གནས་བདུན་པ། ཡེ་ཤེས་བསྟན་པ།
ཨེ་མ་རྒྱལ་མཆོག་དམ་པའི་ཐུགས་རྗེ་དེ་ནི་རང་བློ་དྲི་མེད་ལ་ཆགས་ཏེ། །དམ་པ་རྣམས་ཀྱི་སྤྱོད་ཡུལ་རྒྱ་ཆེན་ག་ལ་བ་དེར་འགྲོ་བའི་བློ་གྲོས་ནི། །དཔལ་ལྡན་བླ་མ་དྭགས་པོའི་བཀའ་བརྒྱུད་འཇམ་པའི་དཔལ་གྱི་བྱིན་གྱིས་བརླབས་གྱུར་པས། །ཟབ་གསལ་རྣོ་བའི་ལང་ཚོ་འདི་ལ་དུས་གསུམ་གཟིགས་རྣམས་རབ་མཚར་ལྟད་མོར་མཛོད། །བདག་ནི་བྱིས་པའི་ས་ལས་རིང་ནས་འགོངས། །ཐར་པ་མཆོག་གི་གྲོང་ཁྱེར་དམ་པར་ཞུགས། །གསུང་རབ་ཡིད་བཞིན་ནོར་བུའི་དཔལ་འབྱོར་ལ། །ངོམས་མེད་ལོངས་སྤྱོད་དགའ་བདེས་བཟོད་གར་འཚལ། །ཆ༧ གནས་བདུན་པ་ཡེ་ཤེས་བསྟན་པའི་གནས་ཀྱི་དོན་ལ་གཉིས་ལས། དང་པོ་གནས་ཀྱི་གཞུང་བཤད་པ་ལ། ཤེས་པ་དང་། ལྡན་པ་དང་། ཐོབ་པ་དང་། ཡོན་ཏན་ནོ། །དང་པོ་ལ་གསུམ། བཟོད་ཤེས་དང་ལྟ་བའི་ཁྱད་པར། ཤེས་པ་བཅུ་ངོས་བཟུང་བ། དེ་དག་གི་ཁྱད་པར་དཔྱད་པའོ། །དང་པོ་ལ། ཟག་མེད་དང་། ཟག་བཅས་སོ། །དང་པོ་ནི། དྲི་མེད་བཟོད་རྣམས་ཤེས་པ་མིན། །ཟད་དང་མི་སྐྱེའི་བློ་ལྟ་མིན། །དེ་ལས་གཞན་འཕགས་བློ་གཉིས་ཀ །ཆོས་མངོན་པར་རམ་གནས་དྲུག་པར། བཟོད་པ་དང་། ཤེས་པ་དང་། ཡང་དག་པའི་ལྟ་བ་དང་། ཡང་དག་པའི་ཤེས་པ་ཞེས་(༣༡༤བ)
འབྱུང་ན། བཟོད་པ་ཡིན་ལ་ཤེས་པ་མ་ཡིན་པ་དང་ཡང་དག་པའི་ཤེས་པ་ཡིན་ལ་ལྟ་བ་མ་ཡིན་པ་ཡོད་ལྟ་དམ་ཞེ་ན། དྲི་མེད་ཀྱི་བཟོད་པ་བརྒྱད་པོ་རྣམས་ཆོས་ཅན། ལྟ་བ་ཡིན་གྱི། ཤེས་པ་མིན་ཏེ། ཡང་དག་པར་རྟོགས་པའི་ངོ་བོ་ཡིན་ཀྱང་། དེས་སྤང་བྱའི་ཕྲ་རྒྱས་ཐེ་ཚོམ་མ་སྤངས་པའི་ཕྱིར། འདིར་འདི་ཤེས་པར་བྱ་སྟེ། སྤྱིར་རིག་པ་ཙམ་ལ་ཤེས་པ་ཟེར་བ་ཞིག་ཀྱང་ཡོད། ཤེས་རབ་ལ་ཤེས་པ་ཟེར་བ་ཞིག་ཀྱང་ཡོད། ཤེས་པ་བཅུ་ལ་ཤེས་པ་ཟེར་བ་ཞིག་ཀྱང་ཡོད་པས། དྲི་མ་མེད་པའི་བཟོད་པ་དེ་སྤྱིར་རིག་པ་ཙམ་གྱི་ཤེས་པ་མིན་ཟེར་པའང་མིན། དྲི་མེད་བཟོད་པ་ལ་རིག་པས་ཁྱབ། ཤེས་རབ་ལ་ཤེས་པ་ཟེར་བའི་ཤེས་རབ་མིན་ཟེར་བའང་མིན། དྲི་མེད་བཟོད་པ་ཤེས་རབ་ཡིན། འོ་ན་དྲི་མེད་བཟོད་པ་ཤེས་པ་མིན་བྱ་བ་དེ་ཤེས་པ་བཅུའི་ཤེས་པ་མིན་པར་བྱ་དགོས་ལ། བཟོད་པ་ཤེས་པ་མིན་པའི་རྒྱུ་མཚན་རང་གིས་སྤང་བྱ་ཐེ་ཚོམ་མ་སྤངས་པའི་ཕྱིར་བྱ་བའི་གཏན་ཚིགས་དེ་ཕྱོགས་ཀྱིས་ཕྱོགས་གཅིག་ལ་མ་གྲུབ་སྟེ། སྔར་ཅིའང་མེད་མན་ཆོད་ཀྱི་མཐོང་སྤོང་སྒོམ་སྤོང་གཅིག་ཏུ་དྲིལ་ནས་སྤངས་པ་ལ་སྡུག་ཀུན་ལ་ཤེས་བཟོད་སྐྱེས་པ་དེ་རང་གི་སྤང་བྱའི་ཐེ་ཚོམ་དང་བྲལ་ནས་འདུག་པ་སྙམ་ན། བཟོད་པ་ཡིན་པའི་རྒྱུ་མཚན་ཙམ་གྱིས་རང་གི་སྤང་བྱའི་ཐེ་ཚོམ་དང་བྲལ་བ་མ་ཡིན། ཡིན་ན་སྔར་འཇིག་རྟེན་པའི་ལམ་སྔོན་དུ་མ་སོང་པའི་བཟོད་པ་ཀུན་ལའང་རང་གི་སྤང་བྱའི་ཐེ་ཚོམ་དང་མ་བྲལ་བ་ཉིད་ཀྱི་ཕྱིར། བཟོད་པ་ཙམ་ལ་རང་གིས་སྤང་བྱའི་ཐེ་ཚོམ་མ་སྤངས་པར་ཡོད་དོ་ཞེས་དགོངས་སོ། །བཟོད་པ་དྲི་མེད་ཁོ་ན་ཤེས་པ་མིན་ཅེས་ངེས་པར་བཟུང་བས་བཟོད་པ་ཟག་བཅས་ནི་ཤེས་པ་ཡིན་ཏེ། ཀུན་རྫོབ་ཤེས་པ་ཡིན་པའི་ཕྱིར། དེ་ལྟ་བ་ཡིན་གྱི་ཤེས་པ་མ་ཡིན་པ་དེ་བཞིན་དུ་ཟད་པ་ཤེས་པ་དང་མི་སྐྱེ་བ་ཤེས་པའི་བློ་ཆོས་ཅན། ཤེས་པ་ཡིན་གྱི་ལྟ་བ་མིན་ཏེ། ཡང་དག་པར་ངེས་པའི་ཡེ་ཤེས་གང་ཡང་དག་(༣༡༥ན)
པར་རྟོག་པ་མེད་ཅིང་འབྲས་བུ་རྫོགས་ཟིན་པས་ཡོངས་སུ་ཚོལ་བའི་བསམ་པ་ཅན་མ་ཡིན་པའི་ཕྱིར། གྲུབ་སྟེ། ཇི་སྲིད་དུ་བྱ་བ་མ་བྱས་པ་དེ་སྲིད་དུ་སྡུག་བསྔལ་ལ་སོགས་པའི་བདེན་པ་དག་ལ་ཉེ་བར་རྟོག་ཅིང་བསམ་པ་ཐག་པ་ནས་མི་རྟག་པ་ལ་སོགས་པའི་རྣམས་ཇི་སྐད་བཤད་པ་དག་གིས་ཡོངས་སུ་ཚོལ་བར་བྱེད་དོ། །བྱ་བ་བྱས་ནས་ནི་དེ་དག་གི་སྡུག་བསྔལ་ལ་སོགས་པ་འཕགས་པའི་བདེན་པ་ཇི་ལྟར་མཐོང་བ་དག་ཁོ་ན་ལ་བདག་གིས་སྡུག་བསྔལ་ཡོངས་སུ་ཤེས་ཏེ། ཡང་ཤེས་པར་བྱར་མེད་དོ། །ཞེས་བྱ་བ་ལ་སོགས་པ་སོ་སོར་རྟོག་པ་ཙམ་དུ་ཟད་དེ། དེ་ལྟ་བས་ན་དེ་དག་ནི་ལྟ་བའི་ངོ་བོ་ཉིད་མ་ཡིན་ནོ། །ཟག་མེད་ཀྱི་བཟོད་པ་རྣམས་དང་ཟད་མི་སྐྱེ་ཤེས་པ་དེ་ལས་གཞན་པའི་འཕགས་པའི་བློ་ཟག་མེད་ཀྱི་ཤེས་རབ་ཆོས་ཅན། ལྟ་བའང་ཡིན་ལ་ཤེས་པའང་ཡིན་པས་གཉིས་ཀ་ཡིན་ཏེ། ཡང་དག་པར་རྟོགས་པ་དང་ཡང་དག་པར་ངེས་པས་ཐེ་ཚོམ་སྤངས་པའི་ཕྱིར། གཉིས་པ་ནི། གཞན་ཤེས་དྲུག་ནི་ལྟ་བའང་ཡིན། །གཞན་ཞེས་བྱ་བ་ནི་འཇིག་རྟེན་པ་སྟེ་ཐམས་ཅད་ཁོ་ན་ཤེས་པ་ཡིན་ནོ་ཞེས་ངེས་པར་བཟུང་བས་ཤེས་པ་མ་ཡིན་པའི་ཤེས་རབ་གང་ཡིན་པ་དེ་ནི་མེད་དོ། །ཤེས་རབ་དེ་ནི་སྒོ་ལྔའི་དགེ་མི་དགེ་ལུང་མ་བསྟན། ཡིད་ལས་བྱུང་བ་ལྟ་བའི་ངོ་བོ་ཉིད་མ་ཡིན་པ་ཉོན་མོངས་པ་དང་མཚུངས་པར་ལྡན་པ་དང་མ་སྒྲིབ་ལུང་མ་བསྟན་ཏོ། །དམིགས་བསལ་ལྟ་བ་ལྔ་དང་ཡིད་ལས་བྱུང་བ་དགེ་བ་འཇིག་རྟེན་པའི་ཡང་དག་པའི་ལྟ་བ་དང་དྲུག་ནི་ལྟ་བའང་ཡིན་གྱི། གཞན་འཇིག་རྟེན་པ་རྣམས་ལྟ་བ་མ་ཡིན་ཏེ། ཡང་དག་པར་རྟོགས་པའི་རྣམ་པར་མ་ཞུགས་པའི་ཕྱིར། ལྟ་བའི་ངོ་བོ་ཤེས་རབ་དྲུག་པོ་འདི་དང་གཞན་སྔར་བཤད་པ་དག་ཀྱང་ཤེས་པ་ཡིན་ནོ། །གཉིས་པ་ཤེས་པ་བཅུ་ངོས་བཟུང་བ་ལ། དབྱེ་བ་དངོས་དང་། སེམས་ཤེས་ཁྱད་པར་དུ་བསྟན་པའོ། །དང་པོ་ལ། བསྟན། བཤད་(༣༡༥བ)
གཉིས་ལས། དང་པོ་ནི། ཤེས་པ་ཟག་བཅས་ཟག་པ་མེད། །དང་པོ་ཀུན་རྫོབ་ཅེས་བྱའོ། །ཟག་མེད་རྣམ་གཉིས་ཆོས་དང་ནི། །རྗེས་སུ་ཤེས་པ་ཁོ་ན་ཡིན། །ཇི་སྙེད་ཅིག་གིས་ཤེས་པ་བསྡུ་ན་བཅུས་བསྡུས་ཏེ། ཆོས་དང་། རྗེས་དང་། ཀུན་རྫོབ་དང་། གཞན་གྱི་སེམས་དང་། བདེན་པ་བཞི་དང་། ཟད་མི་སྐྱེ་ཤེས་པས་སོ། །འཆི་འཕོ་དང་། སྐྱེ་བ་དང་། གང་ཟག་དང་། འཁོར་བ་ཤེས་སོགས་ཀྱང་འདི་ཁོ་ནའི་ནང་དུ་འདུའོ། །མདོར་བསྡུ་ན། ཤེས་པ་ཟག་བཅས་ཟག་པ་མེད་པ་གཉིས་སོ། །དེ་ལས་དང་པོ་ཟག་བཅས་ནི། ཀུན་རྫོབ་ཤེས་པ་ཞེས་བྱ་སྟེ། བུམ་སྣམ་སྐྱེས་པ་བུད་མེད་སོགས་དངོས་པོ་ཐ་སྙད་ཀྱི་ཡན་ལག་ཏུ་གྱུར་པ་ཀུན་རྫོབ་འཛིན་པའི་ཕྱིར། རེས་འགའ་ནི་རང་དང་སྤྱིའི་མཚན་ཉིད་ཀྱང་འཛིན་མོད། ཕལ་ཆེར་ཞེས་པས། བླུན་པོ་རྟག་ཏུ་སྨྲ་དགོས་པ་དང་། རྒྱལ་པོ་རྟག་ཏུ་བཀྱོན་པ་ཞེས་པ་ལྟ་བུའོ། །ཤེས་པ་ཟག་མེད་ཀྱང་བསྡུ་ན་རྣམ་པ་གཉིས་ཏེ། ཆོས་ཤེས་པ་དང་རྗེས་སུ་ཤེས་པ་ཁོ་ན་ཡིན་ཏེ། བདེན་པ་བཞི་ཤེས་པ་ནི་འདི་དག་གི་ནང་དུ་འདུ་བའི་ཕྱིར། དེ་ལྟར་ན་ཤེས་པ་ཟག་བཅས་ཟག་མེད་འདི་གསུམ་སྟེ། ཀུན་རྫོབ་ཤེས་པ་དང་། ཆོས་ཤེས། རྗེས་ཤེས་སོ། །གཉིས་པ་རྒྱས་བཤད་ནི། ཀུན་རྫོབ་ཡུལ་ནི་ཐམས་ཅད་དོ། །ཆོས་ཞེས་བྱ་བའི་སྤྱོད་ཡུལ་ནི། །འདོད་སྡུག་བསྔལ་སོགས་རྗེས་ཤེས་པའི། །སྤྱོད་ཡུལ་གོང་མའི་སྡུག་བསྔལ་སོགས། །དེ་དག་ཉིད་བདེན་བྱེ་བྲག་གིས། །བཞི་སྟེ་རྣམ་བཞི་དེ་དག་ནི། །མི་སྐྱེ་བ་དང་ཟད་པ་ཤེས། །དེ་གཉིས་དང་པོ་སྐྱེས་པ་ནི། །སྡུག་བསྔལ་རྒྱུ་རྗེས་ཤེས་པ་ཡིན། །བཞི་ལས་ཕ་རོལ་སེམས་རིག་པ། །དེ་ལ་ཀུན་རྫོབ་ཤེས་པའི་དམིགས་པའི་ཡུལ་ནི་ཅི་རིགས་པར་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་དོ། །ཆོས་ཤེས་པའི་སྤྱོད་ཡུལ་ནི། འདོད་པའི་སྡུག་བསྔལ་ལ་སོགས་པ་ཀུན་འབྱུང་དང་འགོག་ལམ་མོ། །རྗེས་སུ་ཤེས་པའི་སྤྱོད་ཡུལ་ནི། གོང་མའི་སྡུག་བསྔལ་ལ་སོགས་ཡིན། ཅེས་པ་ནི་གོ་སླའོ། །ཆོས་ཤེས་རྗེས་ཤེས་དེ་དག་ཉིད་བདེན་པ་བཞིའི་བྱེ་བྲག་གིས་སྡུག་ཀུན་འགོག་ལམ་ཤེས་པ་བཞི་ཡིན་ཏེ། སྡུག་བསྔལ་སོགས་དེ་དག་ལ་དམིགས་པའི་ཕྱིར། སྡུག་བསྔལ་ནས་ལམ་གྱི་བར་ཤེས་པ་རྣམ་བཞི་ཆོས་དང་རྗེས་སུ་ཤེས་པ་ལྟ་བའི་རང་བཞིན་མ་ཡིན་པ་དེ་དག་ནི་ཟད་པ་ཤེས་པ་དང་མི་སྐྱེ་བ་ཤེས་པ་ཞེས་བྱའོ། །ཟད་མི་སྐྱེ་ཤེས་(༣༡༦ན)
པ་དེ་གཉིས་རྒྱུན་ཆགས་སུ་འཇུག་པས་དང་པོ་སྐྱེས་པ་ནི་སྡུག་བསྔལ་ལམ་རྒྱུ་ཀུན་འབྱུང་ལ་རྗེས་སུ་ཤེས་པ་ཡིན་ཏེ། གདོན་མི་ཟ་བར་སྲིད་རྩེའི་ཕུང་པོ་ལ་སྡུག་བསྔལ་ལམ་ཀུན་འབྱུང་བ་ལ་རྗེས་སུ་ཤེས་པའི་རྣམ་པར་དམིགས་པའི་ཕྱིར། ཕྱིས་སྐྱེས་པ་ནི་བདེན་པ་གཞན་ལའང་དམིགས་སོ། །རྡོར་ཏིང་གི་མཇུག་ཐོགས་སུ་ཟད་མི་སྐྱེ་ཤེས་པ་འབྱུང་བས་ན། ཡང་ཇི་ལྟར་ཟད་པ་དང་མི་སྐྱེ་བ་དམིགས་པ་གཅིག་ཡིན་པ་ལྟར་རྡོ་རྗེ་ལྟ་བུའི་ཏིང་ངེ་འཛིན་ཀྱང་དེ་གཉིས་དང་དམིགས་པ་གཅིག་པ་ཞིག་གམ་ཞེ་ན། རྡོ་རྗེ་ལྟ་བུའི་སྡུག་ཀུན་ལ་དམིགས་ན་གཅིག་ལ་འགོག་ལམ་ལ་དམིགས་ན་མི་གཅིག་སྟེ། དཔེར་ན། དུག་མདས་ཕོག་སྟེ་ཤི་བའི་དུག་ཡན་ལག་ཐམས་ཅད་ལ་ཁྱབ་ནས་ཤི་བའི་ཚེ་རྨའི་ཕྱོགས་ཁོ་ནར་འདུ་བ་བཞིན་སྤང་བྱ་ཐམས་ཅད་སྤངས་ནས་ཤེས་པ་འདི་གཉིས་སྲིད་རྩེའི་ཕུང་པོའི་སྡུག་ཀུན་ཁོ་ན་ལ་དམིགས་པ་ཡིན་ནོ། །ཆོས་ཤེས་རྗེས་ཤེས་ལམ་ཤེས་པ་ཀུན་རྫོབ་ཤེས་པ་བཞི་ལས་ནི་ཕ་རོལ་གྱི་སེམས་རིག་པར་བཞག་སྟེ། དེ་ནི་ཤེས་པ་དེ་དག་གི་བདག་ཉིད་ཡིན་པའི་ཕྱིར། སྡུག་བསྔལ་ཤེས་པ་སོགས་ལས་མིན་ཏེ། གཞན་གྱི་རྣམ་པ་ཅན་ཡིན་པའི་ཕྱིར། ཟག་མེད་ལ་དམིགས་ལ་ནི་ལམ་ཤེས་ཡིན་ལ། ཟག་བཅས་ནི་ཆགས་བཅས་དང་ཆགས་བྲལ་ཞེས་འཇིག་རྟེན་པའི་རྣམ་པ་ཅན་ནོ། །དེའང་གཞན་གྱི་ཆོས་ཤེས་པ་དེ་བདག་གི་ཆོས་ཤེས་པས་ཤེས། གཞན་གྱི་རྗེས་སུ་ཤེས་པ་དེ་བདག་གི་རྗེས་སུ་ཤེས་པ་ཤེས་ཀྱི། ཆོས་རྗེས་བློ་ཕྱོགས་ཕན་ཚུན་མིན་པས་སྣ་བསྣོལ་དུ་མི་ཤེས། གཞན་གྱི་ཆོས་ཤེས་དང་རྗེས་ཤེས་དེ་ཀ་ལམ་ཡིན་པས། བདག་གི་ལམ་གྱིས་གཞན་གྱི་ལམ་དེ་ཤེས་ཀྱི། ཡུལ་ལམ་བཟང་པོ་དེ་ཡུལ་ཅན་ཀྱང་ལམ་བཟང་པོ་གཅིག་གིས་ཤེས་ཀྱི། དམན་པས་མི་ཤེས། ལར་ལྟ་(༣༡༦བ)
ཤེས་བྱ་དེ་ཡིན་པས་ཤེས་པའང་དེར་མི་འགྲོ་སྟེ། ད་རེས་ཤེས་བྱ་ལམ་བཟང་བ་དེ་ཤེས་བྱེད་ཀྱང་ལམ་བཟང་བ་ཞིག་གིས་ཤེས་ཀྱི། དམན་པས་མི་ཤེས་སོ། །འགོག་པ་ཤེས་པ་ལ་ཕ་རོལ་གྱི་སེམས་ཤེས་གྲངས་མི་སྐྱེ་བ་ནི། འགོག་པ་ཕ་རོལ་གྱི་སེམས་མིན་ཙ་ན། དེ་ཤེས་པ་ཕ་རོལ་གྱི་སེམས་ཤེས་པ་མིན་ནོ། །སྡུག་ཀུན་ཤེས་པ་ཕ་རོལ་གྱི་སེམས་ཤེས་པ་མིན་པ་ཅིས་སྙམ་ན། སྡུག་ཀུན་ཤེས་པ་ནི་མི་རྟག་པ་ལ་སོགས་པ་སྤྱིའི་ཚུལ་གྱིས་འཇལ་བ་ཡིན། ཕ་རོལ་གྱི་སེམས་ཤེས་ནི་རང་གི་མཚན་ཉིད་ལས་ཏེ། དེའི་སྤྱོད་ཡུལ་ཡིན་པས་སོ། །ཟད་སྐྱེ་དང་མི་སྐྱེ་བ་ཤེས་པ་ལ་ཕ་རོལ་གྱི་སེམས་ཤེས་མི་འཇོག་པ་ཅིས་སྙམ་ན། ཕ་རོལ་གྱི་སེམས་ཤེས་ཟག་བཅས་ཀྱིས་ཕ་རོལ་གྱི་སེམས་ཟག་བཅས་ཤེས་པའི་ཤེས་བྱ་དེ་ཟད་པ་དང་མི་སྐྱེ་བ་མིན། ཤེས་བྱ་ཟག་མེད་ཤེས་པ་དེ་ནི་རྟོག་ཅིང་འཇལ་བ་ཡིན་ཏེ། འདི་ཆོས་ཤེས་པ་ཡིན་ནམ། འདི་རྗེས་སུ་ཤེས་པ་ཡིན་ནམ་ཞེས་འཚོལ་ཞིང་དཔྱོད་པ་དེ་ཟད་པ་དང་མི་སྐྱེ་བའི་ཤེས་པ་མ་ཡིན་ཏེ། ཟད་དང་མི་སྐྱེ་བློ་ལྟ་མིན། །ཅེས་འབྱུང་བའི་ཕྱིར་རོ། །གཉིས་པ་སེམས་ཤེས་ཁྱད་པར་དུ་བཤད་པ་ལ། སེམས་ཤེས་ཀྱི་ཁྱད་ཆོས་དང་། ཟད་མི་སྐྱེ་ཤེས་པའི་ཁྱད་པར་རོ། །དང་པོ་ལ། སྤྱིར་བསྟན་པ་དང་། ལམ་གྱི་གནས་སྐབས་སོ། །དང་པོ་ནི། དེས་ནི་ས་དབང་གང་ཟག་འདས། །ཞིག་དང་མ་སྐྱེས་མི་རིག་གོ། །ཕ་རོལ་སེམས་ཤེས་དེས་ནི་བསམ་གཏན་འོག་མའི་ས་པས་གོང་མའི་ས་འདས་པ་མི་རིག་ལ། མི་ལྕོགས་མེད་པས་འདོད་ཁམས་མི་ཤེས་བྱ་བར་མི་བཞག་པ་ནི་འདོད་ཆགས་དང་མ་བྲལ་བས་གཞན་གྱི་སེམས་ཤེས་པ་མེད་དོ། །དད་མོས་དང་དུས་ཀྱི་རྣམ་གྲོལ་གྱི་ལམ་གྱིས་དབང་པོ་འདས་པ་མཐོང་ཐོབ་དང་དུས་མི་སྦྱོར་བ་རྣམ་པར་གྲོལ་བའི་ལམ་མི་ཤེས་སོ། །དད་པའི་རྗེས་འབྲང་གིས་ཆོས་ཀྱི་རྗེས་འབྲང་མི་ཤེས་བྱ་བ་མི་སྨོས་པ་ནི། དད་པའི་རྗེས་འབྲང་ཆོས་ཀྱི་རྗེས་(༣༡༧ན)
འབྲང་མཐོང་ལམ་ཡིན་ལ། གཞན་གྱི་སེམས་ཤེས་པ་མེད་དོ། །ཕྱིར་མི་འོང་དང་དགྲ་བཅོམ་དང་ཉན་ཐོས་དང་རང་སངས་རྒྱས་དང་སངས་རྒྱས་ཀྱི་ལམ་རྣམས་འོག་མས་གང་ཟག་འདས་པ་གོང་མ་མི་ཤེས་སོ། །བསམ་གཏན་གྱི་དངོས་གཞི་མ་ཐོབ་པས་རྒྱུན་ཞུགས་དང་ཕྱིར་འོང་ལ་གཞན་གྱི་སེམས་ཤེས་མེད་པས་མ་སྨོས་སོ། །འོག་མ་འོག་མས་གོང་མ་གོང་མ་མི་ཤེས་ཀྱི། གོང་མ་གོང་མས་འོག་མ་འོག་མ་ཤེས་སོ། །ཞིག་པ་འདས་པ་དང་མ་སྐྱེས་པ་མ་འོངས་པའང་མི་རིག་སྟེ། ད་ལྟར་གྱི་དེ་ཕ་རོལ་གྱི་སེམས་ཡུལ་ཡིན་པའི་ཕྱིར། གཉིས་པ་ནི། ཆོས་རྗེས་བློ་ཕྱོགས་ཕན་ཚུན་མིན། །ཉན་ཐོས་མཐོང་བའི་སྐད་ཅིག་གཉིས། །རིག་སྟེ་བསེ་རུ་ལྟ་བུས་གསུམ། །སངས་རྒྱས་སྦྱོར་བ་མེད་པར་ཀུན། །ཆོས་ཤེས་དང་རྗེས་ཀྱི་ཕྱོགས་མཐུན་པའི་སེམས་ཤེས་པའི་བློ་ཡང་ཕྱོགས་ཕན་ཚུན་རིག་པ་མིན་ཏེ། སེམས་ཤེས་དེ་གཉིས་ནི་འདོད་པ་དང་ཁམས་གོང་མའི་གཉེན་པོ་ཐ་དད་ལ་དམིགས་པའི་ཕྱིར། ས་དང་ནམ་མཁའ་ལ་ལྟ་བ་བཞིན་ནོ། །མཐོང་ལམ་ལ་ཕ་རོལ་གྱི་སེམས་ཤེས་མེད་དེ། ཡུན་ཐུང་ཞིང་བདེན་པ་རྟོགས་བྱའི་སྦྱོར་བ་ཡོད་ཀྱི། ཕ་རོལ་སེམས་ཤེས་བྱ་བའི་སྦྱོར་བ་མེད་པའི་ཕྱིར་ཏེ། ཕ་རོལ་གྱི་སེམས་ཤེས་དེའི་དམིགས་པས་མཐོང་ལམ་ཡོད་དེ། དེ་ཤེས་པར་འདོད་པས་སྦྱོར་བ་བྱས་ན། ཉན་ཐོས་ཀྱིས་སེམས་ཤེས་པས་ནི་མཐོང་བའི་ལམ་སྡུག་བསྔལ་ལ་ཆོས་ཤེས་པའི་བཟོད་པ་དང་ཆོས་ཤེས་ཀྱི་སྐད་ཅིག་གཉིས་སམ། རེས་སྡུག་བསྔལ་ལ་རྗེས་སུ་ཤེས་པའི་བཟོད་པ་དང་སྡུག་བསྔལ་ལ་རྗེས་ཤེས་ཀྱང་ཤེས་སྲིད་དེ་སྦྱོར་བའི་དབང་གིས་སོ། །ཉན་ཐོས་ཀྱི་སེམས་ཤེས་ཀྱི་མཐོང་ལམ་སྐད་ཅིག་གཉིས་ལས་ལྷག་པ་མི་རིག་པའི་རྒྱུ་མཚན་ནི། རྗེས་སུ་ཤེས་པའི་ཕྱོགས་དང་མཐུན་པ་དམིགས་པ་ནི་སྦྱོར་བ་གཞན་གྱི་བསྒྲུབ་བྱ་ཡིན་པའི་ཕྱིར། ཇི་སྲིད་རྗེས་ཤེས་ཀྱི་ཕྱོགས་མཐུན་དེ་ལ་ཤེས་པའི་ཆེད་ཀྱི་སྦྱོར་བ་རྩོམ་པ་དེ་སྲིད་ཀྱི་རིང་ལ་དེས་སེམས་བཅུ་དྲུག་རྗེས་སུ་ཐོབ་པ་སྟེ་བཟླས་(༣༡༧བ)
པར་འགྱུར་བས། བར་དེར་ནི་སེམས་ཤེས་དེ་མི་ཤེས་སོ། །འོ་ན་སྐད་ཅིག་མ་དང་པོ་གཉིས་ཀྱང་མི་རིག་པར་འགྱུར་ཏེ། དེ་ཤེས་པར་འདོད་ནས་སྦྱོར་བ་བརྩམས་ཏེ་གྲུབ་པ་ན་སྐད་ཅིག་མ་གཉིས་པོའང་འགག་པའི་ཕྱིར་ཞེ་ན། སྐད་ཅིག་མ་གཉིས་པོ་འདི་ཤེས་པར་བྱའོ་ཞེས་སྦྱོར་བ་རྩོམ་པ་ནི་མ་ཡིན་གྱི། གང་ཟག་འདིའི་སེམས་ཤེས་པར་བྱའོ་ཞེས་སྦྱོར་བ་རྩོམ་པ་ན་མངོན་ཤེས་འགྲུབ་པ་དང་མཉམ་པར་སྐད་ཅིག་དང་པོ་གཉིས་སྐྱེས་པ་དག་ཤེས་པར་འགྱུར་རོ་ཞེས་བྱེ་སྨྲ་ཟེར་རོ། །རང་སངས་རྒྱས་བསེ་རུ་ལྟ་བུའི་སེམས་ཤེས་པས་ནི་སྐད་ཅིག་མ་དང་པོ་གཉིས་དང་བརྒྱད་པ་གསུམ་རིག་སྟེ། ཉན་ཐོས་ཀྱི་སྦྱོར་བ་ཆེན་པོ་སྐད་ཅིག་ལྔ་ལས་ལྷག་པར་བསྒྲུབ་དགོས་ཤིང་། འདི་ནི་དང་པོ་གཉིས་ཤེས་ནས་ཀྱང་སྦྱོར་བ་རྩོལ་བ་ཆུང་བས་སྐད་ཅིག་མ་ལྔའི་བར་ལ་མངོན་ཤེས་འགྲུབ་པའི་ཕྱིར། དེས་ཀྱང་སྐད་ཅིག་མ་དགུ་པ་སོགས་ནི་མི་རིག་སྟེ། ཡང་སྦྱོར་བ་གཞན་གྱིས་བསྒྲུབ་དགོས་པའི་ཕྱིར། སྐད་ཅིག་མ་བཅོ་ལྔ་པའང་མི་རིག་སྟེ། དེ་ནས་དུབ་པས་སྐད་ཅིག་མ་བདུན་ལའང་སྦྱོར་བ་མི་རྫོགས་པའི་ཕྱིར། ཁ་ཅིག །དང་པོ་གཉིས་པ་ཤེས་ནས་སྦྱོར་བ་བྱས་ཏེ་བཅོ་ལྔ་པ་དང་གསུམ་ཤེས་ཟེར་རོ། །ཐུགས་ཀྱི་དབང་ཕྱུག་སངས་རྒྱས་ཀྱིས་ནི་སྦྱོར་བ་མེད་ཅིང་མི་མངའ་བར་ཡོན་ཏན་ཐམས་ཅད་མངོན་དུ་འགྱུར་བའི་ཕྱིར་མཐོང་ལམ་གྱི་སྐད་ཅིག་ཀུན་མཁྱེན་ཏེ། གྲངས་མེད་གསུམ་དུ་ཚད་མེད་པའི་ཚོགས་ཀྱིས་བསགས་པའི་ཡེ་ཤེས་ཀྱི་ནུས་མཐུ་དེ་ནི་བསམ་གྱིས་མི་ཁྱབ་པའི་ཕྱིར་ཞེས་པ་ནི། སློབ་དཔོན་གང་སྤེལ་གྱིས་བཤད་པ་དེ་ཐེག་པ་ཆེན་པོའི་སྒྲོས་དང་མཐུན་ལ། བྱེ་སྨྲ་རང་ལུགས་ཀྱི་དོགས་པ་ནི། སངས་རྒྱས་ཀྱི་ས་མ་འོངས་པ་མཁྱེན་ནམ་མི་མཁྱེན། མཁྱེན་ན་ཞིག་དང་མ་སྐྱེས་མི་རིག་དང་འགལ། མི་མཁྱེན་ན་ཐམས་ཅད་མཁྱེན་དུ་མི་བཏུབ་སྙམ་ན། ད་ལྟ་བ་འདིས་འདས་མ་འོངས་མི་མཁྱེན། འོ་ན་ཐམས་ཅད་མཁྱེན་པར་(༣༡༨ན)
འགྲོ་ཡེ་སྙམ་ན། སྔ་ཕྱི་བར་གསུམ་ཡོ་ལོག་པས་ཐམས་ཅད་མཁྱེན་ཏེ། རྒྱུན་གྱི་སྤྱོད་པའི་ཕྱིར་ན་དཔེར། ཞེས་སོ། །གཉིས་པ་ཟད་པ་དང་མི་སྐྱེ་བ་ཤེས་པའི་ཁྱད་པར་ནི། ཟད་པར་ཤེས་པ་བདེན་རྣམས་ལ། །ཡོངས་ཤེས་ལ་སོགས་ངེས་པའོ། །ཡོངས་ཤེས་བྱར་མེད་ཅེས་ལ་སོགས། །མི་སྐྱེ་བ་ཡི་བློ་འདོད་དོ། །ཟད་པར་ཤེས་པས་སྡུག་བསྔལ་སོགས་བདེན་པ་རྣམས་ལ་བདག་གིས་སྡུག་བསྔལ་ཡོངས་སུ་ཤེས་ཞེས་དང་། སོགས་པས་ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ་ཞེས་ངེས་པའི་ཤེས་པ་གང་ཡིན་པ་དེ་ནི་ཟད་པ་ཤེས་པའོ་སྟེ། ཤེས་པ་དེའི་རྒྱུ་ལས་བྱུང་བའི་ཤེས་པ་དང་། མཐོང་བ་དང་། རིག་པ་དང་། བློ་དང་། རྟོགས་པ་དང་། ཤེས་རབ་དང་། སྣང་བ་དང་། མངོན་པར་ཤེས་པ་གང་ཡིན་པའི་ཕྱིར། བདག་གིས་སྡུག་བསྔལ་ཡོངས་སུ་ཤེས་ཏེ་ཡང་ཤེས་པ་བྱར་མེད་དོ། །ཞེས་ཤེས་པ་ནས་བདག་གིས་ལམ་བསྒོམས་ཏེ་ཡང་བསྒོམ་དུ་མེད་དོ། །ཞེས་པའི་བར་དུ་ཤེས་པ་ནི་མི་སྐྱེ་བའི་བློ་སྟེ། ཤེས་པ་དེའི་རྒྱུ་ལས་བྱུང་བའི་ཤེས་པ་སོགས་སྔ་མ་ལྟར་རོ། །ཟག་པ་མེད་པ་རྣམས་ནི་སྡུག་བསྔལ་ལ་སོགས་པའི་རྣམ་པ་ཅན་ཡིན། འདི་ནི་ཀུན་རྫོབ་ལ་སོགས་པའི་རྣམ་པ་ཅན་ཏེ་སྡུག་བསྔལ་སོགས་ཡོངས་སུ་ཤེས་སོ་ཞེས་པའི་རྣམ་པ་ཅན་ཡིན་པའི་ཕྱིར། དེ་ལྟར་ན་ཟག་མེད་ཀྱི་ཤེས་པས་ཇི་ལྟར་ཤེས་ཞེ་ན། ཁ་ཆེ་བ་ན་རེ། རྣམ་རྟོག་མེད་པས་ཟག་མེད་ཀྱིས་མི་ཤེས་མོད། ཟག་མེད་དེའི་རྗེས་ལས་ལངས་པ་ན་རྟོག་པ་སྐྱེ་བས་དེ་ལྟར་ཤེས་ཏེ། ཀུན་རྫོབ་ཤེས་པ་དེ་ནི་རྟོག་པ་དེ་དག་གི་སྟོབས་ཀྱིས་ཐོབ་པའི་ཕྱིར། དེའི་ཕྱིར་བསྟན་བཅོས་ལས། ཀུན་རྫོབ་ཤེས་པ་སྐྱེས་བུ་བྱེད་འབྲས་དེའི་རྗེས་ཐོབ་ཀྱི་བྱེ་བྲག་གིས་ཟད་མི་སྐྱེ་བ་ཤེས་པ་དེ་གཉིས་ཀྱི་མཉམ་གཞག་གི་བྱེ་བྲག་བསྟན་པ་ཡིན་ཏེ། དེའི་རྒྱུ་ལས་བྱུང་བ་ནི་རྒྱུ་དེ་སྔོན་དུ་སོང་བས། རྒྱུ་མཐུན་གྱི་མི་རྟོག་པ་དེ་གཉིས་ཀྱི་ཁྱད་པར་རྗེས་སུ་དཔག་པ་ཉིད་ཀྱི་ཕྱིར། ཞེས་ཟེར་རོ། །གཞན་ན་རེ། དེར་ཟག་མེད་ཀྱིས་(༣༡༨བ)
ཀྱང་དེ་ལྟར་ཤེས་ཏེ། རྣམ་པ་བཅུ་དྲུག་ལས་མ་གཏོགས་པའི་ཟག་མེད་ཀྱི་རྣམ་པ་ཡོད་པའི་ཕྱིར། འོ་ན་བསྟན་བཅོས་ལས་མཐོང་བ་ཞེས་ཀྱང་བཤད་ན་དེ་གཉིས་ལྟ་བར་འགྱུར་ཏེ། ལྟ་མཐོང་དོན་གཅིག་པའི་ཕྱིར། འདོད་ན། ཟད་དང་མི་སྐྱེ་བློ་ལྟ་མིན། །ཅེས་པ་དང་འགལ་ལོ་ཞེ་ན། མི་འགལ་ཏེ། བསྟན་བཅོས་ལས། ཤེས་པ་དང་མཐོང་བ། ཞེས་སྨོས་པ་ན་སྔོན་མཐོང་ལམ་གྱི་དུས་སྡུག་བསྔལ་ཆོས་ཤེས་སོགས་ལ་བཤད་པ་ཡིན་ལ། དེའི་མཇུག་སོགས་སུ་ཤེས་པ་འདི་གཉིས་ཀྱང་འདོན་པའི་ཚིག་གིས་འཕངས་པའམ་ཤུགས་ཀྱིས་ཁ་ཤོར་བ་ཡིན་པས། དགེ་སློང་གིས་ད་ལྟ་འདོན་པ་ནི་ཚིག་ཙམ་དུ་ཟད་པས་དེ་གཉིས་ལྟ་བ་མ་ཡིན་ནོ། །ཡང་ན་རེ་ཞིག་ཤེས་པ་གང་ཡིན་པ་དེ་ནི་མཐོང་བའང་ཡིན་ཏེ། འདི་གཉིས་མངོན་སུམ་དུ་འཇུག་པ་ཉིད་ཀྱི་ཕྱིར། རྗེས་སུ་དཔག་པ་དང་ལུང་ལས་བྱུང་བ་ལྟ་བུ་ལྐོག་ཏུ་འཇུག་པ་ནི་མ་ཡིན་པའི་ཕྱིར། དཔེར་ན། མིག་གི་རྣམ་ཤེས་ལྟ་བུའོ། །དེས་ན་མཐོང་བ་ནི་མཐོང་བ་ཉིད་ཡིན་པར་འདོད་ཀྱི། ལྟ་བ་ཡིན་མི་དགོས་ཏེ། མཐོང་བ་ཡིན་ལ་ཤེས་པ་མ་ཡིན་པ་མངོན་པར་རྟོགས་པའི་ཁོངས་སུ་བཟོད་པ་བརྒྱད་འབྱུང་བ་བཞིན་ཅེས་ཟེར་རོ། །དེ་ལྟར་ན་དེ་དག་ནི་ཤེས་པ་བཅུ་ཡིན་ལ། ཀུན་རྫོབ་ཤེས་པ་ནི་ཀུན་རྫོབ་ཤེས་པ་གཅིག་པུ་ཡིན་ལ། ཕ་རོལ་སེམས་ཤེས་གཅིག་གི་ཆ་སེམས་ཟག་བཅས་ཤེས་པའང་ཡིན། ཆོས་ཤེས་པ་ནི་ཆོས་ཤེས་གཅིག་པུ་ཡིན་ལ། བདེན་བཞི་དང་གཞན་སེམས་ཟད་མི་སྐྱེ་ཤེས་པ་སྟེ་བདུན་གྱི་ཆའང་ཡིན་ལ། དེའང་འདོད་པའི་སྡུག་བསྔལ་སོགས་ལ་དམིགས་པའོ། །རྗེས་ཤེས་ཀྱང་ཤེས་པ་བཅུའི་ནང་ནས་ཤེས་པ་གཅིག་རྗེས་ཤེས་ཉིད་ཀྱང་ཡིན་ལ། གོང་མའི་སྡུག་བསྔལ་ལ་སོགས་ཀྱི་ཡུལ་ཅན་བདུན་གྱི་ཆའང་ཡིན་ཏེ། རྗེས་སུ་ཤེས་པའི་མཚན་ཉིད་ཡིན་པའི་ཕྱིར་སྡུག་བསྔལ་ཤེས་(༣༡༩ན)
པ་ནི་སྡུག་བསྔལ་ཤེས་པ་གཅིག་པུ་ཡིན་ལ། ཆོས་དང་རྗེས་དང་ཟད་མི་སྐྱེ་ཤེས་པ་སྡུག་བདེན་ལ་དམིགས་པས་བཞིའི་ཆའང་ཡིན་ནོ། །ཀུན་འབྱུང་དང་འགོག་པ་ཤེས་པའང་སོ་སོར་ཤེས་པ་རེ་རེ་དང་། ཆོས་རྗེས་ཟད་མི་སྐྱེ་ཤེས་པ་སྟེ་བཞིའི་ཆའང་ཡིན་ནོ། །ལམ་ཤེས་ནི་ལམ་ཤེས་གཅིག་པུ་དང་ཆོས་དང་རྗེས་དང་ཟད་པ་དང་མི་སྐྱེ་བ་དང་གཞན་གྱི་སེམས་ཤེས་པ་ལྔའི་ཆའང་ཡིན་ནོ། །ཕ་རོལ་གྱི་སེམས་ཤེས་ནི་གཅིག་པུ་དེ་ཉིད་དང་ཆོས་དང་རྗེས་དང་ཀུན་རྫོབ་དང་ལམ་ཤེས་པ་སྟེ་བཞིའི་ཆ་ཡིན་ནོ། །ཟད་པ་དང་མི་སྐྱེ་བ་ཤེས་པ་ནི་བཅུའི་ནང་ནས་དེ་ཉིད་ཡིན་པ་དང་། ཆོས་རྗེས་དང་བདེན་བཞི་ཤེས་པ་སྟེ་དྲུག་གི་ཆའང་ཡིན་ནོ། །གསུམ་པ་དེ་དག་གི་ཁྱད་པར་དཔྱད་པ་ལ། ཤེས་བཅུའི་ཁྱད་པར། གཉེན་པོའི་ཁྱད་པར། རྣམ་པའི་ཁྱད་པར། ཁྱད་པར་གཞན་བཤད་པའོ། །དང་པོ་ནི། རང་བཞིན་དང་ནི་གཉེན་པོ་དང་། །རྣམ་པ་རྣམ་པ་སྤྱོད་ཡུལ་དང་། །སྦྱོར་དང་བྱ་བ་བྱས་ཉིད་དང་། །རྒྱུ་རྒྱས་པ་ལས་བཅུ་ཡིན་ནོ། །ཆོས་དང་རྗེས་དང་ཀུན་རྫོབ་ཤེས་པ་གསུམ་ཡོད་ལ། བཅུར་བཞག་ཅེ་ན། རྒྱུ་བདུན་ལས། ཤེས་པ་བཅུར་བཞག་པ་ཡིན་ནོ་ཞེས་གྲགས་ལ། དེའང་རང་བཞིན་ཏེ་ངོ་བོ་ཉིད་ཀྱིས་ཀུན་རྫོབ་ཤེས་པ་འབྱུང་བས་དེས་དོན་དམ་མི་ཤེས་སོ། །ཆོས་དང་རྗེས་སུ་ཤེས་པ་ནི་གཉེན་པོ་ལས་ཏེ། འདོད་པ་དང་ཁམས་གོང་གི་གཉེན་པོ་ཡིན་པའི་ཕྱིར། སྡུག་ཀུན་ཤེས་པ་ནི་རྣམ་པ་ལས་ཏེ་སྡུག་བསྔལ་ཉིད་ཀུན་འབྱུང་ཡིན་པ་དམིགས་པ་གཅིག་ལ་རྣམ་པ་ཐ་དད་པའི་ཕྱིར་ཏེ། སྡུག་བསྔལ་ཤེས་པ་ནི་ཕུང་པོ་ལ་མི་རྟག་སོགས་ཀྱི་ཆ་ནས་དང་། ཀུན་འབྱུང་ཤེས་པ་ཕུང་པོ་ལ་ཕུང་ལྔའི་རྒྱུ་སོགས་ཀྱི་ཆ་ནས་ཡིད་ལ་བྱེད་པའི་ཕྱིར། འོ་ན་སྡུག་ཀུན་གྱི་རྣམ་པ་ཐ་དད་པ་བཞིན་ནང་ཚན་བཞི་བཞིའང་ཐ་དད་པས་བརྒྱད་དུ་འགྲོའམ་སྙམ་ན། སྡུག་བསྔལ་གྱི་རྣམ་པ་བཞི་ནི་སྡུག་བསྔལ་གྱི་མཚན་ཉིད་གཅིག་གིས་བཅིངས་པའི་རྣམ་པ་ཡིན་ལ། བཞི་མིན་ཅིང་(༣༡༩བ)
ཀུན་འབྱུང་ཡང་དེ་དང་འདྲ་ལ། འོ་ན་སྡུག་ཀུན་གཉིས་ཀྱང་རྫས་གཅིག་ཙམ་ན། རྫས་གཅིག་གིས་བཅིངས་པ་སྡུག་ཀུན་གྱི་རྣམ་པ་གཉིས་པོའང་གཅིག་ཏུ་འགྱུར་སྙམ་ན། རྫས་གཅིག་ཀྱང་སྡུག་ཀུན་དེ་གཉིས་མཚན་ཉིད་ཐ་དད་པ་རྣམ་པ་ཐ་དད་པའོ། །འགོག་པ་དང་ལམ་ཤེས་པ་ནི་རྣམ་པ་དང་སྤྱོད་ཡུལ་ལས་ཏེ། རྣམ་པ་དང་དམིགས་པ་འདུས་བྱས་དང་འདུས་མ་བྱས་ཐ་དད་པའི་ཕྱིར། ཕ་རོལ་གྱི་སེམས་ཤེས་པ་ནི་སྦྱོར་བ་ལས་ཏེ་སེམས་ཤེས་པའི་ཆེད་ཀྱི་སྦྱོར་བ་ལས་བལྟོས་པའི་ཕྱིར། སེམས་བྱུང་རྣམས་ཀྱང་མི་ཤེས་པ་མ་ཡིན་མོད་པས་རྟ་རྒྱུག་ཞར་ལ་མེ་ཏོག་ཆད་པ་ལྟ་བུའོ། །ཟད་པ་ཤེས་པ་ནི་བྱ་བ་བྱས་པའི་རྒྱུ་ཉིད་ལས་དང་པོར་སྐྱེ་སྟེ། མི་སྐྱེ་བ་ཤེས་པའང་བྱ་བ་བྱས་པ་ལས་རྒྱུད་ནས་སྐྱེ་བའི་ཕྱིར། མི་སྐྱེ་བ་ཤེས་པ་ནི་སྐལ་མཉམ་གྱི་རྒྱུ་རྒྱས་པ་ལས་ཏེ། ཟག་མེད་ཀྱི་ཤེས་པ་ཐམས་ཅད་སྐལ་བ་མཉམ་པའི་རྒྱུ་ཅན་ཡིན་པའི་ཕྱིར། ཟད་པ་ཤེས་པ་ནི་ཟག་པ་མེད་པ་ཐམས་ཅད་ཀྱི་རྒྱུ་ཅན་མ་ཡིན་ཏེ། མི་སྐྱེ་བ་ཤེས་པས་ཁྱད་པར་དུ་འཕགས་པའི་ཆ་ནས་ཐམས་ཅད་ཀྱི་རྒྱུ་ཅན་མ་ཡིན་པའི་ཕྱིར། གཉིས་པ་ནི། བསྒོམ་པའི་ལམ་ལ་འགོག་པའམ། །ལམ་ལ་ཆོས་ཤེས་གང་ཡིན་དེ། །ཁམས་གསུམ་གྱི་ནི་གཉེན་པོ་ཡིན། །འདོད་པའི་ཁམས་ཀྱི་རྗེས་མ་ཡིན། །ཆོས་ཤེས་ནི་འདོད་པའི་སྤང་བྱ་རིགས་ལྔ་པོ་ཐམས་ཅད་ཀྱི་གཉེན་པོ་ཡིན་ལ། དེ་མཐོང་སྒོམ་གྱི་ལམ་གྱིས་བསྡུས་པ་བདེན་བཞི་ལ་དམིགས་པ་ཐམས་ཅད་ཡིན་པའི་ཕྱིར། ཆོས་ཤེས་པ་འདོད་པའི་ཁོ་ནའི་གཉེན་པོ་ཡིན་ནོ་ཞེས་བཤད་པར་ཟད་མོད་ཀྱི། འོན་ཀྱང་ཆོས་ཤེས་ཁམས་གོང་མ་གཉིས་པོ་དག་གི་གཉེན་པོ་བྱེད་པའང་ཡོད་དེ། སྒོམ་པའི་ལམ་ལ་འགོག་པའམ་ལམ་ལ་ཆོས་ཤེས་པ་གང་ཡིན་པ་དེ་ནི་ཁམས་གསུམ་ཅར་གྱི་ནི་གཉེན་པོ་ཡིན་ཏེ། འདོད་པའི་རྟེན་ཅན་གྱི་འཕགས་པས་འདོད་པའི་སྒོམ་སྤོང་དགུ་ཆོས་ཤེས་པས་རིམ་གྱིས་སྤངས་ནས་ཁམས་གོང་མའི་སྒོམ་སྤོང་ཡང་སྔར་འདྲིས་པའི་(༣༢༠ན)
ལམ་དེ་ཉིད་བསྐྱེད་ནས་སྤོང་བ་དག་སྲིད་པའི་ཕྱིར་རམ། ཡང་འགོག་ལམ་ཆོས་ཤེས་ཀྱིས་ཀྱང་ཁམས་གོང་གི་གཉེན་པོ་བྱེད་ཟེར་བ་མིན་གྱི། འགོག་ལམ་ཆོས་ཤེས་ཀྱི་དམིགས་པ་འགོག་ལམ་ནི་ཟག་མེད་ཡིན་པས་ཁམས་སུ་མ་གཏོགས་པས་དམིགས་པ་དམན་པ་མ་ཡིན་པས་དེ་དག་ལ་དམིགས་པའི་ཆོས་ཤེས་ནི་ཁམས་གསུམ་གའི་གཉེན་པོར་འགྱུར་རུང་དུ་སྲིད་པའི་ཕྱིར་རོ། །འོ་ན་སྡུག་བསྔལ་དང་ཀུན་འབྱུང་ལ་ཆོས་ཤེས་པ་ཡང་ཁམས་གོང་གིས་གཉེན་པོར་མི་འགྱུར་དྲང་ཞེ་ན། སྡུག་ཀུན་ལ་ཆོས་ཤེས་ཀྱི་དམིགས་པ་ནི། འདོད་པའི་བདེན་པ་ཟག་བཅས་དམན་པ་ཡིན་ལ། དེ་ལ་དམིགས་པའི་ཆོས་ཤེས་ནི་ཁམས་གོང་གི་གཉེན་པོར་མི་འགྱུར་ཏེ། འདོད་པའི་སྡུག་བདེན་རྣམ་པར་སུན་འབྱིན་པའི་ཡིད་བྱེད་ཀྱི་ཁམས་གོང་གིས་དེ་སུན་འབྱིན་པ་ན་གཞན་ཁམས་གོང་གི་དེ་ལ་འདོད་ཆགས་དང་བྲལ་བར་མི་རིགས་པའི་ཕྱིར། ཁ་ཅིག་སྤང་བྱ་སྤོང་བ་ལ་དེ་ལ་དངོས་སུ་གནོད་པའམ། ཡང་ན་སྤང་བྱ་དེ་དང་འགལ་བ་ལ་ཡོན་ཏན་དུ་བལྟ་བའི་ཤུགས་ལས་སྤོང་བ་ཡིན་པས་ན་སྡུག་བསྔལ་དང་ཀུན་འབྱུང་ལ་ཆོས་ཤེས་པ་ནི་དེ་ལྟར་མ་ཡིན་ཏེ། ཁམས་གོང་མའི་སྤང་བྱ་ལ་དངོས་སུ་མི་དམིགས་པའི་ཕྱིར་དང་། འགལ་ཟླ་ལ་ཡོན་ཏན་དུ་ལྟ་བའང་མ་ཡིན་ཏེ། འོག་མའི་བདེན་པ་ལ་དམིགས་ནས་ཡིད་སྐྱོ་བར་བྱེད་པའི་ཕྱིར། འགོག་ལམ་ལ་དམིགས་པའི་ཆོས་ཤེས་ནི་ཁམས་གོང་མའི་སྤང་བྱ་དང་འགལ་བ་ལ་ཡོན་ཏན་དུ་བལྟ་བའི་ཕྱིར་ཤུགས་ལ་སྤོང་བ་ཡིན་ནོ་ཞེས་འཆད་དོ། །འདིར་ཁམས་གོང་གི་སྒོམ་སྤོང་སྤོང་བ་ལ་འགོག་ལམ་གྱི་ཆོས་ཤེས་བཞག་ནས་ཁམས་གོང་གི་མཐོང་སྤོང་སྤང་བ་ལ་འགོག་ལམ་ཆོས་ཤེས་མ་བཞག་པ་ནི་ཁམས་གོང་ལ་སྤྱོད་པའི་མཐོང་སྤོང་ནི་རྗེས་སུ་ཤེས་པའི་བཟོད་པས་སྤང་བའི་དབང་དུ་བྱས་པའོ། །འོ་ན་འགོག་ལམ་ལ་རྗེས་ཤེས་སྒོམ་ལམ་གྱིས་བསྡུས་པས་ཀྱང་འདོད་པའི་གཉེན་པོར་(༣༢༠བ)
འགྱུར་རམ་སྙམ་ན། འདོད་པའི་ཁམས་ཀྱི་སྤང་བྱའི་གཉེན་པོ་ནི་རྗེས་སུ་ཤེས་པ་སྒོམ་ལམ་གྱིས་བསྡུས་པའང་རྣམ་པ་ཐམས་ཅད་དུ་མ་ཡིན་ཏེ། ཆོས་ཤེས་ཀྱི་འདོད་པ་ལས་རྒྱལ་བའི་བྱ་བ་ཐམས་ཅད་རྫོགས་པར་བྱས་རྗེས་སུ་འབྱུང་བས་དེས་འདོད་པར་བྱ་བ་ཅུང་ཟད་ཀྱང་མེད་ཅིང་། འོག་མའི་སྤང་བྱ་མ་སྤངས་པར་གོང་མའི་གཉེན་པོ་སྐྱེ་བ་མི་སྲིད་པའི་ཕྱིར་རོ། །ཡང་ཆོས་ཤེས་པས་ནི་གོང་མའི་སྒོམ་སྤོང་སྤངས་ཏེ། དེའི་ཡུལ་ཅན་འདོད་པའི་ཀུན་འགྲོ་སྤངས་པའི་ཕྱིར་དགྲ་བཅོམ་ནས་ཡུལ་འཇིག་པ་བཞིན་ནོ། །རྗེས་སུ་ཤེས་པ་ལ་ནི་དེ་ལྟ་བུའི་བྱ་བ་མེད་པའི་ཕྱིར། ཞེས་ཟེར་རོ། །གསུམ་པ་རྣམ་པའི་ཁྱད་པར་ལ། ཤེས་པ་སོ་སོའི་རྣམ་པ་དང་། རྣམ་པ་སོ་སོའི་ངོ་བོའོ། །དང་པོ་ལ། ཆོས་ཤེས་རྗེས་ཤེས་རྣམ་པ་གང་གིས་འཇུག་པ། ཀུན་རྫོབ་ཤེས་པ། བདེན་བཞི་ཤེས་པ། ཕ་རོལ་གྱི་སེམས་ཤེས་པ། ཟད་མི་སྐྱེ་ཤེས་པ་རྣམ་པ་གང་གིས་འཇུག་པའོ། །དང་པོ་ནི། ཆོས་ཤེས་པ་དང་རྗེས་སུ་ཤེས། །རྣམ་པ་བཅུ་དྲུག །ཤེས་པ་བཅུ་པོ་དེ་ལས་ཆོས་ཤེས་པ་དང་རྗེས་སུ་ཤེས་པ་ནི་རྣམ་པ་བཅུ་དྲུག་སྟེ། བདེན་བཞི་ལ་རེ་རེ་ཞིང་རྣམ་པ་བཞི་བཞི་ཡིན་པའི་ཕྱིར། རྣམ་པ་བཅུ་དྲུག་ནི་འོག་ནས་བཤད་པར་བྱའོ། །གཉིས་པ་ནི། ཀུན་རྫོབ་ནི། །དེ་བཞིན་གཞན་དུའང་། ཀུན་རྫོབ་ཤེས་པ་ནི་ཆོས་ཤེས་རྗེས་ཤེས་དེ་བཞིན་དུ་དྲོད་རྩེ་སོགས་ན་རྣམ་པ་བཅུ་དྲུག་ཅན་ཡང་ཡིན་ལ། དེ་བཞིན་གཞན་མི་སྡུག་པ་དང་དབུགས་རྔུབ་པ་དང་། དབྱུང་བ་དང་། བྱམས་པ་སོགས་ཀྱི་རྣམ་པ་ཅན་དུའང་ཡིན་ཏེ། ཆོས་ཐམས་ཅད་ཀྱི་རང་སྤྱིའི་མཚན་ཉིད་ལ་སོགས་འཛིན་པའི་ཕྱིར། སོགས་པས་ནི་རང་སྤྱིའི་མཚན་ཉིད་མ་ཡིན་པ་ཟོ་ཞིག་འདུག་ཅིག་སོང་ཞིག་ཅེས་སོགས་བུམ་སྣམ་ལ་སོགས་པ་བསྡུའོ། །གསུམ་པ་ནི། རང་རང་གི། །བདེན་པའི་རྣམ་པས་བཞི་ཡིན་ནོ། །རང་རང་གི་བདེན་པའི་རྣམ་པས་རྣམ་པ་བཞི་བཞི་ཡིན་ནོ། །བཞི་པ་ཕ་རོལ་གྱི་སེམས་ཤེས་པ་ལ། དྲི་མེད་དང་། དྲི་བཅས་འཇུག་ཚུལ་ལོ། །དང་པོ་ནི། ཕ་རོལ་ཡིད་ཤེས་དྲི་མེད་ཀྱང་། །དེ་བཞིན། ཕ་རོལ་ཡིད་ཤེས་དྲི་མེད་ཀྱང་ལམ་ཤེས་པ་དེ་བཞིན་དུ་ལམ་བདེན་གྱི་རྣམ་པ་བཞི་ཅན་ཡིན་ཏེ། ལམ་བདེན་ཤེས་པ་ཡིན་པའི་ཕྱིར། (༣༢༡ན)
ཡང་བདེན་པ་བཞིའི་ནང་ནས་ལམ་ཤེས་པར་འཇོག་པ་ན་ལམ་དེའི་ཚོགས་པ་ན་སེམས་དང་སེམས་བྱུང་གཟུགས་ལྡན་པ་མ་ཡིན་པ་ཡོད་ལ། ལམ་རིག་པ་ལ་སོགས་པར་འཇལ་བ་ཡིན་ལ། གཞན་གྱིས་སེམས་ཤེས་པའི་དུས་སུ་ལམ་དེའི་སེམས་སམ་སེམས་གང་བྱུང་རེ་རེ་ལ་ལམ་སོགས་སུ་འཇལ་བ་ཡིན་ཏེ། ལམ་གྱི་སེམས་ལྟ་བུ་དེ་ལ་ལམ་རིག་པ་ལ་སོགས་པར་འཇལ་ལོ། །གཉིས་པ་ནི། དྲི་མ་དང་བཅས་ནི། །ཤེས་བྱ་རང་གི་མཚན་ཉིད་རྣམ། །རྫས་རེ་རེ་ཞིག་སྤྱོད་ཡུལ་ལོ། །ཕ་རོལ་སེམས་ཤེས་དྲི་མ་དང་བཅས་པ་ནི་ཤེས་བྱ་སེམས་དང་སེམས་བྱུང་དེའི་རང་གི་མཚན་ཉིད་ཀྱི་རྣམ་པ་འཛིན་ཏེ། རང་གི་མཚན་ཉིད་འཛིན་པར་བྱེད་པའི་ཕྱིར་རོ། །སེམས་ཤེས་ཟག་བཅས་ཟག་མེད་གཉིས་ཀའང་རྫས་རེ་རེ་ཞིང་སྤྱོད་ཡུལ་དུ་བྱེད་དེ། སེམས་འཛིན་པའི་ཚེ་སེམས་བྱུང་རྣམས་མི་འཛིན་ལ། གང་གི་ཚོར་བ་འཛིན་པའི་ཚེ་འདུ་ཤེས་མི་འཛིན་ཅེས་བྱ་བ་དེ་ལྟ་བུ་ལ་སོགས་པའི་ཕྱིར། སེམས་དང་སེམས་བྱུང་བསྡོམས་ནས་མི་འཛིན་ན། འོ་ན། མདོ་ལས། འདོད་ཆགས་དང་བཅས་པའི་སེམས་ལའང་འདོད་ཆགས་དང་བཅས་པའི་སེམས་ཞེས་བྱ་བར་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་བྱ་བར་ཡང་དག་པ་ཇི་ལྟ་བར་རབ་ཏུ་ཤེས་སོ། །འདོད་ཆགས་དང་བཅས་པ་དང་འདོད་ཆགས་དང་བྲལ་བ་ཇི་ལྟ་བ་དེ་བཞིན་དུ་ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། ཀུན་ཏུ་བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་བཟུང་བ་དང་། ཆུང་ངུ་དང་ཆེན་པོར་འགྱུར་བ་དང་། ཉེ་བར་ཞི་བ་དང་། ཉེ་བར་མ་ཞིབ་དང་། རྒོད་པ་དང་། རྒོད་པ་མ་ཡིན་པ་དང་། མཉམ་པར་མ་བཞག་པ་དང་། མཉམ་པར་བཞག་པ་དང་། མ་བསྒོམས་པ་དང་། སྒོམ་པ་དང་། རྣམ་པར་མ་གྲོལ་བ་དང་། རྣམ་པར་གྲོལ་བའོ། །ཞེས་བྱ་བ་ཡང་དག་པར་ཇི་ལྟ་བ་རབ་ཏུ་ཤེས་(༣༢༡བ)
སོ་ཞེས་འབྱུང་ངོ་། །ཞེས་པ་ཇི་ལྟར་ཞེ་ན། ཁྱད་པར་དང་ཁྱད་པར་ཅན་དུ་གཉིས་པོ་དེ་གཅིག་ཏུ་འཛིན་ཀྱང་། དེ་གཉིས་ཁྱད་པར་ཅན་དུ་གཅིག་ཅར་འཛིན་པ་ནི་མ་ཡིན་ཏེ། རྟོག་པས་གོས་སོ་སྙམ་པའི་ཚེ་དྲི་མ་མི་འཛིན་ལ། དྲི་མའོ་སྙམ་པའི་ཚེ་གོས་མི་འཛིན་པ་བཞིན་ནོ། །དེ་རྟོག་བཅས་ཀྱི་དབང་དུ་ཡིན་ལ། སེམས་ཤེས་རྟོག་མེད་ཡིན་ཙམ་ན། སེམས་སེམས་བྱུང་གཅིག་ཅར་འཛིན་ནམ་སྙམ་ན། མཉམ་གཞག་ལ་གཉིས་ཀ་གསལ་བར་དུས་གཅིག་འཛིན་ཀྱང་། ལངས་ཙམ་ན་ཁྱད་པར་དང་ཁྱད་པར་ཅན་དུ་འཛིན་པས། མཉམ་གཞག་ལའང་ཁྱད་པར་དང་ཁྱད་པར་ཅན་དུ་འཛིན་གྱི། ཁྱད་པར་ཅན་དུ་གཉིས་ཀ་དུས་གཅིག་ཏུ་མི་འཛིན་ཏོ། །འདོད་ཆགས་དང་བཅས་པའི་སེམས་ཞེས་བྱ་བ་ནི་རྣམ་པ་གཉིས་ཏེ། འདོད་ཆགས་དང་མཚུངས་པར་ལྡན་པའི་འདྲེས་པའི་འདོད་ཆགས་དང་། འདོད་ཆགས་ཀྱི་ཐོབ་པ་དང་འབྲེལ་བའི་ལྡན་པའི་འདོད་ཆགས་དང་བཅས་པ་ཉིད་དོ། །དེ་ལ་འདོད་ཆགས་དང་མཚུངས་པར་ལྡན་པའི་སེམས་ནི། འདྲེས་པའི་འདོད་ཆགས་དང་བཅས་པ་ཉིད་དང་ལྡན་པའི་འདོད་ཆགས་གཉིས་ཀྱི་འདོད་ཆགས་དང་བཅས་པ་ཡིན་ནོ། །དེ་ལས་གཞན་པའི་ཟག་བཅས་ཉོན་མོངས་ཅན་དང་ལུང་མ་བསྟན་དང་། འཇིག་རྟེན་པའི་དགེ་བ་དེ་ལྡན་པའི་འདོད་ཆགས་དང་བཅས་པའོ། །སློབ་དཔོན་ན་རེ། མདོ་འདིར་ནི་འདོད་ཆགས་དང་མཚུངས་པར་ལྡན་པའི་སེམས་ནི་འདྲེས་པའི་འདོད་ཆགས་དང་བཅས་པ་ལ་འདོད་ཀྱི། ལྡན་པའི་འདོད་ཆགས་དང་བཅས་པ་ལ་མི་འདོད་ལ། དེས་ན་འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བར་ཤེས་པ་ཡིན་ནོ། །ལ་ལའི་ལུགས་ཀྱིས། འདོད་ཆགས་དང་མཚུངས་པར་མི་ལྡན་ཙམ་འདོད་ཆགས་དང་བྲལ་བ་ཡིན་ནོ་ཞེ་ན། །འོ་ན་ཞེ་སྡང་ལ་སོགས་ཉོན་མོངས་པ་གཞན་དང་ལྡན་པའང་འདོད་ཆགས་དང་བྲལ་བར་འགྱུར་ཏེ། དུས་དེར་འདོད་ཆགས་དང་མཚུངས་པར་མི་ལྡན་པ་ཙམ་གྱི་ཕྱིར། འདོད་དོ་ཞེ་ན། (༣༢༢ན)
མདོ་ལས། ཞེ་སྡང་ལ་སོགས་པ་དང་མཚུངས་པར་ལྡན་ལ་འདོད་ཆགས་དང་བྲལ་ཅེས་ནི་མ་བཤད་དེ། ཞེ་སྡང་དང་གཏི་མུག་དང་བཅས་པ་ཞེས། སོགས་འབྱུང་བས་གནོད་ལ། འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བར་བཤད་པའི་ལུགས་ལྟར་ན་ནི། འདོད་ཆགས་ཀྱི་གཉེན་པོ་དེ་ཞེ་སྡང་སོགས་དང་མཚུངས་པར་ལྡན་པ་མ་ཡིན་ནོ། །ཞེས་ཟེར་རོ། །ཆོས་མངོན་པ་བ་ན་རེ། འདོད་ཆགས་དང་མཚུངས་པར་ལྡན་པའི་སེམས་ནི་འདོད་ཆགས་དང་བཅས་པ་ཡིན་ལ། ལྡན་པའི་འདོད་ཆགས་དང་བཅས་པར་མི་འདོད་ལ། འདོད་ཆགས་ཀྱི་གཉེན་པོ་ནི་འདོད་ཆགས་དང་བྲལ་བར་བཤད་པ་དེ་ལྟར་ན། འདོད་ཆགས་དང་བཅས་པའི་སེམས་ལུང་མ་བསྟན་ཉོན་མོངས་པ་ཅན་མ་ཡིན་པ་དེ་ཆོས་ཅན། འདོད་ཆགས་དང་བཅས་པའང་མ་ཡིན་ལ། འདོད་ཆགས་དང་བྲལ་བའང་མ་ཡིན་པའི་ཕུང་སུམ་པར་ཐལ། དེ་འདོད་ཆགས་དང་མཚུངས་པར་ཡང་མི་ལྡན། འདོད་ཆགས་ཀྱི་གཉེན་པོའང་མ་ཡིན་པའི་ཕྱིར། འདོད་མི་ནུས་པ་དེ་ལྟ་བས་ན། འདྲེས་པའི་འདོད་ཆགས་དང་བཅས་པས་སེམས་ཆགས་པ་དང་བཅས་པར་འཇོག་པར་མ་ཟད་མདོ་འདིར་འདོད་ཆགས་དང་ལྡན་པས་ཀྱང་འདོད་ཆགས་དང་བཅས་པའི་སེམས་སུ་འདོད་པར་བྱ་སྟེ། གཏི་མུག་དང་ལྡན་པས་ཀྱང་གཏི་མུག་དང་བཅས་པ་ནས་བྲལ་བའི་བར་དུའང་དེ་ལྟ་བུ་འབྱུང་བའི་ཕྱིར་ཞེས་ཟེར་རོ། །བྱེ་བྲག་ཏུ་སྨྲ་བ་ན་རེ། ཀུན་ཏུ་བསྡུས་པ་ནི་དགེ་བའི་སེམས་ཏེ། དམིགས་པ་ལ་མི་གཡེང་བར་མངོན་པར་སྡུད་པའི་ཕྱིར། རྣམ་པར་གཡེང་བ་ནི་ཉོན་མོངས་པ་ཅན་ཏེ། རྣམ་པར་གཡེང་བ་དང་མཚུངས་པར་ལྡན་པའི་ཕྱིར། ཞེས་ཟེར་རོ། །ནུབ་ཕྱོགས་པ་ན་རེ། ཉོན་མོངས་པ་ཅན་གྱི་གཉིད་དང་མཚུངས་པར་ལྡན་པ་ཡིན་ཏེ། དབང་པོ་ལྔ་རྒྱུ་བ་མངོན་པར་བསྡུ་བའི་ཕྱིར། རྣམ་པར་གཉིད་དང་མཚུངས་ལྡན་ལས་ཉོན་མོངས་ཅན་གཞན་ཡིན་ནོ་ཞེས་ཟེར་རོ། །བྱེ་སྨྲས། དེ་(༣༢༢བ)
སྐད་དུ་མི་བརྗོད་དེ། བརྗོད་ན་རིག་པ་དང་འགལ་ཏེ། དེ་ལྟར་ན་ཀུན་ཏུ་བསྡུས་པ་དེ་ཆོས་ཅན། འཆོལ་བའི་སྐྱོན་དུ་འགྱུར་ཏེ། ཉོན་མོངས་པ་ཅན་གྱི་གཉིད་དང་མཚུངས་པར་ལྡན་པས་བསྡུས་པའང་ཡིན་ལ། ཉོན་མོངས་པ་ཡིན་པས་རྣམ་པར་གཡེང་བའང་ཡིན་པའི་ཕྱིར། དེར་མ་ཟད་བསྟན་བཅོས་ལས། སེམས་ཀུན་ཏུ་བསྡུས་པ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཀུན་བསྡུས་པ་དེ་ཤེས་པའི་ཤེས་པ་ནི་བཞི་སྟེ། ཆོས་ཤེས་པ་དང་། རྗེས་སུ་ཤེས་པ་དང་། ཀུན་རྫོབ་ཤེས་པ་དང་། ལམ་ཤེས་པའོ། །ཞེས་འབྱུང་བ་དང་འགལ་བར་འགྱུར་ཏེ། དེ་ལྟར་ན་རྗེས་ཤེས་ཀུན་བསྡུས་ལ་དམིགས་པར་མི་འགྱུར་ཏེ། ཀུན་བསྡུས་ནི་ཉོན་མོངས་པ་ཅན་གྱི་གཉིད་དང་མཚུངས་ལྡན་དུ་ཁྱེད་འདོད་ལ། འདོད་ཁམས་ལས་གོང་ན་གཉིད་མེད་པ་དང་། རྗེས་ཤེས་ཀྱི་འདོད་པར་མི་དམིགས་པའི་ཕྱིར། ལམ་ཤེས་ཀྱང་གཉིད་དང་མཚུངས་ལྡན་གྱིས་ཀུན་བསྡུས་ཤེས། ཀུན་རྫོབ་ཤེས་པས་ནི་ནམ་ཡང་ཤེས་པས་དེ་གཉིས་ཁོ་ན་བརྗོད་པ་ལས་གཞན་གཉིས་བརྗོད་པར་མི་རིགས་སོ། །འདིར་གནའ་མཚན་ལས། རྒྱལ་པོའི་སྲས་ཀྱིས་དེ་ཤེས་པ་ནི་གཉིས་ཏེ། ཆོས་ཤེས་དང་ཀུན་རྫོབ་ཤེས་པའོ། །ཞེས་པ་དེ་ཀུན་བསྡུས་གཉིད་དང་མཚུངས་ལྡན་གྱི་དབང་དུ་བྱས་ཏེ་འཆད་ན་གཉིས་སུ་རིགས་བྱ་བ་ཉུང་སྟེ། ཆོས་ཤེས་བགྲང་ན་སྡུག་བསྔལ་ཀུན་འབྱུང་ཤེས་པ། ཟད་མི་སྐྱེ་ཤེས་པ་བཞིའང་བགྲང་རིགས་པའི་ཕྱིར་ཏེ། བཞི་པོ་དེས་ཀྱང་གཉིད་ཤེས་པའི་ཕྱིར། དེ་ཆོས་ཤེས་སུ་འདུས་པས་ལོགས་སུ་མི་བགྲང་ངོ་སྙམ་ན། འོ་ན་ཆོས་ཤེས་ཀྱང་འདོད་པ་ཤེས་པ་ཙམ་མིན། འདོད་པའི་བདེན་པ་བཞི་ཤེས་པའི་ནང་ནས་ཀྱང་འདོད་པའི་ལམ་ཤེས་པ་ཡིན་ཙམ་ན། ལམ་ཤེས་གཉིད་དང་མཚུངས་ལྡན་གྱི་ཤེས་པ་མིན་པས་དེས་གཉིད་མི་ཤེས་ཙ་ན། དེ་ཤེས་པ་ནི་གཅིག་སྟེ། ཀུན་རྫོབ་ཤེས་པའོ་བྱ་བ་གཅིག་ཏུ་བགྲང་(༣༢༣ན)
དགོས་པར་ཐལ་བར་འགྱུར་རོ་ཞེས་འགལ་བ་བཟུང་བར་བྱའོ་ཞེས་བྲིས་སྣང་ངོ་། །ཀུན་བསྡུས་པའི་སེམས་དགེ་བའི་སེམས་ལ་འདོད་པ་ལྟར་ན། དེ་བསྡུས་པའང་ཡིན་ལ་རྣམ་པར་གཡེང་བ་ཡང་མི་འགྱུར་ཏེ། དེ་ཉོན་མོངས་ཅན་གྱི་གཉིད་དང་མཚུངས་པར་མི་ལྡན་པའི་ཕྱིར། བསྟན་བཅོས་དང་འགལ་བ་མེད་དེ། ཀུན་བསྡུས་པའི་སེམས་དགེ་བ་ནི་ཁམས་གསུམ་དུ་གཏོགས་པ་དང་མ་གཏོགས་པ་ཡིན་པས། དེ་ཤེས་པའི་ཤེས་པ་ནི་བཞི་ཞེས་བྱ་བ་གྲུབ་སྟེ། ཁམས་གོང་མ་གཉིས་ཀྱིས་དགེ་བ་ལ་དམིགས་པ་ནི། ཟག་མེད་རྗེས་ཤེས་ཀྱི་གོང་མའི་ཀུན་བསྡུས་ཤེས་པ་ཡིན་ལ། ལམ་གྱིས་བསྡུས་པའི་སེམས་དགེ་བ་ལ་དམིགས་པ་ནི་ལམ་ཤེས་པའང་ཡིན་ལ། ཀུན་བསྡུས་པའི་དགེ་བ་དེ་འདོད་པ་ན་ཡོད་པས་ཆོས་ཤེས་པས་ཀྱང་ཤེས། ཀུན་རྫོབ་ཤེས་པས་ནམ་ཡང་ཤེས་པའི་ཕྱིར་རོ། །སེམས་ཞུམ་པ་ནི་ཉོན་མོངས་པ་ཅན་ཏེ། མངོན་པར་མི་སྤྲོ་བའི་ལེ་ལོ་དང་མཚུངས་པར་ལྡན་པའི་ཕྱིར། རབ་ཏུ་བཟུང་བ་ནི་དགེ་བ་སྟེ་བརྩོན་འགྲུས་དང་མཚུངས་པར་ལྡན་པའི་ཕྱིར། ཆུང་ངུ་ནི་རྣམ་པར་བྱང་བ་སྟེ་ཉོན་མོངས་ཅན་ཡིན་ལ། ངོ་བོ་ཉིད་ཀྱི་དགེ་བས་དག་པ་ཡིན་པའི་དགེ་བ་ཆུང་ངུ་དག་གིས་བསྟེན་པའི་ཕྱིར། ཆེན་པོར་གྱུར་པ་ནི་དགེ་བ་ཡིན་ཏེ། དེ་ལས་བཟློག་པ་རྣམ་བྱང་ཆེན་པོས་བསྟེན་པའི་ཕྱིར། གཞན་ཡང་རྩ་བ་དང་རིན་དང་འཁོར་དང་རྗེས་སུ་འབྲང་བ་དང་སྟོབས་ཆུང་བ་དང་ཆེ་བའི་ཕྱིར་ཡང་ཆུང་ངུ་དང་ཆེན་པོའོ། །ཉོན་མོངས་པ་ཅན་ནི་མི་དགེ་བའི་རྩ་བ་གཉིས་ཀྱི་རྩ་བ་དང་བཅས་པ་ཡིན་ཏེ། གཏི་མུག་དང་ཆགས་སྡང་གང་རུང་ཞིག་གི་རྩ་བ་དང་བཅས་པའི་ཕྱིར་ཏེ། ཆགས་སྡང་གཉིས་ཚོགས་གཅིག་ཏུ་མེད་པའི་ཕྱིར། དགེ་བ་ནི་དགེ་བའི་རྩ་བ་གསུམ་གྱིས་ཏེ། དེ་གསུམ་ཕན་ཚུན་མེད་ན་མི་འབྱུང་བའི་ཕྱིར། ཉོན་མོངས་ཅན་ནི་རིན་ཆུང་སྟེ། འབད་པས་བསྒྲུབ་པར་བྱ་བ་མ་ཡིན་པ་མི་འདོད་བཞིན་དུ་འབྱུང་(༣༢༣བ)
བའི་ཕྱིར། དགེ་བ་ནི་རིན་ཆེ་བ་སྟེ། དམ་པའི་ཆོས་དང་ཚུལ་བཞིན་ཡིད་ལ་བྱེད་པ་དང་། དོན་གྱི་སྒྲུབ་པ་ལ་སོགས་ཚེགས་ཆེན་པོའི་བསྒྲུབ་བྱ་ཡིན་པའི་ཕྱིར། ཉོན་མོངས་པ་ཅན་ནི་འཁོར་མང་བ་མ་ཡིན་ཏེ། ཉོན་མོངས་པ་ཅན་དེ་དང་འདྲ་བ་མ་འོངས་པའི་རྙེད་པའམ་ཐོབ་བྱ་ཁྱུ་མཆོག་ལྟར་དང་། ལྡིང་གི་ཐོབ་པས་ཐོབ་པ་མེད་པའི་ཕྱིར་ཏེ། ལུགས་ལས། ཆོས་དགེ་བའི་ཐོབ་པ་ཡིན་ནོ་ཞེས་འབྱུང་བའི་ཕྱིར། །སྤྱིར་དུས་གསུམ་སོ་སོའི་རྣམ་པ་གསུམ་གྱི་སྐབས་སུ་མ་འོངས་པའི་ཐོབ་པ་ཡོད་པ་ཙམ་ལ་དགོངས། འདིར་མ་འོངས་པའི་ཐོབ་པ་ཕལ་ཆུང་བ་ལ་དགོངས་ཀྱང་། ཟེར་རོ། །ཉོན་མོངས་ཅན་ནི་ཚོར་འདུ་འདུ་བྱེད་དེ་ཕུང་སུམ་གྱི་རྗེས་འབྲངས་དང་བཅས་པ་རྣམ་ཤེས་ཀྱི་ཕུང་པོའི་རྗེས་འབྲངས་དང་བཅས་པ་མིན་ཏེ། རྣམ་ཤེས་ཉིད་རྣམ་ཤེས་ཀྱི་འཁོར་དུ་མི་རིགས་པའི་ཕྱིར་ཏེ་འཚོགས་པ་གཅིག་ན་རྣམ་ཤེས་གཉིས་མེད་ཅིང་རང་གིས་རང་ལ་བྱེད་པ་འགལ་བའི་ཕྱིར། དགེ་བ་ནི་འཁོར་མང་བ་ཡིན་ཏེ། དེ་དང་འདྲ་བར་མ་འོངས་པའི་ཐོབ་པ་ཡོད་པའི་ཕྱིར། དགེ་བ་ནི་ཕུང་པོ་བཞིའི་རྗེས་འབྲངས་དང་བཅས་པ་ཡིན་ཏེ། ཕུང་པོ་དེ་གསུམ་དང་གཟུགས་ཕུང་བསམ་གཏན་ཟག་མེད་ཀྱི་སྡོམ་པས་བསྡུས་པ་སེམས་ཀྱི་རྗེས་སུ་ཅི་རིགས་པར་འབྱུང་བའི་ཕྱིར། ཡང་ཉོན་མོངས་ཅན་ནི་སྟོབས་ཆུང་བའོ། །དགེ་བ་ནི་སྟོབས་ཆེ་བ་ཡིན་ནོ། །འོ་ན་ལོག་ལྟའི་སྐད་ཅིག་གིས་དགེ་བའི་ཕུང་པོ་ལྔ་འཇོམས་པས་སྟོབས་ཆེ་བ་མིན་ནམ་ཞེ་ན། མིན་ཏེ། དེས་དེ་གཏན་དུ་འཆད་པ་མིན་ལ། ཡང་མཚམས་སྦྱོར་བའི་ཕྱིར། སྡུག་བསྔལ་ལ་ཆོས་ཤེས་པའི་བཟོད་པ་གཅིག་གིས་ཀྱང་ཕྲ་རྒྱས་བཅུ་གཏན་དུ་འཇོམས་ཤིང་གཅོད་པར་བྱེད་པའི་ཕྱིར་ཡང་ཉོན་མོངས་པ་ནི་ཆུང་ལ། དགེ་བ་ནི་ཆེན་པོར་གྱུར་པ་ཡིན་ནོ། །རྒོད་པའི་སེམས་ནི་ཉོན་མོངས་ཅན་ཏེ། རྒོད་པ་དང་མཚུངས་པར་ལྡན་པའི་ཕྱིར། རྒོད་པ་མ་ཡིན་པ་ནི་དགེ་བ་སྟེ་རྒོད་པའི་གཉེན་པོ་ཡིན་པའི་ཕྱིར། རྣམ་པར་མ་ཞི་བ་དང་ཞི་བ་ཡང་སྔ་མ་དང་འདྲ་སྟེ། རྒོད་པ་དང་མཚུངས་པར་ལྡན་པ་དང་མི་(༣༢༤ན)
ལྡན་པའི་ཕྱིར་རོ། །མཉམ་པར་མ་བཞག་པ་ནི་ཉོན་མོངས་ཅན་ཏེ། རྣམ་གཡེང་དང་མཚུངས་པར་ལྡན་པའོ། །མཉམ་པར་བཞག་པ་ནི་དགེ་བ་སྟེ། རྣམ་གཡེང་གི་གཉེན་པོ་ཡིན་པའི་ཕྱིར། མ་སྒོམ་པ་ནི་ཉོན་མོངས་ཅན་ཏེ། གསར་དུ་ཐོབ་པ་དང་མངོན་དུ་བྱེད་པ་བསྟེན་པའི་སྒོམ་པ་ངག་གིས་མ་བསྒོམ་པའི་ཕྱིར། སྒོམ་པ་ནི་དགེ་བ་སྟེ། ཐོབ་པ་དང་བསྟེན་པ་གཉིས་ཀྱིས་བསྒོམ་པའི་ཕྱིར། ཉོན་མོངས་པ་ཅན་ནི་བསྟེན་པར་འོས་པ་མིན་ཏེ། མ་འོངས་པའི་ཐོབ་པ་ཡང་མེད་ལ་དམན་པའི་ཕྱིར། ཐོབ་བསྟེན་ནི་དགེ་བ་འདུས་བྱས་ཐོབ་པའོ། །རྣམ་པར་མ་གྲོལ་བ་ནི་ཉོན་མོངས་ཅན་ཏེ། ཉོན་མོངས་དང་མཚུངས་པར་ལྡན་པས་རང་བཞིན་གྱིས་ཀྱང་མ་གྲོལ་ལ། ཉོན་མོངས་ཟད་པའི་རྒྱུད་ལས་མི་སྐྱེ་བས་རྒྱུད་གྲོལ་བས་ཀྱང་མ་གྲོལ་བའི་ཕྱིར། རྣམ་པར་གྲོལ་བ་ནི་དགེ་བ་སྟེ། ཉོན་མོངས་པ་མཚུངས་པར་མི་ལྡན་པ་དང་། ཉོན་མོངས་པ་ཟད་པའི་རྒྱུད་ལས་སྐྱེ་བས་དེ་གཉིས་ཀྱིས་གྲོལ་བའི་ཕྱིར་ཞེས་ཟེར་རོ། །བྱེ་བྲག་ཏུ་སྨྲ་བའི་བཤད་པ་དེ་ལ་མདོ་སྡེ་པ་མ་རངས་ནས་ཉེས་པ་བརྗོད་པ་ནི། བཤད་པ་དེ་ལྟ་ནི་མདོ་དང་མི་མཐུན་པའང་ཡིན་ལ། ཚིག་དེ་རྣམས་ཀྱི་དོན་གྱི་ཁྱད་པར་མ་བཤད་པའང་ཡིན་ནོ། །མདོ་དང་ཇི་ལྟར་མི་མཐུན་ན། མདོ་ལས། ཇི་ལྟར་སེམས་ནང་དུ་ཀུན་ཏུ་བསྡུས་པ་ཡིན་ཅེ་ན། སེམས་གང་རྨུགས་པ་དང་གཉིད་དང་ལྷན་ཅིག་པ་སྟེ་མཚུངས་ལྡན་དུ་གྱུར་ཅིང་། ཕྱིར་འཕྲོ་མ་ནུས་པར་ནང་དུ་ཀུན་ཏུ་འགོག་པ་དང་ལྷན་ཅིག་པར་གྱུར་ལ། ལྷག་མཐོང་དང་མཚུངས་པར་མི་ལྡན་པ་ཡིན་ནོ། །ཇི་ལྟར་ཕྱི་རོལ་དུ་གཡེང་བ་ཡིན་ཅེ་ན། སེམས་གང་འདོད་པའི་ཡོན་ཏན་ལྔ་ལ་རྗེས་སུ་གཡེང་ཞིང་རྣམ་པར་འཕྲོ་བ་ཞི་གནས་དང་མཚུངས་པར་མི་ལྡན་པ་ཡིན་ནོ། །ཞེས་གསུངས་སོ། །དེ་ལྟར་ཁས་བླངས་ན་བྱེ་སྨྲས་སེམས་དེ་ཉིད་ཀུན་ཏུ་བསྡུས་པའང་ཡིན་ལ། རྣམ་པར་གཡེང་བ་ཡིན་པའང་འགྱུར་བའི་ཉེས་པ་བརྗོད་པ་མ་ཡིན་ནམ་ཞེ་ན། བརྗོད་མོད། ཉེས་བརྗོད་(༣༢༤བ)
དེ་རིགས་པས་གྲུབ་པ་མིན་ཏེ། ཉོན་མོངས་པ་ཅན་གཉིད་དང་ལྷན་ཅིག་པར་གྱུར་པ་རྣམ་པར་གཡེང་བ་དམ་མ་བཅས་ལ། གཉིད་དང་ལྷན་ཅིག་པ་མིན་པའི་ཉོན་མོངས་པ་གཞན་སེམས་གཡེང་བར་དམ་བཅས་པའི་ཕྱིར་རོ། །ཅི་ཉོན་མོངས་པ་ཅན་གྱི་སེམས་གཉིད་དང་ལྷན་ཅིག་པར་གྱུར་པ་ལ་རྣམ་པར་གཡེང་བ་ཉིད་མེད་པས་དམ་མི་འཆའམ། འོན་ཏེ་འདི་ལ་རྣམ་གཡེང་ཡོད་མོད་ཀྱང་། ཀུན་བསྡུས་ཉིད་དུ་བཞག་པའི་དབང་གིས་དམ་མི་འཆའ་བ་ཡིན་ཅེ་ན། གཉིས་ཀར་སྨྲ་སྟེ་ཁ་ཅིག་ཉོན་མོངས་ཅན་གྱི་གཉིད་དང་ལྷན་ཅིག་པར་གྱུར་པ་ལས་གཞན་པའི་ཉོན་མོངས་ཅན་ནི་རྣམ་གཡེང་ཡིན་ལ། གཉིད་དང་ལྷན་ཅིག་པའི་ཉོན་མོངས་ཅན་ཡིན་མིན་ཐམས་ཅད་ཀུན་བསྡུས་སུ་ཁྱད་མེད་པས་དེར་རྣམ་གཡེང་མེད་པར་དམ་འཆའོ། །གཞན་དག་རྣམ་གཡེང་གཉིད་དང་མཚུངས་ལྡན་དུ་ཡོད་པ་གང་ཡིན་པ་དེ་ནི་ཀུན་ཏུ་བསྡུས་པ་ཁོ་ན་ཡིན་གྱི་རྣམ་གཡེང་མིན་ཏེ། རྣམ་གཡེང་ནི་ཡུལ་ལ་འཕྲོས་པ་གང་ཡིན་པ་དེ་ཁོ་ན་ཡིན་པའི་ཕྱིར། དེས་ན་གཉིད་དང་མཚུངས་ལྡན་ལ་གཡེང་བའི་སེམས་ཡིན་པར་དམ་མི་འཆའོ། །བསྟན་བཅོས་དང་འགལ་བར་འགྱུར་རོ་ཞེས་མ་བཤད་དམ་ཞེ་ན། དེ་ཤེས་པ་ནི་བཞི་སྟེ་ཞེས་སོགས་ཀྱི་བསྟན་བཅོས་དང་འགལ་བ་ནི་སླའི། མདོ་དང་འགལ་བ་ནི་མ་ཡིན་ཏེ། བསྟན་བཅོས་མངོན་པ་སངས་རྒྱས་ཀྱི་མདོ་དང་མཐུན་པར་སྨྲ་དགོས་པའི་ཕྱིར། ཇི་ལྟར་ཚིག་དེ་རྣམས་ཀྱི་དོན་གྱི་ཁྱད་པར་མ་བཤད་པ་ནི། སེམས་རྣམ་པར་གཡེང་བ་དང་། ཞུམ་པ་དང་། རྒོད་པ་དང་། རྣམ་པར་མ་ཞི་བ་དང་། མཉམ་པར་མ་བཞག་པ་དང་། མ་བསྒོམ་པ་དང་། རྣམ་པར་མ་གྲོལ་བ་རྣམས་ཀྱི་མཚན་ཉིད་ཐ་མི་དད་པར་བཤད་དེ། ཐམས་ཅད་ཉོན་མོངས་ཅན་དུ་བཤད་པས་ཉོན་མོངས་ཅན་ནི་ཉོན་མོངས་པའི་ས་པ་རྣམས་དང་མཚུངས་པར་ལྡན་པའི་ཕྱིར། ཀུན་ཏུ་བསྡུས་པ་དང་། རབ་ཏུ་བཟུང་བ་དང་། ཆེན་པོ་དང་། རྒོད་པ་མ་ཡིན་པ་དང་། རྣམ་པ་ཞི་བ་(༣༢༥ན)
དང་། མཉམ་པར་བཞག་པ་དང་། སྒོམ་པ་དང་། རྣམ་པར་གྲོལ་བ་རྣམས་ཀྱི་དོན་གྱི་ཁྱད་པར་མ་བཤད་དེ། དེ་དག་དགེ་བར་བཤད་པས་མཚན་ཉིད་ཐ་མི་དད་པའི་ཕྱིར་ཏེ། དགེ་བའི་ས་མང་པོ་པ་དང་མཚུངས་པར་ལྡན་པའི་ཕྱིར། བྱེ་བྲག་ཏུ་སྨྲ་བ་ན་རེ། ཚིག་རྣམས་ཀྱི་དོན་གྱི་ཁྱད་པར་མ་བཤད་པ་མ་ཡིན་པ་ཉིད་དེ། རྣམ་གཡེང་སོགས་ཉོན་མོངས་ཅན་དུ་མཚུངས་ཀྱང་འདི་ལྟར་སེམས་ཉོན་མོངས་པ་ཅན་འདི་ནི་རྣམ་པར་གཡེང་བ་དང་ལྡན་པའི་ཕྱིར་རྣམ་པར་གཡེང་བ་ཡིན་ནོ། །ཉོན་མོངས་པ་ཅན་གྱི་ལེ་ལོ་དང་ལྡན་པས་ཞུམ་པ་ཡིན་ནོ། །ཞེས་སོགས་ཀྱིས་རྒྱས་པར་ཉོན་མོངས་ཅན་དུ་འདྲ་ཡང་། དེའི་ཉེས་པའི་ལྡོག་ཆའི་ཁྱད་པར་ཡང་དག་པར་བསྟན་པའི་ཕྱིར་དོན་གྱི་ཁྱད་པར་བཤད་ལ། དེ་བཞིན་དུ་ཀུན་བསྡུས་ལ་སོགས་དགེ་བའི་ཡང་དོན་གྱི་ཁྱད་པར་བཤད་པ་ཁོ་ན་སྟེ། ཡོན་ཏན་གྱི་ཁྱད་པར་ཡང་དག་པར་བསྟན་པའི་ཕྱིར། མདོ་སྡེ་པས། བྱེ་སྨྲའི་ལུགས་དེ་ནི་ཚིག་དེ་རྣམས་ཀྱི་དོན་མ་ཡིན་ཏེ། མདོ་དང་འགལ་བ་མ་སྤངས་པའི་ཕྱིར། ཇི་ལྟར་འགལ་ན། མདོ་ལས། ཀུན་ཏུ་བསྡུས་པ་ནི་རྨུགས་པ་དང་གཉིད་དང་ལྷན་ཅིག་པར་གྱུར་པ་ཡིན་ནོ། །ཞེས་འབྱུང་བས་ཉོན་མོངས་ཅན་གྱི་གཉིད་དང་མཚུངས་ལྡན་དེ་ཀུན་ཏུ་བསྡུས་པ་ཡིན་གྱི། དགེ་བ་ཡིན་པ་ནི་གྲུབ་སྟེ། རྨུགས་པ་ནི་ཉོན་མོངས་པའི་ས་མང་པོ་པ་ཡིན་པའི་ཕྱིར། ཡང་བྱེ་སྨྲས་མདོ་སྡེ་པ་ལ་གལ་ཏེ་ཁྱེད་ལྟར་སེམས་དེ་ཉིད་ཞུམ་པའང་ཡིན་ལ་དེ་ཉིད་རྒོད་པའང་ཡིན་ནོ་ཞེས་སངས་རྒྱས་ཀྱིས་བཞེད་ན་ནི། ཞུམ་པ་དང་རྒོད་པ་ཐ་དད་དུ་གསུངས་པར་མི་འགྱུར་ཏེ། སེམས་ཞུམ་པ་དེ་ཉིད་རྒོད་པའང་ཡིན་པའི་ཕྱིར། འདོད་ན། མདོ་ལས། གང་གི་ཚེ་སེམས་ཞུམ་པ་དང་། ཞུམ་པར་དོགས་པའི་ཚེ་ཤིན་ཏུ་སྦྱངས་པ་དང་། ཏིང་ངེ་འཛིན་དང་བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་སྒོམ་པའི་དུས་མ་ཡིན་ནོ། །གང་གི་ཚེ་སེམས་རྒོད་པ་(༣༢༥བ)
དང་། རྒོད་པར་དོགས་པ་དེའི་ཚེ་ཆོས་རབ་ཏུ་རྣམ་པར་འབྱེད་པ་དང་བརྩོན་འགྲུས་དང་དགའ་བ་ཡང་དག་བྱང་ཆུབ་ཀྱི་ཡན་ལག་རྣམས་སྒོམ་པའི་དུས་མ་ཡིན་ནོ། །ཞེས་གསུངས་པའི་ཕྱིར། ཁྱེད་ལྟར་ན་མདོ་འདི་ལྟར་གསུང་བར་མི་འགྱུར་ཏེ། ཞུམ་པ་དང་ཞུམ་པར་དོགས་པའི་ཚེ་ཤིན་སྦྱངས་སོགས་སྒོམ་པའི་དུས་མིན་ཅེས་ངེས་བཟུང་མེད་པར་ཆོས་རབ་ཏུ་རྣམ་འབྱེད་སོགས་སྒོམ་པའི་དུས་ཀྱང་མ་ཡིན་ལ། རྒོད་པ་དང་རྒོད་པར་དོགས་པའི་ཚེ་ཆོས་རབ་ཏུ་རྣམ་འབྱེད་སོགས་སྒོམ་པའི་དུས་མ་ཡིན་ཅེས་ངེས་བཟུང་མེད་པར་ཤིན་སྦྱངས་སོགས་སྒོམ་པའི་དུས་མ་ཡིན་ནོ་ཞེས་བརྗོད་རིགས་པའི་ཕྱིར། ཞེས་སྨྲའོ། །དྲན་པ་ཡང་དག་བྱང་ཆུབ་ཀྱི་ཡན་ལག་མ་སྨོས་པ་ནི་མ་བཤད་ཀྱང་སེམས་གཉིས་ཀ་ལ་གྲུབ་སྟེ། མདོ་ལས། དྲན་པ་ནི་ཀུན་ཏུ་སོང་བ་ཡིན་ནོ་ཞེས་ང་སྨྲའོ། །ཞེས་འབྱུང་བའི་ཕྱིར། ཡང་གློ་ན་གནས་པ་ཞིག་གིས་མདོ་སྡེ་པ་དང་བྱེ་སྨྲ་གཉིས་ཀ་ལ་དྲིས་པ་ནི། ཅིས་ངེས་འགའ་ཤིན་སྦྱངས་སོགས་བསྒོམས་ལ། རེས་འགའ་ཆོས་འབྱེད་སོགས་སྒོམ་ན་བྱང་ཆུབ་ཀྱི་ཡན་ལག་རྣམས་སོ་སོར་སྒོམ་པ་ཡིན་པས། སོ་སོར་སྒོམ་ན་དུས་གཅིག་ཏུ་བསྒོམ་པ་དང་། བདུན་གར་མངོན་དུ་བྱས་པའི་ཆེད་དུ་སྒོམ་པ་མ་ཡིན་པར་ཐལ་བའི་ཉེས་པ་དང་བཅས་སོ་ཞེ་ན། མདོ་སྡེ་པས་ཉེས་པ་དེ་མེད་པ་ཉིད་དེ། ཡན་ལག་འདི་དག་དུས་ཕྱིས་དུས་གཅིག་ཏུ་བསྒོམས་ལ། དུས་དང་པོར་ཡང་བདུན་གར་བསྒོམ་མོད་ཀྱི། བྱིང་ངམ་བྱིང་དུ་དོགས་ན་ཆོས་འབྱེད་སོགས་དང་རྒོད་པའམ་རྒོད་པར་དོགས་ན་ཤིན་སྦྱངས་སོགས་ཡིད་ལ་བྱེད་པས་སྒོམ་པ་ཡིན་པར་འདོད་པ་ཉིད་ཀྱི་ཕྱིར་དང་། བདུན་གར་མངོན་སུམ་དུ་གྱུར་པའི་ཆེད་དུ་ནི་ཤིན་སྦྱངས་སོགས་མི་སྒོམ་པ་མ་ཡིན་པའི་ཕྱིར། བྱེ་བྲག་སྨྲ་བས། སྒོམ་པ་ཡེ་བསྒོམས་ཀྱང་། མདོ་ལས་སོ་སོར་སྨོས་པ་འགལ་བ་མེད་དེ། གང་གི་ཚེ་སེམས་ཞུམ་པ་ཞེས་པའི་མདོ་འདི་ལས། ལེ་ལོ་ལྷག་ཅིང་ཤས་ཆེ་ལ། རྒོད་པ་ནི་བག་ལ་ཞ་བར་འདུག་(༣༢༦ན)
པ་དེ་ནི་ཞུམ་པ་ཡིན་ལ། གང་ལ་རྒོད་པ་ལྷག་ལ་ལེ་ལོ་བག་ཞ་བར་འདུག་པ་དེ་རྒོད་པ་ཡིན་པས་འདི་གཉིས་ཀྱི་བྱེ་བྲག་ཡོད་པའི་ཕྱིར། དེ་ལྟར་ནའང་ཞུམ་པའི་སེམས་དེ་ཉིད་རྒོད་པའང་ཡིན་ལ་ཞུམ་པའང་ཡིན་ཏེ། དེ་གཉིས་འཚོགས་པ་གཅིག་པའི་ལྷན་ཅིག་པ་ཡིན་པའི་ཕྱིར། ཞེས་སྨྲའོ། །སློབ་དཔོན་གྱིས། མདོའི་དགོངས་པ་ཚོལ་བར་འདོད་པའི་བསམ་པ་ཅན་གྱི་ཚིག་ལ་ནི་བཟློག་པ་སྟེ་བཀག་པ་མེད་ཀྱི། ལེ་ལོ་ལྷག་པ་ཞུམ་པ་དང་རྒོད་པ་ལྷག་པ་རྒོད་པའི་སེམས་ཞེས་བཤད་པ་འདི་མདོའི་དགོངས་པ་མ་ཡིན་ཏེ། མདོ་ལས་ཞུམ་པའམ་ཞུམ་པར་དོགས་པ་ཞེས་གསུངས་ཀྱི། ལེ་ལོ་ལྷག་པའམ་རྒོད་པ་ལྷག་པ་ཞེས་ཁྱད་པར་དུ་མ་མཛད་པའི་ཕྱིར། ཡང་ཇི་སྐད་དུ། དེ་ལ་འདོད་ཆགས་དང་མཚུངས་པར་ལྡན་པའི་སེམས་ནི་གཉིས་ཀྱི་འདོད་ཆགས་དང་བཅས་པ་ཡིན། དེ་ལས་གཞན་ཟག་པ་དང་བཅས་པ་ནི་ལྡན་པའི་འདོད་ཆགས་དང་བཅས་པས་འདོད་ཆགས་དང་བཅས་པ་ཡིན་ཅེས་འབྱུང་བ་དང་། དེ་ལྟ་བས་ན་འདིར་འདོད་ཆགས་དང་ལྡན་པས་ཀྱང་འདོད་ཆགས་དང་བཅས་པའི་སེམས་སུ་འདོད་པར་བྱ་སྟེ་ཞེས་འབྱུང་བས། འདོད་ཆགས་དང་ལྡན་པའི་སེམས་ཐམས་ཅད་འདོད་ཆགས་དང་བཅས་པ་ཡིན་ནོ་ཞེས་གང་བཤད་པ་དེ་འདོད་ཆགས་དང་ལྡན་པའི་སེམས་དེ་གང་ཞིག་ཡིན་ཅེས་མདོ་སྡེ་པས་དོགས་པ་བསླངས་ནས། གལ་ཏེ་བྱེ་སྨྲས་ལུང་འགལ་གྱི་སྐྱོན་འགལ་སྔར་བརྗོད་པ་ལྟར་ལྡན་པ་ནི་འདོད་ཆགས་ཀྱི་ཐོབ་པ་དང་ལྷན་ཅིག་པ་ཡིན་ནོ་ཞེ་ན། མདོ་སྡེ་པས། ཁྱེད་ཀྱི་དེ་ལྟར་ན་ཉེས་པ་མང་དུ་གནས་ཤིང་ལུང་དང་འགལ་བ་མེད་པའི་ཚུལ་བརྗོད་པ་ནི་སློབ་པ་རྒྱུན་དུ་ཞུགས་པའི་འབྲས་བུ་ལ་ཞུགས་པའི་སེམས་ཟག་པ་མེད་པ་ཡང་འདོད་ཆགས་དང་བཅས་པར་འགྱུར་ཏེ། དེའི་རྒྱུད་ལ་འདོད་ཆགས་ཀྱི་ལྷག་མ་ཡོད་པས། འདོད་ཆགས་ཀྱིས་ཐོབ་པ་དང་ལྷན་ཅིག་པའི་ཕྱིར། གལ་(༣༢༦བ)
ཏེ་ཡང་འདོད་ཆགས་ཀྱི་དམིགས་པ་གང་ཡིན་པ་དེ་འདོད་ཆགས་དང་ལྡན་པས་འདོད་ཆགས་དང་བཅས་པ་ཡིན་ནོ་ཞེ་ན། འོ་ན་དགྲ་བཅོམ་པའི་སེམས་ཟག་པ་དང་བཅས་པ་ཡང་ཆོས་ཅན། འདོད་ཆགས་དང་བཅས་པ་ཞེས་བྱ་བར་བཟུང་བ་སྟེ་འཇོག་རིགས་པར་ཐལ། དགྲ་བཅོམ་པའི་འཇིག་རྟེན་པའི་སེམས་ཀྱང་གཞན་གྱི་འདོད་ཆགས་ཀྱིས་དམིགས་པ་ཡིན་པའི་ཕྱིར། འདོད་པར་མི་ནུས་ལ། ཡང་ན་དམིགས་པ་མ་ཡིན་ནོ་ཞེ་ན། དགྲ་བཅོམ་གྱི་སེམས་ཟག་བཅས་དེ་ཅི་ལྟར་ཟག་པ་དང་བཅས་པ་ཡིན་ཏེ་མ་ཡིན་པར་ཐལ། འདོད་ཆགས་ཀྱིས་མི་དམིགས་པའི་ཕྱིར། ཡང་གལ་ཏེ་མ་ཁྱབ་སྟེ། ཉོན་མོངས་པ་སྤྱི་པ་ལྟ་བ་ཐེ་ཚོམ་མ་རིག་པ་རྣམས་ཀྱི་དམིགས་པ་ཡིན་པ་དེའི་ཕྱིར་ཟག་པ་དང་བཅས་པར་འཇོག་པའི་ཕྱིར་སྙམ་ན་ནི། དེ་ལྟར་ན་དགྲ་བཅོམ་གྱི་སེམས་ཟག་བཅས་ཀྱང་གཏི་མུག་དང་བཅས་པར་བཟུང་བྱར་འགྱུར་ཏེ། གཏི་མུག་གི་དམིགས་པ་ཡིན་པའི་ཕྱིར། ཁྱབ་སྟེ། འདོད་ཆགས་ཀྱིས་དམིགས་པ་གང་ཡིན་པ་དེ་འདོད་ཆགས་དང་ལྡན་པས་འདོད་ཆགས་དང་བཅས་པར་འཇོག་པ་དེ་ཉིད་གཏི་མུག་སོགས་ལའང་རིགས་འགྲེ་བའི་ཕྱིར། གཞན་གྱི་སེམས་ཤེས་ཟག་བཅས་ཀྱང་ཐོབ་པ་ལ་དམིགས་པ་མ་ཡིན་ཏེ། སེམས་དང་སེམས་ལས་བྱུང་བ་ལ་དམིགས་པའི་ཕྱིར་དང་། ཐོབ་པ་ཡང་མི་ལྡན་པ་ཡིན་པའི་ཕྱིར། གཞན་སེམས་ཤེས་པ་དེ་ཆོས་ཅན། གཞན་གྱིས་སེམས་དེ་ལ་དམིགས་པ་སྟེ་དེ་ལ་ཡོད་པའི་འདོད་ཆགས་ལ་དམིགས་པ་ཅན་ཡང་མ་ཡིན་ཏེ། ཤིན་ཏུ་བསྐལ་བའི་ཕྱིར་དང་། རྫས་རེ་རེ་ཞིང་ཡུལ་དུ་བྱེད་པའི་ཕྱིར་དང་། དེས་སེམས་དེའི་དམིགས་པ་མི་འཛིན་པའི་ཕྱིར་ཏེ། དེ་ནི་རྣམ་པ་དང་དམིགས་པ་ལ་མི་བལྟས་ཏེ་ཞེས་འབྱུང་བའི་ཕྱིར་ཏེ། སེམས་འདི་ཆགས་པ་ཡིན་ནོ་ཞེས་བྱ་བར་ཤེས་པ་འབྱུང་བའི་ཕྱིར། གཞན་སེམས་ཤེས་པ་ཐམས་ཅད་ཀྱང་འདོད་ཆགས་ཀྱི་དམིགས་པ་ཉིད་(༣༢༧ན)
ཀྱིས་ལྡན་པ་མ་ཡིན་པས་ཆགས་པ་དང་བྲལ་བ་ཉིད་དུ་འགྱུར་རོ། །དེས་ན་འདིར་འདོད་ཆགས་དང་ལྡན་པས་འདོད་ཆགས་དང་བཅས་པའི་སེམས་སུ་འདོད་པར་མི་བྱ་སྟེ། མདོའི་དགོངས་པ་ནི་འདོད་ཆགས་དང་མཚུངས་པར་ལྡན་པའི་སེམས་ནི་འདོད་ཆགས་དང་བཅས་པ་ཡིན་ལ། འདོད་ཆགས་ཀྱི་ཐོབ་པ་ཡོངས་སུ་ཟིན་ཀྱང་འདོད་ཆགས་དང་མཚུངས་པར་མི་ལྡན་པའི་སེམས་ནི་འདོད་ཆགས་དང་བྲལ་བ་ཡིན་ནོ་ཞེས་པར་སྣང་ངོ་། །ལུང་གང་ལས། འདིའི་སེམས་འདོད་ཆགས་དང་བྲལ་བ་ཡིན། ཞེ་སྡང་དང་གཏི་མུག་དང་བྲལ་བ་ཡིན། འདོད་པའི་སྲིད་པ་དང་གཟུགས་ཀྱི་སྲིད་པ་དང་གཟུགས་མེད་པའི་སྲིད་པར་ཕྱིར་མི་ལྡོག་པའི་ཆོས་ཅན་ཡིན་གསུངས་པ་ཆགས་སོགས་ཀྱི་ཐོབ་པ་དང་བྲལ་བ་ལ་དགོངས་ནས་གསུངས་པ་ཡིན་ཏེ། མཚུངས་པར་མི་ལྡན་པས་ནི་མ་ཡིན་པའི་ཕྱིར། བྱེ་སྨྲས། མཚུངས་པར་མི་ལྡན་པ་ཆགས་བྲལ་ཡིན་ན་གོང་དུ་ཁྱེད་རང་གིས་འདོད་ཆགས་དང་མཚུངས་པར་མི་ལྡན་ཙམ་འདོད་ཆགས་དང་བྲལ་བ་ཡིན་ན་ཉོན་མོངས་པ་གཞན་དང་མཚུངས་པར་ལྡན་པའི་སེམས་ཀྱང་འདོད་ཆགས་དང་མཚུངས་པར་མི་ལྡན་པའི་ཕྱིར། འདོད་ཆགས་དང་བྲལ་བ་ཡིན་པར་འགྱུར་རོ་ཞེས་ཉེས་པ་སྨྲས་པ་མ་ཡིན་ནམ་ཞེ་ན། མདོ་སྡེ་པས། འདོད་ཆགས་དང་མཚུངས་པར་མི་ལྡན་པའི་ཕྱིར། འདོད་ཆགས་དང་བྲལ་བའོ་ཞེས་པའི་དགོངས་པ་འདིས་ནི་གོང་དུ་དེ་མཚུངས་པར་མི་ལྡན་ཙམ་ཆགས་བྲལ་མིན་པར་བརྗོད་པས་ཉེས་པ་མེད་དེ། དགོངས་གཞི་མི་གཅིག་པའི་ཕྱིར། འདིར་བཤད་པ་ནི་སྐབས་དེའི་སེམས་ཙམ་ལ་འདོད་ཆགས་དང་མཚུངས་པར་མི་ལྡན་པས་ཆགས་བྲལ་དུ་འཇོག་ལ། གོང་དུ་བཤད་པ་ནི་སྤྱིར་སེམས་ཀྱི་རྒྱུད་ལ་རེས་འགའ་བར་འདོད་ཆགས་དང་མཚུངས་པར་མི་ལྡན་པ་ཙམ་དེ་ནི་འདོད་ཆགས་དང་བྲལ་བ་ཞེས་མི་བཟུང་བར་སྟོན་པའི་སྐབས་ཡིན་ཏེ། དེ་ཉིད་ཀྱི་ཕྱིར་ཞེ་སྡང་དང་མཚུངས་པར་མི་ལྡན་ཙམ་ལ་ཞེ་སྡང་དང་བྲལ་བར་མི་(༣༢༧བ)
འཇོག་པས་ཞེ་སྡང་དང་བཅས། གཏི་མུག་དང་བཅས་ཞེས་ཡོངས་སུ་བཟུང་ངོ་། །ཞེས་ཤེས་པར་གྱིས་ཤིགཞར་ལ་འོངས་པ་ཆོག་གོ། །ཞར་ལ་འོངས་པ་སོང་ནས་གྲུབ་པའི་མཐའ་བརྗོད་པར་བྱ་སྟེ། ཕ་རོལ་སེམས་ཤེས་ཀྱིས་ཕ་རོལ་གྱི་སེམས་ཀྱི་རྣམ་པའམ་དམིགས་པ་འཛིན་ཅེ་ན། དེ་ནི་དམིགས་པ་དང་རྣམ་པ་ལ་མི་བལྟོས་པ་ཡིན་ཏེ། སེམས་འདི་ཆགས་པ་ཡིན་ནོ་ཞེས་ཤེས་ཀྱི། གཟུགས་ཆེ་གེ་མོ་ཞིག་ལ་ཆགས་སོ་ཞེས་བྱ་བ་ནི་མི་ཤེས་སོ། །གཟུགས་ཆེ་གེ་ཞིག་ལ་ཆགས་སོ་ཞེས་ཤེས་ན་གཞན་སེམས་ཤེས་པར་མི་འགྱུར་ཏེ། གཟུགས་ལ་དམིགས་པར་འགྱུར་བའི་ཕྱིར། གཞན་གྱི་སེམས་དེ་ལ་དམིགས་པའི་ཕ་རོལ་གྱི་སེམས་འཛིན་པ་ན། གཞན་སེམས་ཤེས་པ་དེ་རང་གི་སེམས་ཀྱི་ངོ་བོ་འཛིན་པར་འགྱུར་ཏེ། གཞན་གྱི་སེམས་རིག་པ་ཞིག་གིས་གང་གི་སེམས་འཛིན་པ་དེས་ཀྱང་གཞན་གྱི་སེམས་ཤེས་པ་དེའི་སེམས་ལ་དམིགས་པ་ཞིག་སྲིད་ལ། དེའི་ཚེ་ན། དམིགས་པ་དེ་ནི་རང་གི་སེམས་ཉིད་ཡོངས་སུ་ཤེས་པར་འགྱུར་བའི་ཕྱིར། འདི་ཡང་གཞན་སེམས་ཤེས་པ་དེ་ཤེས་པ་རང་དུས་དེར་ཤེས་པ་དེས་དམིགས་ནས་གཞན་སེམས་ཤེས་པ་མ་ཡིན། ཡིན་ན་རང་གིས་སེམས་རང་གི་སེམས་ཀྱིས་ཤེས་པར་སོང་ལ། དེ་ནི་མི་འཐད་དེ། རང་གིས་རང་ལ་བྱ་བ་འགལ་བའི་ཕྱིར་ཞེས་ཏེ། (དམིགས་པ་ཞིག་སྲིད་པ་ཡིན་ཏེ། ཞེས་པ་འདི་ནི་གང་སྤེལ་གྱི་ཚིག་ཡིན་ལ། རྒྱལ་སྲས་མར་སྲིད་པ་ཡོད་དོ་ཞེས་ཡོད་པས། འདི་སྐབས་བྱེ་སྨྲས་གཞན་སེམས་ཤེས་པའི་ཤེས་པ་རང་བློ་དེ་ལ་དམིགས་སྲིད་པ་ཞིག་ཁས་བླངས་པའི་དབང་དུ་བྱས་པ་མ་ཡིན་གྱི། མདོ་སྡེ་པ་སོགས་གཞན་སེམས་ཤེས་པའི་མངོན་ཤེས་ཀྱང་གཞན་གྱི་སེམས་ཀྱི་རྣམ་པ་དང་བློ་ལ་གསལ་བ་མེ་ལོང་ནང་གི་གཟུགས་བརྙན་ལྟར་ཡིན་པས། དོན་ལ་གཞན་སེམས་ཤེས་པའང་རང་སེམས་ཤེས་པར་སོང་བའི་ཆ་ནས་གཞན་སེམས་ཤེས་པ་ཡིན་ཅེས་པའི་ཕྱོགས་ལ། ཕ་རོལ་པོས་གཞན་སེམས་ཤེས་པའི་ཡུན་དེ་ཉིད་སླར་ཤེས་པ་དེའི་ཡུལ་དུ་དམིགས་པ་ཞིག་ནི་ཁྱོད་ཀྱིས་ཁས་བླངས་དགོས་ཏེ། ཁྱོད་རང་གིས་རང་རིག་པའི་གྲུབ་མཐའ་སྨྲ་བའི་ཕྱིར་ཞེས་དགོངས་པ་ཡིན། ངག་དོན་ཕ་རོལ་པོའི་སེམས་དངོས་སུ་ཤེས་པ་མིན། རང་གི་སེམས་ཀྱིས་ཕ་རོལ་གྱི་སེམས་ཤེས་དེ་རང་གིས་ཤེས་པ་ཡིན་བྱས་པ་ལ། དེ་ལྟར་སེམས་ཤེས་དེ་སེམས་དེ་ལ་མ་དམིགས་ན་ཤེས་པར་མི་ནུས། དམིགས་ན་མི་རིགས་ཏེ། རང་བློ་རང་ལ་བྱེད་པ་འགལ་ཅེས་བསྟན་པ་ཡིན། མཆན།) (༣༢༨ན)
འགྲེལ་ཚིག་ཆེས་གོ་དཀའ་བར་སྣང་ངོ་། །གཞན་གྱི་སེམས་ཤེས་པ་ཟག་བཅས་ཟག་མེད་ཐམས་ཅད་ནི་ཡུལ་གཟུགས་སོགས་མི་འཛིན། སེམས་སེམས་བྱུང་དང་ཀུན་རྫོབ་ཡོད་པ་བསལ་ནས་རྫས་ཀྱི་སྤྱིའི་མཚན་ཉིད་བཟློག་པ་རང་གི་མཚན་ཉིད་དང་། འདས་དང་མ་འོངས་ལས་དགའ་བ་ད་ལྟར་འབྱུང་བ་རྣམས་དང་། གཟུགས་མེད་ན་ལྡན་པ་དགག་པའི་ཕྱིར། འདོད་གཟུགས་ལྡན་པ་དང་ལྡན་པ་མ་ཡིན་པ་ཞེས་སྨོས་སོ། །སངས་རྒྱས་ཀྱང་གཟུགས་མེད་ཤེས་པ་དེ་སྨོན་ནས་ཤེས་པ་ཡིན་གྱི། སེམས་ཤེས་ཀྱིས་ཤེས་པ་མིན། གཞན་སེམས་ཤེས་པ་མཐོང་ལམ་ལ་བཀག་སྟེ། དེར་དེ་མངོན་དུ་བྱེད་པའི་སྦྱོར་བ་མི་སྲིད་པའི་ཕྱིར་དང་། དེས་ནི་མཐའ་དག་ལ་དམིགས་པས་རྣམ་པར་ཆད་པ་ལམ་དམིགས་པའི་ཕྱིར་རོ། །སྒོམ་ལམ་གྱིས་བསྡུས་པ་སྟེ་སྒོམ་ལམ་གྱིས་བསྡུས་པ་དང་དེའི་ཚེ་དམིགས་པ་མངོན་དུ་བྱེད་པའོ། །ཕ་རོལ་སེམས་ཤེས་དེ་སྟོང་ཉིད་ཀྱི་ཏིང་ངེ་འཛིན་དང་མཚན་མེད་ཀྱི་ཏིང་ངེ་འཛིན་དང་མི་ལྡན་ཏེ། དེ་གཉིས་ནི་རིམ་པ་བཞིན་དུ་སྡུག་བསྔལ་ཤེས་པ་དང་མཚུངས་ལྡན་དང་འགོག་པ་ཤེས་པ་དང་མཚུངས་ལྡན་ཡིན་ལ། གཞན་སེམས་ཤེས་པ་དེ་གཉིས་དང་དམིགས་རྣམ་ཐ་དད་པས་དེ་གཉིས་དང་མི་ལྡན་པའི་ཕྱིར་ཏེ། སྡུག་བསྔལ་ཤེས་པ་སྤྱིའི་རྣམ་པ་ཅན་དང་། འགོག་ཤེས་འདུས་མ་བྱས་ཀྱི་ཡུལ་ཅན་ཡིན་ལ། དེ་རང་མཚན་དང་། སེམས་སེམས་བྱུང་གི་ཡུལ་ཅན་ཡིན་པའི་ཕྱིར། སྨོན་མེད་ཀྱི་ཏིང་ངེ་འཛིན་དང་མཚུངས་པར་ལྡན་པ་སྲིད་དེ། སྡུག་བསྔལ་གྱི་ཚོར་བ་རང་མཚན་པ་ལ་དམིགས་པ་ནི་སྨོན་པ་མེད་པ་(༣༢༨བ)
དང་མཐུན་པའི་ཕྱིར། དེ་ཟད་པ་དང་མི་སྐྱེ་བ་ཤེས་པས་མ་བསྡུས་ཏེ། དེ་ནི་རྫས་ཀྱི་རང་བཞིན་ལ་དམིགས་པ་དང་ཀུན་ཏུ་རྟོག་པ་དང་ཡོངས་སུ་འཚོལ་བའི་བསམ་པ་ཅན་ཡིན་ན་ཟད་མི་སྐྱེ་ཤེས་པ་དེ་ལྟ་བུའི་བདག་ཉིད་མ་ཡིན་པའི་ཕྱིར། དེ་བར་ཆད་མེད་ལམ་ལ་བཀག་པ་སྟེ། དེ་རྣམ་གྲོལ་དང་ཁྱད་པར་གྱི་ལམ་ཡང་ཡིན་ལ། བར་ཆད་མེད་ལམ་ནི་སྤོང་ལམ་ཡིན་པའི་ཕྱིར། ཕ་རོལ་གྱི་སེམས་ཤེས་པ་བཤད་ཟིན་ཏོ། །ལྔ་པ་ནི། ལྷག་མ་རྣམ་པ་བཅུ་བཞི་ཅན། །སྟོང་དང་བདག་མེད་མ་གཏོགས་སོ། །ཤེས་པ་བརྒྱད་བཤད་ནས་ལྷག་མ་ཟད་མི་སྐྱེ་ཤེས་པ་ནི། སྟོང་བདག་མེད་མ་རྟོགས་པ་རྣམ་པ་བཅུ་བཞི་ཅན་ནོ། །དེ་གཉིས་དོན་དམ་རྟོགས་པས་ཁྱད་པར་དུ་བྱས་པས་དོན་དམ་པ་དག་ཡིན་ཀྱང་། ཕུང་ལྔའི་རྒྱུན་ཀུན་རྫོབ་པ་འདི་ཙམ་ལ་བདག་གོ་ཞེས་བཏགས་པ་དེ་དག་གི་སྟོབས་ཀྱི་རྗེས་སུ་ཐ་སྙད་འདོགས་པའི་སྒོ་ནས་བདག་ཏུ་ལྟ་བ་ལ་བསྟེན་པར་བདག་སྐྱེ་བ་ཟད་དོ། །འདི་ལས་སྲིད་པ་གཞན་རབ་ཏུ་མི་ཤེས་སོ་ཞེས་དེ་ལྟ་བུའི་འཇུག་པ་རྒྱུ་མཐུན་པས་རྗེས་ཀྱི་ཤེས་པ་ཀུན་རྫོབ་ལ་བརྟེན་པ་ཡིན་ནོ། །རྗེས་ཐོབ་ཏུ་ཀུན་རྫོབ་ལ་བསྟེན་པས་མཉམ་གཞག་ཀྱང་དེ་དང་མཐུན་པར་བྱས་པའོ། །དེ་གཉིས་རྒྱུ་མཐུན་པས་ཀུན་རྫོབ་ལ་བསྟེན་པ་ཞེས་བྱའི་དངོས་སུ་བསྟེན་པ་ནི་མ་ཡིན་ནོ། །གཉིས་པ་རྣམ་པ་སོ་སོའི་ངོ་བོ་ལ། ཟག་མེད་ལ་རང་མཚན་གྱི་རྣམ་པ་ཡོད་མེད་དཔྱད་པ། རྣམ་པ་བཅུ་དྲུག་རྫས་སུ་སྒྲུབ་པ། རྣམ་པའི་ངོ་བོ། གཟུང་འཛིན་གྱི་ཁྱད་པར་རོ། །དང་པོ་ལ། རང་ལུགས་དང་། གཞན་ལུགས་སོ། །དང་པོ་ནི། དྲི་མེད་བཅུ་དྲུག་གཞན་རྣམ་མེད། །ཟག་མེད་ལ་སྤྱིའི་ཡིད་བྱེད་རྣམ་པ་བཅུ་དྲུག་བཤད་པ་བཞིན་ཟག་མེད་ཀྱི་རང་མཚན་གྱི་རྣམ་པ་ཡོད་དམ་སྟེ། གཞན་སེམས་ཤེས་པ་ཟག་པ་མེད་པ་རང་མཚན་གྱི་ཡུལ་ཅན་དུ་བཤད་པའི་ཕྱིར་སྙམ་ན། ཁ་ཆེ་བ་ལྟར་ན། ཟག་པའམ་དྲི་མེད་ཀྱི་རྣམ་པ་བཅུ་དྲུག་ལས་གཞན་སྤྱི་མཚན་གྱི་རྣམ་པ་ཡང་མེད་ན་རང་མཚན་ལྟ་ག་ལ་ཡོད། གཉིས་པ་ནི། གཞན་ཡོད་ཅེས་པ་བསྟན་བཅོས་ལས། །གཞན་ཉི་འོག་པ་ན་རེ། ཡོད་ཅེས་པར་འདོད་དེ། བསྟན་བཅོས་ལས་བཤད་པའི་ཕྱིར། ཇི་སྐད་(༣༢༩ན)
དུ། མི་ལྡན་པའི་སེམས་ཀྱིས་འདོད་པ་དང་ལྡན་པའི་ཆོས་རྣམས་ཤེས་པར་འགྱུར་བ་ཡོད་དམ་ཞེ་ན། ཤེས་པར་འགྱུར་ཏེ། རིགས་པ་བསྐྱེད་པའི་སྒོ་ནས་མི་རྟག་པ་དང་སྡུག་བསྔལ་དང་སྟོང་པ་དང་བདག་མེད་པ་དང་རྒྱུ་དང་ཀུན་འབྱུང་བ་དང་རབ་ཏུ་སྐྱེ་བ་དང་རྐྱེན་འདི་ནི་གནས་ཡོད་དོ། །འདི་ནི་གཞི་ཡོད་དོ་ཞེས་བྱ་བར་ཤེས་པར་འགྱུར་རོ་ཞེས་འབྱུང་ངོ་ཞེའོ། །འདིའི་མི་ལྡན་པའི་སེམས་ནི། ཁམས་གསུམ་གྱི་ཉོན་མོངས་དང་མི་ལྡན་པས་ཟག་མེད་ཀྱི་སེམས་དང་། རིགས་པས་བསྐྱེད་པ་ནི་ཕྱིན་ཅི་མ་ལོག་པར་ཤེས་པར་འགྱུར་བའོ། །གནས་ཡོད་པ་ན་མཚན་ཉིད་ཡོད་པ་དང་། གཞི་ཡོད་པ་ནི་རྒྱུ་ཡོད་པའོ་ཞེས་བསམ་པ་ཡིན་ལ། བསྟན་བཅོས་ཀྱི་ལུང་འདིའི་དོན་ནི་བཅུ་དྲུག་ལས་གཞན་མེད་པ་འདི་མ་ཡིན་ཏེ། འོ་ན་ཅི་ཞེ་ན། མི་རྟག་ལ་སོགས་པ་ཤེས་པར་འགྱུར་བ་གང་ཡིན་པ་འདི་ནི་གནས་ཡོད་དོ། །འདི་ནི་གཞི་ཡོད་དོ། །ཞེས་བྱ་བ་སྲིད་པ་དང་། གོ་སྐབས་དང་འབྱོར་པ་ཡོད་དོ་ཞེས་བྱ་བ་ཡིན་ནོ་ཞེ་ན། དེ་ལྟར་འདོད་ན་རུང་བ་མ་ཡིན་ཏེ། ཚིག་གཞན་ནས་ཚིག་དེ་གཉིས་མི་འབྱུང་བའི་ཕྱིར། དེས་ན་གནས་དང་གཞི་ཡོད་བྱ་བ་དེ་བཅུ་དྲུག་ལས་གཞན་པའི་ཟག་མེད་ཀྱི་རྣམ་པ་མིན། བཅུ་དྲུག་ཏུ་ཤེས་པ་དེ་ལ་ཤེས་པ་གཞན་ཞིག་གིས་བཞག་པའི་རྣམ་པ་ཡིན་ལ། དེ་ལྟར་མིན་པར་ཁྱེད་ཀྱིས་བཤད་པ་འདི་བསྟན་བཅོས་ཀྱི་དོན་ཡིན་པར་འགྱུར་ན། མཐོང་བས་སྤང་བར་བྱ་བའི་སེམས་ཀྱི་འདོད་པ་དང་ལྡན་པའི་ཆོས་རྣམས་ཤེས་པར་འགྱུར་བ་ཡོད་དམ་ཞེ་ན། ཤེས་པར་འགྱུར་ཏེ་རིག་པ་མ་ཡིན་པ་བསྐྱེད་པའི་སྒོ་ནས་བདག་དང་བདག་གི་ཞེས་པ་འཇིག་ལྟ་དང་། མཐར་ལྟས་ཆད་པ་དང་རྟག་པ་དང་། ལོག་ལྟས་རྒྱུ་མེད་པ་དང་། བྱེད་པ་མེད་པ་དང་། སྐུར་བ་འདེབས་པ་དང་། ལྟ་པ་མཆོག་འཛིན་གྱི་མཆོག་དང་། གཙོ་བོ་དང་། ཁྱད་པར་འཕགས་པ་དང་། དམ་པ་(༣༢༩བ)
དང་། ཚུལ་ཁྲིམས་བརྟུལ་ཞུགས་མཆོག་འཛིན་གྱི་དག་པ་དང་། གྲོལ་བ་དང་། ངེས་པར་འབྱིན་པར་བྱེད་པ་དང་། ཐེ་ཚོམ་གྱིས་ནེམ་ནུར་དང་ཡིད་གཉིས་དང་ཐེ་ཚོམ་དུ་ཤེས་པར་འགྱུར་ཞིང་། ཆགས་པ་དང་སྡང་བ་དང་ང་རྒྱལ་གྱིས་རློམ་པ་དང་། གཏི་མུག་གིས་རྨོངས་པར་འགྱུར་རོ། །ཞེས་གསུངས་པ་དེར་ཡང་འདི་ནི་གནས་ཡོད་དོ་འདི་ནི་གཞི་ཡོད་དོ་ཞེས་འབྱུང་བར་འགྱུར་བ་ཞིག་ན། དེ་སྐད་ཀྱང་མི་འབྱུང་བ་དེས་ན་འདི་ནི་དེའི་དོན་མ་ཡིན་ནོ། །རྣམ་པ་བཅུ་དྲུག་པོ་འདི་མིང་གི་སྒོ་ནས་སམ་རྫས་སུ་ཡིན་ཅེ་ན། ཁ་ཅིག་རྫས་སུ་སྡུག་བསྔལ་གྱི་གཞི་དང་། ཀུན་འབྱུང་འགོག་པ་ལམ་རྣམས་རྫས་རེ་རེ་ཡིན་པས་བདུན་ཡིན་ལ། མིང་གི་སྒོ་ནས་བཅུ་དྲུག་སྟེ། ཀུན་འབྱུང་སོགས་གསུམ་པོའི་བཞི་པོ་དེ་རྣམ་གྲངས་སུ་ཟད་དེ། བརྒྱ་བྱིན་དང་རྡོ་རྗེ་འཛིན་པ་བཞིན་བརྗོད་པ་ལྟར་ཟེར་རོ། །གཉིས་པ་རྣམ་པ་བཅུ་དྲུག་རྫས་སུ་སྒྲུབ་པ་ནི། རྫས་སུ་རྣམ་པ་བཅུ་དྲུག་གོ། །བྱེ་བྲག་ཏུ་སྨྲ་བས། རྫས་སུ་རྣམ་པ་བཅུ་དྲུག་གོ་སྟེ། སྡུག་བསྔལ་གྱི་རྣམ་པ་བཞིན་དུ་ཀུན་འབྱུང་ལ་སོགས་པའི་རྣམ་པ་ཐམས་ཅད་ཀྱང་སོ་སོར་མངོན་དུ་བྱ་དགོས་ལ། རྣམ་པ་རྣམས་ནི་ཤེས་རབ་ཀྱི་ངོ་བོའི་རྫས་ཐ་དད་པ་ཉིད་ཀྱི་ཕྱིར་རོ། །དེ་ལ་རྐྱེན་ལ་རགས་ལས་ཏེ་སྐྱེ་བའི་ཕྱིར། མི་རྟག་པ་དང་། གནོད་པ་བྱེད་པའི་བདག་ཉིད་ཡིན་པས་སྡུག་བསྔལ་བ་དང་། བདག་གིར་ལྟ་བའི་མི་མཐུན་ཕྱོགས་གཉེན་པོ་ཉིད་ཡིན་པས་སྟོང་པ་དང་། བདག་ཏུ་ལྟ་བའི་མི་མཐུན་པའི་ཕྱོགས་གཉེན་པོར་བདག་མེད་པའོ། །དང་པོའི་ས་བོན་ལྟ་བུའི་ཆོས་ཀྱི་ཚུལ་ལུགས་ཀྱི་རྒྱུ་དང་། དེ་མ་ཐག་འདི་ལས་ཉེ་བར་འབྱུང་བའི་ཚུལ་གྱིས་ཀུན་འབྱུང་བ་དང་། རྒྱུན་གྱི་ཚུལ་གྱིས་རྒྱུན་མི་འཆད་པར་འབྲེལ་བས་རབ་ཏུ་སྐྱེ་བ་དང་། མང་པོ་ལས་མངོན་པར་འགྲུབ་པའི་དོན་གྱི་རྐྱེན་ཏེ། དཔེར་ན། འཇིམ་གོང་ཐལ་ཞར་འཁོར་ལོ་ཐིག་གུ་རྣམས་འདུས་པ་ལས་བུམ་པ་འགྲུབ་པ་(༣༣༠ན)
བཞིན་ནོ། །ཕུང་པོ་ཞིག་པའི་ཕྱིར་འགོག་པའོ། །ཆགས་སོགས་ཀྱི་མེ་གསུམ་ཞི་བས་ཞི་བ་དང་། ཚོར་བ་སྡུག་བསྔལ་མེད་པས་གྱ་ནོམ་པ་དང་། སྡུག་བསྔལ་གྱི་རྒྱུ་སྐྱོན་དང་བྲལ་བས་ངེས་འབྱུང་དང་། མྱང་འདས་སུ་བགྲོད་པའི་དོན་གྱིས་ལམ་དང་། འཐད་པའམ་ཐབས་དང་ལྡན་པས་རིག་པའོ། །མྱང་འདས་བསྒྲུབས་པས་སྒྲུབ་པ་དང་། ཤིན་ཏུ་ཡང་དག་པར་འདའ་ཞིང་གཏན་དུ་ངེས་པར་འབྱིན་པར་བྱེད་པས་ངེས་འབྱིན་དང་། ཡང་ན་སྔར་ནི་སྔ་ནས་མེད་པས་མི་རྟག་པར་བཤད་ནས། ད་ནི་ཞིག་ནས་མེད་པས་གཏན་དུ་བ་མིན་པས་མི་རྟག་པ་དང་། སྡུག་བསྔལ་གྱི་གང་ཟག་དེ་གནོན་ཅིང་འཚིར་བས་ཁུར་ལྟ་བུར་གྱུར་ཏེ་སྡུག་བསྔལ་བའོ། །གཙུག་ལག་ཁང་དགེ་སློང་གིས་སྟོང་པ་དང་འདྲ་བར་ནང་གི་སྐྱེས་བུ་དང་བྲལ་བའི་ཕྱིར་སྟོང་པའོ། །གཟུགས་བདག་ཡིན་ན་བདག་ཉིད་ལ་གནོད་པར་མི་ནུས་ཏེ། ངེས་ཚིག་ལས་བདག་ནི་འདོད་དགུར་བྱེད་པ་ལ་འཆད་པའི་ཕྱིར། འདོད་དགུར་བྱེད་པ་མེད་པས་བདག་མེད་པའོ། །འདས་པ་ནས་འོང་བའི་ཚུལ་གྱི་རྒྱུའོ། །མ་འོངས་པའི་དུས་ན་འབྱུང་བའི་ཚུལ་གྱིས་ཀུན་འབྱུང་དང་། ད་ལྟ་རྒྱུན་ཆགས་སུ་འཕེལ་བས་རབ་སྐྱེ་དང་། རྒྱུའི་གཙོ་བོ་རེ་རེའི་ལག་རྗེས་སོ་སོར་འབྲང་བས་རྐྱེན། སྡུག་བསྔལ་སྔ་ཕྱིའི་འབྲེལ་པ་ཆད་ཅིང་ཞིག་པས་འགོག་པ། སྐྱེ་འཇིག་གནས་པའི་གཞན་འགྱུར་གསུམ་དང་བྲལ་བས་ཞི་བ་དང་། དམ་པའི་དོན་དུ་དགེ་བས་གྱ་ནོམ་པ་དང་། (དམ་པའི་དོན་དུ་དགེ་བ་ནི་གཏན་དུ་བའི་བདེ་བ་བསྐྱེད་པའི་དོན་ཡིན་གྱི། བོད་ཁ་ཅིག་དམ་པའི་དོན་གྱི་དགེ་བ་ནི་དོན་དམ་པའི་དགེ་བ་རྟག་པ་འདུས་མ་བྱས་ལ་འཆད་ནས། ཐེག་ཆེན་མདོར་འབྱུང་བའི་བདེ་གཤེགས་སྙིང་པོ་ལ་འཆད་པ་ནི་ཤིན་ཏུ་ནོར་རོ། །མཆན།) སྡུག་བསྔལ་ཐམས་ཅད་རྒྱུན་ཆད་པས་མཆོག་ཏུ་བདེ་བ་དེ་ལས་གཞན་ཡིད་བརྟན་བྱ་བ་མེད་པས་ངེས་པར་འབྱུང་བ་དང་། ལས་(༣༣༠བ)
ངན་པའི་མི་མཐུན་ཕྱོགས་འཚོལ་བས་ལམ་དང་། རིག་པ་མ་ཡིན་པའི་མི་མཐུན་ཕྱོགས་ཀྱི་རིག་པའོ། །མྱང་འདས་ཀྱིས་གྲོང་སྒྲུབ་པར་བྱེད་ཀྱི། དེར་འཇུག་པ་དང་མི་འགལ་ཅིང་སླུ་བར་མི་བྱེད་པས་སྒྲུབ་པ་དང་། སྲིད་པ་གསུམ་ཐམས་ཅད་ཀྱི་གཉེན་པོ་ཡིན་པའི་ཕྱིར་ངེས་པར་འབྱིན་པའོ། །སྔ་མ་དེ་དང་མི་མཐུན་པའི་ཚུལ་སློབ་དཔོན་གྱིས་ཇི་ལྟར་འདོད་པ་བརྗོད་པར་བྱ་སྟེ། མདོ་ལས། ཉེ་བར་ལེན་པའི་ཕུང་པོ་ལྔ་པོ་འདི་དག་ནི་སྐྱེ་འཇིག་གི་ཆོས་ཅན་ཡིན་པས་མི་རྟག་པ་དང་། མི་མཐུན་པས་སྡུག་བསྔལ་བ་དང་། བདག་དང་བྲལ་བས་སྟོང་པ་དང་། བདག་ཉིད་ཀྱི་བདག་མ་ཡིན་པས་བདག་མེད་པ་དང་། འདུན་པ་སྲེད་པའི་རྩ་བ་རྒྱུ་ཅན་རྒྱུ་དང་། འདུན་པ་ལས་ཉེ་བར་ཀུན་འབྱུང་བ་ཅན་ཀུན་འབྱུང་དང་། འབྲས་བུ་འདུན་པ་དང་འདྲ་བའི་རྒྱུ་འདུན་པའི་རྐྱེན་ཅན་རྐྱེན་མེ་ཏོག་ལས་འབྲས་བུ་བསྐྱེད་པ་བཞིན་ཉིང་མཚམས་སྦྱོར་བའི་འདུན་པ་ལས་དངོས་སུ་སྡུག་བསྔལ་བསྐྱེད་པས་རབ་སྐྱེའོ། །ཞེས་གསུངས་པ་ཁོ་ན་ཡིན་ཏེ། མངོན་པ་བ་རྣམས་ལྟར་མི་བརྗོད་པར་མདོའི་རྗེས་སུ་འབྲངས་ནས་རབ་སྐྱེའི་སྒྲ་ཐ་མར་འདོན་པ་འབའ་ཞིག་ཏུ་ཟད་དོ། །འདུན་པ་འདི་དག་གི་ཁྱད་པར་ནི་ལུས་ཉེར་ལེན་གྱི་ཕུང་པོ་མཐའ་དག་སྤྱི་ལ་བྱེ་བྲག་མེད་པར་ངོ་བོ་ཞེས་དོན་དུ་གཉེར་ཞིང་འདུན་པ་དང་པོ་དང་། ལྷ་མི་ལ་སོགས་པར་གྱུར་ཅིག་སྙམ་པའི་བྱེ་བྲག་མེད་པར་ཡང་སྲིད་ཙམ་དོན་དུ་གཉེར་བ་གཉིས་པ་དང་མ་འོངས་པ་ན་འཁོར་ལོས་སྒྱུར་རྒྱལ་འདི་ལྟ་བུར་གྱུར་ཅིག་སྙམ་པ་བྱེ་བྲག་ཏུ་ཡང་སྲིད་ལ་འདུན་པ་གསུམ་པ་དང་། ཉིད་མཚམས་སྦྱོར་བ་ཉིད་འཆིང་བ་ཡིན་པས་དེ་ལ་འདུན་ཅིང་དོན་དུ་གཉེར་བ་བཞི་པའོ། །ཡང་ན་བཞི་པ་ནི་ལས་མངོན་པར་འདུ་བྱེད་པ་ལ་འདུན་པ་ཡིན་ན། དེ་ལ་དང་པོ་ནི་སྡུག་བསྔལ་གྱི་དང་པོའི་རྒྱུ་ཡིན་པས་རྩ་བའི་རྒྱུ་སྟེ་ས་བོན་བཞིན་ནོ། །འདུན་པ་གཉིས་པ་ནི། དེས་སྐད་ཅིག་མ་བརྒྱུད་པས་ཡང་སྲིད་འགྲུབ་པའི་ཕྱིར་འབྲས་བུའི་(༣༣༡ན)
མྱུག་སོགས་སྐྱེ་བ་བཞིན་ནོ། །འདུན་པ་གསུམ་པ་ནི། ཡང་སྲིད་འདུན་པའི་ཁྱད་པར་དེ་དང་འདྲ་བའི་སྡུག་བསྔལ་གྱི་རྐྱེན་ཏེ། འབྲས་བུ་བཟང་ངན་གྱི་རྐྱེན་ཞིང་དང་ལུད་དང་ཆུ་དང་སོགས་པས་རླུང་ཉིད་བཞིན་ནོ། །ཞིང་སོགས་ཀྱི་དབང་གིས་འབྲས་བུའི་དྲི་དང་རོ་དང་བསིལ་བ་དང་དྲོ་བའི་ནུས་པ་དང་སྨིན་པ་དང་དྲོ་བ་དང་བསིལ་བ་ཞུ་བ་དང་། ཡང་ན་མངར་སྐྱུར་དང་། མཐུ་ནུས་ཀྱི་ཁྱད་པར་པི་ཛ་པུ་རའི་ཁུ་བས་མཁྲིས་པ་བསྐྱེད་ལ། སྐྱུ་རུ་རའི་ཁུ་བས་ཞི་བར་བྱེད་པ་ལྟ་བུའོ། །བཞི་པ་ནི་རབ་ཏུ་སྐྱེ་བ་སྟེ་ཉིད་མཚམས་སྦྱོར་བའི་འཆིང་བ་ལ་འདུན་པ་ཁོ་ན་ལས་ཡང་སྲིད་སྐྱེ་བའི་ཕྱིར་ཐ་མ་མེ་ཏོག་ལས་འབྲས་བུ་སྐྱེ་བ་བཞིན་ནོ། །ཡང་ན་སྲེད་པ་སྤྱད་པ་རྣམས་ཀྱི་འདུན་པ་བཞི་ནི། སྲེད་པའི་བྱེ་བྲག་རྣམས་ལས་འདུན་པ་དང་པོ་དང་གཉིས་པ་གཉིས་ལྔ་ཚན་རེ་རེ་བ་རྣམ་པ་གཉིས་དང་། འདུན་པ་གསུམ་པ་དང་བཞི་པ་གཉིས་བཞི་ཚན་རེ་རེ་བ་གཉིས་ཡིན་ཏེ། དགེ་སློང་དག་ངའོ་སྙམ་པའི་བདག་ལྟ་ཡོད་ན། ང་ད་ལྟ་འདི་ལྟ་བུའོ་སྙམ་པ་འབྱུང་བར་འགྱུར་ཞིང་། ང་ནི་སྔོན་ཇི་ལྟ་བ་བཞིན་ད་ལྟའི་འདི་འདྲའོ་སྙམ་པ་དང་། ང་དེ་ལྟར་མ་ཡིན་ནོ་སྙམ་སྟེ། ཁ་དོག་དང་སྟོབས་དང་སྤོབས་སོགས་གཞན་དུ་མཐོང་བའི་ཕྱིར་རོ། །དེ་ལ་རྟག་པའི་ངོ་བོ་འབྱུང་བར་མི་འགྱུར་སྙམ་པ་སྟེ་ཆད་པར་སྨོན་པའོ། །ང་བཟང་ངོ་སྙམ་པ་དང་། ང་ངན་ནོ་སྙམ་པ་འབྱུང་བར་འགྱུར་རོ། །བདག་ལ་འདུན་པ་ལྔ་པོ་ཁྱད་པར་མེད་པ་སྲེད་པ་དང་པོ་ཡིན་ནོ། །དེ་ལ་རྟག་པའི་ངོ་བོ་འབྱུང་བར་འགྱུར་བར་བྱའོ་སྙམ་པ་སྟེ་མ་ཆད་པར་སྨོན་ནོ། །སྔར་གྱི་འདི་ལྟ་བུ་འབྱུང་བར་འགྱུར་སྙམ་པ་དང་། ད་ལྟའི་འདི་དང་མ་འོངས་པའི་དུས་སུའང་འདྲ་བར་བྱ་སྙམ་པ་དང་། སྔར་དང་ད་ལྟའི་འདི་མ་ཡིན་པར་འདི་ལས་བཟང་བར་འགྱུར་བར་བྱའོ་སྙམ་པ་འབྱུང་བར་འགྱུར་རོ། །ལྔ་པོ་འདི་ཁྱད་པར་མེད་པ་ཡང་སྲིད་ལ་འདུན་པ་གཉིས་པ་ཡིན་ནོ། །དེ་ལ་དེ་(༣༣༡བ)
ལྟ་བུར་སྤྱིར་གྱུར་ཅིག་སྙམ་པ་འབྱུང་བར་འགྱུར་ཞིང་། དེ་ལ་བྱེ་བྲག་འདི་ལྟ་བུར་གྱུར་ཅིག་སྙམ་པ་དང་། འདས་ད་ལྟར་དེ་དང་འདྲ་བ་མ་འོངས་པར་གྱུར་ཅིག་སྙམ་པ་དང་། འདི་ལས་བཟང་བ་དེ་ལྟར་མ་ཡིན་པར་གྱུར་ཅིག་སྙམ་པ་འབྱུང་བར་འགྱུར་བ་སྟེ། ཡང་སྲིད་ལ་འདུན་པ་བཞི་འདི་ཁྱད་པར་མེད་པ་གསུམ་པ་ཡིན་ནོ། །སྤྱིར་འདིར་གྱུར་ཀྱང་ཅི་མ་རུང་སྙམ་པ་དང་། བྱེ་བྲག་འདི་ལྟ་བུར་གྱུར་ཀྱང་ཅི་མ་རུང་སྙམ་པ་དང་། སྔ་མ་དེ་འདྲ་བ་མ་འོངས་པར་གྱུར་ཀྱང་ཅི་མ་རུང་སྙམ་པ་དང་། ད་ལྟ་མ་ཡིན་པར་གྱུར་ཀྱང་ཅི་མ་རུང་སྙམ་པ་འབྱུང་བར་འགྱུར་བ་ཉིད་མཚམས་སྦྱོར་བ་འཆིང་བ་ལ་འདུན་པ་བཞི་པོ་འདི་ནི་བཞི་པ་ཡིན་ནོ། །ཉོན་མོངས་པ་དང་སྐྱེ་བའི་འཇུག་པ་མེད་པས་འགོག་པ་དང་། མ་ཞི་བ་སྡུག་བསྔལ་མེད་པས་ཞི་བ་སྟེ། དགེ་སློང་དག་དེ་ལྟར་ན་འདུ་བྱེད་ཐམས་ཅད་ནི་སྡུག་བསྔལ་བའོ། །མྱ་ངན་ལས་འདས་པ་ནི་ཞི་བའོ་ཞེས་གསུངས་པའི་ཕྱིར། གོང་ན་མེད་པའི་ཕྱིར་གྱ་ནོམ་པའོ། །ཡང་ཕྱིར་མི་ལྡོག་པའི་ཕྱིར་ངེས་པར་འབྱུང་བའོ། །འགྲོ་བའི་ལམ་ལྟ་བུར་གྱུར་བས་ལམ་དང་། ཡང་དག་པར་ཇི་ལྟ་བ་བཞིན་ཞུགས་པའི་ཕྱིར་རིགས་པ་དང་། དེ་ཉིད་ཀྱིས་དེར་འགྲོ་བས་སོ་སོར་ངེས་པའི་ཕྱིར་སྒྲུབ་པ་སྟེ། ཇི་སྐད་དུ། མཐོང་བ་རྣམ་པར་དག་པའི་ཕྱིར། འདི་ལམ་ཡིན་གྱི་གཞན་མེད་དོ། །ཞེས་གསུངས་པ་ལྟ་བུའོ། །གཏན་དུ་ངེས་པར་འབྱིན་པར་བྱེད་པའི་ཕྱིར་ངེས་པར་འབྱིན་པའོ། །ཡང་ན་གང་ཟག་དང་ཕུང་པོ་འདི་ནི། རྟག །བདེ། ཕུང་པོ་འདི་བདག་གི་རྟེན་ཡིན། ཕུང་པོ་འདི་བདག་རང་དུ་ལྟ་བ་སྤྱད་པ་རྣམས་ཀྱི་གཉེན་པོར་གོ་རིམ་བཞིན་མི་རྟག་སྡུག་བསྔལ་སྟོང་བདག་མེད་ཀྱི་རྣམ་པ་དག་གོ། །རྒྱུ་མེད་དུ་ལྟ་བའི་གཉེན་པོ་རྒྱུའི་རྣམ་པ་དང་། རྒྱུ་གཅིག་པུ་དབང་ཕྱུག་གམ་གཙོ་བོའམ། དུས་ཞེས་ལྟ་བ་སྤྱད་པའི་གཉེན་པོར་མང་པོ་ལས་ཏེ་ཀུན་འབྱུང་དང་། དངོས་པོ་ནི་འགྱུར་བའོ། །ཞེས་འགྱུར་(༣༣༢ན)
བར་ལྟ་བ་སྤྱད་པ་རྣམས་ཀྱི་གཉེན་པོ་ནི། སྔ་ནས་གནས་པ་ནི་མ་ཡིན་གྱི། དང་པོར་འབྱུང་ཞིང་རབ་ཏུ་སྐྱེ་བ་དང་། བློ་སྔར་བཏང་ནས་བྱས་སོ་ཞེས་ལྟ་སྤྱད་ཀྱི་གཉེན་པོའི་རྐྱེན་ཏེ། བསྐྱེད་ནུས་ན་བློ་སྔོན་དུ་མ་བཏང་ཡང་མི་སྐྱེའོ། །སྐྱེ་བའི་རྒྱུན་ཐོག་མ་མེད་པ་ལྟར་སེམས་འདོད་ཆགས་སོགས་ཀྱི་གཤིས་ཡིན་པས་ཐ་མའང་མེད་ཅིང་། ཐར་པ་མེད་དོ་སྙམ་དུ་ལྟ་བ་སྤྱད་པ་རྣམས་ཀྱི་གཉེན་པོར་འགོག་པའི་རྣམ་པ་ཡིན་ནོ། །ཡུལ་ལ་ལོངས་སྤྱོད་པ་མེད་པ་དང་། དབང་པོ་རྣམས་འཇིག་པའི་སྡུག་བསྔལ་ལ་ཐར་པ་ཡིན་ནོ་སྙམ་དུ་ལྟ་བས་སྤྱད་པ་རྣམས་ཀྱི་གཉེན་པོ་ནི་ཞི་བའི་རྣམ་པའོ། །བསམ་གཏན་གྱི་བདེ་བ་གྱ་ནོམ་པ་ཡིན་པར་ལྟ་སྤྱད་ཀྱི་གཉེན་པོར་གྱ་ནོམ་པའི་རྣམ་པ་ཡིན་ནོ། །ཐར་པ་ནི་གཏན་དུ་བ་མ་ཡིན་ཏེ། ཡང་ནས་ཡོངས་སུ་ཉམས་པའི་སྙམ་པ་ལྟ་སྤྱད་ཀྱི་གཉེན་པོ་ངེས་པར་འབྱུང་བའི་རྣམ་པའོ། །ལམ་མེད་དོ་སྙམ་པ་དང་འདི་ལམ་ངན་ནོ་སྙམ་པ་དང་། གཞན་ཡང་ལམ་ཡིན་ནོ་སྙམ་པ་དང་། ལམ་འདིའང་ལོག་གོ་སྙམ་དུ་ལྟ་བ་སྤྱད་པ་རྣམས་ཀྱི་གཉེན་པོ་ལམ། རིགས་པ། སྒྲུབ་པ། ངེས་པར་འབྱིན་པའི་རྣམ་པ་དག་ཡིན་ནོ། །གསུམ་པ་ངོ་བོ་ནི། རྣམ་པ་ཤེས་རབ། རྣམ་པ་ཞེས་བྱ་བའི་ཆོས་འདི་ཇི་ལྟ་བུ་ཞེ་ན། རྣམ་པ་ཞེས་པའི་ཆོས་ནི་ཤེས་རབ་བའོ། །མདོ་སྡེ་པས་དེ་ལྟར་ན་ཤེས་རབ་རྣམ་པ་དང་བཅས་པར་མི་འགྱུར་ཏེ། ཤེས་རབ་ཤེས་རབ་དང་མཚུངས་པར་མི་ལྡན་པའི་ཕྱིར། མདོ་སྡེ་པས་འདི་ལྟར་རྣམ་པ་ནི། སེམས་དང་སེམས་ལས་བྱུང་བ་ཐམས་ཅད་ཀྱི་དམིགས་པ་དེ་ལ་བཀར་ནས་ཡུལ་གྱི་བྱེ་བྲག་གི་འཛིན་སྟངས་ནི་རྣམ་པ་ཞེས་རིགས་པར་འགྱུར་ཏེ། དམིགས་པ་ནི་ཡུལ། རྣམ་པ་ནི་བློའི་འཛིན་སྟངས་ཏེ། ཡུལ་གྱི་རྣམ་པ་ཅན་ལ་བརྗོད་པ་འཐད་པའི་ཕྱིར་རོ། །བཞི་པ་གཟུང་འཛིན་གྱི་ཁྱད་པར་ནི། དང་བཅས་པའི། །དམིགས་དང་བཅས་པས་འཛིན་པར་བྱེད། །ཡོད་པ་ཐམས་ཅད་གཟུང་བྱ་ཡིན། །ཤེས་རབ་ཁོ་ནས་འཛིན་པ་མ་ཡིན་ཏེ། ཤེས་རབ་དེ་དང་བཅས་པའི་ཡུལ་ཅན་གྱི་བློ་(༣༣༢བ)
སེམས་སེམས་བྱུང་དམིགས་དང་བཅས་པས་འཛིན་པར་བྱེད་པའི་ཕྱིར། གཟུང་བྱ་ལ་དེ་འདྲའི་དབྱེ་བ་མེད་དེ། རྫས་བཏགས་ཀྱི་ཤེས་བྱ་ལ་ཡོད་པ་ཐམས་ཅད་བཟུང་བྱ་ཡིན་པའི་ཕྱིར། དེ་ལྟར་བྱས་ན་ཤེས་རབ་ནི་རྣམ་པ་དང་འཛིན་བྱེད་བཟུང་བྱ་གསུམ་ཀ་ཡིན་ནོ། །དམིགས་བཅས་ཤེས་རབ་ལས་གཞན་པའི་སེམས་སེམས་བྱུང་འཛིན་བྱེད་དང་བཟུང་བྱ་གཉིས་ཀའོ། །དམིགས་མེད་རྣམས་ནི་གཟུང་བྱ་ཁོ་ནའོ། །བཞི་པ་ཤེས་པའི་ཁྱད་པར་གཞན་བསྟན་པ་ལ། ངོ་བོའི་ཁྱད་པར། སའི་ཁྱད་པར། རྟེན་གྱི་ཁྱད་པར། དྲན་པ་ཉེར་བཞག་གི་ཁྱད་པར། དམིགས་པའི་ཁྱད་པར་རོ། །དང་པོ་ནི། དང་པོ་རྣམ་གསུམ་གཞན་རྣམ་དགེ། །ཚིགས་བཅད་ཀྱི་དང་པོ་ཀུན་རྫོབ་ཤེས་པ་ནི་དགེ་མི་དགེ་ལུང་མ་བསྟན་རྣམ་པ་གསུམ་ཡིན་ལ། གཞན་དགུ་པོ་རྣམས་ནི་དགེ་བ་སྟེ་སེམས་ཤེས་ཟག་བཅས་ཀྱང་སྒོམ་བྱུང་ཡིན་ལ་གཞན་ལམ་བདེན་གྱིས་བསྡུས་པའོ། །གཉིས་པ་ནི། དང་པོ་ས་རྣམས་ཐམས་ཅད་ན། །དྲུག་ན་ཆོས་ཤེས་བྱ་བར་དགུ། །རྗེས་ཤེས་བྱ་བ་དེ་བཞིན་དྲུག །གཞན་ཡིད་ཤེས་པ་བསམ་གཏན་བཞི། །དང་པོ་ཀུན་རྫོབ་ཤེས་པ་ནི་འདོད་པ་ནས་སྲིད་རྩེའི་བར་ས་རྣམས་ཐམས་ཅད་ན་ཡོད་དེ། ཐམས་ཅད་ལ་དམིགས་པའི་ཕྱིར་རོ། །ཆོས་ཤེས་ནི་བསམ་གཏན་བཞི་མི་ལྕོགས་མེད། བསམ་གཏན་ཁྱད་པར་ཅན་ཏེ་ས་དྲུག་ན་ཡོད་དེ། འདོད་པ་ལ་དམིགས་ཤིང་གཟུགས་མེད་ན་མེད། ཉེར་བསྡོགས་གོང་མ་རྣམས་ཟག་བཅས་ཡིན་པས་མེད་པའི་ཕྱིར། བསམ་གཏན་དེ་དྲུག་གཟུགས་མེད་དང་པོ་གསུམ་སྟེ། ཟག་མེད་ས་དགུ་ན་རྗེས་སུ་ཤེས་པ་ཞེས་བྱ་ཡོད་དེ། གཟུགས་མེད་དང་པོ་གསུམ་ན་རྗེས་ཤེས་སྒོམ་ལམ་གྱིས་བསྡུས་པ་ཁོ་ན་ཡོད་དོ། །རྗེས་ཤེས་ས་དགུ་ན་ཡོད་པ་དེ་བཞིན་དུ་བདེན་པ་བཞི་ཤེས་དང་། ཟད་མི་སྐྱེ་ཤེས་པ་དྲུག་ཀྱང་དགུ་པོ་དེ་ན་ཡོད་ལ། བྱེ་བྲག་ཏུ་ཕྱེ་ན། ཆོས་ཤེས་ཀྱིས་བསྡུས་པ་རྣམས་ས་དྲུག་ན་ཡོད་ལ། རྗེས་ཤེས་ཀྱིས་བསྡུས་པ་རྣམས་ས་དགུ་ན་ཡོད་དོ། །གཞན་ཡིད་ཤེས་པ་ནི་བསམ་གཏན་བཞི་ཁོ་ན་ལ་ཡོད་ཀྱི། གཞན་དུ་མེད་དེ། དེའི་སྦྱོར་བ་ནི་གཟུགས་ཀྱི་སེམས་ལ་རྟེན་འཆད་དགོས་ཤིང་། (༣༣༣ན)
ས་གཞན་ལ་མངོན་ཤེས་མི་བསྟེན་ལ་བསམ་གཏན་ཁྱད་ཅན་ལ་བསྟེན་རིགས་ཀྱང་། དེ་ལྷག་མཐོང་ཤས་ཆེ་ཞིང་ཞི་གནས་ཆུང་བས་ལམ་སྐྱེ་དཀའ་བའི་ཕྱིར། གསུམ་པ་ནི། དེ་ནི་འདོད་དང་གཟུགས་རྟེན་ཅན། །ཆོས་ཤེས་བྱ་བ་འདོད་རྟེན་ཅན། །ཁམས་གསུམ་པ་ཡི་རྟེན་ཅན་གཞན། །ཕ་རོལ་སེམས་ཤེས་དེ་ནི་འདོད་དང་གཟུགས་ཀྱི་རྟེན་ཅན་ཡིན་ཏེ། འདོད་ཁམས་སུ་སྐྱེས་པའི་བསམ་གཏན་བཞི་པ་མན་ཆོད་ཀྱི་སེམས་ཐོབ་ན་བསམ་གཏན་བཞི་ཀ་ལ་བརྟེན་པའི་གཞན་སེམས་ཤེས་པ་ཡོད་ལ། གསུམ་པ་སོགས་དེའི་རིགས་འགྲེལ་བསམ་གཏན་དང་པོར་སྐྱེས་པ་ཞིག་གིས་ཀྱང་དེ་དང་འདྲ་བའི་ཕྱིར། ཆོས་ཤེས་བྱ་བ་འདོད་པའི་རྟེན་ཅན་ཁོ་ན་ཡིན་ཏེ། ཁམས་གོང་མ་གཉིས་སུ་མངོན་དུ་མི་བྱེད་པའི་ཕྱིར། ཆོས་ཤེས་གཟུགས་མེད་དུ་མངོན་དུ་མི་བྱེད་པར་རིགས་ནའང་གཟུགས་སུ་ཅིས་མི་བྱེད་སྙམ་ན། གཙོ་བོར་འདོད་པ་སུན་འབྱིན་བྱེད་ཡིན་ན་གཟུགས་ཁམས་སུ་སྐྱེས་པ་ན། འདོད་པའི་འདོད་ཆགས་དང་བྲལ་བ་དང་། ས་འཕོས་པས་དེ་བཏང་བས་སུན་མི་འབྱིན་ལ། འདོད་ཁམས་སུ་སྐྱེས་པ་ནི་འདོད་ཆགས་དང་བྲལ་ཀྱང་འདོད་ཁམས་ཀྱི་ཕུང་པོའི་ལྷག་མ་ལུས་པའི་ཕྱིར། ཆོས་ཤེས་མངོན་དུ་བྱེད་ཅེས་ཁ་ཅིག་ཟེར་ལ། འདུས་བཟང་ན་རེ། ཆོས་ཤེས་ནི་འདོད་པ་ཁོ་ནར་མངོན་དུ་བྱེད་ཀྱི། ཁམས་གོང་མ་གཉིས་སུ་མ་ཡིན་ཏེ། ཆོས་ཤེས་དེ་ལ་སྙོམས་པར་འཇུག་ལྡང་གི་སེམས་རྣམས་འདོད་པ་ཁོ་ནར་ཡོད་པའི་ཕྱིར། ཡང་ན་འདོད་ཁམས་ཀྱི་འཆལ་ཚུལ་གྱི་གཉེན་པོ་སྤོང་བ་བདུན་ཡིན་ལ། ཆོས་ཤེས་དང་སྤོང་བདུན་འཚོགས་པ་གཅིག་ཏུ་སྐྱེས་ཙ་ན། སྤོང་བ་བདུན་གྱི་རྟེན་གྱི་འབྱུང་བ་འདོད་ཁམས་ན་ཡོད་ཀྱི། གཟུགས་ཁམས་ན་མེད་པས་འཚོགས་པ་གཅིག་པོ་དེ་འཕྲལ་དུ་མི་ཉན་པས། གཟུགས་ཁམས་ཀྱི་རྟེན་ལ་ཆོས་ཤེས་མེད་ཟེར་རོ། །སེམས་ཤེས་ཆོས་ཤེས་མ་གཏོགས་གཞན་བརྒྱད་ན་ཁམས་གསུམ་པའི་རྟེན་ཅན་ནོ། །(༣༣༣བ)
བཞི་པ་ནི། འགོག་བློ་དྲན་པ་ཉེར་གཞག་པ། །གཅིག་སྟེ་ཕ་རོལ་སེམས་བློ་ནི། །གསུམ་མོ་ལྷག་མ་བཞི་ཡིན་ནོ། །དྲན་པ་ཉེར་བཞག་གིས་བསྡུས་པ་བརྗོད་དེ། འགོག་བློ་ནི་ཆོས་དྲན་པ་ཉེར་གཞག་གཅིག་སྟེ་བློ་དང་ཤེས་རབ་དང་ཤེས་པ་ཞེས་རྣམ་གྲངས་སོ། །ཕ་རོལ་སེམས་བློ་སྟེ་སེམས་ཤེས་ན་དྲན་པ་ཉེར་གཞག་གསུམ་སྟེ། ཚོར་བ་དང་སེམས་དང་ཆོས་དྲན་པ་ཉེར་གཞག་གོ། །འགོག་ཤེས་དང་ཕ་རོལ་སེམས་ཤེས་ཀྱི་ལྷག་མ་ཤེས་པ་བརྒྱད་ནི་དྲན་པ་ཉེར་གཞག་བཞིའི་ངོ་བོ་ཡིན་ཏེ། སྡུག་ཀུན་ཤེས་པས་རེས་ལུས་ནས་ཆོས་ཀྱི་བར་དམིགས། ལམ་ཤེས་ཀྱང་གལ་ཏེ་ཟག་མེད་ཀྱི་སྡོམ་པ་ལ་དམིགས་ན་དེ་ལུས་དྲན་པ་ཉེར་གཞག་ལ་དམིགས་པ་ཡིན་ནོ། །ལྔ་པ་དམིགས་པའི་ཁྱད་པར་ལ། ཤེས་པ་གང་གི་དམིགས་པ་ཤེས་པ་དུ་ཡིན་པ། ཆོས་དུ་མ་ལ་ཡུལ་ཅན་གང་གིས་དམིགས་པ། ཤེས་པ་གཅིག་གིས་ཇི་ཙམ་ཤེས་པའོ། །དང་པོ་ནི། ཆོས་བློའི་སྤྱོད་ཡུལ་དགུ་ཡིན་ནོ། །ལམ་རྗེས་བློ་ཡི་དགུ་ཡིན་ནོ། །སྡུག་བསྔལ་རྒྱུ་བློའི་གཉིས་ཡིན་ནོ། །བཞི་ཡི་བཅུ་ཡིན་གཅིག་གི་མིན། །ཤེས་པ་གང་གིས་དམིགས་པ་ཤེས་པ་དུ་ཡིན་པ་ནི། ཆོས་བློ་སྟེ་ཤེས་པའི་སྤྱོད་ཡུལ་དགུ་ཡིན་ནོ་སྟེ་རྗེས་ཤེས་མ་གཏོགས་པའི་ཕྱིར། དེའང་ཆོས་ཤེས་ཀྱི་བདེན་པ་བཞི་ཤེས་པ་ཡིན་ལ། བདེན་པ་བཞིའི་ནང་ན་ལམ་ཡོད་ཙམ་ན་ལམ་དེ་ག་སྡུག་ཀུན་འགོག་ལམ་ཤེས་པ་ཡིན། ཟད་མི་སྐྱེ་ཤེས་པ་ཡིན། ལམ་དེའི་ནང་ན་ཟག་མེད་ཕ་རོལ་སེམས་ཤེས་ཞིག་ཡོད་པ་ཡུལ་དུ་བྱེད། སྡུག་ཀུན་གྱི་ནང་ན་ཀུན་རྫོབ་ཤེས་པ་དང་ཕ་རོལ་ཟག་བཅས་ཤེས་པ་ཡོད་པས་སྡུག་ཀུན་ཤེས་པ་གཉིས་ཡུལ་དུ་བྱེད་དོ། །རྗེས་བློའི་དམིགས་པ་ནི་དགུ་ཡིན་ནོ་སྟེ་ཆོས་ཤེས་པ་མ་གཏོགས་སོ། །ལམ་ཤེས་པའི་དམིགས་པ་ཡང་དགུ་སྟེ། ཟག་མེད་ལ་དམིགས་པ་ངེས་པས་ཀུན་རྫོབ་ཤེས་པ་མ་གཏོགས་པའི་ཕྱིར། སྡུག་བསྔལ་དང་རྒྱུ་ཀུན་འབྱུང་བློའི་དམིགས་པ་ནི་གཉིས་ཡིན་ནོ་སྟེ་ཀུན་རྫོབ་དང་གཞན་སེམས་ཤེས་པ་སྟེ་ཀུན་རྫོབ་ཤེས་པ་སྡུག་ཀུན་གྱི་ནང་དུ་གཏོགས་ལ། སེམས་ཤེས་ཟག་བཅས་ཀྱང་བསྡུས་པའི་ཕྱིར། ཀུན་རྫོབ། གཞན་སེམས། ཟད་པ། མི་སྐྱེ་(༣༣༤ན)
བ་ཤེས་པ་བཞིའི་དམིགས་པ་ནི། ཤེས་པ་བཅུ་ཅར་ཏེ། དེའང་ཀུན་རྫོབ་ཤས་པས་ནི་ཆོས་ཐམས་ཅད་ཤེས་ལ། སེམས་ཤེས་ཟག་མེད་ཀྱིས་དམིགས་པ་ནི་ཤེས་པ་དགུ་ཡིན་ལ། ཟག་བཅས་ནི་ཀུན་རྫོབ་ཤེས་པ་དང་ཕ་རོལ་སེམས་ཤེས་ཟག་བཅས་ཡིན་ནོ། །ཟད་མི་སྐྱེ་ཤེས་པ་ནི་བདེན་བཞི་ཤེས་པ་ཡིན་ལ། བདེན་བཞིའི་ནང་ན་ལམ་ཡོད་ཙ་ན། ལམ་ནི་སྡུག་ཀུན་འགོག་ལམ་ཟད་མི་སྐྱེ་ཤེས་པ་ཡིན། ལམ་གྱི་ནང་ན་ཟག་མེད་སེམས་ཤེས་ཡོད་པས་བདུན། ལམ་ཤེས་པ་རྗེས་ཤེས་ཤེས་པ་བརྒྱད། ལམ་ཤེས་པ་ཆོས་ཤེས་ཤེས་པ་དགུ། སྡུག་ཀུན་གྱི་ནང་ན་ཀུན་རྫོབ་ཤེས་པ་དང་ཕ་རོལ་ཟག་བཅས་ཤེས་པ་ཡོད་པས། ཤེས་པ་བཅུ་ཀ་དེ་གཉིས་ཀྱི་ཡུལ་དུ་འགྲོའོ། །འགོག་པ་ཤེས་པ་གཅིག་པུའི་དམིགས་པ་ནི་ཤེས་པ་གང་ཡང་མིན་ཏེ། དེ་ནི་བརྟགས་འགོག་ཁོ་ན་ལས་དམིགས་པས་ཤེས་པའི་རང་བཞིན་མ་ཡིན་པའི་ཕྱིར། གཉིས་པ་ནི། ཆོས་བཅུ་དག་ནི་སྦྱར་བར་བྱ། །ཁམས་གསུམ་པ་དང་དྲི་མེད་ཆོས། །འདུས་མ་བྱས་རྣམས་གཉིས་གཉིས་སོ། །ཡང་ཤེས་པའི་ཆོས་རྣམ་པ་བཅུར་ཕྱེ་ལ། ཆོས་བཅུ་པོ་དག་ནི་ཤེས་པ་དུ་ཞིག་གི་ཡུལ་དུ་འགྱུར་བ་སྦྱར་ཏེ་ཤེས་པར་བྱ་བ་ལས། ཆོས་བཅུའི་ཆོས་འདུས་བྱས་ལ་ཁམས་གསུམ་པའི་ཆོས་དང་། ཟག་པ་མེད་པ་དྲི་མ་མེད་པའི་ཆོས་བཞི་ལས། སེམས་བྱུང་གི་མཚུངས་པར་ལྡན་པ་དང་། ཐོབ་སོགས་ལྡན་པ་མིན་པས་གཉིས་ཀྱིས་ཕྱེ་བས་བརྒྱད་དོ། །ཆོས་འདུས་མ་བྱས་རྣམས་ལ་བརྟགས་འགོག་ནི་མཆོག་ཏུ་བདེ་བས་དགེ་བ་དང་ནམ་མཁའ་དང་བརྟགས་མིན་ལུང་མ་བསྟན་ཏེ་རྣམ་པ་གཉིས་སོ། །དེ་ལ་ཀུན་རྫོབ་ཤེས་པའི་དམིགས་པ་ནི་བཅུ་ཅར་ཏེ། ཆོས་ཤེས་པ་ནི་ལྔ་སྟེ། འདོད་པ་སྤྱོད་པ་དང་། ཟག་མེད་ལ་མཚུངས་ལྡན་ཡིན་མིན་གྱི་བཞི་དང་འདུས་མ་བྱས་དགེ་བ་སྟེ་ལྔའོ། །རྗེས་སུ་ཤེས་པ་བདུན་ཏེ། གཟུགས་དང་གཟུགས་མེད་དུ་གཏོགས་པ་དང་། ཟག་མེད་ལ་སྔར་གྱི་དགེ་བས་དྲུག་དང་། འདུས་མ་བྱས་དགེ་བའོ། །སྡུག་བསྔལ་དང་རྒྱུ་ཤེས་(༣༣༤བ)
དག་གིས་དྲུག་སྟེ། འདོད་པ་དང་གཟུགས་དང་གཟུགས་མེད་གསུམ་ལ་གཉིས་སུ་ཕྱེ་བས་དྲུག་གོ། །འགོག་པ་ཤེས་པ་གཅིག་ཡིན་ཏེ། འདུས་མ་བྱས་དགེ་བའོ། །ལམ་ཤེས་པའི་གཉིས་ཡིན་ཏེ། ཟག་མེད་གཉིས་སོ། །གཞན་གྱི་སེམས་ཤེས་པ་ནི་གསུམ་སྟེ། ཟག་མེད་ཀྱི་མཚུངས་ལྡན་ཏེ། མི་ལྡན་པ་མ་གཏོགས་སོ། །ཟད་དང་མི་སྐྱེ་ཤེས་པ་ནི་དགུ་སྟེ། ལུང་མ་བསྟན་གྱི་འདུས་མ་བྱས་མ་གཏོགས་པའོ། །གསུམ་པ་ནི། ཀུན་རྫོབ་གཅིག་པུས་རང་ཚོགས་ལས། །གཞན་ནི་བདག་མེད་ཉིད་རིག་འགྱུར། །ཤེས་པ་གཅིག་གིས་ཆོས་ཐམས་ཅད་ཤེས་པར་འགྱུར་བ་ནི་མེད་དོ། །མདོ་ལས། བཀའ་སྩལ་པ། ཀྱེ་ངས་དེ་སྐད་དུ་སྨྲས་པ་ནི་དྲན་མོད་ཀྱི། འོན་ཀྱང་དགེ་སྦྱོང་དང་བྲམ་ཟེ་ཡང་རུང་། གང་གཅིག་ཅར་ཐམས་ཅད་ཤེས་པའམ་མཐོང་བ་དེ་ནི་འགའ་ཡང་མེད་དོ་ཞེས་བྱ་བ་ཡིན་ནོ། །ཞེས་འབྱུང་ངོ་། །འོན་ཀྱང་ཀུན་རྫོབ་ཤེས་པ་གཅིག་པུ་རང་གི་ངོ་བོ་དང་ཚོགས་ཏེ་རང་དང་ལྷན་ཅིག་འབྱུང་བའི་ཆོས་མཚུངས་ལྡན་དང་དེ་མ་ཡིན་པ་ལས་གཞན་པའི་ཆོས་ཐམས་ཅད་ནི་བདག་མེད་པ་ཉིད་དུ་སྐད་ཅིག་མ་གཅིག་ལ་རིག་པར་འགྱུར་ཏེ། ཀུན་རྫོབ་ཤེས་པ་དེའང་མོས་པས་སྤྱོད་པའི་ས་དག་ན་ཐོས་བསམ་ལས་བྱུང་བའི་ཆོས་ཐམས་ཅད་བདག་མེད་དོ་ཞེས་ཡིད་ལ་བྱེད་པའི་ཕྱིར་རོ། །སྐད་ཅིག་མ་གཉིས་པའི་ཡུལ་དུ་དང་པོའང་འགྱུར་བས་སྐད་ཅིག་གཉིས་ཀྱི་ཡུལ་དུ་ནི་ཆོས་ཐམས་ཅད་འགྱུར་རོ། །ཀུན་རྫོབ་ཤེས་པ་དེས་རང་གིས་རང་ཉིད་ནི་ཡུལ་དུ་མི་བྱེད་དེ། ཡུལ་དང་ཡུལ་ཅན་དེ་དག་ལ་ཐ་དད་ཀྱིས་ཁྱབ་པ་ལས། དེ་ལྟར་ན་ཡུལ་དང་ཡུལ་ཅན་ཐ་དད་མེད་པའི་ཕྱིར་དང་། མ་ཁྱབ་སྙམ་ན་ཁྱབ་སྟེ། རང་ཉིད་ལ་བྱེད་པ་འགལ་བའི་ཕྱིར། རལ་གྲིས་རང་མི་གཅོད་པ་བཞིན་རང་དང་ལྷན་ཅིག་འབྱུང་བའི་མཚུངས་ལྡན་རྣམས་ཀྱང་མི་རིགརིག་ན་ཚོར་བས་ཚོར་བ་རིག་དགོས་ཏེ། གཙོ་འཁོར་དམིགས་པ་མཚུངས་པའི་ཕྱིར། འདོད་ན་གཙོ་སེམས་ཀྱིས་གཙོ་སེམས་རིག་དགོས་པར་ཐལ། གཙོ་འཁོར་དམིགས་པ་མཚུངས་པའི་ཕྱིར། འདོད་ན་རང་གིས་རང་ཉིད་དམིགས་པར་ཐལ། དེ་དག་དམིགས་པ་གཅིག་པའི་ཕྱིར། འདོད་པ་ནི་མིན་ཏེ། བྱེ་སྨྲས་(༣༣༥ན)
རང་རིག་མི་འདོད་པས་སོ། །རང་དང་ལྷན་ཅིག་འབྱུང་བའི་ལྡན་པ་མ་ཡིན་པ་སྐྱེ་སོགས་རྣམས་ཀྱང་མི་འཛིན་ཏེ། ཧ་ཅང་ཉེ་བའི་ཕྱིར། མིག་སྨན་དང་མིག་གི་ཐུར་མ་བཞིན་ནོ། །དེ་ཡང་འདོད་པ་ན་ཐོས་བསམ་གཉིས་ཀ་དང་། སྒོམ་པ་ལས་བྱུང་བས་ནི་ཆོས་ཐམས་ཅད་བདག་མེད་པ་ཉིད་དུ་གཅིག་པར་ཤེས་པ་མིན་ཏེ། དེ་ནི་བསམ་གཏན་དང་པོ་ནས་སྲིད་རྩེའི་བར་ས་རྣམ་པར་ཆད་པ་ཁོ་ན་ལ་དམིགས་པའི་ཕྱིར་ཏེ། བར་ཆད་མེད་ལམ་དང་རྣམ་གྲོལ་གྱི་ལམ་རྣམས་གོ་རིམ་བཞིན་ས་འོག་མ་འོག་མ་དང་གོང་མ་གོང་མ་ལ་དམིགས་པའི་ཕྱིར། དེ་ལྟར་མིན་པར་ས་ཐམས་ཅད་ལ་དམིགས་ན་གོང་འོག་ཐམས་ཅད་ལ་གཅིག་ཅར་འདོད་ཆགས་དང་བྲལ་བར་འགྱུར་རོ། །དེའང་འདོད་མི་ནུས་ཏེ། ངེས་འབྱེད་ཆ་མཐུན་གྱིས་བསྡུས་པ་གང་གི་དམིགས་པ་འདོད་ཁམས་ཡིན་པ་དེའི་ཁམས་གཞན་དག་མ་ཡིན་ནོ། །གང་གི་དམིགས་པ་གཞན་དག་ཡིན་པ་དེའི་འདོད་ཁམས་མ་ཡིན་ནོ། །མི་སྡུག་པ་དང་ཟད་པར་ཟིལ་གནོན་གྱི་སྐྱེ་མཆེད་སོགས་དང་། རྣམ་པར་སུན་འབྱིན་པའི་ལམ་གྱིས་བསྡུས་པའི་དམིགས་པ་ནི་འདོད་པ་ཁོ་ན་ཡིན་གྱི། གཞན་ནི་མ་ཡིན་ནོ་ཞེས་བྱེ་སྨྲ་ཟེར་ལ། མདོ་སྡེ་པས། རང་རིག་འདོད་པས་རང་གི་ཚོགས་པའང་བདག་མེད་པར་ཤེས་པར་འདོད་ལ། ཐེག་པ་གོང་མ་པ་ནི་སྒོམ་བྱུང་གི་ཆོས་ཐམས་ཅད་བདག་མེད་པ་ཉིད་དུ་ཤེས་པ་ཡིན་ལ། གཅིག་ཅར་འདོད་ཆགས་དང་བྲལ་བའང་འདོད་དོ། །འདིར་སྨྲས་པ། བློ་ན་རིང་མོ་ཞིག་ནས་ཐེག་པ་ཆེ་འདིར་ཞུགས། །འགྲོ་ཁམས་བཟོད་མེད་སྡུག་བསྔལ་འདི་ནི་སྙིང་ལ་གཟེར། །དེ་ལ་གཅིག་ཏུ་སྨན་པའི་སེམས་ནི་དྲག་ཏུ་དར། །དེ་ལྟར་ནའང་བློ་ཡི་ནུས་པ་མ་ཐོབ་ངལ་བ་ཅན། །ཀྱེ་མ། རང་བློས་ལེགས་པར་སེམས་ལ་ལེགས་པར་སྤྱོད། །རང་འདོད་དབེན་པ་གོམས་པའི་དབེན་པ་ཅན། །(༣༣༥བ)
བྱང་ཆེན་སྤྱོད་པ་དམ་པའི་སྤྱོད་རྗེས་ལ། །སྙིང་ནས་མོས་པ་ཐོབ་པའི་མོས་པ་དེ། །ཨེ་མ། དབྱར་མཚོ་ལྟ་བུར་གྱུར་བཞིན་པས། །ཁོང་ནས་རྩེ་ཤུགས་འབར་བ་ཡང་། །དུས་འདིར་བཟོད་པར་མི་འཚལ་བའི། །དགའ་གདུང་ལྷན་ཅིག་སྟོབས་སུ་གྱུར། །གཉིས་པ་ལྡན་པ་བཤད་པ་ནི། ཟག་མེད་སྐད་ཅིག་དང་པོ་ལ། །ཆགས་ཅན་ཤེས་པ་གཅིག་དང་ལྡན། །གཉིས་པ་ལ་གསུམ་ཡན་ཆད་ནི། །བཞི་ལ་རེ་རེ་འཕེལ་དང་ལྡན། །གང་ཟག་གང་ཤེས་པ་དུ་དང་ལྡན་ཅེ་ན། སོ་སྐྱེ་ནི་ཀུན་རྫོབ་ཤེས་པ་གཅིག་པུ་དང་ལྡན། འདོད་པ་ལས་ཆགས་བྲལ་ཞིག་ཡིན་ན་སེམས་ཤེས་དང་ཡང་ལྡན། འཕགས་པ་ནི་ཆགས་ཅན་ཏེ། འདོད་པ་ལས་འདོད་ཆགས་དང་མ་བྲལ་བ་ཞིག་ཡིན་ན། ཟག་མེད་སྐད་ཅིག་དང་པོ་སྡུག་བསྔལ་ཆོས་བཟོད་དང་ལྡན་པ་ལ་ཀུན་རྫོབ་ཤེས་པ་གཅིག་དང་ལྡན་ཏེ། དྲི་མེད་བཟོད་རྣམས་ཤེས་པ་མིན་ལ། ཤེས་པ་གཞན་དང་ཡང་མི་ལྡན་པའི་ཕྱིར། སྐད་ཅིག་གཉིས་པ་སྡུག་བསྔལ་ལ་ཆོས་ཤེས་ལ་གསུམ་དང་ལྡན་ཏེ། ཀུན་རྫོབ་ཤེས་པ་དང་། འདོད་པའི་སྡུག་བསྔལ་ཤེས་པ་དེ་ཉིད་ཆོས་ཤེས་ཀྱང་ཡིན་པའི་ཕྱིར། དེ་ཡན་ཆད་ཀྱི་སྐད་ཅིག་མ་སྡུག་བསྔལ་ལ་རྗེས་ཤེས་དང་། ཀུན་འབྱུང་འགོག་ལམ་ལ་ཆོས་ཤེས་བཞི་ལ་ནི་སྔར་གསུམ་པའི་སྟེང་དུ་རིམ་པ་ལྟར་བཞི་དང་ལྔ་དང་དྲུག་དང་བདུན་དང་ལྡན་ཏེ། རིམ་པ་ལྟར་གོང་མའི་སྡུག་བསྔལ་དང་། འདོད་པའི་ཀུན་འབྱུང་འགོག་ལམ་ལ་གསར་དུ་ཤེས་པའི་སྡུག་བསྔལ་རྗེས་ཤེས་དང་། ཀུན་འགོག་ལམ་གྱི་ཆོས་ཤེས་རེ་རེ་འཕེལ་བའི་ཕྱིར། འཕགས་པ་འདོད་ལས་ཆགས་བྲལ་ཡིན་ན་སྡུག་བསྔལ་ཆོས་བཟོད་ནས་ལམ་ལ་ཆོས་ཤེས་ཀྱི་བར་ཐམས་ཅད་དུ་སེམས་ཤེས་ཀྱང་བསྣན་ཏོ། །བཟོད་པ་ཕྱི་མ་བདུན་དང་རྗེས་ཤེས་ཕྱི་མ་གསུམ་ལ་ནི་ཤེས་པ་སྔར་མེད་གསར་དུ་འཕེལ་བ་མེད་དེ། བཟོད་པ་ཤེས་པ་མིན་ཅིང་རྗེས་ཤེས་ནི་སྔར་ནས་བགྲངས་ཟིན་པའི་ཕྱིར། ཁ་ཅིག །ལམ་ལ་རྗེས་ཤེས་ཀྱི་ཚེ་ན་ཆགས་བཅས་ལ་ལམ་ཤེས་པ་དེ་ཉིད་དང་ཆགས་བྲལ་(༣༣༦ན)
ལ་ཕ་རོལ་སེམས་ཤེས་དང་གཉིས་ལྡན་གྱི་གཞན་ནི་མ་ཡིན་ཏེ། འབྲས་བུ་ཐོབ་པས་ཤེས་པ་སྔ་མ་རྣམས་བཏང་བའི་ཕྱིར་ཏེ། འཕགས་པ་འབྲས་བུ་ཐོབ་སྦྱངས་ཉམས་པ་ལས་ཞེས་འཆད་མོད། རྒྱལ་སྲས་མར། ལམ་ལ་རྗེས་སུ་ཤེས་པ་ལས་ན་འདོད་ཆགས་དང་མ་བྲལ་བ་ཞིག་ཡིན་ན་བདུན་པོ་དེ་དག་དང་ལྡན་ནོ། །འདོད་ཆགས་དང་བྲལ་བ་ཞིག་ཡིན་ན་བརྒྱད་དེ། དེ་དག་དང་གཞན་གྱི་སེམས་ཤེས་པ་དང་ལྡན་ནོ། །ཞེས་བཤད་དོ། །དེ་བཞིན་སྒོམ་ལམ་ལ་གནས་པའང་འདོད་པ་ལ་ཆགས་བཅས་ཤིག་ཡིན་ན། ཕ་རོལ་གྱི་སེམས་ཤེས་པ་དང་། ཟད་པ་དང་མི་སྐྱེ་བ་ཤེས་པ་མ་གཏོགས་བདུན་དང་། ཆགས་བྲལ་ཞིག་ཡིན་ན་ཕ་རོལ་སེམས་ཤེས་བསྣན་ཏེ་བརྒྱད་དོ། །མི་སློབ་ལམ་ལ་གནས་པ་ནི། ཤེས་རབ་རྣམ་གྲོལ་ལ་སེམས་ཤེས་མ་གཏོགས་དགུ་དང་། གཉིས་ཀའི་ཆ་ལས་རྣམ་གྲོལ་ལ་བཅུ་དང་ལྡན་ནོ། །གསུམ་པ་ཤེས་པ་ཐོབ་ཚུལ་ལ། མཐོང་ལམ་སྐབས་སུ་ཐོབ་པ། ལམ་གཞན་དུ་ཐོབ་པ། ལམ་གང་ལས་དུ་ཐོབ་པ། ཐོབ་པའི་དབྱེ་བའོ། །དང་པོ་ནི། མཐོང་བའི་ལམ་ལ་བཟོད་པ་དང་། །ཤེས་པ་ཇི་ལྟར་སྐྱེས་པ་རྣམས། །མ་འོངས་པ་འཐོབ་དེ་ཉིད་ལ། །རྗེས་གསུམ་ལ་ནི་ཀུན་རྫོབ་ཀྱང་། །དེ་ཕྱིར་མངོན་རྟོགས་མཐའ་ཞེས་བྱ། །དེ་ནི་མི་སྐྱེའི་ཆོས་ཅན་ཡིན། །རང་དང་འོག་ས་འགོག་པའི་མཐའ། །རང་བདེན་རྣམ་ཅན་འབད་ལས་བྱུང་། །ཡང་གནས་སྐབས་གང་དུ་ཤེས་པ་དུ་ཐོབ་ཅེ་ན། མཐོང་བའི་ལམ་ལ་ནི་བཟོད་པ་བརྒྱད་དང་ཤེས་པ་བདུན་པོ་ཇི་ལྟར་སྐྱེས་པ་རྣམས་རང་རང་གི་རིགས་མ་འོངས་པ་རྣམ་པ་བཞི་རེ་ཐོབ་སྟེ། དཔེར་ན། སྡུག་བསྔལ་ལ་ཆོས་ཤེས་པའི་བཟོད་པ་མི་རྟག་པ་ལ་སོགས་པའི་རྣམ་པ་བཞི་ཐོབ་ལ། དེར་རྣམ་པ་མི་འདྲ་བ་དང་བདེན་པ་གཞན་གྱི་ཡུན་ནི་མ་ཡིན་པའི་ཕྱིར། དེའང་སྡུག་བསྔལ་ཆོས་ཤེས་པའི་བཟོད་པ་སྐྱེས་པ་ན། ས་གང་ལ་བརྟེན་ནས་སྐྱེས་པ་དེ་ནི་ད་ལྟ་བ་དང་མ་འོངས་པ་ཐོབ་ལ། ས་གཞན་ལ་བརྟེན་པ་ནི་མ་འོངས་པ་ཁོ་ན་ཐོབ་སྟེ། དེའང་མི་སྐྱེ་བའི་ཆོས་ཅན་དག་ཡིན་གྱི། སྐྱེ་བའི་ཆོས་ཅན་ནི་མ་ཡིན་ཏེ། མཐོང་ལམ་ལན་དུ་མར་སྐྱེ་བར་ཐལ་བའི་ཕྱིར་རོ། །དེ་ལྟར་ཐམས་(༣༣༦བ)
ཅད་ལའང་སྦྱར་རོ། །ཅིའི་ཕྱིར། མཐོང་བའི་ལམ་ལ་ཤེས་པ་འདྲ་བའི་རྣམ་པ་ཁོ་ན་ཐོབ་ཅེ་ན། སྒོམ་པའི་ལམ་ལ་ནི་ཤེས་པ་སྐལ་བ་མི་མཉམ་པ་ཐོབ་པ་ཡོད་པ་ལས་ཁྱད་པར་དུ་བྱས་ལ། སྒོམ་པའི་ལམ་ལ་ནི་ཤེས་པ་དང་འདྲ་བའི་རྣམ་པ་འདྲ་བའང་ཡོད་པ་མ་ཡིན་ལ། བཟོད་པའི་རྣམ་པ་མ་དྲིས་པ་ནི་བཟོད་པ་དཔེར་བཀོད་པ་ཉིད་ཀྱིས་ཤེས་པའི་རྣམ་པའང་རྟོགས་པར་འགྱུར་རོ། །མཐོང་ལམ་ལའང་ཤེས་པ་དང་འདྲ་བའི་རྣམ་པ་ཁོ་ནའི་རིགས་ཐོབ་སྟེ། སྐལ་བ་མཉམ་པའི་རྒྱུ་གཞན་གྱི་རིགས་རྣམས་མ་ཐོབ་པའི་ཕྱིར་ཏེ་སྐལ་བ་དང་མཉམ་པའི་རིགས་ནི་མི་རྟག་པ་སོགས་བཞི་སྟེ། བཟོད་པས་བསྡུས་པའི་ཕྱིར་དང་། དམིགས་པ་ཐ་མི་དད་པའི་ཕྱིར་དང་། དེ་དང་མི་མཉམ་པའི་རིགས་ནི་ཀུན་འབྱུང་ཆོས་ཤེས་སོགས་ཡིན་ཏེ། བཟོད་པ་ལས་གཞན་ཤེས་པས་བསྡུས་པའི་ཕྱིར་དང་། དམིགས་པ་ཐ་དད་པའི་ཕྱིར་རོ། །མཐོང་བའི་ལམ་ལ་བཟོད་པ་དང་། ཤེས་པ་ཇི་ལྟར་སྐྱེས་པ་རྣམས་མ་འོངས་པ་ཐོབ་ཅེས་རྒྱས་པར་བཤད་པ་ཡིན་ནོ། །སྒོམ་ལམ་ལ་ནི་ཤེས་པ་རིགས་འདྲ་བ་དང་མི་འདྲ་བ་དེ་དག་གི་རྣམ་པའང་ཐམས་ཅད་མངོན་སུམ་དུ་འགྱུར་བའི་ཕྱིར་ཐམས་ཅད་རྒྱུ་ཐོབ་པས་མཐོང་ལམ་ལས་ཁྱད་པར་འཕགས་པའི་རྣམ་པ་མ་འོངས་པ་ཐོབ་པར་འགྱུར་རོ། །འོ་ན་མཐོང་བའི་ལམ་ལ་རིགས་མི་འདྲ་བ་མི་ཐོབ་བམ་ཞེ་ན། མཐོང་བའི་ལམ་དེ་ལ་སྡུག་བསྔལ་དང་ཀུན་འབྱུང་འགོག་པ་ལ་རྗེས་སུ་ཤེས་པ་གསུམ་ལ་ནི་སྔོན་མ་ཐོབ་པ་ལས་ཀུན་རྫོབ་ཤེས་པའང་ཐོབ་པའི་ཕྱིར་མི་འདྲ་བ་ཐོབ་བོ། །གསུམ་པ་དེའི་ཆོས་ཤེས་ལ་ནི་ཐོབ་པ་མ་ཡིན་ཏེ། ཁམས་གོང་མ་གཉིས་ཀྱི་སྡུག་བསྔལ་མ་ཤེས་ཤིང་ཀུན་འབྱུང་མ་སྤངས་ལ། འགོག་པ་མངོན་དུ་མ་བྱས་པས་བདེན་པར་ཟད་པར་མ་རྟོགས་པའི་ཕྱིར། ཀུན་རྫོབ་ཤེས་པ་དེ་ནི་མངོན་པར་རྟོགས་པའི་(༣༣༧ན)
མཐའ་ལས་བྱུང་བ་ཞེས་བྱ་སྟེ། བདེན་པ་གསུམ་པོ་རེ་རེ་ཟད་པར་རྟོགས་པའི་རྗེས་ལ་ཐོབ་པ་དེའི་ཕྱིར། ལམ་རྗེས་སུ་ཤེས་པ་ན་ཀུན་རྫོབ་ཤེས་པ་མི་ཐོབ་སྟེ། སྔོན་ཐོག་མ་མེད་པའི་འཁོར་བ་ན་འཇིག་རྟེན་པའི་ལམ་གྱིས་བདེན་པ་དང་པོ་གསུམ་རྟོགས་ཀྱི། ཀུན་རྫོབ་ཤེས་པས་ལམ་བདེན་ནི་ནམ་ཡང་རྟོགས་མི་སྲིད་པའི་ཕྱིར། འདི་ནི་བདེན་པ་ཟད་པར་མངོན་པར་རྟོགས་པའི་མཐའ་ལས་བྱུང་བ་ཡིན་ན་ཆོས་ཅན། ལམ་ཟད་པར་སྡོམ་པར་མི་ནུས་ཏེ། ཉན་རང་སངས་རྒྱས་གསུམ་གྱི་ལམ་རིགས་མང་ཞིང་དེ་དག་རེ་རེ་ལའང་ཆུང་འབྲིང་སོགས་ཀྱི་དབྱེ་བ་མཐའ་མེད་པས་དེ་དག་དུས་གཅིག་གིས་བསྒོམ་མི་ནུས་ལ། གཞན་རྒྱུད་ལ་ཡོད་པ་བསྒོམ་མི་ནུས་ཤིང་རང་རྒྱུད་ལ་རྙེད་ཟིན་བརྒྱའི་ཆར་ཡང་མངོན་དུ་བྱར་མི་ནུས་པའི་ཕྱིར། དེ་ན་མངོན་པར་རྟོགས་པའི་མཐའ་ལས་བྱུང་བ་མ་ཐོབ་བོ། །འོ་ན་ཀུན་འབྱུང་རྗེས་སུ་ཤེས་པའང་ཐོབ་པར་མི་འགྱུར་ཏེ། ཀུན་འབྱུང་མཐའ་དག་མ་སྤངས་པའི་ཕྱིར་ཏེ། ཀུན་འབྱུང་ལ་རྗེས་ཤེས་ཀྱི་ཚེ་ཀུན་འབྱུང་འགོག་ལམ་མཐོང་སྤོང་གི་ཉོན་མོངས་ཀུན་འབྱུང་སྤངས་པ་མ་ཡིན་པའི་ཕྱིར་ཞེ་ན། སྐྱོན་མེད་དེ། ཀུན་འབྱུང་དེའི་བདེན་པ་མཐོང་བས་དེའི་ལོག་ཞུགས་ཐམས་ཅད་སྤང་བའི་ཕྱིར། ཐོབ་པར་འཐད་དོ། །འོ་ན་ལམ་ལ་ཡང་འདྲ་སྟེ། ལམ་གྱི་བདེན་པ་མཐོང་བས་སྤང་བར་བྱ་བ་ཐམས་ཅད་སྤངས་པའི་ཕྱིར་སྙམ་ན། མི་མཚུངས་པའི་ཁྱད་པར་ཆེར་ཡོད་དེ། ལམ་ནི་རིགས་ཅན་གསུམ་གྱི་ལུས་ཀྱི་རྒྱུད་ཀྱི་ནུས་པའི་ཁྱད་པར་ཡིན་ལ། ཉན་ཐོས་ལྟ་བུ་ལའང་ཆུང་འབྲིང་ཆེན་པོ་མང་བས་རང་ལམ་གྱི་མཐོང་སྤོང་གི་གཉེན་པོ་འགའ་ཞིག་ཁོ་ནར་བསྒོམ་གྱི། ལམ་མཐའ་དག་བསྒོམ་པར་མི་ནུས་པའི་ཕྱིར་མི་ཐོབ་བོ། །གཞན་དག་ན་རེ། ཀུན་རྫོབ་ཤེས་པ་ཆོས་ཅན། བདེན་པ་གསུམ་གྱི་རྗེས་ལ་ཐོབ་སྟེ། དེ་མཐོང་ལམ་གྱི་(༣༣༧བ)
འཁོར་ཡིན་པའི་ཕྱིར། ལམ་གྱི་རྗེས་ལ་ནི་མ་ཡིན་ཏེ། ལམ་ལ་རྗེས་ཤེས་ནི་སྒོམ་ལམ་ཡིན་པའི་ཕྱིར། དེ་ལྟར་ན་མཐོང་ལམ་གྱི་འཁོར་དེ་སྒོམ་ལམ་གྱི་དུས་ཅི་ལ་སྐྱེ་སྙམ་མོ་ཞེས་ཟེར་རོ། །མཐོང་ལམ་ཁོ་ནའི་འཁོར་ཡིན་པའི་སྒོམ་ལམ་གྱི་དུས་སུ་མི་སྐྱེ་བའི་གཏན་ཚིགས་འདི་ནི་མ་གྲུབ་པས་བསྒྲུབ་པར་བྱ་བ་ཡིན་པའི་ཕྱིར། ཀུན་རྫོབ་ཤེས་པ་སྒོམ་ལམ་གྱི་དུས་སུ་མི་སྐྱེ་བའི་ཤེས་བྱེད་དུ་འགྲོ་བ་མ་ཡིན་ནོ། །འོ་ན་ཀུན་རྫོབ་ཤེས་པ་མངོན་པར་རྟོགས་པའི་མཐའ་ལས་བྱུང་བ་དེ་རེས་འགའ་མངོན་དུ་བྱེད་དམ་ཞེ་ན། ཀུན་རྫོབ་ཤེས་པ་དེ་ནི་གཅིག་ཏུ་མི་སྐྱེ་བའི་ཆོས་ཅན་ཡིན་པས་ནམ་ཡང་མངོན་དུ་བྱེད་པ་ནི་མ་ཡིན་ནོ། །སློབ་དཔོན་གྱིས། ཡེ་མི་སྐྱེ་ན་ཅི་ལྟར་དེ་ཐོབ་པ་ཡིན་དྲིས་པས། བྱེ་སྨྲས་ཐོག་མེད་ཀྱི་འཁོར་བར་སྔར་མ་རྙེད་པ་ལས་བདེན་པ་གསུམ་རྟོགས་པའི་མཐར་རྙེད་པའི་ཕྱིར། དེ་ཐོབ་པར་བཞག་གོ་ཞེ་ན། དེ་ན་གལ་ཏེ་ཅི་ལྟར་ན་དེ་རྙེད་པ་ཡིན་ཏེ་མ་ཡིན་པར་ཐལ། མི་སྐྱེ་བས་དེ་མངོན་སུམ་དུ་བྱ་མི་ནུས་པའི་ཕྱིར་བྱས་པ་ལ་སྐབས་དེར། ཐོབ་པ་སྐྱེས་པའི་སྒོ་ནས་དེའི་ཚེ་དེ་རྙེད་པར་བཞག་གོ། །ཞེས་ཟེར་རོ། །སྨྲ་བ་དེ་ལ་སློབ་དཔོན་ཐུགས་མ་རངས་ནས། ཐོབ་པ་དང་རྙེད་པ་དོན་གཅིག་པ་ཐོབ་པའི་ཚེ་རྙེད་ཅེས་བརྗོད་པ་ནི། ཡེ་མི་སྐྱེ་ན་ཅི་ལྟར་ཐོབ་བྱས་པ་ལ་གང་གི་ཕྱིར་རྙེད་པ་དེའི་ཕྱིར་རམ་དེའི་སྒོ་ནས་རྙེད་ཅེས་བཀོད་པའམ་སྟོན་པ་འདི་ནི་བསྒྲུབ་བྱ་ཉིད་སྒྲུབ་བྱེད་ལ་བཀོད་པ་སྔོན་མ་བྱུང་བའི་རྣམ་གྲངས་ཡིན་ཏེ། རིགས་པ་དང་བྲལ་བར་བརྗོད་པའི་ཕྱིར། དེ་བས་ན་དེ་ལྟར་ན་ནི་ཐོབ་པ་འགྲུབ་པར་མི་འགྱུར་བ་ཉིད་ཀྱིས་སྔོན་གྱི་སློབ་དཔོན་དག་ཇི་སྐད་ཟེར་བ་དེ་ལྟར་ན་འགྲུབ་པར་འགྱུར་རོ། །སྔོན་གྱི་སློབ་དཔོན་འཕགས་པ་ཐོགས་མེད་ལ་སོགས་པ་དག་ཇི་སྐད་ཟེར་ཅེ་ན། འཇིག་རྟེན་ལས་འདས་པའི་ལམ་གྱི་མཐུས་ཀུན་རྫོབ་ཤེས་པ་ཐོབ་ཀྱི། མངོན་དུ་འགྱུར་བའི་སྒོ་ནས་ནི་མ་ཡིན་ཏེ། དེ་ནས་ལངས་པ་ན་མངོན་དུ་(༣༣༨ན)
བྱེད་པའི་ཕྱིར། དུག་གིས་མི་ཤི་བའི་ནུས་པ་དཔོག་པ་དང་འདྲ་བར་རྗེས་ཐོབ་ཀྱི་མཉམ་གཞག་གི་ནུས་པ་དཔོག་པ་བཞིན་རྗེས་ཐོབ་ཀྱི་མཉམ་གཞག་གི་ནུས་པ་དཔོག་པའོ། །མཐོང་བའི་གནས་སྐབས་ལས་སྔོན་འཇིག་རྟེན་པའི་ཀུན་རྫོབ་ཤེས་པ་ཡོད་པ་བས། འཇིག་རྟེན་པའི་ཤེས་པ་འདི་ཁྱད་པར་དུ་འཕགས་པ་བདེན་པ་ལ་དམིགས་པ་མངོན་སུམ་དུ་བྱེད་པར་འགྱུར་བའི་ཀུན་རྫོབ་ཤེས་པ་སྐྱེ་བར་འགྱུར་རོ། །ཀུན་རྫོབ་ཤེས་པ་དེ་མངོན་སུམ་དུ་འགྱུར་བའི་ནུས་པའི་རྟེན་རྙེད་པ་དེ་ཉིད་ཀུན་རྫོབ་ཤེས་པ་དེ་རྙེད་པ་ཡིན་ཏེ། འཇིག་རྟེན་ལས་འདས་པའི་རིགས་རྙེད་པ་ལས་རིགས་ལས་བྱུང་བ་འཇིག་རྟེན་པའི་རྗེས་ཐོབ་ཀུན་རྫོབ་ཤེས་པའང་རྙེད་པའི་ཕྱིར་ཞེས་ཟེར་རོ། །དེའང་མངོན་པ་གོང་མར་མཐོང་བའི་ལམ་ལ་བདེན་པ་རྣམ་པར་འཇོག་པ་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་རྣམས་ཐོབ་སྟེ་མངོན་དུ་བྱེད་པ་ནི་མ་ཡིན་ནོ། །དེ་དག་ནི་སྒོམ་པའི་ལམ་ལ་མངོན་དུ་བྱེད་དོ་ཞེས་གསུངས་སོ། །བྱེ་བྲག་ཏུ་སྨྲ་བ་ནི། འདི་མི་འདོད་དེ། དེ་ནི་མཐོང་ལམ་གྱི་ཐོབ་པར་བྱ་བ་ཡིན་ན་ཇི་ལྟར་དེ་སྒོམ་ལམ་མངོན་དུ་འགྱུར་ཏེ་མི་འགྱུར་བར་ཐལ། མཐོང་ལམ་གྱི་དུས་སུ་ཐོབ་པ་དེ་སྐྱེ་བའི་གོ་སྐབས་མེད་པས་མི་སྐྱེ་བའི་ཆོས་ཅན་ཡིན་ལ། སྒོམ་ལམ་གྱིས་མཐོང་ལམ་གྱི་ཐོབ་པའི་ཐག་པ་ཆད་པས་དེ་གཏན་མི་སྐྱེ་བའི་ཆོས་ཅན་ཡིན་པའི་ཕྱིར་སྨྲའོ། །ས་དུ་པའི་ཀུན་རྫོབ་ཤེས་པ་དེ་ཐོབ་ཅེ་ན། མཐོང་ལམ་ས་གང་ཡིན་པ་དེ་རང་གི་ས་པའི་ཀུན་རྫོབ་ཤེས་པ་དང་འོག་སའི་ཀུན་རྫོབ་ཤེས་པ་ཐོབ་སྟེ། གལ་ཏེ་མཐོང་ལམ་མི་ལྕོགས་མེད་ལ་བརྟེན་ན་མི་ལྕོགས་མེད་པ་དང་། འདོད་པའི་ས་པའི་ཀུན་རྫོབ་ཤེས་པ་ཐོབ་ལ། བསམ་གཏན་བཞི་པའི་ས་པ་ཡིན་ན་བསམ་གཏན་ས་དྲུག་སྟེ་འདོད་པའི་བར་བདུན་གྱི་ཀུན་རྫོབ་ཤེས་པ་ཐོབ་ལ། བསམ་གཏན་དང་པོ་སོགས་ལའང་དེ་ལྟར་སྦྱར། འདི་(༣༣༨བ)
ནི་ངེས་པའི་དབང་དུ་བྱས་ལ། མ་ངེས་པ་ནི་སྔར་བསམ་གཏན་གསུམ་པ་ལྟ་བུ་ལས་འདོད་ཆགས་དང་བྲལ་བ་ཞིག་བསམ་གཏན་དང་པོ་ལ་བརྟེན་ནས་མཐོང་ལམ་སྐྱེ་ན་ས་བདུན་ཀའི་དེ་ཐོབ་པ་ཡིན་ཏེ། དེ་ལྟ་བུ་ཡང་ཡོད་པའི་ཕྱིར། འགོག་པ་མངོན་པར་རྟོགས་པའི་ཀུན་རྫོབ་ཤེས་པ་དེ་ནི་དྲན་པ་ཉེར་གཞག་བཞིའི་མཐའ་མ་ཆོས་དྲན་པ་ཉེར་གཞག་གོ། །གཅིག་གྲངས་བཅད་པས་ལྷག་མ་ནི་དྲན་པ་ཉེ་བར་བཞག་པ་བཞི་ཅར་ཡིན་ཏེ། ཕུང་པོ་ལྔ་པོ་ལ་དམིགས་པའི་ཕྱིར་ཞེས་གྲུབ་བོ། །མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པ་དེ་ནི་རང་བདེན་པ་གང་རྟོགས་པས་ཐོབ་པའི་བདེན་པ་དེའི་རྣམ་པ་ཅན་ཁོ་ན་ཡིན་ཏེ། འདིའི་དམིགས་པའང་དེ་ཉིད་ཡིན་ན་རྣམ་པའང་དེ་ཉིད་ཀྱི་ཕྱིར་ཞེས་བཤད་དོ། །དེ་མཐོང་ལམ་གྱི་ཐོབ་བྱ་ཡིན་པས་འབད་བ་སྐྱོར་བ་ལས་བྱུང་བ་ཡིན་གྱི་སྐྱེ་བས་ཐོབ་པ་ནི་མ་ཡིན་ནོ། །འཁོར་བཅས་སྨོས་པས་འདོད་པ་དང་གཟུགས་ན་སྐྱོད་པའི་ཀུན་རྫོབ་ཤེས་པ་གཉིས་རིམ་པ་ལྟར་བསམ་གཏན་གྱི་སྡོམ་པའི་གཟུགས་རྗེས་སུ་འབྲང་བ་མེད་པ་དང་ཡོད་པའི་ཁྱད་པར་གྱི་ཕུང་པོ་བཞི་པ་དང་ལྔ་པ་ཡིན་ནོ། །གཉིས་པ་ལ། གྲངས་མི་འདྲ་བ་སོ་སོར་བཤད་པ་དང་། འདྲ་བ་ཕྱོགས་གཅིག་ཏུ་བཤད་པའོ། །དང་པོ་ལ། སློབ་པའི་ལམ་ལ་དུ་ཐོབ་པ་དང་། མི་སློབ་པའི་ལམ་ལ་དུ་ཐོབ་པའོ། །དང་པོ་ལ། བཅུ་དྲུག་པ་ལ་དུ་ཐོབ་པ་དང་། སྒོམ་ལམ་ཕལ་ཆེ་བ་ལ་དང་། སྲིད་རྩེའི་རྣམ་གྲོལ་བརྒྱད་ལ་དང་། སློབ་པ་དབང་པོ་སྦྱོང་བའི་གྲོལ་ལམ་ལ་དང་། སྲིད་རྩེའི་བར་ཆད་མེད་ལམ་ལ་དུ་ཐོབ་པའོ། །དང་པོ་ལ། ཆགས་བཅས་དང་། ཆགས་བྲལ་ལོ། །དང་པོ་ནི། ཆགས་བཅས་བཅུ་དྲུག་པ་ལ་དྲུག །མི་ལྕོགས་མེད་པ་ལ་བརྟེན་པའི་འདོད་ཆགས་བཅས་པའི་རྒྱུན་ཞུགས་དང་ལན་གཅིག་ཕྱིར་འོང་སྐད་ཅིག་བཅུ་དྲུག་པ་ལམ་ལ་རྗེས་སུ་ཤེས་པ་ལྔ་རྗེས་ཤེས་དང་ལམ་ཤེས་གཉིས་སུ་བཞག་པ་ནི་གཉིས་ཀའི་ངོ་བོ་ད་ལྟར་བྱུང་བ་ཡིན་ལ། མ་འོངས་པ་ནི་(༣༣༩ན)
ཆོས་རྗེས་བདེན་བཞི་ཤེས་པ་དྲུག་ཐོབ་ཀྱི། ཀུན་རྫོབ་ཤེས་པ་དང་གཞན་སེམས་ཤེས་པ་ནི་མི་ཐོབ་སྟེ། སྔོན་རྙེད་ཟིན་པའི་ཕྱིར་དང་། འདོད་ཆགས་ལས་མ་བྲལ་བའི་ཕྱིར་དང་། གཉིས་པ་ནི། འདོད་ལས་ཆགས་དང་བྲལ་བས་བདུན། །འདོད་པ་ལ་ཆགས་པ་དང་བྲལ་བས་སྐད་ཅིག་བཅུ་དྲུག་མར་ཕ་རོལ་སེམས་ཤེས་དང་བདུན་ཐོབ་ལ། མཐོང་ལམ་ལ་ནི་ཆགས་བྲལ་གྱི་ཕ་རོལ་སེམས་ཤེས་མི་ཐོབ་སྟེ། དེ་མངོན་དུ་བྱ་བས་རབ་ཏུ་ཕྱེ་བ་ཡིན་ལ། དེ་ན་མངོན་དུ་བྱ་བའི་སྐབས་མེད་པའི་ཕྱིར། དེས་ན་བར་ཆད་མེད་ལམ་ཐམས་ཅད་ལ་མི་ཐོབ་བོ། །དེའང་ཕ་རོལ་གྱི་སེམས་ཤེས་ཟག་མེད་ཐོབ་ཀྱི། ཟག་བཅས་མི་ཐོབ་སྟེ། ཐོབ་ན་ཀུན་རྫོབ་ཤེས་པའང་ཐོབ་པར་འགྱུར་ཏེ། སེམས་ཟག་བཅས་ཀྱི་ཁྱབ་བྱེད་ཀུན་རྫོབ་བདེན་པ་ཡིན་པའི་ཕྱིར། དེས་ན་ཁྱབ་བྱེད་མི་ཐོབ་པས་ཁྱབ་བྱའང་མི་ཐོབ་བོ། །གཉིས་པ་སྒོམ་ལམ་ཕལ་ཆེ་བ་ལ་དུ་ཐོབ་པ་ལ། ཆགས་བཅས་དང་། ཆགས་བྲལ་ལོ། །དང་པོ་ནི། དེ་ཡི་གོང་མ་ཆགས་བཅས་ཀྱི། །བསྒོམ་པའི་ལམ་ལ་བདུན་འཐོབ་བོ། །སེམས་ཀྱི་སྐད་ཅིག་མ་བཅུ་དྲུག་དེའི་གོང་མ་སྒོམ་ལམ་ལ་ཇི་སྲིད་འདོད་པ་ལ་ཆགས་བཅས་ཀྱི་རྣམ་པ་བརྒྱད་སྤངས་པའི་བར་དུ་སྦྱོར་བ་དང་། བར་ཆད་མེད་པ་དང་རྣམ་པར་གྲོལ་བ་དང་ཁྱད་པར་ཅན་གྱི་ལམ་ཐམས་ཅད་ལ་ཤེས་པ་བདུན་ཐོབ་སྟེ། ཆོས་ཤེས་པ་ནི་གཉེན་པོ་ཡིན་པས་དང་། རྗེས་ཤེས་ནི་རྒྱུ་རྒྱས་པ་ཡིན་པས་དང་། བདེན་པ་བཞི་ཀུན་རྫོབ་ཤེས་པ་རྣམས་ཐོབ་བོ། །གལ་ཏེ། སྒོམ་ལམ་འཇིག་རྟེན་པ་ཞི་རགས་ཀྱི་རྣམ་པ་ཅན་ཡིན་ན། ཀུན་རྫོབ་ཤེས་པ་ད་ལྟར་བྱུང་བ་དང་། འདས་པ་ཞིག་ཡིན་ན་རྗེས་ཤེས་འདོད་པའི་གཉེན་པོ་མིན་པས་བདེན་བཞིའི་ཆོས་ཤེས་གང་རུང་ཞིག་ད་ལྟར་བྱུང་བ་ཡིན་ལ། གཞན་དག་ནི་མ་འོངས་པ་ཐོབ་སྟེ། རང་རིས་ཀྱི་སྐལ་མཉམ་གྱི་རྒྱུ་རྒྱས་པའི་ཕྱིར། གཉིས་པ་ནི། ས་བདུན་ལས་རྒྱལ་མངོན་ཤེས་དང་། །མི་གཡོ་འཐོབ་དང་སྤེལ་བསྒོམ་པའི། །བར་ཆད་མེད་པའི་ལམ་དག་དང་། །སློབ་པ་བསམ་གཏན་བཞི་གཟུགས་མེད་གསུམ་སྟེ། ས་བདུན་ལས་རྒྱལ་ཏེ་འདོད་ཆགས་(༣༣༩བ)
དང་བྲལ་བ་དང་། ཟག་ཟད་མ་གཏོགས་མངོན་ཤེས་ལྔ་དང་མི་གཡོ་བ་རྟོགས་ཤིང་ཐོབ་པར་བྱེད་པ་དང་། བསམ་གཏན་སྤེལ་མར་སྒོམ་པའི་བར་ཆད་མེད་ལམ་ཇི་སྙེད་པ་དེ་དག་ཐམས་ཅད་ལ་ཤེས་པ་བདུན་པོ་དེ་དག་ཉིད་ཐོབ་སྟེ། མི་སློབ་པ་མིན་པས་ཤེས་པ་ཕྱི་མ་གཉིས་མི་ཐོབ། རྣམ་གྲོལ་ལམ་མིན་པས་གཞན་སེམས་ཤེས་པ་མི་ཐོབ་པའི་ཕྱིར། དེ་ལ་གལ་ཏེ་འཇིག་རྟེན་པའི་སྒོམ་ལམ་ཞི་རགས་ཀྱི་རྣམ་པ་ཅན་ཞིག་ཡིན་ན་ཀུན་རྫོབ་ཤེས་པ་ད་ལྟར་བྱུང་བ་དང་། གཞན་དྲུག་མ་འོངས་པ་ཐོབ་ལ། འདས་པ་ཡིན་ན། སྤྱིར་རིགས་ཁམས་གསུམ་གྱི་གཉེན་པོར་རུང་བས་འགོག་ལམ་ཆོས་ཤེས་གང་ཡང་རུང་བའམ། ཁམས་གོང་གི་གཉེན་པོ་ཡིན་པས་མི་སྐྱེ་བ་ཤེས་པ་མི་ཐོབ་སྟེ། བར་ཆད་མེད་ལམ་ལ་གནས་པ་མི་གཡོ་བའི་ཆོས་ཅན་མ་ཡིན་པ་རྣམ་གྲོལ་དགུ་པ་ལ་མི་སྐྱེ་བ་ཐོབ་པའི་ཕྱིར། གསུམ་པ་སྲིད་རྩེའི་རྣམ་གྲོལ་ལམ་བརྒྱད་ལ་དུ་ཐོབ་པ་ནི། གོང་མའི་གྲོལ་པའི་ལམ་བརྒྱད་ལའང་། །ས་བདུན་ལས་ཆགས་བྲལ་གྱིའང་གོང་མ་སྲིད་རྩེ་ལ་ཆགས་བྲལ་གྱི་རྣམ་གྲོལ་གྱི་ལམ་བརྒྱད་ལའང་ཤེས་པ་བདུན་ཐོབ་སྟེ། ཆོས་རྗེས་བདེན་བཞི་ཕ་རོལ་གྱི་སེམས་ཤེས་སོ། །རྣམ་གྲོལ་ལ་སེམས་ཤེས་མ་བཀག་པས་རྒྱུད་ཀྱི་ཁྱད་པར་གྱི་སྒོ་ནས་ཁྱད་པར་དུ་འཕགས་པའི་སེམས་ཤེས་ཐོབ་བོ། །ཀུན་རྫོབ་ཤེས་པ་མི་ཐོབ་སྟེ་སྲིད་རྩེའི་གཉེན་པོ་མ་ཡིན་པའི་ཕྱིར། རྗེས་ཤེས་བཞི་དང་ཆོས་ཤེས་གཉིས་ལས་གང་རུང་ཞིག་ད་ལྟ་བ་ཡིན་ལ། གཞན་དག་ནི་མ་འོངས་པ་ཐོབ་བོ། །བཞི་པ་སློབ་པ་དབང་པོ་སྦྱོང་བའི་རྣམ་གྲོལ་ལམ་ལ་དུ་ཐོབ་པ་ནི། སློབ་པ་སྦྱོང་བའི་གྲོལ་བ་ལ། །ཤེས་པ་དྲུག་དང་བདུན་འཐོབ་བམ། །བར་ཆད་མེད་པའི་ལམ་ལ་དྲུག །སློབ་པ་འདོད་ཆགས་དང་བཅས་པ་དབང་པོ་རྟུལ་པོ་རྣོན་པོར་སྦྱོང་བའི་རྣམ་པར་གྲོལ་བའི་ལམ་ལ་ཆོས་རྗེས་བདེན་བཞི་ཤེས་པ་དྲུག་ཐོབ་པ་དང་། འདོད་པ་ལ་ཆགས་བྲལ་གྱིས་ནི་ཕ་རོལ་སེམས་ཤེས་དང་བདུན་ཐོབ་ལ། ལམ་ནི་ཁ་ཅིག །འདི་ནི་མཐོང་ལམ་དང་འདྲ་བའི་ཕྱིར། (༣༤༠ན)
ཇི་ལྟར་མཐོང་ལམ་གྱིས་འབྲས་བུ་ཐོབ་པ་དང་ཀུན་རྫོབ་ཤེས་པ་ཐོབ་པ་ལྟར་འདི་ལའང་མངོན་པར་རྟོགས་པའི་མཐའ་ལས་བྱུང་བའི་ཀུན་རྫོབ་ཤེས་པའང་ཐོབ་པའི་ཕྱིར་བདུན་ཐོབ་བོ་ཞེས་འདོད་པ་བསྟན་ལ། ཁ་ཅིག་ནི། སྔར་རྟོགས་ཟིན་པས་མངོན་པར་རྟོགས་པའི་མཐའ་མེད་པའི་ཕྱིར་དང་། མཐོང་ལམ་ནི་ཐོབ་པར་བྱེད་པ་ཡིན་ལ། འདི་ནི་ཐོབ་ཟིན་པའི་ཕྱིར་མཐོང་ལམ་དང་འདྲ་བ་མ་ཡིན་ནོ། །སྦྱོར་ལམ་ལ་ནི་ཆགས་བཅས་གྲོལ་ལམ་དེ་གཉིས་ཀྱི་ཀུན་རྫོབ་ཤེས་པའང་ཐོབ་བོ། །སློབ་པ་འདོད་ཆགས་དང་བྲལ་རུང་མ་བྲལ་རུང་དབང་པོ་སྦྱོང་བའི་བར་ཆད་མེད་པའི་ལམ་ལ་དྲུག་ཐོབ་སྟེ། སྔ་མ་རྣམ་གྲོལ་ལམ་གྱི་ཐོབ་པ་བཞིན་ནོ། །ཀུན་རྫོབ་ཤེས་པ་མི་ཐོབ་སྟེ་མཐོང་ལམ་དང་འདྲ་བའི་ཕྱིར། འདྲ་ཚུལ་ནི། མཐོང་ལམ་གྱི་འབྲས་བུ་དང་པོ་གསུམ་གང་རུང་ཞིག་ཐོབ་པ་ལྟར་འདིས་ཀྱང་བར་ཆད་མེད་པའི་ལམ་གྱི་སློབ་པ་དབང་པོ་སྦྱོང་བ་ན་འབྲས་བུ་དང་པོ་གསུམ་དབང་པོ་རྣོན་པོས་བསྡུས་པ་འདུས་བྱས་གང་རུང་ཞིག་ཐོབ་ལ། མཐོང་ལམ་བར་ཆད་མེད་པའི་ལམ་བཟོད་པ་རྣམས་ལ་ཀུན་རྫོབ་ཤེས་པ་མི་ཐོབ་པ་ལྟར་འདྲའོ། །སེམས་ཤེས་པའང་མིན་ཏེ། བར་ཆད་མེད་ལམ་ཐམས་ཅད་ལ་བཀག་པའི་ཕྱིར་ཏེ། སེམས་ཤེས་དེ་གཉེན་པོ་མིན་པའི་ཕྱིར། ལྔ་པ་སྲིད་རྩེའི་བར་ཆད་མེད་ལམ་ལ་དུ་ཐོབ་པ་ནི། དེ་བཞིན་སྲིད་རྩེ་རྣམ་རྒྱལ་ལའང་། །སྲིད་རྩེ་ལས་རྣམ་པར་རྒྱལ་བ་ཆགས་པ་དང་བྲལ་བར་བྱེད་པའི་བར་ཆད་མེད་ལམ་ལའང་སྔ་མ་དེ་བཞིན་ཆོས་རྗེས་བདེན་བཞི་ཤེས་པ་སྟེ་དྲུག་ཐོབ་ཀྱི། སྲིད་རྩེའི་གཉེན་པོ་མིན་ཅིང་། སློབ་པའི་བར་ཆད་མེད་ལམ་ཡིན་པས་གཞན་མི་ཐོབ་པ་ནི་སྔར་བཞིན་ནོ། །གཉིས་པ་མི་སློབ་པའི་ལམ་ལ་དུ་ཐོབ་པ་ལ། དབང་པོ་རྟུལ་པོ། དབང་པོ་རྣོན་པོ། དབང་པོ་འཕོ་བའི་ལམ་ལ་དུ་ཐོབ་པའོ། །དང་པོ་ནི།(༣༤༠བ)
ཟད་པ་ཤེས་པ་ལ་དགུའོ། །སྲིད་རྩེ་ལས་ཆགས་བྲལ་རྣམ་གྲོལ་གྱི་ལམ་དགུ་པ་ནི། ཟད་པ་ཤེས་པ་ལ་ནི་དབང་རྟུལ་ཉམས་སྲིད་པས་མི་སྐྱེ་བ་ཤེས་པ་མ་གཏོགས་དགུ་ཐོབ་བོ། །གཉིས་པ་ནི། མི་གཡོ་བས་ནི་བཅུ་འཐོབ་བོ། །མི་གཡོ་བའི་ཆོས་ཅན་གང་ཡིན་པ་ལ་མི་སྐྱེ་བ་ཤེས་པ་དང་བཅུ་ཐོབ་བོ། །གསུམ་པ་ནི། དེར་འཕོ་གྲོལ་བའི་ཐ་མ་ལའང་། །མི་གཡོ་བ་དེར་འཕོ་བའི་རྣམ་པར་གྲོལ་བའི་ལམ་ཐ་མ་ལའང་བཅུ་པོ་ཐམས་ཅད་ཐོབ་བོ། །འདི་ལ་སྡུག་ཀུན་གང་ཞིག་དང་། རྗེས་ཤེས་དང་། ཟད་མི་སྐྱེ་ཤེས་གང་ཞིག་སྟེ་གསུམ་ནི་ད་ལྟར་བྱུང་བ་ཡིན་ལ། གཞན་དག་མ་འོངས་པ་ཐོབ་བོ། །གཉིས་པ་འདྲ་བ་ཕྱོགས་གཅིག་ཏུ་ཐོབ་པ་ནི། བཤད་པའི་ལྷག་མ་ལ་བརྒྱད་འཐོབ། །སྔར་བཤད་པའི་ལྷག་མ་འདོད་པ་ལས་ཆགས་བྲལ་གྱི་རྣམ་གྲོལ་ལམ་དགུ་པ་དང་། ས་བདུན་ལས་འདོད་ཆགས་དང་བྲལ་བའི་རྣམ་གྲོལ་དང་། མངོན་ཤེས་དང་། སྤེལ་སྒོམ་དང་། མི་གཡོ་བ་རྟོགས་པར་བྱེད་པའི་རྣམ་གྲོལ་གྱི་ལམ་དང་པོ་བརྒྱད་དང་། སྔར་མ་སྨོས་པའི་འདོད་ཆགས་དང་བྲལ་བའི་ཕྱིར་མི་འོང་བའི་སྦྱོར་བ་དང་། ཁྱད་པར་གྱི་ལམ་རྣམས་ལ་ཟད་མི་སྐྱེ་ཤེས་མ་གཏོགས་བརྒྱད་བརྒྱད་མ་འོངས་པ་འཐོབ་པ་ནི་སློབ་པའི་དབང་དུ་བྱས་པའོ། །མི་སློབ་པ་ནི་མངོན་པར་ཤེས་པ་དང་ལ་སོགས་པས་སྤེལ་མར་བསྒོམ་པ་དང་། བསམ་གཏན་གྱི་སྦྱོར་བ་དང་། རྣམ་གྲོལ་གྱི་ལམ་དང་ཁྱད་ཅན་གྱི་ལམ་རྣམས་ལ་དུས་ཀྱི་རྣམ་གྲོལ་ཡིན་ན་མི་སྐྱེ་ཤེས་མ་གཏོགས་དགུའམ། མི་གཡོ་བའི་ཆོས་ཅན་ཞིག་ན་དེ་ཉིད་དང་བཅུ་ཐོབ་བོ། །མངོན་ཤེས་དང་སྤེལ་མ་བསྒོམ་པ་དང་མི་གཡོ་བ་རྟོགས་པར་བྱེད་པའི་བར་ཆད་མེད་ལམ་རྣམས་ལ་དུས་ཀྱི་རྣམ་གྲོལ་གྱིས་གཞན་སེམས་དང་མི་སྐྱེ་བ་ཤེས་པ་མ་གཏོགས་བརྒྱད་དམ། མི་གཡོ་བའི་ཆོས་ཅན་གྱིས་གཞན་སེམས་ཤེས་པ་མ་གཏོགས་དགུ་ཐོབ་སྟེ། དེ་ནི་བར་ཆད་མེད་ལམ་ལ་བཀག་པའི་ཕྱིར། ལྷའི་མིག་(༣༤༡ན)
དང་རྣ་བའི་མངོན་པར་ཤེས་པའི་རྣམ་གྲོལ་གྱི་ལམ་གཉིས་ནི་མ་འོངས་པ་ཅུང་ཟད་ཀྱང་མི་ཐོབ་སྟེ། དེ་དག་ནི་ལུང་མ་བསྟན་ཡིན་པའི་ཕྱིར། ད་ནི་སོ་སོ་སྐྱེ་བོ་འདོད་པ་དང་། བསམ་གཏན་དང་གཉིས་གསུམ་པ་ལས་ཆགས་བྲལ་གྱི་རྣམ་གྲོལ་ལམ་ཐ་མ་རྣམས་ལ་རིམ་པ་ལྟར་བསམ་གཏན་དང་པོ་དང་གཉིས་པ་དང་གསུམ་པའི་སས་བསྡུས་པའི་ཀུན་རྫོབ་ཤེས་པ་དང་ཕ་རོལ་སེམས་ཤེས་མ་འོངས་པ་ཐོབ་བོ། །བསམ་གཏན་བཞི་པ་ལས་ཆགས་བྲལ་གྱི་རྣམ་གྲོལ་གྱི་ལམ་དགུ་པ་ལ་ནི་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞིས་བསྡུས་པའི་ཀུན་རྫོབ་ཤེས་པ་ཐོབ་ཀྱི་ཕ་རོལ་སེམས་ཤེས་ནི་མི་ཐོབ་སྟེ། དེ་ནི་གཟུགས་ལ་བརྟེན་ནས་བསྒྲུབ་པར་བྱ་བ་ཡིན་གྱི། གཞན་གྱི་སེམས་ཤེས་གཟུགས་མེད་ཀྱི་སས་བསྡུས་པ་མེད་པའི་ཕྱིར། གཟུགས་མེད་ལྷག་མ་རྣམས་ལའང་ཤེས་པར་བྱའོ། །བསམ་གཏན་གྱི་དངོས་གཞིའི་ས་པའི་སྦྱོར་བའི་ལམ་རྣམས་དང་། ལྷའི་མིག་དང་རྣ་བའི་མངོན་ཤེས་མ་གཏོགས་པའི་མངོན་ཤེས་གསུམ་(རྫུ་འཕྲུལ་སྔོན་གནས་དྲན་སེམས་ཀྱི་རྣམ་གྲངས་ཤེས། མཆན།)གྱི་རྣམ་གྲོལ་གྱི་ལམ་དང་། ཚད་མེད་རྣམ་ཐར་དང་ཟིལ་གནོན་དང་ཟད་པར་གྱི་སྐྱེ་མཆེད་ལ་སོགས་པ་ཡོན་ཏན་མངོན་པར་སྒྲུབ་པའི་རྣམ་གྲོལ་གྱི་ལམ་ལ་ནི་ཀུན་རྫོབ་ཤེས་པ་མ་འོངས་པ་དང་། ཕ་རོལ་སེམས་ཤེས་གཉིས་ཀ་ཐོབ་སྟེ་དེ་དག་ནི་བསམ་གཏན་གྱི་དངོས་གཞི་ལ་བརྟེན་པའི་ཕྱིར། བསམ་གཏན་གྱིས་སྨོས་པ་ནི་ཉེར་བསྡོགས་ལ་བརྟེན་པའི་གཞན་སེམས་ཤེས་པ་མེད་དོ། །ངེས་འབྱེད་ཆ་དང་མཐུན་པ་དག་ལ་ནི་བསམ་གཏན་གྱི་ས་པ་དག་གིས་ཀྱང་ཕ་རོལ་གྱི་སེམས་ཤེས་ཐོབ་པ་མེད་དེ། མཐོང་ལམ་གྱི་འཁོར་ཡིན་པའི་ཕྱིར། ཁྱབ་སྟེ། གཙོ་བོ་མཐོང་ལམ་ཕ་རོལ་སེམས་ཤེས་མི་ཐོབ་ན་འཁོར་འདིས་ཀྱང་མི་ཐོབ་བོ། །འདོད་པ་དང་(༣༤༡བ)
བསམ་གཏན་གསུམ་ལས་ཆགས་བྲལ་གྱི་རྣམ་གྲོལ་གྱི་ལམ་ཐ་མ་མ་གཏོགས་པ་སོ་སྐྱེའི་སྔོན་མེད་ཀྱི་ལམ་གཞན་སྦྱོར་བ་དང་བར་ཆད་མེད་པ་དང་ཁྱད་པར་ཅན་གྱི་ལམ་ཐོབ་པ་ལ་ནི་ཀུན་རྫོབ་ཤེས་པ་མ་འོངས་པ་ཁོ་ནར་ཐོབ་ཀྱི། གཞན་སེམས་ཤེས་པ་མི་ཐོབ་བོ། །མངོན་ཤེས་གསུམ་དང་། ཚད་མེད་སོགས་ཡོན་ཏན་སྒྲུབ་པའི་བར་ཆད་མེད་ལམ་སྔོན་མེད་ཀྱི་ལམ་ཐོབ་པ་དེ་ལ་ཡང་ཀུན་རྫོབ་ཤེས་པ་ཁོ་ནར་ཐོབ་ཀྱི། སེམས་ཤེས་མི་ཐོབ་སྟེ། གཉེན་པོ་མ་ཡིན་པའི་ཕྱིར། གསུམ་པ་ལམ་གང་ལས་དུ་ཐོབ་པ་ནི། གང་ལས་ཆགས་བྲལ་བྱ་ཕྱིར་གང་། །ཐོབ་པ་དེར་ཡང་འོག་མའང་འཐོབ། །ཟད་པ་ཤེས་ལ་ཟག་བཅས་ཀྱང་། །ས་ཀུན་སྔོན་རྙེད་མི་འཐོབ་བོ། །ཡང་ལམ་གང་ལ་བརྟེན་པ་དེ་ཉིད་དམ། གཞན་ས་དུའི་ཤེས་པ་ཐོབ་ཅེ་ན། རེ་ཞིག་ཀུན་རྫོབ་ཤེས་པ་ནི་འཇིག་རྟེན་དང་། དེ་ལས་འདས་པའི་ལམ་མི་ལྕོགས་མེད་པ་སོགས་ས་གང་ཐོབ་པ་ཡིན་པ་དང་། འདོད་ཆགས་དང་བྲལ་བའི་སྒོ་ནས་བསམ་གཏན་དང་པོ་ནས་སྲིད་རྩེའི་བར་གྱི་དང་པོ་ཉིད་དུ་ས་གང་ཐོབ་པ་དེ་པའི་མ་འོངས་པ་ཐོབ་པ་ཡིན་ཏེ། མི་ལྕོགས་མེད་ལ་བརྟེན་ནས་འཇིག་རྟེན་པས་འདོད་ཆགས་དང་བྲལ་ནས་བསམ་གཏན་དང་པོ་ཐོབ་ན་རྣམ་གྲོལ་དགུ་པ་མན་ཆད་ཀུན་རྫོབ་ཤེས་པ་ཉེར་བསྡོགས་ཀྱིས་བསྡུས་པ་དང་། དེའི་ཚེ་དངོས་གཞི་བསྡུས་པའང་ཐོབ་ལ། དེ་བཞིན་སྲིད་རྩེའི་ཉེར་བསྡོགས་ཀྱིས་འདོད་ཆགས་དང་བྲལ་བའི་བར་སྦྱར་རོ། །མི་ལྕོགས་མེད་ཟག་མེད་ལའང་དེ་བཞིན་ནོ། །བསམ་གཏན་དང་པོའི་དངོས་གཞི་ཟག་མེད་ཀྱིས་དང་པོ་ལས་འབྲལ་བའི་ཚེ་གཉིས་པའི་ཉེར་བསྡོགས་ཀྱིས་བསྡུས་པ་དང་པོའི་ཉོན་མོངས་པ་བརྒྱད་པའི་གཉེན་པོར་གྱུར་པའི་བར་དང་། དགུ་པའི་ཚེ་གཉིས་པའི་དངོས་གཞིས་བསྡུས་པའང་ཐོབ་སྟེ། གཞན་ལའང་སྦྱར་རོ། །ཟག་མེད་ནི་ལམ་ས་པ་གང་ཡིན་པ་འབའ་ཞིག་ཏུ་མ་ཟད། ས་གང་ལས་འདོད་ཆགས་དང་བྲལ་བར་བྱ་བའི་ཕྱིར་ཡང་ས་གང་ཡིན་པ་འབའ་ཞིག་ཏུ་མ་ཟད། དེར་སྦྱོར་བའི་ལམ་དང་། སོགས་པས་བར་མེད། (༣༤༢ན)
རྣམ་གྲོལ། ཁྱད་ཅན་དང་། འཇིག་རྟེན་དང་འཇིག་རྟེན་ལས་འདས་པའི་ལམ་གྱི་ཁྱད་པར་ཡོད་པ་ལས། ཟག་མེད་ཀྱི་བསམ་གཏན་གཉིས་པ་ལ་བརྟེན་ནས་བསམ་གཏན་གསུམ་པ་ལས་འདོད་ཆགས་དང་བྲལ་བར་བྱེད་ན། ལམ་ས་གང་ཡིན་པ་བསམ་གཏན་གཉིས་པ་དེའི་ས་པའི་ཟག་མེད་ཀྱི་ཤེས་པ་དང་རྣམ་གྲོལ་དགུ་པ་ལ་འདོད་ཆགས་དང་བྲལ་བར་བྱེད་པའི་བསམ་གཏན་གསུམ་པའི་ས་པའི་ཟག་མེད་ཀྱི་ཤེས་པའང་འཐོབ་ལ། དེ་ཡང་ས་འོག་མ་དང་པོའི་ཉེར་བསྡོགས་དང་། དངོས་གཞི་དང་། དངོས་གཞི་ཁྱད་ཅན་གྱི་ས་པའི་ཟག་མེད་ཀྱི་ཤེས་པ་རྣམས་ཐོབ་པར་འགྱུར་ཏེ། འོག་མ་པའང་དེའི་སྦྱོར་ལམ་ལ་སོགས་པ་ཡིན་པ་སྲིད་པའི་ཕྱིར། འོན་ཏེ་བསམ་གཏན་གསུམ་པའི་ཉེར་བསྡོགས་ལ་བརྟེན་ནས་གཉིས་པ་ལ་འདོད་ཆགས་དང་བྲལ་བར་བྱེད་ན་དེ་ནི་བར་ཆད་མེད་ལམ་དང་རྣམ་གྲོལ་ལམ་བརྒྱད་ལ་ཉེར་བསྡོགས་དེ་ཟག་བཅས་ཡིན་པས་དེའི་ས་པའི་ཟག་མེད་ཤེས་རབ་མི་ཐོབ་སྟེ་མེད་པའི་ཕྱིར། གཉིས་པ་དང་དང་པོ་གསུམ་གྱིས་བསྡུས་པའི་ཟག་མེད་གསུམ་གྱིས་བསྡུས་པའི་ཟག་མེད་འཐོབ་སྟེ། དེའི་གཉེན་པོའི་རིགས་ཡིན་པའི་ཕྱིར་གཞན་ལའང་སྦྱར་ཏེ་འདིས་ཕྱོགས་མཚོན་ནོ། །དགྲ་བཅོམ་པ་ཐོབ་ནས་ཟད་པ་ཤེས་པ་ཐོབ་པ་དེ་ལ་ནི་ཟག་བཅས་ཀྱི་ཡོན་ཏན་མི་སྡུག་པ་དང་། དབུགས་དབྱུང་བ་དང་། རྔུབ་པ་དྲན་པ་དང་། དྲན་པ་ཉེ་བར་བཞག་པ་དང་། ཚད་མེད་པ་དང་། རྣམ་ཐར་དང་། ཟིལ་གནོན་དང་། ཟད་པར་ལ་སོགས་པའི་ས་ཀུན་གྱིས་བསྡུས་པའི་ཡོན་ཏན་ཐོབ་སྟེ། དེའང་འདོད་ཆགས་དང་བྲལ་བས་ཐོབ་པ་རྣམས་ཐོབ་ཀྱི་སྦྱོར་བས་ཐོབ་པ་རྣམས་ནི་མ་ཡིན་ཏེ། དེ་དག་ནི་བསམ་གཏན་གྱི་སྟོབས་ཀྱིས་བསྐྱེད་བྱ་ཡིན་པའི་ཕྱིར། ཀྱང་སྒྲ་ནི་ཟག་མེད་དུ་མ་ཟད་པར་ཤེས་པར་བྱའོ། །འདོད་ཆགས་དང་བྲལ་བས་ཐོབ་(༣༤༢བ)
པ་རྣམས་ནི་སྤྲོག་མ་གང་ཐག་པས་གཞུངས་ཏེ་བཅིངས་པ་ཐག་པ་བཅད་དེ་ནང་ན་ཡོད་པ་ཐམས་ཅད་སྲོག་ཆགས་དབུགས་འབྱིན་པའི་ཕྱིར་ཕུང་གིས་འོང་བ་ལྟར། རྡོར་ཏིང་གིས་ཉོན་མོངས་པའི་ཐོབ་པ་བཅད་དེ། མི་སློབ་པའི་རྒྱུད་ལ་ཡོད་པའི་ཡོན་ཏན་མི་སྡུག་པ་ལ་སོགས་པའི་ཐོབ་པ་འབྱུང་བ་ནི་དབུགས་འབྱིན་པ་ལྟ་བུའོ། །རྒྱལ་པོ་ཐམས་ཅད་ལས་ལྷག་པའི་རྒྱལ་སྲིད་ཆེན་པོ་ཐོབ་ན། ཡུལ་མི་རྣམས་གོས་རྒྱན་སོགས་སྐྱེས་འབུལ་བས་བསུ་བ་བཞིན། རང་གི་སེམས་ཉོན་མོངས་པའི་གཞན་དབང་དང་བྲལ་བས། རང་སེམས་རང་དབང་བའི་རྒྱལ་སྲིད་ཆེན་པོ་ཐོབ་པའི་དགྲ་བཅོམ་དེ་ལ་དགེ་བའི་ཆོས་ཐམས་ཅད་སྐྱེས་ལྟ་བུས་བསུའོ། །འདོད་ཁམས་སུ་དགྲ་བཅོམ་ཐོབ་ན་ཅི་རིགས་པར་མི་སྡུག་ལ་སོགས་ཐོས་བསམ་སྒོམ་གསུམ་ཁམས་གསུམ་པ་ཐོབ། གཟུགས་སུ་ཐོབ་ན་ཁམས་འོག་མ་གཉིས་ཀྱིས་ཐོབ། གཟུགས་མེད་དུ་ཐོབ་ན་ཁམས་གསུམ་པ་ཐོབ། སྲིད་རྩེར་ཐོབ་ན་ས་པ་དེ་རང་གིས་ཐོབ་བོ། །སློབ་དཔོན་ནི། གང་སྔོན་མེད་ལས་རྙེད་པ་དེ་ཐམས་ཅད་ནི་ཐོབ་ཀྱི། སྔོན་རྙེད་ཟིན་ཉམས་པ་ལས་ཀྱང་རྙེད་པ་དེའང་མ་འོངས་པ་མི་འཐོབ་སྟེ། འཁོར་བ་ན་སྔར་ཐོབ་པ་བཏང་བའི་ཕྱིར། མཚར་གཅིག་དགའ་བ་མེད་པ་དང་། འབད་མེད་དུ་ཤིན་ཏུ་མངོན་དུ་འགྱུར་བའི་ཕྱིར། བསམ་གཏན་སོགས་འཁོར་བ་ན་འདྲིས་པ་མིན་པ་ཟག་མེད་དང་མཐུན་པའི་ཁྱད་ཅན་དེ་མངོན་དུ་གྱུར་ན། དེ་དང་འདྲ་བ་མ་འོངས་པ་ཁྱད་པར་ཅན་ཐོབ་སྟེ། འབད་ནས་མངོན་དུ་བྱེད་པའི་ཕྱིར། འདུས་བཟང་ཡང་དེ་ལྟར་འཆད་ལ། ཡང་ལམ་རྒྱུན་མ་ཆད་པ་ནི་མ་འོངས་པ་ཐོབ་སྟེ། དེས་འབད་ནས་མངོན་དུ་བྱེད་དགོས་ལ། འབད་པས་འཕངས་པ་ནི་སྟོབས་དང་ལྡན་པའི་ཕྱིར། སྔོན་ལམ་རྒྱུན་བཅད་པ་ནི་མངོན་དུ་གྱུར་ནས་རྙེད་ཀྱང་མ་འོངས་པ་མི་ཐོབ་སྟེ། འབད་མེད་དུ་མངོན་དུ་བྱ་མི་ནུས་ཤིང་བྱ་བ་བྱས་པ་(༣༤༣ན)
དང་། འབྲས་བུ་ཕྱུངས་ཟིན་པ་ཉིད་ཀྱིས་སྟོབས་ཤུགས་ཉམས་པའི་ཕྱིར། སློབ་དཔོན་དབྱིག་བཤེས་ནི། ཇི་ཙམ་དུ་སྔོན་རྙེད་པ་པོ་ད་ལྟ་མི་ལྡན་པ་ལས་རྙེད་ན་སྔར་བཏང་ཡང་མ་འོངས་པ་ཐོབ་པ་ཡིན་ཏེ། ཇི་ལྟར་ན་སྔོན་རྙེད་པ་ནི། ཇི་ལྟར་ན། སྔོན་མེད་པར་འཇིག་རྟེན་ནམ་གྲགས་པའི་ཕྱིར་ཞེའོ། །གཞན་དག་རྩ་བའི་ལུགས་འདི་ཚེ་གཅིག་གི་དབང་དུ་བྱས་པ་ཡིན་ཏེ། ཚེ་འདི་ལ་ཉམས་ཏེ་བཏང་བ་ལས་རྙེད་པ་ནི་མ་འོངས་པ་མི་ཐོབ་ལ། ཚེ་རབས་གཞན་ན་རྙེད་པ་ནི་དེར་ཐོབ་སྟེ་གཞན་དུ་རྙེད་པའི་ཐོབ་པ་དེར་མ་བཏང་བའི་ཕྱིར་ཏེ། རྙེད་པ་བརྗོད་པ་ཉིད་ཀྱི་ཕྱིར་རོ་ཞེས་ཟེར་རོ། །བཞི་པ་ཐོབ་པའི་དབྱེ་བ་ནི། རྙེད་དང་བསྟེན་ཞེས་བྱ་བ་ནི། །དགེ་བ་འདུས་བྱས་ཐོབ་པའོ། །གཉེན་པོ་དང་ནི་ཐག་བསྲིང་བའི། །ཐོབ་པ་ཟག་དང་བཅས་པའི་ཡིན། །ཅི་ཐོབ་པ་རྙེད་པ་ཁོ་ན་མ་ཡིན་གྱི། ཐོབ་པ་ནི་བཞི་སྟེ། རྙེད་པ་ཐོབ་པ་དང་། བསྟེན་པ་ཐོབ་པ་དང་། གཉེན་པོ་ཐོབ་པ་དང་། ཐག་བསྲིངས་པས་ཐོབ་པའོ། །དེ་ལ་རྙེད་ཐོབ་ནི་དགེ་བ་འདུས་བྱས་ཀྱི་གསར་རྙེད་ཡིན་ལ། བསྟེན་པ་ཐོབ་པ་ཞེས་བྱ་བ་ནི་དགེ་བ་འདུས་བྱས་རྣམས་ཀྱིས་ཐོབ་ཟིན་ཡང་ཡང་མངོན་དུ་བྱེད་པའི་ཐོབ་པའོ། །དེའང་ད་ལྟ་བའི་ཆོས་ལ་ནི་རྙེད་བསྟེན་གྱི་ཐོབ་པ་གཉིས་ཡོད་ལ། མ་འོངས་པ་ལ་རྙེད་ཐོབ་འབའ་ཞིག་དེ་གཅིག་དང་། འདས་པ་ལ་གཉིས་ཀ་མེད་དོ། །གཉེན་པོ་ཐོབ་པ་དང་ཐག་བསྲིང་བ་ཐོབ་པ་ནི་ཟག་པ་དང་བཅས་པའི་ཆོས་རྣམས་ཀྱི་གཉེན་པོ་ཐོབ་པ་དང་། དེ་དག་སྤངས་པ་ཐག་བསྲིང་བ་ཡིན་ཏེ། རིམ་པ་ལྟར་ལུས་སེམས་ལ་འདོད་ཆགས་དང་བྲལ་བར་བྱེད་པ་དང་། ཉོན་མོངས་པའི་ཐོབ་པ་གཅོད་པར་བྱེད་པའི་ཕྱིར་རོ། །ཇི་ལྟར་ལུས་སེམས་ལ་འདོད་ཆགས་དང་བྲལ་བར་བྱེད་ཅེ་ན། མདོ་ལས་ལུས་སེམས་སྒོམ་པ་ཞེས་འབྱུང་བ་ནི་དེ་དག་གི་གཉེན་པོ་སྒོམ་པའི་ཐ་ཚིག་གོ། །ལུས་ཀྱི་གཉེན་པོ་ནི། བསམ་གཏན་བཞི་པ་ལ་ཆགས་བྲལ་བྱེད་པའི་ལམ་སྟེ། འདི་ལྟར་ལུས་དང་། སེམས་དང་། ཚུལ་ཁྲིམས་སྒོམ་(༣༤༣བ)
པའི་དགེ་སློང་ངོ་། །ཇི་ལྟར་ལུས་སྒོམ་ན། ལུས་ལ་འདོད་ཆགས་སྲེད་པ་སྐོམས་པ་དགའ་བ་ཆུམས་པ་དང་བྲལ་བའོ། །ཡང་ན་ལུང་ལས། གཟུགས་ཀྱི་ཆགས་པ་ཟད་བྱེད་ཀྱི་བར་ཆད་མེད་ལམ་ཡིན་ནོ། །ཞེས་སོ། །དེ་ན་དགེ་བ་ཟག་བཅས་རྣམས་ཀྱི་ཐོབ་པ་བཞི་ཅར་ཡིན་ནོ། །དེའང་དང་པོ་གཉིས་ནི་དགེ་བ་ཟག་བཅས་རང་གིས་ཐོབ་ལ། ཕྱི་མ་གཉིས་ནི་དེ་དག་གི་གཉེན་པོ་དང་། རྣམ་གྲོལ་ཐོབ་པ་ལ་དེ་དག་གིས་ཐོབ་པ་ཞེས་བརྗོད་དོ། །ཟག་མེད་ཀྱིས་ནི་ཐོབ་པ་དང་པོ་གཉིས་ཡིན་གྱི། ཕྱི་མ་གཉིས་ནི་མ་ཡིན་ཏེ། ཟག་མེད་ལ་གཉེན་པོ་མེད་པའི་ཕྱིར་དང་དེ་ཉིད་ཀྱིས་ཐག་བསྲིང་བའང་མེད་པའི་ཕྱིར་རོ། །ཉོན་མོངས་ཅན་དང་སྒྲིབ་ལ་ལུང་མ་བསྟན་གྱི་གཉེན་པོ་ཐོབ་པ་དང་། སྤང་བྱ་ཐག་བསྲིང་བའི་ཐོབ་པ་གཉིས་ཡིན་ཏེ། ཤེས་པ་ཁ་ཅིག་ནི་དེ་དག་གི་གཉེན་པོ་ཡིན་ལ། ཁ་ཅིག་ནི་དེ་དག་ཐག་བསྲིང་བ་ཡིན་པའི་ཕྱིར། འོ་ན་ནི་ཀུན་རྫོབ་ཤེས་པ་མི་དགེ་བ་དང་། ལུང་མ་བསྟན་ཀྱང་ཡོད་པས། དེ་དག་རྙེད་པ་དང་བསྟེན་པའི་ཐོབ་པའང་ཡིན་པའི་ཕྱིར། དེ་དག་གི་ཐོབ་པ་བཞིར་འགྱུར་ཞེ་ན། དེ་ལྟར་མོད་ཀྱི་ཕལ་ཆེ་བའི་དབང་དུ་བྱས་ཞེས་འཇམ་སྒེག་ཟེར་རོ། །ཉི་འོག་པ་ནི་ཐོབ་པ་དྲུག་སྟེ། བཞི་པོ་དེ་དག་དང་། སྡོམ་པ་ཐོབ་པ་དང་། རྣམ་པར་འཇིག་པའི་ཐོབ་པའོ། །དང་པོ་ནི། དྲན་པ་དང་ཤེས་བཞིན་གྱི་བདག་ཉིད་དེ། ཇི་སྐད་དུ། དབང་པོ་དྲུག་པོ་འདི་དག་ཤིན་ཏུ་དུལ་བ་དང་། ཤིན་ཏུ་སྤས་པ་དང་། ཤིན་ཏུ་སྲུང་བ་དང་། ཤིན་ཏུ་བསྡམས་པ་དང་། ཤིན་ཏུ་སྒོམ་པ་ནི་ཕྱི་མ་ལ་རྣམ་པར་སྨིན་པའི་བདེ་བར་འགྱུར་རོ། །ཞེས་འབྱུང་ངོ་། །གཉིས་པ་ནི། ལུས་འདི་ལ། སྐྲ་དང་སྤུ་དང་སོ་སེན་དང་། །རྔུལ་དང་དྲི་མ་པགས་པ་དང་། །ཞེས་སོགས་སུམ་ཅུ་རྩ་བཞིར་བལྟ་བ་ལས་ཐོབ་པར་བཞག་གོ། །ཁ་ཆེ་བ་ནི། དེ་གཉིས་གཉེན་པོ་དང་(༣༤༤ན)
ཐག་བསྲིང་བའི་ཐོབ་པའི་ནང་དུ་འདུས་སོ་ཞེས་ཟེར་རོ། །སྨྲས་པ། བདག་ནི་ཐོག་མེད་སྲིད་པའི་ལམ་འདིར་དུ་བ་གྱུར་ནས། །བཟོད་མེད་ངེས་པར་འབྱུང་བས་བློ་ནི་རབ་དྲངས་ཏེ། །རང་ཉིད་ངེས་པར་འབྱུང་བའི་རྒྱུ་དེས་མ་རྒན་གྱི། །སྡུག་བསྔལ་མཐའ་དག་མཐོང་བས་དེ་ལས་ལྷག་པར་ཡང་། །ངེས་འབྱུང་བསྲན་བཟོད་འཚལ་ལྟ་ག་ལ་སྨོས། །དེ་ཚེ་དེ་དག་ཀུན་གྱི་སྡུག་བསྔལ་གྱི། །ཁུར་ཆེན་སྤྱི་བོར་བབས་ལས་སྡུག་བསྔལ་ཀུན། །སེལ་བའི་ཐབས་ལ་བློ་གྲོས་ཅི་ཡང་སྐྱེས། །དེ་ཚེ་ཤེས་བྱའི་གནས་དོན་ཕལ་མོ་ཆེའི། །ངེས་པ་རྙེད་པའི་ཞར་ལས་འདིར་བརྗོད་ཀྱི། །རང་དགར་རྟོག་གེས་རང་བློ་དཀྲུགས་པ་ཡི། །རྣམ་འགྱུར་གོམས་པའི་མཐུ་ལས་མ་ཡིན་ནོ། །བཞི་པ་ཤེས་པའི་ཡོན་ཏན་ལ་གཉིས་ཏེ། ཐུན་མོང་མིན་པའི་ཡོན་ཏན་དང་། ཐུན་མོང་གི་ཡོན་ཏན་ནོ། །དང་པོ་ལ། བསྟན། བཤད། བསྡུ་གསུམ། དང་པོ་ནི། སངས་རྒྱས་ཆོས་ནི་མ་འདྲེས་པ། །སྟོབས་ལ་སོགས་པ་བཅོ་བརྒྱད་དོ། །སངས་རྒྱས་ཁོ་ནས་ཟད་པ་མཁྱེན་པའི་ཚེ་བརྙེས་པར་འགྱུར་གྱི། གཞན་གྱིས་མ་ཡིན་པས་གང་ཟག་སངས་རྒྱས་ཁོ་ནའི་ཡིན་པ་མ་འདྲེས་པའི་ཆོས་ནི་སྟོབས་བཅུ་དང་། ལ་སོགས་པས་མི་འཇིགས་པ་བཞི་དང་། དྲན་པ་ཉེར་གཞག་དང་། ཐུགས་རྗེ་ཆེན་པོ་སྟེ་བཅོ་བརྒྱད་དོ། །ཉན་རང་སོགས་དང་ཐུན་མོང་མིན་པའི་མ་འདྲེས་པའི་ཆོས་སོ། ཐེག་པ་ཆེན་པོ་པས་ནི། དེ་ལས་གཞན་དུ་སྤྱོད་པས་བསྡུས་པ་ནི། སྐུ་ལ་འཁྲུལ་བ་དང་། གསུང་ལ་ཅ་ཅོ་དང་། ཐུགས་ལ་བསྙེལ་བ་དང་། ཐུགས་མཉམ་པར་མ་བཞག་པ་དང་། འཁོར་འདས་ཐ་དད་པའི་འདུ་ཤེས་དང་། སོ་སོར་མ་བརྟགས་པའི་བཏང་སྙོམས་མི་མངའ་བ་སྟེ་དྲུག་གོ། །རྟོགས་པས་བསྡུས་པ་ནི། འདུན་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་ལས་ཉམས་(༣༤༤བ)
པ་མི་མངའ་བ་དྲུག་གོ། །དུས་གསུམ་ལ་ཡེ་ཤེས་མ་ཆགས་མ་ཐོགས་པའི་ཡེ་ཤེས་ཀྱིས་བསྡུས་པ་གསུམ་དང་། སྐུ་གསུང་ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་བའི་ཕྲིན་ལས་ཀྱིས་བསྡུས་པ་གསུམ་སྟེ། མ་འདྲེས་པའི་ཆོས་བཅོ་བརྒྱད་དང་ལྡན་པས་ཉན་ཐོས་དང་རང་སངས་རྒྱས་ཀྱི་བླ་མར་གྱུར་པའོ་ཞེས་བརྗོད་དོ། །གཉིས་པ་རྒྱས་བཤད་ལ། སྟོབས་བཅུ་བཤད་པ། མི་འཇིགས་པ་བཞི། དྲན་ཉེ་གསུམ། ཐུགས་རྗེ་ཆེན་པོ་བཤད་པའོ། །དང་པོ་ལ། མཁྱེན་པའི་སྟོབས་དང་། སྐུའི་སྟོབས་སོ། །དང་པོ་ལ། ངོ་བོའི་ཁྱད་པར་དང་། སའི་ཁྱད་པར་དང་། ངེས་ཚིག་གི་ཁྱད་པར་རོ། །དང་པོ་ནི། གནས་དང་གནས་མིན་ཤེས་པ་བཅུ། །ལས་འབྲས་ལ་བརྒྱད་བསམ་གཏན་སོགས། །དབང་པོ་མོས་དང་ཁམས་ལ་ནི། །དགུའོ་ལམ་དག་ལ་བཅུ་འམ། །གཉིས་ནི་ཀུན་རྫོབ་ཤེས་པ་ཡིན། །ཟད་པ་དྲུག་གམ་བཅུ་ཡིན་ནོ། །གནས་དང་གནས་མིན་པ་མཁྱེན་པའི་སྟོབས་ནི། ཆོས་ཐམས་ཅད་ཀྱི་རང་བཞིན་དང་འབྲས་བུ་དང་རྒྱུ་དང་ནུས་པ་འདི་ནི་ངེས་པར་རྒྱུ་འདི་ལས་བྱུང་། འདི་ནི་མི་འབྱུང་ངོ་སྙམ་པའི་མཁྱེན་པ་སྟེ། གནས་དགེ་བ་ལས་མཐོ་རིས་འབྱུང་བ་དང་། མི་དགེ་བ་ལས་ངན་སོང་འབྱུང་བ་དང་། སྐྱེས་པ་རང་སངས་རྒྱས་སུ་འགྱུར་བ་སོགས་སྲིད་པ་དང་གནས་མིན་དགེ་བས་ངན་སོང་དུ་འགྲོ་བ་སོགས་མི་སྲིད་པ་སྟེ། མདོར་ན་གོང་དུ་བཤད་པའི་ཆོས་བཅུ་ལ། འདིར་བསྟན་ཤེས་པ་བཅུའི་སྒོ་ནས་མཁྱེན་ཚུལ་ནི། འདུས་བྱས་ལ་ཁམས་གསུམ་པ་དང་། ཟག་མེད་ལ་མཚུངས་ལྡན་ཡིན་མིན་གཉིས་ཀྱིས་བརྒྱད། འདུས་མ་བྱས་ལ་དགེ་བ་དང་ལུང་མ་བསྟན་ཏེ་བཅུ་ལས། ཀུན་རྫོབ་ཤེས་པའི་ཡུལ་དུ་ཆོས་བཅུ། ཆོས་ཤེས་ཀྱི་ཡུལ་དུ་ལྔ་སྟེ། འདོད་སྤྱོད་ཟག་མེད་ལ་མཚུངས་ལྡན་ཡིན་མིན་གྱིས་བཞི་འདུས་མ་བྱས་དགེ་བའོ། །རྗེས་ཤེས་ཀྱི་བདུན་ཏེ། ཁམས་གོང་མ་གཉིས་ཟག་མེད་ལ་མཚུངས་ལྡན་ཡིན་མིན་གྱི་དྲུག །འདུས་མ་བྱས་དགེ་བའོ། །སྡུག་ཀུན་ཤེས་པའི་དྲུག་སྟེ་(༣༤༥ན)
ཁམས་གསུམ་ལ་གཉིས་གཉིས་སོ། །འགོག་ཤེས་ཀྱི་འདུས་མ་བྱས་གཅིག་ཁོ་ནའོ། །ལམ་ཤེས་ཀྱི་ཟག་མེད་ཀྱི་གཉིས་སོ། །གཞན་སེམས་ཤེས་པ་གསུམ་སྟེ་ཁམས་གསུམ་གྱི་མཚུངས་ལྡན་ནོ། །ཟད་མི་སྐྱེ་ཤེས་པའི་དགུ་སྟེ་འདུས་མ་བྱས་ལུང་མ་བསྟན་མ་གཏོགས་པའོ། །ཟག་བཅས་ཀྱི་ལས་དང་འབྲས་བུ་རྣམ་པར་སྨིན་པ་སྣ་ཚོགས་པ་མཁྱེན་པའི་སྟོབས་ལ་ནི་ཤེས་པ་བརྒྱད་ཀྱིས་བསྡུས་ཏེ། འགོག་ལམ་ཤེས་པ་ནི་ཟག་མེད་ཁོ་ན་ལ་དམིགས་ལ། ལས་དང་དེའི་རྣམ་སྨིན་ནི་ཟག་བཅས་བདེན་པ་དང་པོ་གཉིས་ཀྱིས་བསྡུས་པའི་ཕྱིར། བསམ་གཏན་བཞི་དང་སོགས་པས་རྣམ་ཐར་བརྒྱད་དང་། སྟོང་པ་ཉིད་ལ་སོགས་པའི་ཏིང་ངེ་འཛིན་ལ་སོགས་པ་གསུམ་དང་། འདུ་ཤེས་མེད་པ་དང་། འགོག་པའི་སྙོམས་འཇུག་གཉིས་དང་། མཐར་གནས་ཀྱི་སྙོམས་འཇུག་དགུ་དང་། གཟུགས་མེད་སྙོམས་འཇུག་བཞིའི་རང་བཞིན་དང་། ཐོབ་པ་དང་། ཕན་འདོགས་པ་དང་། རོ་མྱོང་ལྡན་པ་སོགས་དང་། ཉམས་པ་ཆ་མཐུན་སོགས་ཀྱི་དོན་ཐོགས་མེད་དུ་མཁྱེན་པའི་སྟོབས་ནི་ཤེས་པ་དགུས་བསྡུས་ཏེ། དེ་དག་འདུས་བྱས་ཟག་བཅས་ཟག་མེད་ཁོ་ན་ལ་དམིགས་ཀྱི། འགོག་ཤེས་མ་གཏོགས་པའི་ཕྱིར། དེ་ཡང་བསམ་གཏན་རྣམ་ཐར་ཏིང་ངེ་འཛིན་སོགས་འདོད་ཁམས་ན་མེད་པས་ཆོས་ཤེས་ཀྱིས་མི་ཤེས། འོ་ན་ཁམས་གོང་ན་ཡོད་པ་རྗེས་ཤེས་ཀྱིས་ཤེས། ལམ་ལ་ཆོས་ཤེས་པས་ཤེས། དེ་ལྟར་ཤེས་པ་དེ་ཀ་ཆོས་ཤེས་རྗེས་ཤེས་ཡིན། བསམ་གཏན་རྣམ་ཐར་ཏིང་ངེ་འཛིན་དེ་དག་ཁམས་གོང་མའི་སྡུག་ཀུན་ཡིན་པས་སྡུག་ཀུན་ཤེས་ཏེ་བཞི། དེ་ཀ་ཟད་མི་སྐྱེ་ཤེས་པས་ཤེས་ཏེ། ཟད་མི་སྐྱེ་ཤེས་པ་དང་དྲུགབསམ་གཏན་རྣམ་ཐར་(༣༤༥བ)
དེ་ཀུན་རྫོབ་ཤེས་པས་ཤེས་པ་དང་བདུན། བསམ་གཏན་རྣམ་ཐར་གྱི་སེམས་དེ་ཀ་གཞན་སེམས་ཤེས་པས་ཤེས་པ་དང་བརྒྱད། བསམ་གཏན་སོགས་དེ་ཀ་ལམ་ཡིན་པས་དེ་ཤེས་པས་ལམ་ཤེས་པ་དང་དགུའོ། །དད་སོགས་དབང་པོ་ཆེ་ཆུང་གི་ངོ་བོ་ཡིན་མིན་གྱི་མཆོག་དང་མཆོག་མིན་མཁྱེན་པའི་སྟོབས་དང་། སེམས་ཅན་རྣམས་ཀྱི་སེམས་དང་སེམས་ལས་བྱུང་བའི་མོས་པ་སྣ་ཚོགས་པ་མཁྱེན་པའི་སྟོབས་དང་། ཆོས་རྣམས་ཀྱི་རང་བཞིན་དང་ངོ་བོ་སྟེ་ཁམས་སྣ་ཚོགས་པ་མཁྱེན་པའི་སྟོབས་ཏེ་གསུམ་པོ་ལ་ནི་ཤེས་པ་དགུ་དགུ་ཡིན་ཏེ། དེ་དག་ཀྱང་ཟག་བཅས་ཟག་མེད་འདུས་བྱས་ཁོ་ན་ལ་དམིགས་པའི་ཕྱིར། སློབ་དཔོན་འདུས་བཟང་ནི། ཁམས་ཞེས་པ་སྔོན་གོམས་པའི་བག་ཆགས་ཀྱིས་ཡང་དག་པར་གྲུབ་པའི་བསམ་པ་ལ་བཤད་པས། ཐེག་པ་ཆེན་པོར་བཤད་པའི་སངས་རྒྱས་ཀྱི་རྒྱུ་བདེ་གཤེགས་སྙིང་པོའི་རྒྱས་འགྱུར་གྱི་ཆ་མཁྱེན་པའང་འདིར་ཤུགས་ཀྱིས་ཐོན་པས་རང་བཞིན་གནས་རིགས་ཀྱི་ཆ་མཁྱེན་པའང་མཚོན་པ་ཡིན་ཅེས་ཇོ་བོ་སྨྲྀ་ཏིས་གསུངས། དམྱལ་བ་ནས་འགོག་པའི་བར་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དག་ལ་ནི་ཤེས་པ་བཅུ་ཡིན་ཏེ། ལམ་ནི་རྒྱུ་ཡིན་ལ། འབྲས་བུ་དང་བཅས་པ་མཁྱེན་པར་འདོད་ན་ནི་འགོག་པ་ཤེས་པའང་ཡོད་པའི་ཕྱིར་ཏེ། འགོག་པ་ནི་ལམ་གྱི་སྐྱེས་བུ་དང་བྲལ་བའི་འབྲས་བུ་ཡིན་པའི་ཕྱིར། ལམ་འབའ་ཞིག་མཁྱེན་པ་སྟོབས་སུ་འདོད་ན་ནི་ཤེས་པ་དགུ་ཡིན་ཏེ། ལམ་འདུས་བྱས་ཡིན་པས་འགོག་པ་ཤེས་པ་མེད་པའི་ཕྱིར་རོ། །འམ་ནི་དེ་དག་གི་ཁྱད་པར་རྟོགས་སུ་གཞུག་པའོ། །སྔོན་གྱི་གནས་རྗེས་སུ་དྲན་པའི་སྟོབས་དང་། འཆི་འཕོ་བ་དང་སྐྱེ་བ་མཁྱེན་པའི་སྟོབས་གཉིས་ནི་ཀུན་རྫོབ་ཤེས་པ་ཡིན་ཏེ། བདག་གཞན་གྱི་སྐྱེ་བ་འདས་པ་གཅིག་ནས་གཅིག་ཏུ་བརྒྱུད་(༣༤༦ན)
པ་དང་། སེམས་ཅན་རྣམས་འཆི་བ་དང་། འཕོ་བ་དང་། བར་དོ་དང་། སྲིད་པར་ཉིང་མཚམས་སྦྱོར་བ་རྣམས་ཐོགས་མེད་དུ་མཁྱེན་པའི་ཕྱིར་ཏེ། འདི་དག་རང་གི་མཚན་ཉིད་ལ་དམིགས་ཀྱི། སྤྱིའི་མཚན་ཉིད་བདག་མེད་པའི་རྣམ་པར་མ་ཞུགས་པའི་ཕྱིར། བདེན་པ་ལ་དམིགས་པ་ནི་མ་ཡིན་ནོ། །ཟག་པ་ཟད་པ་མཁྱེན་པའི་སྟོབས་ཀྱིས་གལ་ཏེ་ཟག་པ་ཟད་པའི་འགོག་བདེན་འབའ་ཞིག་མཁྱེན་ན། འདོད་པའི་འགོག་པ་ཤེས་པའི་ཆོས་ཤེས་དང་། ཁམས་གོང་གི་འགོག་པ་ཤེས་པའི་རྗེས་ཤེས་དང་། ཁམས་གོང་འོག་གི་འགོག་པ་ཤེས་པ་དང་། ཟད་མི་སྐྱེ་ཤེས་པ་དང་ཀུན་རྫོབ་ཤེས་པ་དང་དྲུག་ཡིན་ཏེ། འགོག་པ་ཤེས་པའི་རིགས་ཁོ་ན་ཆོས་ཤེས་ལ་སོགས་པའི་བྱེ་བྲག་གིས་ཐ་དད་དུ་བྱས་པའི་ཕྱིར་དང་། འདུས་བྱས་མ་ཡིན་པ་བདེན་པ་གཞན་གསུམ་ཤེས་པ་དང་། ཕ་རོལ་སེམས་ཤེས་མི་སྲིད་པའི་ཕྱིར་རོ། །འོན་ཏེ་ཟད་པ་ཤེས་པ་ཟག་པ་ཟད་པའི་རྒྱུད་ལ་ཡོད་པའི་ཤེས་པ་འདོད་ན་ནི་དེའི་རྒྱུད་ལ་ནི་ཤེས་པ་ཐམས་ཅད་འབྱུང་བས་ཤེས་པ་བཅུ་ཡིན་ནོ། །གཉིས་པ་སའི་ཁྱད་པར་ནི། སྔོན་གནས་འཆི་འཕོ་སྐྱེ་བའི་སྟོབས། །བསམ་གཏན་དག་ན་ལྷག་མ་ནི། །ས་རྣམས་ཀུན་ན། དེ་ལ་སྔོན་གནས་རྗེས་དྲན་དང་། འཆི་འཕོ་དང་སྐྱེ་བ་མཁྱེན་པའི་སྟོབས་གཉིས་ནི་བསམ་གཏན་གྱི་དངོས་གཞི་བཞི་པོ་དག་ན་ཡོད་དེ། འདི་དག་ནི་ཞི་ལྷག་ཟུང་དུ་འབྲེལ་བའི་ཏིང་ངེ་འཛིན་ལ་བརྟེན་ནས་བསྐྱེད་བྱ་ཡིན་གྱི། གཞན་ནི་ད་ལྟར་མ་ཡིན་པའི་ཕྱིར། སྟོབས་ལྷག་མ་བརྒྱད་པོ་ནི་འདོད་པ་དང་བསམ་གཏན་ས་དྲུག་དང་གཟུགས་མེད་བཞི་སྟེ་ས་རྣམས་ཀུན་ན་ཡོད་དེ། བསྐྱེད་སླ་བའི་ཕྱིར། ཟག་མེད་རྣམས་ནི་ཅི་རིགས་པར་ཟག་མེད་ཀྱིས་རྣམས་ལ་བརྟེན་ལ། ཀུན་རྫོབ་ཤེས་པས་བསྡུས་པའི་སྟོབས་རྣམས་ས་ཐམས་ཅད་ལ་བརྟེན་པར་འདོད་དོ། །འོན་ཀྱང་འདི་དག་ཡོངས་སུ་དག་པའི་ཏིང་ངེ་འཛིན་ལ་བརྟེན་ནས་(༣༤༦བ)
མཁྱེན་པའི་ཕྱིར་བསམ་གཏན་བཞི་པའི་སེམས་ལ་ཕལ་ཆེར་བརྟེན་པ་ཡིན། ལུས་ཀྱི་རྟེན་ནི་གླིང་གཞན་དང་ཁམས་གཞན་དང་འགྲོ་བ་གཞན་གྱི་རྟེན་ལ་སངས་རྒྱས་མི་འབྱུང་བའི་ཕྱིར་དང་། བུད་མེད་ཀྱི་རྟེན་ནི་བསམ་སྦྱོར་དམན་པའི་ཕྱིར་འཛམ་བུའི་གླིང་གི་སྐྱེས་པ་ཁོ་ན་ལ་བརྟེན་པར་འདོད་དོ། །གསུམ་པ་ངེས་ཚིག་གི་ཁྱད་པར་ནི། ཅི་ཡི་ཕྱིར། །འདིའི་སྟོབས་གང་ཕྱིར་ཐོགས་མི་མངའ། །སངས་རྒྱས་ཁོ་ནའི་ཤེས་པ་བཅུ་ནི་སྟོབས་ཞེས་བྱ་ལ། གཞན་ལའང་ཡོད་མོད་ཀྱི་སྟོབས་ཞེས་མི་བྱ་སྟེ། ཐོགས་པ་དང་བཅས་པའི་ཕྱིར། ཅིའི་ཕྱིར་མཁྱེན་པ་འདི་ལ་སྟོབས་སུ་བརྗོད་ཅེ་ན། ཤེས་བྱ་ཐམས་ཅད་ལ་ཐོགས་པ་མི་མངའ་བར་འཇུག་པ་གང་གི་ཕྱིར་རོ། །གཞན་ཉན་རང་གི་ཤེས་པ་ནི་ལ་ལར་རྟོགས་འདོད་ཀྱང་ཡུལ་དེ་ལ་མི་འཇུག་ཅིང་ཐོགས་པས་སྟོབས་ཀྱི་མིང་ཐོབ་པར་འོས་པ་མིན་ཏེ། ཤཱ་རིའི་བུས་ཐར་ཆའི་དགེ་རྩ་མ་མཐོང་ནས་རབ་ཏུ་བྱུང་འདོད་ཀྱི་མི་རབ་ཏུ་མ་བྱུང་བར་ཕྱིར་བཏང་བ་དང་། བྱ་ཞིག་ཁྲས་གཙེས་པའི་སྐྱེ་འཆིའི་མཐའ་མ་ཤེས་པ་ལྟ་བུའོ། །མདོར་ན། སངས་རྒྱས་རྣམས་ཀྱི་ཐུགས་ཀྱི་སྟོབས་ནི་ཤེས་བྱ་བཞིན་དུ་མཐའ་ཡས་པ་ཡིན་ཏེ། མཁྱེན་པ་ལ་ཐོགས་པ་མི་མངའ་བའི་ཕྱིར། གཉིས་པ་སྐུའི་སྟོབས་ནི། སྐུ་ལ་སྲེད་མེད་བུ་ཡི་སྟོབས། །གཞན་དག་ཚིགས་ན་གླང་ཆེན་སོགས། །བདུན་ཅུས་བླགས་པའི་སྟོབས་ཡིན་ནོ། །དེ་ནི་རེག་བྱའི་སྐྱེ་མཆེད་དོ། །སངས་རྒྱས་ཀྱི་སྐུ་ལ་སྲེད་མེད་བུའི་སྟོབས་མངའ་སྟེ། སྲེད་མེད་ནི་སྟོབས་ཀྱི་མིང་སྟེ། དཔེར་ན། གྲངས་ཀྱི་གནས་གཞན་དྲུག་ཅུ་ལ་གྲངས་མེད་བརྗོད་པ་བཞིན། དེས་ན་སྲེད་མེད་ནི་སྟོབས་ཡིན། དེ་གང་ལ་ཡོད་པ་དེ་ལ་སྲེད་མེད་ཀྱི་བུ་ཟེར། ཡང་བསྐལ་པ་དང་པོའི་མིའི་སྟོབས་ནི་སྲེད་མེད་ཀྱི་བུའི་སྟོབས་ཀྱང་ཟེར། གཞན་དག་སྐུའི་རུས་པའི་ཚིགས་དང་ཚིག་རེ་རེ་ན་སྲེད་མེད་ཀྱི་བུའི་སྟོབས་མངའོ་ཟེར་རོ། །དེས་སྟོན་པའི་གནས་བརྟན་བཙུན་པ་ན་རེ། སྐུའི་སྟོབས་ཀྱང་ཐུགས་ཀྱི་སྟོབས་བཞིན་མཐའ་ཡས་ཏེ། དེ་ལྟར་མ་ཡིན་ན་མཁྱེན་པའི་སྟོབས་མཐའ་ཡས་པ་སྐུའི་བཟོད་པར་མི་འགྱུར་བའི་ཕྱིར། མི་བཟོད་ན་(༣༤༧ན)
ནི་སངས་རྒྱས་བཟོད་པའི་ངང་ཚུལ་ཅན་དུའང་མི་འགྱུར་བའི་ཕྱིར་ཟེར་རོ། །སངས་རྒྱས་དང་། རང་སངས་རྒྱས་དང་། འཁོར་ལོས་སྒྱུར་པའི་ཚིག་ནི། རིམ་བཞིན་ཤིན་ཏུ་དམ་པ་ཀླུའི་མདུད་པ་དང་། (སྦྲུལ་མདུད་ལ་ཟེར།) ལུ་གུ་རྒྱུད་དང་། (དར་གོས་ཀྱི་སྤུན་ཐག་མ་ཁྲེགས་པས་ཟེར) གཟེར་བུ་བཏབ་ལ་ལྟར་སྲ་བ་ཡིན་ནོ། །སྲེད་མེད་ཀྱི་བུའི་སྟོབས་ཀྱི་ཚད་ནི་གླང་ཆེན་ཕལ་པ་བཅུའི་སྟོབས་ནི་སྤོས་ཀྱི་གླང་པོ་ཆེ་གཅིག་གི་སྟོབས་དང་། (སྤོས་ཀྱི་གླང་པོ་ནི་བྲུན་བླ་རྩིར་འོང་ཞིང་ཀླད་པ་ག་བར་དུ་འགྱུར་ལ། མཁྲིས་པ་གི་ཝང་དུ་འགྱུར་པ་ཞིག་ཡོད་སྐད།) སོགས་པས་དེ་བཞིན་དུ་ཚན་པོ་ཆེ་ཆེན་པོ་དང་། སྤོས་ཀྱི་གླང་པོ་ནི་བྲུན་བླ་རྩིར་འོང་ཞིང་ཀླད་པ་ག་བར་དུ་འགྱུར་ལ། མཁྲིས་པ་གི་ཝང་དུ་འགྱུར་བ་ཞིག་ཡོད་སྐད། རབ་གནོན་དང་། ཡན་ལག་མཆོགདང་། སྟོབས་མཆོག་དང་། སྲེད་མེད་ཀྱི་བུ་སྟེ་བདུན་པ་བཅུ་འགྱུར་དུ་གླགས་པའི་སྟོབས་ཡིན་ནོ། །ཚན་པོ་ཆེ་ཕྱིན་གླང་ཆེན་གྱི་མིང་མིན། སྐྱེས་བུ་ཚན་པོ་ཆེ་རྡོ་རྗེ་བྱ་བ་སྟོབས་ཤིན་ཏུ་ཆེ་བ་ཞིག་ཡིན་ལ་ལྷག་མ་རྣམས་ཀྱང་དེ་དང་འདྲའོ། །གཞན་ན་རེ། གླང་པོ་ཆེ་ཕལ་བ་ནས་སྟོབས་མཆོག་གི་བར་གོང་ནས་གོང་དུ་བཅུ་འགྱུར་དུ་བསྐྱེད་པ་ནི་སྲེད་མེད་ཀྱི་བུའི་སྟོབས་ཕྱེད་ཡིན་ཟེར་རོ། །སློབ་དཔོན་ནི་གནས་བརྟན་བཙུན་པའི་གཞུང་འཛུགས་པའི་ཆེད་དུ་སྐུའི་སྟོབས་ཆེ་བ་ཇི་ལྟར་ཆེས་ཆེ་པ་དེ་ལྟར་རུང་སྟེ། དེ་ལྟར་མིན་ན་མཁྱེན་པའི་སྟོབས་མཐའ་ཡས་པ་བཟོད་པར་མི་འགྱུར་བའི་ཕྱིར་དང་། གཞན་དུ་ན་ལྷ་བྱིན་གྱིས་བསད་པའི་གླང་པོ་ཆེའི་རོ་ཞབས་ཀྱི་མཐེ་བོས་འོབས་བདུན་ཟློ་བ་ཡང་མི་འགྱུར་བའི་ཕྱིར་ཞེས་བཞེད་དོ། །དེ་ལྟ་བུའི་སྐུའི་སྟོབས་དེའི་ངོ་བོ་དེ་ནི་རེག་བྱའི་སྐྱེ་མཆེད་དེ་འབྱུང་བ་ཆེན་པོའི་ཁྱད་པར་ཁོ་ན་ཡིན་གྱི་འབྱུང་བ་ལས་གྱུར་པ་ནི་མ་ཡིན་ནོ། །ཁ་ཅིག་ན་རེ། སྟོབས་དེ་ནི་འབྱུང་བ་མ་ཡིན་གྱི་སྔར་བཤད་པའི་རེག་བྱ་འཇམ་པ་ཉིད་སོགས་བདུན་དོན་གཞན་དུ་གྱུར་པ་རྒྱུར་བྱས་པའི་རེག་བྱ་བརྒྱད་པ་ཞིག་ཡིན་ནོ། །(༣༤༧བ)
ཞེས་ཟེར་རོ། །གཉིས་པ་མི་འཇིགས་པ་བཤད་པ་ལ། བསྟན་པ་དང་། བཤད་པའོ། །དང་པོ་ནི། མི་འཇིགས་པ་ནི་རྣམ་པ་བཞི། །མདོ་ལས་འབྱུང་བ་ནི། ཀྱེ་མ། ང་མངོན་པར་རྫོགས་པར་སངས་རྒྱས་པ་ལ་འདི་ན་ཆོས་འདི་དག་མངོན་པར་རྫོགས་པར་སངས་མ་རྒྱས་སོ་ཞེས་ང་ལ་དགེ་སྦྱོང་ངམ་བྲམ་ཟེ་གང་ཡང་རུང་བ་འགའ་ཡང་ཆོས་དང་མཐུན་པས་རྒོལ་ཅིང་གླེང་པར་བྱེད་པའི་རྒྱུ་མཚན་ཡང་དག་པར་རྗེས་སུ་མ་མཐོང་ངོ་། །དེ་ལྟར་ངས་རྒྱུ་མཚན་ཡང་དག་པར་རྗེས་སུ་མ་མཐོང་བས་བདེ་བ་ཐོབ་པ་དང་འཇིགས་པ་མེད་པར་གྱུར་ཅིང་མི་འཇིགས་པ་ཐོབ་པར་གནས་ཏེ། ཁྱུ་མཆོག་གི་གནས་རླབས་པོ་ཆེར་ཞལ་གྱིས་འཆེ་ཞིང་ཚངས་པའི་འཁོར་ལོ་བསྐོར། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པ་འདི་ནི་མི་འཇིགས་པ་དང་པོ་ཡིན་ནོ། །ཀྱེ་མ། ང་ཟག་པ་ཟད་པ་ལ་ཟག་པ་འདི་དག་མ་སྤངས་སོ་ཞེས་པ་ལ་ཞེས་པ་ནས་འདི་ནི་མི་འཇིགས་པ་གཉིས་པ་ཡིན་ནོ། །ཞེས་དང་། འདི་ན་ངས་ཉན་ཐོས་རྣམས་ལ་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟན་ན་བར་དུ་གཅོད་པར་མི་འགྱུར་རོ་ཞེས་ང་ལ་ཞེས་སོགས་མི་འཇིགས་པ་གསུམ་དང་། འདི་ན་ངས་ཉན་ཐོས་རྣམས་ལ་ངེས་པར་འབྱིན་པའི་ལམ་དུ་གསུངས་པ་ངེས་པར་འབྱིན་པ་སྡུག་བསྔལ་ཡང་དག་པར་ཟད་པར་བྱེད་པའི་ཆེད་དུ་ངེས་པར་འབྱུང་བ་ལ་སྡུག་བསྔལ་གྱི་མཐར་བྱེད་པའི་ཆེད་དུ་ངེས་པར་འབྱུང་བ་མ་ཡིན་ཅེས་ང་ལ་ཞེས་བྱ་བ་སྔ་མ་བཞིན་མི་འཇིགས་པ་བཞི་པ་ཡིན་ནོ་ཞེས་འབྱུང་ངོ་། །གཉིས་པ་ནི། ཇི་ལྟར་སྟོབས་ནི་དང་པོ་དང་། །བཅུ་པ་གཉིས་པ་བདུན་པ་བཞིན། །མི་འཇིགས་པ་བཞི་པོ་དེ་དག་ཀྱང་ཇི་ལྟར་སྟོབས་དང་པོ་གནས་དང་གནས་མིན་མཁྱེན་པའི་སྟོབས་ཤེས་པ་བཅུ་དང་། ས་ཐམས་ཅད་ཀྱིས་བསྡུས་པ་བཞིན་དུ་མི་འཇིགས་པ་དང་པོ་འདི་ཡང་དེ་དང་འདྲའོ། །སྟོབས་བཅུ་པ་(༣༤༨ན)
ཟག་པ་ཟད་པ་མཁྱེན་པའི་སྟོབས། ཤེས་པ་དྲུག་གམ་བཅུ་དང་། ས་བཅུ་གཅིག་གིས་བསྡུས་པ་དེ་བཞིན་དུ་མི་འཇིགས་པ་གཉིས་པ་འདི་ཡང་དེ་དང་འདྲའོ། །སྟོབས་གཉིས་པ་ལས་བདག་གིར་བྱ་བ་མཁྱེན་པའི་སྟོབས་འགོག་ལམ་ཤེས་པ་མ་གཏོགས་པ་བརྒྱད་དང་། ས་ཐམས་ཅད་ཀྱིས་བསྡུས་པ་དེ་བཞིན་དུ་མི་འཇིགས་པ་གསུམ་པ་འདིའང་ཤེས་པ་བརྒྱད་ཀྱི་རང་བཞིན་དང་ས་ཐམས་ཅད་ཀྱིས་བསྡུས་པ་ཡིན་ཏེ། བདེན་པ་དང་པོ་གཉིས་ཀྱིས་བསྡུས་པ་ཁོ་ནས་བར་དུ་གཅོད་ཀྱི། འགོག་ལམ་གྱིས་བསྡུས་པས་བར་དུ་མི་གཅོད་པའི་ཕྱིར། སྟོབས་བདུན་པ་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་ཤེས་པ་བཅུའམ་དགུ་དང་། ས་ཐམས་ཅད་ཀྱིས་བསྡུས་པ་དེ་བཞིན་དུ་མི་འཇིགས་པ་བཞི་པ་འདིའང་ཤེས་པ་བཅུའམ་དགུའི་རང་བཞིན་དང་ས་ཐམས་ཅད་ཀྱིས་བསྡུས་པ་ཡིན་ཏེ། ཟག་བཅས་ཟག་མེད་ཀྱི་ལམ་འབྲས་བུ་དང་བཅས་པ་བཟུང་ན་བཅུ་དང་། འབྲས་བུ་མེད་པ་བཟུང་ན་དགུ་ཡིན་པའི་ཕྱིར་རོ། །བྱེ་སྨྲ་ནི་ཤེས་པ་ཉིད་མི་འཇིགས་པར་འདོད་ལ། སློབ་དཔོན་ནི་མི་འཇིགས་པ་མི་སྐྲག་པ་ཡིན་པས་ཤེས་པ་ཉིད་མ་ཡིན་གྱི། ཤེས་པའི་འབྲས་བུ་ཡིན་ཏེ། ཤེས་པ་ལ་བརྟེན་ནས་མི་སྐྲག་པ་འབྱུང་བའི་ཕྱིར། འབྲས་མིང་རྒྱུ་ལ་བཏགས་པ་ཡིན་ཏེ། ལྡེང་ཀ་རྐང་ནད་ཅེས་བརྗོད་པ་བཞིན་ནོ། །མི་འཇིགས་པ་བཞིའི་སྔ་མ་གཉིས་ཀྱིས་རང་གི་ཡེ་ཤེས་དང་སྤངས་པ་ཕུན་ཚོགས་བརྗོད། ཕྱི་མ་གཉིས་ཀྱིས་གཞན་ལ་ཕན་པ་ཕུན་ཚོགས་ཏེ། ཡང་དག་མིན་པའི་ལམ་བཟློག་པའི་ཕྱིར་དང་། ཡང་དག་པའི་ལམ་བསྟེན་པའི་ཕྱིར་རོ། །མི་བརྫི་བའི་ཐོགས་མེད་ཀྱི་མཁྱེན་པ་ནི་སྟོབས་ཡིན་ལ། མི་ཞུམ་པའི་རྒྱུ་ནི་མི་འཇིགས་པ་སྟེ་གཞན་གྱི་ཟིལ་གྱིས་མི་ནོན་པ་དེ་ལྟར་ན་སྟོབས་(༣༤༨བ)
དང་། གཞན་ཟིལ་གྱིས་གནོན་པ་དེ་ལྟར་ན་མི་འཇིགས་པའོ། །གཞན་གྱི་སྟོབས་ནི་དཔའ་བ་དང་མི་འཇིགས་པ་ནི་བརྟན་པ་ཡིན་པས། འདི་གཉིས་ཀྱི་བྱ་བ་ཐ་དད་དེ་སྟོབས་ཀྱི་དོན་ནི་འདོད་པའི་དོན་སྒྲུབ་པ་དང་། མི་འཇིགས་པའི་དོན་ནི་མི་ཞུམ་པའི་དོན་ནོ་ཞེས་ཟེར་རོ། །གསུམ་པ་དྲན་ཉེ་གསུམ་བཤད་པ་ནི། དྲན་དང་ཤེས་བཞིན་བདག་ཉིད་གསུམ། །དྲན་པ་ཉེར་གཞག་འཁོར་གྱི་བྱེ་བྲག་ལ་གསུམ་སྟེ། མདོ་ལས་དགེ་སློང་དྲན་པ་ཉེར་གཞག་གསུམ་པོ་འདི་དག་འཕགས་པས་བསྟེན་ནས། འཁོར་ལ་རྗེས་སུ་སྟོན་པར་འོས་ན། སྟོན་པ་ཐུགས་རྗེ་ཅན་ཉན་ཐོས་རྣམས་ལ་ཆོས་སྟོན་པར་མཛད་ཅིང་ཉན་ཐོས་དེ་དག་དེ་ལ་ཉན་རྣ་གཏོད། ཀུན་ཤེས་པའི་སེམས་འཇོག་ཆོས་ཀྱི་རྗེས་སུ་མཐུན་པའི་ཆོས་སྒྲུབ། བསྟན་པ་དང་མི་འགལ་བར་བྱེད་ན་དེས་དེ་བཞིན་གཤེགས་པ་དགྱེས་པར་མི་འགྱུར་ཐུགས་བདེ་བ་མ་ཡིན། ཐུགས་ཡ་ཡོར་མི་འགྱུར་གྱི། དེ་ལ་དེ་བཞིན་གཤེགས་པ་དྲན་པ་དང་ཤེས་བཞིན་བཏང་སྙོམས་སུ་བཞུགས་ཏེ། འཕགས་པས་དེ་དག་བསྟེན་ན་ཚོགས་ལ་སྟོན་པར་འོས་པའི་དྲན་པ་ཉེར་གཞག་དང་པོ་ཡིན་ནོ། །ཞེས་དང་། དེ་ལས་བཟློག་ཀྱང་མནར་སེམས་སུ་མི་འགྱུར། མི་བཟོད་པ་མ་ཡིན། འཚིག་པའང་མ་ཡིན། ཐུགས་མ་རངས་པའང་མི་མངའ། ཞེས་སོགས་གཉིས་པ་དང་། ཁ་ཅིག་ཉན། ཁ་ཅིག་མི་ཉན་པ་དེ་ལ་གཉིས་ཀ་མི་འགྱུར་བར་དྲན་པ་དང་ཤེས་བཞིན་དུ་བཏང་སྙོམས་སུ་བཞུགས་ཞེས་སོགས་རྒྱ་ཆེར་འབྱུང་བ་བཞིན་ནོ། །དྲན་པ་ཉེར་གཞག་གསུམ་པོ་འདི་དག་ནི་དྲན་པ་དང་ཤེས་བཞིན་ཤེས་རབ་ཀྱི་བདག་ཉིད་དག་ཡིན་ལ། ཤེས་རབ་ཀྱི་ཆ་ནི་ཀུན་རྫོབ་ཤེས་པ་ཡིན་ནོ། །འོ་ན་ཉན་ཐོས་ཉོན་མོངས་པ་སྤངས་པ་རྣམས་ལའང་འཁོར་གུས་པས་ཉན་མི་ཉན་གཉིས་ཀ་ལ་ཆགས་སྡང་མི་འབྱུང་བ་ཡོད་པའི་ཕྱིར། སངས་རྒྱས་ཀྱི་(༣༤༩ན)
ཆོས་མ་འདྲེས་པར་ཇི་ལྟར་འགྱུར་ཞེ་ན། ཉན་ཐོས་ཀྱིས་ནི་ཆགས་སྡང་གི་བག་ཆགས་མ་སྤངས་ལ་སངས་རྒྱས་ཀྱིས་སྤངས་པའི་ཕྱིར་དེར་བཞག་གོ། །བག་ཆགས་ནི་ཉན་ཐོས་ལ་སྔོན་ཉོན་མོངས་སྤྱད་པའི་མཐུས་ལུས་ངག་གི་གཡོ་བ་འགྱུར་བའི་རྒྱུ་ནུས་པའི་ཁྱད་པར་སེམས་ལ་ཡོད་པ་ལ་འདོད་ཅིང་། བཙུན་པ་གོ་ཆ་མཐའ་ཡས་ནི་བག་ཆགས་ནི་ལུང་དུ་མ་བསྟན་པའི་སེམས་ཀྱི་ཁྱད་པར་ལ་འདོད་དོ། །སློབ་དཔོན་གྱིས། ཡང་ན། ཉན་ཐོས་རྣམས་སངས་རྒྱས་གང་གི་འཁོར་དུ་ཡོད་པ་ཡིན་པ་དེ་ལས་སྟོན་པ་དེ་ལ་ནི་གུས་པར་ཉན་པ་དང་མི་གུས་པར་ཉན་པ་དང་། གཉིས་པ་དེ་དག་ལ་ཤིན་ཏུ་ཡིད་བདེ་བ་ལ་སོགས་པའི་གོ་སྐབས་སུ་འགྱུར་གྱི། གཞན་སྟོན་པ་ལ་ནི་དེ་ལྟར་མ་ཡིན་པས་སྟོན་པ་དེ་ཁོ་ན་ལ་ཡིད་བདེ་སོགས་དེ་དག་མི་འབྱུང་བས་ཡ་མཚན་དུ་རྣམ་པར་བཞག་གི། ཉན་ཐོས་ལ་ནི་མ་ཡིན་ནོ། །ཡང་ན། རང་བས་དམན་པ་གཅིག་གིས་གནོད་པ་བྱས་པ་ལ་བཟོད་པ་དེ་ཡ་མཚན་ཆེའི། རང་བས་ཁས་དྲག་པ་གཅིག་གིས་གནོད་པ་བྱས་པ་བཟོད་པ་ལ་ཡ་མཚན་རྒྱུ་མེད་དེ། དེ་དང་འདྲ་བར་ཉན་ཐོས་ཀྱི་འཁོར་དུ་གསོལ་བ་དེ་རང་། སངས་རྒྱས་ཀྱིས་དབང་གི་ཉན་རང་མི་དབང་བས་ན་དེ་ལ་དགའ་མི་དགའ་མེད་པས་དེར་ཡ་མཚན་རྒྱུ་མེད། དབང་བ་སངས་རྒྱས་ལ་དགའ་མི་དགའ་མེད་པ་དེ་ཡ་མཚན་ཆེའོ་ཞེས་འཆད་དོ། །བཞི་པ་ཐུགས་རྗེ་ཆེན་པོ་བཤད་པ་ནི། ཐུགས་རྗེ་ཆེན་པོ་ཀུན་རྫོབ་བློ། །ཚོགས་དང་རྣམ་པ་སྤྱོད་ཡུལ་དང་། །མཉམ་པའི་ཕྱིར་དང་ཆེས་ཆེའི་ཕྱིར། །ཐ་དད་བྱ་བ་རྣམ་པ་བརྒྱད། །ཐུགས་རྗེ་ཆེན་པོ་ནི་ཀུན་རྫོབ་པའི་བློའམ་ཤེས་པའི་བདག་ཉིད་དེ། དེ་ལྟར་མིན་ན་སྙིང་རྗེ་བཞིན་ཞེ་སྡང་མེད་པའི་ངོ་བོ་ཙམ་ཡིན་ན་ཁམས་གསུམ་པའི་སེམས་ཅན་ཐམས་ཅད་ལ་དམིགས་པའང་མི་འགྲུབ་ལ། སྙིང་རྗེ་བཞིན་སྡུག་བསྔལ་གསུམ་གྱི་རྣམ་པ་ཅན་མ་ཡིན་པར་ཡང་འགྱུར་བའི་ཕྱིར། ཅིའི་ཕྱིར་ཆེན་པོར་བརྗོད་ན། བསོད་ནམས་དང་ཡེ་ཤེས་ཀྱི་ཚོགས་ཆེན་པོས་ཡང་དག་པར་འགྲུབ་པའི་ཕྱིར། རྣམ་པ་ནི་སྡུག་བསྔལ་གསུམ་ལ་རྟོགས་པའི་ཕྱིར། དམིགས་པ་སྤྱོད་ཡུལ་ནི་ཁམས་གསུམ་གྱི་སེམས་ཅན་ཐམས་ཅད་ལ་དམིགས་ཤིང་། (༣༤༩བ)
འདུ་བྱེད་ཀྱི་སྡུག་བསྔལ་ཅན་དུ་དྲན་པ་མཉམ་པ་ཉིད་དུ་འཇུག་པའི་ཕྱིར་དང་། ཤེས་རབ་ཀྱི་ངོ་བོ་ཡིན་པས་ཤིན་ཏུ་རྣོ་བ་དེ་ལས་ཆེས་ཆེ་བ་མེད་པའི་ཕྱིར་རོ། །སྙིང་རྗེ་དང་ཐུགས་རྗེ་ལ་ཐ་དད་དུ་བྱ་བ་ཅི་ཡོད་ན། ངོ་བོ་སོགས་ཐ་དད་དུ་བྱ་བ་རྣམ་པ་བརྒྱད་ཡོད་དེ། སྙིང་རྗེ་དང་ཐུགས་རྗེ་ཆེན་པོ་ཆོས་ཅན། ངོ་བོ་ལས་ཐ་དད་དུ་ཡོད་དེ། ཞེ་སྡང་མེད་པ་དང་གཏི་མུག་མེད་པའི་ངོ་བོ་ཡིན་པའི་ཕྱིར། རྣམ་པ་ལས་ཐ་དད་དེ། སྡུག་བསྔལ་གཅིག་དང་གསུམ་གྱི་རྣམ་པ་ཅན་ཡིན་པའི་ཕྱིར། དམིགས་པ་ལས་ཐ་དད་དེ། འདོད་པའི་ཁམས་གཅིག་དང་ཁམས་གསུམ་གྱི་སེམས་ཅན་ལ་དམིགས་པའི་ཕྱིར། ས་ལས་ནི་ཐ་དད་ཡོད་དེ། བསམ་གཏན་དང་པོ་སྐོར་གསུམ་གཅིག་ཏུ་བྱ་སྟེ་གོང་མ་གསུམ་དང་བཅས་པས་བསམ་གཏན་ས་བཞི་དང་བསམ་གཏན་བཞི་པ་ཁོ་ནའི་ས་པ་ཡིན་པའི་ཕྱིར། རྒྱུད་ལས་དེ་གཉིས་ཐ་དད་དེ་ཉན་ཐོས་རང་རྒྱལ་དང་། སོ་སྐྱེའི་རྒྱུད་ལ་སྐྱེ་བའི་ཕྱིར། དེ་གཉིས་ཐོབ་པ་ལས་ཐ་དད་དེ། འདོད་ཁམས་དང་སྲིད་རྩེ་ལས་འདོད་ཆགས་དང་བྲལ་བ་ཐོབ་པའི་ཕྱིར། བྱ་བ་ལས་ཐ་དད་དེ། སྙིང་རྗེ་ནི་ཉན་ཐོས་སོགས་སྙིང་རྗེ་བར་བྱེད་པ་འབའ་ཞིག་ཏུ་ཟད་པས་ཡིད་ལ་ཉམ་ང་བར་བྱེད་ཀྱི་འཁོར་བའི་འཇིགས་པ་ལས་སྐྱོབ་མི་ནུས་ལ། ཐུགས་རྗེ་ཆེན་པོས་ནི་བཅོམ་ལྡན་འདས་ཀྱི་ཐུགས་རྗེ་མཛད་པས་འཁོར་བའི་འཇིགས་པ་ལས་ཡོངས་སུ་སྐྱོབ་པའི་ཕྱིར་རོ། །བྱེད་ལས་ཐ་དད་དེ། སྙིང་རྗེ་ནི་སྡུག་བསྔལ་བ་ཁོ་ན་ལ་སྙིང་རྗེ་བས་མི་འདྲ་བར་སྙིང་རྗེ་བྱེད་པ་དང་། ཐུགས་རྗེ་ཆེན་པོ་ནི་སེམས་ཅན་ཐམས་ཅད་ལ་འདྲ་བར་ཐུགས་རྗེ་མཛད་པའི་ཕྱིར་རོ། །གསུམ་པ་མཇུག་བསྡུ་བ་ལ། སངས་རྒྱས་ཀྱི་ཁྱད་པར་མཉམ་པའི་ཚུལ་དང་། མི་མཉམ་པའི་ཚུལ་ལོ། །དང་པོ་ནི། སངས་རྒྱས་ཐམས་ཅད་ཚོགས་དང་ནི། །ཆོས་སྐུ་འགྲོ་བའི་དོན་སྤྱོད་པས། །མཉམ་པ་ཉིད་དེ། སངས་རྒྱས་ཐམས་ཅད་ནི་ཆེ་བའི་ཡོན་(༣༥༠ན)
ཏན་གྱིས་མཉམ་པ་ཉིད་དེ་རྒྱུ་སྔོན་བསོད་ནམས་ཡེ་ཤེས་ཀྱི་ཚོགས་རྫོགས་པས་ཡང་དག་པར་འགྲུབ་པ་དང་། འབྲས་བུ་ཟག་མེད་ཆོས་ཀྱི་རྒྱུན་ནམ་སེམས་གནས་ཡོངས་སུ་གྱུར་པའི་ཚེས་སྐུ་ཡོངས་སུ་གྲུབ་པ་དང་། ཕྲིན་ལས་འགྲོ་བའི་མཐོ་རིས་དང་བྱང་གྲོལ་གྱི་དོན་སྒྲུབ་པར་སྤྱོད་པས་མཉམ་པའི་ཕྱིར་རོ། །གཉིས་པ་ནི། སྐུ་ཚེ་དང་། །རིགས་དང་སྐུ་བོང་ཚོད་ཀྱིས་མིན། །དུས་ཇི་ལྟ་བ་བཞིན་སྐྱེ་རྒུ་ཚེ་ལོ་བརྒྱད་ཁྲི་སོགས་ཚེ་རིང་བའི་ཚེ་སྐུ་ཚེ་རིང་བ་དང་། ཚེ་ལོ་བརྒྱ་པའི་ཚེ་སྐུ་ཚེ་ཐུང་བ་དང་། དུས་ཇི་ལྟ་བ་བཞིན་འཇིག་རྟེན་ན་རྒྱལ་རིགས་དང་བྲམ་ཟེ་གང་བསྐུར་བའི་ཚེ་རིགས་དེ་དང་། (འདིའི་ཆོས་སྐུ་ནི་ཐེག་ཆེན་ནས་བཤད་པའི་ཆོས་སྐུ་དང་མི་གཅིག་པས་ཉོན་མོངས་པ་མཐའ་དག་སྤངས་པའི་སེམས་ལ་བཤད་པ་ཡིན་ནོ། །)དུས་ཇི་ལྟ་བ་བཞིན་འཇིག་རྟེན་ན་འོད་སྲུངས་དང་གདུང་གང་བསྐུར་བ་དེ་གདུང་འཛིན་པ་དང་། (ཡང་སངས་རྒྱས་སྨོན་ལམ་སྟོབས་ཀྱི་རྒྱལ་པོ་ནི་གདུལ་བྱ་ཚེ་རིང་ཡང་ལོ་བདུན་ལས་མ་བཞུགས་ཟེར། ཉིན་ཞག་བདུན་ཡང་ཟེར་རོ། །)འཇིག་རྟེན་ན་བོང་ཚོད་ཆུང་བ་དང་ཆེ་བའི་ཚེ་ཐུབ་པ་དང་བྱམས་པ་སོགས་སྐུ་བོང་ཚོད་ཀྱིས་མཉམ་པ་མིན་ནོ། །(བྲམ་ཟེ་སྒོ་ཚན་གཅིག་འོད་སྲུང་ཡིན་ཙ་ན་སྒོ་ཚན་དེའི་མིང་གིས་སངས་རྒྱས་ལ་བཏགས་པའོ། །)ཕུན་སུམ་ཚོགས་པ་གསུམ་པོ་འདི་ཁོ་ན་ཡིད་ལ་བྱེད་པའི་མཁས་པ་ནི་སངས་རྒྱས་རྣམས་ལ་དགའ་བ་དང་གུས་པ་ཆེན་པོ་བསྐྱེད་པར་ནུས་ཏེ། (མཐེ་བོང་ཅན་གྱི་འཇིག་རྟེན་གྱི་སངས་རྒྱས་སྐར་མ་ལ་དགའ་བ་ནི་སྐུ་མཐེ་བོང་ཙམ་མོ། །)ཚོགས་གཉིས་ཀྱི་རྒྱུ་ཕུན་སུམ་ཚོགས་པ་དང་། འབྲས་བུ་ཆོས་ཀྱི་སྐུ་ཕུན་སུམ་ཚོགས་པ་དང་། འགྲོ་བའི་དོན་སྤྱོད་པ་ཕན་འདོགས་པ་ཕུན་སུམ་ཚོགས་པའོ། །དང་པོ་ལ་བཞི་སྟེ། བསོད་ནམས་ཕར་ཕྱིན་ལྔ་དང་། ཡེ་ཤེས་ཤེར་ཕྱིན་གྱི་ངོ་བོ་ཚོགས་ཐམས་ཅད་ལ་གོམས་པ་ཡང་ཡང་དུ་སྦྱོར་བ་དང་། ཡུན་རིང་པོ་བསྐལ་པ་གྲངས་མེད་གསུམ་དུ་གོམས་པ་དང་། དེའང་བར་དུ་ཆད་པ་མེད་པ་དང་། གུས་པ་དྲག་པོར་གོམས་པའོ། །གཉིས་པ་སྤངས་པ་ལའང་(༣༥༠བ)
བཞི་སྟེ། ཡེ་ཤེས་དང་། སྤངས་པ་དང་། མཐུ་དང་། གཟུགས་ཀྱི་སྐུ་ཕུན་སུམ་ཚོགས་པའོ། །ཕྱི་མ་འདི་གཉིས་ཡེ་ཤེས་ཀྱི་འབྲས་བུ་དང་། ཡེ་ཤེས་ཀྱི་རྟེན་ཡིན་པས་ཡེ་ཤེས་སུ་བསྡུའོ་ཟེར། དང་པོ་ལའང་བཞི་སྟེ། བདག་ཉིད་མངོན་པར་རྫོགས་པར་བྱང་ཆུབ་པའི་དོན་གྱིས་མ་བསྟན་པར་མཁྱེན་པ་དང་། རང་སྤྱིའི་མཚན་ཉིད་མ་ལུས་པ་ཐུགས་སུ་ཆུད་པས་ཐམས་ཅད་མཁྱེན་པ་དང་། བདེན་བཞིའི་རྣམ་པ་ཀུན་ཐམས་ཅད་མཁྱེན་པ་དང་། བཞེད་པ་ཙམ་གྱིས་ཐུགས་སུ་ཆུད་པས་མ་འབད་པར་མཁྱེན་པའོ། །སྤངས་པ་ལ་བཞི་སྟེ། མཐོང་སྒོམ་གྱི་སྤང་བྱའི་ཉོན་མོངས་ཁམས་གསུམ་པ་ཐམས་ཅད་སྤངས་པ་དང་། ཡོངས་སུ་མི་ཉམས་པའི་སྒོ་ནས་གཏན་དུ་བ་དང་། ཉན་རང་དགྲ་བཅོམ་དང་ཐུན་མོང་མིན་པས་བག་ཆགས་ཀྱི་རྗེས་སུ་འབྲེལ་བ་དང་བཅས་པ་སྤངས་པ་དང་། གཉིས་ཀའི་ཆ་ལས་གྲོལ་བ་ཏིང་ངེ་འཛིན་དང་སྙོམས་འཇུག་གི་སྒྲིབ་པ་ཐམས་ཅད་སྤངས་པའོ། །མཐུ་ཡང་བཞི་སྟེ། ཕྱིའི་ཡུལ་སྔོན་མེད་འབྱིན་པ་སྤྲུལ་པ་དང་། རྡོ་སོགས་གསེར་དུ་བསྒྱུར་བ་དང་། ཡུན་རིང་དུ་གནས་པར་བྱིན་གྱིས་རློབས་པའི་མངའ་དབང་ཕུན་ཚོགས་དང་། སྐུ་ཚེ་གཏོང་འཇོག་བྱིན་རློབས་ལ་མངའ་དབང་ཕུན་ཚོགས་དང་། སྒྲིབ་པ་ལ་གཤེགས་ནམ་མཁའ་ལ་གཤེགས། ཤིན་ཏུ་རིང་བ་ལ་མྱུར་དུ་གཤེགས་པ་དང་། ཆུང་ངུ་རྡུལ་ཕྲ་རབ་ཏུ་འཇིག་རྟེན་གྱི་ཁམས་མང་པོ་འཇུག་པར་མངའ་མཛད་པ་དང་ཡ་མཚན་གྱི་ཆོས་ནར་མ་གཤེགས་པ་ན་མཐོ་དམན་མཉམ། ལོང་འོན་གྱིས་མིག་རྣ་ཐོབ། སྨྱོན་པས་དྲན་པ་རྙེད་པ་སོགས་རྣམ་པ་སྣ་ཚོགས་ཕུན་སུམ་ཚོགས་པའོ། །གཟུགས་སྐུ་ཕུན་ཚོགས་ཀྱང་བཞི་སྟེ། མཛོད་སྤུ་དང་གཙུག་ཏོར་སོགས་སྐྱེས་བུ་ཆེན་པོར་མཚོན་བྱེད་མཚན་ཕུན་ཚོགས་དང་། སོར་མོ་ཟླུམ་པ་སོགས་སྐྱེས་བུ་ཆེན་པོའི་ངོ་བོ་གསལ་བྱེད་དཔེ་(༣༥༡ན)
བྱད་བཟང་པོ་ཕུན་ཚོགས་དང་། སྲེད་མེད་ཀྱི་བུའི་སྟོབས་ཕུན་ཚོགས་དང་། གདུང་རྡོ་རྗེ་ལྟ་བུར་སྲ་ལ། (སྐུ་དེ་བཞིན་གཤེགས་པའི་སྐུ་གདུང་ནི་ནོར་བུར་གྱུར་ན། རང་སངས་རྒྱས་དང་ཉན་ཐོས་ལ་སོགས་པའི་རུས་པ་ནི་མཇུག་ཏུ་རྡོར་འགྱུར་བའང་ཡོད་དོ། །)སྲ་བ་དེ་རིན་པོ་ཆེར་འགྱུར། མཇུག་ཏུ་ནམ་ཀའི་བག་ལ་ཞབ་ཉིད་ཀྱིས་ཕུན་སུམ་ཚོགས་པའོ། །གསུམ་པ་ལ་བཞི་སྟེ། ངན་སོང་གསུམ་དང་འཁོར་བའི་སྡུག་བསྔལ་ལས་གཏན་ཐར་དུ་མཛད་པ་ཕུན་ཚོགས་དང་། ཡང་ན་ཐེག་གསུམ་དང་། བདེ་འགྲོ་ལ་འགོད་བར་མཛད་པ་ཕུན་ཚོགས་སོ། །དེ་ལྟར་དེ་དག་སངས་རྒྱས་ཀྱི་ཆེ་བའི་བདག་ཉིད་མདོར་བསྡུས་པ་སྟེ། སྐྱེས་བུ་དམ་པ་དད་པ་སྐྱེས་པ་སངས་རྒྱས་ལ་བསྟོད་པར་འགྱུར་བ་དེ་ཐམས་ཅད་ནི་གསུམ་པོ་འདི་ཁོ་ནས་མོས་པར་བྱེད་པ་ཡིན་ནོ། །དེ་བཞིན་གཤེགས་པའི་ཡོན་ཏན་ཕུན་སུམ་ཚོགས་པ་དེ་དབྱེ་ན་མཐའ་ཡས་ཏེ། བཅོམ་ལྡན་འདས་སྐུ་ཚེ་བསྐལ་པ་གྲངས་མེད་དུ་མར་བྱིན་གྱིས་བརླབས་པར་གྱུར་པའི་ཆེ་བའི་བདག་ཉིད་དེ་ལྟར་ན། ཡོན་ཏན་མཐའ་དག་ལ་མཁྱེན་པ་དང་བརྗོད་པར་སྤྱོད་དེ་སྤྱོད་མི་ནུས་པའི་ཕྱིར། སྟོང་གསུམ་གྱི་འཇིག་རྟེན་ཐམས་ཅད་སངས་རྒྱས་སུ་གྱུར། སངས་རྒྱས་རེ་རེ་ལ་དབུ་སྟོང་། དབུ་རེ་རེ་ལ་ཞལ་སྟོང་སྟོང་། ཞལ་རེ་ལ་ལྗགས་སྟོང་ཡོད་པའི་ལྗགས་དེ་རྣམས་ཀྱིས་ཡོན་ཏན་བསྐལ་བ་དཔག་མེད་དུ་བརྗོད་ཀྱང་ཚུལ་ཁྲིམས་གཅིག་པུའི་ཡོན་ཏན་བརྗོད་ཀྱང་མི་རྫོགས་སོ། །དེས་ན་དེ་བཞིན་གཤེགས་པ་རྣམས་ཀྱི་ཡོན་ཏན་ཡེ་ཤེས་མཐུ་ཕན་འདོགས་མཐས་གཏུགས་པ་མེད་པས་མཐའ་ཡས་ཤིང་གཞན་ལ་མེད་པས་རྨད་དུ་བྱུང་བ་རིན་པོ་ཆེ་ཆེན་པོ་སེམས་ཅན་ལ་ཕན་པར་བྱེད་པའི་འབྱུང་གནས་ཡིན་ནོ། །འོན་ཀྱང་བྱིས་པ་རང་ལ་ཡོན་ཏན་མེད་པས་ཡོན་ཏན་ལ་མོས་པ་(༣༥༡བ)
བཅོམ་པ་རྣམས་ནི་སངས་རྒྱས་ཀྱི་ཡོན་ཏན་འབྱོར་པ་དེ་ལྟ་བུ་ཐོས་སུ་ཟིན་ཀྱང་སངས་རྒྱས་དང་དེའི་ཆོས་ལ་གུས་པར་མི་བྱེད་ཀྱི། མཁས་པ་རྣམས་ནི་སྙིང་ཁོང་རུས་པའི་གཏིང་ཡན་ཆད་ནས་ཀྱང་བཅོམ་ལྡན་འདས་དང་། དེའི་ཆོས་ལ་རབ་ཏུ་དད་པར་འགྱུར་ཏེ། གཅིག་ཏུ་རབ་ཏུ་དད་པ་དེ་དག་ནི་མ་གཏོགས་པར་དད་པ་ཙམ་གྱིས་ཀྱང་མ་ངེས་པའི་སྡིག་པ་བགྱིས་པའི་རྣམ་སྨིན་གྱི་ཆོས་རྣམས་འབྱུང་མི་ནུས་པར་ཟིལ་གྱིས་མནན་ནས་ལྷ་དང་མིའི་ལེགས་པ་ཉམས་སུ་མྱོང་ནས་བགྲོད་བྱའི་མཆོག་མྱ་ངན་ལས་འདའ་བར་འགྱུར་རོ། །དེའི་ཕྱིར་དེ་བཞིན་གཤེགས་པ་ནི་བསོད་ནམས་ཀྱི་ཞིང་བླ་ན་མེད་པ་ཞེས་བྱ་སྟེ། དེ་ལ་བསོད་ནམས་བསྐྲུན་པས་འབྱིན་པར་ངེས་པས་འབྲས་བུ་མེད་པ་མ་ཡིན་ལ། འབྲས་བུ་ལྷ་ཡུལ་ལ་སོགས་ཡིད་འོང་བསྐྱེད་པ་དང་། འབྲས་བུ་མང་བས་མཆོག་ཏུ་གྱུར་པ་དང་། མཐོང་ཆོས་ལ་མྱོང་བས་མྱུར་བ་དང་། མྱང་འདས་ཀྱི་རྒྱུར་གྱུར་པས་འབྲས་བུ་མཐའ་བཟང་བའི་ཕྱིར་རོ། །གཉིས་པ་ཐུན་མོང་གི་ཡོན་ཏན་ལ། བསྟན། བཤད་གཉིས་ལས། དང་པོ་ལའང་། མདོར་བསྟན་པ་དང་། ཅུང་ཟད་རྒྱས་པར་བཤད་པའོ། །དང་པོ་ནི། ཆོས་གཞན་སློབ་དང་ཐུན་མོང་ཡིན། །ཁ་ཅིག་སོ་སོའི་སྐྱེ་བོ་དང་། །མ་འདྲེས་པ་བཅོ་བརྒྱད་མ་གཏོགས་ཆོས་གཞན་ནི་སློབ་མ་ཉན་ཐོས་དང་རང་རྒྱལ་དང་ཡང་ཐུན་མོང་ཡིན་ལ། ཡོན་ཏན་གྱི་ཆོས་ཁ་ཅིག་ནི་སོ་སོ་སྐྱེ་བོ་དང་ཡང་ཐུན་མོང་བ་ཡིན་ནོ། །གཉིས་པ་ནི། ཉོན་མོངས་མེད་དང་སྨོན་ནས་ཤེས། །སོ་སོ་ཡང་དག་རིག་མངོན་སོགས། །ཆོས་དེ་དག་ཀྱང་གང་ཞེ་ན། ཉོན་མོངས་མེད་པ་དང་། སྨོན་ནས་ཤེས་པ་དང་། སོ་སོར་ཡང་དག་པར་རིག་པ་བཞི་དང་། མངོན་ཤེས་དྲུག་དང་། སོགས་པས་བཟུང་བས་བསམ་གཏན་བཞི་དང་། ཚད་མེད་བཞི་དང་། རྣམ་ཐར་བརྒྱད་དང་། ཟིལ་གྱིས་གནོན་པའི་སྐྱེ་མཆེད་བརྒྱད་དང་། ཟད་པར་གྱི་སྐྱེ་མཆེད་བཅུ་དང་། ཏིང་ངེ་འཛིན་ལ་སོགས་པའོ། །དེ་ལ་མངོན་ཤེས་དང་པོ་ལྔ་དང་། བསམ་གཏན་བཞི་དང་། གཟུགས་མེད་བཞི་(༣༥༢ན)
དང་། ཚད་མེད་བཞི་དང་། རྣམ་ཐར་དང་པོ་བདུན་དང་། ཟད་པར་བཅུ་དང་། ཟིལ་གནོན་སྐྱེ་མཆེད་བརྒྱད་དང་། ཏིང་ངེ་འཛིན་གསུམ་པོ་དག་ནི་སོ་སོའི་སྐྱེ་བོ་དང་ཐུན་མོང་བ་ཡིན་ལ། གཞན་དག་ནི་ཉན་རང་འཕགས་པ་དང་བྱང་སེམས་རྣམས་དང་ཐུན་མོང་བ་ཡིན་ནོ། །དགྲ་བཅོམ་པས་འདི་ལྟར་བསམ་པར་བྱ་ལ། སེམས་ཅན་གྱི་སྡུག་བསྔལ་ནི་ཉོན་མོངས་ལས་སྐྱེ་བས་ཉོན་མོངས་སྤང་དགོས་ལ། ཉོན་མོངས་པ་ཡང་གཞན་ལ་ཉོན་མོངས་པ་སྐྱེས་པས་བདག་ལ་གྱོད་མེད་མོད། བདག་ལ་དམིགས་ནས་གཞན་ཉོན་མོངས་སྐྱེ་བ་བདག་གིར་མི་བྱ་སྟེ། བདག་ནི་དེ་དག་གི་ཡོན་ཏན་གྱི་གནས་ཁྱད་པར་ཅན་དུ་རིག་པའི་ཕྱིར། ཕ་རོལ་པོ་དག་བདག་དེ་ལ་དམིགས་ནས་ཉོན་མོངས་སྐྱེ་བ་ཡོངས་སུ་སྤོང་བར་འདོད་དེ། དེའི་ཐབས་ནི་གཞན་གྱི་ཚོགས་གསོག་པའི་ཞིང་ཁྱད་པར་ཅན་དུ་གྱུར་པ་དང་། སྔོན་རང་ཉོན་མོངས་པ་ལ་དགའ་མགུར་སྤྱད་ཙམ་ན་དེས་གནོང་ཞིང་ངོ་ཚ་བའི་དྲན་པ་བསྐྱེད་པ་དང་། ཉོན་མོངས་མེད་པའི་གདམས་ངག་ཐོབ་པས་སྐྱེད་པར་བྱེད་པའི་ཕྱིར་རོ། །རྒྱུ་མཚན་གང་གིས་ན་སྨད་འཚོང་མ་སོགས་ཕ་རོལ་པོ་དག་རྣམ་པ་ཐམས་ཅད་དུ་ཉོན་མོངས་སྐྱེད་པར་མི་བྱེད་ཅིང་། སེམས་ཅན་འགའ་ཡང་བདག་དེ་ལ་དམིགས་ནས་འདོད་ཆགས་ཞེ་སྡང་ང་རྒྱལ་སྐྱེ་བར་མི་འགྱུར་བ་དེ་ལྟ་བུའི་ཤེས་པ་སྐྱེད་པར་བྱེད་དེ། བདག་ཏིང་འཛིན་ལས་མ་ལངས་པ་ན་བདག་མཐོང་ན་ཕ་རོལ་པོ་ཉོན་མོངས་བསྐྱེད་པར་མ་གྱུར་ཅིག་ཅེས་མངོན་པར་རྟོགས་ཤིང་། ལངས་ཀྱང་རྗེས་སུ་མཐུན་པར་བྱེད་པའི་གཞན་སེམས་སྲུང་བའི་ཐབས་ཀྱི་ལམ་དེ་ནི་ཕ་རོལ་པོ་འགའ་ཡང་ཉོན་མོངས་སྐྱེད་པས་མི་བྱེད་པས་ན་ཉོན་མོངས་མེད་པ་ཡིན་གྱི། ཉོན་མོངས་མེད་པའི་ཏིང་ངེ་འཛིན་དེ་སྐྱེས་པ་ཙམ་གྱིས་གཞན་གྱི་ཉོན་མོངས་(༣༥༢བ)
མེད་པར་འགྱུར་བ་ནི་མ་ཡིན་ཏེ། འཕགས་པ་རབ་འབྱོར་ཉོན་མོངས་པ་མེད་པའི་མཆོག་དེས་བདག་ལངས་པས་ཉོན་མོངས་སྐྱེ་སྐྱེ་འདྲ་ན་ཉལ། ཉལ་བས་སྐྱེ་སྐྱེ་འདྲ་ན་ལྡང་། རྫུ་འཕྲུལ་བྱས་པས་སྐྱེ་སྐྱེ་འདྲ་ན་མི་བྱེད། མ་བྱས་པ་ལ་སྐྱེ་སྐྱེ་འདྲ་ན་བྱེད་པ་བཞིན་ནོ། །གཉིས་པ་རྒྱས་བཤད་ལ། འཕགས་པ་དང་ཐུན་མོང་བ་དང་། སྐྱེ་འཕགས་གཉིས་ཀ་དང་ཐུན་མོང་བའོ། །དང་པོ་ལ། ཡོན་ཏན་དྲུག་པོ་སོ་སོའི་ཆོས་བཤད་པ་དང་། ཐུན་མོང་བའི་ཆོས་བཤད་པའོ། །དང་པོ་ལ། ཉོན་མོངས་མེད་པ་དང་། སྨོན་ནས་མཁྱེན་པ། སོ་སོ་ཡང་དག་པར་རིག་པ་བཞིའོ། །དང་པོ་ནི། ཉོན་མོངས་མེད་པ་ཀུན་རྫོབ་ཤེས། །བསམ་གཏན་མཐའ་ན་མི་གཡོའི་ཆོས། །མིས་སྐྱེས་ཉོན་མོངས་འདོད་གཏོགས་པ། །མ་སྐྱེས་གཞིར་བཅས་སྤྱོད་ཡུལ་ཅན། །ཉོན་མོངས་མེད་པའི་ཏིང་འཛིན་དེ་ནི་ཀུན་རྫོབ་ཤེས་པ་ཡིན་ཏེ། གཞན་གཞན་རྒྱུད་ཀྱི་སྒོམ་སྤོང་ཉོན་མོངས་མ་འོངས་པའི་ཡུལ་ཅན་ཡིན་པས་ཟག་མེད་མི་སྲིད་པའི་ཕྱིར། སངས་རྒྱས་ཉོན་མོངས་མེད་པ་ལ་གནས་པ་ཉོན་མོངས་གཏན་དབྱུང་བར་བཞེད་པའི་ཐུགས་རྗེའི་དགོངས་པ་བརླིང་བས་སོར་ཕྲེང་ཅན་སོགས་ཀྱི་ཉོན་མོངས་སྐྱེ་བ་བཏང་སྙོམས་སུ་མཛད་དེ། མངོན་པར་རྟོགས་པའི་སྐལ་བ་དང་ལྡན་པའི་ཕྱིར་རོ། །ཉན་ཐོས་རྣམས་བསམ་པ་དང་བག་ལ་ཉལ་ཤེས་པ་དང་བྲལ་བས་ཉོན་མོངས་པ་རྣམ་པ་ཐམས་ཅད་དུ་དབྱུང་མི་ནུས་ཏེ། དུས་རེ་ཞིག་སྤོང་བར་བྱེད་པ་ཙམ་དུ་ཟད་པའི་ཕྱིར། ཏིང་འཛིན་དེ་བསམ་གཏན་གྱི་ཡ་མཐའ་བཞི་པ་ཁོ་ནར་ཡོད་དེ། བཞི་པ་དེ་ལམ་སླ་བ་རྣམས་ཀྱི་མཆོག་ཡིན་པའི་ཕྱིར། དགྲ་བཅོམ་པ་མི་གཡོ་བའི་ཆོས་ཅན་ཡིན་གྱི། གཞན་ཉམས་པའི་ཆོས་ཅན་སོགས་པས་མིན་ཏེ། མི་གཡོ་བའི་ཆོས་ཅན་གྱིས་གཞན་རྒྱུད་ཀྱི་ཉོན་མོངས་སེལ་བར་ཞུགས་པའི་ཕྱིར་དང་། ཕྱི་མ་དེ་དག་ལ་ཉམས་པ་སྲིད་པས་རང་གི་རྒྱུད་ཀྱིའང་ཉོན་མོངས་རེས་འགའ་སྤོང་མི་ནུས་པའི་ཕྱིར། (༣༥༣ན)
ལུས་རྟེན་ནི་མི་ཁོ་ནས་སྐྱེད་པར་བྱེད་པ་ཡིན་ཏེ་བློ་གསལ་བའི་ཕྱིར། དམིགས་པ་ཉོན་མོངས་འདོད་པར་གཏོགས་པ་མ་སྐྱེས་པ་སྟེ་མ་འོངས་པ་གཞིར་བཅས་ཆགས་སོགས་སྒོམ་སྤོང་རྣམས་ཀྱི་སྤྱོད་ཡུལ་ཅན་ཡིན་ཏེ། ཁམས་གོང་ལ་དམིགས་ནས་ཉོན་མོངས་སྐྱེ་བ་ཤས་ཆུང་པའི་ཕྱིར་དང་། སྔར་སྐྱེས་རྣམས་སྤང་བར་མི་ནུས་པའི་ཕྱིར་དང་། གཞི་མེད་པ་མཐོང་སྤོང་ཀུན་འགྲོ་ནི་ཁམས་དང་ས་ཐམས་ཅད་ལ་དམིགས་པས་བཟློག་མི་ནུས་ལ། ཕ་རོལ་ཆགས་སྡང་ཅན་དག་ལ་ཉོན་མོངས་སྐྱེ་བར་མ་གྱུར་ཅིག་ཅེས་དེ་ལྟར་ཞུགས་པའི་ཕྱིར་རོ། །གཉིས་པ་ནི། སྨོན་ནས་ཤེས་པའང་དེ་བཞིན་ནོ། །དེ་ཡི་དམིགས་པ་ཐམས་ཅད་དོ། །སྨོན་ནས་ཤེས་པའང་ངོ་བོ་ཀུན་རྫོབ་ཤེས་པ་དང་ས་བསམ་གཏན་གྱི་མཐའ་ན་ཡོད་པ་དང་། མི་གཡོ་བའི་ཆོས་ཅན་གྱི་དང་། གླིང་གསུམ་པའི་རྟེན་ཅན་གྱི་ཡིན་པ་ནི་ཉོན་མོངས་པ་མེད་པ་དེ་བཞིན་ནོ། །སྨོན་ཤེས་དེའི་དམིགས་པ་ཉོན་མོངས་པ་གཞི་བཅས་ཁོ་ན་མིན་གྱི། གཟུགས་སོགས་ཆོས་ཐམས་ཅད་དོ། །དེ་ལ་སྨོན་ཤེས་ནི་སྨོན་པ་སྔར་བཏང་ནས་ཤེས་པ་སྟེ། འདི་དང་འདི་ཤེས་པར་བྱའོ་སྙམ་དུ་སྨོན་ནས་རབ་མཐའ་བཞི་པ་ལ་མཉམ་པར་བཞག་ནས་དེའི་ཡུལ་དུ་ཇི་ཙམ་གྱུར་པ་ཤེས་པའོ། །བྱེ་སྨྲས་ནི། གཟུགས་མེད་པ་ནི་མངོན་སུམ་དུ་མི་ཤེས་ཏེ། འདི་ནི་བསམ་གཏན་བཞི་པའི་ས་ཡིན་པས་གོང་མ་གཟུགས་མེད་པའི་ཡུལ་མིན་པའི་ཕྱིར་ཏེ། འདི་ནི་མངོན་ཤེས་དང་འདྲ་བ་ཡིན་ལ། དེ་ནི་རང་དང་འོག་ས་ལ་ཡུལ་ཅན་ཡིན་ཅེས་འཆད་པར་འགྱུར་བའི་ཕྱིར། འོན་ཀྱང་ལུས་དང་སེམས་དམན་ཅིང་ཞི་བའི་རྒྱུ་མཐུན་པ་ལས་ནི། གཟུགས་མེད་ན་སྐྱེས་སོ་བྱ་བ་དང་། སྙོམས་འཇུག་གི་སྤྱོད་པ་དང་ལྡན་པ་ལས་གཟུགས་མེད་ན་སྐྱེས་སོ་བྱ་བ་དང་། གཟུགས་མེད་(༣༥༣བ)
ཀྱི་ཏིང་ངེ་འཛིན་ཐོབ་ལ་མ་ཉམས་པ་དང་། ལྡན་པ་གཟུགས་མེད་དུ་སྐྱེ་བར་འགྱུར་རོ་ཞེས་བྱེ་བྲག་ལས་ཤེས་པ་ནི་ཞིང་པ་རྣམས་ཀྱིས་འབྲུ་ལ་ཞིང་དང་། ཞིང་ལས་འབྲུ་དཔོག་པ་བཞིན་ཟེར་རོ། །གཞུང་ལུགས་གཞན་ལྟར་ན། སངས་རྒྱས་ཀྱིས་གཟུགས་མེད་ཀྱང་མངོན་སུམ་དུ་མཁྱེན་ཏེ། དེས་མངོན་སུམ་གྱི་ཡུལ་དུ་མ་བྱས་པའི་ཆོས་མེད་པའི་ཕྱིར། ཞེས་འདོད། གསུམ་པ་སོ་སོ་ཡང་དག་པར་རིག་པ་བཞི་བཤད་པ་ལ། དབྱེ་བའི་སྒོ་ནས་ཐུན་མོང་གི་ཆོས་བསྟན་པ། མི་འདྲ་བའི་ཁྱད་ཆོས་སོ་སོར་བཤད་པ། ཐོབ་ཚུལ་གྱི་དོན་བསྡུ་བའོ། །དང་པོ་ནི། དེ་བཞིན་ཆོས་དོན་ངེས་ཚིག་དང་། །སྤོབས་པ་སོ་སོ་ཡང་དག་རིག །ཆོས་དོན་ངེས་ཚིག་དང་། སྤོབས་པ་སོ་སོ་ཡང་དག་རིག་བཞི་ནི་ཉོན་མོངས་མེད་པ་དེ་བཞིན་མི་གཡོ་བའི་ཆོས་ཅན་གྱི་ཡིན་པ་དང་། མིའི་རྟེན་ཅན་ཡིན་ནོ། །གཉིས་པ་ལ། དང་པོ་གསུམ་གྱི་དམིགས་པ་དང་རང་བཞིན། བཞི་པའི་ཆོས་བཞི། གཉིས་པའི་ཆོས་གཉིས། དང་པོ་དང་གསུམ་པའི་ངོ་བོ། དང་པོའི་ས། གསུམ་པའི་སའི་ཁྱད་པར་རོ། །དང་པོ་ནི། གསུམ་ནི་གོ་རིམས་བཞིན་མིང་དང་། །དོན་དང་ངག་ལ་ཐོགས་མེད་ཤེས། །དེ་དག་གི་དམིགས་པ་དང་ས་དང་ངོ་བོ་ལ་ནི་ཁྱད་པར་ཡོད་དེ། དེ་དག་ལས་དང་པོ་གསུམ་ནི་གོ་རིམ་བཞིན་དུ་མིང་དང་དོན་དང་ངག་རྣམས་ལ་གཞན་གྱིས་བཟློག་པར་མི་ནུས་པས་ཐོགས་པ་མེད་པར་ཤེས་པ་ཡིན་ཏེ། དེ་ལ་ཆོས་སོ་སོ་ཡང་དག་པར་རིག་པ་ནི། སྒྲུབ་པའི་ཆོས་འཕགས་ལམ་བརྒྱད་དང་། འབྲས་བུའི་ཆོས་མྱང་འདས་ནི་རིག་པ་མ་ཡིན་གྱི། ཆོས་རྣམས་ཀྱི་མིང་ཚིག་ཡི་གེའི་ཚོགས་རིག་པ་སྟེ། དོན་རྣམས་ཀྱི་རྗོད་བྱེད་ཡིན་པའི་ཕྱིར་ན་བསྟན་པའི་ཆོས་སོ། །དོན་སོ་སོ་ཡང་དག་པར་རིག་པ་ནི། ཆོས་རྣམས་ཀྱི་རང་གི་མཚན་ཉིད་དམ་མྱ་ངན་ལས་འདས་པ་རིག་པ་སྟེ། བརྗོད་པར་བྱ་བའི་དོན་ནམ་དོན་གྱི་མཆོག་ཡིན་པའི་ཕྱིར། ངེས་པའི་ཚིག་སོ་སོ་ཡང་དག་པར་རིག་པ་ནི། ཆོས་རྣམས་ཀྱི་(༣༥༤ན)
བཤད་པའི་རྒྱུ་མཚན་གྱི་ངག་རིག་པ་སྟེ། དོན་རྒྱུ་མཚན་ཅན་གྱི་ཚིག་ཡིན་པས་ངེས་པའི་ཚིག་གོ། །ཐོགས་པ་མེད་པ་ནི་བཟློག་པར་མི་ནུས་པའོ། །གཉིས་པ་ནི། བཞི་པ་རིགས་པ་ཐགས་ཐོགས་མེད། །མངོན་བརྗོད་ལམ་ལ་དབང་ཉིད་ལ། །དེ་ཡི་དམིགས་པ་ངག་དང་ལམ། །ཤེས་པ་དགུའོ་ས་ཐམས་ཅད། །བཞི་པ་སྤོབས་པ་སོ་སོ་ཡང་དག་པར་རིག་པ་ནི། དོན་རྣམས་ཀྱི་འགལ་བ་དང་འབྲེལ་བའི་རིགས་པ་དང་། དེའང་ཐག་ཐོགས་མེད་པར་མངོན་པར་བརྗོད་པ་ཉིད་དང་། རང་ཉིད་ཡིད་ལ་བྱེད་པས་ཞི་ལྷག་གི་ཏིང་ངེ་འཛིན་མི་བརྗེད་པས་ལམ་ལ་དབང་བ་ཉིད་ལ་ཐོགས་མེད་དུ་ཤེས་པ་སྟེ། དང་པོ་ནི་འབེལ་བའི་གཏམ་ལ་མཁས་པ་ཡིན་ལ། གཉིས་པ་ནི་རང་ཉིད་ཡིད་ལ་བྱེད་པ་ལ་མཁས་པ་ཡིན། འདི་ནི་སྤོབས་པ་ཡིན་ལ་སོ་སོ་རིག་པའང་ཡིན་པས་སྤོབས་པ་སོ་སོ་རིག་པའོ། །ཡང་ན་སྤོབས་པ་ནི་རིག་གྲོལ་དུ་སྨྲ་བ་སྟེ། དེའི་ཕྱིར་ཡང་ངོ་། །བཞི་པ་དེའི་དམིགས་པ་ནི་ངག་དང་ཟག་བཅས་ཟག་མེད་ཀྱི་ལམ་མོ། །དེ་ཤེས་པ་དགུ་སྟེ། ངག་ལ་དམིགས་པ་དེ་སྡུག་ཀུན་ཆོས་རྗེས་ཟད་མི་སྐྱེ་ཀུན་རྫོབ་ཤེས་པ་ཡིན་ལ། ལམ་ལ་དམིགས་པ་དེ་ལམ་ཆོས་རྗེས་ཟད་མི་སྐྱེ་ཀུན་རྫོབ། གཞན་སེམས་ཤེས་པ་སྟེ་དགུ་ལས་འདུས་མ་བྱས་ལ་མི་དམིགས་པས་འགོག་ཤེས་མ་གཏོགས་པའི་ཕྱིར། གལ་ཏེ་ངག་དང་ལམ་ལ་དམིགས་ན། སྡུག་ཀུན་ཇི་ལྟར་ཤེས་ཞེ་ན། ངག་དེ་འདོད་གཟུགས་ན་ཡོད་ལ། དེ་ཉིད་ཟག་བཅས་ཡིན་པས་སྡུག་བསྔལ་ཡིན་ལ། ཕྱི་མ་བསྐྱེད་པས་ཀུན་འབྱུང་ཡིན་པས་ཤེས་པར་བཞག་གོ། །ངག་ལ་དམིགས་ན་འདོད་པ་བསམ་གཏན་ས་བཞི་སྟེ་ལྔ་ལམ་ལ་དམིགས་ན་བསམ་གཏན་ས་དགུ་སྟེ་ས་ཐམས་ཅད་ན་ཡོད་དོ། །གསུམ་པ་ནི། ཡང་དག་དོན་རིག་བཅུའམ་དྲུག །དེ་ནི་ཀུན་ན། དོན་སོ་སོ་ཡང་དག་པར་རིག་པ་ནི། བརྗོད་བྱའི་དོན་ཆོས་ཐམས་ཅད་ཡིན་ན་ཤེས་པ་བཅུའམ། དོན་མྱང་འདས་ཡིན་ན་ཤེས་པ་དྲུག་སྟེ། ཆོས་རྗེས། འགོག་པ། ཟད་མི་སྐྱེ། ཀུན་རྫོབ་ཤེས་(༣༥༤བ)
པའོ། །དོན་སོ་སོ་ཡང་དག་རིག་པ་དེ་ནི་ས་ཀུན་ན་ཡོད་དོ། །བཞི་པ་ནི། གཞན་ཀུན་རྫོབ། །གཞན་ཆོས་དང་ངེས་ཚིག་རིག་པ་གཉིས་ཀུན་རྫོབ་ཤེས་པའི་རང་བཞིན་ཏེ། མིང་གི་ཚོགས་ལ་སོགས་བསྟན་པའི་ཆོས་དང་ངག་ལ་དམིགས་པའི་ཕྱིར། ལྔ་པ་ནི། ཆོས་རིག་འདོད་དང་བསམ་གཏན་ན། །ཆོས་སོ་སོ་ཡང་དག་པར་རིག་པ་ནི་འདོད་པ་དང་བསམ་གཏན་བཞི་པོ་དག་ན་ཡོད་དེ། དེ་ཡན་ཆད་ན་རྗོད་བྱེད་མིང་ཚིག་ཡི་གེའི་ཚོགས་མེད་པའི་ཕྱིར། དྲུག་པ་ནི། ངག་ནི་འདོད་དང་དང་པོ་ན། །ངག་གམ་ངེས་པའི་ཚིག་རིག་པ་ནི་འདོད་པ་དང་བསམ་གཏན་དང་པོ་ཁོ་ན་ལ་ཡོད་དེ། མདོ་ལས། བརྟགས་ཤིང་དཔྱད་ནས་ཚིག་ཏུ་སྨྲའོ་ཞེས་འབྱུང་བས། ངག་ནི་རྟོག་པས་ཀུན་ནས་བླང་བའི་བདག་ཉིད་ཡིན་ན། བསམ་གཏན་གཉིས་པ་ཡན་ཆད་ན་རྟོག་དཔྱོད་མེད་པའི་ཕྱིར། བཏགས་པའི་བསྟན་བཅོས་ལས། སོ་སོ་ཡང་དག་པར་རིག་པ་རྣམས་འདི་སྐད་དུ། ཚིག་དང་ཚིག་གསལ་བྱེད་ཀྱི་ཡི་གེ་དང་ཡི་གེ་དེ་ཉིད་དོན་སོ་སོར་རིག་བྱ་དང་། ངེས་ཚིག་དེ་ཉིད་ཀྱི་གཅིག་དང་། གཉིས་དང་། མང་པོའི་ཚིག་དང་། ཕོ་མོའི་རྟགས་དང་། སོགས་པས་དུས་དང་བྱེད་པ་སོགས་ཚིག་བླ་དྭགས་ཏེ། ཐ་སྙད་བཏགས་པ་དེ་ལ་ཐག་ཐོགས་མེད་པར་བྱ་བ་ལ་ཐོགས་པ་མེད་པའི་ཤེས་པ་ནི་ཆོས་སོ་སོ་ཡང་དག་རིག་པ་སོགས་ཡིན་ནོ་ཞེས་སྟོན་ཏེ། ཚིག་དང་ཡི་གེའི་རྗེས་སུ་འབྲངས་ནས་དོན་རྟོགས་པ་དང་། དེའི་གཅིག་དང་མང་པོ་དང་། ཕོ་མོ་ལ་སོགས་བླ་དྭགས་ཏེ། ཐ་སྙད་ལ་ཐོགས་པ་མེད་པ་དེ་ཉིད་ཀྱི་སྔ་ཕྱིའི་གོ་རིམ་གྲུབ་སྟེ། ཆོས་མིང་ལ་བརྟེན་ནས་དོན་རྟོགས། དོན་རྟོགས་པ་ལ་བརྟེན་ནས་ངེས་ཚིག་ཤེས། དེ་རྣམས་རྟོགས་པ་ལ་བརྟེན་ནས་སྤོབས་པ་ཐོབ་པའི་ཕྱིར། ཚིག་ངེས་པ་ནི་ངེས་པའི་ཚིག་སྟེ། དཔེར་ན། གཟུགས་རུང་གཟུགས། ཞེས་བྱ་བ་ལྟ་བུའོ། །གཞན་དག་བརྩད་པའི་ཚུལ་གྱིས་ལན་དང་ལན་སྤོབས་པས་སྤོབས་པ་ཡིན་ནོ་ཞེས་ཟེར་རོ། །བྱེ་སྨྲ་ནི། ཆོས་དང་དོན་དང་(༣༥༥ན)
ངེས་ཚིག་དང་སྤོབས་པ་སོ་སོ་ཡང་དག་པར་རིག་པའི་སྔོན་གྱི་སྦྱོར་བ་ནི་གོ་རིམ་བཞིན། རྩིས་དང་། སངས་རྒྱས་ཀྱི་བཀའ་དང་། སྒྲ་རིག་པ་དང་། གཏན་ཚིགས་རིག་པ་སྟེ། འདི་དག་ལ་མཁས་པར་མ་བྱས་པར་དེ་དག་བསྐྱེད་པར་མི་ནུས་སོ་ཞེས་གྲག་གོ། །སློབ་དཔོན་ནི། སོ་སོར་རིག་པ་ཐམས་ཅད་ཀྱི་སྦྱོར་བ་སངས་རྒྱས་ཀྱི་བཀའ་ཁོ་ན་ཡིན་ནོ་ཞེས་བརྗོད་དོ། །གསུམ་པ་ཐོབ་ཚུལ་གྱི་དོན་བསྡུ་བ་ནི། མ་ཚང་བར་ནི་དེ་ཐོབ་མེད། །གང་ལ་གཅིག་ཡོད་པ་དེ་ལ་ངེས་པ་བཞི་ཅར་ཡོད་དེ། འགས་ཀྱང་དེ་དག་མ་ཚང་བ་ནི་དེ་ཐོབ་པ་མེད་དེ། ལམ་གཅིག་གི་འབྲས་བུ་ཡིན་པའི་ཕྱིར། གཉིས་པ་ཡོན་ཏན་དྲུག་པོ་ཐུན་མོང་བའི་ཆོས་བཤད་པ་ལ། སེམས་རྟེན་སྤྱིར་བསྟན་པ་དང་། རབ་མཐའ་དངོས་ཡིན་མིན་གྱི་ཁྱད་པར། བཞི་པའི་རབ་མཐའ་ངོས་བཟུང་བ། སྦྱོར་བའི་དམིགས་བསལ་ལོ། །དང་པོ་ནི། དྲུག་པོ་དེ་དག་རབ་མཐའ་བས། །ཉོན་མོངས་མེད་སོགས་ཡོན་ཏན་དྲུག་པོ་དེ་དག་ནི་རབ་མཐའི་བསམ་གཏན་གྱིས་ཐོབ་ཀྱི། རབ་མཐས་བསྡུས་པ་ནི་མ་ཡིན་ཏེ། ངག་ནི་འདོད་དང་དང་པོ་ན། །ཞེས་འབྱུང་བའི་ཕྱིར། གཉིས་པ་ནི། དེ་ནི་རྣམ་དྲུག །བསམ་གཏན་བཞི་པ་རབ་ཀྱི་མཐའ་བདེ་ནི་ཉོན་མོངས་མེད། སྨོན་ནས་ཤེས་པ་སོ་སོ་ཡང་དག་རིགས་གསུམ་རབ་མཐའ་འབའ་ཞིག་པ་སྟེ་རྣམ་པ་དྲུག་གི་བདག་ཉིད་ཡིན་ནོ། །ངེས་ཚིག་སོ་སོ་ཡང་དག་པར་རིག་པ་ནི་བསམ་གཏན་བཞི་པ་དེའི་སྟོབས་ཀྱིས་ཐོབ་པ་ཡིན་གྱི། བཞི་པའི་ས་པ་ནི་མ་ཡིན་ཏེ། འདོད་པའི་སྤྲུལ་སེམས་བསམ་གཏན་གྱི་དངོས་གཞི་ཐོབ་ཀྱང་། དེ་དངོས་གཞི་མ་ཡིན་པ་དང་འདྲའོ། །གསུམ་པ་ནི། བསམ་གཏན་མཐའ། །དེ་ནི་ས་ཀུན་གྱིས་མཐུན་བྱས། །འཕེལ་བའི་རབ་ཏུ་ཕྱིན་པ་ཡིན། །རབ་ཀྱི་མཐའ་པ་ནི། བསམ་གཏན་གྱི་ཡ་མཐའ་བཞི་པའོ། །དེའང་བསམ་གཏན་བཞི་པ་ཙམ་ཁྱབ་བྱེད། རབ་ཀྱི་མཐའ་པ་ཁྱབ་བྱ། བསམ་གཏན་བཞི་པ་ཙམ་ལ་གཟུགས་མེད་ཀྱི་ཏིང་ངེ་འཛིན་སོགས་བརྒྱུད་མི་དགོས་(༣༥༥བ)
པས་དེ་ནི་འདོད་སེམས་བསམ་གཏན་བཞི་རིམ་པར་བརྒྱུད། གཟུགས་མེད་གསུམ་བརྒྱུད་སྲིད་རྩེ་ལ་འཇུག་པས་ས་དགུ་པ་ཀུན་གྱིས་མཐུན་པར་བྱས་ནས། ཡང་སྲིད་རྩེ་ནས་འདོད་པའི་བར་གྱི་མི་མཐུན་པ་དང་། དེ་ལས་ཡང་བསམ་གཏན་བཞི་པའི་བར་དུ་མཐུན་པ་ཡིན་ལ། དེ་ལྟར་ན་ཏིང་ངེ་འཛིན་དེ་ནི་ས་ཐམས་ཅད་ཀྱི་མཐུན་པ་ཉིད་དུ་བསྐྱེད་པར་བྱས་པ་ཡིན་ནོ། །དེ་ལྟར་བསྒོམས་པས་ཆུང་ངུ་བསམ་གཏན་དང་པོ་ལས་འབྲིང་གཉིས་པ་དང་། འབྲིང་གཉིས་པ་ལས་ཆེན་པོ་གསུམ་པ་ལ་སྙོམས་པར་འཇུག་པས་གསུམ་པ་ནི་འཕེལ་བ་མཆོག་ཏུ་གྱུར་པས་འཕེལ་བའི་བར་ཡིན་ལ། རབ་དེའི་ཡ་མཐའ་ཡིན་པས་བཞི་པ་འདི་ནི་རབ་ཀྱི་མཐའ་ཡིན་ཏེ། འཕེལ་བའི་མཐར་རབ་ཏུ་ཕྱིན་པ་ཡིན་པའི་ཕྱིར། འདིའི་རབ་མཐའ་ནི། མུ་བཞི་བརྩིས་པ་ན་མུ་བཞི་པ་མུར་ཐུག་པ་ལྟ་བུའི་བསམ་གཏན་འདིར་བལྟོས་ལ་མཐའ་ཟད་པར་སྟོན་པའི་དཔེའོ། །བཞི་པ་ནི། སངས་རྒྱས་ལས་གཞན་སྦྱོར་ལས་སྐྱེས། །ཡོན་ཏན་དེ་དྲུག་ཀྱང་སངས་རྒྱས་ལས་གཞན་པ་ཉན་རང་དེའི་ནི་སྦྱོར་བ་ལས་སྐྱེས་པ་ཡིན་གྱི། འདོད་ཆགས་བྲལ་ཙམ་གྱིས་ཐོབ་པ་མ་ཡིན་ནོ། །སངས་རྒྱས་ནི་སྦྱོར་བྱུང་ཅུང་ཟད་ཀྱང་མེད་དེ། འདོད་དགུར་འབྱོར་པའི་དབང་ཕྱུག་ཡིན་པའི་ཕྱིར། (ཡིག་རྙིང་ལ་ལར་འདོད་ཆགས་ཀྱི་དབང་ཕྱུག་ཟེར་བ་སྣང་། ཡི་གེ་གསར་པ་ལ་ལར་ཆོས་ཀྱི་དབང་ཕྱུག་ཟེར་བ་སྣང་། འདོད་ཆགས་ཀྱི་དབང་ཕྱུག་གི་གནའ་མཆན་ལ་འདོད་དགུར་ཟེར་བའང་སྣང་།) དེའི་ཡོན་ཏན་ཕུན་ཚོགས་ཐམས་ཅད་ནི་མངོན་འགྱུར་བ་བཞེད་པ་ཙམ་ལ་རགས་ལས་པའོ། །འདིར་སྨྲས་པ། འགྲན་ཟླ་ཀུན་བྲལ་རྫོགས་སངས་རྒྱས་པ་ཡི། །ཐུབ་ཆེན་ཆོས་རྗེ་འདི་ཡི་ཡོན་ཏན་ལ། །བྱིས་འཕགས་རང་བློ་དང་འཚམས་བརྗོད་པ་ནི། །མཁའ་ལ་དཔག་ཚད་བྱེ་བར་བཅད་པ་བཞིན། །ཕྱོགས་རེ་ཙམ་ཞིག་ཡིན་པ་དེ་ལྟ་ཡི། །དགེ་དེའི་(༣༥༦ན)
འབྲས་བུ་གཟུགས་སུ་གྲུབ་པ་ན། །ནམ་མཁའི་ཁམས་སུ་ཤོང་བ་ཡོད་མིན་པས། །རྒྱལ་བའི་ཡོན་ཏན་བསམ་དང་བརྗོད་པར་གྱིས། །ཞེས་སོ། །གཉིས་པ་སྐྱེ་འཕགས་གཉིས་ཀ་དང་ཐུན་མོང་བའི་ཡོན་ཏན་བཤད་པ་ལ། ཡོན་ཏན་གྱི་ཁྱད་པར་དང་། ཁྱད་པར་གཏན་ལ་དབབ་པའོ། །དང་པོ་ལ། དབྱེ་བ། ངོ་བོ། ཆོས་ཀྱི་ཁྱད་པར། ཐོབ་ཚུལ་ལོ། །དང་པོ་ནི། རྫུ་འཕྲུལ་རྣ་བ་ཡིད་དང་ནི། །སྔོན་ཚེ་འཆི་འཕོ་སྐྱེ་བ་དང་། །ཟད་ཤེས་མངོན་དུ་བྱ་བ་ཡི། །མངོན་ཤེས་རྣམ་དྲུག །རྫུ་འཕྲུལ་གྱི་ཡུལ་སྤྲུལ་པ་དང་ནམ་མཁའ་ལ་འགྲོ་བ་ཤེས་པ་དང་། ལྷའི་རྣ་བ་དང་། གཞན་གྱི་ཡིད་ཆགས་སྡང་སོགས་སེམས་ཀྱི་རྣམ་གྲངས་ཤེས་པ་དང་ནི་རང་གཞན་གྱི་སྔོན་གྱི་ཚེ་རབས་རྗེས་སུ་དྲན་པ་དང་། འཆི་འཕོ་དང་སྐྱེ་བ་ཤེས་པ་དང་། ཟག་པ་ཟད་པ་ཤེས་པ་མངོན་དུ་བྱ་བ་ཡི་མངོན་ཤེས་ནི། སྡུག་བསྔལ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ་ཞེས་བདེན་པ་ལྷག་མ་རྣམས་ལ་དེ་དང་འདྲ་བར་སྦྱར་ཞིང་། མཐོང་བ་དེ་འདོད་པའི་ཟག་པ་ལས་སེམས་གྲོལ། སྲིད་པའི་ཟག་པ། མ་རིག་པའི་ཟག་པ་ལས་སེམས་གྲོལ་བར་འགྱུར་རོ། །རྣམ་པར་གྲོལ་ན་རྣམ་པར་གྲོལ་ལོ་ཞེས་བྱ་བ་ཡེ་ཤེས་མཐོང་བར་འགྱུར་ཞིང་། བདག་གི་ཟག་པ་ཟད་དོ་ཞེས་བྱ་བ་ན་སྲིད་པ་གཞན་མི་ཤེས་བྱ་བའི་བར་དུའོ། །དེ་དག་གིས་ནི་མངོན་ཤེས་རྣམ་པ་དྲུག་གོ། དེ་ལ་དང་པོ་ལྔ་ནི་སོ་སྐྱེ་དང་ཐུན་མོང་བའོ། །གཉིས་པ་ནི། རྣམ་གྲོལ་བློ། །དྲུག་པོ་དེ་ཐམས་ཅད་ནི་དགེ་སྦྱོང་ཚུལ་འབྲས་འདུས་བྱས་རྣམ་གྲོལ་ལམ་གྱི་རང་བཞིན་ཡིན་པ་ལྟར། རྣམ་གྲོལ་ལམ་གྱི་བློ་ཤེས་རབ་ཀྱི་རང་བཞིན་ཡིན་ནོ། །གསུམ་པ་ཆོས་ཀྱི་ཁྱད་པར་ལ། ཤེས་པ་གང་ཡིན་པ་དང་། ས་གང་ན་ཡོད་པ་དང་། སྤྱོད་ཡུལ་གང་ཡིན་པའོ། །དང་པོ་ནི། བཞི་ནི་ཀུན་རྫོབ་ཤེས་པ་སྟེ། །སེམས་ལ་ཤེས་པ་ལྔ་ཡིན་ནོ། །ཟད་པའི་མངོན་ཤེས་སྟོབས་བཞིན་ནོ། །སེམས་ཀྱི་རྣམ་གྲངས་དང་ཟག་ཟད་མ་གཏོགས་བཞི་ནི་ཀུན་རྫོབ་ཤེས་པ་སྟེ། ཟག་བཅས་ཁོ་ན་ཡིན་པའི་ཕྱིར། གཞན་སེམས་ལ་(༣༥༦བ)
དམིགས་ནས་དེའི་ཁྱད་པར་ཤེས་པ་ནི། ཟག་མེད་ཀྱི་ཆ་ཆོས་རྗེས་ལམ་སེམས་ཤེས་དང་། ཟག་བཅས་ལ་ཀུན་རྫོབ་དང་སེམས་ཤེས་ཏེ་ལྔ་ཡིན་ནོ་སྟེ། རྫས་རང་མཚན་ལ་དམིགས་པ་དང་། རྟོག་ཅིང་འཚོལ་བའི་བློ་ཅན་དང་། ཟག་མེད་ལམ་གྱི་རྣམ་པ་ཅན་དང་། ཟག་བཅས་སེམས་ཤེས་ཆགས་བཅས་སོགས་ཀྱི་རྣམ་པ་ཅན་ཡིན་ན་ཟད་མི་སྐྱེ་ཤེས་པ་དེ་ལྟར་མིན་ལ། འགོག་པ་མཚུངས་ལྡན་མིན་ཅིང་སྡུག་ཀུན་ཤེས་པའི་རྣམ་པ་ཅན་ཡང་མིན་པས་ལྔ་པོ་དེ་དག་མིན་པའི་ཕྱིར་རོ། །ཟག་ཟད་མངོན་ཤེས་ནི་ཟད་པ་པ་མཁྱེན་པའི་སྟོབས་བཞིན་ནོ་སྟེ། ཟག་ཟད་འབའ་ཞིག་ལ་དམིགས་ན། འགོག་ཆོས་རྗེས་མི་སྐྱེ་ཀུན་རྫོབ་ཤེས་པ་དང་དྲུག་གོ། ཟག་ཟད་ཀྱི་རྒྱུད་ལ་ཡོད་པའི་དབང་དུ་ན་བཅུ་ཅར་རོ། །གཉིས་པ་ནི། ལྔ་ནི་བསམ་གཏན་བཞི་དག་ན། །ལྷག་མ་མངོན་ཤེས་ལྔ་ནི་བསམ་གཏན་བཞི་དག་ན་ཡོད་ཀྱི། གཟུགས་མེད་ན་མེད་དེ། དེའང་རྫུ་འཕྲུལ་དང་ལྷའི་རྣ་བ་དང་མིག་གི་མངོན་ཤེས་གསུམ་མེད་པའི་ཕྱིར་ཏེ། དེ་ནི་གཟུགས་ལ་དམིགས་པ་ཡིན་ན་གཟུགས་མེད་ནི་གཟུགས་ཀྱི་འདུ་ཤེས་བཤིག་པས་གཟུགས་ལ་མི་དམིགས་པའི་ཕྱིར། སེམས་ཤེས་ཀྱང་མེད་དེ། (གཞན་སེམས་ཤེས་པ་ལ་གཟུགས་ཤེས་པ་བཏེགས་སུ་བྱེད་དགོས་ཟེར་བ་འདི་ནི་ཐེག་དམན་གྲུབ་མཐའ་དམའ་བའི་དབང་དུ་བྱས་པའོ། །) གཟུགས་འདི་འདྲ་བས་ན་སེམས་འདི་འདྲར་འགྱུར་རོ་ཞེས་གཟུགས་ལ་སྟེགས་བཅས་པ་སྟེ་གཟུགས་ལ་དམིགས་པའི་ལམ་གྱི་བསྒྲུབ་བྱ་ཡིན་པའི་ཕྱིར། བྱ་རྒོད་ཀྱི་ཕྲུ་གུ་ནམ་མཁར་འཕུར་བ་རྡོ་ལ་སྟེགས་འཆའ་བ་བཞིན་ནོ། །སྔོན་གནས་རྗེས་དྲན་ཀྱང་མེད་དེ། དེ་དྲན་པ་ལ་རང་གི་སྐད་ཅིག་སྔ་མ་དེའི་སྔ་མ་ཞག་ཟླ་ལོ་སོགས་མཐར་གྱིས་དམིགས་ནས་སྔོན་གྱི་གནས་གཞན་འདོད་པ་སོགས་རྗེས་སུ་དྲན་ནས་མངོན་པར་སྒྲུབ་པར་བྱེད་(༣༥༧ན)
དགོས་པ་ལས་གཟུགས་མེད་པས་གནས་གཞན་འདོད་པ་མི་དམིགས་པའི་ཕྱིར་ཏེ། གཟུགས་མེད་དངོས་ཀྱི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །ཅེས་པས་གཟུགས་མེད་ཀྱིས་འདོད་སྤྱོད་ཀྱི་ཆོས་མི་དམིགས་ལ། འདོད་སྤྱོད་དེ་དག་ཀྱང་གཟུགས་མེད་སྐྱེ་མཆེད་མངོན་པར་སྒྲུབ་པའི་དུས་དམིགས་ཀྱང་གྲུབ་པ་ན་དམིགས་པ་མ་ཡིན་ནོ། །གཟུགས་ལ་དམིགས་པའི་ཚུལ་ཡང་གནས་དེ་ནས་ཤི་འཕོས་ནས་ཆེ་གེ་ཞིག་ཏུ་སྐྱེ་ཞེས་གནས་དང་། དུས་ནི་འདི་ལྟ་བུ་ཞེས་དང་། མིང་ཁ་ཟས་སོགས་ཅི་རིགས་པར་འདོད་གཟུགས་སུ་དམིགས་པའོ། །གཞན་གྱི་སེམས་ཤེས་པར་འདོད་པའི་སྦྱོར་བ་གཟུགས་ལ་སྟེགས་ཇི་ལྟར་འཆའ་བ་ནི། རང་གི་ལུས་འདི་འདྲ་བ་ཞིག་ལ་སེམས་ནི་འདི་འདྲ་བ་སྟེ། ཞེ་སྡང་སྐྱེས་པའི་ཁ་དོག་ཅི་འདྲ་དང་། འདོད་ཆགས་སྐྱེས་པའི་ཁ་དོག་ཅི་ལྟ་བའི་མཚན་མ་འཛིན་ནས་རང་རྒྱུད་ལ་གཏན་ལ་ཕབ་ཅིང་། དེ་བཞིན་དུ་ཕ་རོལ་པོའི་རྒྱུད་ལ་གཏོད་ཅིང་སྦྱོར་བའི་སྒོ་ནས་སེམས་ཤེས་པ་ལས་མངོན་པར་ཤེས་པ་འགྲུབ་པར་འགྱུར་རོ། །གྲུབ་ནས་ནི་མཇུག་ཏུ་གཟུགས་ལ་མི་བལྟོས་པར་མངོན་པར་ཤེས་སོ། །སྔོན་གྱི་གནས་རྗེས་སུ་དྲན་པར་འདོད་པའི་སྦྱོར་བ་ནི་ཡིད་ཀྱི་རྣམ་ཤེས་འགགས་མ་ཐག་པའི་མཚན་མ་སེམས་ཀྱིས་ཡོངས་སུ་བཅད་དེ་བཟུང་ནས་སེམས་དེ་ལུགས་ལས་བཟློག་སྟེ། དྲན་པས་མཚམས་སྦྱོར་བའི་སེམས་ཀྱི་བར་དུ་དེ་མ་ཐག་པའི་གནས་སྐབས་གཞན་རྣམས་ཡིད་ལ་བྱེད་པ་ནས་བར་སྲིད་ཀྱི་སྐད་ཅིག་མ་གཅིག་དྲན་ན་གྲུབ་པ་ཡིན་ནོ། །དེ་བཞིན་དུ་སྔ་མའི་འཆི་སྲིད་སྔོན་དུས་ཀྱི་སྲིད་པ་སོགས་གཞན་ཡང་རིམ་གྱིས་དྲན་ནོ། །མངོན་པར་གྲུབ་ནས་ནི་ཚེ་གཅིག་གམ་གཉིས་སོགས་ཐོད་རྒལ་དུའང་(༣༥༧བ)
དྲན་ལ། སྔོན་ཉམས་སུ་མྱོང་བ་ཁོ་ན་དྲན་ནོ། །འོ་ན་རྟེན་འདོད་པའི་སྔོན་གནས་རྗེས་དྲན་གྱི་གནས་གཙང་མ་རྣམས་ཇི་ལྟར་དྲན་ཏེ། ཕྱིར་མི་འོང་ཡིན་པས་དེ་དག་ཀྱང་འདིར་མི་སྐྱེ་ཞིང་། སོ་སོ་སྐྱེ་བོ་རྣམས་ཀྱང་དེར་མི་སྐྱེ་བས་དེ་ཉམས་སུ་མ་མྱོང་བའི་ཕྱིར་ཞེ་ན། མ་གྲུབ་སྟེ་ཉམས་སུ་མྱོང་བ་གཉིས་ལ་མཐོང་བས་ཉམས་སུ་མྱོང་བ་མེད་ཀྱང་ཐོས་པས་ཉམས་སུ་མྱོང་བའི་སྒོ་ནས་དྲན་པར་བྱེད་པའི་ཕྱིར་རོ། །རང་གཟུགས་མེད་པ་ནས་ཤི་འཕོས་ནས་འདོད་པ་འདིར་སྐྱེས་པ་རང་གི་སྐྱེ་བ་སྔ་མའི་གཟུགས་མེད་མི་ཤེས་ཙ་ན། དེར་བསམ་གཏན་བསྐྱེད་ནས་སྔོན་གནས་རྗེས་དྲན་འདོད་ན། ཕ་རོལ་པོ་ཁམས་གང་ནས་འདིར་སྐྱེས་པའི་རྒྱུད་ལ་བརྟེན་ནས་མངོན་ཤེས་དེ་བསྐྱེད་དོ། །གཟུགས་མེད་ནས་ཤི་འཕོས་པ་མིན་པ་གཞན་དེ་དག་གི་སྔོན་གནས་རྗེས་དྲན་ནི་རང་རྒྱུད་ལ་བརྟེན་པ་ནི་བསྐྱེད་སླ་བ་ཡིན་ནོ། །རྫུ་འཕྲུལ་དང་ལྷའི་རྣ་བ་དང་མིག་གི་སྦྱོར་བ་ནི་ཡང་བ་དང་སྒྲ་དང་སྣང་བ་ཡིད་ལ་བྱེད་པའོ། །སྣང་བ་ཕུལ་བས་ལྷ་མིགརོལ་མོ་ཕུལ་བས་ལྷའི་རྣ་བ། བཞོན་པ་བྱིན་པས་རྫུ་འཕྲུལ། ཆོས་བྱིན་པས་ཚེ་རབས་དྲན་པ་སོགས་ནི་རྣམ་སྨིན་ལས་གྲུབ་པ་ཡིན་གྱི་སྦྱོར་བ་མ་ཡིན་ལ། སྣང་བ་ཕུལ་བ་སོགས་ཀྱི་རྒྱུ་དེས་སྦྱོར་བ་རང་ཡང་འགྲུབ་སླ་བ་ཡིན་ནོ། །ཟག་ཟད་ཀྱི་སྦྱོར་བ་ནི། ཚུལ་གནས་ཐོས་དང་བསམ་ལྡན་པ། །སྒོམ་པ་ལ་ནི་རབ་ཏུ་སྦྱོར། །ཅེས་པར་བཤད་ཟིན་ཏོ། །གསུམ་པ་ནི། རང་དང་འོག་སའི་ཡུལ་ཅན་ཡིན། །མངོན་ཤེས་ལྔ་པོ་འདི་དག་ནི་རང་ས་དང་འོག་སའི་སྤྱོད་ཡུལ་ཅན་ཡིན་ལ། གོང་མ་མིན་པ་ནི་དམན་པའི་ཡུལ་མཆོག་མ་ཡིན་པས་སོ། །རྫུ་འཕྲུལ་གྱི་མངོན་ཤེས་ཀྱིས་རང་གི་ས་པ་དེའི་ས་པའམ་འོག་མར་འགྲོ་བ་སྤྲུལ་པར་བྱེད་ཀྱི་གོང་དུ་ནི་མ་ཡིན་ནོ། །དེ་བཞིན་དུ་ལྷའི་རྣ་བ་དང་སེམས་ཤེས་དང་སྔོན་གྱི་(༣༥༨ན)
གནས་རྗེས་དྲན་དང་ཤི་འཕོ་དང་སྐྱེ་བ་ཤེས་པས་རིམ་བཞིན་རང་ས་དང་འོག་སར་འཇུག་གི། གོང་མ་མི་ཐོས་མི་ཤེས་མི་དྲན་མི་མཐོང་བས་གཟུགས་མེད་པའི་སེམས་ནི་གོང་མའི་ཡིན་པས་སེམས་ཤེས་དང་སྔོན་གྱི་གནས་མངོན་པར་ཤེས་པ་མི་འཛིན་ཏོ། །བཞི་པ་ཐོབ་ཚུལ་ནི། ཐོབ་བྱ་འདྲིས་པ་ཆགས་བྲལ་བས། །མ་འདྲིས་པ་སྔོན་མ་བསྐྱེད་པའི་བྱེ་བྲག་ཅན་ནི་སྦྱོར་བས་ཐོབ་བྱ་ཡིན་ལ། མངོན་ཤེས་ཚེ་རབས་གཞན་ནས་གོམས་ཤིང་འདྲིས་པ་ནི་འདོད་ཆགས་དང་བྲལ་བས་ཐོབ་ལ། འདྲིས་མ་འདྲིས་ཐམས་ཅད་ཀྱང་མངོན་དུ་བྱེད་པ་ན་སྦྱོར་བས་བསྐྱེད་པར་བྱ་དགོས་ཏེ། མངོན་དུ་བྱེད་མ་ནུས་ན་ཐོབ་ཀྱང་མ་ཐོབ་པ་དང་འདྲ་བའི་ཕྱིར། དེའང་མངོན་ཤེས་ཀྱི་རིས་ལ་ལ་ཐོབ་ཀྱང་མངོན་དུ་བྱེད་ནུས་པ་ཡོད། ལ་ལ་ཐོབ་ཀྱང་མངོན་དུ་བྱེད་མི་ནུས་པ་ཡོད་དེ། ཤེས་རབ་རྐྱང་གྲོལ་གྱི་དགྲ་བཅོམ། མི་ལྕོགས་མེད་པ་ལ་སྲིད་རྩེ་མན་གྱི་ས་ཐོབ་ཀྱང་མངོན་དུ་བྱེད་མི་ནུས་པ་ནི་དེ་ལྟ་བུའོ། །མངོན་དུ་བྱེད་པ་ལ་མ་ཐོབ་པ་ནི་མི་སྲིད་དོ། །གཉིས་པ་ཁྱད་པར་གཏན་ལ་དབབ་པ་ལ། ཐུན་མོང་དུ་གཏན་ལ་དབབ་པ་དང་། བྱེ་བྲག་ཏུ་གཏན་ལ་དབབ་པའོ། །དང་པོ་ལ། དྲན་པ་ཉེར་གཞག་དང་སྦྱར་བ། དགེ་སོགས་གསུམ་དང་སྦྱར་བ། རིག་པ་གསུམ་དང་སྦྱར་བ། ཆོ་འཕྲུལ་གསུམ་དང་སྦྱར་བའོ། །དང་པོ་ནི། གསུམ་པ་དྲན་པ་ཉེར་གཞག་གསུམ། །དང་པོ་རྫུ་འཕྲུལ་རྣ་བ་མིག །གསུམ་པ་གཞན་སེམས་ཤེས་པ་ནི། སེམས་དང་སེམས་བྱུང་ལ་དམིགས་པས་ཚོར་བ་དང་སེམས་དང་ཆོས་དྲན་པ་ཉེར་གཞག་གསུམ་མོ། །རྫུ་འཕྲུལ་རྣ་བ་མིག་གིས་མངོན་ཤེས་ནི། དང་པོ་ལུས་དྲན་ཉེ་ཡིན་ཏེ། གཟུགས་ལ་དམིགས་པའི་ཕྱིར། ཁྱད་པར་རྫུ་འཕྲུལ་གྱི་དམིགས་པ་ནི་ཕྱིའི་སྐྱེ་མཆེད་བཞི་ཡིན་གྱི། སྒྲ་མ་གཏོགས་ཏེ། སྒྲ་ནི་རྒྱུན་ཆད་པས་སྤྲུལ་པར་མི་བྱེད་པའི་ཕྱིར། རྣ་བ་དང་མིག་གི་མངོན་ཤེས་ཀྱི་(༣༥༨བ)
དམིགས་པ་ནི་སྒྲ་དང་གཟུགས་ཀྱི་སྐྱེ་མཆེད་དོ། །ཁྱད་པར་ལྷའི་མིག་ནི་འཆི་བ་དང་བར་དོ་དང་སྐྱེ་སྲིད་ཀྱི་ཁ་དོག་བཟང་ངན་སོགས་གཟུགས་ཀྱི་སྐྱེ་མཆེད་ཁོ་ན་ལ་དམིགས་པ་ཡིན་ན། འོ་ན་མདོ་ལས། འཆི་འཕོ་བ་དང་སྐྱེ་བ་ཤེས་པ་འདི་ལྟར་སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན་ནོ། །ཞེས་སྒོ་གསུམ་གྱི་ལས་དང་ལྡན་པར་གསུངས་པས། ངག་ཡིད་ཀྱང་དམིགས་ཡུལ་དུ་བྱེད་པར་མ་བཤད་དམ་ཞེ་ན། ངག་ཡིད་ཀྱི་ལས་དེ་ནི་མིག་གི་མངོན་ཤེས་ཀྱིས་ངོ་བོའི་རྣམ་ཤེས་དེས་མི་ཤེས་ཀྱི། འཕགས་པ་རྣམས་ལ་མིག་གི་མངོན་ཤེས་དེ་ལས་གཞན་པ་གང་གིས་དེ་ལྟར་ཤེས་པར་འགྱུར་བ་ནི་མིག་གི་མངོན་ཤེས་དེའི་འཁོར་དུ་གྱུར་པའི་ཡིད་ཀྱི་ཤེས་པ་སྐྱེ་བ་དེས་འཛིན་ཏོ། །ཞེས་བྱེ་སྨྲས་ཟེར་བ་ལ། ཡིད་ཤེས་དེ་མངོན་ཤེས་དྲུག་ཏུ་མ་འདུས་ན་མངོན་ཤེས་བདུན་པར་ཐལ། འདུས་ན་གཙོ་འཁོར་གྱི་རྣམ་གཞག་མི་འཐད། འོ་ན་ལུས་ངག་གི་ཉེས་སྤྱད་ནི་ལྷའི་མིག་དང་རྣ་བའི་མངོན་ཤེས་ཀྱིས་ཤེས་ལ། ཡིད་ཀྱི་ཉེས་སྤྱད་དེ་དག་ལས་དཔོག་པའམ། སེམས་ཀྱི་རྣམ་གྲངས་ཤེས་པས་ཤེས་པ་ཡིན་ནོ་ཞེས་པར་རིགས་སོ་ཞེས་ཟེར་རོ། །སྔོན་གནས་རྗེས་དྲན་ནི། གཟུགས་དང་སེམས་དང་སེམས་བྱུང་གསུམ་ཀ་ལ་དམིགས་པས་དྲན་པ་ཉེར་གཞག་བཞི་ཀའི་བདག་ཉིད་ཡིན་ལ། ཟག་ཟད་ཀྱི་མངོན་ཤེས་ཀྱང་། གལ་ཏེ་ཟག་ཟད་འབའ་ཞིག་ལ་དམིགས་ན་ཆོས་དྲན་ཉེ་དང་། འོན་ཏེ་དེའི་རྒྱུད་ལ་དམིགས་པ་ཡིན་ན་ནི་ཤེས་པ་བཅུའི་ངོ་བོ་ཡིན་པས་དྲན་པ་ཉེར་གཞག་བཞི་དག་ཡིན་ལ། ཡང་ན་ཟག་ཟད་འབའ་ཞིག་ལ་དམིགས་པས་ཤེས་པ་དྲུག་གི་ངོ་བོ་ཡིན་ཀྱང་དྲན་པ་ཉེར་གཞག་གཞན་གསུམ་ཡང་མ་འོངས་པ་ཐོབ་པས་དྲན་པ་ཉེར་གཞག་བཞི་ཅར་གྱི་ངོ་བོ་ཡིན་ནོ། །གཉིས་པ་ནི། མིག་དང་རྣ་བའི་མངོན་ཤེས་ནི། །ལུང་དུ་མ་བསྟན་ལྷག་རྣམས་དགེ། །ལྷའི་མིག་དང་རྣ་བའི་མངོན་ཤེས་ནི་(༣༥༩ན)
ཉོན་མོངས་ཅན་མ་ཡིན་ཅིང་དགེ་བ་བཞིར་མ་འདུས་པས་མ་སྒྲིབ་ལུང་དུ་མ་བསྟན་ཏེ། དེ་གཉིས་ཀྱང་མིག་རྣའི་རྣམ་ཤེས་དང་མཚུངས་ལྡན་གྱི་ཤེས་རབ་བོ། །འདི་ཡང་ཞིབ་ཏུ་དཔྱད་ན། བསམ་གཏན་དང་པོའི་མིག་རྣའི་མངོན་ཤེས་དགེ་དང་ལུང་མ་བསྟན་གཉིས་ཀ་མ་ཡིན། བསམ་གཏན་གཉིས་གསུམ་བཞི་པའི་མིག་རྣའི་མངོན་ཤེས་རྟེན་གཉིས་གསུམ་བཞི་པ་ཡིན་པས། གཉིས་གསུམ་བཞི་པའི་མངོན་ཤེས་ཟེར་གྱི། དངོས་སུ་ནི་དང་པོའི་ཡིན་ཙ་ན། དང་པོའི་དགེ་བ་དམན་པས་མི་བསྐྱེད། ཉོན་མོངས་ཅན་ནི་འདོད་ཆགས་དང་བྲལ་བས་མི་བསྐྱེད་ཙ་ན་ལུང་མ་བསྟན་ཕལ་ཆེ་བའི་དབང་དུ་བྱས་ལ། དེ་གཉིས་དགེ་བ་ཡིན་པ་ནི་བསམ་གཏན་དང་པོའི་བྱེད་ལས་མེད་དོ། །འོ་ན་མངོན་ཤེས་དེ་གཉིས་བསམ་གཏན་བཞི་པའི་ས་པར་མི་འགྱུར་ཏེ། གཉིས་པ་སོགས་ནས་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །ཞེས་འབྱུང་བས། མིག་རྣའི་རྣམ་ཤེས་དེ་དག་བསམ་གཏན་གཉིས་པ་ཡན་ཆད་ན་མེད་ལ། དེ་དག་མེད་པར་དེ་དག་དང་མཚུངས་ལྡན་གྱི་ཤེས་རབ་མི་འཐད་པའི་ཕྱིར་ཞེ་ན། དེའི་བར་ཆད་མེད་ལམ་དེ་ལྟར་མོད་ཀྱི། འོན་ཀྱང་གཟུགས་ཀྱི་ཁམས་ན་བཅུ་བཞིའོ། །ཞེས་འབྱུང་བས་རྣམ་ཤེས་དེ་དག་གི་རྟེན་མིག་དང་རྣ་བའི་དབང་པོ་བསམ་གཏན་བཞི་པའང་ཡིན་པས་རྟེན་དེ་དག་གི་དབང་གིས་བསམ་གཏན་བཞི་བར་བརྗོད་དོ། །ཡང་ན་དེ་གཉིས་ཐོབ་བྱེད་བར་ཆད་མེད་ལམ་གྱི་དབང་གིས་དེར་བརྗོད་དེ། ཐོག་མར་སྒྲུབ་པ་ན་ལམ་སླ་བའི་མཆོག་ཡིན་པས་དེའི་བར་ཆད་མེད་ལམ་བསམ་གཏན་བཞི་པ་ལ་བརྟེན་ནས་སྒྲུབ་དགོས་པའི་ཕྱིར། བསམ་གཏན་གཉིས་གསུམ་ལ་བརྟེན་པའི་མངོན་ཤེས་ཀྱང་དེ་དང་འདྲའོ། །ལྷག་མ་བཞི་རྣམས་དགེ་བའོ། །འོ་ན་རབ་ཕྱེད་ལས། མངོན་པར་(༣༥༩བ)
ཤེས་པ་གང་ཞེ་ན། ཤེས་རབ་དགེ་བ་ཡིན་ནོ་ཞེས་གང་བཤད་པ་ཇི་ལྟ་བུ་ཞེ་ན། དེ་ལྟར་གསུངས་པ་ནི་ཟག་པ་ཟད་པའི་མངོན་ཤེས་གཙོ་བོ་ཡིན་པས་སམ། ཡང་ན་ཕལ་ཆེ་བའི་དབང་དུ་བྱས་པ་ཡིན་ཏེ། དཔེར་ན། མོན་སྲན་སྡེའུ་སོགས་ཡོད་བཞིན་དུ་མོན་སྲན་གྲེའུ་ཕལ་ཆེ་བས་དེའི་ཕུང་པོར་བརྗོད་པ་བཞིན་ནོ། །གསུམ་པ་རིག་པ་གསུམ་དང་སྦྱར་བ་ལ། བསྟན། བཤད་གཉིས་ལས། དང་པོ་ནི། གསུམ་ནི་རིག་པ་སྔོན་མཐའ་སོགས། །མ་རིག་པ་ནི་བཟློག་ཕྱིར་རོ། །མངོན་ཤེས་དྲུག་ལས་ཕྱི་མ་གསུམ་ནི་མི་སློབ་པའི་རིག་པ་གསུམ་ཞེས་བྱའོ། །འདི་དག་གིས་སྔོན་གྱི་མཐའ་དང་སོགས་པས་ཕྱི་མའི་མཐའ་དང་བར་ལ་ཀུན་ཏུ་རྨོངས་པའི་མ་རིག་པ་བཟློག་པའི་ཕྱིར་ཏེ་ཆེད་དུའོ། །དེའང་འདུས་བཟང་ན་རེ། སྔ་མས་ནི་བདག་གཞན་གྱི་རྒྱུད་ལ་མཐོང་ནས་ཀུན་ཏུ་སྐྱོ་བ་སྐྱེ། བར་མས་ནི་གཞན་ཁོ་ནའི་སྟེང་དུ་རྒུད་པ་མཐོང་ནས་སྐྱོ་བ་སྐྱེ། གསུམ་པ་ཟག་པ་ཟད་པས་ཡང་དག་པའི་དོན་རྟོགས་པས་སྐྱོ་བ་སྐྱེ་ཟེར་ལ། སྐལ་ལྡན་ཁྱད་ཅན་ན་རེ། སྔོན་གནས་རྗེས་དྲན་ནི་སྔོན་མཐའ་དང་འཆི་འཕོ་སྐྱེ་བའི་མངོན་ཤེས་ནི་བར་མ་དང་། ཟག་ཟད་ནི་ཕྱི་མའི་མཐའ་ལ་ཡིན་ཏེ། མདོ་ལས། ཟག་ཟད་ཀྱི་སྲེད་པ་གཞན་མི་ཤེས་སོ་ཞེས་འབྱུང་བའི་ཕྱིར་རོ། །ཞེས་སོ། །མངོན་ཤེས་གསུམ་ཁོ་ན་རིག་པ་གསུམ་ཡིན་པ་ཅིས་ཤེས་ཞེ་ན། མདོ་ལས། མི་སློབ་པའི་སྔོན་གནས་རྗེས་སུ་དྲན་པ་མངོན་དུ་བྱེད་པའི་རིག་པ། ཞེས་སོགས་འབྱུང་བའི་ཕྱིར། གཉིས་པ་རྒྱས་བཤད་ལ། དོན་དམ་པའི་མི་སློབ་པའི་རིག་པ་ངོས་བཟུང་བ། གཞན་གཉིས་ལ་དེའི་སྒྲ་འཇུག་པའི་རྒྱུ་མཚན། དེ་ལས་འཕྲོས་པའི་དོན་ཏོ། །དང་པོ་ནི། མི་སློབ་ཐ་མ། དེ་དག་ལས་ཀྱང་དོན་དམ་པའམ་ཡང་དག་པར་ན་ཐ་མ་ཟག་ཟད་ཀྱི་མངོན་ཤེས་ཁོ་ན་མི་སློབ་པའི་རིག་པ་ཡིན་ཏེ། ཟག་མེད་ཡིན་པའི་ཕྱིར། གཉིས་པ་ནི། གཉིས་ནི་དེའི། །རྒྱུད་ལ་སྐྱེས་ཕྱིར་དེ་ཞེས་བྱ། །སྔོན་གནས་རྗེས་དྲན་དང་འཆི་འཕོ་ཤེས་པ་གཉིས་ནི་མི་སློབ་པ་དེའི་རྒྱུད་ལས་སྐྱེས་པའི་ཕྱིར་མི་སློབ་པ་(༣༦༠ན)
དེའི་རིག་པ་ཞེས་བྱའི་དངོས་སུ་ན་དེ་གཉིས་ཟག་བཅས་ཡིན་པར་སློབ་མི་སློབ་གཉིས་ཀ་མ་ཡིན་པས་མི་སློབ་པ་མ་ཡིན་ནོ། །གསུམ་པ་ནི། སློབ་ལ་འདོད་དེ་མ་རིག་དང་། །བཅས་རྒྱུད་ཕྱིར་ན་རིག་མ་བཤད། །མངོན་ཤེས་འདི་དགེ་སློང་བ་ལའང་ཡོད་ན། གང་གི་ཕྱིར། སློབ་པའི་རིག་པ་ཞེས་མི་བྱ་སྙམ་ན། འདི་དག་སློབ་པ་ཕྱིར་མི་འོང་ལའང་ཡོད་པར་འདོད་དེ། འོན་ཀྱང་དེ་དག་ནི་རིག་པར་མ་བཤད་དེ། རིག་པར་མི་འོས་པའི་ཕྱིར་ཏེ། རྒྱུད་སྒོམ་སྤོང་གི་མ་རིག་པ་དང་བཅས་ཤིང་ཟིལ་གྱིས་ནོན་པའི་ཕྱིར། བཞི་པ་ཆོ་འཕྲུལ་གསུམ་དང་སྦྱར་བ་ལ། སྤྱིར་བསྟན་པ་དང་། དེའི་མཆོག་ངོས་བཟུང་བ་གཉིས་ལས། དང་པོ་ནི། དང་པོ་གསུམ་པ་དྲུག་པ་ནི། །ཆོ་འཕྲུལ་རྣམས་ཡིན། མངོན་ཤེས་དག་ལས་དང་པོ་རྫུ་འཕྲུལ་དང་། གསུམ་པ་སེམས་ཀྱི་རྣམ་གྲངས་ཤེས་པ་དང་། དྲུག་པ་ཟག་ཟད་ནི་རྫུ་འཕྲུལ་དང་། ཀུན་བརྗོད་པ་དང་རྗེས་སུ་བསྟན་པའི་ཆོ་འཕྲུལ་རྣམས་ཡིན་ནོ། །ཅིའི་ཕྱིར་ཆོ་འཕྲུལ་ཅེས་བྱ་ན། དང་པོར་གདུལ་བྱ་གཞན་གྱིས་ཡིད་འཕྲོག་པའི་ཕྱིར་ཏེ། ཧ་རིའི་དོན་ཏེ། དེ་ལ་དང་པོས་ནི་ཕ་རོལ་གྱི་ཡིད་འདུན་པའི་སྒོ་ནས་འཕྲོག་པར་བྱེད་ཅིང་། གཉིས་པས་ནི་ཕ་རོལ་གྱི་བསམ་པ་ཤེས་ནས་ཆོས་བསྟན་པའི་སྒོ་ནས་ཡིད་འཕྲོག་པར་བྱེད་ལ། གསུམ་པས་ནི་བསྟན་པ་བཞིན་བསྒྲུབས་པས་སྨིན་ཅིང་གྲོལ་བའི་སྒོ་ནས་ཡིད་འཕྲོག་པར་བྱེད། ཡང་ན་འདི་དག་གི་གོ་རིམ་ནི་བསྟན་པ་ལ་ཞེ་འགྲས་པ་གཟུ་པོའི་བློར་གཏོང་ཞིང་། གཟུ་བོའི་བློ་དང་བར་གཏོང་། ཡེ་ནས་དང་བ་ནི་ཤིན་ཏུ་དང་བར་གཏོང་བར་བྱེད་དོ། །གཉིས་པ་ནི། བསྟན་པ་མཆོག །མི་འཁྲུལ་ཕྱིར་དང་ཕན་པ་དང་། །ཡིད་འོང་འབྲས་ལ་སྦྱོར་བྱེད་ཕྱིར། །འདི་དག་གི་ནང་ནས་རྗེས་སུ་བསྟན་པའི་ཆོ་འཕྲུལ་ནི་མཆོག་ཡིན་ཏེ། ཉོན་མོངས་པ་ཟད་པ་མེད་ན་མི་འབྱུང་ཞིང་། བར་ཆད་མེད་ལམ་ཟག་མེད་ཁོ་ན་ལ་སྐྱེས་པས་རྒྱུ་དེ་ལས་མི་འཁྲུལ་བའི་ཕྱིར་དང་། ཕྱི་རོལ་པ་རྣམས་དང་ཐུན་མོང་མ་ཡིན་པའི་ཕྱིར། རྫུ་འཕྲུལ་དང་(༣༦༠བ)
ཀུན་བརྗོད་ནི་རིག་སྔགས་ཀྱིས་ཀྱང་བྱེད་དེ། ཞེས་པའི་རིག་སྔགས་ཀྱིས་ནམ་མཁའ་ལ་འགྲོ་བ་དང་། རྟོག་བྱེད་ཅེས་བྱ་བའི་རིག་སྔགས་ཀྱིས་ཕ་རོལ་གྱི་སེམས་ཤེས་པའང་ཡོད་མོད་པ་དེ་ཉིད་ཀྱི་ཕྱིར་རོ། །ཡང་དག་པ་ཇི་ལྟ་བ་བཞིན་དུ་རྗེས་སུ་བསྟན་པ་ནི་གཞན་གྱི་བྱ་བར་མི་ནུས་ཏེ། ཉོན་མོངས་པ་ཟད་པ་མེད་ན་མི་འབྱུང་བ་ལ་མི་འཁྲུལ་བའི་ཕྱིར། འདི་ནི་གཙོ་བོ་ཡིན་ནོ། །རྫུ་འཕྲུལ་དང་སེམས་ཤེས་གཉིས་ཀྱིས་ནི་གཞན་བསྟན་པ་ལ་འཇུག་ཅིང་གཏོད་པ་ཙམ་དུ་ཟད་ཀྱི། རྗེས་སུ་བསྟན་པའི་ཆོ་འཕྲུལ་ནི་མཆོག་ཡིན་ཏེ། ཐབས་སྟོན་པས་འདིར་ཉོན་མོངས་པ་དང་བྲལ་བས་ཕན་པ་དང་། ཕྱི་མར་སྡུག་བསྔལ་གྱི་ཁུར་དང་བྲལ་བས་གཏན་དུ་ཡིད་འོང་གི་འབྲས་བུ་ལ་སྦྱོར་བར་བྱེད་པའི་ཕྱིར་རོ། །གཉིས་པ་བྱེ་བྲག་ཏུ་གཏན་ལ་དབབ་པ་ལ་གསུམ། རྫུ་འཕྲུལ་གྱི་མངོན་ཤེས་གཏན་ལ་དབབ་པ། མིག་རྣའི་མངོན་ཤེས་གཏན་ལ་དབབ་པ། སྐྱེས་ཐོབ་སོགས་ཀྱི་རང་བཞིན་གཏན་ལ་དབབ་པའོ། །དང་པོ་ལ། རྫུ་འཕྲུལ་གྱི་ཁྱད་པར། སྤྲུལ་སེམས་ངོས་བཟུང་བ། དེས་ཇི་ལྟར་སྤྲུལ་པ། སྤྲུལ་སེམས་ཀྱི་ངོ་བོ། རྫུ་འཕྲུལ་གྱི་དབྱེ་བའོ། །དང་པོ་ལ། རྫུ་འཕྲུལ་སྤྱིར་བཤད་པ་དང་། ཁྱད་པར་དངོས་སོ། །དང་པོ་ནི། རྫུ་འཕྲུལ་ཏིང་འཛིན་དེ་ལས་ནི། །སྤྲུལ་དང་འགྲོ་བ། བྱེ་སྨྲའི་ལུགས་ཀྱི་རྫུ་འཕྲུལ་ནི་ཏིང་ངེ་འཛིན་དུ་འདོད་དེ། འདིས་འབྱོར་ཞིང་འགྲུབ་པར་བྱེད་པའི་ཕྱིར་རོ། །ཇི་ལྟར་འབྱོར་ཞེ་ན། རྫུ་འཕྲུལ་གྱི་ཏིང་ངེ་འཛིན་དེ་ལས་ནི་ཡུལ་སྤྲུལ་པ་དང་འགྲོ་བ་ལ་དབང་འབྱོར་བར་བྱེད་པ་སྟེ། རྫུ་འཕྲུལ་གྱི་འགྲོ་བ་ནི་རྣམ་པ་གསུམ་སྟེ། བྱ་བཞིན་དུ་རིམ་གྱི་ལུས་ཀྱིས་མགྱོགས་པོར་ཕྱིན་པས་བྱེད་པས་ལུས་ཕྱིན་བྱེད་དང་། ལམ་ཐག་རིང་པོའང་ཐུང་ངུར་མོས་པ་བྱས་པས་མྱུར་དུ་སླེབས་པ་མོས་པ་ལས་བྱུང་བ་དང་། ཡིད་ཀྱིས་བསམ་པ་ཙམ་གྱི་དེར་སླེབས་(༣༦༡ན)
པའི་ཡིད་མགྱོགས་སོ། །གཉིས་པ་ལ། འགྲོ་བ་གསུམ་གྱི་ཁྱད་པར། སྤྲུལ་པ་གཉིས་ཀྱི་ཁྱད་པར་རོ། །དང་པོ་ནི། སྟོན་པ་ལ། །ཡིད་མགྱོགས་འགྲོ་བ་གཞན་དག་ལ། །ཕྱིན་བྱེད་མོས་པ་ལས་བྱུང་ཡང་། །དེ་ལ་ཡིད་བཞིན་དུ་མགྱོགས་པའི་འགྲོ་བ་ནི་སྟོན་པ་སངས་རྒྱས་ཁོ་ན་ལ་མངའི། ཉན་ཐོས་ཀྱི་མ་ཡིན་ཏེ། སངས་རྒྱས་ནི་ཡུལ་ཐག་རིང་པོར་ཡང་ཐུགས་བསྐྱེད་པའི་དུས་ཀྱིས་བྱོན་པའི་ཕྱིར། དེ་ཕྱིར་བཞི་ལས་འཕྲོས་པའི་མདོར་བཅོམ་ལྡན་འདས་ཀྱིས་སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་བོ་ཞེས་གསུངས་སོ། །སྤྱིར་སངས་རྒྱས་ཀྱི་ཡུལ་བསམ་གྱིས་མི་ཁྱབ། ལས་ཀྱི་རྣམ་སྨིན་བསམ་གྱིས་མི་ཁྱབ། བསམ་གཏན་གྱི་ཡུལ་བསམ་གྱིས་མི་ཁྱབ་པ་ཡིན་ནོ། །འགྲོ་བ་གཞན་གཉིས་ནི་སངས་རྒྱས་ལ་དངོས་སུ་མ་བཤད་ཀྱང་མངའ་བར་གྲུབ་སྟེ། ཕྱག་རྡོར་གྱིས་གདུགས་ཚོད་ལ་སྤྱན་དྲངས་པས་ལྕང་ལོ་ཅན་དུ་ནམ་མཁའ་ལ་ལྡིང་སྟེ་གཤེགས་པ་དང་། དཔག་ཚད་སྟོང་གོམ་པ་བཅུར་མོས་ནས་གོམ་པ་བཅུས་བྱོན་པ་ལྟ་བུའོ། །གཞན་ཉན་རང་དག་ལ་ལུས་ཕྱིན་བྱེད་ཀྱི་འགྲོ་བ་ཡོད་དེ། བྱ་བཞིན་དུ་རིམ་གྱི་ལུས་ཀྱིས་ཕྱིན་པར་བྱེད་པའི་ཕྱིར། རིང་བ་ལས་ཉེ་བར་མོས་པ་ལས་བྱུང་བ་ཡང་ཡོད་དེ། ཐག་རིང་བ་ལ་ཉེ་བར་མོས་ན་མྱུར་དུ་འགྲོ་བའི་ཕྱིར། གཉིས་པ་ལ། འདོད་པ་ན་སྤྱོད་པའི་སྤྲུལ་པ། གཟུགས་ན་སྤྱོད་པའི་སྤྲུལ་པའོ། །དང་པོ་ནི། འདོད་པར་གཏོགས་པའི་སྤྲུལ་པ་ནི། །ཕྱི་ཡི་སྐྱེ་མཆེད་བཞི་རྣམ་གཉིས། །འདོད་པར་གཏོགས་པའི་སྤྲུལ་པ་ནི་ཕྱིའི་སྐྱེ་མཆེད་གཟུགས་དྲི་རོ་རེག་བྱ་བཞི་སྤྲུལ་གྱི། ནང་གི་སྐྱེ་མཆེད་སྤྲུལ་བར་མི་བྱེད་དེ། སྤྲུལ་ན་སྔོན་མེད་པའི་སེམས་ཅན་འབྱུང་བར་ཐལ་བའི་ཕྱིར། སྒྲ་ནི་རང་རྐྱང་པ་སྤྲུལ་དུ་མི་འདོད་དེ། རྒྱུན་ཆད་ཅིང་འབྱུང་བས་སྒྲ་སྤྲུལ་པ་ན་དེའི་རྟེན་དང་བཅས་པ་སྤྲུལ་པར་བྱེད་དོ། །དྲི་རོ་སོགས་ནི་རང་རྐྱང་པར་སྤྲུལ་པ་ཡིན་ནོ། །གཞན་ཡང་སངས་རྒྱས་རྒྱལ་པོ་ཀ་བི་ནར་བསྒྱུར་བ་ལྟ་བུ་(༣༦༡བ)
རང་གི་ལུས་དང་འབྲེལ་བར་སྤྲུལ་པ་དང་། འཇམ་དཔལ་གྱིས་བདུད་སྡིག་ཅན་ལ་མོས་པ་ལ་སྡིག་ཅན་སངས་རྒྱས་ཀྱི་སྐུར་སྤྲུལ་པ་ནི་གཞན་གྱི་ལུས་དང་འབྲེལ་བའི་སྤྲུལ་པ་སྟེ་རྣམ་པ་གཉིས་སོ། །འཇམ་དཔལ་གྱིས་བདུད་སྡིག་ཅན་སངས་རྒྱས་ཀྱི་སྐུར་བྱིན་གྱིས་བརླབས་ཆོས་སྟོན་དུ་བཅུག་པ་ལ། ཤཱ་རིའི་བུ་ཡ་མཚན་ཆེ་ནས་བསྔགས་པ་བརྗོད་པ་ལ། འཇམ་དཔལ་གྱི་ཞལ་ནས་སངས་རྒྱས་ཀྱི་སྐུར་བྱིན་གྱིས་བརླབས་ལ་ཆོས་སྟོན་དུ་གཞུག་གི་ཟེར་བ་ལ་ཤཱ་རིའི་བུའི་བསམ་པ་ལ་ང་ཉན་ཐོས་ནི་སངས་རྒྱས་ཀྱི་སྐུར་གྱུར་པ་དེ་ཉམས་ལམ་བདེ་ནས་མི་སྣང་བར་བྱ་མནོ་བ་ལ་མི་སྣང་བར་བྱ་ལོང་མེད་པར་སངས་རྒྱས་ཀྱི་སྐུར་བྱིན་གྱིས་བརླབས་ནས་ཆོས་སྟོན་དུ་བཅུག་གོ་ཞེས་ཐོས་སོ། །གཉིས་པ་ནི། གཟུགས་གཏོགས་གཉིས། །རྟེན་འདོད་པ་དེས་གཟུགས་སུ་གཏོགས་པ་སྤྲུལ་ན་དེར་དྲི་རོ་མེད་པས་གཟུགས་རེག་གཉིས་ཁོ་ནར་སྤྲུལ་ལ། དེའང་བདག་གཞན་གྱི་ལུས་དང་འབྲེལ་བས་གཉིས་ཏེ་བཞི་ལ་དེ་བཞིན་དུ་གཟུགས་ཁམས་སུ་སྐྱེས་པས་ཀྱང་གཟུགས་རེག་ལ་བདག་གཞན་གྱི་ལུས་དང་འབྲེལ་བས་བཞི་སྟེ་སྤྲུལ་པ་རྣམ་པ་བརྒྱད་ཡིན་ནོ། །གཟུགས་ཁམས་པས་འདོད་པར་བདག་གི་ལུས་དང་འབྲེལ་བའི་དྲི་རོ་སྤྲུལ་ན་ཅི་ལྟར་དེ་གཉིས་དང་མི་ལྡན་ཅེ་ན། ལྡན་པ་མ་ཡིན་ཏེ། ཁམ་ཟས་ལ་འདོད་ཆགས་དང་བྲལ་བས་ལས་ཀྱིས་གྲུབ་པར་མི་འདུག་ཅིང་། དབང་པོའི་རྟེན་དང་མ་འབྲེལ་བའི་ཕྱིར། གོས་རྒྱན་ནི་རང་གི་ལུས་དང་འབྲེལ་ཀྱང་སེམས་ཅན་དུ་མི་བགྲང་བ་བཞིན་མི་ལྡན་ནོ། །གཞན་ན་རེ། གཟུགས་རེག་གཉིས་སྤྲུལ་གྱི་དྲི་རོ་ནི་མ་ཡིན་ཏེ། མི་ལྡན་པའམ་དེ་གཉིས་ས་དེ་ལ་བལྟོས་པའི་གློ་བུར་བ་ཡིན་པའི་ཕྱིར། གཉིས་པ་སྤྲུལ་སེམས་ངོས་བཟུང་བ་ལ། གང་གིས་སྤྲུལ་པ། སྤྲུལ་སེམས་ཀྱི་དབྱེ་བ། གང་གིས་རྙེད་པ། གང་ལས་གང་སྐྱེ་བའོ། །དང་པོ་ནི། སྤྲུལ་སེམས་དག་གིས། །མངོན་ཤེས་ཁོ་ནས་སྤྲུལ་པར་བྱེད་པ་མ་ཡིན་གྱི། (༣༦༢ན)
མངོན་ཤེས་ཀྱི་འབྲས་བུ་སྤྲུལ་སེམས་དག་གིས་སྤྲུལ་པ་དང་འགྲོ་སེམས་ཀྱིས་འགྲོ་བར་ཡང་བྱེད་དོ། །གཉིས་པ་ནི། དེ་དག་ཀྱང་ནི་བཅུ་བཞིའོ། །བསམ་གཏན་འབྲས་གཉིས་ནས་ལྔའི་བར། །རིམ་བཞིན་གོང་མ་ལས་སྐྱེས་མིན། །སྤྲུལ་སེམས་དེ་དག་ཀྱང་ནི་དབྱེ་ན་བཅུ་བཞིའོ་སྟེ། བསམ་གཏན་དང་པོའི་འབྲས་བུ་སྤྲུལ་སེམས་ནི་འདོད་པ་དང་བསམ་གཏན་དང་པོའི་ས་པ་གཉིས་ཡིན་པ་ནས་བསམ་གཏན་གཉིས་པའི་འབྲས་བུ་ས་འོག་མ་པ་གཉིས་དང་རང་གི་ས་པ་སྟེ་གསུམ་དང་། གསུམ་པའི་ས་འོག་མ་པ་གསུམ་དང་རང་གི་ས་པ་སྟེ་བཞི་དང་། བཞི་པའི་ས་འོག་མ་པ་བཞི་དང་རང་གི་ས་པ་དང་ལྔ་ཡིན་པའི་བར་དུ་རིམ་པ་བཞིན་དུ་ཤེས་པར་བྱའོ། །འདིར་འདི་ཤེས་དགོས་ཏེ། འདོད་པའི་ཡུལ་སྤྲུལ་པས་འདོད་པའི་སྤྲུལ་སེམས་བྱ་བ་ཡིན་གྱི། སྤྲུལ་སེམས་རང་ནི་བསམ་གཏན་གྱི་སས་བསྡུས་པ་ཡིན་ནོ། །དེས་ན་བསམ་གཏན་གྱི་འབྲས་བུ་སྤྲུལ་སེམས་ནི་རང་དང་འོག་མའི་ས་པ་ཡིན་གྱི། བསམ་གཏན་འོག་མའི་ས་པ་དག་གི་འབྲས་བུ་པ་གོང་མ་ལས་སྐྱེས་པའི་སྤྲུལ་སེམས་ནི་མིན་ཏེ། གོང་ས་མ་ཐོབ་ན་བསྐྱེད་མི་ནུས་ལ་ཐོབ་ན་དེ་ཉིད་ཀྱི་འབྲས་བུ་ཡིན་པའི་ཕྱིར། དེ་ལྟར་ན་འདོད་པའི་སྤྲུལ་སེམས་བསམ་གཏན་བཞི་པོ་ཁོ་ནའི་འབྲས་བུ་ཡིན་པ་ལས་བསམ་གཏན་འོག་མའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་བས་བསམ་གཏན་གོང་མའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་འགྲོ་བའི་སྒོ་ནས་ཁྱད་འཕགས་ཏེ། བསམ་གཏན་དང་པོའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་དེས་བསམ་གཏན་དང་པོའི་ས་པའི་བར་དུ་འགྲོ་ནུས་ཀྱི། གཉིས་པ་ལ་སོགས་པར་འགྲོ་མི་ནུས་ལ། བསམ་གཏན་གཉིས་པའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པའི་འདོད་པའི་སྤྲུལ་པ་དེས་བསམ་གཏན་གཉིས་པའི་བར་དུ་འགྲོ་(༣༦༢བ)
མི་ནུས་པའི་ཕྱིར། དེ་བཞིན་དུ་བསམ་གཏན་གསུམ་པ་ལ་སོགས་པའི་འབྲས་བུ་འདོད་པའི་སྤྲུལ་སེམས་ཀྱིས་སྤྲུལ་པ་ལའང་སྦྱར་ཏེ་ཤེས་པར་བྱའོ། །གསུམ་པ་ནི། དེ་རྙེད་བསམ་གཏན་བཞིན། སྤྲུལ་སེམས་དེ་ཇི་ལྟར་རྙེད་ན་བསམ་གཏན་གྱི་དངོས་གཞི་བཞིན་འོག་ས་ལས་འདོད་ཆགས་དང་བྲལ་བའི་སྒོ་ནས་རྙེད་དོ། །བསམ་གཏན་དང་པོ་ལྟ་བུའི་སྤྲུལ་སེམས་དེ་གཉིས་པ་ནས་དང་པོར་སྐྱེས་པས་རྙེད་པའང་ཡོད་དོ། །བཞི་པ་གང་ལས་གང་སྐྱེ་བ་ལ། སྤྲུལ་སེམས་གང་ལས་སྐྱེས་པ་དང་། སྤྲུལ་སེམས་ལས་གང་སྐྱེ་བའོ། །དང་པོ་ནི། དེ་ནི། །དག་དང་རང་ལས། སྤྲུལ་སེམས་ཁོ་ན་ལས་ལྡང་བ་ནི་མེད་ཀྱི། སྤྲུལ་སེམས་དེ་ནི་ཐོག་མར་མངོན་དུ་བྱས་པ་དེས་སྦྲུལ་སེམས་ལ་དང་པོར་འཇུག་པ་ན་བསམ་གཏན་དག་པ་བ་དང་ཕྱིས་ནས་སྤྲུལ་སེམས་རང་ལས་སྐྱེའོ། །གཉིས་པ་ནི། དེ་ལས་གཉིས། །སྤྲུལ་སེམས་ལ་གནས་པ་དེ་ལྡང་བ་ན་བསམ་གཏན་ལ་མ་ཞུགས་པར་ལྡང་བ་མེད་པས་སྤྲུལ་སེམས་དེ་ལས་ཀྱང་སྤྲུལ་སེམས་ལངས་པའི་ཚེ་བསམ་གཏན་དག་པ་དང་། རྒྱུན་གྱི་ཚེ་སྤྲུལ་སེམས་རང་ཉིད་དང་གཉིས་སྐྱེ་བར་འགྱུར་གྱི། གཞན་དང་གཞན་ལས་འབྱུང་བ་ནི་མེད་དོ། །ཏིང་ངེ་འཛིན་གྱི་འབྲས་བུ་སྤྲུལ་སེམས་ལ་གནས་པ་ནི་ཡང་ཏིང་ངེ་འཛིན་ལ་མ་ཞུགས་པར་ཏིང་ངེ་འཛིན་དེ་ལས་ལྡང་བ་མེད་དོ། །གསུམ་པ་དེས་ཇི་ལྟར་སྤྲུལ་པ་ལ། སྤྲུལ་སེམས་གང་གིས་སྤྲུལ་པ། སྤྲུལ་པ་སྨྲར་འཇུག་པའི་སེམས། སྤྲུལ་སེམས་དང་སྤྲུལ་པ་མང་ཉུང་གི་ཚུལ་ལོ། །དང་པོ་ནི། རང་གི་ས་པས་སྤྲུལ་པར་བྱེད། །སྤྲུལ་པ་ཐམས་ཅད་ཀྱང་རང་རང་གི་ས་པའི་སྤྲུལ་སེམས་ཀྱིས་རངས་པའི་སྤྲུལ་པ་སྤྲུལ་པར་བྱེད་ཀྱི། ས་གཞན་པའི་སྤྲུལ་སེམས་ཀྱིས་ནི་ས་གཞན་གྱི་སྤྲུལ་པ་སྤྲུལ་པར་མི་བྱེད་དོ། །གཉིས་པ་ལ། སྤྲུལ་པའི་སྨྲ་སེམས་གང་ལ་བརྟེན་པ། སྤྲུལ་པས་སྨྲ་བའི་ཁྱད་པར། བྱིན་རླབས་ཀྱིས་སྨྲ་བའི་ཚུལ་ལོ། །དང་པོ་ནི། སྨྲར་འཇུག་པ་ནི་འོག་མས་ཀྱང་། །དམིགས་བསལ་(༣༦༣ན)
བསམ་གཏན་གཉིས་པ་ཡན་ཆད་པ་ངག་གི་སྤྲུལ་པ་ངག་སྨྲར་འཇུག་པ་ནི་ས་འོག་མ་བསམ་གཏན་དང་པོའི་ས་པའི་སྨྲ་སེམས་ཁོ་ནས་སྨྲར་འཇུག་པ་ཡིན་ཏེ། དེ་ཡན་ཆད་རང་སར་རྟོག་དཔྱོད་མེད་ཅིང་ངག་སྨྲ་བ་ནི་ཀུན་སློང་རྟོག་དཔྱོད་ལ་བལྟོས་པའི་ཕྱིར། ཀྱང་སྒྲས་ནི་འདོད་པ་དང་བསམ་གཏན་དང་པོ་ན་ནི་རང་གི་ས་པའི་སེམས་ཁོ་ནས་སྨྲར་འཇུག་གོ་ཞེས་པའོ། །གཉིས་པ་ལ། དངོས་དང་། དོགས་གཅོད་དོ། །དང་པོ་ནི། སྟོན་མིན་སྤྲུལ་པ་པོ་དང་བཅས། །སྤྲུལ་པ་མང་པོར་སྨྲ་བ་ནི་སྟོན་པ་སངས་རྒྱས་ཡིན་ལ། དེ་ཡིན་པའི་སྤྲུལ་པ་ནི་སྤྲུལ་པ་པོ་དང་བཅས་ནས་སྨྲ་བར་བྱེད་དེ། ལུང་རིང་པོ་ལས། གཅིག་གིས་སྨྲ་བར་བྱེད་པ་ན། །སྤྲུལ་པ་ཐམས་ཅད་སྨྲ་བར་བྱེད། །གཅིག་མི་སྨྲ་བར་གྱུར་པ་དང་། །དེ་དག་ཐམས་ཅད་སྨྲར་མི་འགྱུར། །ཞེས་སོ། །སངས་རྒྱས་ཀྱི་སྤྲུལ་པ་ནི་ཐམས་ཅད་བཞེད་ཙམ་གྱིས་འབྱུང་བའི་ཕྱིར། སྔ་ཕྱི་ཇི་ལྟར་བཞེད་པར་སྨྲ་བས་ངེས་པ་མེད་དེ། ལས་བརྟགས་པ་ལས། ཅིའི་ཕྱིར། སངས་རྒྱས་བཅོམ་ལྡན་འདས་ཀྱིས་སྤྲུལ་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་སྤྲུལ་པ་ནི། གང་གི་ཚེ། སངས་རྒྱས་བཅོམ་ལྡན་འདས་གསུང་བ་དེའི་ཚེ་སྤྲུལ་པ་མི་སྨྲ་ལ། སྤྲུལ་པ་གསུང་བ་དེའི་ཚེ་སངས་རྒྱས་མི་གསུང་བ་དང་། ཉན་ཐོས་ཀྱི་སྤྲུལ་པ་ཉན་ཐོས་ཀྱི་ཆ་བྱད་ཅན་སྤྲུལ་པ་ནི་ཉན་ཐོས་སྨྲ་བའི་ཚེ་སྤྲུལ་པའང་སྨྲ་ལ། ཉན་ཐོས་མི་སྨྲ་བའི་ཚེ་སྤྲུལ་པའང་མི་སྨྲ་ཞེ་ན། སངས་རྒྱས་བཅོམ་ལྡན་འདས་ནི་སེམས་དང་ཏིང་ངེ་འཛིན་ལ་མངའ་བརྙེས་པས་སྙོམས་པར་འཇུག་ཅིང་བཞེངས་ཏེ། དམིགས་པའང་མི་གཏོང་ལ། ཉན་ཐོས་ནི་དེ་ལྟར་མ་ཡིན་པའི་ཕྱིར། གཞན་ཡང་སངས་རྒྱས་བཅོམ་ལྡན་འདས་ནི་ཐམས་ཅད་མཁྱེན་པ་ཡིན་ཏེ། ཡེ་ཤེས་དང་དབང་གི་ཕ་རོལ་ཕྱིན་པ་ཡིན་ལ། ཉན་ཐོས་ནི་དེ་ལྟར་(༣༦༣བ)
མ་ཡིན་པའི་ཕྱིར། ཞེས་སོ། །འདི་ལ་འཇམ་སྒེག་གིས། དེ་ལྟར་ན་སྨྲ་བའི་ངག་མང་པོར་སྤྲུལ་ན་ནི་སྒྲ་ཡང་སྤྲུལ་པར་འགྱུར་བས་ཕྱིའི་སྐྱེ་མཆེད་བཞི། ཞེས་པ་དང་འགལ་བར་འགྱུར་ལ། འོན་ཏེ་ངག་གཅིག་ལས་མེད་ན་མང་པོ་སྨྲ་བར་བྱེད་པ་མི་འཐད་དོ། །གལ་ཏེ་མང་པོར་སྨྲ་བར་སྣང་བ་ཡིན་གྱི། ངག་གཅིག་ལས་མེད་དོ་ཞེ་ན། དེ་ནི་ཕྱིའི་སྐྱེ་མཆེད་བཞི་ལའང་མཚུངས་པའི་ཕྱིར། དེའི་ཕྱིར་བྱེ་བྲག་ཏུ་སྨྲ་བས་སེམས་ཅན་གསར་སྐྱེ་མེད་པས་དབང་པོ་ལྔ་མི་སྤྲུལ་ལ། སྒྲ་ལ་རྒྱུན་མེད་པས་སྤྲུལ་ལོ་ཞེས་པའང་འདི་དག་སེམས་ཀྱི་སྣང་བ་མ་གཏོགས་དོན་ལ་ཡོད་པའི་ཆོས་ཡིན་ན་ནི་ཇི་ལྟར་སྤྲུལ་པ་ཡིན། མེད་ན་གསར་དུ་སྐྱེ་བ་དང་རྒྱུན་མེད་པ་དག་ཀྱང་ཤེས་པ་ལ་སྣང་བར་འགྱུར་དུ་རུང་ངོ་ཞེས་ཟེར་ལ། ངག་དོན། སྡེ་པས་སྤྲུལ་པ་ནི་དོན་ལ་ཡོད་དེ། འབྱུང་བའི་རྟེན་ལས་སྤྲུལ་ཞིང་སྤྲུལ་པ་དེ་ལྟར་བྱ་བ་བྱེད་ནུས་སུ་ཡོད་ལ། དེ་ལྟར་ནའང་སྟག་སེང་གེ་སོགས་སུ་སྤྲུལ་པའི་སྟག་སེང་དེ་སྟག་སེང་ཡིན་པ་ནི་མི་འདོད་ཅིང་། སྟག་སེང་ཉིད་དུ་ཡོད་པར་འདོད་པས། འདིར་ཡོད་ན་ཡིན་དགོས་པས་མ་ཁྱབ་པར་ཡང་འདོད་ལ། ཐེག་པ་ཆེན་པོ་པ་དག་སྤྲུལ་པ་ནི་དོན་ལ་ཡོད་པ་ལྟ་ག་ལ་འཚལ། མེད་བཞིན་སྣང་བའི་དཔེ་ཁོ་ནར་བཤད་པ་ཡིན། གཉིས་པ་ལ། དངོས་དང་། འཕྲོས་དོན་ནོ། །དང་པོ་ནི། བྱིན་གྱིས་བརླབས་ནས་གཞན་འཇུག་ཕྱིར། །འོ་ན་ཇི་ལྟར་སྤྲུལ་པས་སྨྲ་ནུས་ཏེ་མི་ནུས་པར་ཐལ། རྒྱུད་གཅིག་ལ་སེམས་གཉིས་གཅིག་ཅར་མི་འབྱུང་པས་སྨྲ་སེམས་ཡོད་ཚེ་སྤྲུལ་སེམས་མེད་ལ། སྤྲུལ་སེམས་ཡོད་ཚེ་སྨྲ་སེམས་མེད་པའི་ཕྱིར་ཞེ་ན། ཉེས་པ་དེ་མེད་དེ། དང་པོ་སྦྱོར་བའི་ཚེ་སྤྲུལ་སེམས་ཀྱིས་སྤྲུལ་པ་སྤྲུལ་ནས་བདག་གི་སྤྲུལ་པ་འདི་ཡུན་རིང་དུ་གནས་པར་གྱུར་ཅིག །དེ་ན་རིག་བྱེད་ཀུན་སློང་གི་རྟོག་དཔྱོད་(༣༦༤ན)
སྨྲ་སེམས་ཀྱིས་སྨྲ་བར་གྱུར་ཅིག །ཅེས་སྔོན་གྱི་བསམ་རྒྱུན་རྗེས་སུ་འབྲང་བའི་རིམ་པ་ལྟར་འབྱུང་བར་བྱིན་གྱིས་བརླབས་ནས་ཇི་ལྟར་བྱིན་གྱིས་བརླབས་པ་ལྟར་སྤྲུལ་སེམས་ལས་གཞན་སྨྲ་སེམས་ཀྱིས་སྨྲར་འཇུག་པའི་ཕྱིར་རོ། །གསུམ་པ་བྱིན་རླབས་ཀྱིས་སྨྲ་བའི་ཚུལ་ནི། ཤི་བ་ལ་ཡང་བྱིན་བརླབས་ཡོད། །མི་བརྟན་ལ་མེད་གཞན་དག་མིན། །ཅི་བྱིན་རླབས་དེ་གསོན་པ་ཁོ་ནའམ་ཤི་བ་ལའང་ཡོད་ཡོད་དམ་ཞེ་ན། ཤི་བ་ལ་ཡང་བྱིན་གྱིས་བརླབས་ནས་ཡུན་རིང་དུ་འཇུག་པ་ཡོད་དེ། འཕགས་པ་འོད་སྲུངས་ཆེན་པོའི་མོས་པས་བྱིན་རླབས་ཀྱིས་དེའི་རུས་པའི་ཀེང་རུས་གནས་པའི་ཕྱིར། དེའང་རུས་པ་སོགས་བརྟན་པ་ལ་བྱིན་རླབས་ཡོད་ཀྱི། མི་བརྟན་པ་ཤ་ཁྲག་སོགས་ལ་མེད་དེ། འཕགས་པ་འོད་སྲུངས་ཆེན་པོས་ཤ་སོགས་བྱིན་གྱིས་མ་བརླབས་པའི་ཕྱིར། གཞན་དག་ན་རེ། ཤི་བ་ལ་བྱིན་རླབས་ཡོད་པ་མིན་ཏེ། འོད་སྲུང་གི་ཀེང་རུས་གནས་པ་ནི་གཙང་མའི་ལྷའི་མཐུས་བྱས་པའི་ཕྱིར། ཞེས་ཟེར་རོ། །གསུམ་པ་སྤྲུལ་སེམས་དང་སྤྲུལ་པ་མང་ཉུང་གི་དོན་ནི། དང་པོ་དུ་མས་གཅིག་ཡིན་ཏེ། །བྱང་བར་གྱུར་ནས་བཟློག་པའོ། །དང་པོ་ནི་སྤྲུལ་པའི་སེམས་དུ་མས་སྤྲུལ་པ་གཅིག་སྤྲུལ་པར་བྱེད་པ་ཡིན་ཏེ། མངོན་ཤེས་བྱང་བར་གྱུར་ནས་སེམས་གཅིག་གིས་བཟློག་པ་མང་པོ་སྤྲུལ་པར་བྱེད་པའི་ཕྱིར་རོ། །བཞི་པ་སྤྲུལ་སེམས་ཀྱི་ངོ་བོ་ནི། བསྒོམས་ལས་སྐྱེས་པ་ལུང་མ་བསྟན། །སྐྱེ་བ་ལས་སྐྱེས་རྣམ་གསུམ་མོ། །ཅི་སྤྲུལ་སེམས་ཐམས་ཅད་ལུང་མ་བསྟན་ཡིན་ནམ་ཞེ་ན། སྒོམ་པ་ལས་སྐྱེས་པའི་སྤྲུལ་སེམས་ནི་ངེས་པར་ལུང་མ་བསྟན་ཡིན་ཏེ། ས་གོང་མར་སྐྱེས་པས་འོག་མའི་སྤྲུལ་སེམས་མངོན་དུ་བྱེད་པའི་ཕྱིར། ལྷ་ཀླུ་དང་ཤ་ཟ་སོགས་ཀྱིས་སྐྱེ་བ་ལས་སྐྱེས་ཐོབ་ཀྱི་སྤྲུལ་སེམས་ནི། དགེ་མི་དགེ་ལུང་མ་བསྟན་རྣམ་པ་གསུམ་མོ་སྟེ་གཞན་ལ་ཕན་གདགས་པ་དང་གནོད་པ་དང་བཏང་སྙོམས་ཀྱི་ཆེད་དུ་བྱས་པའི་ཕྱིར། ལྷ་ལ་སོགས་པ་དེ་དག་གིས་བྱས་པའི་སྤྲུལ་པ་རང་གཞན་གྱི་ལུས་དང་འབྲེལ་བ་ནི། སྐྱེ་མཆེད་དགུ་(༣༦༤བ)
པ་ཡིན་ཏེ། སྒྲ་མེད་པའི་མིག་སོགས་དང་གཟུགས་ཀྱི་སྐྱེ་མཆེད་ཡོད་པའི་ཕྱིར། ཡང་དབང་པོ་རྣམས་སྤྲུལ་ན་དབང་པོ་རྣམས་སེམས་ཅན་དུ་སྟོན་པས། སྔོན་མེད་ཀྱི་སེམས་ཅན་འབྱུང་བར་འགྱུར་ཞེ་ན། དབང་པོ་ནི་སྤྲུལ་པར་མི་བྱེད་དེ། དེས་ན་དེ་ནི་སྐྱེ་མཆེད་དགུ་པར་འདོད་པའི་ཕྱིར་ཏེ། རང་གཞན་གྱི་ལུས་དང་འབྲེལ་བའི་སྤྲུལ་པ་གཟུགས་དྲི་རོ་རེག་བྱའི་ངོ་བོ་ཉིད་དབང་པོ་དང་ཐ་མི་དད་པར་གནས་པའི་ཕྱིར། འདི་ནི་གྲུབ་མཐའོ། །ཡིད་དང་ཆོས་ཀྱི་སྐྱེ་མཆེད་ཀྱང་སྤྲུལ་པར་མི་བྱེད་དེ་སེམས་མེད་པའི་ཕྱིར། དེ་སྐད་དུ་གདགས་པ་ལས། སྤྲུལ་པ་དེ་འབྱུང་བ་ཆེན་པོ་བཞི་ལས་གྱུར་པ་ཞེས་བརྗོད་པར་བྱའོ། །འབྱུང་བ་ཆེན་པོ་བཞི་ལས་གྱུར་པ་མ་ཡིན་ཅེས་བརྗོད་པར་བྱ། སྨྲས་པ། འབྱུང་བ་ཆེན་པོ་བཞི་ལས་གྱུར་པའོ་ཞེས་བརྗོད་པར་བྱའོ། །རྒྱུར་བྱས་པའི་གཟུགས་ཅན་ནམ་རྒྱུར་བྱས་པའི་གཟུགས་ཅན་མ་ཡིན་པ་ཞེས་བརྗོད་པར་བྱ། སྨྲས་པ། རྒྱུར་བྱས་པའི་གཟུགས་ཅན་ནོ་ཞེས་བརྗོད་པར་བྱ་སྟེ། སེམས་མེད་པ་ཞེས་ཀྱང་བརྗོད་པར་བྱའོ། །སྤྲུལ་པ་གང་གི་སེམས་ཀྱི་དབང་གིས་འཇུག་པར་བྱ་ཞེས་བརྗོད་པར་བྱ། སྨྲས་པ། སྤྲུལ་པ་ནི་གཉིས་ཏེ། སྐྱེས་ནས་ཐོབ་པ་དང་། སྒོམ་པ་ལས་བྱུང་བའོ། །དེ་ལ་དང་པོ་ནི། སེམས་ཅན་དེའི་སེམས་ཀྱི་དབང་གིས་འགྱུར་ལ། གཉིས་པ་ནི། སྤྲུལ་པ་པོའི་སེམས་ཀྱི་དབང་གིས་འཇུག་གོ་ཞེས་བརྗོད་པར་བྱའོ། །ཞེས་འབྱུང་ལ། དེས་ན་འདི་ནི་སྒོམ་བྱུང་གི་དབང་དུ་བྱས་ཀྱི་སྐྱེས་ཐོབ་ནི། དེ་ཉིད་ལས། སྤྲུལ་སེམས་ཡོད་པ་ཞེས་བྱའམ་མེད་པ་ཞེས་བྱ་ཞེ་ན། སྤྲུལ་པ་ནི་གཉིས་ཏེ། སྐྱེས་ནས་ཐོབ་པ་དང་། སྒོམ་པ་ལས་བྱུང་བའོ། །དེ་ལ་སྐྱེས་ཐོབ་ནི་སེམས་ཡོད་པ་ཞེས་བྱ་ལ། སྒོམ་བྱུང་གི་སེམས་མེད་པ་ཞེས་བྱའོ་ཞེས་སྐྱེས་ཐོབ་ལ་སེམས་ཡོད་པར་བཤད་དོ། །དེས་ན་རང་(༣༦༥ན)
གཞན་གྱི་ལུས་དང་འབྲེལ་བའི་སྤྲུལ་པ་ནི་སྐྱེ་མཆེད་དགུ་པ་ཡིན་ལ། མ་འབྲེལ་བའི་སྤྲུལ་པ་ནི་སྐྱེ་མཆེད་བཞི་ཁོ་ནའོ། །སྨྲས་པ། ཀུན་མཁྱེན་བླ་མའི་དགེ་ལེགས་གང་སྩོལ་བ། །གཟུར་གནས་དད་པའི་དབང་པོར་ལྷུང་བ་ལས། །ཡིད་ཆེས་ཤེས་རབ་ཕྱིར་ལྡོག་མེད་པ་དེས། །ལྟ་ངན་ཐེ་ཚོམ་དྲི་མ་ཀུན་བསལ་ནས། །འཕགས་རྣམས་དགྱེས་དགུར་རྩེན་པའི་སྤྱོད་ཡུལ་དུ། །དཀོན་མཆོག་འབངས་གྱུར་བདག་ཀྱང་ཅིས་མི་མཆིས། །དེས་ན་རང་འདོད་མཚན་འཛིན་རྟོག་པ་ཡི། །རྣམ་གཡེང་སྤངས་ཏེ་དབེན་པ་ཆེན་པོ་པ། །རྒྱལ་བ་མཆོག་གི་ཞི་བའི་དགོན་པ་དེར། །རིང་པོར་མི་ཐོགས་ཅིས་ཀྱང་བསྙེགས་པར་འདོད། །ཅེས་སོ། །ལྔ་པ་རྫུ་འཕྲུལ་གྱི་དབྱེ་བ་ནི། རྫུ་འཕྲུལ་གསང་སྔགས་སྨན་དག་དང་། །ལས་ལས་སྐྱེས་དང་རྣམ་པ་ལྔ། །རྫུ་འཕྲུལ་ནི་སྒོམ་བྱུང་སྐྱེས་ཐོབ་གཉིས་དང་། གསང་སྔགས་ལས་སྐྱེས་པ་དང་། རུས་སྦལ་གྱི་ཟེ་བ་དང་རྨ་བྱའི་མདོངས་སོགས་སྨན་དག་ལས་སྐྱེས་པ་དང་། ང་ལ་ནུ་དང་སྲིད་པ་བར་མ་པའི་རྫུ་འཕྲུལ་ལྟ་བུ་ལས་ལས་སྐྱེས་དང་རྣམ་པ་ལྔའོ། །གཉིས་པ་ལྷའི་མིག་རྣའི་མངོན་ཤེས་ལ། ངོ་བོ་གང་ཡིན་པ། ཁྱད་པར་གྱི་ཆོས། གང་ཟག་གསུམ་གྱི་ལྷའི་མིག་གིས་གཟིགས་ཚུལ་ལོ། །དང་པོ་ནི། ལྷ་ཡི་མིག་དང་རྣ་བ་ཡིན། །བསམ་གཏན་ས་པའི་གཟུགས་དང་བ། །ལྷའི་རྣ་མིག་དེ་ལྷ་ཁོ་ནའི་ཡིན་ནམ། འོན་ཏེ་བྱང་སེམས་དང་། འཁོར་ལོས་སྒྱུར་བ་དང་། ཁྱིམ་བདག་རིན་པོ་ཆེས་དཔག་ཚད་དུ་མ་མཐོང་བ་ལྷའི་རྣ་མིག་དང་འདྲ་བས་ལྷའི་རྣ་མིག་བརྗོད་པ་ཡིན་ནམ་ཞེ་ན། འདོད་རྟེན་གྱི་ལྷའི་མིག་དང་རྣ་བ་ནི་ལྷའི་མིག་རྣ་དངོས་ཡིན་ཏེ། འདོད་པའི་ཤ་རུས་སོགས་དང་མ་འབྲེལ་བའི་ཕྱིར་ཏེ། བསམ་གཏན་ལ་སྙོམས་པར་ཞུགས་པའི་མིག་དང་རྣ་བའི་ཐོན་གོར་དུ་སྒྲ་དང་སྣང་བ་ལ་གཏོད་པའི་སྦྱོར་བ་བྱས་པ་ན། བསམ་གཏན་ས་པའི་འབྱུང་བ་རྒྱུར་བྱས་ཀྱི། གཟུགས་དང་བ་གཟུགས་སྒྲ་མཐོང་ཐོས་ཀྱི་རྒྱུར་གྲུབ་(༣༦༥བ)
པས་བསམ་གཏན་གྱི་ས་པ་ཡིན་པའི་ཕྱིར། གཉིས་པ་ནི། རྟག་ཏུ་རྟེན་བཅས་མ་ཚང་མེད། །ཐག་རིང་ཕྲ་སོགས་སྤྱོད་ཡུལ་ཅན། །ལྷའི་མིག་རྣ་གཉིས་རྟག་ཏུ་རྣམ་ཤེས་དང་བཅས་པས་རྟེན་མཚུངས་དང་བཅས་པ་ཡིན་གྱི། དེ་མཚུངས་མེད་ལ་གཏན་མེད་པའི་ཞར་བ་དང་ནོངས་པ་སྟེ་ཡོ་བ་དང་། འོན་པ་ལྟ་བུ་མ་ཡིན་པས་མ་ཚང་བ་མེད་པ་དེ་གཟུགས་ཁམས་ཀྱི་སེམས་ཅན་བཞིན་ནོ། །ཏིང་ངེ་འཛིན་གྱི་སྟོབས་ཀྱིས་འབྱུང་བ་ལས་གྱུར་པའི་ལྷ་མིག་གསར་བྱུང་དེ་ཡོད་ཀྱི། བར་གཟུགས་མཐོང་ལ་ཏིང་འཛིན་ཉམས་པ་ན་གཟུགས་མི་མཐོང་ངོ་། །དེ་གཉིས་ཀྱི་ཡུལ་གཟུགས་སྒྲ་ཐག་རིང་དང་ཕྲ་སོགས་སྒྲིབ་པ་དག་གི་ཡང་སྤྱོད་ཡུལ་ཅན་ནོ། །གང་ཕྱིར་ཤ་ཡི་མིག་གི་གཟུགས། །ཐག་རིང་གནས་དང་སྒྲིབ་པ་དང་། །ཕྲ་དང་ཐམས་ཅད་མི་མཐོང་བ། །དེ་ཕྱིར་ལྷ་ཡིས་མཐོང་བར་འདོད། །ཅེས་པས་ཐམས་ཅད་ནི་མདུན་དུ་མ་ཟད་རྒྱབ་ལ་སོགས་ཀྱང་མཐོང་ངོ་། །གསུམ་པ་ནི། དགྲ་བཅོམ་བསེ་རུ་སྟོན་རྣམས་ཀྱིས། །སྟོང་གཉིས་གསུམ་དང་གྲངས་མེད་མཐོང་། །བསམ་གཏན་དང་པོའི་ལྷ་མིག་གིས་འདོད་པ་དང་བསམ་གཏན་དང་པོ་མཐོང་བ་སོགས་སྔར་བཤད་ཟིན་ལ། ཉན་རང་སངས་རྒྱས་རྣམས་ཀྱི་ལྷའི་མིག་གིས་མངོན་པར་འདུ་བྱེད་པ་མེད་པར་སྟོང་དང་། སྟོང་གཉིས། སྟོང་གསུམ་མཐོང་ལ། ཉན་ཐོས་ཆེན་པོ་དགྲ་བཅོམ་བསེ་རུ་སྟོན་རྣམས་ཀྱིས་འདུ་བྱེད་མེད་པར་སྟོང་གཉིས། གསུམ་དང་། གྲངས་མེད་མཐོང་སྟེ། སྟོན་པ་ནི་ཇི་ཙམ་བཞེད་པ་ལ་རགས་ལས་པས་སོ། །གསུམ་པ་སྐྱེས་ཐོབ་སོགས་ཀྱི་རང་བཞིན་གཏན་ལ་དབབ་པ་ལ། སྤྱིར་བསྟན་པ་དང་། རྟེན་གྱི་ཁྱད་པར་རོ། །དང་པོ་ལ། གཞན་བཞིའང་སྐྱེས་ཐོབ་ཏུ་བསྟན་པ། སྐྱེས་ཐོབ་ཀྱི་ལྷའི་མིག་གིས་མཐོང་ཚུལ། སེམས་ཤེས་རྒྱས་བཤད་དོ། །དང་པོ་ནི། གཞན་ཡང་སྐྱེ་བས་ཐོབ། རྫུ་འཕྲུལ་དུ་མ་ཟད་ལྷའི་རྣ་བ་སོགས་གཞན་བཞི་ཡང་སྐྱེ་བས་ཐོབ་པ་ཡོད་མོད་ཀྱི། ཅུང་ཟད་ཀྱང་མངོན་ཤེས་ཀྱི་མིང་(༣༦༦ན)
མི་ཐོབ་བོ། །ལྷའི་མིག་སྐྱེས་ཐོབ་ནི་འདོད་པའི་ལྷ་རྣམས་དང་ཀླུ་རྣམས་དང་གཟུགས་ཀྱི་ལྷའིའོ། །གཟུགས་མེད་ན་སྤྲུལ་འགྲོ་དང་ལྷའི་མིག་རྣ་གཞན་སེམས་ཤེས་པ་དང་སྔོན་གནས་རྗེས་དྲན་ཀྱང་མེད་དེ། གཟུགས་མེད་པའི་ཕྱིར། གཉིས་པ་ནི། དེས་ནི། །སྲིད་པ་བར་མ་མི་མཐོང་ངོ་། །སྐྱེས་ཐོབ་ཀྱི་ལྷ་མིག་དེས་ནི་སྲིད་པ་བར་མ་མི་མཐོང་གི། སྲིད་པ་བར་མ་ནི་སྦྱོར་བྱུང་གི་མངོན་ཤེས་ཁོ་ནས་མཐོང་ངོ་། །གསུམ་པ་ནི། སེམས་ཤེས་དེ་ནི་རྣམ་གསུམ་གང་། །རྟོག་དང་རིག་སྔགས་ཀྱིས་བྱས་པའང་། །ཕ་རོལ་སེམས་ཤེས་སྐྱེས་ཐོབ་དེ་ནི་དགེ་མི་དགེ་ལུང་མ་བསྟན་རྣམ་པ་གསུམ་གང་ཡང་མདོག་གནག་པ་དང་སོ་གཅིགས་པ་སོགས་མཚན་མ་བ་རྣམས་ཀྱི་ཕ་རོལ་སེམས་ཤེས་རྟོག་གེ་དང་། གང་རིག་སྔགས་ཀྱིས་བྱས་པའང་དགེ་མི་དགེ་ལུང་མ་བསྟན་གསུམ་སྟེ། སྒོམ་བྱུང་དགེ་བ་ཁོ་ན་ཡིན་པ་ལྟ་བུ་ནི་མ་ཡིན་ནོ། །གཉིས་པ་རྟེན་གྱི་ཁྱད་པར་ནི། དམྱལ་བ་པས་ནི་དང་པོ་ཤེས། །མི་ལ་སྐྱེ་བས་ཐོབ་པ་མེད། །སེམས་ཤེས་དང་སྔོན་གནས་རྗེས་དྲན་ནི། དམྱལ་བ་པས་ནི་དང་པོ་སྐྱེས་ནས་ཇི་སྲིད་སྡུག་བསྔལ་གྱི་ཚོར་བས་མ་ཉན་པ་དེ་སྲིད་དུ་ཤེས་ཏེ། ཕྱིས་སྡུག་བསྔལ་གྱི་ཚོར་བས་ཉམས་ཏེ་མི་དྲན་པའི་ཕྱིར། འགྲོ་བ་གཞན་ལྷ་དང་དུད་འགྲོ་ཡི་དྭགས་ཀྱིས་སྔོན་གནས་རྗེས་དྲན་དང་སེམས་ཤེས་པས་རྟག་ཏུ་ཤེས་ཏེ། སྡུག་བསྔལ་གྱི་ཚོར་བས་མ་ཉན་པའི་ཕྱིར། མི་ལ་ནི་རྫུ་འཕྲུལ་སོགས་ཇི་སྐད་བཤད་པ་དེ་ཐམས་ཅད་སྐྱེ་བས་ཐོབ་པ་མེད་ཀྱི། ཆགས་བྲལ་གྱིས་ཐོབ་པ་དང་རྟོག་གེ་དང་རིག་སྔགས་དང་སྨན་དང་ལས་ཀྱིས་བྱས་པ་ནི་ཡོད་དོ། །འོ་ན་མིར་གྱུར་པའི་རང་བཞིན་གྱིས་ཚེ་རབས་དྲན་པ་དེ་ཇི་ལྟ་བུ་ཞེ་ན། དེ་ནི་སྐྱེས་ཐོབ་ཀྱིས་མིན་པར་སྔོན་ལས་ལས་སྐྱེས་པ་ཡིན་ཏེ། རིན་ཆེན་ཕྲེང་བར། ཆོས་ཀྱི་ཆེད་དང་དེ་བཞིན་དུ། །གཞུང་གི་དོན་དག་དྲན་པ་དང་། །ཆོས་ཀྱི་སྦྱིན་པ་དྲི་མེད་པ། །ཚེ་རབས་དྲན་པ་ཐོབ་པར་འགྱུར། །ཞེས་སོ། །སྔོན་གྱི་གནས་རྗེས་དྲན་ནི་སྒོམ་(༣༦༦བ)
བྱུང་ཁོ་ན་མིན་པ་གསུམ་སྟེ། ཇི་སྐད་བཤད་པའི་སྒོམ་བྱུང་དང་། ལྷ་སོགས་སྐྱེས་ཐོབ་དང་། བྱང་སེམས་ཀྱི་ལྟ་བུ་ལས་ལས་སྐྱེས་པའོ། །གཉིས་པ་གནས་ཀྱི་མཚན་བསྟན་པ་ནི། ཆོས་མངོན་པ་མཛོད་ཀྱི་ཚིག་ལེའུར་བྱས་པ་ལས། ཡེ་ཤེས་བསྟན་པ་ཞེས་བྱ་བ་སྟེ་གནས་བདུན་པའོ།། །།འདིར་སྨྲས་པ། ཀྱེ་མ། ལྔ་བརྒྱ་ཐ་མའི་དུས་འདིར་སྙིང་རྗེ་ཆེན་པོའི་གཞན་དབང་གི། །ནུས་མཐུ་ཕུན་སུམ་ཚོགས་པས་དྲང་གྱུར་བསྟན་པ་ཡོངས་རྫོགས་ཀྱི། །གླེགས་བམ་མ་ལུས་འཆང་ཞིང་ཤེས་རབ་ཡེ་ཤེས་རལ་གྲི་ཡིས། །བློ་མདུད་གཅོད་བྱེད་འཇམ་དབྱངས་མགོན་པོ་རྗེ་བཙུན་མཉན་པ་ཆེ། །ཁྱེད་ཀྱིས་དོར་བའི་འབངས་གྱུར་ཉམ་ཆུང་ནི། །འདོད་འཇོའི་བ་མཆོག་ནོངས་པའི་བེའུ་ལྟར། །སྐྱབས་གཞན་མ་རྙེད་ཕྱོགས་སླད་དབུས་གཙང་གི། །རི་སུལ་བས་མཐའ་ཕལ་དུ་འཁྱམས་པར་གྱུར། །དེ་ཚེ་ངལ་དང་ངུབ་པ་ཡིས། །མ་བཟོད་མྱ་ངན་སེལ་ཆེད་དུ། །ཐུབ་དབང་རིང་ལུགས་ཁོ་ནར་བརྣགས། །དེ་ཚེ་ལེགས་པར་དཔྱད་འདི་ཡང་། །བརྩོན་པར་བྱ་བར་རིགས་སོ་ཞེས། །གཟུ་བར་བསམ་ནས་གངས་རི་མཆོག །ཡར་ལྷ་ཤམ་པོའི་མགུལ་པ་རུ། །དགེ་བར་བསྟི་བ་དེ་ཡི་ཚེ། །ལེགས་པར་གྲུབ་པའི་བགྱི་བ་དེས། །ཀརྨའི་བཀའ་བརྒྱུད་འཕེལ་གྱུར་ཅིག །ཅེས་སྨྲས་སོ། །