གནས་བརྒྱད་པ། སྙོམས་འཇུག་བསྟན་པ།
སྟོན་དང་བསྟན་པར་བཅས་ཀུན་གཅིག་བསྡོམས་ཞབས། །རྗེ་བཙུན་རས་པ་དེ་དང་ཀརྨ་པའི། །ཕྲིན་ལས་ཁྱུ་མཆོག་ཆེ་གྱུར་ལ་སོགས་པ། །རྩོད་མེད་གྲུབ་པའི་ཏོག་གྱུར་སྐྱབས་གནས་མཆོག །བསླུ་མེད་རྣམས་ལ་ཡིད་རྟོན་འཆའ་བཞིན་དུ། །ལས་དང་རྒྱུ་འབྲས་ངེས་པའི་ངང་ཚུལ་འདིར། །ཐེ་ཚོམ་བྲལ་བའི་ཤེས་རབ་ཐོབ་པའི་མཐུས། །གཏིང་ནས་ཐར་པའི་གྲོང་ཁྱེར་མ་གཏོགས་པའི། །འཇུག་བྱ་གཞན་ཡོད་(༣༦༧ན)
མིན་འདིར་སེམས་བསྐྱེད་དོ། །དེ་ཡི་ཕྱིར་དུ་འགྲོ་བ་ཡི། །བཤུལ་ལམ་ཡངས་པར་བྱ་བའི་ཕྱིར། །འཕགས་པའི་བགྲོད་པ་ཁྱད་པར་ཅན། །གསལ་བར་འདི་ན་འཆད་དོ་ཀྭ །གནས་བརྒྱད་པ་སྙོམས་འཇུག་བསྟན་པའི་དོན་ལ། དང་པོ་གནས་ཀྱི་གཞུང་བཤད་པ་ལ། བསམ་གཏན་གཟུགས་མེད་བཤད་པ། ཏིང་ངེ་འཛིན་གྱི་དབྱེ་བ། སྙོམས་འཇུག་ལ་བརྟེན་པའི་ཡོན་ཏན་བཤད་པའོ། །དང་པོ་ལ། སོ་སོར་བཤད་པ་དང་། ཐུན་མོང་དུ་གཏན་ལ་དབབ་པའོ། །དང་པོ་ལ། བསམ་གཏན་བཤད་པ། གཟུགས་མེད་བཤད་པ། གཉིས་ཀའི་མཇུག་བསྡུ་བའོ། །དང་པོ་ལ། དབྱེ་བ་དང་། སོ་སོའི་རང་བཞིན་ནོ། །དང་པོ་ནི། བསམ་གཏན་དག་ནི་རྣམ་གཉིས་བཞི། །གནས་དྲུག་པར་ཤེས་པའི་རང་བཞིན་གྱི་ཡོན་ཏན་རྣམས་བཤད་ནས་རང་བཞིན་བསམ་གཏན་དང་སྙོམས་འཇུག་སོགས་བརྗོད་པར་བྱ་སྟེ། ཡོན་ཏན་ཐམས་ཅད་ཀྱི་རྟེན་ཡིན་པས་གཙོ་བོ་ཡིན་པའི་ཕྱིར། ཡང་ན་ཤེས་པའི་སྐབས་ཀྱི་གཏི་མུག་མེད་པའི་རང་བཞིན་རྒྱས་པར་བཤད་ནས། མ་ཆགས་པ་དང་ཞེ་སྡང་མེད་པའི་རང་བཞིན་བསམ་གཏན་གཟུགས་མེད་རྣམས་བཤད་པའོ། །བསམ་གཏན་དག་ནི་མདོར་བསྡུ་ན། རང་གི་ལུས་གཞལ་ཡས་ཁང་སོགས་འབྲས་བུའང་སྐྱེ་བའང་ཡིན་པས་འབྲས་བུ་སྐྱེ་བ་དང་། ཉེར་བསྡོགས་དངོས་གཞི་ཐམས་ཅད་རྒྱུའང་ཡིན་སྙོམས་འཇུག་ཀྱང་ཡིན་པས། རྒྱུ་སྙོམས་འཇུག་གི་བྱེ་བྲག་ལས་རྣམ་པ་གཉིས་སོ། །དེའང་བསམ་གཏན་དང་པོ་ནས་བཞི་པའི་བར་བཞིའོ། །གཉིས་པ་ལ། འབྲས་བུ་སྐྱེ་བའི་བསམ་གཏན་འདིར་མི་འཆད་པའི་རྒྱུ་མཚན། རྒྱུ་སྙོམས་འཇུག་གི་བསམ་གཏན་བཤད་པའོ། །དང་པོ་ནི། དེར་སྐྱེ་བ་དག་རབ་ཏུ་བཤད། །དེ་ལ་བསམ་གཏན་དུ་སྐྱེ་བ་རྣམས་ནི་མི་བརྗོད་དེ། འཇིག་རྟེན་བསྟན་པ་དེར་སྐྱེ་བའི་བསམ་གཏན་རབ་ཏུ་བཤད་པའི་ཕྱིར་ཏེ། ཇི་ལྟར་བཤད་ན། དེར་སོ་སོའི། བསམ་གཏན་ས་ནི་གསུམ་པ་ཡིན། །བཞི་པ་ས་ནི་བརྒྱད་པ་ཡིན། །(༣༦༧བ)
ཅེས་བཤད་དོ། །གཉིས་པ་ལ། སྤྱིའི་ངོ་བོ་དང་། སོ་སོའི་ངོ་བོའོ། །དང་པོ་ལ། དངོས་དང་། འཁོར་བཅས་ལས། དང་པོ་ནི། སྙོམས་འཇུག་དགེ་བ་རྩེ་གཅིག་པ། །རྒྱུ་སྙོམས་འཇུག་གི་བསམ་གཏན་ནི་བྱེ་བྲག་མེད་པར་དགེ་བའི་སེམས་རྩེ་གཅིག་པ་སྟེ། ཏིང་ངེ་འཛིན་གྱི་རང་བཞིན་ཡིན་པའི་ཕྱིར། དགེ་བ་སྨོས་པས་ནི་ཉོན་མོངས་ཅན་དང་མ་སྒྲིབ་ལུང་མ་བསྟན་གྱི་སེམས་རྩེ་གཅིག་པ་གཅོད་པ་ཡིན་ནོ། །གཉིས་པ་ནི། རྗེས་འབྲང་བཅས་ན་ཕུང་པོ་ལྔ། །འཁོར་རྗེས་འབྲངས་དང་བཅས་ན་ཕུང་པོ་ལྔའི་རང་བཞིན་ཏེ། རིག་བྱེད་མ་ཡིན་པའི་གཟུགས་དང་བཅས་པའི་ཕྱིར། རྩེ་གཅིག་པ་ཞེས་པ་འདི་ཇི་ལྟ་བུ་ཞེ་ན། སེམས་མཉམ་གཞག་གི་དམིགས་པའི་རྩེ་ལ་གཅིག་པ་ཉིད་ཀྱི་ཕྱིར་དེ་སྐད་དུ་བརྗོད་དེ། སེམས་དང་སེམས་ལས་བྱུང་བ་ཐམས་ཅད་ཀྱང་དམིགས་པ་གཅིག་ཉིད་ནའང་དེ་སྐད་མི་སྨོས་ཏེ། སེམས་གཙོ་བོ་ཡིན་པའི་ཕྱིར་རོ། །མདོ་སྡེ་པའི་ཁྱད་པར་འགའ་ཞིག་ན་རེ། དེ་ལྟར་ན་སེམས་མ་ཡེངས་ཤིང་མཉམ་པར་བཞག་པའི་དམིགས་པ་གཅིག་པ་དག་ཁོ་ན་ཏིང་ངེ་འཛིན་ཡིན་ཏེ། གནས་སྐབས་ཀྱི་ཁྱད་པར་དུ་འགྱུར་བའི་ཕྱིར། སེམས་ཀྱི་ཡོན་ཏན་དང་ངོ་བོ་བཞིན་ནོ། །ཆོས་གཞན་སེམས་ལས་བྱུང་བ་ནི་དམིགས་པ་གཅིག་པ་མ་ཡིན་པར་འགྱུར་ཏེ། དམིགས་པ་གཅིག་པ་ཉིད་དེ་ནི་སེམས་ལས་གཞན་ལ་མེད་དེ། སེམས་ཉིད་གཡེང་བར་འགྱུར་དུ་དོགས་ནས་དེ་ཉིད་དམིགས་པ་ལ་རྩེ་གཅིག་ཏུ་བྱེད་དགོས་པའི་ཕྱིར། ལུགས་འདིས་སེམས་བྱུང་སེམས་ལས་ལོག་པར་མི་འདོད་པའི་དབང་དུ་བྱས་སོ། །བྱེ་སྨྲ་ན་རེ། སེམས་རྣམས་ཏིང་ངེ་འཛིན་མ་ཡིན་ཏེ། ཡིན་ན་སེམས་རྣམས་ནི་དམིགས་པ་གཅིག་ལ་འཇུག་པ་རང་ལས་ནུས་པ་ཡོད་པར་ཐལ་ཏེ། སེམས་ཁོ་ན་ཏིང་ངེ་འཛིན་ཡིན་པ་དེའི་ཕྱིར། འདོད་ན་རྣམ་གཡེང་མི་འབྱུང་བར་ཐལ་ཏེ། འདོད་པ་ཉིད་ཀྱི་ཕྱིར། དེས་ན་སེམས་རྣམས་ཁོ་ན་ཏིང་(༣༦༨ན)
ངེ་འཛིན་མ་ཡིན་ཏེ། སེམས་རྣམས་ཀྱི་དམིགས་པ་རྩེ་གཅིག་པ་ཉིད་སེམས་ཀྱི་རང་བཞིན་ལས་བྱུང་བ་མིན་པའི་ཕྱིར། རྣམ་གཡེངས་བཞིན་ནོ། །འོ་ན་ཇི་ལྟར་ཞེ་ན། སེམས་བྱུང་ཏིང་ངེ་འཛིན་གང་གི་སེམས་དེ་དག་རྩེ་གཅིག་ཅིང་མཉམ་པར་བཞག་པར་བྱེད་པའི་ཆོས་དེ་ཏིང་ངེ་འཛིན་ཡིན་ལ། དེ་ཉིད་རྩེ་གཅིག་པ་ཉིད་ཀྱང་ཡིན་ཏེ། དཔེར་ན། མུ་སྟེགས་བྱེ་བྲག་པའི་ལུགས་ཀྱི་དཀར་པོའི་ཡོན་ཏན་དང་ལྡན་པའི་ཕྱིར། རས་ཡུག་དཀར་པོ་ཡིན་ལ་ཡོན་ཏན་དེ་ཉིད་འདི་ལ་ཡོད་པས་དཀར་པོ་ཅན་ཞེས་བྱ་བ་དང་འདྲའོ་ཞེས་ཟེར། མདོ་སྡེ་པའི་ཁྱད་པར་ཁ་ཅིག་ན་རེ། རྩེ་གཅིག་པར་བྱེད་པའི་སེམས་བྱུང་ཏིང་ངེ་འཛིན་གང་ཡིན་བརྟགས་པ་ནི་དོན་མེད་པར་ཤེས་དགོས་ཏེ། སེམས་ཐམས་ཅད་ཆོས་ཅན་རྩེ་གཅིག་པ་མ་ཡིན་ནམ་སྟེ་ཡིན་པར་ཐལ། སེམས་ནི་སྐད་ཅིག་མ་ཡིན་པས་རང་ཡུལ་གྱི་དམིགས་པ་ལས་གཞན་ལ་འཕོ་ལོང་མེད་པའི་ཕྱིར་ཞེས་ཟེར་རོ། །བྱེ་སྨྲས། སྐད་ཅིག་དང་པོའི་སེམས་ལ་རྩེ་གཅིག་བྱེད་ཀྱི་ཏིང་ངེ་འཛིན་མི་དགོས་ཀྱང་། སྐད་ཅིག་གཉིས་པའི་སེམས་ཏིང་ངེ་འཛིན་དེའི་སྒོ་ནས་དམིགས་པ་ལས་རྣམ་པར་མི་གཡེང་བར་བྱེད་པས་བརྟགས་པ་འདི་ནི་དོན་དང་བཅས་པའོ་ཟེར་རོ། །མདོ་སྡེ་པས། དེ་ལྟར་ན་ནི་སེམས་ཀྱི་སྐད་ཅིག་དང་པོའི་ཏིང་ངེ་འཛིན་དང་མཚུངས་ལྡན་དེ་ལ་ཏིང་ངེ་འཛིན་གྱི་དོན་མི་གནས་པར་ཐལ། སེམས་བྱུང་ཏིང་འཛིན་གྱིས་ཏིང་འཛིན་དེ་ལ་བྱ་བ་མི་བྱེད་ཀྱི་གཉིས་པ་ལ་བྱ་བ་བྱེད་པའི་ཕྱིར། ཡང་སེམས་བྱུང་ཏིང་འཛིན་སྐད་ཅིག་གཉིས་པས་དེ་གོང་གི་སྐད་ཅིག་དང་པོ་ལ་ཏིང་འཛིན་རྩེ་གཅིག་པའི་བྱ་བ་བྱེད་དོ་སྙམ་ནའང་མ་ཡིན་ཏེ། སྐད་ཅིག་དང་པོའི་ཏིང་ངེ་འཛིན་ནི་གཉིས་པའི་དུས་ན་འགག་པས་གཉིས་པའི་དུས་ན་དེའི་བྱ་བ་ཡོད་པ་མ་ཡིན་ལ། མ་འགགས་ན་སྐད་ཅིག་སྔ་མ་དང་དུས་མི་(༣༦༨བ)
མཚུངས་པར་ཡང་འགྱུར་རོ། །ཡང་སེམས་རྩེ་གཅིག་པར་འཇོག་བྱེད་ལ་ཏིང་འཛིན་དོན་གཞན་མི་དགོས་པ་ནི། དྲན་པ་མ་ཉམས་པ་སོགས་ཀྱི་རྒྱུན་གང་ཁོ་ན་ལས་ཏིང་ངེ་འཛིན་སེམས་རྩེ་གཅིག་ཏུ་བྱེད་པར་ནུས་པ་དེ་ཁོ་ན་ལས་སེམས་སྔ་ཕྱི་རྣམས་ཀྱི་ཏིང་ངེ་འཛིན་གྱི་དམིགས་པ་རྩེ་གཅིག་པ་ཉིད་དུ་ཅིའི་ཕྱིར་མི་འདོད་དེ། འདོད་རིགས་པར་རིགས་པས་གྲུབ་ལ། དྲན་པས་གོམས་པ་སོགས་ཀྱི་ཏིང་ངེ་འཛིན་རྩེ་གཅིག་ཏུ་བྱེད་མི་ནུས་ན་ནི་རྩེ་གཅིག་པར་འཇོག་བྱེད་ཀྱི་ཏིང་ངེ་འཛིན་དེས་ཀྱང་མི་ནུས་པར་མཚུངས་སོ། །གཞན་ཡང་སེམས་ཐམས་ཅད་རྩེ་གཅིག་པ་ཉིད་དུ་ཐལ་བར་འགྱུར་ཏེ། ཏིང་ངེ་འཛིན་ས་མང་པོ་པ་ཡིན་པའི་ཕྱིར། ཏིང་ངེ་འཛིན་ས་མང་པོ་པ་ནི། སེམས་སྔ་མ་དང་མཚུངས་པར་ལྡན་པའི་ཏིང་ངེ་འཛིན་གྱི་མཐུས་ཕྱི་མའི་སེམས་སྔ་མའི་དམིགས་པ་ལ་མི་གཡེང་བ་ཡིན་ནོ། །བྱེ་སྨྲས། ཏིང་ངེ་འཛིན་ས་མང་པོ་པ་ཉིད་ཡིན་ཀྱང་སེམས་ཐམས་ཅད་རྩེ་གཅིག་པར་མི་ཐལ་ཏེ། ཏིང་ངེ་འཛིན་གྱི་ས་མང་པོ་པ་ཙམ་ནི་དགེ་བ་ཁོ་ནར་མ་ངེས་པ་དང་སྟོབས་ཆུང་བའི་ཕྱིར། དེས་ན་ཏིང་ངེ་འཛིན་ཐམས་ཅད་སྟོབས་མི་མཉམ་པས་ཏིང་ངེ་འཛིན་སྟོབས་ཆེ་བས་སེམས་གཉིས་པ་སེམས་དང་པོའི་དམིགས་པ་ལས་མི་གཡེང་བར་བྱེད་ཀྱི། ཏིང་ངེ་འཛིན་སྟོབས་ཆུང་བས་དེ་ལྟར་མ་ཡིན་པས་ཤེས་པར་བྱའོ། །ཞེས་འདོད་དོ། །མདོ་སྡེ་པས། སེམས་རྩེ་གཅིག་པ་ཁོ་ན་ཏིང་ངེ་འཛིན་ཡིན་གྱི། སེམས་ལས་དོན་གཞན་དུ་གྱུར་པའི་ཏིང་ངེ་འཛིན་ནི་མེད་དེ། ལམ་གྱི་ཚོགས་ཀྱི་བསླབ་པའི་སྒོའི་མདོ་ལས། ལྷག་པའི་སེམས་ཀྱི་བསླབ་པ་གང་ཞེ་ན། བསམ་གཏན་བཞིའོ་ཞེས་པ་དང་། སྟག་གི་བྱང་ཆུབ་ཀྱི་བུའི་མདོ་དང་། ཉན་ཐོས་ཀྱི་རྣམ་པར་བཤད་པ་ལས། སེམས་ཡོངས་སུ་དག་པའི་གཙོ་བོ་ནི་(༣༦༩ན)
བསམ་གཏན་བཞི་ཡིན་ནོ་ཞེས་ཇི་ལྟར་ཚུལ་ཁྲིམས་དང་ཤེས་རབ་ཁོ་ན་ཡིན་པ་ལྟར་སེམས་དཔའང་སེམས་ཁོ་ནར་གསུངས་ལ། སེམས་ཡོངས་སུ་དག་པའང་སེམས་ལས་གཞན་མིན་ཏེ། བསམ་གཏན་བཞིའི་མཚན་ཉིད་ཀྱིས་ཏིང་ངེ་འཛིན་གྱི་ཕྱིར། ཅིས་བསམ་གཏན་ཞེ་ན། འདིས་སེམས་པར་བྱེད་པས་ན་བསམ་གཏན་ཏེ། སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པའི་ཕྱིར་རབ་ཏུ་ཤེས་པར་བྱེད་ཅེས་པའི་ཐ་ཚིག་གོ། །སེམས་པར་བྱེད་ཅེས་པའི་སྐབས་སུ་ཤེས་པར་བྱེད་བྱ་བ་ཅིས་འབྲེལ་སྙམ་ན། སྐད་ཀྱི་བྱིངས་འདི་ནི་སེམས་པའི་དོན་ཡིན་ལ། རྐྱེན་བྱིན་པས་སེམས་པར་བྱེད་པ་ཞེས་འོངས་ལ། དེས་ན་སེམས་པ་དང་ཤེས་རབ་གཅིག་པ་ཉིད་ཀྱི་ཕྱིར་སེམས་པ་ཡང་ཤེས་རབ་ཡིན་ནོ། །ཞེས་བྱ་བ་འདི་མདོ་སྡེ་པའི་གྲུབ་མཐའ། །བྱེ་སྨྲ་དང་སེམས་ཙམ་པས་ནི་དེ་ཐ་དད་དུ་འདོད་དོ། །བསམ་གཏན་ཏིང་འཛིན་ཡིན་པ་དེ་ལྟར་ན་དགེ་བ་དང་། ཉོན་མོངས་ཅན་དང་། ལུང་མ་བསྟན་གྱི་ཏིང་ངེ་འཛིན་ཐམས་ཅད་བསམ་གཏན་དུ་ཐལ་བར་འགྱུར་ཏེ། ཏིང་ངེ་འཛིན་ས་མང་པོ་པ་ཡིན་པའི་ཕྱིར་ཞེ་ན། ཏིང་ངེ་འཛིན་ཐམས་ཅད་བསམ་གཏན་དུ་འགྱུར་བ་མིན་ཏེ། ཕུལ་དུ་ཕྱིན་པ་དང་ལྡན་པའི་ཏིང་ངེ་འཛིན་ལ་བསམ་གཏན་དུ་མིང་བཏགས་པའི་ཕྱིར། ཕུལ་དུ་བྱུང་བའི་སྣང་ལྡན་དེ་ལ་ཉི་མ་ཞེས་བྱའི་སྲིན་བུ་མེ་ཁྱེར་ལ་མིན་པ་དང་འདྲའོ། །ཕུལ་བྱུང་གི་ཏིང་ངེ་འཛིན་ནི་ཡན་ལག་དང་ལྡན་པ་ཡིན་ཏེ། ཞི་ལྷག་ཟུང་འབྲེལ་དུ་ངང་གིས་འབྱུང་བའི་ཕྱིར། རྟ་གཉའ་བསྒྲེལ་བས་ཤིང་རྟ་འདྲེན་པ་བཞིན་ནོ། །དེའི་ཕྱིར་མདོ་ལས། མཐོང་ཆོས་ལ་བདེ་བར་གནས་པ་དང་། ཡན་ལག་དང་ལྡན་པའི་ཏིང་ངེ་འཛིན་ལ་ལམ་སླ་བ། ཞེས་གསུངས་སོ། །(༣༦༩བ)
ལམ་སླ་བ་དེས་ནི་ཤིན་ཏུའང་སེམས་པར་བྱེད་དོ། །གལ་ཏེ། དགེ་བའི་ཡན་ལག་དང་ལྡན་པའི་ཏིང་ངེ་འཛིན་བསམ་གཏན་ཡིན་ན། ཉོན་མོངས་ཅན་དང་ལྡན་པ་ཇི་ལྟར་བསམ་གཏན་ཡིན་ཅེ་ན། བསམ་གཏན་ཡིན་ཏེ། ལོག་པར་ངེས་པར་རྟོག་ཅིང་སེམས་པའི་ཕྱིར། འོ་ན་འདོད་པའི་འདོད་ཆགས་ཀྱིས་ཀུན་ནས་དཀྲིས་པའི་སེམས་ཀྱང་བསམ་གཏན་དུ་ཧ་ཅང་ཐལ་བར་འགྱུར་ཏེ། ལོག་པར་ངེས་པར་སེམས་པའི་ཕྱིར་ཞེ་ན། ཐལ་བར་འགྱུར་བ་མིན་ཏེ། དེ་དང་མཐུན་པར་མཚར་གཅིག་མཚན་ཉིད་མང་པོ་མི་མཐུན་པ་མེད་པའི་ཉོན་མོངས་པ་ཅན་ལ་བསམ་གཏན་ཅེས་མིང་དུ་བཏགས་པའི་ཕྱིར། དཔེར་ན། རྡོ་སོགས་ས་བོན་མིན་པས་དེའི་རིགས་དང་མཚན་ཉིད་མི་འདྲ་བས་ས་བོན་རུལ་པ་ཞེས་མི་བྱའི། ས་བོན་གྱི་རིགས་ཉམས་པ་ལ་ས་བོན་རུལ་པ་ཞེས་བརྗོད་པ་བཞིན་ནོ། །དེས་ན་འདོད་ཆགས་ཀྱི་ཀུན་དཀྲིས་ཏིང་ངེ་འཛིན་དང་མཚན་ཉིད་མི་མཐུན་པ་དེ་ཏིང་ངེ་འཛིན་དུ་ག་ལ་འགྱུར། ཡང་ན་འདོད་ལན་འདེབས་པར་བྱེད་དེ། འདོད་པའི་འདོད་ཆགས་ཀྱི་ཀུན་དཀྲིས་བསམ་གཏན་ཡིན་ཏེ། བཅོམ་ལྡན་འདས་ཀྱིས་ཀྱང་། བསམ་གཏན་མི་དགེ་བ་དག་ཀྱང་གསུངས་པའི་ཕྱིར་ཏེ། དེའི་དབང་དུ་མཛད་ནས་སེམས་པར་བྱེད་རབ་ཏུ་སེམས་པར་བྱེད་ཅེས་སོགས་རྒྱ་ཆེར་འབྱུང་ངོ་། །གཉིས་པ་སོ་སོའི་ངོ་བོ་ལ། བསམ་གཏན་དང་པོའི་ངོ་བོ་དང་། ལྷག་མ་གསུམ་གྱི་ངོ་བོའོ། །དང་པོ་ནི། དཔྱོད་དང་དགའ་དང་བདེ་དང་ལྡན། །བསམ་གཏན་དང་པོའི་དགེ་བ་རྩེ་གཅིག་པ་དཔྱོད་པ་དང་དགའ་བ་དང་བདེ་བ་དང་མཚུངས་ལྡན་ནོ། །དཔྱོད་པ་སྨོས་པས་རྟོག་པ་ཡང་ཡོད་པར་བཤད་དོ། །རྟོག་པ་དང་ལྷན་ཅིག་དཔྱོད་པའི་ཕྱིར། གང་དུ་བ་ཡོད་པ་དེར་མེ་ཡང་ཡོད་པ་བཞིན། ཡང་དུ་བ་ལ་མེས་ཁྱབ་པ་ཡིན་པ་ལ་དཔྱོད་པར་རྟོག་(༣༧༠ན)
པས་མ་ཁྱབ་སྙམ་ན། དཔྱོད་པ་ཙམ་ལ་མ་ཁྱབ་ཀྱང་དཔྱོད་པ་ཁྱད་ཅན་ལ་ཁྱབ་པར་སྟོན་པ་ནི། དགའ་བདེ་དང་ལྡན་པའི་དཔྱོད་པ་ཅན་ཡིན་ན་རྟོག་པ་དང་ལྷན་ཅིག་དཔྱོད་པས་ཁྱབ་སྟེ། རྟོག་པ་མེད་ན་དགའ་བདེ་དང་ལྡན་པའི་དཔྱོད་པའང་མེད་པའི་ཕྱིར། འོ་ན་ལྷན་ཅིག་དཔྱོད་པས་རྟོག་པས་དཔྱོད་པའང་། གོ་བས་རྟོག་དང་དགའ་བདེ་ལྡན། །ཅེས་ཅི་མི་སྨོས་སྙམ་ན། མི་སྨོས་ཏེ། ཡན་ལག་སྔ་སྔ་སྤངས་པ་ཡི། །ཞེས་བརྗོད་པས་ན། རྟོག་པ་སྤངས་པའི་བསམ་གཏན་ཁྱད་ཅན་ཡང་གཉིས་པའོ་སྙམ་པའི་དོགས་པ་སྐྱེ་ཉེན་ཡོད་པའི་ཕྱིར། ཡང་ཁ་ཅིག །རྟོག་པ་བཟུང་ཡང་བསམ་གཏན་ཁྱད་པར་ཅན་གཉིས་པར་མི་ཐལ་ཏེ། རྟོག་པ་སྤངས་པའི་དགའ་བདེ་ཅན་གཉིས་པ་ཡིན་གྱི། དང་པོ་ཁྱད་ཅན་ལ་དགའ་བདེ་མེད་པས་རྟོག་པ་སྤངས་པ་ཙམ་གྱིས་གཉིས་པར་མི་འགྱུར་བའི་ཕྱིར་ཡང་ཟེར། གཉིས་པ་ནི། ཡན་ལག་སྔ་སྔ་སྤངས་པ་ཡིན། །བསམ་གཏན་ལྷག་མ་གསུམ་ནི། ཡན་ལག་སྔ་མ་སྔ་མ་སྤངས་པ་ཡི་དགེ་བ་རྩེ་གཅིག་པ་ཞེས་སྦྱོར་ཏེ། བསམ་གཏན་གཉིས་པ་ནི་དཔྱོད་པ་སྤངས་ལ་དགའ་བདེ་དང་། མཚུངས་ལྡན་དང་། གསུམ་པ་ནི་དཔྱོད་པ་དང་དགའ་བ་སྤངས་ལ། བདེ་བ་དང་མཚུངས་ལྡན་དང་། བཞི་པ་ནི་དཔྱོད་པ་དང་དགའ་བདེ་སྤངས་པའོ། །གཉིས་པ་གཟུགས་མེད་བཤད་པ་ལ། སྤྱིའི་ངོ་བོ། སོ་སོའི་ངོ་བོ། འཕྲོས་དོན་ཏོ། །དང་པོ་ལ། འདྲ་བ་ཉེར་སྦྱར་དང་། མི་འདྲ་བའི་ཁྱད་པར་གཉིས་ལས། དང་པོ་ནི། དེ་བཞིན་གཟུགས་མེད། བསམ་གཏན་རྣམས་ཇི་ལྟ་བ་དེ་བཞིན་དུ་གཟུགས་མེད་དེ་དག་ཀྱང་སྐྱེ་བ་དང་སྙོམས་འཇུག་གི་སྒོ་ནས་གཉིས་ཡིན་ལ། ནམ་མཁའ་ལ་སོགས་པ་བཞི་ཡང་ཡིན་ནོ། །དེ་དག་གི་སྐྱེ་བ་རྣམས། གཟུགས་མེད་ཁམས་ན་གནས་མེད་དེ། །སྐྱེ་བ་ལས་ནི་རྣམ་པ་བཞི། །ཞེས་པར་བཤད་ཟིན་ཏོ། །(༣༧༠བ)
གཟུགས་མེད་ཀྱི་སྙོམས་འཇུག་རྣམས་ནི་དགེ་བ་རྩེ་གཅིག་པའི་ཏིང་ངེ་འཛིན་ཅེས་བྱ་བའི་ཚུལ་དེ་བཤད་ཟིན་ཏོ། །གཉིས་པ་ནི། ཕུང་པོ་བཞི། །འཁོར་རྗེས་འབྲངས་དང་བཅས་ན་ཕུང་པོ་བཞི་རྗེས་སུ་འབྲང་བའི་གཟུགས་བསམ་གཏན་ཟག་མེད་ཀྱི་སྡོམ་པ་མེད་པའི་ཕྱིར། གཉིས་པ་སོ་སོའི་ངོ་བོ་ནི། འོག་མའི་ས་ལས་དབེན་ལས་སྐྱེས། །འོག་མའི་ས་བསམ་གཏན་བཞི་པ་དང་། ནམ་མཁའ་མཐའ་ཡས་དང་། རྣམ་ཤེས་མཐའ་ཡས་དང་། ཅིའང་མེད་པའི་ས་ལས་དབེན་པ་རྣམ་པར་འབྱེད་པ་ལས་སྐྱེས་པ་ནི་རིམ་པ་བཞིན་ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅིའང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དེ་དེ་ལྟར་གཟུགས་མེད་བཞིའོ། །དབེན་པ་ནི་བར་ཆད་མེད་ལམ་གང་གིས་འོག་མ་ལས་འབྱེད་པ་སྟེ། དེས་འོག་མ་ལ་རྒྱབ་ཀྱིས་ཕྱོགས་ནས་འདོད་ཆགས་དང་བྲལ་བར་འགྱུར་བའི་ཕྱིར། ནམ་མཁའི་ཉེར་བསྡོགས་ནི་བསམ་གཏན་བཞི་ལ་དམིགས་པས་གཟུགས་ཀྱི་འདུ་ཤེས་བཤིག་པ་མ་ཡིན་ཅིང་མ་བྲལ་བའོ། །གསུམ་པ་འཕྲོས་དོན་ལ། འདུ་ཤེས་ཀྱི་ཁྱད་པར་དང་། སྒྲ་བཤད་པའོ། །དང་པོ་ནི། ཉེར་བསྡོགས་གསུམ་དང་བཅས་པར་ནི། །གཟུགས་ཀྱི་འདུ་ཤེས་བཤིག་ཅེས་བྱ། །གཟུགས་མེད་དེ་དག་ཀྱང་ཉེར་བསྡོགས་གོང་མ་གསུམ་དང་བཅས་པ་ནི་གཟུགས་ཀྱི་འདུ་ཤེས་བཤིག་ཅེས་མིང་མི་ཐོབ་སྟེ། རང་ས་ན་གཟུགས་མེད་ཅིང་འོག་སའི་ཟག་བཅས་ཀྱི་གཟུགས་ལ་མི་དམིགས་པའི་ཕྱིར། སྡེ་པ་གཞན་དགེ་འདུན་ཕལ་ཆེན་པའི་བྱེ་བྲག་འཇིག་རྟེན་ལས་འདས་པར་སྨྲ་བའི་སྡེ་པ་དང་། ཐམས་ཅད་ཡོད་སྨྲའི་བྱེ་བྲག་གོས་དམར་བའི་སྡེ་པ་དང་། མང་བཀུར་བ་རྣམས་ན་རེ། རེ་ཞིག་གཟུགས་མེད་དག་ན་རྗེས་འབྲངས་ཕུང་པོ་བཞི་པ་ཅན་ཏེ། གཟུགས་མེད་པའི་ཕྱིར་ཞེས་པའི་རྟགས་ནི་བསྒྲུབ་བྱའོ་ཞེས་ཟེར་རོ་ཞེས་པ་ལ། བྱེ་སྨྲས། འོ་ན་དེར་ཇི་ལྟར་གཟུགས་མེད་པ་ཞེས་བརྗོད་མི་རིགས་པ་གཟུགས་ཅན་ནོ་ཞེས་བརྗོད་པར་(༣༧༡ན)
ཐལ་བར་ཅིས་མི་འགྱུར་ཏེ། དེར་གཟུགས་ཡོད་པའི་ཕྱིར་ཞེས་དྲིས་པ་ལ། དེས་དེ་མ་ཁྱབ་སྟེ། གཟུགས་ཅུང་ཟད་ཅིག་ཡོད་པ་ལ་གཟུགས་མེད་པར་བརྗོད་པའི་ཕྱིར་ཏེ། ཅུང་ཟད་སེར་བ་ལ་སེར་པོར་བརྗོད་པ་བཞིན་ཅེས་ཟེར་རོ། །ཡང་གཟུགས་མེད་དེར་གཟུགས་ཇི་ལྟ་བུ་ཡོད་དྲིས་པས། ལུས་ངག་གི་སྡོམ་པ་ཙམ་ཞིག་ཡོད་དོ་ཞེ་ན། དེར་ལུས་ངག་གི་སྡོམ་པ་ཡོད་པ་མིན་ཏེ། ལུས་ངག་མེད་པའི་ཕྱིར། ཁྱབ་སྟེ། གཟུགས་མེད་ན་སྤྱོད་པ་འབྱུང་བ་མེད་ན་འབྱུང་འགྱུར་ཡོད་དུ་མི་རུང་བའི་ཕྱིར། གལ་ཏེ་དཔེར་ན། ཟག་མེད་ཀྱི་འབྱུང་བ་མེད་ཀྱང་ཟག་མེད་ཀྱི་སྡོམ་པ་འབྱུང་འགྱུར་གྱི་གཟུགས་ཡོད་པ་ལྟར་གཟུགས་མེད་རང་ས་ན་འབྱུང་བ་མེད་ཀྱང་གཟུགས་ཀྱི་འབྱུང་བ་རྒྱུར་བྱས་ནས་བསམ་གཏན་གྱི་སྡོམ་པ་ཡོད་དོ་ཞེ་ན། ཟག་མེད་ཀྱི་སྡོམ་པ་དང་དེ་མི་མཚུངས་ཏེ། ཟག་མེད་ལ་འབྱུང་བ་མེད་ཀྱང་ཟག་མེད་ཀྱི་སྡོམ་པ་ནི་གང་དུ་སྐྱེས་པ་དེ་ན་ཡོད་པའི་ཟག་བཅས་ཀྱི་འབྱུང་བ་རྒྱུར་བྱས་ནས་སྐྱེ་བའི་ཕྱིར་ཏེ། ཟག་མེད་ནི་ས་དེར་གློ་བུར་དུ་འོངས་པ་ཡིན་ཙ་ན་ཟག་བཅས་ཀྱི་འབྱུང་བ་རྟེན་དུ་ཡོད་པ་མི་འགལ་བའི་ཕྱིར། བསམ་གཏན་གྱི་སྡོམ་པ་ནི་དེ་ལྟར་མི་རུང་སྟེ། ཟག་བཅས་ཀྱི་འབྱུང་བ་ལས་གྱུར་པ་འབྱུང་བ་རྟེན་དུ་ཡོད་པ་དེ་ནི་ལྟ་བས་རིས་སུ་བཅད་ཅིང་། སྲེད་པས་བདག་གིར་བྱས་ཙམ་ན་འབྱུང་བ་ལས་གྱུར་བ་ཁམས་དེ་པ་ཡིན་ཙམ་ན་རྟེན་འབྱུང་བ་རང་ཡང་ཁམས་དེ་ཡིན་དགོས་ཀྱི། རྟེན་ཁམས་གཞན་ལ་བརྟེན་པ་ཁམས་གཞན་མི་རིགས་པའི་ཕྱིར། འབྲས་བུ་སྐྱེ་བའི་གཟུགས་མེད་ལ་བཀག་པས་དེའི་རྒྱུ་སྙོམས་འཇུག་ལའང་གཟུགས་དེ་དག་དགག་པར་བཤད་པ་འདི་ལ་འབད་པ་གཞན་མི་བྱའོ། །འོན་ཀྱང་དེར་ལུས་དང་དབང་པོ་གཟུགས་ཅན་རྣམས་ཀྱང་ཡོད་དོ་ཞེ་ན། ཇི་ལྟར་ན་དེར་གཟུགས་ཅུང་ཟད་ཡོད་པར་(༣༧༡བ)
འདོད་དེ། འདོད་མི་རིགས་པར་ཐལ། གཟུགས་མཐའ་དག་ཡོད་པའི་ཕྱིར། མ་ཁྱབ་སྟེ། རྡུལ་ཕྲ་རབ་ཙམ་གྱི་གཟུགས་ཡོངས་རྫོགས་ཡོད་ཀྱང་བོང་ཚོད་ཆུང་བའི་ཕྱིར་ཞེ་ན། འོ་ན་ཆུའི་ནང་དུ་སྐྱེ་བོ་གཟུགས་བལྟར་མི་སྣང་ཡང་གཟུགས་མེད་དུ་ཐལ་བར་འགྱུར་ཏེ། ཤིན་ཏུ་ཕྲ་ཡང་ལུས་ཡོངས་སུ་རྫོགས་པའི་ཕྱིར། ཡང་མ་ཁྱབ་སྟེ། འདི་ནི་དང་བའི་ཕྱིར་གཟུགས་མེད་པའོ་ཞེ་ན། སྲིད་པ་བར་མ་དང་གཟུགས་ན་སྤྱོད་པ་རྣམས་ཀྱང་གཟུགས་མེད་པར་ཐལ། འདི་དག་དང་བས་རྡོ་རྗེའི་རི་ལའང་ཐོགས་མེད་དུ་འགྲོ་བའི་ཕྱིར། ཡང་གང་ལས་ཆེས་དང་བ་མེད་པ་དེ་ནི་གཟུགས་མེད་པ་ཡིན་ཅེ་ན་ནི། སྲིད་རྩེ་བ་ཁོ་ན་གཟུགས་མེད་དུ་འགྱུར་ཏེ། སྙོམས་འཇུག་འོག་མ་ལས་ཁྱད་པར་འཕགས་པ་བཞིན་སྙོམས་འཇུག་གི་སྟོབས་ཀྱིས་ལུས་ཀྱང་ཁྱད་པར་དུ་འཕགས་ན་སྐྱེ་བ་ཆེས་མཆོག་ཏུ་དང་བའི་ཁྱད་པར་ནི་དེར་མུ་ཐུག་པའི་ཕྱིར། གལ་ཏེ་གཟུགས་མེད་པའི་གཟུགས་ནི་ས་འོག་མའི་དབང་པོས་མི་འཛིན་པས་གཟུགས་མེད་པ་ཞེས་བྱ་སྟེ། གཟུགས་མེད་དུ་སྐྱེས་པའི་གཟུགས་དེ་ཤིན་ཏུ་ཕྲ་བའི་ཕྱིར་སྙམ་ན། དེ་ལྟར་ན་བསམ་གཏན་བཞིར་སྐྱེས་པའི་གཟུགས་ཀྱང་གཟུགས་མེད་པ་དང་ཁྱད་མེད་དུ་ཐལ། གོང་མ་གོང་མའི་གཟུགས་འོག་མ་འོག་མའི་དབང་པོས་མི་ཟིན་པའི་ཕྱིར། དེ་ལ་ཁོ་ན་རེ། དང་བའི་ཚུལ་དང་འོག་མའི་དབང་པོའི་གོང་མ་མི་འཛིན་པར་འདྲ་ཡང་གོང་མ་བཞི་གཟུགས་མེད་དུ་གཏོགས་ཀྱི། གཟུགས་ཁམས་པ་མ་ཡིན་པས་གཟུགས་མེད་པར་འཇོག་གོ། །ཞེས་དང་། འོ་ན་ཅི་གཟུགས་མེད་ན་གཟུགས་ཡོད་ན་གཟུགས་མེད་ཅིའི་ཕྱིར་བརྗོད་སྙམ་ན། འདོད་གཟུགས་གཉིས་འདོད་ཡོན་དང་གཟུགས་ཀྱིས་ཕྱེ་བས་དེ་གཉིས་ཀྱི་མིང་དོན་མཐུན་ཡིན་ལ། གཟུགས་མེད་ཁམས་ཞེས་པའི་མིང་དོན་དང་མི་མཐུན་ཏེ། (༣༧༢ན)
འདོད་རྒྱལ་བའི་སྒྲ་ཡིན་པའི་ཕྱིར་ཞེ་ན། སྔ་མ་གཉིས་མིང་དོན་མཐུན་ལ་ཕྱི་མ་ལ་མི་མཐུན་པའི་རིགས་པ་ཅི་ཞིག་ཡོད་དེ་ཚད་མ་མེད་དོ། །ད་ནི་གཟུགས་མེད་ན་གཟུགས་ཡོད་པར་ལུང་གིས་སྒྲུབ་པར་འདོད་དེ། ཚེ་དང་ལྡན་པ་གསུས་པོ་ཆེ་ཚེ་གང་ཡིན་པ་དང་དྲོད་གང་ཡིན་པའི་ཆོས་འདི་དག་ནི་འདྲེས་པ་སྟེ། མ་འདྲེས་པ་མ་ཡིན་ནོ་ཞེས་ཚེ་དང་དྲོད་གཉིས་འདྲེས་པར་གསུངས་ཤིང་གཟུགས་མེད་ནའང་ཚེ་ཡོད་ལ། དེ་ཡོད་ན་དྲོད་ཡོད་པས་དྲོད་གཟུགས་ཅན་ནོ་སྙམ་པའོ། །ཡང་ཚེ་དང་ལྡན་པ་ཤཱ་རིའི་བུ། དཔེར་ན། འདམ་བུའི་གཤོག་གཉིས་གནམ་དུ་བསྒྲེངས་ཏེ། ཕན་ཚུན་བསྟེན་ཅིང་འདུག་པ་དེ་ལ་འགའ་ཞིག་གིས། གཅིག་བོར་ན་གཅིག་ཤོས་འགྱེལ་བར་འགྱུར་ལ། གཅིག་ཤོས་བོར་ན་གཅིག་ཤོས་འགྱེལ་བར་འགྱུར་རོ། །ཚེ་དང་ལྡན་པ་ཤཱ་རིའི་བུ་དེ་བཞིན་དུ་མིང་དང་གཟུགས་དག་ཀྱང་ཕན་ཚུན་བརྟེན་ཅིང་གནས་སོ་ཞེས་བྱ་བ་དང་། ཡང་རྟེན་ཅིང་འབྲེལ་འབྱུང་གི་མདོ་ལས་ཀྱང་། ཉིང་མཚམས་སྦྱོར་བའི་མཚན་ཉིད་ཀྱི་སྐབས་སུ་རྣམ་པར་ཤེས་པའི་རྐྱེན་གྱི་མིང་དང་གཟུགས་ཞེས་མིང་གཟུགས་ཕན་ཚུན་བརྟེན་པ་དང་། རྣམ་ཤེས་ཀྱིས་མིང་གཟུགས་བསྐྱེད་པར་གསུངས་ཤིང་གཟུགས་མེད་ནའང་མིང་དང་རྣམ་ཤེས་ཡོད་པའི་ཕྱིར། རྣམ་ཤེས་གནས་པ་བཞི་སྟོན་པའི་མདོ་ལས། དགེ་སློང་དག་རྣམ་པར་ཤེས་པ་གཟུགས་སུ་ཉེ་བར་འགྲོ་བ། གཟུགས་ལ་དམིགས་པ། གཟུགས་ལ་བརྟེན་པ་གནས་སོ། །དགེ་སློང་དག་གང་ལ་ལ་ཞིག །འདི་སྐད་དུ་བདག་ནི་གཟུགས་དང་ཚོར་བ་ནས་འདུ་བྱེད་ཀྱི་བར་དག་ལས་གཞན་དུ་རྣམ་པར་ཤེས་པ་འགྲོའམ་འོང་བར་སྨྲའོ་ཞེས་ཟེར་ན། དེའི་ངག་དེ་ནི་དེའི་ཚིག་ཙམ་དུ་ཟད་དོ། །ཞེས་གསུངས་པས། ཕུང་པོ་བཞི་ལས་རྣམ་ཤེས་གཞན་དུ་འགྲོ་བ་བཀག་པའི་(༣༧༢བ)
ཕྱིར། གཟུགས་མེད་དག་ན་གཟུགས་ཡོད་པ་ཉིད་དུ་བཤད་པ་གྲུབ་བོ་ཞེ་ན། ལུང་དེ་སྒྲུབ་བྱེད་དུ་རུང་བ་མ་ཡིན་ཏེ། དགོངས་ཏེ་གསུངས་པའམ་སྒྲ་ཇི་བཞིན་པ་ཡིན་ཅེས་དཔྱད་བྱ་ཡིན་པའི་ཕྱིར་རོ། །དེའང་རེ་ཞིག །ཚེ་དྲོད་འདྲེས་པར་གསུངས་པ་དེ་ངེད་ཟེར་བ་ལྟར། འདོད་གཟུགས་ན་སྤྱོད་པའི་ཚེ་ལ་དགོངས་པའམ། ཁྱེད་ཟེར་བ་ལྟར་ཁམས་ཐམས་ཅད་ལ་དགོངས་ཞེས་བྱ་བའང་དཔྱད་པར་བྱ་དགོས་ལ། གཟུ་བོར་བརྗོད་ན་ལུང་གི་དགོངས་པ་ནི་འདི་ཡིན་ཏེ། འདོད་པ་ན་སྤྱོད་པའི་ཚེ་ཁོ་ན་ལ་དགོངས་ཏེ་གསུངས་པའི་ཕྱིར། ཚེ་དང་དྲོད་དང་རྣམ་ཤེས་ཀྱི། །གང་ཚེ་ལུས་འདི་འདོར་བྱེད་ཅིང་། །བོར་ནས་དེ་ཚེ་ཉལ་བ་ནི། །ཇི་ལྟར་ཤིང་ལ་སེམས་མེད་བཞིན། །ཅེས་འབྱུང་ངོ། །གཟུགས་མེད་ཁམས་ན་ལུས་ཀྱང་མེད་ན་ལུས་འཇིག་པ་ལྟ་ག་ལ་ཡོད། གཟུགས་ཁམས་ན་ལུས་ཡོད་མོད་ཀྱི་ལུས་འཇིག་པར་མངོན་པ་ནི་མེད་དོ། །མིང་གཟུགས་ཕན་ཚུན་བརྟེན་པར་གསུངས་པ་ངེད་ཟེར་བ་བཞིན་འདོད་གཟུགས་ལ་སྤྱོད་པ་ལ་དགོངས་ཏེ་གསུངས་པའམ། ཁྱེད་ཟེར་བ་བཞིན་ཁམས་ཐམས་ཅད་ལ་དགོངས་ཞེས་བྱ་བ་དཔྱད་པར་བྱ་ལ། ལུང་དེའི་དོན་ནི། འདོད་གཟུགས་ལ་སྤྱོད་པ་ཁོ་ན་ལ་དགོངས་ནས་གསུངས་པ་ཡིན་ཏེ། གཉིས་ཀ་ཡོད་ན་ཕན་ཚུན་བརྟེན་པ་སྲིད་པའི་དབང་དུ་བྱས་པའི་ཕྱིར། གང་ཡང་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པ་འདི་ཅི། ཁྱེད་ཟེར་བ་ལྟར་ཁམས་གསུམ་གར་རྣམ་ཤེས་ཐམས་ཅད་མིང་གཟུགས་ཀྱི་རྐྱེན་དུ་གསུངས་ཟེར་བ་ལྟར་རམ། འོན་ཏེ་ང་ཟེར་བ་ལྟར་འདོད་གཟུགས་ཀྱི་མིང་གཟུགས་རྣམ་ཤེས་ཀྱི་རྐྱེན་ཅན་ཡིན་ལ། གཟུགས་མེད་ཀྱི་རྣམ་ཤེས་ནི་མིང་ཁོ་ནའི་རྐྱེན་ཅན་ཡིན་པའི་ཕྱིར། མིང་གཟུགས་ཐམས་ཅད་རྣམ་ཤེས་ཀྱི་རྐྱེན་ཅན་དུ་གསུངས་ཀྱི། རྣམ་ཤེས་ཐམས་(༣༧༣ན)
ཅད་མིང་གཟུགས་ཀྱི་རྐྱེན་དུ་སྟོན་པ་མ་ཡིན་པས་དཔྱད་དགོས་སོ། །ཡང་གཟུགས་སོགས་ལས་གཞན་དུ་རྣམ་ཤེས་འོང་བ་དང་འགྲོ་བ་དགག་པར་གསུངས་པ་འདི་ང་ཟེར་བ་བཞིན་གཟུགས་ཚོར་འདུ་ཤེས་འདུ་བྱེད་དེ་དག་ཐམས་ཅད་མེད་ན་འཇིག་རྟེན་སྔ་མ་ནས་སྲིད་པ་བར་མའི་རྒྱུན་གྱི་རྣམ་ཤེས་འོང་བ་དང་། སྲིད་པ་བར་མའི་རྒྱུན་གྱིའང་འཇིག་རྟེན་འདི་ནས་འཇིག་རྟེན་ཕ་རོལ་དུ་འགྲོ་བ་བཀག་གམ། འོན་ཏེ་ཁྱོད་ཟེར་བ་བཞིན་གཟུགས་སོགས་ཀྱི་ནང་ནས་གང་རུང་འགའ་ཞིག་ཀྱང་མེད་ན་རྣམ་ཤེས་འགྲོ་འོང་བཀག་པ་ཡིན་ཅེས་དཔྱད་པར་བྱ་དགོས་ལ། དེ་ལྟར་ན་ཁོ་བོ་ཅག་ནི་དེ་ཐམས་ཅད་མེད་ན་རྣམ་ཤེས་ཀྱི་འགྲོ་འོང་བཀག་པ་ཡིན་ལ། གང་ཡང་རུང་བ་རེ་མེད་པས་རྣམ་ཤེས་ཀྱི་འགྲོ་འོང་མི་ཁེགས་ཏེ། གསུམ་ཡོད་ན་རྣམ་ཤེས་ཀྱི་འགྲོ་འོང་གྲུབ་ཟིན་པའི་ཕྱིར། ཡང་ལུང་དེ་དག་ལ་བྱེ་བྲག་མི་ཕྱེ་བར་གསུངས་པའི་ཕྱིར། གཟུགས་མེད་པའི་སྐྱེ་བོ་ལ་གཟུགས་ཡོད་པ་ལ་དཔྱད་པར་མི་བྱའོ་ཞེ་ན། འོ་ན་ཧ་ཅང་ཐལ་བར་འགྱུར་ཏེ། ཇི་ལྟར་ཐལ་སྙམ་ན། འོ་ན་ཕྱི་ཡི་མེ་ཡི་དྲོ་བའང་ཇི་ལྟར་ཡོད་པར་འགྱུར་ཏེ་མེད་པར་ཐལ། བུད་ཤིང་གི་མེའི་དྲོ་བ་ལ་ཡང་ཚེ་མེད་པའི་ཕྱིར། ཁྱབ་སྟེ། ཚེ་མེད་ན་དྲོད་མེད་པས་ཁྱབ་པ་བྱེ་བྲག་མ་མཛད་པའི་ཕྱིར་ཏེ། ཇི་སྐད་དུ། གསུས་པོ་ཆེ་ཚེ་གང་ཡིན་པ་དང་ནང་གི་དྲོད་གང་ཡིན་པ་འདྲེས་པ། ཞེས་མ་གསུངས་པའི་ཕྱིར་རོ། །ཤིང་དང་རྩིག་པ་སོགས་ཀྱང་རྣམ་ཤེས་དང་མིང་ལ་བརྟེན་པར་འགྱུར་ཏེ། མིང་དང་སེམས་ཅན་དུ་བགྲངས་པའི་གཟུགས་ཕན་ཚུན་བརྟེན་ནས་གནས་ཞེས་མ་གསུངས་པར་མིང་དང་གཟུགས་ཕན་ཚུན་བརྟེན་ནས་གནས་ཞེས་ཁྱད་པར་མེད་པར་འབྱུང་བའི་ཕྱིར། ཡང་ཁྱོད་རྣམ་ཤེས་གནས་པ་བཞི་ཁྱད་མེད་དུ་གསུངས་པ་ལྟར་གཟུགས་མེད་ཁམས་ན་(༣༧༣བ)
གཟུགས་ཡོད་པར་འདོད་པ་དེ་ལྟར་ན། གཟུགས་དང་གཟུགས་མེད་པའི་ཁམས་ནའང་ཁམ་ཟས་ཡོད་པར་ཐལ་བར་འགྱུར་ཏེ། འདོད་སྤྱོད་བྱེ་བྲག་ཏུ་མ་མཛད་པར་སེམས་ཅན་རྣམས་གནས་པའི་ཕྱིར། ཟས་བཞི་ཁྱད་པར་རམ་བྱེ་བྲག་མེད་པར་གསུངས་པའི་ཕྱིར་ཏེ། མདོ་ལས། ཟས་བཞི་ནི་སེམས་ཅན་བྱུང་བ་རྣམས་གནས་པར་བྱེད་པ་དང་། སྲིད་པ་འཚོལ་བ་རྣམས་ལ་ཕན་འདོགས་པར་བྱེད་པ་ཡིན་ནོ། །བཞི་གང་ཞེ་ན། ཁམ་གྱི་ཟས་རགས་པ་དང་། ཕྲ་བ་དང་། གཉིས་པ་རེག་པའི་ཟས། གསུམ་པ་ཡིད་ལ་སེམས་པའི་ཟས་དང་། བཞི་པ་རྣམ་པར་ཤེས་པའི་ཟས་སོ། །ཞེས་འབྱུང་ངོ། །སྡེ་པ་གཞན་དག་ལུང་དེ་ལ་སྤྱིར་བཏང་དམིགས་བསལ་བྱེད་དེ། འཆར་བྱེད་ལ་སོགས་པའི་མདོ་ལས། ལུས་ཞིག་ནས་ཁམ་དུ་བྱེད་པའི་ཟས་ཟ་བའི་ལྷ་རྣམས་ལས་འདས་ཏེ། ལྷ་ཡིད་ཀྱི་ལུས་ཅན་འགའ་ཞིག་ཏུ་སྐྱེའོ། །ཞེས་དང་། ཡང་འཇིག་རྟེན་པའི་དུས་གང་ཡིན་པ་དེ་ཡོད་དེ། འཇིག་རྟེན་འཇིག་པ་ན་སེམས་ཅན་ཕལ་ཆེར་འོད་གསལ་བའི་ལྷ་རིགས་སུ་སྐྱེ་བར་འགྱུར་ཞིང་། དེ་དག་གཟུགས་བཟང་པོ་ཡིད་ལས་བྱུང་བ་དང་། དབང་པོ་མ་ཚང་བ་མེད་ཅིང་ངན་པ་མ་ཡིན་པ། ཡན་ལག་དང་ཉིང་ལག་ཐམས་ཅད་དང་ལྡན་པ། ཁ་དོག་བཟང་པོ་བརྟན་པ། རང་གི་འོད་ཀྱིས་ནམ་མཁའ་ལ་འགྲོ་བ། དགའ་བ་ཟ་ཞིང་དགའ་བའི་ཟས་ཅན་ཚེ་རིང་བ་དུས་རིང་པོར་གནས་པར་འགྱུར་ཞེས་གསུངས་པའི་ཕྱིར། དེར་ཁམ་ཟས་ཡོད་པར་ཐལ་བར་མི་འགྱུར་ཞེ་ན། འོ་ན་གཟུགས་མེད་པ་ནའང་གཟུགས་ཡོད་པར་ཐལ་བར་མི་འགྱུར་ཏེ། དམིགས་ཀྱིས་བསལ་བའི་ཕྱིར། ཇི་ལྟར་གསལ་ན། མདོ་ལས། གཟུགས་མེད་པ་རྣམས་ནི་གཟུགས་ལས་ངེས་པར་འབྱུང་བ་ཡིན་ནོ། །ཞེས་དང་། གཟུགས་མེད་པའི་རྣམ་པར་ཐར་པ་ཞི་བ་གང་དག་གཟུགས་(༣༧༤ན)
རྣམས་ལས་འདས་ནས་ཞེས་བྱ་བ་དང་། གཟུགས་ཅན་མ་ཡིན་པའི་སེམས་ཅན་དག་ཡོད་དོ་ཞེས་བྱ་བ་དང་། རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ནས་ཞེས་གསུངས་པའི་ཕྱིར། གཟུགས་མེད་ཀྱི་སྙོམས་འཇུག་དང་སྐྱེ་བ་དག་ལ་གཟུགས་ཞིག་ཡོད་ན་རང་གི་གཟུགས་ངེས་པར་འདུ་ཤེས་བྱེད་པར་འགྱུར་བས་གཟུགས་ཀྱི་འདུ་ཤེས་ལས་འདས་ཞེས་མི་སྨོས་པར་འགྱུར་བ་ལས་སྨོས་པ་ཉིད་ཀྱི་གཟུགས་མེད་དོ། །ཡང་གཟུགས་མེད་པའི་རྣམ་པར་ཐར་པ་གང་དག་ཅེས་པས་ས་འོག་མའི་གཟུགས་རགས་པ་ལ་དགོངས་ཏེ་གསུངས་པའོ་ཞེ་ན། འོ་ན་དེར་ཁམ་གྱི་ཟས་རགས་པ་ལ་དགོངས་ཏེ་གསུངས་ཞེས་མཚུངས་སོ། །ཡང་ས་འོག་མའི་གཟུགས་རགས་པ་ལས་ངེས་པར་འབྱུང་བས་གཟུགས་མེད་དུ་བརྗོད་ཅེ་ན། འོ་ན་བསམ་གཏན་དང་པོ་ནས་བཞི་པའི་བར་རྣམས་ཀྱང་གཟུགས་མེད་པར་ཐལ་བར་འགྱུར་ཏེ། འོག་མའི་གཟུགས་ལས་ངེས་པར་འབྱུང་བའི་ཕྱིར། རང་སའི་གཟུགས་ཡོད་ཀྱང་འོག་མའི་གཟུགས་མེད་པས་གཟུགས་མེད་པར་བརྗོད་པའི་ཕྱིར་ན། ས་འོག་མའི་ཚོར་སོགས་ལས་ངེས་པར་འབྱུང་བས། ཚོར་སོགས་ལས་ངེས་པར་འབྱུང་བའང་ཅིའི་ཆེད་དུ་མ་བཤད་དེ། བཤད་རིགས་པར་ཐལ་བར་འགྱུར་རོ། །དེས་ན་གཟུགས་མེད་པ་ནི། ཕྱི་ནང་གི་ཕྲ་རགས་ཀྱི་གཟུགས་ཀྱི་རྣམ་པ་ཟད་པར་ལས་འདས་ལ། ཚོར་སོགས་ལས་ནི་མ་ཡིན་པར་བཏང་སྙོམས་ཡོད་པས། གཟུགས་རྣམས་ལས་ངེས་པར་འབྱུང་བ་ཞེས་གསུངས་ཀྱི། ཚོར་སོགས་ལས་ངེས་པར་འབྱུང་བ་ཞེས་མ་གསུངས་སོ། །འོ་ན་གཟུགས་མེད་པ་རྣམས་གཟུགས་ལ་ངེས་པར་འབྱུང་ན། མདོ་ལས། སྲིད་པས་སྲིད་པར་འབྱུང་བར་མི་སྨྲའོ། །ཞེས་གསུངས་པ་དང་མི་འགལ་ལམ་སྙམ་ན། དེ་སྐད་གསུངས་པ་(༣༧༤བ)
ནི་སྲིད་པ་དེ་ཉིད་ཀྱི་སྲིད་པ་དེ་ལས་ངེས་པར་མི་འབྱུང་བའི་ཕྱིར་དང་། གོང་མ་ཐམས་ཅད་ལས་ངེས་པར་འབྱུང་བ་མ་ཡིན་པ་དང་། འདོད་གཟུགས་ལ་གཏན་ངེས་པར་འབྱུང་བ་མ་ཡིན་པས་ཕྱིར་འོང་བའི་ཕྱིར། གཟུགས་ཀྱི་སྲིད་པ་ལས་རེས་འགའ་ངེས་པར་འབྱུང་བ་ཙམ་གྱི་གཟུགས་ཀྱི་སྲིད་པ་ལས་གཏན་ངེས་པར་འབྱུང་མི་ནུས་སོ། །གཉིས་པ་ལ། གཟུགས་མེད་ཁམས་ཀྱི་སྒྲ་བཤད་དང་། བཞི་པོ་སོ་སོའི་སྒྲ་བཤད་དོ། །དང་པོ་ལ། དངོས་དང་། དོགས་གཅོད་གཉིས་ལས། དང་པོ་ནི། གཟུགས་མེད་པ་ན་གཟུགས་མེད་དོ། །ཐུབ་པས། བསམ་གཏན་དག་ལ་ནི་གཟུགས་ཀྱི་རྣམ་པ་ཡོད་པའང་རུང་། རྣམ་པར་ཤེས་པའི་རྣམ་པའི་བར་ཡོད་པའང་རུང་། ཞེས་གསུངས་ལ། གཟུགས་མེད་དག་ལ་ནི་ཚོར་བའི་རྣམ་པའང་ཡོད་རུང་། རྣམ་པར་ཤེས་པའི་བར་ཡོད་རུང་། ཞེས་གསུངས་པས། གཟུགས་མེད་ན་གཟུགས་ཡོད་ན་ཅིའི་ཕྱིར་གཟུགས་ཀྱི་རྣམ་པ་ཡོད་པའང་རུང་གསུང་དགོས་པ་ལས་མ་གསུངས་པའི་ཕྱིར། དེས་ན་གཟུགས་མེད་པ་ན་གཟུགས་མེད་དོ། །གཉིས་པ་ནི། གཟུགས་ནི་སེམས་ལས་སྐྱེ་བར་འགྱུར། །གཟུགས་མེད་དེ་ནས་འཆི་འཕོ་བ་རྣམས་གཟུགས་སྐལ་པ་མི་ཉུང་བ་ཞིག་ཏུ་གཟུགས་རྒྱུན་ཆད་པ་ལས་ཀྱང་སྐྱེ་བར་འགྱུར་རམ་ཞེ་ན། དེའི་ཚེ་གཟུགས་ནི་ལྷན་ཅིག་བྱེད་པའི་རྐྱེན་ལས་ཀྱིས་འཕངས་པའི་སེམས་ལས་སྐྱེ་བར་འགྱུར་ལ། ཉེ་བར་ལེན་པའི་རྒྱུ་ནི་འདོད་གཟུགས་ན་ཡོད་པའི་འབྱུང་བཞི་ཉིད་དོ། །མདོ་སྡེ་པས་ནི། གཟུགས་ནི་རྣམ་སྨིན་གྱི་རྒྱུ་སེམས་པས་གཟུགས་བསྐྱེད་པའི་ནུས་པ་བཞག་ཅིང་ཡོངས་སུ་བསྒོ་བའི་སེམས་རྒྱུད་ལ་འཇུག་པ་རྙེད་པ་ལས་ནི་སྐྱེ་བར་འགྱུར་གྱི། གཟུགས་ཁོ་ན་ལས་མིན་ཏེ། ལུས་སེམས་ཕན་ཚུན་ས་བོན་ཅན་ལས་གྲུབ་པར་བཤད་ལ། བྱེ་སྨྲས་ནི། འཆི་ཀར་གཟུགས་དང་མཐུན་པའི་སེམས་རྒྱུན་གནས་ལ། དེ་ཉིད་དེའི་འཆི་ལྟས་ཡིན་ལ། དེ་དང་དུས་མཚུངས་སྔར་འགགས་པའི་རྣམ་སྨིན་གྱི་(༣༧༥ན)
གཟུགས་འདས་པ་ལས་སླར་གཟུགས་སྐྱེ་སྟེ། སྐལ་མཉམ་གྱི་རྒྱུ་ནི་འདས་ད་ལྟར་འབྱུང་བ་ཁས་ལེན་པའི་ཕྱིར། སེམས་ཙམ་པས་ཀུན་གཞི་ལས་སྐྱེ་བར་འདོད་ཀྱང་ལེགས་པ་མིན་ཏེ། དང་པོ་ནི་ཚུ་རོལ་མཛེས་པ་བའི་ལུགས་མིན་ལ། གཉིས་པ་ནི་ད་ལྟར་བའི་གཟུགས་ཡོད་བཞིན་དུ་འདས་པ་ལ་བལྟོས་མི་དགོས་པའི་ཕྱིར་དང་། གསུམ་པ་ནི་གཟུགས་རྫས་སུ་མེད་པར་འདོད་བཞིན་དེའི་རྒྱུ་ལ་འབད་པ་དོན་མེད་དོ་ཞེས་འཇམ་སྒེག་ཟེར་རོ། །ཡང་ཇི་ལྟར་སེམས་གཟུགས་ལ་མ་བརྟེན་པར་གནས་ཞེ་ན། གནས་པར་མི་འགྱུར་ཏེ། མཐོང་བའི་ཡུལ་འདི་ན་གཟུགས་ལ་མ་བརྟེན་པར་སེམས་གནས་པ་དེ་ལྟ་བུ་མ་མཐོང་བའི་ཕྱིར། འོ་ན་ཁམ་གྱི་ཟས་མེད་པའང་གཟུགས་ཀྱི་ཁམས་གནས་པར་མི་འགྱུར་ཏེ། འདི་ནི་མཐོང་བའི་སྤྱོད་ཡུལ་དུ་མ་གྱུར་པའི་ཕྱིར། དེར་ནི་རིགས་དང་སྲོག་ལ་ཡང་། །སེམས་ཀྱི་རྒྱུད་ནི་བརྟེན་པ་ཡིན། །ཅེས་གནས་པ་ནི་སྔར་བཤད་ཟིན་ཏོ། །གཉིས་པ་བཞི་པོ་སོ་སོའི་སྒྲ་བཤད་ལ། དང་པོ་གསུམ་གྱི་སྒྲ་དོན་དང་། ཐ་མའི་སྒྲ་དོན་ནོ། །དང་པོ་ནི། རྣམ་ཤེས་མཐའ་ཡས་མཁའ་མཐའ་ཡས། །ཅི་ཡང་མེད་ཅེས་བྱ་དེ་ལྟར། །སྦྱོར་ཕྱིར། ནམ་མཁའ་མཐའ་ཡས་ཀྱི་སྐྱེ་མཆེད་སོགས་ནམ་མཁའ་ཁོ་ན་ལ་དམིགས་པས་དེ་སྐད་བརྗོད་དམ། སྦྱོར་བས་དེ་སྐད་བཏགས་ཞེ་ན། སྦྱོར་བའི་ཚེ་ན་ཡིན་ཏེ། ནམ་མཁའ་མཐའ་ཡས་སོ། །རྣམ་ཤེས་མཐའ་ཡས་སོ། །ཅི་ཡང་མེད་དོ་ཞེས་བྱ་བ་དེ་ལྟར་ཡིད་ལ་བྱེད་ཅིང་སྦྱོར་བའི་ཕྱིར། སྦྱོར་བའི་དུས་དེ་སྐད་དུ་བརྗོད་ཀྱི་གཞན་ནི་ཅི་རིགས་པར་ཆོས་གཞན་ལའང་དམིགས་སོ། །གཉིས་པ་ནི། དམན་ཕྱིར་འདུ་ཤེས་མེད། །འདུ་ཤེས་མེད་པའང་མ་ཡིན་ནོ། །འདུ་ཤེས་རྒྱུ་བ་དམན་ཅིང་མི་གསལ་བ་ཆུང་བའི་ཕྱིར་སྙོམས་འཇུག་བདུན་པོ་བཞིན་འདུ་ཤེས་གསལ་བར་མེད་པས་འདུ་ཤེས་མེད་པ་ཞེས་བྱ་ལ། འདུ་ཤེས་ཅུང་ཟད་ཡོད་པས་སྙོམས་འཇུག་གསུམ་བཞིན་འདུ་ཤེས་མེད་པའང་མ་ཡིན་ནོ། །དེ་ལའང་འདུ་ཤེས་ནི་ནད་དོ་འབྲས་སོ་ཟུག་རྔུའོ། །འདུ་ཤེས་(༣༧༥བ)
མེད་པ་ན་ཀུན་ཏུ་རྨོངས་པའི་རྒྱུའོ། །འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་འདི་ནི་ཞི་བ་གྱ་ནོམ་པའོ་ཞེས་སྦྱོར་བ་ཡོད་པས། སྦྱོང་བའི་མིང་གི་དངོས་གཞི་ལ་བཏགས་པར་བྱས་ན་འགལ་བ་སྦྱར་དུ་མི་བཅུ་བ་ཟེར་ནས་རྒོལ་བས་ལན་ཚེགས་ཆེ་བ་ལ་བསམས་ནས། འདིར་དངོས་གཞི་སྙོམས་འཇུག་གི་སྐྱེ་མཆེད་དེ་ལ་གང་ཟག་དེ་དག་གི་འདུ་ཤེས་མེད་འདུ་ཤེས་མེད་མིན་དེ་ལྟར་འཛིན་ཅིང་འདུ་ཤེས་རྣམས་ཆུང་བའི་ཕྱིར་སོགས་ཀྱི་འཐད་པས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཅེས་གདོན་མི་ཟ་བར་བརྗོད་དགོས་པས་དེ་ཉིད་བརྗོད་དོ། །གསུམ་པ་གཉིས་ཀའི་མཇུག་བསྡུ་བ་ནི། དེ་ལྟར་སྙོམས་འཇུག་དངོས་གཞིའི་རྫས། །རྣམ་པ་བརྒྱད། དེ་ལྟར་ན་སྙོམས་འཇུག་དངོས་གཞིའི་རྫས་རྣམ་པ་བརྒྱད་དེ་བསམ་གཏན་བཞི་དང་གཟུགས་མེད་བཞིའོ། །གཉིས་པ་ཐུན་མོང་དུ་གཏན་ལ་དབབ་པ་ལ། ངོ་བོ་རྣམ་པར་དཔྱད་པ། བསམ་གཏན་གྱི་ཡན་ལག་ངོས་བཟུང་བ། སྙོམས་འཇུག་ཐོབ་ཚུལ། རྟེན་གང་གིས་མངོན་དུ་བྱེད་པ། སྤྱོད་ཡུལ་གང་ལ་དམིགས་པ། ཉོན་མོངས་སྤོང་བྱེད་ངོས་བཟུང་བའོ། །དང་པོ་ལ། ངོ་བོའི་སྒོ་ནས་དབྱེ་བ་དང་། དབྱེ་བ་སོ་སོའི་དོན་ཏོ། །དང་པོ་ལ། འོག་མ་བདུན་གྱི་དབྱེ་བ་དང་། སྲིད་རྩེའི་དབྱེ་བ་གཉིས་ཀྱི། དང་པོ་ནི། བདུན་རྣམ་པ་གསུམ། །རོ་མྱང་ལྡན་དང་དག་པ་དང་། །ཟག་མེད། དེ་དག་ལ་སྲིད་རྩེ་ལས་གཞན་བདུན་ནི་དབང་པོ་ཐ་མ་སྲེད་པ་དང་། ལྟ་བ་ང་རྒྱལ་ཐེ་ཚོམ་ཤས་ཆེ་བ་རོ་མྱོང་བ་དང་མཚུངས་ལྡན་དང་དབང་པོ་འབྲིང་དག་པ་པ་དང་དབང་པོ་རབ་ཟག་པ་མེད་པ་སྟེ་རྣམ་པ་གསུམ་མོ། །གཉིས་པ་ནི། བརྒྱད་པ་རྣམ་པ་གཉིས། །བརྒྱད་པ་སྲིད་རྩེ་པ་ནི་རྣམ་པ་གཉིས་ཏེ་མཚུངས་ལྡན་དག་པ་པ་གཉིས་ཡིན་གྱི། ཟག་མེད་ནི་མིན་པའི་ཕྱིར། དེར་འདུ་ཤེས་དམན་ཅིང་འཕགས་པའི་ལམ་མི་བརྟེན་པའི་ཕྱིར། གཉིས་པ་དབྱེ་བ་སོ་སོའི་དོན་ནི། རོ་མྱང་མཚུངས་ལྡན་སྲེད་བཅས་སོ། །འཇིག་རྟེན་པ་ཡི་དགེ་བ་ནི། །དག་པ་དེ་ནི་དེས་མྱང་བྱ། །ཟག་མེད་འཇིག་རྟེན་འདས་པའོ། །དེ་ལ་རོ་མྱོང་བ་ནི་སྲེད་པ་མཚུངས་ལྡན་དང་བཅས་པའོ། །འོ་ན་ལྟ་བ་དང་ང་རྒྱལ་མཚུངས་ལྡན་གྱི་(༣༧༦ན)
བསམ་གཏན་ཀྱང་ཡོད་མོད་ཀྱི། དེར་མ་བཤད་པ་ནི། ཉོན་མོངས་གཞན་ནི་སྲེད་པ་དང་སེམས་མི་སྦྲེལ་ལ། སྲེད་པ་ནི་རོ་མྱོང་བའི་སྒོ་ནས་འཇུག་ཅིང་དེ་ལ་ཞེན་པས་དེ་ལས་ངེས་པར་མ་བྱུང་ན་གོང་མར་འགྱུར་མི་སྲིད་པའི་ཕྱིར། ཏིང་ངེ་འཛིན་དང་འདྲ་བར་དམིགས་པ་ལ་ཉེ་བར་རྟོགས་པའི་ཕྱིར་རོ། །འཇིག་རྟེན་པའི་སྙོམས་འཇུག་དགེ་བ་ནི་དག་པ་བ་སྟེ། ཉོན་མོངས་པའི་དྲི་མ་དང་མ་འབྲེལ་ལ་མ་ཆགས་པ་སོགས་དགེ་བའི་ཆོས་དང་ལྡན་པའི་ཕྱིར་རོ། །སྙོམས་འཇུག་གི་རྫས་ཉམས་པ་ཆ་མཐུན་དག་པ་བ་གང་འདས་མ་ཐག་པ་དེ་ནི་འདས་པ་ལ་བལྟ་བའི་སྲེད་བཅས་རོ་མྱོང་མཚུངས་ལྡན་ཅན་དེས་མྱོང་བར་བྱེད་པ་ལས། རོ་མྱང་བར་བྱ་བ་གང་ཡིན་པའི་སྐབས་སུ་དག་པ་བ་དེ་ལས་ལངས་པ་ཡིན་ལ། གང་གིས་རོ་མྱོང་བར་བྱེད་པའི་སྐབས་དེ་ནི་བསམ་གཏན་ཉོན་མོངས་ཅན་དེ་ལ་སྙོམས་པར་ཞུགས་པ་ཡིན་ནོ། །ཟག་མེད་ཀྱི་སྙོམས་འཇུག་ནི་འཇིག་རྟེན་ལས་འདས་པ་བདེན་པའི་རྣམ་པ་ཅན་ནོ། །གཉིས་པ་བསམ་གཏན་གྱི་ཡན་ལག་ངོས་བཟུང་བ་ལ། ཡན་ལག་སོ་སོར་སྦྱར་བ། ཡན་ལག་གསུམ་ཁྱད་པར་དུ་བསྟན་པ། སྙོམས་འཇུག་རྣམས་ཀྱི་ཁྱད་པར་བསྟན་པའོ། །དང་པོ་ལ། མིང་གི་སྒོ་ནས་དབྱེ་བ་དང་། རྫས་ཀྱི་སྒོ་ནས་མཇུག་བསྡུ་བའོ། །དང་པོ་ནི། དང་པོ་ལ་ལྔ་རྟོག་དཔྱོད་དང་། །དགའ་དང་བདེ་དང་ཏིང་འཛིན་རྣམས། །གཉིས་པ་ལ་ནི་ཡན་ལག་བཞི། །རབ་དང་དང་ནི་དགའ་ལ་སོགས། །གསུམ་པ་ལ་ལྔ་བཏང་སྙོམས་དང་། །དྲན་དང་ཤེས་བཞིན་བདེ་དང་གནས། །མཐའ་ན་བཞི་དྲན་བཏང་སྙོམས་དང་། །བདེ་མིན་སྡུག་མིན་ཏིང་འཛིན་རྣམས། །བསམ་གཏན་དང་པོ་ལ་ནི་ཡན་ལག་ལྔ་སྟེ། མི་མཐུན་ཕྱོགས་འདོད་པའི་འདོད་ཆགས་གནོད་སེམས་རྣམ་འཚེ་སོགས་སྤོང་བས་གཉེན་པོའི་ཡན་ལག་རྟོག་དཔྱོད་གཉིས་དང་། རྟོག་དཔྱོད་ཀྱི་མི་མཐུན་ཕྱོགས་སྤངས་ནས་དབེན་པ་ལས་སྐྱེས་པའི་དགའ་བདེ་ཕན་ཡོན་གྱི་ཡན་ལག་དགའ་བདེ་གཉིས་དང་། སེམས་རྩེ་གཅིག་པའི་སྟོབས་ཀྱིས་སྔ་མ་དེ་དག་འགྲུབ་པས་དེ་གཉིས་ཀའི་རྟེན་གྱི་ཡན་ལག་ཏིང་ངེ་འཛིན་རྣམས་སོ། །ཕྱི་མ་འདི་ཡན་ལག་ཀྱང་ཡིན། བསམ་(༣༧༦བ)
གཏན་ཀྱང་ཡིན་ལ། ལྷག་མ་ནི་ཡན་ལག་ཡིན་ཅེས་གྲག་གོ། །སློབ་དཔོན་དང་མདོ་སྡེ་པ་ནི་ཡན་ལག་བཞི་པའི་དམག་ཡན་ལག་ལས་དོན་གཞན་དུ་གྱུར་པ་མེད་པ་བཞིན་ཡན་ལག་ལྔ་པའི་བསམ་གཏན་ཡང་ཚོགས་པ་ལ་བལྟོས་ནས་བསྟན་པས་དོན་གཞན་དུ་གྱུར་པ་མེད་དོ། །བསམ་གཏན་གཉིས་པ་ལ་ནི་ཡན་ལག་བཞི་མི་མཐུན་ཕྱོགས་རྟོག་དཔྱོད་སྤོང་བས་གཉེན་པོའི་ཡན་ལག་ནང་རབ་ཏུ་དང་བ་དང་། (འདིའི་རབ་དང་ནི་དྲན་ཤེས་བཞིན་བཏང་སྙོམས་ཀྱི་ངོ་བོ་ཡིན་ཀྱང་བསམ་གཏན་འདིའི་མི་མཐུན་ཕྱོགས་རྟོག་དཔྱོད་ཡིན་པས་རྟོག་དཔྱོད་ཀྱི་འཁྲུལ་པ་ཞི་བས་ན་རབ་ཏུ་དང་བ་ཞེས་བརྗོད་དོ། །) ཕན་ཡོན་དང་རྟེན་གྱི་ཡན་ལག་དགའ་བ་དང་སོགས་པས་བདེ་བ་དང་རྩེ་གཅིག་པ་ཉིད་དོ། །བསམ་གཏན་གསུམ་པ་ལ་ཡན་ལག་ལྔ་སྟེ། མི་མཐུན་ཕྱོགས་འོག་སའི་དགའ་བ་སྤོང་བས་གཉེན་པོའི་ཡན་ལག་དགའ་བ་ལ་རྩོལ་བ་མེད་པས་དམིགས་པ་ལ་ལྷུན་གྱིས་གྲུབ་པའི་མཚན་ཉིད་ཅན་འདུ་ཤེས་ཀྱི་བཏང་སྙོམས་དང་། བཏང་སྙོམས་ཀྱི་རྒྱུན་མི་བརྗེད་པའི་དྲན་པ་དང་། དྲན་པ་མི་བརྗེད་པའི་ཤེས་བཞིན་གསུམ་དང་ཕན་ཡོན་དང་རྟེན་གྱི་ཡན་ལག་ནི་རིམ་པ་ལྟར་བདེ་བ་དང་། སེམས་གནས་པ་ཏིང་ངེ་འཛིན་རྣམས་སོ། །གནས་པ་ཏིང་ངེ་འཛིན་ཡིན་པ་ནི། མདོ་ལས། ཡང་དག་པའི་ཏིང་ངེ་འཛིན་གང་ཞེ་ན། གང་སེམས་གནས་པ་དང་། ཡང་དག་པར་གནས་པའོ། །ཞེས་འབྱུང་ངོ་། །མཐའ་མ་བསམ་གཏན་བཞི་པ་ན་ཡན་ལག་བཞི་སྟེ། བདེ་མིན་སྡུག་མིན་གྱི་ཚོར་བ་བཏང་སྙོམས་དང་། འོག་སའི་སྐྱོན་བརྒྱད་དང་བྲལ་བའི་འདུ་བྱེད་བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་དང་། ཏིང་ངེ་འཛིན་ཡོངས་སུ་དག་པ་རྣམས་སོ། །དེ་དག་ནི་བསམ་གཏན་གྱི་ཡན་ལག་མིང་གི་སྒོ་ནས་བཅོ་བརྒྱད་དེ། དང་པོ་གསུམ་གཉིས་ལྔ་གཉིས་བཅུ་དང་། གཉིས་པ་བཞི་(༣༧༧ན)
པ་དག་ལ་བཞི་གཉིས་བརྒྱད་ཡིན་པའི་ཕྱིར། གཉིས་པ་ནི། རྫས་སུ་བཅུ་གཅིག །རྫས་སུ་ནི་བཅུ་གཅིག་སྟེ་དང་པོ་ལ་རྫས་ལྔ། གཉིས་པའི་ནང་རབ་ཏུ་དང་བ་དང་དྲུགགསུམ་པའི་བཏང་སྙོམས་དང་དྲན་པ་དང་ཤེས་བཞིན་དང་བདེ་བ་དང་བཞི་སྟེ་བཅུ། བཞི་པའི་ཚོར་བ་བཏང་སྙོམས་དང་བཅུ་གཅིག་གོ། །དེ་ཉིད་ཀྱི་ཕྱིར་ཡན་ལག་གང་བསམ་གཏན་དང་པོ་ན་ཡོད་ལ། གཉིས་པ་ནི་མ་ཡིན་པ་སོགས་མུ་བཞི་སྟེ། མུ་དང་པོ་རྟོག་དཔྱོད། གཉིས་པ་རབ་ཏུ་དང་བ། མུ་གསུམ་པ་ནི་དགའ་བདེ་དང་སེམས་རྩེ་གཅིག་པའོ། །མུ་བཞི་པ་ནི་བཤད་པ་ལས་མ་གཏོགས་པའི་ཆོས་བསམ་གཏན་བཞི་པའི་བཏང་སྙོམས་ལྟ་བུའོ། །དེ་བཞིན་དུ་བསམ་གཏན་གྱི་ཡན་ལག་ཐམས་ཅད་ཕན་ཚུན་སྦྱར་བར་བྱ་སྟེ། དང་པོ་དང་གསུམ་པ་ན་ཡོད་པ་ལའང་མུ་བཞི་སྟེ། མུ་དང་པོ་རྟོག་དཔྱོད་དང་དགའ་བདེ་དག་གོ། །མུ་གཉིས་པ་ནི་བཏང་སྙོམས་དང་དྲན་པ་དང་ཤེས་བཞིན་དང་བདེ་བ་དག་གོ། །གསུམ་པ་ནི་ཏིང་ངེ་འཛིན་ནོ། །བཞི་པ་ནི་བཤད་པ་མ་གཏོགས་པའི་ཆོས་སོ། །བསམ་གཏན་དང་པོ་དང་བཞི་པ་ན་ཡོད་པ་ལ་མུ་བཞི་སྟེ། དང་པོ་རྟོག་དཔྱོད་དང་དགའ་བདེ་དག་གོ། །མུ་གཉིས་པ་ཚོར་བ་བཏང་སྙོམས་དང་ཡོངས་སུ་དག་པའི་བཏང་སྙོམས་དང་དྲན་པའོ། །མུ་གསུམ་པ་ནི་ཏིང་ངེ་འཛིན་ནོ། །བཞི་པ་ནི་བཤད་པ་ལས་མ་གཏོགས་པའི་ཆོས་རྣམས་སོ། །གཉིས་པ་ན་ཡོད་པ་དང་། གསུམ་པ་ན་ཡོད་པ་ལ་མུ་བཞིའི་དང་པོ་ནི། ནང་རབ་ཏུ་དང་བ་དང་དགའ་བདེའོ། །གཉིས་པ་ནི་བཏང་སྙོམས་དང་དྲན་པ་དང་ཤེས་བཞིན་དང་བདེ་བ་དག་གོ། །གསུམ་པ་ནི་ཏིང་ངེ་འཛིན་ནོ། །བཞི་པ་ནི་བཤད་པ་ལ་མ་གཏོགས་པའི་ཆོས་སོ། །ཡན་ལག་གང་གཉིས་པ་དང་བཞི་པ་ན་ཡོད་པ་ལའང་མུ་བཞི་སྟེ། མུ་དང་པོ་ནི་རབ་ཏུ་དང་བ་དང་དགའ་(༣༧༧བ)
བདེའོ། །གཉིས་པ་ནི་ཚོར་བ་བཏང་སྙོམས་དང་། བཏང་སྙོམས་དག་པ་དང་། དྲན་པ་ཡོངས་སུ་དག་པའོ། །མུ་གསུམ་པ་ནི་ཏིང་ངེ་འཛིན་ནོ། །བཞི་པ་ནི་བཤད་པ་ལ་མ་གཏོགས་པའི་ཆོས་སོ། །ཡན་ལག་གང་བསམ་གཏན་གསུམ་པ་དང་བཞི་པ་ན་ཡོད་པའང་མུ་བཞི་སྟེ། མུ་དང་པོ་ཏིང་ངེ་འཛིན་མ་གཏོགས་གསུམ་པའི་ཡན་ལག་རྣམས་སོ། །གཉིས་པ་ནི་ཏིང་ངེ་འཛིན་མ་གཏོགས་བཞི་པའི་ཡན་ལག་རྣམས་སོ། །གསུམ་པ་ནི་ཏིང་ངེ་འཛིན་ནོ། །བཞི་པ་ནི་བཤད་པ་ལ་མ་གཏོགས་པའི་ཆོས་སོ། །གཉིས་པ་ཡན་ལག་གསུམ་གྱི་ཁྱད་པར་བཤད་པ་ལ། བདེ་བའི་ཁྱད་པར་བཤད། ནང་རབ་དང་ཁྱད་པར་དུ་བཤད་པ། ཡིད་བདེ་བའི་ཁྱད་པར་བཤད་པའོ། །དང་པོ་ནི། དང་པོ་ན། །ཤིན་ཏུ་སྦྱངས་པ་བདེ་བ་ཡིན། །བསམ་གཏན་དང་པོ་དང་གཉིས་པ་ནའང་བདེ་བ་ཡོད་ན་ཅིའི་ཕྱིར་བདེ་བའི་རྫས་གཞན་དུ་བརྗོད་ཅེ་ན། བསམ་གཏན་དང་པོ་དང་གཉིས་པ་དག་ན་ཤིན་ཏུ་སྦྱངས་པ་ལ་བདེ་བ་ཞེས་བརྗོད་པ་ཡིན། གསུམ་པའི་བདེ་བ་ནི་ཚོར་བདེ་ཡིན་ནོ། །དེ་ལྟར་ཡིན་པའི་སྒྲུབ་བྱེད་གང་ལས་ཤེས་སྙམ་ན། སྙོམས་འཇུག་གི་བསམ་གཏན་གཉིས་ན་བདེ་བའི་དབང་པོ་དང་མི་ལྡན་པའི་ཕྱིར་ཏེ། དང་པོ་དང་གཉིས་པ་ན་བདེ་བ་དེ་ལུས་ཀྱི་ཡིན་པར་མི་རུང་བའི་ཕྱིར་ཏེ། སྙོམས་པར་ཞུགས་པ་ལ་རྣམ་ཤེས་ཚོགས་ལྔ་ཁ་ཕྱིར་བལྟ་བ་མེད་པའི་ཕྱིར་ཏེ། ཚོགས་ལྔ་ངོ་བོ་ཉིད་ཀྱིས་གཡེང་བ་ཡིན་པའི་ཕྱིར། དེ་ནི་སེམས་ལས་བྱུང་བ་ཡིད་ཀྱི་བདེ་བའང་མ་ཡིན་ཏེ། དེ་ནི་དགའ་བ་ཞེས་ལོགས་སུ་ཡན་ལག་ཏུ་འབྱུང་བའི་ཕྱིར། ཡང་དགའ་བ་ནི་ཡིད་བདེ་ཡིན་ན་སེམས་གཅིག་ལ་ཚོར་བའི་རྫས་གཉིས་གཅིག་ཅར་མཚུངས་ལྡན་དུ་འབྱུང་བར་ཐལ་བས། དེ་ལྟ་བུའང་མེད་པའི་ཕྱིར། ཡང་བདེ་བ་དང་ཡིད་བདེ་དེ་གཉིས་རེས་འཇོག་གི་བསམ་གཏན་དང་པོ་ན་ཡོད་དོ་སྙམ་ནའང་མི་(༣༧༨ན)
རིགས་ཏེ། རིགས་ན་ཡན་ལག་བཞི་ཞེས་བརྗོད་རིགས་པ་ལས། མ་བརྗོད་པར་ཡན་ལག་ལྔ་ནི་དུས་གཅིག་ཏུ་འབྱུང་བའི་ཕྱིར་རོ། །གཞན་དཔེ་བསྟན་པའི་ལུགས་ཀྱི་བསམ་གཏན་གསུམ་ཅར་ནའང་སེམས་ཀྱི་བདེ་བའི་དབང་པོ་མེད་པ་ཁོ་ན་སྟེ། ལུས་ཀྱི་བདེ་བ་ཁོ་ན་ཡན་ལག་ཏུ་བཞག་ལ། ལུས་བདེ་དེའང་མཉམ་གཞག་གི་གནས་སྐབས་ཀྱི་བར་དང་བར་དུ་ཀུན་ཏུ་འབྱུང་བའི་ཕྱིར། བདེ་བའི་དབང་པོ་འདོད་པ་དང་བསམ་གཏན་དང་པོ་ཁོ་ནར་མ་ཟད་འདོད་སྤྱོད་ནས་བསམ་གཏན་གསུམ་པའི་བར་ས་བཞི་པའང་ཡིན་ནོ། །དེས་ན་བྱེ་བཤད་ལས། མདོ་སྡེ་པ་བཙུན་པས། ཆོས་མངོན་པ་བ་རྣམས་ཀྱི་ལྟར་ན། ཟོ་ཆུན་རྒྱུན་མོ་ལྟ་བུར་མིག་ཤེས་ལ་སོགས་པ་འོག་ནས་གོང་དུ་འདྲེན་ནོ། །ཞེས་འབྱུང་བས། བསམ་གཏན་གསུམ་པར་གཉིས་པའི་ས་པའི་མིག་ཤེས་སོགས་ཀྱང་ཡོད་དོ། །འོ་ན་མདོ་ལས། བདེ་བའི་དབང་པོ་གང་ཞེ་ན། བདེ་བ་མྱོང་བར་འགྱུར་བའི་རེག་པས་རེག་པ་ལ་ལུས་ཀྱི་དང་། སེམས་ལས་བྱུང་བའི་ཚོར་བའི་དབང་པོ་བདེ་བའི་སིམ་པ་སྐྱེ་བ་གང་ཡིན་པ་ནི་བདེ་བའི་དབང་པོ། ཞེས་བྱའོ། །ཞེས་གསུངས་པ་ཇི་ལྟར་ཞེ་ན། ཚིག་དེ་ནི་གང་ཟག་འགའ་ཞིག་གིས་སྒྲོ་བཏགས་པ་ཡིན་ཏེ། སྡེ་པ་གཞན་དག་ཐམས་ཅད་ལུས་ཀྱི་ཞེས་ཁོ་ནར་འབྱུང་བའི་ཕྱིར་དང་། ཁྱད་པར་བསམ་གཏན་གསུམ་པ་བསྟན་པ་ལས། དགའ་བ་ལས་འདོད་ཆགས་དང་བྲལ་ནས་བཏང་སྙོམས་དང་དྲན་པ་དང་ཤེས་བཞིན་དུ་གནས་ཤིང་བདེ་བ་ལུས་ཀྱིས་མྱོང་ལ་ཞེས་རང་སྒྲས་གསུངས་པའི་ཕྱིར། གལ་ཏེ་ལུས་དེ་ཡིད་ཀྱི་ལུས་སོ་ཞེ་ན། འོ་ན་བདེ་བ་ལུས་ཀྱིས་མྱོང་ལ་ཞེས་བཤད་པ་ལ་ཡོན་ཏན་ཅི་ཞིག་ཡོད་དེ། བདེ་བ་ཡིད་ཀྱིས་མྱོང་ལ་ཞེའམ། བདེ་བ་མྱོང་ཞེས་དེ་སྐད་དུ་བཤད་རིགས་པའི་ཕྱིར། ཡང་གསུམ་(༣༧༨བ)
པའི་བདེ་བ་ཤིན་སྦྱངས་ཡིན་ནོ་ཞེ་ན། དེ་མ་ཡིན་པ་ཉིད་ཀྱིས་ན་གསུམ་པ་ལ་ཚོར་བདེ་ཡོད་ཀྱི། བཞི་པ་ལ་མེད་པས་མ་སྨོས་ཏེ། བཞི་པ་ན་ཤིན་སྦྱངས་ཀྱི་བདེ་བ་བསམ་གཏན་དང་གཉིས་ལས་མང་ཞིང་ཕལ་ཆེ་བ་བཞིན་དུ་བདེ་བ་མ་སྨོས་པའི་ཕྱིར། བྱེ་སྨྲས། གལ་ཏེ་བསམ་གཏན་དང་གཉིས་ན་བདེ་བའི་ཚོར་བ་དང་མཐུན་པའི་ཤིན་སྦྱངས་ཡོད་པས་དེ་དག་གི་བདེ་བ་ཡིན་ལ། བཞི་པའི་ཤིན་སྦྱངས་ནི་བདེ་བའི་ཚོར་བ་དང་མཐུན་པ་མ་ཡིན་པའི་ཕྱིར་བཞི་པར་མ་བཤད་དོ་ཞེ་ན། མདོ་སྡེ་པས། དེ་ལྟར་ན་གསུམ་པའི་ཤིན་སྦྱངས་ཀྱང་དེར་བདེ་བར་གསུངས་རིགས་པར་ཐལ། དེ་བདེ་བའི་ཚོར་བ་དང་མཐུན་པའི་ཕྱིར། དེས་ན་བདེ་བར་མ་གསུངས་པ་ལ་རྒྱུ་མཚན་ཅི་ལྟ་བུ་ཞིག་ཡོད་ཅེས་འདྲིའོ། །བྱེ་སྨྲས། དེར་ཤིན་ཏུ་སྦྱངས་པའི་བདེ་བ་མ་བརྗོད་དེ་གསུམ་པའི་བཏང་སྙོམས་ལས་རུང་དེས་ཤིན་སྦྱངས་བཅོམ་པའི་ཕྱིར། མདོ་སྡེ་པས། བཅོམ་པ་མ་ཡིན་ཏེ། དང་གཉིས་ཀྱི་ཤིན་སྦྱངས་ལས་གསུམ་པའི་ཤིན་སྦྱངས་ཁྱད་དུ་འཕགས་པའི་ཕྱིར་ཏེ། བཏང་སྙོམས་ཁོ་ནས་དེ་འཕེལ་བར་བྱེད་པའི་ཕྱིར། ཤིན་ཏུ་སྦྱངས་པ་ཁོ་ན་བདེ་བ་མ་ཡིན་ཏེ། གང་གི་ཚེ་འཕགས་པ་ཉན་ཐོས་རབ་ཏུ་དབེན་པ་ལས་སྐྱེས་པའི་བདེ་བ་ལུས་ཀྱི་མངོན་དུ་བྱས་ནས་རྫོགས་པར་བྱས་ཏེ། གནས་པ་དེའི་ཚེ་ཆོས་ལྔ་ནི་སྤོང་བར་འགྱུར་ལ། ཆོས་ལྔ་པོ་ནི་ནང་རབ་ཏུ་དང་བ་དང་། དགའ་བ་དང་། ཤིན་ཏུ་སྦྱངས་པ་དང་། བདེ་བ་དང་ཏིང་ངེ་འཛིན་སྒོམ་པ་ཡོངས་སུ་རྫོགས་པར་འགྱུར་རོ་ཞེས་མདོ་འདི་ལས། ཤིན་སྦྱངས་དང་བདེ་བ་གཉིས་ཐ་དད་དུ་གསུངས་པའི་ཕྱིར། བྱེ་སྨྲས་དྲིས་པ་སྙོམས་པར་ཞུགས་པ་ལ་ཇི་ལྟར་ལུས་ཤེས་འབྱུང་བར་འགྱུར་ཞེ་ན། མདོ་སྡེ་ལས། ཏིང་ངེ་འཛིན་གྱི་ཁྱད་པར་ལས་སྐྱེས་པ་ལུས་ཤིན་སྦྱངས་ཞེས་པ་བདེ་བ་མྱོང་བར་བྱེད་པར་འགྱུར་བའི་རླུང་བདེ་བའི་ཚོར་བ་དང་མཐུན་པ་(༣༧༩ན)
ཞིག་གིས་ལུས་ལ་བདེ་བ་ཁྱབ་ཅིང་རྒྱས་པར་བྱེད་པ་ཡིན་ནོ། །ཞེས་ཟེར་རོ། །བྱེ་སྨྲས། དེ་ལྟར་ན་ཏིང་ངེ་འཛིན་ཉམས་པར་འགྱུར་ཏེ། ལུས་ཤེས་སྐྱེས་པས་ཕྱི་རོལ་དུ་རྣམ་པར་གཡེང་བའི་ཕྱིར་ཞེ་ན། མདོ་སྡེ་པས། ཏིང་ངེ་འཛིན་ཉམས་པར་མི་འགྱུར་ཏེ། ཏིང་ངེ་འཛིན་ལས་སྐྱེས་པ་ཕྱི་རོལ་དུ་བྱུང་བ་མིན་པ་ལུས་ཀྱི་ནང་དུ་བྱུང་བའི་ལུས་ཀྱི་བདེ་བ་ནི་ཏིང་ངེ་འཛིན་དང་མཐུན་པའི་ཕྱིར། གལ་ཏེ་ལུས་ཤེས་སྐྱེས་པའི་ཚེ་མཉམ་གཞག་ལས་ལངས་པར་འགྱུར་ཏེ། ཡིད་དང་ལུས་ཀྱི་རྣམ་ཤེས་གཅིག་ཅར་དུ་མི་འབྱུང་ཞིང་རེས་མོས་འགྱུར་བའི་ཕྱིར་ཞེ་ན། ལུས་ཤེས་སྐྱེས་པའི་ཚེ་མཉམ་གཞག་ལས་ལྡང་བ་མིན་ཏེ། ཏིང་ངེ་འཛིན་གྱི་སྟོབས་ལས་སྐྱེས་པའི་ལུས་ཀྱི་ནང་དུ་བྱུང་བའི་རེག་བདེ་ནི་ཏིང་ངེ་འཛིན་དང་མཐུན་པས་དེ་མངོན་དུ་གྱུར་མ་ཐག་ཏིང་ངེ་འཛིན་དུ་ཉེ་བར་གནས་པ་དེ་ཉིད་ཀྱི་ཕྱིར་རོ། །གལ་ཏེ་གཟུགས་ཁམས་སུ་གཏོགས་པའི་ཤིན་སྦྱངས་ཀྱི་རེག་བྱ་ལ་འདོད་པའི་ལུས་དབང་གི་ལུས་ཤེས་མི་བསྐྱེད་པས། དེ་དང་མཚུངས་ལྡན་གྱི་བདེ་བ་ནི་བསམ་གཏན་གྱི་ཡན་ལག་ཏུ་མི་འགྲུབ་པ་ཉིད་དོ་ཞེ་ན། མ་ཡིན་ཏེ། ཏིང་ངེ་འཛིན་སྟོབས་བསྐྱེད་པའི་སྒོ་ནས་འདོད་པའི་ལུས་དབང་གིས་གཟུགས་ཀྱིས་ཤིན་ཏུ་སྦྱངས་པའི་རེག་བྱ་འཛིན་པའི་ས་གོང་མའི་ལུས་ཀྱི་རྣམ་ཤེས་སྐྱེ་བའི་ཕྱིར་རོ། །ཟག་མེད་ཀྱི་བསམ་གཏན་ལ་རེག་བྱ་དང་། ལུས་ཤེས་ཟག་མེད་དུ་འགྱུར་ཏེ། ཡན་ལག་ཅུང་ཟད་ཤིན་ཏུ་སྦྱངས་པའི་རེག་བྱ་དང་། ལུས་ཤེས་ཟག་བཅས་དང་། ལྷག་མ་ཅུང་ཟད་གཅིག་ནི་ཟག་མེད་ཡིན་པ་མི་རུང་བའི་ཕྱིར་ཞེ་ན། དེ་ནི་མི་འདོད་དེ། ལུས་ཤིན་ཏུ་སྦྱངས་པ་ཡང་དག་ཀྱང་བྱང་ཆུབ་ཀྱི་ཡན་ལག་ཏུ་གསུངས་པའི་ཕྱིར། གལ་ཏེ་ལུས་ཤིན་སྦྱངས་བྱང་ཆུབ་ཀྱི་ཡན་ལག་མ་ཡིན་ཏེ། ལུས་ཤིན་སྦྱངས་བྱང་ཆུབ་ཀྱི་ཡན་ལག་དང་མཐུན་(༣༧༩བ)
པས་དེར་འདོགས་པའི་ཕྱིར་ཞེ་ན་ནི། རེག་བྱ་དང་ལུས་ཀྱི་རྣམ་ཤེས་དེ་དག་ནི་ཟག་མེད་ཉིད་མ་ཡིན་པ་སྔ་མ་དང་འདྲ་སྟེ། དེ་དག་ནི་ཟག་མེད་དང་མཐུན་པས་ཟག་མེད་ཅེས་ཉེ་བར་འདོགས་པའི་ཕྱིར། གལ་ཏེ་ཟག་པ་དང་བཅས་པའི་ཆོས་གང་ཞེ་ན། མིག་ཇི་སྙེད་པ་དང་། གཟུགས་ཇི་སྙེད་པ་དང་། ལུས་ཇི་སྙེད་པ་དང་། རེག་བྱ་ཇི་སྙེད་པའོ་ཞེས་པའི་མདོ་འདི་དང་འགལ་ལོ་ཞེ་ན། མདོ་དང་མི་འགལ་ཏེ་ཤིན་སྦྱངས་ཀྱི་རེག་བྱ་དང་ལུས་ཤེས་མ་གཏོགས་པའི་རེག་བྱ་དང་ལུས་ཀྱི་རྣམ་ཤེས་གཞན་ལ་དགོངས་ཏེ་གསུངས་པའི་ཕྱིར། ཡང་ན་རེག་བྱ་དང་ལུས་བདེ་དེ་ཟག་མེད་ཅེས་ཀྱང་བྱ་སྟེ། དངོས་སུ་ཟག་བཅས་ཡིན་ཀྱང་ཟག་མེད་དང་མཐུན་པའི་ཕྱིར་བྱ་བ་ཡང་ལན་གྱི་རྣམ་གྲངས་གཅིག་ཡིན་ནོ། །གལ་ཏེ་ཟག་མེད་ལ་ཉེས་པར་འགྱུར་ཏེ། ཡན་ལག་རེག་བྱ་དང་ལུས་ཤེས་ཅུང་ཟད་ཅིག་ཟག་བཅས་ཡིན་ལ། དེ་ལས་གཞན་ཅུང་ཟད་ཅིག་ནི་ཟག་མེད་ཡིན་པའི་ཕྱིར་ཞེ་ན། ཉེས་པ་ཅི་ཞིག་ཡོད་དེ། ཟག་མེད་ཀྱི་ཡན་ལག་འབྱུང་བའི་ཚེ་ཟག་བཅས་མི་འབྱུང་ལ། ཟག་བཅས་འབྱུང་བའི་ཚེ་ཟག་མེད་མི་འབྱུང་བས་གཅིག་ཅར་མ་ཡིན་པའི་ཕྱིར། འོ་ན་བསམ་གཏན་དང་པོ་ཡན་ལག་ལྔ་པར་མི་འགྱུར་བར་ཐལ། ལུས་ཀྱི་བདེ་བ་དང་སེམས་ཀྱི་དགའ་བ་དུས་གཅིག་ཏུ་འཕྲད་པ་མེད་པའི་ཕྱིར་ཞེ་ན། དང་པོ་ཡན་ལག་ལྔ་པར་མི་འགྱུར་བ་མིན་ཏེ། སྐད་ཅིག་ལ་མི་སྲིད་ཀྱང་རྒྱུན་གཅིག་ལ་སྲིད་པའི་ཕྱིར་རྟོག་དཔྱོད་རེས་འཇོག་ཏུ་འབྱུང་བ་བཞིན་དགའ་བདེ་ཡང་དེ་དང་འདྲའོ། །གལ་ཏེ་རྟོག་དཔྱོད་རེས་འཇོག་གི་འབྱུང་བའང་དཔེར་མི་རུང་སྟེ། བསྒྲུབ་བྱ་ཡིན་པའི་ཕྱིར་ཞེ་ན། སེམས་རྩིང་ཞིབ་ཀྱི་རྟོག་དཔྱོད་གཉིས་ཆོས་ཅན། རེས་འཇོག་ཏུ་འབྱུང་བར་གྲུབ་པ་ཡིན་ཏེ། སེམས་གཅིག་ལ་དུས་གཅིག་ཅར་འབྱུང་བ་འགལ་བའི་ཕྱིར་དང་། རྩིང་ཞིབ་(༣༨༠ན)
དང་རྣམ་པའི་བྱེ་བྲག་གི་བལྟོས་པ་ཅན་གཅིག་ཅར་དུ་འབྱུང་བ་ཡིན་ན་སྲིད་རྩེའི་བར་རྟོག་དཔྱོད་ཡོད་པར་འགྱུར་ཞེས་ཉེས་པ་སྨོས་པའི་ཕྱིར། ཡང་ཉེས་པ་མ་སྨོས་པའི་ཕྱིར་ཞེས་འདོན་པ་ལྟར་ན་རེས་འཇོག་ཏུ་འབྱུང་བ་ལ་ཉེས་པ་འགའ་ཡང་མ་སྨོས་པའི་ཕྱིར་རོ། །དེས་ན་བསམ་གཏན་དང་པོར་ཡོད་པའི་ཡན་ལག་ལྔ་ལས། རྟོག་དཔྱོད་གཉིས་བོར་ནས་བསམ་གཏན་གཉིས་པ་དང་དགའ་བ་དང་གསུམ་བོར་ནས་བསམ་གཏན་གསུམ་པ་དང་བདེ་བ་དང་བཞི་བོར་ནས་བསམ་གཏན་བཞི་པར་རྣམ་པར་བཞག་གོ། །དེས་ན་བསམ་གཏན་དང་པོ་ལ་སེམས་བྱུང་འདུ་ཤེས་སོགས་ཡོད་ཀྱང་ཡན་ལག་ལྔ་ཁོ་ནར་བཤད་ཀྱི། འདུ་ཤེས་སོགས་བོར་ནས་བསམ་གཏན་གྱི་ཡན་ལག་ལྷག་མ་རྣམས་བཞག་ལ། བསམ་གཏན་གཞན་དག་ལ་འདུ་ཤེས་སོགས་མ་བོར་བར་ཡོད་ཀྱང་བསམ་གཏན་གོང་མའི་ཡན་ལག་ཏུ་བཞག་པ་མ་ཡིན་ནོ། །ཅིའི་ཕྱིར་ལྔ་ཁོ་ན་ཡན་ལག་ཉིད་ཡིན་ཅེས་དྲིས་པ་ལ། ལྔ་ཁོ་ན་ཡན་ལག་ཡིན་ཏེ། འདུ་ཤེས་སོགས་ལས་རྟོག་པ་སོགས་ཕན་པའི་ཕྱིར་ཞེ་ན། དྲན་པ་དང་ཤེས་བཞིན་ལྟར་ཆེས་ཕན་པ་ནི་མ་ཡིན་ཏེ། དྲན་པ་ཉེ་བར་གནས་པ་དང་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ལ་ཞུམ་རྒོད་སོགས་མེད་པའི་ཕྱིར་རོ། །དེས་ན་རྟོག་དཔྱོད་གཉིས་ལས་དྲན་ཤེས་ཆེས་ཕན་ན་ཅིའི་ཕྱིར་མ་སྨོས་ཞེས་ཁ་ཅིག་རྒོལ་བ་ཡོད་ཀྱི། སྔོན་གྱི་སློབ་དཔོན་ཐོགས་མེད་ཞབས་བཏང་སྙོམས་དྲན་ཤེས་བཞིན་སོགས་ཇི་སྙེད་མངོན་པ་དེ་ལྟར་མི་སྟོན་ཏེ། དེ་ལྟ་བས་ན་འདི་ནི་རྣལ་འབྱོར་སྤྱོད་པའི་ས་མཐོང་བ་རྣམས་ཀྱི་དཔྱད་བྱ་ཡིན་པའི་ཕྱིར་ཞེས་སློབ་དཔོན་དབྱིག་གཉེན་གྱིས་དེར་བལྟ་བའི་ཁུངས་སྦྱིན་པར་མཛད་ལ། ཁུངས་དེའི་དག་དོན་བསྡུ་ན་དེར་འདུ་ཤེས་སོགས་ཀྱི་ཆོས་ཡོད་ཀྱང་མ་བཞག་རྟོག་དཔྱོད་སོགས་འཇོག་(༣༨༠བ)
པ་ནི་གཉེན་པོ་དང་ཕན་ཡོན་དང་གཉིས་ཀའི་རྟེན་གྱི་ཡན་ལག་རྫོགས་པའི་ཆེད་དུ་ཡིན་ཏེ། དེའང་དང་པོར་གནོད་སེམས་དང་རྣམ་འཚེ་སྤོང་བས་རྟོག་དཔྱོད་ནི་གཉེན་པོའི་ཡན་ལགདགའ་བདེ་ནི་ཕན་ཡོན་གྱི་ཡན་ལག་སྟེ་གཉེན་པོས་མི་མཐུན་ཕྱོགས་སྤངས་ནས་དེ་ལས་དབེན་པ་ལས་སྐྱེས་པའི་དགའ་བདེ་ཐོབ་པའི་ཕྱིར། དེ་གཉིས་ཀའི་རྟེན་གྱི་ཡན་ལག་ནི་སེམས་རྩེ་གཅིག་པ་སྟེ། དེའི་སྟོབས་ཀྱིས་རྟོག་སོགས་འཇུག་པའི་ཕྱིར། གཉིས་པ་ལ་རྟོག་དཔྱོད་སྤོང་བའི་གཉེན་པོའི་ཡན་ལག་ནང་རབ་ཏུ་དང་བ་དང་དགའ་བདེ་ཕན་ཡོན་དང་སེམས་རྩེ་གཅིག་པ་ཉིད་རྟེན་གྱི་ཡན་ལག་གོ། །གསུམ་པ་ལ་བཏང་སྙོམས་དང་དྲན་པ་དང་ཤེས་བཞིན་གྱི་དགའ་བ་སྤོང་བས་གཉེན་པོའི་ཡན་ལག་དང་། བདེ་བ་དང་སེམས་རྩེ་གཅིག་པ་ཉིད་ནི་ཡན་ལག་ལྷག་མའོ། །བསམ་གཏན་བཞི་པ་ལ་བཏང་སྙོམས་དང་དྲན་པ་ཡོངས་སུ་དག་པས་བདེ་བ་སྤོང་བ་གཉེན་པོའི་ཡན་ལག་དང་། ཚོར་བ་བཏང་སྙོམས་ཕན་ཡོན་གྱི་ཡན་ལག་དང་། སེམས་རྩེ་གཅིག་པ་ནི་དེ་གཉིས་ཀའི་རྟེན་གྱི་ཡན་ལག་ཡིན་ནོ། །དེས་ན་བསམ་གཏན་དང་པོ་གཉིས་སུའང་དྲན་ཤེས་བཏང་སྙོམས་གཉེན་པོ་ཡིན་ཀྱང་དགའ་བའི་འདོད་ཆགས་ཀྱིས་ཀུན་ནས་དཀྲིས་པ་རང་མིང་གིས་མ་བསྟན་པར་རྟོག་དཔྱོད་ཀྱི་སྒོ་ནས་བསྒྲུབས་པས་དེའི་མིང་གིས་སྨོས་ལ། གཉིས་པ་ནི། རྟོག་དཔྱོད་ཀྱི་འཁྲུལ་པ་ཞི་བས་ནང་རབ་ཏུ་དང་བ་ཞེས་སྨོས་ལ། གསུམ་པར་དགའ་བ་ལས་འདོད་ཆགས་དང་བྲལ་བས་རང་མིང་གིས་སྨོས་པའོ། །ནང་རབ་དང་ནི་རྟོག་དཔྱོད་ཀྱི་འཁྲུལ་པ་དང་བྲལ་བའི་རྒྱུད་རབ་ཞི་དམིགས་པ་ལ་ཆེས་མཉམ་པར་འགྱུར་པ་དེ་ཡིན་ཏེ། རྟོག་དཔྱོད་ཀྱིས་དཀྲུགས་པའི་རྒྱུད་ནི་རབ་ཏུ་དང་བ་མ་ཡིན་པའི་ཕྱིར། ཆུ་བོ་(༣༨༡ན)
རྦ་རླབས་དང་བཅས་པ་བཞིན་ནོ། །འོ་ན་དེ་ཇི་ལྟར་རྫས་སུ་ཡན་ལག་བཅུ་གཅིག་ཡིན་ཏེ། ཡིན་མི་རིགས་པར་ཐལ། བསམ་གཏན་གཉིས་པའི་རབ་དང་རྟོག་དཔྱོད་དང་བྲལ་ཙམ་ལས་མ་ཡིན་དགག་གི་རྫས་ཡིན་གྱི། དེ་ལས་རྫས་གཞན་མིན་པའི་ཕྱིར་ཞེས་དོགས་སོ། །གཉིས་པ་ནི། རབ་ཏུ་དང་བ་དད་པ་ཡིན། །བྱེ་སྨྲས། བསམ་གཏན་གཉིས་པའི་ཡན་ལག་ནང་རབ་ཏུ་དང་བ་ནི། དང་པོས་འདོད་པ་ལས་ངེས་པར་འབྱུང་བར་མ་ཟད་མཉམ་པར་བཞག་པའི་ས་ལས་ཀྱང་ངེས་པར་འབྱུང་བས། དེ་ལ་ཡིད་ཆེས་པའི་དད་པ་སྐྱེ་བ་ཡིན་ནོ། །སྐལ་ལྡན་ཁྱད་པར་ཅན་ན་རེ། རྟོག་དཔྱོད་དང་ཏིང་ངེ་འཛིན་རྣམས་ཀྱང་རྫས་གཞན་མ་ཡིན་ལ། ནང་རབ་ཏུ་དང་བ་ཡང་རྫས་གཞན་མ་ཡིན་ནོ། །རྟོག་པ་སོགས་རྫས་གཞན་མེད་ན་སེམས་བྱུང་དུ་ཇི་ལྟར་འགྲུབ་ཅེ་ན། སྐལ་ལྡན་ཁྱད་ཅན་ན་རེ། སེམས་ལ་གནས་སྐབས་སྣ་ཚོགས་ཡོད་པས། སེམས་ཀྱི་གནས་སྐབས་ཀྱི་བྱེ་བྲག་ཀྱང་ཡིད་ཀྱི་བརྗོད་པ་འཚོལ་བའི་གནས་སྐབས་ན་རྟོག་པ་དང་། ཡིད་ཀྱི་བརྗོད་པ་སོ་སོར་རྟོག་པའམ་ངེས་པ་ནི་དཔྱོད་པ་དང་། སེམས་ཀྱི་ངག་ཀུན་སློང་གི་གནས་སྐབས་རྩིང་བ་ཉིད་ནི་རྟོག་པ་དང་། ཀུན་སློང་ཞིབ་པའི་གནས་སྐབས་ནི་དཔྱོད་པ་དང་། རྣམ་པར་མ་གཡེངས་པའི་གནས་སྐབས་ནི་ཏིང་ངེ་འཛིན་དང་། རབ་ཏུ་ཞི་བའི་གནས་སྐབས་ནི་རབ་ཏུ་དང་བ་ཞེས་པའི་སེམས་བྱུང་ཡིན་ནོ་ཞེས་ཟེར་ཏེ། དེ་དག་རྫས་གཞན་མིན་པ་དང་། སེམས་ཀྱི་གནས་སྐབས་ཡིན་ཅེས་པ་འདི་ནི་ཆོས་མངོན་པའི་བསྟན་བཅོས་ཀྱི་གྲུབ་མཐའ་མ་ཡིན་ནོ། །བསམ་གཏན་དང་པོ་དང་གཉིས་པའི་དགའ་བ་ཡིད་བདེ་ཡིན་པ་ཇི་ལྟར་ཁོང་དུ་ཆུད་སྙམ་ན། ད་ལྟར་མི་འདོད་པའི་སྡེ་པ་གཞན་དག་གི་འདོད་པ་བརྗོད་ན་ཤེས་སླ་བར་འགྱུར་བས། སྡེ་པ་གཞན་ནི་ཡིད་བདེ་ལས་མ་གཏོགས་པའི་བསམ་གཏན་དང་པོ་དང་། (༣༨༡བ)
གཉིས་པའི་དགའ་བ་ནི་སེམས་ལས་བྱུང་བའི་ཆོས་གཞན་ཁོ་ན་ཡིན་ལ། ཡིད་བདེ་ནི་བསམ་གཏན་དང་གཉིས་གསུམ་ཅར་གྱི་བདེ་བའང་ཡིན་ནོ། །གསུམ་པ་ནི། ལུང་རྣམ་གཉིས་ཕྱིར་དགའ་ཡིད་བདེ། །བསམ་གཏན་གྱི་བདེ་བ་དེ་དག་ཡིད་བདེར་མི་རུང་སྟེ། དེ་ལྟར་འཆད་ན་ལུང་རྣམ་པ་གཉིས་ཀྱིས་གནོད་པའི་ཕྱིར་ཏེ། རྣམ་པར་བསྒྱུར་བའི་མདོ་ལས། བསམ་གཏན་གསུམ་པ་བཀའ་སྩལ་ནས། བསམ་གཏན་གསུམ་པ་འདིར་གང་ཟག་འདིའི་ཡིད་བདེ་བའི་དབང་པོ་སྐྱེས་པ་མ་ལུས་པ་འགག་པར་འགྱུར་རོ། །ཞེས་དང་། བཞི་པ་ལ་བདེ་བའི་དབང་པོ་འགག་པར་འགྱུར་རོ། །ཞེས་དང་། བསམ་གཏན་གསུམ་པ་ན་ཡིད་བདེ་ཡོད་ན་བཞི་པ་སྟོན་པའི་དུས་སུ་བདེ་བའང་སྤངས་ཏེ། སྡུག་བསྔལ་ཡང་སྤངས་ཤིང་སྔ་ན་ཡིད་བདེ་བའང་ནུབ་པ་ཞེས་གསུངས་པས། ཡིད་བདེ་སྔ་ན་སྤངས་པ་མི་འགྲུབ་པའི་ཕྱིར། གསུམ་པ་ན་ཡིད་བདེ་བའི་དབང་པོ་མེད་དོ། །དེས་ན་དང་པོ་དང་གཉིས་པའི་དགའ་བ་ཁོ་ན་ཡིད་བདེ་ཡིན་གྱི། བསམ་གཏན་གསུམ་ཅར་གྱི་བདེ་བ་ནི་ཡིད་བདེ་མ་ཡིན་ཏེ། དང་པོ་གཉིས་ནི་ཤིན་སྦྱངས་དང་། ཕྱི་མ་ནི་ལུས་ཚོར་བདེ་བ་ལ་འདོད་པ་དང་། སེམས་ཚོར་བདེ་བ་ལ་འདོད་པའི་ལུགས་གཉིས་བྱུང་བའི་ཕྱིར་རོ། །འདིར་འདི་ཤེས་དགོས་ཏེ། བསམ་གཏན་དང་པོ་དང་གཉིས་པ་ན་ཡིད་བདེ་བ་ལ་ཚོར་བ་བདེ་ཞིང་ཡིད་ཀྱི་ཡིན་པར་འདྲ་ཡང་ཡིད་བདེ་དེ་བདེ་བར་མི་འཇོག་དགའ་བར་འཇོག་པའི་རྒྱུ་མཚན་དེ་ཇི་ཞེ་ན། འཇོག་བྱེད་ཡོད་དེ། ཡིད་བདེ་དགའ་བ་འདི་ནི་ཉེ་བར་མ་ཞི་བ་ཡིན་པས། མཉམ་གཞག་དེའང་གཡེང་བ་དང་། ཁེངས་པ་དང་། དགའ་བ་དང་། གད་མོ་དང་། ཕྱར་བར་བྱེད་པའི་ལས་ཅན་ཡིན་པས་དེར་བཞག་པའི་ཕྱིར། དགའ་བ་བཞི་ནས་ས་གོང་མ་ཐོབ་པའི་ཚེ་ཡིད་བདེའི་མལ་དུ་ཚོར་བདེ་ཐོབ་པར་འགྱུར་བའི་ཕྱིར་རོ། །(༣༨༢ན)
གསུམ་པ་སྙོམས་འཇུག་རྣམས་ཀྱི་ཁྱད་པར་བསྟན་པ་ལ། ཉོན་མོངས་ཅན་ཡིན་མིན་གྱི་ཁྱད་པར། བསམ་གཏན་བཞི་པའི་ཁྱད་ཆོས། རྒྱུ་འབྲས་ཀྱི་བསམ་གཏན་གཉིས་ཀྱི་ཚོར་བའི་ཁྱད་པར་རོ། །དང་པོ་ནི། ཉོན་མོངས་ཅན་ལ་དགའ་བདེ་དང་། །རབ་དང་ཤེས་བཞིན་དྲན་པ་དང་། །བཏང་སྙོམས་དྲན་པ་དག་པ་མེད། །ཁ་ཅིག་ཤིན་ཏུ་སྦྱངས་བཏང་སྙོམས། །ཉོན་མོངས་ཅན་གྱི་བསམ་གཏན་ནི་ཡན་ལག་དེ་དག་ཇི་ལྟར་ཞེ་ན། བསམ་གཏན་དང་པོ་ཉོན་མོངས་ཅན་ལ་དབེན་པ་ལས་སྐྱེས་པའི་དགའ་བདེ་མེད་དེ། དེའི་ས་པའི་ཉོན་མོངས་པས་དབེན་པ་མ་ཡིན་པའི་ཕྱིར། གཉིས་པ་ནི་རབ་དང་མེད་དེ། རང་སའི་ཉོན་མོངས་པ་རྣམས་ཀྱིས་རྙོགས་པའི་ཕྱིར། གསུམ་པ་ནི་དྲན་ཤེས་བཞིན་མེད་དེ། ཉོན་མོངས་ཅན་གྱི་བདེ་བས་བསླད་དེ་ཀུན་ཏུ་རྨོངས་པར་བྱས་པའི་ཕྱིར། བཞི་པ་ནི་བཏང་སྙོམས་དང་དྲན་པ་ཡོངས་སུ་དག་པ་མེད་དེ། དེའི་ས་པའི་ཉོན་མོངས་པ་རྣམས་ཀྱི་དྲི་མ་ཅན་དུ་བྱས་པའི་ཕྱིར། ཁ་ཅིག །ཉོན་མོངས་པ་ཅན་དང་པོ་དང་གཉིས་པ་ལ་ཤིན་སྦྱངས་དང་། གཉིས་པའི་རབ་དང་གསུམ་པ་དང་བཞི་པ་ལ་བཏང་སྙོམས་མེད་དེ། དེ་དག་དགེ་བའི་ས་མང་པོ་པ་ཡིན་པའི་ཕྱིར་ཏེ། དད་དང་བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །རྩ་བ་གཉིས་རྣམས་མི་འཚེ་དང་། །བརྩོན་འགྲུས་རྟག་ཏུ་དགེ་ལས་འབྱུང་། །ཞེས་སོ། །ལུགས་སྔ་མ་ལའང་མེད་པར་འདོད་ཀྱང་། མ་བཤད་པ་ནི་གྲུབ་པའི་ཕྱིར་སྙམ་དུ་དགོངས་སོ། །གཉིས་པ་ནི། སྐྱོན་བརྒྱད་ལས་ནི་གྲོལ་བའི་ཕྱིར། །བཞི་པ་གཡོ་བ་མེད་པ་ཡིན། །རྟོག་དང་དཔྱོད་དང་དབུགས་དག་དང་། །བདེ་བ་ལ་སོགས་བཞི་ཡིན་ནོ། །སྟོན་པས་བསམ་གཏན་གསུམ་ནི་སྐྱོན་དང་བཅས་པས་གཡོ་བར་བཀའ་སྩལ། འཆད་འགྱུར་གྱི་སྐྱོན་བརྒྱད་པོ་ལས་ནི་གྲོལ་བའི་ཕྱིར། བསམ་གཏན་བཞི་པ་གཡོ་བ་མེད་པ་ཡིན་ནོ། །སྐྱོན་བརྒྱད་ནི། རྟོག །དཔྱོད་དང་། བདེ་བ་དང་། ལ་སོགས་པས་སྡུག་བསྔལ་དང་། ཡིད་བདེ། མི་བདེ་གཉིས་དང་བཞི་ཡིན་ལ། དབུགས་དབྱུང་རྔུབ་གཉིས་དག་དང་བརྒྱད་དོ། །ཡང་གཞན་ན་རེ། (༣༨༢བ)
དང་པོ་ན་རྟོག་དཔྱོད་ཀྱིས་གཡོ། གཉིས་པ་ན་དགའ་བས། གསུམ་པ་ན་བདེ་བས་ཏེ། སྡུག་བསྔལ་སོགས་ཀྱིས་ཏིང་ངེ་འཛིན་གཡོ་མི་ནུས་པས་བཞི་པར་བཞི་པོ་དེའི་གཡོ་བ་དང་བྲལ་བས་མི་གཡོ་བ་སྟེ། མདོ་ལས་རླུང་མེད་པའི་མར་མེ་དཔེར་མཛད་དོ། །གསུམ་པ་རྒྱུ་འབྲས་ཀྱི་བསམ་གཏན་གཉིས་ཀྱི་ཚོར་བའི་ཁྱད་པར་ལ། དངོས་དང་། དོགས་པ་གཅོད་པའོ། །དང་པོ་ནི། སྐྱེ་བའི་བསམ་གཏན་དག་ན་ནི། །ཡིད་བདེ་བདེ་དང་བཏང་སྙོམས་དང་། །བཏང་སྙོམས་ཡིད་བདེ་བདེ་བ་དང་། །བཏང་སྙོམས་བཏང་སྙོམས་ཚོར་བ་ཡོད། །བསམ་གཏན་གཉིས་ན་དགའ་བ་ཡིད་བདེ་དང་། གསུམ་ན་བདེ་བ། བཞི་ན་བཏང་སྙོམས་ཏེ། རྒྱུ་སྙོམས་འཇུག་གི་བསམ་གཏན་ན་ཡོད་པའི་ཚོར་བདེ་སྐྱེ་བའི་བསམ་གཏན་ན་ཡོད་པ་མ་ཡིན་གྱི། སྐྱེ་བའི་བསམ་གཏན་དག་ན་ནི། རིམ་བཞིན་དང་པོར་རྣམ་ཤེས་ཚོགས་གསུམ་གྱི་བདེ་བ་དང་། ཡིད་ཀྱི་ས་པའི་ཡིད་བདེ་རྣམ་ཤེས་ཚོགས་བཞིའི་བཏང་སྙོམས་དང་པོ། །འདིར་རྒྱུ་སྙོམས་འཇུག་གི་ཚོར་བ་ལས་སྐྱེ་བའི་བསམ་གཏན་ལ་བཏང་སྙོམས་ལྷག་གོ། །གཉིས་པ་ན་ཡིད་བདེ་དང་བཏང་སྙོམས་སོ། །མིག་ལ་སོགས་པའི་རྣམ་ཤེས་ཚོགས་གཞན་མེད་པས་བདེ་བ་ནི་མ་སྨོས། རྒྱུའི་སྙོམས་འཇུག་ལས་འབྲས་བུ་འདིར་ཡིད་ཀྱི་བཏང་སྙོམས་ལྷག་གོ། །གསུམ་པ་ན་ཡིད་བདེ་དང་བཏང་སྙོམས་ཏེ། རྒྱུ་སྙོམས་འཇུག་བདེ་བ་ལས་མེད་པ་ལ་འབྲས་བུ་འདིར་ཡིད་བདེ་དང་ཡིད་ཀྱི་བཏང་སྙོམས་གཉིས་ལྷག་བཞི་པ་ན་བཏང་སྙོམས་ཀྱི་ཚོར་བ་ཁོ་ན་ཡོད་དེ། རྒྱུ་འབྲས་ཚོར་བ་བཏང་སྙོམས་པར་འདྲའོ། །གཉིས་པ་ནི། གཉིས་པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །དེ་ལུང་མ་བསྟན་ཉོན་མོངས་མིན། །བསམ་གཏན་གཉིས་པ་སོགས་ན་རྣམ་ཤེས་ཚོགས་གསུམ་མེད་ལ། རྟོག་དཔྱོད་ཀྱང་མེད་ན་དེ་དག་གིས་ཇི་ལྟར་ན་མཐོང་བ་དང་རིག་པར་འགྱུར། རིག་བྱེད་ཀུན་ནས་སློང་བར་བྱེད་ཅེ་ན། བསམ་གཏན་གཉིས་པ་སོགས་གསུམ་ན་ཆོས་ཅན། རྣམ་ཤེས་ཚོགས་གསུམ་དང་རྟོག་དཔྱོད་དེར་སྐྱེས་པ་རྣམས་ལ་མེད་པ་མ་ཡིན་ལ། རྣམ་ཤེས་ཚོགས་གསུམ་དང་རྟོག་དཔྱོད་བསམ་གཏན་གཉིས་པ་སོགས་རང་གི་ས་པ་(༣༨༣ན)
ཡང་མ་ཡིན་ཏེ། དེར་སྐྱེས་པའི་ལུས་དང་མིག་དང་རྣ་བའི་རྣམ་ཤེས་དང་རྣམ་པར་རིག་བྱེད་ཀུན་སློང་རྟོག་དཔྱོད་མངོན་དུ་བྱ་བ་གང་ཡིན་དེ་ནི་བསམ་གཏན་དང་པོར་གཏོགས་པའི་ཕྱིར། གོང་མར་སྐྱེས་པ་འོག་མར་སྤྲུལ་པ་སྤྲུལ་འདོད་པས་ས་འོག་མའི་སྤྲུལ་སེམས་མངོན་དུ་བྱེད་པ་བཞིན་ནོ། །བསམ་གཏན་གཉིས་པ་ལ་སོགས་པར་མངོན་དུ་བྱེད་པའི་བསམ་གཏན་དང་པོའི་ས་པའི་ལུས་མིག་སོགས་ཀྱི་རྣམ་ཤེས་དེ་ཆོས་ཅན། མ་སྒྲིབ་པ་ལ་ལུང་དུ་མ་བསྟན་པ་ཡིན་ཏེ། ཉོན་མོངས་ཅན་ཡང་མིན་ལ། དགེ་བའང་མ་ཡིན་པའི་ཕྱིར་ཏེ། བསམ་གཏན་དང་པོ་ལ་ཆགས་བྲལ་གྱི་གཉིས་པར་མངོན་དུ་བྱེད་པའི་དང་པོའི་དགེ་བ་ནི་གཉིས་པའི་ས་པ་པའི་དམན་པས་གཉིས་པར་མངོན་དུ་མི་བྱེད་ལ། དགོས་པའི་ཕྱིར་མངོན་དུ་བྱེད་པའི་ཕྱིར་དང་། དགེ་བ་ནི་རྣམ་སྨིན་དང་བཅས་པ་ཡིན་ན་འདིས་ནི་རྣམ་སྨིན་དོན་དུ་མི་གཉེར་བས་དགེ་སེམས་མངོན་དུ་བྱ་བ་ལ་མི་འབད་པའི་ཕྱིར་རོ། །འདིར་སྨྲས་པ། འཇིག་རྟེན་འདི་དང་འཇིག་རྟེན་འདས་པ་ཡི། །ལམ་གྱི་རིམ་པས་འཁོར་བའི་ས་རྣམས་ལས། །སྒྲོལ་བྱེད་ཐབས་འདིར་བདག་ཡིད་གདུང་གྱུར་ཏེ། །ཇི་བཞིན་འབྱེད་པའི་ཤེས་རབ་འཁྲུལ་མེད་ཅིག །རྒྱུད་ལ་སྐྱེ་བར་བྱིན་གྱིས་རློབས་ཤིག་ཅེས། །དཔལ་ལྡན་བླ་མ་དམ་པ་མཆོག་གྱུར་ལ། །གསོལ་བ་དྲག་ཏུ་བཏབ་པའི་ནུས་པ་ལས། །ཇི་ལྟར་ཡིད་ལ་རེ་བཞིན་བསོད་པ་ཡི། །ངོ་མཚར་དགའ་བ་བྱེ་བའི་འབྱུང་གནས་ཞིག །རང་སེམས་སྙིང་པོར་འདྲེས་སོ་དབྱངས་ཅན་བཟང་། །ད་ནི་ཚུལ་འདི་ཐར་པ་འདོད་རྣམས་ལ། །ཅིས་ཀྱང་བརྡ་སྤྲོད་བྱེད་ལ་བརྩོན་པ་སྙམ། །ཞེས་སོ། །གསུམ་པ་སྙོམས་འཇུག་གི་ཐོབ་ཚུལ་ལ། ཇི་ལྟར་ཐོབ་པའི་ཚུལ་དངོས། གང་གི་མཇུག་ཏུ་གང་སྐྱེ་བ། ཐོད་རྒལ་གྱི་སྙོམས་འཇུག་སྐྱེ་ཚུལ་ལོ། །དང་པོ་ལ། དག་པ་བ་ཐོབ་ཚུལ། ཟག་མེད་ཐོབ་ཚུལ། ཉོན་མོངས་ཅན་ཐོབ་ཚུལ་ལོ། །དང་པོ་ནི།(༣༨༣བ)
དེ་དང་མི་ལྡན་འདོད་ཆགས་བྲལ། །སྐྱེ་བ་ལས་ནི་དག་པ་འཐོབ། །བསམ་གཏན་ནམ་གཟུགས་མེད་དག་པ་བ་དེ་དང་མི་ལྡན་པ་ནི་ས་འོག་མ་ལས་འདོད་ཆགས་དང་བྲལ་བའམ། སྲིད་རྩེ་མ་གཏོགས་པ་གོང་ནས་ས་འོག་མར་སྐྱེ་བས་ཐོབ་སྟེ། སྲིད་རྩེ་ནི་ས་འོག་མ་ལས་འདོད་ཆགས་དང་བྲལ་བས་ཐོབ་ཀྱི། ས་གོང་ནས་འོག་ཏུ་སྐྱེ་བས་ཐོབ་པ་མེད་པའི་ཕྱིར། དངོས་གཞིའི་དབང་དུ་བྱས་ཀྱི་ཉེར་བསྡོགས་ནི་འདོད་ཆགས་དང་མ་བྲལ་བ་སྦྱོར་བས་ཀྱང་ཐོབ་བོ། །དེ་ཡང་སྔར་ཡེ་མི་ལྡན་པ་ལས་ལྡན་པའི་དག་པ་ཐོབ་ཚུལ་གྱི་དབང་དུ་བྱས་པ་ནི་བཤད་མ་ཐག་པ་ལྟར་ཡིན་གྱི། ཡེ་ནས་ལྡན་པའི་དག་པ་ཙམ་ལ་ངེས་འབྱེད་ཆ་མཐུན་གྱི་དག་པ་བ་སྐྱེ་བས་ཐོབ་པའང་ཡོད་མོད། སྔར་ནས་ལྡན་པ་ནི་ངེས་འབྱེད་ཆ་མཐུན་གྱི་བསམ་གཏན་དག་པ་བ་ལྡན་པ་ལ་ནི་ཆགས་བྲལ་དང་སྐྱེ་བས་མི་ཐོབ་ཀྱི་སྦྱོར་བས་མི་ཐོབ་ལ། གནས་པ་ཆ་མཐུན་ལས་ཉམས་པ་ཆ་མཐུན་དང་བསམ་གཏན་དང་པོ་ལས་འདོད་ཆགས་དང་བྲལ་བ་ལས་ཉམས་པ་ལས་དང་པོའི་ཉམས་པའི་ཆ་མཐུན་ཐོབ་པ་ལྟ་བུ་ཉམས་པ་ལས་ཀྱང་ཐོབ་བོ། །ཉམས་པས་ཉམས་པ་ཆ་དང་མཐུན་པ་ཐོབ་པ་དེ་ཉིད་ཀྱི་ཕྱིར་འདི་ལྟར་ཤེས་པར་བྱ་དགོས་ཏེ། བསྟན་བཅོས་ལས། བསམ་གཏན་དག་པ་འདོད་ཆགས་དང་བྲལ་བས་ཐོབ་བར་འགྱུར་ལ། འདོད་ཆགས་དང་བྲལ་བས་འདོར་བར་འགྱུར་བ་དང་། བསམ་གཏན་དང་པོའི་གནས་པ་ཆ་མཐུན་ལས་ཉམས་ན་ཉམས་པ་ཆ་མཐུན་ལས་ཐོབ་པ་དང་འདོར་བ་ནི་ཡོད་དམ་མེད་ཅེ་ན། ཡོད་དེ། འདོད་པ་ལས་འདོད་ཆགས་དང་བྲལ་བས་ཐོབ་ལ། ཚངས་པའི་འཇིག་རྟེན་ལས་འདོད་ཆགས་དང་བྲལ་བས་འདོར་བ་ཡིན་ཏེ། ཉམས་པ་ཆ་མཐུན་གྱི་བསམ་གཏན་དེ་ཉོན་མོངས་དང་མཐུན་པས། དེའི་ཉོན་མོངས་པ་འདོར་བ་ན་དེ་བཞིན་དུ་དེའི་བསམ་གཏན་ཀྱང་དེའི་འདོད་ཆགས་དང་བྲལ་བས་འདོར་བར་བྱེད་པའི་ཕྱིར། ཡོངས་སུ་ཉམས་པ་ལས་ཐོབ་(༣༨༤ན)
པ་དང་འདོར་བ་ཡོད་མེད་ཅེ་ན། ཚངས་པའི་འཇིག་རྟེན་ལས་ཆགས་བྲལ་ལས་ཡོངས་སུ་ཉམས་སུ་ཉམས་ན་ཉམས་པ་ཆ་མཐུན་ཐོབ་པ་ནི་དེའི་ས་པའི་ཉོན་མོངས་བཞིན་ཡིན་ལ། འདོད་པ་ལ་འདོད་ཆགས་དང་བྲལ་བ་ལས་ཡོངས་སུ་ཉམས་པ་ལས་ཀྱང་དག་པ་བདེ་འདོར་རོ། །བསམ་གཏན་དག་པ་སྐྱེ་བས་འཐོབ་པ་ཐོབ་པ་དང་འདོར་བ་ཡོད་མེད་ཅེ་ན། ཡོད་དེ། གོང་མ་གཉིས་པ་ལྟ་བུ་ནས་ཚངས་རིས་སུ་སྐྱེ་བ་ན་ཐོབ་ལ། ཚངས་གནས་ནས་འདོད་ཁམས་སུ་སྐྱེ་བ་ན་འདོར་བའོ། །གཉིས་པ་ནི། ཟག་མེད་འདོད་ཆགས་བྲལ་བ་ཡིས། །བསམ་གཏན་དང་གཟུགས་མེད་ཟག་མེད་ནི་སྔར་མི་ལྡན་པ་ལས། འོག་ས་ལས་འདོད་ཆགས་དང་བྲལ་བ་ཡིས་ཐོབ་པར་བྱེད་དོ། །སྔར་ནས་ཟག་མེད་དང་ལྡན་པ་ནི་སྦྱོར་བའི་སྟོབས་ཀྱིས་ཟད་ཤེས་ལས་ཀྱང་མི་སློབ་པ་འཐོབ་ལ། དབང་པོ་བརྟུལ་པོའི་སློབ་མི་སློབ་རྣོན་པོར་འཕོས་པ་ན། རྣོན་པོས་བསྡུས་པའི་སློབ་པ་དང་མི་སློབ་པ་ཐོབ་བོ། །ཕྱིར་མི་འོང་ཆགས་བྲལ་སྔོན་འགྲོས་བསམ་གཏན་གྱི་དངོས་གཞི་ལ་བརྟེན་ནས་ངེས་པ་ལ་འཇུག་པ་ལས་ཀྱང་ཟག་མེད་ཀྱི་བསམ་གཏན་དངོས་གཞི་ཐོབ་ཀྱང་མཐར་གྱིས་པ་མི་ལྕོགས་མེད་ཁོ་ན་ལ་བརྟེན་ནས་ངེས་པ་ལ་འཇུག་ན་དངོས་གཞི་ཐོབ་པས་ཐམས་ཅད་ཀྱི་ཐོབ་པར་མ་ངེས་པས་ངེས་པ་ལ་འཇུག་པས་ཐོབ་པ་མ་བཤད་ཅིང་། མི་སློབ་པ་ཉམས་ན་སློབ་པས་བསྡུས་པའི་སྙོམས་འཇུག་དངོས་གཞི་ཐོབ་ཀྱང་སྙོམས་འཇུག་ཟག་མེད་ཀྱི་རིགས་ཙམ་སྔར་ནས་ལྡན་པས་གསར་ཐོབ་མེད་པས་ཉམས་པས་ཐོབ་པའང་མ་བཤད་ལ། ཟག་མེད་ལ་སྐྱེ་བས་ཐོབ་པ་ནི་མེད་དོ། །གསུམ་པ་ནི། ཉོན་མོངས་ཅན་ཉམས་སྐྱེ་བ་ཡིས། །སྙོམས་འཇུག་ཉོན་མོངས་ཅན་ནི་སྔར་དེ་དང་མི་ལྡན་པ་ལས། བསམ་གཏན་དང་པོ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་ན་བསམ་གཏན་དང་པོ་ཉོན་མོངས་ཅན་ཐོབ་པ་ལྟ་བུ་ཡོངས་སུ་ཉམས་པས་ཐོབ་པ་དང་། (༣༨༤བ)
སྲིད་རྩེ་མ་གཏོགས་པ་བསམ་གཏན་གཉིས་པ་ཡན་ཆད་ནས་དང་པོར་སྐྱེས་ན། དང་པོའི་ཉོན་མོངས་ཅན་ཐོབ་པ་ལྟ་བུ་གོང་ས་ནས་འོག་སར་སྐྱེ་བ་ཡིས་ཐོབ་ལ། ཉོན་མོངས་ཅན་གྱི་སྲིད་རྩེ་ན་ཉམས་པ་ཁོ་ནས་ཐོབ་ལ། སྦྱོར་བ་དང་འདོད་ཆགས་དང་བྲལ་བས་ཐོབ་པ་ནི་མེད་དོ། །གཉིས་པ་གང་གི་མཇུག་ཏུ་གང་སྐྱེ་བ་ལ། སྤྱིར་བསྟན་པ་དང་། ཕྱི་མ་གཉིས་ཀྱི་དམིགས་བསལ་ལོ། །དང་པོ་ལ། ཟག་མེད་ཀྱི་མཇུག་ཏུ་གང་སྐྱེ་བ། དག་པ་བའི་མཇུག་ཏུ་གང་སྐྱེ་བ། ཉོན་མོངས་ཅན་གྱི་མཇུག་ཏུ་གང་སྐྱེ་བའོ། །དང་པོ་ནི། ཟག་པ་མེད་པའི་མཇུག་ཐོགས་སུ། །ལྟག་འོག་གསུམ་པའི་བར་དགེ་བ། །སྐྱེའོ། ཟག་མེད་བསམ་གཏན་དང་པོའི་མཇུག་ཐོགས་སུ་དྲུག་སྐྱེ་སྟེ། རང་ས་དང་། གསུམ་པའི་བར་གྱི་དག་པ་བ་གསུམ་དང་། དེ་དག་གི་ཟག་མེད་གསུམ་མོ། །དེའང་རྒྱུན་གྱི་ཚེ་ཟག་མེད་རང་དང་། ལྡང་བའི་རང་སའི་དག་པ་བ་དང་། གཉིས་གསུམ་པའི་དག་པ་བ་དང་། ཟག་མེད་ནི་སྤེལ་མ་དང་། སྤེལ་མ་མ་ཡིན་པར་རིམ་བཞིན་ལུགས་བཞིན་དང་ཐོད་རྒལ་དུ་སྙོམས་པར་འཇུག་ནའོ། །ཅི་ཡང་མེད་པའི་སྐྱེ་མཆེད་ཀྱི་མཇུག་ཐོགས་སུ་བདུན་ཏེ། རང་ས་དང་། རྣམ་ཤེས་དང་། ནམ་མཁའ་མཐའ་ཡས་ཀྱི་ས་པའི་དག་པ་དང་། ཟག་མེད་ཀྱི་ལུགས་མཐུན་ལ་སྙོམས་པར་འཇུག་པ་ལས་ལངས་པའི་ཆེད་དུ་སྲིད་རྩེའི་དག་པ་བ་ཁོ་ན་སྟེ། དེའི་ཟག་མེད་མེད་པའི་ཕྱིར་རོ། །བསམ་གཏན་གཉིས་པའི་རྗེས་སུ་བརྒྱད་དེ། རང་གི་ས་པ་དང་། བསམ་གཏན་གསུམ་པ་དང་། བཞི་པ་དང་། དང་པོའི་ས་པ་དང་། ཟག་པ་མེད་པ་དག་གོ། །རྣམ་ཤེས་མཐའ་ཡས་ཀྱི་སྐྱེ་མཆེད་ཀྱི་མཇུག་ཏུ་དགུ་སྟེ། རང་གི་ས་པའི་གཉིས། ནམ་མཁའ་མཐའ་ཡས་སྐྱེ་མཆེད་དང་། བསམ་གཏན་བཞི་པའི་ས་བཞི་དང་། ཅི་ཡང་མེད་པ་དང་། སྲིད་པའི་རྩེ་མོའི་ས་དང་གསུམ་མོ། །འདི་ལའང་བརྒྱད་ལ། དག་པ་དང་ཟག་མེད་གཉིས་ཀ་ཡོད་ལ། (༣༨༥ན)
སྲིད་རྩེ་བ་ལ་ཟག་མེད་མེད་དོ། །ལར་འདིའི་ལུགས་ཀྱི་ཡར་འཛེགས་མར་འབབ་གང་ལའང་རེ་རེ་ནས་བརྒལ་ཞིང་སྙོམས་པར་འཇུག་ནུས་ཀྱི། གཉིས་གཉིས་དང་གསུམ་གསུམ་དང་བཞི་བཞི་དང་ལྔ་ལྔ་སོགས་བརྒལ་ཞིང་འཇུག་ནུས་པ་མིན་ལ། ལུགས་མཐུན་དང་ཐོད་རྒལ་དུ་སྤེལ་བ་དང་། སྤེལ་བ་མིན་པ་འདིའང་རྣམ་ཤེས་མཐའ་ཡས་སྐྱེ་མཆེད་ཀྱི་མཇུག་ཐོགས་སུ་ཇི་ལྟར་ཡིན་ཞིབ་ཏུ་མཚོན་ནས་བཤད་ན། གཞན་རྣམས་ལའང་རིགས་འགྲེ་བས། འདི་ལྟར་སྐྱེ་མཆེད་འདིའི་མཇུག་ཐོགས་སུ་རང་སའི་གཉིས་དང་། ལུགས་དང་མཐུན་པར་སྙོམས་པར་འཇུག་ན་ཅིའང་མེད་པའི་སྐྱེ་མཆེད་ཀྱི་གཉིས་དང་། ལུགས་མཐུན་པར་རིགས་མི་མཐུན་པ་གསུམ་པར་འགྲོ་ན་སྙོམས་པར་འཇུག་པ་ལས་ལངས་པའི་ཚེ་སྲིད་རྩེའི་དག་པ་ཁོ་ན་འབྱུང་སྟེ། དེ་ན་རྒྱུ་བ་ཞན་པས་ཟག་མེད་མེད་པའི་ཕྱིར། ལུགས་དང་མི་མཐུན་པར་སྙོམས་པར་འཇུག་ན། ནམ་མཁའ་དང་བསམ་གཏན་བཞི་པའི་ས་པའི་དག་པ་བ་དང་ཟག་མེད་གཉིས་གཉིས་སོ། །དེ་ལྟར་བསམ་གཏན་གཟུགས་མེད་གཞན་གྱི་མཇུག་ཐོགས་སུའང་བཅུ་སྦྱར་བར་བྱ་སྟེ། བསམ་གཏན་གསུམ་པའི་མཇུག་ཐོགས་སུ་རང་སའི་དག་པ་དང་ཟག་མེད་དེ་གཉིས་དང་། བསམ་གཏན་བཞི་པ་དང་། ནམ་མཁའ་མཐའ་ཡས་སྐྱེ་མཆེད་ཀྱི་ས་པ་བཞི་དང་། དང་པོ་དང་གཉིས་པའི་ས་པ་བཞི་སྟེ་བཅུ་འབྱུང་ངོ། །བསམ་གཏན་བཞི་པའི་མཇུག་ཐོགས་སུའང་བཅུ་འབྱུང་སྟེ། རང་སའི་དག་པ་ཟག་མེད་གཉིས་དང་། ནམ་མཁའ་རྣམ་ཤེས་ཀྱི་ས་པ་བཞི་དང་། བསམ་གཏན་གཉིས་པ་གསུམ་པའི་ས་པ་བཞིའོ། །ནམ་མཁའ་མཐའ་ཡས་སྐྱེ་མཆེད་ཀྱི་མཇུག་ཐོགས་སུ་བཅུ་སྟེ། རང་སའི་གཉིས་དང་། རྣམ་ཤེས་ཅི་ཡང་གི་བཞི་དང་། བསམ་གཏན་གསུམ་པ་དང་བཞི་པའི་བཞི་འབྱུང་བས་སོ། །སྲིད་རྩེ་ལ་ཟག་མེད་མེད་པ་དེའི་མཇུག་ཐོགས་སུ་འབྱུང་བ་མ་བགྲང་ངོ་། །འདིར་ལུགས་(༣༨༥བ)
འབྱུང་སྙོམས་འཇུག་གི་ཚེ་སྤེལ་མ་སྤེལ་དང་། ལུགས་འབྱུང་ཐོད་རྒལ་གྱི་ཚེ་སྤེལ་མ་སྤེལ་དང་། ལུགས་མི་མཐུན་སྙོམས་འཇུག་གི་ཚེ་སྤེལ་མ་སྤེལ་དང་། ལུགས་མི་མཐུན་སྙོམས་འཇུག་གི་ཐོད་རྒལ་གྱི་ཚེ་སྤེལ་མ་སྤེལ་ཏེ་བཞིར་ཤེས་པར་བྱའོ། །མདོར་བསྡུ་ན། བསམ་གཟུགས་ཟག་པ་མེད་པའི་སྙོམས་འཇུག་གི་རྫས་ཀྱི་མཇུག་ཐོགས་སུ་རང་གི་ས་པ་དང་། དག་ས་གོང་མ་དང་འོག་ས་གསུམ་པའི་བར་གྱི་དགེ་བ་དག་པ་བ་དང་ཟག་པ་མེད་པ་སྐྱེ་སྟེ། ཐོད་རྒལ་དུ་སྙོམས་པར་འཇུག་པར་བྱེད་པས་གསུམ་པ་ཕན་ཆོད་དུ་བརྒལ་མི་ནུས་པའི་ཕྱིར་རོ། །རྗེས་སུ་ཤེས་པའི་མཇུག་ཐོགས་སུ་གཟུགས་མེད་ལ་སྙོམས་པར་འཇུག་གི། ཆོས་ཤེས་ཀྱི་མཇུག་ཐོགས་སུ་མ་ཡིན་ཏེ། ཆོས་ཤེས་དེའི་རྟེན་འོག་མ་འདོད་ཁམས་དང་དམིགས་པའང་འོག་མའི་སྡུག་བསྔལ་ལ་སོགས་པ་ཡིན་པའི་ཕྱིར། གཉིས་པ་ནི། དག་པ་ལས་དེ་བཞིན། །རང་གི་ས་པའི་ཉོན་མོངས་ཀྱང་། །སྙོམས་འཇུག་དག་པ་བ་ལས་དག་པ་དང་ཟག་མེད་སྐྱེ་བའང་བཤད་མ་ཐག་པ་དེ་བཞིན་རིག་པར་བྱ་ལ། ལྷག་པར་དག་པ་པའི་མཇུག་ཏུ་རང་གི་ས་པའི་ཉོན་མོངས་ཀྱང་སྐྱེ་སྟེ། ཟག་མེད་ཀྱི་མཇུག་ཐོགས་སུ་ཉོན་མོངས་ཅན་སྐྱེ་བ་མེད་པའི་ཕྱིར་ཏེ། ཉོན་མོངས་ཅན་དང་འཇུག་པ་ཤིན་ཏུ་འགལ་བའི་ཕྱིར། གསུམ་པ་ནི། ཉོན་མོངས་ཅན་ལས་རང་དག་དང་། །ཉོན་མོངས་འོག་མའི་དག་གཅིག་ཀྱང་། །སྙོམས་འཇུག་ཉོན་མོངས་ཅན་གྱི་མཇུག་ཐོགས་ལས་ཤེས་བཞིན་དང་དྲན་པས་ཟིན་ནས་ལངས་པའི་ཚེ་རང་སའི་དག་པ་བ་དང་། རྒྱུན་གྱི་ཚེ་ཉོན་མོངས་ཅན་སྐྱེ་ལ། དེར་མ་ཟད་ཉོན་མོངས་པས་གཟིང་ཆེས་ནས་འོག་མའི་དག་པ་བ་ལ་དགའ་བར་གྱུར་པས་དེའི་དག་པ་བ་གཅིག་ཀྱང་སྐྱེའོ། །གལ་ཏེ་གོས་པའི་ཉོན་མོངས་ཅན་འདིའི་རྒྱུན་ཡོངས་སུ་བཅད་ནས། འདི་པས་འོག་མའི་དགེ་བ་རུང་སྙམ་ནས་འོག་མར་འཕོ་བ་ནི། སྡིག་པ་ལ་སྡིག་པར་ལྟ་ན་ཡང་དག་པའི་ལྟ་བ་ཡིན་པས་གོང་མའི་དགེ་བ་ལས་འཕོ་བ་ཡིན་གྱི་ཉོན་མོངས་ཅན་ལས་ནི་མ་ཡིན་ནོ། །(༣༨༦ན)
འོན་ཏེ་གོང་མའི་ཉོན་མོངས་ཅན་སྐྱོན་དུ་ཤེས་ནས་ཡོངས་སུ་རྒྱུན་གཅོད་པའི་བློས་འཕོ་བ་མ་ཡིན་ན་ཇི་ལྟར་འཕོ་ཞེ་ན། སྙོམས་འཇུག་གི་གོང་རོལ་ནས་བློའི་འཕེན་པས་འཕངས་པའི་སྒོ་ནས་འགྲུབ་སྟེ། སྔོན་འདི་སྙམ་དུ་འོག་མའི་དག་པ་བ་ནི་སླའི། གོང་མའི་ཉོན་མོངས་ཅན་ནི་མ་ཡིན་ནོ་སྙམ་དུ་འདོད་པར་འགྱུར་བས། སྔོན་གྱི་བསམ་པའང་སེམས་ཅན་རྣམས་ཀྱི་སེམས་ཀྱི་རྒྱུན་ལ་ས་བོན་གྱི་ནུས་པ་རྗེས་སུ་འབྲང་བས་དེ་ཉིད་སད་སྟོབས་ཀྱིས་འགྲུབ་པའི་ཕྱིར། ནམ་ཕྱེད་དམ་ཟླ་བ་ཤར་བའི་ཚེ་སད་པར་བྱའོ་ཞེས་བསམས་ནས་གཉིད་ལོག་པ་འདོད་པའི་དུས་སུ་སད་པ་བཞིན་ནོ། །ཉོན་མོངས་ཅན་གྱི་མཇུག་ཐོགས་སུ་ཟག་མེད་ནི་རང་དང་འོག་སའི་ས་པ་རྣམ་པ་ཐམས་ཅད་དུ་མི་སྐྱེའོ། །གཉིས་པ་ཕྱི་མ་གཉིས་ཀྱི་དམིགས་བསལ་ལ། འཆི་འཕོའི་གནས་སྐབས་དང་། ཆ་མཐུན་བཞིའི་དམིགས་བསལ་ལོ། །དང་པོ་ལ། དག་པ་བ་དང་། ཉོན་མོངས་ཅན་གཉིས། དང་པོ་ནི། འཆི་འཕོའི་དག་ལས་ཉོན་མོངས་ཀུན། །སྙོམས་པར་འཇུག་པའི་དུས་ཀྱི་ཆེད་དུ་དག་པ་བ་དང་ཉོན་མོངས་ཀྱི་མཇུག་ཐོགས་སུ་རང་སའི་ཉོན་མོངས་ཅན་ཁོ་ན་སྐྱེའི། གཞན་གྱི་ས་པ་སྐྱེ་བ་ནི་མ་ཡིན་ལ། སྙོམས་འཇུག་མ་ཡིན་པ་མཉམ་པར་མ་བཞག་པའི་དགེ་བ་དག་པ་བའི་མཇུག་ཐོགས་སུ་རང་དང་གོང་འོག་གིས་ཀུན་གྱི་ཉོན་མོངས་སྐྱེ་བར་བཤད་ཀྱི། འཆི་འཕོ་བའི་ཚེ་ན་འཆི་སྲིད་ནི་མཉམ་གཞག་མིན་པས་སྙོམས་འཇུག་གི་བསམ་གཏན་དག་པ་བ་མེད་ཀྱང་སྐྱེ་བའི་བསམ་གཏན་སྐྱེས་ཐོབ་ཀྱི་དགེ་བ་མཉམ་གཞག་མིན་པ་ལའང་བསམ་གཏན་དག་པ་བ་ཞེས་ཐ་སྙད་དུ་འཇུག་པས། དག་པ་བ་དེ་ལས་ནི་རང་ས་དང་གོང་འོག་གི་ས་གང་དུ་སྐྱེ་བ་དེ་དག་ཐམས་ཅད་ཀྱི་ཉིང་མཚམས་སྦྱོར་བའི་སེམས་ཉོན་མོངས་པ་ཅན་ཀུན་འབྱུང་བ་སྲིད་དེ། སྐྱེ་བའི་སྲིད་པ་ཉོན་མོངས་ཅན། །ཅེས་འབྱུང་བས་སྐྱེ་བའི་སེམས་ཐམས་ཅད་ཉོན་(༣༨༦བ)
མོངས་ཅན་དུ་ངེས་པའི་ཕྱིར། གཉིས་པ་ནི། ཉོན་མོངས་ཅན་ལས་གོང་མ་མིན། །འཆི་འཕོ་བའི་ཚེ་སྙོམས་འཇུག་ཉོན་མོངས་ཅན་ལས་རང་ས་དང་འོག་སའི་ཉོན་མོངས་ཅན་སྐྱེའི། གོང་མའི་ཉོན་མོངས་ཅན་སྐྱེ་བ་མིན་ཏེ། འོག་མའི་ཉོན་མོངས་པ་མ་སྤངས་པར་ཡོད་ན་གོང་མར་མི་སྐྱེ་བས་དེ་དེར་ཉིང་མཚམས་སྦྱོར་འགལ་བའི་ཕྱིར། གཉིས་པ་ཆ་མཐུན་བཞིའི་དམིགས་བསལ་ལ། དག་པ་བ་ལ་དེ་བཞིར་དབྱེ་བ། དབྱེ་བ་སོ་སོའི་དོན། བཞི་པོ་གང་གི་མཇུག་ཏུ་གང་སྐྱེ་བའོ། །དང་པོ་ནི། དག་པ་ཉམས་པའི་ཆ་མཐུན་སོགས། །རྣམ་བཞི། དག་པ་བ་ཐམས་ཅད་ལ་ཟག་མེད་ཀྱི་སྙོམས་འཇུག་སྐྱེ་བ་མ་ཡིན་ལ། སྤྱིར་དག་པ་བ་ལ་ཉམས་པ་ཆ་མཐུན་དང་སོགས་པས་གནས་པ་ཆ་མཐུན། ཁྱད་པར་ཆ་མཐུན། ངེས་འབྱེད་ཆ་མཐུན་རྣམ་པ་བཞི་ཡོད་པ་ལས། སྲིད་རྩེ་ལ་ཁྱད་པར་ཆ་མཐུན་མེད་དེ་གོང་ས་མེད་པའི་ཕྱིར་རོ། །གཉིས་པ་ནི། དེ་ནི་གོ་རིམས་བཞིན། །ཉོན་མོངས་སྐྱེ་དང་རང་ས་དང་། །གོང་དང་ཟག་མེད་རྗེས་མཐུན་པ། །དེའི་མཚན་ཉིད་ནི་གོ་རིམ་བཞིན་དུ་རྒྱུན་གྱི་དུས་སུ་ཉོན་མོངས་སྐྱེ་བ་དང་རྗེས་སུ་མཐུན་པ་དང་། རང་ས་དང་རྗེས་སུ་མཐུན་པ་དང་། ས་གོང་མ་དང་རྗེས་སུ་མཐུན་པ་དང་། ཟག་མེད་དང་རྗེས་སུ་མཐུན་པའོ། །གསུམ་པ་ནི། ཉམས་ཆ་མཐུན་སོགས་མཇུག་ཐོགས་སུ། །གཉིས་དང་གསུམ་དང་གསུམ་དང་གཅིག །ཉམས་པ་ཆ་མཐུན་ཉམས་པ་དང་བསྟེན་པས་དེའི་མཇུག་ཐོགས་སུ་རྒྱུན་གྱི་དུས་སུ་ཉམས་པ་ཆ་མཐུན་དང་། ཁྱད་པར་དུ་འགྲོ་བའི་དུས་གནས་པ་ཆ་མཐུན་གཉིས་དང་སོགས་པས་གནས་པ་ཆ་མཐུན་གྱི་མཇུག་ཐོགས་སུ་ཆ་མཐུན་ཐ་མ་མ་གཏོགས་པ་གསུམ་དང་། ཁྱད་པར་ཆ་མཐུན་གྱི་མཇུག་ཐོགས་སུ་ཉམས་པ་ཆ་མཐུན་མ་གཏོགས་པ་གསུམ་དང་སྟེ། ཉམས་པ་ཆ་མཐུན་མ་བཏང་ན་ཁྱད་ཅན་སྐྱེ་བར་མི་རུང་བའི་ཕྱིར། ངེས་འབྱེད་ཆ་མཐུན་གྱི་མཇུག་ཐོགས་སུ་ངེས་འབྱེད་གཅིག་པུ་སྐྱེའོ། །གསུམ་པ་ཐོད་བརྒལ་གྱི་སྙོམས་འཇུག་སྐྱེ་ཚུལ་ལ། སྦྱོར་བ་དང་། དངོས་གཞིའོ། །དང་པོ་ལ། རིང་སྦྱོར་དང་། ཉེ་སྦྱོར་ལས། དང་པོ་ནི། ས་བརྒྱད་རྣམ་གཉིས་འབྲེལ་བ་དང་། །ཐོད་རྒལ་གྱི་སྙོམས་འཇུག་ཇི་ལྟར་སྐྱེ་ཞེ་ན། བསམ་གཟུགས་ཀྱི་ས་བརྒྱད་ལ་ཟག་བཅས་(༣༨༧ན)
ཟག་མེད་རྣམ་གཉིས་ཀྱི་ལུགས་མཐུན་དང་ལུགས་མི་མཐུན་པར་གོ་རིམ་ཉིད་ཀྱི་འཇུག་པས་འབྲེལ་བའོ། །གཉིས་པ་ནི། གཅིག་རྒལ་སོང་ཞིང་འོངས་ནས་ནི། །དེས་ན་གཅིག་སྟེ་རེ་རེ་བརྒལ་ནས་སོང་བ་ལུགས་མཐུན་དུ་སྙོམས་པར་ཞུགས་ཤིང་ལུགས་དང་མི་མཐུན་པར་སྙོམས་པར་ཞུགས་ཏེ་འོང་ནས་ནི་ཟག་བཅས་ས་བརྒྱད་དང་ཟག་མེད་ཀྱི་ས་བདུན་ལུགས་དང་མཐུན་པ་དང་མི་མཐུན་པར་སྙོམས་འཇུག་གི་སྒོ་ནས་བྱང་བར་བྱས་ནས་ཕྱིས་ཟག་བཅས་ཀྱི་བསམ་གཏན་དང་པོ་ནས་ཟག་བཅས་ཀྱི་བསམ་གཏན་གསུམ་པ་ལ་སྙོམས་པར་འཇུག་ཅིང་། དེ་ནས་ནམ་མཁའ་མཐའ་ཡས་སྐྱེ་མཆེད་ལ། དེ་ནས་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་གོ། །དེ་བཞིན་དུ་ལུགས་དང་མི་མཐུན་པ་བྱང་བར་བྱས་ནས་ཟག་མེད་རྣམས་ཀྱང་རེ་རེ་བརྒལ་ཞིང་ལུགས་མཐུན་དང་། ལུགས་དང་མི་མཐུན་པ་སྙོམས་པར་འཇུག་པ་ནི་སྦྱོར་བ་ཡིན་ནོ། །དེའང་ཟག་བཅས་ཟག་མེད་མཐུན་པར་ཡར་འཕར་མར་འབབ་ཅིག་འགྲོས་བྱེད་རུང་ཟག་བཅས་ཟག་མེད་མཐུན་པར་གཅིག་བརྒལ་དུ་ཡར་འཕར་མར་འབབ་བྱེད་པ་ནི་སྦྱོར་བ་ཡིན་ནོ། །གཉིས་པ་དངོས་གཞི་ནི། རིགས་མི་མཐུན་པ་གསུམ་པར་འགྲོ། །ཐོད་རྒལ་གྱི་ནི་སྙོམས་འཇུག་ཡིན། །ཟག་བཅས་ཀྱི་བསམ་གཏན་དང་པོ་ནས་ཟག་མེད་ཀྱི་བསམ་གཏན་གསུམ་པ་དང་། དེ་ནས་ཟག་བཅས་ཀྱི་ནམ་མཁའ་མཐའ་ཡས་ཀྱི་སྐྱེ་མཆེད་དང་། དེ་ནས་ཟག་མེད་ཀྱི་ཅི་ཡང་མེད་པའི་སྐྱེ་མཆེད་ལ་ལུགས་དང་མཐུན་པར་ས་རེ་རེ་བརྒལ་ཞིང་རིགས་མི་མཐུན་པ་གསུམ་པ་ལ་སྙོམས་པར་འཇུག་པ་དང་། དེ་བཞིན་དུ་ཟག་བཅས་ཀྱི་ཅི་ཡང་མེད་པའི་སྐྱེ་མཆེད་ནས་ཟག་མེད་ཀྱི་བསམ་གཏན་དང་པོའི་བར་དུ་ལུགས་མི་མཐུན་པར་ས་རེ་རེ་བརྒལ་ཞིང་རིས་མི་མཐུན་པ་གསུམ་པར་འགྲོ་བ་དང་། དེ་བཞིན་དུ་ཟག་མེད་ཀྱི་བསམ་གཏན་དང་པོ་ནས་ཟག་བཅས་ཀྱི་ཅི་ཡང་མེད་པའི་སྐྱེ་མཆེད་ཀྱི་བར་དུ་ལུགས་དང་མཐུན་(༣༨༧བ)
པར་ས་རེ་རེ་བརྒལ་ཞིང་རིས་མི་མཐུན་པ་གསུམ་པར་འགྲོ་བ་དང་། དེ་བཞིན་དུ་ཟག་མེད་ཀྱི་ཅི་ཡང་མེད་པའི་སྐྱེ་མཆེད་ནས་ཟག་བཅས་ཀྱི་བསམ་གཏན་དང་པོའི་བར་དུ་ལུགས་མི་མཐུན་པར་ས་རེ་རེ་བརྒལ་ཞིང་རིས་མི་མཐུན་པར་གསུམ་པར་འགྲོ་བ་སྟེ། ཟག་བཅས་ཟག་མེད་རིས་མི་མཐུན་པའང་གསུམ་པར་འགྲོ་བ་སྟེ། སྤེལ་ནུས་པའི་ཐོད་རྒལ་གྱི་ནི་སྙོམས་འཇུག་གི་དངོས་གཞི་གྲུབ་པ་ཡིན་ནོ། །དེ་བཞིན་ཟག་བཅས་ཟག་མེད་ཀྱི་བསམ་གཏན་གཉིས་པ་ནས་སྲིད་རྩེའི་བར་དང་། སྲིད་རྩེ་ནས་གཉིས་པའི་བར་དུ་ལུགས་དང་མཐུན་པ་དང་མི་མཐུན་པར་ས་རེ་རེ་བརྒལ་ནས་རིས་མི་མཐུན་པ་གསུམ་པར་འགྲོ་བའི་ཐོད་རྒལ་སོགས་ལའང་སྦྱར་ཏེ་ཤེས་པར་བྱའོ། །བཞི་པ་ལ་ནི་སྙོམས་པར་མི་འཇུག་སྟེ་ཤིན་ཏུ་རིང་བའི་ཕྱིར། དེའང་གླིང་གསུམ་དུ་སྐྱེས་པའི་སྐྱེས་པ་དང་བུད་མེད་ཀྱིས་ཐོད་རྒལ་ལ་སྙོམས་པར་འཇུག་སྟེ་བློ་གསལ་བའི་ཕྱིར། མཐོང་ཐོབ་དབང་པོ་རྣོ་བས་ཏིང་ངེ་འཛིན་ལ་དབང་ཡང་སྒོམ་སྤོང་ཉོན་མོངས་མེད་པ་མ་ཡིན་ལ། དུས་ཀྱི་རྣམ་གྲོལ་ཉོན་མོངས་མེད་པ་ཡིན་ཀྱང་དབང་པོ་བརྟུལ་བས་ཏིང་ངེ་འཛིན་ལ་དབང་བ་མ་ཡིན་པས་དུས་དང་མི་སྦྱོར་བའི་རྣམ་པར་གྲོལ་བའི་དགྲ་བཅོམ་པ་མི་གཡོ་བ་ཁོ་ནས་སྐྱེད་པར་བྱེད་དེ། མི་སློབ་པ་ཡིན་པས་ཉོན་མོངས་མེད་པའི་ཕྱིར་དང་། དབང་པོ་རྣོ་ཞིང་བསམ་གཏན་དངོས་གཞི་ཐོབ་པས་ཏིང་ངེ་འཛིན་ལ་དབང་འབྱོར་བའི་ཕྱིར། བཞི་པ་རྟེན་གང་གིས་གང་མངོན་དུ་བྱེད་པ་ལ། སྤྱིར་བཏང་བ་དང་། སྲིད་རྩེ་ལ་དམིགས་བསལ་ལོ། །དང་པོ་ནི། བསམ་གཏན་གཟུགས་མེད་རང་དང་ནི། །འོག་སའི་རྟེན་ཅན་འོག་དགོས་མེད། །བསམ་གཏན་དང་སྲིད་རྩེ་ལ་སོགས་པའི་གཟུགས་མེད་ཀྱི་སྙོམས་འཇུག་ནི་རང་ས་དང་ནི་འོག་ས་འདོད་པའི་བར་དུ་མངོན་དུ་བྱེད་པའི་རྟེན་ཅན་ཡིན་གྱི། གོང་དུ་སྐྱེས་པས་སྙོམས་འཇུག་འོག་མ་མངོན་དུ་མི་བྱེད་དེ། དེ་ལ་ནི་སྙོམས་འཇུག་འོག་མའི་རྫས་ཀྱིས་ཅུང་ཟད་ཅིག་ཀྱང་(༣༨༨ན)
དགོས་བྱེད་མེད་པའི་ཕྱིར་ཏེ། འོག་མའི་ཏིང་ངེ་འཛིན་བསྐྱེད་པ་ནི་འོག་མའི་རྣམ་སྨིན་གྱི་ཆེད་དུ་བསྐྱེད་པ་ཡིན་ལ། གོང་མ་དེ་འོག་མའི་རྣམ་སྨིན་གྱི་ས་ལ་འདས་ཤིང་འོག་མའི་ཏིང་ངེ་འཛིན་དམན་པའི་ཕྱིར་རོ། །གཉིས་པ་ནི། སྲིད་རྩེར་འཕགས་པའི་ཅི་ཡང་མེད། །མངོན་སུམ་བྱས་ནས་ཟག་པ་ཟད། །སྤྱིར་བཏང་ནས་དམིགས་བསལ་བ་ནི། སྲིད་རྩེར་སྐྱེས་པའི་འཕགས་པ་ནི་ཟག་མེད་ཅི་ཡང་མེད་པའི་སྐྱེ་མཆེད་མངོན་སུམ་དུ་བྱས་ནས་སྲིད་རྩེའི་ཟག་པ་ཟད་པར་བྱེད་དེ། སྲིད་རྩེའི་ཟག་མེད་ཀྱི་ལམ་མེད་པའི་ཕྱིར་དང་། ཅི་ཡང་མེད་པའི་སྐྱེ་མཆེད་ཟག་མེད་དེ་སྲིད་རྩེ་ལ་ཐག་ཉེ་བའི་ཕྱིར་རོ། །ལྔ་པ་སྤྱོད་ཡུལ་གང་ལ་དམིགས་པ་ལ། བསམ་གཏན་ཉོན་མོངས་ཅན་གྱིས་གང་ལ་དམིགས་པ། བསམ་གཏན་དག་པ་བ་དང་ཟག་མེད་ཀྱིས་གང་ལ་དམིགས་པ། གཟུགས་མེད་ཀྱི་དངོས་གཞིས་གང་ལ་དམིགས་པའོ། །དང་པོ་ནི། སྲེད་བཅས་རང་གི་སྲིད་ལ་དམིགས། །སྲེད་བཅས་རོ་མྱོང་མཚུངས་ལྡན་ནི་རང་གི་ས་པའི་སྲིད་པ་ཟག་བཅས་ཀྱི་དངོས་པོ་ལ་དམིགས་སོ། །འོག་མ་ལའང་མི་དམིགས་ཏེ། འདོད་ཆགས་དང་བྲལ་བའི་ཕྱིར། གོང་མ་ལ་ཡང་དམིགས་པ་མ་ཡིན་ཏེ། ས་རྣམས་ནི་རང་སའི་སྲེད་པས་དེ་ཁོ་ན་ལ་རྒྱས་པས་སྲེད་པ་ཡོངས་སུ་གཅོད་པའི་ཕྱིར། དེ་ལྟར་མ་ཡིན་ན་དེ་གོང་མ་ཉིད་དུ་མི་འགྲུབ་སྟེ། ས་ཐ་དད་དུ་མ་བཅད་པའི་ཕྱིར། ས་གཅིག་པའི་གནས་གཞན་བཞིན་ནོ། །དེས་ན་གནས་གཞན་གསུམ་གསུམ་པོ་རྣམས་དང་བརྒྱད་པོ་ལྟག་ལོག་ཏུ་འདུག་ཀྱང་རང་ས་རང་ས་གཅིག་པར་འགྲུབ་སྟེ། སྲིད་པའི་ཚོལ་བར་འགྲོ་བ་དང་ལྡན་པའི་ཕྱིར། ཟག་མེད་ལའང་དམིགས་པ་མ་ཡིན་ཏེ། དགེ་བ་ཉིད་དུ་ཐལ་བར་འགྱུར་བའི་ཕྱིར། གཉིས་པ་ནི། བསམ་གཏན་དགེ་ཡུལ་ཡོད་དགུ་ཡིན། །བསམ་གཏན་དགེ་བ་དག་པ་བ་དང་ཟག་མེད་ཀྱི་ཡུལ་ནི་འདུས་བྱས་འདུས་མ་བྱས་ཅི་ཡོད་དགུ་ཐམས་ཅད་རུང་བ་ཡིན་ནོ། །གསུམ་པ་ནི། གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན། །བསམ་གཏན་རྣམས་ནི་ཀུན་ཏུ་(༣༨༨བ)
བལྟ་བ་ཡིན་པས་མ་སྨོས་ལ། གཟུགས་མེད་པའི་དངོས་གཞི་དགེ་བ་རྣམས་ཀྱི་སྤྱོད་ཡུལ་ནི་ས་འོག་མའི་ཟག་བཅས་ཀྱི་དངོས་པོ་མིན་ཏེ། རང་ས་དང་ས་གོང་མ་ལ་དམིགས་པའི་ཕྱིར། ཤིན་ཏུ་དེ་ཞི་བ་ཡིན་ལ་ས་འོག་མ་རབ་ཏུ་མ་ཞི་བ་ཡིན་པའི་ཕྱིར། ཆོས་འོག་མའི་ཟག་མེད་ནི་གཟུགས་མེད་དངོས་གཞིའི་དགེ་བ་རྣམས་ཀྱིས་དམིགས་པ་ཡིན་ནོ། །དེའི་དམིགས་པ་ཟག་མེད་ནི་རྗེས་ཤེས་དང་། དེའི་ཕྱོགས་མཐུན་སྡུག་བསྔལ་ལ་རྗེས་སུ་ཤེས་པའི་བཟོད་པ་དག་དང་། དེ་ལྷན་ཅིག་འབྱུང་བ་བཟུང་བ་ཡིན་ལ། དེའང་དབང་པོ་དང་རིགས་ལ་སོགས་པའི་བྱེ་བྲག་གིས་ཐ་དད་པས་དགུ་པོ་ཐམས་ཅད་ཡིན་གྱི། འདོད་པའི་སྡུག་བསྔལ་ལ་དམིགས་པ་ཐག་རིང་བས་ཆོས་ཤེས་ཕྱོགས་མཐུན་ལ་དམིགས་པ་མ་ཡིན་ལ། དགག་བྱའི་སྒོ་ནས་དེ་ལ་མི་དམིགས་པས་ས་འོག་མའི་འགོག་པའང་མ་ཡིན་ནོ། །གཟུགས་མེད་ཉེར་བསྡོགས་ཀྱི་བར་ཆད་མེད་པའི་ལམ་རྣམས་ཀྱི་དམིགས་པ་ནི་ས་འོག་མ་ཡིན་ནོ། །དྲུག་པ་ཉོན་མོངས་སྤོང་བྱེད་ངོས་བཟུང་བ་ལ། གང་གིས་གང་སྤོང་བ། སྤོང་བྱེད་གཉེན་པོའི་ཁྱད་པར་རོ། །དང་པོ་ལ། དངོས་གཞི་ཟག་མེད་ཀྱིས་གང་སྤོང་བ། ཉེར་བསྡོགས་ཀྱིས་གང་སྤོང་བའོ། །དང་པོ་ནི། ཟག་པ་མེད་པས་ཉོན་མོངས་རྣམས། །སྤོང་ངོ་། བསམ་གཏན་གཟུགས་མེད་དག་པ་སོགས་གསུམ་པོ་ལས། ཟག་པ་མེད་པས་དངོས་གཞི་རྣམས་ཀྱི་རང་ས་དང་གོང་སའི་ཉོན་མོངས་རྣམས་སྤོང་ངོ། །ཉོན་མོངས་ཅན་གྱིས་མི་སྤོང་བ་ལྟ་ཅི་སྨོས་ཏེ། དག་པ་བས་ཀྱང་ཉོན་མོངས་པ་མི་སྤོང་བའི་ཕྱིར། དག་པས་ས་འོག་མའི་ཉོན་མོངས་སྤོང་བ་མིན་ཏེ། འོག་མ་ལས་འདོད་ཆགས་དང་བྲལ་བའི་ཕྱིར། རང་ས་ན་ཡོད་པའང་སྤོང་བ་མིན་ཏེ། དེ་ཉིད་དེའི་གཉེན་པོ་མ་ཡིན་པའི་ཕྱིར་ཏེ། སྲིད་པས་སྲིད་པ་ལས་ངེས་པར་འབྱུང་བ་མ་ཡིན་(༣༨༩ན)
པའི་ཕྱིར། འོག་མའི་དག་པ་བས་གོང་མའི་ཉོན་མོངས་རྣམས་ནི་མི་སྤོང་སྟེ། གོང་མའི་ཉོན་མོངས་ཆེས་ཁྱད་པར་དུ་འཕགས་ན། དམན་པས་ཁྱད་པར་ཅན་སྤང་མི་ནུས་པའི་ཕྱིར། གཉིས་པ་ནི། ཉེར་བཟློག་དག་པས་ཀྱང་། །བསམ་གཟུགས་གོང་ས་གོང་སའི་ཉེར་བསྡོགས་དག་པས་ཀྱང་ཉོན་མོངས་རྣམས་སྤོང་སྟེ། ས་འོག་མ་པའི་གཉེན་པོ་ཡིན་པའི་ཕྱིར་རོ། །གཉིས་པ་སྤོང་བྱེད་གཉེན་པོའི་ཁྱད་པར་ལ། ཉེར་བསྡོགས་ཀྱི་ཁྱད་པར་དང་། བསམ་གཏན་ཁྱད་པར་ཅན་ངོས་བཟུང་བའོ། །དང་པོ་ལ། དབྱེ་བ། ངོ་བོ་ཚོར་བ་དང་བཅས་པའོ། །དང་པོ་ནི། དེ་དག་ལ་ནི་ཉེར་བཟློག་བརྒྱད། །དངོས་གཞི་བརྒྱད་པོ་དེ་དག་ལ་ནི་ཉེར་བསྡོགས་རེ་རེ་ཡོད་པས་བརྒྱད་ཡོད་དོ། །གཉིས་པ་ལ། ངོ་བོ་སྤྱིར་བཏང་བ། ཚོར་བ་ལྡན་ཚུལ། ངོ་བོའི་དམིགས་བསལ། གཞན་འདོད་དོ། དང་པོ་ནི། དག་པ། བསམ་གཏན་དང་གཉིས་ན་ཚོར་བ་དགའ་བ་ཡོད་ལ། གསུམ་པ་ན་ནི་བདེ་བ་ཡོད་ལ། བཞི་པ་ན་ནི་བཏང་སྙོམས་ཞེས་བཤད་པ་ལྟར་ཉེར་བསྡོགས་དེ་དག་ལ་ཚོར་བའང་དེ་དང་འདྲ་བར་ཡོད་དམ་ཞེ་ན་མ་ཡིན་ལ། ཉེར་བསྡོགས་དེ་རྣམས་ནི་ངོ་བོ་དག་པ་བ་ཡིན་གྱི། རོ་མྱོང་དང་མཚུངས་ལྡན་མ་ཡིན་ཏེ། ས་འོག་མ་ལས་ཡིད་འབྱུང་བ་དང་མ་བྲལ་བའི་ཕྱིར་དང་། འདོད་ཆགས་དང་བྲལ་བའི་ལམ་ཡིན་པའི་ཕྱིར་རོ། །གཉིས་པ་ནི། བདེ་མིན་སྡུག་བསྔལ་མིན། །བདེ་མིན་སྡུག་བསྔལ་མིན་པའི་ཚོར་བ་བཏང་སྙོམས་ཀྱི་དབང་པོ་དང་མཚུངས་ལྡན་ཡིན་ཏེ། མངོན་པར་འདུ་བྱེད་མེད་པར་འབྱུང་བའི་ལམ་ནི་དགའ་བདེ་དང་མཚུངས་ལྡན་ཡིན་ན་ཉེར་བསྡོགས་ནི་འབད་དེ་དྲང་དགོས་པས་མངོན་པར་འདུ་བྱ་བ་དང་བཅས་ཏེ་འབྱུང་བའི་ཕྱིར། སློབ་དཔོན་ཐོགས་མེད་ནི་དངོས་གཞི་བརྒྱད་པོ་དེ་ལ་འཇུག་པའི་ཉེར་བསྡོགས་དེ་དག་ལ་ཡིད་བྱེད་བདུན་བདུན་བཤད་དེ། དེ་ལ་ས་འོག་མ་རྣམས་ཚེ་ཐུང་ཞིང་སྡུག་བསྔལ་མང་བ་ལ་སོགས་པའི་སྒོ་ནས་རགས་(༣༨༩བ)
སོགས་དང་གོང་མ་རྣམས་དེ་ལས་བཟློག་པ་ཞི་སོགས་སུ་ལྟ་བའི་སྒོ་ནས་སྤང་བྱ་དང་ཐོབ་བྱ་ཤེས་པར་བྱས་ཤིང་སྤོང་བ་དང་ཐོབ་པར་བྱ་བའི་ཕྱིར་སེམས་གཏོད་པར་བྱེད་པ་ཐོས་བསམ་དང་འདྲེས་པ་མཚན་ཉིད་སོ་སོར་རིག་པའི་ཡིད་ལ་བྱེད་པ་དང་། སྤང་བྱ་དང་ཐོབ་བྱའི་སྦྱོར་བ་རྩོམ་པར་བྱེད་པའི་རྩེ་གཅིག་པ་ཞི་རགས་ཀྱི་མཚན་མ་ལ་མོས་པ་ཐོས་བསམ་ལས་འདས་པ་མོས་པ་ལས་བྱུང་བའི་ཡིད་ལ་བྱེད་པ་དང་། འོག་སའི་ཉོན་མོངས་པ་ཆེ་གསུམ་སྤོང་བར་བྱེད་པས་རབ་ཏུ་དབེན་པ་ཡིད་ལ་བྱེད་པ་དང་། ཆེན་པོས་དབེན་པ་ལ་དགའ་བ་རྒྱས་ཤིང་ཉོན་མོངས་པ་འབྲིང་གསུམ་སྤོང་བར་བྱེད་པ་དགའ་བ་སྡུད་པའི་ཡིད་ལ་བྱེད་པ་དང་། འོག་མའི་ཉོན་མོངས་པ་མངོན་དུ་རྒྱུ་དང་བྲལ་བ་དེ་ཟད་མ་ཟད་བརྟག་པའི་ཕྱིར་དེ་སྐྱེ་བའི་མཚན་མ་ཡིད་ལ་བྱེད་པ་དང་། ཐོབ་ལ་མངོན་པའི་ང་རྒྱལ་མེད་པ་ལ་སེམས་འཇོག་པར་བྱེད་པ་དཔྱོད་པའི་ཡིད་ལ་བྱེད་པ་དང་། དེ་ལྟར་བརྟགས་པས་ཉོན་མོངས་པ་ཆུང་གསུམ་ཡོད་པར་རྟོགས་ནས་ཆུང་གསུམ་སྤངས་ཤིང་། དངོས་གཞིའི་དངོས་རྒྱུར་གྱུར་པ་སྦྱོར་བ་མཐར་ཐུག་པའི་ཡིད་ལ་བྱེད་པ་དང་། གོང་མའི་དངོས་གཞི་ཐོབ་པ་ནི་སྦྱོར་བ་མཐར་ཐུག་པའི་འབྲས་བུ་ཡིད་ལ་བྱེད་པའོ། །དེ་རྣམས་ཀྱིའང་དང་པོ་དྲུག་སྦྱོར་བ་དང་བདུན་པ་ནི་དངོས་གཞིའོ། །དེ་ལྟར་གོང་མ་པས་འཇིག་རྟེན་པའི་གོང་མའི་ཉེར་བསྡོགས་ཀྱིས་འོག་སའི་སྒོམ་སྤོང་དགུ་ཅར་སྤངས་པར་བཤད་པ་དེ་ནི་གོང་མ་པའི་ལུགས་ཡིན་གྱི། བྱེ་བྲག་ཏུ་སྨྲ་བའི་ལུགས་ནི་མ་ཡིན་ཏེ། གལ་ཏེ་ཡིན་ན་གང་ཞིག་བསམ་གཏན་གྱི་དངོས་གཞི་མ་ཐོབ་པ་མི་ལྕོགས་མེད་ལ་བརྟེན་ནས་མཐོང་ལམ་ཐོབ་པ་དེས་དང་པོའི་ཉེར་བསྡོགས་ཐོབ་པའི་ཕྱིར་འདོད་པའི་སྒོམ་སྤོང་མཐའ་དག་སྤང་བར་འགྱུར་ན། སྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །ཞེས་བྱ་བའི་འགྲེལ་པར་འདོད་པ་ལ་ཆགས་བཅས་ཀྱི་མཐོང་ལམ་པ་དེ་ཁམས་གསུམ་གྱི་སྒོམ་སྤོང་གཅིག་ཀྱང་མ་སྤངས་པ་འཆིང་བ་མཐའ་དག་དང་ལྡན་པར་བཤད་པའི་ཕྱིར་རོ། །གསུམ་པ་ནི། དང་པོ་འཕགས་པའང་། ཉེར་བསྡོགས་གཞན་ནི་ཟག་མེད་(༣༩༠ན)
མ་ཡིན་པས་དང་པོ་མི་ལྕོགས་མེད་པ་ནི་འཕགས་པ་ཟག་པ་མེད་པའང་ཡིན་ལ་དག་པ་བ་ཡང་ཡིན་ཏེ། གསལ་བའི་ཕྱིར་རམ་རང་ས་ལས་ཡིད་འབྱུང་བ་དང་ལྡན་པས་ས་འོག་མའི་གཉེན་པོ་ཡིན་པའི་ཕྱིར། བསྡུ་བ་ནས་འདོད་པའི་སེམས་ནི་མཉམ་གཞག་མིན། དངོས་གཞི་མ་ཐོབ་ན་དེ་མི་ལྕོགས་མེད་པ་ལ་བརྟེན་པ་ལས་ཐབས་མེད། གཉིས་པའི་ཉེར་བསྡོགས་ལས་དང་པོའི་དངོས་གཞི་སླ་བ་འདམ་དུ་ཡོད་པས། གཉིས་པའི་ཉེར་བསྡོགས་ལ་བསྟེན་བྱ་བ་འབྱུང་ཡང་། འདིའི་ལུགས་ཀྱི་མི་ལྕོགས་མེད་པ་ཤེས་པ་གསལ་བས་ཟག་མེད་བརྟེན། ཉེར་བསྡོགས་གཞན་གསུམ་མི་གསལ་བས་མི་བརྟེན་ཟེར་རོ། །འོག་མའི་ཉེར་བསྡོགས་གཞན་དག་ནི་འཇིག་རྟེན་ལས་འདས་པ་མི་བརྟེན་ཏེ། འོག་མའི་དངོས་གཞི་ལ་བརྟེན་པའི་ཕྱིར། ཉེར་བསྡོགས་གཞན་རྣམས་ལའང་མཉམ་པར་བཞག་མ་བཞག་གཉིས་ལས། དང་པོ་ནི་དགེ་བ་ཡིན་ལ། གཉིས་པ་ཉེར་བསྡོགས་བརྒྱད་ཀྱི་སེམས་ཀྱི་ཉིང་མཚམས་སྦྱོར་བ་མཉམ་པར་མ་བཞག་པ་ཡིན་ཅེས་པ་གྲུབ་མཐའ་སྟེ། ཉེར་བསྡོགས་མཉམ་པར་བཞག་པ་ལ་ཉོན་མོངས་པ་ཅན་བཀག་གི་སྐྱེ་བ་ལ་བཀག་པ་མ་ཡིན་པའི་ཕྱིར། བཞི་པ་ནི། ཁ་ཅིག་གསུམ། །ཁ་ཅིག །མི་ལྕོགས་མེད་པ་གསུམ་དུ་འདོད་དེ། རོ་མྱོང་མཚུངས་ལྡན་ཀྱང་ཡོད་པའི་ཕྱིར། བྱ་བ་ནི་མི་ལྕོགས་མེད་གསལ་བས་ཟག་མེད་སྲིད་ན་རོ་མྱང་མཚུངས་ལྡན་ཀྱང་ཅིས་མི་སྲིད་བསམ་པའོ། །འདུས་བཟང་ནི་དངོས་གཞི་ལ་སྙོགས་པའི་ཕྱིར་ཡང་ཟེར་ཏེ། སྲེད་པ་འཚོལ་བར་འདོད་པ་ཉིད་ཀྱི་རོ་མྱོང་ཅན་དུ་སྨྲའོ། །གཉིས་པ་བསམ་གཏན་ཁྱད་པར་ཅན་ངོས་བཟུང་བ་ལ། ངོ་བོ་ངོས་བཟུང་བ། དབྱེ་བ། ཚོར་བ་གང་དང་ལྡན་པ། འབྲས་བུའོ། །དང་པོ་ནི། རྟོག་མེད་བསམ་གཏན་ཁྱད་པར་ཅན། །ཉེར་བསྡོགས་ནི་བསམ་གཏན་ཁྱད་ཅན་དང་དོན་ཐ་(༣༩༠བ)
དད་དེ་ཉེར་བསྡོགས་དེ་ནི་ཆགས་དང་བྲལ་བའི་ལམ་ཡིན་ལ། བསམ་གཏན་ཁྱད་པར་ཅན་ནི་བསམ་གཏན་དང་པོའི་དངོས་གཞི་ཉིད་རྟོག་པ་དང་མཚུངས་ལྡན་དུ་མེད་པས་ཁྱད་པར་དུ་འཕགས་པའི་བསམ་གཏན་ཡིན་པའི་ཕྱིར། གཉིས་པ་ལ་སོགས་པར་ཁྱད་ཅན་མ་བཞག་སྟེ། དང་པོའི་ལ་ལར་རྟོག་དཔྱོད་ཡོད་ལ། ལ་ལར་མེད་ཅིང་གཉིས་པ་ལ་སོགས་པར་དེ་ལྟ་བུའི་ཁྱད་པར་མེད་པའི་ཕྱིར། གཉིས་པ་ནི། རྣམ་གསུམ། ཁྱད་ཅན་དེ་ནི་རོ་མྱོང་ཅན། དག་པ། ཟག་མེད་རྣམ་པ་གསུམ་མོ། །གསུམ་པ་ནི། བདེ་མིན་སྡུག་བསྔལ་མིན། །ཁྱད་ཅན་དེ་བདེ་མིན་སྡུག་བསྔལ་མིན། བཏང་སྙོམས་ཀྱི་དབང་པོ་དང་མཚུངས་ལྡན་ཏེ། མངོན་པར་འདུ་བྱ་བ་དང་བཅས་པས་དྲང་བ་ཉིད་ཀྱི་དགའ་བ་དང་མཚུངས་པར་མི་ལྡན་ལ། འབད་པས་དྲང་བྱ་ཡིན་པས་ལམ་དཀའ་བའི་ཕྱིར། བཞི་པ་ནི། དེ་ནི་ཚངས་ཆེན་འབྲས་བུ་ཅན། །བསམ་གཏན་ཁྱད་ཅན་སྒོམ་པ་དེ་ནི་ཚངས་ཆེན་གྱི་འབྲས་བུ་ཐོབ་པ་ཅན་ནོ། །གཉིས་པ་ཏིང་ངེ་འཛིན་གྱི་དབྱེ་བ་ལ། གསུམ་དུ་དབྱེ་བ། བཞིར་དབྱེ་བའོ། །དང་པོ་ལ། སའི་སྒོ་ནས། ལམ་གྱི་སྒོ་ནས། ཡུལ་ལ་འཇུག་པའི་ཚུལ་གྱི་སྒོ་ནས་དབྱེ་བའོ། །དང་པོ་ནི། མན་ཆད་རྟོག་དཔྱོད་བཅས་པ་ཡི། །ཏིང་འཛིན་ཡན་ཆད་གཉིས་ཀ་མེད། །ཏིང་ངེ་འཛིན་ཐམས་ཅད་མདོར་བསྡུ་ན། མདོ་ལས་རྟོག་དཔྱོད་དང་བཅས་པ་དང་། རྟོག་པ་མེད་ལ་དཔྱོད་པ་ཙམ་དང་། གཉིས་ཀའང་མེད་པར་བཀའ་སྩལ་པ་ལས། བསམ་གཏན་ཁྱད་ཅན་ནི་རྟོག་པ་བཀག་པས་རྟོག་མེད་དཔྱོད་ཙམ་གྱི་ཏིང་ངེ་འཛིན་དང་། ཁྱད་ཅན་དེ་མན་ཆད་བསམ་གཏན་དང་པོ་དང་མི་ལྕོགས་མེད་པ་ནི་རྟོག་དང་དཔྱོད་པ་དང་ཏིང་ངེ་འཛིན་དང་། ཁྱད་ཅན་ཡན་ཆད་གཉིས་པའི་ཉེར་བསྡོགས་ནས་སྲིད་རྩེའི་བར་ནི་རྟོག་དཔྱོད་གཉིས་ཀ་མེད་པའི་ཏིང་ངེ་འཛིན་ནོ། །གཉིས་པ་ལ། ཏིང་ངེ་འཛིན་གསུམ་པོ་དེའི་ངོ་བོ་ངོས་བཟུང་བ། ནང་གསེས་ཀྱི་དབྱེ་བ། དངོས་བཏགས་དཔྱད་པའོ། །དང་པོ་ནི། མཚན་མེད་ཞི་བའི་རྣམ་པ་དང་། །སྟོང་ཉིད་བདག་མེད་སྟོང་ཉིད་དུ། །འཇུག་པའོ་སྨོན་པ་མེད་པ་ནི། །དེ་ལས་གཞན་བདེན་རྣམ་པ་དང་། །མཚན་མ་མེད་པ་དང་། སྟོང་(༣༩༡ན)
པ་ཉིད་དང་། སྨོན་པ་མེད་པའི་ཏིང་ངེ་འཛིན་གསུམ་གསུངས་པ་ལས། མྱང་འདས་སོ་སོར་བརྟགས་འགོག་ནི་ཡུལ་ལྔ་དང་། ཕོ་མོ་དང་། འདུས་བྱས་ཀྱི་མཚན་ཉིད་གསུམ་མམ་བཞིའི་མཚན་མ་དང་བྲལ་བས་མཚན་མེད་ཡིན་ལ། དེ་ལ་དམིགས་པའི་ཏིང་ངེ་འཛིན་ཡིན་ཅིང་། མཚན་མ་ཐམས་ཅད་ཞི་བའི་འགོག་པའི་རྣམ་པ་བཞི་དང་མཚུངས་པར་ལྡན་པ་དང་སྟོང་ཉིད་ཀྱི་ཏིང་ངེ་འཛིན། སྡུག་བདེན་གྱི་སྟོང་ཉིད་བདག་མེད་པ་ལ་དམིགས་པས་བདག་མེད་སྟོང་ཉིད་དང་མཚུངས་ལྡན་དུ་འཇུག་པ་འཇིག་ལྟའི་གཉེན་པོའོ། །སྨོན་པ་མེད་པའི་ཏིང་ངེ་འཛིན་ནི། ཡུལ་སྨོན་བྱ་མ་ཡིན་པའི་འདུས་བྱས་ལ་དམིགས་ནས་ཡིད་འབྱུང་བའི་རྣམ་པ་ཅན་ཡིན་ལ། སྟོང་པ་དང་བདག་མེད་པས་ཀྱང་སྡུག་བསྔལ་གྱི་བདེན་པ་ལ་སྟོང་པ་དང་བདག་མེད་ཀྱི་རྣམ་པར་དམིགས་མོད་ཀྱི། དེ་གཉིས་ནི་ཆོས་ཐམས་ཅད་ཀྱི་མཚན་ཉིད་ཡིན་པས་མྱང་འདས་ཀྱི་མཚན་ཉིད་ཀྱང་ཡིན་ན། དེ་དག་གི་མྱང་འདས་ལ་ཡིད་མི་འབྱུང་བ་ལྟར་སྡུག་བསྔལ་ལས་ཀྱང་ཡིད་མི་འབྱུང་བ་ལ་འགོག་བདེན་གྱིས་ཀྱང་ཡིད་མི་འབྱུང་གི་མི་རྟག་པ་དང་། སྡུག་བསྔལ་གྱི་རྣམ་པ་གཉིས་དང་། ཀུན་འབྱུང་གི་བདེན་པ་དང་། ལམ་གྱི་བདེན་པའང་ལུང་བར་མ་ལས་རེ་ཞིག་བླང་བྱ་ཡིན་ཀྱང་འདུས་བྱས་ཡིན་པས་ཆུ་བརྒལ་བའི་གཟིངས་ལྟར་ལྷག་མེད་དུ་འཇུག་པ་ན་ངེས་པར་འདོར་བས་སྤང་བྱར་གསུངས་ཏེ། གཟིངས་ལ་བརྟེན་ནས་ཆུ་བརྒལ་ལ། བརྒལ་ནས་གཟིངས་ལ་འཆེལ་ཏེ་མི་འདུག་པ་ལྟར་ལམ་ལ་བརྟེན་ནས་སྲིད་པ་ལ་བརྒལ་ཡང་ལམ་ལ་བརྟེན་ཏེ་མི་འདུག་པ་བཞིན་ནོ། །དེའང་གཉེན་པོས་འདོར་བ་མིན་ཀྱང་རྐྱེན་མ་ཚང་བས་དོར་བྱ་ཡིན་པས། སྡུག་བསྔལ་གྱི་བདེན་པའི་རྣམ་པ་ཕྱི་མ་གཉིས་དང་། འགོག་བདེན་གྱི་རྣམ་པ་བཞི་སྟེ་དྲུག་པོ་དེ་དག་ལས་(༣༩༡བ)
གཞན་པ་སྡུག་བསྔལ་གྱི་བདེན་པའི་རྣམ་པ་དང་པོ་གཉིས་དང་ཀུན་འབྱུང་དང་ལམ་གྱི་བདེན་པའི་རྣམ་པ་བརྒྱད་དེ་རྣམ་པ་བཅུ་དང་མཚུངས་པར་ལྡན་པའི་ཏིང་ངེ་འཛིན་ནོ། །ཐེག་པ་ཆེན་པོ་ལྟར་ན། སློབ་དཔོན་ཐོགས་མེད་དང་སེང་གེ་བཟང་པོ་ལ་སོགས་པས་འགོག་ལམ་གྱི་རྣམ་པ་བརྒྱད་ནི། མཚན་མ་མེད་པའི་ཏིང་ངེ་འཛིན་ཏེ་ཞི་བའི་ངོ་བོ་ཡིན་པའི་ཕྱིར། སྨོན་པ་མེད་པ་དང་སྟོང་པ་ཉིད་ནི་སྔ་མ་དང་འདྲ་ལ། སྨོན་མེད་ནི་མི་རྟག་པ་དང་། སྡུག་བསྔལ་དང་ཀུན་འབྱུང་གི་རྣམ་པ་བཞི་སྟེ་དྲུག་ལྡན་དུ་བཞེད་དོ། །གཉིས་པ་ནི། དག་དང་དྲི་མ་མེད། གསུམ་པོ་དེ་དག་ལ་དག་པ་འཇིག་རྟེན་པ་དང་། དྲི་མ་མེད་པ་འཇིག་རྟེན་ལས་འདས་པའང་ཡོད་དོ། །འཇིག་རྟེན་པ་རྣམས་ནི་འདོད་པ་དང་། མི་ལྕོགས་མེད་པ་དང་། བསམ་གཏན་ཁྱད་ཅན་དང་། བསམ་གཏན་བཞི་དང་། གཟུགས་མེད་པ་རྣམས་ཏེ་ས་བཅུ་གཅིག་ན་ཡོད་ལ། འཇིག་རྟེན་ལས་འདས་པ་དང་། སྲིད་རྩེ་དང་། གཉིས་པའི་ཉེར་བསྡོགས་བདུན་ཏེ་ཟག་མེད་ས་དགུ་ན་ཡོད་དོ། །གསུམ་པ་ནི། དེ་དག །དྲི་མེད་རྣམ་ཐར་སྒོ་གསུམ་མོ། །གསུམ་པོ་དེ་དག་དྲི་མེད་དེ་ཟག་མེད་ནི་རྣམ་ཐར་སྒོ་གསུམ་མོ་སྟེ་ཐར་པའི་སྒོ་ཡིན་པའི་ཕྱིར། གསུམ་པ་ཡུལ་ལ་འཇུག་པའི་ཚུལ་གྱི་སྒོ་ནས་དབྱེ་བ་ལ། དབྱེ་བ་སྤྱིར་བསྟན་པ་དང་། ཁྱད་ཆོས་རྒྱས་པར་བཤད་པའོ། །དང་པོ་ནི། སྟོང་ཉིད་སྟོང་ཉིད་ཅེས་ལ་སོགས། །གཞན་ཡང་ཏིང་ངེ་འཛིན་གསུམ་མོ། །གཞན་ཡང་ཏིང་ངེ་འཛིན་གསུམ་མོ་ཞེས་པ་ལས་སྟོང་པ་ཉིད་ལ་དམིགས་པའི་སྟོང་ཉིད་ཀྱི་ཏིང་ངེ་འཛིན་དང་། སོགས་པས་སྨོན་མེད་ལ་དམིགས་པ་སྨོན་མེད་ཀྱི་ཏིང་ངེ་འཛིན་དང་། མཚན་མ་མེད་པ་ལ་དམིགས་པ་མཚན་མེད་ཀྱི་ཏིང་ངེ་འཛིན་ནོ། །གཉིས་པ་ལ། དམིགས་རྣམ་གྱི་ཁྱད་པར། ངོ་བོའི་ཁྱད་པར། རྟེན་གྱི་ཁྱད་པར། གང་ཟག་གི་ཁྱད་པར། སའི་ཁྱད་པར་རོ། །དང་པོ་ནི། གཉིས་ནི་སྟོང་དང་མི་རྟག་པར། །མི་སློབ་པའི་ལ་དམིགས་པ་ཡིན། །མཚན་མ་མེད་པ་མཚན་མེད་ནི། །ཞི་བར་མ་བརྟགས་ཟད་པ་ལ། །གསུམ་པོ་དེ་ལས་གཉིས་ནི་རིམ་པ་ལྟར་མི་སློབ་པའི་སྟོང་ཉིད་དང་སྨོན་པ་མེད་པའི་ཏིང་ངེ་འཛིན་ལ་དམིགས་ནས། དེ་གཉིས་ལ་བདག་འཛིན་དང་སྲེད་པའི་དགའ་བ་དགག་པའི་ཕྱིར་མི་སློབ་པའི་(༣༩༢ན)
སྟོང་པ་ཉིད་ཀྱི་ཏིང་ངེ་འཛིན་འདི་ནི་བདག་གི་མ་ཡིན་ནོ་ཞེས་སྟོང་པའི་རྣམ་པ་དང་མི་སློབ་པའི་སྨོན་པ་མེད་པའི་ཏིང་ངེ་འཛིན་འདི་ནི་མི་རྟག་པའོ། །ཞེས་མི་རྟག་པའི་རྣམ་པ་ཡིད་ལ་བྱེད་པ་ཡིན་ནོ། །འོ་ན་སྟོང་ཉིད་ཀྱི་ཏིང་ངེ་འཛིན་ལྟར་སྟོང་བདག་མེད་གཉིས་ཀར་མི་དམིགས་པ་སྟོང་ཉིད་ཀྱི་རྣམ་པ་ཁོ་ནར་དམིགས་ཤེ་ན། སྟོང་ཉིད་ཀྱི་ཏིང་ངེ་འཛིན་སྟོང་བདག་མེད་ཀྱི་རྣམ་པ་གཉིས་པ་ཅན་ཡིན་ཀྱང་སྟོང་ཉིད་སྟོང་ཉིད་ཀྱི་ཏིང་འཛིན་འདི་སྟོང་ཉིད་ཀྱི་རྣམ་པར་བཞུགས་པའི་སྟོང་ཉིད་ཀྱི་རྗེས་ཁོ་ན་ལ་བསྐྱེད་པའི་ཕྱིར་དང་། ལམ་དུ་ཞུགས་པ་གྲོགས་དང་བྲལ་བ་ན་མགྲོན་པོ་ངོ་མི་ཤེས་པ་མཐོང་བས་ཀྱང་དགའ་བ་གཅིག་པུ་ནི་གྲོགས་ཀྱི་སྟོང་པས་མི་དགའ་བ་ལྟར་སྲིད་པ་ལ་བདག་མེད་པར་མཐོང་ཡང་སྟོང་པར་མ་མཐོང་ན་དགའ་བར་འགྱུར་གྱི། སྟོང་པར་མཐོང་ན་མི་དགའ་ཞིང་སྐྱོ་བར་འགྱུར་བས། དེས་ན་སྐྱོ་བ་དང་མཐུན་པས་སྟོང་པའི་རྣམ་པ་ཁོ་ནར་དམིགས་ཀྱི། བདག་མེད་པའི་རྣམ་པ་ནི་མ་ཡིན་ནོ། །དེར་མ་ཟད་སྟོང་པ་ཉིད་ཀྱི་ཉེར་ལེན་གྱི་ཕུང་པོ་རྣམས་སྟོང་པ་ཉིད་དུ་ཡིད་ལ་བྱེད་ལ། སྟོང་པ་ཉིད་ཀྱིས་ནི་དེའི་རྗེས་ལས་སྐྱེས་པའི་དགེ་རྩ་ཡིན་པའི་སྒོ་ནས་སྟོང་པ་ཉིད་ཁྱོད་ཀྱང་སྟོང་ངོ་ཞེས་མི་སློབ་པ་དེ་ཉིད་ཡིད་ལ་བྱེད་དེ། ཤིང་གི་མེར་རོ་བཅུག་ནས་རོ་དེ་ཚིག་པ་དང་ཤིང་དེ་ཡང་འཚིག་པ་བཞིན་དུ་སྟོང་པ་ཉིད་ཀྱིས་ཉོན་མོངས་པ་བསྲེགས་ནས་སྟོང་ཉིད་དེ་ཡང་སྟོང་པ་ཉིད་ཀྱིས་སུན་འབྱིན་པར་བྱེད་དོ། །དེ་བཞིན་དུ་ཏིང་ངེ་འཛིན་གཉིས་པོ་དེ་དག་བདེན་པ་དང་པོ་སྡུག་བསྔལ་གྱི་རྣམ་པ་དང་། ཀུན་འབྱུང་དང་འགོག་ལམ་གྱི་རྣམ་པ་བཅུ་གཉིས་ལ་དམིགས་པ་མ་ཡིན་ཏེ། གོ་རིམ་བཞིན་དུ་དམིགས་ཡུལ་ཏིང་ངེ་འཛིན་དེ་དག་ཟག་མེད་ཡིན་པས་ཟག་བཅས་འཕགས་པ་དང་མི་མཐུན་པའི་སྡུག་བསྔལ་དང་། སྡུག་བསྔལ་བསྐྱེད་(༣༩༢བ)
པའི་རྒྱུ་ལ་སོགས་པའི་མཚན་ཉིད་མ་ཡིན་པའི་ཕྱིར་དང་། འགོག་བདེན་མ་ཡིན་པའི་ཕྱིར་དང་། ལམ་བདེན་ཡིན་པས་སུན་དབྱུང་བྱ་ཡིན་ལ། སུན་དབྱུང་བྱ་དེ་ཉིད་སུན་འབྱིན་བྱེད་དུ་མི་འཐད་པའི་ཕྱིར། མཚན་མ་མེད་པ་མཚན་མ་མེད་པའི་ཏིང་ངེ་འཛིན་ནི་མི་སློབ་པའི་མཚན་མེད་ལས་ལངས་པའི་རྗེས་ལ་ཟག་བཅས་སམ། ཟག་མེད་ཀྱི་ཤེས་པ་གཞན་མ་སྐྱེས་ན་མཚན་མེད་ཀྱི་རྒྱུན་འབྱུང་བར་འགྱུར་བ་ལས། མཚན་མེད་ལས་ལངས་པའི་རྗེས་ལ་ཟག་བཅས་སམ་ཟག་མེད་སྐྱེ་བ་ན་མཚན་མེད་འབྱུང་བའི་རྐྱེན་མ་ཚང་བས་འགག་པར་འགྱུར་ཞིང་། འགག་པ་དེ་ནི་སོ་སོར་བརྟགས་མིན་གྱི་འགོག་པ་ཡིན་གྱི། བརྟགས་འགོག་ནི་མ་ཡིན་ཏེ། ཟག་བཅས་གཉེན་པོས་བྲལ་བ་ནི་བརྟགས་འགོག་ཡིན་པ་ལ། མི་སློབ་པའི་མཚན་མེད་ནི་ཟག་མེད་ཡིན་པས་འཕགས་པ་དང་མི་མཐུན་པ་མེད་པས་གཉེན་པོས་བྲལ་བ་མི་སྲིད་པའི་ཕྱིར། དེས་ན་མི་སློབ་པའི་ཏིང་ངེ་འཛིན་གྱིས་སོ་སོར་མ་བརྟགས་པས་ཟད་པ་སྟེ་འགོག་པ་ལ་དམིགས་ནས་འདུག་པ་ཆད་པའི་མཚན་ཉིད་ཅན་ཞི་བའི་རྣམ་པ་ཁོ་ནར་བལྟས་ཏེ། མཚན་མེད་འགོག་པར་བྱེད་པ་ནི་དགྲ་གསོད་བྱེད་ལ་དགའ་ན་དགྲ་ལ་མི་དགའ་བར་གྲུབ་པ་ལྟར་འགོག་བྱེད་ལ་ཡོན་ཏན་དུ་བལྟ་བས་དགག་བྱ་སུན་ཕྱུང་བར་འགྱུར་རོ། །འགོག་པ་དང་གྱ་ནོམ་པ་དང་ངེས་པར་འབྱུང་བའི་རྣམ་པ་ཅན་ནི་མ་ཡིན་ཏེ། རིམ་པ་ལྟར་འགོག་པ་ནི་མི་རྟག་པའི་འགོག་པ་དང་ཐུན་མོང་ཡིན་ལ། དེའི་ཚེ་ན་མི་རྟག་པའང་དམིགས་པར་འགྱུར་ལ། འདོད་ན་དེ་ཉིད་མཚན་མ་ཡིན་པས་མཚན་མེད་ཀྱི་བྱེ་བྲག་ཏུ་མི་རུང་བས་མཚན་མ་མེད་པ་འགོག་བྱེད་བརྟགས་མིན་བརྟག་པ་ཉིད་ཀྱང་སུན་ཕྱུང་བར་འགྱུར་ན། མཚན་མེད་སུན་འབྱིན་བྱེད་སུན་ཕྱུང་བས་སུན་དབྱུང་བྱའི་མཚན་མེད་སུན་(༣༩༣ན)
ཕྱུང་བར་མི་འགྱུར་བའི་ཕྱིར་རོ། །གྱ་ནོམ་ནི་དགེ་བ་ཡིན་ན་བརྟགས་མིན་ལུང་མ་བསྟན་ཡིན་པའི་ཕྱིར། ངེས་འབྱུང་ནི་གཉེན་པོས་སྤང་བྱ་ལས་འབྲལ་དགོས་ཀྱི། བརྟགས་མིན་ནི་གཉེན་པོས་བྲལ་བ་མ་ཡིན་པའི་ཕྱིར། གཉིས་པ་ནི། ཟག་བཅས། ཏིང་འཛིན་འདི་དག་གཅིག་ཏུ་ཟག་བཅས་ཡིན་ཏེ། སྟོང་པ་ཉིད་ལ་སོགས་པའི་རྣམ་པ་འཕགས་ལམ་ལ་སྡང་ཞིང་རྒྱབ་ཀྱིས་ཕྱོགས་པའི་ཕྱིར། ཏིང་འཛིན་གསུམ་པའང་འཕགས་ལམ་ལ་སྡང་བ་སྟེ། མི་སློབ་པའི་ཏིང་ངེ་འཛིན་མི་འཇུག་པའི་རྒྱུའི་ཆོས་ལ་བསྡགས་པའི་ཕྱིར། འདི་ལ་རྣམ་པར་ཐར་པ་སུན་འབྱིན་པའི་ཏིང་ངེ་འཛིན་ཅེས་གྲགས་སོ། །ཟག་མེད་ཀྱི་ཏིང་ངེ་འཛིན་ནི་འཕགས་ལམ་ལ་སྡང་བ་མིན་ནོ། །གསུམ་པ་ནི། མི་ནང་། མིའི་ནང་ཁོ་ནར་བསྐྱེད་ཀྱི་ལྷའི་ནང་དུ་ནི་མ་ཡིན་ནོ། །བཞི་པ་ནི། མི་གཡོ་ལ། །དགྲ་བཅོམ་པ་མི་གཡོ་བའི་ཆོས་ཅན་ཁོ་ན་ལ་སྐྱེའི། དབང་རྟུལ་དགྲ་བཅོམ་སོགས་ལས་མིན་ཏེ། དབང་རྟུལ་གྱིས་བསྐྱེད་པར་མི་ནུས་ཤིང་དབང་རྣོན་གྱིས་བསྐྱེད་པར་ནུས་པའི་ཕྱིར། འདིའི་དགོས་པ་ནི་མཐོང་ཆོས་ལ་བདེ་བར་གནས་པར་བྱ་བ་དང་། ཀུན་ཏུ་ཆགས་པའི་གནས་སུ་གྱུར་པ་མི་སློབ་པའི་སྟོང་པ་ཉིད་སོགས་ལ་རྒྱབ་ཀྱིས་ཕྱོགས་པར་ཏིང་ངེ་འཛིན་གཞན་དག་ལ་སྙོམས་པར་འཇུག་པའི་ཆེད་ཡིན་གྱི། ཞེས་སྡེ་པ་འདོད་ལ། དུས་ཀྱི་རྣམ་གྲོལ་ནི་འཕགས་ལམ་རྗེས་སུ་བསྲུང་བའི་ཕྱིར་སུན་འབྱིན་པར་མི་བྱེད་དོ། །ཐེག་པ་གོང་མ་པ་ནི་རྣམ་སྣང་མངོན་བྱང་ལས། སེམས་ནི་རང་དངོས་མེད་ཕྱིར་དང་། །འབྲས་བུ་རྒྱུ་རྣམས་སྤང་ཕྱིར་དང་། །ཞེས་འབྱུང་བ་བཞིན་དུ་ཆོས་རྣམས་ཀྱི་རང་གི་ངོ་བོ་དང་འབྲས་བུ་དང་རྒྱུས་སྟོང་པ་ལ་མཉམ་པར་བཞག་པའི་ཏིང་ངེ་འཛིན་སྟོང་པ་ཉིད་ཀྱི་ཏིང་ངེ་འཛིན་ལ་སོགས་པར་འདོད་ལ། དེ་དག་ཀྱང་(༣༩༣བ)
ཆོས་རྣམས་ཀྱི་རང་གི་ངོ་བོས་སྟོང་པ་ལ་སོགས་པའམ་སྟོང་པ་ཉིད་ཀྱང་སྟོང་པ་ཉིད་དུ་ཤེས་པའི་ཏིང་ངེ་འཛིན་སོགས་ལ་འཇོག་པས་ཟག་མེད་དུ་འདོད་དོ། །རྣམ་པར་གཏན་ལ་དབབ་པ་བསྡུ་བ་ལས། ཀུན་བརྟགས་གཞན་དབང་ཡོངས་གྲུབ་ཀྱི་ཡུལ་ཅན་གསུམ་གྱི་དབང་དུ་བྱས་ནས་སྟོང་ཉིད་མཚན་མེད་སྨོན་མེད་ཀྱི་ཏིང་ངེ་འཛིན་གསུམ་གསུངས་ལ། དེས་ན་ཐོས་བསམ་ལས་བྱུང་བ་དང་། འཇིག་རྟེན་པའི་སྒོམ་བྱུང་དང་། འཇིག་རྟེན་ལས་འདས་པའི་སྒོམ་བྱུང་གི་ཏིང་ངེ་འཛིན་གསུམ་རིམ་པ་ལྟར། སྟོང་པ་ཉིད་ལ་སོགས་དང་། སྟོང་ཉིད་ཀྱི་ཏིང་ངེ་འཛིན་ལ་སོགས་དང་། རྣམ་ཐར་སྒོའི་སྟོང་ཉིད་ལ་སོགས་པ་ཡིན་ནོ་ཞེས་གསུངས་སོ། །ལྔ་པ་ནི། ཉེར་བསྡོགས་བདུན་ནི་མ་གཏོགས་སོ། །ས་ནི་ཉེར་བསྡོགས་བདུན་ནི་མ་གཏོགས་པ་འདོད་ཁམས་དང་མི་ལྕོགས་མེད་དང་བསམ་གཏན་ཁྱད་པར་ཅན་དང་བསམ་གཏན་དང་གཟུགས་མེད་ཐམས་ཅད་ན་ཡོད་དོ། །གཉིས་པ་ཏིང་ངེ་འཛིན་བཞིར་དབྱེ་བ་ནི། དགེ་བའི་བསམ་གཏན་དང་པོ་ནི། །བདེ་འགྱུར་ཏིང་འཛིན་སྒོམ་པ་ཡིན། །མིག་གི་མངོན་ཤེས་མཐོང་འགྱུར་འདོད། །སྦྱོར་བ་ལས་བྱུང་བློ་དབྱེར་འགྱུར། །རྡོ་རྗེ་ལྟ་བུའི་བསམ་གཏན་མཐའི། །གང་ཡིན་དེ་ཟག་ཟད་འགྱུར་བསྒོམ། །དེའང་བཅོམ་ལྡན་འདས་ཀྱིས། ཏིང་ངེ་འཛིན་སྒོམ་པ་ནི་རྣམ་པ་བཞི་སྟེ། ཏིང་ངེ་འཛིན་སྒོམ་པ་ཀུན་ཏུ་བསྟེན་གོམས་པར་བྱས་ལན་མང་དུ་བྱས་ན་མཐོང་བའི་ཆོས་ལ་བདེ་བར་གནས་པར་འགྱུར་བའང་ཡོད་ཅེས་བྱ་བ་ནས། ཏིང་ངེ་འཛིན་ཀུན་ཏུ་བསྟེན་གོམས་པར་བྱས་ལན་མང་དུ་བྱས་ན་ཤེས་པ་མཐོང་བར་འགྱུར་བའང་ཡོད་དོ། །ཤེས་རབ་མང་དུ་རྣམ་པར་འབྱེད་པར་འགྱུར་བའང་ཡོད་དོ། །ཟག་པ་ཟད་པར་འགྱུར་བའང་ཡོད་ཅེས་འབྱུང་བས་དགེ་བ་སྟེ་དག་པའམ། ཟག་མེད་ཀྱི་བསམ་གཏན་དང་པོ་ནི་མཐོང་བའི་ཆོས་ལ་བདེ་བར་གནས་པར་འགྱུར་བའི་ཏིང་ངེ་འཛིན་སྒོམ་པ་ཡིན་ནོ། །དེ་ནི་རྣལ་འབྱོར་པ་འདོད་ཁམས་ཉེས་པ་མང་བ་ལས་འདས་པ་དེའི་བདེ་བས་བློ་ལྷག་པར་ཡོངས་སུ་ཚིམ་པ་དང་པོ་(༣༩༤ན)
ཡིན་པས་དཔེར་བཀོད་ཀྱི། བསམ་གཏན་གཞན་དག་ཀྱང་དེ་ལྟར་ཡིན་པར་ཤེས་པར་བྱའོ། །ཚེ་ཕྱི་མ་ལ་བདེ་བར་གནས་པར་འགྱུར་བ་ནི་མ་ངེས་ཏེ། ཡོངས་སུ་ཉམས་པ་དང་གོང་དུ་སྐྱེས་པ་དང་། ཡོངས་སུ་མྱ་ངན་ལས་འདས་པ་རྣམས་ལ་དེ་མེད་པའི་ཕྱིར་རོ། །འཆི་འཕོ་བ་དང་སྐྱེ་བ་ཤེས་པའི་ལྷའི་མིག་གིས་མངོན་ཤེས་དང་དེའི་རྗེས་སུ་འབྱུང་བའི་ཡིད་ཤེས་དང་མཚུངས་ལྡན་ཤེས་རབ་ནི། ཤེས་པ་མཐོང་བར་འགྱུར་བའི་ཏིང་ངེ་འཛིན་སྒོམ་པར་འདོད་དེ། དེ་ལ་ཤེས་པར་འགྱུར་བ་དང་། མཐོང་བར་འགྱུར་བ་གཉིས་ལས། དང་པོ་ནི། སེམས་ཅན་འདི་དག་ནི་ལུས་ཀྱིས་ཉེས་པར་སྤྱོད་པ་དང་ལྡན་པའོ་ཞེས་བྱ་བ་ལ་སོགས་པ་ཤེས་པ་མིག་གི་མངོན་ཤེས་ཀྱི་རྗེས་སུ་རྒྱུ་བ་ཡིད་ཀྱི་རྣམ་ཤེས་དང་མཚུངས་ལྡན་གྱི་ཤེས་རབ་རྟོག་བཅས་ཡིན་ལ། གཉིས་པ་ནི། ད་ལྟར་གྱི་གཟུགས་ཀྱི་སྐྱེ་མཆེད་ལ་དམིགས་པ་མིག་གི་རྣམ་ཤེས་དང་མཚུངས་ལྡན་གྱི་ཤེས་རབ་རྟོག་པ་མེད་པའོ། །འོ་ན་མདོ་ལས་ལྷའི་མིག་གི་མངོན་ཤེས་ཤེས་པ་མཐོང་འགྱུར་གྱི་ཏིང་ངེ་འཛིན་དུ་བཤད་པ་དང་འགལ་ཏེ། མངོན་ཤེས་ནི་ཤེས་རབ་ཡིན་ལ། དེ་ནི་ཏིང་ངེ་འཛིན་སྒོམ་པ་མ་ཡིན་པའི་ཕྱིར་ཞེ་ན། ཏིང་ངེ་འཛིན་གྱི་འབྲས་བུ་ལ་རྒྱུ་ཏིང་ངེ་འཛིན་གྱི་མིང་གིས་བཏགས་པ་སྟེ། ལྟེང་ཀ་རྐང་ནད་ཅེས་བརྗོད་པ་བཞིན་ནོ། །ཁ་ཅིག་ན་རེ། མངོན་ཤེས་རྣམ་དྲུག་རྣམ་གྲོལ་བླང་། །ཞེས་པས་འདི་ནི་རྣམ་གྲོལ་གྱི་ལམ་བསམ་གཏན་གྱིས་བསྡུས་པ་མཉམ་གཞག་ཁོ་ན་ཡིན་པས་ཏིང་ངེ་འཛིན་སྒོམ་པ་དངོས་ཡིན་པས་མདོ་དང་འགལ་བ་མེད་དོ་ཞེས་ཟེར་རོ། །སློབ་དཔོན་རྒྱལ་པོའི་སྲས། ཕྱོགས་སྔ་མ་ནི་ཆོས་མངོན་པའི་མཛོད་སེམས་པ་རྣམས་ཀྱི་ལུགས་ཡིན་ཏེ། མངོན་ཤེས་མཚན་ཉིད་པ་དང་ཏིང་ངེ་འཛིན་སྒོམ་པ་བཏགས་པ་བར་འདོད་ལ། (༣༩༤བ)
ལུགས་ཕྱི་མ་ལྟར་ན་མིག་གི་མངོན་ཤེས་ཏིང་ངེ་འཛིན་ཡིན་པས་ཏིང་ངེ་འཛིན་སྒོམ་པ་དངོས་སུ་འདོད་པར་འཆད་དོ། །སྦྱོར་བ་ལས་བྱུང་བའི་ཡོན་ཏན་ཁམས་གསུམ་པ་མི་སྡུག་པ་དང་། དབུགས་དབྱུང་རྔུབ་དང་། ཉོན་མོངས་མེད་སྨོན་ནས་ཤེས་སོ་སོ་ཡང་དག་རིག་པ་དང་། མངོན་པར་ཤེས་པ་དང་། རྣམ་ཐར་ཟིལ་གནོན་ལ་སོགས་ཟག་བཅས་དང་ཟག་མེད་རྣམ་ཐར་གྱི་སྒོ་དང་ཐོད་རྒལ་གྱི་སྙོམས་འཇུག་དང་ཟག་ཟད་ཀྱི་མངོན་ཤེས་ལ་སོགས་པ་ནི་ཏིང་ངེ་འཛིན་དང་མཚུངས་པར་ལྡན་པས་ཏིང་ངེ་འཛིན་སྒོམ་པ་ཞེས་བཏགས་ཏེ། བློ་ཤེས་རབ་རབ་ཏུ་དབྱེ་བར་འགྱུར་བ་སྟེ་ཁྱད་པར་ཕུལ་དུ་ཕྱིན་པར་འགྱུར་རོ། །བསམ་གཏན་གྱི་མཐའི་བཞི་པའི་རྡོ་རྗེ་ལྟ་བུའི་ཏིང་ངེ་འཛིན་གང་ཡིན་དེ་ནི་ཟག་པ་ཟད་པར་འགྱུར་བའི་ཏིང་ངེ་འཛིན་སྒོམ་པ་ཡིན་ནོ། །བྱེ་སྨྲས། ཏིང་ངེ་འཛིན་བཞི་པོ་འདི་བཅོམ་ལྡན་འདས་ཀྱིས་ཆོས་སྟོན་པ་འདི་རང་ཉིད་ཀྱི་ཐུགས་ལ་ཉེ་བར་གཏོད་པ་སྟེ་སྐྱེ་རིམ་ནས་གསུང་བར་མཛད་དེ། བྱང་སེམས་ལས་ཀྱི་མཐའ་ལ་གཟིགས་པའི་ཆེད་དུ་ཕྱིར་བྱུང་སྟེ། ཤིང་འཛམ་བུའི་དྲུང་དུ་བསམ་གཏན་དང་པོ་བསྐྱེད། བྱང་ཆུབ་ཀྱི་ཤིང་དྲུང་དུ་ཐུན་དང་པོ་ལ་ལྷའི་བུའི་བདུད་བཅོམ་ནས་ལྷའི་སྤྱན་བསྐྱེད་དེ། དེས་འཆི་འཕོ་བ་དང་སྐྱེ་བའི་གནས་ཉམ་ང་བར་སེམས་ཅན་རྣམས་ལ་གཟིགས་ནས་དེ་དག་ཡོངས་སུ་བསྐྱབ་པའི་ཕྱིར་གུང་ཐུན་ལ་བསམ་གཏན་དང་རྣམ་ཐར་གྱི་སྙོམས་འཇུག་མངོན་དུ་མཛད་དེ། འདི་སྦྱོར་བ་ལས་བྱུང་བའི་ཡོན་ཏན་དེ་དག་ནི་ཤེས་རབ་རབ་ཏུ་རྣོན་པོར་འབྱེད་པར་འགྱུར་བའོ། །དེའི་འོག་ཏུ་ཐུན་གསུམ་པའི་བསམ་གཏན་བཞི་པ་ལ་བརྟེན་ཏེ་ངེས་པར་ཞུགས་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་ཀུན་སྦྱོར་སྤངས་པའི་བར་དུ་མཛད་དོ། །འདིར་སྨྲས་པ། ཡིད་ལ་དམ་པའི་བགྱི་བ་ཐམས་ཅད་ལ། །ཕྱོགས་རེ་མིན་པའི་སྦྱོར་མཆོག་སྩོལ་བ་(༣༩༥ན)
ཡི། །སྙིང་སྟོབས་ཅུང་ཟད་ལྡན་པར་གྱུར་ན་ཡང་། །འགྲོ་བ་ཕལ་གྱི་ལས་མཐའ་འདི་མཐོང་བས། །རྟག་ཏུ་ཡིད་ལ་མྱ་ངན་བཟོད་མེད་ཀྱིས། ཁུར་ཆེན་ཆེས་པས་གཟིར་བར་གྱུར་ན་ཡང་། །དེ་ཚེ་མི་བཟོད་སྙིང་རྗེ་འདི་འདྲ་བས། །བདག་གི་རྒྱུད་ལ་འཆར་བའི་གོ་སྐབས་ཞེས། །སླར་བསམས་ཚེ་ན་དགའ་དང་བདེ་བ་ཡི། །ལུས་སེམས་སིམ་པའི་ཚོར་བ་ཅི་ཡང་སྐྱེས། །བདག་ལ་མོས་ཤིང་རྗེས་སུ་འབྲང་བ་དག །ཁོ་བོའི་སྤྱོད་པར་སློབས་ཤིག་བཞིན་བཟང་ཀྱེ། །གསུམ་པ་སྙོམས་འཇུག་ལ་བརྟེན་པའི་ཡོན་ཏན་བཤད་པ་ལ། ཚད་མེད་བསྟན་པ་དང་། ཡོན་ཏན་གཞན་བསྟན་པའོ། །དང་པོ་ལ། དབྱེ་བ་དང་། ཁྱད་ཆོས་སོ། །དང་པོ་ལ། དབྱེ་བ་དངོས། གྲངས་ངེས། དབྱེ་བ་སོ་སོའི་ངོ་བོའོ། །དང་པོ་ནི། ཚད་མེད་པ་ནི་བཞི་ཡིན་ནོ། །བྱམས་སྙིང་རྗེ་དགའ་བ་བཏང་སྙོམས་ནི་ཚད་མེད་པ་བཞི་ཡིན་ནོ་སྟེ་སེམས་ཅན་ཚད་མེད་པ་ལ་དམིགས་པའི་ཕྱིར། གཞན་ནི་བསོད་ནམས་ཚད་མེད་པ་སྒྲུབ་པ་དང་འབྲས་བུ་ཡིད་དུ་འོང་བ་ཚད་མེད་པས་ཚད་མེད་དག་ཟེར་རོ། །གཉིས་པ་ནི། གནོད་སེམས་ལ་སོགས་གཉེན་པོའི་ཕྱིར། །དེ་དག་བཞིར་གྲངས་ངེས་ཏེ་གནོད་སེམས་དང་ལ་སོགས་པས་རྣམ་འཚེ་དང་གཞན་གྱི་ཕུན་ཚོགས་ལ་མི་དགའ་བ་དང་། འདོད་པའི་འདོད་ཆགས་དང་། གནོད་སེམས་མང་བ་རྣམས་ཀྱི་གཉེན་པོའི་ཕྱིར་རོ། །མི་སྡུག་པ་དང་བཏང་སྙོམས་གཉིས་འདོད་པའི་འདོད་ཆགས་ཀྱི་གཉེན་པོར་ཁྱད་པར་ཅི་ཡོད་ཅེ་ན། བྱེ་བྲག་ཏུ་སྨྲ་བ་ན་རེ། ཁ་དོག་གི་འདོད་ཆགས་ཀྱི་གཉེན་པོ་མི་སྡུག་པ་དང་འཁྲིག་པའི་འདོད་ཆགས་ཀྱི་གཉེན་པོ་ནི་བཏང་སྙོམས་ཟེར་ལ། སློབ་དཔོན་ནི། འཁྲིག་པའི་ཆགས་པའི་གཉེན་པོ་མི་སྡུག་པ་དང་། ཕ་མ་དང་བུ་དང་ཉེ་དུའི་འདོད་ཆགས་ཀྱི་གཉེན་པོ་ནི་བཏང་སྙོམས་སོ་ཞེས་རུང་ངོ་། །གསུམ་པ་ནི། ཞེ་སྡང་མེད་བྱམས་སྙིང་རྗེ་ཡང་། །ཡིད་བདེ་བ་ནི་དགའ་བ་ཡིན། །བཏང་སྙོམས་མ་ཆགས། བྱམས་པ་ནི་ཞེ་སྡང་མེད་པའི་རང་བཞིན་ནོ། །སྙིང་རྗེའང་དེ་དང་(༣༩༥བ)
འདྲའོ། །དགའ་བ་ནི་ཡིད་བདེ་བའི་རང་བཞིན་ཡིན་ནོ། །བཏང་སྙོམས་ནི་མ་ཆགས་པའི་རང་བཞིན་ནོ། །བཏང་སྙོམས་ནི་གནོད་སེམས་ཀྱི་གཉེན་པོའང་ཡིན་ཏེ། གནོད་སེམས་དེ་ནི་ཆགས་པས་དྲང་བའི་ཕྱིར། བཏང་སྙོམས་འདི་ནི་མ་ཆགས་པ་དང་ཞེ་སྡང་མེད་པ་གཉིས་ཀའི་རང་བཞིན་ཡིན་ན་རུང་ངོ་། །གཉིས་པ་ཁྱད་པར་གྱི་ཆོས་ལ། རྣམ་པའི་ཁྱད་པར། ཡུལ་གྱི་ཁྱད་པར། སའི། གཉེན་པོའི་བྱེད་ཚུལ་གྱི། རྟེན་གྱི། ལྡན་ཚུལ་གྱི་ཁྱད་པར་རོ། །དང་པོ་ནི། རྣམ་པ་ནི། །ཀྱེ་མ་བདེར་གྱུར་སྡུག་བསྔལ་དང་། །དགར་གྱུར་སེམས་ཅན་རྣམས་སྙམ་པ། །འདི་དག་གི་རྣམ་པ་ནི་ཀྱེ་མ་སེམས་ཅན་རྣམས་བདེ་བར་གྱུར་ཅིག་སྙམ་པ་དང་། སྡུག་བསྔལ་ལས་གྲོལ་བར་གྱུར་ཅིག་སྙམ་པ་དང་། ཡིད་དགའ་བ་དང་ལྡན་པར་གྱུར་ཅིག་སྙམ་པ་དང་། ཉེ་རིང་ཆགས་སྡང་མེད་པར་སེམས་ཅན་རྣམས་མཉམ་པར་བྱའོ་ཞེས་ཡིད་ལ་བྱེད་ཅིང་སྙོམས་པར་འཇུག་སྟེ། ཕྱོགས་སུ་མ་ལྷུང་བས་རྗེས་ཆགས་ཀྱང་མེད། ཞེ་འགྲས་པའང་མེད་པས་བར་མར་གནས་པའི་ཕྱིར། ཇི་ལྟར་ན་བློ་དེ་དག་ཕྱིན་ཅི་ལོག་པ་ཉིད་དུ་མི་འགྱུར་རམ་སྟེ། བདེ་བ་དང་མི་ལྡན་པ་རྣམས་བདེ་བ་ལ་ཡོད་པར་མོས་པའི་ཕྱིར་ཞེ་ན། ཕྱིན་ཅི་མ་ལོག་པ་ཡིན་ཏེ། སྡུག་བསྔལ་སོགས་བདེ་བའོ་སྙམ་དུ་ཤེས་པ་མ་ཡིན་གྱི། སྡུག་པའི་སེམས་ཅན་འདི་དག་བདེ་བར་གྱུར་ཅིག་སྙམ་དུ་སེམས་པའི་ཕྱིར། ཡང་བསམ་པ་དགེ་བའི་ཆོས་སེམས་སེམས་བྱུང་འཁོར་བཅས་ནི་ཕྱིན་ཅི་མ་ལོག་པའི་ཕྱིར་ཏེ། ཇི་ལྟར་མོས་པ་དེ་ལྟར་འདུ་ཤེས་པའི་ཕྱིར། ཡང་ཕྱིན་ཅི་ལོག་ཡིན་ན་ཉེས་པ་ཅི་ཡོད་དྲིས་པས། དེ་ཡིན་ན་མི་དགེ་བར་འགྱུར་དུ་དོགས་སོ་ཞེ་ན། མི་དོགས་ཏེ། གནོད་སེམས་སོགས་ཀྱི་གཉེན་པོ་ཡིན་པས་དགེ་རྩ་ཡིན་པའི་ཕྱིར། གཉིས་པ་ནི། སྤྱོད་ཡུལ་འདོད་པའི་སེམས་ཅན་རྣམས། །འདི་དག་གི་དམིགས་པ་སྟེ་སྤྱོད་ཡུལ་འདོད་པའི་སེམས་ཅན་རྣམས་ཡིན་ཏེ། འདོད་པའི་སེམས་ཅན་རྣམས་ལ་དམིགས་པའི་གནོད་(༣༩༦ན)
སེམས་ལ་སོགས་པའི་གཉེན་པོ་ཡིན་པའི་ཕྱིར། མདོ་ལས། དེ་བྱམས་པ་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་འགྱུར་བ། ཚད་མེད་པ། ཤིན་ཏུ་སྒོམ་པ། ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་སོ། །ཞེས་གསུངས་པས་བྱམས་པ་དང་མཚུངས་ལྡན་གྱི་སེམས་ནི་བྱམས་པ་དང་ལྡན་པའི་སེམས་ཡིན་ལ། དེ་ཉིད་རིམ་པ་ལྟར་ཉེ་བའི་ཉོན་མོངས་པ་འཁོན་འཛིན་དང་། ཕྲག་དོག་དང་ཞེ་སྡང་གི་གཉེན་པོ་ཡིན་པས་འཁོན་མེད་པ་ལ་སོགས་པ་གསུམ་དང་། དེ་ཉིད་ཀྱི་འབྲས་བུ་ཆེ་བས་སྤངས་པ་དང་། ས་གཟུགས་ན་སྤྱོད་པ་ཡིན་པས་རྒྱ་ཆེན་པོར་འགྱུར་བ་དང་། མི་མཐུན་ཕྱོགས་སྤངས་པས་ཤིན་ཏུ་བསྒོམ་པའོ། །དེ་ལྟར་འཁོན་མེད་པ་ལ་སོགས་པ་ཚིག་གསུམ་དང་། གཅིག་དང་གཅིག་དང་གཅིག་དང་གཅིག་གིས་རིམ་པ་བཞིན་མི་མཐུན་ཕྱོགས་ཀྱི་གཉེན་པོ་བྱེད་པ་དང་། འབྲས་བུ་དང་། ས་དང་། དམིགས་པ་དང་། རྣམ་པར་དག་པའི་ཕན་ཡོན་གྱི་སྒོ་ནས་བྱམས་པ་དེ་ལྟར་བསྟན་པ་ཡིན་ནོ། །ཕྱོགས་གཅིག་ཏུ་མོས་ནས་ཞེས་པ་ནི་སྣོད་ཕྱོགས་ཀྱིས་མཚོན་ནས་ཕྱོགས་ཅན་སྣོད་ན་གནས་པའི་སེམས་ཅན་བསྟན་པ་ཡིན་ནོ། །གསུམ་པ་སའི་ཁྱད་པར་ལ། དངོས་དང་། གཞན་འདོད་གཉིས་ལས། དང་པོ་ནི། དགའ་བ་བསམ་གཏན་གཉིས་ན་ཡོད། །གཞན་ནི་དྲུག་ན། དགའ་བ་ནི་བསམ་གཏན་དང་པོ་དང་གཉིས་པ་གཉིས་ན་ཡོད་དེ། ཡིད་བདེ་ཡོད་པའི་ཕྱིར། ཚད་མེད་གཞན་གསུམ་ནི་བསམ་གཏན་བཞི་ཁྱད་ཅན་མི་ལྕོགས་མེད་དེ་ས་དྲུག་ན་ཡོད་དོ། །གཉིས་པ་ནི། ཁ་ཅིག་ལྔ། །ཁ་ཅིག་ནི་མི་ལྕོགས་མེད་པ་མ་གཏོགས་པ་ས་ལྔ་ན་ཡོད་པར་འདོད་དོ། །གཞན་ན་རེ། །འདོད་ཁམས་དང་ཉེར་བསྡོགས་བཞི་བསྣན་ནས་བཅུ་ན་ཡོད་ཟེར་ཏེ། འགའ་ཞིག་མཉམ་པར་བཞག་པ་དང་། ཁ་ཅིག་མཉམ་(༣༩༦བ)
པར་མ་བཞག་པ་དང་། དངོས་གཞི་དང་སྦྱོར་བ་སྨོས་སོ། །བཞི་པ་ནི། དེ་ཡིས་མི་སྤོང་། གནོད་སེམས་སོགས་ཀྱི་གཉེན་པོ་ཡིན་ན་ཉོན་མོངས་སྤོང་ངམ་ཞེ་ན། བྱམས་སོགས་དེ་ཡིས་མི་སྤོང་སྟེ། དེ་ནི་དངོས་གཞི་དག་པ་བ་ཡིན་པས་ཉོན་མོངས་མི་སྤོང་བའི་ཕྱིར། དེ་ཁོ་ན་ཉིད་ཡིད་བྱེད་ཀྱིས་སྤོང་གི། འདི་ནི་མོས་པ་ཡིད་ལ་བྱེད་པ་ཡིན་པའི་ཕྱིར་དང་། ཆོས་སྤྱིའི་མཚན་ཉིད་ཡིད་ལ་བྱེད་པས་སྤང་བ་གྲུབ་མཐའ་ཡིན་གྱི། འདིས་ནི་སེམས་ཅན་རང་མཚན་ལ་མི་དམིགས་པའི་ཕྱིར། དེ་དག་གི་སྦྱོར་བས་གནོད་སེམས་སོགས་རྣམ་པར་གནོན་པའི་ཕྱིར་དང་། འཇིག་རྟེན་པའམ་འཇིག་རྟེན་ལས་འདས་པའི་བར་ཆད་མེད་ལམ་དངོས་གཞིའི་ས་པ་རྣམས་ཀྱིས་གནོད་སེམས་སོགས་ཀྱི་ཉོན་མོངས་སྤངས་པ་དེ་དག་གིས་གྲོགས་བྱས་ནས་ཐག་སྲིང་བར་བྱེད་པའི་ཕྱིར་དེ་དག་གི་གཉེན་པོ་ཉིད་དུ་བཤད་དོ། །བྱམས་སོགས་གསུམ་པོ་འདོད་པའི་ཁམས་ཀྱི་ས་པ་དང་། མི་ལྕོགས་མེད་པའི་ས་པ་རྣམས་ནི། སྦྱོར་བ་དང་། དམིགས་པ་དང་། རྣམ་པ་ངོ་བོ་དངོས་གཞིའི་ཚད་མེད་པ་དང་འདྲ་བ་ཡོད་དེ། གསུམ་པོ་དེས་ཉོན་མོངས་པ་རྣམས་རྣམ་པར་བསྣན་ནས་བར་ཆད་མེད་ལམ་གྱིས་སྤོང་བར་བྱེད་དོ། །དེས་ན་འདོད་ཆགས་དང་བྲལ་བའི་གནས་སྐབས་ན་ནི་དངོས་གཞིའི་ཚད་མེད་པ་རྙེད་པ་ཡིན་ཏེ། གནོད་སེམས་སོགས་ཀྱི་རྐྱེན་སྟོབས་ལྡན་རྙེད་ཀྱང་དེ་དག་མངོན་དུ་གྱུར་པའི་སྒོ་ནས་མི་བརྫི་བ་ཡིན་ནོ། །དངོས་གཞི་ཐོབ་པ་ཙམ་ལས་བྱམས་སོགས་མ་བསྒོམས་ན་རྐྱེན་སྟོབས་དང་ལྡན་པ་བརྫི་བ་ཡིན་ནོ། །ལས་དང་པོ་པ་བྱམས་པ་ལ་སྦྱོར་བའི་ཚུལ་ནི། ཇི་ལྟར་རང་གི་བདེ་བ་ཉམས་ལ་ཡོད་པའམ། གཞན་སངས་རྒྱས་དང་བྱང་ཆུབ་སེམས་དཔའ་དང་། འཕགས་པ་དགྲ་བཅོམ་པ་ཐོབ་པ་དེ་བཞིན་དུ་ཀྱེ་མ་སེམས་ཅན་རྣམས་ནི་དེ་ལྟར་བདེ་བར་གྱུར་ཅིག་(༣༩༧ན)
ཅེས་སེམས་ཅན་རྣམས་ལ་བདེ་བར་མོས་པར་བྱེད་དོ། །གལ་ཏེ་ཉོན་མོངས་པའི་འཇུག་པ་ཤས་ཆེ་བས་སེམས་ཅན་ཐམས་ཅད་ལ་དེ་ལྟར་མོས་པར་མི་ནུས་ན། སེམས་ཅན་ལ་མཛའ་བོ་དང་། ཐ་མལ་པ་དང་། དགྲ་བོའི་ཕྱོགས་གསུམ་དུ་དབྱེ་ཞིང་། མཛའ་བོའང་ཆེ་འབྲིང་ཆུང་གསུམ་དུ་ཕྱེ་ལ། དང་པོར་བསྐྱེད་སླ་བ་མཛའ་བོ་ཆེ་འབྲིང་ཆུང་གསུམ་ལ་རིམ་གྱིས་མོས་པར་བྱེད་ལ། གལ་ཏེ་གསུམ་ཀ་ལ་བྱམས་པ་དང་མཉམ་པོར་ཐོབ་ན། དེ་ནས་ཐ་མལ་པ་དང་དགྲ་བོའི་ཕྱོགས་ལ་ཆུང་འབྲིང་ཆེ་གསུམ་དུ་ཕྱེ་ནས་རིམ་གྱིས་ཁྱབ་པར་བྱེད་ཅིང་། གལ་ཏེ་དགྲ་བོ་ཆེན་པོ་ལ་མཛའ་བོ་ཆེན་པོ་ལྟར་བར་དུ་མོས་པ་མི་ལྡོག་ན། རིམ་གྱིས་ཁྱིམ་དང་གྲོང་དང་ཡུལ་ཕྱོགས་གཅིག་གི་སེམས་ཅན་དང་། རིམ་གྱིས་ཕྱོགས་གཅིག་ནས་འཇིག་རྟེན་ཐམས་ཅད་ཀྱི་བར་དུ་བྱམས་པ་རྒྱས་པ་སྟེ་ཁྱབ་པར་བྱེད་པའོ། །དེ་ལ་མཛའ་བོ་ཆེ་བ་ནི། སྐྱེ་བ་དང་ཆོས་དང་ལུས་མཉམ་པ་སྟེ། གང་ཞིག་མེད་ན་གནས་པར་དཀའ་བའོ། །འབྲིང་ནི། ཟས་དང་ཆོས་དང་འབྲེལ་བའོ། །ཆུང་ངུ་ནི། ཕན་འདོགས་པ་དང་ཟས་དང་འབྲེལ་བའོ། །ཐ་མལ་པ་ཆུང་ངུ་ནི། སྔར་མཐོང་ཐོས་མིན་པ་དང་། འབྲིང་ནི། མཐོང་ཐོས་ཀྱང་མ་འདྲིས་པ་དང་། ཐ་མ་ནི། འདྲིས་ཀྱང་ཕན་གནོད་ཀྱི་བྱེད་པ་དང་བྲལ་བའོ། །དགྲ་བོ་ཆུང་ངུ་ནི། མཛའ་བཤེས་དང་འཁོར་གཡོག་གི་འཚོ་བ་འཕྲོག་པའོ། །འབྲིང་ནི། འཚོ་བའི་ཡོ་བྱད་འཕྲོག་པའོ། །ཆེན་པོ་ནི། གྲགས་པ་དང་། འཚོ་བ་དང་། ཡིད་ཕེབས་པ་དང་། རྩ་ལག་འཕྲོག་པར་བྱེད་པའོ། །དགེ་བའི་རྩ་བ་ཀུན་ཏུ་ཆད་པ་དང་། རང་སངས་རྒྱས་ལའང་བསོད་ནམས་དང་བསོད་ནམས་མ་ཡིན་པའི་འབྲས་བུ་གཟུགས་བཟང་བ་དང་། ངན་པར་སྣང་བའི་སྒོ་ནས་ཡོན་ཏན་དང་སྐྱོན་བཟུང་བར་ནུས་པ་ལས། གང་ཞིག་ཐམས་ཅད་དུ་ཡོན་ཏན་(༣༩༧བ)
འཛིན་པ་དེ་ནི་བྱམས་པ་མྱུར་དུ་སྐྱེད་པར་བྱེད་དོ། །སྙིང་རྗེ་དང་དགའ་བ་ལའང་དེ་བཞིན་དུ་སེམས་ཅན་སྡུག་བསྔལ་བ་མང་པོ་ཆུ་བོར་བྱིང་བ་འདི་དག་སྡུག་བསྔལ་ལས་མྱུར་དུ་ཐར་ཀྱང་ཅི་མ་རུང་། མངོན་པར་དགའ་བར་གྱུར་ཀྱང་ཅི་མ་རུང་སྙམ་དུ་མོས་ཤིང་དགའ་བ་ལ་སྦྱོར་བར་བྱེད་དོ། །བཏང་སྙོམས་ནི་ཐ་མལ་པའི་ཕྱོགས་ལས་རྩོམ་མོ། །ལྔ་པ་ནི། མི་དག་གི། །ནང་དུ་སྐྱེད་དོ། བཞི་པོ་འདི་སྒྲ་མི་སྙན་མ་གཏོགས་མི་དག་གི་ནང་དུ་བསྐྱེད་ཀྱི་གཞན་དུ་མིན་ཏེ། གོམས་པའི་སྟོབས་ཀྱིས་བསྐྱེད་པའི་ཕྱིར་རོ། །དྲུག་པ་ནི། ངེས་གསུམ་ལྡན། །ཚད་མེད་གཅིག་དང་ལྡན་པ་དེ་ཐམས་ཅད་དང་ལྡན་པའི་ངེས་པ་མེད་ཀྱི། ངེས་པར་གསུམ་གསུམ་དང་ལྡན་ལ་དགའ་བ་ནི་ཡིད་བདེ་ཡིན་པས་བསམ་གཏན་གསུམ་པ་དང་བཞི་པར་མི་ལྡན་ནོ། །འདིའང་ཐོབ་པ་ལ་བསམ་གྱི། མངོན་གྱུར་ནི་རེ་རེ་ལས་མི་ལྡན་ཏེ་རྣམ་པ་འགལ་བས་སོ། །གཉིས་པ་ཡོན་ཏན་གཞན་བསྟན་པ་ལ། ཐོབ་བྱ་ཡོན་ཏན་གྱི་ངོ་བོ། དེ་དག་གི་ཐོབ་ཚུལ། རྟེན་གྱི་ཁྱད་པར། ཏིང་ངེ་འཛིན་གྱི་སྐྱེ་ཚུལ་ལོ། །དང་པོ་ལ། རྣམ་ཐར། ཟིལ་གནོན། ཟད་པར་རོ། །དང་པོ་ལ། རྣམ་ཐར་གྱི་དབྱེ་བ། སོ་སོའི་རང་བཞིན། སྔ་མ་བདུན་གྱི་སྤྱོད་ཡུལ་ལོ། །དང་པོ་ནི། རྣམ་པར་ཐར་བརྒྱད། རྣམ་པར་ཐར་པ་བརྒྱད་ནི་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ལ་ལྟ་བའི་རྣམ་ཐར་དང་པོ་ཡིན་ནོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ལ་ལྟ་བ་ཞེས་བྱ་བ་ནི་གཉིས་པའོ། །སྡུག་པའི་རྣམ་པར་ཐར་པ་ལུས་ཀྱིས་མངོན་དུ་བྱས་ཏེ་རྫོགས་པར་བྱས་ནས་གནས་ཞེས་བྱ་བ་ནི་གསུམ་པའོ། །དེ་བཞིན་དུ་གཟུགས་མེད་པ་བཞི་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལས་འདས་ཏེ། འདུ་ཤེས་དང་ཚོར་བ་འགོག་པ་ལུས་ཀྱིས་མངོན་སུམ་དུ་བྱས་ཏེ་གནས་པ་འདི་ནི་རྣམ་པར་ཐར་པ་བརྒྱད་པའོ། །གཉིས་པ་ལ།(༣༩༨ན)
རྣམ་ཐར་དང་པོ་གཉིས་བཤད་པ། གསུམ་པ། གཟུགས་མེད་ཀྱི་རྣམ་ཐར། འགོག་པའི་རྣམ་ཐར་བཤད་པའོ། །དང་པོ་ལ། དངོས་དང་། སའི་ཁྱད་པར་རོ། །དང་པོ་ནི། དང་པོ་གཉིས། །མི་སྡུག །རྣམ་ཐར་དང་པོ་གཉིས་ནི་མི་སྡུག་པའི་རང་བཞིན་ཡིན་ཏེ། ཁ་དོག་ནི་འདོད་ཆགས་ལ་སོགས་པའི་གཉེན་པོ་རྣམ་པར་བསྔོས་པ་ལ་སོགས་པའི་རྣམ་པ་ཅན་ཡིན་པའི་ཕྱིར། མི་སྡུག་པ་ནི། མི་སྡུག་མ་ཆགས་ས་བཅུ་དང་། །དམིགས་པ་འདོད་སྣང་མི་སྐྱེ་དགེ། །ཞེས་གོང་དུ་བཤད་ཟིན་ཏོ། །གཉིས་པ་ནི། བསམ་གཏན་གཉིས་ན་ཡོད། །རྣམ་ཐར་དེ་གཉིས་བསམ་གཏན་དང་པོ་དང་གཉིས་པ་གཉིས་ན་ཡོད་ཀྱི། ས་གཞན་ན་མེད་དེ། འདོད་པའི་ཁ་དོག་གི་གཉེན་པོར་དང་པོའི་ས་པའི་རྣམ་ཐར་དང་། དང་པོའི་ཁ་དོག་གི་འདོད་ཆགས་ཀྱི་གཉེན་པོར་གཉིས་པ་རྣམ་ཐར་ཡིན་པས་མགོ་གནོན་པ་ཙམ་མོ། །རྟེན་འདོད་པ་ཡིན་ཀྱང་ས་བསམ་གཏན་དང་པོ་པ་ཡིན་ན་འདོད་པའི་གཟུགས་ལ་ཞེན་པ་མི་འོང་། རྟེན་དང་པོ་པ་ལྟ་བུ་ཡིན་ཀྱང་ས་གཉིས་པ་བས་དང་པོའི་གཟུགས་ལ་ཆགས་པ་མི་འོང་བས་ཐག་སྲིང་བའི་གཉེན་པོ་ལས་དངོས་སུ་སྤང་བ་མ་ཡིན་པའི་ཕྱིར། བསམ་གཏན་གཉིས་པ་སོགས་ན་ཁ་དོག་གི་འདོད་ཆགས་མེད་དེ། མིག་གི་རྣམ་ཤེས་མེད་པའི་ཕྱིར། གཉིས་པ་སོགས་ན་མིག་གི་རྣམ་ཤེས་སོགས་མེད་པས་ཁ་དོག་གི་འདོད་ཆགས་དང་བྲལ་བར་གྲུབ་སྟེ། གང་ཡུལ་ལས་འདོད་ཆགས་དང་བྲལ་བ་དེ་ནི་ངེས་པར་དེ་འཛིན་གྱི་འདོད་ཆགས་ལས་ཀྱང་བྲལ་བའི་ཕྱིར། དེ་ལ་ནང་གཟུགས་དང་གཟུགས་མེད་པར་འདུ་ཤེས་པ་ཞེས་བྱ་བ་ནི་གཟུགས་ལ་འདོད་ཆགས་དང་མ་བྲལ་བའམ། འདིར་རང་ཉིད་ལ་གཟུགས་ཀྱི་འདུ་ཤེས་མ་བཤིག་པ་དང་། བཤིག་ནས་ཕྱི་རོལ་གྱི་གཟུགས་ལ་བལྟ་བ་ཡིན་པར་བཤད་པའམ། ཡང་ན་(༣༩༨བ)
ཀུན་ལས་བཏུས་ཀྱི་འགྲེལ་པར། གཟུགས་མེད་པའི་སྙོམས་འཇུག་ལ་བརྟེན་ནས་ལྟ་བ་པོ་རང་ཉིད་ལ་གཟུགས་སུ་འདུ་ཤེས་མངོན་དུ་བྱེད་པ་དང་། གཟུགས་ཀྱི་འདུ་ཤེས་སྤངས་ནས་མིང་བཞིའི་འདུ་ཤེས་མངོན་དུ་བྱེད་པ་ལ་རིམ་བཞིན་བཤད་དོ། །གཉིས་པ་ནི། གསུམ་པ་མཐའ་ན་དེ་མ་ཆགས། །གསུམ་པ་སྡུག་པའི་རྣམ་ཐར་ནི། བསམ་གཏན་གྱི་ཡ་མཐའ་བཞི་པ་ན་ཡོད་ཅིང་། དེའང་ངོ་བོ་ཆགས་པའི་གཉེན་པོ་ཡིན་པས་གཙོ་བོ་མ་ཆགས་པ་ཡིན་གྱི། སྡུག་པའི་རྣམ་པ་ཅན་ཡིན་ལ་མི་སྡུག་པའི་རྣམ་པ་ཅན་མ་ཡིན་ནོ། །དེས་ན་གཟུགས་ཡིད་འོང་སྤྲུལ་ནས་སྡུག་པར་བལྟ་ཞིང་། དེ་ཉིད་ཏིང་ངེ་འཛིན་གྱི་ལུས་ཀྱིས་མངོན་དུ་བྱེད་པས་མིང་དེ་སྐད་ཅེས་བྱའོ། །དེ་དག་འཁོར་བཅས་ནི་རྗེས་འབྲངས་ཕུང་པོ་ལྔ་པ་ཅན་ནོ། །དགོས་པ་ནི་མི་སྡུག་པ་བསྒོམས་པས་ཡིད་ཞུམ་པ་རབ་ཏུ་དགའ་བས་གཟེངས་བསྟོད་པ་དང་། སྡུག་པ་སྤྲུལ་ལ་ཆགས་པ་སྐྱེ་ན་རྣམ་ཐར་དང་པོ་གཉིས་མ་གྲུབ་པ་ཡིན་ལ། མི་སྐྱེ་ན་གྲུབ་པ་ཡིན་པས་དེ་བརྟག་པ་ཡིན་པའི་ཕྱིར། བསམ་གཏན་དང་པོ་གསུམ་དུ་སྡུག་པའི་རྣམ་ཐར་མི་སྟོན་པ་ནི་ས་དེ་དག་ན་དགའ་བ་དང་བདེ་བ་ཡོད་པས་སྡུག་པར་ཡིད་ལ་བྱས་ན་ཡུལ་དེ་ལ་དགའ་བ་དང་། སྲེད་ན་མ་ཆགས་པར་མི་འགྲུབ་པའི་ཕྱིར་རམ། སྐྱོན་དང་བཅས་པའི་བསམ་གཏན་ཡིན་པས་དེ་མི་འགྲུབ་པའི་ཕྱིར། གསུམ་པ་ནི། གཟུགས་མེད་མཉམ་གཞག་དགེ་རྣམས་སོ། །གཟུགས་མེད་པའི་མཉམ་གཞག་དགེ་བ་དག་པ་བ་དང་ཟག་མེད་ཁོ་ན་རྣམ་ཐར་ཡིན་གྱི། ཉོན་མོངས་ཅན་དང་མཉམ་པར་མ་བཞག་པ་འཆི་བའི་སྲིད་པའི་སེམས་ལྟ་བུའང་མ་ཡིན་ནོ། །ཁ་ཅིག །གཟུགས་མེད་དེ་དག་ན་རྣམ་སྨིན་སྐྱེས་ཀྱི་སེམས་དང་སེམས་བྱུང་རྣམས་ལ་བསམས་ནས་འཆི་བའི་སེམས་ལས་གཞན་པའི་སེམས་ལས་མཉམ་པར་མ་བཞག་པའི་སེམས་ཀྱང་ཡོད་པར་འདོད་དོ། །ཕྱོགས་སྔ་མ་ལྟར་ན་ནི། གཟུགས་མེད་མཉམ་(༣༩༩ན)
པར་མ་བཞག་པ་ནི་འཆི་བའི་སྲིད་པའི་སེམས་སེམས་བྱུང་ཁོ་ན་ཡིན་པར་འདོད་དོ། །གཟུགས་མེད་ཀྱི་དངོས་གཞིར་མ་ཟད་ཉེར་བསྡོགས་ཀྱི་རྣམ་གྲོལ་ལམ་གྱི་རྣམ་ཐར་གྱི་མིང་ཐོབ་སྟེ་གོང་ས་ལ་དམིགས་པའི་ཕྱིར། བར་ཆད་མེད་ལམ་གྱིས་ནི་རྣམ་ཐར་གྱི་མིང་མི་ཐོབ་སྟེ། རྣམ་ཐར་ནི་འོག་ས་ལས་རྒྱབ་ཀྱིས་ཕྱོགས་པ་ཡིན་ན་དེ་ནི་ས་འོག་མ་ལ་དམིགས་པའི་ཕྱིར། བཞི་པ་འགོག་པའི་རྣམ་ཐར་བཤད་པ་ལ། ངོ་བོ་ངོས་གཟུང་། འཇུག་སེམས་དང་། ལྡང་སེམས་སོ། །དང་པོ་ནི། འགོག་པའི་སྙོམས་པར་འཇུག་པའོ། །རྣམ་ཐར་བརྒྱད་པ་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པའོ་སྟེ་གནས་གཉིས་པར་བཤད་ཟིན་ལ། དང་པོ་གཉིས་དང་། གསུམ་པ་དང་། བཞི་པ་དང་། གཟུགས་མེད་རྣམས་དང་འགོག་པ་ནི་གོ་རིམ་བཞིན་དུ་ཁ་དོག་གི་འདོད་ཆགས་དང་ཞུམ་ཞིང་ཆགས་པ་དང་། གཟུགས་ཀྱི་འདུ་ཤེས་དང་། ཚོར་བའམ། འདུ་བྱེད་ཐམས་ཅད་ལ་རྒྱབ་ཀྱིས་ཕྱོགས་པས་རྣམ་པར་ཐར་པའོ། །གཞན་ན་རེ། སྙོམས་འཇུག་གི་སྒྲིབ་པ་གང་ཡོད་ན་སེམས་ལས་སུ་མི་རུང་བས་ཁམས་གསུམ་པའི་ཆགས་བྲལ་གྱིས་ཀྱང་བསམ་གཏན་དང་པོའི་དངོས་གཞི་ཡང་སྐྱེད་པར་མི་བྱེད་པའི་སྒྲིབ་པ་ལས་རྣམ་པར་ཐར་པས་རྣམ་པར་ཐར་པ་ཞེས་སོ་ཟེར་རོ། །གཉིས་པ་ནི། ཕྲ་བ་ཕྲ་བའི་མཇུག་ཐོགས་སུ། །འགོག་སྙོམས་ལ་འཇུག་པ་ལ་ནི་ཁམས་གསུམ་ན་སྲིད་རྩེའི་འདུ་ཤེས་ནི་ཕྲ་བ་ཡིན་ལ། འགོག་པ་ལ་དམིགས་ན་དེ་བས་ཀྱང་ཆེས་ཕྲ་བར་བྱས་པའི་མཇུག་ཐོགས་སུ་སྙོམས་པར་འཇུག་གོ། །གསུམ་པ་ནི། རང་གི་དག་དང་འོག་མ་ཡི། །འཕགས་པའི་སེམས་ཀྱིས་དེ་ལས་ལྡང་། །ལྡང་བ་ན་ནི་འཕེན་པ་ཇི་ལྟ་བ་བཞིན་སྲིད་རྩེ་རང་གི་ས་པའི་དག་པ་བ་འོག་མ་ཅིའང་མེད་པའི་སྐྱེ་མཆེད་ཀྱི་ས་པའི་འཕགས་པ་ཟག་པ་མེད་པའི་སེམས་ཀྱིས་འགོག་པ་དེ་ལས་ལྡང་བར་འགྱུར་ཏེ། དེ་ལྟར་ན། འགོག་པའི་སྙོམས་འཇུག་དང་དེ་ལ་སྙོམས་པར་འཇུག་སེམས་ནི་སྲིད་རྩེ་བ་ཡིན་པས་ཟག་བཅས་ཁོ་ན་ཡིན་ལ། (༣༩༩བ)
ལྡང་སེམས་ནི་ཟག་བཅས་ཟག་མེད་གཉིས་ཀ་ཡིན་ནོ། །(འགོག་པའི་སྙོམས་འཇུག་འདོད་པར་སྙོམས་པར་ཞུགས་ན་འདོད་པ་བ་ནི་ཁམ་ཟས་ཀྱི་འདོད་ཆགས་དང་མ་བྲལ་བས་ཁམ་གྱི་ཟས་འཚོལ་བ་ནི་ཁམ་གྱི་ཟས་དང་བྲལ་ན་ཞག་བདུན་ལས་མི་ཐུབ་ཙན་ཞག་བདུན་གྱིས་མི་འདོ་བར་སྐལ་པ་ལ་སོགས་པར་ཁམ་ཟས་མ་གསོལ་བས་ནམ་བཞེངས་པའི་དུས་སུ་འགྲངས་པ་ཡིན། དགེ་སློང་གཅིག་ད་ལྟར་བདག་འགོག་པ་ལ་ཞུགས་ལ། ནངས་པར་གཎྜི་མ་བརྡུང་གི་བར་འགོག་པ་ལ་སྙོམས་པར་འཇུག་གོ་ཞེས་ཞུས་པས། གནས་དེར་མེ་ཤོར་ནས་ཆོས་སྟོན་གྱིས་གཎྜི་མ་བརྡུངས་པས། དེ་ལྟར་འགོག་པ་མ་ལངས། དེ་ནས་ཞག་བཅོ་ལྔ་ལོན་པ་ན་གཎྜི་བརྡུངས་པས་འགོག་པ་ལས་ལངས་ཐོག་ཏུ་གུམ་སྟེ། འདོད་པ་ནི་ཁམ་གྱི་ཟས་དང་བྲལ་ན་ཞག་བདུན་ལས་མི་ཐུབ་ཅེ་ན། བདུན་གྱི་ཡང་མི་འདོ་བར་ཞག་བཅོ་ལྔ་ལས་ལངས་མ་ཐག་ཏུ་གུམ་མོ། །དེ་ལྟར་ན་ཕྱིས་ལངས་ནས་བྱམས་པ་ལ་ཆོས་ཞུ་བ་འགོག་རྫུན་ནོ་ཞེས་ཁ་གཅིག་ཟེར་རོ། །འགོག་སྙོམས་ལ་ཞུགས་པའི་ལུས་ནི་འབྱུང་བས་ཀྱང་འཇིག་མི་ནུས་སོ། །མཆན།) གསུམ་པ་སྔ་མ་བདུན་གྱི་སྤྱོད་ཡུལ་ལ། དང་པོ་གསུམ་གྱི་དང་། གཟུགས་མེད་བཞིའི་སྤྱོད་ཡུལ་ལོ། །དང་པོ་ནི། དང་པོ་འདོད་གཏོགས་སྣང་ཡུལ་ཅན། །རྣམ་ཐར་འདི་དག་ལས་དང་པོ་གསུམ་ལས་སྔ་མ་གཉིས་ནི་འདོད་པར་གཏོགས་པའི་སྣང་བ་གཟུགས་ཀྱི་སྐྱེ་མཆེད་ཡིད་དུ་མི་འོང་བ་དང་། གསུམ་པ་ནི་ཡིད་དུ་འོང་བའི་ཡུལ་ཅན་ཡིན་ནོ། །གལ་ཏེ་འདི་དག་ཏིང་ངེ་འཛིན་ལ་བརྟེན་ནས་སྤྲུལ་པ་མ་ཡིན་ནམ་ཞེ་ན། ཡིན་མོད་ཀྱི། འདོད་པར་གཏོགས་པ་སྤྲུལ་པ་ཡིན་ནོ། །གཉིས་པ་ནི། གང་དག་གཟུགས་ཅན་མིན་དེ་དག །སྤྱོད་ཡུལ་གོང་དང་རང་གི་སའི། །སྡུག་བསྔལ་སོགས་དང་རྗེས་ཤེས་ཕྱོགས། །གང་དག་གཟུགས་ཅན་མིན་པའི་རྣམ་ཐར་བཞི་པོ་དེ་དག་གི་སྤྱོད་ཡུལ་དམིགས་པ་ནི། རང་གི་ས་དང་གོང་མའི་སྡུག་བསྔལ་དང་སོགས་པས་ཀུན་འབྱུང་དང་། རྗེས་ཤེས་ཕྱོགས་མཐུན་གྱི་ལམ་ས་གོང་འོག་རང་ས་པ་ཐམས་ཅད་ཡིན་ནོ། །གཟུགས་མེད་ཀྱི་རྣམ་ཐར་དེ་མཚན་མ་མེད་པ་མཚན་མ་མེད་པའི་ཏིངངེ་འཛིན་ཡིན་སྲིད་པས་བརྟགས་མིན་(༤༠༠ན)
གྱི་འགོག་པའང་ཡིན་ནོ། །འདུས་མ་བྱས་ནམ་མཁའ་ཡང་ནམ་མཁའ་མཐའ་ཡས་སྐྱེ་མཆེད་ཀྱི་ཡུལ་ཡིན་ནོ། །བསམ་གཏན་གསུམ་པ་ལ་རྣམ་ཐར་མ་བཞག་པ་ནི། བསམ་གཏན་གཉིས་པའི་ས་པའི་ཁ་དོག་གི་འདོད་ཆགས་མེད་པའི་ཕྱིར་དང་། བདེ་བ་མཆོག་ཏུ་གྱུར་པའི་སྙིང་པོས་བསྐྱོད་པས་གཡོ་བའི་ཕྱིར། དེ་ལྟར་ན་བསམ་གཏན་གསུམ་པའང་ཁ་དོག་གི་འདོད་ཆགས་མེད་པས་བསམ་གཏན་བཞི་པར་སྡུག་པའི་རྣམ་ཐར་ཅིའི་ཕྱིར་མི་བསྐྱེད་ཅེ་ན། མི་སྡུག་པས་རྒྱུད་ཞུམ་པ་རབ་ཏུ་དགའ་བར་བྱ་བའམ། ཅི་མི་སྡུག་པའི་རྣམ་པར་ཐར་པ་དག་གྲུབ་པ་ཡིན་ནམ་མ་ཡིན་ཅེས་བརྟགས་པའི་ཆེད་དེ། གལ་ཏེ་སྡུག་པ་ཡིད་ལ་བྱས་ཀྱང་ཉོན་མོངས་པ་མི་སྐྱེ་ན་དེ་ལྟར་ན་རྣམ་ཐར་དེ་གཉིས་གྲུབ་པ་ཡིན་ནོ། །རྣལ་འབྱོར་པ་རྣམས་ཀྱི་རྒྱུ་གཉིས་ཀྱི་རྣམ་ཐར་དང་སོགས་པས་ཟིལ་གནོན་གྱི་སྐྱེ་མཆེད་བསྐྱེད་དེ། ཉོན་མོངས་མེད་སོགས་ཡོན་ཏན་སྒྲུབ་པའི་ཆེད་དུ་སྟེ། དེས་ཉོན་མོངས་པ་དེ་ཐག་སྲིད་བར་བྱེད་པའི་ཕྱིར་དང་། འཕགས་པའི་མངོན་པར་ཤེས་པའི་རྫུ་འཕྲུལ་སྒྲུབ་པའི་ཆེད་དུ་སྟེ། དེས་སྙོམས་པར་འཇུག་པ་ལ་དབང་བར་བྱ་བའི་ཕྱིར་རོ། །འཕགས་པའི་རྫུ་འཕྲུལ་ནི་ས་སོགས་གསེར་དུ་བསྒྱུར་བ་དང་། དུས་ཡུན་རིང་པོར་གནས་པར་བྱིན་གྱིས་རློབས་པ་དང་། སྐུ་ཚེ་བཏང་འཇོག་དང་རི་རབ་རྡུལ་ཕྲན་དུ་འཇུག་པར་བྱེད་པ་ལ་སོགས་པའོ། །ཅིའི་ཕྱིར་རྣམ་ཐར་གསུམ་པ་དང་བརྒྱད་པ་ཁོ་ན་ལ་ལུས་ཀྱིས་མངོན་སུམ་བྱས་ཏེ་རྫོགས་པར་བྱས་ནས་གནས་ཞེས་བཤད་ལ། གཞན་ལ་མ་ཡིན་པ་ཅི་ཞེ་ན། གོ་རིམ་བཞིན་དུ་རྣམ་ཐར་དང་པོ་གཉིས་དང་། གཟུགས་མེད་དང་པོ་གསུམ་པོས་གཟུགས་ཅན་དང་གཟུགས་མེད་ཀྱི་རྣམ་ཐར་སྒྲིབ་པ་མཐའ་དག་སྤངས་པས་གཙོ་བོ་ཡིན་པའི་ཕྱིར་དང་། (༤༠༠བ)
གཟུགས་དང་གཟུགས་མེད་པའི་ཁམས་དང་སའི་མཐའ་ན་གནས་པའི་ཕྱིར་ཞེས་ཟེར་རོ། །འོན་ཀྱང་དེ་གཉིས་རིམ་པ་ལྟར་གཟུགས་དང་གཟུགས་མེད་ཀྱི་ས་པའི་རྣམ་ཐར་རྫོགས་པར་མངོན་དུ་བྱས་པ་ཡིན་པས་དེ་སྐད་དུ་བསྟན་ཏོ། །ཞེས་ཀྱང་སྨྲ་ལ། ཡང་ན་འཕགས་པ་རྣམས་དེ་གཉིས་ལ་ལན་མང་དུ་གནས་པས་ན་དེ་སྐད་ཅེས་གསུངས་སོ། །ཞེས་ཀུན་ལས་བཏུས་པའི་འགྲེལ་པར་བཤད་དོ། །གཉིས་པ་ཟིལ་གནོན་ལ། དབྱེ་བ་དང་། མཚན་ཉིད་བཤད་པའོ། །དང་པོ་ནི། ཟིལ་གྱིས་གནོན་པའི་སྐྱེ་མཆེད་བརྒྱད། །བརྒྱད་ལས་འཕྲོས་པའི་མདོ་ལས། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་དང་ཁ་དོག་ངན་པ་རྣམས་ལ་བལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟ་བུར་འདུ་ཤེས་པར་གྱུར་པ་འདི་ནི་ཟིལ་གྱིས་གནོན་པའི་སྐྱེ་མཆེད་དང་པོའོ། །དེ་བཞིན་དུ་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཁ་དོག་བཟང་པོ་དང་ཁ་དོག་ངན་པ་རྣམས་ལ་བལྟ་ཞིང་ཞེས་བྱ་བ་ནས་རྒྱས་པ་འདི་ནི་ཟིལ་གྱིས་ནོན་པའི་སྐྱེ་མཆེད་གཉིས་པའོ། །ཞེས་བྱ་བའི་བར་དང་། དེ་བཞིན་དུ་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་བ་དང་ཆེ་བ་ལ་བལྟ་བ་གཉིས་ཏེ་བཞི་དང་། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ། དཔེར་ན། ཟར་མའི་མེ་ཏོག་གམ། ཡུལ་ཝཱ་ར་ཎ་སིའི་རས་ཕུན་སུམ་ཚོགས་པ་སྔོན་པོ། ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་བྱུང་བ་རྣམས་ལ་བལྟ་ཞིང་གཟུགས་དེ་དག་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་སྟེ། དེ་ལྟ་བུར་འདུ་ཤེས་པར་འདི་ནི་ཟིལ་གྱིས་གནོན་པའི་སྐྱེ་མཆེད་ལྔ་པའོ། །ཞེས་དང་། དེ་བཞིན་སེར་དམར་དཀར་པོ་ལ་དེ་ལྟར་ལྟ་བ་བཞི་སྟེ་ཟིལ་གྱིས་(༤༠༡ན)
གནོན་པའི་སྐྱེ་མཆེད་བརྒྱད་གསུངས་པའི་ནང་གཟུགས་སུ་འདུ་ཤེས་པ་དང་། དེ་མེད་པར་འདུ་ཤེས་པ་ནི་རྣམ་ཐར་གྱི་དང་མཚུངས་ལ། ཆུང་ངུ་དང་ཆེན་པོ་ནི་སེམས་ཅན་དང་སྣོད་ཀྱི་གཟུགས་སམ། ཁ་དོག་བཟང་ངན་ནི་ཡིད་དུ་འོང་མི་འོང་ངམ། ཡང་ན་ལྷ་དང་མིའི་གཟུགས་སོ། །ཟིལ་གྱིས་མནན་ནས་ཞེས་བྱ་བ་ནི་དབང་དུ་བསྒྱུར་ནས་སོ། །ཤེས་པ་ནི་ཞི་གནས་དང་ལྷག་མཐོང་ཡིན་ནོ་ཞེས་འཕགས་པ་ཐོགས་མེད་ཀྱིས་བཤད་ལ། ཁ་དོག་བཞིའི་དཔེ་དོན་གཉིས་ཀའི་སྐབས་སུ་རེ་རེ་ཞིང་སྔོན་པོ་ལ་སོགས་པ་ཚིག་བཞི་བཞི་སྨོས་པ་ནི་གོ་རིམ་བཞིན་དུ་མདོར་བསྟན་པ་དང་། ལྷན་སྐྱེས་དང་། བཅོས་མ་དང་། ལྷན་སྐྱེས་དང་བཅོས་མ་གཉིས་ཀའི་ཐུན་མོང་གི་ཁ་དོག་ཡིན་ལ། ཟར་མ་དང་དོང་ཀ་དང་། བན་དུ་ཛི་ཀའི་མེ་ཏོག་དང་། སྐར་མ་པ་སངས་དང་། རས་ནི་རིམ་པ་ལྟར་ལྷན་སྐྱེས་དང་བཅོས་མའི་དཔེའོ། །དེ་ལྟ་བུར་འདུ་ཤེས་པར་གྱུར་པ་ནི་ཟིལ་གྱིས་ནོན་ནམ་མ་ནོན་ཀྱང་རུང་སྟེ། དེ་ལ་མངོན་པའི་ང་རྒྱལ་གྱི་འདུ་ཤེས་མེད་པའོ། །སློབ་དཔོན་གང་སྤེལ་ནི། ཤེས་པ་ནི་དང་པོ་ཤེས་པ་ཙམ་སྟེ་བར་ཆད་མེད་པའི་ལམ་མོ། །མཐོང་བ་ནི་དེའི་རྒྱུ་མཚན་རྣལ་འབྱོར་རྫོགས་པ་སྟེ་རྣམ་གྲོལ་གྱི་ལམ་མོ་ཞེས་འཆད་དོ། །དེ་དག་ཀྱང་དང་པོ་བཞི་ནི་ཁ་དོག་དང་དབྱིབས་གཉིས་ཀ་ལ་ཆགས་སྡང་སྐྱེ་བའི་གཉེན་པོ་དང་། ལྷག་མ་བཞི་ནི་གཞན་གྱི་ཁ་དོག་ལ་ཆགས་པ་དང་ཡིད་རྣམ་པར་ཞུམ་པའི་གཉེན་པོ་ཡིན་ནོ། །གཉིས་པ་ལ། གཟུགས་ཅན་གཟུགས་ལ་ལྟ་བའི་ཟིལ་གནོན་གཉིས་པ་བཤད་པ། གཟུགས་མེད་གཟུགས་ལ་ལྟ་བའི་ཟིལ་གནོན་གཉིས་བཤད་པ། ཁ་དོག་གི་ཟིལ་གནོན་བཞི་བཤད་པའོ། །དང་པོ་ནི། གཉིས་ནི་རྣམ་ཐར་དང་པོ་བཞིན། །དེ་དག་ལས་ཟིལ་གྱིས་ནོན་པའི་སྐྱེ་མཆེད་དང་པོ་དང་གཉིས་པ་གཉིས་ནི་རང་བཞིན་དང་ས་དང་རྣམ་པའི་བྱེ་བྲག་གི་རྣམ་པར་ཐར་(༤༠༡བ)
པ་དང་པོ་བཞིན་ནོ། །གཉིས་པ་ནི། གཉིས་ནི་གཉིས་པ་བཞིན། ཟིལ་གྱིས་གནོན་པའི་སྐྱེ་མཆེད་གསུམ་པ་དང་བཞི་པ་གཉིས་ནི་རྣམ་པར་ཐར་པ་གཉིས་པ་བཞིན་དུ་བལྟ་བ་ཡིན་ནོ། །གསུམ་པ་ནི། དེ་གཞན། །སྡུག་པའི་རྣམ་པར་ཐར་པ་བཞིན། །གཞན་ཁ་དོག་གི་ཟིལ་གནོན་བཞི་ནི་སྡུག་པའི་རྣམ་པར་ཐར་པ་བསམ་གཏན་བཞིའི་ས་དང་། གཟུགས་ཁམས་ཀྱི་གཟུགས་ཀྱི་སྐྱེ་མཆེད་ཡིད་འོང་ལ་དམིགས་པ་དང་། ངོ་བོ་མ་ཆགས་པ་ཡིན་པ་དང་། ཕུང་པོ་ལྔ་པ་ཡིན་པ་བཞིན་ཁོང་དུ་ཆུད་པར་བྱའོ། །རྣམ་ཐར་དང་ཟིལ་གནོན་གྱི་ཁྱད་པར་ནི་རྣམ་ཐར་གྱིས་ནི་དམིགས་པ་ལ་རྒྱབ་ཀྱིས་ཕྱོགས་པ་ཙམ་དུ་ཟད་ཀྱི་ཟིལ་གྱིས་མི་གནོན་ལ། ཟིལ་གནོན་གྱི་ནི་ཇི་ལྟར་འདོད་པ་བཞིན་དུ་སྐད་ཅིག་ལ་སྔོན་པོ་ལ་སོགས་པའམ། རྣམ་པར་བསྔོས་པ་ལ་སོགས་པ་ཡིད་དུ་མི་འོང་པར་མོས་པའི་ཕྱིར་དང་། ཀུན་ནས་ཉོན་མོངས་པའི་དངོས་པོ་ལ་སྡུག་པར་དམིགས་ཀྱང་ཉོན་མོངས་པ་མི་སྐྱེ་བར་དམིགས་པ་ཟིལ་གྱིས་གནོན་པའི་ཕྱིར། གཟུགས་མེད་ལ་ཟིལ་གནོན་མ་བཤད་པ་ནི་གཟུགས་ཟིལ་གྱིས་ནོན་ན་དེ་ཡང་ནོན་པའི་ཕྱིར་མ་བཤད་དོ། །འཕགས་པ་རྣམས་ནི་གཟུགས་ཀྱི་དེ་བཞིན་ཉིད་དང་མཚན་མ་ཡིད་ལ་བྱེད་པས་ཟིལ་གྱིས་གནོན་པར་བྱེད་ལ། བྱིས་པ་རྣམས་ནི་སྡུག་པ་དང་མི་སྡུག་པ་ཕན་ཚུན་བལྟོས་པ་དང་ཕན་ཚུན་གཅིག་ལ་གཅིག་རྗེས་སུ་འབྲེལ་བ་དང་། དེས་ན་གཟུགས་ཐམས་ཅད་ཕན་ཚུན་བསྲེས་ཏེ་སྡུག་པར་རོ་གཅིག་པའི་འདུ་ཤེས་ཀྱིས་མོས་པར་བྱས་ནས་ཟིལ་གྱིས་གནོན་པར་བྱེད་དོ་ཞེས་འཕགས་པ་ཐོགས་མེད་འཆད་ལ། ཡང་ཁ་ཅིག་ནི། བཟང་ངན་ལ་ཆགས་སྡང་མེད་པར་དམིགས་པ་ཟིལ་གྱིས་ནོན་པར་བྱེད་དོ་ཞེས་ཟེར་ལ། ཁ་ཅིག་ན་རེ། དེ་ལྟར་ན་ཟིལ་གྱིས་ནོན་པའི་སྐྱེ་མཆེད་འདི་དག་ཞེ་སྡང་མེད་པའི་རང་བཞིན་དུའང་འགྱུར་ན་མ་ཆགས་པའི་རང་བཞིན་ཅན་དུ་བཤད་པའི་ཕྱིར། བཟང་ངན་གཉིས་ཀ་(༤༠༢ན)
ཟིལ་གྱིས་མནན་ནས་མི་སྡུག་པར་རོ་གཅིག་ཏུ་མཐོང་བ་ཡིན་ཅེས་སྔོན་གྱི་སློབ་དཔོན་རྣམས་ཀྱི་ལུགས་སྟོན་པར་བྱེད་དོ། །གསུམ་པ་ཟད་པར་བཤད་པ་ལ། དབྱེ་བ་དང་། སོ་སོའི་རང་བཞིན་ནོ། །དང་པོ་ནི། ཟད་པར་བཅུའོ། ཡང་བཅུ་ལས་འཕྲོས་པའི་མདོ་ལས། ཟད་པར་ས་དང་ཆུ་དང་མེ་དང་རླུང་དང་སྔོན་པོ་དང་སེར་པོ་དང་དམར་པོ་དང་དཀར་པོ་དང་ནམ་མཁའ་དང་རྣམ་པར་ཤེས་པ་སྟེ་བར་ཆད་མེད་པར་ཟད་པར་ས་ལ་སོགས་པ་རྒྱས་པར་ཁྱབ་པར་བྱེད་པའི་ཟད་པར་གྱི་སྐྱེ་མཆེད་བཅུའོ། །གཉིས་པ་ལ། སྔ་མ་བརྒྱད་བཤད་པ་དང་། ཕྱི་མ་གཉིས་བཤད་པའོ། །དང་པོ་ནི། བརྒྱད་མ་ཆགས། །བསམ་གཏན་མཐའ་ན་སྤྱོད་ཡུལ་ནི། །འདོད་པ། དང་པོ་བརྒྱད་ནི་མ་ཆགས་པའི་རང་བཞིན་ཡིན་ལ། ས་བསམ་གཏན་གྱི་མཐའ་བཞི་པ་ཁོ་ནར་ཡོད་དོ། །དམིགས་པ་སྤྱོད་ཡུལ་ནི་འདོད་པའི་གཟུགས་ཀྱི་སྐྱེ་མཆེད་དེ་འཇིག་རྟེན་ཐ་སྙད་དང་མཐུན་པར་ཁ་དོག་དང་དབྱིབས་སུ་འདོད་པའི་ཕྱིར། དེ་སྐད་དུ། འཇིག་རྟེན་གྱི་ནི་ཐ་སྙད་དུ། ཁ་དོག་དབྱིབས་ལ་ས་ཞེས་བརྗོད། །ཆུ་མེ་ཡང་ངོ་རླུང་ཚོགས་ཁམས། །ཉིད་ཡིན་དེ་དང་འདྲ་བའང་ཡིན། །ཅེས་སོ། །ཁ་ཅིག་ཟད་པར་རླུང་གི་དམིགས་པ་ནི་རེག་བྱའི་སྐྱེ་མཆེད་དོ་ཞེས་ཟེར་རོ། །གཉིས་པ་ནི། གཉིས་ནི་གཟུགས་མེད་དག །སྤྱོད་ཡུལ་རང་གི་ཕུང་པོ་བཞི། །ཟད་པར་ནི་སྐྱེ་མཆེད་ཐ་མ་གཉིས་ནི་གཟུགས་མེད་དག་པའི་རང་བཞིན་ནོ། །འདི་གཉིས་ཀྱི་སྤྱོད་ཡུལ་ནི་རང་གི་ས་པའི་ཕུང་པོ་བཞིའོ། །སྐྱེ་མཆེད་གཞན་ལ་ཟད་པར་མི་འཇོག་པ་ནི་མིག་སོགས་བདུན་གྱིས་སྣོད་ལ་མ་ཁྱབ་ཅིང་དྲི་རོས་གཟུགས་ཁམས་སུ་མ་ཁྱབ་ལ། སྒྲ་ལ་རྒྱུན་མེད་པས་ཟད་པར་མ་བཞག་ཅེས་ས་ལས་འབྱུང་ངོ། །ཅིའང་མེད་པ་དང་སྲིད་རྩེ་གཉིས་ཟད་པར་དུ་མ་བཞག་པ་ནི། བསྡུ་བ་ལས། ནམ་མཁའ་དང་རྣམ་ཤེས་མཐའ་ཡས་ཀྱི་ཟད་པར་མཐའ་ཡས་ཤིང་ཚད་མེད་པར་གྲུབ་པ་དེ་དག་ལས་བོགས་དབྱུང་དུ་མེད་པའི་ཕྱིར་རོ། །ཞེས་ཟེར་རོ། །(༤༠༢བ)
རྣམ་ཐར་ལ་སོགས་པ་གསུམ་གྱི་ཁྱད་པར་ནི་ཡོན་ཏན་རྣམས་རིམ་གྱིས་འཛེགས་པས་རྣམ་ཐར་གྱི་དམིགས་པ་ལས་རྒྱབ་ཀྱིས་ཕྱོགས། དེ་ནས་ཟིལ་གྱིས་གནོན། དེ་ནས་ཁྱབ་པར་བྱེད་པས་སྔ་མ་སྔ་མ་རྫོགས་ཤིང་དག་པ་ལས་ཕྱི་མ་ཕྱི་མ་འབྱུང་བས་གོང་ནས་གོང་དུ་ཁྱད་པར་དུ་འཕགས་པའི་ཕྱིར་ཆུང་ངུ་དང་འབྲིང་དང་ཆེན་པོ་དང་རྒྱུ་དང་རྒྱུ་འབྲས་གཉིས་ཀ་དང་འབྲས་བུ་ཁོ་ནའོ། །དེ་དག་འགོག་པའི་རྣམ་ཐར་ལས་གཞན་རྣམས་སྐྱེ་བོ་དང་ཐུན་མོང་མིན་ལ། ཐམས་ཅད་ཀྱང་ཐག་སྲིང་བའི་གཉེན་པོ་ཡིན་ནོ། །གཉིས་པ་ཐོབ་ཚུལ་ནི། འགོག་པ་བཤད་ཟིན་ལྷག་མ་ནི། །འདོད་ཆགས་བྲལ་དང་སྦྱོར་བས་འཐོབ། །ཉེར་དྲུག་པོ་དེ་ལས་འགོག་པའི་རྣམ་ཐར་གྱིས་ཐོབ་པ་དང་རྟེན་སོགས་སྔར་གནས་གཉིས་པར་བཤད་ཟིན་ལ། ལྷག་མ་ཉེར་ལྔ་ནི་སྔར་འདྲིས་པ་སྟེ་སྐྱེ་མྱོང་བ་ཡིན་ན་འདོད་ཆགས་དང་བྲལ་བ་ཙམ་དང་། མ་འདྲིས་པ་རྣམས་ནི་སྦྱོར་བ་འབད་རྩོལ་གྱིས་འཐོབ་སྟེ། གོམས་པ་དང་མ་གོམས་པའི་མཐུ་ལས་ཕྱུང་བའི་ཕྱིར་རོ། །སྦྱོར་བའང་བྱས་ཙམ་གྱིས་མི་ཆོག་སྦྱོར་བ་རྫོགས་པས་ཐོབ། སྐྱེ་བ་སྔ་མ་ཡང་སྔ་ཞེ་སྔ་ནི་སྔར་ཡིན་ཅེས་ཁ་ཅིག་ཟེར་ལ། (དཔྱོད་དགོས། མཆན།) ཁ་ཅིག་སྐྱེ་བ་འདིར་སྔར་ཐོབ་མ་ཐོབ་ལ་འཇོག་ཟེར། གསུམ་པ་རྟེན་གྱི་ཁྱད་པར་ལ། དངོས་དང་། འཕྲོས་དོན་ལས། དང་པོ་ནི། གཟུགས་མེད་ཅེས་བྱ་ཁམས་གསུམ་གྱི། །རྟེན་ཅན་ལྷག་མ་མི་ལས་སྐྱེ། །གཟུགས་མེད་ཅེས་བྱ་བའི་རྣམ་ཐར་བཞི་དང་ཟད་པར་གཉིས་ནི་ཁམས་གསུམ་གྱི་རྟེན་ཅན་ཡིན་ལ། དེ་དག་གི་ལྷག་མ་བཅུ་དགུ་པོ་རྣམས་ནི་མི་ལས་སྐྱེ་བས་མིའི་རྟེན་ཅན་ཁོ་ན་ཡིན་ཏེ། འདི་ནི་ལུང་གི་མཐུས་བསྐྱེད་དགོས་ན་ལྷ་སོགས་འགྲོ་བ་ན་གཞན་ལུང་མེད་པའི་ཕྱིར། གཉིས་པ་ནི། ཁམས་གཉིས་དག་ཏུ་གཟུགས་མེད་པ། །རྒྱུ་དང་ལས་ཀྱི་སྟོབས་ཀྱིས་སྐྱེ། །འོ་ན་ལུང་མེད་པས་བསམ་གཏན་གཟུགས་མེད་དག་ཁམས་གོང་མར་ཇི་ལྟར་སྐྱེ་ཞེ་ན། བསམ་གཟུགས་ཀྱི་ཏིང་ངེ་འཛིན་ནི་སྤྱིར་ལུང་དང་རྒྱུ་དང་ལས་དང་ཆོས་ཉིད་ཀྱི་སྟོབས་དང་བཞིས་སྐྱེ་བས་(༤༠༣ན)
ཁམས་གོང་མ་གཉིས་དག་ཏུ་ནི་ལུང་མེད་ཀྱང་གཟུགས་མེད་པའི་སྙོམས་འཇུག་རྒྱུ་དང་ལས་ཀྱི་སྟོབས་གཉིས་ཀྱིས་སྐྱེའོ། །དེའང་རྒྱུའི་སྟོབས་ཀྱི་སྐྱེ་བ་ནི་སྔོན་མིའི་རྟེན་ལ་གཟུགས་མེད་ཀྱི་སྙོམས་འཇུག་གོམས་པར་བྱས་པ་ལས་ཉམས་པ་དག་གཟུགས་ཁམས་སུ་སྐྱེས་ཏེ། དེར་སྔོན་གོམས་པས་སྐལ་མཉམ་གྱི་རྒྱུ་སྟོབས་དང་ལྡན་པས་ཏིང་ངེ་འཛིན་སྐྱེ་ལ། དེ་ལའང་རྒྱུ་སྟོབས་ཆེ་བར་ལྡན་པས་ནི་མྱུར་དུ་སྐྱེ་ལ། རྒྱུ་སྟོབས་ཆུང་བས་ནི་དེར་གཟུགས་མེད་པའི་སྙོམས་འཇུག་སྐྱེ་བ་གོམས་པ་ལས་སོ། །ལས་ཀྱི་སྟོབས་ཀྱིས་སྐྱེ་བ་ནི། སྔོན་མིའི་རྟེན་ལ་གཟུགས་མེད་ཀྱི་སྙོམས་འཇུག་ཐོབ་ནས་ཉམས་པ་དེ་ཉིད་ལན་གྲངས་གཞན་ལ་མྱོང་འགྱུར་གྱི་ལས་སུ་གྱུར་པའི་སྟོབས་ཀྱིས་གཟུགས་ཁམས་སུ་སྐྱེས་པས་ན་གཟུགས་མེད་ཀྱི་ཏིང་ངེ་འཛིན་ཐོབ་ནའང་གཟུགས་མེད་པར་སྐྱེ་སྟེ། འོག་མ་ལས་འདོད་ཆགས་དང་མ་བྲལ་བར་གོང་མར་མི་སྐྱེ་བའི་ཕྱིར་རོ། །ཇི་ལྟར་གཟུགས་མེད་གཟུགས་སུ་སྐྱེ་བ་ལྟར་གཟུགས་མེད་གཟུགས་མེད་ཉིད་དུ་སྐྱེ་བའང་རྒྱུ་དང་ལས་ཀྱི་སྟོབས་གཉིས་ལས་སྐྱེ་སྟེ། དེ་ལ་རྒྱུའི་སྟོབས་ཀྱིས་སྐྱེ་བ་ནི་གོང་མའི་ཉེར་བསྡོགས་སྒོམ་པར་བྱེད་པ་ཡིན་ལ། ལས་ཀྱི་སྟོབས་ཀྱིས་སྐྱེ་བ་ནི་སྐྱེ་བས་ཐོབ་པའི་གཟུགས་མེད་དོ། །བཞི་པ་ཏིང་ངེ་འཛིན་གྱི་སྐྱེ་ཚུལ་ནི། གཟུགས་ཀྱི་ཁམས་སུ་བསམ་གཏན་རྣམས། །དེ་དག་དང་ཆོས་ཉིད་ཀྱིས་ཀྱང་། །གཟུགས་ཀྱི་ཁམས་སུ་བསམ་གཏན་རྣམས་ནི་རྒྱུ་དང་ལས་ཀྱི་སྟོབས་དེ་དག་དང་ཆོས་ཉིད་ཀྱི་སྟོབས་ཀྱིས་ཀྱང་སྐྱེའོ། །དེ་ལ་མདོ་སྡེ་པས། ཆོས་ཉིད་ཀྱིས་སྐྱེ་བ་ནི་འཇིག་རྟེན་འཇིག་པའི་ཚེ་བསམ་གཏན་འོག་མའི་སེམས་ཅན་ལ་དགེ་བའི་ཆོས་རྣམས་ཀྱི་འཇུག་པ་ཤས་ཆེ་བས་བསམ་གཏན་གོང་མའི་སེམས་ངང་གིས་སྐྱེ་བ་བཞིན་ཏེ། བསམ་གཏན་གྱི་གདམས་ངག་སྟོན་པའི་ལུང་ལ་མ་བལྟོས་པར་སྔོན་བསམ་གཏན་གོམས་པའི་བག་(༤༠༣བ)
ཆགས་ཀྱིས་སྐྱེ་བ་ལ་ཆོས་ཉིད་ཀྱི་སྐྱེ་བ་ཞེས་བརྗོད་དོ། །བྱེ་བྲག་ཏུ་སྨྲ་བས། བག་ཆགས་ཀྱི་རྣམ་གཞག་མི་འདོད་པས་སྔོན་བསམ་གཏན་གོམས་པའི་སྐལ་མཉམ་གྱི་རྒྱུ་ལས་བྱུང་བ་ལ་འདོད། འདོད་པའི་ཁམས་སུ་ནི་ལྷ་ལ་རྒྱུ་གསུམ་པོ་དེ་དག་དང་མི་ལ་དེ་དག་གི་སྟེང་དུ་ཡིད་ལ་བྱེད་པ་བདུན་དང་། སེམས་གནས་པའི་ཐབས་དགུ་ལ་སོགས་པ་ལུང་གི་སྟོབས་ལས་ཀྱང་སྐྱེའོ། །འཇམ་སྒེག་ན་རེ། ལེགས་པར་དཔྱད་ན་ལས་ཀྱི་སྟོབས་ཀྱིས་སྐྱེ་བ་དེ་གལ་ཏེ་ལས་ཀྱི་རྣམ་པར་སྨིན་པ་ཡིན་པར་འདོད་ན་ནི། འདོད་ཁམས་སུ་བསམ་གཏན་གཟུགས་མེད་དང་། གཟུགས་སུ་གཟུགས་མེད་ཀྱི་སེམས་ལས་ཀྱི་སྟོབས་ཀྱིས་མི་སྐྱེ་བར་འགྱུར་ཏེ། དེ་དག་ནི་གཟུགས་དང་གཟུགས་མེད་ཁོ་ནར་རྣམ་པར་སྨིན་པའི་ཕྱིར། འོན་ཏེ་ལས་ཀྱི་རྒྱུ་མཐུན་གྱི་འབྲས་བུར་འདོད་ན་ནི་དེ་ནི་རྒྱུ་དང་ཆོས་ཉིད་ཀྱི་སྐྱེ་བའང་ཡིན་པས་རྣམ་པ་གསུམ་གྱི་དབྱེ་བ་མི་འཐད་པར་འགྱུར་མོད་ཀྱི། འོན་ཀྱང་གཙོ་ཆེ་ཆུང་གི་བྱེ་བྲག་ལ་དགོངས་ཏེ་རྣམ་དབྱེ་མཛད་དོ། །འཇིག་རྟེན་འཇིག་པ་ན་དེའི་རྐྱེན་གྱིས་བསམ་གཏན་བཞི་པ་ལ་གཟུགས་མེད་ཀྱི་ཏིང་ངེ་འཛིན་མི་སྐྱེ་བས་གཟུགས་མེད་ལ་ཆོས་ཉིད་ཀྱི་སྟོབས་ཀྱིས་སྐྱེ་བར་མ་བཤད་ལ། རང་སའི་ཏིང་ངེ་འཛིན་སྐྱེ་བའང་ཆོས་ཉིད་མ་ཡིན་པས་འཇིག་རྟེན་འཇིག་པ་ན་ལུང་མེད་པར་འོག་སའི་རྟེན་ལ་གོང་སའི་ཏིང་ངེ་འཛིན་སྐྱེ་བ་ཁོ་ན་ལ་འདིར་ཆོས་ཉིད་ཅེས་བྱའོ། །ལས་དང་ཆོས་ཉིད་ལ་ཡང་རྒྱུ་ཡོད་མོད་ཀྱི་དེ་དག་གཙོ་ཆེ་བས་དེ་སྐད་བསྟན་ཏོ་ཞེས་ཟེར་རོ། །སྨྲས་པ། གང་ཞིག་རྒྱལ་མཆོག་བསྟན་འདིར་ཕྱོགས་པ་ཞིག །ཉེ་འམ་རིང་ན་འཁོད་པ་གང་ཡོད་ཀྱིས། །ཁོ་བོའི་ལེགས་བཤད་ཚུལ་འདིར་ད་གཟིགས་དང་། །དགེ་ལ་དགའ་གྱུར་(༤༠༤ན)
ཡི་རང་ཅི་ཡང་འབྱུང་། །དེ་སླད་རང་གཞན་ཕན་བདེའི་རྩ་ལག་ནི། །འཁྲུལ་མེད་བསྟན་པའི་བསྟན་འདི་མ་ཡིན་ནམ། །གཉིས་པ་རྩོམ་པ་མཐར་ཕྱིན་བྱེད་ཀྱི་ཡན་ལག་བསྟན་བཅོས་ཀྱི་མཇུག་གི་དོན་བཤད་པ་ལ། བསྟན་པ་གནས་པའི་ཚད། བསྟན་བཅོས་འདི་ཉིད་ཀྱི་མཇུག་གི་དོན། བཤད་པ་མཐར་ཕྱིན་པའི་ཚུལ་ལོ། །དང་པོ་ལ། བསྟན་པ་དང་། དེ་གནས་པའི་ཚད་དོ། །དང་པོ་ནི། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །གང་ལ་ཆོས་རྣམས་ཀྱི་རྣམ་པ་ཟག་བཅས་ཟག་མེད་ས་དང་དམིགས་པ་དང་རྣམ་པ་ལ་སོགས་ཇི་སྐད་བཤད་པ་འདི་ལྟ་བུའི་མངོན་པའི་དམ་ཆོས་འདི་ཇི་སྲིད་དུ་གནས་ཞེ་ན། སྟོན་པའི་དམ་པའི་ཆོས་ནི་རྣམ་པ་གཉིས་ཏེ། ལུང་སྡེ་སྣོད་གསུམ་(༤༠༤བ)
དང་། (སྡེ་སྣོད་གསུམ་ནི། སོ་སོར་ཐར་པས་བསྡུས་པ་ལྷག་པ་ཚུལ་ཁྲིམས་ཀྱི་བསླབ་པ། བསམ་གཟུགས་ཀྱིས་བསྡུས་པ་ལྷག་པའི་སེམས་དང་། ཟག་མེད་ཤེས་རབ་འཁོར་བཅས་ཀྱིས་བསྡུས་པ་ལྷག་པའི་ཤེས་རབ་ཀྱི་བསླབ་པ་རྣམས་གཙོ་བོར་སྟོན་པ་ནི་སྡེ་སྣོད་གསུམ་སྟེ། འདུལ་བ་ལུང་དང་དྲན་པ་ཉེར་བཞག་གི་མདོ་ལ་སོགས་པའི་ཐེག་ཆུང་ལ་མདོ་ཐོར་བུ་བ་སྣ་ཚོགས་ནི་དང་པོ་གཉིས་ཀྱི་མཚན་གཞི་ཡིན་ལ། མངོན་པའི་སྡེ་སྣོད་ཀྱི་བཀའ་ནི། བྱེ་སྨྲ་ལྟར་ན་སྡེ་བདུན་དང་། མདེ་སྡེ་པ་ལྟར་ན་དེ་དག་བསྟན་བཅོས་ཡིན་ཅིང་། བཀའ་ཟུར་པ་མེད་པས་སྔ་མ་གཉིས་ཀྱི་ནང་ན་ཐོར་བུར་བསྟན་པ་རྣམས་མཚན་གཞིར་འདོད། ཐེག་པ་གོང་མ་པ་ནི་མངོན་པ་སྟོང་ཕྲག་བརྒྱ་པ་ཞེས་པ་དགའ་ལྡན་དུ་བཞུགས། འཛམ་བུའི་གླིང་དུ་མངོན་པ་ལ་དགྲ་ལན་གསུམ་བྱུང་བས་ནུབ་ལ། ཡང་རྒྱ་གར་ལྷོ་ཕྱོགས་ན་མངོན་པའི་ཆོས་ཚུལ་བརྒྱ་པ་ཟེར་བ་ཞིག་ཡོད་པ་ལས་ག་དགུ་ནུབ་ནས་གཅིག་ལས་བཏུས་པ་ལ་ས་སྡེ་རྣམས་བྱུང་བ་ཡིན་ནོ་ཞེས་གཏམ་དུ་གྲགས་པའང་ཡོད་དོ། །མཆན།) རྟོགས་པ་བྱང་ཆུབ་ཕྱོགས་དང་མཐུན་པའི་བདག་ཉིད་དོ། །གཉིས་པ་ནི། དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ལུང་ཆོས་དེ་འཛིན་པ་གང་ཞེ་ན། ལུང་གི་ཆོས་དེ་འཛིན་པར་བྱེད་པ་ནི་ལུང་བཞིན་དུ་ཤེས་ནས་ཉོན་མོངས་པ་ཅན་མ་ཡིན་པའི་བསམ་པས་གཞན་ལ་སྨྲ་བར་བྱེད་པ་ཡིན་པའི་ཕྱིར་སྡེ་སྣོད་འཛིན་པ་དང་། ལུང་གི་ཆོས་འཛིན་པ་དང་། བསྟན་པ་འཛིན་པ་ཞེས་ཀྱང་བྱའོ། །རྟོགས་པའི་ཆོས་འཛིན་པ་ནི། བྱང་ཕྱོགས་དང་མཐུན་པའི་ཆོས་རང་གི་རྒྱུད་ལ་སྒྲུབ་ཅིང་ཉམས་སུ་ལེན་པར་བྱེད་པ་ཡིན་པའི་ཕྱིར། བསླབ་པ་གསུམ་ལ་སློབ་པ་དེ་དག་ནི་སྟོན་པའི་བསྟན་པ་དམ་པའི་ཆོས་འཛིན་པ་ཡིན་ནོ། །དེ་གཉིས་ལས་གཞན་པ་ནི་དམ་པའི་ཆོས་འཛིན་པ་མ་ཡིན་པས་ན་ཁོ་ནའི་སྒྲ་སྨོས་སོ། །དེའང་ལུང་འཛིན་བྱེད་ནི་སྨྲ་བྱེད་དང་སྒྲུབ་བྱེད་ཀྱི་རྟེན་ཡིན་ལ། ལུང་ཕྱིན་ཅི་མ་ལོག་པའི་རྟེན་ནི་སྒྲུབ་པ་པོ་རྣམས་ཡིན་ནོ། །རྟོགས་པ་སྨྲ་བྱེད་ནི་སྒྲུབ་པ་ཁོ་ན་ཡིན་ཏེ། མ་སྒྲུབ་པར་རང་གི་རྟོགས་དོན་སྨྲ་མི་ནུས་པའི་ཕྱིར། དེས་ན་སྨྲ་བྱེད་དང་སྒྲུབ་བྱེད་ཡོད་པ་དེ་སྲིད་དུ་དམ་པའི་ཆོས་གནས་པར་རིག་པར་བྱའོ། །འགྲེལ་པ་ལས། དེ་དག་ཀྱང་ལོ་སྟོང་དུ་གནས་སོ། །ཞེས་བཤད་དོ། །གཞན་དག་ན་རེ། རྟོགས་པ་ལོ་སྟོང་དུ་གནས་པ་དེ་ལྟར་ཡིན་གྱི། ལུང་ནི་ཡུན་རིང་དུ་སྟོང་གི་ཕྱི་ནས་ཀྱང་གནས་སོ་ཞེས་ཟེར་ཏེ། ཕྱོགས་འདི་རིགས་པར་མཐོང་སྟེ། ད་ལྟ་ལུང་གི་ཆོས་མེད་པ་མ་ཡིན་གྱི། ཉོན་མོངས་རྣམས་འཇུག་པ་རྙེད་པས་རྟོགས་པའི་ཆོས་ནི་མེད་དོ་ཞེས་འགྲེལ་བཤད་བྱེད་པ་དག་ཟེར་རོ། །བསྐལ་བཟང་ལས། དེ་བཞིན་གཤེགས་པ་ཤཱཀྱ་ཐུབ་པའི་དམ་པའི་ཆོས་ནི་ལོ་སྟོང་གི་བར་དུ་ནི་གནས་སོ། །ལོ་ལྔ་བརྒྱའི་བར་དུ་ནི་དམ་པའི་ཆོས་ལྟར་སྣང་ངོ་། །ཞེས་དང་། ལུང་ཕྲན་ཚེགས་ལས་ཀྱང་། ལོ་སྟོང་གནས་པར་གསུངས་སོ། །ལུང་ཕྲན་ཚེགས་ལས། བསྟན་པ་ལོ་བདུན་སྟོང་གནས་པ་ལས་སྐྱེ་རྒུའི་བདག་མོ་ལ་སོགས་པ་རབ་ཏུ་བྱུང་བས་ལོ་ཉིས་སྟོང་འགྲིབ་ནས་ལོ་ལྔ་སྟོང་དུ་གནས་པར་གསུངས་སོ། ཞེས་པ་ལ། ཁ་ཅིག །དེ་ལྟར་འཆད་པ་དེས་ལུང་ཕྲན་ཚེགས་མ་མཐོང་བར་ཟད་དེ། ཕྲན་ཚེགས་ཀྱིས་སྐྱེ་རྒུའི་(༤༠༥ན)
བདག་མོ་གོའུ་ཏ་མ་ལ་སོགས་པ་ལ་བླ་མའི་ཆོས་བརྒྱད་གསུངས་པའི་སྐབས་དང་། འཕགས་པ་ཀུན་དགའ་བོ་མྱ་ངན་ལས་འདའ་བར་བཞེད་ནས་ཤ་ནའི་གོས་ཅན་ལ་བསྟན་པ་གཏོད་པའི་སྐབས་དང་། འཕགས་པ་ཉི་མ་གུང་པས་རི་སྤོས་ཀྱི་ངད་ལྡང་གི་ཀླུ་བཏུལ་བའི་སྐབས་སོགས་ལས་བསྟན་པ་ལོ་སྟོང་ཁོ་ནར་གནས་པར་གསུངས་ཀྱི། ལོ་ཉིས་སྟོང་འགྲིབ་པ་དང་ལོ་ལྔ་སྟོང་གནས་པར་གསུངས་པ་མེད་པའི་ཕྱིར་རོ་ཞེས་ཟེར་རོ། །འབུམ་ཏིག་ལས། ལྔ་སྟོང་ལ་ཕྱེད་ཕྱེད་དུ་བྱས་ནས་ལྔ་བརྒྱ་པ་ཕྲག་བཅུ་ལས། དང་པོ་ལ་དགྲ་བཅོམ་པ་དང་། གཉིས་པ་ལ་ཕྱིར་མི་འོང་བ་དང་། གསུམ་པ་ལ་རྒྱུན་ཞུགས་མང་དུ་བྱུང་བས་འབྲས་བུའི་དུས་ཀྱི་ལེའུ་གསུམ་དང་། བཞི་པ་ལ་ཤེས་རབ་བསླབ་པ་དང་། ལྔ་པ་ལ་སེམས་ཀྱི་བསླབ་པ་དང་། དྲུག་པ་ལ་ཚུལ་ཁྲིམས་ཀྱི་བསླབ་པ་ལ་གནས་པ་མང་དུ་འབྱུང་བས་སྒྲུབ་པའི་དུས་ཀྱི་ལེའུ་གསུམ་དང་། བདུན་པ་ལ་མངོན་པ་དང་། བརྒྱད་པ་ལ་མདོ་སྡེ་དང་། དགུ་པ་ལ་འདུལ་བ་འཛིན་པ་མང་དུ་འབྱུང་བས་ལུང་གི་དུས་ཀྱི་ལེའུ་གསུམ་དང་། བཅུ་པ་ནི་རྟགས་ཙམ་འཛིན་པའི་དུས་ཀྱི་ལེའུ་ཞེས་བྱ་སྟེ། དེ་ཉིད་ལ་ལྔ་བརྒྱ་ཐ་མ་ཞེས་བརྡར་བྱེད་དོ། །དེ་ནས་དམ་པའི་ཆོས་ནུབ་པར་འགྱུར་ཏེ། དེའི་དུས་ན་འཛམ་གླིང་པའི་མི་ཚེ་ཚད་ལྔ་བཅུ་པ་ཡིན་ལ། ད་ལྟ་ནི་ཚེ་ཚད་དྲུག་ཅུ་པ་དང་། མངོན་པ་བའི་དུས་ཡིན་ཅེས་ཟེར་ལ། འདི་ལ་ནི་འདོད་པ་མི་འདྲ་བ་མང་དུ་སྣང་བས་གང་གི་ཕྱོགས་སུའང་དཔྱད་མི་བཟོད་དོ། །ཟླ་བའི་སྙིང་པོས་ཞུས་པའི་མདོ་ལས་ལོ་ཉིས་སྟོང་དུ་གནས་པར་གསུངས་སོ། །གཉིས་པ་བསྟན་བཅོས་འདི་ཉིད་ཀྱི་མཇུག་དོན་ལ། བསྟན་བཅོས་བརྩམས་པའི་ཚུལ། ནོངས་པ་བཤགས་པ། བག་ཡོད་བྱ་བར་གདམས་པའོ། །དང་པོ་ནི། བདག་གིས་མངོན་པའི་ཆོས་འདི་ཕལ་ཆེར་ནི། །ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད། །མངོན་པ་མཛོད་ཀྱི་བསྟན་བཅོས་འདིར་ཆོས་མངོན་པ་བརྗོད་བྱར་བྱས་པའི་བསྟན་བཅོས་འདི་(༤༠༥བ)
ཉིད་སྟོན་པས་ཆོས་མངོན་པ་ཡེ་ཤེས་ལ་འཇུག་པ་ལ་སོགས་པའི་མཚན་ཉིད་དུ་བཤད་དམ་ཞེ་ན། འདིའི་དོན་གྱི་སྒོ་ནས་བཤད་ཀྱི་ཚིག་གི་སྒོ་ནས་མ་ཡིན་ལ། དེའང་བདག་གིས་མངོན་པའི་ཆོས་འདི་ནི་ཁ་ཆེ་བྱེ་བྲག་སྨྲ་བའི་ཚུལ་གྱི་གྲུབ་མཐའ་ལྟར་བཤད་དེ། ཁ་ཆེའི་ཡུལ་དུ་འཁོད་ཅིང་བྱེ་བྲག་ཏུ་བཤད་པས་རྩེན་པའི་དབང་དུ་བྱས་པའི་ཕྱིར་རོ། །ཕལ་ཆེར་ཞེས་པས་ཅུང་ཟད་ནི་མདོ་སྡེ་པ་དང་ཉི་འོག་བྱེ་སྨྲའི་ལུགས་སུའང་བཤད་དེ། ཁ་ཆེ་བ་ཡིན་ལ་བྱེ་སྨྲ་མིན་པ་འདུལ་བ་ཤེས་པ་སོགས་དང་། མདོ་སྡེ་བཙུན་པ་སོགས་ཀྱི་ལུགས་དང་། བྱེ་བྲག་ཏུ་སྨྲ་བ་ཡིན་ལ་མདོ་སྡེ་པ་མ་ཡིན་པ་ཉི་འོག་པའི་ལུགས་ཀྱང་ཡོད་པས་ཕལ་ཆེ་བའི་སྒྲས་ཆོས་མངོན་པ་རང་གཞན་གྱི་ལུགས་ཀྱིས་གྲུབ་པ་དག་བརྗོད་པར་བསྟན་པ་ཉིད་ཀྱི་ཕྱིར་རོ། །གཉིས་པ་ནི། ཉེས་པར་ཟིན་གང་དེ་འདིར་བདག་གིས་ཉེས། །དམ་ཆོས་ཚུལ་ལ་ཚད་མ་ཐུབ་རྣམས་ཡིན། །བསྟན་བཅོས་འདིར་ཚིག་དོན་གྱི་ཆ་ལ་ཉེས་པར་ཟིན་པ་གང་དེ་འདིར་བདག་གི་ཉེས་པ་ཡིན་ཏེ། ཆོས་ཟབ་ཅིང་ལུང་འབོགས་མཛད་རྣམས་རྙེད་དཀའ་བའི་ཕྱིར། དེ་ལྟར་ནའང་ཁ་ཆེ་བྱེ་སྨྲའི་སློབ་དཔོན་མཁས་པ་རྣམས་གཅིག་ནས་གཅིག་ཏུ་བརྒྱུད་པ་ལས་རྙེད་པས་སྐྱོན་མེད་དོ་སྙམ་པ་དེ་ལྟར་ནའང་ལུང་རྟོགས་ཀྱི་དམ་ཆོས་ཀྱི་ཚུལ་ལ་ནི་ཐུབ་པ་བཅོམ་ལྡན་འདས་དང་། དེའི་སྲས་ཤཱ་རིའི་བུ་སོགས་རྣམས་ཁོ་ན་ཚད་མ་ཡིན་གྱི། གཞན་ལ་འཁྲུལ་པ་སྲིད་པའི་ཕྱིར་རོ། །ཆོས་མངོན་པ་མཛོད་ཀྱི་ཚིག་ལེའུར་བྱས་པ་ལས། སྙོམས་འཇུག་བསྟན་པ་ཞེས་བྱ་བ་སྟེ་གནས་བརྒྱད་པའོ།། །།