེན་གྱིས་བསྐྱེད་པའི་འདུས་བྱས་པ་ཡིན་པའི་ཕྱིར་ཞེ་ན། འདི་ལ་ནི་ཞིབ་ཏུ་དཔྱད་པ་ན་ཉེས་པ་དེ་འཇུག་པ་མ་ཡིན་པ་ནི་བྱས་ན་མི་རྟག་པ་གཞིར་བྱས་ལ། འཕགས་པ་རྣམས་དང་མི་མཐུན་པ་དེ་འདུ་བྱེད་ཀྱི་སྡུག་བསྔལ་དུ་འཇོག་སྟེ། ཟག་པ་དང་བཅས་པའི་དངོས་པོ་ཉིད་ཀྱི་འཕགས་པ་དང་མི་མཐུན་པར་བྱས་(༢༢༥བ)
པའི་ཕྱིར། ཟག་མེད་ཀྱི་ལམ་ཡང་བྱས་ན་མི་རྟག་པ་གཞིར་བྱས་ལ་སྡུག་བསྔལ་མ་ཡིན་ཏེ། ལམ་སྐྱེ་བ་ནི་སྡུག་བསྔལ་ཐམས་ཅད་ཀྱི་ཟད་པ་འདྲེས་པས་འཕགས་པ་རྣམས་དང་མི་མཐུན་པ་མེད་པའི་ཕྱིར། དེས་ན་འདུས་བྱས་པ་ཉིད་ཀྱིས་སྡུག་བསྔལ་གྱི་ངོ་བོར་སྐྱེས་པའི་མི་རྟག་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་ཡིན་ལ། འདུས་བྱས་པ་ཉིད་ཀྱིས་སྡུག་བསྔལ་ཟད་པ་འདྲེན་བྱེད་ཀྱི་མི་རྟག་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་ཡིན་པས་མ་ཁྱབ་སྟེ། འཇིག་རྟེན་ན་ཁྱད་པར་མེད་པར་བརྗོད་ཀྱང་ཁྱད་པར་རྟོགས་པ་འགྲོ་བས་ན་བ་ལང་ཞེས་བྱ་ལ། འགྲོ་བས་མ་ཧེ་ནི་བ་ལང་དུ་འགྱུར་བ་མ་ཡིན་ནོ། །ཞེས་བྱ་བ་དེ་ལྟ་བུར་ཡང་མཐོང་བའི་ཕྱིར། ལམ་སྡུག་བསྔལ་མིན་ན་འདུས་བྱས་ཐམས་ཅད་འགགས་པ་ལ་ཞི་བར་ཇི་ལྟར་བལྟ་ཞེ་ན། མྱང་འདས་ཞི་བར་བལྟ་བ་དེའི་ཚེའང་འདུས་བྱས་ཙམ་ཞི་བར་མི་བལྟའི། སྡུག་བསྔལ་དུ་མཐོང་བའི་འདུས་བྱས་དེ་འགོག་པ་ལ་ཞི་བར་ལྟ་བ་ཡིན་ཅིང་ལམ་ལ་ནི་མ་ཡིན་ནོ། །ཁྱབ་པ་འདུ་བྱེད་ཀྱི་སྡུག་བསྔལ་འདི་ལ་བདེ་བའང་ཡོད་པས། སྡུག་བསྔལ་ཁོ་ན་འཕགས་པའི་བདེན་པ་ཞེས་བྱ་ཞེ་ན། བདེ་བ་ཡོད་ཀྱང་ཉུང་བའི་ཕྱིར་སྡུག་བསྔལ་དུ་བཞག་པ་ཡིན་ཏེ། དཔེར་ན། མོན་སྲན་སྡེའུ་དང་སྲན་ཆུང་སོགས་ཡོད་བཞིན་དུ་དེ་ཉུང་བས་མོན་སྲན་གྲེའུའི་ཕུང་པོ་ཞེས་སྟོན་པ་བཞིན། མཁས་པ་དག་ཆུས་གདབ་པའི་བདེ་བ་ཆུང་ངུས་འབྲས་བདེ་བ་ཡིན་ནོ་སྙམ་དུ་སེམས་པར་ག་ལ་འགྱུར། དེས་ན་བདེ་བ་ནི་སྡུག་བསྔལ་གྱི་རྒྱུ་ཡིན་ཏེ། སྡུག་བསྔལ་མྱོང་བར་འགྱུར་བའི་ལས་དང་མཚུངས་པར་ལྡན་པའི་ཕྱིར། བདེ་བ་ནི་གཞན་ལ་བསྟེན་པ་དང་། ཞིང་ལ་སོགས་ཀྱི་སྡུག་བསྔལ་ཤིན་ཏུ་མང་པོས་བསྐྱེད་པར་བྱས་པའི་ཕྱིར་དང་། བཀྲེས་སྐོམ་སོགས་ཀྱི་སྡུག་བསྔལ་ཡོད་ན་ཟས་སྐོམ་(༢༢༦ན)
གྱི་བདེ་བ་འདོད་པའི་ཕྱིར་འཁོར་བའི་བདེ་བ་ཐམས་ཅད་སྡུག་བསྔལ་དུ་རྟོགས་སོ། །སྲིད་པ་ཐམས་ཅད་ནི་སྲིད་པའི་བདེ་བ་དང་བཅས་པ་སྡུག་བསྔལ་ཁོ་ན་འཕགས་པའི་བདེན་པར་བཞག་གི། བདེ་བ་ནི་མ་ཡིན་ཏེ། འདུ་བྱེད་ཀྱི་སྡུག་བསྔལ་དུ་རྣམ་པ་གཅིག་པས་འཕགས་པ་རྣམས་ཀྱི་སྡུག་བསྔལ་དུ་གཟིགས་པའི་ཕྱིར། ད་ནི་བདེ་བའི་རང་བཞིན་གྱི་ཚོར་རྣམས་ལ་སྡུག་བསྔལ་དུ་ཇི་ལྟར་བལྟ་ཞེ་ན། སྡུག་བསྔལ་གྱི་ངོ་བོར་སྐྱེས་པའི་མི་རྟག་པའི་མཚན་ཉིད་ཀྱི་འཕགས་པ་དང་མི་མཐུན་པའི་ཕྱིར་སྡུག་བསྔལ་དུ་བལྟ་སྟེ། གཟུགས་དང་འདུ་ཤེས་སོགས་ཀྱང་སྡུག་བསྔལ་དུ་བལྟ་མོད་ཀྱི། དེ་དག་སྡུག་བསྔལ་གྱི་ཚོར་བ་བཞིན་དུ་གནོད་ཅིང་སྡུག་བསྔལ་བ་ནི་མ་ཡིན་པ་བཞིན་ནོ། །བཙུན་པ་གཞོན་ནུ་ལེན་ན་རེ། སྡུག་བསྔལ་གྱི་རྒྱུ་ཡིན་པའི་ཕྱིར་རོ་སྙམ་དུ་མོས་པ་དེའི་དེ་ནི་ཀུན་འབྱུང་གི་རྣམ་པ་ཡིན་གྱི། སྡུག་བསྔལ་གྱི་རྣམ་པ་ནི་མ་ཡིན་ཏེ། སྡུག་བསྔལ་ལ་རྒྱུར་བལྟ་བའི་ཕྱིར། གཞན་ཡང་ཁམས་གོང་ན་སྤྱོད་པའི་འཕགས་པ་རྣམས་ཀྱི་ཕུང་པོ་ཆོས་ཅན། སྡུག་བསྔལ་གྱི་འདུ་ཤེས་འཇུག་པ་མི་རིགས་པར་ཐལ། ཕྱིར་མི་འོང་གི་ཕུང་པོ་རྣམས་སྡུག་བསྔལ་གྱི་གནས་སུ་མི་འོང་བའི་ཕྱིར། ཡང་སྡུག་བསྔལ་གྱི་རྒྱུ་ཡིན་པའི་ཕྱིར། བདེ་བ་ཡང་སྡུག་བསྔལ་ཉིད་དུ་བལྟ་ན་ཆོས་ཅན། གང་མི་རྟག་ན་སྡུག་བསྔལ་ལོ་ཞེས་འདུ་བྱེད་སྡུག་བསྔལ་དུ་བཤད་མི་དགོས་པར་ཐལ། སྡུག་བསྔལ་གྱི་རྒྱུ་ཡིན་པ་ཁོ་ནས་སྡུག་བསྔལ་ཡིན་པ་དེ་འགྲུབ་པའི་ཕྱིར། གལ་ཏེ་མི་རྟག་པ་ནི་སྡུག་བསྔལ་བ་ཡིན་པའི་ཕྱིར་སྡུག་བསྔལ་དུ་བལྟ་ཡི། སྡུག་བསྔལ་གྱི་རྒྱུ་ཡིན་པའི་ཆ་ནས་མ་ཡིན་ན། འོ་ན་མི་རྟག་པ་དང་སྡུག་བསྔལ་གྱི་རྣམ་པ་(༢༢༦བ)
དག་ལ་ཁྱད་ཅི་ཞིག་ཡོད། སློབ་དཔོན་གྱིས་དེའི་ཁྱད་པར་ནི། སྐྱེ་ཞིང་འཇིག་པའི་ཆོས་ཅན་ཡིན་པའི་ཕྱིར་མི་རྟག་པར་བལྟ་ལ། མི་མཐུན་པ་ཡིན་པའི་ཕྱིར་སྡུག་བསྔལ་དུ་བལྟ་སྟེ། མི་རྟག་པར་མཐོང་ན་མི་མཐུན་པར་འགྱུར་བས་མི་རྟག་པའི་རྣམ་པས་སྡུག་བསྔལ་གྱི་རྣམ་པ་འདྲེན་པར་བྱེད་པའི་ཕྱིར། གང་མི་རྟག་པ་དེ་ནི་སྡུག་བསྔལ་བ་ཡིན་ཅེས་བཤད་པ་དེ་རྣམ་པ་གཅིག་པའི་ཕྱིར་དེ་སྐད་དུ་བཤད་པ་མ་ཡིན་ཏེ། འོན་ཀྱང་བདེ་བ་དེ་མི་རྟག་པར་མཐོང་ན་མི་མཐུན་པར་འགྱུར་ལ། མི་མཐུན་པ་ཉིད་ཀྱི་སྡུག་བསྔལ་ཉིད་དུ་བལྟ་བའི་ཕྱིར། བཙུན་པ་དཔལ་ལེན་ན་རེ། བདེ་བའི་ཚོར་བ་མེད་དེ། ཐམས་ཅད་སྡུག་བསྔལ་ཁོ་ནར་མདོ་དང་རིགས་པ་ལས་ཁོང་དུ་ཆུད་པའི་ཕྱིར་ཏེ། བཅོམ་ལྡན་འདས་ཀྱིས། གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་དང་། བདེ་བའི་ཚོར་བ་ནི་སྡུག་བསྔལ་དུ་བལྟའོ་ཞེས་དང་། སྡུག་བསྔལ་ལ་བདེའོ་སྙམ་དུ་འདུ་ཤེས་ཕྱིན་ཅི་ལོག་གོ་ཞེས་གསུངས་ལ། རིགས་པ་ནི་བདེ་བའི་རྒྱུ་རྣམ་པར་མི་གནས་པའི་ཕྱིར་ཏེ། བདེ་བའི་རྒྱུ་བཟའ་བཏུང་དང་གྲང་དྲོ་ལ་སོགས་པར་འདོད་པ་དག་ཧ་ཅང་སྤྱད་པ་དང་། དགུན་གྲང་བ་དང་སོས་དྲོ་བར་སྤྱད་པ་རྣམས་ཀྱང་སྡུག་བསྔལ་གྱི་རྒྱུར་འགྱུར་བའི་ཕྱིར། ཁ་ཟས་བདེ་བའི་རྒྱུ་ཡིན་ན་ཆོས་ཅན། རྒྱུ་ཁ་ཟས་ཟོས་པས་བདེ་བ་འཕེལ་བའམ་མཉམ་པ་ཁོ་ནར་ཐལ། བདེ་བའི་རྒྱུ་འཕེལ་བའམ་མཉམ་པས་ནི་དུས་གཞན་དུའང་སྡུག་བསྔལ་བསྐྱེད་པར་མི་རིགས་པའི་ཕྱིར། འདོད་མི་ནུས་པས། དེ་དག་ནི་དང་པོ་ཁོ་ན་ནས་སྡུག་བསྔལ་གྱི་རྒྱུ་དག་ཡིན་ཅིང་བདེ་བའི་རྒྱུ་མིན་ལ། དང་པོ་སྡུག་བསྔལ་དུ་མི་གསལ་བས་སྡུག་བསྔལ་གྱི་རྒྱུར་མ་རྟོགས། ཕྱིས་སྡུག་བསྔལ་འཕེལ་བས་སྡུག་བསྔལ་གྱི་རྒྱུར་གསལ་(༢༢༧ན)
བར་རྟོགས་པ་ཡིན། སྤྱོད་ལམ་གྱིས་བྱེ་བྲག་ལའང་ཉལ་བ་སོགས་ཧ་ཅང་བསྟེན་པ་དང་། དུས་མ་ཡིན་པར་བརྟེན་པ་ལའང་དེ་བཞིན་བརྗོད་པར་བྱའོ། །སྡུག་བསྔལ་གྱི་གཉེན་པོ་ལ་ཡང་བདེ་བའི་བློ་སྐྱེ་བར་མཐོང་སྟེ། ཇི་སྲིད་དུ་བཀྲེས་སྐོམ་ཚ་གྲང་ངལ་བ་དང་། འདོད་པའི་འདོད་ཆགས་ལས་སྐྱེས་པའི་སྡུག་བསྔལ་ལས་སྡུག་བསྔལ་གཞན་གྱིས་གཙེས་པར་མ་གྱུར་པ་དེ་སྲིད་དུ་བདེའོ་སྙམ་དུ་ཚོར་བ་ཅུང་ཟད་ཀྱང་མེད་ལ། དེས་ན་བླུན་པོ་རྣམས་གཉེན་པོ་ཁོ་ན་ལ་བདེ་བའི་བློ་འཇུག་གི། བདེ་བ་ལ་ནི་མ་ཡིན་པའི་ཕྱིར། འདིར་སྡུག་བསྔལ་གྱི་གཉེན་པོ་ཀ་བདེ་བ་ཡིན་པས་སྡུག་བསྔལ་གྱི་གཉེན་པོ་ལ་བདེ་བའི་བློ་སྐྱེ་བ་དེས་སླར་ལ་བདེ་བ་སྒྲུབ་པར་མི་འགྲོའམ་སྙམ་ན། སྡུག་བསྔལ་གྱི་གཉེན་པོ་བྱ་བ་དེ་སྡུག་བསྔལ་རིས་མཐུན་ནང་འགལ་ལ་གཉེན་པོར་བརྗོད་ན་བདེ་བའི་བློ་སྐྱེས་པ་ཡིན་གྱི། དེ་ལ་བདེ་བ་རང་གཅིག་ཡོད་ནས་བདེ་བའི་བློ་སྐྱེས་པ་ལྟ་ག་ལ་ཡིན་ནོ། །ཡང་སྡུག་བསྔལ་གྱི་བྱེ་བྲག་ལ་ཡང་བདེ་བའི་བློ་སྐྱེ་བ་མཐོང་སྟེ། ཕྲག་པ་སྔ་མ་ལྗིད་པས་ན་བ་ནས་ཕྲག་པ་ཕྱི་མར་ཁུར་སྦེད་པར་བྱེད་པའི་སྡུག་བསྔལ་ཕྱི་མ་ལ་བདེ་བའི་བློ་བསྐྱེད་པ་ལྟ་བུའི་ཕྱིར་རོ། །དེས་ན་བདེ་བ་ནི་མེད་པ་ཁོ་ནའོ་ཟེར་རོ། །ཆོས་མངོན་པ་རྣམས་ནི། བདེ་བ་ནི་དོན་ལ་ཡོད་པ་ཉིད་དུ་ཟེར་རོ། །སློབ་དཔོན་ནི་འདི་ཉིད་རིགས་པར་བཞེད་དོ། །ཇི་ལྟར་རིགས་ན། སློབ་དཔོན་གྱིས་བདེ་བ་ལ་སྐུར་འདེབས་དེ་ལ་འདི་འདྲི་སྟེ། སྡུག་བསྔལ་བྱ་བ་འདི་ཅི་ཞིག་ཡིན། གནོད་པའི་བདག་ཉིད་གང་ཡིན་པའོ་ཞེས་ཟེར་ན་ནི་གནོད་པའི་བདག་ཉིད་དེ་ཇི་ལྟ་བུའོ་ཞེས་བརྗོད་དགོས་སོ། །གལ་ཏེ་གནོད་པར་བྱེད་པ་ཡིན་ནོ་ཞེས་ཟེར་ན་ནི། འོ་ན་ནི་བདེ་བ་ཡོད་པར་གྲུབ་སྟེ། ཕན་པར་བྱེད་པ་བདེ་བ་ཡིན་པའི་ཕྱིར། གལ་ཏེ་ཕན་པར་བྱེད་པའི་བདེ་བ་(༢༢༧བ)
དེ་འཁོར་བར་འཆིང་བྱེད་ཡིན་པས། འཕགས་པས་མི་འདོད་པས་སྡུག་བསྔལ་ཡིན་ནོ་ཞེས་ཟེར་ན་ནི། འོ་ན་དེ་བདེ་བར་གྲུབ་སྟེ། དེ་བྱིས་པས་འདོད་པའི་བདེ་བ་ཡིན་པའི་ཕྱིར། གལ་ཏེ་བྱིས་པའི་འདོད་པ་ལ་བློ་གཏད་ཅིའང་མེད་པས། བྱིས་པའི་འདོད་པ་དེ་ཉིད་འཕགས་པ་རྣམས་འདོད་ཆགས་དང་བྲལ་བའི་ཚེ་བཞེད་པ་མ་ཡིན་པས་དེའི་བདེ་བ་དེའང་སྡུག་བསྔལ་ཁོ་ན་ཡིན་ཏེ། དེས་ན་བྱིས་པའི་འདོད་པ་དེ་ལ་བློ་གཏད་མེད་པས་འདོད་པ་ཉིད་ཡོངས་སུ་མ་རྫོགས་པའི་ཕྱིར་ཞེ་ན། མ་གྲུབ་སྟེ། མི་འདོད་པ་ནི་བག་མེད་པ་ལ་སོགས་ཉེས་དམིགས་གཞན་འབྱུང་བས་མི་འདོད་པ་ཡིན་གྱི། བདེ་བ་དེ་རང་གི་ངོ་བོས་རྫོགས་པར་མི་འདོད་པ་མ་ཡིན་པའི་ཕྱིར། གྲུབ་སྟེ། ཚོར་བ་གང་ཞིག་རང་གི་མཚན་ཉིད་ཀྱི་འདོད་པ་དེ་ནི་ནམ་ཡང་དེ་ཁོ་ནས་མི་འདོད་པར་མི་འགྱུར་བའི་ཕྱིར་ཏེ། འཕགས་པས་མི་བཞེད་པར་འགྱུར་བ་ནི་ཉེས་དམིགས་གཞན་བསྐྱེད་པས་ཉེས་པ་སུན་འབྱིན་པར་བྱེད་པའི་ཆ་ནས་དང་། བདེ་བ་དེའི་ཆེད་དུ་སྲོག་གཅོད་པ་སོགས་བག་མེད་པའི་གནས་ལ་སྤྱད་པས་བདེ་ལས་ཉམས་པའི་རྒྱུ་ཡིན་པའི་ཆ་ནས་དང་། མངོན་པར་འདུ་བྱ་བ་ཆེན་པོས་བདེ་བ་སྒྲུབ་པའི་མཇུག་ཐོགས་སུ་སྡུག་བསྔལ་སྐྱེ་བའི་ཆ་ནས་དང་། གནས་སྐབས་འགྱུར་ཞིང་མཐར་འཇིག་པར་ལྟ་བའི་ཆ་ནས་སྡུག་བསྔལ་དུ་བལྟའི། བདེ་བ་རང་གི་མཚན་ཉིད་ཀྱི་ཆ་ནས་ནི་མ་ཡིན་པའི་ཕྱིར་ཏེ། བདེ་ཚོར་གྱི་རྣམ་པས་ནི་འཕགས་པ་རྣམས་ལའང་ཕན་འདོགས་བྱེད་ལ་བསླུ་བ་མ་ཡིན་པའི་ཕྱིར། གལ་ཏེ། དེ་རང་གི་མཚན་ཉིད་ཀྱིས་མི་འདོད་པའི་ངོ་བོར་གྱུར་ན་བདེ་བ་ལ་འདོད་ཆགས་དང་བྲལ་བའི་ཆེད་དུ་འབད་པ་དོན་མེད་པར་ཐལ། བདེ་བའི་ཚོར་བ་དེ་ལ་རང་གི་མཚན་ཉིད་ཀྱི་མི་འདོད་པ་ཉིད་ཀྱིས་འདོད་ཆགས་སྐྱེ་བར་མི་འགྱུར་བའི་ཕྱིར། སྡུག་བསྔལ་(༢༢༨ན)
གྱི་ཚོར་བ་བཞིན་ནོ། །འདོད་མི་ནུས་པ་དེས་ན་བདེ་བའི་ཚོར་བ་ནི་རང་གི་མཚན་ཉིད་ཀྱིས་ཡོད་ཀྱང་། འདོད་ཆགས་དང་བྲལ་བའི་ཆེད་དུ་བདེ་བ་ལ་ཉེས་པའི་རྣམ་པ་གཞན་གྱི་སྒོ་ནས་སྐྱོན་དང་སྡུག་བསྔལ་དུ་ལྟ་བ་འདི་གྲུབ་བོ། །གང་ཅི་ཚོར་ཡང་རུང་། དེ་ནི་འདིར་སྡུག་བསྔལ་ལོ་ཞེས་པ་ནི། བཅོམ་ལྡན་འདས་ཉིད་ཀྱིས། ཀུན་དགའ་བོ་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་ལོ་ཞེས་བྱ་བ་ནི་ངས་འདུ་བྱེད་མི་རྟག་པ་དང་། འདུ་བྱེད་རྣམས་འགྱུར་བ་ཉིད་ལ་དགོངས་ནས་གསུངས་སོ་ཞེས་དོན་ངེས་པར་མཛད་དོ། །དེས་ན་འདི་ནི་སྡུག་བསྔལ་གྱི་སྡུག་བསྔལ་ཉིད་ལ་དགོངས་ཏེ་གསུང་བ་མིན་པར་གྲུབ་སྟེ། དེ་ནི་སྡུག་བསྔལ་དུ་གང་ཟག་ཐམས་ཅད་ལ་གྲུབ་པའི་ཕྱིར། ཚོར་བ་ཐམས་ཅད་རང་བཞིན་གྱི་སྡུག་བསྔལ་ཡིན་ན། ཀུན་དགའ་བོས་བཅོམ་ལྡན་འདས་ལ་འདི་སྐད་དུ་བདེ་སྡུག་བཏང་སྙོམས་ཀྱི་ཚོར་བ་གསུམ་ཡང་གསུངས་ལ། ཅི་ཚོར་བ་སྡུག་བསྔལ་ཞེས་ཀྱང་གསུངས་ན། ཅི་ལ་དགོངས་ནས་དེ་སྐད་ཅེས་བཀའ་སྩལ་ཅེས་ཞུས་ཏེ། ཞུ་བ་པོས་ཀྱང་ཅི་ལ་དགོངས་ནས་ཚོར་བ་གསུམ་བཀའ་སྩལ་ཅེས་དང་། བཅོམ་ལྡན་འདས་ཀྱིས་ཀྱང་། ཚོར་བ་གསུམ་འདི་ནི་ངས་དགོངས་ནས་བཤད་པ་ཡིན་ཅེས་ལུང་བསྟན་པར་གྱུར་པ་ཞིག་ན་དེ་སྐད་དུ་བཀའ་མ་སྩལ་ཏེ། དེས་ན་ཚོར་བ་གསུམ་ནི་རང་གི་ངོ་བོས་ཡོད་ལ། ཅི་ཚོར་བ་སྡུག་བསྔལ་ལོ། །ཞེས་དགོངས་ནས་བཤད་ཅེས་ཚིག་འདི་འགྱུར་བ་ཉིད་ལ་དགོངས་ནས་དགོངས་པ་ཅན་དུ་མཛད་དོ། །བདེ་བའི་ཚོར་བ་ནི་སྡུག་བསྔལ་དུ་བལྟའོ་ཞེས་པ་ལ་ཡང་བདེ་སྡུག་གཉིས་ཀ་ཡོད་དེ། རང་གི་ངོ་བོས་ཡིད་དུ་འོང་བས་བདེ་བ་ཡིན་ལ། འགྱུར་བ་དང་མི་རྟག་པའི་རྣམ་པའི་གྲངས་ཀྱི་སྡུག་བསྔལ་ཡིན་པའི་ཕྱིར། དེ་ལ་བདེ་བར་མཐོང་ན་ནི་འདོད་ཆགས་ཅན་རྣམས་དེའི་རོ་མྱོང་(༢༢༨བ)
བར་བྱེད་པས་འཆིང་བར་འགྱུར་ལ། སྡུག་བསྔལ་དུ་མཐོང་ན་ནི་དེ་ལ་འདོད་ཆགས་དང་བྲལ་བས་ཐར་བར་འགྱུར་བས། བཅོམ་ལྡན་འདས་ཀྱིས་ཐར་པར་འགྱུར་བ་དེ་ཁོ་ན་བཞིན་དུ་བལྟ་བར་བཀའ་སྩལ་བ་ཡིན་ནོ། །དེ་རང་གི་ངོ་བོས་བདེ་བར་ཤེས་ཏེ། རྫོགས་པའི་སངས་རྒྱས་རབ་མཁྱེན་གྱིས། །འདུ་བྱེད་མི་རྟག་ཉིད་དང་ནི། །རྣམ་པར་འགྱུར་བ་ཉིད་མཁྱེན་ནས། །ཚོར་བ་སྡུག་བསྔལ་བར་གསུངས་སོ། །གང་ཡང་སྡུག་བསྔལ་ལ་བདེ་བའོ་སྙམ་དུ་འདུ་ཤེས་ཕྱིན་ཅི་ལོག་གོ། །ཞེས་གསུངས་པའང་དགོངས་པ་ཅན་ཡིན་ཏེ། འཇིག་རྟེན་ན་ཚོར་བ་དང་། འདོད་ཡོན་དང་། ལྷ་མིའི་སྐྱེ་བ་ལ་བདེ་བར་འདུ་ཤེས་སོ། །དེ་ལ་བདེ་བའི་ཚོར་བ་ལ་རྣམ་གྲངས་ཀྱི་སྡུག་བསྔལ་ཡོད་པ་དེའི་ཕྱིར་མཐའ་གཅིག་ཏུ་བདེ་བར་བལྟ་བ་ནི་ཕྱིན་ཅི་ལོག་ཡིན་ལ། གཟུགས་སོགས་ཡིད་འོང་གི་བདེ་སྡུག་འདྲེས་མ་དེ་ལ་བདེ་བ་ཆུང་ཞིང་སྡུག་བསྔལ་གཞི་ཆེ་བས་མཐའ་གཅིག་ཁོ་ནར་བདེ་བར་ལྟ་བ་ནི་ཕྱིན་ཅི་ལོག་ཡིན་ལ། བདེ་བ་གཏན་མེད་ནི་མ་ཡིན་པའི་ཕྱིར་རོ། །སྐྱེ་བ་ལའང་དེ་དང་འདྲ་བ་དེས་ན་ལུང་དེས་བདེ་བའི་དབང་པོ་མེད་པར་གྲུབ་བོ། །ཚོར་བ་ཐམས་ཅད་རང་གི་ངོ་བོ་ཁོ་ནས་སྡུག་བསྔལ་ཡིན་པར་གྱུར་ན་ཚོར་བ་གསུམ་ཞེས་གསུངས་པ་ལ་ཡོན་ཏན་ཅི་ཞིག་ཡོད་པར་འགྱུར། འཇིག་རྟེན་གྱི་ཚོར་བ་དང་རྟོགས་པ་དང་མཐུན་པར་ཚོར་བ་གསུམ་གསུངས་སོ་ཞེ་ན། མ་ཡིན་ཏེ། ཚོར་བ་ཐམས་ཅད་སྡུག་བསྔལ་ལོ་ཞེས་བྱ་བ་ལ་སོགས་པས་རང་གི་མཚན་ཉིད་ཀྱི་སྒོ་ནས་ངེས་པར་འཛིན་པར་མཛད་དོ་ཞེས་དགོངས་ནས་བཀའ་སྩལ་པའི་ཕྱིར། ཚོར་བ་གསུམ་དོན་དམ་པར་ཡོད་ཀྱི། འཇིག་རྟེན་དང་མཐུན་པ་ནི་མ་ཡིན་ཏེ། ཡང་དག་པར་ཅི་ལྟ་བ་བཞིན་ཅེས་གསུངས་པའི་ཕྱིར། གྲུབ་སྟེ། བདེ་བའི་དབང་པོ་གང་ཡིན་པ་དང་། (༢༢༩ན)
ཡིད་བདེ་བའི་དབང་པོ་གང་ཡིན་པ་འདི་ནི་བདེ་བའི་ཚོར་བ་ཡིན་པར་བལྟ་བར་བྱའོ། །སྡུག་བསྔལ་གྱི་དབང་པོ་གང་ཡིན་པ་དང་། ཡིད་མི་བདེ་བའི་དབང་པོ་གང་ཡིན་པ་འདི་ནི་སྡུག་བསྔལ་གྱི་ཚོར་བ་ཡིན་ནོ། །བཏང་སྙོམས་ཀྱི་དབང་པོ་གང་ཡིན་པ་འདི་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ཡིན་ནོ་ཞེས་རྒྱས་པར་གསུངས་ནས་ཚོར་བ་གསུམ་ཡོད་པའི་ཁུངས་ནི། གོང་གི་དབང་པོ་ལྔ་པོ་འདི་དག་དེ་ལྟར་ཡང་དག་པ་ཇི་ལྟ་བ་བཞིན་མཐོང་ཞིང་། དེའི་ཀུན་ཏུ་སྦྱོར་བ་གསུམ་ཡང་སྤངས་པ་ཡིན་ཅེས་བྱ་བ་དེ་ལྟ་བུ་ལ་སོགས་པ་གསུངས་སོ། །འཇིག་རྟེན་ཡང་ཇི་ལྟར་ན་སྡུག་བསྔལ་གྱི་ཚོར་བ་ཆུང་ཆེན་འབྲིང་གསུམ་ལ་བདེ་སྡུག་བཏང་སྙོམས་ཀྱི་བློ་སྐྱེའོ་ཞེ་ན། འོ་ན་སྡུག་བསྔལ་ཆུང་འབྲིང་ཆེན་པོ་དག་ལ་བདེ་བ་ཆེ་འབྲིང་ཆུང་ངུ་དག་གི་བློ་སྐྱེ་བར་རིགས་པར་ཐལ། བདེ་བ་ལའང་ཆུང་འབྲིང་ཆེན་པོ་གསུམ་ཡོད་པ་ལས། སྡུག་བསྔལ་ཆེན་པོ་ལ་ནི་བདེ་བ་ཆུང་ངུའི་བློ་སྐྱེ་བར་རིགས་པ་མ་ཡིན་པའི་ཕྱིར། གྲུབ་སྟེ། དེ་ལ་བདེ་བ་ཆུང་ངུའི་བློ་སྐྱེ་བར་འགྱུར་ན་སྡུག་བསྔལ་ཆེན་པོ་ཉིད་དུའང་མི་འགྱུར་བའི་ཕྱིར། ཡང་སྡུག་བསྔལ་ཆུང་ངུ་ལ་བདེ་བ་ཆེན་པོའི་བློ་སྐྱེ་བ་ཆོས་ཅན། སྡུག་བསྔལ་ཆུང་ངུ་མ་ཡིན་པར་ཐལ། བདེ་བ་ཆེན་པོ་གསལ་བར་ཉམས་སུ་མྱོང་བ་ནི་སྡུག་བསྔལ་ཆུང་ངུར་རིགས་པ་མ་ཡིན་པའི་ཕྱིར། གང་གི་ཚེ་དྲི་རོ་རེག་བྱ་བཏང་སྙོམས་ཀྱི་ཁྱད་པར་ལ་བདེ་བ་མྱོང་བའང་མཐོང་བས། དེའི་ཚེ་བཏང་སྙོམས་དེ་སྡུག་བསྔལ་ཆུང་ངུར་གྱུར་པ་གང་ཡིན་པའང་བརྗོད་དགོས་ན་བརྗོད་པར་ནུས་པ་མ་ཡིན་ཏེ། སྡུག་བསྔལ་དང་བཏང་སྙོམས་འགལ་བའི་ཕྱིར། དེ་བས་ན་བདེ་བ་ཡུལ་གྱི་སྟོབས་ཁོ་ན་ལས་སྐྱེ་བ་ཡིན་ཏེ། མཚུངས་པ་དེ་མ་ཐག་རྐྱེན་སྡུག་བསྔལ་ཆུང་ངུའམ་སྡུག་བསྔལ་ཆེན་པོའི་སྟོབས་ཀྱིས་(༢༢༩བ)
སྐྱེ་བ་མ་ཡིན་པའི་ཕྱིར། ཡང་སྡུག་བསྔལ་ཆུང་ངུ་མ་སྐྱེས་པའམ། སྐྱེས་ནས་འགགས་པ་ན་ཆོས་ཅན། སྡུག་བསྔལ་མ་ལུས་པ་དང་བྲལ་བའི་བདེ་བློ་ཤིན་ཏུ་ཆེ་བ་སྐྱེ་བར་ཐལ། སྡུག་བསྔལ་ཆུང་ངུ་ལའང་བདེ་བའི་བློ་སྐྱེ་བའི་ཕྱིར། དེ་བཞིན་དུ་འདོད་ཆགས་ཀྱི་སྡུག་བསྔལ་ཆུང་ངུ་དེ་མ་སྐྱེས་པ་དང་། འགག་པ་ན་ཆོས་ཅན། འདོད་པའི་བདེ་བློ་ཤིན་ཏུ་ཆེས་སྐྱེ་བར་ཐལ། འདོད་ཆགས་ཀྱི་སྡུག་བསྔལ་ཆུང་ངུ་ལ་འདོད་པའི་བདེ་བློ་ཆེན་པོ་སྐྱེ་བའི་ཕྱིར་ཞེས་བརྗོད་པར་བྱའོ། །འདོད་མི་ནུས་ཏེ། དེ་ལྟ་བུ་མ་མཐོང་བའི་ཕྱིར། སྡུག་བསྔལ་གྱི་ཚོར་བ་ཆུང་ངུ་ལ་ནི་བདེ་བའི་ཉམས་མྱོང་ཤིན་ཏུ་ཆེས་གསལ་དུ་འཛིན་ལ། སྡུག་བསྔལ་གྱི་ཚོར་བ་འབྲིང་ལ་བཏང་སྙོམས་ཀྱི་ཚོར་བ་མི་གསལ་བར་འཛིན་བྱ་འདི་མི་རུང་བར་ཐལ། རུང་ན་སྡུག་བསྔལ་འབྲིང་ལ་མི་གསལ་བར་འཛིན་ན་སྡུག་བསྔལ་ཆུང་ངུ་ལ་ནི་དེ་ལ་དེ་ལས་ཀྱང་ཆེས་ཆེར་མི་གསལ་བར་འཛིན་རིགས་པའི་ཕྱིར། བསམ་གཏན་དང་པོ་གཉིས་པ་གསུམ་པ་ན། མདོ་ལས། བདེ་བའི་ཚོར་བ་ཡོད་དོ་ཞེས་འབྱུང་བས་དེར་སྡུག་བསྔལ་ཆུང་ངུ་ཡོད་པར་ཐལ། སྡུག་བསྔལ་ཆུང་ངུ་ལ་བདེ་བའི་བློ་སྐྱེ་བར་འདོད་པའི་ཕྱིར། བསམ་གཏན་བཞི་པ་དང་གཟུགས་མེད་པ་དག་ན་ཆོས་ཅན། མདོ་ལས། གོང་ནས་བདེ་བ་ཡང་མ་ཡིན་པ་ཡོད་དོ་ཞེས་འབྱུང་བས་སྡུག་བསྔལ་ཡང་འབྲིང་པོ་ཡོད་པར་ཐལ། སྡུག་བསྔལ་འབྲིང་ལ་བཏང་སྙོམས་ཀྱི་བློ་སྐྱེ་བར་འདོད་པའི་ཕྱིར། དེས་ན་འདི་དག་འདོད་མི་ནུས་པས་སྡུག་བསྔལ་ཆུང་ངུ་སོགས་ལ་བདེ་སོགས་ཀྱི་ཚོར་བ་རྣམ་པར་བཞག་མི་རུང་ངོ་། །བཅོམ་ལྡན་འདས་ཀྱིས། མིང་ཅན་གལ་ཏེ་གཟུགས་གཅིག་པུ་སྡུག་བསྔལ་བ་ཞིག་ཡིན་ན་ནི། བདེ་བའང་མེད། བདེ་བ་དང་རྗེས་སུ་འབྲེལ་བའང་མེད། ཡིད་བདེ་ཡང་མེད། ཡིད་བདེ་དང་རྗེས་སུ་འབྲེལ་བ་ཡང་མེད་ལ། བདེ་བའི་ཚོར་བའང་(༢༣༠ན)
གཟུགས་ལ་ཀུན་ཏུ་འདོད་ཆགས་པར་མི་འགྱུར་བ་ཞིག་ན་ཞེས་སོགས་གསུངས་པས་བདེ་བ་ནི་ཅུང་ཟད་ཡོད་དེ། དེ་ལྟར་ན། མདོ་ལས་བདེ་བའི་ཚོར་བ་མེད་པར་མི་འགྲུབ་བོ། །གང་ཡང་བདེ་བའི་རྒྱུད་རྣམ་པར་མི་གནས་པའི་ཕྱིར། ཞེས་སྨྲས་པ་དེའང་ཆོས་ཅན། བདེ་བའི་རྒྱུ་ཡོངས་སུ་མ་ཤེས་ནས་སྡུག་བསྔལ་དུ་གྱུར་པས་སྨྲས་པར་ཟད་དེ། ཡུལ་འབའ་ཞིག་ནི་བདེ་བའི་རྒྱུ་མ་ཡིན་པས་རྟེན་གྱི་ཁྱད་པར་ལ་བལྟོས་ནས་ཡུལ་བདེ་བའི་རྒྱུའམ་སྡུག་བསྔལ་གྱི་རྒྱུ་རིག་པའི་ཕྱིར། གྲུབ་ཚུལ་ནི། ཡུལ་ཁ་ཟས་གཅིག་པུ་བདེ་བའི་རྒྱུ་ཡིན་ན་ཆོས་ཅན། དྲག་པོ་ཚད་མེད་དུ་ཟོས་ན་བདེ་བ་ཚད་མེད་དུ་སྐྱེ་བར་ཐལ། ཡུལ་གཅིག་པུ་བདེ་བའི་རྒྱུ་ཡིན་པའི་ཕྱིར། འདོད་མི་ནུས་ཏེ། ལུས་བཀྲེས་པ་ན་ཡུལ་ཁ་ཟས་ཀྱིས་བདེ་བའི་རྒྱུ་བྱེད་ཀྱི། གཞན་དུ་སྡུག་བསྔལ་གྱི་རྒྱུ་བྱེད་པའི་ཕྱིར། ཡང་བཀྲེས་པའི་ལུས་སྐབས་དང་འཕྲད་ན་བདེ་བའི་རྒྱུ་ཡིན་པའི་ཁ་ཟས་ཆོས་ཅན། བདེ་བའི་རྒྱུར་གནས་པ་ཁོ་ན་ཡིན་ཏེ། བཀྲེས་སྐབས་དང་འཕྲད་ནས་སྡུག་བསྔལ་སྐྱེ་བའི་རྒྱུ་མ་ཡིན་པ་ནི། བཀྲེས་སྐབས་ནམ་དུའང་སྡུག་བསྔལ་གྱི་རྒྱུ་མ་ཡིན་པའི་ཕྱིར། དཔེར་ན། མ་ཚོས་པ་བཙོ་བར་བྱ་བའི་འབྱུང་བའི་ཁྱད་པར་འབྲས་ཀྱི་ཚོགས་ཤས་ཀྱིས་ཚོས་པ་ལ་ནི་མེ་དེ་ཉིད་ཞིམ་པར་ཚོས་པའི་རྒྱུ་ཡང་ཡིན་ཅིང་། ཚོས་ཟིན་པ་དེ་ཉིད་བཙོས་པས་ཚིག་ནས་མི་ཞིམ་པར་ཚོས་པའི་རྒྱུ་ཡང་ཡིན་ལ། བཙོ་བྱའི་འབྱུང་བའི་གནས་སྐབས་གང་དང་འཕྲད་ནས་ཞིམ་པར་ཚོས་པའི་རྒྱུ་ཡིན་པར་གྱུར་བ་དེ་དང་འཕྲད་ན་ཕྱིས་ཚོས་པའི་རྒྱུ་མ་ཡིན་པ་མ་ཡིན་པ་བཞིན་ནོ། །བསམ་གཏན་དག་ནའང་བདེ་བའི་རྒྱུ་མི་གནས་པ་མི་འཐད་དེ། བསམ་གཏན་དང་པོ་ནས་གསུམ་པའི་བར་བདེ་བའི་རྒྱུ་སྙོམས་འཇུག་ཇི་ལྟར་རྒྱས་བཞིན་བདེ་བ་རྒྱས་རིགས་པའི་ཕྱིར། གང་ཡང་གཉེན་པོ་ལས་བདེ་བའི་བློ་སྐྱེས་(༢༣༠བ)
ཞེས་སྨྲས་པ་དེའང་ཆོས་ཅན། འཐད་པར་མ་མཐོང་སྟེ། སྔར་དྲི་ང་བ་དང་རོ་མི་ཞིམ་པས་གདུངས་པའི་དྲི་ཞིམ་སོགས་མྱོང་བ་ལ་ལྟ་གཉེན་པོས་བདེ་བའི་བློ་སྐྱེ་རུང་ལ། སྔར་དྲི་རོ་མ་མྱོང་བས་གདུངས་པ་མེད་པའི་དྲི་རོ་ཞིམ་པོ་མྱོང་བ་ནི་གང་གི་གཉེན་པོའང་མི་རིགས་པའི་ཕྱིར། དེས་ན་སྡུག་བསྔལ་སྔ་མ་དེ་མ་སྐྱེས་པ་དང་འགག་ན་བདེ་བློ་ཤིན་ཏུ་ཆེས་སྐྱེ་བར་འགྱུར་ཏེ། སྡུག་བསྔལ་ཆུང་ངུ་ལའང་བདེ་བའི་བློ་སྐྱེ་བའི་ཕྱིར། གཉེན་པོ་ལས་བདེ་བའི་བློ་སྐྱེ་བ་ཡིན་ན་ཆོས་ཅན། བསམ་གཏན་ལས་སྐྱེས་པའི་བདེ་བ་དེ་གཉེན་པོ་ལས་སྐྱེས་པའི་བདེ་བའི་བློ་དེ་མ་ཡིན་པར་ཐལ། བསམ་གཏན་དག་ན་སྡུག་བསྔལ་མེད་པའི་ཕྱིར། ལ་སོགས་པས་སྡུག་བསྔལ་ལས་གཉེན་པོ་ལས་བདེ་བའི་བློ་སྐྱེ་བ་ཡིན་ན། མིང་ཅན་གལ་ཏེ་གཟུགས་གཅིག་ཏུ་སྡུག་བསྔལ་བ་ཞིག་ཡིན་པར་གྱུར་ན་ནི་ཞེས་སོགས་ཀྱི་ལུང་གིས་མི་འཐད་པར་བཤད་ཟིན་ཏོ། ཁུར་སྤོད་པ་ལའང་ཇི་སྲིད་དུ་ལུས་ཀྱི་གནས་སྐབས་བདེ་བ་སྐྱེ་བ་དང་མཐུན་པར་དཔུང་གཡོན་ལ་ཁྲག་མ་བབ་པ་མེད་པར་མ་གྱུར་གྱི་བར་དུ་བདེ་བའི་ཚོར་བ་ཁོ་ན་སྐྱེ་བར་འགྱུར་བ་ཡིན་གྱི། དེ་སྡུག་བསྔལ་གྱི་ཚོར་བ་ལ་བདེ་བ་ཉིད་དུ་བརྟགས་པ་ནི་མ་ཡིན་ནོ། །ལུས་ཀྱི་གནས་སྐབས་དེ་ལྟ་བུ་དེ་མེད་པར་མ་གྱུར་གྱི་བར་དུ་གནས་སྐབས་གཞན་ལས་སྐྱེས་པའི་བདེ་བ་ཁོ་ན་སྐྱེ་བར་མི་འགྱུར་ན་ནི་ཆོས་ཅན། སྤོས་ནས་ཅུང་ཞིག་ལོན་པ་ན་ཕྱིས་བདེ་བའི་བློ་ཇེ་མང་དུ་འཕེལ་བར་ཐལ། དེ་སྡུག་བསྔལ་གྱི་བྱེ་བྲག་ལ་བདེ་བའི་བློ་སྐྱེ་བ་གང་ཞིགསྤོས་པའི་དུས་དེ་རང་དུ་ནི་བདེ་བ་དེ་མི་སྐྱེ་བའི་ཕྱིར། ངལ་བའི་སྤྱོད་ལམ་གྱི་གནས་སྐབས་ལ་ཡང་ངལ་བསོ་བ་ན་བདེ་བའི་ཚོར་བ་ཁོ་ན་སྐྱེ་བ་ཡིན་ཏེ། སྡུག་བསྔལ་གྱི་ཚོར་བ་ལ་བདེ་བར་བརྟགས་པ་ནི་མ་ཡིན་པར་རིགས་པའི་ཕྱིར་རོ། །གལ་ཏེ་(༢༣༡ན)
དང་པོ་ནས་སྡུག་བསྔལ་དེའི་རྩོམ་གཞིར་མེད་ན་ཟས་སྐོམ་གྱི་མཇུག་ཏུ་སྡུག་བསྔལ་གྱི་བློར་ག་ལ་འགྱུར་ཞེ་ན། སྐོམ་ལ་སོགས་པ་ཧ་ཅང་བསྟེན་པ་གང་གིས་ན་བདེ་བ་སྐྱེ་བའི་གནས་སྐབས་ན་སྡུག་བསྔལ་མི་སྐྱེའི། མཇུག་ཏུ་ནི་སྐྱེ་བར་འགྱུར་བ་དེ་ལྟ་བུ་ལུས་ཀྱི་བདེ་བ་ཡོངས་སུ་འགྱུར་པས་སྡུག་བསྔལ་ཕྱིས་འབྱུང་བར་འགྱུར་ཏེ། དཔེར་ན། ཆང་དང་འོ་མ་སོགས་མངར་བའི་གནས་སྐབས་ཡིན་པ་ལ་མཇུག་ཏུ་མངར་བ་མེད་པ་ལ་སྐྱུར་བ་སྟེ་སྐྱུར་བ་ཉིད་འབྱུང་བར་གྱུར་པ་གང་ཡིན་པ་དེ་དང་འདྲ་བའི་ཡོངས་སུ་འགྱུར་བའི་ཁྱད་པར་ཕྱིས་སྐྱེ་བར་འགྱུར་བ་ལྟ་བུའོ། །དེས་ན་བདེ་བའི་ཚོར་བ་ཡོད་པ་ཁོ་ནར་གྲུབ་ལ། སྡུག་བསྔལ་ཉིད་གསུམ་དང་ལྡན་པས་ཟག་བཅས་ཐམས་ཅད་སྡུག་བསྔལ་ལོ་ཞེས་གྲུབ་བོ། །ཀུན་འབྱུང་གི་བདེན་པ་གང་ཡིན་པ་དེ་ཉིད་སྡུག་བསྔལ་གྱི་བདེན་པ་ཡིན་ནོ་ཞེས་བྱ་བ་ནི་མདོ་དང་མི་མཐུན་པར་ཐལ་བ་ཡིན་ཏེ། མདོ་ལས། ཀུན་འབྱུང་གི་བདེན་པ་གང་ཞེ་ན། གང་འདི་དགེ་བ་འདོད་ཆགས་དང་ལྷན་ཅིག་པའི་སྲེད་པ་སྟེ། དེ་དང་དེ་ལ་མངོན་པར་དགའ་བ་ཅན་ཡིན་ནོ། །ཞེས་འབྱུང་བས་སྲེད་པ་ཁོ་ན་ལ་བཤད་པའི་ཕྱིར་ཞེ་ན། བྱེ་སྨྲས། སྲེད་པ་ནི་ཀུན་འབྱུང་གི་གཙོ་བོ་ཡིན་པར་མདོ་ལས་བཤད་ཀྱི། མདོ་གཞན་ལས་ལས་དང་མ་རིག་པ་ཡང་ཀུན་འབྱུང་ཡིན་པར་གསུངས་ཏེ། བཅོམ་ལྡན་འདས་ཀྱིས། ལས་དང་སྲེད་པ་དག་ནི་མ་རིག་པ། །ཕྱི་མའི་ཚེ་ལ་འདུ་བྱེད་རྣམས་ཀྱི་རྒྱུ། །ཞེས་གསུངས་ལ། མདོ་གཞན་ལས་དགེ་སློང་དག་ས་བོན་གྱི་རྣམ་པ་ལྔ་མ་གྲུགས། མ་སྨས་མ་རུལ་ལ་རླུང་དང་ཉི་མས་མ་ཉམས་ཤིང་གྲུང་པོ་ལེགས་པར་གནས་ལ། སའི་ཁམས་དང་ཆུའི་ཁམས་ཀྱང་ཡོད་ན། དེ་ལྟར་ན་ས་བོན་དེ་དག་འཕེལ་ཞིང་མཆེད་པར་འགྱུར་རོ། །དཔེ་དེ་(༢༣༡བ)
བཞིན་ཡང་དགེ་སློང་དག་ས་བོན་གྱི་རིམ་པ་ལྔ་ཞེས་བྱ་བ་འདི་ནི་ཉེ་བར་ལེན་པ་དང་བཅས་པའི་རྣམ་པར་ཤེས་པ་དང་བཅས་པའི་ཚིག་བླ་དྭགས་ཡིན་ནོ། །སའི་ཁམས་ཞེས་བྱ་བ་འདི་ནི་རྣམ་པར་ཤེས་པ་གནས་པ་བཞིའི་ཚིག་གི་བླ་དྭགས་ཡིན་ནོ་ཞེས་གསུངས་པས་ས་བོན་ནི་རྒྱུ་ཡིན་ནོ། །རྒྱུ་གང་ཡིན་པ་དེ་ནི་ཀུན་འབྱུང་བ་ཡིན་ནོ། །རྣམ་པར་ཤེས་པ་གནས་པ་ལ་ཡང་རྟེན་གྱི་རྒྱུ་ཡིན་པའི་ཕྱིར་རོ། །དེས་ན་མདོ་ལས་བསྟན་པ་ནི་དགོངས་པ་ཅན་ཡིན་ཏེ། ལས་ལ་སོགས་པ་ཡང་རྒྱུ་ཡིན་པ་ཉིད་དུ་གསུངས་པས་ཀུན་འབྱུང་བའི་བདེན་པ་ཉིད་དུ་འགྲུབ་པའི་ཕྱིར། ཆོས་མངོན་པ་ལས་ཟག་བཅས་ཀྱི་ཕུང་པོ་ལྔ་ཅར་ཀུན་འབྱུང་བདེན་པར་བསྟན་པ་ནི། ཀུན་འབྱུང་གི་མཚན་ཉིད་དང་ལྡན་པའི་ཕྱིར། ཡང་མངོན་པར་གྲུབ་པའི་རྒྱུ་བཀའ་སྩལ་བ་ན་ནི། མདོ་ལས་ཀུན་འབྱུང་གི་བདེན་པ་སྲེད་པ་ཁོ་ན་ཡིན་པར་གསུངས་ལ། སྐྱེ་བ་དང་མངོན་པར་འགྲུབ་པའི་རྒྱུ་རྒྱུ་དང་བཅས་པར་བཀའ་སྩལ་ན་ནི། ལས་དང་སྲེད་པ་དང་མ་རིག་པའི་བར་ཡིན་པར་གསུངས་ཏེ། སྐྱེ་བའི་རྒྱུ་ནི་ལས་ཡིན་ནོ། །མངོན་པར་འགྲུབ་པའི་རྒྱུ་ནི་སྲིད་པ་དག་ལ་སྲེད་པ་ཡིན་ནོ། །ལས་དང་སྲེད་པ་གཉིས་ཀྱི་རྒྱུ་ནི་མ་རིག་པ་ཡིན་ནོ། །དེ་ཅིས་ཤེས་ན་མདོ་གཞན་ལས། ལས་ནི་སྐྱེ་བའི་རྒྱུ་ཡིན་ལ། སྲེད་པ་ནི་མངོན་པར་འགྲུབ་པའི་རྒྱུ་ཡིན་ནོ་ཞེས་འབྱུང་བས་སོ། །ཡང་ན་མདོ་ལས་རྒྱུ་དང་བཅས་རྐྱེན་དང་བཅས་གཞི་དང་བཅས་ཞེས་རིམ་པར་བསྟན་པས་ནི་མིག་སོགས་འདུ་བྱེད་ཀྱི་རྒྱུ་རྐྱེན་གཞི་གསུམ་ནི་ལས་ཡིན་ལ། ལས་ཀྱི་རྒྱུ་རྐྱེན་གཞི་གསུམ་ནི་སྲེད་པ་དང་། སྲེད་པའི་རྒྱུ་རྐྱེན་གཞི་གསུམ་ནི་མ་རིག་པ་དང་། མ་རིག་པའི་རྒྱུ་རྐྱེན་གཞི་གསུམ་ཚུལ་མིན་ཡིད་བྱེད་དོ། །རྣམ་ཤེས་སོགས་ཟག་བཅས་ཀྱི་ཕུང་པོ་ལྔ་ཀ་ཡང་ཀུན་འབྱུང་དུ་གསུངས་ཀྱི། སྲེད་པ་འབའ་ཞིག་ཏུ་མ་ཟད་པས་མདོ་ལས་(༢༣༢ན)
བསྟན་པ་དགོངས་པ་ཅན་ཡིན་ཏེ། ས་བོན་དང་ཞིང་གི་དངོས་པོར་རྣམ་ཤེས་དང་གཞན་ཕུང་པོ་བཞི་སྟོན་པར་མཛད་པའི་ཕྱིར། སྐྱེ་བ་དང་མངོན་པར་འགྲུབ་པ་གང་ཡིན་ཅེ་ན། ཁམས་དང་འགྲོ་བ་དང་སྐྱེ་གནས་སོགས་པས་རིགས་དང་ཕོ་མོ་སོགས་ཀྱི་བྱེ་བྲག་གིས་ལུས་སྐྱེ་བ་ནི་སྐྱེ་བ་ཡིན་ལ། ཁམས་སོགས་བྱེ་བྲག་མེད་པར་ཡང་སྲིད་དུ་ཉིད་མཚམས་སྦྱོར་བ་ནི་མངོན་པར་འགྲུབ་པ་ཡིན་ནོ། །འདི་གཉིས་ཀྱི་རྒྱུ་ནི་རིམ་བཞིན་ལས་དང་སྲེད་པ་ཡིན་ཏེ། ས་བོན་ནི་ས་ལུ་དང་ནས་སོགས་རིགས་ཀྱི་བྱེ་བྲག་གིས་མྱུ་གུ་སྐྱེ་བའི་རྒྱུ་ཡིན་ལ། ཆུ་ནི་བྱེ་བྲག་མེད་པར་མྱུ་གུ་ཐམས་ཅད་སྐྱེ་བ་ཙམ་གྱི་རྒྱུ་ཡིན་པ་བཞིན་ནོ། །མངོན་པར་འགྲུབ་པའི་རྒྱུ་སྲེད་པ་ཡིན་ནོ། །ཞེས་པ་འདི་ལ་རིགས་པ་ཅི་ཡོད་ཅེ་ན། སྲེད་པ་ཆོས་ཅན། སྲིད་པ་མངོན་པར་འགྲུབ་བྱེད་ཡིན་ཏེ། སྲེད་བཅས་དང་སྲེད་བྲལ་གཉིས་ཀའང་འཆི་བ་ལས་སྲེད་བཅས་ཁོ་ན་སྐྱེ་བར་སྣང་གི། སྲེད་བྲལ་ནི་སྐྱེ་བ་མེད་པའི་ཕྱིར་རོ། །སྲེད་པ་ནི་མངོན་པར་འགྲུབ་བྱེད་ཡིན་ཏེ། རྒྱུད་གཞོལ་བའི་ཕྱིར། གྲུབ་སྟེ། གཟུགས་སོགས་ཡུལ་གང་ལ་སྲེད་པ་དང་བཅས་པ་དེར་སེམས་ཀྱི་རྒྱུད་ཡང་ཡང་དུ་གཞོལ་བར་མཐོང་བས་དེས་ན་ཡང་སྲིད་ལའང་སེམས་རྒྱུད་ཡང་ཡང་དུ་གཞལ་བར་འདྲ་བའི་ཕྱིར། དཔེར་ན། ཡུལ་དོན་དུ་གཉེར་བ་མེད་ན་ཡུལ་གཞན་དུ་མི་ཕྱིན་པ་བཞིན་ནོ། །འདག་ཆལ་སྲན་ཆུང་གི་ཕྱེ་མའི་འདག་གུ་སྐམ་པ་དེས་བཟུང་བ་བཞིན་དུ་ཇི་ལྟར་སྲེད་པས་ལུས་ཀུན་ཏུ་བཟུང་བ་བཞིན་དུ་ནི་རྒྱུ་གཞན་གང་གིས་ཀྱང་ལུས་ཀུན་ཏུ་མ་བཟུང་སྟེ། སྲེད་པའི་གཞན་དབང་གིས་ལུས་བཟུང་བ་བཞིན་རྒྱུ་གཞན་གྱིས་ཇི་ལྟར་བདག་ལ་ཆགས་པ་དེ་ལྟར་རྗེས་སུ་འབྲེལ་བ་མ་ཡིན་པའི་ཕྱིར། མངོན་པར་འགྲུབ་པའི་རྒྱུ་སྲེད་པ་ཡིན་པའི་རིགས་པ་ཡིན་ནོ། །སྨྲས་པ། ཡིད་ནི་རྟག་ཏུ་བྱང་ཆུབ་ཆེན་པོ་(༢༣༢བ)
ལ། །མངོན་པར་ཕྱོགས་པའི་རྣམ་དཀར་བགྱི་བ་ཀུན། །མཁའ་མཉམ་འགྲོ་བའི་གསོ་སྨན་རྨད་གྱུར་པ། །དམ་ཆོས་བདུད་རྩི་མཆོག་ལས་གཞན་ཡོད་མིན། །ཅེས་སོ། །གཉིས་པ་བདེན་གཉིས་བཤད་པ་ནི། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །འདིར་བཅོམ་ལྡན་འདས་ཀྱིས་བདེན་པ་བཞི་དང་བདེན་པ་གཉིས་ཀྱི་མཚན་ཉིད་གསུངས་པ་ཇི་ཞེ་ན། བྱེ་བྲག་སྨྲ་བས། འགོག་བདེན་དོན་དམ་པའི་བདེན་པར་འདོད། བདེན་པ་གསུམ་ལ་རྒྱུན་དང་འདུས་པའི་བདག་ཉིད་ཀུན་རྫོབ་ཀྱི་བདེན་པར་འདོད། རྫས་དང་སྐྱེ་མཆེད་ཀྱི་རྡུལ་ཕྲ་རབ་རྒྱུན་ཅན་ནི་དོན་དམ་པའི་བདེན་པར་འདོད། དེ་ཡང་རྫས་ཀྱི་རྡུལ་ཕྲ་རབ་རྟག་པ་དང་། སྒྲིབ་ཐོགས་སོགས་ཀྱི་བྱ་བ་མི་བྱེད་པ་དང་། དོན་དམ་པར་ཡོད་པའི་ཕྱིར་དོན་དམ་པའི་བདེན་པ་ལས་མ་འདས་སོ། །འདི་ལ་ནི་རྡུལ་རྫས་བརྒྱད་ཚང་བར་འདོད་པ་ནི་མ་ངེས་ཏེ། དབང་པོའི་ཡུལ་ལས་འདས་པའི་ཕྱིར་དང་། སྒྲིབ་ཐོགས་ཀྱི་བྱ་བ་མི་བྱེད་པའི་ཕྱིར། དེས་བརྩམས་པའི་རྡུལ་རྫས་བརྒྱད་པོ་སྐྱེ་མཆེད་ཀྱི་རྡུལ་ཕྲ་རབ་ནི་སྒྲིབ་ཐོགས་ཀྱི་བྱ་བའང་བྱེད་ལ། མི་རྟག་པར་ཡང་འདོད་ཅིང་། དེ་ལྟར་ནའང་དེ་བཅོས་པའམ་གཞིག་པ་ན་དེ་བློ་མི་འདོར་བས་དོན་དམ་བདེན་པ་ལས་མ་འདས་སོ། །སྐྱེ་མཆེད་ཀྱི་རྡུལ་རྫས་བརྒྱད་པོ་དེའང་སྣོད་ཀྱི་འཇིག་རྟེན་ཞིག་པའི་ཚེ་སོ་སོར་གྱེས་པའི་སྒོ་ནས་འདུས་པ་འཇིག་པར་འདོད་ཀྱང་། རྫས་ཕྲ་རབ་རང་གི་ངོ་བོ་འཇིག་པར་མི་འདོད་པས། དེར་འཛིན་གྱི་བློ་ནི་འདོར་བར་ག་ལ་འགྱུར། སྐྱེ་མཆེད་ཀྱི་རྡུལ་རྫས་བརྒྱད་པོ་སོ་སོར་གྱེས་པའི་ཚེའང་ལས་ཀྱི་ནུས་པ་ཟད་པས་སོ་སོར་གྱེས་པ་ཡིན་གྱི། འཇིག་རྒྱུ་གཞན་གྱིས་བཅོམ་པས་ནི་མ་ཡིན་ནོ། །དེ་ལྟར་བཤད་པ་བྱེ་སྨྲས་བདེན་པ་བཞི་བདེན་པ་གཉིས་སུ་བསྡུ་ཚུལ་ལོ། །མདོ་སྡེ་པས་ནི། བདེན་པ་བཞི་ཀའི་ཕྱོགས་རེ་དོན་དམ་དུ་འདོད་དེ། བདེན་པ་གསུམ་ནི་དོན་བྱེད་ནུས་(༢༣༣ན)
པ་དོན་དམ། འགོག་པའི་བདེན་པ་ནི་མེད་པ་དོན་དམ་དུ་འདོད། བཞི་ཀ་རྣམ་རྟོག་ལ་སྣང་བ་སྤྱི་ཀུན་བཏགས་ཀུན་རྫོབ་ཏུ་འདོད། དེ་ནི་མདོ་སྡེ་པས་བདེན་བཞི་ལ་བདེན་གཉིས་སུ་བསྡུ་ཚུལ་ལོ། །སྐབས་བབ་ཀྱི་དཀྱུས་དོན་འཆད་པ་ནི། རྡུལ་རྫས་བརྒྱད་འདུས་ཀྱི་གོང་བུ་བུམ་པའི་དབྱིབས་གང་ལ་ཆོས་ཅན། ཀུན་རྫོབ་ཏུ་ཡོད་པ་ཡིན་ཏེ། དེའི་མིང་བཏགས་ནས་ཐ་སྙད་དེའི་ངོར་བདེན་པ་ཁོ་ནར་སྨྲས་ཀྱི་རྫུན་པ་ནི་མ་ཡིན་ལ། ཆ་ཤས་སུ་བཅོམ་ན་དེའི་བློ་མི་འཇུག་པའི་ཕྱིར། བུམ་པ་ལ་གྱོ་མོར་བཅོམ་ན་བུམ་པའི་བློ་མི་འཇུག་པ་བཞིན་དུའོ། །རྡུལ་རྫས་བརྒྱད་འདུས་ཀྱི་རྫས་སོ་སོའི་ཁྱད་པར་དུ་མ་ཕྱེས་པའི་ཆུར་རྟོག་པའི་ངོ་བོར་ཡོད་པའི་ཆུ་གང་ལ་ཆོས་ཅན། ཀུན་རྫོབ་ཏུ་ཡོད་པ་ཡིན་ཏེ། ཆ་ཤས་སུ་མ་ཕྱེ་བའི་རྟོག་ཡུལ་དེའི་ངོ་བོར་བདེན་པ་ཁོ་ནར་སྨྲས་ཀྱི་རྫུན་པ་ནི་མ་ཡིན་ལ། དེའི་གཟུགས་སོགས་ཀྱི་ཆོས་གཞན་རེ་རེ་ནས་བསལ་ན་དེའི་བློ་མི་འཇུག་པའི་ཕྱིར། ཆུ་ལ་བློས་གཟུགས་སོགས་ཆོས་གཞན་བསལ་ན་ཚོགས་པའི་ཆུའི་བློ་མི་འཇུག་པ་བཞིན་དུའོ། །དཔེ་གཉིས་བཀོད་པ་ནི། འཇོམས་པ་དང་། བློས་འཇིག་པ་སྟེ་འཇིག་པ་གཉིས་བསྟན་པའི་ཕྱིར་རོ། །ཆུ་སོགས་ནི་བཅོམ་པས་རོ་སོགས་བསལ་བར་མི་འཐད་པས་བློའི་འཇིག་པས་ཟུར་དུ་བཀར་བའོ། །རྣམ་པ་གཅིག་ཏུ་ན་ཀུན་རྫོབ་ནི་རྣམ་པ་གཉིས་ཏེ། གྱོ་མོ་ལྟ་བུ་ཀུན་རྫོབ་གཞན་ལ་བརྟེན་པའི་ཀུན་རྫོབ་དང་། གཟུགས་སོགས་རྫས་གཞན་ལ་བརྟེན་པའི་ཀུན་རྫོབ་ཆུ་ལྟ་བུ་སྟེ། དབྱིབས་ཀྱི་ཀུན་རྫོབ་དང་། ཚོགས་པའི་ཀུན་རྫོབ་ཅེས་ཀྱང་བྱ་ལ། ཀུན་རྫོབ་སྔ་མ་ལ་འཇིག་པ་གཉིས་ཀ་སྲིད་ལ། ཕྱི་མ་ལ་ཐོ་བས་བཅོམ་པ་ལྟ་བུའི་འཇིག་པ་མི་སྲིད་དེ། རྡུལ་རྫས་བརྒྱད་ལ་ཐོ་བས་ཆ་ཤས་སུ་འབྲལ་མི་ནུས་པའི་ཕྱིར། ཐོ་བས་བུམ་པ་བཤིག་པ་མཐར་ཐུག་པ་(༢༣༣བ)
དེ་གྱོ་མོར་སོང་བས་ཇོ་མོ་རང་དེ་ཀུན་རྫོབ་ཡིན་ཙམ་ན་ཀུན་རྫོབ་གཞན་ལ་བརྟེན་པའོ། །བློས་ཆུ་ལ་གཟུགས་དང་དྲི་རོ་སོགས་བསལ་བ་མཐར་ཐུག་པ་དེ་དྲི་རོ་སོ་སོ་ན་གནས་པར་སོང་བས་གཟུགས་སོགས་ཀྱི་རྫས་སོ་སོ་པ་རང་དེ་རྫས་ཡིན་ཙམ་ན་རྫས་གཞན་ལ་བརྟེན་པའོ། །དྲི་རོ་ལ་སོགས་པའི་རྫས་སུ་ཡོད་པ་ཆོས་ཅན། ཀུན་རྫོབ་དེ་ལས་གཞན་དོན་དམ་པར་ཡོད་དེ། གང་ལ་བཅོམ་ཡང་དེའི་བློ་འཇུག་པ་ཁོ་ན་དང་བློས་ཆོས་གཞན་བསལ་ཀྱང་དེའི་བློ་འཇུག་པའི་ཕྱིར་གཟུགས་ལྟ་བུའོ། །གཟུགས་དེ་རྡུལ་ཕྲ་རབ་ཏུ་བཅོམ་ཡང་རུང་། བློས་རོ་སོགས་ཆོས་གཞན་བསལ་ཀྱང་རུང་། གཟུགས་ཀྱི་བློ་མི་འདོར་བ་དེ་བཞིན་ཚོར་བ་དང་འདུ་ཤེས་སེམས་པ་སོགས་ཀྱང་རྫས་ཡོད་དུ་བལྟའོ། །ཐ་སྙད་དུ་ཡོད་པ་དང་རང་གི་མཚན་ཉིད་དུ་ཡོད་པས་ཀུན་རྫོབ་དང་དོན་དམ་དུ་ཡོད་པའོ། །སྔོན་གྱི་སློབ་དཔོན་རྣམས་ན་རེ། འཇིག་རྟེན་ལས་འདས་པའི་ཡེ་ཤེས་དང་། དེའི་རྗེས་ཐོབ་འཇིག་རྟེན་པས་འཛིན་པ་ནི་དོན་དམ་བདེན་པ་ཡིན་ཏེ། དམ་པའི་དོན་དུ་བདེན་པ་ཡིན་པའི་ཕྱིར་འཇིག་རྟེན་པའི་བློ་ཐ་སྙད་པ་ཉོན་མོངས་ཅན་དང་ཉོན་མོངས་ཅན་མིན་པས་འཛིན་པ་ནི་ཀུན་རྫོབ་བདེན་པ་སྟེ། ཐ་སྙད་དེའི་ངོར་བསླུ་བ་མ་ཡིན་པའི་ཕྱིར། ཐེག་ཆེན་པའི་ལུགས་ཀྱི་བློ་མ་འཁྲུལ་བ་དོན་དམ་ཡིན། དེས་གཏན་ལ་ཕབ་པ་དེ་དོན་དམ་ཡིན་ཙམ་ན་ལམ་དང་འགོག་པ་དོན་དམ་པའི་བདེན་པའོ། །འཁྲུལ་པ་ཀུན་རྫོབ་ཡིན་ན་དེས་གཏན་ལ་ཕབ་པ་ཀུན་རྫོབ་ཀྱི་བདེན་པ་ཡིན་པས་སྡུག་ཀུན་ཀུན་རྫོབ་ཀྱི་བདེན་པའོ། །སེམས་ཙམ་པ་ནི་ཀུན་བརྟགས་ཀུན་རྫོབ། གཞན་དབང་དང་ཡོངས་གྲུབ་དོན་དམ་དུ་འདོད་ཙམ་ན་བདེན་པ་བཞི་ཡང་ངོ་བོ་ཉིད་གསུམ་དུ་འདུའོ། །དབུ་མ་པ་ནི་འགོག་པ་དོན་དམ། ལྷག་མ་གསུམ་ཀུན་རྫོབ་ཟེར་རོ། །དེ་(༢༣༤ན)
ལ་ཡུལ་ཅན་ལམ་རིགས་ཤེས་དེས་གཏན་ལ་ཕབ་པ་སྤྲོས་བྲལ་ཏེ་ཡུལ་ལོ། །བྱེ་མདོ་ཐུན་མོང་ཙམ་དུ་སྡེ་པའི་ལུགས་འདི་ལ་དངོས་པོ་ཙམ་ཡིན་ན་རང་གི་མཚན་ཉིད་དུ་གྲུབ་པའི་དོན་དམ་ཡིན་མ་དགོས་ཏེ། གང་ཟག་དང་རྒྱུན་དོན་བྱེད་ནུས་ཀྱང་ཀུན་རྫོབ་བདེན་པ་ཡིན་པ་དང་། ལྡན་མིན་འདུ་བྱེད་ཕལ་ཆེར་ཡང་དོན་བྱེད་ནུས་ལ་རྫས་སུའང་ཡོད་པ་མིན་པས་ཀུན་རྫོབ་ཏུ་འཇོག་པ་མཐོང་བའི་ཕྱིར། ལྷག་པར་མདོ་སྡེ་པས་འབྱུང་འགྱུར་ལ་དོན་དམ་བདེན་པའི་མཚན་ཉིད་ཞུགས་པར་མི་འདོད་དེ། འབྱུང་བཞིའི་ཆ་ལ་གཟུགས་སོགས་སུ་བཏགས་པ་ཙམ་གྱིས་ཡོད་པར་འདོད་པའི་ཕྱིར་ཏེ། འབྱུང་བཞིའི་རྡུལ་སོ་སོར་གྱེས་པའི་ཚེ་གཟུགས་སོགས་ཀྱི་རྡུལ་སོགས་ཤུལ་ན་ལུས་པ་མེད་པའི་ཕྱིར། ཡང་བོད་ཁ་ཅིག་བྱེ་སྨྲས་རྫས་ཡོད་དང་ཀུན་རྫོབ་བདེན་པའི་གཞི་མཐུན་ཁས་ལེན་དགོས་ཏེ། གང་ཟག་ཙམ་རང་ལུགས་ལ་ཡོད་པ་དང་ལྡན་མིན་འདུ་བྱེད་དུ་གྱུར་པའི་རྒྱུན་སོགས་རྫས་སུ་ཡོད་པའི་ཕྱིར་ཞེ་ན། གང་ཟག་ཙམ་རང་ལུགས་སུ་ཡོད་པ་ནི་རྫས་སུ་མ་ཡིན་ཏེ། བཏགས་པ་ཙམ་དུ་ཡོད་པའི་ཕྱིར། ལྡན་མིན་འདུ་བྱེད་ཀྱི་རྒྱུན་དུ་བརྗོད་པའི་གནས་པའི་ཆོས་དེ་རྫས་སུ་ཡོད་ཀྱང་གང་ལ་གནས་པའི་གཞི་སོ་སོ་བ་དེའི་རྒྱུན་རྫས་སུ་མ་གྲུབ་པ་དང་ལྡན་མིན་འདུ་བྱེད་ཀྱི་གནས་པའི་རྫས་ཉིད་ཀྱིས་གནས་པའི་རྒྱུན་ཡང་རྫས་སུ་མ་གྲུབ་པའི་ཕྱིར། བྱེ་སྨྲའི་ལུགས་ལ་རྫས་ཡོད་དང་ཀུན་རྫོབ་བདེན་པའི་གཞི་མཐུན་གྱི་འཇོག་མཚམས་ཀྱང་རྙེད་པར་དཀའོ། །དེས་ན་དེང་སང་གངས་ཅན་གྱི་ལྗོངས་འདི་ན་མདོ་སྡེ་པས། དངོས་པོ་ལ་དོན་དམ་བདེན་པས་ཁྱབ་པ་དང་། དངོས་པོ་ལ་རང་མཚན་དང་རྫས་ཡོད་ཀྱིས་ཁྱབ་པར་འདོད་པ་ནི་བཏང་སྙོམས་སུ་བྱས་ནས་བསྟན་བཅོས་ཆེན་པོའི་ལུགས་ཇི་ལྟ་བར་བཤད་(༢༣༤བ)
པའོ། །བཞི་པ་ལམ་གྱི་སྐྱེ་ཚུལ་ལ། འཇུག་ཚུལ་མདོར་བསྟན་པ་དང་། སྒོམ་ཚུལ་རྒྱས་པར་བཤད་པའོ། །དང་པོ་ལ། དངོས་དང་། འཇུག་བྱེད་ཤེས་རབ་གསུམ་གྱི་ངོ་བོའོ། །དང་པོ་ནི། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །བདེན་པ་མཐོང་བར་འདོད་པའི་དང་པོ་ཁོ་ནར་ཚུལ་ཁྲིམས་ལ་གནས་ཤིང་སྲུང་བར་བྱེད་དགོས་ཏེ། དེས་ནི་འདུ་འཛི་མེད་པའི་རྒྱུ་དང་། རྣམ་པར་མི་གཡེང་བའི་རྒྱུ་དང་། ཆོ་ག་ཕུན་སུམ་ཚོགས་པའི་རྒྱུ་ཡིན་པའི་ཕྱིར་དེའི་འོག་ཏུ་བདེན་པ་མཐོང་བ་ལ་ཕན་པའི་ཐོས་པ་འཛིན་ཅིང་འདོན་པར་བྱེད་ལ། དོན་མཉན་པའི་སྒོ་ནས་ཤེས་པར་བྱེད་དེ། རྨོངས་པ་སེལ་བར་བྱེད་པའི་རྒྱུ་ཡིན་ནོ། །ཐོས་ནས་ཕྱིན་ཅི་མ་ལོག་པར་བསམ་པ་དང་ལྡན་པས་ནི་གཏན་ལ་འབེབས་པའི་རྒྱུ་ཡིན་ཏེ། ཐོས་པའི་དུས་ཀར་རྗེས་དཔག་བསམ་བྱུང་སྐྱེ་བའང་སྲིད་པས་ཐོས་བྱུང་དང་བསམ་བྱུང་རེས་འཇོག་གི་གདིང་མེད། བསམ་བྱུང་ལ་ཐོས་བྱུང་གཅིག་དགོས་པ་ཡིན་ནོ། །དེ་དག་སྔོན་དུ་སོང་བས་ཏིང་ངེ་འཛིན་སྒོམ་པ་ལ་ནི་རབ་ཏུ་སྦྱོར་བ་ནི་འབྲལ་བའི་རྒྱུ་བྱེད་དེ། ཉོན་མོངས་འཇོམས་པའི་སྒོམ་བྱུང་ལ་ཅིས་ཀྱང་བསམ་བྱུང་ཞིག་དགོས། སོ་སོར་རྟོག་པའི་ཤེས་རབ་ཀྱིས་གཏན་ལ་ཕབ་པ་མེད་པའི་ཅི་རུང་སྒོམ་པའམ། ཏིང་ངེ་འཛིན་དུ་བྱེད་པས་ཉོན་མོངས་མི་སྤོང་ངོ་། །གཉིས་པ་ནི། ཐོས་སོགས་ལས་བྱུང་བློ་རྣམས་ནི། །མིང་དང་གཉིས་ཀ་དོན་ཡུལ་ཅན། །བྱེ་སྨྲ་ན་རེ། ཐོས་བྱུང་གི་ཤེས་རབ་ནི་མིང་ལ་དམིགས་པ་ཡིན་ལ་སོགས་པས་བསམ་པ་ལས་བྱུང་བ་ནི་མིང་དོན་གཉིས་ཀ་ལ་དམིགས་པ་སྟེ། རེས་མིང་འདི་ཡི་དོན་འདི་ཡིན་ཅེས་ཡི་གེས་དོན་འདྲེན་པར་བྱེད་ལ། རེས་ནི་བརྗོད་བྱའི་དོན་གྱིས་ཡི་གེ་འདྲེན་པར་བྱེད་དེ། མདོ་ལས་ཀྱང་། དོན་བཟང་པོ་ཡི་གེ་བཟང་པོ། ཞེས་འབྱུང་བའི་ཕྱིར། སྒོམ་པ་ལས་བྱུང་བའི་བློ་རྣམས་ནི་ཡི་གེ་ལ་མི་བལྟོས་པར་དོན་ལ་འཇུག་པའི་ཡུལ་ཅན་ཏེ། ཤེས་རབ་གསུམ་པོ་མིང་ལ་བལྟོས་པ་དང་། རེས་བལྟོས་པ་དང་(༢༣༥ན)
མི་རེས་མི་བལྟོས་པ་དང་། གཏན་མི་བལྟོས་པའི་དཔེ་སྟོང་རྐྱལ་ལེགས་པར་མ་ལོབས་པ་ཆུའི་ནང་དུ་འཇུག་པར་བྱ་བ་མི་གཏོང་བ་དང་། ཅུང་ཟད་ལོབས་པ་རེས་གཏོང་རེས་འཇུ་བ་དང་། ལེགས་པར་ལོབས་པ་འཇུ་བྱ་ལ་མ་བལྟོས་པར་བརྒལ་བར་བྱ་བ་ལྟ་བུའོ་ཞེས་ཟེར་རོ་ཞེས་གྲག་གོ། །གཞན་ན་རེ། བསམ་བྱུང་གི་ཤེས་རབ་ནི་ཤེས་རབ་སྔ་ཕྱི་གཉིས་ལས་ཟུར་དུ་བཞག་པར་བྱ་བ་མིན་ཏེ། དེའི་མིང་ལ་དམིགས་པ་ཐོས་བྱུང་། དོན་ལ་དམིགས་པ་སྒོམ་བྱུང་ཡིན་པའི་ཕྱིར། ཐོས་བྱུང་གི་ཤེས་རབ་དེའང་ཉེས་ཟད་ཀྱི་ལུང་ཚད་མ་ཉིད་ལས་སྐྱེས་པའི་ངེས་པའི་ཤེས་རབ་དང་། ལུང་དོན་རིགས་པས་དཔྱད་པ་ལས་སྐྱེས་པ་ནི་བསམ་པ་ལས་བྱུང་བའི་ཤེས་རབ་དང་། ཏིང་ངེ་འཛིན་ལས་སྐྱེ་བའི་ཤེས་རབ་ནི་སྒོམ་པ་ལས་བྱུང་བ་ཡིན་པས་མཚན་ཉིད་ཁ་ན་མ་ཐོ་བ་མེད་པའོ་ཞེས་གསུངས་སོ། །གཉིས་པ་སྒོམ་ཚུལ་རྒྱས་པར་བཤད་པ་ལ། རྟེན་སྒོམ་པ་པོའི་ཁྱད་པར། སྒོམ་བྱ་ལམ་གྱི་རིམ་པའོ། །དང་པོ་ལ། ལམ་རྫོགས་པར་འགྱུར་བའི་རྟེན་དང་། རྫོགས་པར་མི་འགྱུར་བའི་རྟེན། དེ་ལས་འཕྲོས་པ་འཕགས་པའི་རིགས་བཤད་པའོ། །དང་པོ་ནི། བསྲིང་གཉིས་ལྡན། ཟླ་མེད་པར་གཅིག་པུར་གནས་པས་ལུས་ཀྱིས་འདུ་འཛི་ཐག་བསྲིངས་པ་དང་། སེམས་ཀྱི་དྲན་པ་ལེགས་པར་གནས་པས་མི་དགེ་བའི་རྣམ་རྟོག་དང་འདོད་པ་ལ་འདུན་པ་དང་གནོད་སེམས་དང་རྣམ་འཚེའི་རྣམ་རྟོག་ལ་མི་ཕྱོགས་པའི་ཕྱིར་ཐག་བསྲིངས་ཏེ་བསྲིངས་པ་གཉིས་དང་ལྡན་ན་སྒོམ་པ་ཡོངས་སུ་རྫོགས་པར་འགྱུར་རོ། །གཉིས་པ་ལ། སྤང་བྱ་དང་། གཉེན་པོ་གཉིས་ལས། དང་པོ་ནི། ཆོག་མི་ཤེས་དང་། །འདོད་ཆེན་ཅན་ལ་མ་ཡིན་ནོ། །རྙེད་ལ་ཡང་སྲེད་ཆོག་མི་ཤེས། །མ་རྙེད་ལ་འདོད་འདོད་ཆེན་ཅན། །བསྲིངས་པ་དེ་གཉིས་འདོད་ཆུང་དང་ཆོག་ཤེས་ལ་སླའི། ཆོག་མི་ཤེས་པ་དང་འདོད་ཆེན་ཅན་ལ་སླ་བ་མ་ཡིན་ནོ། །ཆོས་མངོན་པ་བ་རྣམས་ན་རེ། ཆོས་གོས་སོགས་(༢༣༥བ)
གྱ་ནོམ་པ་རྙེད་པ་ལ་ཡང་ཡང་དུ་སྲེད་ཅིང་འདོད་པ་ནི་ཆོག་མི་ཤེས་པ་དང་མ་རྙེད་པ་ལ་དེ་འདོད་པ་ནི་འདོད་ཆེན་ཅན་ཡིན་ནོ་ཞེས་གྲག་གོ། །ཡང་ཡང་དུ་འདོད་པ་ལ་ཡང་མ་རྙེད་པ་ཁོ་ན་ལ་ཡིན་གྱི། རྙེད་པ་ལ་མ་ཡིན་པས་འདི་གཉིས་ཀྱི་ཁྱད་པར་ཅི་ཡོད་དེ་བརྗོད་དགོས་སོ། །གྱ་ནོམ་པ་དང་མང་པོ་མ་ཡིན་པ་རྙེད་པས་ཡིད་མི་བདེ་བ་མི་མགུ་བ་མ་རངས་པ་ཆོག་མི་ཤེས་པ་དང་། གྱ་ནོམ་པ་དང་། མང་པོ་མ་རྙེད་པ་ལ་འདོད་པ་ནི་འདོད་ཆེན་ཅན་ཞེས་པ་སློབ་དཔོན་གྱི་ལུགས་སོ། །གཉིས་པ་ནི། བཟློག་པ་དེ་ཡི་གཉེན་པོ་དག །དེ་གཉིས་ཁམས་གསུམ་གཏོགས་དྲི་མེད། །ཆོག་མི་ཤེས་པ་དང་འདོད་ཆེན་ཅན་ལས་བཟློག་པ་དེ་ཡི་གཉེན་པོ་ཆོག་ཤེས་པ་དང་། འདོད་པ་ཆུང་བར་རིག་པར་བྱའོ། །དེའི་གཉེན་པོ་ཆོག་ཤེས་དང་འདོད་ཆུང་གཉིས་ནི་ཁམས་གསུམ་དུ་གཏོགས་པ་གསུམ་དང་ཁམས་གསུམ་མ་གཏོགས་པ་དྲི་མེད་དེ་བཞིའོ། །འདོད་པའི་མ་ཆགས་པ་ནི་སུན་འབྱིན་པ་གཉེན་པོ་ཡིན། གཟུགས་ཀྱི་མ་ཆགས་པ་ནི་སྤོང་བ་གཉེན་པོ་ཡིན། གཟུགས་མེད་པའི་མ་ཆགས་པ་ནི་ཐག་སྲིད་པའི་གཉེན་པོ་ཡིན། ཆོག་མི་ཤེས་པ་དང་འདོད་ཆེན་ཅན་ནི་འདོད་པ་ལ་སྤྱོད་པ་སྟེ། ཆགས་པ་ནི་མི་དགེ་བའི་རྩ་བའི་རང་བཞིན་ཡིན་པའི་ཕྱིར། འདོད་ཆེན་ཆུང་བ་དང་ཆོག་ཤེས་འདི་གཉིས་ཀྱི་རང་བཞིན་ནི་མ་ཆགས་པའི་རང་བཞིན་དག་གོ། །གསུམ་པ་དེ་ལས་འཕྲོས་པ་འཕགས་རིགས་བཤད་པ་ལ། བསྟན། བཤད་གཉིས་ལས། དང་པོ་ནི། མ་ཆགས་འཕགས་རིགས། འདི་དག་ལས་འཕགས་པ་རྣམས་སྐྱེ་བས་ན་འཕགས་པའི་རིགས་བཞི་སྟེ། དེའང་མ་ཆགས་པའི་རང་བཞིན་ཡིན་ནོ། །གཉིས་པ་ནི། དེ་དག་ལས། །གསུམ་ནི་ཆོག་ཤེས་བདག་ཉིད་དོ། །གསུམ་གྱིས་ཚུལ་བསྟན་ཐ་མས་ལས། །སྲེད་པ་སྐྱེ་བའི་གཉེན་པོའི་ཕྱིར། །བདག་གིར་བདག་འཛིན་དངོས་འདོད་པ། །དེ་ཡི་དུས་དང་གཏན་ཞིའི་ཕྱིར། །དེ་དག་ལས་དང་པོ་གསུམ་པོ་ཆོས་གོས་དང་། བསོད་སྙོམས་དང་། མལ་ཆ་དང་སྟན་གྱི་ཆོ་ག་ཤེས་པ་གསུམ་ནི་ཆོག་ཤེས་པའི་བདག་ཉིད་དོ། །འཕགས་རིགས་དྲི་མ་མེད་པ་བཞི་པ་ནི་སྤོང་བ་བྲལ་བ་དང་ལམ་སྒོམ་པ་ལ་དགའ་བ་སྟེ་འདིའང་མ་ཆགས་པའི་རང་བཞིན་ཡིན་ཏེ། (༢༣༦ན)
སྲིད་པ་དང་སྲིད་པའི་འདོད་ཆགས་ལ་རྒྱབ་ཀྱིས་ཕྱོགས་པའི་ཕྱིར། ཆོས་ཀྱི་རྗེ་བཅོམ་ལྡན་འདས་ཀྱིས་འཕགས་པའི་རིགས་གསུམ་གྱིས་ནི་ཁྱིམ་པའི་ཕྱོགས་ཀྱིས་བསྡུས་པའི་རང་གི་ཚུལ་འཚོ་བར་བྱེད་པའམ་རྒྱལ་པོ་ལ་བརྟེན་པ་དང་། ཟས་སྐོམ་དང་གོས་སོགས་སྤངས་ཤིང་ལས་ཀྱི་མཐའ་དེའི་ཆེད་ཀྱི་ཞིང་དང་བཟོ་ལ་སོགས་པའི་བྱ་བ་ཡོངས་སུ་སྤངས་ཤིང་ཐར་པ་དོན་དུ་གཉེར་བའི་སློབ་མ་རྣམས་ལ་ཚུལ་བཅས་ཤིང་བསྟན་ལ། ཐ་མ་རིགས་བཞི་པས་ལས་བཅས་ཏེ། ཁྱེད་ཚུལ་འདིས་ལས་འདི་བྱེད་ན་རིང་པོར་མི་ཐོགས་པར་ཐར་པ་ཐོབ་པར་འགྱུར་རོ་ཞེས་གསུངས་སོ། །ཅི་ཡི་ཕྱིར་ཚུལ་དང་ལས་འདི་ལྟ་བུ་བཅས་ཞེ་ན། མདོ་ལས་སྲེད་པ་སྐྱེ་བ་བཞི་གསུངས་ཏེ། དགེ་སློང་སྲེད་པ་སྐྱེ་བར་ཆོས་གོས་ཀྱི་ཕྱིར་དང་། བསོད་སྙོམས་ཀྱི་ཕྱིར་དང་། མལ་ཆ་དང་སྟན་གྱི་ཕྱིར་སྐྱེའོ། །གནས་པ་ན་གནས་སོ། །མངོན་པར་ཞེན་པ་ན་ཞེན་ཏོ། །དགེ་སློང་སྲེད་པ་སྐྱེ་བ་ན་འབྱུང་བ་དང་འཇིག་པ་དེ་ལྟ་བུའི་ཕྱིར་སྐྱེའོ་ཞེས་གསུངས་པ་དེའི་གཉེན་པོའི་ཕྱིར་འཕགས་པའི་རིགས་བཞི་བསྟན་ཏོ། །འབྱུང་བ་དང་འཇིག་པ་ཞེས་པའི་འབྱུང་བའི་རྣམ་པ་ལ་སྲེད་པ་ནི། ཀྱེ་མ་བདག་དབང་པོར་གྱུར་ཀྱང་ཅི་མ་རུང་། འཁོར་ལོས་བསྒྱུར་བར་གྱུར་ཀྱང་ཅི་མ་རུང་སྙམ་པ་དེ་ལྟ་བུ་ལ་སོགས་པའོ། །རྣམ་པར་འཇིག་པ་ལ་སྲེད་པ་ནི་མེད་པར་གྱུར་པ་ལ་སྲེད་པ་སྟེ། ཀྱེ་མ་བདག་ཤི་ཡང་ཅི་མ་རུང་། མེད་ཀྱང་ཅི་མ་རུང་། མ་བྱུང་ཡང་ཅི་མ་རུང་སྙམ་པ་ལ་སོགས་པ་ཡིན་ནོ། །དོན་དེ་ཉིད་རྣམ་གྲངས་ཀྱིས་སྟོན་པ་ཆོས་གོས་ལ་སོགས་གསུམ་ནི་བདག་གིར་འཛིན་པའི་དངོས་པོ་དང་བདག་ཏུ་འཛིན་པའི་དངོས་པོ་ནི་ལུས་ཏེ། དེ་ལ་འདོད་པ་སྲེད་པ་སྟེ། འཕགས་པའི་རིགས་གསུམ་གྱིས་སྲེད་པ་དང་པོ་དེའི་དུས་སུ་ཞི་(༢༣༦བ)
བར་བྱེད་པ་དང་རིགས་བཞི་པས་གཉིས་ཀ་ལ་སྲེད་པ་གཏན་དུ་ཞི་བར་བྱེད་པའི་ཕྱིར་རོ། །གཉིས་པ་སྒོམ་བྱ་ལམ་གྱི་རིམ་པ་ལ། ཞི་གནས་སྒོམ་ཚུལ་དང་། ལྷག་མཐོང་སྒོམ་ཚུལ་ལོ། །དང་པོ་ལ། ཇི་ལྟར་འཇུག་པའི་རིམ་པ་དང་། ཏིང་ངེ་འཛིན་སྒོམ་ཚུལ་དངོས་སོ། །དང་པོ་ནི། དེ་ལ་འཇུག་པ་མི་སྡུག་པ། །དབུགས་རྡུབ་འབྱུང་བ་དྲན་པ་ཡིས། །འདོད་ཆགས་རྣམ་རྟོག་ལྷག་རྣམས་སོ། །དེ་ལྟར་སྣོད་དུ་གྱུར་པ་དེ་སྒོམ་པ་དེ་ལ་འཇུག་པ་མི་སྡུག་པས་འཇུག་པ་དང་། དབུགས་རྔུབ་པ་དང་དབྱུང་བ་དྲན་པ་ཡིས་གོ་རིམ་བཞིན་གཞི་ཆུང་ངུས་མྱུར་དུ་སྐྱེ་བའི་འདོད་ཆགས་དང་། འདོད་ཆགས་སྤྱད་པས་ཤིན་ཏུ་འདོད་ཆགས་ཆེན་པོ་སྟེ་འདོད་ཆགས་ལྷག་པར་སྤྱད་པ་དང་། རྣམ་རྟོག་ལྷག་པར་སྤྱད་པ་རྣམས་ལ་འཇུག་གོ། །ཁ་ཅིག་ན་རེ། དབུགས་རྔུབ་པ་དང་དབྱུང་བ་དྲན་པ་འདི་ནི་རྣམ་རྟོག་གཅོད་བྱེད་ཡིན་པས། རླུང་ལ་ཁ་དོག་དང་དབྱིབས་སྣ་ཚོགས་མེད་པས་དེ་ལ་མི་དམིགས་པའི་ཕྱིར། མི་སྡུག་པ་ནི་ཀེང་རུས་སོགས་ཁ་དོག་དང་དབྱིབས་ཀྱི་བྱེ་བྲག་ལ་དམིགས་ནས་རྣམ་རྟོག་འདྲེན་པར་བྱེད་དོ་ཞེས་ཟེར་རོ། །གཞན་ན་རེ། དབུགས་རྔུབ་དབྱུང་དྲན་པ་འདི་ནི་རྣམ་རྟོག་གཅོད་བྱེད་ཡིན་ཏེ། ཁ་ནང་དུ་བལྟས་པའི་ཕྱིར། མི་སྡུག་པ་ནི་ཁ་ཕྱིར་བལྟས་པ་ཡིན་ཏེ། མིག་ཤེས་ཀྱིས་ཡུལ་ལ་ཉེ་བར་རྟོག་པའི་ཕྱིར། མིག་ཤེས་བཞིན་ནོ་ཞེས་ཟེར་རོ། །གཉིས་པ་ལ། མི་སྡུག་པ་ལ་དམིགས་པའི་སྒོམ་ཚུལ་དང་། རླུང་ལ་དམིགས་པའི་སྒོམ་ཚུལ་ལོ། །དང་པོ་ལ། མདོར་བསྟན། རྒྱས་པར་བཤད། ཁྱད་པར་གྱི་ཆོས་དང་གསུམ་མོ། །དང་པོ་ནི། ཀེང་རུས་ཆགས་བཅས་ཐམས་ཅད་ལ། །འདོད་ཆགས་ལ་བཞི་སྟེ། ཁ་དོག་དང་། དབྱིབས་དང་། རེག་པ་དང་། བསྙེན་བཀུར་གྱི་འདོད་ཆགས་སོ། །དང་པོའི་གཉེན་པོ་རྣམ་པར་བསྔོས་པ་དང་། རྣམ་པར་བརྣག་པ་དང་། སོགས་ལ་དམིགས་པའི་མི་སྡུག་པ་དང་། གཉིས་པའི་གཉེན་པོ་རྣམ་པར་ཟོས་པ་དང་། རྣམ་པར་འཐོར་བ་ལ་དམིགས་པ་དང་། (༢༣༧ན)
གསུམ་པའི་གཉེན་པོའི་རྣམ་པར་འབུ་ཞུགས་ཏེ་གློངས་པ་དང་། རྒྱུས་པས་བྲང་བྲིང་དུ་སྦྲེལ་བའི་ཀེང་རུས་ལ་དམིགས་པ་དང་། བཞི་པའི་གཉེན་པོ་ནི་ཤི་བའི་རོ་གཡོ་བ་མེད་པ་ལ་དམིགས་པའོ། །བྱེ་བྲག་མེད་པ་ནི། ཀེང་རུས་ཆགས་ཅན་ཐམས་ཅད་ལ་ཤིས་ཏེ། ཆགས་པའི་གཞི་ཁ་དོག་དང་དབྱིབས་དང་རེག་པ་དང་བསྙེན་བཀུར་གྱི་རྣམ་པ་བཞི་པོ་ཐམས་ཅད་མེད་དོ། །མི་སྡུག་པས་ཉོན་མོངས་སྤངས་པ་ནི་མ་ཡིན་གྱི་རྣམ་པར་གནོན་པ་ནི་ཡིན་ཏེ། མོས་པ་དང་། ཁ་དོག་དང་དབྱིབས་ཉི་ཚེ་ཡིད་ལ་བྱེད་པའི་ཕྱིར། ཉི་ཚེ་བ་ཁྱབ་པ་མ་ཡིན་པར་གྲུབ་སྟེ། མི་སྡུག་པ་ནི་ཕུང་པོ་ལྔ་ཅར་ལ་དམིགས་པའམ་ས་ཐམས་ཅད་ལ་དམིགས་པ་མ་ཡིན་པའི་ཕྱིར། འོ་ན་ཕུང་པོའི་ཕྱོགས་གཅིག་ལ་དམིགས་པ་ཡིན་ནོ། །མི་སྡུག་པ་སྒོམ་པའི་རྣལ་འབྱོར་ལ་སྤྱོད་པ་དེ་ནི་གསུམ་སྟེ། ལས་དང་པོ་པ་དང་། ཡོངས་སུ་སྦྱང་བ་བྱས་པ་དང་། ཡིད་ལ་བྱེད་པ་རྫོགས་པའོ། །གཉིས་པ་ལ། ལས་དང་པོ་པ། སྦྱང་བ་བྱས་པ་དང་། ཡིད་ལ་བྱེད་པ་རྫོགས་པའི་ཚུལ་ལོ། །དང་པོ་ནི། རུས་པ་རྒྱ་མཚོའི་བར་དུ་ནི། །སྤྲོ་ཞིང་སྡུད་པས་ལས་དང་པོ། །མི་སྡུག་པ་སྒོམ་པ་ནི་གཞན་བུད་མེད་སོགས་ལ་ཆགས་པ་རང་ཡང་རང་གི་ལུས་ལ་ཆགས་པའི་རྩ་བ་ཅན་ཡིན་པས་རང་གི་ལུས་ཀྱི་རྐང་པའི་མཐེ་བོའམ། དཔྲལ་བའི་དབྱེས་སམ། ཡང་ན་དེར་གར་དགའ་བར་སེམས་གཏོད་པར་བྱེད་ཅིང་། རྣལ་འབྱོར་པ་དེས་རང་གི་ལུས་ཀྱི་ཀླེ་ཆེ་ས་དེར་ཤ་མྱགས་ཤིང་ཟད་པར་མོས་པས་རུས་པ་ལ་ཤ་བསལ་ནས་ཐམས་ཅད་རུས་པའི་ཀེང་རུས་སུ་བལྟ་ཞིང་རྣམ་པར་སྤྱོད་པར་བྱེད་པ་ན། དེ་བཞིན་དུ་མོས་པ་བསྐྱེད་པའི་ཕྱིར། རང་གི་གཡོག་ལྟ་བུ་གཉིས་པ་ལ་མོས་པར་བྱེད་པས་ན། གཙུག་ལག་ཁང་ངམ་ཀུན་དགའ་ར་བ་དང་གྲོང་དང་ཞིང་གི་རིམ་གྱིས་རྒྱ་མཚོའི་(༢༣༧བ)
མཐའ་ཀླས་པའི་བར་དུ་ས་གཞི་རུས་པའི་ཀེང་རུས་ཀྱིས་གང་བར་མོས་པའི་སྒོ་ནས་སྤྲོ་ཞིང་ཡང་སྡུད་པ་ན། སེམས་བསྡུ་བའི་ཕྱིར་རྒྱ་མཚོ་དང་གཙུག་ལག་ཁང་སོགས་རུས་པ་མིན་པ་རྣལ་མར་འདུག་ལ། རང་གཅིག་པུ་ཁོ་ན་ལ་རུས་པའི་ཀེང་རུས་ཡིན་པ་དོན་མཐུན་མོས་པའི་བར་དུ་སྡུད་དེ་འདི་ཙམ་གྱིས་མི་སྡུག་པ་ཡོངས་སུ་རྫོགས་པ་ཡིན་ནོ་ཞེས་གྲགས་ཏེ་འདི་ནི་ལས་དང་པོའི་རྣལ་འབྱོར་སྤྱོད་པ་ཡིན་ནོ། །གཉིས་པ་ནི། རྐང་རུས་ནས་ནི་ཐོད་ཕྱེད་བར། །བཏང་བས་སྦྱང་བ་བྱས་པར་བཤད། །དེ་སེམས་བསྡུ་བ་ཁྱད་པར་དུ་བྱ་བའི་ཕྱིར། རུས་པའི་ཀེང་རུས་དེ་ལས་རྐང་པའི་རུས་པ་རྣམས་བོར་ནས་ནི་ལྷག་མ་ཡིད་ལ་བྱེད་ཅིང་། དེ་བཞིན་དུ་ཐོད་པའི་ཕྱེད་ཀྱི་བར་གྱི་རུས་པ་བཏང་ཞིང་བོར་བས་ཕྱེད་ཀེང་རུས་སུ་ཡིད་ལ་བྱེད་པ་ནི་ཡོངས་སུ་སྦྱོང་བ་བྱས་པར་བཤད་དོ། །གསུམ་པ་ནི། སྨིན་མའི་བར་དུ་སེམས་འཛིན་པས། །ཡིད་ལ་བྱེད་པ་རྫོགས་པ་ཡིན། །ཡང་སྡུད་པའི་ཚེ་དེ་ཐོད་པའི་ཕྱེད་ཀྱི་རུས་པའང་བོར་ནས་སྨིན་མ་གཉིས་ཀྱི་བར་དུ་རུས་པ་མཐེ་བོང་ཙམ་ལ་སེམས་འཛིན་པ་འདི་ནི་མི་སྡུག་པ་ཡིད་ལ་བྱེད་པ་རྫོགས་པའི་རྣལ་འབྱོར་པ་ཡིན་ནོ་ཞེས་གྲག་གོ། །མི་སྡུག་པ་དམིགས་པ་ཆུང་ལ་དབང་ཆུང་བས་ཆུང་བ་སོགས་ལ་མུ་བཞི་སྟེ། དང་པོ་ནི། །ཡིད་ལ་བྱེད་པ་སྦྱོང་བས་རུས་པ་ཐེབ་གང་ཙམ་ལ་དམིགས་པ་ནི་ལུས་ཆུང་བས་དམིགས་པ་ཆུང་ལ་དབང་ཆུང་བ་མ་ཡིན་ཏེ། སྦྱོང་བ་བྱས་པས་ཡིད་ལ་བྱེད་པ་རྫོགས་པའི་ཕྱིར། གཉིས་པ་ནི། ཡིད་ལ་བྱེད་པ་སྦྱོང་བ་མ་བྱས་པས་མི་སྡུག་པ་རྒྱ་མཚོའི་མཐའ་ཀླས་པར་དམིགས་པ་སྟེ་དབང་ཆུང་བས་ཡིན་གྱི། དམིགས་པ་ཆུང་བས་ནི་མ་ཡིན་པའི་ཕྱིར། སྦྱོང་བ་མ་བྱས་པས་རང་གི་ལུས་ལ་དམིགས་པ་དེ་དམིགས་པ་དང་དབང་གཉིས་ཀ་ཆུང་བའོ། །སྦྱོང་བ་བྱས་པས་རྒྱ་མཚོའི་མཐའ་ཀླས་པར་སྦྱོང་བ་ནི་དམིགས་པ་དང་དབང་གཉིས་ཀ་ཆེ་བའོ། །གསུམ་པ་ཁྱད་ཆོས་ནི། མི་སྡུག་མ་ཆགས་ས་བཅུ་དང་། །དམིགས་པ་འདོད་སྣང་མིས་སྐྱེད་དོ། །མི་སྡུག་པའི་རང་(༢༣༨ན)
བཞིན་ནི་མ་ཆགས་པ་དང་། ས་ནི་བསམ་གཏན་བཞི་དང་། ཉེར་བསྡོགས་བཞི། བསམ་གཏན་ཁྱད་པར་ཅན་དང་དགུ། འདོད་ཁམས་ཀྱི་ས་སྟེ་བཅུ་ན་ཡོད་དེ། འདོད་ཁམས་ན་མཉམ་གཞག་མེད་ཀྱང་ཆ་མཐུན་ཡོད་པ་ལ་དགོངས་པའོ། །དམིགས་པ་ནི་འདོད་པའི་སྣང་བ་སྟེ། ཁ་དོག་དང་དབྱིབས་ཡིན་པས་ཁ་དོག་དང་དབྱིབས་ལ་དམིགས་པའི་ཕྱིར་མིང་ལ་མི་དམིགས་པར་དོན་ལ་དམིགས་ཞེས་གྲུབ་བོ། །མི་རྣམས་ཀྱི་ནང་ཁོ་ནར་བསྐྱེད་པ་ཡིན་ཏེ། འགྲོ་བ་གཞན་དུའང་མ་ཡིན་ལ་ཁམས་གཞན་དུ་ལྟ་ཅི་སྨོས་པའི་ཕྱིར། ཁྱབ་སྟེ། འཕགས་ལམ་གྱི་རྒྱུ་ཡིན་པས་འདི་ཁོ་ནར་ངེས་པ་ལ་འཇུག་པའི་ཕྱིར། གྲུབ་སྟེ། ངན་སོང་གསུམ་ནི་དབང་པོ་རྟུལ་བ་དང་། ལྷ་ཀུན་ནི་སྐྱོ་བ་ཆུང་བ་དང་། ལྷག་པར་འདོད་ལྷ་ལ་ནི་ནང་ཁྲོལ་དང་ཁྲག་སོགས་མེད་ལ། གཟུགས་ཀྱི་ལྷ་ལ་ནི་ཀེང་རུས་སོགས་ཀྱང་མེད་པའི་ཕྱིར། མིའི་ཡང་བྱང་སྒྲ་མི་སྙན་དུ་ནི་མ་ཡིན་ཏེ། དེར་ཆགས་བྲལ་མེད་ལ་འདི་ཆགས་བྲལ་གྱི་ཐབས་ཡིན་པའི་ཕྱིར་རོ། །རྣམ་པ་ལོགས་སུ་བཤད་མི་དགོས་ཏེ། མིང་ཉིད་ཀྱི་རྣམ་པ་ནི་མི་སྡུག་པར་གྲུབ་པའི་ཕྱིར། འདས་མ་འོངས་ད་ལྟར་གྱི་དུས་གང་ཡིན་པ་ལ་དམིགས་པ་ཡིན་ཏེ། ལར་ཉོན་མོངས་པ་འདས་པ་སོགས་ལ་དམིགས་པའི་ངེས་པ་མེད་ཀྱང་། ཡིད་མི་སྡུག་པར་སྣང་བ་འདི་ནི་སྒོ་ལྔའི་ཁ་དོག་དང་དབྱིབས་ལ་དམིགས་པ་ཡིན་པའི་ཕྱིར། དཔེར་ན། རྣམ་ཤེས་བཞིན་མ་འོངས་པ་མི་སྐྱེ་བའི་ཆོས་ཅན་གྱི་ཡུལ་ནི་དུས་གསུམ་པ་ཡིན་ནོ། །རུས་པ་མ་ཡིན་པ་ལ་རུས་པར་མོས་པས་ཤེས་བྱ་དང་མི་མཐུན་པས་མོས་པ་ཡིད་ལ་བྱེད་པ་ཡིན་པའི་ཕྱིར་ཟག་པ་དང་བཅས་པ་ཡིན་ནོ། །སོ་སྐྱེའི་རྒྱུད་ཀྱིས་ནི་ཐོག་མེད་ཅན་གྱི་འཁོར་བ་ན་འདྲིས་པའི་ཕྱིར་འདོད་ཆགས་དང་བྲལ་བས་ཐོབ་(༢༣༨བ)
པ་དང་འཕགས་པའི་རྒྱུད་ཀྱི་མ་འདྲིས་པ་ནི་སྦྱོར་བྱུང་ངོ་། །འདིའང་ཞིབ་ཏུ་བྱས་ན་ཚེ་རབས་སྔ་མ་ལ་མི་སྡུག་པ་སྒོམ་པ་གཅིགའདོད་པ་ལ་འདོད་ཆགས་རང་བྲལ་ནས་བསམ་གཏན་གྱི་དངོས་གཞི་ཐོབ་པ་དེ་མི་སྡུག་པའི་ཏིང་ངེ་འཛིན་འདོད་ཆགས་དང་བྲལ་བས་ཐོབ་བོ། །ཚེ་རབས་སྔ་མ་ལ་མི་སྡུག་པ་སྒོམ་མ་མྱོང་བ་ཞིག་འདོད་པ་ལ་འདོད་ཆགས་དང་བྲལ་ན་བསམ་གཏན་གྱི་སེམས་མངོན་དུ་བྱས་ནས་སྦྱོར་བས་སྒྲུབ་དགོས་པའོ། །ཡང་ན་ཚེ་རབས་འདི་རང་ལ་མི་སྡུག་པ་གོམས་པ་འདྲིས་མ་འདྲིས་གཉིས་སོ། །འཕགས་པ་མི་སྡུག་པའི་ཏིང་ངེ་འཛིན་ལ་མ་འདྲིས་པ་ནི། རྒྱུན་ཞུགས་པ་འདོད་པ་ལ་ཆགས་བྲལ་སྔོན་དུ་མ་སོང་བའི་དབང་དུ་བྱས་ལ། སོ་སྐྱེ་འདྲིས་པ་ནི་འདོད་པ་ལ་ཆགས་བྲལ་སྔོན་དུ་སོང་བ་ལ་ཤས་ཆེར་མི་སྡུག་པའི་ཏིང་ངེ་འཛིན་ཐོབ་པའི་དབང་དུ་བྱས་པའོ། །གཉིས་པ་རླུང་ལ་དམིགས་པའི་སྒོམ་ཚུལ་ལ། ཐུན་མོང་དུ་བསྟན་པ་དང་། ཁྱད་པར་དུ་བཤད་པའོ། །དང་པོ་ནི། དབུགས་རྔུབ་དབུགས་འབྱུང་དྲན་པ་ནི། །ཤེས་རབ་ས་ལྔ་སྤྱོད་ཡུལ་རླུང་། །འདོད་རྟེན་ཕྱི་པའི་མ་ཡིན་ནོ། །དབུགས་རྔུབ་པ་ནི་རླུང་ནང་དུ་འཇུག་པ་དང་། དབུགས་དབྱུང་བ་ནི་རླུང་ཕྱིར་འབྱིན་པ་སྟེ་དེ་གཉིས་དྲན་པ་ནི་ཤེས་རབ་ཀྱི་རང་བཞིན་ནོ། །ཤེས་རབ་ཡིན་ཀྱང་དྲན་པ་ཞེས་པས་སྨོས་ཏེ། དྲན་པའི་སྟོབས་བསྐྱེད་པས་འཇུག་པའི་ཕྱིར། ལུས་སོགས་ཀྱི་དྲན་པ་ཉེར་བཞག་བཞིན་བསམ་གཏན་དང་པོ་གསུམ་གྱི་ཉེར་བསྡོགས་གསུམ་དང་། དངོས་གཞི་ན་བདེ་བ་ཡོད་པས་དངོས་གཞིའི་ས་ལ་མི་བརྟེན་པ་དང་། བསམ་གཏན་ཁྱད་པར་ཅན་དང་འདོད་ཁམས་ཏེ་ས་ལྔ་ན་ཡོད་དེ། ཚོར་བ་བཏང་སྙོམས་དང་མཚུངས་པར་ལྡན་པའི་ཕྱིར། བཞི་པའི་ཉེར་བསྡོགས་ན་བཏང་སྙོམས་ཡོད་ཀྱང་དབུགས་དབྱུང་རྔུབ་མེད་དོ། །རྣམ་རྟོག་དེའི་གཉེན་པོ་དབུགས་དབྱུང་རྔུབ་དྲན་པ་ནི་བདེ་སྡུག་དང་མཚུངས་པར་མི་ལྡན་ཏེ། དབུགས་དབྱུང་རྔུབ་དྲན་པ་ནི་(༢༣༩ན)
རྣམ་རྟོག་གཅོད་བྱེད་ཡིན་ལ། ཚོར་བ་བདེ་སྡུག་ནི་རྣམ་རྟོག་དང་མཐུན་པའི་ཕྱིར། ཡང་དབུགས་དབྱུང་རྔུབ་དྲན་པ་ནི་ཆོས་ཅན། བདེ་བ་དང་ཡིད་བདེ་བ་དང་མཚུངས་པར་ལྡན་པ་མ་ཡིན་ཏེ། དབུགས་དབྱུང་རྔུབ་དྲན་པ་དེ་ཡང་བློ་གཏད་པས་བསྒྲུབ་བྱ་ཡིན་པ་གང་ཞིགབདེ་བ་དང་ཡིད་བདེ་དག་ཀྱང་བློ་གཏད་པ་ལ་བར་ཆད་བྱེད་པའི་ཕྱིར་ཞེས་གྲག་གོ། །བསྡོམས་པ་དང་། གཏོད་པ་དང་། བཟོ་བ་དང་། ལྷུར་ལེན་པ་ཞེས་པ་ནི་རྣམ་གྲངས་སོ། །འབྲས་བུ་སྐྱེ་བའི་བསམ་གཏན་ན་ནམ་ཡང་བཏང་སྙོམས་ཡོད་ལ། རྒྱུ་སྙོམས་འཇུག་གི་དུས་ན་བཏང་སྙོམས་ཡོད་པར་འདོད་པ་ལྟར་ན་བསམ་གཏན་གསུམ་པའི་དངོས་གཞི་མན་ཆད་ས་བརྒྱད་པ་ཡིན་ནོ། །བཞི་པ་ཡན་ཆད་ན་དབུགས་དབྱུང་རྔུབ་ཀྱི་ས་མ་ཡིན་ནོ། །ཁ་ཅིག་ན་རེ། བཏང་སྙོམས་སུ་སོང་ན་དགའ་བདེའི་ཡན་ལག་མ་ཚང་བའི་སྐྱོན་དུ་འགྱུར་བས་དང་པོའི་དངོས་གཞི་གསུམ་ན་བཏང་སྙོམས་མེད་པས་ལྔ་ཁོ་ན་ཡིན་ཟེར་རོ། །དེའི་སྤྱོད་ཡུལ་ལམ་དམིགས་པ་ནི་རླུང་ཡིན་ནོ། །འདོད་ཁམས་ཀྱི་རྟེན་ཅན་ཏེ། དེ་ནི་རྣམ་རྟོག་མང་བའི་ཕྱིར། ངན་སོང་ནི་དབང་པོ་བརྟུལ་བས་མི་སྒོམ། གཟུགས་དང་གཟུགས་མེད་པ་དབང་པོ་བརྟུལ་ཞིང་རྣམ་རྟོག་ཉུང་བའི་ཕྱིར། མ་འདྲིས་པའི་ཕྱིར་སྦྱོར་བ་ལས་བྱུང་བ་དང་། འདོད་ཆགས་དང་བྲལ་བས་ཐོབ་པ་ནི་འདྲིས་པའི་ཕྱིར། ཡུལ་གང་ན་ཡོད་པ་དང་གྲངས་དང་མ་འཆོལ་བར་སྒོམ་པ་འདི་ནི་དེ་ཁོ་ན་ཡིད་ལ་བྱེད་པ་ཡིན་ནོ། །སངས་རྒྱས་ཀྱི་ཆོས་འདི་ཡོད་པའི་ཆོས་འདི་པ་རྣམས་ཁོ་ནའི་ཡིན་གྱི། ཕྱི་རོལ་མུ་སྟེགས་པའི་མ་ཡིན་ནོ། །ཕྱི་རོལ་པ་ལ་སྲོག་འཛིན་པའི་ལུང་ཡོད་ཀྱང་རླུང་རྔུབ་དབྱུང་དྲན་པའི་ལུང་མེད་པའི་ཕྱིར། བདག་ཏུ་འཛིན་པ་དང་འགལ་བའི་ཕྱིར་དང་ཟབ་པའི་ཕྱིར་རོ། །ཕྱི་རོལ་པ་རྣམས་ནི་རང་(༢༣༩བ)
ཉིད་ཀྱིས་ཆོས་ཟབ་མོ་མངོན་པར་མི་རྟོགས་ཏེ། འདི་ཡི་ཟབ་པ་ཉིད་རྒྱུ་དྲུག་དང་ལྡན་པའི་ཕྱིར། གཉིས་པ་ལ། སྒོམ་ཚུལ་གྱི་དབྱེ་བ། ཡུལ་གྱི་ངོ་བོ། ཡུལ་ཅན་གྱི་ཁྱད་པར་རོ། །དང་པོ་ནི། བགྲང་ལ་སོགས་པ་རྣམ་པ་དྲུག །དེའང་བགྲང་བ་དང་ལ་སོགས་པས་རྗེས་སུ་འགྲོ་བ་དང་། འཇོག་པ་དང་། ཉེ་བར་རྟོག་པ་དང་། བསྒྱུར་བ་དང་། ཡོངས་སུ་དག་པ་སྟེ་རྒྱུ་རྣམ་པ་དྲུག་དང་ལྡན་ན་རྫོགས་པ་ཡིན་ནོ། །དེ་ལ་བགྲང་བ་ནི་དབུགས་རྔུབ་དབྱུང་དག་ལ་སེམས་གཏད་ནས་ལུས་སེམས་མངོན་པར་འདུ་མི་བྱེད་པར་གློད་དེ། ལུས་སྐྱིལ་མོ་གྲུང་བཅའ། སེམས་བྱིང་རྒོད་དུ་མ་ཤོར་བར་རྣལ་དུ་བཞག་སྟེ་མ་ཆགས་པར་བྱས་ཤིང་། དྲན་པ་ཙམ་གྱིས་གཅིག་དང་གཉིས་ནས་བཅུའི་བར་དུ་བགྲང་བར་བྱེད་པའོ། །སེམས་མངོན་པར་སྡུད་པར་དོགས་པས་བཅུ་ལས་ཉུང་ངུ་ནི་མ་ཡིན་ལ། སེམས་གཡེང་བར་དོགས་པས་བཅུ་ལས་ལྷག་པ་ཧ་ཅང་མང་བ་ནི་མ་ཡིན་ནོ། །དེ་ལ་སྐྱོན་ནི་གསུམ་ཡོད་དེ། གཉིས་ལ་གཅིག་ཏུ་འཛིན་ན་དོན་ལྷག་ཀྱང་འཇལ་བྱེད་དེས་བགྲང་བྱ་མ་ཚང་བར་བགྲང་བའི་སྐྱོན་ནོ། །གལ་ཏེ་གཅིག་ལ་གཉིས་སུ་འཛིན་ན་དོན་ཆད་ཀྱང་གྲངས་ལྷག་པས་ལྷག་པར་བགྲང་བའི་སྐྱོན་ནོ། །རྔུབ་པ་ལ་དབྱུང་བ་དང་། དབྱུང་བ་ལས་རྔུབ་པར་འཛིན་ན་འཆོལ་བར་བགྲང་བའི་སྐྱོན་ཡོད་དོ། །དེ་ལས་གཞན་པ་ནི་ཡང་དག་པའི་བགྲང་བའོ། །བར་སྐབས་སུ་སེམས་གཡེངས་ན་དང་པོ་གཅིག་རང་ནས་བསྐྱར་ལ་ཇི་སྲིད་དུ་ཏིང་ངེ་འཛིན་མ་ཐོབ་ཀྱི་བར་དུ་བགྲང་བར་བྱའོ། །ཏིང་ངེ་འཛིན་ཐོབ་ན་རང་ཤུགས་ཀྱིས་འབྱུང་ངོ་། །སྔར་འཇུག་པ་དང་ཕྱིས་དབྱུང་བ་བགྲང་བ་ནི་སྐྱེ་བ་སྔར་འཐུག་ལ་འཆི་བ་ཕྱིས་འབྱུང་དེས་དེ་ལྟར་སྐྱེ་འཆི་རྟོག་པ་ལས་མི་རྟག་པ་ལ་འདྲིས་པ་བྱས་པར་འགྱུར་རོ། །རྗེས་སུ་འགྲོ་བ་ནི་འདི་དག་ཐག་ཇི་སྲིད་ཅིག་འབྱུང་ངམ་འཇུགལུས་ཐམས་(༢༤༠ན)
ཅད་ལ་ཁྱབ་པ་ཞིག་གམ། ཕྱོགས་འགའ་ཞིག་ན་རྒྱུ་ཞེས་མངོན་པར་འདུ་བྱ་བ་མེད་པར་རྔུབ་པ་དང་དབྱུང་བའི་འགྲོས་ཀྱིས་རྗེས་སུ་འགྲོ་བ་སྟེ། དེ་འཇུག་པ་ན་ལྐོག་མ་དང་སྙིང་ག་དང་ལྟེ་བ་དང་རྐེད་པ་དང་བརླ་དང་བྱིན་པར་འཇུག་པའི་རིམ་གྱིས་རྐང་པ་གཉིས་ཀྱི་བར་དུ་རྗེས་སུ་འགྲོ་ལ། འབྱུང་བ་ན་མཐོ་གང་དང་འདོམ་གང་གི་བར་དུ་འབྱུང་སྟེ་སྲོག་ཆགས་སྟོབས་ལྡན་དང་ཉམ་ཆུང་བ་དང་རྗེས་སུ་འབྲེལ་བའི་ཕྱིར། འདིར་ལུས་ཀྱི་གནས་རྣམས་སུ་སྲོག་ཆགས་ཡོད་པས་དེའི་རླུང་གི་ནུས་པས་རང་ཉིད་ཀྱི་རླུང་གི་ནུས་པའང་སྟོབས་སུ་འགྲོ་བར་བཤད་པ་འདི་ནི་སྒྲོས་ཡ་མཚན་པ་ཞིག་སྣང་ངོ་། །གཞན་དག་ན་རེ། འོག་ཏུ་རླུང་གི་དཀྱིལ་འཁོར་དང་། གྱེན་དུ་ཉི་ཟླ་འདེགས་པའི་རྣམ་པར་འཐོར་བྱེད་ཀྱི་བར་དུའོ། །ཞེས་ཟེར་ཏེ། དེ་ནི་མོས་པ་ཡིད་བྱེད་ལ་རུང་དུ་ཆུག་ཀྱང་། འདི་ནི་དེ་ཁོ་ན་ཉིད་ལ་ཡིད་བྱེད་ཡིན་ཙམ་ན་རླུང་གང་དུ་གནས་པ་དེར་ཡིད་ལ་བྱེད་ཀྱི། རང་གི་དབུགས་མེད་པ་རླུང་གི་དཀྱིལ་འཁོར་དང་ཉི་ཟླའི་བར་དུ་བལྟ་ན་དངོས་པོ་དང་མི་མཐུན་པའི་ཕྱིར་རིགས་པ་མ་ཡིན་ནོ། །འཇོག་པ་ནི་ནོར་བུའི་ཐག་པ་བཞིན་དུ་སྣ་རྩེ་ནས་རྐང་པའི་མཐེ་བོའི་བར་དུ་གནས་པར་བལྟ་ཞིང་། དབུགས་འདི་དག་ཡོད་པས་སྲོག་འཛིན་པའི་ཕྱིར་ལུས་ལ་ཕན་འདོགས་པར་བྱེད་པ་ཞིག་གམ། དབུགས་རྒྱུ་བ་དྲག་ན་གནོད་པར་བྱེད་པ་ཞིག་གམ། གྲང་ངམ་དྲོ་བ་ཞིག་ཅེས་རྟོག་པའོ། །ཉེ་བར་རྟོག་པ་ནི་འདི་དག་རླུང་འབའ་ཞིག་མ་ཡིན་གྱི། འབྱུང་ཆེན་བཞི་པོ་འདི་དག་དང་འབྱུང་བ་ལས་གྲུབ་པ་རྒྱུར་བྱས་པའི་གཟུགས་དང་དེ་དག་ལ་རགས་ལས་ཏེ་འབྱུང་བས་བརྟེན་པ་སེམས་དང་སེམས་བྱུང་དག་ཀྱང་ཡོད་དོ་ཞེས་ཕུང་པོ་ལྔ་པར་ཉེ་བར་རྟོག་པར་བྱེད་པའོ། །སྒྱུར་བ་ནི། རླུང་ལ་དམིགས་པའི་བློ་བསྒྱུར་ཏེ། ཆོས་མཆོག་གི་བར་དུ་གོང་ནས་གོང་དུ་དེ་དག་དྲན་པ་(༢༤༠བ)
ཉེར་གཞག་དང་དྲོད་སོགས་རྣམས་ལ་ཡང་དག་པར་སྦྱོར་བའོ། །ཡོངས་སུ་དག་པ་ནི་མཐོང་སྒོམ་མི་སློབ་པའི་ལམ་ལ་འཇུག་པའོ། །གཞན་ན་རེ། སྒྱུར་བ་ནི་དྲན་པ་ཉེར་གཞག་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་ཡིན་ལ། རྣམ་པར་དག་པ་ནི་ཟད་པ་ཤེས་པ་ལ་སོགས་པ་ཡིན་ནོ་ཞེས་ཟེར་རོ། །སོགས་པས་མི་སྐྱེ་བ་ཤེས་པ་དང་། མི་སློབ་པའི་ཡང་དག་པའི་ལྟ་བ་བཟུང་སྟེ་གོས་དྲི་མ་དང་འབྲེལ་བ་ལྟར་དག་པ་མེད་པས་ལྷག་མ་དང་བཅས་པ་ལྟར་ལྷག་མ་དང་བཅས་པ་ནི་དག་པར་མི་འོས་པའི་ཕྱིར། གཉིས་པ་ཡུལ་གྱི་ཁྱད་པར་ནི། དབུགས་རྔུབ་དབུགས་འབྱུང་གང་ལས་ལུས། །སེམས་ཅན་ཞེས་བྱ་མ་ཟིན་པའོ། །རྒྱུ་མཐུན་ལས་བྱུང་། དབུགས་རྔུབ་པ་དང་དབུགས་དབྱུང་བ་ས་གང་ལས་ཡིན་ཅེ་ན། འདོད་པ་ནས་བསམ་གཏན་གསུམ་པའི་བར་གྱི་ལུས་གང་ཡིན་པ་དེའི་ས་པ་དག་ཡིན་ཏེ། འདི་གཉིས་ནི་ལུས་ཀྱི་ཕྱོགས་གཅིག་ཡིན་པའི་ཕྱིར་རོ། །གཟུགས་མེད་པ་དང་ནུར་ནུར་པོ་ལ་སོགས་པས་མེར་མེར་པོའི་སྐབས་སུ་ནི་དབུགས་དབྱུང་རྔུབ་དྲན་པ་འདི་མེད་དེ། ལུས་ཁྱད་པར་ཅན་སྦུབས་ཡོད་པ་ལ་བརྟེན་ནས་འཇུག་པ་མ་ཡིན་པའི་ཕྱིར། སེམས་མེད་པ་དང་། བསམ་གཏན་བཞི་པ་ལ་སྙོམས་པར་འཇུག་པ་ན་ཡང་དབུགས་དབྱུང་རྔུབ་དྲན་པ་འདི་མེད་དེ། རིམ་པ་བཞིན་སེམས་མེད་པའི་ཕྱིར་དང་། དབུགས་དབྱུང་རྔུབ་ཀྱི་ས་པའི་སེམས་མེད་པའི་ཕྱིར། མངལ་ནས་སྤྱིར་སྐྱེ་བ་དང་བསམ་གཏན་བཞི་པ་ལས་ལྡང་བ་ལ་ནི་དབུགས་ནང་དུ་འཇུག་ལ། འཆི་བའི་ཚེ་དང་བསམ་གཏན་བཞི་པ་ལ་སྙོམས་པར་འཇུག་པ་ལ་དབུགས་ཕྱིར་འབྱུང་ངོ་། །དབུགས་དབྱུང་རྔུབ་འདི་གཉིས་ནི་སེམས་ཅན་ཞེས་བྱ་བར་བགྲང་སྟེ། ཐོབ་པ་དང་མ་ཐོབ་པ་དང་ལྡན་པའི་ཕྱིར། རྒྱུད་དུ་སྒྲོ་བཏགས་པའི་ཕྱིར། མ་ཟིན་པ་སྟེ། དབང་པོ་དང་ཐ་དད་པར་འཇུག་པའི་ཕྱིར། སྐལ་མཉམ་གྱི་རྒྱུས་བསྐྱེད་པས་རྒྱུ་མཐུན་ལས་བྱུང་བ་ཡིན་ཏེ། ལུས་རྒྱས་(༢༤༡ན)
པས་འགྲིབ་པར་འགྱུར་བས་རྒྱས་བྱུང་མིན་པའི་ཕྱིར་དང་། རྣམ་སྨིན་ལས་བྱུང་བ་མ་ཡིན་ཏེ། ཆད་ནས་ཉིང་མཚམས་སྦྱོར་བའི་ཕྱིར། དེའང་རྣམ་སྨིན་གྱི་གཟུགས་མིག་སོགས་ལ་ཉིང་མཚམས་སྦྱོར་བ་འདི་མེད་ཀྱི། སེམས་དང་སེམས་བྱུང་རྣམ་སྨིན་སྐྱེས་ཡིན་ཀྱང་ཆད་ནས་ཡང་མཚམས་སྦྱོར་བ་ལ་འགལ་བ་མེད་དོ། །གསུམ་པ་ནི། འོག་མ་ཡི། །ཡིད་ཀྱིས་དེ་གཉིས་མི་རྟོགས་སོ། །རྔུབ་དབྱུང་དེ་གཉིས་རང་ས་དང་ས་གོང་མའི་སེམས་ཀྱིས་རྟོགས་ཀྱི། འོག་མའི་སྤྱོད་ལམ་པ་དང་། སྤྲུལ་པའི་ཡིད་གོང་མར་མངོན་དུ་བྱེད་པ་ཉིད་ཀྱིས་དེ་གཉིས་མི་རྟོགས་ན་དགེ་བ་དང་ཉོན་མོངས་པ་གཞན་ལྟ་ཅི་སྨོས་སོ། །དེའང་འོག་མའི་སེམས་གཉིས་པོ་འདི་གོང་མའི་རྟེན་ལ་སྐྱེས་པའི་གཉིས་པོ་འདི་གོང་མའི་དབུགས་མི་རྟོགས་ན་གོང་མ་ལ་འོག་མའི་སེམས་མ་སྐྱེས་པ་ལ་ལྟ་ཅི་སྨོས་པའི་ཕྱིར་རོ། །དེའང་འདོད་པའི་སྤྱོད་ལམ་གྱི་སེམས་བསམ་གཏན་དང་པོ་ཡན་ཆད་ལ་མི་འབྱུང་ཡང་བསམ་གཏན་དང་པོའི་སྤྱོད་ལམ་གྱི་སེམས་བསམ་གཏན་གཉིས་པ་ཡན་ཆད་ལ་འབྱུང་སྟེ། གཉིས་པ་སོགས་ན་ལུས་མིག་དང་། རྣ་བའི་རྣམ་ཤེས་གང་ཡིན་པ་དེ་ནི་དང་པོར་གཏོགས་ཞེས་འབྱུང་བས་སོ། །གཉིས་པ་ལྷག་མཐོང་གི་སྒོམ་ཚུལ་ལ། ཚོགས་ལམ། སྦྱོར་ལམ། བདེན་པ་མངོན་པར་རྟོགས་པའི་ལམ་མོ། །དང་པོ་ལ། བསྟན། བཤད་གཉིས་ལས། དང་པོ་ནི། ཞི་གནས་གྲུབ་པར་གྱུར་པ་ཡིས། །དྲན་པ་ཉེར་གཞག་བསྒོམ་པར་བྱ། །འཇུག་པའི་སྒོ་མི་སྡུག་པ་དང་དབུགས་རྔུབ་པ་དང་དབྱུང་བ་འདི་གཉིས་ཞི་གནས་ཀྱི་ཏིང་ངེ་འཛིན་འགྲུབ་ཀྱང་ལྷག་མཐོང་གི་ཤེས་རབ་མེད་ན་ཉོན་མོངས་པ་རྣམས་རྩ་བ་ནས་མི་སྤངས་ཏེ། མདོ་ལས། ཉོན་མོངས་པ་རྣམས་ནི་ཡེ་ཤེས་ཀྱིས་གཞོམ་པར་བྱ་བ་ཡིན་ནོ། །ཞེས་འབྱུང་བའི་ཕྱིར་རོ། །དེའི་ཕྱིར་ཞི་གནས་འགྲུབ་པར་འགྱུར་བ་ཡིས་ཉོན་མོངས་པ་རྩ་བ་ནས་སྤངས་ཤིང་ལྷག་མཐོང་གི་ཤེས་རབ་བསྐྱེད་(༢༤༡བ)
པའི་ཕྱིར་དྲན་པ་ཉེ་བར་བཞག་པ་བཞི་བསྒོམ་པར་བྱའོ། །དེ་དག་བསྒོམས་པས་ལྷག་མཐོང་འགྲུབ་པའང་། མདོ་ལས། དགེ་སློང་དག་བགྲོད་པ་གཅིག་པའི་ལམ་ནི་འདི་ཡིན་ནོ། །འདི་ལྟ་སྟེ། དྲན་པ་ཉེ་བར་བཞག་པ་བཞིའོ་ཞེས་འབྱུང་བའི་ཕྱིར། ཞེས་སོ། །དྲན་པ་ཉེར་བཞག་ཚོགས་ལམ། ཡང་དག་སྤོང་བ་དྲོད། རྫུ་འཕྲུལ་གྱི་རྐང་པ་རྩེ་མོ། དབང་པོ་ལྔ་བཟོད་པ། སྟོབས་ལྔ་ཆོས་མཆོག །འཕགས་ལམ་ཡན་ལག་མཐོང་ལམ། བྱང་ཆུབ་ཀྱི་ཡན་ལག་བདུན་སྒོམ་ལམ། དེ་ལའང་ཆོས་མཆོག་སྟོབས་ཀྱི་དུས་ན་དབང་པོ་དང་། རྫུ་འཕྲུལ་གྱི་རྐང་པ། ཡང་དག་པར་སྤོང་བ། དྲན་པ་ཉེར་གཞག་ཡོན་ཏན་ཡར་ལྡན་དུ་ཡོད། བཟོད་པ་དབང་པོའི་དུས་སུའང་འོག་ཀུན་ཡོན་ཏན་ཡར་ལྡན་དུ་ཡོད། གཞན་ལའང་དེ་བཞིན་དུ་སྦྱར་རོ། །ཆོས་མཆོག་སྟོབས་ཀྱི་དུས་ན་འཕགས་ལམ་དང་། བྱང་ཆུབ་ཀྱི་ཡན་ལག་མེད། མཐོང་ལམ་ཡན་ལག་བརྒྱད་པའི་དུས་ན་སྟོབས་མན་ཆོད་ཡོན་ཏན་ཡར་ལྡན་དུ་ཡོད། བྱང་ཆུབ་ཀྱི་ཡན་ལག་བདུན་ཆ་མཐུན་དུ་ཡོད། སྒོམ་ལམ་ཡན་ལག་བདུན་གྱི་དུས་ན། ལམ་ཡན་ལག་བརྒྱད་པ་མན་ཆོད་ཡོད། དྲན་པ་ཉེར་གཞག་གི་དུས་སུ་སྟོབས་མན་ཆོད་ཆ་མཐུན་ཡོད། ཡང་དག་སྤོང་བའི་དུས་སུ་དྲན་པ་ཉེར་གཞག་ཡོན་ཏན་ཡར་ལྡན་དུ་ཡོད། སྟོབས་མན་ཆོད་ཆ་མཐུན་དུ་ཡོད་དོ། །གཉིས་པ་ལ། ཐུན་མོང་གི་ཆོས་དང་། བྱེ་བྲག་ཏུ་ཆོས་དྲན་ཉེ་སྒོམ་ཚུལ་ལོ། །དང་པོ་ལ། ཉསྒོམ་ཚུལ། ངོ་བོ། གོ་རིམ། གྲངས་ངེས་སོ། །དང་པོ་ནི། ལུས་ཚོར་སེམས་དང་ཆོས་རྣམས་ལ། །མཚན་ཉིད་གཉིས་སུ་ཡོངས་བརྟགས་པས། །ལུས་ཚོར་སེམས་དང་ཆོས་རྣམས་ལ། རང་སྤྱིའི་མཚན་ཉིད་གཉིས་སུ་ཡོངས་སུ་བརྟགས་པས་ཤེས་པར་བྱའོ། །རང་གི་མཚན་ཉིད་ནི། ལུས་ནི་འབྱུང་བ་དང་འབྱུང་འགྱུར་རོ། །ཚོར་བ་ནི་མྱོང་བའོ། །སེམས་ནི་དམིགས་(༢༤༢ན)
པའོ། །ཆོས་ནི་ལུས་ཚོར་སེམས་གསུམ་ལས་གཞན་འདུ་ཤེས། འདུ་བྱེད། འདུས་མ་བྱས་ཀྱི་ཆོས་སོ། །དེའང་མ་འདྲེས་པ་རྣམ་པར་བཞག་པ་ལ་བསམས་ནས་བརྗོད་པ་ཡིན་གྱི། འདྲེས་པ་རྣམ་པར་བཞག་ན་ལུས་སོགས་གསུམ་པོའང་བཟུང་སྟེ། འདུས་བྱས་དང་འདུས་མབྱས་ཀྱི་ཆོས་ཐམས་ཅད་ཡིན་པར་བལྟའོ། །དེ་ལྟར་མཉམ་པར་བཞག་པས་ལུས་དེ་ལ་རྡུལ་ཕྲ་རབ་དང་། དུས་ཀྱི་མཐའི་སྐད་ཅིག་མ་རེ་རེར་མཐོང་བས་དྲན་པ་ཉེར་གཞག་གྲུབ་བའི་ཚད་ཡིན་ནོ། །ཐམས་ཅད་ལ་དེར་མཐོང་བ་ཡོད་པ་མིན་པས་གྲག་ཅེས་སྨོས་སོ། །སྤྱིའི་མཚན་ཉིད་ནི། འདུས་བྱས་རྣམས་མི་རྟག་པ་ཉིད་དང་། ཟག་པ་དང་བཅས་པ་རྣམས་སྡུག་བསྔལ་བ་ཉིད་དང་། ཆོས་ཐམས་ཅད་སྟོང་ཞིང་བདག་མེད་པ་ཉིད་དོ། །སྡུག་བསྔལ་གྱི་མཚན་ཉིད་ནི་འཕགས་པ་རྣམས་དང་མི་མཐུན་པའོ། །གཉིས་པ་ནི། ཤེས་རབ་ཐོས་སོགས་ལས་བྱུང་བའོ། །གཞན་ནི་འབྲེལ་དང་དམིགས་པ་ལས། །དྲན་པ་ཉེར་གཞག་གསུམ་སྟེ། རང་བཞིན་གྱི་དྲན་པ་ཉེར་གཞག་ནི་ཐོས་པ་ལས་བྱུང་བ་དང་སྒོམ་པ་ལས་བྱུང་བའི་ཤེས་རབ་བོ། །སྦྱོར་བྱུང་ཐོས་སོགས་བཞག་གི་སྐྱེས་ཐོབ་དམན་པ་ཡིན་པས་མ་བཞག་གོ། །གཞན་ཤེས་རབ་དེ་དང་ལྷན་ཅིག་འབྱུང་བ་འདུ་ཤེས་དང་སེམས་པ་སོགས་རྣམས་ནི་རང་བཞིན་གྱི་དྲན་པ་ཉེར་གཞག་དང་འབྲེལ་བའི་དྲན་པ་ཉེ་བར་བཞག་པ་ཡིན་ནོ། །དེ་དག་ནི་དམིགས་པ་ལུས་ཚོར་སེམས་དང་ཆོས་རྣམས་ནི་དམིགས་པའི་དྲན་པ་ཉེར་གཞག་སྟེ། དམིགས་པའི་དྲན་པ་ཉེར་གཞག་ནི་ཆོས་ཐམས་ཅད་དེ། བཅོམ་ལྡན་འདས་ཀྱིས། དགེ་སློང་དག །ཆོས་ཐམས་ཅད་ཅེས་བྱ་བ་འདི་ཉིད་དྲན་པ་ཉེ་བར་བཞག་པ་བཞིའི་ཚིག་བླ་དྭགས་ཡིན་ནོ། །ཞེས་གསུངས་སོ། །རང་བཞིན་དྲན་པ་ཉེར་བཞག་ཡིན་པའི་རྒྱུ་མཚན་ནི། ལུས་ལ་ལུས་ཀྱི་རྗེས་སུ་བལྟ་བ་ནི་(༢༤༢བ)
དྲན་པ་ཉེ་བར་འཇོག་པའོ་ཞེས་འབྱུང་བའི་ཕྱིར། རྗེས་སུ་ལྟ་བ་ནི། ཤེས་རབ་ཡིན་ཏེ། ཤེས་རབ་དེས་ཤེས་རབ་དེ་དང་ལྡན་པའི་གང་ཟག་ནི་རྗེས་སུ་ལྟ་བར་བྱེད་པ་པོ་ཡིན་པའི་ཕྱིར། འདི་ལྟར་ནང་གི་ལུས་ཀྱི་རྗེས་སུ་ལྟ་ཞིང་གནས་སོ་ཞེས་གསུངས་པ་སྟེ། འདི་ལ་རྗེས་སུ་ལྟ་བ་སྟེ། ལྟ་བ་ཤེས་རབ་ཡོད་པས་རྗེས་སུ་ལྟ་བར་བྱེད་པ་ནི་གང་ཟག་ཡིན་པས་དབྱུག་པ་ཅན་ཞེས་པ་ལྟ་བུའོ། །ལུས་ལ་ལུས་ཀྱི་ལྟ་བ་ནི་བདུན་པའི་ཚིག་གི་བསྡུ་བ་ཡིན་པས་རྗེས་སུ་ལྟ་བ་པོའང་གང་ཟག་ཡིན་པར་གྲུབ་བོ། །བྱེ་སྨྲས། ཤེས་རབ་ལ་དྲན་པར་བཞག་སྟེ་དྲན་པའི་སྟོབས་ཀྱིས་དམིགས་པ་ལ་འཇུག་པའམ་འཛིན་ནས་ཤེས་རབ་ཀྱིས་རབ་ཏུ་ཤེས་པས་དྲན་པ་ཤས་ཆེ་ཞིང་ལྷག་པའི་ཕྱིར། དང་པོ་ཁྱེའུའི་སྟོབས་ཀྱིས་ཤིང་གཤགས་པས་ཁྱེའུས་གཤགས་ཟེར་བ་བཞིན་ཅེས་ཟེར་རོ། །སློབ་དཔོན་གྱིས། བྱེད་བསྒྲུབ་པ་ཡིན་ན་རུང་སྟེ། ཤེས་རབ་འདིས་དོན་ཇི་ལྟར་མཐོང་བ་བཞིན་ལུས་སོགས་ལ་དྲན་པ་ཉེ་བར་འཇོག་པས་ན་ཆོས་ཅན། དྲན་པ་ཉེར་གཞག་ནི་ཤེས་རབ་ཡིན་ཏེ། ཤེས་རབ་ཀྱིས་ཇི་ལྟར་མཐོང་བ་བཞིན་དུ་དྲན་པས་མངོན་པར་བརྗོད་ཅིང་འཛིན་པའི་ཕྱིར། རང་བཞིན་གྱི་དྲན་པ་ཉེར་བཞག་ཇི་ལྟར་འབྲེལ་བའི་དྲན་པ་ཉེར་གཞག་ཀྱང་དེ་དང་འདྲ་སྟེ། ཤེས་རབ་ཀྱིས་ལུས་ལ་སོགས་ལ་དྲན་པ་ཉེ་བར་འཇོག་པ་དེ་བཞིན་དུ་དེ་དང་མཚུངས་ལྡན་དག་གིས་ཀྱང་ཉེ་བར་འཇོག་པར་བྱེད་དོ། །ཚེ་དང་ལྡན་པ་མ་འགགས་པས་ཀྱང་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་དེའི་ལུས་ལ་དམིགས་པའི་དྲན་པ་ཉེ་བར་གནས་པ་ཡང་དག་པར་གནས་ཞེས་རྒྱས་པར་བཤད་དོ། །བཅོམ་ལྡན་འདས་ཀྱིས་ཀྱང་། ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་དེའི་དྲན་པ་ཉེ་བར་གནས་ཤིང་ཀུན་ཏུ་མི་རྨོངས་པ་ཡིན་ནོ། །ཞེས་སོ། །ད་ནི་མདོ་གཞན་ལས་གསུངས་པའི་དྲན་པ་ཉེར་གཞག་རྣམས་(༢༤༣ན)
བྱེད་པ་སྒྲུབ་པ་མ་ཡིན་པར་བྱེད་པ་དོན་གཞན་དུ་བྱེད་པར་འདོད་དེ། མདོ་ལས། དགེ་སློང་དག །ཇི་ལྟར་དྲན་པ་ཉེ་བར་བཞག་པ་རྣམས་ཀུན་འབྱུང་བ་དང་ནུབ་པ་ཡིན་ཅེ་ན། ཟས་ཀུན་འབྱུང་བས་ལུས་ཀུན་འབྱུང་བ་ཡིན་ལ། ཟས་འགགས་པས་ནི་ལུས་ནུབ་པ་ཡིན་ནོ། །ལུས་ཀུན་ཏུ་འབྱུང་བ་དང་ནུབ་པ་བཤད་པ་ལྟར་ཚོར་བ་ལ་ཡང་དེ་བཞིན་དུ་བརྗོད་དེ། རེག་པ་ཀུན་ཏུ་འབྱུང་བས་ནི་ཚོར་བ་ཀུན་ཏུ་འབྱུང་བ་ཡིན་ལ། རེག་པ་འགགས་པས་ནི་ཚོར་བ་ནུབ་པ་ཡིན་ནོ། །མིང་དང་གཟུགས་ཀུན་ཏུ་འབྱུང་བས་ནི་སེམས་ཀུན་ཏུ་འབྱུང་བ་ཡིན་ལ། མིང་དང་གཟུགས་འགགས་པས་ནི་སེམས་ནུབ་པ་ཡིན་ནོ། །ཡིད་ལ་བྱེད་པ་ཀུན་ཏུ་འབྱུང་བས་ནི་ཆོས་རྣམས་ཀུན་ཏུ་འབྱུང་བ་ཡིན་ལ། ཡིད་ལ་བྱེད་པ་འགགས་པས་ནི་ཆོས་ནུབ་པ་ཡིན་ནོ། །ཞེས་གསུངས་པས། ལུས་ཚོར་སེམས་ཆོས་ཀྱི་དམིགས་པ་ཁོ་ན་དྲན་པ་ཉེར་གཞག་ཏུ་གསུངས་ཏེ། ཡུལ་འདི་ལ་དྲན་པ་ཉེ་བར་གནས་པའི་ཕྱིར་རོ། །དྲན་ཉེ་འདི་དག་གི་མིང་ནི་དམིགས་པ་ཡུལ་གྱི་སྒོ་ཇི་ལྟ་བ་བཞིན་ཡུལ་ཅན་ལའང་ངེས་པའི་ཚིག་གིས་བཏགས་སོ། །འདི་དག་རེ་རེ་ཞིང་རྣམ་པ་གསུམ་གསུམ་ཡིན་ཏེ། འདི་དག་རང་དང་གཞན་དང་གཉིས་ཀའི་རྒྱུད་ལ་དམིགས་པའི་ཕྱིར། དེའང་རང་གི་ལུས་ལ་ནང་གི་ལུས་དང་། གཞན་གྱི་ལུས་ལ་ཕྱིའི་ལུས་དང་། རང་གཞན་གཉིས་ཀའི་ལུས་ལ་གཉིས་ཀའི་ལུས་སུ་བརྗོད་པའམ། ཁ་ཅིག་ནི་ནང་གི་ལུས་ནི་མཉམ་པར་བཞག་པ་ཁམས་གོང་མ་གཉིས་ཀྱིའོ། །ཕྱིའི་ལུས་ནི་འདོད་ཁམས་མཉམ་པར་མ་བཞག་པའོ། །ཕྱི་ནང་གཉིས་ཀའི་ལུས་ནི་རྟེན་འདོད་པ་མཉམ་པར་བཞག་པ་དེས་གོང་མ་གཉིས་ཀྱི་སེམས་ཐོབ་པའོ། །ཚོར་བ་ལ་སོགས་པའང་དེ་བཞིན་དུ་སྦྱར་རོ། །གསུམ་པ་ནི། རིམ་ནི་ཇི་ལྟར་སྐྱེས་བ་བཞིན། །སྔ་ཕྱིའི་རིམ་པ་ནི། བྱེ་བྲག་ཏུ་སྨྲ་བ་རྣམས་(༢༤༣བ)
ན་རེ། ཇི་ལྟར་སྐྱེ་བའི་རིམ་པ་བཞིན་ཏེ། སྔར་རགས་པར་མཐོང་བའི་ཕྱིར། དེའང་ལུས་རྣམ་ཤེས་དྲུག་གི་ཤེས་བྱ་ཡིན་པས་རགས་ལ། དེ་ནས་ཕྱི་མ་གཉིས་ལས་ཚོར་བ་རྒྱུ་བ་རགས་ལ། དེ་ནས་སེམས་རགས་ཏེ་སོ་སོ་རྣམ་པར་རིག་པའི་རྣམ་པར་མཚོན་སླ་བའི་ཕྱིར་དང་། ཆོས་ནི་ཕྲ་བས་རྣམ་པར་ཤེས་པས་རྟོགས་དཀའ་བའི་ཕྱིར་རོ། །ཡང་ན། འདོད་པ་ལ་འདོད་ཆགས་པའི་རྟེན་ལུས་ཡིན་ལ། འདོད་ཆགས་དེ་ཡང་ཚོར་བ་མངོན་པར་འདོད་པ་ལས་བྱུང་ཞིང་། ཚོར་བ་མངོན་པར་འདོད་པ་དེའང་སེམས་མ་ཞི་བར་གྱུར་པ་དང་། སེམས་མ་ཞི་བས་ཉོན་མོངས་པ་ལ་སོགས་པའི་ཆོས་མ་སྤངས་པས་སོ་ཞེས་ཟེར་རོ། །བཞི་པ་ནི། ཕྱིན་ཅི་ལོག་གི་གཉེན་པོར་བཞི། །ལུས་ནི་ཕྱི་ས་པ་དང་འདྲ་བར་མི་གཙང་བ་དང་། ཚོར་བ་སྡུག་བསྔལ་བ་དང་། སེམས་ནི་མྱུར་དུ་འགྱུར་བས་མི་རྟག་པ་དང་། ཆོས་ནི་རང་དབང་གཅིག་པུའི་བདག་མེད་པས་གཙང་བདེ་རྟག་བདག་ཕྱིན་ཅི་ལོག་བཞི་དག་གི་གཉེན་པོར་དྲན་པ་ཉེར་གཞག་བཞི་གོ་རིམ་བཞིན་བསྟན་ཏེ། མི་མང་མི་ཉུང་བའི་ཕྱིར་རོ། །དེ་དག་ལས་དང་པོ་གསུམ་ནི་མ་འདྲེས་པ་ལ་དམིགས་པ་སྟེ། སོ་སོར་ངེས་པ་ལ་དམིགས་པའི་ཕྱིར། བཞི་པ་ནི། མ་འདྲེས་པ་ལ་དམིགས་པ་དང་། འདྲེས་པ་ལ་དམིགས་པ་ཡིན་ནོ། །དེའང་ཆོས་ཁོ་ན་ལ་ལྟ་བ་ན་མ་འདྲེས་པ་ལ་དམིགས་པ་དང་། ལུས་སོགས་གཉིས་སམ་གསུམ་བཞི་ལ་ཕྱིར་ལྟ་ན་འདྲེས་པ་ལ་དམིགས་པའོ། །གཉིས་པ་བྱེ་བྲག་ཏུ་ཆོས་དྲན་ཉེ་སྒོམ་ཚུལ་ནི། དེ་ནི་ཆོས་དྲན་ཉེར་གཞག་པ། །སྤྱི་ལ་དམིགས་པ་ལ་གནས་ཏེ། །དེ་དག་ལ་ནི་མི་རྟག་དང་། །སྡུག་བསྔལ་སྟོང་བདག་མེད་པར་ལྟ། །དེ་ལྟར་ལུས་སོགས་ལ་དམིགས་པའི་དྲན་པ་ཉེར་གཞག་རྣམས་གོམས་པར་བྱས་ནས་གོམས་པ་དེ་ནི་ཆོས་དྲན་པ་ཉེ་བར་བཞག་པ་སྤྱི་སྟེ་འདྲེས་པ་ལ་དམིགས་པ་ལ་གནས་ཏེ། ལུས་སོགས་དེ་ཐམས་ཅད་སྤྱིར་བསྡུས་ཏེ། དེ་དག་ལ་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་དང་རྣམ་པ་བཞིར་བལྟའོ། །(༢༤༤ན)
གཉིས་པ་སྦྱོར་ལམ་ལ། སྐྱེ་ཚུལ། ངོ་བོ། ཁྱད་ཆོས། སྔོན་འགྲོའོ། །དང་པོ་ལ། དྲོད། རྩེ་མོ། བཟོད་པ། ཆོས་མཆོག ། ཐུན་མོང་གི་ཆོས་སོ། །དང་པོ་ནི། དེ་ལས་དྲོ་བར་གྱུར་པ་འབྱུང་། །དེ་ནི་བདེན་བཞིའི་སྤྱོད་ཡུལ་ཅན། །རྣམ་པ་བཅུ་དྲུག །ཆོས་དྲན་པ་ཉེར་གཞག་གོམས་པ་དེ་ལས་རིམ་གྱིས་དགེ་རྩ་དྲོ་བ་འགྱུར་བ་འབྱུང་ངོ་། །དེའང་གཙུབས་ཤིང་གཙུབས་པ་ལས་མེའི་སྔ་ལྟས་དྲོ་བར་གྱུར་པ་དང་འདྲ་བས་དྲོ་བ་སྟེ། ཤེས་པ་དང་ཤེས་བྱའི་གཙུབས་ཤིང་གཙུབས་པ་ལས་ཉོན་མོངས་པའི་བུད་ཤིང་སྐམ་པོ་སྲེག་པར་བྱེད་པ་འཕགས་ལམ་ཟག་མེད་ཀྱི་སྔ་ལྟས་སམ་མཚན་མ་ཡིན་པའི་ཕྱིར། སྤྱིར་དྲོད་ཆུང་ངུ་། རྩེ་མོ་འབྲིང་། བཟོད་པ་ཆེན་པོ། ཆོས་མཆོག་ཆེན་པོའི་ཡང་ཆེན་པོ། ཡང་དྲོད་དང་རྩེ་མོ་གཡོ་བ་ཆུང་ངུ་། བཟོད་པ་འབྲིང་། ཆོས་མཆོག་ཆེན་པོ། ཡང་ན་དྲོད་དང་རྩེ་མོ་ཆུང་ངུ་། བཟོད་པ་དང་ཆོས་མཆོག་ཆེན་པོ། དྲོད་ནི་དྲོད་དང་འདྲ། རྩེ་མོ་དུ་བ་འཐུལ་བ་དང་འདྲ། བཟོད་པ་དང་དུ་བ་ཆེར་འཐུལ་བ་མེ་སྟག་དང་འདྲ། ཆོས་མཆོག་མེ་དང་འདྲ། ཡང་ན་རེ་རེ་ལའང་ཆེ་འབྲིང་ཆུང་གསུམ་གསུམ། ཆོས་མཆོག་སྐད་ཅིག་མ་ཡིན་པས་གསུམ་མེད། ཁ་ཅིག་ན་རེ། དྲོད་བཟོད་པ་ཆུང་ངུ་། རྩེ་མོ་བཟོད་པ་འབྲིང་། བཟོད་པ་བཟོད་པ་ཆེན་པོ་ཟེར་རོ། །དྲོ་བར་གྱུར་པ་དེ་ནི་བདེན་བཞིའི་སྤྱོད་ཡུལ་ཅན་ཡིན་ཏེ། སྐད་ཅིག་མ་གཅིག་གིས་ཁམས་གོང་འོག་གི་བདེན་པ་ལ་དམིགས་མི་ནུས་པས་རྒྱུན་ཆགས་པ་ཡིན་པའི་ཕྱིར། ཆོས་ཤེས་བཟོད་ཀྱི་སྦྱོར་བ་འདོད་ཁམས་ཀྱི་བདེན་པ་སྤྱིའི་ཚུལ་གྱིས་བཅུ་དྲུག་ཏུ་གོམས་པར་བྱེད། རྗེས་སུ་ཤེས་བཟོད་ཀྱི་སྦྱོར་བ་ཁམས་གོང་མ་གཉིས་ཀྱི་བདེན་པ་བཅུ་དྲུག་ཏུ་གོམས་པར་བྱེད་པས་མཐོང་ལམ་ལ་ཉེ་བའི་སྦྱོར་བ་ཡིན་པས་སྦྱོར་ལམ་མོ། །འོ་ན་ཆོས་མཆོག་གཅིག་པུ་སྦྱོར་ལམ་དུ་མི་འོང་ངམ། དེས་ན་དྲོད་ཡན་ཆོད་མཐོང་ལམ་ལ་ཉེ་(༢༤༤བ)
བས་སྦྱོར་ལམ་དུ་འཇོག་ན། ཚོགས་ལམ་རིང་ཟེར་ན། འོ་ན་དྲོད་ཀྱང་རིང་། དྲོད་ཚོགས་ལམ་ལ་བལྟོས་ན་ཉེ་བས་སྦྱོར་ལམ་ཡིན་ཟེར་ན། འོ་ན་རྩེ་མོ་ཡན་ཆད་སྦྱོར་ལམ་ཡིན། དྲོད་ལ་བལྟོས་ན་ཉེ་བས་སྙམ་ན། དེ་ལྟ་བུ་མགོ་མི་འདྲེ་སྟེ། ཚོགས་ལམ་དང་མི་འདྲ་བར་དྲོད་ཡན་ཆད་མཐོང་ལམ་དང་དམིགས་རྣམ་གཅིག་པས་སྦྱོར་ལམ་དུ་བཞག་གོ། །འདོད་ཁམས་ཀྱི་འགོག་པ་ལ་དམིགས་བྱ་བ་ཇི་ལྟར་བཏུབ། འདོད་ཁམས་ན་འགོག་པ་མེད་པས་སྙམ་ན། དགག་བྱ་ལ་བལྟོས་པ་ཡིན་ཏེ། འདོད་པ་འདིའི་དགག་བྱ་འགོག་པའོ། །འདོད་པའི་ལམ་ནི་ས་དྲུག་ལ་བརྟེན་ལ། ཁམས་གོང་མ་གཉིས་ཀྱི་ལམ་ནི་ས་དགུ་ལ་བརྟེན་པའོ། །དེའི་རྣམ་པ་ནི་བཅུ་དྲུག་སྟེ། སྡུག་བསྔལ་ལ། མི་རྟག་པ། སྡུག་བསྔལ་བ། སྟོང་པ། བདག་མེད་བཞི། ཀུན་འབྱུང་ལ། རྒྱུ། (རྒྱུ་མེད།) ཀུན་འབྱུང་། (མི་མཐུན་པའི་རྒྱུ།) རབ་སྐྱེ། (གྲངས་ཅན་བཞིན་དུ་མངོན་པར་གསལ་བ།) རྐྱེན། (གཡོ་བའི་བློ་དེ་བཞིའི་གཉེན་པོའོ། །)འགོག་པ་ལ། འགོག་པ། (འགོག་པ་མེད་པ།) ཞི་བ། (ཐར་པ་གདུགས་ཕུབ་པ་ལྟ་བུ།) གྱ་ནོམ། (བསམ་གཏན་གྱི་བདེ་བ།) ངེས་འབྱུང་། (ཕྱོགས་གཅིག་ཐར་པ་སྟེ་བཞིའི་གཉེན་པོའོ། །)ལམ་ལ། ལམ། (ལམ་མེད་པ་དང་།) རིགས་པ། (ལམ་ངན་པ་དང་།) སྒྲུབ་པ། (འདི་དང་འདྲ་བ་དང་།) ངེས་འབྱིན་གྱི་རྣམ་པ་བཞི་བཞིར་བལྟ་སྟེ། (ཕྱོགས་གཅིག་འབྱིན་པ་བཞིའི་གཉེན་པོའོ། །)འདིའི་བྱེ་བྲག་འོག་གནས་བདུན་པར་འཆད་དོ། །སྡེ་པ་གཉིས་ཀྱི་ལུགས་ཀྱིས་ཉན་ཐོས་ཀྱི་དྲོད་རྩེ་མོ་ཉམས་པར་འདོད། རང་རྒྱལ་དང་པོ་དེ་མི་ཉམས་པར་འདོད། ཐེག་ཆེན་ནི་རང་རྒྱལ་གྱི་དྲོད་རྩེ་མོ་མི་ཉམས་པར་འདོད། གཞན་ཉམས་པར་འདོད། དྲོད་རྩེ་མོ་བཟོད་པ་ནི་ཤིན་ཏུ་ཡུན་རིང་རྒྱུན་ཅན་ཡིན། ཆོས་མཆོག་ནི་རྒྱུན་མེད་དོ། །གཉིས་པ་ལ། རྩེ་མོ་དངོས་དང་། དྲོད་(༢༤༥ན)
རྩེ་གཉིས་ཀའི་ཐུན་མོང་གི་ཆོས་སོ། །དང་པོ་ནི། དྲོ་བ་ལས། །རྩེ་མོ་དེ་ཡང་དེ་དང་འདྲ། །དྲོ་བ་དེ་ཆུང་འབྲིང་ཆེན་པོར་རིམ་གྱིས་འཕེལ་བ་ལས་རྩེ་མོ་སྐྱེ་སྟེ། རྩེ་མོ་དེ་ཡང་དྲོ་བར་གྱུར་པ་དེ་དང་དམིགས་རྣམ་འདྲ་སྟེ། བདེན་བཞི་ལ་དམིགས་ནས་རྣམ་པ་བཅུ་དྲུག་ཏུ་བལྟ་བའི་ཕྱིར་རོ། །དེ་དང་འདྲ་ན་ལོགས་སུ་ཅིའི་ཕྱིར་བསྟན་ཅེ་ན། ཆོས་མཆོག་ཏུ་གྱུར་པའི་ཕྱིར་མིང་གཞན་དུ་བཏགས་སོ། །དགེ་བའི་རྩ་བ་གཡོ་ཞིང་ཉམས་པ་སྲིད་པ་རྣམས་ཀྱི་རྩེ་མོའམ་རབ་ཀྱི་མཐར་ཕྱིན་པའི་ཕྱིར། དེ་ལས་ཉམས་ནས་ལྟུང་བའམ་འདས་ཏེ་བཟོད་པ་མངོན་དུ་འགྱུར་ཏེ། དཔེར་ན། བྱ་ཤིང་རྩེར་ཕྱིན་པ་དེ་མན་མར་ལྟུང་། ཡན་ཡར་འཕུར། ས་གཅིག་ཏུ་མི་སྡོད་པ་བཞིན་ནོ། །གཉིས་པ་ནི། གཉིས་ཀ་ཆོས་ཀྱིས་རྣམ་པ་གཏོད། །གཞན་དག་གིས་ཀྱང་འཕེལ་བར་བྱེད། །དྲོད་དང་རྩེ་མོ་གཉིས་ཀ་ཆོས་དྲན་པ་ཉེ་བར་བཞག་པས་དང་པོ་ཉིད་དུ་བདེན་པ་དག་ལ་རྣམ་པ་གཏོད་ཅིང་འཇུག་པར་བྱེད་དོ། །ཆོས་དྲན་པ་ཉེར་གཞག་ལས་གཞན་པ་དག་གིས་ཀྱང་སྟེ། དྲན་པ་ཉེར་གཞག་བཞི་ཅར་གྱིས་འཕེལ་ཞིང་གོམས་པ་བྱང་བར་བྱེད་དོ། །རྣམ་པར་འཕེལ་བར་བྱེད་པའི་རྣལ་འབྱོར་པས་ནི་འཕེལ་བ་ཁྱད་པར་དུ་གྱུར་པ་རྣམས་མངོན་དུ་བྱེད་ལ། ཁྱད་པར་ཅན་མ་ཡིན་པ་སྔོན་ཐོབ་པ་རྣམས་མངོན་དུ་མི་བྱེད་དེ། དེ་དམན་པས་དགའ་བ་ཆེན་པོ་མེད་པའི་ཕྱིར། གསུམ་པ་བཟོད་པའི་སྐྱེ་ཚུལ་ལ། དངོས་དང་། བཟོད་པ་ཆེན་པོའི་ཁྱད་པར་བྱེ་བྲག་ཏུ་བཤད་པའོ། །དང་པོ་ནི། དེ་ལས་བཟོད་པ་གཉིས་དེ་བཞིན། །རྣམ་གཉིས་དེ་བཞིན་བཟོད་པ་ནི། །ཐམས་ཅད་ཆོས་ཀྱིས་འཕེལ་བར་བྱེད། །རྩེ་མོ་དེ་ཆུང་འབྲིང་ཆེན་པོའི་རིམ་གྱིས་འཕེལ་བ་དག་ལས་བཟོད་པའང་སྐྱེ་སྟེ། དྲོད་རྩེར་ཉམས་ལ་བཟོད་པ་ཆུང་འབྲིང་དུ་གྱུར་ཅིང་། དེའི་ཚེ་དེ་ལས་ཡོངས་སུ་མི་ཉམས་པའི་སྒོ་ནས་བདེན་པ་ལ་ཆེར་བཟོད་པའི་ཕྱིར། བཟོད་པ་དེའང་ཆུང་འབྲིང་ཆེན་པོ་གསུམ་མོ། །དེ་ལ་བཟོད་པ་ཆུང་འབྲིང་རྣམ་གཉིས་རྩེ་མོ་དེ་བཞིན་དུ་ཆོས་དྲན་པ་ཉེར་གཞག་གི་བདེན་(༢༤༥བ)
པ་རྣམས་ལ་རྣམ་པ་གཏོད་ཅིང་འགོད་པར་བྱེད་དོ། །འཕེལ་བྱེད་ལ་ནི་ཁྱད་ཡོད་དེ། བཟོད་པ་ཆུང་འབྲིང་ཆེན་པོ་ཐམས་ཅད་ཆོས་དྲན་ཉེ་ཉིད་ཀྱིས་འཕེལ་བར་བྱེད་དེ། ལུས་དྲན་ཉེ་སོགས་ཀྱིས་མ་ཡིན་ཏེ། དེ་ནི་ཆོས་མཆོག་དང་ཉེ་ཞིང་ཆོས་མཆོག་མཐོང་ལམ་དང་ཉེ་ལ། མཐོང་ལམ་ཆོས་དྲན་ཉེའི་ངོ་བོ་ཡིན་པར་བསྟན་པར་འདྲ་བའི་ཕྱིར། གཉིས་པ་ནི། ཆེན་པོ་འདོད་གཏོགས་སྡུག་བསྔལ་ཡུལ། །དེ་ནི་སྐད་ཅིག་གཅིག །བཟོད་པ་ཆེན་པོ་ནི་འདོད་པར་གཏོགས་པའི་སྡུག་བསྔལ་གྱི་ཡུལ་ཅན་ཏེ། འདོད་པའི་སྡུག་བསྔལ་ལ་དམིགས་པའི་ཆོས་མཆོག་དང་ཉེ་བའི་ཕྱིར། དྲོད་སོགས་ཀྱི་དམིགས་པ་ཆོས་ཅན། ཁམས་གསུམ་གྱི་བདེན་བཞི་ལ་དམིགས་པར་གྲུབ་སྟེ། བཟོད་ཆེན་བཞིན་དུ་དམིགས་པ་སོ་སོར་ངེས་པ་མ་སྨོས་པའི་ཕྱིར། གང་གི་ཚེ་གཟུགས་དང་གཟུགས་མེད་ཀྱི་ཚེ་གཉེན་པོ་ལམ་དང་། འགོག་པ་དང་། ཀུན་ཏུ་འབྱུང་བ་དང་། སྡུག་བསྔལ་དང་། སོགས་པས་འདོད་པའི་གཉེན་པོའི་བདེན་པའི་རྣམ་པ་དང་དམིགས་པ་རེ་རེ་འཕྲི་བ་ནས་བཟུང་སྟེ། འདོད་པའི་སྡུག་བསྔལ་ཁོ་ན་ལ་མི་རྟག་པ་དང་སྡུག་བསྔལ་པའི་རྣམ་པ་ཅན་སྐད་ཅིག་གཉིས་སུ་ཡིད་ལ་བྱེད་པའི་བར་དེ་ཐམས་ཅད་ནི་བཟོད་པ་འབྲིང་ཡིན་ནོ། །དེ་ལ་བཟོད་པ་ཆུང་ངུ་ནི་འདོད་པའི་བདེན་པ་བཞི་ལ་རྣམ་པ་བཅུ་དྲུག་དང་། ཁམས་གོང་མ་གཉིས་དྲིལ་བའི་བདེན་བཞི་ལ་རྣམ་པ་བཅུ་དྲུག་སྟེ། སྐད་ཅིག་སོ་གཉིས་ཚང་བར་སྒོམ་པ་ཡིན་ལ། བཟོད་འབྲིང་གི་སྐབས་འདིར་ཊཱི་ཀའི་དགོངས་པ་འགྲེལ་ཚུལ་གཉིས་བྱུང་བས་དང་པོ་ནི། ཊཱི་ཀར་བདེན་པའི་རྣམ་པ་དང་དམིགས་པ་རེ་རེ་ནས་ཞེས་པས། རྣམ་པ་རེ་རེར་དབྲི་བ་སྔོན་དུ་བཏང་ནས་དམིགས་པའང་དོར་ནས་སྒོམ་པ་ཡིན་ཅེས་པ་དང་། གཉིས་པས་ནི། ཊཱི་ཀར་བདེན་པའི་རྣམ་པ་དང་དམིགས་པ་རེ་རེ་ནས་ཞེས་པས། (༢༤༦ན)
དམིགས་པ་ཡོད་བཞིན་དུ་རྣམ་པ་འདོར་མི་རུང་བས། དམིགས་རྣམ་དུས་མཉམ་དུ་འཕྲི་ནས་ལྷག་མ་བསྒོམ་པའོ་ཞེས་འདོད་དོ། །དེའི་དང་པོའི་ལུགས་ལ། ཁམས་གོང་འོག་གི་བདེན་པའི་རྣམ་པ་སོ་གཉིས་ལས། ཁམས་གོང་གི་ལམ་གྱི་རྣམ་པ་ངེས་འབྱིན་འཕྲི་ནས་སུམ་ཅུ་སོ་གཅིགདེ་ནས་སྒྲུབ་པ་འཕྲི་ནས་སུམ་ཅུ། རིགས་པ་འཕྲི་ནས་ཉེར་དགུ། ལམ་འཕྲི་ནས་ཉེར་བརྒྱད། དེ་ནས་འདོད་པའི་ལམ་གྱིས་ངེས་འབྱིན་འཕྲི་ནས་ཉེར་བདུན། སྒྲུབ་པ་འཕྲི་ནས་ཉེར་དྲུགརིགས་པ་འཕྲི་ནས་ཉེར་ལྔ། ལམ་འཕྲི་ནས་ཉེར་བཞི་རེ་བསྒོམ། དེ་ནས་ཁམས་གོང་གིས་འགོག་པའི་ངེས་འབྱུང་འཕྲི་ནས་ཉེར་གསུམ་རེ་བསྒོམ། གྱ་ནོམ་འཕྲི་ནས་རྩ་གཉིས། ཞི་བ་འཕྲི་ནས་རྩ་གཅིགའགོག་པ་འཕྲི་ནས་ཉི་ཤུ། དེ་ནས་འདོད་པའི་ངེས་འབྱུང་འཕྲི་ནས་བཅུ་དགུ། གྱ་ནོམ་འཕྲི་ནས་བཅོ་བརྒྱད། ཞི་བ་འཕྲི་ནས་བཅུ་བདུན། འགོག་པ་འཕྲི་ནས་བཅུ་དྲུགདེ་ནས་ཁམས་གོང་གི་རྐྱེན་འཕྲི་ནས་བཅོ་ལྔ། རབ་སྐྱེ་འཕྲི་ནས་བཅུ་བཞི། ཀུན་འབྱུང་འཕྲི་ནས་བཅུ་གསུམ། རྒྱུ་འཕྲི་ནས་བཅུ་གཉིས། དེ་ནས་འདོད་པའི་རྐྱེན་འཕྲི་ནས་བཅུ་གཅིགརབ་སྐྱེ་འཕྲི་ནས་བཅུ། ཀུན་འབྱུང་འཕྲི་ནས་དགུ། རྒྱུ་འཕྲི་ནས་བརྒྱད། དེ་ནས་ཁམས་གོང་གི་སྡུག་བསྔལ་གྱི་བདག་མེད་འཕྲི་ནས་བདུན། སྟོང་པ་འཕྲི་ནས་དྲུགསྡུག་བསྔལ་བ་འཕྲི་ནས་ལྔ། མི་རྟག་པ་འཕྲི་ནས་བཞི། དེ་ནས་འདོད་པའི་བདག་མེད་པ་འཕྲི་ནས་གསུམ། སྟོང་པ་འཕྲི་ནས་གཉིས་ཏེ་བཞི་བརྒྱ་དང་གོ་ལྔ། དེའི་ཁར་འོག་ནས་འབྱུང་བའི་གང་ཟག་བཞིའི་གཉེན་པོའི་དབང་གིས་སྡུག་བདེན་གྱི་རྣམ་པ་བཞི་ལས་གང་རུང་གཅིག་ལན་གཉིས་སུ་བཟླས་ཏེ་བསྒོམས་པས་བཟོད་པ་འབྲིང་ནི་སྐད་ཅིག་བཞི་བརྒྱ་དང་གོ་བདུན་ནོ་ཞེས་འདོད་དོ། །(༢༤༦བ)
གཉིས་པའི་ལུགས་ལ་བཏགས་པ་ལས་སྐད་ཅིག་ལ་བརྒྱ་རྩ་བཅུ་དགུར་བཤད་པ་དང་འགལ་བས་འདི་ལྟར་ཤེས་པར་བྱ་སྟེ། རྣམ་པ་སོ་གཉིས་ལས། ཁམས་གོང་མ་གཉིས་ཀྱི་ལམ་གྱི་རྣམ་པ་བཞི་འཕྲི་ནས་ཉེར་བརྒྱད་བསྒོམ། དེ་ནས་འདོད་པའི་ལམ་གྱི་བཞི་འཕྲི་ནས་རྩ་བཞིར་བསྒོམ། དེ་ནས་ཁམས་གོང་གི་འགོག་པའི་རྣམ་པ་བཞི་འཕྲི་ནས་ཉི་ཤུར་བསྒོམ། དེ་ནས་འདོད་པའི་འགོག་པའི་རྣམ་པ་བཞི་འཕྲི་ནས་བཅུ་དྲུག་བསྒོམ། དེ་ནས་ཁམས་གོང་མའི་ཀུན་འབྱུང་གི་རྣམ་པ་བཞི་འཕྲི་ནས་བཅུ་གཉིས་སུ་བསྒོམ། དེ་ནས་འདོད་པའི་ཀུན་འབྱུང་གི་རྣམ་པ་བཞི་འཕྲི་ནས་བརྒྱད་དུ་བསྒོམ། དེ་ནས་ཁམས་གོང་མའི་སྡུག་བསྔལ་གྱི་རྣམ་པ་བཞི་འཕྲི་ནས་བཞིར་བསྒོམ། དེ་རྣམས་ལ་བརྒྱ་དང་བཅུ་གཉིས་ཡོད་པའི་ཐོག་ཏུ་ལྟ་བས་སྤྱོད་པའི་གང་ཟག་ཡིན་ན། མི་རྟག་པ་དང་སྡུག་བསྔལ་གཉིས་གང་རུང་གཅིག་སྟོང་པ་དང་བདག་མེད་གཉིས་ཏེ་གསུམ་བསྒོམས་པས་བརྒྱ་དང་བཅོ་ལྔ། དེ་ནས་གང་རུང་དེ་བཞག་པས་སྟོང་པ་དང་བདག་མེད་གཉིས་བསྒོམས་པས་བརྒྱ་དང་བཅུ་བདུན། དེ་ནས་བདག་ཏུ་འཛིན་པ་ཤས་ཆེ་ན་བདག་མེད་བསྒོམས་པས་བརྒྱ་དང་བཅོ་བརྒྱད། དེ་ཀ་ལ་བསྐྱར་ནས་ཡང་གཅིག་བསྒོམས་པས་བརྒྱ་དང་བཅུ་དགུའོ། །བདག་གིར་འཛིན་པ་ཤས་ཆེ་ན་སྟོང་པ་བསྒོམ་སྟེ་བརྒྱ་དང་བཅོ་བརྒྱད། སྟོང་བ་དེ་ཀ་བསྐྱར་ནས་བསྒོམས་པས་བརྒྱ་དང་བཅུ་དགུ། སྲེད་པས་སྤྱོད་པ་གཅིག་ཡིན་ན་སྟོང་པ་དང་བདག་མེད་གང་རུང་གཅིག་མི་རྟག་པ་དང་སྡུག་བསྔལ་གཉིས་ཏེ་གསུམ་བསྣན་པས་བརྒྱ་དང་བཅོ་ལྔ། དེ་ནས་སྟོང་པ་དང་བདག་མེད་གང་རུང་དེ་བོར་བས་མི་རྟག་པ་དང་སྡུག་བསྔལ་གཉིས་ཏེ་བརྒྱ་དང་བཅུ་བདུན། དེ་ཡང་མངོན་པའི་ང་རྒྱལ་གྱིས་ཉམས་པ་གཅིག་ཡིན་ན་མི་རྟག་པ་གཅིག་པུ་བསྒོམ་སྟེ་བརྒྱ་དང་བཅོ་(༢༤༧ན)
བརྒྱད། མི་རྟག་པ་དེ་ཀ་བསྐྱར་ནས་བསྒོམས་པས་བརྒྱ་དང་བཅུ་དགུ། ལེ་ལོས་ཉམས་པ་གཅིག་ཡིན་ན་སྡུག་བསྔལ་གཅིག་པུ་བསྒོམ་སྟེ་བརྒྱ་དང་བཅོ་བརྒྱད། སྡུག་བསྔལ་དེ་སླར་བསྐྱར་ནས་བསྒོམས་པས་བརྒྱ་དང་བཅུ་དགུའོ། །དེས་ན་ཆེ་འབྲིང་ཡུན་མི་མཚུངས་ཏེ། འབྲིང་ནི་ཡེ་ཤེས་ཐ་མའང་སྐད་ཅིག་མ་གཉིས་པ་ཡིན་པས་རྒྱུན་ལྡན་ཡིན་ལ། བཟོད་པ་ཆེན་པོ་དེ་ནི་སྐད་ཅིག་གཅིག་ཡིན་གྱི་རྒྱུན་ལྡན་ནི་མ་ཡིན་ནོ། །འདིར་སྨྲས་པ། ནང་གི་རྩོད་པ་མ་ལུས་དྲུངས་ཕྱུང་སྟེ། །ཕྱི་རོལ་རིགས་པ་མིན་པའི་རྩོད་པ་ལ། །ཕྱོགས་ལས་རྣམ་པར་རྒྱལ་བའི་ལེགས་བཤད་འདི། །སྨྲ་ལ་འཇིགས་པའི་གོ་སྐབས་ག་ལ་ཡོད། །བཞི་པ་ཆོས་མཆོག་ནི། དེ་བཞིན། །ཆོས་མཆོག །བཟོད་པ་ཆེན་པོ་དེ་བཞིན་དུ་ཆོས་མཆོག་ཀྱང་འདོད་པའི་སྡུག་བསྔལ་ལ་དམིགས་པ་དང་སྐད་ཅིག་མ་གཅིག་ཡིན་ནོ། །(ཐེག་པ་ཆེན་པོ་དག་གིས་ནི། བཟོད་ཆེན་སྐད་ཅིག་མ་གཅིག་དང་། ཆོས་མཆོག་ལ་ཆུང་འབྲིང་གི་དབྱེ་བ་མེད་པ་སོགས་རྟོག་བཏགས་སུ་བཞེད་དོ། །སློབ་དཔོན་སེང་བཟང་སོགས་ཀྱིས་ཉན་ཐོས་རང་དོན་བྱེད་པ་དང་། བྱང་ཆུབ་སེམས་དཔའ་གཞན་དོན་བྱེད་པའི་དབང་དུ་བྱས་ནས་ལུགས་འདིར་བཟོད་ཆེན་དང་ཆོས་མཆོག་སྐད་ཅིག་མ་རེ་དང་། གཞུང་གཞན་དུ་བཟོད་ཆེན་སྐད་ཅིག་མང་པོ་དང་། ཆོས་མཆོག་ལའང་ཆུང་འབྲིང་གི་དབྱེ་བ་བྱས་པར་བཤད་དོ། །མཆན།)དེ་དག་འཇིག་རྟེན་པའང་ཡིན་ལ། འཇིག་རྟེན་པའི་མཆོག་ཀྱང་ཡིན་ཏེ། འཇིག་རྟེན་པ་ཐམས་ཅད་ཀྱི་མཆོག་ཏུ་གྱུར་པའི་ཕྱིར། གྲུབ་སྟེ། དེ་ནི་སྔོན་ཟག་མེད་མེད་པས་སྐལ་མཉམ་གྱི་རྒྱུ་མེད་པས་དེའི་རྩལ་གྱིས་ཟག་མེད་ཀྱི་ལམ་འདྲེན་པར་བྱེད་པའི་ཕྱིར། དྲོད་སོགས་དེ་དག་ནི་ཤེས་རབ་ཀྱི་རང་བཞིན་ཏེ། དྲན་པ་ཉེར་གཞག་གི་རང་བཞིན་ཡིན་པའི་ཕྱིར། ལྔ་པ་བཞི་ཀའི་ཐུན་མོང་གི་ཆོས་ནི། ཐམས་ཅད་ཕུང་པོ་ལྔ། །ཐོབ་པ་མ་གཏོགས་དེ་ལྟར་ན། །ངེས་འབྱེད་ཆ་མཐུན་རྣམ་པ་བཞི། །དྲོད་སོགས་ཐམས་ཅད་མཉམ་གཞག་གི་ས་པ་ཡིན་པས་རྣམ་(༢༤༧བ)
རིག་མིན་པའི་གཟུགས་ཀྱི་ཕུང་པོ་ཡོད་པས་ཕུང་པོ་ལྔ་པ་སྟེ། འཁོར་དང་བཅས་ཏེ་སྨོས་པའི་ཕྱིར། དྲོད་སོགས་ཀྱི་ཐོབ་པ་ནི་དྲོད་སོགས་ལ་མ་གཏོགས་ཏེ། ངེས་འབྱེད་སྐྱེས་པ་ན་ཐོབ་པ་མངོན་དུ་གྱུར་པས་དྲོད་སོགས་ཀྱང་མངོན་འགྱུར་དུ་འོང་བ་ལས་དེ་ལྟ་བུའང་མ་ཡིན་པའི་ཕྱིར་ཏེ། སངས་རྒྱས་ཐོབ་པ་ནི་སྦྱོར་ལམ་མངོན་དུའང་བྱེད་མི་རིགས་ཏེ། དོན་བྱས་ཟིན་པས་དགོས་པ་མེད་པའི་ཕྱིར། གླང་ཆེན་རྙེད་ནས་གླང་པོའི་རྗེས་འཚོལ་བ་བཞིན་ནོ། །སྡུག་ཀུན་ལམ་གསུམ་ལ་དམིགས་པའི་དྲོ་བར་གྱུར་པ་རྣམ་པ་གཏོད་པའི་ཐོབ་པ་ནི། ཆོས་དྲན་ཉེ་ད་ལྟར་བྱུང་བ་ཡིན་ཏེ། དང་པོ་འབད་པས་བསྐྱེད་པའི་རྣམ་པ་གཏོད་པ་ནི་སྤྱི་ལ་དམིགས་པ་ཉིད་ཀྱིས་ཆོས་དྲན་ཉེ་ཁོ་ནས་གཏོད་པར་ནུས་པའི་ཕྱིར། ལུས་དྲན་ཉེ་སོགས་ཀྱིས་མི་ནུས་ཏེ། སོ་སོར་ངེས་པ་ལ་མིགས་པའི་ཕྱིར། དེ་གསུམ་ལ་ནི་དམིགས་པའི་དྲོར་གྱུར་གྱི་རྣམ་པ་གཏོད་པའི་ཐོབ་པ་མ་འོངས་པ་ནི་དྲན་པ་ཉེར་གཞག་བཞི་ཅར་གྱིས་ཐོབ་པ་ཡིན་ཏེ། ལུས་ཚོར་སོགས་སྡུག་བདེན་གྱིས་བསྡུས་ཏེ་ལུས་དྲན་ཉེ་སྔར་ཡང་ཐོབ་ལ། ཐོབ་པ་སྐྱེ་བའི་ཕྱིར། འགོག་པའི་བདེན་པ་ལ་དམིགས་པ་དྲོ་བར་གྱུར་པ་རྣམ་པ་གཏོད་པ་ལ་ནི་ཆོས་དྲན་པ་ཉེར་གཞག་ད་ལྟར་བྱུང་བ་ཡིན་ཅིང་། དེ་ཁོ་ན་མ་འོངས་པ་ཐོབ་ཀྱི། ལུས་དྲན་ཉེ་སོགས་མ་ཡིན་ཏེ། འགོག་བདེན་ལ་ལུས་ཚོར་སེམས་པ་མེད་པའི་ཕྱིར། དྲོད་ཀྱི་གཏོད་པ་བདེན་པ་བཞིའི་རྣམ་པའི་ཐོབ་པའང་རྣམ་པ་འདྲ་བ་ཐམས་ཅད་དུ་མ་འོངས་པ་ཉིད་ཐོབ་སྟེ། རང་རང་གི་བདེན་པའི་རྣམ་པ་བཞི་བཞི་ཡིན་ནོ། །དྲོད་ཀྱི་རྣམ་པར་འཕེལ་བའི་ཐོབ་པ་ལས། བདེན་པ་གསུམ་ལ་དམིགས་པའི་འཕེལ་བའི་ཐོབ་པ་ནི། དྲན་ཉེ་སོགས་བཞི་ལས་གང་རུང་ཞིག་ད་ལྟར་བྱུང་བ་ཡིན། མ་འོངས་པ་ནི་དྲན་ཉེ་བཞི་ཅར་གྱིས་ཡིན། དྲོད་ཀྱི་འགོག་པ་ལ་དམིགས་པ་འཕེལ་བའི་ཐོབ་(༢༤༨ན)
པ་དེ་ཁོ་ན་ལ་ནི་ཆོས་དྲན་ཉེ་ད་ལྟར་བྱུང་བ་ཡིན་ཏེ། དེ་ལ་ལུས་སོགས་མེད་པའི་ཕྱིར་རོ། །མ་འོངས་པ་ནི་བཞི་ཅར་ཐོབ་སྟེ། དེ་དག་གི་ཐོབ་པ་སྐྱེས་ཟིན་པའི་ཕྱིར་དང་། གཏོད་པའི་དུས་སུ་འགོག་པ་ལུས་ཚོར་སེམས་ཀྱི་ཐོབ་པ་མེད་ཀྱང་། འཕེལ་བའི་དུས་སུ་རྒྱུ་ཡོངས་སུ་སྦྱོང་བའི་སྒོ་ནས་བདེན་པ་གཞན་ལ་ཡོད་པའི་ལུས་ཚོར་སེམས་ཀྱི་དྲན་པ་ཐོབ་པའི་ཕྱིར་རོ། །དྲོད་ཀྱི་འཕེལ་བའི་བདེན་བཞིའི་རྣམ་པའི་ཐོབ་པ་ནི་རྣམ་པ་བཅུ་དྲུག་པོ་ཐམས་ཅད་ཀྱིས་ཐོབ་སྟེ། སྔར་རྣམ་པ་གཏོད་པའི་གནས་སྐབས་ཀྱི་རིམ་པས་རིགས་རྣམས་ཐོབ་ཟིན་པའི་ཕྱིར། རྩེ་མོའི་བདེན་བཞི་ལ་རྣམ་པ་གཏོད་བྱེད་ལ་ནི་ཆོས་དྲན་ཉེ་ད་ལྟ་བས་ཡིན་ཏེ། ལུས་དྲན་ཉེ་སོགས་ཀྱི་རྣམ་པ་གཏོད་མི་ནུས་པའི་ཕྱིར། འགོག་པ་ལ་དམིགས་པ་འཕེལ་བ་དེ་དང་འདྲ་སྟེ། གཞན་མ་ཡིན་པའི་ཕྱིར་མ་འོངས་པ་ལ་ནི་བཞི་ཅར་ཐོབ་སྟེ། དེ་དག་གི་ཐོབ་པ་སྐྱེས་ཟིན་པའི་ཕྱིར། རྣམ་པ་ནི་ཐམས་ཅད་ཐོབ་སྟེ། དྲོ་བར་གྱུར་པའི་རྣམ་པ་གཏོད་པའི་ཚེ་དེའི་རིགས་རྣམ་ཐོབ་པའི་ཕྱིར། རྩེ་མོའི་སྡུག་ཀུན་ལམ་གསུམ་ལ་དམིགས་པ་རྣམ་པར་འཕེལ་བ་ལ་ནི་བཞི་ལས་གང་རུང་ཞིག་ད་ལྟར་བྱུང་བ་ཡིན་ལ། ཐམས་ཅད་དུའང་མ་འོངས་པ་ནི་བཞི་ཆར་རོ། །དེ་དག་གི་རིགས་ཐོབ་ཟིན་པས་རྣམ་པ་ནི་ཐམས་ཅད་དོ། །བཟོད་པ་ནི་གཏོད་འཕེལ་གཉིས་ཀའང་ཆོས་དྲན་ཉེ་ད་ལྟར་བྱུང་བ་ཡིན་ཏེ། བཟོད་པ་ནི་ཐམས་ཅད་ཆོས་ཀྱིས་འཕེལ་བར་བྱེད་ཅེས་འབྱུང་བའི་ཕྱིར། མ་འོངས་པ་ནི་བཞི་ཅར་རོ། །རྣམ་པ་ནི་ཐམས་ཅད་དོ། །ཆོས་མཆོག་མངོན་དུ་བྱེད་པ་ལ་ནི་དྲན་པ་ཉེར་གཞག་ཐ་མ་ད་ལྟར་བྱུང་བ་ཡིན་ལ། མ་འོངས་པ་ནི་མི་སྐྱེ་བའི་ཆོས་ཅན་བཞི་ཅར་ཐོབ་པ་ཡིན་ནོ། །རྣམ་པ་ནི་སྡུག་བདེན་གྱི་རྣམ་པ་བཞི་ཁོ་ན་སྟེ། (༢༤༨བ)
སྡུག་བསྔལ་ཙམ་ལ་དམིགས་ཀྱི་ཀུན་འབྱུང་ལ་སོགས་པའི་རྣམ་པ་གཞན་མེད་པའི་ཕྱིར་དང་། མཐོང་ལམ་ནི་བདེན་པ་གང་མཐོང་བ་དེའི་རྣམ་པ་ཐོབ་ལ། མཐོང་ལམ་དང་པོར་འདོད་པའི་སྡུག་བསྔལ་ལ་དམིགས་པས་མཐོང་ལམ་དང་ཉེ་ཞིང་། ས་གཅིག་པ་དང་སོ་སོ་སྐྱེ་བོའི་གཉེན་པོར་འདྲ་བའི་ཕྱིར་རོ། །དེ་ལྟར་ན་དྲོད་རྩེ་བཟོད་མཆོག་རྣམས་ཏེ་ངེས་འབྱེད་ཆ་མཐུན་རྣམ་པ་བཞིའོ། །དེ་ལས་དྲོད་རྩེ་གཉིས་ནི་ཉམས་པའི་སྒོ་ནས་གཡོ་བའི་ཕྱིར་ཆུང་ངུ་དག་གོ། །བཟོད་པ་ནི་འབྲིང་ཡིན་ནོ། །ཆོས་ཀྱི་མཆོག་རྣམས་ནི་ཆེན་པོ་ཡིན་ནོ། །ངེས་པར་འབྱེད་པས་ན་ངེས་འབྱེད་འཕགས་པའི་ལམ་མོ། །ཇི་ལྟར་ངེས་པར་འབྱེད་པ་ནི། དེས་ཐེ་ཚོམ་སྤོང་བའི་ཕྱིར་རོ། །བདེན་པ་རྣམས་ལ་འདི་ནི་སྡུག་བསྔལ་ལོ་ཞེས་པ་ནས་འདི་ནི་ལམ་མོ་ཞེས་པའི་བར་དུ་རྣམ་པར་འབྱེད་པའི་ཕྱིར་རོ། །དེའི་ཆ་ནི་མཐོང་ལམ་གྱི་ཕྱོགས་གཅིག་སྟེ། སྔ་མ་གསུམ་བརྒྱུད་ནས་དང་། བཞི་པས་དངོས་སུ་དེ་དག་འདྲེན་པར་བྱེད་པས་ཕན་འདོགས་པའི་ཕྱིར་ངེས་པར་འབྱེད་པའི་ཆ་དང་མཐུན་པ་ཡིན་ནོ། །གཉིས་པ་ངོ་བོ་ནི། བསྒོམས་བྱུང་། ངེས་འབྱེད་ཆ་མཐུན་འདི་བཞི་ཅར་ཡང་སྒོམ་བྱུང་ཡིན་གྱི་ཐོས་བསམ་ལས་བྱུང་བ་ནི་མ་ཡིན་ནོ། །གསུམ་པ་ཁྱད་ཆོས་ལ། སའི་ཁྱད་པར། རྟེན་གྱི་ཁྱད་པར། གཏོང་ཚུལ་གྱི་ཁྱད་པར། ཡོན་ཏན་གྱི་ཁྱད་པར། རིགས་ཀྱི་ཁྱད་པར་རོ། །དང་པོ་ནི། མི་ལྕོགས་མེད་པ་དང་། །ཁྱད་པར་བསམ་གཏན་ས་པའོ། །གཉིས་ནི་འོག་ནའང་ཡོད་པའམ། །འདི་ཡི་ས་ནི་མི་ལྕོགས་པ་མེད་པ་དང་། བསམ་གཏན་ཁྱད་པར་ཅན་དང་བསམ་གཏན་དངོས་གཞི་སྟེ། དྲུག་པོ་དེ་དག་གིས་བསྡུས་པའི་ཕྱིར། གོང་གཟུགས་མེད་ན་ངེས་འབྱེད་ཆ་མཐུན་མེད་དེ། ངེས་འབྱེད་ནི་མཐོང་ལམ་གྱི་སྦྱོར་བ་ཡིན་པ་གང་ཞིགདེར་མཐོང་ལམ་གྱི་སྦྱོར་བ་མེད་པའི་ཕྱིར། དེར་མཐོང་(༢༤༩ན)
ལམ་མེད་པ་ནི་མཐོང་ལམ་དེ་འདོད་ཁམས་ལ་དམིགས་ལ། གཟུགས་མེད་ཀྱི་འདོད་ཁམས་དེ་ཡང་སྡུག་བསྔལ་གྱི་ངོ་བོ་ནི་གཟུགས་དང་གཟུགས་མེད་ཀྱི་སྔར་ཤེས་བྱ་ཡིན་ཅིང་། ཀུན་འབྱུང་གི་ངོ་བོ་ནི་སྤང་བྱ་ཡིན་པའི་ཕྱིར། ངེས་འབྱེད་ཆ་མཐུན་དེ་དག་གཟུགས་ན་སྤྱོད་པ་ཡིན་པས་རྣལ་འབྱོར་པ་དེ་གཟུགས་ཁམས་སུ་སྐྱེས་པ་ཡིན་ན་དེའི་རྣམ་པར་སྨིན་པ་དེར་ཕུང་པོ་ལྔ་འགྲུབ་པར་འགྱུར་རོ། །ངེས་འབྱེད་ཆ་མཐུན་དེ་རྣམས་སྔར་རིས་མཐུན་འཕེན་པའི་ལས་ཤིག་ཡོད་ན་དེའི་རོགས་བྱས་ནས་ཡིད་དུ་འོང་བའི་མྱོང་འགྱུར་ཁོ་ན་རྫོགས་པར་བྱེད་ཀྱི། རིས་མཐུན་འཕེན་བྱེད་ནི་མ་ཡིན་ཏེ། མི་རྟག་པ་ལ་སོགས་པའི་རྣམ་པར་སུན་འབྱིན་པས་སྲིད་པའི་གཉེན་པོ་ཡིན་པའི་ཕྱིར། བཙུན་པ་དབྱངས་སྒྲོགས་ཀྱི་ལུགས་ལྟར་ན། དྲོད་རྩེ་གཉིས་ནི་འོག་འདོད་ཁམས་ནའང་ཡོད་པའམ་གྱི་སྒྲས་ལུགས་ཐ་དད་སྟོན་ཏེ། དེ་གཉིས་ས་བདུན་པ་སྟེ་བསམ་གཏན་ས་དྲུག་དང་འདོད་པར་ཡོད་པས་སོ། །དེ་ལྟར་ན་འདོད་པའི་ས་ལ་བརྟེན་ནས་སྒོམ་བྱུང་དུ་ནི་འགྲོ་བ་མ་ཡིན་ནོ། །གཉིས་པ་ནི། འདོད་རྟེན་ཆོས་མཆོག་བུད་མེད་ཀྱིས། །གཉིས་ཀའི་རྟེན་ཅན་འཐོབ་པར་འགྱུར། །བཞི་པོ་དེ་དག་ཀུན་ཀྱང་འདོད་པའི་རྟེན་ཅན་དང་། བཟོད་པ་ཆེན་པོ་དང་ཆོས་མཆོག་མ་གཏོགས་པ་གསུམ་ནི་མི་དག་གི་ནང་ཁོ་ན་དང་གླིང་གསུམ་དུ་བསྐྱེད་དེ། སྒྲ་མི་སྙན་པ་དང་དབང་པོ་བརྟུལ་བ་དང་མངོན་རྟོགས་མེད་པའི་ཕྱིར། ངེས་འབྱེད་ཆ་མཐུན་སྔོན་བསྐྱེད་པ་རྣམས་ནི་འདོད་པའི་ལྷའི་ནང་དུའང་མངོན་པར་བྱེད་དོ། །སྔར་དྲོད་མིའི་ནང་དུ་བསྐྱེད་ནས་དྲོད་དེ་མངོན་དུ་ལྷའི་ནང་དུ་བྱེད་པའི་རྗེས་ཀ་ལ་ལྷའི་ནང་དུ་རྩེ་མོ་བསྐྱེད་དམ་སྙམ་ན། སྔར་མིའི་ནང་དུ་རྩེ་མོ་བསྐྱེད་ན་དེའི་རྗེས་སུ་ལྷའི་ནང་དུ་རྩེ་མོ་བསྐྱེད་ཀྱི། སྔར་མིའི་ནང་དུ་རྩེ་མོ་མ་བསྐྱེད་ན་ལྷའི་ནང་དུ་རྩེ་མོ་མི་བསྐྱེད་(༢༤༩བ)
པས་མར་ལོག་ནས་མིའི་ནང་དུ་བསྐྱེད་དེ། དེ་ནས་རྩེ་མོ་ལྷའི་ནང་དུ་མངོན་དུ་བྱེད་དོ། །གཞན་ཡང་དེ་དང་འདྲ་སྟེ། གསུམ་ག་མིའི་ནང་དུ་བསྐྱེད་ན་གསུམ་ག་ལྷའི་ནང་དུ་མངོན་དུ་བྱེད་ཀྱི། སྔར་མིའི་ནང་དུ་གསུམ་ག་མ་བསྐྱེད་ན་ལྷའི་ནང་དུ་གང་མ་བསྐྱེད་པ་དེ་མངོན་དུ་བྱེད་ཀྱི། གང་མིའི་ནང་དུ་མ་བསྐྱེད་པ་དེ་མངོན་དུ་མི་བྱེད་དོ། །ངེས་འབྱེད་ཆ་མཐུན་བཞི་པ་ནི་ལྷ་དག་གི་ནང་དུའང་སྐྱེད་པར་བྱེད་དོ། །དང་པོར་མི་དང་ལྷའི་ནང་དུ་བསྐྱེད་ན་ནི་མི་དང་ལྷ་དེ་ཁོ་ནའི་ནང་དུ་བསྐྱེད་ཀྱི། དེ་ལས་གཞན་དུ་མ་ཡིན་ཏེ། དེ་ལ་རྒྱུན་མེད་པའི་ཕྱིར། དང་པོ་གསུམ་ནི་བུད་མེད་ཀྱི་འདི་དག་བསྐྱེད་ནས་ཚེ་གཞན་དུ་བུད་མེད་ཀྱི་ལུས་སུ་སྐྱེ་ན་བུད་མེད་ཀྱི་རྟེན་ཅན་དག་མངོན་དུ་བྱེད་དོ། །ཚེ་གཞན་སྐྱེས་པར་སྐྱེས་ན་སྐྱེས་པའི་རྟེན་ཅན་མངོན་དུ་བྱེད་དོ། །དེ་དག་ཐོབ་བའི་བུད་མེད་རྣམས་ཚེ་གཞན་དུ་མོའི་ལུས་སུ་མི་སྐྱེ་བ་ནི་མ་ཡིན་ཏེ། སྐྱེས་པ་རྣམས་ཀྱང་དེ་བཞིན་དུ་མོའི་ལུས་སུ་གྱུར་ན་ནི་མོའི་རྟེན་ཅན་མངོན་དུ་བྱེད་ལ། ཕོའི་ལུས་སུ་གྱུར་ན་ནི་ཕོའི་རྟེན་ཅན་མངོན་དུ་བྱེད་དོ། །ཚེ་དེ་ཉིད་ལ་སྐྱེས་པ་དང་བུད་མེད་ཀྱི་དབང་པོ་གཉིས་ཀ་དང་ལྡན་པར་གྱུར་ན་སྐྱེས་པ་དང་བུད་མེད་གཉིས་ཀའི་རྟེན་ཅན་གྱིས་ཐོབ་སྟེ། ཚེ་མ་འཕོས་པས་དྲོད་ཀྱིས་བཏང་རྒྱུ་མེད་པས་དྲོད་ཙམ་བཏང་ཨ་ཅང་ཆེས་དྲོད་ཀྱི་ཐོབ་པའང་གཉིས་ཀའི་རྟེན་ཅན་ནོ། །སྐྱེས་པའི་རྟེན་ལ་དྲོད་སྐྱེས་ནས་ཤི་ནས་བུད་མེད་དུ་སྐྱེས་པ་ནི་དྲོད་ཙམ་ནི་གཉིས་ཀའི་རྟེན་ཅན་ཡིན་གྱི་ཐོབ་པ་ནི་མ་ཡིན་ནོ། །ཆོས་ཀྱི་མཆོག་ནི་བུད་མེད་ཀྱིས་སྐྱེས་པ་དང་བུད་མེད་གཉིས་ཀ་རྟེན་ཅན་ཐོབ་པར་འགྱུར་ལ། སྐྱེས་པས་ནི་སྐྱེས་པའི་རྟེན་ཅན་འབའ་ཞིག་ཐོབ་སྟེ། ཚེ་གཞན་དུ་བུད་མེད་ཉིད་དུ་འགྱུར་བའི་བརྟགས་མིན་གྱི་འགོག་(༢༥༠ན)
པ་ཐོབ་པའི་ཕྱིར། དེའང་ཆོས་མཆོག་བསྐྱེད་པ་དེས་ནི་ངེས་པར་འཇུག་ཐོགས་སུ་མཐོང་ལམ་བསྐྱེད་ལ། བདེན་པ་མཐོང་བ་ཡང་བུད་མེད་དུ་སྐྱེ་བ་མེད་ཅེས་པ་གྲུབ་མཐའ་ཡིན་ནོ། །གསུམ་པ་གཏོང་ཚུལ་གྱི་ཁྱད་པར་ལ། འཕགས་པས་གཏོང་ཚུལ་དང་། སོ་སྐྱེའི་གཏོང་ཚུལ་ལོ། །དང་པོ་ནི། འཕགས་པས་དེ་དག་ས་བོར་ནས། །གཏོང་ངོ་། འཕགས་པས་བསམ་གཏན་དང་པོ་ནས་བཞི་པའི་སའི་བར་ས་གང་དག་གིས་ངེས་འབྱེད་ཐོབ་པར་གྱུར་པའི་ས་དེ་དག་འདོར་ཞིང་འཕོས་པ་ན་དེ་དག་གཏོང་གི། སོ་སྐྱེ་ལྟར་འཆི་བའམ་ཉམས་པས་ནི་མ་ཡིན་ཏེ། དགེ་རྩའི་རྒྱུན་མཐོང་ལམ་གྱིས་སྤེལ་བའི་ཕྱིར། ས་འདོར་བ་ནི། བསམ་གཏན་དང་པོ་ནས་ཤི་སྟེ་གཉིས་པར་འཕོས་པས་ཡིན་གྱི། འདོད་ཆགས་དང་བྲལ་བའི་ཆ་ནས་མ་ཡིན་ནོ། །གཉིས་པ་ལ། དངོས་དང་། འཕྲོས་དོན་ནོ། །དང་པོ་ནི། འཕགས་མིན་འཆི་བས་སོ། །དང་པོ་གཉིས་ཡོངས་ཉམས་པས་ཀྱང་། །འཕགས་མིན་སོ་སྐྱེ་ནི་ཆགས་བྲལ་ཡིན་ན་ས་འཕོས་ནས་གོང་དུ་སྐྱེ་བའི་ཚེ་འཆི་བ་སྟེ་རིས་མཐུན་དོར་བ་དང་། མ་བྲལ་བས་ས་མི་འཕོ་བས་རིས་མཐུན་དོར་བས་གཏོང་ངོ་སྟེ། འདོད་ཁམས་ཉིད་དུ་སྐྱེའོ། །སོ་སོའི་སྐྱེ་བོས་དེར་གཏོང་བ་ཅིས་ཤེས་ན། བསྟན་བཅོས་ལས། སྒོ་ང་དང་ནུར་ནུར་པོ་ལ་སོགས་པར་གྱུར་པའི་སོ་སོའི་སྐྱེ་བོ་ནི་ལུས་དང་ལྡན་གྱི་ལས་དང་པོ་ནི་མ་ཡིན་ནོ། །ཞེས་འབྱུང་བའི་ཕྱིར། སྐྱེ་བ་སྔ་མའི་ལུས་ཀྱི་ལས་ནི་ཤི་བས་བཏང་། སྐྱེ་བ་འདིར་ནི་སྦྱོར་བ་མ་བྱས་པ་མེད་དོ་ཞེས་པས་ཤེས་པར་བྱའོ། །དབྱིག་བཤེས་ནི། སོ་སྐྱེ་ཚངས་རིས་ནས་ཤི་འཕོས་ཏེ་མདུན་ན་འདོན་དུ་སྐྱེ་ན་རིས་མཐུན་གཏོང་བ་དང་། གཉིས་པར་སྐྱེས་ན་གཉིས་ཀས་གཏོང་ངོ་། །ཞེས་ཟེར་རོ། །རྒྱལ་པོའི་སྲས་ཀྱིས། ཆགས་བྲལ་ཡིན་ན་རུང་གི། མིན་ན་མི་རིགས་ཏེ། དེ་དག་འདོད་པའི་རྟེན་ལ་བསྐྱེད་ནས་ཤི་འཕོས་ཏེ་གཟུགས་སུ་སྐྱེས་པའི་ཚེ་བཏང་ཟིན་པས་དེར་མེད་པའི་ཕྱིར། ཞེས་(༢༥༠བ)
བཤད་དོ། །འདུས་བཟང་གིས་ཀྱང་དེ་དང་མཐུན་པར་འཆད་དེ། སོ་སྐྱེ་ནི། ས་གང་དུ་ངེས་འབྱེད་ཆ་མཐུན་ཐོབ་པ་དེ་ནས་ས་གཞན་དུ་སྐྱེས་པའི་ཚེ་ངེས་འབྱེད་ཆ་མཐུན་འདོར་བ་མ་ཡིན་ནམ་ཞེ་ན། མ་ཡིན་ཏེ། རིས་མཐུན་བཏང་བ་ཁོ་ནས་བོར་བའི་ཕྱིར། ཁྱབ་སྟེ། འཆི་སྲིད་ལ་གནས་པས་དེ་འདོར་ཞིང་སྲིད་པ་བར་མ་ལ་གནས་པས་དེ་བོར་ཟིན་ན། གོང་དུ་སྐྱེ་བའི་ཚེ་འདོར་རྒྱུ་མེད་པར་འཆི་བ་ཁོ་ནའི་ཚེ་འདོར་བར་རིགས་པའི་ཕྱིར་རོ། །ཞེས་བཤད་དོ། །དང་པོ་དྲོད་རྩེ་གཉིས་ཡོངས་སུ་ཉམས་པས་ཀྱང་གཏོང་ལ་འཆི་བས་ཀྱང་གཏོང་སྟེ། སོ་སོའི་སྐྱེ་བོ་ཁོ་ན་ཡིན་གྱི། འཕགས་པས་ནི་དེ་གཉིས་ལས་ཡོངས་སུ་ཉམས་པ་མེད་པའི་ཕྱིར། མཆིམས་ཆེན་པོར་རང་གིས་རྟོགས་པ་དང་ས་གང་ལས་ཉམས་པ་བསམ་མོ་ཞེས་བརྟགས་པར་མཛད་དོ། །བཟོད་མཆོག་ལས་ནི་སོ་སྐྱེ་ཡང་ཉམས་པ་མེད་དོ། །གཉིས་པ་འཕྲོས་དོན་ལ། འཆི་བས་གཏོང་བའི་དམིགས་བསལ་དང་། སླར་ཐོབ་ཚུལ། ཉམས་པ་གཉིས་ཀྱི་ངོ་བོའོ། །དང་པོ་ནི། དངོས་གཞིས་དེ་ཉིད་ལ་བདེན་མཐོང་། །བསམ་གཏན་དངོས་གཞིའི་ས་པའི་ངེས་འབྱེད་ཆ་མཐུན་རྣམས་སྐྱེད་པར་བྱེད་པ་དེས་ནི་ཚེ་དེ་ཉིད་ལ་ངེས་པར་བདེན་པ་མཐོང་སྟེ། ཡིད་འབྱུང་བ་མང་ཞིང་ཤས་ཆེ་བའི་ཕྱིར། འདིར་དངོས་གཞི་ལ་བདེན་པ་མཐོང་བྱ་བ་དེ་དངོས་གཞི་ལ་དྲོད་སོགས་བསྐྱེད་ན་ཅིས་ཀྱང་ཚེ་དེར་བདེན་པ་མཐོང་བྱ་བ་ཡིན་གྱི། བདེན་པ་མཐོང་དགུ་ཅོག་དངོས་གཞི་ལ་མཐོང་གི། ཉེར་བསྡོགས་ལ་མི་མཐོང་བྱ་བ་ཡིན། ཡིན་ན་བདེན་པ་མཐོང་ངོ་ཅོག་ཕྱིར་མི་འོང་བར་འགྱུར་བས་ཕྱིར་འོང་མེད་པར་ཐལ་བའང་འགྱུར་ལ། དེས་ན་ཉེར་བསྡོགས་དང་དངོས་གཞི་གཉིས་ཀ་ལ་དྲོད་སོགས་བསྐྱེད་ནས་བདེན་པ་མཐོང་བ་ཡོད་དོ། །གཉིས་པ་ནི། རྣམ་པར་ཉམས་ཚེ་སྔོན་མེད་འཐོབ། །གང་གི་ཚེ་རྣམ་པར་ཉམས་ནའང་འཐོབ་པ་དེའི་ཚེ་བསླབ་པ་ཕུལ་ནས་(༢༥༡ན)
སྡོམ་པ་ཕྱིས་ལེན་པ་ནི། སྔོན་གྱི་སྡོམ་པ་ཐོབ་པ་མ་ཡིན་པ་བཞིན་དུ་སྔོན་མེད་པ་འཐོབ་ཀྱི། སྔོན་བཏང་བ་དག་མ་ཡིན་ཏེ། འཁོར་བ་ཐོག་མེད་ནས་འདྲིས་པ་མ་ཡིན་པས་འདོད་ཆགས་དང་བྲལ་བས་ཐོབ་པ་མ་ཡིན་པའི་ཕྱིར་དང་། འབད་དེ་བསྒྲུབ་བྱ་མ་ཡིན་པའི་ཕྱིར། བར་མཚམས་སྟོན་པར་བྱེད་པ་སྨོན་ནས་ཤེས་པར་བྱེད་པ་ཞིག་ཡོད་ན་ཐོབ་སྟེ། ཉམས་པར་བྱེད་པའི་གོང་མ་སྐྱེད་པར་བྱེད་དོ། །མཚམས་སྟོན་བྱེད་མེད་ན་ནི་གང་ཉམས་པ་དེ་ནས་སྐྱེད་དོ། །གསུམ་པ་ནི། ཉམས་པ་གཉིས་ནི་མི་ལྡན་པ། །རྣམ་པར་ཉམས་པ་དང་ཡོངས་སུ་ཉམས་པ་གཉིས་ནི་མི་ལྡན་པའི་རང་བཞིན་ཡིན་ལ། ཡོངས་སུ་ཉམས་པ་ནི་ལོག་ལྟས་དགེ་རྩ་ཉམས་པ་ལྟ་བུ་ཉོན་མོངས་པས་བྱས་པ་ཡིན་གྱི། རྣམ་པར་ཉམས་པ་ནི་ངེས་པར་ཉམས་པར་བྱས་པ་མ་ཡིན་གྱི། མཐོང་ལམ་སྐྱེས་པས་སོ་སྐྱེ་ཉམས་པ་ལྟ་བུ་ཡོན་ཏན་གྱིས་བྱས་པའང་ཡིན་ནོ། །དེས་ན་རྣམ་པར་ཉམས་པ་གང་ཡིན་པ་ལ་ངེས་པར་ཡོངས་སུ་ཉམས་པས་ཁྱབ་པ་མ་ཡིན་ཏེ། ཡོངས་སུ་ཉམས་པ་ནི་ཡོན་ཏན་གྱི་ཁྱད་པར་ལས་ཉམས་པའི་ཕྱིར། དྲོད་ཐོབ་པ་ནི་ཡོངས་སུ་ཉམས་ཀྱང་ངེས་པར་མྱ་ངན་ལས་འདའ་བའི་ཆོས་ཅན་ཡིན་ནོ། །འདི་དང་ཐར་ཆའི་ཁྱད་པར་ནི་རྐྱེན་ཚང་ཞིང་འགལ་རྐྱེན་མེད་པར་འདྲ་ཡང་ཐར་པ་ཆ་མཐུན་ལས་བདེན་པ་མཐོང་བ་ལ་དྲོད་ཆེས་ཉེ་བ་ཡིན་ནོ། །བཞི་པ་ཡོན་ཏན་གྱི་ཁྱད་པར་ནི། རྩེ་མོ་ཐོབ་པ་རྩ་མི་འཆད། །བཟོད་ཐོབ་ངན་སོང་མི་འགྲོའོ། །རྩེ་མོ་ཐོབ་པ་ནི་ཡོངས་སུ་ཉམས་ཀྱང་དགེ་བའི་རྩ་བ་མི་ཆད་དེ། དགེ་བའི་རྟེན་ལྷག་པས་དཀོན་མཆོག་གསུམ་གྱི་ཡོན་ཏན་དཔྱད་པའི་སྒོ་ནས་དེ་དག་ལ་དང་བ་ཐོབ་པའི་ཕྱིར། འོན་ཏེ་དེ་ངན་སོང་དུ་འགྲོ་ལ་མཚམས་མེད་པ་དག་ཀྱང་བྱེད་དོ། །བཟོད་པ་ཐོབ་པ་དེ་ལས་ཉོན་མོངས་པས་ཡོངས་སུ་མ་ཉམས་ཀྱང་འཆི་འཕོ་སོགས་ཀྱིས་རྣམ་པར་ཉམས་ཀྱང་ངན་སོང་དུ་མི་འགྲོ་སྟེ། དེར་འགྲོ་བའི་ལས་(༢༥༡བ)
ཉོན་ཐག་བསྲིང་བའི་ཕྱིར། བཟོད་པ་ཐོབ་པ་ཁོ་ནས་ངན་སོང་གི་འགྲོ་བ་དང་། སྒོ་ང་དང་དྲོད་གཤེར་ལས་སྐྱེ་བའི་སྐྱེ་གནས་དང་། འདུ་ཤེས་མེད་པའི་སེམས་ཅན་དང་། བྱང་གི་སྒྲ་མི་སྙན་པ་དང་། ཚངས་པ་ཆེན་པོར་སྐྱེ་བ་དང་། ཟ་མ་དང་མ་ནིང་དང་མཚན་གཉིས་པའི་ལུས་དང་། བརྒྱད་པ་ལ་སོགས་པའི་སྲིད་པ་དང་། མཐོང་སྤོང་གི་ཉོན་མོངས་རྣམས་ཀྱིས་མི་སྐྱེ་བའི་ཆོས་ཉིད་ཐོབ་སྟེ། དེ་དག་གིས་བརྟགས་མིན་གྱི་འགོག་པ་ཐོབ་པའི་ཕྱིར། དེའང་བཟོད་པ་ཆུང་ངུའི་ཚེ་འགྲོ་བའི་དང་། ཆེན་པོའི་ཚེ་སྐྱེ་གནས་ཀྱི་ཚེ་དང་། ཆུང་ངུའི་ཚེ་སྐྱེ་བའི་དང་། ཆེན་པོའི་ཚེ་ལུས་ཀྱི་དང་། བཟོད་པ་ཆེན་པོའི་ཚེ་སྲིད་པ་བརྒྱད་པ་དང་དགུ་པ་དང་། ཉོན་མོངས་འགའ་ཞིག་གིས་མི་སྐྱེ་བའི་ཆོས་ཉིད་ཐོབ་བོ། །ལྔ་པ་རིགས་ཀྱི་ཁྱད་པར་ལ། བསྒྱུར་དུ་བཏུབ་པའི་རིགས། འགྱུར་མི་སྲིད་པའི་རིགས་སོ། །དང་པོ་ནི། གཉིས་སློབ་རིགས་ལས་བཟློག་ནས་ནི། །སངས་རྒྱས་སུ་འགྱུར་གཞན་གསུམ་ཡང་། །ཉན་ཐོས་དང་། རང་རྒྱལ་དང་། རྫོགས་སངས་ཀྱི་རིགས་ཐ་དད་པའི་ངེས་འབྱེད་ཆ་མཐུན་རྣམས་རིགས་གསུམ་ཡིན་ཏེ། དྲོད་རྩེ་གཉིས་སྐྱེས་པ་སློབ་མ་ཉན་ཐོས་ཀྱི་རིགས་ལས་བཟློག་ནས་ནི། སངས་རྒྱས་ཀྱི་རིགས་བསྐྱེད་ནས་སངས་རྒྱས་སུ་འགྱུར་བ་སྲིད་ཀྱི། བཟོད་པ་ཐོབ་པ་ལ་ནི་དེ་ལྟ་བུ་མི་སྲིད་དེ། བཟོད་པ་ཐོབ་ནས་ངན་སོང་དུ་མི་འགྲོ་བ་ལས་བྱང་སེམས་གཞན་དོན་དུ་ངན་སོང་ལ་འགྲོ་བར་གྲགས་པའི་ཕྱིར། སློབ་དཔོན་ནི་གཏན་ཚིགས་དེས་དམ་བཅའ་དེ་འགྲུབ་པ་མ་ཡིན་ཏེ། བྱང་སེམས་དེ་ནི་སྐྱེ་བ་ལ་དབང་ཞིང་སེམས་ཅན་གྱི་དོན་བྱེད་པས་ངན་སོང་དུ་འགྲོ་བ་མཚན་ཉིད་པ་མ་ཡིན་པའི་ཕྱིར། འོ་ན་དམ་བཅའ་སྔ་མ་བཞིན་ལ་སྒྲུབ་བྱེད་ནི། ཉན་ཐོས་ཀྱི་རིགས་གྱུར་གྱི་བཟོད་པ་ཆོས་ཉིད་ཀྱིས་ཐོབ་པ་ནི་བཟོད་པ་ཡོངས་སུ་སྒོམ་པ་ཉིད་ཀྱིས་བཟློག་ཏུ་མི་རུང་བའི་ཕྱིར། གསུམ་པ་བཟོད་པ་ཡང་ཉན་ཐོས་ཀྱི་རིགས་ལས་བཟློག་(༢༥༢ན)
ནས་སངས་རྒྱས་ལས་གཞན་རང་རྒྱལ་དུའང་འགྱུར་ཏེ། དེ་ནི་གཞན་དོན་དུའང་ངན་སོང་དུ་མི་འགྲོ་བའི་ཕྱིར། ཆོས་མཆོག་ནི་རང་རྒྱལ་དུ་མི་འགྱུར་ཏེ། ཆོས་མཆོག་ནི་སྟན་གཅིག་གི་ཐོག་ཏུ་མཐོང་ལམ་སྐྱེས་ཙམ་ན་སྲིད་པ་བརྒྱད་བར་མི་འགྱུར་བས་བསྐལ་པ་བརྒྱ་ལ་སོགས་པར་ཚོགས་བསགས་པའི་རང་རྒྱལ་དུ་མི་འགྱུར་བའི་ཕྱིར་རོ། །གཉིས་པ་ནི། སྟོན་དང་བསེ་རུ་བྱང་ཆུབ་བར། །བསམ་གཏན་མཐའ་རྟེན་གཅིག་ལ་ཀུན། །རང་སངས་རྒྱས་ཀྱི་རིགས་རྣམས་ནི་བཟློག་པར་མི་ནུས་ཏེ། འདི་ལྟར་སྟོན་པ་སངས་རྒྱས་དང་བསེ་རུ་ལྟ་བུའི་རང་སངས་རྒྱས་གཉིས། ཏིང་ངེ་འཛིན་སྐྱོན་བརྒྱད་ཀྱིས་མི་གཡོ་བ་དང་། དབང་པོ་སྦྱངས་པ་དང་། རྣོ་བ་དང་གསལ་བའི་ཕྱིར་བསམ་གཏན་ཡ་མཐའ་བཞི་པ་ཁོ་ན་ལ་བརྟེན་ནས་སྟན་ཅིག་ཁོ་ན་ལ་ངེས་འབྱེད་ཆ་མཐུན་ནས་བཟུང་བྱང་ཆུབ་ཟད་པ་དང་མི་སྐྱེ་བ་ཤེས་པའི་བར་དུ་ཀུན་བསྐྱེད་པས་སོ་ཟེར། གཞན་དག་ན་རེ། མི་སྡུག་པ་ནས་བཟུང་བྱང་ཆུབ་ཀྱི་བར་དུའོ་ཞེས་ཟེར་རོ། །ཆོས་མངོན་པ་བདག་གི་ལུགས་ཀྱི་བསེ་རུ་ལྟ་བུ་ལས་གཞན་པའི་རང་རྒྱལ་ཚོགས་སྤྱོད་ཡོད་པར་འདོད་པ་དེའི་ལྟར་ན། དེའི་རིགས་ཀྱི་དྲོད་རྩེ་རྣམས་ནི་བཟློག་པ་ལ་དགག་པ་མེད་དེ། བསེ་རུ་ལྟ་བུར་ཁོ་ན་དམིགས་ཀྱིས་བཀར་བའི་ཕྱིར་རོ། །བསེ་རུ་ལས་གཞན་པའི་རང་རྒྱལ་འདི་ནི་ཉན་ཐོས་སྔོན་དུ་འགྲོ་བའི་རང་རྒྱལ་ལོ། །རང་རྒྱལ་དེའི་ལམ་བགྲོད་ཚུལ་ཉན་ཐོས་དང་འདྲའོ། །བཞི་པ་སྔོན་འགྲོའི་ཆོས་ནི། དེ་ཡི་སྔོན་དུ་ཐར་ཆ་མཐུན། །མྱུར་བ་སྲིད་པ་གསུམ་གྱིས་ཐར། །ཐོས་བསམས་ལས་བྱུང་ལས་གསུམ་མོ། །མི་ཡི་ནང་ནས་འཕེན་པར་བྱེད། །ཚེ་དང་པོ་ཁོ་ན་ལ་སྦྱོར་བ་བྱས་ཏེ། ངེས་འབྱེད་ཆ་མཐུན་བསྐྱེད་པ་ནི་མེད་ཀྱི། ངེས་པར་དེའི་སྔོན་དུ་ཐར་པ་ཆ་མཐུན་གྱི་དགེ་རྩ་བསྐྱེད་པར་བྱ་དགོས་སོ། །ཐམས་ཅད་པས་ཤིན་ཏུ་མྱུར་བར་ཐར་པ་ཐོབ་པ་དེ་ཚེ་གཅིག་ལ་ཐར་ཆའི་དགེ་རྩ་བསྐྱེད། གཉིས་པ་ལ་ངེས་འབྱེད་ཆ་མཐུན། གསུམ་པ་ལ་འཕགས་ལམ་སྟེ། ས་བོན་འདེབས་པ་དང་། འབྲས་(༢༥༢བ)
བུ་སྐྱེ་བ་དང་། འབྲས་བུ་ཆགས་པ་བཞིན་དུ་སྲིད་པ་གསུམ་གྱི་གསུང་རབས་ཀྱི་ཆོས་ཉིད་འདི་ལ་ནི། དེ་གསུམ་གྱིས་རྒྱུད་རིམ་གྱིས་འཇུགསྨིན་པ་ཐར་པ་སྟེ་གྲོལ་བར་འགྱུར་རོ། །ཡང་ཚེ་སྔ་མ་ལ་ཐར་པའི་ཚོགས་བསགས་པ་དེ་ནས་ཚེ་གཉིས་པ་ལ་ངེས་འབྱེད་དང་། འཕགས་ལམ་བསྐྱེད་པའང་ཡོད་པས་རིགས་པར་བྱའོ། །དེས་ན་མྱུར་བ་སྲིད་པ་གསུམ་དང་། ཤིན་ཏུ་མྱུར་བ་སྲིད་པ་གཉིས་ཀྱིས་ཐར་བར་འགྱུར་རོ། །ཐར་པའི་ཆ་མཐུན་དེའང་ཐོས་བསམ་ལས་བྱུང་བ་ཡིན་པར་བརྗོད་དེ། སྒོམ་བྱུང་ནི་མ་ཡིན་ནོ། །དེའང་སྒོ་གསུམ་གྱི་ལས་གསུམ་མོ། །གཙོ་བོ་ནི་ཡིད་ཀྱི་ལས་ཏེ། དེའི་སྨོན་ལམ་གྱིས་ཡོངས་སུ་བཟུང་བའི་ཕྱིར། སྨོན་ལམ་ནི་སེམས་པའི་ཁྱད་པར་རོ། །ལུས་ངག་གི་ལས་ཀྱང་ཐར་པའི་ཆ་མཐུན་ཏེ། ལ་ལས་ལུས་ཀྱི་ལས་ཟས་འགའ་ཙམ་བྱིན་ནས་སམ། ངག་གི་ལས་བསླབ་པ་འགའ་ཙམ་མ་ནོས་པ་ཆུང་ངུ་ཡིན་དུ་ཟིན་ཀྱང་ཐར་པ་འདོད་པའི་སྟོབས་བསྐྱེད་པས་ལས་གསུམ་གྱི་རང་བཞིན་ཐར་པའི་ཆ་དང་མཐུན་པ་འཕེན་པར་འགྱུར་རོ། །དེའང་མི་རྣམས་ཀྱི་ནང་ཁོ་ན་དང་གླིང་གསུམ་ནས་འཕེན་གྱི། ངན་སོང་དང་ལྷ་དང་སྒྲ་མི་སྙན་པའི་འཕེན་པ་མ་ཡིན་པའི་ཕྱིར་ཏེ། རིམ་བཞིན་དུ་སྐྱོ་བ་ཡོད་ཀྱང་ཤེས་རབ་མེད་ལ། ཤེས་རབ་ཡོད་ཀྱང་སྐྱོ་བ་མེད་པ་དང་གཉིས་ཀ་མེད་པའི་ཕྱིར་རོ། །གསུམ་པ་བདེན་པ་མངོན་རྟོགས་ཀྱི་ལམ་ལ། སེམས་ཀྱི་སྐད་ཅིག་མ་བཅུ་དྲུག་སྐྱེ་བའི་ཚུལ། མངོན་རྟོགས་གསུམ་དུ་བསྟན་པ། ས་གང་ལ་བརྟེན་པ། སེམས་བཅུ་དྲུག་ཏུ་དབྱེ་བའོ། །དང་པོ་ནི། འཇིག་རྟེན་པ་ཡི་ཆོས་མཆོག་ལས། །ཆོས་ཀྱི་བཟོད་པ་ཟག་པ་མེད། །འདོད་སྡུག་བསྔལ་ལ་དེ་ནས་ནི། །དེ་ཉིད་ལ་ཆོས་ཤེས་དེ་བཞིན། །སྡུག་བསྔལ་ལྷག་ལ་རྗེས་བཟོད་ཤེས། །བདེན་པ་གསུམ་ལའང་དེ་བཞིན་ནོ། །དེ་ལྟར་བདེན་པ་མངོན་རྟོགས་འདི། །སེམས་བཅུ་དྲུག་གོ། འཇིག་རྟེན་པའི་ཆོས་ཀྱི་མཆོག་ལས་མཇུག་ཐོགས་སུ་ཆོས་ཤེས་ཀྱི་བཟོད་པ་ཟག་པ་མེད་པར་སྐྱེའོ། །དེའང་འདོད་པའི་སྡུག་བསྔལ་ལ་དམིགས་པའོ། །ཆོས་ཤེས་པའི་བཟོད་པ་ཆོས་ཅན། ཁྱོད་ལ་ཆོས་བཟོད་(༢༥༣ན)
ཤེས་བརྗོད་པར་བྱ་སྟེ། ཆོས་ཤེས་ཟག་མེད་ཡིན་ཙམ་ན་དེ་དང་རྒྱུ་མཐུན་པས་བྱེ་བྲག་ཏུ་བྱས་པའི་ཆོས་བཟོད་ཀྱང་ཟག་མེད་ཡིན་ལ། དེ་ནས་ཆོས་ཤེས་པའི་ཆེད་ཀྱི་བཟོད་པ་ཡིན་པས་ཆོས་བཟོད་དུ་བརྗོད་པའི་ཕྱིར། མེ་ཏོག་དང་འབྲས་བུའི་ཆེད་ཀྱི་ཤིང་ལ་མེ་ཏོག་དང་འབྲས་བུའི་ཤིང་ཞེས་བརྗོད་པ་ལྟ་བུ་དང་། རྩ་བ་ལས་ཆོས་ཀྱི་བཟོད་པ་ཞེས་སྨོས་པས་ཕྱོགས་གཅིག་སྨོས་པའི་ལྷ་བྱིན་གྱི་བྱིན་ལྟ་བུའོ། །བཟོད་པ་དེ་ཉིད་ལ་ངེས་འཇུག་ཅེས་བྱ་སྟེ། ཡང་དག་པ་ཉིད་དུ་ངེས་པར་འཇུག་པའི་ཕྱིར། ཡང་དག་པ་ཉིད་ནི་མདོ་ལས་མྱང་འདས་ཡིན་པར་བཤད་དོ། །ཡང་དག་པ་ཉིད་དེར་ངེས་པ་ནི་གཅིག་ཏུ་སྲིད་པ་བདུན་གྱིས་ངེས་པར་མྱ་ངན་ལས་འདའ་བར་གྱུར་པའོ། །དེར་འཇུག་པ་ནི་མངོན་པར་འགྲོ་བའམ་ཕྱིན་པས་ཏེ། ཆོས་ཤེས་པའི་བཟོད་པ་དེ་སྐྱེས་ན་འཕགས་པའི་གང་ཟག་ཅེས་བྱའོ། །སྡུག་བསྔལ་ཆོས་ཤེས་པའི་བཟོད་པ་མ་འོངས་པ་སྐྱེ་བས་ནི་སོ་སྐྱེ་ཉིད་ཟློག་པར་བྱེད་ཀྱི། མ་འོངས་པ་དེའི་བྱ་བ་ནི་སོ་སྐྱེ་བཟློག་པ་དེ་ཁོ་ན་ཡིན་གྱི། བྱ་བ་གཞན་ནི་མ་ཡིན་ཏེ། མར་མེ་མ་འོངས་པས་མུན་པ་བསལ་ནུས་པ་དང་། སྐྱེ་བ་མ་འོངས་པས་བསྐྱེད་བྱ་བསྐྱེད་ནུས་པ་བཞིན་ནོ། །དེའང་ཞིབ་ཏུ་དཔེ་དོན་སྦྱར་ན། མར་མེ་ད་ལྟ་བ་འདི་མུན་པ་དང་འགལ་བ་མིན་ཏེ། འགལ་བ་ལ་ད་ལྟ་མུན་པ་ཡོད་དགོས་པ་ལ་ད་ལྟ་མུན་པ་མེད་པས། ད་ལྟར་གྱི་མར་མེ་དང་འགལ་བར་བཞག་ཏུ་མི་འདོད་ཅིང་། ད་ལྟ་བ་འདིས་སྤང་བ་མིན། དེ་ཅི་ནས་སྔར་སྤངས་པས་སོ། །འོ་ན་མར་མེ་མ་འོངས་པའི་ས་ན་རྫས་སུ་ཡོད་པ་དེ་ད་ལྟར་དུ་ལ་ཕྱོགས་པ་དེས་མུན་པ་སེལ་བའོ། །དེ་བཞིན་དུ་སྐྱེ་བ་མ་འོངས་པའི་ས་ན་རྫས་སུ་ཡོད་པ་དེ་བསྐྱེད་བྱ་ད་ལྟར་དུ་འོང་བ་ལ་ཕྱོགས་པ་དེས་བསྐྱེད་པ་(༢༥༣བ)
ཡིན་པ་ལྟར་ཆོས་ཤེས་ཀྱི་བཟོད་པ་མ་འོངས་པ་ད་ལྟར་དུ་ཕྱོགས་པ་དེས་སོ་སྐྱེ་བཟློག་གོ། །གཞན་ན་རེ། འཇིག་རྟེན་ཆོས་མཆོག་རྣམས་ཀྱིས་སོ་སྐྱེ་བཟློག་གོ་ཞེས་ཟེར་རོ། །དེ་ནི་མི་རིགས་ཏེ། ཆོས་མཆོག་ནི་སོ་སྐྱེའི་ཆོས་ཡིན་ན། དེའི་ཆོས་ཀྱིས་སོ་སྐྱེ་བཟློག་མི་རིགས་པའི་ཕྱིར་ཞེས་པ་ལ། ཁོས་རྟགས་ཁྱབ་ག་ལ་ཡོད་དེ། འདི་ལྟར་དེས་དེ་མི་བཟློག་པའི་ཉེས་པ་མེད་དེ། སོ་སྐྱེ་དང་འགལ་བའི་ཕྱིར། དཔེར་ན། དགྲ་བོའི་ཕྲག་པ་ལ་ཞོན་ནས་དགྲ་བོ་འཚོགས་པ་ལྟར་ཆོས་མཆོག་གིས་དགྲ་སོ་སྐྱེའི་ཕྲག་པ་ལ་ཞོན་ཏེ་སོ་སྐྱེ་འཇོམས་སོ་ཞེས་གྲགས་སོ། །གཞན་དག་ན་རེ། སོ་སྐྱེ་ཉིད་འཇིག་རྟེན་ཆོས་མཆོག་དང་བཟོད་པ་གཉིས་ཀས་བཟློག་སྟེ། དཔེར་ན། བར་ཆད་མེད་ལམ་གྱིས་ཉོན་མོངས་སྤོང་བར་བྱེད་ལ། རྣམ་གྲོལ་གྱི་ལམ་གྱིས་སྤངས་པ་དེ་བཞིན་དུ་ཆོས་མཆོག་གིས་སོ་སོའི་སྐྱེ་བོ་ཉིད་གཉེན་པོས་ཉམས་པར་བྱེད་ལ། བཟོད་པས་སྤངས་པས་ཉམས་པར་བྱེད་དོ། །བཟོད་པ་དེ་ཡི་མཇུག་ཐོགས་དེ་ནས་ནི་འདོད་པའི་སྡུག་བསྔལ་དེ་ཉིད་དེ། དེ་ཁོ་ན་ལ་ཆོས་ཤེས་པ་སྐྱེ་སྟེ། དེ་ནི་བསྟན་བཅོས་ལས་སྡུག་བསྔལ་ལ་ཆོས་ཤེས་པ་ཞེས་པའི་ཐ་སྙད་བྱའོ། །ཐམས་ཅད་དུའང་ཟག་པ་མེད་པའི་སྐབས་ཡིན་པས་དེ་ཉིད་ལ་ཆོས་ཤེས་ཟག་པ་མེད་ཅེས་པར་མངོན་ནོ། །འདོད་པའི་སྡུག་བསྔལ་ལ་ཆོས་ཤེས་པའི་བཟོད་པ་དང་། ཆོས་ཤེས་པ་སྐྱེ་བ་དེ་བཞིན་དུ་ཡང་སྡུག་བསྔལ་ལ་ཆོས་ཤེས་ཀྱི་མཇུག་ཐོགས་སུ་ལྷག་མ་གཟུགས་དང་གཟུགས་མེད་ཀྱི་སྡུག་བསྔལ་ལ་རྗེས་སུ་ཤེས་པའི་བཟོད་པ་སྤྱི་ལ་དམིགས་པ་སྐྱེ་སྟེ། དེ་ནི་སྡུག་བསྔལ་ལ་རྗེས་སུ་ཤེས་པའི་བཟོད་པ་ཞེས་བྱའོ། །དེ་ནས་ནི་སྡུག་བསྔལ་ལ་རྗེས་སུ་ཤེས་པ་ཞེས་བྱ་བ་སྐྱེའོ། །དང་པོ་ཉིད་དུ་སྡུག་བསྔལ་ལ་སོགས་པའི་ཆོས་(༢༥༤ན)
ཀྱི་དེ་ཁོ་ན་ཉིད་ཤེས་པའི་ཆོས་ཤེས་པ་དང་། དེའི་རྒྱུ་ལས་བྱུང་བའི་རྒྱུན་ཅན་གོང་མའི་སྡུག་བསྔལ་སོགས་ལ་དམིགས་པ་ནི་རྗེས་སུ་ཤེས་པ་སྟེ། ཆོས་ཤེས་ཀྱི་སྡུག་བསྔལ་ལ་སོགས་པའི་བདེན་པ་ལ་སྡུག་བསྔལ་སོགས་ཀྱིས་རྣམ་པར་རྟོགས་ཤིང་ཤེས་པ་དེ་བཞིན་དུ་གོང་མའི་སྡུག་བསྔལ་རྟོགས་པའི་ཕྱིར། སྡུག་བསྔལ་གྱི་བདེན་པ་ལ་བཟོད་ཤེས་བཞི་དག་སྐྱེ་བ་ལྟར་ཀུན་འབྱུང་དང་འགོག་པ་དང་ལམ་གྱི་བདེན་པ་གསུམ་ལའང་དེ་བཞིན་དུ་བཟོད་ཤེས་བཞི་བཞི་སྐྱེ་སྟེ། སྡུག་བསྔལ་ལ་རྗེས་ཤེས་ཀྱི་རྗེས་སུ་འདོད་པའི་ཀུན་འབྱུང་ལ་ཆོས་ཤེས་པའི་བཟོད་པ་སྐྱེ་ཞིང་དེ་ནས་ཀུན་འབྱུང་ལ་ཆོས་ཤེས་སྐྱེ་ལ། དེ་བཞིན་དུ་མཇུག་ཐོགས་སུ་སྐྱེ་བའི་རིམ་གྱིས་ཀུན་འབྱུང་ལྷག་མ་ལ་རྗེས་སུ་ཤེས་པའི་བཟོད་པ་དང་ཀུན་འབྱུང་ལ་རྗེས་སུ་ཤེས་པ་སྐྱེའོ། །འདོད་པའི་སྡུག་བསྔལ་འགོག་པ་ལ་ཆོས་ཤེས་པའི་བཟོད་པ་དང་འགོག་པ་ལ་ཆོས་ཤེས་སྐྱེའོ། །འདོད་པའི་ལམ་ལ་ཆོས་ཤེས་པའི་བཟོད་པ་དང་ལམ་ལ་ཆོས་ཤེས་པ་སྐྱེའོ། །ལམ་ལྷག་མ་ལ་རྗེས་སུ་ཤེས་པའི་བཟོད་པ་ལམ་ལ་རྗེས་སུ་ཤེས་པ་སྐྱེ་སྟེ། དེ་ལྟར་ན་རིམ་པ་དེས་བདེན་པ་མངོན་པར་རྟོགས་པ་འདི་ནི་སེམས་ཀྱི་སྐད་ཅིག་བཅུ་དྲུག་གོ། །གཉིས་པ་ནི། རྣམ་གསུམ་སྟེ། །མཐོང་དམིགས་བྱ་བ་ཞེས་བྱའོ། །འཕགས་པ་ཆོས་སྲུང་སྡེ་པ་ན་རེ། བདེན་པ་མངོན་པར་རྟོགས་པ་ནི་གཅིག་གོ། །ཞེས་བརྗོད་པ་དེ་དག་གི་བསམ་པ་དང་མཐུན་པར་བྱས་ནས། མངོན་རྟོགས་ཙམ་དུ་བྱེ་བྲག་མེད་པར་གཅིག་ཟེར་བའམ། བྱ་བ་དུས་གཅིག་པས་གཅིག་ཟེར་ནས་འགལ་བ་མེད་པར་བརྗོད་པར་བྱའོ། །ཡང་ན་དེ་ལྟར་བརྗོད་པའི་བསམ་པ་ལ་བརྟག་པར་བྱ་ན། ངོ་བོ་དང་དམིགས་པ་ཐ་དད་པས་གཅིག་ཏུའང་མི་བཏུབ་བོ། །ཁ་ཅིག་བདེན་པ་བཞི་ལ་སྐད་ཅིག་མ་བཞི་དང་། ཁ་ཅིག་མཉམ་པར་བཞག་མ་བཞག་གི་བརྒྱད། (༢༥༤བ)
ཁ་ཅིག་བཅུ་གཉིས་ཏེ་བརྒྱད་པོ་དེ་ལ་གཞན་འཇིག་རྟེན་པའི་ཤེས་པ་བཞི་འབྱུང་ངོ་ཞེས་སྡེ་པ་གཞན་རྣམས་བློ་ཐ་དད་པར་འགྱུར་རོ། །མངོན་རྟོགས་དེ་ནི་རྣམ་པ་གསུམ་སྟེ་ཟག་མེད་ཀྱི་ཤེས་རབ་ཀྱིས་བདེན་པར་མངོན་པར་རྟོགས་པ་ནི་མཐོང་བའི་མངོན་རྟོགས་དང་། ཤེས་རབ་དེ་དང་མཚུངས་ལྡན་གྱི་ཚོར་སོགས་དང་ཤེས་རབ་ཀྱང་བདེན་པ་དེ་ལ་དམིགས་པར་བྱེད་པས། དམིགས་པ་མངོན་རྟོགས་དང་། བདེན་བཞི་ལ་ཤེས་པ་དང་། སྤོང་བ་དང་། མངོན་དུ་དང་། ལམ་བསྒོམ་པར་བྱ་བའི་མངོན་རྟོགས་ནི་ཚོགས་པ་གཅིག་པའི་ཕུང་པོ་ལྔ་སྟེ། ཤེས་རབ་དང་། མཚུངས་ལྡན་མིན་པའི་ཚུལ་ཁྲིམས་དང་། སྐྱེ་སོགས་དང་། ཐོབ་སོགས་དང་། ཤེས་རབ་མཚུངས་ལྡན་རྣམས་ཀྱང་ཡིན་པའི་ཕྱིར། ཐམས་ཅད་ཀྱིས་ཀྱང་བྱ་བ་བཞི་པོ་དེ་བྱེད་པའི་ཕྱིར། སྡུག་བསྔལ་གྱི་ཆོས་ཉིད་མཐོང་བས་དམིགས་པ་ན་དེ་ཀ་སྡུག་བསྔལ་ཤེས་པ་ཡིན་པས་དེ་མངོན་པར་རྟོགས་པ་ནི་གསུམ་སྟེ། སྡུག་བསྔལ་ལ་ལོག་ཞུགས་སྤངས་པ་དེ་ཀ་ཀུན་འབྱུང་སྤངས་པ་ཡིན། སྤངས་པས་རྒྱུད་སྐྱེས་པ་དེ་དག་འགོག་པ་མངོན་དུ་བྱས་པ་ཡིན། མཐོང་བ་དེ་ག་འདྲིས་ཤིང་རྒྱུད་ལ་བསྐྱེད་པར་བྱ་བ་ཡིན་པས་ལམ་བསྒོམ་པར་བྱ་བ་ཡིན་ནོ། །ཀུན་འབྱུང་གི་ཆོས་ཉིད་མཐོང་བ་དེས་ཀུན་འབྱུང་གི་ལོག་ཞུགས་སྤངས་པས་ཀུན་འབྱུང་སྤངས་པ་ཡིན། སྤངས་པ་ཀ་འགོག་པ་ཡིན་ལ། དེ་མངོན་དུ་བྱས་པས་འགོག་པ་མངོན་དུ་བྱས་པ་ཡིན། དེ་རྒྱུད་ལ་བསྐྱེད་པར་བྱ་བ་ཡིན་པས་ལམ་སྒོམ་པ་ཡིན། སྡུག་བསྔལ་སྔར་ཤེས་པས་ཤེས་པར་བྱར་མེད། ཀུན་འབྱུང་ལ་གསུམ་མོ། །ལམ་གྱི་ཆོས་ཉིད་མཐོང་བའི་དུས་སུ་ལམ་གྱི་ལོག་ཞུགས་སྤངས་པས་ཀུན་འབྱུང་སྤངས་པ་ཡིན། སྤངས་པ་དེ་རྒྱུད་ལ་མངོན་དུ་གྱུར་པས་འགོག་(༢༥༥ན)
པ་མངོན་དུ་བྱས་པ་ཡིན། དེ་ག་རྒྱུད་ལ་འདྲིས་པས་ལམ་བསྒོམ་པར་བྱ་བ་ཡིན། འགོག་པའི་ཆོས་ཉིད་མཐོང་བས་འགོག་པ་ལ་ལོག་ཞུགས་སྤངས་པས་ཀུན་འབྱུང་སྤངས་པ་ཡིན། སྤངས་པ་དེ་མངོན་དུ་བྱས་པས་འགོག་པ་མངོན་དུ་བྱས་པ་ཡིན། ལམ་གྱི་ཆོས་ཉིད་མཐོང་བ་དེ་འདྲིས་པར་བྱ་བས་ལམ་བསྒོམ་པར་བྱ་བ་ཡིན་ནོ། །དེ་ལྟར་ན་སྡུག་བསྔལ་ལ་བཞི། བདེན་པ་གཞན་ལ་གསུམ་གསུམ་སྟེ་བྱ་བའི་མངོན་རྟོགས་སོ། །དེས་ན་བདེན་པ་རྣམས་མཐོང་བའི་མངོན་རྟོགས་གཅིག་གོ་ཞེས་སྨྲ་བ་ནི་མི་རིགས་ཏེ། རྣམ་པ་ཐ་དད་པས་ཀུན་འབྱུང་ལ་སོགས་པ་ལ་སྡུག་བསྔལ་གྱི་རྣམ་པར་མཐོང་བ་ནི་རུང་བ་མ་ཡིན་པའི་ཕྱིར། སྡེ་པ་གཞན་དག་ཆོས་ཐམས་ཅད་ཀྱི་སྤྱིའི་མཚན་ཉིད་ཐམས་ཅད་སྟོང་པ་དང་བདག་མེད་པའི་རྣམ་པར་མཐོང་ངོ་ཟེར་ན་ནི། འོ་ན་བདེན་པ་རྣམས་ལ་སྡུག་བསྔལ་ལ་སོགས་པའི་རྣམ་པ་མཐོང་བར་མི་འགྱུར་བར་ཐལ། བདེན་པ་ལ་སོགས་པའི་ཆོས་ཐམས་ཅད་ལ་བདག་མེད་པའི་རྣམ་པ་གཅིག་ཁོ་ནར་མཐོང་བའི་ཕྱིར། འདོད་ན་མདོ་དང་འགལ་ཏེ། མདོ་ལས། འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་པའམ། ཀུན་འབྱུང་ལ་ཀུན་འབྱུང་དུ་ཡིད་ལ་བྱེད་པའམ། ལམ་ལ་ལམ་གྱི་བར་དུ་ཡིད་ལ་བྱེད་པའི་ཟག་པ་མེད་པའི་ཡིད་ལ་བྱེད་པ་དང་། མཚུངས་པར་ལྡན་པའི་ཆོས་རྣམ་པར་འབྱེད་པ་གང་ཡིན་པ། ཞེས་གསུངས་པའི་མདོ་དང་འགལ་ལོ། །ཡང་ཁོ་མདོ་དང་འགལ་བ་མེད་དེ། འཕགས་པ་ཉན་ཐོས་སྡུག་བསྔལ་ལ་སྡུག་བསྔལ་དུ་ཡིད་ལ་བྱེད་པ་སོགས་ཀྱི་ཚིག་དེ་མངོན་པར་རྟོགས་པའི་སྔོན་རོལ་གྱི་སྦྱོར་བའི་གནས་སྐབས་ན་ཡིན་གྱི། མངོན་པར་རྟོགས་པ་ནི་ཐམས་ཅད་བདག་མེད་པའི་རྣམ་པ་གཅིག་ཁོ་ནའོ་སྙམ་ན། དེའང་མི་རིགས་(༢༥༥བ)
ཏེ། སྦྱོར་བའི་གནས་སྐབས་ན་ཟག་པ་མེད་པ་ཡིད་ལ་བྱེད་པ་མི་སྲིད་ཅིང་། འདི་ནི་ཟག་མེད་ཡིད་བྱེད་ཡིན་པར་བཤད་པའི་ཕྱིར། ཡང་ཁོ་ལུང་དེ་སྒོམ་པའི་ལམ་ལ་ཡིན་ནོ་ཞེ་ན། དེ་ལྟར་ན་སྒོམ་ལམ་གྱི་སྐབས་སུ་ཆོས་ཅན། སྡུག་བསྔལ་ལོ་ཞེས་སོགས་སྒོམ་མི་རིགས་པར་ཐལ། མཐོང་ལམ་གྱི་དུས་སུ་བདག་མེད་མཐོང་བ་དེ་ཁོ་ན་སྒོམ་ལམ་གྱི་དུས་སུའང་གོམས་པར་རིགས་པའི་ཕྱིར། རྟགས་ཁྱབ་མ་གྲུབ་བོ་སྙམ་ན། གྲུབ་པར་ཐལ། བདེན་པ་རྣམས་སྔར་མཐོང་བ་བཞིན་ཕྱིས་ཀྱང་དེ་དག་བསྒོམ་དགོས་པའི་ཕྱིར། འོན་ཏེ་སྡུག་བསྔལ་ལ་སོགས་པའི་རྣམ་པ་གཅིག་མཐོང་བས་ལྷག་མ་ཀུན་འབྱུང་སོགས་རྩོལ་མེད་དུ་མངོན་པར་འགྱུར་བའི་མཐུ་ཐོབ་པའི་ཕྱིར། མངོན་པར་རྟོགས་པ་གཅིག་གོ་ཟེར་ན་ནི་མཐོང་ལམ་གྱི་བར་སྐབས་སུ་ལྡང་བ་ཡོད་མེད་དཔྱད་པ་ན་ཉེས་པ་མེད་པའང་ཡོད་དེ། ཁ་ཅིག་རྐྱེན་མ་ཚང་བའམ་བློ་རྒོད་པར་གྱུར་ནས་ལྡང་བ་ཡོད་དོ་ཞེས་ཟེར་ན། བྱེ་སྨྲས་ལུགས་དེ་འདྲ་མི་སྲིད་པར་བརྗོད་ཅིང་། དེ་ལྟར་ན་བདེན་པ་མཐོང་བ་མ་རྫོགས་པར་འགྱུར་ལ། དེའང་མི་རིགས་པས། མདོ་ལས། རྒྱུན་ཞུགས་ཀྱི་འབྲས་བུ་མངོན་དུ་བྱ་བའི་ཆེད་དུ་ཞུགས་པ་གཅིག་ལ་ཟས་སྟེར་ན་མ་ལངས་པར་དེས་ཟས་ཟ་མི་སྲིད་དོ། །ཞེས་འབྱུང་བས་ལྡང་བ་མེད་པ་བར་མ་ཆད་པར་གྲུབ་པ་ན་བྱ་རྫོགས་ཙམ་དུ་མངོན་པར་རྟོགས་པ་གཅིག་པ་ལ་ཉེས་པ་མ་མཐོང་བའི་ཕྱིར་རོ། །འོན་ཏེ་སྡུག་བསྔལ་ཁོ་ན་ཡོངས་སུ་ཤེས་ན་ཀུན་འབྱུང་ཡང་སྤངས་ལ་འགོག་པ་མངོན་དུ་བྱེད་ཅིང་། ལམ་བསྒོམ་པའི་ཕྱིར་མངོན་རྟོགས་གཅིག་གོ་ཞེས་ཟེར་ན། དེ་ཙམ་གཅིག་ནི་ཁོ་བོའང་ཁས་ལེན་པས་ཉེས་པ་མེད་དེ། གོང་དུ་གཅིག་མཐོང་ན་ལྷག་མ་གསུམ་རྣམས་ཀྱང་སྤང་བ་དང་མངོན་དུ་བྱ་བ་དང་བསྒོམ་པར་བྱ་བའི་མངོན་རྟོགས་ཡིན་ནོ་ཞེས་འབྱུང་བའི་(༢༥༦ན)
ཕྱིར། མངོན་པར་རྟོགས་པ་གཅིག་ཡིན་ན། མདོ་ལས་བདེན་པ་རྣམས་རིམ་གྱིས་མངོན་པར་རྟོགས་པ་དང་འགལ་ལོ་ཞེ་ན། མི་འགལ་ཏེ། གཅིག་ཏུ་གསུངས་པ་ནི་བྱ་རྫོགས་ཙམ་ལ་དགོངས་པ་ཡིན་ལ། ངོ་བོ་དང་རྣམ་པ་ནི་རིམ་གྱིས་རྟོགས་པར་གསུངས་པར་མངོན་ཏེ། དཔེ་གསུམ་ཁུངས་སུ་མཛད་དེ་གསུངས་པའི་ཕྱིར་ཏེ། མདོ་ལས། ཁྱིམ་བདག་མགོན་མེད་ཟས་སྦྱིན་གྱིས་བཙུན་པ་ཅི་ལགས། འཕགས་པའི་བདེན་པ་བཞི་པོ་མཐར་གྱིས་མངོན་པར་རྟོགས་སམ། འོན་ཏེ་མངོན་པར་རྟོགས་པ་གཅིག་ལགས་སོ་ཞེས་ཞུས་པ་དང་། ཁྱིམ་བདག་འཕགས་པའི་བདེན་པ་བཞི་ནི་མཐར་གྱིས་མངོན་པར་རྟོགས་ཀྱི་མངོན་པར་རྟོགས་པ་གཅིག་ནི་མེད་དོ། །ཁྱིམ་བདག་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པར་བྱའོ། །ཞེས་བྱ་བ་ནས། རྒྱས་པར་སྡུག་བསྔལ་འགོག་པ་འཕགས་པའི་བདེན་པ་མངོན་པར་མ་རྟོགས་པར་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་མངོན་པར་རྟོགས་པར་བྱའོ། །ཞེས་བྱ་བའི་བར་དུ་སྨྲ་ན། དེ་སྐད་དུ་ནི་མ་སྨྲ་ཞིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པར་འགྱུར་བ་གང་ཡིན་པ་དེ་ནི་གནས་མེད་ཅིང་སྐབས་མེད་དོ། །སྡུག་བསྔལ་འཕགས་པའི་བདེན་པ་མངོན་པར་རྟོགས་ནས་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པ་འདི་ནི་གནས་ཡོད་ཅིང་གོ་སྐབས་ཡོད་དོ་ཞེས་བྱ་བ་ནས། དེ་བཞིན་དུ་བདེན་པ་གཞན་ལའང་སྦྱར་ནས་དཔེ་ནི་ཁང་པ་བརྩེགས་མའམ། ཁང་པ་བརྩེགས་མ་ཆེན་(༢༥༦བ)
པོའི་རྨང་དང་རྩིག་པ་དང་ཕྱམ་སོ་དང་། གཡོགས་མ་རྣམས་སྔ་མ་སྔ་མ་ལ་རྐང་པ་མ་བཞག་པར་ཕྱི་མ་ཕྱི་མ་ལ་རྐང་པ་བཞག་པར་བྱ་བའི་གནས་མེད་ཅིང་གོ་སྐབས་མེད་པ་དང་། སྔ་མ་སྔ་མ་ལ་བཞག་ནས་ཕྱི་མ་ཕྱི་མ་ལ་བཞག་པའི་གནས་དང་གོ་སྐབས་ཡོད་པའི་སྒོ་ནས་གསུངས་པ་དང་། དགེ་སློང་གཅིག་ཅིག་གིས་གསོལ་བ་ལ་ཡང་བང་རིམ་བཞི་ལ་འཛེགས་པའི་དཔེར་གསུངས་པ་དང་། ཀུན་དགའ་བོས་གསོལ་པ་ལ་ཡང་གདང་བུ་བཞི་པའི་ཐེམ་སྐས་དཔེར་གསུངས་སོ། །གལ་ཏེ་མདོ་ལས་གང་ཞིག་སྡུག་བསྔལ་ལ་ནེམ་ནུར་མེད་ཅིང་ཐེ་ཚོམ་མེད་པ་དེ་ནི་སངས་རྒྱས་ལའང་ཞེས་གསུངས་པས་སྡུག་བསྔལ་ཤེས་པ་དང་། སངས་རྒྱས་ཤེས་པ་དུས་མཉམ་དུ་བཤད་པའི་ཕྱིར་བདེན་པ་རྟོགས་པ་རིམ་ཅན་མ་ཡིན་པས་མངོན་པར་རྟོགས་པ་གཅིག་གོ་ཟེར་ན། སྒྲུབ་བྱེད་དེས་བསྒྲུབ་བྱ་དེ་ལྟར་སྒྲུབ་པ་དེ་ནི་མ་ཡིན་ཏེ། སྡུག་བསྔལ་མངོན་པར་རྟོགས་ནའང་བུདྡྷའི་ཡུལ་ལ་ཐེ་ཚོམ་ཟ་བ་མངོན་གྱུར་དུ་མི་འབྱུང་བ་དང་། གདོན་མི་ཟ་བར་སྤང་བར་འགྱུར་བ་ལ་དགོངས་ནས་མདོ་དེ་ལྟར་གསུངས་པའི་ཕྱིར་རོ། །གསུམ་པ་ནི། དེ་ནི་ཆོས་མཆོག་དང་ས་གཅིག །མངོན་རྟོགས་སེམས་བཅུ་དྲུག་བཤད་པ་དེ་ནི་ཆོས་མཆོག་དང་ས་གཅིག་སྟེ། དེ་ནི་ས་དྲུག་པའོ་ཞེས་སྔར་བཤད་ཟིན་ཏོ། །ངེས་འབྱེད་གཞན་དྲོད་རྩེ་བཟོད་པ་དང་ས་གཅིག་པར་མི་འཆད་པར་ཆོས་མཆོག་ཁོ་ན་དང་ས་གཅིག་པར་འཆད་པ་ཅིས་སྙམ་ན། ཆོས་མཆོག་གིས་གཞན་ཡང་ས་གཅིག་པར་མཚོན་པ་ཡིན། ཡང་ན་ཆོས་མཆོག་དང་ནི་གང་ཟག་ཐམས་ཅད་ལས་གཅིག་པར་ངེས་པ་ཡིན། གཞན་གསུམ་གང་ཟག་ལ་ལ་ལ་ངེས་པ་མེད་དེ། བཟོད་པ་ལྟ་བུ་མི་ལྕོགས་པ་མེད་པ་ལ་སྐྱེས་པ་ན་མཐོང་ལམ་དངོས་གཞི་ལ་སྐྱེས་པའང་། (༢༥༧ན)
སྲིད་པས་ངེས་པ་མེད་དོ། །བཞི་པ་སེམས་བཅུ་དྲུག་ཏུ་དབྱེ་བ་ལ། བར་ཆད་མེད་ལམ་དང་རྣམ་གྲོལ་ལམ་དུ་བསྟན་པའི་དབྱེ་བ་དང་། མཐོང་ལམ་གྱི་ངེས་ཚིག་གོ། །དང་པོ་ནི། བཟོད་དང་ཤེས་པ་གོ་རིམས་བཞིན། །བར་ཆད་མེད་དང་རྣམ་གྲོལ་ལམ། །བཟོད་པ་རྣམས་ནི་ཆོས་ཅན་བར་ཆད་མེད་པའི་ལམ་ཡིན་ཏེ། ཉོན་མོངས་པའི་ཐོབ་པ་གཅོད་པ་ལ་བར་ཆད་བྱ་མི་ནུས་པའི་ཕྱིར། ཤེས་པ་རྣམས་ནི་ཆོས་ཅན། རྣམ་གྲོལ་གྱི་ལམ་ཡིན་ཏེ། ཉོན་མོངས་པའི་ཐོབ་པ་ལས་གྲོལ་བ་རྣམས་ལ་བྲལ་ཐོབ་དང་ལྷན་ཅིག་ཏུ་སྐྱེ་བའི་ཕྱིར། གོ་རིམ་བཞིན་ནི་གཞུང་གི་སྦྱོར་ཚུལ་ལོ། །དེས་ན་གཉིས་ཀའང་གཉེན་པོ་ཡིན་པར་འགྱུར་ཏེ། བར་ཆད་མེད་ལམ་གྱིས་ཉོན་མོངས་པའི་ཆོམ་རྐུན་དེའི་ཐོབ་པ་གཅོད་པའི་སྒོ་ནས་འབྱིན་པར་བྱེད་ལ། རྣམ་གྲོལ་གྱི་ལམ་གྱིས་ནི་བྲལ་ཐོབ་ད་ལྟར་དུ་བྱེད་པའི་སྒོ་གཅོད་པའི་ཕྱིར། དཔེར་ན། གཉིས་ལས་གཅིག་གིས་ནི་རྐུན་པོ་འབྱིན་པར་བྱེད་པ་དང་། གཉིས་པས་ནི་དེ་ནང་དུ་མི་ཤོར་བར་བྱ་བའི་ཕྱིར་སྒོ་གཅོད་པ་བཞིན་ནོ། །གལ་ཏེ་སྡུག་བསྔལ་ལ་ཆོས་བཟོད་ཀྱིས་རྗེས་སུ་སྡུག་བསྔལ་ལ་ཆོས་ཤེས་སྐྱེ་མི་དགོས་པར་བར་ཆད་མེད་ལམ་གཉིས་པ་སྡུག་བསྔལ་རྗེས་བཟོད་ཁོ་ན་བྲལ་བའི་ཐོབ་པ་དང་ལྷན་ཅིག་སྐྱེ་བར་འགྱུར་རོ་སྙམ་ན་ནི། མི་འཐད་དེ། སྡུག་བསྔལ་དེ་ལ་ཆོས་བཟོད་ཀྱིས་ནི་ཐེ་ཚོམ་དང་བཅས་པ་ཁོ་ནར་འཇུག་སྟེ། ཐེ་ཚོམ་མ་སྤངས་པའི་ཕྱིར། འདོད་པའི་སྡུག་བསྔལ་ལ་དམིགས་པ་དེ་ཁོ་ན་ལ་ནི་རྗེས་བཟོད་ཀྱི་ཐེ་ཚོམ་སྤངས་པའི་ཤེས་པ་སྐྱེ་བར་མི་འགྱུར་ཏེ། དེས་འདོད་པའི་སྡུག་བསྔལ་ཡུལ་དུ་མི་བྱེད་པའི་ཕྱིར། དེ་ལྟར་ན། མདོ་ལས་ཉོན་མོངས་པ་རྣམས་ནི་ཤེས་པ་བརྒྱད་ཀྱིས་སྤང་བྱ་བརྒྱད་དང་། སྒོམ་སྤོང་དང་བཅས་པའི་ཀུན་སྦྱོར་རིས་དགུ་ཤེས་པས་གཞོམ་པར་བཤད་པ་དེ་མི་འཐད་པར་ཐལ། བཟོད་(༢༥༧བ)
པ་རྣམས་ཀྱིས་ཉོན་མོངས་པ་སྤངས་པའི་ཕྱིར་ཞེ་ན། བཟོད་པས་སྤང་བྱའི་ཀུན་སྦྱོར་གྱི་རིས་ལ་ཤེས་པས་སྤང་བྱའང་ཡིན་པར་བརྗོད་པས་མི་འགལ་ཏེ། བཟོད་པ་རྣམས་ནི་ཤེས་པའི་འཁོར་ཡིན་པའི་ཕྱིར། རྒྱལ་པོའི་འཁོར་གྱིས་བྱས་པ་ལ་རྒྱལ་པོས་བྱས་ཞེས་བརྗོད་པ་བཞིན་ནོ། །སྒོམ་པས་སྤང་བྱའི་ཀུན་སྦྱོར་གྱི་རིས་ནི་ཤེས་པས་སྤང་བྱ་ཁོ་ན་སྟེ། དེའི་བར་ཆད་མེད་ལམ་ཡང་ཤེས་པའི་འཁོར་ཡིན་པས་བར་ཆད་མེད་ལམ་དེའི་ཁྱད་པར་དུ་གཏོགས་པའི་ཕྱིར། གཉིས་པ་ནི། དེ་ལ་སྐད་ཅིག་བཅོ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །སེམས་བཅུ་དྲུག་པོ་ཐམས་ཅད་མཐོང་ལམ་མ་ཡིན་གྱི། སེམས་བཅུ་དྲུག་པོ་དེ་ལ་སྡུག་བསྔལ་ལ་ཆོས་ཤེས་པའི་བཟོད་པ་ནས་བཟུང་སྟེ་ལམ་ལ་རྗེས་སུ་ཤེས་པའི་བཟོད་པའི་བར་སྐད་ཅིག་བཅོ་ལྔ་པོ་མཐོང་བའི་ལམ་ཡིན་ཏེ་བདེན་པ་མ་མཐོང་བ་མཐོང་བའི་ཕྱིར་རོ། །སེམས་ཀྱི་སྐད་ཅིག་བཅུ་དྲུག་པ་ལ་ནི་སྒོམ་ལམ་ཁོ་ན་ཡིན་ཏེ། བདེན་པ་སྔོན་མ་མཐོང་བ་མཐོང་བྱར་མེད་ཀྱི། ཇི་ལྟར་མཐོང་བ་གོམས་པར་བྱེད་པའི་ཕྱིར་རོ། །འོ་ན་བར་གྱི་ཤེས་པ་བདུན་པོའང་སྔོན་མ་མཐོང་བའི་དོན་དུ་མཐོང་བ་མིན་པས་མཐོང་ལམ་དུ་མི་བཞག་པར་འགྲོ་སྙམ་ན། བདུན་པོ་དེ་རང་ལ་མ་མཐོང་བའི་དོན་མཐོང་བ་མེད་ཀྱང་། གཞན་གྱིས་མ་མཐོང་བ་མཐོང་བའི་ཆེད་དུ་ཞུགས་པས་མཐོང་ལམ་དུ་བཞག་སྟེ། ཕྱོགས་གཅིག་མཚོན་ན་སྡུག་བསྔལ་ལ་ཆོས་ཤེས་དེ་སྡུག་བསྔལ་གྱིས་ཆོས་ཉིད་སྔར་མ་མཐོང་བ་མིན་ཀྱང་། ཀུན་འབྱུང་གི་ཆོས་ཉིད་མ་མཐོང་བ་མཐོང་བ་ཀུན་འབྱུང་ལ་རྗེས་སུ་ཤེས་པའི་བཟོད་པ་ཡིན་པ་དེའི་ཆེད་དུ་ཞུགས་པས་མཐོང་ལམ་དུ་བཞག་པའི་ཕྱིར། ལམ་ལ་རྗེས་ཤེས་ནི་ཁོ་རང་མ་མཐོང་བ་མཐོང་བའང་མིན་ལ། མ་མཐོང་བ་མཐོང་བ་གཞན་གྱི་ཆེད་དུ་ཞུགས་པ་ཡང་མིན་པས་མཐོང་ལམ་དུ་མི་བཞག་(༢༥༨ན)
གོ། །ལམ་ལ་རྗེས་སུ་ཤེས་པའི་བཟོད་པའི་སྐད་ཅིག་སྔོན་མ་མཐོང་བ་མ་ཡིན་ནམ་ཞེ་ན། ལམ་ལ་རྗེས་སུ་ཤེས་པའི་བཟོད་པ་ནི་བདག་ཉིད་མ་གཏོགས་པ་ལྷག་མ་ས་དགུས་བསྡུས་པའི་རྗེས་སུ་ཤེས་པ་ཕྱོགས་དང་མཐུན་པའི་ལམ་ལ་དམིགས་པར་བྱེད་ལ། དེ་ལྟར་ནའང་རང་གིས་རང་མཐོང་བའི་བདག་ཉིད་དུ་བྱེད་པ་མི་རུང་བས་རྗེས་ཤེས་ཀྱི་མཐོང་དགོས་ཀྱང་། དེ་མཐོང་ལམ་དུ་མི་བཞག་སྟེ། བདེན་པ་མཐོང་མ་མཐོང་ནི་བདེན་པའི་དབང་དུ་བྱས་ཀྱི། རྣམ་པའི་སྐད་ཅིག་མ་མཐོང་བས་མཐོང་བར་བཞག་པར་མ་ཡིན་པའི་ཕྱིར། ཉག་མ་གཅིག་མ་བརྔས་ཀྱང་ཞིང་མ་བརྔས་པར་མི་འགྱུར་བ་བཞིན་ནོ། །སྐད་ཅིག་མ་བཅུ་དྲུག་ནི་སྒོམ་པའི་ལམ་ཡིན་ཏེ། དགེ་སྦྱོང་ཚུལ་འབྲས་ཡིན་པའི་ཕྱིར། ཕྱིར་འོང་གི་འབྲས་བུ་དང་དགྲ་བཅོམ་པའི་འབྲས་བུ་བཞིན། གཞན་ཡང་དེ་སྒོམ་ལམ་ཁོ་ན་ཡིན་ཏེ། ཤེས་པ་བརྒྱད། རྣམ་པ་བཅུ་དྲུག་ཐོབ་པའི་ཕྱིར། ཞུགས་པའི་ལམ་རྣམ་པར་ཉམས་པའི་ཕྱིར། འབྲས་བུ་གཞན་བཞིན་བཅུ་དྲུག་པ་ལ་ནི་ཤེས་པ་བརྒྱད་ཀའང་ཐོབ་ལ་མི་རྟག་པ་སོགས་རྣམ་པ་བཅུ་དྲུག་ཀྱང་ཐོབ་ལ། མཐོང་ལམ་ལ་ནི་དེ་ཁོ་ན་བཞིན་ཤེས་པ་བརྒྱད་དང་རྣམ་པ་བཅུ་དྲུག་ཐོབ་པ་མེད་དེ། མཐོང་བ་ལ་ནི་བཟོད་པ་དང་། ཤེས་པ་ཅི་ལྟར་སྐྱེ་བ་རྣམས་མ་འོངས་ཐོབ་ཅེས་འབྱུང་བའི་ཕྱིར། དེ་ལ་ནི་ཤེས་པ་དང་རྣམ་པ་སྐལ་བ་མཉམ་པ་ཁོ་ན་འཐོབ་བོ། །ལམ་ལ་རྗེས་སུ་ཤེས་པ་ནི་ལམ་སྔ་མ་སྟེ། ཞུགས་ལམ་རྣམ་པར་ཉམས་པ་ཡིན་གྱི། མཐོང་ལམ་གྱིས་ནི་ལམ་སྔ་མ་རྣམ་པར་ཉམས་པ་ནི་མ་ཡིན་ནོ། །ལམ་ལ་རྗེས་སུ་ཤེས་པ་འདི་རྒྱུན་ཆགས་པ་ཡིན་གྱི། མཐོང་བའི་ལམ་ལ་ནི་བཟོད་པའམ་ཤེས་པ་ཡང་རུང་རྒྱུན་ཆགས་པ་ཅུང་ཟད་ཀྱང་མེད་དེ། ཡར་འཕར་མར་འཕར་བྱེད་པའི་ཕྱིར། བྱེ་བྲག་ཏུ་སྨྲ་(༢༥༨བ)
བས། སྐད་ཅིག་མ་བཅུ་དྲུག་ཆོས་ཅན། མཐོང་བའི་ལམ་ཡིན་ཏེ། གདོན་མི་ཟ་བར་ཡོངས་སུ་མི་ཉམས་པའི་ཕྱིར། (རྟགས་འདིས་འཁྲུལ་གཞི་བྱས་ནས་མགོ་རྨོངས་ཀྱི་དོགས་པས་འདི་ཤེས་དགོས་ཏེ། ཡོངས་སུ་མི་ཉམས་པ་ནི་མཐོང་ལམ་ཡིན་པའི་གནད་ཀས་ཡོངས་སུ་མི་ཉམས་པ་མིན། མཐོང་སྤོང་སྤངས་པ་འཛིན་པས་ཡོངས་སུ་མི་ཉམས་པའི་དོན་ཏོ། །མཆན།) སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་བཞིན། ཡང་ན་ཁྱེད་ཅག་དེ་སྒོམ་ལམ་དུ་བསྒྲུབ་བྱར་འདོད་ནའང་རང་གི་ཕྱོགས་བཅུ་དྲུག་པ་སྒོམ་ལམ་དུ་འདོད་པ་དེ་སུན་འབྱིན་པར་འགྱུར་བར་མངོན་ཏེ། འདི་ལྟར་བཅུ་དྲུག་པ་སྒོམ་ལམ་ཡིན་པའི་ཕྱོགས་འདི་རྗེས་སུ་དཔག་པས་རང་གི་ངོ་བོ་ལས་བཟློག་པ་ཡིན་ཏེ། ཡོངས་སུ་མི་ཉམས་པ་ཉིད་རྗེས་སུ་དཔག་པས་བསལ་བྱ་ཡིན་པའི་ཕྱིར་ཏེ། མཐོང་བས་སྤང་བར་བྱ་བའི་ཉོན་མོངས་པ་རྣམས་ཀྱི་སྤངས་པ་ལམ་ལ་རྗེས་སུ་ཤེས་པའི་རྟེན་གྱི་གཉེན་པོ་ཡང་དག་པར་འཛིན་པའི་ཕྱིར། ཡང་བཅུ་དྲུག་པ་དེ་ཡོངས་སུ་མི་ཉམས་པ་མ་གྲུབ་བོ་ཞེ་ན། རྒྱུན་ཞུགས་ཀྱི་འབྲས་བུ་ལས་ཡོངས་སུ་ཉམས་པར་འགྱུར་པར་ཐལ། འདོད་པ་དེའི་ཕྱིར། དེའང་འདོད་མི་ནུས་པས་སོ། །རྒྱུ་མཚན་དེ་ཉིད་ཀྱི་ཕྱིར་བཅུ་དྲུག་པ་མཐོང་ལམ་ཡིན་ནོ་ཞེ་ན། འོ་ན་ལམ་རྗེས་ཤེས་ཀྱི་སྒོམ་ལམ་དེ་ཕན་ཆད་རྒྱུན་ཆགས་ཀྱི་ཚུལ་གྱིས་འབྱུང་བའི་བཅུ་བདུན་པ་དང་བཅོ་བརྒྱད་པ་སོགས་མཐོང་ལམ་དུ་ཧ་ཅང་ཐལ་བར་འགྱུར་ཏེ། ལམ་རྗེས་སུ་ཤེས་པ་ཕན་ཆད་ཀྱི་སྒོམ་ལམ་ཐམས་ཅད་ཀྱིས་མཐོང་སྤོང་སྤངས་པ་ཡང་དག་པར་འཛིན་པའི་ཕྱིར། མཐོང་སྤོང་སྤང་བའི་སྤངས་པ་ཡོངས་སུ་མི་ཉམས་པས་དེ་མཐོང་ལམ་ཡིན་པ་མ་ངེས་པས། དེས་དེ་བསྒྲུབ་པར་ཡང་མི་ནུས་ལ། བཅུ་དྲུག་པ་སྒོམ་ལམ་དུ་འདོད་པའི་ཕྱོགས་སུན་འབྱིན་པའང་ག་ལ་འགྱུར་རོ། །སྡུག་བསྔལ་ཤེས་པ་ནས་(༢༥༩ན)
ལམ་ལ་ཆོས་ཤེས་པའི་བར་གྱི་ཤེས་པ་བདུན་མཐོང་ལམ་ཡིན་ཏེ། བདེན་པ་ཐམས་ཅད་ཀྱི་མཐོང་བ་མ་རྫོགས་པའི་ཕྱིར། ལམ་ལ་རྗེས་བཟོད་སྐྱེས་པའི་ཚེ་ནི་མཐོང་བ་རྫོགས་པ་ཡིན་ཏེ། བདེན་པ་ཐམས་ཅད་མཐོང་བའི་ཕྱིར། དེའང་སྡུག་བསྔལ་ལ་ཆོས་ཤེས་སྐྱེས་པའི་ཚེ་འོག་མའི་སྡུག་བསྔལ་མཐོང་མོད་ཀྱི་གོང་མ་གཉིས་ཀྱིས་མ་མཐོང་ངོ་། །ལམ་ལ་ཆོས་ཤེས་སྐྱེས་པ་ལའང་དེས་མཚོན་ནོ། །དེས་ན་བདེན་པ་མཐོང་བ་མ་རྫོགས་པས་སྡུག་བསྔལ་ཆོས་བཟོད་ནས་ལམ་རྗེས་བཟོད་ཀྱི་བར་གྱུར་བ་དེ་ཐམས་ཅད་མཐོང་ལམ་དུ་གྲུབ་བོ། །འདིར་སྨྲས་པ། སེམས་ནི་ཉོན་མོངས་ཕྱོགས་ལ་ལེ་ལོ་ཡིས། །མངོན་པར་འཕྱན་བྱས་ངན་རྟོག་བརྒྱུད་མ་དང་། །བསྲེས་འགས་དམ་པའི་ལས་ཚུལ་སྨོད་ཆེད་དུ། །དོན་ལོག་ཚིག་གི་སྦྱོར་བ་བྱེད་རྣམས་ལ། །མི་བཟོད་སྙིང་རྗེས་དྲངས་པའི་བློ་ཤུགས་ཀྱིས། །བདེན་པའི་དོན་ལ་ལྷག་པར་ཡིད་དྭངས་ནས། །ལུས་སེམས་ལས་རུང་མཉེས་གཤིན་ཐོབ་བཞིན་བར། །བློ་གྲོས་རྣོན་པོས་ཚེགས་མེད་སླ་བར་བཤད། །དེ་ལྟའི་སྤོབས་པ་ཐོགས་པ་མེད་འདོད་ན། །རྟག་ཏུ་ཐར་པའི་ཕྱོགས་འདིར་ཡིད་དམ་བཟུང་། །ཞེས་སོ། །གཉིས་པ་གང་ཟག་བཤད་པ་ལ། གང་ཟག་ཟུང་བཞི་བཤད་པ། རྣམ་གྲངས་བདུན་དུ་དབྱེ་བ། རྫས་དྲུག་ཏུ་བསྡུ་བའོ། །དང་པོ་ལ། རྒྱུན་ཞུགས་ཞུགས་པ་བཤད་པ། ཆགས་བྲལ་སྔོན་སོང་བཤད་པ། འབྲས་བུ་མཐར་གྱིས་བ་བཤད་པའོ། །དང་པོ་ལ། བློའི་དབྱེ་བ་དང་། སྤངས་རྟོགས་ཀྱི་ཁྱད་པར་རོ། །དང་པོ་ནི། དབང་པོ་རྣོ་རྟུལ་དེ་དག་ཏུ། །དད་དང་ཆོས་ཀྱི་རྗེས་འབྲང་བ། །འཕགས་པའི་ལམ་མཐོང་སྒོམ་མི་སློབ་པ་གསུམ་སྐྱེས་པའི་གང་ཟག་རྣམས་རྣམ་པར་བཤད་པར་བྱ་སྟེ། མཐོང་ལམ་སྐད་ཅིག་བཅོ་ལྔ་པོ་དེ་དག་ཏུ་གནས་པའི་གང་ཟག་དབང་པོ་རྟུལ་པོ་ཤེས་རབ་མི་གསལ། རྒྱ་ཆུང་བ། (༢༥༩བ)
བུལ་བ་དེ་ནི་དད་པས་རྗེས་སུ་འབྲང་བའི་ངང་ཚུལ་ཡིན་པས་དད་རྗེས་འབྲང་བ་ཞེས་བྱ་སྟེ། སྔོན་སོ་སྐྱེའི་གནས་སྐབས་ན་དྲན་པ་ཉེར་གཞག་སོགས་ལམ་ལ་སྦྱོར་བ་ན། གཞན་གྱི་ལུང་གི་དྲིན་གྱིས་ཕྱིས་དོན་གྱི་རྗེས་སུ་འབྲངས་ནས་སྡུག་བསྔལ་ལ་སོགས་པའི་བདེན་པ་རྟོགས་པའི་ཕྱིར། སྐད་ཅིག་བཅོ་ལྔ་པོ་དེ་དག་ལ་གནས་པའི་གང་ཟག་དབང་པོ་རྣོན་པོ་ཤེས་རབ་གསལ། རྒྱ་ཆེ། མྱུར་བ་དེ་ནི་ཆོས་ཀྱི་རྗེས་སུ་འབྲང་བ་འདི་ལ་ཡོད་པས་ཆོས་ཀྱི་རྗེས་འབྲངས་ཞེས་བྱ་སྟེ། སྔོན་སོ་སྐྱེའི་གནས་སྐབས་ན་རང་གིས་ཤེས་རབ་ཀྱི་མདོ་སོགས་གསུང་རབས་ཡན་ལག་བཅུ་གཉིས་ཀྱི་ཆོས་རྗེས་སུ་འབྲང་བས་བྱང་ཆུབ་ཀྱི་ཕྱོགས་མཐུན་གྱིས་དོན་ལ་སྦྱོར་ཞིང་བསམ་སྒོམ་བསྟེན་པའི་ཕྱིར་རོ། །གཉིས་པ་ནི། བསྒོམས་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །རྣམ་ལྔའི་བར་བཅོམ། གང་ཟག་དེ་གཉིས་ནི་སྔོན་འཇིག་རྟེན་པའི་ལམ་གྱིས་བསྒོམས་པས་སྤང་བྱ་མ་སྤངས་པ་འཆིང་བ་ཀུན་ལྡན་ཞིག་ཡིན་ན་འཐོབ་བྱའི་འབྲས་བུ་ཐམས་ཅད་ཀྱི་དང་པོ་ཡིན་པའི་ཕྱིར། འབྲས་བུ་རྣམས་ཀྱི་དང་པོ་རྒྱུན་ཞུགས་ཀྱི་འབྲས་བུ་ལ་ཞུགས་པ་ཞེས་བྱའོ། །གལ་ཏེ་འཇིག་རྟེན་པའི་ལམ་གྱིས་འདོད་པའི་སྒོམ་སྤོང་རྣམ་པ་ལྔའི་བར་དུ་བཅོམ་པ་ཞིག་ཡིན་ཀྱང་འཆིང་བ་ཀུན་ལྡན་བཞིན་དུ་དང་པོའི་འབྲས་བུ་ལ་ཞུགས་པའོ། །བར་དུའི་སྒྲས་ནི། གཅིག་གམ་གཉིས་གསུམ་བཞི་ལྔའི་བར་བཟུང་ངོ་། །གཉིས་པ་[ཆགས་བྲལ་སྔོན་སོང་བཤད་པ་]ལ། ཞུགས་པ་དང་། འབྲས་གནས་སོ། །དང་པོ་ལ། ཕྱིར་འོང་ཞུགས་པ་དང་། ཕྱིར་མི་འོང་ཞུགས་པའོ། །དང་པོ་ནི། གཉིས་པ་ལ། །དགུ་པ་ཚུན་ཆད་ཟད་པ་ཡིན། །སེམས་སྐད་ཅིག་བཅོ་ལྔ་ལ་གནས་པའི་གང་ཟག་དེ་གཉིས་འདོད་པའི་སྒོམ་སྤོང་དྲུག་པ་ནས་དགུ་པ་ཚུན་ཆད་(རྣམ་པ་དགུ་སྤངས་པ་མན་ཆད་དེ། དོན་གྱི་རྣམ་པ་དགུ་སྤངས་པ་མ་གཏོགས་ཞེས་བཤད་དོ། །མཆན།)དེ་རྣམ་པ་དྲུག་པའམ་བདུན་ནམ་བརྒྱད་སྤངས་ཤིང་ཟད་པ་ཡིན་ན་འབྲས་བུ་(༢༦༠ན)
གཉིས་པ་ལན་གཅིག་ཕྱིར་འོང་གི་འབྲས་བུའི་ཕྱིར་ཞུགས་པའོ། །གཉིས་པ་ནི། འདོད་པའམ་ཡང་ན་གོང་མ་ལས། །ཆགས་བྲལ་གསུམ་པ་ལ་ཞུགས་པ། །རྣམ་པ་དགུ་པ་སྤངས་པས་འདོད་པའི་ཁམས་ལ་ཆགས་བྲལ་ཡིན་པའམ། ཡང་ན་གོང་མ་ཅི་ཡང་གི་བར་ལ་ཆགས་བྲལ་ཞིག་ཡིན་ན་དེ་གཉིས་འབྲས་བུ་གསུམ་པ་ཕྱིར་མི་འོང་གི་འབྲས་བུ་ལ་ཞུགས་པའོ། །གཉིས་པ་འབྲས་གནས་ལ། དངོས་དང་། མིང་གི་འབོད་ཚུལ་ལོ། །དང་པོ་ནི། གང་ཞིག་གང་ལ་ཞུགས་པ་ནི། །བཅུ་དྲུག་པ་ལ་དེ་འབྲས་གནས། །གང་ཟག་དབང་པོ་རྟུལ་རྣོ་གང་ཞིག་འབྲས་བུ་གསུམ་པོ་གང་ལ་ཞུགས་པ་དེ་ནི་སེམས་ཀྱི་སྐད་ཅིག་བཅུ་དྲུག་པོ་སྐྱེས་པ་ན། དེའི་ཚེ་དད་པས་རྗེས་སུ་འབྲང་བ་དང་ཆོས་ཀྱི་རྗེས་སུ་འབྲང་ཞེས་མི་བྱ་ཞིང་། ཞུགས་པ་ཞེས་མི་བྱའི། གང་ལ་ཞུགས་པའི་འབྲས་བུ་དེ་དང་དེ་ལ་གནས་པ་ཡིན་ནོ། །དགྲ་བཅོམ་ཉིད་ནི་ཕྱིར་མི་འོང་གི་འབྲས་བུ་མ་ཐོབ་པའི་དང་པོར་ཐོབ་པར་མི་ནུས་ཏེ། མཐོང་ལམ་གྱིས་སྲིད་རྩེའི་སྒོམ་སྤོང་སྤངས་པ་མི་སྲིད་པའི་ཕྱིར་དང་། སྔར་སོ་སྐྱེའི་གནས་སྐབས་ན་འཇིག་རྟེན་པའི་ལམ་གྱིས་སྲིད་རྩེ་ལས་འདོད་ཆགས་དང་བྲལ་བ་མི་སྲིད་པའི་ཕྱིར་ཏེ། དེའི་གོང་ན་ས་མེད་པའི་ཕྱིར། གཉིས་པ་ནི། དེ་ཚེ་དབང་པོ་རྣོ་རྟུལ་དག །དད་པས་མོས་དང་མཐོང་བས་ཐོབ། །སྐད་ཅིག་བཅུ་དྲུག་ལ་གནས་པ་དེའི་ཚེ་དབང་པོ་རྟུལ་པོ་སྔོན་དད་པའི་རྗེས་འབྲངས་དེ་དད་པས་མོས་པ་ཞེས་བྱ་སྟེ། ཤེས་རབ་མོས་པ་མ་ཡིན་མོད་ཀྱི། དད་པས་མོས་པ་རབ་ཏུ་ཕྱེ་བའི་ཕྱིར། དབང་པོ་རྣོན་པོ་སྔོན་ཆོས་ཀྱི་རྗེས་འབྲངས་དེ་ནི་དེའི་ཚེ་མཐོང་བས་ཐོབ་པ་ཞེས་བྱ་སྟེ། དད་པ་མོངས་པ་མ་ཡིན་མོད་ཀྱི། ཤེས་རབ་ལྷག་པས་མཐོང་བ་རབ་ཏུ་ཕྱེ་བའི་ཕྱིར། གཞན་ནི་ངེས་ཚིག་གི་ཚུལ་ལ་དམིགས་ནས་དད་པའི་དབང་གིས་མཐོང་སྤོང་ལས་གྲོལ་བས་དད་པའི་དབང་གིས་གྲོལ་བ་དང་། ལྟ་བའི་དབང་གིས་འབྲས་བུ་ཐོབ་པས་མཐོང་བས་ཐོབ་པ་ཡིན་ནོ་ཞེས་བྱའོ། །གསུམ་པ་འབྲས་བུ་མཐར་གྱིས་པ་བ་ཤད་པ་ལ།(༢༦༠བ)
རྒྱུན་ཞུགས་ཞུགས་གནས། ཕྱིར་འོང་ཞུགས་གནས། ཕྱིར་མི་འོང་ཞུགས་གནས། དགྲ་བཅོམ་ཞུགས་གནས་སོ། །དང་པོ་ལ། ཞུགས་པ་ནི། གོང་དུ་བཤད་ཟིན་ཏོ། །གཉིས་པ་འབྲས་གནས་ལ། སྤྱིར་བསྟན་པ་དང་། སོ་སོར་བཤད་པའོ། །དང་པོ་ལ། འབྲས་གནས་ཙམ་པོ་བ་ཞུགས་པ་མ་ཡིན་པར་བསྟན་པ། ཞུགས་པའི་ལམ་དང་སྒོམ་སྤང་གི་དབྱེ་བའོ། །དང་པོ་ནི། འབྲས་ཐོབ་འབྲས་བུ་ཁྱད་པར་གྱི། །ལམ་ཐོབ་མེད་པས་དེ་ཡི་ཕྱིར། །འབྲས་གནས་ཁྱད་པར་བྱ་བའི་ཕྱིར། །མི་བརྩོན་བ་ནི་ཞུགས་མ་ཡིན། །རྣམ་པ་ལྔ་སྤངས་ཀྱང་སེམས་བཅུ་དྲུག་པ་ལ་རྒྱུན་ཞུགས་ཞེས་བྱའི་ལན་ཅིག་ཕྱིར་འོང་གི་འབྲས་བུ་ལ་ཞུགས་པ་ཞེས་མི་བྱ་ཞེ་ན། འདོད་པའི་སྒོམ་སྤོང་རྣམ་པ་ལྔ་སྤངས་པ་སེམས་བཅུ་དྲུག་པ་ལ་གནས་པ་ནི་ཆོས་ཅན། ལན་ཅིག་ཕྱིར་འོང་གི་འབྲས་བུ་ལ་ཞུགས་པ་མ་ཡིན་ཏེ། རྒྱུན་ཞུགས་ཀྱི་འབྲས་བུ་ཙམ་ཐོབ་ཀྱི། རྒྱུན་ཞུགས་ཀྱི་འབྲས་གནས་ཁྱད་པར་དུ་བྱ་བའི་ཕྱིར་ལན་གཅིག་ཕྱིར་འོང་གི་འབྲས་བུ་ཐོབ་པ་ལ་མི་བརྩོན་པའི་ཕྱིར་ཏེ། རྒྱུན་ཞུགས་ཀྱི་འབྲས་བུ་ཁྱད་པར་ཅན་གྱི་ལམ་འདོད་པའི་སྒོམ་སྤང་རྣམ་པ་དང་པོ་ལ་སོགས་པའི་གཉེན་པོ་ལམ་མི་བསྒོམ་ཞིང་ཐོབ་པ་མེད་པས་དེའི་ཕྱིར་རོ། །ཤུགས་ཀྱིས་ན་གང་གི་ཚེ་རབ་ཏུ་སྦྱོར་བའི་ཚེ་ནི་ཞུགས་པ་ཡིན་ནོ་ཞེས་བཤད་པར་འགྱུར་རོ། །རྒྱུན་དུ་ཞུགས་པ་བཤད་ཟིན་ཏོ། །དེ་བཞིན་དུ་འབྲས་བུ་གཞན་ལན་ཅིག་ཕྱིར་འོང་དང་ཕྱིར་མི་འོང་གི་འབྲས་བུ་ལ་སྦྱར་ཏེ། འཇིག་རྟེན་པའི་ལམ་གྱིས་རྣམ་པ་དྲུག་སྤངས་པ་སེམས་བཅུ་དྲུག་ལ་གནས་པ་དང་། འདོད་པའམ་གོང་མ་ཅིའང་མེད་པའི་སྐྱེ་མཆེད་ཀྱི་བར་ལས་ཆགས་བྲལ་སེམས་བཅུ་དྲུག་པ་ལ་གནས་པ་དེ་དག་ལན་ཅིག་ཕྱིར་འོང་གི་འབྲས་གནས་དང་། ཕྱིར་མི་འོང་གི་འབྲས་གནས་ཡིན་གྱི། ཕྱིར་མི་འོང་གི་འབྲས་བུ་ལ་ཞུགས་པ་དང་དགྲ་བཅོམ་ལ་ཞུགས་པ་མ་ཡིན་ཏེ། ’འབྲས་ཐོབ་འབྲས་བུའི་ཁྱད་པར་གྱིས། ལམ་ཐོབ་མེད་པས། ཞེས་པའི་ཕྱིར་རོ། །(༢༦༡ན)
བཤད་མ་ཐག་པ་དེ་ཉིད་ཞིབ་པར་བཤད་ན། མཐར་གྱིས་པའི་སྐབས་སུ་ལྔ་པ་སྤངས་པ་ལ་ཕྱིར་འོང་བའི་རྒྱུ་ལ་བཞག་པ་བཞིན་དུ་ཆགས་བྲལ་སྔོན་དུ་འགྲོ་བ་ལའང་སྔར་ལྔ་པ་སྤངས་པའི་བཅུ་དྲུག་པ་དེ་རྒྱུན་ཞུགས་ཀྱི་འབྲས་བུ་ལ་གནས་པ་ཡང་ཡིན། ཕྱིར་འོང་བའི་འབྲས་བུ་ལ་ཞུགས་པར་ཡང་ཅིས་མི་བཞགམཐར་གྱིས་པའི་སྐབས་སུ་བདུན་པ་དང་བརྒྱད་པ་སྤངས་པ་ཕྱིར་མི་འོང་བའི་འབྲས་བུ་ལ་ཞུགས་པར་བཞག་པ་བཞིན་དུ་ཆགས་བྲལ་སྔོན་དུ་འགྲོ་བའི་བདུན་པ་དང་བརྒྱད་པ་སྤངས་པའི་བཅུ་དྲུག་པ་ཕྱིར་འོང་གི་འབྲས་བུ་ལ་གནས་པའང་ཡིན་ལ། ཕྱིར་མི་འོང་བའི་འབྲས་བུ་ལ་ཞུགས་པར་ཡང་ཅིས་མི་བཞགམཐར་གྱིས་པའི་སྐབས་སུ་འདོད་པའི་དགུ་པ་སྤངས་པ་དང་། ཅིའང་མེད་པ་མན་ཆད་ཀྱི་དགུ་པ་སྤངས་པ་ཕྱིར་མི་འོང་གི་འབྲས་བུའང་ཡིན། དགྲ་བཅོམ་རྒྱུ་ལ་ཞུགས་པ་ཡིན་པ་བཞིན་ཆགས་བྲལ་སྔོན་དུ་འགྲོ་བའི་སྐབས་སུ་སྔར་འདོད་པའི་དགུ་པ་སྤངས་པའམ། ཅིའང་མེད་པའི་དགུ་པ་སྤངས་པའི་བཅུ་དྲུག་པ་ཕྱིར་མི་འོང་བའི་འབྲས་བུའང་ཡིན། དགྲ་བཅོམ་པའི་རྒྱུ་ལ་ཞུགས་པའང་ཅིས་མི་བཞག་སྙམ་ན། ལྔ་པ་སྤངས་པའི་བཅུ་དྲུག་པ་རྒྱུན་ཞུགས་ཀྱི་འབྲས་བུ་ཐོབ་པ་དེ་ལྔ་པ་སྤངས་ཀྱང་རྒྱུན་ཞུགས་ཀྱི་འབྲས་བུ་ཁྱད་པར་ཅན་རྒྱུན་ཞུགས་ཀྱི་འབྲས་བུའི་ཐོག་ཏུའང་ལྔ་སྤངས་པའི་རྒྱུན་ཞུགས་ཀྱི་འབྲས་བུ་ཁྱད་པར་ཅན་གྱི་ལམ་ཐོབ་པ་མེད་པས་ཕྱིར་འོང་བའི་འབྲས་བུ་ཁྱད་པར་ཅན་གྱི་ལམ་ལྔ་པ་སྤངས་པ་མེད་ཅིང་། ཕྱིར་འོང་བའི་ལམ་ལ་མི་བརྩོན་པ་དེ་ཕྱིར་འོང་བའི་འབྲས་བུ་ལ་ཞུགས་པ་མ་ཡིན་བྱས་པ་ལ། རྒྱུན་ཞུགས་ཀྱི་འབྲས་བུ་ཁྱད་པར་ཅན་ཡོད་དེ། མཐོང་སྤོང་སྤངས་པའི་ཐོག་ཏུའང་སྒོམ་སྤོང་ལྔ་སྤངས་པ་འདུག་སྙམ་ན། ལྔ་སྔར་སྤངས་པ་དེ་ནི་(༢༦༡བ)
ཟག་པ་མེད་པའི་དབང་པོས་སྤངས་པ་མིན། ལྔ་སྔར་འཇིག་རྟེན་པའི་ལམ་གྱིས་སྤངས་པ་ཙམ་གྱིས་ཕྱིར་འོང་བའི་རྒྱུ་ལ་འཇུག་པར་འགྲོ་ན། སོ་སོའི་སྐྱེ་བོ་ལྔ་པ་སྤངས་པའང་ཕྱིར་འོང་གི་རྒྱུ་ལ་འཇུག་པར་ཐལ། འོ་ན་ཕྱིར་འོང་གི་རྒྱུ་ལ་འཇུག་པ་ལ་ལྔ་སྤོང་བ་ལྟ་བུ་དེ་ཟག་པ་མེད་པའི་དབང་པོས་སྤོང་བ་གཅིག་དགོས་པ་ལ་ཟག་པ་མེད་པའི་དབང་པོས་སྤངས་པ་མེད་པས། ཕྱིར་འོང་གི་འབྲས་བུ་ལ་འཇུག་པ་མིན། འོ་ན་མཐོང་ལམ་གྱི་རྟིང་ལ་འཇིག་རྟེན་ལས་འདས་པའི་ལམ་གྱིས་ལྔ་ལྟ་བུ་སྤངས་པ་ལ་ལྔ་ཟག་མེད་ཀྱི་དབང་པོས་སྤངས་པ་ཡོད་པ་ལ་འཇིག་རྟེན་པའི་ལམ་གྱིས་སྤངས་པ་ལ་ཟག་མེད་ཀྱི་དབང་པོས་སྤངས་པ་ཡོད་དོ་སྙམ་ན། ཡོད་དེ། འཇིག་རྟེན་པ་ཡི་ལམ་གྱིས་ཆགས་པ་དང་བྲལ་བའི་སྐྱེ་འཕགས་ལ་སྤངས་པ་བརྟན་མི་བརྟན་གྱི་ཁྱད་པར་ཡོད་དེ། འཕགས་ལ་བྲལ་བའི་ཐོབ་པ་ཟག་བཅས་ཟག་མེད་རྣམ་གཉིས་སྐྱེ་བས་བརྟན་ལ། སོ་སྐྱེ་ལ་ཟག་བཅས་ཁོ་ནར་སྐྱེ་བས་མི་བརྟན་པའི་ཕྱིར་རོ། །ཞེས་འབྱུང་བ་དང་། སྔར་འདས་པའི་ལམ་སྔོན་དུ་སོང་བའོ། །གཞན་ལའང་དེ་བཞིན་དུ་སྦྱར་ཏེ། སྔར་བདུན་པ་དང་བརྒྱད་པ་སྤངས་པ་དེ་ཟག་མེད་ཀྱི་དབང་པོས་སྤངས་པ་མིན་པས་ཕྱིར་མི་འོང་བའི་འབྲས་བུ་ལ་ཞུགས་པ་མིན། ཡིན་ན་སོ་སོའི་སྐྱེ་བོའི་བདུན་པ་དང་བརྒྱད་པ་སྤངས་པ་དེའང་ཕྱིར་མི་འོང་བའི་འབྲས་བུ་ལ་འཇུག་པར་ཐལ་ལོ། །བསམ་གཏན་གསུམ་པ་ལ་ཆགས་བྲལ་ཞིག་ས་འོག་མ་མི་ལྕོགས་མེད་པའི་བསམ་གཏན་ཁྱད་པར་ཅན་དང་པོའམ་གཉིས་པ་ལ་བརྟེན་ནས་ངེས་པར་འཇུག་པ་དེ་ནི་ངེས་པར་བསམ་གཏན་གསུམ་པས་བསྡུས་པའི་ཟག་མེད་ཀྱི་བདེ་བའི་དབང་པོ་ཐོབ་པར་འགྱུར་བ་འབྲས་བུ་ཁྱད་པར་ཅན་གྱི་ལམ་བསམ་གཏན་གསུམ་པ་ཟག་མེད་མངོན་(༢༦༢ན)
དུ་བྱེད་པ་སྲིད་དེ། དེ་ནི་འདོད་ཁམས་སུ་སྐྱེས་པ་ཡིན་ཏེ། གོང་ན་མཐོང་ལམ་མེད་པ་དང་། བསམ་གཏན་གསུམ་པའི་ཉོན་མོངས་སྤངས་པའི་ཕྱིར། གལ་ཏེ་མངོན་དུ་མི་བྱེད་ན་བསམ་གཏན་བཞི་པའམ་གཟུགས་མེད་དུ་སྐྱེས་པའི་འཕགས་པ་དེ་བདེ་བའི་དབང་པོ་དང་མི་ལྡན་པར་འགྱུར་ཏེ། ཟག་བཅས་ཀྱི་བདེ་བའི་དབང་པོ་ནི་ས་འཕོས་པས་བཏང་། ཟག་མེད་ཀྱི་བདེ་བའི་དབང་པོ་མངོན་དུ་མ་བྱས་པའི་ཕྱིར། འདོད་མི་ནུས་ཏེ། བདེ་བའི་དབང་པོ་དང་ནི་བསམ་གཏན་བཞི་པ་དང་གཟུགས་མེད་པར་སྐྱེས་པའི་སོ་སོའི་སྐྱེ་བོ་མི་ལྡན་གྱི། འཕགས་པ་ནི་ལྡན་ནོ་ཞེས་འབྱུང་བའི་ཕྱིར་དང་། གང་ཞིག་ཡིད་བདེ་བའི་དབང་པོ་དང་ལྡན་པ་དེ་ནི་གདོན་མི་ཟ་བར་བཏང་སྙོམས་དང་། སྲོག་དང་། ཡིད་དང་། བདེ་བ་དང་། ཡིད་བདེ་བ་ཞེས་བྱ་བ་ལྔ་དང་ལྡན་ནོ། །ཞེས་བྱ་བ་ལ་སོགས་པ་འབྱུང་བའི་ཕྱིར། གོང་དུ་སྐྱེས་པའི་འཕགས་པའང་གདོན་མི་ཟ་བར་བདེ་བའི་དབང་པོ་དང་ལྡན་པར་བཤད་དོ། །ངག་དོན་སྤྱིར་བསྒོམ་ལ་འཇིག་རྟེན་པས་མཐོང་ལམ་གྱིས་སྔར་སྤང་བྱ་འགའ་ཞིག་སྤངས་ཀྱང་མཐོང་ལམ་སྐྱེས་ཙམ་ན་སྔར་གྱི་སྤངས་པ་དེ་ཟག་པ་མེད་པའི་དབང་པོས་སྤངས་པ་མིན་པས་འབྲས་བུ་མཐོང་ལམ་ཙམ་ཐོབ་པའི་དུས་སུ་འབྲས་བུ་ཁྱད་པར་ཅན་མི་ཐོབ་ཀྱང་མཐོང་སྤོང་སྤངས་པ་འགའ་ཞིག་ལ་འབྲས་བུ་ཁྱད་པར་ཐོབ་པ་ཡོད་དེ། སྔར་བསམ་གཏན་གསུམ་པ་ལ་འདོད་ཆགས་དང་བྲལ་ནས་བཞི་པའི་དངོས་གཞི་ཐོབ་པ་དེ་མི་ལྕོགས་མེད་པའམ། དང་པོའམ་གཉིས་པ་ལ་བརྟེན་ནས་མཐོང་ལམ་གྱིས་སྐད་ཅིག་མ་བཅུ་དྲུག་སྐྱེས་པ་དེས་དྲུག་གི་ལམ་སྐྱེས་པ་དེའི་ནང་ནས་ཀྱང་བསམ་གཏན་གསུམ་པའི་ཟག་མེད་ཀྱི་བདེ་བའི་དབང་པོ་ཐོབ་པ་ཡིན། མ་ཐོབ་ན་ཕྱིས་བསམ་གཏན་བཞི་(༢༦༢བ)
པའམ་གཟུགས་མེད་དུ་སྐྱེས་པའི་འཕགས་པ་བདེ་བའི་དབང་པོ་དང་མི་ལྡན་པར་ཐལ་བ་ལས་ལྡན་ནོ་ཞེས་སྤྱིར་བཏང་དམིགས་བསལ་ཡིན་ནོ། །སློབ་དཔོན་རྒྱལ་པོའི་སྲས་ནི། དམིགས་བསལ་ཡིན་པ་འདིར་སྨྲས་པ་ནི། རྣམ་བཤད་འདིའི་ནང་དུ་བྲིས་པ་ཡོད་མོད་ཀྱི། རང་ལུགས་བཞག་པའི་ཕྱོགས་མ་ཡིན་པར་མངོན་ཏེ། གཞན་དག་ན་རེ། ཞེས་འབྱུང་བའི་ཕྱིར། ཞེས་གསུངས་འདུག་ནའང་བོད་དུ་བསྒྱུར་བའི་རང་འགྲེལ་གཞན་དག་ན་རེ། ཞེས་པ་དེ་མི་སྣང་ངོ་། །བསམ་གཏན་བཞི་པ་ཐོབ་པ་གང་ཞིག་ས་དྲུག་ལས་གང་ཡང་རུང་བ་ཞིག་ལ་བརྟེན་ཏེ། ངེས་པར་འཇུག་པ་དེ་ནི་སེམས་བཅུ་དྲུག་པ་ལ་ཕྱིར་མི་འོང་བའི་འབྲས་བུ་མི་ལྕོགས་པ་མེད་པའི་ས་པ་དེ་ནས་བསམ་གཏན་བཞི་པའི་ས་པའི་བར་ས་དྲུག་དང་ལྡན་པ་ཡིན་ཏེ། དེ་ལྟར་འདོད་ཆགས་དང་བྲལ་བའི་ཕྱིར། གང་ཞིག་བསམ་གཏན་གསུམ་པ་ཐོབ་པ་དེ་ནི་བསམ་གཏན་བཞི་པའི་ས་པ་མ་གཏོགས་པ་ས་ལྔ་པ་དང་ལྡན་ནོ། །བསམ་གཏན་གཉིས་པ་ཐོབ་པ་ལ་གསུམ་པ་མ་ཐོབ་པ་དེ་ནི་གསུམ་པ་དང་བཞི་པའི་ས་པ་མ་གཏོགས་པ་ས་བཞི་པ་དང་ལྡན་ནོ། །འདོད་ཆགས་དང་བྲལ་བའི་བསམ་གཏན་དང་པོ་ཐོབ་ལ་གཉིས་པ་མ་ཐོབ་པ་གང་ཡིན་པ་དེ་ནི་གལ་ཏེ་ཕྱིར་མི་འོང་བའི་འབྲས་བུ་ཐོབ་ན། དེ་ཕྱིར་མི་འོང་བའི་འབྲས་བུ་མི་ལྕོགས་མེད་པ་དང་། བསམ་གཏན་ཁྱད་པར་ཅན་དང་། བསམ་གཏན་དང་པོའི་ས་པ་སྟེ་ས་གསུམ་དང་ལྡན་ནོ། །རེ་ཞིག་ཕལ་ཆེར་འདོད་པ་ལས་འདོད་ཆགས་དང་བྲལ་བ་རྣམས་ཀྱིས་ངེས་པར་འཇུག་པའི་གང་ཟག་རྣམ་པར་བཞག་པ་ནི་དེ་ལྟ་བུ་ཡིན་ནོ། །གཉིས་པ་ནི། ས་དང་ས་ན་ཉེས་རྣམ་དགུ། །དེ་བཞིན་དུ་ནི་ཡོན་ཏན་རྣམས། །ཆུང་དང་འབྲིང་དང་ཆེ་རྣམས་ཀྱི། །ཆུང་ངུ་ལ་སོགས་ཐ་དད་ཕྱིར། །འདོད་པའི་ཉོན་མོངས་ཀྱི་རྣམ་པ་དགུ་བསྟན་པ་དེ་བཞིན་དུ་ས་བསམ་གཏན་དང་པོ་དང་སྲིད་རྩེའི་བར་ས་དང་ས་ན་ཉེས་པའི་རྣམ་པ་དགུ་ཡོད་ལ། ཉེས་པ་རྣམས་ཇི་ལྟ་བ་དེ་བཞིན་དུ་ཡང་ས་དང་ས་ན་(༢༦༣ན)
ཡོན་ཏན་གཉེན་པོ་བར་ཆད་མེད་ལམ་དང་རྣམ་གྲོལ་གྱི་ལམ་རྣམས་ཀྱང་རྣམ་པ་དགུ་སྟེ། རྩ་བའི་དབྱེ་བ་ཆུང་ངུ་དང་འབྲིང་དང་ཆེན་པོ་རྣམས་ཀྱི་རེ་རེ་ཞིང་ཡང་ཆུང་ངུ་དང་ལ་སོགས་པས་འབྲིང་དང་ཆེན་པོ་ཐ་དད་པ་གསུམ་ཡིན་པའི་ཕྱིར་རོ། །དེ་ལ་ལམ་ཆུང་ངུའི་ཆུང་ངུས་ནི་ཉོན་མོངས་ཆེན་པོའི་ཆེན་པོ་སྤངས་ལ། ལམ་ཆེན་པོའི་ཆེན་པོས་ནི་ཉོན་མོངས་ཆུང་ངུའི་ཆུང་ངུ་བར་དུ་སྤོངས་ཏེ། དང་པོ་ཁོ་ནར་ལམ་ཆེན་པོ་མི་སྲིད་པའི་ཕྱིར་དང་། ལམ་ཆེན་པོ་སྐྱེས་པས་ཉོན་མོངས་པ་ཆེན་པོ་མི་སྲིད་པའི་ཕྱིར། གོས་ལ་དྲི་མ་ཆེ་ལོང་ནི་སྔར་འཁྲུ་ལ། ཕྲ་མོ་ཕྱིས་འཁྲུ་བ་དང་། མུན་པ་ཆེ་ལོང་ནི་སྣང་བ་ཆུང་ངུས་འཇོམས་ལ། ཕྲ་མོ་ནི་ཆེན་པོས་སེལ་ཞེས་བྱ་བ་འདི་དཔེའི་རྣམ་པ་ཡིན་ནོ། །འཕགས་ལམ་སྐད་ཅིག་མ་ཆུང་ངུས་ཀྱང་འཁོར་བ་ཐོག་མེད་བརྒྱུད་པས་སེལ་བའི་ཉོན་མོངས་པ་ཆེན་པོ་རྣམས་རྩ་བ་ལྟ་བུ་ཐོབ་པ་བཅད་ནས་མེད་པར་བྱེད་པའི་ཕྱིར་ཆོས་དཀར་པོ་རྣམས་ནི་སྟོབས་དང་ལྡན་པ་ཡིན་ལ། ནག་པོ་རྣམས་ནི་སྟོབས་ཆུང་སྟེ། ཡུན་རིང་པོ་ནས་བསགས་པའི་རླུང་དང་མཁྲིས་པ་ལས་གྱུར་པ་ལ་སོགས་པའི་ནད་རྣམས་སྨན་རྟི་བྲིད་སྲང་ལ་གཅལ་བའི་ཞོ་གཅིག་གིས་འབྱིན་པ་ལྟ་བུ་དང་། མར་མེ་སྐད་ཅིག་མ་ཆུང་ངུས་མུན་པ་ཆེན་པོ་འཇོམས་པ་བཞིན་ནོ། །གཉིས་པ་སོ་སོར་བཤད་པ་ལ། སྲིད་པ་ལན་བདུན་པ་དང་། རིགས་ནས་རིགས་སྐྱེ་གཉིས། དང་པོ་ལ། སྲིད་པ་ལན་བདུན་པར་ངེས་པ་དང་། སྲིད་པ་ལན་བདུན་པའི་རིགས་ཅན་ནོ། །དང་པོ་ནི། འབྲས་གནས་བསྒོམས་སྤང་བྱ་མ་ཟད། །འབྲས་བུ་ལ་གནས་པ་གང་འདོད་པའི་སྒོམ་པས་སྤང་བྱའི་ཉོན་མོངས་གཅིག་ཀྱང་མ་ཟད་ཅིང་མ་སྤངས་པ་དེ་ནི་རྒྱུན་དུ་ཞུགས་པ་ཡིན་ལ། ཐམས་ཅད་དུ་ལན་བདུན་པ་མ་ཡིན་པས་ཤིན་ཏུ་རེས་ལྟར་ཐོགས་ན་ཚེ་བདུན་གྱི་བར་དུ་སྐྱེ་བས་སྲིད་པ་ལན་བདུན་པ་སྟེ། (༢༦༣བ)
ཐམས་ཅད་ཀྱི་ཐ་ཤལ་བའོ། །མདོ་ལས་མཆོག་ཏུ་ཐོགས་ན་ལན་བདུན་པ་ཞེས་པ་ནི་མཆོག་སྟེ་རབ་ཏུ་ཐོགས་ན་སྐྱེ་བ་ལན་བདུན་པའོ། །མྱང་འདས་ཀྱི་རྒྱུན་ནི་ལམ་སྟེ། ལམ་དེ་ནས་མྱང་འདས་དེར་འགྲོ་བའི་ཕྱིར་རོ། །འདི་དེར་ཞུགས་ཤིང་ཕྱིན་ལ་སོན་པས་ན་རྒྱུན་དུ་ཞུགས་པ་ཡིན་ནོ། །མྱང་འདས་ཀྱི་ལམ་གྱི་རྒྱུན་ལ་ཞུགས་པས་རྒྱུན་ཞུགས་ཡིན་ནོ། །ཕྱིར་འོང་ཕྱིར་མི་འོང་སོགས་ཀྱང་འདས་ལམ་གྱི་རྒྱུན་ལ་ཞུགས་པས་རྒྱུན་ཞུགས་སུ་མི་འགྲོའམ་སྙམ་ན། མི་འགྲོ་སྟེ། གཞན་ལ་སྒོས་མིང་ཡོད། གཞན་ལ་མེད་པའི་ཕྱིར། དེའང་ལམ་དང་པོ་མཐོང་ལམ་ཐོབ་པའི་ཕྱིར་རོ་ཞེ་ན་ནི། ལུགས་ལས་བཟློག་ནས་བགྲངས་པའི་བརྒྱད་པ་རྒྱུན་ཞུགས་ལ་ཞུགས་པའང་རྒྱུན་ཞུགས་སུ་འགྱུར་རོ། །འབྲས་བུ་དང་པོ་ཐོབ་པའི་ཕྱིར་ཞེ་ན། འདོད་པ་དང་ཕལ་ཆེར་ལས་འདོད་ཆགས་དང་བྲལ་བ་ཕྱིར་མི་འོང་དང་ཕྱིར་འོང་ཡང་རྒྱུན་ཞུགས་སུ་འགྱུར་ཏེ། སྔོན་མ་ཐོབ་པའི་འབྲས་བུ་དང་པོ་ཡིན་པའི་ཕྱིར། འབྲས་བུ་བཞི་པོ་ཐམས་ཅད་ཐོབ་པའི་དབང་དུ་བྱས་ནས་འབྲས་བུ་དང་པོ་ཐོབ་པའི་ཕྱིར་རྒྱུན་ཞུགས་ཡིན་ནོ། །དེ་ཁོ་ན་རྒྱུན་ཞུགས་ཡིན་ལ་བརྒྱད་པ་ནི་མ་ཡིན་ཏེ། དེས་ཞུགས་པའི་ལམ་ཁོ་ན་ཐོབ་ལ། འབྲས་བུ་ཐོབ་པའི་དང་པོར་ལམ་ལ་རྗེས་སུ་ཤེས་པ་ནི་ཞུགས་པ་དང་འབྲས་བུའི་ལམ་ཐོབ་པའི་ཕྱིར། མཐོང་བ་དང་སྒོམ་པའི་ལམ་ཐོབ་པའི་ཕྱིར་དང་། ལམ་ལ་རྗེས་སུ་ཤེས་པས་ལམ་རྗེས་བཟོད་ཀྱི་མཚན་ཉིད་མཐོང་བས་རྒྱུན་ཐམས་ཅད་མངོན་པར་རྟོགས་པའི་ཕྱིར་རྒྱུན་ཞུགས་ཡིན་གྱི། བརྒྱད་པ་ནི་དེ་ལྟར་མ་ཡིན་པའི་ཕྱིར་རོ། །ཆགས་བྲལ་སྔོན་དུ་སོང་བའི་བཅུ་དྲུག་པ་ཕྱིར་འོང་དང་ཕྱིར་མི་འོང་ཀྱང་འབྲས་བུ་དང་པོ་ཡིན་པས་རྒྱུན་ཞུགས་སུ་ཐལ་ཟེར་བ་ལ། ཆགས་བྲལ་སྔོན་དུ་སོང་བའི་འབྲས་བུ་སྟེ་དང་པོ་གཉིས་ཡིན་ཀྱང་ལར་(༢༦༤ན)
འབྲས་བུ་བཞི་ཀ་རེས་མོས་ཐོབ་པའི་འབྲས་བུ་དང་དེ་གཉིས་མིན་པའི་འབྲས་བུ་བཞི་ཀ་རིམ་གྱིས་ཐོབ་པའི་དང་པོའི་འབྲས་བུ་ལ་རྒྱུན་དུ་ཞུགས་པ་ཡིན་ནོ། །བྱེ་བྲག་ཏུ་སྨྲ་བ་ནི། དེ་ནི་མཐོང་ལམ་ཐོབ་པའི་སྐྱེ་བ་དེ་ལས་གཞན་པའི་སྐྱེ་བའི་སྲིད་པ་བདུན་དང་། བར་སྲིད་བདུན་དུ་མིའི་ནང་དུ་ཉིང་མཚམས་སྦྱོར་བར་བྱེད་ལ། ལྷའི་ནང་དུའང་དེ་བཞིན་དུ་སྲིད་པ་བདུན་གཉིས་ཏེ་སྲིད་པ་ཉེར་བརྒྱད་དུ་མཚམས་སྦྱོར་བར་བྱེད་དོ། །བདུན་ཚན་དུ་འདྲ་བའི་ཕྱིར། མཆོག་ཏུ་ཐོགས་ན་ལན་བདུན་པ་ཞེས་བཤད་དེ། གཟུགས་ཡང་དག་པར་ཇི་ལྟ་བ་བཞིན། གཟུགས་ཀུན་འབྱུང་། གཟུགས་འགོག་པ། གཟུགས་འགོག་པར་འགྲོ་བའི་ལམ། གཟུགས་ཀྱི་རོ་མྱོང་བ་གཟུགས་ཀྱི་ཉེས་དམིགས། ངེས་པར་འབྱུང་བ་ཡང་དག་པར་ཇི་ལྟ་བ་བཞིན་རབ་ཏུ་ཤེས་པ་ཕུང་པོ་གཞན་རྣམས་ལའང་དེ་བཞིན་དུ་སྦྱར་བས་སུམ་ཅུ་སོ་ལྔ་ཡིན་ཀྱང་བདུན་ཚན་དུ་འདྲ་བ་དང་། ལོ་མ་རེ་རེ་ལ་འདབ་མ་བདུན་ཡོད་པར་འདྲ་བའི་ཕྱིར། འདབ་མ་བརྒྱ་ཕྲག་དུ་མ་ཡོད་ཀྱང་། ཤིང་ལོ་མ་བདུན་པ་ཞེས་པ་བཞིན་ནོ་ཞེས་ཟེར་རོ། །དེ་ལྟར་ན་སྲིད་པ་ཉེར་བརྒྱད་ཡོད་ན། མདོ་ལས། གང་ཟག་ལྟ་བ་རྣམས་ཕུན་སུམ་ཚོགས་པ་སྲིད་པ་བརྒྱད་པ་མངོན་པར་གྲུབ་པ་གང་ཡིན་པ་ནི་གནས་མ་ཡིན་ཅིང་གོ་སྐབས་མེད་དེ། འདི་ནི་གནས་མེད་དོ། །ཞེས་གསུངས་པ་དེ་ཇི་ལྟ་བུ་ཞེ་ན། མི་ལྟ་བུའི་འགྲོ་བ་གཅིག་ཏུ་གོ་སྐབས་མེད་པ་ལ་དགོངས་སོ། །ལྷ་དང་མི་རྣམས་ཀྱི་ནང་དུ་ལན་བདུན་འཁོར་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་དོ། །ཞེས་སྒྲ་ཇི་བཞིན་དུ་བརྟགས་ན་ནི་སྲིད་པ་བར་མའང་ཡོད་པར་མི་འགྱུར་རོ། །གལ་ཏེ་སྲིད་པ་བར་མ་རྣམས་དང་བཅས་ཏེ་སྲིད་པ་བདུན་བགྲངས་པར་གྱུར་ན་ནི་དེའི་སྐྱེ་བ་བཞི་ཁོ་ནར་འགྱུར་ལ། དེ་ལྟར་ཡང་མི་འདོད་པས་(༢༦༤བ)
སོ། །གལ་ཏེ་འགྲོ་བ་གཅིག་ཏུ་སྲིད་པ་བརྒྱད་པ་མངོན་པར་མི་འགྲུབ་པར་འཆད་ན། གོང་དུ་འཕོ་བའི་འགྲོ་བ་གཅིག་ཏུ་སྲིད་པ་བརྒྱད་པའང་མི་འགྱུར་རོ། །དེའང་འདོད་མི་ནུས་ཏེ། དེ་འཕར་ཕྱེད་འཕར་ཐམས་ཅད་དུ། །འཆི་འཕོ་གཞན་སྲིད་རྩེ་མོར་འགྲོ། །ཞེས་འབྱུང་བའི་ཕྱིར་ཞེ་ན། ཉེས་པ་མེད་དེ། འགྲོ་བ་གཅིག་པོ་མིའམ་ལྷའི་འགྲོ་བ་གང་ཡིན་པ་དེར་སྲིད་པ་བརྒྱད་པ་མངོན་པར་མི་འགྲུབ་ཀྱི། ཁམས་གོང་མ་དག་ཏུ་ནི་མ་ཡིན་པའི་ཕྱིར། འདིའི་ཕྱོགས་སྔར་འོག་མིན་གྱི་བར་དུ་གོང་འཕོ་སྲིད་པ་བརྒྱད་པ་འགྲུབ་པ་སྲིད་པ་ལ་སྲིད་རྩེ་ཁྱད་པར་དུ་ཅིས་སྨོས་ཞེ་ན། འོག་མིན་གྱི་བར་གྱི་གོང་འཕོ་བརྗོད་བྱ་ཡིན་མོད་ཀྱི། སྲིད་རྩེ་སྨོས་པའི་བསམ་པ་ནི་སྲིད་པའི་མཆོག་བརྗོད་པར་འདོད་ནས། སྲིད་རྩེའི་བར་གྱི་གོང་འཕོ་ཞེས་སྨོས་པ་ཡིན་ནོ། །བྱེ་བྲག་ཏུ་སྨྲ་བའི་ལུགས་ཀྱི་རྒྱུན་ཞུགས་སྲིད་པ་ལན་བདུན་པ་ལ་ལྷ་དང་མི་དག་གི་ནང་དུ་སོ་སོར་ལན་བདུན་བདུན་སྐྱེའི། གཉིས་ཀ་ནང་དུ་མ་ཡིན་པ་ཉིད་ཀྱི་སྲིད་པ་ཉེར་བརྒྱད་ཡོད་ཀྱང་རིས་མཐུན་དུ་འདྲ་བས་སྲིད་པ་ལན་བདུན་པ་ཡིན་པ་འདི་ལ་ཤེས་བྱེད་ཀྱི་ལུང་དང་འདོད་པའི་དབང་དུ་བྱས་པའི་འགྲོ་བ་གཅིག་ལ་སྲིད་པ་བརྒྱད་པ་མི་འགྲུབ་པའི་མདོ་དང་རིག་པ་ཅི་ཞིག་ཡོད། ངེད་ཅག་མདོ་སྡེ་པ་ལྟར་ན། སྲིད་པ་ལན་བདུན་པ་ནི་མི་རྣམས་ཀྱི་ནང་དུ་བདེན་པ་མཐོང་བ་དེ་ནི་ལྷའི་ནང་དུའང་ལན་གསུམ་འཁོར་ལ། མིའི་ནང་དུའང་ལན་གསུམ་འཁོར། དེ་ནས་ལྷ་རྣམས་ཀྱི་ནང་དུ་འོང་སྟེ་མྱ་ངན་ལས་འདའོ། །ལྷའི་ནང་དུ་བདེན་པ་མཐོང་ན་མིར་གསུམ། ལྷར་གསུམ། དེ་ནས་མིའི་ནང་དུ་འོངས་ཏེ་མྱ་ངན་ལ་འདའོ་ཞེས་སྨྲའོ་ཞེ་ན། བྱེ་སྨྲས། དེ་ལ་ལུང་ཡོད་དེ། ཇི་སྐད་དུ། ལྷ་རྣམས་དང་མི་རྣམས་ཀྱི་ནང་དུ་ལན་བདུན་འབྱུང་ངོ་ཞེས་པ་འདིའོ། །ཞེ་ན་ལུང་དེ་སྤྱིར་སྡོམ་པ་ཙམ་(༢༦༥ན)
གྱི་དབང་དུ་བྱས་ཀྱི། སོ་སོར་ཕྱེ་བའི་གསལ་ཁ་མི་སྣང་བས་བྱེ་སྨྲའི་ཕྱོགས་དེ་ཐེ་ཚོམ་དང་བཅས་པར་གྱུར་པ་ལ། སློབ་དཔོན་གྱིས་བྱེ་སྨྲའི་ཕྱོགས་དེའི་གཞུང་འཛུགས་པའི་སླད་དུ་སྡེ་པ་གཞན་པ་འོད་སྲུངས་པ་རྣམས་ཀྱིས་ནི་མདོ་འདི་སྐད་དུ་འདོན་ཏེ། ལྷ་རྣམས་སུ་ལན་བདུན། མི་རྣམས་སུ་ལན་བདུན་ཞེས་འབྱུང་བ་དེ་དྲངས་པ་ཉིད་ཀྱི་ཆོས་ཅན། ལྷ་མི་སོ་སོར་ལན་བདུན་སྐྱེ་བའི་ཤེས་བྱེད་ཅི་ཡོད་ཀྱི་ལན་དང་། སྲིད་པ་བརྒྱད་པ་འདོད་པའི་འགྲོ་བ་རིས་གཅིག་པར་མི་འགྲུབ་པ་ལ་ལུང་རིགས་ཅི་ཡོད་ཀྱིས་ལན་གཉིས་ཀ་ཐེབས་པ་ཡིན་ཏེ། མི་དང་ལྷ་སོ་སོར་གྱི་དོན་སྨོས་པ་ཁོ་ནས་འདོད་ཁམས་ལ་དགོངས་པར་བསྟན་པ་ཡིན་གྱི། གཟུགས་དང་གཟུགས་མེད་ལ་དགོངས་པ་མ་ཡིན་པའི་ཕྱིར་ཏེ། ཕྱིར་མི་འོང་རྣམས་ནི་འདོད་པའི་ལྷ་དང་མི་དག་གི་ནང་དུ་འཁོར་ཞིང་འོངས་པ་མིན་པའི་ཕྱིར། རིགས་པའང་ལུང་གིས་དྲངས་པའི་རིགས་པ་དེ་ཉིད་ཀྱི་ཕྱིར་རོ། །དེས་ན་འདོད་ཁམས་ཀྱི་འགྲོ་བ་རིས་གཅིག་པ་ལ་དགོངས་ཏེ་སྲིད་པ་བརྒྱད་པ་མི་འགྲུབ་པ་དང་། སྲིད་པ་ལན་བདུན་པ་ལྷ་མི་སོ་སོར་ལན་བདུན་བདུན་ཡིན་པ་ལ་ཤེས་བྱེད་ཅི་ཡོད་ཅེས་མདོ་སྡེ་པ་ཁྱེད་ཅག་མངོན་པར་ཞེན་པར་བྱ་མི་དགོས་ཏེ། ཤེས་བྱ་ལ་ཡང་དག་པར་གྲུབ་པ་ལུང་དང་རིགས་པ་ཉིད་ཀྱིས་གསལ་བར་བྱས་ཟིན་པའི་ཕྱིར་རོ། །གང་ཞིག་མིའི་ནང་དུ་འོང་ནས་རྒྱུན་ཞུགས་པར་གྱུར་པ་དེ་ནི་དེ་ཁོ་ནར་འོངས་ནས་ཡོངས་སུ་མྱ་ངན་ལས་འདའ་ལ། གང་ཞིག་ལྷ་དག་གི་ནང་དུའང་རྒྱུན་ཞུགས་སུ་གྱུར་པ་དེ་ཁོ་ནར་འོངས་ནས་མྱ་ངན་ལས་འདའ་བར་གསུང་བ་ནི། དང་པོ་མིར་རྒྱུན་ཞུགས་ཐོབ་པ་ནི་མི་ཚེ་དྲུག་བླངས་ནས། དེ་ནས་ལྷར་བདུན་བླངས་ནས་མཐར་མིར་འོངས་ནས་མྱ་ངན་ལས་འདའ་ལ། ལྷའི་(༢༦༥བ)
རྟེན་ཅན་ལའང་དེ་བཞིན་དུ་སྦྱར་རོ། །ཡང་སྲིད་པ་བརྒྱད་པ་མི་འགྲུབ་སྟེ། འདོད་སྲེད་བདུན་གྱིས་དགྲ་བཅོམ་ཐོབ་ངེས་ཀྱི་རྒྱུད་སྨིན་པའི་ཕྱིར་དང་། དེ་མྱོང་ངེས་ཀྱི་ལས་ཡོད་པའི་ཕྱིར། དཔེར་ན། སྦྲུལ་གོམ་པ་བདུན་པས་ཟིན་པ་ཕན་ཆད་དང་ཚུན་ཆད་དུ་འཆི་བ་མ་ཡིན་པ་དང་། རིམས་ཉིན་བཞི་པའང་དེ་ཙམ་དུ་འདེབས་ཀྱི། ཕན་ཆད་དུ་དེ་ཚུན་ཆད་དུ་མ་ཡིན་པ་བཞིན་ནོ། །སྲིད་པ་བརྒྱད་པའང་མི་འགྲུབ་ལ། ཚུ་རོལ་དུའང་མྱ་ངན་ལས་མི་འདའ་སྟེ། འདོད་པ་ལ་འདུན་པ་དང་། གནོད་སེམས་ཏེ་ཐ་མའི་ཆ་མཐུན་གཉིས་དང་། གོང་མ་གཉིས་ཀྱི་འདོད་ཆགས་གཉིས་དང་། རྒོད་པ་དང་། ང་རྒྱལ་དང་། གཏི་མུག་སྟེ་གོང་མའི་ཆ་མཐུན་ལྔ་ལུས་པའི་ཕྱིར། འདུས་བཟང་ན་རེ། ཀུན་སྦྱོར་བདུན་ལུས་སོ་ཞེས་བྱ་བ་འདི་ནི་གཏན་ཚིགས་སུ་མི་རུང་སྟེ། ཐ་མའི་ཆ་མཐུན་གཉིས་ལྟ་འོག་ཏུ་སྐྱེ་བའི་རྒྱུ་ཡིན་ལ། གོང་མའི་ཆ་མཐུན་རྣམས་ས་གོང་མ་ཡིན་པས་འདོད་ཁམས་སུ་སྐྱེ་བ་འགྲུབ་བྱེད་མི་ནུས་པའི་ཕྱིར་ཞེས་ཟེར་རོ། །གཏན་ཚིགས་དེ་སྨྲ་བ་ན་རེ། དེ་དག་གོང་མ་བ་ཡིན་མོད་ཀྱི། དེ་དག་གི་ཐོབ་པའི་མཐུས་སྲིད་པ་ཇི་སྙེད་ཅིག་མངོན་པར་འགྲུབ་པར་འགྱུར་ཏེ། དེ་དག་ནི་ལུང་མ་བསྟན་པའི་ཕྱིར་དང་། རྣམ་པར་སྨིན་པའི་རྒྱུ་ཉིད་དུ་རྣམ་པར་མི་བཞག་པའི་ཕྱིར། འོ་ན་འོག་མར་སྐྱེ་བའི་གྲོགས་སམ་རྐྱེན་བྱེད་པས་ཀུན་སྦྱོར་བདུན་གྱི་སྲིད་པ་བདུན་ཡིན་ཟེར་བ་དེའང་མི་འཐད་དེ། ཀུན་དགའ་བོ་ལ་ཀུན་སྦྱོར་བདུན་ལུས་ཀྱང་ཚེ་དེ་ལ་མྱ་ངན་ལས་འདས་པས་མི་འཐད་པར་གྲུབ་བོ། །འོ་ན་འདི་ལྟར་འཐད་པས། བར་སྐབས་སུའང་འཕགས་པའི་ལམ་མངོན་དུ་མི་བྱེད་ཅིང་ཡོངས་སུ་མྱ་ངན་ལས་མི་འདས་ཏེ། (ལུང་འདིས་རྒྱུན་ཞུགས་སྲིད་པ་ལན་བདུན་པ་དེ་དགྲ་བཅོམ་མ་ཐོབ་བར་དུ་འཕགས་ལམ་བར་པ་གཉིས་མངོན་དུ་མི་བྱེད་པར་བཤད་འདུག་པས་བརྟག་པར་བྱའོ། །མཆན།) (༢༦༦ན)
དེ་སྲིད་དུ་སྲིད་པ་མྱོང་བར་འགྱུར་བའི་ལས་ཀྱི་སྟོབས་བསྐྱེད་པའི་ཕྱིར་རོ། །སངས་རྒྱས་འབྱུང་བ་མེད་ནས་རབ་ཏུ་བྱུང་བའི་བསྟན་པ་མེད་ན་ཁྱིམ་པ་ཁོ་ནར་དགྲ་བཅོམ་པ་ཉིད་ཐོབ་ལ། ཁྱིམ་ན་མི་གནས་ཏེ་མི་སློབ་པའི་ལམ་གྱི་མཐུས་སྤོང་བདུན་ཆོས་ཉིད་ཀྱི་ཐོབ་པས་དགེ་སློང་དུ་འགྱུར་ཏེ། དགེ་སློང་གི་རྟགས་མཚན་ལྷུང་བཟེད་སོགས་དང་སྦྱོར་བར་བྱེད་པ་དེ་ནི་དེའི་རང་བཞིན་ཡིན་ནོ། །གཞན་ན་རེ། ཁྱིམ་པའི་ཆ་བྱད་པས་ཕྱི་རོལ་པའི་དགེ་སྦྱོང་གཞན་གྱི་མཚན་མོས་སོ་ཞེས་ཟེར་རོ། གང་སྤེལ་དེ་ནི་མི་འདོད་དེ། དེ་དག་ནི་ལོག་ལྟའི་དབང་གིས་དམ་པ་མ་ཡིན་པའི་ལས་ལ་འཇུག་པའི་ཕྱིར། ཞེས་གསུངས་སོ། །མདོ་ལས་དེ་ལོག་པར་ལྟུང་བའི་ཆོས་ཅན་མ་ཡིན་པར་གསུངས་པ་ནི་འཕགས་པའི་གནས་སྐབས་ན་བདེན་པ་མཐོང་ལ་འཕེན་པ་མེད་པ་ལྟ་ཨ་ཅང་ཆེ་སྟེ། རྫོགས་བྱེད་ཀྱི་དེར་འགྲོ་བའི་ལས་མི་སོག་པའི་ཕྱིར་དང་། སོ་སོའི་སྐྱེ་བོའི་གནས་སྐབས་ན་དེར་འགྲོ་བའི་ལས་མྱོང་བར་འགྱུར་བ་མ་ངེས་པ་བསགས་པའང་སྦྱོར་བ་དག་པ་འཕགས་པ་དགྱེས་པའི་ཚུལ་ཁྲིམས་དང་། བསམ་པ་དག་པ་སངས་རྒྱས་ལ་ཤེས་ནས་དད་པའི་སྒོ་ནས་ཕུང་པོའི་རྒྱུད་དེ་ནི་དགེ་བའི་རྩ་བ་སྟོབས་དང་ལྡན་པས་བསྒོས་པའི་ཕྱིར་ཕུང་པོའི་རྒྱུད་ངན་སོང་གི་རྣམ་སྨིན་འགྲུབ་པ་དང་མི་མཐུན་པར་བྱས་པའི་ཕྱིར། ངན་སོང་དུ་ངེས་པའི་ལས་ཡོད་ན་ནི་གང་ཟག་དེས་བཟོད་པ་ཡང་མི་བསྐྱེད་པར་འགྱུར་ན་ཟག་མེད་ཀྱི་ལམ་ལྟ་ཅི་སྨོས་སོ། །དགེ་རྩ་སྟོབས་ལྡན་བསགས་པས་བསྒོས་པའི་རྒྱུད་རྣམ་སྨིན་དང་མི་མཐུན་པར་འགྱུར་བ་དེ་བསྟན་པའི་ཕྱིར། སྨྲས་པ། མི་མཁས་པས་ནི་སྡིག་པ་ཆུང་ངུ་བྱས་ཀྱང་འོག་ཏུ་འགྲོ། །མཁས་པས་སྡིག་པ་ཆེན་པོ་བྱས་(༢༦༦བ)
ཀྱང་གནོད་པ་རབ་ཏུ་སྤོང་བར་འགྱུར་ཏེ། །(ངན་སོང་དུ་འགྲོ་བའི་ལས། མཆན།)དཔེ་ནི་ལྕོགས་ཀྱི་གོང་བུ་ཐོ་ལུམ་ཆུང་ཡང་བཅོས་ལེགས་མ་བྱས་པས་ཆུའི་གཏིང་དུ་བྱིང་བར་འགྱུར་ལ། ལྕགས་དེ་ཉིད་སྣོད་དུ་བྱས་ན་ཆེའང་བཅོས་ལེགས་བྱས་པའི་ཡོན་ཏན་གྱིས་ཆུའི་གཏིང་དུ་འཕྱོ་ཞིང་བྱིང་བར་མི་འགྱུར་ལ། མི་མཁས་པ་ནི་ཡོན་ཏན་རྣམས་ཀྱི་སྣོད་དུ་མ་བྱས་པས་བྱིང་ལ། མཁས་པ་ནི་མ་ཡིན་ཏེ། ཡོན་ཏན་གྱི་སྣོད་དུ་བྱས་པའི་ཕྱིར། འདིར་ཡང་མཁས་པའི་གོང་མི་མཁས་པ་ལ་སྡིག་པ་བྱས་པ་དེ་མཁས་པར་གྱུར་པའི་ཕྱིས་ཀྱི་མཁས་པ་དེས་སྤོང་གི། མཁས་པའི་དུས་རང་དུ་སྡིག་པ་བྱས་པ་དེ་ནི་སླར་ལ་སྡིག་ཆེའོ། །སྡུག་བསྔལ་གྱི་མཐར་བྱེད་དོ་ཞེས་གསུངས་པས་སྡུག་བསྔལ་གྱི་མཐའ་ནི་གང་ཕན་ཆད་སྲིད་པ་གཞན་གྱིས་བསྡུས་པའི་སྡུག་བསྔལ་མེད་པ་སྟེ་སྡུག་བསྔལ་གྱི་མཐའ་ནི་འཇུག་གོ། །ཤི་ནས་སྡུག་བསྔལ་གྱི་ཉིད་མཚམས་སྦྱོར་བར་མི་བྱེད་པའོ། །ཡང་ན་སྡུག་བསྔལ་གྱི་མཐའ་ནི་མྱང་འདས་ཡིན་ནོ། །མྱང་འདས་ཡིན་ན་རྟག་པས་དེ་བྱེད་པར་མི་རུང་ངོ་ཞེ་ན། མྱང་འདས་དེ་ཐོབ་པའི་གེགས་ཉོན་མོངས་ཀྱི་ཐོབ་པ་བསལ་བའི་ཕྱིར་མྱང་འདས་བྱེད་པར་བརྗོད་དེ། དཔེར་ན། ནམ་མཁའ་ནི་ཁང་པའི་གནས་ན་མི་མངོན་ཏེ། དེ་ནི་དེའི་གེགས་ཡིན་པས་འདུན་ཁང་དེ་རྡིབས་པ་སྟེ་བསལ་བ་ན། རྟག་ཀྱང་ནམ་མཁའ་མངོན་དུ་བྱེད་ཅེས་བྱ་བ་བཞིན་ནོ། །གཉིས་པ་ནི། རེ་ལྟར་ཐོགས་ན་ལན་བདུན་པ། །མ་ངེས་པའི་རྒྱུན་ཞུགས་སྲིད་པ་ལན་བདུན་པ་སྟེ། མཆོག་ཏུ་ཐོགས་ན་ལན་བདུན་པ་ངེས་འབྱེད་དང་ཐར་པ་ཆ་མཐུན་སྐྱེས་པས་རྒྱུད་སྨིན་པའི་སོ་སྐྱེ་གཞན་ཡང་ཡོད་མོད་ཀྱི། འདི་ཉིད་དང་སྲིད་པ་བར་མའང་འདའ་བར་འགྱུར་བས་ངེས་པར་མི་བརྗོད་དོ། །གཉིས་པ་རིགས་ནས་རིགས་སྐྱེ་ནི། རྣམ་གསུམ་རྣམ་བཞི་ལས་གྲོལ་བ། །ཚེ་གཉིས་གསུམ་དུ་རིགས་ནས་རིགས། །རྒྱུན་ཞུགས་དེ་ཉིད་རྒྱུ་གསུམ་གྱིས་རིགས་ནས་རིགས་སུ་སྐྱེ་བ་ཡིན་ཏེ། ཉོན་མོངས་སྤངས་པ་ལས་ནི་ཉོན་མོངས་རྣམ་པ་གསུམ་པའམ་བཞི་པ་ལས་གྲོལ་བའི་ཕྱིར་དང་། དབང་པོ་ལས་ནི་དེའི་གཉེན་པོ་ཟག་མེད་ཀྱི་དབང་པོ་ཐོབ་པའི་ཕྱིར། (༢༦༧ན)
དང་། སྐྱེ་བ་ལས་ནི་ཚེ་གཉིས་སམ་གསུམ་ལུས་པའི་ཕྱིར་རོ། །འདིར་རིགས་ནས་རིགས་སྐྱེ་ལ་ཉོན་མོངས་རྣམ་པ་གསུམ་མམ་བཞི་ལས་གྲོལ་བ་གཅིག་གིས་ཁྱབ་ཀྱི། གསུམ་མམ་བཞི་ལས་གྲོལ་བ་ལ་ཚེ་གཉིས་སམ་གསུམ་གྱིས་ངེས་པ་མེད་དོ། །ཚིགས་སུ་བཅད་པའི་ནང་དུ་ཉོན་མོངས་སྤངས་པ་དང་ཚེ་གཉིས་དག་སྨོས་པ་ནི། འཕགས་པས་ཕྱིས་ཉོན་མོངས་སྤོང་ན་དེའི་གཉེན་པོ་ཟག་མེད་ཀྱི་དབང་པོ་ཐོབ་པ་ནི་མ་སྨོས་ཀྱང་གྲུབ་པའི་ཕྱིར། སྐྱེ་བ་ནི་གལ་ཏེ་ན་འབྲས་བུ་གོང་མ་ལན་གཅིག་ཕྱིར་འོང་དང་ཕྱིར་མི་འོང་དང་དགྲ་བཅོམ་གྱི་སྐལ་བ་དང་ལྡན་པའི་ཕྱིར་འདི་ཉིད་དུའམ་སྲིད་པ་བར་མའམ་སྐྱེས་ནས་མྱ་ངན་ལས་འདའ་བར་འགྱུར་ན་ཆེས་ཉུང་ངུར་འགྱུར་བས་འདིར་རྩ་བར་སྨོས་སོ། །ཉོན་མོངས་པ་གཅིག་གམ་གཉིས་སྤངས་པ་དེ་ནི་ཚེ་དྲུག་གམ་ལྔར་རིགས་ནས་རིགས་སུ་སྐྱེ་བ་ཡིན་ནོ། །ཞེས་མ་སྨོས་ཀྱང་ཤུགས་ལ་གོའོ་ཞེས་སྔོན་གྱི་སློབ་དཔོན་ཁ་ཅིག་འཆད་དོ། །ཁ་ཅིག་ན་རེ། དེའང་ཚེ་གཉིས་སམ་གསུམ་དུ་རིགས་ནས་རིགས་སུ་སྐྱེ་བ་ཡིན་པའི་ཕྱིར་ལོགས་སུ་མ་བཤད་དོ་ཞེས་ཟེར་རོ། །ཅིའི་ཕྱིར་རྣམ་པ་ལྔ་སྤངས་པའི་རིགས་ནས་རིགས་སུ་སྐྱེ་བར་མ་སྨོས་ཞེ་ན། འདོད་པའི་ཉོན་མོངས་པ་ལྔ་པ་སྤངས་ན་དྲུག་པའང་ངེས་པར་སྤོང་བས་རིགས་ནས་རིགས་སུ་སྐྱེ་བ་མ་ཡིན་ཏེ། རྣམ་པ་དྲུག་པ་གཅིག་པུས་ནི་ཕྱིར་འོང་གི་འབྲས་བུ་ལ་གེགས་བྱ་བར་མི་ནུས་པའི་ཕྱིར་རོ། །དེ་ལྟར་ན་བར་ཆད་གཅིག་པའི་རྣམ་པ་དགུ་པ་གཅིག་པུས་ཀྱང་ཕྱིར་མི་འོང་བའི་འབྲས་བུ་ལ་གེགས་བྱེད་པར་མི་འགྱུར་རོ་ཞེ་ན། དེ་ནི་མི་མཚུངས་ཏེ། བར་ཆད་གཅིག་པ་ནི་འདོད་ཁམས་ལས་འདའ་དགོས་པས་དཀའ་བའི་ཕྱིར་རྣམ་པ་གཅིག་གིས་ཀྱང་གེགས་བྱ་བར་ནུས་ལ། འདིར་ཕྱིར་འོང་ནི་ཁམས་ལས་འདའ་མི་དགོས་པས་རྣམ་པ་དྲུག་པ་གཅིག་པུས་གེགས་བྱ་བར་མི་ནུས་པའི་ཕྱིར། རིགས་ནས་རིགས་སྐྱེ་དེ་རྣམ་པ་གཉིས་ཏེ་ལྷའི་ནང་དུ་(༢༦༧བ)
རིགས་གཉིས་སམ་གསུམ་དུ་འཁོར་ནས་ལྷའི་རིས་དེའམ་གཞན་གོང་འོག་ཏུ་མྱ་ངན་ལས་འདའ་བ་དང་། མི་ཡི་ནང་དུ་རིགས་གཉིས་སམ་གསུམ་དུ་འཁོར་ནས་གླིང་དེའམ་གཞན་གཉིས་ཉིད་དུ་མྱ་ངན་ལས་འདའ་བ་ལྷའི་རིགས་ནས་རིགས་སུ་སྐྱེ་བ་དང་། མིའི་རིགས་ནས་རིགས་སུ་སྐྱེ་བ་གཉིས་སོ། །གཉིས་པ་ཕྱིར་འོང་ཞུགས་གནས་ལ། ཞུགས་པ་དང་། འབྲས་གནས་སོ། །དང་པོ་ནི། རྣམ་པ་ལྔ་ཡི་བར་བཅོམ་པ། །གཉིས་པ་ལ་ནི་ཞུགས་པའང་ཡིན། །རྒྱུན་ཞུགས་ཀྱི་འབྲས་བུ་ཁྱད་པར་ཅན་ལ་གནས་པའང་ཡིན། འདོད་པའི་སྒོམ་སྤོང་རྣམ་པ་གཅིག་ནས་ལྔའི་བར་དུ་བཅོམ་པ་ཡིན་ན་འབྲས་བུ་གཉིས་པ་ལ་ནི་ཞུགས་པ་ཡིན་ནོ། །གཉིས་པ་ལ། འབྲས་གནས་ཙམ་པོ་བ་དང་། ཁྱད་པར་ཅན་ནོ། །དང་པོ་ནི། རྣམ་པ་དྲུག་པ་ཟད་གྱུར་པ། །དེ་ནི་ལན་ཅིག་ཕྱིར་འོང་བ། །འདོད་པའི་སྒོམ་སྤོང་རྣམ་པ་དྲུག་པ་ཟད་པར་གྱུར་བ་དེ་ནི་འབྲས་བུ་གཉིས་པ་ལན་གཅིག་ཕྱིར་འོང་བའི་འབྲས་བུ་ཐོབ་པ་ཡིན་ཏེ། ལྷའི་ནང་དུ་སོང་ནས་དྲུག་པ་སྤངས་ནས་མིའི་འཇིག་རྟེན་དུ་ལན་གཅིག་ཕྱིར་འོང་སྟེ། དེ་ཕན་ཆད་དུ་སྐྱེ་བ་མེད་དོ། །མིའི་ནང་དུ་དྲུག་པ་སྤངས་ནས་ལྷ་དག་གི་ནང་དུ་ལན་གཅིག་འོང་བའམ། མིའི་ནང་དུ་དྲུག་པ་སྤངས་ནས་མི་རང་གི་ནང་དུ་འོང་བའམ། ལྷའི་ནང་དུ་དྲུག་པ་སྤངས་ནས་ལྷའི་ནང་དུ་འོང་བའོ། །མདོ་ལས། ཀུན་སྦྱོར་གསུམ་སྤངས་པའི་ཕྱིར་དང་། དུག་གསུམ་བསྲབ་པའི་ཕྱིར། ཞེས་འབྱུང་བ་ནི་ཆུང་ངུའི་རྣམ་པ་གསུམ་ལུས་པའི་ཕྱིར་རོ། །གཉིས་པ་ཁྱད་པར་ཅན་ནི། ཉེས་ཆ་བདུན་དང་བརྒྱད་ཟད་པ། །ཚེ་གཅིག་བར་ཆད་གཅིག་པ་དང་། །ལན་གཅིག་ཕྱིར་འོང་གི་འབྲས་གནས་དེ་ཉིད་རྒྱུ་གསུམ་གྱིས་བར་ཆད་གཅིག་པ་ཡིན་ཏེ། ཉེས་ཆ་བདུན་པ་དང་བརྒྱད་པ་ཟད་པའི་ཕྱིར་དང་། དེའི་གཉེན་པོ་ཟག་མེད་ཀྱི་དབང་པོ་ཐོབ་པའི་ཕྱིར་དང་། ཚེ་གཅིག་ལུས་པའི་ཕྱིར། འདིར་རྣམ་པ་གཅིག་གི་འབྲས་བུ་ལ་གེགས་བྱ་བར་ནུས་ཞེ་ན། དེ་ཡོད་ན་ཁམས་ལས་འདའ་དཀའ་བའི་ཕྱིར། གོང་དུ་ངན་སོང་དུ་སྐྱེ་ངེས་ཀྱི་བཟོད་པ་དང་འདོད་ཁམས་སུ་སྐྱེ་ངེས་ཀྱི་ལས་ཀྱི་ཕྱིར་མི་འོང་དང་གོང་མར་སྐྱེ་ངེས་ཀྱི་ལས་ཀྱིས་དགྲ་བཅོམ་ཐོབ་པ་ལས་དེ་དག་གིས་(༢༦༨ན)
ཤིན་ཏུ་བྱེད་ཅེས་འབྱུང་བ་ལྟར་ཉོན་མོངས་པ་རྣམས་ཀྱང་དེ་དང་འདྲ་སྟེ། འདི་ཡོད་ན་རྣམ་སྨིན་དང་རྒྱུ་མཐུན་གྱི་འབྲས་བུ་འབྱིན་པའི་ས་ལས་འདའ་དཀའ་བའི་ཕྱིར། དེའི་མྱ་ངན་ལས་འདས་པ་ལ་ཚེ་གཅིག་གིས་ཆོད་པའི་ཕྱིར་དང་། ཕྱིར་མི་འོང་གི་འབྲས་བུ་ལ་རྣམ་པ་གཅིག་གིས་ཆོད་པའི་བར་ཆད་ཡོད་པས་བར་ཆད་གཅིག་པའོ། །གསུམ་པ་ཕྱིར་མི་འོང་ལ། ཞུགས། གནས་གཉིས་ལས། དང་པོ་ནི། གསུམ་པ་ལ་ནི་ཞུགས་པའང་ཡིན། །རྣམ་པ་བདུན་དང་བརྒྱད་པ་སྤངས་པས་ལན་གཅིག་ཕྱིར་འོང་དེ་ནི་འབྲས་བུ་གསུམ་པ་ཕྱིར་མི་འོང་ལ་ཞུགས་པ་ཡིན་ནོ། །སྔོན་འཇིག་རྟེན་པའི་ལམ་གྱི་རྣམ་པ་གསུམ་པ་དང་བཞི་པ་སྤངས་པའམ། བདུན་ནམ་བརྒྱད་སྤངས་པས་འབྲས་བུ་ཐོབ་པ་ནི་ཇི་སྲིད་དུ་འབྲས་བུ་ཁྱད་པར་ཅན་གྱི་ལམ་མངོན་དུ་མ་བྱས་པ་དེ་སྲིད་དུ་དེའི་གཉེན་པོ་ཟག་མེད་ཀྱི་དབང་པོ་མ་ཐོབ་པས་རིགས་ནས་རིགས་སུ་སྐྱེ་བའམ་བར་ཆད་གཅིག་པ་མ་ཡིན་ནོ། །གཉིས་པ་ལའང་། སྤྱིར་བསྟན་པ་དང་། སོ་སོར་བཤད་པའོ། །དང་པོ་ནི། དེ་དགུ་ཟད་པས་ཕྱིར་མི་འོང་། །འབྲས་བུ་ལ་གནས་པ་དེ་ཉིད་རྣམ་པ་དགུ་པ་ཟད་པས་ཕྱིར་མི་འོང་ཡིན་ཏེ། འདོད་ཁམས་སུ་མི་འོང་བའི་ཕྱིར་རོ། །མདོ་སྡེ་ལས། ཀུན་སྦྱོར་ཐ་མའི་ཆ་མཐུན་ལྔ་སྤངས་པའི་ཕྱིར། ཞེས་འབྱུང་བ་ནི་འཇིག་ལྟ་སོགས་སྤངས་པ་བསྡོམས་ཏེ་གཅིག་ཉིད་དུ་བཞག་པའི་ཕྱིར་རོ། །འདོད་པ་ལས་ཆགས་བྲལ་ཞིག་ངེས་པ་ལ་འཇུག་ན་ངེས་པར་སྔོན་འཇིག་རྟེན་པའི་ལམ་གྱིས་འདོད་པ་ལ་འདུན་པ་དང་། གནོད་སེམས་གཉིས་སམ། མཐར་གྱིས་པ་ཡིན་ན་འཇིག་ལྟ་སོགས་གསུམ་དང་། དེ་གཉིས་བསྡོམས་པས་ལྔ་སྤངས་པ་ཡིན་ནོ། །གཉིས་པ་ལ། གཟུགས་སུ་ཉེར་འགྲོ། གཟུགས་མེད་ཉེར་འགྲོ། མཐོང་ཆོས་ཞི་བཤད་པ། ཕྱིར་མི་འོང་གི་དབྱེ་བ་དུ་མ་བཤད་པ། ལུས་མངོན་བྱེད་བཤད་པའོ། །དང་པོ་ལ། སྤྱིར་(༢༦༨བ)
དབྱེ་བ་དང་། གོང་འཕོའི་དབྱེ་བ་བྱེ་བྲག་ཏུ་བཤད་པའོ། །དང་པོ་ནི། དེ་ནི་བར་སྐྱེས་འདུ་བྱེད་དང་། །འདུ་བྱེད་མེད་ཡོངས་མྱ་ངན་འདའ། །གོང་དུ་འཕོ་བ་རྣམས། ཕྱིར་མི་འོང་དེ་ནི་རྣམ་པ་ལྔ་སྟེ། སྲིད་པ་བར་མ་དོར་ལྷག་མེད་ཀྱི་ཡོངས་སུ་མྱ་ངན་ལས་འདའ་བ་དང་། སྐྱེས་ནས་མྱ་ངན་ལས་འདའ་བ་དང་། འདུ་བྱེད་པ་དང་བཅས་པ་དང་། འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་རྣམས་སོ། །དང་པོ་ནི། བར་མ་དོ་ནི་ཕུང་པོའི་རྒྱུན་སྤོང་སླ་བས། ཉོན་མོངས་སྤངས་པ་རང་གི་ཕུང་པོའི་རྒྱུན་འགགས་པས་ལྷག་བཅས་ལྷག་མེད་གཉིས་དུས་མཉམ་དུ་ཐོབ་བོ། །འདིའང་འདོད་པའི་ཁམས་ཀྱི་འདུ་ཤེས་གསལ་བ་འདིའི་འཕེན་པའི་རྒྱུན་བསམ་གཏན་དང་པོ་ལྟ་བུའི་བར་དོར་འདུ་ཤེས་གསལ་བས་བར་མ་དོར་ལམ་བསྐྱེད་ནས་མྱ་ངན་ལ་འདའི། དང་པོ་ནས་ཤི་ནས་གཉིས་པ་ལྟ་བུའི་བར་དོར་འདུ་ཤེས་མི་གསལ་བས་བར་དོ་དེ་ལྟ་བུར་མྱ་ངན་ལས་མི་འདའོ། །གཉིས་པ་ནི། སྐྱེས་ཙམ་ལས་མི་འཕྱི་བར་ཟག་པ་ཐམས་ཅད་ཟད་དེ་ཕུང་པོ་ལྷག་མ་དང་བཅས་པའི་མྱ་ངན་ལས་འདའ་བ་སྟེ། རྣལ་འབྱོར་ལ་མངོན་པར་བརྩོན་པའང་ཡིན་ལ། ལམ་ངང་གིས་འབྱུང་བ་ཡང་ཡིན་པ་ཉིད་ཀྱི་ཕྱིར་རོ། །གཞན་དག་ན་རེ། བར་མ་དོར་ཡོངས་སུ་མྱ་ངན་ངན་ལས་འདའ་བ་འབའ་ཞིག་དགྲ་བཅོམ་པ་ཉིད་ཐོབ་ནས་ཚེ་ཡོངས་སུ་མ་རྫོགས་པར་ཕུང་པོ་ལྷག་མེད་དུ་མྱ་ངན་ལས་འདས་པར་མ་ཟད་ཀྱི། སྐྱེས་ནས་ཡོངས་སུ་མྱ་ངན་ལས་འདས་པའང་དེ་དང་འདྲའོ། །ཞེས་ཟེར་རོ། །དེའང་མི་འཐད་དེ། དེ་ཚེ་འདོར་བ་ལ་དབང་མེད་པའི་ཕྱིར། གྲུབ་སྟེ། རབ་མཐའི་བསམ་གཏན་བཞི་པ་ཐོབ་པ་ན་ཚེ་ལོངས་སྤྱོད་དུ་བསྒྱུར་བ་སོགས་ལའང་དབང་བ་ཡིན་གྱི། རབ་མཐའ་དེའང་གླིང་གསུམ་གྱི་མི་རྣམས་ཀྱི་ནང་དུ་སྐྱེད་པར་བྱེད་ན། དེ་ནི་གཟུགས་ཀྱི་ནང་དུ་སྐྱེས་པའི་ཕྱིར། དེ་ལྟར་ན་བར་འདའ་བ་དེ་ཚེ་འདོར་(༢༦༩ན)
བ་ལ་དབང་མེད་ན་ཡོངས་སུ་མྱ་ངན་ལས་འདའ་བ་ལ་དབང་འོང་ངོ་སྙམ་ན། དེ་ཚེ་འདོར་བ་ལ་དབང་མེད་མོད་ཀྱི། སྲིད་པ་བར་མར་གནས་པར་བྱེད་པ་ལ་ནི་སྐྱེས་ནས་འདའ་བ་དང་ཅི་འདྲ་བའི་ལས་མེད་དེ། དེ་ནི་ཉོན་མོངས་སངས་ན་ཕུང་པོ་དེ་ནི་མྱུར་དུ་ཡལ་འགྲོ་བའི་ཕྱིར། དེས་ན་བར་འདའ་བ་ནི་མྱུར་དུ་མྱ་ངན་ལས་འདའ་ལ། སྐྱེ་འདའ་བ་ནི་ཚེ་ཇི་སྲིད་བར་གནས་ནས་འདའ་བས་སྐྱེས་ནས་འདའ་བ་ཁོ་ན་ལྷག་བཅས་མྱང་འདས་སོ་ཞེས་བྱའོ། །[གསུམ་པ་]མངོན་པར་འདུ་བྱེད་བཅས་ནི། སྔོན་གྱི་སྦྱོར་བ་འཕེན་པའི་སྦྱོར་བ་མ་བོར་བས་འདའ་བ་སྟེ། རྣལ་འབྱོར་པ་དེ་མངོན་པར་བརྩོན་ཅིང་ལམ་ངང་གིས་འབྱུང་བ་མེད་པའི་ཕྱིར། [བཞི་པ་]མངོན་པར་འདུ་བྱེད་པ་མེད་པ་ནི། མངོན་པར་ཡང་བརྩོན་པ་མེད་ལ། ལམ་ངང་གིས་འབྱུང་བའང་མེད་པའི་ཕྱིར། གྲགས་ཞེས་པ་ནི་བྱེ་སྨྲའི་ལུགས་སུ་སྟོན་ཏེ། རང་ལུགས་ནི་མདོ་སྡེ་པ་དང་མཐུན་པར་ཕྱིས་འཆད་དོ། །གཞན་དག་ན་རེ། འདུ་བྱེད་པ་ནི་འདུས་བྱས་དང་དོན་གཅིག་པས་སྡུག་ཀུན་ལམ་གསུམ་ལ་དམིགས་པའི་ལམ་གྱིས་ཉོན་མོངས་སྤོང་བ་དང་། འདུ་བྱེད་པ་མེད་པ་ནི་འགོག་པ་ལ་དམིགས་པས་སྤོང་བས་མྱ་ངན་ལས་འདའ་བའོ་ཞེ་ན། དེ་ནི་མི་རུང་སྟེ། གཞན་ཀུན་ཀྱང་བདེན་བཞི་ལ་དམིགས་པ་ཡོད་པས་ཧ་ཅང་ཐལ་བར་འགྱུར་བའི་ཕྱིར་ཏེ། དེ་ལྟ་བས་ན་གང་ཟག་གཉིས་ཁོ་ནར་འགྱུར་གྱི། ལྔ་ནི་མ་ཡིན་པའི་ཕྱིར། མདོ་ལས་ནི། མངོན་པར་འདུ་བྱེད་པ་ལས་སྔ་པར་འདུ་མི་བྱེད་པ་བྱུང་བས། དེ་ཁོ་ན་བཞིན་དུ་རུང་སྟེ། གང་ཟག་རྩོལ་བ་མེད་པ་དང་ཡོད་པ་ལས། ལམ་ངང་གིས་འབྱུང་བ་དང་འབྱུང་བ་མ་ཡིན་པས་འདའ་བ་ནི་འདུ་བྱེད་པ་མེད་པ་དང་ཡོད་པས་བསྒྲུབ་པར་བྱ་བ་ཡིན་པའི་ཕྱིར། གྲུབ་སྟེ། མྱང་འདས་དེ་གཉིས་གོ་རིམ་བཞིན་དུ་འབད་པ་(༢༦༩བ)
མེད་པ་དང་འབད་པའི་སྒོ་ནས་ཐོབ་པའི་ཕྱིར་རོ། །མངོན་པར་འདུ་མི་བྱེད་པས་ངང་གིས་འབྱུང་བ་ཡིན་པས། སྐྱེ་འདའ་བ་ཡང་ངང་གིས་འབྱུང་བས་དེ་གཉིས་ལ་ཁྱད་པར་ཅི་ཡོད་སམ་ན། སྐྱེས་འདའ་བ་ནི་ལམ་ཆེས་ངང་གིས་འབྱུང་བས་ཆེས་ཆེ་བ་དང་། ཕྲ་རྒྱས་ཆེས་ཆུང་བ་ཡིན་ལ། གཅིག་ཤོས་དེ་ལྟར་མ་ཡིན་པའི་ཕྱིར་ཁྱད་པར་རོ། །[ལྔ་པ་]གོང་དུ་འཕོ་བ་ནི། གང་དུ་སྐྱེས་པ་དེང་མྱ་ངན་ལས་མི་འདའ་བར་གོང་དུ་འཕོ་ཞིང་འགྲོ་བ་རྣམས་ཏེ་ལྔའོ། །གཉིས་པ་ལ། འོག་མིན་འགྲོ་དང་། སྲིད་རྩེ་འགྲོའོ། །དང་པོ་ནི། དེ་ནི། །བསམ་གཏན་སྤེལ་ན་འོག་མིན་འགྲོ། །དེ་འཕར་ཕྱེད་འཕར་ཐམས་ཅད་དུ། །འཆི་འཕོ། སྤྱིར་གོང་འཕོ་ལ། ལ་ལ་ནི་གཟུགས་ཁམས་སུ་སྐྱེ་བར་ངེས་ལ། གཟུགས་མེད་དུ་མི་སྐྱེ་བ་ཡོད། ལ་ལ་ནི་གཟུགས་མེད་དུ་སྐྱེ་བར་ངེས་པ་ལ་གཟུགས་ཁམས་སུ་སྐྱེ་བ་ཡོད། ལ་ལ་ནི་གཉིས་ཀར་སྐྱེ་བར་ངེས་པ་ཡོད། སྔ་མ་ནི་བསམ་གཏན་སྤེལ་བ་དེ་འོག་མིན་མན་ཆད་དུ་མྱ་ངན་ལས་འདའ་བའོ། །དེ་ལ་འཕར་བ། ཕྱེད་འཕར། གནས་ཐམས་ཅད་དུ་འཆི་བའོ། །བར་མ་ནི་གཟུགས་ཀྱི་འདོད་ཆགས་དང་བྲལ་བ་དེ་གཟུགས་མེད་མུ་བཞིར་སྐྱེ་སྟེ། འཕར་ཕྱེད་འཕར་ཐམས་ཅད་དུ་འཆི་འཕོ་བའོ། །གཉིས་ཀར་སྐྱེ་བར་ངེས་པ་ནི་གཟུགས་ཁམས་སུ་ཐོན་ནས་གནས་གཙང་དུ་མི་སྐྱེ་བར་གཟུགས་མེད་དུ་སྐྱེ་བའོ། །གོང་དུ་འཕོ་བ་དེ་ནི་རྒྱུ་དང་འབྲས་བུའི་སྒོ་ནས་གཉིས་ཏེ། ལྷག་མཐོང་སྤྱད་པའི་རིགས་ཅན་ཞིག་སྟེ། རྒྱུའི་སྒོ་ནས་བསམ་གཏན་ཟག་བཅས་དང་ཟག་མེད་སྤེལ་བ་སྟེ་བསྲེས་ནས་བསྒོམས་པ་དང་མ་བསྲེས་པའི་ཕྱིར། འབྲས་བུའི་སྒོ་ནས་ནི་མིང་གྱུར་པས་བསམ་གཏན་སྤེལ་བ་འོག་མིན་དུ་འགྲོ་བ་དང་། གནས་གཙང་མར་མ་ཞུགས་པར་མྱ་ངན་ལས་འདའ་བ་ནི་མ་སྤེལ་བས་སྲིད་པའི་རྩེ་མོ་ལ་མཐར་ཐུག་པར་འགྲོ་སྟེ། དེ་དག་གི་གོང་དུ་སྐྱེ་བ་མེད་པའི་ཕྱིར། གོང་དུ་འཕོ་བ་འོག་(༢༧༠ན)
མིན་གྱི་མཐར་ཐུག་པ་དེའང་། འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བ་སྟེ་རྣམ་པ་གསུམ་མོ། །དེ་ལ་དང་པོ་ནི། མིར་བསམ་གཏན་བཞི་པ་སྤེལ་བ་བསམ་གཏན་དང་པོའི་རོ་མྱོང་སྟེ། བསམ་གཏན་གཉིས་པ་ཡན་ཆད་གསུམ་ལས་ཡོངས་སུ་ཉམས་པ་ཚངས་རིས་ཀྱི་ནང་དུ་སྐྱེས་ནས། སྔོན་གོམས་པའི་དབང་གིས་བསམ་གཏན་བཞི་པ་སྤེལ་ཏེ། དེ་ནས་ཤི་འཕོས་ནས་འོག་མིན་གྱི་ནང་དུ་སྐྱེས་པ་གང་ཡིན་པ་སྟེ། དེ་གཟུགས་ཀྱི་དང་པོ་དང་ཐ་མར་སྐྱེའི་བར་དུ་མི་འགྲོ་བས་འཕར་བ་ཞེས་བྱའོ། །དེའང་ཞིབ་ཏུ་བཤད་ན། འདོད་ཁམས་ཀྱི་བསམ་གཏན་སྤེལ་བ་དེ་བསམ་གཏན་དང་པོའི་རོ་མྱོང་བས་བསམ་གཏན་གསུམ་ཉམས་ནས་ཚངས་རིས་སུ་སྐྱེས་པ་དེ་གཉིས་པའི་འདོད་ཆགས་དང་བྲལ། གསུམ་པའི་འདོད་ཆགས་དང་བྲལ་ནས། ཡང་སྔོན་གོམས་པའི་དབང་གིས་བསམ་གཏན་སྤེལ་མ་ལྔ་པོ་(ཟག་མེད་གཉིས་ཀྱི་བར་དུ་ཟག་བཅས་རེ་བཅུག་པའི་གསུམ་པ་ལྔ་ལ་བཅོ་ལྔའི་དབང་དུ་བྱས་པའོ། །མཆན།)དེ་བསྒོམས་ནས་དེ་ནས་ཤི་ནས་འོག་མིན་དུ་སྐྱེས་ནས་བཞི་པ་དང་། གཟུགས་མེད་ཀྱི་ཀུན་སྦྱོར་སྤངས་ནས་དགྲ་བཅོམ་ཐོབ་སྟེ་མྱ་ངན་ལས་འདའ་བ་དེ་འཕར་བའོ། །དེའང་ཚེ་སྟོད་ལ་བདེན་པ་མཐོང་བའི་གང་ཟག་གི་དབང་དུ་བྱས་པ་ཡིན་གྱི། ཚེ་རབས་སྔ་མ་ནས་འཕགས་པར་གྱུར་བ་དེ་ནི། འདོད་པར་ཚེ་ཡོངས་གྱུར་པའི་འཕགས། ཁམས་གཞན་དུ་ནི་འགྲོ་བ་མེད། །ཅེས་འབྱུང་བ་ལྟར་རོ། །འདོད་པར་བསམ་གཏན་སྤེལ་བ་དེ་གཉིས་པའི་རོ་མྱངས་པས་བཞི་པ་དང་གསུམ་པ་ལས་ཉམས་པ་བསམ་གཏན་གཉིས་པའི་འོད་ཆུང་ལྟ་བུར་སྐྱེས་ནས་གཉིས་པ་དང་གསུམ་པའི་འདོད་ཆགས་དང་བྲལ་བར་བྱས་ནས། བསམ་གཏན་སྤེལ་མ་ལྔ་བསྒོམས་པས་ཤི་ནས་འོག་མིན་དུ་(༢༧༠བ)
སྐྱེས་ནས་ཀུན་སྦྱོར་ལྷག་མ་སྤངས་ནས་མྱ་ངན་ལས་འདའ་བ་དེའང་འཕར་བའོ། །དེ་བཞིན་དུ་འདོད་པའི་རྟེན་ལ་བསམ་གཏན་སྤེལ་ནས་གསུམ་པའི་རོ་མྱངས་པས་བཞི་པ་ཉམས་ནས་བསམ་གཏན་གསུམ་པར་སྐྱེས་པ་དེ་ཡང་གསུམ་པའི་འདོད་ཆགས་དང་བྲལ་བར་བྱས་ནས་སྔོན་གོམས་པའི་དབང་གིས་བཞི་པའི་སྤེལ་མ་ལྔ་བསྒོམས་ནས་ཤི་འཕོས་ཏེ་འོག་མིན་དུ་ཀུན་སྦྱོར་སྤངས་ནས་མྱ་ངན་ལས་འདའ་བ་དེའང་འཕར་བའོ། །དེ་ལྟར་བསམ་གཏན་དང་པོ་ནས་འོག་མིན་དུ་འཕར། གཉིས་པ་ནས་འཕར། གསུམ་པ་ནས་འཕར་བ་ཡོད། བཞི་པ་སྤྲིན་མེད་ནས་འོག་མིན་དུ་འཕར་བ་དེ་འཕར་བ་མ་ཡིན་ཏེ། བཞི་པ་རང་གི་ས་ལ་རང་སར་འཕར་བ་མེད་དོ། །འབྲས་བུ་ཆེར་སྐྱེ་བའི་ལས་བསགས་པ་ཞིག་ཟག་མེད་དུ་སྤེལ་བས་འབྲས་བུ་ཆེར་སྐྱེ་བའི་ནུས་པ་བཅོམ། ཟག་བཅས་སུ་སྤེལ་བས་གནས་གཙང་ལྔར་སྐྱེ་བ་དེ་འདྲ་ནི་རྫོགས་བྱེད་གཡོ་བར་དོན་གསང་མཁན་པོ་འདོད་དོ། །འདོད་པའི་ཁམས་ནས་འཕར་བ་ནི་མེད་དེ། ཡོད་ན་འཕར་དྲགས་ན་སླར་ལ་འཕར་བ་ལ་སོགས་པར་མི་འགྲོ་བར་གཞན་དུ་འགྲོ་སྟེ། འདོད་པར་ཤི་ན་འོག་མིན་གྱི་བར་དོར་མྱ་ངན་ལས་འདའ་ན་བར་མ་དོར་མྱ་ངན་ལས་འདའ་བར་འགྲོ། སྐྱེས་ནས་འདའ་ན་སྐྱེས་ནས་མྱ་ངན་ལས་འདའ་བ་དང་། འདུ་བྱེད་མེད་པ་དང་། འདུ་བྱེད་པས་མྱ་ངན་ལས་འདའ་བར་འགྲོ་བས་འཕར་སོགས་སུ་སླར་ལ་མི་འགྲོའོ། །[གཉིས་པ་]ཕྱེད་དུ་འཕར་བ་ནི། དང་པོ་དེ་ནས་གནས་གཙང་མ་རྣམས་སུ་སྐྱེས་ལ། བར་ན་གནས་གཞན་འགའ་ཙམ་ཡང་བརྒལ་ཏེ་འོག་མིན་དུ་འཇུག་པའོ། །དེའང་ཞིབ་ཏུ་བཤད་ན། འདོད་པར་བསམ་གཏན་སྤེལ་བ་དེ་དང་པོའམ་རོ་མྱངས་པས་བསམ་གཏན་བཞི་པ་གསུམ་པ་གཉིས་པ་ཉམས་པ་དེ་བསམ་གཏན་དང་པོར་སྐྱེས་པ་དེ་དང་པོ་གཉིས་པ་གསུམ་པའི་འདོད་ཆགས་དང་བྲལ་བར་བྱས་ནས་བསམ་གཏན་(༢༧༡ན)
སྤེལ་བ་གསུམ་དྲུག་དགུ་བཅུ་གཉིས་སུ་སྤེལ་བ་དེ་སྔོན་གོམས་པའི་སྟོབས་ཀྱིས་གསུམ་མམ་དྲུག་གམ་དགུའམ་བཅུ་གཉིས་སུ་སྤེལ་བས་དེ་ནས་ཤི་ནས་མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། གྱ་ནོམ་སྣང་གང་རུང་ཞིག་ཏུ་བར་ཞག་བྱས་ནས་དེ་ནས་འོག་མིན་དུ་སྐྱེས་ནས་མྱ་ངན་ལས་འདའོ། །དེ་བཞིན་དུ་འདོད་པར་བསམ་གཏན་སྤེལ་བ་དེ་བསམ་གཏན་གཉིས་པའི་རོ་མྱངས་པས་གསུམ་པ་དང་བཞི་པ་ལས་ཉམས་པ་དེ་བསམ་གཏན་གཉིས་པར་སྐྱེས་ནས་གཉིས་པ་དང་གསུམ་པའི་འདོད་ཆགས་དང་བྲལ་བར་བྱས་ནས་སྔོན་གོམས་པའི་སྟོབས་ཀྱིས་གསུམ་དང་དྲུག་དགུ་བཅུ་གཉིས་སྤེལ་ནས་ཤི་ནས་མི་ཆེ་མི་གདུང་བ་ཤིན་ཏུ་མཐོང་བ་གྱ་ནོམ་སྣང་གང་རུང་ཞིག་ཏུ་བར་ཞག་བྱས་ནས་འོག་མིན་དུ་སྐྱེས་ནས་མྱ་ངན་ལས་འདའོ། །དེ་བཞིན་དུ་འདོད་པར་བསམ་གཏན་སྤེལ་བ་དེ་གསུམ་པའི་རོ་མྱངས་པས་བཞི་པ་ལས་ཉམས་ནས་གསུམ་པར་སྐྱེས་པ་དེ་གསུམ་པའི་འདོད་ཆགས་དང་བྲལ་བར་བྱས་ནས་སྤེལ་བ་གསུམ་སོགས་སྔོན་གོམས་པས་མི་ཆེ་བ་སོགས་གང་རུང་དུ་བར་ཞག་བྱས་ནས་འོག་མིན་དུ་མྱ་ངན་ལས་འདའ་སྟེ་གསུམ་པོ་དེའང་ཕྱེད་འཕར་ཡིན་ནོ། །ཕྱེད་འཕར་ལའང་བསམ་གཏན་དང་པོ་གཉིས་པ་གསུམ་པ་ན་ཡོད་ཀྱི། བཞི་པའི་རང་ས་ནས་བཞི་པར་འཕར་བ་མེད་དེ། འཕར་བ་ནས་ཐ་དད་པས་ཁྱབ་པའི་ཕྱིར་རོ། །འཕགས་པ་ནི་ཚངས་ཆེན་གྱི་ནང་དུ་མི་སྐྱེ་སྟེ། བདག་ནི་སེམས་ཅན་འདི་རྣམས་ཀྱི་སྤྲུལ་པ་པོ་ཡིན་སྙམ་པ་རྒྱུ་དང་ལམ་མ་ཡིན་པ་ལ་དེར་འཛིན་པ་དང་། དང་པོར་སྐྱེས་པ་རྣམས་ཀྱང་དེས་སྤྲུལ་པར་ང་རྒྱལ་བྱེད་པས་ལྟ་བའི་གནས་ཡིན་པའི་ཕྱིར་དང་། འཕགས་པ་དེར་སྐྱེ་ན་མཐུའི་སྒོ་ནས་གཙོ་བོ་ཉིད་དུ་འགྱུར་ན། ད་ནི་འགྲན་ཟླ་དང་བཅས་པར་མི་འགྱུར་(༢༧༡བ)
བའི་གཙོ་བོ་གཅིག་ཏུ་ཟད་པའི་ཕྱིར། [གསུམ་པ་]གནས་ཐམས་ཅད་དུ་འཆི་འཕོ་བ་ནི། ཚངས་རིས་ནས་ཤི་འཕོས་ཏེ་ཚངས་པའི་མདུན་ན་འདོན་ལ་སོགས་ནས་གྱ་ནོམ་སྣང་བ་ལ་ཐུག་གི་བར་གནས་གཞན་བཅུ་བཞིར་འཕོས་ནས་འོག་མིན་དུ་འཇུག་པ་སྟེ། དེ་དབང་པོ་བརྟུལ་བའི་ཕྱིར། གང་སྤེལ་གྱིས་བར་མེད་པར་གནས་ཐམས་ཅད་དུ་ལན་རེ་སྐྱེས་ཤིང་འོག་མིན་དུ་འཇུག་ནས་མྱ་ངན་ལས་འདའ་བ་ལ་བཤད་དོ། །ཕྱིར་མི་འོང་བ་ནི། ཐ་ཤལ་གཅིག་ཡིན་ཀྱང་རང་གི་ས་དེར་ཡང་ལན་གཉིས་བལྡབ་ནས་མི་སྐྱེ་ན་འོག་མ་དག་ཏུ་ལྟ་ཅི་སྨོས་སོ། །གཉིས་པ་ནི། གཞན་སྲིད་རྩེ་མོར་འགྲོ། །བསམ་གཏན་སྤེལ་བ་འོག་མིན་དུ་འགྲོ་བ་དེ་ལས་གཞན་གོང་དུ་འཕོ་བ་བསམ་གཏན་མ་སྤེལ་བ་ནི་སྲིད་པའི་རྩེ་མོའི་མཐར་ཐུག་པར་འགྲོ་བ་ཡིན་ཏེ། སྲིད་རྩེའི་མཐར་ཐུག་པ་དེ་ནི་ཏིང་ངེ་འཛིན་ལ་དགའ་བ་ཡིན་པས། གཟུགས་མེད་ཀྱི་ཏིང་ངེ་འཛིན་ནི་རབ་ཏུ་ཞི་བ་ཡིན་པས། སྙོམས་འཇུག་གཞན་རྣམས་རོ་མྱོང་བར་བྱེད་ཅིང་གནས་གཞན་ཐམས་ཅད་དུ་སྐྱེ་ལ། གནས་གཙང་མར་མི་འཇུག་པ་ཁོ་ནར་གཟུགས་མེད་པར་སྐྱེ་བས་རིམ་གྱིས་སྲིད་རྩེར་སོང་སྟེ་མྱ་ངན་ལས་འདའ་བའོ། །འདི་ནི་ཏིང་ངེ་འཛིན་ལ་དགའ་བ་ཞི་གནས་སྤྱད་པ་ཡིན་ལ། སྔ་མ་འོག་མིན་གྱི་མཐར་ཐུག་པ་ནི་ཤེས་རབ་ལ་དགའ་བ་ལྷག་མཐོང་སྤྱད་པ་ཡིན་ནོ། །གོང་དུ་འཕོ་བ་འོག་མིན་དང་སྲིད་རྩེའི་མཐར་ཐུག་པར་ཡང་འོག་མིན་དང་སྲིད་རྩེར་མ་ཞུགས་པར་བར་སྐབས་སུའང་མྱ་ངན་ལས་འདའ་བར་རུང་སྟེ། བསྟན་བཅོས་བྱེད་པ་སྔ་མ་རྣམས་ཀྱིས་བྲིས་པ་དང་བཀག་པའང་མེད་ཀྱང་རིགས་པ་དང་འགལ་བ་མེད་པའི་ཕྱིར་རོ། །འོག་མིན་དང་སྲིད་པའི་རྩེ་མོའི་མཐར་ཐུག་པར་གསུངས་པ་ནི་དེ་གཉིས་ལས་ཕན་ཆད་དུ་འགྲོ་བ་མེད་པའི་ཕྱིར་ཏེ། རྒྱུན་ཞུགས་མཆོག་ཏུ་ཐོགས་ན་ལན་བདུན་པ་སྲིད་པ་གཉིས་སམ་(༢༧༢ན)
གསུམ་གྲུབ་ནས་མྱ་ངན་ལས་འདའ་བ་སྲིད་ཀྱང་བརྒྱད་ཕན་ཆད་མི་འགྲུབ་པས་དེར་བཤད་པ་བཞིན་ནོ། །འདི་ཕྱིས་གཟུགས་མེད་འགྲོ་ཡང་དང་པོར་གཟུགས་སུ་ཉེར་འགྲོ་ཡིན་ནོ། །དེ་དག་ནི་གཟུགས་སུ་ཉེར་འགྲོའི་ཕྱིར་མི་འོང་བ་ཡིན་ནོ། །གཉིས་པ་གཟུགས་མེད་ཉེར་འགྲོ་ནི། གཞན་ནི་གཟུགས་མེད་འགྲོ་རྣམ་བཞི། །ཕྱིར་མི་འོང་བ་གཞན་ནི་གཟུགས་མེད་པར་འགྲོ་བ་སྟེ། གཟུགས་ཀྱི་ཆགས་བྲལ་འདི་ནས་ཤི་འཕོས་ནས་གཟུགས་མེད་དུ་སྐྱེ་བའོ། །བར་མ་དོར་མྱ་ངན་ལས་འདའ་བ་དེ་ལ་མེད་པས་སྐྱེས་ནས་དང་འདུ་བྱེད་དང་བཅས་པ་ལ་སོགས་རྣམ་པ་བཞི་སྟེ། དེ་ཕྱིར་མི་འོང་དྲུག་པ་གཟུགས་མེད་པར་འགྲོ་བ་ཡིན། དེའང་ཚེ་མ་རྫོགས་པའི་བར་དུ་མྱ་ངན་ལས་འདའ་བ་ལ་བར་དོར་མྱ་ངན་ལས་འདའ་བར་བྱས་ན་གཟུགས་མེད་ཀུན་ལ་ཡང་ཚེ་མ་རྫོགས་པའི་བར་དུ་མྱ་ངན་ལས་འདའ་བ་ཡོད་པས་བར་དོར་མྱ་ངན་ལས་འདའ་བ་འོང་བ་ལ། ཚེ་མ་རྫོགས་པའི་བར་དུ་མྱ་ངན་ལས་འདའ་བ་ལ་བར་དོར་མྱ་ངན་ལས་འདའ་བ་མ་ཡིན་ནོ། །འདི་ཡི་གོང་འཕོ་ལ་ནམ་མཁར་སྲིད་རྩེའི་སེམས་ཐོབ་པ་གཅིག་ནམ་མཁའི་རོ་མྱོངས་པས་གོང་མ་གསུམ་ལས་ཉམས་ནས་ནམ་མཁར་ཡེ་ནས་སྐྱེས་པ་དེ་ནམ་མཁའ་རྣམ་ཤེས། ཅི་ཡང་མེད་པའི་འདོད་ཆགས་དང་བྲལ་ནས་སྲིད་རྩེའི་སེམས་ཐོབ་པ་དེ་ཤི་ནས་སྲིད་རྩེར་སྐྱེས་ནས་ཀུན་སྦྱོར་ལྷག་མ་སྤངས་ནས་མྱ་ངན་ལས་འདའ་བ་དེ་འཕར་བའོ། །ཕྱེད་དུ་འཕར་བ་ནི། ནམ་མཁར་སྲིད་རྩེའི་སེམས་ཐོབ་པ་གཅིག་ནམ་མཁའི་རོ་མྱོངས་པས་གོང་མ་གསུམ་ལས་ཉམས་པ་ནམ་མཁར་ཡེ་ནས་སྐྱེས་པ་གཅིག་བར་མ་གཉིས་པོ་གང་རུང་དུ་འོག་མའི་འདོད་ཆགས་དང་བྲལ་ནས་གང་རུང་དེ་རུ་བར་ཞག་བྱས་ནས་ཤི་ནས་སྲིད་རྩེར་སྐྱེས་ནས་སྲིད་རྩེར་མྱ་ངན་ལས་འདའོ། །གནས་ཐམས་ཅད་དུ་འཆི་འཕོ་བའང་(༢༧༢བ)
སྲིད་རྩེ་ལས་ཉམས་པ་ནམ་མཁར་སྐྱེས་པ་དེ་ཙོག་གེ་འགྲོ་བར་བྱེད་དོ། །གསུམ་པ་མཐོང་ཆོས་ནི། གཞན་ནི་འདི་ལ་མྱ་ངན་འདའ། །ཕྱིར་མི་འོང་གཞན་མཐོང་ཆོས་ཚེ་འདི་ཁོ་ན་ལ་མྱ་ངན་ལས་འདའ་བ་ནི་བདུན་པའོ། །བཞི་པ་ཕྱིར་མི་འོང་གི་དབྱེ་བ་དུ་མ་བཤད་པ་ལ། གཟུགས་སུ་ཉེར་འགྲོ་དགུར་དབྱེ་བ། སྐྱེས་བུ་དམ་པའི་འགྲོ་བ་བཤད་པ། ཚེ་ཡོངས་གྱུར་གྱི་འཕགས་པ་ངོས་བཟུང་བ། བསམ་གཏན་སྤེལ་མ་སྒོམ་ཚུལ་ལོ། །དང་པོ་ལ། དངོས་དང་། དེའི་ཁྱད་པར་རོ། །དང་པོ་ནི། གསུམ་ལ་ཡང་རྣམ་གསུམ་ཕྱེ་ནས། །གཟུགས་སུ་ཉེ་འགྲོ་དགུར་བཤད་དོ། །ཕྱིར་མི་འོང་གསུམ་ལའང་རྣམ་པ་གསུམ་དུ་ཕྱེ་ནས་ཕྱིར་མི་འོང་བ་གཟུགས་སུ་ཉེ་བར་འགྲོ་བ་དགུར་བཤད་དོ། །དབྱེ་བྱ་གསུམ་ནི། བར་མདོར་དང་། སྐྱེས་ནས་དང་། གོང་དུ་འཕོ་བའོ། །རྣམ་པ་གསུམ་དུ་ཕྱེ་བ་ནི་བར་མ་དོར་མྱ་ངན་ལས་འདའ་བ་ལ་སོག་མ་ཆུང་ངུའི་མེ་གྲུབ་བཞིན་དུ་འཆི་བ་དང་། ལྕགས་ཀྱི་ཐོ་ལུམ་མ་མཐོང་ལྕགས་མེ་འབར་བ་ལྕགས་ཀྱི་ཐོ་བས་བརྒྱབས་པའི་ཚྭ་ཚྭ་གྱེན་དུ་ཡར་བཞིན་དུ་འཆི་བ་དང་། དེའི་ཚྭ་ཚྭ་གྱེན་དུ་ཡར་ནས་ས་ལས་ལྷུང་བར་འཆི་བའི་དཔེ་གསུམ་གྱིས་མྱུར་བར་མྱ་ངན་ལས་འདའ་བ་དང་། མྱུར་བ་མ་ཡིན་པ་དང་། ཡུན་རིང་མོ་ནས་མྱ་ངན་ལས་འདའ་བའི་ཕྱིར་རོ། །སྐྱེས་ནས་མྱ་ངན་ལས་འདའ་བ་ལ་སྐྱེས་ནས་དང་། འདུ་བྱེད་དང་བཅས་པ་དང་། འདུ་བྱེད་པ་མེད་པ་ཡོངས་སུ་མྱ་ངན་ལས་འདའ་བའི་ཕྱིར་རོ། །དེའང་སྐྱེས་ནས་མྱ་ངན་ལས་འདའ་བ་ནི་སྐྱེས་པ་ཙམ་གྱིས་ཡིན་གྱི། འདུ་བྱེད་པའམ་འདུ་བྱེད་པ་མེད་པས་མིན། མངོན་པར་འདུ་བྱེད་པས་མྱ་ངན་ལས་འདའ་བ་ནི། སྐྱེས་པ་ཙམ་གྱིས་མ་ཡིན། འོ་ན་ཅི་ཞེ་ན། སྔོན་གྱི་མངོན་པར་འདུ་བྱེད་པ་མ་བཏང་བའི་མཐུས་མྱ་ངན་ལས་འདའ་བ་ཡིན། འདི་ལ་ནི་ལམ་ངང་གིས་འབྱུང་བ་ཡིན་མོད་ཀྱི། མངོན་པར་བརྩོན་པས་མྱ་ངན་ལས་འདའ་ལ། སྐྱེས་ནས་འདའ་བ་ནི་(༢༧༣ན)
མངོན་པར་བརྩོན་པ་མེད་པས་ཀྱང་ཁྱད་ཡོད་དོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ནི། སྔོན་གྱི་མངོན་པར་འདུ་བྱེད་པ་བཏང་སྟེ་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བ་ཡིན་ནོ་སྟེ་དེ་དག་གི་ཁྱད་པར་རོ། །གསུམ་པོ་དེ་ཐམས་ཅད་སྐྱེས་ནས་མྱ་ངན་ལས་འདའ་བའི་ཕྱིར་སྐྱེས་ནས་མྱ་ངན་ལས་འདའ་བ་ཡིན་ནོ། །གོང་དུ་འཕོ་བ་ནི། འཕར་བ་ལ་སོགས་པའི་བྱེ་བྲག་གི་གསུམ་མོ། ཡང་ན་དབྱེ་བྱ་གསུམ་པོ་ཐམས་ཅད་ལ་མྱུར་བ་དང་མྱུར་བ་མ་ཡིན་པ་དང་ཡུན་རིང་མོ་ཞིག་ནས་མྱ་ངན་ལས་འདའ་བའི་ཕྱིར་རོ། །གཉིས་པ་ནི། དེ་དག་གི་ནི་ཁྱད་པར་རྣམས། །ལས་དབང་ཉོན་མོངས་བྱེ་བྲག་ལས། །ཕྱིར་མི་འོང་། བར་འདའ། སྐྱེ་འདའ། གོང་འཕོ་གསུམ་པོ་རེ་རེ་ལ་གསུམ་གསུམ་སྟེ་དགུ་པོ་དེ་དག་གི་ཁྱད་པར་རྣམས་ནི་ལས་དབང་ཉོན་མོངས་བྱེ་བྲག་ལས་སོ་སོར་དབྱེ་བར་བྱ་སྟེ། དེའང་སྲིད་པ་བར་མ་མངོན་པར་འགྲུབ་པའི་མྱོང་འགྱུར་གྱི་ལས་བསགས་པའི་ཕྱིར། བར་དོར་མྱ་ངན་ལས་འདའ་བ་དང་། སྐྱེས་ནས་མྱོང་འགྱུར་གྱི་ལས་བསགས་པའི་ཕྱིར། སྐྱེས་ནས་ཡོངས་སུ་མྱ་ངན་ལས་འདའ་བ་དང་། ལན་གྲངས་གཞན་ལ་མྱོང་འགྱུར་གྱི་ལས་བསགས་པའི་གོང་དུ་འདའ་བའོ། །དེ་དག་ཉིད་ཀྱི་ཁྱད་པར་ཡང་ཉོན་མོངས་པ་ཆུང་འབྲིང་ཆེན་པོས་སྤོང་སླ་བ་དང་དཀའ་བ་ལ་སོགས་པར་འགྱུར་བ་དང་། དེ་དག་ཉིད་ཀྱི་ཁྱད་པར་གྱིས་དབང་པོ་རྣོ་འབྲིང་བརྟུལ་པོར་འགྱུར་རོ། །འདིར་རིགས་དྲུག་ཏུ་བཞག་པའི་དབང་པོ་རྟུལ་པོ་ནི་རིགས་ལྔ། དབང་པོ་རྣོན་པོ་ནི་རིགས་གཅིག་སྟེ། དེ་འདྲ་བར་བྱས་པའི་དབང་པོ་རྣོ་རྟུལ་མིན། རིགས་ཀྱི་དབང་དུ་བྱས་པའི་དྲུག་གར་ཡོ་འདྲ། སྤྱིར་དབང་པོ་རབ་འབྲིང་གསུམ་གྱི་ནང་གསེས་ཀྱི་གསུམ་གསུམ་སྟེ་དགུར་བཞག་པ་ཡིན། ཉོན་མོངས་པ་སྤོང་(༢༧༣བ)
མང་ཉུང་གི་སྒོ་ནས་བཞག་པ་མིན། བར་དོའི་ཚེ་སྟོད་དུ་མྱ་ངན་ལས་འདའ་བ་དེ་ལ་ཉོན་མོངས་པ་ཆུང་ངུའི་ཆུང་ངུ་གཅིག་པུ་ལས་མེད་པས་ཉུང་བས་སྤོང་། གནས་ཐམས་ཅད་དུ་འཆི་བ་མང་བས་སྤང་བར་བྱ་བ་མིན། དེ་ལྟར་མིན་ན་འཕར་བ་ཀུན་བསམ་གཏན་བཞི་བའི་ཉོན་མོངས་དང་གཟུགས་མེད་ཀྱི་ཉོན་མོངས་ཙམ་སྤོང་བས་སླར་ལ་ཉུང་། བར་དོ་ཀུན་ཚངས་རིས་ཡན་ཆོད་ཀྱི་ཉོན་མོངས་སྤོང་བས་སླར་ལ་མང་བར་འགྲོ། །འོ་ན་བར་དོའི་ཚེ་སྟོད་དུ་མྱ་ངན་ལས་འདའ་བ་དེ་ལ་ཉོན་མོངས་པ་ཆུང་ངུའི་ཆུང་ངུ་སྤང་བྱ་བ་དེ་དབང་པོ་རབ་ཏུ་གྱུར་ཀ་ཙམ་ན་སྤོང་སླ་ཞིང་མྱུར་དུ་སྤོང་བས་ཆུང་ངུའི་ཆུང་ངུ་སྤོང་ཞེས་བྱ། བར་དོའི་ཚེ་དཀྱིལ་དུ་མྱ་ངན་ལས་འདའ་བ་དེ་དབང་པོ་རབ་ཀྱི་འབྲིང་ཡིན་ཙམ་ན་ཉོན་མོངས་པ་སྤངས་དེ་བས་དཀའ་ཞིང་། དེ་བས་བུལ་བར་སྤོང་བས་ཉོན་མོངས་འབྲིང་སྤངས་ཞེས་བྱ་བ་གཞན་ལའང་འགྲེའོ། །གསུམ་ཚན་དང་པོ་བར་འདའ་བ་དང་སྐྱེ་འདའ་བ་གཉིས་ནི་ཉོན་མོངས་པ་ཆུང་འབྲིང་ཆེན་པོ་དང་། དབང་པོ་རྣོ་འབྲིང་རྟུལ་པོའི་ཁྱད་པར་གྱིས་ཡིན་གྱི། ལས་ཀྱི་བྱེ་བྲག་ལས་མ་ཡིན་ཏེ། མངོན་པར་འགྲུབ་པ་མྱོང་འགྱུར་ཡང་འདྲ་ལ། སྐྱེས་ནས་མྱོང་འགྱུར་ཡང་འདྲ་བའི་ཕྱིར། གསུམ་ཚན་དང་པོ་གཉིས་བར་དོའི་སྲིད་པའང་རིས་གཅིག་སྐྱེ་བའི་སྲིད་པའང་རིས་གཅིག་པས་ལས་ཀྱི་བྱེ་བྲག་མ་སྨོས། གསུམ་ཚན་ཐ་མ་ནི་ཉོན་མོངས་པ་དང་དབང་པོ་ཨ་ཅང་ཡང་ཆེས། ལས་ཀྱི་བྱེ་བྲག་གིས་ཀྱང་ཐ་དད་དེ། འཕར་བ་ནི། ལན་གྲངས་གཞན་གྱི་སྐྱེ་བ་གཅིག་གི་ལས་ཀྱིས་སོ། །ཕྱེད་དུ་འཕར་བ་ནི། ལན་གྲངས་གཞན་གྱིས་སྐྱེ་བ་གཉིས་ཀྱི་ལས་ཀྱིས་སོ། །གནས་ཐམས་ཅད་དུ་འཆི་འཕོ་བ་ནི། ལན་གྲངས་གཞན་གྱི་སྐྱེ་བ་མང་པོའི་ལས་ཀྱིས་སོ། །དེ་དག་ནི་ཉོན་མོངས་པ་དང་དབང་པོའི་རྣམ་པ་དགུའི་(༢༧༤ན)
བྱེ་བྲག་གིས་ཕྱིར་མི་འོང་དགུ་ཡིན་ཏེ། འདི་ལྟར་ཉོན་མོངས་པ་ཆུང་འབྲིང་ཆེན་པོ་གསུམ་ལས། བར་འདའ་ཆུང་ངུ་། སྐྱེས་ནས་འབྲིང་། གོང་འཕོ་ཆེན་པོ། བར་དོ་དང་པོ་ཆུང་ངུའི་ཆུང་ངུ་། བར་དོ་གཉིས་པ་ཆུང་ངུའི་འབྲིང་། བར་དོ་གསུམ་པ་ཆུང་ངུའི་ཆེན་པོ། སྐྱེས་ནས་ཀྱི་ཡང་སྐྱེ་གནས་ནི་འབྲིང་པོའི་ཆུང་ངུ་། མངོན་པར་འདུ་བྱེད་ནི་འབྲིང་གི་འབྲིང་། མངོན་པར་འདུ་བྱེད་མེད་པ་ནི་འབྲིང་པོའི་ཆེན་པོའོ། །གོང་དུ་འཕོ་བ་རྣམས་ལའང་འཕར་བ་ནི་ཉོན་མོངས་པ་ཆེན་པོའི་ཆུང་ངུ་། ཕྱེད་འཕར་ནི་ཉོན་མོངས་ཆེན་པོའི་འབྲིང་། གནས་ཐམས་ཅད་དུ་འཆི་འཕོ་བ་ནི་ཉོན་མོངས་ཆེན་པོའི་ཆེན་པོ་ཅན་ཡིན་ནོ། །དེ་བཞིན་དུ་དབང་པོའང་ཆེ་འབྲིང་ཆུང་ངུ་སྟེ། བར་འདའ་ནི་ཆེན་པོ། །སྐྱེས་འདའ་ནི་འབྲིང་། གོང་འཕོ་ནི་ཆུང་ངུ་ཡིན་ནོ། །དེའང་བར་འདའ་བ་དང་པོ་ནི་དབང་པོ་ཆེན་པོའི་ཆེན་པོ། གཉིས་པ་ནི་ཆེན་པོའི་འབྲིང་། གསུམ་པ་ནི་ཆེན་པོའི་ཆུང་ངུ་། སྐྱེས་འདའ་བ་ལ་ཡང་སྐྱེས་ནས་འདའ་བ་ནི་འབྲིང་གི་ཆེན་པོ། བྱེད་བཅས་ཀྱི་འདའ་བ་ནི་དབང་པོ་འབྲིང་གི་འབྲིང་། བྱེད་མེད་ཀྱི་འདའ་བ་ནི་འབྲིང་གི་ཆུང་ངུའོ། །གོང་འཕོ་ལའང་འཕར་བ་ནི་དབང་པོ་ཆུང་ངུའི་ཆེན་པོ། ཕྱེད་འཕར་ནི་དབང་པོ་ཆུང་ངུའི་འབྲིང་། གནས་ཐམས་ཅད་དུ་འཆི་འཕོ་བ་ནི་དབང་པོ་ཆུང་ངུའི་ཆུང་ངུ་ཡིན་ནོ། །གཉིས་པ་སྐྱེས་བུ་དམ་པའི་འགྲོ་བ་ལ། དངོས་དང་། འཕྲོས་དོན་ནོ། །དང་པོ་ནི། གོང་དུ་འཕོ་བ་མ་ཕྱེ་བར། །དམ་པའི་འགྲོ་བ་བདུན་དུ་འདོད། །མདོ་ལས་སྐྱེས་བུ་དམ་པའི་འགྲོ་བ་བདུན་བསྟན་པ་ནི། བར་འདའ་བ་གསུམ་དང་། སྐྱེས་འདའ་བ་གསུམ་དང་དྲུགགོང་དུ་འཕོ་བའི་འགྲོ་བ་མ་ཕྱེ་བར་གཅིག་ཏུ་བྱས་ཏེ་སྐྱེས་བུ་དམ་པའི་འགྲོ་བ་བདུན་དུ་གསུངས་པར་འདོད་དོ། །དེ་མ་ཕྱེ་བ་ནི་དེའི་དབྱེ་བ་ཤིན་ཏུ་མང་བས་འཁྲུགས་པར་འགྱུར་ཏེ་འོང་བས་ཞེས་གང་སྤེལ་(༢༧༤བ)
འཆད་ལ། རྒྱལ་པོའི་སྲས་གདུལ་བྱའི་བསམ་པ་ལ་བལྟོས་པས། ཞེས་འཆད་དོ། །ལ་ལ་ན་རེ། གོང་དུ་འཕོ་བ་ནི། གཟུགས་སུ་འགྲོ་བ་ཁོ་ན་ལ་བཤད་ཙམ་ན་གཟུགས་མེད་ལ་གོང་དུ་འཕོ་བ་མེད་ཀྱི། གོང་དུ་ཉེར་འགྲོ་ཐམས་ཅད་གཟུགས་སུ་ཉེར་འགྲོ་ཡིན་ནམ་སྙམ་ནས་འོང་བ་ལ། གཟུགས་མེད་ཀྱི་གོང་འཕོ་ཡང་གོང་འཕོར་འདུས་པ་བསྟན་པའི་ཆེད་དུ་གོང་འཕོ་ལ་མ་ཕྱེས་ཟེར་རོ། །གཉིས་པ་ནི། དམ་པ་དམ་མིན་འཇུག་མི་འཇུག །སོན་པ་ཕྱིར་མི་འོང་ཕྱིར་དེ། །ཕྱིར་མི་འོང་འདི་དག་ཁོ་ན་སྐྱེས་བུ་དམ་པའི་འགྲོ་བ་ཡིན་གྱི། སློབ་པའི་འགྲོ་བ་རྒྱུན་ཞུགས་དང་། ལན་གཅིག་ཕྱིར་འོང་མ་ཡིན་ཅེ་ན། ཕྱིར་མི་འོང་གང་ལ་འགྲོ་བ་འདི་དག་ཡོད་པ་དེ་ནི་ཆོས་ཅན། རྣམ་གྲངས་མེད་པར་སྐྱེས་བུ་དམ་པའི་འགྲོ་བ་ཡིན་གྱི། གཞན་ལ་ནི་མེད་པས་མ་ཡིན་ཏེ། འདི་ནི་སྲོག་གཅོད་སོགས་(འགྲོ་བ་སྐྱེ་བ་ཚེ་ཕྱི་མ་ཞེས་པ་མདོ་ལས་རྣམ་གྲངས་སུ་གསུངས་སོ། །མཆན།)མི་བྱེད་པས་ལས་དམ་པ་དགེ་བ་ཁོ་ན་ལ་འཇུག་ཅིང་། རྒྱུན་ཞུགས་དང་ཕྱིར་འོང་ནི་མི་ཚངས་སྤྱོད་དང་ངག་ཀྱལ་དམ་པ་མ་ཡིན་པ་ལ་འཇུག་ལ། འདོད་པར་ཡང་སྐྱེ་ལ། འདི་ནི་ཚངས་སྤྱོད་སོགས་མི་བྱེད་པས་དམ་པ་མིན་པ་མི་དགེ་བ་ལ་མི་འཇུག་པའི་ཕྱིར་དང་། འགྲོ་བ་འདི་དག་ཏུ་སོན་པ་རྣམས་དེའི་འོག་གམ་དེར་ཡང་ཕྱིར་གཏན་མི་འོང་བའི་ཕྱིར་རོ། །ཁྱབ་སྟེ། སངས་རྒྱས་ལ་ནི་དམ་པ་ལ་འཇུགདམ་མིན་ལ་མི་འཇུག་པ་ཡོད་ཀྱང་། འགྲོ་བ་མེད། རྒྱུན་ཞུགས་དང་ཕྱིར་འོང་ལ་འགྲོ་བ་ཡོད་ཀྱང་སྡིག་པ་ལྔའམ་མི་དགེ་བ་ལ་མི་འཇུག་པས་དམ་མིན་ལ་མི་འཇུག་པ་དེ་ཀ་དམ་པ་ལ་འཇུག་པ་ཡིན། དེ་ཡོད་ཀྱང་སོན་པ་ཕྱིར་མི་འོང་བ་མེད་ཅིང་རྒྱུ་མཚན་གཉིས་སྡོམ་མེད་པས་སྐྱེས་བུ་དམ་པའི་འགྲོ་བར་མ་བཞགབྱང་སེམས་ལ་དམ་པ་དམ་མིན་འཇུག་མི་འཇུག་ཡོད་ཀྱང་། སོན་པ་ཕྱིར་མི་འོང་མེད། སོ་སྐྱེ་ལ་གཉིས་ཀ་མེད་པས་དེ་རྣམས་ལ་(༢༧༥ན)
དམ་པའི་འགྲོ་བར་མི་འགྲུབ་པའི་ཕྱིར་རོ། །འོ་ན་མདོ་ལས། སྐྱེས་བུ་དམ་པ་གང་ཞེ་ན། སློབ་པའི་ཡང་དག་པའི་ལྟ་བ་དང་ལྡན་པའོ། །ཞེས་གསུངས་པ་ཇི་ལྟ་བུ་ཞེ་ན། གཞན་རྒྱུན་ཞུགས་དང་ལན་གཅིག་ཕྱིར་འོང་བ་དག་ལའང་སྲོག་གཅོད་མ་བྱིན་ལེན། འདོད་ལོག་རྫུན་ཆང་འཐུང་སྟེ་སྡིག་པ་རྣམ་པ་ལྔ་ཚེ་གཞན་དུའང་གཏན་མི་བྱེད་པའི་སྡོམ་པ་ཐོབ་པའི་ཕྱིར་དང་། ཉོན་མོངས་པ་མཐོང་སྤོང་དང་འདོད་པའི་སྒོམ་སྤོང་ཁ་ཅིག་སྤངས་པས་རྣམ་གྲངས་ཡོད་པའི་སྐྱེས་བུ་དམ་པ་ཡིན་གྱི། ཁམས་གསུམ་གྱི་མཐོང་སྤོང་ཐམས་ཅད་སྤངས་པའི་ཕྱིར་དང་། འདོད་པའི་སྒོམ་སྤོང་དགུ་པོ་ཐམས་ཅད་སྤངས་པའི་ཕྱིར། མདོ་འདིར་ནི་རྣམ་གྲངས་མེད་པར་སྐྱེས་བུ་དམ་པ་ཡོད་པའི་ཕྱིར་མི་འོང་དེ་དག་གི་སྐབས་ཡིན་ནོ། །གསུམ་པ་ཚེ་ཡོངས་གྱུར་གྱི་འཕགས་པ་ལ། དངོས་དང་། དེ་དང་འབྲེལ་བའི་ཆོས་སོ། །དང་པོ་ནི། འདོད་པར་ཚེ་ཡོངས་གྱུར་པའི་འཕགས། །ཁམས་གཞན་དུ་ནི་འགྲོ་བ་མེད། །ཕྱིར་མི་འོང་ཚེ་གྱུར་པ་ལ་ནི་འདི་མེད་པས་འདོད་པར་ཚེ་དང་པོ་ལ་རྒྱུན་ཞུགས་སམ་ལན་གཅིག་ཕྱིར་འོང་ཐོབ་སྟེ་ཚེ་ཡོངས་སུ་གྱུར་ནས་ཚེ་གཉིས་པར་ཕྱིར་མི་འོང་ཐོབ་པའི་འཕགས་པ་ནི་ཁམས་གཞན་དུ་ནི་འགྲོ་བ་མེད་དེ། འདོད་པར་སྐྱོན་མང་བའི་སྲིད་པའི་སྡུག་བསྔལ་གྱིས་གཟིར་བ་ལས་སྐྱོ་བ་མང་བའི་སྟོབས་ཀྱིས་ཚེ་དེ་ལ་ཕྱིར་མི་འོང་བའི་འབྲས་བུ་ཐོབ་ནས་ཡོངས་སུ་མྱ་ངན་ལས་འདའ་བའི་ཕྱིར་རོ། །གཟུགས་ཁམས་སུ་ཚེ་གྱུར་པ་ནི་རེས་གཟུགས་མེད་དུ་འཇུག་སྟེ་གོང་དུ་འཕོ་བ་སྲིད་རྩེའི་མཐར་ཐུག་བཤད་པས་སོ། །འོ་ན་བརྒྱ་བྱིན་གྱིས། བདག་ནི་ཐ་མར་རིས་མཐུན་པའི་མཇུག་ཏུ་ཉམས་ན་སྟེ་དགྲ་བཅོམ་མ་ཐོབ་ན་ལྷ་གང་འོག་མིན་ཅེས། རྣམ་པར་གྲགས་པ་དེ་ནི་སྐྱེ་བར་འགྱུར་བར་ཤོག་ཅེས་སྨྲས་པ་ལ། སྟོན་པས་ཀྱང་ལེགས་སོ་ཞེས་དགག་པ་མ་མཛད་པ་ཅི་ཞེ་ན། བྱེ་བྲག་ཏུ་སྨྲ་བས། བརྒྱ་བྱིན་(༢༧༥བ)
ནི་ཆོས་མངོན་པ་མི་ཤེས་པ་དང་། སྟོན་པས་མ་བཀག་པ་ནི་འདོད་པའི་སྡུག་བསྔལ་སྤོང་བར་འདོད་པས་བརྒྱ་བྱིན་དགའ་བའི་ཕྱིར། འདུས་བཟང་ན་རེ། འཆི་འཕོ་བའི་རྒྱུ་མཚན་གྱི་སྐྱེ་བའི་སྡུག་བསྔལ་གྱིས་ཡིད་འབྱུང་བ་ནི་ཡང་དག་པར་དགའ་བར་བྱ་བ་ཡིན་པའི་ཕྱིར་ཞེས་ཟེར་རོ། །ངོ་ཚ་བ་སྤང་བའི་ཕྱིར་མ་བཟློག་ཅེས་གང་སྤེལ་འཆད་དོ། །གཉིས་པ་ནི། དེ་དང་གོང་མར་སྐྱེས་པ་ནི། །ཡོངས་ཉམས་དབང་པོ་འཕོ་མི་སྟེན། །འདོད་པར་ཚེ་གྱུར་པའི་འཕགས་པ་ཕྱིར་མི་འོང་དེ་དང་ཁམས་གོང་མར་སྐྱེས་པའི་འཕགས་པ་རྣམས་ནི་དབང་པོ་རྣམས་འཕོ་བ་ལ་མི་བསྟེན་ཅིང་ཡོངས་སུ་ཉམས་པར་མི་འགྱུར་ཏེ། དེ་གཉིས་མེད་པའི་ཕྱིར་ཏེ། ཚེ་གཞན་ནས་འདྲིས་པས་ཤེས་རབ་ལ་སོགས་པའི་དབང་པོ་རྣམས་སྨིན་པས་སྔོན་གོམས་ལམ་གྱིས་ཀུན་སྦྱོར་ལྷག་མ་སྤངས་ནས་མྱ་ངན་ལས་འདའ་བའི་ཁམས་གཞན་དུ་མི་འཇུག་པའི་ཕྱིར་དང་། སྔོན་འདྲིས་པས་དབང་པོ་སྨིན་ཅིང་སྤངས་ཟིན་པས་དབང་པོ་མི་འཕོ་བའི་ཕྱིར་དང་། དབང་པོ་འཕོ་བ་ནི་ཉོན་མོངས་པ་སྤོང་བའི་ཆེད་ཡིན་ལ། ཉོན་མོངས་སྤངས་ཟིན་པ་ལ་དབང་པོ་འཕོ་བ་ཅི་ལ་དགོས་པའི་ཕྱིར་རོ། །ལམ་མངོན་དུ་གྱུར་པའི་རྟེན་ཁྱད་པར་ཅན་ཐོབ་པའི་ཕྱིར། ཡང་སློབ་པ་རྒྱུན་ཞུགས་དང་ལན་གཅིག་ཕྱིར་འོང་འདོད་ཆགས་དང་མ་བྲལ་བ་བར་དོར་མྱ་ངན་ལས་མི་འདའ་ཞེ་ན། སློབ་དཔོན་ནི། ཁམས་གོང་མའི་གཉེན་པོ་རྣམས་ལ་མ་འདྲིས་པས་མངོན་སུམ་དུ་མི་འགྱུར་བའི་ཕྱིར་དང་། ཉོན་མོངས་པའི་ཕྲ་རྒྱས་རྣམས་ཆུང་བ་མ་ཡིན་པའི་ཕྱིར་ཞེས་འདེབས་སོ། །བྱེ་བྲག་ཏུ་སྨྲ་བ་ན་རེ། འདོད་པའི་ཁམས་ལས་འདའ་བར་དཀའ་བའི་ཕྱིར་ཏེ་མྱ་ངན་ལས་འདའ་བ་ནི་འདོད་པའི་མི་དགེ་བ་དང་ཁམས་གོང་མའི་སྒྲིབ་ལ་ལུང་མ་བསྟན་གྱི་ཉོན་མོངས་པ་ཐམས་ཅད་སྤོང་བ་དང་། ཁམས་གསུམ་ལས་འདའ་བ་དང་། དགེ་སྦྱོང་གི་ཚུལ་གྱིས་འབྲས་བུ་རྒྱུན་ཞུགས་ཀྱི་(༢༧༦ན)
གསུམ་མམ་ཕྱིར་མི་འོང་གིས་གཉིས་ཐོབ་པ་ལ་སོགས་པའི་བྱ་བ་མང་པོ་ཞིག་བྱ་དགོས་ལ་དེ་དག་དཀའ་བའི་ཕྱིར་བར་མདོ་པས་མི་ནུས་སོ་ཞེས་ཟེར་རོ། །བཞི་པ་བསམ་གཏན་སྤེལ་མ་སྒོམ་པ་ལ། སྤེལ་ཆོས། སྤེལ་སྒོམ་གྲུབ་པའི་ཚད། སྤེལ་སྒོམ་བྱས་པའི་དགོས་པ། གཙང་མ་ལྔར་ངེས་པའི་རྒྱུའོ། །དང་པོ་ནི། དང་པོ་བཞི་པ་སྤེལ་བར་བྱེད། །བསམ་གཏན་སྤེལ་ནས་འོག་མིན་འགྲོ། །ཞེས་བཤད་པ་ལ་དང་པོར་བསམ་གཏན་བཞི་པ་ཟག་བཅས་དང་ཟག་མེད་གཉིས་སྤེལ་བར་བྱེད་དེ། ལམ་སླ་བ་བསམ་གཏན་དངོས་གཞི་རྣམས་ཀྱི་ནང་ནས་སྐྱོན་བརྒྱད་ལས་གྲོལ་བས་མཆོག་ཡིན་པ་དང་། ཏིང་ངེ་འཛིན་དེ་ནི་ཐམས་ཅད་པས་ལས་སུ་རུང་བ་ཡིན་པའི་ཕྱིར་ཏེ། ཐམས་ཅད་པས་ཤིན་ཏུ་སྦྱངས་པའི་བདེ་བ་མཆོག་ཡིན་པའི་ཕྱིར། བསམ་གཏན་སྐྱེ་བའི་རིམ་པ་དང་པོ་ནས་ཡར་སྐྱེ་ལ། སྤེལ་བ་ནི་ཐོག་མར་བཞི་པ་ནས་སྤེལ་ཅིང་། ཕྱིས་གསུམ་པ་དང་། གཉིས་པ་དང་། དང་པོ་ནས་ཀྱང་སྤེལ་ལོ། །འདི་ལྟར་སྤེལ་བར་བྱེད་དེ། དགྲ་བཅོམ་མམ་ཕྱིར་མི་འོང་བའང་རུང་ཟག་མེད་ཀྱི་བསམ་གཏན་བཞི་པ་རྒྱུན་ལྡན་ལ་སྙོམས་པར་འཇུག་ཅིང་དེ་ལས་ལངས་ནས་དེ་ཟག་བཅས་རྒྱུན་ལྡན་ལ་སྙོམས་པར་འཇུག་ལ། ཡང་ཟག་མེད་ལ་སྙོམས་པར་འཇུག་ལ། ཡང་ཟག་མེད་ལ་སྙོམས་པར་འཇུག་སྟེ། དེ་བཞིན་དུ་རྒྱུན་འཕྲི་ནས་སྐད་ཅིག་མ་གཉིས་ཟག་མེད་ལ་སྙོམས་པར་འཇུག་ཅིང་། ཡང་སྐད་ཅིག་ཟག་བཅས་ལ་སྙོམས་པར་འཇུག་སྟེ། (ཞི་རགས་སམ་ཟད་པར་སྔོན་སོང་ལ་སོགས་པའི་ཟག་བཅས་ཞིག་སྟེ། དེ་ལྟར་ན་ཞི་རགས་དངོས་གཞི་ལ་འོང་སྟེ་སྙམ་ན། བསམ་གཏན་དགེ་བ་ཡོང་དགུ་ཡིན། །ཅེས་དེའི་དམིགས་ཡུལ་ཆོས་འདུས་བྱས་མ་བྱས་ཐམས་ཅད་ཡིན་པས་དངོས་གཞི་ལའང་ཡོང་ངོ་། །མཆན།) ཡང་ཟག་མེད་ལ་སྙོམས་པར་འཇུག་གོ་ཞེས་གྲགས་སོ་ཞེས་བྱེ་སྨྲའི་ལུགས་སུ་སྟོན་པའོ། །གཉིས་པ་ནི། (༢༧༦བ)
སྐད་ཅིག་མ་ནི་བསྲེས་པས་གྲུབ། །བྱེ་བྲག་ཏུ་སྨྲ་བ་རྣམས་ན་རེ། ཟག་མེད་སྐད་ཅིག་མའི་རྗེས་སུ་ཟག་བཅས་སྐད་ཅིག་མ་དང་། ཟག་བཅས་ཀྱི་མཇུག་ཐོགས་སུ་ཡང་ཟག་མེད་སྐད་ཅིག་མ་མངོན་དུ་བྱེད་ལ། དེ་ལྟར་སྐད་ཅིག་མ་ལ་ཟག་བཅས་ཟག་མེད་མེ་ཏོག་གི་ཕྲེང་བ་བཞིན་བསྲེས་པས་གྲུབ་པ་ཡིན་ཏེ། ཟག་མེད་དང་ཟག་བཅས་སྐད་ཅིག་མ་གཉིས་ནི་བར་ཆད་མེད་པའི་ལམ་ལྟ་བུ་དང་། གསུམ་པ་ཟག་མེད་ནི་རྣམ་པར་གྲོལ་བའི་ལམ་ལྟ་བུ་ཡིན་ནོ་ཞེས་ཟེར་རོ། །ཟག་མེད་གཉིས་ཀྱི་བར་དུ་ཟག་བཅས་བཞུགས་པ་ནི་མཚོན་པ་ཡིན། ཟག་བཅས་གཉིས་ཀྱི་བར་དུ་ཟག་མེད་གཅིག་བཅུག་པ་ཡང་འོང་ངོ་ཟེར་རོ། །དེ་ལྟར་བསམ་གཏན་བཞི་པ་སྤེལ་ནས་དེའི་སྟོབས་ཀྱི་ཕྱིས་གཞན་གསུམ་པ་དང་གཞན་གཉིས་པ་དག་ཀྱང་སྤེལ་བར་བྱེད་དོ། །དང་པོ་འདོད་ཁམས་སུ་གླིང་གསུམ་དུ་སྤེལ་བར་བྱེད་ལ། ཕྱིས་ཉམས་པས་གཟུགས་ཁམས་སུའང་སྤེལ་ལོ། །སློབ་དཔོན་གྱི་ལུགས་ནི་སངས་རྒྱས་མ་གཏོགས་པ་སྐད་ཅིག་མ་ནི་སྤེལ་བར་མི་ནུས་ཏེ། དེ་ནི་རྒྱུན་ཆགས་གསུམ་ལ་ཇི་སྲིད་འདོད་པ་སྙོམས་པར་འཇུག་པའི་སྒོ་ནས་རྫོགས་པ་ཡིན་ནོ་ཞེས་པ་ལྟའོ། །གསུམ་པ་ནི། སྐྱེ་དང་གནས་པར་བྱ་ཕྱིར་དང་། །ཉོན་མོངས་པས་ནི་འཇིགས་ཕྱིར་ཡང་། །ཡང་ཅིའི་ཆེད་དུ་བསམ་གཏན་སྤེལ་བར་བྱེད་ཅེ་ན། ཕྱིར་མི་འོང་དབང་པོ་རྣོན་པོ་རྣམས་ནི་ཚེ་དེ་ལ་མྱ་ངན་ལས་མི་འདའ་བར་གནས་གཙང་མར་སྐྱེ་བར་བྱ་བའི་ཕྱིར་དང་། མཐོང་ཆོས་ལ་བདེ་བར་གནས་པར་བྱ་བའི་ཕྱིར་དང་། དབང་པོ་རྟུལ་བོ་རྣམས་ནི་ཉོན་མོངས་པས་འཇིགས་པའི་ཕྱིར་ཏེ། རོ་མྱོང་དང་མཚུངས་ལྡན་གྱི་ཏིང་ངེ་འཛིན་ཐག་བསྲིང་བའི་སྒོ་ནས་འབྲས་བུ་ལས་ཡོངས་སུ་མི་ཉམས་པར་བྱ་བའི་ཕྱིར་རོ། །དགྲ་བཅོམ་དབང་རྣོན་སྐྱེ་བ་དང་འཇིགས་པ་སྤོང་བའི་ཆེད་དུ་མ་ཡིན་པར་མཐོང་ཆོས་ལ་བདེར་གནས་ཀྱི་(༢༧༧ན)
ཆེད་དང་། དབང་རྟུལ་ཉོན་མོངས་པས་འཇིགས་པའི་ཆེད་དུ་ཡང་སྟེ་ཡོངས་སུ་མི་ཉམས་པར་བྱ་བའི་ཕྱིར་རོ་སྟེ། བྱེ་སྨྲས་དགྲ་བཅོམ་ཉམས་པའི་ཆོས་ཅན་སྲིད་པའི་དབང་དུ་བྱས་པའོ། །བཞི་པ་ནི། དེ་ནི་རྣམ་པ་ལྔ་ཡི་ཕྱིར། །གནས་གཙང་སྐྱེ་བ་ལྔ་ཁོ་ན། །ཅིའི་ཕྱིར་གནས་གཙང་མར་སྐྱེ་བ་ལྔ་ཁོ་ན་ཡིན་ཅེ་ན། སྤེལ་མ་བསྒོམས་པ་དེ་ནི་ཆུང་ངུ་ཟག་མེད་གཉིས་ཀྱི་བར་དུ་ཟག་བཅས་གཅིག་སྟེ་སེམས་གསུམ་མངོན་དུ་བྱེད་པ་དང་། འབྲིང་དེ་གཉིས་འགྱུར་དུ་བྱས་པའི་དྲུག་དང་། ཆེན་པོ་ལ་ནི་དེ་གསུམ་ལྡབ་ཏུ་བྱས་པའི་དགུ་སྤེལ་དང་། ཤིན་ཏུ་ཆེ་བ་ལ་དེ་གསུམ་ཚན་གཅིག་བསྣན་པའི་བཅུ་གཉིས་དང་། ཆེས་ཤིན་ཏུ་ཆེ་བ་བཅོ་ལྔ་སྤེལ་བ་རྣམ་པ་ལྔའི་ཕྱིར་དེ་དག་གི་འབྲས་བུ་ནི་ཟག་བཅས་ཀྱི་དབང་གིས་མི་ཆེ་བ་ནས་འོག་མིན་གྱི་བར་གནས་གཙང་དུ་སྐྱེ་བ་ལྔ་ཁོ་ན་ཡིན་ནོ། །སྤེལ་སྒོམ་འདི་རྣམས་ལས་གསུམ་དུ་སྤེལ་བའི་དབང་དུ་བྱས་ནའང་སྔར་གསུམ་དུ་སྤེལ། དེ་ནས་འཕྲོ་གཅོད་པ་ཞིག་ཡིན་ནམ་སྙམ་ན། མ་ཡིན་ཏེ། འཕྲོ་མི་གཅོད་པར་སྒོམ། འོ་ན་འཕྲོ་མ་བཅད་པས་གསུམ་དུ་སྤེལ་བ་དེའང་དྲུག་ཏུ་སྤེལ་བར་མི་འགྲོའམ་སྙམ་ན། དེ་འཕྲོ་མི་གཅོད་ཀྱང་དེ་ལྟར་མི་འགྲོ་སྟེ། དང་པོ་གསུམ་དུ་སྤེལ་བ་དེ་ཀ་ལྟར་འཕྲོ་མ་བཅད་ཀྱང་གསུམ་དུ་སྤེལ་བ་རང་གི་རྒྱུན་ཡིན་པས་དེ་ལས་འཕགས་མ་ནུས་པས་དྲུག་ཏུ་སྤེལ་བར་མ་སོང་། དྲུག་ཏུ་སྤེལ་བ་སོགས་ལའང་དེས་འགྲེའོ། །བཙུན་པ་དཔལ་ལེན་ན་རེ། དབང་པོ་ལྔ་ལྷག་པའི་ཕྱིར་ལྔ་ཡིན་ཟེར་རོ། །ལྔ་པ་ལུས་མངོན་བྱེད་ནི། འགོག་པ་ཐོབ་པའི་ཕྱིར་མི་འོང་། །ལུས་ཀྱིས་མངོན་སུམ་བྱེད་པར་འདོད། །འདི་ལ་འགོག་པའི་ཐོབ་པ་ཡོད་པས་ན་འགོག་པ་ཐོབ་པ་སྟེ། དེའང་ལུས་ཀྱིས་མངོན་སུམ་དུ་བྱེད་པར་འདོད་དེ། ཕྱིར་མི་འོང་གང་འགོག་པ་ཐོབ་པ་དེ་ནི་མྱང་འདས་དང་འདྲ་བའི་ཆོས་སེམས་མེད་པའི་ཕྱིར། སེམས་མེད་པས་(༢༧༧བ)
ལུས་འབའ་ཞིག་གིས་མངོན་དུ་བྱེད་པའི་ཕྱིར། སློབ་དཔོན་གྱི་ལུགས་ཀྱིས་ནི། མངོན་དུ་བྱེད་པ་བྱ་བ་སེམས་ཀྱི་མངོན་དུ་བྱེད་པ་ཡིན་ཙམ་ན་སྙོམས་འཇུག་གི་དུས་སེམས་ཀྱི་མངོན་དུ་བྱེད་པ་མེད་ཀྱང་། འགོག་པ་དེ་ལས་ལངས་ནས་དེ་ཐོབ་པའི་དབང་གིས། ཀྱེ་མ་འགོག་སྙོམས་འདི་ནི་མྱ་ངན་ལས་འདས་པ་དང་འདྲ་བར་ཞི་བ་ངོ་མཚར་ཅན་ཅིག་འདུག་གོ་སྙམ་དུ་སེམས་པར་འགྱུར་བ་རྣམ་ཤེས་དང་བཅས་པའི་ལུས་ཞི་བ་སྔོན་མ་ཐོབ་པ་ཐོབ་པར་འགྱུར་ཏེ། དེ་ལྟར་ན་འདིས་དེའི་ཞི་བ་ཉིད་ལུས་ཀྱིས་མངོན་དུ་བྱས་པ་སྟེ། ཏིང་ངེ་འཛིན་གྱི་དུས་ན་དེ་དང་མཐུན་པའི་རྟེན་གྱི་ཐོབ་པ་མངོན་དུ་བྱེད་པའི་ཕྱིར། ལངས་པའི་དུས་ན་ཀྱེ་མ་ཞེས་སྔར་བཤད་པའི་ཚུལ་གྱིས་དེ་སོ་སོ་ཡང་དག་པར་མྱོང་བའི་ཤེས་པས་མངོན་སུམ་དུ་བྱེད་པའི་ཕྱིར་མངོན་སུམ་དུ་བྱེད་པའོ། །མདོ་ལས་མགོན་མེད་ཟས་སྦྱིན་ལ་ཡོན་གནས་རྒྱུན་ཞུགས་ལ་ཞུགས་པ་ནས་གོང་འཕོའི་བར་དུ་སློབ་པ་བཅོ་བརྒྱད་གསུངས་པ་དེ་འདིར་ཅིའི་ཕྱིར་མ་གསུངས་ཤེ་ན། དེར་མ་གསུངས་པ་ནི་སློབ་པ་དང་དེའི་འབྲས་བུར་བཞག་པའི་རྒྱུ་མཚན་ཡོད་པ་མ་ཡིན་ཏེ། དེའི་རྒྱུ་ནི་ཟག་མེད་ཀྱི་བསླབ་གསུམ་དང་། དེའི་འབྲས་བུ་སོ་སོར་བརྟགས་འགོག་དེ་སྒྲུབ་པའམ་བསླབ་པ་གསུམ་ལ་སློབ་པའི་ཁྱད་པར་གྱིས་སློབ་པ་རྣམས་རྣམ་པར་བཞག་པའི་སྐབས་སུ་ལས་འདིར་རྒྱུ་དེ་མེད་པའི་ཕྱིར། འགོག་སྙོམས་ནི་བསླབ་པའང་མ་ཡིན་ཏེ། སྤོང་ལམ་མ་ཡིན་པའི་ཕྱིར། བསླབ་པའི་འབྲས་བུའང་མ་ཡིན་ཏེ། བྲལ་བའི་རང་བཞིན་ཅན་མ་ཡིན་ཅིང་སེམས་མེད་ཟག་བཅས་ཡིན་པའི་ཕྱིར། དེ་ལྟ་བུའི་དབང་དུ་བྱས་ནས་འགོག་སྙོམས་དེ་དང་ལྡན་པས་སློབ་པ་བཅོ་བརྒྱད་པོ་བཞིན་མ་གསུངས་ཀྱི་འདི་སློབ་པ་མ་ཡིན་པ་ནི་མ་ཡིན་ནོ། །བཅོ་བརྒྱད་ལས་(༢༧༨ན)
རྒྱུན་ཞུགས་ལ། ཞུགས་པ། རྒྱུན་ཞུགས། ཕྱིར་འོང་ལ་ཞུགས་པ། ལན་གཅིག་ཕྱིར་འོང་། ཕྱིར་མི་འོང་ལ་ཞུགས་པ། ཕྱིར་མི་འོང་། དགྲ་བཅོམ་ལ་ཞུགས་པ་དང་། དད་པ་དང་ཆོས་ཀྱི་རྗེས་འབྲང་གཉིས། དད་མོས་མཐོང་ཐོབ། རིགས་ནས་རིགས་སྐྱེ། བར་ཆད་གཅིག་པ། བར་མ་དོར་དང་། སྐྱེས་ནས་དང་། འདུ་བྱེད་བཅས། བྱེད་མེད། གོང་འཕོ་སྟེ་བཅོ་བརྒྱད། གོང་འཕོ་ལའང་གཟུགས་སུ་ཉེར་འགྲོ་ལྔ། གཟུགས་མེད་དུ་ཉེར་འགྲོ་བཞི། མཐོང་ཆོས་ལ་མྱང་འདས་ཞེས་སོགས་འདི་ནི་ཕྱིར་མི་འོང་གི་དགེ་བ་ཆེ་ལོང་ཡིན་ནོ། །ཆེ་ལོང་དུ་བསྟན་ནས་ཞིབ་མོར་བརྩི་ཐབས་བསྟན་པའི་སྐབས་ནས་ཞིབ་ཏུ་དབྱེ་བ་ནི། སྤྱིར་གཟུགས་སུ་འགྲོ་བའི་ཕྱིར་མི་འོང་ལྔ་དང་། གཟུགས་མེད་པར་འགྲོ་བ་དང་། མཐོང་ཆོས་ལ་མྱ་ངན་ལས་འདའ་བ་སྟེ། ཕྱིར་མི་འོང་བདུན་ཡིན་ནོ། །ཡང་ན་གཟུགས་སུ་འགྲོ་བ་གཅིག་ཏུ་བགྲང་ན་ཕྱིར་མི་འོང་གསུམ་ཡིན་ནོ། །འདི་ལས་སྟོང་ཕྲག་ཏུ་དབྱེ་བ་ཡོད་དེ། བར་མདོར་མྱ་ངན་ལས་འདའ་བ་ལ། དབང་པོ་རྟུལ་འབྲིང་རྣོན་པོའི་བྱེ་བྲག་གི་གསུམ་དང་། དེ་དག་བསམ་གཏན་བཞིའི་སའི་བྱེ་བྲག་གི་བཞིས་བསྒྱུར་བས་བཅུ་གཉིས་སོ། །དེ་དག་ཉིད་ཡོངས་སུ་ཉམས་པ། འཆི་བར་སེམས་པ། རྗེས་སུ་སྲུང་བ། གནས་པ་ལ་མི་གཡོ་བ། རྟོགས་པའི་སྐལ་བ་ཅན་མི་གཡོ་བའི་ཆོས་ཅན་ལ་སོགས་པའི་རིགས་ཀྱི་བྱེ་བྲག་གི་དྲུག་གིས་བསྒྱུར་བས་དོན་གཉིས་སོ། །ཚངས་རིས་ནས་འོག་མིན་གྱི་བར་གནས་གཞན་གྱི་བྱེ་བྲག་གིས་བཅུ་དྲུག་དང་། (འདི་རྣམ་གྲངས་གཞན་ཡིན་པས་འདིར་མི་བགྲང་)ས་དང་འདོད་ཆགས་དང་བྲལ་བའི་བྱེ་བྲག་གིས་སུམ་ཅུ་རྩ་དྲུག་གིས་བསྒྱུར་བས་ཉིས་སྟོང་ལྔ་བརྒྱ་གོ་གཉིས་ཏེ། བསམ་གཏན་དང་པོ་ལ་འཆིང་བ་ཀུན་ལྡན་ནས་རྣམ་པ་གཅིག་ལ་(༢༧༨བ)
ཆགས་བྲལ་ཏེ་དགུ་དང་བཞི་པའི་བར་དུའང་དེ་དང་འདྲ་བར་སུམ་ཅུ་རྩ་དྲུག་སྟེ་དགུ་ཚན་བཞི་ཡོད་པས་སོ། །གནས་གཞན་དང་རིགས་དང་འདོད་ཆགས་དང་བྲལ་བ་དང་དབང་པོའི་བྱེ་བྲག་གིས་ཉིས་སྟོང་ལྔ་བརྒྱ་དགུ་བཅུ་རྩ་གཉིས་ཏེ། དེའང་ཚངས་རིས་ཀྱི་གནས་ལྟ་བུ་ཞིག་ན་རིགས་ཀྱི་བྱེ་བྲག་གིས་དྲུགདེ་ལའང་འཆིང་བ་ཀུན་ལྡན་ནས་རྣམ་པ་བརྒྱད་ལས་ཆགས་པ་དང་བྲལ་བའི་གང་ཟག་དགུ་དགུ་སྟེ། དགུ་དྲུག་ན་ལྔ་བཅུ་ང་བཞིའོ། །ང་བཞི་པོ་དེ་གནས་གཞན་བཅུ་དྲུག་གིས་བསྒྱུར་བའི་དབང་གིས་ལྔ་བཅུ་རྩ་བཞི་པ་ཕྲག་བཅུ་དྲུག་པོ་དེ་བསྡོམས་ན་བརྒྱད་བརྒྱ་དྲུག་ཅུ་རྩ་བཞིའོ། །ཡང་དེ་དབང་པོ་གསུམ་གྱི་བྱེ་བྲག་གིས་སུམ་འགྱུར་དུ་བྱས་པ་སྟེ་གསུམ་གྱིས་བསྒྱུར་བས་ཉིས་སྟོང་ལྔ་བརྒྱ་དགུ་བཅུ་རྩ་གཉིས་སོ། །བསམ་གཏན་བཞི་ནས་འདྲ་བར་དགུ་དགུར་བརྩི་བའི་ཕྱིར་བསམ་གཏན་འོག་མའི་རྣམ་པ་དགུ་ལས་འདོད་ཆགས་དང་བྲལ་བ་དེ་གོང་མའི་འཆིང་བ་མཐའ་དག་དང་ལྡན་པར་བཤད་པ་ཡིན་ནོ། །དེས་ན་བཞི་པའི་རྣམ་པ་དགུ་ལས་ཆགས་བྲལ་མ་སྨོས་ཏེ། དེ་གཟུགས་མེད་ཀྱི་འཆིང་བ་ཀུན་ལྡན་ཡིན་ལ། འདི་བར་སྲིད་དང་སྦྱར་བས་གཟུགས་སུ་ཉེར་འགྲོའི་སྐབས་ཡིན་པའི་ཕྱིར་བར་མདོར་མྱ་ངན་ལས་འདའ་བ་ཅི་ལྟ་བར་གོང་དུ་འཕོ་བའི་བར་དུའང་དེ་འདྲ་བས་ཉིས་སྟོང་ལྔ་བརྒྱ་དགུ་བཅུ་རྩ་གཉིས་སྔ་འགྱུར་དུ་བྱས་ནས་ཐམས་ཅད་བསྡུས་པས་ཕྱིར་མི་འོང་ལྔ་པོ་དག་ཁྲི་ཉིས་སྟོང་དགུ་བརྒྱ་དང་དྲུག་ཅུ་ཡིན་ནོ། །སྐྱེས། འདུ་བྱེད། འདུ་བྱེད་མེད་པ་སྟེ། བར་དོ་དང་གྲངས་འདྲ་བ་ལ། འཕར་བ། ཕྱེད་འཕར། གནས་ཐམས་ཅད་དུ་འཆི་འཕོ་བ་གསུམ་ཉམས་པ་ཡིན་ཙམ་ན་ཉམས་པ་དེ་དབང་པོ་རྟུལ་པོ་ཡིན་པས་དབང་པོ་འབྲིང་དང་དབང་པོ་རྣོན་པོའི་དབྱེ་བ་མེད་ཙམ་ན། བར། སྐྱེ། བྱེད། མི་བྱེད་བཞི་དང་ཆོས་འདྲ་ཡེ་སྙམ་ན། འདོད་(༢༧༩ན)
པར་བསམ་གཏན་བཞི་པ་སྤེལ། དེ་ནས་བསམ་གཏན་དང་པོའི་རོ་མྱངས་པས་ཉམས་ནས་ཚངས་རིས་སུ་སྐྱེས་པའི་བར་དེར་དབང་པོ་སྦྱངས་ནས་འབྲིང་དང་རྣོན་པོར་འགྱུར་བས་དབང་པོའི་དབང་གིས་དབྱེ་བ་ཡོད་པས་བར་དོ་སོགས་དང་དབྱེ་བའི་གྲངས་འདྲའོ། །གཟུགས་མེད་པར་འགྲོ་བའི་སྐྱེ་བ་སོགས་བཞི་ལའང་ལམ་འདིས་ཤེས་ནུས་པས་མ་བྲིས་སོ། །སྨྲས་པ། ཕྲ་མོར་དཔྱོད་པའི་ངལ་བ་རྒྱས་པ་འདི། །ལེ་ལོ་ཅན་འགའི་བློ་ལ་དུབ་མོད་ཀྱང་། །དེ་ལ་སྤྲོ་བའི་སྟོབས་དང་ལྡན་རྣམས་ལ། །ཚ་གདུངས་ཅན་ལ་ག་བུར་གདུགས་དཀར་རོ། །བཞི་པ་དགྲ་བཅོམ་ཞུགས་གནས་ལ། ཞུགས་པ་དང་། འབྲས་གནས་དང་། འབྲས་གནས་ཀྱི་དབྱེ་བའོ། །དང་པོ་ནི། སྲིད་རྩེའི་བར་ཆ་བརྒྱད་ཟད་པ། །དགྲ་བཅོམ་ཉིད་ལ་ཞུགས་པ་ཡིན། །དགུ་པའི་བར་ཆད་མེད་ལམ་ཡང་། །དེ་ནི་རྡོ་རྗེ་ལྟ་བུ་ཡིན། ཕྱིར་མི་འོང་དེ་བསམ་གཏན་དང་པོའི་རྣམ་པ་གཅིག་སྟེ་ཆགས་བྲལ་ནས་བཟུང་སྟེ་སྲིད་རྩེའི་ཉེས་པའི་ཆ་བརྒྱད་ཀྱི་བར་ཟད་ཅིང་སྤངས་པས་དགྲ་བཅོམ་ཉིད་ལ་ཞུགས་པ་ཡིན་ནོ། །སྲིད་རྩེའི་རྣམ་པ་དགུ་པ་སྤོང་བྱེད་བར་ཆད་མེད་ལམ་ལ་གནས་ན་ཡང་དགྲ་བཅོམ་ཉིད་ལ་ཞུགས་པ་ཡིན་ནོ། །བར་ཆད་མེད་ལམ་དེ་ནི་ཆོས་ཅན། རྡོ་རྗེ་ལྟ་བུའི་ཏིང་ངེ་འཛིན་ཅེས་བྱ་བ་ཡིན་ཏེ། ཏིང་ངེ་འཛིན་འདིས་མཐུའི་སྒོ་ནས་ཕྲ་རྒྱས་ཐམས་ཅད་འཇོམས་པའི་ཕྱིར། དཔེར་ན། རྡོ་རྗེས་ཐམས་ཅད་འཇོམས་པ་བཞིན་ནོ། །འདི་ཕྲ་རྒྱས་ཐམས་ཅད་འཇོམས་པ་ནི་མ་ཡིན་ཏེ། ཁམས་གསུམ་པའི་མཐོང་སྤོང་དང་སྒོམ་སྤོང་། འདོད་པ་ནས་སྲིད་རྩེའི་རྣམ་པ་བརྒྱད་ཀྱི་བར་བཅོམ་ཟིན་པའི་ཕྱིར། ཐམས་ཅད་མི་འཇོམས་ན་ཕྲ་རྒྱས་ཐམས་ཅད་འཇོམས་པ་དང་འགལ་ཅེ་ན། དེ་ནི་ཐམས་ཅད་འཇོམས་པར་ནུས་པ་སྲིད་པའི་དབང་དུ་བྱས་པ་ཡིན་ཏེ། བར་ཆད་མེད་ལམ་ཐམས་ཅད་ཀྱི་ནང་ནས་ཤིན་ཏུ་མཐུ་ཆེ་བ་ཡིན་པའི་ཕྱིར། རྡོ་རྗེ་ལྟ་བུ་དེ་ནི་ཉན་ཐོས་ཀྱི་དབང་དུ་བྱས་ན་རྟེན་ནི་རྩ་(༢༧༩བ)
དགུ་ཡིན་ཏེ། གླིང་གསུམ། འདོད་ལྷ་དྲུག །གཟུགས་ཀྱི་ལྷ་ཚངས་ཆེན་པོར་བའི་བཅུ་དྲུག །གཟུགས་མེད་བཞི་སྟེ་རྩ་དགུའོ། །ས་ནི་བསམ་གཏན་ས་དྲུག །གཟུགས་མེད་གསུམ་སྟེ་དགུའོ། །ཐེག་པ་ཆེན་པོའི་རྟེན་གྱི་དབང་དུ་བྱས་ན། འཛམ་གླིང་གི་རྟེན་ཅན་ཁོ་ནའོ། །ས་ནི་བསམ་གཏན་བཞི་པ་ཁོ་ནའོ། །རང་རྒྱལ་གྱི་བརྟེན་གྱི་དབང་དུ་བྱས་ན་གླིང་གསུམ་པ་དང་བསམ་གཏན་བཞི་པ་ཁོ་ནའོ། །རྡོ་རྗེ་ལྟ་བུ་དེ་འདོད་པར་བསྐྱེད་ན་འདིར་མྱ་ངན་ལས་འདའ་བའོ། །གཟུགས་སུ་བསྐྱེད་ན་གཟུགས་སུ་འགྲོ་བའོ། །གཟུགས་མེད་དུ་བསྐྱེད་ན་གཟུགས་མེད་དུ་འགྲོ་བའོ། །རྡོ་རྗེ་ལྟ་བུའི་ཏིང་ངེ་འཛིན་གྱི་རྣམ་པའི་བྱེ་བྲག་ནི་མང་པོ་ཞིག་ཏུ་བརྗོད་དེ། དེ་ཡང་ཡང་ན་རྣམ་པ་དྲུག་སྟེ། བདེན་བཞིའི་རྗེས་སུ་ཤེས་པའི་རྣམ་པ་བཞི་དམིགས་པ་བཟང་བས་འགོག་པ་དང་ལམ་གྱི་ཆོས་ཤེས་ཀྱི་རྣམ་པ་གཉིས་ཏེ་དྲུག་གོ། །དེའང་དགྲ་བཅོམ་ཉིད་ནི་ས་དགུ་ལ་བརྟེན་ནས་ཐོབ་ཏུ་རུང་བས། མི་ལྕོགས་མེད་པས་བསྡུས་པ་སྲིད་རྩེའི་བར་སྡུག་ཀུན་ལ་དམིགས་པའི་སྡུག་ཀུན་རྗེས་ཤེས་ཀྱི་རྣམ་པ་བཞི་བཞི་དང་མཚུངས་ལྡན་བཞི་གཉིས་བརྒྱད་དང་། འགོག་ལམ་ལ་ཆོས་ཤེས་པའི་རྣམ་པ་བཞི་བཞི་དང་མཚུངས་ལྡན་བཞི་གཉིས་བརྒྱད་དེ་བཅུ་དྲུག་དང་། འགོག་པ་ལ་རྗེས་སུ་ཤེས་པའི་རྣམ་པ་དག་མཚུངས་པར་ལྡན་པ་བསམ་གཏན་དང་པོའི་འགོག་པ་ལ་དམིགས་པ་བཞི་ནས་དེ་བཞིན་དུ་བསམ་གཏན་གཉིས་པ་གསུམ་པ་དང་། བཞི་པ་དང་། ནམ་མཁའ། རྣམ་ཤེས། ཅིའང་། སྲིད་རྩེའི་འགོག་པ་ལ་དམིགས་པའི་བར་བཞི་རེ་སྟེ། སོ་གཉིས་པོ་སྔ་མའི་བཅུ་དྲུག་དང་དྲིལ་བས་ཞེ་བརྒྱད། ལམ་ལ་རྗེས་སུ་ཤེས་པའི་རྣམ་པ་དང་མཚུངས་ལྡན་གྱི་བཞི་སྟེ་ང་གཉིས་ཏེ། རྗེས་ཤེས་ཕྱོགས་དང་མཐུན་པར་ཟད་པ་དམིགས་པའི་ཕྱིར་རོ། །སྒོམ་ལམ་(༢༨༠ན)
རྡོར་ཏིང་གི་དུས་སུ་ས་བརྒྱད་པ་དེའི་འགོག་པ་བཞི་སོགས་རེ་རེ་ལ་རེ་རེ་ནས་འཇལ་བ་ཡིན་ལ། ལམ་ཡང་སའི་བྱེ་བྲག་གི་སྒོ་ནས་བཞི་བཞིར་མི་བཞག་པ་ཅིས་སྙམ་ན། རྗེས་སུ་ཤེས་པའི་ཕྱོགས་དང་མཐུན་པའི་ལམ་ནི་གཉེན་པོར་ཁྱད་པར་མེད་དེ། ལམ་ནི་ཕན་ཚུན་རྒྱུ་ཡིན་པས་ཟེར་ལ། འགོག་པ་ཕན་ཚུན་རྒྱུ་མ་ཡིན་པའི་ཕྱིར། སྒོམ་པའི་ལམ་ལ་འགོག་པ་ཡི། ལམ་ལ་ཆོས་ཤེས་གང་ཡིན་དེ། །ཁམས་གསུམ་གྱི་ནི་གཉེན་པོ་ཡིན། །ཅེས་འབྱུང་བས་འདིར་དེ་གཉིས་ཁོ་ན་ཉེ་བར་འགོད་ཀྱི་སྡུག་བསྔལ་དང་ཀུན་འབྱུང་ལ་ཆོས་ཤེས་མི་བཟུང་ངོ་། །དེ་དག་ནི་རྡོ་རྗེ་ལྟ་བུ་ལྔ་བཅུ་རྩ་གཉིས་ཡིན་ཏེ། ཤིས་པའི་རྣམ་པ་དང་དམིགས་པའི་བྱེ་བྲག་གིས་ཐ་དད་པའི་ཕྱིར། ས་མི་ལྕོགས་མེད་པས་བསྡུས་པ་ཇི་ལྟ་བར་བསམ་གཏན་བཞི་པས་བསྡུས་པའི་བར་དག་ཀྱང་དེ་དང་འདྲ་སྟེ་བསམ་གཏན་ས་དྲུག་ལ་ལྔ་བཅུ་རྩ་གཉིས་ཡིན་ནོ། །ནམ་མཁའ་དང་། རྣམ་ཤེས་དང་། ཅིའང་མེད་པའི་སྐྱེ་མཆེད་ཀྱིས་བསྡུས་པའི་རྡོ་རྗེ་ལྟ་བུའི་ཏིང་ངེ་འཛིན་རྣམས་ནི་རིམ་པ་བཞིན་ཉི་ཤུ་རྩ་བརྒྱད་དང་། ཉི་ཤུ་རྩ་བཞི་དང་། ཉི་ཤུ་ཡིན་ཏེ། ཆོས་ཤེས་ནི་ས་དྲུག་པ་ཡིན་པས་དེ་དག་ན་ཆོས་ཤེས་མེད་པའི་ཕྱིར་འགོག་ལམ་ལ་ཆོས་ཤེས་ཀྱི་རྣམ་པ་དང་མཚུངས་ལྡན་བརྒྱད་མེད་ལ། རྗེས་སུ་ཤེས་པས་ས་འོག་མའི་འགོག་པ་ལ་དམིགས་པ་མེད་པས་འགོག་པ་ལ་རྗེས་ཤེས་ཀྱི་རྣམ་པ་དང་མཚུངས་ལྡན་བསམ་གཏན་བཞིའི་འགོག་པ་ལ་དམིགས་པ་བཅུ་དྲུག་མེད་པས་ཉེར་བརྒྱད་དུ་འགྱུར་ཏེ། ལྔ་བཅུ་རྩ་གཉིས་ལ་དེ་ལྟར་བརྒྱ་དང་བཅུ་དྲུག་བོར་བའི་ཕྱིར། དེའང་གཟུགས་མེད་འདོད་ཁམས་དང་རིས་བཞིས་རིགས་ཙམ་ན་འདོད་པའི་འགོག་ལམ་གྱི་ཆོས་ཤེས་ཀྱི་རྣམ་པ་བརྒྱད་འབྲིད། ནམ་མཁས་བསམ་གཏན་བཞིའི་དགག་བྱ་དེ་མ་བཟུང་(༢༨༠བ)
བས་བསམ་གཏན་བཞིའི་འགོག་པ་མི་འཛིན་པས་དེ་ལ་དམིགས་པའི་རྗེས་ཤེས་བཅུ་དྲུག་པོ་འབྲིད་དོ། །དེའང་ཉེར་བརྒྱད་དུ་ཇི་ལྟར་འགྱུར་ན། ནམ་མཁའ་མཐའ་ཡས་ཀྱི་སྐྱེ་མཆེད་ཀྱིས་བསྡུས་པ་སྲིད་རྩེའི་སྡུག་ཀུན་ལ་རྗེས་ཤེས་ཀྱི་རྣམ་པ་མཚུངས་ལྡན་བརྒྱད་དང་། འགོག་པ་ལ་རྗེས་ཤེས་ཀྱི་རྣམ་པ་དང་མཚུངས་ལྡན་ནམ་མཁའ་མཐའ་ཡས་ཀྱི་སྐྱེ་མཆེད་ལ་སོགས་པའི་འགོག་པ་ལ་དམིགས་པ་བཅུ་དྲུག་དང་། ལམ་ལ་རྗེས་ཤེས་ཀྱི་རྣམ་པ་མཚུངས་ལྡན་བཞི་སྟེ། རྗེས་ཤེས་ཕྱོགས་མཐུན་ཟད་པ་ལ་དམིགས་པའི་ཕྱིར། ཤེས་པའི་རྣམ་པ་དང་དམིགས་པའི་བྱེ་བྲག་གི་ཉེར་བརྒྱད་དོ། །དེ་བཞིན་དུ་རྣམ་ཤེས་མཐའ་ཡས་སྐྱེ་མཆེད་ཀྱིས་བསྡུས་པ་ནི་ནམ་མཁའི་འགོག་པ་ལ་དམིགས་པའི་བཞི་བོར་ནས་ཉེར་བཞི། ཅི་ཡང་གིས་བསྡུས་པ་ནི་རྣམ་ཤེས་ཀྱི་འགོག་པ་ལ་དམིགས་པ་གཞན་བཞི་བོར་བས་ཉི་ཤུའོ། །གཟུགས་མེད་རྣམས་རང་ས་དང་གོང་སའི་འགོག་པ་ལ་དམིགས་ཀྱི། བསམ་གཏན་བཞིན་འོག་ས་ལ་མ་ཡིན་ཏེ། འོག་སའི་སྡུག་བསྔལ་ལ་མ་དམིགས་པར་དེའི་འགོག་པ་ལ་དམིགས་པར་མི་ནུས་སོ། །སྡུག་བསྔལ་ཟག་བཅས་ཡིན་པས། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཅེས་སོ། །བསམ་གཏན་ནི་ཀུན་ཏུ་བལྟ་བའི་ཕྱིར་མི་དགག་སྟེ། བསམ་གཏན་དགེ་ཡུལ་ཡོད་དགུ་ཡིན། །ཅེས་འཆད་པར་འགྱུར་རོ། །འགོག་པ་ཁོ་ན་ལ་དམིགས་ཀྱི་སྡུག་ཀུན་ལ་དམིགས་པ་ནི་སྲིད་རྩེ་མན་ཆད་ཀྱི་ས་ལས་འདོད་ཆགས་དང་བྲལ་བའི་ཕྱིར། དེ་ལ་ནི་རྡོ་རྗེ་ལྟ་བུའི་སྲིད་རྩེའི་རྣམ་པ་དགུ་ཁོ་ནར་གཞོམ་བྱར་ལུས་སོ། །ས་འོག་མའི་གཉེན་པོ་ལ་དམིགས་པའི་རྡོ་རྗེ་ལྟ་བུའི་ཏིང་ངེ་འཛིན་ཡོད་དེ། ལམ་ལ་རྗེས་སུ་ཤེས་པ་དེ་ནི་རྗེས་སུ་(༢༨༡ན)
ཤེས་པའི་ཕྱོགས་དང་མཐུན་པའི་དམིགས་པ་ཡིན་པའི་ཕྱིར་ཏེ། མཉམ་དང་ཁྱད་པར་ཅན་གྱི་ཕན་ཚུན་རྒྱུ་ཡིན་པའི་ཕྱིར། ས་དགུའི་ལམ་ནི་ཕན་ཚུན་དུ། །ཉམས་དང་ཁྱད་པར་ཅན་དག་གི། །ཞེས་འབྱུང་བའི་ཕྱིར། ཆོས་མངོན་པ་བ་གང་དག་ལམ་ལ་རྗེས་སུ་ཤེས་པ་ཡང་ས་རེ་རེའི་གཉེན་པོ་ལ་དམིགས་པ་ཡིན་པར་འདོད་པ་དེ་དག་གི་ལྟར་ན། ཉི་ཤུ་རྩ་བརྒྱད་ལྷག་པར་བསྣན་ནས་མི་ལྕོགས་མེད་པས་བསྡུས་པའི་རྡོ་རྗེ་ལྟ་བུ་ནི་བརྒྱད་ཅུ་ཡིན་ཏེ། དེའང་ཁ་ཅིག་གིས་གཞུང་ལུགས་ཀྱི་ས་རེ་རེའི་གཉེན་པོ་ལ་དམིགས་པ་ཡིན་པར་འཇོག་སྟེ། མི་ལྕོགས་མེད་པས་བསྡུས་པ་བསམ་གཏན་དང་པོའི་གཉེན་པོ་ལ་དམིགས་པ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བཞི་ནས་དེ་བཞིན་དུ་ཅིའང་མེད་པའི་སྐྱེ་མཆེད་ཀྱི་གཉེན་པོ་ལ་དམིགས་པའི་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པའི་བར་དུ་བཞི་སྟེ། དེ་ལྟར་ན་ཉེར་བརྒྱད་ལྷག་པས་ང་གཉིས་ལ་ཉེར་བརྒྱད་བསྣན་པས་བརྒྱད་ཅུར་འགྱུར་རོ། །ཅིའི་ཕྱིར་སྲིད་རྩེའི་གཉེན་པོ་ལ་དམིགས་པ་ལམ་ལ་རྗེས་སུ་ཤེས་པའི་རྣམ་པ་དག་དང་ལྡན་པ་བཞི་མི་བགྲང་ཞེ་ན། ཟག་མེད་ཀྱི་ལམ་སྲིད་རྩེས་བསྡུས་པ་སྲིད་རྩེའི་གཉེན་པོ་ནི་མེད་ཀྱི། བསམ་གཏན་དང་པོའི་ས་ནས་ཅི་ཡང་མེད་པའི་སའི་བར་ནི་ཡོད་དེ། དེ་ལྟ་བས་ན་དེ་དག་གི་གཉེན་པོ་ལ་དམིགས་པ་ཁོ་ནར་བཤད་ཀྱི། སྲིད་རྩེའི་གཉེན་པོ་ལ་དམིགས་པ་མ་ཡིན་ནོ། །གཞན་དག་འཆད་པ་ནི་འགོག་པ་ལ་རྗེས་སུ་ཤེས་པ་ཇི་ལྟ་བ་བཞིན་དུ་འདོད་པ་ཞེས་བྱ་བར་བསམས་པ་ཡིན་ཏེ། སྲིད་རྩེའི་སྡུག་ཀུན་ལ་རྗེས་སུ་ཤེས་པའི་རྣམ་པ་དག་དང་མཚུངས་པར་ལྡན་པ་བརྒྱད། འགོག་ལམ་ལ་ཆོས་ཤེས་པའི་རྣམ་པ་དག་(༢༨༡བ)
དང་མཚུངས་ལྡན་བརྒྱད། འགོག་པ་ལ་རྗེས་ཤེས་ཀྱི་རྣམ་པ་བསམ་གཏན་དང་པོའི་འགོག་པ་ལ་དམིགས་པ་བཞི་ནས་སྲིད་རྩེའི་འགོག་པ་ལ་དམིགས་པའི་བར་དུ་བཞི་བཞི་སྟེ་སོ་གཉིས། དེ་བཞིན་དུ་ལམ་ལ་རྗེས་སུ་ཤེས་པའི་རྣམ་པ་དག་དང་མཚུངས་ལྡན་ཀྱང་དེ་དང་འདྲ་བས་སུམ་ཅུ་རྩ་གཉིས་ཡིན་པས་མི་ལྕོགས་མེད་པས་བསྡུས་པའི་རྡོ་རྗེ་ལྟ་བུ་ནི་བརྒྱད་ཅུ་ཡིན་ནོ། །དེ་དག་གི་ལྟར་ན་རྗེས་སུ་ཤེས་པའི་ཕྱོགས་དང་མཐུན་པ་ཟད་པར་ལ་དམིགས་པའི་ཕྱིར་ལམ་ལ་རྗེས་སུ་ཤེས་པའི་རྣམ་པ་དང་མཚུངས་ལྡན་སྤྱིའི་བཞི་པོ་གང་ཡིན་པ་དེ་དག་ནི་མེད་ཀྱི། དེའི་དོད་དམ་གོར་སྲིད་རྩེའི་གཉེན་པོ་ལ་དམིགས་པ་དག་ཡོད་པས་རྡོ་རྗེ་ལྟ་བུ་བརྒྱད་ཅུའོ། །འོ་ན་སྲིད་རྩེའི་སས་བསྡུས་ཀྱི་སྲིད་རྩེའི་གཉེན་པོ་མེད་པས་ཇི་ལྟར་བཞག་སྙམ་ན། སྲིད་རྩེའི་སས་བསྡུས་པའི་སྲིད་རྩེའི་གཉེན་པོ་མེད་ཀྱང་སྲིད་རྩེའི་ཉོན་མོངས་དགག་བྱར་བྱས་པའི་སྲིད་རྩེའི་གཉེན་པོ་ཡོད་པས་དེ་ལྟར་བཞག་གོ་ཞེས་ཟེར་རོ། །བསམ་གཏན་བཞི་པས་བསྡུས་པའི་བར་དུ་དེ་དང་འདྲ་བ་ནི་བསམ་གཏན་ཁྱད་པར་ཅན་ནས་བཞི་པའི་བར་དུ་བརྒྱད་ཅུ་བརྒྱད་ཅུའོ། །སྲིད་རྩེ་མ་གཏོགས་པ་ནམ་མཁའ་མཐའ་ཡས་སོགས་གསུམ་ནི། བཞི་བཅུ་དང་། སུམ་ཅུ་རྩ་གཉིས་དང་། ཉེར་བཞི་ཡིན་ཏེ། ནམ་མཁའི་རྡོ་རྗེ་ལྟ་བུའི་ཉེར་བརྒྱད་ལ། ནམ་མཁའ། རྣམ་ཤེས། ཅི་ཡང་གི་གཉེན་པོ་ལ་དམིགས་པའི་ལམ་ལ་རྗེས་ཤེས་ཀྱི་རྣམ་པ་དང་མཚུངས་ལྡན་བཞི་ཚན་གསུམ་སྟེ། བཅུ་གཉིས་བསྣན་ནས་བཞི་བཅུ་ཉེར་བཞི་ལ་རྣམ་ཤེས་དང་། ཅི་ཡང་གི་གཉེན་པོ་ལ་དམིགས་པ་བརྒྱད་བསྣན་པས་སུམ་ཅུ་རྩ་གཉིས། ཉི་ཤུ་ལ་ཅི་ཡང་གཉེན་པོ་ལ་དམིགས་པ་བཞི་(༢༨༢ན)
བསྣན་པས་ཉི་ཤུ་རྩ་བཞིར་འགྱུར་རོ། །གཟུགས་མེད་རང་དང་གོང་སའི་གཉེན་པོ་ཁོ་ན་ལ་དམིགས་པར་བཤད་ཀྱི། འོག་མའི་གཉེན་པོ་ལ་དམིགས་པ་མ་ཡིན་ཅེ་ན། རྣམ་པ་ཐམས་ཅད་དུ་གཟུགས་ཀྱི་འདུ་ཤེས་སོགས་ལས་ཡང་དག་པར་འདའ་བར་གསུངས་པའི་ཕྱིར། ས་འོག་མའི་གཉེན་པོའི་སྒོ་ནས་ནི་དེའི་མི་མཐུན་ཕྱོགས་ལ་དམིགས་པའི་ཕྱིར། འོ་ན་འོག་མའི་གཉེན་པོ་ལ་དམིགས་པ་ནི་ཡོད་དེ། དེ་ནི་ཕན་ཚུན་རྒྱུ་ཡིན་པའི་ཕྱིར་ཞེས་བཤད་པ་ཇི་ལྟར་ཞེ་ན། དེ་ནི་ཁྱད་པར་དུ་མ་བྱས་པར་རྗེས་ཤེས་ཕྱོགས་མཐུན་གྱི་ལམ་ས་དགུ་པ་ནི་ས་འོག་མའི་གཉེན་པོ་ལ་དམིགས་པ་ཡིན་ནོ་ཞེས་བཤད་ཀྱི། ནམ་མཁའ་ལ་སོགས་པས་བསྡུས་པ་ས་འོག་མའི་གཉེན་པོ་ལ་དམིགས་ཞེས་ཁྱད་པར་དུ་བྱས་ནས་མ་བསྟན་པས་འོག་མའི་གཉེན་པོ་ལ་དམིགས་པ་མ་ཡིན་གྱི། རང་ས་དང་གོང་སའི་གཉེན་པོ་ལ་དམིགས་པའོ། །ཡང་སྲིད་རྩེའི་སྡུག་བསྔལ་ལ་དམིགས་པའི་མི་རྟག་པའི་རྣམ་པ་དང་མཚུངས་ལྡན་གྱི་རྡོ་རྗེ་ལྟ་བུའི་རིགས་ཀྱི་བྱེ་བྲག་གིས་དྲུག་དང་། སྡུག་བསྔལ་ལ་སོགས་པའི་རྣམ་པ་དང་མཚུངས་ལྡན་ལའང་རིགས་ཀྱི་རྣམ་པ་དྲུག་དང་། དབང་པོ་བྱེ་བྲག་གིས་གསུམ་ཡིན་པས་ཆེས་མང་བ་ཡིན་ནོ། །ཕྱོགས་དང་པོ་ལ་སྤྱིར་བསྡུ་ན་རྡོ་རྗེ་ལྟ་བུ་སུམ་བརྒྱ་དང་བརྒྱད་ཅུ་རྩ་བཞི། དེ་རིགས་དང་དབང་པོའི་བྱེ་བྲག་གིས་བསྒྱུར་ན་དྲུག་སྟོང་དགུ་བརྒྱ་བཅུ་གཉིས་སུ་འགྱུར་རོ། །ཕྱོགས་གཉིས་པ་མངོན་པ་བདག་གི་ལུགས་དེ་བསྡོམས་ན་ལྔ་བརྒྱ་བདུན་ཅུ་རྩ་དྲུགརིགས་དང་དབང་པོའི་བྱེ་བྲག་གིས་རྡོ་རྗེ་ལྟ་བུ་ཁྲི་སུམ་བརྒྱ་དྲུག་ཅུ་རྩ་བརྒྱད་དུ་འགྱུར་རོ། །གཉིས་པ་ལ། དངོས་དང་། ཞར་ལས་བྱུང་བའོ། །དང་པོ་ནི། དེ་ཟད་ཐོབ་དང་ཟད་པ་ཤེས། །དེ་ཚེ་དེ་མི་སློབ་དགྲ་བཅོམ། །སྲིད་རྩེའི་རྣམ་པ་དགུ་པ་དེ་རྡོ་རྗེ་ལྟ་བུས་སྤངས་ནས་ཟད་པའི་བྲལ་ཐོབ་དང་(༢༨༢བ)
ལྷན་ཅིག་ཏུ་ཟད་པ་ཤེས་པ་སྐྱེ་སྟེ། རྡོ་རྗེ་ལྟ་བུའི་ཏིང་ངེ་འཛིན་གྱི་མཇུག་ཐོགས་སུ་རྣམ་གྲོལ་གྱི་ལམ་ཐ་མ་སྐྱེ་བའི་ཕྱིར། ཟད་པ་ཤེས་པ་ཞེས་བྱ་སྟེ། མི་སྐྱེ་བ་ཤེས་པའི་དང་པོ་ཉིད་དུ་ཟག་པ་ཐམས་ཅད་ཟད་པའི་ཐོབ་པ་དང་ལྷན་ཅིག་ཏུ་སྐྱེས་པའི་ཕྱིར། དགྲ་བཅོམ་ལ་ཞུགས་པ་དེ་ཟད་པ་སྐྱེས་པ་དེའི་ཚེ་མི་སློབ་པ་དང་དགྲ་བཅོམ་པ་ཉིད་ཀྱི་འབྲས་བུ་ཐོབ་པ་ཡིན་ཏེ། འབྲས་བུ་གཞན་གྱི་ཆེད་དུ་བསླབ་པར་བྱ་བ་མེད་པའི་ཕྱིར། རང་གི་ཉོན་མོངས་ཐམས་ཅད་དང་བྲལ་བས་རང་དོན་ཡོངས་སུ་རྫོགས་ནས་གཞན་དོན་བྱེད་པར་གཤའ་བས། སོ་སྐྱེ་དང་སློབ་པ་ཆགས་བཅས་ཐམས་ཅད་ཀྱིས་མཆོད་པར་འོས་པའི་ཕྱིར། དགྲ་བཅོམ་པ་ཡིན་ནོ། །འདི་ལས་གཞན་པའི་སྔར་བཤད་ཀྱི་འཕགས་པ་ནི་སློབ་པར་གྲུབ་བོ། །རྒྱུ་མཚན་ཅིས་གང་ཟག་གི་བདུན་པོ་སློབ་པ་ཡིན་ཅེ་ན། ཟག་པ་ཟད་པའི་ཆེད་དུ་ལྷག་པའི་ཚུལ་ཁྲིམས་དང་། ལྷག་པའི་སེམས། ལྷག་པའི་ཤེས་རབ་ལ་རྟག་ཏུ་སློབ་པའི་ངང་ཚུལ་ཅན་ཡིན་པ་དེ་ནི་སློབ་པའོ། །བསླབ་པ་གསུམ་པོ་དེ་དག་གི་རང་བཞིན་ནི་གསུམ་པོ་དེ་ཉིད་ཀྱི་རང་བཞིན་ཡིན་ཏེ། བསླབ་གསུམ་ལས་ཐ་མི་དད་པའི་ཕྱིར། འོ་ན་སོ་སོའི་སྐྱེ་བོ་ཡང་ཇི་སྐད་དུ་བཤད་པ་ལ་སློབ་པས་སློབ་པར་འགྱུར་རོ་ཞེ་ན། མ་ཡིན་ཏེ། མདོ་ལས། དགེ་སློང་དག་འཕགས་པའི་ཤེས་རབ་ཀྱིས་མཐོང་བ་གང་ཡིན་པ་དེ་ནི་སློབ་པའོ། །ཞེས་འབྱུང་བས། སྡུག་བདེན་སོགས་ཇི་ལྟ་བར་ཁོང་དུ་མ་ཆུད་པའི་ཕྱིར་དང་། སོ་ཐར་གྱི་སྡོམ་པ་ཡོངས་སུ་གཏོང་བ་དང་དྲོ་བར་གྱུར་པ་ལ་སོགས་པ་ཡོངས་སུ་ཉམས་པའི་སྒོ་ནས་ཚུལ་ཁྲིམས་ལ་སོགས་པ་གང་ལ་བསླབ་པ་དེ་ལ་སློབ་པ་གཏོང་བའི་ཕྱིར། འཕགས་པ་ནི་ཅུང་ཟད་གཏོང་དུ་ཟིན་ཀྱང་ཐམས་ཅད་མ་ཡིན་པས་ནམ་ཡང་བསླབ་པ་གསུམ་ཆར་མེད་པ་མ་ཡིན་པས་རྟག་ཏུ་སློབ་པའི་ངང་ཚུལ་ཡོད་པས་སློབ་པ་(༢༨༣ན)
ཡིན་གྱི། སོ་སོའི་སྐྱེ་བོ་ལ་རྟག་ཏུ་སློབ་པའི་ངང་ཚུལ་མེད་པས་སློབ་པ་མ་ཡིན་པའི་ཕྱིར། དེ་ཉིད་ཀྱི་དམིགས་ཀྱིས་བསལ་བ་ཤེས་པར་བྱ་བའི་ཆེད་དུ། མདོ་ལས་ཞི་བྱེད་བསླབ་པ་ལ་སློབ་ཅིང་། བསླབ་པ་ལ་སློབ་པ་ནས་དེའི་ཕྱིར། སློབ་པ་ཞེས་ལན་གཉིས་སུ་གསུངས་པས་ཞི་བྱེད་ཅེས་ཞུ་བ་པོ་ལ་བོས་ནས། འཕགས་པ་ནི་བསླབ་པ་མི་འདོར་བས་ལན་གཉིས་སུ་སྨོས་པ་ཡིན། སོ་སྐྱེ་ནི་དེ་ལྟར་མ་ཡིན་པས་མ་སྨོས་པ་ཡིན། འཕགས་པ་བསོད་སྙོམས་ལ་སོགས་པར་རྒྱུ་བ་ན། རྟག་ཏུ་སློབ་པའི་ངང་ཚུལ་ཅན་ཇི་ལྟར་ཡིན་ཏེ། སེམས་མཉམ་པར་མ་བཞག་པའི་གནས་སྐབས་ཡིན་པའི་ཕྱིར་ཞེ་ན། དེ་སློབ་པ་ཡིན་ཏེ། འདུན་པའི་སྒོ་ནས་དེར་བཞག་པའི་ཕྱིར། ལམ་དུ་འགྲོ་བ་འདུག་ཀྱང་འགྲོ་བའི་བསམ་པ་མ་བོར་བས་ལམ་དུ་འགྲོ་བ་ཡིན་པ་བཞིན་ནོ། །འཕགས་པ་ནི་རང་བཞིན་ལ་གནས་ཀྱང་སློབ་པའི་ངང་ཚུལ་ཅན་ཡིན་ཏེ། བསླབ་པ་གསུམ་གྱིས་ཐོབ་པ་དང་རྗེས་སུ་འབྲེལ་བའི་ཕྱིར། སློབ་མི་སློབ་ཀྱི་ཞར་ལ་དེའི་ཆོས་གང་ཞེ་ན། སློབ་པའི་ཆོས་ཟག་པ་མེད་པ་རྣམས་ཏེ། དགེ་བ་ཟག་བཅས་འདུ་བྱེད་མ་སྒྲིབ་ལུང་མ་བསྟན་ཉོན་མོངས་མ་གཏོགས་པ་རྣམས་ཀྱི་ཕྱིར་རོ། །མི་སློབ་པའི་ཆོས་ཟག་པ་མེད་པ་རྣམས་ཏེ། ཉོན་མོངས་མི་སློབ་པ་ལ་ནམ་ཡང་མེད་ཅིང་། དགེ་བ་ཟག་བཅས་འདུ་བྱེད་མ་སྒྲིབ་ལུང་མ་བསྟན་མ་གཏོགས་པའི་ཕྱིར། མྱང་འདས་ནི་སློབ་པ་མ་ཡིན་ཏེ། མི་སློབ་པ་དང་སོ་སྐྱེའང་འཇིག་རྟེན་པའི་ལམ་གྱི་ཐོབ་པའི་མྱང་འདས་དང་ལྡན་པའི་ཕྱིར། དེ་མི་སློབ་པའང་མ་ཡིན་ཏེ། སློབ་མ་དང་སོ་སྐྱེ་དེ་དང་ལྡན་པའི་ཕྱིར། དེ་ཐམས་ཅད་ནི་ཞུགས་པ་བཞི་འབྲལ་གནས་བཞི་སྟེ། མིང་གི་སྒོ་ནས་འཕགས་པའི་གང་ཟག་བརྒྱད་དེ། ཞུགས་པ་དང་པོ་དང་འབྲས་གནས་བཞིའོ། །ཕྱིར་འོང་ཕྱིར་མི་འོང་། དགྲ་(༢༨༣བ)
བཅོམ་ཞུགས་པ་གསུམ་ནི་རྒྱུན་ཞུགས་ཕྱིར་འོང་ཕྱིར་མི་འོང་གི་འབྲས་བུ་གསུམ་ལས་ཐ་མི་དད་པའི་ཕྱིར། མཐར་གྱིས་འབྲས་བུ་བཞི་ཐོབ་པའི་ཕྱིར་དེ་སྐད་དུ་བཤད་ཀྱི། དྲུག་པ་ཟད་པའི་ཕལ་ཆེར་དང་། རྣམ་པ་དགུ་པ་ཟད་པའི་འདོད་ཆགས་དང་བྲལ་བ་ལམ་བཅོ་ལྔ་པ་དེ། ཕྱིར་འོང་དང་ཕྱིར་མི་འོང་ལ་ཞུགས་པ་ཡིན་གྱི། རྒྱུན་ཞུགས་དང་ལན་གཅིག་ཕྱིར་འོང་མ་ཡིན་ནོ། །དེ་ལྟར་ཡིན་ན་རྫས་སུ་རྒྱུན་ཞུགས་ཕྱིར་འོང་ཕྱིར་མི་འོང་བའི་འབྲས་བུ་ལ་ཞུགས་པ་གསུམ་དང་། འབྲས་བུ་ལ་གནས་པ་བཞི་སྟེ་བདུན་དུ་འགྱུར་གྱི། དགྲ་བཅོམ་པའི་འབྲས་བུ་ལ་ཞུགས་པ་གཅིག་པུ་ཕྱིར་མི་འོང་བའི་འབྲས་བུ་ལས་ཐ་མི་དད་དོ་ཞེས་བྱ་བར་ཁོང་དུ་ཆུད་པར་བྱའོ། །གཉིས་པ་ལ། ཆགས་བྲལ་གྱི་ཚུལ་དཔྱད་པ། དགེ་སྦྱོང་གི་ཚུལ་གྱི་འབྲས་བུ་བཤད་པའོ། །དང་པོ་ལ། ཆགས་བྲལ་སྤྱིར་བསྟན་པ་དང་། བྲལ་ཐོབ་སྐྱེ་ཚུལ། ས་གང་གིས་ཆགས་པ་སྤོང་བ། ལམ་གྱི་དམིགས་རྣམ་དཔྱད་པའོ། །དང་པོ་ནི། འཇིག་རྟེན་འདས་ཀྱིས་སྲིད་རྩེ་ལས། །ཆགས་བྲལ་གཞན་ལས་རྣམ་པ་གཉིས། །སྒོམ་པའི་ལམ་ནི་རྣམ་གཉིས་ཏེ། །མཐོང་བ་ཞེས་བྱ་ཟག་པ་མེད། །ཅེས་བཤད་པ་ལས། སོ་སོའི་སྐྱེ་བོ་ལྟ་འཇིག་རྟེན་པའི་ལམ་ཁོ་ནས་འདོད་ཆགས་དང་བྲལ་བ་ཡིན་ལ། འཕགས་པས་འཇིག་རྟེན་ལས་འདས་པའི་ལམ་ཁོ་ནས་འདོད་ཆགས་དང་བྲལ་ལམ། འོན་ཏེ་གཉིས་ཀས་འདོད་ཆགས་དང་བྲལ་སྙམ་ན། འཇིག་རྟེན་ལས་འདས་པ་ཉིད་ཀྱིས་སྲིད་རྩེ་ལས་འདོད་ཆགས་དང་བྲལ་གྱི། འཇིག་རྟེན་པས་ནི་མ་ཡིན་ཏེ། དེའི་གོང་ན་འཇིག་རྟེན་པ་མེད་པའི་ཕྱིར་དང་། འཇིག་རྟེན་པའི་ལམ་དེ་རང་སའི་གཉེན་པོ་མ་ཡིན་པའི་ཕྱིར་རོ། །འཇིག་རྟེན་པའི་ལམ་དེ་ལ་དེ་པའི་ཉོན་མོངས་པ་དམིགས་པའི་སྒོ་ནས་རྒྱས་པར་འགྱུར་ཏེ། ཉོན་མོངས་པ་གང་དངོས་པོ་གང་ལ་རྒྱས་པར་འགྱུར་བ་དེ་ནི་དངོས་པོ་དེ་སྤོང་བར་བྱེད་པ་མ་ཡིན་ལ། གང་གི་དངོས་པོ་གང་ཡིན་པ་(༢༨༤ན)
དེ་ནི་དངོས་པོ་དེས་སྤོང་བར་བྱེད་པ་མ་ཡིན་ལ། གང་གི་གཉེན་པོ་གང་ཡིན་པ་དེ་ནི་ཉོན་མོངས་པ་དེ་རྒྱས་པར་མི་འགྱུར་བའི་ཕྱིར། སྲིད་རྩེ་ལས་གཞན་པའི་ས་ཐམས་ཅད་ལས་ནི་སྒོམ་ལམ་གོང་མའི་ཉེར་བསྡོགས་འཇིག་རྟེན་པའི་ལམ་ཞི་གནས་སྤྱོད་པ་དང་འཇིག་རྟེན་ལས་འདས་པའི་ལམ་ལྷག་མཐོང་སྤྱད་པས་རང་ས་དང་འོག་ས་པ་རྣམ་པ་གཉིས་ཀྱིས་ཅི་རིགས་པར་འདོད་ཆགས་དང་བྲལ་བའོ། །གཉིས་པ་ལ། འཇིག་རྟེན་པ་དང་། འཇིག་རྟེན་ལས་འདས་པའོ། །དང་པོ་ནི། འཇིག་རྟེན་པ་ཡིས་ཆགས་བྲལ་བའི། །འཕགས་ལ་བྲལ་བའི་ཐོབ་རྣམ་གཉིས། །འཇིག་རྟེན་པའི་ལམ་གྱིས་ཆགས་པ་དང་བྲལ་བའི་འཕགས་པ་རྒྱུན་ཞུགས་ཞི་གནས་སྤྱད་པ་ལྟ་བུ་ལ་བྲལ་བའི་ཐོབ་པ་རྣམ་པ་རེ་རེ་ཞིང་འཇིག་རྟེན་དང་འཇིག་རྟེན་ལས་འདས་པ་རྣམ་པ་གཉིས་སྐྱེའོ། །དེའང་བྱེ་བྲག་ཏུ་སྨྲ་བས། ཉོན་མོངས་པ་སྤོང་བའི་བྱ་བ་ཐུན་མོང་བ་ཡིན་པའི་ཕྱིར། ཞེས་ཟེར་རོ། །གཉིས་པ་ལ། གཞན་གྱི་འདོད་པ་བརྗོད་པ་དང་། དེ་དགག་པའོ། །དང་པོ་ནི། ཁ་ཅིག་འཇིག་རྟེན་འདས་ཀྱིས་ཀྱང་། །བཏང་ལ་ཉོན་མོངས་མི་ལྡན་ཕྱིར། སྡེ་པ་ཁ་ཅིག་ནི། འཇིག་རྟེན་ལས་འདས་པའི་ལམ་གྱིས་ཀྱང་བྲལ་ཐོབ་གཉིས་སྐྱེའོ། །དེ་ལྟར་མ་ཡིན་ན་ཟག་མེད་ཀྱི་ལམ་གྱིས་ཅིའང་འདོད་ཆགས་དང་བྲལ་བ་ཞིག་བསམ་གཏན་ས་དྲུག་གང་རུང་ལ་བརྟེན་ནས་དབང་པོ་འཕོས་པའི་ཚེ་དེ་ལ་ས་གོང་མའི་ཉོན་མོངས་དང་ལྡན་པར་འགྱུར་ཏེ། ས་གོང་མའི་ཉོན་མོངས་བྲལ་ཐོབ་ཟག་བཅས་ནི་མེད། ཟག་མེད་བཏང་བའི་ཕྱིར། འདོད་མི་ནུས་ཏེ། དེ་བཏང་ཡང་དེ་ལ་ཉོན་མོངས་མི་ལྡན་པའི་ཕྱིར། རྟགས་གྲུབ་སྟེ། དེའི་ཚེ་གཟུགས་མེད་པའི་ཕྱིར་མི་འོང་འབྲས་བུ་ཁྱད་པར་ཅན་དབང་པོ་རྟུལ་པོས་བསྡུས་པའི་ཟག་མེད་མཐའ་དག་བཏང་ཞིང་། རྣོན་པོས་བསྡུས་པའི་འབྲས་བུ་ཙམ་པོ་འདོད་པའི་སྒོམ་སྤོང་དགུ་པ་སྤངས་པའི་འབྲས་བུ་ཙམ་ལས། འབྲས་བུ་ཁྱད་པར་ཅན་ཅིའང་མེད་མན་ཆོད་ཀྱི་སྤང་བྱ་སྤངས་པའི་འབྲས་(༢༨༤བ)
བུ་ཁྱད་པར་ཅན་ཐོབ་པ་མེད་པའི་ཕྱིར། གཉིས་པ་ནི། སྲིད་རྩའི་ཕྱེད་ལས་རྣམ་གྲོལ་དང་། །གོང་དུ་སྐྱེས་པ་བཞིན་མི་ལྡན། །སློབ་དཔོན་གྱིས་དེ་ལ་མ་ངེས་པ་སྟོན་ཏེ། གང་ཟག་དེ་ལ་འཇིག་རྟེན་པའི་ཐོབ་པ་མེད་དུ་ཟིན་ཀྱང་ཉོན་མོངས་པ་དེ་དག་དང་ལྡན་པར་མི་འགྱུར་ཏེ། དཔེར་ན། སྲིད་རྩེའི་རྣམ་པ་ཕྱེད་ལས་རྣམ་པར་གྲོལ་བ་དེ་ལ་དེའི་གཉེན་པོ་འཇིག་རྟེན་པའི་ལམ་མེད་པས་བྲལ་ཐོབ་འཇིག་རྟེན་པ་ཡང་མེད་ལ། འཇིག་རྟེན་ལས་འདས་པ་ནི་དབང་པོ་འཕོས་པས་བཏང་ཡང་ཁྱེད་རང་སྲིད་རྩེའི་ཉོན་མོངས་ཀྱི་རྣམ་པ་དེ་དག་མི་ལྡན་པར་ཁས་ལེན་པ་དང་། འདིར་ཡང་འདྲ་བའི་ཕྱིར་དང་། དཔེར་ན། སོ་སྐྱེ་ཞིག་ཀྱང་གོང་དུ་སྟེ་བསམ་གཏན་དང་པོ་ཡན་ཆད་དུ་སྐྱེས་པའི་ཚེ། འདོད་པའི་ཉོན་མོངས་པ་དང་ལྡན་པར་འགྱུར་ཏེ། འདོད་པའི་ཉོན་མོངས་སྤངས་པའི་བྲལ་ཐོབ་བཏང་བའི་ཕྱིར། ཁྱབ་པ་ཡོད་དེ། འཕགས་པ་ལ་འཇིག་རྟེན་ལས་འདས་མ་འདས་གཉིས་ཀའི་བྲལ་ཐོབ་ཡོད་པས་འཇིག་རྟེན་པའི་བྲལ་ཐོབ་བཏང་ཡང་འཇིག་རྟེན་ལས་འདས་པའི་བྲལ་ཐོབ་ཡོད་པས། དེའི་ཉོན་མོངས་མི་ལྡན་ལ་སོ་སྐྱེ་ལས་འདས་པའི་བྲལ་ཐོབ་མེད་ལ། འཇིག་རྟེན་པའི་བྲལ་ཐོབ་བཏང་ན་དེར་འགྱུར་བའི་ཕྱིར། འདོད་མི་ནུས་ཏེ། དེ་ལ་དེ་མི་ལྡན་པར་ཁྱེད་རང་ཁས་ལེན་པ་ལྟར། འདིར་ཡང་དེ་བཞིན་གྱི་ཕྱིར་རོ། །དེ་ལྟ་བས་ན། བཏང་ལ་ཉོན་མོངས་མི་ལྡན་ཕྱིར། །ཞེས་པ་འདི་ནི་ཤེས་བྱེད་མ་ཡིན་ནོ། །གསུམ་པ་ས་གང་གིས་ཆགས་པ་སྤོང་བ་ལ། མི་ལྕོགས་མེད་དང་། ས་ལྷག་མ་བརྒྱད་དོ། །དང་པོ་ལ། དངོས་དང་། དེའི་རྣམ་གྲོལ་ལ་དོགས་གཅོད་དོ། །དང་པོ་ནི། ཟག་མེད་མི་ལྕོགས་མེད་པ་ཡིས། །ཐམས་ཅད་ལས་ནི་འདོད་ཆགས་འབྲལ། །ས་ཟག་མེད་མི་ལྕོགས་མེད་པ་ཡི། འདོད་པ་ནས་སྲིད་རྩེའི་བར་ས་གོང་འོག་ཐམས་ཅད་ལ་ནི་འདོད་ཆགས་དང་བྲལ་ཏེ་ཟག་པ་མེད་པའི་ཕྱིར་རོ། །ཉེར་བསྡོགས་གཞན་རྣམས་ནི་ཟག་བཅས་སུ་ངེས་པས་འོག་ས་ཁོ་ནའི་གཉེན་(༢༨༥ན)
པོའོ། །གཉིས་པ་ནི། ས་གསུམ་རྒྱལ་ལ་བསམ་གཏན་ནམ། །ཉེར་བསྡོགས་ལས་མཐའི་རྣམ་གྲོལ་ལམ། །གོང་མའི་ཉེར་བསྡོགས་ལས་མིན། ཉེར་བསྡོགས་ཀྱི་ས་དགུ་ལས་རྒྱལ་བར་བྱེད་པའི་ཆུང་ངུའི་ཆུང་ངུ་སྤོང་བའི་མཐའི་རྣམ་གྲོལ་གྱི་ལམ་ཐམས་ཅད་གོང་མའི་དངོས་གཞི་ལ་གནས་སམ་ཉེར་བསྡོགས་ལ་གནས་སྙམ་ན། འདོད་པ་ནས་གཉིས་པའི་བར་གྱི་ས་དང་པོ་གསུམ་ལས་རྒྱལ་བ་ལ་ནི་དབང་པོ་རྣོན་ཚོར་བ་སྤོང་ནུས་ལ། ཉེར་བསྡོགས་ལ་དགའ་བ་ཆུང་བས་བསམ་གཏན་དངོས་གཞིའི་ངོ་བོར་སྐྱེ་བའམ། རྟུལ་ན་ཚོར་བ་སྤོང་མི་ནུས་ཀྱང་ཉེར་བསྡོགས་ཀྱི་ངོ་བོ་ལས་མཐའི་རྣམ་གྲོལ་གྱི་ལམ་སྐྱེའོ། །དེའང་འདོད་ཁམས་ཀྱི་ཆུང་ངུའི་ཆུང་ངུ་སྤོང་བའི་རྣམ་གྲོལ་གྱི་ལམ་ཐ་མ་དེ་དང་པོའི་དགའ་བ་དེ་ཐོབ་ན་དངོས་གཞི་ཡིན། མ་ཐོབ་ན་ཉེར་བསྡོགས་ལ་གནས་པ་ཡིན། དེ་ལྟར་གཞན་ལའང་འགྲེའོ། །དེའི་གོང་མ་བསམ་གཏན་གསུམ་པའི་ས་པ་ཡན་ཆད་ལས་རྒྱལ་ན་དངོས་གཞི་ཁོ་ན་ལས་སྐྱེའི། ཉེར་བསྡོགས་ལས་སྐྱེ་བ་མིན་ཏེ། དེའི་དངོས་གཞི་དང་ཉེར་བསྡོགས་བཏང་སྙོམས་ཀྱི་དབང་པོར་འདྲ་བའི་ཕྱིར། བསམ་གཏན་དང་པོ་གསུམ་ནི་ཉེར་བསྡོགས་བཏང་སྙོམས་དང་། དང་པོ་དང་གཉིས་པའི་དངོས་གཞི་དག་བདེ་གསུམ་པའི་དངོས་གཞི་བདེ་བ་ཐ་དད་པས་བཏང་སྙོམས་ཀྱི་མཇུག་ཐོགས་སུ་དབང་རྟུལ་བསམ་གཏན་དངོས་གཞི་ལ་འཇུག་མི་ནུས་ཏེ། ཡིད་བདེ་བའི་དབང་པོའམ་བདེ་བའི་དབང་པོ་བསྐྱེད་དཀའ་བའི་ཕྱིར། དེར་དངོས་གཞི་ཁོ་ན་ལས་རྣམ་གྲོལ་གྱི་ལམ་མངོན་དུ་བྱེད་ནས་ཉེར་བསྡོགས་ལས་མ་ཡིན་ཏེ། འདོད་ཆགས་དང་བྲལ་བའི་ས་ལ་གུས་པ་དང་། འདོད་ཆགས་དང་བྲལ་ཟིན་པ་དང་། ཉེར་བསྡོགས་ཁོ་ནས་འོག་མ་ལས་འདོད་ཆགས་དང་བྲལ་བར་བྱས་པའི་ཕྱིར་རོ། །གཉིས་པ་ས་ལྷག་མ་བརྒྱད་གང་གིས་སྤོང་བ་ནི། འཕགས། །བརྒྱད་ཀྱིས་རང་གོང་ས་ལས་རྒྱལ། །འཕགས་པ་སྟེ་ཟག་མེད་ཀྱི་བསམ་(༢༨༥བ)
གཏན་དངོས་གཞི་བཞི་ཁྱད་པར་ཅན་དང་ལྔ་གཟུགས་མེད་ཀྱི་དངོས་གཞི་གསུམ་སྟེ་བརྒྱད་ཀྱི་རང་ས་དང་གོང་མ་ལས་རྒྱལ་ཞིང་འདོད་ཆགས་དང་བྲལ་བར་འགྱུར་ལ། འོག་ས་ལས་ཆགས་པ་དང་བྲལ་བ་མ་ཡིན་ཏེ། ཆགས་པ་དང་མ་བྲལ་ན་དེ་མངོན་དུ་བྱེད་མི་ནུས་པས་འདོད་ཆགས་དང་བྲལ་ཟིན་པའི་ཕྱིར་རོ། །བཞི་པ་ལམ་གྱི་དམིགས་རྣམ་དཔྱད་པ་ལ། དངོས་དང་། ཟད་ཤེས་ཀྱི་མཇུག་ཐོགས་སུ་གང་འབྱུང་བའོ། །དང་པོ་ནི། འཇིག་རྟེན་པ་ཡི་རྣམ་གྲོལ་དང་། །བར་ཆད་མེད་ལམ་གོ་རིམས་བཞིན། །ཞི་སོགས་རགས་སོགས་རྣམ་པ་ཅན། །གོང་རང་འོག་མའི་སྤྱོད་ཡུལ་ཅན། །འཇིག་རྟེན་ལས་འདས་པའི་བར་ཆད་མེད་ལམ་དང་རྣམ་གྲོལ་གྱི་ལམ་རྣམས་ནི་བདེན་པ་ལ་དམིགས་པས་དེའི་རྣམ་པར་ཞུགས་པ་ཡིན་ལ། འཇིག་རྟེན་པའི་རྣམ་གྲོལ་གྱི་ལམ་དང་བར་ཆད་མེད་ལམ་གོ་རིམ་བཞིན་དུ་ཞི་སོགས་ཀྱི་ངེས་འབྱུང་གི་རྣམ་པ་ཅན་དང་། རགས་སོགས་ཀྱི་རྣམ་པ་ཅན་ནོ། །དེའང་སྦྱོར་བའི་ལམ་ནི་ཞི་སོགས་ཀྱི་རྣམ་པ་གསུམ། རགས་སོགས་ཀྱི་རྣམ་པ་གསུམ་སྟེ་དྲུགཁྱད་པར་གྱི་ལམ་ལ་ཡང་དེ་ཀ་ལྟར་དྲུག་སྟེ་བཅུ་གཉིས། བར་ཆད་མེད་པའི་རགས་སོགས་ཀྱི་རྣམ་པ་གསུམ་སྟེ་བཅོ་བརྒྱད། ཆེན་པོའི་ཆེན་པོ་སྤོང་བའི་ཁྱད་པར་གྱི་ལམ་དེ་ཆེན་པོའི་འབྲིང་སྤོང་བའི་སྦྱོར་བ་གནས་སྐབས་ཁ་ཅིག་ཏུ་མི་འགྲོ་སྟེ། ཆེན་པོའི་ཆེན་པོ་སྤངས་པས་ཆོག་ཤེས་མི་བྱེད་པར་དེ་ཀ་ལྟར་ཆེན་པོའི་འབྲིང་སྤོང་བར་བྱེད་པ་ལ་ཆེན་པོའི་ཆེན་པོ་སྤོང་བའི་ཁྱད་པར་གྱི་ལམ་དེ་ཆེན་པོའི་འབྲིང་སྤོང་བའི་སྦྱོར་ལམ་དུ་འགྲོའོ། །དེའང་རྣམ་གྲོལ་གྱི་ལམ་རྣམས་ནི་ས་གོང་མ་ལ་ཞི་བ་དང་གྱ་ནོམ་པ་དང་ངེས་པར་འབྱུང་བའི་རྣམ་པར་བལྟ་ཞིང་། བར་ཆད་མེད་ལམ་རྣམས་ནི་ས་འོག་མ་ལ་མ་ཞི་བར་རགས་པ་ཆེ་ལོང་དུ་བལྟ་སྟེ། མ་ཞི་བའང་གོང་མ་བས་འབད་པ་ཆེན་པོས་བསྒྲུབ་བྱ་ཡིན་པའི་ཕྱིར། ཐ་བ་གཞིག་དཀའ་བ་དང་ངན་པ་སྨད་པའི་གནས་(༢༨༦ན)
སུ་བལྟ་སྟེ། གྱ་ནོམ་པ་མ་ཡིན་པའི་ཕྱིར། གྲུབ་སྟེ། གནས་ངན་ལེན་ལུས་སེམས་ལས་སུ་མི་རུང་བ་རབ་ཏུ་མང་བ་ཉིད་ཀྱིས་ཉོན་མོངས་མེད་པ་དང་མི་མཐུན་པར་འགྱུར་བའི་ཕྱིར། ཡང་ན་སྡུག་བསྔལ་ཡོད་པས་ཐ་བ་ལེན་པས་ན་ཐ་མ་ངན་པ་སྟེ། པུས་ནད་དུ་གྱུར་པས་ལུས་ནད་དུ་གྱུར་པ་འདི་ཉེ་བར་ལེན་པའི་ཕྱིར་རོ། །རྩིག་པ་སྟུག་པོ་ལྟ་བུར་སྤྱོད་ཡུལ་དུ་བྱེད་པ་ཅན་ཡིན་ཏེ། རྩིག་པས་ནམ་མཁའི་ཕྱོགས་ནོན་པས་དེ་ལས་ངེས་པར་མི་འབྱུང་བ་བཞིན་ས་དེ་ཉིད་ཀྱིས་དེ་ལས་ངེས་པར་མི་འབྱུང་བའི་ཕྱིར། ཞི་བ་ན་འོག་མ་ལ་བལྟོས་ཏེ་འདུ་བྱེད་པ་ཤིན་ཏུ་ཆུང་བའི་ཕྱིར། གྱ་ནོམ་པ་ནི་གནས་ངན་ལེན་རབ་ཏུ་ཉུང་བས་མཐུན་པའི་ཕྱིར། ངེས་པར་འབྱུང་བ་ནི་དེས་ས་འོག་མ་ལས་ངེས་པར་འབྱུང་བའི་ཕྱིར་རོ། །གཉིས་པ་ནི། གལ་ཏེ་མི་གཡོའི་ཟད་ཤེས་ལས། །མི་སྐྱེའི་བློ་གྲོས་གལ་ཏེ་མིན། །ཟད་པ་ཤེས་སམ་མི་སློབ་ལྟ། །དེ་ནི་དགྲ་བཅོམ་ཐམས་ཅད་ལ། །ཟད་པ་ཤེས་པའི་མཇུག་ཐོགས་སུ་ཤེས་པ་གང་སྐྱེ་ན། གལ་ཏེ་དགྲ་བཅོམ་མི་གཡོ་བའི་ཆོས་ཅན་ཡིན་ན་མི་ཉམས་པས་ཟད་ཤེས་ལས་མི་སྐྱེ་བའི་བློ་གྲོས་སྐྱེ་ལ། གལ་ཏེ་མི་གཡོ་བའི་ཆོས་ཅན་མིན་ན་ནི་ཟད་པ་ཤེས་པ་ལས་ཟད་པ་ཤེས་པ་ཁོ་ནའམ། ཡང་ན་མི་སློབ་པའི་ཡང་དག་པའི་ལྟ་བ་སྐྱེའོ། །མི་སྐྱེ་བ་ཤེས་པ་ནི་མ་ཡིན་ཏེ། ཉོན་མོངས་པ་སྐྱེ་བའི་སྐབས་ཡོད་པས་ཉམས་པ་སྲིད་པའི་ཕྱིར་དང་། མི་སྐྱེ་བ་ཤེས་པ་ལས་ཉམས་པ་མེད་པའི་ཕྱིར། མི་སློབ་པའི་ཡང་དག་པའི་ལྟ་བ་དེ་ནི་དགྲ་བཅོམ་ཐམས་ཅད་ལ་སྐྱེ་སྟེ། མི་གཡོ་བའི་ཆོས་ཅན་ལའང་རེས་འགའ་མི་སྐྱེ་བ་ཤེས་པ་ལས་མི་སྐྱེ་བ་ཤེས་པ་ཁོ་ན་དང་། རེས་འགའ་མི་སློབ་པའི་ཡང་དག་པའི་ལྟ་བ་སྐྱེ་བའི་ཕྱིར་རོ། །གཉིས་པ་དགེ་སྦྱོང་ཚུལ་གྱི་འབྲས་བུ་ལ། དགེ་སྦྱོང་ཚུལ་འབྲས་ཀྱི་དབྱེ་བ། དགེ་སྦྱོང་ཚུལ་ཉིད་བཤད་པའོ། །དང་པོ་ལ། བསྡུས་ཏེ་དབྱེ་བ། རྒྱས་པར་དབྱེ་བ། འབྲས་བུ་བཞིའི་གྲངས་ངེས། མ་ཁྱབ་པ་སྤང་བའོ། །དང་པོ་ནི། དགེ་སྦྱོང་ཚུལ་ནི་དྲི་མེད་ལམ། །འབྲས་བུ་འདུས་བྱས་འདུས་མ་བྱས། །(༢༨༦བ)
འབྲས་བུ་བཞིར་བཤད་པ་དེ་གང་གི་འབྲས་བུ་ཡིན་ཅེ་ན། དགེ་སྦྱོང་ཚུལ་གྱིས་ཡིན་ནོ། །དགེ་སྦྱོང་གི་ཚུལ་ནི་དྲི་མ་མེད་པའི་བར་ཆད་མེད་ལམ་བརྒྱད་ཅུ་རྩ་དགུ་ཡིན་ལ། འབྲས་བུ་ནི་རྣམ་གྲོལ་གྱི་ལམ་འདུས་བྱས་དང་བྲལ་འབྲས་འདུས་མ་བྱས་དེ་སྙེད་ཉིད་ཡིན་ནོ། །དེ་ཡང་མདོ་ལས་བཞིར་གསུངས་སོ། །དེས་ན་འབྲས་བུ་འདི་ཕུང་པོ་ལྔ་དང་འདུས་མ་བྱས་དང་རྫས་དྲུག་ཡིན་ནོ། །ཚུལ་འདིས་ཉོན་མོངས་པ་ཡང་དག་པར་ཞི་བར་བྱེད་པ་དང་ལྡན་པའི་སྒོ་ནས་དགེ་སྦྱོང་དུ་འགྱུར་ཏེ། མདོ་ལས་འདིས་སྡིག་པ་མི་དགེ་བའི་ཆོས་ཞེས་བྱ་བ་ནས་རྒྱས་པར་རྒ་ཤིར་འགྱུར་བའི་བར་དུ་རྣམ་པ་དུ་མ་ཞི་བར་བྱས་པ་ཡིན་པའི་ཕྱིར། དགེ་སྦྱོང་། ཞེས་གསུངས་པའི་ཕྱིར་རོ། །སོ་སྐྱེ་ནི་དོན་དམ་པའི་དགེ་སྦྱོང་མ་ཡིན་ཏེ། ཅི་ཡང་གི་བར་ལ་འདོད་ཆགས་དང་བྲལ་ཀྱང་ཉེས་པའི་འཕྲོ་དང་བཅས་པ་དང་ཉེས་པ་གཏན་དུ་ཞི་བར་མི་བྱེད་པའི་ཕྱིར། གཉིས་པ་ནི། དེ་དག་བརྒྱད་ཅུ་རྩ་དགུའོ། །གྲོལ་ལམ་ཟད་པ་རྣམས་དང་བཅས། །དེའང་མཐོང་སྤོང་སྤོང་བྱེད་བར་ཆད་མེད་ལམ་བརྒྱད། དེ་སྙེད་ཀྱི་རྣམ་གྲོལ་ལམ། སྒོམ་སྤོང་སྤོང་བྱེད་བར་ཆད་མེད་ལམ་ས་དགུ་པོ་རེ་རེ་ཞིང་ཉོན་མོངས་པ་རྣམ་པ་དགུ་དགུ་སྤོང་བྱེད་དེ་སྙེད་ཁོ་ན་དང་རྣམ་གྲོལ་གྱི་ལམ་དག་ཡིན་ནོ། །དེ་ལ་བར་ཆད་མེད་ལམ་རྣམས་ནི་དགེ་སྦྱོང་གི་ཚུལ་དང་། རྣམ་གྲོལ་གྱི་ལམ་རྣམས་ནི་ཚུལ་གྱི་འབྲས་བུ་འདུས་བྱས་དག་ཡིན་ཏེ། དེའི་རྒྱུ་མཐུན་དང་སྐྱེས་བུ་བྱེད་པའི་འབྲས་བུ་ཡིན་པའི་ཕྱིར། ཉོན་མོངས་ཟད་པ་རྣམས་དང་བཅས་པ་འབྲས་བུ་འདུས་མ་བྱས་ཀྱང་སྐྱེས་བུ་བྱེད་འབྲས་ཏེ་དེ་དག་བརྒྱད་ཅུ་རྩ་དགུ་ཡིན་ནོ། །གསུམ་པ་ནི། འབྲས་བུ་བཞིར་རྣམ་གཞག་པ་ནི། །རྒྱུ་ལྔ་དག་ནི་སྲིད་ཕྱིར་རོ། །འབྲས་ལ་སྔོན་ལམ་བཏང་བ་དང་། །གཞན་ཐོབ་པ་དང་ཟད་བསྡོམས་དང་། །ཤེས་པ་བརྒྱད་ཚན་ཐོབ་པ་དང་། །རྣམ་པ་བཅུ་དྲུག་ཐོབ་པའོ། །འབྲས་བུ་བརྒྱད་ཅུ་རྩ་དགུ་ཡོད་པ་དེ་ལྟར་ན་སོ་སོའི་སྐྱེ་བོ་པཎྜི་ཏའི་ཚིག་ལ་ཆད་པ་ཡོད་པ་ལྟར་སངས་རྒྱས་ཀྱི་གསུང་ལ་ཁ་བསྐང་བྱ་དགོས་པར་འགྱུར་རོ་ཞེ་ན། མི་དགོས་ཏེ། འབྲས་བུ་མང་པོ་དེ་བཞིར་འདུས་པའི་ཕྱིར་ཏེ། འདོད་པ་དང་ཁམས་གོང་གི་མཐོང་(༢༨༧ན)
སྤོང་བཞི་བཞི་སྤངས་པ་རྒྱུན་ཞུགས་ཀྱི་འབྲས་བུར་འདུ། འདོད་པའི་དྲུག་པ་མན་ཆོད་སྤངས་པ་ཕྱིར་འོང་གི་འབྲས་བུར་འདུ། འདོད་པའི་དགུ་སྤངས་པ་ཕྱིར་མི་འོང་གི་འབྲས་བུར་འདུ། སྲིད་རྩེའི་དགུ་པ་མན་ཆོད་སྤངས་པ་དགྲ་བཅོམ་པའི་འབྲས་བུར་འདུའོ། །གཞན་ཡང་འབྲས་བུའི་རྣམ་པ་མང་མོད་ཀྱི། བཅོམ་ལྡན་འདས་ཀྱིས་སྤོང་ལམ་གྱི་གནས་སྐབས་ན་འབྲས་བུ་བཞིར་རྣམ་པར་བཞག་ཅེས་པ་ནི་གྲགས་ཏེ་རྒྱུ་ལྔ་དག་ནི་སྲིད་པའི་ཕྱིར་རོ། །རྒྱུ་ལྔ་ནི་འབྲས་བུ་ལ་ཞུགས་པའི་ལམ་སྔོན་མ་བཏང་བས་མི་ལྡན་པ་དང་། འབྲས་བུའི་ལམ་སྔོན་མེད་གཞན་ཐོབ་ཅིང་ལྡན་པ་དང་ཟད་པ་བསྡོམས་པའམ་སྤངས་པ་སྡོམ་པ་ནི་སྤང་བྱ་སྤངས་པའི་བྲལ་བའི་རྫས་མང་ཡང་ཐོབ་པ་རེ་རེ་བ་སྟེ། ཐམས་ཅད་ཀྱི་ཐོབ་པ་གཅིག་རྙེད་པའི་ཕྱིར། དེའང་རྒྱུན་ཞུགས་ཀྱི་འབྲས་བུ་ཐོབ་པའི་དུས་ན་མཐོང་བས་སྤང་བར་བྱ་བ་ཐམས་ཅད་ཀྱིས་ཐོབ་པའི་སྒོམ་པའི་ལམ་གྱིས་བསྡུས་པ་གཅིག་རྙེད་ལ། དེ་བཞིན་དུ་ལན་གཅིག་ཕྱིར་འོང་བའི་འབྲས་བུ་དུས་ནའང་མཐོང་བས་སྤང་བར་བྱ་བའི་སྤངས་པ་དང་། སྒོམ་པས་སྤང་བར་བྱ་བའི་རྣམ་པ་དྲུག་པོ་ཐམས་ཅད་ཀྱིས་ཐོབ་པ་གཅིག་རྙེད་དེ། ཕྱིར་མི་འོང་དང་དགྲ་བཅོམ་གྱི་འབྲས་བུ་ལའང་དེ་བཞིན་དུ་སྦྱར་རོ། །སྡུག་བསྔལ་ནས་ལམ་ལ་ཆོས་ཤེས་པའི་བར་བཞི་དང་། རྗེས་སུ་ཤེས་པ་བཞི་ཤེས་པ་བརྒྱད་ཚན་གཅིག་ཅར་དུ་ཐོབ་པ་དང་། ཞེས་པ་ལ། སྔར་གྱི་ཤེས་པ་བདུན་གྱི་ཐོག་ཏུ་ལམ་ལ་རྗེས་སུ་ཤེས་པ་བསྣན་ནས་བརྒྱད་ཐོབ་བྱ་བ་དེ་ལྟར་མིན། ཇི་ལྟར་ཡིན་ན་སྔར་གྱི་ཤེས་པ་བདུན་བཏང་བ་ཡིན། རྒྱུ་ཡོངས་སུ་རྒྱས་པས་མ་འོངས་པའི་ཤེས་པ་བརྒྱད་ཐོབ་པ་ཡིན་ནོ། །མི་རྟག་པ་ལ་སོགས་པའི་རྣམ་པ་བཅུ་དྲུག་ཐོབ་པའོ། །ཞེས་པ་ནི་སྔར་གྱི་བཅོ་ལྔའི་ལམ་ལ་རྗེས་སུ་ཤེས་པ་བསྣན་པས་བཅུ་དྲུག་ཐོབ་པ་(༢༨༧བ)
མིན། དེ་ཅིས་སྙམ་ན། སྔར་གྱི་ཤེས་པ་བཅོ་ལྔ་ནི་བཅུ་དྲུག་པའི་དུས་ན་བཏང་། འོ་ན་ཇི་ལྟར་ཡིན་ན་རྒྱུ་ཡོངས་སུ་རྒྱས་པའི་སྒོ་ནས་ལམ་ལ་རྗེས་སུ་ཤེས་པའི་ཡེ་ཤེས་སྐྱེས་པའི་དུས་སུ་མ་འོངས་པ་བཅུ་དྲུག་ཐོབ་པའོ། །མདོར་ན་ལྔ་པོ་དེ་འབྲས་བུ་རེ་རེ་ལའང་ཡོད་པའོ། །བཞི་པ་ནི། འཇིག་རྟེན་པ་ཡིས་ཐོབ་འབྲས་ནི། །བསྲེས་དང་ཟག་མེད་ཐོབ་འཛིན་ཕྱིར། །གལ་ཏེ་ཟག་མེད་ཀྱིའམ་ཁོ་ན་དགེ་སྦྱོང་གི་ཚུལ་ཡིན་ན། མཐོང་ལམ་ཟག་མེད་ཡིན་པས་རྒྱུན་ཞུགས་ཀྱི་འབྲས་བུར་གཏུབ། ཕྱིར་འོང་ཕྱིར་མི་འོང་གཉིས་འདས་ལམ་གྱི་ཐོབ་པ་སྟེ་དགེ་སྦྱོང་ཚུལ་འབྲས་ཡིན་པར་བཏུབ་ཀྱང་། འབྲས་བུ་བར་པ་གཉིས་འཇིག་རྟེན་པའི་ལམ་གྱིས་ཐོབ་པར་སྲིད་ན་དེ་དགེ་སྦྱོང་གི་ཚུལ་འབྲས་བུ་རུང་ཞེ་ན། འཇིག་རྟེན་པའི་ལམ་གྱིས་ཐོབ་པའི་ལན་གཅིག་ཕྱིར་འོང་དང་ཕྱིར་མི་འོང་གི་འབྲས་བུ་ནི་ཆོས་ཅན། འཇིག་རྟེན་པའི་ལམ་གྱི་འབྲས་བུའི་སྤངས་པ་ཁོ་ནའང་མ་ཡིན་ཏེ། མཐོང་བའི་ལམ་གྱི་འབྲས་བུ་སྤངས་པའང་དེར་བསྲེས་ཤིང་སྡོམ་པ་དང་མཐོང་སྒོམ་གྱི་ལམ་གྱི་འབྲས་བུ་ཐམས་ཅད་ཀྱི་ཐོབ་པ་ལན་གཅིག་ཕྱིར་འོང་དང་ཕྱིར་མི་འོང་དེའི་འབྲས་བུ་བསྡུས་པ་གཅིག་རྙེད་པའི་ཕྱིར། དེ་སྐད་དུ་མདོ་ལས་ལན་གཅིག་ཕྱིར་འོང་བའི་འབྲས་བུ་ཀུན་སྦྱོར་གསུམ་སྤངས་པ་དང་། ཆགས་སྡང་གཏི་མུག་སྲབ་པ་དེ་ཡིན་ནོ། །ཕྱིར་མི་འོང་བའི་འབྲས་བུ་ཀུན་སྦྱོར་ཐ་མའི་ཆ་མཐུན་ལྔ་སྤངས་པ་དེ་ཡིན་ཅེས་གསུངས་པས། ཀུན་སྦྱོར་གསུམ་མཐོང་སྤོང་གི་སྤངས་པ་ཡིན་པ་དང་། ཐ་མའི་ཆ་མཐུན་གྱི་འཇིག་ཚུལ་ཐེ་ཚོམ་རྣམས་ཀྱང་མཐོང་སྤོང་གི་སྤངས་པ་ཡིན་པས་སྤངས་པ་འདྲེས་མར་འཇུག་པ་སངས་རྒྱས་ཀྱིས་གསུངས་པའོ། །མཐོང་ལམ་གྱི་སྤངས་པ་ལ་ལྟ་ཟག་མེད་ཀྱི་ཐོབ་པ་ཡོད་ཀྱང་། སྒོམ་ལམ་འཇིག་རྟེན་པས་སྤངས་པ་ལ་ཟག་མེད་ཀྱི་ཐོབ་པ་ཡོད་དོ་སྙམ་ན། བྲལ་ཐོབ་ཟག་མེད་ཀྱི་(༢༨༨ན)
སྟོབས་ཀྱིས་འཇིག་རྟེན་པའི་ལམ་གྱིས་ཐོབ་པའི་སྤངས་པ་དེ་འཛིན་པར་བྱེད་པས་འཕགས་པ་ཡོངས་སུ་ཉམས་པ་སོར་མ་ཆུད་ཀྱི་བར་མི་འཆི་བའི་ཕྱིར་འདི་དགེ་སྦྱོང་གི་འབྲས་བུ་ཉིད་དུ་རིགས་སོ། །བརྒྱ་ལ་འཕགས་པ་ལ་འཇིག་རྟེན་པའི་ལམ་གྱིས་སྤངས་པ་ལ་ཡང་བྲལ་བའི་ཐོབ་པ་ཟག་མེད་མེད་ན་སོ་སྐྱེ་བཞིན་དུ་ཉམས་བཞིན་དུ་འཆི་ཞིང་དམྱལ་བ་ལ་སོགས་པར་ཡང་སྐྱེ་བར་ཐལ་ལོ། །ཡང་ན་ཟག་པ་མེད་པའི་ཐོབ་པ་འཇིག་རྟེན་པའི་ལམ་གྱིས་ཉེ་བར་བསྐྱེད་པ་ཡོད་པས་འཕགས་པའི་ལམ་ཡན་ལག་བརྒྱད་པོ་འཇིག་རྟེན་པའི་སྟོབས་ཀྱིས་ཐོབ་པར་བྱ་བ་མ་འོངས་པ་དེ་ལ་དགེ་སྦྱོང་གི་ཚུལ་གྱིས་འབྲས་བུར་བཞག་སྟེ། སོ་སོའི་སྐྱེ་བོ་ལ་ནི་འཇིག་རྟེན་པའི་ལམ་གྱི་འབྲས་བུར་འཕགས་པའི་ལམ་ཡན་ལག་བརྒྱད་མ་འོངས་པ་དེ་འབྲས་བུར་མི་འོང་། འཕགས་པ་ལ་འཇིག་རྟེན་པའི་ལམ་ཡན་ལག་བརྒྱད་པ་མ་འོངས་པ་དེ་འབྲས་བུར་བཞག་པའི་ཕྱིར། མདོ་ལས་ནི་གཙོ་བོ་ཡིན་པའི་ཕྱིར། དགེ་སྦྱོང་གི་ཚུལ་འབྲས་འདུས་མ་བྱས་སྨོས་ཏེ། དེར་ནི་འདུས་བྱས་ཀྱང་འདོད་པར་བྱའོ། །གཉིས་པ་དགེ་སྦྱོང་གི་ཚུལ་ཉིད་བཤད་པ་ལ། ལམ་གྱི་ཚངས་པའི་འཁོར་ལོ་བཤད་པ། མཐོང་ལམ་བྱེ་བྲག་ཏུ་ཆོས་འཁོར་དུ་བཤད་པ། ཁམས་གང་དུ་དགེ་སྦྱོང་ཚུལ་གྱི་འབྲས་བུ་དུ་ཐོབ་པའོ། །དང་པོ་ནི། དེ་ཉིད་ཚངས་ཚུལ་ཚངས་པ་ཡི། །འཁོར་ལོ་ཚངས་པས་བསྐོར་ཕྱིར་རོ། །དགེ་སྦྱོང་གི་ཚུལ་དེ་ཉིད་ཚངས་པའི་ཚུལ་ཡིན་ཏེ། ཉོན་མོངས་སྡིག་པ་མི་དགེ་བའི་ཆོས་རྣམ་པ་དུ་མ་སྤངས་པའི་ཕྱིར་རོ། །བཅོམ་ལྡན་འདས་ནི་ཚངས་པའི་ཚུལ་ཟག་པ་མེད་པའི་ལམ་བླ་ན་མེད་པ་དང་ལྡན་པའི་ཚངས་པ་ཡིན་ལ། འཁོར་ལོ་འདི་ནི་བཅོམ་ལྡན་འདས་དེའི་ཡིན་པས་ཚངས་པའི་འཁོར་ལོ་སྟེ་ཚངས་པ་བཅོམ་ལྡན་འདས་དེས་བསྐོར་བའི་ཕྱིར་རོ། །མདོ་ལས་བཅོམ་(༢༨༨བ)
ལྡན་འདས་དེ་ནི་ཚངས་པ་ཞེས་ཀྱང་བྱ་སྟེ། མི་དགེ་བ་མེད་པའི་ཕྱིར་དང་། བསིལ་བ་ཞེས་བྱ་སྟེ་སྡུག་བསྔལ་མེད་པའི་ཕྱིར་རོ། །གཉིས་པ་ནི། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །མཐོང་བའི་ལམ་ནི་ཆོས་ཀྱི་འཁོར་ལོ་ཞེས་བརྗོད་དེ། རྒྱུ་པས་ན་འཁོར་ལོ་རིན་པོ་ཆེ་དང་ཆོས་མཐུན་པའི་ཕྱིར། ཇི་ལྟར་ཆོས་མཐུན་ན། འཁོར་ལོ་རིན་པོ་ཆེ་ལྟར་མཐོང་བའི་ལམ་ཡང་སེམས་ཀྱི་སྐད་ཅིག་མ་བཅོ་ལྔས་བདེན་པ་མངོན་པར་རྟོགས་པའི་ཕྱིར། མྱུར་བར་འགྲོ་བ་དང་། སོགས་པས་འཁོར་ལོ་རྒྱབ་མ་འདོར་ཞིང་མདུན་མ་ལ་འཇུག་པ་བཞིན་བར་ཆད་མེད་ལམ་འདོར་ལ། རྣམ་གྲོལ་གྱི་ལམ་མངོན་དུ་གྱུར་པའི་སྒོ་ནས་འཇུག་པའམ་བདེན་པའི་དམིགས་པ་གཞན་དོར་ནས་གཞན་ལ་འཇུག་པའི་ཕྱིར་དང་། འཁོར་ལོས་གྲོང་དང་གྲོང་རྡལ་སོགས་དགེ་བ་བཅུ་ལ་འགོད་དེ་མ་རྒྱལ་བ་ལས་རྒྱལ་བར་བྱེད་པ་དང་། བཀོད་པ་མི་ཉམས་པར་བྱེད་པས་རྒྱལ་བ་རྣལ་དུ་འགོད་པ་ལྟར་བར་ཆད་མེད་ལམ་གྱིས་འཇིག་ལྟ་སོགས་ཉོན་མོངས་ལས་མ་རྒྱལ་བ་རྣམས་དེའི་ཐོབ་པ་གཅོད་པའི་སྒོ་ནས་རྒྱལ་བར་བྱེད་དེ། རྣམ་གྲོལ་གྱི་ལམ་གྱིས་རྒྱལ་བ་རྣལ་དུ་འགོད་དེ་བྲལ་ཐོབ་དང་ལྷན་ཅིག་སྐྱེ་བའི་ཕྱིར། དེ་འཕར་བ་དང་འབབ་པ་བཞིན་བར་ཆད་མེད་ལམ་དང་རྣམ་གྲོལ་གྱི་ལམ་ཡང་མངོན་དུ་བྱེད་པའམ། འདོད་པའི་སྡུག་བསྔལ་ལ་སོགས་ལ་དམིགས་པའི་སྒོ་ནས་འབབ། ཁམས་གོང་མ་ལ་དམིགས་པས་འཕར་བའི་ཕྱིར། བཙུན་པ་དབྱངས་སྒྲོག་ནི། འཕགས་ལམ་ཡན་ལག་བརྒྱད་ནི་རྩིབས་སོགས་ཀྱི་ཆོས་མཐུན་པའི་ཕྱིར་ཆོས་ཀྱི་འཁོར་ལོའོ། །འདི་ནི་ཚུལ་ཁྲིམས་ལ་བརྟེན་ཏིང་ངེ་འཛིན་ཐོབ་ལ། དེ་ཐོབ་པས་ཤེས་རབ་སྐྱེ་བས་ཡང་དག་པའི་ངག་དང་། ལས་ཀྱི་མཐའ་དང་འཚོ་བ་རྣམས་ནི་ལྟེ་བ་ལྟ་བུ་སྟེ། ཚུལ་ཁྲིམས་གཞིར་གྱུར་པས་ཡང་དག་པའི་ལྟ་བ་སོགས་དེ་ལ་རག་(༢༨༩ན)
ལུས་ཏེ་འཇུག་པའི་ཕྱིར། ཏིང་ངེ་འཛིན་ནི་མུ་ཁྱུད་ལྟ་བུ་སྟེ། དེས་གཞན་དག་ཉེ་བར་འཛིན་པའི་ཕྱིར། ཡང་དག་པའི་ལྟ་བ། རྟོག་པ་རྩོལ་བ། དྲན་པ་རྣམས་ནི་རྩིབས་བཞིན་དུ་ཕན་ཚུན་འཇུག་པའི་ཕྱིར། ཞེས་ཟེར་རོ། །མཐོང་ལམ་ཆོས་འཁོར་ཡིན་ཏེ། འཕགས་པ་ཀོའུ་ཌི་ཉ་ལ་མཐོང་ལམ་སྐྱེས་པ་ནི་ཆོས་ཀྱི་འཁོར་ལོ་བསྐོར་ཏེ། ཞེས་གསུངས་པའི་ཕྱིར། ལན་གསུམ་དང་བཟླས་པ་དང་རྣམ་པ་བཅུ་གཉིས་ནི། བྱེ་བྲག་ཏུ་སྨྲ་བ་ན་རེ། སྡུག་བསྔལ་འཕགས་པའི་བདེན་པའོ་ཞེས་བྱ་བ་སོགས་བསྐོར་བ་གཅིགདེ་ཡོངས་སུ་ཤེས་པར་བྱའོ་ཞེས་པ་སོགས་གཉིས། ཡོངས་སུ་ཤེས་སོ་ཞེས་སོགས་འདི་ནི་ལན་གསུམ་དུ་བཟླས་པའོ། །བཟླས་པ་རེ་རེ་ལའང་ཟག་མེད་ཀྱི་ཤེས་རབ་ནི་མངོན་སུམ་དུ་འཇུག་པས་མིག་དང་། ཐེ་ཚོམ་མེད་པས་ཤེས་པ་དང་། ཡང་དག་པའི་དོན་གྱི་ཕྱིར་རིག་པ་དང་རྣམ་པར་དག་པས་བློ་སྐྱེས་སོ་ཞེས་བྱ་བ་འདི་ནི་རྣམ་པ་བཅུ་གཉིས་ཏེ་བདེན་པ་རེ་རེ་ལའང་བཞི་གསུམ་བཅུ་གཉིས་དེ་དང་འདྲའོ། །འོ་ན་བཞི་བཅུ་ཞེ་བརྒྱད་ལ་བཅུ་གཉིས་ཟེར་བ་ཇི་ལྟར་ཞེ་ན། གསུམ་ཚན་ཀྱང་བཅུ་གཉིས་སུ་ཆོས་མཐུན་པའི་ཕྱིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཞེས་བཤད་དེ། དཔེར་ན། མང་པོ་ཞིག་བཤད་པའི་རྗེས་ལ། དགེ་སློང་དག་ཁྱེད་ལ་གཉིས་ཤིག་བསྟན་པར་བྱས། ལེགས་པར་ཉོན་ལ་ཡིད་ལ་ཟུངས་ཤིགགཉིས་གང་ཞེ་ན། མིག་དང་གཟུགས་དང་། ཡིད་དང་ཆོས་རྣམས་སོ། །དཔེ་དེ་བཞིན་དུ་སྡུག་བསྔལ་ལ་བཅུ་གཉིས། ཀུན་འབྱུང་ལ་བཅུ་གཉིས། འགོག་པ་ལ་བཅུ་གཉིས། ལམ་ལ་བཅུ་གཉིས་ཏེ་བཅུ་གཉིས་ཚན་དུ་ཆོས་མཐུན་པའོ། །དེ་བཞིན་གནས་བདུན་ལ་མཁས་པར་བསྟན་པ་བཞིན་ནོ། །ཡང་ན། མིག་སྤྱི། (༢༨༩བ)
ཤེས་པ་རིག་པ་བློ་གསུམ་དུས་གསུམ་དང་སྦྱར་རོ། །ཡང་ན། དང་པོ་མཐོང་བ་མིགམཐོང་བ་ལ་དཔྱོད་པ་ཤེས་པ། ཇི་སྙེད་ཡོད་པ་ལ་བརྟེན་ནས་རིག་པ། ཇི་ལྟ་བ་བཞིན་རིག་པས་བློ། ཡང་ན། མ་ཐོས་པའི་ཆོས་ལ་རྗེས་སུ་དཔོག་པའི་ཤེས་རབ་དགག་པའི་ཕྱིར་མིགམོས་པ་ལས་བྱུང་བའི་ཤེས་པ་དགག་པའི་ཕྱིར་ཤེས་པ། མངོན་པའི་ང་རྒྱལ་ལས་བྱུང་བའི་ཤེས་པ་དགག་པའི་ཕྱིར་རིག་པ། ཟག་པ་དང་བཅས་པ་དགག་པའི་ཕྱིར་བློ། ཡང་ན། ཕྱི་རོལ་པའི་ཆགས་པ་དང་། ཐེ་ཚོམ། མ་རིག་པ། ཟག་པ་ལ་སོགས་པའི་གོ་རིམ་བཟློག་གོ། །མདོ་ལས་ཇི་སྐད་དུ་གསུངས་པའི་བཟླས་པ་འདི་དག་གི་གྲངས་བཞིན་དུ་བདེན་པའི་ཞེས་པ་མཐོང་ལམ། དེ་ཡོངས་སུ་ཤེས་པར་བྱ་ཞེས་པས་སྒོམ་ལམ། དེ་ཡོངས་སུ་ཤེས་སོ་ཞེས་པས་མི་སློབ་ལམ་བསྟན་ཅེས་ཟེར་རོ། །སློབ་དཔོན་གྱིས་བྱེ་བྲག་སྨྲ་བའི་ལུགས་དེ་སུན་འདོན་པ་ནི། དེ་ལྟར་ན་མཐོང་ལམ་འདི་གཅིག་པུ་ཆོས་འཁོར་དུ་རྣམ་པར་བཞག་པ་དེ་མི་འཐད་པར་ཐལ། མཐོང་བའི་ལམ་ཁོ་ན་ལན་གསུམ་དུ་བཟླས་པའང་མ་ཡིན་པ་གང་ཞིགམཐོང་ལམ་ལན་གཅིག་བཟླས་པ་དང་རྣམ་པ་བཞི་ཡིན་ན། རྣམ་པ་བཅུ་གཉིས་ཀྱང་བཟླས་པ་མེད་པས་འཁོར་ལོ་དང་ཆོས་མཐུན་པ་མེད་པའི་ཕྱིར། དེས་ན་མདོ་ལས་བསྟན་པའི་མཚན་ཉིད་ཅན་ཆོས་ཀྱི་རྣམ་གྲངས་དེ་ཆོས་འཁོར་ཀྱང་ཡིན་ཏེ། ཆོས་གསུམ་ནི། བསྟན་པ་དང་། སྒྲུབ་པ་དང་། འབྲས་བུའི་ཆོས་སོ། །གཞུང་ལའང་དོན་ཉེ་བར་འདོགས་སོ། །དེའང་ཆོས་ཀྱི་འཁོར་ལོ་རབ་ཏུ་སྟོན་པའི་ཕྱིར་རོ། །ལན་གསུམ་དུ་བཟླས་པ་དང་རྣམ་པ་བཅུ་གཉིས་ཀྱང་རུང་སྟེ། དེ་དག་གི་དོན་དུ་སྟོན་པའི་ཕྱིར། སྡུག་བསྔལ་ནས་ལམ་ཞེས་པའི་བར་བཟླས་(༢༩༠ན)
པ་གཅིག་དང་། ཡོངས་སུ་ཤེས་པར་བྱ་ནས་བསྒོམ་པར་བྱ་བའི་བར་གཉིས་དང་། ཡོངས་སུ་ཤེས་སོ་ནས་བསྒོམས་སོའི་བར་བཟླས་པ་གསུམ་པ་སྟེ་ལན་གསུམ་དུ་བཟླས་པའི་ཕྱིར་རོ། །ཇི་ལྟར་རྣམ་པ་བཅུ་གཉིས་ཡིན་ཅེ་ན། བདེན་པ་བཞི་པོ་རྣམས་ལ་རང་གི་ངོ་བོ་ལ་དམིགས་པ་སྡུག་བསྔལ་ཀུན་འབྱུང་འགོག་པ་ལམ་ཞེས་དང་། བྱ་བའི་ངོ་བོར་དམིགས་པ་ཤེས་པར་བྱ་སྤང་བར་བྱ་མངོན་སུམ་དུ་བྱ་བསྒོམ་པར་བྱ་ཞེས་དང་། མཐར་ཐུག་པར་དམིགས་པ་ཡོངས་སུ་ཤེས། སྤངས། མངོན་སུམ་དུ་བྱས། བསྒོམས་སོ་ཞེས་རྣམ་པ་གསུམ་དུ་བྱས་པའི་ཕྱིར། ཆོས་ཀྱི་རྣམ་གྲངས་དེ་བསྐོར་བ་ནི་གཞན་གདུལ་བྱའི་རྒྱུད་ལ་གཏོང་བར་བྱེད་པ་སྟེ། དོན་ཤེས་པར་བྱེད་པའི་ཕྱིར། ཡང་ན། འཕགས་ལམ་གསུམ་པོ་ཐམས་ཅད་ཀྱང་ཆོས་ཀྱི་འཁོར་ལོ་སྟེ་གདུལ་བྱའི་རྒྱུད་ལ་འཇུག་པས་འཁོར་ལོ་ཞེས་བྱ་བའི་ཕྱིར། ཀོའུ་ཌི་ཉ་ལ་མཐོང་ལམ་སྐྱེས་པ་ཙམ་གྱིས་ཆོས་ཅན། དེ་སྐོར་ཅེས་བརྗོད་པ་ཡིན་ཏེ། མཐོང་ལམ་གཅིག་པུ་ལ་ལན་གསུམ་དུ་བཟླས་པ་མེད་ཀྱང་། གཞན་ཀོའུ་ཌི་ཉའི་རྒྱུད་ལ་མཐོང་ལམ་སྐྱེས་པ་ནས་འཁོར་ལོ་བསྐོར་བའི་མགོ་བརྩམས་པའམ་ཚུགས་པའི་ཕྱིར་རོ། །གསུམ་པ་ཁམས་གང་དུ་དགེ་སྦྱོང་ཚུལ་གྱི་འབྲས་བུ་དུ་ཐོབ་པ་ལ། དངོས་དང་། དོགས་གཅོད་དོ། །དང་པོ་ནི། འདོད་པར་གསུམ་འཐོབ་ཐ་མ་ནི། །གསུམ་དུའོ། འདོད་པའི་ཁམས་སུ་རྒྱུན་ཞུགས་ལན་གཅིག་ཕྱིར་འོང་ཕྱིར་མི་འོང་གི་འབྲས་བུ་གསུམ་ཐོབ་ཀྱི། ཁམས་གཞན་དུ་ནི་མ་ཡིན་ལ། འབྲས་བུ་ཐ་མ་དགྲ་བཅོམ་ནི་ཁམས་གསུམ་དུ་འཐོབ་བོ། །གཉིས་པ་ནི། གོང་ན་མཐོང་ལམ་མེད། །མི་སྐྱོ་ལུང་ལས་འདིར་རྩོམ་ཞིང་། །དེར་མཐར་ཕྱིན་ཞེས་འབྱུང་ཕྱིར་རོ། །འབྲས་བུ་གཉིས་འདོད་ཆགས་མ་བྲལ་བས་ཐོབ་བྱ་ཡིན་པས་གོང་མར་མི་ཐོབ་པར་རིགས་ན། གལ་ཏེ་གཟུགས་ཀྱི་ཁམས་སུ་སྐྱེས་པ་ཞིག་ངེས་པ་ལ་འཇུག་ན་སེམས་ཀྱི་སྐད་ཅིག་བཅུ་དྲུག་ལ་ཕྱིར་མི་འོང་བའི་འབྲས་བུ་ཅིས་མི་ཐོབ་ཅེ་ན། མཐར་གྱིས་བ་ནི་ཁམས་གོང་(༢༩༠བ)
མར་སྐྱེ་བ་ལ་འདོད་པའི་ཉོན་མོངས་སྤང་དགོས་ཙ་ན། འདོད་པའི་ཉོན་མོངས་སྐྱེས་པའི་གང་དུ་མཐོང་ལམ་སྐྱེས་ཟིན་པས་མཐར་གྱིས་པ་ལ་གོང་ན་མཐོང་ལམ་མེད་པ་རྟོགས་སླ་བས་མ་བརྗོད་ལ། ཆགས་བྲལ་སྔོན་དུ་འགྲོ་བ་དྲུག་པ་སྤངས་པས་གོང་དུ་མི་སྐྱེ། དགུ་པ་སྤངས་ནས་ཁམས་གོང་མ་གཉིས་ཀྱི་རྟེན་ལ་སྐྱེས་ཙམ་ན་འདོད་ཆགས་ལས་བྲལ་བའི་ཕྱིར་མི་འོང་གི་འབྲས་བུ་ཐོབ་པ་མེད་དེ། དེ་ན་མཐོང་ལམ་མེད་པའི་ཕྱིར་རོ། །དེར་སྐྱེས་པའི་རྟེན་ལ་མཐོང་ལམ་མེད་པའང་གཟུགས་མེད་པའི་ཁམས་ན་ཡོད་ནའང་དེར་རང་བྱང་ཆུབ་ནི་མི་སྲིད་ལ། ཉན་ཐོས་ཀྱིས་མངོན་པར་རྟོགས་པ་ནི་གཞན་ལས་མ་ཐོས་པར་མི་འབྱུང་བས། དེར་བདག་མེད་སྟོན་པའི་གཞན་གྱི་སྒྲ་ཉན་པ་མེད་པ་དང་། གཟུགས་མེད་ཁམས་སུ་སྐྱེས་པས་འདོད་པ་ལ་མི་དམིགས་པའི་ཕྱིར། གཟུགས་ཁམས་ན་སོ་སྐྱེ་རྣམས་ཀྱི་མཐོང་ལམ་ཐོབ་པར་མི་ནུས་ཏེ། ཀུན་ཏུ་མི་སྐྱོ་བའི་ཕྱིར་ཏེ། སྙོམས་འཇུག་གི་བདེ་བ་ལ་ཆགས་པའི་ཕྱིར་དང་། སྡུག་བསྔལ་གྱི་ཚོར་བ་མེད་པའི་ཕྱིར་རོ། །འདོད་པ་ན་སྡུག་བསྔལ་གྱི་ཚོར་བ་མང་བ་དང་འབད་པས་བདེ་བ་རྣམས་ཀྱང་ཚེ་ཐུང་བའི་ཕྱིར་དང་། ནད་མེད་པ་དང་ལོངས་སྤྱོད་དང་གཉེན་བཤེས་དང་བྲལ་བ་སྲིད་པའི་ཕྱིར་སྐྱོ་བ་མང་ངོ་། །རིགས་པའོ། །ལུང་ལས་ཀྱང་བར་དོར་མྱ་ངན་ལས་འདའ་བ་ནས་གོང་དུ་འཕོ་བའི་བར་གང་ཟག་ལྔ་ནི་འདིར་ལམ་རྩོམ་པ་མགོ་འཛུགས་ཤིང་ཁམས་གོང་མ་དེར་མཐར་ཕྱིན་པར་འགྱུར་ཞེས་འབྱུང་བའི་ཕྱིར། །རྩོམ་པ་ནི་ཐར་པའི་ལམ་རྩོམ་ཞིང་མགོ་འཛུགས་པ་སྟེ་མྱང་འདས་ཀྱི་ཐབས་ཡིན་པའི་ཕྱིར་རོ། །གསུམ་པ་དགྲ་བཅོམ་འབྲས་གནས་ཀྱི་དབྱེ་བ་ལ། དྲུག་ཏུ་དབྱེ་བ་དང་། དགུར་དབྱེ་བའོ། །དང་པོ་ལ། དབྱེ་བ་དངོས་དང་། དབང་པོ་འཕོ་ཚུལ་ལོ། །དང་པོ་ལ། བསྟན་པ་དང་། བཤད་པའོ། །དང་པོ་ནི། དགྲ་བཅོམ་དྲུག་འདོད། མདོ་ལས་དགྲ་བཅོམ་དྲུག་ཏུ་(༢༩༡ན)
གསུངས་པར་འདོད་དེ། སྤངས་པའམ་བདེར་གནས་ལས་ཡོངས་སུ་ཉམས་པའི་ཆོས་ཅན་གྱི་རང་བཞིན་ཡོད་པ་ཅན་དང་། ཉམས་ཀྱིས་དོགས་ནས་དེ་གོང་དུ་བདག་ཉིད་འཆི་བར་སེམས་པའི་ཆོས་ཅན་དང་། སྤངས་པའི་རྣམ་གྲོལ་དེ་རྗེས་སུ་སྲུང་བའི་ཆོས་ཅན་དང་། སྤངས་པའམ་བདེ་བའི་རྣམ་གྲོལ་གང་ལ་གནས་པ་མི་བསྐྱོད་པ་སྟེ་སོ་ཐུབ་པ་དང་། དབང་པོ་རྟོགས་པ་དེ་འཕོ་བའི་སྐལ་ཅན་དང་། མི་གཡོ་ཞིང་མི་འགྱུར་བའི་ཆོས་ཡོད་པ་ཅན་ནོ། །དེ་ལའང་རང་བཞིན་གྱིས་དབང་པོ་རྣོན་པོ་དང་། དབང་པོ་འཕོས་པས་དབང་པོ་རྣོ་བའོ། །གཉིས་པ་ལ། གཉིས་སུ་བསྡུ་བ། རིགས་དང་འབྲས་བུ་གང་ལས་ཉམས་པ། རིགས་ཀྱི་དབྱེ་བ་དེ་གཞན་ལའང་སྦྱར་བ། ལམ་གང་ལ་དབང་པོ་འཕོ་བ། ཉམས་པའི་རབ་ཏུ་དབྱེ་བའོ། །དང་པོ་ལ། རིགས་ཅན་ལྔ་དུས་ཀྱི་རྣམ་གྲོལ་དུ་བསྟན་པ། དྲུག་པ་དུས་ལ་མི་ལྟོས་པར་བསྟན་པ། དེ་ལས་འཕྲོས་པའི་དོན་ཏོ། །དང་པོ་ནི། དེ་དག་ལས། །ལྔ་ནི་དད་པས་མོས་ལས་སྐྱེས། །དེ་དག་རྣམ་གྲོལ་དུས་དང་སྦྱོར། །དེ་དག་ལས་མི་གཡོ་བའི་ཆོས་ཅན་མ་གཏོགས་པ་གཞན་ལྔ་ནི་དད་པས་མོས་པ་སྔོན་དུ་འགྲོ་བ་ལས་སྐྱེས་པའོ། །ལྔ་པོ་དེ་དག་གི་སེམས་ཀྱི་རྣམ་གྲོལ་ནི་ཡོ་བྱད་དང་ནད་མེད་པ་དང་ཡུལ་གྱི་ཁྱད་པར་ལ་སོགས་ཀྱི་དུས་ལས་བྱུང་བས་དུས་དང་སྦྱོར་བས་སྤངས་པ་སྟེ། མིག་གཅིག་པ་ཞར་དོགས་པ་བཞིན་རྟག་ཏུ་རྗེས་སུ་བསྲུང་བའི་ཕྱིར། དེས་ན་འདི་ནི་དུས་ལ་བལྟོས་པའང་ཡིན་རྣམ་པར་གྲོལ་བའང་ཡིན་པས་དུས་ཀྱིས་རྣམ་པར་གྲོལ་བསྟེ་བར་གྱི་ཚིག་མི་མངོན་པར་བྱས་པའི་ཕྱིར་མར་གྱི་བུམ་པ་བཞིན་ནོ། །འདི་དག་གི་ཏིང་ངེ་འཛིན་མངོན་དུ་འགྱུར་བ་ཡོ་བྱད་ལ་བལྟོས་ཏེ། ཡོངས་སུ་མྱ་ངན་ལས་འདས་པའི་མདོ་ལས། གང་ཟག་ཅིག་ན་རེ། ངའི་གནས་ཁང་ཐམས་ཅད་དར་གྱི་ལྡ་ལྡི་བྲེས་ཤིགདེ་ལྟར་བྱས་ན་དགྲ་བཅོམ་པ་ཐོབ་སྟེ་འོང་ཟེར་བ་ལ། (༢༩༡བ)
ཤཱ་རིའི་བུ་ན་རེ། ཁྱོད་ལྟོགས་པས་ཁྱོད་ཀྱི་གནས་ཁང་དར་གྱི་བླ་རེས་བྲེར་མི་འོང་བྱས་པ་ལ། བུདྡྷའི་ཞལ་ནས། ཀུན་ནས་སློང་ལ་དར་གྱི་བླ་རེ་བྲེས་ཤིག་གསུངས་པ་དེ་ལྟར་བྱས་པས་གང་ཟག་དགྲ་བཅོམ་པའི་འབྲས་བུ་ཐོབ་པ་ཞེས་པ་དང་། ནད་མེད་པ་དང་དགྲའི་ཚེར་མ་མེད་པ་སོགས་ཡུལ་གྱི་བྱེ་བྲག་ལ་བལྟོས་པའི་ཕྱིར་དུས་ལ་བལྟོས་པ་ཡིན་ནོ། །གཉིས་པ་ནི། མི་གཡོའི་ཆོས་ཅན་མི་གཡོ་བ། །དེ་ཕྱིར་དེ་དུས་མི་སྦྱོར་གྲོལ། །དེ་ནི་མཐོང་ཐོབ་རྒྱུ་ལས་བྱུང་། །མི་གཡོ་བའི་ཆོས་ཅན་གྱི་རྣམ་གྲོལ་ནི་ཆོས་ཅན། མི་གཡོ་བ་སྟེ་དེ་ཡོངས་སུ་མི་ཉམས་པའི་སྒོ་ནས་ཉོན་མོངས་པས་གཡོ་བར་མི་ནུས་པའི་ཕྱིར་རོ། །དེ་ནི་དུས་དང་མི་བལྟོས་པ་དང་མི་སྦྱོར་བར་རྣམ་པར་གྲོལ་བ་ཡིན་ཏེ། དེ་ཉིད་ཀྱི་ཕྱིར་དང་། དེ་ནི་འདོད་དགུར་ཏིང་ངེ་འཛིན་མངོན་སུམ་དུ་གྱུར་པའི་ཕྱིར་རོ། །ཡང་ཡོངས་སུ་ཉམས་པ་སྲིད་པ་དུས་གཞན་གྱི་བར་གྲོལ་བས་དུས་ཀྱི་རྣམ་གྲོལ་དང་མི་སྲིད་པ་གཏན་གྱི་རྣམ་གྲོལ་དུས་དང་མི་སྦྱོར་རྣམ་པར་གྲོལ་བའོ། །དེ་སློབ་པར་གྱུར་པ་ལས་དབང་པོ་དག་འཕོ་བར་བྱེད་ནའང་མཐོང་བས་ཐོབ་པ་ཉིད་དུ་འགྱུར་ལ། འོན་ཏེ་སློབ་པའི་དུས་ན་མི་འཕོ་བར་རང་བཞིན་གྱི་དབང་པོ་རྣོན་པོ་ཞིག་ཡིན་ན་སེམས་ཀྱི་སྐད་ཅིག་བཅུ་དྲུག་ལ་མཐོང་བས་ཐོབ་པ་ཁོ་ན་ཡིན་པའི་ཕྱིར། དེ་བས་མི་གཡོ་བའི་ཆོས་ཅན་དེ་ནི་མཐོང་ཐོབ་ཀྱི་རྒྱུ་ལས་བྱུང་བ་ཡིན་ནོ། །མི་གཡོ་བའི་ཆོས་ཅན་དེ་དགྲ་བཅོམ་པ་ཉིད་ཀྱི་གནས་སྐབས་ན་དབང་པོ་དག་འཕོ་བར་བྱེད་པ་གང་ཡིན་པ་དེ་ནི་མཐོང་བས་ཐོབ་པ་སྔོན་དུ་འགྲོ་བ་མ་ཡིན་པར་ཁོང་དུ་ཆུབ་པར་བྱའོ། །གསུམ་པ་ནི། ཁ་ཅིག་དང་པོ་ནས་དེའི་རིགས། །ཁ་ཅིག་སྦྱངས་པ་ལས་གྱུར་ཏོ། །དགྲ་བཅོམ་དྲུག་པོ་འདི་ཁ་ཅིག་ནི་དང་པོ་ཉིད་ནས་འཆི་བར་སེམས་པ་དེའི་ཆོས་ཅན་གྱི་རིགས་ཅན་ཡིན་ལ། ཁ་ཅིག་ནི་ཡོངས་སུ་ཉམས་པའི་ཆོས་ཅན་དུ་གྱུར་པ་དབང་པོ་རྣམས་སྦྱངས་པ་ལས་འཆི་བར་སེམས་པའི་ཆོས་ཅན་དུ་གྱུར་པ་སྟེ། མ་ཞར་རྩེག་འགྲོས་སུ་(༢༩༢ན)
གོང་མ་ན་ཡར་འགྲོ་བ་ལས་ཐོད་རྒལ་གྱི་སྒོ་ནས་མི་འགྲོ་བའི་ཕྱིར། མི་གཡོ་བའི་ཆོས་ཅན་གྱི་བར་དུའང་དེ་དང་འདྲ་བར་རིགས་པར་བྱའོ། །བྱེ་བྲག་ཏུ་སྨྲ་བ་ན་རེ། མ་ཆགས་འཕགས་རིགས་ཞེས་དགེ་བའི་རྩ་བར་འདོད་པ་དང་། གཞན་ནི་སོ་སྐྱེའི་གནས་སྐབས་ནས་བཟུང་སྟེ་དབང་པོའི་ཁྱད་པར་དང་། མདོ་སྡེ་པ་ན་རེ། སེམས་ཀྱི་ས་བོན་གྱི་ནུས་པའོ་ཞེས་ཟེར་རོ། །དེ་ལ་དགྲ་བཅོམ་དྲུག་པོའི། དང་པོ་ནི། ཉམས་པར་འགྱུར་བའི་སྐལ་བ་ཅན་ཡིན་གྱི། འཆི་བར་སེམས་པ་སོགས་བཞི་པོ་མ་ཡིན་པ་དང་། གཉིས་པ་དང་གསུམ་པ་ནི། འཆི་བར་སེམས་པར་འགྱུར་བའི་སྐལ་བ་ཅན་དང་། རྗེས་སུ་བསྲུང་བར་འགྱུར་བའི་སྐལ་བ་ཅན་ནོ། །བཞི་པ་ནི། ཡོངས་སུ་ཉམས་པའི་རྐྱེན་སྟོབས་ལྡན་མེད་ན། རྗེས་སུ་མ་བསྲུངས་ཀྱང་འབྲས་བུ་དེ་ལ་གནས་པར་འགྱུར་བའི་སྐལ་ཅན་ཡིན་ཅིང་ཉམས་པར་མི་འགྱུར་བ་དང་། མངོན་པར་བརྩོན་པ་མེད་ན་རྟོགས་པའི་སྐལ་ཅན་དུ་འཕེལ་བར་མི་འགྱུར་བའི་སྐལ་བ་ཅན་ཡིན་ནོ། །ཡོངས་སུ་ཉམས་པའི་རྐྱེན་ཡང་། མདོ་ལས། རྐྱེན་ལྔ་དང་རྒྱུ་ལྔས་དུས་ཀྱི་རྣམ་པར་གྲོལ་བའི་དགྲ་བཅོམ་པ་ཡོངས་སུ་ཉམས་པར་འགྱུར་རོ། །ལྔ་གང་ཞེ་ན། ལས་ཀྱི་མཐའ་ལ་ཞུགས་པ་ཡིན། སྨྲ་བ་ལ་ཞུགས་པ་ཡིན། རྩོད་པ་ལ་ཞུགས་པ་ཡིན། རིང་དུ་སྦྱོར་དང་ལྡན་པ་ཡིན། ནད་ཀྱིས་ཡུན་རིང་དུ་ཐེབས་པ་ཡིན། ཅེས་སོ། །ལྔ་པ་ནི། མི་གཡོ་བ་རྟོགས་པར་འགྱུར་བའི་སྐལ་བ་ཅན་གང་ཡིན་པའོ། །དྲུག་པ་ནི། ཡོངས་སུ་ཉམས་པར་མི་འགྱུར་བའི་སྐལ་བ་ཅན་གང་ཡིན་པའོ། །དང་པོ་ནི། སློབ་པའི་གནས་སྐབས་ན་རྒྱུན་སྦྱོར་གུས་སྦྱོར་མེད་པ་དང་། གཉིས་པ་ལ་རྒྱུན་སྦྱོར་མེད་མོད། ཁྱད་པར་དུ་གུས་སྦྱོར་མེད་པའོ། །དེའང་གཉིས་པ་འདི་ནི་ལུས་ལ་སྨོད་པའི་སྤྱོད་པ་ཆེས་མང་བས། བདག་བརླག་(༢༩༢བ)
པར་སེམས་ཤིང་ཉམས་དོགས་པས་ལུས་མི་གཙང་བ་ལ་བདག་གནས་པ་དགོས་པ་མེད་པས་འཆི་བར་སེམས་པའམ། སྲོག་ལ་མི་བལྟོས་པར་རྣམ་གྲོལ་ཐོབ་པར་བྱེད་དེ། ཇི་སྐད་དུ། མགྲིན་པ་ལ་མཚོན་ཆའི་ཁ་བསྟན་ཏེ། དེ་ནས་སེམས་རྣམ་པར་གྲོལ་ལོ། །ཞེས་གསུངས་པ་ལྟ་བུའོ། །གསུམ་པ་ནི། གུས་སྦྱོར་མེད་ཅིང་རྒྱུན་དུ་སྦྱོར་བ་ཡིན་ནོ། །བཞི་པ་ནི། གུས་པར་སྦྱོར་བ་ཡིན་གྱི་རྒྱུན་དུ་སྦྱོར་བ་མ་ཡིན་པའོ། །ལྔ་པ་ནི། རྒྱུན་དང་གུས་པ་གཉིས་ཀར་སྦྱོར་བ་པ་དབང་པོ་རྟུལ་པོ་ཡིན་ནོ། །དྲུག་པ་དང་འདི་གཉིས་དབང་པོས་བྱས་པའི་བྱེ་བྲག་ཡོད་ཀྱི། སྦྱོར་བས་བྱས་པ་ནི་མ་ཡིན་ནོ། །དྲུག་པ་ནི། གཉིས་ཀར་སྦྱོར་བ་དབང་པོ་རྣོན་པོ་ཡིན་ནོ། །ཡོངས་སུ་ཉམས་པའི་ཆོས་ཅན་ཀྱང་སྲིད་པ་ལས་ཡོངས་སུ་ཉམས་པར་འགྱུར་བ་མ་ཡིན། འཆི་བར་སེམས་པ་ཡང་བདག་ཉིད་ལྕེབ་པར་སྲིད་པ་ལས་ངེས་པར་ལྕེབ་པ་མིན། རྟོགས་པའི་སྐལ་བ་ཅན་གྱི་བར་དུའང་རྟོགས་པར་འགྱུར་བ་མ་ཡིན་གྱི། སྲིད་པའི་ཕྱིར་དེ་སྐད་ཅེས་བཤད་དོ། །ཁ་ཅིག་མི་ཉམས་ཀྱང་སྲིད། ཁ་ཅིག་མི་གསོད་ཀྱང་སྲིད་པ་སོགས་དེ་ལྟར་ཡིན་པས་རྫས་ལ་དེ་ལྟར་མིན་པས་ཁམས་གོང་གཉིས་ན་དྲུག་ཅར་གྱི་རིགས་ཡོད་པས་ཁམས་གསུམ་ན་དགྲ་བཅོམ་པ་དྲུག་ཡོད་པར་རུང་ངོ་། །ཡང་དག་ངེས་པར་ཉམས་པར་འགྱུར་བ་ནས་མངོན་པར་རྟོགས་པའི་བར་དུ་འགྱུར་བ་དེ་དག་གི་ལྟར་ན་འདོད་ཁམས་ན་རིགས་དྲུག་གོ། །ཁམས་གོང་མ་གཉིས་ན་གནས་པ་ལས་མི་བསྐྱོད་པ་དང་མི་གཡོ་བའི་ཆོས་ཅན་གཉིས་ཏེ། ཁམས་གོང་ན་ཉམས་སུ་ཉམས་པ་མེད་པའི་ཕྱིར་ཉམས་པའི་ཆོས་ཅན་ཡང་མེད་ལ། རྗེས་སུ་སྲུང་བའི་ཆོས་ཅན་ཡང་ཡོངས་སུ་ཉམས་པ་མེད་པ་ཉིད་ཀྱི་རྗེས་སུ་བསྲུང་བར་བྱ་བ་ཉིད་མི་འཐད་པའི་ཕྱིར་མེད་ལ། དབང་པོ་འཕོ་བ་མེད་པ་དེ་ཉིད་ཀྱི་ཕྱིར་རྟོགས་པའི་སྐལ་བ་ཅན་ཡང་མེད་དེ། (༢༩༣ན)
དེ་དང་གོང་མར་སྐྱེས་པ་ནི། །ཡོངས་ཉམས་དབང་པོ་འཕོ་མི་བསྟེན། །ཅེས་འབྱུང་བས་སོ། །དེས་ན་བདག་ཉིད་འཆི་བར་སེམས་པའང་མེད་ལ་གཞན་གྱིས་གསོད་པའང་མེད་པས་འཆི་བར་སེམས་པ་མེད་དོ། །གཉིས་པ་རིགས་དང་འབྲས་བུ་གང་ལ་ཉམས་པ་ནི། བཞི་ནི་རིགས་ལས་ལྔ་འབྲས་ལ། །ཉམས་འགྱུར་དང་པོ་ལས་མ་ཡིན། །འཆི་བར་སེམས་པའི་ཆོས་ཅན་ལ་སོགས་པ་བཞི་ནི་རིགས་ལས་ཉམས་པར་འགྱུར་ཏེ། སྦྱངས་པ་ལས་གྱུར་པའི་གོང་དུ་འགྲོ་བ་ལ་ཙེག་གེ་འགྲོ་བ་ཉམས་པའི་དུས་སུ་ཙེག་གེ་འགྲོས་སུ་ཉམས་པའང་སྲིད། ཐོད་རྒལ་དུ་ཉམས་པའང་སྲིད་པའི་ཕྱིར། སྐས་གདང་ལ་འཛེགས་པ་ལས་སར་ལྷུང་བ་ལྟ་བུའོ། །ཡོངས་སུ་ཉམས་པའི་ཆོས་ཅན་ནི་རང་རིས་ལས་ཉམས་པར་མི་འགྱུར་ཏེ། རིགས་དེ་བཅོས་མ་མ་ཡིན་པའི་ཕྱིར། ས་གཞི་ལ་འདུག་པ་མི་ལྟུང་བ་དང་འདྲ། ཡོངས་སུ་ཉམས་པའི་ཆོས་ཅན་སོགས་ལྔ་ནི་འབྲས་བུ་དེ་གློ་བུར་བ་ཡིན་པས་ཐོབ་པ་ལས་ཡོངས་སུ་ཉམས་པར་འགྱུར་ལ། དེ་དག་ཀྱང་རིགས་དང་འབྲས་བུ་དང་པོ་གང་ཡིན་དེ་ལས་ཉམས་པ་མ་ཡིན་ཏེ། དགྲ་བཅོམ་དེ་སློབ་པའི་གནས་སྐབས་ན་ཡོད་པའི་རིགས་དང་པོ་དེ་སློབ་པ་དང་མི་སློབ་པའི་ལམ་གཉིས་དག་གིས་བསྒོམས་པས་བརྟན་པོར་བྱས་པའི་ཕྱིར། ཞེས་པ་འདི་ལ། སློབ་དཔོན་དབྱིག་བཤེས་ན་རེ། དེ་ནི་དེའི་གཏན་ཚིགས་སུ་འགྱུར་བ་མ་ཡིན་ཏེ། ཡིན་ན་སོ་སྐྱེའི་དུས་སུ་ཉམས་པའི་ཆོས་ཅན་དེ་འཆི་བར་སེམས་པའི་ཆོས་ཅན་དུ་སྦྱངས་པས་སྦྱངས་པ་ལས་གྱུར་པའི་རིགས་གང་ཡིན་པ་དེ་ལས་ཡོངས་སུ་ཉམས་པར་འགྱུར་བའི་རིགས་དེ་ཡང་ཆོས་ཅན། ཡོངས་སུ་མི་ཉམས་པར་ཐལ་བར་འགྱུར་ཏེ། སློབ་པ་དང་མི་སློབ་པའི་ལམ་དག་གིས་བརྟན་པར་བྱས་པའི་ཕྱིར། འདོད་མི་ནུས་པའི་ཕྱིར། ལམ་གཉིས་ཀྱིས་བརྟན་པར་བྱས་པས་མི་ཉམས་པའི་རྒྱུ་མཚན་དུ་མི་རུང་བར་གྲུབ་བོ། །(༢༩༣བ)
འོ་ན་འདིའི་རྒྱུ་མཚན་ཅི་ཞེ་ན། དང་པོ་ནས་འཆི་བར་སེམས་པ་ལྟ་བུ་དེའི་རིགས་སུ་འདུག་པ་མི་ཉམས་པ་ནི་ཆོས་ཉིད་ཡིན་ལ། སྦྱངས་ཏེ་ཐོབ་པ་ལས་ཉམས་པ་འདིའང་ཆོས་ཉིད་ཀྱི་ཕྱིར་རོ། །གཏན་ཚིགས་དེ་འབྲས་བུ་ལས་མི་ཉམས་པའི་རྒྱུ་མཚན་དུའང་མི་རིགས་ཏེ། རྒྱུན་ཞུགས་འཇིག་རྟེན་པའི་ལམ་གྱིས་ཐོབ་པ་མ་ཡིན་པའི་ཕྱིར། དེས་ན་འཆི་བར་སེམས་པའི་ཆོས་ཅན། སྦྱངས་པ་ལས་གྱུར་པའི་རིགས་གང་ཡིན་པ་དེ་ཉམས་པར་སྨྲ་བ་མི་རིགས་པར་ཐལ། སློབ་པ་དང་མི་སློབ་པའི་ལམ་དག་གིས་བརྟན་པོར་བྱས་པའི་ཕྱིར། ཁྱབ་པ་ཡོད་དེ། སློབ་པའི་གནས་སྐབས་ན་རིགས་ཀྱི་དང་པོར་གྱུར་པའི་ཕྱིར། འདི་ནི་འདུས་བཟང་ཡང་འདོད་དེ། སློབ་པའི་སྐབས་སུ་རིགས་གཞན་ཐོབ་ན་དགྲ་བཅོམ་ཉིད་ཐོབ་པ་དེས་ཀྱང་དེ་ཡོངས་སུ་མི་འདོར་ཏེ། སྦྱངས་པ་ལས་གྱུར་པའི་རིགས་ཁོ་ན་ལ་མི་གནས་པ་མ་ཡིན་པའི་ཕྱིར་ཞེས་བཤད་དོ། །འཆི་བར་སེམས་པའི་ཆོས་ཅན་གྱི་རིགས་མི་སློབ་པའི་སྐབས་ན་འཕྲལ་ལ་ཐོབ་པ་སློབ་པའི་སྐབས་ན་ཐོབ་པ་མིན་པ་དེ་ལས་ཡོངས་སུ་ཉམས་ཕན་ཡོངས་སུ་ཉམས་པར་འགྱུར་ཏེ། དེ་གནས་སྐབས་གཉིས་ཀྱི་བརྟན་པོར་བྱས་པ་མ་ཡིན་པའི་ཕྱིར། དེ་བས་ན་འདི་གཏན་ཚིགས་སུ་མི་རུང་བ་ཉིད་དོ། །གཏན་ཚིགས་དེས་འབྲས་བུ་དང་པོ་ལས་མི་ཉམས་པ་དེ་ལྟར་ན་རྒྱུན་ཞུགས་ཀྱང་ཡོངས་སུ་ཉམས་པར་ཐལ། རྒྱུན་ཞུགས་ནི་ལམ་གཉིས་ཀྱིས་བརྟན་པོར་མ་བྱས་པའི་ཕྱིར། ཡང་གཏན་ཚིགས་དེ་ནི་རིགས་མི་ཉམས་པའི་རྒྱུ་མཚན་དུ་བཤད་ཀྱི། འབྲས་བུ་ལས་མི་ཉམས་པའི་རྒྱུ་མཚན་ནི་མ་ཡིན་པས་དེའི་རྒྱུ་མཚན་མཐོང་སྤོང་གཞི་མེད་སོགས་འཆད་པར་འགྱུར་རོ། །རིགས་ནི་ལམ་གཉིས་དག་གིས་བརྟན་པོར་བྱས་པ་སྲིད་དེ། ཚེ་འདིར་དྲོ་བ་ལ་སོགས་པའམ་ཚེ་ཕ་རོལ་གྱི་སྤོང་ལམ་འདས་ལམ་གཞན་གྱིས་སློབ་པའི་གནས་(༢༩༤ན)
སྐབས་ན་བསྒོམ་པའི་ཕྱིར་ཞེས་ཟེར་རོ། །ལམ་གཉིས་ཀྱིས་བརྟན་པོར་བྱས་ནས་ཕྱིས་མི་སློབ་པ་ན་སྦྱངས་པ་ལས་གྱུར་ཀྱང་དང་པོ་ནས་ཡོད་པའི་རིགས་དེ་ནི་མི་ཉམས་ཤིང་། ལར་ཉམས་སམ་ཞེ་ན། སྦྱངས་པ་ལས་གྱུར་པའི་འཆི་བའི་སེམས་པའི་ཆོས་ཅན་གྱི་རིགས་ཕྱིས་ཐོབ་པའི་གློ་བུར་བ་གང་ཡིན་པ་དེ་ནི་ཉམས་པར་འགྱུར་ཏེ། གནས་སྐབས་གཉིས་ཀྱིས་བརྟན་པོར་མ་བྱས་པའི་ཕྱིར། རིགས་ལས་མི་ཉམས་པར་བསྟན་ནས་འབྲས་བུ་ལས་མི་ཉམས་པར་བསྟན་པར་བྱ་བ་ནི་འབྲས་བུ་དང་པོ་ལས་ཉམས་པར་མི་འགྱུར་རོ། །འབྲས་བུ་ལྷག་མ་གསུམ་ལས་ནི་ཡོངས་སུ་ཉམས་པར་འགྱུར་རོ། །འབྲས་བུ་དང་པོ་ལས་ཉམས་པ་མེད་པ་དེ་ཉིད་ཀྱི་ཕྱིར་རྒྱུན་ཞུགས་ཀྱི་འབྲས་བུ་ལས་ཡོངས་སུ་ཉམས་པ་མེད་དོ། །རིགས་དང་འབྲས་བུ་ལས་མི་ཉམས་པ་དེ་ལྟར་ན་ཡོངས་སུ་ཉམས་པའི་ཆོས་ཅན་ནི་རྣམ་པ་གསུམ་ཡིན་ཏེ། དེ་སོ་ན་གནས་པ་བཞིན་དུ་དབང་པོའང་མི་འཕོ། ཡོངས་སུ་ཉམས་ནས་སློབ་པར་ཡང་མི་འགྱུར་བར་མྱ་ངན་ལས་འདས་པའམ། དེའི་སོ་ལ་མྱ་ངན་ལས་མི་འདའ་བར་མི་གཡོ་བ་སོགས་སུ་དབང་པོ་འཕོ་བའམ། འབྲས་བུ་ལས་ཉམས་ནས་སློབ་པར་འོང་ཡང་ཡོངས་སུ་ཉམ་པའི་རིགས་ལས་མི་ཉམས་པའོ། །འཆི་བར་སེམས་པའི་ཆོས་ཅན་ནི་བཞི་སྟེ། འཆི་བར་སེམས་པ་ཡོངས་སུ་ཉམས་པའི་ཆོས་ཅན་གྱི་རིགས་སུ་སླར་འོང་བའོ། །དེ་བཞིན་དུ་གསུམ་ལའང་རེ་རེ་བསྐྱེད་དེ། རྗེས་སུ་སྲུང་བའི་ཆོས་ཅན་ནི་ལྔ་ཡིན་ཏེ། དེ་སོ་ན་གནས་བཞིན་དུ་ཡོངས་སུ་མྱ་ངན་ལས་འདའ་བ་དང་། དབང་པོ་འཕོ་བ་དང་། ཡོངས་སུ་ཉམས་ནས་སློབ་པ་ཉིད་དུ་འགྱུར་བ་དང་། ཡོངས་སུ་ཉམས་པ་དང་འཆི་བར་སེམས་པའི་རིགས་སུ་སླར་འོང་བའོ། །གནས་པ་ལས་མི་བསྐྱོད་པ་ནི་རྣམ་པ་དྲུག་ཡིན་ཏེ། ལྔ་པོ་དེ་དག་ཉིད་(༢༩༤བ)
དང་། དྲུག་པ་རྗེས་སུ་བསྲུང་བའི་ཆོས་ཅན་གྱི་རིགས་སུ་སླར་འོང་བའོ། །རྟོགས་པའི་སྐལ་བ་ཅན་རྣམ་པ་བདུན་ཡིན་ཏེ། དྲུག་པ་དེ་དག་ཉིད་དང་། བདུན་པ་གནས་པ་ལས་མི་བསྐྱོད་པའི་རིགས་ཅན་སླར་འོང་བའོ། །ཕྱིས་དེ་སློབ་པར་གྱུར་ན་གང་གི་སློབ་པའི་གནས་སྐབས་ན་ཡོད་པའི་རིགས་དང་པོ་དེ་ཁོ་ན་ལ་གནས་ཀྱི། དང་པོའི་རང་རིས་ལས་གོང་མ་གཞན་དག་ལ་མ་ཡིན་ཏེ། ལྷུང་ན་སྐས་གདབ་དུ་མི་ཆགས་པར་ས་ལ་ལྟུང་བ་དང་འདྲའོ། །དེ་ལྟར་མ་ཡིན་ན་གང་ཟག་དེ་འཕེལ་བ་ཁོ་ནར་འགྱུར་གྱི། ཡོངས་སུ་ཉམས་པར་མི་འགྱུར་ཏེ། སློབ་པའི་གནས་སྐབས་ཀྱི་རིགས་ལས་ཁྱད་པར་ཅན་རྙེད་པའི་ཕྱིར། ཅི་འབྲས་བུ་དང་པོ་ལས་མི་ཉམས་ཞེ་ན། མི་ཉམས་ཏེ། མཐོང་སོང་རྣམས་ཀྱི་གཞི་རྟེན་མེད་པའི་ཕྱིར་ཏེ། དེའི་གཞི་ནི་འཇིག་ཚོགས་ལ་ལྟ་བའི་རྩ་བ་ཅན་ཡིན་པས། འཇིག་ཚོགས་ནི་བདག་གི་གཞི་ལ་འཇུག་པ་ཅན་ཡིན་ན་གཞི་མེད་པས་བདག་དེ་ཡང་མེད་པས་ཡོངས་སུ་ཉམས་པ་མེད་པའི་ཕྱིར་རོ། །འོ་ན་མེད་པ་ལ་དམིགས་པར་འགྱུར་རོ་ཞེ་ན། མེད་པ་ལ་དམིགས་པ་མ་ཡིན་གྱི་སྡུག་བསྔལ་བདེན་པ་སོགས་དམིགས་རྐྱེན་དུ་ཡོད་པ་ལ་བདག་ཏུ་ཕྱིན་ཅི་ལོག་གི་སེམས་དང་སེམས་ལས་བྱུང་བས་དམིགས་པ་ཡིན་ཏེ། སྡུག་བསྔལ་སོགས་བདེན་པ་དག་ལ་རྟགས་སོགས་སུ་དམིགས་པའི་ཕྱིར། དེ་ལྟར་མ་ཡིན་པའི་ཉོན་མོངས་པ་གཞི་མེད་པ་དེ་གང་ཞིག་ཡིན། ཆགས་སོགས་སྒོམ་སྤོང་ཡིན་ན། དེའང་མི་གཙང་སོགས་ཀྱི་དངོས་པོ་ལ་གཙང་བདེ་རྟག་པར་དམིགས་པའི་ཕྱིར་གཞི་དང་། བཅས་པར་མི་ཐལ་ལམ་ཞེ་ན། ཁྱད་ཡོད་དེ། བདག་ཏུ་ལྟ་བ་ནི་བདག་མེད་བཞིན་དུ་གཟུགས་སོགས་ཀྱིས་དངོས་པོ་ལ་རྒྱུ་དགེ་མི་དགེའི་ལས་བྱེད་པ་པོ་དང་། དེའི་འབྲས་བུ་ཚོར་བ་པོ་དང་། གཉིས་ཀ་ལ་དབང་བསྒྱུར་བ་(༢༩༥ན)
ཉིད་དུ་བདག་ཡང་དག་པ་མ་ཡིན་པར་སྒྲོ་འདོགས་པར་བྱེད་ལ། མཐར་འཛིན་པ་ལ་སོགས་པའི་མཐོང་སྤོང་རྣམས་ཀྱང་བདག་གི་གཞི་ཡི་རྗེས་སུ་ཞུགས་པ་ཡིན་པས་མཐོང་སྤོང་གི་ཉོན་མོངས་པ་ནི་གཞི་མེད་པ་དག་ཅེས་བྱའོ། །སྒོམ་སྤོང་འདོད་ཆགས་ཁོང་ཁྲོ་ང་རྒྱལ་མ་རིག་པ་རྣམས་ནི་གཟུགས་སོགས་ཀྱི་དངོས་པོ་ལ་ཆགས་པ་དང་། ཀུན་ནས་མནར་སེམས་དང་། ཁེངས་པ་དང་མི་གསལ་བའི་ངོ་བོར་ཞུགས་ཀྱི་སྒྲོ་མི་འདོགས་པ་འབའ་ཞིག་ཏུ་ཟད་པས་གཞི་དང་བཅས་པར་བརྗོད་པའི་ཕྱིར་ཏེ། གང་ལ་དེ་དག་འཇུག་པར་འགྱུར་བ་སྡུག་པ་ལ་སོགས་པ་ཙམ་ཡོད་ཀྱི། དངོས་པོར་བརྗོད་པ་བདག་ལ་སོགས་པ་ནི་བག་ཞད་ཀྱང་མེད་པའི་ཕྱིར། དེའང་སྒོམ་སྤོང་འདོད་ཆགས་ཀྱི་གཞི་ནི་སྐྲ་དང་སོ་སེན་སྡུག་པ་ལ་སོགས་པའི་མཚན་ཉིད་ཡིད་དུ་འོང་བ་ཡིན། ཁོང་ཁྲོ་བ་ནི་དེ་དག་མི་སྡུག་པས་ཡིད་དུ་མི་འོང་བ་ཡིན། ང་རྒྱལ་ཀྱང་ཡིད་དུ་མི་འོང་བ་ཡིན། མ་རིག་པའི་ཡང་གཉིས་པོ་དེ་ཉིད་ཅུང་ཟད་ཀུན་ཏུ་རྨོངས་པར་འགྱུར་བའོ། །དེས་ན་སྡུག་པ་ལ་རྨོངས་པའི་མ་རིག་པ་དེ་མི་སྡུག་པ་ལས་མི་སྐྱེ། མི་སྡུག་པ་ལས་སྐྱེས་པའི་མ་རིག་པ་དེ་སྡུག་པ་ལ་མི་སྐྱེ། བར་མ་ལས་སྐྱེས་པའི་མ་རིག་པ་དེ་སྡུག་མི་སྡུག་ལས་མི་སྐྱེ། དེ་ལྟ་བས་ན་སྒོམ་སྤོང་ནི་གཞི་སོ་སོར་ངེས་པ་ཡོད་ཀྱི། མཐོང་སྤོང་ལོག་ཞུགས་ལ་ལོག་ཞུགས་མ་གཏོགས་དངོས་སུ་ལོག་ཞུགས་ལ་གཞི་སོ་སོར་ངེས་པ་མེད་དེ། བདག་རང་མེད་པར་དངོས་སུ་ལོག་ཞུགས་ལ་གཞི་མེད་ཙམ་ན་ལོག་ཞུགས་ལ་ལོག་ཞུགས་ལའང་གཅན་གཟན་འཕར་བའི་དཔྱོད་ཐག་བཞིན་གཞིའི་གཞི་མེད་དོ། །གཞན་ནི་སྒོམ་སྤོང་རྣམས་ལ་ནི་གཞི་ཡིད་དུ་འོང་བ་དང་མི་འོང་བ་སོ་སོར་ཡོད་ཀྱི། མཐོང་སྤོང་རྣམས་ནི་བདག་ལ་སོགས་པའི་(༢༩༥བ)
མཚན་ཉིད་མེད་དེ། དེས་ན་གཞི་མེད་པ་དག་ཅེས་བྱའོ། །སློབ་དཔོན་གྱིས་གཞན་ཡང་འཕགས་པ་སློབ་པ་ངེས་པར་མི་རྟོག་པ་དྲན་པ་ཉམས་པ་ཉོན་མོངས་དང་ལྡན་པ་ལ་ཆགས་སོགས་ཉོན་མོངས་སྐྱེ་བར་འགྱུར་ཏེ། ཐག་ཁྲ་ལ་སྦྲུལ་དུ་འདུ་ཤེས་སྐྱེའི། ངེས་པར་རྟོགས་པ་ལ་ནི་མ་ཡིན་པ་ཉིད་དེ་དང་འདྲའོ། །ངེས་པར་མི་རྟོག་པ་ལ་ནི་བདག་ལྟ་དང་མཐར་ལྟ་སོགས་འབྱུང་བར་མི་རུང་སྟེ། འཕགས་པ་ལ་ངེས་པར་མི་རྟོག་པའི་སྒོ་ནས་བདག་ཏུ་ལྟ་བ་ལ་སོགས་པ་མི་བྱེད་པས་ཡོངས་སུ་ཉམས་པའི་རྒྱུ་མེད་པའི་ཕྱིར་ཀུན་ཏུ་རྟོག་པ་ལ་ནི་བདག་ཏུ་ལྟ་བ་ལ་སོགས་པ་འབྱུང་བར་རུང་སྟེ་ཀུན་ཏུ་རྟོག་པར་བྱེད་པའི་ཕྱིར་རོ། །དེས་ན་མཐོང་སྤོང་སྤངས་པ་ལས་ཉམས་པ་མེད་དོ། །མདོ་སྡེ་པ་ན་རེ། མཐོང་སྤོང་སྤངས་པ་ཉམས་པ་མེད་པར་མ་ཟད་དགྲ་བཅོམ་ཉིད་ལས་ཀྱང་ཡོངས་སུ་ཉམས་པ་མེད་དོ། །ཕྱིར་འོང་དང་ཕྱིར་མི་འོང་གི་འབྲས་བུ་ལས་ནི་ཡོངས་སུ་ཉམས་པ་སྲིད་དེ། འཇིག་རྟེན་པའི་ལམ་གྱིས་ཐོབ་པ་སྲིད་པའི་ཕྱིར་སྙམ་དུ་བསམ་པའོ། །ཞེས་ཟེར་རོ། །དེ་རིགས་པ་ཡིན་ཏེ། ལུང་དང་རིགས་པ་ལས་ཏེ། ལུང་ནི། འཕགས་པའི་ཤེས་རབ་ཀྱིས་སྤངས་པ་གང་ཡིན་པ་དེ་ནི་སྤངས་པ་ཡིན་ནོ། །ཞེས་གསུངས་པས། འཇིག་རྟེན་པས་སྤངས་པ་གང་ཡིན་པ་དེ་ནི་སྐྱེའོ་སྙམ་དུ་དགོངས་པ་ཡིན་ནོ། །ཁུངས་གཉིས་པ་སློབ་པ་ལ་བག་ཡོད་པ་ལ་བག་ཡོད་པར་བྱའོ་ཞེས་ང་སྨྲའོ་ཞེས་གསུངས་ཀྱི། དགྲ་བཅོམ་ལ་ནི་མ་ཡིན་ནོ། །དགྲ་བཅོམ་ལའང་རྙེད་པ་དང་བཀུར་སྟིས་བར་ཆད་བྱེད་པར་ང་སྨྲའོ་ཞེས་གསུངས་པའི། མདོ་སྡེ་ལས་ནི། སློབ་པ་ལ་འཕགས་པའི་ཤེས་རབ་སྤངས་པ་ཡོད་པའི་ཆ་ནས་བག་བྱ་བར་བསླབ་པ་མིན་ལ། སྤངས་པ་ལ་འཇིག་རྟེན་པའི་ལམ་གྱིས་བྱས་པ་(༢༩༦ན)
ཡོད་པ་དེ་ཉམས་དོགས་ནས་བག་བྱ་བར་གསུངས་ལ། མཐོང་ཆོས་ལ་བདེར་གནས་ཁོ་ན་ལས་ཡོངས་སུ་ཉམས་པར་འགྱུར་བར་གསུངས་པར་ཟད་དེ། འདིས་སེམས་རྣམ་གྲོལ་སྤངས་པ་མི་ཉམས་པ་ལུས་ཀྱིས་མངོན་སུམ་དུ་བྱས་པ་གང་ཡིན་པ་དེ་ལས་ནི་རྣམ་གྲངས་གང་གིས་ཀྱང་ཡོངས་སུ་ཉམས་པར་འགྱུར་བ་ང་མི་སྨྲའོ་ཞེས་གསུངས་སོ། །བྱེ་བྲག་ཏུ་སྨྲ་བ་ན་རེ། རྣམ་གྲོལ་དུས་དང་སྦྱོར་བ་ལས་ཉམས་པ་ཡོད་དེ། མི་གཡོ་བ་ཞེས་ཁྱད་པར་དུ་བྱས་པའི་ཕྱིར་ཞེ་ན། མདོ་སྡེ་པས། ཁོ་བོའང་དུས་དང་སྦྱོར་བ་ལས་ཡོངས་སུ་ཉམས་པ་ཡོད་དོ། །ཞེས་ཟེར་རོ། །ཅི་རྣམ་གྲོལ་དུས་སྦྱོར་དེ་དགྲ་བཅོམ་པ་ཉིད་དང་། འཇིག་རྟེན་པའི་བསམ་གཏན་མཐོང་ཆོས་བདེར་གནས་ཀྱི་དབང་དུ་བྱས་པ་གང་ཡིན་དཔྱད་པར་བྱ་སྟེ། བསམ་གཏན་དངོས་གཞི་ནི་ལམ་སླ་བས་དེའི་ཏིང་ངེ་འཛིན་ནི་སྒྲ་མེད་པའི་དུས་སོགས་ལ་ལར་མངོན་དུ་འགྱུར་བའི་ཕྱིར། དུས་ལས་འབྱུང་བས་ན་རྣམ་གྲོལ་དུས་དང་སྦྱོར་བ་ཞེས་བྱ་ལ། སྤངས་པའི་རྣམ་གྲོལ་དེ་སྐྲ་མེད་པའི་དུས་སོགས་ལ་བལྟོས་རྒྱུ་མེད་པས་ད་དུས་སྦྱོར་ལས་ཡོངས་སུ་ཉམས་པར་མི་བཞག་གོ། །བསམ་གཏན་དེ་ནི་ཉམས་ཀྱང་ཡིད་དུ་འོང་བས་ཡང་ནས་ཡང་དུ་བརྩམ་བྱ་ཡིན་ཏེ། མཐོང་ཆོས་ལ་བདེ་བར་གནས་པའི་ཕྱིར། བཙུན་པ་དགའ་ལྡན་ན་རེ། ཉམས་ཤིང་ཉམས་ན་འདོད་བྱའམ་དོན་དུ་གཉེར་བྱ་ཡིན་པས་ཕོངས་པ་ཡིན་ཏེ། རོ་མྱང་བར་བྱ་བ་ཡིན་པའི་ཕྱིར། དེའང་འཕགས་པ་ལ་རོ་མྱོང་བ་མེད་ཀྱང་སོ་སོའི་སྐྱེ་བོའི་དུས་ཀྱིས་རོ་མྱང་བར་བྱ་བའི་ཡུལ་དེ་དང་རིགས་གཅིག་ཏུ་འདུག་པས་རོ་མྱོང་ཟེར། ཡང་ན་རོ་མྱོང་རང་ཡང་ཡོད་དེ། འཕར་བ་ལ་སོགས་པའི་གནད་ཀྱི་ཕྱིར་རོ། །དགྲ་བཅོམ་པ་ཉིད་ཀྱིས་རྣམ་གྲོལ་ནི་ཐོབ་པའི་ཚུལ་གྱིས་རྟག་ཏུ་རྗེས་སུ་འབྲེལ་བ་ཡིན་པས་དུས་དང་(༢༩༦བ)
སྦྱོར་བ་ཡིན་པའང་མི་རུང་ལ། དགྲ་བཅོམ་པའི་རྣམ་གྲོལ་ནི་ཉམས་པ་མེད་པས་ཡིད་དུ་འོང་བའམ་འཕང་བྱ་མ་ཡིན་པས་དོན་དུ་གཉེར་བྱ་མ་ཡིན་པའི་ཕྱིར། གལ་ཏེ་ཡང་སྤངས་པ་ལས་ཉམས་པ་ཞིག་སྲིད་ན། བཅོམ་ལྡན་འདས་ཀྱིས། སེམས་ལས་བྱུང་བ་མཐོང་བའི་ཆོས་ལ་བདེ་བར་གནས་པ་བཞི་པོ་ཐོབ་པ་གང་ཡིན་པ་དེ་དག་ལས་གང་ཡང་རུང་བ་ཞིག་ལས་འདི་ཡོངས་སུ་ཉམས་པར་འགྱུར་བ་ང་སྨྲའོ་ཞེས་གསུངས་པ་ལས། དགྲ་བཅོམ་པའི་རྣམ་གྲོལ་དུས་དང་སྦྱོར་བ་ལས་ཉམས་པར་མ་གསུངས་པའི་ཕྱིར་དགྲ་བཅོམ་པ་ཐམས་ཅད་ཀྱི་རྣམ་གྲོལ་ནི་མི་གཡོ་བ་ཡིན་པས་ཁོང་དུ་ཆུད་པར་བྱའོ། །མཐོང་ཆོས་ལས་བདེ་བར་གནས་པ་ལས་ནི་རྙེད་པ་དང་བཀུར་སྟིས་དབྱེ་ན་སྦྱོས་པའི་ཉེས་པས་ཏིང་ངེ་འཛིན་གྱི་དབང་ཉམས་པའི་ཕྱིར་ཡོངས་སུ་ཉམས་པ་ནི་དབང་པོ་རྟུལ་པོའོ། །ཏིང་འཛིན་བརྟན་པས་མི་སྟོང་སྡེའི་གསེབ་ན་བསྡད་ཀྱང་ཡོངས་སུ་ཉམས་པར་མི་འགྱུར་ཏེ། དབང་པོ་རྣོན་པོ་གང་ཡིན་པའོ། །དེའང་མདོ་ལས་མི་སློབ་པ་དགུ་གང་ཞེ་ན། ཡོངས་སུ་ཉམས་མི་ཉམས་ཀྱི་ཆོས་ཅན་གཉིས་དང་། འཆི་སེམས་ནས་མི་གཡོ་བའི་བར་ལྔ་དང་། ཤེས་རབ་དང་། གཉིས་ཀའི་ཆ་ལས་རྣམ་གྲོལ་ཏེ་དགུའོ། །དེ་ལ་མཐོང་ཆོས་ལས་བདེར་གནས་ལས་ཉམས་པ་དེ་ནི་ཉམས་པའི་ཆོས་ཅན་ཡིན་ལ། དེ་ལས་མི་ཉམས་པ་ནི་མི་ཉམས་པའི་ཆོས་ཅན་ནོ། །གང་ཏིང་འཛིན་ཉམས་པས་འཇིགས་ནས་བདག་ཉིད་འཆི་བར་སེམས་པ་ནི་དེའི་ཆོས་ཅན་ནོ། །གང་ཡོན་ཏན་གྱི་ཁྱད་པར་ཅུང་ཟད་ཅིག་སྲུང་བ་དེ་ནི་རྗེས་སུ་སྲུང་བའི་ཆོས་ཅན་ནོ། །གང་ཡོན་ཏན་ཁོ་ནས་གནས་པ་དེ་ལ་རྗེས་སུ་མ་སྲུང་ཡང་མི་གཡོ་བ་དེ་ནི་གནས་པ་ལས་མི་བསྐྱོད་པ་ཡིན་ནོ། །གང་རྟོགས་པར་བྱེད་ཅིང་ཡོན་ཏན་གྱི་ཁྱད་པར་སྐྱེད་པ་དེ་ནི་རྟོགས་པའི་སྐལ་བ་ཅན་ནོ། །(༢༩༧ན)
གང་བྱུང་བ་དག་ལས་ཡོངས་སུ་ཉམས་པར་མི་འགྱུར་བ་དེ་ནི་མི་གཡོ་བའི་ཆོས་ཅན་ནོ། །ཡོངས་སུ་མ་ཉམས་པ་དང་གནས་པ་ལས་མི་བསྐྱོད་པ་དང་། མི་གཡོ་བའི་ཆོས་ཅན་རྣམས་ལ་ཁྱད་པར་ཅི་ཡོད་ཅེ་ན། ཡོངས་སུ་མི་ཉམས་པའི་ཆེན་པོ་ནི་རང་བཞིན་གྱི་དབང་པོ་རྣོན་པོ་ཡིན་གྱི། དབང་པོ་སྦྱངས་པས་ཐོབ་པ་ནི་མ་ཡིན་ནོ། །མི་གཡོ་བའི་ཆོས་ཅན་ནི་སྦྱངས་པ་ལས་གྱུར་པ་སྟེ། དེ་གཉིས་ནི་ཏིང་ངེ་འཛིན་གྱི་ཁྱད་པར་གང་དང་གང་ཁོ་ནས་སྐྱེད་པར་བྱེད་པ་དེ་ལས་ཉམས་པར་མི་འགྱུར་རོ། །གནས་པ་ལ་མི་བསྐྱོད་པ་ནི་ཡོན་ཏན་གང་ཁོ་ན་ལ་གནས་པ་དེ་ལས་ཡོངས་སུ་ཉམས་པར་མི་འགྱུར་བ་འབའ་ཞིག་ཏུ་མ་ཟད་ཀྱི། གཞན་ཡང་སྐྱེད་པར་མི་བྱེད་པའམ། སྐྱེད་པར་བྱེད་ནའང་ཡོན་ཏན་གྱི་ཁྱད་པར་དེ་ལས་གཡོ་བར་འགྱུར་བ་འདི་ནི་ཁྱད་པར་ཡིན་པར་མངོན་ནོ། །བྱེ་བྲག་ཏུ་སྨྲ་བ་ན་རེ། ཚེ་དང་ལྡན་པ་གནག་ཚོགས་ཅན་དགྲ་བཅོམ་པ་ལས་ཡོངས་སུ་ཉམས་པ་མ་ཡིན་ནམ་ཞེ་ན། དེ་ནི་དགྲ་བཅོམ་པ་ཉིད་ལ་མི་སློབ་པ་ཡིན་པས་ཧ་ཅང་རོ་མྱོང་བ་དང་དབང་པོ་རྟུལ་པོར་གྱུར་པས་སེམས་རྣམ་པར་གྲོལ་བ་དུས་དང་སྦྱོར་བ་ལས་ཡང་དང་ཡང་དུ་ཉམས་ནས་ཡི་མུག་སྟེ་མཚོན་གྱིས་བཏབ་པས། མཚོན་གྱིས་བཏབ་པའི་རྟིང་ལ་དགྲ་བཅོམ་ཐོབ་པ་ཡིན། ཡང་ན་དགྲ་བཅོམ་པ་ཡིན་ངོ་ཤེས་ཀྱང་མཐོང་ཆོས་ཀྱི་བདེ་བ་ཉམས་པ་ཡིན། དེ་ལྟར་ཉམས་པས་ཡི་མུག་ནས་རང་ལ་མཚོན་གྱིས་བཏབ་པ་ཡིན། དེས་མྱ་ངན་ལས་འདས་ཀྱང་དགྲ་བཅོམ་ལས་ཉམས་པ་མིན་ནོ། །བཅུ་ལས་འཕྲོས་པའི་མདོ་ལས་ཀྱང་། བསྐྱེད་པར་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་དུས་དང་སྦྱོར་བ་ལས་ཡིད་དུ་འོང་བ་ཡིན། མངོན་སུམ་དུ་བྱ་བའི་ཆོས་ནི་གཅིག་སྟེ། སེམས་རྣམ་པར་གྲོལ་བ་མི་གཡོ་བའི་ཆོས་ཅན་ཡིན་ནོ། །ཞེས་གསུངས་པ་ལ། བྱེ་སྨྲ་ན་རེ། དགྲ་(༢༩༧བ)
བཅོམ་པ་གཉིས་ཡོད་པས་ལོགས་སུ་སྨོས་པའོ། །ཞེས་སྨྲ་བའི་གོ་སྐབས་ཀྱང་ཡོད་པ་མ་ཡིན་ཏེ། བཅུ་ཚན་དེ་ལས་འོ་ན་དགྲ་བཅོམ་པ་ལན་གཉིས་སུ་སྨོས་པར་འགྱུར་དགོས་པར་ཐལ། སེམས་རྣམ་གྲོལ་དུས་དང་སྦྱོར་བ་ཡིད་འོང་ཡང་དགྲ་བཅོམ་པ་ཁོ་ན་ཉིད་ཡིན་པའི་ཕྱིར། འདོད་མི་ནུས་ཏེ། དགྲ་བཅོམ་པ་ཉིད་བསྐྱེད་པར་བྱ་བ་ཡིན་པ་ནི་གང་ཡང་མ་གསུངས་ཤིང་། མདོ་དེ་ལས་ནི་མངོན་སུམ་དུ་བྱ་བ་ཡིན་པར་གསུངས་སོ། །ཡང་བསྐྱེད་པ་ནི་དབང་པོ་རྟུལ་པོས་བསྡུས་པའི་དགྲ་བཅོམ་པའི་དབང་དུ་བྱས་སོ་ཞེ་ན། བྱེ་སྨྲ་ལ་དྲིས་པ། འདི་ཅིས་ཤེས་པར་བྱས་པ་ཡིན། དབང་པོ་རྟུལ་པོས་བསྐྱེད་པར་ནུས་པས་ཤེས་པར་བྱ་བ་ཡིན་ནོ་ཞེ་ན། འོ་ན་མདོ་ལས། བསྐྱེད་པར་བྱ་བའི་ཆོས་ནི་གཅིག་སྟེ་སེམས་རྣམ་པར་གྲོལ་བའོ། །ཞེས་བརྗོད་དགོས་པར་ཐལ། དབང་པོ་རྣོན་པོས་ཀྱང་བསྐྱེད་པར་ནུས་པའི་ཕྱིར། འོན་ཏེ་དབང་རྟུལ་གྱིས་ཀྱང་བསྐྱེད་པར་འོས་པ་ཤེས་བྱེད་ཡིན་ཅེ་ན། དབང་རྣོན་གྱིས་ཀྱང་ཤིན་ཏུ་བསྐྱེད་འོས་ཡིན་ཏེ། མི་གཡོ་བའི་ཕྱིར། དེས་ན་རྣམ་པར་གྲོལ་བ་དུས་དང་སྦྱོར་བ་ནི་དགྲ་བཅོམ་པ་མ་ཡིན་ནོ། །འོ་ན་དུས་ཀྱིས་རྣམ་གྲོལ་གྱི་དགྲ་བཅོམ་པ་ཞེས་ཇི་སྐད་དུ་བྱ་ཞེ་ན། དབང་པོ་རྟུལ་བའི་ཕྱིར་ཏིང་འཛིན་ཟག་བཅས་ཟག་མེད་གང་ཡང་རུང་བ་ནད་མེད་པ་དང་། ཡུལ་གྱི་ཁྱད་པར་ལ་སོགས་པ་ལས་བལྟོས་པ་དེ་དགྲ་བཅོམ་པ་ལ་ཡོད་པས་དུས་ཀྱིས་གྲོལ་བའི་དགྲ་བཅོམ་པའོ། །ཏིང་འཛིན་མངོན་དུ་འགྱུར་བ་ནད་མེད་པ་དང་ཡུལ་གྱི་ཁྱད་པར་ལ་མི་བལྟོས་པ་དེ་དགྲ་བཅོམ་པ་ལ་ཡོད་པས་དུས་དང་མི་སྦྱོར་བའི་དགྲ་བཅོམ་པའོ། །ཆོས་མངོན་པ་ལས་ཀྱང་དགྲ་བཅོམ་པ་ཉམས་པ་མེད་པར་གྲུབ་སྟེ། གནས་གསུམ་གྱིས་འདོད་པའི་འདོད་ཆགས་ཀྱི་ཕྲ་རྒྱས་སྐྱེ་བར་འགྱུར་ཏེ། འདོད་པའི་འདོད་ཆགས་ཀྱི་ཕྲ་རྒྱས་མ་སྤངས་(༢༩༨ན)
ཤིང་ཡོངས་སུ་མ་ཤེས་པ་ཡིན། འདོད་པའི་འདོད་ཆགས་ཀུན་ནས་དཀྲིས་པར་གྱུར་བའི་ཆོས་རྣམས་ཀྱང་སྣང་བར་གྱུར་པ་ཡིན། དེ་ལའང་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་ནོ་ཞེས་གསུངས་པའི་ཕྱིར་རོ། །ཡང་ལུང་དེ་ནི་ཉོན་མོངས་པའི་རྒྱུ་ཚང་བ་ལས་ཉོན་མོངས་སྐྱེ་བའི་དབང་དུ་བྱས་ཀྱི། ཡུལ་གྱི་སྟོབས་ཁོ་ན་ལས་ཉོན་མོངས་སྐྱེ་བ་ནི་རྒྱུ་མ་ཚང་བའི་དབང་དུ་བྱས་སོ་སྙམ་ན། རྒྱུ་མ་ཚང་བ་ལས་ཉོན་མོངས་གང་ཞིག་སྐྱེ་སྟེ། རྒྱུའི་ཕྱོགས་གཅིག་མ་ཚང་ན་དེའི་འབྲས་བུ་བསྐྱེད་པར་མི་འགྱུར་བའི་ཕྱིར། དཔེར་ན། མིག་གི་རྣམ་ཤེས་བསྐྱེད་པ་ལ་མིག་གཟུགས་ཡིད་བྱེད་གང་རུང་ཞིག་མ་ཚང་ཡང་མི་བསྐྱེད་པ་བཞིན་བསྐྱེད་པར་སྨྲ་བ་ནི་གྱི་ན་པའོ། །རེ་ཞིག་ལུང་ནི་དེ་ལྟ་བུ་ཡིན་ནོ། །རིགས་པ་ནི། གལ་ཏེ་དགྲ་བཅོམ་པ་ཆོས་ཅན། ཅི་ལྟར་ན་ཡོངས་སུ་ཉམས་པར་མི་འགྱུར་པར་ཐལ། གང་གིས་ན་ཉོན་མོངས་པ་རྣམས་གཏན་དུ་མི་སྐྱེ་བའི་ཆོས་ཅན་དུ་གྱུར་པ་དེ་ལྟ་བུའི་གཉེན་པོ་ཞིག་སྐྱེས་པའི་ཕྱིར། མ་གྲུབ་ན། ཅི་ལྟར་ཟག་པ་ཟད་པ་སྟེ་མ་ཟད་པར་ཐལ། ཉོན་མོངས་པའི་ས་བོན་གྱི་ཆོས་ཉིད་རྩ་བ་ནས་མ་བཏོན་པའི་ཕྱིར། འདོད་ན་དགྲ་བཅོམ་པ་མ་ཡིན་པར་ཐལ། ཟག་པ་ཟད་པ་མ་ཡིན་པའི་ཕྱིར། འོ་ན་གར་ལ་འཕགས་པ་ཉན་ཐོས་ཐོས་པ་དང་ལྡན་པ། དྲན་པ་དང་ལྡན་པ་བསྐྱོད་པ་ཞི་གནས་དང་ལྷག་མཐོང་ལ་གནས་པ་དེ་བརྒྱ་ལ་རེས་འགའ་ཞིག་དྲན་པ་ཉམས་པ་ལས་སྡིག་པ་མི་དགེ་བའི་རྣམ་རྟོག་སྐྱེ་བར་འགྱུར་རོ། །ཞེས་གསུངས་པས་སོལ་བའི་ཕུང་པོ་ལྟ་བུའི་མདོའི་ལན་གདབ་དགོས་སོ། །མདོ་དེ་ལས་བསྟན་པ་ནི་སློབ་པའི་དབང་དུ་བྱས་ཀྱི། དགྲ་བཅོམ་པའི་དབང་དུ་བྱས་པ་མིན་ནོ་ཞེ་ན། དགྲ་བཅོམ་པའི་དབང་དུ་བྱས་པ་ཡིན་པར་བསྟན་ཏེ། ཡུན་རིང་པོ་ནས་སེམས་དབེན་པ་ལ་གཞོལ་བ་ཡིན་བྱ་བ་ནས་མྱ་ངན་ལས་(༢༩༨བ)
འདས་པ་ལ་འབབ་པ་ཡིན། ཅེས་བྱ་བའི་བར་དགྲ་བཅོམ་པའི་སྟོབས་བརྒྱད་གསུངས་པའི་ཕྱིར། འདིས་ནི་འདོད་པ་རྣམས་སོལ་བའི་ཕུང་པོ་ལྟ་བུར་མཐོང་བ་ཡིན་ཏེ། འདིས་འདོད་པ་ལ་འདོད་པའི་འདུན་པ་དང་། འདོད་པའི་ཆགས་པ་ནས་རྒྱས་པར་འདོད་པ་ལ་ལྷག་པར་ཞེན་པའི་བར་གང་ཡིན་པ་འདིའི་སེམས་གཏུགས་ཏེ་མི་གནས་པ་དེ་ལྟར་འདིས་འདོད་པ་རྣམས་མཐོང་བ་ཡིན་ནོ་ཞེས་རྒྱས་པར་འབྱུང་ལ། མདོ་དེ་ལས་ཀུན་འབྱུང་སྤངས་པས་བསིལ་བར་གྱུར་ཅིང་སྡུག་བསྔལ་སྤངས་པས་བསལ་བར་གྱུར་པ། ཞེས་སོལ་ཕུང་གི་མདོ་ལ་དགྲ་བཅོམ་པ་ཡིན་པར་བསྟན་ཏོ་སྙམ་ན། དེ་སྐད་དུ་འབྱུང་མོད་ཀྱི། དེ་སྐད་དུ་གསུངས་པ་ནི་སློབ་པའི་གནས་སྐབས་ཀྱི་དབང་དུ་མཛད་པས་ཉེས་པ་མེད་དེ། བསོད་སྙོམས་སོགས་སྤྱོད་པ་ལེགས་པར་མ་བརྟགས་པ་དེ་སྲིད་དུ་སློབ་པ་དེ་ལྟར་སྤྱོད་པ་ལ་ཉོན་མོངས་པ་འབྱུང་སྲིད་པའི་ཕྱིར། སློབ་དཔོན་ནི། དགྲ་བཅོམ་པ་ཉིད་ཀྱི་གནས་སྐབས་ཀྱི་དབང་དུ་མཛད་ནས་དེ་སྐད་དུ་གསུངས་ཀྱང་དགྲ་བཅོམ་ལས་ཉམས་པའི་ཉེས་པ་མེད་དོ་སྙམ་དུ་དགོངས་པའོ། །གསུམ་པ་རིགས་ཀྱི་དབྱེ་བ་དེ་གཞན་ལའང་སྦྱར་བ་ནི། སློབ་དང་འཕགས་མིན་རིགས་དྲུག་ལྡན། །དགྲ་བཅོམ་དུ་མ་ཟད་སློབ་པ་དང་འཕགས་མིན་སོ་སྐྱེ་རྣམས་ཀྱང་དགྲ་བཅོམ་དེ་བཞིན་རིགས་དྲུག་དང་ལྡན་ལ། དགྲ་བཅོམ་པའི་རིགས་རྣམས་དེ་དག་སྔོན་དུ་འགྲོ་བ་ཡིན་ནོ། །བཞི་པ་ལམ་གང་ལས་དབང་པོ་འཕོ་བ་ནི། མཐོང་བ་ལ་ནི་འཕོ་བ་མེད། །མཐོང་ལམ་ལས་གཞན་ལ་དབང་པོ་འཕོ་ཡི། མཐོང་བའི་ལམ་ལ་ནི་དབང་པོ་འཕོ་བ་མེད་དེ། བཅོ་ལྔ་པོ་དེ་བདེན་པ་རྟོགས་པའི་ཆེད་དུ་སྦྱོར་བ་བྱས་ཀྱི། དབང་པོ་འཕོ་བའི་ཆེད་དུ་སྦྱོར་བའི་གོ་སྐབས་མི་སྲིད་པའི་ཕྱིར། ལ་ལ་སོ་སྐྱེའི་གནས་ནའང་བར་ཆད་མེད་ལམ་དང་རྣམ་གྲོལ་གྱི་ལམ་གཉིས་ཀྱི་དབང་པོ་འཕོ་(༢༩༩ན)
ལ། ལ་ལ་དད་མོས་ཀྱི་སྐབས་ན་དབང་པོ་འཕོའོ། །མི་སློབ་པ་ལ་མ་སྨོས་པ་ནི་སློབ་པ་དང་སོ་སོའི་སྐྱེ་བོའི་གནས་སྐབས་ཡིན་ལ། མི་སློབ་པ་འཕོ་བའང་དོན་གྱིས་ཤེས་སོ། །ལྔ་པ་ཉམས་པའི་རབ་ཏུ་དབྱེ་བ་ལ། དངོས་དང་། གང་ཟག་གང་ལ་ཉམས་པ་གང་ཡོད་པ། འབྲས་བུ་ལས་ཉམས་བཞིན་པར་མི་འཆི་བའི་རྒྱུ་མཚན་ནོ། །དང་པོ་ནི། ཐོབ་དང་མ་ཐོབ་ཉེར་སྤྱད་ལས། །ཡོངས་ཉམས་རྣམ་པ་གསུམ་ཤེས་བྱ། །མདོ་ལས་འདི་མཐོང་བའི་ཆོས་ལ་བདེ་བར་གནས་པ་ལྷག་པའི་སེམས་ལས་བྱུང་བ་བཞི་ཐོབ་པ་གང་དག་ཡིན་པ་དེ་དག་ལས་གང་ཡང་རུང་བ་ཞིག་ལས་འདི་ཡོངས་སུ་ཉམས་པར་འགྱུར་བ་ནི་ང་སྨྲའི། འདི་གཅིག་པུ་སེམས་ཀྱི་རྣམ་པར་གྲོལ་བ་མི་གཡོ་བའི་བར་དུ་ལུས་ཀྱི་མངོན་དུ་བྱས་པ་གང་ཡིན་པ་དེ་ལས་འདི་རྣམ་གྲངས་གང་གིས་ཀྱང་ཡོངས་སུ་ཉམས་པར་འགྱུར་བ་ང་མི་སྨྲའོ། །ཞེས་གསུངས་པ་ན་མི་གཡོ་བའི་ཆོས་ཅན་དབང་པོ་རྣོ་བའི་ཕྱིར། མཐོང་ཆོས་བདེར་གནས་ལས་ཇི་ལྟར་ཉམས་པར་ཉམས་པར་འགྱུར་ཞེས་འདྲི་བ་ཡིན་ལ། རྣམ་གྲོལ་ལས་མི་གཡོ་བ་ལྟ་ཅི་སྨོས་ཞེས་ཡིད་ལ་བཞག་པའོ། །དེ་ལ་སྤྱིར་ཡོན་ཏན་ཐོབ་པ་ལས་ཡོངས་སུ་ཉམས་པ་དང་སྟེ། འདོད་པའི་ཉོན་མོངས་ཀྱིས་གོས་པའི་དུས་སུ་བསམ་གཏན་དང་པོའི་ཡོན་ཏན་ཐོབ་པ་ལས་ཉམས་པའོ། །ཡོན་ཏན་ཐོབ་བྱ་མ་ཐོབ་ན་མ་ཐོབ་པ་ཉིད་ཉམས་པ་ཡིན་པས་མ་ཐོབ་པ་ལས་ཡོངས་སུ་ཉམས་པ་དང་། ཡོན་ཏན་ཐོབ་པ་མངོན་དུ་མི་བྱེད་ན་ཉེ་བར་སྤྱད་པ་ལས་ཡོངས་སུ་ཉམས་པ་སྟེ། བསམ་གཏན་གཉིས་པ་ལྟ་བུ་ཉེ་བར་སྤྱད་པས་བསམ་གཏན་དང་པོ་ལྟ་བུའོ། །དེ་ལྟར་ན་ཡོངས་སུ་ཉམས་པ་རྣམ་པ་གསུམ་ཞེས་བྱའོ། །དེ་ལ་བྱེ་སྨྲས། ཉེར་སྤྱད་ལས་ཉམས་པས་ཉེས་པ་མེད་ཟེར། མདོ་སྡེ་པས། མི་གཡོ་བ་དྲུག་ཀ་རྣམ་གྲོལ་མི་གཡོ་བ་ཡིན། (༢༩༩བ)
དྲུག་གི་ནང་ནས་མི་གཡོ་བ་ཁྱད་ཅན་དབང་རྣོན་མཐོང་ཆོས་ལས་མི་གཡོ་བ་ཡིན་ཙམ་ན་ཉམས་པ་དང་མི་གཡོ་བ་འགལ་བར་དོགས་ན། མི་གཡོ་བ་རྣམ་གྲོལ་གྱི་དབང་དུ་བྱས། ཉམས་པ་མཐོང་ཆོས་བདེར་གནས་ཀྱི་དབང་དུ་བྱས་པའོ། །གཉིས་པ་ནི། སྟོན་ལ་ཐ་མ་མི་གཡོ་ལ། །བར་མའང་གཞན་ལ་རྣམ་གསུམ་མོ། །ཡོངས་སུ་ཉམས་པ་འདི་རྣམས་ལ་སྟོན་པ་སངས་རྒྱས་ལ་ནི་གདུལ་བའི་དོན་ལ་ཞུགས་པས་མཐོང་ཆོས་ལ་བདེ་བར་གནས་པ་མི་སྤྱོད་ཅིང་མངོན་དུ་མི་མཛད་པས། ཐ་མ་ཉེར་སྤྱད་ལས་ཡོངས་སུ་ཉམས་པ་ཁོ་ནར་མངའི། གཞན་མི་མངའོ། །མི་གཡོ་བའི་ཆོས་ཅན་ལ་ཉེར་སྤྱད་ལས་ཉམས་པ་དེ་དང་། བར་མ་མ་ཐོབ་པ་ལས་ཉམས་པའང་ཡོད་དེ། བྱ་བ་གཞན་ལ་གཡེངས་པས་བསམ་གཏན་ལ་སོགས་མངོན་དུ་མི་བྱེད་པའི་ཕྱིར་དང་། སངས་རྒྱས་དང་རང་སངས་རྒྱས་ཀྱི་རྒྱུད་ལ་མངའ་བའི་ཡོན་ཏན་མ་ཐོབ་པའི་ཕྱིར། དགྲ་བཅོམ་གཞན་དབང་པོ་རྟུལ་པོ་ལ་ནི་ཐོབ་པ་ལས་ཡོངས་སུ་ཉམས་པ་དང་ཉམས་པ་གཞན་གཉིས་ཀྱང་ཡོད་པས་ཉམས་པ་རྣམ་པ་གསུམ་མོ། །དེས་ན་མི་གཡོ་བའི་ཆོས་ཅན་ཉེར་སྤྱད་ལས་ཡོངས་སུ་ཉམས་པར་འབྱུང་བའི་ཕྱིར། འདིས་མཐོང་བའི་ཆོས་ལ་ཞེས་པ་ནས་ང་སྨྲ་ཞེས་པའི་བར་གྱི་མདོ་དང་མི་འགལ་ལོ། །དགྲ་བཅོམ་ཡོངས་སུ་ཉམས་པ་བྱེ་སྨྲ་ན་རེ། དགྲ་བཅོམ་ཐམས་ཅད་ཀྱི་རྣམ་གྲོལ་ཟག་མེད་མི་གཡོ་བ་ཡིན་ན་ཅིའི་ཕྱིར་དུས་དང་མི་སྦྱོར་བར་གྲོལ་བ་ཁོ་ན་མི་གཡོ་བའི་ཆོས་ཅན་དུ་འཇོག་ལ། གཞན་མ་ཡིན་ཅེས་སྨྲ་བར་འགྱུར་ཏེ། ཡོངས་སུ་མི་ཉམས་པར་སྨྲ་བ་མདོ་སྡེ་པ་ན་རེ། ཐམས་ཅད་ཀྱི་རྣམ་གྲོལ་ཟག་མེད་མི་གཡོ་བ་ཡིན་ལ། མི་གཡོ་བའི་ཆོས་ཅན་དུ་ཇི་ལྟར་རྣམ་པར་བཞག་པ་ནི་ལ་ལ་ཡོངས་སུ་ཉམས་པར་མི་འགྱུར་ཏེ། དབང་པོ་རྣོན་པོ་གང་ཡིན་པ་སྟེ་ཞེས་སོགས་དེ་བཞིན་(༣༠༠ན)
དུ་བཤད་ཟིན་པས་དེའི་ཕྱིར་འདི་ཀླན་ཀ་མི་རུང་ཞེས་ཟེར་རོ། །གསུམ་པ་ནི། འབྲས་ལས་ཉམས་པ་འཆི་བ་མེད། །བྱ་བ་མ་ཡིན་དེ་མི་བྱེད། །དགྲ་བཅོམ་འབྲས་བུ་ལས་ཉམས་ན་ཡང་སྐྱེའམ་ཞེ་ན། ཡང་སྐྱེ་བ་དེ་ལྟ་བུ་མེད་དེ། འབྲས་བུ་ལས་ཡོངས་སུ་ཉམས་པ་ནི་འགའ་ཡང་འཆི་བ་མེད་དེ། མདོ་ལས་དགེ་སློང་དག་འཕགས་པ་ཉན་ཐོས་པ་ཐོས་པ་དང་ལྡན་པ་དག་ལ་དྲན་པ་ཉམས་པ་ཆུང་ངུ་འབྱུང་མོད་ཀྱི། འོན་ཀྱང་ཡང་མྱུར་བ་ཁོ་ནར་ནུབ་པ་དང་ཡོངས་སུ་ཟད་པ་དང་ཡོངས་སུ་གཏུགས་པར་འགྱུར་རོ་ཞེས་འབྱུང་བའི་ཕྱིར། དེ་ལྟར་མ་ཡིན་ན་ཚངས་སྤྱོད་ལ་ཡིད་བརྟན་དུ་མི་རུང་སྟེ། དགྲ་བཅོམ་ལས་ཉམས་པ་ཡང་སྐྱེ་བར་འགྱུར་བའི་ཕྱིར། ཕྱིར་འོང་མ་ཐོབ་པ་རྒྱུན་ཞུགས་མི་ཚངས་སྤྱོད་ལྟ་བུ་བྱ་བ་མ་ཡིན་པ་བྱེད་པ་ལ། དེ་ཡན་གྱི་འབྲས་བུ་ལས་ཉམས་པ་ནི་འབྲས་བུ་དེ་དང་འགལ་བའི་བྱ་བ་མ་ཡིན་པ་མི་ཚངས་སྤྱོད་སོགས་དེ་མི་བྱེད་དེ་རྩལ་སྟོབས་ཆེན་པོ་དྲང་ཀྱང་མཐུས་རང་ཉིད་བཟུང་བས་རྡེག་མི་འཆའ་བ་བཞིན་ནོ། །འདིར་སྨྲས་པ། ཡིད་ལ་ཚུལ་མིན་བཟླས་པའི་གོ་མ་ཕྱེས། །ཀུན་ཏུ་འཕགས་པའི་འབྲས་ལམ་ཁོ་ནར་མོས། །ལུས་ངག་བགྱི་བ་དེ་ཡི་ཕྱོགས་སུ་བཀོལ། །རྣམ་དཀར་དེ་ལ་རང་ཡང་རྗེས་ཡི་རང་། །གཅིག་ཏུ་འཁོར་བའི་གནས་ལས་སྒྲོན་མོ་རུ། །བདག་ཉིད་ཁོ་ན་ཅི་ཐར་སྙམ་པ་ཡིས། །སྙིང་ལས་བསྐལ་མང་གོང་ནས་མ་སྐྱེས་པས། །ཉམ་ཐག་མ་རྒན་རྣམས་ཀྱི་སྡུག་བསྔལ་གྱི། །གཟེར་ཟུག་དྲག་པོས་རྟག་ཏུ་མནར་བའི་ཡིད། །བྱང་ཆུབ་ཆེན་པོར་སྤྱོད་ལས་གཞན་ཅི་ཡོད། །གཉིས་པ་དབང་པོ་འཕོ་ཚུལ་ལ། ལམ་དུས་དབང་པོ་འཕོ་བ། ལམ་དེའི་ངོ་བོ། རྟེན་གང་ལས་འཕོ་བ། ས་གང་ལ་བརྟེན་ནས་འཕོ་བའོ། །དང་པོ་ལ། མི་སློབ་པ་དང་། སློབ་པའོ། །དང་པོ་ནི། མི་གཡོ་རྣམ་གྲོལ་བར་ཆད་མེད། །ལམ་དགུའོ་ཤིན་ཏུ་བསྟེན་ཕྱིར་རོ། །དབང་པོ་རྣམས་འཕོ་བ་ལ་བར་(༣༠༠བ)
ཆད་མེད་ལམ་དང་རྣམ་གྲོལ་གྱི་ལམ་དུ་སྐྱེ་ན། རྟོགས་པའི་སྐལ་བ་ཅན་ཞིག་མི་གཡོ་བའི་རིགས་ཅན་དུ་ཐོབ་པར་བྱེད་ན། དབང་རྟུལ་ཆེན་པོའི་ཆེན་པོ་སྤོང་བ་ལ་དབང་རྣོན་ཆུང་ངུའི་ཆུང་ངུ་བར་ཆད་མེད་གཅིག་ནས་དགུ་དང་། དེ་བཞིན་རྣམ་གྲོལ་གྱི་ལམ་དགུ། དཔེར་ན། དགྲ་བཅོམ་ཐོབ་པ་ལ་སྲིད་རྩེའི་ཉོན་མོངས་ཆེ་འབྲིང་དགུ་སྤོང་བ་ལ་བར་ཆད་མེད་ལམ་དང་རྣམ་གྲོལ་གྱི་ལམ་དགུ་དགུ་དགོས་པ་བཞིན། དེ་ལྟར་དགོས་པ་ཡང་དབང་པོ་རྟུལ་པོའི་རིགས་དེ་ཤིན་ཏུ་བསྟེན་ཅིང་གོམས་པར་བྱས་པས་འབད་པ་ཆུང་ངུས་བཟློག་མི་ནུས་པའི་ཕྱིར་ཏེ། སློབ་པ་དང་མི་སློབ་ཀྱི་ལམ་དག་གིས་བརྟན་པར་བྱས་པའི་ཕྱིར། དཔེར་ན། ཡི་གེ་ངན་སྟོ་ཞིག་ལ་ཤིན་ཏུ་གོམས་ན་དེ་བསྒྱུར་དཀའ་བ་དང་འདྲའོ། །གཉིས་པ་ནི། མཐོང་བས་ཐོབ་ལ་རེ་རེའོ། །དད་མོས་མཐོང་བས་ཐོབ་པ་འཕོ་བར་བྱེད་ན་དབང་པོ་རྟུལ་པོ་ཆེན་པོའི་ཆེན་པོ་ནས་དབང་པོ་རྟུལ་པོ་ཆུང་ངུའི་ཆུང་ངུ་བར་དུ་སྤང་བྱ་ཆེ་འབྲིང་དགུ་ཡོད་ཀྱང་དེ་ཚོ་ཡོ་སྤོང་བ་ལ་བར་ཆད་མེད་ལམ་གཅིག་དང་རྣམ་གྲོལ་གྱི་ལམ་གཅིག་སྟེ་རེ་རེ་ཁོ་ནར་སྐྱེ་སྟེ། དེ་ནི་སློབ་ལམ་གྱིས་བརྟན་པར་བྱས་ཀྱང་མི་སློབ་ལམ་གྱིས་བརྟན་པར་མ་བྱས་པའི་ཕྱིར། སྦྱོར་བའི་ལམ་ནི་མི་གཡོ་བ་ཐོབ་པར་བྱ་བ་དང་མཐོང་ཐོབ་ཐོབ་པར་བྱེད་པ་ཐམས་ཅད་དུ་གཅིག་ཁོ་ནའོ། །གཉིས་པ་ལམ་དེའི་ངོ་བོ་ནི། ཟག་མེད། བར་ཆད་མེད་ལམ་དང་རྣམ་གྲོལ་གྱི་ལམ་དེ་ཐམས་ཅད་ནི་ཟག་མེད་དེ་འཕགས་པའི་དབང་པོ་ཟག་བཅས་ཀྱི་ལམ་གྱིས་འཕོ་བ་མེད་པའི་ཕྱིར། སོ་སོའི་སྐྱེ་བོ་དབང་པོ་འཕོ་བ་ནི་ཟག་པ་དང་བཅས་པ་ཞི་རགས་ཀྱི་རྣམ་པས་འཕོ་བའོ། །གསུམ་པ་ནི། མི་ཡི་ནང་དུ་འཕོ། །མིའི་ནང་དུ་ཁོ་ནར་དབང་པོ་འཕོ་ཡི་གཞན་དུ་མ་ཡིན་ཏེ། གཞན་འདོད་པ་ན་སྤྱོད་པའི་ལྷ་རིགས་དྲུག་དང་གཟུགས་དང་གཟུགས་མེད་ཀྱི་ཁམས་ན་ཡོངས་སུ་ཉམས་པ་མེད་དེ། (༣༠༡ན)
དུས་གཞན་གྱི་བར་དུ་བསྒོམས་པས་དབང་པོ་ཆེས་ཡོངས་སུ་སྨིན་པའི་ཕྱིར་དང་། རྟེན་ཁྱད་པར་ཅན་རྙེད་པའི་ཕྱིར་ན་ཡོངས་སུ་ཉམས་པ་མི་སྲིད་པའི་ཕྱིར། འདོད་པའི་ལྷ་རིགས་དྲུག་ཏུ་ཉམས་པ་མེད་པའང་སྔོན་ཡུལ་གྱི་རྒྱ་ཆེ་བ་སྟེ་བཟང་པོ་ལ་ཡིད་བྱུང་བས་བདེན་པ་མཐོང་བ་རྣམས་དེ་ལ་དམིགས་ནས་ཉམས་མི་སྲིད་པའི་ཕྱིར། བཞི་པ་ས་གང་ལ་བརྟེན་ནས་འཕོ་བ་ལ། མི་སློབ་པ་དང་། སློབ་པའོ། །དང་པོ་ནི། མི་སློབ་ས་དགུ་ལ་བརྟེན་ཏེ། །མི་སློབ་པ་ནི་མི་ལྕོགས་མེད་པ་དང་བསམ་གཏན་ཁྱད་པར་ཅན་དང་། བསམ་གཏན་བཞི་གཟུགས་མེད་གསུམ་སྟེ་ས་དགུ་ལ་བརྟེན་ཏེ་དབང་པོ་རྣམས་འཕོ་བར་བྱེད་དེ། དེའི་འབྲས་བུ་ས་དགུས་བསྡུས་པའི་ཕྱིར། གཉིས་པ་ནི། སློབ་པ་དྲུག་ལ་གང་གི་ཕྱིར། །འཕེལ་བ་འབྲས་བུ་ཁྱད་པར་ཅན། །བཏང་སྟེ་འབྲས་བུ་ཐོབ་པར་འགྱུར། །སློབ་པ་དབང་པོ་འཕོ་བ་ནི་གཟུགས་མེད་མ་གཏོགས་པ་སྲིད་པའི་དབང་དུ་བྱས་ནས་ས་དྲུག་ལ་བརྟེན་ནས་འཕོ་སྟེ། ཕྱིར་མི་འོང་གི་འབྲས་བུས་དྲུག་གིས་བསྡུས་པའི་ཕྱིར་དང་གང་གི་ཕྱིར་དབང་པོ་འཕེལ་བ་ནི་དབང་པོ་རྟུལ་པོའི་ལམ་གྱི་ལན་གཅིག་ཕྱིར་འོང་བའི་འབྲས་བུ་དང་འབྲས་བུ་ཁྱད་པར་ཅན་སྤོང་བའི་སྦྱོར་བ་དང་། བར་ཆད་མེད་ལམ་དང་། རྣམ་གྲོལ་དང་། ཁྱད་པར་གྱི་ལམ་གྱིས་བསམ་གཏན་དང་པོ་སོགས་བཏང་སྟེ། དབང་པོ་རྣོན་པོའི་རིགས་ཀྱི་ལམ་གྱི་འབྲས་བུ་འདོད་པ་ལས་ཆགས་བྲལ་ཙམ་གྱིས་བསྡུས་པ་ཁོ་ན་ཐོབ་པར་འགྱུར་ན་ཕྱིར་མི་འོང་གི་འབྲས་བུ་གཟུགས་མེད་ཀྱིས་བསྡུས་པ་ནི་མེད་པའི་ཕྱིར་ཏེ། མདོ་ལས། ཐ་མའི་ཆ་མཐུན་ལྔ་སྤངས་པའི་ཕྱིར་མི་འོང་བ་ཡིན་ནོ། །ཞེས་དང་། མཐོང་ལམ་སྐྱེ་བ་ནི་སྔར་འཇིག་རྟེན་པའི་ལམ་གྱིས་གཟུགས་མེད་པའི་དངོས་གཞི་དེ་བཏང་ནས་བསམ་གཏན་ས་དྲུག་ལ་བརྟེན་ནས་མཐོང་ལམ་སྐྱེའི། གཟུགས་མེད་ནི་འདོད་པ་ལ་མི་དམིགས་པས་དེ་ལྟར་ན་གཟུགས་མེད་ཀྱི་དངོས་གཞི་ཐོབ་ཀྱང་དེ་ནས་བསམ་གཏན་ས་དྲུག་ལ་(༣༠༡བ)
མཐོང་ལམ་སྐྱེ་བ་དང་འདྲ་བར་བརྗོད་དོ། །གཉིས་པ་དགུར་དབྱེ་བ་ལ། དབྱེ་བ་དངོས་དང་། འབྱེད་པའི་རྒྱུ་མཚན་ནོ། །དང་པོ་ནི། སངས་རྒྱས་གཉིས་དང་ཉན་ཐོས་བདུན། །དགྲ་བཅོམ་ཐམས་ཅད་དབང་པོའི་བྱེ་བྲག་ལས་དགུ་ཁོ་ན་ཡིན་ཏེ། མི་གཡོ་བ་ཁོ་ནའི་བྱེ་བྲག་སངས་རྒྱས་དང་། རང་སངས་རྒྱས་གཉིས་གཉིས་ཀའི་ཆ་ལས་རྣམ་གྲོལ་ཁོ་ནས་བསྡུས་པའི་ཕྱིར་དང་། ཡོངས་སུ་ཉམས་པའི་ཆོས་ཅན་ལ་སོགས་པ་ལྔ་མི་གཡོ་བའི་ཆོས་ཅན་སྦྱངས་པ་ལས་གྱུར་པ་དང་། དང་པོ་ནས་དེའི་རིགས་ཅན་གཉིས་ཏེ་ཉན་ཐོས་བདུན་ནོ། །གཉིས་པ་ནི། དེ་དགུ་དབང་པོ་རྣམ་དགུ་ཅན། །གང་ཟག་བདུན་པོ་སྦྱོར་བ་དང་། །དབང་པོ་སྙོམས་འཇུག་རྣམ་གྲོལ་དང་། །གཉིས་ཀས་བྱས་པའོ། གང་ཟག་དེ་དགུ་ཆུང་ངུའི་ཆུང་ངུ་ལ་སོགས་པ་དབང་པོའི་བྱེ་བྲག་རྣམ་པ་དགུའི་བྱེ་བྲག་གིས་བཞག་པ་ཅན་ནོ། །དེའང་ཡོངས་སུ་ཉམས་པའི་ཆོས་ཅན་ནི་དབང་པོ་ཐ་མའི་ཐ་མ། འཆི་བར་སེམས་པའི་ཐ་མའི་འབྲིང་། རྗེས་སུ་བསྲུང་བའི་ཆོས་ཅན་ཐ་མའི་རབ། གནས་པ་ལས་མི་བསྐྱོད་པ་འབྲིང་གི་ཐ་མ། རབ་ཏུ་རྟོགས་པའི་བོས་སུ་གྱུར་པ་འབྲིང་གི་འབྲིང་། མི་གཡོ་བའི་སྦྱངས་པ་ལས་གྱུར་བ་འབྲིང་གི་རབ། མི་གཡོ་བ་དང་པོ་ནས་དེའི་རིགས་རབ་ཀྱི་ཐ་མ། རང་སངས་རྒྱས་རབ་ཀྱི་འབྲིང་། བུདྡྷ་རབ་ཀྱི་རབ་བོ། །འཕགས་པའི་གང་ཟག་ཐམས་ཅད་ནི་བདུན་ཏེ། དད་པས་རྗེས་འབྲང་དང་། ཆོས་ཀྱི་རྗེས་འབྲང་དང་། དད་པས་མོས་པ་དང་། མཐོང་བས་ཐོབ་པ་དང་། ལུས་ཀྱིས་མངོན་སུམ་དུ་བྱེད་པ་དང་། ཤེས་རབ་ཀྱིས་རྣམ་པར་གྲོལ་བ་དང་། གཉིས་ཀའི་ཆ་ལས་རྣམ་པར་གྲོལ་བའོ། །[གཉིས་པ་རྣམ་གྲངས་བདུན་དུ་དབྱེ་བ་ནི།] གང་ཟག་བདུན་པོ་དེ་དག་ཀྱང་སྦྱོར་བ་ལས་ནི་དང་པོ་གཉིས་ཏེ། དང་པོ་སོ་སྐྱེའི་གནས་སྐབས་ཉིད་ན་གཞན་གྱི་དྲིང་འཇོག་པས་གཞན་ལས་དྲན་པ་ཉེར་གཞག་སོགས་ཆོས་ཐོས་ནས་ཕྱིས་དོན་ལ་སྦྱོར་ཞིང་བསམ་སྒོམ་བསྟེན་པའི་ཕྱིར་དང་། སྔོན་སོ་སྐྱེའི་ཚེ་ཤེས་རབ་ཀྱིས་ཆོས་ཀྱི་རྗེས་སུ་འབྲང་བས་རང་ཉིད་ཀྱི་བྱང་ཆུབ་ཀྱི་ཕྱོགས་མཐུན་ལ་བསམ་སྒོམ་བསྟེན་(༣༠༢ན)
པའི་ཕྱིར་དང་། དབང་པོ་རྟུལ་རྣོ་ལས་དད་མོས་དང་མཐོང་ཐོབ་སྟེ། དད་པས་མོས་པ་ལྷག་པ་དང་། ཤེས་རབ་ལྷག་པའི་སྒོ་ནས་དབང་པོ་རྟུལ་པོ་དང་རྣོན་པོ་ཡིན་པའི་ཕྱིར། སྙོམས་འཇུག་ལས་ནི་ལུས་ཀྱིས་མངོན་སུམ་དུ་བྱེད་པ་སྟེ། འགོག་པའི་སྙོམས་པར་འཇུག་པ་མྱང་འདས་དང་འདྲ་བའི་ཆོས་ལུས་ཀྱིས་མངོན་སུམ་དུ་བྱེད་པའི་ཕྱིར། ཉོན་མོངས་པ་ལས་རྣམ་པར་གྲོལ་བ་ལས་ནི་ཤེས་རབ་ཀྱིས་ཉོན་མོངས་པ་ལས་རྣམ་པར་གྲོལ་བའི་ཕྱིར། སྙོམས་འཇུག་དང་རྣམ་གྲོལ་གཉིས་ཀས་བྱས་པ་ནི་གང་གིས་བསམ་གཏན་བསྐྱེད་མི་ནུས་པ་ལུས་སེམས་ལས་སུ་མི་རུང་བ་རྣམ་ཐར་གྱི་སྒྲིབ་པ་ལས་འགོག་པའི་སྙོམས་འཇུག་ཐོབ་པས་གྲོལ་བའི་ཕྱིར་དང་། དགྲ་བཅོམ་གྱིས་རྣམ་གྲོལ་ཐོབ་བས་ཉོན་སྒྲིབ་ཀྱི་ཆ་ལས་གྲོལ་བའི་ཕྱིར་རོ། །གསུམ་པ་རྫས་དྲུག་ཏུ་བསྡུ་བ་ལ། དངོས་དང་། འཕྲོས་དོན་ནོ། །དང་པོ་ནི། དེ་དག་དྲུག །འདི་ལྟར་ལམ་གསུམ་ལ་གཉིས་གཉིས། །མིང་གི་སྒོ་ནས་གང་ཟག་དེ་བདུན་ཡིན་ལ། དེ་དག་རྫས་སུ་ནི་དྲུག་ཡིན་ཏེ། འདི་ལྟར་ལམ་གསུམ་གྱི་གནས་སྐབས་ལ་རྫས་གཉིས་གཉིས་ཏེ། མཐོང་ལམ་ལ་དད་པ་དང་ཆོས་ཀྱི་རྗེས་འབྲངས་གཉིས། སྒོམ་ལམ་ལ་དད་མོས་མཐོང་ཐོབ་གཉིས། མི་སློབ་པ་ལ་དབང་པོ་རྟུལ་ཀྱང་མཐོང་བའི་ཆོས་ལ་བདེ་བར་གནས་པའི་བསམ་གཏན་སྦྱང་བ་དང་རྣམ་པར་ཐར་པ་སྦྱང་བ་གཉིས་ཀའི་ཆ་ལས་གྲོལ་བ་ཡིན་རུང་། ཤེས་རབ་ཀྱི་ཆ་ལས་གྲོལ་བ་ཡིན་རུང་དུས་ཀྱིས་རྣམ་པར་གྲོལ་བ་དང་། དབང་པོ་རྣོ་བ་ཤེས་རབ་ཀྱིས་གྲོལ་བ་ཡིན་རུང་གཉིས་ཀས་གྲོལ་བ་ཡིན་རུང་དུས་དང་མི་སྦྱོར་བ་རྣམ་པར་གྲོལ་བའོ། །རྒྱས་པར་དབྱེ་ན། དད་པའི་རྗེས་འབྲངས་ལ་མཐོང་ལམ་པ་བཅོ་ལྔ། དང་པོ་སྡུག་བསྔལ་ཆོས་བཟོད་ལ་ཉམས་པའི་ཆོས་ཅན་ནས་རྟོགས་པའི་སྐལ་བ་ཅན་གྱི་བར་རིས་ལྔ། ལྔ་པོ་རེ་རེ་ལ་འཆིང་བ་མཐའ་དག་དང་ལྡན་པ་དང་། (༣༠༢བ)
འདོད་ཉོན་དང་པོ་ནས་འདོད་ཆགས་དང་བྲལ་བ་དགུ་ནས་ཅིའང་མེད་ལ་འདོད་ཆགས་དང་བྲལ་བའི་དགུ་བརྒྱད་བརྒྱད་དགུ་བདུན་ཅུ་དོན་གཉིས་སྔར་གྱི་འཆིང་བ་མཐའ་དག་དང་ལྡན་པ་སྟེ་དོན་གསུམ། སྤྱིར་དྲིལ་བས་སུམ་བརྒྱ་དང་དྲུག་ཅུ་རེ་ལྔའོ། །དེ་ཡང་དབང་པོ་རྣོ་འབྲིང་རྟུལ་པོའི་བྱེ་བྲག་གི་སྟོང་དང་དགུ་བཅུ་གོ་ལྔ། དེ་ཉིད་རྟེན་གླིང་གསུམ་གྱི་མི་འདོད་ལྷ་རིས་དྲུག་རེ་རེ་ལ་སྦྱར་བས་སྟོང་ཕྲག་དགུ་དང་བརྒྱད་བརྒྱ་ལྔ་བཅུ་རྩ་ལྔ། མཐོང་ལམ་ཕྱི་མ་བཅུ་བཞི་པོ་ལའང་རེ་རེ་ཞིང་སྟོང་ཕྲག་དགུ་དང་བརྒྱད་བརྒྱ་ལྔ་བཅུ་རྩ་ལྔ་རེ་བྱས་ནས། སྔར་གྱི་དེ་དང་བསྡོམས་པས་དབང་པོ་དང་རིགས་དང་ལམ་དང་འདོད་ཆགས་དང་བྲལ་བ་དང་རྟེན་གྱི་སྒོ་ནས་འབུམ་ཕྲག་གཅིགཁྲི་ཚོ་བཞི། སྟོང་ཕྲག་བདུན་དང་བརྒྱད་བརྒྱ་ཉི་ཤུ་རྩ་ལྔར་འགྱུར་རོ། །གང་ཟག་གཞན་དག་ཀྱང་ཅི་རིགས་པར་དེ་བཞིན་དུ་བརྩི་བར་བྱའོ་ཞེས་པ་ལས། ཅི་རིགས་པར་བརྩི་ཚུལ་ནི། དེའང་ཆོས་ཀྱི་རྗེས་འབྲངས་དང་། མཐོང་ཐོབ་དང་དུས་དང་མི་སྦྱོར་བ་གྲོལ་བ་རྣམས་ལ་ནི་རིགས་ཀྱི་དབྱེ་བ་མེད་ལ། དད་མོས་དང་དུས་ཀྱི་རྣམ་གྲོལ་གཉིས་ལ་ནི་རིགས་ལྔའི་དབྱེ་བ་ཡོད་དོ། །ཡང་དད་མོས་མཐོང་ཐོབ་ལ་ལམ་གྱི་སྒོ་ནས་ནི་སློབ་དཔོན་རྒྱལ་པོའི་སྲས་ལྟར་ན་འབྲས་བུ་ལ་གནས་པའི་སེམས་ཀྱི་སྐད་ཅིག་བཅུ་དྲུག་པ་ལམ་ལ་རྗེས་ཤེས་ཀྱི་དབང་དུ་བྱས་ན་དབྱེ་བ་མེད་ལ། སྐལ་ལྡན་ཁྱད་པར་ཅན་ནི་ས་དགུ་ལ་བརྟེན་པའི་ལམ་དགུར་འདོད་དོ། །ལུས་ཀྱིས་མངོན་སུམ་བྱེད་པ་ནི། དད་མོས་མཐོང་ཐོབ་ཏུ་འདུག་པས་ལོགས་སུ་བརྩིར་མེད་དོ། །གལ་ཏེ་བརྩི་ན་དབང་པོའི་སྒོ་ནས་གསུམ་དང་། རིགས་ཀྱི་སྒོ་ནས་དད་མོས་ཡིན་ན་ལྔ་དང་། མཐོང་ཐོབ་ཡིན་ན་དབྱེ་བ་མེད་དོ། །ལམ་དང་འདོད་ཆགས་དང་བྲལ་བ་ལའང་དབྱེ་བ་མེད་དོ། །རྟེན་ནི་སྐལ་ལྡན་ཁྱད་པར་ཅན་ནི་(༣༠༣ན)
འདོད་པ་ནས་སྲིད་རྩེའི་བར་དུ་ཉེར་དགུར་འདོད་ལ། རྒྱལ་པོའི་སྲས་ནི། གླིང་གསུམ་གྱི་མི་དང་འདོད་ལྷ་རིས་དྲུག་སྟེ་དགུ་དང་། གཟུགས་ན་གནས་བཅུ་དྲུག་དང་། སྲིད་རྩེ་སྟེ་ཉི་ཤུ་རྩ་དྲུག་ཏུ་འདོད་དོ། །ཤེས་རབ་ཀྱི་རྣམ་གྲོལ་ཀྱང་དུས་ཀྱི་རྣམ་གྲོལ་ཡིན་ན་རིས་ལྔ་དང་། དུས་དང་མི་སྦྱོར་བ་ཡིན་ན་ནི་རིགས་ལ་དབྱེ་བ་མེད་དོ། །དེ་ལས་གཞན་ནི་དད་པའི་རྗེས་འབྲངས་བཞིན་ནོ། །འདི་དག་གི་ཞིབ་པར་འགྲེལ་པ་རྒྱལ་སྲས་མར་བལྟའོ། །རྟོགས་སླ་བར་བརྗོད་ན། དད་རྗེས་ལ་རྟེན་དགུ། དབང་པོ་གསུམ། རིགས་ལྔ་ལམ་བཅོ་ལྔ། ཆགས་བྲལ་དོན་གསུམ་བསྡོམས་པས་ཆིག་འབུམ་བཞི་ཁྲི་བདུན་སྟོང་བརྒྱད་བརྒྱ་ཉེར་ལྔ། ཆོས་རྗེས་ལ་རྟེན་དབང་ལམ་ཆགས་བྲལ་སྔ་མ་ལྟར་ལ་རིགས་ཀྱི་དབྱེ་བ་མེད་པས་ཉི་ཁྲི་དགུ་སྟོང་ལྔ་བརྒྱ་རེ་ལྔའོ། །དད་མོས་ལ་རྟེན་དབང་རིགས་ཆགས་བྲལ་སྔ་མ་ལྟར་ལ་ལམ་གྱི་དབྱེ་བ་མེད་པས་དགུ་སྟོང་བརྒྱད་བརྒྱ་ལྔ་བཅུ་ང་ལྔའོ། །དད་མོས་རྡོར་ཏིང་ལ་གནས་པ་ནི། རྟེན་ཉེར་དགུ། དབང་པོ་གསུམ། རིགས་ལྔ། ཆགས་བྲལ་གྱ་གཅིག་བསྡོམས་པས་སུམ་ཁྲི་ལྔ་སྟོང་ཉིས་བརྒྱ་སོ་ལྔའོ། །མཐོང་ཐོབ་ལ། རྟེན་དགུ། དབང་པོ་གསུམ། ལམ་བཅོ་ལྔ། ཆགས་བྲལ་དོན་གསུམ་སྔ་མ་ལྟར་ལ་རིགས་ཀྱི་དབྱེ་བ་དོར་བས་སྟོང་དགུ་བརྒྱ་དོན་གཅིགམཐོང་ཐོབ་རྡོར་ཏིང་ལ་གནས་པའི་རྟེན་ཉེར་དགུ། དབང་པོ་གསུམ། ཆགས་བྲལ་གྱ་གཅིག །རིགས་ཀྱི་དབྱེ་བ་དོར་བས་བདུན་སྟོང་བཞི་བཅུ་རྩ་བདུན་ནོ། །ལུས་ཀྱིས་མངོན་དུ་བྱེད་པ་ནི་དེ་གཉིས་སུ་མི་བརྩི་ན། རྟེན་འདོད་པའི་དགུ། གཟུགས་ཀྱི་བཅུ་དྲུག་སྟེ་ཉེར་ལྔ། དེ་ཉིད་སྲིད་རྩེར་སྐྱེས་པའི་ཚེ་སྙོམས་འཇུག་དེ་དང་ལྡན་པས་ལྡན་པའི་སྒོ་ནས་ཉི་ཤུ་རྩ་དྲུགདབང་པོའི་སྒོ་ནས་གསུམ། དད་མོས་ཡིན་ན་རིགས་ཀྱི་སྒོ་ནས་ལྔ་(༣༠༣བ)
སུམ་བརྒྱ་དགུ་བཅུ་ཐམ་པ། མཐོང་ཐོབ་ལ་ལམ་རིགས་ཀྱི་དབྱེ་བ་མེད་པས་རྟེན་ཉེར་དྲུགདབང་པོ་གསུམ་ལ་བདུན་ཅུ་དོན་བརྒྱད། འདི་ལ་འདོད་ཆགས་དང་བྲལ་བ་ནས་ཅིའང་མེད་ལ། ཆགས་བྲལ་གྱི་བར་ཁྱད་པར་མེད་པས་དབྱེར་མེད་ལ་སྲིད་རྩེའི་འཆིང་བ་མཐའ་དག་དང་ལྡན་པ་དང་། དང་པོ་ནས་བརྒྱད་པའི་བར་ཡིན་ན་འདོད་ཆགས་དང་བྲལ་བའི་སྒོ་ནས་ཁྱད་ཡོད་ཀྱང་། ལུས་ཀྱིས་མངོན་དུ་བྱེད་པ་དེའི་སྟོབས་ཀྱི་ཐོབ་པ་མིན་པས་དེས་ཁྱད་པར་དུ་བྱས་ཏེ་ཆགས་བྲལ་གྱི་སྒོ་ནས་དབྱེ་བ་མེད། འགོག་སྙོམས་ལུས་ཀྱིས་མངོན་དུ་བྱེད་ན་སྲིད་རྩེ་བ་ལ་ལུས་མེད་པས། དེ་ཇི་ལྟར་མངོན་དུ་བྱེད་སྙམ་ན། འདོད་གཟུགས་ཀྱི་རྟེན་ཅན་གྱི་འགོག་པའི་སྙོམས་འཇུག་བསྐྱེད་པ་དང་ལྡན་པས་ཕྱིར་མི་འོང་བ་ལུས་མངོན་བྱེད་པར་གྱུར་པ་དེའི་ལྡན་པ་ཙམ་སྲིད་རྩེ་བ་དང་འབྲེལ་བས་སྲིད་རྩེ་ལ་འགོག་སྙོམས་ཡོད་པར་བཞག་གོ། །དུས་སྦྱོར་ལ་རྟེན་ཉེར་དགུ། དབང་པོ་གསུམ། རིགས་ལྔ་སྟེ་བཞི་བརྒྱ་སོ་ལྔ། དུས་མི་སྦྱོར་ལ་རྟེན་ཉེར་དགུ། དབང་པོ་གསུམ། རིགས་ཀྱི་དབྱེ་བ་མེད་པས་བརྒྱད་ཅུ་གྱ་བདུན། དེ་དག་གི་ཤེས་རབ་དང་གཉིས་ཀའི་ཆ་ལས་རྣམ་གྲོལ་ནི་དབང་པོ་རྣོ་རྟུལ་གཉིས་ཀ་ཡོད་པས་ལྔ་བརྒྱ་ཉེར་གཉིས་སུ་འདྲ་བར་འཆད། ཡང་ན་ཤེས་རབ་རྣམ་གྲོལ་སྙོམས་འཇུག་གི་སྒྲིབ་པ་མ་སྤངས་པ་དངོས་གཞི་མ་ཐོབ་གོང་དུ་མི་སྐྱེ་བའི་དུས་སྦྱོར་ལ་རྟེན་དགུ། དབང་པོ་གསུམ། རིགས་ལྔ་སྟེ་བརྒྱ་སོ་ལྔ། དུས་མི་སྦྱོར་ལ་རྟེན་དགུ། དབང་པོ་གསུམ་ཉེར་བདུན། དུས་མི་སྦྱོར་གྱི་རྐྱང་གྲོལ་གཉིས་ཀ་སྙོམས་པས་བརྒྱ་དྲུག་ཅུ་རེ་གཉིས་སོ། །ཅུང་ཟད་ཙམ་གྱི་བགྱི་བས་དཀའ་བའི་གནས། །ཇི་བཞིན་ལེགས་པར་འཁྲོལ་བའི་གནས་མེད་པས། །ཚིག་གི་ཁུར་གྱི་ལྕི་བ་ཐེག་བྱས་ཏེ། །འཛིངས་པ་མེད་པར་བདེ་བར་བགྲོལ་ཟིན་ཏོ། །གཉིས་པ་ལ། རྣམ་གྲོལ་གཉིས་ངོས་བཟུང་། ཡོན་(༣༠༤ན)
ཏན་རྫོགས་པའི་ཁྱད་པར་རོ། །དང་པོ་ནི། འགོག་ཐོབ་གཉིས་ཀ་ལས་རྣམ་གྲོལ། །ཤེས་རབ་ཀྱིས་ནི་ཅིག་ཤོས་སོ། །འོ་ན་གཉིས་ཀའི་ཆ་ལས་རྣམ་གྲོལ་དང་ཤེས་རབ་ཀྱི་རྣམ་གྲོལ་གང་ཞེ་ན། གང་ཞིག་བསམ་གཏན་དངོས་གཞི་ལ་བརྟེན་ནས་འགོག་པའི་སྙོམས་འཇུག་ཐོབ་པ་དེ་ནི་གཉིས་ཀའི་ཆ་ལས་རྣམ་པར་གྲོལ་བ་ཡིན་ཏེ། ཤེས་རབ་ཀྱིས་ཉོན་མོངས་པའི་སྒྲིབ་པ་དང་ཏིང་ངེ་འཛིན་གྱི་རྣམ་པར་ཐར་པའི་སྒྲིབ་པ་ལས་ཀྱང་གྲོལ་བའི་ཕྱིར། དེ་ལ་རྣམ་པར་ཐར་པའི་སྒྲིབ་པ་ནི། དམིགས་པ་བརྗེད་པ་དང་བྱིང་བ་དང་རྒོད་པ་དང་རྩོམ་པ་དང་མི་རྩོམ་པའི་ཉེས་པ་ལྔ་ལ་སོགས་པ་སྟེ། གང་གིས་རྣམ་པར་ཐར་པ་དང་བསམ་གཏན་དག་བསྐྱེད་པར་མི་ནུས་པ་སྟེ་ལུས་དང་སེམས་ལས་སུ་མི་རུང་བ་ཉིད་དོ་ཞེས་པ་དང་། སྙོམས་པར་འཇུག་པའི་སྒྲིབ་པ་ནི། གང་ཞིག་ཡོད་ན་སེམས་ལས་སུ་མི་རུང་བས་ཁམས་གསུམ་གྱི་འདོད་ཆགས་དང་བྲལ་བ་དག་གིས་ཀྱང་བསམ་གཏན་དང་པོའི་དངོས་གཞིའང་བསྐྱེད་པར་མི་ནུས་པ་ཞེས་བཤད་པས་བསམ་གཏན་དང་པོའི་ཉེར་བསྡོགས་ཁོ་ན་ལ་བརྟེན་པ་ཡིན་ལ། དེའང་གང་ཟག་ནི་ཉན་ཐོས་ལ་སྲིད་ཀྱི། སངས་རྒྱས་གཉིས་ནི་གཉིས་ཀའི་ཆ་ལས་རྣམ་གྲོལ་ཡིན་པས་རྣམ་ཐར་དང་སྙོམས་འཇུག་གི་སྒྲིབ་པ་མ་སྤངས་པ་མི་སྲིད་པའི་ཕྱིར་རོ། །སྒྲིབ་པ་འདི་ནི་ཤེས་བྱའི་སྒྲིབ་པ་ཡིན་ཏེ། རྣམ་པར་གཏན་ལ་དབབ་པ་བསྡུ་བ་ལས། རྣམ་ཐར་རྣམས་ནི་ཤེས་བྱའི་སྒྲིབ་པ་ལས་རྣམ་པར་ཐར་པས་རབ་ཏུ་ཕྱེ་བ་ཡིན་ཏེ། ཤེས་བྱའི་སྒྲིབ་པ་ཇི་ཙམ་ལས་ཉན་ཐོས་དང་རང་སངས་རྒྱས་རྣམས་ཀྱི་སེམས་རྣམ་པར་གྲོལ་བར་འགྱུར་བ་ཡིན་ནོ། །ཞེས་བཤད་དོ། །གང་ཞིག་བསམ་གཏན་དང་པོའི་ཉེར་བསྡོགས་ཙམ་ལ་བརྟེན་ནས་བདག་མེད་རྟོགས་པའི་ཤེས་རབ་ཀྱི་སྟོབས་ཀྱིས་ཉོན་མོངས་པའི་སྒྲིབ་པ་འབའ་ཞིག་ལས་གྲོལ་བ་དེ་ནི་གཉིས་ཀའི་ཆ་ལས་རྣམ་གྲོལ་ལས། གཅིག་ཤོས་ཤེས་རབ་(༣༠༤བ)
ཀྱིས་རྣམ་པར་གྲོལ་བ་སྟེ། དེ་དག་ལ་དགྲ་བཅོམ་པ་རྒྱན་ཅན་དང་རྒྱན་མེད་ཅེས་བྱ་བར་གྲགས་སོ། །གཉིས་པ་ནི། སྙོམས་འཇུག་དབང་པོ་འབྲས་རྣམས་ཀྱིས། །སློབ་པ་ཡོངས་རྫོགས་ཞེས་བྱ་འོ། །གཉིས་ཀྱིས་མི་སློབ་ཡོངས་སུ་རྫོགས། །བཅོམ་ལྡན་འདས་ཀྱིས་འདི་ལ་གང་ཞིག་ཉོན་མོངས་འཇིག་ལྟ་སོགས་ཐ་མའི་ཆ་མཐུན་ལྔ་སྤངས་ཏེ་ཡོངས་སུ་མི་ཉམས་པའི་ཆོས་ཅན་ཡིན་པས་མི་འཕྲོག་ཆོས་ལྡན་སློབ་པ་ཡོངས་སུ་རྫོགས། ཞེས་གསུངས་པ་ལ། ཇི་ཙམ་གྱིས་སློབ་པ་རྫོགས་ཤེ་ན། སློབ་པ་ནི་སྙོམས་འཇུག་དང་དབང་པོ་དང་འབྲས་བུ་རྣམས་ཀྱིས་ཡོངས་སུ་རྫོགས་པ་ཞེས་བྱའོ། །དེའང་ཕྱིར་མི་འོང་དད་པས་མོས་པ་ལུས་ཀྱིས་མངོན་སུམ་དུ་བྱེད་པ་ནི་འབྲས་བུའི་སྒོ་ནས་ཡོངས་སུ་རྫོགས་པ་ཡིན་ཏེ། དད་པས་མོས་པའི་ཕྱིར་དབང་པོའི་སྒོ་ནས་ཡོངས་སུ་རྫོགས་པའང་མ་ཡིན་ལ། ལུས་ཀྱིས་མངོན་དུ་བྱེད་པ་མ་ཡིན་པས་སྙོམས་འཇུག་གི་སྒོ་ནས་ཀྱང་མ་ཡིན་པའི་ཕྱིར། མཐོང་ཐོབ་ཆགས་བཅས་དབང་པོ་ཁོ་ནའི་སྒོ་ནས་རྫོགས་པ་སྟེ། དབང་པོ་རྣོན་པོ་ཡིན་པའི་ཕྱིར། འབྲས་བུའི་སྒོ་ནས་མ་ཡིན་ཏེ། འདོད་ཆགས་དང་མ་བྲལ་བའི་ཕྱིར། སྙོམས་འཇུག་གི་སྒོ་ནས་མ་ཡིན་ཏེ། ཕྱིར་མི་འོང་བའི་འབྲས་བུ་དང་སྙོམས་འཇུག་དག་མ་ཐོབ་པའི་ཕྱིར། ཕྱིར་མི་འོང་མཐོང་བས་ཐོབ་འགོག་པ་ཐོབ་པ་མ་ཡིན་པ་ནི་འབྲས་བུ་དང་དབང་པོ་ལས་རྫོགས་པའོ། །དད་མོས་འགོག་པ་ཐོབ་པ་ནི་འབྲས་བུ་དང་སྙོམས་འཇུག་ལས་རྫོགས་པའོ། །མཐོང་བས་ཐོབ་པ་ལུས་ཀྱིས་མངོན་སུམ་དུ་བྱེད་པ་ནི་འབྲས་བུ་དང་དབང་པོ་དང་སྙོམས་པར་འཇུག་པ་ལས་རྫོགས་པའོ། །སྙོམས་པར་འཇུག་པ་ཁོ་ན་དང་སྙོམས་འཇུག་དང་དབང་པོས་རྫོགས་པ་མེད་དེ། ཕྱིར་མི་འོང་གི་འབྲས་བུ་མ་ཐོབ་པར་འགོག་པའི་སྙོམས་འཇུག་མེད་པར་བྱས། དབང་པོ་དང་སྙོམས་འཇུག་གཉིས་ཀྱིས་མི་སློབ་པ་ཡོངས་སུ་རྫོགས་པའོ། །འདིའི་འབྲས་བུ་ཡོངས་སུ་རྫོགས་པས་ནི་ཡོངས་སུ་རྫོགས་པ་ཉིད་དུ་མ་བཞག་སྟེ། འབྲས་(༣༠༥ན)
བུ་ཡོངས་སུ་མ་རྫོགས་པ་ལ་མི་སློབ་པ་མེད་པའི་ཕྱིར། ཤེས་རབ་ཀྱི་རྣམ་གྲོལ་དུས་དང་མི་སྦྱོར་བར་གྲོལ་བ་ནི་དབང་པོ་ཁོ་ན་ལས་དང་། གཉིས་ཀའི་ཆ་ལས་རྣམ་གྲོལ་དུས་དང་སྦྱོར་བ་ནི་སྙོམས་འཇུག་ཁོ་ན་ལས་སོ། །གཉིས་ཀའི་ཆ་ལས་རྣམ་གྲོལ་དུས་དང་མི་སྦྱོར་བར་གྲོལ་བ་ནི་དབང་པོ་དང་སྙོམས་འཇུག་ལས་སོ། །གསུམ་པ་ལམ་བྱེ་བྲག་ཏུ་བཤད་པ་ལ། ལམ་གྱི་ཁྱད་པར་གྱི་ཡོན་ཏན། བྱང་ཆུབ་ཕྱོགས་མཐུན་གྱི་རྣམ་གཞག །ལམ་གྱིས་ཐོབ་པའི་རྣམ་གྲོལ་ལོ། །དང་པོ་ལ། སྦྱོར་ལམ་སོགས་བཞིའི་ཁྱད་པར། དཀའ་སླ་མྱུར་བུལ་བཞིའི་ཁྱད་པར་རོ། །དང་པོ་ནི། མདོར་ན་ལམ་ནི་རྣམ་བཞི་སྟེ། །ཁྱད་པར་ཅན་དང་རྣམ་གྲོལ་དང་། །བར་ཆད་མེད་དང་སྦྱོར་ཞེས་བྱ། །ལམ་ལ་འཇིག་རྟེན་པ་དང་དེ་ལས་འདས་པ་དང་། མཐོང་སྒོམ་མི་སློབ་ལམ་གསུམ་དང་། སྦྱོར་བ་དང་། བར་ཆད་མེད་པ་དང་། རྣམ་གྲོལ་དང་། ཁྱད་པར་ཅན་གྱི་ལམ་ཞེས་བྱེ་བྲག་མང་པོ་བཤད་པ་ཐམས་ཅད་མདོར་བསྡུ་ན། ལམ་ནི་རྣམ་པ་བཞི་སྟེ། སྦྱོར་བའི་ལམ་ཞེས་བྱ་བ་ནི་ཆོས་མཆོག་ལྟ་བུ་གང་གི་མཇུག་ཐོགས་སུ་བར་ཆད་མེད་ལམ་སྐྱེའོ། །བར་ཆད་མེད་པའི་ལམ་ནི་གང་གི་སྒྲིབ་པ་རབ་ཏུ་སྤོང་བའོ། །དབང་པོ་འཕོ་བའི་བར་ཆད་མེད་ལམ་སྒྲིབ་པ་མི་སྤོང་བའང་ཡོད་དོ། །རྣམ་པར་གྲོལ་བའི་ལམ་ནི་བར་ཆད་མེད་ལམ་གྱི་སྤང་བྱའི་སྒྲིབ་པ་ལས་ངེས་པར་གྲོལ་བ་དང་པོ་ཉིད་དུ་སྐྱེའོ། །ཁྱད་པར་ཅན་གྱི་ལམ་ནི་སྦྱོར་བ་དང་བར་ཆད་མེད་ལམ་དང་རྣམ་གྲོལ་གྱི་ལམ་གསུམ་ལས་གཞན་པའི་ལམ་གང་ཡིན་པ་སྟེ། ལམ་ལ་རྗེས་ཤེས་ཕན་ཆད་ཟག་མེད་སྐད་ཅིག་བཅུ་བདུན་པ་ཕན་ཆད་དང་། ཟད་པ་ཤེས་པའི་རྒྱུན་དགྲ་བཅོམ་གྱིས་མཐོང་ཆོས་ལ་བདེ་བར་གནས་པ་དང་། ཡོན་ཏན་ཁྱད་པར་ཅན་སྒྲུབ་པའི་ལམ་ལྟ་བུའོ། །དེས་ན་མྱ་ངན་ལས་འདས་པ་དེར་འགྲོ་བའི་ཕྱིར་རམ། འདིས་མྱང་འདས་འཚོལ་ཞིང་ཐོབ་(༣༠༥བ)
པར་བྱེད་པའི་ཕྱིར། འདི་ནི་མྱ་ངན་ལས་འདས་པའི་ལམ་མམ་ཤུལ་ཡིན་ནོ། །རྣམ་གྲོལ་དང་ཁྱད་པར་གྱི་ལམ་དག་ཀྱང་ལམ་དུ་བཞག་སྟེ། སྦྱོར་བ་དང་བར་ཆད་མེད་ལམ་དུ་དམིགས་རྣམ་འདྲ་བ་དང་། སྤོང་ལམ་དང་ཟག་མེད་དུ་འདྲ་བ་དང་། རྒྱུ་བསགས་པའི་སྒོ་ནས་ཆེས་ཆེ་པ་ཡིན་པའི་ཕྱིར་ཏེ། ལམ་གོང་ནས་གོང་དུ་ཕྱིན་པར་བྱེད་པའི་ཕྱིར་རམ། དེ་སྐྱེས་ན་ཕུང་པོ་ལྷག་མ་མ་ལུས་པའི་མྱང་འདས་ལ་འཇུག་པའི་ཕྱིར་རོ། །ཡང་དེ་དག་ལམ་ཡིན་ཏེ། མྱང་འདས་སྒྲུབ་པར་བྱེད་པས་སྒྲུབ་པ་ཞེས་གསུངས་པའི་ཕྱིར་རོ། །གཉིས་པ་ནི། བསམ་གཏན་དག་གི་ལམ་རྣམས་སླ། །ས་གཞན་དག་གི་དཀའ་བ་ཡིན། །བློ་རྟུལ་མངོན་ཤེས་བུལ་བ་སྟེ། །ཅིག་ཤོས་ཀྱི་ནི་མངོན་ཤེས་མྱུར། །ལམ་ལ་མངོན་ཤེས་བུལ་ལ་དཀའ་བ་དང་། མངོན་ཤེས་མྱུར་ལ་དཀའ་བ་དང་། དེ་བཞིན་དུ་སླ་བའི་ལམ་ཡང་རྣམ་པ་གཉིས་སོ། །འདིའང་ཤེས་བྱ་ཤེས་པ་ཙམ་ལ་བརྗོད་ཀྱི། ལྷའི་མིག་གི་མངོན་ཤེས་སོགས་ཁྱད་པར་ལ་མི་བརྗོད་དོ། །དེ་ལ་བསམ་གཏན་བཞི་པོ་དག་གི་ལམ་རྣམས་སླ་སྟེ། ཡན་ལག་གིས་ཡོངས་སུ་ཟིན་པ་དང་། ཞི་གནས་དང་ལྷག་མཐོང་མཉམ་པ་དག་གིས་འབད་མི་དགོས་པར་འབྱུང་བའི་ཕྱིར། བླང་དོར་རྩལ་ཆེ་བས་མཉམ་པས་ཞིང་རྨོ་བ་སླ་བ་དང་འདྲའོ། །ས་གཞན་མི་ལྕོགས་མེད་དང་བསམ་གཏན་ཁྱད་པར་ཅན་དང་གཟུགས་མེད་རྣམས་ཀྱི་ལམ་ནི་དཀའ་བ་ཡིན་ཏེ། བསམ་གཏན་དེ་གཉིས་ན་ཞི་གནས་ཆུང་ལ་གཟུགས་མེད་ན་ལྷག་མཐོང་ཆུང་བས་འབད་ནས་འབྱུང་བའི་ཕྱིར། །ཐང་ལ་གཟིངས་བཞིན་ནོ། །ལམ་དེ་ཡང་གཉིས་ཏེ། དབང་པོ་རྟུལ་བ་ནི་ལམ་སླའམ་དཀའ་ཡང་རུང་མངོན་པར་ཤེས་པ་བུལ་བ་སྟེ་བློ་ཤེས་རབ་ཆུང་བ་ཞེས་བྱའོ། །ཅིག་ཤོས་དབང་རྣོན་ཉིད་ཀྱིས་ནི་ཤེས་རབ་རྣོ་བས་མངོན་པར་ཤེས་པ་མྱུར་བའོ། །ཤེས་རབ་འདིས་མངོན་དུ་ཕྱོགས་ནས་རབ་ཏུ་ཤེས་པས་ན་མངོན་པར་ཤེས་པའོ། །ལམ་འདི་ལ་མངོན་པར་ཤེས་པ་བུལ་བ་(༣༠༦ན)
ཡོད་པས་ན་འདི་ནི་མངོན་པར་ཤེས་པ་བུལ་བ་སྟེ། མངོན་ཤེས་མྱུར་བའང་དེ་དང་འདྲའོ། །ཡང་ན་མང་ན་ཤེས་འདི་གང་ཟག་རྨོངས་རྟུལ་བླུན་པོ་ཡིན་པས་མངོན་ཤེས་བུལ་བ་ཡིན་ལ། མངོན་ཤེས་གང་ཟག་ཡིད་རྣོན་པོ་ཡིན་པས་མངོན་པར་ཤེས་པ་མྱུར་བའོ། །གཉིས་པ་བྱང་ཆུབ་ཕྱོགས་མཐུན་བཤད་པ་ལ། བྱང་ཆུབ་ཕྱོགས་མཐུན་གྱི་དབྱེ་བསྡུ། གནས་སྐབས་གང་དུ་སྒོམ་པ། ཟག་བཅས་ཟག་མེད་དཔྱད་པ། ས་གང་ན་ཡོད་པའི་ཚུལ། ཤེས་ནས་དད་པ་གང་དུ་ཐོབ་པའོ། །དང་པོ་ལ། འབྲས་བུ་བྱང་ཆུབ་དང་། རྒྱུ་ལམ་གྱི་ཆོས་སོ། །དང་པོ་ནི། ཟད་དང་མི་སྐྱེ་ཤེས་པ་ནི། །བྱང་ཆུབ། ལམ་འདི་ནི་བྱང་ཆུབ་ཀྱི་ཕྱོགས་དང་མཐུན་པ་ཞེས་བྱ་བའི་མིང་ཐོབ་སྟེ། བྱང་ཕྱོགས་སོ་བདུན་ནམ། ལུས་ཚོར་སེམས་ཆོས་དྲན་པ་ཉེར་གཞག་བཞི་དང་། ཡང་དག་པར་སྤོང་བ་བཞི་ནི། སྡིག་པ་མི་དགེ་བའི་ཆོས་སྐྱེས་པ་རྣམས་སྤོང་བའི་ཕྱིར་དང་། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་དང་། དགེ་བའི་ཆོས་མ་བསྐྱེད་པ་རྣམས་བསྐྱེད་པའི་ཕྱིར་དང་། དགེ་བའི་ཆོས་སྐྱེས་པ་རྣམས་གནས་པ་དང་། མི་བརྗེད་པ་དང་། བསྒོམ་པ་རྫོགས་པ་དང་། ཕྱིར་ཞིང་གོམས་པ་དང་། འཕེལ་ཞིང་རྒྱས་པ་དང་། ཡེ་ཤེས་ཀྱིས་མངོན་དུ་བྱ་བའི་ཕྱིར། འདུན་པ་སྐྱེད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །ཡང་དག་པར་རབ་ཏུ་འཇོག་གོ་ཞེས་པ་དང་། རྫུ་འཕྲུལ་ནི་ཟག་པ་མེད་པའི་ཡེ་ཤེས། རྐང་པ་ནི་སྒྲུབ་པའི་རྒྱུ་སྟེ། རྐང་པ་ནི་ལ་ལ་ནས་ལྡོག །ལ་ལར་འཇུག་པ་དེ་བཞིན་དུ་ཟག་བཅས་ལས་ལྡོག་ལ་ཟག་མེད་དུ་འཇུག་པའི་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པ་རྫུ་འཕྲུལ་གྱི་རྐང་པ་དང་། དེ་བཞིན་དུ་བརྩོན་འགྲུས་དང་། སེམས་དང་། དཔྱོད་པ་དང་། ཏིང་ངེ་འཛིན་ནོ། །འཇིག་རྟེན་ལས་འདས་པའི་དགེ་བའི་ཆོས་(༣༠༦བ)
ཀྱི་བདག་པོར་གྱུར་པས་དབང་པོ་ལྔ་ནི། དད་པ་དང་། བརྩོན་འགྲུས། དྲན་པ་དང་། ཏིང་ངེ་འཛིན། ཤེས་རབ་ཀྱི་དབང་པོ་དག་གོ། །སྟོབས་ལྔ་ནི། དེ་ལྔའི་སྟོབས་དག་གོ། །བྱང་ཆུབ་ཀྱི་ཡན་ལག་བདུན་ནི། དྲན་པ་དང་། ཆོས་རབ་ཏུ་རྣམ་འབྱེད་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ་བཏང་སྙོམས་ཀྱི་བར་དུའང་དེ་དང་འདྲའོ། །འཕགས་ལམ་ཡན་ལག་བརྒྱད་ནི། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཏིང་ངེ་འཛིན་ནོ། །དེ་ལ་ཟད་པ་དང་མི་སྐྱེ་བ་ཤེས་པ་ནི། གང་ཟག་གི་བྱེ་བྲག་ཉོན་མོངས་པའི་མུན་པ་ཟད་པ་ཉན་ཐོས་ཀྱི་བྱང་ཆུབ་དང་། དེའི་ཐོག་ཏུ་ཉོན་མོངས་པ་མུན་པའི་ཕྱེད་ཟད་པ་རང་བྱང་ཆུབ་དང་། གཉིས་ཀ་ཟད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་བྱང་ཆུབ་གསུམ་ཞེས་བྱ་སྟེ། དེ་གཉིས་ཀྱི་ཁམས་གསུམ་པའི་མ་རིག་པ་མ་ལུས་པ་སྤངས་པའི་ཕྱིར་དང་། ཟད་ཤེས་ཀྱིས་རང་གི་དོན་བྱས་པ་རྟོགས་པ་དང་། མི་སྐྱེ་བ་ཤེས་པས་རང་གི་དོན་ཡང་བྱར་མེད་པ་ཉིད་ཇི་ལྟ་བ་བཞིན་དུ་རྟོགས་པའི་ཕྱིར་རོ། །གཉིས་པ་ལ། སྒྲ་དོན་གྱི་སྒོ་ནས་མདོར་བསྟན་པ། དབྱེ་བསྡུ་དངོས། བཅུར་འདུས་པའི་སྒྲུབ་བྱེད་དོ། །དང་པོ་ནི། དེ་དང་མཐུན་ཉིད་ཕྱིར། །སུམ་ཅུ་རྩ་བདུན་དེའི་ཕྱོགས་མཐུན། །མིང་གི་སྒོ་ནས། བྱང་ཆུབ་དེའི་ཕྱོགས་དང་མཐུན་པའི་མིང་གི་སྒོ་ནས་སུམ་ཅུ་རྩ་བདུན་ཅེས་བྱ་སྟེ། ཟད་པ་དང་མི་སྐྱེ་བ་ཤེས་པའི་ཡེ་ཤེས་བྱང་ཆུབ་ཡིན་པ་དེའི་ཚོགས་ཡིན་པས་བྱང་ཆུབ་དེ་དང་མཐུན་པ་ཉིད་ཀྱི་ཕྱིར་རོ། །གཉིས་པ་ནི། རྫས་སུ་བཅུ། །དད་དང་བརྩོན་འགྲུས་དྲན་པ་དང་། །ཤེས་རབ་ཏིང་འཛིན་བཏང་སྙོམས་དགའ། །རྟོག་དང་ཚུལ་ཁྲིམས་ཤིན་ཏུ་སྦྱངས། །དེ་ཐམས་ཅད་བྱེ་སྨྲའི་ལུགས་ཀྱི་ལུས་དང་ངག་ཐ་དད་པའི་ཕྱིར། ཚུལ་ཁྲིམས་ཀྱི་ཡན་ལག་རྫས་གཉིས་ཡིན་པས་(༣༠༧ན)
རྫས་བཅུ་གཅིག་དང་། ཁ་ཅིག་གི་ལུགས་ཀྱི་རྫས་སུ་བཅུ་སྟེ། དད་དང་བརྩོན་འགྲུས་དྲན་པ་དང་། །ཤེས་རབ་ཏིང་འཛིན་བཏང་སྙོམས་དགའ། །རྟོག་དང་ཚུལ་ཁྲིམས་ཤིན་ཏུ་སྦྱངས། །ཞེས་སོ། །གསུམ་པ་བཅུར་འདུས་པའི་སྒྲུབ་བྱེད་ལ། དངོས་དང་། འཕྲོས་དོན་ནོ། །དང་པོ་ནི། དྲན་པ་ཉེར་གཞག་ཤེས་རབ་སྟེ། །བརྩོན་འགྲུས་ཡང་དག་འཇོག་ཅེས་བྱ། །རྫུ་འཕྲུལ་རྐང་པ་ཏིང་འཛིན་ཏོ། །དྲན་པ་ཉེར་གཞག་བཞི་ནི་ཤེས་རབ་སྟེ། ལུས་ལ་ལུས་ཀྱི་རྗེས་སུ་བལྟ་ཞིང་གནས་སོ་ཞེས་འབྱུང་བའི་ཕྱིར་རོ། །ཡང་དག་པར་འཇོག་པའམ་སྤོང་བ་ནི་བརྩོན་འགྲུས་ཞེས་བྱ་སྟེ། འདུན་པ་སྐྱེད། རྩོལ་བར་བྱེད། བརྩོན་འགྲུས་བརྩམས་ཞེས་འབྱུང་བའི་ཕྱིར། རྫུ་འཕྲུལ་གྱི་རྐང་པ་བཞི་ནི་ཏིང་ངེ་འཛིན་གྱི་རང་བཞིན་ནོ། །དེས་ན་དབང་པོ་ལྔ་དང་སྟོབས་ལྔ་ནི་རང་མིང་གིས་སྨོས་པ་དད་པ་དང་བརྩོན་འགྲུས་དང་ཏིང་ངེ་འཛིན་དང་ཤེས་རབ་ཀྱི་རྫས་ལྔ་ཡིན་ལ། དྲན་པ་ཉེར་གཞག་དང་། ཆོས་རབ་ཏུ་རྣམ་འབྱེད་བྱང་ཆུབ་ཀྱི་ཡན་ལག་དང་། ཡང་དག་པའི་ལྟ་བ་ནི་ཤེས་རབ་ཁོ་ན་ཡིན་ནོ། །ཡང་དག་སྤོང་བ་བཞི་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་ཡང་དག་པའི་རྩོལ་བ་ནི་བརྩོན་འགྲུས་སོ། །རྫུ་འཕྲུལ་གྱི་རྐང་པ་རྣམས་དང་ཏིང་འཛིན་ཡང་དག་བྱང་ཆུབ་ཀྱི་ཡན་ལག་དང་། ཡང་དག་པའི་ཏིང་ངེ་འཛིན་ནི་ཏིང་འཛིན་ཁོ་ནའོ། །དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཡང་དག་པའི་དྲན་པ་ནི་དྲན་པ་ཁོ་ནའོ། །ལྷག་མ་དགའ་བ་དང་། ཤིན་སྦྱངས་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང་ཡང་དག་པའི་རྟོག་པ་དང་ཚུལ་ཁྲིམས་ཀྱི་ཡན་ལག་རྣམས་རིག་བྱེད་མ་ཡིན་པའི་ངོ་བོ་ཡིན་པས་རྫས་སུ་གཅིག་ཡིན་པ་དང་། དེ་ལྟར་ན་རྫས་རིས་བཅུའོ། །དངོས་སུ་འཚོགས་པ་ལ་རྫས་ཇི་སྙེད་ཅིག་ཡོད་པ་རིམ་གྱིས་བགྲང་ན་མཉམ་པར་བཞག་པའི་ལུས་ངག་གི་རིག་མིན་གྱི་གཟུགས་རྫས་བདུན་ཡིན་པས་རྫས་བཅུ་དྲུག་(༣༠༧བ)
གོ། །གཉིས་པ་ནི། གཅོ་བོ་སྨོས་པ་དེ་དག་ནི། །སྦྱོར་བྱུང་ཡོན་ཏན་ཀུན་ཀྱང་ཡིན། །དྲན་པ་ཉེར་གཞག་ལ་སོགས་ཤེས་རབ་དང་བརྩོན་འགྲུས་དང་ཏིང་ངེ་འཛིན་གྱི་རང་བཞིན་ཡིན་ཅེས་བཤད་པ་དེ་ནི་གཙོ་བོ་སྨོས་པས་ཤེས་རབ་སོགས་ཡིན་ཅེས་རིག་པར་བྱའི། དྲན་ཉེ་ཡང་སྤོང་རྫུ་རྐང་དེ་དག་རྣམས་ནི་སྦྱོར་བ་ལས་བྱུང་བའི་ཡོན་ཏན་ཐོས་བསམ་སྒོམ་པ་ལས་བྱུང་བའི་ཟག་བཅས་ཟག་མེད་རྣམས་ཀྱང་ཡིན་ནོ། །ཇི་ལྟར་ཞེ་ན། ཤེས་རབ་དང་བརྩོན་འགྲུས་དང་ཏིང་ངེ་འཛིན་དགའ་བ་ཤིན་ཏུ་སྦྱངས་པ་བཏང་སྙོམས་ཡང་དག་པའི་རྟོག་པ་སོགས་ཀྱང་དྲན་པ་ཉེར་གཞག་ཡིན་ནོ། །སྦྱོར་བྱུང་སྨོས་པས་ནི་སྐྱེས་ཐོབ་ཀྱི་དད་སོགས་བསལ་བའོ། །བརྩོན་འགྲུས་ལ་ཡང་དག་འཇོག་པ་ཞེས་བཤད་པའང་སྒོ་གསུམ་འཛིན་པ་དང་རབ་ཏུ་འཇོག་པ་དང་། རེས་ངེས་པར་བྱེད་པའམ། འཇུག་པར་བྱེད་པ་ནས་ཡང་དག་པར་རབ་ཏུ་འཇོག་པའི་ཕྱིར་རོ། །འདུས་བཟང་ན་རེ། རྫུ་འཕྲུལ་གྱི་རྐང་པ་བདུན་སོགས་ལ་བཞག་ན་ནང་འགལ་དང་ལུང་འགལ་སྟོན་པ་ནི། བྱེ་སྨྲ་གང་དག་རྫུ་འཕྲུལ་ནི་ཏིང་ངེ་འཛིན་ཁོ་ན་ཡིན་ལ། འདུན་པ་བརྩོན་འགྲུས་སེམས་དཔྱོད་རྐང་པ་ཡིན་ནོ་ཞེས་ཟེར་བ་དེ་དག་གི་ལྟར་ན་བཅུ་གཅིག་ནང་དུ་འདུན་པ་དང་སེམས་ལྷག་པར་བསྣན་པའི་ཕྱིར། བྱང་ཕྱོགས་རྫས་བཅུ་གསུམ་དུ་ཐལ་ལོ། འདོད་ན་ནི་མདོ་དང་འགལ་ཏེ། ཇི་སྐད་དུ། དགེ་སློང་དག་རྫུ་འཕྲུལ་ཀྱང་བཤད་ལ། རྫུ་འཕྲུལ་གྱི་རྐང་པ་རྣམས་ཀྱང་བཤད་དོ། །ཞེས་པ་ནས་རྫུ་འཕྲུལ་གང་ཞེ་ན། འདི་ན་དགེ་སློང་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་ཅིང་གཅིག་ཏུ་གྱུར་ནས་མང་པོར་འགྱུར་ཞེས་བྱ་བའི་བར་རྒྱས་པར་གསུངས་པའི་ཕྱིར། དེས་ན་ཏིང་ངེ་འཛིན་ལ་ལ་ནི་དགེ་བའི་རྩ་བ་སྦྱོར་བའི་གནས་སྐབས་ན་གཙོ་བོ་ཡིན་པས་དེ་ལ་ནི་རྫུ་འཕྲུལ་གྱི་རྐང་པ་ཞེས་བྱ་ལ། ལ་ལ་ནི་དགེ་(༣༠༨ན)
བའི་རྩ་བ་འགྲུབ་པའི་གནས་སྐབས་ན་གཙོ་བོ་ཡིན་པས་རྫུ་འཕྲུལ་ཞེས་བྱའོ། །རྫུ་འཕྲུལ་གྱི་འབྲས་བུ་རྫུ་འཕྲུལ་གྱི་སྒྲར་བཤད་པས་མདོ་དང་ཡང་མི་འགལ་ཏེ། ཡོངས་ཤེས་ཀྱི་འབྲས་བུ་ལ་དེའི་སྒྲར་བརྗོད་པ་བཞིན་ནོ། །དབང་པོ་རྣམས་དང་སྟོབས་རྣམས་ནི་དེ་དག་ཆུང་ངུ་དང་ཆེན་པོའི་བྱེ་བྲག་གིས་མི་མཐུན་ཕྱོགས་མ་དད་པ་དང་། ལེ་ལོ་དང་། བརྗེད་ངས་དང་། གཡེང་བ་དང་། ཤེས་བཞིན་མ་ཡིན་པ་རྣམས་བར་བར་དུ་ཀུན་ཏུ་འབྱུང་བས་བརྫི་བ་དང་། མི་འབྱུང་བས་བརྫི་བ་མེད་པའི་ཕྱིར། དབང་པོ་རྣམས་ཀྱི་གོ་རིམ་ནི་གཏེར་རྐོ་བ་བཞིན་ཏེ་དད་པར་གྱུར་ན་ནི་འབྲས་བུའི་དོན་དུ་བརྩོན་འགྲུས་རྩོམ་པར་བྱེད་དོ། །བརྩོན་འགྲུས་བརྩམས་ན་དྲན་པ་ཉེ་བར་གནས་པར་འགྱུར་རོ། །དེ་གནས་ན་རྣམ་པར་མི་གཡེང་བའི་ཕྱིར་སེམས་མཉམ་པར་འཇོག་གོ། །བཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་འགྱུར་རོ། །གཉིས་པ་གནས་སྐབས་གང་དུ་བསྒོམ་པ་ནི། སྡེ་ཚན་བདུན་ནི་གོ་རིམས་བཞིན། །ལས་ནི་དང་པོ་པ་དག་དང་། །ངེས་འབྱེད་ཆ་མཐུན་རྣམས་དང་ནི། །བསྒོམ་དང་མཐོང་ལ་རབ་ཏུ་ཕྱེ། །བྱེ་བྲག་ཏུ་སྨྲ་བ་རྣམས་ན་རེ། སྡེ་ཚན་བདུན་གྱི་གོ་རིམ་བཞིན་ལས་ནི་དང་པོ་བ་གནས་སྐབས་སུ་ལུས་སོགས་ཀྱི་རང་བཞིན་ལ་ཉེ་བར་བརྟག་པའི་ཕྱིར་དྲན་པ་ཉེར་གཞག་རྣམས་དང་། ངེས་འབྱེད་ཆ་མཐུན་རྣམས་ལས་དྲོ་བར་གྱུར་པ་ལ་ཁྱད་པར་ངེས་འབྱེད་ཆ་མཐུན་གྱི་ཆོས་ཐོབ་པས་བརྩོན་འགྲུས་སྤེལ་བའི་ཕྱིར་ཡང་དག་སྤོང་བ་རྣམས་དང་། ཡོངས་སུ་ཉམས་པར་མི་འགྱུར་བའི་དགེ་རྩ་བཟོད་པ་ལ་འཇུག་པའི་ཕྱིར་རྩེ་མོ་ལ་རྫུ་འཕྲུལ་གྱི་རྐང་པ་རྣམས་དང་། ཡོངས་སུ་ཉམས་པར་མི་འགྱུར་བའི་སྒོ་ནས་དབང་པོ་ཐོབ་པའི་ཕྱིར་བཟོད་པ་ལ་དབང་པོ་རྣམས་དང་། ཉོན་མོངས་རྣམས་ཀྱིས་མི་བརྫི་བའི་ཕྱིར་རམ། འཇིག་རྟེན་པའི་ཆོས་གཞན་གྱིས་མི་བརྫི་བའི་ཕྱིར་ཆོས་མཆོག་ལ་ནི་སྟོབས་རྣམས་དང་ནི་བྱང་ཆུབ་ཟད་མི་སྐྱེ་ཤེས་པ་དང་ཉེ་བའི་ཕྱིར་སྒོམ་(༣༠༨བ)
ལམ་ལ་བྱང་ཆུབ་ཀྱི་ཡན་ལག་རྣམས་དང་འདིས་འགྲོའོ་ཞེས་རབ་ཏུ་ཕྱེ་བའི་ཕྱིར། མཐོང་ལམ་ལ་འཕགས་པའི་ལམ་ཡན་ལག་བརྒྱད་རྣམས་རབ་ཏུ་ཕྱེ་སྟེ། དེ་ནི་མྱུར་དུ་འགྲོ་བའི་ཕྱིར་རོ། །སྔར་བདུན་བཤད་ལ། ཕྱིས་བརྒྱད་བཤད་པ་ནི་ཉུང་ཉུང་ནས་ཡར་ལ་གྲངས་ཀྱི་རིམ་པ་བྱ་བའི་ཆེད་ཡིན་ནོ། །གོང་དུ་བྱང་ཆུབ་ཟད་མི་སྐྱེ་ཤེས་པ་ལ་བྱས་ནས། དེ་དང་མཐུན་པ་ལ་སོ་བདུན་དུ་བྱས་ན། འདི་རུ་ཆོས་འབྱེད་ཡན་ལག་ཏུ་སྟོན་ན་ནང་འགལ་ལོ་སྙམ་ན། མི་འགལ་ཏེ། ཆོས་འབྱེད་བྱང་ཆུབ་ཡན་ལག་ནི་བྱང་ཆུབ་ཀྱང་ཡིན་ལ་བྱང་ཆུབ་ཀྱི་ཡན་ལག་ཀྱང་ཡིན་ནོ། །ཡང་དག་པའི་ལྟ་བ་ནི་ལམ་ཀྱང་ཡིན་ལ་ལམ་གྱི་ཡན་ལག་ཀྱང་ཡིན་ནོ་ཟེར་རོ། །སློབ་དཔོན་རང་ཉིད་སོགས་གཞན་ནི་གོ་རིམ་མ་ཉམས་པར་བྱང་ཕྱོགས་རྣམས་བརྗོད་དེ། དང་པོ་ཁོ་ནར་ཡུལ་གཟུགས་སོགས་ཀྱི་བྱེ་བྲག་མང་པོ་རྣམས་ལ་རྣམ་པར་གཡེང་བའི་བློ་རྣམས་ཚར་བཅད་པའི་ཕྱིར་དྲན་པ་ཉེར་གཞག་རྣམས་བཞག་པ་དང་། དྲན་པ་ཉེར་གཞག་བཞི་འདི་དེའི་སེམས་ཉེ་བར་འདོགས་པ་ཡིན་ཏེ། མདོ་ལས། ཞེན་པ་ལ་བརྟེན་པའི་དྲན་པའི་ཡུལ་ཀུན་ཏུ་རྟོག་པ་རྣམས་བསལ་བར་བྱ་བའི་ཕྱིར་རོ། །ཞེས་འབྱུང་བའི་ཕྱིར་རོ། །ཞེན་པ་ལ་བརྟེན་པ་ནི་སྲེད་པ་ལ་བརྟེན་པ་དང་། ཡུལ་ཉམས་སུ་མྱོང་བའི་དྲན་པའི་ཀུན་རྟོག་རྣམས་འདོད་པའི་ཀུན་རྟོག་རྣམས་སོ། །དྲན་པ་ཉེར་གཞག་དེའི་སྟོབས་ཀྱིས་བརྩོན་འགྲུས་ཡང་དག་པར་འཕེལ་བས་སྡིག་པ་སྐྱེས་པ་སྤངས། མ་སྐྱེས་པ་མི་བསྐྱེད། དགེ་བ་མ་སྐྱེས་པ་བསྐྱེད། བསྐྱེད་པ་གནས་པ་སྟེ། དགོས་པ་རྣམ་པ་བཞི་བསྒྲུབ་པའི་ཕྱིར། སེམས་ཡང་དག་པར་རབ་ཏུ་འཇོག་པས་ཡང་དག་པར་རབ་ཏུ་འཇོག་པ་རྣམས་སོ། །ཡང་དག་འཇོག་པའི་འོག་ཏུ་ཏིང་ངེ་འཛིན་རྣམ་པར་སྦྱོང་བའི་ཕྱིར་རྫུ་འཕྲུལ་གྱི་རྐང་པ་རྣམས་སོ། །ཏིང་འཛིན་ལ་བརྟེན་ནས་འཇིག་རྟེན་ལས་འདས་(༣༠༩ན)
པའི་ཆོས་རྣམས་ཀྱི་འདྲེན་བྱེད་ཡིན་པས་བདག་པོར་གྱུར་པའི་དད་སོགས་དབང་པོ་རྣམས་སོ། །དབང་པོ་དེ་ཉིད་མི་མཐུན་ཕྱོགས་མ་དད་པ་སོགས་ཀུན་ཏུ་སྤྱོད་པ་ལས་རྒྱལ་བ་ནི་སྟོབས་རྣམས་ཏེ། དབང་པོའི་གནས་སྐབས་ན་སྤྱོད་པ་སྲིད་ཀྱང་། བཟོད་པའི་གནས་སྐབས་ན་ཐག་རིང་པའི་ཕྱིར་རོ། །མཐོང་ལམ་ལ་ནི་བྱང་ཆུབ་ཀྱི་ཡན་ལག་རྣམས་ཏེ། བྱང་ཆུབ་ཟག་མེད་ཀྱི་ཤེས་རབ་རྣམས་ཡིན་པའི་ཕྱིར་དང་། དང་པོ་ཉིད་དུ་ཆོས་ཀྱི་དེ་ཁོ་ན་ཉིད་རྟོགས་པའི་ཕྱིར། མཐོང་སྒོམ་གཉིས་ཀ་ལ་ལམ་གྱི་ཡན་ལག་རྣམས་ཏེ། འཕགས་ལམ་ཡན་ལག་སྒོམ་པ་ཡོངས་སུ་རྫོགས་པར་གྱུར་ན་དྲན་པ་ཉེར་གཞག་བཞི་སྒོམ་པ་ཡོངས་སུ་རྫོགས་པར་འགྱུར་བ་ནས་བྱང་ཆུབ་ཀྱི་ཡན་ལག་བདུན་གྱི་བར་དུ་ཡོངས་སུ་རྫོགས་པར་འགྱུར་ཞེས་གསུངས་ལ། སྒོམ་ལམ་ཡོངས་སུ་རྫོགས་པ་ནི་སྒོམ་པ་ཡོངས་སུ་རྫོགས་པ་ཡིན་པས་སྒོམ་ལམ་ན་འཕགས་ལམ་ཡན་ལག་བརྒྱད་ཡོད་པས་སོ། །ཡང་དགེ་སློང་ཡང་དག་པ་ཇི་ལྟ་བ་བཞིན་གྱི་ཚིག་བརྗོད་པ་ཞེས་བྱ་བ་འདི་ནི་འཕགས་པའི་བདེན་པ་བཞིའི་ཚིག་གི་བླ་དྭགས་ཡིན་ནོ་ཞེས་མཐོང་ལམ་ཡིན་པར་སྟོན་པ་དང་། དགེ་སློང་ཇི་ལྟར་རྟོགས་པའི་ལམ་གྱིས་འཇུག་ཅེས་བྱ་བ་འདི་ནི་འཕགས་ལམ་ཡན་ལག་བརྒྱད་ཀྱི་ཚིག་གི་བླ་དྭགས་ཡིན་ནོ་ཞེས་སྒོམ་ལམ་ཡིན་པར་སྟོན་ཏེ། ཇི་ལྟར་ཐོབ་པའི་ལམ་གྱིས་བྱང་ཆུབ་ཀྱི་བར་དུ་འཇུག་ཅིང་ངེས་པར་འབྱུང་བའོ། །གསུམ་པ་ཟག་བཅས་ཟག་མེད་ལ་དཔྱད་པ་ནི། བྱང་ཆུབ་ཡན་ལག་ལམ་ཡན་ལག །ཟག་པ་མེད་གཞན་རྣམ་གཉིས་སོ། །བྱང་ཆུབ་ཀྱི་ཡན་ལག་དང་ལམ་གྱི་ཡན་ལག་བརྒྱད་ནི་ཟག་པ་མེད་པ་སྟེ། མཐོང་བ་དང་འཇིག་རྟེན་ལས་འདས་པའི་སྒོམ་ལམ་ལ་བཞག་པའི་ཕྱིར། འཇིག་རྟེན་པའི་ཡང་དག་པའི་ལྟ་བ་སོགས་ཡོད་ཀྱང་འཕགས་ལམ་གྱི་སྒྲ་མི་ཐོབ་བོ། །གཞན་དྲན་པ་ཉེར་གཞག་ནས་སྟོབས་(༣༠༩བ)
ལ་ཐུག་པ་རྣམས་ནི་དྲོད་སོགས་ཀྱིས་བསྡུས་པ་ཟག་བཅས་དང་། ལམ་གསུམ་གྱིས་བསྡུས་པ་རྣམས་ཟག་མེད་རྣམ་པ་གཉིས་ཡོད་དོ། །བཞི་པས་གང་ན་ཡོད་དཔྱད་པ་ནི། བསམ་གཏན་དང་པོ་ན་ཐམས་ཅད། །མི་ལྕོགས་མེད་ན་དགའ་མ་གཏོགས། །གཉིས་པ་ན་ནི་རྟོག་མ་གཏོགས། །གཉིས་ན་དེ་གཉིས་མ་གཏོགས་པ། །བསམ་གཏན་བར་ནའང་གཟུགས་མེད་པ། །གསུམ་ནའང་དེ་དང་ཚུལ་ཡན་ལག །བྱང་ཆུབ་དང་ནི་ལམ་ཡན་ལག །མ་གཏོགས་འདོད་ཁམས་སྲིད་རྩེ་ན། །བསམ་གཏན་དང་པོ་ན་སུམ་ཅུ་རྩ་བདུན་ཐམས་ཅད་ཡོད་དོ། །མི་ལྕོགས་མེད་ན་དགའ་བ་མ་གཏོགས་ཏེ། ཉེར་བསྡོགས་རྣམས་ནི་བརྩོན་འགྲུས་ཀྱི་སྟོབས་ཀྱིས་དྲང་དགོས་པས། བདེ་བླག་ཏུ་ཐོབ་པ་ནི་སེམས་དགའ་བ་ཡིན་གྱི། གཞན་དགའ་བ་ཡོད་པ་མ་ཡིན་པའི་ཕྱིར་དང་། ས་འོག་མར་ཉམས་ཀྱི་དོགས་པ་དང་བཅས་པའི་ཕྱིར། གཉིས་པ་ན་ནི་ཡང་དག་པའི་རྟོག་པ་མ་གཏོགས་པ་སོ་དྲུག་ཡོད་དེ། དེ་ན་རྟོག་པ་མེད་པའི་ཕྱིར། གཉིས་ན་དགའ་བ་དང་རྟོག་པ་དེ་གཉིས་མ་གཏོགས་པ་སུམ་ཅུ་སོ་ལྔ་ཡོད་དོ། །བསམ་གཏན་པར་ཁྱད་པར་ཅན་ནའང་དེ་གཉིས་མ་གཏོགས་པ་སོ་ལྔ་ཡོད་དོ། །གཟུགས་མེད་པ་གསུམ་ནའང་དགའ་བ་དང་རྟོག་པ་དེ་དང་ཚུལ་ཁྲིམས་ཀྱི་ཡན་ལག་ཡང་དག་པའི་ངག་དང་ལས་ཀྱི་མཐའ་དང་འཚོ་བ་རྣམས་མ་གཏོགས་པ་སུམ་ཅུ་རྩ་གཉིས་ཡོད་དོ། །འདོད་ཁམས་དང་སྲིད་རྩེ་ན་བྱང་ཆུབ་ཀྱི་ཡན་ལག་བདུན་དང་ལམ་གྱི་ཡན་ལག་བརྒྱད་མ་གཏོགས་པ་ཉེར་གཉིས་ཡོད་དེ། དེ་གཉིས་ན་ཟག་མེད་ཀྱི་ལམ་མེད་པའི་ཕྱིར་ཏེ་མཉམ་པར་མ་བཞག་ཅིང་མི་གསལ་བའི་ཕྱིར། འོ་ན་བསམ་གཏན་ཕྱི་མ་གསུམ་གཟུགས་མེད་བཞིའི་ཉེར་བསྡོགས་ཏེ་བདུན་ལ་ཉེར་གཉིས་པོའི་ཆ་མཐུན་ཀྱང་མེད་དེ། བདེན་པའི་རྣམ་པ་ཅན་མ་ཡིན་པའི་ཕྱིར། འདོད་པ་དང་སྲིད་རྩེ་ན་རྩ་གཉིས་པོའི་ཁྱད་པར་གྱི་ཆ་མཐུན་མེད་ཀྱང་ངེས་འབྱེད་ཀྱི་ཆ་མཐུན་ཡོད་དེ། བདེན་པའི་རྣམ་པ་ཅན་ཡིན་པའི་ཕྱིར། སྲིད་རྩེ་ན་ལུས་མེད་པས་ལུས་དྲན་པ་ཉེར་གཞག་ཡོད་དེ་སྙམ་ན། སྲིད་རྩེ་ན་ཤེས་རབ་དགེ་བ་ཟག་བཅས་ཟག་མེད་ཀྱི་སྡོམ་པ་རིག་བྱེད་མིན་པ་ལ་དམིགས་པས་འཐད་ལ། དེའང་གཟུགས་(༣༡༠ན)
མེད་པའི་དངོས་གཞི་དགེ་བ་ཟག་བཅས་འོག་མ་ལ་དམིགས་པར་མི་འདོད་ཀྱི། ཟག་མེད་འོག་མ་ལ་དམིགས་པར་འདོད་པས་དེར་ལུས་དྲན་པ་ཉེར་གཞག་ཡོད་དོ། །ལྔ་པ་གནས་སྐབས་གང་དུ་ཤེས་ནས་དད་པ་ཐོབ་པ་ལ། དངོས་དང་། འཕྲོས་དོན་ནོ། །དང་པོ་ནི། བདེན་གསུམ་མཐོང་ན་ཚུལ་ཁྲིམས་དང་། །ཆོས་ལ་ཤེས་ནས་དད་པ་འཐོབ། །ལམ་མངོན་རྟོགས་ན་སངས་རྒྱས་དང་། །དེ་ཡི་དགེ་འདུན་དག་ལ་ཡང་། །བྱང་ཆུབ་ཀྱི་ཕྱོགས་མཐུན་རྣམས་ལ་གནས་པ་གནས་སྐབས་གང་དུ་ཤེས་ནས་དད་པ་ཐོབ་ཅེ་ན། སྡུག་བསྔལ་དང་ཀུན་འབྱུང་འགོག་བདེན་གསུམ་མཐོང་ནས་འཕགས་པ་དགྱེས་པ་སྟེ། ཟག་མེད་ཀྱི་སྡོམ་པས་འཆལ་ཚུལ་ཐག་བསྲིང་ཙམ་ན་བདག་གི་ངན་སོང་གི་ཕུང་པོ་ཟད་པར་མཐོང་བས་འཕགས་པའི་ཐུགས་སུ་བྱོན་ཅིང་ཐུགས་དང་འཐད་པས་འཕགས་པ་དགྱེས་པ་ན་ཟག་མེད་ཀྱི་ཚུལ་ཁྲིམས་དང་། བདེན་པ་དེ་གསུམ་ལ་འདི་དག་ནི་སྡུག་བསྔལ་ལ་སོགས་ཙམ་དུ་ཟད་ཀྱི་སེམས་ཅན་མེད་དོ་སྙམ་དུ་ཡིད་ཆེས་པ་ཆོས་ལ་ཤེས་ནས་དད་པ་ཐོབ་སྟེ། དེ་གསུམ་ཆོས་ཡིན་པའི་ཕྱིར་དང་། སངས་རྒྱས་དང་དགེ་འདུན་ལ་ཤེས་ནས་དད་པ་མ་ཡིན་པའི་ཕྱིར། ལམ་གྱི་བདེན་པ་མངོན་པར་རྟོགས་ནས་སངས་རྒྱས་དང་དེའི་ཉན་ཐོས་ཀྱི་དགེ་འདུན་དག་ལའང་ཤེས་ནས་དད་པ་ཐོབ་སྟེ། ལམ་ནི་སངས་རྒྱས་དང་དགེ་འདུན་གྱི་ངོ་བོ་ཡིན་པའི་ཕྱིར། གང་དེ་གཉིས་ལ་དད་པ་དེ་ནི་སངས་རྒྱས་སུ་བྱེད་པའི་ཆོས་མི་སློབ་པ་རྣམས་དང་། དགེ་འདུན་དུ་བྱེད་པའི་ཆོས་སློབ་པ་དང་མི་སློབ་པ་རྣམས་ལ་དད་པ་ཡིན་ནོ། །ཡང་ཞེས་བྱ་བའི་སྒྲས་ཚུལ་ཁྲིམས་དང་ཆོས་ལ་ཤེས་ནས་དད་པ་དང་། ཀྱང་ཐོབ་པ་སྟོན་ཏོ། །གཉིས་པ་འཕྲོས་དོན་ལ། ཆོས་ཀྱི་ངོ་བོ་ངོས་བཟུང་བ། རྫས་དུ་ཡིན་པ། ངོ་བོའི་ཁྱད་པར་རོ། །དང་པོ་ནི། ཆོས་བདེན་གསུམ་དང་རང་སངས་རྒྱས། །བྱང་ཆུབ་སེམས་དཔའི་ལམ་ཡིན་ནོ། །འདིར་གང་ལ་ཆོས་སུ་དགོངས་ཞེ་ན། ཆོས་ནི་སྡུག་ཀུན་འགོག་པའི་བདེན་པ་གསུམ་དང་བྱང་ཆུབ་སེམས་དཔའི་སློབ་པའི་གནས་སྐབས་(༣༡༠བ)
ཀྱི་ལམ་ཟག་མེད་དང་རང་སངས་རྒྱས་ཀྱི་ལམ་སློབ་མི་སློབ་ཡིན་ནོ། །དེས་ན་བདེན་པ་བཞི་ཆར་ཡང་རྟོགས་ན་ཆོས་ལ་དད་པ་ཐོབ་པ་ཡིན་ནོ། །གཉིས་པ་ནི། རྫས་སུ་གཉིས་ཏེ་དད་པ་དང་། །ཚུལ་ཁྲིམས། དེ་དག་རྫས་སུ་ན་གཉིས་ཏེ། དཀོན་མཆོག་གསུམ་ལ་ཤེས་ནས་དད་པས་དད་པ་ཡིན་པ་དང་། འཕགས་པ་དགྱེས་པའི་ཚུལ་ཁྲིམས་རྣམས་ནི་ཚུལ་ཁྲིམས་ཡིན་པས་སོ། །(ཟག་མེད་ཀྱི་སྡོམ་པས་འཆལ་ཚུལ་ཐག་བསྲིང་ཙམ་ན་བདག་གི་ངན་སོང་གི་ཕུང་པོ་ཟད་པར་མཐོང་བས་འཕགས་པའི་ཐུགས་སུ་བྱོན་ཅིང་ཐུགས་དང་འཐད་པས་འཕགས་པ་དགྱེས་པ་དེ་ཀ་ཡིན་ནོ། །མཆན།) གསུམ་པ་ནི། དྲི་མ་མེད་པ་ཡིན། །ཤེས་ནས་དད་པ་རྣམས་ནི་གཅིག་ཏུ་དྲི་མ་མེད་པ་ཡིན་ནོ། །ཤེས་ནས་དད་པ་ཞེས་བྱ་བའི་དོན་ནི་ཤེས་རབ་ཀྱིས་བདེན་པ་རྣམས་ཡང་དག་པ་ཇི་ལྟ་བ་བཞིན་རྟོགས་ནས་ཤེས་པ་དང་དད་པ་ནི་ཡིད་ཆེས་པ་ཡིན་ནོ། །འདི་དག་གི་རིམ་པ་ནི་ལངས་ནས་ཇི་ལྟར་མངོན་དུ་བྱེད་པ་དེ་བཞིན་དུ་བཀོད་དེ། ཀྱེ་མ་བཅོམ་ལྡན་འདས་ནི་སངས་རྒྱས་སྨན་པ་ལྟ་བུ་མངོན་དུ་བྱེད་དེ་ཆོས་ཀྱི་སྨན་སྟོན་པའི་ཕྱིར་རོ། །དེའི་ཆོས་འདུལ་བ་ནི་ལེགས་པར་གསུངས་པ་སྨན་ལྟ་བུར་མངོན་དུ་བྱེད་དེ། ཉོན་མོངས་པའི་ནད་གསོ་བའི་ཕྱིར་དང་། མྱ་ངན་ལས་འདས་པ་ནད་མེད་པ་ཐོབ་པར་བྱེད་པའི་ཕྱིར། དེའི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ་སྨན་གཡོག་གམ་ནད་གཡོག་ལྟ་བུར་མངོན་དུ་བྱེད་དེ། མྱ་ངན་ལས་འདས་པས་ནད་མེད་པ་ཐོབ་པར་བྱ་བའི་ཕྱིར་ཕན་ཚུན་གྲོགས་བྱེད་པའི་ཕྱིར་རོ། །སེམས་རབ་ཏུ་དང་བས་བྱས་པའི་ཚུལ་ཁྲིམས་ཀྱང་རབ་ཏུ་དང་བ་ཡིན་པས་སམ། ཚུལ་ཁྲིམས་ཀྱང་རབ་ཏུ་དང་བ་ཟག་མེད་ཡིན་པས་ཚུལ་ཁྲིམས་ཀྱང་རབ་ཏུ་དང་བ་སྟེ། རབ་ཏུ་དང་བ་གསུམ་གྱི་ཐ་མར་བཞི་པ་བཤད་དེ། ཀྱེ་མ་བཅོམ་ལྡན་འདས་ནི་སངས་རྒྱས་ཡིན་ནོ། །ཞེས་སོགས་དེ་ལྟར་རབ་ཏུ་དང་བར་གྱུར་པ་ནི་(༣༡༡ན)
འཕགས་པ་དགྱེས་པའི་ཚུལ་ཁྲིམས་ཡིན་ནོ། །ཡང་ན་བཅོམ་ལྡན་འདས་ནི་སྟོན་པར་བྱེད་པ་དང་། ཆོས་ནི་ལམ་ལྟ་བུ་དང་། དགེ་འདུན་ནི་ལམ་གྲོགས་ལྟ་བུ་དང་། འཕགས་པ་རྣམས་དགྱེས་ཤིང་མཉེས་པར་འགྱུར་བའི་ཚུལ་ཁྲིམས་ནི་བཞོན་པ་ལྟ་བུ་སྟེ། ཚུལ་ཁྲིམས་ནི་རྟེན་དུ་གྱུར་པས་དེ་ལ་བརྟེན་པ་འཁོར་བ་ལས་ངེས་པར་འབྱུང་བ་ཐ་མར་བཞི་པ་བཤད་པ་ཡིན་ནོ། །གསུམ་པ་ལམ་གྱིས་ཐོབ་པའི་རྣམ་གྲོལ་བཤད་པ་ལ། ཡང་དག་པའི་རྣམ་གྲོལ། ཡང་དག་པའི་ཤེས་པ། རྣམ་གྲོལ་བྱེ་བྲག་ཏུ་བཤད་པའོ། །དང་པོ་ལ། རྣམ་གྲོལ་སློབ་པའི་ཡན་ལག་མ་ཡིན་པའི་རྒྱུ་མཚན་དང་། རྣམ་གྲོལ་གྱི་དབྱེ་བའོ། །དང་པོ་ནི། བཅིངས་ཕྱིར་སློབ་པའི་ཡན་ལག་ཏུ། །རྣམ་གྲོལ་མ་བཤད། མདོ་ལས་སློབ་པ་ནི་ཡན་ལག་བརྒྱད་དང་ལྡན་ནོ། །མི་སློབ་པ་ནི་ཡན་ལག་བཅུ་དང་ལྡན་ནོ། །ཞེས་སློབ་པའི་ཡང་དག་པའི་ལྟ་བ་ནས་སློབ་པའི་ཡང་དག་པའི་ཏིང་ངེ་འཛིན་གྱི་བར་དང་། མི་སློབ་པའི་དེ་བརྒྱད་དང་། མི་སློབ་པའི་ཡང་དག་པའི་རྣམ་གྲོལ་དང་། མི་སློབ་པའི་ཡང་དག་པའི་ཤེས་པའོ། །སློབ་པ་ལ་དེ་གཉིས་མ་བཤད་པ་ནི། སློབ་པ་ཆོས་ཅན། དེའི་ཡན་ལག་ཏུ་རྣམ་པར་གྲོལ་བ་མ་བཤད་དེ། ད་དུང་ཉོན་མོངས་པའི་འཆིང་བ་རྣམས་ཀྱིས་བཅིངས་པའི་ཕྱིར་ཏེ། བཅིངས་བཞིན་དུ་འཆིང་བའི་ཕྱོགས་གཅིག་ལས་གྲོལ་བས་གྲོལ་བ་ཞེས་མི་བྱའོ། །རྣམ་གྲོལ་མེད་པར་རྣམ་གྲོལ་གྱི་ཤེས་པའང་ཇི་ལྟར་བཞགམི་སློབ་པ་ནི་ཉོན་མོངས་པའི་བཅིང་བ་ཐམས་ཅད་ལས་གཏན་དུ་ངེས་པར་ཐར་བའི་ཕྱིར་རྣམ་པར་གྲོལ་བ་ཡིན་ལ། རྣམ་གྲོལ་དེ་བདག་ནི་ཉོན་མོངས་ལས་གྲོལ་ལོ་ཞེས་སོ་སོ་རང་གི་ཤེས་པ་དག་གིས་རབ་ཏུ་ཕྱེ་བ་སྟེ་རྣམ་པར་བཞག་པས་མི་སློབ་པ་དེ་ཁོ་ན་ལ་རྣམ་པར་གྲོལ་བ་དེ་སྨོས་པ་དང་། རྣམ་(༣༡༡བ)
གྲོལ་གྱི་ཡེ་ཤེས་སྨོས་པ་དེ་རིགས་པ་དང་ལྡན་པ་ཡིན་ནོ། །གཉིས་པ་ནི། དེ་རྣམ་གཉིས། །ཉོན་མོངས་བཅོམ་པ་འདུས་མ་བྱས། །མོས་པ་འདུས་བྱས་ཡན་ལག་ནི། །དེ་ཡིན་དེ་ཉིད་རྣམ་གྲོལ་གཉིས། །རྣམ་གྲོལ་དེ་འདུས་བྱས་དང་འདུས་མ་བྱས་རྣམ་པ་གཉིས་སོ། །དེ་ལ་ཉོན་མོངས་བཅོམ་ཞིང་སྤངས་པ་ནི་རྣམ་པར་གྲོལ་བ་འདུས་མ་བྱས་ཡིན་ནོ། །མི་སློབ་པའི་མོས་པ་ནི་རྣམ་པར་གྲོལ་བ་འདུས་བྱས་ཡིན་ཏེ་མོས་པ་དང་རྣམ་གྲོལ་ཞེས་བྱ་བ་སྐད་ཀྱི་བྱིངས་གཅིག་པའི་ཕྱིར། ཨ་དྷི་མུཀྟ་དང་བི་མུཀྟ་ཞེས་སོ། །རྣམ་པར་གྲོལ་བ་འདུས་བྱས་དེ་ནི་མི་སློབ་པའི་ཡན་ལག་ཡིན་ཏེ། དེ་ལས་གཞན་དགུ་བཞིན་དུ་ཡན་ལག་རྣམས་ནི་འདུས་བྱས་ཡིན་པའི་ཕྱིར། འདུས་མ་བྱས་ནི་མ་ཡིན་ཏེ། སྐལ་བ་མི་མཉམ་པའི་ཕྱིར། རྣམ་གྲོལ་འདུས་བྱས་དེ་ཉིད། མདོ་ལས། སེམས་རྣམ་པར་གྲོལ་བ་དང་ཤེས་རབ་རྣམ་པར་གྲོལ་བ་སྟེ། རྣམ་གྲོལ་གཉིས་སུ་གསུངས་ཏེ། འདོད་ཆགས་ལས་ཆགས་པ་དང་བྲལ་བའི་ཕྱིར་རམ། མ་རིག་པ་ལས་འདོད་ཆགས་དང་བྲལ་བའི་ཕྱིར་རམ། སེམས་དང་སེམས་སུ་འཚོགས་པའི་དུས་སུ་སེམས་གཙོ་བོ་ཡིན་པས་སེམས་རྣམ་པར་གྲོལ་བ་དང་། ཉོན་མོངས་པ་སྤོང་བའི་དུས་སུ་ཤེས་རབ་གཙོ་བོ་ཡིན་པས་ཤེས་རབ་རྣམ་པར་གྲོལ་བའི་ཕྱིར། དེ་ཉིད་རྣམ་གྲོལ་གྱི་ཕུང་པོར་བལྟའོ། །གཞན་དག་སྟེ་སློབ་དཔོན་ན་རེ། མདོ་ལས་སྟག་(སྟག་གི་བྱང་ཆུབ་ཀྱི་བུའི་མདོ་ཞེས་བརྗོད་ཀྱི། དག་ཅེས་པ་གང་ཚིག་གིས་འབོད་པའོ། །མཆན།)གི་བྱང་ཆུབ་ཀྱི་བུ་དག་རྣམ་པར་གྲོལ་བ་ཡོངས་སུ་དག་པ་གཙོ་བོ་གང་ཡིན་ཅེ་ན། འདི་ན་དགེ་སློང་འདོད་ཆགས་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་ཡིན། ཞེ་སྡང་དང་གཏི་མུག་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་ཡིན་ཏེ། འདི་ལྟར་རྣམ་པར་གྲོལ་བའི་ཕུང་པོ་ཡོངས་སུ་མ་རྫོགས་པ་རྫོགས་པར་བྱེད་པའམ། ཡོངས་སུ་རྫོགས་པ་རྗེས་སུ་(༣༡༢ན)
འཛིན་པར་བྱེད་པ་འདུན་པ་དང་བརྩོན་འགྲུས་གང་ཡིན་པ་ཞེས་སོགས་རྒྱས་པར་གསུངས་པས། མདོ་ལས་དེ་ལྟར་བཤད་པ་དེའི་ཕྱིར་རྣམ་པར་གྲོལ་བ་ཡོངས་སུ་དག་པ་གཙོ་བོའི་ཆེད་དུ་འདུན་པ་དང་བརྩོན་འགྲུས་སོགས་བཤད་པས་འདུན་པ་གཅིག་པུར་མ་ཟད་དོ། །འོ་ན་ཅི་ཞེ་ན། དེ་ཁོ་ན་ཤེས་པས་འདོད་ཆགས་ལ་སོགས་པ་སྤངས་པ་ན་སེམས་དྲི་མ་མེད་པ་ཉིད་དེ་ཟག་མེད་ཀྱི་ངོ་བོ་ཉིད་དང་དོན་གཞན་མ་ཡིན་པར་གྱུར་པ་མར་གྱི་ཉིང་ཁུ་དང་བ་ལྟ་བུ་ཡིན་ནོ་ཞེས་ཟེར་རོ། །གཉིས་པ་ཡང་དག་པའི་ཤེས་པ་ནི། བྱང་ཆུབ་ཇི་སྐད་བཤད་ཅེས་པ། །ཡང་དག་པའི་ལྟ་བ་མ་གཏོགས་པའི་ཡང་དག་པའི་ཤེས་པ་ནི་སྔར་བྱང་ཆུབ་ཏུ་ཇི་སྐད་བཤད་པའི་ཟད་པ་དང་མི་སྐྱེ་བ་ཤེས་པ་དེ་ཉིད་དོ། །གསུམ་པ་རྣམ་གྲོལ་བྱེ་བྲག་ཏུ་བཤད་པ་ལ། ལམ་གང་སྒྲིབ་པ་ལས་གྲོལ་བ། ལམ་གང་གིས་སྒྲིབ་པ་སྤོང་བ། རྣམ་གྲོལ་ལ་སོགས་པའི་ཁྱད་པར། ཡིད་འབྱུང་བ་ལ་སོགས་པའི་མུ་བཞིའོ། །དང་པོ་ནི། མི་སློབ་སེམས་ནི་སྐྱེ་འགྱུར་བ། །སྒྲིབ་པ་ལས་ནི་རྣམ་གྲོལ་འགྱུར། །བསྟན་བཅོས་ལས། མི་སློབ་པའི་སེམས་མ་འོངས་པ་སྐྱེ་བར་འགྱུར་བ་ནི་སྒྲིབ་པ་རྣམས་ལས་ནི་རྣམ་པར་གྲོལ་བར་འགྱུར་རོ་ཞེས་འབྱུང་ངོ་། །སེམས་ཁོ་ནར་མ་ཟད་སེམས་བྱུང་ཡང་གྲོལ་བར་འགྱུར་རོ། །དེའི་སྒྲིབ་པ་ནི་ཉོན་མོངས་པའི་ཐོབ་པ་ཡིན་ཏེ། མི་སློབ་པའི་སེམས་དེ་སྐྱེ་བ་ལ་གེགས་བྱེད་པའི་ཕྱིར། རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པའི་ཐོབ་པ་འཇིང་སྒྲིལ་དུ་ཡོད་པ་དེའང་སྤོང་བར་འགྱུར་ལ། མི་སློབ་པའི་སེམས་སྐྱེ་འགྱུར་དེའང་རྣམ་པར་གྲོལ་བར་འགྱུར་རོ། །དེ་སྤངས་ནས་ནི་མི་སློབ་པའི་སེམས་དེ་ཡང་སྐྱེས་པ་དང་རྣམ་པར་གྲོལ་བ་ཡིན་ནོ། །འོ་ན་མ་འོངས་པའི་མི་སློབ་པ་རྡོ་རྗེ་ལྟ་བུའི་མཇུག་ཐོགས་སུ་མི་སྐྱེ་བའི་ཆོས་ཅན་དགེ་བ་ཟག་བཅས་དང་འདུ་བྱེད་མ་སྒྲིབ་ལུང་མ་བསྟན་དང་། མི་སློབ་པའི་རྒྱུད་ལ་ཡོད་པའི་འཇིག་རྟེན་པའང་(༣༡༢བ)
རྣམ་པར་གྲོལ་བར་འགྱུར་མོད་ཀྱི་སྐྱེ་བར་མ་ངེས་པས་མ་བཤད་ལ། བསྟན་བཅོས་ལས། མ་འོངས་པ་སྐྱེ་པར་ངེས་པ་དེ་ཁོ་ན་གྲོལ་བར་འགྱུར། ཞེས་བཤད་དེ། དེའི་རྣམ་པར་གྲོལ་བ་ནི་བརྟག་སླ་བ་ཕྱིར། མ་འོངས་པ་མི་སྐྱེ་བའི་ཆོས་ཅན་ནི་གྲོལ་བར་བརྟག་དཀའ་བའི་ཕྱིར་རོ། །མི་སློབ་པའི་འཇིག་རྟེན་པའང་སྐྱེ་བའི་སྒྲིབ་པ་དེ་ལས་གྲོལ་ཏེ་སྐྱེ་བ་ལ་གེགས་བྱེད་པའི་ཕྱིར། གལ་ཏེ་མི་སློབ་པའི་རྒྱུད་ལ་ཡོད་པའི་འཇིག་རྟེན་པ་རྣམ་པར་གྲོལ་བར་འགྱུར་རོ་ཞེས་ཁས་ལེན་ན་སློབ་པ་ལའང་འཇིག་རྟེན་པ་སྐྱེ་ན་ཅིའི་ཕྱིར་རྣམ་པར་གྲོལ་བར་འགྱུར་རོ་ཞེས་བྱ་བར་ཁས་མི་ལེན་ཅེ་ན། སློབ་པའི་འཇིག་རྟེན་པ་དེ་ནི་མི་སློབ་པའི་འཇིག་རྟེན་དང་མི་འདྲ་སྟེ། སློབ་པའི་འཇིག་རྟེན་དགེ་བ་ཟག་བཅས་དང་འདུ་བྱེད་མ་སྒྲིབ་ལུང་མ་བསྟན་ཉོན་མོངས་པའི་ཐོབ་པ་དང་ལྷན་ཅིག་པ་ཡིན་ལ། མི་སློབ་པའི་འཇིག་རྟེན་ནི་དེ་ལྟར་མ་ཡིན་པའི་ཕྱིར་རོ། །གཉིས་པ་ནི། འགག་པར་འགྱུར་བའི་ལམ་གྱིས་ནི། །དེ་ཡི་སྒྲིབ་པ་རབ་ཏུ་སྤོང་། །འགག་པར་འགྱུར་བ་ལ་མངོན་དུ་ཕྱོགས་པ་ད་ལྟ་བའི་གནས་སྐབས་ཀྱི་ལམ་གྱིས་ནི་མི་སློབ་པའི་སེམས་དེའི་སྒྲིབ་པ་རབ་ཏུ་སྤོང་ངོ་། །གསུམ་པ་རྣམ་གྲོལ་ལ་སོགས་པའི་ཁྱད་པར་ནི། འདུས་མ་བྱས་ཉིད་ཁམས་ཞེས་བྱ། །འདོད་ཆགས་ཀུན་ཟད་འདོད་ཆགས་བྲལ། །སྤངས་པའི་ཁམས་ནི་གཞན་དག་གོ། །འགོག་པའི་ཁམས་ཞེས་བྱ་བ་གཞི། །རྣམ་གྲོལ་འདུས་མ་བྱས་དང་ཁམས་གསུམ་མདོའམ་བསྟན་བཅོས་ལས་འབྱུང་བ་སྤངས་པའི་ཁམས་དང་འདོད་ཆགས་དང་བྲལ་བའི་ཁམས་དང་འགོག་པའི་ཁམས་ཞེས་འབྱུང་བའི་ཁྱད་པར་ནི་རྣམ་གྲོལ་འདུས་མ་བྱས་དེ་ཉིད་ཁམས་གསུམ་ཤེས་བྱ་སྟེ། དེ་ལ་ཁམས་གསུམ་གྱི་འདོད་ཆགས་ཀུན་སྤངས་ཤིང་ཟད་པ་ནི་འདོད་ཆགས་དང་བྲལ་བའི་ཁམས་སོ། །འདོད་ཆགས་ལས་གཞན་པའི་ཉོན་མོངས་ཁམས་གསུམ་པ་རྣམས་སྤངས་ཤིང་ཡང་དག་པར་ཟད་པ་ནི་སྤངས་པའི་ཁམས་དག་གོ། །འགོག་པའི་ཁམས་ཞེས་བྱ་བ་ནི་ཉོན་མོངས་ལས་མ་གཏོགས་པ་གཞི་གཟུགས་སོགས་ཟག་བཅས་ཁམས་གསུམ་པ་ཐམས་ཅད་(༣༡༣ན)
སྤངས་ཤིང་ཡང་དག་པར་ཟད་པ་ཡིན་ནོ། །སློབ་དཔོན་ཐོགས་མེད་ཀྱིས། མཐོང་སྤོང་སྤངས་པ་སྤངས་པའི་ཁམས། སྒོམ་སྤོང་སྤངས་པ་ལ་འདོད་ཆགས་དང་བྲལ་བའི་ཁམས། ཕུང་པོ་ལྷག་མེད་ཀྱི་མྱང་འདས་ལ་འགོག་པའི་ཁམས། ཞེས་གསུངས་སོ། །བཞི་པ་ཡིད་འབྱུང་བ་ལ་སོགས་པའི་མུ་བཞི་ནི། སྡུག་བསྔལ་རྒྱུ་བཟོད་ཤེས་རྣམས་ཀྱིས། །ཡིད་འབྱུང་གང་གིས་སྤོང་འགྱུར་བ། །ཀུན་གྱི་འདོད་ཆགས་འབྲལ་བར་འགྱུར། །དེ་ལྟར་ན་ནི་མུ་བཞི་སྲིད། །དངོས་པོ་གང་གིས་ཡིད་འབྱུང་བར་འགྱུར་བའི་དངོས་པོ་དེས་འདོད་ཆགས་དང་བྲལ་ལམ་ཞེ་ན་མུ་བཞི་སྟེ། སྡུག་བསྔལ་དང་རྒྱུ་ཀུན་འབྱུང་ལ་བཟོད་པ་དང་ཤེས་པ་རྣམས་ཁོ་ནས་ཡིད་འབྱུང་བར་འགྱུར་ཏེ། ཡིད་འབྱུང་བའི་དངོས་པོ་ལ་དམིགས་པའི་ཕྱིར། གཞན་འགོག་ལམ་ལ་བཟོད་པ་དང་ཤེས་པ་དག་གིས་མ་ཡིན་ཏེ། མཆོག་ཏུ་དགའ་བའི་དངོས་པོ་ལ་དམིགས་པའི་ཕྱིར། ཉོན་མོངས་གང་གིས་སྤོང་བར་འགྱུར་པ་སྡུག་ཀུན་དང་འགོག་ལམ་བཟོད་པ་དང་ཤེས་པ་ཐམས་ཅད་ཀུན་གྱིས་འདོད་ཆགས་དང་བྲལ་བར་འགྱུར་ཏེ་ཉོན་མོངས་སྤོང་བྱེད་ཡིན་པའི་ཕྱིར། དེ་ལྟར་ན་མུ་བཞི་འགྲུབ་སྲིད་དེ། སྡུག་ཀུན་ལ་བཟོད་ཤེས་རྣམས་ཀྱིས་ཉོན་མོངས་མི་སྤོང་ན་ཡིད་འབྱུང་ཁོ་ན་སྟེ། ཡིད་འབྱུང་བའི་དངོས་པོ་ལ་དམིགས་པའི་ཕྱིར་རོ། །དེའང་ཆགས་བྲལ་ངེས་པ་ལ་འཇུག་ན་མི་སྤོང་སྟེ་སྔར་སྤངས་ཟིན་པའི་ཕྱིར་ན་བྱ་བ་དེ་ཤེས་པ་རྣམས་ནི་ཉོན་མོངས་པ་མི་སྤོང་བ་ཁོ་ན་ཡིན་པ་ལ། ན་བྱ་བའི་ཚིག་འཇུག་གི་སྙམ་ན། ཤེས་པས་མཐོང་ལམ་དུས་ན་མི་སྤོང་ཡང་སྒོམ་ལམ་དུས་ན་སྤོང་བས་མཐོང་ལམ་གྱི་དུས་ལ་དགོངས་ནས་མི་སྤོང་ན་ཞེས་བྱ་བར་གསུངས་སོ། །འགོག་ལམ་ལ་བཟོད་ཤེས་རྣམས་ཀྱིས་ཉོན་མོངས་སྤོང་ན་འདོད་ཆགས་དང་བྲལ་བ་ཁོ་ན་སྟེ། མཆོག་ཏུ་དགའ་བའི་དངོས་པོ་ལ་དམིགས་པའི་ཕྱིར་རོ། །དེ་གཉིས་ལ་བཟོད་ཤེས་ནི་ཡིད་འབྱུང་བའང་མི་འགྱུར་ཏེ། རྟགས་སྔ་མ་ཉིད་ཀྱི་ཕྱིར་རོ། །(༣༡༣བ)
སྡུག་ཀུན་ལ་བཟོད་ཤེས་ནི་ཉོན་མོངས་པ་སྤོང་ན་ཡིད་འབྱུང་དང་འདོད་ཆགས་དང་བྲལ་བར་འགྱུར་བ་གཉིས་ཀ་ཡིན་ནོ། །འགོག་ལམ་ལ་བཟོད་ཤེས་རྣམས་ཀྱི་ཉོན་མོངས་མི་སྤོང་ན་ཡིད་འབྱུང་དང་འདོད་ཆགས་དང་བྲལ་བ་གཉིས་ཀ་མི་འགྱུར་རོ། །མུ་དང་པོ་དང་བཞི་པས་ཉོན་མོངས་པ་དག་མི་སྤོང་ན་ཞེས་བསྟན་པ་གང་ཞིག་གང་དག་གིས་ཉོན་མོངས་པ་དག་མི་སྤོང་ཞེ་ན། དེ་ལ་འདོད་པ་ནས་ཅིའང་གི་བར་ལ་འདོད་ཆགས་དང་བྲལ་བ་ཞིག་བདེན་པ་རྣམས་ལ་བལྟ་ཞིང་མངོན་པར་རྟོགས་པར་བྱེད་ན་ཆོས་ཤེས་པ་རྣམས་དང་། ཆོས་ལ་བཟོད་པ་རྣམས་ཀྱིས་ཉོན་མོངས་པ་མི་སྤོང་སྟེ། འཇིག་རྟེན་པའི་ལམ་གྱིས་སྤངས་ཟིན་པའི་ཕྱིར་བྲལ་ཐོབ་ཟག་མེད་བསྐྱེད་པ་འབའ་ཞིག་ཏུ་ཟད་དོ། །རྗེས་སུ་ཤེས་བཟོད་ཀྱིས་སྤངས་ཏེ་སྲིད་རྩེ་ལ་འཇིག་རྟེན་པའི་ཆགས་བྲལ་མེད་པའི་ཕྱིར། སྒོམ་ལམ་ལ་ཤེས་པ་རྣམས་ཀྱིས་ནི་སྦྱོར་བ་དང་རྣམ་གྲོལ་དང་ཁྱད་པར་ཅན་གྱི་ལམ་གྱིས་བསྡུས་པ་དང་། བར་ཆད་མེད་ལམ་ལའང་ཁ་ཅིག་གིས་དབང་པོ་འཕོ་བ་ལ་སོགས་པ་ན་ཉོན་མོངས་མི་སྤོང་གི། ཆོས་ཤེས་དེས་སྡུག་ཀུན་ལ་དམིགས་པས་ཡིད་དབྱུང་བ་ནི་ཡིན་ནོ། །འདིར་བཟོད་པ་མི་སྨོས་པ་ནི་འཇིག་རྟེན་པའི་ལམ་གྱི་སྔར་འདོད་ཆགས་དང་མ་བྲལ་ན་སྤོང་བའང་ཡོད་པས་བཟོད་པ་མ་སྨོས་སོ། །གཉིས་པ་གནས་ཀྱི་མཚན་བསྟན་པ་ནི། ཆོས་མངོན་པ་མཛོད་ཀྱི་ཚིག་ལེའུར་བྱས་པ་ལས། ལམ་དང་གང་ཟག་བསྟན་པ་ཞེས་བྱ་བ་སྟེ་གནས་དྲུག་པའོ།། །།འདིར་སྨྲས་པ། གཅིག་ཏུ་ཐར་འདོད་ཡོངས་ཀྱི་བསྟེན་བྱའི་མཆོག །ཀུན་མཁྱེན་སྙིང་རྗེའི་དབང་ཕྱུག་གྲུབ་པའི་རྗེ། །དཔལ་ལྡན་སངས་རྒྱས་མཉན་པ་ཆེན་པོ་དང་། །བཙུན་པའི་ཏོག་གཅིག་ཀརྨའི་ཕྲིན་ལས་ཏེ། །ཡོངས་རྫོགས་བསྟན་པའི་རྨད་འབྱོར་ཕུལ་བྱུང་ལ། །ངོམས་པ་མེད་པར་ཤེས་ནས་(༣༡༤ན)
དད་པའི་འབྱོར། །ཆོག་ཤེས་ཕྲ་མོའི་ཆ་ཙམ་མ་བཟུང་སྟེ། །ཀུན་དགར་བྱེད་པའི་འབྱོར་བ་ཅི་ཡང་སྐྱེས། །དེ་ཚེ་བྱིན་རླབས་དམ་པའི་ནུས་པ་ལས། །རང་རྒྱུད་སངས་རྒྱས་བསྟན་པའི་ཐེག་པར་འགྱུར། །དེ་ཚེ་ཤེས་བྱའི་གནས་རྣམས་མ་ལུས་པ། །རིང་དུ་བསྐལ་བའི་དྲི་མ་ཐམས་ཅད་སངས། །དེ་ལྟའི་རྟོགས་པ་ཐོབ་པར་གྱུར་པ་དེས། །གནོད་སྦྱིན་ཤ་མེད་བསྟེན་པའི་གངས་ཁྲོད་དུ། །རྒྱ་ཆེན་ཆོས་མངོན་མཛོད་ཀྱི་རྒྱས་འགྲེལ་བརྩམས། །དགེ་བ་གང་ཐོབ་སྒྲུབ་བརྒྱུད་རིན་པོ་ཆེ། །ཀརྨའི་བཀའ་བརྒྱུད་ཉི་ལྟར་འབར་བ་དེས། །རྟོག་གེ་ངན་པའི་མིག་ནི་ལོང་གྱུར་ཅིག །ཅེས་སྨྲས་སོ། །