གནས་བཞི་པ། ལས་བསྟན་པ།
༄༅། །ཆོས་མངོན་པ་མཛོད་ཀྱི་འགྲེལ་པ་རྒྱས་པར་སྤྲོས་པ་གྲུབ་བདེའི་དཔྱིད་འཇོ་ཞེས་བྱ་བ་གླེགས་བམ་གཉིས་པ་བཞུགས་སོ། །
ཨོཾ་སྭསྟི། བདག་གི་སྐྱབས་མཆོག་སྟོན་པ་བཅོམ་ལྡན་འདས། །ཁྱེད་ཅག་མི་ཡི་སློབ་དཔོན་ཚུལ་བཟུང་ནས། །ཚུ་རོལ་མཐོང་བའི་མིག་ལའང་སྟོན་མཛད་པའི། །བཀའ་དྲིན་དྲན་ནོ་སྙིང་ནས་དད་པ་ཐོབ། །སྐྱེ་བ་འདི་ནས་ཚེ་རབས་ཐམས་ཅད་དུ། །ཐུབ་མཆོག་ཁྱོད་ཀྱི་བསྟན་པའི་སྙིང་པོ་མཆོག །དཔལ་ལྡན་དྭགས་པོའི་བཀའ་བརྒྱུད་ཅེས་གྲགས་པའི། །སྟོན་དང་བསྟན་པས་འགྲོ་འདི་དགེ་བའི་ཕྱིར། །བདག་གིས་ཤེས་བྱ་གནས་ལུགས་རབ་འབྱམས་ལ། །མི་འཕྲོག་བློ་གྲོས་རྒྱས་པའི་ངང་ཚུལ་གྱིས། །ཀརྨ་པ་ཡི་བསྟན་པའི་བགྱི་བ་ལ། །ཆེད་དུ་བྱས་པའི་རྣམ་དཀར་འདི་ལྟར་རོ། །ཞེས་བརྗོད་ནས། བཞི་པ་ལས་(༢ན)
བསྟན་པའི་གནས་ཀྱི་དོན་ལ། གནས་ཀྱི་གཞུང་བཤད་པ་དང་། གནས་ཀྱི་མཚན་བསྟན་པའོ། །དང་པོ་ལ། ཐམས་ཅད་ལས་ལས་བྱུང་བ། ལས་ཉིད་གཏན་ལ་དབབ་པ། ཆོས་ཀྱི་རྣམ་གྲངས་བསྟན་པས་མཇུག་བསྡུ་བའོ། །དང་པོ་ནི། ལས་ལས་འཇིག་ཏེན་སྣ་ཚོགས་སྐྱེས། །སྣོད་བཅུད་ཀྱི་འཇིག་རྟེན་སྣ་ཚོགས་པ་འདི་སུས་བྱས་ཤེ་ན། དབང་ཕྱུག་སོགས་ཀྱི་བློ་སྔོན་དུ་བཏང་སྟེ་བྱས་པ་ནི་མ་ཡིན་གྱི། ལས་དགེ་མི་དགེ་སྣ་ཚོགས་ལ་འཇིག་རྟེན་སྣ་ཚོགས་སྐྱེས་པའོ། །དེའང་སྣོད་གུར་གུམ་སོགས་སྐྱེ་བའི་ཡུལ་ལེགས་པོ་ལ། ལུས་དམན་པ་མཛེ་ཅན་ལྟ་བུ་དང་། ཡང་ལུས་བཟང་པོ་ལ་སྣོད་དུག་དང་ཚེར་མས་གང་བ་ལྟ་བུ་ནི་འདྲེས་མའི་ལས་བསགས་པ་དང་། སྣོད་བཅུད་ཐམས་ཅད་དགའ་དགའ་ལྟར་འདུག་པ་གཟུགས་ན་སྤྱོད་པ་རྣམས་ནི་མ་འདྲེས་པར་དགེ་བ་ཁོ་ནའི་འབྲས་བུ་དང་། ངན་སོང་གི་ལུས་དང་ཡུལ་གཉིས་ཀ་མ་འདྲེས་(༢བ)
པར་མི་དགེ་བའི་འབྲས་བུའོ། །གཉིས་པ་[ལས་ཉིད་གཏན་ལ་དེ་དབབ་པ་]ལ། ལས་ངོས་བཟུང་བ་དང་། ལས་ཀྱི་རྣམ་གཞག །མདོ་ལས་འབྱུང་བའི་ལས་ཀྱི་དོན་ཏོ། །དང་པོ་ལ། ལས་ལ་གཉིས་སུ་དབྱེ་བ། དེ་སོ་སོའི་ངོ་བོ། རྣམ་རིག་ཡིན་མིན་ནོ། །དང་པོ་ནི། དེ་ནི་སེམས་པ་དང་དེས་བྱས། །ལས་ཇི་ལྟ་བུ་ཞེ་ན། དེ་ནི་དབྱེ་ན། སེམས་པའི་ལས་དང་། སེམས་པ་དེས་བྱས་པ་བསམ་པའི་ལས་ཡིན་ཏེ། མདོ་ལས། ལས་ནི་གཉིས་ཏེ། སེམས་པ་དང་བསམ་པའི་ལས་སོ། །ཞེས་པའོ། །བསམ་པ་ལ་གཉིས་སུ་ཕྱེ་བས་ལས་གསུམ་མོ། །ཅི་འདི་དག་རྟེན་དང་། ངོ་བོ་དང་། ཀུན་སློང་གང་ལ་བཞགགལ་ཏེ་ལུས་ལ་བརྟེན་པའི་ཕྱིར་ཡིན་ན། གཞན་གཉིས་ཀྱང་ལུས་ཀྱི་ལས་སུ་ཐལ་བར་འགྱུར་ལ། ངོ་བོ་ལས་ཡིན་ན། ངག་གི་ལས་མ་ཡིན་པ་ལུས་དང་ཡིད་ལས་ཀྱི་ངོ་བོ་མ་ཡིན་པའི་ཕྱིར་དང་། ཀུན་སློང་ལས་ཡིན་ན། ལུས་ངག་གི་ལས་ཀྱང་ཡིད་ཀྱི་ཀུན་ནས་བསླངས་པའི་ཕྱིར། དེར་ཐལ་བར་འགྱུར་ཞེ་ན། བྱེ་སྨྲ་ན་རེ། རྒྱུ་གསུམ་ལས་རིམ་པ་ལྟར་བཞག་པའི་ཕྱིར་སྐྱོན་མེད་དོ་ཟེར་རོ། །གཉིས་པ་ནི། སེམས་པ་ཡིད་ཀྱི་ལས་ཡིན་ནོ། །དེས་བསྐྱེད་ལུས་དང་ངག་གི་ལས། །གསུམ་པོ་དེ་ལ་སེམས་བྱུང་སེམས་པ་ཡིད་ཀྱི་ལས་ཡིན་ནོ། །སེམས་པ་དེས་བསྐྱེད་པའི་བསམ་པའི་ལས་དེ་ནི་ལུས་དང་ངག་གི་ལས་སོ། །གསུམ་པ་ནི། དེ་དག་རྣམ་རིག་རྣམ་རིག་མིན། །ལུས་ངག་གི་ལས་དེ་དག་ནི་ལུས་ཀྱི་རྣམ་པར་རིག་བྱེད་དང་། ལུས་ཀྱི་རྣམ་པར་རིག་བྱེད་མིན་པ་དང་། ངག་གི་རྣམ་པར་རིག་བྱེད་དང་། རྣམ་པར་རིག་བྱེད་མིན་པའི་ངག་གི་ལས་སོ། །(དངོས་བསྟན་ལུས་ངག་གི་འབྱུང་བ་རྒྱུར་བྱས་ནས་ལུས་ངག་གི་རིག་བྱེད་མིན་པས་འབྱུང་ཟེར་ཡང་། ལུས་ངག་ལ་རྒྱང་ཆད་པ་རིག་བྱེད་མིན་པའི་སྡོམ་དང་སྡོམ་མིན་ཞིག་གོ། །མཆན།) གཉིས་པ་ལས་ཀྱི་རྣམ་གཞག་ལ། ལས་ལ་གཉིས་སུ་དབྱེ་བ། ལས་གསུམ་སྤྱིའི་(༣ན)
ཆོས་ཀྱི་རྣམ་གཞག །རིག་བྱེད་མིན་པའི་རྣམ་གཞག་གོ། །དང་པོ་ལ། རིག་བྱེད་དང་། རིག་བྱེད་མིན་པའོ། །དང་པོ་ལ། ལུས་ཀྱི་རིག་བྱེད་དང་། ངག་གི་རིག་བྱེད་བཤད་པའོ། །དང་པོ་ལ། བྱེ་སྨྲའི་ལུགས་ཀྱི་ངོ་བོ་ངོས་བཟུང་བ་དང་། གནས་མ་བུ་པའི་ལུགས་ལ་དོགས་པ་བཅད་པ། མདོ་སྡེ་པའི་ལུགས་སོ། །དང་པོ་ནི། ལུས་རྣམ་རིག་བྱེད་དབྱིབས་སུ་འདོད། །སེམས་ཀྱི་དབང་གིས་ལུས་ཕྱག་འཚལ་བར་བྱ་སྙམ་ནས་ཕྱག་འཚལ་བ་དང་ཐལ་མོ་སྦྱར་བ་ལྟ་བུ་ལུས་ཀྱི་རྣམ་པར་རིག་བྱེད་དབྱིབས་སུ་འདོད་དོ། །གཉིས་པ་ནི། འགྲོ་མིན་གང་ཕྱིར་འདུས་བྱས་ནི། །སྐད་ཅིག་མ་ཡིན་འཇིག་ཕྱིར་རོ། །རྒྱུ་མེད་པ་ལས་འགའ་མི་འབྱུང་། །རྒྱུ་ཡང་འཇིག་པ་པོར་འགྱུར་རོ། །ཀུན་ཏུ་གནས་པ་བྱ་བ་ཕྱི་རོལ་མུ་སྟེགས་པ་ཞིག་ཕྱིས་རབ་ཏུ་བྱུང་། སངས་རྒྱས་ཀྱི་བསྟན་པ་ལ་ཞུགས་པ་ཞིག་གིས། བསྟན་པ་ལ་ཞུགས་ཀྱང་སྔར་གྱི་ལྟ་བ་ངན་པའི་དབྲེ་ཡོད་པ་ཞིགམཁན་བུ་ཀུན། མཁན་པོ་གནས་པ་བྱ་བ་དེ་མ་བཞིན་དུ་འཛིན་པས་མཁན་བུ་ཀུན་ལ་གནས་མ་བུ་པའི་སྡེ་པ་ཟེར་བས། དེ་པ་ན་རེ། འདུས་བྱས་ཆུ་ཀླུང་དང་། སྒྲ་དང་། མེ་ལྕེ་དང་། སེམས་སེམས་བྱུང་སོགས་ཁ་ཅིག་སྐད་ཅིག་མར་འདོད་ཀྱང་། ཕལ་ཆེ་བ་སྐད་ཅིག་གིས་མི་རྟག་པར་ཁས་མི་ལེན་ལ། དེས་ན་ལུས་ཀྱི་རིག་བྱེད་ཆོས་ཅན། མི་རྟག་པ་མ་ཡིན་པར་ཡུལ་གཞན་དང་གཞན་དུ་མ་ཉམས་པར་འགྲོ་བ་ཡིན་ཏེ། ལུས་བསྐྱོད་པའི་ལས་ཡིན་གྱི། མི་བསྐྱོད་པའི་ལས་མ་ཡིན་པའི་ཕྱིར་ཟེར་བ་ལ། (ཡང་ལུས་བསྐྱོད་པའི་དབྱིབས་ཆོས་ཅན། ལུས་ཀྱི་རིག་བྱེད་ཀྱི་ལས་མ་ཡིན་ཏེ། བསྐྱོད་པ་ཙམ་ལས་ཡིན་ཀྱང་ཀུན་སློང་རིག་བྱེད་ཙམ་ཡིན་པས། ཀུན་སློང་རིག་བྱེད་ཁོ་ན་དེའི་རིག་བྱེད་དུ་འཇོག་པའི་ཕྱིར་རོ། །མཆན།) གཞན་དུ་བསྐྱོད་པ་རིགས་པ་བདེན་ཀྱང་དེ་ཉིད་གཞན་དུ་འགྲོ་བ་མི་བདེན་པས་ཁྱབ་པ་མེད་ལ། རྟག་པར་གཞན་འགྲོ་དགག་པ་ནི། ལུས་ཀྱི་རིག་བྱེད་དེ་མི་འགག་པར་ཡུལ་གཞན་དུ་འགྲོ་བ་ཆོས་ཅན། ལུས་ཀྱི་ལས་རིག་བྱེད་མིན་ཏེ་གང་གི་ཕྱིར་ན་འདུས་བྱས་ཡིན་པའི་ཕྱིར། སེམས་སོགས་(༣བ)
བཞིན་ནོ། །དེའི་ཁྱབ་པ་སྒྲུབ་ནི། འདུས་བྱས་རྣམས་ཆོས་ཅན། དེ་མ་ཐག་འཇིག་པའི་སྐད་ཅིག་མར་ཡོད་པ་ཡིན་ཏེ། གདོན་མི་ཟ་བར་རྒྱུ་རྐྱེན་དོན་གཞན་ལ་བལྟོས་མེད་དུ་འཇིག་པའི་ཕྱིར་རོ། །སྐད་ཅིག་གི་སྒྲ་ནི། སྟོང་པ་དང་། བྱ་བ་མེད་པ་དང་། དུས་ཀྱི་མཐའ་སྟེ་དོན་དུ་མ་ལ་བརྗོད་དེ། སྣོད་སྟོང་པ་ལ་སྣོད་སྐད་ཅིག་བྱ་བ་དང་། ལྷས་བྱིན་བྱ་བ་མེད་པ་ལ་ལྷས་བྱིན་སྐད་ཅིག་པ་དང་། སྐད་ཅིག་ཏུ་བྱས་སོ་ཞེས་པ་སོགས་སུ་མཐོང་བའི་ཕྱིར། སྐད་ཅིག་དེ་འདུས་བྱས་འདི་ལ་ཡོད་པས་དབྱུག་པ་ཡོད་པ་ལ་དབྱུག་པ་བཞིན་ནོ། །ད་དུང་སྤྲོས་ཏེ་བརྗོད་ན། འདུས་བྱས་ཐམས་ཅད་ཆོས་ཅན། གང་དུ་སྐྱེས་པ་དེ་ཉིད་དུ་འཇིག་པ་ཡིན་ཏེ། བདག་ཉིད་དུ་ཐོབ་པ་ལས་ཕན་ཆད་དུ་མེད་པའི་ཕྱིར། ཡང་ཁོ་ན་རེ། འདུས་བྱས་རྣམས་ངེས་པར་འཇིག་ཀྱང་། དེ་འདུས་བྱས་ཀྱི་ཐ་མ་ལ་བསམ་པ་ཡིན་པས་དེའི་གོང་གི་འདུས་བྱས་རྣམས་སྐད་ཅིག་མ་མིན་ན་ཅི་སྟོ། དེའི་ཕྱིར་ཕྱི་རྒྱུ་ལས་འཇིག་སྙམ་པའམ། ནང་གཏན་ཚིགས་རྒྱུ་མེད་དུ་འཇིག་པ་འདི་ལ་གཏན་ཚིགས་ཀྱི་ངོ་བོ་འཇིག་པ་གྲུབ་ཀྱང་། གཏན་ཚིགས་ཀྱི་ཁྱད་པར་རྒྱུ་མེད་མ་གྲུབ་སྙམ་པ་དེ་དག་འགོག་པ་ནི། དངོས་པོ་རྣམས་འཇིག་པ་ནི་ཆོས་ཅན། རྒྱུས་བསྐྱེད་པ་ལས་འབྱུང་སྟེ། དངོས་པོ་མེད་པའི་ངོ་བོ་ཡིན་པའི་ཕྱིར། གཏན་མེད་བཞིན་ནོ། །འཇིག་པའི་རྒྱུ་བྱ་བ་ཆོས་ཅན། འཇིག་པ་དང་མེད་པ་ལ་རྒྱུར་མི་འཐད་དེ། རྒྱུའི་བྱ་བ་ནི་འབྲས་བུར་བྱ་བ་གང་ཞིགའབྲས་བུ་མེད་པར་ཡོད་པ་ནི་གང་གིས་ཀྱང་བྱར་མེད་པའི་ཕྱིར། ཡང་དངོས་པོ་སྐྱེས་ཙམ་ན་འཇིག་པ་མ་ཡིན་གྱི། ཕྱིས་དངོས་པོ་དོན་གཞན་གྱིས་འཇིག་པའི་རྒྱུ་ཞིག་ཡོད་སྙམ་ན། འོ་ན་དངོས་པོ་ཆོས་ཅན། ཕྱིས་ཀྱང་མི་འཇིག་པར་ཐལ། དངོས་པོ་དང་པོའི་དུས་སུ་མི་འཇིག་པར་མཚུངས་པའི་ཕྱིར། གཞན་ཡང་འཇིག་རྒྱུ་དངོས་པོ་བ་དོན་གཞན་གྱིས་བྱེད་ན་ཆོས་ཅན། འཇིག་པར་བྱ་རྒྱུའི་དངོས་པོ་དེ་མི་འཇིག་(༤ན)
པར་ཐལ། འཇིག་བྱེད་ཀྱི་དངོས་པོ་དེ་ཉིད་འཇིག་རྒྱུ་ཡིན་པའི་ཕྱིར། ཁྱབ་པ་ཡོད་དེ། དངོས་པོ་གཞན་གྱི་འཇིག་རྒྱུ་བྱས་པས་དངོས་པོ་གཞན་འཇིག་པ་བྱས་པར་མི་འགྲོ་བའི་ཕྱིར། དངོས་པོ་དེ་ཉིད་ཀྱིས་ཀྱང་དེ་ཉིད་འཇིག་རྒྱུ་མི་བྱེད་དེ། དངོས་པོར་གྲུབ་ཟིན་པའི་ཕྱིར་བུམ་པ་ཉིད་བཞིན། དེས་ན་འཇིག་པ་ནི་དངོས་པོ་དེའི་ངོ་བོ་ཡིན་པས་རྒྱུ་མེད་དུ་ངང་གིས་འཇིག་གོ། །ད་དུང་ཡང་གསལ་བར་བརྗོད་ན་སྤྱིར་འཇིག་པའི་རྒྱུ་དེས་ཆོས་ཅན། མེད་པ་མི་བྱེད་དེ། མེད་པ་དེ་རྒྱུའི་བྱ་བའི་ཡུལ་དུ་འགལ་བའི་ཕྱིར། འཇིག་པའི་རྒྱུ་དོན་གཞན་དེས་གལ་ཏེ་བྱ་བ་བྱེད་པ་ཞིག་ཡོད་ན་དངོས་པོ་བྱེད་པ་ལས་འོས་མེད། དངོས་པོ་བྱེད་པ་ཡང་གཞན་གཅིག་བྱས་པས་འཇིག་པ་མེད་པར་བྱས་པར་མི་འགྲོ། འཇིག་པ་མེད་པ་དེ་ཉིད་བྱེད་ཙམ་ན་འཇིག་པ་དེ་ཉིད་དུ་གྲུབ་ཟིན་པ་ལ། འཇིག་རྒྱུ་བྱ་ཅི་དགོས། འཇིག་རྒྱུ་དོན་གཞན་དེས་བྱེད་ན་འཇིག་བྱེད་གྲུབ་པའི་རང་དུས་སྐད་ཅིག་མར་འཇིག་བྱ་དེ་ཡང་གྲུབ་དགོས་ན། དེའི་ཚེ་འཇིག་བྱ་སྐད་ཅིག་མ་དེའི་དུས་སུ་མ་གྲུབ་ན་འཇིག་བྱེད་དངོས་པོ་དོན་གཞན་གྲུབ་པ་དང་། གཅིག་ཤོས་ངོ་བོ་མ་གྲུབ་པས་ཕན་ཚུན་ངོ་བོ་གཅིག་པའི་འཇིག་བྱེད་དུ་འགལ་ལོ། །ཡང་འཇིག་རྒྱུ་དོན་གཞན་དེས་འཇིག་བྱ་དེ་ཉིད་གཞན་དུ་འགྱུར་བར་བྱེད་སྙམ་ན། དེ་ཉིད་དང་གཞན་དུ་འགལ་ཙམ་ན་རྒྱུ་ཅི་ལྟར་སྟོབས་ཆེ་ཡང་འགལ་བ་བསྐྱེད་དུ་མི་འདོད་དོ། །དེར་མ་ཟད་དེ་ཉིད་གཞན་དུ་མི་འགྱུར་ཏེ། དེ་ཉིད་ཡིན་ན་གཞན་ཡིན་པར་མི་རུང་བའི་ཕྱིར་ཏེ། དེ་གཉིས་མཚན་ཉིད་མི་མཐུན་པའི་ཕྱིར། འཇིག་རྒྱུ་དོན་གཞན་དང་། དེ་ཉིད་ཀྱིས་ཀྱང་མི་བྱེད་པར་བསྟན་ནས། ད་ནི་མཐོང་བ་དང་མི་འགལ་བར་བསྟན་པ་ནི། ཁོ་ན་རེ། མར་མེའི་རྩེ་མོ་སོགས་འཇིག་པ་རྒྱུ་མེད་ལས་བྱུང་ཡང་། དངོས་པོའི་འཇིག་པ་ཐམས་ཅད་རྒྱུ་མེད་ལས་བྱུང་བ་མ་ཡིན་ཏེ། བུམ་པ་དང་(༤བ)
ཤིང་གི་འཇིག་པ་ནི་ཐོ་བ་དང་མེ་ལས་བལྟོས་པར་མངོན་སུམ་དུ་མཐོང་བའི་ཕྱིར། མངོན་སུམ་ལས་བརླིང་བའི་ཚད་མ་ཡང་མེད་པས་འཇིག་རྒྱུ་དོན་གཞན་གྲུབ་བོ་ཞེ་ན། སློབ་དཔོན་གྱིས་ལན་བཏབ་པ་ནི། ཕ་རོལ་པོ་དག་གི་ཤིང་གི་འཇིག་རྒྱུ་དོན་གཞན་མངོན་སུམ་ཡིན་པར་མངོན་པའི་ང་རྒྱལ་གྱི་དོན་ལ་མི་གནས་པར་བསྟན་པའི་ཕྱིར། ཕྱིར་དྲིས་པ་ནི། ཤིང་གི་མེ་དང་འབྲེལ་བར་མཐོང་བ་ཙམ་ལས་ཤིང་འཇིག་བྱེད་མེ་ཡིན་པའི་མངོན་སུམ་ཡིན་པར་མ་ངེས་པ་ལས། ངེས་བྱེད་ཅི་ཡོད་བྱས་པས། ཁོ་ན་རེ། ཤིང་མངོན་སུམ་དུ་དམིགས་པ་བཞིན་དེའི་འཇིག་པ་མངོན་སུམ་དུ་མ་དམིགས་ཀྱང་འཇིག་རྒྱུ་དོན་གཞན་རྗེས་དཔག་གིས་གྲུབ་སྟེ། གང་ཞིག་གང་ཡོད་ན་འབྱུང་བ་དེ་ནི་དེའི་རྒྱུ་ཅན་ཡིན་ཏེ། དཔེར་ན། ས་བོན་ཡོད་ན་འབྱུང་བའི་མྱུ་གུ་ལྟ་བུའོ། །དེ་བཞིན་དུ་ཤིང་སོགས་འཇིག་པ་ཡང་མེ་ཡོད་ན་ཤིང་མི་སྣང་བ་འབྱུང་བའི་ཕྱིར་ཞེས་ཟེར་རོ། །སློབ་དཔོན་གྱིས་དཔྱད་པ་འདི་ལྟར་མཛད་དེ། གང་ཞིག་གང་ཡོད་ན་འབྱུང་བ་དེ་ལ་དེའི་རྒྱུ་ཅན་ཡིན་པས་མ་ཁྱབ་པའི་ཕྱིར། རླུང་དང་འབྲེལ་པས་མར་མེ་འཇིག་མོད་ཀྱི། འཇིག་པ་དེ་ནི་རླུང་དང་འབྲེལ་པས་བྱས་པ་མིན་ཏེ། མར་མེ་སྐད་ཅིག་མ་ཉིད་དུ་ཁས་བླང་བའི་ཕྱིར། འཇིག་པ་རྒྱུ་མེད་ཅན་དུ་འདོད་པ་ཡིན་པས། མར་མེ་དེ་ནི་སྐྱེས་ནས་འཇིག་པའི་ཕྱིར། རང་ཞིག་པ་ཡིན་ལ། རླུང་དང་འབྲེལ་བའི་ཕྱིར་སྐད་ཅིག་ཕྱི་མ་གཞན་མ་སྐྱེས་ན་མི་སྣང་བ་ཡིན་གྱི། དེས་བཤིག་པའི་ཕྱིར་ནི་མ་ཡིན་ནོ། །དེ་བཞིན་དུ་དྲིལ་བུའི་སྒྲ་སྐད་ཅིག་མར་འདོད་པ་ཡང་ལག་པ་དང་འབྲེལ་བར་ཡོད་ན་དྲིལ་བུའི་སྒྲ་འཇིག་མོད་ཀྱི། དེ་ནི་དེས་བྱས་པ་མ་ཡིན་གྱི། སྐད་ཅིག་མ་ཡིན་པའི་ཕྱིར། དྲིལ་བུའི་སྒྲ་ནི་རང་ཞིག་ལ། དེས་གེགས་བྱས་པའི་ཕྱིར་གཞན་མ་སྐྱེས་ནས་མི་སྣང་བ་ཡིན་གྱི། དེས་ཤིག་པའི་ཕྱིར་ནི་མ་ཡིན་ནོ། །དེས་ན་འཇིག་རྒྱུ་དོན་གཞན་མེད་པ་ནི་རྗེས་སུ་དཔག་(༥ན)
པའི་ཚད་མས་ཤེས་པར་བྱ་སྟེ། འདི་ལྟར་འཇིག་པ་ཆོས་ཅན། རྒྱུ་མེད་ཅན་ཡིན་ཏེ། བྱ་བ་མ་ཡིན་པའི་ཕྱིར། ནམ་མཁའ་བཞིན། འཇིག་པ་འདི་ཡང་བྱ་བ་མ་ཡིན་ཏེ། དངོས་པོ་མེད་པའི་ངོ་བོ་ཡིན་པའི་ཕྱིར། གཏན་མེད་བཞིན་ནོ་ཞེས་སོགས་སྔར་བཤད་ཟིན་པ་རྣམས་ཀྱིས་བསྒྲུབ་པར་བྱའོ། །ཡང་འདུས་བྱས་འགའ་ཞིག་གི་འཇིག་པ་ཆོས་ཅན། རྒྱུ་དོན་གཞན་མེད་པ་ལས་འབྱུང་བར་མི་འགྱུར་བར་ཐལ། རྒྱུ་དོན་གཞན་དང་ལྡན་པའི་དངོས་པོ་ཡིན་པའི་ཕྱིར་སྐྱེ་བ་བཞིན། འདོད་མི་ནུས་ཏེ། བློ་དང་སྒྲ་དང་མེ་ལྕེ་འཇིག་པ་རྒྱུ་མེད་ལས་འབྱུང་བ་མཐོང་བས་སོ། །བྱེ་བྲག་པས། བློ་ཡང་བློ་གཞན་གྱིས་འཇིག་ལ། སྒྲ་ཡང་སྒྲ་གཞན་གྱིས་འཇིག་སྙམ་ན། དེ་ནི་རིགས་པ་མིན་ཏེ། བློ་གཉིས་གཅིག་ཅར་འཕྲད་ཅིང་འབྱུང་བ་མེད་པའི་ཕྱིར། ཐེ་ཚོམ་དང་ངེས་ཤེས་བཞིན་ནོ། །དེ་ཡང་ཇི་ལྟར་འགལ་བ་མི་འཕྲད་པ་བཞིན་དུ་རིགས་གཅིག་པའི་མི་འགལ་བ་དག་ཀྱང་འཕྲད་པ་མེད་དོ། །བློ་དང་སྒྲ་གསལ་བ་བྱུང་བའི་རྗེས་ཐོགས་སུ་བློ་དང་སྒྲ་མི་གསལ་བ་འབྱུང་བ་དེའི་ཚེ་ཆོས་ཅན། སྔ་མའི་གསལ་བ་དེ་འཇིག་བྱེད་མ་ཡིན་ཏེ། སྟོབས་ཆུང་ཞིང་རིགས་མཐུན་པའི་ཕྱིར། རིས་མི་མཐུན་ན་ཉམ་ཆུང་ངུས་ཀྱང་འཇིག་སྟེ་ཆུ་མེ་བཞིན་ནོ། །སློབ་དཔོན་དབྱིག་བཤེས་ན་རེ། གནས་པའི་རྒྱུ་མེད་པས་འཇིག་པར་འདོད་པ་དང་། བྱེ་བྲག་པས། མར་མེ་བདག་ལ་ཕན་ན་ཆོས་སྐྱེ་བའི་རྒྱུ་ཡིན། མར་མེ་བདག་ལ་གནོད་ན་མར་མེ་སྐྱེ་བའི་རྒྱུ་ཆོས་མ་ཡིན། དེས་ན་མར་མེ་དེ་བདག་ལ་གནོད་ན་མར་མེ་དེ་ཆོས་ཀྱི་མཐུས་འཇིགམར་མེ་དེ་བདག་ལ་ཕན་ན་ཆོས་མ་ཡིན་པའི་མཐུས་འཇིག་ཟེར་རོ། །དེ་ལ་དབྱིག་བཤེས་ཀྱིས། དེ་མི་རིགས་ཏེ། གནས་པའི་རྒྱུ་མེད་པ་ནི་རྒྱུ་མ་ཡིན་པའི་ཕྱིར། བྱེ་བྲག་པའི་ལུགས་དེ་མི་རིགས་ཏེ། འཇིག་པའི་སྐད་ཅིག་གཅིག་ལ་ཆོས་ཅན། ཆོས་ཀྱི་འཇུག་པ་ཐོབ་(༥བ)
པ་དང་། ཆོས་མིན་གྱི་གེགས་བྱེད་པ་སྟོབས་ཆེ་ཆུང་དུ་འཇུག་མི་ནུས་པར་ཐལ། ཆོས་དང་ཆོས་མིན་གྱི་སྐྱེ་འཇིག་གཉིས་འགལ་བ་གང་ཞིགཁོ་རང་གཉིས་རིས་མ་མཐུན་པས་གང་ཟག་གཅིག་གི་རྒྱུད་ལ་འཚོགས་མ་བཏུབ་པའི་ཕྱིར། དེ་ལ་ཁྱབ་པ་གྲུབ་པས་འཇིག་རྒྱུ་གཉིས་ཀྱི་འཇིག་དགོས་པ་ལས། འཇིག་རྒྱུ་གཉིས་དུས་གཅིག་ཏུ་མ་གྲུབ་པས་འཇིག་བྱ་མི་འཇིག་པར་ཤོར་སོང་ངོ་། །རྫ་བུམ་སོགས་ཚོས་བྱ་ཚོས་བྱེད་ཀྱི་རྫས་འཕྲད་པ་ལས། ཚོས་པ་དང་། ཆེར་ཚོས་པ་དང་། ཆེས་ཆེར་ཚོས་པ་སོགས་སྔ་མ་འགགས་པ་དང་། ཕྱི་མ་ཕྱི་མ་སྐྱེ་བར་མཐོང་བས་རྫ་བུམ་སྔོན་པོ་དང་། དམར་པོ་དང་། ཆེས་དམར་པོ་ཚོས་པར་སྐྱེད་བྱེད་ཀྱི་རྒྱུ་སྐྱེ་བ་འབྱུང་བའང་ཆོས་ཅན། ཚོས་པ་དང་། ཆེར་ཚོས་པ་དང་། ཆེས་ཆེར་ཚོས་པ་སྔ་མ་དེ་དག་གི་འཇིག་པ་པོར་འགྱུར་ཏེ། མེ་དང་དེ་འབྲེལ་བ་ལས་སྔ་མ་སྔ་མ་མི་སྣང་བ་འབྱུང་བའི་ཕྱིར་རོ། །གལ་ཏེ་འདོད་དོ་ཞེ་ན་ནི་མི་རིགས་ཏེ། རྒྱུ་སྔ་ཕྱི་འདྲ་བ་གཉིས་ཀྱིས་འབྲས་བུ་ཡང་འདྲ་བར་བསྐྱེད་པར་རིགས་ཀྱི། རྒྱུ་འདྲ་བ་ལས་འབྲས་བུ་མི་འདྲ་བ་གཅིག་གིས་བསྐྱེད། གཅིག་གིས་བཤིགས་ནས་མེད་པར་བྱེད་མི་རིགས་པའི་ཕྱིར་རོ། །ཡང་ཁོང་མེ་སྐད་ཅིག་སྔ་མ་ཡང་གཞན་ཡིན་པས་ཚོས་པ་བསྐྱེད། མེ་ཕྱི་མ་དེས་སྔ་མ་ལས་གཞན་ཡིན་པས་ཚོས་པ་དེ་འཇིག་པར་བྱེད་དོ། །དེ་ལྟར་ནའང་ཁྱེད་རང་བྱ་བར་རག་་མོད། མི་འགྲུབ་སྟེ། དེ་ལྟ་བུ་དེ་མེ་སྐད་ཅིག་མ་དང་སེམས་བྱུང་སོགས་ལ་བལྟ་བྱར་རུང་ཡང་། ཚྭ་སྐད་ཅིག་མ་མན་ཙམ་ན་མངར་བ་བསྐྱེད་པ་དེ་ཉིད་ཁ་བ་བསྐྱེད་པ་ཡིན། ཁ་བ་བསྐྱེད་པ་དེ་ཉིད་སྐྱུར་བ་བསྐྱེད་པ་ཡིན་ཙམ་ན་རྒྱུ་གཅིག་པོ་དེས་མངར་བ་བསྐྱེད་ཀྱང་སྐྱེད། ཁ་བ་བསྐྱེད་པས་མངར་བ་དེ་བཤིག་ཀྱང་བཤིགདེ་བཞིན་ཐལ་བ་དེ་ལུད་དང་། ཉི་མ་དང་ཆུ་དང་ས་དེ་ཚོ་སྐད་ཅིག་མ་ཡིན་པའི་སྔ་ཕྱི་གཅིག་ཡིན་ཙམ་(༦ན)
ན་གཅིག་པོ་དེས་མྱུ་གུ་བསྐྱེད་ཀྱང་བསྐྱེད། སྡོང་བུ་བསྐྱེད་པས་མྱུ་གུ་དེ་བཤིག་ཀྱང་བཤིག་པས་རྒྱུ་ཡང་འཇིག་པར་འགྱུར་བས་སྐད་ཅིག་མ་མིན་པའི་འདུས་བྱས་དེ་ལ་ནི་སྐྱེད་བྱེད་དང་འཇིག་བྱེད་ཀྱི་ཆ་དབྱེ་མི་ནུས་པའི་ཕྱིར་རོ། །རིགས་པ་དེ་དག་གིས་ནི་གནས་མ་བུ་པའི་འདོད་པ་བཀག་ནས། རང་གི་ཕྱོགས་ལ་ཉེས་པ་མེད་པར་བསྟན་པ་ནི། ཁོང་གི་ལྟར་མེས་ཆུ་འཇིག་པར་བྱེད་པ་ཡིན་ཏེ། ཆུ་བསྐོལ་བས་ཟད་པའི་ཕྱིར་རོ་སྙམ་ན། དེ་ནི་ཁྱབ་པ་མ་ངེས་པ་ཡིན་ཏེ། མེས་ཆུ་བསྐོལ་བ་ན། མེས་ཁམས་འཕེལ་ནས་ཆུ་ཉམས་ཆུང་ཆུང་གི་བར་བྱས་ནས། མཐར་ཆུའི་རྒྱུན་ཆགས་པར་མི་བྱེད་ཀྱང་ཆུའི་ངོ་བོ་མེད་པ་ནི་བྱེད་པ་མ་ཡིན་པའི་ཕྱིར། དེས་ན་འཇིག་པ་རྒྱུ་མེད་དུ་ངང་གིས་འཇིག་པའི་ཕྱིར་སྐད་ཅིག་མར་ཡང་གྲུབ་བོ། །དེས་ན་ལུས་ཀྱི་རིགས་བྱེད་མ་ཉམས་པར་ཡུལ་གཞན་དུ་འགྲོ་བ་མེད་དེ། འགྲོ་མ་ཐུབ་པའི་སྐད་ཅིག་ལ་འཇིག་པའི་ཕྱིར། དཔེར་ན། རྩྭའི་མེ་སྐད་ཅིག་མ་ཡིན་ཀྱང་། ཡུལ་གཞན་དུ་བར་ཆད་མེད་པར་རྩྭ་སྲེག་བྱེད་ཀྱི་མེ་འགྲོ་ཞེས་མངོན་པའི་ང་རྒྱལ་བྱེད་པ་དང་འདྲའོ། །འགྲོ་བ་མེད་པའི་ཕྱིར་ལུས་ཀྱི་རིགས་བྱེད་དབྱིབས་ཡིན་པ་བྱེ་སྨྲའི་ལུགས་འདི་གྲུབ་བོ། །གསུམ་པ་ནི། གཉིས་གཟུང་འགྱུར་ཏེ་རྡུལ་ལ་མེད། །མདོ་སྡེ་པ་ན་རེ། དབྱིབས་ནི་རྫས་སུ་མེད་དེ། དེ་བཅོམ་ན་དེའི་བློ་མེད་པའི་ཕྱིར། བུམ་པ་བཞིན་ཞེའོ། །འོན་ཀྱང་ཕྱོགས་གཅིག་གི་སྒོར་ཕལ་ཆེ་བ་མང་པོ་བྱུང་བ་ལ་གཟུགས་རིང་པོ་ཞེས་འདོགས། དེ་ཉིད་ལ་བལྟོས་ཏེ་ཉུང་ངུར་བྱུང་བ་ལ་ཐུང་ངུར་འདོགས། ཕྱོགས་བཞིར་བྱུང་བ་ལ་གྲུ་བཞི་ཞེས་འདོགས། ཐམས་ཅད་དུ་མཉམ་པ་ན་ལྷམ་པ་ཞེས་འདོགས། ཕྱོགས་ཀྱི་སྒོ་གྱེན་དུ་ཕལ་ཆེ་བ་ན་མཐོན་པོ་ཞེས་འདོགས། མཐུར་དུ་ཕལ་ཆེ་བ་ན་དམའ་བ་ཞེས་འདོགས་ཏེ། མགལ་མེ་ཕྱོགས་གཞན་དུ་མྱུར་དུ་འདབ་ཆགས་པར་སྣང་བ་ན་རིང་པོ་སྙམ་དུ་དབྱུག་པའི་(༦བ)
རྣམ་པར་ཤེས་ལ། ཐམས་ཅད་དུ་སྣང་ལ་ཟླུམ་པོ་སྙམ་དུ་ཤེས་ཀྱི་དབྱིབས་རྫས་གཞན་མེད་པ་བཞིན་ནོ། །དབྱིབས་ནི་རྫས་སུ་མེད་དེ། དེ་འཛིན་པ་ཁ་དོག་འཛིན་པ་ལ་བལྟོས་པའི་ཕྱིར་རམ། གཟུགས་འཛིན་པ་ལ་བལྟོས་པའི་ཕྱིར། མགལ་མེའི་འཁོར་ལོ་དང་འབྲུའི་ཕུང་པོ་བཞིན་ནོ། །སྔོན་པོ་ལ་སྔོན་པོའི་བློ་འབྱུང་བས་སེར་པོ་ལས་ལོགས་ན་ཡོད་པ་བཞིན་དུ་དབྱིབས་ཀྱི་བློ་འབྱུང་བས་ཁ་དོག་གཞན་པའི་རྫས་སུ་གྲུབ་པ་ཞིག་ཡོད་སྙམ་ན། དབྱིབས་གཟུགས་རྫས་གྲུབ་ཡིན་ན་ཆོས་ཅན། མིག་དང་ལུས་ཀྱི་དབང་པོ་གཉིས་ཀྱིས་བཟུང་བར་འགྱུར་བར་ཐལ། མིག་གི་མངོན་སུམ་དུ་མཐོང་ནས་ཤེས་ཤིང་། ལུས་དབང་གིས་རེག་པ་ན་ཡང་ཤེས་པའི་ཕྱིར། འདོད་མི་ནུས་ཏེ། དབང་པོ་དུ་མ་དོན་མེད་དང་། སྐྱེ་མཆེད་ཀྱི་རྫས་མཚུངས་ཉམས་པར་འགྱུར་རོ། །དེ་ལ་བྱེ་སྨྲས། རིང་པོ་ཉིད་ལ་སོགས་པ་ལུས་ཀྱིས་འཛིན་ན། དབང་པོ་དོན་མེད་དུ་འགྲོ་བས་མི་འཛིན། འོ་ན་ཅི་ཞེ་ན། རེག་བྱའི་ཡན་ལག་ཁོ་ན་དེ་ལྟར་གནས་པ་ལ་རིང་པོ་ལ་སོགས་པར་འཛིན་པར་འགྱུར་ཏེ། དེ་བས་ན་གཉིས་ཀྱིས་འཛིན་པར་མི་འགྱུར་རོ་ཞེ་ན། འོ་ན་རེག་བྱ་ལ་རིང་སོགས་འཛིན་ཀྱང་། དབྱིབས་རེག་བྱའི་སྐྱེ་མཆེད་ཀྱིས་བསྡུས་པ་མ་ཡིན་པ་ལྟར་ཁ་དོག་ལ་རིང་སོགས་སུ་འཛིན་ཀྱང་དེ་དང་འདྲ་བར་ཡིད་ཆེས་པར་བྱ་སྟེ། གཟུགས་ཀྱི་སྐྱེ་མཆེད་ཀྱིས་བསྡུས་པའི་དོན་གཞན་དུ་གྱུར་པ་མེད་པའི་ཕྱིར་རོ། །དེས་ན་བྱེ་སྨྲས། དབྱིབས་དེ་མངོན་སུམ་གྱིས་འཛིན་པ་མིན་ཏེ། རེག་བྱ་འཇམ་པ་སོགས་དང་ལྷན་ཅིག་སྤྱོད་པས་དྲན་པའི་ཕྱིར། དཔེར་ན། མེའི་ཚ་བ་དང་། མེ་ཏོག་གི་དྲི་ལས་ཁ་དོག་དྲན་པ་བཞིན་ནོ་ཞེས་ཟེར་རོ། །སློབ་དཔོན་གྱིས། དཔེ་དོན་མི་མཚུངས་ཏེ། མེ་ཚབ་ལ་མི་འཁྲུལ་བ་སོགས་གཟུགས་ལས་རེག་བྱ་དཔག་པ་ལྟ་བུ་གཞན་དྲན་པར་རིགས་ཀྱང་། རེག་བྱ་འཇམ་རྩུབ་སོགས་ལས་དབྱིབས་དཔག་(༧ན)
མི་ནུས་པའི་ཕྱིར། ཁྱབ་པ་ཡོད་དེ། རེག་བྱ་དང་དབྱིབས་གཉིས་ལྷན་ཅིག་སྤྱོད་པའི་འབྲེལ་པ་མེད་པའི་ཕྱིར། ལྷན་ཅིག་སྤྱོད་པའི་འབྲེལ་བ་མེད་བཞིན་དུ་རེག་བྱས་དབྱིབས་དྲན་པར་འགྱུར་ན་ཁ་དོག་ཀྱང་དྲན་པར་མཚུངས་པར་ཐལ་ལོ། །རེག་བྱ་ལས་ཁ་དོག་མི་ངེས་ན། རེག་བྱ་ལས་དབྱིབས་ངེས་པའང་མི་རིགས་ཏེ་མཚུངས་པའི་ཕྱིར་རོ། །གཞན་ཡང་དབྱིབས་རྫས་སུ་ཡོད་ན་ཆོས་ཅན། ཟ་འོག་ལྟ་བུའི་དབྱིབས་རིང་པོའི་གཞི་གཅིག་ཏུ་གྲུ་བཞི་ཟླུམ་པོ་སོགས་དབྱིབས་བྲན་དུ་མ་འོང་བར་མི་རིགས་པར་ཐལ། ཁ་དོག་རྫས་སུ་ཡོད་པས་སེར་པོའི་གོ་རང་དུ་དཀར་པོ་སོགས་མི་འོང་བ་བཞིན་མཚུངས་པའི་ཕྱིར། འདོད་མི་ནུས་པས་དབྱིབས་རྫས་སུ་མེད་དོ། །གང་ཐོགས་བཅས་ཀྱི་གཟུགས་ཅི་ཡོད་པ་ནི། འདུས་པའི་རྡུལ་ཕྲ་རབ་ལ་ཡོད་པ་ཡིན་ན། རིང་པོ་ལ་སོགས་པའི་དབྱིབས་དེ་ཆོས་ཅན། ཐོགས་བཅས་ཀྱི་གཟུགས་རྫས་ཡོད་མ་ཡིན་ཏེ། དེ་རྡུལ་ཕྲ་རབ་ལ་མེད་པའི་ཕྱིར་ཏེ། རྡུལ་ཕྲ་རབ་ནི་ཆ་ཤས་མེད་པའི་ཕྱིར། དེས་ན་མང་པོ་ཕྱོགས་ཀྱི་སྒོར་གནས་པ་ཁོ་ན་ལ་རིང་པོ་ཞེས་འདོགས་ཏེ་བུམ་པ་དང་སྣམ་བུ་བཞིན་ནོ། །འོན་ཏེ་ཕྱོགས་ཀྱི་སྒོར་གནས་པ་ལ་རིང་པོར་འདོགས་པ་དེ་ནི་དབྱིབས་ཀྱི་རྡུལ་ཕྲ་རབ་བོ་ཞེ་ན། མི་འཐད་དེ། དབྱིབས་ཀྱི་རྡུལ་ཕྲ་རབ་མ་གྲུབ་པའི་ཕྱིར། ཕྱོགས་འཛིན་ཙམ་མོ། །ཡང་ན་དབྱིབས་ཀྱི་རྡུལ་ཕྲ་རབ་ཡོད་ན་ཆོས་ཅན། བསགས་རུང་བར་ཐལ། རང་གི་མཚན་ཉིད་ཀྱིས་གྲུབ་པའི་ཕྱིར། ཁ་དོག་གི་རྡུལ་ཕྲ་རབ་བསགས་པ་བཞིན་འདོད་ན་ནི་ལྟ་ག་ལ་ཞིག་པས་བསལ་ལོ། །འོ་ན་ཁ་དོག་ལས་དབྱིབས་རྫས་གཞན་མེད་ན་ཁམ་པའི་སྣོད་ཁ་དོག་འདྲ་བར་འདུག་བཞིན་དུ་སྣོད་བུམ་པ་དང་། ཕྲུ་བ་དང་། ཁམ་གཞོང་སོགས་དབྱིབས་ཐ་དད་པ་སྣང་བས། དབྱིབས་རྫས་ལོག་པ་ཡིན་ནོ་སྙམ་ན། ཁ་དོག་རིགས་གཅིག་ཀྱང་(༧བ)
ཁ་དོག་གི་རྫས་ཐ་དད་ཡིན་པས། ཁ་དོག་གི་རྫས་ཐ་དད་ལ་དབྱིབས་ཐ་དད་དུ་བརྟགས་པ་ཡིན་ཏེ། ཁ་དོག་གི་རྫས་རང་གཅིག་ལ་དབྱིབས་ཐ་དད་བྱུང་ན་རྟ་ཁ་དོག་གཅིག་ཀྱང་། དབྱིབས་ཐ་དད་པས་དབྱིབས་རྫས་སུ་ཡོད་པ་བྱར་རུང་བ་ལ་ཁ་དོག་གི་རྫས་རང་ཐ་དད་པའི་ཕྱིར། དེས་ན་སྣོད་བུམ་པ་དང་ཕྲུ་བ་སོགས་ཕྱོགས་གཅིག་གི་སྒོར་བྱུང་བ་སོགས་ལ་རིང་པོའི་དབྱིབས་སུ་བྱུང་ཞེས་སོགས་གོང་དུ་བཤད་པ་ཡིན་གྱི། དཔེར་ན། གྲོག་མོར་རིས་གཅིག་པ་མ་བསྐོར་བ་ལ་རིང་པོ་དང་། བསྐོར་བ་ལ་ཟླུམ་པོར་འདོགས་པ་ལྟར་དབྱིབས་ཀྱང་དེ་བཞིན་ནོ། །འོ་ན་མུན་ཁུང་དང་ཐག་རིང་བ་ན་སྡོང་དུམ་ལ་སོགས་པ་ཡོད་པ་ཆོས་ཅན། ཁ་དོག་མ་མཐོང་བར་དབྱིབས་མི་མཐོང་བར་ཐལ། ཁ་དོག་ལས་དབྱིབས་རྫས་ལོགས་པ་མེད་པའི་ཕྱིར། འདོད་མི་ནུས་ཏེ། དངོས་སུ་བསལ་ལོ་ཞེས་པ་ནི་རང་ཉིད་བློ་གྲོས་རྩིང་བ་ཡིན་ཏེ། ཕྱོགས་འདི་ལ་ནི་འདོད་པའི་ཕྱིར། དབྱིབས་མི་གསལ་བ་མཐོང་ཚོད་དུ་ཁ་དོག་གདགས་གཞི་ཡང་མི་གསལ་བར་མཐོང་སྟེ། གདགས་གཞི་ཁ་དོག་མི་གསལ་བར་མཐོང་ཚོད་དུ་བཏགས་པ་དབྱིབས་ཀྱང་མི་གསལ་བར་མཐོང་བའི་ཕྱིར། བྱའམ་གྲོག་མོ་མི་གསལ་བ་དུ་མ་སྦྲེངས་པ་ལ་ཕྲེང་བར་རྟོག་པ་དང་། གླང་པོ་ཆེ་ལ་སོགས་དང་དཔུང་བུ་ཆུང་མི་གསལ་བར་མཐོང་བ་ལ་དམག་བསྐྱིལ་བར་རྟོག་པ་དང་འདྲའོ། །དབྱིབས་ངེས་པར་མ་ཟིན་ན་ནི་ཁ་དོག་ཀྱང་ངེས་པར་མི་ཟིན་ཏེ། སྔོན་པོ་སོགས་ཁ་དོག་གི་ཚོགས་ཙམ་དང་མི་གསལ་བར་སྣང་བའི་ཕྱིར། བྱེ་སྨྲས། ཁྱེད་མདོ་སྡེ་པ་རྣམས་ཀྱིས་གནས་མ་བུ་པའི་ལུས་ཀྱི་འགྲོ་བ་དང་བྱེ་བྲག་ཏུ་སྨྲ་བའི་དབྱིབས་ཀྱང་ཁས་མི་ལེན་ན། དབྱིབས་བཏགས་པ་ཙམ་དུ་ཟད་པའི་ཕྱིར། ལུས་ཀྱི་རྣམ་རིག་གི་ལས་སུ་ཇི་ལྟར་འདོགས་ཞེ་ན། མདོ་སྡེ་པའི་ལན་ནི། དབྱིབས་ལ་རིག་བྱེད་དུ་འདོགས་ལ། དབྱིབས་ཀྱང་ཁ་དོག་(༨ན)
ལ་བརྟགས་པས། ཉིད་བརྟགས་གཅིག་རིག་བྱེད་དུ་བརྗོད་པས་རྫས་སུ་ནི་མ་ཡིན་ནོ། །དབྱིབས་རྫས་ལོག་པ་ཞིག་རིག་བྱེད་མིན་ན། འོ་ན་ཁ་དོག་ནི་ཅོག་གེ་སྡོད་པ་ལ་ཡང་ཡོད་ཙམ་ན་དེ་ཡང་རིག་བྱེད་མ་ཡིན་པས། དབྱིབས་རྫས་གྲུབ་ཅིག་ཡོད་དམ་སྙམ་ན། ཁ་དོག་མི་འགྲོ་བ་ལས་འགྲོ་བའི་གནས་སྐབས་དེ་རིག་བྱེད་ཡིན་པས། ལུས་ལ་བརྟེན་པ་ནི་ལུས་ལ་དམིགས་པའི་སེམས་དཔའ་ཡིན་ཏེ། སེམས་པ་གང་ཞིག་གིས་ལུས་འཇུག་པར་འགྱུར་བའི་སེམས་པ་དེ་ལུས་ལ་བརྟེན་པའི་ལས་ཡིན་ཏེ་དངོས་སུ་སེམས་པ་ཡིན། ངག་གི་ངོ་བོ་ཡིན་པས་ངག་གི་ལས་མི་ཟེར། གང་ལ་བརྟེན་པའི་ལས་ནི་ངག་གི་ལས་ཏེ། ངག་ལ་དམིགས་པའི་སེམས་པ་དེས་ངག་འཇུག་པར་བྱེད་པ་སྟེ་དངོས་སུ་སེམས་པ་ཡིན། དངོས་སུ་སེམས་པ་ཡིན་ཀྱང་ཡིད་དང་མཚུངས་པར་ལྡན་པའི་ལས་ལ་ཡིད་ཀྱི་ལས་སོ། །བྱེ་བྲག་ཏུ་སྨྲ་བས་ནི། ལུས་ལ་བརྟེན་པ་ལུས་ཀྱི་ལས། ངག་གི་ངོ་བོ་ཡིན་པ་ངག་གི་ལས། ཡིད་ཀྱི་ཀུན་ནས་སློང་བས་ཡིད་ཀྱི་ལས་བྱ་བར་འདོད། དེའང་ལུས་ངག་གི་ལས་དགེ་མི་དགེར་དངོས་སུ་འདོད། མདོ་སེམས་ཀྱིས་ནི། རྒྱུ་མིང་འབྲས་བུ་ལ་བཏགས་པར་འདོད་དོ། །ད་དུང་མདོ་སྡེ་པའི་རང་ལུགས་ལ་རྩོད་པ་སྤོང་བ་ནི། ཐམས་ཅད་སེམས་པའི་ལས་ཡིན་ན། ཆེད་དུ་བྱ་བའི་མདོ་ལས། ལས་གང་ཞེ་ན། སེམས་པ་དང་བསམ་པའོ། །ཞེས་གསུངས་པ་དང་འགལ་སྙམ་ན། མི་འགལ་ཏེ། དང་པོ་རྒྱུའི་ཀུན་སློང་ལ་སེམས་པའི་ལས་འཇོགགཉིས་པ་དུས་ཀྱི་ཀུན་སློང་ལ་བསམ་པའི་ལས་སུ་བཞག་པའི་ཕྱིར་རོ། །དེ་ལ་བྱེ་སྨྲས་རྒོལ་བ་ནི། འདོད་པ་ན་སྤྱོད་པའི་སྡོམ་པ་དང་སྡོམ་མིན་རྫས་ལས་བྱུང་བའི་བསོད་ནམས་འཕེལ་བར་བྱེད་པའི་རིག་བྱེད་མིན་པ་རྣམས་ཆོས་ཅན། མེད་པར་ཐལ། དེའི་རྒྱུའམ་ཁྱབ་བྱེད་རྣམ་པར་རིག་བྱེད་མེད་པའི་ཕྱིར་ཞེས་ཟེར་རོ། །(༨བ)
ཆོས་ཅན་འདོད་པ་ན་སྤྱོད་པ་སྨོས་པ་ནི། བསམ་གཏན་དང་ཟག་མེད་ཀྱི་སྡོམ་པ་རིག་བྱེད་ལ་མ་རག་པ་ལ་བསམ་པའོ། །དེ་ལ་མདོ་སྡེ་པས་ལན་བཏབ་པ་ནི། དབྱིབས་ཀྱི་རིག་བྱེད་རྫས་སུ་མ་གྲུབ་པ་བཞིན་དུ་ཁྱོད་འདོད་པའི་རིག་བྱེད་མིན་པ་དེ་ལྟ་བུའང་མེད་པར་འདོད་ལ། ཡང་ན་ནི་རྟགས་ཁྱབ་མ་གྲུབ་སྟེ། ང་འདོད་པའི་རིག་བྱེད་ནི། ལུས་ངག་ལ་དམིགས་པའི་སེམས་པའི་ཁྱད་པར་གྱི་རྒྱུད་ལ་སེམས་པ་ས་བོན་དང་བཅས་པའི་ནུས་པ་བཞག་ནས་སེམས་པ་ས་བོན་དང་བཅས་པའི་རིག་བྱེད་མ་ཡིན་པ་འབྱུང་ངོ་། །འོ་ན་འདོད་པའི་རིག་བྱེད་མིན་པ་ཡང་སེམས་ཀྱི་རྗེས་སུ་འབྲང་བར་ཐལ། ཁམས་གོང་འོག་གི་རིག་བྱེད་མ་ཡིན་པ་དེ་རིག་བྱེད་མ་ཡིན་པར་འདྲ་བས་གོང་མའི་རིག་བྱེད་མ་ཡིན་པ་སེམས་ཀྱི་རྗེས་སུ་འབྲང་བ་བཞིན་འདིར་ཡང་འཐད་པའི་ཕྱིར། འདོད་མི་ནུས་ཏེ། གཡེངས་དང་སེམས་པ་མེད་པ་ཡིས་ཀྱང་ཟེར་བས་གནོད་སྙམ་ན། མ་ཁྱབ་སྟེ། མཉམ་པར་མ་བཞག་པའི་རིག་བྱེད་ཀྱིས་མཉམ་པར་མ་བཞག་པའི་རིག་བྱེད་མིན་པ་འཕངས་པས་སེམས་ཀྱི་རྗེས་སུ་མི་འཇུག་པའི་ཕྱིར་ལུང་འགལ་མེད་དོ། །དེ་ཡང་འདོད་པའི་ལུས་ངག་ལ་དམིགས་པའི་སེམས་པ་རིག་བྱེད་དེ་སྟོབས་ཆེ་བས། དེས་འཕངས་པའི་རིག་བྱེད་མ་ཡིན་པ་གཡེང་བ་ལ་སོགས་པའི་དུས་སུ་འབྱུང་བ་མི་སྟོ་སྟེ། སེམས་མེད་པའི་རྗེས་སུ་བྱེད་དོ། །མཉམ་གཞག་གི་རིག་བྱེད་སེམས་པ་སྟོབས་ཆུང་བས་མཉམ་གཞག་གི་རིག་བྱེད་མ་ཡིན་པ་སེམས་ཀྱི་རྗེས་སུ་འབྲང་ངོ་། །བྱེ་བྲག་ཏུ་སྨྲ་བ་ཁྱོད་བཞིན་དུ་རྣམ་པར་རིག་བྱེད་ཀྱི་བེམས་པོ་ཡོད་ནའང་ཆོས་ཅན། སེམས་པའི་སྟོབས་མེད་པར་དེ་ཁོ་ནས་རིག་བྱེད་མིན་པ་བསྐྱེད་མི་ནུས་ཏེ། ཡང་དག་པར་ལེན་པའི་སེམས་པ་མེད་ན། རིག་བྱེད་ཀྱི་རྣམ་པ་མི་གསལ་བ་བླུན་པའི་ཕྱིར་རོ། །གནས་ཚུལ་དེ་ལྟར་ཡིན་ཀྱང་མཇུག་སྡུད་ནི་བྱེ་སྨྲའི་ལུགས་ལྟར་དབྱིབས་རྫས་སུ་བརྗོད་དོ། །གཉིས་པ་ངག་གི་རིག་(༩ན)
བྱེད་ནི། ངག་རྣམས་རིག་བྱེད་ནི་ངག་སྒྲ། །ངག་གི་རྣམ་པར་རིག་བྱེད་ནི་ཆོས་ཅན། ངག་གི་རང་བཞིན་ཡི་གེའི་སྒྲ་ཡིན་ཏེ། ཁྱུ་མཆོག་གམ་མེ་སྒྲ་སོགས་མ་ཡིན་པའི་ཕྱིར། རིག་བྱེད་མིན་པ་ནི། རྣམ་པར་གཡེངས་སེམས་མེད་པའི་ཡང་ཞེས་པར་བཤད་དོ། །མདོ་སྡེ་པ་ནི། རིག་བྱེད་མིན་པ་རྫས་སུ་མེད་དེ། དུས་འདི་ནས་བཟུང་ནས་འདི་སྲིད་དུ་སྤོང་ཞེས་ཁས་བླངས་ནས་ཕྱིན་ཆད་མི་བྱེད་པ་ཙམ་ལ་རིག་བྱེད་མ་ཡིན་པར་བརྟགས་པ་ཙམ་གྱི་ཕྱིར་དང་། འདས་པའི་འབྱུང་བ་ལ་བརྟེན་ནས་འདོགས་ཀྱང་། འདས་པའི་འབྱུང་བ་ངོ་བོ་མེད་པའི་ཕྱིར་དང་། འདས་པའི་འབྱུང་བ་ད་ལྟར་བྱུང་བ་ལྟ་བུའི་རང་གི་ངོ་བོ་མེད་པ་འདི་ནི་མཛོད་ཀྱི་གནས་ལྔ་པ་ལས་ཀྱང་བསྟན་ཏོ། །གཟུགས་སུ་རུང་བ་གཟུགས་ཀྱི་མཚན་ཉིད་ཡིན་པ་ལ་རིག་བྱེད་མིན་པ་ནི་ཐོགས་པ་མེད་པས་འདི་ལ་མེད་པའི་ཕྱིར་རོ། །ནི་ཞེས་བྱ་བའི་སྒྲ་ནི་ཁྱད་པར་དུ་བྱ་བ་ཡིན་ཏེ། ཇི་ལྟར་ལུས་ཀྱི་རྣམ་པར་རིག་བྱེད། དབྱིབས་ཀྱི་བདག་ཉིད་ཡིན་པ་ལྟར་ངག་གི་རྣམ་པར་རིག་བྱེད་ནི་དེ་ལྟར་མ་ཡིན་ནོ། །འོ་ན་ཇི་ལྟ་བུའོ་ཞེས་འདྲི་ནས། ངེས་པར་བཟུང་བའི་དོན་ཏོ། །གཉིས་པ་རིག་བྱེད་མིན་པ་ལ། རྫས་སུ་ཡོད་པའི་སྒྲུབ་བྱེད། ཁྱད་ཆོས་རྣམ་པར་བཞག་པའོ། །དང་པོ་ནི། རྣམ་གསུམ་དྲི་མེད་གཟུགས་གསུངས་དང་། །འཕེལ་དང་མ་བྱས་ལམ་སོགས་ཕྱིར། །བྱེ་བྲག་ཏུ་སྨྲ་བས། རིག་བྱེད་མིན་པའི་གཟུགས་ནི་རྫས་སུ་ཡོད་དོ་ཞེས་ཟེར་ལ། དེའི་སྒྲུབ་བྱེད་ཀྱང་། མདོར། གནས་གསུམ་གྱི་གཟུགས་ཀྱིས་རིག་བྱེད་མིན་པའི་གཟུགས་སོ། །གཟུགས་དང་རྣམ་ཤེས་ཀྱི་བར་འདས་མ་འོངས་ད་ལྟར་བྱུང་བ་གང་ལ་རྗེས་ཆགས་དང་ཁོང་ཁྲོ་མི་སྐྱེ་བ་འདི་དག་ནི་ཟག་མེད་ཀྱི་ཆོས་རྣམས་ཞེས་བྱའོ། །ཞེས་གཟུགས་ཟག་མེད་དམ་དྲི་མེད་གསུངས་པའི་ཕྱིར་དང་། དེ་ཡང་ཟག་མེད་ཀྱི་ཕུང་ལྔ་གསུངས་པས། རིག་བྱེད་མིན་པའི་ཕྱོགས་གཅིག་ཟག་མེད་ཀྱི་སྡོམ་པ་གཟུགས་ཅན་པ་ཡོད་དེ། བརྒྱ་ལ་དེ་མེད་ན་ཟག་པ་མེད་པའི་གཟུགས་ཀྱིས་ཅི་བྱེད་(༩བ)
དེ། ལམ་གྱི་བདེན་པ་ལ་སྙོམས་པར་ཞུགས་པའི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ཡིན་པར་ནི་རིགས་པ་མ་ཡིན་པའི་ཕྱིར། ཡང་མདོ་ལས། སངས་རྒྱས་ཡུལ་ཀཽ་ཤམ་བི་ན། དབྱངས་ལེན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་སྐུལ་བྱེད་ཀྱི་སངས་རྒྱས་ཀྱི་དྲུང་ག་ལ་བ་དེར་སོང་ནས་མགོ་བོས་ཕྱག་འཚལ་ཏེ། སངས་རྒྱས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ། རྫས་ལས་བྱུང་བའི་བསོད་ནམས་བགྱི་བའི་དངོས་པོ་འབྲས་བུ་ཕན་ཡོན་ཆེ་བ། གཟི་བརྗིད་ཆེ་བ། གདགས་པ་མཆིས་ལགས་སམ། སངས་རྒྱས་ཀྱིས་སྐུལ་བྱེད་ལ་ཡོད་དོ། །སྐུལ་བྱེད་བདུན་པོ་འདི་དག་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ནས་རྒྱ་ཆེ་བའི་བར་དག་ཡིན་ཏེ། དེ་དག་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་རྒྱུ་ཡང་རུང་། ཉལ་ཀྱང་རུང་། འདུག་ཀྱང་རུང་། འགྲོ་ཡང་རུང་སྟེ་རྒྱུན་མི་འཆད་པར་བསོད་ནམས་འཕེལ་བར་འགྱུར་རོ། །བདུན་གང་ཞེ་ན། སྐུལ་བྱེད་འདི་ན་རིགས་ཀྱི་བུའམ་རིགས་ཀྱི་བུ་མོ་ཕྱོགས་བཞིའི་དགེ་འདུན་ལ་ཀུན་དགའ་ར་བ་འབུལ་བར་བྱེད་དེ། དེ་ལྟར་བྱས་ན་ཉལ་ཀྱང་རུང་མི་ཉལ་ཀྱང་རུང་། གྲོང་དུ་རྒྱུ་ཡང་རུང་མི་རྒྱུ་ཡང་རུང་། འདི་ནི་རྫས་ལས་བྱུང་བ་དང་པོའོ། །དེ་ག་བཞིན་གཙུག་ལག་ཁང་བཞེངས་པ། སྟན་ནང་ཚངས་ཅན་དང་། ལྭ་བའི་སྔས་སྟན་གོར་འབུལ་བ། ནར་མར་ཆོས་སྟོན་འདྲེན་པ། འགྲོན་པོ་གློ་བུར་དུ་འོངས་བ་ལ་སྦྱིན་པ། ནད་པ་དང་ནད་གཡོག་ལ་ཟས་དང་སྨན་སྦྱིན་པ། ལྷགས་པ་དང་ཆར་སྐྱོབ་པ་སྟེ། ལྷགས་པས་ཉེན་པ་དང་། ཆར་གྱི་གཤེར་བར་བཞུགས་ཤིག་ཟེར་ནས་ཆར་སྐྱོབ་ན་བསོད་ནམས་འདི་ལ་འདི་ཙམ་བྱ་བ་ཚད་བཟུང་དུ་མེད་དེ། ཞེས་སོགས་གསུངས་པས། རྫས་ལས་བྱུང་བའི་དངོས་པོ་བདུན་དང་ལྡན་པ་ཡིད་གཞན་དང་ལྡན་ཀྱང་བསོད་ནམས་འཕེལ་བར་གསུངས་པ་དང་། རྫས་ལས་བྱུང་བ་མ་ཡིན་པའི་བསོད་ནམས་(༡༠ན)
བྱ་བའི་དངོས་པོ་བདུན་ཀྱང་དེ་འདྲ་བར་བསོད་ནམས་འཕེལ་བར་གསུངས་པ་ནི། སྐུལ་བྱེད་ཀྱིས་སངས་རྒྱས་ལ། རྫས་ལས་བྱུང་བ་མ་ཡིན་པའི་བསོད་ནམས་ཡོད་དམ་ཞེས་ཞུས་པ་ལས། ཡོད་དོ་གསུངས། སྐུལ་བྱེད་བདུན་པོ་འདི་དག་ནི། རྫས་ལས་བྱུང་བ་མ་ཡིན་པའི་བསོད་ནམས་ཏེ། སངས་རྒྱས་གྲོང་ཁྱེར་ཆེ་གེ་མོ་ཞིག་ན་བཞུགས་པ་ཐོས་ནས་དད་པ་དང་དགའ་བ་རྒྱ་ཆེ་བས་ངེས་པར་འབྱུང་བ་དང་གཅིགབདག་གི་དྲུང་དུ་གཤེགས་པ་རྩོམ་པ་ཐོས་པ་དང་། ལམ་དུ་ཞུགས་པ་ཐོས་པ། གྲོང་དུ་འབྱོན་པ་ཐོས་པ། སངས་རྒྱས་མཐོང་བ། ཆོས་ཐོས་པ། དཀོན་མཆོག་ལ་སྐྱབས་སུ་འགྲོ་ཞིང་བསླབ་པའི་གནས་འཛིན་པར་བྱེད་པ་སྟེ་བདུན་ནོ། །དད་པ་དང་། དགའ་བ་དང་། རབ་ཏུ་དགའ་བ་མཆོག་ཏུ་འབྱུང་བ་དང་། རྒྱུ་ཡང་རུང་། གཉིད་ལོག་གམ་ཉལ་བ་སོགས་ནི་རེ་རེ་ལའང་སྦྱར་རོ། །དེ་ལྟར་གསུངས་པ་ནི་རྣམ་རིག་མེད་པའི་གཟུགས་མེད་ན་ཆོས་ཅན། མི་དགེ་བ་དང་ལུང་མ་བསྟན་ནམ་གཡེང་བ་དང་གཉིད་ལོག་པའི་དུས་སུའང་མི་འཕེལ་བར་ཐལ། རྣམ་རིག་མིན་པའི་གཟུགས་མེད་པའི་ཕྱིར་ཞེས་སོ། །འདོད་མི་ནུས་པས་ཡོད་རིགས་སོ། །ཡང་རང་གིས་མ་བྱས་ལ་གཞན་བྱེད་དུ་བཅུག་པའི་ལས་ལམ་འགྲུབ་པ་མི་འགྱུར་ཏེ། རིག་བྱེད་མིན་པའི་གཟུགས་མེད་པའི་ཕྱིར་རོ། །མ་བྱས་པའི་ལས་ལམ་རིག་བྱེད་མིན་གཟུགས་ཡོད་པའི་དབང་ལས་འཇོག་གི། དེ་ལྟར་མིན་ན་བསྒོ་བ་ཙམ་ནི་ལས་ལམ་དུ་མི་རུང་སྟེ། སྲོག་གཅོད་སོགས་ལས་དེ་མ་བྱས་པའི་ཕྱིར། བསྒོ་བྱ་དེས་བྱས་ཀྱང་སྒོ་བྱེད་ཀྱི་རང་ངོས་ནས་བསྒོ་བྱས་སྔར་ལས་ལམ་མ་བྱས་དུས་དང་། རང་གི་ངོ་བོ་ལ་ཁྱད་པར་མེད་པའི་ཕྱིར་རོ། །དེས་ན་བསྒོ་བྱས་བསྒོས་ནས་སྒོ་བྱེད་ཀྱི་སྦྱོར་བ་མཐར་ཐུག་པ་ན། བསྒོ་བྱས་ལས་ལམ་དུ་གྱུར་པའི་རིག་བྱེད་མིན་གཟུགས་སྐྱེས་(༡༠བ)
པའོ། །སོགས་ཕྱིར་ཞེས་པ་ནི། ཆོས་ཀྱི་སྐྱེ་མཆེད་པའི་གཟུགས་ཡོད་དེ། མེད་ན། བཅོམ་ལྡན་འདས་ཀྱིས་ཆོས་ནི་ཕྱིའི་སྐྱེ་མཆེད་ཡིན་ཏེ། སྐྱེ་མཆེད་བཅུ་གཅིག་གིས་མ་བསྡུས་པའི་གཟུགས་ཅན་མ་ཡིན་པའོ་ཞེས་གསུང་འོས་པ་ལས་མ་གསུངས་པར་བཅོམ་ལྡན་འདས་ཀྱིས། དགེ་སློང་ཆོས་ནི་ཕྱིའི་སྐྱེ་མཆེད་ཡིན་ཏེ། སྐྱེ་མཆེད་བཅུ་གཅིག་གིས་མ་བསྡུས་པ་བསྟན་མེད་ཐོགས་པ་མེད་པའོ་ཞེས་གསུངས་པའི་ཕྱིར་རོ། །གཞན་ཡང་རིག་བྱེད་མེད་པའི་གཟུགས་མེད་ན་ཆོས་ཅན། འཕགས་པའི་ལམ་དུ་ཡན་ལག་བརྒྱད་པར་ཡང་མི་འགྱུར་ཏེ། སྙོམས་པར་ཞུགས་པ་ལ་རྫུན་ལ་སོགས་པ་སྤོང་བའི་ངག་དང་། སྲོག་གཅོད་ལ་སོགས་པ་སྤོང་བའི་ལས་ཀྱི་མཐའ་དང་། ངག་དང་ལས་ཀྱི་མཐའ་དང་། མཚུངས་ལྡན་གྱིས་མ་ཆགས་པའི་འཚོ་བ་རྣམས་མི་རུང་བའི་ཕྱིར། དེ་ལ་གཞན་དག་འཕགས་ལམ་ན་རིག་བྱེད་མིན་པའི་གཟུགས་དག་སོགས་གསུམ་པོ་དེ་ཡོད་པ་མིན་ཏེ། ལུང་ལས། དེ་ལྟར་ཤེས་ཤིང་དེ་ལྟར་མཐོང་བ་དེའི་ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་བསྒོམ་པ་ཡོངས་སུ་རྫོགས་པར་འགྱུར་རོ། །ཞེས་པས། འདིར་ལྔ་གསུངས་པ་བཞིན་གསུམ་གསུང་བར་རིགས་པ་ལས་མ་གསུངས་པའི་ཕྱིར་ཤེས་ཤིང་མཐོང་བའི་སྐབས་ན་རིག་མིན་གྱི་གཟུགས་མེད་དོ། །འདིའི་དག་ལས་འཚོ་བ་གསུམ་ནི། ལམ་ལ་སྙོམས་པར་འཇུག་པའི་དུས་ཀྱི་སྔོན་རོལ་ཏུ་ཡོངས་སུ་དག་ཅིང་ཡོངས་སུ་བྱང་བ་ཡིན་ནོ་ཞེས་གསུངས་པས་ཀྱང་འཕགས་ལམ་ན་དེར་གྱུར་གྱི་རིག་བྱེད་མིན་པའི་གཟུགས་མེད་དོ་ཟེར་རོ། །ལུང་སྔ་མ་དྲངས་པ་དེའི་དུས་སུ་གསུམ་པོ་དེ་མ་གསུངས་པ་ནི། དེའི་དུས་སུ་མེད་ནས་མ་གསུངས་པ་མིན། དེའི་དུས་སུ་(༡༡ན)
ཡོད་ཀྱང་སྔར་འཇིག་རྟེན་པའི་ལམ་གྱི་འདོད་ཆགས་དང་བྲལ་བར་བྱ་བའི་དུས་སུ་ཡོད་པ་ལ་དགོངས་ནས་ཕྱིས་མ་གསུངས་པ་ཡིན་ལ། ལུང་ཕྱི་མ་ནི། འཇིག་རྟེན་པའི་ལམ་གྱི་འདོད་ཆགས་དང་བྲལ་བའི་གནས་སྐབས་ཀྱི་ངག་ལ་སོགས་པའི་ངོ་བོ་ཉིད་ཀྱི་རིག་བྱེད་ཀྱིས་གཟུགས་ལ་དགོངས་ནས་གསུངས་པ་ཡིན་གྱི། ལམ་གྱི་ཚེ་ན་ལམ་དེས་བསྡུས་པའི་ངག་ལ་སོགས་པའི་རྣམ་པར་རིག་བྱེད་མིན་པའི་གཟུགས་མེད་པའི་ཕྱིར་ནི་མ་ཡིན་ནོ། །རྣམ་པར་རིག་བྱེད་མིན་པའི་གཟུགས་མེད་ན་ཆོས་ཅན། ཡང་དག་པར་བླངས་པའི་འོག་ཏུ་སོ་སོར་ཐར་པའི་སྡོམ་པ་དང་། དགེ་སློང་ཕ་མ་ལ་སོགས་པ་ལ་ཡང་མེད་པར་ཐལ། སྡོམ་པ་རིག་བྱེད་མིན་པ་ནི་སེམས་པ་ཡིན་པ་གང་ཞིགསེམས་པ་གཡེངས་པ་དང་གཉིད་ལོག་པ་ལྟ་བུ་ཡིད་གཞན་དང་ལྡན་པའི་དུས་སུ་མེད་པའི་ཕྱིར་ཞེས་རིགས་པས་བསྒྲུབས་ནས། ལུང་གིས་སྒྲུབ་པ་ནི། སོ་ཐར་གྱི་སྡོམ་པ་ཆུ་ལོན་དུ་གསུངས་པ་ཆོས་ཅན། རིག་བྱེད་མིན་པའི་གཟུགས་ཡོད་ན་དེ་ལ་འཐད་ཀྱི། དེ་མེད་ན་གསུངས་པ་མི་འཐད་དེ། ཇི་སྐད་དུ། སྤོང་བ་ལ་ནི་འཆལ་པའི་ཚུལ་ཁྲིམས་ཀྱི་གེགས་བྱེད་པའི་ཆུ་ལོན་ནོ། །ཞེས་གསུངས་པའི་ཕྱིར་གྲུབ་བོ་ཟེར་རོ། །ལུང་གིས་རིག་མིན་གྱི་གཟུགས་སྒྲུབ་པ་འདི་ལ། མདོ་སྡེ་པ་ན་རེ། ལུང་འདི་རིག་བྱེད་མིན་པའི་གཟུགས་ལ་དགོངས་པ་མིན་ཏེ། ལུང་གི་དོན་ནི་སྤྱིར་དོན་སྣ་ཚོགས་པ་མང་པོ་ལ་འཇུག་པའི་ཕྱིར་ཞེས་ཟེར་རོ། །ལུང་དོན་སྣ་ཚོགས་པར་ཇི་ལྟར་འགྱུར་ན། གཟུགས་གསུམ་གསུང་པའི་གསུམ་པ་བསྟན་མེད་ཐོགས་མེད་ཀྱི་གཟུགས་ལ། རྣལ་འབྱོར་སྤྱོད་པ་པ་ནི། བསྟན་མེད་ཐོགས་མེད་ཀྱི་གཟུགས་གསུངས་པ་ཆོས་ཅན། རྣམ་རིག་མིན་པའི་གཟུགས་ལ་དགོངས་པ་མིན་ཏེ། མི་སྡུག་པའི་ཏིང་ངེ་འཛིན་གྱི་མཐུས། དེའི་ཡུལ་ཀེང་རུས་ཀྱི་གཟུགས་སུ་སྐྱེས་(༡༡བ)
པ་ལྟ་བུ་ཡིན་པའི་ཕྱིར། དེ་བསྟན་མེད་ཡིན་ཏེ། དབང་པོའི་ཡུལ་མ་ཡིན་པའི་ཕྱིར། ཐོགས་མེད་ཡིན་ཏེ། ཡུལ་ལ་མི་སྒྲིབ་པའི་ཕྱིར། ཏིང་ངེ་འཛིན་གྱི་སྤྱོད་ཡུལ་གྱི་གཟུགས་དེ་ཆོས་ཅན། དེ་བསྟན་མེད་ཐོགས་མེད་ཡིན་ཀྱང་གཟུགས་སུ་འཇོག་པ་སྟེ། ཆ་དང་བཅས་ཤིང་ཕྱོགས་དང་བཅས་པ་ཡིན་པའི་ཕྱིར། ཏིང་ངེ་འཛིན་གྱི་ཡུལ་གྱི་གཟུགས་དེ་གཟུགས་མ་ཡིན་ན་ནི་རིག་བྱེད་མིན་པའི་གཟུགས་ཀྱང་གཟུགས་མ་ཡིན་པར་མཚུངས་སོ། །ཡང་ཟག་མེད་ཀྱི་གཟུགས་གསུངས་པ་ཡང་ཟག་མེད་ཀྱི་སྡོམ་པ་རིག་བྱེད་མིན་པ་ལ་མ་དགོངས། འཕགས་པ་རྣལ་འབྱོར་ལ་སྤྱོད་པའི་ལམ་མངོན་དུ་བྱེད་པ་ན་ཟག་པ་མེད་པའི་ཏིང་ངེ་འཛིན་གྱི་མཐུ་ལས་སྐྱེས་པའི་ཟག་པ་མེད་པའི་གཟུགས་སུ་འདོད་དེ། ཡང་དག་པའི་ལྟ་བ་ལ་མཉམ་པར་བཞག་པས་ཟག་མེད་ཀྱི་ཚུལ་ཁྲིམས་ཐོབ་པའི་ཕྱིར། ཞེས་ལུང་དོན་གཞན་དུ་འདྲེན་ནོ། །དེ་ལ་མདོ་སྡེ་པ་དཔེ་སྟོན་པ་ན་རེ། ཟག་མེད་ཀྱི་གཟུགས་གསུང་བའི་དགོངས་པ་ནི་ཆོས་ཅན། དེ་ལྟར་མ་ཡིན་ཏེ། དགྲ་བཅོམ་པའི་ནང་མིག་གི་སྐྱེ་མཆེད་ཀྱི་གཟུགས་དང་། ཕྱི་རྩིག་པ་སོགས་ཟག་པའི་རྟེན་མ་ཡིན་པའི་ཕྱིར། ཟག་མེད་ཀྱི་གཟུགས་ནི་དེ་ལ་དགོངས་སོ་ཞེས་ཟེར་རོ། །འོ་ན་ནི་དཔེ་སྟོན་པའི་ལུགས་དེ་ཆོས་ཅན། མདོ་དང་འགལ་ཏེ། མདོ་ལས། ཟག་པ་དང་བཅས་པའི་ཆོས་རྣམས་གང་ཞེ་ན། མིག་ཇི་སྙེད་པ་དང་། གཟུགས་ཇི་སྙེད་པ་དག་ཡིན་ནོ། །ཞེས་ཁྱད་མེད་པར་བསྟན་པའི་ཕྱིར། དཔེ་སྟོན་པའི་ལན་ནི། དེ་ཐམས་ཅད་ཁྱད་མེད་དུ་ཟག་བཅས་སུ་གསུངས་པ་ཆོས་ཅན། དགོངས་པ་གཞན་ཡིན་ཏེ། ཟག་པའི་གཉེན་པོ་མ་ཡིན་པ་ལ་དགོངས་པའི་ཕྱིར་དང་། ཟག་པའི་གཉེན་པོ་ནི་སེམས་དང་སེམས་བྱུང་གི་ཁྱད་པར་ཡིན་པའི་ཕྱིར་ཞེས་ཟེར་རོ། །འོ་ན་དགྲ་བཅོམ་པའི་གཟུགས་སོགས་ཆོས་ཅན། ཟག་བཅས་ཟག་མེད་གཉིས་ཀ་ཡིན་པར་ཐལ། ཟག་པའི་གཉེན་པོ་མ་(༡༢ན)
ཡིན་པར་ཟག་བཅས་དང་། ཟག་པའི་རྟེན་མ་ཡིན་པས་ཟག་མེད་ཡིན་པའི་ཕྱིར། འདོད་ན། གཟུགས་ཀྱི་མཚན་གཞི་གཅིག་ལ་ཆོས་ཅན། མི་མཐུན་པའི་མཚན་ཉིད་གཉིས་ཕན་ཚུན་འཆོལ་བར་མཚན་ཉིད་དུ་སོང་བར་ཐལ། གཞི་གཅིག་པོ་དེ་ལ་མཚན་ཉིད་གཉིས་ཀ་ཡོད་པའི་ཕྱིར་རོ་ཞེས་བརྗོད་དོ། །དེ་ལ་དཔེ་སྟོན་པའི་ལན་ནི། མཚན་ཉིད་འཆོལ་བར་མི་འགྱུར་ཏེ། ཟག་པའི་གཉེན་པོ་མ་ཡིན་པའི་ལྡོག་པ་ནས་ཟག་བཅས་ཁོ་ན་དང་། ཟག་པའི་རྟེན་མ་ཡིན་པའི་ལྡོག་པ་ནས་ཟག་མེད་ཁོ་ན་ཡིན་པའི་ཕྱིར། ཡང་གཟུགས་སོགས་ཆོས་ཅན། མཐའ་གཅིག་ཏུ་ཟག་བཅས་མ་ཡིན་ཏེ། ཡིན་ན་ཁྱད་པར་དུ་འབྱེད་མི་དགོས་པར་གཟུགས་ནི་སེམས་ཀྱི་ཐ་བ་དང་སྦགས་པའི་གཞི་ཡིན་ཅེས་བརྗོད་རིགས་པར་ཐལ་བ་ལས། དེ་སྐད་དུ་མ་གསུངས་པའི་ཕྱིར་ཏེ། མདོ་ལས། གཟུགས་ཟག་པ་དང་བཅས་པ་ཉེ་བར་ལེན་པར་འགྱུར་བ་གང་དག་ཡིན་པ་དེ་དག་ནི་སེམས་ཀྱི་ཐ་བ་དང་སྦགས་པའི་གཞི་ཡིན་ནོ། །ཞེས་ཁྱད་ཕྱེས་ཏེ་གསུངས་པའི་ཕྱིར་རོ། །བསོད་ནམས་མངོན་པར་འཕེལ་བར་གསུངས་པའི་དགོངས་པ་ཡང་། སྔོན་གྱི་སློབ་དཔོན་དག་ན་རེ། རྫས་ལས་བྱུང་བའི་བསོད་ནམས་གསུངས་པ་དེ་ཡང་རིག་བྱེད་མ་ཡིན་པའི་གཟུགས་ལ་དགོངས་པ་མིན། སྦྱིན་པར་བྱ་བའི་ཡུལ་ཁྱད་པར་ཅན་དང་། ཕན་བཏགས་པའི་ཁྱད་པར་དང་། རང་གི་སེམས་དད་པ་ཁྱད་པར་ཅན་གྱི་བག་ཆགས་བཞག་པའི་སྟོབས་བསྐྱེད་པས། བསོད་ནམས་ཚད་མེད་རྒྱུན་ཆགས་སུ་འབྱུང་བ་ལ་དགོངས་ཏེ། སྦྱིན་པ་པོ་རྣམས་ཀྱི་སྦྱིན་པ་ལེན་པ་པོ་རྣམས་ཀྱིས་སྤྱད་པ་ན། ལེན་པ་པོ་ལ་བསམ་གཏན་དང་ཚད་མེད་སོགས་ཡོན་ཏན་གྱི་ཁྱད་པར་དང་། ལུས་དང་ཁ་དོག་དང་སྟོབས་སོགས་ཀྱི་ཕན་བཏགས་པའི་ཁྱད་པར་གྱིས། སྦྱིན་པ་པོ་གཡེང་བ་དང་མི་དགེ་བ་དང་ལུང་མ་བསྟན་གྱི་ཡིད་གཞན་དང་ལྡན་པ་ནའང་། ཚེ་ཕྱི་མ་ལ་འབྲས་(༡༢བ)
བུ་ཆེས་མང་བ་འགྲུབ་ནུས་པ་ནི། ལེན་པ་པོ་ཁྱད་པར་ཅན་ལ་དམིགས་པའི་སྦྱིན་པའི་སེམས་པས་བསྒོས་པའི་རྒྱུད་ཀྱི་འགྱུར་བ་འབྲས་བུ་རྒྱ་ཆེན་པོ་འགྲུབ་ཀྱང་། རྟོགས་དཀའ་བའི་ཁྱད་པར་ཕྲ་མོ་ཐོབ་པ་འདི་ནི་མི་གསལ་བས་དེ་བཞིན་གཤེགས་པའི་ཡེ་ཤེས་ཀྱི་ཐུགས་སུ་ཆུད་དེ། འདི་ནི་འདིའི་ཆོས་ཉིད་དུ་གསུངས་པས། བསོད་ནམས་འཕེལ་ཞེས་བྱ་བ་ནི་འདི་ལ་དགོངས་ཏེ་གསུངས་སྲིད་དོ་ཞེས་སྟོན་པར་བྱེད་དོ། །དེ་ལ་ཞིང་ས་ཁྱད་པར་ཅན་གྱི་རྒྱུད་གཞན་གྱི་ཁྱད་པར་གྱིས། གཡེང་སོགས་ཀྱི་ཡིད་གཞན་དང་ལྡན་པའི་སྦྱིན་པོ་ལ་འབྲས་བུ་མང་པོ་འགྲུབ་པའི་རྒྱུད་གཞན་ཡོངས་སུ་འགྱུར་བ་མི་འཐད་པར་ཐལ། རྒྱུད་གཞན་གྱི་ཁྱད་པར་གྱིས་རྒྱུད་གཞན་ཁྱད་པར་དུ་མི་འགྱུར་བའི་ཕྱིར་སྙམ་ན། མ་གྲུབ་སྟེ། འདི་གྲུབ་ན་རྒྱུད་གཞན་གྱི་ཁྱད་པར་གྱིས་རྒྱུད་གཞན་ལ་རིག་བྱེད་མ་ཡིན་པའི་གཟུགས་ཀྱི་ཁྱད་པར་ཡང་མི་འགྲུབ་པར་མཚུངས་པའི་ཕྱིར་རོ། །ཡང་རྫས་ལས་བྱུང་བ་ལ་ལྟ་གཞན་ལ་ཕན་བཏགས་ཡོད་པས་རྒྱུད་འགྱུར་བའི་ཁྱད་པར་འབྱུང་སྲིད་དུ་ཆུག་ཀྱང་། རྫས་ལས་བྱུང་བ་མ་ཡིན་པའི་བུདྡྷ་བཞུགས་པ་ལ། དང་བ་སོགས་ལས་ཕྱི་མ་ལ་འབྲས་བུ་མང་པོ་འགྲུབ་པར་མི་འགྱུར་སྙམ་ན། ཕན་བཏགས་པ་མེད་ཀྱང་དེ་པ་དང་ཉན་ཐོས་ལ་རྨི་ལམ་ན་ཡང་དང་བ་གོམས་པས་འབྲས་བུ་རྒྱ་ཆེན་པོ་འབྱུང་ན་མངོན་སུམ་དུ་སངས་རྒྱས་ལ་དང་བ་གོམས་པས་འབྲས་བུ་རྒྱ་ཆེན་པོ་འབྱུང་བ་ཡིན་ནོ། །རྣམ་པར་རིག་མིན་གྱི་གཟུགས་ཁས་ལེན་པའི་བྱེ་སྨྲས་ནི། བུདྡྷ་ལ་དང་བ་སོགས་རྫས་ལས་བྱུང་བ་མ་ཡིན་པ་ལ་རྣམ་རིག་མིན་པའི་གཟུགས་བསྐྱེད་པ་མི་འཐད་དེ། རིག་མིན་རྒྱུ་ལ་རག་ཙམ་ན། རྒྱུ་རིག་བྱེད་མེད་པས་འབྲས་བུ་རིག་མིན་མི་འོང་བའི་ཕྱིར་སྙམ་པ་ལ། རིག་བྱེད་མིན་པ་རྫས་སུ་སྨྲ་བ་གཞན་དག་ན་རེ། རྫས་ལས་བྱུང་བ་དང་རྫས་ལས་བྱུང་བ་མ་ཡིན་པ་གཉིས་ཀ་ལ་སེམས་པ་ཡང་ཡང་གོམས་པས་འབྲས་བུ་མང་པོ་འཕེལ། (༡༣ན)
གཉིས་ཀ་འབྲས་བུ་མང་པོ་འཕེལ་བའི་རྒྱུ་མཚན་ནི་སེམས་པ་གོམས་པ་དེ་ཐུན་མོང་གི་ཆོས་ཡིན་པའི་ཕྱིར་ནའོ་ཞེས་ཟེར་རོ། །རྩོད་ལན་འདིའི་འབྲེལ་བ་ལ་དཔྱད་ན། རིག་མིན་གྱི་གཟུགས་རིག་བྱེད་ལ་རག་མི་དགོས་པའི་ཁྱབ་པ་འཆའ་བའམ། ཡང་ན་རིག་མིན་རྫས་སུ་སྨྲའང་གཟུགས་སུ་མི་སྨྲ་བ་ཞིག་ཡིན། བརྟགས་དགོས་སོ། །འོ་ན་ཞིང་བཟང་ངན་མེད། ཕན་བཏགས་མ་བཏགས་མེད་པར་རང་གི་དད་པའི་སེམས་གོམས་པ་ཁོ་ནས་འབྲས་བུ་དཔག་མེད་འབྱུང་ན་མདོ་དང་འགལ་ཏེ། དཀོན་བརྩེགས་ཀྱི་རིན་པོ་ཆེའི་ཕུང་པོའི་མདོ་ལས། དྲག་ཤུལ་ཅན། དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་དང་ལྡན་པས་གང་གི་བསོད་སྙོམས་ཡོངས་སུ་ཟོས་ནས་སེམས་ཀྱི་ཏིང་ངེ་འཛིན་ལུས་ཀྱིས་མངོན་དུ་བྱས་ཏེ་རྫོགས་པར་བྱས་ནས་གནས་ན། དེའི་གཞི་ལས་སྦྱིན་བདག་གི་བསོད་ནམས་ཀྱི་རྒྱུ་མཐུན་པ་དང་། དགེ་བའི་རྒྱུ་མཐུན་པ་དང་། བདེ་བའི་གཞི་ཚད་མེད་པ་རེ་བར་བྱའོ། །ཞེས་གསུངས་པའི་ཕྱིར། ལེན་པོས་ཆོས་སྤྱོད་མང་པོ་མ་བྱས་པར་ཉལ་ནས་བསྡད་པ་དང་། ལེན་པོས་ཆོས་སྤྱོད་མང་པོ་བྱེད་པ་ལ་སྦྱིན་པ་གཉིས་འབྲས་བུ་མཉམ་པར་ཐལ་བ་ལ། འདོད་ན། མདོ་འདིས་བཀག་འདུག་གོ། །དེས་ན་མདོ་འདི་ལྟར་ནའང་། བསོད་ནམས་འཕེལ་བ་ལ་རིག་མིན་གྱི་གཟུགས་མེད་ཅིང་། སྦྱིན་པ་པོའི་སེམས་དད་པ་ཆེ་ཆུང་ལ་མ་བལྟོས་པར་གཏོང་པའི་ཡོན་གནས་མཆོག་དམན་གྱིས་གཏོང་པོ་ལའང་བསོད་ནམས་ཀྱི་འབྲས་བུ་ཆེ་ཆུང་འབྱུང་བར་བཤད་པའི་ཕྱིར། གཏོང་ཡུལ་གྱི་རྒྱུད་ཀྱི་འགྱུར་བས་གཏོང་པོའི་རྒྱུད་ཡོངས་སུ་འགྱུར་བའི་ཁྱད་པར་ནི་རིགས་པས་གྲུབ་བོ། །ཡང་བསྐུལ་བའི་དུས་ན་སྐུལ་མཁན་ལ་སེམས་པ་ཡོད་ཀྱང་བསད་པ་མེད། ཕྱིས་བསད་པའི་དུས་ན་བདག་ལ་སེམས་པ་མེད་པས། རིག་བྱེད་མིན་པའི་གཟུགས་མེད་ན་ལས་ཀྱི་ལམ་མེད་པར་ཐལ་བ་ལས། ཡོད་དགོས་པས་དེ་ནི་རིག་(༡༣བ)
བྱེད་མ་ཡིན་པའི་གཟུགས་སོ་ཞེས་སྨྲ་བ་ལ་ཡང་སྙིང་པོ་མ་མཐོང་སྟེ། སྐུལ་མཁན་དེས་བསྐུལ་ནས་སྐུལ་པོས་གཞན་ལ་གནོད་པའི་བྱེ་བྲག་གིས་སྐུལ་མཁན་གྱི་རྒྱུད་ཡོངས་འགྱུར་གྱིས་འབྲས་བུ་རྒྱ་ཆེན་པོ་འབྱུང་ཡང་རྟོགས་དཀའ་བའི་ཁྱད་པར་ཕྲ་མོ་འགྲུབ་ནུས་པའི་རྒྱུད་སྐྱེ་བ་ཡིན་ནོ། །རང་གི་གསོད་པ་རང་ལ་ཡང་དངོས་གཞི་མ་གྲུབ་ན་སྦྱོར་པའི་སྡིག་པ་ལས་མེད། དངོས་གཞི་ཡོངས་སུ་རྫོགས་ན་དངོས་གཞིའི་སྡིག་པ་ཡོད་ལ། སྐུལ་མཁན་གྱི་སོང་བས་སྐུལ་པོས་གནོད་པ་བྱས་པའི་ཁྱད་པར་ལས། སྐུལ་མཁན་གྱི་འདོད་པའི་འབྲས་བུ་མང་པོ་འགྲུབ་པའི་ནུས་པ་རྒྱུད་ཡོངས་སུ་འགྱུར་བའི་འབྲས་བུ་འདི་ནི། རྒྱུ་ལས་ཀྱི་ལམ་ཞེས་བྱ་སྟེ། འབྲས་བུ་མང་པོ་སྒྲུབ་པའི་ནུས་པ་ལ་རྒྱུ་ལས་ལམ་དུ་བཏགས་པའི་ཕྱིར་རོ། །ལུས་ངག་ལས་ཀྱི་ལམ་དུ་འཇོག་པ་དེ་ཡང་རྒྱུ་སེམས་པ་ལས་ཀྱི་ལམ་ཡིན་ཙམ་ན། རྒྱུ་མིང་འབྲས་བུ་ལ་འདོགས་པའོ། །དཔེར་ན། བྱེ་བྲག་སྨྲ་བས། རྣམ་པར་རིག་བྱེད་མ་ཡིན་པ་ནི་ལས་ཀྱི་ལམ་ཞེས་བྱ་སྟེ། འབྲས་བུ་རྒྱུར་བཏགས་པའི་ཕྱིར། ཞེས་བརྗོད་པ་བཞིན་ནོ། །གནས་བརྟན་བཙུན་པ་ན་རེ། རིག་མིན་གྱི་གཟུགས་མེད་ཀྱང་མ་བྱས་པའི་ལས་ནི་ཡོད་དེ། ཟིན་པའི་ཕུང་པོ་ངག་ལ་མ་འོངས་པའི་དུས་སུ་གསད་པར་བྱའོ། །ད་ལྟར་གསོད་དོ། །འདས་པའི་དུས་སུ་བསད་དོ་ཞེས་དུས་གསུམ་དུ་སེམས་པས་གསོད་པོ་ལ་སྲོག་གཅོད་པའི་ཁ་ན་མ་ཐོ་བར་འགྱུར་རོ་ཞེས་ཟེར་རོ། །སློབ་དཔོན་གྱིས། བཙུན་པའི་ལུགས་འདི་ལ་མི་རིགས་པ་དང་། རིགས་པའི་ཆ་གཉིས་ཡོད་པ་ལས། དང་པོ་ནི། བདག་གི་མ་སོད་ཅིག་པར་བསྐུལ་ནས་མ་གསོད་པ་ན། དེ་མ་འོངས་པའི་དུས་སུ་བསད་པར་བྱའོ་སྙམ་ནས། མི་དེས་སྲོག་ཆགས་གཞན་ཞིག་གསོད་པའི་དུས་སུ་ང་ད་ལྟར་མ་གསོད་དོ་སྙམ། མི་དེས་སྲོག་ཆགས་གཞན་ཞིག་བསད་ཟིན་ཙམ་ན་ངས་མ་གསོད་སྙམ་པའི་སེམས་པ་གསུམ་(༡༤ན)
སྐྱེས་ཀྱང་དོན་ལ་མ་མ་བསད་པས་མཚམས་མེད་ཀྱི་ལས་ལམ་མི་འབྱུང་བ་ཡིན་ནོ། །གཉིས་པ་ནི། ལས་ཀྱི་ལམ་དུ་འགྱུར་བ་ལ་བདག་ཉིད་ཀྱིས་སྐུལ་བ་བཞིན་དུ་མི་དེས་མ་བསད་པ་ནི་སེམས་པ་གསུམ་ཚང་དགོས་པ་འདི་རིགས་ཏེ། སྦྱོར་དངོས་རྗེས་གསུམ་གྱི་ལས་ལམ་རྫོགས་དགོས་པའི་ཕྱིར་རོ། །དེ་ནི་རིག་བྱེད་མ་ཡིན་པའི་གཟུགས་རྟོགས་དཀའ་བ་བཞིན་མི་མངོན་པར་རྒྱུད་ཡོངས་སུ་འགྱུར་བའི་ཁྱད་པར་ཀྱང་རྟོགས་དཀའ་ན། རྟོགས་དཀའ་བ་ལ་ཁྱད་མེད་བཞིན་དུ་རྣམ་རིག་མིན་གཟུགས་ཀྱི་ཕྱོགས་ལ་ཞེ་སྡང་བའི་རྒྱུ་མཚན་གང་ཞེ་ན། རྒྱུད་ཡོངས་འགྱུར་གྱི་ཕྱོགས་བཟུང་ནས་རིག་མིན་གྱི་གཟུགས་ལ་སྡང་བ་མེད་མོད། འོན་ཀྱང་སེམས་སྔོན་དུ་འགྲོ་བའི་ལུས་ཀྱི་སྦྱོར་བས་ལས་ལམ་དངོས་གཞི་གྲུབ་ནས། ད་དུང་དེས་མ་ཚིམ་པར་ལུས་སེམས་ཀྱི་སྦྱོར་བ་དེ་ལས་ཐ་དད་པའི་རིགས་བྱེད་མིན་གཟུགས་སྐྱེའོ་ཞེས་པ་ལ་ནི་དགའ་བ་ཅི་ཡང་མ་སྐྱེས་སོ། །ལུས་ངག་གི་ལས་བྱས་པའི་སྦྱོར་བ་ལས་དངོས་གཞི་གྲུབ་པ་ཁོ་ན་ལ་སྦྱོར་བ་དེའི་རྒྱུ་ཅན་གྱི་འབྲས་བུའི་རྒྱུད་ཡོངས་སུ་འགྱུར་བ་འབྱུང་ངོ་། །ཞེས་འདི་ལ་ནི་ཁོ་བོ་ཅག་དགའ་བར་འགྱུར་ཏེ། སེམས་དང་སེམས་ལས་བྱུང་བའི་རྒྱུད་ལས་ཚེ་ཕྱི་མ་ལ་འབྲས་བུ་འབྱུང་བའི་ཕྱིར་དང་། རིག་མིན་གྱི་གཟུགས་ལས་འབྲས་བུ་འབྱུང་ན་ཤི་འཕོས་པས་བཏང་ཙ་ན་རྒྱུ་མེད་པས་འབྲས་བུ་མི་སྐྱེ་བར་ཐལ་བའི་ཕྱིར་རོ། །འདི་ནི་གོང་དུའང་བཤད་ཟིན་ཏོ། །ཆོས་ཀྱི་སྐྱེ་མཆེད་གཟུགས་ཅན་མ་ཡིན་པར་མ་གསུངས་པས་རིག་མིན་གྱི་གཟུགས་སུ་ཡོད་དམ་སྙམ་པ་ནི་མིན་ཏེ། བསམ་གཏན་པ་རྣམས་ཀྱི་ཏིང་ངེ་འཛིན་གྱི་མཐུས་ཏིང་ངེ་འཛིན་གྱི་གཟུགས་འབྱུང་བ་དེ་བསྟན་མེད་ཐོགས་མེད་ཀྱི་གཟུགས་ཡིན། དེ་ཆོས་ཀྱི་སྐྱེ་མཆེད་དུ་ཡང་གཏོགས་པའོ། །རིག་མིན་གྱི་གཟུགས་མེད་ན་འཕགས་ལམ་ཡན་(༡༤བ)
ལག་བརྒྱད་པར་མི་འགྱུར་ཞེས་སྨྲ་བ་ནི། དེ་ལྟར་ན་སྙོམས་པར་ཞུགས་པ་ན་ཡང་དག་པའི་ངག་སོགས་ཡོད་པར་ཁྱོད་སྨྲོས་ཤིགཁོ་ན་རེ། དེའི་དུས་ངག་སྨྲ་བ་དང་། ཆོས་ཀྱི་ལས་སོགས་བྱེད་པར་སྨྲ་བ་ནི་མ་ཡིན། འོ་ན་ཇི་ལྟར་ཞེ་ན། སྲོག་གཅོད་སོགས་དང་འགལ་བ་སྤོང་བ་ལ་ཆུ་ལོན་ལྟ་བུའི་རྣམ་རིག་མིན་པ་ཟག་མེད་ཐོབ་པའི་ཕྱིར། སྙོམས་འཇུག་ལས་ལངས་ན་ཡང་ལོག་པའི་ངག་སོགས་ལ་མི་འཇུག་ཅིང་། ཡང་དག་པའི་ངག་སོགས་ལ་འཇུག་པར་འགྱུར་བ་དེའི་ཕྱིར་རྒྱུ་མཚན་རིག་བྱེད་མིན་པ་ལ་རྒྱུ་མཚན་ཡང་དག་པའི་ངག་སོགས་ཉེ་བར་བཏགས་ནས་རིག་བྱེད་མིན་པ་ལ་ཡང་དག་པའི་ངག་སོགས་སུ་བཤད་དོ། །དེ་ལྟར་ན་གོ། རིག་མིན་མེད་བཞིན་དུ་སྲོག་གཅོད་སོགས་སྤོང་བའི་བསམ་པ་དང་། བསམ་པ་དང་མཐུན་པའི་ལུས་རྟེན་ཐོབ་པའི་ཕྱིར། སྙོམས་འཇུག་ལས་ལངས་ན་ཡང་ལོག་པའི་ངག་སོགས་ལ་མི་འཇུག་ཅིང་། ཡང་དག་པའི་ངག་སོགས་ལ་འཇུག་པར་འགྱུར་བ་དེའི་ཕྱིར། རྒྱུ་མཚན་བསམ་པའམ་ལུས་ལ་རྒྱུ་མཚན་ཅན་ཡང་དག་པའི་ངག་སོགས་བཏགས་ནས་ལམ་གྱི་ཡན་ལག་བརྒྱད་བཞག་པར་ཅིས་མི་བཟུང་། གཞན་དག་ན་རེ། ལོག་པའི་ངག་སོགས་མི་བྱེད་ཙམ་ཆོས་ཅན། འཕགས་ལམ་གྱི་ཡན་ལག་ཡིན་ཏེ། འཕགས་ལམ་གྱི་མཐུས་ངེས་པར་མི་བྱེད་པ་ཐོབ་པའི་ཕྱིར། ལམ་གྱི་ཡན་ལག་ཏུ་གྱུར་པའི་ལོག་པའི་ངག་སོགས་མི་བྱེད་པ་ཙམ་ཆོས་ཅན། ཟག་པ་མེད་པ་ཡིན་ཏེ། ཟག་མེད་ལམ་ལ་བརྟེན་ནས་ཐོབ་པའི་ཕྱིར། ལོག་པའི་ངག་སོགས་མི་བྱེད་པ་ཙམ་རྫས་ཡོད་མིན་པ་ཆོས་ཅན། ལམ་གྱི་ཡན་ལག་ཏུ་མི་འཇོག་པ་མིན་ཏེ། འཇིག་རྟེན་ཆོས་བརྒྱད་ཀྱི་ཡན་ལག་མ་རྙེད་པའང་རྫས་སུ་མེད་བཞིན་དེའི་ཡན་ལག་འཇོག་པ་དང་འདིར་ཡང་མཚུངས་པའི་ཕྱིར་ཞེས་ཟེར་རོ། །རིག་བྱེད་མིན་གཟུགས་མེད་ན་སོ་ཐར་གྱི་སྡོམ་པ་མེད་པའི་ཁྱབ་པ་(༡༥ན)
མ་གྲུབ་པར་བསྟན་པ་ནི། དགེ་སློང་ལྟ་བུའི་རྒྱུད་ལ་ཆོས་ཅན་རིག་མིན་མེད་ཀྱང་། སོ་ཐར་གྱི་སྡོམ་པ་ཡོད་དེ། སེམས་པ་གང་གིས་ཚུལ་ཁྲིམས་ནོད་པའི་ཆོ་ག་སྔོན་དུ་བཏང་ནས་ཁས་བླངས་ཏེ་ལུས་དང་ངག་སྡོམ་པར་བྱེད་པའི་ཕྱིར་རོ། །འོ་ན་སེམས་གཞན་དང་ལྡན་པ་ན་ཆོས་ཅན། སྡོམ་པ་མེད་པར་ཐལ། སེམས་པ་སྡོམ་པ་ཡིན་པ་གང་ཞིགསེམས་པ་མེད་པའི་ཕྱིར་ཞེ་ན། རྟགས་ཕྱི་མ་མ་གྲུབ་སྟེ། སེམས་དང་སེམས་བྱུང་གི་རྒྱུན་གོམས་པས་ཉེས་པ་སྤྱོད་ཉེ་བ་ན་བདག་སྲོག་གཅོད་སྤོང་བ་ཡིན་ནོ་སྙམ་པའི་སེམས་གང་གིས་ལུས་ངག་སྡོམ་བྱེད་མངོན་དུ་འགྱུར་བའི་ཕྱིར་རོ། །རིག་བྱེད་མིན་པ་མེད་ཀྱང་སྡོམ་པ་ཆུ་ལོན་གྱི་ངོ་བོ་ཡིན་ཏེ། ངོ་ཚ་ཤེས་པས་མི་བྱ་བར་དམ་བཅས་པ་ཡང་དག་པར་དྲན་ནས་འཆལ་བའི་ཚུལ་ཁྲིམས་མི་བྱེད་པའི་ཕྱིར། ཁྱབ་སྟེ། དམ་བཅས་པའི་སྡོམ་པ་ནི། འཆལ་ཚུལ་འགོག་པའི་ཆུ་ལོན་ཁོ་ནའི་ཆེད་དུ་བླང་བའི་ཕྱིར་རོ། །རིག་བྱེད་མིན་གཟུགས་ཁོ་ནས་འཆལ་ཚུལ་གྱི་ཆུ་ལོན་བྱེད་ན་ཆོས་ཅན། བརྗེད་ངས་འགས་ཀྱང་ཚུལ་ཁྲིམས་མི་འདྲལ་བར་ཐལ། བརྗེད་ངས་དེ་རིག་མིན་གྱི་གཟུགས་ཉམས་བྱེད་མ་ཡིན་ཅིང་། རིག་མིན་གྱི་གཟུགས་ནི་དེའི་དུས་སུ་ཆུ་ལོན་དུ་ཡོད་པའི་ཕྱིར་རོ། །མདོ་སྡེ་པའི་རིགས་པའི་མཇུག་བསྡུ་བ་ནི། རྒྱས་པར་ནི་བརྗོད་མི་དགོས་སོ་ཞེས་བསྟན་ཏོ། །གོང་དུ་བྱེ་སྨྲའི་ལུགས་མི་འཐད་པར་བསྟན་ཀྱང་ཁོའི་ལུགས་སུ་བཤད་པ་ཡིན་པས། འཐད་པར་བྱས་ནས་མཇུག་བསྡུ་བ་ནི། བསྟན་མེད་ཐོགས་མེད་ཀྱི་གཟུགས་ཡོད་དོ་ཞེས་གསུངས་པ་ནི་དངོས་པོའི་ཆོས་ཉིད་ལ་ཞུགས་པ་སྟེ། དེ་བས་གསུངས་པའི་ཕྱིར། ཆོས་ཐམས་ཅད་བདག་མེད་པར་གསུངས་པ་བཞིན་རུས་གོང་ལ་སོགས་པར་གཟུགས་བརྙན་གྱི་གཟུགས་སམ་རྒྱུད་འགྱུར་བའི་ཁྱད་པར་ནི། དགེ་སློང་ལ་སོགས་པར་རྣམ་པར་བཞག་པའི་རྒྱུ་མ་ཡིན་ཏེ།(༡༥བ)
འཁྲུལ་པའི་ཕྱིར། རིག་བྱེད་མིན་གཟུགས་རྫས་གཞན་ཁོ་ནར་ཡོད་དོ་ཞེས་ཟེར་རོ། །དེའི་རྒྱུ་འབྱུང་ཆེན་བཞི་ཡིན་ནོ་ཞེས་བཤད་ན། དེས་རིག་བྱེད་མིན་གཟུགས་ཁོ་ན་བསྐྱེད་དམ། གཞན་རིག་བྱེད་ཀྱང་བསྐྱེད་ཅེ་ན། སྲོག་གཅོད་སྤོང་བའི་འབྱུང་བ་བཞི་ཚན་དེས་མ་བྱིན་པར་ལེན་པའི་སྤོང་བ་མི་བསྐྱེད་དེ། སྤོང་བ་བདུན་སྤོང་བའི་འབྱུང་བ་གཞན་དང་གཞན་པ་བཞི་ཚན་བདུན་གྱིས་སོ་སོར་བསྐྱེད་དགོས་པའི་ཕྱིར་ན། འབྱུང་བ་བཞི་ཚན་གཅིག་གིས་རིག་བྱེད་དང་རིག་བྱེད་མིན་པ་གཉིས་མི་བསྐྱེད་དེ། འབྱུང་བའི་ཚོགས་པ་གཅིག་གིས་རིག་མིན་ཕྲ་བ་དང་རིག་བྱེད་རགས་པའི་འབྲས་བུ་འགལ་བ་གཉིས་མི་བསྐྱེད་པའི་ཕྱིར། ཡང་རིག་བྱེད་མིན་པ་ཡོད་པའི་འབྱུང་ཆེན་རྒྱུར་བྱས་ནས་འབྱུང་ངམ་ཞེ་ན། རྒྱུར་བྱས་པའི་གཟུགས་རིག་བྱེད་དང་། རིག་བྱེད་མིན་པ་དང་། བསམ་གཏན་དང་ཟག་མེད་ཀྱིས་བསྡུས་པ་དང་། མིག་རྣ་གཟུགས་སྒྲ་སོགས་ཐམས་ཅད་དེ་ལྟ་བུ་ཡིན་ཏེ། དུས་མཉམ་གྱི་འབྱུང་བ་ཆེན་པོ་ཁོ་ན་རྒྱུར་བྱས་ནས་འབྱུང་བའི་ཕྱིར། ཕལ་ཆེར་སྨོས་པས་འདོད་པའི་རིག་མིན་ཅུང་ཟད་ཅིག་བསལ་ཏོ། །སྨྲས་པ། སྔོན་ཚེ་བསྐལ་མང་གོང་ནས་ཐུབ་མཆོག་གི། །བསྟན་པ་བདུད་རྩིའི་རོ་བཅུད་ཟབ་མོ་གང་། །ལེགས་པར་མྱོང་ནས་སྙིགས་མའི་དུས་འདིར་ཡང་། །བདེ་གཤེགས་གསུང་རབ་རྒྱ་མཚོའི་དགོངས་པ་ལ། །གནས་ཚུལ་ཇི་བཞིན་འགྲེལ་ལ་དབང་ཐོབ་པ། །འདི་ཡང་མཉམ་མེད་ཀརྨ་ཀཾ་ཚང་གི། །རྟོགས་ལྡན་བླ་མ་རྣམས་ཀྱི་བྱིན་རླབས་ཡིན། །མཚུངས་མེད་རྣམ་དཔྱོད་བཟང་པོའི་ལེགས་བྱས་འདི། །སངས་རྒྱས་བྱང་སེམས་རྣམས་ལ་མཆོད་པར་འབུལ། །ཀརྨ་བཀའ་བརྒྱུད་རྣམས་ལ་མཆོད་པར་འབུལ། །འདི་དོན་ལེགས་པར་ཤེས་ནས་འཆད་བྱེད་པའི། །བསྟན་འཛིན་ཀུན་གྱི་རྒྱུད་ལ་བདག་ཉིད་ཀྱི། །བྱང་ཆུབ་སེམས་མཆོག་ནུས་པ་(༡༦ན)
བླ་མེད་པས། །བདག་གཞན་བརྗེ་བའི་ལྷག་བསམ་འཁྲུང་བར་ཤོག །གཉིས་པ་ཁྱད་ཆོས་རྣམ་པར་བཞག་པ་ལ། རྒྱུའི། སའི། ངོ་བོའི། རྒྱུའི་ཁྱད་པར་གཞན་བསྟན་པའོ། །དང་པོ་ལ། སྐད་ཅིག་དང་པོ་དང་། དེ་ཕྱིན་གྱི་རྒྱུའི་ཁྱད་པར་རོ། །དང་པོ་ནི། འདོད་གཏོགས་རྣམ་རིག་མིན་སྐད་ཅིག །རྒྱུར་བྱས་པའི་གཟུགས་ད་ལྟར་དང་མ་འོངས་པ་ཅུང་ཟད་ཅིག་འདས་པའི་འབྱུང་བ་ལས་སྐྱེས་ཏེ། འདོད་པར་གཏོགས་པའི་རྣམ་རིག་མིན་པ་སྐད་ཅིག་དང་པོ་སྡོམ་པ་ནོད་སོགས་ཀྱི་ཚེ། གཞིའི་འབྱུང་བ་དང་རྟེན་གྱི་འབྱུང་བ་གཉིས་ཀ་ལྷན་ཅིག་སྐྱེ་བའི་འབྱུང་བ་ད་ལྟ་བ་ཡིན་ལ། གཉིས་པ་ནི། ཕྱིན་ཆད་འདས་པའི་འབྱུང་ལས་སྐྱེ། །ཕྱིན་ཆད་གཞིའི་འབྱུང་བ་འདས་པའི་འབྱུང་བ་དང་རྟེན་གྱི་འབྱུང་བ་ད་ལྟ་བ་ལས་སྐྱེའོ། །འདས་པའི་འབྱུང་བ་མེད་པོ་དག་ནི་ཆོས་ཅན། གཞིའི་དོན་དུ་འགྱུར་ཏེ། འཇུག་པའི་རྒྱུ་ཡིན་ཅིང་འཕེན་པའི་རྒྱུ་ཡིན་པའི་ཕྱིར། ད་ལྟར་གྱི་འབྱུང་ཆེན་དག་ནི་ཆོས་ཅན། རྟེན་གྱི་དོན་དུ་འགྱུར་ཏེ། འཇུག་པའི་རྒྱུ་ཡིན་ཅིང་། རྟེན་པར་བྱེད་པ་ཡིན་པའི་ཕྱིར། དཔེར་ན། འཁོར་ལོ་ས་ལ་འདྲིལ་བ་ལ་ལག་པས་འཕུལ་བ་ལྟ་བུ་ནི་འཇུག་པའི་རྒྱུ་ཡིན་ཅིང་། སའི་ཕྱོགས་གཟར་པོ་ལྟ་བུ་ནི་རྗེས་སུ་འཇུག་པའི་རྒྱུ་ཡིན་ནོ། །གཉིས་པ་སའི་ཁྱད་པར་ལ། ཟག་བཅས་དང་། ཟག་མེད་ཀྱི་སའི་ཁྱད་པར་རོ། །དང་པོ་ནི། ཟག་བཅས་ལུས་དང་ངག་གི་ལས། །རང་གི་འབྱུང་བ་དག་རྒྱུར་བྱས། །ས་གང་གི་འབྱུང་བ་རྒྱུར་བྱས་ཞེ་ན། འདོད་པའི་ཁམས་ནས་བསམ་གཏན་བཞི་པའི་སའི་བར་གྱི་ཟག་བཅས་ལུས་དང་ངག་གི་ལས་ཀྱི་རིག་རིག་མིན་གྱི་གཟུགས་ནི་རང་གི་འབྱུང་བ་དག་རྒྱུར་བྱས་པ་ཡིན་ནོ། །དེ་ཡང་འདོད་གཏོགས་ཀྱི་རྣམ་རིག་མིན་པའི་སྡོམ་པ་སོགས་ནི་འདོད་པའི་སས་བསྡུས་ཀྱིས་བསྐྱེད་ཀྱང་། ཁྱད་པར་འདི་ཤེས་དགོས་ཏེ། འདོད་པའི་རྟེན་ཅན་ཞིག་གིས་བསམ་གཏན་དང་པོའི་ཏིང་ངེ་འཛིན་བསྐྱེད་ན། ཏིང་ངེ་འཛིན་དེས་བསམ་གཏན་དང་པོའི་འབྱུང་(༡༦བ)
བ་བསྐྱེད་ལ། འབྱུང་བ་དེས་ལུས་ངག་གི་ལས་བསྐྱེད་དོ། །རྟེན་འདོད་པ་དེས་བསམ་གཏན་གཉིས་པའི་ཏིང་ངེ་འཛིན་ཐོབ་ན་ཡང་དེ་དང་འདྲ་སྟེ། བཞི་པ་མན་ཆད་དེ་བཞིན་དུ་སྦྱར་རོ། །འབྱུང་བ་དང་ལུས་ངག་ས་ལྔ་པ་ཡིན་པའི་ཕྱིར། བཞི་པ་ཡན་ཆད་ན་འབྱུང་བ་དང་འབྱུང་འགྱུར་ལུས་ངག་གི་ལས་དང་བཅས་པ་མེད་དོ། །རྗེ་བླ་མ་ཀརྨ་ཕྲིན་ལས་པ་ཆེན་པོའི་ཊཱི་ཀར། གཟུགས་མེད་ན་ལུས་ངག་གི་ལས་མེད་ཅིང་རང་སའི་འབྱུང་བ་ལས་སྐྱེ་བའི་འབྲས་གཟུགས་ཡིན་པས་སོ་ཞེས་སྤར་དུ་བརྐོས་པ་ནི། སྤྱིར་གཟུགས་མེད་ཀྱི་འཇིག་རྟེན་གྱི་ཁམས་ན་གཟུགས་ཡོད་ཀྱང་། གཟུགས་མེད་པའི་སེམས་ཅན་ལ་ལུས་སེམས་ཀྱི་ཟླས་ཕྱེ་བའི་ལུས་གཟུགས་སུ་མེད་ཀྱང་དེའི་རིག་མིན་གྱི་གཟུགས་ཡོད་པར་ཞལ་གྱིས་བཞེས་པ་ཡིན་ནམ་སྙམ་དུ་སེམས་སོ། །འདོད་པའི་རྟེན་ལ་བསམ་གཏན་དང་པོ་ཐོབ་ན་བསམ་གཏན་དང་པོའི་ནུས་པས་གཟུགས་ཀྱི་ས་པའི་འབྱུང་བ་འདོད་པས་སྤྱོད་པའི་ཁམས་ན་འདྲེན་པ་ན། འདོད་པས་སྤྱོད་པའི་འབྱུང་བའི་གོ་ས་ན་ནི་འདྲེན་པར་མི་རུང་སྟེ། གཅིག་གོ་གཅིག་གིས་འགེགས་པའི་ཕྱིར། འོན་ཀྱང་བར་སྟོངས་ཀྱི་ནམ་མཁའ་ཡོད་པས་འདྲེན་མི་ཐུབ་པ་ནི་མ་ཡིན་ནོ། །གཉིས་པ་ནི། ཟག་མེད་གང་དུ་སྐྱེས་པའི་ཡིན། །རྟེན་གང་དུ་སྐྱེས་པ་དེའི་འབྱུང་བ་ཡང་དེའི་རྒྱུར་བྱས་པ་ཡིན་ཏེ། རྟེན་འདོད་པའི་ཁམས་ལ་བརྟེན་པའི་ཟག་མེད་ཀྱི་སྡོམ་པ་ཞིག་ཡིན་ན་འབྱུང་བ་ཆེན་པོ་ཡང་འདོད་ཁམས་ཀྱི་འབྱུང་བ་ལས་སྐྱེས་པ་ཡིན་ནོ། །རྟེན་བསམ་གཏན་དང་པོའི་ཟག་མེད་ཀྱི་སྡོམ་པ་ཡིན་ན་འབྱུང་བ་ཆེན་པོ་ཡང་བསམ་གཏན་དང་པོ་པས་སོ། །ཟག་པ་མེད་པ་ལ་འབྱུང་བ་མེད་པས་དང་། ཟག་མེད་ཀྱི་ལུས་ངག་གི་ལས་ནི་ཁམས་སུ་མ་གཏོགས་པའི་ཕྱིར། ཟག་པ་མེད་པའི་འབྱུང་བ་རྒྱུར་བྱེད་པ་ནི་མ་ཡིན་ལ། འོ་ན་སེམས་ཀྱི་སྟོབས་ཀྱིས་ཅིའི་ཕྱིར་མི་སྐྱེ་སྙམ་ན། རྒྱུར་བྱས་པའི་(༡༧ན)
གཟུགས་མ་ཡིན་པར་ཐལ་བར་འགྱུར་བས། ཟག་མེད་ཀྱི་གཟུགས་གང་ལ་བརྟེན་པའི་ས་པའི་འབྱུང་བའི་སྟོབས་ལས་སྐྱེ་བའི་ཕྱིར་རོ། །གསུམ་པ་ངོ་བོའི་ཁྱད་པར་ནི། རྣམ་རིག་བྱེད་མིན་མ་ཟིན་དང་། །རྒྱུ་མཐུན་ལས་བྱུང་སེམས་ཅན་སྟོན། །རྣམ་རིག་བྱེད་མིན་པ་ནི་ལུས་ཅན་མ་ཡིན་པས་སེམས་དང་སེམས་ལས་བྱུང་བའི་བདེ་སྡུག་སྐྱེ་བའི་རྟེན་གྱི་དངོས་པོར་མི་རུང་བའི་ཕྱིར། མ་ཟིན་པ་དང་དགེ་བ་དང་མི་དགེ་བ་ཡིན་པའི་ཕྱིར། རྣམ་པར་སྨིན་པ་ལས་སྐྱེས་པ་ནི་མ་ཡིན་ཏེ། རྣམ་རིག་མིན་ལུང་བསྟན་མིན་མེད། །ཅེས་འབྱུང་བའི་ཕྱིར། རྣམ་པར་སྨིན་པ་ཡང་། རྣམ་སྨིན་ལུང་དུ་མ་བསྟན་ཆོས། །ཞེས་འབྱུང་བས། ལུང་དུ་མ་བསྟན་པ་ཡིན་པའི་ཕྱིར། བསགས་པ་མེད་པའི་ཕྱིར། ཁ་ཟས་ལ་སོགས་པ་རྒྱས་པ་ལས་བྱུང་བ་མ་ཡིན་པས། ཤུགས་ཀྱི་རྒྱུ་མཐུན་ལས་བྱུང་ངོ་། །དེ་ལས་ཀྱང་སྡོམ་པ་མ་ཡིན་པ་དང་། བར་མ་མི་དགེ་བ་ནི་ཉོན་མོངས་ཅན་ཡིན་པས། ཀུན་འགྲོའི་རྒྱུ་མཐུན་ལས་སྡོམ་པ་དང་བར་མའི་དགེ་བ་ནི་སྐལ་མཉམ་གྱི་རྒྱུ་མཐུན་ལས་བྱུང་ངོ་། །སེམས་ཅན་དུ་སྟོན་པ་སྟེ། སེམས་ཅན་གྱི་རྒྱུད་དུ་གཏོགས་པ་ལ་བྱའི། །སེམས་ཅན་དུ་མཚོན་པའི་མཚོན་བྱེད་མ་ཡིན་ལ། ཡིན་ན་རྣམ་པར་རིག་བྱེད་མ་ཡིན་པར་མི་བཏུབ་པའི་ཕྱིར། བདག་ཉིད་ཆེན་པོ་ཀརྨ་ཕྲིན་ལས་པས། འདིའི་ཐད་ཀྱི་འགྲེལ་པར་རྣམ་རིག་མིན་པ་གཟུགས་རྡུལ་གསར་པ་མིན་པས་རྣམ་སྨིན་སྐྱེས་དང་རྒྱས་བྱུང་མིན་ཅེས་བཤད་སྣང་བ་འབྲེལ་ཅིའང་མི་འཇུག་པའི་ཕྱིར་ཡི་གེ་མ་དག་པ་ཡིན་ནམ་སྙམ་མོ། །བཞི་པ་རྒྱུའི་ཁྱད་པར་གཞན་བསྟན་པ་ལ། འདོད་པའི་རིག་བྱེད་མིན་གཟུགས་ཀྱི་རྒྱུའི་ཁྱད་པར་དང་། བསམ་གཏན་ཟག་མེད་ཀྱི་རྒྱུའི་ཁྱད་པར་རོ། །དང་པོ་ནི། རྒྱུ་མཐུན་ཟིན་པའི་འབྱུང་ལས་སྐྱེ། །མཉམ་པར་མ་བཞག་པའི་ས་པའི་རིག་མིན་ནི། སྤྱིར་ཟག་མེད་སྐད་ཅིག་དང་པོ་མ་གཏོགས་པ་ཐམས་ཅད་སྐལ་མཉམ་གྱི་རྒྱུ་ཡོད་པར་བཤད་ཙམ་ན། འབྱུང་ཆེན་ཐམས་(༡༧བ)
ཅད་ལ་ཡང་རྒྱུ་མཐུན་གྱི་རྒྱུ་ཡོད་པའི་ཕྱིར། རྒྱུ་མཐུན་པའི་འབྱུང་བ་ལས་སྐྱེ་ཞིང་། ད་ལྟ་ལུས་ཀྱི་ཚོགས་པ་ན་ཡོད་པའི་ཕྱིར་རྒྱུད་ཀྱིས་ཟིན་པའི་འབྱུང་བ་ཆེན་པོའི་རྒྱུ་ལས་སྐྱེ་བའོ། །གཉིད་དང་ཏིང་ངེ་འཛིན་གྱིས་རྒྱས་པར་བྱས་པའི་འབྱུང་ཆེན་ལས་སྐྱེ་བ་མ་ཡིན་ཏེ། རིག་མིན་ཀུན་སློང་སེམས་ལ་བལྟོས་པའི་ཕྱིར་དང་། མཉམ་གཞག་མ་ཡིན་པའི་སེམས་ཀྱི་སྐབས་ཡིན་པའི་ཕྱིར། རྣམ་སྨིན་སྐྱེས་ཀྱི་འབྱུང་བ་ལས་སྐྱེ་བ་མ་ཡིན་ཏེ། འདི་ནི་གཟུགས་ཅན་ཆད་ནས་མཚམས་སྦྱོར་བའི་ཕྱིར། རྒྱུ་མཐུན་ལས་བྱུང་བ་དེ་ཉིད་ཀྱི་ཕྱིར་རོ། །དབང་པོའི་ཚོགས་པ་ན་ཡོད་ན་རྣམ་སྨིན་སྐྱེས་ཀྱི་དབང་པོ་ལས་སྐྱེས་པའི་འབྱུང་བ་མིན་པས་མ་ཁྱབ་བོ། །འདིར་ནི་སྤོང་བ་བདུན་ཀྱང་སེམས་ཀྱི་རྗེས་འབྲང་ཡིན་པས་རེ་རེ་ཞིང་འབྱུང་བ་བཞི་ཚན་ཐ་དད་པ་ལས་སྐྱེ་བ་ཡིན་ནོ། །གཉིས་པ་ནི། ཏིང་འཛིན་སྐྱེས་འབྱུང་མ་ཟིན་དང་། །རྒྱས་བྱུང་ཐ་དད་མིན་ལས་སྐྱེས། །ཟག་བཅས་ཀྱི་ཏིང་ངེ་འཛིན་བསམ་གཏན་དང་། ཟག་མེད་ཀྱི་ཏིང་ངེ་འཛིན་ལས་སྐྱེས་པའི་རིག་བྱེད་མིན་པའི་སྡོམ་པ་ནི། ཏིང་ངེ་འཛིན་གྱི་རྒྱས་པའི་ཕྱིར་རྒྱས་པ་ལས་བྱུང་བའི་འབྱུང་བ་དང་། ཏིང་ངེ་འཛིན་གྱི་ཟིལ་གྱིས་ནོན་པས་འབྱུང་བ་དེ་བདེ་སྡུག་སྐྱེ་བའི་རྟེན་དུ་མ་གྱུར་པའི་ཕྱིར་མ་ཟིན་པའི་འབྱུང་བ་ལས་སྐྱེ་སྟེ། དེའི་འབྱུང་བ་དབང་པོ་དང་ཐ་དད་པའི་ཕྱིར་སེམས་ལ་རག་ལས་པའི་ཕྱིར། ཟིན་པའི་འབྱུང་བ་རྣམས་ནི་སེམས་ལ་བལྟོས་པ་མེད་པར་འབྱུང་སྟེ། འགོག་པའི་སྙོམས་འཇུག་ལ་སོགས་པའི་གནས་སྐབས་དག་ན་སེམས་མེད་པར་ཡང་འཇུག་པའི་ཕྱིར། དེར་སྤོང་བདུན་སྤོང་བའི་འབྱུང་བ་བཞི་ཚན་ཐ་དད་ལ་སྐྱེ་བ་མ་ཡིན་པར་འབྱུང་བ་བཞི་ཚན་ཐ་མི་དད་པ་ཞིག་ལས་སྐྱེ་བ་ཡིན་ཏེ། དེ་སྐྱེད་པར་བྱེད་པའི་སེམས་ཐ་དད་པ་བཞིན། དེ་སྐྱེད་པར་བྱེད་པའི་འབྱུང་བ་ཐ་མི་དད་ཀྱིས་ཀྱང་བསྐྱེད་རིགས་པའི་ཕྱིར། ཡང་ན་དེར་འབྱུང་བ་ཆེན་པོ་དག་ནི་རྟེན་གྱི་དོན་གྱིས་རྣམ་པར་རིག་བྱེད་མིན་པའི་གཞིར་གྱུར་པ་(༡༨ན)
མ་ཡིན། འཇུག་པར་བྱེད་པ་མིན་པས་འབྱུང་བ་ཐ་མི་དད་ལས་སྐྱེ་བའི་ཕྱིར། སོ་ཐར་སྡོམ་པ་ནི་ཆོས་ཅན། རིག་བྱེད་མིན་པ་བདུན་འབྱུང་བ་བཞི་ཚན་སོ་སོ་བས་བསྐྱེད་དེ། སེམས་ཀྱི་རྗེས་འཇུག་མ་ཡིན་པའི་ཕྱིར། རྣམ་པར་རིག་བྱེད་ནི་རྒྱུ་མཐུན་ལས་བྱུང་བ་སྟེ། འཕེན་པའི་དབང་གིས་རྗེས་སུ་འཇུག་པའི་ཕྱིར། ལུས་ཀྱི་རིག་བྱེད་ནི་ཟིན་པ་སྟེ། ལུས་ཀྱི་འབྱུང་བ་ཆེན་པོ་དང་ཐ་མི་དད་པར་འཇུག་པའི་ཕྱིར། ཐ་དད་པར་འཇུག་པའི་ཕྱིར་ནི་ངག་གིས་མ་ཟིན་པའོ། །གདགས་པའི་བསྟན་བཅོས་ལས། དགེ་བསྙེན་གྱི་བསླབ་པའི་གཞི་ཐམས་ཅད་མ་ཟིན་པར་བཤད་པ་ནི་རིག་བྱེད་མ་ཡིན་པའི་རང་བཞིན་ལ་དགོངས་པའམ། ཕལ་ཆེ་བ་བསྟན་པས་ཉེས་པ་མེད་དོ། །ཅིང་ནི་འདི་དཔྱད་པར་བྱ་སྟེ། རྣམ་པར་རིག་བྱེད་འདི་སྐྱེ་བ་ན་དབྱིབས་སྔ་མའི་རྒྱུད་བཤིགས་ནས་སྐྱེའམ། མ་བཤིག་པར་སྐྱེ། དང་པོ་ལྟར་ན། བྱེ་བྲག་ཏུ་སྨྲ་བ་ཁྱོད་རང་གི་ལུགས་ཀྱིས་རྣམ་སྨིན་རྒྱུད་ཆད་ནས་མཚམས་སྦྱོར་བ་མིན་པར་འདོད་པ་དེ་མི་འཐད་པར་ཐལ། རྣམ་པར་སྨིན་པའི་གཟུགས་ཆད་པ་ཡང་རྒྱུན་ཆགས་པའི་ཕྱིར། རྟགས་ཁས། ཁྱབ་པ་ཚད། འདོད་ན། བྱེ་སྨྲ་ཡིན་པ་བུད། གཉིས་པ་ལྟར་ན། འབྱུང་བའི་ཚོགས་གཅིག་ལ་ཆོས་ཅན། དབྱིབས་གཉིས་འགྲུབ་པར་འགྱུར་ཏེ། རྣམ་སྨིན་གྱི་དབྱིབས་གཅིག་དང་། རྒྱུ་མཐུན་གྱི་དབྱིབས་གཉིས་འགྲུབ་པའི་ཕྱིར་རོ། །འདོད་དོ་ཞེ་ན་མི་སྲིད། ཕན་ཚུན་གོ་སྐབས་མི་འབྱེད་པའི་ཕྱིར། ཡང་ཁོང་ན་རེ། སྔར་གྱི་དབྱིབས་བཤིགས་ནས་སྐྱེ་བ་མིན། ཡིན་ན་རྣམ་སྨིན་རྒྱུད་ཆད་ནས་མཚམས་སྦྱོར་བར་འགྲོ། འོ་ན་རྒྱུ་མཐུན་པ་ལས་བྱུང་བའི་འབྱུང་བའི་དབྱིབས་འདི་ག་འདྲ་བ་གཞན་ཞིག་བསྐྱེད་དེ་ལས་གཞན་དེ་སྐྱེའོ་ཟེར་རོ། །འོ་ན་ཡན་ལག་གང་དང་གང་ལ་བརྟེན་ནས་རྣམ་པར་རིག་བྱེད་སྐྱེ་བར་གྱུར་པའི་ཚེ་ན་ཆོས་ཅན། (༡༨བ)
ཡན་ལག་འདི་བས་ལོག་པོར་ཆེ་བར་ཐལ། ཡན་ལག་གང་ཡིན་པ་དེ་ལ་དབྱིབས་གསར་པའི་འབྱུང་ཆེན་དག་གིས་མངོན་པར་ཁྱབ་པའི་ཕྱིར། འཁོར་གསུམ། ཡང་ན་རྟགས་འདོན་པ་པོ་སྟེ། རྒྱུ་མཐུན་གྱི་དབྱིབས་གསར་པ་སྐྱེས་པར་མ་ཟད། རྣམ་པར་རིག་བྱེད་ཀྱི་རྟེན་གྱི་འབྱུང་བ་ཆེན་པོ་སྔ་མའི་རྒྱུད་དག་གིས་ལུས་མངོན་པར་ཁྱབ་པའི་ཕྱིར། མ་གྲུབ་ན་གྲུབ་པར་ཐལ། རྒྱུ་མཐུན་གྱི་ལུས་ཀྱི་ཡན་ལག་ཐམས་ཅད་ཀྱིས་རྣམ་པར་རིག་བྱེད་ཀྱི་རྟེན་གྱི་འབྱུང་བ་ཆེན་པོ་བྱེད་པའི་ཕྱིར། དེ་ཡང་མ་གྲུབ་བོ་ཞེ་ན། འོ་ན་ཡན་ལག་གི་ཕྱོགས་ཐེབ་ནོན་ཙམ་གྱིས་རྣམ་པར་རིག་བྱད་ཀྱི་རྟེན་བྱེད་པར་ཐལ། དེས་དེའི་རྟེན་བྱེད་པ་ནི་གང་ཞིགཡན་ལག་ཐམས་ཅད་ཀྱིས་མི་བྱེད་པའི་ཕྱིར། འཁོར་གསུམ། ཡང་ཁོང་ན་རེ། དབྱིབས་གསར་པས་མངོན་པར་ཁྱབ་ཏུ་ཟིན་ཀྱང་ཆོས་ཅན། ཡན་ལག་ལོག་བོས་ཆེ་བར་མི་འགྱུར་ཏེ། ལུས་ལ་གསེབ་ཡོད་པས་གསེབ་ཏུ་ཞུགས་པའི་ཕྱིར། འོ་ན་སྔར་བས་ལུས་མ་ཟེགས་པར་འགྱུར་སྙམ་ན། མི་འགྱུར་ཏེ་ཕྲ་བའི་ཕྱིར་ཞེས་ཟེར་རོ། །མདོར་ན། བྱེ་སྨྲས་ནི། རིག་བྱེད་ཀྱི་རིག་པར་བྱེད་པའི་འབྱུང་བ་ནི། ལུས་འདི་ཉིད་མིན། འདི་ག་འདྲ་བ་གསར་སྐྱེས་ཞིག་གིས་རིག་པར་འདོད། མདོ་སྡེ་པས་ནི། ཁ་དོག་རང་གི་ཁྱད་པར་གནས་སྐབས་གཞན་དུ་འབྱུང་བ་ཞིག་གིས་རིག་པར་འདོད། འོ་ན་རྣམ་པར་རིག་བྱེད་ནི་དགེ་མི་དགེ་ཡིན། སྔོན་གྱི་ལས་ཀྱིས་གྲུབ་པའི་ཁ་དོག་ནི་རྣམ་སྨིན་ཡིན་པས། དགེ་མི་དགེར་མི་འཐད་དོ་སྙམ་ན། འདི་དགེ་མི་དགེར་བཏགས་པ་ཡིན་ནོ། །སེམས་ཙམ་པས་ནི། གཟུགས་དྲི་སོགས་རིག་བྱེད་ཐུན་མོང་དུ་གཅིག་ལ་གཅིག་སྤྱོད་པ་འདི། གཅིག་ལ་གཅིག་གི་བདག་པོའི་འབྲས་བུ་ཡིན། རྣམ་སྨིན་གྱི་འབྲས་བུ་ནི་ཀུན་གཞི་དབང་པོ་ལྔར་སྣང་བ་ཐུན་མོང་མ་ཡིན་པ་འདི་ཡིན་ཟེར་རོ། །ཡང་ལས་ནི། (༡༩ན)
སེམས་དཔའ་དང་དེས་བྱས་པའི་གཉིས་དང་། དེའི་ཁར་དེས་སྐྱེད་ལུས་དང་ངག་གི་ལས་ཞེས་གསུམ་དང་། ལུས་ངག་གཉིས་ལ་རིག་བྱེད་དང་རིག་བྱེད་མིན་པ་གཉིས་གཉིས་ཏེ་བཞི། ཡིད་དང་ལྔར་བཤད་པ་ལས། རིག་བྱེད་མིན་པ་ནི་དགེ་མི་དགེ་གཉིས་སོ་ཞེས་བྱེ་སྨྲའི་འདོད་པ་བཞག་པས་མཇུག་བསྡུ་བའོ། །སྨྲས་པ། སྙིགས་མ་ལྔ་བདོའི་རོ་མཆོག་སྨིན་པ་ལས། །བློ་གྲོས་བླུན་པའི་མྱོང་བ་ཚིམ་མེད་ལ། །ལྷག་པར་དམིགས་ནས་རིག་སྔགས་གྲུབ་པ་ཡི། །ཡེ་ཤེས་ཟབ་མོའི་ནུས་པ་སྔོན་སོང་ལས། །སྐྱེས་པའི་ཤེས་རབ་རྣོན་པོའི་བ་མོ་དེས། །སྐྱེད་ཚལ་དང་བཅས་སད་པར་མ་བྱས་སམ། །གཉིས་པ་ལས་གསུམ་སྤྱིའི་ཆོས་ཀྱི་རྣམ་གཞག་ལ། དངོས་ཀྱི་དོན་རྣམ་པར་བཞག་པ་དང་། ཀུན་སློང་བྱེ་བྲག་ཏུ་བཤད་པའོ། །དང་པོ་ལ། དགེ་སོགས་ཀྱི་ཁྱད་པར། ཁམས་གང་ན་གང་ཡོད་པ། ཆོས་གསུམ་སོ་སོའི་དབྱེ་བའོ། །དང་པོ་ནི། རྣམ་རིག་མིན་ལུང་བསྟན་མིན་མེད། །གཞན་ནི་རྣམ་གསུམ། རྣམ་རིག་མིན་པ་ཆོས་ཅན། ལུང་བསྟན་མིན་མེད་དེ། ལུང་མ་བསྟན་པའི་སེམས་ནི་སྟོབས་ཆུང་བས་རིག་བྱེད་མིན་པའི་དགེ་མི་དགེའི་ལས་ནི་དགེ་མི་དགེའི་སེམས་སྟོབས་ལྡན་པས་འཕེན་དགོས་པའི་ཕྱིར། གཞན་རྣམ་པར་རིག་བྱེད་དང་སེམས་པ་ནི་རྣམ་པ་གསུམ་སྟེ། དཔེར་ན། རིག་བྱེད་དགེ་བ་ཐལ་མོ་སྦྱོར་བ་དང་། མི་དགེ་བ་སྲོག་གཅོད་པ་དང་། ལུང་མ་བསྟན་བཟོ་དང་སྤྱོད་ལམ་པ་སོགས་སུ་ཡོད་པའི་ཕྱིར། གཉིས་པ་[ཁམས་གང་ན་གང་ཡོད་པ་]ལ། མི་དགེ་བ་གང་ན་ཡོད་པ། རིག་བྱེད་མིན་པ་གང་ན་ཡོད་པ། རིག་བྱེད་ཙམ་གང་ན་ཡོད་པ། བསྒྲིབས་པའི་རིག་བྱེད་གང་ན་ཡོད་པའོ། །དང་པོ་ནི། མི་དགེ་ནི། །འདོད་ནའོ། མི་དགེ་བའི་ལས་ནི་འདོད་ཁམས་ཁོ་ན་ན་ཡོད་དོ། །གཞན་ན་མེད་དོ། །དེ་དག་གིས་ངོ་ཚ་མེད་པ་དང་། ཁྲེལ་མེད་པ་དག་སྤངས་པའི་ཕྱིར། དགེ་བ་དང་ལུང་མ་བསྟན་ནི་ཐམས་ཅད་དུ་ཡོད་དེ། མ་བཀག་པའི་ཕྱིར། གཉིས་པ་(༡༩བ)
ནི། གཟུགས་ནའང་རྣམ་རིག་མིན། །གཟུགས་ནའང་བསམ་གཏན་ཟག་མེད་ཀྱི་སྡོམ་པའི་རྣམ་རིག་མིན་པ་ཡོད་ལ། འང་གི་སྒྲས་ནི་འདོད་པ་ན་ཡོད་དོ། །གཟུགས་མེད་པ་དག་ན་ནི་རིག་བྱེད་མ་ཡིན་པ་བསྐྱེད་པའི་འབྱུང་བ་མེད་པར་དེའི་འབྲས་བུ་རིག་བྱེད་མིན་པ་མི་འོང་བ་དང་། དེ་ན་ལུས་ངག་གི་འཇུག་པ་མེད་པས་ལུས་དང་ངག་གི་སྡོམ་པ་མེད་དོ། །འོ་ན་ཁམས་འོག་མ་གཉིས་སུ་གཟུགས་མེད་ལ་སྙོམས་པར་ཞུགས་ཙམ་ན་གཟུགས་མེད་ཀྱི་སའི་འབྱུང་བ་མེད་ཀྱང་འོག་མ་གཉིས་ཀྱི་རྟེན་གྱི་འབྱུང་བ་ཡོད་པས། དེ་རྒྱུར་བྱས་ནས་གཟུགས་མེད་དུ་རིག་བྱེད་མིན་པ་ཅིས་མི་འོང་། དེ་བཞིན་ཟག་པ་མེད་པའི་རྣམ་པར་རིག་བྱེད་མ་ཡིན་པ་ལ་ཟག་པ་མེད་པའི་འབྱུང་བ་མེད་མོད་ཀྱི། འོན་ཀྱང་དེ་ནི་ས་གང་དུ་སྐྱེས་པ་དེའི་སྐྱེད་པར་བྱེད་པའི་ས་པའི་འབྱུང་བ་ཆེན་པོ་རྣམས་རྒྱུར་བྱས་ནས་སྐྱེ་བ་དེ་བཞིན་དུ། རེ་ཞིག་གཟུགས་མེད་པ་ན་སྤྱོད་པའི་འབྱུང་བ་ཆེན་པོ་དག་ཀྱང་མེད་མོད་ཀྱི། ས་གང་དུ་སྐྱེས་ཏེ་གཟུགས་མེད་བསྐྱེད་པར་བྱེད་པའི་སའི་འབྱུང་བ་རྒྱུར་བྱས་ནས། གཟུགས་མེད་པ་ན་སྤྱོད་པའི་རྣམ་རིག་བྱེད་མིན་སྐྱེ་བར་འགྱུར་རོ་ཞེ་ན། མི་འདྲ་བའི་ཕྱིར་དཔེ་མ་ཡིན་ཏེ། ཟག་མེད་ཀྱི་རྣམ་རིག་བྱེད་མིན་ནི། ཁམས་གསུམ་གྱི་སྲེད་པས་བདག་གིར་མ་བྱས་པས་དེ་ལ་ནི་འབྱུང་བ་ཆེན་པོ་སྐལ་མཉམ་དང་སྐལ་བ་མི་མཉམ་པ་མེད་དོ། །དེའི་ཕྱིར་གང་དུ་སྐྱེས་པའི་འབྱུང་བ་རྒྱུར་བྱས་ནས་སྐྱེའོ། །དེས་ན་ཟག་མེད་ནི་སྲེད་པས་བདག་གིར་མ་བྱས། ལྟ་བས་རིས་སུ་མ་བཅད་ཀྱང་གང་དུ་སྐྱེས་པའི་འབྱུང་བ་བསྐྱེད་པ་ཡིན་པ་ལ། གཟུགས་མེད་ཀྱི་རིག་བྱེད་མིན་པ་ནི་ལྟ་བས་རིས་སུ་བཅད་པས་འབྱུང་བ་ལས་སྐྱེ་ཙམ་ན་སྐལ་བ་མི་མཉམ་པའི་འབྱུང་བ་ལས་སྐྱེ་བར་མི་འདོད་དོ། །རིག་པ་གཞན་ཡང་གཟུགས་ཀྱི་ས་པའི་ཟག་པ་མེད་པའི་སྙོམས་པར་འཇུག་པ་ནི་གཟུགས་བསྐྱེད་པར་ནུས་ཀྱི། གཟུགས་མེད་ཀྱི་མི་ནུས་ཏེ། གཟུགས་(༢༠ན)
ཐམས་ཅད་ལས་རྒྱབ་ཀྱིས་ཕྱོགས་པའི་ཕྱིར། གྲུབ་སྟེ། གཟུགས་ཀྱི་འདུ་ཤེས་དང་བྲལ་བའི་ཕྱིར། བྱེ་སྨྲས་ནི། འདོད་པ་ན་སྤྱོད་པའི་འཆལ་བའི་ཚུལ་ཁྲིམས་ནི་མི་དགེ་བས་ཀུན་ནས་སློང་བའི་ཕྱིར། དེའི་གཉེན་པོ་གཟུགས་ཀྱི་ས་པའི་རིག་བྱེད་མ་ཡིན་པ་རུང་བ་དེ་བཞིན་དུ་གཟུགས་མེད་ན་སྤྱོད་པ་ཡང་དེ་དང་འདྲའམ་སྙམ་ན། མི་འདྲ་སྟེ། ཚུལ་ཁྲིམས་ནི་འཆལ་ཚུལ་གྱི་གཉེན་པོ་ཡིན་ལ། འཆལ་ཚུལ་ནི་འདོད་པ་ཁོ་ན་ན་ཡོད་ལ། གཟུགས་མེད་ནི་བསམ་གཏན་བཞི་པ་ལ་དམིགས་ཀྱི། བསམ་གཏན་གསུམ་པ་མན་ཆོད་ལ་མི་དམིགས་ན་འདོད་ཁམས་ལ་ལྟ་སྨོས་ཀྱང་ཅི་དགོས་པས། དམིགས་པ་རིང་བ་དང་། དམིགས་པ་དེ་ལྟར་རིང་ཙམ་ན་རྣམ་པ་ཡིད་ལ་མི་བྱེད་པས་རྣམ་པ་རིང་བ་དང་རྟེན་རིང་སྟེ་གོང་མ་ལ་འོག་མའི་ཆོས་མི་བརྟེན། གཉེན་པོ་རིང་སྟེ་སུན་འབྱིན་པ་དང་སྤོང་བའི་གཉེན་པོ་མེད། ཐག་བསྲིད་བའི་གཉེན་པོ་ཙམ་བྱེད་པས་གཉེན་པོའི་སྒོ་ནས་རིང་བའི་ཕྱིར། དེས་ན་འཆལ་ཚུལ་འགོག་བྱེད་ཀྱི་གཟུགས་མེད་པའི་རིག་མིན་ནི་མེད་དོ། །ཞེས་ཟེར་རོ། །བདག་ཉིད་ཆེན་པོ་ཀརྨ་ཕྲིན་ལས་པའི་ཊཱི་ཀར། ཟག་བཅས་ལུས་དང་ངག་གི་ལས། །རང་གི་འབྱུང་བ་རྣམ་རྒྱུར་བྱས། །ཞེས་པའི་འགྲེལ་པར། གཟུགས་མེད་ན་ལུས་ངག་གི་ལས་མེད་ཅིང་། དེ་རང་སའི་འབྱུང་བ་ལས་སྐྱེས་པའི་འབྲས་གཟུགས་ཡིན་པས་སོ། །ཞེས་དང་། གཞུང་འདིའི་འགྲེལ་པར། གཟུགས་མེད་ན་ལུས་ངག་གི་སྡོམ་པའི་ངོ་བོ་མེད་ཅིང་ཐོབ་པ་ཡོད་དོ་བྱ་བ་སོགས་ཆོས་འདི་པའི་དྲི་ཙམ་ཡང་མི་བྲོ་བ་མང་དུ་སྣང་བ་ནི་ཡི་གེ་མ་དག་པའི་སྐྱོན་དུ་ཤེས་པར་བྱའོ། །གསུམ་པ་ནི། རྣམ་རིག་དཔྱོད་དང་བཅས་དག་ན། །རྣམ་པར་རིག་བྱེད་ནི་དཔྱོད་པ་དང་བཅས་པ་འདོད་ཁམས་དང་བསམ་གཏན་དང་པོ་དག་ཁོ་ན་ན་ཡོད་ཀྱི། ལུས་ངག་གི་ལས་ནི་རྟོག་དཔྱོད་སྔོན་འགྲོ་ཅན་ཡིན་པས། རྟོག་དཔྱོད་ཀུན་(༢༠བ)
སློང་མེད་པས། གཉིས་པ་ཡན་ཆད་ཀྱི་ལུས་ངག་གི་ལས་ཀྱི་དང་པོའི་རྟོག་དཔྱོད་ཀྱི་ཀུན་སློང་གིས་བསླང་ངོ་། །འདིར་རྟོག་དང་བཅས་དག་ན་བྱས་ན། བསམ་གཏན་དང་པོ་ཁྱད་པར་ཅན་ལ་མ་ཁྱབ་པར་འགྲོ་སྟེ། རྟོག་པ་མེད་པས་སོ། །བཞི་པ་ནི། འདོད་པ་ན་ཡང་བསྒྲིབས་པ་མེད། །གང་ཕྱིར་ཀུན་སློང་མེད། དཔྱོད་པ་མེད་པའི་ས་དག་ན་མེད་པར་མ་ཟད་ཀྱི། འདོད་པ་ན་ཡང་བསྒྲིབས་ལ་ལུང་མ་བསྟན་གྱི་རིག་བྱེད་མེད་ཀྱི་ཚངས་པའི་འཇིག་རྟེན་ཁོ་ན་ན་ཡོད་དེ། རྒྱུ་མཚན་གང་གི་ཕྱིར་ཚངས་བའི་འཇིག་རྟེན་ཡན་ཆད་དུ་རྟོག་དཔྱོད་མེད་ལ་འདོད་ན་དུས་ཀྱི་ཀུན་སློང་བསྒྲིབས་ལ་ལུང་མ་བསྟན་གྱི་ཡིད་སྒོམ་སྤང་མེད་ལ། འདོད་ཁམས་ན་བསྒྲིབས་ལ་ལུང་མ་བསྟན་མཐོང་ཡང་འཇིག་ལྟ་མཐར་ལྟ་མཚུངས་ལྡན་ཁོ་ན་ཡོད་པར་འདོད་ལ། དེ་ཡང་ཁ་ནང་དུ་བལྟས་པས་དུས་ཀྱི་ཀུན་སློང་དུ་མེད་པའི་ཕྱིར། དཔེར་ན། ཚངས་པ་ཆེན་པོས་བདག་ཉིད་བསྔགས་པའི་གཏམ་རླུང་བསྐུར་དེ་གཡོས་ཀུན་ནས་བསླང་བའི་ངག་གི་ལས་དེ་བསྒྲིབས་ལ་ལུང་མ་བསྟན་གྱི་ཀུན་ནས་སློང་བའི་རིག་བྱེད་ཡིན་ཏེ། དེ་ཉོན་མོངས་ཅན་ཡིན་པས་དགེ་བ་དང་མ་སྒྲིབ་ལུང་མ་བསྟན་པ་མ་ཡིན། བསམ་གཏན་དང་པོ་ཡན་ཆད་ན་མི་དགེ་བ་མེད་པས་མི་དགེ་བ་མ་ཡིན་པའི་ཕྱིར་རོ། །ཚངས་པའི་འཇིག་རྟེན་ཡན་ཆད་ན་ངག་གི་རིག་བྱེད་མེད་ན་སྒྲའི་སྐྱེ་མཆེད་ཇི་ལྟར་ཡོད་ཅེ་ན། རླུང་སྒྲ་སོགས་ཕྱིའི་འབྱུང་བ་རྒྱུར་བྱས་པ་ཡོད་དོ། །འདི་ལྟར་སྨོས་པས་རྣམ་པར་རིག་བྱེད་ཀྱི་སྒྲ་དགག་པའི་ཆེད་དུ་ཡིན་གྱི། ཕྱིའི་འབྱུང་བ་ཆེན་པོ་གཅིག་པུ་རྒྱུར་བྱས་ལས་མེད་པར་བཤད་ན་ཡང་མི་རུང་སྟེ། བསམ་གཏན་གཉིས་པ་ལ་སོགས་པ་ན་ལག་པ་ལ་སོགས་པའི་སྒྲ་ཡང་སྲིད་དོ། །དེ་ལྟར་མ་ཡིན་ན་བསྟན་བཅོས་དང་འགལ་བར་འགྱུར་ཏེ། འདི་ལྟར་བསྟན་བཅོས་ལས་ནི། གང་ཞིག་སྒྲའི་ཁམས་དང་ལྡན་ཅེ་ན། སྨྲས་པ། འདོད་པ་ན་སྤྱོད་པ་དང་གཟུགས་ན་སྤྱོད་པའོ། །གང་ཞིག་མི་ལྡན་(༢༡ན)
ཅེ་ན། སྨྲས་པ། གཟུགས་མེད་པ་ན་སྤྱོད་པའོ། །ཞེས་བཤད་དེ། ཐོབ་དང་མ་ཐོབ་རང་རྒྱུད་དུ། །གཏོགས་པ་རྣམས་ཀྱི། ཞེས་འབྱུང་བའི་ཕྱིར། སེམས་ཅན་དུ་མི་བགྲང་བ་ཕྱི་རོལ་གྱི་དང་ལྡན་པ་ནི་མ་ཡིན་ནོ། གཞན་དག་ན་རེ། (འདིའི་གཞན་དག་ཀྱང་བྱེ་སྨྲའི་འདོད་པ་ནང་ཚན་པ་ཞིག་གོ། །མཆན།) བཅོམ་ལྡན་འདས་གནས་གཙང་མན་བཞུགས་པ་ལ་ཕྱག་དང་བསྟོད་པ་བཀུར་སྟི་བྱེད་པས། བསམ་གཏན་གཉིས་པ་སོགས་ན་གནས་པ་རྣམས་ཕན་ཚུན་སྨྲ་བར་བྱེད་པ་སོགས་མ་སྒྲིབ་ལུང་མ་བསྟན་གྱི་རིག་བྱེད་ནི་ཡོད་དོ། །དེ་སློང་བྱེད་ནི་འོག་མའི་སེམས་ཀྱིས་དགོས་ཏེ། གཉིས་པ་སོགས་ན་ལུས་མིག་དང་། །རྣ་བའི་རྣམ་ཤེས་རྣམ་རིག་སློང་། །གང་ཡིན་དེ་ནི་དང་པོར་གཏོགས། །དེ་ལུང་མ་བསྟན་ཉོན་མོངས་མིན། །ཅེས་འབྱུང་བས། ས་འོག་མའི་དགེ་བ་ནི་དམན་པ་དང་། ས་འོག་མའི་ཉོན་མོངས་ནི་སྤངས་ཟིན་པའི་ཕྱིར། གོང་མའི་རིག་བྱེད་འོག་མའི་སེམས་ཀྱིས་སློང་ངོ་ཞེས་ཟེར་རོ། །བྱེ་སྨྲས། སློང་སེམས་བཞིན་དུ་རིག་བྱེད་ཀྱང་བསམ་གཏན་དང་པོའི་ས་པར་འདོད་པའི་ལུགས་སྔ་མ་ལེགས་སོ། །གསུམ་པ་ཆོས་གསུམ་སོ་སོའི་དབྱེ་བ་ལ། དགེ་བའི། མི་དགེ་བའི། ལུང་མ་བསྟན་གྱི་དབྱེ་བའོ། །དང་པོ་ལ། དོན་དམ་པའི་དགེ་བ་བཤད། ངོ་བོ་ཉིད་ཀྱི་དགེ་བ། མཚུངས་ལྡན་གྱི་དགེ་བ། ཀུན་སློང་གི་དགེ་བ་བཤད་པའོ། །དང་པོ་ནི། ཐར་པ། །དམ་པའི་དོན་དུ་དགེ། ཐར་པ་ཆོས་ཅན། དོན་དམ་པར་དགེ་སྟེ། མྱ་ངན་ལས་འདས་པས་སྡུག་བསྔལ་ཐམས་ཅད་ཉེ་བར་ཞི་བའི་ཕྱིར་ཏེ། མི་བདེ་བ་དང་འབྲེལ་བ་བག་ཙམ་ཡང་མེད་པའི་ཕྱིར་རོ། །དཔེར་ན། ནད་མེད་པ་བཞིན་ནོ། །ངོ་བོ་ཉིད་དང་། མཚུངས་ལྡན་དང་། ཀུན་ནས་སློང་བས་དགེ་བ་དེ་ནི་འདུ་བྱེད་དང་འགྱུར་བའི་སྡུག་བསྔལ་གྱི་མཆོག་ཏུ་བདེ་བ་མ་ཡིན་ནོ། །གཉིས་པ་ནི། རྩ་བ། །ངོ་ཚ་ཁྲེལ་ཡོད་བདག་ཉིད་ཀྱིས། །ཆགས་སྡང་རྨོངས་གསུམ་མེད་པའི་དགེ་བའི་རྩ་བ་གསུམ་དང་། ཡོན་ཏན་དང་(༢༡བ)
ཡོན་ཏན་ཅན་ལ་གུས་པའི་ངོ་ཚ་ཤེས་པ་དང་། ཁ་ན་མ་ཐོ་བ་ལ་འཇེམ་པའི་ཁྲེལ་ཡོད་པའི་བདག་ཉིད་ཀྱིས་དགེ་བ་ནི་ངོ་བོ་ཉིད་ཀྱི་དགེ་བ་ཡིན་ཏེ། ཀུན་སློང་དང་མཚུངས་ལྡན་ལ་མི་བལྟོས་པའི་ཕྱིར། འཕྲོད་པའི་སྨན་བཞིན་ནོ། །འོ་ན་དད་པ་དང་བརྩོན་འགྲུས་སོགས་ངོ་བོ་ཉིད་ཀྱི་དགེ་བ་ཡིན་ནམ་སྙམ་ན། ངོ་བོ་ཉིད་ཀྱི་མི་དགེ་བ་འཆད་ཙམ་ན་ལྔ་པོ་དེ་ལས་བཟློག་པ་ངོ་བོ་ཉིད་ཀྱིས་མི་དགེ་བ་ཡིན་ཀྱང་། མ་དད་པ་དང་ལེ་ལོ་ཀུན་དད་པ་དང་བརྩོན་འགྲུས་ལས་བཟློག་སྟེ། ངོ་བོ་ཉིད་ཀྱིས་མི་དགེ་བ་མིན། དེས་ན་ངོ་བོ་ཉིད་ཀྱི་མི་དགེ་བ་བཟློག་པར་བཤད་པའི་ཆེད་དུ། ངོ་བོ་ཉིད་ཀྱི་དགེ་བ་དེ་ལྔར་བཞག་གོ། །གསུམ་པ་ནི། དེ་དག་དང་ལྡན་མཚུངས་ལྡན་གྱིས། །ངོ་བོ་ཉིད་ཀྱིས་དགེ་བ་དེ་དག་དང་མཚུངས་ལྡན་གྱི་ཆོས་རྣམས་ནི། མཚུངས་ལྡན་གྱི་དགེ་བ་དག་ཡིན་ཏེ། དགེ་བའི་རྩ་བ་དང་མཚུངས་པར་མི་ལྡན་པའི་སེམས་ལ་དགེ་བ་ཉིད་མེད་པའི་ཕྱིར། སྨན་དང་སྦྱར་བའི་བཏུང་བ་བཞིན་ནོ། །བཞི་པ་ནི། བྱ་བ་ལ་སོགས་ཀུན་སློང་བས། །དགེ་བའི་རྩ་བ་ལ་སོགས་པ་དང་མཚུངས་ལྡན་གྱི་ཆོས་དེ་དག་གིས་ཀུན་ནས་བསླང་བའི་བྱ་བ་ལུས་དང་ངག་གི་ལས་དང་། ལ་སོགས་པས་སྐྱེ་བ་ལ་སོགས་པ་དང་། ཐོབ་པ་དང་། འགོག་པ་དང་། འདུ་ཤེས་མེད་པའི་སྙོམས་འཇུག་རྣམས་ནི་ཀུན་ནས་སློང་བས་དགེ་བ་སྟེ། བུད་མེད་འགའ་ཞིག་གིས་སྨན་དང་སྦྱར་བའི་བཏུང་བ་འཐུངས་པའི་ནུ་ཞོས་བུ་ལ་ནད་མེད་པ་སོགས་འོང་སྟེ་བརྒྱུད་པས་ཕན་པ་ལྟ་བུའོ། །ཡང་དག་པའི་ལྟ་བས་སྟེ། དགེ་བ་མཚམས་སྦྱར་བའི་ཐོབ་པ་དེ་དགེ་བས་ཀུན་ནས་སློང་བ་ཡིན་པ་ལ། ཐེ་ཚོམ་གྱིས་དགེ་བ་མཚམས་སྦྱར་བའི་དེའི་ཐོབ་པ་དེ་ཀུན་ནས་སློང་བས་དགེ་བ་ཡིན་ནམ་མིན་དཔྱོད་ན། ཐོབ་པ་དེ་མ་ཆགས་པ་ལ་སོགས་པ་བཞིན་ངོ་བོ་ཉིད་ཀྱིས་མ་ཡིན། ཚོར་སོགས་བཞིན་དུ་མཚུངས་ལྡན་གྱིས་ཀྱང་མ་ཡིན། ཀུན་ནས་བསླང་བས་ཀྱང་མ་ཡིན་ཏེ། དེའི་ཀུན་སློང་ཐེ་ཚོམ་ནི་ཉོན་མོངས་(༢༢ན)
ཡིན་པའི་ཕྱིར། དེའི་ཐོབ་པ་ནི་ཇི་ལྟར་དགེ་བ་ཡིན་བརྗོད་དགོས་སོ། །དེ་བཞིན་དུ་སྲིད་པ་ཉིང་མཚམས་སྦྱོར་བའི་ཚེའི་སྐྱེས་ནས་ཐོབ་པའི་དགེ་བ་ཡང་ཇི་ལྟར་དགེ་བ་ཡིན་པ་བརྗོད་པར་བྱ་སྟེ། ཉིང་མཚམས་སྦྱོར་བའི་སེམས་ཉོན་མོངས་ཅན་དེས་སྐྱེས་ནས་ཐོབ་པའི་དགེ་བ་ཐོབ་པ་དེ་ཡང་ཇི་ལྟར་དགེ་བ་ཡིན་པར་བརྗོད་དགོས་སོ་ཞེས་སློབ་དཔོན་ཐུགས་མ་རངས་ནས་ཐེ་ཚོམ་བསླང་བའོ། །འདི་ལ་ལན་ནི། དེ་ལྟ་བུའི་ཐོབ་པ་དེ་དག་སྐལ་བ་མི་མཉམ་པའི་སེམས་ལས་རྐྱེན་དུ་ལྟོས་པ་ཡིན་གྱི། དགེ་སོགས་ཀྱི་ངོ་བོར་ནི་མ་ཡིན་པ་བདེན་དུ་ཆུགགལ་ཏེ་མི་བདེན་པ་སྲིད་པ་ན་ནི། ཀུན་སློང་དང་མཚུངས་ལྡན་གྱི་དགེ་བར་ནི་མི་འོངས་པས། དོན་དམ་དང་ངོ་བོ་ཉིད་ཀྱི་དགེ་བ་གང་རུང་དུ་ཁས་མི་ལེན་ཀ་མེད་པའམ། ཡང་ན་དགེ་རྩས་ཀུན་ནས་བསླང་བྱ་ཡིན་པའི་ཕྱིར། དེ་དག་མ་འོངས་པའི་གནས་སྐབས་ན་དགེ་བ་ཡིན་ལ། ཉོན་མོངས་ཅན་གྱི་སེམས་ཀྱིས་དེ་དག་གི་ཐོབ་པའི་གེགས་སེལ་གྱིས། དེ་དག་དགེ་བ་ཉིད་དུ་བྱེད་པ་མ་ཡིན་ནོ་ཞེས་ལན་གདབ་བོ་ཟེར་རོ། །གཉིས་པ་མི་དགེ་བའི་དབྱེ་བ་ནི། བཟློག་པ་མི་དགེ། དགེ་བ་བཞི་ལས་བཟློག་པའི་མི་དགེ་བ་ཡང་བཞིར་ཡོད་དེ། ཡུལ་ཅན་དམ་པའི་ཡུལ་དུ་ཆོས་ཅན། འཁོར་བ་ཐམས་ཅད་དོན་དམ་པའི་མི་དགེ་བ་ཡིན་ཏེ། སྡུག་བསྔལ་ཐམས་ཅད་འཇུག་པའི་བདག་ཉིད་ཀྱིས་མཆོག་ཏུ་མི་བདེ་བའི་ཕྱིར། མི་དགེ་བའི་རྩ་བ་གསུམ་དང་། ངོ་ཚ་དང་ཁྲེལ་མེད་རྣམས་ནི་ངོ་བོ་ཉིད་ཀྱི་མི་དགེ་བའོ། །དེ་དག་དང་མཚུངས་ལྡན་གྱི་ཆོས་ནི་མཚུངས་ལྡན་གྱི་མི་དགེ་བའོ། །དེ་དག་གིས་ཀུན་ནས་བསླངས་པའི་ལུས་དང་ངག་གི་ལས་དང་། སྐྱེ་བ་ལ་སོགས་པ་དང་མི་དགེ་བའི་ཐོབ་པ་རྣམས་ནི་ཀུན་ནས་བསླངས་པའི་མི་དགེ་བའོ། །འཁོར་བའི་དཔེ་ནི་ནད་ཀྱིས་བྱས་ཏེ། འཁོར་བ་ནད་དང་འདྲའོ། །ཆགས་པ་ལ་སོགས་པའི་དཔེ་ནི། སྨན་ཟེར་རུང་(༢༢བ)
དུག་ཡིན། མི་འཕྲོད་པའི་སྨན་གྱིས་བྱས་ཏེ། གཞན་དང་མཚུངས་ལྡན་དང་ཀུན་ནས་སློང་བ་ལ་མི་བལྟོས་པས་སོ། །མཚུངས་ལྡན་གྱི་དཔེ་ནི། མི་འཕྲོད་པའི་སྨན་དང་སྦྱར་བའི་བཏུང་བས་བྱས་སོ། །ལུས་དང་ངག་གི་ལས་སྐྱེ་སོགས་ཀྱི་དཔེ་ནི། མི་འཕྲོད་པའི་སྨན་དང་སྦྱར་བའི་བཏུང་བ་ལས་བྱུང་བའི་འོ་མས་བྱས་སོ། །འོ་ན་ཟག་པ་དང་བཅས་པ་ཅུང་ཟད་ཀྱང་ཆོས་ཅན། ལུང་མ་བསྟན་དང་དགེ་བར་མི་འགྱུར་བར་ཐལ། ཟག་བཅས་ཐམས་ཅད་འཁོར་བའི་ཁོངས་སུ་གཏོགས་པའི་ཕྱིར་ཞེ་ན། མ་ཁྱབ་སྟེ། ཡུལ་ཅན་དོན་དམ་རིགས་ཤེས་ཀྱི་ཡུལ་དུ་སྡུག་བསྔལ་གྱི་བདག་ཉིད་ཀྱི་ལྡོག་པ་དེ་ནས་དོན་དམ་པའི་མི་དགེ་བ་ཞེས་བྱ་ལ། འཁོར་བའི་ཁོངས་སུ་གཏོགས་པ་ཁ་ཅིག་དགེ་མི་དགེར་ལུང་བསྟན་དུ་མེད་པ་རྣམ་སྨིན་དུ་འདུག་པའི་ལྡོག་པ་ནས་ལུང་མ་བསྟན་ཅེས་བྱ། རྣམ་སྨིན་ཡིད་དུ་འོང་བ་བསྐྱེད་པའི་ལྡོག་པ་ན་དགེ་བ་ཞེས་སུ་བརྗོད་པའི་ཕྱིར་རོ། །གསུམ་པ་ལུང་མ་བསྟན་གྱི་དབྱེ་བ་ནི། དོན་དམ་པར། །ལུང་མ་བསྟན་པ་བསྟན་པ་དག །ལུང་མ་བསྟན་པ་དེ་ལ་འདུས་མ་བྱས་བརྟན་ཅིང་རྟག་པ་ནམ་མཁའ་དང་བརྟགས་མིན་གྱི་འགོག་པ་དག་མཚུངས་ལྡན་ནམ་སློང་བ་ལ་སོགས་པའི་རྣམ་གྲངས་མེད་པར་དོན་དམ་པར་ལུང་མ་བསྟན་དག་ཡིན་ཏེ། དགེ་བ་དང་མི་དགེ་བའི་མཚན་ཉིད་བཞི་དང་བྲལ་བའི་ཕྱིར། ངོ་བོ་ཉིད་ཀྱི་ལུང་མ་བསྟན་ནི། བུམ་པ་ལྟ་བུ་བེམས་པོ་རྣམས་དང་། འདོད་ཁམས་སུ་སྒྲིབ་པ་ལ་འཇིག་ཚོགས་མཐར་འཛིན་དང་གོང་མ་ན་ཉོན་མོངས་པ་ཐམས་ཅད་དོ། །མཚུངས་ལྡན་ནི་བཟོ་སེམས་ལ་སོགས་པ་དང་མཚུངས་པར་ལྡན་པའོ། །ཀུན་སློང་གིས་ནི་བཟོ་དང་། སྤྱོད་ལམ་དང་། སྤྲུལ་པ་དང་། རྣམ་སྨིན་སྐྱེས་ཀྱི་ལུས་ངག་གི་རིག་བྱེད་དང་། སྐྱེ་སོགས་དང་ཐོབ་པའོ། །ད་ནི་འདི་དཔྱད་པར་བྱ་སྟེ། ཀུན་སློང་གིས་འབྱུང་བ་བསླང་བ་ན་ཆོས་ཅན། འབྱུང་བ་ཡང་ཀུན་སློང་གི་(༢༣ན)
དབང་གིས་དགེ་མི་དགེར་ཐལ། ཀུན་སློང་གི་དབང་གིས་ལུས་ངག་གི་ལས་དགེ་མི་དགེར་འགྱུར་བའི་ཕྱིར་ཞེ་ན། མ་ཁྱབ་སྟེ། སྤྱིར་འབྱུང་བ་ཙམ་ཀུན་སློང་གིས་བསླང་བ་ཡོད་རུང་། ཀུན་སློང་གིས་ལུས་ངག་གི་ལས་ལ་དམིགས་པ་དེ་དགེ་མི་དགེར་འགྱུར་གྱི། ཀུན་སློང་དེས་འབྱུང་བ་དེ་ལ་མ་དམིགས་པས་འབྱུང་བ་དགེ་མི་དགེར་མི་འགྱུར་བའི་ཕྱིར། དེ་ལྟར་ན་དོགས་པ་འདི་འདྲ་ཤར་ཏེ། ཀུན་སློང་གིས་བསྐྱེད་པར་འདྲ་བ་ལས། དེ་ལ་མ་དམིགས་ན་ཀུན་ནས་བསླང་ཙམ་གྱིས་དགེ་མི་དགེར་མི་འགྱུར་བ་དང་། དམིགས་ན་འགྱུར་ན། འོ་ན་མཉམ་གཞག་གི་རིག་བྱེད་མིན་པ་ཆོས་ཅན། ཀུན་ནས་སློང་བའི་དབང་གིས་དགེ་བ་མ་ཡིན་པར་ཐལ། མཉམ་པར་བཞག་པ་ལ་རིག་བྱེད་མིན་པ་འདི་ལྟ་བུ་ཞིག་ཁས་བླངས་སྙམ་ཞིང་། དེ་ལ་དམིགས་པ་མེད་པའི་ཕྱིར། ཅི་མཉམ་གཞག་གི་རིག་བྱེད་མིན་པ་ཆོས་ཅན། མཉམ་པར་མ་བཞག་པའི་སེམས་ཀྱིས་ཀུན་ནས་སློང་བ་ནི་མི་རིགས་པར་ཐལ། སྐལ་བ་མི་འདྲ་བའི་ཕྱིར། དེས་ན་མཉམ་གཞག་གི་རིག་མིན་དེ་ཇི་ལྟར་དགེ་བར་འཇོག་ཅེས་ཐེ་ཚོམ་པའོ། །ཡང་ན། ཡང་དེ་ལ་མཉམ་གཞག་གི་དམིགས་པའི་སེམས་པ་མེད་ཀྱང་མཉམ་གཞག་གི་བསྐྱེད་པ་ཙམ་གྱིས་དགེ་བ་ཡིན་པའམ། ཡང་ན་མཉམ་གཞག་གི་སྔར་མཉམ་པར་མ་བཞག་གོང་གི་སེམས་པས་དམིགས་པའི་ཕྱིར་དགེ་བར་བསྐྱེད་དོ་ཞེ་ན། འོ་ན་ལྷའི་མིག་དང་རྣ་བ་དག་ཀྱང་དགེ་བ་ཉིད་དུ་ཐལ། མཉམ་གཞག་གི་ཏིང་ངེ་འཛིན་ཙམ་གྱིས་བསྐྱེད་པ་གང་ཞིགཡང་ན་མཉམ་པར་མ་བཞག་པའི་སེམས་པས་མིག་དང་རྣ་བ་འདི་ལྟ་བུ་ཞིག་བསྐྱེད་དོ་སྙམ་དུ་སེམས་པས་དམིགས་པའི་ཕྱིར། འདོད་མི་ནུས་ཏེ། རྣ་མིག་མངོན་ཤེས་ལུང་མ་བསྟན་བྱ་བ་དང་འགལ་བས། སློབ་དཔོན་གྱིས། འདི་ལ་དཔྱད་(༢༣བ)
དཀའ་བས་ལན་ལ་འབད་པར་བྱའོ། །ཞེས་གསུངས་ནས་ལན་མ་བཏབ་འདུག་ཅིང་། གནའ་མཆན་རྙིང་པ་གཅིག་ཏུ་མཉམ་པར་མ་བཞག་པའི་དགེ་མི་དགེའི་རིག་བྱེད་མ་ཡིན་པ་ལ་སེམས་པས་དམིགས་བྱེད་དགོས། མཉམ་གཞག་གི་རིག་མིན་དགེ་བ་ལ་དམིགས་བྱེད་ཀྱི་སེམས་པ་མེད་ཀྱང་ཆོས་ཉིད་ཀྱི་དབང་གིས་དགེ་བར་འཇོག་ལ། ལྷའི་མིག་དང་རྣ་བ་ནི་དགེ་བ་མིན་ཏེ། རྣམ་གྲོལ་གྱི་ལམ་དང་ལྷན་ཅིག་སྐྱེ་བའི་ཕྱིར་དང་། དེ་དག་གི་སྦྱོར་བ་ཡང་སྒྲ་དང་སྣང་བ་དང་ཡིད་ལ་བྱེད་པ་ཡིན་པས་སྦྱོར་བའི་དབང་གི་དགེ་བ་མ་ཡིན་པར་སྨྲའོ་ཞེས་བྲིས་གདའོ། །གཉིས་པ་ཀུན་སློང་བྱེ་བྲག་ཏུ་བཤད་པ་ལ། ཀུན་སློང་གི་དབྱེ་བ། དབྱེ་བ་སོ་སོའི་རང་བཞིན། མཚན་གཞི་ལ་མུ་བཞི་དཔྱད་པའོ། །དང་པོ་ནི། ཀུན་སློང་རྣམ་གཉིས་རྒྱུ་དང་ནི། །དེ་ཡི་དུས་ཀྱི་སློང་ཞེས་བྱ། །འདོད་པ་ན་འཇིག་མཐར་གྱིས་བསྒྲིབས་ལ་ལུང་མ་བསྟན་ནི་ཁ་ནང་དུ་བལྟས་པ་མཐོང་སྤང་ཡིན་ཙམ་ན། ཕྱིར་ལྟས་ཀྱི་ལུས་ངག་གི་རིག་བྱེད་མི་སློང་བར་གོང་དུ་བཤད་པ་དང་། བུདྡྷས་ལོག་ལྟ་ལས་ལོག་རྟོག་དང་ལོག་པའི་ངག་སོགས་འབྱུང་བར་བཤད་པ་འགལ་སྙམ་ན། མི་འགལ་ཏེ། སྤྱིར་ཀུན་སློང་ལ་རྣམ་པ་གཉིས་ཏེ། རྒྱུའི་ཀུན་སློང་དང་ནི། བྱ་བ་དེའི་དུས་ན་ཡོད་པའི་ཀུན་སློང་ཞེས་བྱ་བ་གཉིས་སུ་ཡོད་པ་ལས། ལོག་ལྟ་དེ་ནི་ལོག་པའི་ངག་སོགས་འབྱུང་བའི་གྲོགས་ཙམ་ཡིན་གྱི་གཙོ་བོའི་ཀུན་སློང་མིན། གྲོགས་ཡོད་ཀྱང་གཙོ་བོའི་རྒྱུ་མེད་ན་འབྲས་བུ་མི་འབྱུང་སྟེ། མིག་གི་དབང་པོ་མེད་ན་གཟུགས་ཡོད་ཀྱང་མིག་གི་རྣམ་ཤེས་མི་འབྱུང་བ་དང་འདྲ། འོ་ན་གཙོ་བོའི་རྒྱུ་གང་ཡིན་ན། རྒྱུའི་ཀུན་སློང་གཉིས་པ་དང་དུས་ཀྱི་ཀུན་སློང་ཡིན། ལོག་ལྟ་དེ་རྒྱུ་དུས་ཀྱི་ཀུན་སློང་གཉིས་ཀྱི་དང་པོ་གཙོ་བོ་དེ་མིན། གྲོགས་ཙམ་ཡིན་པས་དེ་ལ་བརྟེན་ནས་ལོག་རྟོག་སོགས་འབྱུང་བར་གསུངས་པ་ཡིན་ནོ། །ལོག་ལྟས་ལོག་རྟོག་སོགས་དངོས་ཀྱི་ཀུན་ནས་སློང་བའི་ལུང་མ་ཡིན་(༢༤ན)
ཏེ། ཡིན་ན་བཟློག་པའི་ཚེ་ཡང་དག་པའི་ལྟ་བས་ཡང་དག་པའི་ངག་སོགས་ཀུན་ནས་སློང་དགོས་པ་ལས་དེ་ལྟར་ཡང་མི་རུང་བའི་ཕྱིར། གཉིས་པ་ནི། གཉིས་ལས་དང་པོ་རབ་འཇུག་བྱེད། །གཉིས་པ་རྗེས་སུ་འཇུག་བྱེད་ཡིན། །ཀུན་སློང་གཉིས་ལས་དང་པོ་རབ་ཏུ་འཇུག་བྱེད་ཡིན་ཏེ། རྒྱུ་ཡང་ཡིན་ཀུན་ནས་སློང་བ་ཡང་ཡིན་ཅིང་འཕེན་པར་བྱེད་པ་ཡིན་པའི་ཕྱིར། གཉིས་པ་ནི་དེའི་རྗེས་སུ་འཇུག་བྱེད་ཡིན་ཏེ། བྱ་བའི་དུས་སུ་མཐུན་པར་འཇུག་པའི་ཕྱིར། དུས་ཀྱི་ཀུན་སློང་མེད་ན་རྒྱུའི་ཀུན་སློང་གིས་འཕངས་སུ་ཟིན་ཀྱང་། བྱ་བ་མཐར་ཐུག་རྣམ་པར་རིག་བྱེད་དུ་མི་འགྱུར་ཏེ། དཔེར་ན། འགའ་ཞིག་གྲོང་དུ་འགྲོ་སྙམ་ནས་འཕངས་ཀྱང་བར་མ་དོར་ཤི་ན་གྲོང་དུ་མི་ཕྱིན་པ་དང་འདྲའོ། །དུས་ཀྱི་ཀུན་སློང་མེད་ན་ཤི་བ་བཞིན་དུ་ལས་ལམ་གྱི་རིག་བྱེད་མཐར་མི་ཕྱིན་ན། དགེ་ཚུལ་ཕྱིར་མི་འོང་གཅིག་གིས་དགེ་འདུན་ལ་དགེ་སློང་གི་དངོས་པོར་གསོལ་བ་བཏབ་ནས་འགོག་སྙོམས་ལ་ཞུགས་ནས། ལས་བརྗོད་པའི་མཇུག་ཏུ་སོ་ཐར་གྱི་སྡོམ་པ་མི་སྐྱེ་བར་ཐལ་བ་ལས། དེ་ཡང་འདོད་མི་ནུས་པས་སོ་སྙམ་ན། དེ་ནི་ཚུལ་ལུགས་གཞན་ཡིན་ཏེ། སེམས་མེད་པ་ལ་དུས་ཀྱི་ཀུན་སློང་མེད་ཀྱང་ཐོབ་པ་ཡིན་པ་ལ། སེམས་དང་བཅས་པ་ལ་དུས་ཀྱི་ཀུན་སློང་མེད་པར་མི་ཐོབ་པས། སེམས་བཅས་ལ་དུས་ཀྱི་ཀུན་སློང་གི་རིག་བྱེད་ཆེས་གསལ་བས་ནི་དགེ་སློང་གི་དངོས་པོ་འབྱུང་བར་བྱེད་པའི་ནུས་པ་ནི་དེ་ཡིན་ནོ། །འདི་ལ་ནི་ཐ་སྙད་འདི་འདྲ་ཞིག་ཡོད་དེ། ངེས་འབྱུང་ཆུང་ངུ་དང་ལྷན་ཅིག་པའི་རྒྱུའི་ཀུན་སློང་བྱས། ངེས་འབྱུང་ཆེན་པོ་དང་ལྷན་ཅིག་པའི་སེམས་པས་དུས་ཀྱི་ཀུན་སློང་བྱས་ན་སྡོམ་པ་དངོས་ཀྱི་ལས་ལམ་དངོས་གཞི་གྲུབ་པ་ན་སྡོམ་པ་སྐྱེས་པའི་ཚེ་སྡོམ་པ་ནི་ཆུང་ངུ་དང་། རིག་བྱེད་ནི་ཆེན་པོ་དང་། ཡང་རྒྱུའི་ཀུན་སློང་ངེས་འབྱུང་ཆེན་པོ་དང་། དུས་ཀྱི་ཀུན་སློང་ལུང་མ་བསྟན་དང་ཉོན་མོངས་པས་བསླངས་ནས་སྐྱེས་པའི་(༢༤བ)
སྡོམ་པ་ལ་ནི་སྡོམ་པ་ཆེན་པོ་དང་། རིག་བྱེད་ཆུང་ངུ་ཞེས་བྱ་ལ། དེ་ལྟར་ཆེ་འབྲིང་ཆུང་གསུམ་དུ་བཞག་དགོས་ལ། སྡོམ་མིན་ལ་ཡང་འདིས་མཚོན་ཅིང་། དེའི་ཚེ་དགྲ་བཅོམ་པ་ལ་སོ་ཐར་གྱི་སྡོམ་པ་ཆུང་ངུ་ལས་མེད་པ་དང་། རིག་བྱེད་ཀྱི་དུས་འགོག་སྙོམས་ལ་ཞུགས་ན་རིག་བྱེད་ཆེ་ཆུང་གང་ཡང་མེད་པ་སྲིད་དོ། །གསུམ་པ་མཚན་གཞི་ལ་མུ་བཞི་དཔྱད་པ་ལ། རབ་ཏུ་འཇུག་བྱེད་ཁོ་ན་ཡིན་པའི་མུ། གཉིས་ཀ་ཡིན་པའི་མུ། རྗེས་སུ་འཇུག་བྱེད་ཁོ་ན་ཡིན་པའི་མུ། ཕན་ཚུན་འཇུག་ཚུལ་ལ་དཔྱད་པའི་མུ། གཉིས་ཀ་མིན་པའི་མུའོ། །དང་པོ་ནི། མཐོང་བས་སྤང་བྱའི་རྣམ་ཤེས་ནི། །རབ་ཏུ་འཇུག་བྱེད་ཡིན། མཐོང་བས་སྤང་བྱའི་རྣམ་ཤེས་ནི་ཆོས་ཅན། རྣམ་པར་རིག་བྱེད་རབ་ཏུ་འཇུག་བྱེད་ཁོ་ན་ཡིན་ཏེ། རྒྱུའི་ཀུན་སློང་རྟོག་དཔྱོད་དག་གི་ཡང་གཞིར་གྱུར་པའི་ཀུན་སློང་ཡིན་པའི་ཕྱིར། རྗེས་སུ་འཇུག་བྱེད་ཁ་ཕྱིར་ལྟའི་དུས་ན་ཚོགས་དྲུག་ཉག་ཕྲེང་དུ་སྐྱེ་བས། ཁ་ནང་ལྟའི་སྔར་གྱི་དེ་མེད་པའི་ཕྱིར། རྗེས་སུ་འཇུག་བྱེད་ནི་མ་ཡིན་ནོ། །ཡིན་ན་ཉེས་པ་གཞན་ཡང་ཡོད་དེ། མཐོང་བས་སྤང་བར་བྱ་བ་དེ་ཡང་རྗེས་སུ་འཇུག་བྱེད་ཡིན་ན་ཆོས་ཅན། མཐོང་སྤང་གི་སེམས་དེས་ཀུན་ནས་སློང་བའི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ཀྱང་མཐོང་སྤང་དུ་ཐལ། ཇི་ལྟར་སྒོམ་སྤང་གི་སེམས་ཀྱིས་ཀུན་ནས་སློང་བའི་ལུས་ངག་གི་ལས་སྒོམ་སྤང་ཡིན་པ་དང་མཚུངས་པའི་ཕྱིར། དེ་ལ་འདོད་དོ་སྙམ་ན། ཆོས་མངོན་པ་ལ་གནོད་པར་འགྱུར་ཏེ། ཉོན་མོངས་ཅན་མིན་མཐོང་སྤང་མིན། །གཟུགས་མིན། ཅེས་གསུངས་པ་དང་འགལ་བའི་ཕྱིར། གཟུགས་ནི་ཆོས་ཅན། མཐོང་སྤང་མ་ཡིན་ཏེ། འཇིག་ལྟ་བཞིན་རིག་པ་མཐོང་ལམ་དང་མི་འགལ་བའི་ཕྱིར། བདེན་པ་མཐོང་བ་ལ་ཡང་གཟུགས་ཡོད་པས་སོ། །གཟུགས་ནི་ཆོས་ཅན། མཐོང་ལམ་མ་ཡིན་ཏེ། མཐོང་ལམ་མ་རིག་པ་དང་འགལ་བ་བཞིན། གཟུགས་ནི་མ་རིག་པ་དང་མི་འགལ་བའི་ཕྱིར། མ་རིག་པ་ཡོད་པ་(༢༥ན)
ལའང་གཟུགས་ཡོད་པས་སོ། །མཐོང་བས་སྤང་བྱ་མ་ཡིན་པའི་ཤུགས་ཀྱིས་སྒོམ་སྤང་དུ་གྲུབ་བོ། །གཟུགས་མཐོང་སྤང་དུ་འདོད་པའི་ཕྱོགས་ལ་ནི། གཟུགས་རིག་པ་དང་མི་འགལ་བ་འདི་མི་འགྲུབ་པས་ད་དུང་ཁྱོད་རང་གི་སྒྲུབ་བྱེད་ཀྱིས་བསྒྲུབ་པར་བྱ་དགོས་སོ། །ཡང་མཐོང་སྤང་གི་སེམས་ཀྱིས་གཟུགས་སློང་བ་ན་དེའི་རྟེན་གྱི་འབྱུང་བ་ཡང་སློང་བས་འབྱུང་བ་དེ་ཆོས་ཅན། མཐོང་སྤང་ཡིན་པར་ཐལ། སེམས་ཀྱིས་བསླང་བར་མཚུངས་པའི་ཕྱིར། འདི་ལ་གཟུགས་མཐོང་སྤང་ཡིན་ལ། དེའི་རྟེན་གྱི་འབྱུང་བ་མཐོང་སྤང་མིན་པའི་ཕྱོགས་ཀྱི་ལན་དང་། གཉིས་ཀ་དེ་མ་ཡིན་པའི་ཕྱོགས་ཀྱི་ལན་འདེབས་ཚུལ་གཉིས་ལས། དང་པོས་ནི་འབྱུང་བ་དེ་ཆོས་ཅན། མཐོང་སྤང་མ་ཡིན་ཏེ། མཐོང་སྤང་ནི་སྒྲིབ་ལུང་མ་བསྟན་ཡིན་པ་གང་ཞིགའབྱུང་བ་ནི་མ་སྒྲིབ་ལུང་མ་བསྟན་ཡིན་པའི་ཕྱིར་རོ། །གཉིས་པས་ནི་སྤྱིར་ཆོས་ཅན་དེའི་ཕྱོགས་སྔ་མ་མ་གྲུབ་ལ། སྤྱིར་གཟུགས་དང་འབྱུང་བ་སེམས་ཀྱིས་བསླང་བར་མཚུངས་པས། འབྱུང་བ་དགེ་མི་དགེར་འགྱུར་བའི་ཁྱབ་པ་མ་གྲུབ་སྟེ། ཇི་ལྟར་དགེ་བ་དང་མི་དགེ་བའི་སེམས་གང་གིས་དགེ་བ་དང་མི་དགེ་བའི་གཟུགས་ལ་དམིགས་ནས་ཀུན་སློང་བའི་སྟོབས་ཀྱིས་དེའི་རྟེན་འབྱུང་བ་རྣམས་ཀྱང་བསླང་བ་ཡིན་ལ། དེའི་ལུས་ངག་གི་ལས་ངོ་བོ་ཉིད་ཀྱི་གཟུགས་དེ་དགེ་མི་དགེར་འགྱུར་ལ། དེའི་རྟེན་གྱི་འབྱུང་བ་ལ་ནི་མ་དམིགས་པའི་ཕྱིར་འབྱུང་བ་དེ་དགེ་མི་དགེར་མི་འགྱུར་རོ། །སླར་བཟློག་སྟེ། འབྱུང་བ་དེ་མཐོང་སྤང་དུ་གྱུར་དུ་ཟད་མོད། ཉེས་པ་ཅི་ཡོད་བྱས་པ་ལ། བྱེ་སྨྲས། དེ་སྐད་དུ་བརྗོད་མི་ནུས་ཏེ། ཉོན་མོངས་པ་ཅན་མིན་པའི་མ་སྒྲིབ་ལུང་མ་བསྟན་དང་། དགེ་བ་ཟག་བཅས་ནི་ཆོས་ཅན། མཐོང་སྤང་མ་ཡིན་ཏེ། མ་སྒྲིབ་ལུང་མ་བསྟན་དང་དགེ་བ་ཟག་བཅས་ནི་ཉོན་མོངས་ཅན་(༢༥བ)
གྱི་ཆོས་ཐོབ་པ་ཆད་པས་འགལ་བ་ལྟར་རིག་པ་ཟག་མེད་ཀྱི་ལམ་དང་འགལ་བ་མེད་པའི་ཕྱིར་རོ། །མ་སྒྲིབ་ལུང་མ་བསྟན་དང་དགེ་བ་ཟག་བཅས་ཆོས་ཅན། སྤང་བྱ་མ་ཡིན་པའང་མ་ཡིན་ཏེ། མ་རིག་པ་དང་། ཐོབ་པ་ཆད་པ་དང་། དེ་དེ་ལ་དམིགས་པའི་ཉོན་མོངས་པ་སྤོང་བའི་ཚུལ་གྱིས་སྤང་བྱ་མ་ཡིན་པར་ཡང་མི་འགལ་བའི་ཕྱིར། ཡང་ན་གྱུར་དུ་ཟད་མོད་ཅེས་པ་ནི་མི་འཐད་པར་སྒྲུབ་པ་ནི། ཉོན་མོངས་ཅན་གྱི་གཟུགས་ཀྱི་རྟེན་འབྱུང་བ་རྣམས་ཆོས་ཅན། མཐོང་སྤང་མིན་ཏེ། ཉོན་མོངས་ཅན་མ་ཡིན་པའི་ཕྱིར། ཉོན་མོངས་ཅན་མིན་པའི་སེམས་དང་སེམས་བྱུང་བཞིན་ནོ། །དེས་ན་མཐོང་སྤང་ནི་རྒྱུའི་ཀུན་སློང་ཡིན་པས་ལོག་ལྟ་ལས་ལོག་རྟོག་འབྱུང་བར་གསུངས་པའི་ལུང་དང་མི་འགལ་ཞིང་། འདི་ལ་བྱེ་སྨྲས་ཀླན་ཀ་མང་དུ་བསུས་ནས་སོ་སོར་ལན་བཏབ་པ་ཡིན་ནོ། །སྨྲས་པ། ཀྱེ་མ༔བསྟན་པ་རིན་ཆེན་འདི་ནི་འགྲོ་བའི་མགོན། །ནུབ་པར་འཕངས་ནས་དབེན་པའི་རི་སུལ་དུ། །རྣམ་གཡེང་སྤངས་ནས་བློ་གྲོས་ནུས་པ་མཆོག །དད་པས་གསོས་ནས་མངོན་པའི་གཞུང་འདིར་དཔྱད། །ཇི་བཞིན་གོ་བའི་དགའ་སྤྲོ་རྒྱས་ཆེས་པས། །རྩ་བརྒྱུད་བླ་མ་དཀོན་མཆོག་བཅས་པ་ལ། །བཟོད་དུ་མེད་པའི་མོས་གུས་མཁའ་དང་མཉམ། །མ་རྒན་མཐའ་མེད་ཚོགས་ཀྱིས་ཤེས་བྱའི་གནས། །གསལ་པོ་འདི་ལ་རྨོངས་ཕྱིར་མི་བཟོད་པའི། །སྙིང་རྗེ་དྲག་པོ་དེ་ཡང་མཁའ་དང་མཉམ། །ཞེས་སོ། །གཉིས་པ་ནི། ཡིད་ནི། །བསྒོམ་པས་སྤང་བྱ་གཉིས་ཀ་ཡིན། །ཞེས་པས་བསྟན། ཡིད་ཀྱི་རྣམ་པར་ཤེས་པ་སྒོམ་པས་སྤང་བྱ་ནི། རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་ཀ་ཡིན་ཏེ། ཁ་ནང་དང་ཕྱི་རོལ་དུ་བལྟས་ནས་འཇུག་པའི་ཕྱིར། གསུམ་པ་ནི། ལྔ་ནི་རྗེས་སུ་འཇུག་བྱེད་ཡིན། །སྒོ་ལྔའི་རྣམ་པར་ཤེས་པ་ནི་རྗེས་སུ་འཇུག་བྱེད་ཁོ་ན་ཡིན་ཏེ། རྣམ་པར་མི་རྟོག་པའི་ཕྱིར། ཟག་པ་མེད་(༢༦ན)
པའི་ཡིད་ཀྱི་རྣམ་ཤེས་ནི་རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་ཀ་མ་ཡིན་ཏེ། མཉམ་པར་བཞག་པའི་ཕྱིར་དང་། ཁ་ནང་དུ་བལྟས་པའི་ཕྱིར་དང་། འཇུག་པ་འགལ་བའི་ཕྱིར། བཞི་པ་[ཕན་ཚུན་འཇུག་ཚུལ་ལ་དཔྱད་པའི་མུ་]ལ། སྤྱིར་བཏང་དང་། དམིགས་བསལ་ལོ། །དང་པོ་ནི། རབ་ཏུ་འཇུག་བྱེད་དགེ་སོགས་ལས། །རྗེས་འཇུག་བྱེད་ཀྱང་རྣམ་གསུམ་འགྱུར། །རབ་ཏུ་འཇུག་བྱེད་དང་རྗེས་སུ་འཇུག་བྱེད་འདྲ་བའི་ངེས་པ་མེད་དེ། རབ་ཏུ་འཇུག་བྱེད་དགེ་བ་ལས་རྗེས་སུ་འཇུག་བྱེད་དགེ་བ་དང་སོགས་པས་མི་དགེ་བ་དང་། ལུང་མ་བསྟན་དུའང་འགྱུར་ལ། རབ་ཏུ་འཇུག་བྱེད་མི་དགེ་བ་དང་ལུང་མ་བསྟན་ལས་ཀྱང་རྗེས་སུ་འཇུག་བྱེད་དགེ་བ་དང་མི་དགེ་བ་དང་ལུང་མ་བསྟན་རྣམ་པ་གསུམ་དུ་འགྱུར་རོ། །ཕལ་ཆེར་ནི་རབ་ཏུ་འཇུག་བྱེད་དགེ་བ་ཡིན་ན་རྗེས་སུ་འཇུག་བྱེད་དགེ་བ་ཡིན་ཏེ། ལ་ལ་ནི་དང་པོར་དགེ་སློང་གི་སྡོམ་པ་བླང་སྙམ་པའི་དགེ་བ་དེས་གསོལ་བ་དང་བཞིའི་ལས་སོགས་སྐུལ་བ་དེ་ཡང་དགེ་བ་ལ་གང་ཟག་རྒྱུད་ངན་ཁ་ཅིག་ནི་དང་པོ་དེ་དགེ་ཡང་བར་དུ་ཁོང་ཁྲོ་ལྟ་བུ་མི་དགེ་བ་དང་། མོས་པ་ཉམས་ནས་ལུང་མ་བསྟན་དུ་ཡང་འགྱུར་སྲིད་པས་སོ། །གཉིས་པ་ནི། ཐུབ་པའི་འདྲ་བའམ་དེ་དགེ་བ། །ཐུབ་པ་སངས་རྒྱས་བཅོམ་ལྡན་འདས་ནི་རབ་ཏུ་འཇུག་བྱེད་དང་རྗེས་སུ་འཇུག་བྱེད་འདྲ་བ་སྟེ། དགེ་བ་ལས་དགེ་བ་དང་། ལུང་མ་བསྟན་ལས་ལུང་མ་བསྟན་འཇུག་པའི་ཕྱིར། འམ་ནི་རྣམ་གྲངས་པའི་སྒྲའོ། །ཡང་ན་ལུང་མ་བསྟན་གྱི་རབ་ཏུ་འཇུག་བྱེད་ཀྱི་རྗེས་སུ་འཇུག་བྱེད་དེ་དགེ་བར་འགྱུར་གྱི། རབ་ཏུ་འཇུག་བྱེད་དགེ་བའི་རྗེས་འཇུག་དགེ་བ་ཁོ་ན་ལས་ལུང་མ་བསྟན་དུ་མི་འགྱུར་ཏེ། སངས་རྒྱས་རྣམས་ཀྱི་སྟོབས་ནི་དམན་པར་འགྱུར་བ་མ་ཡིན་པའི་ཕྱིར་རོ། །སྡེ་པ་གཞན་དག་ན་རེ། སངས་རྒྱས་རྣམས་ལུང་དུ་མ་བསྟན་པའི་སེམས་མེད་དེ། སངས་རྒྱས་རྣམས་ཀྱི་རྒྱུད་ནི་རྟག་ཏུ་མཉམ་པར་བཞག་པའི་ཕྱིར། དགེ་བ་རྒྱུད་གཅིག་པ་ཡིན་ནོ། །མདོ་ལས། གླང་ཆེན་གཤེགས་(༢༦བ)
ནའང་མཉམ་པར་བཞག །གླང་ཆེན་བཞེངས་ནའང་མཉམ་པར་བཞག །གླང་ཆེན་མནལ་ནའང་མཉམ་པར་བཞག །བཞུགས་ནའང་མཉམ་པར་བཞག་པ་ཡིན། །ཅེས་ཟེར་རོ། །སངས་རྒྱས་སྐུ་གསུང་ཐུགས་ཀྱིས་ངན་པ་མི་མཛད་པ་ནི་གླང་ཆེན་ཉེས་པ་མི་བྱེད་པ་དང་མཚུངས་པའི་དཔེ་ཡིན་གྱི། གླང་ཆེན་རང་དང་མཚུངས་པའི་དཔེ་མིན་ནོ། །བྱེ་བྲག་ཏུ་སྨྲ་བ་རྣམས་ན་རེ། རྟག་ཏུ་མཉམ་པར་བཞག་བྱ་བ་དེ། སྤྱོད་ལམ་བཞི་ཅར་གྱི་གནས་སྐབས་སུ་མཁྱེན་སོགས་ཀྱི་དགོངས་པ་ཉེ་བར་གནས་པ་ཙམ་ལ་དགོངས་པ་ཡིན་ཏེ། ཐུགས་མི་བཞེད་བཞིན་སྤྱོད་ལམ་ལུང་མ་བསྟན་དུ་མི་འགྲོ་བའི་ཕྱིར། གཞན་དུ་སངས་རྒྱས་རྣམས་ལ་ལུང་མ་བསྟན་རྣམ་སྨིན་སྐྱེས་དང་། སྤྱོད་ལམ་པ་དང་སྤྲུལ་པའི་སེམས་མི་མངའ་བ་ནི་མ་ཡིན་ནོ་ཞེས་ཟེར་རོ། །སྒོམ་སྤང་གི་ཡིད་རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་ཀར་དུ་བཤད་པ་དེ་ནི་དགེ་བ་དང་མི་དགེ་བ་དང་ལུང་མ་བསྟན་དུ་རིག་པར་བྱའོ། །ལྔ་པ་ནི། རྣམ་སྨིན་ལས་སྐྱེས་གཉིས་ཀ་མིན། །རྣམ་སྨིན་ལས་སྐྱེས་པའི་སེམས་ནི་ཆོས་ཅན། རབ་ཏུ་འཇུག་བྱེད་དང་རྗེས་སུ་འཇུག་བྱེད་གཉིས་ཀ་མིན་ཏེ། མངོན་པར་འདུ་བྱ་བ་མེད་པར་ངང་གིས་འབྱུང་བའི་ངོ་བོ་ཉིད་ཀྱི་ཕྱིར། ད་ནི་སློབ་དཔོན་གྱིས་ཁོ་ལ་ཕར་དྲིས་པ་ནི་རབ་ཏུ་འཇུག་བྱེད་དགེ་བ་ཡིན་ན་དེའི་རྣམ་པར་རིག་བྱེད་ཀྱང་དགེ་བ་དང་། རབ་ཏུ་འཇུག་བྱེད་མི་དགེ་བ་ཡིན་ན་དེའི་རིག་བྱེད་ཀྱང་མི་དགེ་བ་ཡིན། དེ་བཞིན་ལུང་མ་བསྟན་ལ་ཡང་སྦྱར་བས་དེ་ལྟ་བུ་ཞིག་ཡིན་ནམ། འོན་ཏེ་རྗེས་སུ་འཇུག་བྱེད་དགེ་བ་ཡིན་ན་རིག་བྱེད་ཀྱང་དགེ་བ་དང་། དེ་བཞིན་མི་དགེ་བ་དང་ལུང་མ་བསྟན་སོགས་ལའང་སྦྱར་ནས་གང་ཡིན་དྲིས་པ་ལ། དང་པོ་ལྟར་རོ་ཞེ་ན། འདོད་པ་ན་མཐོང་བས་སྤོང་བའི་སྒྲིབ་ལ་ལུང་མ་བསྟན་གྱི་རིག་བྱེད་ཡོད་པར་ཐལ། རབ་ཏུ་འཇུག་བྱེད་ཀྱིས་ཀུན་ནས་སློང་བའི་རིག་བྱེད་དགེ་སོགས་ཡོད་པའི་ཕྱིར། འདོད་ན། (༢༧ན)
འདོད་པ་ན་སྒྲིབ་ལུང་མ་བསྟན་གྱི་རིག་བྱེད་མེད་པར་བཤད་པ་དང་འགལ། ཡང་མཐོང་སྤང་དུ་གྱུར་པའི་འཇིག་ལྟས་རིག་བྱེད་མི་བསླངས་ཀྱང་། ལོག་ལྟས་བསླང་ངོ་ཞེས་སྙམ་ན་ནི། ཡང་དམིགས་ཀྱིས་བསལ་ཏེ་བརྗོད་དགོས་སོ། །གཉིས་པ་ལྟར་རོ་ཞེ་ན། འོ་ན་བསྙེན་རྫོགས་བྱ་བར་བརྩམས་ནས། བར་སྐབས་སུ་མི་དགེ་བའམ་ལུང་མ་བསྟན་གྱི་དུས་ཀྱི་ཀུན་སློང་བྱུང་ན། དེའི་དུས་ཀྱི་ཐལ་མོ་སྦྱོར་བ་སོགས་ཀྱི་རིག་བྱེད་དགེ་བར་མི་འགྱུར་བར་ཐལ། དུས་ཀྱི་ཀུན་སློང་མི་དགེ་བ་དང་ལུང་མ་བསྟན་དུ་འཇུག་པའི་ཕྱིར། འདིའི་ལན་དུ་ནི། རབ་ཏུ་འཇུག་བྱེད་འདི་ལ་མཐོང་སྤོང་གི་རབ་ཏུ་འཇུག་བྱེད་བྱས་ཤིང་། རྗེས་སུ་འཇུག་བྱེད་ཀྱང་མཐོང་སྤང་གིས་བྱས་པ་ཞིག་ཡོད་ན། རབ་ཏུ་འཇུག་བྱེད་དགེ་མི་དགེའི་དབང་གིས་རིག་བྱེད་ཀྱང་དེར་འགྱུར་བ་ཞིག་སྲིད་ལ། དེ་བཞིན་རབ་ཏུ་འཇུག་བྱེད་སྒོམ་སྤང་གིས་བྱས་ནས། རྗེས་སུ་འཇུག་བྱེད་སྒོམ་སྤང་གིས་བྱས་པའི་དུས་ཀྱི་རིག་བྱེད་ཀྱང་རབ་ཏུ་འཇུག་བྱེད་དགེ་མི་དགེ་སོགས་ཀྱི་དབང་གིས་རིག་བྱེད་ཀྱང་དེར་འགྱུར་བ་ཡིན་པ་ལས། དང་པོ་རབ་ཏུ་འཇུག་བྱེད་མཐོང་སྤང་གིས་བྱས་པ་ཡོད་ཀྱང་། རྗེས་སུ་འཇུག་བྱེད་མཐོང་སྤང་གིས་བྱས་པ་མེད་པས། འདོད་ན་སྒྲིབ་པའི་རིག་བྱེད་མེད་ལ། གཉིས་པའི་ཕྱོགས་ལྟར་ན། བདག་བསྙེན་པར་རྫོགས་འདོད་ཀྱི་དགེ་བ་བདག་ལ་ཁ་ནང་དུ་ལྟ་བའི་རབ་ཏུ་འཇུག་བྱེད་དེ་ཆོས་ཅན། ཁྱོད་ཀྱིས་འདོད་པའི་རིག་བྱེད་མི་སློང་སྟེ། འདོད་པའི་རིག་བྱེད་དང་དེའི་བར་དུ་སྒོམ་སྤང་གི་རབ་ཏུ་འཇུག་བྱེད་དང་རྗེས་སུ་འཇུག་བྱེད་ཀྱིས་བར་དུ་ཆོད་པའི་ཕྱིར། བར་ཆོད་ཚུལ་ནི་དང་པོར་བདག་བསྙེན་པར་རྫོགས་པར་བྱའོ་ཞེས་བདག་ལ་ཁ་ནང་དུ་ཕྱོགས་པའི་དམིགས་རྣམ་འཛིན་པའི་ཤེས་པ་ནི་རབ་ཏུ་འཇུག་བྱེད་མཐོང་སྤང་ཡིན་ཀྱང་། (༢༧བ)
དེའི་འོག་ཏུ་དེའི་ཕྱིར་ཕྱག་འབུལ་བར་བྱ་གསོལ་བ་གདབ་པར་བྱ་སྙམ་པ་ལྟ་བུ་ཁ་ཕྱིར་ལྟ་བ་དེ་ནི་སྒོམ་སྤང་ཡིན་ལ། སྒོམ་སྤང་དེའི་རབ་ཏུ་འཇུག་བྱེད་དེ་དགེ་བ་ཡིན་ན། དེ་ནས་དེའི་རྗེས་སུ་འཇུག་བྱེད་ཐལ་མོ་སྦྱར་བ་དང་གསོལ་བ་གདབ་པ་ལྟ་བུ་ནི་མི་དགེ་བ་དང་ལུང་མ་བསྟན་གྱི་ཀུན་ནས་སློང་ཀྱང་དེ་དུས་ཀྱི་རིག་བྱེད་དེ་ནི་དགེ་བར་འགྱུར་རོ། །མི་དགེ་བ་སོགས་ལ་ཡང་དེས་མཚོན་ཏོ། །དེས་ན་རྗེས་སུ་འཇུག་བྱེད་དང་དུས་ཀྱི་ཀུན་སློང་དབང་མི་བཙན་པས། མདོ་ལས་རྒྱུའི་ཀུན་སློང་དབང་བཙན་པར་གསུངས་པའི་ཕྱིར། འདོད་པ་ན་སྒྲིབ་ལུང་མ་བསྟན་གྱི་རིག་བྱེད་མེད་དོ་ཞེས་ཁྱབ་པ་འཆའ་བ་ནི་མ་ཡིན་ནོ། །འོ་ན་མཐོང་སྤང་སྒྲིབ་ལ་ལུང་མ་བསྟན་ལས་གཞན་པའི་སྒོམ་སྤང་ཁ་ཕྱིར་ལྟ་རབ་ཏུ་འཇུག་བྱེད་དང་རྗེས་སུ་འཇུག་བྱེད་གཞན་གྱིས་བར་ཆོད་པའི་སྔ་རོལ་མཐོང་སྤང་གི་རྒྱུའི་ཀུན་སློང་དེ་སྒོམ་སྤང་གི་རབ་ཏུ་འཇུག་བྱེད་དེའི་རྐྱེན་བྱེད་པ་ཙམ་ལ་དགོངས་ནས། (རྒྱུའི་ཀུན་སློང་དབང་བཙན་ན། འདོད་པ་ན་སྒྲིབ་ལ་ལུང་མ་བསྟན་གྱི་རིག་བྱེད་མེད་པས་ཁྱབ་པ་བཅས་ན་མཐོང་སྤང་གི་རྒྱུའི་ཀུན་སློང་གོ་ཆོད་པའི་དབང་དུ་བྱས་ན་ནི། ཁྱབ་པ་ཡོང་བས་རྒྱུའི་ཀུན་ནས་སློང་བ་གཙོ་བོར་གསུངས་པའི་རྒྱུ་འདི་ཁྱབ་ཆེ་བས། རྣམ་པ་གཅིག་ཏུ་ན་ཁྱབ་པ་མི་འོང་བའི་གནད་ཤེས་པར་བྱའོ། །མཆན།) རྒྱུའི་ཀུན་སློང་གཙོ་བོར་གསུངས་པ་ཡིན་པས། ཁྱབ་པ་གར་བཅས་ཀྱི་གནད་རིག་པར་བྱའོ། །(གཞུང་འདིའི་རང་འགྲེལ་གྱི་ཐད་དུ་ནི་བདག་གི་རྣམ་པར་དཔྱོད་པས་གཏིང་ལྷོངས་པར་བཤད་པ་འདི་ལྟ་བུ་ནི་བོད་གངས་ཅན་ན་སྔོན་མ་བྱོན་པར་སྣང་སྟེ། རྣམ་དཔྱོད་ཀྱི་དབང་པོ་མི་དམན་པ་བློ་གྲོས་མཚུངས་པ་མེད་པ་ལྟ་བུས་ཀྱང་། འདིའི་སྐབས་སུ་ཇི་བཞིན་འགྲེལ་མ་ནུས་པར་ཚིགས་བཅད་གཅིག་བརྩམས་ནས་ཟོལ་གྱིས་འཇོག་དགོས་པར་བྱུང་སྣང་ངོ་། །ཚིགས་བཅད་འདི་ནི་འདི་ཡིན་ཏེ། དངོས་དང་བརྒྱུད་པས་རྒྱུ་ཡི་ནི། །སློང་བྱེད་རྣམ་པ་གཉིས་སུ་འདོད། །མཐོང་སྤང་བརྒྱུད་པའི་སྒོ་ནས་ཏེ། །གཞན་གྱི་དངོས་སུའང་ཡིན་པྲ་འདོད། །ཅེས་བྲིས་སྣང་ངོ་། །ཡང་ན་ཚིགས་བཅད་འདི་རྒྱ་འགྲེལ་གྱི་ཚིག་ལྟ་བུ་ཞིག་ཡིན་པའང་སྲིད་དེ། ཁོ་བོ་མཐོང་རྒྱ་ཆུང་བའི་ཕྱིར། མཆན།) གསུམ་པ་རིག་བྱེད་མ་ཡིན་པའི་རྣམ་གཞག་ལ།(༢༨ན)
དབྱེ་བ་མདོར་བསྟན། རྣམ་གཞག་རྒྱས་བཤད་དོ། །དང་པོ་ནི། རྣམ་རིག་མིན་རྣམ་གསུམ་ཤེས་བྱ། །སྡོམ་དང་སྡོམ་པ་མིན་དང་གཞན། །ཞེས་པས་བསྟན། རྣམ་རིག་མིན་པ་རྣམས་ཆོས་ཅན། རྣམ་གསུམ་ཞེས་བྱ་སྟེ། ཆོ་གས་ཕོག་ཅིང་བླངས་ནས་འཆལ་བ་དང་ཡི་མ་བླངས་པར་འཆལ་བའི་འཆལ་ཚུལ་སྡོམ་ཞིང་འགོག་པའི་སྡོམ་དང་སྡོམ་པ་མིན་དང་། བར་མས་བསྡུས་པའི་དགེ་མི་དགེ་གཞན་དུ་ཡོད་པའི་ཕྱིར། གཉིས་པ་ལ། སྡོམ་པ་ཁྱད་པར་དུ་བཤད་པ་དང་། ཐམས་ཅད་ཐུན་མོང་དུ་བསྟན་པའོ། །དང་པོ་ལ། བསྟན། བཤད་གཉིས་ཀྱི། དང་པོ་ནི། སྡོམ་པ་སོ་སོར་ཐར་ཅེས་བྱ། །དེ་བཞིན་ཟག་མེད་བསམ་གཏན་སྐྱེས། །འདི་པ་རྣམས་ཀྱི་འདོད་པ་ན་སྤྱོད་པ་སྤོང་བ་གཙོ་བོར་གྱུར་པའི་ལྷག་པའི་ཚུལ་ཁྲིམས་འདི་ལ་ནི་སྡོམ་པ་སོ་སོ་ཐར་ཅེས་བྱའོ། །འདི་ལ་ནི་རིག་བྱེད་དང་རིག་བྱེད་མ་ཡིན་པ་གཉིས་ཀ་ཡོད་དོ། །འདོད་པ་ན་ཡོད་པ་དེ་བཞིན་བསམ་གཏན་ལས་སྐྱེས་པའི་སྡོམ་པ་ནི། ཏིང་ངེ་འཛིན་གཙོ་བོར་གྱུར་པའི་ལྷག་པའི་སེམས་ཀྱིས་ཀུན་ནས་སློང་བ་གཟུགས་ན་སྤྱོད་པའི་ཚུལ་ཁྲིམས་སོ། །འདི་ལ་ནི་རིག་བྱེད་མ་ཡིན་པ་གཅིག་པུར་ཟད་དོ། །ལྷག་པའི་ཤེས་རབ་གཙོ་བོར་གྱུར་པས་ཀུན་ནས་སློང་བ་ཟག་པ་མེད་པའི་ཚུལ་ཁྲིམས་སོ། །འདི་ལ་ནི་རིག་བྱེད་ཡིན་མིན་གཉིས་ཀ་ཡོད་དོ། །སྤྱིར་འཇིགས་པ་སྲུང་བའི་ཚུལ་ཁྲིམས། ལེགས་སུ་སྨོན་པའི་ཚུལ་ཁྲིམས། བྱང་ཆུབ་དང་མཐུན་པའི་ཚུལ་ཁྲིམས། རྣམ་པར་དག་པའི་ཚུལ་ཁྲིམས་བཞི་ཡང་ཟེར་བའི་གསུམ་པ་ནི་སོ་ཐར་གྱི་སྡོམ་པ། བཞི་པ་ནི་ཟག་པ་མེད་པའི་སྡོམ་པའོ། །གཉིས་པ་ལ། སོ་ཐར་རྒྱས་བཤད། བསམ་གཏན་ཟག་མེད་རྒྱས་བཤད། ཞར་ལས་བྱུང་བའི་དོན་ཏོ། །དང་པོ་ལ། བསྡུས་ཏེ་བསྟན་པ་དང་། ཕྱེ་སྟེ་བཤད་པ་གཉིས་ལས། དང་པོ་ལ། མིང་གི་སྒོ་ནས་བརྒྱད་དུ་དབྱེ་བ། རྫས་ཀྱི་སྒོ་ནས་བཞིར་བསྡུ་བ། གནས་(༢༨བ)
པའི་ཚུལ་ལོ། །དང་པོ་ནི། སོ་སོར་ཐར་ཅེས་བྱ་རྣམ་བརྒྱད། །སོ་སོར་ཐར་པའི་སྡོམ་པ་ཞེས་བྱ་བ་དགེ་སློང་གི་སྡོམ་པ་དང་། དགེ་སློང་མའི་སྡོམ་པ་དང་། དགེ་ཚུལ་གྱི་དང་། དགེ་སློང་མའི་དང་། དགེ་ཚུལ་མའི་དང་། དགེ་བསྙེན་གྱི་དང་། དགེ་བསྙེན་མའི། བསྙེན་གནས་ཀྱི་སྡོམ་པ་སྟེ་རྣམ་པ་བརྒྱད་དོ། །བསྙེན་གནས་ནི་ཟ་མ་དང་མ་ནིང་ལ་ཡང་སྐྱེ་བས། ཕོ་མོ་གཉིས་སུ་ངེས་པ་མེད་པས། ཕོ་མོ་སོ་སོར་མ་བགྲང་ངོ་། །འོ་ན་དགེ་བསྙེན་ཀྱང་ཟ་མ་དང་མ་ནིང་ལ་སྐྱེ་བས་དབྱེར་མི་རིགས་ཞེ་ན། དགེ་བསྙེན་གྱི་སྡོམ་པ་ནི། ཟ་མ་དང་མ་ནིང་ལ་སྐྱེ་བ་ཐེག་ཆེན་གྱི་ལུགས་ཡིན་ལ། བྱེ་སྨྲ་ནི་དེ་ལྟར་དུ་མི་འདོད་དོ། །གཉིས་པ་ནི། རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །བརྒྱད་པོ་དེའང་དགེ་སློང་གི་སྡོམ་པ་དང་། དགེ་ཚུལ་གྱི་སྡོམ་པ་དང་། དགེ་བསྙེན་གྱི་སྡོམ་པ་དང་། བསྙེན་གནས་ཀྱི་སྡོམ་པ་སྟེ། རྫས་སུ་རྣམ་པ་བཞི་ཡིན་ནོ། །འོ་ན་དགེ་ཚུལ། དགེ་སློབ་མ། དགེ་ཚུལ་མ་གསུམ་གྱི་སྡོམ་པ་རྫས་གཅིག་པར་འདོད་པ་ལ། དགེ་ཚུལ་དང་དགེ་ཚུལ་མའི་སྡོམ་པ་རྫས་གཅིག་པ་ཡིན་ཀྱང་། དགེ་སློབ་མའི་སྡོམ་པ་དེ་དེ་གཉིས་དང་གཅིག་པ་མི་འཐད་དེ། དགེ་ཚུལ་མཚན་གྱུར་པས་དགེ་ཚུལ་མར་འགྲོ་བ་བཞིན། དགེ་ཚུལ་མཚན་གྱུར་པས་དགེ་སློབ་མར་མི་འགྱུར་བའི་ཕྱིར་ཏེ། ཆོས་དྲུག་དང་རྗེས་མཐུན་གྱི་ཆོས་དྲུག་མ་བླངས་པའི་ཕྱིར། དེ་ལྟར་ན་དགེ་སློབ་མ་དང་། དེ་གཉིས་གཅིག་ཏུ་འདོད་དོ་སྙམ་ན། དགེ་ཚུལ་མཚན་གྱུར་པས་དགེ་སློབ་མར་མི་འགྲོ་ཡང་། དགེ་སློབ་མ་མཚན་གྱུར་པས་དགེ་ཚུལ་དུ་འགྲོ་བས་དེ་གསུམ་གཅིག་ཡིན། དགེ་སློབ་མ་མཚན་གྱུར་པས་དགེ་ཚུལ་དུ་འགྲོ་བ་དེ་ཆོས་དྲུག་དང་རྗེས་ཀྱི་ཆོས་དྲུག་བཏང་སྟེ། སྐྱེས་པའི་རྟེན་ལ་ཉེ་བར་མི་མཁོ་བས་སོ། །ཡང་ན། ཆོས་དྲུག་དང་རྗེས་ཀྱི་ཆོས་དྲུག་མཚན་གྱུར་པའི་དུས་སུ་མ་བཏང་བར་ཡོད་ཀྱང་། སྐྱེས་པའི་རྟེན་ལ་ཉེ་བར་མི་མཁོ་བས་དོན་བྱེད་ནུས་པར་ལྡན་པ་མེད། (༢༩ན)
གཞན་ཚོ་དོན་བྱེད་ནུས་པར་ཡོད་པས་དགེ་ཚུལ་ཡིན། ཡང་ན་ཆོས་དྲུག་དང་ཉེ་བའི་ཆོས་དྲུག་བཅས་པའི་ཁ་ན་མ་ཐོ་བ་དེ་རིག་བྱེད་མ་ཡིན་པ་མིན། ད་རེས་རིག་བྱེད་མིན་པའི་རྩིས་འདིངས་ཙམ་ན་རིག་བྱེད་མ་ཡིན་པ་ཕན་ཚུན་མཚན་གྱུར་པའི་དུས་སུ་ལྡན་གྱི། བཅས་པའི་ཁ་ན་མ་ཐོ་བ་ཆོས་དྲུག་དང་ཉེ་བའི་ཆོས་དྲུག་པོ་དེ་དགེ་ཚུལ་གྱུར་པས་བཅུ་གཉིས་དེ་དང་ལྡན་པ་མིན། བར་སློབ་མ་མཚན་གྱུར་པས་དགེ་ཚུལ་ལ་ཆོས་དྲུག་དང་། ཉེ་བའི་ཆོས་དྲུག་ལྡན་པ་མིན་ཅེས་ཟེར་རོ། །དགེ་སློབ་མའི་བསླབ་པའི་ཆོས་དྲུག་ནི། སྐྱེས་པ་ལ་རེག་པ་དང་། སྐྱེས་པ་དང་ལྷན་ཅིག་འདུག་པ་དང་། གཅིག་པུར་ལམ་དུ་འགྲོ་བ་དང་། རྐྱལ་བྱེད་པ་དང་། སྨྱན་བྱེད་པ་དང་། ཟླ་མོའི་ཉེས་པ་འཆབ་པ་ཞེས་བྱ་བའི་ཆོས་དྲུག་དང་། གསེར་ལ་རེག་པ་དང་། མདོམས་ཀྱི་སྤུ་བྲེགས་པ་དང་། བྱིན་ལེན་མ་བྱས་པར་ཟ་བ་དང་། རྩྭ་གཅོད་པ་དང་། བསོག་འཇོག་བྱས་པ་ཟ་བ་དང་། ས་རྐོ་བ་ཞེས་བྱ་བ་ཉེ་བའི་ཆོས་དྲུག་གོ། །སྡོམ་པ་ལ་རྫས་སུ་བཞིར་ངེས་ཏེ། དགེ་སློང་གི་མཚན་ནམ་རྟགས་འགྱུར་བ་ན་མིང་ནི་དགེ་སློང་མ་ཞེས་བྱ་བར་འཕོ་བ་འདིའི་ཕྱིར། འདིར་དགེ་སློང་ནི་ལོ་ཉི་ཤུ་མ་ལོན་པ་ལ་བྱར་མི་རུང་། དགེ་སློང་མ་ནི་ལོ་བཅུ་གཉིས་ལོན་ནས་བྱར་རུང་བ་ཡིན་ཙམ་ན། ལོ་བཅུ་གཉིས་ལ་དགེ་སློང་མ་བྱས་པ་དེ་ལོ་བཅུ་གསུམ་བཅུ་བཞི་ལ་མཚན་འགྱུར་ན་དགེ་སློང་དུ་འགྱུར་ཏེ་སྙམ་ན། དེ་འགྱུར་ཏེ། ཡེ་ནས་སྐྱེས་པ་ཡིན་པ་དེ་ལོ་ཉི་ཤུ་མ་ལོན་བར་དུ་བྱར་མི་རུང་བ་ཡིན། སྔར་བུད་མེད་ཡིན་པ་དེ་མཚན་འགྱུར་བ་དེ་ལོ་བཅུ་གསུམ་བཅུ་བཞི་ལ་དགེ་སློང་དུ་འགྱུར་རོ། །མཚན་གྱུར་པས་ནི་སྡོམ་པ་གཏོང་ཐོབ་གཉིས་ཀར་མེད་དོ། །དེས་ན་དགེ་སློབ་མ་དགེ་སློང་མ་དགེ་ཚུལ་མ་དགེ་བསྙེན་མ་བཞི་པོ་དེ་དག་ནི། དགེ་སློང་དགེ་ཚུལ་དགེ་བསྙེན་གསུམ་པོ་ལས་རང་བཞིན་ཐ་མི་དད་དོ། །གསུམ་པ་ནི། ཐ་དད་དེ་དག་འགལ་བ་མེད། །(༢༩བ)
གང་གིས་དགེ་བསྙེན་ནས་དགེ་ཚུལ་དགེ་སློང་གི་བར་གྱི་སྡོམ་པ་བླངས་པ་ན། སྡོམ་པ་དེ་དག་ལྔ་དང་། ལྔ་ལ་ལྔ་བསྣན་པས་བཅུ་དང་། དེ་ལ་བཅུ་བསྣན་པས་ཉི་ཤུར་འགྱུར་བ་བཞིན་སྤོང་བའི་འཕེལ་བ་དགེ་བསྙེན་གྱི་སྲོག་གཅོད་སྤོང་པ་ལས་དགེ་ཚུལ་གྱི་སྲོག་གཅོད་སྤངས་པ་ལྟ་བུ་ཐ་དད་པ་ཞིག་ཡིན་ནམ། ཡང་ན་སྡོམ་པ་ཐ་དད་པ་དག་གི་སྤོང་བ་རིས་མཐུན་རྣམས་གཅིག་ཅར་སྐྱེའམ་ཞེ་ན། སྡོམ་པ་གསུམ་ལ་སྲོག་གཅོད་སྤང་བ་གསུམ་ནས་མྱོས་འགྱུར་བཏུང་བའི་སྤང་བ་གསུམ་གྱི་བར་མཚན་ཉིད་ཐ་དད་པར་སྐྱེ་སྟེ། ལྷག་མ་གར་དང་གླུ་སོགས་ཀྱང་དེ་དང་འདྲའོ། །སྡོམ་པ་སྔ་མའི་རྫས་ལས་སྡོམ་པ་ཕྱི་མའི་རྫས་བླངས་པ་དེ་རྒྱགས་པ་དང་། བག་མེད་པ་དང་། སྲོག་གཅོད་སོགས་གཞི་ཆེས་མང་པོ་དག་ལྡོག་པར་འགྱུར་ཞིང་། སྤོང་བའི་གཞི་རྣམས་ལ་ཡང་འཇུག་པར་འགྱུར་བས་གཞིའི་དབང་གིས་ཀྱང་སྤོང་བ་སྔ་ཕྱི་རྣམས་ཐ་དད་དེ། དཔེར་ན། དུས་མིན་པའི་ཟས་སྲོག་གཅོད་པའི་གཞིར་གྱུར་དེ་ལས་ནི་དགེ་ཚུལ་ལྡོག་གི་དགེ་བསྙེན་ནི་མ་ཡིན་ནོ་ཞེས་བྱ་བ་དེ་ལྟ་བུའམ། ས་བརྐོ་བ་རྩྭ་སྔོན་གཅོད་པ་སྲོག་གཅོད་པའི་གཞིར་གྱུར་པ་དེ་ལ་དགེ་སློང་གིས་ལྡོགདགེ་ཚུལ་གྱིས་མི་ལྡོག་པ་བཞིན་ནོ། །དེ་ལྟར་མིན་ན་དགེ་སློང་གི་བསླབ་པ་ཕུལ་ནས། དགེ་ཚུལ་དུ་ན་སྨད་པའི་དུས་སུ་སྲོག་གཅོད་སྤང་བའི་རྫས་གཅིག་ན་དགེ་ཚུལ་གྱི་སྡོམ་པ་ཡང་ཤོར་ན་གསུམ་ཀ་མེད་པར་འགྲོ་བ་ལས། སྔ་མ་གཉིས་མེད་པར་མི་འགྲོ་བའི་ཕྱིར། སྲོག་གཅོད་པ་སྤང་བའི་སྡོམ་པ་དུ་མ་ཡིན་ནོ། །སྡོམ་པ་གསུམ་པོ་དེ་དག་གི་རྫས་སོ་སོ་བ་ཆོས་ཅན། ལྷན་ཅིག་ཏུ་འབྱུང་བ་ཡོད་དེ། སྤོང་བ་སོ་སོ་བ་དེ་འགལ་བ་མེད་པའི་ཕྱིར། ཕྱི་མ་བླངས་པས་སྔ་མ་མི་གཏོང་བས། དགེ་སློང་གི་སྡོམ་པ་གཏོང་བས་དགེ་བསྙེན་མ་ཡིན་པར་ཡང་མི་འགྱུར་བ་བཞིན་ནོ། །གཉིས་པ་ཕྱེ་སྟེ་བཤད་པ་ལ། སོ་(༣༠ན)
སོའི་ངོ་བོ། མིང་གི་རྣམ་གྲངས། སྒྲ་དོན། ལྡན་པའི་གང་ཟག་གོ། །དང་པོ་ནི། སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བ་མནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཆེད་དང་དགེ་སློང་ཉིད། །སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་ གཡེམ་པ 
་དང་། རྫུན་དུ་སྨྲ་བ་དང་། འབྲུའི་ཆང་ཡང་སྦྱར་བ་ཡིན་མོད་ཀྱི་མ་རེག་པ་དང་། རྙིངས་ནས་མྱོས་མི་ནུས་པ་བསལ་བའི་ཕྱིར། འབྲུའི་ཆང་ཞེས་དམིགས་ཀྱིས་བཀར། སྦྱར་བའི་ཆང་ཞེས་པ་ནི་འབྲུ་དང་མ་སྦྱར་བའི་ཞོ་དང་། དར་བ་རྒུན་འབྲུམ་ལྟ་བུ་ལ་ཡང་མྱོས་པའི་ནུས་པ་ཡོད་པས། དམིགས་ཀྱིས་བཀར་ནས་སྦྱོར་བའི་ཆང་སྟེ་སྤང་བྱ་ལྔ་སྤོང་བ་ཡང་དག་པར་བླང་བ་ནི་དགེ་བསྙེན་དང་ལོག་
གཡེམ་དང་མི་ཚངས་སྤྱོད་བརྗེས་པའི་ལྔའི་སྟེང་དུ་སྤོས་དང་། མེ་ཏོག་དང་། ཕྲེང་བ་དང་། བྱུག་པ ་དང་། གར་དང་། གླུ་དང་། རོལ་མོ་རྣམས་ཡན་ལག་གཅིག་ཏུ་བྱས། དེའི་ཁར་ཁྲི་སྟན་ཆེ་མཐོ་གཅིག་ཏུ་བྱས། དུས་མ་ཡིན་པའི་ཟས་ཏེ་བརྒྱད་སྤོང་བ་བླང་བ་ནི་བསྙེན་གནས་དང་བརྒྱད་པོ་དེ་ལ་གར་དང་གླུ་དང་རོལ་མོ་གསུམ་གཅིག་དང་། མེ་ཏོག་གི་ཕྲེང་བ་དང་། སྤོས་དང་བྱུག་པ་དང་། རྒྱན་དང་ཁ་དོག་འཆང་བ་གསུམ་གཅིག་ཏུ་བྱས་ནས་དགུ་དང་། གསེར་དངུལ་ལེན་ཅིང་འཛིན་པ་བཅུ་སྤོང་བ་ཡང་དག་པར་བླང་བ་ནི་དགེ་ཚུལ་དང་ལུས་ངག་གི་སྤོང་བར་བྱ་བ་ཐམས་ཅད་སྤོང་བར་མནོས་པ་ལས་དགེ་སློང་ཉིད་དོ། །གཉིས་པ་ནི། ཚུལ་ཁྲིམས་དང་ནི་ལེགས་སྤྱད་དང་། །ལས་དང་སྡོམ་པ་ཞེས་བྱའོ། །སྡིག་པའི་ལས་དག་ནི་སེམས་ཅན་རྣམས་ལ་མི་མཉམ་པར་འཇུག་པས་འགྲོ་བ་དམན་པ་དམྱལ་བ་ལ་སོགས་པར་འཇུག་པར་བྱེད་པ་དེ་ལས་བཟློག་སྟེ། ཡང་དག་པར་འཇོག་པར་བྱེད་པས་ན། ཚུལ་ཁྲིམས་དང་ངེས་པའི་ཚིག་ཏུ་གདུང་བ་མེད་པ་བསིལ་བས་ན་སྟེ། བསིལ་བ་ཐོབ་བྱེད་ཡིན་པས་འབྲས་མིང་རྒྱུ་ལ་བཏགས་པའོ། །མཁས་པས་བསྔགས་པའི་ཕྱིར་ལེགས་སྤྱད་དང་། བྱ་བའི་རང་བཞིན་ཡིན་པའི་ཕྱིར་ལས་དང་། ངོ་ཚ་ཤེས་པ་རྣམས་ཡང་དག་པར་བླངས་པ་དེའི་སྡིག་པ་མི་བྱེད་པ་(༣༠བ)
དེས་ན་བྱ་བ་མ་ཡིན་པར་ཡང་བརྗོད་དོ། །སོ་སོ་ཐར་པས་བསྡུས་པའི་རིག་བྱེད་མིན་པ་རིག་བྱེད་ཀྱིས་དང་། བསམ་གཏན་དང་ཟག་མེད་ཀྱི་སྡོམ་པས་བསྡུས་པ་རིག་བྱེད་མིན་པ་ནི་ཏིང་ངེ་འཛིན་གྱི་སེམས་དག་གི་བྱེད་པས་བྱ་བ་ཡིན་པར་ཡང་བརྗོད་དོ། །གཞན་ན་རེ། སྡོམ་པ་ལ་གནས་པ་སྡོམ་པ་བསྲུང་བའི་ཕྱིར་རིག་བྱེད་ཀྱི་རང་བཞིན་བྱ་བ་རྩོམ་པས་བྱ་བའི་རྒྱུ་ཡིན་པ་དང་། རྣམ་པར་རིག་བྱེད་ཀྱི་མཚན་ཉིད་ཀྱི་བྱ་བའི་འབྲས་བུ་ཡིན་པའི་ཕྱིར་ཡང་བྱ་བར་བརྗོད་དོ། །ཡང་ན་ཏིང་ངེ་འཛིན་ལས་སྐྱེས་པའི་རིག་བྱེད་མ་ཡིན་པ་ནི་ཏིང་ངེ་འཛིན་ལས་སྐྱེས་པའི་སེམས་པའི་འབྲས་བུ་ཡིན་ནོ། །ལུས་དང་ངག་སྡོམ་པའི་ཕྱིར་སོ་སོར་ཐར་པའི་སྡོམ་པ་ཞེས་བྱའོ། །ཡོན་ཏན་ཐམས་ཅད་ཀྱི་རྩ་བ་ཡིན་པས་རྩ་བ་ཞེས་ཀྱང་བྱ། བསིལ་བར་བྱེད་པས་བྱུག་པ་ཞེས་ཀྱང་བྱ། ཕྱོགས་སུ་གྲགས་པས་དྲི་ཞེས་ཀྱང་བྱ། རྩ་བ་བརྟན་པར་བྱེད་པ་དང་། ཞི་བའི་སེམས་ལ་དགའ་བ་དང་། འཕགས་པའི་ལྟ་བ་དང་སྡིག་པའི་ལྟ་བ་ལེན་ཅིང་སྤོང་བར་བྱེད་པས་མཛེས་པར་བྱེད་པའི་རྒྱན་ཅེས་བྱའོ། །གསུམ་པ་ནི། དང་པོའི་རྣམ་རིག་རྣམ་རིག་མིན། །སོ་སོར་ཐར་དང་བྱ་བའི་ལམ། །སྡོམ་པ་ཡང་དག་པར་བླངས་པའི་དང་པོའི་རྣམ་རིག་དང་རྣམ་རིག་མིན་པ་ཆོས་ཅན། སོ་སོར་ཐར་པ་ཞེས་བྱ་སྟེ། སྡིག་པ་ལྷག་པའི་ཚུལ་ཁྲིམས། ལྷག་པའི་སེམས། ལས་སོ་སོར་ལྷག་པའི་ཤེས་རབ། ཐར་པའི་ཕྱིར། དང་པོའི་རྣམ་རིག་དང་རྣམ་རིག་མིན་པ་ཆོས་ཅན། སོ་སོར་ཐར་པའི་སྡོམ་པ་ཞེས་ཀྱང་བྱ་སྟེ། ལུས་དང་ངག་སྡོམ་པའི་ཕྱིར། དང་པོའི་རྣམ་རིག་དང་རྣམ་རིག་མིན་པ་ཆོས་ཅན། བྱ་བ་ལས་ཀྱི་ལམ་དངོས་ཞེས་ཀྱང་བྱ་སྟེ། མཇུག་མ་ཡིན་པའི་དངོས་ཀྱིས་བསྡུས་པའི་ཕྱིར་རོ། །སྐད་ཅིག་མ་གཉིས་པ་ལ་སོགས་པ་ནི་ཆོས་ཅན། སོ་སོར་ཐར་པ་དང་འདྲ་བའམ་སོ་སོར་ཐར་པ་ལས་སྐྱེས་པའི་སྡོམ་པ་ནི་སོ་སོར་ཐར་པའི་སྡོམ་པ་ཁོ་ན་ཡིན་ཏེ། སྐད་ཅིག་མ་དང་པོ་ཁོ་ནས་ཐར་ཟིན་པའི་ཕྱིར། སྐད་ཅིག་མ་གཉིས་པ་ལ་སོགས་པ་དེས་སྡིག་པ་(༣༡ན)
ལས་སོ་སོར་ཐར་བར་མི་བྱེད་པས་སོ། །བཞི་པ་ནི། སོ་སོར་ཐར་དང་ལྡན་པ་བརྒྱད། །སོ་སོར་ཐར་པའི་སྡོམ་པ་དང་ལྡན་པ་ནི་དགེ་སློང་ནས་བསྙེན་གནས་པའི་བར་གྱི་གང་ཟག་བརྒྱད་དོ། །ཡང་དག་པར་བླངས་པ་ཞེས་སྨོས་པས། ཚུལ་ཁྲིམས་ལ་གཉིས་ཡོད་པ་ཡིན་ཏེ། ཡང་དག་པར་བླངས་པ་དང་། ཆོས་ཉིད་ཀྱིས་ཐོབ་པའོ། །ཡང་དག་པར་བླངས་པའི་ཚུལ་ཁྲིམས་ནི། འདི་དང་འདི་མི་བྱའོ་ཞེས་མནོས་པ་གང་ཡིན་པའོ། །ཆོས་ཉིད་ཀྱིས་ཐོབ་པ་ནི་བསམ་གཏན་དང་ཟག་པ་མེད་པའི་སྡོམ་པའོ། །ཟག་བཅས་ཟག་མེད་ཀྱི་ཏིང་ངེ་འཛིན་སྐྱེས་པས་སྲོག་གཅོད་སོགས་ཀྱི་རྒྱུ་ངོ་ཚ་མེད་སོགས་སྤངས་ཙམ་ན་རྒྱུད་ལ་སྲོག་གཅོད་སོགས་སྤངས་པ་ཆོས་ཉིད་ཀྱིས་འབྱུང་བ་ཡིན་ནོ། །ཕྱི་རོལ་པ་ལ་ཡང་དག་པར་བླངས་པའི་ཚུལ་ཁྲིམས་ཡོད་པ་ཆོས་ཅན། སོ་སོར་ཐར་པའི་སྡོམ་པ་ནི་མ་ཡིན་ཏེ། སྲིད་པའི་ཁྱད་པར་ཁོ་ན་ལ་ཐར་པར་སེམས་པས་དེ་ནི་སྲིད་པ་ལ་བརྟེན་པའི་ཚུལ་ཁྲིམས་ཁོ་ན་ཡིན་པའི་ཕྱིར་དང་། སྡིག་པ་ལས་གཏན་དུ་སོ་སོར་ཐར་བྱེད་ནི་མ་ཡིན་པའི་ཕྱིར་རོ། །གཉིས་པ་བསམ་གཏན་དང་ཟག་མེད་ཀྱི་སྡོམ་པ་རྒྱས་བཤད་ལ། གང་ལ་ལྡན་པ། སེམས་ཀྱི་རྗེས་འབྲང་དུ་བསྟན་པ། སྤོང་བའི་སྡོམ་པར་བསྟན་པའོ། །དང་པོ་ནི། བསམ་གཏན་སྐྱེས་དང་དེ་ལྡན་པ། །ཟག་མེད་འཕགས་པའི་སེམས་ཅན་དང་། །བསམ་གཏན་སྐྱེས་ཏེ་བསམ་གཏན་དང་ལྡན་པ་དེ་ངེས་པར་བསམ་གཏན་གྱི་སྡོམ་པ་དང་ལྡན་ནོ། །ཉེར་བསྡོགས་ནའང་བསམ་གཏན་དང་ཟག་མེད་ཀྱི་སྡོམ་པ་ཡོད་པས། ཉེར་བསྡོགས་ཀྱང་བསམ་གཏན་དུ་བརྗོད་ནས་བསྟན་ཏེ། གྲོང་འདི་ན་སཱ་ལུའི་ཞིང་ཡོད་ཅེས་གྲོང་གི་ཉེན་ཀོར་ལའང་གྲོང་ཞེས་བྱ་བ་བཞིན་ནོ། །ཟག་མེད་ཀྱི་སྡོམ་པ་ནི་འཕགས་པའི་སེམས་ཅན་ཏེ་གང་ཟག་སློབ་པ་དང་མི་སློབ་པ་རྣམས་དང་ལྡན་ནོ། །གཉིས་པ་ནི། ཐ་མ་གཉིས་ནི་སེམས་རྗེས་འབྲང་། །ལྷན་ཅིག་འབྱུང་རྒྱུའི་སྐབས་སུ་སེམས་ཀྱི་རྗེས་འབྲང་གི་སྡོམ་པ་གཉིས་བཤད་པས་ནི་སྡོམ་པ་གསུམ་པོ་འདི་དག་ཉིད་ལས་ཐ་མ་བསམ་གཏན་(༣༡བ)
གྱི་སྡོམ་པ་དང་ཟག་མེད་ཀྱི་སྡོམ་པ་གཉིས་ནི་སེམས་ཀྱི་རྗེས་སུ་འབྲང་བ་ཡིན་གྱི། སོ་ཐར་ནི་སེམས་ཀྱི་རྗེས་འབྲང་མ་ཡིན་ཏེ། རང་ཀུན་སློང་གི་སེམས་ལས་སེམས་གཞན་དང་ལྡན་པ་དང་། འགོག་པའི་སྙོམས་འཇུག་སོགས་སེམས་མེད་པ་ལའང་རྗེས་སུ་འཇུག་པའི་ཕྱིར། གསུམ་པ་ནི། བར་ཆད་མེད་ལམ་སྐྱེས་དེ་གཉིས། །མི་ལྕོགས་མེད་ལ་སྤོང་ཞེས་བྱ། །བསམ་གཏན་དང་ཟག་མེད་ཀྱི་སྡོམ་པ་དེ་གཉིས་ཉེར་བསྡོགས་མི་ལྕོགས་མེད་པ་འདོད་པའི་འཆལ་ཚུལ་ལས་དང་པོར་ཐར་པའི་བར་ཆད་མེད་ལམ་དགུ་དག་ཏུ་སྐྱེས་པ་ནི་ཆོས་ཅན། འདོད་པའི་ཉོན་མོངས་རྣམ་པ་དགུ་སྤོང་བའི་ལམ་ཡིན་པས་སྤོང་བའི་སྡོམ་པ་ཞེས་བྱ་བའི་མིང་ཐོབ་སྟེ། དེ་གཉིས་ཀྱིས་འཆལ་ཚུལ་དང་། དེ་ཀུན་ནས་སློང་བྱེད་ཀྱི་ཉོན་མོངས་རྣམས་སྤོང་བར་བྱེད་པའི་ཕྱིར་རོ། །བསམ་གཏན་གྱི་སྡོམ་པ་ཡིན་ལ་སྤོང་བའི་སྡོམ་པ་ཡིན་མིན་ལ་མུ་བཞི་ལས། བསམ་གཏན་གྱི་སྡོམ་པ་ཡིན་ལ་སྤོང་བའི་སྡོམ་པ་མིན་པ་ནི། མི་ལྕོགས་མེད་པའི་བར་ཆད་མེད་ལམ་ལས། དེའི་ས་པའི་རྣམ་གྲོལ་དང་སྦྱོར་བ་དང་ཁྱད་པར་གྱི་ལམ་དག་ལ་ཡོད་པ་དང་། བསམ་གཏན་དང་པོ་ནས་བཞི་པའི་བར་གྱི་དངོས་གཞི་བར་ཆད་མེད་པ་དང་། རྣམ་པར་གྲོལ་བ་དང་སྦྱོར་བ་དང་ཁྱད་པར་གྱི་ལམ་དག་ལ་བསམ་གཏན་གྱི་སྡོམ་པ་ཡོད་པ་ནི་བསམ་གཏན་གྱི་སྡོམ་པ་ཡིན་གྱི། སྤོང་བའི་སྡོམ་པ་མ་ཡིན་ཏེ། དེས་འདོད་པའི་འཆལ་ཚུལ་དང་། ཀུན་ནས་སློང་བར་བྱེད་པའི་ཉོན་མོངས་མི་སྤོང་བའི་ཕྱིར། སྤོང་བའི་སྡོམ་པ་ཡིན་ལ་བསམ་གཏན་གྱི་སྡོམ་པ་མིན་པ་ནི། མི་ལྕོགས་མེད་པའི་བར་ཆད་མེད་པའི་ལམ་དགུ་དག་ཏུ་ཡོད་པའི་ཟག་མེད་ཀྱི་སྡོམ་པ་ནི་འཆལ་བའི་ཚུལ་ཁྲིམས་ལ་སོགས་པ་སྤོང་བའི་ཕྱིར་སྤོང་བའི་སྡོམ་པ་ཡིན་གྱི། བསམ་གཏན་གྱི་སྡོམ་པ་ནི་མ་ཡིན་ཏེ། ཟག་པ་མེད་པ་ཡིན་པའི་ཕྱིར་རོ། །སྤོང་བའི་སྡོམ་པ་ཡང་ཡིན། བསམ་གཏན་གྱི་སྡོམ་པའང་ཡིན་པ་ནི། མི་ལྕོགས་མེད་(༣༢ན)
པའི་བར་ཆད་མེད་པའི་ལམ་དགུ་དག་ཏུ་ཡོད་པའི་ཟག་བཅས་ཀྱི་སྡོམ་པ་ནི་འཆལ་བའི་ཚུལ་ཁྲིམས་སོགས་སྤོང་བའི་ཕྱིར་སྤོང་བའི་སྡོམ་པ་ཡིན་གྱི། བསམ་གཏན་གྱི་སྡོམ་པའང་ཡིན་ཏེ། ཟག་པ་དང་བཅས་པའི་ཏིང་ངེ་འཛིན་ལས་སྐྱེས་པའི་ཕྱིར། གཉིས་ཀ་མིན་པའི་མུ་ནི། མི་ལྕོགས་མེད་པའི་བར་ཆད་མེད་པའི་ལམ་མ་གཏོགས་པའི་ཟག་པ་མེད་པའི་སྡོམ་པ་ནི་ཟག་པ་མེད་པའི་ཕྱིར་བསམ་གཏན་གྱི་སྡོམ་པའང་མ་ཡིན་ལ། སྤོང་བའི་སྡོམ་པའང་མ་ཡིན་ཏེ། དེས་འཆལ་པའི་ཚུལ་ཁྲིམས་ལ་སོགས་པ་མི་སྤོང་བའི་ཕྱིར། ཟག་མེད་ཀྱི་སྡོམ་པ་ཡིན་ལ་སྤོང་བའི་སྡོམ་པ་ཡིན་མིན་ལ་མུ་བཞི་ལས། མུ་དང་པོ་ནི་མི་ལྕོགས་མེད་པའི་བར་ཆད་མེད་པའི་ལམ་མ་གཏོགས་པ་ཟག་པ་མེད་པའི་སྡོམ་པའོ། །མུ་གཉིས་པ་ནི་ཟག་བཅས་མི་ལྕོགས་མེད་པས་སོ། །མུ་གསུམ་པ་ནི་ཟག་མེད་མི་ལྕོགས་མེད་པས་སོ། །མུ་བཞི་པ་ནི་བསམ་གཏན་བཞི་པ་ལྟ་བུའོ། །གསུམ་པ་ཞར་ལ་བྱུང་བའི་དོན་ནི། ཤེས་བཞིན་དང་ནི་དྲན་དག་གཉིས། །ཡིད་དང་དབང་པོའི་སྡོམ་པ་ཡིན། །ཞེས་པས་བསྟན། སོ་སོར་ཐར་པའི་སྡོམ་པ་མ་ཡིན་ཀྱང་སྡོམ་པའི་རྣམ་གྲངས་གཞན་ནི། བཅོམ་ལྡན་འདས་ཀྱིས། ལུས་ཀྱི་སྡོམ་པའང་ལེགས་པ་སྟེ། །ངག་གི་སྡོམ་པའང་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཞེས་གང་གསུངས་པ་དང་། གང་ཡང་མིག་གི་དབང་པོ་སྡོམ་པས་བསྡམས་ཏེ། གནས་སོ་ཞེས་གསུངས་པས། ཡིད་དང་དབང་པོའི་སྡོམ་པ་འདི་གཉིས་ཀྱི་རང་བཞིན་ཅི་ཞེ་ན། འདི་གཉིས་རིག་བྱེད་མིན་པའི་རང་བཞིན་ནི་མ་ཡིན་ནོ། །འོ་ན་ཅི་ཞེ་ན། ཤེས་བཞིན་དང་ནི་དྲན་དག་གཉིས་ཀྱི་བདག་ཉིད་ཀྱི་ཡིད་ཀྱི་སྡོམ་པ་ཡིན་ལ། གང་ན་སྡོམ་ན། གཟུགས་ལ་སོགས་པའི་ཡུལ་ལ་གང་གིས་སྡོམ་ན་དྲན་ཤེས་བཞིན། ཇི་ལྟར་སྡོམ་ན། དང་པོར་མཚན་མར་མ་ཞེན་པ་མཚན་མར་མི་འཛིན་པ་ཡིན། ཕྱིས་མ་ཞེན་པ་མངོན་རྟགས་(༣༢བ)
སུ་མི་འཛིན་པ་ཡིན་ནོ། །ཡང་ལྟུང་བ་དང་དེའི་གཉེན་པོ་ཤེས་པའི་ཤེས་བཞིན་དང་། སྤོང་བའི་སེམས་མ་བརྗེད་ངན་པ་དག་གཉིས་ཀྱི་བདག་ཉིད་ཀྱིས་ཡིད་ཀྱི་སྡོམ་པ་དང་སྟེ། ཟླས་དབྱེ་བའི་ཚིག་གོ། །དག་སྒྲས་གཉིས་ཚིག་གྲུབ་པ་ལས། སླར་གཉིས་ཚིག་སྨོས་པ་ནི། ཤེས་བཞིན་ཡིད་ཀྱི་སྡོམ་པ་དང་། དྲན་པ་དབང་པོའི་སྡོམ་པར་དོགས་པ་སེལ་བྱེད་ཡིན་ནོ། །ཡིད་དང་དབང་པོའི་སྡོམ་པ་སྔ་ཕྱི་འདི་གཉིས་ལས། གོང་མ་ནི་ཁྱབ་ཆུང་སྟེ་ཡིད་ཀྱི་དབང་པོ་ཁོ་ན་ཡིན་ལ། ཕྱི་མ་ནི་དབང་པོ་དྲུག་གར་གྱི་ཡིན་ནོ། །འདི་ནི་ལུང་ལས། ནང་མ་དག་པར་ཕྱི་རོལ་བཙུན་བཙུན་ལྟར་བྱེད་པ་ཞིག་གིས་མཚོ་ཞིག་ཏུ་ཁྲུས་བྱས་པས། མཚོའི་ལྷ་ན་རེ། ངེད་ཀྱི་མཚོ་ཡེ་མི་གཙང་བར་བྱས་པས་ཁྱོད་འདིར་ད་ཚུན་ཆོད་མ་འོང་ཞིག་ཟེར། དགེ་ཚུལ་ཚུལ་ཁྲིམས་བཙུན་པོ་ཞིག་གིས་ཕྱགས་དར་བྱས་ནས། མི་གཙང་བ་མཚོ་དེར་བཀྲུས་པ་ལ། ཁྱོད་མི་ཚུལ་ཁྲིམས་དག་པས་བདག་ཀྱང་དག་པར་བྱེད་དོ། །ཞེས་ཁོའི་དྲི་མས་རྒྱ་མཚོའི་ལྷ་ཡང་བཀྲུས་སོ། །གཞན་ཡང་དགེ་སློང་ཞིག་ཡུལ་དག་ཏུ་རྒྱུ་བ་ཞིག་ལ། ལྷ་ཞིག་གིས་དགེ་སློང་ལ་བོས་ནས། དགེ་སློང་རྨ་འབྱིན་པར་མ་བྱེད་ཅིགདགེ་སློང་གིས་སྨྲས་པ། ལྷ་དགག་པར་བྱའོ་ཞེས་སྨྲས་པ་དང་། དགེ་སློང་རྨ་རྫ་མ་ཙམ་ཞིག་བྱུང་ན་ཅི་ཞིག་གིས་དགག་པར་བྱེད། དགེ་སློང་གིས་སྨྲས་པ། ལྷ་དྲན་པ་དང་ཤེས་བཞིན་དག་གིས་དགག་པར་བྱའོ་ཞེས་གྲགས་སོ། །གཉིས་པ་ཐམས་ཅད་ཐུན་མོང་དུ་བསྟན་པ་ལ། དུས་ཇི་སྲིད་ལྡན་པ། ཚུལ་ཇི་ལྟར་ཐོབ་པ། རྒྱུ་གང་གིས་གཏོང་བ། རྟེན་གང་དང་ལྡན་པའོ། །དང་པོ་ལ། རིག་བྱེད་མིན་པའི་ལྡན་ཚུལ། རིག་བྱེད་ཀྱི་ལྡན་ཚུལ། སྡོམ་མིན་གྱི་མིང་གི་རྣམ་གྲངས། དེ་དག་གི་མུ་བཞི་བཤད་པའོ། །དང་པོ་ལ་གསུམ། མཉམ་པར་མ་བཞག་པའི་དང་། མཉམ་པར་བཞག་པའི་དང་། བར་མའི་ལྡན་ཚུལ་ལོ། །དང་པོ་ལ་གཉིས། སྡོམ་པ་དང་།(༣༣ན)
སྡོམ་མིན་ནོ། །དང་པོ་ནི། སོ་སོར་ཐར་གནས་ཇི་སྲིད་དུ། །མ་བཏང་བར་དག་ད་ལྟར་གྱི། །རྣམ་རིག་མིན་ལྡན་སྐད་ཅིག་མ། །དང་པོ་ཕྱིན་ཆད་འདས་པ་དང་། །སོ་སོར་ཐར་པའི་སྡོམ་པ་ལ་གནས་པར་བཤད་པའི་གང་ཟག་དེ་ནི་ཇི་སྲིད་དུ་བསླབ་པ་ཕུལ་བ་ལ་སོགས་པས་རྣམ་པར་རིག་བྱེད་མིན་པ་མ་བཏང་བ་དེ་སྲིད་དུ་རྟག་ཏུ་ད་ལྟར་གྱི་དེ་དང་ལྡན་ཏེ། མིག་གི་དབང་པོའི་རྒྱུན་རྗེས་སུ་འཇུག་པ་དང་འདྲའོ། །སྐད་ཅིག་མ་དང་པོ་ནི་ད་ལྟར་གྱི་ཁོ་ན་དང་ལྡན་པ་ཡིན་ལ། སྐད་ཅིག་མ་དང་པོ་ཕྱིན་ཆད་ཇི་སྲིད་མ་བཏང་གི་བར་དུ་འདས་པ་དང་ཡང་ལྡན་པ་ནི། སྐད་ཅིག་གཉིས་པའི་དུས་སུ་དང་པོ་དང་ཡང་ལྡན། གསུམ་པའི་དུས་སུ་གཉིས་པ་དང་དང་པོ་དང་ཡང་ལྡན་པས་རིགས་མཚོན་ནོ། །གཉིས་པ་ནི། སྡོམ་མིན་གནས་པའང་དེ་དང་འདྲ། །སྡོམ་མིན་གནས་པའང་མི་གཏོང་བ་དེ་སྲིད་དུ་ད་ལྟ་བ་དང་འདས་པའི་ལྡན་ཚུལ་ནི་ཇི་སྐད་བཤད་པ་སོ་ཐར་གྱི་དེ་དང་འདྲའོ། །གཉིས་པ་མཉམ་པར་བཞག་པའི་ལྡན་ཚུལ་ནི། བསམ་གཏན་སྡོམ་དང་ལྡན་པ་ནི། །རྟག་ཏུ་འདས་དང་མ་འོངས་དང་། །འཕགས་ནི་དང་པོ་འདས་དང་མིན། །མཉམ་གཞག་འཕགས་ལམ་གནས་དེ་གཉིས། །ད་ལྟར་དང་ལྡན། བསམ་གཏན་སྡོམ་དང་ལྡན་པ་ནི། ཇི་སྲིད་མ་བཏང་གི་བར་རྟག་ཏུ་འདས་དང་མ་འོངས་པའི་རྣམ་པར་རིག་བྱེད་མ་ཡིན་པ་དང་ལྡན་ཏེ། དེ་ནི་སྐད་ཅིག་མ་དང་པོ་ལ་ཡང་སྔོན་ཚེ་རབས་དཔག་ཏུ་མེད་པ་ནས་བསམ་གཏན་དང་པོའི་སྡོམ་པ་ཐོབ་པ་བཏང་བའི་འདས་པ་དང་ལྡན། ཚེ་འདི་ལ་སྔར་བཏང་བ་དང་ཡང་ལྡན་པའི་ཕྱིར། འདིས་ནི་བསམ་གཏན་གྱི་སྡོམ་ལྡན་གྱི་སྐྱེ་འཕགས་གཉིས་ཀ་བཟུང་ངོ་། །འཕགས་པའི་གང་ཟག་ནི་སྐད་ཅིག་མ་དང་པོ་འདས་པ་དང་ལྡན་པ་མིན་ཏེ། སྡུག་བསྔལ་ལ་ཆོས་ཤེས་པའི་བཟོད་པ་སྔར་སྐྱེ་མ་མྱོང་བས་འདས་པ་དང་མི་ལྡན་པའི་ཕྱིར་རོ། །དེ་ཡང་རྒྱལ་པོའི་སྲས་ནི། སྡུག་བསྔལ་ལས་ཆོས་ཤེས་སྔར་སྐྱེ་མ་མྱོང་བས་འདས་པ་དང་མི་ལྡན་པར་མ་ཟད། རྒྱུན་དུ་ཞུགས་པའི་འབྲས་བུ་ཐོབ་པའི་སྐད་ཅིག་མ་དང་པོ་དེ་ཡང་འདས་པ་དང་མི་ལྡན་ཏེ་སྔར་བསྐྱེད་མ་མྱོང་བས། རྒྱུ་ལ་འཇུག་པ་ནི་འབྲས་བུའི་དུས་ན་བཏང་། དབང་པོ་རྣོན་པོར་འཕོས་པའི་དུས་སུ་ཡང་སྔར་རྣོན་པོ་བསྐྱེད་མ་མྱོང་བས་འདས་པ་དང་མི་ལྡན། རྟུལ་པོ་ནི་རྣོན་པོར་གྱུར་(༣༣བ)
པས་བཏང་ཙ་ན། འབྲས་བུ་དང་རྣོན་པོ་གཉིས་པོ་དེ་འདས་པ་དང་མི་ལྡན་ནོ་གསུངས། དབྱིག་བཤེས་ནི། ཟག་མེད་ཀྱི་སྡོམ་པའི་སྐབས་ཡིན་ཙམ་ན། འབྲས་བུ་ཐོབ་པ་དང་། རྣོན་པོའི་དུས་སུ་ཟག་མེད་འདས་པ་དང་ལྡན་ཏེ། གོང་དུའམ་ལམ་གཞན་ཐོབ་པ་དེ་ལ་ཟག་མེད་ཕྱི་མ་དང་འདྲ་བར་ཡོད་པའི་ཕྱིར། འདས་པ་དང་ལྡན་པར་བརྗོད་ཟེར་རོ། །རྒྱལ་སྲས་ན་རེ། དེ་འདྲ་བ་དེ་ཟག་བཅས་བསམ་གཏན་གྱི་སྡོམ་པ་འདྲ་བས་ཟེར་ན། བསམ་གཏན་གྱི་སྡོམ་པ་དེ་སྡུག་བསྔལ་ལ་ཆོས་ཤེས་པ་ལ་ཡང་སྔར་སྐྱེས་ནས་ཡོད་པས་འདས་པ་དང་མི་ལྡན་བྱ་བར་དགག་མི་རིགས། འདྲ་བྱ་བ་དེ་འབྲས་བུའི་ལམ་སྐད་ཅིག་བཅོ་ལྔ་ལྟ་བུ་སྔར་བསྐྱེད་པས་དེ་དང་ལྡན་ཟེར་ན། འབྲས་བུ་ཐོབ་པའི་ཚེ་ལམ་སྔ་མ་བོར་ནས་ཡོད་པར་བརྗོད་པ་ཅི་ལ་ནུས་ཏེ་མི་ནུས། དེས་ན་འབྲས་བུ་ཐོབ་པ་དང་། དབང་པོ་འཕོ་བ་ཡང་འདས་པ་དང་མི་ལྡན་ནོ། །འཇིག་རྟེན་པའི་ལམ་ལ་མཉམ་པར་བཞག་པ་བསམ་གཏན་གྱི་སྡོམ་པ་དང་ལྡན་པ་དང་། མཉམ་གཞག་འཕགས་ལམ་ལ་གནས་ཤིང་སྙོམས་པར་ཞུགས་པ་ཟག་མེད་ཀྱི་སྡོམ་པ་དང་ལྡན་པ་དེ་གཉིས་ཆོས་ཅན། གོ་རིམ་བཞིན་ད་ལྟར་གྱི་རིག་བྱེད་མིན་པ་དང་ལྡན་པ་ཡིན་ཏེ། སྙོམས་འཇུག་ལས་ལངས་པ་ལ་ནི་ལྡན་པ་མ་ཡིན་པའི་ཕྱིར། གྲུབ་སྟེ། སྡོམ་པ་ཐ་མ་གཉིས་སེམས་རྗེས་འབྲང་བའི་ཕྱིར། རྒྱལ་པོའི་སྲས་ནི། གྲུར་ཞུགས་བྱས་པ་རང་གིས་གྲུ་ལ་གནས་པ་བཞིན་དུ་འཕགས་པའི་ལམ་ལ་ཞུགས་ཤིང་སྙོམས་པར་ཞུགས་པ་དེ་འཕགས་པའི་ལམ་ལ་གནས་པ་ཡིན་ཏེ། སྤྱིར་ཐོབ་པ་ཙམ་མིན། ད་ལྟར་མངོན་དུ་བྱེད་པ་ཡིན། ད་ལྟར་མ་ཡིན་ཏེ། འཕགས་པའི་ལམ་ལ་ཞུགས་ཤིང་སྙོམས་པར་ཞུགས་ཀྱང་སྤྱིར་ཐོབ་པ་ཙམ་ཡིན་གྱི། མངོན་དུ་བྱེད་པ་མིན་ན་ཐ་མལ་པར་འདུག་པའི་འཕགས་པ་ཡང་ད་ལྟར་གྱི་ཟག་པ་མེད་པའི་སྡོམ་པ་དང་ལྡན་པར་ཐལ་བར་འགྱུར་བྱས་པ་ལ། འདུས་(༣༤ན)
བཟང་ན་རེ། དེས་ན་འཕགས་པའི་ལམ་ལ་གནས་བྱ་བ་དེ་ལ་ཡང་མཉམ་གཞག་འཕགས་པའི་ལམ་ལ་གནས་པ། ཞེས་མཉམ་གཞག་གདགས་དགོས་ཟེར་བ་ལ། མ་ཡིན་ཏེ། བསམ་གཏན་གྱི་སྐབས་ཡིན་པའི་ཕྱིར། ཕལ་པ་དེ་ལ་རྣམ་པར་རིག་བྱེད་མ་ཡིན་པ་མེད་པའི་ཕྱིར་ཏེ། མངོན་དུ་མི་བྱེད་པ་དེ་ལ་ད་ལྟའི་རིག་བྱེད་མིན་པ་མེད་པའི་ཕྱིར། དེ་ལ་ཐལ་བར་མི་འགྱུར་རོ། །གསུམ་པ་བར་མ་ལྡན་ཚུལ་ལ་གཉིས། དངོས་དོན་དང་། འཕྲོས་དོན་སྡོམ་སྡོམ་མིན་ཅན་ལ་ལྡན་ཚུལ་ལོ། །དང་པོ་ནི། པར་གནས་ལ། །ཡོད་ན་དང་པོ་བར་གྱི་དང་། །ཕྱིན་ཆད་དུས་ནི་གཉིས་དང་ངོ་། །སྡོམ་པ་དང་སྡོམ་མིན་གཉིས་ཀྱི་བར་མ་ལ་གནས་པ་ནི། དགེ་སློང་སོགས་ཀྱང་མ་ཡིན་ལ་ཉ་པ་སོགས་ཀྱང་མ་ཡིན་པ་སྟེ། དེ་ལ་རིག་བྱེད་མ་ཡིན་པ་ངེས་པར་ཡོད་པ་མ་ཡིན་གྱི། གང་ལ་སྲོག་གཅོད་སོགས་འཆལ་བའི་ཚུལ་ཁྲིམས་དང་། ཚུལ་ཁྲིམས་ཀྱི་ཡན་ལག་སྲོག་གཅོད་སྤོང་བ་ལ་སོགས་པ་དང་། སྡོམ་པ་སྡོམ་མིན་གྱིས་མ་བསྡུས་པ་སོགས་པའི་སྒྲས་མཆོད་རྟེན་ལ་ཕྱག་འཚལ་བ་དང་ལྕགས་དབྱུག་དང་ཐལ་ལྕག་བསྣུན་པ་སོགས་བར་མའི་རིག་བྱེད་མིན་པ་ཡོད་ན་སྐད་ཅིག་མ་དང་པོ་ལ་འདས་མ་འོངས་ཀྱི་བར་ད་ལྟར་གྱི་རིག་བྱེད་མ་ཡིན་པ་དང་ལྡན་ནོ། །སྐད་ཅིག་མ་དང་པོ་ཕྱིན་ཆད་མ་བཏང་གི་བར་དུ་དུས་ནི་འདས་ད་ལྟར་གཉིས་ཀྱི་དང་ལྡན་ནོ། །གཉིས་པ་ནི། སྡོམ་མིན་གནས་པ་དགེ་བ་དང་། །སྡོམ་ལ་གནས་པ་མི་དགེ་བའི། །རྣམ་རིག་མིན་ལྡན་ཇི་སྲིད་དུ། །རབ་དང་ཉོན་མོངས་ཤུགས་ལྡན་པར། །རེས་སྡོམ་མིན་ལ་གནས་པ་དགེ་བའི་རིག་བྱེད་མ་ཡིན་པ་དང་ལྡན་པར་འགྱུར་ལ། སྡོམ་པ་ལ་གནས་པ་མི་དགེ་བའི་རིག་བྱེད་མ་ཡིན་པ་ལ་གནས་པར་འགྱུར་ཏེ། དེ་ཡང་སྡོམ་མིན་ལ་གནས་པ་རབ་ཏུ་དང་བ་དྲག་པོས་མཆོད་རྟེན་ལ་ཕྱག་བྱེད་པའི་ཚེ་བར་མ་དགེ་བའི་རིག་བྱེད་མ་ཡིན་པ་སྐྱེ་བ་དང་། སྡོམ་པ་ལ་གནས་པ་ཉོན་མོངས་པའི་ཤུགས་ཀྱིས་གསོད་འཆིང་རྡེག་པར་བྱེད་པའི་ཚེའི་བར་མ་མི་དགེ་བའི་རྣམ་པར་རིག་བྱེད་མིན་པ་དང་ལྡན་ཏེ། དེའང་དུས་ཇི་སྲིད་རབ་ཏུ་དང་བ་དྲག་པོ་དང་ཉོན་མོངས་པའི་(༣༤བ)
ཤུགས་དང་ལྡན་པའི་བར་དུ་རིག་བྱེད་མིན་པ་རྗེས་སུ་འབྲང་བ་ཡིན་ནོ། །སྐད་ཅིག་མ་དང་པོ་ནི་ད་ལྟར་གྱི་རིག་བྱེད་མ་ཡིན་པ་ཁོ་ན་དང་ལྡན་ལ། གཞན་སྐད་ཅིག་མ་གཉིས་པ་སོགས་སུ་འདས་པ་དང་ཡང་ལྡན་ནོ། །གཉིས་པ་རིག་བྱེད་ཀྱི་ལྡན་ཚུལ་ནི། རྣམ་རིག་བྱེད་ནི་ཐམས་ཅད་ལ། །བྱེད་པ་དག་ལ་ད་ལྟར་ལྡན། །མ་བཏང་བར་དུ་སྐད་ཅིག་མ། །ཕྱིན་ཆད་འདས་ལྡན་མ་འོངས་མེད། །བསྒྲིབས་པ་དང་ནི་མ་བསྒྲིབས་པ། །འདས་པ་དག་དང་ལྡན་པའང་མེད། །ལུས་ངག་གི་རྣམ་པར་རིག་བྱེད་ནི་སྡོམ་པ་དང་སྡོམ་མིན་དང་བར་མ་ལ་གནས་པ་ཐམས་ཅད་ལ་རིག་བྱེད་དངོས་སུ་བྱེད་པ་དག་ལ་ད་ལྟ་བ་དང་ལྡན་ལ། གཏོང་བའི་རྒྱུ་དག་གིས་མ་བཏང་གི་བར་དུ་སྐད་ཅིག་མ་དང་པོ་ཕྱིན་ཆད་ནི་འདས་པ་དང་ཡང་ལྡན་ནོ། །སྡོམ་པའི་མཚན་ཉིད་ཀྱི་རྣམ་པར་རིག་བྱེད་ནི། ཇི་སྲིད་དུ་བསླབ་པ་ཕུལ་སོགས་ཀྱིས་མ་བཏང་གི་བར་དེ་སྲིད་དུ་འདས་པའི་རིག་བྱེད་དང་ལྡན། སྡོམ་པ་མ་ཡིན་པའི་མཚན་ཉིད་ཀྱི་རྣམ་པར་རིག་བྱེད་ནི་སྡོམ་པ་ཡང་དག་པར་ལེན་པ་སོགས་ཀྱིས་མ་བཏང་བ་དེ་སྲིད་དུ་འདས་པ་དང་ལྡན། བར་མས་བསྡུས་པའི་མཚན་ཉིད་ཀྱི་རིག་བྱེད་ནི། ཇི་སྲིད་རབ་ཏུ་དང་བ་དང་ཉོན་མོངས་པའི་ཤུགས་ཆད་པས་མ་བཏང་བ་དེ་སྲིད་དུ་འདས་པ་དང་ལྡན་ཏེ། གང་ཞིག་སྡོམ་པ་ལ་སོགས་ཀྱི་རྣམ་པར་རིག་བྱེད་དང་ལྡན་པ་དེ་ནི་ཐེ་ཚོམ་མེད་པར་སྐད་ཅིག་མ་ཕྱིན་ཆད་འདས་པའི་རྣམ་པར་རིག་བྱེད་ཀྱི་ལས་ལམ་དངོས་ཀྱི་ངོ་བོ་ཉིད་ཀྱིས་ཐོབ་པ་དང་ལྡན་ནོ། །མ་འོངས་པའི་རིག་བྱེད་ནི་སུ་ལ་ཡང་ལྡན་པ་མེད་དེ། རིག་བྱེད་ནི་སེམས་ཀྱི་རྗེས་འབྲང་མ་ཡིན་པའི་བེམས་པོ་ཡིན་པའི་ཕྱིར། དེ་ལྟ་བུའི་ནུས་པ་མེད་དོ། །ཚངས་ཆེན་གྱི་གཡོ་སྒྱུའི་ངག་ལྟ་བུ་སྒྲིབ་པ་དང་ནི་བཟོ་དང་སྤྱོད་ལམ་པ་ལྟ་བུ་མ་སྒྲིབ་ལ་ལུང་དུ་མ་བསྟན་པའི་རིག་བྱེད་ནི་ཆོས་ཅན། མ་འོངས་པ་དང་མི་ལྡན་པར་མ་ཟད། འདས་པ་དང་ཡང་མི་ལྡན་ཏེ། ཆོས་ཉམ་ཆུང་བའི་ཕྱིར་ཐོབ་པ་སྔ་ཕྱིར་འདྲེན་མི་ནུས་པའི་ཕྱིར། གྲུབ་སྟེ། ལུང་མ་བསྟན་གྱི་རིག་བྱེད་ཉམ་ཆུང་བ་ནི་ལུང་མ་བསྟན་གྱི་སེམས་ཆུང་བའི་ཕྱིར། འོ་ན་སྒྲིབ་ལ་ལུང་དུ་མ་བསྟན་(༣༥ན)
པའི་སེམས་ཀྱི་ཐོབ་པ་ཡང་རྗེས་སུ་མི་འབྲང་བར་ཐལ། སྒྲིབ་ལ་ལུང་མ་བསྟན་གྱི་སེམས་ཉམ་ཆུང་བའི་ཕྱིར་ཞེ་ན། མ་ཁྱབ་སྟེ། སེམས་ནི་བླུན་པ་དང་གཞན་ལ་རགས་ལས་པའང་མ་ཡིན་ལ། རིག་བྱེད་ནི་དམིགས་པ་མེད་པས་བེམས་པོ་བླུན་པོ་ཡིན་པའི་ཕྱིར་དང་། སེམས་གཞན་ལ་མ་རགས་པའི་ཕྱིར་ཁྱད་པར་འཐད་དོ། །གསུམ་པ་སྡོམ་མིན་གྱི་མིང་གི་རྣམ་གྲངས་ནི། སྡོམ་པ་མིན་དང་ཉེས་སྤྱད་དང་། །འཆལ་པའི་ཚུལ་ཁྲིམས་ལས་དེའི་ལམ། །ལུས་ངག་མི་སྡོམ་པས་སྡོམ་མིན་དང་། དམ་པས་སྨད་ཅིང་འབྲས་བུ་ཡིད་དུ་མི་འོང་བ་འབྱིན་པས་ཉེས་སྤྱད་དང་། ཚུལ་ཁྲིམས་ཀྱི་མི་མཐུན་པའི་ཕྱོགས་ཡིན་པའི་ཕྱིར། འཆལ་བའི་ཚུལ་ཁྲིམས་དང་ལུས་ངག་གི་ལས་ཡིན་པས། ལས་དང་སྲོག་གཅོད་པ་སོགས་དངོས་གཞི་ནམ་གྲུབ་ཙམ་ན་དངོས་ཀྱིས་བསྡུས་པ་དེའི་ཕྱིར་དེའི་ལམ་མོ། །བཞི་པ་དེ་དག་གི་མུ་བཞི་བཤད་པ་ལས། བར་མ་དོར་གནས་སེམས་ཞན་པས། །བྱེད་ན་རྣམ་རིག་ཉིད་དང་ལྡན། །རྣམ་རིག་བཏང་དང་མ་སྐྱེས་པའི། །འཕགས་པའི་གང་ཟག་རྣམ་རིག་མིན། །མུ་དང་པོ་ནི། སྡོམ་པ་དང་སྡོམ་མིན་གྱི་བར་མ་དོར་གནས་པ་ཞིག་སེམས་ཞན་པས་དགེ་བའམ་མི་དགེ་བ་ཞིག་བྱེད་ན་ཆོས་ཅན། རྣམ་པར་རིག་བྱེད་ཉིད་ཁོ་ན་དང་ལྡན་པ་ཡིན་ཏེ། རིག་བྱེད་མ་ཡིན་པ་དང་ལྡན་པ་མ་ཡིན་ན། སེམས་ཞན་པས་ལུང་མ་བསྟན་བྱེད་ན་ལྟ་ཅི་སྨོས་པའི་ཕྱིར། ངག་དོན་རྟེན་དགེ་སློང་སོགས་ཀྱང་མིན། ཉ་པ་སོགས་ཀྱང་མིན་པའི་བར་མ་བ་ཞིག་གི་དགེ་མི་དགེའི་སེམས་དྲག་པོ་མིན་པས་ཀུན་སློང་གི་རིག་བྱེད་ནི་རིག་བྱེད་ཁོ་ན་ཡིན་གྱི། རིག་མིན་མེད་དོ། །དྲག་པོས་བླང་བ་ན་ནི་རིག་མིན་ཀྱང་ཡོད་དོ། །ཞན་པ་ཡིན་ཀྱང་དམིགས་ཀྱིས་བསལ་བ་ཡོད་དེ། ཞིང་ཁྱད་པར་ཅན་ལ་སེམས་ཞན་པས་བྱས་ཀྱང་རིག་བྱེད་མིན་པ་ལྡན་པར་འགྱུར་བའི་ཕྱིར། རྫས་ལས་བྱུང་བའི་བསོད་ནམས་ཀྱི་དངོས་པོ་བཞིན། མདོ་ལས། རྒྱུ་ཡང་རུང་འདུག་ཀྱང་རུང་རྒྱུན་མི་འཆད་པར་ཞེས་བྱ་བ་ནས། བསོད་ནམས་ཉེ་བར་སྐྱེ་བ་ཁོ་ནར་འགྱུར་ཞེས་བྱ་བའི་བར་དུ་འབྱུང་ངོ་། །སྲོག་གཅོད་པ་ལ་(༣༥བ)
སོགས་པའི་ལས་ཀྱི་ལམ་ཡང་སེམས་ཞན་པས་བྱེད་ནའང་རྣམ་རིག་མིན་པ་དང་ལྡན་པར་འགྱུར་ཏེ། ཕ་རོལ་པོ་ཤི་བ་ན་བདག་ལ་རིག་མིན་གྱི་ལས་ལམ་གྲུབ་པའི་ཕྱིར་རོ། །མུ་གཉིས་པ་ནི། འཕགས་པའི་གང་ཟག་རྒྱུན་ཞུགས་སྲིད་པ་ལན་བདུན་པ་ལྟ་བུ་ཞིག་མའི་མངལ་ན་གནས་པ་དེ་སྐྱེ་བ་སྔ་མའི་རྣམ་རིག་ནི་བཏང་། ཚེ་འདིའི་རྣམ་རིག་ནི་མ་སྐྱེས་ན། རྣམ་པར་རིག་བྱེད་དང་མི་ལྡན་པ་ལ་རིག་བྱེད་མིན་པ་ཟག་མེད་ཀྱི་སྡོམ་པ་དང་ལྡན་ནོ། །གཟུགས་མེད་ཁམས་སུ་སྐྱེས་པའི་འཕགས་པ་ལ་ཡང་རིག་བྱེད་མེད་ལ་རིག་བྱེད་མིན་པའི་ཟག་མེད་ཀྱི་སྡོམ་པ་ཡོད་དོ། །རྫས་ལས་བྱུང་བའི་བསོད་ནམས་གསོག་པ་པོ་འདོད་པ་ནས་ཚེ་འཕོས་ན་འདིའི་རིག་བྱེད་བཏང་ཀྱང་རིག་མིན་མ་བཏང་བ་ལྟ་བུ་ཡོད་དོ། །འོ་ན་འདིར་དཔྱད་དགོས་ཏེ། སོ་སོ་སྐྱེ་བོ་རྟེན་འདོད་ཁམས་པ་བསམ་གཏན་གྱི་སེམས་ཐོབ་པ་ཚེ་བརྗེས་ནས་གཟུགས་ཁམས་སུ་སྐྱེས་པ་རྣམ་པར་རིག་བྱེད་མ་བྱས་པའམ། བྱས་ན་ཡང་རྣམ་རིག་བཏང་བ་དེ་རིག་བྱེད་མ་ཡིན་པ་དང་ལྡན་ལ། རིག་བྱེད་དང་མི་ལྡན་པ་དེ་ལྟ་བུའི་སོ་སོ་སྐྱེ་བོ་མི་སྨོས་པ་ཅི་ཞེ་ན། སོ་སོ་སྐྱེ་བོ་ནི་ངེས་པ་མ་ཡིན་པས་མ་བཤད་དེ། འདི་ལྟར་སོ་སོ་སྐྱེ་བོ་ལ་རིག་བྱེད་མེད་ལ། རིག་བྱེད་མ་ཡིན་པ་དེ་འདྲ་བ་ཡོད་ཀྱང་དེ་ག་བཞིན་མ་ངེས་ཏེ། གཟུགས་ཁམས་ནས་འདོད་པར་སྐྱེས་པ་ལྟ་བུ་ལ་གཉིས་ཀ་མེད་པ་ཡང་ཡོད་པས་མ་ངེས་པའི་ཕྱིར་དང་། འཕགས་པ་ནི་ངེས་ཏེ། འདོད་ཁམས་ནས་འདོད་པར་སྐྱེ་བ་དང་། འདོད་པ་ནས་གཟུགས་ཁམས་སུ་སྐྱེ་བ་དང་། གཟུགས་མེད་དུ་སྐྱེ་བ་དང་། གཟུགས་ཁམས་ནས་གཟུགས་མེད་དུ་སྐྱེ་བ་གང་ཡིན་ཀྱང་རིག་བྱེད་མེད་ལ་རིག་བྱེད་མིན་པ་ཟག་མེད་ཀྱི་སྡོམ་པ་ཡོད་པར་ངེས་སོ། །ཡང་ན། འདོད་ཁམས་པ་མུ་བཞི་པ་ཞིག་ཡོད་པ་དེ་མུ་གསུམ་(༣༦ན)
པར་འགྱུར་བ་བཟློག་པའི་ཆེད་དེ། དཔེར་ན། འཕགས་པ་མ་ཡིན་པ་སོ་སོ་སྐྱེ་བོ་འདི་ལྟ་བུ་སྲིད་དེ། བསམ་གཏན་དང་པོ་མི་ལྕོགས་མེད་པ་ལ་བརྟེན་ནས་འདོད་ཉོན་བརྒྱད་པ་སྤངས་པ་གཅིག་ཤི་ན། མའི་མངལ་ནུར་ནུར་སོགས་འདུག་པ་དེ་རིག་བྱེད་མེད་ལ། བསམ་གཏན་དང་པོའི་མི་ལྕོགས་པ་མེད་པའི་བསམ་གཏན་གྱི་སྡོམ་པ་བཏང་བས་གཉིས་ཀ་མེད་པར་འགྲོའི་རིག་བྱེད་མིན་པ་ཡོད་པ་མ་ཡིན་ནོ། །ཡང་ན། འཕགས་པ་དེ་ལྟ་བུས་རྣམ་རིག་མེད་ལ་རིག་བྱེད་མ་ཡིན་པ་ཡོད་པ་ཐམས་ཅད་ལ་མཚོན་ནོ། །མུ་གསུམ་པ་ནི། སྡོམ་པ་དང་སྡོམ་མིན་ལ་གནས་པ་དང་། བར་མ་དོར་གནས་པ་སེམས་དྲག་པོས་དགེ་མི་དགེ་བྱེད་པ་ནི་གཉིས་ཀ་དང་ལྡན་ནོ། །མུ་བཞི་པ་ནི། སོ་སོ་སྐྱེ་བོ་ཞིག་ཚེ་གཞན་བརྗེས་ནས་ད་དུང་རྣམ་པར་རིག་བྱེད་མ་བྱུང་བའམ་རྣམ་རིག་ཉམས་པའོ། །འདིར་སྨྲས་པ། ཟབ་མོའི་དོན་འདིར་ཞུགས་པའི་བགྲོད་པ་ཅན། །དེ་ལ་ཉེ་བར་མཁོ་དགུའི་ལེགས་སྤྱད་མིག །འཁྲུལ་པ་བྲལ་བ་དེ་ནི་འདིར་བྱིན་པས། །སྔོན་རབས་རྒན་པོའི་ཟེར་སྒྲོས་མྱ་ངམ་གྱི། །ཐང་ལ་འཁྱམས་པས་ཕྱོགས་བསླད་ངལ་བ་ཡིས། །ཁུར་གྱི་དུབ་རྣམས་བདེ་བར་ཡིད་སོས་སམ། །གཉིས་པ་ཚུལ་ཇི་ལྟར་ཐོབ་པ་ལ། སྡོམ་པའི་ཐོབ་ཚུལ་དང་། སྡོམ་མིན་གྱི་དང་། བར་མའི་ཐོབ་ཚུལ་ལོ། །དང་པོ་ལ། དངོས་དང་། གང་ལས་ཐོབ་པའོ། །དང་པོ་ལ། བསམ་གཏན་གྱི་དང་། ཟག་མེད་ཀྱི་དང་། སོ་ཐར་སྡོམ་པའི་ཐོབ་ཚུལ་ལོ། །དང་པོ་ནི། བསམ་གཏན་ལས་སྐྱེས་བསམ་གཏན་གྱི། །ས་ཉིད་ཀྱིས་འཐོབ། བསམ་གཏན་ལས་སྐྱེས་པའི་སྡོམ་པ་ནི་ཆོས་ཅན། བསམ་གཏན་གྱི་ས་པའི་སེམས་ཟག་བཅས་དངོས་གཞིའམ། ཉེར་བསྡོགས་ཐོབ་པ་ཉིད་ཀྱིས་ཐོབ་སྟེ། བསམ་གཏན་གྱི་སེམས་དང་ལྷན་ཅིག་འབྱུང་བའི་ཕྱིར། དེའང་མི་ལྕོགས་མེད་པ་ནི་སྦྱོར་བས་ཐོབ་ལ། དངོས་གཞི་ནི་འདོད་ཆགས་དང་བྲལ་བས་ཐོབ། (༣༦བ)
གོང་མ་གཉིས་པ་ནས་དང་པོར་སྐྱེ་ན་ཉེར་བསྡོགས་དང་དངོས་གཞི་གཉིས་ཀ་སྐྱེ་བས་ཐོབ་བོ། །གཉིས་པ་ཟག་མེད་ནི། །འཕགས་དེས། ཟག་མེད་ཀྱི་སྡོམ་པ་ནི་འཕགས་པའི་བསམ་གཏན་བཞི། མི་ལྕོགས་མེད་པ་དང་ཁྱད་པར་ཅན་ཏེ། ས་དྲུག་པོ་གང་རུང་ཐོབ་པ་དེས་ན་ཐོབ་སྟེ། དེ་དང་ལྷན་ཅིག་འབྱུང་བའི་ཕྱིར་དང་། འོག་ནས་ཀྱང་དེ་ནི་ཆོས་མཆོག་དང་ས་གཅིག་ཅེས་པར་ཡང་བཤད་དོ། །འཕགས་པའི་དབང་དུ་ན་ཉེར་བསྡོགས་ནི་སྦྱོར་བས་ཐོབ། དངོས་གཞི་འདོད་ཆགས་དང་བྲལ་བས་ཐོབ་ཀྱི། འོག་མར་གོང་མ་ནས་སྐྱེ་བ་མེད་པས་སྐྱེ་བས་ཐོབ་པ་མེད་དོ། །གསུམ་པ་སོ་ཐར་སྡོམ་པའི་ཐོབ་ཚུལ་ལ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི། སོ་སོར་ཐར་ཅེས་པ། །གཞན་གྱི་རྣམ་རིག་བྱེད་སོགས་ཀྱིས། །སོ་སོར་ཐར་པའི་སྡོམ་པ་ཞེས་པ་ནི་ཆོས་ཅན། གོ་བྱེད་གཞན་གྱི་རྣམ་པར་རིག་བྱེད་ལས་ཐོབ་སྟེ། དེའི་རྒྱུད་ལ་སྡོམ་པ་ཐོབ་པ་མཁན་སློབ་གཞན་གྱིས་ཀྱང་རྣམ་པར་རིག་པར་བྱེད་ལ། སྡོམ་པ་རྒྱུད་ལ་སྐྱེས་པ་དེས་ཀྱང་རང་ལ་སྐྱེས་པ་གཞན་ལ་རྣམ་པར་རིག་པར་བྱེད་པའི་ཕྱིར་རོ། །སོགས་ཀྱིས་ནི་ལེན་འདོད་དེ། ཐོབ་ཤེས་ངེས་འབྱུང་གི་བསམ་པ་རྣམས་འདྲེན་ནོ། །དེ་ཡང་དགེ་སློང་དང་དགེ་སློང་མ་དང་དགེ་སློབ་མའི་སྡོམ་པ་རྣམས་ནི་དགེ་འདུན་ལས་ཐོབ་ལ། དགེ་ཚུལ་ཕ་མ་དང་དགེ་བསྙེན་ཕ་མ་ནི་གང་ཟག་ལས་ཐོབ་བོ། །བྱེ་སྨྲས། འདུལ་བ་པ་རྣམས་རྣམ་པ་བཅུས་བསྙེན་པར་རྫོགས་སོ་ཞེས་ཟེར་བ་བསྡུ་པའི་ཕྱིར། སོགས་སྒྲ་སྨོས་ཏེ། རང་བྱུང་གི་ཡེ་ཤེས་བརྙེས་པ་ནི་སངས་རྒྱས་དང་རང་སངས་རྒྱས་རྣམས་སོ། །སྨོན་ལམ་གྱི་དབང་ངམ་སངས་རྒྱས་ཀྱི་མཐུས་ཡང་དག་པར་ངེས་པ་མཐོང་ལམ་སྐྱེས་པ་ལྔ་སྡེ་ཀུན་ཤེས་ཀོའུ་དི་ཉ་ལ་སོགས་པ་དང་། བདེ་བར་གཤེགས་པས་ཚུར་ཤོག་ཅེས་གསུངས་པས། མགོ་ཡང་བྱི་ཞིང་ཆོས་གོས་གྱོན་པར་གྱུར། །ཅེས་འབྱུང་བ་ལྟར། དགེ་སློང་ཚུར་ཤོག་སྤྱད་པ་སྤྱོད་ཅིགཆོས་ནི་ལེགས་པར་གསུངས་པའོ་ཞེས་བཀའ་(༣༧ན)
སྩལ་པས་གྲགས་པ་ལ་སོགས་ཉེ་བའ་ལྔ་སྡེ་རྣམས་སོ། །འོད་སྲུང་ཆེན་པོ་ནི་མཐུ་ཆེ་བའི་ཕྱིར་ལྷའི་གཟུགས་གང་ལ་ཕྱག་བྱས་པ་དེ་འགས་པས་བཅོམ་ལྡན་འདས་ལ་ཕྱག་མ་བྱས་པས། དེ་བ་ལ་ཕྱག་འཚོལ་ཅེས་གླེངས་པས་འཚལ་བས་གཟུགས་མ་གྱུར་པར་མཐོང་ནས་བཅོམ་ལྡན་འདས་བདག་གི་སྟོན་པ་ཡིན་ཅེས་སྟོན་པར་ཁས་བླངས་པས་བསྙེན་པར་རྫོགས་པ་དང་། ལེགས་བྱིན་གྱིས་དྲིས་པའི་ལན་བཏབ་པས། བཅོམ་ལྡན་འདས་མཉེས་ཏེ་བསྙེན་པར་རྫོགས་པ་དང་། འདིའི་གཏམ་རྒྱུད་སྙིགས་མ་ལྔའི་མདོ་ལས་བཤད་ཅེས་ཞི་གནས་ལྷའི་མཛོད་ཊཱི་ཀ་ལས་བཤད་དོ། །བླ་མའི་ཆོས་བརྒྱད་པོ་དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པའང་དེ་རིང་བསྙེན་པར་རྫོགས་པའི་དགེ་སློང་ལ་ཕྱག་བྱ་བ་དང་། ལྕི་བའི་ཆོས་ཀྱི་ལྟུང་བ་བྱུང་བ་གཉིས་ཀའི་དགེ་འདུན་ལ་མགུ་བ་སྤྱད་པ་དང་། དགེ་སློང་གི་ལྟུང་བ་མི་གླེང་བ་དང་། དགེ་སློང་ལྟུང་བ་བྱུང་བ་ལ་གཤེ་ཁྲོ་སྤྱོ་བར་མི་བྱ་བ་དང་། དབྱར་ཁས་བླངས་པས་གཉིས་ཀའི་དགེ་འདུན་ལ་དགག་དབྱེ་བྱ་བ་དང་། དབྱར་དགེ་སློང་མེད་པའི་གནས་སུ་མི་འགྲོ་བ་དང་། ཟླ་བ་ཕྱེད་ཅིང་དགེ་སློང་ལས་གདམས་ངག་གནོད་པ་དང་། དགེ་སློང་ལས་བསྙེན་པར་རྫོགས་པ་སྟེ་བརྒྱད་ཁས་བླངས་པས་སྐྱེ་རྒུའི་བདག་མོ་བསྙེན་པར་རྫོགས་པ་དང་། རྒྱལ་རིགས་ཆོས་སྦྱིན་བྱ་བ་བཙུན་མོའི་འཁོར་གྱི་ནང་ན་འདུག་པ་ལས་ནེ་ཙོ་བཞིན་རྒྱས་སྟོན་པའི་དྲུང་དུ་རབ་ཏུ་བྱུང་བས་གསོལ་བའི་ཕྲིན་གྱིས་སོ། །ཡང་ན། ས་གའི་ཆུང་མ་ཆོས་སྦྱིན་མ་ཨུཏྤ་ལའི་མདོག་ལ་ཕྲིན་གྱིས་བསྙེན་པར་རྫོགས་པ་ལྟ་བུའོ། །འདུལ་བ་འཛིན་པ་གསོལ་བ་དང་ལས་བརྗོད་པ་སློབ་དཔོན་གཏོགས་པ་ལྔས་མཐའ་འཁོབ་ཀྱི་མི་རྣམས་བསྙེན་པར་རྫོགས་པ་དང་། བཅུ་ཚོགས་ཀྱིས་ཡུལ་དབུས་ཀྱི་མི་རྣམས་སོ། །སངས་རྒྱས་ལ་སྐྱབས་སུ་འགྲོ་བ་ལན་གསུམ་བཟླས་(༣༧བ)
པ་ནི་རིགས་ཀྱི་བུ་སྡེ་བཟང་དྲུག་ཅུའི་ཚོགས་བསྙེན་རྫོགས་བྱས་ཏེ། བསྙེན་པར་རྫོགས་ཚུལ་བཅུ་པོ་དེ་ལ་ཤས་ཆེར་རིག་བྱེད་མེད་པ་ཡང་ཡོད་པས། སོ་ཐར་གྱི་སྡོམ་པ་ནི། གདོན་མི་ཟ་བར་རིག་བྱེད་ལ་རགས་མ་ལས་པ་ཡིན་ནོ། །སྐབས་འདིར་དཔལ་མཆོག་ལྡན་ན་རེ། སྤྱིར་རང་བྱུང་ཞེས་པའི་མིང་ནི་གཉིས་ཏེ། ཁྱིམ་ནས་རང་བྱུང་བ་དང་། རང་བྱུང་གི་ཡེ་ཤེས་མངོན་དུ་བྱས་པའོ། །ཕྱི་མ་ལ་ཡང་གཉིས་ཏེ། ཟག་མེད་ཀྱི་ཡེ་ཤེས་མངོན་དུ་བྱས་པ་དང་། བྱང་ཆུབ་མངོན་དུ་བྱས་པའོ། །དེ་ལའང་གཉིས་ཏེ། རྫོགས་པའི་བྱང་ཆུབ་དང་། རང་བྱང་ཆུབ་བོ། །དེ་ལྟར་གསུམ་ལས་རྫོགས་པའི་བྱང་ཆུབ་ནི་སོ་ཐར་སྡོམ་པ་ཐོབ་པའི་ཐོབ་རྒྱུར་མི་རིགས་ཏེ། དེའི་ཚེ་སྒོམ་སྤང་མ་ལུས་པ་སྤངས་ཟིན་པས་རྒྱུའི་ཀུན་སློང་མེད་པའི་ཕྱིར། རང་བྱང་ཆུབ་ཀྱང་མ་ཡིན་ཏེ། དགྲ་བཅོམ་པའི་འབྲས་བུ་མངོན་དུ་བྱས་ཟིན་པའི་ཕྱིར། ངེས་འབྱུང་གི་ཕྱིར་དུ་ལེན་པ་མེད་པས་ངེས་འབྱུང་གི་ཚུལ་ཁྲིམས་མེད་ལ། ལེགས་སྨོན་སོགས་སུ་སྐྱེ་བར་ཡང་མི་རིགས་པའི་ཕྱིར། མཐོང་ལམ་གྱི་དུས་སུ་སྐྱེ་བ་ཡང་མ་ཡིན་ཏེ། ཇི་སྐད་དུ། སྟོན་དང་བསེ་རུ་བྱང་ཆུབ་པ། །ཞེས་དང་། དང་པོར་མ་ཡིན་སྐད་ཅིག་མ། །སུམ་ཅུ་རྩ་བཞིས་ཐོབ་ཕྱིར་རོ། །ཞེས་བཤད་པ་ན་བར་དེར་སོ་ཐར་གྱི་སྡོམ་པ་སྐྱེས་པ་ཡིན་ན། མཉམ་པར་མ་བཞག་པའི་སེམས་མངོན་དུ་བྱས་པར་ཐལ་བའི་ཕྱིར་དང་། ཟག་མེད་ཀྱི་སེམས་ནི་སོ་ཐར་གྱི་རྒྱུའི་ཀུན་སློང་དུ་མི་རུང་བའི་ཕྱིར་དང་། རྒྱུའི་ཀུན་སློང་སྔོན་དུ་མ་སོང་ན་ཀུན་ནས་སློང་བའི་དགེ་བ་མི་རིགས་པའི་ཕྱིར་རོ། །དེས་ན་སངས་རྒྱས་གཉིས་ཀ་ཡང་ཁྱིམ་ནས་རང་བྱུང་གིས་བསྙེན་པར་རྫོགས་སོ། །འོ་ན་དེ་ཉིད་ཀྱི་ཚེའམ་དེའི་རྗེས་སུ་རྫོགས་པ་གང་ཡིན་ཅེ་ན། སྤྱིར་རབ་བྱུང་དང་བསྙེན་རྫོགས་ཀྱི་སྐྱེ་ཚུལ་ལ་གཉིས། གཅིག་ཅར་སྐྱེ་བ་དང་རིམ་ཅན་དུ་སྐྱེས་པའོ། །ཕྱི་མ་ལ་(༣༨ན)
གཉིས་ཏེ། རབ་བྱུང་གིས་ཕྱིས་བསྙེན་པར་རྫོགས་པ་དང་། སྔར་བསྙེན་པར་རྫོགས་པའོ། །དང་པོ་ནི། གསོལ་གཞིའི་ཆོ་ག་འོག་ཏུ་བཤད་པ་དེས་བསྙེན་པར་རྫོགས་པའི་ཚེའོ། །གཉིས་པ་ནི། ད་ལྟར་གྱི་ཆོ་གས་བསྙེན་པར་རྫོགས་པའི་ཚེའོ། །སྔ་མ་ནི་བསྙེན་རྫོགས་ཀྱི་ཐོབ་རྒྱུར་བཤད་པ་ཕལ་ཆེ་བ་དག་གིས་ཡིན་པ་ལ། རང་བྱུང་གཉིས་པོ་ཡང་དགོས་པ་ངེས་འབྱུང་གི་ཕྱིར་དུ་ལས་སུ་བྱ་བ་ཁྱིམ་ནས་རང་བྱུང་ཟིན་པ་ཙམ་གྱིས་བསྙེན་པར་རྫོགས་ཟིན་པ་ཡིན་ཏེ། དེའི་ཚེ་བཅས་པ་ནི་མེད་ལ། མི་དགེ་བ་བདུན་སྤོང་བའི་ཚུལ་ཁྲིམས་མཉམ་པར་མ་བཞག་པའི་སས་བསྡུས་པ་ཞིག་འཐོབ་པའི་ཕྱིར། དེའི་འོག་ཏུ་བྱུང་ནས་དཀའ་བ་སྤྱད་པའི་ཚེ་བསམ་གཏན་གྱི་སྡོམ་པ་དང་། བྱང་ཆུབ་ཀྱི་ཤིང་དྲུང་དུ་ཟག་མེད་ཀྱི་སྡོམ་པ་མངོན་དུ་མཛད་ལ། རང་སངས་རྒྱས་ལའང་གོ་རིམ་དེ་བཞིན་ནོ། །སྔར་བསྙེན་པར་རྫོགས་ནས་ཕྱིས་རབ་ཏུ་བྱུང་བའི་གོ་རིམ་འདི་ནི་མི་སྲིད་པའོ་ཞེ་ན། མ་ཡིན་ཏེ། ངེས་འཇུག་དང་ཚུར་ཤོག་སོགས་ཕལ་ཆེ་བ་ལ་གོ་རིམ་དེ་ལྟར་ངེས་པའི་ཕྱིར། དཔེར་ན། ལྔ་སྡེ་ལ་མཐོང་ལམ་སྐྱེས་ཟིན་པའི་འོག་དེ་མ་ཐག་ཏུ་སྐྲ་དང་ཁ་སྤུ་རང་བྱི་དང་། སྣམ་སྦྱར་བགོས་ཤིང་ལྷུང་བཟེད་ལག་ཏུ་ཐོགས་པར་གྱུར་ཏེ། བསྙེན་པར་རྫོགས་པའི་དགེ་སློང་ལོ་བརྒྱ་ལོན་པ་བཞིན་དུ་གྱུར་པར་བཤད་ལ། དེ་ལྟར་བཤད་པ་ན་མཉམ་གཞག་ཏུ་བསྙེན་པར་རྫོགས་ཤིང་། རྗེས་ཐོབ་ཏུ་རབ་ཏུ་བྱུང་བར་ཁས་ལེན་དགོས་པ་བཞིན་ནོ། །ཞེས་བྲིས་པ་དང་། ཡང་སངས་རྒྱས་གཉིས་པོ་དེ་བསྙེན་པར་རྫོགས་པ་ན་ཁྱིམ་པའི་རྒྱལ་མཚན་ཅན་ལ་བསྙེན་པར་རྫོགས་པ་སྐྱེ་བར་གྲུབ་ལ། ཕྱིས་དབུ་སྐྲ་བཅད་པ་དང་། ལྷས་ཆོས་གོས་ཕུལ་བ་དེའི་ཚེ་ནི་རབ་ཏུ་བྱུང་བ་ཡིན་ཅེས་པ་རྣམས་ནི། ཟི་ལུང་པའི་བཞེད་པ་མཐར་ཐུག་པའོ། །ལུགས་འདི་ནི་རྟོག་བརྟགས་ཀྱི་གཏམ་སར་ཞིག་ཏུ་(༣༨བ)
སྣང་བས། དཔྱད་བཟོད་པ་མ་ཡིན་ཏེ། སྤྱིར་སངས་རྒྱས་གཉིས་སངས་རྒྱས་པ་ན་སོ་ཐར་གྱི་སྡོམ་པ་ཐོབ་པ་འདི་རྒྱ་བོད་དུ་མཁས་རྨོངས་ཐམས་ཅད་ལ་རླུང་ལྟར་གྲགས་པ་དེ་མ་ཡིན་པར་དེ་ཁས་བླང་མ་འདོད་ནས་བརྫུན་སྐྱོབས་སུ་ཐ་སྙད་གསར་འཇོག་ཅིག་རང་གི་བློས་བཟོས་ནས། དེ་སྔོན་གྱི་གསུང་རབ་ཀྱི་བརྡ་ལས་བྱུང་ཁ་མོར་བཅོས་པ་འདི་ཉེས་པ་ཆེ་སྟེ། ཁོ་རང་གི་དེར་སྤྱིར་རང་བྱུང་ཞེས་པའི་མིང་ནི་གཉིས་ཏེ། ཁྱིམ་ནས་རང་བྱུང་དང་རང་བྱུང་གི་ཡེ་ཤེས་མངོན་དུ་བྱས་པའི་རྣམ་གཞག་གཉིས་ཡོད་ཟེར་བའི་རྣམ་གཞག་འདི་གསུང་རབ་ཇི་ལྟ་བུ་ཞིག་ན་ཡོད་ཁུངས་སྟོན་དགོས་ལ། ཁུངས་མེད་པའི་གསར་རྩོམ་འདིས་མི་ཡོང་སྟེ། གསུང་རབ་ལས་ཁྱིམ་ནས་ཁྱིམ་མེད་པར་རབ་ཏུ་བྱུང་ཞེས་གྲགས་ཀྱི། ཁྱིམ་ནས་ཁྱིམ་མེད་པར་རང་བྱུང་བྱས་ཞེས་ཟེར་བ་སྔོན་ཆད་མ་གྲགས་ལ། ཁྱེད་ལྟར་ན་རབ་བྱུང་གི་ནང་གི་དབྱེ་བར་རང་བྱུང་ཡང་འདྲེན་ན། རང་བྱུང་གི་ཡེ་ཤེས་ཞེས་བརྗོད་མི་རིགས་པར་ཐལ། རབ་བྱུང་གི་ཡེ་ཤེས་བརྗོད་རིགས་པའི་ཕྱིར། དེར་ཐལ། རབ་བྱུང་གི་དབྱེ་བ་བརྗོད་པའི་སྐབས་ཡིན་པའི་ཕྱིར། འཁོར་གསུམ། ཆོས་ཀྱི་ནང་ན་རྫུན་མི་ཤོང་། མིག་གི་ནང་དུ་རྡུལ་མི་ཚུད་ཟེར་བ་དེ་བདེན་པར་འདུག་གམ་ལྟོས་ཤིགསངས་རྒྱས་དུས་སྒོམ་སྤང་གི་ཀུན་སློང་མེད་པས་སངས་རྒྱས་དུས་སོ་ཐར་གྱི་སྡོམ་པ་མི་སྐྱེ་བ་དང་། རང་སངས་རྒྱས་དུས་དགྲ་བཅོམ་ཟིན་པས་ངེས་འབྱུང་གི་བསམ་པ་མེད་པས་དེ་དུས་སོ་ཐར་གྱི་སྡོམ་པ་མི་སྐྱེ་བ་ལ་ཁྱབ་པ་ག་ལ་ཡོད་དེ། སོ་སྐྱེའི་སོ་ཐར་གྱི་སྡོམ་པ་ཐོབ་རྒྱུར་དེ་དག་དགོས་ཀྱང་། སྤྱིར་འཕགས་པ་ལ་མིན་པ་དང་། ལྷག་པར་སངས་རྒྱས་གཉིས་ལ་དེ་ལྟར་མ་ཡིན་པས། རྫོགས་ཚུལ་བཅུ་ལ་སོགས་པ་ཟུར་དུ་རྣམ་གྲངས་དུ་མར་དམིགས་ཀྱིས་བཀར་འདུག་པའི་ཕྱིར། དེར་མ་ཟད་རང་སངས་རྒྱས་ཟིན་ནས་ངེས་(༣༩ན)
འབྱུང་མེད་པའི་རྟགས་མ་གྲུབ་སྟེ། འོ་ན་ཉན་ཐོས་དགྲ་བཅོམ་ནས་ཀྱང་ངེས་འབྱུང་མེད་པར་ཐལ། རང་རྒྱལ་དགྲ་བཅོམ་ནས་ཀྱང་ངེས་འབྱུང་མེད་པའི་ཕྱིར། རྟགས་ཁས་བླངས། ཁྱབ་པ་ཡོད་དེ། རང་སངས་རྒྱས་ཀྱང་འཁོར་བ་ལས་ཐར་བའི་ཕྱིར་ངེས་འབྱུང་མེད་དགོས་ན་ཉན་ཐོས་དགྲ་བཅོམ་ལ་ཡང་མཚུངས་པའི་ཕྱིར། འདོད་ན། ཉན་ཐོས་དགྲ་བཅོམ་ལྷག་བཅས་རང་གི་ཕུང་པོ་ལ་ངེས་པར་འབྱུང་ནས་ལྷག་མེད་དུ་འདའ་བ་མེད་པར་ཐལ། དེའི་རྒྱུ་ལ་ངེས་འབྱུང་མེད་པའི་ཕྱིར། འཁོར་གསུམ། རང་སངས་རྒྱས་རང་ཉིད་འཁོར་བ་ལས་ངེས་པར་དུ་འབྱུང་འདོད་མེད་ཀྱང་སྤྱིར་རང་རྒྱལ་ལ་ངེས་འབྱུང་མེད་བྱས་ན་ཉེས་པ་ཆེན་པོར་འགྱུར་ཏེ། འོ་ན་རང་རྒྱལ་ཆོས་ཅན། ཁྱོད་ཀྱི་སྡུག་བསྔལ་གྱི་བདེན་པ་མངོན་དུ་མ་བྱས་པའམ་མ་གཟིགས་པར་ཐལ། འཁོར་བ་སྡུག་བསྔལ་དུ་བདེན་པར་གཟིགས་པའི་བློ་དེ་ངེས་འབྱུང་གི་བློ་ཡིན་པ་གང་ཞིག་དེ་དེ་ལ་མེད་པའི་ཕྱིར། རྟགས་དང་པོ་མ་གྲུབ་པོ་ཞེ་ན། འཁོར་བ་ལ་བདེ་བ་ཡོད་པར་ཐལ། རང་རྒྱལ་བ་དེ་འཁོར་བ་སྡུག་བསྔལ་བདེན་པར་མ་གཟིགས་པའི་ཕྱིར། ཁྱབ་པ་ཡོད་དོ། །འཕགས་པས་སྡུག་བསྔལ་དུ་མ་གཟིགས་ན་འཁོར་བ་བཏང་སྙོམས་སུ་ནི་སུས་ཀྱང་མི་འདོད་པས་བདེ་བ་ལས་འོས་མེད་ཅིང་། འཕགས་པའི་མཁྱེན་པ་ཚད་མ་ཡིན་པའི་ཕྱིར། འདི་ལ་འཁོར་བ་བཏང་སྙོམས་སུ་མི་འདོད་པ་རྟགས་མ་གྲུབ་པའི་ལན་འདེབས་པར་བྱེད་དམ། འཁོར་བ་ལ་བདེ་བ་ཡོད་པར་ཐལ་བ་ལ་འདོད་ལན་བྱེད། ལན་གང་ཡང་འདེབས་མ་ནུས་ན་སྨྲ་བ་ལ་ལན་མེད་པས་ཁྱེད་ཅག་དང་རྩོད་པའི་སྐབས་བོར་རོ། །འོ་ན་ལན་དང་པོ་ལྟར་འདེབས་སོ་ཞེ་ན། དོན་ལ་འཕགས་པའི་བདེན་པ་བཞི་མ་ཚང་བར་ཐལ། འཁོར་བ་མཐའ་དག་སྡུག་བསྔལ་མིན་པར་བཏང་སྙོམས་ཡིན་པའི་ཕྱིར། ཡང་ལན་གཉིས་པ་(༣༩བ)
ལྟར་འདེབས་སོ་ཞེ་ན། ཁྱེད་ཅག་མུ་སྟེགས་རྒྱང་འཕེན་པའི་རྗེས་འཇུག་ཏུ་ཐལ། འཁོར་བ་ལ་བདེ་བ་ཡོད་པར་ཁས་ལེན་པའི་ཕྱིར། རྩ་བའི་རྟགས་ཁྱབ་གྲུབ། རྩ་བར་འདོད་ན། རང་རྒྱལ་ཆོས་ཅན། ཁྱོད་འཕགས་པ་མ་ཡིན་པར་ཐལ། འཕགས་པའི་བདེན་པ་མངོན་དུ་མ་བྱས་པའི་ཕྱིར། དེར་ཐལ། སྡུག་བསྔལ་བདེན་པ་མངོན་དུ་མ་བྱས་པའི་ཕྱིར། ཡང་ཁྱེད་ཀྱིས་མཐོང་ལམ་གྱི་དུས་སུ་སོ་ཐར་གྱི་སྡོམ་པ་སྐྱེ་ན། མཉམ་པར་མ་བཞག་པའི་སེམས་མངོན་དུ་བྱེད་དགོས་ཟེར་བ་ལ་ཁྱབ་པ་མེད་དེ། སོ་སྐྱེ་རྫོགས་ཚུལ་ལ་དེ་ལྟར་ཡིན་ཀྱང་འཕགས་པ་ལ་དེ་ལྟར་ཡིན་མི་དགོས་པའི་ཕྱིར་རོ། །ཁྱེད་རང་མཐོང་ལམ་གྱི་དུས་སུ་སོ་ཐར་གྱི་སྡོམ་པ་སྐྱེ་བ་དང་ཐོབ་པ་མེད་པར་ཁས་ལེན་ན། ལྔ་སྡེ་བཟང་པོ་རྣམས་ཆོས་ཅན། ཁྱོད་ངེས་པས་འཇུག་པའི་དུས་སུ་སོ་ཐར་གྱི་སྡོམ་པ་སྐྱེ་བ་དང་ཐོབ་པ་མེད་པར་ཐལ། ངེས་པར་འཇུག་པ་དེ་བདེན་པ་མཐོང་བ་ལ་བརྗོད་པ་གང་ཞིགམཐོང་ལམ་གྱི་དུས་སུ་སོ་ཐར་གྱི་སྡོམ་པ་སྐྱེ་མི་སྲིད་པའི་ཕྱིར། རྟགས་ཁྱབ་ཁས་བླངས། འདོད་ན། མཛོད་འགྲེལ་ལས། ངེས་པར་འཇུག་པས་ནི་རྟེན་ལྔ་པོ་རྣམས་སོ། །ཞེས་ལྔ་སྡེ་མཐོང་ལམ་ཐོབ་པའི་དུས་དེར་སོ་ཐར་གྱི་སྡོམ་པ་སྐྱེ་བར་བཤད་འདུག་པའི་ཕྱིར། ངེད་དེ་མི་འདོད་དོ་ཟེར་ན། འོ་ན་ཁྱེད་མཁས་མཆོག་དབྱིག་གཉེན་གྱི་མཛོད་རྩ་འགྲེལ་གྱི་དགོངས་པ་འགྲེལ་པ་ན། དབྱིག་གཉེན་ལས་ཁྱེད་རང་དབང་ཆེ་བར་མཛད་ན་ནི་ངོ་ཚ་དང་བྲལ་བ་ཡིན་པས་བྱར་མེད་དོ། །ཡང་མཐོང་ལམ་ཐོབ་དུས་སུ་སོ་ཐར་གྱི་སྡོམ་པ་སྐྱེ་བ་དང་ཐོབ་ཏུ་མི་རུང་བྱ་བ་འདི་ལ་ནི་ནང་འགལ་བྱུང་འདུག་པ་ཁྱེད་རང་གིས་མ་མཐོང་ན་བདག་གིས་བསྟན་པར་བྱ་སྟེ། ཁྱེད་རང་གིས་དེ་མ་ཐག་པར་བསྙེན་རྫོགས་སྔར་བྱས་ནས་རབ་བྱུང་ཕྱིས་བྱས་པ་ཞིག་སྲིད་པའི་སྒྲུབ་བྱེད་ཀྱི་སྐབས་སུ་ངེས་འབྱུང་དང་ཚུར་ཤོག་སོགས་ཕལ་ཆེ་བ་ལ་གོ་རིམ་དེ་(༤༠ན)
ལྟར་ངེས་པའི་ཕྱིར། དཔེར་ན། ལྔ་སྡེ་ལ་མཐོང་ལམ་སྐྱེས་ཟིན་པའི་འོག་དེ་མ་ཐག་ཏུ་སྐྲ་དང་ཁ་སྤུ་བྱི་ཟེར་བ་བཀོད་འདུག་པའི་ཕྱིར་ན་བདེན་པ་མཐོང་དུས་སོ་ཐར་གྱི་སྡོམ་པ་སྐྱེ་བ་དང་ཐོབ་པ་མེད་ན། ལྔ་སྡེ་བདེན་པ་མཐོང་དུས་བསྙེན་རྫོགས་ཀྱི་སྡོམ་པ་སྐྱེ་ཐོབ་ཡོད་པར་བཤད་པ་འདི་འགལ་ཁྱབ་ཏུ་འགྲོ་བ་འདི་ལ་འགལ་སྤོང་ཅི་ལྟར་བྱེད། ཡང་སོ་ཐར་གྱི་སྡོམ་པ་དང་བསྙེན་རྫོགས་ཀྱི་སྡོམ་པ་མི་གཅིག་པས་མི་འགལ་ལོ་ཞེ་ན། ད་ནི་རང་གི་དེ་ཉིད་ཐམས་ཅད་བསྟན་བྱུང་བས་དེ་ཙམ་གྱིས་ཆོག་གི། ཆེས་མངོན་པར་ངོ་མཚར་རོ། །ཡང་སངས་རྒྱས་གཉིས་ལ་སོ་ཐར་གྱི་སྡོམ་པ་སངས་རྒྱས་དུས་མི་སྐྱེ་བའི་སྒྲུབ་བྱེད་ལ་ཟག་མེད་ཀྱི་སེམས་ནི་སོ་ཐར་གྱི་རྒྱུའི་ཀུན་སློང་དུ་མི་རུང་། རྒྱུའི་ཀུན་སློང་སྔོན་དུ་མ་སོང་ན་ནི་སོ་ཐར་གྱི་སྡོམ་པ་དགེ་བར་ཡང་མི་རིགས་ཞེས་པ་ལ། ཟག་མེད་ཀྱི་སེམས་སོ་ཐར་གྱི་ཀུན་སློང་དུ་སྤྱིར་མི་འཐད་ཀྱང་། སངས་རྒྱས་གཉིས་ལ་དམིགས་བསལ་བྱས་པའི་ཕྱིར་དང་། སངས་རྒྱས་གཉིས་ལ་སོ་ཐར་གྱི་སྡོམ་པ་སྐྱེས་པའི་རྒྱུའི་ཀུན་སློང་སྔོན་དུ་མ་སོང་བ་ཡང་མ་ཡིན་ཏེ། རང་བྱུང་གི་ཡེ་ཤེས་བརྙེས་པ་ན་སོ་ཐར་གྱི་སྡོམ་པ་དེ་ལེན་འདོད་ཀྱི་ཀུན་སློང་སྔར་སོ་སྐྱེའི་སྐབས་ནས་སྔོན་དུ་སོང་བའི་ཕྱིར། ཡང་ཁྱེད་ཀྱི་བསམ་པ་ལ་སངས་རྒྱས་ནས་འདོད་པ་ན་སྤྱོད་པའི་སྡོམ་པ་དགེ་བ་ཞིག་མི་དགོས་ཤིང་མི་སྲིད་དོ་ཞེ་ན། སངས་རྒྱས་ནས་མི་དགོས་པ་བདེན་ཀྱང་། འཚང་རྒྱ་བཞིན་པ་ན་འདོད་པ་ན་སྤྱོད་པའི་སྡོམ་པ་དགེ་བ་ཞིག་སྐྱེས་ནས། སངས་རྒྱས་ཟིན་པ་ནའང་དེ་ཡོད་པ་ལ་སུ་ཞིག་གིས་འགོགབསྙེན་རྫོགས་ཀྱི་སྡོམ་པའི་ངོ་བོ་ངོས་འཛིན་པ་ན། སྤོང་བདུན་འཁོར་བཅས་སྤོང་བ་ཞེས་འདོན་འདུག་པ་ལ། ཁྱེད་ལྟར་ན། སངས་རྒྱས་གཉིས་ལ་བསྙེན་རྫོགས་ཀྱི་སྡོམ་པ་ཡོངས་རྫོགས་མེད་པར་ཐལ། དེ་གཉིས་བསྙེན་པར་རྫོགས་དུས་བཅས་པ་ནི་མེད་ལ། མི་དགེ་བ་བདུན་སྤོང་བའི་(༤༠བ)
ཚུལ་ཁྲིམས་མཉམ་པར་མ་བཞག་པའི་སས་བསྡུས་པ་ཞིག་ཐོབ་པའི་ཕྱིར། རྟགས་ཁས་བླངས། ཁྱབ་པ་རྒྱ་བོད་གཉིས་ན་རླུང་ལྟར་གྲགས། འདོད་ན། སངས་རྒྱས་གཉིས་བསྙེན་རྫོགས་ཀྱི་སྡོམ་པ་ཕྱེད་གཤག་རེ་བསྣམས་ལ་བཞུགས་ཤིག །ཡང་སངས་རྒྱས་གཉིས་རབ་བྱུང་གི་དུས་ནས་བསྙེན་པར་རྫོགས་པ་ཡིན་ཟེར་བ་དང་། སངས་རྒྱས་གཉིས་དང་། ངེས་འབྱུང་ཚུར་ཤོག་སོགས་ཕལ་ཆེ་བ་སྔར་བསྙེན་པར་རྫོགས་ནས་ཕྱིས་རབ་ཏུ་བྱུང་བ་ཡིན་ཅེས་པ་ལ་ནང་འགལ་བྱུང་འདུག་པ་ཁྱེད་རང་གིས་མ་མཐོང་བ་དེ་བདག་གིས་ངོ་སྤྲད་པར་བྱའོ། །མཆོད་རྟེན་རྣམ་དག་གི་དྲུང་དུ་རང་རྟགས་བླངས་ནས་རབ་བྱུང་མཚན་ཉིད་པ་མཛད་པའི་ཚེ་ན་ཆོས་ཅན། རབ་ཏུ་བྱུང་བ་ན་བསྙེན་རྫོགས་ཀྱི་སྡོམ་པ་སྐྱེས་པ་མིན་པར་ཐལ། བསྙེན་རྫོགས་དེ་དུས་མི་སྐྱེ་བ་ནི་ཁྱེད་རང་གི་འདོད་པ་ཡིན་པ་གང་ཞིགདེ་ལས་གཞན་དུ་རབ་བྱུང་མཚན་ཉིད་པ་མ་མཛད་པའི་ཕྱིར། ཡང་རྟགས་ཕྱི་མ་མ་གྲུབ་སྟེ། ཁྱིམ་ནས་ནམ་མཁའ་ལ་གཤེགས་པ་དེའི་ཚེ་རབ་བྱུང་མཚན་ཉིད་པ་མཛད་པའི་ཕྱིར་ཟེར་ན། འོ་ན་སངས་རྒྱས་ཆོས་ཅན། སྔར་བསྙེན་པར་རྫོགས་ནས་ཕྱིས་རབ་ཏུ་བྱུང་བ་མ་ཡིན་པར་ཐལ། སྔར་རབ་བྱུང་དང་བསྙེན་རྫོགས་གཅིག་ཅར་དུ་གྲུབ་ཟིན་པའི་ཕྱིར། འཁོར་གསུམ། ཡང་སངས་རྒྱས་ཆོས་ཅན། སྔར་རབ་བྱུང་གི་དུས་བསྙེན་རྫོགས་ཀྱི་སྡོམ་པ་མ་སྐྱེས་པར་ཐལ། བསྙེན་རྫོགས་ཟིན་ནས་ཕྱིས་རབ་ཏུ་བྱུང་དགོས་པའི་ཕྱིར། རྟགས་ཁྱབ་ཁས་བླངས། ཐལ་བ་སྔ་ཕྱི་འདོད་ན་དམ་བཅའ་ཞིགཡང་ཁྱེད་རང་གི་ཐ་སྙད་གསར་བཞག་གི་ཁྱིམ་ནས་རང་བྱུང་དེ་ཆོས་ཅན། རང་བྱུང་གིས་གོ་མི་ཆོད་པར་ཐལ། ཁྱིམ་པའི་རྒྱལ་མཚན་ཅན་བསྙེན་པར་རྫོགས་ཟིན་པ་དེ་ཡིན་པའི་ཕྱིར། རྟགས་ཁས་བླངས། ཁྱབ་སྟེ། ཁྱེད་རང་གི་ཁྱིམ་པའི་རྒྱལ་མཚན་ཅན་བར་མ་རབ་བྱུང་གི་བར་ཆད་ཡིན་གྱི། དགེ་(༤༡ན)
ཚུལ་སོགས་ཀྱི་ནི་མ་ཡིན་ནོ། །ཞེས་བྲིས་འདུག་པའི་ཕྱིར། ཁྱབ་པ་ཁྱེད་རང་ལ་སོང་། འདོད་ན་དམ་བཅས་པ་དེ་བུད་དོ། །བདག་ནི་སྔ་རབས་པ་ཐམས་ཅད་ལ་གྲགས་པ་ལྟར་འདྲེན་པ་རང་རྒྱལ་རང་བྱུང་གིའོ། །ཞེས་རྫོགས་པའི་སངས་རྒྱས་འདྲེན་པ་དམ་པ་དེ་དང་རང་སངས་རྒྱས་ནི་སྲིད་པ་ཐ་མར་མཁན་སློབ་སོགས་ལ་མ་བལྟོས་པར་རང་བྱུང་གི་ཡེ་ཤེས་བརྙེས་པ་དེའི་ཚེ་དེའི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེ་བར་གསུངས་པ་ནི་ལུགས་འདི་པའི་དགོངས་པ་མཐར་ཐུག་གོ་སྙམ་པའི་ངེས་ཤེས་གཏིང་ཚུགས་པ་སྐྱེས་སོ། །གཞན་ཡང་དཀའ་བ་སྤྱད་པའི་ཚེ་བསམ་གཏན་གྱི་སྡོམ་པ་ཐོབ་བྱ་བ་དེ་ནི་བདག་ཉིད་སངས་རྒྱས་ཀྱི་མཛད་པ་བཅུ་གཉིས་ཀྱི་རྣམ་ཐར་ཙམ་ཡང་མ་ཐོས་སོ་ཞེས་གཞན་ལ་གསལ་བར་སྟོན་པའི་གཏམ་སྟེ། རེངས་བྱེད་བུ་ལྷག་སྤྱོད་ལས་བསམ་གཏན་གྱི་སེམས་ཐོབ་པར་བཤད་པ་དང་། སྒྱུ་རྩལ་ཤེས་ཀྱི་བུ་རིང་འཕུར་ལས་སྲིད་རྩེའི་སེམས་ཐོབ་པར་བཤད་པས་དུས་དེ་དང་དེ་རྣམས་སུ་བསམ་གཏན་གྱི་སྡོམ་པ་ཐོབ་པ་ཡིན་ལ། བསམ་གཏན་དེ་ལ་ལོ་དྲུག་ཏུ་མཉམ་པར་བཞག་པར་མཛད་པ་ལ་སྙིང་པོར་མ་གཟིགས་ནས་གདོད་དཀའ་སྤྱད་དེ་བཀྲོལ་བའི་ཕྱིར་རོ། །ཡང་མཉམ་གཞག་ལ་བསྙེན་རྫོགས་དང་རྗེས་ཐོབ་ཀྱི་རབ་བྱུང་ཟེར་བ་འདི་ནི་སྟོན་པའི་གསུང་རབ་ཀྱི་དགོངས་པ་ག་ལ་ཡིན་ཏེ། ཚུར་ཤོག་ཅེས་བརྗོད་པའི་སྐད་ཅིག་ལ་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེས་པ་དང་། ལུས་ལ་རྫོགས་པའི་རྟགས་གཅིག་ཅར་བྱུང་བ་དེ་ལ་ཁྱེད་ལྟར་ན། དེ་སྐད་གཅིག་གིས་བར་ཆོད་པའི་ཕྱིར། ཚུར་ཤོག་གི་དགེ་སློང་དེ་མ་ཡིན་པ་དང་། ཡང་གསོལ་བཞིའི་ལས་ཀྱི་དུས་སྐད་ཅིག་གཅིག་ཅར་རབ་ཏུ་བྱུང་བ་དང་བསྙེན་རྫོགས་ཀྱི་སྡོམ་པ་སྐྱེས་པ་ལྟ་བུ་དེའང་འཐད་པ་མ་ཡིན་པར་འགྱུར་ལ། དེ་འདོད་ན་སྔོན་གྱི་རྫོགས་ཚུལ་གྱི་ཆོ་གའི་མཚོན་གཞིར་སློབ་དཔོན་(༤༡བ)
ཡོན་ཏན་འོད་ཀྱིས་དེ་འདྲ་བཀོད་པ་དེའང་མི་འཐད་པར་འགྱུར་རོ། །དེས་ན་ཁྱེད་ཀྱིས་གཞན་ལ་མ་གྲགས་པའི་ཁྱད་ཆོས་བླ་ན་མེད་པ་ཞིག་བཞག་པར་འདོད་ནས་རྣམ་རྟོག་ངན་པ་ལ་ཤར་བ་དེ་དག་རིགས་པའི་ལམ་བཟང་པོ་ནས་དྲངས་པའི་ཚེ་རང་ཉིད་ཀྱི་ཚིག་གིས་རང་གི་དམ་བཅའ་འཇོམས་ཤིང་སྒྲུབ་བྱེད་དང་བསྒྲུབ་བྱ་འགལ་ཁྱབ་ཏུ་འགྲོ་བ་འགའ་ཞིག་འདུག་པ་ལ། བློ་གྲོས་དམན་པ་དག་གིས་གནད་འདི་ལྟ་བུའི་ཕྲ་གསང་ནི་ཁོ་བོ་ཅག་ཟི་ལུང་པ་མ་གཏོགས་སུས་ཀྱང་སྔར་མ་ཤེས། ད་ལྟའང་ཤེས་པ་མེད་ཅིང་མ་འོངས་པར་ཡང་ཤེས་པ་མི་འབྱུང་ངོ་ཞེས་མོས་པ་བྱེད་པ་ནི་གཏི་མུག་གི་ནོར་མུ་མཐའ་མེད་པས་ཕྱུག་པའི་བདག་ཉིད་དུ་རིག་པར་བྱའོ། །སྨྲས་པ། རང་བློས་བརྟགས་ནས་གྲུབ་པའི་ཁྱད་ཆོས་མཆོག །སྔོན་ཆད་གཞན་གྱིས་ཤེས་པ་མ་ཡིན་ཅེས། །སྨྲ་བ་འདི་ལ་འགལ་བ་མི་བཟོད་པ། །དཔག་མེད་མཐོང་བཞིན་ད་དུང་ཁས་ལེན་པའི། །རྒོལ་བ་དེ་དག་གྲགས་པའི་ཕྱིར་ཡིན་གྱི། །དམ་པའི་ཆོས་ལ་སྤྱོད་པ་ག་ལ་ཡིན། །ཅེས་སོ། །གཉིས་པ་[བྱེ་བྲག་ཏུ་བཤད་པ་]ལ། ལེན་པའི་དུས། སྡོམ་མིན་གྱི་དུས་ངེས་པ། བསྙེན་གནས་ཀྱི་ཁྱད་པར། དགེ་བསྙེན་གྱི་ཁྱད་པར་རོ། །དང་པོ་ནི། ཇི་སྲིད་འཚོ་དང་ཉིན་ཞག་ཏུ། །སྡོམ་པ་ཡང་དག་བླང་བར་བྱ། །རིས་བདུན་གྱི་སོ་སོར་ཐར་པའི་སྡོམ་པ་ནི་ཇི་སྲིད་འཚོའི་བར་དུ་ཡང་དག་བླང་བར་བྱ་བ་ཡིན་པ་དང་། བསྙེན་གནས་ཀྱི་སྡོམ་པ་ནི་ཉིན་ཞག་གཅིག་ཏུ་ཡང་དག་པར་བླང་བར་བྱ་བ་ཡིན་ནོ། །སོ་ཐར་སྡོམ་པར་གྱུར་པའི་དུས་ཀྱི་མཐའ་ནི་སྲོག་གི་མཐའ་པ་དང་། ཉིན་ཞག་གི་མཐའ་པའོ། །འདིར་རང་འགྲེལ་དུ་ཟླ་བ་ཕྱེད་ལ་སོགས་པ་ནི་ཉིན་ཞག་བཟླས་པས་སོ། །བྱ་བ་འདི་བོད་དུ་གོ་བ་ཉུང་ཤས་ལས་མ་བྱུང་བར་སྣང་སྟེ། བདག་གིས་བཀྲོལ་ན། མདོ་སྡེ་པའི་ཕྱོགས་ལ་བསྙེན་གནས་ཞག་བཅོ་ལྔར་སྐྱེ་བ་ཞིག་ཡོད་པ་དེའི་ཚེ་ན། བསྙེན་གནས་དེ་ལྟ་བུ་དེའི་དུས་ནི་ཞག་བཅོ་ལྔ་པའི་མཐའ་པའོ་སྙམ་དུ་དོགས་པ་ལ། (༤༢ན)
དེ་མ་ཡིན་པར་སྟོན་པ་ནི། བསྙེན་གནས་ཞག་བཅོ་ལྔར་སྐྱེ་ཡང་སྤྲེལ་ནས་གཅིག་ཏུ་སྐྱེ་བ་མ་ཡིན་ཏེ། ཉིན་ཞག་རེ་རེ་ཞིང་སྐྱེ་ནས་གཏོང་བས་ཉིན་ཞག་བཟླས་པ་སྟེ། ཉིན་ཞག་རེ་རེ་ཞིང་བསྐྱར་མར་སྐྱེ་ཞིང་ཡང་གཏོང་ཞིང་འབྱུང་བའི་དོན་ནོ། །སྤྱིར་དུས་ཞེས་བྱ་བའི་ཆོས་དེ་ཅི་ཞིག་ཅེ་ན། འདི་ལ་མུ་སྟེགས་སོགས་ཁ་ཅིག །རྟག་པའི་དངོས་པོ་ཞིག་ཡོད་དོ་སྙམ་པ་ལྟར་ནི་མ་ཡིན། དུས་གསུམ་གྱི་འདུ་བྱེད་ཡོངས་སུ་འགྱུར་བ་སྟོན་པ་དེ་ཚེའི་མིང་ངམ་བླ་དྭགས་ཡིན་པའི་ཕྱིར། དཔེར་ན། སྣང་བའི་གནས་སྐབས་སུ་ནི་གླིང་དག་ན་ཉིན་བར་གྱི་དུས་ཞེས་བྱ། མུན་པའི་གནས་སྐབས་ན་ནི་མཚན་མོའི་དུས་ཞེས་བྱའོ། །མདོ་སྡེ་པས། ཚེ་རབས་ཕྱི་མ་ཕན་ཆད་དུ་དགེ་སློང་སོགས་ཀྱི་སྡོམ་པ་ཇི་སྲིད་འཚོའི་བར་དུ་བླངས་པ་ཡོད་ཀྱང་ཆོས་ཅན། ཚེ་གཞན་དུ་སྡོམ་པ་མི་སྐྱེ་སྟེ། འདི་ཕྱི་ལུས་རིས་མི་མཐུན་པའི་ཕྱིར་དང་། ཚེ་འདིར་བླངས་པའི་སྦྱོར་བ་བྱས་ཀྱི་ཕྱི་མར་བླངས་པའི་སྦྱོར་བ་མ་བྱས་པའི་ཕྱིར་དང་། ཚེ་སྔ་མར་བླངས་པ་ཕྱི་མར་བླངས་པ་མི་དྲན་པའི་ཕྱིར་རིགས་ནའང་། བསྙེན་གནས་ཀྱི་སྡོམ་པ་ནི། ཞག་གཅིག་གི་འོག་ཞག་ལྔའམ་བཅུ་ལ་སོགས་པར་ཡང་སྐྱེ་བ་ཡིན་ཏེ། དེ་སྐྱེ་བ་ལ་གེགས་བྱེད་སུ་ཡང་མེད་པའི་ཕྱིར་བྱས་པ་ལ། བྱེ་སྨྲ་ན་རེ། ཞག་མང་པོར་སྐྱེ་བ་ལ་གེགས་བྱེད་ཡོད་དེ། སངས་རྒྱས་ཀྱིས་ཉིན་ཞག་གི་བསྙེན་གནས་ཁོ་ནར་བསྟན་པའི་ཕྱིར་ཟེར་བ་ལ། མདོ་སྡེ་པས་དྲིས་པ་ནི། ཅི་ཞག་གཅིག་གི་འོག་ཏུ་བསྙེན་གནས་ཀྱི་སྡོམ་པ་མི་སྐྱེ་བར་སངས་རྒྱས་ཀྱིས་གཟིགས་ནས་བསྟན་པ་དེ་ཁྱེད་བྱེ་སྨྲ་ལྟར་ཉིན་ཞག་གཅིག་ཁོ་ན་ལས་སྐྱེ་མི་རུང་བར་གཟིགས་སམ། ངེད་མདོ་སྡེ་པ་ལྟར་དབང་པོ་གདུལ་དཀའ་བ། དཔེར་ན། ཟླ་གཅིག་ལས་བསླབ་པ་བསླབ་མི་ནུས་ཟེར་བ་ལྟ་བུ་ཞིག་ཉིན་ཞག་པའི་སྡོམ་པ་ལ་སྦྱོར་བའི་ཆེད་ཡིན་དྲིས་པ་ལ། བྱེ་སྨྲས། དྲི་བ་དེ་ལྟར་(༤༢བ)
བརྟགས་མི་ནུས་ཏེ། འདུལ་བའི་དོན་དག་ནི་ཐམས་ཅད་མཁྱེན་པ་མ་ཡིན་པ་རྟོག་གེས་ཁོང་དུ་མི་ཆུད་པའི་ཕྱིར་ཏེ། གང་སྡོམ་པ་དེ་དག་ལས་ཁ་ཅིག་ནི་ཚོགས་ཀྱི་ནང་དུ་གསོལ་བ་ཙམ་གྱིས་ཐོབ་ལ། ཁ་ཅིག་ནི། གང་ཟག་གཅིག་ལ་གསོལ་བ་ཙམ་གྱིས་ཐོབ་པ་འདི་ལ་རྒྱུ་ཅི་ཞིག་ཡོད། དེས་ན་འདི་ལ་རྒྱུ་མཚན་བཙལ་བར་མི་བྱའོ། །དབང་པོ་གདུལ་དཀའ་བ་ལ་བལྟོས་ནས་བསྙེན་གནས་ཞག་གཅིག་པའི་མཐའ་བར་བཞག་པའང་མ་ཡིན་ཏེ། ཡིན་ན་ཆེས་གདུལ་དཀའ་བ་ལ་ཡུད་ཙམ་དང་ཉིན་མོ་ཙམ་དང་མཚན་མོ་ཙམ་གྱི་བསྙེན་གནས་ཀྱང་འཇོག་རིགས་པ་ལས་མ་བཞག་པའི་ཕྱིར་རོ་ཞེས་ཟེར་རོ། །སློབ་དཔོན་ནི། དགེ་སློང་སོགས་ཀྱི་སྡོམ་པ་ཤི་ནས་མི་སྐྱེ་ཡང་བསྙེན་གནས་ནི་ཞག་གཅིག་པའི་འོག་ཏུ་སྐྱེ་བ་ལ་རིགས་པས་མི་གནོད་དོ་ཞེས་བཞེད། བྱེ་སྨྲ་ནི། བསྙེན་གནས་ཞག་ལས་ཐལ་ནས་བཏུད་མར་མི་སྐྱེ་བར་འདོད་དོ། །ཡང་སྐབས་འདིར། དཔལ་མཆོག་ལྡན་ན་རེ། མདོ་སྡེ་པའི་ཕྱོགས་ཉིད་གྲུབ་པ་ཡིན་ཏེ། ཡན་ལག་བརྒྱད་པོ་ཞག་བཅུ་ལ་སོགས་པར་བླངས་པས་མི་སྐྱེ་ན། ཚེ་ཇི་སྲིད་འཚོའི་བར་དུ་བླངས་པས་ཀྱང་མ་སྐྱེ་བར་ཐལ་བའི་ཕྱིར་དང་། དེ་ཡང་འདོད་ན། དེ་འདྲ་དེ་ལ་གོ་མིའི་དགེ་བསྙེན་ཅེས་མིང་བཏགས་ནས་དགེ་བསྙེན་བརྒྱད་ཀྱི་དབྱེ་བ་ཚད་ལྡན་དག་གིས་བཤད་པ་ཡང་མི་རིགས་པར་ཐལ་བའི་ཕྱིར་རོ། །བོད་ཀྱི་སློབ་དཔོན་གཞན་དག །ཟླ་བ་བྱུང་ངོ་ཅོག་གི་ཚེས་བརྒྱད་ལ་བསྙེན་གནས་སྲུང་བར་ཁས་བླངས་ནས། ལེན་པའི་ཆོ་ག་བྱེད་པ་དེ་མདོ་སྡེ་པའི་ལུགས་སུ་དྲངས་མ་ཐག་པའི་ལུང་དེས་བསྟན་པ་ཡིན་ནོ་ཟེར་བ་ནི་མི་རིགས་ཏེ། ལུང་དེ་ནི་བར་མ་ཆོད་པར་ཉིན་ཞག་མང་པོ་སྦྲེལ་བའི་བསྙེན་གནས་ཤིག་བསྟན་པ་ཡིན་གྱི། སྡོམ་པ་མེད་པའི་ཞག་རིས་མི་མཐུན་གྱི་བར་ཆོད་པའི་བསྙེན་གནས་སྔོན་གྱི་འཕེན་(༤༣ན)
པའི་དབང་གིས་སྐྱེ་བར་བསྟན་པ་མ་ཡིན་པའི་ཕྱིར་ཞེས་པ་དང་། ཡང་དེ་ལྟར་ན་ཡང་གོ་མིའི་དགེ་བསྙེན་བསྙེན་གནས་ཁས་མི་ལེན་པས། བསྙེན་གནས་ཇི་སྲིད་འཚོའི་བར་དུ་ལེན་པ་ནི་མེད་ལ། ཞག་དུ་མའི་བར་དུ་ལེན་པ་ཉིད་ཡོད་དོ་ཞེས་པ་ནི་མདོ་སྡེ་པའི་གྲུབ་མཐའ་སྐྱོན་མེད་པ་ཉིད་ཡིན་པ་དེའི་ཕྱིར། བསྙེན་གནས་ཀྱི་དུས་ཀྱི་མཐའ་ནི་ཞག་གཅིག་ལས་ལྷག་པ་སྲིད་ལ། སོ་ཐར་གྱི་སྡོམ་པ་གཞན་ནི་སྲོག་གི་མཐའ་ལས་ལྷག་པ་མི་སྲིད་དོ་ཞེས་པ་ནི་གྲུབ་པའི་དོན་ཏོ་ཞེས་བྲིས་སྣང་ངོ་། །འདི་ལའང་དཔྱད་བཟོད་པར་མ་མཐོང་སྟེ། བསྙེན་གནས་ཀྱི་སྡོམ་པའི་དུས་ཀྱི་མཐའ་ཞག་གཅིག་པ་ཡིན་མིན་ལ་བྱེ་སྨྲ་དང་མདོ་སྡེ་པ་མ་མཐུན་པ་མ་ཡིན་གྱི། སྡོམ་མེད་ཀྱི་ཞག་རིས་མི་མཐུན་པའི་བར་དུ་ཆོད་དམ། མཆོད་ཀྱང་ཉིན་ཞག་མང་པོར་སྤྲེལ་ནས་བསྙེན་གནས་ཀྱི་སྡོམ་པ་སྟབས་སུ་དགེ་སློང་ལས་ནོད་པ་ན། མ་འོངས་པ་ན་སྔར་ནོད་པ་ལྟར་ཉིན་ཞག་སོ་སོར་སྐྱེ་ཞིང་ཉིན་ཞག་རྫོགས་པ་ན་གཏོང་བའི་བསྙེན་གནས་ཞག་བཏུད་མར་སྐྱེ་བ་ཞིག་ཡོད་པ་མདོ་སྡེ་པའི་འདོད་པ་དང་། དགེ་སློང་ལ་ཟླ་བ་བྱུང་ངོ་ཅོག་གི་ཚེས་བརྒྱད་ལྟ་བུར་བསྙེན་གནས་སྟབས་སུ་ལེན་པ་ན། གང་བླངས་པའི་ཉིན་ཞག་གཅིག་པོ་དེར་ནི་ཐོབ་ལ། མ་འོངས་པ་སྟབས་སུ་བླངས་པ་དེ་ནི་མི་ཐོབ་བོ་ཞེས་བྱེ་སྨྲས་འདོད་པས་འདོད་པ་མ་མཐུན་པ་ཡིན་ནོ། །དེ་ལྟར་མ་ཡིན་པར་བསྙེན་གནས་ཞག་གཅིག་ལས་ལྷག་པར་ལེན་ན་མི་སྐྱེ་བར་བྱེ་སྨྲས་འདོད་པ་ཡིན་ན། ཁྱིམ་པ་ཕལ་པ་དང་དགེ་བསྙེན་ལྟ་བུའི་གསོ་སྦྱོང་དུ་ཡང་ནས་ཡང་དུ་ལེན་མི་རུང་བར་ཐལ། བསྙེན་གནས་ཞག་གཅིག་ལས་ལྷག་པ་སྐྱེ་མི་རུང་བའི་ཕྱིར། ཡང་ཁྱིམ་པ་ལྟ་བུའི་ཚེ་གང་གཅིག་ལ་ཆོས་ཅན། བསྙེན་གནས་ལན་གཅིག་ལས་མི་སྐྱེ་བར་ཐལ། བསྙེན་གནས་ཀྱི་སྡོམ་པ་ཉིན་ཞག་གཅིག་ཕན་(༤༣བ)
ཏུ་སྐྱེ་མི་སྲིད་པའི་ཕྱིར། བྱ་བའི་གནོད་པ་མི་བཟོད་པས་བྱེ་སྨྲའི་འདོད་པའང་དེ་ལྟར་མ་ཡིན་པའི་ཕྱིར། མདོ་སྡེ་པའི་ལུགས་འདི་བོད་དུ་ཇོ་བོ་རྗེ་དཔལ་ལྡན་ཨ་ཏི་ཤས་དར་བར་མཛད་པས། བོད་ན་སྐྱབས་འགྲོ་དང་བསྙེན་གནས་འདི་གཅིག་པུ་ལ་བསམས་ནའང་། དཔལ་ལྡན་མར་བྱེད་པ་བཀའ་དྲིན་ཆེ་བར་གྲགས་པ་ཡིན། དེ་དང་རྗེས་སུ་མཐུན་པར་འཇིག་རྟེན་གསུམ་གྱི་མགོན་པོ་འབྲི་གུང་པས་སེང་གེའི་སྒྲ་དེ་ལྟར་བསྒྲགས་པ་ལ། ཆོས་རྗེ་ས་པཎ་པས། བསྙེན་གནས་ཞག་མང་པོ་སྟབས་གཅིག་ཏུ་ལེན་མི་རུང་སྟེ་ནངས་པར་གཞན་ལ་ནོད་པར་བྱ་ཞེས་པའི་ལུང་ཙམ་ལ་བརྟེན་ནས་དགག་པ་མཛད་ཀྱང་། དེ་ནི་སྡེ་པ་གཞན་གྱིས་འདོད་པས་སྡེ་པ་གཞན་སུན་འབྱིན་མི་ནུས་ལ། ཆོས་རྗེ་པའི་ཕྱག་ལེན་དེས་ནི་རྒྱལ་ཁམས་ཀྱི་སེམས་ཅན་སྤྱི་ལ་ཕན་པར་མ་མཐོང་སྟེ། བསྙེན་གནས་མང་པོ་ལེན་འདོད་ཀྱི་གང་ཟག་ལ། ལེན་ཡུལ་དགེ་སློང་ཞག་རེ་རེ་ཞིང་མ་འབྱོར་ཡང་སྟབས་སུ་བླངས་ནས་སྐྱེ་ཞིང་སྲུང་ན་དགེ་བ་རྒྱ་ཆེན་པོར་འགྱུར་བའི་མདོ་སྡེ་པའི་ལུགས་དེ་བསྣུབས་པར་མཛད་པ་ཡིན་པས་ལེགས་སོ་ཞེས་ཡི་རང་བའི་སྐབས་གར་ཡོད། ས་སྐྱ་པའི་ཕྱོགས་འཛིན་པར་འདོད་ནས་ཟི་ལུང་པ་ཆེན་པོས་བོད་ཀྱི་སློབ་དཔོན་ཞེས་ཟུར་ཟ་བར་མཛད་པ་ནི་སྡང་བས་འགྲོ་བ་མ་གཏོགས་རང་གཞན་གྱི་རྒྱུད་ལ་ལེགས་པའི་ཆ་ཤས་འཕེལ་བ་ལྟ་ག་ལ་ཞིགདེའི་ཕྱིར་བརྗོད་ན། བསྙེན་གནས་ཆོས་ཅན། ཇི་སྲིད་འཚོའི་བར་དུ་ལེན་པ་ཡོད་པར་ཐལ། གོང་དུ་ཁྱེད་རང་གི་མདོ་སྡེ་པའི་ལུགས་སུ་ཡན་ལག་བརྒྱད་ཇི་སྲིད་འཚོའི་བར་བླངས་པ་དེ་ལ་གོ་མིའི་དགེ་བསྙེན་དུ་བཏགས་ནས་དགེ་བསྙེན་གྱི་དབྱེ་བར་བཞག་པའི་ཕྱིར། རྟགས་ཁྱབ་ཁས་བླངས། འདོད་ན། དེས་དེ་ཁས་བླངས་པར་ཐལ། དེ་ཁས་བླངས་པ་དེ་ལ་དེར་འཇོག་པའི་ཕྱིར། འཁོར་གསུམ། མདོ་སྡེ་པའི་རང་ལུགས་ལའང་བསྙེན་གནས་ཀྱི་སྡོམ་པའི་དུས་ཀྱི་མཐའ་(༤༤ན)
ནི་ཉིན་ཞག་གཅིག་ལས་ལྷག་པ་མ་ཡིན་པར་ཐལ། མཛོད་འགྲེལ་དུ་ཟླ་ཕྱེད་ལ་སོགས་པས་ནི་ཉིན་ཞག་བཟླས་པས་སོ་ཞེས་གསུངས་པས། དགེ་བསྙེན་གྱི་སྡོམ་པའི་དུས་ཀྱི་མཐའ་ལ་ཞག་བཅོ་ལྔ་པ་སོགས་བཀག་འདུག་པའི་ཕྱིར། ལུང་དོན་དེ་གྱོང་བས་བཀག་པ་ཆེར་མ་གོ་ནས་ཁྱབ་པ་མེད་སྙམ་ན། བདེན་མོད། ཁོ་བོས་ཊཱི་ཀ་འདིར་རྒྱ་ཆེར་བཀྲོལ་ཟིན་ཏོ། །དེས་ན་ཕྲེང་རེའི་ནང་དུའང་འགལ་འདུའི་རྒྱ་མདུད་བཅུ་ཕྲག་མང་པོས་ཆོས་འདི་པའི་ལུགས་ལ་མ་རུངས་པར་བྱས་འདུག་ནའང་རེ་རེ་ཞིང་བརྒལ་བརྟགས་བྱས་ན་ཧ་ཅང་འབྱམས་ཀླས་པས་སྐབས་དོན་བོར་བའི་ཕྱིར་སྤྲོས་པ་ཆོག་གོ། །སྨྲས་པ། པཎ་ཆེན་ཆེན་པོར་གྱུར་པ་མཆོག །བགྲེས་པོར་གྱུར་པ་དེས་ཀྱང་བསྟན་བཅོས་འདིའི། །ཕྱོགས་ལ་ངལ་ཞིང་དུབ་པའི་ལས་མཛད་ཀྱང་། །ཇི་བཞིན་ཕྱེད་པའི་སྤྱན་ནི་བཏང་སྙོམས་གྱུར། །བདག་བློ་གཟུ་བོས་ཅུང་ཟད་བརྡ་སྤྲད་ན། །མཁྱེན་ཅན་དེ་ཡི་ཐུགས་ལ་འཆར་བར་འགྱུར། །གཞན་དག་རྣམས་ཀྱིས་རྩ་འགྲེལ་ཀློག་ཙམ་ལས། །དོན་ལ་དཔྱོད་པའི་ངལ་བ་བསྟེན་ན་ཡང་། །དེ་ལ་སྒྲིབ་པའི་མུན་པ་སྟུག་པའི་ཕྱིར། །ཆོས་མངོན་མཛོད་ཅེས་མིང་གི་ལྷག་མར་གྱུར། །གཉིས་པ་ནི། ཉིན་ཞག་པ་ཡི་སྡོམ་མིན་མེད། །དེ་དེ་ལྟར་ནོད་མེད་ཅེས་གྲག །ཇི་སྲིད་འཚོའི་བར་དུ་སྡིག་པའི་ཆོས་ཁས་བླངས་པ་ལས་སྡོམ་མིན་སྐྱེའི། བསྙེན་གནས་བཞིན་ཉིན་ཞག་པའི་སྡོམ་མིན་མེད་དེ། སྡོམ་མིན་དེ་བསྙེན་གནས་དེ་ལྟར་ཉིན་ཞག་གཅིག་ཏུ་སྡོམ་མིན་ལ་གནས་པར་གྱུར་ཅིག་ཅེས་ལེན་ཅིང་ནོད་པ་སུ་ཡང་མེད་པའི་ཕྱིར་ཏེ། ལས་སྨད་པ་ཡིན་པའི་ཕྱིར་ཞེས་གྲག་གོ། །གྲག་ཅེས་པས་ནི་མ་རངས་པར་བསྟན་ཏོ། །དེ་ལྟར་ན་ཇི་སྲིད་འཚོ་བའང་མི་ཐོབ་པར་འགྱུར་ཏེ། ཇི་སྲིད་འཚོའི་བར་དུ་དེ་ལ་གནས་པར་གྱུར་ཅིག་ཅེས་སུ་ཡང་ལེན་པ་མེད་པའི་ཕྱིར། དེ་ལ་བྱེ་སྨྲ་ན་རེ། དུས་རྟག་ཏུ་སྲོག་གཅོད་པ་ལ་གནས་པར་གྱུར་ཅིག་ཅེས་མི་ལེན་མོད་ཀྱི། དེ་དང་ཆ་འདྲ་བ་གཏན་དུ་སྲོག་གཅོད་དགོས་ཀྱི་བསམ་པས་སྲོག་གཅོད་སོགས་བྱས་ན་ཇི་(༤༤བ)
སྲིད་འཚོ་བའི་སྡོམ་མིན་ཐོབ་པར་འགྱུར་གྱི། དུས་རྟག་ཏུ་ལོག་པར་ཞུགས་པ་བླངས་པ་ཁོ་ན་ལས་སྡོམ་མིན་ཐོབ་མི་དགོས་སོ། །བསྙེན་གནས་ཀྱི་སྡོམ་པ་ཉིན་ཞག་གཅིག་ཏུ་སྐྱེ་བ་ཡོད་དེ། གཏན་དུ་བ་མིན་པ་དེའི་ཆེད་དུ་ལེན་འདོད་ཀྱིས་བསྐྱེད་ནས་ཐོབ་པ་ཡོད་པའི་ཕྱིར་རོ། །ཡང་འགའ་ཞིག་གིས་ཇི་སྲིད་འཚོ་བར་ཡང་དག་པར་བླངས་ན་ཡང་སྡོམ་མིན་གདོན་མི་ཟ་བར་ཐོབ་པར་འགྱུར་རོ། །དེ་ལྟར་ནའང་ཉིན་ཞག་གཅིག་པའི་སྡོམ་མིན་ནོད་པ་ནི་མ་མཐོང་བས་རྣམ་པར་མ་བཞག་གོ་ཞེས་ཟེར་ཏེ། འདི་མི་འཐད་པ་དེང་སང་མངོན་སུམ་གྱིས་གྲུབ་སྟེ། སྡོམ་ལྡན་གྱི་གང་ཟག་དེ་འདྲ་རྒྱལ་པོ་ལྟ་བུའི་བྱ་དགའི་ཕྱིར། ཞག་གཅིག་པ་དང་ཞག་གཉིས་སོགས་དེ་བཞིན་དུ་ཟླ་གཅིག་ཙམ་ལོ་གཅིག་ཙམ་ལ་སྡོམ་མིན་བྱེད་པར་ཁས་འཆེ་བ་མང་དུ་མཐོང་བའི་ཕྱིར། དཔེར་ན། ཁྲ་པའི་མི་ངོ་རྣམས་ནར་མ་སོན་གྱི་བར་ཁྲ་པ་ཆོས་མཛད་པས་ཁུར་ཁུར་པ་བཞིན་ནོ། །མདོ་སྡེ་པས་ནི། སྡོམ་པ་ཡང་རིག་མིན་གྱི་རྫས་སུ་མེད་པ་བཞིན། སྡོམ་མིན་ཀྱང་རིག་མིན་གྱི་རྫས་སུ་མེད་དེ། སྡིག་པ་བྱེད་འདོད་ཀྱི་བསམ་པ་བག་ཆགས་དང་བཅས་པ་དེ་ཉིད་སྡོམ་མིན་ཡིན་པའི་ཕྱིར་རོ། །སེམས་དགེ་བ་ལའང་མི་དགེ་བའི་སེམས་པའི་ས་བོན་མ་བཅོམ་ན་སྡོམ་མིན་དང་ལྡན་པ་ཞེས་བྱའོ། །རང་འགྲེལ་གྱི་མདོ་སྡེ་པའི་འདོད་པ་འཆད་པ་ན། དེས་ན་སེམས་དགེ་བ་ལ་ཡང་དེ་མ་སྤངས་པའི་ཕྱིར་དེ་དང་ལྡན་པ་ཞེས་བྱའོ་ཞེས་གསུངས་པས། སེམས་དགེ་བ་ལ་ཡང་ཞེས་དགེ་བ་མངོན་གྱུར་བཞིན་དུ་མི་དགེ་བའི་བག་ཆགས་ས་བོན་གྱི་ཚུལ་དུ་ལྡན་པ་ཡིན་གྱི། རྣམ་རིག་པ་ལྟར་ཀུན་གཞིའི་སེམས་ཁས་ལེན་པ་ནི་མ་ཡིན་ནོ། །གསུམ་པ་བསྙེན་གནས་ཀྱི་ཁྱད་པར་ལ། རྣམ་བཞག་སྤྱིར་བསྟན་པ། ཡན་ལག་བརྒྱད་ཀྱི་གྲངས་ངེས། སྐྱབས་འགྲོ་རྩོམ་བྱེད་དུ་དགོས་པའོ། །(༤༥ན)
དང་པོ་ནི། དམའ་བར་འདུག་སྨྲས་བཟླས་པ་ཡིས། །མི་བརྒྱན་ནམ་ནི་ནངས་པར་དུ། །བསྙེན་གནས་ཡན་ལག་ཚང་བར་ནི། །ནང་པར་གཞན་ལས་ནོད་པར་བྱ། །བསྙེན་གནས་ཉིན་ཞག་ཏུ་ཇི་ལྟར་ནོད་ན། འབོགས་པོ་ལས་ལེན་པོ་དམའ་བར་འདུགཙོག་ཙོག་པོའམ་ཡང་ན་པུས་མོ་བཙུགས་ནས་ཐལ་མོ་བསྣོལ་བ་ནི། གཡས་པའི་མཐེ་བོ་མ་གཏོགས་པ་སོར་མོ་བཞི་གཡོན་པའི་མཐེ་བོ་དང་མཛུབ་མོའི་བར་དུ་བཀོད་པའམ། ཐལ་མོ་སྦྱར་བ་སྟེ་ནད་པས་ནི་དེ་ལྟར་བྱས་ཀྱང་ཐོབ་བོ། །མ་གུས་པ་ལ་ནི་སྡོམ་པ་མི་སྐྱེའོ། །འབོགས་པ་པོས་ཚིག་སྔར་སྨྲས་པའི་རྗེས་སུ་བཟླས་པ་ཡིས་རྗེས་ཟློས་བྱེད་དགོས་ཀྱི། མཐོན་པོར་འདུག་པ་དང་། དུས་མཉམ་དུ་སྨྲ་བའམ། སྔར་སྨྲ་བ་ལས་ནོད་པ་མི་འགྲུབ་བོ། །མི་བརྒྱན་པ་ནི་ནར་མ་ལས་མཚར་བསྐྱེད་ཕྱིར་མི་བརྒྱན་ནོ། །དུས་ནི་ཕྱིར་ནམ་ནི་ནངས་ཀྱི་བར་དུའོ། །དེ་ལྟ་བུའི་བསྙེན་གནས་ཡན་ལག་བརྒྱད་ཚང་བ་ནི་ནངས་པར་ཉི་མ་འཆར་བའི་ཚེ་གཞན་ལ་ནོད་པར་བྱ་སྟེ། ཉིན་ཞག་པའི་སྡོམ་པ་ཡིན་པའི་ཕྱིར་རོ། །གང་གི་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ་ཞེས་སྔོན་ཡང་དག་པར་བླངས་པ་དེས་ནི་ཟན་ཟོས་ནས་ཀྱང་མ་ནོས་པར་བྱའོ་ཞེས་པ་འདི་ལ། བྱེ་སྨྲ་རང་ལུགས་ཀྱི་འགྲེལ་ཚུལ་ཞིག་དང་། མཆིམས་ཆེན་པོ་ནམ་མཁའ་གྲགས་དང་མཁས་པའི་དབང་པོ་འཇམ་སྒེག་སོགས་ཀྱི་མདོ་སྡེ་པའི་ལུགས་སུ་སྦྱོར་བ་དང་གཉིས་ལས། དང་པོ་ནི། ངེས་པར་ལེན་ཡུལ་ཀྱང་རང་ལ་འབོགས་ལེན་མེད་པའམ། ཡོད་ཀྱང་ཉམས་ན་ངོ་ཚ་བས་མི་ཉམས་པའི་རྐྱེན་གྱི་ཕྱིར་ཡུལ་དགེ་སློང་གཞན་ལ་མནོད་དགོས་ཀྱི་མ་མནོད་པར་རང་གི་མནོད་པས་ནི་ལེགས་སྤྱད་ཙམ་དུ་འགྱུར་གྱི། བསྙེན་གནས་ཀྱི་སྡོམ་པ་ནི་མེད་དོ། །ལེགས་སྤྱད་ལའང་འབྲས་བུ་ནི་ཡོད་པར་རུང་སྟེ། ཤན་པས་མཚན་མོ་སྲོག་མི་གཅོད་པའི་སྡོམ་པ་མནོས་པས་ཕྱི་མ་ལ་ལྷ་མོ་ལྔའི་བཀུར་སྟི་བྱུང་། ཉིན་མོ་སྲོག་བཅད་པས་སྤྱང་ཀིས་ཉིན་མོ་ཟ། དེ་ག་བཞིན་ཉིན་(༤༥བ)
མོ་ལོག་གཡེམ་སྤངས་པས་ཕྱི་མ་ལ་ཉིན་མོ་བདེ། མཚན་མོ་ལོག་པར་གཡེམ་པས་ཕྱི་མ་ལ་མཚན་མོ་སྡུག་བསྔལ་བ་བཞིན་ནོ། །དེའི་ཕྱིར་ལར་ནི་རྟག་ཏུ་ཟླ་བ་བྱུང་ངོ་ཅོག་གི་ཚེས་བརྒྱད་ལ་སློབ་དཔོན་ལས་བསྙེན་གནས་ལེན་པ་ན། སློབ་དཔོན་དེ་ལ་སྔར་ལེན་ཡེ་མ་མྱོང་ན་ཟན་མ་ཟོས་པར་མནོད། སྔར་བླངས་ན་ཕྱིས་ལེན་པ་ན་ཟོས་ལ་མནོད་དེ། སྔར་གྱི་མཇུག་ཡོད་པའི་ཕྱིར་ཞེས་ཟེར་རོ། །གཉིས་པ་ནི། མཆིམས་གོང་མའི་ཊཱི་ཀར། བོད་ན་གཅིག་ཅར་ལེན་པ་ནི། ཡུལ་དཀོན་པས་རུང་མཐུན་དུ་བྱས་པའོ་ཞེས་བླ་མ་གསུང་སྟེ། འགྲེལ་པར། ཚེས་བརྒྱད་ལ་རྟག་ཏུ་གནས་པར་བྱའོ། །ཞེས་བླངས་པ་དེས་ནི་ཟན་ཟོས་ནས་ཀྱང་མནོད་དེ། ཞེས་པས་རྒྱ་གར་ན་ཡང་ཡོད་པར་མངོན་ལ། ལེན་པར་ངེས་པའི་སེམས་ཀྱིས་ཐོབ་པས་ནངས་པར་སྐྱེ་ཡང་། ཟན་ཟོས་ནས་ལེན་པ་ནི་གསལ་བར་བྱས་པའི་ཕྱིར། ཞེས་དྷྭ་ཛས་འཆད་དོ་ཞེས་བྲིས་གདའ་བ་སློབ་དཔོན་ཞིག་ལ་ཟླ་བ་བྱུང་ངོ་ཅོག་གི་ཚེས་བརྒྱད་ལ་བསྙེན་གནས་ཀྱི་སྡོམ་པ་མང་པོ་སྟབས་གཅིག་ཏུ་བླངས་པ་ན། བསམ་པའི་སྟོབས་ཀྱིས་ཉི་མ་འཆར་ཀ་ན་སྡོམ་པ་སྐྱེས་སུ་ཟིན་ཀྱང་བརྗེད་ནས་ཟན་ཟོས་ཟིན་པའི་འོག་ཏུ་རང་གིས་དྲན་ནས་བླངས་ཆོག་པའི་དོན་ཏོ། །དེས་ན་ལུགས་འདི་ལ་བསྙེན་གནས་ཀྱི་སྡོམ་པ་ནི་སྔར་སྐྱེས་ལ་ཆོ་ག་ཕྱིས་ལེན་པ་ཞིག་ཡོད་ཀྱང་། སྔར་སྐྱེས་པའི་སྡོམ་པ་ཡང་དེའི་སྔོན་དུ་ནི་ཆོ་གས་མ་བསྐྱེད་པ་མ་ཡིན་ནོ། །འོ་ན་ཕྱིས་ཀྱི་ཆོ་ག་དགོས་པ་མེད་པར་ཐལ་སྙམ་ན། ཕྱིས་ཀྱི་དེ་ནི་དྲན་པ་གསོ་བའི་ཐབས་ཤེས་ནུས་ལྡན་གྱི་དགོས་པ་ཡོད་པས་སོ། །ཡང་ཊཱི་ཀ་དེ་ཉིད་ལས། གནས་འཇོག་གི་མདོ་ལས། རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་ཡན་ལག་བརྒྱད་དང་ལྡན་པའི་བསྙེན་གནས་བླང་བར་འདོད་པས་ནངས་པར་ལངས་ལ་དགེ་སྦྱོང་ངམ་བྲམ་ཟེའམ་གཞན་གང་(༤༦ན)
ཡང་རུང་བ་ཤེས་པ་ཞིག་གི་དྲུང་དུ་སོང་སྟེ། ཞེས་པས་དགེ་སློང་ལས་གཞན་ལའང་རུང་ཞིང་། བསྡུ་བར། བསྟན་པ་མི་བརྟན་པར་འགྱུར་བ་དང་། གཞན་ལ་རགས་ལས་པར་བསྟན་པའི་ཕྱིར། རབ་ཏུ་བྱུང་བའི་གཞན་ལས་བླང་གི། ཁྱིམ་པའི་ནི་རང་གིས་ཀྱང་བླང་ངོ་ཞེས་པས། བསྙེན་གནས་ཀྱི་སྡོམ་པ་རང་གིས་བླངས་པས་ཀྱང་སྐྱེ་བར་བཤད་དོ། །ཞེས་གསུངས་པས། དཔལ་ལྡན་དྭགས་པོ་བཀའ་བརྒྱུད་ཀྱི་བསྟན་འཛིན་དཔལ་འབྲི་གུང་པའི་བཞེད་པའི་བསྙེན་གནས་མང་པོ་སྟབས་གཅིག་ཏུ་སློབ་དཔོན་ལ་མནོད་པས་གྲུབ་པར་གསུངས་པ་འདི་ཡང་ལེགས་པར་གྲུབ་པ་ཡིན་ནོ། །བསྙེན་གནས་ཞེས་སྒྲ་བརྗོད་པའི་དོན་ཆོས་ཅན། འདིས་དགྲ་བཅོམ་པ་ལ་ཉེ་བར་གནས་པར་བྱེད་པ་ཡིན་ཏེ། དགྲ་བཅོམ་པའི་རྗེས་སུ་སློབ་པའི་ཕྱིར། གཞན་དག་ན་རེ། རིས་བདུན་གྱི་སྡོམ་པ་དང་ཉེ་བར་གནས་བྱེད་ཡིན་པས་བསྙེན་གནས་ཞེས་ཟེར་རོ། །ཡང་ན་ཡིད་ཀྱི་དགེ་བའི་རྩ་བ་ཆུང་ངུ་རྣམས་འདིས་གསོས་འདེབས་པར་བྱེད་པས་ན། གསོ་སྦྱོང་ཞེས་ཀྱང་བྱ་བ་ཡིན་ནོ། །གཉིས་པ་[ཡན་ལག་བརྒྱད་ཀྱི་གྲངས་ངེས་]ལ། དངོས་དང་། དོགས་གཅོད་དོ། །དང་པོ་ནི། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་དེ་བཞིན་གསུམ་རིམ་བཞིན། །ཡན་ལག་བརྒྱད་ནོད་པའི་རྒྱུ་མཚན་རེ་ཞིག་བརྫུན་དུ་སྨྲ་བ་སྤང་བའི་བར་བཞི་ནི་རང་བཞིན་ཁ་ན་མ་ཐོ་བ་སྤོང་བའི་ཕྱིར་ཚུལ་ཁྲིམས་ཀྱི་ཡན་ལག་སྟེ། ཚུལ་ཁྲིམས་ནི་ཕ་མ་ལྷག་སོགས་མེད་པའོ། །མྱོས་འགྱུར་གྱི་བཏུང་བ་སྤོང་བ་གཅིག་པུ་བག་ཡོད་པའི་ཡན་ལག་སྟེ། མྱོས་འགྱུར་འཐུང་བས་ནི་ཚུལ་ཁྲིམས་རྫོགས་ཀྱང་བག་མེད་པར་འགྱུར་རོ། །དེ་བཞིན་དུ་དུས་མ་ཡིན་པའི་ཟས་སྤོང་བའི་བར་གསུམ་ནི་སྐྱོ་བ་དང་རྗེས་སུ་མཐུན་པའི་ཕྱིར་བརྟུལ་ཞུགས་ཀྱི་ཡན་ལག་ཡིན་ནོ། །སྤྱིར་སྲོག་གཅོད་སོགས་བརྟུལ་ནས་དེ་རྣམས་སྤོང་བ་ལ་ཞུགས་པ་གཅིག་ལ་བརྟུལ་(༤༦བ)
ཞུགས་ཟེར་ཀྱང་ད་རེས་སྤྱོད་ཚུལ་གཞན་ལས་ཁྱད་པར་དུ་བྱེད་པ་ཞིག་ལ་བརྟུལ་ཞུགས་ཟེར་རོ། །རིམ་བཞིན་བྱ་བ་ནི་གཞུང་གི་སྦྱོར་ཚུལ་ལོ། །གཉིས་པ་ནི། དེ་ཡིས་དྲན་ཉམས་དྲེགས་པར་འགྱུར། །བག་ཡོད་དང་བརྟུལ་ཞུགས་ཀྱི་ཡན་ལག་འདི་དག་མ་མནོད་ན་མྱོས་འགྱུར་འཐུངས་པ་དེ་ཡིས་བྱ་བ་དང་བྱ་མིན་གྱི་དྲན་པ་ཉམས་པ་ཉིད་དུ་འགྱུར་རོ། །ཁྲི་སྟན་ཆེ་མཐོ་དང་གླུ་གར་སོགས་བསྟེན་པས་ནི་དྲན་པ་ཉམས་པའི་ཁར་དྲེགས་པར་འགྱུར་ལ། དྲེགས་པས་འཆལ་ཚུལ་ཐམས་ཅད་ཉེ་བར་བྱེད་དོ། །ཉིན་ཕྱེད་ཡན་བཟའ་ཞིང་དགོང་མོའི་བཟའ་བ་སྤངས་པ་ལས་ནི་བསྙེན་གནས་པར་དྲན་པ་དང་། ལུས་ཉམ་རྨྱ་བས་དྲེགས་པ་ཉམས་པར་འགྱུར་ཏེ། དུས་མིན་པའི་ཟས་སྤོང་བ་མེད་ན་དྲན་པ་དང་སྐྱོ་བ་ཡང་མི་འབྱུང་བའི་ཕྱིར་རོ། །ཡང་ཁ་ཅིག་ནི། ཡན་ལག་བརྒྱད་པར་འཇོག་པ་ལ་ཡན་ལག་ཅན་དགོས་པས། དུས་མིན་པའི་ཟས་སྤོང་བ་ནི་ཡན་ལག་ཅན་བསྙེན་གནས་ཡིན་ལ། ལྷག་མ་ཡན་ལག་བརྒྱད་འཇོག་ཚུལ་ནི། དགེ་ཚུལ་གྱི་སྐབས་བཞིན་སྒྲ་ལ་བརྟེན་པའི་གླུ་གར་རོལ་མོ་ཡན་ལག་གཅིག་དང་། ཡིད་འོང་ལ་བརྟེན་པའི་སྤོས་མེ་ཏོག་ཕྲེང་བ། བྱུག་པ་སོགས་ཡན་ལག་གཅིག་ཏུ་བྱས་པས་ཡན་ལག་བརྒྱད་དོ་ཟེར་རོ། །སློབ་དཔོན་གྱིས། འོ་ན་མདོ་ཚིག་དང་འགལ་ཏེ། མདོ་ལས། དུས་མིན་གྱི་ཟས་བགྲངས་ནས་ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་རྗེས་སུ་སློབ་བོ། །ཞེས་སྨོས་ན། དེ་ལྟར་ན་ཡན་ལག་ཅན་དང་བཅས་པ་ཞེས་དགུར་སྨོས་དགོས་པའི་ཕྱིར་རོ། །འོ་ན་ཡན་ལག་བརྒྱད་ལྡན་གྱི་བསྙེན་གནས་ཡན་ལག་ཅན་ཇི་ལྟར་འཇོག་ཅེ་ན། བྱེ་སྨྲ་ནི། ཡན་ལག་ཅན་ནི་ཡན་ལག་ལས་གཞན་དུ་བཞག་ཏུ་མེད་དེ། ཤིང་རྟའི་ཡན་ལག་ལ་ཤིང་རྟའི་ཡན་ལག་ཅན་ཟུར་དུ་མེད་པ་བཞིན་སྲོག་གཅོད་སྤོང་བ་སོགས་སྤོང་བ་བརྒྱད་ལས་བསྙེན་གནས་ཟུར་དུ་བཞག་(༤༧ན)
ཏུ་མེད་དོ། །ཡང་ན། དུས་མིན་གྱི་ཟས་སྤོང་བ་ཁོ་ན་བསྙེན་གནས་ཡིན། གཞན་བདུན་པོ་བསྙེན་གནས་དངོས་མིན། དེའི་ཡན་ལག་ཡིན་ནོ། །ཞེས་ནན་གྱིས་འདོད་པ་ལྟར་ན་ཡང་། དུས་མིན་གྱི་ཟས་སྤོང་བ་ནི་བསྙེན་གནས་ཀྱང་ཡིན། དེའི་ཡན་ལག་ཀྱང་ཡིན་ཏེ། དཔེར་ན། འཕགས་ལམ་ཡན་ལག་བརྒྱད་ཀྱི་སྐབས་སུ་གཙོ་བོ་ཡང་དག་པའི་ལྟ་བ་ལམ་ཡང་ཡིན་ལ། ལམ་གྱི་ཡན་ལག་ཀྱང་ཡིན་པ་དང་། བྱང་ཆུབ་ཡན་ལག་གི་སྐབས་སུ་གཙོ་བོ་ཆོས་རབ་ཏུ་རྣམ་འབྱེད་ཡང་དག་བྱང་ཆུབ་ཀྱི་ཡན་ལག་བྱང་ཆུབ་ཀྱང་ཡིན་ལ། བྱང་ཆུབ་ཀྱི་ཡན་ལག་ཀྱང་ཡིན་པ་དང་། བསམ་གཏན་གྱི་སྐབས་སུ་གཙོ་བོ་ཏིང་ངེ་འཛིན་རྩེ་གཅིག་པ་བསམ་གཏན་ཡང་ཡིན། བསམ་གཏན་གྱི་ཡན་ལག་ཀྱང་ཡིན་པ་བཞིན་ཟེར་རོ། །དེ་ལ་མདོ་སྡེ་པས། དཔེ་མ་གྲུབ་པར་བསྟན་ཏེ། ཡང་དག་པའི་ལྟ་བ་སོགས་སྨོས་པ་རྣམས་ཁོ་རང་གི་ཡན་ལག་ཁོ་རང་ཅི་ལ་ཡིན། གལ་ཏེ་ཡང་དག་པའི་ལྟ་བ་དེ་ཁོ་རང་ཁོ་རང་གི་ཡན་ལག་མིན་ཀྱང་། ཡང་དག་པའི་ལྟ་བ་སྔ་མ་ཡང་དག་པའི་ལྟ་བ་ཕྱི་མའི་ཡན་ལག་ཡིན་ནམ་སྙམ་ན། འོ་ན་སྐད་ཅིག་དང་པོའི་ཡང་དག་པའི་ལྟ་བ་དེ་ལ་ཡན་ལག་སྔར་སྐྱེས་པ་མེད་པས། དེ་ལ་ཡན་ལག་མི་ལྡན་པའི་ཕྱིར། དེ་ལམ་གྱི་ཡན་ལག་ཏུ་མ་སོང་བས་ལམ་གྱི་ཡན་ལག་བདུན་པར་ཐལ་བ་དང་། ཡང་ན་མྱ་ངན་ལས་འདའ་ཀ་མའི་ཆོས་རྣམ་འབྱེད་བྱང་ཆུབ་ཀྱི་ཡན་ལག་མ་ཡིན་པར་ཐལ། དེའི་རྗེས་ལ་ཡན་ལག་ཅན་མ་སྐྱེས་པའི་ཕྱིར། དེ་ག་བཞིན་ཏིང་ངེ་འཛིན་སོགས་ལའང་སྦྱར་བར་བྱའོ་ཞེས་ཟེར་རོ། །གསུམ་པ་ནི། གཞན་ལའང་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅི་བསྙེན་གནས་འདི་དགེ་བསྙེན་ཁོ་ན་ལས་གཞན་ལ་སྐྱེ་རུང་ངམ་ཞེ་ན། དགེ་བསྙེན་ལས་གཞན་ལའང་བསྙེན་གནས་ཡོད་མོད་ཀྱི། ཉིན་ཞག་དེར་གསུམ་ལ་སྐྱབས་སུ་མ་སོང་བ་དེ་ལ་བསྙེན་གནས་ཀྱི་སྡོམ་པ་སྐྱེ་(༤༧བ)
བ་མེད་དོ། །མ་ཤེས་པ་ནི་མ་གཏོགས་སོ་ཞེས་འབྱུང་བའི་མ་གཏོགས་པའི་དོན། སློབ་དཔོན་རྒྱལ་པོའི་སྲས་སྐྱབས་འགྲོ་བརྗེད་པ་དང་མ་བྱང་བ་སོགས་ལ་འཆད་མོད་ཀྱི། སློབ་དཔོན་གང་སྤེལ་གང་ཞིགདཀོན་མཆོག་གསུམ་ལ་ཐེ་ཚོམ་ཟ་བ་དང་། ལོག་པར་ཞུགས་པའི་བསམ་པས་སྐྱབས་སུ་མི་འགྲོ་བ་ཅན་ལ་ནི་སྡོམ་པ་མི་སྐྱེ་ལ། གང་ཞིག་འབོགས་པ་པོ་དང་ལེན་པ་པོ་སྐྱབས་སུ་འགྲོ་དགོས་པར་མ་ཤེས་པས་སྐྱབས་སུ་མི་འགྲོ་བ་ཡིན་གྱི། ལོག་པར་ཞུགས་པའམ་ཐེ་ཚོམ་ཟ་བས་སྐྱབས་སུ་མི་འགྲོ་བ་མ་ཡིན་པ་དེ་ལ་ནི་སྐྱབས་སུ་མ་སོང་ཡང་བསྙེན་གནས་ཀྱི་སྡོམ་པ་སྐྱེའོ་ཞེས་འཆད་ལ། དེའི་ལུགས་ཕྱི་མ་ལེགས་ཞེས་འཇམ་སྒེག་ཟེར་རོ། །སྡོམ་པ་མེད་པར་དགེ་བསྙེན་མེད་ན། མདོར། མིང་ཅན་འདི་ལྟར་ཁྱིམ་པ་གོས་དཀར་པོ་བགོས་པ། སྐྱེས་པ་ཕོའི་དབང་པོ་དང་ལྡན་པ་ཞིག་སངས་རྒྱས་ཆོས་དགེ་འདུན་ལ་སྐྱབས་སུ་འགྲོ་ཞིང་། བདག་ལ་དགེ་བསྙེན་དུ་བཟུང་དུ་གསོལ་ཞེས་ཚིག་ཏུ་སྨྲ་ན། འདི་ཙམ་གྱིས་དགེ་བསྙེན་དུ་འགྱུར་རོ། །ཞེས་སྐྱབས་འགྲོ་ཁོ་ནས་དགེ་བསྙེན་དུ་འགྱུར་བར་མ་བཤད་དམ་ཞེ་ན། ཉི་འོག་པའི་བྱེ་སྨྲ་རྣམས་སྡོམ་པ་མེད་ཀྱང་སྐྱབས་སུ་སོང་བ་ཙམ་གྱི་དགེ་བསྙེན་ཡོད་པར་ཁས་ལེན་ཏོ། །འདིར་ཐམས་ཅད་མཁྱེན་པ་ནི་ཟློས་བུ་མི་གསུང་བས། ཁྱིམ་པ་གོས་དཀར་ཞེས་པ་བསྟན་བཤད་དམ། སྐྱེས་པ་ཕོའི་དབང་པོ་ཞེས་པ་བསྟན་བཤད་དམ། གཟུགས་ཁམས་པ་དགག་པའི་ཆེད་དོ། །བཞི་པ་དགེ་བསྙེན་གྱི་ཁྱད་པར་ལ། ལུང་གི་དོན་བཤད་པ། མདོ་དང་འགལ་བ་སྤང་བ། སྡོམ་པ་ཆེ་ཆུང་གི་ཁྱད་པར། སྐྱབས་གནས་བཤད་པ། ཡན་ལག་གི་ཁྱད་པར་རོ། །དང་པོ་ནི། དགེ་བསྙེན་ཉིད་དུ་ཁས་བླངས་པས། །སྡོམ་པ་བསྟན་པ་དགེ་སློང་བཞིན། །ཁ་ཆེ་བ་ན་རེ། སྡོམ་པ་མེད་པ་དགེ་བསྙེན་དུ་མི་འགྱུར་རོ་ཞེས་ཟེར་རོ། །འོ་ན་མདོ་ལས་སྡོམ་པ་མེད་པར་སྐྱབས་འགྲོ་ཙམ་གྱིས་དགེ་བསྙེན་དུ་གསུངས་པ་ཇི་ཞེ་ན། མིང་ཅན་གྱི་མདོ་དང་མི་འགལ་ཏེ། (༤༨ན)
བདེན་པ་མཐོང་བའི་མདོར། གང་གི་ཚེ་བདག་ལ་དགེ་བསྙེན་དུ་བཟུང་དུ་གསོལ། དེང་སླན་ཆད་ནས་འཚོའི་བར་དུ་སྲོག་སྤོང་ངོ་། །ཞེས་དགེ་བསྙེན་ཉིད་དུ་ཁས་བླངས་པས་དགེ་བསྙེན་གྱི་སྡོམ་པ་སྐྱེ་བར་འགྱུར་བའི་ཕྱིར། སྲོག་སྤོང་ཞེས་པས་ནི་སྲོག་གཅོད་པ་སྤོང་བའི་ཐ་ཚིག་སྟེ། བར་གྱི་ཚིག་མི་མངོན་པར་བྱ་བའི་ཕྱིར། བ་ལང་གིས་འདྲེན་པའི་ཤིང་རྟ་ལ་བ་ལང་གི་ཤིང་རྟ་ཞེས་པ་ལྟ་བུའོ། །སྡོམ་པ་ཐོས་ཀྱང་བསླབ་པའི་གཞི་རྣམས་ཤེས་པའི་ཕྱིར། དགེ་སློང་དགེ་ཚུལ་སྡོམ་པ་ཐོབ་ཟིན་ཀྱང་བསླབ་གཞི་ཤེས་པར་བྱ་བའི་ཕྱིར། ཁྱོད་ཀྱི་འདི་དང་འདི་ལྟ་བུ་བསྡམ་མོ་ཞེས་བསླབ་གཞི་རྣམས་འཛིན་དུ་འཇུག་པ་བཞིན་བསླབ་གཞི་རྣམས་བསྟན་པ་དགེ་བསྙེན་ལའང་དེ་དང་འདྲ་ཞིང་། སྡོམ་པ་མེད་པའི་དགེ་བསྙེན་ནི་མེད་དོ། །གཉིས་པ་ནི། གལ་ཏེ་ཐམས་ཅད་བསྡམས་ཡིན་ན། །སྣ་གཅིག་སྤྱོད་སོགས་ཇི་ལྟ་བུ། །དེ་སྲུངས་བ་ལའང་གསུངས་ཞེས་གྲག །གལ་ཏེ་དགེ་བསྙེན་ཐམས་ཅད་གཞི་ལྔ་ཀས་བསྡམས་པ་ཡིན་ན། བཅོམ་ལྡན་འདས་ཀྱི་བསླབ་གཞི་སྲོག་གཅོད་སྤོང་བ་ཙམ་སྣ་གཅིག་སྤྱོད་པ་དང་སོགས་པས་མ་བྱིན་པར་ལེན་པ་དང་ཆང་སྤོང་བ་ལྟ་བུ་ཕྱོགས་གཅིག་སྤྱོད་པ། དེའི་ཁར་འདོད་ལོག་དང་ཆང་སྤོང་བ་ཕལ་ཆེར་སྤྱོད་པ་དང་། དེའི་ཁར་རྫུན་དང་ཆང་སྤོང་བའི་ཡོངས་རྫོགས་དགེ་བསྙེན་བཞིར་གསུངས་པ་ཇི་ལྟ་བུ་ཞེ་ན་ཞེས་དྲི་བ་བཀོད་པའོ། །དེའི་ལན་ལ་ཁ་ཆེ་བྱེ་སྨྲས། དང་པོར་བསླབ་གཞི་ལྔ་ཀར་བླངས་ཀྱང་ཕྱིས་ཉམས་པ་ན། གང་སྲུང་ཐུབ་པ་སྣ་མང་ཉུང་གང་ཡིན་པ་དེ་བསྲུང་བ་ལས་སྣ་གཅིག་སྤྱོད་པ་ལ་སོགས་པར་གསུང་ཞེས་གྲགས། རང་འགྲེལ་དུ། གང་ཞིག་བསླབ་པའི་གཞི་གང་སྲུང་བར་བྱེད་པ་དེ་ནི་དེའི་སྤྱོད་པ་ཞེས་གསུང་བར་ཟད་ཀྱི། ཐམས་ཅད་ཀྱང་སྡོམ་པ་ལ་གནས་པར་ནི་འདྲའོ། །ཞེས་པ་འདི་ལ་མཆིམས་གོང་འོག་འཇམ་སྒེག་ལ་སོགས་པས་ཀྱང་ཇི་ལྟ་བར་འདི་པའི་འདོད་པ་མ་གོ་བར་འདུག་པས་བཤད་ན། བོད་ཆོས་རྒྱལ་དུས་ཀྱི་(༤༨བ)
གནའ་མཆན་ཞིག་ལ་འདི་ལྟར་སྣང་སྟེ། དང་པོར་ཡོངས་རྫོགས་སྤྱོད་པའི་དགེ་བསྙེན་ཡིན་པ་དེས་སྲུང་མ་ནུས་ནས་འདོད་ལོག་སྤྱོད་པ་ན། དེ་ལ་སྣ་གཅིག་སྤྱོད་པ་དང་། ཕལ་ཆེར་སྤྱོད་པའང་མི་ཟེར་ཏེ། ད་དུང་རྫུན་སྤོང་བ་མ་ཉམས་པས་ཡོངས་རྫོགས་ཀྱི་དགེ་བསྙེན་དུ་འཇོག་བྱེད་གཅིག་ཚང་ལ། ཡོངས་རྫོགས་དགེ་བསྙེན་ཅེས་བརྗོད་ཀྱང་མི་རིགས་ཏེ། ཡོངས་རྫོགས་དགེ་བསྙེན་དུ་འཇོག་བྱེད་ཡན་ལག་ལྔ་ཀར་མ་ཚང་བའི་ཕྱིར། འོ་ན་དེ་ཕལ་ཆེར་སྤྱོད་པའི་དགེ་བསྙེན་ཀྱང་ཟེར་མི་རིགས་ཏེ། དེར་འཇོག་བྱེད་ཀྱི་འདོད་ལོག་མ་སྤང་བའི་ཕྱིར་ཞེ་ན། དེ་འདྲ་དེ་ལ་ཕལ་ཆེར་སྤྱོད་པའི་དགེ་བསྙེན་ཅེས་བྱ་བར་འཇོག་སྟེ། དགེ་བསྙེན་གང་ཞིག་གིས་མཆོད་སྦྱིན་གྱི་ཆུང་མ་ལ་ལོག་པར་ གཡེམ་ན་བུད་མེད་དེ་ལ་སྡོམ་པ ་ཞིག་པས་ཚུལ་ཁྲིམས་འཆལ་ཀྱང་། ལྷ་སྦྱིན་གྱི་ཆུང་མ་ལ་ལོག་པར་མ་ གཡེམ་པས་སྡོམ་པ ་མ་ཞིག་པས་བསླབ་པའི་གཞི་འདོད་ལོག་གང་སྲུང་བར་བྱེད་པ་དེ་ནི་ཕལ་ཆེ་བ་དེ་སྤྱོད་པའི་དགེ་བསྙེན་ནོ་ཞེས་གསུངས་པར་ཟད་ཀྱི། དེའི་ཚེའང་ལུས་ངག་གི་མི་དགེ་བ་བཞི་པོ་ཐམས་ཅད་ཀྱང་སྤོང་བའི་གདམས་པ་མ་ཞིག་པར་ཡན་ལག་ལྔ་པའི་དགེ་བསྙེན་གྱི་སྡོམ་པ་ལ་གནས་པར་ནི་འདྲའོ་ཞེས་དགོངས་པར་སྣང་ལ། ཡོངས་རྫོགས་དགེ་བསྙེན་ཞིག་ལ་རྩ་བ་བཞི་ཀ་ཆང་དང་བཅས་པ་ཉམས་ཀྱང་། སྔར་གྱི་རྩ་བ་བཞི་ཀ་ཉམས་ཡུལ་དེར་ཚུལ་ཁྲིམས་ཞིག་པས་འཆལ་ཀྱང་ད་དུང་རྗེས་ནས་སམ། དེའི་དུས་ཀྱི་ཡུལ་མིན་པ་ལ་མ་ཉམས་པས་ཚུལ་ཁྲིམས་དང་ལྡན་པའི་ཕྱིར། ཡོངས་རྫོགས་དགེ་བསྙེན་གྱི་སྡོམ་པ་གཏན་མེད་པའང་མིན་པས། དེ་ལྟ་བུ་ལ་ཡོངས་སུ་རྫོགས་པར་སྤྱོད་པའི་དགེ་བསྙེན་གྱི་ཆ་ཞིག་ཀྱང་ཡོད། ཉམས་པའི་ཆ་ཞིག་ཀྱང་ཡོད་པ་ལས། དགེ་བསྙེན་དུ་འཇོག་བྱེད་ནི་མ་ཉམས་པའི་ཆ་དེ་ནས་སོ། །དེས་ན་སྣ་གཅིག་སྤྱོད་པའི་དགེ་བསྙེན་ཅེས་པ་དེ་ལའང་སྤོང་བའི་ཡན་(༤༩ན)
ལག་ལྔ་ཚང་བའི་དགེ་བསྙེན་ཞིག་གིས་མཆོད་སྦྱིན་བསད་པ་ན། རྩ་བ་གསུམ་ཆང་དང་བཞི་མ་ཉམས་ལ། སྲོག་གཅོད་པར་གྱུར་པའི་མཆོད་སྦྱིན་བསད་པས་ཉམས་ཀྱང་། སྲོག་གཅོད་པར་གྱུར་པའི་ལྷ་སྦྱིན་མ་བསད་པའི་ཆ་ནས་སྣ་གཅིག་སྤྱོད་པའི་དགེ་བསྙེན་དུ་འཇོག་པ་ནི་འདི་པའི་ལུགས་སུ་གདའ་བས་ཕྱོགས་གཅིག་སྤྱོད་པ་སོགས་ལའང་རིགས་བསྒྲེ་བར་བྱའོ། །དེས་ན་རང་འགྲེལ་དྲངས་ནས་འབྲུ་གནོན་ཞིབ་ཏུ་བྱས་པ་འདི་ནི་བོད་སྔ་རབས་པ་དག་གིས་དེ་སྲུང་བ་ལ་གསུངས་ཞེས་གྲགས་ཀྱི། འབྲུ་གནོན་ལུགས་དང་གཏན་མི་འདྲ་བས་ཁྱད་ཞིབ་མོ་ཡོད་པས་བློ་གྲོས་ཀྱི་འཇུག་པ་རབ་ཏུ་བསྒྲིམས་ལ་རྟོགས་པར་གྱིས་ཤིགལུགས་འདི་དང་ནི་ཉི་འོག་བྱེ་སྨྲ་བ་དང་ཡང་མི་མཐུན་ལ། ཉི་འོག་པ་དང་མདོ་སེམས་པས་ནི། སྐྱབས་སུ་སོང་བ་ཙམ་གྱིས་དགེ་བསྙེན་དུའང་འདོད། སྣ་གཅིག་སྤྱོད་པ་སོགས་ཀྱང་དགེ་བསྙེན་རང་རྐྱ་བ་ཚོ་ཐུབ་ཏུ་འདོད། དགེ་བསྙེན་ཡིན་ན་ཡན་ལག་ལྔ་པའི་དགེ་བསྙེན་ཡིན་པས་ཁྱབ་པར་མི་འདོད་པའི་ཕྱིར། ལུགས་འདི་མདོ་སྡེ་དང་སེམས་ཙམ་པས་སུན་འདོན་པར་འདོད་ནས་གྲག་ཅེས་མ་རངས་པའི་ཚིག་གིས་ཁྱོད་ཀྱིས་ལུང་དངས་དྲངས་པའི་སྲོག་སྤོང་ངོ་ཞེས་དགེ་བསྙེན་དུ་ཁས་བླངས་པས་སྡོམ་པ་ཐོབ་པར་གསུངས་སོ་ཟེར་བ་དེ་ཆོས་ཅན། མདོ་ལས་འདས་པ་ཡིན་ཏེ། མིང་ཅན་གྱི་མདོར་སྲོག་སྤོང་ངོ་ཞེས་པའི་ཚིག་མི་འབྱུང་བའི་ཕྱིར། འོ་ན་མིང་ཅན་གྱི་མདོར་ཚིག་ཅི་ལྟ་བུ་བྱུང་སྙམ་ན། ཁྱིམ་པ་ཞེས་བྱ་བ་ནས་དགེ་བསྙེན་དུ་བཟུང་དུ་གསོལ་ཞེས་པའི་བར་གྱི་སྔགས་ཀྱིས་བསྒྲུབ་བྱའི་རྒྱུད་ལ་དགེ་བསྙེན་གྱི་དངོས་པོའམ་མཚན་ཉིད་འགྲུབ་པར་བསྟན་གྱི། གཞན་དུ་སྐྱབས་འགྲོའི་སྔགས་ཚིག་ཙམ་གྱིས་ནི་མ་ཡིན་པར་བསྟན་ཏོ། །ཁྱོད་ཀྱི་ལུང་གཉིས་པ་དྲངས་པ་ཡང་མ་དག་སྟེ། དེར་ནི་(༤༩བ)
ནམ་འཚོའི་བར་དུ་སྲོག་དང་བསྔོ་བར་སྐྱབས་སུ་སོང་བ་མངོན་པར་རབ་ཏུ་དང་བ་ཞེས་འབྱུང་བས། བདེན་པ་མཐོང་བའི་གང་ཟག་བདག་ཅག་གི་སྲོག་ལ་ཐུག་ཀྱང་སྐྱབས་འགྲོ་གཏོང་དུ་མི་རུང་ངོ་ཞེས་དད་པའི་རྒྱུད་སྲོག་ལ་བབ་ཀྱང་མི་གཏོང་བར་ཆོས་ལ་རྟེན་པ་ཡིན་གྱི། ངས་སྡོམ་པའི་མཚན་ཉིད་སྟོན་པ་ནི་མ་ཡིན་ནོ། །སྲོག་སྤངས་པའི་ལུང་ནི་མིང་ཆེན་གྱི་མདོ་དང་། བདེན་པ་མཐོང་བའི་མདོ་གཉིས་ཀ་ནས་མི་འབྱུང་ལ། སྲོག་སྤང་བྱ་བ་འདི་དོན་ཇི་འདྲ་བ་ཞིག་བརྗོད་པར་འདོད་མ་གོ་སྟེ། སྲོག་དག་གིས་བོར་བ་ལ་ཟེར་རམ། སྲོག་དག་གིས་སྤོང་བ་ཞིག་ལ་ཟེར་རམ་གང་ལ་ཟེར་ཡོངས་སུ་མི་གསལ་བའི་ལུང་འདི་སྒྲུབ་བྱེད་དུ་ཇི་ལྟར་འདོན་པར་བྱེད། ཚུལ་ཁྲིམས་ཉམས་པ་ལ་ཇི་ལྟར་མིང་འདོགས་ཞེས་ཞུ་བ་རང་ཡང་མི་འཐད་ན། དེ་ལ་ལན་ལྟ་སྨོས་ཀྱང་ཅི་དགོས་ཏེ། ཚུལ་ཁྲིམས་འཆལ་པ་དེ་སྲོག་གཅོད་སྤོང་བ་ཙམ་ལ་སྤྱོད་ཅིང་འདུག་པ། གཉིས་སྤོང་བ་ཙམ་ལ་སྤྱོད་ཅིང་འདུག་བྱ་བར་རང་གིས་ཤེས་ན་གཞན་ལ་འདྲི་མི་དགོས་པའི་ཕྱིར། དགེ་བསྙེན་གྱི་སྡོམ་པ་ཤེས་པའི་གང་ཟག་སུ་ཞིག་གིས་སྲོག་གཅོད་སོགས་བསླབ་གཞི་གང་ཉམས་པར་མི་བྱེད་པ་དེ་ནི་བསླབ་གཞི་དེ་སྤྱོད་པར་བྱ་བ་ཡིན་ནོ་ཞེས་མི་ཤེས་མི་སྲིད་པས་ཞུས་ལན་མི་འཐད་དོ། །འོ་ན་མདོ་སྡེ་པ་རང་ལུགས་ལ་དགེ་བསྙེན་གྱི་དབྱེ་བའི་ཞུས་ལན་ཇི་ལྟར་འཐད་ཅེ་ན། ཡན་ལག་འདི་རྣམས་སྲུང་ན་དགེ་བསྙེན་འདི་དང་འདིར་འགྱུར་བྱ་བའི་ཚད་མི་ཤེས་པའི་གང་ཟག་ལ་བསླབ་གཞི་གཅིག་གམ་གཉིས་སོགས་དེ་ཙམ་དུ་བཟོད་པའམ་མནོད་པ་ལ་ནི། བཙུན་པ་ཇི་ཙམ་གྱིས་ན། སྣ་གཅིག་སྤྱོད་པའི་དགེ་བསྙེན་དུ་འགྱུར་བ་ལགས་ཞེས་བྱ་བ་ནས་ཡོངས་སུ་རྫོགས་པར་སྤྱོད་པ་ལགས་ཞེས་བྱ་བའི་བར་ཞུ་བ་འདི་རུང་ངོ་། །དེ་ལ་བྱེ་སྨྲས་རྒོལ་བ་ནི། འོ་ན་བསླབ་གཞི་ཐམས་ཅད་མ་(༥༠ན)
ནོད་པའི་དགེ་སློང་དགེ་སྦྱོང་དག་ཀྱང་ཡོད་པར་ཐལ། སྐྱབས་འགྲོ་ཙམ་གྱིས་དགེ་བསྙེན་དུ་འགྱུར་ཞིང་། སྡོམ་པ་མེད་པ་དང་ཡན་ལག་མ་ཚང་ཡང་དགེ་བསྙེན་དུ་འགྱུར་བའི་ཕྱིར་ཟེར་རོ། །དེ་ལ་མདོ་སྡེ་པས་ལན་བཏབ་པ་ནི་མི་མཚུངས་ཏེ། སྣ་གཅིག་སྤྱོད་པའི་དགེ་བསྙེན་སོགས་བུདྡྷས་བཏགས་པའི་དབང་གིས་སོ་སོར་ངེས་པ་ཡིན་ཏེ། མདོ་ལས། ཁྱིམ་པ་བྱ་བ་ནས་འདི་ཙམ་གྱི་དགེ་བསྙེན་དུ་འགྱུར་རོ། །བྱ་བ་དེས་སྐྱབས་སུ་སོང་བ་ཙམ་གྱིས་དགེ་བསྙེན་དུ་བཏགས་ཤིང་བཞགསྣ་གཅིག་སྤྱོད་པ་སོགས་ཀྱང་དེ་ལྟར་བཏགས་ཤིང་བཞག་པས་ཡན་ལག་མ་ཚང་ཡང་དགེ་བསྙེན་གྱི་སྡོམ་པར་བཏགས་ལ། སངས་རྒྱས་ཀྱིས་དགེ་སློང་དང་དགེ་སྦྱོང་ལ་ནི་ཡན་ལག་མ་ཚང་བའི་དགེ་སློང་ལ་སོགས་པར་མ་བཏགས་པའི་ཕྱིར། ཁ་ཆེ་བས་ནི་ཡན་ལག་མ་ཚང་བའི་དགེ་བསྙེན་ཀྱང་འདོད་དོ། །གཞན་ཡང་ལུང་རྣམ་འབྱེད་ལས། བཞིན་བཟང་ཇི་སྲིད་འཚོའི་བར་བཅོམ་ལྡན་འདས་ཀྱི་སྤྱན་སྔར་ལྔ་པ་ཚངས་པར་སྤྱོད་པའི་བསླབ་པའི་གཞི་དག་ལོངས་ཤིག །ཅེས་མི་ཚངས་སྤྱོད་སྤོང་བའི་དགེ་བསྙེན་ཀྱང་གསུངས་ལ། གཞན་ཡང་ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་དང་། ཚེ་དང་ལྡན་པ་བེའུས་ཞུས་པའི་མདོ་དང་ལས་བརྒྱ་པ་ལས་ཀྱང་འབྱུང་ངོ་། །གསུམ་པ་ནི། ཆུང་ངུ་ལ་སོགས་ཡིན་ཇི་བཞིན། །སྡོམ་པ་ཐམས་ཅད་ཀྱང་ཆུང་ངུ་དང་ལ་སོགས་པས་འབྲིང་དང་ཆེན་པོ་ཉིད་ནི་ལེན་པར་བྱེད་པའི་ཀུན་སློང་གི་ཡིད་ཆེ་བ་ལ་སོགས་པ་ཇི་ལྟ་བ་བཞིན་གྱི་དབང་གིས་ཏེ། དེ་ལྟར་ན་ཀུན་སློང་གི་སེམས་ཆུང་ངུར་གྱུར་ན་དགྲ་བཅོམ་ལ་སོ་ཐར་གྱི་སྡོམ་པ་ཆུང་ངུ་ཡོད་ལ། ཀུན་སློང་གི་སེམས་ཆེན་པོ་ཡོད་ན་སོ་སྐྱེ་ལའང་སོ་ཐར་གྱི་སྡོམ་པ་ཆེན་པོ་ཡོད་པར་འགྱུར་རོ། །བཞི་པ་ནི། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཅི་སྐྱབས་འགྲོ་མེད་པར་སྡོམ་པ་ནོད་པ་ཁོ་ནས་དགེ་བསྙེན་དུ་མི་འགྱུར་ལ། སྐྱབས་(༥༠བ)
འགྲོ་ཡོད་ཀྱང་འབོགས་བྱེད་དང་གནོད་བྱེད་མ་གུས་པ་དང་། མི་ཤེས་པ་དང་སྡིག་པའི་བསམ་པ་ཡོད་པ་ལས་དགེ་བསྙེན་དུ་མི་འགྱུར་རོ། །དེས་ན་གསུམ་ལ་སྐྱབས་སུ་འགྲོ་བར་ཤེས་ཀྱང་། གསུམ་པོ་རང་དེ་ཇི་ལྟ་བུ་ཞེ་ན། གང་ཞིག་དཀོན་མཆོག་གསུམ་ལ་སྐྱབས་སུ་འགྲོ་བ་དེ་ལས་སངས་རྒྱས་སུ་བྱེད་པའི་ཆོས་ནི་རྒྱུ་མི་སློབ་ལམ་ཡིན་ལ། དེ་ལ་སྐྱབས་སུ་འགྲོ་བའོ། །དེས་ན་ཟད་མི་སྐྱེ་བ་ཤེས་པའི་ཡེ་ཤེས་ཆོས་ཅན། གང་གིས་བརྙེས་པའི་ཆོས་སྐུ་དེ་ལ་སངས་རྒྱས་ཞེས་བརྗོད་དེ། སངས་རྒྱས་སུ་འཇོག་བྱེད་ལ་དེ་ཉིད་གཙོ་བའི་ཕྱིར། ཡང་ན་ཟད་མི་སྐྱེ་ཤེས་པ་འཁོར་བཅས་ཟག་མེད་ཀྱི་ཕུང་ལྔ་དང་བཅས་པ་ཆོས་ཅན། ཁྱོད་ལ་སངས་རྒྱས་སུ་བརྗོད་པ་ཡིན་ཏེ། དེ་ཐམས་ཅད་ཐུགས་སུ་ཆུད་པར་སྤྱོད་པའི་ཕྱིར། གཟུགས་ཀྱི་སྐུ་ལ་ནི་སྐྱབས་སུ་མི་འགྲོ་སྟེ། རྣམ་སྨིན་གྱི་རང་བཞིན་འདོད་པ་ན་སྤྱོད་པ་བྱང་སེམས་དོན་གྲུབ་ཀྱི་གཟུགས་དང་། སྟོན་པ་སངས་རྒྱས་ཀྱི་གཟུགས་ལ་བཟང་ངན་བྱེ་བྲག་མེད་པའི་ཕྱིར། ཐེག་ཆེན་པོ་ནི་གཟུགས་སྐུ་དེ་ལའང་སྐྱབས་སུ་འགྲོ་སྟེ། དེ་བྱ་གྲུབ་ཡེ་ཤེས་ཀྱི་སྣང་བར་འདོད་པའི་ཕྱིར། འོ་ན་སངས་རྒྱས་ཐམས་ཅད་ལ་སྐྱབས་སུ་འགྲོ་བ་ཡིན་ནམ། གཅིག་ལ་སྐྱབས་སུ་འགྲོ་བ་ཡིན་བྱས་པས། མདོའི་དངོས་བསྟན་ལ། ཐམས་ཅད་ལ་སྐྱབས་སུ་འགྲོ་བ་ཞལ་མི་གསལ་ཡང་། བསྟན་བཅོས་ལས་དཔྱད་པ་ན། སངས་རྒྱས་ཐམས་ཅད་ལ་སྐྱབས་སུ་འགྲོ་བ་ཡིན་ཏེ། སངས་རྒྱས་རྣམས་ནི་འཇིག་རྟེན་པའི་ལམ་བསོད་ནམས་དང་ཡེ་ཤེས་ཀྱི་ཚོགས་ཀྱི་མཚན་ཉིད་དང་། འཇིག་རྟེན་ལས་འདས་པ་ཟད་པ་མཁྱེན་པ་ལ་སོགས་པའི་མཚན་ཉིད་མི་འདྲ་བ་མེད་པའི་ཕྱིར། དེས་ན་སྐུ་ཚེ་དང་རིགས་ལ་སོགས་པ་མི་འདྲ་ཡང་། སངས་རྒྱས་ཤཱཀ་ཐུབ་ཀྱི་མི་སློབ་ལམ་ལ་སྐྱབས་སུ་སོང་བ་ན་སངས་རྒྱས་ཐམས་ཅད་ཀྱི་དེ་ལ་སྐྱབས་(༥༡ན)
སུ་སོང་བ་ཡིན་ནོ། །སློབ་པ་དང་མི་སློབ་པའི་ལམ་གཉིས་ཀ་ཆོས་ཅན། ཁྱོད་ལ་སྐྱབས་སུ་འགྲོ་དགོས་ཏེ། དགེ་འདུན་དུ་འཇོག་བྱེད་ཀྱི་ཆོས་ཡིན་པའི་ཕྱིར། སངྒྷ་ཞེས་པ་སྲ་བ་དང་མི་ཕྱེད་པའི་དོན་ཡིན་པས་ལམ་དེ་དག་ཐོབ་པ་འཕགས་པའི་གང་ཟག་བརྒྱད་པོ་དེ་ནི་ལྷ་དང་བཅས་པའི་འཇིག་རྟེན་གྱིས་ལམ་ལས་ཟློག་ཀྱང་མི་ཕྱེད་པས་མྱ་ངན་ལས་འདས་པའི་ཆེད་དུ་འཚོགས་པའི་ངོ་བོར་གྱུར་པའི་ཕྱིར་དགེ་འདུན་ཅེས་པའོ། །དགེ་འདུན་ཐམས་ཅད་དམ་གཅིག་ལ་སྐྱབས་སུ་འགྲོ་བ་གང་ཡིན་ན། སྔ་མ་ལྟར་མཚན་ཉིད་འདྲ་བས་ཐམས་ཅད་ལ་ཡིན་ནོ། །དགེ་འདུན་ཐམས་ཅད་ལ་སྐྱབས་སུ་འགྲོ་ན་མདོ་འདི་དང་འགལ་ཏེ། བུདྡྷས་ག་གོན་དང་བཟང་པོ་ལ་བཀའ་སྩལ་པ། ཁྱེད་གཉིས་ཚུར་ཤོག་སངས་རྒྱས་དང་ཆོས་ལ་སྐྱབས་སུ་སོང་ཞིགགང་ཡང་མ་འོངས་པའི་དུས་ན་དགེ་འདུན་ཅེས་བྱ་བ་འབྱུང་བར་འགྱུར་བ་དེ་ལ་སྐྱབས་སུ་སོང་ཞིག་ཅེས་ད་ལྟ་བའི་དགེ་འདུན་དམིགས་ཀྱིས་བཀར་བའི་ཕྱིར་སྙམ་ན། དེ་ནི་འདས་ད་ལྟར་གྱི་དགེ་འདུན་ལ་སྐྱབས་སུ་མི་འགྲོ་བའི་ཕྱིར་བཀའ་སྩལ་པ་མ་ཡིན་གྱི། ག་གོན་ལ་སོགས་པ་དེ་དག་གིས་སྟོན་པས་ཆོས་འཁོར་ཕྱིས་བསྐོར་བ་ན། ལྔ་སྡེ་ལ་སོགས་མངོན་སུམ་དུ་གྱུར་པ་ན་ཡོན་ཏན་ལ་དད་པ་བསྐྱེད་པའི་ཆེད་དུ་མ་འོངས་པའི་དགེ་འདུན་ལ་སྐྱབས་སུ་སོང་ཞིག་ཅེས་བཀའ་སྩལ་པ་ཡིན་ནོ། །སོ་སོར་བརྟགས་པས་འགོག་པར་གྱུར་པའི་མྱང་འདས་ཐམས་ཅད་ལ་ཆོས་ཅན། སྐྱབས་སུ་སོང་བ་ན་ཆོས་ལ་སྐྱབས་སུ་འགྲོ་བ་ཡིན་ཏེ། རང་གཞན་གྱི་རྒྱུད་ཀྱི་ཉོན་མོངས་འགོག་པ་ལྷག་བཅས་ཀྱི་མྱང་འདས་ཞི་བ་དང་། སྡུག་བསྔལ་འགོག་པ་ལྷག་མེད་ཀྱི་མྱང་འདས་ཞི་བ་མཚན་ཉིད་གཅིག་པ་ཉིད་ཀྱི་ཕྱིར་རོ། །ཐེག་ཆེན་པས། བསྟན་པ་ལུང་གི་ཆོས་གསུང་རབ་ཀྱང་ཆོས་དཀོན་མཆོག་ཏུ་འདོད་དེ། ཆོས་ཀྱི་དབྱིངས་(༥༡བ)
ཀྱི་རྒྱུ་མཐུན་དུ་འདོད་པའི་ཕྱིར། རྟོགས་པའི་ཆོས་ཀྱང་ཆོས་དཀོན་མཆོག་ཏུ་འདོད་དེ། གཉེན་པོ་ལམ་གྱི་བདེན་པ་ཡིན་པའི་ཕྱིར་ཞེས་བཞེད་ཀྱང་། བྱེ་སྨྲས། སྟོན་པའི་ཆོས་མིང་ཚིག་ཡི་གེས་བསྡུས་པ་ནི་ཆོས་དཀོན་མཆོག་མ་ཡིན་ཏེ། སྡུག་བསྔལ་དང་ཀུན་འབྱུང་གི་རང་བཞིན་ཡིན་པའི་ཕྱིར། རྟོགས་པའི་ཆོས་ནི་ཆོས་དཀོན་མཆོག་ཏུ་མ་བཞག་སྟེ། སངས་རྒྱས་དང་དགེ་འདུན་གྱི་ཁོངས་སུ་བསྡུས་ཟིན་པའི་ཕྱིར། འདི་ལ་དོགས་པ་འདི་འདྲ་ཞིག་གཅོད་དགོས་ཏེ། འོ་ན་དེ་བཞིན་གཤེགས་པའི་སྐུ་ལ་ངན་སེམས་ཀྱི་ཁྲག་ཕྱུང་བ་ཆོས་ཅན། མཚམས་མེད་ཀྱི་ལས་སུ་མི་འགྱུར་བར་ཐལ། མི་སློབ་པའི་ཆོས་ཁོ་ན་སངས་རྒྱས་ཡིན་ཅིང་། དེའི་གཟུགས་ཕུང་ནི་སངས་རྒྱས་མ་ཡིན་ཅིང་། མི་སློབ་པའི་ཆོས་ལ་ནི་གནོད་པ་མ་བྱས་པའི་ཕྱིར་ཞེས་པ་ལ། བྱེ་སྨྲས། རྟགས་ཕྱི་མ་མ་གྲུབ་སྟེ། མི་སློབ་པའི་རྟེན་གཟུགས་ཕུང་ལ་གནོད་པས་ཉམས་པར་བྱས་པས་རྟེན་ཅན་སངས་རྒྱས་སུ་བྱེད་པའི་ཆོས་ལའང་གནོད་པར་བྱས་པའི་ཕྱིར་ཞེས་ཟེར་རོ། །མདོ་སྡེ་པས། ཆོས་མངོན་པའི་བསྟན་བཅོས་ལས། མི་སློབ་པའི་ཆོས་ཁོ་ན་སངས་རྒྱས་ཡིན་ནོ་ཞེས་མི་འབྱུང་གི། ཇི་ལྟར་འབྱུང་ན། སངས་རྒྱས་སུ་གདགས་པའི་རྒྱུ་འཇིག་རྟེན་དང་འཇིག་རྟེན་ལས་འདས་པའི་ཆོས་ངོས་བཟུང་བ་ཙམ་གྱིས་འཇིག་རྟེན་པའི་ཕུང་པོ་ལྔའི་མཚན་ཉིད་གྱི་རྟེན་སངས་རྒྱས་མིན་པར་མ་བཀག་པའི་ཕྱིར། རྟེན་ལ་གནོད་པ་བྱས་པ་མཚམས་མེད་དུ་མི་ཐལ་བའི་ཀླན་ཀ་མི་རུང་ངོ་། །དཔེར་ན། བྲམ་ཟེར་བྱེད་པའི་ཆོས་ཕ་མ་བྲམ་ཟེ་ལ་སྐྱེས་པ་ཡིན་པས། ཕ་མ་བྲམ་ཟེ་ལས་སྐྱེས་པས་བྲམ་ཟེ་ཡིན་ན། དེའི་མིག་ནི་བྲམ་ཟེ་མིན་པར་འགྱུར་ཞེས་མི་འདོད་པ་བཞིན་སངས་རྒྱས་སུ་བྱེད་ཆོས་ཁོ་ན་སངས་རྒྱས་ཡིན་ཀྱང་སངས་རྒྱས་ཀྱི་ཕུང་ལྔ་སངས་རྒྱས་མིན་པར་མི་(༥༢ན)
འགྲོ་སྟེ། ཕ་མ་བྲམ་ཟེ་ལས་སྐྱེས་པས་བྲམ་ཟེ་ཡིན་པས་དེའི་མིག་བྲམ་ཟེ་མིན་པར་མི་འགྲོ་བ་བཞིན་ནོ། །དེ་ལྟར་མིན་ན་འཇིག་རྟེན་པའི་སེམས་ལ་གནས་པའི་སངས་རྒྱས་དང་དགྲ་བཅོམ་ཆོས་ཅན། སངས་རྒྱས་དང་དགྲ་བཅོམ་མ་ཡིན་པར་ཐལ། མི་སློབ་པའི་ཆོས་དང་སློབ་མི་སློབ་ཀྱི་ཆོས་འཇིག་རྟེན་པའི་སེམས་ལ་མེད་པའི་ཕྱིར། དགེ་སློང་དུ་བྱེད་ཆོས་རྒྱུད་ལྡན་གྱི་དགེ་སློང་ཆོས་ཅན། དགེ་སློང་མ་ཡིན་པར་ཐལ། དགེ་སློང་དེ་དགེ་སློང་བྱེད་ཆོས་ཁོ་ན་ཡིན་པའི་ཕྱིར་ཞེས་རིགས་པ་བརྗོད་པ་ལ། བྱེ་སྨྲས། རྟེན་སངས་རྒྱས་ཡིན་ན་བསྟན་བཅོས་ལས་སངས་རྒྱས་ལ་སྐྱབས་སུ་འགྲོ་བ་དེ་སངས་རྒྱས་སུ་བྱེད་པའི་ཆོས་མི་སློབ་པ་ལ་སྐྱབས་སུ་འགྲོ་བར་བཤད་ཅེས་ངེས་བཟུང་གིས་ཅི་བྱ་སྙམ་ན། ངེས་བཟུང་དོན་མེད་པ་མིན་ཏེ། དགེ་སློང་གི་ལུས་ངག་དགེ་སློང་ཡིན་པ་ལ་མཆོད་པ་བྱེད་པ་ན། དགེ་སློང་གི་བྱེད་ཆོས་ལའང་མཆོད་པར་བྱས་པའི་ངེས་བཟུང་སྨོས་པ་བཞིན། སངས་རྒྱས་ཀྱི་སྐུ་སངས་རྒྱས་ཡིན་པ་ལ་སྐྱབས་སུ་འགྲོ་བ་ན། སངས་རྒྱས་སུ་འཇོག་བྱེད་ཀྱི་ཆོས་ལའང་སྐྱབས་སུ་སོང་བ་ཡིན་ཅེས་ངེས་པར་བཟུང་བའི་ཕྱིར་རོ། །གཞན་དག་སངས་རྒྱས་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་སྟོབས་བཅུ་སོགས་ཡིན་པས་དེ་ལ་སྐྱབས་སུ་འགྲོ་བ་ཡིན་ནོ་ཟེར་རོ། །སྐབས་འདིར་དཔལ་ཤཱཀྱ་མཆོག་ལྡན་ན་རེ། མངོན་གྱུར་བཅུ་འཆད་པའི་སྐབས་ཀྱི་དགེ་འདུན་གྱིས་ནི་སྐྱབས་འགྲོའི་ཡུལ་གྱི་དགེ་འདུན་དཀོན་མཆོག་གི་གོ་ཆོད་པ་མ་ཡིན་ཏེ། དེའི་ཚེ་ན་སངས་རྒྱས་ཀྱི་སྐུ་གཟུགས་དང་ལུང་གི་ཆོས་སུ་གྱུར་པའི་ལས་ཀྱི་ཆོ་གས་ཀྱང་སངས་རྒྱས་དང་ཆོས་མངོན་གྱུར་གྱི་གོ་ཆོད་པར་བཤད་པའི་ཕྱིར་ཞེས་འཆད་མོད། འདི་ཡང་མགོ་བཅད་ནས་མཇུག་མའི་རྒྱན་དུ་བྱེད་པ་ལྟར་ཤིན་ཏུ་ཡང་སྟེ། འོ་ན་མངོན་གྱུར་བཅུའི་(༥༢བ)
སྐབས་ཀྱི་དགེ་འདུན་ཆོས་ཅན། དགེ་འདུན་དཀོན་མཆོག་མ་ཡིན་པར་ཐལ། སྐྱབས་འགྲོའི་ཡུལ་གྱི་དགེ་འདུན་དཀོན་མཆོག་མ་ཡིན་པའི་ཕྱིར། ཁྱབ་པ་མེད་སྙམ་ན། ཁྱབ་པར་ཐལ། སྐྱབས་འགྲོའི་ཡུལ་གྱི་དགེ་འདུན་དཀོན་མཆོག་དེ་ཚལ་བུ་འཛིན་པ་སྟེ། རྟགས་ཙམ་འཛིན་པའི་དགེ་འདུན་ལའང་བྱེད་རིགས་ན་མངོན་གྱུར་བཅུའི་དགེ་འདུན་མངོན་གྱུར་ནི་དགེ་སློང་རྣམ་དག་ལས་ཀྱི་ཁ་བསྐང་དུ་འོས་པའི་དགེ་སློང་གི་དགེ་འདུན་ཡིན་པས་སྐྱབས་འགྲོའི་ཡུལ་གྱི་དགེ་འདུན་ལས་འོས་མེད་པའི་ཕྱིར། རྟགས་དང་པོ་གྲུབ་ན་ཕྱི་མ་གྲུབ་ཏུ་ཆུག་ཀྱང་རྟགས་དང་པོ་མ་གྲུབ་བོ་ཞེ་ན། གྲུབ་པར་ཐལ། ཚལ་བུ་འཛིན་པ་སྟེ་རྟགས་ཙམ་འཛིན་པའི་དགེ་སློང་གི་དགེ་འདུན་ཇི་སྲིད་འཇིག་རྟེན་དུ་ཡོད་པ་དེ་སྲིད་དུ་སྐྱབས་ཡུལ་དཀོན་མཆོག་གསུམ་གྱི་བསྟན་པ་ཡོད་པར་བཞག་པའི་ཕྱིར་ན་རྩ་ཁྱབ་རྫོགས་པའི་སངས་རྒྱས་ཀྱིས་བཅས། རྩ་བར། འདོད་ན། དེ་དགེ་འདུན་དཀོན་མཆོག་ཡིན་པར་ཐལ། དེ་སོ་ཐར་གྱི་སྡོམ་པ་རྒྱུད་ལྡན་ལས་ཀྱི་ཕྱིར་ལས་བྱེད་པ་དང་བཅས་པའི་གང་ཟག་བཞིར་ལོངས་པ་ཡན་གྱི་སྡེ་འཆགས་པའི་ཕྱིར། འཁོར་གསུམ། ཡང་མངོན་གྱུར་བཅུའི་སྐབས་ཀྱི་དགེ་འདུན་དཀོན་མཆོག་ཆོས་ཅན། སྐྱབས་ཡུལ་གྱི་དགེ་འདུན་དཀོན་མཆོག་ཡིན་པར་ཐལ། མིན་ན་སྐྱབས་འགྲོ་ལེན་པའི་སྔགས་ཚིག་ཏུ་འཕགས་པའི་དགེ་འདུན་ཅེས་དམིགས་བསལ་དགོས་པ་ལས། མ་བསལ་བར་ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆི་ཞེས་འབྱུང་བའི་ཕྱིར། རྟགས་ཁྱབ་གྲུབ། འདོད་ན་དངོས་འགལ། ཡང་མངོན་གྱུར་བཅུའི་སྐབས་ཀྱི་དགེ་འདུན་དཀོན་མཆོག་ཆོས་ཅན། སྐྱབས་ཡུལ་གྱི་དགེ་འདུན་དཀོན་མཆོག་ཡིན་པར་ཐལ། དགེ་འདུན་ཐམས་ཅད་སྐྱབས་ཡུལ་གྱི་དགེ་འདུན་དཀོན་མཆོག་ཡིན་པའི་ཕྱིར། མ་གྲུབ་བོ་ཞེ་ན། གྲུབ་པར་ཐལ། (༥༣ན)
འདིའི་རང་འགྲེལ་དུ། དགེ་འདུན་ཐམས་ཅད་ལའམ། འོན་ཏེ་གཅིག་ལ་ཡིན་ཅེ་ན། མཚན་ཉིད་ཀྱི་སྒོ་ནས་ཐམས་ཅད་ལ་སྟེ། ལམ་མཚན་ཉིད་མི་འདྲ་བ་མེད་པའི་ཕྱིར། ཞེས་འབྱུང་བའི་ཕྱིར། རྟགས་ཁྱབ་སོང་། འདོད་ན་དངོས་འགལ། ཡང་མངོན་གྱུར་བཅུའི་སྐབས་ཀྱི་སངས་རྒྱས་དང་ཆོས་མངོན་གྱུར་དེ་ཆོས་ཅན། མངོན་གྱུར་མ་ཡིན་པར་ཐལ། སྤྱིར་སངས་རྒྱས་དང་ཆོས་ཙམ་ཡང་དེ་སྐབས་མངོན་གྱུར་མ་ཡིན་ཅིང་། ལྷག་པར་སྐྱབས་ཡུལ་གྱི་སངས་རྒྱས་དང་ཆོས་དཀོན་མཆོག་ནི་ནམ་དུ་ཡང་མངོན་དུ་མ་གྱུར་པའི་ཕྱིར། རྟགས་དང་པོ་ཁྱེད་རང་གི་ཞེན་དོན་ལ་ཁས་བླངས་པ་ཡིན་ཏེ། ཁྱེད་རང་སྟོན་པའི་སྐུ་གཟུགས་མི་སློབ་ལམ་མིན་པས། སྐུ་གཟུགས་སངས་རྒྱས་སུ་འོང་དོན་མེད་པ་དང་། ལས་ཆོག་བརྟགས་འགོག་གི་མྱང་འདས་མིན་པས་ལས་ཆོག་ཆོས་སུ་འོང་བ་མེད་པར་ཁས་བླངས་པའི་ཕྱིར། ཅི་ལྟར་མངོན་དུ་འགྱུར། རྟགས་གཉིས་པ་དངོས་སུ་ཁས་བླངས་ཏེ། མངོན་གྱུར་བཅུའི་སྐབས་ཀྱི་དགེ་འདུན་དཀོན་མཆོག་སྐྱབས་ཡུལ་གྱི་དགེ་འདུན་དཀོན་མཆོག་མིན་པའི་མཐུན་དཔེར། མངོན་གྱུར་བཅུའི་དཀོན་མཆོག་དང་པོ་གཉིས་སྐྱབས་ཡུལ་གྱི་དཀོན་མཆོག་དང་པོ་གཉིས་མིན་པ་མཐུན་དཔེར་དྲངས་པའི་ཕྱིར་རོ། །རྩ་ཁྱབ་གྲུབ་སྟེ། སངས་རྒྱས་དང་ཆོས་ཙམ་མངོན་དུ་མ་གྱུར་ན་སངས་རྒྱས་དང་ཆོས་མངོན་དུ་གྱུར་པ་བུད། རྩ་བར་འདོད་ན། བསྙེན་རྫོགས་ཀྱི་སྡོམ་པ་སྐྱེ་རྒྱུར་མངོན་གྱུར་བཅུ་བཤད་པ་དེ་མི་འཐད་པར་ཐལ། མངོན་གྱུར་བརྒྱད་ལས་མེད་པའི་ཕྱིར་ཏེ། སངས་རྒྱས་དང་ཆོས་གཉིས་མངོན་དུ་མ་གྱུར་པའི་ཕྱིར། ཡང་མངོན་གྱུར་བཅུའི་སྐབས་སུ་སངས་རྒྱས་ཀྱི་སྐུ་གཟུགས་དང་ལས་ཆོག་ཆོས་ཅན། དཀོན་མཆོག་གཉིས་མངོན་དུ་གྱུར་པའི་གོ་མི་ཆོད་པར་ཐལ། དེ་གཉིས་དཀོན་མཆོག་(༥༣བ)
མཚན་ཉིད་པ་དང་པོ་གཉིས་མིན་པའི་ཕྱིར། རྟགས་ཁས། ཁྱབ་པ་ཚད། འདོད་ན། དངོས་འགལ། ཁོ་བོ་ཅག་གི་ལུགས་ལ་མངོན་གྱུར་དང་པོ་གསུམ་འདི་ལ་དགེ་འདུན་ལ་དངོས་སུ་དམིགས་པ་ཙམ་བྱུང་ཞིང་། དཀོན་མཆོག་དང་པོ་གཉིས་ལའང་མཚན་མ་ཙམ་གྱི་རྟེན་ཡིད་ལ་བྱས་ན། སྐྱབས་ཡུལ་དཀོན་མཆོག་གསུམ་ལ་སྐྱབས་སུ་འགྲོ་བའི་དད་པ་རྣམ་པར་དགེ་བ་གསུམ་བསྙེན་པར་རྫོགས་པའི་རྒྱུད་ལ་མངོན་དུ་འགྱུར་བ་དེ་བསྙེན་རྫོགས་ཐོབ་པའི་རྒྱུ་གཙོ་བོ་ཡིན་ཏེ། བསྙེན་གནས་དགེ་བསྙེན་དགེ་ཚུལ་གྱི་སྡོམ་པ་སྐྱེ་བ་ལ་རྒྱུའི་གཙོ་བོ་སྐྱབས་འགྲོ་རྩོམ་བྱེད་དུ་དགོས་པར་ཚུལ་མཚུངས་པའི་ཕྱིར། ཁྱེད་ལྟར་བསྙེན་པར་རྫོགས་དུས་ཀྱི་དཀོན་མཆོག་གསུམ་མངོན་གྱུར་གྱི་སྐབས་སུ་སྐྱབས་གནས་སུ་རུང་བ་མིན་པའི་དཀོན་མཆོག་གཞན་པ་གསུམ་མངོན་དུ་གྱུར་དགོས་ཞེས་གཏམ་ངན་པ་འདི་ཐར་འདོད་སུ་ཞིག་གི་ཡིད་ལ་འཇེབས། ཡང་སྟོན་པའི་སྐུ་གཟུགས་སྐྱབས་ཡུལ་མིན་ན་ཆོས་ཅན། ཁྱེད་ཅག་སྟོན་པའི་སྐུའི་གཟུགས་བརྙན་ལ་ལུས་ཀྱིས་ཕྱག་འཚལ་ཞིང་། ངག་གིས་སྐྱབས་སུ་འགྲོ་བར་བགྱིའོ་ཞེས་དང་། ཡིད་ཀྱིས་དད་པ་བྱ་བ་ཐམས་ཅད་ལ་བསོད་ནམས་ཀྱི་འབྲས་བུ་མི་ཐོབ་པར་ཐལ། སྟོན་པའི་སྐུའི་གཟུགས་བརྙན་དེ་ཕྱག་མཆོད་ལ་སོགས་པའི་སྒོ་ནས་སྐྱབས་ཡུལ་གྱི་དཀོན་མཆོག་རིན་པོ་ཆེ་མ་ཡིན་པའི་ཕྱིར། རྟགས་ཁས། ཁྱབ་པ་ཚད། མི་འདོད་ཀ་མེད། འོ་ན་ནི་ཁྱེད་ཅག་རྒྱ་ནག་ཧྭ་ཤང་གི་སྤྱོད་པ་ལས་དམན་པའི་སྤྱོད་པ་སྤྱད་པར་བགྱི་བ་སྟེ། ཧྭ་ཤང་ཆེན་པོས་ནི་སྐུ་གཟུགས་སོགས་ལ་བསྟོད་ཕྱག་གི་སྒོ་ནས་སྐྱབས་སུ་འགྲོ་ན་བསོད་ནམས་ཀྱི་འབྲས་བུ་ཐོབ་ཀྱང་བསོད་ནམས་བསགས་པ་འཁོར་བའི་རྒྱུར་འདོད་ནས་མི་གསོག་པ་ཡིན་ལ། བླ་མ་ཁྱེད་ལྟར་ན། དེ་ལ་བསོད་(༥༤ན)
ནམས་བསགས་ཀྱང་བསགས་པའི་འབྲས་བུ་བདེ་བ་མི་ཐོབ་པར་བཞེད་པ་ལས་ལྡོག་ཏུ་མེད་ན་བདག་གིས་ཅི་ཡང་བྱར་མེད་དེ། སེམས་ཅན་གཅིག་བསོད་ནམས་ཟད་ན་སངས་རྒྱས་ཐམས་ཅད་མཐུ་རྡུགས་པའི་ཕྱིར་རོ། །སྨྲས་པ། གང་གིས་ཆེན་པོར་བསྙེན་པ་ཡིས། །རྣམ་པར་དཔྱོད་པ་ཕལ་ཆེར་ཡང་། །དྲི་མ་མེད་པའི་རིགས་ཚུལ་ལས། །འདའ་བར་མཐོང་ནས་འབད་པས་བཀག །ཅེས་སོ། །ནོད་པའི་ལུས་ཀྱི་དབང་དུ་བྱས་ན་སྐྱབས་སུ་འགྲོ་བའི་ཏིང་ངེ་འཛིན་དག་གི་རྣམ་པར་རིག་བྱེད་ཀྱི་ངོ་བོ་ཡིན་ནོ། །སེམས་དང་བཅས་ན་འཁོར་བཅས་ཕུང་པོ་ལྔ་ཅན་ནོ། །ཇི་ལྟར་སྐྱབས་ན། དེ་ལ་བརྟེན་ནས་སྡུག་བསྔལ་ཐམས་ཅད་ལས་གཏན་དུ་ངེས་པར་ཐར་བའི་ཕྱིར་རོ། །དེས་ན་དཀོན་མཆོག་གསུམ་པོ་མ་གཏོགས་སྡུག་བསྔལ་ལས་སྐྱོབ་ཐུབ་པའི་སྐྱབས་མེད་པ་ཉིད་ཀྱི་ཕྱིར། སྐྱབས་སུ་འགྲོ་བ་ནི་བསྙེན་གནས་སོགས་སྡོམ་པ་ཡང་དག་པར་བླངས་པ་ཐམས་ཅད་ལ་རྟེན་ནམ། ཐབས་སམ། གཞིའམ། སྒོར་གྱུར་པ་ཡིན་ནོ། །ལྔ་ པ་[ཡན་ལག་གི་ཁྱད་པར་]ལ། ལོག་གཡེམ ་ཡན་ལག་ཏུ་དང་། རྫུན་ཡན་ལག་ཏུ་དང་། མྱོས་འགྱུར་ཡན་ལག་ཏུ་འཇོག་པའི་དོན་ཏོ། །དང་པོ་ལ། དངོས་དང་། དོགས་གཅོད་དོ། །དང་པོ་ནི། ལོག་ གཡེམ་ཤིན་ཏུ་སྨད་ཕྱིར་དང་། །སླ་ཕྱིར་མི་བྱེད་ཐོབ་ཕྱིར་རོ། །སྡོམ་པ ་གཞན་ལ་མི་ཚངས་སྤྱོད་སྤོང་བ་བསླབ་གཞིར་བཞག་ལ། དགེ་བསྙེན་ལ་ལོག་གཡེམ་སྤང་བ་ཅིའི་ཕྱིར་བསླབ་གཞིར་བཞག་ཅེ་ན། འདོད་པས་ལོག་གཡེམ་ནི་གཞན་གྱི་ཆུང་མ་སུན་འབྱིན་པའི་ཕྱིར་དང་། གཅིག་ཏུ་ངན་སོང་གི་རྒྱུ་ཡིན་པའི་ཕྱིར། འཇིག་རྟེན་ན་ཤིན་ཏུ་སྨད་པའི་ཕྱིར་དང་། མི་ཚངས་སྤྱོད་དེ་ལྟར་མིན་པ་དང་། ཁྱིམ་ན་གནས་པས་འདོད་ལོག་སྡོམ་སླ་བའི་ཕྱིར་ཐོགས་མེད་ནས་གོམས་པས་མི་ཚངས་སྤྱོད་སྤང་བ་ནི་དཀའ་བའི་ཕྱིར། དེ་སྤོང་བར་ཡང་མི་སྤྲོ་ལ། ལྷའི་དབང་པོ་བརྒྱ་བྱིན་(༥༤བ)
དང་། གཟུགས་ཅན་སྙིང་པོ་ཀུན་འཕགས་པ་ཡིན་ཀྱང་མི་ཚངས་པ་སྤྱོད་པར་བྱེད་ཀྱི། ལོག་ གཡེམ་ནི་མ་ཡིན་པ ་བཞིན་འཕགས་པ་རྣམས་ཚེ་རབས་གཞན་དུའང་ལོག་ གཡེམ་མི་བྱེད་པའི་སྡོམ་པ ་ཐོབ་པའི་ཕྱིར་ལོག་ གཡེམ་སྤོང་བ་བསླབ་གཞིར་བཞག་གི། མི་ཚངས་སྤྱོད་སྤོང་བ་བསླབ་གཞིར་མ་བཞག་གོ། །བཞག་ན་ཉེས་པ ་ཅི་ཡོད་ན། འཕགས་པ་སློབ་པ་ཚེ་རབས་གཞན་དུ་ཆོས་ཅན། དགེ་བསྙེན་གྱི་སྡོམ་པ་ལ་གནས་པ་མ་ཡིན་པར་འགྱུར་ཏེ། དེས་མི་ཚངས་པར་སྤྱོད་པའི་ཕྱིར། ཞེས་ཉེས་པ་ལ་ཟོན་བྱེད་མོད། དེ་ལྟར་ན་འཆི་འཕོས་པས་སོ་ཐར་གྱི་སྡོམ་པ་མི་གཏོང་བར་འགྱུར་གྱི་དོགས་ནས། འཕགས་པ་ལ་ཚེ་བརྗེས་ནས་མི་གཏོང་བར་གནས་པའི་དགེ་བསྙེན་གྱི་སྡོམ་པ་དེ་ནི་ཡང་དག་པར་བླངས་པ་ལས་བྱུང་བའི་སྡོམ་ པ་ནི་མ་ཡིན་པས། ཚེ་ཕྱི་མར་འཕགས་པས་ལོག་གཡེམ ་མི་བྱེད་པར་ངེས་ པ་ནི་ལོག་གཡེམ ་མི་བྱེད་པའི་དགེ་བསྙེན་གྱི་སྡོམ་པའོ། །མི་བྱེད་པའི་སྡོམ་ པ་དེའང་མདོ་སྡེ་པས་ནི། ལོག་གཡེམ ་སྤོང་བའི་ལུས་སེམས་ཀྱི་གནས་སྐབས་ཀྱི་ཁྱད་པར་ཁོ་ན་ལ་འདོད། བྱེ་བྲག་ཏུ་སྨྲ་བས་ནི། ཚུལ་ཁྲིམས་ཀྱི་ཡན་ལག་རྣམ་པར་རིག་བྱེད་མིན་པ་ཞིག་ལ་འདོད། འདིར་ཁོ་བོས་བསམས་ན། སྐྱོབ་པ་འབྲི་གུང་འཇིག་རྟེན་གསུམ་གྱི་མགོན་པོའི་ཞལ་སྔ་ནས། སོ་སོར་ཐར་པའི་སྡོམ་པ་འཆི་འཕོས་པས་མི་གཏོང་ཞེས་སེང་གེའི་སྒྲ་ཆེན་པོ་བསྒྲགས་པ་ལས། བདག་ཉིད་ཆེན་པོ་ས་སྐྱ་པཎྜི་ཏས་བཀག་པ་རྒྱ་ཆེར་མཛད་མོད་ཀྱང་། དོན་ལ་བྱེ་སྨྲས་རྟོགས་བཏགས་ཀྱི་སྡོམ་པ་རྣམ་རིག་མིན་པའི་གཟུགས་སུ་ཡོད་བྱ་བ་ནི་དོན་ལ་མི་གནས། སྤོང་བདུན་སྤོང་བའི་སེམས་པ་རྒྱུན་ཆགས་བཅས་པའི་ཁ་ན་མ་ཐོ་བ་དང་བཅས་པ་སྤོང་བ་ཚེ་རབས་བརྗེས་ཀྱང་དྲན་པ་དང་ཤེས་བཞིན་གྱིས་མ་ཉམས་པར་ཡོད་ན། དེ་ལ་སོ་ཐར་གྱི་སྡོམ་(༥༥ན)
པའི་མིང་བཏགས་ཀྱང་རུང་། ཉེས་སྤྱོད་སྡོམ་པའི་ཚུལ་ཁྲིམས་སུ་མིང་བཏགས་ཀྱང་རུང་། མ་བཏགས་ཀྱང་རུང་། བདེ་འགྲོ་ལྷ་མིའི་ལུས་རྟེན་དལ་འབྱོར་གྱི་ཆོས་བཅོ་བརྒྱད་ཚང་བ་ཐོབ་པའི་རྒྱུ་ནུས་ཐོགས་མེད་དུ་གྲུབ་པ་འདི་ནི་མི་ཉམས་ཤིང་མི་གཏོང་བར་གྲུབ་སྟེ། འདིའི་རང་འགྲེལ་དུ། མི་ཚངས་པར་སྤྱོད་པ་ནི་མ་ཡིན་པས་སློབ་པ་ཚེ་རབས་གཞན་དུ་གྱུར་པ་དགེ་བསྙེན་གྱི་སྡོམ་པ་ལ་གནས་པ་མ་ཡིན་པར་འགྱུར་དུ་འོངས་པས། ཞེས་བྱ་བ་འདིས་ལེགས་པར་གྲུབ་པའོ་སྙམ་དུ་སེམས་ཏེ། འཕགས་པ་ལ་འཆི་འཕོས་པས་དགེ་བསྙེན་གྱི་སྡོམ་པ་མི་གཏོང་བ་ཞིག་ཡང་དག་པར་རྫོགས་པའི་སངས་རྒྱས་ཀྱི་དགོངས་པ་ཡིན་པ་དེ་མཁས་མཆོག་དབྱིག་གི་གཉེན་གྱིས་ཟུར་ཙམ་འགྲེལ་པར་མཛད་ཀྱང་། ཡང་ཉན་ཐོས་སྡེ་གཉིས་ཀྱི་བློར་མ་ཤོང་དོགས་ནས། དེའི་སྡོམ་པ་ནི་ཡང་དག་པར་བླངས་པ་ལས་བྱུང་བའི་སྡོམ་པ་ནི་མ་ཡིན་ནོ་ཞེས་འཆད་དགོས་བྱུང་བ་ཡིན་ནོ། །དེས་ན་འཕགས་པ་ལ་ཚེ་རབས་བརྗེས་ནས་ཀྱང་སོ་ཐར་སྡོམ་པ་མི་གཏོང་བར་གྲུབ་ན་སོ་སྐྱེ་ལའང་འཆི་འཕོས་པས་སོ་ཐར་གྱི་སྡོམ་པ་མི་གཏོང་བར་གྲུབ་པ་འདི་ནི་སྟོན་པ་ཡང་དག་པར་རྫོགས་པའི་སངས་རྒྱས་དང་མགོན་པོ་ཀླུ་སྒྲུབ་ཀྱི་རྣམ་པར་འཕྲུལ་པ་སྐྱོབ་པ་འབྲི་གུང་འཇིག་རྟེན་གསུམ་གྱི་མགོན་པོའི་དགོངས་པ་ཡིན་ནོ། །གཉིས་པ་ནི། སྡོམ་པ་ཇི་ལྟར་ཁས་བླངས་བཞིན། །འཐོབ་ཀྱི་རྒྱུད་ལས་མ་ཡིན་ནོ། །བསླབ་པའི་གནས་ལྔ་མ་ནོས་པ་ཡིན་བཞིན་དུ་ཆུང་མ་ལེན་པ་དེའི་ཚེ་དགེ་བསྙེན་དེས་ཆུང་མར་གྱུར་པའི་བུད་མེད་ལས་ཀྱང་སྡོམ་པ་ཐོབ་པ་ཡོད་དམ་མེད་ཅེ་ན། བགྲོད་པར་བྱ་བའི་གནས་མ་ཡིན་པ་ཐམས་ཅད་སྤང་བའི་ཕྱིར། །དེ་ལས་ཉི་ཚེ་བའི་སྡོམ་པ་ཐོབ་པ་ཡོད་དོ། །འོ་ན་རང་གི་བུད་མེད་ལ་སྤྱད་ན་སྡོམ་པ་ཉམས་པར་མི་འགྱུར་རམ་ཞེ་ན། མི་འགྱུར་ཏེ། སྡོམ་པ་འདི་བདག་ལ་འདོད་པས་ལོག་པར་ གཡེམ་(༥༥བ)
པ ་སྤོང་ངོ་ཞེས་ཁས་ལེན་གྱི། བདག་གིས་ཆུང་མར་བླངས་པའི་རྒྱུད་འདི་ལས་མི་ཚངས་བར་སྤྱད་པར་མི་བྱའོ་ཞེས་ཁས་བླངས་པ་མ་ཡིན་པས་རང་གི་ཆུང་མའི་གཞི་དེ་ལས་ལོག་ གཡེམ་གྱི་ཡན་ལག་ཁོ་ན་སྡོམ་པ ་ཇི་ལྟར་ཁས་བླངས་པ་བཞིན་འཐོབ་ཀྱི། མི་ཚངས་སྤྱོད་སྤོང་བ་མ་ཡིན་པས་ཆུང་མར་བླངས་པ་ལ་མི་ཚངས་པར་སྤྱོད་པས་སྡོམ་པ་ཉམས་པ་མེད་དོ། །གཉིས་པ་རྫུན་ཡན་ལག་ཏུ་འཇོག་པའི་དོན་ནི། བསླབ་པ་ཐམས་ཅད་འདས་གྱུར་ན། །རྫུན་དུ་ཐལ་བར་འགྱུར་བའི་ཕྱིར། །གང་གི་ཁ་ན་མ་ཐོ་བ་ལ་ཕྲ་མ་ལ་སོགས་སྤོང་བ་བསླབ་གཞིར་མ་བཞག་ནས། རྫུན་སྤོང་བ་དགེ་བསྙེན་གྱི་སྡོམ་པའི་བསླབ་གཞིར་བཞག་ཅེ་ན། རྫུན་སྨྲ་ཤིན་ཏུ་སྨད་ཕྱིར་དང་། །སླ་ཕྱིར་མི་བྱེད་ཐོབ་ཕྱིར་རོ། །ཞེས་པ་ལྟར་ཡིན་ལ། གཞན་ཡང་བསླབ་པ་ཐམས་ཅད་འདས་པར་གྱུར་ན་དྲིས་པ་ན། བདག་གིས་དེ་ལྟ་བུ་མ་བྱས་སོ་ཞེས་སྔར་གྱི་མི་སྦྱོང་གི་སྟེང་དུ་ཉེས་པ་བརྩེགས་མ་རྫུན་དུ་སྨྲ་བ་ཐལ་བར་འགྱུར་སྲིད་པའི་ཕྱིར། དེ་བཟློག་པའི་དོན་དུ་རྫུན་སྤོང་བ་དགེ་བསྙེན་གྱི་བསླབ་གཞིར་བཞག་གོ། །གསུམ་པ་ནི། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུངས་ཕྱིར་རོ། །བཅས་པའི་ཁ་ན་མ་ཐོ་བ་རྣམས་ཀྱི་ནང་ནས་མྱོས་འགྱུར་གྱི་བཏུང་བ་འཐུང་བ་སྤོང་བ་ཁོ་ན་ལས། གཞན་མ་བཞག་པ་ཅི་ཞེ་ན། མྱོས་འགྱུར་གྱི་བཏུང་བ་འཐུང་བ་སྤོང་ན་ཡན་ལག་གཞན་དང་གཞན་བསྲུང་བར་འགྱུར་བའི་ཕྱིར་རོ། །བཅས་པའམ་བཅད་པ་ཁ་ན་མ་ཐོ་བ་ཇི་ལྟར་འགྱུར་ན། སངས་རྒྱས་ཀྱིས་བཀག་པའི་ལས་སྤྱོད་པ་ནི་སྡིག་པར་འགྱུར་ཏེ། སངས་རྒྱས་ཀྱི་བསྟན་པ་ལ་མ་གུས་པའི་ལས་ཡིན་པའི་ཕྱིར་ཏེ། མ་གུས་པ་ནི་ངོ་བོ་ཉིད་ཀྱི་མི་དགེ་བ་ངོ་ཚ་མེད་པ་ཡིན་པའི་ཕྱིར་རོ། །མྱོས་འགྱུར་འཐུང་བ་བཅས་པའི་ཁ་ན་མ་ཐོ་བ་ཡིན་ཏེ། རང་བཞིན་གྱི་ཁ་ན་མ་ཐོ་བའི་མཚན་ཉིད་མེད་པའི་ཕྱིར་ཏེ། རང་བཞིན་གྱི་ཁ་ན་མ་ཐོ་བ་ནི་སེམས་ཉོན་མོངས་ཅན་ཁོ་ནས་སྤྱོད་པ་ཡིན་པའི་ཕྱིར། ཆང་ནི་ནད་ལ་ཕན་པའི་ཕྱིར་མྱོས་པར་(༥༦ན)
མི་འགྱུར་བ་ཉོན་མོངས་ཀྱི་སེམས་ཀྱི་སྤྱོད་པ་མིན་པར་གཉེན་པོའི་བློ་ཁོ་ནས་བཏུང་བར་ནུས་སོ། །མྱོས་པར་འགྱུར་བ་ཡིན་པར་ཤེས་ནས་ངོ་ཚ་མེད་པར་རམ་ཉེས་པ་ཡོད་པ་ལ་མེད་པར་ཤེས་ནས་འཐུང་བའི་སེམས་དེ་ཉིད་ཉོན་མོངས་ཅན་ཡིན་ནོ། །མྱོས་པར་མི་འགྱུར་བའི་དྲོད་རིག་ནས་ནད་བསལ་བའི་ཕྱིར་འཐུང་བ་དེ་ལ་ཉོན་མོངས་པ་ཅན་ཡོད་པ་མ་ཡིན་ནོ། །འདི་ལ་འདུལ་འཛིན་རྣམས་ན་རེ། ཆང་ནི་རང་བཞིན་གྱི་ཁ་ན་མ་ཐོ་བ་ཡིན་པས། ནད་པ་གསོ་བའི་ཕྱིར་ཡང་མ་གནང་ལ། བཅས་པ་ནི་ནད་པ་གསོ་བའི་ཕྱིར་གནང་བ་ཡིན་ཏེ། བཙུན་པ་ཇི་ལྟར་བྲོ་གཡོག་བགྱི། ཉེ་བ་འཁོར་རང་བཞིན་གྱི་ཁ་ན་མ་ཐོ་བ་མ་གཏོགས། ཞེས་དང་། ཤཱཀྱ་ནད་པ་རྣམས་ལ་ཡང་མྱོས་པར་འགྱུར་བ་འཐུང་བ་མ་གནང་ངོ་ཞེས་འབྱུང་བའི་ཕྱིར། ཆང་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པས་སངས་རྒྱས་ཀྱིས་བཀག་པ་ཡིན་ལ། མྱོས་པར་འགྱུར་རོ་སྙམ་དུ་དགོངས་ནས་བཀག་པ་མ་ཡིན་ཏེ། ཡིན་ན་རྩྭ་མཆོག་ཙམ་གྱིས་བླངས་པས་མྱོས་པར་མི་འགྱུར་བས་དེ་ཙམ་བཀག་མི་རིགས་ཀྱང་བཀག་འདུག་པའི་ཕྱིར། གྲུབ་སྟེ། འདི་སྐད་དུ། དགེ་སློང་དག །(ཤཱཀ་ཐུབ་ལ་སྟོན་པར་འཛིན་པ་རྣམས།)སྟོན་པ་ཡིན་པར་སྨྲ་བ་རྣམས་ཀྱིས་མྱོས་པར་འགྱུར་བ་རྩྭ་ཡི་རྩེ་མོས་ཀྱང་བཏུང་བར་མི་བྱའོ། །ཞེས་གསུངས་སོ། །གཞན་ཡང་ཆང་འཐུང་བ་ནི་རང་བཞིན་གྱི་ཁ་ན་མ་ཐོ་བ་ཡིན་ཏེ། ལུས་ཀྱི་ཉེས་སྤྱོད་ཡིན་པའི་ཕྱིར། སྲོག་གཅོད་བཞིན་འཕགས་པ་རྣམས་ཚེ་འཕོས་ནས་ཀྱང་མི་སྤྱོད་པ་ཡིན་ནོ། །ཆང་འཐུང་བ་ལུས་ཀྱི་ཉེས་སྤྱོད་ཡིན་པར་གང་ལས་ཤེས་ཞེ་ན། དགའ་བྱེད་སོགས་ཀྱི་མདོ་ལས། ལུས་ཀྱི་ཉེས་སྤྱོད་ལོག་ གཡེམ་མ་བྱིན་ལེན་འབྲུའི་དང་སྦྱར་བའི་ཆང་བག་མེད་པའི་གནས་དང་བཞིར་བཤད་པས་ཤེས་སོ། །ཆོས་མངོན་པ ་བ་(༥༦བ)
ན་རེ། ནད་པ་ལ་བཅས་པའི་ཁ་ན་མ་ཐོ་བས་སྤྱིར་བསྐྱངས་པར་གསུང་ཡང་། ཆང་དམིགས་ཀྱིས་བསལ་ནས་བཀག་པ་ནི་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་ནས་བཀག་པ་མིན་ཏེ། སངས་རྒྱས་ཀྱིས་རྨུགས་གཉིད་ཆང་མི་ཚངས་སྤྱོད་རྣམས་ནི་ངོམས་པའམ་ཆོག་པའམ་ཚིམ་པ་མེད་པས་མྱོས་པར་མི་འགྱུར་བའི་ཚོད་འཛིན་མི་ཐུབ་པས་དེའི་ཆེད་དུ་བཀག་པའི་ཕྱིར་རོ། །རྩྭའི་རྩེ་མོས་འཐུང་བའང་བཀག་པ་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པའི་ཆ་ནས་བཀག་པ་མིན་ཏེ། ཚོད་མ་ཟིན་པར་ཐལ་གྱིས་དོགས་ནས་ལ་དོར་བའི་ཚུལ་གྱིས་བཀག་པའི་ཕྱིར། ཆང་ཚེ་བརྗེས་ཀྱང་འཕགས་པས་མི་སྤྱོད་པ་ནི་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པའི་ཆ་ནས་མིན་ཏེ། འཕགས་པ་སློབ་པས་དད་པ་དང་། བརྩོན་འགྲུས་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། ཤེས་རབ་ཀྱི་སྟོབས་ཀྱིས་མི་འཐུང་བ་ཡིན་པའི་ཕྱིར། ངོ་ཚ་དང་ལྡན་པའི་ཕྱིར་མི་འཐུང་ན། ངོ་ཚ་བསྒྲིབ་ཕྱིར་ཆུ་ལྟར་བྱས་ནས་གཞན་གྱིས་མི་ཤེས་པར་བྱས་ཏེ་འཐུང་བས་ཆོག་མོད་སྙམ་ན། མ་ཡིན་ཏེ། ཆུ་ལྟར་བྱས་པ་དེས་ཀྱང་དྲན་པ་ཉམས་པར་བྱེད་པའི་ཕྱིར། ཡང་དྲན་པ་མི་ཉམས་པའི་ཅུང་ཟད་ཙམ་འཐུང་བས་ཆོག་མོད་སྙམ་ན། ཅུང་ཟད་ཀྱང་མི་གསོལ་ཏེ། དུག་ཆུང་ངུས་ཀྱང་འཆི་བ་བཞིན་དུ་མྱོས་འགྱུར་ཅུང་ཟད་ཀྱིས་ཀྱང་དྲན་པ་ཉམས་པར་བྱེད་པའི་ཕྱིར། ཆང་ཉེས་པར་སྤྱོད་པ་བག་མེད་ཀྱི་གནས་སུ་གསུངས་པ་ཆོས་ཅན། སྲོག་གཅོད་བཞིན་རང་བཞིན་གྱི་ཁ་ན་མ་ཐོ་བ་ཡིན་པའི་ཆ་ནས་དེར་གསུང་བ་མིན་ཏེ། ཆང་གི་ཉེས་སྤྱོད་བག་མེད་ནི་མྱོས་པས་མི་དགེ་བ་མི་སྤོང་དགེ་བ་མི་བྱེད་པས་དེར་བཤད་པ་ཡིན་པའི་ཕྱིར། དཔེར་ན། སྲོག་གཅོད་སོགས་རང་བཞིན་གྱི་ཁ་ན་མ་ཐོ་བ་ཡིན་ཏེ། སྤོང་བའི་སྔགས་ཚིག་ཏུ་སྲོག་གཅོད་པ་བག་མེད་པའི་གནས་(༥༧ན)
སྤངས་ཏེ་དེ་དག་ལས་ལྡོག་ཅེས་མི་འབྱུང་བའི་ཕྱིར། ཆང་བཏུང་བ་ནི་རང་བཞིན་གྱི་ཁ་ན་མ་ཐོ་བ་མིན་ཏེ། དེ་ལས་ལྡོག་པའི་སྔགས་ཚིག་ཏུ། འབྲུའི་ཆང་དང་སྦྱར་བའི་ཆང་བག་མེད་པའི་གནས་སྤངས་ཏེ་དེ་དག་ལས་ལྡོག་ཅེས་འབྱུང་བའི་ཕྱིར། དགའ་བྱེད་ཀྱི་མདོ་ལས། འབྲུའི་ཆང་སྦྱར་བའི་ཆང་བག་མེད་པའི་གནས་ཀུན་ཏུ་བསྟེན་ཅིང་གོམས་པར་བྱས། ལན་མང་དུ་བྱས་པས་ལུས་ཞིག་ནས་དམྱལ་བ་དག་ཏུ་སྐྱེའོ། །ཞེས་འབྱུང་བ་ནི། ཆང་འཐུང་བའི་ཞར་ལ་མི་དགེ་བའི་རྒྱུན་འཇུག་པས་ངན་སོང་གི་འབྲས་བུ་ཅན་གྱི་ལས་སྔོན་མེད་འཕེན་པའམ། འཆི་བའི་གནས་སྐབས་ན་སྔོན་བསགས་པའི་ལས་ཀྱི་འབྲས་བུ་འབྱིན་པར་བྱ་བའི་འཇུག་པ་ཐོབ་པ་ལ་དགོངས་པ་ཡིན་ནོ། །འབྲུའི་ཆང་དང་སྦྱར་བའི་ཆང་མྱོས་པར་འགྱུར་བ་བག་མེད་པའི་གནས་ཞེས་བྱ་བའི་དོན་ཅི་ཞེ་ན། འབྲུའི་ཆང་ནི་ཟས་ལ་སྦྱར་བ་འབྲས་འཐུག་པོ་ཆེ་ལས་བྱུང་བའི་བཏུང་བའོ། །སྦྱར་བའི་ཆང་ནི་བུ་རམ་ཤིང་གི་ཁུ་བ་སོགས་ཀྱི་རྫས་ལ་བཏུང་བའོ། །གཞོན་ནུ་སྟེ་མ་ལོངས་པ་དང་རྙིངས་ཏེ་ཡལ་བ་ལྟ་བུ་མ་ཡིན་པ་ལ་ནི་མྱོས་པར་འགྱུར་བ་ཞེས་སྨོས་སོ། །གླ་གོར་ཞོ་ཤ་དང་ཁྲེ་རྒོད་དང་ནི་པ་ལ་སོགས་ཀྱིས་མྱོས་ཀྱང་མྱོས་ཚབ་ཆུང་བས། འབྲུའི་ཆང་དང་སྦྱར་བའི་ཆང་ཞེས་སྨོས་སོ། །སྤྱད་ན་བཅས་འདས་ལས་མེད་ཀྱང་བག་མེད་ཀྱི་གནས་ཡིན་པས་བསྒྲིམས་ནས་སྤོང་བར་ཤེས་དགོས་པའི་ཕྱིར་བག་མེད་ཀྱི་གནས་ཞེས་སྨོས་སོ། །སྐབས་འདིར་དཔལ་མཆོག་ལྡན་ན་རེ། བྱེ་སྨྲའི་འདུལ་འཛིན་ཚད་ལྡན་སུས་ཀྱང་ཆང་བཏུང་བ་རང་བཞིན་གྱི་ཁ་ན་མ་ཐོ་བར་འཇོག་མཁན་སུ་ཡང་མེད། ཡོད་ན་དེ་ཉིད་རྩ་ལྟུང་དུ་ཁས་ལེན་དགོས་པར་འགྱུར། འདོད་ན་རྩ་ལྟུང་མི་མཐུན་པ་དུ་མ་སོ་སོར་འདོད་པས་གྱེས་པ་བཅོ་བརྒྱད་པོ་ཐམས་(༥༧བ)
ཅད་ཀྱི་བཀར་སྒྲུབ་མི་ནུས་སོ་ཞེས་པ་ལ། ལུགས་འདིར་རང་བཞིན་གྱི་ཁ་ན་མ་ཐོ་བ་ཡིན་ཀྱང་རྩ་ལྟུང་དུ་འཇོག་དགོས་པས་མ་ཁྱབ་པ་ནི་ཡིད་ཀྱི་རང་བཞིན་གྱི་ཁ་ན་མ་ཐོ་བ་གསུམ་པོ་ལྟ་བུའང་ཡོད་ལ། དེའི་ཕྱིར་གྱེས་པ་བཅོ་བརྒྱད་སངས་རྒྱས་ཀྱི་བསྟན་པར་མ་དོགས་པའི་བློ་ནི་དཔྱོད་ལྡན་སུ་ཞིག་ལ་འཆར། རྒྱ་གར་ན་བྱེ་སྨྲ་སོགས་ཆང་འཐུང་བ་རང་བཞིན་གྱི་ཁ་ན་མ་ཐོ་བར་འདོད་པ་ཚད་ལྡན་སུ་ཡང་མེད་ན། མཁས་མཆོག་ནོར་གྱི་རྩ་ལག་གིས་མཛོད་རྩ་འགྲེལ་དུ། དེ་རང་བཞིན་གྱི་ཁ་ན་མ་ཐོ་བ་ཡིན་མིན་ལ་རྩོད་ལན་དེ་ཙམ་དུ་མཛད་པ་ཐམས་ཅད་རྫུན་ཚིག་ཁོ་ནར་སོང་སྟེ། དེ་འདྲའི་རྒོལ་ཕྱིར་རྒོལ་མེད་བཞིན་དུ་ཡོད་པར་བཏགས་ནས་དགག་སྒྲུབ་བྱུང་ངོ་ཞེས་སྨྲས་པར་སོང་བའི་ཕྱིར། དེས་ན་འདི་ལྟ་བུའི་དོགས་གཅོད་ཀྱང་དོགས་གཅོད་བྱེད་རྒྱུ་ཟད་པའི་ཕོངས་རྟགས་བླ་ན་མེད་པའོ། །གཉིས་པ་གང་ལས་ཐོབ་པ་ལ། སོ་སོར་བཤད་པ་དང་། བསྡོམས་ནས་བཤད་པའོ། །དང་པོ་ལ། སོ་ཐར་གང་ལས་ཐོབ་པ། བསམ་གཏན་དང་ཟག་མེད་གང་ལས་ཐོབ་པའོ། །དང་པོ་ནི། འདོད་གཏོགས་ཐམས་ཅད་གཉིས་ཀ་དང་། །ད་ལྟར་དག་ལས་འཐོབ་པར་འགྱུར། །སོ་ཐར་སོགས་གསུམ་པོ་འདི་ལ་གཅིག་ཐོབ་པས་ལྷག་མ་ཀུན་ཐོབ་པ་མ་ཡིན་པས། འདོད་པར་གཏོགས་པའི་སོ་སོར་ཐར་པའི་སྡོམ་པ་ནི་མི་དགེ་བའི་ལས་ཀྱི་སྦྱོར་དངོས་མཇུག་ཐམས་ཅད་དག་ལས་ཅི་རིགས་པར་དེ་དག་གི་གཉེན་པོར་གྱུར་པ་རིག་བྱེད་དང་རིག་བྱེད་མ་ཡིན་པ་སྦྱོར་དངོས་མཇུག་གི་ངོ་བོ་ཉིད་གསུམ་ཐོབ་པ་དང་། སེམས་ཅན་གྱི་གཞི་ལ་རང་བཞིན་གྱི་ཁ་ན་མ་ཐོ་བ་སྲོག་གཅོད་པ་ལྟ་བུ། བཅས་པའི་ཁ་ན་མ་ཐོ་བ་གག་ཚིལ་བྱེད་པ་ལྟ་བུ་དང་། སེམས་ཅན་དུ་མ་ཡིན་པའི་གཞི་ལ་གསེར་དངུལ་ལྟ་བུ་རྐུན་རང་བཞིན་གྱི་ཁ་ན་མ་ཐོ་བ། རྩྭ་གཅོད་པ་ལྟ་བུ་བཅས་པའི་ཁ་ན་མ་ཐོ་གཉིས་ཀ་(༥༨ན)
ལས་དང་། དེའང་ད་ལྟར་གྱི་ཕུང་པོ་ཁམས་དང་སྐྱེ་མཆེད་དག་ཁོ་ན་ལས་ཐོབ་པར་འགྱུར་ཏེ། སེམས་ཅན་གྱི་རྟེན་ལ་འཇུག་པའི་ཕྱིར་ཏེ། འདས་མ་འོངས་ནི་མ་ཟིན་པས་མེད་པ་དང་འདྲ་བས་སེམས་ཅན་དུ་མ་བགྲང་བའི་ཕྱིར། སེམས་ཅན་མིན་པར་སྟོན་པ་ལས་ཐོབ་ཀྱང་ད་ལྟར་གྱི་རྟེན་ཅན་ཁོ་ན་ལས་ཡིན་ནོ། །གཉིས་པ་ནི། བསམ་གཏན་ཟག་མེད་སྡོམ་པ་ནི། །དངོས་དང་དུས་ནི་ཐམས་ཅད་ལས། །བསམ་གཏན་དང་ཟག་མེད་ཀྱི་སྡོམ་པ་ནི་དངོས་གཞི་ཁོ་ནས་འཐོབ་ཀྱི། མཉམ་པར་མ་བཞག་པ་ན། སྡོམ་པ་མེད་པས་སྦྱོར་བ་དང་། རྗེས་ཀྱི་མ་ཡིན་ན་འོ་ན་སྲོག་གཅོད་པའི་སྦྱོར་བ་ཡོད་དམ། རྗེས་ཡོད་དམ་སྙམ་ན། སྦྱོར་བ་ཡང་མེད། སྲོག་གཅོད་དངོས་མེད་ཙམ་ན་དེའི་རྗེས་ཀྱང་ཅི་ལ་ཡོད་དེ་མེད། མེད་ན་དངོས་གཞི་ཁོ་ནས་ཐོབ་བྱ་བ་ཇི་ལྟར་ཡིན་སྙམ་ན། མཉམ་གཞག་གི་གནས་སྐབས་ཁོ་ནར་གཉེན་པོ་དངོས་གཞི་ཁོ་ན་ཡིན་ཙམ་ན། དེའི་མི་མཐུན་པ་དངོས་གཞི་ཡིན་གྱི། སྲོག་གཅོད་པའི་སྦྱོར་བ་དང་རྗེས་ཡོད་པ་མིན་ནོ། །ཁས་བླངས་མེད་པས་ས་རྐོ་བ་ལྟ་བུ་བཅས་པའི་ཁ་ན་མ་ཐོ་བ་ལྟ་བུ་ལས་ཐོབ་པ་ལྟ་ཅི་སྨོས། ངོ་ཚ་ཁྲེལ་ཡོད་དང་ལྡན་པས་ཉོན་མོངས་ཅན་ཁོ་ནས་བསླངས་པ་སྤོང་བ་ལས་ཐོབ་བོ། །དུས་ནི་འདས་མ་འོངས་ཐམས་ཅད་ཀྱི་ཕུང་ཁམས་སྐྱེ་མཆེད་ལས་ཐོབ་བོ། །དེ་ན་སོ་ཐར་གྱི་སྡོམ་པ་ཐོབ་ལ་བསམ་གཏན་དང་ཟག་མེད་ཀྱི་སྡོམ་པ་མ་ཐོབ་པའི་ཕུང་ཁམས་སྐྱེ་མཆེད་ནི། འདོད་གཏོགས་ཐམས་ཅད་གཉིས་ཀ་དང་ཞེས་འབྱུང་བས། ད་ལྟར་བྱུང་བའི་ཉེར་བསྡོགས་དང་། མཇུག་དང་བཅས་པའི་ཁ་ན་མ་ཐོ་བ་ལས་སོ། །བསམ་གཏན་དང་ཟག་མེད་ཀྱི་སྡོམ་པ་ཐོབ་ལ་སོ་ཐར་གྱི་སྡོམ་པ་མི་ཐོབ་པའི་ཕུང་ཁམས་སྐྱེ་མཆེད་ནི། དངོས་དང་དུས་ནི་ཐམས་ཅད་ལས་ཞེས་འབྱུང་བས། སོ་ཐར་དང་བསམ་གཏན་དང་ཟག་མེད་ཀྱི་(༥༨བ)
སྡོམ་པ་གཉིས་ཀ་ཐོབ་པའི་ཕུང་ཁམས་སྐྱེ་མཆེད་ནི། ད་ལྟར་བྱུང་བའི་ལས་ཀྱི་ལམ་དངོས་དག་ལས་སོ། །སོ་ཐར་དང་བསམ་ཟག་གཉིས་ཀ་མ་ཐོབ་པའི་ཕུང་ཁམས་སྐྱེ་མཆེད་ནི། འདས་པ་དང་མ་འོངས་པའི་ཉེར་བསྡོགས་ཀྱི་དུས་དེའི་སོ་ཐར་གྱི་སྡོམ་པ་མ་ཐོབ་ལ། ཉེར་བསྡོགས་དང་མཇུག་ཡིན་པའི་ཕྱིར་བསམ་ཟག་གི་སྡོམ་པ་མ་ཐོབ་བོ། །སློབ་དཔོན་གྱིས། མུ་གསུམ་པ་འདི་ནི་སྲིད་པ་མིན་ཏེ། རང་གི་རྒྱུད་ལ་ད་ལྟར་གྱི་ལས་ལམ་དག་ལ་སྡོམ་པ་ཐོབ་པར་རུང་བ་མ་ཡིན་པའི་ཕྱིར། གྲུབ་སྟེ། ད་ལྟར་གྱི་ལས་ལམ་གྱི་བྱ་བ་ཡོངས་སུ་རྫོགས་པ་མེད་པའི་ཕྱིར། ད་ལྟར་སྲོག་མི་གཅོད་པ་ཙམ་གྱི་གཞི་ཅན་ལས་བཏགས་ནས་སྲོག་གཅོད་སྤོང་བ་ད་ལྟར་ལྡན་ཅེས་བརྗོད་ཀྱི། སྲོག་མི་གཅོད་པ་ལས་ལྡོག་ཙམ་སྲོག་གཅོད་སྤོང་བ་དངོས་འཐོབ་པ་ག་ལ་ཡིན། དེ་ལྟར་ན་སྡོམ་པ་ཐམས་ཅད་མ་འོངས་པ་སྡོམ་པ་ཡིན་པ་ནི་མདོ་སྡེ་པའི་ལུགས་ཡིན་ལ། དེའང་ད་ལྟར་མི་བྱེད་དོ་སྙམ་ནས་སྲོག་གཅོད་ལས་ལྡོག་པ་ན་མ་འོངས་པ་ན་སྲོག་གཅོད་པའི་ལས་ལམ་དངོས་གཞིའི་དུས་སུ་སྲོག་གཅོད་པ་སྤངས་པའི་སྡོམ་པར་རུང་བའི་ཕྱིར། འདས་པ་ནི་བྱུང་ཟིན་པའི་ཕྱིར་སྡོམ་པར་རུང་བ་མ་ཡིན་པ་དང་། ད་ལྟར་གྲུབ་ཟིན་པ་དེ་མི་སྐྱེ་བར་མི་ནུས་པའི་ཕྱིར་རོ། །བྱེ་བྲག་ཏུ་སྨྲ་བས་ནི། སྲོག་གཅོད་པའི་སྦྱོར་དངོས་མཇུག་གསུམ། སྲོག་གཅོད་སྤོང་བའི་སྦྱོར་དངོས་རྗེས་གསུམ་གྱི་ཐད་སོར་སེལ་བ་དེ་ད་ལྟར་གྱི་སོ་སོར་ཐར་པའི་སྡོམ་པ་ཐོབ་ཟེར་བ་དེ་སྐད་དུ་མི་བརྗོད་དོ། །གཉིས་པ་བསྡོམས་ནས་བཤད་པ་ནི། སྡོམ་པ་སེམས་ཅན་ཐམས་ཅད་ལས། །ཡན་ལག་རྒྱུ་ལ་དབྱེ་བ་ཡོད། །ཅི་སྡོམ་པ་དང་སྡོམ་པ་མིན་པ་དག་སེམས་ཅན་ཐམས་ཅད་དང་། ཡན་ལག་ཐམས་ཅད་དང་། རྒྱུ་ཐམས་ཅད་ཀྱིས་ཐོབ་བམ་ཐོབ་པ་མ་ཡིན་ཅེ་ན། སྡོམ་པ་སེམས་ཅན་ཐམས་ཅད་ལས་ཐོབ་ཀྱི། སེམས་ཅན་འགའ་ལས་ནི་མ་ཡིན་ནོ། །(༥༩ན)
ཡན་ལག་ལ་དབྱེ་བ་ཡོད་དེ། བྱེ་བྲག་ཏུ་སྨྲ་བ་ནི་སྤོང་བ་བདུན་དང་། ཡང་ན་བཞིའི་ཡན་ལག་ཅན་ཡིན་པས། ཡན་ལག་དེ་མིན་གསུམ་དང་གཉིས་གཅིག་པ་སོགས་ཀྱི་སྡོམ་པ་མི་འདོད་པས། དགེ་སློང་གི་སྡོམ་པ་ནི་ལས་ལམ་ཐམས་ཅད་ལས་ཐོབ་ཅིང་། སྡོམ་པ་གཞན་གསུམ་ཡན་ལག་བཞི་ལས་ཏེ། ལུས་ཀྱི་གསུམ་དང་ངག་གི་བཞི་ལས་ཐོབ་བོ། །ལས་ལམ་རྣམས་ནི་སྡོམ་པའི་ཡན་ལག་གོ། །རྒྱུ་ལའང་དབྱེ་བ་ཡོད་དེ། དགེ་བའི་རྩ་བ་གསུམ་རྒྱུར་འདོད་པའི་རྣམ་གྲངས་ལྟར་ན་སྡོམ་པ་ཐམས་ཅད་ལ་གསུམ་ཆར་གྱི་རྒྱུ་ཡོད་དེ། ཀུན་སློང་གི་སེམས་དགེ་བ་ལ་འདི་གསུམ་གཅིག་ཅར་འབྱུང་བའི་དགེ་བའི་ས་མང་པོ་པ་ཡིན་པའི་ཕྱིར། སེམས་པ་ཆུང་འབྲིང་ཆེན་པོ་རྒྱུར་འདོད་པའི་རྣམ་གྲངས་ལྟར་ན་གང་རུང་ཞིག་གིས་ཐོབ་སྟེ། སྡོམ་པ་ཐམས་ཅད་ལ་གསུམ་པོ་གཅིག་ཅར་རྒྱུར་ཡོད་པའི་ངེས་པ་མེད་པའི་ཕྱིར། རྣམ་གྲངས་གཉིས་པའི་དབང་དུ་བྱས་ན། སྡོམ་པ་སེམས་ཅན་ཐམས་ཅད་ལས་བསྡམས་པ་ཡིན་ལ། ཡན་ལག་ཐམས་ཅད་དང་རྒྱུ་ཐམས་ཅད་ཀྱི་མ་ཡིན་པ་ནི། སེམས་པ་གསུམ་པོ་གང་རུང་རེས་དགེ་བསྙེན་བསྙེན་གནས་དགེ་ཚུལ་གྱི་སྡོམ་པ་ལེན་པ་ལྟ་བུའོ། །སེམས་ཅན་ཐམས་ཅད་དང་ཡན་ལག་ཐམས་ཅད་ཀྱིས་བསྡམས་ལ་རྒྱུ་ཐམས་ཅད་ཀྱིས་མ་ཡིན་པ་ནི། སེམས་པ་གང་རུང་རེས་དགེ་སློང་གི་སྡོམ་པ་ལེན་པའོ། །སེམས་ཅན་དང་ཡན་ལག་དང་རྒྱུ་ཐམས་ཅད་ལས་བསྡམས་པ་ཡང་ཡོད་དེ། སེམས་པ་ཆུང་འབྲིང་ཆེན་པོ་གསུམ་གྱིས་རིམ་བཞིན་དགེ་བསྙེན་དགེ་ཚུལ་དགེ་སློང་གི་སྡོམ་པ་གསུམ་ལེན་པའོ། །སེམས་ཅན་ཐམས་ཅད་དང་རྒྱུ་ཐམས་ཅད་ཀྱིས་བསྡམས་ལ་ཡན་ལག་ཐམས་ཅད་ལས་མ་ཡིན་པ་ནི། སེམས་པ་གསུམ་པོ་རིམ་ཅན་གྱིས་དགེ་བསྙེན་(༥༩བ)
དང་བསྙེན་གནས་དང་དགེ་ཚུལ་གྱི་སྡོམ་པ་ལེན་པར་བྱེད་པའོ། །སེམས་ཅན་ཐམས་ཅད་ལས་མ་བསྡམས་པའི་སྡོམ་པ་ནི་མེད་དེ། སེམས་ཅན་ཐམས་ཅད་ལ་ཕན་པའི་སེམས་རྗེས་སུ་སོང་བ་དགེ་བ་ལ་གནས་པས་ཐོབ་ཀྱི། གནོད་པའི་སེམས་སྡིག་པ་དང་མ་བྲལ་ན་ནི་མི་ཐོབ་པའི་ཕྱིར། ངེས་པ་ལྔ་དང་མ་བྲལ་ན་སོ་ཐར་གྱི་སྡོམ་པ་མི་ཐོབ་སྟེ། ངེས་བཟུང་བྱས་པའི་ཕྱིར་ལེགས་སྤྱད་ཙམ་དུ་འགྱུར་རོ། །ངེས་བཟུང་ལྔ་ནི། སེམས་ཅན་མི་ལྟ་བུ་ཞིག་ལས་སྤོང་ཞེས་སེམས་ཅན་ངེས་པ་དང་། ཡན་ལག་སྲོག་གཅོད་པ་སྤངས་པ་ལྟ་བུ་ཡན་ལག་ངེས་པ་དང་། ཡུལ་བྱེས་ལྟ་བུར་སྤངས་པ་ཡུལ་ངེས་པ་དང་། དུས་ཟླ་བའི་བར་དུ་སྤངས་པ་དུས་ངེས་པ་དང་། འཐབ་མོའི་ཚེ་མ་གཏོགས་ཞིས་སྐབས་ཚེ་ངེས་བཟུང་དུ་བྱས་པ་རྣམས་སོ། །ཅི་སྡོམ་པ་སེམས་ཅན་ཐམས་ཅད་ལས་འཐོབ་ན་ཆོས་ཅན། ལྷའི་དབང་པོ་བརྒྱ་བྱིན་སོགས་ལ་སྲོག་གཅོད་སྤོང་བའི་སྡོམ་པ་ཐོབ་མི་རིགས་པར་ཐལ། དེ་དག་གསད་པར་མི་ནུས་པའི་ཕྱིར་སྙམ་ན། སློབ་དཔོན་གྱིས། ཁྱབ་པ་མེད་དེ། སྡོམ་པ་བསམ་པའི་ཁྱད་པར་ཡིན་པས་བསད་མི་ནུས་ཀྱང་། དེའི་སྲོག་ལ་ངས་མི་གནོད་པའི་ལྷག་བསམ་གྱི་སྤོང་སེམས་ཁས་བླངས་པའི་སྒོ་ནས་ཐོབ་པའི་ཕྱིར་རོ། །བྱེ་སྨྲ་ནི། བསམ་པའི་ཁྱད་པར་གྱིས་སེམས་ཅན་ཐམས་ཅད་ལས་སྡོམ་པ་ཐོབ་པ་ནི་མི་འདོད་ལ། འོ་ན་ཚད་མ་གཞན་གྱི་སྒོ་ནས་ལན་འདེབས་པར་བྱེད་དེ། གལ་ཏེ་གསོད་ནུས་པ་ཁོ་ན་ལས་ཐོབ་ཅིང་། མི་ནུས་པ་ལས་མི་ཐོབ་ན་ཆོས་ཅན། ལྷ་བསད་པར་མི་ནུས་པ་མང་པོ་འཆི་འཕོས་ནས་དབྱར་དུད་འགྲོ་ལྟ་བུའི་སེམས་ཅན་གསོད་ནུས་མང་པོར་སྐྱེས་ཏེ་འཕེལ་ཙམ་ན་སྡོམ་པ་ཐོབ་པའི་རྒྱུ་རྣམ་པར་རིག་བྱེད་སོགས་མེད་པར་ཡང་མང་དུ་འཐོབ་པར་འགྱུར་ལ། དགུན་བསད་ནུས་ཀྱི་སེམས་ཅན་འགྲིབ་(༦༠ན)
ཙམ་ན། བསླབ་པ་ཕུལ་བ་སོགས་སྡོམ་པ་གཏོང་རྒྱུ་མེད་པར་ཡང་གཏོང་བར་ཐལ། སྡོམ་པ་གསོད་ནུས་ཁོ་ན་ལས་ཐོབ་ཅིང་། མ་ནུས་པ་ལས་མི་ཐོབ་པའི་ཕྱིར་ཞེས་འཕངས་པ་ན། ཁྱབ་པ་གྲུབ་ཅིང་འདོད་མི་ནུས་པ་དེའི་ཕྱིར། གསོད་ནུས་མི་ནུས་ཀྱི་སེམས་ཅན་ཐམས་ཅད་ལས་སྡོམ་པ་ཐོབ་པར་གྲུབ་བོ་ཞེས་ཟེར་རོ། །མདོ་སྡེ་པ་ན་རེ། རྟགས་དེས་ཁྱབ་པ་དེ་མི་འགྲུབ་ལ། འགྲུབ་པར་འདོད་ན། རྩྭ་སྔོན་གཅོད་པ་སྤང་བའི་སྡོམ་པ་དེ་ཆོས་ཅན། དབྱར་རྩྭ་སྐྱེས་ཙམ་ན་སྡོམ་པ་ཐོབ་པའི་རྒྱུ་མེད་པར་ཡང་ཐོབ་ཅིང་། དགུན་རྩྭ་མེད་ཙ་ན་གཏོང་བའི་རྒྱུ་མེད་པར་ཡང་གཏོང་བར་ཐལ། སྲོག་གཅོད་ཀྱི་སྡོམ་པ་དེ་བསད་ནུས་ལས་གསོད་མི་ནུས་སུ་འཕོས་པས་གཏོང་བ་དང་། གསོད་མི་ནུས་ལས་བསད་ནུས་སུ་འཕོས་པས་ཐོབ་པའི་ཕྱིར། འདོད་མི་ནུས་པས་གསོད་ནུས་པ་མི་ནུས་པར་འཕོས་པས་ཀྱང་སྡོམ་པ་གཏོང་བ་དང་མི་ནུས་པ་ནུས་པར་འཕོས་པས་ཀྱང་སྡོམ་པ་ཐོབ་པར་མི་འགྱུར་རོ་ཞེས་པ་ལ། བྱེ་སྨྲས། ཁྱེད་ཀྱི་དེ་ལའང་ཁྱབ་པ་མེད་དེ། སེམས་ཅན་ནི་སྔ་ཕྱི་ཐམས་ཅད་དུ་ཡོད་ལ། རྩྭ་དང་འགེལ་བ་སོགས་ནི་སྔ་ཕྱི་གཉིས་ཀར་མེད་པའི་ཕྱིར། རྩ་འགྲེལ་འཕེལ་འགྲིབ་བྱུང་ཡང་རྩྭ་སྔོན་གཅོད་པའི་སྡོམ་པ་ལ་ཐོབ་གཏོང་མི་འབྱུང་ལ། གསོད་ནུས་མི་ནུས་འཕེལ་འགྲིབ་འབྱུང་བས་ནི་སྲོག་གཅོད་ཀྱི་སྡོམ་པའི་ཐོབ་གཏོང་དུ་འགྱུར་རོ་ཞེས་ཟེར་རོ། །མདོ་སྡེ་པས། རྩྭའི་འཕེལ་འགྲིབ་དང་གསོད་ནུས་མི་ནུས་ཀྱི་འཕེལ་འགྲིབ་ལས་སྡོམ་པ་ཐོབ་གཏོང་མི་འབྱུང་བ་དང་། འབྱུང་བའི་ཁྱད་པར་གྱི་ཁྱབ་པ་སོ་སོར་འབྱེད་མི་རིགས་པར་ཐལ། རྩྭ་སྐམ་ན་གཅོད་པར་མི་ནུས་པ་དང་། སེམས་ཅན་འགྲིབ་ན་གསོད་པར་མི་ནུས་པར་མཚུངས་པའི་ཕྱིར། ཁྱབ་པ་ཡང་མེད་ལ། (༦༠བ)
སེམས་ཅན་ཕྱིས་ཡོད་པའི་རྟགས་ཀྱང་མ་གྲུབ་པར་ཐལ། སེམས་ཅན་མྱ་ངན་ལས་འདའ་བ་ཡོད་པའི་ཕྱིར། ཡང་སེམས་ཅན་ཕྱིས་མེད་ན་སྲོག་གཅོད་སྡོམ་པ་གཏོང་བར་དམ་བཅས་པ་དེ་མི་འཐད་པར་ཐལ། སེམས་ཅན་ཕྱིས་མེད་པར་མྱ་ངན་ལས་འདས་ཀྱང་། སྲོག་གཅོད་སྤོང་བའི་སྡོམ་པ་མི་གཏོང་པའི་ཕྱིར། འཁོར་གསུམ། དེས་ན་བྱེ་སྨྲའི་ལན་འདི་ནི་མི་འཐད་ལ། དེ་ལྟ་བས་ན་མདོ་སྡེ་པས་སེམས་པའི་ཁྱད་པར་གྱིས་ཐམས་ཅད་ལས་ཐོབ་པའི་གཏན་ཚིགས་བཟང་ངོ་། །སྔོན་སངས་རྒྱས་སུ་གྱུར་ནས་མྱ་ངན་ལས་འདས་པ་རྣམས་ལས་སངས་རྒྱས་ཕྱི་མས་སོ་ཐར་གྱི་སྡོམ་པ་མ་ཐོབ་པའི་ཕྱིར། དེའི་རྒྱུད་ཀྱི་ཚུལ་ཁྲིམས་ཉུང་བར་ཐལ་ཅེ་ན། སངས་རྒྱས་ཕྱི་མའི་ཚུལ་ཁྲིམས་ཉུང་བར་མི་འགྱུར་ཏེ། སངས་རྒྱས་ཕྱི་མས་ཀྱང་སེམས་ཅན་ཐམས་ཅད་ལས་སྡོམ་པ་ཐོབ་ན། སྔར་སངས་རྒྱས་ཟིན་པ་དེ་དག་སེམས་ཅན་དུ་ཡོད་ན་ནི་དེ་དག་ལས་ཀྱང་ཐོབ་དགོས་པའི་ཕྱིར། སྨྲས་པ། གངས་ཅན་འདི་ན་སངས་རྒྱས་བསྟན་འདི་ལ། །ཞེ་ནས་དང་བ་བསྐྱེད་པ་འགའ་མ་མཐོང་། །དེ་ཕྱིར་ཐེག་པའི་ལམ་གྱི་རྣམ་དབྱེ་ལ། །དྲི་ཙམ་བྲོ་ལའང་སྡང་བའི་རྣམ་འགྱུར་གྱིས། །ཅུང་ཟད་ཡིད་ཕྱོགས་རྣམས་ཀྱང་སུན་ཅི་ཕྱིན། །རྒོལ་བྱེད་རབ་ཏུ་འབྱམས་ཀླས་གྱུར་པ་ལས། །མ་བཟོད་བདག་གིས་སྟོན་དང་བསྟན་པ་ལ། །མི་བཟོད་མོས་པ་སྐྱེས་ནས་ཕྱོགས་འདིར་འབད། །ཅེས་སོ། །གཉིས་པ་སྡོམ་མིན་གྱི་ཐོབ་ཚུལ་ལ། གང་ལས་ཐོབ་པ་དང་། ཇི་ལྟར་ཐོབ་པའོ། །དང་པོ་ནི། སྡོམ་པ་མིན་པ་ཐམས་ཅད་དང་། །ཡན་ལག་ཀུན་ལས་རྒྱུས་མིན་ནོ། །སྡོམ་པ་མིན་པ་ནི་སེམས་ཅན་ཐམས་ཅད་དང་། ཡན་ལག་ལས་ཀྱི་ལམ་ཐམས་ཅད་ཀུན་ནས་ཐོབ་བོ། །ལས་ལམ་ཀུན་ནས་ཐོབ་པ་འདི་ནི། བྱེ་སྨྲས་ལས་ཀྱི་ལམ་སྲོག་གཅོད་ནས་ངག་ཀྱལ་གྱི་བར་ཐམས་ཅད་ལས་ཐོབ་པར་འདོད་ཟེར་བ་(༦༡ན)
ལ་མ་རངས་ནས་མདོ་སྡེ་པས་དྲིས་པ། སེམས་ཅན་ལྐུགས་པ་ལྟ་བུ་ཞིག་ཡིན་ན་སྲོག་གཅོད་སོགས་གསུམ་གྱི་སྡོམ་མིན་ཡོད་ཀྱང་བརྫུན་སོགས་བཞིའི་ཅི་ལ་ཡོད་བྱས་པ་ལ། དེ་ལ་ཡང་ལག་བརྡ་སོགས་ཀྱིས་ཀྱང་རྫུན་སོགས་བྱེད་པ་ཐམས་ཅད་ཡོད་ཟེར་བ་ལ། མདོ་སྡེ་པས། འོ་ན་ངས་སྲོག་གཅོད་ཀྱི་གཞན་སྡོམ་མིན་མི་བྱེད་ཟེར་བ་ལ་ལས་ལམ་ཐམས་ཅད་ཀྱིས་ཐོབ་པ་ཇི་ལྟར་ཡོད་དེ། བྱེ་སྨྲའི་འདོད་པ་ནི་གྲགས་པ་ཙམ་དུ་བས་སོ། །རྒྱུ་སེམས་པ་གསུམ་པོ་ཐམས་ཅད་ཀྱིས་མིན་ཏེ། གཅིག་ཅར་དུ་མི་འབྱུང་བའི་ཕྱིར། སེམས་ཆུང་ངུས་སྡོམ་མིན་ཐོབ་པ་དེ་ཀུན་དཀྲིས་ཆེན་པོས་སྲོག་གཅོད་པ་ན། སྡོམ་མིན་ནི་ཆུང་ངུ་ཁོ་ན་དང་ལྡན་ལ། སྲོག་གཅོད་པའི་རིག་བྱེད་ནི་ཆེན་པོ་དང་ལྡན་ནོ། །སེམས་འབྲིང་གི་སྡོམ་མིན་ཐོབ་པ་དེ་སེམས་དྲག་པོས་སྲོག་གཅོད་ཀྱང་སྡོམ་མིན་འབྲིང་དང་ལྡན་ལ། སེམས་ཆེན་པོས་སྡོམ་མིན་ཐོབ་པ་དེ་ཡང་སེམས་དྲག་པོས་སྲོག་གཅོད་པ་དེ་སྡོམ་མིན་ཆེན་པོ་དང་ལྡན་པ་ཨ་ཅང་ཡང་ཆེ། སེམས་ཆེན་པོས་སྡོམ་མིན་ཐོབ་པ་དེ་ཀུན་དཀྲིས་ཆུང་ངུས་སྲོག་གཅོད་ཀྱང་སྡོམ་མིན་ཆེན་པོ་དང་ལྡན་ལ། སྲོག་གཅོད་པའི་རིག་བྱེད་ཆུང་ངུ་དང་ལྡན་ནོ། །སྡོམ་མིན་ཅན་ནི། ཤན་པ་རྣམས་དང་། བྱ་གག་གསོད་པ་རྣམས་དང་། ཕག་གསོད་པ་རྣམས་དང་། བྱ་པ་རྣམས་དང་། ཉ་པ་རྣམས་དང་། རི་དྭགས་བཤོར་བ་རྣམས་དང་། གཤེད་མ་རྣམས་དང་། ཆོམ་རྐུན་པ་རྣམས་དང་། གླང་པོ་ཆེ་འཚོ་བ་ནི་འཁྲུགས་པ་ཆེན་པོའི་ཕྱིར་དམག་གི་གླང་པོ་ཆེའོ། །ཁྱི་བཤོར་བ་རྣམས་དང་། བ་གུ་རི་སྟེ་སྲོག་ཆགས་ཀྱི་རིགས་སམ་བ་བཤོར་བ་རྣམས་སོ། །རྒྱལ་པོ་དང་བློན་པོ་དག་ཀྱང་གཞན་ལ་ཆད་པ་གཅོད་དུ་འཇུག་པས་སྡོམ་མིན་ཅན་ཡིན་ལ། ཤགས་ཟིན་པ་སྟེ་ཁ་ཕྱོགས་བྱེད་པ་རྣམས་(༦༡བ)
ཀྱིས་རྒྱལ་བར་བྱས་ནས་གཞན་གསོད་དུ་འཇུག་པ་ཡང་སྡོམ་མིན་ཅན་ནོ། །ཀུན་ལས་བཏུས་ལས་ནི། བང་རྒྱས་འཆོར་བ་དང་། སྦྲུལ་བཟུང་ནས་རྩེ་བས་སྦྲུལ་གྱིས་འཚོ་བ་དང་། གཞན་ལ་ཕྲ་མ་བྱས་ནས་འཚོ་བའི་ཉན་བླ་བྱེད་པ་ཡང་བསྣན་ནས་གསུངས་ལ། ཨ་བྷྱས་ནི། ཡུལ་འཆོས་པ་རྣམས་ཀྱང་སྡོམ་མིན་ཅན་དུ་བཤད་ལ། དྲིན་ལན་བསབས་བ་ལས་ནི། དར་གྱི་སྲིན་བུ་གསོ་བའང་སྡོམ་མིན་ཅན་དུ་བཤད་དོ། །བྱ་བ་དེ་དག་ལ་གནས་པ་ལ་སྡོམ་མིན་ཡོད་པའམ། འདིས་སྡོམ་པ་མིན་པ་བྱེད་པའི་ཕྱིར་སྡོམ་མིན་ཅན་རྣམས་སོ། །ལུག་གསོད་པོ་ལ་ཤན་པ་སྦྱོར་བ་བཞིན་བྱ་གག་གསོད་པོ་སོགས་ཀྱང་ཤན་པའོ། །ད་ནི་བྱེ་སྨྲ་ལ་མདོ་སྡེ་པས་དྲིས་པ། སྡོམ་པ་ནི་སེམས་ཅན་ཐམས་ཅད་ལས་ཐོབ་པར་རིགས་ཏེ། སྡོམ་པ་ནི་སེམས་ཅན་ཐམས་ཅད་ལ་ཕན་པའི་བསམ་པས་ཞེས་སྨོས་པའི་ཕྱིར། འོན་ཀྱང་ཤན་པ་སོགས་ཀྱི་འཚོ་བའི་ཕྱིར་ཡང་ཕ་མ་བུ་བྲན་སོགས་ལ་གསོད་འདོད་ཀྱི་ལོག་པར་མ་ཞུགས་ན་དེ་ལ་སྡོམ་མིན་ཇི་ལྟར་ཐོབ་པར་རུང་། བྱེ་བྲག་ཏུ་སྨྲ་བས། ཤན་པས་ད་ལྟ་མ་གསོད་པའི་བསམ་པས་མ་ལ་སྡོམ་མིན་མི་ཐོབ་ཀྱང་། མ་འོངས་པ་ན་མ་ལུག་ཏུ་གྱུར་པ་དེའི་ཚེ་གསོད་ན། དེའི་ཆ་ནས་མ་སོགས་ལའང་སྡོམ་མིན་ཐོབ་པར་འདོད་དོ། །སློབ་དཔོན་གྱིས་དེའི་ལན་དུ་ཤན་པ་དེས་ལུག་དེ་མ་ཡིན་པར་ཤེས་ན་ནི་མི་གསོད་པས་དེ་ལས་སྡོམ་མིན་ཇི་ལྟར་ཐོབ། ཡང་མ་འཕགས་མ་ཡིན་པ་དེ་ཕྱུགས་སུ་མི་འགྱུར་བས། དེ་ལས་སྡོམ་མིན་ཇི་ལྟར་ཐོབ། ཕ་མ་མ་འོངས་པ་ན་ལུག་ལྟ་བུར་གྱུར་པ་ལ་བལྟོས་ནས། ད་ལྟ་ཕ་མའི་རྟེན་ལས་སྡོམ་མིན་ཐོབ་ཅེས་སྨྲ་བ་ཆོས་ཅན། ཐོབ་མི་རིགས་པར་ཐལ། མ་འོངས་པ་ན་ལུག་དེ་ཕ་མ་ཡིན་པར་ཤེས་ན་གཏན་མི་གསོད་པའི་ཕྱིར། བྱེ་བྲག་ཏུ་སྨྲ་བས། མ་འོངས་པ་ན་ཕ་མ་ལུག་ཏུ་སྐྱེས་པ་(༦༢ན)
ན་ཆོས་ཅན། སྡོམ་མིན་འཐོབ་པར་ཅིས་མི་འགྱུར་ཏེ། འགྱུར་བར་ཐལ། ལུག་ཏུ་སྐྱེས་པ་ན་དེ་ལ་གསོད་ཅིང་གནོད་པར་འདོད་པའི་ཕྱིར་ཞེས་སྨྲས་པ་ལ། འོ་ན་མདོ་སྡེ་པས། ད་ལྟར་གྱི་ཕ་མ་ལས་སྡོམ་མིན་ཐོབ་པར་ཐལ། དེ་ལའང་གསོད་འདོད་ཀྱི་གནོད་སེམས་སྐྱེ་བར་མཚུངས་པའི་ཕྱིར། ཁྱབ་པ་འདི་བྱེ་སྨྲ་ལ་སོང་ཡང་མདོ་སྡེ་པ་རང་གིས་ཁས་མི་ལེན་ནོ། །ཡང་མདོ་སྡེ་པས་དྲིས་པ། ཤན་པས་ཚེ་གང་ལ་མ་ཕྱིན་ཕར་མི་ལེན། རང་གི་ཆུང་མས་ཆོག་ཤེས། ལྐུགས་པ་ཡང་ཡིན་ན་དེ་ལ་ཡན་ལག་ཐམས་ཅད་ལས་སྡོམ་མིན་ཐོབ་པར་ཇི་ལྟར་རུང་། བྱེ་སྨྲས། ལྐུགས་པ་ནི་ལག་བརྡ་སོགས་ཀྱི་རྫུན་བྱེད་པས་ལས་ལམ་ཐམས་ཅད་ལ་སྡོམ་མིན་འཐོབ་སྟེ་བསམ་པས་ལོག་པར་ཞུགས་པའི་ཕྱིར་རོ། །ཡང་མདོ་སྡེ་བས་དྲིས་པ། འོ་ན་བསླབ་པའི་གཞི་གཉིས་སམ་གསུམ་བླང་བ་དེ་ལ་སྡོམ་མིན་ཐམས་ཅད་ཡན་ལག་ཚང་བར་མ་ཐོབ་པར་འདུག་པས་དེ་སྡོམ་མིན་ཅན་དུ་འགྱུར་རམ་མི་འགྱུར། དེ་ལ་བྱེ་སྨྲས། ཡན་ལག་མ་ཚང་བ་དང་ཉི་ཚེ་བའི་སྡོམ་མིན་མེད་པས། དེ་སྡོམ་མིན་ཅན་དུ་མི་འགྱུར་ཟེར་རོ། །དེ་ལ་མདོ་སྡེ་པས། བསླབ་གཞི་གཉིས་གསུམ་བླང་བ་དེ་ཆོས་ཅན། སྡོམ་མིན་ཅན་ཡིན་པར་ཐལ། སྡོམ་མིན་སྡོམ་པས་གཏོང་དགོས་པ་ནི་གང་ཞིགསྡོམ་པ་ནི་བསླབ་གཞི་བཞི་དང་བདུན་གང་རུང་གི་སྡོམ་པ་ཡིན་ན། བསླབ་གཞི་གཉིས་པ་དང་གསུམ་པ་བླང་བ་སྡོམ་པ་མ་ཡིན་པའི་ཕྱིར། འཁོར་གསུམ། མདོ་སྡེ་པས། སྣ་འགར་བསྲུང་བ་ལྟ་བུ་སྡོམ་མིན་དང་ལྡན་པའང་ཡོད་ལ། སོ་ཐར་གྱི་སྡོམ་པ་བརྒྱད་མ་གཏོགས་ཡན་ལག་མ་ཚང་བ་ཡང་ཡོད་ལ། ངེས་བཟུང་གི་ཉི་ཚེ་བ་ཡང་ཡོད་པས་དེའི་ཕྱིར་སྡོམ་མིན་གྱིས་ཚུལ་ཁྲིམས་ལ་གེགས་བྱེད་པ་དང་སྡོམ་པས་ཚུལ་འཆལ་ལ་(༦༢བ)
གེགས་བྱེད་པའང་ཡོད་པའི་ཕྱིར་རོ། །གཉིས་པ་ནི། སྡོམ་པ་མིན་པ་བྱ་བའམ། །ཁས་ལེན་པ་ལས་འཐོབ་པར་འགྱུར། །སྡོམ་པ་མིན་པ་ནི། རིགས་སུ་སྐྱེས་པ་གསོད་སྦྱོར་གྱི་བྱ་བ་བརྩམས་པའམ། གཞན་རིས་སུ་སྐྱེས་ན་བདག་ཀྱང་འཚོ་བ་འདིས་འཚོའོ་ཞེས་ཁས་ལེན་པ་ལས་ཐོབ་པར་འགྱུར་རོ། །གསུམ་པ་བར་མའི་ཐོབ་ཚུལ་ནི། ལྷག་མའི་རྣམ་རིག་མིན་ཞིང་དང་། །ལེན་དང་གུས་པར་བྱེད་པས་འཐོབ། །སྡོམ་པ་སྡོམ་མིན་གྱི་ལྷག་མ་བར་མ་དགེ་མི་དགེའི་རྣམ་པར་རིག་བྱེད་མིན་པ་ནི་ཀུན་ར་ཕུལ་བ་ལ་སོགས་རྫས་ལས་བྱུང་བའི་བསོད་ནམས་བྱ་བའི་དངོས་པོ་ལྟ་བུ་ཞིང་ལ་སྐྱེས་པ་དང་། སངས་རྒྱས་ལ་ཕྱག་མ་འཚལ་བར་དུ་མི་བཟའ་བ་དང་། ཆོས་སམ་ཟླ་གཅིག་གམ་ཟླ་ཕྱེད་ཅིང་རྟག་ཏུ་ཟས་དག་སྦྱིན་པར་བྱ་ཞེས་པ་དང་། མཎྜལ་བྱེད་པ་ལྟ་བུ་ཡིད་དམ་བཅས་ཏེ་ལེན་པ་དང་། དགེ་བའམ་མི་དགེ་བའམ། ཉོན་མོངས་དྲག་པོས་གུས་པར་བྱེད་པས་རིག་བྱེད་མ་ཡིན་པ་འཐོབ་བོ། །གསུམ་པ་རྒྱུ་གང་གིས་གཏོང་བ་ལ། སྡོམ་པའི་གཏོང་རྒྱུ། སྡོམ་མིན་གྱི་གཏོང་རྒྱུ། བར་མའི་གཏོང་རྒྱུ། ཆོས་གཞན་གྱི་གཏོང་རྒྱུའོ། །དང་པོ་ལ། སོ་ཐར་དང་། བསམ་གཏན་དང་། ཟག་མེད་ཀྱི་གཏོང་རྒྱུའོ། །དང་པོ་ལ། སྤྱིར་བསྟན་པ་དང་། འདོད་པ་མི་འདྲ་བ་བཀོད་པའོ། །དང་པོ་ནི། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །སོ་སོར་ཐར་པའི་འདུལ་བ་གཏོང་། །བསྙེན་གནས་མ་གཏོགས་པའི་སོ་ཐར་གྱི་སྡོམ་པ་ནི། མི་བརྡ་ཕྲད་པའི་དྲུང་དུ་བསླབ་གཞི་རྣམས་བསམ་པ་ཐག་པ་ནས་སླར་ཕུལ་བས་གཏོང་སྟེ། ཇི་སྲིད་འཚོའི་བར་དུ་སྲོག་གཅོད་པ་སྤོང་ངོ་ཞེས་ཡང་དག་པར་བླངས་པ་དང་འགལ་བའི་རྣམ་པར་རིག་བྱེད་བསྐྱེད་པའི་ཕྱིར་དང་། ཤི་འཕོས་པ་རིས་མཐུན་པ་བཏང་བས་གཏོང་སྟེ། རྟེན་གང་གིས་སྡོམ་པ་བླང་པའི་རྟེན་དེ་ཤི་བས་བོར་བའི་ཕྱིར་དང་། སྐྱེས་པ་དང་བུད་མེད་ཀྱི་མཚན་གཉིས་དག་ནི་གཅིག་ཅར་དུ་བྱུང་བས་གཏོང་སྟེ། སྐྱེས་པའམ་བུད་མེད་ཀྱི་རྟེན་གང་གིས་སྡོམ་པ་བླང་བའི་ལུས་ཀྱི་རྟེན་སྐྱེས་པའམ་བུད་མེད་དེ་ཉམས་པའི་ཕྱིར་དང་། དགེ་བའི་རྩ་བ་ཀུན་ཏུ་ཆད་པ་ལས་གཏོང་སྟེ། (༦༣ན)
སྡོམ་པའི་ཞིའམ་དགེ་རྩ་གསུམ་འཆད་པའི་ཕྱིར་དང་། བསྙེན་གནས་ཀྱི་སྡོམ་པ་ནི་རྒྱུ་དེ་དག་དང་མཚན་མོ་འདས་པ་ལས་གཏོང་སྟེ། ཉིན་མཚན་གཅིག་པུ་དེ་སྲིད་དུ་འཕངས་པའི་ཕྱིར། སོ་སོར་ཐར་པའི་སྡོམ་པ་ཆོས་ཅན། ཁྱོད་ལ་འདུལ་བ་ཞེས་བརྗོད་དེ། ཁྱོད་ཀྱིས་དབང་པོ་འདུལ་བར་བྱེད་པའི་ཕྱིར་རོ། །གཞན་ཡང་འདུལ་བ་ནས་མཚན་ལན་གསུམ་དུ་གྱུར་པ་དང་། བསྙེན་རྫོགས་ཀྱི་སྡོམ་པ་ལོ་ཉི་ཤུ་མ་ལོན་ཕ་ལ་མ་ལོན་པར་ཤེས་པའང་གཏོང་རྒྱུར་བཤད་དོ། །གཉིས་པ་འདོད་པ་མི་འདྲ་བ་བཀོད་པ་ལ། རྩ་ལྟུང་གཏོང་རྒྱུར་འདོད་པ། དམ་ཆོས་ནུབ་པ་དེར་འདོད་པ། ཁ་ཆེ་བས་རྩ་ལྟུང་གཏོང་རྒྱུར་མི་འདོད་པའོ། །དང་པོ་ནི། ཁ་ཅིག་ལྟུང་བར་འགྱུར་ལས་སྨྲ། །ཁ་ཅིག །འདིས་ལྟུང་བ་བྱེད་པས་ན་ལྟུང་བར་འགྱུར་བ་བཞི་པོའི་གཞི་གང་ལས་གང་ཡང་རུང་བ་ཞིག་གི་དགེ་སློང་དང་དགེ་སྦྱོང་གི་སྡོམ་པ་གཏོང་ངོ་ཞེས་སྨྲའོ། །གཉིས་པ་ནི། གཞན་དག་དམ་ཆོས་ནུབ་པ་ལས། །གཞན་དག་དམ་ཆོས་ནུབ་པ་ལས་སྡོམ་པ་གཏོང་སྟེ། བསླབ་མཚམས་ཐམས་ཅད་དང་གསོ་སྦྱོང་སོགས་ལས་ཀྱི་མཐའ་མེད་པར་འགྱུར་བའི་ཕྱིར་ཞེས་ཟེར་རོ། །གསུམ་པ་ནི། ཁ་ཆེ་རྣམས་ནི་བྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཁ་ཆེ་བྱེ་སྨྲ་རྣམས་ནི་རྩ་བའི་ལྟུང་བ་བྱུང་བ་ལ་སྟེ་ཚུལ་ཁྲིམས་ཉམས་པའི་རྒྱུད་ལ་སྡོམ་པ་གཏོང་བ་མེད་དོ། །འདུལ་བ་ལས། གལ་ཏེ་དགེ་སློང་ཚུལ་ཁྲིམས་འཆལ་བ་ཞིག་དགེ་སློང་མ་ལ་རྗེས་སུ་སྟོན་ན་དགེ་འདུན་གྱི་ལྟུང་བྱེད་དུ་འགྱུར་རོ། །ཞེས་གསུངས་པས། འཆལ་ཚུལ་ནི་ཕས་ཕམ་བྱུང་བ་ལ་བརྗོད་དེ། ཕས་ཕམ་མ་བྱུང་བ་ལ་ནི་བཟློག་སྟེ་རང་བཞིན་དུ་གནས་པའི་ཚུལ་ཁྲིམས་དང་ལྡན་པ་ཞེས་གསུངས་པའི་ཕྱིར། ཚུལ་འཆལ་ལ་དགེ་སློང་གི་དངོས་པོ་ཡོད་པས་དེ་ལ་ལྟུང་བྱེད་དུ་བཞག་གི། མེད་ན་དེ་ལ་མི་འཇོག་པའི་ཕྱིར། ཡང་ལུང་ལས། ཕས་ཕམ་པ་ཞིག་བྱུང་ཟེར་བས་གཅིག་ཉམས་ཀྱང་གཞན་ཡོད་པར་མངོན་ཏེ། མེད་ན་སྔར་གྱི་(༦༣བ)
དེས་སྡོམ་མེད་དུ་སོང་ཙམ་ན་ཕྱི་མ་ཀུན་ལ་ཕམ་པ་མི་འོང་བའི་ཕྱིར་དང་། འོ་ན་དེའི་ཕྱིར་ཁྱིམ་པས་བརྐུས་པ་ལའང་ཕམ་པ་འོང་བར་འགྱུར་རོ། །ཡང་དགེ་སློང་གཅིག་ལ་རྩ་བ་གཅིག་ཉམས་པ་ལ། རྩ་བ་གཅིག་ཉམས་པ་དེ་གཞི་བྱས་ནས་རྩ་བ་གཞན་ལ་སྒྲོ་བཏགས་ནས་ཚུལ་ཁྲིམས་འཆལ་བ་དེ་ལ་ལྟུང་བྱེད་དུ་འགྱུར་ཟེར་བས་ཚུལ་ཁྲིམས་ཡོད་པར་མངོན་ཏེ། མེད་ན་དེ་ལ་ལྟུང་བྱེད་མི་འོང་བའི་ཕྱིར་དང་། འོང་ན་དེའི་ཕྱིར་ཁྱིམ་པ་གཅིག་གིས་རྩ་བ་གཅིག་ཉམས་པ་དེ་རྩ་བ་གཞན་ལའང་སྒྲོ་བཏགས་ནས་ལྟུང་བྱེད་འབྱུང་བར་ཐལ་ལོ། །རིགས་པ་ནི། རྩ་བ་གཅིག་ཉམས་པ་ཆོས་ཅན། སྡོམ་པ་ཐམས་ཅད་གཏོང་བ་མིན་ཏེ། ཕྱོགས་གཅིག་ཉམས་པའི་ཕྱིར། འོན་ཀྱང་གྲོགས་མེད་པས་དུམ་གཅིག་གིས་དམན་པར་འགྱུར་ལ། ཡང་ན་ཕྱོགས་གཅིག་ཉམས་པས་ཕྱོགས་གཞན་མི་གཏོང་བར་མ་ཟད། སྲོག་གཅོད་སྤོང་བ་རང་ལ་ཡང་མཐའ་དག་མ་ཉམས་ཏེ། ལྷ་སྦྱིན་ལ་བལྟོས་པའི་ཤོར་ཀྱང་གཞན་ལ་བལྟོས་ཏེ་མ་ཤོར་བའི་ཕྱིར། དེས་ན་ཕམ་པ་མ་གཏོགས་དགེ་འདུན་ལྷག་མ་སོགས་བྱུང་བ་ལ་ནི་ཚུལ་འཆལ་དུ་མི་བརྗོད་དོ། །འོ་ན་རྩ་ལྟུང་བྱུང་བ་ལ་ཚུལ་ཁྲིམས་དང་འཆལ་བའི་ཚུལ་ཁྲིམས་གཉིས་སུ་ཡོད་པར་འདོད་དེ། མི་འགའ་ལ་བུ་ལོན་ཀྱང་ཡོད། ནོར་ཡང་ཡོད་པ་བཞིན་ལྟུང་བྱེད་དེ་བཤགས་པར་བྱས་ན་ཚུལ་ཁྲིམས་དང་ལྡན་པ་ཡིན་གྱི། འཆལ་བ་མ་ཡིན་ཏེ། བུ་ལོན་གཅལ་ན་ནོར་ཡོད་པ་ཡིན་གྱི། བུ་ལོན་ཆགས་པ་མ་ཡིན་པ་བཞིན་ནོ་ཞེས་ཟེར་རོ། །ཕམ་པ་ལ་ནི་བཤགས་པས་ལྡང་བ་མེད་པ་མ་ཡིན་ནོ། །འོ་ན་བཅོམ་ལྡན་འདས་ཀྱིས་དགེ་སློང་མ་ཡིན། དགེ་སྦྱོང་མ་ཡིན། ཤཀྱཱའི་བུ་མ་ཡིན། དགེ་སློང་གི་དངོས་པོ་ལས་ཉམས་པར་འགྱུར། དེའི་དགེ་སྦྱོང་གི་ཚུལ་ཁྲིམས་ཞིག་པར་འགྱུར། ཉམས་(༦༤ན)
པ་དང་། བཅོམ་པ་དང་། ལྟུང་བ་དང་། ཕམ་པར་འགྱུར་ཞེས་གང་གསུངས་པ་ཇི་ལྟ་བུ་ཞེ་ན། དེ་ནི་ཉོན་མོངས་པ་སྤོང་བའི་དགེ་སློང་མ་ཐོབ་པ་ལས་ཉམས་པ་ཡིན་ཏེ། ལྟུང་བར་འགྱུར་བ་འབྱུང་བ་དེ་ནི་བདེན་པ་མཐོང་བའི་སྐལ་བ་མེད་པ་ཉིད་ཀྱིས་དོན་དམ་པའི་དགེ་སློང་དུ་མ་གྱུར་པའི་ཕྱིར། དེ་སྐད་དུ་གསུངས་སོ་ཞེ་ན། མདོ་སྡེ་པས། ཁྱེད་ཀྱི་ལུགས་འདི་ནི་མི་འཐད་དེ། སྔར་ཁྱེད་ཀྱིས་དྲང་བའི་ཕམ་པ་བཞི་ག་བྱུང་བྱ་བའི་ལུང་དེའང་རེས་འཇོག་ཏུ་ཕྱིས་ཀྱང་ཕམ་པ་འོང་ན་སྟེ་ཚུལ་ཁྲིམས་ཡོད་དུ་རུང་བ་ལ་དུས་གཅིག་ཏུ་བྱུང་བ་ཡིན་ཏེ། རང་གི་བུད་མེད་ལ་བགྲོད་པའི་དུས་དེ་གར་སྲོག་གཅོད་དུ་ཡང་བཅུགམ་བྱིན་པར་ལེན་དུ་ཡང་བཅུགརྫུན་ཀྱང་སྨྲར་བཅུག་པས་དུས་གཅིག་ཏུ་བྱུང་བ་ཡིན། སྒྲོ་བཏགས་པ་དང་དགེ་སློང་མ་ལ་སྟོན་པ་དེ་ཀུན་གང་ཟག་གཞན་ཞིག་གིས་དགེ་སློང་མིན་པའི་ཚུལ་འཆལ་དེ་ལ་དགེ་སློང་དུ་གོ་ནས་ལྟུང་བྱེད་དུ་གོ་བའམ། ཡང་ན་དེ་ལྟ་བུ་དེ་ཡང་ཚུལ་ཁྲིམས་དང་ལྡན་པ་སྐད་དུ་བསྟན་པ་ནི། གཞན་མ་ཉམས་པ་ལ་ཕན་ཡོན་དུམ་རེའང་ཡོད་པར་སྟོན་པ་ལ་དགོངས་སོ། །ཁྱེད་ཀྱིས་བཅོམ་ལྡན་འདས་ཀྱིས་དགེ་སློང་མིན་དགེ་སྦྱོང་མིན་ཅེས་གསུངས་པའི་འབྲུ་གནོན་ནི་ཐུག་ཐུབ་ཏུ་སྨྲ་བ་ཡིན་ཏེ། སྒྲ་ཐད་སོ་དེ་ངེས་དོན་ཡིན་པ་གང་ཞིགདེ་དོན་དམ་པའི་དགེ་སློང་མིན་པར་དྲངས་པའི་ཕྱིར། རྟགས་དང་པོ་གྲུབ་སྟེ། དེ་ལྟར་མ་ཡིན་ན་རྩ་བའི་ལྟུང་བས་ཀྱང་དགེ་སློང་ཉིད་ཉམས་པར་མི་འགྱུར་སྙམ་དུ་ལྟུང་བ་དེ་དག་བྱེད་པའི་ངན་མིག་བསྐྱེད་པའི་ཕྱིར་རོ། །དེས་ན་ལུང་འདི་སྒྲ་ཇི་བཞིན་པའི་ངེས་དོན་ཡིན་ཏེ། གསོལ་བཞིའི་ལས་ཀྱི་དགེ་སློང་ཚུལ་ལྡན་གྱི་སྡོམ་པ་གཏོང་པའི་སྐབས་དོན་ཡིན་པའི་ཕྱིར་དང་། དེ་ལས་གཞན་པ་བསྙེན་པར་མ་རྫོགས་(༦༤བ)
ཀྱང་མིང་དགེ་སློང་དུ་བཏགས་པ་དང་། མི་ཚངས་པར་སྤྱོད་པ་ཚུལ་འཆལ་སོགས་ཁས་འཆེ་བའི་དགེ་སློང་དང་། ཟས་འཚོ་བའི་ཕྱིར་རབ་ཏུ་བྱུང་ནས་སྤྲང་བའི་ཕྱིར་སློང་བའི་དགེ་སློང་དང་། ཉོན་མོངས་བཅོམ་པའི་དགེ་སློང་གཏོང་བ་བཞི་ལ་དགོངས་པ་མ་ཡིན་པའི་ཕྱིར་རོ། །ལུང་དེ་དོན་དམ་པའི་དགེ་སློང་གཏོང་བ་ལ་གསུངས་པ་མིན་ཏེ། ཚུལ་འཆལ་དེ་སྔོན་དོན་དམ་པའི་དགེ་སློང་དུ་མ་གྱུར་པའི་ཕྱིར། ཕྱོགས་གཅིག་ཉམས་པས་ཀུན་གཏོང་བ་རིགས་པར་ཐལ། སྟོན་པ་ཉིད་ཀྱིས་ཤིང་ཏ་ལའི་མགོ་བཅད་ན་འཕེལ་དུ་མི་རུང་བའི་དཔེ་དང་བཅས་ནས་གཅིག་བཏང་བས་ཀུན་གཏོང་བར་གསུངས་པའི་ཕྱིར་རོ། །མདོར་ན། དགེ་སློང་གི་དངོས་པོའི་མཚམས་འཇིག་བྱེད་རྩ་ལྟུང་ལྕི་བ་བྱུང་ན་ཆོས་ཅན། སྡོམ་པ་ཟད་པ་གཏོང་བར་རིགས་ཏེ། ཁྲེལ་མེད་པ་ཤས་ཆེན་པོ་དང་ལྡན་པས་སྡོམ་པའི་རྩ་བ་ཆད་པའི་ཕྱིར། ཚུལ་འཆལ་ལ་དགེ་སློང་གི་དངོས་པོ་ཅི་འདྲ་ཞིག་ཡོད་དུ་རུང་སྟེ་མི་རུང་བར་ཐལ། སྟོན་པས་གང་ལ་དགེ་འདུན་གྱི་ཞལ་ཟས་དང་། གཙུག་ལག་ཁང་དག་ལ་ཁམ་གཅིག་དང་། གོམ་པ་གཅིག་དོར་བའི་ཕྱོགས་ལོངས་སྤྱོད་པར་ཡང་མ་གནང་བས་དགེ་སློང་རྣམ་དག་ལས་ཆོས་དང་ཟང་ཟིང་གི་ལོངས་སྤྱོད་ཐམས་ཅད་ལས་བཀར་བའི་ཕྱིར་དང་། དགེ་སློང་མིན་ལ་དགེ་སློང་དུ། སྨྲ་བ་པྲེ་ད་བསལ་བར་གྱིས། །ཤིང་རུལ་དག་ནི་སྤང་བར་གྱིས། །སྙིང་པོ་མེད་པར་དོར་བར་གྱིས། །ཞེས་གསུངས་པའི་ཕྱིར། པྲེ་ད་ནི། ནས་འདྲ་བ་ཞིག་གིས་ནས་མ་རུང་བར་བྱེད་པ་དེ་བཞིན་དུ་དགེ་སློང་མ་ཡིན་པ་དགེ་སློང་གི་ཤ་ཚུགས་ཅན་དེ་དོར་དགོས་པར་བསྟན་ཏོ། །བྱེ་སྨྲས། ཚུལ་འཆལ་ལ་དགེ་སློང་གི་སྡོམ་པ་ཅི་འདྲ་ཞིག་ཡོད་ཀྱང་རུང་ཆོས་ཅན། དགེ་སློང་གི་དངོས་པོ་ནི་ཡོད་དེ། བཅོམ་ལྡན་(༦༥ན)
འདས་ཀྱིས། དགེ་སྦྱོང་བཞི་སྟེ་ལྔ་པ་མེད། །ལམ་གྱིས་རྒྱལ་དང་ལམ་སྟོན་དང་། །ལམ་གྱིས་འཚེ་དང་ལམ་སུན་འབྱིན། །ཅེས་གསུངས་པའི་ཕྱིར། ཁྱབ་པ་ཡོད་དེ། ལམ་སུན་འབྱིན་པའི་དགེ་སློང་ཚུལ་འཆལ་ལ་བཤད་པའི་ཕྱིར་དང་། ལམ་གྱིས་འཚོ་བ་ཚུལ་ལྡན་དང་། ལམ་སྟོན་སངས་རྒྱས་དང་། ལམ་གྱིས་རྒྱལ་བ་སློབ་པ་དང་། མི་སློབ་པ་ལ་བཤད་པའི་ཕྱིར་རོ་ཞེ་ན། ཚུལ་འཆལ་ལ་དགེ་སློང་དུ་གསུངས་པ་ཆོས་ཅན། དགེ་སློང་ཡིན་ནས་དེར་བསྟན་པ་མ་ཡིན་ཏེ། དགེ་སློང་གི་ཤ་ཚུགས་ཙམ་ལ་དགོངས་ཏེ་དེར་བསྟན་པའི་ཕྱིར། ཤིང་ཚིག་པ་ལ་ཤིང་དང་། མཚེའུ་སྐམ་པ་ལ་མཚེའུ་དང་། ནེ་ཙོའི་གཟུགས་ཀྱི་མཆུ་ལ་ནེ་ཙོའི་མཆུ་དང་། ས་བོན་རུལ་བ་ལ་ས་བོན་དང་། མགལ་མེ་འཁོར་བ་ལ་འཁོར་ལོ་དང་། སེམས་ཅན་ཤི་བའི་རོ་ལ་སེམས་ཅན་ཞིག་འདུག་གོ་ཞེས་བརྗོད་པ་བཞིན་ནོ། །བྱེ་སྨྲས། འཆལ་བའི་ཚུལ་ཁྲིམས་ཀྱིས་དགེ་སློང་མ་ཡིན་པ་ཁོ་ནར་འགྱུར་ན་ནི་ཆོས་ཅན། བསླབ་བྱིན་དགེ་སློང་མེད་པར་ཐལ། དེ་བསྙེན་པར་རྫོགས་པ་ཡང་མི་བྱེད་ལ། དེ་དགེ་སློང་ཡང་མ་ཡིན་པའི་ཕྱིར་ཞེས་ཟེར་རོ། །དེ་ལ་ཁོ་བོ་ཅག་མདོ་སྡེ་པས། བསླབ་བྱིན་དགེ་སློང་མ་ཡིན་པའི་རྟགས་ཕྱི་མ་ཆོས་ཅན། འཆལ་ཚུལ་གྱིས་དགེ་སློང་མིན་པར་བྱས་པའི་སྟེང་དུ་མ་གྲུབ་སྟེ། མི་ཚངས་པར་སྤྱོད་པའི་ལྟུང་བ་བྱུང་བའི་མོད་ཁོ་ན་ལ་ཕས་ཕམ་པར་མི་འཇོག་པའི་ཕྱིར། བཅབ་སེམས་ཡོད་ན་ཕས་ཕམ་པར་འགྱུར་བའི་ཕྱིར་ཚུལ་ཁྲིམས་འཆལ་པ་ཅན་ཡིན་ལ། དེ་མེད་ན་ནི་དེའི་ཕྱིར། དེ་ཚུལ་འཆལ་མིན་པས་བསླབ་སྦྱིན་དགེ་སློང་དུ་འཐད་པ་འདི་ནི་ཆོས་ཀྱི་རྗེ་རིན་པོ་ཆེ་ཤཱཀྱ་ཐུབ་པས་རྣམ་པར་བཞག་གོ། །འོ་ན་ཕས་ཕམ་གྱི་དགེ་སློང་གཏོང་པ་ན་ཆོས་ཅན། དེ་ལྟ་བུ་དེ་རབ་ཏུ་དབྱུང་རིགས་པར་ཐལ། དེ་ལ་འཆལ་(༦༥བ)
ཚུལ་གྱི་སྡོམ་པ་སྔ་མས་སྡོམ་པ་ཕྱི་མ་སྐྱེ་བའི་གོ་བཀག་པ་མེད་པའི་ཕྱིར་ཞེ་ན། ཁྱབ་པ་མེད་དེ། དེ་རབ་ཏུ་མི་འབྱུང་བ་འཆལ་ཚུལ་གྱི་གོ་བཀག་པའི་ཆ་ནས་རབ་ཏུ་མི་འབྱིན་པ་མ་ཡིན་ལ། དེ་རྒྱུད་ཁྲེལ་མེད་ཤས་ཆེན་པོས་ཉམས་པར་བྱས་པས་སྡོམ་པའི་སྐལ་བ་མེད་པས་ན་རབ་ཏུ་དབྱུང་བ་མ་ཡིན་པའི་ཕྱིར། དེས་ན་ཕས་ཕམ་ཅན་ནི་ཆོས་ཅན། བསླབ་པ་མ་ཕུལ་ན་རབ་ཏུ་མི་འབྱིན་པ་ཨ་ཅང་ཆེ་བར་མ་ཟད། སྡོམ་པ་ཕུལ་ཡང་རུང་། རབ་ཏུ་དབྱུང་མི་རིགས་ཏེ། རྒྱུད་ཁྲེལ་མེད་ཆེན་པོས་ཉམས་ནས་སྡོམ་པའི་སྐལ་བ་མེད་པའི་ཕྱིར། མདོར་ན་ཕས་ཕམ་ཅན་དགེ་སློང་ཡིན་པར་སྒྲུབ་པ་འདི་ལ་ནི་འབད་པས་སྒྲུབ་མི་རིགས་ཏེ། དེ་དགེ་སློང་མིན་པའི་ཕྱིར། ནན་གྱིས་ཡིན་ནོ་ཞེ་ན། ཁྱེད་འདོད་པའི་དགེ་སློང་དེ་འདྲ་ལ་ང་ཕྱག་འཚལ་ལོ་སྟེ་མི་འཚལ་བའོ། །དམ་ཆོས་ནུབ་པ་ན། སྔོན་མེད་པའི་སྡོམ་པ་ཐོབ་པ་ནི་མེད་དེ། འདུལ་བའི་ལས་ནུབ་པའི་ཕྱིར། ཐོབ་ཟིན་གཏོང་བ་ནི་མེད་དེ། གཏོང་རྒྱུས་གཏོང་བར་མ་བྱས་པའི་ཕྱིར། སྨྲས་པ། བདག་གིས་འཁོར་བའི་མནག་པ་མ་བཟོད་ནས། །གཅིག་ཏུ་ཞི་བའི་གནས་ལ་ཕྱོགས་གྱུར་ཀྱང་། །ཐོག་མེད་དུས་ཀྱི་མ་རྒན་ཚན་པོ་ཆེ། །སྡུག་བསྔལ་དང་དྲག་མྱོང་འདིར་མ་བཟོད་ནས། །བླ་མེད་རྫོགས་སངས་ཀྱི་གོ་འཕང་འདོད། །དེ་ཕྱིར་བདག་གིས་བསྟན་བཅོས་ཆེ་འདིར་འབད། །གཉིས་པ་བསམ་གཏན་གྱི་གཏོང་རྒྱུ་ལ། དངོས་དང་། ཞར་བྱུང་ངོ་། །དང་པོ་ནི། བསམ་གཏན་གཏོགས་པའི་དགེ་བ་ནི། །ས་འཕོས་ཉམས་པ་དག་གིས་གཏོང་། །བསམ་གཏན་དུ་གཏོགས་པའི་དགེ་བ་ཐམས་ཅད་ནི་འོག་ས་ནས་གོང་སར་སྐྱེས་པ་དང་། གོང་ས་ནས་འོག་སར་སྐྱེས་པ་ན་རིམ་པ་ལྟར་འོག་ས་དང་གོང་སས་བསྡུས་པ་གཏོང་བས་ན་ས་འཕོས་པ་དང་། སྙོམས་པར་འཇུག་པ་དེ་ཐོབ་ན་ཡང་ཉམས་ཏེ་རྒྱུ་གཉིས་པོ་དག་གིས་གཏོང་ངོ་། །འདི་ལ་ཡང་རྟེན་འདོད་(༦༦ན)
ཁམས་པའི་རྟེན་དེ་ལ་དང་པོའི་སེམས་ཐོབ་པ་ཤི་ནས་དང་པོར་སྐྱེ་བ་དེ་ནི་རང་སར་སོང་བ་ཡིན་གྱི། ས་འཕོས་པ་མ་ཡིན། འོ་ན་དང་པོའི་སེམས་ཐོབ་པ་དང་པོ་ལས་འདོད་ཆགས་དང་བྲལ་ནས་ཤི་ནས་གཉིས་པ་ལྟ་བུར་སྐྱེས་ན་ས་འཕོས་པ་ཡིན། དང་པོར་སྐྱེས་པ་དེ་ཤི་འཕོས་ནས་གཉིས་པར་སྐྱེས་པ་ནི་ས་འཕོས་པ་ཡིན་ནོ། །ཡང་དཔལ་ཤཱཀྱ་མཆོག་ལྡན་ན་རེ། འདོད་པའི་རྟེན་ལ་དངོས་གཞིའི་སྙོམས་འཇུག་བརྒྱད་ཀ་མངོན་དུ་བྱས་པ་ཞིག་གི་འོག་ས་འོག་སའི་ཆགས་བྲལ་ལས་ཉམས་ནས། འོག་སའི་དངོས་གཞི་ཕན་ཡོན་གྱི་ཡན་ལག་དང་དམིགས་རྣམ་མངོན་དུ་བྱས་པ་དེའི་ཚེ་འོག་སར་འཕོས་པར་ཡིན་ཏེ། གོང་མའི་དགེ་བ་དག་པ་བ་གཏོང་ཞིང་། འོག་མའི་དངོས་གཞི་རྒྱུད་ལ་སྐྱེས་པའི་ཕྱིར་ཞེས་སྨྲ་མོད། །སྐབས་དོན་མིན་པས་འཐད་པ་མིན་ཏེ། ཁྱེད་ཀྱི་ས་འཕོས་པའི་འཇོག་མཚམས་དེ་ནི་རྒྱུ་སྙོམས་འཇུག་གི་བསམ་གཏན་གཏོང་མཚམས་ལ་ཡིན་ན་འཐད་དུ་ཆུག་ཀྱང་། འདིར་ནི་འབྲས་བུ་སྐྱེ་བའི་བསམ་གཏན་གཏོང་བའི་སྐབས་ཡིན་པས་མི་འཐད་པའི་ཕྱིར་རོ། །གཞན་ཡང་ཁྱེད་ཀྱིས་བསམ་གཏན་དང་པོ་པའི་ས་པ་གཉིས་པར་ས་འཕོས་པ་དེ་བསམ་གཏན་གཉིས་པར་སྐྱེ་བ་མ་བླངས་གོང་དུ་ས་འཕོ་དགོས་ཏེ། འོག་སའི་རྟེན་ལ་གོང་མའི་དངོས་གཞི་མངོན་དུ་བྱེད་དགོས་པའི་ཕྱིར། ཞེས་ཟེར་བ་ཡང་སྙིང་པོ་མེད་པ་སྟེ། འོ་ན་འདོད་པའི་རྟེན་ཅན་ལ་སྙོམས་འཇུག་བརྒྱད་ཀ་མངོན་དུ་བྱས་པ་དེ་གོང་མ་གོང་མ་ལས་ཉམས་ནས་འོག་མ་འོག་མར་ལྟུང་བ་དེའི་ཚེ་ཆོས་ཅན། བསམ་གཏན་གཉིས་པའི་ས་མ་འཕོས་བཞིན་དུ་བསམ་གཏན་དང་པོའི་ས་པར་འཕོས་པར་ཐལ། བསམ་གཏན་དང་པོའི་ས་པ་མ་འཕོས་པར་བསམ་གཏན་(༦༦བ)
གཉིས་པའི་ས་ཡང་འཕོས་པའི་ཕྱིར། རྟགས་ཁྱབ་ཁས། འདོད་ན་ས་འཕོས་པ་ལ་གོང་འོག་ཏུ་སྐྱེ་བ་ལེན་དགོས་པར་བཤད་པ་དང་འགལ། འཁོར་གསུམ། མདོར་ན། ས་འཕོས་པས་གཏོང་བ་ནི། གོང་འོག་ཏུ་སྐྱེ་བ་བླངས་པས་གཏོང་བ་དང་། འཆི་འཕོ་བས་གཏོང་བ་གཉིས་གནད་མི་གཅིག་པ་ལ། ཁྱེད་ཅག་དེ་གཉིས་གནད་གཅིག་པར་འགྲོ་ཡིས་དོགས་ནས་བརྒལ་བརྟགས་མང་དུ་བྱས་པ་ཐམས་ཅད་ཕྱོགས་འདི་ཉིད་མ་མཐོང་བའི་རྣམ་འགྱུར་ཁོ་ནར་བས་སོ། །ཤི་འཕོས་པས་ཅུང་ཟད་གཏོང་བར་འགྱུར་བའི་ཅུང་ཟད་ནི་འདོད་པའི་རྟེན་ལས་གོང་མའི་ཉེར་བསྡོགས་མངོན་དུ་བྱས་པ་དང་། འཕགས་རྒྱུད་ལ་བསམ་གཏན་བཞི་པའི་དངོས་གཞི་ལྟ་བུ་ལ་བརྟེན་པའི་ངེས་འབྱེད་ཆ་མཐུན་ནི་ས་མ་འཕོས་པས་མི་གཏོང་ཡང་། སོ་སོ་སྐྱེ་བོའི་ངེས་འབྱེད་བཟོད་པའི་བར་བསྐྱེད་པ་དེ་ནི་ས་འཕོ་བ་མེད་ཀྱང་། འདོད་པའི་ཁམས་སུ་ཤི་ནས་དེ་ཉིད་དུ་སྐྱེ་བ་ན་གཏོང་ངོ་། །དེས་ན། འཕགས་པས་དེ་དག་ས་བོར་བས། །གཏོང་ངོ་འཕགས་མིན་འཆི་བས་སོ། །ཞེས་བཤད་པའི་ཕྱིར། འོན་ཀྱང་དམིགས་ཕྱེད་དགོས་ཏེ། སོ་སྐྱེའི་སྦྱོར་ལམ་བཟོད་ཆེན་དང་ཆོས་མཆོག་ལ་གནས་བཞིན་དུ། འཆི་བ་ནི་མེད་དེ། དེ་ནི་སྐད་ཅིག་གཅིག་དེ་ལས་མེད་པས་དེའི་སྐད་ཅིག་གི་གོ་སར་འཆི་སྲིད་ཀྱི་སྐད་ཅིག་མི་ཤོང་བའི་ཕྱིར། བཟོད་འབྲིང་མན་ཆད་ནི་ཉེར་བསྡོགས་ལ་གནས་པ་ལྟ་ཅི་སྨོས། དངོས་གཞི་ལ་བརྟེན་པ་ཡིན་ཀྱང་ངེས་ཆ་ནི་གཏོང་ལ། དངོས་གཞི་ནི་མི་གཏོང་སྟེ། རང་ས་ནས་རང་སར་སྐྱེ་བ་གཏོང་རྒྱུ་མ་ཡིན་པའི་ཕྱིར། ངེས་ཆ་ནི་འཆི་འཕོ་བ་ཉིད་ཀྱིས་གཏོང་སྟེ། དངོས་གཞི་ཅན་ཤི་འཕོས་ནས་གོང་མར་སྐྱེ་བ་ལས་འོས་མེད་ལ། གོང་མའི་རྟེན་ལ་ངེས་འབྱེད་ཆ་མཐུན་མི་སྲིད་པའི་ཕྱིར་རོ། །གཉིས་པ་ནི། དེ་བཞིན་གཟུགས་མེད་གཏོགས། གཟུགས་གཏོགས་ཀྱི་དགེ་བས་འཕོས་པ་དང་། (༦༧ན)
ཉམས་པས་གཏོང་བ་དེ་བཞིན་དུ་གཟུགས་མེད་དུ་གཏོགས་པའང་དེ་དག་གིས་གཏོང་ངོ་། །འདིར་གཟུགས་མེད་ཉེར་བསྡོགས་ཤི་འཕོས་ནས་གཏོང་བའི་རྣམ་གཞག་མ་བྱས་པ་ནི་ཡོངས་སུ་ཉམས་པའི་ནང་དུ་བསྡུས་པ་ཡིན་ལ། སྦྱོར་ལམ་ནི་གཟུགས་མེད་ལ་བརྟེན་མི་སྲིད་པས་ངེས་འབྱེད་ཀྱང་འདིར་འཆི་འཕོ་བས་གཏོང་བར་འཆད་མི་དགོས་པའི་ཕྱིར་རོ། །གསུམ་པ་ཟག་མེད་ཀྱི་གཏོང་རྒྱུ་ནི། འཕགས་པ། །འབྲས་བུ་ཐོབ་སྦྱངས་ཉམས་པ་ལས། །འཕགས་པའི་དགེ་བ་ཟག་མེད་ནི། དཔེར་ན། ཕྱིར་འོང་གི་འབྲས་བུ་ཐོབ་པ་ན་རྒྱུན་དུ་ཞུགས་པའི་སྦྱོར་བ་དང་། བར་ཆད་མེད་པ་དང་རྣམ་པར་གྲོལ་བའི་ལམ་སྔ་མ་གཏོང་བར་འགྱུར་རོ། །དབང་པོ་སྦྱངས་པ་ལས་ནི་དབང་པོ་རྟུལ་པོའི་ལམ་གཏོང་བར་འགྱུར་རོ། །ཕྱིར་མི་འོང་གི་འབྲས་བུ་ལས་ཡོངས་སུ་ཉམས་པ་ལས། ཕྱིར་མི་འོང་གི་འབྲས་བུ་གཏོང་བ་སྟེ། དེ་ཡང་ཕྱིར་མི་འོང་ཙམ་ནི་འདོད་པའི་དགུ་པ་མན་ཆད་སྤངས་པ་ཙམ་ཡིན་གྱི། དེའང་ཉམས་ནས་འདོད་པའི་ཉོན་མོངས་ཀྱིས་གོས་པ་དེ་ནི་ཕྱིར་མི་འོང་ཙམ་ལས་ཉམས་པ་ཡིན་གྱི། ཕྱིར་མི་འོང་ཁྱད་ཅན་ལས་ཉམས་པ་མིན་ཏེ། ཕྱིར་མི་འོང་ཁྱད་ཅན་མ་ཐོབ་པས་དེ་ལས་ཉམས་རྒྱུ་མེད་པའི་ཕྱིར། ཕྱིར་མི་འོང་ཁྱད་ཅན་ནི། ཅི་ཡང་མེད་མན་ཆད་ལ་འདོད་ཆགས་དང་བྲལ་བ་ཡིན་པ་ལ་དེ་ལས་ཉམས་ཏེ་བསམ་གཏན་བཞི་པ་ལྟ་བུའི་ཉོན་མོངས་རྒྱུད་ལ་སྐྱེས་པ་དེ་ཕྱིར་མི་འོང་ཁྱད་ཅན་ལས་ཉམས་པ་ཡིན་གྱི། ཕྱིར་མི་འོང་ཙམ་པོ་ལས་ཉམས་པ་མིན་ཏེ། འདོད་པའི་དགུ་པ་སྤངས་པ་ལས་མ་ཉམས་པའི་ཕྱིར་རོ། །ཅི་ཡང་མེད་མན་ཆད་ཀྱི་འདོད་ཆགས་དང་བྲལ་བ་དེ་འདོད་པའི་ཉོན་མོངས་ཀྱིས་གོས་ན་ཕྱིར་མི་འོང་ཙམ་པོ་དང་ཁྱད་ཅན་གཉིས་ཀ་ལས་ཉམས་པའོ། །ཕྱིར་མི་འོང་གི་འབྲས་བུ་ཙམ་པོ་ནི་དྲུག་པ་སྤངས་པ་ཡིན་ལ། ཁྱད་ཅན་(༦༧བ)
ནི་བདུན་པ་དང་བརྒྱད་པ་སྤངས་བ་ཡིན་ནོ། །གཉིས་པ་སྡོམ་མིན་གྱི་གཏོང་རྒྱུ་ནི། སྡོམ་མིན་སྡོམ་པ་ཐོབ་པ་དང་། །ཤི་དང་མཚན་གཉིས་བྱུང་བ་ལས། །སྡོམ་མིན་ནི་སྡོམ་པ་ཐོབ་པས་གཏོང་བ་དང་སྟེ། དེ་ཡང་བསྙེན་གནས་དང་དགེ་བསྙེན་གྱི་སྡོམ་པ་ཐོབ་བས་སྡོམ་མིན་གཏོང་གི། དགེ་ཚུལ་དང་དགེ་སློང་གི་སྡོམ་པ་ཐོབ་པས་མི་གཏོང་སྟེ། སྔར་གྱི་གཉིས་པོས་བཏང་ཟིན་པའི་ཕྱིར། འདི་ཡང་ཚིག་གསུམ་རིམ་ནོད་ཀྱི་དབང་དུ་བྱས་པ་ལ་ཡིན་ལ། དེ་ལྟར་མིན་ན་ཕྱི་མ་གཉིས་ཀྱི་ཡང་སྡོམ་མིན་གཏོང་ངོ་། །སྡོམ་མིན་དེ་སོ་ཐར་གྱི་སྡོམ་པ་མ་ཐོབ་ཀྱང་བསམ་གཏན་གྱི་སྡོམ་པ་ཐོབ་ནས་གཏོང་བ་ཡོད་དེ། གང་ཟག་ཁ་ཅིག་ལ་སྔོན་གྱི་སྐལ་མཉམ་གྱི་རྒྱུས་བསམ་གཏན་གྱི་ཏིང་ངེ་འཛིན་ཐོབ་ན་དེས་སྡོམ་པ་མ་ཡིན་པ་གཏོང་། གང་ཟག་ཕྱི་རོལ་མུ་སྟེགས་པ་ཁ་ཅིག་ལ་སོ་ཐར་གྱི་སྡོམ་པ་མེད་ཀྱང་གཞན་གྱིས་ཐོབ་པ་ལ་བརྟེན་ནས་བསམ་གཏན་གྱི་ཏིང་ངེ་འཛིན་བསྐྱེད་ནས་བསམ་གཏན་གྱི་སྡོམ་པ་ཐོབ་ན་སྡོམ་མིན་གཏོང་ངོ་། །ཤི་དང་མཚན་གཉིས་བྱུང་བ་ལས་སྡོམ་མིན་གཏོང་སྟེ། ལུས་བོར་བ་དང་རྟེན་ཉམས་པའི་ཕྱིར་རོ། །མཚོན་དང་རྒྱ་མི་བྱ་བར་བསམ་པ་ཐག་པ་ནས་བོར་བ་ཆོས་ཅན། སྡོམ་མིན་ཆད་པ་མེད་དེ། སྡོམ་པ་ཐོབ་པ་མེད་པའི་ཕྱིར། དཔེར་ན། ནད་ཀྱི་གཞི་ཟས་མི་འཕྲོད་པ་ཡོངས་སུ་སྤངས་ཀྱང་། སྨན་མེད་བར་ནད་རྙིང་མི་བཟློག་པ་བཞིན་ནོ། །ཡང་སྡོམ་མིན་ཅན་ཞིག་གིས་བསྙེན་གནས་ཞག་གཅིག་སྲུངས་ནས། ཞག་གཉིས་ཕན་ཆད་དུ་དེ་སྡོམ་མིན་ཅན་ནམ། སྡོམ་ལྡན་ཅན་གང་ཡིན་ཅེ་ན། ཁ་ཅིག་ན་རེ། དེ་སྡོམ་མིན་ཅན་ཡིན་ཏེ། ཉ་སྟོང་ཚེས་བརྒྱད་འདས་མ་ཐག་རི་དྭགས་བསད་མནོ་བའི་ཕྱིར། ལྕགས་ཀྱི་ཐོ་ལུམ་འབར་བ་ཡང་གྲང་མ་ཐག་སྔོན་པོར་འགྱུར་བ་བཞིན་ནོ་ཞེས་ཟེར་རོ། །གཞན་དག་ན་རེ། བསྙེན་གནས་པ་དེ་ཞག་གཉིས་པ་ཕན་དུ་སྡོམ་མིན་ཐོབ་པ་ལ་(༦༨ན)
བོང་རྒྱ་འཆོར་བ་སོགས་སྦྱོར་བ་བྱེད་ན་སྡོམ་མིན་གྱི་རིག་མིན་ཐོབ་སྟེ། སྡོམ་མིན་ནི་རིག་བྱེད་ལ་རགས་ལུས་པའི་ཕྱིར་རོ་ཞེས་ཟེར་རོ། །གསུམ་པ་བར་མའི་གཏོང་རྒྱུ་ནི། བར་མ་ཤུགས་བླངས་བྱ་བ་དང་། །དོན་ཚེ་རྩ་བ་ཆད་པ་ལས། །སྡོམ་པ་དང་སྡོམ་མིན་གྱི་བར་པ་རིག་མིན་ཇི་ལྟར་གཏོང་ཞེས་འདྲི་བ་ཡིན་ལ། འདི་ལ་རིག་མིན་སྨོས་པས་གཞན་རིག་བྱེད་སྨོས་པ་ཡིན་ཟེར། ཡང་ཁ་ཅིག །བར་མའི་རིག་མིན་ནི། རང་ཀུན་ནས་སློང་བའི་རིག་བྱེད་འདས་པའི་ཐོབ་པས་གཏོང་ལ། འདིར་མ་སྨོས་པས་རིག་མིན་ཁོ་ན་སྨོས་པ་ཡིན་ནོ། །དེ་ཡང་འདོད་ལོག་མ་གཏོགས་རིག་མིན་དང་། དེ་ལ་གཉིས་ཀ་ཡོད་པར་བསྟན་པ་ལྟ་བུ་སྟེ། མི་དགེ་དྲུག་རྣམ་རིག་བྱེད་མིན། །གཅིག་ནི་རྣམ་གཉིས། ཞེས་པ་ལྟ་བུའོ། །བར་མ་རིག་མིན་ནི། རབ་ཏུ་དང་བ་དང་ཉོན་མོངས་པའི་ཤུགས་གང་གིས་རིག་བྱེད་མིན་པ་འཕངས་པ་དེ་ཆད་པས་གཏོང་སྟེ། རྫ་མཁན་གྱི་འཁོར་ལོ་དང་མདའི་འགྲོས་བཞིན་ནོ། །བླངས་པ་འདིས་ཆོག་གོ་ཞེས་ཡང་དག་པར་བླངས་པ་བཏང་བ་ལས་ཀྱང་གཏོང་ལ། ཇི་ལྟར་བླངས་པ་བཞིན་མི་བྱེད་དེ་བྱ་བ་འཆད་པ་ལས་ཀྱང་གཏོང་བ་དང་། དོན་མཆོད་རྟེན་དང་། ཀུན་ར་དང་། གཙུག་ལག་ཁང་དང་། མལ་ཆ་དང་། སྟན་དང་། གདོས་དང་། རྒྱ་དང་། མཚོན་དང་། དུག་ཆད་པས་ཀྱང་གཏོང་ངོ་། །ཚེ་ཆད་པས་ཀྱང་གཏོང་ངོ་། །དགེ་བའི་རྩ་བ་ཆད་པ་ལས་བར་མ་དགེ་བ་གཏོང་ངོ་། །འདོད་པའི་འདོད་ཆགས་དང་བྲལ་བ་ན་མི་དགེ་བའི་རྩ་བ་ཆད་པའི་ཕྱིར་བར་མ་མི་དགེ་བ་གཏོང་ངོ་། །བཞི་པ་ཆོས་གཞན་གྱི་གཏོང་རྒྱུ་ལ། གཟུགས་མིན་དགེ་བ་གཏོང་རྒྱུ། གཟུགས་མིན་ཉོན་མོངས་ཅན་གཏོང་རྒྱུའོ། །དང་པོ་ནི། འདོད་གཏོགས་དགེ་བ་གཟུགས་མིན་ནི། །རྩ་ཆད་གོང་དུ་སྐྱེས་པ་ལས། །འདོད་གཏོགས་ཀྱི་དགེ་བ་གཟུགས་ཅན་མིན་པ་ནི་དགེ་རྩ་ཆད་པ་དང་། གཟུགས་དང་གཟུགས་མེད་(༦༨བ)
པའི་ཁམས་གོང་དུ་སྐྱེས་པ་ལས་གཏོང་ངོ་། །རྒྱལ་པོའི་སྲས་ཀྱིས། ཡིད་མི་བདེའི་དབང་པོ་དགེ་བར་གྱུར་པ་ནི་འདོད་ཆགས་དང་བྲལ་ཀྱང་ཅུང་ཟད་གཏོང་བར་གསུང་ངོ་། །གཉིས་པ་ནི། ཉོན་མོངས་པ་ཅན་གཟུགས་མིན་ནི། །གཉེན་པོ་སྐྱེས་པས་རྣམ་ཉམས་འགྱུར། །ཁམས་གསུམ་པའི་ཉོན་མོངས་པ་ཅན་གཟུགས་ཅན་མིན་པ་ནི། འཇིག་རྟེན་དང་འཇིག་རྟེན་ལས་འདས་པ་སྤོང་བའི་ལམ་མཐོང་བ་དང་སྒོམ་པའི་ལམ་གྱིས་གཉེན་པོ་སྐྱེས་པས་ཉེ་བའི་ཉོན་མོངས་པ་འདི་དང་ལྷན་ཅིག་འབྱུང་བའི་ཐོབ་པ་སོགས་རྗེས་འབྲངས་དང་བཅས་པ་རྣམ་པར་ཉམས་པར་འགྱུར་རོ། །འདིར་ཉོན་མོངས་དང་ཉེ་ཉོན་ཐམས་ཅད་བསྡུ་བར་འདོད་ནས་ཉེ་ཉོན་སྨོས་ཏེ། བསྟན་བཅོས་ལས། རེ་ཞིག་ཉོན་མོངས་པ་གང་ཡིན་དེ་དག་ཐམས་ཅད་ནི་ཉེ་བའི་ཉོན་མོངས་པའང་ཡིན་ཏེ། ཉེ་བའི་ཉོན་མོངས་པ་ཡིན་ལ་ཉོན་མོངས་པ་མ་ཡིན་པའང་ཡོད་དོ། །ཞེས་བཤད་པའི་ཕྱིར་རོ། །བཞི་པ་གང་ཟག་ལ་ལྡན་ཚུལ་ལ། སྡོམ་མིན་ལྡན་ཚུལ་དང་། སྡོམ་པ་ལྡན་ཚུལ་ལོ། །དང་པོ་ནི། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །སྡོམ་མིན། སྡོམ་མིན་ནི། ཟ་མ་མ་ནིང་སྒྲ་མི་སྙན་མཚན་གཉིས་མ་གཏོགས་པའི་མི་རྣམས་ལ་ཡོད་དོ། །གཉིས་པ་ལ། སྤྱིར་བསྟན་པ་དང་། རྟེན་གང་ལ་སྡོམ་པ་གང་ཡོད་པའོ། །དང་པོ་ནི། སྡོམ་པའང་དེ་བཞིན་ལ། །ལྷ་ལའང་། སྡོམ་པའང་ཇི་སྐད་བཤད་པ་མ་གཏོགས་པའི་མི་ལའང་ཡོད་ལ་ཡོད་པ་དེ་བཞིན་ལྷ་ལའང་ཡོད་དོ། །འང་སྔ་མ་ནི་མི་ལ་སྡོམ་མིན་ཡོད་པར་མ་ཟད་སྡོམ་པའང་ཡོད་པའི་དོན་ཏོ། །ཟ་མ་སོགས་ལ་སྡོམ་པ་མེད་པ་ནི། མདོ་ལས། མིང་ཆེན་འདི་ལྟར་ཁྱིམ་པ་གོས་དཀར་པོ་གྱོན་པ་སྐྱེས་པ་ཕོའི་དབང་པོ་དང་ལྡན་པ་ཞིག་སངས་རྒྱས་ལ་སྐྱབས་སུ་འགྲོ་བ་ན་བདག་དགེ་བསྙེན་དུ་བཟུང་དུ་གསོལ། ཅེས་ཚིག་ཏུ་སྨྲ་ན་དགེ་བསྙེན་དུ་འགྱུར་རོ། །ཞེས་གསུངས་པ་དང་། འདུལ་བ་ལས་ཀྱང་། ཟ་མ་ལ་སོགས་པ་དེ་ལྟ་བུ་བསལ་བར་བྱའོ། །ཞེས་(༦༩ན)
གསུངས་སོ། དེ་དག་ལ་སྡོམ་པ་མེད་པའི་རིགས་པ་ནི། སྐྱེས་པ་དང་ཡང་སྦྱོར་འདོད་ལ་བུད་མེད་དང་ཡང་སྦྱོར་འདོད་པས། སྐྱེས་པ་དང་བུད་མེད་གཉིས་ཀའི་རྟེན་ཅན་གྱི་ཉོན་མོངས་ཤས་ཆེ་བའི་ཕྱིར་དང་། སྐྱེས་པ་དང་བུད་མེད་སོ་སོའི་རྟེན་ལ་གཉེན་པོའི་མཚན་ཉིད་སོ་སོར་རྟོག་མི་བཟོད་པའི་ཕྱིར། ངོ་ཚ་དང་ཁྲེལ་ཡོད་ཤས་ཆེན་པོ་མེད་པའི་ཕྱིར་རོ། །དེ་དག་ལ་སྡོམ་མིན་ཅི་སྟེ་མེད་ཅེ་ན། མེད་དེ། སྡིག་པ་ལ་ཡང་བསམ་པ་མི་བརྟན་པའི་ཕྱིར་དང་། གང་ལ་སྡོམ་པ་མ་ཡིན་པ་ཡོད་པ་ལ་སྡོམ་པ་ཡོད་དགོས་པའི་ཕྱིར་ཏེ། དེ་དེའི་གཉེན་པོ་ཡིན་པའི་ཕྱིར། དཔེར་ན། ཞིང་གང་ན་ལོ་ཏོག་ཡོད་པ་ན་རྩྭ་ཡང་ཡོད་དགོས་པ་བཞིན་ནོ། །བྱང་སྒྲ་མི་སྙན་པ་རྣམས་ལ་ནི་སྡོམ་པ་མེད་དེ། སོ་སོར་ཐར་པའི་སྡོམ་པ་ཡང་དག་པར་ལེན་པ་མེད་པའི་ཕྱིར་དང་། ཆགས་བྲལ་གྱིས་མ་བསྡུས་པས་བསམ་གཏན་གྱི་སྡོམ་པ་མེད་པའི་ཕྱིར་དང་། སྡོམ་མིན་མེད་དེ། སྡིག་པ་བྱས་པའི་བསམ་པ་མེད་པའི་ཕྱིར་རོ། །ངན་སོང་རྣམས་ལ་ངོ་ཚ་ཁྲེལ་ཡོད་དང་ལྡན་པའི་སྡོམ་པ་དང་། ངོ་ཚ་མེད་པ་དང་ཁྲེལ་མེད་པའི་སྡོམ་པ་མ་ཡིན་པ་དག་མེད་དེ། ངོ་ཚ་ཁྲེལ་ཡོད་ཤས་ཆེན་པོ་མེད་པའི་ཕྱིར་རོ། །འདིའི་ཁྱབ་པ་ནི་ངོ་ཚ་ཁྲེལ་ཡོད་ཤས་ཆེན་པོ་ཡོད་ན་ངོ་ཚ་ཁྲེལ་མེད་ཆེན་པོའི་སྡོམ་མིན་འགོག་ནུས་པས། གང་ལ་སྡོམ་པ་མིན་པའང་ཡོད་པར་གྲུབ་ཅིང་། སྡོམ་པའང་ཡོད་པར་གྲུབ་པ་ཡིན་ནོ། །གཞན་ཡང་། ཟ་མ། མ་ནིང་། མཚན་གཉིས་པ་དང་། ངན་སོང་བ་དག་གི་ལུས་ལ་ཆོས་ཅན། སྡོམ་པ་དང་སྡོམ་མིན་གཉིས་ཀ་མི་སྐྱེ་སྟེ། ཞིང་ཚྭ་སྒོ་ཅན་ལྟ་བུར་གྱུར་པའི་ཕྱིར། དཔེར་ན། ཚྭ་སྒོ་ཅན་ལས། འབྲུ་ཚར་གཅིག་ཀྱང་མི་སྐྱེ་ལ། རྩྭ་ཚར་གཅིག་ཀྱང་མི་སྐྱེ་བ་བཞིན་ནོ། །འོ་ན་མདོར་སྒོང་སྐྱེས་ཀྱི་ཀླུ་རྣམས་ཟླ་བ་ཕྱེད་ཀྱི་(༦༩བ)
ཚེས་བརྒྱད་ལ་གནས་ནས་བྱུང་སྟེ། ཡན་ལག་བརྒྱད་པའི་བསྙེན་གནས་ལ་གནས་པར་བཤད་པ་དེ་ཇི་ལྟ་བུ་ཞེ་ན། དེ་ནི་བསྙེན་གནས་ཀྱི་སྡོམ་པ་མིན་གྱི་ལེགས་པར་སྤྱད་པ་ཙམ་ཡིན་ནོ། །གཉིས་པ་ལ། མི་དང་། ལྷ་ལ་གང་ལྡན་པའོ། །དང་པོ་ནི། མི་རྣམས་ལ་གསུམ་མོ། །མི་རྣམས་ལ་སོ་སོར་ཐར་པ་དང་། བསམ་གཏན་དང་ཟག་མེད་ཀྱི་སྡོམ་པ་གསུམ་ག་ཡོད་དོ། །དེའང་ལྷ་རྣམས་ནི་མི་དག་གི་གནས་གསུམ་གྱི་ཟིལ་གྱིས་གནོན་ཏེ། དཔའ་བ་དང་དྲན་པ་དང་ལྡན་པ་དང་། འདིར་ཚངས་པར་སྤྱོད་པ་ལ་གནས་པའོ་ཞེས་གསུངས་པས། ཚངས་སྤྱོད་ནི། རབ་ཏུ་དབྱུང་བ་དང་བསྙེན་རྫོགས་ཀྱི་དངོས་པོ་ཁྱད་པར་དུ་འཕགས་པར་བཤད་པའོ། །འོ་ན་འདོད་ལྷའི་དྲང་སྲོང་རྣམས་འདོད་ཡོན་ལ་ཆགས་པ་དང་བྲལ་ནས་འདོད་ལྷའི་ཁྱིམ་ནས་རབ་ཏུ་བྱུང་བར་བཤད་འདུག་པ་སྙམ་ན། འདོད་པའི་ཁྱིམ་ནས་རབ་ཏུ་བྱུང་བ་ཡོད་ཀྱང་སངས་རྒྱས་ཀྱི་བསྟན་པ་ལ་ཞུགས་པ་ཡང་དག་པར་བླངས་པའི་རབ་ཏུ་བྱུང་བ་ནི་ཡོད་པ་མ་ཡིན་ནོ། །དོན་དེའི་ཕྱིར་བོད་སྔ་རབས་པ་ཁ་ཅིག །གང་སྤེལ་དུ། སྐྱེ་བ་མེད་པའི་ཕྱིར། འདོད་པ་སྤྱོད་པའི་ལྷ་ཤེས་རབ་ཅན་རྣམས་ལ་ཡང་མེད་ན་གོང་དུ་སྐྱེས་པ་རྣམས་ལ་ལྟ་སྨོས་ཀྱང་ཅི་དགོས་པའི་ཕྱིར། ཞེས་པ་ནི་ཐལ་ཆེས་སོ་ཞེས་ཟེར་རོ། །གཉིས་པ་ལ། བསམ་གཏན་དང་། ཟག་མེད་ལྷ་གང་ལ་ལྡན་པའོ། །དང་པོ་ནི། འདོད་དང་གཟུགས་སྐྱེས་ལྷ་རྣམས་ལ། །བསམ་གཏན་སྐྱེས་ཡོད། འདོད་ལྷ་དང་གཟུགས་ཀྱི་ལྷ་རྣམས་ལ་བསམ་གཏན་ལས་སྐྱེས་པའི་སྡོམ་པ་ཡོད་དོ། །དེ་ཡང་འདོད་ལྷ་ལ་བསམ་གཏན་གྱི་སྡོམ་པ་ཡོད་རུང་གཟུགས་ཁམས་ཀྱི་ལྷ་ལ་བསམ་གཏན་གྱི་སྡོམ་པ་ཅིས་ཀྱང་ཡོད་ལ། དེ་ཡང་བསམ་གཏན་དང་པོ་པ་ལ་རང་སའི་སྡོམ་པ་ཡོད། གོང་མ་གསུམ་ཡོད་དུ་རུང་། གཉིས་པ་ལ་རང་ས་དང་། གོང་མ་གཉིས་ཀྱི་སྡོམ་པ་ཡོད་དུ་རུང་། གསུམ་པ་ལ་རང་(༧༠ན)
ས་དང་། གོང་མ་བཞི་པའི་སྡོམ་པ་ཡོད་དུ་རུང་། བཞི་པ་ལ་བཞི་པ་ཁོ་ན་ཡོད་པའོ། །གཟུགས་མེད་ན་ནི་བསམ་གཏན་གྱི་སྡོམ་པ་མེད་དེ། རང་ས་ན་གཟུགས་མེད་པའི་ཕྱིར་འོག་མར་ཐོབ་པ་དག་ཀྱང་ས་འཕོས་པས་གཏོང་བའི་ཕྱིར་རོ། །གཉིས་པ་ནི། ཟག་མེད་ནི། །བསམ་གཏན་ཁྱད་པར་འདུ་ཤེས་མེད། །སེམས་ཅན་མ་གཏོགས་གཟུགས་མེད་ནའང་། །ཟག་མེད་ཀྱི་སྡོམ་པ་ནི་འདོད་པར་ཡང་ཡོད་ལ། བསམ་གཏན་ཁྱད་པར་ཅན་གྱི་སེམས་ཅན་ཚངས་པ་ཆེན་པོ་དང་། འདུ་ཤེས་མེད་པར་སྐྱེ་བའི་སེམས་ཅན་མ་གཏོགས་པ་འདོད་གཟུགས་སུ་སྐྱེས་པའི་ལྷ་རྣམས་དང་གཟུགས་མེད་པ་ནའང་ཡོད་དོ། །དེའང་རྟེན་འདོད་ཁམས་པ་གཅིག་ལ་ཟག་མེད་ཀྱི་སྡོམ་པ་ཡོད་པ་དེ་འདོད་པའི་འབྱུང་བ་ཆེན་པོ་ལ་བརྟེན་ནས་ཡོད་པ་དེ་ཤི་ནས་བསམ་གཏན་དང་པོར་སྐྱེས་ཙམ་ན་འདོད་པའི་འབྱུང་བ་དང་། དང་པོའི་འབྱུང་བ་ཆེན་པོ་གཉིས་ལ་བརྟེན་ནས་ཡོད། །གཉིས་པར་སྐྱེས་ཙམ་ན་དང་པོའི་འབྱུང་བ་དང་གཉིས་པའི་འབྱུང་བ་གསུམ་ལ་བརྟེན་ནས་ཡོད། །དེ་ག་བཞིན་བཞི་པར་སྐྱེས་ཙམ་ན་ལྔ་ལ་བརྟེན་ནས་ཡོད་དོ། །ནམ་མཁའ་ལ་སོགས་པར་སྐྱེས་པ་ནའང་འབྱུང་བ་ལ་བརྟེན་ནས་ཡོད་དོ། །དེ་ལྟར་ནའང་ལྡན་པའི་སྒོ་ནས་ཡོད་ཀྱི་མངོན་གྱུར་ལས་ནི་མ་ཡིན་ཏེ། དེར་གཟུགས་མེད་པའི་ཕྱིར། ཚངས་ཆེན་ནི་ལྟ་བའི་གནས་པ་ཡིན་པས་གཙོ་བོ་གཅིག་ཁོ་ནར་ཟད་ལ། འཕགས་པ་དེར་མི་སྐྱེ། སྐྱེ་ན་གཙོ་བོར་འོང་དགོས་པ་ལས་གཙོ་བོ་གཅིག་ཏུ་ཟད་པའི་ཕྱིར། ཐེག་པ་ཆེན་པོ་པ་ནི་ལས་ཀྱི་དབང་གིས་སྐྱེས་པའི་ཚངས་པ་ཆེན་པོ་ལ་ཟག་མེད་མེད་ཀྱང་བྱང་ཆུབ་སེམས་དཔའ་ནི་སྨོན་ལམ་གྱི་དབང་གིས་ཚངས་པ་ཆེན་པོར་ཡང་སྐྱེ་བས་དེ་ལ་ནི་ཟག་མེད་ཀྱི་སྡོམ་པ་ཡོད་དོ་ཞེས་འདོད་དོ། །སྲིད་རྩེ་ལ་ནི་འཕགས་པ་མི་བརྟེན་པའི་ཕྱིར་ཟག་མེད་ཀྱི་སྡོམ་པ་མེད་དོ། །གསུམ་པ་མདོ་ལས་འབྱུང་བའི་ལས་ཀྱི་དོན་ལ། ཐུན་མོང་(༧༠བ)
དུ་བསྟན་པ། སོ་སོར་བཤད་པའོ། །དང་པོ་ལ། རྒྱུ་འབྲས་ཀྱི་སྒོ་ནས་དབྱེ་བ་དང་། ལས་ཀྱི་རྣམ་གྲངས་དུ་མ་བསྟན་པ། ལས་གང་འབྲས་བུ་དུ་དང་བཅས་པ། ལས་ཀྱི་རྣམ་གཞག་གཞན་བསྟན་པའོ། །དང་པོ་ལ། འབྲས་བུའི་སྒོ་ནས་དབྱེ་བ། རྒྱུའི་སྒོ་ནས། གཉིས་ཀའི་སྒོ་ནས་དབྱེ་བའོ། །དང་པོ་ལ། དགེ་སོགས་གསུམ་དང་། བསོད་ནམས་སོགས་གསུམ་དང་། མྱོང་འགྱུར་གསུམ་དུ་དབྱེ་བ། ཕྱི་མ་གཉིས་ཀྱི་རྒྱས་བཤད་དོ། །དང་པོ་ནི། ལས་བདེ་མི་བདེ་དང་གཞན་ནི། །དགེ་དང་མི་དགེ་དང་གཞན་ཡིན། །རེ་ཞིག་ལས་ཀྱི་རྣམ་སྨིན་ཡིད་དུ་འོང་བ་བདེ་བ་མྱོང་བ་དང་གཏན་སྡུག་བསྔལ་ལས་སྐྱོབ་པ་མྱང་འདས་ཐོབ་བྱེད་ནི་དགེ་བ་དང་། རྣམ་སྨིན་ཡིད་དུ་མི་འོང་བ་མི་བདེ་བ་མྱོང་བ་ནི་མི་དགེ་བ་དང་། ཡིད་དུ་འོང་མི་འོང་བསྐྱེད་པ་དེ་གཉིས་ལས་གཞན་པའི་ལས་ནི་དགེ་མི་དགེ་ལས་གཞན་ལུང་མ་བསྟན་ཡིན་ནོ། །འོ་ན་བསམ་གཏན་བཞི་པ་ཡན་ཆད་ཀྱི་དགེ་བའང་ལུང་མ་བསྟན་དུ་འགྱུར་ཏེ། བདེ་མི་བདེ་གཉིས་ཀ་མི་མྱོང་བའི་ལས་ཡིན་པའི་ཕྱིར་ཞེ་ན། མ་ཡིན་ཏེ། ས་དེ་དག་གི་དགེ་བ་ནི་ཉེ་བར་ཞི་བའི་བདེ་བ་མྱོང་བའི་ལས་ཡིན་པའི་ཕྱིར་རམ། ཡང་ན་བདེ་བ་མྱོང་འགྱུར་དགེ་བ་ཡིན་ནོ་ཞེས་བྱ་བ་ནི་ཕལ་ཆེ་བའི་དབང་དུ་བྱས་སོ་ཞེས་ཤེས་པར་བྱའོ། །གཉིས་པ་ནི། བསོད་ནམས་བསོད་ནམས་མིན་མི་གཡོ། །ཡང་བསོད་ནམས་དང་བསོད་ནམས་མིན་པ་དང་། མི་གཡོ་བའི་ལས་སོ། །ཅིའི་ཕྱིར་བསོད་ནམས་ཀྱི་ལས་ཤེས་བྱ་ན། སྲུང་བའི་དོན་གྱི་བསོད་ནམས་དང་། སྐྱོང་བའི་དོན་གྱི་བསོད་ནམས་དང་། ངན་སོང་ལས་སྐྱོབ་ཅིང་དགེ་བ་འཕེལ་པར་བྱེད་པས་བསོད་ནམས་ཀྱི་ལས་སོ། །དེའི་ཕྱིར་ལས་རང་ལའང་བསོད་ནམས་ཀྱི་ལས་སུ་བཞག་པའོ། །ཡང་ན། འབྲས་བུ་བསོད་ནམས་ཡིན་ཙམ་ན་དེ་སྒྲུབ་པའི་ལས་དེ་ལ་བསོད་ནམས་ཀྱི་ལས་སོ། །གསུམ་པ་ནི། བདེ་བ་མྱོང་འགྱུར་ལ་སོགས་གསུམ། །བདེ་བ་མྱོང་འགྱུར་དང་ལ་སོགས་པས་སྡུག་བསྔལ་མྱོང་འགྱུར་(༧༡ན)
དང་བཏང་སྙོམས་མྱོང་འགྱུར་གསུམ་དུ་ཡོད་དོ། །བཞི་པ་ཕྱི་མ་གཉིས་ཀྱི་རྒྱས་བཤད་ལ། བསོད་ནམས་སོགས་རྒྱས་པར་བཤད། མྱོང་འགྱུར་གསུམ་ཞར་བྱུང་དང་བཅས་པའོ། །དང་པོ་ལ། བསོད་ནམས་ཀྱི་ལས། མི་གཡོ་བའི་ལས་སོ། །དང་པོ་ནི། བསོད་ནམས་འདོད་ཁམས་དགེ་བའི་ལས། །འདོད་ཁམས་ཀྱི་དགེ་བའི་ལས་བསོད་ནམས་མ་ཡིན་པའི་གཉེན་པོར་འགྱུར་བའི་ཕྱིར་བསོད་ནམས་ཞེས་བྱ་སྟེ། སྲུང་བའམ་ཚིམ་པར་བྱེད་པས་བསོད་ནམས་སོ། །གཉིས་པ་ནི། མི་གཡོ་གོང་མ་ལས་སྐྱེས་པའི། །གང་ཕྱིར་ས་ནི་དེ་དག་ཏུ། །ལས་རྣམས་སྨིན་ཕྱིར་མི་གཡོའི་ཕྱིར། །ཁམས་གོང་མ་གཟུགས་དང་གཟུགས་མེད་ལས་སྐྱེས་པའི་ལས་ནི་མི་གཡོ་བའི་ལས་ཡིན་ནོ། །འོ་ན་བཅོམ་ལྡན་འདས་ཀྱིས། བསམ་ཏན་དང་པོ་འདི་ལ་བརྟགས་ཤིང་དཔྱད་པས་འཕགས་པ་རྣམས་ཀྱིས་གཡོ་བའོ། །ཞེས་དང་། བསམ་གཏན་གཉིས་པ་འདི་ལ་དགའ་བ་དང་མ་བྲལ་བ་གང་ཡིན་པ་དེ་ནི་འཕགས་པ་རྣམས་ཀྱིས་གཡོ་བའོ་ཞེས་གསུངས་པ་དང་། གསུམ་པ་ཡང་འདི་ལ་བདེ་བའོ་སྙམ་དུ་སེམས་ཀྱི་གཏོད་པ་གང་ཡིན་པ་འདི་ནི་འཕགས་པ་རྣམས་ཀྱིས་གཡོ་བའོ། །ཞེས་གསུངས་པ་མིན་ནམ་ཞེ་ན། བསམ་གཏན་གསུམ་པོ་དེ་དག་གི་ཏིང་ངེ་འཛིན་སྐྱོན་དང་བཅས་པའི་དབང་དུ་མཛད་ནས་གསུངས་པ་ཡིན་གྱི། མི་གཡོ་བའི་ལས་ཀྱི་དབང་དུ་བྱས་ནས་གསུངས་པ་མིན་ཏེ། མི་གཡོ་བའི་མདོ་ལས། རྣམ་སྨིན་མི་གཡོ་བ་དང་མཐུན་པར་འགྲོ་བའི་ལས་ལས་བརྩམས་ཏེ་མི་གཡོ་བར་གསུངས་སོ། །ཏིང་ངེ་འཛིན་གྱི་སྐྱོན་དང་བཅས་པ་ཉིད་ཀྱིས་གཡོ་བ་དང་བཅས་ཀྱང་། གནས་གཞན་གྱི་རྣམ་པར་སྨིན་པ་ནི་གནས་གཞན་ལ་རྣམ་པར་མ་སྨིན་པས་མི་གཡོ་བར་ཅིས་གསུངས་ཤེ་ན། གཟུགས་དང་གཟུགས་མེད་པའི་རྫོགས་བྱེད་ཀྱི་ལས་ནི་ཆོས་ཅན། ས་གཞན་དུ་རྣམ་པར་སྨིན་པར་མི་འགྱུར་ཏེ། གང་ཕྱིར་ས་ནི་དེ་དག་ཏུ་ལས་(༧༡བ)
རྣམས་རྣམ་པར་སྨིན་པའི་ཕྱིར་རོ། །ཁྱབ་སྟེ། རྐྱེན་དབང་གིས་གཞན་དུ་མི་གཡོ་བའི་ཕྱིར་རོ། །འོ་ན་འདོད་པར་ཡང་རྣམ་སྨིན་གཞན་དུ་མི་གཡོ་བར་ཐལ། དེར་ས་ཐ་དད་པ་མེད་པའི་ཕྱིར་ཞེ་ན། མ་ཁྱབ་སྟེ། དེར་ས་ཐ་དད་པ་མེད་ཀྱང་འགྲོ་བ་ཐ་དད་པ་ཡོད་ལ། ཁམས་གོང་ལ་ནི་འགྲོ་བ་གཅིག་ཏུ་ངེས་པས་མི་མཚུངས་པའི་ཕྱིར། འདོད་པར་ནི་རྒྱལ་ཆེན་རིས་བཞིའི་ལྷ་རིས་ལ་སྨིན་རྒྱུ་ཞིག་སུམ་ཅུ་རྩ་གསུམ་པའི་ལྷ་རིས་ལ་སྨིན་པར་འགྱུར་བ་ཞིག་ཡོད་ལ། གོང་མར་ནི་བསམ་གཏན་དང་པོ་པ་ལ་སྨིན་རྒྱུ་གཉིས་པ་པ་ལ་མི་སྨིན་པ་དང་། གཉིས་པ་པ་ལ་སྨིན་རྒྱུ་དང་པོ་པ་ལ་སྨིན་མི་སྲིད་པའི་ཕྱིར་རོ། །འདི་ཡང་ཟག་བཅས་ཀྱི་མི་གཡོ་བའི་ལས་ཀྱི་དབང་དུ་བྱས་པ་ཡིན་ཏེ། ཟག་མེད་ཀྱི་ལས་དང་སྤེལ་ནས་བསགས་ན་མ་ངེས་པའི་ཕྱིར། དཔེར་ན། བདེན་པ་མཐོང་བའི་འཕགས་པ་ནི། བདེན་པ་མཐོང་ལ་འཕེན་པ་མེད་པ་ཡིན་པས། འཕེན་བྱེད་ཀྱི་ལས་ནི་མི་སོགའོན་ཀྱང་འབྲས་བུ་ཆེར་སྐྱེས་པའི་ལས་དེ་ལ་སྤེལ་བར་བསྒོམས་པས་གནས་གཙང་མར་སྐྱེ་བ་ལྟ་བུའི་ཁམས་གོང་ནའང་ལས་ཀྱི་རྣམ་སྨིན་མི་གཡོ་བ་མི་སྲིད་པར་ནི་མི་བཟུང་ངོ་། །ལུས་དང་ལོངས་སྤྱོད་ལ་སོགས་པ་ཕུན་སུམ་ཚོགས་པ་འབྱུང་རྒྱུའི་སྦྱིན་པ་བཏང་བ་སོགས་ཀྱི་འབྲས་བུ་ལྷ་དག་གི་ནང་དུ་སྨིན་རྒྱུ་དེ་ཚུལ་ཁྲིམས་འཆལ་པ་སོགས་ཀྱི་རྐྱེན་དབང་དང་ལྷན་དུ་བསགས་པས་མི་དང་དུད་འགྲོའི་རྟེན་ལ་སྨིན་པ་ལྟ་བུ་སྟེ། སྲོག་བཅད་པའི་སྦྱིན་བཏང་གི་འབྲས་བུ་གླང་པོ་ཆེར་སྐྱེས་པ་ལ་རིན་པོ་ཆེའི་རྒྱན་སྣ་ཚོགས་པས་བརྒྱན་པའི་རྣམ་པར་སྨིན་པ་ལ་ལོངས་སྤྱོད་པ་ལྟ་བུའོ། །བསོད་ནམས་མིན་པའི་ལས་ལ་ནི་འབད་པས་བཤད་མི་དགོས་ཏེ། འཇིག་རྟེན་དུ་མི་དགེ་བ་ཉིད་ལ་གྲགས་པའི་ཕྱིར་རོ། །གཉིས་པ་མྱོང་འགྱུར་གསུམ་ཞར་(༧༢ན)
བྱུང་དང་བཅས་ཏེ་བཤད་པ་ལ། མྱོང་འགྱུར་གསུམ་བཤད་པ་དངོས། ཞར་ལ་མྱོང་འགྱུར་ལྔ་བསྟན་པ། མྱོང་འགྱུར་གྱི་ཁྱད་པར་གཏན་ལ་དབབ་པའོ། །དང་པོ་ལ། སོ་སོའི་ངོ་བོ། གཞན་འདོད་འགོད་པའོ། །དང་པོ་ལ། བདེ་བ་མྱོང་འགྱུར། བཏང་སྙོམས་མྱོང་འགྱུར། སྡུག་བསྔལ་མྱོང་འགྱུར་རོ། །དང་པོ་ནི། བསམ་གཏན་གསུམ་པའི་བར་དགེ་བ། །བདེ་བ་མྱོང་འགྱུར། འདོད་པའི་ཁམས་དང་བསམ་གཏན་གསུམ་པའི་བར་བསམ་གཏན་གསུམ་གྱི་ལས་དགེ་བ་ནི། བདེ་བ་མྱོང་འགྱུར་ཡིན་པས་ལུས་སེམས་ཀྱི་བདེ་བ་ཚོར་བའི་ས་ཡིན་ནོ། །འདོད་ཁམས་དང་བསམ་གཏན་དང་པོ་དག་ནི་བདེ་བའི་ཚོར་བ་ལུས་ཀྱི་བདེ་བ་དང་། སེམས་ཀྱི་ཡིད་བདེ་བ་ཡིན་ནོ། །གཉིས་པ་ན་ནི་བདེ་བའི་ཚོར་བ་ཡིད་བདེ་བ་ཡིན་ནོ། །གསུམ་པ་ན་སེམས་ཀྱི་བདེ་བ་ཡིན་ནོ། །གཉིས་པ་ནི། དེ་ཡན་ཆད། །སྡུག་མིན་བདེ་མིན་མྱོང་འགྱུར་བ། །བསམ་གཏན་གསུམ་པ་དེ་ཡན་ཆད་ཀྱི་ལས་དགེ་བ་ནི་སྡུག་བསྔལ་ཡང་མིན་བདེ་བའང་མིན་པ་མྱོང་བར་འགྱུར་བ་ཡིན་ཏེ། དེ་ནི་བདེ་བ་དང་སྡུག་བསྔལ་གྱི་ཚོར་བ་མེད་པའི་ཕྱིར། གསུམ་པ་ནི། སྡུག་བསྔལ་མྱོང་འགྱུར་འདིའི་མི་དགེ། །སྡུག་བསྔལ་མྱོང་འགྱུར་གྱི་ལས་ནི་འདོད་ཁམས་འདི་ཡི་མི་དགེ་བ་སྟེ། འདི་ཡི་ཞེས་སྨོས་པ་ནི་སྡུག་བསྔལ་དེ་འདོད་ཁམས་ཁོ་ན་ན་ཡོད་པར་བསྟན་པའི་ཕྱིར་རོ། །ཚོར་བ་འབའ་ཞིག་མི་དགེ་བའི་འབྲས་བུར་མ་ཟད་ཀྱི། སྐྱེ་མཆེད་དེའི་ཚོགས་པ་ན་ཡོད་པའི་དབང་ཡུལ་རྟེན་གྱི་མཚན་ཉིད་དང་བཅས་པའང་དེའི་འབྲས་བུ་ཡིན་ནོ། །གཉིས་པ་གཞན་འདོད་འགོད་པ་ནི། འོག་ནའང་བར་མ་ཡོད་དོ་ཞེས། །ཁ་ཅིག་ཟེར་ཏེ་གང་གི་ཕྱིར། །བསམ་གཏན་ཁྱད་པར་རྣམ་སྨིན་ལས། །སྔ་ཕྱི་མེད་གསུམ་སྨིན་འདོད་ཕྱིར། །འོག་བསམ་གཏན་བཞི་པ་མན་ཆོད་ནའང་བདེ་སྡུག་གི་བར་མ་བཏང་སྙོམས་མྱོང་འགྱུར་གྱི་ལས་ཡོད་དོ་ཞེས་ཁ་ཅིག་ཟེར་ཏེ། ཏེ་ནི་གང་གི་ཕྱིར་འདྲེན་པའོ། །སྒྲུབ་བྱེད་ནི་བསམ་གཏན་ཁྱད་པར་ཅན་གྱི་ལས་ཀྱི་རྣམ་སྨིན་མེད་པར་ཐལ། གང་གི་ཕྱིར་ན། དེའི་རྣམ་སྨིན་གྱི་འབྲས་བུའི་ཚོར་བ་བདེ་སྡུག་མེད་པ་(༧༢བ)
གང་ཞིག །བཏང་སྙོམས་ཀྱང་མེད་པར་ཁས་བླངས་པའི་ཕྱིར་རོ། །དེ་ལྟར་ཐལ་བ་ལས་འདོད་མི་ནུས་པས། བསམ་གཏན་ཁྱད་ཅན་གྱི་ལས་དགེ་བའི་རྣམ་སྨིན་ཚོར་བ་བཏང་སྙོམས་ཡོད་པ་ལས་ཤེས་པར་ནུས་སོ་ཞེས་དགོངས་སོ། །ཡང་ཁོ་ན་རེ། རྩ་བར་མ་ཁྱབ་སྟེ། བསམ་གཏན་ཁྱད་ཅན་གྱི་རྣམ་སྨིན་དེ་དང་པོའི་དངོས་གཞི་ཙམ་གྱི་ས་པའི་ལས་ཀྱིས་བྱེད་པའི་ཕྱིར་ཞེ་ན། དེ་ནི་དེ་ལས་ཀྱང་མ་ཁྱབ་སྟེ། བསམ་གཏན་དང་པོའི་དངོས་གཞི་རྟོག་པ་དང་བཅས་པ་དམན་པས་ཁྱད་པར་ཅན་གྱི་རྣམ་སྨིན་བསྐྱེད་མི་ནུས་པའི་ཕྱིར། ཁྱེད་ལྟར་ན། ལས་གང་གིས་ཀྱང་བསམ་གཏན་ཁྱད་ཅན་གྱི་རྣམ་སྨིན་མི་བསྐྱེད་པར་ཐལ། རྣམ་སྨིན་ཚོར་བ་བཏང་སྙོམས་མེད་པ་གང་ཞིགཁྱད་ཅན་གྱི་དངོས་གཞི་རྒྱུའི་དུས་ན་བཏང་སྙོམས་ལ་འབྲས་བུ་རྣམ་སྨིན་ཚོར་བ་བདེ་བ་མི་འབྱུང་ཞིང་། སྡུག་བསྔལ་གྱི་ས་ལས་འདས་པས་རྣམ་སྨིན་ཚོར་བ་སྡུག་བསྔལ་ཡང་མི་འབྱུང་བའི་ཕྱིར། ཅུང་ཟད་བཤད་ན། བསམ་གཏན་ཁྱད་པར་ཅན་ནི་རྟོག་པ་མེད་ལ་དཔྱོད་པ་ཙམ་དང་། ཚོར་བ་བཏང་སྙོམས་དང་། ཚངས་པ་ཆེན་པོར་སྐྱེས་པ་དེ་གསུམ་གྱིས་ཕྱེས་པ་ཡིན་ཙམ་ན། བསམ་གཏན་ཁྱད་པར་ཅན་གྱི་ལས་ཀྱི་རྣམ་སྨིན་གྱི་ཚོར་བ་ནི། བསམ་གཏན་ཁྱད་པར་ཅན་དུ་སྐྱེས་པ་ན་ཡོད་པར་བྱ་དགོས་ལ། དེ་ན་ཡང་བདེ་སྡུག་མེད་པའི་བཏང་སྙོམས་ཡོད་ཙམ་ན་དེ་སྒྲུབ་པའི་ལས་དགེ་བ་ཡོད་དོ། །དེ་ཡང་སྡུག་བསྔལ་མེད་པ་ནི་སྡུག་བསྔལ་གྱིས་ལས་འདས་པ་ཡིན་པས་དེ་ལས་ཡིད་བདེ་མེད་པའི་རྒྱུ་མཚན་ནི། དངོས་གཞིའི་རྒྱུའི་དུས་ན་བཏང་སྙོམས་ཡོད་ཙམ་ན་རྒྱུ་བཏང་སྙོམས་དེའི་འབྲས་བུ་ཡིད་མི་བདེ་བ་འགལ་བས་སོ། །ཉེར་བསྡོགས་ཀྱི་དུས་ཀྱི་བཏང་སྙོམས་ལ་འབྲས་བུ་ཡིད་བདེ་བ་མི་འགལ་བ་ལ་དངོས་གཞིའི་དུས་ཀྱི་རྒྱུ་བཏང་(༧༣ན)
སྙོམས་ལ་འབྲས་བུ་ཡིད་མི་བདེ་བ་འགལ་བས། འབྲས་བུ་བཏང་སྙོམས་ཡོད་པས་དེའི་རྒྱུ་དགེ་བ་ཡོད། སྒོ་ལྔའི་བདེ་བ་མེད་པའི་རྒྱུ་མཚན་ནི། སྒོ་ལྔ་སྐྱེ་རྒུ་ཅོག་རྟོག་དཔྱོད་དང་བཅས་པ་ཡིན་ཏེ། རྟོག་དང་དཔྱོད་དང་བཅས་པ་ནི། །རྣམ་པར་ཤེས་པའི་ཁམས་ལྔ་ཡིན། །ཟེར་བས་སོ། །དེ་ལྟར་ན། སྒོ་ལྔ་ཡིན་ནོ་ཅོག་ལ་རྟོག་དཔྱོད་ཀྱིས་ཁྱབ་ཙམ་ན་བསམ་གཏན་ཁྱད་པར་ཅན་གྱི་རྒྱུ་རྟོག་མེད་དཔྱོད་ཙམ་ལ་འབྲས་བུ་རྟོག་དཔྱོད་དང་བཅས་པ་བྱུང་ན། འབྲས་བུ་སླར་ལ་ལད་པས་ས་དེར་སྒོ་ལྔ་མེད་པས་བདེ་བ་མེད་དོ། །ས་དེའི་སྒོ་ལྔ་མེད་ཀྱང་རྟེན་དེ་ལ་མིག་གི་རྣམ་ཤེས་དང་རྣ་བའི་རྣམ་ཤེས་དང་ལུས་ཀྱི་རྣམ་ཤེས་ཡོད་དེ་གཉིས་པ་ན་ཡར་ལ་འདྲེན་པར་བྱེད་དོ། །ཡང་ཁ་ཅིག་ན་རེ། ཡང་རྒྱུ་བཏང་སྙོམས་ལ་འབྲས་བུ་བཏང་སྙོམས་ཡོད་པའི་ཕྱིར་གྱི་གཏན་ཚིགས་མ་གྲུབ་སྟེ། བསམ་གཏན་དང་པོའི་ཁྱད་ཅན་གྱི་རྣམ་སྨིན་ནི་དགེ་བའི་ལས་ཀྱིས་བདེ་བའི་དབང་པོ་རྣམ་སྨིན་དུ་བསྐྱེད་ཅེས་ཟེར་རོ། །ཡང་གཞན་དག་ན་རེ། རྣམ་སྨིན་གྱི་ཚོར་བ་དེར་ཡོད་པ་མ་གྲུབ་སྟེ། རྣམ་སྨིན་གྱི་ཚོར་བ་ལས་གཞན་པའི་ཕུང་པོ་བཞི་པོ་ཡིན་ལ། ཚོར་བ་ནི་རྒྱུ་མཐུན་པ་ལས་བྱུང་བ་ཡིན་ཅེས་ཟེར་རོ། །སློབ་དཔོན་གྱིས། ལུགས་དེ་གཉིས་ནི་བསྟན་བཅོས་དང་འགལ་ཏེ། བསྟན་བཅོས་ཡེ་ཤེས་ལ་འཇུག་པར། ལས་ཀྱི་རྣམ་པར་སྨིན་པ་སེམས་ཀྱི་ཚོར་བ་ཁོ་ན་རྣམ་པར་སྨིན་པར་འགྱུར་བ་ཡོད་དམ་ཞེ་ན། རྟོག་པ་མེད་པའི་ལས་དགེ་བ་ཡིན་ནོ་ཞེས་གསུངས་པའི་ཕྱིར་རོ། །ལུང་དེ་དང་ཇི་ལྟར་འགལ་ན། རྟོག་པ་མེད་པ་ཟེར་བ་ནི་བསམ་གཏན་དང་པོ་ཁྱད་ཅན་གྱི་དགེ་བའི་ལས་ཡིན་ལ། བསམ་གཏན་དང་པོ་ཙམ་གྱི་དགེ་བའི་ལས་ཡིན་ན་རྟོག་པ་མེད་པ་ཞེས་མི་སྨོས་ལ། གཉིས་པ་ཡན་ཆད་ཀྱི་ལས་ཡིན་ན་(༧༣བ)
རྟོག་དཔྱོད་གཉིས་ཀ་མེད་བྱ་བར་རིགས་སོ། །དེས་ན་བསམ་གཏན་ཁྱད་པར་ཅན་ལ་ཚོར་བར་མ་སྒྲུབ་པའི་ལས་དགེ་བ་ཡོད་པར་བཤད་དོ། །སེམས་ཀྱི་ཚོར་བ་ཟེར་བས་རྣམ་སྨིན་གྱི་ཚོར་བ་མེད་པ་ལ་ཡང་གནོད་ན། སེམས་ཀྱི་ཟེར་བས་བདེ་བའི་དབང་པོ་ཡོད་པ་ལ་ཡང་གནོད་དོ། །གཞན་ཡང་བསྟན་བཅོས་ལས་འདི་ལྟར་ལས་གསུམ་པོ་རྣམས་ཀྱི་རྣམ་སྨིན་ནམ་སྔ་ཕྱི་མེད་པར་སྨིན་པར་འགྱུར་བ་ཡོད་དམ་ཞེ་ན། ཡོད་དེ། བདེ་བ་མྱོང་བར་འགྱུར་བ་ནི་གཟུགས་སོ། །སྡུག་བསྔལ་མྱོང་བར་འགྱུར་བའི་ནི་སེམས་དང་སེམས་ལས་བྱུང་བའི་ཆོས་རྣམས་སོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མྱོང་བར་འགྱུར་བའི་ནི་སེམས་དང་ལྡན་པ་མ་ཡིན་པ་འདུ་བྱེད་རྣམས་སོ། །ཞེས་དང་། འདིའི་ཕྱིར་ཡང་འོག་ན་བདེ་མིན་གྱི་མྱོང་འགྱུར་གྱི་ལས་ཡོད་དེ། ཞེས་གསུངས་པས་ཀྱང་འདོད་ཁམས་ལས་གཞན་ན་ལས་གསུམ་གྱི་རྣམ་སྨིན་དང་གཅིག་ཅར་ལྡན་པ་མེད་དེ། ཁམས་གཞན་ན་སྡུག་བསྔལ་མྱོང་འགྱུར་གྱི་ལས་མེད་པའི་ཕྱིར་རོ། །དེ་ཡང་བདེ་བ་མྱོང་འགྱུར་གྱི་ལས་ཀྱི་འབྲས་བུ་ནི་རྣམ་སྨིན་ཚོར་བ་གཅིག་པུར་མ་ཟད། ལས་བཟང་པོས་འཕངས་པའི་མཐོ་རིས་ཀྱི་རྟེན་དབང་སོགས་ཀྱང་ཡིན་ནོ། །སྡུག་བསྔལ་མྱོང་འགྱུར་གྱི་ལས་འབྲས་ངན་སོང་གི་རྣམ་ཤེས་སྒོ་ལྔའི་ཚོགས་པ་ན་ཡོད་པའི་སེམས་སེམས་བྱུང་རྣམ་པར་སྨིན་པའི་ངོ་བོར་གྱུར་པ་སྟེ། ཡིད་མི་བདེ་ནི་རྣམ་སྨིན་མ་ཡིན་པའི་ཕྱིར་རོ། །བདེ་སྡུག་མིན་པའི་མྱོང་འགྱུར་གྱི་ལས་འབྲས་ཀྱི་ཚོར་བ་བཏང་སྙོམས་ལ་ལྡན་མིན་འདུ་བྱེད་ཀྱི་སྲོག་དབང་བཟུང་བ་ནི། མིག་ལ་སོགས་པ་ནི་བདེ་སྡུག་གི་རྟེན་དུ་གསལ་བ་ཡིན་པས་བདེ་སྡུག་གི་ཚོར་བར་བཞགསྲོག་གི་དབང་པོ་དེ་ཚོད་ཀྱི་རྟེན་དུ་མི་གསལ་བས་བཏང་སྙོམས་དང་མཐུན་པར་བཞག་ཟེར་ཏེ། རིས་མཐུན་བཟུང་ན་(༧༤ན)
བདེ། སྲོག་གི་དབང་པོ་ནི་མཐོ་རིས་ཀྱི་མིག་ལ་སོགས་པ་བཞིན་དགེ་བའི་རྣམ་སྨིན་ཡིན། ངན་སོང་གི་སྲོག་གི་དབང་པོ་ནི་མི་དགེ་བའི་རྣམ་སྨིན་ཡིན་ནོ། །ཡང་ཅི་བཏང་སྙོམས་མྱོང་འགྱུར་གྱི་ལས་དེ་དགེ་མི་དགེ་གང་ཡིན་ཅེ་ན། དགེ་བ་ནི་ཡིན་ལ་དེའང་སྟོབས་ཆུང་ངུ་ཞིག་ཡིན་ནོ། །དེ་ལྟར་ན་བསམ་གཏན་གསུམ་པའི་བར་གྱི་དགེ་བས་བདེ་བ་མྱོང་འགྱུར་དང་། རྣམ་སྨིན་ཡིད་འོང་ནི་དགེ་བའི་འབྲས་བུར་བཤད་པས། དགེ་བའི་ལས་འབྲས་བཏང་སྙོམས་སུ་འབྱུང་བ་དང་འགལ་ཞེ་ན། འདི་ལྟར་བཤད་པས་དགེ་བས་རྣམ་སྨིན་ཡིད་འོང་སྒྲུབ་པ་ཕལ་ཆེ་ལ། བཏང་སྙོམས་སྒྲུབ་པ་ཕལ་ཆུང་བའི་དབང་དུ་བྱས་པ་ཡིན་ནོ། །འོ་ན་བདེ་བ་མྱོང་བ་མིན་པ་ལ་བདེ་བ་མྱོང་འགྱུར་གྱི་ལས་ཟེར་བ་ཅི་ཡིན་སྙམ་ན། ལས་དེས་བདེ་བའི་ཚོར་བ་སྐྱེ་བ་དང་མཐུན་པས་དེའི་འབྲས་མིང་རྒྱུ་ལ་བཏགས་པའོ། །ལས་འདིའི་རྣམ་སྨིན་བདེ་བ་མྱོང་བྱའི་ལས་ཡིན་པས། བདེ་བ་མྱོང་འགྱུར་གྱི་ལས་ཞེས་བྱ་སྟེ། དཔེར་ན། རྒྱལ་པོས་དབང་བའི་མི་ལ་རྒྱལ་པོའི་མི་ཟེར་བ་ལྟ་བུའོ། །ཡང་ན། འདིས་བདེ་བ་མྱོང་བར་བྱེད་པས། བདེ་བ་མྱོང་འགྱུར་གྱི་ལས་སུ་བརྗོད་དེ། གང་གིས་འཁྲུ་བར་བྱེད་པ་འདག་ཆལ་ཡིན་པ་བཞིན་ནོ། །མདོར་ན། དགེ་བ་སྟོབས་ཆེ་བ་ལ་ཚོར་བ་བདེ་བ་མྱོང་བའི་ནུས་པ་ཡོད་པ་བཞིན་དགེ་བ་སྟོབས་ཆུང་ལའང་ཡོད་དེ། དགེ་བའི་ལས་ཡིན་པ་ལ་བསམས་ན། ལས་སུ་བྱ་བ་དང་། བྱེད་པའི་སྒོ་ནས་བདེ་བ་བསྐྱེད་པ་དང་མཚུངས་པར་སྒྲུབ་པ་ཡིན་ནོ། །སྡུག་བསྔལ་དང་བདེ་བ་མྱོང་འགྱུར་གྱི་ལས་ལའང་བྱ་བ་དང་བྱེད་པའི་སྒོ་ནས་དེ་བཞིན་དུ་ཤེས་དགོས་སོ། །གཉིས་པ་ཞར་ལ་མྱོང་འགྱུར་ལྔ་བསྟན་པ་ནི། ངོ་བོ་ཉིད་དང་མཚུངས་ལྡན་དང་། །དམིགས་པ་དང་ནི་རྣམ་སྨིན་དང་། །མངོན་སུམ་དུ་ནི་གྱུར་པ་ལས། །མྱོང་འགྱུར་རྣམ་པ་ལྔ་ཡིན་ནོ། །ངོ་བོ་ཉིད་ཀྱི་ཉམས་སུ་མྱོང་བར་འགྱུར་བའི་ཚོར་བ་རྣམས་དང་། མཚུངས་(༧༤བ)
པར་ལྡན་པས་བདེ་བ་མྱོང་འགྱུར་ནི་རེག་པ་སྟེ། བདེ་བའི་ཚོར་བ་དང་མཐུན་པའི་རེག་པ་འདི་ལ་བདེ་བ་མྱོང་འགྱུར་ཡོད་པ་དང་། དམིགས་པ་དང་ནི་ཞེས་དམིགས་བྱའི་ཡུལ་མྱོང་བ་སྟེ། ཇི་སྐད་དུ། མིག་གིས་གཟུགས་རྣམ་པར་མཐོང་ནས་གཟུགས་སོ་སོར་ཡང་དག་པར་མྱོང་བར་འགྱུར་གྱི། གཟུགས་ལ་འདོད་ཆགས་སོ་སོར་ཡང་དག་པར་མྱོང་བ་ནི་མ་ཡིན་ནོ། །ཞེས་གསུངས་པས། དམིགས་པ་ན་ཚོར་བས་དེ་དག་སོ་སོ་ཡང་དག་པར་མྱོང་བར་བྱེད་དོ། །དེ་ཡང་གཟུགས་ལ་འདོད་ཆགས་མི་མྱོང་བའི་དོན་མིག་གི་རྣམ་ཤེས་ཀྱིས་གཟུགས་མྱོང་གི། འདོད་ཆགས་ཀྱིས་གཟུགས་མ་མྱོང་ཟེར་ཏེ། དེ་འཐད་ན་དམིགས་མཚུངས་ཉམས་པའི་ཕྱིར་མི་རུང་ངོ་། །འོ་ན་མིག་གི་རྣམ་ཤེས་ཀྱིས་གཟུགས་མྱོང་གི། མཚུངས་ལྡན་འདོད་ཆགས་མ་མྱོང་བའི་དོན་ཏོ། །རྣམ་སྨིན་མྱོང་འགྱུར་ནི་མཐོང་ཆོས་མྱོང་འགྱུར་གྱི་ལས་དང་། མངོན་སུམ་དུ་ནི་གྱུར་པ་ལས་མྱོང་འགྱུར་ནི། ཇི་སྐད་དུ། གང་གི་ཚེ། བདེ་བའི་ཚོར་བ་མྱོང་བར་བྱེད་པ་དེའི་ཚེ་དེའི་ཚོར་བ་གཉིས་འགག་པར་འགྱུར་རོ། །ཞེས་གསུངས་ལ། དེའི་དོན་ནི་ཚོར་བ་རང་གིས་བདེ་བ་མྱོང་གི། མྱོང་བྱེད་གཉིས་པ་ལ་མི་བལྟོས། བལྟོས་ན་རང་གི་རིགས་ཀྱང་དེའི་དུས་སུ་འགག་ལ། ཆོར་བ་གཉིས་པོ་ཡང་དེའི་དུས་སུ་འགགས་པས་མྱོང་བྱེད་གཉིས་པ་མེད། འོ་ན་རང་གིས་མྱོང་བྱེད་གཉིས་པ་ལ་མི་བལྟོས་པར་རང་གིས་མྱོང་ན་བྱེ་སྨྲས་གཞན་རིག་ཁོ་ན་ཡིན། རང་རིག་མེད་བྱ་བ་དེ་མི་འཇིག་གམ་ཞེ་ན། དེ་མི་འཇིག་སྟེ། དཔེར་ན། རལ་གྲིས་ཁོ་རང་མི་གཅོད་ཅིང་། ཤིང་གཅོད་པའི་ཤིང་གཅོད་པ་དེ་རལ་གྲི་གཉིས་པ་དང་། བུམ་སོགས་གཞན་གང་ལའང་མི་བལྟོས་པར་ཤིང་གཅོད་པ་དེ་བཞིན་དུ་གཟུགས་རིག་པའི་མིག་གི་རྣམ་ཤེས་དེ་(༧༥ན)
ཡང་རང་རིག་མེད་ཀྱང་། གཟུགས་རིག་པ་དེ་རིག་བྱེད་གཉིས་པ་གང་ལ་ཡང་མི་བལྟོས་པར་རིག་ཅེའོ། །དེས་ན་རང་རིག་མེད་པར་ཁས་ལེན་པ་འཇིག་པ་མེད་དོ། །དེ་ལྟ་བུའི་མྱོང་འགྱུར་གྱི་ལས་ལའང་བདེ་སྡུག་བཏང་སྙོམས་མྱོང་འགྱུར་གྱི་ལས་སུ་ཡོད་པས་རྣམ་པ་ལྔ་ཡིན་ནོ། །གསུམ་པ་མྱོང་འགྱུར་གྱི་ཁྱད་པར་གཏན་ལ་དབབ་པ་ལ། བསྟན། བཤད་དོ། །དང་པོ་ནི། དེ་ཡང་ངེས་དང་མ་ངེས་དང་། །མྱོང་འགྱུར་གསུམ་པོ་དེ་ཡང་མྱོང་བར་ངེས་པ་དང་མ་ངེས་པ་ཡིན་ཏེ། གདོན་མི་ཟ་བར་མྱོང་ངེས་ཁོ་ན་ནི་མིན་ནོ། །གཉིས་པ་ལ། དབྱེ་བ་སྤྱིར་བསྟན་པ་དང་། སོ་སོའི་ཁྱད་པར། མྱོང་ངེས་ཀྱི་ལས་བསྟན་པའོ། །དང་པོ་ལ། རང་ལུགས་དང་། གཞན་ལུགས་སོ། །དང་པོ་ནི། མཐོང་བའི་ཆོས་ལ་སོགས་པ་ལ། །མྱོང་འགྱུར་ཕྱིར་ན་ངེས་རྣམ་གསུམ། །མཐོང་བའི་ཆོས་ལ་མྱོང་བར་འགྱུར་བ་དང་། སོགས་པས་སྐྱེ་གནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་ཕྱིར་ན་ལས་རྣམ་པ་འདི་གསུམ་ནི་མྱོང་བར་ངེས་པའོ། །མྱོང་བར་མ་ངེས་པ་དང་བཅས་ཏེ་ལས་རྣམ་པ་བཞི་ཡིན་ནོ། །གཉིས་པ་ལ། ལྔར་འདོད་པའི་ལུགས། མུ་བཞི་བརྩི་བའི་ལུགས་སོ། །དང་པོ་ནི། ཁ་ཅིག་ལས་རྣམ་ལྔ་ཞེས་ཟེར། །སྔོན་གྱི་སློབ་དཔོན་ཁ་ཅིག་ནི་མ་ངེས་པ་ལའང་རྣམ་སྨིན་དང་གནས་སྐབས་མ་ངེས་པ་གཉིས་སུ་ཕྱེ་ནས་ལས་རྣམ་པ་ལྔ་ཡིན་ནོ་ཞེས་ཟེར་རོ། །འདི་ལ་ཡང་བརྩི་ལུགས་ནི། རྣམ་སྨིན་ངེས་ལ་དུས་མ་ངེས་པ་གཅིགགཉིས་ཀ་མ་ངེས་པ་སྟེ་མ་ངེས་པ་གཉིས། མཐོང་ཆོས་སོགས་ངེས་པ་གསུམ་སྟེ་ལྔར་བཞག་པ་དང་། ཡང་ན་མཐོང་ཆོས་མྱོང་འགྱུར་སོགས་གནས་སྐབས་ངེས་པ་གསུམ། རང་གི་ངོ་བོ་ཅིས་ཀྱང་མྱོང་བར་ངེས་པ་དང་བཞི། གཉིས་ཀ་མ་ངེས་པ་དང་ལྔ་ཟེར་རོ། །དེ་ལ་མཐོང་ཆོས་མྱོང་འགྱུར་ནི་སྐྱེས་གང་དུ་བྱ་བ་པ་དེ་ཉིད་དུ་སྨིན་པར་འགྱུར་བའོ། །(༧༥བ)
སྐྱེས་ནས་མྱོང་འགྱུར་ནི་སྐྱེ་བ་གཉིས་པ་ལའོ། །ལན་གྲངས་གཞན་ལ་མྱོང་འགྱུར་ནི་དེ་ཕན་དུའོ། །གཞན་དག་ན་རེ། མཐོང་ཆོས་ལ་མྱོང་འགྱུར་གྱི་ལས་ཚེ་རབས་གཞན་དག་ནའང་ཡོད་དེ། མེད་ན་ཆོས་སྟོབས་དང་ལྡན་པའི་ལས་དེའི་རྣམ་སྨིན་ཆུང་ཆེས་པར་འགྱུར་དུ་འོང་བའི་ཕྱིར། ཁྱབ་སྟེ། སྐྱེ་བ་འདི་ཁོ་ན་ལ་སྨིན་ནས་ལས་འབྲས་ཟད་ནུས་པའི་ཕྱིར། དེས་ན་མཐོང་ཆོས་ལ་རྣམ་སྨིན་མགོ་རྩོམ་པའི་དབང་གིས་མིང་དེ་རྣམ་པར་བཞག་གོ་ཞེས་ཟེར་རོ། །བྱེ་སྨྲས་ནི་དེ་མི་འདོད་པས། འབྲས་བུ་ཉེ་ལ་འབྲས་བུ་རིང་བ་མ་ཡིན་པའི་ལས་ཀྱང་ཡོད་དེ། དཔེར་ན། ལྕམ་པ་ལ་སོགས་པ་ཟླ་བ་ཕྱེད་དང་གཉིས་ཀྱིས་འབྲས་བུ་སྨིན་པ་བཞིན་ནོ། །འབྲས་བུ་རིང་ལ་འབྲས་བུ་ཉེ་བ་མ་ཡིན་པའི་ལས་ཀྱང་ཡོད་དེ། ནས་དང་གྲོ་ལ་སོགས་པ་ཟླ་བ་དྲུག་གིས་འབྲས་བུ་སྨིན་པ་བཞིན་ནོ། །གཉིས་པ་ནི། གཞན་དག་མུ་ནི་བཞི་ཞེས་ཟེར། །གཞན་དཔེས་སྟོན་པ་རྟོག་གེའི་ཐ་སྙད་བྱེད་པ་དག་གནས་སྐབས་དང་རྣམ་སྨིན་ངེས་པ་ལ་མུ་བཞི་ཞེས་ཟེར་ཏེ། དེའང་གནས་སྐབས་ངེས་ལ་རྣམ་སྨིན་མ་ངེས་པའི་ལས་ཡོད་དེ། མཐོང་ཆོས་སོགས་ལ་མྱོང་བར་འགྱུར་ལ། རྣམ་པར་སྨིན་པ་ནི་མ་ངེས་པའི་ལས་དེ་དེ་ཡིན་པའི་ཕྱིར། དཔེར་ན། ཐག་རིང་ཞིག་གི་བུ་ལོན་དེ་གཅལ་དགོས་ན། སང་ལ་མ་གཞོལ་ན་ཡེ་འཇོལ་ནས་གཅལ་མི་དགོས་པ་སྲིད་པ་ལྟ་བུའོ། །རྣམ་པར་སྨིན་པ་ངེས་ལ་གནས་སྐབས་དག་ཏུ་མ་ངེས་པའི་ལས་ཀྱང་ཡོད་དེ། རྣམ་པར་སྨིན་པ་ནི་ངེས་ལ་གནས་གང་དུ་མྱོང་འགྱུར་མ་ངེས་པའི་ལས་དེ་དེ་ཡིན་པའི་ཕྱིར། དཔེར་ན། གཞན་གྱི་བུ་ལོན་དེ་ཅིས་ཀྱང་གཅལ་དགོས་པ་ལ། དུས་ནམ་གཅལ་ཀྱང་གལ་མེད་པ་ལྟ་བུའོ། །ཁ་ཅིག་ན་རེ། རྣམ་སྨིན་ངེས་ལ་གནས་སྐབས་མ་ངེས་པ་ནི། ལྷའི་ལུས་ཁོ་ན་ལ་སྨིན་དགོས་བྱ་བའམ། མིའི་ལུས་(༧༦ན)
ཁོ་ན་ལ་སྨིན་དགོས་བྱ་བའམ། དུད་འགྲོའི་ལུས་ཁོ་ན་ལ་སྨིན་དགོས་བྱ་བ་དེ་རྣམ་སྨིན་ངེས་པ་ཡིན་ལ། གནས་སྐབས་མ་ངེས་ཏེ་དེང་སང་ན་མཐོང་ཆོས་སམ། དེང་སང་ན་སྐྱེས་ནས་སམ། དེང་སང་ན་ལན་གྲངས་གཞན་ལ་ངེས་པ་མེད་པའོ། །དཔེར་ན། བུ་ལོན་དེ་གསེར་ཁོ་ན་གཅལ་དགོས་པ་ལ། དུས་ནམ་གཅལ་ཀྱང་གལ་མེད་པ་ལྟ་བུའོ། །ཁ་ཅིག་ན་རེ། རྣམ་སྨིན་དེ་མྱོང་བར་ངེས་པ་ལ་གནས་སྐབས་མིའི་ལུས་ལ་སྨིན་ནམ། དུད་འགྲོའི་ལུས་ལ་སྨིན་མ་ངེས་པ་དེ་ལྟ་བུ་ཡིན་ཟེར་རོ། །གཉིས་ཀ་ངེས་པའི་ལས་ཀྱང་ཡོད་དེ། མཐོང་ཆོས་སོགས་མྱོང་འགྱུར་གྱི་གནས་སྐབས་ངེས་པ་དང་། རྣམ་པར་སྨིན་པ་ཡང་ངེས་པའི་ལས་དེ་དེ་ཡིན་པའི་ཕྱིར་རོ། །དཔེར་ན། ཁ་དྲག་པོ་གཅིག་གི་བུ་ལོན་དེ་གནངས་ཁོ་ན་ལ་གཅལ་དགོས་པ་ལྟ་བུའོ། །གཉིས་ཀ་མ་ངེས་པའི་ལས་ཀྱང་ཡོད་དེ། མྱོང་བར་འགྱུར་བ་ཡང་མ་ངེས་ལ། རྣམ་པར་སྨིན་པ་ཡང་མ་ངེས་པའི་ལས་དེ་དེ་ཡིན་པའི་ཕྱིར། དཔེར་ན། ཁ་ཞན་པོ་གཅིག་གི་བུ་ལོན་དེ་དུས་དང་གཅལ་དགོས་པ་གཉིས་ཀ་མ་ངེས་པ་ལྟ་བུའོ། །དཔེ་སྟོན་པ་དེ་དག་གི་ལུགས་ལས། ལས་རྣམ་པ་བརྒྱད་དེ། རྣམ་སྨིན་མཐོང་ཆོས་ལ་མྱོང་འགྱུར་ངེས་པ་དང་། མ་ངེས་པ་དང་། རྣམ་སྨིན་སྐྱེས་ནས་མྱོང་འགྱུར་དུ་ངེས་མ་ངེས་གཉིས་དང་། རྣམ་སྨིན་ལན་གྲངས་གཞན་ལ་མྱོང་འགྱུར་དུ་ངེས་མ་ངེས་གཉིས་དང་། མྱོང་བར་མ་ངེས་པ་ལའང་རྣམ་སྨིན་མྱོང་བར་ངེས་ཀྱང་གནས་སྐབས་མྱོང་བར་མ་ངེས་པ་གཉིས་ཏེ་བརྒྱད་ལས། སྔ་མ་དྲུག་སྤྱི་ལྡོག་ནས་ངེས་ལ། ཕྱི་མ་གཉིས་མ་ངེས་པར་ཡང་བརྗོད་ལ། སྔ་མ་གསུམ་གྱི་ཕྱེད་གོང་མ་གསུམ་ངེས་ལ། ཕྱེད་འོག་མ་གསུམ་དང་ཕྱི་མའི་གཉིས་བསྡོམས་པས་ལྔ་ནི་མ་ངེས་པར་ཡང་འཇོག་གོ། །གཉིས་པ་སོ་སོའི་ཁྱད་པར་ལ།(༧༦བ)
ལས་གང་གིས་རིས་མཐུན་འཕེན་པ། ཁམས་དང་འགྲོ་བ་གང་ན་ལས་འཕེན་དུ་ཡོད་པའོ། །དང་པོ་ནི། གསུམ་གྱིས་རིགས་ནི་འཕེན་པར་བྱེད། །སྐད་ཅིག་མ་གཅིག་ལ་མཐོང་ཆོས་ལ་མྱོང་འགྱུར་སོགས་ལས་རྣམ་པ་བཞི་འཕེན་པར་འགྱུར་བ་ཡོད་དམ་ཞེ་ན། ཡོད་དེ། ཕ་རོལ་པོ་སྲོག་གཅོད་མ་བྱིན་ལེན་རྫུན་ལ་སྦྱར་ནས། རང་འདོད་ལོག་ལ་ཞུགས་ནས་ལས་བཞི་པོ་དེ་དག་གཅིག་ཅར་མཐར་ཕྱིན་པར་གྱུར་ན། སྲོག་གཅོད་ལྟ་བུ་ནི་མཐོང་ཆོས་ལ་མྱོང་འགྱུར་དང་། མ་བྱིན་ལེན་གྱིས་ནི་སྐྱེས་ནས་མྱོང་འགྱུར་དང་། མི་ཚངས་སྤྱོད་ནི་ལན་གྲངས་གཞན་ལ་མྱང་འགྱུར་དང་། རྫུན་སྨྲ་ནི་མྱོང་བར་མ་ངེས་པ་ལྟ་བུ་སྐད་ཅིག་གཅིག་ལ་རྫོགས་པའི་ཕྱིར་རོ། །ལས་བཞི་པོ་དེ་དག་ལས་མཐོང་ཆོས་ལ་མྱོང་འགྱུར་གྱིས་རིས་མཐུན་མི་འཕེན་གྱི་སྐྱེས་ནས་མྱོང་འགྱུར་ལ་སོགས་པ་གསུམ་གྱིས་རིས་མཐུན་ནི་འཕེན་པར་བྱེད་དེ། སྔ་མས་མི་འཕེན་པ་ཡང་ལས་གཞན་གྱིས་འཕངས་པའི་རིས་མཐུན་པ་ལ་དེ་འབྱུང་བའི་ཕྱིར། དེ་ཉིད་དུ་འབྲས་བུ་དེ་འབྱིན་པའི་ཕྱིར་རོ། །གཉིས་པ་ལ། སྤྱིར་བཏང་བ་དང་། དམིགས་ཀྱིས་བསལ་བའོ། །དང་པོ་ནི། ཐམས་ཅད་ན་ནི་འཕེན་པ་བཞི། །ཁམས་དང་འགྲོ་བ་གང་ན་འཕེན་པ་དུ་ཡོད་པ་ནི། ཁམས་གསུམ་པོ་དང་འགྲོ་བ་ཐམས་ཅད་ན་ནི་དགེ་བ་དང་མི་དགེ་བའི་འཕེན་པ་བཞི་བཞིར་ཡོད་དོ། །ཅི་རིགས་པར་ཞེས་པ་ནི། མི་དགེ་བ་འདོད་ཁམས་ཁོ་ན་ལ་ཡོད་པ་ལ་དགོངས་སོ། །གཉིས་པ་ལ། སྐྱེ་སྲིད་ལ་དང་། བར་སྲིད་ལ་ལས་འཕེན་དུ་ཡོད་པའོ། །དང་པོ་ལ། དམྱལ་བའི་སྐྱེ་སྲིད་ལ་དུ་ཡོད་པ་དང་། སོ་སྐྱེ་ཁྱད་པར་བའི་སྐྱེ་སྲིད་ལ་དང་། འཕགས་པའི་སྐྱེ་སྲིད་ལ་དུ་ཡོད་པའོ། །དང་པོ་ནི། དམྱལ་བ་ན་ནི་དགེ་བའི་གསུམ། །འགྲོ་བ་ཐམས་ཅད་ན་ཞེས་སྤྱིར་བསྟན་པའི་དམིགས་བསལ་ནི། དམྱལ་བ་ན་ནི་མི་དགེ་བ་བཞི་ཅར་གྱི་འཕེན་པ་སྲིད་དེ། དམྱལ་བའི་ཚེ་སྟོད་ལ་ལས་ངན་བྱས་པས་ཚེ་སྨད་ལ་ཤིན་ཏུ་ཡིད་(༧༧ན)
འོང་བསྐྱེད་པ་སྲིད་པའི་ཕྱིར་རོ། །ལས་དགེ་བའི་གསུམ་གྱི་འཕེན་པ་ཡོད་ཀྱི། མཐོང་ཆོས་ལ་མྱོང་འགྱུར་གྱི་འཕེན་པ་ནི་མེད་དེ། ཚེ་སྟོད་ལ་དགེ་བ་བྱས་པས་ཚེ་སྨད་ལ་བདེ་བ་མྱོང་བ་མེད་ལ། སྤྱིར་དམྱལ་བ་ན་རྣམ་སྨིན་ཡིད་འོང་མེད་པའི་ཕྱིར། དཔེར་ན། སྟོན་པ་ཤཱཀ་ཐུབ་དམྱལ་བར་སྐྱེས་པའི་དུས་སུ་གྲོགས་པོ་གཅིག་ལ་སྙིང་རྗེ་སྐྱེས་ནས་གྲོགས་པོ་ངལ་བསོར་བཅུག་ནས། རང་གི་ཤིང་རྟ་དྲངས་པའི་ལས་ཀྱིས་སྐྱེས་ནས་མྱོང་འགྱུར་གྱི་ལས་དེས་རྫ་མཁན་སྨྲང་བྱེད་དུ་སྐྱེས། དེ་བཞིན་ལན་གྲངས་གཞན་པ་དང་མ་ངེས་པའི་ལས་གསུམ་འཕེན་པ་ལྟ་བུའོ། །གཉིས་པ་ནི། གང་ལས་འདོད་ཆགས་བྲལ་བརྟེན་པའི། །བྱིས་པ་དེར་སྐྱེས་མྱོང་མི་བྱེད། །ས་གང་ལས་འདོད་ཆགས་དང་བྲལ་བའི་བྱིས་པ་ཆོས་ཅན། དེར་སྐྱེས་ནས་མྱོང་བའི་ལས་མི་བྱེད་དེ། དེའང་ཡོངས་སུ་མི་ཉམས་པ་བརྟན་པའི་དབང་དུ་བྱས་པའི་ཕྱིར། མཐོང་ཆོས། ལན་གྲངས་གཞན་ལ་མྱོང་བ་དང་མ་ངེས་པ་གསུམ་འཕེན་པར་ནི་བྱེད་ལ། འཕགས་པ་ལ་དེར་སྐྱེས་ནས་མྱོང་འགྱུར་མི་སྲིད་དེ། ཕྱིར་མི་འོང་ཡིན་པའི་ཕྱིར། གཞན་རྣམ་པ་གསུམ་བྱེད་པ་དེ་ཡང་འདོད་ཁམས་སུ་ལན་གྲངས་གཞན་ལ་མྱོང་འགྱུར་གྱི་འཕེན་པ་བྱེད་པའི་མ་རིག་པ་དེས་གོང་མ་བསྡུས་པ་ཡིན་ཏེ། འོག་མ་ལས་འདོད་ཆགས་དང་བྲལ་བ་ཡིན་པས་སོ། །ཡང་ན། འོག་མར་ལན་གྲངས་གཞན་ལས་སྐྱེ་བ་དེ་ཡང་ལས་རྙིང་གིས་སྐྱེ་ཙ་ན་ལས་རྙིང་དེའི་སྐུལ་བྱེད་མ་རིག་པ་འོག་མར་གཏོགས་སོ། །ཡང་ན། འཕེན་བྱེད་ཀྱི་ལས་མི་སོག་ཀྱང་། ལན་གྲངས་གཞན་ལ་མྱོང་འགྱུར་གྱི་རྫོགས་བྱེད་ཀྱི་ལས་སོག་པ་ཡིན་ནོ། །གསུམ་པ་ནི། འཕགས་པ་གཞན་དུའང་མྱོང་མི་བྱེད། །འདོད་རྩེའི་མི་བརྟན་པ་ཡང་མིན། །འཕགས་པའི་གང་ཟག་མི་ཉམས་པའི་ཆོས་ཅན་ཡིན་ན། ས་གང་ལས་འདོད་ཆགས་དང་བྲལ་བ་དེར་སྐྱེས་ནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་གྱི་ལས་ཀྱང་མི་བྱེད་དེ། འཕགས་པ་མི་ཉམས་པ་འདི་ནི་ས་འོག་མར་འོང་བ་(༧༧བ)
རུང་བ་མ་ཡིན་པའི་ཕྱིར། ཉམས་པའི་ཆོས་ཅན་ལ་ནི་རུང་སྟེ། འཕགས་པ་སྲིད་རྩེ་ཐོབ་པ་ཉམས་པའི་ཆོས་ཅན་ཉམས་ནས་གཟུགས་ཁམས་སུ་སྐྱེ་བ་དེ་ལ་སྐྱེས་ནས་མྱོང་བ་དང་ལན་གྲངས་གཞན་ལ་མྱོང་བར་འགྱུར་བ་སྲིད་དེ། འཆར་བྱེད་ཀྱི་མདོ་ལས་འབྱུང་བ་བཞིན་ནོ་ཞེས་སོ། །འཕགས་པ་མི་ཉམས་པ་དེས་མྱོང་བར་མ་ངེས་པ་དང་མཐོང་ཆོས་ལ་མྱོང་འགྱུར་གཉིས་ནི་བྱེད་དོ། །འདོད་པ་ལས་ཆགས་བྲལ་གྱི་ཕྱིར་མི་འོང་དང་སྲིད་རྩེ་ལས་ཆགས་བྲལ་གྱི་དགྲ་བཅོམ་མི་བརྟན་པ་ཡོངས་སུ་ཉམས་པའི་ཆོས་ཅན་ཡིན་ཀྱང་། འདོད་པ་དང་སྲིད་རྩེར་སྐྱེས་ནས་མྱོང་འགྱུར་དང་། ལམ་གྲངས་གཞན་ལ་མྱོང་འགྱུར་གྱི་ལས་བྱེད་པར་རུང་བ་མིན་ཏེ། དེ་ནི་འབྲས་བུ་ལས་ཉམས་པ་ཡིན་ལ། འབྲས་བུ་ལས་ཉམས་པ་ལ་ནི་འབྲས་བུ་དེ་མ་ཐོབ་ཀྱི་བར་དུ་འཆི་བ་མེད་པའི་ཕྱིར་རོ། །འདིར་དཔལ་ཤཱཀྱ་མཆོག་ལྡན་ན་རེ། བདེན་པ་མཐོང་ལ་འཕེན་པ་མེད། །ཅེས་བྱ་བ་ནི་རྣལ་འབྱོར་སྤྱོད་པ་པ་དག་གི་ལུགས་ཡིན་ལ། ལུགས་འདི་ལ་ནི་དེ་ལྟར་མ་ཡིན་ཏེ། གང་ལ་འདོད་ཆགས་བྲལ་བརྟན་པའི། །ཞེས་ས་གང་ལ་ཆགས་བྲལ་མ་ཡིན་པ་དང་། བྱས་ཀྱང་མི་རྟག་པའི་འཕགས་པས་སྐྱེས་ནས་དང་ལན་གྲངས་གཞན་ལ་མྱོང་འགྱུར་འཕེན་པར་བྱེད་དེ། རྒྱུན་ཞུགས་སྲིད་པ་ལན་བདུན་པ་དང་། རིགས་ནས་རིགས་སྐྱེ་དང་། ཚེ་གཅིག་བར་ཆད་གཅིག་པ་དང་། ཁམས་གོང་མར་ཉེ་བར་འགྲོ་བ་དག་ཡིན་ནོ། །གཅིག་ལ་མཚོན་ན། ཕྱིར་མི་འོང་སྐྱེ་འདའ་བ་དང་། གོང་འཕོ་དེ་ཁམས་གོང་མ་དག་ཏུ་སྐྱེས་ནས་མྱོང་འགྱུར་དང་། ལན་གྲངས་གཞན་ལ་མྱོང་འགྱུར་གྱི་ལས་ཅན་དུ་བཤད་པ་དང་། ལས་དེ་དག་ནི་འཕེན་བྱེད་ཀྱི་ལས་ཡིན་ཏེ། གསུམ་གྱིས་རིས་ནི་འཕེན་པར་བྱེད། །ཅེས་བཤད་པས། ལས་དེ་ཡང་འཕགས་པས་བྱས་པ་ཡིན་ཏེ། དཔེར་ན། བསམ་གཏན་(༧༨ན)
གྱི་སྤེལ་མ་གོམས་ལམ་ཉམས་པའི་ཚེ་གནས་གཙང་མ་དག་ཏུ་སྐྱེས་ནས་མྱོང་འགྱུར་གྱི་ལས་ཅན་དང་། དེ་བསམ་གཏན་རོ་མྱོང་པའི་ཚེ་ན་གནས་གཙང་མ་དག་ཏུ་ལན་གྲངས་གཞན་ལ་མྱོང་འགྱུར་གྱི་ལས་བྱས་པར་འཇོག་པའི་ཕྱིར། ཞེས་བཀོད་པ་དེ་ནི་ཆོས་འདིའི་ལུགས་རྒྱུས་མེད་པ་དག་གི་ངོར་དཔེར་བཀོད་པ་རྣམས་ཀྱང་རྣམ་པ་གསལ་གསལ་ལྟར་འཆར་མོད། མི་བརྟན་པའི་འཕགས་པས་སྔས་ནས་དང་ལན་གྲངས་གཞན་ལ་མྱོང་འགྱུར་གྱི་ལས་འབྲས་བསགས་པ་ཡོད་ཀྱང་། དེ་འཕེན་བྱེད་སྲིད་རྩེའི་མ་རིག་པ་ཡིན་པར་མ་ངེས་པ་དང་། གསུམ་གྱི་རིས་ནི་འཕེན་པར་བྱེད་ཅེས་པས་ཀྱང་འཕགས་པ་འཁོར་བར་སྐྱེ་བའི་འཕེན་བྱེད་ཀྱི་སྲིད་རྩེ་བསྟན་པའི་སྐབས་མ་ཡིན་པའི་ཕྱིར་རོ། །དེས་ན་འཕགས་པ་ལ་མཐོང་སྤང་དུ་གྱུར་པའི་སྲིད་རྩེས་འཁོར་བ་ན་འཕེན་བྱེད་ཀྱི་ལས་སོག་པ་མེད་པ་ནི་མངོན་པ་གོང་འོག་གང་ནའང་ཁྱད་པར་མེད་པ་ལ་འདིར་ཡོད་པར་བཤད་པ་ནི་རང་གི་སློབ་མའི་ཚོགས་ཀྱི་དབུས་ན་བདག་ཉིད་སྔ་ན་མེད་པའི་སྟོན་པ་ཟླ་མེད་པར་ཞལ་འཆེ་བའི་ཁྱུ་མཆོག་གི་སྒྲའོ། །གཉིས་པ་བར་སྲིད་ལ་ལས་འཕེན་དུ་ཡོད་པ་ལ། དབྱེ་བ། ངེས་པ་བཅུ་གཅིག་མཐོང་ཆོས་སུ་སྒྲུབ་པའོ། །དང་པོ་ནི། སྲིད་པ་བར་མ་འདོད་ཁམས་སུ། །འཕེན་པ་རྣམ་པ་ཉི་ཤུ་གཉིས། །འདོད་པའི་ཁམས་སུ་སྲིད་པ་བར་མར་ནི་མངལ་གྱི་གནས་སྐབས་ནུར་ནུར་པོ་དང་། མེར་མེར་པོ་དང་། ནར་ནར་པོ་དང་། གོར་གོར་པོ་དང་། རྐང་ལག་འགྱུས་པའི་གནས་སྐབས་ཏེ་ལྔ་དང་། བྱིས་པ་དང་། གཞོན་ནུ་དང་། དར་བབ་དང་། དར་ཡོལ་དང་། རྒན་པོའི་གནས་སྐབས་ཏེ་སྐྱེས་པའི་གནས་སྐབས་ལྔ་སྟེ་བཅུ། བར་སྲིད་ཀྱི་གནས་སྐབས་གཅིག་སྟེ། དེ་རྣམས་ལ་མྱོང་བར་འགྱུར་བར་ངེས་མ་ངེས་གཉིས་གཉིས་ཏེ། འཕེན་པ་རྣམ་པ་ཉི་ཤུ་རྩ་གཉིས་ཀྱི་བར་དུ་འཕེན་པར་བྱེད་དོ། །གཟུགས་ནི་ནི་མངལ་(༧༨བ)
སོགས་ཀྱི་གནས་སྐབས་དེ་རྣམས་མེད་དོ། །གཉིས་པ་ནི། དེ་ནི་མཐོང་ཆོས་འབྲས་བུ་ཡིན། །དེ་ནི་རིགས་གཅིག་ཁོ་ན་ཡིན། །སྲིད་པ་བར་མའི་ལས་ནུར་ནུར་པོ་མྱོང་བར་འགྱུར་བ་སོགས་ལས་ངེས་པ་བཅུ་གཅིག་བཤད་པ་དེ་ནི་འབྲས་བུ་མཐོང་ཆོས་ལ་མྱོང་བར་འགྱུར་བ་ཡིན་ནོ། །དེའི་རྒྱུ་མཚན་ཡང་། བར་སྲིད་དང་དེའི་རྒྱུ་ལས་བྱུང་བ་གནས་སྐབས་བཅུ་པོ་དེ་ནི་རིས་མཐུན་པ་གཅིག་ཁོ་ན་ཡིན་ཏེ། ལས་གཅིག་གིས་འཕངས་པ་ཡིན་ནོ། །དེའི་ཕྱིར། སྲིད་པ་བར་མ་མཐོང་ཆོས་དང་། སྐྱེས་ནས་དང་། ལན་གྲངས་གཞན་ལ་དང་། མྱོང་བར་མ་ངེས་པའོ་ཞེས་བྱ་བ་དེར་མ་བཤད་དེ། བར་སྲིད་དེ་ནི་སྐྱེས་ནས་མྱོང་འགྱུར་ཁོ་ནས་འཕངས་པའི་ཕྱིར། གསུམ་པ་མྱོང་ངེས་ཀྱི་ལས་བསྟན་པ་ལ། སྤྱིར་བཤད་པ། མཐོང་ཆོས་བྱེ་བྲག་ཏུ་བཤད་པ། ལས་འབྲས་མྱོང་ཚུལ་གཞན་བསྟན་པའོ། །དང་པོ་ནི། ཉོན་མོངས་རབ་དང་དྲག་པོ་དང་། །ཡོན་ཏན་ཞིང་དང་རྒྱུན་ཆགས་སུ། །བྱས་པ་གང་ཞིག་ཡིན་པ་དང་། །ཕ་མ་གསོད་གང་དེ་ངེས་སོ། །ཉོན་མོངས་དྲག་པོ་དང་། རབ་ཏུ་དང་པ་དྲག་པོས་བྱས་པ་གང་ཡིན་པ་དང་། ཞེས་དགེ་བ་ལ་དང་བའི་ལས་ནི་དགེ་བ་ལ་དད་ཅིང་འདུན་པའི་ལས་གང་ཡིན་པའོ། །ཡོན་ཏན་གྱི་ཞིང་དང་ཞེས་པ་ནི་དཀོན་མཆོག་གསུམ་དང་། མཐོང་ལམ་དང་དགྲ་བཅོམ་པའི་འབྲས་བུ་དང་། འགོག་པ་དང་ཉོན་མོངས་མེད་པ་དང་། བྱམས་པའི་སྙོམས་འཇུག་ཐོབ་པ་དང་། འཇིག་རྟེན་པའི་སྙོམས་འཇུག་གཞན་ལས་ཁྱད་པར་ཟག་མེད་ལམ་གྱི་འབྲས་བུ་ཐོབ་པའི་ཞིང་ཁྱད་ཅན་རྣམས་སོ། །དེ་དག་ལ་ནི་ཉོན་མོངས་དང་དང་བ་དྲག་པོ་མེད་ཅིང་རྒྱུན་དུ་བྱེད་པ་མེད་པར་ཡང་དགེ་མི་དགེའི་ལས་གང་བསགས་པ་མཐོང་ཆོས་ལ་མྱོང་བར་ངེས་སོ། །ཕ་མ་གསོད་གང་དེ་ངེས་སོ། །ཞེས་པས་ནི་དགེ་མི་དགེའི་བློ་ཅི་རིགས་པས་བསད་ཀྱང་རུང་སྟེ། འབྲས་བུ་ཡིད་མི་འོང་ནི་མཐོང་ཆོས་མྱོང་འགྱུར་མ་ངེས་པའི་ཕྱིར་རོ། །སོག་པོ་པར་སིག་པས་ཕ་མ་གསོད་པ་དེ། ཕ་མ་ལྟར་སྐྱེ་བའི་ཕྱིར་གསོད་པ་(༧༩ན)
ནི། བྱང་སེམས་བཞིན་དུ་དག་པར་ཅིས་མི་འགྱུར་ཞེ་ན། བྱང་སེམས་ནི་གང་ཟག་དེ་ཉེས་པར་སྤྱོད་པ་ཆེ་བས་དམྱལ་བར་སྐྱེ་བ་ལ་སྙིང་རྗེས་མ་བཟོད་པ་དང་། དེ་བསད་པས་རང་ལ་རྣམ་སྨིན་བསྐལ་པ་སྟོང་ཕྲག་ཏུ་ཡིད་དུ་མི་འོང་བ་བཟོད་པ་ཡིན་པ་ལ། སོག་པོ་པར་སིག་པ་ཕ་མ་གསོད་པའི་རྣམ་སྨིན་རང་ལ་ཇི་ཙམ་འོང་ཡང་བཟོད་པ་མེད། ཕ་མ་དེ་སླར་ལ་སྡུག་བསྔལ་བར་སྐྱེ་བ་མཐོང་བ་ཡང་མེད། དེ་བས་བདེ་བར་སྐྱེ་བ་ཡང་མཐོང་བ་མེད་པས་བྱང་སེམས་ཀྱི་གཞན་དོན་དུ་སྲོག་བཅད་པ་དང་ཅི་ལ་མཚུངས་སོ། །ཕ་མ་གསོད་པའི་མཚམས་མེད་འདི་ལའང་རྣམ་སྨིན་ནི་ངེས་པས་ཁྱབ་ལ། གནས་སྐབས་ནི་ངེས་པས་མ་ཁྱབ་སྟེ། ལས་དེའི་འབྲས་བུ་མཐོང་ཆོས་སུ་བསྒྱུར་ནས་ཁམས་གསུམ་ལ་ཆགས་བྲལ་བྱེད་པ་དག་ཀྱང་སྲིད་དོ་ཞེས་ཁ་ཅིག་ཟེར་རོ། །ཉོན་མོངས་པ་དང་རབ་དང་ཆུང་ངུས་བྱས་པ་ནི་མྱོང་བར་མ་ངེས་སོ། །གཉིས་པ་ལ། ལས་ཀྱི་ནུས་པ་དང་། གཉེན་པོའི་ནུས་པས་མཐོང་ཆོས་སུ་ངེས་པ་དང་། ཞིང་གི་ཁྱད་པར་རོ། །དང་པོ་ནི། མཐོང་ཆོས་འབྲས་བུ་ཅན་གྱི་ལས། །ཞིང་དང་བསམ་པའི་ཁྱད་པར་ལས། །མཐོང་ཆོས་ལ་འབྲས་བུ་མྱོང་བ་ཅན་གྱི་ལས་ཞིང་གི་ཁྱད་པར་ལས་འགྱུར་པ་དགེ་སློང་ཤགས་ཀྱིས་ཕམ་པ་ཞིག་གིས་དགེ་འདུན་ལ་བུད་མེད་ཅེས་འཐབ་མོ་བརྒལ་བས་ཚེ་དེ་ལ་བུད་མེད་དུ་གྱུར་པར་གྲགས་པ་དང་། བསམ་པའི་ཁྱད་པར་ལས་རྒྱལ་པོ་ཀ་ན་ཀའི་ཉུག་རུམ་ལོང་བ་ཞིག་གིས་བརྔན་པ་བྱིན་ནས་གླང་ལྔ་བརྒྱ་དག་རླིག་པ་དབྱུང་བ་ལས་ཐར་བར་བྱས་པས་སྐྱེས་པའི་དབང་པོར་གྱུར་པ་ལྟ་བུའོ། །སྐབས་འདིར་དཔལ་ཤཱཀྱ་མཆོག་ལྡན་ན་རེ། ལས་དགེ་བའམ་མི་དགེ་བའི་རྣམ་སྨིན་འཕེན་པའི་ཆ་ནས་ནི་མཐོང་ཆོས་ལ་མྱོང་འགྱུར་དུ་མི་འཇོག་སྟེ། དེའི་ཆ་ནས་མྱོང་འགྱུར་གཞན་གཉིས་པོ་གང་རུང་དུ་འཇོག་པའི་ཕྱིར། རྒྱུ་མཐུན་གྱི་འབྲས་བུ་མྱོང་བའི་ཆ་ནས་དེར་འཇོག་པ་(༧༩བ)
ཡིན་ཏེ། སྔོན་དགེ་སློང་གིས་དགེ་འདུན་ལ་བུད་མེད་ཅེས་བརྗོད་པས་བུད་མེད་དུ་མཚན་གྱུར་པ་དང་། ཉུག་རུམ་པས་གླང་རླིག་འབྱིན་པ་ལས་ཐར་བར་བྱས་པས་རང་འབྲས་སོར་ཆུད་པར་བཤད་པ་ལྟ་བུའོ་ཞེས་ཟེར་རོ། །འདི་ཡང་སྔོན་མ་གྲགས་པའི་ཆོས་སྐད་ངོ་མཚར་བ་ཞིག་ཟུར་ཁྱད་ཐོན་པར་རློམ་པ་ཡིན་མོད། གསུང་རབ་ཀྱི་དགོངས་པ་ནི་མ་ཡིན་ཏེ། ལས་ཀྱི་རྣམ་པར་སྨིན་པའི་འབྲས་བུ་འཆད་པའི་སྐབས་སུ་ངེས་པ་གསུམ་དང་མ་ངེས་པ་གཅིག་གི་རྣམ་སྨིན་ཏེ་རྣམ་སྨིན་བཞི་འཆད་པའི་སྐབས་ཡིན་ལ། རྒྱུ་མཐུན་གྱི་འབྲས་བུ་ནམ་སྨིན་འཆད་པའི་སྐབས་མ་ཡིན་པའི་ཕྱིར་དང་། དགེ་མི་དགེའི་རྣམ་སྨིན་མཐོང་ཆོས་སུ་སྨིན་རྒྱུ་དེ་སྐྱེ་གནས་གཞན་དང་ལན་གྲངས་གཞན་ལ་མྱོང་བའམ་སྨིན་པར་ཁས་བླངས་པས་རང་ཚིག་བླ་ན་མེད་པར་འགལ་བའི་ཕྱིར་དང་། མཐོང་ཆོས་མྱོང་འགྱུར་གྱི་ལས་འབྲས་ཡིན་ན་རྒྱུ་མཐུན་གྱི་འབྲས་བུ་ཡིན་དགོས་ན་མྱོང་འགྱུར་ཕྱི་མ་གཉིས་ཀྱི་ལས་འབྲས་ཡིན་ནའང་རྒྱུ་མཐུན་གྱི་ལས་འབྲས་ཁོ་ན་ཡིན་དགོས་པ་དང་། དེ་མི་དགོས་ན་སྔ་མའང་མི་དགོས་པ་དང་། དེ་ལྟར་སྒྲུབ་པ་ལ་ལུང་དང་འཐད་པ་གང་ཡང་མེད་པའི་ཕྱིར་དང་། མཐོང་བའི་ཆོས་ལ་སེམས་ཅན་དམྱལ་བ་ཆེན་པོར་སྐྱེས་པའང་མི་འཐད་པར་འགྱུར་བ་དང་། ཁྱེད་ཀྱིས་བཤད་པའི་མཐོང་ཆོས་རྣམ་སྨིན་གྱི་དཔེ་གཉིས་པོའང་རྒྱུ་མཐུན་གྱི་ལས་འབྲས་མྱོང་བའི་དཔེ་མ་ཡིན་ཏེ། མཐོ་རིས་ཀྱི་ལུས་རྟེན་མཆོག་དམན་ཀྱང་དགེ་མི་དགེའི་རྣམ་སྨིན་གྱི་འབྲས་བུ་ཡིན་པའི་ཕྱིར་དང་། ཁྱབ་པ་ཡོད་དེ། མཐོ་རིས་ན་ཡོད་པའི་མི་ཁོམ་པའི་ལུས་རྟེན་རྣམས་མི་དགེ་བའི་རྣམ་སྨིན་གྱི་འབྲས་བུ་ཡིན་པའི་ཕྱིར་དང་། གསུང་རབ་ཀྱི་ཚིག་ཟིན་ཐམས་ཅད་དང་ཡང་འགལ་ཏེ། ལས་ཀྱི་རྣམ་པར་སྨིན་པ་ཚེ་དེ་ཉིད་ལ་སྨིན་པར་འགྱུར་ཏེ། ཞེས་རྒྱས་པར་འབྱུང་བ་ཐམས་ཅད་དང་། འགྲེལ་པ་འདི་ཉིད་དུའང་། མཐོང་(༨༠ན)
བའི་ཆོས་ལ་མྱོང་བར་འགྱུར་བ་ནི་སྐྱེ་བ་གང་དུ་བྱས་པ་དེ་ཉིད་དུ་རྣམ་པར་སྨིན་པར་འགྱུར་བའོ་ཞེས་པ་དང་མངོན་སུམ་དུ་འགལ་བའི་ཕྱིར་རོ། །ཐེག་པ་ཆེན་པོ་ལྟར་ན། སོར་མོའི་ཕྲེང་བ་ཅན་མི་དུ་མ་བསད་པའི་ལས་བཤགས་པས་དག་ཀྱང་། དེའི་རྣམ་སྨིན་གྱི་འབྲས་བུ་མི་བསླུ་བར་མཐོང་ཆོས་མྱོང་འགྱུར་ལ་དམྱལ་བའི་རྣམ་སྨིན་མྱོང་བར་བཤད་པ་དང་། འཆད་མ་ཐག་པའི་གཞུང་རྣམ་སྨིན་གྱི་འབྲས་བུར་ནི་ངེས་ལ། གནས་སྐབས་མ་ངེས་པ་དེ་མཐོང་ཆོས་ལ་རྣམ་སྨིན་གྱི་འབྲས་བུ་མྱོང་བར་གསུངས་པ་སོགས་ཕྱོགས་འདི་ལྟ་བུ་ལ་གཞོགས་གཅིག་གཡང་བསྐྱུར་མཛད་པ་ནི། ཨེ་མ་ཧོ་སྐྱེས་བུ་ཆེན་པོ་ཤིན་ཏུ་དཔའ་ཞིང་བརྟུལ་ཕོད་པའོ། །གཉིས་པ་ནི། ས་དེའི་འདོད་ཆགས་གཏན་བྲལ་ཕྱིར། །རྣམ་སྨིན་ངེས་པ་གང་ཡིན་པའོ། །ཡང་ན་འདོད་པ་ལ་སོགས་པའི་ས་དེའི་དགེ་མི་དགེ་ལས་འདོད་ཆགས་དང་གཏན་དུ་བྲལ་བའི་ཕྱིར། ཕྱིན་ཆད་དེར་མི་སྐྱེ་བས་ཡུལ་འཕོ་བ་ན་བུ་ལོན་ལྡང་བ་ལྟར་ས་དེར་མྱོང་བར་ངེས་པའི་ལས་གང་ཡིན་པ་དེའི་འབྲས་བུ་ནི་མཐོང་ཆོས་དེ་ཁོ་ན་ལ་མྱོང་བར་འགྱུར་རོ། །ལས་དེ་ཡང་ཇི་ལྟ་བུ་ཞེ་ན། དེ་ནི་གནས་སྐབས་མ་ངེས་ཀྱང་རྣམ་སྨིན་མྱོང་བར་ངེས་པ་གང་ཡིན་པའོ། །མཐོང་ཆོས་སོགས་གནས་སྐབས་གཞན་དུ་ངེས་པ་དེ་ནི་དེ་དང་ལྡན་བཞིན་དུ་གཏན་དུ་འདོད་ཆགས་དང་བྲལ་མི་སྲིད་པས་དེ་ཉིད་དུ་རྣམ་པར་སྨིན་པར་འགྱུར་རོ། །མ་ངེས་པ་ནི་ཆགས་བྲལ་གྱི་གེགས་མི་ནུས་ལ། ས་དེ་ལས་གཏན་དུ་འདོད་ཆགས་དང་བྲལ་བའི་ཕྱིར་མ་ངེས་པ་དེ་རྣམ་པར་མི་སྨིན་པ་ཉིད་དོ། །ཐེག་པ་ཆེན་པོ་པའི་ལུགས་ལ་ནི། མྱོང་འགྱུར་གཞན་གཉིས་ཀྱང་མཐོང་ཆོས་སུ་བསྒྱུར་བ་དང་། རྣམ་སྨིན་ངེས་པའི་ལས་ཀྱང་མི་མྱོང་བར་བསྒྱུར་ནུས་པར་བཞེད་ལ། ལུགས་འདིར་ནི་དེ་མི་འདོད་དོ། །འདི་དང་མཐུན་པར་སྔགས་བླ་ན་མེད་པའི་རྫོགས་རིམ་གྱི་སྐབས་སུ། འགྲོ་བ་དྲུག་ཏུ་སྨིན་རྒྱུའི་(༨༠བ)
ལས་འབྲས་ཐམས་ཅད་མཐོང་ཆོས་མྱོང་འགྱུར་དུ་བྱས་ཏེ། འགྲོ་བ་དྲུག་གི་གནས་སྦྱོང་ཉམས་སྣང་ལ་རྨི་ལམ་གྱི་ཚོད་ཙམ་དུ་མྱོང་ནས། འགྲོ་དྲུག་གི་སྐྱེ་བ་ལེན་པའི་ལས་ཐམས་ཅད་ཟད་པར་བྱེད་པའི་སྔགས་ཀྱི་ཐབས་ཁྱད་པར་ཅན་ཡང་ཡོད་དོ། །གསུམ་པ་ནི། གང་དག་འགོག་བྱམས་ཉོན་མོངས་མེད། །མཐོང་དང་དགྲ་བཅོམ་འབྲས་ལངས་པ། །དེ་ལ་ཕན་གནོད་བྱས་པ་ཡི། །འབྲས་བུ་འཕྲལ་དུ་མྱོང་བར་འགྱུར། །ངེས་པར་མཐོང་ཆོས་ལ་མྱོང་བར་འགྱུར་བའི་ལས་སུ་འགྱུར་བའི་ཞིང་ནི་སངས་རྒྱས་ལ་སོགས་པ་དགེ་སློང་གི་དགེ་འདུན་དང་། གང་ཟག་ལྔ་པོ་གང་དག་འགོག་པའི་སྙོམས་འཇུག་ལངས་པ་ནི་སྙོམས་འཇུག་དེ་སེམས་དང་སེམས་བྱུང་འཇུག་པ་མེད་པས་མྱང་འདས་དང་འདྲ་བའི་ཕྱིར་སེམས་མཆོག་ཏུ་ཞི་བ་འཐོབ་སྟེ། དེ་ནི་མྱ་ངན་ལས་འདས་པར་སོང་པ་ལས་སླར་ལོག་པ་དང་འདྲ་བ་ཡིན་པས་སེམས་མཆོག་ཏུ་དང་བའི་གཞིར་གྱུར་བ་ཡིན་ནོ། །ཉོན་མོངས་མེད་པ་ལས་ལངས་པའི་རྒྱུད་ནི་སེམས་ཅན་ཚད་མེད་པ་ལ་ཉོན་མོངས་པ་མེད་པ་དང་ལྡན་པའི་ལྷག་པའི་བསམ་པ་དང་རྗེས་སུ་འབྲེལ་བ་དང་། ཤིན་ཏུ་གསལ་ཞིང་རྣོ་བའི་བསོད་ནམས་ཚད་མེད་པ་ཡོངས་སུ་བསྒོས་པ་དང་རྗེས་སུ་འབྲེལ་བ་ཡིན་ནོ། །བྱམས་པ་ལས་ལངས་པའི་རྒྱུད་ནི་སེམས་ཅན་ཚད་མེད་པ་ལ་ཕན་པའི་ལྷག་བསམ་དང་རྗེས་སུ་འབྲེལ་བ་དང་ཤིན་ཏུ་གསལ་བའི་བསོད་ནམས་ཚད་མེད་པས་ཡོངས་སུ་བསྒོས་པ་དང་རྗེས་སུ་འབྲེལ་པ་ཡིན་ནོ། །མཐོང་ལམ་ལས་ལངས་པའི་རྒྱུད་ནི་མཐོང་སྤངས་མ་ལུས་པར་སྤངས་པའི་ཕྱིར་གནས་ཡོངས་སུ་གྱུར་པ་སར་པ་ཡིན་པས་དྲི་མ་མེད་པ་སྟེ། ལངས་ནས་ཡུན་རིང་མ་ལོན་པ་བཟུང་བའི་ཕྱིར། དགྲ་བཅོམ་གྱི་འབྲས་བུ་ལས་ལངས་པའི་རྒྱུད་ནི་སྒོམ་སྤངས་མ་ལུས་པར་སྤངས་པའི་ཕྱིར་གནས་ཡོངས་སུ་གྱུར་པ་དྲི་མ་མེད་པ་ཡིན་ནོ། །དེའི་ཕྱིར། དེ་དག་ལ་ཕན་གནོད་བྱས་པའི་འབྲས་བུ་འཕྲལ་དུ་མཐོང་ཆོས་ལ་མྱོང་བར་འགྱུར་རོ། །(༨༡ན)
ལྷག་མ་སྒོམ་ལམ་ལན་གཅིག་ཕྱིར་འོང་དང་ཕྱིར་མི་འོང་ཐོབ་པར་བྱེད་པ་ནི་ལམ་གྱི་རང་བཞིན་དང་། འབྲས་བུ་ཉོན་མོངས་སྤངས་པ་མ་རྫོགས་པ་ཅན་ཉིད་ཀྱི་ཕྱིར་དེ་ལས་ལངས་པ་རྣམས་ཀྱི་རྒྱུད་དེ་ལྟར་གནས་ཡོངས་སུ་གྱུར་པ་སར་པ་དང་། དག་པ་མ་ཡིན་པས་དེ་དག་ནི་དགྲ་བཅོམ་ལས་ལངས་པ་དེ་ལྟར་བསོད་ནམས་ཀྱི་ཞིང་མ་ཡིན་ནོ། །གསུམ་པ་ལས་འབྲས་མྱོང་ཚུལ་གཞན་བསྟན་པ་ལ། ཚོར་བ་མྱོང་ཚུལ། གཡེངས་བའི་སེམས་གང་ལ་གནས་པ། དེ་རྒྱུ་ཅི་ལས་གྱུར་པ། དེ་འགྲོ་བ་གང་ན་ཡོད་པའོ། །དང་པོ་ནི། རྣམ་པར་རྟོག་པ་མེད་པ་ཡི། །དགེ་བའི་ལས་ཀྱི་རྣམ་སྨིན་ནི། །སེམས་ཀྱི་ཚོར་བ་ཁོ་ནར་འདོད། །མི་དགེ་བའི་ནི་ལུས་ཀྱི་ཡིན། །རྣམ་སྨིན་གྱི་གཙོ་བོ་ཚོར་བ་ཡིན་པས་སེམས་ཚོར་ཁོ་ན་ཡིན་ལ། ལུས་ཚོར་མ་ཡིན་པ་ཡོད་དམ་ཞེ་ན། ཡོད་དེ། རྣམ་པར་རྟོག་པ་མེད་པའི་དགེ་བའི་ལས་ནི་བསམ་གཏན་ཁྱད་པར་ཅན་ནས་སྲིད་རྩེའི་བར་ན་ཡོད་དེ། ལས་དེ་ཉིད་ཀྱི་རྣམ་སྨིན་ནི་སེམས་ཀྱི་ཚོར་བ་ཁོ་ནར་འདོད་ཀྱི། ལུས་ཀྱི་ནི་མ་ཡིན་ཏེ། ལུས་ཀྱི་ཚོར་བ་ནི་རྟོག་དཔྱོད་དང་བཅས་པ་ཡིན་ལ། བསམ་གཏན་ཁྱད་ཅན་ལ་སོགས་པ་ན་རྟོག་དཔྱོད་མེད་པའི་ཕྱིར། རྟོག་པ་མེད་པའི་ལས་ཀྱི་རྣམ་སྨིན་ས་འོག་མ་རྟོག་དཔྱོད་དང་བཅས་པ་ཡིན་པར་མི་རུང་ངོ་། །འོ་ན་སྒོ་ལྔའི་ལུས་ཚོར་རྟོག་མེད་དུ་བཤད་པ་དང་འགལ་སྙམ་ན། རང་བཞིན་དང་རྗེས་སུ་དྲན་པའི་རྟོག་པ་མེད་པར་རྟོག་མེད་ཡིན། ཚོར་བ་དང་སོ་སོར་ངེས་པའི་རྟོག་དཔྱོད་ཅི་སྟེ་མེད་དེ་ཡོད་པའི་ཕྱིར། མི་དགེ་བའི་ལས་ཀྱི་རྣམ་པར་སྨིན་པ་ནི་ལུས་ཀྱི་ཚོར་བ་སྡུག་བསྔལ་ཁོ་ན་ཡིན་གྱི། སེམས་ཀྱི་མ་ཡིན་ཏེ། སེམས་ཀྱི་སྡུག་བསྔལ་ནི་ཡིད་མི་བདེ་ཡིན་ལ། དེ་རྣམ་སྨིན་མ་ཡིན་པ་ནི། དབང་པོ་བསྟན་པར། སྲོག་ནི་རྣམ་སྨིན་བཅུ་གཉིས་གཉིས། །ཐ་མ་བརྒྱད་དང་ཡིད་མི་བདེ། །མ་གཏོགས་པ་སྟེ། ཞེས་པར་བཤད་ཟིན་པའི་ཕྱིར་རོ། །གཉིས་པ་ནི། གཡེངས་པའི་སེམས་ནི་ཡིད་སེམས་ལ། །ཡིད་མི་བདེ་བ་རྣམ་སྨིན་མ་ཡིན་ན་ཞེས་པ་འདི་བློ་ལ་མ་བདེ་ནས། (༨༡བ)
འོ་ན་སྨྱོ་བའི་སེམས་དེ་སྒོ་ལྔའི་རྣམ་ཤེས་ཀྱི་ཚོགས་ལ་གནས་པ་ནི་མ་ཡིན་ཏེ། རྣམ་རྟོག་མེད་པའི་ཕྱིར་དེས་ན་རྟོག་པ་དང་བཅས་པའི་སེམས་གཡེངས་པའི་ཡིད་མི་བདེ་བ་ནི་ཆོས་ཅན། རྣམ་པར་སྨིན་པ་ཡིན་པར་ཐལ། དེ་མི་དགེ་བའི་རྒྱུ་ཅན་གྱི་ཡིད་དུ་མི་འོང་བའི་ཕྱིར་སྙམ་ནས་གཡེངས་པའི་སེམས་དེ་གང་ལ་གནས་པ་ཡིན་ཅེས་དྲིས་པའོ། །གཡེང་བ་སྟེ་སྨྱོས་པའི་སེམས་ནི་ཡིད་སེམས་ལ་བརྟེན་པ་སྟེ་ཡིད་ཀྱི་རྣམ་ཤེས་ལ་བརྟེན་པ་ཡིན་ཏེ། རྣམ་ཤེས་ཚོགས་ལྔ་ལ་གནས་པ་ལ་ནི་གཡེངས་པ་མེད་དེ། ངེས་པར་རྟོག་པ་དང་རྗེས་སུ་དྲན་པ་དག་གིས་རྣམ་པར་མི་རྟོག་པའི་ཕྱིར་དང་། སེམས་གཡེངས་པ་ནི་རྣམ་རྟོག་ངན་པའི་མཚན་ཉིད་ཡིན་པའི་ཕྱིར་རོ། །གསུམ་པ་ནི། དེ་ནི་ལས་ཀྱི་རྣམ་སྨིན་སྐྱེས། །སྐྲག་གནོད་མ་མཉམ་མྱ་ངན་གྱིས། །གཡེང་སེམས་དེ་ནི་སེམས་ཅན་རྣམས་ལས་ཀྱི་རྣམ་སྨིན་ལས་སྐྱེས་པ་ཡིན་ཏེ། དེའི་རྒྱུ་ནི་རྫས་སྔགས་ཀྱི་སྦྱོར་བས་ཕ་རོལ་གྱི་སེམས་གཡེང་བར་སྐྱེད་པ་དང་། དྲག་ཤུལ་ཅན་གྱིས་ཞུས་པའི་མདོ་ལས། བྱང་སེམས་རང་ཆང་མི་འཐུང་ཡང་སེམས་ཅན་སྐོམ་གྱིས་གདུངས་པ་ལ་ཆང་སྦྱིན་པར་བཤད་ཀྱང་། མི་འདོད་བཞིན་དུ་བླུད་པ་དང་། རླུང་སེལ་བའི་ཆེད་དུ་དུག་སྦྱིན་པ་ལས། མི་འདོད་བཞིན་དུ་དུག་བླུད་པ་དང་། རི་དྭགས་སོགས་སྐྲག་པར་བྱེད་པའམ། ནགས་ལ་མེ་གཏོང་བའམ། གཡང་དུ་འདོར་བར་བྱེད་པའམ། མི་འདོད་པ་ན་ཚར་འགྱུར་བ་གཞན་གྱི་སེམས་ཉམས་པར་བྱེད་པ་དེ་དག་ལས་རྣམས་ཀྱི་རྣམ་སྨིན་ལས་སྐྱེས་པ་དེས་ནི་སེམས་གཡེང་བར་བྱེད་པའི་ཕྱིར། སེམས་གཡེང་བ་ཡང་མི་མ་ཡིན་པའི་གཟུགས་མི་སྡུག་པ་བསྟན་པ་ལ་སོགས་པས་སྐྲག་པར་བྱས་པ་དང་། མི་མ་ཡིན་ཁྲོས་ཏེ་གནད་དུ་བསྣུན་པས་གནོད་པ་བྱས་པ་དང་། རླུང་མཁྲིས་བད་ཀན་འཁྲུགས་པས་འབྱུང་བ་ཆ་མ་མཉམ་པ་དང་། སྔོན་གནས་བྱེད་ཀྱི་བུ་དང་རུས་མཐུན་པའི་བྲམ་ཟེ་མོ་ཁྱོ་ཤུགས་གཉིས་ལ་(༨༢ན)
བུ་བདུན་ཡོད་པ་ལས། བུ་དྲུག་ཤི་བས་མྱ་ངན་གྱིས་སྨྱོ་བར་གྱུར་ཏེ། གཅེར་བུ་ཁོ་ནར་བཅོམ་ལྡན་འདས་མི་ཐི་ལའི་ཨ་མྲའི་ཚལ་ན་བཞུགས་པའི་དྲུང་དུ་ཕྱིན་པ་ན། སངས་རྒྱས་ཀྱི་མཐུས་དྲན་པ་རྙེད་ནས་ངོ་ཚ་བར་གྱུར་པ་ལ་སྟོན་པའི་བཀས་ཀུན་དགའ་བོས་གོས་བྱིན་ཏེ། དེ་ལ་སྟོན་པས་ཆོས་བསྟན་པས་རྒྱུན་ཞུགས་ཀྱི་འབྲས་བུ་ཐོབ་ནས་སླར་རང་གི་ཁྱིམ་དུ་ཕྱིན་པ་ན། བུ་བདུན་པ་ཤི་བ་དང་དེ་ལ་མྱ་ངན་མི་བྱེད་པ་ལ། རང་གི་ཁྱོ་ན་རེ། ཁྱོད་སྔར་བུ་དྲུག་ཤི་བ་ལ་མྱ་ངན་བྱེད་ལ། ད་བུ་བདུན་པ་ཤི་བ་ལ་མྱ་ངན་མི་བྱེད་པས། བུ་དེ་དག་ཁྱོད་རང་གིས་ཟོས་སོ་ཞེས་ཟེར་བ་ལ། བྲམ་ཟེ་མོས། བྲམ་ཟེ་ངས་ནི་ཡུན་རིང་ནས། །བུ་དང་ཚ་བོ་སྟོང་ཕྲག་དང་། །གཉེན་མང་བརྒྱ་ཕྲག་དག་ཟོས་ཏེ། །ཁྱོད་ཀྱིས་ཀྱང་ནི་དེ་དང་འདྲ། །སྐྱེ་བ་དེ་དང་དེ་དག་ཏུ། །བུ་དང་ཚ་བོ་སྟོང་ཕྲག་དག །གཅིག་ལ་གཅིག་ནི་ཟ་རྣམས་ཀྱིས། །ཚད་ནི་ཡོད་པ་མ་ཡིན་ནོ། །འཇིག་རྟེན་ན་ནི་སྐྱེ་བ་དང་། །འཆི་ལས་ངེས་འབྱུང་ཤེས་ནས་ནི། །སུ་ཞིག་མྱ་ངན་ཡོངས་གདུང་བའམ། །སྨྲེ་སྔགས་འདོན་པར་བྱེད་པར་འགྱུར། །བདག་གིས་སངས་རྒྱས་བསྟེན་བྱས་ཏེ། །སྐྱེ་བ་དང་ནི་འཆི་བ་ལས། །ངེས་པར་འབྱུང་བ་ཤེས་པས་ན། །མྱ་ངན་མི་བྱེད་གདུང་བ་མེད། །ཅེས་པ་ལྟ་བུ་ནི་མྱ་ངན་གྱི་རྐྱེན་གྱིས་འབྱུང་བར་འགྱུར་རོ། །དེ་དག་ནི་རིམ་པ་ལྟར་བསགས་སྦྱངས་དང་། སྐྱེས་བུ་དམ་པའི་མན་ངག་དང་། རིག་སྔགས་འཆང་བ་ལ་སོགས་པའི་བྱིན་རླབས་དང་། གསོ་བ་རིག་པ་དང་། མྱ་ངན་བསལ་བའི་ཐབས་དང་སྤྱོད་ལམ་གྱིས་བཅོས་སུ་ཡོད་པའོ། །ཅི་སེམས་ཀྱི་ཚོར་བ་དགེ་བ་དང་མི་དགེ་བའི་རྣམ་སྨིན་ཡིན་པར་ཐལ། གཡེང་བའི་ཚོར་བ་ཡིད་མི་བདེ་བ་ནི་ཡིད་ཀྱི་རྣམ་པར་ཤེས་པ་ཡིན་ལ། གཡེང་བ་ཡང་ལས་ཀྱི་རྣམ་སྨིན་ལས་སྐྱེས་པ་ཡིན་པའི་ཕྱིར་སྙམ་ན། མ་ཁྱབ་(༨༢བ)
སྟེ། གཡེང་བའི་སེམས་ཚོར་ཡིད་མི་བདེ་བ་ནི་ཆོས་ཅན། རྣམ་སྨིན་མ་ཡིན་པར་ཐལ། གཡེང་བ་དེའི་རྒྱུ་འབྱུང་ཆེན་འཁྲུགས་པ་ནི་ལས་ཀྱི་རྣམ་སྨིན་ཡིན་པའི་ཕྱིར། ཁྱབ་སྟེ། རྣམ་སྨིན་ལས་སྐྱེས་པ་ནི་རྣམ་སྨིན་མ་ཡིན་པ་ཡིན་པའི་ཕྱིར་ཏེ། ལས་ལས་སྐྱེས་པ་མ་ཡིན་པའི་ཕྱིར། དེས་ན་ལས་ལས་སྐྱེས་པའི་ཁམས་འཁྲུགས་པའི་རྣམ་སྨིན་ལས་ནི། སེམས་འཁྲུགས་པ་དང་། དབང་མེད་པ་དང་། དྲན་པ་ཉམས་པར་འགྱུར་བས་ན་སེམས་གཡེང་བ་ཞེས་བྱའོ། །དེས་ན་སེམས་གཡེང་བ་དང་། རྣམ་པར་གཡེང་བ་ལ་མུ་བཞི་ཡོད་དེ། རང་བཞིན་དུ་མི་གནས་པས་གཡེང་ལ་ཉོན་མོངས་ཅན་གྱི་རྣམ་པར་མ་གཡེང་བ་ནི། སྨྱོན་པས་དགེ་བ་དང་ལུང་མ་བསྟན་གྱི་ལས་བྱས་པའོ། །རྣམ་པར་གཡེང་ལ་མ་གཡེང་བ་ནི། རང་བཞིན་དུ་གནས་པའི་རྒྱུད་ལ་ཆགས་སོགས་སྐྱེས་པའོ། །གཉིས་ཀ་ནི་སྨྱོན་པའི་རྒྱུད་ལ་ཆགས་སོགས་སྐྱེས་པ་ལྟ་བུའོ། །སེམས་ཉོན་མོངས་པ་ཅན་ནི་རྣམ་པར་སྨིན་པ་ཡིན་པར་མི་རུང་སྟེ། རྣམ་སྨིན་ལུང་དུ་མ་བསྟན་ཆོས། །ཞེས་འབྱུང་བའི་ཕྱིར་རོ། །གཉིས་ཀ་མིན་པ་ནི་རྣལ་དུ་འདུག་པའི་ཉོན་མོངས་ཅན་མིན་པའོ། །སྨྱོ་བའི་དུས་སུ་སྒོ་ལྔའི་རྣམ་ཤེས་ལ་འཁྲུལ་སྣང་འཆར་མོད། དེ་ཡིད་ཀྱི་རྟོགས་པ་ན་གཡེང་བའི་སེམས་སུ་འགྱུར་ལ། དེར་མ་རྟོགས་པ་ན་གཡེང་བའི་སེམས་སུ་མི་འཇོག་གོ། །བཞི་པ་ནི། སྒྲ་མི་སྙན་མིན་འདོད་ལྡན་རྣམས། །སྒྲ་མི་སྙན་མིན་པའི་འདོད་པ་དང་ལྡན་པའི་སེམས་ཅན་རྣམས་ལ་ནི་སྨྱོ་བ་ཡོད་དེ། ལྷ་སྨྱོན་པའང་ཡོད་ན་མི་དང་དུད་འགྲོ་དང་ཡི་དྭགས་ནི་ལྟ་སྨོས་ཀྱང་ཅི་དགོས་པའི་ཕྱིར། དམྱལ་བ་པ་ནི་རྟག་ཏུ་སེམས་གཡེང་བ་ཁོ་ན་ཡིན་ཏེ། གནོད་པ་སྣ་ཚོགས་པས་གནད་གཅད་པའི་ཚོར་བས་ཉེན་པ་རེ་ཞིག་བདག་ཉིད་ཀྱང་མི་དྲན་ན་བྱ་བ་དང་བྱ་བ་མ་ཡིན་པ་དྲན་པ་ལྟ་སྨྲོས་ཀྱང་ཅི་དགོས་པའི་ཕྱིར་རོ། །རྐུན་པོའི་སྡེ་དཔོན་ཞིག་གིས་རང་སངས་རྒྱས་ལྔ་བརྒྱ་གསོད་དུ་བཅུག་པ་ཀྱི་ཧུད་སེམས་ཞེས་སྨྲེ་སྔགས་(༨༣ན)
འདོན་པའི་དམྱལ་བར་སྐྱེ་བ་དཔེར་བྱས་པའོ། །སངས་རྒྱས་བསོད་ནམས་ཀྱི་ཚོགས་ཆེ་བས་འབྱུང་བ་མ་སྙོམས་པས་ཀྱང་ཐུགས་གཡེང་བ་དང་རིམ་གྱིས་འགྲོངས་པ་དང་། གསུང་འཛེར་བ་དང་། དབུ་སྐྱ་བ་མི་མངའ་སྟེ། ལས་ཤིན་ཏུ་དང་བའི་རྣམ་སྨིན་གྱི་སྙིང་པོ་ཡིན་པའི་ཕྱིར། དེ་བཞིན་གཤེགས་པ་མ་གཏོགས་འཕགས་པ་རྣམས་ལ་འབྱུང་བ་མ་མཉམ་པའི་སེམས་གཡེང་བ་ཡོད་དོ། །འཕགས་པ་རྣམས་ལས་ཀྱིས་སེམས་གཡེང་བ་ནི་མ་ཡིན་ཏེ། ངེས་པ་ནི་སྔོན་སོ་སྐྱེའི་གནས་སྐབས་ཁོ་ནར་སྨིན་ཟིན་ལ། མ་ངེས་པ་ནི་འཕགས་པའི་གནས་སྐབས་ན་མི་སྨིན་པའོ་ཕྱིར། འོ་ན་སྤྱོད་འཇུག་ལས། ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །ཅེས་བཤད་པ་དང་འགལ་སྙམ་ན། མིན་ཏེ། དེ་ནི་རང་བཞིན་དུ་གནས་པའི་སྐབས་ཀྱི་ལས་འབྲས་མྱོང་ཚུལ་གྱི་སྐབས་ཡིན་ལ། འདིར་བཤད་པ་ནི་རང་བཞིན་དུ་མི་གནས་པའི་སྐབས་ཡིན་པའི་ཕྱིར་རོ། །འཕགས་པ་ལ་འཚོ་བ་མེད་པ་དང་། གྲགས་པ་མེད་པ་དང་། འཁོར་གྱི་ནང་དུ་བག་ཚ་བ་དང་། འཆི་བ་དང་། ངན་འགྲོའི་འཇིགས་པས་སེམས་གཡེང་བ་མེད་དེ། འཇིགས་པ་ལྔ་པོ་ནི་འཇིག་ཚོགས་ཀུན་བཏགས་ལས་བྱུང་ན་འཕགས་པས་ཀུན་བཏགས་དེ་སྤངས་ཟིན་པའི་ཕྱིར་རོ། །འཕགས་པ་ལ་གནོད་པས་ཀྱང་སེམས་གཡེང་བ་མེད་དེ། མི་མིན་འཁྲུགས་པའི་རྒྱུ་འཕགས་པས་མི་མིན་ལ་གནོད་པ་མི་མཛེས་པ་ནི་མི་བྱེད་པའི་ཕྱིར། གལ་སྲིད་བྱེད་ན་ཁོང་ལ་གནོད་པ་འོང་ཡང་ཁོང་གིས་གནོད་པ་དེ་ཀུན་ཟིལ་གྱིས་གནོན་ནུས་པའི་ཕྱིར། འཕགས་པ་མྱ་ངན་གྱིས་ཀྱང་སེམས་མི་གཡེང་སྟེ། ཆོས་ཀྱི་ངོ་བོ་ཉིད་འདུ་བྱེད་མི་རྟག་ཟག་བཅས་སྡུག་བསྔལ། ཆོས་བདག་མེད་པ་མངོན་པར་ཤེས་པའི་ཕྱིར་རོ། །གཉིས་པ་རྒྱུའི་སྒོ་ནས་དབྱེ་བ་ནི། ཡོན་སྐྱོན་སྙིགས་མར་གསུངས་པ་ནི། །གཡོ་དང་ཞེ་སྡང་འདོད་ཆགས་སྐྱེས། །མདོ་ལས། ལུས་ངག་ཡིད་ཀྱི་ལས་ཡོན་(༨༣བ)
པོ་གསུམ་ནི་གྱ་གྱུ་སྡིག་པ་ཅན་གྱི་ལྟ་བ་ལས་བརྒྱུད་ནས་བྱུང་བའི་ཕྱིར་གཡོ་ལས་སྐྱེས་པ་དང་། སྐྱོན་ནམ་ཉེས་པ་གསུམ་ནི་ཞེ་སྡང་གི་རྒྱུ་ལས་སྐྱེས་པ་དང་། སྙིགས་མ་གསུམ་ནི་ཆགས་པའི་རྒྱུ་ལས་སྐྱེས་པའི་ཕྱིར། འདོད་ཆགས་ལས་སྐྱེས་པར་གསུངས་པ་ནི་ཀུན་སློང་གི་དབང་དུ་བྱས་པའོ། །གསུམ་པ་རྒྱུ་འབྲས་གཉིས་ཀའི་སྒོ་ནས་དབྱེ་བ་ལ། བསྟན་པ་དང་། བཤད་པའོ། །དང་པོ་ནི། དཀར་ནག་ལ་སོགས་བྱེ་བྲག་གིས། །ལས་ནི་རྣམ་པ་བཞི་ཡིན་ནོ། །མདོ་ལས། ལས་གནག་ལ་རྣམ་པར་སྨིན་པ་གནག་པའི་ལས་དང་། ལས་དཀར་ལ་རྣམ་པར་སྨིན་པ་དཀར་བའི་ལས་དང་། སོགས་པས་ལས་དཀར་ནག་འདྲེས་མ་ལ་རྣམ་སྨིན་དཀར་ནག་འདྲེས་མ་དང་། ལས་མི་དཀར་མི་གནག་ཅིང་རྣམ་པར་སྨིན་པ་མེད་ལ་ཟད་པར་བྱེད་པའི་བློ་བྱེ་བྲག་གི་ལས་ནི་རྣམ་པ་བཞི་ཡིན་ནོ། །གཉིས་པ་ལ། སྤྱིར་བསྟན་པ་དང་། ཟད་བྱེད་བྱེ་བྲག་ཏུ་བཤད་པ། གཞན་ལུགས་འགོད་པའོ། །དང་པོ་ནི། མི་དགེ་གཟུགས་དང་འདོད་གཏོགས་པའི། །དགེ་བ་ཉིད་ནི་རིམ་བཞིན་དུ། །གནག་དང་དཀར་དང་གཉིས་ཀའི་ལས། །དེ་ཟད་བྱེད་པ་ཟག་མེད་ཡིན། །དེ་ལ་ལས་མི་དགེ་བ་ཉོན་མོངས་ཅན་ཡིན་པས། རྣམ་སྨིན་ཀྱང་ཡིད་དུ་མི་འོང་བ་འབྱིན་པའི་ཕྱིར་གནག་པའི་ལས་དང་། གཟུགས་སུ་གཏོགས་པའི་དགེ་བ་ཉིད་ནི་མི་དགེ་བ་དང་མ་འདྲེས་ཤིང་། རྣམ་སྨིན་ཡིད་དུ་འོང་བ་འབྱིན་པའི་ཕྱིར། དཀར་བའི་ལས་དང་ངོ་། །གཟུགས་མེད་པར་དཀར་བའི་ལས་ཅིས་མ་བཤད་ཅེ་ན། བྱེ་སྨྲས། ལས་སུ་འཇོག་པ་ནི་འབྲས་བུའི་དུས་ན་འཕངས་རྒྱུ་སྲིད་པ་བར་མ་དང་སྐྱེ་བའི་སྲིད་པ་གཉིས་ཡོད་ལ། རྒྱུའི་དུས་ན་ལུས་ངག་ཡིད་གསུམ་ཡོད་པ་གཅིག་ལས་ཡིན་པ་ལ། གཟུགས་མེད་ན་འབྲས་བུའི་ཡ་གཅིག་སྲིད་པ་བར་མ་མེད། རྒྱུའི་ཡ་གཅིག་ལུས་ངག་གི་ལས་མེད་པས་ལས་སུ་མ་བཞག་ཅེའོ། །སློབ་དཔོན་དེ་ཐུགས་ལ་མ་རངས་ནས་གྲག་ཅེས་བཀོད་དེ། མདོ་ལས། གཟུགས་མེད་པར་གཏོགས་པ་(༨༤ན)
དེ་ཡང་ལས་དཀར་ལ་རྣམ་སྨིན་དཀར་བའང་ཡོད་དེ། བསམ་གཏན་དང་པོ་དང་དེ་བཞིན་དུ་སྲིད་པའི་རྩེ་མོའི་བར་ཡིན་ནོ། །ཞེས་བཤད་དོ། །འདོད་པར་གཏོགས་པའི་དགེ་བ་ཉིད་ནི་རྒྱུད་གཅིག་ལ་མི་དགེ་བ་དང་འདྲེས་པའི་ཕྱིར་གཉིས་ཀའི་ལས་སོ། །རིམ་བཞིན་དུ་ཞེས་པ་ནི་གཞུང་གི་སྦྱོར་ཚུལ་ལོ། །འདྲེས་མའི་ལས་འདི་རྒྱུད་གཅིག་ལ་དགེ་མི་དགེ་ཀུན་ཏུ་འབྱུང་བས་བཞག་གི། ངོ་བོ་ཉིད་ཀྱི་སྒོ་ནས་འདྲེས་པ་ནི་མ་ཡིན་ཏེ། ལས་སམ་རྣམ་སྨིན་གྱི་རྫས་སམ་སྐད་ཅིག་ལ་དཀར་པོ་ཡང་ཡིན་ལ་ནག་པོ་ཡང་ཡིན་པ་མེད་པའི་ཕྱིར་ཏེ། དགེ་མི་དགེ་དང་དཀར་ནག་ལྷན་ཅིག་མི་གནས་འགལ་ཡིན་པའི་ཕྱིར། འདོད་པའི་མི་དགེ་བ་དང་དགེ་བ་འདྲེས་པའི་ཕྱིར་དཀར་ནག་ཏུ་གྱུར་པ་མ་ཡིན་ནམ་ཞེ་ན། འདོད་པ་ཁམས་ཀྱི་མི་དགེ་བ་ནི་དགེ་བ་དང་འདྲེས་པ་མ་ཡིན་ཏེ། འདོད་ཁམས་ཀྱི་མི་དགེ་བ་ནི་འདོད་ཁམས་ཀྱི་དགེ་བ་ལས་སྟོབས་ཆེ་བའི་ཕྱིར་དང་། འདོད་པའི་མི་དགེ་བ་དེ་གཉེན་པོ་ཏིང་ངེ་འཛིན་མེད་པས་སྟོབས་དང་ལྡན་པའི་ཕྱིར། དཔེར་ན། འདོད་ཁམས་ཀྱི་དགེ་བའི་འབྲས་བུ་ཁྱད་ཅན་ནི་གཞན་འཕྲུལ་དབང་བྱེད་ཡིན་ཏེ། ཇི་ལྟར་ཚེ་རིང་ཡང་རང་ལོ་ཁྲི་དྲུག་སྟོང་ཡིན། འདོད་པའི་མི་དགེ་བའི་རྣམ་སྨིན་ནི་མནར་མེད་ཡིན་ཏེ་བར་གྱི་བསྐལ་པ་ཡིན་ནོ། །འདོད་པའི་ཁམས་ན་དགེ་བ་ནི་སྟོབས་ཆུང་བས་ལོག་ལྟས་དགེ་རྩ་ཀུན་ཏུ་བཅད་པའི་ཕྱིར་འདྲེ་རུང་ལ། ཡང་དག་པའི་ལྟ་བས་ནི་ལོག་ལྟ་ཀུན་ཏུ་འཆད་པར་མི་འགྱུར་རོ། །འོ་ན་དེ་ཆད་པའི་ཡང་དག་པའི་ལྟ་བ་གང་ཡིན་སྙམ་ན། ས་གོང་མའམ་ཟག་མེད་ཀྱིས་འཆད་དེ། འདོད་ཁམས་སུ་མ་གཏོགས་གཞན་ར་མདར་སྦྲན་པ་ཡིན་ནོ། །ལས་གསུམ་པོ་དེ་དག་ཟད་པར་བྱེད་ཅིང་སྤོང་བར་བྱེད་པ་ནི་ཟག་མེད་ཀྱི་ལས་ཡིན་ནོ། །དེ་ནི་ཉོན་མོངས་ཅན་མིན་(༨༤བ)
པས་མི་གནག་པའོ། །རྣམ་སྨིན་དཀར་པོ་མིན་པའི་ཕྱིར་མི་དཀར་བའོ། །རང་བཞིན་གྱི་དཀར་པོ་མ་ཡིན་པ་ནི་མ་ཡིན་པས་མི་དཀར་བ་ཞེས་བྱ་བའི་སྒྲ་འདི་ནི་དགོངས་པ་ཅན་ཡིན་ཏེ། བཅོམ་ལྡན་འདས་ཀྱིས་སྟོང་པ་ཆེན་པོའི་མདོ་ལས། མི་སློབ་པའི་ཆོས་ལས་བརྩམས་ཏེ། ཀུན་དགའ་བོ་ཆོས་འདི་དག་ནི་གཅིག་ཏུ་དཀར་བ། གཅིག་ཏུ་དགེ་བ། གཅིག་ཏུ་ཁ་ན་མ་ཐོ་བ་མེད་པ་ཡིན་ནོ། །ཞེས་གསུངས་སོ། །བསྟན་བཅོས་ལས་ཀྱང་། ཆོས་དཀར་པོ་རྣམས་གང་ཞེ་ན། དགེ་བའི་ཆོས་རྣམས་དང་། མ་སྒྲིབ་ལ་ལུང་དུ་མ་བསྟན་པ་རྣམས་ཡིན་ནོ། །ཞེས་འབྱུང་བས་ཉོན་མོངས་ཅན་མིན་པའི་ཕྱིར་དཀར་པོ་ཡིན་ནོ། །ཟག་པ་མེད་པའི་ལས་ནི་ཁམས་སུ་གཏོགས་པའི་ཆོས་རྣམས་ཀྱི་འཇུག་པ་འགོག་པར་བྱེད་པ་ཡིན་གྱི་སྐྱེད་པར་བྱེད་པ་མ་ཡིན་པས་རྣམ་པར་སྨིན་པ་མེད་པ་ཡིན་ནོ། །ཟག་པ་མེད་པའི་ཆོས་རྣམས་ནི་ཁམས་སུ་མ་གཏོགས་པ་ཡིན་ལ། རྣམ་པར་སྨིན་པ་ནི་ཁམས་སུ་གཏོགས་པ་ཡིན་ཏེ་དེའི་ཕྱིར་ཟག་པ་མེད་པའི་ཆོས་རྣམས་ནི་རྣམ་པར་སྨིན་པ་མེད་པ་ཡིན་ནོ། །གཉིས་པ་ལ་གསུམ། ནག་པོ་ཟད་བྱེད་དང་། དཀར་གནག་གཉིས་ཀ་དང་། དཀར་པོ་ཟད་བྱེད་དོ། །དང་པོ་ནི། ཆོས་བཟོད་འདོད་ཆགས་བྲལ་བ་ཡི། །བར་ཆད་མེད་ལམ་བརྒྱད་ཀྱི་གང་། །སེམས་པ་རྣམ་པ་བཅུ་གཉིས་དེ། །ནག་པོ་ཟད་པར་བྱེད་པའི་ལས། །གལ་ཏེ། ཟག་མེད་ཀྱི་ལས་དང་ལམ་ཐམས་ཅད་ཀྱང་ལས་གསུམ་པོ་ཐམས་ཅད་ཟད་བྱེད་མ་ཡིན་གྱི། འོན་ཀྱང་མཐོང་ལམ་གྱི་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་བཞི་དང་། འདོད་པ་ལས་འདོད་ཆགས་དང་བྲལ་བར་བྱེད་པ་ཟག་པ་མེད་པའི་སྒོམ་ལམ་གྱི་བར་ཆད་མེད་པའི་ལམ་བརྒྱད་ཀྱི་སེམས་པ་སྟེ། དེ་ལྟར་སེམས་པ་རྣམ་པ་བཅུ་གཉིས་པོ་གང་དག་ཡིན་པ་དེ་དག་ནི་ནག་པོའི་ལས་ཟད་པར་བྱེད་པའི་ལས་ཡིན་ཏེ། འདོད་པའི་སྡིག་པ་མི་དགེ་བའི་ཆོས་སྤོང་བར་བྱེད་པའི་ཕྱིར། ཆོས་ཤེས་བཞི་དང་འདོད་པ་ལས་འདོད་ཆགས་དང་བྲལ་(༨༥ན)
བའི་རྣམ་གྲོལ་གྱི་ལམ་བརྒྱད་དེ་བཅུ་གཉིས་ནི་མ་ཡིན་ཏེ། བར་ཆད་མེད་པའི་ལམ་གྱིས་ཟད་པར་བྱས་ཟིན་པའི་ཕྱིར་རོ། །རྗེས་སུ་ཤེས་པའི་བཟོད་པ་དང་ཤེས་པ་བརྒྱད་ཀྱང་ནག་པོའི་གཉེན་པོ་མ་ཡིན་ཏེ། དེ་དག་ནི་ཁམས་གོང་མ་ཁོ་ནའི་གཉེན་པོ་ཡིན་བའི་ཕྱིར། གཉིས་པ་ནི། དགུ་པའི་སེམས་པ་གང་ཡིན་པ། །དེ་ནི་དཀར་ནག་ཟད་བྱེད་ཡིན། །འདོད་པ་ལས་འདོད་ཆགས་དང་བྲལ་བར་བྱེད་པའི་སྒོམ་ལམ་བར་ཆད་མེད་པའི་ལམ་དགུ་པའི་སེམས་པ་གང་ཡིན་པ་དེ་ནི་དཀར་ནག་འདྲེས་པའི་ལས་ཟད་བྱེད་ཡིན་ཏེ། དེས་ཡུལ་ཅན་འདོད་པའི་ཉོན་མོངས་ཆུང་ངུའི་ཆུང་ངུ་སྤངས་པ་དང་། དམིགས་ཡུལ་དགེ་བའང་སྤོང་བའི་ཕྱིར་རོ། །འདིར་བཀོད་པའི་དཀར་ནག་འདྲེས་པའི་ལས་དགུ་པའི་བར་ཆད་མེད་པའི་ལམ་གྱིས་སྤོང་ངོ་ཞེས་བྱ་བའང་ལས་དེའི་རང་གི་ངོ་བོ་ཐོབ་བ་ཆད་པའི་ཚུལ་གྱིས་སྤོང་བ་ནི་མ་ཡིན་ཏེ། ལན་གཅིག་སྤངས་ཀྱང་ཡང་འདོད་པའི་དགེ་བ་མངོན་དུ་བྱེད་པའི་ཕྱིར། འོན་ཀྱང་དེ་ལ་དམིགས་པའི་ཡུལ་ཅན་གྱི་ཉོན་མོངས་སྤངས་པ་ལ་དེ་སྐད་བརྗོད་དེ། མདོ་ལས། དགེ་སློང་དག་མིག་ལ་འདུན་པའི་འདོད་ཆགས་གང་ཡིན་པ་དེ་སྤོངས་ཤིག་དང་། དེ་ལྟར་ན་མིག་དེ་སྤང་བར་འགྱུར། །ཞེས་གསུངས་པ་ལྟ་བུའོ། །དེའི་ཕྱིར། དགུ་པའི་བར་ཆད་མེད་པའི་ལམ་གཏོགས་པ་སྔ་མ་དག་ནི་དེའི་གཉེན་པོར་མ་བཤད་དེ། དང་པོའི་རྣམ་པ་སྤངས་ཀྱང་དེའི། །ཡུལ་ཅན་དྲི་མ་ལྷག་རྣམས་ཀྱིས། །ཞེས་འབྱུང་བས། འདོད་པའི་དགེ་བ་ལ་ཡུལ་ཅན་ཉོན་མོངས་ཆུང་ངུའི་ཆུང་སོགས་ཡོད་པའི་ཕྱིར། ནག་པོ་ནི་ཐོབ་པ་ཆད་པའི་ཚུལ་གྱིས་སྤོང་བའི་ཕྱིར་སྔ་མ་དག་གིས་སྤོང་ངོ་། །དེ་བཞིན་དུ་དཀར་པོ་ཟད་པར་བྱེད་པའང་དེའི་ཡུལ་ཅན་སྤངས་པས་ཡིན་གྱི་ངོ་བོ་སྤོང་བ་ནི་མ་ཡིན་པར་ཤེས་པར་བྱའོ། །གསུམ་པ་ནི། དཀར་པོ་བསམ་གཏན་ཆགས་བྲལ་བའི། །བར་ཆད་མེད་ལམ་སྐྱེས་ཐ་མས། །ལས་དཀར་ལ་རྣམ་སྨིན་དཀར་པོ་ཟད་བྱེད་ནི། བསམ་གཏན་བཞི་པོ་དེ་(༨༥བ)
ལས་ཆགས་པ་དང་བྲལ་བའི་བར་ཆད་མེད་ལམ་སྐྱེས་པ་ཐ་མས་དེ་དགུ་པ་སྤོང་བའི་སེམས་པ་བཞི་པོ་དེའོ། །དེའང་ཉོན་མོངས་ཆེ་ཚར་གསུམ་གྱི་དགེ་བ་ཆེ་ཚར་ལ་དམིགས། ཉོན་མོངས་འབྲིང་ཚར་གསུམ་གྱི་དགེ་བ་འབྲིང་ཚར་ལ་དམིགས། ཉོན་མོངས་ཆུང་ཚར་གསུམ་གྱི་དགེ་བ་ཆུང་ཚར་གསུམ་ལ་དམིགས་ན་བསམ་གཏན་བཞི་གའི་བརྒྱད་པ་དང་བདུན་པ་མན་ཆད་སྤོང་བའི་ཡེ་ཤེས་ཀྱང་བཟུང་ཐད་ལ། དེ་ལྟར་མི་དམིགས། ཉོན་མོངས་ཆུང་ངུའི་ཆུང་ངུས་ཀྱང་དགེ་བ་ཆེ་འབྲིང་ཀུན་ལ་དམིགས་ཙ་ན་དགུ་པའི་ཡེ་ཤེས་ལ་བཞག་གོ། །བར་ཆད་མེད་ལམ་ཐ་མས་སྤང་གི། གཞན་གྱིས་མིན་པ་ཅིའི་ཕྱིར་ཞེ་ན། གཞན་གྱིས་དེའི་རང་གི་ངོ་བོ་སྤོང་བའམ་ཐོབ་པ་བཅད་པ་མ་ཡིན་ཏེ། ཉོན་མོངས་སྤངས་ཀྱང་ཏིང་ངེ་འཛིན་ལས་ལངས་དུས་སུ་མངོན་དུ་བྱེད་པའི་ཕྱིར། མདོར་ན། བསམ་གཏན་བཞི་པའི་དགེ་བ་བརྒྱད་པ་སྤངས་ཀྱང་དགུ་པ་མ་སྤངས་ན་དེ་ལ་འདུན་པའི་འདོད་ཆགས་དང་བྲལ་བའི་སྒོ་ནས་མ་སྤངས་པས་བརྒྱད་པ་ཕན་ཆོད་སྤོང་བའི་ཡེ་ཤེས་ལ་མ་བཞགདགུ་པ་སྤོང་ཙམ་ན་དེ་ལ་འདུན་པའི་འདོད་ཆགས་དང་བྲལ་བའི་སྒོ་ནས་སྤངས་བར་བཞག་གོ། །དགེ་བ་ཆུང་ངུའི་ཆུང་ངུ་དེ་ལ་དམིགས་པའི་ཉོན་མོངས་སྤངས་པས་དགེ་བ་དེ་ཡང་སྤོང་བ་ཡིན་ནོ། །ཇི་སྲིད་དུ་དགེ་བ་དེ་ལ་དམིགས་པའི་ཉོན་མོངས་ཀྱི་རྣམ་པ་གཅིག་ཡོད་པ་དེ་སྲིད་དེའི་དགེ་བའི་ལས་སྤོང་བར་མི་འཐད་ལ། ཉོན་མོངས་པའི་རྣམ་པ་ས་དགུ་པའི་ཐོབ་པ་ཆད་ན་བྲལ་བའི་ཐོབ་པ་སྐྱེ་ཞིང་། ཟག་བཅས་ཀྱི་ལས་གཞན་ལ་སྒྲིབ་ལུང་མ་བསྟན་གྱི་བྲལ་ཐོབ་སྐྱེའོ། །གསུམ་པ་གཞན་ལུགས་འགོད་པ་ནི། གཞན་ནི་དམྱལ་བ་མྱོང་འགྱུར་དང་། །འདོད་གཞན་མྱོང་འགྱུར་གཉིས་སུ་རིག །གཞན་ནི་མཐོང་བས་སྤང་བྱ་གནག །འདོད་པ་ལས་སྐྱེས་གཞན་དཀར་གནག །སློབ་དཔོན་གཞན་ནི་དམྱལ་བ་མྱོང་བར་འགྱུར་བ་དང་། དམྱལ་བ་ལས་གཞན་འདོད་ཁམས་མྱོང་འགྱུར་གྱི་ལས་ནི་ནག་པོ་དང་དཀར་ནག་གི་ལས་(༨༦ན)
གཉིས་སུ་རིག་པར་བྱ་སྟེ། དམྱལ་བ་ན་མི་དགེ་ཁོ་ནའི་རྣམ་སྨིན་ཡོད་པས་དེ་མྱོང་འགྱུར་ནི་ནག་པོ་དང་། གཞན་མི་ལ་སོགས་པའི་འདོད་ཁམས་ན་དགེ་བ་དང་མི་དགེ་བའི་རྣམ་སྨིན་ཡོད་པའི་ཕྱིར་རོ། །དམྱལ་བ་མྱོང་འགྱུར་ལའང་དམྱལ་བ་ཆེན་པོ་ཞེས་སྨོས་དགོས་ཏེ། ཉི་ཚེ་བ་མྱོང་འགྱུར་ནི་དགེ་བ་དང་འདྲེ་བའི་ཕྱིར། གཞན་དག་ནི་མཐོང་བས་སྤང་བྱའི་ལས་ནི་དགེ་བ་དང་མ་འདྲེས་པས་ནག་པོ་ཡིན་ནོ་ཞེས་ཟེར་ཏེ། ཉོན་མོངས་ཅན་མིན་མཐོང་སྤང་མིན། །ཅེས་མཐོང་སྤང་ལ་དགེ་བ་མེད་པར་འདོད་དོ། །འདིར་འདོད་པའི་མཐོང་སྤང་ནག་པོ་ཡིན་ཅེས་འདོད་པས་ཁྱད་པར་དུ་བྱ་དགོས། འདོད་པས་ཁྱད་པར་དུ་མི་བྱེད་པར་སྤྱིར་མཐོང་སྤང་ཙམ་ལས་གནག་ལ་རྣམ་སྨིན་ནག་པ་ཡིན་བྱས་ན། གོང་མ་གཉིས་ཀྱི་མཐོང་སྤང་ཡང་ནག་པོར་འགྲོ་བ་ལས་གོང་མ་གཉིས་ཀྱི་མཐོང་སྤང་གཉིས་ཀ་ནག་པོ་མ་ཡིན་པས། འདོད་པའི་མཐོང་སྤང་ནག་པོ་ཡིན་ཅེས་བརྗོད་དགོས་སྙམ་ན། མི་དགོས་ཏེ། འདོད་ལས་སྐྱེས་པའི་གཞན་དཀར་ནག་ཅེས་སྨོས་ཙམ་ན། འདོད་སྐྱེས་གཞན་དཀར་ནག་གཉིས་ཀ་བྱས་པས། འདོད་པའི་མཐོང་སྤང་དོན་གྱིས་ནག་པོ་ཡིན་པར་འགྲོ་བས་འདོད་པ་སྨོས་མི་དགོས་ཟེར། ལ་ལ་ན་རེ། འདོད་པའི་མཐོང་སྤང་གཉིས་ཀ་ནག་པ་ཡིན་ཅེས་སྨོས་མི་དགོས། མཐོང་སྤང་ཙམ་གཉིས་ཀ་གནག་བྱས་པས་གཉིས་ཀ་གནག་པ་འདོད་པའི་མཐོང་སྤང་གི་ཐོག་ཏུ་འབབ། དེ་ཅི་སྟེ་སྙམ་ན། ཁམས་གོང་མ་གཉིས་ཀྱི་མཐོང་སྤང་ལུང་མ་བསྟན་རྣམ་སྨིན་མེད་པ་དེ་ལ་གཉིས་ཀ་གནག་པ་ཅི་ལ་འོང་ཟེར། འོ་ན་འདོད་པའི་མཐོང་སྤང་འཇིག་ཚོགས་དང་མཐར་འཛིན་ལུང་མ་བསྟན་ཡིན་པས་རྣམ་སྨིན་མེད་པས་དེ་ལ་གཉིས་གནག་པ་ཅི་ལ་འོང་། འོ་ན་འདོད་པའི་(༨༦བ)
མཐོང་སྤང་གི་ཡང་བྱེ་བྲག་གཅིག་གནག་པས་གཉིས་ཀ་གནག་པ་ཅི་སྟེ་ཡིན་སྙམ་ན། རྣམ་སྨིན་བསྐྱེད་པའི་ལས་ཀྱི་སྐབས་ཡིན་པས་སོ། །རྣམ་སྨིན་བསྐྱེད་པའི་སྐབས་ཡིན་པ་དེས་ན་མཐོང་སྤང་གནག་བྱས་པས་འབྲས་བུ་ནག་པོ་བསྐྱེད་པའི་མཐོང་སྤང་གི་བྱེ་བྲག་དེའི་ཐོག་ཏུ་འབབ། གོང་མའི་མཐོང་སྤང་རིལ་པོ་དང་འདོད་པའི་མཐོང་སྤང་གི་བྱེ་བྲག་གཅིག་གིས་རྣམ་སྨིན་མི་བསྐྱེད་པས་སོ། །འདོད་པ་ལས་སྐྱེས་པའི་གཞན་སྒོམ་སྤང་ནི་དཀར་ནག་ཡིན་ནོ། །དེ་ནི་དགེ་བའང་སྲིད། མི་དགེ་བའང་སྲིད་པའི་ཕྱིར། གཉིས་པ་ལས་ཀྱི་རྣམ་གྲངས་དུ་མ་བསྟན་པ་ལ། བྱེད་ལས་ཀྱི་སྒོ་ནས་དབྱེ་བ། ལས་ལམ་བྱེ་བྲག་ཏུ་བཤད་པའོ། །དང་པོ་ལ། ཐུབ་པའི་གསུམ་བཤད། གཙང་བྱེད་གསུམ་བཤད། ཉེས་སྤྱད་གསུམ། ཡིད་ཀྱི་ཉེས་སྤྱད་གསུམ། ལེགས་སྤྱད་གསུམ་བཤད་པའོ། །དང་པོ་ནི། མི་སློབ་ལུས་ངག་ལས་ཡིད་ཉིད། །ཐུབ་པའི་གསུམ་སྟེ་གོ་རིམ་བཞིན། །མི་སློབ་པའི་ལུས་ངག་གི་ལས་ནི་ཐུབ་པའི་ལུས་ངག་གི་ལས་ཡིན་ཏེ། དེའང་བྱེ་སྨྲས། མི་སློབ་པའི་ལུས་ངག་ཀུན་འབྱུང་དང་སྡུག་བསྔལ་དུ་འདོད་པས་ལུས་ངག་མཐའ་དག་ཐུབ་པ་མིན། འོ་ན་ལུས་ཀྱི་གསུམ་དང་ངག་གི་བཞི་སྤོང་བའི་རིག་བྱེད་མ་ཡིན་པ་ཐུབ་པ་ཡིན་ཅེའོ། །ཡིད་ཀྱི་ཡང་གསུམ་པོ་སྤོང་བའི་རིག་བྱེད་མ་ཡིན་པའོ། །ཅིའི་ཕྱིར་རིག་བྱེད་མ་ཡིན་པ་བཟུང་ཞེ་ན། རྣམ་པར་རིག་བྱེད་ནི་ཟག་པ་དང་བཅས་པ་མི་སློབ་པར་མི་སྲིད་དོ། །མི་སློབ་པའི་ཡིད་ཉིད་དམ་ཡིད་ཁོ་ན་ཐུབ་པ་ཡིན་ཏེ། རང་གི་དོན་དུ་རྒྱས་པར་བྱས་པའི་ཕྱིར་རོ། །དེའང་ཐུབ་པ་ཞེས་པའི་སྒྲ་འདིར་ལྷག་པར་སྨོས་པ་ནི་རང་ཉིད་ལ་བྱའི། དོན་གཞན་ལ་བྱས་པ་མེད་དོ། །ཡང་ན་ཡིད་ཀྱི་ལས་ནི་ཡིད་ཀྱི་ཐུབ་པ་ཞེས་མི་སྦྱར་གྱི། ཡིད་ཉིད་ཐུབ་པ་ཡིན་པས་ཡིད་ཀྱི་ཐུབ་པ་ཞེས་བྱའོ། །ཡིད་ཀྱི་ལས་སེམས་པ་ནི་ཐུབ་པ་མ་ཡིན་པར་ཡིད་རང་ཐུབ་(༨༧ན)
པ་ཡིན་ཏེ། ཡིད་ནི་དོན་དམ་པར་ཐུབ་པ་ཡིན་པའི་ཕྱིར་དང་། ཡིད་མི་སློབ་པའི་ཐུབ་པ་ཡིན་པ་ལུས་ངག་གི་ལས་དག་གི་སྒོ་ནས་རྗེས་སུ་དཔག་བྱ་ཡིན་པའི་ཕྱིར་དང་། ཇི་ལྟར་དཔག་ན་སྐུའི་ལས་རབ་ཏུ་ཞི་བ་དང་། གསུང་གི་ཕྲིན་ལས་ཞི་བ་ཞེས་འབྱུང་བའི་ཕྱིར་རོ། །གྲག་གོ་ཞེས་པ་ནི་སྒྲུབ་བྱེད་འདི་ལ་མ་རངས་བ་སྟེ། ལུས་ངག་གིས་ཀུན་སློང་སེམས་པ་དཔོག་པ་ཡིན་གྱི། ཡིད་མཉམ་པར་བཞག་པ་དེ་དཔག་མི་ནུས་སོ། །ཐུབ་པའི་གསུམ་སྟེ་གོ་རིམ་བཞིན། ཅེས་པ་ནི་གོ་སླའོ། །སློབ་དཔོན་གྱི་རང་ལུགས་ནི། ལུས་ངག་གི་ལས་དག་ནི་སྤོང་བའི་སེམས་པ་ཅན་ཡིན་པའི་ཐུབ་པའི་ཡིད་ཀྱི་ལས་སྤོང་བའི་སེམས་པ་མ་ཡིན་ཏེ། སེམས་ལ་རིག་བྱེད་མ་ཡིན་པ་མེད་པའི་ཕྱིར། ཡིད་ལ་ཐུབ་པར་བཞག་པ་ཡང་མི་དགེ་བ་ཐམས་ཅད་སྤང་བའི་དོན་གྱིས་ཐུབ་པ་ཡིན་ཏེ། ཡིད་ཉིད་མི་དགེ་བ་ཐམས་ཅད་སྤོང་བ་ལ་ཐུབ་པ་ཞེས་བརྗོད་པའི་ཕྱིར། ཅི་ཐུབ་པ་དེ་མི་སློབ་པ་ཁོ་ན་ཡིན་གྱི་གཞན་མིན་ཅེ་ན། མི་སློབ་པ་སྟེ་དགྲ་བཅོམ་པ་ཁོ་ན་ལ་དེ་འཇོག་དགོས་ཏེ། ཉོན་མོངས་པ་ནི་ལོག་པའི་དམིགས་པ་ལ་བརྗོད་པའི་ཕྱིར། ཉོན་མོངས་ཀྱི་བརྗོད་པ་ཐམས་ཅད་མེད་པས་དགྲ་བཅོམ་པ་དེ་ནི་དོན་དམ་པར་ཐུབ་པ་ཡིན་པའི་ཕྱིར། གཉིས་པ་ནི། ལེགས་སྤྱད་གསུམ་པོ་ཐམས་ཅད་ནི། །གཙང་བྱེད་རྣམ་པ་གསུམ་ཡིན་ནོ། །མདོ་ལས། ལུས་ངག་ཡིད་གཙང་བྱེད་གསུམ་གསུངས་པ་ནི། ལུས་དང་ངག་དང་ཡིད་ཀྱི་ལེགས་སྤྱད་གསུམ་པོ་ཐམས་ཅད་ནི་ལུས་ངག་ཡིད་གཙང་བྱེད་རྣམ་པ་གསུམ་ཡིན་ཏེ། ལེགས་སྤྱད་ཟག་བཅས་དང་ཟག་མེད་ཀྱི་དུས་རེ་ཞིག་དང་། གཏན་དུ་ཉེས་སྤྱད་ཀྱི་ཉོན་མོངས་པའི་དྲི་མ་སྤོང་བའི་ཕྱིར། མདོ་ལས། དགེ་སློང་དག་འཕགས་པའི་ཤེས་རབ་ཀྱི་སྤང་བ་གང་ཡིན་པ་དེ་ནི་སྤངས་པ་ཡིན་ནོ་ཞེས་འབྱུང་བའི་ཕྱིར། དེ་ལྟར་བསྟན་པ་འདི་ནི་ལོག་པའི་ཐུབ་པ་མི་སྨྲ་བ་(༨༧བ)
བར་འདུག་པ་ཙམ་གྱིས་འདག་པར་བལྟ་བ་དང་། ལོག་པའི་གཙང་སྦྲ་ལུས་ཀྱི་དྲི་མ་མེད་པར་བྱེད་པ་ལ་མོས་པ་རྣམས་ལྟ་བ་དེ་དང་བཀར་ཏེ་དབྲལ་བའི་ཕྱིར་རོ། །གསུམ་པ་ནི། ལུས་ཀྱི་ལ་སོགས་མི་དགེ་བ། །ཉེས་པར་སྤྱད་པ་གསུམ་དུ་འདོད། །མདོ་ལས། ཉེས་སྤྱད་རྣམ་གསུམ་གསུངས་པས། ལུས་ཀྱི་ལས་དང་སོག་པས་མི་དགེ་བ་གསུམ་ནི་ལུས་ངག་ཡིད་ཀྱི་ཉེས་པར་སྤྱད་པ་གསུམ་དུ་འདོད། བཞི་པ་ནི། བརྣབ་སེམས་ལ་སོགས་ལས་མིན་ཡང་། །ཡིད་ཀྱི་ཉེས་སྤྱད་རྣམ་གསུམ་མོ། །བརྣབ་སེམས་ལ་སོགས་ལས་ཀྱི་རང་བཞིན་མིན་ཀྱང་ཡིད་ཀྱི་ཉེས་སྤྱད་རྣམ་པ་གསུམ་ཡོད་དེ། སེམས་པ་ནི་ཀུན་འགྲོ་ལྔའི་སེམས་པ་ཡིན་པ་དེ་ལས་དོན་གཞན་བརྣབ་སེམས་གནོད་སེམས་ལོག་ལྟ་ནི་ཆགས་སྡང་རྨོངས་གསུམ་ཡིན་པས་རྩ་ཉོན་དྲུག་གི་ནང་ན་ཡོད་པའི་ཉོན་མོངས་ཡིན་ནོ། །མདོ་སྡེ་པའི་བྱེ་བྲག་དཔེ་སྟོན་པ་ན་རེ། ཆེད་དུ་བསམ་པར་བྱ་བའི་མདོ་ལས། དགེ་སློང་དག་ཆེད་དུ་བསམས་པའི་ལས་བྱས་ཤིང་བསགས་པས་དམྱལ་བ་དག་ཏུ་སྐྱེ་བར་འགྱུར་རོ། །ཇི་ལྟར་ཆེད་དུ་བསམ་པར་བྱ་བའི་ལས་བྱས་ཤིང་བསགས་པ་ཡིན་ཅེ་ན། དགེ་སློང་དག་ལ་ལ་འདི་ན་ཆེད་དུ་བསམས་ནས་ལུས་ཀྱི་རྣམ་པ་གསུམ་བྱེད་ཅིང་སོག་པ་ཡིན་ལ། ངག་གི་རྣམ་པ་བཞི་དང་། ཡིད་ཀྱི་རྣམ་པ་གསུམ་ཞེས་བྱ་བ་རྒྱས་པར་གསུངས་ནས་བཀའ་སྩལ་པ། དགེ་སློང་དག་ཡིད་ཀྱི་ཆེད་དུ་བསམ་པར་བྱ་བའི་ལས་གསུམ་བྱས་ཤིང་བསགས་པ་ཡིན་ཅེ་ན། འདི་ལྟ་སྟེ། དགེ་སློང་བརྣབ་སེམས་དང་ལྡན་པ་ཡིན། གནོད་སེམས་ཅན་གྱི་སེམས་སུ་གྱུར་བ་ཡིན། ལོག་པར་ལྟ་བ་ཡིན། དགེ་སློང་དག་ཕྱིན་ཅི་ལོག་ཏུ་ལྟ་བ་ཡིན། ཅེས་པས་བརྣབ་སེམས་སོགས་མ་གཏོགས་པར་ཡིད་ཀྱི་ལས་གཞན་མ་བཤད་པས། བརྣབ་སེམས་སོགས་ཁོ་ན་ཡིད་ཀྱི་ལས་ཡིན་ནོ་ཞེས་ཟེར་རོ། །བྱེ་བྲག་ཏུ་སྨྲ་བ་ན་རེ། ལས་སེམས་པ་དང་། བརྣབ་སེམས་འདོད་ཆགས་སོགས་(༨༨ན)
ཉོན་མོངས་པ་དག་གཅིག་ཏུ་འགྱུར་རོ། །གལ་ཏེ། ཉོན་མོངས་འགའ་ཞིག་ལས་སུ་གྱུར་ན་སྐྱོན་ཅི་ཡོད་ཅེ་ན། བྱེ་སྨྲ་ན་རེ། ལས་ཉོན་གཅིག་པ་མེད་དེ། ཡོད་ན། མདོ་ལས། སེམས་པའི་ལས་དང་བསམ་པའི་ལས་ཞེས་སོ་སོར་གསུངས་པ་དང་འགལ་བའི་ཕྱིར། འོ་ན་ཆེད་དུ་བསམ་པར་བྱ་བའི་མདོ་ཇི་ལྟར་དྲང་སྙམ་ན། བརྣབ་སེམས་ལ་སོགས་པ་དེའི་སྒོ་ནས་སེམས་པ་བཞག་པའི་ཕྱིར། བརྣབ་སེམས་ལ་སོགས་པ་དེ་དག་གིས་བརྣབ་སེམས་དང་ལྡན་པ་ཡིན་སོགས་ཀྱི་སེམས་པ་དེ་སྟོན་པར་བྱེད་དོ། །ཞེས་ཟེར་རོ། །སྒོ་གསུམ་གྱི་སྤྱོད་པ་ལ་སྨད་པ་ནི་ཆོས་ཅན། ཉེས་སྤྱོད་ཡིན་ཏེ། འབྲས་བུ་ཡིད་དུ་མི་འོང་བའི་ཕྱིར་རོ། །ལྔ་པ་ནི། བཟློག་པ་ལེགས་པར་སྤྱད་པ་ཡིན། །ཉེས་སྤྱད་ལས་ཟློག་པ་ནི། ལེགས་པར་སྤྱད་པ་ཡིན་ཏེ། སྒོ་གསུམ་གྱི་ལས་དགེ་བ་དང་། བརྣབ་སེམས་མེད་པ་དང་། གནོད་སེམས་མེད་པ་དང་། ཡང་དག་པའི་ལྟ་བ་རྣམས་སོ། །ཕ་རོལ་ལ་ཕན་གནོད་བྱ་བའི་བསམ་པ་མེད་པར་ཡང་དག་པའི་ལྟ་བ་དང་། ལོག་ལྟ་དག་དགེ་མི་དགེ་ཇི་ལྟར་ཡིན་ཅེ་ན། ཡང་དག་པའི་ལྟ་བ་དང་ལོག་པའི་ལྟ་བ་ཆོས་ཅན། དགེ་མི་དགེར་འཇོག་སྟེ། ཕན་གནོད་ཀྱི་བསམ་པ་དེའི་རྩ་བ་ཡིན་པའི་ཕྱིར་རོ། །གཉིས་པ་ལས་ལམ་བྱེ་བྲག་ཏུ་བཤད་པ་ལ། བསྟན། བཤད་གཉིས་ཀྱི། དང་པོ་ནི། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ལེགས་སྤྱད་དང་ཉེས་སྤྱད་དེ་ལས་ཆེ་ལོང་བསྡུ་ནས་ནི། མདོ་ལས་ལེགས་སྤྱད་ལས་ཅི་རིགས་པར་ཆེ་ལོང་བསྡུས་ནས་ནི་དགེ་བ་དང་ཉེས་སྤྱོད་ལས་ཅི་རིགས་པར་ཆེ་ལོང་བསྡུས་ནས་ནི་དགེ་བའི་ལས་ཀྱི་ལམ་ནི་བཅུར་གསུངས་སོ། །དགེ་བ་དང་མི་དགེ་བ་བཅུའི་རྣམ་གཞག་ལ། མདོ་སྡེ་ས་བཅུ་པའི་འགྲེལ་པ་ནས། གཞན་ལ་གནོད་པའི་དབང་དུ་བྱས་པ་ནི་བདུན། གཞན་ལ་ཟང་ཟིང་སྦྱིན་སོགས་ཀྱི་ཕན་(༨༨བ)
འདོགས་པའི་གནས་གསུམ་གྱི་མི་དགེ་བ་བཅུ་ཡིན་ཏེ། གནོད་པ་བདུན་ནི། གཞན་གྱི་སྲོག་ལ་གནོད། ལོངས་སྤྱོད་ལ་གནོད། ཁྱིམ་ལ་གནོད། བདེན་པ་ལ་གནོད། མཛའ་བ་ལ་གནོད། སྙན་པ་ལ་གནོད། དོན་དང་ལྡན་པ་ལ་གནོད་པའོ། །ཟང་ཟིང་གི་སྦྱིན་པ་དང་། འགལ་བ་བརྣབ་སེམས། མི་འཇིགས་པའི་སྦྱིན་པ་དང་འགལ་བ་གནོད་སེམས། ཆོས་ཀྱི་སྦྱིན་པ་དང་འགལ་བ་ལོག་ལྟ། དེ་ལྟར། དགེ་བ་བཅུར་ངེས་པས་དེ་སྤོང་བ་ལ་དགེ་བ་བཅུར་བཞག་གོ། །མི་དགེ་བ་བཅུ་ནི་ཉེས་སྤྱོད་ཀྱི་ལས་ཏེ། དེས་ཉེས་སྤྱད་དང་། ལེགས་སྤྱད་ཅི་ཞིག་མ་བསྡུས་ཞེ་ན། མི་དགེ་བ་བཅུས་ནི་མི་དགེ་བ་གཙོ་ཆེ་བ་བསྡུས་ཀྱི། ཉེས་སྤྱད་ཀྱི་སྦྱོར་འཇུག་ཉོན་མོངས་ཅན་བརྡེག་འཆིང་སོགས་ཀྱང་མ་བསྡུས་ཏེ། དེ་རྣམས་གཞན་ལ་གནོད་པའི་རྒྱུའི་གཙོ་བོ་རགས་པ་མ་ཡིན་པའི་ཕྱིར་དང་། ལུས་ཀྱི་ཉེས་སྤྱོད། གཞན་སྲོག་དང་འཚོ་བ་དང་། ཆུང་མ་རྣམས་དང་དབྲལ་བར་བྱེད་པ་གསུམ་ནི་ཆོས་ཅན། ལས་ལམ་དུ་བཤད་དེ། དེ་རྣམས་དང་དབྲལ་བར་བྱ་བའི་ཕྱིར། ངག་གི་ཉེས་སྤྱད་ཚབ་བོ་ཆེ་བཞིའང་ཆོས་ཅན། ལས་ལམ་དུ་བཤད་དེ། སྔ་མ་དེ་ཁོ་ན་བཞིན་གྱིས་ཕྱིར་རོ། །ཡིད་ཀྱི་ཉེས་སྤྱད་ཉོན་མོངས་པ་གསུམ་དུ་སེམས་པ་ཡང་མ་བསྡུས་སོ། །དགེ་བ་ལའང་ལུས་ཀྱི་དགེ་བའི་སྦྱོར་འཇུག་དང་མྱོས་འགྱུར་དང་བརྡེག་འཆིང་སོགས་སྤོང་བ་དང་། སྦྱིན་པ་དང་། མཆོད་སྦྱིན་དང་། ཁྲུས་བྱེད་པ། ཉམ་ང་བ་ནས་འདྲེན་པ། ལུས་སྐུད་པ་དང་། མངོན་དུ་ལྡང་བ་སོགས་མ་བསྡུས་སོ། །ངག་གི་ལེགས་སྤྱད་ཀྱིའང་སྙན་སྨྲ་སོགས་མ་བསྡུས་སོ། །ཡིད་ཀྱི་ལེགས་སྤྱད་ཀྱིའང་སེམས་པ་མ་བསྡུས་སོ། །གཉིས་པ་ལ། རིག་བྱེད་ཡིན་མིན་གྱི་དབྱེ་བ། རྩ་བ་གསུམ་གསུམ་དུ་བསྟན་པ། རྫོགས་བྱེད་གསུམ་བསྟན་པ། ལས་སོ་སོར་བསྟན་པའོ། །(༨༩ན)
དང་པོ་ལ། དངོས་དང་། ཞར་ལ་སྦྱོར་མཇུག་གང་དུ་ངེས་པའོ། །དང་པོ་ལ། མི་དགེ་བ་དང་། དགེ་བ་གང་དུ་ངེས་པའོ། །དང་པོ་ནི། མི་དགེ་དྲུག་ནི་རྣམ་རིག་མིན། །གཅིག་རྣམ་གཉིས་སོ་དེ་དག་ཀྱང་། །བྱེད་ན། མི་དགེ་བའི་ལས་ཀྱི་ལམ་དྲུག་པོ་སྲོག་གཅོད་མ་བྱིན་ལེན་ངག་གི་བཞི་རྣམས་ནི་གཞན་བྱེད་དུ་འཇུག་པ་ཆོས་ཅན། རྣམ་རིག་མིན་པ་ཡིན་ཏེ། བྱེ་བྲག་ཏུ་སྨྲ་བའི་ལུགས་ཀྱི་དངོས་ཀྱི་ལས་ཀྱི་ལམ་གྱིས་བསྡུས་པའི་རིག་བྱེད་ནི་མེད་པའི་ཕྱིར་རོ། །སྦྱོར་བས་བསྡུས་ པ་ནི་ཡོད་དོ། །གཅིག་ལོག་གཡེམ ་ནི་ཆོས་ཅན། རྟག་ཏུ་རིག་བྱེད་རིག་བྱེད་མིན་པ་རྣམ་པ་གཉིས་ཡོད་དེ། རང་གི་མཐར་ཕྱིན་པར་བྱེད་པའི་ཕྱིར་དང་། ལོག་ གཡེམ་གཞན་ལ་བྱེད་བཅུག་པ ་ནི། རང་གི་བྱེད་པ་དེ་དང་འདྲ་བར་དགའ་བ་མ་ཡིན་པའི་ཕྱིར་རོ། །ལས་ལམ་དྲུག་པོ་དེ་དག་ཀྱང་རང་གིས་བྱེད་ན་རིག་བྱེད་དང་རིག་བྱེད་མིན་པ་གཉིས་སུ་འགྱུར་ཏེ། དེའང་རིག་བྱེད་ཀྱི་དུས་དེའི་ཚེ་ཤི་བའི་དབང་དུ་བྱས་པའི་ཕྱིར། དུས་ཕྱིས་ཞིག་ཤི་ན་ནི་རིག་བྱེད་མིན་པ་ཁོ་ནའོ། །གཉིས་པ་ནི། དགེ་བ་བདུན་རྣམ་གཉིས། །ཏིང་འཛིན་ལས་སྐྱེས་རྣམ་རིག་མིན། །དགེ་བའི་ལས་ལམ་གཟུགས་ཅན་བདུན་ནི་ཆོས་ཅན། རིག་བྱེད་དང་རིག་བྱེད་མིན་པ་རྣམ་པ་གཉིས་ཡོད་དེ། ཡང་དག་པར་བླངས་པའི་སོ་ཐར་གྱི་སྡོམ་པ་ནི་རིག་བྱེད་ལ་རག་ལུས་པའི་ཕྱིར། ཆོས་ཉིད་ཀྱི་ཚུལ་ཁྲིམས་ནི་རིག་བྱེད་ལ་རགས་མ་ལས་ཏེ། སེམས་ཙམ་ལ་རགས་ལས་པའི་ཕྱིར་རོ། །ཏིང་ངེ་འཛིན་ལས་སྐྱེས་པའི་བསམ་གཏན་ཟག་མེད་ཀྱི་སྡོམ་པ་ནི་ཆོས་ཅན། རྣམ་རིག་བྱེད་མིན་ཁོ་ན་ཡིན་ཏེ། སེམས་ཙམ་ལ་རགས་ལས་པའི་ཕྱིར་རོ། །འདིར་དཔལ་ཤཱཀྱ་མཆོག་ལྡན་ན་རེ། སོ་ཐར་གྱི་སྡོམ་པ་རྣམ་རིག་མིན་པའི་གཟུགས་ཀྱིས་ཁྱབ་པ་འདོད་ནས། ལུང་འདི་རྩ་འགྲེལ་གྱིས་སོ་ཐར་གྱི་སྡོམ་པ་ལ་རྣམ་པར་རིག་བྱེད་ཀྱི་གཟུགས་ཡིན་པ་མེད་པར་བསྟན་ཅེས་རྩལ་བཤད་དུ་བྱེད་པས་དེའི་ཕྱིར། ཁོང་རང་གི་ཊཱི་ཀར། གལ་ཏེ། (༨༩བ)
ལུང་དེས་ཡང་དག་པར་བླངས་པའི་ཚུལ་ཁྲིམས་གཉིས་ཀ་ཡིན་པར་བསྟན་པས་རིག་བྱེད་ཡོད་པར་ཡང་གྲུབ་བོ་ཞེ་ན། ཚུལ་ཁྲིམས་སུ་གྲུབ་པས་སྡོམ་པར་མི་འགྲུབ་སྟེ། སྡོམ་པ་ཡང་དག་པར་ལེན་པའི་སྦྱོར་བའི་སྐབས་ཀྱི་རིག་བྱེད་དང་རིག་བྱེད་མ་ཡིན་པ་བཞིན་ནོ། །ཞེས་པ་དང་། ཡང་ལུས་ངག་གི་དགེ་བ་བདུན་པོའི་དངོས་གཞིའི་དུས་སུ་རྣམ་པར་རིག་བྱེད་ཡོད་པར་བསྟན་པ་ཡིན་གྱི། རྣམ་པར་རིག་བྱེད་སྡོམ་པར་མི་སྟོན་པའི་ཕྱིར། དངོས་གཞི་དང་དུས་མཉམ་པའི་རྣམ་པར་རིག་བྱེད་དེ་ཡང་ལས་ལམ་གྱི་མཇུག་ཏུ་སྟོན་པ་ཡིན་གྱི། དངོས་གཞིར་མི་འཆད་པའི་ཕྱིར། སྤོང་བདུན་འཁོར་བཅས་ཀྱི་ཚུལ་ཁྲིམས་དེ་རིག་བྱེད་ལས་སྐྱེ་བར་བཤད་ཀྱི། རིག་བྱེད་དངོས་སུ་མ་བཤད་པའི་ཕྱིར་ཞེས་བྲིས་གདའོ། །འདི་ལ་སྤྱིར་ཚུལ་ཁྲིམས་སུ་གྲུབ་པས་སྡོམ་པར་མི་འགྲུབ་ཏུ་ཆུག་ཀྱང་འདི་སྐབས་ཀྱི་ཡང་དག་པར་བླངས་པའི་ཚུལ་ཁྲིམས་ནི་སྡོམ་པ་ཁོ་ན་ལ་འཆད་དགོས་ཏེ། ཡང་དག་པར་བླངས་པའི་ཚུལ་ཁྲིམས་ནི་རྣམ་པར་རིག་བྱེད་ལ་རགས་ལས་པའི་ཕྱིར། ཞེས་པའི་འགྲེལ་བཤད་དུ། རྒྱལ་པོའི་སྲས་ཀྱིས། ཚུལ་ཁྲིམས་ནི་རྣམ་པ་གཉིས་ཏེ། ཡང་དག་པར་བླངས་པའི་ཚུལ་ཁྲིམས་ནི་སོ་སོར་ཐར་པའི་སྡོམ་པའོ། །ཞེས་གསུངས་པས། སོ་སོར་ཐར་པའི་སྡོམ་པར་གྱུར་པའི་ཚུལ་ཁྲིམས་ལ་གདོན་མི་ཟ་བར་རིག་བྱེད་ཀྱི་གཟུགས་ཡོད་པར་བསྟན་ཏོ། །གཞན་ཡང་ལུས་ངག་གི་དགེ་བ་བདུན་པོའི་དངོས་གཞིའི་དུས་སུ་རྣམ་པར་རིག་བྱེད་ཡོད་པར་བསྟན་གྱི། རིག་བྱེད་སྡོམ་པར་བསྟན་པ་མིན། །ཅེས་པ་ནི་ཚིག་གིས་ཕོངས་པའི་ཞིབ་ཆ་ཡིན་ལ། དངོས་གཞི་དང་དུས་མཉམ་པའི་རྣམ་པར་རིག་བྱེད་ལས་ལམ་གྱི་མཇུག་ཏུ་སྟོན་པ་ཡིན་ཅེས་པ་ནི་རང་ཚིག་བླ་ན་མེད་པར་འགལ་བ་ཡིན་ཏེ། ཁྱོད་ཀྱི་དངོས་གཞི་(༩༠ན)
དང་དུས་མཉམ་ན་ཁྱོད་ཀྱི་རྗེས་ཡིན་པ་བུད་བའི་ཕྱིར་དང་། གོང་དུ་ཚུལ་ཁྲིམས་ལ་རིག་བྱེད་ཡིན་མིན་གཉིས་ཡོད་ཀྱི། སྡོམ་པ་ལ་མེད་ཅེས་སྨྲས་པ་དེ། དེ་མ་ཐག་ཏུ་བརྗོད་ནས་ཚུལ་ཁྲིམས་ལ་རིག་བྱེད་དངོས་སུ་མ་བཤད་ཅིང་། ཚུལ་ཁྲིམས་དེ་རིག་བྱེད་ལས་སྐྱེ་བར་བཤད་ཅེས་པ་ལ་སོགས་པ་ནི་སྐྱེ་བོ་ཕལ་པ་དྷ་དུ་རས་མྱོས་པའི་ཅལ་ཅོལ་ལྟར་འདུག་པས། དམ་པ་ཁྱེད་ལྟ་བུས་གསུངས་པར་ག་ལ་འོས་སོ། །གཉིས་པ་ཞར་ལ་སྦྱོར་མཇུག་ཏུ་ངེས་པ་ནི། ཉེར་བསྡོགས་རྣམས་ནི་རྣམ་རིག་བྱེད། །རྣམ་རིག་བྱེད་མིན་འགྱུར་བའམ། །མ་ཡིན་བཟློག་པ་མཇུག་ཡིན་ནོ། །འདོད་པའི་ལས་ལམ་གྱི་སྦྱོར་བ་ཉེར་བསྡོགས་རྣམས་ནི་ངེས་པར་རྣམ་པར་རིག་བྱེད་ཀྱི་རང་བཞིན་ཡིན་ནོ། །ངོ་ཚ་མེད་པ་སོགས་ཀུན་དཀྲིས་དྲག་པོའམ་རབ་ཏུ་དང་བ་ལྷུར་ལེན་པ་ཤུགས་དྲག་པོ་ཆེན་པོས་སྦྱོར་བ་རྩོམ་པ་ན་རྣམ་པར་རིག་བྱེད་མིན་པ་སློང་བར་འགྱུར་བའམ་གཞན་སེམས་ཞན་པས་བྱེད་པ་ན་ནི་མ་ཡིན་ནོ། །ཉེར་བསྡོགས་སྦྱོར་བ་ལས་བཟློག་པ་ནི་ལས་ལམ་རྣམས་ཀྱི་མཇུག་ཡིན་ནོ་སྟེ། དེ་ངེས་པར་རིག་བྱེད་མ་ཡིན་པའི་རང་བཞིན་མིན་ནོ། །ཡང་མཇུག་ཏུ་རིག་བྱེད་དུ་འགྱུར་གྱི། གཞན་རིག་བྱེད་མིན་པ་མ་ཡིན་པ་ཡོད་དེ། ལས་ཀྱི་ལམ་བྱས་ནས་ལས་ལམ་དེ་དང་འདྲ་བའི་ལས་སམ་ཆོས་ཤི་ནས་ཀྱང་སྣུན་པར་བྱེད། པགས་པ་བཤུ་བས་ངན་བྱེད། ཤ་གཅོད་པ་སོགས་སྤྱོད་ན་ནི་དེར་འགྱུར་བའི་ཕྱིར། ཁ་ཅིག་ལ་ནི། སྦྱོར་བ་རིག་བྱེད་དུ་ངེས་རིག་བྱེད་མ་ཡིན་པར་མ་ངེས། མཇུག་རིག་བྱེད་མ་ཡིན་པར་ངེས་རིག་བྱེད་དུ་མ་ངེས། ཁ་ཅིག །དངོས་གཞི་ལ་རྣམ་པར་རིག་བྱེད། ཁ་ཅིག །དངོས་གཞི་ལ་རྣམ་པར་རིག་བྱེད་མ་ཡིན་པ་ཡོད་ཟེར་བའི་སྦྱོར་དངོས་མཇུག་རང་ཇི་ཙམ་ཡིན་སྙམ་ན། ཕྱུགས་གསོད་པར་འདོད་ལ་ཁྲི་སོགས་ལས་ལྡང་། རིན་ལེན། འགྲོ་བར་བྱེད། ཚོ་མི་ཚོ་བལྟ་བའི་ཕྱིར་ནོམ་པར་བྱེད། (༩༠བ)
ཕྱུགས་ཉོ་བར་བྱེད། ཁྲིད་པར་བྱེད། ལྕག་གིས་བྲབས་པར་བྱེད། ཁྱིམ་དུ་འཇུག་པར་བྱེད། གནོན་པར་བྱེད། མཚོན་ལེན། མཚོན་ལན་གཅིག་གམ་གཉིས་འདེབས་པ་ནས་སྲོག་མི་གཅོད་པའི་བར་དུ་སྦྱར་བའོ། །བསྣུན་པས་སྲོག་གཅོད་པ་དེའི་ཚེའི་རིག་བྱེད་དང་དེའི་སྐད་ཅིག་མའི་རིག་བྱེད་མ་ཡིན་པ་ནི་ལས་ལམ་དངོས་ཡིན་ནོ། །བསད་པའི་སྦྱོར་བ་མཚོན་བརྒྱབ་ཀྱང་མ་ཤི་བ་ལ་ལས་ཀྱི་ལམ་དངོས་མེད་གསོད་སེམས་ཀྱི་སྦྱར་བ་མ་བྱས་པར་གསོད་སེམས་ཙམ་གྱིས་ཤི་ཡང་ལས་ཀྱི་ལམ་དངོས་མེད། འོ་ན་སྦྱོར་བ་དང་འབྲས་བུ་ཡོངས་སུ་རྫོགས་པའི་རྒྱུ་གཉིས་ཀྱིས་ཆོས་ཅན། སྲོག་གཅོད་ཀྱི་ཁ་ན་མ་ཐོ་བས་རེག་སྟེ། སྦྱོར་བ་བྱས་པའང་དེའི་འབྲས་བུ་རྫོགས་ནས་སྲོག་ཆད་པའི་ཕྱིར་རོ། །དེ་ཕྱིན་གྱི་རིག་མིན་གྱི་སྐད་ཅིག་མ་རྣམས་ཀྱང་མཇུག་ཡིན་ལ། ཕྱུགས་དེའི་པགས་པ་བཤུ་བའམ་བཀྲུ་བཤལ་བྱེད། འཚོང་། འཚོད། ཟ། ཚོན་པོ་ཞིག་བྱུང་། རྫུད་པ་ཞིག་བྱུང་ཟེར་ནས་རྗེས་སུ་སྒྲོག་པ་དེ་སྲིད་ཀྱི་རིག་བྱེད་ཀྱི་སྐད་ཅིག་ཀྱང་མཇུག་ཡིན་ནོ། །དེ་བཞིན་གཞན་དྲུག་ལ་སྦྱར་བ་ནི། དཔེར་ན། ཁ་ཅིག་གཞན་གྱི་ནོར་རྐུ་བར་འདོད་ལ། ཁྲི་ལས་ལྡང་བར་བྱེད། མཚོན་ཆ་ལེན་པར་བྱེད། གཞན་གྱི་ཁྱིམ་དུ་འགྲོ་བར་བྱེད། གཉིད་ལོག་གམ་འོན་ཏེ་མ་ལོག་ཅེས་ཉན་པར་བྱེད། གཞན་གྱི་ནོར་ལ་ནོམ་པར་བྱེད་པ་ནས་ཇི་སྲིད་དུ་གནས་ནས་མ་དཔགས་པ་དེ་སྲིད་དུ་སྦྱོར་བ་ཡིན་ནོ། །སྐད་ཅིག་མ་གང་ལ་གནས་ནས་སྤོག་པར་བྱེད་པ་དེའི་ཚེ་རིག་བྱེད་དང་དེའི་སྐད་ཅིག་གི་རྣམ་པར་རིག་བྱེད་མ་ཡིན་པ་གང་ཡིན་པ་དེ་ནི་ལས་ཀྱི་ལམ་དངོས་ཡིན་ནོ། །རྒྱུ་གཉིས་ཀྱིས་མ་བྱིན་པར་ལེན་པའི་ཁ་ན་མ་ཐོ་བ་ལ་རེག་པར་འགྱུར་ཏེ། སྦྱོར་བ་དང་། འབྲས་(༩༡ན)
བུ་ཡོངས་སུ་རྫོགས་པས་སོ། །དེ་ཕྱིན་ཅད་ཀྱི་རྣམ་པར་རིག་བྱེད་མ་ཡིན་པའི་སྐད་ཅིག་མ་རྣམས་ཀྱང་མཇུག་ཡིན་ནོ། །ཇི་སྲིད་དུ་གཞན་གྱི་ནོར་འགོད་པའམ། འཚོང་བའམ། སྦེད་པའམ། རྗེས་སུ་སྒྲོག་པ་དེ་སྲིད་དུ་ནི་རྣམ་པར་རིག་བྱེད་ཀྱི་སྐད་ཅིག་མ་དག་ཀྱང་མཇུག་ཡིན་ནོ། །དེ་བཞིན་དུ་གཞན་ལྔ་ལའང་ཅི་རིགས་སུ་སྦྱར་རོ། །སྲོག་གཅོད་སོགས་ནི་བྱ་བ་རྫོགས་པའི་སྐད་ཅིག་མ་དུས་ཐུང་ངུ་གཅིག་ལ་ལས་ཀྱི་ལམ་དངོས་ཡིན་ལ། བརྣབ་སེམས་སོགས་ནི་ཞག་གཅིག་ཏུ་སྐྱེས་ནས་ཡུན་རིང་པོར་ཡང་ལས་ལམ་འབྱུང་བའང་ཡོད་ལ། ཡང་ན་མངོན་དུ་གྱུར་པ་ཙམ་གྱིས་ལས་ལམ་དུ་གྱུར་པའི་ཕྱིར་སྦྱོར་བ་ཡང་མེད་ལ་མཇུག་ཀྱང་མེད་དོ། །བྱེ་བྲག་ཏུ་སྨྲ་བའི་འདོད་པ་དེ་ལ་སློབ་དཔོན་གྱིས་བརྟགས་པ་བྱས་ནས་ཁོ་ལ་སློབ་པ་ནི། སྲོག་ཆགས་དེ་འཆི་སྲིད་ལ་གནས་པའི་ཚེའི་རིག་བྱེད་དང་རིག་བྱེད་མིན་པ་དེ་དག་ལས་ལམ་ཡིན་ནམ། ཤི་ཟིན་པའི་སྲིད་པ་ལ་གནས་པའི་དེའི་ཚེ་ལས་ལམ་འབྱུང་བ་གང་ཡིན་བརྗོད་པར་བྱ་དགོས། བྱེ་སྨྲས། དེ་བརྗོད་པ་ལས་ཅིར་འགྱུར། སློབ་དཔོན་གྱིས། དེ་བརྗོད་ན་འདིར་འགྱུར་ཏེ། དང་པོ་ལྟར་ན། ཆོས་ཅན། རང་གིས་གསོད་པའམ་གཞན་ལ་གསོད་དུ་འཇུག་པ་དེ་དང་གསད་བྱ་ལྷན་ཅིག་ཤི་བ་ཡང་སྲོག་གཅོད་ཀྱི་ཁ་ན་མ་ཐོ་བ་དང་ལྡན་པར་འགྱུར་ཏེ། གདོད་འཆི་བའི་སྲིད་པ་ལ་གནས་པའི་དུས་སུ་ལས་ལམ་དངོས་ཡིན་པའི་ཕྱིར། རྟགས་ཁས། ཁྱབ་པ་གྲུབ། འདོད་ན། གྲུབ་མཐའ་བུད་དེ། སྔ་དང་མཉམ་དུ་ཤི་བ་ལའང་། དངོས་མེད་ལུས་གཞན་སྐྱེ་ཕྱིར་རོ། །ཞེས་འབྱུང་བའི་ཕྱིར། གཉིས་པ་ལྟར་ན། ཆོས་ཅན། ད་གདོད་གསོད་པའི་ཆེད་དུ་བསྣུན་པ་གང་གིས་སྲོག་གཅོད་པར་བྱེད་པ་དེའི་ཚེའི་རིག་བྱེད་དང་རིག་བྱེད་(༩༡བ)
མིན་པ་གང་ཡིན་ལས་ཀྱི་ལམ་དངོས་ཡིན་ཅེས་བརྗོད་པར་བྱར་མི་རིགས་པར་ཐལ། ཤི་ཟིན་ནས་ཀྱི་དུས་སུ་ལས་ལམ་དངོས་ཡིན་པའི་ཕྱིར། འདོད་ན། སྲོག་ཆགས་ཤི་བའི་ཚེ་རིག་བྱེད་དང་དེའི་རིག་བྱེད་མ་ཡིན་པ་ལས་ལམ་ཡིན་ནོ་ཞེས་བརྗོད་དགོས་པར་ཐལ། འདོད་པའི་ཕྱིར། འདོད་ན། དེར་ཡང་མ་བརྗོད་པར་འགལ། གཞན་ཡང་ཤི་ཟིན་པ་ལ་ལས་ལམ་དངོས་འབྱུང་བ་ཡིན་ན་ཆོས་ཅན། སྲོག་གཅོད་པར་བྱེད་པ་དེའི་ཚེ་ཞེས་བྱ་བ་སྨོས་མི་དགོས་པར་ཐལ། སྲོག་གཅོད་བྱེད་ཀྱི་གནས་སྐབས་དང་མི་འབྱོར་བར་སྲོག་བཅད་ཟིན་པའི་ཕྱིར་རོ། །འཁོར་གསུམ། ཡང་བསྟན་བཅོས་ཡེ་ཤེས་ལས་འཇུག་པ་ལ། སྲོག་ཆགས་གསོད་ལ་སྲོག་གཅོད་པ་མ་འགག་པ་ཡོད་དམ་ཞེ་ན། ཡོད་དེ། སྲོག་ཆགས་ཀྱི་སྲོག་བཅད་ལ་སྦྱོར་བ་མེད་པ་ལྟ་བུའོ། །ཞེས་གསུངས་སོ། །དེ་ལ་བྱེ་སྨྲ་ན་རེ། འདིར་ཤི་བའི་དངོས་ཀྱི་མཇུག་ཡིན་ཀྱང་ཆོས་ཅན། སྦྱོར་བའི་སྒྲར་གསུངས་པ་ཡིན་ཏེ། ད་དུང་བསྣུན་པ་སོགས་སྦྱོར་བ་ལུས་ངག་གི་རྩོམ་པ་དང་འདྲ་བར་ལས་བྱེད་པའི་ཕྱིར། འོ་ན་ཤི་ཟིན་པ་བསྣུན་པ་དེའི་ཚེ་ན་མཇུག་དང་སྦྱོར་བའི་སྒྲར་གསུངས་པ་ཆོས་ཅན། བྱེ་སྨྲ་རང་གི་ཁས་བླངས་པའི་དོན་དང་འགལ་བར་ཐལ། ཤི་བའི་ཚེ་ལས་ལམ་གྱི་དངོས་གཞི་བྱུང་བ་དེ་མ་འགག་པའི་ཕྱིར། ཁྱབ་པ་མེད་སྙམ་ན། འོ་ན་སྦྱོར་དངོས་རྗེས་གསུམ་སྐད་ཅིག་སོ་སོ་བ་མ་ཡིན་པར་ཐལ། ཁྱབ་པ་མེད་པ་དེའི་ཕྱིར། ཡང་བྱེ་སྨྲས། འཆི་བའི་ཚེ་ལས་ལམ་དུ་བཞག་པ་དང་། ཤི་བའི་ཚེ་ལས་ལམ་གང་དུ་བཞག་ཀྱང་ཤི་བའི་མཇུག་གི་སྲོག་གཅོད་པའི་ལས་ནི་སྦྱོར་བར་བཞག་པ་ལ་ཉེས་པ་མེད་པ་དེ་ལྟར་ཡིན་ནོ། །སློབ་དཔོན་གྱིས། དེ་ལ་ཉེས་པ་ཇི་ལྟར་མེད་དྲིས་པས། བྱེ་སྨྲས། སྲོག་ཆགས་བསད་ལ་སྲོག་(༩༢ན)
གཅོད་པ་མ་འགག་པ་ཡོད་དམ། ཞེས་འདྲི་བའི་སྐབས་གང་དེར་སྦྱོར་དངོས་མི་འགལ་བར་གསུངས་པས་ཉེས་པ་མེད་དོ། །འོ་ན་དངོས་ཡིན་པས་མཇུག་མིན་ཟེར་ན། འོ་ན་མཇུག་སྦྱོར་བའི་སྦྲ་གསུངས་ཞེས་བྱ་བའི་ཕྱོགས་འདིར་འབོར་རམ་ཞེ་ན། དེ་ཡང་མི་འབོར་བས་དངོས་སྦྱོར་ཡིན་པ་དང་། དངོས་མཇུག་ཡིན་པ་གཉིས་ཀ་སྲིད་དེ། འཆི་སྲིད་ཀྱི་མཇུག་ཐོགས་ཀྱི་སྐད་ཅིག་ལ་སྲོག་ཆགས་ཤི་བར་གྱུར་ན་ནི། དེར་དངོས་གཞི་ཡིན་ཀྱང་སྦྱོར་བའི་སྒྲར་གསུངས་སོ་ཞེས་འདོད་པའི་ཕྱིར་དང་། དེ་ཕན་ཆད་ཤི་ན་སྦྱོར་བ་བྱས་ཀྱང་མཇུག་ཏུ་གཏོགས་པར་འདོད་པའི་ཕྱིར་རོ། །སློབ་དཔོན་གྱིས། འོ་ན་ཤི་ཟིན་པ་ལ་རྣམ་པར་རིག་བྱེད་ཀྱི་ལས་ལམ་དངོས་སུ་ཇི་ལྟར་འགྱུར་རིགས་ཏེ་མི་རིགས་པར་ཐལ། ཤི་ཟིན་པ་ལ་གསོད་པ་ནི་མེད་པས་བསྣུན་པས་སྲོག་ཆད་པའི་རིག་བྱེད་ཅུང་ཟད་ཀྱང་མི་བྱེད་པའི་ཕྱིར་སྙམ་ནས་འདྲི་བའོ། །ཅི་རྣམ་རིག་མིན་པ་མི་འདྲི་བ་ཅི་ཞེ་ན། དེ་ནི་བསྟན་ཐོགས་མེད་པ་ཡིན་པའི་ཕྱིར། བསྣུན་པའི་ལས་སུ་མི་རུང་བས་མ་དྲིས་པའོ། །བྱེ་སྨྲས། ཤི་ཟིན་པ་ལ་རིག་བྱེད་ཀྱི་ལས་ལམ་དངོས་སུ་ཇི་ལྟར་མི་འགྱུར་ཞེས་སྨྲས་པ་ལ། སློབ་དཔོན་གྱིས། དེར་མི་འགྱུར་བའི་དགོངས་པ་བསྟན་པ་ནི། ཤི་ཟིན་པ་ལ་རིག་བྱེད་ཀྱི་ལས་ལམ་དངོས་གཞིར་མི་འགྱུར་ཏེ། ཤི་ཟིན་པ་ལ་རིག་བྱེད་ཀྱི་ནུས་པ་ཅི་ཡང་མ་མཐོང་བའི་ཕྱིར། བྱེ་སྨྲས། འོ་ན་རིག་བྱེད་མིན་པ་ཡང་ལས་ལམ་དངོས་གཞིར་མི་འགྱུར་བར་ཐལ། རིག་བྱེད་མིན་པས་བསྣུན་པའི་ནུས་པ་མེད་པའི་ཕྱིར་ཞེས་ཟེར་བ་ལ། འདིས་ནི་སྔ་མའི་ཁྱབ་རྐང་མ་ཆོག་སྟེ། རིག་བྱེད་ལ་བསྣུན་པའི་བྱ་བ་ཡོད་པ་དང་། རིག་མིན་ལ་བསྣུན་པའི་བྱ་བ་མེད་པ་གཉིས་ཀ་ལ་མཚུངས་པའི་(༩༢བ)
ཕྱིར་རོ། །ད་ནི་སློབ་དཔོན་གྱིས་བྱེ་སྨྲ་ལ་བསླབ་ནས། ཤི་བའི་དུས་སུ་ལས་ལམ་དངོས་རྫོགས་པར་བསྟན་པ་ནི་རིག་བྱེད་མིན་པ་ནུས་པ་མེད་དུ་ཟིན་ཀྱང་ལས་ལམ་དངོས་ཡིན་པ་དེའི་ཕྱིར། སྦྱོར་བའི་འབྲས་བུ་སྲོག་ཆགས་ཤི་བའི་གནས་སྐབས་རྫོགས་པ་ན་རིག་བྱེད་དང་རིག་བྱེད་མིན་པ་གཉིས་ཀ་ལས་ལམ་དུ་རུང་ངོ་། །མི་དགེ་བ་བཅུ་ཕན་ཚུན་གྱི་སྦྱོར་བར་འགྱུར་བའི་ཚུལ་ནི། ལས་ཀྱི་ལམ་གཞན་གྱི་སྦྱོར་བའམ། མཇུག་ལས་ཀྱི་ལམ་གཞན་ཡིན་པ་ཡོད་དམ་ཞེ་ན། ཡོད་དེ། སྲོག་གཅོད་པའི་སྦྱོར་བས་ལས་ལམ་བཅུར་ཡང་ཡིན་ཏེ། དགྲ་གསོད་པའི་ཕྱིར་གཤེད་བྱད་རྦད་པར་གཞན་གྱི་ནོར་འཕྲོགས་ནས་ཕྱུགས་ཀྱིས་གཏོར་མ་བྱེད་པ་དང་། དེས་དེ་གསོད་དུ་བཞུག་པའི་ཕྱིར་དེའི་ཆུང་མ་ལ་ཉལ་པོ་བྱེད་པ་དང་། དགྲ་དེ་སྐྱོབ་པའི་མཛའ་བོ་ལ་རྫུན། ཕྲ་མ། ཚིག་རྩུབ། ཀྱལ་པས་དབྱེན་བྱེད་པ་དང་། དེའི་ནོར་ལ་བརྣབ་སེམས་དང་། ནོར་བདག་ལ་གནོད་སེམས་བྱེད་པ་དང་། ལོག་ལྟ་འཕེལ་བར་བྱེད་པ་ལྟ་བུའོ། །དེ་གཞན་དག་ལ་ཡང་ཅི་རིགས་པར་སྦྱར་བ་ནི། དགྲའི་ནོར་བརྐུ་བར་འདོད་ནས་དོན་འགྲུབ་པར་བྱ་བའི་ཕྱིར། གཞན་གྱི་ནོར་འཕྲོགས་ནས་ཕྱུགས་དེས་གཏོར་མ་བྱེད། དེ་ཉིད་ཀྱིས་དགྲས་ནོར་འཕྲོག་པའི་ཆེད་དུ་ཆུང་མ་ལ་ཉལ་པོ་བྱེད་པ་དང་། དགྲ་སྐྱོབ་པའི་གང་ཟག་དེ་ལ་རྫུན་སོགས་བཞི་ཟེར། དེའི་ནོར་ལ་བརྣབ་སེམས། བདག་པོ་ལ་གནོད་སེམས། ལོག་ལྟ་འཕེལ་བར་བྱེད། དེ་བཞིན་འདོད་ལོག་ལ་སོགས་ལའང་ཅི་རིགས་སུ་སྦྱར་རོ། །བྱེ་སྨྲས། མི་དགེ་བ་གཞན་ཚོ་ཡོ་སྲོག་གཅོད་ཀྱི་སྦྱོར་བར་འགྲོ་བ་དེ་མ་རངས་ནས་བརྣབ་སེམས་སོགས་ཡིད་ཀྱི་གསུམ་པོ་སྲོག་གཅོད་སོགས་ཀྱི་སྦྱོར་བ་ཡིན་པར་མི་རུང་སྟེ། བྱ་བ་མ་བརྩམས་པའི་ཕྱིར་དང་། (༩༣ན)
སེམས་བསྐྱེད་པ་ཙམ་གྱིས་ནི་སྦྱོར་བ་བྱས་པ་མ་ཡིན་པའི་ཕྱིར་རོ། །གཉིས་པ་རྩ་བ་གསུམ་གསུམ་དུ་བསྟན་པ་ལ། མི་དགེ་བ་དང་། དགེ་བའོ། །དང་པོ་ལ། ལུས་ངག་གི་དང་། ཡིད་ཀྱི་མི་དགེ་བའི་རྩ་བའོ། །དང་པོ་ནི། སྦྱོར་བ་རྩ་བ་གསུམ་ལས་སྐྱེས། །མདོ་ལས། དགེ་སློང་དག་སྲོག་གཅོད་པ་ནི་གསུམ་སྟེ། ཆགས་པ་དང་། ཞེ་སྡང་དང་གཏི་མུག་ལས་སྐྱེས་པའོ། །ཞེས་པ་ནས་ལོག་ལྟའི་བར་གསུངས་པ་དེ་ལ་ཆགས་སོགས་ཀྱི་སྲོག་གཅོད་པ་སོགས་བརྗོད་པར་བྱ་སྟེ། འདོད་ལོག་སོགས་ཁ་ཅིག་མིན་པ་ལས་ལམ་ཐམས་ཅད་ཆགས་སོགས་མཐར་ཕྱིན་པ་མ་ཡིན། ལ་ལ་གང་གིས་འབྱིན། ལུང་གང་གིས་འབྱིན་མ་ངེས་སོ། །དེ་དག་གི་སྦྱོར་བ་མི་དགེ་བའི་རྩ་བ་གསུམ་ལས་སྐྱེས་པ་ཡིན་པས་ན་དང་པོའི་ཀུན་ནས་སློང་བ་ཡིན་པའི་ཚིག་ལས་དེ་སྐད་བཤད་དོ། །སྲོག་གཅོད་ཆགས་པ་ལས་སྐྱེས་པ་ནི། དེའི་རྔ་མ་དང་སོ་དང་པགས་པ་སོགས་ལུས་ཀྱི་ཡན་ལག་གི་ཕྱིར་རམ། རྩེད་མོའི་ཕྱིར་རམ། རིན་གྱི་ནོར་བདག་གིར་བྱ་བའི་ཕྱིར་དང་། བདག་གམ་མཛའ་བོ་ཡོངས་སུ་བསྐྱབ་པའི་ཕྱིར་གསོད་པའོ། །ཞེ་སྡང་ལས་སྐྱེས་པ་ནི། དགྲ་སོད་ཙམ་ན་སྙིང་ཚིམ་བྱ་ཞིང་། དགྲ་མེད་ཙམ་ན་མཁོན་མི་འོང་བའི་ཕྱིར་གཅོད་པ་དང་། གཏི་མུག་ལས་སྐྱེས་པ་ནི། མཆོད་སྦྱིན་བྱེད་པ་སྟེ། དེ་ཡང་རྒྱལ་བའི་ཆོས་ལུགས་ཚད་མར་བྱས་ནས་ཆོས་ཀྱི་བློས་གསོད་པ་དང་། མི་བགྲུངས་པ་རྣམས་ཆད་པས་བཅད་ན། རྒྱལ་པོ་བསོད་ནམས་གྱི་སྣོད་དུ་འགྱུར་རོ་ཞེས་གྲགས་པ་ལྟ་བུ་དང་། པར་སིག་པ་རྣམས་ཀྱིས་ཕ་མ་རྒས་སམ་ནད་ཚབ་ཆེན་པོས་ཐེབས་ན་གསོད་ཅེས་ཟེར་བ་དང་། འདི་སྐད་དུ། སྦྲུལ་དང་། སྡིག་པ་དང་། སྒྲང་བུ་ཏྲྱཻ་མ་བུ་ག་སོགས་པས་སྟག་ལ་སོགས་ནི་མི་རྣམས་ལ་གདུད་བྱེད་ཡིན་(༩༣བ)
པས་གསད་པར་བྱའོ། །ཞེས་དང་། རི་དྭགས་དང་། ཕྱུགས་དང་། བྱ་དང་། མ་ཧེ་ལ་སོགས་པ་ནི་ལོངས་སྤྱད་པར་བྱ་བའི་ཕྱིར་གསད་པར་བྱའོ་ཞེས་ཟེར་བ་དང་། འཇིག་རྟེན་ཕ་རོལ་མེད་དོ་སྙམ་ནས་གསོད་པའོ། །མ་བྱིན་ལེན་ཆགས་པ་ལས་སྐྱེས་པའང་། གང་དོན་དུ་གཉེར་བ་དེས་འཕྲོག་པའམ། གཞན་གྱི་རྙེད་པའམ། བཀུར་སྟིའམ། གྲགས་པའི་ཕྱིར་རམ། བདག་གམ་མཛའ་བོ་ཡོངས་སུ་བསྐྱབ་པའི་ཕྱིར་འཕྲོག་པའོ། །ཞེ་སྡང་ལས་སྐྱེས་པ་ནི། མཁོན་ལས་འབྱུང་བའི་ཕྱིར་འཕྲོག་པའོ། །གཏི་མུག་ལས་སྐྱེས་པ་ནི། རྒྱལ་པོའི་ཆོས་ལུགས་ངན་པ་འདོན་པ་ཚད་མར་བྱས་ནས་མི་བགྲུངས་པོ་ཆད་པ་གཅོད་པའི་ཕྱིར་འཕྲོག་པ་དང་། བྲམ་ཟེ་རྣམས་ན་རེ། འཇིག་རྟེན་གྱི་ལོངས་སྤྱོད་ཐམས་ཅད་ཚངས་པའི་སྤྱི་བོ་ནས་སྐྱེས་པའི་བྲམ་ཟེ་ལ་ཚངས་པས་བྱིན་པ་ཡིན་པས། བྲམ་ཟེ་རྣམས་ཉམས་དམས་པས་དམངས་རིགས་རྣམས་ཀྱིས་སྤྱོད་པར་ཟད་དོ། །དེས་ན་བྲམ་ཟེས་འཕྲོག་པ་ན་མ་བྱིན་ལེན་གྱི་ཉེས་པ་མེད་དེ། བདག་ཉིད་ཀྱིས་ལེན་པ་དང་། ཟ་བ་དང་། གྱོན་པ་དང་། སྦྱིན་པ་ཡིན་ནོ་ཞེས་ཟེར་བ་ལྟ་བུའོ། །དབྲོག་བྱའི་སེམས་ཅན་དེ་དག་ལ་ང་ཡི་ཡིན་བྱ་བ་ཡོད་པས། དེ་ལས་འཕྲོག་ན་མ་བྱིན་པར་ལེན་པར་འགྲོའོ། །ཡང་འཇིག་རྟེན་ཕ་རོལ་མེད་སྙམ་ནས་འཛེམ་པ་མེད་པར་མ་བྱིན་པར་ལེན་པའོ། །འདོད་ལོག་ཆགས་པ་ལས་སྐྱེས་པ་ནི། གཞན་གྱི་ཆུང་མ་སོགས་ལ་དེ་ཆགས་པའམ། རྙེད་བཀུར་གྱི་ཕྱིར་རམ། རང་ངམ་མཛའ་བོ་བསྐྱབ་པའི་ཕྱིར་མི་ཚངས་པར་སྤྱོད་པའོ། །ཞེ་སྡང་ལས་སྐྱེས་པ་ནི། མཁོན་ལས་བྱུང་བའི་ཕྱིར་སྤྱོད་པའོ། །གཏི་མུག་ལས་སྐྱེས་པ་ནི། པར་སིག་སོགས་མ་ལ་ཉལ་བ་དང་། བ་ལང་འབྲང་གི་མཆོད་སྦྱིན་ལ་སྔགས་བཏབ་པ་ཅན་གྱི་ཆུ་བཏུང་ངོ་། །རྩྭ་བཅད་དོ། །མ་སྲིང་(༩༤ན)
དང་རུས་གཅིག་གི་གནས་སུ་འགྲོའོ། །དེ་དག་རྙེད་པ་དེར་འགྲོ་བར་བྱ་སྟེ། དེ་ནི་འཇིག་རྟེན་ལས་རྒྱལ་བར་འགྱུར་ཞེས་བྱ་བ་དང་། གང་བུད་མེད་ནི་ཐུན་མོང་དུ་ལོངས་སྤྱོད་བྱ་སྟེ། གཏུན་དང་། མེ་ཏོག་དང་། འབྲས་བུ་དང་། ཟས་སྨིན་པ་དང་། ངོགས་དང་ལམ་དང་འདྲ་བས་བགྲོད་པ་ལ་ཉེས་པ་མེད་ཟེར་རོ། །རྫུན། ཕྲ་མ། ཚིག་རྩུབ། ངག་ཀྱལ། ཆགས་པ་དང་ཞེ་སྡང་ལས་སྐྱེས་པ་ནི། རྙེད་བཀུར་གྱི་ཕྱིར་རམ། རང་ངམ་མཛའ་བོ་བསྐྱབ་པའི་ཕྱིར་བྱེད་པ་དང་། མཁོན་ཚར་ཕྱིན་པའི་ཕྱིར་བྱེད་པའོ། །རྫུན་དུ་སྨྲ་བ་གཏི་མུག་ལས་སྐྱེས་པ་ནི། དྲང་སྲོང་རྒྱས་པས། རྒྱལ་པོ་བཞད་གད་ལྡན་དང་བུད་མེད་དང་། །བག་མ་ལེན་པའི་ཚེ་དང་གསོད་པ་དང་། །ནོར་ཀུན་འཕྲོག་ཚེ་བརྫུན་བྱས་གནོད་མེད་དེ། །རྫུན་ལྔ་ལྟུང་བར་འགྱུར་བ་མིན་ཅེས་བཤད། །ཅེས་པ་ལྟ་བུ་དང་། ལོག་ལྟས་བཅུག་པའི་རྫུན་དང་། རིག་བྱེད་སོགས་དང་། གྲངས་ཅན་དང་བྱེ་བྲག་པའི་བསྟན་བཅོས་ངན་པ་བརྡོལ་བའི་ཚིག་ཀྱལ་པ་ཡིན་ནོ། །གཉིས་པ་ནི། དེ་ཡི་མཇུག་ཐོགས་ལས་བྱུང་ཕྱིར། །བརྣབ་སེམས་སོགས་རྩ་གསུམ་ལས་སྐྱེས། །དུག་གསུམ་པོ་དེའི་མཇུག་ཐོགས་ལས་བྱུང་བའི་ཕྱིར་བརྣབ་སེམས་ལ་སོགས་པའང་མི་དགེ་བའི་རྩ་བ་གསུམ་ལས་སྐྱེས་པ་ཡིན་ནོ། །གཉིས་པ་དགེ་བའི་རྩ་བ་བསྟན་པ་ནི། དགེ་བ་སྦྱོར་དང་མཇུག་བཅས་རྣམས། །ཆགས་སྡང་གཏི་མུག་མེད་ལས་སྐྱེས། །དགེ་བའི་ལས་ལམ་སྦྱོར་བ་དང་མཇུག་དང་བཅས་པ་རྣམས་ནི་ཆོས་ཅན། མ་ཆགས་པ་དང་ཞེ་སྡང་མེད་པ་དང་གཏི་མུག་མེད་པ་ལས་སྐྱེས་པ་ཡིན་ཏེ། དགེ་བའི་སེམས་ཀྱིས་ཀུན་ནས་སློང་བའི་ཕྱིར་དང་། དགེ་སེམས་དེ་ཡང་མ་ཆགས་པ་སོགས་དང་མཚུངས་པར་ལྡན་པའི་ཕྱིར། མི་དགེ་བའི་ལས་ལམ་གྱི་སྦྱོར་བ་ནི། དགེ་བའི་ལས་ལམ་གྱི་སྦྱོར་བ་དང་། དངོས་སྤོང་བ་དངོས་དང་། མཇུག་སྤོང་བ་ནི་མཇུག་ཡིན་ཏེ། དགེ་ཚུལ་བསྙེན་པར་རྫོགས་པར་བྱེད་པ་ན་ལས་ཀྱི་དཀྱིལ་(༩༤བ)
འཁོར་དུ་འཇུག་པ་དེའི་ཚེ་མཚམས་ཆེན་པོ་ན་གནས་སྣ་ཚོགས་ཡོད་པས་དེར་འཇུག་པར་བྱེད། དགེ་འདུན་རྣམས་ལ་ཕྱག་འཚལ་བར་བྱེད། མཁན་པོ་ལ་གསོལ་བ་འདེབས་པ་ནས། ལས་གཅིག་དང་གཉིས་བརྗོད་པའི་བར་ནི་སྦྱོར་བས་སྤོང་བའི་ཕྱིར་དང་། ལས་གསུམ་པ་བརྗོད་པའི་མཇུག་གི་རིག་བྱེད་དང་། དེའི་སྐད་ཅིག་གི་རིག་མིན་གྱི་ལས་ལམ་དངོས་ཀྱིས་སྤོང་བའི་ཕྱིར་རོ། །འདིར་དཔལ་ཤཱཀྱ་མཆོག་ལྡན་པས་ནི། བརྗོད་པ་གསུམ་པའི་མཇུག་གི་རིག་བྱེད་དེ། ལས་ལམ་དངོས་གཞིའི་རིག་བྱེད་ཡིན་པར་བཤད་པ་དེ་མ་གོ་ནས། བརྗོད་པ་གསུམ་པའི་མཇུག་གི་རིག་བྱེད། ལས་ལམ་དངོས་ཀྱི་མཇུག་གི་རིག་བྱེད་ཡིན་པར་གོ་བ་ནི་བཏབ་པའི་ཚྭ་མ་བྲོ་བར་མ་བཏབ་པའི་སྤོད་བྲོ་བ་ཡིན་ནོ། །དངོས་ཀྱི་ལས་ལམ་གྱི་འོག་ཏུ་གནས་བཞི། ཆོས་གོས། བསོད་སྙོམས། གནས་མལ། ན་བའི་རྐྱེན་སྨན་གྱི་ཡོ་བྱད་ཀྱི་ཇི་སྐད་བཤད་པའི་ཆོ་གས་བསྙེན་པར་རྫོགས་པ་དེ་ལ་བསྒོ་བ་དང་། གནས་ཀྱི་རྟེན་རིག་བྱེད་ཚིག་གིས་བརྗོད་པ་དང་། ཇི་སྲིད་སྡོམ་པ་མ་བཏང་གི་བར་རིག་མིན་རྗེས་སུ་འབྲང་བ་དེ་ནི་མཇུག་གི་སྤོང་བའི་ཕྱིར་རོ། །གསུམ་པ་རྫོགས་བྱེད་གསུམ་བསྟན་པ་ལ། དངོས་དང་། གཞི་གང་ཡིན་པ། དངོས་གཞིར་འགྱུར་བའི་ཚད་དོ། །དང་པོ་ལ། ཞེ་སྡང་གིས་རྫོགས་པ་གསུམ། འདོད་ཆགས་ཀྱིས་རྫོགས་པ་གསུམ། གཏི་མུག་གིས་རྫོགས་པ་གཅིག །གསུམ་ཀས་རྫོགས་པ་གསུམ་མོ། །དང་པོ་ནི། གསོད་དང་གནོད་སེམས་ཚིག་རྩུབ་པོ། །ཞེ་སྡང་གིས་ནི་མཐར་ཕྱིན་བྱེད། །གསོད་དང་གནོད་སེམས་ཚིག་རྩུབ་མོ་ནི་ཆོས་ཅན། ཞེ་སྡང་གིས་ནི་མཐར་ཕྱིན་པར་བྱེད་དེ། དང་པོ་ལ་སྲོག་ཡོངས་སུ་འདོར་བ་དང་། ཕྱི་མ་གཉིས་ལ་རྩུབ་པའི་སེམས་མངོན་དུ་གྱུར་པའི་ཕྱིར། གཉིས་ པ་ནི། ལོག་གཡེམ ་བརྣབ་སེམས་མ་བྱིན་ལེན། །ཆགས་ པ་ཡིས་ནི་རྫོགས་པར་བྱེད། །ལོག་གཡེམ ་བརྣབ་སེམས་མ་བྱིན་ལེན་ནི་ཆགས་(༩༥ན)
པ་ཡིས་ནི་རྫོགས་པར་བྱེད་དོ། །གསུམ་པ་ནི། ལོག་པར་ལྟ་བ་གཏི་མུག་གིས། །ལོག་པར་ལྟ་བ་ནི་ཆོས་ཅན། ཆེས་རྨོངས་པར་གྱུར་པ་ཡིན་ཏེ། གཏི་མུག་གིས་མཐར་ཕྱིན་པར་བྱེད་པའི་ཕྱིར། བཞི་པ་ནི། ལྷག་མ་གསུམ་གྱིས་རྫོགས་པར་འདོད། །ལྷག་མ་རྫུན་དུ་སྨྲ་བ་དང་། ཕྲ་མ། ཚིག་ཀྱལ་པ་གསུམ་ནི་ཆགས་སྡང་གཏི་མུག་གསུམ་གྱིས་མཐར་ཕྱིན་ཅིང་རྫོགས་པར་འདོད་དོ། །གཉིས་པ་གཞི་གང་ཡིན་པ་ནི། གཞི་ནི་སེམས་ཅན་ལོངས་སྤྱོད་དང་། །མིང་དང་གཟུགས་ནི་མིང་ཡིན་ནོ། །སྲོག་གཅོད་པའི་གཞི་ཡུལ་ནི་སེམས་ཅན་དང་། གཞན་གྱི་བུད་མེད་ལ་བགྲོད་པ་ལ་སོགས་པའི་གཞི་ནི་ལོངས་སྤྱོད་དང་། ལོག་ལྟའི་གཞི་མིང་ཚོར་སོགས་ཀྱི་ཕུང་པོ་བཞི་དང་། གཟུགས་ཀྱི་ཕུང་པོ་ཡིན་ནོ། །རྫུན་སྨྲ་སོགས་བཞི་ནི་མིང་གི་ཚོགས་ཡིན་ནོ་སྟེ། ངག་ནི་མིང་ལ་འཇུག་པའི་ཕྱིར་རོ། །གསུམ་པ་དངོས་གཞིར་འགྱུར་བའི་ཚད་ལ། འགྱུར་བ་ལྟ་བུའི་མི་འགྱུར་བ་དང་། མི་འགྱུར་བ་ལྟ་བུའི་འགྱུར་བའོ། །དང་པོ་ནི། སྔ་དང་མཉམ་དུ་ཤི་བ་ལ། །དངོས་མེད་ལུས་གཞན་སྐྱེས་ཕྱིར་རོ། །གང་གིས་ཕ་རོལ་པོ་འཆི་ངེས་སུ་བྱས་ནས་དེ་དང་སྔ་བ་དང་། དེ་དང་མགོ་མཉམ་དུ་གསོད་བྱེད་ཤི་བ་ན་ཆོས་ཅན། ལས་ལམ་དངོས་མེད་དེ། སྦྱོར་བ་ཡང་བྱས་ལ་འབྲས་བུ་ཡང་ཡོངས་སུ་རྫོགས་ཀྱང་སྲོག་གཅོད་ཀྱི་ཁ་ན་མ་ཐོ་བས་རེག་པར་མི་འགྱུར་བ་ལྟ་མཆིས་སམ། བཀའ་སྩལ་པ་ཡོད་དེ། གསོད་པོ་སྔར་རམ། མཉམ་དུ་ཤི་བ་ལྟ་བུའོ། །ཞེས་གསུངས་པའི་ཕྱིར་རོ། །དངོས་མེད་བྱས་པས་མཇུག་ཀྱང་མེད་པར་ཤུགས་ཀྱིས་འགྲོ་སྟེ། མཇུག་ནི་དངོས་སྔོན་དུ་འགྲོ་བ་ཡིན་པའི་ཕྱིར། བསད་བྱ་གསོན་བཞིན་དུ་གསོད་པ་པོ་ལ་ཁ་ན་མ་ཐོ་བ་དང་ལྡན་པ་མེད་དེ། བསད་བྱ་བསད་པར་མ་བྱས་པའི་ཕྱིར་རོ། །བསད་བྱ་མ་ཤི་བར་གསོད་པོ་ཤི་བ་ལ་ཡང་ཁ་ན་མ་ཐོ་བ་ལྡན་པ་མ་ཡིན་ཏེ། ལུས་གང་གིས་སྦྱོར་བ་བྱས་པ་དེའི་རྒྱུན་ནི་ཆད་ལ། ཤི་འཕོས་པའི་ལུས་དེ་ནི་སྦྱོར་བ་པོ་མ་ཡིན་པའི་སྐལ་བ་མི་མཉམ་པ་(༩༥བ)
རིས་མི་འདྲ་བའི་ལུས་གཞན་ཞིག་སྐྱེས་པའི་ཕྱིར་རོ། །འདི་ལ་ཡང་ལེགས་པར་དཔྱད་ན། དགེ་མི་དགེའི་ལས་བསགས་པ་པོ་གང་ཟག་གི་རྒྱུན་ལ་འཇོག་ན། སྔ་དང་མཉམ་དུ་ཤིའང་བསད་བྱ་རྗེས་ནས་ཤི་པ་ན་སྦྱོར་བ་བྱེད་པོ་ལ་ལས་ལམ་འབྱུང་བར་རིགས་ཏེ། གང་ཟག་གི་རྒྱུན་མ་འགག་པའི་ཕྱིར་སྙམ་མོ། །འོ་ན་གང་ཟག་ནི་ཕུང་པོ་ལ་བཏགས་པའི་བཏགས་ཡོད་ཙམ་ཡིན་ལ། གདགས་གཞི་གཟུགས་ཕུང་དེའི་ལུས་དང་འབྲེལ་བའི་ལས་ལམ་དངོས་མ་བྱུང་སྟེ། སྔ་དང་མཉམ་དུ་ཤི་བའི་ཚེ་ན་ནི། བསད་བྱ་ཤི་བ་དངོས་མ་བྱུང་བའི་ཕྱིར་དང་། གསོད་བྱེད་ཤི་བའི་འོག་གི་ལུས་ལ་ནི་ལས་ལམ་དངོས་མ་བྱུང་སྟེ། དེས་སྔ་དང་མཉམ་དུ་ཤི་བའི་བསད་བྱ་ལ་སྦྱོར་བ་མ་བྱས་པའི་ཕྱིར། དེ་ལྟར་དཔྱད་ན་ལུས་ཀྱི་ཁ་ན་མ་ཐོ་བའི་ལས་ལམ་དངོས་མི་འབྱུང་བ་ཙམ་སྲིད་ཆུག་ཀྱང་། ཐེག་པ་ཆེན་པོ་ལྟར་ན། ལས་ཐམས་ཅད་ལ་ཡིད་གཙོ་བས། དེ་སྐབས་ཀྱི་བྱ་བ་དངོས་གཞི་ལ་བརྟེན་པའི་རྣམ་སྨིན་ཡིད་དུ་མི་འོང་བ་འབྱིན་པར་ངེས་སོ། །གཉིས་པ་ནི། དམག་ལ་སོགས་པར་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །དམག་གིས་གདབ་པ་དང་། ལ་སོགས་པས་ལིང་འདེབས་པ་དང་། མ་ཕྲིགས་པར་གདབ་པ་དག་ཏུ་ཕ་རོལ་པོ་བསད་པའི་སླད་དུ་མང་པོའི་ཚོགས་པས་བཏབ་སྟེ། གཅིག་གཅིག་གིས་སྲོག་གཅོད་པར་བྱེད་པ་ན་ཆོས་ཅན། གསོད་པའི་ཕྱིར་འདུས་པའི་མང་པོ་དེ་ཐམས་ཅད་ལ་བྱེད་པ་པོ་བཞིན་ལས་ལམ་ལྡན་པར་འགྱུར་ཏེ། ཚིག་གིས་ཕན་ཚུན་སྦྱོར་བ་ཙམ་མིན་པར་དོན་གྱིས་ན་ཕན་ཚུན་བསྒྲུབ་བྱའི་དོན་གཅིག་ཁས་བླངས་པའི་ཕྱིར་རོ། །འོ་ན་དེའི་ཕྱིར་ནན་གྱིས་ཁྲིད་ན། དེ་ཚོད་གཅིག་ཏུ་ཕྱིན་ན་ཆོས་ཅན། ཁ་ན་མ་ཐོ་བ་དང་ལྡན་པ་ཡོད་དེ། དེ་ལ་བསམ་པ་བཟང་པོ་མེད་པའི་དབང་དུ་བྱས་པའི་ཕྱིར། དེའི་ངོ་ཙམ་དུ་འགྲོའང་ཆོས་ཅན། ཁ་(༩༦ན)
ན་མ་ཐོ་བ་དང་མི་ལྡན་པའང་ཡོད་དེ། བདག་རང་གི་སྲོག་གི་ཆེད་དུའང་མི་བསད་སྙམ་བཞིན་དུ་འགྲོ་བ་དེའི་ཚེ་ནའི་ཕྱིར། བཞི་པ་ལས་སོ་སོར་བསྟན་པ་ལ། ལས་སོ་སོའི་མཚན་ཉིད། སེམས་པ་གང་དང་ལྷན་ཅིག་ཏུ་འཇུག་པ། འགྲོ་བ་གང་ན་ལས་ལམ་དུ་ཡོད་པ། ལས་ལམ་གྱི་འབྲས་བུ་བསྟན་པའོ། །དང་པོ་ལ། སོ་སོར་ངེས་བཟུང་བ་དང་། ལོག་ལྟ་བྱེ་བྲག་ཏུ་བཤད་པའོ། །དང་པོ་ལ། ལུས་ཀྱི་ལས། ངག་གི་ལས། ཡིད་ཀྱི་ལས། ལས་དང་ལས་ལམ་གྱི་བྱེ་བྲག་གོ། །དང་པོ་ལ་གསུམ་ལས། དང་པོ་སྲོག་གཅོད་པ་ནི། སྲོག་གཅོད་པ་ནི་བསམས་བཞིན་དུ། །མ་ནོར་བར་ནི་གཞན་གསད་པའོ། །སྲོག་གཅོད་པའི་བསམ་པ་ནི། འདི་བསོད་སྙོམས་པས་བསམས་བཞིན་དུ་འདུ་ཤེས་གཞན་དང་། མ་ནོར་བར་ནི་གསོད་པའི་གཞི། རང་ལས་རྒྱུད་གཞན་བསད་པའོ། །འོ་ན་སྲོག་ཆགས་ཡིན་མིན་དང་། བསད་བྱ་དེའམ་དེ་མིན་ཐེ་ཚོམ་ཟོས་ནས་བསད་ན་ཅི་ལྟ་བུ་ཞེ་ན། ཐེ་ཚོམ་གྱིས་མ་ཡིན་པར་སྲོག་ཆགས་སམ་བསད་བྱ་འདིའི་ངེས་པ་རྙེད་ནས་དེ་ལ་བསྣུན་པའི་སྦྱོར་བ་བྱེད་ཅིང་། སྦྱོར་བ་དེས་དེ་སྲོག་འདོར་འདོད་ཀྱི་འདུ་ཤེས་ཡོད་ན་ལས་ཀྱི་ལམ་འོང་སྟེ། སེམས་ཅན་དང་བསད་བྱ་གང་ཡིན་པ་གདོན་མི་ཟ་བར་ངེས་བཟུང་དུ་བྱས་པའི་ཕྱིར། ཕུང་པོ་སྐད་ཅིག་མ་རྣམས་རང་གི་དང་ཁོ་ནས་འཇིག་པ་ལ། འདི་གཞན་གྱིས་ཇི་ལྟར་སྲོག་གཅོད་པའི་དགག་པར་བྱེད་ཅེས་འདྲི་བའོ། །དེའི་ལན་ནི། འཇིག་རྟེན་ན་གྲགས་པའི་སྲོག་ནི་ཆོས་ཅན། ལུས་དང་སེམས་ལ་བརྟེན་ནས་འཇུག་པའི་རླུང་ཡིན་ཏེ། དེ་བཅད་པས་ཁ་ན་མ་ཐོ་བ་འབྱུང་བའི་ཕྱིར། རླུང་སེམས་ལ་རགས་ལས་ཤིང་འཇུག་པ་ཡིན་ཏེ། འགོག་པ་དང་འདུ་ཤེས་མེད་པའི་སྙོམས་པར་འཇུག་པ་ལ་ཞུགས་པ་དང་ཤི་བ་ལ་མི་འབྱུང་བའི་ཕྱིར། སྐྱེས་པ་ནི་རང་གི་ངང་གིས་(༩༦བ)
འགག་པ་ཡིན་ཀྱང་། མ་འོངས་པའི་སྐྱེ་བ་ལ་གེགས་བྱེད་པ་ནི་འགག་བྱེད་ཡིན་པས་དེའི་དཔེ་ནི་རྟེན་ལ་གནོད་པས་གནོད་པ་མར་མེའམ་དྲིལ་བུའི་སྐད་འགག་པར་བྱེད་པ་དང་འདྲའོ། །ཡང་ན། བསྟན་བཅོས་ལས་བཤད་པའི་སྲོག་གཅོད་པའི་ཁ་ན་མ་ཐོ་བ་བསྐྱེད་པ་ཡོད་དེ། སྲོག་གི་དབང་པོ་འགག་པར་བྱེད་ན་དེར་འགྱུར་བའི་ཕྱིར། ཁྱབ་པ་ཡོད་དེ། སྲོག་གི་དབང་པོ་སྐད་ཅིག་མ་གཅིག་བཅད་ཀྱང་ཕྱིས་མཚམས་མི་སྦྱོར་བའི་དབུགས་ནི་ཡུན་རིང་བར་ཆད་ཀྱང་ཕྱིས་མཚམས་སྦྱོར་བའི་ཕྱིར་རོ། །སངས་རྒྱས་པས་བདག་མེད་པར་ཁས་ལེན་པས་སྲོག་ཀྱང་མེད་པར་ཁས་ལེན་རིགས་ན། སྲོག་ཆགས་གང་ཞིག་འཆི་བར་འགྱུར་བའི་སྲོག་དེ་གང་ཡིན་འདྲི་བའོ། །དེ་ལ་གང་གི་ཞེས་དྲུག་སྒྲ་འདི་ནི་གང་ཟག་དགག་པའི་སྐབས་སུ་དཔྱད་པར་བྱའོ། །སྲོག་དེའང་དབང་པོ་དང་བཅས་པའི་ལུས་ཁོ་ན་ལ་ཡིན་གྱི། བདག་ལ་མ་ཡིན་ཏེ། དབང་པོ་དང་བཅས་པའི་ལུས་ནི་གསོན་པ་ཞེས་བྱ་ལ། དབང་པོ་མེད་པའི་ལུས་ལ་ནི་ཤི་བའི་རོ་ཞེས་བརྗོད་པའི་ཕྱིར། དེ་སྐད་དུའང་། གང་ཚེ་ཚེ་དང་དྲོད་རྣམ་ཤེས། །འདི་དག་གིས་ནི་ལུས་འདོར་ཞིང་། །བོར་ནས་དེ་ཚེ་འདུག་པ་ནི། །ཇི་ལྟར་ཤིང་ལ་སེམས་མེད་བཞིན། །ཞེས་སོ། །གཅེར་བུ་པ་རྣམས་ན་རེ། ཆེད་དུ་མ་བསམ་པར་སྲོག་གཅོད་ཀྱང་བྱེད་པ་པོ་སྲོག་གཅོད་པའི་དངོས་གཞིའི་ལྟུང་བ་དང་ལྡན་ཏེ། མེ་འདི་ལ་རེག་པར་བྱ་སྙམ་པས་འཚིགམི་བྱ་སྙམ་པས་རེག་ཀྱང་མི་འཚིག་པ་མ་ཡིན། རེག་ན་རེག་པར་མི་བྱ་སྙམ་ཀྱང་འཚིག་པ་དང་འདྲ་བར་ཆོས་ཉིད་དབང་ཆེ་བའི་ཕྱིར། ཞེས་ཟེར་རོ། །དེ་ལྟར་ན་ཉོན་མོངས་ཀྱི་ཆེད་དུ་གཏད་པ་མེད་པའི་གཞན་གྱི་ཆུང་མ་མཐོང་རེག་ལའང་ཆོས་ཅན། འདོད་ལོག་གི་ཉེས་པ་བསྐྱེད་པར་ཐལ། མ་བསམ་པར་སྲོག་བཅད་ཀྱང་ལྟུང་བ་དངོས་(༩༧ན)
གཞིས་འགོས་པའི་ཕྱིར། དེ་ལྟར་ཐལ་བས་གཅེར་བུ་པ། དེ་ཡང་མི་འདོད་དོ། །གཅེར་བུ་པ་སྐྲ་འབལ་བ་དང་། (ཡང་ན། གཅེར་བུ་པ་སྐྲ་འབལ་བ་ན་ཆོས་ཅན། ཆོས་མ་ཡིན་པ་དང་ལྡན་པའི་སྐབས་སྲིད་པར་འགྱུར་ཏེ། སྐྲ་འབལ་བ་ལ་སྡང་བ་བསྐྱེད་ན་བསོད་ནམས་འདོད་པ་ཡང་སྡིག་པ་དང་ལྡན་པར་འགྱུར་བའི་ཕྱིར། རྟགས་འདི་ནི་གཅེར་བུ་པ་རང་ལ་ལོག་སོང་བ་ཡིན་ལ། སངས་རྒྱས་པ་ལ་སྤྱིར་སྡང་བ་ཆོས་མ་ཡིན་པ་ཡིན་ཀྱང་། སྐྲ་འབལ་བས་ཁྱད་པར་དུ་བྱས་པའི་སྡང་བ་ཆོས་མིན་ལྷག་པར་ཡིན་མི་དགོས་སོ། །ཡང་ན་དཀའ་ཐུབ་དྲག་པོའི་ལུང་སློབ་མ་ལ་དཔོགས་པ་ན། སློབ་དཔོན་ལ་ཆོས་མིན་དང་ལྡན་པར་ཐལ། སློབ་མ་ལ་གནོད་འདོད་ཀྱི་བློ་སྔོན་དུ་མ་སོང་ཡང་སྡུག་བསྔལ་བསྐྱེད་པའི་ཕྱིར། མཆན།) དཀའ་ཐུབ་དྲག་པོའི་ལུང་སློབ་མ་ལ་དབོག་པ་ན་དཔོན་སློབ་ཐམས་ཅད་ཆོས་མ་ཡིན་པ་དང་ལྡན་པར་འགྱུར་ཏེ། སྡུག་བསྔལ་བསྐྱེད་པའི་ཕྱིར། གཅེར་བུ་པ་རྣམས་གསུད་དེ་མ་ཞུ་བས་ཤི་ན་ཡང་ཆོས་ཅན། ཟས་སྦྱིན་པ་ལ་སྲོག་གཅོད་ཀྱི་ལྟུང་བ་དངོས་འབྱུང་བར་ཐལ། གསོད་པའི་བློ་སྔོན་དུ་མ་སོང་ཡང་འཆི་བར་བྱ་བ་ཆོས་མིན་གྱི་རྒྱུ་ཡིན་པའི་ཕྱིར། མ་དང་བུ་ལྟོ་ན་ཡོད་པ་དག་ཀྱང་ཆོས་ཅན། ཆོས་མ་ཡིན་པ་དང་ལྡན་པར་འགྱུར་ཏེ། ཕན་ཚུན་སྡུག་བསྔལ་གྱི་རྒྱུ་མཚན་དུ་གྱུར་པའི་ཕྱིར། མེའི་དཔེ་དེས་ནའོ། །བསད་བྱ་དེ་ལ་ཡང་ཆོས་ཅན། བསད་པའི་ཁ་ན་མ་ཐོ་བ་དང་ལྡན་པར་འགྱུར་ཏེ། གསོད་པ་དེའི་བྱ་བ་དང་འབྲེལ་བའི་ཕྱིར། མེས་རང་གི་རྟེན་བསྲེག་པ་བཞིན་ནོ། །གཞན་ཅིག་སྲོག་གཅོད་དུ་བཅུག་པས་གཞན་པ་དེ་ལ་སྲོག་གཅོད་པའི་ཁ་ན་མ་ཐོ་བ་འོང་ཡང་། སྐུ་ལ་མཁན་ལ་ཆོས་ཅན། སྲོག་གཅོད་པའི་ཁ་ན་མ་ཐོ་བ་མི་འབྱུང་བར་ཐལ། བདག་གི་མེ་གཅིག་མེར་ཕུལ་བས་ཕ་རོལ་ཚིག་ཀྱང་རང་མི་ཚིག་པ་དང་མཚུངས་པའི་ཕྱིར། ཤིང་དང་སོ་ཕག་དང་སྨྱིག་(༩༧བ)
མ་སོགས་ཀྱང་སྡིག་པ་དང་ལྡན་པར་ཐལ། ཁྱིམ་བརྡིབ་པ་ན་དེ་དག་གིས་སྲོག་ཆགས་འཆི་བར་བྱེད་པའི་ཕྱིར། སྨན་དཔྱད་བྱས་པས་ནད་པ་ལ་གནོད་པའམ་ཤི་བ་ན་ཆོས་ཅན། སྨན་པ་ལ་ཡང་སྡིག་ལྡན་དུ་ཐལ། གནོད་པ་དང་གསོད་སེམས་མེད་པར་ཡང་དེར་འགྱུར་བའི་ཕྱིར། དེ་ཡི་དཔེ་དེ་ཆོས་ཅན། དོན་མི་འགྲུབ་པར་ཐལ། རྟགས་མེད་པའི་ཕྱིར། གཉིས་པ་མ་བྱིན་ལེན་ནི། མ་བྱིན་ལེན་པ་གཞན་གྱི་ནོར། །མཐུ་དང་འཇབ་བུས་བདག་གིར་བྱེད། །མ་བྱིན་ལེན་པ་ནི་གཞན་གྱིས་བདག་གིར་བྱས་པའི་ནོར་ཆེད་དུ་བསམས་ནས་མ་ནོར་བར་དངོས་སུ་མཐུའམ། ལྐོག་ཏུ་འཇབ་བུས་ལྷ་སྦྱིན་ལ་རྐུའོ་སྙམ་ནས་མཆོད་སྦྱིན་ལ་རྐུ་བ་ལྟ་བུ་མ་ཡིན་པ་འདུ་ཤེས་མ་འཁྲུལ་བ་བདག་གིར་བྱེད་ཅིང་ལེན་ནའོ། །མཆོད་རྟེན་ལ་འཕྲོག་པ་ནི་ཆོས་ཅན། སངས་རྒྱས་ལ་མ་བྱིན་པར་བླངས་པ་ཡིན་ཏེ། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་ཚེ། དེ་དག་ཐམས་ཅད་ཡོངས་སུ་བཟུང་བའི་ཕྱིར། གྲུབ་སྟེ། སྦྱིན་པ་པོའི་སྐྱེ་བོ་ལ་ཕན་གདགས་པའི་སླད་དུ་ཡོངས་སུ་མ་བཟུང་ན་ལེན་པ་མེད་པའི་ཕྱིར་མཆོད་རྟེན་ལ་ཕུལ་བ་འབྲས་བུ་མེད་པར་འགྱུར་བའི་ཕྱིར་རོ། །གཞན་དག་ན་རེ། མཆོད་རྟེན་ལས་འཕྲོག་པ་ནི། ཆོས་སྐྱོང་སྲུང་མས་དབང་དུ་བྱས་པ་ལས་བླངས་པར་འགྱུར་རོ་ཞེས་ཟེར་རོ། །བདག་པོ་མེད་པའི་གཏེར་བྲུས་ན་ནི་ཡུལ་གྱི་བདག་པོ་ལ་བླངས་པའོ། །དགེ་སློང་ཤི་བའི་ནོར་འཕྲོག་ན་གསོལ་བའི་ལས་བྱས་པ་ཡིན་ན་ཆོས་ཅན། མཚམས་ཀྱི་ནང་དུ་གཏོགས་པའི་དགེ་འདུན་ལས་འཕྲོག་པ་ཡིན་ཏེ། མཚམས་ནང་དུ་གཏོགས་པའི་དགེ་འདུན་གྱིས་དབང་བར་སྟོན་པས་བཅས་པའི་ཕྱིར། ཡང་མཚམས་གཉིས་ཀྱི་བར་དུ་ཤི་ན། གང་ཉེ་བ་དེ་དབང་པ་ཡིན། ཉེ་རིང་མཉམ་ན་མགོ་ནང་དུ་བསྟན་པ་དེ་དབང་བ་ཡིན་ནོ། །གསོལ་བ་མ་བྱས་པ་ཞིག་ཡིན་ན་ནི་སངས་རྒྱས་ཀྱི་སློབ་མ་(༩༨ན)
ཐམས་ཅད་ལས་མ་བྱིན་པར་བླང་བ་ཡིན་ནོ། །གསུམ་ པ་ལོག་གཡེམ ་ནི། བགྲོད་མིན་འགྲོ་བ་འདོད་པ་ཡིས། །ལོག་པར་ གཡེམ་པ ་རྣམ་པ་བཞི། །བགྲོད་བྱ་མིན་པ་ལ་ཉལ་པོ་བྱ་བར་འགྲོ་བར་འདོད་པ་ཡིས་འདོད་པས་ལོག་པར་ གཡེམ་པ ་ལ་རྣམ་པ་བཞི་སྟེ། གཞན་གྱི་ཁྱིམ་ཐབ་གཅིགམ་དང་བུ་མོ་གཅིགཕ་མ་དང་འབྲེལ་བའི་བདུན་བརྒྱུད་ཚུན་ཕྱོགས་གཅིགརང་གི་ཆུང་མ་ལ་ཡང་སྤྱོད་ཡུལ་མ་ཡིན་པ་ལ་སོགས་ པ་གཅིག་དེ་བཞི་པོ་དེ་ལོག་གཡེམ ་བཞི་ཡིན་ནོ། །ཡང་ན། གཞན་དབང་བའི་ཆུང་མ་དང་། མ་དང་། བུ་མོ་དང་། ཕ་མའི་འབྲེལ་པ་ཚོ་ལ་གཅིགརང་གི་ཁྱིམ་ཐབ་ལ་ཡུལ་མིན་པ་གཉིས་པ། དུས་མིན་པ་གསུམ་པ། ཡན་ལག་མིན་ པ་བཞི་སྟེ་ལོག་གཡེམ ་བཞི་ནི་དེའོ། །བགྲོད་བྱར་གྱུར་པ་རང་གི་ཆུང་མ་ཡིན་ཀྱང་ཡན་ལག་མ་ཡིན་པར་འགྲོ་བ་ཁའམ་རྐུབ་ཏུ་འཇུག་པའམ། ཡུལ་མིན་པར་འགྲོ་བ་སྣང་བའམ། མཆོད་རྟེན་ནམ། གཙུག་ལག་ཁང་ངམ། དུས་མིན་པར་འགྲོ་བ་སྦྲུམ་མའམ། བུ་ནུ་ཞོ་འཐུང་བའི་གནས་སྐབས་ཀྱི་བུད་མེད་ལ་མི་ཚངས་པར་སྤྱད་ན། དེའི་ནུ་ཞོ་སྐམ་པའམ། དེའི་ནུ་ཞོ་བུ་ལ་མི་གསོད་པས་དང་། བསྙེན་གནས་སྲུང་བའི་གན་དུ་འགྲོ་བའོ། །ཁ་ཅིག །གལ་ཏེ། ཁྱོས་ཆུང་མ་བསྙེན་གནས་སྲུང་བར་གནང་ན་ངེས་པ་དང་བཅས་པ་ཡིན་ནོ་ཞེས་ཟེར་རོ། །མ་ནོར་བ་ཞེས་སྦྱར་ཏེ། རང་གི་ཆུང་མའི་འདུ་ཤེས་ཀྱིས་གཞན་གྱི་ཆུང་མའི་གན་དུ་སོང་ན་ལས་ལམ་དུ་མི་འགྱུར་རོ། །གལ་ཏེ། གཞན་ལྷ་སྦྱིན་གྱི་ཆུང་མ་ཡིན་པའི་འདུ་ཤེས་ཀྱིས་མཆོད་སྦྱིན་གྱི་ཆུང་མའི་གན་དུ་སོང་ན། ཁ་ཅིག་ནི། ལས་ཀྱི་ལམ་དུ་འགྱུར་ཏེ། གཞན་གྱི་ཆུང་མ་ལ་སྦྱོར་བ་བྱས་པའི་ཕྱིར་དང་། དངོས་པོ་ལ་ཡང་ཡོངས་སུ་ལོངས་སྤྱད་པའི་ཕྱིར་ཟེར་རོ། །གཞན་དག་ན་རེ། སྔོ་བསངས་མ་ལ་སྤྱད་པར་འདོད་པ་ལ་སྐྱ་བསངས་མ་ལ་(༩༨བ)
ལོངས་སྤྱོད་པ་འདོད་ལོག་ཏུ་མི་འགྱུར་ཏེ། སྦྱོར་བ་གཞན་དུ་བྱས་པའི་ཕྱིར། ལྷ་སྦྱིན་གསོད་པར་སེམས་པས་མཆོད་སྦྱིན་བསད་ཀྱང་སྲོག་བཅད་པའི་ལས་ལམ་འབྱུང་བ་མ་ཡིན་ པ་བཞིན་ནོ། །དགེ་སློང་མའི་གན་དུ་འགྲོ་ན། སུ་ལས་འདོད་པས་ལོག་པར་གཡེམ ་ཡིན་ཅེ་ན། དགེ་སློང་མ་དེ་ཉིད་ཡུལ་དུ་བྱས་ནས་བདག་པོར་གྱུར་ པ་ལས་ལོག་གཡེམ ་དུ་འགྲོ་སྟེ། ཡུལ་དེས་ནི་སྤྱོད་པ་དེ་མི་བཟོད་པར་བྱ་བ་ཡིན་པའི་ཕྱིར། དེ་ནི་རང་གི་ཆུང་མ་ངེས་པ་དང་བཅས་པ་བཞིན་དུ་བགྲོད་བྱ་མ་ཡིན་པ་ཡང་ཡིན་ནོ། །གཞོན་ནུ་མའི་གན་དུ་འགྲོ་བ་ནི། བག་མར་མ་བླངས་ཀྱང་གང་ལ་བྱིན་པ་སྟེ་གཉེན་གང་ལ་བྱས་པ་ལས་སོ། །གལ་ཏེ་བྱིན་པ་མེད་ན་བསྲུང་བ་གང་ཡིན་པ་དང་། ཐ་ན་རྒྱལ་པོ་ལས་ཏེ་དེས་ནི་དེ་མི་བཟོད་པར་བྱ་བ་ཡིན་པའི་ཕྱིར་རོ། །གཉིས་པ་ངག་གི་ལས་ལ་བཞི་ལས། དང་པོ་རྫུན་ལ། དངོས་དང་། མཐོང་ཐོས་སོགས་ཀྱི་དོན་ཏོ། །དང་པོ་ནི། རྫུན་ཚིག་འདུ་ཤེས་གཞན་སྒྱུར་བའི། །ཚིག་དོན་མངོན་པར་གོ་བ་འོ། །རྫུན་གྱི་ཚིག་ནི་དོན་སྨྲ་བ་དེ་ལ་འདུ་ཤེས་གཞན་དུ་བསྒྱུར་བའི་སྒོ་ནས་སྨྲ་བའི་ཚིག་དེའི་དོན་མངོན་པར་གོ་བ་ན་ཡིན་ཏེ། མ་གོ་ན་ཚིག་ཀྱལ་པར་འགྱུར་བའི་ཕྱིར་རོ། །རྒྱ་གར་ལྟ་བུ་བོད་ཀྱི་བརྡ་ལ་མ་འདྲིས་པ་ལ་བོད་ཀྱིས་རྫུན་བྱས་ཀྱང་རྫུན་དུ་མི་འགྱུར་བས། གོ་བ་ཞིག་དགོས་སོ། །མུ་སྟེགས་ཁ་ཅིགརང་གི་བསམ་པ་ལ་བདག་ཡོད་པར་ཤེས་པ་དེ་འདུ་ཤེས་གཞན་དུ་བསྒྱུར་ནས་བདག་མེད་སྨྲས་པ་དེ་དངོས་པོ་ལ་བདེན་ཀྱང་། འདུ་ཤེས་གཞན་དུ་བསྒྱུར་བ་དེ་རྫུན་དུ་འགྲོ་ཟེར། ལ་ལ་ན་རེ། འདུ་ཤེས་གཞན་དུ་བསྒྱུར་ཀྱང་དངོས་པོ་ལ་བདག་མེད་བདེན་པར་ཡོད་པས་རྫུན་དུ་མི་འགྲོ། རྫུན་དུ་འགྲོ་བ་ལ་དངོས་པོ་ལ་མི་བདེན་པ་གཅིག་དགོས་ཟེར་རོ། །ཡི་གེ་མང་པོ་ལས་ཚིག་ཏུ་འགྱུར་ན་ཚིག་སྔ་ཕྱི་གང་ལས་ལས་ལམ་དུ་བཞག་ཅེ་ན། ངག་ཐ་མ་རིག་བྱེད་དང་རིག་བྱེད་མིན་པ་(༩༩ན)
དང་བཅས་པ་དངོས་ལས་ལམ་དུ་བཞག་སྟེ། ཚིག་དང་ཡི་གེ་སྔ་མ་རྣམས་སྦྱོར་བ་ཡིན་པའི་ཕྱིར། ཡང་ན་དོན་གང་ལས་གོ་བའི་ངག་ལས་ལམ་དུ་འགྱུར་ཏེ། ཉན་པ་པོས་རྟོགས་པ་ལ་བལྟོས་ནས་ལས་ལམ་དུ་འཇོག་པའི་ཕྱིར། ཡི་གེ་སྔ་མ་སྦྱོར་བ་དང་། ཕྱི་མ་རིག་བྱེད་མིན་པ་དང་བཅས་པ་མཇུག་ཡིན་ནོ། །དོན་མངོན་པར་གོ་བ་ནི། ཅི་ཉན་པ་པོས་དོན་གོ་ཟིན་པ་ཡིན་ནམ། གོ་ནུས་ཡིན། དང་པོ་གོ་ཟིན་པ་ལས་ལམ་དུ་འགྱུར་བ་ཡིན་ན་ཆོས་ཅན། རྣམ་པར་རིག་བྱེད་མ་གཏོགས་པ་རིག་མིན་ཁོ་ན་ལས་ལམ་དུ་འགྱུར་ཏེ། ཚིག་གི་དོན་མིང་ལ་སོགས་པ་ཡིད་ཤེས་རྟོག་པའི་ཡུལ་ཡིན་པའི་ཕྱིར་དང་། ངག་གི་རིག་བྱེད་ཀྱི་སྒྲ་ཉན་ཤེས་ཀྱི་ཡུལ་ནི་རྣ་བའི་རྣམ་ཤེས་དང་ལྷན་ཅིག་འགགས་ནས་དུས་དེར་རིག་བྱེད་མེད་པའི་ཕྱིར། གཉིས་པ་མངོན་པར་གོ་ནུས་ཀྱི་དབང་དུ་བྱས་ན་ཆོས་ཅན། རིག་བྱེད་ཀྱི་ལས་ལམ་མེད་པའི་ཉེས་པར་མི་འགྱུར་ཏེ། སྐད་བྱང་བ་དང་རྣ་བའི་རྣམ་ཤེས་སྐྱེ་བའི་སྐབས་ཀྱི་རིག་བྱེད་ལས་ལམ་དུ་འཇོག་པའི་ཕྱིར། སྲོག་གཅོད་པ་ནི་ཤི་བའི་དུས་ན་རིག་བྱེད་ཡོད། རྫུན་དུ་སྨྲ་བ་ནི་ཟིན་ཙམ་ན་རིག་བྱེད་མེད་པས་གོ་ཟིན་པ་ལས་ལམ་དུ་འགྱུར་བ་མ་ཡིན་ཏེ། ལས་ལམ་ནི་རིག་བྱེད་དང་བཅས་པ་ཡིན་པའི་ཕྱིར་རོ། །མདོ་ལས་ཐ་སྙད་བཅུ་དྲུག་གསུངས་པས། མ་མཐོང་། མ་ཐོས། མ་རྟོགས། རྣམ་པར་མ་ཤེས་པ་ལ། མཐོང་། ཐོས། རྟོགས། རྣམ་པར་ཤེས་ཞེས་སྨྲ་བ་དང་། མཐོང་ཐོས་རྟོགས་རྣམ་པར་ཤེས་པ་ལ་མ་མཐོང་མ་ཐོས་མ་རྟོགས་མ་ཤེས་ཞེས་སྨྲ་བ་འདི་ནི་འཕགས་པ་མ་ཡིན་པའི་ཐ་སྙད་ཡིན་ནོ། །འོན་ཀྱང་སོ་སོའི་སྐྱེ་བོ་ནི་འཕགས་པ་མ་ཡིན་པའི་ཐ་སྙད་ཉི་ཚེ་སྨྲ་བ་མ་ཡིན་ཀྱང་། འཕགས་པ་མ་ཡིན་པའི་ཐ་སྙད་ནི། སོ་སོའི་སྐྱེ་བོ་ཁོ་ནས་སྨྲའི། འཕགས་པས་མི་སྨྲ་བའི་ཕྱིར། འཕགས་མིན་གྱི་ཐ་སྙད་ཅེས་(༩༩བ)
སྦྱར་བ་ཡིན་ནོ། །མཐོང་བ་ནས་རྣམ་པར་ཤེས་པའི་བར་ལ་མཐོང་བ་ནས་རྣམ་པར་ཤེས་སོ་ཞེས་སྨྲ་བའི་བར་དང་། མ་མཐོང་བ་ནས་མ་ཤེས་ཞེས་སྨྲ་བའི་བར་བརྒྱད་པོ་འདི་ནི་འཕགས་པའི་ཐ་སྙད་དག་ཡིན་ནོ། །གཉིས་པ་ནི། མིག་རྣ་ཡིད་ཀྱི་རྣམ་ཤེས་དང་། །གསུམ་གྱིས་ཉམས་སུ་མྱོང་གང་དེ། །མཐོང་ཐོས་རྣམ་པར་ཤེས་པ་དང་། །རྟོགས་པ་ཡིན་ཏེ་རིམ་བཞིན་བཤད། །མཐོང་ཐོས་རྟོགས་རྣམ་པར་ཤེས་པ་ཞེས་པ་དེ་ཇི་ལྟ་བུ་ཞེ་ན། མིག་རྣ་ཡིད་ཀྱི་རྣམ་ཤེས་ཀྱིས་ཉམས་སུ་མྱོང་བ་ནི། མཐོང་ཐོས་རྣམ་པར་ཤེས་པ་དང་། །ཞེས་པའི་སྒྲ་སྦྱར་རོ། །སྣ་ལྕེ་ལུས་གསུམ་གྱིས་ཉམས་སུ་མྱོང་བ་དེ་རྟོགས་པ་ཡིན་ཏེ་གོ་རིམ་བཤད་པ་བཞིན་སྦྱར་རོ། །བྱེ་སྨྲ་ན་རེ། དྲི་རོ་རེག་བྱ་ནི་ནུས་པ་ཆུང་སྟེ་ཐ་ན་ཀུན་སློང་གིས་ཀྱང་དགེ་མི་དགེར་མི་འགྱུར་བའི་ཕྱིར་ཤི་བ་དང་འདྲ་སྟེ། (འདིར་དྲི་རོ་རེག །ཀུན་སློང་གི་དགེ་མི་དགེར་མི་འཇོག་པ་ནི་སྡོམ་དང་སྡོམ་མིན་གྱི་གཟུགས་ལ་འབྱུང་འགྱུར་གཟུགས་སྒྲ་གཉིས་ཡོད་ཀྱི། ལྷག་མ་གསུམ་མེད་པར་སྟོན་པའོ། །མཆན།) ལུང་མ་བསྟན་ཡིན་པའི་ཕྱིར། ཤི་བར་ཡང་འཇུགརྟོག་པར་ཡང་འཇུག་པའི་ངེས་ཚིག་ཞིག་ལ་རྟོགས་པ་ཞེས་ཟེར་བའི་སྒྲ་ལ་ཤི་བ་ཞེས་པའི་སྒྲ་བཤད་དུ་ཡོད་པས། རྟོགས་པ་ཞེས་བྱའོ་ཞེས་ཟེར་ལ། སློབ་དཔོན་འདུས་བཟང་ནི། རང་གི་དབང་པོ་དག་དང་འཕྲད་པས་རྟོགས་པའོ། །(དྲི་རོ་རེག་པ་དབང་རྟེན་དང་འཕྲད་པ་བདེན་ཀྱང་། དབང་པོ་དང་འཕྲད་པ་ནི་བདེན་ཤས་ཆུང་སྟེ། དབང་རྟེན་ཁོག་པས་བར་དུ་ཆོད་པའི་ཕྱིར། བར་དུ་ཆོད་ཀྱང་མི་ཐོགས་པར་འཕྲད་པ་ཞིག་ཁས་ལེན་ན་སྔས་བླ་མེད་ཀྱི་རྡོ་རྗེའི་ལུས་ལ་གནད་དུ་བསྣུན་པའི་སྒོ་ནས་འཚང་རྒྱ་བ་ལ་རགས་ལུས་འདི་ཕྱག་རྒྱའི་རེག་པ་དང་དངོས་སུ་འཕྲད་པས་དེའི་རང་བཞིན་ལ་ཁྱབ་པའི་ཕྲ་ལུས་མི་གསལ་བར་ཡོད་པ་དེ་དང་ཡང་མི་ཐོགས་པར་འཕྲད་པའི་བདེ་བས་རགས་ལུས་ཕྲ་ལུས་ལ་ཐིམ་ནས་འཚང་རྒྱ་བར་བཤད་པ་དང་གནད་ཆ་འདྲར་སྣང་ངོ་། །མཆན།) ཞེས་ཟེར་རོ། །བྱེ་སྨྲའི་ལུགས་འདི་ལ་ལུང་ནི། མཆོད་བྱེད་ཀྱི་མ་ཅན་ཅི་སྙམ་དུ་སེམས། (བྲམ་ཟེ་ཕྲུ་གུ་གཅིག་ལ་ལམ་ལ་མཆོད་བྱེད་ཡོད་པས་མཆོད་
བྱེད་ཀྱི་མ་ཅན་ཞེས་པས་སོ། །མཆན།) གཟུགས་གང་དག་ཁྱོད་ཀྱིས་སྤྱིར་མིག་གིས་མཐོང་ཡང་ཆགས་པ་སྐྱེ་བའི་ཡུལ་དུ་མ་མཐོང་སྟེ། མཚན་མ་དང་མངོན་རྟགས་སུ་མི་འཛིན་པས་སྔོན་འདས་པའི་དུས་སུ་མ་མཐོང་ཞིང་ད་ལྟར་མི་ལྟ་ལ་མ་འོངས་པའི་དུས་སུ་ཁྱོད་འདི་སྙམ་དུ་བལྟ་བར་བྱའོ་སྙམ་དུའང་མི་སེམས་ན་གཞི་དེ་ལ་ཁྱོད་འདུན་པའམ། འདོད་ཆགས་སམ། འདོད་པའམ། དགའ་བའམ། ཆགས་པའམ། ཆུམས་པའམ། ལྷག་པར་ཆགས་པ་སྐྱེའམ། བཙུན་པ་མ་ལགས་སོ། །སྒྲ་གང་དག་ཁྱོད་ཀྱི་རྣ་བས་མ་ཐོས་ཏེ། སྔོན་མ་ཐོས་ཞེས་བྱ་བ་ནས། དྲི་གང་དག་ཁྱོད་ཀྱིས་མ་བསྣམས་ཏེ། རོ་གང་དག་ཁྱོད་ཀྱིས་མ་མྱངས་ཏེ། རེག་བྱ་གང་དག་ལུས་ཀྱིས་མ་རེག་སྟེ། རྒྱས་པར་ཡིད་ཀྱིས་ཆོས་རྣམས་མ་ཤེས་ཏེ་ཞེས་བྱ་བ་ནས་རྒྱས་པར་བཙུན་པ་མ་ལགས་སོ་ཞེས་བྱ་བའི་བར་དུའོ། །བྱེ་བྲག་ཏུ་ཡུལ་དྲུག་ལ་རེ་རེ་བཞིན་བཤད་ནས། ད་ནི་དོན་བསྡུས་ནས་སྟོན་པ་ནི། མཆོད་བྱེད་ཀྱི་མ་ཅན་ཁྱོད་འདི་ལ་མཐོང་ན་ཡང་མཐོང་བ་ཙམ་དུ་འགྱུར་གྱི། ཉོན་མོངས་སྐྱེ་བའི་ཡུལ་དུ་མ་མཐོང་ལ་ལྷག་མའི་ཙམ་རྣམ་ཡང་དེ་ལྟར་མི་སྦྱར་རོ། །ཐོས་པ་དང་དྲི་རོ་རེག་གསུམ་ལ་རྟོགས་པ་དང་། རྣམ་པར་ཤེས་ན་ཡང་རྣམ་པར་ཤེས་པ་ཙམ་དུ་འགྱུར་རོ། །ཞེས་གསུངས་པས། དྲི་སོགས་གསུམ་ལ་རྟོགས་ཞེས་ཐ་སྙད་སྦྱར་དགོས་པར་དོན་གྱིས་གོ་སྟེ། གཟུགས་སྒྲ་དང་ཆོས་ལ་མཐོང་ཐོས་རྣམ་པར་ཤེས་པའི་སྒྲས་བསྟན་པའི་ཕྱིར། རིགས་པ་ནི་དྲི་སོགས་གསུམ་ལ་ཆོས་ཅན། མཐོང་བ་ཞེས་པ་ནས་རྣམ་པར་ཤེས་བྱ་བའི་བར་གྱིས་ཐ་སྙད་གང་ཡང་འདོགས་པར་མི་འགྱུར་བར་ཐལ། དྲི་སོགས་རྟོགས་པ་ཞེས་བྱ་བ་ནི་མི་འདོད་པ་གང་ཞིག །གཟུགས་ཀྱི་མཚན་ཉིད་མ་ཡིན་པ་ཉིད་ཀྱིས་མཐོང་བའི་དངོས་པོའི་ནང་དུའང་མ་གཏོགས་པའི་ཕྱིར། སྒྲ་དང་ཆོས་ཀྱི་སྐྱེ་མཆེད་ཀྱི་མཚན་ཉིད་མ་ཡིན་པ་ཉིད་ཀྱིས་ཐོས་པ་དང་རྣམ་པར་ཤེས་པའི་དངོས་པོའི་ནང་དུའང་མ་གཏོགས་པའི་ཕྱིར། དེ་ལ་འདོད་མི་ནུས་པས་དྲི་སོགས་གསུམ་ལ་རྟོགས་པ་ཞེས་བྱ་བ་འདི་ནི་རིགས་པ་ཡིན་ནོ། །སློབ་དཔོན་(༡༠༠བ)
གྱིས། མདོ་འདི་ནི་ཆོས་ཅན། རྟོགས་པ་གསུམ་པོ་ལ་བྱ་བའི་ཁུངས་མ་ཡིན་ཏེ། ཤེས་རབ་ཅན་ཡུལ་ལ་ཉོན་མོངས་མི་སྐྱེ་བར་སྟོན་པའི་མདོ་ཁུངས་ཡིན་པའི་ཕྱིར་དང་། སྟོན་པས་མདོ་འདི་ལ་ཐ་སྙད་རྣམས་ཀྱི་མཚན་ཉིད་བསྟན་པ་མ་ཡིན་པའི་ཕྱིར། འོ་ན་མདོ་འདིའི་དོན་ཇི་ལྟ་བུ་ཞེ་ན། ཡུལ་དྲུག་པོ་མཐོང་བ་དང་ཐོས་པ་དང་རྟོགས་པ་དང་མངོན་པར་ཤེས་པ་ཙམ་གྱིས་ཡུལ་དེ་ལ་བརྟེན་པའི་སྡུག་དང་མི་སྡུག་པའི་ཉོན་མོངས་སྐྱེ་བར་འགྱུར་བའི་མཚན་རྟགས་སུ་སྒྲོ་མ་འདོགས་ཤིག་བྱ་བ་ནི་མདོ་དེ་ཡི་དོན་ཡིན་པར་སྣང་ངོ་། །འོ་ན་གཟུགས་ལ་མ་མཐོང་བ་ཞེས་ཁོ་ན་དང་། སྒྲ་ལ་མ་ཐོས་པ་བྱ་བ་ཁོ་ན་དང་། ཆོས་ལ་རྣམ་པར་མ་ཤེས་པ་ཁོ་ན་གསུངས་ཀྱི། དེ་དག་ལ་མ་བསྣམས་པ་དང་མ་མྱོང་བ་དང་མ་རེག་པ་དང་མ་རྟོགས་པའི་ཐ་སྙད་མ་སྦྱར་བས། ཡུལ་གསུམ་ལ་རྟོགས་པའི་ཐ་སྙད་བྱེད་དོ་ཞེ་ན། དེ་ནི་སྟོན་པས་དཔེར་བརྗོད་ཙམ་ཡིན་པས། གཟུགས་ལ་མ་མཐོང་ཞེས་བཤད་པ་དེ་བཞིན་མ་ཐོས་སོགས་ཀྱང་སྦྱར་དགོས་པས། གཟུགས་ལ་མ་མཐོང་བ་ཞེས་ཁོ་ནའི་སྒྲ་སྦྱར་བ་ངེད་ལ་མ་གྲུབ་བོ། །མཐོང་བ་ནས་རྣམ་པར་ཤེས་པའི་བར་ཅི་ཞིག་ཡིན་ཅེ་ན། མདོ་སྡེ་པ་ན་རེ། དབང་པོ་ལྔས་མངོན་དུ་བྱས་པ་དེ་ནི་མཐོང་བའོ། །དོན་གཞན་ཕ་རོལ་ལས་ཐོས་པ་དེ་ནི་ཐོས་པ་དང་། བདག་ཉིད་ཀྱི་རིགས་པས་བསམ་པའི་སྒོ་ནས་རྗེས་སུ་དཔག་པ་གང་ཡིན་པའི་བསམ་པ་ནི་རྟོགས་པའོ། །ཡུལ་དྲུག་ཅར་གྱི་དོན་སྒོམ་བྱུང་གི་ཤེས་རབ་ཡིད་ཀྱི་མངོན་སུམ་གྱི་སྒོ་ནས་རྟོགས་པ་སོ་སོ་རང་གིས་རིག་བྱ་དེ་ནི་རྣམ་པར་ཤེས་པའོ། །ལུགས་འདི་ལའང་ཡུལ་ལྔ་པོ་འདི་དག་ནི་རེ་རེ་ལའང་ཆོས་ཅན། མཐོང་བའམ་གཟུགས་སོགས་ལྔ་གཞན་གྱི་སྒྲ་ལས་ཐོས་པའམ། ལྔ་ཀ་བསམ་བྱུང་གིས་རྟོགས་པའམ། ལྔ་ཀ་སྒོམ་བྱུང་གིས་རྣམ་པར་ཤེས་(༡༠༡ན)
ཞེས་ཐ་སྙད་འདོགས་ཏེ། དྲུག་པ་ཡུལ་ཆོས་ལ་ནི་མཐོང་བ་མ་གཏོགས་པར་ཐོས་རྟོགས་རྣམ་པར་ཤེས་པ་གསུམ་གྱི་ཐ་སྙད་འདོགས་པར་བྱེད་པའི་ཕྱིར་རོ། །དེ་ལྟར་ན་བྱེ་སྨྲས། དྲི་སོགས་གསུམ་ཁོ་ན་ལ་རྟོགས་པ་མི་ཟེར་ན། དྲི་སོགས་ལ་ཐ་སྙད་མི་འདོགས་པར་ཐལ་བའི་ཁྱབ་པ་མ་གྲུབ་སྟེ། དྲི་སོགས་ཁོ་ན་ལ་རྟོགས་པའི་ཐ་སྙད་དེ་མི་འདོད་ཀྱང་། དྲི་སོགས་ལ་ཐ་སྙད་དེ་འདོགས་པར་གྲུབ་པའི་ཕྱིར། ཡང་ན་དྲི་སོགས་ལ་རྟོགས་པ་མི་ཟེར་བའི་ཕྱིར་དྲི་སོགས་ལ་ཐ་སྙད་མི་འདོགས་པར་ཐལ་བའི་རྟགས་མ་གྲུབ་སྟེ། དྲི་སོགས་ལ་རྟོགས་པ་ཟེར་ཡང་དྲི་སོགས་ཁོ་ན་ལ་རྟོགས་པར་འདོད་དགོས་པ་ངེད་ལ་མ་གྲུབ་པའི་ཕྱིར་རོ། །དེས་ན་བྱེ་སྨྲའི་རིགས་པ་དེ་ནི་རིགས་པ་མ་ཡིན་ནོ་ཞེས་ཟེར་རོ། །སྔོན་གྱི་སློབ་དཔོན་རྣམས་འདི་སྐད་དུ་ཟེར་ཏེ། ཞེས་པ་ལ་གང་སྤེལ་དུ་ནི། སྔོན་གྱི་སློབ་དཔོན་ཞེས་བྱ་བ་ནི་མདོ་སྡེ་པ་སྔ་རབས་རྣམས་སོ། །ཞེས་བྱ་བ་བྲིས་འདུག་ཀྱང་། རྒྱལ་པོའི་སྲས་ནི་རྣལ་འབྱོར་སྤྱོད་པའི་ལུགས་ཀྱི་ཞེས་བྲིས་གདའ་བ་དང་། རང་འགྲེལ་གྱི་གནའ་མཆན་ལ་སློབ་དཔོན་ཐོགས་མེད་ཅེས་བྲིས་འདུག་པས་སྔོན་གྱི་སློབ་དཔོན་ནི་ཐོགས་མེད་དེ། དེས་ནི་མིག་གིས་མངོན་སུམ་དུ་བྱས་པའི་གཟུགས་གཅིག་པུ་དེ་ནི་མཐོང་བའོ། །ཡུལ་དྲུག་ཀའམ་ཡང་ན་གོང་མ་ལྔ་རྣ་བས་ཐོས་པ་དང་། ཕ་རོལ་ལས་འོངས་པ་དེ་ནི་ཐོས་པའོ། །ཡུལ་དྲུག་ཀ་ལ་བདག་ཉིད་ཀྱི་ལུང་དང་རིགས་པས་བསམ་པ་ནི་རྟོགས་པའོ། །མཉམ་གཞག་མ་ཡིན་པའི་ཡུལ་དྲུག་སེམས་ཀྱིས་སོ་སོར་རིག་པ་དང་། མཉམ་པར་བཞག་པ་འཇིག་རྟེན་པའི་ལམ་གྱིས་རྟོགས་པ་གང་ཡིན་པ་དེ་ནི་རྣམ་པར་ཤེས་པའོ། །དེའི་ཕྱིར་དྲི་སོགས་གསུམ་ལ་ཐ་སྙད་འདོགས་པ་མེད་པར་ཐལ་བའི་ཉེས་པའང་མེད་དོ། །ཞེས་ཟེར་རོ། །(༡༠༡བ)
ཞར་ལ་འོང་བའོ། །ལུས་ཀྱི་བརྡས་དོན་གཞན་གོ་བར་བྱེད་ནའང་བརྫུན་དུ་སྨྲས་པར་འགྱུར་རོ། །འདི་ལའང་རིག་བྱེད་ལུས་ཡིན་ཀྱང་རིག་བྱེད་མིན་པ་ངག་གིའོ། །ངག་གིས་གཞན་གསོད་པར་བྱེད་ན་ལུས་ཀྱིས་མ་བྱས་ཀྱང་སྲོག་གཅོད་ཀྱི་ཁ་ན་མ་ཐོ་བས་རེག་པར་འགྱུར་རོ། །འདི་ལ་ནི་སྲོག་གཅོད་པ་ལུས་ཀྱི་ཡིན་པའི་ཕྱིར་དངོས་ཀྱིས་བསྡུས་པའི་རྣམ་པར་རིག་བྱེད་མ་ཡིན་པ་ལུས་ཁོ་ན་ཡིན་གྱི་ངག་གིས་ནི་མ་ཡིན་ནོ། །ལུས་ཀྱིས་ཀྱང་མི་བྱེད་དག་གིས་ཀྱང་མི་བྱེད་ན་ལུས་དང་ངག་གི་ཁ་ན་མ་ཐོ་བ་གཉིས་ཀས་རེག་པར་འགྱུར་བ་ཡོད་དམ་ཞེ་ན་ཡོད་དེ། དྲང་སྲོང་རྣམས་ཀྱིས་གཞན་གསོད་པར་འདོད་པའི་ཞེ་སྡང་གིས་ཁྲོ་ནས་གཞན་ཤི་བ་ན་དྲང་སྲོང་རྣམས་ལ་སྲོག་གཅོད་པའི་ལུས་ཀྱི་ཁ་ན་མ་ཐོ་བ་དང་ལྡན་པར་འགྱུར་བའི་ཕྱིར་དང་། དགེ་སློང་གི་གསོ་སྦྱོང་ལ་འདུལ་བ་འཛིན་པས། ཅི་ཡོངས་སུ་དག་གམ་ཞེས་བསྒྲགས་པ་ལས། གལ་ཏེ་དགེ་སློང་འགའ་ཞིག་ལྟུང་བ་བྱུང་བ་ཡིན་བཞིན་དུ་འཆགས་པར་མི་བྱེད་ཀྱི། ཅང་མི་ཟེར་བར་འདུག་ན་ལྟུང་བ་བྱུང་བ་ལ་མ་བྱུང་བར་རྫུན་དུ་སྨྲ་བ་ངག་གི་ཁ་ན་མ་ཐོ་བ་དང་ལྡན་པར་འགྱུར་བའི་ཕྱིར་དཔེར་བྱས་སོ། །ཞེས་དཔེ་གཉིས་སྟོན་པས་གསུངས་སོ་ཞེས་བྱེ་སྨྲ་ཟེར་རོ། །སློབ་དཔོན་གྱིས་དེ་མི་རིགས་པར་བསྟན་པ་ནི། དྲང་སྲོང་དང་དགེ་སློང་ལུས་དང་ངག་དག་གིས་མི་བྱེད་པ་དེ་གཉིས་ཀྱི་སྲོག་གཅོད་པ་དང་རྫུན་དུ་སྨྲ་བ་ཆོས་ཅན། གོ་རིམ་བཞིན་ལས་ཀྱི་ལམ་དུ་མི་འགྱུར་བར་ཐལ། འདོད་པའི་རིག་བྱེད་མ་ཡིན་པའི་ལས་ལམ་རིག་བྱེད་ལ་རགས་ལས་པ་གང་ཞིགརགས་ལས་པ་ལུས་ངག་གཉིས་ཀའི་རིག་བྱེད་མེད་ན་རགས་ལས་པའི་ཆོས་རིག་བྱེད་མིན་པ་མི་འོང་བའི་ཕྱིར། རྟགས་ཁྱབ་གྲུབ། འདོད་མི་ནུས་པས། བྱེ་སྨྲ་རྣམས་འདི་ལ་ལན་འདེབས་པར་བྱེད་པ་ལ་འབད་བར་བྱའོ། །(༡༠༢ན)
དེ་ལ་འདུས་བཟང་གིས་ལན་བཏབ་པ་ནི། དྲང་སྲོང་རྣམས་ལུས་ཀྱིས་གཞན་གྱི་སྲོག་མ་བཅད་ཀྱང་དོན་གྱིས་སྲོག་གཅོད་པའི་རིག་བྱེད་བྱེད་པ་ཡིན་ཏེ། མི་མ་ཡིན་རྣམས་ཀྱིས་དྲང་སྲོང་དེ་དག་གི་སྡིག་པའི་བསམ་པས་སེམས་ཅན་གྱི་སྲོག་འདོར་འཇུག་པར་རྟོགས་ནས་དྲང་སྲོང་ལ་དད་པའི་མི་མ་ཡིན་པས་སེམས་ཅན་དེ་དག་གི་སྲོག་གཅོད་པའི་ལུས་ཀྱི་རིག་བྱེད་ཀྱིས་དྲང་སྲོང་ལ་རིག་བྱེད་ཀྱི་ལས་ལམ་སྐྱེ་བར་བྱེད་པའི་ཕྱིར་རོ། །མི་མ་ཡིན་གྱི་རྣམ་པར་རིག་བྱེད་ཀྱིས་དྲང་སྲོང་ལ་རིག་བྱེད་དུ་འགྱུར་བ་གྲུབ་སྟེ། དེའི་ཚེ་དྲང་སྲོང་རང་ལ་ཡང་གདོན་མི་ཟ་བར་ལུས་ངག་འགྱུར་པའི་རིག་བྱེད་འབྱུང་བའི་ཕྱིར། དྲང་སྲོང་དེ་དག་གི་དམོད་པ་ཡང་འདོར་ལ། (འདིའི་དམོད་པ་འདི་ཡིད་ཀྱིས་ཅི་ལྟར་བསམ་བཞིན་དམོད་པའི་དམོད་པ་ཡིན་ནམ། མོད་དམའ་བའི་གནས་སུ་དམོད་པ་གང་ཡིན་གྱི་སྒྲ་བཤད་ཤེས་མ་བྱུང་བས་སསྐྲི་ཏའི་སྐད་ཀྱི་སྟེང་ནས་དོན་འཚོལ་བར་གྱིས་ཤིག །ཕྱིས་ཀྱི་ལོ་ཙ་བ་ཁ་ཅིག་གིས་དམོད་པ་ནི་ངན་འདོར་གྱི་དོན་ཡིན་པས་རྒྱ་སྐད་ཤ་པའོ་ཞེས་ཟེར་རོ། །མཆན།) ལུས་ངག་གཡོ་བའི་རིག་བྱེད་ཕྲ་བ་ཡོད་ཀྱང་མ་མངོན་པའི་ཕྱིར་ཞེས་ཟེར་རོ། །ཡང་འདོད་ཁམས་ཀྱི་རིག་བྱེད་མིན་པ་ཐམས་ཅད་རྣམ་པར་རིག་བྱེད་ལ་རགས་ལས་པར་ངེས་པ་ཡང་མ་ཡིན་ཏེ། ལྔ་སྡེ་ལ་སོགས་པ་འབྲས་བུ་ཐོབ་པའི་མོད་ལ་སོ་སོར་ཐར་པའི་སྡོམ་པ་སྐྱེ་བ་སྲིད་པའི་ཕྱིར་རོ། །དེ་ལྟ་བས་ན་འདོད་པའི་མི་དགེ་བའི་རིག་བྱེད་མིན་པའང་རིག་བྱེད་ལ་རགས་ལས་པར་ངེས་པ་མ་ཡིན་ནོ། །ཡང་ལྔ་སྡེའི་འབྲས་བུ་ཐོབ་པ་ན་སོ་ཐར་གྱི་རིག་མིན་སྐྱེས་པའི་ཚེ་རིག་བྱེད་ལ་མ་རགས་པའི་རྟགས་ལྔ་སྡེ་ལ་རིག་མིན་སྐྱེ་བའི་རིག་བྱེད་མེད་པ་མ་གྲུབ་སྟེ། ལྔ་སྡེ་དེ་དག་གིས་འབྲས་བུ་ཐོབ་པའི་མོད་ཀྱི་སྔོན་རོལ་དུ་རྣམ་པར་རིག་བྱེད་བྱས་པའི་ཕྱིར་ཞེ་ན། འོ་ན་དྲང་སྲོང་ཁྲོས་པའི་ཚེ་ལུས་ངག་གི་རྣམ་རིག་མ་བྱས་(༡༠༢བ)
ཀྱང་རིག་མིན་གྱི་ལས་ལམ་གྲུབ་པ་ཡིན་ཏེ། དྲང་སྲོང་ཁྲོས་པའི་སྔ་རོལ་དུ་རིག་བྱེད་བྱས་པའི་ཕྱིར་ཞེས་ཟེར་རོ། །གསོ་སྦྱོང་གི་བརྫུན་དུ་སྨྲ་བ་ལ་ཡང་གལ་ཏེ་ཡོངས་སུ་མ་དག་པ་ཞིག་དགེ་འདུན་གྱི་ནང་དུ་འཇུག་པར་བྱེད་ཅིང་རང་གི་སྤྱོད་ལམ་སྟོན་པར་བྱེད་ལ། དེ་དང་འབྲེལ་བ་ཅུང་ཞིག་ཀྱང་སྨྲ་བར་བྱེད་ན་ནི། འདིའི་སྔོན་གྱི་རྣམ་རིག་ཡིན་ནོ་ཞེས་ཟེར་རོ། །གཉིས་པ་ཕྲ་མ་ནི། ཕྲ་མ་ཕ་རོལ་དབྱེ་བའི་ཕྱིར། །ཉོན་མོངས་ཅན་གྱི་སེམས་ཀྱི་ཚིག །ཕྲ་མ་གང་ཞེ་ན། ཕ་རོལ་མཛའ་བ་དབྱེ་བའི་ཕྱིར་དོན་གོ་བར་ནུས་ཤིང་མ་ནོར་བར་སྨྲས་པའི་ཉོན་མོངས་པ་ཅན་གྱི་སེམས་ཀྱིས་བསླང་བའི་ཚིག་སྟེ། དེ་ལ་ཕན་པའི་ཕྱིར་མ་ཡིན་པའོ། །(མི་སྙན་པ་སྙན་པར་སྨྲ་བ་ནི། གཞན་ལ་ཕྱེ་འཛུད་པའོ། །སྙན་ལ་མི་སྙན་པར་སྨྲ་བ་ནི། མཁན་སློབ་བམ་ཕ་མ་སློབ་བུའམ། བུ་ཚ་ལ་ཉེས་ཀྱིས་དོགས་ནས་ཨག་ཙར་ཟེར་བ་ཡིན། སྙན་ལ་སྙན་པར་སྨྲ་བ་ནི། ཕ་མའམ་མཁན་སློབ་བུ་ཚའམ་སློབ་མ་ལ་ཚིག་འཇམ་པོར་ཕན་སེམས་ཀྱིས་སྨྲ་བ་ཡིན། མི་སྙན་ལ་སྙན་པར་སྨྲ་བ་ནི། ཞེ་སྡང་གི་དྲག་ཤུལ་གྱིས་གནད་དུ་ཕོག་པར་སྨྲ་བ་ཡིན། ད་རེས་མི་སྙན་ལ་སྙན་པར་སྨྲ་བ་དེ་བཟུང་ངོ་། །ཕན་པར་འདོད་པ་ཁྲོ་ཡང་ནི། །དེ་ལ་རབ་ཏུ་དགྱེས་པར་མཛོད། །མི་ཕན་འདོད་པ་བསྟོད་ཀྱང་ནི། །དེ་ལ་དགྱེས་པར་མ་མཛད་ཅིག །ཅེས་པའོ། །མཆན།) གསུམ་པ་ཚིག་རྩུབ་ནི། ཚིག་རྩུབ་པོ་ནི་མི་སྙན་པ། །ཚིག་རྩུབ་པོ་ནི་སེམས་ཉོན་མོངས་པ་ཅན་གྱིས་ཚིག་མི་སྙན་པ་དོན་གོ་ཞིང་མ་ནོར་བར་གང་ལ་སྨྲ་འདོད་ཀྱི་ཕ་རོལ་ལ་སྨྲས་པའོ། །བཞི་པ་ངག་ཀྱལ་ལ། དངོས་དང་། གཞན་འདོད་དོ། །དང་པོ་ནི། ཉོན་མོངས་ཅན་ཀུན་ཀྱལ་པ་ཉིད། །ཉོན་མོངས་ཅན་གྱིས་བསླང་བའི་ཚིག་ཀུན་ཀྱལ་པ་ཉིད་དོ། །རྫུན་སོགས་གསུམ་གའང་ཀྱལ་པ་ཡིན་ཀྱང་ཉེས་པ་ཆེ་བས་ལོགས་སུ་ཕྱེ་བ་ཡིན་ནོ། །གཉིས་པ་ནི། གཞན་ནི་དེ་ལས་གཞན་ཉོན་མོངས། །ཁ་གསག་གླུ་དང་ཟློས་གར་བཞིན། །བསྟན་བཅོས་ངན་བཞིན། གཞན་དག་ནི་རྫུན་སོགས་གསུམ་པོ་དེ་ལས་གཞན་ཉོན་མོངས་ཅན་གྱིས་བསླང་བའི་ཚིག་ཀྱལ་ལོ་ཞེས་ཟེར་ཏེ། དཔེར་ན། དགེ་སློང་ལོག་པར་འཚོ་བ་ཅན་གྱིས་རྙེད་བཀུར་དང་གྲགས་པའི་ཆེད་དུ་རང་གི་ཡོན་ཏན། (༡༠༣ན)
དང་ཡོན་ཏན་ཅན་གྱི་ཡོན་ཏན་བརྗོད་པའི་ཁ་གསགས་དང་། ཆགས་པས་གླུ་ལེན་པ་དང་། ཟློས་གར་མཁན་རྣམས་ཟློས་གར་གྱི་ཚེ་གཞན་མགུ་བའི་ཕྱིར་འཁྱལ་པ་སྨྲ་བ་བཞིན་དང་། དེའི་ལྟ་བར་གྱུར་ནས་བསྟན་བཅོས་ངན་པ་འདོན་པ་བཞིན་དང་། སྨྲེ་སྔགས་དང་འདུ་འཛིའི་གཏམ་སོགས་དང་། དེ་ལས་གཞན་པའི་ཉོན་མོངས་ཅན་གྱི་སེམས་ཀྱིས་གང་ཅུང་ཟད་སྨྲ་བ་ནི་ཀྱལ་པའོ། །འཁོར་ལོས་སྒྱུར་བའི་ཚེ་གླུ་ཡོད་པ་དེ་ཚིག་ཀྱལ་པ་མིན་ནམ་ཞེས་འདྲི་ལ། དྲི་བ་འདི་ནི་དེའི་ཚེ་གླུ་དེའི་ཚིག་ཀྱལ་མིན་པར་དམ་བཅས་ནས་དྲིས་པ་མིན་གྱི། གཞན་མི་དགེ་བ་བཅུ་སྤོང་དུ་བཅུག་ནས། མི་དགེ་བ་མེད་པ་ལ་གླུ་ཡོད་པ་དེ་ཚིག་ཀྱལ་མ་ཡིན་ནམ་སྙམ་སྟེ་དྲིས་པའོ། །གླུ་དེ་ནི་བུདྡྷ་ལ་བསྟོད་པ་དང་། འཁོར་བ་ལས་ངེས་པར་འབྱུང་བའི་གླུ་ཡིན་ཀྱང་ཀྱལ་པ་མ་ཡིན་ཏེ། སྟེགས་སྔགས་དང་ལྡན་པ་དག་ནི་མ་ཡིན་པའི་ཕྱིར། (ཆགས་པས་ཐུན་ནས་སློང་བའི་རྒོད་བག་འབེལ་བའི་སྟེགས་སུ་གྱུར་པའི་སྔགས་སམ་དབྱངས་མ་ཡིན་པའོ། །མཆན།) གཞན་དག་ནི། ཁ་འདུས་པའམ་བུ་མོ་བག་མ་ཁྱེའུའི་ཁྱིམ་དུ་ལེན་པ་དང་། ཆོ་ག་(བི་དི་ར་ཞེས་པ་ཆོ་ག་ལ་འཇུག་པ་ནི་བྱ་བའི་རིམ་པ་ཞེས་པ་ལ་འཇུག་པའི་དབང་དུ་བྱས་པའོ། །མཆན།) བྱས་ཏེ། བག་མར་བཏང་བའམ་ཁྱེའུ་བུ་མོའི་ཁྱིམ་དུ་འགྲོ་བ་ནི། སེམས་ཆགས་པ་དང་ལྡན་པས་གླུ་བྱེད་པའི་ཚིག་ཀྱལ་ཡོད་ཀྱང་ལས་ཀྱི་ལམ་ནི་མ་ཡིན་ནོ་ཞེས་ཟེར་རོ། །གསུམ་པ་ཡིད་ཀྱི་ལས་ལ་གསུམ་ལས། དང་པོ་བརྣབ་སེམས་ནི། བརྣབ་སེམས་ནི། །ལོག་པས་གཞན་གྱི་ནོར་ལ་ཆགས། །བརྣབ་སེམས་ནི་ལོག་པ་མི་རིག་པར་ཆགས་པས་གཞན་གྱི་ནོར་བདག་གིར་གྱུར་ཀྱང་ཅི་མ་རུང་སྙམ་ནས་མཐུའམ་འཇབ་བུའང་རུང་བདག་གིར་བྱེད་འདོད་དེ་ནི་བརྣབ་སེམས་ཀྱི་ལས་ལམ་ཡིན་ནོ། །གཞན་དག་ན་རེ། འདོད་པ་ན་སྤྱོད་པའི་སྲེད་པ་ཐམས་ཅད་བརྣབ་སེམས་ཡིན་ཏེ། འདི་ལྟར་སྒྲིབ་པ་ལྔའི་སྐབས་སུ་འདོད་པ་ལ་འདུན་(༡༠༣བ)
བའི་དབང་དུ་མཛད་ནས། མདོ་ལས། འཇིག་རྟེན་ན་བརྣབ་སེམས་སྤངས་ཏེ་བརྣབ་སེམས་དང་བྲལ་བའི་སེམས་ཀྱིས་ལན་མང་དུ་བྱས་ཤིང་། འཇིག་རྟེན་ན་གནོད་སེམས་དང་རྨུགས་པ་དང་གཉིད་དང་རྒོད་པ་དང་འགྱོད་པ་དང་ཐེ་ཚོམ་སྤངས་ཏེ་དོགས་པ་ལས་བརྒལ་ཅིང་། ཆོས་དགེ་བ་རྣམས་ལ་ནེམ་ནུར་མེད་པར་གྱུར་པ་ཡིན་ཏེ། སྒྲིབ་ལྔ་སྤངས་ནས་ཞེས་བྱ་བ་ལ་སོགས་པ་གསུངས་པ་དེའི་ཕྱིར། ཞེས་ཟེར་རོ། །གཞན་དག་ན་རེ། འོ་ན་འཁོར་ལོས་སྒྱུར་བ་རྣམས་དང་། བྱང་གི་སྒྲ་མི་སྙན་པ་རྣམས་ལ་ཡང་ཆོས་ཅན། བརྣབ་སེམས་ཀྱི་ལས་ལམ་ཡོད་པར་ཐལ། འདོད་སྤྱོད་ཀྱི་སྲེད་པ་ཐམས་ཅད་བརྣབ་སེམས་ཡིན་པའི་ཕྱིར། འདོད་མི་ནུས་པས། འདོད་སྲེད་ཐམས་ཅད་བརྣབ་སེམས་མ་ཡིན། བརྣབ་སེམས་ཡིན་ཀྱང་ལས་ཀྱི་ལམ་མ་ཡིན་ནོ། །མདོར་ན། མི་དགེ་བའི་ལས་ལམ་དག་ཏུ་མི་དགེ་བ་ཐམས་ཅད་མ་བསྡུས་པའི་ཕྱིར། བརྣབ་སེམས་ཐམས་ཅད་ལས་ལམ་མ་ཡིན་ལ། གཞན་གྱི་ནོར་ལ་ཆགས་པ་ལས་ལམ་དུ་བཞག་གོ། །གཉིས་པ་གནོད་སེམས་ནི། གནོད་སེམས་སེམས་ཅན་ལ་སྡང་བ། །གནོད་སེམས་སེམས་ཅན་ལ་ཞེ་སྡང་བ་ཕ་རོལ་ལ་གནོད་པའི་རྣམ་པར་ཞུགས་པའོ། །གསུམ་པ་ལོག་ལྟ་ནི། དགེ་དང་མི་དགེ་མེད་ལྟ་བ། །ལོག་པར་ལྟ་བ་ཡིན། ལས་དགེ་བ་དང་མི་དགེ་བ་མེད་པར་ལྟ་བ་ནི་རྒྱུ་ལ་སྐུར་པ་འདེབས་པའི་ལོག་པར་ལྟ་བ་ཡིན་ཏེ། དེ་ཡང་མདོ་ལས། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་ཉེས་སྤྱད་པའི་ལས་དག་གི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་བརྫུས་ཏེ་སྐྱེ་བ་མེད་དོ། །འཇིག་རྟེན་ན་དགྲ་བཅོམ་པ་མེད་དོ་བྱ་བས་རྒྱུ་ལས་དང་། འབྲས་བུ་དང་འཕགས་པ་ལ་སྐུར་བ་འདེབས་པ་གསུམ་གསུངས་ཏེ། དེ་ལ་སྦྱིན་པ་མེད་དོ་ཞེས་(༡༠༤ན)
པ་ནས་ཉེས་པར་སྤྱད་པ་མེད་དོ་ཞེས་པའི་བར་དང་། མ་མེད་དོ། །ཕ་མེད་དོ་ཞེས་པ་རྣམས་ནི་རྒྱུ་ལ་སྐུར་པ་འདེབས་པ་ཡིན་ཅིང་། ལེགས་ཉེས་སྤྱད་པའི་ལས་ཀྱི་འབྲས་བུ་རྣམ་སྨིན་མེད་དོ་ཞེས་པ་ནས་སེམས་ཅན་བརྫུས་ཏེ་སྐྱེ་བ་མེད་དོ་ཞེས་པའི་བར་ནི་འབྲས་བུ་ལ་སྐུར་པ་འདེབས་པ་ཡིན་ལ། འཇིག་རྟེན་ན་དགྲ་བཅོམ་པ་མེད་དོ་ཞེས་པ་ནི་འཕགས་པ་ལ་སྐུར་པ་འདེབས་པ་ཡིན་པས་གསུམ་ཆར་ལོག་ལྟ་ཡིན་མོད་ཀྱི། ཚིགས་སུ་བཅད་པར་ནི་མཚོན་པའི་དོན་དུ་དང་པོ་ཙམ་ཞིག་བསྟན་པར་ཟད་དོ། །བཞི་པ་ལས་དང་ལས་ལམ་གི་བྱེ་བྲག་ནི། འདི་ལ། །གསུམ་ལམ་བདུན་ནི་ལས་ཀྱང་ཡིན། །མི་དགེ་བ་བཅུ་པོ་འདི་ལ་བརྣབ་སེམས་སོགས་གསུམ་པོ་ནི་སེམས་པ་ཞེས་བྱ་བ་ལས་ཀྱི་ལམ་ཡིན་པས་ལས་ཀྱི་ལམ་ཡིན་ཏེ། ཆགས་པ་དང་མི་མཐུན་པ་དང་ལོག་པར་ལྟ་བའི་མཚུངས་ལྡན་གྱི་སེམས་པ་ནི་བརྣབ་སེམས་སོགས་ཀྱི་རྒྱུ་བས་སེམས་པ་རྒྱུ་སྟེ། བརྣབ་སེམས་སོགས་ཀྱི་དབང་ལས་སེམས་པའང་དེ་བཞིན་མངོན་པར་འདུ་བྱེད་ཅིང་། བརྣབ་སེམས་སོགས་ཀྱི་མཚུངས་ལྡན་གྱི་ཚུལ་ལམ་འགྲོས་ཀྱིས་འགྲོ་བའི་ཕྱིར་རོ། །སྲོག་གཅོད་སོགས་བདུན་ནི་ལས་ཀྱང་ཡིན་ཏེ། ལུས་དང་ངག་གིས་བསམས་པའི་ལས་ཡིན་པའི་ཕྱིར། ལས་ཀྱི་ལམ་ཡང་ཡིན་ཏེ། ལུས་ངག་གི་ལས་ཀུན་ནས་སློང་བའི་སེམས་པ་འཇུག་པའི་གཞིའམ་དམིགས་པའམ་ལམ་མམ་རྟེན་ནི་ལུས་དང་ངག་གི་ལས་ཡིན་པའི་ཕྱིར། དེ་ལྟར་ན་ཡིད་ཀྱི་གསུམ་ལ་ལས་ཀྱི་ལམ་ཡིན་པས་ལས་ལམ་མོ། །ཞེས་པ་དང་། ལུས་ངག་གི་བདུན་ལ་ལས་དང་ལས་ལམ་ཡིན་པས་ན་ལས་ཀྱི་ལམ་མོ་ཞེས་པ་ལ། ལས་ཀྱང་ཡིན་ལས་ཀྱི་ལམ་ཀྱང་ཡིན་པས་ལས་ལམ་མོ། །ཞེས་གཅིག་གིས་གཅིག་བསྡུས་པ་ཞིག་ཡིན་ནམ་མིན། ཡིན་ན་ཡིད་ཀྱི་གསུམ་པོ་ལས་ལམ་ཡིན་ལ། ལས་མ་ཡིན་པར་བཤད་(༡༠༤བ)
པ་དང་འགལ་ལ། ཁྱད་པར་ལུས་ངག་གི་བདུན་པོ་ལས་ཀྱང་ཡིན་ལ་ལས་ལམ་ཀྱང་ཡིན་པས། ལས་ཀྱི་ལམ་མོ་ཞེས་གཅིག་གིས་གཅིག་བསྡུས་པར་འདོད་པ་དེ་མི་རིགས་པར་ཐལ། གཅིག་གིས་གཅིག་བསྡུས་པ་ནི། ཤིང་དང་ཤིང་ནི་ཤིང་དག་གོ། །ཞེས་དང་། ཡོན་པོ་དང་འཁྱོག་པོ་དག་ནི་འཁྱོག་པའོ་ཞེས་ཚིག་དང་དོན་འདྲ་བ་གཅིག་གིས་གཅིག་བསྡུ་དགོས་པ་གང་ཞིགལས་ཞེས་བྱ་བའི་སྒྲ་དང་། ལས་ཀྱི་ལམ་ཞེས་བྱ་བའི་སྒྲ་ཡང་མི་འདྲ་བ་དང་། ལས་ཀྱི་དོན་དང་ལས་ལམ་གྱི་དོན་ཐ་དད་ཅིང་མི་འདྲ་བས་གཅིག་གིས་གཅིག་བསྡུས་པར་མི་རིགས་པའི་ཕྱིར། ཡང་ལས་ཀྱང་ཡིན། ལས་ཀྱི་ལམ་ཡང་ཡིན་པས་ལས་ལམ་མོ་ཞེས་གཅིག་གིས་གཅིག་བསྡུས་པ་མ་ཡིན་ན་ནི་ལས་ཀྱང་ཡིན་ལ། ལས་ཀྱི་ལམ་ཡང་ཡིན་པ་ཉམས་སོ་ཞེ་ན། གཅིག་གིས་གཅིག་བསྡུས་པ་ལ་འདྲ་བ་ཁོ་ནས་བསྡུ་དགོས་པ་དང་། མི་འདྲ་བ་ལ་གཅིག་གིས་གཅིག་བསྡུས་པ་མི་རིགས་པར་རྟགས་མ་གྲུབ་སྟེ། རིལ་གྱིས་མི་འདྲའང་ཕྱོགས་གཅིག་གིས་འདྲ་བ་རྣམས་ལའང་གཅིག་གིས་གཅིག་བསྡུས་པར་རིགས་པའི་ཕྱིར། གྲུབ་སྟེ། དཔེར་ན། གང་དང་གང་མི་མངོན་པ་དག་ནི་ཡོན་ཏན་ཡིན་ནོ་ཞེས་བརྗོད་པའི་ཚེ་དག་ནི་གཉིས་ཚིག་བརྗོད་པ་ཡིན་ལ། དེའི་ཚེ་ཡོན་ཏན་གྱི་ཁྱད་པར་མི་འདྲ་བའི་གང་ཚིག་གཅིག་བརྗོད་ནས། ཡོན་ཏན་དུ་འདྲ་བའི་གང་ཚིག་གཉིས་པ་མ་བརྗོད་ཀྱང་གང་མི་མངོན་པ་དག་ནི་ཡོན་ཏན་ཡིན་ནོ་ཞེས་བརྗོད་པས། ཡོན་ཏན་གྱི་ཁྱད་པར་མི་འདྲ་བ་རྣམས་ལའང་ཡོན་ཏན་གྱི་ཆ་ཤས་གཅིག་གིས་ཡོན་ཏན་གྱི་ཆ་ཤས་གཅིག་ཤོས་བསྡུས་ནས་བརྗོད་པའི་ཚེ། གྲུབ་སྟེ། ཡོན་ཏན་གྱི་ཁྱད་པར་མི་འདྲ་བའི་ཡོན་ཏན་གང་ཚིག་གཅིག་བརྗོད་པའི་དག་སྒྲའི་ནང་ན་ཡོན་ཏན་གྱི་གང་ཚིག་གཉིས་པའང་བསྡུས་པའི་ཕྱིར། དེ་ལྟར་མི་འདྲ་བ་(༡༠༥ན)
རྣམས་ལའང་གཅིག་གིས་གཅིག་བསྡུས་པར་གྲུབ་པ་ན། ལས་དང་ལས་ཀྱི་ལམ་མི་འདྲ་བ་དག་ཀྱང་ལས་ཀྱི་ལམ་མོ་ཞེས་གཅིག་ཏུ་བསྡུས་པར་གྲུབ་ལ། དེ་ལྟར་གྲུབ་པ་ན་བརྣབ་སེམས་སོགས་ཀྱང་ལས་ལམ་ཡིན་ལ། སྲོག་གཅོད་སོགས་ཀྱང་ལས་ལམ་ཡིན་ནོ་ཞེས་ལས་ལམ་ཙམ་གྱི་ཕྱོགས་གཅིག་ཏུ་བསྡུས་སོ། །ཡང་ན་ནི་ཚིག་དོན་འདྲ་བས་ཕྱོགས་གཅིག་ཏུ་བསྡུས་པར་ཡང་བཞག་ཆོག་སྟེ། བརྣབ་སེམས་སོགས་ལས་ཀྱི་ལམ་ཡིན་པས་ལས་ལམ་དུ་བསྡུས་ལ། སྲོག་གཅོད་སོགས་ནི་ལས་ཀྱང་ཡིན། ལས་ལམ་ཀྱང་ཡིན་པས་ལས་དང་ལས་ཀྱི་ལམ་དག་གོ་ཞེས་བསྡུས་སོ། །བརྣབ་སེམས་མེད་པ་སོགས་གསུམ་ལའང་ལམ་ཁོ་ན་དང་། སྲོག་གཅོད་སྤོང་བ་སོགས་བདུན་པོའང་ལས་དང་ལམ་གཉིས་ཀ་ཡིན་པར་ཤེས་པར་བྱའོ། །ཅི་སྦྱོར་བ་དང་མཇུག་ནི་ཆོས་ཅན། ལས་ཀྱི་ལམ་མ་ཡིན་ཏེ། སྦྱོར་བ་ནི་ལས་ལམ་གྱི་ཆེད་དུ་བྱས་པ་ཡིན་ལ། མཇུག་ནི་ལས་ལམ་དེའི་རྩ་བའམ་རྗེས་འཇུག་ཡིན་པའི་ཕྱིར། སྔར་ཡང་ཆེ་ལོང་བསྡུས་ནས་དགེ་བ་དང་མི་དགེ་བ་ཅི་རིགས་པར་ལས་ཀྱི་ལམ་བཅུར་བཤད་པའི་ཕྱིར་ཡང་སྦྱོར་བ་དང་མཇུག་མ་བསྡུས་སོ། །ཐམས་ཅད་བདག་པོར་རྒྱུ་མཐུན་ཀྱང་། །རྣམ་སྨིན་འབྲས་བུ་འབྱིན་པར་འདོད། །ཅེས་པ་ལྟར་གང་དག་གི་སྲོག་གཅོད་སྤོང་བ་སོགས་ཀྱི་ལས་ལམ་གྱིས་ཕྱི་ནང་དངོས་པོ་འབྲས་བུ་འདོད་པའི་འབྲས་བུ་རྣམས་འཕེལ་བ་དང་། མི་འདོད་པ་རྣམས་འགྲིབ་པ་ཡིན་ལ། སྲོག་གཅོད་སོགས་ཀྱི་ལས་ལམ་གྱིས་ཕྱི་ནང་གི་དངོས་པོ་མི་འདོད་པའི་འབྲས་བུ་རྣམས་འཕེལ་བ་དང་། འདོད་པའི་འབྲས་བུ་རྣམས་འགྲིབ་པ་ཡིན་ནོ། །སྦྱོར་མཇུག་གིས་འདོད་པ་དང་མི་འདོད་པའི་འབྲས་བུ་འཕེལ་འགྲིབ་མི་བྱེད་པས་ཀྱང་ལས་ལམ་མ་ཡིན་ནོ། །མདོ་སྡེ་པས། བརྣབ་སེམས་(༡༠༥བ)
སོགས་ཁོ་ན་ཡིད་ཀྱི་ལས་སུ་འཇོག་པ་དེ་དག་གི་ལྟར་ན། དེ་དག་ཇི་ལྟར་ལས་ཀྱི་ལམ་དུ་འཇོག་ཅེས་བརྗོད་དགོས་ཏེ། སེམས་པ་འཇུག་པ་མེད་པས་གང་ལ་བལྟོས་པའི་ལམ་ཡིན་པའི་ཕྱིར་སྙམ་ན། དེ་ལྟར་སེམས་པ་ཁོ་ནས་ལན་གདབ་དགོས་པས་མདོ་སྡེ་པ་ཉིད་ལ་དྲིས་ཤིག །སློབ་དཔོན་གྱིས་ནི་བརྗོད་པར་ནུས་ཏེ། སྤྱིར་དགེ་བ་བཅུ་ནི་བདེ་འགྲོའི་ལམ་དང་། མི་དགེ་བ་བཅུ་ནི་ངན་འགྲོའི་ལམ་ཡིན། དགེ་བ་དང་མི་དགེ་བ་བཅུ་ནི་ལུས་ངག་ཡིད་གསུམ་གྱི་ལས་ཡིན་པ་གང་ཞིགཡིད་ཀྱི་གསུམ་པོ་དེའང་ངན་འགྲོའི་ལམ་ཡིན་ལ། ཡིད་ཀྱི་ལས་ཀྱང་ཡིན་པའི་ཕྱིར། ཡང་ན་བརྣབ་སེམས་ཀྱིས་གནོད་སེམས་འདྲེན་པ་ན། གནོད་སེམས་ཀྱི་ལམ་བརྣབ་སེམས་ཡིན་པས་དེ་གཞན་ལའང་སྦྱར་བའི་སྒོ་ནས་ལས་ལམ་དུ་བཞག་གོ། །གཉིས་པ་ལོག་ལྟ་བྱེ་བྲག་ཏུ་བཤད་པ་ལ། དགེ་རྩ་གཅོད་ཚུལ་དང་། མཚམས་སྦྱོར་ཚུལ་ལོ། །དང་པོ་ལ། གང་གིས་གཅོད་པ། གང་གཅོད་པ། གང་ལ་དམིགས་པས་གཅོད་པ། ཇི་ལྟར་གཅོད། རྟེན་གང་ལ་གཅོད་པ། དེའི་ངོ་བོའོ། །དང་པོ་ནི། མེད་པར་ལྟ་བས་རྩ་བ་གཅོད། །མི་དགེ་བའི་ལས་ལམ་བཅུ་པོ་ཐམས་ཅད་ཀྱང་དགེ་བའི་ཆོས་རྣམས་ཀུན་ཏུ་སྤྱོད་པ་དང་འགལ་ལ། ལས་དང་རྒྱུ་འབྲས་མེད་པར་ལྟ་བའི་ལོག་ལྟ་ཆེན་པོ་ཡོངས་སུ་རྫོགས་པས་དགེ་བའི་རྩ་བ་གཅོད་པའོ། །འོ་ན་བསྟན་བཅོས་ལས། མི་དགེ་བའི་རྩ་བ་ཆེན་པོ་རྣམས་གང་དག་ཡིན་ཅེ་ན། མི་དགེ་བའི་རྩ་བ་གང་དག་གིས་དགེ་བའི་རྩ་བ་གཅོད་པར་བྱས་པ་དང་། འདོད་པ་ལས་འདོད་ཆགས་དང་བྲལ་བ་ཐོབ་པར་བྱེད་པ་ན། དང་པོ་ཉིད་དུ་སྤོང་བ་གང་དག་ཡིན་པའོ། །ཞེས་བཤད་ཅེ་ན། དེ་ལྟར་གསུངས་པ་ཆོས་ཅན། མི་དགེ་བའི་རྩ་བ་ཆགས་སོགས་ཆེན་པོས་ལོག་ལྟ་དྲངས་ཤིང་བསྐྱེད་པ་ལ་དགོངས་པ་ཡིན་ཏེ། མི་དགེ་བའི་རྩ་བས་ལོག་ལྟ་དྲངས་ནས་དགེ་རྩ་(༡༠༦ན)
གཅོད་པར་བྱེད་པའི་ཕྱིར། དཔེར་ན། དངོས་སུ་མེས་བསྲེགས་ཀྱང་མེ་འདྲེན་མཁན་རྐུན་པོ་ཡིན་པས་རྐུན་པོས་བསྲེགས་ཟེར་བ་དང་འདྲའོ། །གཉིས་པ་ནི། འདོད་གཏོགས་སྐྱེས་ནས་ཐོབ་པ་རྣམས། །དགེ་བའི་རྩ་བ་འདོད་པར་གཏོགས་པ་སྐྱེས་ནས་ཐོབ་པ་རྣམས་ཀུན་ཏུ་འཆད་པར་འགྱུར་ཏེ། གཟུགས་དང་གཟུགས་མེད་ན་སྤྱོད་པའི་དགེ་རྩ་དང་མི་ལྡན་པའི་ཕྱིར། འོ་ན་བཏགས་པ་ལས། འདི་ཙམ་གྱིས་ན་གང་ཟག་འདིས་ཁམས་གསུམ་པའི་དགེ་བའི་རྩ་བ་རྣམས་ཀུན་ཏུ་བཅད་པ་ཡིན་ནོ། །ཞེས་བཤད་པ་ཇི་ལྟར་དྲངས་ཞེ་ན། གང་ཟག་དེའི་གོང་མའི་དགེ་རྩའི་ཐོབ་པ་ཐག་སྲིང་བར་བྱེད་པ་ལ་དགོངས་ཏེ། རྒྱུད་དེར་སྔོན་ཐོབ་པའི་སྣོད་དུ་གྱུར་པ་ལས་དགེ་རྩ་ཆད་ནས་དེའི་ཚེ་ཐོབ་པའི་སྣོད་མ་ཡིན་པ་ཉིད་དུ་གྱུར་པའི་ཕྱིར། དཔེར་ན། སྡུག་བསྔལ་ལ་ཆོས་ཤེས་པའི་བཟོད་པས་འདོད་པའི་སོ་སོའི་སྐྱེ་བོ་སྤངས་ཙམ་ན་ཁམས་གོང་མ་གཉིས་ཀྱི་སོ་སོའི་སྐྱེ་བོ་ཤིན་ཏུ་ཡང་ཐག་བསྲིངས་པ་དང་འདྲའོ། །དེའང་སྐྱེས་ཐོབ་ཁོ་ན་འཆད་དེ། སྦྱོར་བྱུང་ཐོས་བསམ་སྒོམ་པ་ལས་བྱུང་བ་ནི་སྔར་ཆུང་ངུའི་ཆུང་ངུའི་གནས་སྐབས་ནས་ཐོབ་པ་ཆད་ཟིན་པའི་ཕྱིར། གསུམ་པ་ནི། རྒྱུ་དང་འབྲས་ལ་སྐུར་འདེབས་པས། །ཀུན་གྱིས། དེའི་དམིགས་པ་ནི། ལེགས་སྤྱད་ཉེས་སྤྱད་མེད་ཅེས་རྒྱུ་དང་དེའི་འབྲས་བུ་མེད་ཅེས་འབྲས་བུ་ལ་སྐུར་པ་འདེབས་པས་གཅོད་པའོ། །ཁ་ཅིག །རྒྱུ་བར་ཆད་མེད་ལམ་དང་། འབྲས་བུ་རྣམ་གྲོལ་ལམ་མེད་ཟེར་བ་ཡང་རྒྱུ་འབྲས་ཀྱི་སྐུར་འདེབས་སུ་འདོད་དོ། །ཁ་ཅིག །ཟག་བཅས་སྡུག་ཀུན་ལ་དམིགས་པ་ཁོ་ན་ཡིན་གྱི། ཟག་མེད་འགོག་ལམ་ལ་དམིགས་པས་གཅོད་པ་མ་ཡིན་པ་དང་། སྐལ་བ་མཉམ་པར་འདོད་པའི་རྒྱུ་འབྲས་ཁོ་ན་ལ་དམིགས་པས་ཡིན་གྱི། སྐལ་བ་མི་མཉམ་པ་ཁམས་གོང་གི་རྒྱུ་འབྲས་ལ་དམིགས་པས་གཅོད་པ་མ་ཡིན་ཏེ། ལོག་ལྟས་ཟག་མེད་ལ་དམིགས་པ་དང་སྐལ་བ་མི་མཉམ་པའི་ཁམས་ལ་དམིགས་(༡༠༦བ)
པ་གང་ཡིན་པ་དེ་ནི་མཚུངས་པར་ལྡན་པ་ཙམ་གྱི་སྒོ་ནས་མཚུངས་ལྡན་གྱི་ཆོས་ལ་རྒྱས་པར་འགྱུར་གྱི། ལྕགས་སྲེག་ལ་རྐང་མཐིལ་བཞག་པའི་གླགས་མེད་པ་ལྟར་དམིགས་པའི་སྒོ་ནས་མ་ཡིན་པས་སྟོབས་ཆུང་བའི་ཕྱིར་ཀུན་ཏུ་གཅོད་པར་མི་འགྱུར་རོ་ཞེས་ཟེར་རོ། །བྱེ་སྨྲས། རྒྱུ་དང་འབྲས་བུ་ལ་སྐུར་པ་འདེབས་པ་དང་། སྐལ་པ་མཉམ་མི་མཉམ་དང་། ཟག་བཅས་ཟག་མེད་ལ་དམིགས་པ་ཀུན་གྱིས་གཅོད་པར་འགྱུར་ཏེ། ཟག་བཅས་ཟག་མེད་ཀྱི་ཉོན་མོངས་ཀུན་ལ་དམིགས་པས་ཕྲ་རྒྱས་སུ་འགྱུར་བ་བཞིན་ཟག་མེད་འགོག་ལམ་ལ་སྐུར་པ་བཏབ་པ་དེ་ནི་ཤིན་ཏུ་ཡང་སྡིག་ཆེ་སྟེ། སྐལ་པ་མི་མཉམ་ཡང་སླར་ལ་གོང་མའི་དགེ་བ་བཟང་བས། དེ་ལ་སྐུར་པ་བཏབ་པ་སླར་ལ་སྡིག་ཆེ་བའི་ཕྱིར་ཀུན་གྱིས་གཅོད་པར་གྲུབ་བོ། །ཁ་ཅིག །དགེ་རྩ་དགུ་ཅར་ཡང་གཅིག་ཅར་ཀུན་ཏུ་འཆད་པ་ཡོད་དེ། བདེན་བཞི་མཐོང་བས་མཐོང་སྤང་དགུ་གཅིག་ཅར་སྤོང་བ་བཞིན་ཅེས་ཟེར་རོ། །ཁ་ཅིག །མཐོང་སྤང་ལ་ཆེ་འབྲིང་དགུ་ཡོད་པའི་ཁུངས་ཀྱང་འདི་ཡིན་ཟེར་རོ། །བཞི་པ་ནི། རིམ་གྱིས། སྒོམ་སྤང་གི་ཉོན་མོངས་བཞིན་དུ་ལོག་ལྟ་ཆུང་འབྲིང་ཆེན་པོ་དགུས་དགེ་རྩ་དགུ་རིམ་གྱིས་ལོག་ལྟ་ཆེན་པོའི་ཆེན་པོས་དགེ་རྩ་ཆུང་ངུའི་ཆུང་ངུ་གཅོད་པའི་བར་གཅོད་པར་བྱེད་དོ། །སློབ་དཔོན་གྱིས། རིམ་གྱིས་སྤོང་བར་དམ་བཅས་པ་ལ་སྐྱབས་བྱེད་དམ། སྒྲུབ་བྱེད་ཀྱི་གཞུང་ཡོད་དམ་ཞེ་ན། ཡོད་དེ། ཡེ་ཤེས་ལ་འཇུག་པ་ལས། ཕྲ་མོ་དང་ལྷན་ཅིག་ཏུ་གྱུར་པའི་དགེ་བའི་རྩ་བ་རྣམས་གང་ཞེ་ན། དགེ་བའི་རྩ་བ་རྣམས་ཀུན་ཏུ་གཅོད་པར་བྱེད་པ་ན། ཐམས་ཅད་ཀྱི་ཐ་མར་འདོར་བ་གང་དག་ཡིན་པ་སྟེ། གང་དག་མེད་པས་དགེ་བའི་རྩ་བ་ཀུན་ཏུ་ཆད་པ་ཞེས་བྱ་བའི་གྲངས་སུ་འགྲོ་བ་ཡིན་ནོ། །ཞེས་བྱ་བ་འདིས་འགྲུབ་པའི་ཕྱིར། ཇི་ལྟར་འགྲུབ་ན། ཕྲ་མོ་དང་ལྷན་ཅིག་པ་ནི་ཐོབ་པ་ཆུང་ངུ་དང་ལྷན་ཅིག་པའི་(༡༠༧ན)
དགེ་རྩ་ཡིན་ལ། དགེ་རྩ་ཐམས་ཅད་ཀྱི་ཐ་མར་འདོར་རྒྱུའི་དགེ་རྩ་ནི་ཆུང་ངུའི་ཆུང་ངུ་ཡིན་ལ། ཆུང་ངུའི་ཆུང་ངུ་གང་དག་སྤངས་ན་དགེ་བའི་རྩ་བ་ཀུན་ཏུ་ཆད་པའི་གྲངས་སུ་འགྲོ་སྟེ། ཆུང་ངུའི་ཆུང་ངུའང་སྤངས་ན་གཞན་མི་སྐྱེ་བའི་ཕྱིར། འདི་གྲུབ་བོ། །འོ་ན་རིམ་གྱིས་སྤངས་ན། བསྟན་བཅོས་ལས། མི་དགེ་བའི་རྩ་བ་ཆེན་པོ་གང་དགེ་ཡིན་ཅེ་ན། མི་དགེ་བའི་རྩ་བ་གང་དག་གིས་དགེ་བའི་རྩ་བ་རྣམས་ཀུན་ཏུ་གཅོད་པར་བྱེད་པའོ། །ཞེས་གསུངས་པ་འདི་ཇི་ལྟར་འདྲེན་ཅེ་ན། མི་དགེ་བ་དེ་དག་གིས་དགེ་བ་མ་ལུས་པ་ཡོངས་སུ་རྫོགས་པར་གཅོད་པ་ལ་དགོངས་ཏེ་གསུངས་པ་ཡིན་གྱི། རྣམས་ཟེར་བས་གཅིག་ཅར་གཅོད་པའི་དོན་མ་ཡིན་ཏེ། དགེ་རྩ་དེ་དག་ལས་ཆུང་ངུའི་ཆུང་ངུ་ལྟ་བུ་ཞིག་མ་ཆད་ཀྱང་རྣམ་པ་དགུ་པོ་ཐམས་ཅད་སྐྱེ་བ་འགྱུར་འགྱུར་བའི་ཕྱིར། དེས་ན་རྣམས་སྒྲས་གཅིག་ཅར་མི་གཅོད་ཀྱང་རེ་མོས་གཅོད་པས་གཞུང་དེས་འགལ་བར་འགྲོ་བ་མ་ཡིན་ནོ། །ཁ་ཅིག །མཐོང་ལམ་གྱི་མཉམ་གཞག་གིས་སྡུག་བསྔལ་མཐོང་སྤང་སྤངས། དེ་ནས་མཉམ་གཞག་ལས་ལངས། དེ་ནས་མཉམ་གཞག་གིས་ཀུན་འབྱུང་གི་མཐོང་སྤང་སྤོང་བ་དེ་ལྟ་བུ་ལངས་པ་དང་མཉམ་གཞག་འདྲེས་པ་མེད་པར་མཉམ་གཞག་རྒྱུན་ཆགས་ཀྱིས་སྤོང་བ་བཞིན་དུ་ལོག་ལྟ་ཆེ་འབྲིང་དགུ་པོ་དེ་ཡང་བར་མ་ཆོད་པས་དགེ་རྩ་གཅོད་ཟེར་རོ། །བྱེ་སྨྲས། དེ་མི་འཐད་དེ། སྔོན་ལ་ལོག་ལྟ་ལྟ་བུ་ཆུང་ཚར་སྐྱེས། དགེ་རྩ་ཆེ་ཚར་སྤོང་། དེ་ནས་དགེ་བ་དང་ལུང་མ་བསྟན་བྱུང་བ་དེ། ལོག་ལྟ་འབྲིང་ཚར་གྱིས་དགེ་རྩ་འབྲིང་ཚར་གཅོད་དེ། དེ་བཞིན་དུ་བར་ཆད་དང་བཅས་ཀྱང་སྲིད། ལོག་ལྟ་ཆེ་འབྲིང་དགུ་བར་ཆད་མེད་པར་སྐྱེས་ནས་གཅོད་ཀྱང་སྲིད་པའི་ཕྱིར་གཉིས་ཀར་བརྗོད་དོ། །ཁ་ཅིག །སྡོམ་ལྡན་གྱི་དགེ་རྩ་གཅོད་ན་སྦྱོར་བྱུང་གི་(༡༠༧བ)
སེམས་ཀྱི་འབྲས་བུ་ཡིན་པས་སྔར་སྡོམ་པ་སྤངས་ལ་ཕྱིས་དགེ་རྩ་སྐྱེས་ཐོབ་ཁོ་ན་ཀུན་ཏུ་གཅོད་དོ། །ཟེར་རོ། །བྱེ་སྨྲས། ལོག་ལྟས་སྡོམ་པ་གཏང་བ་ན། དེའི་ཀུན་སློང་གི་དགེ་རྩ་གཅིག་ཅར་གཅོད་པ་ཡིན་ཏེ། དང་བ་དང་གུས་པའི་སེམས་ཆུང་ངུས་སྡོམ་པ་བླངས་ན་སྡོམ་པ་ཆུང་བ་དེ། ལོག་ལྟས་དང་བ་གུས་པ་ཆུང་བ་སྤངས་ན་སྡོམ་པ་ཆུང་ངུ་བ་ཡང་སྤངས་ལ། དེའི་དགེ་བའང་སྤོང་བར་འགྱུར་ཞིང་། འབྲིང་གིས་བླང་བ་སོགས་ཀྱང་དེ་དང་འདྲ་བའི་ཕྱིར། ཡང་འདི་ཡི་དགོངས་པ་ལེན་ལུགས་ལ་དང་བ་དང་གུས་པ་དྲག་པོས་བླངས་བ་དེ་སྡོམ་པ་ཆེན་པོའི་ཆེན་པོ་ཡིན་ཏེ། ལོག་ལྟ་ཆུང་ངུའི་ཆུང་ངུས་གཅོད་དེ། གཅོད་བྱ་ཆེ་ཚར་ནས་མར་གཅོད་བྱེད་ཆུང་ཚར་ནས་ཡར་འབྱུང་བར་འདོད་ཀྱང་། དེ་ལྟར་ན་བཅད་དཀའ་བ་དེ་སྔོན་ལ་བཅད། བཅད་སླ་བ་དེ་ཕྱིས་གཅོད་པར་འགྲོ་བས་རིགས་པར་མི་སེམས་སོ། །ལྔ་པ་ནི། མིའི་ནང་དུ། །སྐྱེས་པ་བུད་མེད་ཀྱིས་གཅོད་དེ། །ལྟ་སྤྱད། མི་ཁོ་ནའི་ནང་དུ་གཅོད་ཀྱི་ངན་སོང་དག་ཏུ་ནི་མ་ཡིན་ཏེ། ཤེས་རབ་ཉོན་མོངས་ཅན་ལོག་ལྟ་དང་། ཉོན་མོངས་ཅན་མིན་པ་དག་མི་བརྟན་པའི་ཕྱིར། ལྷ་དག་གི་ནང་ན་ཡང་མེད་དེ། གང་ནས་ཤི་འཕོས་ནས་སྐྱེས་པ། སྔོན་གྱི་ལས་ཅི་ལས་སྐྱེས་པ། གང་དུ་སྐྱེས་པ་གསུམ་ཤེས་པས་ལས་འབྲས་མངོན་སུམ་དུ་གྱུར་བའི་ཕྱིར། གླིང་གསུམ་དག་ན་ཡོད་ཀྱི་བྱང་སྒྲ་མི་སྙན་ན་མེད་དེ། སྡིག་པའི་བསམ་པ་ཅན་མ་ཡིན་པའི་ཕྱིར། གཞན་དག་འཛམ་བུའི་གླིང་ཁོ་ན་ལ་ཡོད་དེ། ཁྱད་པར་དུ་དེར་རྟོག་གེ་པ་ཉིད་ཡོད་པའི་ཕྱིར་ཞེས་ཟེར་རོ། །དེ་མི་འཐད་དེ། ཡེ་ཤེས་ལ་འཇུག་པ་ལས། འཛམ་བུའི་གླིང་པ་ཐམས་ཅད་པས་ཉུང་ན་དབང་པོ་བརྒྱད་དང་ལྡན་པ་ཡིན་གྱི། ཤར་གྱི་ལུས་འཕགས་པོ་དང་། ནུབ་ཀྱི་བ་ལང་སྤྱོད་པ་ཡང་དེ་དང་འདྲའོ། །ཞེས་བྱ་བའི་གཞུང་འདི་དང་འགལ་བར་འགྱུར་བའི་ཕྱིར། ཇི་ལྟར་འགལ་ན། དད་སོགས་ཀྱི་དབང་(༡༠༨ན)
པོའི་དགེ་རྩ་ནི་ཀུན་ཏུ་འཆད་རྒྱུ་ཡིན་ལ། ཀུན་ཤེས་ཀྱི་དབང་སོགས་གསུམ་ནི་སོ་སྐྱེ་ཡིན་པས་མེད་ལ། མིག་སོགས་ཀྱང་མ་ཚང་བའི་ཚུལ་ལམ་རིམ་གྱིས་འཆི་བའི་གནས་སྐབས་ན་མེད་ལ། དགེ་བའི་རྩ་བ་ཀུན་ཏུ་ཆད་པ་ཁོ་ན་ཚོར་བའི་དབང་པོ་ལྔ་དང་། ལུས་སྲོག་ཡིད་ཀྱི་དབང་པོ་དང་ལྡན་པ་ཡིན་གྱི། འཛམ་གླིང་པ་ལ་བརྒྱད་དང་ལྡན་པས་དགེ་རྩ་གཅོད་པ་བཞིན་དུ་གླིང་གཞན་གཉིས་ནའང་དེ་བརྒྱད་དང་ལྡན་པའི་ཕྱིར་དགེ་རྩ་གཅོད་པར་གསུངས་པ་དང་འགལ་ལོ། །དགེ་རྩ་དེའང་གླིང་གསུམ་གྱི་སྐྱེས་པ་དང་། བུད་མེད་ཀྱིས་གཅོད་དོ། །གཞན་དག་བུད་མེད་ཀྱིས་ནི་མ་ཡིན་ཏེ། འདུན་པ་དང་བརྩོན་འགྲུས་ཞན་པའི་ཕྱིར་ཞེས་ཟེར་རོ། །མི་འཐད་དེ། གཞུང་ལས། གང་མོའི་དབང་པོ་དང་ལྡན་པ་དེ་གདོན་མི་ཟ་བར་དབང་པོ་བརྒྱད་དང་ལྡན་ནོ། །ཞེས་བཤད་པ་དང་འགལ་བའི་ཕྱིར། གྲུབ་སྟེ། དབང་པོ་བརྒྱད་དང་ལྡན་པ་དེ་དགེ་རྩ་གཅོད་པར་བྱེད་པ་དེར་གསུངས་པའི་ཕྱིར། བུད་མེད་ཀྱི་དབང་པོ་བརྒྱད་ལྡན་ཚུལ་ནི། ཡིད་མི་བདེ་བ་མེད་པའི་ཚོར་བའི་དབང་པོ་བཞི། ལུས་སྲོག་ཡིད་མོའི་དབང་པོ་བཞི་སྟེ་བརྒྱད་དོ། །སྲེད་པ་སྤྱོད་པས་ནི། ཀུན་ཏུ་གཅོད་པར་མི་བྱེད་དེ། བསམ་པ་གཡོ་བ་ཅན་ཡིན་པའི་ཕྱིར། འོ་ན་ལྟ་བ་སྤྱོད་པས་གཅོད་དེ། སྡིག་པའི་བསམ་པ་བརྟན་པ་དང་། སྡིག་པ་མི་དགེ་བས་འཁྱུད་པ་ཅན་ཡིན་པའི་ཕྱིར། དེ་གཅོད་པ་ལ་བསམ་པ་བརྟན་པ་གཅིག་དགོས་ཏེ། དཔྱོད་པ་པ་དང་གྲངས་ཅན་གྱིས་མཆོད་བཞིན་ཆུའི་ཚ་བ་བཞིན་ཟེར་ནས་ཕྱིན་ཅི་ལོག་གི་རྒྱུ་མཚན་གྱི་བསམ་པ་བརྟན་པོ་དེ་ལྟ་བ་སྤྱོད་པ་ལ་ཡོད་པས་ལྟ་སྤྱོད་ཀྱིས་གཅོད་པར་གྲུབ་པའི་ཕྱིར། མ་ནིང་སོགས་ཀྱིས་མི་གཅོད་དེ། སྲེད་པ་སྤྱད་པའི་ཕྱོགས་དང་མཐུན་པར་བསམ་པ་གཡོ་བ་ཅན་ཡིན་པའི་ཕྱིར། ངན་སོང་བས་དགེ་རྩ་མི་གཅོད་པ་བཞིན་ནོ། །(༡༠༨བ)
དྲུག་པ་ནི། དེ་ནི་མི་ལྡན་པའོ། །དགེ་རྩ་ཆད་པ་དེ་ནི་དགེ་རྩ་རྣམས་ཀྱི་ཐོབ་པ་ཡང་མི་སྐྱེ་ལ་མ་ཐོབ་པ་སྐྱེ་བ་སྟེ། མི་ལྡན་པ་དེ་སྐྱེས་ན་དགེ་རྩ་ཆད་པ་ཞེས་བྱའོ། །གཉིས་པ་མཚམས་སྦྱོར་ཚུལ་ལ། དངོས་དང་། མཚམས་མེད་བྱེད་པའི་སྦྱོར་ཚུལ་ལོ། །དང་པོ་ནི། མཚམས་ནི་ཐེ་ཚོམ་ཡོད་ལྟ་བས། །ཆད་པ་དེ་ཡང་ཉིང་མཚམས་སྦྱོར་བ་ནི་ནམ་ཞིག་འདི་ལ་རྒྱུ་འབྲས་ལ་ཐེ་ཚོམ་སྐྱེས་པའམ་ཡོད་པར་ཡིད་ཆེས་པའི་ཡང་དག་པའི་ལྟ་བ་སྐྱེས་པའི་ཚེ། དེའི་ཐོབ་པ་ཀུན་ཏུ་སྐྱེས་པའི་ཕྱིར་ཉིང་མཚམས་སྦྱོར་བ་ཞེས་བྱའོ། །དེའང་དགེ་བ་ཆེ་འབྲིང་དགུའི་ཐོབ་པའི་ཉིང་མཚམས་ནི་གཅིག་ཅར་དུ་སྦྱོར་ལ། མངོན་སུམ་དུ་ནི་རེས་མོས་འགྱུར་ཏེ། ནད་མེད་ན་སྟོབས་རྙེད་ཀྱང་ནད་དང་བྲལ་མ་ཐག་སྟོབས་མི་རྙེད་པ་བཞིན་ནོ། །གཉིས་པ་ནི། མཚམས་མེད་བྱེད་པའི་འདི་ལ་མིན། །མཚམས་མེད་བྱེད་པ་མ་ཡིན་པ་ནི། ཚེ་འདི་ཉིད་ལ་ཉིང་མཚམས་སྦྱོར་བར་འགྱུར་གྱི། མཚམས་མེད་བྱེད་པའི་གང་ཟག་ཚེ་འདི་ལ་ཉིང་མཚམས་སྦྱོར་བ་མིན་ཏེ། དེ་ལ་དགོངས་ནས། གང་ཟག་འདི་ནི་མཐོང་བའི་ཆོས་ཁོ་ན་ལ་དགེ་བའི་རྩ་བ་རྣམས་ཉིང་མཚམས་སྦྱོར་བའི་སྐལ་པ་དང་ལྡན་པ་མ་ཡིན་གྱི། འདི་ནི་ངེས་པར་དམྱལ་བ་དག་ནས་འཆི་འཕོ་བའམ་སྐྱེ་བ་ན་དགེ་བའི་རྩ་བ་རྣམས་ཉིང་མཚམས་སྦྱོར་བར་འགྱུར་རོ། །ཞེས་གསུངས་པའི་ཕྱིར། སྐྱེ་བ་ནི་དམྱལ་བར་གདོད་སྐྱེ་བའི་སྲིད་པ་བར་མ་ལ་གནས་པའོ། །འཆི་འཕོ་བ་ནི། དམྱལ་བ་ནས་འཆི་འཕོ་བ་མངོན་དུ་ཕྱོགས་པའོ། །དེ་ལ་གང་ཞིག་སྐལ་མཉམ་གྱི་རྒྱུ་སྔོན་གྱི་ལོག་ལྟས་གཅོད་པ་དེ་ནི་དམྱལ་བ་ནས་འགྲོ་བ་གཞན་དུ་འཆི་འཕོ་གར་ཉིང་མཚམས་སྦྱར་བར་འགྱུར་རོ། །གཞན་གྱི་སྒྲའི་སྟོབས་ཀྱིས་ལོག་པར་ལྟ་བས་ཀུན་ཏུ་གཅོད་པ་དེ་ནི་དམྱལ་བར་སྐྱེ་ཀའི་བར་དོའི་གནས་སྐབས་ན་ཉིང་མཚམས་སྦྱོར་བར་འགྱུར་རོ། །རང་གི་རྟོག་གེའི་སྟོབས་ཀྱིས་(༡༠༩ན)
གཅོད་པ་གང་ཡིན་པ་ནི་འཆི་འཕོ་བ་ན་ཉིང་མཚམས་སྦྱོར་ལ། གཞན་ལ་ཐོས་པའི་སྟོབས་ཀྱིས་གཅོད་པ་ནི་སྐྱེ་བ་ན་ཉིང་མཚམས་སྦྱོར་རོ། །བསམ་པ་ཉམས་པས་ཀུན་ཏུ་གཅོད་པ་ནི། ཚེ་འདི་ཉིད་ལ་དགེ་བའི་རྩ་བ་ཉིད་མཚམས་སྦྱོར་བར་འགྱུར་རོ། །ལོག་པའི་བསམ་པ་མངོན་དུ་གྱུར་པ་དང་། མཚམས་མེད་ཀྱི་ལས་སྦྱོར་བས་གཅོད་པར་བྱེད་པ་དེ་ནི་ལུས་ཞིག་ནས་ཉིང་མཚམས་སྦྱོར་བར་འགྱུར་རོ། །ལྟ་བ་ཙམ་གྱིས་དགེ་རྩ་བཅད་པ་དེ་དམྱལ་བར་སྐྱེ་ཀ་ཉིང་མཚམས་སྦྱོར་རོ། །ལྟ་བ་དང་ཚུལ་ཁྲིམས་འཆལ་པས་དགེ་རྩ་བཅད་པ་དེ་དམྱལ་བར་སྐྱེས་ནས་དེ་ནས་འགྲོ་བ་གཞན་དུ་འཆི་འཕོ་གར་ཉིང་མཚམས་སྦྱོར་རོ། །ཡང་མེད་པར་ལྟ་བའི་ཕྱིར་དགེ་རྩ་ཀུན་ཏུ་ཆད་ལ། མཚམས་མེད་མི་བྱེད་པས་ལོག་པ་ཉིད་དུ་ངེས་པའི་མུ་དང་པོ་ནི་འོད་སྲུང་རྫོགས་བྱེད་ལ་སོགས་པའོ། །མཚམས་མེད་བྱེད་པ་ཡིན་པའི་ཕྱིར་ལོག་པ་ཉིད་དུ་ངེས་པ་ཡིན་ལ། ཡང་དག་པའི་ལྟ་བ་ཅན་ཡིན་པའི་ཕྱིར་དགེ་རྩ་ཀུན་ཏུ་ཆད་པ་མ་ཡིན་པའི་མུ་ནི་མ་སྐྱེས་དགྲའོ། །དགེ་འདུན་གྱི་དབྱེན་དང་། བུདྡྷ་ལ་ངན་སེམས་ཀྱིས་ཁྲག་འབྱིན་པ་དང་། དགེ་སློང་མ་ཨུཏྤ་ལ་ཡང་བསད་པས་དགེ་རྩ་ཀུན་ཏུ་ཆད་པ་ཡང་ཡིན། ལོག་པ་ཉིད་དུ་ངེས་པའི་མུ་ཡང་ཡིན་པ་ནི་ལྷས་བྱིན་ནོ། །གཉིས་ཀ་མ་ཡིན་པའི་མུ་ནི་དེ་དག་མ་གཏོགས་པའོ། །དགེ་རྩ་གཅོད་བའི་ལོག་ལྟའི་རྣམ་སྨིན་ནི་མནར་མེད་པ་ཡིན་ནོ། །མཚམས་མེད་བྱེད་པ་རྣམས་ཀྱི་ནི་མནར་མེད་དེར་རམ་གཞན་དུ་སྨིན་པའོ། །སྨྲས་པ། འདི་ན་དེང་སང་རྒྱལ་བ་མཆོག་དེ་ཡི། །བསྟན་པའི་སྙིང་པོ་དེ་ལ་དམ་ཟ་ནས། །ཐོག་མེད་དུས་ཀྱི་ལྟ་སྤྱོད་སྙིགས་མ་ལ། །ཡིད་དུ་འཐད་པའི་དགའ་མགུར་གྱུར་པ་དེར། །བདག་གིས་ཐུབ་དབང་གསུང་གི་བརྡ་སྦྱར་ཡང་། །དེ་ཡི་སྙིང་ལ་ལེགས་པར་ག་ལ་གཤིན། །འོན་ཀྱང་(༡༠༩བ)
རང་རེའི་སྟོན་པ་ཟླ་བྲལ་དེར། །ལྡོག་མེད་མོས་པ་ཕུལ་དུ་བྱུང་རྣམས་ལ། །བདེ་ཆེན་འཇིགས་མེད་ཐོབ་པའི་རྒྱུར་རིག་ནས། །ཟབ་མོའི་གཏམ་འདི་བདག་གིས་ཅི་ཙམ་ངལ། །དེ་ཙམ་བཟོད་པའི་གོ་ཆ་བཅིངས་བྱས་ནས། །ཐར་འདོད་ཡིད་རྣར་སྙན་ཕྱིར་རྒྱུན་དུ་དངགས། །ཞེས་སོ། །གཉིས་པ་སེམས་པ་གང་དང་ལྷན་ཅིག་འཇུག་པ་ལ། མི་དགེ་བ་སེམས་པ་གང་དང་ལྷན་ཅིག་པ། དགེ་བ་གང་དང་ལྷན་ཅིག་འཇུག་པའོ། །དང་པོ་ནི། མི་དགེ་བརྒྱད་ཀྱི་བར་དག་དང་། །སེམས་པ་ཅིག་ཅར་ལྷན་ཅིག་འབྱུང་། །མི་དགེ་བ་ནི་མང་ན་བརྒྱད་ཀྱི་བར་དག་དང་སེམས་པ་གཅིག་ཅར་ལྷན་ཅིག་འབྱུང་གི། དེ་བས་མང་བ་མ་ཡིན་ཏེ། ཡིད་ཀྱི་གསུམ་དང་ལྷན་ཅིག་མི་འབྱུང་བའི་ཕྱིར་རོ། །དེ་ཡང་སེམས་པ་གཅིག་དང་ལྷན་ཅིག་འབྱུང་བ་ནི་སྲོག་གཅོད་ལ་སོགས་པའི་ལས་ལམ་གཞན་མེད་པར་བརྣབ་སེམས་གཅིག་པུའམ། གནོད་སེམས་གཅིག་པུའམ། ལོག་ལྟ་གཅིག་པུ་དང་སེམས་པ་ལྷན་ཅིག་མངོན་འགྱུར་རམ་མཚུངས་པར་ལྡན་པ་ཡོད་ཀྱང་དེ་ནི་གཅིག་དང་ལྷན་ཅིག་འབྱུང་བའམ། ཡང་ན་སེམས་པ་ཉོན་མོངས་ཅན་མིན་པ་དགེ་བ་དང་ལུང་མ་བསྟན་གང་རུང་གི་སེམས་པ་གཅིག་ཏུ་འདུག་པ་ལ། ལོག་ གཡེམ་མ་གཏོགས་པ ་གཟུགས་ཅན་དྲུག་པོ་གང་རུང་ཞིགམཐར་ཕྱིན་པར་བྱེད་ན་སེམས་ པ་དེ་གཅིག་དང་ལྷན་ཅིག་འབྱུང་ངོ་། །ལོག་གཡེམ ་མཐར་ཕྱིན་བྱེད་ནི། ངེས་པར་ཉོན་མོངས་ཅན་གྱི་སེམས་པ་དང་བཅས་པའི་མི་དགེ་བས་མཐར་ཕྱིན་པར་བྱེད་དགོས་སོ། །སེམས་པ་གཉིས་དང་ལྷན་ཅིག་འབྱུང་བ་ནི། སེམས་པ་དེ་གནོད་སེམས་སུ་གྱུར་པ་དེས་དང་སྲོག་གཅོད་གཉིས་དང་ལྷན་ཅིག་འབྱུང་ངོ་། །སེམས་པ་དེ་བརྣབ་སེམས་དང་ལྡན་པར་གཉིས་དང་ལྷན་ཅིག་འབྱུང་བའམ། སེམས་པ་དེས་བརྣབ་སེམས་དང་ལྡན་པས་ལོག་པར་ གཡེམ་པའམ། སེམས་པ ་དེ་བརྣབ་སེམས་དང་(༡༡༠ན)
ལྡན་པས་ཚིག་ཀྱལ་སྨྲ་ན་གཉིས་དང་ལྷན་ཅིག་འབྱུང་ངོ་། །འདི་ལ་ཁ་ཅིག །གནོད་སེམས་སུ་གྱུར་པ་སྲོག་གཅོད་པ་ན་ཞེས་བྱ་བ་དང་། བརྣབ་སེམས་དང་ལྡན་བས་མ་བྱིན་པར་ལེན་པ་ཞེས་བྱ་བ་འདི་ཅི། རང་བྱེད་པའམ། འོན་ཏེ་གཞན་བྱེད་དུ་བཅུག་པ་ཞིག་ཡིན། རང་བྱེད་པ་ཡིན་ན་ནི་སྲོག་གཅོད་པ་ལ་གནོད་སེམས་དང་། མ་བྱིན་པར་ལེན་པ་ཡང་བརྣབ་སེམས་གདོན་མི་ཟ་བར་ཡོད་པའི་ཕྱིར། གནོད་སེམས་སུ་གྱུར་པ་ཞེས་བྱ་བ་དང་། བརྣབ་སེམས་དང་ལྡན་པ་ཞེས་བྱ་བའི་ཁྱད་པར་དུ་བྱ་རུང་བ་མ་ཡིན་ཏེ། འཁྲུལ་པ་ལ་ནི་ཁྱད་པར་དང་ལྡན་པའི་ཚིག་སྦྱོར་དགོས་ལ། འཁྲུལ་གཞི་མེད་པ་ལ་ཁྱད་ཚིག་སྦྱོར་མི་དགོས་པའི་ཕྱིར་དང་། འོན་ཏེ་གཞན་བྱེད་དུ་བཅུག་པ་ཞིག་ཡིན་ན། བརྣབ་སེམས་གནོད་སེམས་ལོག་པར་ལྟ་བ་གཅིག་ལས་གང་ཡང་རུང་བ་གཅིག་དང་ལྡན་པ་སྲོག་གཅོད་པ་དང་མ་བྱིན་པར་ལེན་པ་དང་འདོད་ལོག་ཚིག་ཀྱལ་སྨྲ་ནའོ་ཞེས་བརྗོད་དགོས་སོ་ཞེ་ན། རང་གི་བྱེད་པ་ལ་ཁྱད་ཚིག་སྦྱར་མི་དགོས་པ་བདེན་ཀྱང་དེའི་ཆེད་དུ་སྦྱར་བ་མ་ཡིན་པས་ཉེས་པ་མེད་དེ། འདིར་སྦྱར་བ་ནི། དེ་ལ་གཉིས་པར་གྱུར་པ་གནོད་སེམས་དང་བརྣབ་སེམས་དང་ལྷན་ཅིག་པ་ཉིད་དུ་བསྟན་པའི་ཆེད་དུ་སྦྱར་བའི་ཕྱིར་རོ། །དེ་ལྟར་ན་ཡང་བརྣབ་སེམས་ལ་སོགས་པའི་ནང་ནས་སེམས་གང་ཡང་རུང་བ་ཞིག་དང་ལྡན་པས་སྲོག་གཅོད་སོགས་དེ་དག་བྱེད་དུ་བཅུག་པའི་སེམས་པ་གཉིས་དང་ལྷན་ཅིག་འབྱུང་བ་སྲིད་པས་དེ་ཡང་བརྗོད་དགོས་པར་འགྱུར་རམ་ཞེ་ན། མ་བརྗོད་ཀྱང་རུང་སྟེ། དཔེར་བརྗོད་ཙམ་དུ་ཟད་པས་དོན་གོ་བར་འགྱུར་བའི་ཕྱིར་ཉེས་པ་མེད་དོ། །གསུམ་དང་ལྷན་ཅིག་འབྱུང་བ་ནི་བསད་པ་ཁོ་ནས་དབྲོག་པ་འགྲུབ་པ་གང་ཡིན་པ་སྟེ། གང་ལ་གནོད་སེམས་དང་སྲོག་གཅོད་པ་(༡༡༠བ)
དང་མ་བྱིན་པར་ལེན་པའི་ལས་ཀྱི་ལམ་གཅིག་ཅར་འབྱུང་བའོ། །གཞན་ནས་ཨུཏྤ་ལའི་འདབ་མ་འབིགས་པ་ལྟ་བུ་མྱུར་ཆེས་པ་ལ་བཤད་ན། འདི་རུ་གསུམ་ག་དུས་གཅིག་ཏུ་ཚང་བར་འདོད་དོ། །འོ་ན་གཞན་གྱི་ནོར་འཕྲོག་པའི་ཚེ་གནོད་སེམས་ཡོད་ན། འོ་ན་མ་བྱིན་པར་ལེན་པ་ཆགས་པ་ཁོ་ནས་མཐར་ཕྱིན་པར་བྱེད་དོ་ཞེས་བྱ་བ་འགྲུབ་པར་མི་འགྱུར་ཏེ། ཆགས་པ་དང་ཞེ་སྡང་གཅིག་ཅར་མི་འབྱུང་བའི་ཕྱིར་ཞེ་ན། མ་ཁྱབ་སྟེ། ལོག་ གཡེམ་བརྣབ་སེམས་མ་བྱིན་ལེན་ཆགས་པས་ངེས་པར་རྫོགས་པར་བྱེད་པ ་དེ་ནི་གསོད་པའི་སེམས་གཞན་དང་མ་འདོམས་པའི་རྐུ་བ་ལ་ཆགས་པས་རྫོགས་པར་བྱེད་ཀྱི། གསོད་པ་དང་འདོམས་པ་ལ་གནོད་སེམས་ཀྱང་ཡོད་པའི་ཕྱིར། བརྣབ་སེམས་མངོན་དུ་གྱུར་ པ་དེའི་ལོག་གཡེམ ་དང་། རྐུ་བ་གཉིས་མཐར་ཕྱིན་པར་བྱེད་ན་ཡང་གསུམ་ཁོ་ན་དང་ལྷན་ཅིག་འབྱུང་ངོ་། །བཞི་དང་ལྷན་ཅིག་འབྱུང་བ་ནི། དབྱེན་བྱ་བའི་གནོད་སེམས་དང་ལྡན་པས་བརྫུན་སྨྲ་ན་རྫུན་དང་། རྫུན་དེ་ག་ཕྲ་མ་ཡང་ཡིན། ཉོན་མོངས་ཅན་ཀུན་ཡིན་པས་ཀྱལ་པའང་ཡིན་ནོ། །ཡང་གནོད་སེམས་དང་ལྡན་པས་ཚིག་རྩུབ་སྨྲས་པ་ན། ཚིག་རྩུབ་དེ་ཀ་ཕྲ་མའང་ཡིན། ཉོན་མོངས་ཅན་གྱི་ཀྱལ་པ་ཡང་ཡིན་ནོ། །འདི་ལ་ནི་ཡིད་ཀྱི་གཅིག་དང་ངག་གི་གསུམ་ཡིན་ནོ། ཁ་ཅིག་ན་རེ། མིང་གི་སྒོ་ནས་ངག་གསུམ་ཡིན་གྱི། ངོ་བོ་ཉིད་ཀྱི་སྒོ་ནས་ནི་མ་ཡིན་ཏེ། རྫུན་སྨྲ་དེ་ཉིད་ལ་ཕྲ་མ་དང་། ཚིག་ཀྱལ་པའི་ངོ་བོ་ཉིད་གསུམ་མེད་དེ། དེ་བཞིན་དུ་ཚིག་རྩུབ་ཀྱང་མིང་གསུམ་ཟེར་རོ། ཁ་ཅིག་ན་རེ། རྫུན་ཕྲ་མ་ཀྱལ་པའི་རིག་བྱེད་མིན་པ་ཐ་དད་ཀྱང་ཡོད་ཟེར་རོ། །དེ་བཞིན་དུ་རྩུབ་ཕྲ་ཀྱལ་པ་གསུམ་ཡང་ཐ་དད་ཟེར་རོ། །ཡང་ན་བརྣབ་སེམས་དང་ལྡན་པས་གཞན་ལ་སྲོག་རྐུ་རྫུན་གསུམ་བཅོལ་བས་རྫོགས་ན་(༡༡༡ན)
བཞིའོ། །བདག་ཉིད་བརྣབ་སེམས་དང་ལྡན་པ་ལ་གཞན་སྲོག་གཅོད་ལ་སོགས་བཞི་བཅོལ་ན་ལྔ་དང་། བདག་ཉིད་བརྣབ་སེམས་ལྟ་བུ་དང་ལྡན་པ་ལ། གཞན་ལ་ལྔ་བཅོལ་ན་དྲུག་དང་། བདག་ལ་གཅིག་ལྡན་པ་ལ་གཞན་ལ་དྲུག་བཅོལ་ན་བདུན་དང་ལྷན་ཅིག་འབྱུང་བའོ། །ཡང་ན་བདག་ཉིད་བརྣབ་སེམས་དང་ལོག་ལྟ་གཉིས་དང་ལྡན་པ་ལ་གཞན་ལ་བཞི་བཅོལ་བའི་སྦྱོར་བ་རྫོགས་ན་དྲུགབདག་ཉིད་གནོད་སེམས་དང་ལྡན་པ་ལ་གཞན་ལ་དྲུག་བཅོལ་བ་རྫོགས་ན་བདུན། ཡང་བདག་ཉིད་བརྣབ་སེམས་དང་རྐུ་བ་ལ་གཞན་ལ་བཞི་བཅོལ་ན་དྲུགབདག་ཉིད་དེ་གཉིས་དང་ལྡན་པ་ལ་གཞན་ལ་ལྔ་བཅོལ་ན་བདུན་དང་ལྷན་ཅིག་འབྱུང་བའོ། །བརྒྱད་དང་ལྷན་ཅིག་འབྱུང་བ་ནི། རང་ཉིད་བརྣབ་སེམས་སོགས་ཡིད་ཀྱི་གང་རུང་མངོན་དུ་གྱུར་ནས་གཞན་ལ་དྲུག་བཅོལ་བའི་སྦྱོར་བ་བྱས་ཤིང་དེ་དང་མཉམ་དུ་བདག་ཉིད་ཀྱི་འདོད་པས་ལོག་ གཡེམ་མཐར་ཕྱིན་པར་བྱེད་ནའོ། །གཉིས་པ ་ནི། དགེ་བ་བཅུ་ཡི་བར་དག་དང་། །གཅིག་དང་བརྒྱད་དང་ལྔ་དང་མིན། །དགེ་བའི་ལས་ལམ་དག་ནི་བཅུའི་བར་དག་དང་སེམས་པ་ལྷན་ཅིག་འབྱུང་ངོ་ཞེས་སྤྱིར་བསྟན་ནས། དམིགས་ཀྱིས་བསལ་བ་ནི། ལས་ཀྱི་ལམ་གཅིག་ཁོ་ན་དང་སེམས་པ་ལྡན་པ་ཡོད་པ་མ་ཡིན་ཏེ། སེམས་པ་དགེ་བ་ལ་བརྣབ་སེམས་མེད་པ་ལ་གནོད་སེམས་མེད་པ་གཉིས་ཀ་འོང་བའི་ཕྱིར་དང་། སྤོང་བ་གཅིག་པའི་རང་བཞིན་གྱི་སྡོམ་པ་མེད་པའི་ཕྱིར། བརྒྱད་ཁོ་ན་དང་ལྷན་ཅིག་འབྱུང་བ་མེད་དེ། དགེ་སློང་གི་སྤོང་བ་བདུན་པོ་དུས་ཀྱི་ཀུན་སློང་ཉོན་མོངས་ཅན་དང་ལུང་དུ་མི་སྟོན་པའི་དུས་ན་བདུན་ཡོད་ལ། དགེ་བའི་སེམས་ཀྱི་གནས་སྐབས་ན་ནི། ཚོགས་ལྔ་ཡིན་ན་མ་ཆགས་པ་དང་། ཞེ་སྡང་མེད་པ་གཉིས་ཅིས་ཀྱང་འབྱུང་བས་དགུར་འགྲོ། ཡིད་ཡིན་ན་(༡༡༡བ)
ཡང་དག་པའི་ལྟ་བ་དང་བཅུར་འགྱུར་བའི་ཕྱིར། ལྔ་ཁོ་ན་དང་ལྷན་ཅིག་འབྱུང་བ་མིན་ཏེ། དགེ་ཚུལ་ལམ་དགེ་བསྙེན་ཡིན་ན་སྤོང་བ་བཞིའི་ཐོག་ཏུ་ཡིད་ཀྱི་གཅིག་ལྟ་བུ་མི་སྲིད་ཀྱི། ཚོགས་ལྔ་ལྟ་བུ་ཡིན་ན་སྤོང་བ་བཞིའི་ཐོག་ཏུ་ཡིད་ཀྱི་མ་ཆགས་པ་དང་། ཞེ་སྡང་མེད་པ་གཉིས་ཅིས་ཀྱང་འབྱུང་བས་དྲུག་ཏུ་འགྲོ། ཡིད་ཡིན་ན་དེའི་ཐོག་ཏུ་ཡང་དག་པའི་ལྟ་བ་འབྱུང་བས་བདུན་དུ་འགྱུར་བའི་ཕྱིར། དེ་ལ་མ་ཆགས་པ་དང་ཞེ་སྡང་མེད་པ་གཉིས་ལྷན་ཅིག་འབྱུང་བ་ནི། དགེ་བའི་རྣམ་པར་ཤེས་པ་ལྔ་ལ་གནས་པ་ན་ཡིན་ཏེ། ཚོགས་ལྔ་ན་བརྣབ་སེམས་མེད་པ་དང་གནོད་སེམས་མེད་པ་དག་ཡོད་ཀྱི། ཡང་དག་པའི་ལྟ་བ་དང་ལྷན་ཅིག་འབྱུང་བ་མ་ཡིན་པའི་ཕྱིར་ཏེ། གྲུབ་མཐའ་ལས། རྣམ་ཤེས་ལྔ་དང་མཚུངས་སྐྱེ་བློ། །ངེས་རྟོག་མེད་ཕྱིར་ལྟ་མ་ཡིན། །ཅེས་འབྱུང་བས་སོ། །གཟུགས་མེད་ཀྱི་སྙོམས་འཇུག་གིས་བསྡུས་པའི་ཟད་པ་དང་མི་སྐྱེ་བ་ཤེས་པ་དག་ལ་གནས་པ་ཡང་ཆོས་ཅན། དེ་གཉིས་དང་ལྷན་ཅིག་འབྱུང་སྟེ། ཡང་དག་པའི་ལྟ་བ་དང་ལྷན་ཅིག་འབྱུང་བ་མིན་པའི་ཕྱིར་ཏེ། གྲུབ་མཐའ་ལས། ཟད་དང་མི་སྐྱེ་བློ་ལྟ་མིན། །ཅེས་འབྱུང་བས་སོ། །གཟུགས་མེད་སྨོས་པ་ནི། བསམ་གཏན་ལ་བརྟེན་པ་ཡིན་ན་ཟག་མེད་ཀྱི་སྡོམ་པ་ཡོད་པས་སྤོང་བ་བདུན་དང་སྔ་མ་གཉིས་དང་དགུར་ཡང་འགྱུར་བས་འོག་ན་འཆད་དོ། །སྡོམ་པ་བླངས་པར་མ་གྱུར་པ་ཡང་དག་པར་ལྟ་བ་དང་མཚུངས་ལྡན་གྱི་ཡིད་ཤེས་ལ་གནས་པ་ན་ཆོས་ཅན། གསུམ་དང་ལྷན་ཅིག་འབྱུང་བ་ཡིན་ཏེ། ཡང་དག་པའི་ལྟ་བ་ཡོད་ན་བརྣབ་སེམས་མེད་པ་དང་གནོད་སེམས་མེད་པའང་ལྷན་ཅིག་འབྱུང་བའི་ཕྱིར། དུས་ཀྱི་ཀུན་སློང་མི་དགེ་བའམ་ལུང་དུ་མ་བསྟན་པའི་སེམས་ཀྱིས་དགེ་ཚུལ་ལས་དགེ་བསྙེན་གྱི་(༡༡༢ན)
སྡོམ་པ་ལེན་པ་ན་ཆོས་ཅན། བཞི་དང་ལྷན་ཅིག་འབྱུང་བ་ཡིན་ཏེ། སྤོང་བ་བཞིའི་ལས་ལམ་དང་ལྷན་ཅིག་འབྱུང་བའི་ཕྱིར། ཆང་སྤོང་བ་ནི་ལས་ལམ་བཅུའི་ནང་དུ་མ་གཏོགས་ལ། ཚིག་རྩུབ་སྤོང་བ་ལ་སོགས་པ་ཡང་དགེ་བསྙེན་དང་དགེ་ཚུལ་གྱི་སྡོམ་པས་མ་བསྡུས་ལ། དགེ་བསྙེན་གྱི་ལོག་ གཡེམ་སྤོང་བའང་དགེ་ཚུལ་གྱི་མི་ཚངས་སྤྱོད་སྤོང་བ་སྡོམ་པར་བཞག་པ ་བཞིན་སྡོམ་པར་བཞག་པ་ཡིན་ནོ། །དགེ་བའི་རྣམ་པར་ཤེས་པ་ལྔ་ལ་གནས་པས་དགེ་བསྙེན་དང་དགེ་ཚུལ་གྱི་སྡོམ་པ་ལེན་པ་ན་ཆོས་ཅན། དྲུག་དང་ལྷན་ཅིག་འབྱུང་བ་ཡིན་ཏེ། ཆགས་པ་དང་སྡང་བ་མེད་པ་དང་སྲོག་གཅོད་སྤོང་བ་ནས་རྫུན་སྤོང་བའི་བར་དྲུག་དང་ལྷན་ཅིག་འབྱུང་བའི་ཕྱིར། དགེ་བའི་ཡིད་ཤེས་ལ་གནས་ཏེ་དགེ་བསྙེན་དགེ་ཚུལ་གྱི་སྡོམ་པ་ལེན་པ་ན་ཆོས་ཅན། བདུན་དང་ལྷན་ཅིག་འབྱུང་སྟེ། ཡིད་ཀྱི་གསུམ་དང་སྤོང་བ་བཞི་ལྷན་ཅིག་འབྱུང་བའི་ཕྱིར། ཡང་དུས་ཀྱི་ཀུན་སློང་མི་དགེ་བ་དང་ལུང་མ་བསྟན་གྱི་སེམས་ཀྱིས་དགེ་སློང་གི་སྡོམ་པ་ལེན་པ་ན་ཆོས་ཅན། བདུན་དང་ལྷན་ཅིག་འབྱུང་སྟེ། སྤོང་བདུན་ལྷན་ཅིག་ཏུ་འབྱུང་བའི་ཕྱིར། དགེ་བའི་རྣམ་ཤེས་ལྔ་ལ་གནས་པས་དགེ་སློང་གི་སྡོམ་པ་ལེན་པ་ན་ཆོས་ཅན། དགུ་དང་ལྷན་ཅིག་འབྱུང་བ་ཡིན་ཏེ། ཆགས་སྡང་མེད་པའི་སེམས་པ་གཉིས་དང་སྤོང་བདུན་ལྷན་ཅིག་ཏུ་འབྱུང་བའི་ཕྱིར། ཡང་ཟད་མི་སྐྱེ་ཤེས་པ་དང་མཚུངས་ལྡན་གྱི་ཡིད་ཀྱི་རྣམ་ཤེས་ལ་གནས་པས་དགེ་སློང་གི་སྡོམ་པ་ལེན་པ་ན་ཆོས་ཅན། བདུན་དང་ལྷན་ཅིག་འབྱུང་སྟེ། རྟགས་སྔ་མ་དང་འདྲ་བའི་ཕྱིར། ཟད་མི་སྐྱེ་ཤེས་པ་དེ་ཉིད་བསམ་གཏན་གྱིས་བསྡུས་པ་ན་ཆོས་ཅན། དགུ་དང་ལྷན་ཅིག་འབྱུང་བ་ཡིན་ཏེ། སེམས་པ་གཉིས་དང་ཟག་མིད་ཀྱི་སྤོང་བདུན་ལྷན་ཅིག་(༡༡༢བ)
འབྱུང་བའི་ཕྱིར། ཟད་མི་སྐྱེ་པའི་ཤེས་པ་དེ་ལས་གཞན་པའི་ཡིད་ཀྱི་རྣམ་ཤེས་ལ་གནས་པས་དགེ་སློང་གི་སྡོམ་པ་ལེན་པ་ན་ཆོས་ཅན། བཅུ་དང་ལྷན་ཅིག་འབྱུང་སྟེ། ཡིད་ཀྱི་སེམས་པ་གསུམ་དང་། སྤོང་བདུན་ལྷན་ཅིག་ཏུ་འབྱུང་བའི་ཕྱིར། ཡང་ཟད་མི་སྐྱེ་ཤེས་པ་དག་མ་གཏོགས་པ་བསམ་གཏན་དང་ཟག་མེད་ཀྱི་སྡོམ་པ་དང་ལྷན་ཅིག་པའི་སེམས་པ་ཐམས་ཅད་ཀྱི་སྐབས་སུ་ཆོས་ཅན། བཅུ་དང་ལྷན་ཅིག་འབྱུང་སྟེ། རྒྱུ་མཚན་སྔ་མ་ཉིད་ཀྱི་ཕྱིར་རོ། །སྡོམ་པ་བརྒྱད་མ་གཏོགས་པར་ནི་གཅིག་དང་ལྷན་ཅིག་འབྱུང་བ་ཡོད་དེ། ཉོན་མོངས་ཅན་ནམ་ལུང་མ་བསྟན་གྱི་སེམས་པས་སྤོང་བའི་ཡན་ལག་གཅིག་ལེན་པར་བྱེད་པ་ན་གཅིག་དང་ལྷན་ཅིག་འབྱུང་བའི་ཕྱིར་རོ། །དེ་བཞིན་ལྔ་དང་བརྒྱད་ལྷན་ཅིག་འབྱུང་བ་ཡོད་དེ། དགེ་བའི་ཡིད་ཀྱི་རྣམ་པར་ཤེས་པ་ལ་གནས་པས། སྤོང་བའི་ཡན་ལག་གཉིས་དང་ལྔ་ལེན་པ་ན་ལྔ་དང་བརྒྱད་དང་ལྷན་ཅིག་འབྱུང་བའི་ཕྱིར་རོ། །གསུམ་པ་འགྲོ་བ་གང་ན་ལས་ལམ་དུ་ཡོད་པ་ལ། མི་དགེ་བ་དང་། དགེ་བ་གང་ན་ཡོད་པའོ། །དང་པོ་ལ། དམྱལ་བ་ན་གང་ཡོད་པ། སྒྲ་མི་སྙན་ན་གང་ཡོད་པ། དེ་གཉིས་ལས་གཞན་པའི་འདོད་ཁམས་ན་གང་ཡོད་པའོ། །དང་པོ་ནི། མྱལ་བ་ན་ནི་ཀྱལ་པ་དང་། །ཚིག་རྩུབ་གནོད་སེམས་རྣམ་གཉིས་སོ། །བརྣབ་སེམས་ལོག་ལྟ་ལྡན་པས་སོ། །དམྱལ་བ་ན་ནི་མངོན་སུམ་དུ་གྱུར་པ་ནི་གསུམ་ཡིན་ཏེ། སྨྲེ་སྔགས་འདོན་པས་ཚིག་ཀྱལ་པ་དང་། དམྱལ་བ་དང་དམྱལ་སྲུང་ཕན་ཚུན་སྤྱོ་ཞིང་བརྒྱད་བཀག་བྱེད་པའི་ཚིག་རྩུབ་དང་། (པ་རི་བྷཱཥ་སྟེ་ཡོངས་སུ་སྨྲ་བ་ལའང་འཇུག་པས་ཕན་ཚུན་སྨྲ་བའོ། །མཆན།) གཅིག་ལ་གཅིག་སེམས་རྒྱུད་རྩུབ་པོས་ཞེ་སྡང་བས་གནོད་སེམས་དང་གསུམ་དུ་ཡོད་པའི་ཕྱིར་རོ། །ལྡན་པའི་སྒོ་ནས་ནི་རྣམ་པ་གཉིས་དང་ལྡན་པ་ཡིན་ཏེ། ཆགས་བྱའི་དངོས་པོ་མེད་པས་བརྣབ་སེམས་མངོན་གྱུར་མེད་ཀྱི། (༡༡༣ན)
ལྡན་པའི་སྒོ་ནས་ཡོད་པ་དང་། ལས་འབྲས་མངོན་དུ་གྱུར་པའི་ཕྱིར་མངོན་གྱུར་གྱི་སྒོ་ནས་ལོག་ལྟ་མེད་ཀྱི། ལྡན་པའི་སྒོ་ནས་ཡོད་པའི་ཕྱིར་རོ། །འདི་གཉིས་ནི་གཉེན་པོ་མ་སྐྱེས་པས་ལྡན་པའི་སྒོ་ནས་ཡོད་པར་བཞག་གི། སྲོག་གཅོད་སོགས་ཀྱང་དེ་དང་མི་འདྲའམ་སྙམ་ན་མི་འདྲ་སྟེ། གཉེན་པོ་མ་སྐྱེས་ཀྱང་སྐྱེ་བ་གཞན་ནས་ཤི་འཕོས་པས་གཏོང་བ་དང་། སྐྱེ་བ་འདིའི་སྲོག་གཅོད་སོགས་ནི་སྦྱོར་བ་ལ་རག་པ་ཡིན་པས་སྦྱོར་བ་མ་བྱས་པའི་ཕྱིར། དེར་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་ གཡེམ་པ ་དག་མེད་དེ། ལས་ཟད་ནས་འཆི་བའི་ཕྱིར་དང་། རྫས་དང་བུད་མེད་ཡོངས་སུ་གཟུང་བ་མེད་པའི་ཕྱིར། རྫུན་དུ་སྨྲ་བ་ནི་མེད་དེ། རྫུན་དུ་སྨྲ་བའི་དགོས་པ་མེད་པའི་ཕྱིར་དང་། ཕྲ་མ་ནི་མེད་དེ། སྙིང་དུ་སྡུག་པ་མེད་པས་བྱེ་ཟིན་པའི་ཕྱིར། གཉིས་པ་ནི། སྒྲ་མི་སྙན་ན་གསུམ་ཡོད་དེ། །དེ་ན་བདུན་པ་དངོས་སུ་ཡང་། །སྒྲ་མི་སྙན་ན་ཡིད་ཀྱི་གསུམ་ལྡན་པའི་སྒོ་ནས་ཡོད་ཀྱི། མངོན་གྱུར་གྱི་སྒོ་ནས་མེད་དེ། ང་ཡིར་འཛིན་པ་མེད་པའི་ཕྱིར་དང་། རྒྱུད་འཇམ་པའི་ཕྱིར་དང་། ཀུན་ནས་མནར་སེམས་ཀྱི་དངོས་པོ་མེད་པའི་ཕྱིར་དང་། སྡིག་པའི་བསམ་པ་ཅན་མ་ཡིན་པའི་ཕྱིར་རོ། །སྒྲ་མི་སྙན་དེ་ན་བདུན་པ་ངག་ཀྱལ་ཆགས་པས་གླུ་ལེན་པ་ཡང་དངོས་སུ་མངོན་གྱུར་ཡོད་ལ། སྲོག་གཅོད་སོགས་དྲུག་ཅར་ཡང་མངོན་སུམ་དུ་གྱུར་པའི་སྒོ་ནས་མེད་དེ། སྡིག་པ་ཅན་གྱི་བསམ་པ་མ་ཡིན་པའི་ཕྱིར་དང་། ཚེ་ངེས་པའི་ཕྱིར་དང་། རྫས་དང་བུད་མེད་ཡོངས་སུ་བཟུང་བ་མེད་པའི་ཕྱིར་དང་། འདི་དག་མི་ཚངས་པར་སྤྱོད་པ་ཡང་བུད་མེད་གང་དག་ལྷན་ཅིག་དགའ་བར་འགྱུར་བ་དེའི་ལག་ནས་བཟུང་ནས་ཤིང་དྲུང་དུ་འགྲོ་སྟེ། བགྲོད་བྱ་ཞིག་ཡིན་ན་ཤིང་གིས་བསྒྲིབས་པས་དེ་ལ་ཉལ་པོ་བྱེད་ལ། བགྲོད་བྱ་མིན་ན་མི་བསྒྲིབས་པས་ཉལ་(༡༡༣བ)
པོ་མི་བྱེད་དོ། །གསུམ་པ་ནི། འདོད་པ་གཞན་ན་མི་དགེ་བཅུ། །དམྱལ་བ་དང་སྒྲ་མི་སྙན་ལས་གཞན་པའི་འདོད་པའི་ཁམས་ན་མི་དགེ་བའི་ལས་ལམ་བཅུ་མངོན་གྱུར་གྱི་སྒོ་ནས་ཀྱང་ཡོད་དེ། དུད་འགྲོ་དང་ཡི་དྭགས་དང་ལྷའི་ནང་དུ་སྡོམ་མིན་དུ་མ་གཏོགས་པར་བར་མའི་མི་དགེ་བས་བསྡུས་པ་ཡོད་ལ། མིའི་ནང་དུ་སྡོམ་མིན་གྱིས་བསྡུས་པའང་ཡོད་དོ། །ལྷས་ལྷ་མི་གསོད་ཀྱང་ཡི་དྭགས་ལ་སོགས་པའི་འགྲོ་བ་གཞན་ན་གནས་པ་ནི་གསོད་དོ། །གཞན་ན་རེ། ལྷ་རྣམས་ཀྱང་ལྷས་གསོད་དེ། ལྷ་དང་ལྷ་མ་ཡིན་འཐབ་པའི་ཚེ། ཡན་ལག་དང་ཉིང་ལག་བཅད་ན་སྐྱེ་ལ། མགོ་བོ་དང་རྐེད་པ་བཅད་ན་སླར་འབྱར་བ་མེད་པས་འཆི་ཞེས་ཟེར་རོ། །གཉིས་པ་དགེ་བ་གང་ན་ཡོད་པ་ལ། ཡིད་ཀྱི་གསུམ་གང་ན་ཡོད་པ་དང་། ལུས་ངག་གི་བདུན་གང་ན་ཡོད་པའོ། །དང་པོ་ནི། དགེ་བ་གསུམ་ནི་ཐམས་ཅད་ན། །རྙེད་དང་མངོན་དུ་གྱུར་སྒོ་ནས། །ཡིད་ཀྱི་དགེ་བ་གསུམ་ནི་ཁམས་གསུམ་ཐམས་ཅད་དང་འགྲོ་བ་ལྔ་ཅར་ན་རྙེད་པ་སྟེ་ལྡན་པ་དང་མངོན་དུ་གྱུར་པའི་སྒོ་ནས་ཡོད་དོ། །གཉིས་པ་ལ། གཟུགས་མེད་དང་འདུ་ཤེས་མེད་པ་ན་གང་ཡོད་པ་དང་། དེ་གཉིས་ལས་གཞན་པའི་འགྲོ་བ་ན་གང་ཡོད་པའོ། །དང་པོ་ནི། གཟུགས་མེད་འདུ་ཤེས་མེད་སེམས་ཅན། །རྙེད་པས་བདུན་ཡོད། གཟུགས་མེད་པ་དང་འདུ་ཤེས་མེད་པའི་སེམས་ཅན་དག་ནི་ལུས་ངག་གི་དགེ་བའི་ལས་ལམ་བདུན་རྙེད་པ་སྟེ་ལྡན་པའི་སྒོ་ནས་ཡོད་དེ། གཟུགས་མེད་དུ་སྐྱེས་པའི་འཕགས་པ་ལ་ཟག་མེད་ཀྱི་སྡོམ་པ་འདས་མ་འོངས་དང་ལྡན་པའི་ཕྱིར་དང་། འདུ་ཤེས་མེད་པའི་སེམས་ཅན་ཡང་བསམ་གཏན་གྱི་སྡོམ་པ་དང་ལྡན་པའི་ཕྱིར། གཟུགས་མེད་པ་དག་ན་འཕགས་པས་འདོད་པར་སྐྱེས་པའི་འབྱུང་ཆེན་ལ་བརྟེན་པའི་ཟག་མེད་ཀྱི་སྡོམ་པ་ད་ལྟར་ཕྱིན་པར་བྱས་ཤིང་དེ་བསྐྱེད་ནས་འདས་པའི་དུས་སུ་ཕྱིན་པར་བྱས་པའི་འགགས་པ་ནི་འདས་པ་དང་ལྡན་ལ། དེ་བཞིན་བསམ་གཏན་དང་པོ་ནས་(༡༡༤ན)
བཞི་པའི་བར་ལ་བརྟེན་པ་ཅན་གྱི་ཟག་མེད་ཀྱི་སྡོམ་པ་འདས་པ་དེ་དང་གཟུགས་མེད་པ་ལྡན་ཏེ། སྐྱེ་བ་སྔ་མ་ལ་རྟེན་གང་དུ་སྐྱེས་པའི་འབྱུང་ཆེན་ལ་བརྟེན་པའི་ཟག་མེད་ཀྱི་སྡོམ་པ་འདས་པ་དེ་དང་ལྡན་པའི་ཕྱིར་རོ། །འདོད་པ་ནས་བསམ་གཏན་བཞི་པའི་བར་ས་ལྔ་ཅར་ལ་བརྟེན་པ་ཅན་ནི་དེར་སྐྱེས་ཀྱང་རུང་མ་སྐྱེས་ཀྱང་རུང་མ་འོངས་པ་དང་ལྡན་ཏེ། ཕྱིས་གར་སྐྱེས་ཀྱང་འགྲུབ་པའི་ནུས་པ་དང་ལྡན་པའི་ཕྱིར། གང་སྤེལ་དུ། དེའི་ཕྱིར་གང་དུ་བསྐྱེད་པ་དེ་འགགས་པ་དེ་ནི་སྐྱེས་ཟིན་པའི་ཕྱིར་ས་ཁོ་ནས་བསྙད་ལ། གང་མ་སྐྱེས་པ་དེ་ནི་ངེས་པ་མེད་པའི་ཕྱིར་ས་ལྔ་ཅར་ལ་རྣམ་པར་བཞག་གོ། །གཉིས་པ་ལ། སྤྱིར་བཏང་བ་དང་། དམིགས་བསལ་ལོ། །དང་པོ་ནི། ལྷག་བྱས་ན། །མངོན་དུ་གྱུར་པའི་སྒོ་ནས་ཀྱང་། །གཟུགས་མེད་པ་དང་འདུ་ཤེས་མེད་པ་དེ་དག་གི་ལྷག་མར་བྱས་པ་ཁམས་དང་འགྲོ་བ་གཞན་ན་དགེ་བའི་ལས་ལམ་བདུན་པོ་འདི་མངོན་དུ་གྱུར་པའི་སྒོ་ནས་ཀྱང་ཡོད་དེ། དུད་འགྲོ་དང་ཡི་དྭགས་ཀྱི་ནང་ན་ནི་སྡོམ་པས་བསྡུས་པ་མ་གཏོགས་པ་ཡོད་ལ། གཟུགས་ཁམས་ན་བསམ་གཏན་གྱིས་བསྡུས་པའི་སྡོམ་པ་རྣམས་ཡོད་ཅིང་། ལྷ་དང་བྱང་གི་སྒྲ་མི་སྙན་མ་གཏོགས་པ་དག་ན་སྡོམ་པ་དང་། བར་མས་བསྡུས་པ་གཉིས་ཡོད་ལ། སྡོམ་པ་ཡང་གསུམ་ཀ་ཅི་རིགས་པར་ཡོད་པའི་ཕྱིར། (འདིར་འཇམ་སྒེག་ན་རེ། དམྱལ་བ་དང་སྒྲ་མི་སྙན་མ་གཏོགས་པ་ཞེས་བྱ་བ་ནི། དེ་ན་ཡང་དག་པར་བླངས་པའི་ཚུལ་ཁྲིམས་མེད་པའི་ཕྱིར་རོ། །ཊི་ཀ་བྱེད་པ་འཆད་མོད་ཀྱི། དེ་ལྟར་ན་ཡི་དྭགས་དང་དུད་འགྲོ་མ་གཏོགས་པའི་ནང་དུ་ཐལ་བའི་ཕྱིར། དེས་ན་དམྱལ་བ་ན་ནི་སྡུག་བསྔལ་གྱི་རྣམ་པར་གཡེངས་པས་སྲོག་གཅོག་སྤང་བ་ལ་སོགས་པ་སེམས་པ་སྐབས་མེད་པའི་ཕྱིར་དང་། སྒྲ་མི་སྙན་ན་ནི་ཤིན་ཏུ་བླུན་པའི་ཕྱིར་དེ་དག་སྤོང་བའི་སེམས་པ་མེད་དོ། །སེམས་པ་མེད་པའི་སྲོག་གཅོད་པ་མེད་པ་ཙམ་གྱིས་ནི་དགེ་བར་མི་འགྱུར་ཏེ། རྡོའི་དུམ་བུ་ལ་སོགས་པའང་དགེ་བར་ཐལ་བའི་ཕྱིར། འོ་ན་དུད་འགྲོའང་ཤིན་ཏུ་བླུན་པའི་ཕྱིར་སྲོག་གཅོད་སྤོང་བ་ལ་སོགས་པ་མེད་པར་འགྱུར་རོ་ཞེ་ན། དུད་འགྲོ་ཁ་གཅིག་ནི་བློ་གསལ་བའི་ཕྱིར་ཞེས་ཟེར་རོ། །མཆན།) (༡༡༤བ)
གཉིས་པ་ནི། དམྱལ་བཅས་སྒྲ་མི་སྙན་མ་གཏོགས། །འོན་ཀྱང་དམྱལ་བ་དང་བཅས་པ་བྱང་གི་སྒྲ་མི་སྙན་པ་མ་གཏོགས་ཏེ། དེ་ན་ཡང་དག་པར་བླངས་པའི་ཚུལ་ཁྲིམས་མེད་པའི་ཕྱིར། བཞི་པ་ལས་ལམ་གྱི་འབྲས་བུ་ལ། དངོས་དང་། ཞར་བྱུང་ངོ་། །དང་པོ་ལ། དམ་བཅའ་དང་། རྒྱུ་མཚན་ནོ། །དང་པོ་ནི། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་བུ་འབྱིན་པར་འདོད། །དགེ་མི་དགེའི་ལས་ལམ་བཅུ་པོ་ཐམས་ཅད་བདག་པོའི་འབྲས་བུ་དང་། རྒྱུ་མཐུན་གྱི་འབྲས་བུ་དང་རྣམ་སྨིན་གྱི་འབྲས་བུ་འབྱིན་པར་འདོད་དེ། མི་དགེ་བ་སྦྱོར་དངོས་མཇུག་གི་སྐབས་སུ་བསྟེན་གོམས་ལན་མང་དུ་བྱས་པ་ཐམས་ཅད་ཀྱིས་དམྱལ་སོགས་ངན་སོང་གི་ནང་དུ་སྐྱེ་བར་འགྱུར་བ་ནི་རྣམ་སྨིན་གྱི་འབྲས་བུ་ཡིན་ནོ། །བརྒྱ་ལ་དགེ་བའི་ལས་གཞན་གྱིས་མི་དང་སྐལ་མཉམ་དུ་སྐྱེས་ནའང་། སྲོག་གཅོད་པས་ནི་ཚེ་ཐུང་འགྱུར། །མ་བྱིན་ལེན་པས་ལོངས་སྤྱོད་ཕོངས། །ལོག་ གཡེམ་དགྲར་བཅས་ཆུང་མ་ཅན། །རྫུན་སྨྲས་སྐུར་པ ་མང་བར་འགྱུར། །རྩུབ་པོས་ཡིད་མི་འོང་སྒྲ་ཐོས། །ཀྱལ་པས་ཚིག་བཟུང་མི་འོས་འགྱུར། །གསུམ་གྱིས་དུག་གསུམ་ཤས་ཆེར་འགྱུར། །ལོག་ལྟས་ལྷག་པར་གཏི་མུག་མང་། །འདི་ནི་མི་དགེ་དེ་དག་གི། །རྒྱུ་མཐུན་པ་ཡི་འབྲས་བུ་ཡིན། །སྒྲ་མི་སྙན་པས་སྟོང་ཐུབ་རུང་། །ལུས་འཕགས་པོས་ཕྱེད་དང་སུམ་བརྒྱ་ཐུབ་རུང་། བ་ལང་སྤྱོད་ཀྱིས་ལྔ་བརྒྱ་ཐུབ་རུང་། འཛམ་བུ་གླིང་པས་དང་པོ་ལོ་དཔག་མེད་ནས་ཐ་མ་ལོ་བཅུ་པ་ཡིན་རུང་དེ་ཐམས་ཅད་དགེ་བའི་རྣམ་སྨིན་ཡིན་ན། དེ་སྲོག་གཅོད་པའི་རྒྱུ་མཐུན་པའི་འབྲས་བུ་ཇི་ལྟར་ཡིན་ཅེ་ན། མི་རྣམས་ཀྱི་ཚེ་དེ་ཉིད་མི་དགེ་བ་དེའི་འབྲས་བུ་ཡིན་ཅེས་ནི་མི་ཟེར་(༡༡༥ན)
རོ། །སྲོག་གཅོད་མི་དགེ་བའི་ལས་དེའི་འབྲས་བུ་ཚེ་ཐུང་བས་ཚེ་རིང་བ་དེའི་བར་ཆད་བྱེད་པའི་རྒྱུ་ཡིན་པར་རིག་པར་བྱའོ། །སྲོག་གཅོད་པ་ཧ་ཅང་ཀུན་ཏུ་བསྟེན་པ་ནི་ཕྱིའི་དངོས་པོ་སྨན་དང་ས་ལ་སོགས་པ་རྣམས་གཟི་མདངས་མཐུ་ཆུང་བར་འགྱུར་རོ། །མ་བྱིན་པ་ལེན་པས་ནི། སེར་བ་དང་། ཆར་མང་བ་དང་། རྡུལ་འབབ་ པ་དང་། བཙའ་འབྱུང་བ་ལ་སོགས་པས་འབྲུ་མ་རུང་བར་འགྱུར་རོ། །འདོད་པས་ལོག་པར་གཡེམ ་པས་ནི་རྡུལ་གྱིས་ཁེབས་པར་འགྱུར་རོ། །རྫུན་དུ་སྨྲ་བས་ནི་དྲི་ང་བར་འགྱུར་རོ། །ཕྲ་མས་ནི་ས་ཕྱོགས་ཐུག་ཐུག་ཅན་དུ་འགྱུར་རོ། །ཚིག་རྩུབ་པོས་ནི་ས་བ་ཚྭའི་སྒོ་ཅན་ནི་འབྲུ་མི་སྐྱེ་བའི་ཕྱོགས་སོ། །དགོན་དུང་ཅན་ནི་ཆུ་མེད་པ་མྱ་ངམ་གྱི་ཕྱོགས་དང་། ཐ་ཆད་ནི་ཀླ་ཀློའི་ཡུལ་དང་། སྡིག་པ་ཅན་གྱིས་ནི་རི་དྭགས་དང་ཕག་གིས་ཉེ་བར་སྤྱོད་པའི་ཞིང་དག་གོ། །ཚིག་ཀྱལ་པས་ན་དུས་གོ་ལྡོག་པ་སྟེ། གང་དུ་ཆར་འབབ་པའི་དུས་མི་འབབ། གྲང་བའི་དུས་དེར་མི་གྲང་། དྲོ་བའི་དུས་དེར་མི་དྲོ་བའོ། །བརྣབ་སེམས་ཀྱིས་ནི་འབྲས་བུ་ཕྲ་མོར་འགྱུར་རོ། །གནོད་སེམས་ཀྱིས་ནི་འབྲས་བུ་ཁ་བ་སྟེ་སྨིན་པ་མ་སྙོམས་པར་འགྱུར་རོ། །ལོག་པར་ལྟ་བས་ནི་འབྲས་བུ་ཆུང་ངུའམ་འབྲས་བུ་མེད་པར་འགྱུར་རོ། །འདི་ནི་དེ་དག་གི་བདག་འབྲས་སོ། །ཅི་སྦྱོར་བའི་ལས་དེ་ཁོ་ནས་འདིར་ཚེ་ཐུང་བར་འགྱུར་རམ། འོན་ཏེ་སྦྱོར་བའི་ལས་ལས་གཞན་པ་ཞིག་གིས་ཚེ་ཐུང་བར་འགྱུར་རམ་ཞེ་ན། ཁ་ཅིག །སྦྱོར་བའི་ལས་ཁོ་ནས་ཚེ་ཐུང་བར་འགྱུར་བའི་འབྲས་བུ་བསྐྱེད་པ་ཡིན་ཏེ། ཚེ་ཐུང་བ་ནི་སེམས་ཅན་གྱི་རྒྱུད་ལ་ཡོད་པ་གང་ཞིགདེའི་ཚེ་ནི་རྣམ་སྨིན་གྱི་འབྲས་བུ་ཡིན་ལ། གཟི་བརྗིད་ཆུང་བ་སོགས་ཕྱི་རོལ་ན་ཡོད་པ་ནི་རྒྱུ་མཐུན་པའི་འབྲས་བུ་ཡིན་པའི་ཕྱིར་(༡༡༥བ)
ཞེས་ཟེར་རོ། །གཞན་དག་ནི། སྲོག་གཅོད་པའི་སྦྱོར་བས་བསད་པར་བྱ་བའི་སེམས་ཅན་ཤིན་ཏུ་སྡུག་བསྔལ་བར་བྱས་པས་དམྱལ་སོགས་སུ་སྐྱེས་ནས་སྡུག་བསྔལ་མི་བཟད་པ་མྱོང་བ་ཡིན་ལ། བསད་བྱ་དེའི་སྲོག་སྤངས་པ་དངོས་ཀྱིས་ཁོའི་ཚེ་ཐུང་བར་བྱས་པས་གསོད་བྱེད་ཚེ་ཐུང་ངུར་བསྐྱེད་པའོ། །དེ་ལྟར་ན་སྦྱོར་བའི་འབྲས་བུ་དམྱལ་བ། དངོས་ཀྱི་འབྲས་བུ་ཚེ་ཐུང་བ་ཡིན་ན། ལུང་ལས། སྲོག་གཅོད་པ་ཀུན་ཏུ་བསྟེན་པ་དང་། གོམས་པར་བྱས་པ་དང་། ལན་མང་དུ་བྱས་པ་དག་གིས་དམྱལ་བར་སྐྱེ། ཟེར་བས་དངོས་གཞི་དང་མཇུག་གིས་ཀྱང་དམྱལ་བར་སྐྱེ་བར་གསུངས་པ་དང་འགལ་སྙམ་ན། མི་སྐྱོན་ཏེ། སྲོག་གཅོད་པ་ནི་དངོས་དང་སྦྱོར་བ་ནི་འཁོར་ཡིན་པས་འཁོར་བཅས་སྨོས་པའི་ཚིག་གིས་དེར་འགྲུབ་པའི་ཕྱིར། ཞེས་ཟེར་རོ། །རྒྱུ་མཐུན་པའི་འབྲས་བུ་བཤད་པ་གང་ཡིན་པ་དེ་ཡང་རང་རྒྱུད་ལ་ཡོད་པ་རྣམ་སྨིན་གྱི་འབྲས་བུ་དང་། གཞན་ལ་ཡོད་པ་བདག་པོའི་འབྲས་བུ་སྟེ་གཉིས་པོ་འདི་ལས་ནི་མི་འདྲའོ། །སྲོག་ཡིད་དུ་འོང་བ་ཆད་པ་དང་། ལོངས་སྤྱོད་ཀྱིས་ཕོངས་པ་ལ་སོགས་པའི་འདྲ་བའི་ཁྱད་པར་ལས། དེ་སྐད་དུ། བརྒྱ་ལ་མི་རྣམས་དང་སྐལ་བ་མཉམ་པར་འོང་ན་ཚེ་ཐུང་བར་འགྱུར་ལ། ལོངས་སྤྱོད་ཀྱིས་ཕོངས་པར་འགྱུར་རོ། །ཞེས་བཤད་ཟིན་ཏོ། །གཉིས་པ་ནི། སྡུག་བསྔལ་ཕྱིར་དང་བསད་ཕྱིར་དང་། །གཟི་བྱིན་མེད་ཕྱིར་འབྲས་རྣམ་གསུམ། །ལས་ལམ་འདི་དག་གིས་འབྲས་བུ་རྣམ་པ་གསུམ་སྐྱེད་པར་བྱེད་དེ། སྲོག་གཅོད་པ་ལྟ་བུ་ལ་མཚོན་ན། ཕ་རོལ་པོ་སྡུག་བསྔལ་བར་བྱས་པའི་ཕྱིར། རྣམ་སྨིན་གྱི་འབྲས་བུ་དམྱལ་བར་སྡུག་བསྔལ་བར་འགྱུར་བ་དང་། བསད་པའི་ཕྱིར་རྒྱུ་མཐུན་གྱི་འབྲས་བུས་ཚེ་ཐུང་བར་འགྱུར་བ་དང་། སྙིང་གའི་ཕྱོགས་ན་ཡོད་པའི་གཟི་བྱིན་མེད་པར་བྱས་པའི་ཕྱིར་བདག་འབྲས་ཕྱིའི་སྨན་རྣམས་གཟི་མཐུ་ཆུང་བར་བྱེད་དོ། །གཞན་ལ་སྦྱར་(༡༡༦ན)
བ་ནི་རྫས་ཀྱི་བདག་པོ་སྡུག་བསྔལ་བསྐྱེད་པ་དང་། ལོངས་སྤྱོད་ཀྱིས་ཕོངས་པར་བྱས་པ་དང་། རྫས་ཀྱི་དབང་གིས་གཟི་བྱིན་ཅན་དུ་འགྱུར་བའི་རྒྱུ་ལོངས་སྤྱོད་མེད་པས་གཟི་བྱིན་མེད་པར་བྱས་པའི་ཕྱིར་འབྲས་བུ་རྣམ་པ་གསུམ་དུ་འགྱུར་རོ། །ཇི་ལྟར་གཟི་བྱིན་མེད་པར་བྱས་སྙམ་ན། ཁོའི་ཡོ་བྱད་མེད་པས་ལུས་བརྟས་པར་བྱེད་པ་མེད་པར་བྱས་པའོ། །དེའི་བདག་འབྲས་ནི་སེར་བ་དང་ཆར་ཆེས་པར་འགྱུར་རོ། །གཞན་གྱི་ཆུང་མ་ལ་ཉལ་པོ་བྱས་པས་གཞན་སྡུག་བསྔལ་བསྐྱེད་པ་དང་། ཆུང་མ་དགྲ་དང་བཅས་པར་བྱས་པ་དང་། འཇིག་རྟེན་གཟི་བྱིན་གང་གི་གཟི་དང་བཅས་པ་ཞེས་པའི་གཟི་བརྗིད་མེད་པར་བྱས་པའི་འདོད་ལོག་གིས་བདག་འབྲས་ཡུལ་རྡུལ་གྱིས་འཁྲིགས་པ་སོགས་གཟི་མདངས་སྣུམ་པ་མེད་པར་བྱེད་དོ། །དེ་ལྟར་གཞན་ལའང་སྦྱར་རོ། །དགེ་བའི་ལས་ལམ་ལའང་དེ་ལྟར་སྦྱར་བ་ནི་སྲོག་གཅོད་སྤོང་བ་བསྟེན་གོམས་ལན་མང་དུ་བྱས་པས་ལྷའི་ནང་དུ་སྐྱེ་ལ། བརྒྱ་ལ་མི་དང་སྐལ་མཉམ་དུ་འོང་ན་ཚེ་རིང་བར་འགྱུར་ཏེ་ཞེས་སོགས་མི་དགེ་བ་ལས་བཟློག་ནས་དེ་ལྟར་སྦྱར་བར་བྱའོ། །གཉིས་པ་ཞར་བྱུང་ལ། ངག་གི་ལོག་འཚོ་ངོས་བཟུང་བ། དེ་ལོགས་སུ་འཇོག་པའི་རྒྱུ་མཚན། གཞན་ལུགས་འགོག་པའོ། །དང་པོ་ནི། ལུས་དང་ངག་ལས་ཆགས་ལས་སྐྱེས། །ལོག་འཚོ། བཅོམ་ལྡན་འདས་ཀྱིས་ལོག་པའི་ངག་དང་ལོག་པའི་ལས་ཀྱི་མཐའ་དང་ལོག་པའི་འཚོ་བ་ཞེས་གང་གསུངས་པ་དེ་གཉིས་ལས་གཞན་པའི་ལོག་འཚོ་གང་ཡིན་ཅེ་ན། གཞན་ནི་མེད་ཀྱི། ལུས་ངག་གི་ལས་ཀྱི་མཐའ་ཞེ་སྡང་ལས་སྐྱེས་པ་དང་གཏི་མུག་ལས་སྐྱེས་པ་ནི་ལོག་པའི་ངག་དང་། ལོག་པའི་ལས་ཀྱི་མཐའ་ཁོ་ན་ཡིན་ལ། ལུས་དང་ངག་གི་ལས་ཆགས་པ་ལས་སྐྱེས་པ་ནི་ལོག་པའི་ངག་དང་ལས་ཀྱི་(༡༡༦བ)
མཐའ་ཡང་ཡིན་ལ་ལོག་པའི་འཚོ་བ་ཡང་ཡིན་ནོ། །གཉིས་པ་ནི། སྦྱང་དཀའི་ཕྱིར་ལོགས་ཤིག །བསྟན་ཏོ། ཆགས་པའི་ཆོས་ནི་ཕྲ་མོ་ཡིན་ཀྱང་ཡིད་འཕྲོག་བྱེད་ཡིན་པས། དེས་བསླང་བའི་ལས་ལས་ཤིན་ཏུ་མཁས་པ་རྣམས་ཀྱིས་ཀྱང་སེམས་སྲུང་བ་སླ་བ་མ་ཡིན་པའི་ཕྱིར། དེ་ནི་ཇི་སྲིད་འཚོའི་བར་དུ་སྦྱང་དཀའ་བའི་ཕྱིར་བསྒྲིམ་པར་བྱ་བ་ཡིན་པས་ལོག་པའི་ངག་དང་ལས་ཀྱི་མཐའ་གཉིས་ལས་ལོགས་ཤིག་ཏུ་བསྟན་ཏོ། །འདིར་གསུངས་པ། ངོ་མཚར་དང་བཀྲ་ཤིས་དང་ཚེས་གྲངས་དང་རྒྱུ་སྐར་ལ་སོགས་པའི་མ་ཤིས་པའམ་ཉེས་པས་ཚེ་འདིར་མི་འདོད་པ་བྱུང་བར་འདོད་དེ། སྔོན་གྱི་ལས་ཀྱི་ཉེས་པར་མི་ཤེས་པའི་རྟག་ཏུ་ལྟ་བ་སྣ་ཚོགས་པ་ཅན་གྱི་ཁྱིམ་པས་ལྟ་བ་སྦྱངས་དཀའ་ལ། རབ་བྱུང་ལ་དེ་མེད་ཀྱང་འཚོ་བ་གཞན་ལ་རགས་ལས་པས། ཚུལ་འཆོས་དང་། ཁ་གསགས་དང་། གཞོགས་སློང་དང་། ཐོབ་འཇལ་དང་། རྙེད་པས་རྙེད་པ་འཚོལ་འདོད་བྲལ་བའི་དགེ་སློང་གིས་འཚོ་བ་ནི་རྙེད་དཀའ་ལ། རྙེད་དཀའ་བས་དེའི་ཕྱིར་ལོག་འཚོ་སྤང་དཀའ་བར་བསྟན་པ་ཡིན་ནོ། །གསུམ་པ་[གཞན་ལུགས་དགག་པ་]ལ། འདོད་པ་བརྗོད་པ་དང་། དེ་དགག་པའོ། །དང་པོ་ནི། གལ་ཏེ་ཡོ་བྱད་ལ། །ཆགས་བསླང་། གལ་ཏེ། འཚོ་བའི་ཡོ་བྱད་ལ་ཆགས་པས་བསླང་བའི་ལུས་དང་ངག་གི་ལས་ཁོ་ན་ལོག་འཚོ་ཡིན་གྱི། གཞན་ནི་མ་ཡིན་ཏེ། བདག་དགའ་བའི་གླུ་གར་བྱེད་པ་སོགས་ལོག་འཚོར་མི་རིགས་སོ་སྙམ་མོ། །གཉིས་པ་ནི། མདོ་དང་འགལ་ཕྱིར་མིན། །སེམས་པ་དེ་ནི་འཐད་པ་མིན་ཏེ། ཚུལ་ཁྲིམས་ཀྱི་ཕུང་པོའི་མདོ་ལས་གླང་པོ་དང་རྟ་དང་ཤིང་རྟ་དང་རྐང་ཐང་དབྱུག་པ་ཁུ་ཚུར་གྱིས་འཐབ་པ་ལ་སོགས་ལ་ལྟ་བ་དང་སྒྲ་སྒྲོག་པ་ལ་ཉན་པ་ཡང་ལོག་པའི་འཚོ་བར་བཞག་པ་དང་འགལ་བའི་ཕྱིར། ཁྱབ་སྟེ། མ་གནང་བའི་ཡུལ་ཡང་དག་པ་མིན་པ་ལ་ལོངས་སྤྱོད་པར་བྱས་པའི་(༡༡༧ན)
ཕྱིར། གསུམ་པ་ལས་གང་འབྲས་བུ་དུ་དང་བཅས་པ་ལ། ཟག་བཅས་ཟག་མེད་ཀྱི། དགེ་སོགས་ཀྱི། དུས་གསུམ། རང་ས་དང་གཞན་ས། སློབ་མི་སློབ་སོགས། མཐོང་སྤང་སོགས་ཕན་ཚུན་འབྲས་བུ་དུ་དང་བཅས་པའོ། །དང་པོ་ལ། སྤོང་ལམ་འབྲས་བུ་དུ་དང་བཅས་པ། སྤོང་ལམ་ཟག་མེད། སྤོང་ལམ་མ་ཡིན་པའི་ཟག་བཅས། སྤོང་ལམ་མ་ཡིན་པའི་ཟག་མེད་དང་ལུང་མ་བསྟན་འབྲས་བུ་དུ་དང་བཅས་པའོ། །དང་པོ་ནི། དྲི་བཅས་སྤོང་བའི་ལམ་དག་གི། །ལས་ནི་ལྔ་ཡི་འབྲས་བུར་བཅས། །གོང་དུ་འབྲས་བུ་ལྔ། བདག་པོ་སྐྱེས་བུ་བྱེད་པ་དང་། །རྒྱུ་མཐུན་རྣམ་སྨིན་བྲལ་བའོ། །ཞེས་བཤད་པ་དེ་ལས། ལས་གང་འབྲས་བུ་དུ་དང་བཅས་ཞེ་ན། དྲི་མ་ཟག་པ་དང་བཅས་པ་ཉོན་མོངས་པ་སྤོང་བར་བྱེད་པའི་སྤོང་བའི་ལམ་བར་ཆད་མེད་པའི་ལམ་དག་གི་ནི་ལས་གང་ཡིན་པ་དེ་ནི་འབྲས་བུ་ལྔ་ཡིས་འབྲས་བུར་བཅས་པ་ཡིན་ཏེ། དེའི་རྣམ་སྨིན་གྱི་འབྲས་བུ་ནི། རང་སར་གཏོགས་པའི་རྣམ་སྨིན་ཡིད་དུ་འོང་བ་ཡིན་ཏེ། དཔེར་ན། བསམ་གཏན་དང་པོའི་མི་ལྕོགས་མེད་པའི་སྤོང་བའི་ལམ་དེའི་རྣམ་སྨིན་བསམ་གཏན་དང་པོར་སྐྱེས་པ་ལྟ་བུའོ། །རྒྱུ་མཐུན་གྱི་འབྲས་བུ་ནི། ཏིང་ངེ་འཛིན་ལས་སྐྱེས་པའི་ཆོས་འདྲ་བ་ཕྱི་མ་རྣམས་སོ། །བྲལ་འབྲས་ནི། བྲལ་བ་རང་སྤངས་པ་གང་ཡིན་པ་དེ་ཡིན་ནོ། །སྐྱེས་བུ་བྱེད་འབྲས་ནི། དེས་དྲངས་པའི་ཆོས་རྣམ་གྲོལ་གྱི་ལམ་དང་། དེ་དང་ལྷན་ཅིག་འབྱུང་བ་ཚོར་སོགས་དང་། མ་འོངས་པའི་ཆོས་ཐོབ་པ་དང་སྤངས་པ་བྲལ་འབྲས་དེའང་ཡིན་ནོ། །བདག་པོའི་འབྲས་བུ་ནི། སྔར་བྱུང་རྣམས་མ་གཏོགས་པ་རང་གི་ངོ་བོ་ལས་གཞན་འདུ་བྱེད་ཐམས་ཅད་དེ། ཇི་སྐད་དུ། སྔར་བྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་བདག་པོའི་འབྲས། །ཞེས་འབྱུང་ངོ་། །གཉིས་པ་ནི། དྲི་མེད་བཞི་ཡི། སྤོང་བའི་ལམ་དྲི་མ་མེད་པའི་(༡༡༧བ)
ལས་གང་ཡིན་པ་དེ་ནི་འབྲས་བུ་བཞི་ཡིས་འབྲས་བུ་དང་བཅས་པ་སྟེ། ཟག་མེད་པ་རྣམ་སྨིན་མེད་པས་རྣམ་སྨིན་གྱི་འབྲས་བུ་མ་གཏོགས་སོ། །ལྷག་མ་སྔ་མ་བཞིན་ནོ། །གསུམ་པ་ནི། ཟག་བཅས་གཞན། །དགེ་དང་མི་དགེ་གང་ཡིན་པའང་། །སྤོང་ལམ་ལས་གཞན་པའི་ལས་དགེ་བ་ཟག་བཅས་དང་མི་དགེ་བ་གང་ཡིན་པ་དེ་ཡང་འབྲས་བུ་བཞིས་འབྲས་བུ་དང་བཅས་པ་སྟེ། སྤོང་ལམ་མིན་པས་བྲལ་འབྲས་མ་གཏོགས་སོ། །བཞི་པ་ནི། ཟག་པ་མེད་པ་ལྷག་མ་དང་། །ལུང་བསྟན་མིན་གང་གསུམ་གྱིས་སོ། །སྤོང་ལམ་གྱི་ལྷག་མ་སྤོང་ལམ་ལས་གཞན་པ་སྦྱོར་བ་དང་རྣམ་གྲོལ་དང་ཁྱད་པར་གྱི་ལམ་དག་ལ་ཡོད་པའི་ལས་ཟག་པ་མེད་པ་དང་། སྒྲིབ་དང་མ་སྒྲིབ་པའི་ལུང་བསྟན་མིན་པའི་ལས་གང་ཡིན་ནི་རྣམ་སྨིན་དང་བྲལ་བ་མ་གཏོགས་པ་འབྲས་བུ་གསུམ་གྱིས་འབྲས་བུ་དང་བཅས་ཏེ་སྔ་མ་ཟག་མེད་ཡིན་པའི་ཕྱིར་དང་། སྤོང་ལམ་མ་ཡིན་པའི་ཕྱིར་རོ། །ཕྱི་མ་ནི་སྤོང་ལམ་མིན་ཅིང་ལུང་མ་བསྟན་གྱི་ལས་ཡིན་པའི་ཕྱིར། གཉིས་པ་དགེ་སོགས་ཀྱི་འབྲས་བུ་དུ་དང་བཅས་པ་ལ། དགེ་བའི། མི་དགེ་བའི། ལུང་མ་བསྟན་གྱི་འབྲས་བུ་དུ་དང་བཅས་པའོ། །དང་པོ་ནི། དགེ་བའི་དགེ་ལ་སོགས་པ་ནི། །བཞི་དང་གཉིས་དང་དེ་བཞིན་གསུམ། །དགེ་བའི་འབྲས་བུ་ཆོས་དགེ་བ་ཡིན་ན་འབྲས་བུ་བཞི་ཡིན་ཏེ། རྣམ་སྨིན་གྱི་འབྲས་བུ་མ་གཏོགས་ཏེ་ལུང་མ་བསྟན་ཡིན་པའི་ཕྱིར་རོ། །དགེ་བའི་འབྲས་བུ་སོགས་པས་ནི། མི་དགེ་བ་ཡིན་ན་སྐྱེ་བདག་གཉིས་ཡིན་ཏེ། རྒྱུ་མཐུན་གྱི་འབྲས་བུ་མེད་དེ། སྐལ་མཉམ་གྱི་རྒྱུ་དགེ་བ་ཡིན་པ་ལས་མི་དགེ་བ་མ་ཡིན་པའི་ཕྱིར། རྣམ་སྨིན་གྱི་འབྲས་བུ་ཡང་མེད་དེ། རྣམ་སྨིན་ལུང་མ་བསྟན་ཡིན་གྱི་མི་དགེ་བ་མ་ཡིན་པའི་ཕྱིར། བྲལ་བའི་འབྲས་བུ་མེད་དེ་མི་དགེ་བ་ཡིན་པའི་ཕྱིར། དེ་བཞིན་དུ་དགེ་བའི་འབྲས་བུ་ལུང་མ་བསྟན་ཡིན་ན་གསུམ་ཡིན་ཏེ། རྒྱུ་མཐུན་དང་བྲལ་བ་མ་གཏོགས་པའི་ཕྱིར། གཉིས་པ་ནི། མི་དགེའི་དགེ་སོགས་གཉིས་དང་ནི། །གསུམ་དང་བཞི་སྟེ་རིམ་པ་བཞིན། །མི་དགེ་བའི་འབྲས་བུ་དགེ་བ་ཡིན་ན་རིམ་པ་བཞིན་དུ་སྐྱེ་བདག་གཉིས་ཡིན་ཏེ། བར་མ་ཆད་པར་སྐྱེད་པར་བྱེད་པ་དང་། (༡༡༨ན)
གེགས་མི་བྱེད་པ་ཙམ་དུ་བསྐྱེད་པའི་ཕྱིར། སོགས་པས་མི་དགེ་བ་ཡིན་ན་གསུམ་ཡིན་ཏེ། རྣམ་སྨིན་མེད་དེ། མི་དགེ་བ་རྣམ་སྨིན་མ་ཡིན་པའི་ཕྱིར་དང་། བྲལ་བ་མེད་དེ། མི་དགེ་བ་དང་བཅས་པ་ཡིན་པའི་ཕྱིར། ལུང་མ་བསྟན་ཡིན་ན་བཞི་ཡིན་ཏེ། བྲལ་བ་མ་གཏོགས་པའི་ཕྱིར། འདིར་མི་དགེ་བ་རྣམ་སྨིན་དང་བཅས་པ་དང་། ལུང་མ་བསྟན་རྣམ་སྨིན་མེད་པ་མི་འདྲ་བ་ལ་རྒྱུ་མཐུན་པ་འབྲས་བུ་ཇི་ལྟར་འཇོག་སྙམ་ན། ཉེས་པ་མེད་དེ། མི་དགེ་བ་དང་། སྒྲིབ་ལུང་མ་བསྟན་དེ་ཉོན་མོངས་ཅན་དུ་འདྲ་བའི་ཕྱིར། སྐལ་མཉམ་གྱི་རྒྱུར་རུང་སྟེ། མི་དགེ་བ་ཡང་སྒྲིབ་ལ་ལུང་མ་བསྟན་གྱི་རྒྱུ་མཐུན་གྱི་འབྲས་བུར་རུང་ལ། སྒྲིབ་ལ་ལུང་མ་བསྟན་འཇིག་ལྟ་དང་མཐར་ལྟ་ནི། མི་དགེ་བ་ཀུན་འགྲོ་སྡུག་ཀུན་མཐོང་བས་སྤང་བྱ་ཆགས་སོགས་ཀྱི་རྒྱུ་མཐུན་པའི་འབྲས་བུ་ཡིན་པའི་ཕྱིར། གསུམ་པ་ནི། ལུང་བསྟན་མིན་གྱི་དགེ་ལ་སོགས། །དེ་དག་གཉིས་དང་གསུམ་དང་གསུམ། །ལས་ལུང་བསྟན་མིན་པ་ཉིད་ཀྱི་འབྲས་བུ་དགེ་བ་ཡིན་ན་དེ་མ་ཐག་ཏུ་སྐྱེ་བས་སྐྱེས་བུ་བྱེད་འབྲས་དང་བདག་འབྲས་དེ་དག་གཉིས་དང་ངོ་། །མི་འདྲ་བས་རྒྱུ་མཐུན་མེད། དགེ་བ་བསྐྱེད་པས་བྲལ་བ་མེད། འབྲས་བུ་དགེ་བར་འདུག་པས་རྣམ་སྨིན་མེད་ལ། ལུང་མ་བསྟན་དང་རྣམ་སྨིན་བསྐྱེད་པ་ལ་ས་བོན་རུལ་པ་ལྟ་བུ་ཡིན། ལ་སོགས་པས་མི་དགེ་བ་ནི། མི་དགེ་བ་བསྐྱེད་པས་བྲལ་བ་དང་། མི་དགེ་བ་རྣམ་སྨིན་མིན་པས་རྣམ་སྨིན་མ་གཏོགས་པ་གསུམ་དང་བཅས་པ་ཡིན་ཏེ། དངོས་སུ་བསྐྱེད་པས་སྐྱེས་བུ་བྱེད་པ་ཡོད། བདག་པོ་ནམ་ཡང་ཡོད། ལུང་མ་བསྟན་གྱིས་མི་དགེ་བ་བསྐྱེད་པ་ལ་ཉོན་མོངས་ཅན་དུ་འདྲ་བས་རྒྱུ་མཐུན་ཡོད་པ་ནི། སྡུག་བསྔལ་མཐོང་སྤང་ནས་སྒོམ་སྤང་གི་བར་མི་དགེ་བའི་རིས་ལྔ་རྣམས་ནི་ལུང་མ་བསྟན་འཇིག་ལྟ་མཐར་ལྟ་གཉིས་ཀྱི་རྒྱུ་མཐུན་གྱི་འབྲས་བུ་ཡོད་པའི་ཕྱིར། འབྲས་བུ་ལུང་མ་བསྟན་ནི་རྣམ་སྨིན་དང་(༡༡༨བ)
བྲལ་བ་མ་གཏོགས་པ་གསུམ་པོ་དེ་དག་ཁོ་ན་ཡིན་ནོ། །གསུམ་པ་དུས་གསུམ་གྱི་འབྲས་བུ་ལ། འདས་པའི། ད་ལྟར་བའི། མ་འོངས་པའི་འབྲས་བུའོ། །དང་པོ་ནི། འདས་པའི་ཐམས་ཅད་བཞི་ཡིན་ནོ། །འདས་པའི་ལས་ཀྱི་འབྲས་བུ་དུས་གསུམ་པ་ཐམས་ཅད་ཀྱི་ཆོས་ནི་དུས་སུ་མ་གཏོགས་པའི་བྲལ་འབྲས་མ་གཏོགས་པ་བཞིའོ། །དེའང་འདས་པས་འདས་པ་བསྐྱེད་པ་ལ་བཞི། འདས་པས་ད་ལྟར་བསྐྱེད་པ་ལ་བཞི། འདས་པས་མ་འོངས་པ་བསྐྱེད་པ་ལ་བཞི་སྟེ། འདི་ལྟར་འདས་པས་འདས་པ་བསྐྱེད་པ་བཞི་ནི། འདས་པའི་ལས་ཀྱི་རྣམ་སྨིན་འདས་པ་ཕྱི་མ། སྐྱེས་བུ་བྱེད་པ་ནི་དེས་དྲངས་བའི་འདས་པ་ལྷན་ཅིག་སྐྱེས་པའམ། ཕྱིས་མཇུག་ཐོགས་སུ་འདས་པ། བདག་པོའི་འབྲས་བུ་ནི། འདས་པ་དེ་དང་ལྷན་ཅིག་འབྱུང་བ་རང་གི་ངོ་བོ་མ་གཏོགས་པ་རྣམས་དང་ཕྱིས་འབྱུང་བའི་ཆོས་རྣམས་སོ། །རྒྱུ་མཐུན་པའི་འབྲས་བུ་ནི་ཕྱིས་འབྱུང་བའི་འདྲ་བའོ། །འདས་པས་མ་འོངས་པ་བསྐྱེད་པ་བཞི་ནི། འདས་པའི་རྣམ་སྨིན་འབྲས་བུ་མ་འོངས་པ་དེ་འདས་པའི་རྣམ་སྨིན་ཡིན་ནོ། །སྐྱེས་བུ་བྱེད་པའི་འབྲས་བུ་ནི་གང་གི་སྟོབས་ཀྱིས་ཆོས་མ་འོངས་པ་ཐོབ་པའོ། །བདག་པོའི་འབྲས་བུ་ནི་མ་འོངས་པ་གང་ཡིན་པའོ། །རྒྱུ་མཐུན་གྱི་འབྲས་བུ་ནི་དེ་དང་འདྲ་བའི་མ་འོངས་པའོ། །འདས་པས་ད་ལྟར་བསྐྱེད་པ་ཡང་དེ་དང་འདྲའོ། །གཉིས་པ་ནི། བར་མ་ཡི་ནི་མ་འོངས་པའང་། །བར་མ་གཉིས་སོ། ལས་འདས་མ་འོངས་གཉིས་ཀྱི་བར་མ་ད་ལྟ་བའི་ནི་ཆོས་མ་འོངས་པའང་བྲལ་འབྲས་མ་གཏོགས་སྔ་མ་བཞིན་ནོ། །བར་མ་ད་ལྟར་བྱུང་བའི་ལས་ཀྱི་འབྲས་བུ་ད་ལྟར་བྱུང་བའི་ཆོས་ནི་སྐྱེས་བདག་གཉིས་ཡིན་གྱི། བྲལ་བའི་རང་བཞིན་མ་ཡིན་པས་བྲལ་བ་མེད། སྔ་ཕྱི་མེད་པས་རྒྱུ་མཐུན་མེད། རྣམ་སྨིན་རྒྱུན་ལ་བལྟོས་པ་ཡིན་པ་ལ་ད་ལྟར་གྱི་རྣམ་སྨིན་ད་ལྟར་མ་ཡིན་ནོ། །གསུམ་པ་ནི། མ་སྐྱེས་པའི། །འབྲས་བུ་མ་འོངས་གསུམ་ཡིན་ནོ། །མ་སྐྱེས་པ་སྟེ་ལས་མ་འོངས་པ་ལ་འབྲས་བུ་མ་འོངས་པའི་ཆོས་ནི་རྒྱུ་མཐུན་དང་བྲལ་བ་དོར་(༡༡༩ན)
བས་གསུམ་ཡིན་ནོ། །མ་འོངས་པའི་རྒྱུ་མཐུན་གྱི་འབྲས་བུ་མ་འོངས་པ་མེད་དེ། མ་འོངས་པ་ལ་སྐལ་མཉམ་ཀུན་འགྲོའི་རྒྱུ་དག་མེད་པའི་ཕྱིར་ཏེ། དེ་ནི་འཆོལ་བར་འདུག་པ་དང་འདྲ་བས། འདི་འབྲས་བུའོ། །འདི་ནི་རྒྱུའོ་ཞེས་བྱ་བར་བཅད་མི་ནུས་པའི་ཕྱིར། བྲལ་འབྲས་ཀྱང་མེད་དེ། བྲལ་བ་མ་འོངས་པ་མ་ཡིན་པའི་ཕྱིར་རོ། །མ་འོངས་པ་ཕྱིས་སྐྱེ་འགྱུར་ཞིག་རྣམ་སྨིན་གྱི་འབྲས་བུར་འགྱུར་རོ། །སྐྱེས་བུ་བྱེད་པའི་འབྲས་བུ་ནི་མ་འོངས་པ་ལྷན་ཅིག་སྐྱེས་པ་དང་མ་འོངས་པ་མཇུག་ཐོགས་སུ་འབྱུང་བའོ། །བདག་པོའི་འབྲས་བུ་ནི་རྟོགས་སླ་པས་སོ། །བཞི་པ་རང་ས་དང་གཞན་སའི་འབྲས་བུ་དུ་དང་བཅས་པ་ནི། རང་གི་ས་པ་བཞི་ཡིན་ནོ། །གཞན་གྱི་ས་པ་གསུམ་དང་གཉིས། །རང་གི་ས་པའི་ལས་ཀྱིས་འབྲས་བུ་ནི་རང་གི་ས་པའི་ཆོས་བཞི་བསྐྱེད་པ་ཡིན་ཏེ། བྲལ་འབྲས་མ་གཏོགས་པའི་ཕྱིར་ཏེ། དེ་སས་མ་བསྡུས་པའི་ཕྱིར་རོ། །རང་སའི་ལས་ཀྱིས་རང་སའི་རྣམ་སྨིན་གྱི་འབྲས་བུ་བསྐྱེད་ལ། འདོད་ཁམས་པའི་འདོད་ཆགས་མཐོང་སྤང་གིས་འདོད་ཆགས་མཐོང་སྤང་འདོད་ཁམས་པ་བསྐྱེད་དེ། རྒྱུ་མཐུན་ཡིན། དངོས་སུ་བསྐྱེད་ན་སྐྱེས་བུ་བྱེད་པ་ཡིན། སྔར་བསྐྱེད་པ་མ་ཡིན་པས་བདག་པོ་ཡིན། གཞན་གྱི་ས་པའི་ཆོས་ཟག་མེད་བཞི་ཡིན་ན་རྣམ་སྨིན་དང་བྲལ་བ་མ་གཏོགས་པ་འབྲས་བུ་གསུམ་སྟེ། རྣམ་སྨིན་དང་བྲལ་བ་དག་མ་གཏོགས་པའི་ཕྱིར། དེའང་ས་དགུ་ལ་ནི་ཕན་ཚུན་དུ་ཟེར་བས་རྒྱུ་མཐུན་གྱི་འབྲས་བུ་སྲིད། བར་མ་ཆད་པས་སྐྱེས་བུ་བྱེད་པ་ཡོད། བདག་པོ་ནི་ནམ་ཡང་ཡོད་པའི་ཕྱིར། ཟག་བཅས་ཞིག་ཡིན་ན་སྐྱེ་བདག་གཉིས་ཏེ། ས་མི་མཐུན་པས་རྒྱུ་མཐུན་ཀྱང་མེད་པའི་ཕྱིར། ལྔ་པ་སློབ་མི་སློབ་ཀྱི་འབྲས་བུ་དུ་དང་བཅས་པ་ལ། སློབ་པའི། མི་སློབ་པའི། དེ་གཉིས་ལས་གཞན་པའི་འབྲས་བུ་དུ་དང་བཅས་པའོ། །དང་པོ་ནི། སློབ་པའི་སློབ་ལ་སོགས་པ་གསུམ། །སློབ་པའི་ལས་ཀྱི་འབྲས་བུ་སློབ་པ་ནི་རྣམ་སྨིན་དང་བྲལ་བ་སློབ་པར་མི་རུང་བས་དེ་གཉིས་མ་གཏོགས་(༡༡༩བ)
པ་གསུམ་མོ། །ལ་སོགས་པས་སློབ་པས་མི་སློབ་པ་བསྐྱེད་པ་ཡང་དེ་དང་འདྲའོ། །སློབ་པའི་ལས་ཀྱི་འབྲས་བུ་སློབ་པ་ཡང་མ་ཡིན། མི་སློབ་པ་ཡང་མ་ཡིན་པ་ཡང་གསུམ་སྟེ། སློབ་པ་ལ་རྣམ་སྨིན་མེད་པ་དང་། མི་འདྲ་བས་རྒྱུ་མཐུན་གྱི་འབྲས་བུ་དག་མ་གཏོགས་པའི་ཕྱིར། བྲལ་བའི་འབྲས་བུར་འགྱུར་ཏེ། བྲལ་བ་གཉིས་ཀ་མ་ཡིན་པའི་ཕྱིར། སྐྱེས་བུའི་འབྲས་བུའང་ཡོད་དེ། གཉིས་ཀ་མིན་པ་ཐོབ་སྲིད་པའི་ཕྱིར། བདག་པོའི་འབྲས་བུ་ཡང་ཡོད་དེ། བདག་ལས་གཞན་པ་གཉིས་ཀ་མ་ཡིན་པ་སྐྱེ་བའི་ཕྱིར། གཉིས་པ་ནི། མི་སློབ་ལས་ཀྱི་འབྲས་བུ་ནི། །སློབ་པ་ཡི་ནི་ཆོས་ལ་སོགས། །གཅིག་དང་གསུམ་དང་གཉིས་ཡིན་ནོ། །མི་སློབ་པའི་ལས་ཀྱི་འབྲས་བུ་ནི་སློབ་པ་ཡི་ནི་ཆོས་ཡིན་ན་གཅིག་སྟེ། བདག་པོའི་འབྲས་བུའོ། །རྒྱུ་མཐུན་གྱི་འབྲས་བུའང་མིན་ཏེ། དམན་པའི་ཕྱིར་ཏེ། མཉམ་དང་ཁྱད་པར་ཅན་གྱི་ཡིན། །ཅེས་སོ། །ལྷན་ཅིག་དང་མཇུག་ཐོགས་སུ་སྐྱེ་བ་མེད་པའི་ཕྱིར་སྐྱེས་བུ་བྱེད་འབྲས་ཀྱང་མེད་དོ། །མི་སློབ་པའི་མཇུག་ཐོགས་སུ་སློབ་པ་མི་འབྱུང་སྟེ། ཉམས་པའི་ཚེ་ཡང་ཉོན་མོངས་འབྱུང་བས་བར་ཆོད་པའི་ཕྱིར། རྣམ་སྨིན་དང་བྲལ་བའི་འབྲས་བུ་ཡང་མིན་ཏེ། སློབ་པ་དེར་མི་རུང་བའི་ཕྱིར། མི་སློབ་པའི་ལས་ཀྱི་འབྲས་བུ་མི་སློབ་པ་ནི་སྐྱེ་བདག་རྒྱུ་མཐུན་རུང་གི། རྣམ་སྨིན་དང་བྲལ་བ་མ་གཏོགས་པས་གསུམ་ཡིན་ཏེ། དེ་གཉིས་མི་སློབ་པ་ཡང་མ་ཡིན་པའི་ཕྱིར། མི་སློབ་པའི་ལས་ཀྱི་འབྲས་བུ་ནི་སློབ་པ་ཡང་མིན། མི་སློབ་པ་ཡང་མིན་ན་གཉིས་ཏེ། མི་སློབ་པ་དེས་དྲངས་པའི་སྤྱོད་ལམ་སོགས་སྐྱེས་བུ་བྱེད་འབྲས་དང་། བདག་འབྲས་ནི་རང་ལས་གཞན་པ་ཡོད་པའི་ཕྱིར། དེས་ན་མི་སློབ་པས་རྣམ་སྨིན་མི་བསྐྱེད། བྲལ་བ་ནི་སློབ་པའི་འབྲས་བུ་ཡིན། མི་སློབ་པའི་འབྲས་བུ་མིན། མི་སློབ་པ་དང་གཉིས་ཀ་མིན་པས་འདྲ་བ་མེད་དོ། །གསུམ་པ་ནི། དེ་ལས་གཞན་པའི་འབྲས་བུ་ནི། །སློབ་སོགས་གཉིས་དང་གཉིས་དང་ལྔ། །སློབ་པ་དང་མི་སློབ་པ་དེ་དག་ལས་གཞན་པ་སློབ་པ་ཡང་མ་ཡིན། མི་སློབ་པ་ཡང་མ་ཡིན་པའི་ལས་(༡༢༠ན)
ཀྱི་འབྲས་བུ་སློབ་པའི་ཆོས་ནི་གཉིས་ཏེ། ཆོས་མཆོག་གིས་སྡུག་བསྔལ་ལ་ཆོས་ཤེས་པའི་བཟོད་པ་བསྐྱེད་པ་ལྟ་བུ་བར་མ་ཆོད་པས་སྐྱེས་བུ་བྱེད་པ་དང་། རང་ལས་གཞན་པའི་བདག་པོའི་འབྲས་བུ་དང་བཅས་པའི་ཕྱིར་རོ། །སོགས་པས་དེའི་འབྲས་བུ་མི་སློབ་པ་ཡང་དེ་དང་འདྲ་བར་སྐྱེ་བདག་གཉིས་དང་། དེའི་འབྲས་བུ་སློབ་པ་ཡང་མ་ཡིན། མི་སློབ་པ་ཡང་མ་ཡིན་པ་ནི་འབྲས་བུ་ལྔ་ཅར་ཡིན་ཏེ། འཇིག་རྟེན་པའི་ལམ་གཉིས་ཀ་མིན་པ་དེས་འོག་མའི་ཉོན་མོངས་དང་བྲལ་བའི་བྲལ་འབྲས་བསྐྱེད་པའི་ཕྱིར། གཞན་ནི་རྟོགས་སླའོ། །དྲུག་པ་མཐོང་སྤང་སོགས་ཕན་ཚུན་འབྲས་བུ་དུ་དང་བཅས་པ་ལ། མཐོང་སྤང་འབྲས་བུ་དུ་དང་བཅས་པ། སྒོམ་སྤང་། སྤང་བྱ་མ་ཡིན་པ་འབྲས་བུ་དུ་དང་བཅས་པའོ། །དང་པོ་ནི། མཐོང་བས་སྤང་བྱའི་དེ་ལ་སོགས། །གསུམ་དང་བཞི་དང་གཅིག་ཡིན་ནོ། །མཐོང་བས་སྤང་བྱའི་ལས་ཀྱི་འབྲས་བུ་མཐོང་བས་སྤང་བྱའི་ཆོས་དེ་ཡིན་ན་གསུམ་སྟེ། མཐོང་སྤང་རྣམ་སྨིན་མ་ཡིན་ཅིང་བྲལ་བ་ཡང་མ་ཡིན་པའི་ཕྱིར་དང་། འདྲ་བ་རྒྱུ་མཐུན་གྱི་འབྲས་བུ་དང་། བར་མ་ཆད་པ་སྐྱེས་བུ་བྱེད་པ་དང་། བདག་འབྲས་ནི་ནམ་ཡང་ཡོད་པའི་ཕྱིར། ལ་སོགས་པས་མཐོང་སྤང་གི་འབྲས་བུ་བསྒོམས་པས་སྤང་བར་བྱ་བ་ནི་བཞི་སྟེ། སྒོམ་སྤང་བྲལ་བ་མ་ཡིན་པའི་ཕྱིར་དང་། སྒོམ་སྤང་རྣམ་སྨིན་ཡིན་པས་རྣམ་སྨིན་གྱི་འབྲས་བུ་ཡོད། བར་མ་ཆད་པར་བསྐྱེད་པས་སྐྱེས་བུ་བྱེད་པ་ཡོད། མཐོང་སྤང་ཀུན་འགྲོའི་རྒྱུ་ལས་ཀུན་འགྲོའི་རྒྱུ་མཐུན་འབྱུང་བས་རྒྱུ་མཐུན་གྱི་འབྲས་བུ་ཡོད། བདག་པོ་ནི་ཨ་ཅང་ཆེ་བའི་ཕྱིར་རོ། །མཐོང་སྤང་གི་འབྲས་བུ་སྤང་བྱ་མིན་པ་ནི་གཅིག་སྟེ། བདག་འབྲས་ལས་གཞན་པའི་སྤང་བྱ་མ་ཡིན་པ་རྣམ་སྨིན་མེད་པས་རྣམ་སྨིན་གྱི་འབྲས་བུ་མེད་ལ། མཐོང་སྤང་དང་སྤང་བྱ་མ་ཡིན་པས་རིས་མི་འདྲ་བས་རྒྱུ་མཐུན་མེད་ཅིང་། མཐོང་སྤང་གིས་སྤང་བྱ་མ་ཡིན་པ་དངོས་སུ་བསྐྱེད་པ་མེད་པས་སྐྱེས་བུ་བྱེད་འབྲས་མེད་ལ། མཐོང་(༡༢༠བ)
སྤང་སྤོང་བྱེད་མིན་པས་དེ་ལ་བྲལ་བའི་འབྲས་བུ་མེད་པའི་ཕྱིར་རོ། །གཉིས་པ་ནི། བསྒོམ་པས་སྤང་བར་བྱ་ལས་ཀྱི། །དེ་དག་གཉིས་དང་བཞི་དང་གསུམ། །སྒོམ་པས་སྤང་བར་བྱ་བའི་ལས་ཀྱི་འབྲས་བུ་མཐོང་བས་སྤང་བྱ་ནི་གཉིས་ཏེ། སྐྱེས་བདག་གཉིས་ལས་གཞན་པ་སྒོམ་སྤང་རིས་ཀུན་ལ་དམིགས་པའི་ཀུན་འགྲོ་མེད་ཅིང་། དེས་ན་ཀུན་འགྲོའི་འདྲ་བ་མེད་པས་རྒྱུ་མཐུན་གྱི་འབྲས་བུ་མེད་ལ། མཐོང་སྤང་རྣམ་སྨིན་མེད་པས་རྣམ་སྨིན་གྱི་འབྲས་བུ་མེད་ལ། མཐོང་སྤང་བྲལ་བ་མ་ཡིན་པའི་ཕྱིར། དེ་དག་ཅེས་པ་ནི་རིམ་པའི་གསལ་བྱེད་དུ་སྦྱར་བའོ། །སྒོམ་པས་སྤང་བྱའི་འབྲས་བུ་སྒོམ་སྤང་ནི་བཞི་སྟེ། སྒོམ་སྤང་བྲལ་བ་མ་ཡིན་པས་དེ་ལས་གཞན་པའི་སྒོམ་སྤང་རྣམ་སྨིན་ཡིན་པས་རྣམ་སྨིན་གྱི་འབྲས་བུ་ཡོད་ལ། བདག་པོ་ནམ་ཡང་ཡོད་ཅིང་འདྲ་བས་རྒྱུ་མཐུན་པའང་ཡོད་ལ། བར་མ་ཆད་པར་བསྐྱེད་པས་སྐྱེས་བུ་བྱེད་པའང་ཡོད་པའི་ཕྱིར། སྒོམ་སྤང་གི་འབྲས་བུ་སྤང་བྱ་མིན་པ་ནི་གསུམ་ཡིན་ཏེ། སྤང་བྱ་མ་ཡིན་པས་རྣམ་སྨིན་མ་ཡིན་ཅིང་། སྒོམ་སྤང་དང་སྤང་བྱ་མ་ཡིན་པས་རྒྱུ་མཐུན་གྱི་འབྲས་བུ་མ་གཏོགས་ལ། སྐྱེས་བུ་བྱེད་པ་བར་མ་ཆད་པ་ཡོད་ལ་བདག་པོ་ཡོད་ཅིང་། འཇིག་རྟེན་པའི་སྒོམ་ལམ་དེ་སྒོམ་སྤང་ཡིན། དེས་བྲལ་བའི་འབྲས་བུ་བསྐྱེད་པ་ཡོད་པའི་ཕྱིར། གསུམ་པ་ནི། སྤང་བྱ་མིན་པའི་དེ་དག་གཅིག །གཉིས་དང་བཞི་སྟེ་གོ་རིམས་བཞིན། །སྤང་བྱ་མིན་པའི་ལས་ཀྱི་འབྲས་བུ་ནི་མཐོང་བས་སྤང་བྱ་ཡིན་ན་བདག་འབྲས་གཅིག་པུ་པ་ཡིན་ཏེ། མི་འདྲ་བས་རྒྱུ་མཐུན་མེད། མཐོང་སྤང་ལ་རྣམ་སྨིན་མེད་པས་རྣམ་སྨིན་མེད། བར་མ་ཆད་དུ་བསྐྱེད་པ་མེད་པས་སྐྱེས་བུ་བྱེད་པ་མེད། མཐོང་སྤང་བྲལ་བ་མིན་པས་བྲལ་བ་མེད་པའི་ཕྱིར། སྒོམ་པས་སྤང་བྱ་ཡིན་ན་གཉིས་དང་བཅས་པ་ཡིན་ཏེ། ཟག་མེད་ལས་ལངས་པའི་ཚེ་དགེ་བ་སྒོམ་སྤང་སྐྱེས་བདག་གཉིས་དང་ལྡན་པའི་ཕྱིར་སྤང་བྱ་མ་ཡིན་པ་ལ་རྣམ་སྨིན་མེད་པས་རྣམ་སྨིན་དང་མི་འདྲ་བ་ལ་རྒྱུ་མཐུན་མེད་ཅིང་། སྒོམ་སྤང་དངོས་པོ་(༡༢༡ན)
ཡིན་པས་བྲལ་བ་མ་ཡིན་པའི་ཕྱིར། སྤང་བྱ་མ་ཡིན་པའི་ལས་ལས་སྤང་བྱ་མིན་པའི་འབྲས་བུ་ནི་བཞི་དང་བཅས་པ་ཡིན་ཏེ། སྤང་བྱ་མ་ཡིན་པ་ལ་རྣམ་སྨིན་གྱི་འབྲས་བུ་མ་གཏོགས་པའི་ཕྱིར། སྤང་བྱ་མ་ཡིན་པ་ལ་བྲལ་བའང་ཡོད་ཅིང་། བདག་པོ་ནམ་ཡང་ཡོད་ལ་འདྲ་བས་རྒྱུ་མཐུན་ཀྱང་ཡོད་ཅིང་། བར་མ་ཆད་པར་སྐྱེ་བས་སྐྱེས་བུ་བྱེད་པའང་ཡོད་པའི་ཕྱིར། དེ་དག་དང་གོ་རིམ་བཞིན་ཅེས་སྦྲེལ་བས་ཐོག་མཐའི་གོ་རིམ་གྱིས་བར་མའི་ཆོས་ལ་མཚུངས་པ་སྦྱར་བའི་དོན་ཡིན་ནོ། །འདིར་དབྱེ་སྒོ་འདི་ལྟར་དུ་ཤེས་པར་བྱ་སྟེ། ཟག་བཅས་ཟག་མེད་དང་གཅིགདགེ་སོགས་གསུམ་ལ་གཅིག་ཏུ་བྱས་པ་དང་གཉིས། འདས་སོགས་གསུམ་གཅིག་ཏུ་བྱས་པ་དང་གསུམ། རང་ས་སོགས་གཅིག་ཏུ་བྱས་པ་དང་བཞི། སློབ་སོགས་གཅིག་ཏུ་བྱས་པ་དང་ལྔ། མཐོང་སྤང་སོགས་གཅིག་ཏུ་བྱས་པ་དང་དྲུག་ནི་དབྱེ་སྒོ་གཅིག་གོ། །ཡང་ན་ཟག་བཅས་ཟག་མེད་གཉིས། དགེ་སོགས་གསུམ་སྟེ་ལྔ། འདས་པ་ལ་སོགས་པ་གསུམ་སྟེ་བརྒྱད། རང་ས་གཞན་ས་གཉིས་ཏེ་བཅུ། སློབ་སོགས་གསུམ་སྟེ་བཅུ་གསུམ། མཐོང་སྤོང་ལ་སོགས་པ་གསུམ་སྟེ་བཅུ་དྲུག་ཏུ་དབྱེ་བ་ནི་དབྱེ་སྒོ་གཉིས་པའོ། །ཡང་ན་ཟག་བཅས་ཟག་མེད་ལ་འབྲས་བུ་ལྔས་འབྲས་བུ་དང་བཅས་པ་གཅིགའབྲས་བུ་བཞིས་འབྲས་བུ་དང་བཅས་པ་གཉིས། གསུམ་གྱིས་འབྲས་བུ་དང་བཅས་པ་གསུམ། དགེ་བས་དགེ་མི་དགེ་ལུང་མ་བསྟན་བསྐྱེད་པ་གསུམ་སྟེ་དྲུགམི་དགེ་བས་དགེ་མི་དགེ་ལུང་མ་བསྟན་བསྐྱེད་པ་གསུམ་སྟེ་དགུ། ལུང་མ་བསྟན་གྱིས་དགེ་མི་དགེ་ལུང་མ་བསྟན་བསྐྱེད་པ་གསུམ་སྟེ་བཅུ་གཉིས། འདས་པས་འདས་མ་འོངས་ད་ལྟར་བསྐྱེད་པ་གསུམ་སྟེ་བཅོ་ལྔ། ད་ལྟར་གྱིས་ད་ལྟར་མ་འོངས་པ་བསྐྱེད་པ་གཉིས་ཏེ་བཅུ་བདུན། (༡༢༡བ)
མ་འོངས་པས་མ་འོངས་པ་བསྐྱེད་པ་གཅིག་དང་བཅོ་བརྒྱད། རང་སས་རང་ས་བསྐྱེད་པ་དང་བཅུ་དགུ། གཞན་སས་གཞན་ས་བསྐྱེད་པ་དང་ཉི་ཤུ། སློབ་པས་སློབ་མི་སློབ་གཉིས་ཀ་མ་ཡིན་པ་བསྐྱེད་པ་གསུམ་སྟེ་རྩ་གསུམ། མི་སློབ་པས་སློབ་མི་སློབ་གཉིས་ཀ་བསྐྱེད་པ་གསུམ་སྟེ་རྩ་དྲུགགཉིས་ཀ་མིན་པས་སློབ་མི་སློབ་གཉིས་ཀ་མིན་པ་གསུམ་སྟེ་རྩ་དགུ། མཐོང་སྤང་གིས་མཐོང་སྤང་སྒོམ་སྤང་སྤང་བྱ་མ་ཡིན་པ་བསྐྱེད་པ་གསུམ་སྟེ་སོ་གཉིས། སྒོམ་སྤང་གིས་མཐོང་སྤང་སྒོམ་སྤང་སྤང་བྱ་མ་ཡིན་པ་བསྐྱེད་པ་གསུམ་སྟེ་སོ་ལྔ། སྤང་བྱ་མ་ཡིན་པས་མཐོང་སྤང་སྒོམ་སྤང་སྤང་བྱ་མ་ཡིན་པ་བསྐྱེད་པ་གསུམ་སྟེ་སོ་བརྒྱད་ཀྱི་དབྱེ་སྒོ་གསུམ་མོ། །སྨྲས་པ། །སེམས་ནི་རྒྱ་ཆེན་ཤེས་བྱའི་གནས་པ་བཟུང་། །ཡིད་ནི་གཅིག་ཏུ་བྱང་ཆུབ་ཆེ་ལ་ཕྱོགས། །རྣམ་ཤེས་ཀུན་གྱིས་དག་པའི་དམིགས་པ་འཛིན། །བློ་གྲོས་ཐམས་ཅད་ངེས་ལེགས་ངོ་བོར་སྐྱེས། །དེ་ལྟར་ཡ་མཚན་བཟང་པོས་རྒྱུད་འགྱུར་ནས། །ཆོས་མངོན་མཛོད་འདིར་ལེགས་བཤད་སྤོབས་པ་ཐོབ། །ཅེས་སོ། །བཞི་པ་ལས་ཀྱི་རྣམ་གཞག་གཞན་བསྟན་པ་ལ། ལས་གང་རྒྱུ་གང་གིས་བྱེད་པ། འཕེན་རྫོགས་གཉིས་ཀྱི་ཁྱད་པར་རོ། །དང་པོ་ནི། རིགས་མིན་བསྐྱེད་པ་ཉོན་མོངས་ཅན། །ལས་ཀྱི་སྐབས་སུ་འདི་འདྲི་བར་བྱ་སྟེ། བསྟན་བཅོས་དག་ལས་ཀྱང་། རིགས་པ་མ་ཡིན་པས་བསྐྱེད་པ་དང་། རིགས་པས་བསྐྱེད་པ་དང་། རིགས་པ་མ་ཡིན་པས་བསྐྱེད་པ་ཡང་མ་ཡིན་པའི་ལས་ཤེས་གསུངས་པའི་མཚན་ཉིད་ཇི་ལྟ་བུ་ཞེ་ན། ཁ་ཅིག་ན་རེ། རིགས་པ་མ་ཡིན་པས་བསྐྱེད་པའི་ལས་ནི་ཉོན་མོངས་ཅན་ཡིན་ཏེ། ཡིད་ལ་བྱེད་པ་གང་ཞིག་ཚུལ་བཞིན་མ་ཡིན་ཅིང་། རིགས་པ་མ་ཡིན་ལ་ཉོན་མོངས་པ་དང་ལྡན་པར་ཞུགས་པ་གང་ཡིན་པ་དེ་ལས་འབྱུང་བའི་ཕྱིར། ཞེས་ཟེར་རོ། །(༡༢༢ན)
གཉིས་པ་ནི། ཁ་ཅིག་ཆོ་ག་ཉམས་པའང་ཞེའོ། །ཁ་ཅིག །ཆོ་ག་སོགས་སྤྱོད་ཡུལ་མ་ཡིན་པ་ལྔ་སྤོང་བ་ལས་ཉམས་པའི་ལས་ཀྱང་ནི་མི་རིགས་པའི་ལས་ཡིན་ཏེ། འགྲོ་བྱ་དང་། གནས་བྱ་དང་། བཟའ་བྱ་དང་། བགོ་བྱ་དང་། འགྲོ་སོགས་སུ་མི་འགྲོ་བ་ནི་མི་རིགས་པའམ་ཚུལ་དང་མི་མཐུན་པར་བྱེད་པའི་ཕྱིར། རིགས་མིན་གྱིས་བསྐྱེད་པ་ཞེས་བྱའོ། །འདིའི་དབང་དུ་བྱས་ནས་ལུས་ངག་གི་ཚུལ་ཤེས་བཞིན་གྱིས་མ་ཟིན་ན་དགྲ་བཅོམ་པས་མ་ཟིན་ཀྱང་ཆོ་ག་ཉམས་པ་ཡིན། ཤེས་བཞིན་གྱིས་ཟིན་ན། སོ་སོ་སྐྱེ་བོས་ཟིན་ཀྱང་ཆོ་ག་མ་ཉམས་པར་འདོད་དོ། །རིགས་པ་དང་རིགས་མིན་ནམ། ཆོ་ག་ཉམས་པ་དང་ཆོ་ག་ཉམས་པ་མ་ཡིན་པ་དག་ལས་གཞན་པ་ནི་ལུང་དུ་མ་བསྟན་པའོ། །གཉིས་པ་འཕེན་རྫོགས་གཉིས་ཀྱི་ཁྱད་པར་ལ། འཕེན་བྱེད་ཀྱི་ཁྱད་པར། རྫོགས་བྱེད་ཀྱི་ཁྱད་པར། འཕེན་བྱེད་ལ་དོགས་པ་བཅད་པའོ། །དང་པོ་ནི། གཅིག་གིས་སྐྱེ་བ་གཅིག་འཕེན་ཏོ། །ཅི་ལས་གཅིག་གིས་སྐྱེ་བ་གཅིག་ཁོ་ན་འཕེན་ནམ། འོན་ཏེ་དུ་མའང་འཕེན། དེ་བཞིན་དུ་ལས་དུ་མས་ཀྱང་སྐྱེ་བ་དུ་མ་འཕེན་ནམ། འོན་ཏེ་གཅིག་ཀྱང་འཕེན་ཅེ་ན། གྲུབ་མཐའི་དབང་དུ་ན་ཆོས་ཅན། ལས་གཅིག་གིས་སྐྱེ་བ་གཅིག་ཁོ་ན་འཕེན་པར་བྱེད་པ་ཡིན་ཏེ། ལས་དུ་མས་ནི་སྐྱེ་བ་གཅིག་འཕེན་པར་བྱེད་པ་མ་ཡིན་པའི་ཕྱིར། སྐྱེ་བ་ཞེས་བྱ་བ་ནི་སེམས་དང་ལྡན་པ་མ་ཡིན་པའི་འདུ་བྱེད་རིས་མཐུན་པ་ལ་བྱ་ཡི། མཚན་ཉིད་ཀྱིས་སྐྱེ་བ་ནི་མ་ཡིན་ཏེ། འགྲོ་བ་གང་གི་གནས་དེར་ཕྱིན་ནས་སྐྱེས་པ་ལ་དེར་བརྗོད་པའི་ཕྱིར། འོ་ན་རྒྱལ་པོ་དང་ཡང་དག་པར་ལྡན་པའི་མདོ་ལས། གནས་བརྟན་མ་འགགས་པས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ཝཱ་ར་ཎ་སིར་སྐྱེས་བུ་དབུལ་པོ་རྩྭ་ཐུ་བ་ཞིག་ཏུ་གྱུར་པ་ན། རང་སངས་རྒྱས་སྟེང་གནས་ཞེས་བྱ་བ་སྤྱི་གཙུག་མེ་ཏོག་ཏ་ར་ཀ་ཞེས་བྱ་བ་ལ་བསོད་སྙོམས་ཕུལ་ཏེ། བདག་ནི་(༡༢༢བ)
བསོད་སྙོམས་གཅིག་པོ་དེའི་རྣམ་པར་སྨིན་པས་ལན་བདུན་གྱི་བར་དུ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ཤིང་ལན་བདུན་གྱི་བར་དུ་འཁོར་ལོས་སྒྱུར་བའི་རྒྱལ་པོར་གྱུར་ནས་ད་ལྟར་ཕྱུག་པོའི་རིགས་སུ་སྐྱེས་པའི་བར་དུ་ཡིན་ནོ། །ཞེས་སྨྲས་པ་དེ་དང་ཅི་ལྟར་མི་འགལ་ལམ་ཞེ་ན། འགལ་བ་མ་ཡིན་པ་ནི། ལུང་གི་དོན་འདིས་གང་ཟག་དེས་ལྷའི་ནང་དུ་འབྱོར་པ་རྙེད་ནས་གང་ནས་ཚེ་འཕོས་པ་དང་ལས་ཅི་ལས་གྲུབ་པའི་ཚེ་རབས་དྲན་པ་དང་། ལས་དེ་ལ་བྲོད་ནས་བསོད་ནམས་གཞན་བྱས་པས་བསོད་ནམས་དེ་དག་གི་ཆེད་ཀྱི་ཀུན་ནས་སློང་བྱེད་ཀྱི་ལས་ནི་སྔ་མའི་ལས་གཅིག་པོ་དེ་ཡིན་པར་བསྟན་པ་ཡིན་ཏེ། ལས་གཅིག་གི་རྒྱུ་ལས་ལས་མང་པོ་སྤྱད་པས་སྐྱེ་བ་མང་པོར་སྨིན་པ་ཡིན་གྱི། ལས་གཅིག་རང་གིས་སྐྱེ་བ་དུ་མ་སྒྲུབ་པ་མ་ཡིན་པའི་ཕྱིར། དཔེར་ན། མི་ཞིག་གིས་དོང་རྩེ་གཅིག་གིས་སྟོང་དུ་བསྒྱུར་ཏེ། བདག་ནི་དོང་རྩེ་གཅིག་གིས་དོང་རྩེ་སྟོང་གི་དབང་ཕྱུག་འདི་ཐོབ་པར་གྱུར་ཏོ་ཞེས་སྨྲས་པ་ལྟ་བུའོ། །ཡང་ན་བསོད་སྙོམས་གཅིག་ཕུལ་བ་ལ་བརྟེན་ནས་དེ་ལ་དགའ་བ་དང་ཡི་རང་བ་སོགས་སེམས་པ་མང་པོ་བྱུང་བའི་ལས་འགའ་ཞིག་པ་དེ་དུ་མ་ཡིན་པ་དེའི་ཕྱིར་སྐྱེ་བའི་འབྲས་བུ་དུ་མ་ཡང་ཡོངས་སུ་བཟུང་བ་ཡིན་ནོ། །གཉིས་པ་ནི། ཡོངས་རྫོགས་བྱེད་པ་དུ་མ་ཡིན། །ལས་དུ་མས་ཀྱང་སྐྱེ་བ་གཅིག་འཕེན་པ་ཡིན་ན་རིས་མཐུན་དུམ་བུར་འཕེན་པར་འགྱུར་བས་དེ་ལྟར་ཡང་རིགས་པ་མ་ཡིན་གྱི། ལས་གཅིག་གིས་འཕངས་པའི་རིས་མཐུན་པ་ལ། ལས་ཡོངས་སུ་རྫོགས་པར་བྱེད་པ་ནི་དུ་མ་ཡིན་པར་འདོད་དེ། འཕེན་བྱེད་ལས་གཅིག་གིས་མིར་སྐྱེ་བ་མཚུངས་ཀྱང་། ཁ་ཅིག་ནི་རྫོགས་བྱེད་དགེ་བས་གཟུགས་བཟང་བ་དང་། དབང་པོ་ཚང་བ་དང་། ལོངས་སྤྱོད་ཆེ་བ་དང་། ནད་མེད་པ་དང་། དབང་ཐང་ཕུན་སུམ་ཚོགས་པ་ཡིན་ལ། ཁ་ཅིག་ནི་རྫོགས་བྱེད་མི་དགེ་བས་གཟུགས་(༡༢༣ན)
ངན་པ་ལ་སོགས་པར་འགྱུར་བའི་ཕྱིར། དཔེར་ན། རི་མོ་མཁན་གྱིས་སྐྱ་རིས་ཀྱི་རིལ་བུ་གཅིག་གིས་གཟུགས་ཀྱི་ས་བཅད་འདྲ་བར་བྱས་ནས་ཚོན་དམར་སེར་ལ་སོགས་པ་མཛེས་མི་མཛེས་དུ་མས་ཡོངས་སུ་རྫོགས་པ་མི་མཚུངས་པ་བཞིན་དུ་རྫོགས་བྱེད་ཀྱི་ལས་ཀྱིས་དུ་མ་འགྲུབ་ཀྱི། རྫོགས་བྱེད་ཀྱི་ལས་ཀྱིས་དུ་མ་མི་འགྲུབ་ན་འཕེན་པས་འཕངས་པ་ལ་འགའ་ཡང་དབང་པོ་མ་ཚང་བ་སོགས་སུ་མི་འགྱུར་བ་ཡང་ཐལ་ལོ། །རྫོགས་བྱེད་སྣ་ཚོགས་པར་ཇི་ལྟར་འགྱུར་ཞེ་ན། རྒྱལ་པོའི་བུ་མོ་ཞིག་གིས་སངས་རྒྱས་ལ་སྔོན་ལ་མེ་ཏོག་ཕུལ། དེ་ནས་མེ་ཏོག་སླར་བླངས། དེ་ནས་མེ་ཏོག་ཕུལ་བས་ཚེ་ཕྱི་མའི་ཚེ་གཅིག་གི་རྒྱུན་ལ། ཚེ་སྟོད་ལ་གསེར་གྱི་དོང་རྩེ་མང་པོ་འབྱུང་བ། ཚེ་སྐེད་དུ་རྒྱུན་ཆད་པ། ཚེ་སྨད་ལ་གསེར་གྱི་དོང་རྩེ་མང་པོ་བྱུང་བ་ལྟ་བུའོ། །ལས་འབའ་ཞིག་ཚེ་འཕེན་བྱེད་ཀྱང་མ་ཡིན་ཏེ། རྣམ་སྨིན་དང་བཅས་པའི་ཚོར་སོགས་ཀྱང་ལྷན་ཅིག་འབྱུང་རྒྱུ་ཡིན་པའི་ཕྱིར་རོ། །གསུམ་པ་ནི། སེམས་མེད་སྙོམས་པར་འཇུག་པ་དག །འཕེན་བྱེད་མ་ཡིན་ཐོབ་པའང་མིན། །རྣམ་སྨིན་དང་བཅས་ཀྱང་སེམས་མེད་པའི་སྙོམས་པར་འཇུག་པ་དག་གིས་ཀྱང་རིས་མཐུན་འཕེན་པར་བྱེད་པ་མ་ཡིན་ཏེ། སེམས་པའི་ལས་དང་ལྷན་ཅིག་མི་འབྱུང་བའི་ཕྱིར། སེམས་མེད་པའི་ཕྱིར་ཏེ། དེ་ནི་ལུས་ངག་གི་ལས་དང་ཡང་ལྷན་ཅིག་མི་འབྱུང་བའི་ཕྱིར་རོ། །དེས་ན་སྙོམས་འཇུག་གཉིས་ཀྱི་རྣམ་སྨིན་ནི། ལྷ་ཚེ་རིང་པོ་དང་སྲིད་རྩེ་བ་ཡིན་ནོ་ཞེས་བྱ་བ་ནི་རྫོགས་བྱེད་ཀྱི་དབང་དུ་བྱས་པ་ཡིན་གྱི། འཕེན་བྱེད་ནི་བསམ་གཏན་བཞི་པ་དང་། སྲིད་པའི་རྩེ་མོའི་སྙོམས་འཇུག་ཡིན་པའི་ཕྱིར། རྣམ་སྨིན་དང་བཅས་པའི་ཐོབ་པ་རྣམས་ཀྱིས་ཀྱང་འཕེན་བྱེད་ཀྱི་ལས་དང་ལྷན་ཅིག་པ་ཡིན་མོད་ཀྱི། རིས་མཐུན་འཕེན་པར་བྱེད་པའང་མིན་ཏེ། ལས་དང་ཐོབ་པ་འབྲས་བུ་མི་གཅིག་པའི་ཕྱིར་དང་། ཐོབ་པ་ལ་སེམས་པ་མེད་པར་ཞར་ལས་བྱུང་བས་སྟོབས་ཤིན་ཏུ་ཆུང་བའི་ཕྱིར་དང་། ལས་པས་འབྲས་བུ་མང་བའི་ཕྱིར་ཏེ་ཤིང་གི་ཕྱི་(༡༢༣བ)
ཤུན་ལྟར་ཐོབ་པ་ནི་ལས་ལས་ཕྱི་རོལ་ཏུ་གནས་པའི་ཕྱིར་རོ། །གཉིས་པ་ལས་སོ་སོར་བཤད་པ་ལ། སྤང་བྱ་སྒྲིབ་པ་གསུམ། བསྟེན་བྱ་བསོད་ནམས་བྱ་བའི་གཞི་གསུམ། ཆ་མཐུན་དགེ་བ་གསུམ་བཤད་པའོ། །དང་པོ་ལ། སྒྲིབ་པ་གསུམ་གྱི་ངོ་བོ། གང་ན་སྒྲིབ་པ་གང་ཡོད་པ། ལས་སྒྲིབ་བྱེ་བྲག་ཏུ་བཤད་པའོ། །དང་པོ་ནི། མཚམས་མེད་པ་ཡི་ལས་རྣམས་དང་། །ཉོན་མོངས་ཤས་ཆེན་ངན་འགྲོ་དང་། །འདུ་ཤེས་མེད་པའི་སེམས་ཅན་དང་། །སྒྲ་མི་སྙན་སྒྲིབ་གསུམ་དུ་འདོད། །བཅོམ་ལྡན་འདས་ཀྱིས་ལས་ཉིད་སྒྲིབ་པ། རྣམ་སྨིན་ཉིད་སྒྲིབ་པ། ཉོན་མོངས་པ་ཉིད་སྒྲིབ་པ་ཞེས་གསུམ་གསུངས་པའི་རང་བཞིན་དེ་གང་ཞེ་ན། མ་དང་ཕ་དང་དགྲ་བཅོམ་གསོད་པ་དང་། དགེ་འདུན་གྱི་དབྱེན་བྱེད་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུངས་པ་སྟེ། མཚམས་མེད་པའི་ལས་རྣམས་ནི་ལས་ཀྱི་སྒྲིབ་པ་དང་ཉོན་མོངས་རྒྱུན་དུ་འབྱུང་བའི་ཤས་ཆེ་བ་དང་། རྣོ་བ་ནི་ཉོན་མོངས་ཆེན་པོ་སྟེ། ཤས་ཆེན་པོ་ནི་ཉོན་མོངས་པའི་སྒྲིབ་པ་སྟེ་རྒྱུན་དུ་འབྱུང་བ་ལ་ནི་ངེས་པར་གཞོམ་པའི་གཉེན་པོ་རྙེད་དཀའ་བའི་ཕྱིར། དཔེར་ན། ཟ་མ་སོགས་ཀྱི་རྒྱུད་ལ་ཉོན་མོངས་རྒྱུན་དུ་འབྱུང་བ་བཞིན། རྒྱུན་དུ་འབྱུང་བ་ལ་ནི་ཆུང་ངུ་ལས་འབྲིང་དང་། འབྲིང་ལས་ཆེན་པོར་འགྱུར་བ་ཉིད་ཀྱིས་སྒྲིབ་པའོ། །ཉོན་མོངས་པ་རེས་འགའ་འབྱུང་བ་ནི་སྒྲིབ་པ་ཡིན་ཀྱང་དེ་སྦྱང་སླ་བས་འཕགས་ལམ་ལ་མི་སྒྲིབ་སྟེ། ཤུགས་དྲག་ཀྱང་གཞོམ་པར་ནུས་པའི་ཕྱིར། དཔེར་ན། སོར་ཕྲེང་ཅན་དང་དགའ་བའི་རྒྱུད་ཀྱི་ཉོན་མོངས་བཞིན་ནོ། །ངན་འགྲོ་གསུམ་དང་བདེ་འགྲོའི་བྱང་སྒྲ་ནི་སྙན་པ་དང་། འདུ་ཤེས་མེད་པའི་སེམས་ཅན་རྣམས་ནི་རྣམ་པར་སྨིན་པའི་སྒྲིབ་པ་སྟེ་སྒྲིབ་པ་གསུམ་དུ་འདོད་དེ། འཕགས་ལམ་དང་། འཕགས་ལམ་ལ་སྦྱོར་བར་བྱེད་པའི་དགེ་རྩ་མི་སྡུག་པ་སོགས་དང་དྲོད་སོགས་རྣམས་ལ་སྒྲིབ་པའི་ཕྱིར། ངན་སོང་གསུམ་དུ་ངེས་པར་འགྱུར་བའི་ལས་དང་། འདུ་ཤེས་མེད་པའི་སྙོམས་འཇུག་དང་། ཚངས་ཆེན་དུ་(༡༢༤ན)
ངེས་པའི་ལས་དང་། ཟ་མ་མ་ནིང་མཚན་གཉིས་པར་འགྱུར་བའི་ལས་དང་། སྒོ་ང་དང་དྲོད་གཤེར་ལས་སྐྱེ་བར་འགྱུར་བ་དང་། བུད་མེད་དུ་འགྱུར་བ་དང་། སྲིད་པ་ལན་བརྒྱད་པ་འགྲུབ་པའི་ལས་གཞན་དག་ཀྱང་དེར་བརྗོད་པར་རིགས་ཏེ། འཕགས་པའི་ལམ་དང་། ལམ་ལ་སྦྱོར་བའི་དགེ་རྩ་ལ་མཚམས་མེད་དང་སྒྲིབ་པར་འདྲ་བའི་ཕྱིར་ཞེ་ན། མི་འདྲ་སྟེ། མཚམས་མེད་ཀྱི་ལས་ལམ་ལྔའི་གཞི་སྲོག་གཅོད་པའི་ལས་ལམ་གསུམ་དང་། རྫུན་དུ་སྨྲ་བའི་ལས་ལམ་དང་། སྲོག་གཅོད་པའི་སྦྱོར་བ་སྟེ་གཞི་དང་། དམྱལ་བ་དང་ཐམས་ཅད་ཀྱི་འབྲས་བུ་ཡིད་དུ་མི་འོང་བ་ཅན་དང་། བྱེད་པ་པོ་མིའི་འགྲོ་བ་དང་། དེས་དམྱལ་བའི་འགྲོ་བ་ཐོབ་པ་དང་། སྐྱེས་ནས་མྱོང་འགྱུར་གྱི་སྐྱེ་བ་དང་། ཟ་མ་དང་མ་ནིང་གི་མ་ཡིན་པར་སྐྱེས་པ་དང་བུད་མེད་ཀྱི་ཡིན་པ་དང་། ཉོན་མོངས་ཆེན་པོ་ཀུན་ཏུ་སྤྱོད་པས་ཕ་སོགས་གསོད་པའི་གང་ཟགགཞན་ལ་བསྟན་པ་དང་རང་གིས་ཤེས་པར་སླ་ཚོད་དུ་དེ་དག་ཁོ་ནར་བཤད་ཀྱི། ངན་སོང་སོགས་སུ་ངེས་འགྱུར་དང་། སྒོ་ང་དང་དྲོད་གཤེར་ལས་སྐྱེ་འགྱུར་དང་། བུད་མེད་དང་སྲིད་པ་བརྒྱད་པར་ངེས་འགྱུར་དུ་སྐྱེ་བའི་ལས་ཀྱི་གཞི་དང་། འབྲས་བུ་དང་འགྲོ་བ་དང་སྐྱེ་བ་དང་། གང་ཟགརང་གིས་ཤེས་པ་དང་། གཞན་ལ་བསྟན་པར་དཀའ་བའི་ཕྱིར་ཏེ། དེ་ཚོར་སྐྱེ་བའི་ལས་ཀྱི་གཞི་འདི་ཚོ་ཡིན་བྱ་བའམ། འབྲས་བུ་འདི་ཚོ་ཡིན་བྱ་བའམ། འགྲོ་བ་འདི་ཚོ་ཡིན་བྱ་བའམ། སྐྱེ་བ་འདི་ཚོ་ཡིན་བྱ་བའམ། གང་ཟག་འདི་ཡིན་བྱ་བ་ཤེས་དཀའ་བའི་ཕྱིར་བཞག་པ་མ་ཡིན་ནོ། །དེ་དག་ལས་ཉོན་སྒྲིབ་ནི་སྐྱེ་བ་མང་པོ་གསོར་མི་རུང་བས་ཐམས་ཅད་ཀྱི་ཐ་ཤལ་ཡིན་ལ། དེ་ནས་ལས་སྒྲིབ་ཐ་ཤལ་ཡིན་ཏེ། དེ་ནི་ཚེ་ཕྱི་མ་ལའང་གསོར་མི་རུང་བའི་ཕྱིར། རྣམ་སྨིན་གྱི་སྒྲིབ་པ་ནི་(༡༢༤བ)
མཐོང་ཆོས་ཁོ་ན་ལ་སྒྲིབ་པས་ཉེས་པ་ཆུང་སྟེ། ཚེ་རབས་ཕྱི་མ་ལ་གསོར་རུང་བའི་ཕྱིར། བྱང་གི་སྒྲ་མི་སྙན་པ་ཡང་སུམ་ཅུ་རྩ་གསུམ་དུ་ལྷའི་བུར་གྱུར་ནས་མཐོང་ལམ་སྐྱེས་པ་ལྟ་བུའོ། །བྱེ་སྨྲ་ན་རེ། ཉོན་སྒྲིབ་ཀྱིས་ལས་སྒྲིབ་འདྲེན་ལ། ལས་སྒྲིབ་ཀྱིས་རྣམ་སྨིན་གྱི་སྒྲིབ་པ་འདྲེན་པས་ཉོན་སྒྲིབ་ནི་ཐམས་ཅད་པས་སྡིག་ཆེའོ། །ལས་སྒྲིབ་ནི་དེ་ལས་ཡང་ཞིང་། རྣམ་སྨིན་གྱི་སྒྲིབ་པ་ནི་དེ་ལས་ཡང་ངོ་། །མཚམས་མེད་པའི་ལས་ཀྱི་དོན་ནི། རྣམ་སྨིན་གཞན་མྱོང་བའི་ལས་གཅིག་གིས་བར་དུ་བཅད་ནས། སྐྱེས་ནས་མྱོང་བའི་རྣམ་པར་སྨིན་པ་ལ་བར་བཅད་མི་ནུས་པས་མཚམས་མེད་ཅེས་བྱ་སྟེ། ལས་གཞན་གྱི་ཟིལ་གྱིས་གནོན་མི་ནུས་པའི་ཕྱིར། ཡང་ན་ལས་དེ་བྱེད་པའི་གང་ཟག་འདི་ནས་ཤི་འཕོས་པ་དང་། དམྱལ་བར་སྐྱེ་བར་འགྱུར་བ་ལ་མཚམས་མེད་པ་ཡིན་ཏེ། འགྲོ་བ་གཞན་གྱི་ཚེ་གཞན་གྱི་བར་ཆད་མེད་པའི་ཕྱིར། དེ་དེར་སྐྱེ་བའི་དངོས་པོ་ནི་ཆོས་ཅན། བར་ཆད་མེད་པ་ཡིན་ཏེ། བར་ཆད་མེད་པའི་ལས་ཉིད་ཀྱི་ཆོས་དང་ལྡན་པའི་ཕྱིར། དཔེར་ན། ཟག་པ་མེད་པའི་ལས་གང་དང་ལྡན་པ་ལ་དགེ་སྦྱོང་ཞེས་བརྗོད་པར་བྱ་བ་ལ། དགེ་སྦྱོང་ཉིད་ནི་དྲི་མེད་ལམ་ཞེས་ངོ་བོའི་རྐྱེན་ཡིན་པ་བཞིན་ནོ། །གཉིས་པ་ལ། མཚམས་མེད་སྤྱིར་བཏང་བ། ཕ་མ་གསོད་པའི་མཚམས་མེད་ལ་དམིགས་བསལ། སྒྲིབ་པ་གཞན་གཉིས་གང་ན་ཡོད་པའོ། །དང་པོ་ནི། མཚམས་མེད་གླིང་གསུམ་དག་ན་ཡོད། །ཟ་མ་སོགས་ལ་མི་འདོད་དོ། །རེ་ཞིག་གཅིག་ཏུ་མཚམས་མེད་ནི་གླིང་གསུམ་དག་ན་ཡོད་ཀྱི། བྱང་གི་སྒྲ་མི་སྙན་དང་འགྲོ་བ་གཞན་ན་ཡང་མེད་པའི་ཕྱིར་ཁམས་གཞན་ན་ལྟ་ཅི་སྨོས། དེ་གསུམ་ནའང་སྐྱེས་པ་དང་བུད་མེད་ཁོ་ན་ལ་ཡོད་ཀྱི། སྡོམ་པ་མེད་པའི་གང་ཟག་ལ་སྡོམ་མིན་ཀྱང་མེད་པ་དེའི་ཕྱིར། དེས་ན་ཟ་མ་དང་སོགས་པས་མ་ནིང་དང་མཚན་གཉིས་པ་ལ་མི་འདོད་དོ། །གཉིས་པ་ནི། (༡༢༥ན)
ཕན་དང་ངོ་ཚ་ཆུང་བའི་ཕྱིར། །ཟ་མ་སོགས་ཀྱིས་ཕ་མ་གསོད་ན་མཚམས་མེད་དུ་མི་འགྱུར་ཏེ། དེའི་ཕ་མས་ནི་དེའི་ལུས་མ་ཚང་བ་བསྐྱེད་ཅིང་བུ་ཚ་དེས་ཕན་མི་ཐོགས་པར་མནོས་ཏེ་བྱམས་པ་ཆུང་བས་ཕན་པ་འདོགས་པའང་ཤས་ཆུང་བའི་ཕྱིར། བུ་ཚས་ཀྱང་ཕ་མ་ལ་ངོ་ཚ་དང་ཁྲེལ་ཡོད་ཀྱི་བློ་ཡོད་ན་བསད་སོགས་ལ་མཚམས་མེད་ཀྱི་ཁ་ན་མ་ཐོ་བར་འགྱུར་བ་ལས། ངོ་ཚ་དང་ཁྲེལ་ཡོད་ཆུང་བའི་ཕྱིར་རོ། །འོ་ན་སྐྱེས་པ་དང་བུད་མེད་དམུས་ལོང་དང་གཏན་འོན་སོགས་ཀྱིས་ཕ་མ་གསོད་ཀྱང་དེར་མི་འགྱུར་བར་ཐལ། ཕ་མས་དབང་པོ་མ་ཚང་བར་བསྐྱེད་པས་ཕན་པ་ཆུང་བའི་ཕྱིར་ཞེ་ན། རྟགས་མ་གྲུབ་སྟེ། འདིར་དབང་པོ་དང་བཅས་པའི་ལུས་མ་ཚང་བ་ནི་མངོན་པར་རྟོགས་པ་སྐྱེ་བའི་ལུས་མ་ཚང་བ་ཟ་མ་སོགས་ལ་བརྗོད་ཀྱི་ལོང་བ་སོགས་ལ་མངོན་རྟོགས་སྐྱེ་བའི་སྐལ་བ་ཅན་ཡིན་པས་ལུས་ཚང་བར་བསྐྱེད་པའི་སྒོ་ནས་ཕ་མ་དྲིན་ཆེ་བའི་ཕྱིར། ཡི་དྭགས་དང་དུད་འགྲོས་ཕ་མ་གསོད་ཀྱང་མཚམས་མེད་དུ་མི་འགྱུར་ཏེ། ཕན་པ་དང་ངོ་ཚ་ཆུང་བའི་ཕྱིར་ཞེས་འདོད་པར་གྲགས་པ་ལ། བཙུན་པ་ན་རེ། ཡི་དྭགས་དང་དུད་འགྲོ་བློ་གསལ་བས་ཕ་མ་གསོད་ན་མཚམས་མེད་དུ་འགྱུར་ཏེ། ངོ་ཚ་དང་ཁྲེལ་ཡོད་ཤས་ཆེན་པོ་དང་ལྡན་པའི་ཕྱིར། དཔེར་ན། རྟ་ཅང་ཤེས་དེ་མ་ལ་མི་བརྒལ་བ་ལ་གདོང་གོས་ཀྱིས་གཡོགས་ཏེ་མ་ལ་བརྒལ་དུ་བཅུག་པ་དང་། དེས་ཕྱིས་ཤེས་ནས་རང་གི་ཕོ་མཚན་བཅད་པར་གྲགས་པ་ལྟ་བུ་བློ་གསལ་འདོད་ལོག་སྤོང་བ་བཞིན་ནོ། །མིའི་ཕ་མ་མི་མ་ཡིན་བསད་ནའང་མཚམས་མེད་དུ་མི་འགྱུར་ཏེ། མི་མིན་དེས་ཀྱང་མི་དང་འཚམས་པའི་ཕན་པ་མི་ནུས་པ་དང་། བུས་ཀྱང་ཕ་མ་དང་རིས་མི་མཐུན་པས་ངོ་ཚ་ཆུང་བའི་ཕྱིར་རོ། །གསུམ་པ་ནི། ལྷག་མ་འགྲོ་བ་ལྔ་དག་ན། །ལྷག་མ་ཉོན་སྒྲིབ་དང་རྣམ་སྨིན་གྱི་སྒྲིབ་པ་ནི་འགྲོ་བ་ལྔ་པོ་དག་ན་ཡོད་དེ། མིའི་(༡༢༥བ)
ནང་ན་རྣམ་སྨིན་གྱི་སྒྲིབ་པ་བདེན་པ་མཐོང་མི་ནུས་པ་སྒྲ་མི་སྙན་པ་ཡོད་ལ། ལྷའི་ནང་དུ་འདུ་ཤེས་མེད་པའི་སེམས་ཅན་རྣམས་ཡོད་པའི་ཕྱིར། མཚམས་མེད་པ་བཞི་ནི་ལུས་ཀྱི་ལས་དང་། གཅིག་ནི་ངག་གི་ལས་ཡིན་ཏེ། གསུམ་ནི་སྲོག་གཅོད་པ་དང་། གཅིག་ནི་རྫུན་དུ་སྨྲ་བ་དང་། གཅིག་ནི་སྲོག་གཅོད་པའི་སྦྱོར་བ་ཡིན་པའི་ཕྱིར་ཏེ། དེ་བཞིན་གཤེགས་པ་ནི་རང་འགྲོངས་ཀྱི་གཞན་ལྷ་སྦྱིན་སོགས་ཀྱིས་གླང་པོ་ནོར་སྐྱོང་སོགས་རྦད་ནས་འགྲོངས་སུ་འཇུག་མ་ནུས་པའི་ཕྱིར། མི་བརྫི་བའི་ཆོས་ཅན་ཡིན་ནོ། །གསུམ་པ་ལས་སྒྲིབ་པ་བྱེ་བྲག་ཏུ་བཤད་པ་ལ། མཚམས་མེད་དང་། དེ་དང་ཉེ་བའོ། །དང་པོ་ལ། མཚམས་མེད་དངོས། དེའི་ལས་འབྲས། ལས་འབྲས་ཀྱི་ཞར་བྱུང་ངོ་། །དང་པོ་ལ། དབྱེན་གྱི་མཚམས་མེད་རྒྱས་པར་བཤད་པ་དང་། ལྔ་ག་བསྡོམས་ཏེ་བཤད་པའོ། །དང་པོ་ལ། ངོ་བོ་དང་། འབྲས་བུ་དང་། རྣམ་པའི་སྒོ་ནས་རྒྱས་པར་བཤད་པའོ། །དང་པོ་ལ། འདི་དབྱེ་བའི་དབྱེན། འདིས་འབྱེད་པའི་དབྱེན་ནོ། །དང་པོ་ལ། ངོ་བོ་དང་། གང་ལ་ལྡན་པའོ། །དང་པོ་ནི། དགེ་འདུན་དབྱེན་ནི་མི་འཕྲོད་པའི། །རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །དགེ་འདུན་གྱི་དབྱེན་ལྡན་མིན་འདུ་བྱེད་ཀྱི་རྒྱུ་ནི་རྫུན་ཡིན་པས། རྒྱུ་ལ་འབྲས་བུའི་མིང་གིས་བཏགས་པའམ། རྫུན་གྱི་རྒྱུ་འདིས་དགེ་འདུན་འབྱེད་པར་བྱེད་པས་ན། དགེ་འདུན་གྱི་དབྱེན་ལ་མཚམས་མེད་ཅེས་བརྗོད་པ་ནི་བྱེད་ལས་ཀྱི་མིང་གིས་འབྲས་བུ་ལ་བཏགས་པ་ཡིན་གྱི། བྱེ་བའི་དབྱེན་གྱི་ངོ་བོ་མཚམས་མེད་དུ་བསྒྲུབ་པ་མ་ཡིན་ནོ། །བྱེ་སྨྲ་ལྟར་ན། དགེ་འདུན་གྱི་དབྱེན་ནི་མི་འཕྲོད་པ་མི་མཐུན་པའི་རང་བཞིན་རྫས་ཡོད་སེམས་དང་ལྡན་པ་མ་ཡིན་པའི་ཆོས་འདུ་བྱེད་དེ། ཉོན་མོངས་སྤངས་པ་དང་དགེ་རྩ་ཆད་པ་དག་ལའང་ལྡན་པས་ངོ་བོ་ཉོན་མོངས་པ་ཅན་ཡང་མིན། མི་དགེ་བར་ལུང་བསྟན་པའང་མིན་པའི་(༡༢༦ན)
ཕྱིར་ན་མ་སྒྲིབ་ལུང་མ་བསྟན་ཡིན་པ་ཉིད་ཀྱིས་མཚམས་མེད་པ་ནི་མ་ཡིན་པས། ལྡན་མིན་གྱི་ཆོས་འདི་ནི་འབྱེད་པ་པོ་དང་ལྡན་པ་མ་ཡིན་ནོ། །གཉིས་པ་ནི། དེ་དང་དགེ་འདུན་ཡང་དག་ལྡན། །དབྱེན་དེ་དང་དབྱེ་བའི་དགེ་འདུན་ཡང་དག་པར་ལྡན་གྱི། དེ་འབྱེད་པ་པོ་ལྷ་སྦྱིན་ལ་ནི་ལྡན་པ་མ་ཡིན་པ་ཁོ་ནའོ། །གཉིས་པ་འདིས་འབྱེད་པའི་དབྱེན་ལ། ངོ་བོ་དང་། གང་ལ་ལྡན་པའོ། །དང་པོ་ནི། དེ་ཡི་ཁ་ན་མ་ཐོ་རྫུན། །དགེ་འདུན་གྱི་དབྱེན་ལྡན་མིན་གྱི་ཆོས་དེ་དང་ལྷན་ཅིག་སྐྱེས་པའི་དེའི་ངག་གི་རིག་བྱེད་དང་རིག་བྱེད་མིན་པ་ཁ་ན་མ་ཐོ་བ་དེ་ནི་རྫུན་ནོ། །གཉིས་པ་ནི། དེ་དང་འབྱེད་པོ་ཡང་དག་ལྡན། །དེ་དང་འབྱེད་པོ་ཡང་དག་ལྡན་ཅེས་སོ། །གཉིས་པ་དེའི་འབྲས་བུ་ལ། དངོས་དང་། དོགས་པ་བཅད་པའོ། །དང་པོ་ནི། བསྐལ་པར་མནར་མེད་པར་སྨིན་འགྱུར། །འབྱེད་པོ་དེ་བར་གྱི་བསྐལ་པར་མནར་མེད་པར་སྨིན་འགྱུར་ཏེ། འདོད་ཁམས་ན་དེ་བས་ཚེ་རིང་བ་མེད་པའི་ཕྱིར། མཚམས་མེད་གཞན་ནི་མནར་མེད་དུ་མ་ངེས་སོ། །གཉིས་པ་ནི། ལྷག་པས་གནོད་པ་ལྷག་པར་འགྱུར། །མཚམས་མེད་མང་པོ་བྱས་ལ་དེ་ལན་གྲངས་གཞན་ལ་ནི་མི་མྱོང་། སྐྱེ་གནས་གཅིག་པུར་ནི་མཚམས་མེད་ཀྱི་ལས་འབྲས་མང་པོ་ཇི་ལྟར་རྫོགས་པར་སྨིན་རུང་ངམ་སྙམ་ན། མཚམས་མེད་ལྷག་པ་མང་པོས་མནར་མེད་དུ་གཉིས་དང་གསུམ་དང་བཞི་དང་ལྔ་འགྱུར་གྱི་ཚོར་བ་སྡུག་བསྔལ་གྱི་གཞི་ཡུས་ཆེན་པོ་དང་། ཤིན་ཏུ་གཞོན་ཤ་ཅན་གྱི་ལུས་ཐོབ་ཅིང་། གནོད་པ་ལྷག་པར་རབ་ཏུ་མང་བ་དང་ཤིན་ཏུ་མི་བཟད་པར་འགྱུར་རོ། །གསུམ་པ་རྣམ་པའི་སྒོ་ནས་རྒྱས་པར་བཤད་པ་ལ། འཁོར་ལོའི་དབྱེན་གྱི་རྣམ་པ་དང་། ལས་ཀྱི་དབྱེན་བཤད་པ། འཁོར་ལོའི་དབྱེན་མི་འབྱུང་བའི་དུས་ངོས་བཟུང་བའོ། །དང་པོ་ལ། སུ་ཞིག་གིས་འབྱེད་པ། གང་དུ་འབྱེད་པ། སུ་དག་འབྱེད་པ། ཇི་ཙམ་གྱིས་བྱེ་བ། དུས་ཇི་སྲིད་དུ་འཇུག་པ། སྒྲ་དོན། གླིང་གང་ལ་ཡོད་པ། དགེ་སློང་གི་གྲངས་སོ། །(༡༢༦བ)
དང་པོ་ནི། དགེ་སློང་ལྟ་སྤྱོད་ཚུལ་ལྡན་པས། །འབྱེད་དོ། འབྱེད་བྱེད་དེ་ཡང་དགེ་སློང་གིས་འབྱེད་ཀྱི། ཡུལ་མི་གཉན་པས་ཁྱིམ་པ་ཡང་མ་ཡིན་ལ་དགེ་སློང་མ་སོགས་ཀྱིས་མ་ཡིན་ཏེ། དགེ་སློང་ལ་མི་སྤོབས་པའི་ཕྱིར། དགེ་སློང་དེ་ཡང་འཇིག་ལྟ་སོགས་ལྟ་བ་ལྔ་སྤྱད་ཅིང་ཞུགས་པ་ཁོ་ནས་བརྟག་ཅིང་སེལ་ནུས་པས་སྟོན་པ་གཞན་དང་ལམ་གཞན་བཟུང་ནུས་དེས་འབྱེད་དེ། སྡིག་པའི་བསམ་པ་བརྟན་པ་དང་འཁྱུད་པ་ཅན་ཡིན་པའི་ཕྱིར། སྲེད་པ་སྤྱོད་པས་ནི་མ་ཡིན་ཏེ། ཀུན་ནས་ཉོན་མོངས་པ་དང་རྣམ་བྱང་གི་ཕྱོགས་ལ་བསམ་པ་མི་བརྟན་པའི་ཕྱིར་རོ། །ཚུལ་དང་ལྡན་པས་འབྱེད་ཀྱི་ཚུལ་ཉམས་པས་ནི་མ་ཡིན་ཏེ། དེའི་ཚིག་མི་བཙན་པའི་ཕྱིར། གཉིས་པ་ནི། གཞན་དུའོ། བཅོམ་ལྡན་འདས་མངོན་སུམ་དུ་བཞུགས་པ་དེ་ལས་གཞན་དུ་འབྱེད་པའོ། །དེ་བཞིན་གཤེགས་པ་རྣམས་ནི་བཟོད་དཀའ་བ་སྟེ། ཟིལ་གྱིས་མནན་དཀའ་བའི་ཕྱིར་དང་། བཀའ་བཙན་པའི་ཕྱིར་སྟོན་པ་མངོན་སུམ་དུ་བཞུགས་པ་ཉིད་དུ་དབྱེ་མི་ནུས་སོ། །གསུམ་པ་ནི། བྱིས་པ་རྣམས། །བྱིས་པ་རྣམས་ཁོ་ན་འབྱེད་ཀྱི་འཕགས་པ་རྣམས་ནི་མ་ཡིན་ཏེ། ལུང་དང་རྟོགས་པའི་ཆོས་མངོན་སུམ་དུ་གྱུར་པའི་ཕྱིར་དང་། དད་པ་མི་ཕྱེད་པ་དང་ལྡན་པའི་ཕྱིར་རོ། །ཁ་ཅིག་ན་རེ། དྲོད་དང་རྩེ་མོ་ལ་གནས་པ་མན་ཆད་འབྱེད་དེ་ཉམས་སྲིད་པའི་ཕྱིར། དེས་འབྱེད་ཆེན་པོ་བཟོད་པ་ཆེན་པོ་ཐོབ་པ་རྣམས་ནི་མ་ཡིན་ཏེ། བདེན་པ་མཐོང་བ་དང་འདྲ་བའི་ཕྱིར་རམ། མཐོང་ལམ་དང་ཉེ་ཞིང་ངེས་པ་ལ་མངོན་སུམ་དུ་ཕྱོགས་པའི་ཕྱིར་ཞེས་ཟེར་རོ། །བཞི་པ་ནི། སྟོན་དང་ལམ་གཞན་ལ་བཟོད་པ། །བྱེ་བའོ། དེ་བཞིན་གཤེགས་པ་ལས་གཞན་པའི་སྟོན་པ་དང་དེས་བསྟན་པའི་ལམ་ལས་གཞན་པའི་ལམ་གཞི་ལྔ་པོ་འོ་མ་མི་སྤྱད་པ་དང་། ཤ་སྤོང་བ་དང་། ལན་ཚ་ལོངས་མི་སྤྱད་པ་དང་། གོས་མ་བྲས་པ་བགོ་བ་དང་། གྲོང་གི་ནང་གི་གཙུག་ལག་ཁང་དུ་འདུག་པ་ཞེས་(༡༢༧ན)
པ་ལ་བཟོད་ན་དེ་ཙམ་གྱིས་དགེ་འདུན་བྱེ་བ་ཞེས་བརྗོད་དོ། །ལྔ་པ་ནི། དེ་ནི་མི་གནས་སོ། །བྱེ་ནས་དེ་ཉིད་ཀྱི་ནི་ནུབ་རངས་པ་གཅིག་ཏུ་མི་གནས་སོ། །ནམ་མ་ལངས་པ་ཉིད་དུ་ངེས་པར་དགེ་འདུན་སླར་འདུམ་པར་འགྱུར་རོ། །དྲུག་པ་ནི། དེ་ནི་འཁོར་ལོའི་དབྱེན་དུ་འདོད། །དགེ་འདུན་གྱི་དབྱེན་དེ་ནི་འཁོར་ལོའི་དབྱེན་དུ་འདོད་དེ། མཐོང་ལམ་ནི་འཁོར་ལོ་དང་འདྲ་བས་འཁོར་ལོ་མྱུར་དུ་འཇུག་པ་བཞིན་མཐོང་ལམ་ཀྱང་མྱུར་དུ་འཇུགའཁོར་ལོ་ས་གཅིག་ཏུ་མི་གནས་པ་བཞིན་དུ་མཐོང་ལམ་ཀྱང་ཤེས་བཟོད་པ་གཅིག་ཏུ་མི་གནས། འཁོར་ལོ་མ་རྒྱལ་བ་རྒྱལ་བར་བྱེད་པ་བཞིན་མཐོང་ལམ་གྱིས་ཀྱང་བྱེད། འཁོར་ལོ་ཡར་འཕར་མར་འཕར་བྱེད་པ་བཞིན་མཐོང་ལམ་ཀྱང་ཁམས་གོང་འོག་ཏུ་ཡར་འཕར་མར་གཞོལ་བྱེད་པའི་འཁོར་ལོ་དང་འདྲ་བ་དེ་ལ། ཇི་སྲིད་དུ་དགེ་འདུན་འདུམ་པར་མ་གྱུར་པ་དེ་སྲིད་དུ་ལམ་འཇུག་པའི་གེགས་སུ་གྱུར་ནས་འགའི་རྒྱུད་ལ་ཡང་འཕགས་པའི་ལམ་མངོན་དུ་མི་འགྱུར་བའི་ཕྱིར། དེའི་ཚེ་བཅོམ་ལྡན་འདས་ཀྱི་ཆོས་འཁོར་ཕྱེ་བའི་ཕྱིར། འཁོར་ལོའི་དབྱེན་དང་དེའི་རྒྱུ་མཚན་དུ་དགེ་འདུན་གྱི་དབྱེན་ཅེས་ཀྱང་བྱའོ། །བདུན་པ་ནི། འཛམ་བུའི་གླིང་ནའོ། འཛམ་བུ་གླིང་ནའོ་སྟེ། གླིང་གཞན་ན་མེད་དེ། གཞན་ན་སྟོན་པ་མེད་པས་སྟོན་པ་དང་མཉམ་དུ་རེ་བའི་ཁ་ལོག་ཏུ་འཇུག་པ་ལྷ་སྦྱིན་ལྟ་བུ་མེད་པའི་ཕྱིར་རོ། །བརྒྱད་པ་ནི། དགུ་སོགས་ཀྱི། །དབྱེ་བྱ་དགེ་འདུན་དགེ་སློང་བརྒྱད་དང་དགུ་པ་ནི་འབྱེད་པོ་ལས། དགུ་སོགས་ཀྱིས་ཏེ། དེ་ཡན་ཆད་གྲངས་མ་ངེས་པས་འབྱེད་དེ། ངེས་པར་སངས་རྒྱས་དང་ལྷ་སྦྱིན་གྱི་ཕྱོགས་ལ་དགེ་འདུན་གཉིས་སུ་གནས་པར་གྱུར་ནས་བྱེ་དགོས་པའི་ཕྱིར། དགེ་འདུན་གྱི་དབྱེན་གཞན་ནི་ལས་ཀྱི་དབྱེན་ལས་འགྱུར་ཏེ། མཚམས་གཅིག་གི་ནང་དུ་བློ་མི་མཐུན་པས་དགེ་འདུན་གྱི་ལས་གསོ་སྦྱོང་སོགས་བྱས་ན་དེར་འགྱུར་བའི་ཕྱིར། (༡༢༧བ)
གཉིས་པ་ལས་ཀྱི་དབྱེན་ནི། ལས་ཀྱི་དབྱེན་ནི་གླིང་གསུམ་ན། །དེ་ནི་བརྒྱད་དག་ཡན་ཆད་ཀྱིས། །ལས་ཀྱི་དབྱེན་ནི་བསྟན་པ་ཡོད་ན་གླིང་གསུམ་ཁོ་ན་ན་ཡོད་དོ། །ལས་ཀྱི་དབྱེན་དེ་ནི་དགེ་སློང་བརྒྱད་དག་ཡན་ཆད་ཀྱིས་ཀྱང་འབྱེད་དེ། འབྱེད་པ་པོ་སྟོན་པར་ང་རྒྱལ་བྱེད་པ་མེད་ཅིང་། འབྱེད་པ་པོའང་མི་དགོས་པར་དགེ་འདུན་བཞི་སོ་སོར་བྱེ་ནས་མཚམས་གཅིག་གི་ནང་ན་ལས་སོ་སོར་བྱེ་བས་འགྲུབ་པའི་ཕྱིར་རོ། །གསུམ་པ་འཁོར་ལོའི་དབྱེན་མི་འབྱུང་བའི་དུས་ངོས་བཟུང་བ་ནི། དང་པོ་མཐའ་སྐྱོན་ཟུང་གཅིག་གི། །སྔ་རོལ་ཐུབ་པ་ནོངས་པ་དང་། །མཚམས་མ་བཅད་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །འཁོར་ལོའི་དབྱེན་ནི་དུས་དྲུག་དག་ཏུ་མི་འབྱུང་སྟེ། དང་པོ་ཆོས་འཁོར་བསྐོར་ནས་རིང་པོར་མ་ལོན་པ་ན། སྔར་མེད་ཀྱི་ཆོས་བྱུང་བ་ལ་དགའ་བ་དང་། རབ་ཏུ་དགའ་བ་སྐྱེ་བས་བསམ་པ་དགེ་བ་ཤ་གཅིག་པ་དང་། མཐའ་མ་བཅོམ་ལྡན་འདས་མྱ་ངན་ལས་འདའ་བའི་ཚེ་སྟོན་པ་དང་བྲལ་བའམ་མི་རྟག་པར་ཡིད་ལ་བྱེད་པས་སྐྱོ་བ་སྐྱེ་བས་དགེ་འདུན་ཤ་གཅིག་པ་བློ་གཅིག་ཅིང་མི་མཐུན་པ་མེད་པ་ཡིན་ནོ། །བར་དུ་ཡང་བསྟན་པ་ལ་ལྟ་བའི་སྐྱོན་འཆི་ལྟས་ཀྱིས། བདག་གིས་བཅོམ་ལྡན་འདས་ཀྱིས་བཤད་པའི་དོན་འཚལ་བ་ལྟར་ན། བཅོམ་ལྡན་འདས་ཀྱིས་གང་ཞིག་གིས་བར་དུ་གཅོད་པའི་ཆོས་སུ་བཀའ་སྩལ་པ་དེ་དག་ནི་བསྟེན་ན་བར་དུ་གཅོད་པར་བགྱིད་པར་མི་འགྱུར་བ་ལགས་སོ། །ཞེས་པ་དང་། སེམས་དེ་ཉིད་ཀུན་ཏུ་རྒྱུག་ཅིང་འཁོར་བར་འགྱུར་བ་ལགས་སོ། །ཞེས་བཤད་པ་ལྟ་བུ་མ་བྱུང་གི་བར་དུ་དང་། ཚུལ་ཁྲིམས་ཀྱི་སྐྱོན་བཟང་སྦྱིན་གྱིས་འཆལ་པའི་ཚུལ་ཁྲིམས་མ་བྱུང་གི་བར་དུ་དང་། ཇི་སྲིད་དུ་ཉན་ཐོས་རྫུ་འཕྲུལ་ཅན་དང་ཤེས་རབ་ཅན་གྱི་མཆོག་ཟུང་གཅིག་མ་བྱུང་གི་སྔ་རོལ་ཏུ་འབྱེ་བར་མི་འགྱུར་ཏེ། བྱེ་བ་ནུབ་རངས་སུ་མི་གནས་པར་ཉན་ཐོས་ཟུང་དེས་ཕྱིར་བཟླུམ་པར་འགྱུར་བའི་ཕྱིར། ཐུབ་པ་ནོངས་པ་ན་ཡང་མི་འབྱུང་སྟེ། སྟོན་པ་མྱ་ངན་ལས་འདས་ན་འབྱེད་པ་པོའི་འགྲན་ཟླ་མེད་པའི་ཕྱིར། དཀྱིལ་འཁོར་གྱི་མཚམས་(༡༢༨ན)
གཅིག་གི་ནང་དུ་ལས་ཐ་དད་བྱེད་པས་དགེ་འདུན་ཕྱོགས་གཉིས་སུ་གནས་པ་ན་བྱེ་བ་ཡིན་ལ། ཇི་སྲིད་དུ་མཚམས་མ་བཅད་པ་དག་ཏུ་འབྱུང་བ་མ་ཡིན་པའི་ཕྱིར། གང་གིས་སློབ་མ་དགེ་འདུན་དབྱེ་བར་འགྱུར་བའི་ལས་བྱས་པ་ལ་རག་པས། སྟོན་པ་འདིས་སྔོན་བྱང་ཆུབ་སེམས་དཔར་གྱུར་པའི་ཚེ་དྲང་སྲོང་མངོན་ཤེས་ལྔ་ཅན་གྱི་འཁོར་གྱི་དབྱེན་བྱས་པས་འདིའི་དགེ་འདུན་ལྷ་སྦྱིན་གྱིས་ཕྱེའོ་ཞེས་གྲགས་ལ། སངས་རྒྱས་ཐམས་ཅད་ཀྱི་འཁོར་ལོ་ལ་ནི་དབྱེན་འབྱུང་བ་མ་ཡིན་ནོ། །གཉིས་པ་ལྔ་ཀ་བསྡོམས་ཏེ་བཤད་པ་ལ། མཚམས་མེད་ལྔའི་གྲངས་ངེས་དང་། འཕྲོས་དོན་དོགས་པ་གཅོད་པའོ། །དང་པོ་ནི། ཕན་འདོགས་པ་དང་ཡོན་ཏན་ཞིང་། །སྤངས་དང་མེད་པར་བྱས་ཕྱིར་རོ། །མ་བསད་པ་སོགས་མཚམས་མེད་ཡིན་ལ། གཞན་དག་མ་ཡིན་པ་ཅི་ཞེ་ན། ཕན་འདོགས་པ་དང་ཡོན་ཏན་གྱི་ཞིང་བསམ་པས་སྤངས་པ་དང་སྦྱོར་བས་མེད་པའམ་ཉམས་པར་བྱས་པ་ལས་དེར་བཞག་པའི་ཕྱིར་རོ། །དེ་ལ་ཕ་མ་ནི་ལུས་ཐར་པ་དང་མཐུན་པར་བསྐྱེད་པས་ཕན་འདོགས་པའི་ཞིང་ཡིན་ལ། གཞན་གསུམ་ནི་ཡོན་ཏན་གྱི་རྟེན་ཡིན་པའམ། །བསོད་ནམས་ཀྱི་ཞིང་མཆོག་ཏུ་གྱུར་པས་ན་ཡོན་ཏན་གྱི་ཞིང་། ཞིང་ས་གཤིན་པ་ལ་ས་བོན་བཏབ་ན་འབྲས་བུ་མང་དུ་འབྱུང་བ་བཞིན་ནོ། །དེ་རྣམས་ནི་བསམ་པས་སྤངས་ཤིང་དང་པོ་གསུམ་སྦྱོར་བས་དངོས་སུ་མེད་པར་བྱས་ལ། ཕྱི་མ་གཉིས་ཀྱང་སྦྱོར་བས་ཉམས་པར་བྱས་པའོ། །གཉིས་པ་ལ། མ་གསོད་པའི་དོགས་གཅོད། ངན་སེམས་ཀྱི་ཁྲག་ཕྱུང་བའི་དོགས་གཅོད། དགྲ་བཅོམ་གསོད་པའི་དོགས་གཅོད་དོ། །དང་པོ་ལ། མཚན་གྱུར་པ་ལ་དཔྱད་པ། ཟླ་མཚན་མངལ་གཞན་དུ་སྐྱེད་པའི་དོགས་གཅོད་དོ། །དང་པོ་ནི། མཚན་ནི་གཞན་དུ་གྱུར་ཀྱང་འགྱུར། །ཕ་མ་མཚན་ནི་གཞན་དུ་གྱུར་ཀྱང་ལུས་གཅིག་པ་དེ་ལ་ཕའམ་མ་བསད་པའི་མཚམས་མེད་དུ་འགྱུར་ཏེ། ཕ་ཡང་མ་ཡིན། དགྲ་བཅོམ་(༡༢༨བ)
ཡང་མ་ཡིན་པའི་སྐྱེས་བ་ཞིག་བསད་ན་མཚམས་མེད་ཀྱི་ཁ་ན་མ་ཐོ་བས་རེག་པ་ཡོད་དམ་ཞེ་ན། ཡོད་དེ། མ་མཚན་གྱུར་པ་བསད་ནའོ། །མ་ཡང་མ་ཡིན། དགྲ་བཅོམ་ཡང་མ་ཡིན་པའི་བུད་མེད་གཅིག་བསད་ན་མཚམས་མེད་ཀྱི་ཁ་ན་མ་ཐོ་བས་རེག་སྟེ། ཕ་མཚན་གྱུར་པ་བསད་ན་དེར་འགྱུར་བའི་ཕྱིར། སྐྱེ་བ་འདིའི་ཕ་དེ་ཚེ་འཕོས་ནས་ལུག་ལྟ་བུར་སྐྱེས་པ་དེ་བསད་ཀྱང་ལུས་ཐ་དད་དུ་འཕོས་པའི་ཕྱིར་མཚམས་མེད་མི་འབྱུང་ངོ་། །གཉིས་པ་ནི། གང་གི་ཟླ་མཚན་ལས་བྱུང་མ། །བུད་མེད་གཞན་ལས་ནུར་ནུར་པོ་ཟག་ནས་བུད་མེད་གཞན་གྱི་མངལ་དུ་བླུགས་ནས་བསྐྱེད་པ་དེ་བསད་ན་མཚམས་མེད་དུ་འགྱུར་བའི་མ་ནི་སེམས་ཅན་དེ་གང་གི་ཟླ་མཚན་ལས་བྱུང་བ་དེ་ནི་དེའི་མ་ཡིན་ནོ། །གཉིས་པ་ལའང་མ་ལ་ཞུ་དགོས་པའི་བྱ་བ་ཐམས་ཅད་ཞུ་དགོས་པ་ཡིན་ཏེ། ལུས་བཟུང་ནུ་ཞོ་ལྡུད་པ་དང་། ཟས་རགས་པ་གོམས་པ་དང་། ཁྲུས་དང་ལུས་མཉེ་བ་དང་། ཡ་ང་བ་སྤོང་དུ་འཇུག་པ་སོགས་ཕན་འདོགས་པ་ལ་མ་དང་འདྲ་བ་ཡིན་པའི་ཕྱིར། མ་གསོད་པའི་སྦྱོར་བ་བྱས་ནས་མ་ལས་གཞན་བསད་པ་དང་། མ་མ་ཡིན་པ་ལ་སྦྱོར་བ་བྱས་ནས་མ་བསད་ནའང་མཚམས་མེད་དུ་མི་འགྱུར་ཏེ། ཁྲིའུའི་སྟེང་ན་གོས་ཡོད་པ་དང་སྦྱར་ན། འདི་ན་དགྲ་ཉལ་ལོ་སྙམ་དུ་བསམ་ནས་དེར་མཚོན་གྱིས་བཏབ་པ་དང་། མཚོན་བཏབ་པ་དེས་མ་ཁྲི་འོག་ཏུ་འདུག་པ་བསད་པ་དང་། བཙོ་བླག་མཁན་གྱིས་ཕའི་མགོ་ལ་སྦྲང་བུ་འདུག་ནས་སྦྲང་བུ་ལ་བརྒྱབས་པས་ཕ་ཤི་བ་ནི་མཚམས་མེད་པ་མ་ཡིན་པ་ལྟ་བུའི་ཕྱིར་རོ། །མཚོན་ཐབས་གཅིག་གིས་མ་དང་གཞན་ཞིག་གཉིས་བསད་ན་རིག་བྱེད་མ་ཡིན་པ་ནི་གཉིས་ཡིན་ལ། རིག་བྱེད་ནི་མཚམས་མེད་ཁོ་ན་ཡིན་ཏེ། ལས་དེ་སྟོབས་ཆེ་བའི་ཕྱིར། བཙུན་པ་དབྱངས་སྒྲོག་ནི། རིག་བྱེད་ཁ་ཅིག་ནི་མཚམས་མེད་ཀྱིས་བསྡུས་ལ། རིག་བྱེད་ཁ་ཅིག་ནི་སྲོག་གཅོད། གཅིག་ཤོས་ཀྱིས་(༡༢༩ན)
བསྡུས་པ་རྣམ་པ་གཉིས་ཏེ། རྡུལ་ཕྲ་རབ་བསགས་པ་མང་བ་ཡིན་པའི་ཕྱིར་ཞེས་ཟེར་རོ། །དགྲ་བཅོམ་མ་ཡིན་པའི་འདུ་ཤེས་ཀྱིས་དགྲ་བཅོམ་པ་བསད་ནའང་མཚམས་མེད་དུ་འགྱུར་ཏེ། འདི་བསད་དོ་ཞེས་རྟེན་ངེས་བཟུང་དུ་བྱས་པའི་ཕྱིར། ཁྱབ་སྟེ། དངོས་པོ་ལ་དགྲ་བཅོམ་པ་ཡིན་པ་ལ་དགྲ་བཅོམ་པ་མ་ཡིན་པའི་འདུ་ཤེས་ཀྱིས་བསད་ཀྱང་མཚམས་མེད་དུ་འགྱུར་ཏེ། དགྲ་བཅོམ་པ་དང་དགྲ་བཅོམ་མིན་པ་ལ་སྤུ་རིས་ཀྱི་བྱེ་བྲག་མེད་པའི་ཕྱིར་རོ། །དེ་ལྟར་ན་ལྷ་སྦྱིན་བསད་སྙམ་ནས་དགྲ་བཅོམ་པ་མཆོད་སྦྱིན་བསད་པས་མཚམས་མེད་མི་འོང་བར་འདོད་པ་ཉམས་ཞེ་ན། གནད་མི་མཚུངས་ཏེ། ལྷ་སྦྱིན་བསད་མནོ་བས་དགྲ་བཅོམ་པ་མཆོད་སྦྱིན་བསད་པ་དེ་གཉིས་ལ་སྤུ་རིས་མི་འདྲ་བ་ཡོད་པས། མཚམས་མེད་དང་སྲོག་གཅོད་པའི་ལས་ལམ་མི་འོང་བར་འདོད་པའི་ཕྱིར་རོ། །ཕ་དང་དགྲ་བཅོམ་ཐུན་མོང་བ་བསད་ན། ཁ་ཅིགདགྲ་བཅོམ་པ་ཡང་གཞན་གཅིག་བསད་པ་དང་། ཕ་ཡང་གཞན་གཅིག་བསད་པ་བས་སྡིག་ཆུང་ཟེར། ལ་ལ་ན་རེ་མཉམ་པོར་སྡིག་པ་འོང་ཟེར། འདིར་ནི་ཕ་དགྲ་བཅོམ་བསད་ནའང་མཚམས་མེད་ནི་དགྲ་བཅོམ་བསད་པའི་གཅིག་ཏུ་འགྱུར་ཏེ། རྟེན་གཅིག་པའི་ཕྱིར་རོ། །འོ་ན་རྒྱལ་པོ་སྒྲ་ཅན་གྱིས་གྲོང་ཁྱེར་རོ་ཀུ་ཀ་དང་ཉེ་བ་ཞིག་ཏུ་ཕ་ཨུ་ཏྲ་ཡ་ན་འོངས་པ་ལ་གཤེད་མ་བཏང་སྟེ་བསད་པ་ལ། ཕ་དགྲ་བཅོམ་དེས་གཤེད་མའི་མི་ལ་སོང་ལ། སྐྲ་ཅན་ལ་ཁྱོད་ཀྱིས་ནི་མཚམས་མེད་པ་གཉིས་བྱས་ཏེ། ཕ་བསད་པ་གང་ཡིན་པ་དང་། དགྲ་བཅོམ་པ་བསད་པའོ། །ཞེས་རྟོགས་པ་བརྗོད་པ་དང་མི་འགལ་ལམ་ཞེ་ན། མི་འགལ་ཏེ། དེར་བརྗོད་པ་ནི། ང་དགྲ་བཅོམ་པ་མིན་ཀྱང་ཕ་ཡིན་པས་ཁྱོད་ཀྱིས་ཕ་བསད། ཕ་མིན་ཀྱང་དགྲ་བཅོམ་པ་ཡིན་པས་དགྲ་བཅོམ་པ་བསད། དེར་སོང་ལ་སྐྲ་ཅན་ཁྱོད་ཀྱིས་མཚམས་(༡༢༩བ)
མེད་པའི་རྒྱུ་གཉིས་ཀྱིས་མཚམས་མེད་པ་བྱས་སོ་ཞེས་སྨྲོས་ཤིག་པའམ། ཡང་ན་མཚམས་མེད་པའི་སྒོ་གཉིས་ནས་སྦྱོས་པས་མཚམས་མེད་པར་བྱས་པས་མཚམས་མེད་ཀྱི་སྡིག་ཤིན་ཏུ་ལྕི་བར་བསྟན་ནས་འགྱོད་དུ་གཞུག་པའི་ཆེད་ཡིན་པའི་ཕྱིར་རོ། །གཉིས་པ་ངན་སེམས་ཀྱིས་ཁྲག་ཕྱུང་བའི་དོགས་གཅོད་ནི། སངས་རྒྱས་བརྡེག་པར་སེམས་ལ་མིན། །སངས་རྒྱས་བཀྲོང་བའི་སེམས་ཀྱིས་མཚམས་མེད་དུ་འགྱུར་གྱི། སངས་རྒྱས་ལ་བརྡེག་པར་སེམས་པས་ཁྲག་ཕྱུང་བ་ལ་མཚམས་མེད་དུ་འགྱུར་བ་མིན་ཏེ། དེས་བཀྲོངས་པར་སེམས་པ་མེད་པའི་ཕྱིར་རོ། །གསུམ་པ་དགྲ་བཅོམ་གསོད་པའི་དོགས་གཅོད་ནི། བསྣུན་འོག་དགྲ་བཅོམ་པ་ལ་མིན། །དགྲ་མ་བཅོམ་པའི་ཚེ་མཚོན་བསྣུན་ལ། བསྣུན་པའི་འོག་ཏུ་དགྲ་བཅོམ་དུ་གྱུར་པ་ལ་མཚམས་མེད་དུ་འགྱུར་བ་མིན་ཏེ། དེས་ནི་དགྲ་བཅོམ་དེ་ལ་སྦྱོར་བ་མ་བྱས་པའི་ཕྱིར་རོ། །གཉིས་པ་དེའི་འབྲས་བུ་བཤད་པ་ལ། སྤྱིར་བསྟན་པ་དང་། ཁྱད་པར་བཤད་པའོ། །དང་པོ་ནི། མཚམས་མེད་སྦྱོར་བ་བྱས་པ་ལ། །འདོད་ཆགས་བྲལ་འབྲས་མི་སྲིད་དོ། །མཚམས་མེད་པའི་སྦྱོར་བ་བྱས་ཏེ། སེམས་དེ་ཡང་མ་བཟློག་པས་འདོད་ཆགས་དང་བྲལ་བ་མི་སྲིད་དོ། །བསམ་པ་ཤིན་ཏུ་འགལ་བའི་ཕྱིར། ལས་ཀྱི་ལམ་གཞན་སྲོག་གཅོད་ཀྱི་སྦྱོར་བ་བྱས་ནས་འཕགས་ལམ་སྐྱེས་པ་ལ་ནི་ཆོས་ཅན། ལས་ལམ་གྱི་ཁ་ན་མ་ཐོ་བ་མི་སྐྱེ་སྟེ། འཕགས་ལམ་སྐྱེས་པའི་རྟེན་དེ་དང་ལས་ལམ་ཤིན་ཏུ་འགལ་བའི་ཕྱིར། སྔོན་འཕགས་སྐྱེས་པོ་སྐྲག་ནས་མི་རྩེན་མ་གངས་ཁྲོད་ཀྱི་ནགས་ཚལ་ཞིག་ན་འཁྲས་ཤིང་འཚོ་བ་རྔོན་གྱིས་འཚོ་བ་ལས། བཅོམ་ལྡན་འདས་སུམ་ཅུ་རྩ་གསུམ་ནས་བབས་ཏེ་འཁོར་བཅས་ལ་ཆོས་བསྟན་པས་བུ་རྣམས་ཀྱིས་རྒྱུན་ཞུགས་ཀྱི་འབྲས་བུ་ཐོབ་སྟེ། སྔར་རི་དྭགས་ཀྱི་གདོས་དང་རྒྱ་བཤམས་པ་ལ། སྦྱོར་བ་དེས་རི་དྭགས་བསད་ཀྱང་འབྲས་བུ་ཐོབ་པས་མི་དགེ་བའི་ལས་ལམ་གྱིས་མ་རེག་གོ། །གང་སྤེལ་དུ། བྱེ་བྲག་ཏུ་སྨྲ་བ་ནི་མཚམས་མེད་པའི་སྦྱོར་བ་ལའང་(༡༣༠ན)
ལྡོག་སྟེ། སོར་ཕྲེང་ཅན་བཞིན་ནོ། །ཞེས་ཟེར་རོ། །འཇམ་སྒེག་ན་རེ། འདི་ཡང་ཐེག་པ་ཐུན་མོང་བའི་དབང་དུ་བྱས་ཀྱི། ཐེག་ཆེན་ལྟར་ན། མཚམས་མེད་བྱས་པས་ཀྱང་འབྲས་བུ་ཐོབ་སྟེ། མ་སྐྱེས་དགྲའི་འགྱོད་བསལ་གྱི་མདོ་ལས། མ་བསད་པའི་མཚམས་མེད་བྱས་པས་ཀྱང་དགྲ་བཅོམ་ཐོབ་པར་གསུངས་པའི་ཕྱིར་རོ། །ཞེས་ཟེར་རོ། །གཉིས་པ་ནི། དགེ་འདུན་དབྱེ་ཕྱིར་རྫུན་སྨྲ་བ། །ཁ་ན་མ་ཐོ་རབ་ཆེར་འདོད། །དེ་བཞིན་གཤེགས་པའི་ཆོས་དང་། མུ་སྟེགས་པའི་ནི་ཆོས་མིན་དུ་ཤེས་པས་དགེ་འདུན་དབྱེ་བའི་ཕྱིར་རྫུན་སྨྲ་བ་ལེགས་བཤད་ལ་ཉེས་བཤད་དང་། ཉེས་བཤད་ལ་ལེགས་བཤད་དུ་ལོག་པས་ཉེས་སྤྱད་ཐམས་ཅད་ཀྱི་ནང་ན་ཁ་ན་མ་ཐོ་བ་དང་བཅས་པ་རབ་ཏུ་ཆེ་བར་འདོད་དེ། དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་ཟག་མེད་ཀྱི་ལམ་སྐྱེ་བ་ལ་གེགས་བྱས་པའི་སྒོ་ནས་བསྣུན་པའི་ཕྱིར། འཇིག་རྟེན་རྣམས་ཀྱི་མཐོ་རིས་དང་བྱང་གྲོལ་གྱི་ལམ་གྱི་བར་དུ་གཅོད་པར་བྱེད་པའི་ཕྱིར་ཏེ། དགེ་འདུན་བྱེ་ནས་སླར་མ་འདུམ་བར་དུ་འཇིག་རྟེན་ངེས་པ་ལ་འཇུག་པ་དང་། འབྲས་བུ་ཐོབ་པ་དང་། འདོད་ཆགས་དང་བྲལ་བ་དང་། ཟག་པ་ཟད་པ་ལ་གེགས་སུ་གྱུར་ཅིང་བསམ་གཏན་དང་། ཀློག་པ་དང་། ཁ་ཏོན་དང་། སེམས་པའི་ལས་རྣམས་ཀྱང་མི་འཇུག་ཅིང་། ལྷ་དང་ཀླུ་དང་མིར་བཅས་པའི་འགྲོ་བ་ཡང་འཁྲུགས་པ་དང་། ཡིད་མི་བདེ་བ་དང་། རང་དབང་མེད་པ་དང་། དྲན་པ་ཉམས་པར་འགྱུར་ལ། འདིའི་རྣམ་སྨིན་ཀྱང་བསྐལ་པ་གཅིག་ཏུ་མནར་མེད་པར་སྐྱེ་བའི་ཕྱིར་རོ། །མཚམས་མེད་ལྷག་མ་རྣམས་ལས་ལྔ་པ་ངན་སེམས་ཀྱིས་ཁྲག་འབྱིན་པ་ལྕི་ལ། སྔ་མ་དག་ལས་གསུམ་པ་དགྲ་བཅོམ་པ་བསད་པ་ལྕི་ཞིང་། གཉིས་པ་ལས་དང་པོ་མ་གསོད་པ་ལྕི་བ་ཡིན་ཏེ། གཉིས་པ་ཕ་གསོད་པ་ནི། ཐམས་ཅད་ཀྱི་ནང་ནས་ཡང་བའོ། །འོ་ན་དབྱེན་ཁ་ན་མ་(༡༣༠བ)
ཐོ་བ་ལྕི་བ་མ་ཡིན་པར་ཐལ། དེ་བས་ཉེས་པ་གསུམ་གྱི་ནང་ནས་ཡིད་ཀྱི་ཉེས་པ་ཁ་ན་མ་ཐོ་བ་དང་བཅས་པ་ཆེན་པོར་གསུངས་པ་དང་། ལོག་ལྟ་ནི་ཁ་ན་མ་ཐོ་བ་དམ་པ་ཡིན་ནོ། །ཞེས་གསུངས་པའི་ཕྱིར་ཞེ་ན། གནས་སྐབས་མི་གཅིག་པས་ཁྱབ་པ་མེད་དེ། དབྱེན་དེར་གསུངས་པ་ནི་མཚམས་མེད་ཀྱི་ནང་ནས་དང་། ཡིད་དེར་གསུངས་པ་ནི་ལས་གསུམ་གྱི་ནང་ནས་དང་། ལོག་ལྟ་དེར་གསུངས་པ་ནི་ལྟ་བའི་ནང་ནས་ངེས་བཟུང་མཛད་པའི་ཕྱིར་དང་། ཡང་ན་དགེ་འདུན་གྱི་དབྱེན་ནི་ཁ་ན་མ་ཐོ་བ་ལྕི་བ་ཡིན་ཏེ། བར་བསྐལ་དུ་རྣམ་སྨིན་འབྱིན་པ་རྒྱ་ཆེ་བའི་ཕྱིར། ཡིད་ཉེས་ཁ་ན་མ་ཐོ་བ་ཆེན་པོ་ཡིན་ཏེ། ཡིད་ཉེས་ཀྱིས་དནྟ་ཀའི་དགོན་ལ་སོགས་ན་ཡོད་པའི་སྐྱེ་བོ་ཕལ་པོ་ཆེ་འཆི་བའི་རྒྱུ་བྱེད་ལ། ལུས་ངག་གིས་དེ་ཙམ་བྱེད་མི་ནུས་པའི་ཕྱིར། ལོག་ལྟ་ཁ་ན་མ་ཐོ་བ་དམ་པ་ཡིན་ཏེ། དགེ་བའི་རྩ་བ་གཅོད་བྱེད་ཡིན་པའི་ཕྱིར་གོ་རིམ་བཞིན་དུ་གསུངས་པ་ཡིན་ནོ། །གསུམ་པ་ལས་འབྲས་ཀྱི་ཞར་བྱུང་ནི། འཇིག་རྟེན་པ་ཡི་དགེ་བ་ལ། །སྲིད་རྩེའི་སེམས་པ་འབྲས་རབ་ཆེ། །འཇིག་རྟེན་པའི་ལས་དགེ་བ་ལ་ནི་ཐམས་ཅད་ཀྱི་ནང་ན་སྲིད་པའི་རྩེ་མོའི་སེམས་པ་འབྲས་བུ་རབ་ཏུ་ཆེ་སྟེ། དེ་རྣམ་པར་སྨིན་པ་བསྐལ་པ་བརྒྱད་ཁྲིར་རབ་ཏུ་ཞི་བ་ཡིན་པའི་ཕྱིར། རྣམ་སྨིན་གྱི་དབང་དུ་བྱས་ནས་དེ་སྐད་བཤད་ཀྱི། བྲལ་བའི་དབང་དུ་བྱས་ན་ནི་སྲིད་རྩེ་ལས་འདོད་ཆགས་དང་བྲལ་བར་བྱེད་པའི་བར་ཆད་མེད་ལམ་དང་། མཚུངས་ལྡན་རྡོ་རྗེ་ལྟ་བུའི་ཏིང་ངེ་འཛིན་གྱི་སེམས་པ་འབྲས་བུ་ཆེ་སྟེ། ཀུན་ཏུ་སྦྱོར་བ་ཐམས་ཅད་གཏན་དུ་གཏུགས་པ་འབྲས་བུ་ཡིན་པའི་ཕྱིར་རོ། །གཉིས་པ་དེ་དང་ཉེ་བ་བཤད་པ་ལ། ངོ་བོ་དང་། ཞར་ལ་ལམ་གསུམ་གྱི་གེགས་བཤད་པ་དང་། ངེས་གནས་བྱེ་བྲག་ཏུ་བཤད་པའོ། །དང་པོ་ནི། མ་དགྲ་བཅོམ་མ་སུན་བྱས་དང་། །བྱང་ཆུབ་སེམས་དཔའ་ངེས་གནས་དང་། །སློབ་པ་གསོད་དང་དགེ་འདུན་གྱི། །འདུ་བའི་སྒོ་ནི་འཕྲོག་པ་དག །མཚམས་མེད་པ་དང་ཆ་འདྲ་སྟེ། །ལྔ་པ་མཆོད་རྟེན་འཇིག་པ་ཡིན། །ཅི་མཚམས་མེད་པ་ཁོ་ན་ལས་གཞན་པའི་ལས་ཀྱིས་དམྱལ་བར་སྐྱེ་(༡༣༡ན)
བ་ཡོད་དམ་ཞེ་ན། ཡོད་དེ། དེ་དང་ཆ་འདྲ་བའི་ལས་རྣམས་ཀྱིས་དམྱལ་བར་སྐྱེ་བ་ཡོད་དོ། །དེ་ལ་ཁ་ཅིག་ན་རེ། བར་ཆད་མེད་པ་ཁོ་ནར་སྐྱེ་བ་ནི་མ་ཡིན་ཏེ། མཚམས་མེད་པ་ཉིད་མ་ཡིན་པའི་ཕྱིར་ཞེས་ཟེར་རོ། །སྔ་མ་དག་གིས་མ་ཁྱབ་སྟེ། བར་ཆད་མེད་པར་སྐྱེ་ན་མཚམས་མེད་ཀྱི་ལས་འབྲས་ཡིན་མི་དགོས་པས་དུས་དང་རྣམ་པར་སྨིན་པ་མི་འདྲ་བའི་ཕྱིར། ཞེས་སྨྲའོ། །དེས་ན་མཚམས་མེད་པ་ལྔ་དང་ཆ་འདྲ་སྟེ། མ་དགྲ་བཅོམ་མ་སུན་ཕྱུང་བྱས་པ་ནི་མ་གསོད་པ་དང་ཆ་འདྲ་བ་དང་། བྱང་ཆུབ་སེམས་དཔའ་ངེས་གནས་གསོད་པ་ནི་ཕ་གསོད་པ་དང་ཆ་འདྲ་བ་དང་། སློབ་པ་གསོད་པ་ནི་དགྲ་བཅོམ་བསད་པ་དང་ཆ་འདྲ་བ་དང་། དགེ་འདུན་འདུ་བའི་སྒོ་འཕྲོག་པ་དག་ནི་འཁོར་ལོའི་དབྱེན་དང་ཆ་འདྲ་བས་འདི་ལའང་ཉིན་གཅིག་དགེ་འདུན་གྱི་ཆོས་སྟོན་མེད་པར་བྱས་པ་ཡིན་ཀྱང་ཟེར། དབྱིག་བཤེས་ན་རེ། མི་ཚེ་གཅིག་ཏུ་དགེ་འདུན་འདུ་བའི་རྫས་མེད་པར་བྱས་པ་ཡིན་ཀྱང་ཟེར་རོ། །ངན་སེམས་ཀྱིས་ཁྲག་འབྱིན་པ་དང་ཆ་འདྲ་བ་ནི། ལྔ་པ་མཆོད་རྟེན་འཇིག་པ་ཡིན་ནོ། །དེ་ཡང་ཇི་སྐད་དུ། དཀར་པོའི་ཆོས་རྣམས་བསགས་པ་དང་། །སྡིག་པ་མ་ལུས་སྤངས་པའི་ཕྱིར། །སངས་རྒྱས་བཅོམ་ལྡན་འདས་ལ་ནི། །མཆོད་རྟེན་ཅེས་ནི་ངེས་པར་བརྗོད། །ཅེས་པས། དོན་དེའི་དཔེ་བང་རིམ་དང་སྲོག་ཤིང་ལ་སོགས་པ་ཡོད་པ་འདི་བྱུང་བ་ཡིན། དེ་ལ་སངས་རྒྱས་ཀྱི་མཆོད་རྟེན་ནི་བང་རིམ་བཅུ་གསུམ་པ། རང་རྒྱལ་གྱི་བཅུ་གཅིག་པ། ཉན་ཐོས་ཀྱི་བཞི་པ། འཁོར་ལོས་སྒྱུར་བ་ལ་བང་རིམ་མེད་པ་ཟེར་རོ། །གཉིས་པ་ནི། བཟོད་དང་ཕྱིར་མི་འོང་དགྲ་བཅོམ། །འཐོབ་ལ་ལས་གེགས་ཤིན་ཏུ་བྱེད། །བཟོད་པ་ཐོབ་པ་ལ་ནི་ངན་སོང་གི་ལས་གེགས་བྱེད་དུ་ཤིན་ཏུ་ཉེ་བར་གནས་པ་ཡིན་ཏེ། བཟོད་པ་ནི་ངན་སོང་གི་ལས་ཀྱི་རྣམ་སྨིན་གྱི་ས་ལས་(༡༣༡བ)
འདའ་བའི་ཕྱིར། མི་ཞིག་ཡུལ་འདོར་བ་ལ་བུ་ལོན་པ་དག་ལྡང་བ་བཞིན་ནོ། །ལར་ཉོན་མོངས་མང་དུ་སྤངས་ཟིན་པ་འབྲས་བུ་ཐོབ་ལ་ཉེ་ཡང་ལས་ཀྱི་ནུས་པ་སྟོབས་ཆེན་ཉོན་མོངས་ཉུང་ངུ་ལས་སྤང་དུ་མེད་ཀྱང་ཤིན་ཏུ་སྤོང་བ་བུལ་ལ་ལས་ཀྱི་ནུས་པ་སྟོབས་ཆུང་ན་ཉོན་མོངས་དུ་མ་སྤང་དུ་ཡོད་ཀྱང་སྤོང་བ་མྱུར་རོ། །ཕྱིར་མི་འོང་བའི་འབྲས་བུ་འཐོབ་པ་ལ་ནི་འདོད་པར་སྐྱེ་བའི་ལས་གེགས་བྱེད་དུ་ཤིན་ཏུ་ཉེ་བར་གནས་ཏེ། ཕྱིར་མི་འོང་གི་འབྲས་བུ་ནི། འདོད་པའི་ལས་ཀྱི་རྣམ་སྨིན་གྱིས་ལས་འདའ་བའི་ཕྱིར་རོ། །མཐོང་ཆོས་ལ་མྱོང་འགྱུར་གྱི་ལས་ནི་མ་གཏོགས་སོ། །གོང་མ་དེ་རུ་མཐོང་ཆོས་ལ་མྱོང་འགྱུར་གྱི་ལས་མ་གཏོགས་བྱ་བ་མ་སྨོས་པ་ཅི་སྙམ་ན། བདེ་འགྲོའི་རྟེན་ལ་ངན་སོང་གི་རྣམ་སྨིན་མཐོང་ཆོས་ལ་སྨིན་དུ་མི་འདོད་པས་གོང་མ་ལ་དེ་སྐད་མ་སྨོས་སོ། །དགྲ་བཅོམ་ཐོབ་པ་ལ་གཟུགས་དང་གཟུགས་མེད་ཀྱི་ལས་(ལས་འདི་གསུམ་ཀྱང་སྐྱེས་ནས་མྱོང་འགྱུར་ལ་དགོངས་ཀྱི། གཞན་འཁོར་བ་ཐོག་མེད་ནས་བསགས་པའི་ལས་མཐའ་ཡས་པའི་རྣམ་སྨིན་ཟད་ཕྱུངས་ཅི་ལ་ཟིན་པས་སོ། །མཆན།) གེགས་བྱེད་དུ་ཤིན་ཏུ་ཉེ་བར་གནས་ཏེ། དེའི་རྣམ་སྨིན་གྱི་ས་ལས་འདས་པའི་ཕྱིར། གསུམ་པ་ངེས་གནས་བྱེ་བྲག་ཏུ་བཤད་པ་ལ། སྤྱིར་བསྟན་པ་དང་། བྱེ་བྲག་ཏུ་སྟོན་པས་མཛད་ཚུལ་ལོ། །དང་པོ་ལ། ས་མཚམས་དང་། ཡོན་ཏན་གྱི་ཆོས། རྣམ་པར་རྒྱས་བཤད་དོ། །དང་པོ་ནི། གང་ནས་བྱང་ཆུབ་སེམས་དཔའ་ཡིན། །གང་ནས་མཚན་གྱི་ལས་བྱེད་པ། །གང་ནས་བྱང་ཆུབ་སེམས་དཔའ་ངེས་པ་ལ་གནས་པ་ཡིན་ཅེ་ན། གང་ནས་བཟུང་སྟེ་མཚན་སོ་གཉིས་རྣམ་པར་སྨིན་པ་ཅན་གྱི་ལས་སོག་པར་བྱེད་པ་དེ་ནས་བསྐལ་པ་བརྒྱ་ན་སངས་རྒྱས་ཐོབ་པར་འགྱུར་བ་དེའོ། །གཉིས་པ་ནི། བདེ་འགྲོ་རིགས་མཐོར་སྐྱེ་དབང་ཚང་། །ཕོར་འགྱུར་ཚེ་རབས་དྲན་མི་ལྡོག །དེ་ཕན་ཆད་སྐྱོན་བཞི་དང་བྲལ་བས་བདེ་འགྲོ་ལྷ་དང་མིར་སྐྱེ་བ་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་ལ་སོགས་པ་རིགས་མཐོན་པོར་སྐྱེ་བ་དང་། དབང་པོ་ཚང་བ་དང་། (༡༣༢ན)
ཕོ་ཁོ་ནར་འགྱུར་བ་དང་། ཡོན་ཏན་གཉིས་དང་ལྡན་པ་ནི་ཚེ་རབས་དྲན་པ་དང་། སངས་རྒྱས་པའི་དུས་ལས་ཕྱིར་མི་ནུར་བས་མི་ལྡོག་པ་སྟེ། སེམས་ཅན་ཐམས་ཅད་ལ་ཕན་པའི་དོན་དུ་སྡུག་བསྔལ་གྱི་རྣམ་པ་ཐམས་ཅད་དང་ལོག་སྒྲུབ་ཐམས་ཅད་ཀྱིས་སྐྱོ་བ་མེད་པའི་ཕྱིར། འཇིག་རྟེན་ན་ནི་ཟོང་གིས་མ་ཉོས་པའི་བྲན་ཅེས་བརྗོད་པ་དེ་ནི་བྱང་སེམས་དེ་དག་ཡིན་ཏེ། བདག་ཉིད་ཆེན་པོ་དེ་དག་ནི་འབྱོར་པའི་མཆོག་ཁྱད་པར་ཅན་མཐའ་དག་བརྙེས་ཀྱང་ཐུགས་རྗེའི་གཞན་དབང་དུ་གྱུར་པས་རང་ཉིད་སེམས་ཅན་ཐམས་ཅད་ཀྱི་དྲུང་དུ་ཁྱི་དང་འདྲ་བར་ང་རྒྱལ་མེད་པར་གནས་ཤིང་། སེམས་ཅན་ཐམས་ཅད་ཀྱི་བརྙས་གནོད་ཐམས་ཅད་བཟོད་ཅིང་། ངལ་བ་དང་སེམས་ཅན་ཐམས་ཅད་ཀྱི་སྡུག་བསྔལ་ལ་གཟིགས་ནས་དེ་བསལ་བའི་བརྣག་པ་ཉམས་སུ་བཞེས་པ་ལ་ཇི་མི་སྙམ་པའི་ཕྱིར། དཔེར་ན། འབྲོག་སྟོང་གི་ནགས་མེས་ཚིག་པའི་རེག་པ་ལ་རྩིས་མེད་པ་དང་འདྲའོ། །གསུམ་པ་ནི། དེ་ནི་འཛམ་གླིང་ཕོ་གྱུར་ཉིད། །མངོན་སུམ་སངས་རྒྱས་ལ་སེམས་པ། །བསམས་པ་ལས་བྱུང་བསྐལ་པ་བརྒྱ། །ལུས་པ་དག་ཏུ་འཕེན་པར་བྱེད། །རེ་རེའང་བསོད་ནམས་བརྒྱ་ལས་སྐྱེ། །མཚན་གྱི་རྣམ་པར་སྨིན་པའི་ལས་དེ་ནི་རྟེན་སེམས་དཔའ་འཛམ་གླིང་པའི་ཕོར་གྱུར་ཉིད་ཀྱིས་འཕེན་གྱི། གླིང་གཞན་དུ་མོས་ནི་མ་ཡིན་ཏེ། འཛམ་གླིང་པ་རྣམས་བློ་རྣོ་བའི་ཕྱིར། གོང་དུ་ཕོར་བཤད་པ་དེ་ནི་མཚན་གྱི་ལས་རྩོམ་པ་ནས་མོར་མི་སྐྱེ་ཟེར་བ་ཡིན། འདིར་ཕོར་བཤད་པ་ནི་མཚན་གྱི་ལས་རྩོམ་པ་དེ་ཐོག་མར་ཕོས་རྩོམ་གྱི་མོས་མི་རྩོམ་ཟེར་བ་ཡིན་ནོ། །ལས་བསགས་པའི་ཡུལ་ནི་སྟོན་པ་མངོན་སུམ་དུ་གྱུར་པ་དང་། བདག་ཀྱང་འདི་ལྟ་བུར་སངས་རྒྱས་སུ་གྱུར་ཅིག་ཅེས་མངོན་སུམ་མམ་ལྐོག་ཏུ་གྱུར་ཀྱང་སླ། སངས་རྒྱས་ལ་དམིགས་པའི་སེམས་པ་ཁོ་ན་དང་། དུས་བསྐལ་པ་བརྒྱ་ལུས་པའི་ཚེ་དག་ཏུ་འཕེན་པར་བྱེད་ཀྱི། མང་པོ་ལུས་པའི་ཚེ་ནི་མ་ཡིན་ནོ། །ལས་ཀྱི་ངོ་བོ་ནི་ཐོས་བྱུང་དང་སྟོབས་(༡༣༢བ)
ཆུང་བས་མི་འཕེན་ལ། བསམ་པ་ལས་བྱུང་བས་འཕེན་པ་ཡིན་གྱི། བསམ་བྱུང་ལས་སྒོམ་བྱུང་བཟང་ཡང་འདིའི་འཕེན་བྱེད་ནི་མ་ཡིན་ཏེ། སྒོམ་བྱུང་ནི་མི་གཡོ་བའི་ལས་ཡིན་ཅིང་། ཁམས་གོང་མར་སྐྱེད་བྱེད་ཡིན་པས་འཛམ་གླིང་གི་ཕོར་སྐྱེད་བྱེད་མ་ཡིན་ལ། འདིས་ནི་འཛམ་གླིང་གི་ཕོར་སྐྱེད་བྱེད་ཡིན་པའི་ཕྱིར། སྟོན་པ་འདིས་ནི་སྐར་རྒྱལ་བསྟོད་པའི་བརྩོན་འགྲུས་ཀྱིས་བསྐལ་པ་དགུ་བཟླུམས་པས་བསྐལ་པ་དགུ་བཅུ་རྩ་གཅིག་ལུས་པའི་ཚེ་འཕངས་ཏེ། མདོ་ལས། གཅེར་བུ་པའི་སྦྱིན་བདག་དྲང་སྲོང་རལ་གྲི་ཐོགས་པ་ཞིག་གིས། གོའུ་ཏ་མ་ཁྱོད་ལོ་ཉེས་འདི་ལྟ་བུ་ལ་དགེ་སློང་གི་འཁོར་འདི་སྙེད་ཅིག་དང་ཐབས་གཅིག་ཏུ་སེར་བ་བཞིན་མ་རུང་བར་བྱེད་ཅིང་། སློང་མོ་ལ་རྒྱུ་བ་ཁྱིམ་རྣམས་ཕུང་བར་བྱ་བའི་ཕྱིར་ཞུགས། ཞེས་སྨྲས་པ་དང་། སངས་རྒྱས་ཀྱིས། གྲོང་དཔོན་ངས་འདི་ནས་བཟུང་སྟེ། བསྐལ་པ་དགུ་བཅུ་རྩ་གཅིག་གི་བར་དུ་རྗེས་སུ་དྲན་ཏེ་ཟས་སྨིན་པ་སྟེར་བར་བྱ་བའི་ཁྱིམ་པ་འགའ་ལ་ཡང་གནོད་པར་འགྱུར་བ་འགའ་ཡང་མ་མཁྱེན་ཏོ། །ཞེས་གསུངས་པ་དེ་ཚུན་ཆད་རང་བཞིན་གྱིས་ཚེ་རབས་དྲན་པའི་ཕྱིར། དེ་ཕན་ཆད་དུའང་མི་དྲན་པ་ནི་མ་ཡིན་ཏེ། སྔོན་གྱི་སློབ་དཔོན་རྣམས་ན་རེ། བསྐལ་པ་གྲངས་མེད་དང་པོ་ཚར་ཕྱིན་པའི་བྱང་སེམས་ཁོ་ན་སྐྱོན་བཞི་ཟློག་པར་བྱེད་ལ། ཡོན་ཏན་གཉིས་ནི་ཐོབ་བོ། །ཞེས་ཟེར་རོ། །མཚན་དེ་དག་རེ་རེའང་བསོད་ནམས་ཏེ་སེམས་པ་བརྒྱ་བརྒྱ་རེ་ལས་སྐྱེས་པ་སྟེ། དེའང་འཕེན་བྱེད་ལྔ་བཅུ་དང་རྫོགས་བྱེད་ལྔ་བཅུ་སྟེ་ལས་ལམ་བཅུ་ལ། སྲོག་གཅོད་སྤོང་བའི་སེམས་པ་དང་། དེ་ལ་འགོད་པའི་སེམས་པ་དང་། དེའི་བསྔགས་པ་བརྗོད་པའི་སེམས་པ་དང་། དེའི་རྗེས་སུ་ཡི་རང་བའི་སེམས་པ་དང་། སངས་རྒྱས་ཉིད་དུ་བསྔོས་པའི་སེམས་པ་སྟེ། དང་པོ་ལ་མཇུག་ཏུ་ལན་(༡༣༣ན)
གཉིས་མངོན་དུ་གྱུར་པས་སེམས་པ་བརྒྱའོ། །ཞེས་ཟེར་རོ། །གཞན་ན་རེ། སངས་རྒྱས་ནི་རྒྱུ་ལྔས་སྲོག་གཅོད་སྤོང་བ་དང་ལྡན་ཏེ། ལས་ལམ་དངོས། དག་པ་ཉེར་བསྡོགས། དག་པ་རྣམ་རྟོག་གིས་མ་སྨས་པ། དྲན་པས་ཡོངས་སུ་ཟིན་པ། མྱང་འདས་སུ་ཡོངས་སུ་བསྔོས་པ་སྟེ། དེ་ལ་དམིགས་པའི་སེམས་པ་ལྔ། ལས་ལམ་བཅུ་ལ་ལྔ་བཅུ་སྟེ། བཅོམ་ལྡན་འདས་དགེ་བའི་ལས་ལམ་མ་འདྲེས་པ་བཅུ་ལས་ངེས་པར་སྐྱེ་བ་ལྟར་བདག་ཀྱང་དེ་འདྲར་ཤོག་ཅིག་སྙམ་དུ་ལན་གཉིས་མངོན་དུ་འགྱུར་བས་སེམས་པ་བརྒྱའོ། །ཞེས་ཟེར་རོ། ཁ་ཅིག་ནི། སངས་རྒྱས་ཀྱི་སྐྱེ་བའི་སྐུ་སྐྱེས་བུ་ཆེན་པོའི་མཚན་སོ་གཉིས་ཀྱི་མཚན་ཉིད་དང་། ཆོས་ཀྱི་སྐུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དེ་སངས་རྒྱས་ཡིད་ལ་བྱེད་པ་ལས། སེམས་པ་ལྔ་བཅུ་འབྱུང་ལ། བདག་ཀྱང་འདི་འདྲ་བར་གྱུར་ཅིག་སྙམ་པ་ལྔ་བཅུ་སྟེ། བསོད་ནམས་བརྒྱ་ཡིན་ནོ། །ཞེས་ཟེར་རོ། །གཞན་ན་རེ། འདོད་ཁམས་གནས་རིགས་ཉི་ཤུ། གཟུགས་ཁམས་བཅུ་དྲུགགཟུགས་མེད་བཞི། གྲང་དམྱལ་བརྒྱད་དེ། ཁམས་གསུམ་ནི་ཁྱད་པར་བཞི་བཅུ་རྩ་བརྒྱད་ཡིན་ལ། དེ་ལ་དམིགས་པའི་བྱང་སེམས་ལ་སྙིང་རྗེ་དང་། མཚུངས་ལྡན་གྱི་སེམས་པ་བཞི་བཅུ་རྩ་བརྒྱད་དང་། དེའི་རྗེས་ལ་འདིས་ཁམས་གསུམ་ལས་སེམས་ཅན་ཇི་ལྟར་བཀྲོལ་སྙམ་དུ་སངས་རྒྱས་ལ་དམིགས་པའི་སེམས་པ་དང་། བདག་ཀྱང་དེ་འདྲ་བར་གྲོལ་བར་བྱེད་པར་གྱུར་ཅིག་སྙམ་པའི་སེམས་པ་སྟེ་ལྔ་བཅུ་དང་། དེ་དག་ལན་གཉིས་སུ་མངོན་དུ་གྱུར་པས་བརྒྱའོ། །ཟེར་རོ། །ཁ་ཅིག་ན་རེ། བསོད་ནམས་དེའི་ཚད་ནི་བྱང་ཆུབ་ཏུ་སེམས་དཔའ་ཉེ་བ་སྟེ་ངེས་གནས་མ་གཏོགས་སེམས་ཅན་ཐམས་ཅད་ཀྱིས་ལོངས་སྤྱོད་འཐོབ་པར་འགྱུར་བའི་བསོད་ནམས་ཀྱི་ཚད་དེ་མཚན་གཅིག་འགྲུབ་པའི་ཚད་དོ་ཟེར། གཞན་(༡༣༣བ)
དག་ན་རེ། དགེ་བའི་སྒོ་ནས་དཔེར་བྱས་པ་མིན། སེམས་ཅན་ཐམས་ཅད་ཀྱི་ལས་ཀྱིས་སྟོང་གསུམ་འགྲུབ་པའི་ལས་ཀྱི་ཚད་དེ་ཀ་ཙམ་གྱི་ཚད་གཅིག་གིས་མཚན་གཅིག་འགྲུབ་ཟེར། གཞན་དག་ན་རེ། དེའི་ཚད་ནི་འོ་ཅག་གིས་མི་ཤེས། སངས་རྒྱས་ཁོ་ནས་མཁྱེན་པར་ཟད་དོ། །ད་ལྟར་ན་འོ་ཅག་གིས་ཀྱང་བརྒྱ་ཡི་ཚད་བཟུང་ན་ཅི་ལྟོ་ཞེ་ན། མཚན་རེ་རེ་བརྒྱ་བརྒྱ་ལས་སྐྱེ་བར་བཟུང་ནུས་ཀྱང་བརྒྱ་ཡི་ནང་ན་གཅིག་ཡོད་པའི་ཚད་འདི་ཡིན་ཅེས་བཟུང་མི་ནུས་པའི་ཕྱིར། དེའི་རྣམ་སྨིན་འདི་ཙམ་བྱ་བའི་ཚད་ཀྱང་བཟུང་མི་ནུས་སོ་ཟེར་རོ། །གཉིས་པ་བྱེ་བྲག་ཏུ་སྟོན་པས་མཛད་ཚུལ་ལ། ཚོགས་བསགས་ཚུལ་དང་། ཕར་ཕྱིན་རྫོགས་ཚུལ་ལོ། །དང་པོ་ནི། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པ་ཡིན། །སྟོན་པ་འདི་བྱང་སེམས་སུ་གྱུར་པ་ན་བསྐལ་པ་གྲངས་མེད་དང་པོ་ལ། སངས་རྒྱས་བདུན་ཁྲི་ལྔ་སྟོང་། གཉིས་པ་ལ་བདུན་ཁྲི་དྲུག་སྟོང་། གསུམ་པ་ལ་བདུན་ཁྲི་བདུན་སྟོང་ལ་བསྙེན་བཀུར་བྱས་སོ། །བསྐལ་པ་གྲངས་མེད་དང་པོ་དང་གཉིས་པ་དང་གསུམ་པ་གསུམ་གྱི་ཐ་མར་སངས་རྒྱས་རིན་ཆེན་གཙུག་ཏོར་ཅན་དང་། མར་མེ་མཛད་དང་། རྣམ་པར་གཟིགས་རིམ་པ་བཞིན་བྱུང་སྟེ། དེ་རྣམས་ཀྱི་ཚེ་བསྐལ་པ་གྲངས་མེད་གསུམ་རྫོགས་པའི་ཕྱིར་རོ། །རྣམ་གཟིགས་ནི་བསྐལ་པ་དགུ་བཅུ་རྩ་གཅིག་འདས་པའི་སྔོན་དུ་བྱུང་ཞིང་། དེའི་ཚེ་གསུམ་པ་རྫོགས་ན་གཙུག་ཏོར་ཅན་དང་། ཐམས་ཅད་སྐྱོབ་དང་། འཁོར་བ་འཇིག་དང་། གསེར་ཐུབ་དང་། འོད་སྲུང་རྣམས་ཀྱིས་བར་བཅད་ཀྱི། དེའི་མོད་ལ་ཅིའི་ཕྱིར་སངས་མ་རྒྱས་ཞེ་ན། སློབ་དཔོན་གང་སྤེལ་ནི། རྫོགས་ཀྱང་ཐམས་ཅད་དུ་རྫོགས་པ་མ་ཡིན་པས་འོད་སྲུང་གི་ཚེ་ཚངས་སྤྱོད་སྤྱད་ནས་དགའ་ལྡན་དུ་འཁྲུངས། ཞེས་བཤད་ལ། སློབ་དཔོན་སངས་རྒྱས་ཡོན་ཏན་ནི། མཚན་རྣམ་སྨིན་ཅན་གྱི་ལས་བྱེད་(༡༣༤ན)
པ་ཕན་ཆོད་དུ་སངས་རྒྱས་བསྟེན་པའི་ཐ་མར་བྱུང་བ་ལ་དགོངས་ལ། དེ་ནས་མ་ཙན་རྣམ་པར་སྨིན་པའི་ལས་བསགས་ཤིང་གྲངས་མེད་གསུམ་པ་ལ་བསྟེན་པ་ཐམས་ཅད་ཀྱི་ཐ་མ་ནི་སངས་རྒྱས་འོད་སྲུང་སྟེ། སངས་རྒྱས་འོད་སྲུང་བར་དག་ཏུ། །བདུན་ཁྲི་བདུན་སྟོང་ང་ཡིས་མཆོད། །ཅེས་འབྱུང་བས་སོ་ཞེས་གསུངས་ཏེ། དེས་ནི་སློབ་དཔོན་གང་སྤེལ་གྱི་གཞུང་དང་ཡང་མཐུན་པ་ཡིན་ནོ། །དེ་དག་ཐམས་ཅད་ཀྱི་སྔོན་དང་པོ་ཤཱཀྱ་ཐུབ་པ་ཞེས་བྱ་བའི་སངས་རྒྱས་ལ་སྟོན་པ་འདི་བྱང་སེམས་སུ་གྱུར་པའི་ཚེ་རྫ་མཁན་གྱི་ཁྱེའུ་སྣང་བྱེད་དུ་གྱུར་པས། ཆུ་འཇམ་པོ་དང་། བསྐུ་མཉེ་དང་། ཞབས་འབྲིང་ལ་སོགས་པས་རིམ་གྲོ་བྱས་ནས་འདི་འདྲ་བའི་རྣམ་པ་ཁོ་ནར་སངས་རྒྱས་པར་ཤོག་ཅིགཅེས་སྨོན་ལམ་བཏབ་པ་ཡིན་པས་སྟོན་པ་དེ་ཡང་འདི་བཞིན་དུ་རྩོད་དུས་སུ་འབྱུང་ལ། དེའི་བསྟན་པ་ཡང་ལོ་སྟོང་གི་མཐའི་བར་དུ་གནས་པར་གྱུར་ཏོ། །ལོ་སྟོང་པོ་དེ་ཡང་རྟོགས་པའི་དུས་ཡིན་གྱི། སྒྲུབ་པ་དང་ལུང་གི་དུས་སོགས་ཡོ་ལོག་ན་ནི་ལྔ་སྟོང་དུ་རིག་པར་བྱའོ། །ཐེག་ཆེན་པ་ནི་གྲངས་མེད་པ་རེ་རེ་ལ་ཡང་སངས་རྒྱས་དཔག་ཏུ་མེད་པ་བསྙེན་བཀུར་བ་འདོད་དོ། །གཉིས་པ་ལ། སྦྱིན་པའི་ཕར་ཕྱིན་རྫོགས་ཚུལ། ཚུལ་ཁྲིམས་དང་བཟོད་པའི། བརྩོན་འགྲུས་ཀྱི། བསམ་གཏན་དང་ཤེས་རབ་ཀྱི་ཕར་ཕྱིན་རྫོགས་ཚུལ་ལོ། །དང་པོ་ནི། ཀུན་ལ་ཐམས་ཅད་སྙིང་རྗེ་ཡིས། །སྦྱིན་པར་བྱེད་པས་སྦྱིན་པ་རྫོགས། །གང་གི་ཚེ། ཡུལ་ཀུན་ལ་མིག་གི་བར་དང་རྐང་གི་བར་ཐམས་ཅད་མངོན་མཐོའི་ཁྱད་པར་ལ་མི་རེ་བར་སྙིང་རྗེ་ཡིས་སྦྱིན་པར་བྱེད་ན་དེ་ཙམ་གྱིས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་སོ། །གཉིས་པ་ནི། ཆགས་བཅས་ཡན་ལག་བཅད་ཀྱང་ནི། །མི་འཁྲུགས་བཟོད་དང་ཚུལ་ཁྲིམས་ཀྱི། །གང་གི་ཚེ་འདོད་ཆགས་དང་བཅས་ཤིང་མ་བྲལ་བཞིན་དུ་ཡན་ལག་(༡༣༤བ)
བཅད་ཀྱང་སེམས་མི་འཁྲུགས་པ་དེའི་ཚེ་ལུས་ངག་གི་ཉེས་སྤྱོད་མི་བྱེད་པའི་ཕྱིར། འདིའི་ཚུལ་ཁྲིམས་ཀྱི་ཕར་ཕྱིན་དང་། སེམས་མ་འཁྲུགས་པའི་ཕྱིར། དེའི་ཚེ་འདིའི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ཡིན་ནོ། ། གསུམ་པ་ནི། སྐར་རྒྱལ་བསྟོད་པས་བརྩོན་འགྲུས་ཀྱི། །སངས་རྒྱས་སྐར་རྒྱལ་གྱིས། བྲམ་ཟེའི་ཁྱེའུ་ལས་བྱམས་པ་སྔོན་ལ་སངས་རྒྱས་པར་གཟིགས། བྲམ་ཟེའི་ཁྱེའུ་ཤཱཀ་ཐུབ་ཕྱིས་འཚང་རྒྱ་བར་གཟིགས། ཤཱཀ་ཐུབ་ཀྱི་གདུལ་བྱ་སྔར་འོང་བར་གཟིགས་ནས་སྟོན་པ་དང་གདུལ་བྱ་ཐེ་ནེ་བསྣོལ་དུ་སོང་བ་དེ་གཟིགས་པ་དེ་ལ། གདུལ་བྱ་དང་སྟོན་པ་དུས་གཅིག་ཏུ་སྒྲུབ་པའི་ཆེད་དུ་སྟོན་པ་སྐར་རྒྱལ་མེའི་ཁམས་ལ་སྙོམས་པར་ཞུགས་ལ། བྲམ་ཟེའི་ཁྱེའུ་ཤཱཀ་ཐུབ་བརྩོན་འགྲུས་དྲག་པོར་རྩོམ་དུ་གཞུགདེས་དྲག་པར་བརྩམས་པས་སྔོན་ལ་བྱང་ཆུབ་ཙམ་ན་གདུལ་བྱ་དང་མི་བསྣོལ་བར་ཐུགས་ལ་དགོངས་ནས་རིན་པོ་ཆེའི་བྲག་ཕུག་ཏུ་མེ་ཁམས་ལ་སྙོམས་པར་ཞུགས་པ་དེ་བྲམ་ཟེའི་ཁྱེའུས་མཐོང་ནས། རྐང་པ་གཅིག་གིས་འགྲེང་ནས་ཞག་བདུན་གྱི་བར་དུ། སྐྱེས་བུ་ཁྱུ་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལ་མེད། འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་ཡོད་པ་མིན། །ལྷ་ཡི་ཕོ་བྲང་གནས་མཆོག་དག་ནའང་ཡོད་མིན་ཕྱོགས་དང་ཕྱོགས་མཚམས་དག་ནའང་མེད། །རི་དང་ནགས་སུ་བཅས་པའི་ས་སྟེང་རྒྱས་པ་ཀུན་ཏུ་ཉུལ་ནའང་ག་ལ་ཡོད། །ཅེས་པའི་ཚིགས་བཅད་གཅིག་གིས་བསྟོད་པས་དེའི་ཚེ་བརྩོན་འགྲུས་ཀྱི་ཕར་ཕྱིན་རྫོགས་ལ། བརྩོན་འགྲུས་བརྩམས་པ་དེས་བསྐལ་པ་དགུ་ཡང་བཟླུམས་སོ་ཞེས་གྲགས་ཏེ། བསྐལ་པ་དགུ་བཅུ་རྩ་གཅིག་གིས་བརྩོན་འགྲུས་ཀྱི་ཕར་ཕྱིན་རྫོགས་པའི་ཕྱིར། དེ་ཉིད་(༡༣༥ན)
ཀྱི་ཕྱིར་གོང་དུ་བསྐལ་པ་དགུ་བཅུ་རྩ་གཅིག་ལུས་པའི་ཚེ་འཕངས་སོ་ཞེས་བྱ་བ་དང་ཡང་ཤིན་ཏུ་འགྲིགས་པ་ཡིན་ནོ། །བཞི་པ་ནི། དེ་མ་ཐག་ལ་ཏིང་འཛིན་བློའི། །ཟད་པ་དང་མི་སྐྱེ་བ་ཤེས་པའི་མཚན་ཉིད་བྱང་ཆུབ་པའི་སྔ་རོལ་གྱི་དེ་མ་ཐག་རྡོ་རྗེ་ལྟ་བུའི་ཏིང་ངེ་འཛིན་གྱི་ཚེ་ལ་ཏིང་ངེ་འཛིན་བསམ་གཏན་གྱི་ཕར་ཕྱིན་དང་ཤེས་རབ་བམ་བློའི་ཕར་ཕྱིན་དག་རྫོགས་ཏེ། དེའི་ཚེ་བསམ་གཏན་དང་ཤེས་རབ་ཀྱི་ཕུན་སུམ་ཚོགས་པའི་ཕ་རོལ་ཏུ་ཕྱིན་པའི་ཕྱིར་རོ། །འདིར་སྨྲས་པ། ལེགས་པ་རབ་མཆོག་དངོས་པོའི་ཚོགས་རྣམས་ཀྱིས། །ཕ་རོལ་སོན་པར་སྒྲུབ་པའི་རྒྱལ་བ་མཆོག །སྐྱོན་བྲལ་ཡོན་ཏན་མ་ལུས་རྫོགས་པ་ཡི། །ཀུན་མཁྱེན་སྟོན་པའི་ཡོན་ཏན་དེ་རིང་དྲན། །དེ་ལ་དང་བ་རྒྱ་ཆེན་བཟོད་མེད་ཀྱི། །དད་པ་སྐྱེས་པའི་དགེ་བ་གང་མཆིས་དེ། །མཁའ་མཉམ་འགྲོ་བའི་བྱང་ཆེན་རིགས་དམ་པ། །ལེགས་པར་སྦྱངས་པའི་རྐྱེན་དུ་འགྲོ་གྱུར་ཅིག །གཉིས་པ་བསྟེན་བྱ་བསོད་ནམས་བྱ་བའི་གཞི་གསུམ་བཤད་པ་ལ། ཐུན་མོང་གི་ངེས་ཚིག །དབྱེ་བ་སོ་སོའི་རང་བཞིན། ཆོས་སྦྱིན་བྱེ་བྲག་ཏུ་བཤད་པའོ། །དང་པོ་ནི། གསུམ་པོ་བསོད་ནམས་བྱ་བ་དང་། །དེའི་གཞི་དཔེར་ན་ལས་ལམ་བཞིན། །མདོ་ལས་སྦྱིན་པ་དང་ཚུལ་ཁྲིམས་དང་སྒོམ་པ་ལས་བྱུང་བའི་བསོད་ནམས་བྱ་བའི་གཞི་གསུམ་ཞེས་འབྱུང་བའི། གསུམ་པོ་དེ་ནི་བསོད་ནམས་དང་བྱ་བ་དང་དེའི་གཞི་ཞེས་བརྗོད་དོ། །རྣམ་སྨིན་ཡིད་དུ་འོང་བའི་ཕྱིར་དང་། ལས་ཀྱི་རང་བཞིན་ཡིན་པའི་ཕྱིར་དང་། ཀུན་སློང་གི་སེམས་པ་འཇུག་པའི་གཞི་ཡིན་པའི་ཕྱིར། དཔེར་ན། སྲོག་གཅོད་པ་ལ་སོགས་པ་བདུན་པོ་དེ་ལས་ཀྱི་རང་བཞིན་ཡིན་པའི་ཕྱིར་དང་། སེམས་པའི་ལམ་ཡིན་པའི་ཕྱིར་ལས་ཀྱང་ཡིན་པ་མ་ཡང་ཡིན་ལ། བརྣབ་སེམས་གསུམ་ལ་སེམས་པ་ཞེས་བྱ་བའི་ལས་ཀྱི་ལམ་ཁོ་ན་ཡིན་པ་བཅུ་ཀ་ལ་ལས་ལམ་དུ་བརྗོད་པ་བཞིན་ནོ། །(༡༣༥བ)
འགྲེལ་པར་ཅི་རིགས་པ་ཞེས་པས། ལ་ལ་ནི་བསོད་ནམས་དང་། བྱ་བ་དང་། གཞི་ཡང་ཡིན། ལ་ལ་ནི་བསོད་ནམས་དང་། བྱ་བ་ཡང་ཡིན། ལ་ལ་ནི་བསོད་ནམས་ཁོ་ན་ཡིན་པའང་ཡོད་པ་ལ་དགོངས་སོ། །དེ་ལ་སྦྱིན་བྱུང་གི་བསོད་ནམས་བྱ་བའི་གཞི་ལ་ལུས་ངག་གི་ལས་ནི་རྣམ་པ་གསུམ་ཆར་ཡིན་ཏེ། རྣམ་སྨིན་ཡིད་དུ་འོང་བའི་ཕྱིར་བསོད་ནམས་ཀྱང་ཡིན་ལ། ལུས་ངག་གི་ངོ་བོ་ཉིད་ཡིན་པའི་ཕྱིར། བྱ་བ་ཡང་ཡིན། དེ་དག་ཀུན་སློང་བའི་སེམས་པ་ནི་དེ་དག་ལ་བརྟེན་ནས་འཇུག་པའི་ཕྱིར་གཞི་ཡང་ཡིན་པའི་ཕྱིར། ལུས་ངག་གི་ལས་དེ་ཀུན་སློང་བྱེད་ཀྱི་སེམས་ནི་བསོད་ནམས་དང་བྱ་བ་གཉིས་ཀ་ཡིན་ཏེ། རྣམ་སྨིན་ཡིད་དུ་འོང་བས་བསོད་ནམས་དང་། ཡིད་ཀྱི་ལས་ཡིན་པས་བྱ་བ་ཡང་ཡིན་པའི་ཕྱིར། དེ་གཞི་ནི་མ་ཡིན་ཏེ་བྱ་བའི་རྟེན་མ་ཡིན་པའི་ཕྱིར་ཏེ། སེམས་པ་ལ་བརྟེན་ནས་སེམས་པ་གཉིས་མི་འཇུག་པའི་ཕྱིར། དེ་དང་ལྷན་ཅིག་འབྱུང་བའི་ཆོས་ཚོར་སོགས་ནི་བསོད་ནམས་ཁོ་ན་ཡིན་ཏེ། དེ་རྣམ་སྨིན་ཡིད་འོང་ཡིན་པའི་ཕྱིར། ཚོར་སོགས་དེ་བྱ་བའི་གཞི་ནི་མ་ཡིན། ཚོར་སོགས་དེ་དང་མཚུངས་པར་ལྡན་ཀྱང་ཚོར་སོགས་དེ་ལ་དམིགས་ཏེ་སེམས་མི་འཇུག་པའི་ཕྱིར་བྱ་བ་མ་ཡིན་ཏེ། ལུས་ངག་གི་བྱ་བ་མ་ཡིན་པའི་ཕྱིར། ཚུལ་ཁྲིམས་ལས་བྱུང་བ་ནི་ལུས་ངག་གི་ལས་ཡིན་པས་རྣམ་པ་གསུམ་ཅར་ཡིན་ཏེ། དགེ་བ་ཡིན་པ་དང་། ལས་ཀྱི་རང་བཞིན་ཡིན་པ་དང་། དེ་ཀུན་ནས་སློང་བའི་སེམས་རྟེན་ཡིན་པའི་ཕྱིར། སྒོམ་བྱུང་གི་བྱམས་པ་ནི་བསོད་ནམས་ཀྱང་ཡིན་ལ། བསོད་ནམས་བྱ་བའི་གཞི་ཡང་ཡིན་ཏེ། རྣམ་སྨིན་ཡིད་དུ་འོང་བས་བསོད་ནམས་དང་། བྱམས་པའི་དབང་གིས་བྱམས་པ་དང་མཚུངས་ལྡན་གྱི་སེམས་མངོན་པར་འདུ་བྱེད་པའམ་(༡༣༦ན)
འཇུག་པའི་གཞི་ཡིན་པའི་ཕྱིར། བྱམས་པ་དང་ལྷན་ཅིག་འབྱུང་བའི་སེམས་པ་དང་། བསམ་གཏན་དང་ཟག་མེད་ཀྱི་སྡོམ་པ་ནི་བསོད་ནམས་ཀྱང་ཡིན་ལ་བྱ་བའང་ཡིན་ཏེ། འབྲས་བུ་ཡིད་འོང་ཙམ་བསྐྱེད་པས་བསོད་ནམས་ཡིན། ཡིད་ཀྱི་བྱ་བར་འདུག་པས་བྱ་བ་ཡིན་པའི་ཕྱིར། དེ་གཞི་མིན་ཏེ། སྡོམ་པ་དང་དུས་མཉམ་དུ་འཇུག་གི། དུས་མཉམ་པ་དེ་དང་སེམས་པ་ལའང་བརྟེན་ནས་སེམས་པ་གཉིས་པ་མི་འཇུག་པའི་ཕྱིར་རོ། །བྱམས་པ་དང་ལྷན་ཅིག་པའི་ཚོར་སོགས་ནི་བསོད་ནམས་ཁོ་ན་ཡིན་ནོ། །ཡང་བསོད་ནམས་བྱེད་པ་ནི་ཆོས་ཅན། བསོད་ནམས་ཀྱི་བྱ་བ་ལ་འཇུག་པ་ཡིན་ཏེ། དེའི་སྦྱོར་བ་ཡིན་པའི་ཕྱིར། སྦྱིན་སོགས་གསུམ་པོ་འདི་དག་ནི་ཆོས་ཅན། བསོད་ནམས་བྱ་བ་དེའི་གཞི་ཡིན་ཏེ། སྦྱིན་སོགས་འདི་དག་སྒྲུབ་ཅིང་བསྐྱེད་པའི་ཆེད་དུ་བསོད་ནམས་ཀྱི་སྦྱོར་བ་རྩོམ་པའི་ཕྱིར། གཞན་དག་ན་རེ། བསོད་ནམས་བྱ་བ་ནི་དོན་དམ་པར་སེམས་པ་དགེ་བ་ཡིན་ལ། སྦྱིན་སོགས་ནི་སེམས་པ་དགེ་བ་དེའི་གཞི་ཡིན་ནོ་ཟེར་རོ། །གཉིས་པ་[དབྱེ་བ་སོ་སོའི་རང་བཞིན་]ལ། སྦྱིན་པ་ལས་བྱུང་བ་བཤད། གཞན་གཉིས་བཤད་པའོ། །དང་པོ་ལ། སྦྱིན་པའི་ངོ་བོ། དབྱེ་བ། ཁྱད་པར་རོ། །དང་པོ་ལ། དངོས་དང་། དེའི་འབྲས་བུའོ། །དང་པོ་ནི། གང་གིས་སྦྱིན་བྱེད་དེ་སྦྱིན་པ། །མཆོད་དང་ཕན་གདགས་འདོད་པ་ཡིས། །ལུས་དང་ངག་ལས་སློང་དང་བཅས། །གང་སྦྱིན་བྱ་གོས་སོགས་ཀྱང་སྦྱིན་པ་ཡིན་མོད་ཀྱི་ལུང་མ་བསྟན་ཡིན་པའི་ཕྱིར་དང་། སྦྱིན་པ་པོའི་རྒྱུད་ལས་ཐ་དད་པའི་ཕྱིར། འདིར་ནི་ཀུན་སློང་བཟང་པོ་གང་གིས་སྦྱིན་པར་བྱེད་པ་དེ་སྦྱིན་པ་ཡིན་གྱི། འཇིགས་པ་དང་། ལན་ལ་རེ་བ་དང་། འདོད་ཆགས་དང་། ཁྲོ་བ་དང་། ཕྲག་དོག་གིས་ཀྱང་སྦྱིན་མོད་ཀྱི། དེ་འདིར་མི་འདོད་པས་ཁྱད་པར་དུ་བྱ་བའི་ཕྱིར་ཀུན་སློང་བཟང་པོ་ཡང་མྱ་ངན་ལས་འདས་པ་ལ་མཆོད་པར་འདོད་པ་དང་། མ་འདས་པ་རྣམས་(༡༣༦བ)
ལ་ནི་འབྱུང་བ་ཆེན་པོ་རྣམས་ལ་ཕན་གདགས་པར་འདོད་པ་ཡིས་སྦྱིན་པར་བྱེད་པའོ། །གང་གིས་སྦྱིན་བྱེད་དེ་ཡང་ལུས་ཀྱིས་ལག་བརྐྱང་བ་དང་ངག་གི་ལས་ཁྱེར་ཅིག་ཅེས་སོགས་དང་། སེམས་དང་སེམས་བྱུང་གི་ཚོགས་གང་གིས་དེ་སློང་བར་བྱེད་པ་དང་བཅས་པའོ། །གང་ཚེ་སྐྱེས་བུ་དགེ་ཡིད་ཀྱིས། །རང་གི་རྫས་དག་སྦྱིན་བྱེད་པ། །དེ་ཚེ་དགེ་བའི་ཕུང་པོ་རྣམས། །སྦྱིན་པ་ཞེས་ནི་བརྗོད་པ་ཡིན། །དེའི་ཕུང་པོ་རྣམས་ཞེས་པ་ནི་ཕུང་པོ་ལྔ་རྣམས་སོ། །ཡང་ན་ལུས་ངག་གི་རིག་བྱེད་ཀྱང་གཟུགས་ཕུང་དུ་བལྟའོ། །གཉིས་པ་ནི། དེ་འབྲས་ལོངས་སྤྱོད་ཆེན་པོ་ཅན། །སྦྱིན་པ་ལས་བྱུང་བའི་བསོད་ནམས་བྱ་བའི་གཞི་དེ་ནི་འབྲས་བུ་ལོངས་སྤྱོད་ཆེན་པོ་ཅན་ཡིན་ཏེ། བྱུང་བ་འདི་ལས་དེ་འབྱུང་བ་ནི་རང་བཞིན་ཡིན་པའི་ཕྱིར། རྩྭ་དང་ལོ་མའི་རང་བཞིན་གྱི་ཁྱིམ་དང་སྣོད་ལ་རྩྭ་དང་ལོ་མ་ལས་བྱུང་བའི་ཁྱིམ་དང་སྣོད་ཅེས་བྱ་བ་བཞིན་ནོ། །གཉིས་པ་དབྱེ་བ་ལ། བདག་གཞན་དོན་ཕྱིར་གཉིས་དོན་ཕྱིར། །གཉིས་ཀའི་དོན་དུ་མིན་ཕྱིར་སྦྱིན། །ཡང་སྦྱིན་པ་འཕགས་པ་འདོད་པ་ལ་འདོད་ཆགས་དང་མ་བྲལ་བའམ། སོ་སྐྱེ་འདོད་ཆགས་དང་བྲལ་བས་མཆོད་རྟེན་ལ་སྦྱིན་པ་དེ་ནི་ཆོས་ཅན། བདག་ཉིད་ཁོ་ནའི་དོན་གྱི་ཕྱིར་སྦྱིན་པ་ཡིན་ཏེ། དེས་ཕ་རོལ་ལ་ཕན་འདོགས་པ་མེད་པའི་ཕྱིར། འཕགས་པ་འདོད་ཆགས་དང་བྲལ་བས་སེམས་ཅན་ཕ་རོལ་ལ་སྦྱིན་པ་དེ་ནི་ཆོས་ཅན། མཐོང་ཆོས་ལ་མྱོང་འགྱུར་ནི་གཉིས་ཀའི་དོན་ཡིན་པས་དེ་མ་གཏོགས་པར་གཞན་དོན་གྱི་ཕྱིར་སྦྱིན་པ་སྟེ། དེས་ལེན་པ་པོ་གཞན་གྱི་འབྱུང་བ་ལ་ཕན་བཏགས་པའི་ཕྱིར། རང་དོན་གྱི་ཕྱིར་མ་ཡིན་ཏེ། སྦྱིན་པའི་རྣམ་སྨིན་གྱིས་འདོད་ཁམས་ཡིན་ན། དེ་ལས་ཤིན་ཏུ་ཡང་དག་པར་འདས་པའི་ཕྱིར། ཆགས་པ་དང་མ་བྲལ་བའམ་སོ་སྐྱེ་ཆགས་བྲལ་གྱིས་སེམས་ཅན་ཕ་རོལ་ལ་སྦྱིན་པ་དེ་ནི་གཉིས་ཀའི་དོན་མཐོང་བའི་ཕྱིར་སྦྱིན་པ་སྟེ། རང་གི་དགེ་བའི་ལས་བསགས་པའི་ཕྱིར་དང་། (༡༣༧ན)
གཞན་ལ་ཕན་པར་བྱ་བའི་ཕྱིར་རོ། །འཕགས་པ་ཆགས་བྲལ་གྱིས་མཆོད་རྟེན་ལ་འབུལ་བ་དེ་ནི་མཐོང་ཆོས་མྱོང་འགྱུར་མ་གཏོགས་པར་གཉི་གའི་དོན་དུ་མིན་པའི་ཕྱིར་ཏེ། བཀུར་སྟི་དང་བྱས་པ་གཟོ་བ་འབའ་ཞིག་གིས་འབུལ་བར་ཟད་པའི་ཕྱིར་རོ། །གསུམ་པ་ཁྱད་པར་ལ། བསྟན། བཤད་གཉིས་ལས། དང་པོ་ནི། དེ་ཡི་ཁྱད་པར་སྦྱིན་བདག་དང་། །དངོས་དང་ཞིང་གི་ཁྱད་པར་ལས། །སྦྱིན་པ་འབྲས་བུ་ལོངས་སྤྱོད་ཆེན་པོ་ཅན་ཅེས་སྤྱིར་བསྟན་ནས། དེ་ཁྱད་པར་སྦྱིན་བདག་དང་དངོས་པོ་དང་ཞིང་གི་ཁྱད་པར་ལས་ཁྱད་པར་དུ་འཕགས་པ་ཡིན་ནོ། །གཉིས་པ་རྒྱས་བཤད་ལ། སྦྱིན་བདག་གི་ཁྱད་པར། སྦྱིན་བྱའི་ཁྱད་པར། ཞིང་གི་ཁྱད་པར། སྦྱིན་པ་ཁྱད་པར་ཅན་ངོས་བཟུང་བ། འཕྲོས་པའི་དོན་ཏོ། །དང་པོ་ལ། དངོས་དང་། སྦྱིན་ཚུལ་གྱི་ཁྱད་པར། དེའི་འབྲས་བུའོ། །དང་པོ་ནི། སྦྱིན་བདག་ཁྱད་འཕགས་དད་སོགས་ཀྱིས། །དེ་ལ་རེ་ཞིག་དད་པ་དང་། སོགས་པས་ཚུལ་ཁྲིམས་དང་། ཐོས་པ་དང་། གཏོང་བ་དང་། འདོད་ཆེན་ཆུང་བ་དང་། ཆོག་ཤེས་པ་ལ་སོགས་ཀྱི་ཡོན་ཏན་དང་ལྡན་པའི་སྦྱིན་བདག་ནི་འབྲས་བུ་འབྱིན་པ་ལ་ཁྱད་པར་དུ་འཕགས་པ་ཡིན་ནོ། །གཉིས་པ་ནི། གུས་ལ་སོགས་པས་སྦྱིན་པར་བྱེད། །སྦྱིན་བདག་དེའི་སྦྱིན་པ་དེ་སྦྱིན་བདག་གི་ཁྱད་པར་གྱིས་འབྲས་བུ་འབྱིན་པ་ལ་ཁྱད་པར་དུ་འཕགས་པར་འགྱུར་ཏེ། སྦྱིན་བདག་དེ་ལྟ་བུ་དེ་ནི་གུས་པས་སྦྱིན་པར་བྱེད་པ་དང་ལ་སོགས་པས་རང་གི་ལག་ནས་སྦྱིན་པ་དང་། དུས་སུ་སྦྱིན་པ་དང་། གཞན་ལ་མི་གནོད་པར་སྦྱིན་པས་ཁྱད་འཕགས་སུ་འགྱུར་བའི་ཕྱིར། གསུམ་པ་ནི། དེ་ཕྱིར་བཀུར་སྟི་རྒྱ་ཆེན་དང་། །དུས་དང་བར་ཆད་མེད་པར་རྙེད། །སྦྱིན་པའི་རྒྱུ་བཞི་པོ་དེའི་ཕྱིར་རིམ་པ་བཞིན་དེ་དག་གིས་ཁྱད་པར་བཞིར་འགྱུར་ཏེ། དང་པོས་བཀུར་སྟི་རྙེད་པར་འགྱུར། གཉིས་པས་ལོངས་སྤྱོད་རྒྱ་ཆེན་པོ་ལ་དད་པ་རྙེད་པར་འགྱུར། གསུམ་པས་ལོངས་སྤྱོད་ནུས་པའི་དུས་ལས་མི་ཡོལ་བར་རྙེད་པར་འགྱུར། བཞི་པས་འདིའི་ལོངས་སྤྱོད་བར་ཆད་མེད་པར་རྙེད་པར་འགྱུར་བའི་ཕྱིར། གཉིས་པ་སྦྱིན་བྱའི་ཁྱད་པར་ལ། དངོས་དང་། དེའི་འབྲས་བུའོ། །དང་པོ་ནི། ཁ་དོག་ལ་སོགས་ཕུན་སུམ་དངོས། །དངོས་པོ་ན་ཁ་དོག་དང་ལ་སོགས་པས་དྲི་རོ་རེག་བྱ་ཕུན་སུམ་ཚོགས་པ་ནི་སྦྱིན་བྱ་ཁྱད་འཕགས་ཡིན་ནོ། །གཉིས་(༡༣༧བ)
པ་ནི། དེ་ལས་གཟུགས་བཟང་གྲགས་ལྡན་དང་། །དགའ་དང་ཤིན་ཏུ་གཞོན་ཤ་དང་། །དུས་སུ་རེག་ན་བདེ་ལུས་འགྱུར། །དེ་ལྟ་བུ་བྱིན་པ་ལས་རིམ་པ་བཞིན་གཟུགས་བཟང་པོར་འགྱུར་བ་དང་། དྲི་བཞིན་དུ་གྲགས་པས་ཕྱོགས་སུ་རྒྱས་པར་འགྱུར་བ་དང་ལྡན་པ་དང་། རོ་ཞིམ་པོ་བཞིན་དུ་དགའ་བར་འགྱུར་བ་དང་། ལུས་ཤིན་ཏུ་གཞོན་ཤ་ཅན་དང་། བུད་མེད་རིན་པོ་ཆེ་བཞིན་དུ་འདི་ཡི་ལུས་དུས་སུ་རེག་ན་བདེ་བའི་ལུས་སུ་འགྱུར་ཏེ། དེའང་གྲང་བའི་ཚེ་དྲོ་ལ། དྲོ་བའི་ཚེ་གྲང་བ་དང་། ཐ་མལ་བའི་ཚེ་ཐ་མལ་དུ་འདུག་པའོ། ། གསུམ་པ་ཞིང་གི་ཁྱད་པར་ནི། འགྲོ་དང་སྡུག་བསྔལ་ཕན་འདོགས་དང་། །ཡོན་ཏན་རྣམས་ཀྱིས་ཞིང་ཁྱད་འཕགས། །ཡང་ཞིང་གི་སྒོ་ནས་འགྲོ་བའི་ཁྱད་པར་དུ་བྱས་པའི་ཞིང་ནི། བཅོམ་ལྡན་འདས་ཀྱིས། དུད་འགྲོའི་སྐྱེ་གནས་སུ་སོང་བ་ལ་སྦྱིན་པ་བྱིན་ན་རྣམ་སྨིན་བརྒྱ་འགྱུར་དུ་རེ་བར་བྱའོ། །ཚུལ་ཁྲིམས་འཆལ་བའི་མི་ལ་སྟོང་འགྱུར་དུ་རེ་བར་བྱའོ། །ཞེས་གསུངས་པས། སྡུག་བསྔལ་དང་ཕན་འདོགས་ཡོན་ཏན་མཉམ་པ་ལ་དུད་འགྲོ་བས་མི་ལ་བསོད་ནམས་ཆེ། མིས་ཕན་མ་བཏགས་དུད་འགྲོས་ཕན་བཏགས་ན་མི་བས་དུད་འགྲོ་ལ་བྱིན་པ་བསོད་ནམས་ཆེ། དེ་ཀ་བཞིན་མི་ལ་སྡུག་བསྔལ་མེད། དུད་འགྲོ་ཤིན་ཏུ་སྡུག་བསྔལ་ན། མི་བས་དུད་འགྲོ་ལ་བྱིན་པ་བསོད་ནམས་ཆེའོ། །སྡུག་བསྔལ་གྱིས་ཁྱད་པར་དུ་བྱས་པའི་ཞིང་ནི། རྫས་ལས་བྱུང་བའི་བསོད་ནམས་བྱ་བའི་དངོས་པོ་དག་ཏུ་ནད་པ་དང་ནད་གཡོག་དང་གྲང་བ་དང་ཡུལ་ངན་པ་དང་ཆར་འབབ་པ་ལ་སྦྱིན་པར་གསུངས་ནས། འདི་བདུན་དང་ལྡན་པའི་དད་པའི་རིགས་ཀྱི་བུའམ། རིགས་ཀྱི་བུ་མོའི་བསོད་ནམས་ཀྱི་ཚད་བཟུང་བར་མི་ནུས་སོ་ཞེས་གསུངས་པ་ལྟ་བུ་ལེན་པ་པོ་སྡུག་བསྔལ་གྱི་ཟིལ་གྱིས་མནན་པས་རྟག་ཏུ་སྐྱོ་བ་ཉིད་ཀྱིས་དགེ་བའི་ཆོས་ཀྱི་སྣོད་ཡིན་པའི་ཕྱིར་དང་། ཕན་འདོགས་པས་ཁྱད་པར་དུ་བྱས་པའི་ཞིང་ནི། ཕ་མ་དང་ཕན་འདོགས་པ་གཞན་རྣམས་ལ་སྦྱིན་པར་བྱེད་པ་སྟེ། དོམ་དང་རི་དྭགས་དང་སྤྲེའུར་(༡༣༨ན)
སྐྱེས་པའི་རབས་ལས་ཕུགས་སུ་བཅུག་ནས་ལུས་ཀྱི་དྲོད་ཀྱིས་བསྲོས་པ་དང་། ཆུས་ཁྱེར་བ་ལས་བརྒལ་བས་ཕན་འདོགས་པ་ལ་གནོད་པ་བྱས་པས་འཕྲལ་ལ་ལག་པ་ཆད་པ་དཔེར་བྱའོ། །ཡོན་ཏན་གྱི་ཁྱད་པར་རྣམས་ཀྱི་ཞིང་ཁྱད་པར་དུ་འཕགས་པ་ནི་ཚུལ་ཁྲིམས་དང་ལྡན་པ་ལ་བྱིན་ན་རྣམ་པར་སྨིན་པ་འབུམ་དུ་འགྱུར་བ་དང་། རྒྱུན་དུ་ཞུགས་པའི་འབྲས་བུ་ལ་འཇུག་པ་ལ་བྱིན་ན་རྣམ་སྨིན་ཚད་མེད་དོ། །དེ་བས་ཀྱང་རྒྱུན་དུ་ཞུགས་པ་ལ་བྱིན་ན་ཆེས་ཚད་མེད་དོ་ཞེས་སོ། །བཞི་པ་སྦྱིན་པ་ཁྱད་པར་ཅན་ངོས་བཟུང་བ་ལ། མཆོག་གི་སྦྱིན་པ་དང་། གཞལ་དུ་མེད་པའི་སྦྱིན་པའོ། །དང་པོ་ལ། དངོས་དང་། སྦྱིན་པ་བརྒྱད་ཀྱི་ནང་ནས་མཆོག་ངོས་བཟུང་བའོ། །དང་པོ་ནི། མཆོག་ནི་གྲོལ་བས་གྲོལ་བའམ། །བྱང་ཆུབ་སེམས་དཔའ་ཡིས། བཅོམ་ལྡན་འདས་ཀྱིས་ཟང་ཟིང་གི་སྦྱིན་པ་རྣམས་ཀྱི་ནང་ནས་མཆོག་ནི་གྲོལ་བ་འདོད་ཆགས་དང་བྲལ་བས། གྲོལ་བ་འདོད་ཆགས་དང་བྲལ་བ་ལ་བྱིན་པའི་སྦྱིན་པ་མཆོག་ཏུ་གསུངས་ཏེ། སྦྱིན་པོ་དང་ལེན་པོ་གཉིས་ཀ་མཆོག་ཏུ་གྱུར་པའི་ཕྱིར་དང་། སྲེད་པས་བདག་གིར་མ་བྱས་པའི་ཕྱིར། ཡང་ན། བྱང་ཆུབ་སེམས་དཔའ་ཡིས་སེམས་ཅན་ཐམས་ཅད་ལ་ཕན་པའི་ཆེད་དུ་སྦྱིན་པ་བྱིན་པ་ནི། མ་གྲོལ་བས་མ་གྲོལ་བ་ལ་བྱིན་པ་ཡང་མཆོག་ཡིན་ཏེ། སེམས་ཅན་ཐམས་ཅད་ཀྱི་དོན་ཡིན་ཅིང་། སྙིང་རྗེས་རབ་ཏུ་བཅུག་པ་དང་། སྲེད་པས་ཡོངས་སུ་མ་ཟིན་པའི་ཕྱིར། གཉིས་པ་ནི། བརྒྱད་པ། །བཤད་མ་ཐག་པ་དེ་མ་གཏོགས་པར་དྲུང་དུ་འོང་བའི་ཉེ་བ་ལ་སྦྱིན་པ་དང་། ཆད་སོགས་ཀྱིས་འཇིགས་ནས་སྦྱིན་པ་དང་། བདག་ལ་སྔར་བྱིན་པས་དེའི་ཁ་ལན་དུ་བྱིན་པ་དང་། བདག་ལ་མ་འོངས་པར་གདོད་ཆེ་བ་སྟེར་དུ་རེ་ནས་སྦྱིན་པ་དང་། སྔོན་ཕ་མེས་གཏོང་ཕོད་ཅན་གྱི་རྗེས་སུ་སྙོགས་འདོད་ཀྱིས་སྦྱིན་པ་དང་། (༡༣༨བ)
མཐོ་རིས་ཀྱི་དོན་དུ་སྦྱིན་པ་དང་། གྲགས་པ་འདོད་ཕྱིར་སྦྱིན་པ་དང་། སེམས་ཀྱི་རྒྱན། སེམས་ཀྱི་ཡོ་བྱད། རྣལ་འབྱོར་གྱི་ཚོགས། དོན་གྱི་མཆོག་ཐོབ་པའི་ཕྱིར་སྦྱིན་པ་བརྒྱད་གསུངས་པ་དག་གི་ནང་ནས། བརྒྱད་པ་སེམས་ཀྱི་རྒྱན་ལ་སོགས་པའི་ཆེད་དུ་སྦྱིན་པ་མཆོག་ཡིན་ནོ། །དེ་ཡང་སེམས་ཀྱི་རྒྱན་ནི་རྫུ་འཕྲུལ་དང་། ཡོ་བྱད་ནི་འཕགས་ལམ་ཡན་ལག་བརྒྱད་དང་། རྣལ་འབྱོར་གྱི་ཚོགས་ནི་ཞི་ལྷག་དང་། དོན་གྱི་མཆོག་ནི་དགྲ་བཅོམ་པ་དང་། མྱ་ངན་ལས་འདས་པའོ། །གང་བ་སྤེལ་ནི། དད་པ་ལ་སོགས་པ་ནི་ནོར་འདྲེན་པས་རྒྱན་དང་། སེར་སྣའི་དྲི་མ་འཁྲུད་པས་ཡོ་བྱད་དང་། སྙོམས་འཇུག་གི་བདེ་བ་བསྐྱེད་པས་རྣལ་འབྱོར་གྱི་ཚོགས་དང་། མྱ་ངན་ལས་འདས་པའི་བདེ་བ་འདྲེན་པས་ན་དོན་གྱི་མཆོག་གོ། །ཞེས་ཟེར་རོ། །ས་སྡེ་ལས། བདེ་འགྲོའི་རྒྱུ་ཡིན་པས་ན་སེམས་ཀྱི་རྒྱན། ལོངས་སྤྱོད་མང་པོ་འབྱུང་བས་ན་ཡོ་བྱད། ཐར་པའི་རྒྱུ་ཚོགས་ཡིན་པས་ན་རྣལ་འབྱོར་གྱི་ཚོགས། བྱང་ཆུབ་ཆེན་པོར་བསྔོས་པའི་དོན་གྱི་མཆོག་ཅེས་བྱ་བ་ཡིན་ནོ། །ཞེས་གསུངས་སོ། །ཉེ་བའི་སྦྱིན་པ་ནི་དྲུང་དུ་འོང་ཞིང་རང་ཉིད་ཀྱི་ང་རྒྱལ་དང་མཐུན་བར་བསྟོད་པ་ལ་དགའ་ནས་སྦྱིན་པའོ་ཞེས་ཟེར་རོ། །འཇིགས་པས་སྦྱིན་པ་ནི། བདག་གི་སྲོག་དང་ཡོ་བྱད་བྲལ་གྱི་དོགས་ནས་དེ་བསླུ་བའི་ཆེད་དུ་རང་གི་བདོག་པ་དམ་པ་གཏོང་བའོ། །གཉིས་པ་གཞལ་དུ་མེད་པའི་སྦྱིན་པ་ནི། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པ་ཡིན། །མདོ་ལས་རྒྱུན་ཞུགས་སོགས་འཕགས་པ་ལ་བྱིན་ན་བསོད་ནམས་ཆེས་གཞལ་མེད་དུ་གསུངས་མོད་ཀྱི། གཞན་ཡང་འཕགས་པ་མིན་པ་སོ་སོ་སྐྱེ་བོ་ཡིན་ཀྱང་ཕ་མ་དང་། ནད་པ་དང་ནི་ཆོས་སྨྲ་དང་། སྐྱེ་མཐའི་བྱང་ཆུབ་སེམས་དཔའ་སྟེ། བྱང་སེམས་སྲིད་པ་ཐ་མ་པ་ལ་སྦྱིན་པ་བྱིན་པ་ནི་འབྲས་(༡༣༩ན)
བུའི་སྒོ་ནས་ཡོན་ནི་གཞལ་དུ་མེད་པ་ཡིན་ནོ། །ཆོས་སྨྲ་བ་ནི། འགྲོ་བ། སྡུག་བསྔལ་བ། ཕན་འདོགས་པ། ཡོན་ཏན་གྱི་ཞིང་གང་དུ་གཏོགས་ཞེ་ན། མི་ཡིན་པས་མིའི་འགྲོ་བར་བསྡུས་པ་ཡང་ཡིན། ཡོན་ཏན་ཅན་ཡིན་ཀྱང་ཕན་འདོགས་པའི་ཕྱོགས་སུ་གཏོགས་ཏེ། དེ་ནི་སྐྱེ་རྒུ་མ་རིག་པས་ལྡོངས་པ་རྣམས་ལ་ཤེས་རབ་ཀྱི་མིག་སྦྱིན་པར་བྱེད་པ་དང་། ཆོས་དགེ་བ་དང་ཆོས་མིན་མི་དགེ་བའི་ལས་ལམ་རབ་ཏུ་སྟོན་པ་དང་། ལམ་སྐྱེ་བའི་སྔོན་དུ་ལུང་འབོགས་པ་སྔོན་དུ་འགྲོ་བས་ཆོས་ཀྱི་སྐུ་ཟག་པ་མེད་པ་སྒྲུབ་པར་བྱེད་པ་དང་། མདོར་ན་སངས་རྒྱས་ཀྱི་མཛད་པ་ཐམས་ཅད་བྱེད་པ་ཡིན་པའི་ཕྱིར། དགེ་བའི་བཤེས་གཉེན་ཆེན་པོ་ཡིན་ནོ། །ལྔ་པ་འཕྲོས་དོན་ལ། ཆེ་ཆུང་གི་ཁྱད་པར། བསགས་མ་བསགས་ཀྱི་ཁྱད་པར། དོགས་གཅོད་དོ། །དང་པོ་ནི། མཇུག་དང་ཞིང་དང་གཞི་དང་ནི། །སྦྱོར་དང་སེམས་པ་བསམ་པ་སྟེ། །དེ་དག་ཆུང་དང་ཆེ་བ་ལས། །ལས་ཀྱང་ཆུང་དང་ཆེ་བ་ཉིད། །མདོར་ན་ལས་ལྕི་ཡང་རྒྱུ་དྲུག་གིས་ཤེས་པར་བྱ་སྟེ། བྱས་པའི་རྗེས་ལ་ད་དུང་བྱེད་པ་སྟོབས་ཆེ་བས་མཇུག་དང་། གང་དུ་ཕ་མ་ལྟ་བུ་ལ་ཕན་གནོད་གང་བྱས་སྟོབས་ཆེ་བས་ཞིང་དང་། སྲོག་གཅོད་སོགས་ལས་ལམ་གྱི་གཞི་དང་། དེའི་དོན་དུ་ལུས་ངག་གི་ལས་བྱེད་པའི་སྦྱོར་བ་དང་། གང་གིས་ལས་ལམ་མཐར་ཕྱིན་བྱེད་སེམས་པ་དང་། འདི་དང་འདི་ལྟ་བུ་ཞིག་ད་ལྟ་དང་ཕྱིས་བྱའོ་སྙམ་པའི་བསམ་པ་སྟེ་དྲུག་གོ། །དེ་ཡང་ལ་ལ་ནི་མཇུག་བསམ་པ་ཤིན་ཏུ་དྲག་པས་ལས་ལྕི་བར་འགྱུར་རོ། །རོ་མྱང་དྲག་པོའི་སྟོབས་ཀྱིས་རྣམ་སྨིན་འབྱིན་པ་ངེས་པར་གནས་པའི་ཕྱིར། ལ་ལ་ནི་ཕལ་པ་བསད་པ་ལས་ཕ་མ་བསད་པ་ལྟ་བུ་ཞིང་གི་དབང་གིས་ལྕིའོ། །ཕ་མ་ལྟ་བུའི་ཞིང་ལ་སྲོག་གཅོད་ཀྱི་མཚམས་མེད་ཀྱིས་ལྕི་བར་འགྱུར་བ་ལྟར་ཕ་མ་ལ་མ་བྱིན་པར་བླང་བ་དང་རྫུན་སོགས་དེ་ལྟར་ལྕི་བ་མ་ཡིན་(༡༣༩བ)
ནོ། །མི་ཕལ་པ་ལས་རྫས་བརྐུས་པ་ལས་ནི་ཕ་མའི་རྫས་བརྐུས་པ་ལྕིའོ། །དེ་བཞིན་དུ་གཞན་ལ་ཡང་སྦྱར་བར་བྱ་སྟེ། ལ་ལ་སྦྱོར་བའི་ཁྱད་པར་གྱིས་ལྕི། ལ་ལ་བསམ་པའི་ཁྱད་པར་གྱིས་ལྕི་བ་སོགས་སུ་ཡོད་པའི་ཕྱིར། ལས་གང་གི་དྲུག་པོ་དེ་དག་ཐམས་ཅད་ཆེ་བ་ཡིན་པ་དེ་ཡིས་ནི་ལས་ཀྱང་ཤིན་ཏུ་ཆེས་ལྕི་བ་ཉིད་ཡིན་པར་རིག་པར་བྱའོ། །གང་གི་ཆུང་ངུ་ཡིན་པ་དེ་དག་ལས་དེ་ནི་ཤིན་ཏུ་ཆུང་བར་རིག་པར་བྱའོ། །གཉིས་པ་ནི། བསམས་བཞིན་པ་དང་རྫོགས་པ་དང་། །མི་འགྱོད་གཉེན་པོ་མེད་པ་དང་། །འཁོར་དང་རྣམ་པར་སྨིན་པ་ལས། །བསགས་པའི་ལས་ཤེས་བྱ་བ་ཡིན། །བྱས་ལ་བསགས་པའི་ལས་ནི། བསམ་བཞིན་པར་འདི་བྱའོ་ཞེས་ཆེད་དུ་བློ་སྔོན་དུ་བཏང་ནས་བྱས་པ་ཞིག་དགོས་ཏེ། བློ་སྔོན་དུ་མ་བཏང་བ་དང་། བཏང་ཡང་བ་བཅོལ་བྱུང་རྒྱལ་དུ་ཁ་ལང་དུ་ཤོར་བས་རྫུན་སྨྲ་སོགས་ཀྱི་མི་དགེ་བ་གང་ཡིན་པ་དེ་བྱས་པ་ཡིན་ཀྱང་བསགས་པ་མ་ཡིན་པའི་ཕྱིར། བདག་ཉིད་ཀྱིས་བྱ་བ་མི་འདོད་ཀྱང་གཞན་གྱིས་ནན་གྱིས་བརྣན་ནས་དགེ་མི་དགེ་སྤྱད་པ་ལ་བདག་ཉིད་དེ་ལ་འགྱོད་དེ། ལས་བྱས་པ་ནི་ཡིན་གྱི། བསགས་པ་ནི་མ་ཡིན་པའི་ཕྱིར་རོ། །སློབ་དཔོན་ཐོགས་མེད་ནི། བསད་པ་ལྟ་བུའི་བསམ་པ་དྲག་པོ་བྱས་ཀྱང་མི་དེ་མ་སོད་ན་ལས་བསགས་པ་ཡིན་གྱི་བྱས་པ་མིན། བསད་པ་ལྟ་བུའི་བསམ་སྦྱོར་དྲག་པོ་ཡང་བྱས་ཏེ་སོང་ཀྱང་སོད་ནམ་སད་པ་དང་བྱས་པ་གཉིས་ཀ་ཡིན། བསམ་པ་དྲག་པོ་ཡང་མ་བྱས། སྦྱོར་བ་དྲག་པོ་ཡང་མ་བྱས་ཀྱང་དེ་སོད་བ་གཅིག་ནི་གཉིས་ཀ་མ་ཡིན་ནོ་ཞེས་ཟེར་རོ། །ཁ་ཅིག་ནི་སྒོ་གསུམ་གྱི་ཉེས་སྤྱད་གཅིག་གིས་ངན་སོང་དུ་འགྲོ་ལ། ཁ་ཅིག་ནི་སྒོ་གསུམ་གྱི་བར་གྱིས་འགྲོ་བ་དང་། གཅིག་ལས་ལམ་གཅིག་གིས་ངན་སོང་དུ་འགྲོ་ལ། ཁ་ཅིག་བཅུའི་བར་གྱིས་འགྲོ་བ་དེ་ལ་ཇི་ཙམ་གྱིས་དེར་འགྲོ་བར་འགྱུར་བ་རྫོགས་པར་བྱས་ན་བསགས་པ་ཡིན་གྱི། རྫོགས་པར་མ་བྱས་ན་ལས་དེ་བྱས་པ་མིན་གྱི་བསགས་པ་(༡༤༠ན)
མ་ཡིན་ནོ། །ཡིད་ལ་གཅགས་པ་མེད་པས་མི་འགྱོད་པ་དང་། ཆགས་པ་ལ་སོགས་པ་ལ་གཉེན་པོ་མེད་པ་དང་། གང་བྱས་ནས་ཀྱང་རྗེས་སུ་ཡི་རང་བར་བྱེད་པ་མི་དགེ་བ་ལ་འཁོར་ཡང་མི་དགེ་བ་མ་བྱིན་པར་བླངས་ནས་གཞན་གྱི་ཆུང་མ་ལ་ཉལ་པོ་བྱེད་པ་དང་། རྣམ་པར་སྨིན་པ་འབྱིན་པར་ངེས་པ་མི་དགེ་བའི་མཚན་ཉིད་རྒྱས་པར་བསྐྱེད་པ་ལས་བྱས་ལ་བསགས་པའི་ལས་ཞེས་བྱ་བ་ཡིན་ལ། དེ་ལས་གཞན་ནི་བྱས་ལ་མ་བསགས་པའོ། །གསུམ་པ་དོགས་གཅོད་ལ། མཆོད་རྟེན་ལ་བཏང་རྒྱུས་བྱུང་བའི། །བསོད་ནམས་ལེན་མེད་བྱམས་སོགས་བཞིན། །རྒྱུ་ལས་འབྲས་བུ་མི་འཁྲུལ་ཕྱིར། །ངན་པའི་ཞིང་ལའང་འབྲས་ཡིད་འོང་། །འདོད་ཆགས་དང་བཅས་པས་མཆོད་རྟེན་ལ་སྦྱིན་པ་བྱིན་པ་ནི་བདག་དོན་དུ་བསོད་ནམས་སུ་འགྱུར་རོ་ཞེས་བཤད་པ་དེ་ཆོས་ཅན། བདག་དོན་དུ་བསོད་ནམས་སུ་མི་འགྱུར་བར་ཐལ། དེ་ལ་ལོངས་སྤྱོད་བྱེད་པ་པོ་མེད་པའི་ཕྱིར་ཞེ་ན། མཆོད་རྟེན་ལ་བཏང་བ་ཆོས་ཅན། བདག་དོན་དུ་བསོད་ནམས་སུ་འགྱུར་བ་ཡིན་ཏེ། ཡོངས་སུ་ལོངས་སྤྱོད་པའི་རྒྱུ་ལས་བྱུང་བའི་བསོད་ནམས་མེད་ཀྱང་བཏང་བའི་རྒྱུ་ལས་བྱུང་བའི་བསོད་ནམས་འབྱུང་བའི་ཕྱིར་རོ། །ལེན་པོ་མེད་ཀྱང་བསོད་ནམས་འབྱུང་བ་འདི་ལ་འཐད་པ་དཔྱད་པ་ནི། ལེན་པ་ཡོད་ན་བསོད་ནམས་སུ་འགྱུར་ལ། མེད་ན་མི་འབྱུང་བ་ལ་རྒྱུ་ཅི་ཡོད་དྲིས་པས། ཁོ་ན་རེ། ལེན་བྱེད་ཡོད་ན་ཆོས་ཅན། གཏོང་རྒྱུ་ལས་བྱུང་བའི་བསོད་ནམས་སུ་འགྱུར་ཏེ། དེ་ལ་ནི་དགའ་བ་དང་ཕན་བཏགས་པ་ཡིན་པས་བླངས་སོ་ཞེས་བྱ་བར་རུང་བའི་ཕྱིར་དང་། ལེན་པོ་མེད་ན་ཆོས་ཅན། གཏོང་རྒྱུ་ལས་བྱུང་བའི་བསོད་ནམས་སུ་མི་འགྱུར་ཏེ། དེ་ལ་ནི་དགའ་བ་དང་ཕན་བཏགས་པ་མེད་པས་བླངས་སོ་ཞེས་བྱ་བར་མི་རུང་བའི་ཕྱིར་ཞེས་ཟེར་རོ། །དེ་ལ་ཁྱབ་པ་ཡོད་ན། འོ་ན་བྱམས་སོགས་དང་ཡང་དག་པའི་ལྟ་བ་བསྒོམ་པ་ཆོས་ཅན། བསོད་ནམས་སུ་མི་འགྱུར་བར་ཐལ། གཞན་ལ་ཕན་བཏགས་(༡༤༠བ)
པ་ཁོ་ནས་བསོད་ནམས་སུ་འགྱུར་བ་ལས་དེ་ལྟར་མ་བཏགས་པའི་ཕྱིར། དེ་འདོད་མི་ནུས་པས་མཆོད་རྟེན་ལ་བྱིན་པ་ལའང་བསོད་ནམས་འབྱུང་བ་འདོད་པར་རིགས་སོ། །མདོར་ན། ཡོན་གནས་སངས་རྒྱས་སོགས་འདས་ཀྱང་དེའི་མཆོད་རྟེན་ལ་དད་པས་ཕུལ་བ་བསོད་ནམས་སུ་འགྱུར་ཏེ། ལེན་པ་དང་ཕན་འདོགས་པ་མེད་ཀྱང་རང་གི་སེམས་ཀྱི་མཐུས་བསོད་ནམས་སུ་འགྱུར་བའི་ཕྱིར། དཔེར་ན། བྱམས་སོགས་བཞིན་ནོ། །འོ་ན་རང་གི་སེམས་ལས་བསོད་ནམས་སུ་འགྱུར་ན། སེམས་འབའ་ཞིག་གི་སྦྱིན་མཆོད་ལས་གཞན་ལུས་ངག་གི་སྦྱིན་མཆོད་དོན་མེད་པར་ཐལ། དེ་ཁོ་ན་ལས་བསོད་ནམས་ཐོབ་པའི་ཕྱིར་ཞེ་ན། མ་ཁྱབ་སྟེ། སྟོན་པ་ལ་སེམས་ཙམ་གྱིས་སྦྱིན་པ་དང་མཆོད་པ་དག་སེམས་པར་བྱེད་པའི་དད་པ་གང་ཡིན་པ་དེ་བས་ནི་སྦྱིན་པ་དང་མཆོད་པ་དག་དངོས་སུ་བྱེད་པའི་དད་པ་ཆེས་མཆོག་ཡིན་པའི་ཕྱིར་ཏེ། ལུས་ངག་གི་ལས་དག་འཇུག་པར་བྱེད་པའི་ཕྱིར། དཔེར་ན། དགྲ་བསད་པའི་བསམ་པ་ཅན་དེས་ལུས་ངག་གི་ལས་དེ་ཤི་བཞིན་དུ་ད་དུང་མ་ཤི་བའི་འདུ་ཤེས་ཀྱིས་བྱེད་ན་སེམས་པ་རྒྱུན་ཆགས་པས་བསོད་ནམས་མིན་པ་ཆེས་མང་དུ་སྐྱེ་བར་འགྱུར་གྱི། བྱ་བ་མེད་པའི་བསམ་པ་ཙམ་གྱིས་མ་ཡིན་པ་བཞིན་དུ་སྟོན་པ་འདས་ཀྱང་དེ་ལ་དད་པས་ཀུན་ནས་བསླངས་པའི་སྦྱིན་པ་དང་མཆོད་པའི་བྱ་བ་བྱེད་ན་བསོད་ནམས་ཆེས་མང་དུ་སྐྱེ་བར་འགྱུར་གྱི་བྱ་བ་མེད་པའི་དད་པ་ཙམ་ནི་དེ་ལྟར་མ་ཡིན་ནོ། །གཅེར་བུ་པ་ཞིང་བཟང་པོ་ལ་སྦྱིན་པའི་ས་བོན་ལས་འབྲས་བུ་ཡིད་འོང་ཅན་ཡིན་ན། ཆོམ་རྐུན་སོགས་ཞིང་ངན་པ་ལ་བྱིན་པས་འབྲས་བུ་ཡིད་མི་འོང་བར་འགྱུར་རོ་ཞེ་ན། ཞིང་གི་ཁྱད་པར་ལས་སྦྱིན་པའི་འབྲས་བུ་ཡིད་འོང་མི་འོང་དུ་འགྱུར་བ་མིན་གྱི། སྦྱིན་པའི་འབྲས་བུ་ཡིད་འོང་གཞིར་བྱས་ལ། མཆོག་དམན་དུ་གྱུར་པར་ནི་འདོད་དེ། ཞིང་ངན་(༡༤༡ན)
བ་ལ་ཡང་རྒྱུ་ས་བོན་བཟང་པོ་བཏབ་པ་ལས་འབྲས་བུ་ཡིད་འོང་དམན་པ་མི་འཁྲུལ་བར་འབྱུང་ལ། ཡིད་མི་འོང་མི་འབྱུང་བར་མཐོང་བའི་ཕྱིར། རྒུན་གྱི་ས་བོན་ལས་རྒུན་གྱི་འབྲས་བུ་མངར་བོ་ཁོ་ནར་སྐྱེ་ལ། ནིམ་པའི་ས་བོན་ལས་ནི་ནིམ་པའི་འབྲས་བུ་ཁོ་ན་སྐྱེའོ། །དེ་བཞིན་དུ་ངན་པའི་ཞིང་ལ་ཡང་གཞན་ལ་ཕན་པའི་ལྟག་པའི་བསམ་པ་ལ་ཞུགས་པའི་སྦྱིན་པའི་ས་བོན་གྱི་འབྲས་བུའང་ཡིད་དུ་འོང་བ་ཁོ་ནར་འགྲུབ་ཀྱི། ཡིད་དུ་མི་འོང་བ་ནི་མ་ཡིན་ནོ། །ཞིང་གི་སྐྱོན་གྱིས་ནི་ས་བོན་དེའི་འབྲས་བུ་ཞན་པའམ་འབྲས་བུ་མི་འདོན་པ་སྲིད་ཀྱི། རང་གི་འབྲས་བུ་ལས་གཞན་པའི་འབྲས་བུ་འདོན་པ་མི་སྲིད་པས། དགེ་བས་ཡིད་དུ་མི་འོང་བ་འབྱིན་པ་ནི་མ་སྲིད་དོ། །གཉིས་པ་གཞན་གཉིས་བཤད་པ་ལ། སོ་སོའི་རང་བཞིན་དང་། གཉིས་ཀའི་འབྲས་བུ། ཞར་བྱུང་ཚངས་པའི་བསོད་ནམས་བཞི་བཤད་པའོ། །དང་པོ་ལ། ཚུལ་ཁྲིམས་ལས་བྱུང་བ་དང་། སྒོམ་པ་ལས་བྱུང་བའོ། །དང་པོ་ལ། སྤང་བྱ་ངོས་བཟུང་བ། དེའི་གཉེན་པོ་ཚུལ་ཁྲིམས། དེ་དག་པའི་ཡོན་ཏན་ནོ། །དང་པོ་ནི། འཆལ་པའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །འཆལ་བའི་ཚུལ་ཁྲིམས་ནི་སྲོག་གཅོད་ནས་ངག་འཁྱལ་གྱི་བར་རང་བཞིན་གྱིས་མི་དགེ་བ་ཁ་ན་མ་ཐོ་བའི་གཟུགས་ཡིན་ནོ། །མི་དགེ་བའི་གཟུགས་དེ་སྤོང་བ་བཞིའམ་བདུན་ནི་ཚུལ་ཁྲིམས་སོ། །སྤོང་བ་དེ་ཡང་རིག་བྱེད་གང་གིས་སྤོང་བ་དང་རིག་བྱེད་མིན་པ་སྤོང་བ་རྣམ་པ་གཉིས་སོ། །གཉིས་པ་ནི། སངས་རྒྱས་ཀྱིས་ནི་བཅད་པ་ཡང་། །ཚུལ་ཁྲིམས་ལ་འཆལ་ཚུལ་གྱི་གཉེན་པོས་མ་ཁྱབ་སྟེ། དུས་དང་གནས་སྐབས་འགའ་ཞིག་ཏུ་གནང་བ་ཡོད་ཀྱང་། དུས་དང་གནས་སྐབས་འགའ་ཞིག་ཏུ་རང་བཞིན་གྱི་ཁ་ན་མ་ཐོ་བའི་རྒྱུར་འགྱུར་ལ། རང་བཞིན་གྱི་འཆལ་བའི་ཚུལ་ཁྲིམས་མ་ཡིན་པ། སངས་རྒྱས་ཀྱིས་ནི་བཀའ་ཡིས་བཅད་པ་དུས་མིན་གྱི་ཁ་ཟས་སྤོང་བར་མནོས་པ་ལྟ་བུ་ལ་(༡༤༡བ)
རིག་བྱེད་ཡིན་མིན་གཉིས་ཡོད་པའང་ཚུལ་ཁྲིམས་ཡིན་པའི་ཕྱིར། དེ་དག་སྤོང་བའི་བསླབ་པ་མནོས་པས་དེ་དག་སྤྱད་ན་འཆལ་བའི་ཚུལ་ཁྲིམས་སུ་འགྱུར་ཏེ། བཅོམ་ལྡན་འདས་ཀྱི་བཀའ་ལ་མ་གུས་པའི་ཕྱིར། ཤུགས་ཀྱིས་ན་ཚུལ་ཁྲིམས་མ་མནོས་པ་འཆལ་བའི་ཚུལ་ཁྲིམས་མ་ཡིན་ནོ་ཞེས་བསྟན་ཏོ། །གསུམ་པ་ནི། རྣམ་དག་ཡོན་ཏན་བཞི་ལྡན་ནོ། །འཆལ་ཁྲིམས་དེའི་རྒྱུས་འཕེན་མ་བྱུང་། །དེ་གཉེན་པོ་དང་ཞི་ལ་རྟེན། །ཚུལ་ཁྲིམས་རྣམ་དག་ནི་ཡོན་ཏན་བཞི་ལྡན་ནོ་སྟེ། དེ་ལས་བཟློག་པ་ནི་མ་དག་པ་ཡིན་པའི་ཕྱིར། བཞི་གང་ཞེ་ན། འཆལ་ཁྲིམས་མི་དགེ་བའི་གཟུགས་ཀྱིས་འཕན་ཏེ་སྐྱོན་མ་བྱུང་བ་དང་། དེའི་རྒྱུ་རྩ་བ་དང་ཉེ་ཉོན་གྱིས་འཕན་མ་བྱུང་བ་དང་། འཆལ་ཚུལ་དེའི་གཉེན་པོ་དྲན་པ་ཉེར་བཞག་ལ་བསྟེན་པ་དང་། ཐར་པར་བསྔོས་པས་ཞི་བ་བརྟེན་པའོ། །གཞན་ན་རེ། རྒྱུ་ལྔ་སྟེ། སྲོག་གཅོད་སོགས་ལས་ཀྱི་ལམ་དངོས་ཀྱིས་ཉམས་པར་མ་བྱས་པས་རྣམ་པར་དག་པ་དང་། སྲོག་གཅོད་སོགས་ཀྱི་ཉེར་བསྡོགས་ཏེ་སྦྱོར་བས་སུན་མ་ཕྱུང་ཞིང་དག་པ་དང་། འདོད་པའི་རྣམ་རྟོག་ལ་སོགས་པ་མི་དགེ་བ་རྣམས་ཀྱིས་དྲི་མ་ཅན་དུ་བྱེད་པའི་འཕན་པ་མ་བྱུང་བ་དང་། ལུས་ལ་སོགས་པའི་དྲན་པ་ཉེར་བཞག་བཞིས་བརྟེན་པར་བྱས་པའམ། ཚུལ་ཁྲིམས་དྲན་པས་ཡོངས་སུ་བཟུང་བ་དང་། མྱ་ངན་ལས་འདས་པར་ཡོངས་སུ་བསྔོས་པ་ཡིན་ནོ་ཞེས་ཟེར་རོ། །གཞན་ན་རེ། ཚུལ་ཁྲིམས་ནི་བཞི་སྟེ། འཇིགས་པའི་ཚུལ་ཁྲིམས་ནི་འཚོ་བ་མེད་པ་དང་། ཚིགས་སུ་བཅད་པ་མེད་པ་དང་། ཆད་པ་དང་། ངན་འགྲོའི་འཇིགས་པས་སྲུང་བ་གང་ཡིན་པའོ། །ལེགས་སུ་སྨོན་པའི་ཚུལ་ཁྲིམས་ནི། སྨོན་པ་ནི་དོན་དུ་གཉེར་བ་སྟེ། སྲིད་པ་དང་ལོངས་སྤྱོད་དང་བཀུར་སྟི་ལ་ཆགས་ནས་སྲེད་པ་དེས་བླངས་ཏེ་སྲུང་བའོ། །བྱང་ཆུབ་ཀྱི་ཡན་ལག་གི་རྗེས་སུ་མཐུན་པའི་ཚུལ་ཁྲིམས་ནི་ཞི་ལྷག་གི་རྟེན་ཅན་གྱི་དོན་ཅན་ཏེ། སངས་རྒྱས་ཀྱི་བསྟན་པ་ལ་ཞུགས་པ་ཡང་(༡༤༢ན)
དག་པའི་ལྟ་བ་ཅན་རྣམས་ཐར་པའི་དོན་དུ་སྲུང་བ་གང་ཡིན་པ་སྟེ། མུ་སྟེགས་ཅན་རྣམས་ནི་ཡང་དག་པའི་ལྟ་བ་ཅན་མ་ཡིན་པའི་ཕྱིར་དང་། སྲིད་པ་ལ་བརྟེན་པའི་ཕྱིར་རོ། །ཡོངས་སུ་དག་པའི་ཚུལ་ཁྲིམས་ནི་ཟག་པ་མེད་པའི་ཚུལ་ཁྲིམས་ཡིན་ཏེ། དྲི་མ་མེད་པའི་ཕྱིར་ཞེས་ཟེར་རོ། །གཉིས་པ་སྒོམ་པ་ལས་བྱུང་བ་ནི། མཉམ་པར་བཞག་པའི་དགེ་བ་ནི། །བསྒོམ་པའོ་སེམས་ལ་སྒོ་ཕྱིར་རོ། །མཉམ་པར་བཞག་པ་རོ་མྱོང་བ་དང་མཚུངས་ལྡན་གྱི་ཉོན་མོངས་ཅན་མ་ཡིན་པའི་དགེ་བ་ནི། ཏིང་ངེ་འཛིན་དེ་དང་ལྷན་ཅིག་འབྱུང་བ་གང་ཡིན་པ་དེ་ནི་སྒོམ་པ་ཞེས་བྱ་སྟེ། རྒྱུད་ཏིང་ངེ་འཛིན་གྱི་ཡོན་ཏན་རྣམས་ཀྱིས་དེའི་བདག་ཉིད་དུ་བྱེད་པས་སེམས་ལ་ཤིན་ཏུ་བསྒོ་བར་བྱེད་པའི་ཕྱིར་རོ། །དཔེར་ན། མེ་ཏོག་རྣམས་ཀྱིས་མེ་ཏོག་གི་དྲིའི་བདག་ཉིད་དུ་བྱེད་པའི་ཆེད་དུ་ཏིལ་ལ་མེ་ཏོག་གི་དྲིས་བསྒོས་པ་བཞིན་ནོ། །གཉིས་པ་གཉིས་ཀའི་འབྲས་བུ་བཤད་པ་ནི། མཐོ་རིས་དོན་དུ་ཚུལ་ཁྲིམས་དང་། །འབྲལ་བའི་དོན་དུ་བསྒོམ་གཙོའི་ཕྱིར། །སྦྱིན་པ་ནི་ལོངས་སྤྱོད་ཆེན་པོར་འགྱུར་རོ་ཞེས་བཤད་ནས། ཚུལ་ཁྲིམས་དང་སྒོམ་པས་ཅིར་འགྱུར་ཞེ་ན། སྦྱིན་པ་ཡང་མཐོ་རིས་ཀྱི་དོན་དུ་འགྱུར་མོད་ཀྱི། མཐོ་རིས་ཀྱི་དོན་དུ་ཚུལ་ཁྲིམས་ནི་གཙོ་བོ་ཡིན་པ་དང་། ཞི་ལྷག་གཉིས་དེ་ལ་བརྟེན་པས་ཚུལ་ཁྲིམས་ཀྱིས་ཀྱང་འབྲལ་བར་འགྱུར་མོད་ཀྱི། དངོས་སུ་བྲལ་བ་ཐོབ་པར་བྱེད་པས་སམ། སྤོང་ལམ་གྱིས་བསྡུས་པས་ན་འབྲལ་བའི་དོན་དུ་སྒོམ་པ་ནི་གཙོ་བོ་ཡིན་པའི་ཕྱིར་རོ། །གསུམ་པ་ཞར་བྱུང་ཚངས་པའི་བསོད་ནམས་བཞི་བཤད་པ་ནི། བསྐལ་པར་མཐོ་རིས་དགའ་གནས་ཕྱིར། །བཞི་ཡི་ཚངས་པའི་བསོད་ནམས་ཡིན། །བསོད་ནམས་བྱ་བའི་དངོས་པོ་ཞར་བྱུང་། མདོ་ལས་གང་ཟག་བཞི་ཡིས་ནི་ཚངས་པའི་བསོད་ནམས་བསྐྱེད་དེ། མ་བྱས་པའི་ཕྱོགས་སུ་དེ་བཞིན་གཤེགས་པའི་སྐུ་གདུང་གི་མཆོད་རྟེན་བྱེད་པ་དང་། ཕྱོགས་བཞིའི་དགེ་འདུན་ལ་ཀུན་དགའི་ར་བ་འབུལ་ཞིང་དེར་གཙུག་ལག་ཁང་བརྩིགས་པ་དང་། དེ་བཞིན་གཤེགས་པའི་ཉན་ཐོས་བྱེ་བ་བཟླུམས་པ་དང་། བྱམས་པའི་སེམས་ཚད་མེད་(༡༤༢བ)
པ་བསྒོམ་པ་ཡིན་ཅེས་གསུངས་པའི་ཚངས་པའི་བསོད་ནམས་ནི། བྱེ་བྲག་ཏུ་སྨྲ་བ་རྣམས་ན་རེ། བྱང་སེམས་ཉེ་བ་མ་གཏོགས་པ་སེམས་ཅན་ཐམས་ཅད་ཀྱི་ལོངས་སྤྱོད་ཀྱི་འབྲས་བུ་ཅན་ཞེས་མཚན་རྣམ་སྨིན་ཅན་གྱི་ལས་ཀྱི་ཚད་ཤེས་པར་བྱ་བའི་ཕྱིར་བཤད་པ་གང་ཡིན་པའོ་ཟེར་རོ། །སྔོན་གྱི་སློབ་དཔོན་རྣམས་ན་རེ། བསོད་ནམས་ཇི་ཙམ་གྱིས་ན་བསྐལ་པར་མཐོ་རིས་འདོད་པའི་ལྷའི་སྐྱེ་བ་དག་ཏུ་དགའ་བར་གནས་པར་འགྱུར་བ་དེ་ནི་ཚངས་པའི་བསོད་ནམས་ཡིན་ཏེ། །ཚངས་པའི་མདུན་འདོན་རྣམས་ཀྱི་ཚེ་བསྐལ་པར་ཐུབ་པ་དང་འདྲ་བར་དེས་བསྐལ་པར་མཐོ་རིས་སུ་དགའ་བར་གནས་པའི་ཕྱིར་རོ། །མཐོ་རིས་ནི་འདོད་པ་ན་སྤྱོད་པའི་དབང་དུ་བྱས་པ་ཡིན་ན། དེ་ལྟར་ན་ཚངས་པ་མདུན་ན་འདོན་གྱི་ཚེ་ཚད་ནི་བར་བསྐལ་བཞི་བཅུ་ཡིན་ལ། མཆོད་རྟེན་རྩིག་སོགས་ཀྱི་འབྲས་བུ་ཇི་ལྟར་ཡུན་རིང་ཡང་གཞན་འཕྲུལ་དབང་བྱེད་ཀྱི་ཚེ་ཡིན་ཙམ་ན། ཚངས་པ་དང་བསོད་ནམས་འདྲ་བ་ཡོད་དམ་སྙམ་ན། སྐྱེ་བ་གཅིག་ཏུ་ཚངས་པ་དང་མི་མཉམ་ཡང་སྐྱེ་བ་དུ་མ་ལོངས་པས་ཚངས་པ་དང་མཉམ། འོ་ན་ལས་གཅིག་གིས་སྐྱེ་བ་དུ་མའི་ལུས་ལེན་པས་ལས་གཅིག་གིས་ལུས་དུ་མ་འཕེན་པར་མི་འགྲོ་འམ་སྙམ་ན། ལས་གཅིག་གིས་ལུས་དུ་མ་ལེན་པ་ཡིན། འོ་ན་གོང་དུ་ལས་གཅིག་གིས་ལུས་གཅིག་ཁོ་ན་འཕེན་ཟེར་བ་ནི་བྱེ་སྨྲའི་ལུགས་ཡིན། སྡེ་པ་གཞན་གྱི་ལུང་ལས། ཚངས་པའི་བསོད་ནམས་བསྐྱེད་པ་ནི། །བསྐལ་པར་མཐོ་རིས་དགའ་བར་གནས། །ཞེས་ཚིགས་སུ་བཅད་དེ་འབྱུང་ངོ་། །གསུམ་པ་ཆོས་སྦྱིན་བྱེ་བྲག་ཏུ་བཤད་པ་ནི། ཆོས་སྦྱིན་ཉོན་མོངས་ཅན་མིན་པས། །མདོ་སོགས་ཡང་དག་ཇི་བཞིན་སྟོན། །ཆོས་ཀྱི་སྦྱིན་པ་ནི་སེམས་ཉོན་མོངས་ཅན། རྙེད་བཀུར་དང་གྲགས་འདོད་མིན་པས་བཤད་བྱ་མདོ་སོགས་ཡན་ལག་བཅུ་གཉིས་ལོག་པར་མི་སྟོན་པར་ཡང་དག་ཇི་བཞིན་སྟོན་པའོ། །(༡༤༣ན)
སྨྲས་པ། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་ཕབ་པའི་སྡེ། །བསྟན་པ་ཡན་ལག་བཅུ་གཉིས་སོ། །དེས་ཆོས་ལོག་པར་འཆད་པའམ། །རྙེད་བཀུར་འདོད་པ་སོགས་སེམས་ཉོན་མོངས་ཅན་གྱིས་འཆད་པ་དེ་དག་ནི་རང་གི་བསོད་ནམས་ཆེན་པོ་ཉམས་པར་བྱེད་པའོ། །གསུམ་པ་ཆ་མཐུན་དགེ་བ་གསུམ་བཤད་པ་ནི། བསོད་ནམས་མྱ་ངན་འདས་པ་དང་། །ངེས་འབྱེད་ཆ་མཐུན་དགེ་རྣམ་གསུམ། །བསོད་ནམས་ཀྱི་ཆ་ནི་བསོད་ནམས་ཀྱི་འབྲས་བུ་སྟེ་རྣམ་སྨིན་ཡིད་དུ་འོང་བ་ཐོབ་པས་བསོད་ནམས་ཀྱི་ཆ་དང་མཐུན་པ་དང་། ཐར་པ་མྱ་ངན་ལས་འདས་པའི་ཚེ་ནི་ཐར་པ་ཐོབ་པ་སྟེ་དེ་དང་མཐུན་པ་ནི་གང་དུ་སྐྱེས་ནས་ཡོངས་སུ་མྱ་ངན་ལས་འདའ་བའི་ཆོས་ཅན་དུ་འགྱུར་བ་སྟེ། ཡོད་པའི་རྟགས་ནི། གང་ལ་འཁོར་བའི་ཉེས་དམིགས་དང་། བདག་མེད་པ་དང་། མྱང་འདས་ཀྱི་ཡོན་ཏན་བརྗོད་པའི་གཏམ་ཐོས་ན་སྤུ་ཟིང་ཞེས་བྱེད་པ་དང་། མཆི་མ་འཁྲུག་ཅེས་བྱེད་པ་དེ་ལ་ནི་ཐར་པའི་ཆ་དང་མཐུན་པའི་དགེ་རྩ་ཡོད་པར་ཤེས་པར་བྱ་སྟེ། དབྱར་མྱུ་གུ་སྐྱེ་བ་ལས་གཡུལ་གྱི་གསེབ་ན་ས་བོན་ཡོད་པར་ཤེས་པ་བཞིན་ནོ། །ངེས་པར་འབྱེད་པ་ནི། འཕགས་ལམ་སྟེ། དེ་དང་ཆ་མཐུན་པ་ནི་ངེས་འབྱེད་ཆ་མཐུན་ཡིན་ལ། དེའང་དྲོ་སོགས་བཞི་སྟེ་འོག་གནས་དྲུག་པ་ལས་འཆད་དོ། །དེ་ལྟར་ཆ་མཐུན་གྱི་དགེ་བ་རྣམ་པ་གསུམ་མོ། །གསུམ་པ་ཆོས་ཀྱི་རྣམ་གྲངས་བསྟན་པས་མཇུག་བསྡུ་བ་ལ། འཇིག་རྟེན་པའི་ལས་གསུམ་གྱི་རྣམ་གྲངས། ཉོན་མོངས་ཅན་གྱི་རྣམ་གྲངས། དགེ་བའི་རྣམ་གྲངས་སོ། །དང་པོ་ནི། རིགས་པས་རབ་ཏུ་བཅུག་པའི་ལས། །རྣམ་གསུམ་ཀུན་སློང་བཅས་པ་ནི། །ཡིག་འབྲུ་བརྒྱ་དང་བགྲང་བཅས་པའི། །སྙན་ངག་གྲངས་ཏེ་གོ་རིམས་བཞིན། །རིགས་པ་སྟེ་ཐབས་ཀྱི་བྱེ་བྲག་གིས་རབ་ཏུ་བཅུག་པའི་ལུས་དང་ངག་གི་ཡིད་ཀྱི་ལས་རྣམ་པ་གསུམ་ཀུན་ནས་སློང་བ་དང་བཅས་པ་ནི་ཡིན་ནོ། །དེའང་གོ་རིམ་བཞིན་(༡༤༣བ)
དུ་ཡིག་འབྲུ་ལས་གང་གིས་འབྲི་བ་དང་། ལས་གང་གིས་ནོར་བུ་དང་རྭ་སོགས་ལ་ཡི་གེ་ཡིན་མིན་གྱི་མཚན་མ་རྒྱ་རྐོ་བར་བྱེད་པ་གཟུགས་ཀྱི་ཕུང་པོ་ལུས་ཀྱི་ལས་ཏེ། རྒྱུ་ལས་འབྲས་བུ་བཏགས་པའི་ཕྱིར། འཇིག་རྟེན་ན་ཡིག་འབྲུ་ནི་གླེགས་བམ་སོགས་ལ་ཡོད་པའི་ཡི་གེའི་མཚན་མ་ཡིན་ལ། རྒྱ་ནི་ཡི་གེ་དང་ཡི་གེ་མ་ཡིན་པའི་མཚན་མར་འདོད་ཅིང་གྲགས་སོ། །བགྲང་བ་དང་བཅས་པའི་སྙན་ངག་ནི་གཟུགས་ཀྱི་ཕུང་པོ་དག་གི་ལས་ཏེ། གཉིས་ཀ་ལའང་ཀུན་སློང་ཚོར་སོགས་ཕུང་པོ་བཞི་ཡོད་པས་ཀུན་སློང་དང་བཅས་པ་ཕུང་པོ་ལྔའི་རང་བཞིན་ནི་ཡིན་ནོ། །གཉིས་པ་ནི། བསྒྲིབས་ངན་ཁ་ན་མ་ཐོ་བཅས། །ཉོན་མོངས་ཅན་ཆོས། ཉོན་མོངས་པས་བཀབ་པས་ན་སྒྲིབ་པ་དང་། ཉོན་མོངས་དང་བཅས་པས་གནག་ཅིང་འཕགས་པ་རྣམས་ཀྱིས་བོར་བ་ན་ངན་པ་དང་། ཉོན་མོངས་པ་དང་ལྷན་ཅིག་འདུག་པས་ན་ཁ་ན་མ་ཐོ་བ་དང་བཅས་པ་ཞེས་བྱ་བ་ནི་ཉོན་མོངས་ཅན་གྱི་ཆོས་ཀྱི་མིང་གི་རྣམ་གྲངས་སོ། །གསུམ་པ་ནི། དྲི་མེད་དགེ། །གྱ་ནོམ་འདུས་བྱས་དགེ་བསྟེན་བྱ། །ཐར་པ་བླ་ན་མེད་པ་ཡིན། །དྲི་མའམ་ཟག་པ་མེད་པའི་དགེ་བའི་རྣམ་གྲངས་གྱ་ནོམ་པ་ཞེས་བྱའོ། །ངན་པ་དང་གྱ་ནོམ་པ་གཞན་པ་ནི་བར་མའོ། །བསྟེན་བྱ་ཞེས་པ་ནི་འདུས་བྱས་ཀྱི་ཆོས་དགེ་བ་རྣམ་གྲངས་དག་སྟེ། ལྷག་མ་འདུས་མ་བྱས་དང་མི་དགེ་བ་དང་། ཉོན་མོངས་ཅན་དང་ལུང་མ་བསྟན་རྣམས་ནི་བརྟེན་བྱ་མ་ཡིན་པའི་ཕྱིར་དང་། འདུས་མ་བྱས་ནི་ཡང་ཡང་དུ་ཁྱད་པར་དུ་འགྱུར་བར་གོམས་པར་བྱར་མི་རུང་བའི་ཕྱིར། འབྲས་བུའི་དོན་དུ་བསྟེན་པ་ཡིན་ན་འབྲས་བུ་ཡང་མེད་པའི་ཕྱིར་རོ། །མི་དགེ་བ་ནི་སྒྲིབ་ལ་ལུང་མ་བསྟན་རྣམས་ཀྱིས་བླ་མ་དང་བཅས་པ་ཡིན་ཏེ། སྒྲིབ་ལ་ལུང་མ་བསྟན་ལ་རྣམ་སྨིན་ཡིད་དུ་མི་འོང་མེད་པའི་ཕྱིར་དང་། སྒྲིབ་ལ་ལུང་མ་བསྟན་ནི་འདུས་བྱས་མ་སྒྲིབ་ལ་ལུང་མ་བསྟན་རྣམས་ཀྱིས་བླ་མ་དང་བཅས་པ་ཡིན་ཏེ། ཉོན་མོངས་ཅན་མ་ཡིན་པའི་ཕྱིར་དང་། དེ་རྣམས་ཀྱང་དགེ་བ་ཟག་པ་དང་བཅས་པས་བླ་མ་དང་བཅས་པ་(༡༤༤ན)
ཡིན་ཏེ། དགེ་བ་ཟག་བཅས་ཀྱི་འབྲས་བུ་ཡིད་དུ་འོང་བའི་ཕྱིར་རོ། །དེ་རྣམས་ཀྱང་ཟག་པ་མེད་པ་རྣམས་ཀྱིས་བླ་མ་དང་བཅས་པ་ཡིན་ཏེ། ཉོན་མོངས་མེད་པའི་ཕྱིར་རོ། །ཟག་པ་མེད་པ་འདུས་བྱས་རྣམས་ཀྱང་འདུས་མ་བྱས་རྣམས་ཀྱིས་བླ་མ་དང་བཅས་པ་ཡིན་ཏེ། འདུས་མ་བྱས་རྣམས་ནི་རྟག་པའི་ཕྱིར་རོ། །འདུས་མ་བྱས་ནམ་མཁའ་དང་བརྟགས་མིན་གྱི་འགོག་པ་ཡང་བརྟགས་པའི་འགོག་པས་བླ་མ་དང་བཅས་ཏེ། བརྟགས་འགོག་ནི་དགེ་བརྟག་པའི་ཕྱིར། དེས་ན་ཐར་པ་མྱ་ངན་ལས་འདས་པ་ནི་དེའི་བླ་ན་ཆེས་ཁྱད་པར་དུ་འཕགས་པ་གཞན་མེད་པ་ཡིན་ཏེ། དགེ་བ་རྟག་པ་ཡིན་པའི་ཕྱིར། ཆོས་གཞན་པ་ཐམས་ཅད་པས་ཁྱད་པར་དུ་འཕགས་པ་ཆོས་ཐམས་ཅད་ཀྱི་མཆོག་ཡིན་ནོ། །གཉིས་པ་གནས་ཀྱི་མཚན་བསྟན་པ་ནི། ཆོས་མངོན་པ་མཛོད་ཀྱི་ཚིག་ལེའུར་བྱས་པ་ལས། ལས་བསྟན་པ་ཞེས་བྱ་བ་སྟེ་གནས་བཞི་པའོ།། །།འདིར་སྨྲས་པ། དཔག་མེད་སྐྱེ་བར་རྒྱ་ཆེན་སྙིང་རྗེ་ཆེ། །ནམ་མཁའི་མཐའ་དང་མཉམ་པར་བསྒོམ་པའི་མཐུས། །དེང་སང་འདི་ན་མ་རྒན་མཐའ་མེད་ལ། །མ་བཟོད་བྱང་ཆེན་ཕན་པ་བཏགས་སྙིང་འདོད། །བརྣག་པ་མཆོག་དེ་མཐར་ཕྱིན་ཡན་ལག་ཏུ། །རྒྱ་ཆེན་ཐེག་པ་གསུམ་གྱི་རིང་ལུགས་ལ། །གཅིག་ཏུ་གོམས་པའི་བློ་གྲོས་དགའ་བ་དེས། །གསུང་རབ་མ་ལུས་དཔྱོད་ལ་དུབ་པ་ཅི། །དེ་བྱིར་ཐར་འདོད་ཡི་གར་འབབ་བྱེད་པའི། །ལེགས་པར་བཤད་པའི་སྤྲོས་པ་རྒྱས་པ་འདི། །གངས་དཀར་ཤ་མེད་བསྟེན་པའི་གངས་རི་མཆོག །དབེན་པའི་གནས་སུ་བསམ་གཏན་བྱེད་པའི་ཚེ། །ཐུན་མཚམས་བྱིང་རྨུགས་སེལ་བའི་ཉམས་མྱོང་ཕྱིར། །དཔལ་ལྡན་མི་བསྐྱོད་བཟང་པོས་ལེགས་པར་སྦྱར། །དེ་ལས་བྱུང་བའི་རྣམ་པར་དཀར་བ་དེས། །ཀརྨ་པ་དེའི་(༡༤༤བ)
ཕྲིན་ལས་ཀུན་ཁྱབ་གྱུར། །ཅེས་སྨྲས་སོ། །